Deuteronomy

Deuteronomy

¹ In mawh lox pa hoik krai Mose ka pui Isarelax daux tiag hawt praok rawm klawng Yawdan, daux lung toi veng Suphax, sinax veng Paran, veng Tawphelax, veng Laban, veng Hazarot mai veng Izahat khankix. ² Jah khaing Hawrax, gawng Sina mai hoek ka Kadesha Bana koe kao tix ngaix krax. ³ Ka daux tixpon num, khix kao tix, tix ngaix, Mose krai lox tawm pingnyap pa dex mai pui Isarelax, awm pa tawm Simiang Siyiex ka nawh khawmuik, ⁴ khaix hoik pex nawh Sihon simiang Amawrix, pa ot daux veng Heshabon mai Awgax simiang Bashan, pa ot daux Ashatarot mai ka veng Edarix. ⁵ Mose jah tix nih nai krai lao lox tat jhawm prawng plak lih singaix rawm klawng Yawdan ka haktiex Mawbax ah nin. ⁶ "Simiang Siyiex hoik sikah ka ex baoh Hawrax ah nin, pex hoik ot piang gawng in tom rheung bawg yam, ⁷ Veeh pex mai deeh hu krax mai hu piang gawng Amawrix, dee dex hawt an, daux lung, piang gawng mai daux ngawd, plak seh mai praok rawm sigrit sigra, daux meung Khanan mai daux Lebanon, tom hoek dee singai rawm klawng ting Yufrethix. ⁸ Jhak heue, Aux hoik deuh haktiex an sivoe pex, laig ka haktiex an mai teei ti cie haktiex pa hoik tiextu Simiang Siyiex ka keeing pex, Abraham, Icak mai Yakop, sonsang tawx ka kix mai doeh ru pa plud khaix kix. ⁹ "Aux hoik krai ah nin ka pex yam an, aux ang pon klawm beeh glawm ka son pex nong nong, ¹⁰ Simiang Siyiex pex, hoik kieh pex haoh hun, ka daux in ngaix pex hoik haoh hun awm simuing ka raoma. ¹¹ Kieh Simiang Siyiex keeing pex, baox kieh pex koe kaing rheng son, khaing pa nie haoh hun pex yam in mai nawb bwan piang pex, awm hoik yuh Nawh Cao sijax mukheu ka pex! ¹² Aux sang pon klawm pa taug mao pex, beeh glawm pex mai pa thung thiang pex nong nong yuh ka mawx? ¹³ Laug pui koe pingnya cuyi, pui lhak lhiem mai pui koe krax tawng yung khankix, khaing sinax ru pex mai aux tak yaog nawh mawh cao kaing piang pex, ¹⁴ pex hoik pawk ka aux ah nin, ceu pa hoik krai maix ka yix, mawh pa mhawm sonsang yuh yix kah. ¹⁵ Aux tom laug cao kaing khaing daux doeh ru pex, ka pui pa koe pingnya cuyi mai pa koe krax tawng yung mai kieh kix mawh cao kaing piang pex, pa mawh cao kaing piang pui kaing rheng, cao kaing piang pui kaing yieh, cao kaing piang pui tixphwan kaux, cao kaing piang pui kao kaux mai cao kaing piang doeh ru pex khankix. ¹⁶ Yam an aux tawx lox ka cao prawng see pex khankix, nghiet ka grawng see pa koe sinax puxaik pex mai prawng ca pa rahsee ka sinax pui mai puxaik nawh mai nyo sinie pa ot tau mai nawh. ¹⁷ Pex tak ang pon jhak pakngai pui tix kaux kawx ka daux pa prawng see, pex tak nghiet ka see pa iak mai see pa ting awm paox tix, paw pex lhat ka pui tix kaux kawx, mawh kheu krax prawng ca mawh cie Siyiex, can see pa nu ka pex viex hoek ka aux, mai aux tak nghiet ka see an, ¹⁸ yam an aux tak tawx lox ka can ceu pa khaw pex ti yuh khawmuik. ¹⁹ "Ex lih khaing Hawrax mai hu phlat daux tiag ting pa koe krax lhat awm pa hoik yaox pex, ka krax hu gawng haktiex Amawrix, awm pa hoik tawm Simiang Siyiex ka ex, mai ex hoek ka haktiex Kadesha Bana. ²⁰ Aux ah nin ka pex, pex hoik hoek ka gawng Amawrix pa tawx Simiang Siyiex ex ka ex. ²¹ Jhak heue, Simiang Siyiex pex hoik deuh haktiex ka plak sivoe pex, haok mai teei ti cie, awm hoik krai Simiang Siyiex keeing pex ka pex, paw lhat graung mai paw laux rhawm ka, ²² pex ku kaux greed tix dex aux ah nin, kieh ex ploi pui hu sivoe ex mai jiang ka haktiex son ex mai kieh kix deeh viex lox satang hoek ka ex, sonsang tawng ex krax pa sang khaw ex tix haok mai sonsang hoek ex ka veng yuh ka mawx, ²³ grawng an aux khaw rhawm ka, aux tom laug pui kao ra kaux, khaing daux ru pex tix cub tix kaux, ²⁴ kix veeh tix mai haok piang gawng, tom hoek daux ngawd Eshakawlax mai jiang ka dee an. ²⁵ Kix pieh ti viex plix khaox hoek daux taix tix tiblah mai viex hoek ka ex mai kix viex lox satang hoek ka ex ah nin, an mawh haktiex pa mhawm pa sang tawx Simiang Siyiex ex ka ex. ²⁶ Viang mawh nan pex ang cu ti haok mai tieh feen lox tawm Simiang Siyiex pex, ²⁷ mai pex bawgbe ka daux nyiex gox tix ah nin, mawh kheu Simiang Siyiex koeng ka ex, Nawh Cao hoik viex ex lih khaing daux meung Ejiptux, sonsang ap ex daux tawm taix pui Amawrix, sonsang yuh ex laux leeing. ²⁸ Ex sang haok yuh ka mawx? Puxaik ex khankix hoik kieh ex laux rhawm ah nin, "Pui haktiex an kied ting lhaong khaing ex, veng kix kawx ting mai guh veng lhaong cux raoma, lheu khaing an yix hoik yaox kawn simex Anakax khankix ot tan." ²⁹ Khaix an aux ah nin ka pex, paw yaoh paw yee mai paw lhat ka kix. ³⁰ Simiang Siyiex pex pa hu sivoe pex, tak puing son pex, awm hoik yuh Nawh Cao ka son pex daux meung Ejiptux plak sivoe ngai pex, ³¹ mai daux tiag, pex hoik yaox kliien Simiang Siyiex tix, awm kliien pui ka kawn tix, daux krax pa hoik lawng pex tom sidah hoek pex dee in. ³² Viang yuh nan kawx, pex ang yum rhawm ka Simiang Siyiex tix, ³³ Kaw pa hoik hu sivoe pex, sonsang jhi krax hu pex mai sawg dah dee sum pex nyiex gox mai ka plak ponsawm ka rong ngu mai ka plak ponngaix ka rong paiawm. ³⁴ Simiang Siyiex mhong ka lox pex mai Nawh Cao song rhawm mai tiextu ah nin, ³⁵ "Haktiex mhawm pa tiextu Aux ti tawx ka keeing pex khankix, ceu pui pa caox in tak ang pon ti yaox ka tix kaux kawx, ³⁶ mawh ngie Kaliep kawn simex Yephunie, pa yaox ka haktiex an mai Aux tak tawx haktiex pa hoik dig nawh ka caong tix ka nawh mai kawn praix nawh khankix, mawh kheu nawh hoik hawt grawng lawng khaix Simiang Siyiex khawm rhawm tix, ³⁷ mawh kheu jao pex Simiang Siyiex song rhawm ka aux ah nin, maix tak ang pon ti laig tan, ³⁸ Yawsux kawn simex Nun, pa cung ka sivoe maix, tak yaox ti laig tan, tawx riang rao ka nawh, mawh kheu nawh tak kieh pui Isarelax teei ti cie sinngao an. ³⁹ Lheu khaing an kawn nyawm iak maix khankix, pa ah maix mawh pa tud rhim, pa mawh kawn praix maix pa ang nyang tawng pa mhawm mai pa caox daux in singaix, kix tak laig ka dee an, pa sang tawx Aux ka kix mai kix tak pon ti cie an. ⁴⁰ Viang mawh nan, phan mawh pex, deeh veeh ti hu ka daux tiag, ka krax rawm sigrit sigra raoh, an mawx rawm sigrit sigra Edom. ⁴¹ Khaix an pex deeh pawk lox ah nin ka aux, yix hoik lud ka Simiang Siyiex, yix tak haok puing awm lox pa hoik tawm Simiang Siyiex ex ka yix, pui ku kaux nhawt ka kraung naing tix mai khre rien tix haok piang gawng. ⁴² Simiang Siyiex ah nin ka aux, krai ka kix, paw haok paw puing mawh kheu Aux ang ot sinax pex, phan ang mawh nan, pex tak som ka pui koeng tix, ⁴³ aux hoik krai ka pex, viang mawh nan, pex ang nghiet ka, mai pex tieh feen lox tawm Simiang Siyiex mai haok piang gawng tau mai rhawm kwa rhawm vao tix. ⁴⁴ Pui Amawrix pa ot piang gawng puing mai pheet ka pex, awm pheet phung hia ka pui mai yuh pex laux jah ka Sirax tom hoek ka veng Hawma. ⁴⁵ Pex deeh ing mai yiiem ka plak sivoe Simiang Siyiex, viang mawh nan, Simiang Siyiex ang cu tix nghiet ka lox pex, mai ang lai daong yhaok ka pex. ⁴⁶ Pex dah tix ot ka Kadasha tom rheung singaix, awm bawg yam pa yaox pex tix ot tan heue.

¹ "Khaix an, awm pa krai Simiang Siyiex ka aux, ex deeh veeh ti hu krax daux tiag ka plak rawm sigrit sigra raoh mai ex hoik vung viang hawt gawng Sirax tom rheung singaix, ² Simiang Siyiex ah nin ka aux, ³ pex vung viang hawt gawng in, hoik rheung bawg yam, veeh ti hu plak laong. ⁴ Tawm lox ka pui khankix ah nin, pex tak tiang ti hu ka mee haktiex puxaik pex, pa mawh doeh ru pex Esaw pa ot ka haktiex Sirax, mai kix tak lhat graung ka pex. Viang mawh nan, yuh satix mhawm mhawm, ⁵ paw doh cheeik ka kix, mawh kheu Aux tak ang tawx haktiex kix ka pex pie ceeix kawx, pie tix tiag caong dig kawx ang tawx ka pex, mawh kheu hoik tawx Aux gawng Sirax mawh cie Esaw. ⁶ Pex tak yaox ti liag pa ih khaing kix ka mau, sonsang yaox pex ti ih mai pex tak liag rawm khaing kix ka mau, sonsang yaox pex tix nyaux kah. ⁷ Mawh kheu Simiang Siyiex pex hoik nawb bwan piang kaing jhaw pa yuh pex ka taix ti khawmuik, Nawh Cao hoik tawng pex vung viang daux tiag ting in, daux tixpon num, Simiang Siyiex hoik ot tau mai pex mai pex ang lai koe ceu pa cud cha. ⁸ Ex lih hu krax luan hu khaing puxaik ex, kawn praix Esaw pa ot haktiex Sirax, khaing krax hu ex daux lung, khaing veng Elat mai veng Eziyon Gaba, ex deeh veeh ti tiang ka krax hu daux tiag Mawbax. ⁹ Simiang Siyiex ah nin ka aux, paw yuh krax tuktiak ka pui Mawbax mai paw yuh naing ka kix, mawh kheu Aux tak ang tawx pex cie ka haktiex kix ceeix kawx, mawh kheu Aux hoik tawx kawn simex Lotax cie ka haktiex Arax. ¹⁰ Pui Emim hoik dawg ot tan tom dix mai kix mawh ceu pui pa ting mai kied nie mai kied lhaong awm ceu pui Anakax, ¹¹ pui ceu in khankix baox kok ceu kaux kix mawh Rephem awm pui Anakax, viang mawh nan, pui Mawbax kok kix mawh ceu pui Emim. ¹² Can pui Hawrix khankix hoik dawg ot ka haktiex Sirax tom dix, viang mawh nan, kawn simex Esaw khankix, grheu kix mai yuh kix laux leeing plak sivoe kix mai kawn praix Esaw ot ka dee ot kix, awm yuh pui Isarelax ka haktiex tawx Simiang Siyiex ka kix pa pon kix ti cie. ¹³ Yam in kaoh mai tiang plak klawng Zeriet, ex tiang plak toi rawm klawng Zeriet. ¹⁴ Bawg yam jah ex ti lih khaing Kadesha Bana, tom sidah tiang ex ka rawm klawng Zeriet hoik koe tixgoe daix num mai tom sidah hoek bawg yam laux leeing doeh ru pui naing khaing daux tab, awm hoik tiextu Simiang Siyiex ka kix. ¹⁵ Mawh kheu plawng taix Simiang Siyiex teei ti tik ka kix, khaing daux tab, tom sidah laux leeing kix. ¹⁶ Pui naing khankix hoik laux leeing mai yum sinax pui hun khankix, ¹⁷ Simiang Siyiex ah nin ka aux, ¹⁸ in singaix pex tak tiang ka mee haktiex Arax mai Mawbax, ¹⁹ yam hoek pex dex pui Amon, paw tuktiak mai paw cheeik ka kix mawh kheu Aux tak ang tawx pex cie haktiex kawn simex Amon tix ceeix kawx, mawh kheu Aux hoik tawx an mawh cie kawn simex Lotax. ²⁰ Ka dee ankix sawn mawh haktiex pui Rephem, mawh kheu pui Rephem hoik dawg ot ka dee an, viang mawh nan, pui Amon kok kix mawh Zamzummim, ²¹ ceu pui an, mawh pa ting mai kied nie mai kied lhaong awm pui Anakax, viang mawh nan, Simiang Siyiex yuh kix laux leeing ka plak sivoe kix, mai grheu kix mai plud tix ot dee ot kix, ²² Nawh Cao hoik yuh ka doeh ru Esaw awm an, pa ot ka Sirax, yam yuh Nawh Cao pui Hawrix laux leeing khaing ka sivoe kix, kix grheu kix mai plud ti ot ka dee an tom hoek in singaix. ²³ Pui Avin pa ot ka yaong, pa singai khaing veng Gaza, ceu pui Katawren pa kaoh khaing veng Katawrax, yuh kix laux leeing mai plud ti ot ka dee ot kix. ²⁴ Kaoh mai lih hu krax mai tiang rawm Anon, Jhak heue, Aux hoik ap Sihon pui Amawrix, pa mawh simiang Heshabon mai haktiex nawh ka daux tawm taix pex, jah pex teei ti cie mai puing ka kix. ²⁵ Jah ka daux in singaix Aux tak kieh pui kuceu piang haktiex yaoh yee mai lhat graung ka pex, pui pa mhong ka grawng pex tak lhat graung mai khi rhawm kheu jao pex. ²⁶ "Aux hoik ploi kawncau khankix hu ka Sihon simiang meung Heshabon, khaing daux tiag Kedemot mai lox pa nhim ah nin, ²⁷ Kieh aux tiang ka haktiex maix, aux tak lawng ngie ka daux krax ting mai aux tak ang veh ka plak khawn dawm mai ka plak khawn gwiex. ²⁸ Maix coh pa ih son aux ka mau, sonsang pon aux ti ih mai coh rawm son aux ka mau, sonsang nyaux aux, kieh ngie aux tiang ka caong tix nong nong, ²⁹ awm yuh kawn simex Esaw pa ot ka Sirax mai pui Mawbax pa ot ka Arax ka son aux, tom sidah tiang aux rawm klawng Yawdan mai hoek ka meung pa tawx Simiang Siyiex ex ka ex. ³⁰ Sihon simiang Heshabon ang kieh ex tiang ka haktiex tix, mawh kheu Simiang Siyiex hoik kieh rhawm nawh kiien mai rhawm nawh kied kwa sonsang ap nawh tix daux taix pex, awm pa hoik yaox pex in singaix. ³¹ Simiang Siyiex ah nin ka aux, jhak heue, Aux hoik jah tix ap Sihon mai haktiex nawh ka pex, pex puing ka, mai teei ti cie kah. ³² Khaix an Sihon mai pui nawh khankix hoek ti puing ka ex ka veng Yahat. ³³ Simiang Siyiex ex ap nawh ka ex mai ex hoik pex ka nawh mai kawn simex nawh mai khawm pui nawh khankix. ³⁴ Yam an ex hoik teei veng nawh khawmuik mai ex hoik yuh simex, bun mai khawm kawn nyawm pa ot daux veng ku veng, laux lak pak leeing mai ex ang lai prah tix ceu kawx, ³⁵ ex teei ngie tobrie awm kraung pa rhim son cao ex tau mai kraung pa pon ex khaing daux veng khankix. ³⁶ Jah khaing veng Araw praok rawm klawng Anon mai khaing veng pa koe hawt rawm klawng khankix, tom singai hoek ka veng Gilat, ang lai koe veng pa ang ex pex tix veng kawx, Simiang Siyiex ex hoik ap daux tawm taix ex khawmuik. ³⁷ Pex paw hu ngie dex haktiex kawn simex Amon mai hawt rawm klawng Yabok mai ka veng pa koe piang gawng khankix, pa tiebtie Simiang Siyiex ex ka ex heue.

¹ "Ex deeh veeh ti hu ka krax Bashan, mai Awgax simiang Bashan nawh mai pui nawh khankix hoek ti puing ka ex, ka Edarix. ² Simiang Siyiex ah nin ka aux, paw lhat graung ka nawh, mawh kheu Aux hoik ap nawh mai pui nawh mai haktiex nawh khankix ka daux tawm taix pex, pex tak yuh ka nawh awm hoik yuh pex ka Sihon simiang pui Amawrix, pa ot ka veng Heshabon. ³ Simiang Siyiex ex hoik ap Awgax simiang Bashan mai pui nawh khawmuik, ex pah nawh tom ang pui nawh lai klawd tix kaux kawx. ⁴ Yam an ex teei veng nawh khawmuik mai veng pa ang ex teei ang koe tix veng kawx, ex teei veng tixgliah veng, pa koe hawt Agawbax khankix, meung haktiex Awgax simiang Bashan. ⁵ Veng in khawmuik mawh veng pa lhaong guh veng pa kaux, tau mai siviex veng mai jhong, lheu khaing an yaong kawn koe tom nie ka plak praix veng. ⁶ Ex hoik yuh kix laux lak pak leeing, awm hoik yuh ex ka Sihon simiang Heshabon mai yuh veng ku veng, simex, bun mai kawn nyawm khankix laux lak pak leeing. ⁷ Khawng brie mai kraung pa rhim ex khaing daux veng khankix, ex hoik teei mawh cie tix. ⁸ Yam an ex hoik teei haktiex khaing daux taix simiang pui Amawrix ra kaux, pa ot ka rawm klawng Yawdan plak in, khaing rawm klawng Anon tom hoek ka gawng Heramon. ⁹ Ceu pui Sidon kok ceu kaux gawng Heramon mawh Sirion mai kok ceu pui Amawrix mawh Sinirax. ¹⁰ Ex hoik teei veng pa koe ka daux lung khawmuik mai pa koe hawt haktiex Gilat mai pa koe hawt haktiex Bashan, tom singai hoek ka veng Salaka mai veng Edarix mai veng meung haktiex Awgax simiang Bashan. ¹¹ Mawh ngie Awgax simiang Bashan ceu pui Rephem tix kaux ngie pa kawn deuk, jhak heue, ku it nawh mawh ku riiem, an koe ka veng Rabat, dee ot pui Amom ang mawh lie? Krax lang koe dim sawk, krax vieh koe pon sawk, awm pa khaw mai sawk cie pui hun. ¹² "Yam hoik teei ex ka haktiex yam an, jah khaing veng Araw, pa koe hawt rawm klawng Amom mai gawng Gilat tix plak mai veng an khankix, Aux hoik tawx ka Rubin mai Gat. ¹³ Pa deuk khaing gawng Gilat mai Bashan meung haktiex simiang Awgax, Aux hoik tawx ka Manashe tix plak. Haktiex pa koe ka daux Bashan khawmuik, kok mawh pui Rephem. ¹⁴ Ya-irax doeh ru Manashe teei ti cie haktiex baoh Agawbax, pa mawh meung Bashan, tom singai ka mee praix Geshurix mai Makhatix, khaix an kix kok ceu kaux mawh Havot Ya-irax tom in singaix. ¹⁵ Aux tawx veng Gilat ka pui Makhirax. ¹⁶ Ka pui Rubin mai pui Gat khankix, Aux tawx haktiex ka kix jah khaing veng Gilat, tom hoek rawm klawng Anon, tau mai sigreung klawng an, tom hoek rawm klawng Yabok, mee haktiex pui Amon khankix. ¹⁷ Daux lung tau mai rawm klawng Yawdan tom mee haktiex, jah khaing Ginesariet plak lih singaix rawm sigrit sigra Arabat, nhawng kih, ka caong gawng Pisaga. ¹⁸ "Aux hoik tawm lox ka pex, yam an ah nin, Simiang Siyiex pex hoik tawx pex cie ka haktiex in, pui kwa pui vao khankix tak tiang tau mai kraung naing sivoe puxaik pex pui Isarelax. ¹⁹ Viang mawh nan, moeng pex, kawn praix pex mai tobrie pex khankix, Aux tawng ka hoik nie tobrie pex tak ot ka daux veng pa hoik tawx aux ka pex. ²⁰ Tom hoek bawg yam tawx Simiang Siyiex puxaik pex laux lee tix, awm tawx nawh ka pex, tom hoek bawg yam teei kix ka haktiex pa tawx Simiang Siyiex pex ka kix, plak toi rawm klawng Yawdan, khaix an pex ku kaux tak deeh hoek ka dee ot tix pa hoik tawx Aux ka pex. ²¹ Aux hoik tawm lox ka Yawsux yam an, ngai pex hoik yaox ka ceu pa hoik yuh Simiang Siyiex pex, ka simiang ra kaux, mai Simiang Siyiex tak yuh ceu in ka meung haktiex can dee hoek maix. ²² Paw pex lhat graung ka kix, mawh kheu tokaux Simiang Siyiex pex tak puing son pex. ²³ "Aux khyox khaw ka Simiang Siyiex, yam an ah nin, ²⁴ Simiang Siyiex eue, Maix Cao hoik jah tix jhi kawncau tix yaox pa ting lhaong tix mai pa ting riang rao taix tix, Siyiex piang raoma mai piang haktiex mawx pa chix yuh awm kaing jhaw Maix Cao mai pa ting siawp sibrawm pa yuh Maix Cao lie? ²⁵ Kieh aux hu ka plak an mai jhak ka haktiex mhawm pa koe toi rawm klawng Yawdan mai gawng pa jiet mhawm gawng Lebanon. ²⁶ Mawh kheu jao pex Simiang Siyiex hoik song rhawm ka aux mai ang lai nghiet ka lox aux mai Simiang Siyiex ah nin ka aux, ding heue, paw lai krai grawng an ka Aux. ²⁷ Haok piang choek gawng Pisaga mai jhak plak lih singaix plak klip singaix plak laong mai plak seh mai jhak an kix ka ngai tix, maix tak ang pon tiang ka plak toi rawm klawng Yawdan. ²⁸ Maix tawm lox ka Yawsux mai tawx riang rao mai joh jhan ka nawh, mawh kheu nawh tak hu sivoe pui in khankix mai nawh tak kieh kix pon ti cie haktiex pa hoik yaox maix. ²⁹ Mawh kheu nan, ex hoik ot ka daux ngawd see veng Bet Pegurax heue.

¹ "Yam in pui Isarelax eue, nghiet ka lox lai beenli mai lox tat jhawm prawng pa gau aux pex yuh khankix, sonsang im ju pex mai hu laig teei ti cie haktiex pa tawx Simiang Siyiex keeing pex ka pex. ² Pex tak ang pon baox ka gumlox tawm Aux ka pex mai ang pon ti tieh khaing an, pex tak priex ka lox tawm pingnyap Simiang Siyiex pex awm pa tawm Aux ka pex. ³ Pex hoik yaox pa yuh Simiang Siyiex ka Balapegurax ka ngai tix, mawh kheu Simiang Siyiex pex hoik yuh pui pa hawt khaix Balapegurax khawmuik laux lak pak leeing khaing sinax pex. ⁴ Pex pa een rhawm ka Simiang Siyiex tix tom kaux cong, hoik yaox ti im ju ku kaux tom in singaix. ⁵ Aux hoik gau pex ka lox lai beenli mai lox tat jhawm prawng awm pa hoik tawm Simiang Siyiex aux ka aux, sonsang hawt yuh pex awm an ka daux haktiex pa teei pex ti cie. ⁶ Priex rien mai hawt ti yuh, mawh kheu in tak mawh pingnya mai krax tawng yung son pex ka sivoe ngai pui pa mhong ka lox lai beenli in tak ah nin, ceu pui pa ting haoh hun in, mawh pa koe pingnya mai koe krax tawng tete. ⁷ Mawh Siyiex mawx pa ot dex ceu pui pa ting haoh hun in awm ot Simiang Siyiex ex dex ex, yam kok yo ex ka Nawh Cao lie? ⁸ Mawh ceu pui pa ting haoh hun mawx pa koe lox lai beenli mai lox tat jhawm prawng pa rahsee khankix, awm koe lox tat jhawm prawng pa deuh Aux ka sivoe pex daux in singaix lie? ⁹ Yuh satix pex mai rien rhawm tix, phan ang mawh nan, pex tak piawm ka ceu pa hoik yaox pex ka ngai tix khankix mai ankix tak lih khaing daux rhawm pex, ka daux singaix pa im ju pex, mai kieh kawn praix pex mai kawn saux kawn sex pex tawng ka ceu in khankix, ¹⁰ daux singaix cung pex ka plak sivoe Simiang Siyiex pex ka baoh Hawrax, Simiang Siyiex ah nin ka aux, khrawm pui hoek ka Aux mai Aux tak kieh kix mhong ka lox tix, sonsang gau kix ti lhat graung ka Aux yam im ju tix piang haktiex mai sonsang gau kix ka kawn praix tix khankix ¹¹ Pex hoek dex mai cung hawt caong gawng mai ngu gleeing ka gawng tom faik hoek ka sigreung raoma tau mai paiawm pa faik. ¹² Simiang Siyiex hoik sikah ka pex khaing daux sigreung ngu, pex hoik mhong sinum lox sikah khankix, viang mawh nan, pex ang yaox ka riang grang, mai pex mhong ngie lox sinum khaing. ¹³ Nawh Cao hoik krai lox sijax mukheu pa hoik tawm Nawh Cao ka pex, sonsang hawt yuh pex ka, pa mawh lox pingnyap kao gum, mai Nawh Cao hoik tiem khankix piang khlawp simaox ra khlawp. ¹⁴ Simiang Siyiex hoik tawm lox ka aux yam an, sonsang gau aux pex ka lox lai beenli mai lox tat jhawm prawng, sonsang hawt yuh pex ka an daux haktiex pa tiang pex ti hu teei ti cie. ¹⁵ "Yuh satix pex mhawm mhawm. Mawh kheu singaix an pex tak ang yaox riang grang tix ceu kawx, yam sikah Simiang Siyiex ka pex, baoh Hawrax khaing daux sigreung ngu, ¹⁶ phan ang mawh nan, lhat pex yuh krax pa lud loe mai yuh riang grang pa hoik saik tix son tokaux tix mai pa koe riang grang tix ceuceu, pa mawh riang grang simex, bun, ¹⁷ pa awm riang grang totiag pa koe piang haktiex mai pa awm riang grang sim koe pruik pa po ka raoma, ¹⁸ pa awm riang grang pa chix mu tix ceuceu, piang tiex mai pa awm riang grang kax tix ceuceu pa koe daux rawm greem haktiex. ¹⁹ Yuh satix tix lhat pex maong ti jhak ka raoma mai yam yaox pex ka singaix, khix, simuing mai kraung khrai raoma khawmuik, pex tak krub mai yuh kaing son an, ka pa gwieh Simiang Siyiex ka kawn pui pa koe greem raoma khawmuik. ²⁰ Simiang Siyiex hoik teei pex lih khaing daux glah ngu rhiem, meung Ejiptux sonsang mawh pex pui cie Nawh Cao awm pa koe pex daux in singaix. ²¹ Lheu khaing an Simiang Siyiex hoik song rhawm ka aux kheu jao pex mai tiextu sonsang ang aux pon tiang toi rawm klawng Yawdan, mai sonsang ang aux pon laig ka daux haktiex mhawm pa tawx Simiang Siyiex pex mawh sinngao cie pex. ²² Aux tak yum daux haktiex in, aux tak ang yaox ti tiang ka toi rawm klawng Yawdan, viang mawh nan pex tak tiang ka plak an mai teei ti cie ka haktiex mhawm an. ²³ Yuh satix tix, son ang pex piawm ka sijax mukheu Simiang Siyiex pex, pa hoik yuh Nawh Cao mai pex mai paw yuh riang grang pa saik tix mai pakpeung riang grang tix ceuceu pa ang Simiang Siyiex cu pex yuh. ²⁴ Mawh kheu Simiang Siyiex pex mawh ngu pa gleeing mai mawh Siyiex pa bak pa viang. ²⁵ Yam pon pex kawn praix tix mai kawn saux kawn sex tix khankix mai hoik ot ka daux haktiex an tom rheung, phan pex lud loe mai yuh riang grang pa saik ti mawh riang grang tix ceuceu mai baox yuh pa caox caig ka plak sivoe ngai Simiang Siyiex pex, sonsang so Nawh Cao song rhawm, ²⁶ Aux tak kok yo raoma mai haktiex mawh mhai rug sonsang puing ka pex daux in singaix mai pex tak grai grup dom mawx dom an khaing haktiex pa tiang pex plak toi rawm klawng Yawdan, pa pon pex ti cie, pex tak ang yaox ti ot rheung daux haktiex an, viang mawh nan, pex tak laux lak pak leeing. ²⁷ Simiang Siyiex tak kieh pex prung prang rairuat ka sinax ceu pui khankix mai pex tak deuk ka sinax pui tang ceu ceeix khaing ka dee grheu Simiang Siyiex ka pex. ²⁸ Ka dee an pex tak yuh kaing jhaw siyiex pa yuh ka taix tix, pa mawh khaox, simaox, pa ang chix yaox, pa ang chix mhong, pa ang chix ih mai pa ang chix ngheet. ²⁹ Phan pex sawg ti yaox Simiang Siyiex tix baoh an, phan pex sawg Nawh Cao khawm rhawm mai khawm ju tix pex tak yaox ka. ³⁰ Yam yaox pex krax laux rhawm mai ceu inkix hoek piang pex, ka daux singaix pa sang hoek, pex tak deeh hoek ka Simiang Siyiex tix mai cu nghiet ka lox Nawh Cao, ³¹ mawh kheu Simiang Siyiex pex, mawh Siyiex pa caux rhawm, Nawh Cao ang tik vud pex mai ang kieh pex laux leeing mai ang piawm sijax mukheu pa tiextu tix ka keeing pex khankix. ³² Mawh kheu nan, yam in chawk pex yaox grawng singaix pa hoik luan, pa hoik koe sivoe pex, jah ka singaix hoik phan Siyiex kawn pui piang haktiex mai chawk khaing caong ma seh, tom hoek ka caong ma laong, hoik sax koe grawng pa ting lhaong awm in phan ang mawh nan, hoik sax mhong pex grawng ceu in lie? ³³ Hoik sax mhong pui lox sikah Siyiex khaing daux sigreung ngu, awm hoik mhong pex mai im ju awm pex lie? ³⁴ Mawh siyiex mawx pa hoik coca ti teei ceu pui tix cub khaing daux sinax pui tang ceu tix cub, ka daux pa cheuk cheu ti yuh mhai rug, ka daux pa daox deng, ka daux naing mai ka plawng taix pa ting riang pa nih tix mai ka daux pa lhat graung, awm pa hoik yuh Simiang Siyiex pex son pex, ka daux meung Ejiptux ka plak sivoe ngai pex? ³⁵ Pa jhi Nawh Cao pex yaox khankix mawh sonsang tawng pex Simiang Siyiex mawh Siyiex, lheu khaing Nawh ang lai koe Siyiex tang kaux. ³⁶ Nawh Cao kieh pex mhong lox tix khaing raoma, sonsang pon sidiex gau ka pex, Nawh Cao hoik jhi pex yaox ngu pa ting lhaong Nawh Cao piang haktiex mai pex hoik mhong lox Nawh Cao khaing daux sigreung ngu. ³⁷ Mawh kheu hoik moh Nawh Cao ka keeing pex mai laug doeh ru pex mai viex pex lih khaing meung Ejiptux ka sivoe ngai tix tau mai pa ting siawp sibrawm Nawh, ³⁸ mai grheu ceu pui pa ting lhaong mai pa ting riang rao khaing pex, ka sivoe pex, sonsang viex pex laig ka daux mai tawx pex cie haktiex kix tom hoek ka daux in singaix, ³⁹ mawh kheu nan kieh pex tawng daux in singaix mai een ka daux rhawm tix, Simiang Siyiex mawh Siyiex pa koe piang raoma mai piang haktiex, ang lai koe Siyiex tang kaux. ⁴⁰ Pex tak priex lox lai beenli mai lox pingnyap Nawh Cao, pa tawm aux ka pex in singaix, sonsang hu mhawm hoek mhawm pex tau mai kawn praix pex mai kawn saux kawn sex pex, sonsang lang singaix ju pex, daux haktiex pa tawx Simiang Siyiex pex ka pex leeing ju." ⁴¹ Mose gwieh ti deuh veng loe veng ka plak lih singaix rawm klawng Yawdan, ⁴² sonsang to pui pa pah ka pui tix klawd tan, pa mawh pui pah ka paox plawg tix ka daux pa ang su ti yuh mai pa ang koe krax koeng ka nawh ka bawg yam pa hoik luan mai yam to nawh ti hoek ka veng an tix veng veng, nawh tak im ju. ⁴³ Veng an khankix mawh veng Beza pa koe ka daux tiag, daux lung mawh son pui Rubin, veng Ramok pa koe daux haktiex Gilat mawh son pui Gat mai veng Golan pa koe daux haktiex Bashan mawh son pui Manashe. Pa Kieh Tawng Ka Lox Tat Jhawm Prawng Siyiex.. ⁴⁴ In mawh lox tat jhawm prawng pa deuh Mose plak sivoe kawn praix Isarelax, ⁴⁵ in khankix mawh lox kham sakse, ka lox lai beenli mai lox tat jhawm prawng, pa hoik krai Mose ka kawn praix Isarelax yam lih kix khaing meung Ejiptux, ⁴⁶ plak lih singaix rawm klawng Yawdan ka ngawd see veng Betpegurax, daux haktiex Sihon simiang Amawrix, pa ot veng Heshabon, pa hoik pex Mose mai kawn praix Isarelax yam lih kix khaing meung Ejiptux. ⁴⁷ Kix teei ti cie haktiex nawh mai haktiex Awgax pa mawh simiang Bashon mai kiex mawh simiang pui Amawrix pa ot ka plak lih singaix rawm klawng Yawdan, ⁴⁸ jah ka veng Araw pa koe praok rawm klawng Anon tom hoek ka gawng Sirion, pa mawh gawng Heramon, ⁴⁹ khawm Arabax khawmuik, pa koe plak lih singaix rawm klawng Yawdan, tom hoek ka rawm sigrit sigra Arabax mai caong gawng Pisaga heue.

¹ Mose kok ka pui Isarelax khankix ah nin, "Pui Isarelax khankix nghiet heue, lox lai beenli mai lox tat jhawm prawng pa sang krai aux pex mhong daux in singaix, pex tak gau tix ka mai yuh satix ka yuh tix an khankix. ² Simiang Siyiex ex hoik yuh sijax mukheu mai ex piang gawng Hawrap. ³ Simiang Siyiex ang yuh sijax mukheu tau mai keeing ex nong nong, viang mawh nan yuh tau mai ex, can pui pa ot tin pa im ju in singaix. ⁴ Simiang Siyiex hoik sikah tau mai pex pakngai taw pakngai, piang gawng daux sigreung ngu, ⁵ aux hoik cung sinax Simiang Siyiex mai pex yam an, sonsang krai pao gumlox Simiang Siyiex ka pex, mawh kheu pex hoik lhat ka ngu, pex ang cu ti haok piang gawng. Nawh Cao ah nin, ⁶ Aux mawh Simiang Siyiex pex, pa hoik viex pex lih khaing meung Ejiptux mai ka dee yuh pex siliex. ⁷ Lheu khaing Aux ang pon ti koe siyiex tang kaux. ⁸ "Ang pon ti yuh riang grang pa saik tix, tix ceuceu son tokaux ti, pa mawh riang grang tix ceuceu, pa koe daux raoma ang ah, pa koe plak greem mai piang haktiex ang ah mai pa koe daux rawm greem haktiex ang ah, ⁹ ang pon ti krub mai ang pon ti yuh kaing kix, mawh kheu Aux mawh Simiang Siyiex pex, mawh Siyiex pa bak pa viang mai pa tawx phimap keeing pex, piang kawn praix tom hoek loe pon ju ru, ka pui pa koeng ka Aux, ¹⁰ viang mawh nan, Aux jhi krax moh tix ka pui pa moh ka Aux mai pui pa hawt ka lox tawm pingnyap Aux tom hoek kaing rheng ju. ¹¹ Ang pon kok ceu kaux Simiang Siyiex maix giex going, mawh kheu pui pa kok ka ceu kaux Siyiex giex going Siyiex tak ang deuh nawh mawh pa ang koe phimap. ¹² Doh keud ka singaix twah mai een mawh singaix singax singeh awm lox tawm Simiang Siyiex pex ka pex. ¹³ Maix tak yuh kaing jhaw son tix liah ngaix, ¹⁴ viang mawh nan, daux ngaix aliah, mawh ngaix twah Simiang Siyiex maix, maix tak ang pon ti yuh kaing tix ceu kawx maix, khawm kawn simex, kawn bun maix, kawncau simex kawncau bun maix, khawm tobrie maix, mawie, la, nyo sinie maix pa ot daux diang siviex veng maix khankix, kawncau simex, kawncau bun maix khankix tak laux lee ti awm maix. ¹⁵ Maix tak doh keud ka hoik sax mawh tix siliex ka daux meung Ejiptux mai Simiang Siyiex pa mawh Siyiex pex viex pex lih khaing tan ka taix pa ting riang mai ka plawng taix pa hoik nih tix, mawh kheu nan Simiang Siyiex pex tawm lox kieh pex priex ka singaix twah. ¹⁶ Yungyi ka miex keeing maix awm lox pa hoik tawm Simiang Siyiex maix ka maix, sonsang lang ju maix mai sonsang hu mhawm hoek mhawm pex tau ka daux haktiex pa tawx Simiang Siyiex maix ka maix. ¹⁷ "Maix tak ang pon pah pui yum. ¹⁸ Maix tak ang pon ti lud vao mai moeng kawn pui. ¹⁹ "Maix tak ang pon ti briex. ²⁰ "Maix tak ang pon ti kham sakse pa ang mawh ang meh ka paox plawg tix. ²¹ "Maix tak ang pon ti ghoing ka moeng paox plawg maix mai paw simie ti cie ka nyiex ma paox plawg tix, kaung nawh, kawncau simex, kawncau bun nawh, mawie nawh, la nawh mai kraung tix ceuceu khaing paox plawg maix. ²² Gumlox in khankix mawh pa krai Simiang Siyiex ka pui hun khawmuik, piang gawng khaing sigreung ngu, daux paiawm mai ka daux pa faik sigrien sigre, tau mai lox ting sinum mai ang lai baox tidtix. Nawh Cao hoik tiiem piang khlawp simaox ra khlawp mai tawx an ka aux. ²³ Yam mhong pex lox pa kaoh khaing sigreung pa faik, yam gleeing ngu ka gawng, hoek ka dex aux, pa mawh cao kaing doeh ru pex mai kwad song khawmuik, ²⁴ mai pex ah nin, jhak heue, Simiang Siyiex ex hoik jhi min plakngai mai pa ting lhaong tix ka ex mai ex hoik mhong lox Nawh Cao khaing daux sigreung ngu, ka daux in sigaix ex hoik yaox pui sikah Siyiex tau kawn im ju. ²⁵ Yam in ex lai sang yum yuh ka mawx lie? Mawh kheu ngu pa ting lhaong in tak gleeing ka ex, phan ex baox mhong ka lox Simiang Siyiex ex tak yum. ²⁶ Mawh kheu kawn pui khankix, pa mhong ka lox sikah Siyiex pa im ju, khaing sigreung ngu, awm mhong ex mai im ju lie? ²⁷ Maix tak hu dex mai nghiet lox krai Simiang Siyiex ex khawmuik mai deeh viex gumlox pa krai Simiang Siyiex ka maix khawmuik mai krai ex mhong mai ex tak nghiet mai hawt ti yuh. ²⁸ Simiang Siyiex hoik mhong lox pex, yam sikah pex ka aux mai Simiang Siyiex ah nin ka aux, Aux hoik mhong ka lox sikah pui in khankix ka maix, lox pa krai kix khawmuik mawh pa khaw. ²⁹ Kieh kix koe rhawm ceu an tix ka daux kix, sonsang lhat graung ka Aux mai priex ti hawt gumlox pingnyap Aux khankix jheung jheung, sonsang pon kix mai khawm kawn praix kix bwanson ceu pa mhawm leeing ju heue. ³⁰ Hu ka kix, Deeh kieh kix ing ka nyiex gox tix. ³¹ Phan mawh maix cung dex Aux tin, Aux tak krai lox tawm pingnyap mai lox lai beenli mai lox tat jhawm prawng pa sang gau maix ka kix, sonsang hawt yuh kix daux haktiex pa tawx Aux kix cie. ³² Mawh kheu nan, pex tak rien rhawm tix sonsang hawt yuh pex awm gumlox pa hoik tawm Simiang Siyiex ka pex heue. Pex tak ang pon ti veh plak gwiex plak dawm. ³³ Pex tak lawng daux krax pa hoik tawm Simiang Siyiex pex ka pex, sonsang im ju pex mai pon bwanson ceu pa mhawm tau mai lang ju ka daux haktiex pa sang pon pex ti cie heue.

¹ In mawh lox tawm pingnyap mai lox lai beenli mai lox tat jhawm prawng pa hoik tawm Simiang Siyiex pex, sonsang gau aux ka pex mai sonsang hawt pex ti yuh daux haktiex pa tiang pex ti hu teei ti cie, ² sonsang lhat graung pex ka Simiang Siyiex pex mai kawn praix pex kawn saux kawn sex pex, tak priex rien ka lox lai beenli mai lox tawm pingnyap, pa tawm Aux ka pex, daux singaix yam im ju maix, sonsang lang singaix im ju maix. ³ O pui Isarelax khankix nghiet heue, yuh satix mai hawt yuh ceu an khankix mai sonsang hu mhawm hoek mhawm pex tan, sonsang haok hwan ting lhaong pex, awm hoik yuh Simiang Siyiex, Siyiex keeing pex sijax mukheu tau mai pex ka haktiex deeh lih rawm teeih mai rawm hia. ⁴ O pui Isarelax khankix nghiet heue, Simiang Siyiex, Siyiex ex mawh Siyiex tix kaux khaing, ⁵ maix tak moh ka Simiang Siyiex maix khawm rhawm tix tau mai khawm ju tix mai khawm riang rao tix khawmuik. ⁶ Priex lox tawm Aux daux rhawm tix daux in singaix, ⁷ maix tak coca ti gau kawn praix tix mai maix tak krai yam ngawm maix nyiex tix, yam hu maix krax laux mai yam it yam tum maix mai yam kaoh maix, ⁸ maix tak vien ti deuh lox ankix awm mhai rug pa koe piang taix maix mai ankix tak mawh pa awm mhai tiiem ti deuh piang dong re tix. ⁹ Maix tak tiiem ti deuh ankix piang pang siviex nyiex tix mai piang siviex veng khankix. ¹⁰ "Yam viex Simiang Siyiex pex, pex laig ka daux haktiex pa hoik tiextu Nawh Cao ka keeing pex Abraham, Icak mai Yakop, sonsang tawx Nawh Cao veng pa ting mai pa mhawm grang pa ang maix yaox ti sum, ¹¹ mai nyiex ma pa naog kraung mhawm khankix, pa mawh pa ang pex tie khrawm mai rawm daux pa ang pex kaong, sipeem plix siiet mai khaox sanlun, pa ang maix sum mai maix hoik yaox ti ih tom sak, ¹² yuh satix maix son ang maix piawm Simiang Siyiex, pa hoik viex maix lih khaing meung Ejiptux, ka dee yuh maix siliex. ¹³ Lhat graung ka Simiang Siyiex tix, maix tak yuh kaing jhaw Nawh mai tiextu tix ka ceu kaux Nawh. ¹⁴ Maix paw hawt khaix siyiex tang kaux, pa mawh siyiex pui pa ot vung viang maix, ¹⁵ mawh kheu Simiang Siyiex maix, pa ot sinax pex mawh Siyiex pa bak pa viang, mai lhat krax song rhawm Siyiex maix lih piang maix mai yuh maix laux leeing piang haktiex. ¹⁶ Ang pon ti cheuk cheu ka Simiang Siyiex tix, awm hoik cheuk cheu maix ka Nawh Cao ka daux Masa. ¹⁷ Pex tak coca ti priex ka lox tawm pingnyap Simiang Siyiex, Siyiex pex mai mhai rug Nawh Cao mai lox lai beenli pa hoik tawm Nawh ka pex. ¹⁸ Pex tak yuh pa khaw mai pa mhawm, ka plak sivoe ngai Simiang Siyiex, sonsang hu mhawm hoek mhawm pex, sonsang pon pex tix laig mai teei ti cie haktiex pa mhawm, pa hoik tiextu Simiang Siyiex tix tawx ka keeing pex, ¹⁹ mai grheu pui koeng pex khankix khaing sivoe ngai pex, awm pa hoik yuh Simiang Siyiex mukheu. ²⁰ Bawg yam pa sang hoek kawn praix pex tak chawk ka pex ah nin, dee bleeh lox kham sakse mai lox lai beenli lox tat jhawm prawng pa hoik tawm Simiang Siyiex ex ka pex mawh tix? ²¹ Maix tak ah nin ka kawn simex tix, ex hoik mawh siliex Pharaw ka meung Ejiptux mai Simiang Siyiex hoik viex ex lih khaing meung Ejiptux tau mai plawng taix pa ting riang tix, ²² Simiang Siyiex hoik jhi mhai rug pa daox deng ka plak sivoe ngai ex, ka daux pa ting lhaong mai krax pa lang teung ka meung Ejiptux mai ka Pharaw mai ka pui nyiex ma nawh khankix, ²³ mai Nawh Cao viex ex lih khaing tan, sonsang viex Nawh ex laig ka daux mai tawx haktiex pa hoik tiextu Nawh ka keeing ex khankix. ²⁴ Simiang Siyiex hoik tawm lox sonsang hawt ex ka lox lai beenli mai lhat graung ka Simiang Siyiex ex, sonsang mhawm ex jheung jheung, sonsang priex Nawh Cao rhawm ex im ju, awm pa yaox ex daux in singaix. ²⁵ Phan ex yuh satix mai hawt yuh awm lox tawm pingnyap ka plak sivoe Simiang Siyiex ex, awm pa hoik tawm Nawh Cao ka ex, an tak mawh pa rahsee ka ex.

¹ Yam viex Simiang Siyiex pex laig ka haktiex pa sang teei pex ti cie mai grheu ceu pui ka plak sivoe pex pa mawh ceu pui Hitix, ceu pui Giragashi, ceu pui Amawrix, ceu pui Khanan, ceu pui Pharazi, ceu pui Hiwix, ceu pui Yebusix, ceu pui aliah cub khankix, pui ting riang mai pa haoh hun khaing pex, ka plak sivoe pex, ² yam ap Simiang Siyiex, kix ka daux taix pex, pex tak tap toi kix, mai yuh kix laux lak pak leeing, maix tak ang pon yuh sijax mukheu mai kix mai ang pon yuh krax caux rhawm ka kix. ³ Maix tak ang pon mawh nyiex ma mai kix mai ang pon tawx kawn bun tix ka kawn simex kix mai ang pon teei kawn bun kix son kawn simex tix. ⁴ Kix tak deeh kieh kawn simex pex khankix veeh ti singai khaing pa hawt kix khaix Aux, sonsang yuh kaing jhaw siyiex tang kaux khankix, mai Simiang Siyiex song rhawm ka pex mai Nawh Cao tak yuh pex laux leeing dom mawx dom an. ⁵ Mai maix tak yuh nin ka kix maix tak yieh khu dee tan kix mai raig ti tik rong simaox singax kix mai tat ti tik riang grang Asherax pa yuh ka khaox mai gleeing riang grang pa hoik saik kix khankix ka ngu. ⁶ Mawh kheu maix mawh pui pa singax singeh, son Simiang Siyiex pex, Simiang Siyiex pex, hoik laug pex, mawh pui cie Nawh Cao, khaing ceu pui piang haktiex. ⁷ Simiang Siyiex moh pex mai laug ka pex, mawh kheu haoh hun pex khaing pui tang ceu ang lai mawh, kheu pex hoik mawh pa kied tux, khaing ceu pui khawmuik. ⁸ Mawh kheu Simiang Siyiex moh ka pex mai Nawh Cao priex rien lox tiextu, pa tiextu Nawh ka keeing pex khankix mai Siyiex hoik viex pex lih ka plawng taix pa ting riang mai taoh lawd pex khaing dee yuh siliex, ka daux tawm taix Pharaw simiang meung Ejiptux. ⁹ Mawh kheu nan, kieh pex tawng ka Simiang Siyiex, Siyiex pex mawh Siyiex pa kaux sijax mai pa priex sijax mukheu mai krax moh krax rhawm tau mai pui pa moh ka Nawh Cao mai ka pui pa priex rien pingnyap Nawh Cao tom hoek ju pui kaing rheng, ¹⁰ mai pawk bix ka pui pa koeng ka Nawh Cao ka plak sivoe ngai kix mai yuh kix laux leeing, Nawh tak ang yawg tix ka pui pa koeng ka Nawh Cao, Nawh tak pawk bix ka nawh, ka plak sivoe ngai nawh. ¹¹ Maix tak priex rien mai hawt yuh lox tawm pingnyap mai lox lai beenli mai lox tat jhawm prawng pa tawm Aux ka pex, daux in singaix. ¹² Mawh kheu jao nghiet maix lox tat jhawm prawng in khankix mai priex rien mai hawt yuh ka an, Simiang Siyiex, Siyiex pex tak yuh sijax mukheu mai krax moh krax rhawm tix ka pex, ka pa hoik tiextu Nawh ka keeing pex khankix, ¹³ Nawh Cao tak moh pex, nawb bwan ka pex mai kieh pex haoh hun, Nawh Cao tak nawb bwan ka doeh ru pex mai plix daux haktiex pex, simie nghox pex mai rawm plix siiet pex mai bee pex mai kieh kawn mawie, kawn yung, kawn pex, pex baox pre, daux haktiex pa tiextu Nawh Cao tix tawx ka keeing pex khankix. ¹⁴ Pex tak pon bwanson ka sinax ceu pui khawmuik, simex, bun tak ang koe pui neh daux sinax pex mai daux sinax tobrie pex. ¹⁵ Simiang Siyiex tak teei ti tik jhawm saux khaing pex, mai jhawm saux pa kied lang teung, pa hoik tawng pex, ka daux meung Ejiptux, tak ang kieh hoek piang pex, tak kieh hoek piang pui pa koeng ka pex khankix. ¹⁶ Pex tak yuh pui pa ap Simiang Siyiex ka pex laux leeing, ngai pex tak ang pon caux rhawm ka kix, pex tak ang pon yuh kaing jhaw siyiex kix, mawh kheu an tak mawh kie ka son pex. ¹⁷ Phan pex keud ka daux rhawm tix ah nin, ceu pui in khankix, nie lheu ting riang khaing aux, aux sang pon grheu kix to yuh ka mawx? ¹⁸ Pex paw lhat ka kix, viang mawh nan, pex tak doh keud ka pa hoik yuh Simiang Siyiex, Siyiex pex ka Pharaw mai ka meung Ejiptux khawmuik, ¹⁹ krax cheuk cheu pa ting, pa hoik yaox pex ka ngai tix, mhai rug pa daox deng mai taix pa ting riang mai plawng taix pa hoik nih tix, pa hoik viex Simiang Siyiex, Siyiex pex lih, Simiang Siyiex, Siyiex pex tak yuh awm an ka pui pa lhat graung pex ka. ²⁰ Lheu khaing an Simiang Siyiex, Siyiex pex tak ploi phung awng sinax kix, tom sidah laux leeing pui pa kawn deuk mai ka pui pa mox tix ka plak sivoe ngai pex. ²¹ Paw pex yaoh yee ka kix, mawh kheu Simiang Siyiex, Siyiex pa ot sinax pex mawh Siyiex pa ting sibrawm mai pa lhat graung pui ka. ²² Simiang Siyiex, Siyiex pex tak grheu ceu pui khankix sivoe ngai pex tix bawg ceeix ceeix, pex tak ang pon yuh kix laux leeing tix dom neh, lhat totiag pa koe daux tiag khankix, nie pre haoh hun khaing pex. ²³ Viang mawh nan, Simiang Siyiex, Siyiex pex, tak ap kix ka pex mai kieh kix som nai tom sidah hoek kix krax laux leeing. ²⁴ Nawh Cao tak ap simiang kix ka daux tawm taix pex, pex tak yuh ceu kaux kix laux khaing greem raoma, pui tix kaux kawx, tak ang pon cung pon tieb ka pex tom sidah yuh pex kix laux leeing. ²⁵ Pex tak gleeing siyiex riang grang pa saik kix ka ngu, pex paw ghoing ka mau khri pa koe piang an mai paw teei son tix, lhat pex krix ka kie an, mawh kheu an mawh pa seeing Simiang Siyiex, Siyiex pex ka. ²⁶ Pex paw viex pa seeing brai laig ka daux nyiex tix, lhat pex awm ka kraung pa jhax lawg an, kieh pex seeing mai koeng ka an kix, an mawh ceu pa jhax lawg ka heue.

¹ "Lox tawm pingnyap pa tawm aux ka pex ka daux in singaix, pex tak priex mai hawt ti yuh sonsang im ju mai nie pre haoh hun pex mai laig ka daux, sonsang teei ti cie haktiex pa tiextu Simiang Siyiex ka keeing pex. ² Doh keud ka pa hoik thong Simiang Siyiex pex, ka krax hu pex ka daux tiag tixpon num, sonsang kieh Nawh Cao koe rhawm awn rhawm tiiem mai cheuk cheu rhawm pex mawh pa yuh ka mawx mai sonsang tawng ka priex rien pex ka lox tawm pingnyap mai ang priex rien ka. ³ Nawh Cao kieh pex koe rhawm awn rhawm tiiem mai ploi pex cai rhawm mai tawx pex ih ka mannax, pa ang pex sax tawng mai pa ang keeing pex sax tawng, mai sonsang kieh Nawh Cao pex tawng ka ang pui im ka blah nong nong, viang mawh nan im kheu lox pa lih khaing jheeh Simiang Siyiex. ⁴ Ka daux tixpon num an, kraung ceep pex ang sax prim sax griah mai caong pex kawx ang sax saux sax uah. ⁵ Deuh pex tawng an khankix ka daux rhawm tix, awm sidiex gau keeing ka kawn simex tix, Simiang Siyiex, Siyiex pex kawx sidiex gaux ka pex. ⁶ Mawh kheu nan, pex tak priex rien ka lox tawm pingnyap Simiang Siyiex, Siyiex pex mai hawt daux krax Nawh mai lhat graung ka Nawh Cao. ⁷ Mawh kheu Simiang Siyiex, Siyiex pex viex pex laig ka daux haktiex pa mhawm, dee koe rawm klawng, rawm keut, rawm daux, pa lih khaing daux ngawd mai khaing daux gawng khankix, ⁸ haktiex pa koe nghox ca, koi, nhu plix siiet, khaox ruh, plix kla jiang, khaox sanlun mai rawm hia khankix, ⁹ Mawh haktiex pa sang yaox maix ti ih blah mai pa ang koe ceu pa cud cha, pa grum naog mai haktiex simaox pa mhawm rhiem, pex tak yaox ti kaong tawng khaing gawng khankix. ¹⁰ Pex tak yaox ti ih mai sak mai pex tak yaogyaw bwanson Simiang Siyiex, Siyiex pex, son haktiex mhawm pa hoik tawx Nawh ka pex. ¹¹ Yuh satix pex son ang pex piawm ka Simiang Siyiex, Siyiex pex, ka daux pa ang tix priex rien lox tawm pingnyap, lox tat jhawm prawng mai lox lai beenli pa tawm Aux ka pex daux in singaix. ¹² lhat ka yam hoik ih pex mai hoik sak mai yam sum pex ka nyiex mhawm khankix, ¹³ mai yam deeh pre haoh hun cub tobrie pex mai cub yung pex mai yam deeh haoh hun mau khri pex mai can ceu pa koe pex khankix, ¹⁴ mai rhawm pex tak yaw rangdi ka kix, pex tak piawm ka Simiang Siyiex, Siyiex pex, pa viex pex lih khaing meung Ejiptux, khaing dee mawh pex siliex, ¹⁵ Kaw pa hoik thong hu ka daux tiag pa ting, dee lhat graung, ka dee koe siuing ngu mai tamtim khankix mai haktiex dee kroh ang rawm koe kawx pa hoik kieh rawm lih khaing daux rang kiien son pex, ¹⁶ Kaw pa hoik tawx pex ih mannax ka daux tiag, pa ang keeing pex nyang sax tawng, sonsang kieh Nawh pex koe rhawm awn rhawm tiiem mai cheuk ka pex mai sonsang yuh pa mhawm ka pex daux pa ghoik, ¹⁷ lhat pex keud ah nin daux rhawm tix, aux hoik magmi, kheu siawp sibrawm mai riang rao plawng taix ti, ¹⁸ Kieh pex doh keud ka Simiang Siyiex, Siyiex pex, mawh kheu Nawh mawh pa tawx siawp sibrawm riang rao krax magmi ka pex, sonsang kaux cong sijax mukheu pa tiextu Nawh ka keeing pex khankix, awm pa koe daux in singaix. ¹⁹ Phan maix piawm ka Simiang Siyiex maix mai phan maix hawt grawng lawng khaix siyiex tang kaux mai yuh kaing jhaw kix mai krub ka kix, aux tak kham sakse ka son maix, ka daux in singaix mai maix tak laux leeing tete. ²⁰ Awm ceu pui pa hoik yuh Simiang Siyiex kix laux leeing ka plak sivoe maix khankix, mawh kheu ang kix cu nghiet ka lox Simiang Siyiex maix kawx tak laux leeing awm an heue.

¹ Ceu pui Isarelax khankix eue, nghiet heue, pex tak tiang toi rawm klawng Yawdan daux in singaix mai laig sonsang grheu ka ceu pui pa nie lheu ting mai pa nie lheu ting riang khaing pex, pon ka veng pa ting mai veng pa kaux cong pa lhaong tom cux raoma, ² pui pa ting lhaong kaux hak, pa mawh doeh ru Anakax, awm pa tawng maix khankix mai pa hoik mhong maix pui ah nin. Mawh pui mawx pa pon cung ka plak sivoe doeh ru pui Anakax?" ³ Mawh kheu nan, een tix tawng ka daux in singaix, Simiang Siyiex maix, tak hu ka sivoe maix, awm ngu pa gleeing. Nawh Cao yuh kix laux leeing mai grheu kix ka plak sivoe maix. Mawh kheu nan maix tak grheu kix lih mai nied ti yuh kix laux leeing, awm lox pa hoik tawm Simiang Siyiex ka maix. ⁴ Khaix hoik grheu Simiang Siyiex kix khaing plak sivoe maix, paw doh keud ti ah nin daux rhawm tix, "Mawh kheu koe pa rahsee aux, Simiang Siyiex hoik viex aux laig, sonsang pon aux tix cie haktiex in, mawh kheu jao krax pa caox caig ceu pui inkix, Simiang Siyiex tom grheu kix lih khaing plak sivoe maix. ⁵ Ankix ang lai mawh, kheu pa rahsee maix mai krax pa rauh rhawm maix, sonsang laig teei maix ti cie haktiex kix. Mawh kheu jao pa caox caig ceu pui inkix, Simiang Siyiex tom grheu kix lih khaing plak sivoe maix mai sonsang kieh Nawh Cao lox sijax mukheu tix grum naog ka pa hoik tiextu Nawh ka keeing maix Abraham, Icak mai Yakop. ⁶ Mawh kheu nan, een tix tawng, Simiang Siyiex tawx haktiex mhawm in ka maix, sonsang pon maix ti cie ang mawh kheu rahsee maix, Mawh kheu mawh maix ceu pui pa kiien ngawg. ⁷ Doh keud mai paw piawm ka grawng pa hoik kieh maix Simiang Siyiex song rhawm ka daux tiag, jah ka singaix lih maix khaing daux meung Ejiptux, tom hoek ka dee in maix hoik mawh pa tieh feen ka Siyiex. ⁸ Maix baox kieh Simiang Siyiex song rhawm ka daux haktiex Hawrax, Simiang Siyiex song rhawm ka maix, sang yuh maix laux leeing. ⁹ Yam haok aux piang gawng, sonsang rieb aux ti teei khlawp simaox, pa mawh khlawp simaox gumlox sijax mukheu pa hoik yuh Simiang Siyiex tau mai pex, yam an aux ot piang gawng tixpon ngaix tixpon sawm, aux ang ih blah mai ang nyaux rawm. ¹⁰ Simiang Siyiex ap khlawp simaox ra khlawp ka aux, pa hoik tiiem ka giien taix tix mai piang an hoik mawh gumlox pa sikah Simiang Siyiex ka pex, piang gawng khaing sigreung ngu, singaix khrawm pex paox tix. ¹¹ Khaix hoik luan tixpon singaix tixpon sawm, Simiang Siyiex ap khlawp simaox an ra khlawp ka aux, pa mawh khlawp simaox lox sijax mukheu. ¹² Simiang Siyiex ah nin ka aux, kaoh mai nied lih khaing tin. Grawh grawng nawh pui pa viex maix lih khaing meung Ejiptux khankix hoik yuh pa laux leeing. Kix nied tix veeh ti khaing daux pa tawm Aux ka kix, kix hoik yuh riang grang pa raug son tix. ¹³ Simiang Siyiex baox ah nin ka aux, Aux hoik yaox ka ceu pui in khankix, mawh ceu pui pa kiien ngawg. ¹⁴ Grham Aux sonsang yuh Aux kix laux leeing mai preet ceukau kix khaing greem raoma, Aux tak kieh maix mawh ceu pui pa nie lheu ting riang rao mai pa nie lheu ting khaing kix. ¹⁵ Mawh kheu nan Aux deeh veeh ti lih hu khaing piang gawng mai gawng hoik gleeing ka ngu, khlawp simaox gumlox sijax mukheu an ra khlawp hoik koe ka daux tawm taix aux, ¹⁶ Yam jhak aux tix yaox, pex hoik lud ka Simiang Siyiex pex mai raug ka riang grang kawn mawie, pex nied tix veeh khaing pa hoik tawm Simiang Siyiex. ¹⁷ Aux taing ti tik khlawp simaox an ra khlawp khaing daux tawm taix ti khawm ra khawn mai hoik max ka plak sivoe ngai pex. ¹⁸ Aux deeh gup ti ka plak sivoe Simiang Siyiex awm phao voe tixpon singaix tixpon sawm, Aux ang ih blah mai ang nyaux rawm kheu jao phimap pex khawmuik, ka pa hoik lud pex ka daux pa yuh ti pa caox caig ka plak sivoe ngai Simiang Siyiex, sonsang song rhawm Nawh Cao. ¹⁹ Mawh kheu aux lhat graung ka pa kied kin song rhawm Simiang Siyiex piang pex mai pa sang yuh Nawh pex laux leeing, viang mawh nan, ka daux bawg yam an, Simiang Siyiex hoik baox deeh nghiet ka lox aux, ²⁰ Simiang Siyiex hoik kied song rhawm ka Arun mai dex sang yuh nawh laux leeing, mawh kheu nan, aux baox deeh rawg bwan, son Arun ka daux bawg yam an. ²¹ Aux teei riang kawn mawie pa hoik raug pex pa hoik kieh pex lud mai gleeing ka daux ngu mai krid tom phawng mai aux tik phawng an ka daux rawm klawng pa lih khaing piang gawng. ²² "Pex hoik kieh Simiang Siyiex song rhawm hawt baoh Taberax, baoh Masa mai baoh Kibarot Hatava khankix. ²³ Yam ploi Simiang Siyiex pex lih khaing haktiex Kadesha Bana Nawh ah nin, haok mai teei ti cie haktiex pa hoik tawx aux ka pex Yam an pex deeh tieh feen ka lox pingnyap Simiang Siyiex mai ang yum rhawm ka Nawh Cao mai ang cu nghiet ka lox Nawh Cao. ²⁴ Pex hoik tieh feen ka Simiang Siyiex jah khaing daux singaix hoik tawng aux pex. ²⁵ "Mawh kheu nan, aux baox deeh gup ti ka plak sivoe Simiang Siyiex tixpon singaix tixpon sawm, kheu hoik ah Simiang Siyiex tix sang yuh pex laux leeing. ²⁶ Mawh kheu nan, aux rawg bwan ka Simiang Siyiex ah nin, cao Simiang Siyiex eue, paw yuh pui maix khankix, laux leeing liak. Kix mawh sinngao Maix Cao pa hoik deeh taoh Maix Cao ka krax pa ting riang rao tix mai pa hoik viex Maix Cao kix lih khaing daux meung Ejiptux ka plawng taix pa ting riang Maix. ²⁷ Doh keud ka kawncau maix Abraham, Icak mai Yakop liak, paw nyang keud ka pa kiien rhawm kix mai pa caox caig kix mai phimap kix. ²⁸ Phan ang mawh nan, pui haktiex pa viex Maix Cao yix lih khaing ka daux, tak sang ah nin, "Mawh kheu ang Simiang Siyiex pon viex kix hu ka daux haktiex pa hoik deuh Nawh Cao lox sijax mukheu tix ka kix, mawh kheu koeng Nawh Cao ka kix, Nawh Cao hoik viex kix lih sonsang pah kix ka daux tiag." ²⁹ Mawh kheu kix mawh pui Maix Cao mai mawh sinngao Maix Cao, pa hoik viex Maix lih hu ka siawp sibrawm pa ting riang rao Maix Cao mai ka plawng taix pa hoik nih Maix Cao heue.

¹ "Yam an Simiang Siyiex ah nin ka aux, saik khlawp simaox pa awm phao voe ra khlawp mai haok ka Aux piang gawng mai yuh teug khaox tix mu. ² Aux tak sang deeh tiiem gumlox pa hoik koe piang khlawp simaox awm bawg voe pa hoik kieh maix max maix tak deuh khlawp simaox in daux teuk. ³ Mawh kheu nan, aux tom yuh teug ka khaox Akasha mai saik khlawp simaox ra khlawp awm phao voe mai haok piang gawng tau mai khlawp simaox an ra khlawp daux taix tix. ⁴ Nawh Cao tiiem gumlox pingnyap kao gum piang khlawp simaox an awm phao ka, pa mawh lox sikah Simiang Siyiex ka pex piang gawng khaing daux sigreung ngu, singaix khrawm pex paox tix, Simiang Siyiex deeh tawx ka aux. ⁵ Khaix an aux deeh lih khaing gawng mai deuh khlawp simaox an, daux teug pa hoik yuh aux, yam in hoik koe daux teug tan, awm gumlox pa hoik tawm Simiang Siyiex ka aux. ⁶ Pui Isarelax khankix lih hu khaing rawm daux Beneyakan mai hoek ka haktiex Moserax. Arun hoik yum mai kix sipaung nawh tan mai kawn simex nawh Eliza dee plud ti yuh kaing jhaw cao giex kaing li tang nawh. ⁷ Jah khaing tan, kix lih hu ka haktiex Gugodax mai kix deeh lih khaing Gugodax mai hoek ka Yobatax haktiex koe rawm klawng tix dah. ⁸ Yam an Simiang Siyiex tang gwieh pui Lewix, tawx beeh glawm kieh klawm teug bwan sijax mukheu Simiang Siyiex, sonsang cung kix ka plak sivoe Simiang Siyiex mai yuh kaing jhaw son Nawh Cao mai sonsang nawb kix bwan ka daux min ceu kaux Nawh Cao tom hoek in singaix. ⁹ Mawh kheu nan, pui Lewix tak ang koe nyum cie mai ang koe sinngao tau mai puxaik nawh khankix, Simiang Siyiex mawh sinngao nawh, awm hoik yuh Simiang Siyiex maix sijax mukheu tix ka nawh. ¹⁰ Aux ot piang gawng tixpon ngaix tixpon sawm awm bawg phao ka, yam an Simiang Siyiex deeh baox nghiet ka lox aux mai ang lai yuh pex laux leeing. ¹¹ Simiang Siyiex ah nin ka aux, kaoh thong krax mai hu sivoe pui khankix, sonsang pon laig kix mai teei ti cie haktiex pa hoik tiextu Aux ka keeing kix khankix mai pa sang tawx Aux ka kix. ¹² "Pui Isarelax khankix eue, yam in pa mhaing Simiang Siyiex pex yuh mawh ceu patix lie? ceu an khankix mawh pa lhat graung pex ka Simiang Siyiex pex mai sonsang hawt pex ti hu ka daux krax Nawh Cao khankix mai sonsang moh pex ka Nawh Cao mai sonsang yuh pex kaing jhaw Nawh, khawm rhawm tix mai khawm ju tix khawmuik. ¹³ Sonsang priex pex ti hawt gumlox pingnyap Nawh mai gumlox beenli pa deuh Nawh Cao khankix, awm pa hoik tawm aux ka pex in singaix, sonsang pon pex bwanson ceu pa mhawm. ¹⁴ Meung raoma mai piang raoma pa kied ting lhaong mawh cie Simiang Siyiex pex, haktiex in mai khawm pa koe piang haktiex khawmuik kawx mawh cie Nawh Cao. ¹⁵ Simiang Siyiex khaw rhawm ka keeing maix mai kied moh ka kix, Nawh Cao hoik laug ti teei doeh ru kix khaing sinax ceu pui khankix awm pa koe ka daux in singaix. ¹⁶ Mawh kheu nan, pat hak rhawm pex mai paw lai baox kieh ngawg pex kiien khaix in. ¹⁷ Grawh grawng nawh Simiang Siyiex mawh Siyiex piang siyiex khankix mai Nawh Cao mawh Simiang piang simiang khankix mai Nawh Cao mawh Siyiex pa ting lhaong mai pa ting riang rao mai pa khaw tix lhat graung ka mai pa ang jhak pakngai pui mai pa ang teei ka totaix chun praok khankix. ¹⁸ Nawh Cao priex rien mai prawng ca son miexmai kawn doe ka daux pa rahsee mai Nawh Cao moh ka nyo sinie mai tawx pa ih khawm kraung ceep ka nawh. ¹⁹ Mawh kheu nan, moh ka nyo sinie, pex kawx hoik mawh nyo sinie daux meung Ejiptux. ²⁰ Maix tak koe krax lhat graung ka Simiang Siyiex maix mai yuh kaing jhaw Nawh Cao mai maix tak kleuk tix mai Nawh Cao mai yuh krax tiextu ka daux ceu kaux Nawh Cao. ²¹ Nawh Cao mawh krax pa yaogyaw maix mai Nawh Cao mawh Siyiex maix pa hoik yuh ceu pa ting lhaong mai ceu pa lhat grawng an khankix mawh pa hoik yaox maix ka ngai tix. ²² Keeing maix khankix lih hu ka daux meung Ejiptux pui atixgliah kaux mai yam in Simiang Siyiex maix, hoik deeh yuh maix koe awm simuing raoma khankix ka daux pa nie pre haoh hun heue.

¹ "Maix tak moh ka Simiang Siyiex tix mai priex ti hawt gumlox tawm Nawh mai lox lai beenli pa deuh Nawh Cao mai lox tat jhawm prawng Nawh Cao mai lox pingnyap Nawh Cao khankix jheung jheung. ² Priex tix tawng ka daux in singaix, aux ang krai kawn praix maix khankix pa ang nyang sax koe krax tawng yung mai pa ang nyang sax yaox ka krax sidiex gau Simiang Siyiex maix khankix mai krax pa ting lhaong Nawh Cao mai plawng taix pa hoik nih Nawh Cao lih, ³ mhai rug pa daox deng pa hoik yuh Nawh Cao ka daux sigreung meung Ejiptux ka Pharaw, pa mawh simiang meung Ejiptux mai piang haktiex nawh khawmuik, ⁴ Ceu pa hoik yuh Nawh Cao ka kru naing meung Ejiptux khawm brung kix mai ling brung kix mai grawng pa yuh Nawh Cao rawm sigrit sigra raoh kheem kix, yam hawt pheet kix khaix pex mai pa hoik yuh Simiang Siyiex kix laux leeing tom hoek ka daux in singaix. ⁵ Grawng pa hoik yuh Nawh Cao son pex ka daux tiag, tom sidah hoek pex dee in, ⁶ grawng pa hoik yuh Nawh Cao ka Datan mai Abiram kawn simex Eliabax ceu pui Rubin khankix, haktiex ang jheeh tix mai bleet kix, khawm nyiex khawm ma kix, khawm nyiex gox kix mai khawm kraung khrai tobrie kix khawmuik, ka daux sigreung ceu pui Isarelax khankix, ⁷ mai ngai pex hoik yaox ka grawng kaing pa ting lhaong Simiang Siyiex, ka pa hoik yuh Nawh Cao kuceu khawmuik. ⁸ "Mawh kheu nan, pex tak priex ti hawt gumlox pingnyap khawmuik pa tawm aux ka pex ka daux haktiex pa sang laig pex teei ti cie, ⁹ sonsang lang ju singaix im ju pex ka daux haktiex pa hoik tiextu Simiang Siyiex tix tawx ka keeing pex, ka son kix mai ka son doeh ru kix pa mawh haktiex dee lih rawm teeih mai rawm hia khankix. ¹⁰ Grawh grawng nawh haktiex pa sang hu teei pex ti cie, ang lai awm haktiex meung Ejiptux, dee hoik kaoh pex mai ka dee hoik ruat pex simie mai dee shiao pex caong tix see rawm awm sipeem taux lhax. ¹¹ Haktiex pa sang teei pex ti cie, mawh haktiex koe gawng lua mai daux ngawd daux lung, pa pon rawm lhiex, ¹² mai mawh haktiex pa priex rien Simiang Siyiex pex, ngai Simiang Siyiex, mawh pa kia ngiien piang haktiex an leeing lang num. ¹³ Phan pex jawk tix nghiet ka lox pingnyap pa tawm aux ka pex daux in singaix, moh ka Simiang Siyiex pex mai yuh kaing jhaw Nawh Cao khawm rhawm tix mai khawm ju tix khawmuik, ¹⁴ Aux tak tawx rawm lhiex ka haktiex pex, bawg yam mawx bawg yam an, khawm rawm lhiex cao mai rawm lhiex lha, sonsang pon pex ti khrawm nghox koi, rawm plix siiet khraox mai bee khankix. ¹⁵ Sonsang yaox pex ti ih tom sak mai son to eei brie liang pex kawx Aux tak kieh rib kuah ka daux lung pex khankix. ¹⁶ Yuh satix pex phan ang mawh nan, rhawm pex tak hawt khaix tawb kheem mai deeh veeh ti yuh kaing jhaw siyiex tang kaux khankix mai krub ka an kix. ¹⁷ Phan ang mawh nan, krax song rhawm Simiang Siyiex tak lih piang pex mai Nawh Cao tak nyeep raoma, son ang lhiex lai lih mai haktiex tak ang lai chix plix mai pex tak grai grup khaing haktiex pa mhawm, pa tawx Simiang Siyiex ka pex. ¹⁸ Mawh kheu nan, pex tak priex gumlox inkix pa hoik krai aux ka daux rhawm pex mai vien ti deuh awm mhai rug piang taix pex mai piang dong re pex. ¹⁹ Pex tak sidiex gau kawn praix pex ka gumlox an mai krai grawng an kix yam ngawm pex daux nyiex ma mai yam lawng pex krax mai yam it yam tum mai yam kaoh pex. ²⁰ Maix tak tiiem ti deuh piang pang siviex nyiex pex mai piang siviex veng, ²¹ sonsang baox nie lang ju pex mai kawn praix pex khankix, sonsang baox nie pre haoh hun pex, ka daux haktiex pa hoik tiextu Simiang Siyiex tix tawx ka keeing pex khankix, awm rheung lang singai raoma piang haktiex kawx awm an. ²² Phan pex yuh satix mai priex ti hawt ka gumlox pingnyap pa tawm aux ka pex khawmuik, moh ka Simiang Siyiex pex mai hawt grawng lawng khaix Nawh Cao mai een rhawm ka Nawh Cao tom kaux cong, ²³ Simiang Siyiex tak grheu ceu pui in khankix lih ka plak sivoe pex. Pex tak pon ti cie haktiex ceu pui pa nie lheu ting lhaong mai pa nie lheu ting riang rao khaing pex. ²⁴ Ka dee hoik dig pex ka caong tix kudah tak mawh cie pex, jah khaing daux tiag tom hoek ka gawng Lebanon mai jah ka rawm Yufrethix tom hoek ka plak klip singaix rawm sigrit sigra tak mawh dee kwang pex. ²⁵ Pui tix kaux kawx tak ang pon ti cung ka plak sivoe ngai pex, Simiang Siyiex tak kieh pui lhat graung ka pex mai piang haktiex dee hoik dig pex khankix, awm lox pa hoik ah Nawh Cao ka pex. ²⁶ "Jhak heue, Aux deuh krax nawb bwanson mai krax pa jhax lawg ka plak sivoe pex daux in singaix, ²⁷ phan pex cu nghiet ka lox pingnyap Simiang Siyiex pex, ka pa tawm aux daux in singaix, pex tak pon krax nawb bwan. ²⁸ Phan pex ang cu nghiet ka lox pingnyap Simiang Siyiex mai phan veeh ti khaing daux krax pa hoik tawm aux ka pex, daux in singaix mai hawt khaix siyiex tang kaux khankix, pa ang pex nyang sax tawng pex tak pon krax pa jhax lawg. ²⁹ Yam hoik viex Simiang Siyiex pex laig ka daux haktiex pa sang hu teei pex ti cie, mai pex tak deuh krax pa nawb bwan piang gawng Gerizim mai jhax lawg piang gawng Ebalax. ³⁰ Grawng an kieh koe ka toi rawm klawng Yawdan, ka plak glip singaix, ka daux haktiex ceu pui Khanan, pa koe daux lung plak toi veng Gilagalax, hawt dex tiag khaox Piakvan More khankix ang mawh lie? ³¹ Pex tak sang tiang plak toi rawm klawng Yawdan mai laig daux haktiex pa sang teei pex ti cie, ka dee pa tawx Simiang Siyiex ka son pex mai ot ka daux haktiex an. ³² Pex tak priex ti hawt yuh awm lox lai beenli pa deuh aux khankix mai lox tat jhawm prawng pa deuh aux ka plak sivoe pex khankix daux in singaix heue.

¹ "In mawh lox lai beenli mai lox tat jhawm prawng pa sang priex rien pex tix hawt, ka daux haktiex pa tawx Simiang Siyiex keeing pex ka pex glang singaix yam kawn im ju pex piang ca haktiex in. ² Pex tak yieh laux lak pak leeing, ka dee pa hoik yuh ceu pui sang grheu pex an khankix, kaing jhaw Siyiex Cao tix, piang gawng lhaong, piang ton, mai pa koe ka greem khaox klai kankix. ³ Pex tak yieh ti tik khu dee tan kix laux leeing mai raig ti tik rong simaox kix khankix mai gleeing khaox riang grang Asherax ka ngu, pex tak kid riang grang pa hoik saik mawh riang siyiex kix khankix mai yuh ceu kaux kix laux leeing khaing dee an. ⁴ Pex tak ang pon ti krub Simiang Siyiex pex, awm krub kix. ⁵ Viang mawh nan, pex tak sawg ti yaox ka dee pa laug Simiang Siyiex pex khaing daux doeh ru pex khankix, sonsang deuh Nawh Cao ceu kaux tix mai son dee ot Nawh Cao pex tak hu tan. ⁶ Pex tak teei ti viex krax tan pa gleeing, krax tan pa appong mai kao son tix son, krax tan pa yaog pa koe daux tawm taix pex, krax tan pa yuh sija mukheu mai krax tan ceu pa koe rhawm pex, mai krax tan pa liang pex tix pon khaing cub yung cub mawie pex khankix. ⁷ Pex tak ih ka plak sivoe Simiang Siyiex pex tan, pex mai kawn nyiex ma pex khankix tak koe krax gaux rhawm ka daux pa hoik yuh pex ka taix ti khawmuik, pa hoik nawb Simiang Siyiex bwanson ka pex. ⁸ Awm pa yuh ex tin daux in singaix, can ceu pa yuh pui ku kaux, mawh pa khaw caw ka ngai cao tix, pex tak ang pon ti yuh nin khaix in singaix. ⁹ Yam in pex ang nyang bax hoek ka dee sang laux lee tix, ka daux haktiex sinngao pa sang tawx Simiang Siyiex ka pex. ¹⁰ Yam tiang pex ka rawm klawng Yawdan, yam ot pex ka daux haktiex pa sang tawx Simiang Siyiex ka pex, pa mawh sinngao pa sang pon pex, yam tawx Nawh Cao pex laux lee ti khaing pui koeng pex khankix, pa koe hawt rawb rim pex khawmuik. Mawh kheu nan, pex tak ot ka daux haktiex an tau mai pa yiien yawg. ¹¹ Tak sang koe dee pa laug Simiang Siyiex pex, sonsang deuh Nawh Cao ceu kaux tix ot tan. Pex tak viex can ceu pa tawm aux ka pex hoek tan, pa mawh krax tan pa gleeing, krax tan pa appong kao son tix son mai krax tan pa yaog, pa koe daux tawm taix pex mai krax tan pa laug pex awm pa koe lox sijax tix ka Simiang Siyiex. ¹² Pex tak gaux rhawm ka plak sivoe Simiang Siyiex, pex mai kawn simex kawn bun pex khankix mai kawn ceu simex kawncau bun pex mai ceu pui Lewix khankix pa paung ka pex, pa ang koe nyum cie mai pa ang koe sinngao. ¹³ Yuh satix pex, son ang pex sang yuh krax tan pa gleeing ka can dee pa yaox pex kudah. ¹⁴ Viang mawh nan, pex tak yuh krax tan pa gleeing ka dah dee pa laug Simiang Siyiex, khaing doeh ru pex mai pex tak yuh an khawmuik awm pa tawm aux ka pex. ¹⁵ Awm pa nawp Simiang Siyiex bwan, pex tak pon ti pah mai ih nex pa koe ka daux veng pex khankix, ka can ceu pa sang simie rhawm pex ti ih, pui pa singax ang ah, pa ang singax ang ah, tak pon ti ih tau, awm ih kix ka nex cak mai nex kiah. ¹⁶ Viang mawh nan, tak ang pon ti ih ka nham, tak hieh piang tiex awm rawm. ¹⁷ Pex tak ang pon ti ih krax tan pa mawh kao son tix son khaing nghox koi pex, rawm plix siiet khraox pex, rawm bee pex mai khaing tobrie pa liang pex tix pon khaing cub yung cub mawie pex khankix mai khaing krax tan pa yuh sijax mukheu mai krax tan pex khawm rhawm tix mai krax tan pa yaog pa koe daux tawm taix pex ka veng baoh dee ot pex. ¹⁸ Pex tak pon ti ih an khakix ka plak sivoe Simiang Siyiex ka dah dee pa laug Simiang Siyiex, pex mai kawn simex kawn bun pex mai kawncau simiex kawncau bun pex, khawm ceu pui Lewix pa paung daux veng pex khankix mai pex tak gaux rhawm tau plak sivoe Simiang Siyiex, can ceu pa hoik yuh pex ka taix ti. ¹⁹ Yuh satix pex, son ang pex piawm ka ceu pui Lewix khankix, glang yam kawn im ju pex ka haktiex dee ot pex. ²⁰ Yam yuh Simiang Siyiex mee haktiex maix vieh va, awm gumlox sijax mukheu pa hoik yuh Nawh Cao ka maix, maix tak ah nin, aux tak ih nex kheu koe rhawm tix sang ih nex maix tak pon ti ih nex, awm pa koe rhawm maix ti sang ih. ²¹ Phan dah dee pa laug Simiang Siyiex ti deuh son ceu kaux tix mawh pa singai khaing dee ot maix, tak pon ti pah tobrie eei maix mai khaing cub yung cub mawie pa hoik tawx Simiang Siyiex ka maix, awm gumlox pa tawm aux ka maix. Maix tak pon ti ih an, ka daux veng baoh dee ot maix, awm pa koe rhawm maix ti sang ih. ²² Maix tak pon ti ih nex an, awm pa ih tix nex kiah mai nex cak, pui pa ang singax mai pui pa singax khankix tak pon ti ih tau. ²³ Yuh satix maix son ang maix ih nham, mawh kheu nham mawh ju, tak ang pon ti ih ju tau mai nex. ²⁴ Maix tak ang pon ti ih nham maix tak hieh nham piang tiex awm rawm. ²⁵ Sonsang pon maix mai kawn praix maix bwanson pa mhawm tau mai kawn saux maix khankix, yam yuh maix ceu pa khaw caw ka plak sivoe ngai Simiang Siyiex maix. ²⁶ Krax tan ceu pa singax pa koe maix mai krax tan pa hoik yuh maix sijax mukheu maix tak viex an khankix, hu ka dah dee pa laug Simiang Siyiex. ²⁷ Maix tak tan krax tan pa gleeing nex khawm nham, piang khu dee tan Simiang Siyiex, nham to tan pa appong maix khankix maix tak hieh piang khu dee tan Simiang Siyiex, maix tak ih nex an. ²⁸ Sonsang pon maix mai kawn praix maix bwanson pa mhawm tau mai kawn saux maix tix ju hoik tix ju, yam yuh maix ceu pa mhawm mai pa khaw caw ka plak sivoe ngai Simiang Siyiex, yuh kaing pa khaw rhawm Nawh Cao mai nghiet ka lox pa tawm aux ka pex. ²⁹ Yam teei Simiang Siyiex ti tik ka ceu pui haktiex pa sang laig ot maix ka daux khankix, khaing plak sivoe maix, maix tak yaox ti ot daux haktiex kix. ³⁰ Yuh satix maix, son ang maix sang krix ka kie taong mai son ang maix sang hawt khaix kix, pa hoik laux leeing ka plak sivoe maix mai son ang maix lai chawk grawng beenli pa krub kix, ceu pui inkix hoik yuh kaing jhaw siyiex kix yuh ka mawx, Aux tak sang yuh nawh awm an, ³¹ maix tak ang pon ti krub Simiang Siyiex maix awm krax pa yuh kix, kix yuh ceu pa seeing brai Simiang Siyiex maix mai ceu pa koeng Nawh Cao khankix, ka siyiex kix mai hoik gleeing ti tan kawn simex, kawn bun ti ka siyiex kix. ³² Can ceu pa tawm aux ka maix khankix maix tak priex rhawm tix mai hawt ti yuh ka. Maix tak ang pon ti baox thie gumlox piang an mai ang pon ti tieh khaing an heue.

¹ "Phan cao jhai tix kaux kaux lih khaing daux sinax pex, pa chix krai dee bleeh camaox mai mhai rug pa daox deng ang ah, ² mhai rug mai mhai pa daox deng pa krai nawh ka pex khankix mawh pa hoik grum naog kawx, nawh ah nin, kieh ex hawt khaix siyiex tang kaux pa ang pex nyang sax tawng mai yuh kaing jhaw kix. ³ Pex ang pon ti nghiet ka lox cao jhai pa chix krai dee bleeh camaox an, mawh kheu Simiang Siyiex pex cheuk tix yaox pex, grawng pa moh ang pex moh ka Simiang Siyiex tix khawm rhawm mai khawm ju tix. ⁴ Pex tak hawt khaix Simiang Siyiex tix, daux pa lhat graung ka Nawh Cao mai priex ti hawt gumlox pingnyap Nawh Cao, nghiet ka gumlox sikah Nawh Cao mai yuh kaing jhaw Nawh Cao. ⁵ Cao jhai ang ah, cao chix krai dee bleeh camaox ang ah, tak yaox ti pah yum, kheu kraix kix grawng pa sang deeh veeh pex ti hu khaing Simiang Siyiex pex, pa hoik viex pex lih khaing daux meung Ejiptux, pa hoik taoh pex khaing daux yuh pex siliex, mai nawh nyaw glaw pex lud loe khaing daux krax pa hoik tawm Simiang Siyiex ka pex, pa hoik hu ka pex daux krax Nawh Cao. Mawh kheu nan, pex tak teei ti tik pa caox caig khankix khaing daux sinax pex. ⁶ Phan puxaik maix, kawn simex kawn bun maix khankix mai moeng maix pa koe piang naok maix mai paox grawm pa sidu rhawm maix khankix, nyaw glaw maix ah nin, kieh ex hu mai yuh kaing jhaw siyiex tang kaux, pa ang maix sax tawng khankix mai pa ang keeing maix sax tawng, ⁷ siyiex ceu pui pa ot hawt rawb rim maix khankix, pa koe dee dex mai dee singai ang ah, jah ka daog dee sidah haktiex ka plak in, tom hoek ka daog dee sidah haktiex plak an, ⁸ maix tak ang pon ti rieb lox nawh mai ang pon ti nghiet lox nawh, ngai maix tak ang pon ti koe krax caux rhawm ka nawh mai ang pon ti koe rhawm pa lhawk ka nawh mai ang pon mox nawh dee glip. ⁹ Viang mawh nan maix tak pah ti tik nawh, taix maix tak hoek piang nawh phao ka, sonsang kieh maix nawh yum, khaix an taix pui hun tak pon ti hoek piang nawh. ¹⁰ Pex tak dheem nawh yum ka simaox, kheu jao nyaw glaw nawh pex hu singai khaing Simiang Siyiex, pa hoik viex pex lih khaing daux meung Ejiptux, khaing dee yuh pex siliex. ¹¹ Mawh kheu nan, pui Isarelax khankix tak mhong ka ceu in mai koe krax lhat graung mai kix tak ang lai baox yuh pa caox caig an kix, awm hoik koe ceu in ka daux sinax pex. ¹² Phan maix mhong ka pui tix kaux kaux pa ah nin, ka daux veng pex tix veng veng ka veng pa tawx Simiang Siyiex sonsang ot maix ka daux, ¹³ pui caox khankix, hoik lih koe khaing daux sinax pex mai kix hoik nyaw glaw ka pui pa ot ka daux veng pex ah nin ka pex, kieh ex hu yuh kaing jhaw siyiex tang kaux, siyiex pa ang pex sax tawng khankix, ¹⁴ maix tak chawk cheng, sawg ti yaox mai mhaing ti yaox grawng an kriem kre, phan rug mawh mai phan krax pa seeing brai an hoik yuh ka daux sinax pex, ¹⁵ Pex tak pah ka pui pa ot ka daux veng an khankix ka lawm vaig mai pah ceu pa koe ka daux veng khawmuik mai khawm tobrie cie kix laux lak pak leeing ka lawm vaig pex. ¹⁶ Pex tak khrawm ti deuh kraung khrai pa tud rhim pex khankix ka daux sigreung krax mai gleeing khawm veng mai khawm kraung khrai pa tud rhim pex khankix tau ka ngu khawmuik, sivoe Simiang Siyiex maix. Veng an tak mawh pum nyhee leeing ju, tak ang lai baox deeh sum ka veng an. ¹⁷ Mawh kheu nan, can ceu pa hoik jhax lawg khankix, tak mawh pa ang lai deuh ka daux taix pex tix ceu kawx, sonsang deeh veeh Simiang Siyiex tix khaing pa kied song rhawm Nawh Cao mai sonsang jhi Nawh Cao krax caux rhawm tix ka maix mai sonsang koe rhawm Nawh Cao ka maix mai Nawh Cao tak deeh kieh maix baox nie pre haoh hun, awm pa hoik tiextu Nawh Cao ka keeing maix khankix, ¹⁸ phan pex nghiet ka lox sikah Simiang Siyiex mai priex ti hawt lox tawm pingnyap Nawh, pa hoik tawm aux ka pex daux in singaix mai yuh pa khaw caw ka plak sivoe ngai Simiang Siyiex pex heue.

¹ "Pex mawh kawn praix Simiang Siyiex pex, pex tak ang pon ti pat nex cao tix mai ang pon khlao ka hauk dieb dong tix pak son pui yum. ² Grawh grawng nawh pex mawh ceu pui pa singax singeh, son Simiang Siyiex pex. Simiang Siyiex hoik laug pex mawh ceu pui Nawh Cao khaing ceu pui pa ot piang haktiex khawmuik. ³ "Pex tak ang pon ti ih ceu pa seeing brai tix ceu kawx. ⁴ Inkix mawh totiag pa pon pex ti ih, mawie, yung mai pex, ⁵ cak mai poh ceu pa ting mai kiah, pex rang, mawie praix, cak lang rung mai yung tiag, ⁶ pex tak pon ti ih totiag kuceu pa koe gip, pa gwieh tix koe ra plak mai totiag pa deeh sai roing tix khankix. ⁷ Viang mawh nan, khaing daux sinax totiag pa deeh sai roing tix mai pa koe gip ra mu, pex tak ang pon ti ih kala-uk mai pietla, Ghot. Grawh grawng nawh, viang ceu ankix, mawh totiag pa deeh sai roing tix kawx, kheu jao ang kix koe gip ra mu, ceu an khankix mawh pa ang singax son pex. ⁸ Lig mawh pa ang singax son pex, viang koe gip ra mu kawx, kheu ang mawh totiag pa deeh sai roing tix, pex tak ang pon ti ih nex mai pex ang pon ti hu krox hu teeh ka to pa yum ankix. ⁹ Inkix mawh pa pon pex ti ih pa koe daux rawm khankix, pex tak pon ti ih can ceu pa koe kak pruik mai sibiak khankix. ¹⁰ Can ceu pa ang koe kak pruik mai sibiak khankix, pex tak ang pon ti ih, an mawh pa ang singax son pex. ¹¹ Pex tak pon ti ih sim pa singax khawmuik, ¹² viang mawh nan, pex tak ang pon ti ih, klang lung, klang preng, klang ting, ¹³ klang raoh, klang ce mai can ceu pa mawh paox klang, ¹⁴ lak kuceu mai paox ceu lak, ¹⁵ mai sim kala-uk, sim pang plawh dawd yhaok, sim sivik rawm mai paox ceu klang khankix, ¹⁶ sim pang plawh iak, sim teek kreei, sim pang plawh paing hauk khankix, ¹⁷ lak tiag, klang preng, sim klang kax, ¹⁸ sim paing ting, sim sigaig mai paox ceu an khankix, sim gawx cux mai blak khankix. ¹⁹ Can ceu pa chix mu kuceu, pa koe pruik, mawh pa ang singax son pex. An khankix mawh pa ang pon ti ih. ²⁰ Pex tak pon ti ih sim pa singax khawmuik. ²¹ Pex tak ang pon ti ih to pa tang yum, tix ceu kawx, pex tak tawx nyo sinie pa ot daux veng pex khankix ih, phan ang mawh nan, pex tak coh ka pui tang meung, grawh grawng nawh pex mawh ceu pui pa singax ka Simiang Siyiex pex heue. Pex tak ang pon ti ngaik kawn pex iak ka daux rawm teeih miex nawh. ²² "Pex tak gwieh ti deuh kao son tix son mhawm mhawm khaing daux plix nghox plix koi pa pon pex, pa lih khaing daux kaung pex khankix tix num hoik tix num. ²³ Pex tak ih can kao son tix son khaing daux plix nghox plix koi pex mai rawm plix siiet khraox pex mai rawm bee pex mai khaing pa liang pex tix pon phao ka khaing cub yung cub mawie pex, ka plak sivoe Simiang Siyiex, ka dah dee pa laug Nawh Cao ti deuh ceu kaux tix ot ka, phan yuh nan mawh sonsang gau pex tix koe krax lhat graung ka Simiang Siyiex jheung jheung. ²⁴ Viang mawh nan, phan krax hu pex mawh pa kied singai ka son pex mai phan pex ang pon viex krax tan kao son tix son an khankix ang ah mai phan dah dee laug Simiang Siyiex ti deuh ceu kaux tix mawh pa kied singai khaing dee ot pex, khaix hoik nawb Simiang Siyiex bwanson piang pex. ²⁵ Pex tak deeh coh ceu an khankix, teei ti viex mau an ka daux taix pex mai hu ka dah dee pa hoik laug Simiang Siyiex pex. ²⁶ Pex tak cai mau an son ceu pa sang simie pex ti yuh ka daux rhawm pex, liag mawie ang ah, yung ang ah, rawm plix siiet ang ah mai rawm plai khankix mai son can ceu pa sang mie pex ti yuh ka daux rhawm pex, pex tak ih ka plak sivoe Simiang Siyiex pex tan mai pex tak koe krax gaux rhawm, maix mai kawn nyiex ma maix. ²⁷ Pex tak ang pon ti prah ceu pui Lewix khankix, pa ot ka daux veng pex. Grawh grawng nawh kix mawh ceu pui pa ang koe nyum cie, mai pa ang pon sinngao tau mai pex. ²⁸ Yam hoik naog loe num ku num, pex tak viex kao son tix son khaing daux plix nghox plix koi pa pon pex daux num an mai khrawm ti deuh ka daux veng ot pex. ²⁹ Pui Lewix khankix kheu ang kix koe nyum cie, mai ang kix pon sinngao tau mai pex, khawm nyo sinie mai miexmai kawn doe pa ot daux veng pex khankix, tak hoek mai ih tom sak, phan pex yuh nan Simiang Siyiex tak nawb bwan piang pex mai ka kaing jhaw pa yuh pex heue.

¹ "Yam hoik naog aliah num ku num maix tak pluat ploi ka ceuk rom. ² In mawh grawng pa pluat ploi, cao tawx ceuk rom ku kaux, pa hoik tawx ceuk rom tix ceuceu ka paox plawg ti khankix, tak pluat ploi ceuk rom an, Nawh tak ang pon ti mhaing ceuk rom an ka paox plawg ti mai ka puxaik ti khankix. Grawh grawng nawh, an mawh pa kok mawh krax pluat ploi Simiang Siyiex. ³ Maix tak pon ti mhaing ceuk rom khaing pui tang meung, viang mawh nan, ceuk rom ceu patix ang ah maix tak pluat ploi ka ceuk rom cie puxaik maix khankix, ⁴ phan maix priex rhawm tix mai nghiet ka gumlox Simiang Siyiex maix, mai priex ti hawt lox pingnyap khankix, pa tawm Aux ka maix daux in singaix. ⁵ Pui hot pui sibhawm tak ang lai koe ka daux pex, mawh kheu Simiang Siyiex tak nawb bwan pa ting lhaong piang maix, ka daux haktiex pa sang tawx Simiang Siyiex mawh sinngao cie maix. ⁶ Simiang Siyiex maix tak nawb bwan piang maix, awm hoik yuh Nawh sijax mukheu ka maix, maix tak tawx pui tom nie ceuk rom. Viang mawh nan maix tak ang pon ti ceuk ka pui maix tak kwang ka ceu pui tom nie, viang mawh nan, kix ang pon ti kwang ka maix. ⁷ "Phan puxaik pa hot maix koe ka sinax pex tix kaux ka daux veng maix tix veng veng, ka daux haktiex tawx Simiang Siyiex ka pex, paw gun rhawm tix mai paw bhok taix ti khaing puxaik pa hot maix khankix. ⁸ Maix tak yah taix ti vieh va mai tawx nawh ceuk rom mai pa sibieh rhawm tix tawx tom kub mai naok can ceu pa lo nawh khankix. ⁹ Yuh satix maix mai ang pon ti keud pa caox caig ka daux rhawm tix ah nin, num aliah, num pa pluat ploi hoik dex phao, ngai maix tak koe krax caox krax caig piang puxaik hot maix khankix mai ang rhawm tawx tix ceu kawx ka nawh mai nawh tak riag yo ka Simiang Siyiex kheu jao maix, phimap tak hoek piang maix. ¹⁰ Maix tak tawx ka nawh tete mai rhawm maix tak ang pon ti lhawk yam tawx maix ka nawh, Simiang Siyiex maix tak nawb bwan piang maix, ka kaing jhaw maix khankix mai kaing jhaw pa yuh maix ka taix tix. ¹¹ Mawh kheu pui hot ang jud khaing piang haktiex dee ot maix, mawh kheu nan, aux tom tawm lox ka maix ah nin, maix tak yah taix ti vieh va ka puxaik maix khankix mai ka pui hot sibhawm khankix mai ka pui pa koe krax cu krax nghiet ka daux haktiex maix. ¹² "Phan puxaik maix pui Hebrie simex, bun tix kaux kaux ang ah, mawh pa coh ti ka maix mai phan kix hoik yuh kaing jhaw maix liah num, khaix an yam hoek daux num aliah maix tak ploi kieh lih hu khaing maix. ¹³ Yam ploi maix nawh hu luad luan khaing tix maix tak ang pon ti kieh nawh hu mai taix yi tix, ¹⁴ maix tak teem nawh tom kub, khaing daux cub yung maix khankix mai khaing daux glah nghox maix mai khaing daux dee biiet maix rawm plix siiet khankix, awm pa hoik nawb Simiang Siyiex bwanson piang maix, maix tak tawx ankix ka nawh. ¹⁵ Maix tak doh keud ka hoik mawh maix siliex ka meung Ejiptux, mai ka hoik taoh Simiang Siyiex ka maix, mawh kheu nan, aux tawm lox ka maix daux in singaix. ¹⁶ Phan nawh ah nin ka maix, aux ang rhawm hu khaing maix, mawh kheu moh aux ka maix mai kawn nyiex ma maix, aux gaux rhawm ti ot tau mai maix, ¹⁷ teei nyex lawm mai toh ka yhaok nawh, hawt diang siviex tan mai nawh tak mawh siliex maix leeing ju, ka siliex bun maix kawx maix tak yuh awm an. ¹⁸ Yam ploi maix nawh hu luad luan khaing tix maix tak ang pon ti kieh mawh pa nu son maix, mawh kheu nawh hoik yuh kaing maix liah num, lheu khaix ngawh kaing pui cang ra son, khaix an Simiang Siyiex tak nawb bwan piang maix, ka can ceu pa yuh maix khawmuik heue. ¹⁹ "Can tobrie maix pa liang tix keh pa mawh mhaing khawmuik, khaing daux cub yung cub mawie maix tak priex mawh pa singax singeh ka son Simiang Siyiex. Maix tak ang pon ti cau ka kawn mawie pa liang tix keh, khaing daux cub mawie maix khankix mai maix tak ang pon ti rib hauk kawn yung pa liang tix keh khaing daux cub yung maix. ²⁰ Kawn mawie kawn yung pa liang tix keh inkix maix mai kawn nyiex ma maix, tak pon ti ih ankix ka plak sivoe Simiang Siyiex, ku num ka dah dee pa laug Simiang Siyiex ti deuh. ²¹ Viang mawh nan, phan dee mat dee ne koe mai phan mawh pa pot taix caong ang ah mai dug ngai ang ah mai phan mawh pa nie dee mat dee ne maix tak ang pon ti tan ka Simiang Siyiex. ²² Maix tak pon ti ih ka daux veng ot maix, pui pa ang singax mai pui pa singax khankix, tak pon ti ih awm paox ti, awm pa ih kix ka nex kiah mai nex cak. ²³ Maix tak ang pon ti ih ngie nham nawh, maix tak hieh ti tik piang tiex awm rawm heue.

¹ Rien rhawm maix daux khix Abibax mai priex rien pawie Pasakha son Simiang Siyiex, mawh kheu ka daux khix Abibax, Simiang Siyiex hoik viex maix lih khaing daux meung Ejiptux ka plak ponsawm. ² Mawh kheu nan maix tak appong tobrie pawie Pasakha ka son Simiang Siyiex, khaing pa koe ka daux cub yung cub mawie maix, ka dah dee pa hoik laug Simiang Siyiex ti deuh ceu kaux tix. ³ Maix tak ang pon ti ih blah pa sau susaix tau mai an aliah ngaix maix tak ih blah pa ang sau susaix pa mawh blah krax kha rhawm, grawh grawng nawh maix hoik lih sijaox khaing meung Ejiptux. Maix tak doh keud ka singaix lih maix khaing meung Ejiptux, glang singaix im ju maix. ⁴ Blah pa sau susaix tak ang pon ti yaox ka sinax pex, ka daux haktiex pa kwang maix khankix, aliah singaix. Nex pa appong maix plak bo, singaix liang tak ang pon ti deuh tom hoek ka plak ponngawb. ⁵ Maix tak ang pon ti appong tobrie pawie Pasakha ka daux veng ot maix tix dah kawx, ka pa tawx Simiang Siyiex ka maix. ⁶ Viang mawh nan maix tak appong tobrie pawie Pasakha plak ponbo, bawg yam hoik laig singaix, awm bawg yam lih hu maix khaing meung Ejiptux, ka dah dee pa hoik laug Simiang Siyiex ti deuh ceu kaux tix. ⁷ Maix tak tong ti ih ankix ka ngu, ka dah dee pa hoik laug Simiang Siyiex, yam hoek plak ponngawb pex tak deeh ing ka nyiex gox tix. ⁸ Maix tak ih blah pa ang sau susaix daux liah ngaix, yam hoek ka daux singaix aliah, pex tak khrawm paox ti daux pa singax singeh son Simiang Siyiex. Maix tak ang pon ti yuh kaing ka daux singaix an heue. ⁹ Maix tak simin tix yaox aliah twah son cao maix. Maix tak jah tix simin aliah twah khaing bawg yam jah maix ti vawg nghox koi. ¹⁰ Khaix an maix tak yuh pawie aliah vang twah son Simiang Siyiex, tau mai krax tan pa tan maix khawm rhawm tix, ka daux taix maix. Maix tak tan an kix awm pa hoik nawb Simiang Siyiex bwanson piang maix. ¹¹ Maix tak koe krax gaux rhawm ka plak sivoe Simiang Siyiex, khawm kawn simex kawn bun maix khankix mai kawncau simex kawncau bun maix mai khawm ceu pui Lewix khankix, pa ot ka daux veng ot maix mai khawm nyo sinie mai khawm miexmai kawn doe pa ot daux sinax pex, ka dah dee pa hoik laug Simiang Siyiex ti deuh ceu kaux tix. ¹² Maix tak doh keud ka hoik mawh maix siliex ka daux meung Ejiptux mai maix tak priex ti hawt yuh awm lox lai beenli in khankix heue. ¹³ Maix tak yuh pawie nyiex gox bang aliah singaix, khaix hoik khrawm maix nghox koi khaing daux glah nghox mai khaing dah dee briet maix rawm plix siiet khankix, ¹⁴ Maix tak koe krax gaux rhawm ka daux pawie yuh tix, khawm kawn simex kawn bun maix mai kawncau simex kawncau bun maix khankix mai khawm ceu pui Lewix khankix mai khawm nyo sinie mai khawm miexmai kawn doe pa ot daux veng ot pex khankix. ¹⁵ Maix tak yuh pawie aliah singaix son Simiang Siyiex, ka dah dee pa hoik laug Simiang Siyiex, grawh grawng nawh Simiang Siyiex, hoik nawb bwanson piang maix mai ka daux krax haok hwan kaing jhaw yuh maix ka taix ti khawmuik maix tak koe krax gaux rhawm ka tete. ¹⁶ tix num loe bawg kawn simex pex khawmuik, tak hoek ti bleeh ka plak sivoe Simiang Siyiex, ka dah dee pa hoik laug Nawh Cao ka daux bawg yam pawie blah pa ang sau susaix mai ka daux bawg yam pawie aliah vang twah mai ka daux bawg yam pawie nyiex gox bang khankix. Kix tak ang pon ti hoek bleeh ka plak sivoe Simiang Siyiex tau mai taix yi ti. ¹⁷ Pui ku kaux tak tawx pa pon tawx nawh, awm pa pon nawh bwanson khaing Simiang Siyiex heue. ¹⁸ Maix tak yaog ti deuh cao prawng see mai cao kaing khankix, awm koe doeh ru pex, daux veng pa hoik tawx Simiang Siyiex, ka pex khawmuik. Kix tak prawng see ka ceu pui ka daux pa rahsee. ¹⁹ Maix tak ang pon ti veeh khaing krax prawng pa rahsee. Maix tak ang pon jhak pakngai pui tix plak kawx mai maix tak ang pon ti teei kraung chun praok. Grawh grawng nawh kraung chun praok, mawh pa kieh ngai pui pa koe pingnya cuyi dug mai kieh lox sikah pui pa rahsee klung kliien ti mawh pa suksag. ²⁰ Maix tak hawt khaix pa rahsee, sonsang pon maix ti im ju mai teei ti cie sinngao haktiex pa tawx Simiang Siyiex ka maix. ²¹ Maix tak ang pon ti sum khaox riang grang tix ceu kawx son cao tix, hawt dex khu dee tan pa hoik sum maix, ka son Simiang Siyiex. ²² Maix tak ang pon ti jung rong simaox riang grang, in mawh pa koeng Simiang Siyiex ka heue.

¹ Maix tak ang pon ti appong mawie ang ah, yung ang ah, pa koe dee mat dee ne mai pa koe dee laux maung ka Simiang Siyiex, mawh kheu an mawh pa seeing brai Simiang Siyiex ka. ² Ka daux sinax pex ka daux veng pa tawx Simiang Siyiex ka pex khankix mai phan sipub simex ang ah, bun ang ah, pa yuh pa caox caig ka plak sivoe ngai Simiang Siyiex mai lud ka gumlox sijax mukheu Nawh Cao, ³ mai nawh hoik lih hu yuh kaing jhaw mai krub siyiex tang kaux khankix, pa mawh singaix ang ah, khix ang ah mai ceu pa koe ka daux raoma tix ceuceu pa ang Aux sax tawm khankix, ⁴ mai phan an mawh pa hoik krai ka maix mai phan maix mhong ka grawng an khankix, khaix an maix tak jawg ti chawk tom kriem, phan rug mawh tete, phan grawng pa seeing brai an hoik mawh pa yuh ka daux ceu pui Isarelax khankix, ⁵ khaix an maix tak teei simex an mai bun an, pa hoik yuh ceu pa caox caig an, lih ka plak praix siviex veng mai maix tak dheem yum ka simaox. ⁶ Pui mawx pa keung tix yum tak kieh nawh yum awm pa kham sakse son nawh ra kaux, loe kaux, viang mawh nan, phan pa kham sakse koe tix kaux ngie tak ang pon ti kieh nawh yum. ⁷ Pui pa kham sakse tak sau taix ti ka, khaix an pui hun tak sau taix ti kieh nawh yum. Mawh kheu nan maix tak teei ti tik pui caox caig khaing daux sinax pex. ⁸ Phan grawng see pa kied nu tix prawng koe ka son maix, daux sinax veng ot pex, pa mawh grawng see pa pah pui, grawng see pa simah mai grawng see pa tap toi paox ti khankix, khaix an maix tak yaog ti kaoh mai haok ka dah dee pa hoik laug Simiang Siyiex, ⁹ maix tak hoek ka cao giex kaing li ceu pui Lewix khankix, pa mawh cao prawng see khankix tan, ka daux baux yam an mai chawk tix yaox ka grawng an. Kix tak krai grawng lox pa sang prawng ka maix. ¹⁰ Grawng pa sang prawng ca pa hoik krai kix ka maix, ka dah dee pa hoik laug Simiang Siyiex tan. Maix tak priex rhawm tix sonsang yuh maix awm gumlox pa tawm kix ka maix. ¹¹ Awm grawng prawng ca pa tat kix ka maix mai awm grawng lox prawng ca pa krai kix ka maix khankix maix tak yuh awm an maix tak ang pon veeh ti hu ka plak khawn gwiex khawn dawm, khaing krax prawng ca pa hoik tat kix ka maix. ¹² Phan koe pui pa hawt ti yuh awm koe rhawm vao tix mai pa ang cu tix nghiet ka cao giex kaing li pa cung ti yuh kaing jhaw Siyiex tan, ka plak sivoe Simiang Siyiex ang ah, ka plak sivoe cao prawng see ang ah, tak kieh pui an yum, mawh kheu nan maix tak teei ti tik pui caox caig khaing daux sinax ceu pui Isarelax khankix. ¹³ Pui khawmuik tak mhong mai tak koe krax lhat graung mai kix tak ang lai baox yuh ceu an khankix, ka daux pa koe rhawm vao tix khaix in sax heue. ¹⁴ Yam hoek maix ka haktiex pa tawx Simiang Siyiex ka maix mai yam hoik pon ot pex ka daux an, phan maix ah nin, "Aux tak yaog ti deuh simiang tix kaux piang tix awm ceu pui khankix, pa ot hawt vung viang aux khankix. ¹⁵ Maix tak yaog ti deuh simiang tix kaux, ka daux puxaik maix khankix, ka pui pa laug Simiang Siyiex. Maix tak ang pon yaog ti deuh pui tang meung pa ang mawh puxaik maix mawh simiang. ¹⁶ Viang mawh nan, simiang an tak ang pon ti eei brung tom nie mai ang chix kieh pui haktiex deeh ing ka meung Ejiptux, sonsang baox nie brung eei nawh, grawh grawng nawh Simiang Siyiex hoik ah nin ka pex, pex tak ang pon ti deeh ing ka krax an." ¹⁷ Nawh tak ang pon ti koe moeng tom nie, ha rhawm nawh, veeh ti hu plak pa caox mai ang pon ti sawg mau, khri tom nie son tokaux tix. ¹⁸ Yam ngawm nawh piang dangngeung meung haktiex, nawh tak tiiem thawk ti deuh gumlox been inkix ka daux phuk lai tix phuk son tokaux tix, khaing daux phuk lai pa koe ka plak sivoe cao giex kaing li, ceu pui Lewix khankix. ¹⁹ Nawh tak deuh lai an mai tix, nawh tak phat an glang singaix im ju nawh khawmuik, sonsang pon gau nawh ti lhat graung ka Simiang Siyiex mai sonsang priex rien nawh ti hawt yuh awm lox inkix mai gumlox beenli inkix khawmuik, ²⁰ son ang nawh pon ti lhaong rhawm ca nyhau ka puxaik pux o tix khankix mai son ang nawh veeh ti hu ka plak gwiex plak dawm khaing gumlox pingnyap in, phan yuh nan, nawh khawm kawn praix nawh tak lang ju, daux meung haktiex cao nawh mai ka daux sinax ceu pui Isarelax khankix heue.

¹ Cao giex kaing li ceu pui Lewix khankix, pa mawh doeh ru ceu pui Lewix khawmuik, tak ang pon ti koe nyum cie, mai kix tak ang pon ti koe sinngao tau mai ceu pui Isarelax khankix, kix tak ih krax tan ka Simiang Siyiex pa hoik yuh ka ngu mai sinngao Nawh Cao. ² Mawh kheu nan, kix tak ang pon ti koe sinngao, ka daux sinax puxaik pux o nawh khankix. Simiang Siyiex mawh sinngao kix, awm pa hoik koe gumlox Nawh Cao ka kix, ³ in tak mawh pa sang caw cao giex kaing li tix pon, khaing can pui pa tan krax tan pa appong, viang ankix mawh mawie ang ah, yung ang ah, kix tak tawx glip tix khawn mai kap ra plak mai kraung vaig kraung tu ka cao giex kaing li. ⁴ Plix khaox plix ox pa liang tix pon, nghox koi, rawm plix siiet khraox, rawm bee mai hauk yung pa pon maix phao ka maix tak tawx ka nawh. ⁵ Grawh grawng nawh Simiang Siyiex, hoik laug ti teei nawh khaing doeh ru pex khawmuik, sonsang cung kix ti yuh kaing jhaw Siyiex, ka daux ceu kaux Simiang Siyiex, nawh mai kawn simex nawh khankix leeing ju. ⁶ Phan ceu pui Lewix lih tix hoek khaing daux veng dee paung nawh tix veng veng, ka daux sinax ceu pui Isarelax khankix mai koe rhawm dee pa laug Simiang Siyiex, ⁷ nawh tak pon ti yuh kaing jhaw daux ceu kaux Simiang Siyiex, awm pa yuh puxaik nawh ceu pui Lewix khankix, pa cung ka plak sivoe Simiang Siyiex tan. ⁸ Lheu khaing ceu pa pon coh nawh sinngao tix, nawh tak koe krax pa sidu pon tau mai ceu pui Lewix sonsang ih tau mai kix. ⁹ Yam hoek maix ka daux haktiex pa tawx Simiang Siyiex ka maix, maix tak ang pon gau tix hawt khaix pa seeing brai pui ceu an khankix. ¹⁰ Ka daux sinax pex tak ang pon ti koe pui pa kieh kawn simex kawn bun tix khankix laig ka daux ngu mai ang pon koe pui pa yuh sibawk, pui pa chix jhak mhai lai taix mai pa yuh simeed yuh sat mai pa yuh phi khankix, ¹¹ pui pa chix yuh sidah moh, pui pa yuh paox pie mai si ngie, pui pa chix pih miang mai pui pa chix kok ka khwan pa yum khankix. ¹² Can pui pa yuh ceu inkix khawmuik mawh pa seeing brai Simiang Siyiex ka, mawh kheu pa seeing brai pa yuh kix, Simiang Siyiex tom grheu kix lih khaing ka plak sivoe maix. ¹³ Maix tak mawh pui pa grum mhawm ka plak sivoe Simiang Siyiex. ¹⁴ Pui tak sang grheu maix ti tik khankix, hoik nghiet ka lox cao sibawk mai cao pa jhak mhai lai taix kix, phan mawh son maix, Simiang Siyiex ang cu maix yuh ceu an khankix. ¹⁵ Simiang Siyiex maix tak sang kieh cao jhai lih tix kaux khaing daux puxaik pex pa awm aux. Pex tak nghiet ka lox nawh. ¹⁶ Awm krax pa khyox khaw pex ka Simiang Siyiex tix hawt baoh Hawrax ka daux singaix khrawm pex paox tix mai pex hoik ah nin, "Paw lai baox kieh aux chix mhong ka gumlox Simiang Siyiex aux. Paw lai kieh aux yaox ka ngu pa ting in tix bawg kawx liak, phan ang mawh nan aux tak yum ka." ¹⁷ Simiang Siyiex ah nin ka aux, "Can ceu pa hoik krai kix, mawh pa mhawm." ¹⁸ "Aux tak kieh cao jhai pa awm maix lih daux sinax puxaik pex khankix mai Aux tak sau gumlox tix ka daux jheeh nawh mai nawh tak krai gumlox pa tawm Aux ka kix khawmuik. ¹⁹ Can pui pa ang nghiet ka lox krai nawh ka daux ceu kaux Aux, Aux tak ciyang ka pui an. ²⁰ Phan koe cao jhai pa teei min tix krai lox ka daux ceu kaux Aux, pa ang Aux tawm nawh krai khankix mai pa krai ka daux ceu kaux siyiex tang kaux khankix, tak pah cao jhai an yum. ²¹ Phan maix keud ah nin ka daux rhawm tix, "Ex tak sang tawng gumlox pa ang Simiang Siyiex nyang bax krai yuh ka mawx lie?" ²² Yam krai cao jhai lox ka daux ceu kaux Simiang Siyiex, phan ang mawh tete awm pa hoik krai nawh mai ang mawh lox pa krai khaing Simiang Siyiex khankix, mai phan mawh pa tang krai cao jhai ka rhawm kwa tix, pex ang pon ti lhat ka nawh heue.

¹ "Yam teei Simiang Siyiex ti tik ceu pui khankix, pa mawh haktiex pa tawx Simiang Siyiex ka pex mai pex grheu kix lih mai ot ka daux veng daux nyiex kix, ² Pex tak tang gwieh veng loe veng son tix ka daux haktiex tawx Simiang Siyiex, Siyiex pex, pex cie. ³ Pex tak cox khre krax mai gwieh haktiex pa tawx Simiang Siyiex pex, pex cie loe son, sonsang to pui pa pah pui t peung tan. ⁴ In mawh grawng pa dex mai cao pah pui to ti klawd mai pa loe ti pah paox plawg ti mai pa ang koe krax cang krax khoi ka nawh, bawg yam pa luan, ⁵ awm yam hu pui tix kaux kid khix daux tiag mai paox plawg tix mai yam kid nawh khaox goh ka moe, moe goh khaing krong tix, mai moe loe krox ka paox plawg nawh mai yum, nawh tak to ka veng an tix veng veng mai pon ti im ju, ⁶ Phan cao pawk bix nham pheet sonsang krub ka cao pah pui yam kawn song rhawm tix, kheu kied singai krax mai sang pah nawh, nawh ang khaw tix yum, mawh kheu ang nawh koe krax cang krax khoi ka pui yum an, ka bawg yam pa luan. ⁷ Mawh kheu nan, Aux tawm lox ka pex, pex tak tang gwieh veng loe veng. ⁸ Phan Simiang Siyiex greed mee haktiex pa hoik tiextu Nawh ka keeing pex khankix mai ap haktiex pa hoik yuh Nawh sijax mukheu sonsang tawx ka keeing pex khankix, ⁹ mawh kheu nan, yuh satix pex mai hawt ka lox tawm pingnyap pa tawm Aux ka pex daux in singaix, sonsang moh pex ka Simiang Siyiex tix, mai hawt daux krax Nawh Cao jheung jheung, khaix an pex tak baox veng loe veng piang veng in loe veng, ¹⁰ mawh kheu lhat pui ang koe phimap jauh nham ka daux haktiex pex, pa mawh haktiex pa tawx Simiang Siyiex pex cie, mawh kheu nan, nham phimap tak hoek piang maix. ¹¹ Phan pui tix kaux kaux, koeng ka paox plawg ti, jawm tix pau mai tap toi nawh, phan nawh hoik yum mai pui an tak to ka veng an tix veng veng, ¹² mai kwad song ka daux veng ot pui an, tak ploi pui hu teei pui an ing khaing tan mai ap pui an ka daux tawm taix cao pawk bix nham, sonsang teei nawh yum. ¹³ Pex tak ang pon ti koe krax pa caux rhawm ka nawh mai pex tak teei ti tik krax lud pa ang koe phimap khaing pui Isarelax, sonsang hu mhawm ing mhawm pex khawmuik. ¹⁴ Pex ang pon gah ka lhak simaox mee haktiex paox plawg tix, pa hoik sum pui didix ka, ka daux sinngao haktiex pa tawx Simiang Siyiex ka pex. ¹⁵ "Ka pui tix kaux kaux pa yuh krax caox tix ceuceu mai pa yuh phimap tix ceuceu ang ah, phan cheuk cheu ka nawh, mhai rug pa kham pui tix kaux khaing ang chix grum naog, phan pui kham sakse koe ra loe kaux tom chix grum naog. ¹⁶ Phan koe mhai rug pa ang mawh ang meh pa kham krax lud pui tix kaux kaux, ¹⁷ mai kieh pui koe see khawm ra kaux hoek sivoe Simiang Siyiex, sivoe cao giex kaing li mai sivoe cao prawng see, pa yuh kaing jhaw ka daux singaix an, ¹⁸ Cao prawng see tak jawg tix chawk cheng ka grawng an, phan mhai rug an mawh mhai rug pa lud mai yuh see ka puxaik nawh awm krax lud nawh, ¹⁹ pex tak yuh ka nawh, awm krax keud nawh ti yuh ka puxaik ti, mawh kheu nan, pex tak teei ti tik pa caox caig khaing daux sinax tix. ²⁰ Pui pa deuk khankix, tak mhong grawng an mai lhat graung ang lai baox yuh pa caox caig daux sinax pex. ²¹ Pex paw koe krax caux rhawm ka, ju tak mawh son ju, ngai son ngai, rhang son rhang, taix son taix mai caong son caong heue.

¹ Yam lih hu puing pex naing ka pui koeng pex khankix, yam yaox pex ka brung, ka ling lawx brung mai ka pui hun khaing pex, paw lhat graung ka kix, mawh kheu Simiang Siyiex, Siyiex pex, pa hoik viex pex lih khaing Ejiptux, ot tau mai pex. ² Yam dex bawg yam sang puing naing cao giex kaing li tak hoek sivoe mai krai lox ka pui hun, ³ ah nin ka kix, Isarelax khankix nghiet heue, daux in singaix pex tak hu daux naing mai puing ka pui koeng pex khankix pex paw koe krax khi rhawm, paw lhat graung, paw siyaung mai paw yaoh yee ka kix, ⁴ mawh kheu Simiang Siyiex, pa mawh Siyiex pex hu tau mai pex, sonsang puing ka pui koeng ka son pex mai tawx pex, pex ka. ⁵ Cao kaing naing tak ah nin ka pui hun, pui mawx pa sum nyiex khraox mai ang nyang appong lie? Kieh nawh deeh ing ka nyiex tix, lhat nawh yum ka daux naing mai pui tang kaux tak appong nyiex an. ⁶ Pui mawx pa hoik sum sipeem plix siiet mai ang nyang yaox ti ih plix lie? Kieh nawh deeh ing ka nyiex tix, lhat nawh yum ka daux bang naing mai pui tang kaux tak ih ka plix an. ⁷ Pui mawx pa chawk ka bun sonsang moeng mai ang nyang yuh kupaox koe lie? Kieh nawh deeh ing ka nyiex tix, lhat nawh yum ka daux bang naing mai pui tang kaux tak moeng ka nawh. ⁸ Cao kaing naing tak baox krai ka pui hun ah nin, mawh koe pui ot tin pa koe rhawm lhat mai pa khi rhawm lie? Kieh nawh deeh ing ka nyiex tix, lhat rhawm puxaik nawh iak rhawm awm iak rhawm nawh, ⁹ yam hoik krai cao kaing naing lox ka pui hun mai kieh kix laug cao kaing kru naing kieh mawh cao kaing piang pui hun. ¹⁰ Yam laig pex dex veng sonsang puing ka, pex tak krai pao sonsang yuh pa nhim tau mai pui veng an. ¹¹ Phan kix deeh pawk lox pex daux pa nhim mai paoh siviex veng ka pex, pui hun pa ot ka daux veng an, tak tawx gha ka pex mai yuh kaing jhaw son pex. ¹² Phan veng an ang yuh pa nhim mai pex mai phan kix sang yuh naing ka pex, pex tak lai lawm ka veng an, ¹³ yam ap Simiang Siyiex pex kix daux tawm taix pex, pex tak pah simex ku kaux ka lawm vaig, ¹⁴ viang mawh nan bun, kawn nyawm, tobrie mai can pa koe daux veng khankix mai kraung khrai pa rhim an khawmuik, pex tak teei ti cie, mai pex tak gaux rhawm ka kraung pa rhim tix khaing pui koeng khankix, pa tawx Simiang Siyiex, Siyiex pex ka pex. ¹⁵ Pex tak yuh awm in ka veng khankix pa ot singai khaing pex, pa ang mawh veng ceu pui in khankix. ¹⁶ Viang mawh nan, veng ceu pui in khankix, pa ap Simiang Siyiex, Siyiex pex, pex cie, pex tak ang pon kieh ceu pa toek bhawm khankix im ju tix ceu kawx, ¹⁷ pex tak yuh pui Hetax, pui Amawrix, pui Khananix, pui Pherazix, pui Hiwix mai pui Yebusix khankix, laux lak pak leeing awm lox tawm Simiang Siyiex, Siyiex pex, ka pex, ¹⁸ son ang kix gau pex yuh pa seeing brai, awm pa yuh kix kaing jhaw son siyiex kix, mawh kheu pa yuh ka ceu an mawh pa lud ka Simiang Siyiex pex. ¹⁹ "Yam lai lawm pex ka veng tix veng tom rheung, yam puing pex ka veng an, pex paw kid khaox laux leeing ka moe, mawh kheu pex tak ih plix khaing khaox an, paw pex kid goh. Khaox pa koe daux kaung khankix mawh pa koe bwanson son pui, mawh kheu nan, lai lawm mai priex ka. ²⁰ Mawh ngie khaox pa tawng pex pa ang chix ti ih plix pa chix yuh laux leeing mai kid goh, sonsang shiao ka kaing jhaw lai lawm veng, pa sang puing naing mai pex tom sidah laux leeing veng an heue.

¹ "Phan pui tix kaux kaux yaox ka tokaux yum pah pui, pa ang tawng ka cao pah ka daux bing pak, haktiex pa tawx Siyiex, Siyiex pex, pex cie, ² kieh kwad song mai cao prawng see, tiag tix yaox ka veng pa koe rawb rim pui yum an, ³ kwad song pa ot dex veng dee koe tokaux yum an, tak viex mawie shiang tix mu pa ang sax cau mai pa ang nyang sax sau iak piang. ⁴ kwad song veng an khankix, tak viex mawie shiang an hu ka daux ngawd dee lih rawm, dee ang sax thai mai dee ang sax ruat simie mai kieh raig ngawg mawie shiang ka daux ngawd. ⁵ Cao giex kaing li kawn simex Lewix khankix tak hoek dex, mawh kheu Simiang Siyiex, Siyiex pex hoik laug kix sonsang yuh kix kaing jhaw Nawh mai kieh nawb bwan daux ceu kaux Simiang Siyiex, krax simah mai krax tap toi, tak yawg kheu cao giex kaing li. ⁶ Kwad song veng an pa ot dex tokaux yum khankix, tak khoek taix ti, piang mawie shiang pa hoik raig ngawg ka daux ngawd, ⁷ mai kix kham sakse ah nin, taix yix ang kieh nham pui in lih mai ngai yix ang yaox ka lih nham pui in. ⁸ Simiang Siyiex eue, pluat ploi ka phimap pui Isarelax, pa hoik taoh Maix Cao mai paw deuh nham pa ang koe krax lud in ka sinax pui Isarelax, kix tak luad luan khaing pa pah ju pui yum. ⁹ Mawh kheu nan, pex tak teei ti tik phimap nham pa ang koe krax lud khaing daux sinax tix, yam yuh pex pa khaw caw, ka plak sivoe ngai Simiang Siyiex. ¹⁰ Yam lih hu pex daux naing mai puing pui koeng tix khankix mai Simiang Siyiex ap kix ka daux taix pex mai giex kix mawh pui giex pui laung, ¹¹ mai maix yaox pa mhawm grang ka sinax pui pa giex laung khankix maix koe rhawm mie ti teei mawh moeng tix, ¹² maix tak viex nawh hoek ka nyiex tix mai nawh tak khlao hauk kaing tix mai rhip nghim tix. ¹³ Bun an tak peeik kraung ceep pa giex laung tix mai prah nawh ot ka daux nyiex maix mai kieh nawh yuh krax doe ka miex keeing tix naog tix khix, khaix an maix tak pon hu laig ka nawh mai mawh mex nawh mai nawh tak mawh moeng maix. ¹⁴ Khaix an, phan maix ang khaw rhawm ka nawh maix tak ploi nawh hu ka dee sang hu nawh, maix tak ang pon coh ka nawh mai paw kieh nawh mawh siliex, kheu hoik kieh maix nawh kaig. ¹⁵ "Phan pui tix kaux koe moeng ra kaux, nawh moh ka tix kaux mai ang moh ka tix kaux, moeng pa moh nawh mai pa ang nawh moh khankiex keh kawn simex, phan kawn Ai keh khaing moeng pa ang nawh moh, ¹⁶ yam hoek singaix gwieh nawh sinngao ka kawn simex tix, nawh tak ang pon tawx sinngao kawn Ai, ka kawn simex khaing moeng pa moh nawh, tang kawn simex khaing moeng pa ang nawh moh pa mawh kawn Ai, ¹⁷ mai nawh tak rieb kawn simex khaing moeng pa ang tix moh mawh kawn Ai mai tawx sinngao ka nawh ra son, khaing pa koe nawh khawmuik, mawh kheu kawn Ai an mawh riang rao pa jah son keeing mai Ara kawn Ai mawh cie nawh. ¹⁸ "Phan pui tix kaux koe kawn simex pa ang lih grawng mai pa teih feen pa ang nghiet lox miex keeing tix, viang miex keeing sidiex ka nawh kawx, nawh ang nghiet, ¹⁹ miex keeing nawh tak giex ti viex nawh hu ka kwad song pa ot ka veng an ka diang siviex veng, ²⁰ mai kix tak ah nin ka kwad song pa ot ka veng an, kawn simex yix ang lih grawng mai teih feen ang nghiet ka lox yix, nawh mawh pa nie luan ih luan nyaux ka priex. ²¹ Pui pa ot ka daux veng khankix tak dheem nawh yum ka simaox, pex tak teei ti tik pa caox caig khaing daux sinax tix, mai pui Isarelax lhat graung ka mhong tix ka grawng an heue. ²² Phan pui tix kaux hoik lud ka pa keung tix yum, nawh tak caw tix yum mai preue nawh piang khaox, ²³ ang pon ti grham tokaux yum nawh leeing sawm piang khaox, pex tak sipaung nawh ka daux singaix an, son ang pex sang kieh haktiex tawx Simiang Siyiex, Siyiex pex, pex cie seeing brai, mawh kheu kaw pa preue tix piang khaox ot greem pa jhax lawg Siyiex heue.

¹ Phan pex yaox ka mawie mai yung puxaik ti lud krax, pex tak ang pon prah grham mai deeh viex hoek ka puxaik tix. ² Phan puxaik pex ang ot dex pex mai phan pex ang tawng dee ot nawh, pex tak cax ing ka nyiex tix, tom sidah hoek sawg puxaik pex ka mai pex tak deeh tawx ka nawh. ³ Pex tak yuh awm an ka la mai kraung ceep nawh, mai can pa grai cie puxaik pex tix ceuceu, ka pa hoik grai nawh yuh phan pex deeh yaox, pex ang pon prah grham. ⁴ Phan pex yaox ka la mai mawie puxaik ti goh hawt krax, pex ang pon prah grham ka mai deeh teem nawh yaog cung. ⁵ Bun ang pon ceep kraung simex mai simex ang pon ceep kraung bun, mawh kheu pui pa yuh ceu an mawh pa seeing brai Simiang Siyiex, Siyiex pex ka. ⁶ Phan pex pub ka mheem sim koe hawt krax, piang khaox mai piang tiex, tau mai kawn nawh mai tawm nawh khankix yam kawn num piang tawm tix, pex paw vi teei khawm miex khawm kawn, ⁷ pex tak ploi miex pu mai teei kawn son cao pex, sonsang mhawm hu mhawm ing pex mai sonsang lang ju pex. ⁸ Yam sum pex nyiex khraox, pex tak yuh pa tiebtie hawt braux nyiex tix, sonsang ang pex kieh nham phimap hoek piang nyiex tix, phan pui tix kaux kaux cod khaing an, ⁹ paw ruat simie ra ceu ka daux sipeem plix siiet pex, phan yuh nan, simie plix mai plix plix siiet khawm ra tak laux leeing ka. ¹⁰ Pex ang pon thai ka mawie mai la tau. ¹¹ Paw ceep ka kraung pa taing ka tai mai hauk yung tau. ¹² Pex tak yuh ciem tai khankix piang daog pon plak ka kraung ceep pa kheem pex tokaux tix. ¹³ Phan pui tix kaux kaux koe moeng mai laig it tau mai nawh mai deeh koeng ka bun an, ¹⁴ mai yaox bun an yuh ceu pa kaig tua mai min ceu kaux nawh hoik laux ah nin, aux hoik rieb bun in mawh moeng tix, yam it aux mai nawh, aux hoik yaox ang nawh lai mawh bun loig, ¹⁵ miex keeing bun an, tak viex nawh sonsang jhi mhai rug pa mawh bun an pa loig, ka kwad song veng an khankix hawt diang siviex veng, ¹⁶ mai keeing bun an, tak ah nin ka kwad song khankix, aux hoik tawx pui in moeng ka kawn bun tix, viang mawh nan, nawh deeh tieh tix koeng ka, ¹⁷ yam in nawh hoik deuh phimap mai yuh pa kaig tua ka nawh ah nin, "Aux hoik yaox kawn bun maix ang lai mawh bun krih loig." In khankix hoik mawh mhai rug pa mawh kawn bun aux bun krih loig kix tak nih kraung ceep nawh ka plak sivoe kwad song khankix, ¹⁸ kwad song veng an khankix, giex ka pui an mai tap toi ka nawh, ¹⁹ kix kieh nawh se mau tix yieh shekhe mai ap mau an ka keeing bun an, kheu jao hoik kieh nawh bun krih pui Isarelax laux ceu kaux, mai bun an tak mawh moeng nawh, mai ang pon tik bun an tom leeing ju tix. ²⁰ Viang mawh nan, phan ceu an mawh tete mai ang yaox mhai rug grawng mawh bun an bun krih loig, ²¹ kix tak viex bun an lih hoek ka diang siviex nyiex keeing nawh mai simex daux veng an khankix tak dheem nawh yum ka simaox, kheu jao hoik yuh nawh ceu pa kaig tua ka daux pui Isarelax khankix mai kheu jao yuh nawh krax lud vao ka daux nyiex ma keeing nawh, pex tak teei ti tik pa caox caig khaing sinax pex. ²² Phan yaox simex tix kaux it tau mai bun koe mex, kiex tak yum khawm ra tix, khawm simex pa it tau mai bun an mai khawm bun an mai pex tak teei ti tik pa caox caig khaing pui Isarelax. ²³ Phan koe bun krih loig tix kaux pa hoik chawk ti deuh mai simex tix kaux pub nawh ka daux veng mai it tau mai nawh, ²⁴ pex tak viex kiex khawm ra kaux lih ka daux diang siviex laig daux veng an mai pex tak dheem kiex yum ka simaox, kheu ang bun an riag yo ka daux veng mai kheu nunai simex an ka moeng paox plawg tix, mai pex tak teei ti tik pa caox caig khaing sinax pex. ²⁵ Phan simex tix kaux pub ka bun krih pa hoik chawk ti deuh ka daux tiag mai simex an khin ka nawh mai it tau mai nawh, mawh ngie simex pa it tau mai nawh pa yum nong nong. ²⁶ Paw yuh tidtix ka bun an, mawh kheu bun an ang lud ka tidtix sonsang tawx phimap nawh tom yum nawh, mawh kheu see in awm pui tix kaux pa puing mai pah ka paox plawg tix. ²⁷ Yam pub nawh bun an ka daux tiag mai bun an riag yo pui teem ka nawh ang koe tix kaux kawx, ²⁸ phan simex tix kaux pub bun krih pa ang pui nyang bax chawk, phan nawh giex mai it tau mai nawh mai phan pui yaox ka, ²⁹ simex pa hoik it tau mai bun an, tak tawx mau tixphwan shekhe ka keeing bun an mai kieh bun an mawh moeng nawh, mawh kheu hoik nunai nawh ka bun an, ang lai pon tik bun an tom leeing ju tix. ³⁰ Paw kieh pui tix kaux kawx teei ka moeng keeing tix mai paw kieh seeing yuh kraung it keeing tix heue.

¹ "Pui pa ang grum naog ka cie simex, pa pat ti tik khankix ang pon ti laig ka daux cub phung hun Simiang Siyiex. ² Ang pon kieh kawn kawn cang laig ka daux cub phung hun Simiang Siyiex, mai doeh ru nawh tom hoek kao ju kawx ang pon laig ka daux cub phung hun Simiang Siyiex. ³ Pui Amawrix ang ah, pui Mawbax ang ah, ang pon ti laig ka daux cub phung hun Simiang Siyiex, mai doeh ru nawh tom hoek kao ju kawx, ang pon laig ka daux cub phung hun Simiang Siyiex leeing ju, ⁴ kheu ang kix rieb pex ka blah mai rawm, ka daux krax yam lih pex khaing meung Ejiptux mai kheu vai kix ka Balam kawn simex Bawrax veng Petaw, haktiex Mesopotemia sonsang jhax lawg ka pex. ⁵ Kheu Simiang Siyiex pex ang nghiet ka lox Balam, mai Simiang Siyiex pex deeh tieh krax jhax lawg mawh krax pa nawb bwan ka pex, mawh kheu moh Simiang Siyiex, Siyiex pex, ka pex. ⁶ Pex ang pon ti tawx pa nhim ka kix mai krax magmi khankix baux singaix im ju pex leeing ju. ⁷ "Pex paw koeng ka pui Edom, mawh kheu kix mawh puxaik pex, mai pex paw koeng ka pui Ejiptux, mawh kheu hoik sax mawh pex siliex ka daux meung kix. ⁸ Tom sidah hoek kawn praix doeh ru kix loe ju, kix tak pon ti laig ka daux cub phung hun Simiang Siyiex. ⁹ Yam hu puing pex naing ka pui koeng tix khankix mai yam kawn ot pex daux tab, yuh satix via pex khaing pa caox caig. ¹⁰ Phan pui tix kaux kaux ka daux sinax pex, ang singax ka ceu pa lih ti mawh plak ponsawm, nawh yaox ti lih ot plak praix tab, ang pon ot daux tab, ¹¹ yam hoek plakbo, nawh tak heem rawm, yam klip singaix, kieh nawh deeh laig ka daux tab. ¹² Pex caw tix koe dah dee ka plak praix tab sonsang hu pex ka, ¹³ pex caw ti koe sipeed khaox tix mu, pa mawh kraung shiao pex, yam hu tiag ka plak praix, pex tak kaong daux ka mai kheem ceu pa seeing pa lih khaing pex ka. ¹⁴ Mawh kheu Simiang Siyiex pex tak lailing ka sinax tab pex, sonsang taoh ka pex mai ap pui koeng pex khankix ka pex, mawh kheu nan, tab pex caw tix singax mai son ang Nawh Cao yaox pa ang singax ka daux sinax pex mai veeh ti khaing pex. ¹⁵ Phan koe siliex pa to khaing cao nawh, hoek ot mai pex, paw giex tix deeh tawx ka cao nawh, ¹⁶ kieh nawh ot mai pex, ka dah dee pa laug nawh, ka daux veng pa moh tix, paw yuh krax kha ka nawh. ¹⁷ Paw kieh bun coh kaux koe ka daux kawn bun Isarelax mai paw kieh simex coh kaux koe khaing daux kawn simex Isarelax. ¹⁸ Pex ang pon viex mau coh kaux mai mau ngawh sox hoek ka nyiex Simiang Siyiex, Siyiex pex, sonsang tiextu ka, mawh kheu in khawm ra mawh pa seeing brai ka Simiang Siyiex pex. ¹⁹ Pex ang pon teei rao mau ka puxaik tix, rao mau piang mau mai rao piang pa ih mai rao piang ceu pa tawx ceuk rom, sonsang pon ti rao. ²⁰ Pui tang ceu pex pon ti teei rao tawx nawh yaog, viang mawh nan, puxaik pex Isarelax ang pon ti teei rao, sonsang nawb Simiang Siyiex pex bwan ka pex, ka daux pa yuh pex ka taix ti khawmuik, ka daux haktiex laig teei pex ti cie. ²¹ Yam yuh maix krax tiextu ka Simiang Siyiex ti, pex ang pon deuh bawg yam tom rheung, sonsang yuh tix ka an, mawh kheu Simiang Siyiex, pex tak mhaing an ka pex tete, phan pex ang tawx, tak sang mawh phimap ka pex. ²² Phan pex ang yuh krax tiextu, an tak ang mawh phimap ka son pex. ²³ Yuh satix pex hawt ti yuh awm lox pa kaoh khaing jheeh tix, awm pa hoik khaw rhawm pex ti yuh ka Simiang Siyiex tix, pa hoik tawx pex sijax mukheu ka jheeh tix. ²⁴ Yam laig pex daux sipeem plix siiet paox plawg tix, pex pon ti ih plix siiet tom sak tix, awm pa koe rhawm pex ti ih, viang mawh nan, pex ang pon sau ti viex ka daux bau tix. ²⁵ Yam laig pex daux kaung nghox ca pa kawn jung paox plawg tix, pex tak pon ti caik sigleem nghox ankix ka taix tix, viang mawh nan, pex ang pon ti shiao sivawg mai vawg sigleem nghox paox plawg tix khankix heue.

¹ Yam teei simex moeng ti, phan simex ang lai moh ka bun an, kheu yaox simex an ceu pa deuh phimap ka nawh, nawh tak tiiem lai gwieh paox tix mai ap an ka daux taix nawh mai tak ploi nawh ing ka nyiex tix. ² Yam hoik lih bun an khaing nyiex, nawh deeh pon ti moeng pui tang kaux, ³ phan mex khaix nawh ang moh ka nawh, kieh nawh tiiem lai gwieh paox tix mai ap ka daux taix bun an mai ploi bun an lih khaing nyiex tix, phan ang mawh nan, phan mex khaix yum, ⁴ mex phao ka nawh, pa hoik gwieh paox tix, ang lai deeh pon rieb mawh moeng tix, kheu hoik seeing nawh, mawh kheu an mawh pa seeing brai ka plak sivoe Simiang Siyiex, pex ang pon ti viex phimap an hoek piang haktiex tawx Simiang Siyiex sinngao ka pex. ⁵ Yam teei pui tix kaux moeng khraox tix, nawh ang pon ti lih hu daux naing mai ang pon tawx beeh glawm ka nawh, nawh tak ot giex ka nyiex ti tix num, sonsang gaux rhawm nawh tau mai moeng tix. ⁶ Pui mawx ang ah, ang pon ti teei khlawp simaox mhaw plak greem mai khlawp simaox mhaw plak piang sonsang tang tix ka. Mawh kheu mhaw pa tang nawh an, mawh pa een nawh ju tix ka. ⁷ Phan pui tix kaux yaox ka briex pui ka kawn praix ceu pui Isarelax khaing daux puxaik nawh tix kaux kaux, phan deuh nawh mawh siliex ang ah mai coh ka nawh ang ah, khaix an tak caw ti pah cao briex an yum pex tak teei ti tik pa caox caig an khaing daux sinax pex. ⁸ Yuh satix pex ka grawng jhawm saux sipawg, yuh satix mai yuh awm lox tawm cao giex kaing li pui Lewix, awm hoik tawm Aux ka kix, pex yuh satix yuh hawt awm an. ⁹ Doh keud ka pa hoik yuh Simiang Siyiex, Siyiex pex ka Meriam, daux krax yam lih pex khaing meung Ejiptux. ¹⁰ Yam tawx pex puxaik ti yaog tix ceuceu, pex ang pon laig daux nyiex nawh, ang pon teei kraung pa sang tang ti deuh. ¹¹ Maix tak cung ka plak praix, pui pa yaog yaing an, tak viex kraung pa tang ti deuh hoek tawx ka maix. ¹² Phan nawh mawh pui hot, pex ang pon priex kraung tang an tiang sawm, ¹³ yam laig singaix maix tak deeh tawx kraung pa tang nawh ti deuh, sonsang koe ceu pa lhop nawh ponsawm mai sonsang nawb nawh bwan ka maix, ceu an tak mawh pa rahsee son maix, ka plak sivoe Simiang Siyiex, Siyiex maix. ¹⁴ Pex paw yuh krax kha rhawm ka siliex vai tix, pa mawh pui hot pa cud cha, pa mawh puxaik pex ang ah mai nyo sinie ang ah, pa ot ka daux haktiex pex mai daux veng pex, ¹⁵ pex tak tawx ngawh riang kaing yuh nawh, sivoe sang klip singaix, mawh kheu nawh mawh pui hot mai nawh een rhawm tix ka ngawh riang kaing yuh tix, lhat nawh riag yo deuh phimap ka pex sivoe Simiang Siyiex, Siyiex pex mai an lih ti mawh phimap ka pex. ¹⁶ Keeing khankix tak ang pon ti yum tang phimap kawn praix tix mai kawn praix nawh tak ang pon ti yum tang phimap keeing tix, pui ku kaux tak yum tang phimap cao tix. ¹⁷ Pex ang pon tieh loh ka been pa rahsee, grawng nyo sinie mai kawn doe khankix mai ang pon teei kraung ceep miexmai mawh kraung pa tang ti deuh, ¹⁸ kieh pex doh keud ka mawh tix siliex ka meung Ejiptux mai Simiang Siyiex, Siyiex pex hoik taoh pex khaing tan, mawh kheu nan, Aux tom tawm lox sonsang yuh pex ceu in khankix. ¹⁹ Yam vawg pex nghox daux kaung tix mai piawm jhoi nghox tix jhoi daux kaung, pex ang pon ti deeh hu teei ka, kieh an mawh son nyo sinie, son kawn doe mai son miexmai, sonsang nawb Simiang Siyiex, Siyiex pex bwan ka pex ka kaing jhaw yuh pex ka taix ti. ²⁰ Yam pieh pex ka plix Sanlun, paw lai baox pieh pa deuk, kieh an mawh son nyo sinie, son kawn doe mai son miexmai. ²¹ Yam khrawm pex plix siiet daux sipeem plix siiet, pex ang pon sut plix an khaix khrawm tix, kieh an mawh son nyo sinie, son kawn doe mai son miexmai. ²² Kieh pex doh keud ka mawh tix siliex daux meung Ejiptux, mawh kheu nan, Aux tom tawm lox sonsang yuh pex ceu in heue.

¹ Phan pui koe see ka paox tix mai hoek ka nyiex prawng see, yam tat cao prawng see kieh khawm ra kaux mai kieh kaw pa ang koe krax lud luad luan mai ciyang ka kaw pa lud. ² Phan pui lud mawh pa khaw tix sivied ka, cao prawng see tak kieh nawh gup tix it mai sivied nawh ka plak sivoe pui, awm koe krax lud nawh, awm pa keung nawh ti pon krax pa sivied tix. ³ Kieh sivied ka nawh tixpon taix mai paw kieh lheu khaing an, phan sivied lheu khaing an, puxaik pex tak salao pex sivoe ngai pex. ⁴ Maix tak ang jup jheeh mawie ka jup yam dig ka nghox heue. ⁵ Phan puxaik ot tau mai paox tix mai phan tix kaux kaux yum mai ang koe kawn simex, moeng kaw pa yum an tak ang pon mex ka pui plak praix pao nyiex tix mai kieh puxaik mex nawh laig ot mai nawh, kieh mawh moeng tix mai yuh beeh glawm puxke ti ka bun an. ⁶ Kawn simex pa liang tix keh khaing nawh tak deeh plud ceu kaux puxke pa hoik yum, sonsang ang min ceu kaux nawh pon ti mawh pa preet tix khaing ceu pui Isarelax. ⁷ Phan pui an ang rhawm rieb moeng puxke tix, khaix an moeng puxke nawh tak hu ka diang siviex veng ka kwad song ah nin, pux mex aux ang cu ti plud ceu kaux puxke tix khaing daux Isarelax, nawh ang cu ti teei beeh glawm puxke tix pa mawh mex aux, ⁸ kwad song veng ot nawh, tak kok ka nawh mai krai lox ka nawh, phan nawh ca kawn ah nin, aux ang rhawm simie ti teei ka nawh, ⁹ mai moeng puxke nawh, tak hoek ka nawh, plak sivoe kwad song mai peeik kiep khaing caong nawh mai baig ka pakngai nawh, bun an tak pawk lox ah nin, tik ka simex pa ang pon sang nyiex ma puxke tix, ¹⁰ ka daux pui Isarelax tak kok nyiex ma in mawh pa yaox ti peeik kiep tix. ¹¹ Phan pui ra kaux simah paox tix mai phan moeng pui an tix kaux hoek dex, sonsang teem nawh ka mex tix khaing daux taix pui pa tawk ka nawh, phan nawh giex bluh ka pa viex simex an, ¹² pex tak tat ti tik taix bun an, paw kieh ngai pex caux rhawm ka nawh. ¹³ Pex ang pon ti koe kla jiang tang khaing paox tix, pa mawh kla jiang cien tix mu mai pa chaong tix mu ka daux bau tix. ¹⁴ Pex ang pon kieh kraung tong koe ra ceu daux nyiex tix, pa ting tix mu mai pa iak tix mu. ¹⁵ Pex caw tix koe kla jiang pa khaw caw mai kraung tong pa khaw caw, sonsang lang singaix ju pex ka daux haktiex pa tawx Simiang Siyiex, Siyiex pex ka pex. ¹⁶ Mawh kheu pui pa yuh ka ceu in khankix mai pui pa yuh pa ang rahsee mawh ceu pa seeing brai ka Simiang Siyiex, Siyiex pex. ¹⁷ Doh keud ka pa hoik yuh pui Amaliet ka pex daux krax, yam lih pex khaing Ejiptux, ¹⁸ kix lih hoek puing pex yam awn riang mai yam taug mao pex mai pah ka pui pa dah plak khaix, mai kix ang lhat ka Simiang Siyiex. ¹⁹ Mawh kheu nan, yam hoik tawx Simiang Siyiex maix laux lee tix, khaing pui koeng khankix, pa koe hawt vung viang pex, ka daux haktiex pa tawx Simiang Siyiex mawh sinngao son maix, maix tak preeit krax pa doh keud ka ceu pui Amaliet khankix khaing greem raoma maix tak ang pon ti piawm an heue.

¹ Yam laig teei maix ti ot ka daux haktiex pa sang tawx Simiang Siyiex mawh sinngao son maix, ² teei can ceu pa liang maix ti pon phao ka khaing haktiex pa tawx Simiang Siyiex maix ka maix, maix tak sau ankix daux khrawng tix mu mai viex hu ka dee pa hoik laug Simiang Siyiex maix ti deuh ceu kaux Nawh Cao, ³ mai hoek ka pui pa yuh kaing jhaw cao giex kaing li ka daux baux yam an, ah nin ka nawh, "Aux doh keud tix ka Simiang Siyiex daux in singaix, ka hoik hoek aux daux haktiex pa hoik tiextu Simiang Siyiex ka keeing ex khankix, sonsang tawx ankix ka ex." ⁴ Khaix an cao giex kaing li tak teei khrawng an khaing daux taix maix mai deuh ka plak sivoe khu dee tan Simiang Siyiex maix. ⁵ Maix tak ah nin ka plak sivoe Simiang Siyiex maix, "Keeing aux hoik mawh ceu pui Shurix tix kaux, pa hoik sang grai hu mai nawh hoik lih hu peung tix ot ka daux haktiex meung Ejiptux, viang pui nawh mawh pa tux tan kawx, deeh lih ti mawh ceu pui pa ting lhaong mai ceu pui pa ting riang rao tix cub mai mawh ceu pui pa nie pre haoh hun tan." ⁶ Ceu pui Ejiptux khankix hoik yuh krax pa lang teung caox piang yix mai hoik khin yix, thux yix mai teek yix yuh kaing jhaw siliex pa kied kin tete, ⁷ khaix an yix riag yo lox tix ka Simiang Siyiex keeing yix mai Simiang Siyiex hoik mhong ka lox yix mai hoik yaox ka krax pa kham geu yix mai hoik yaox kaing jhaw pa yuh yix mai khawm ka krax pa khin kix piang yix khankix. ⁸ Mawh kheu nan, Simiang Siyiex hoik viex yix lih hu khaing daux meung Ejiptux ka plawng taix pa ting riang Nawh Cao mai tawm taix pa nih Nawh Cao mai krax pa lhat graung mai mhai rug khankix mai khawm krax pa daox deng khankix. ⁹ Nawh Cao hoik viex ex hoek dee in mai hoik tawx haktiex in, pa mawh haktiex dee lih rawm teeih mai rawm hia ka ex, ¹⁰ Simiang Siyiex eue, yam in aux hoik viex plix khaox plix ox pa liang tix pon phao ka khaing haktiex pa hoik tawx maix ka aux. Khaix an maix tak deuh khrawng an ka plak sivoe Simiang Siyiex maix mai krub ka Simiang Siyiex maix. ¹¹ Mawh kheu nan maix tak gaux rhawm ka daux bwanson kuceu, pa hoik tawx Simiang Siyiex maix, ka maix mai ka daux nyiex ma maix, khawm ceu pui Lewix mai nyo sinie pa ot daux sinax pex. ¹² Yam hoik tawx maix krax tan kao son tix son khaing plix khaox plix ox pa pon ti kuceu, ka daux num loe pa mawh num tan maix kao son tix son mai maix tak tawx ceu ankix ka ceu pui Lewix mai nyo sinie mai ka miexmai kawn doe, sonsang pon kix ti ih tom sak ka daux veng maix khankix, ¹³ khaix an maix tak ah nin ka plak sivoe Simiang Siyiex maix, aux hoik teei krax tan pa singax singeh, kao son tix son lih khaing daux nyiex aux mai aux hoik tawx an kix ka ceu pui Lewix mai ka nyo sinie mai ka miexmai kawn doe awm gumlox pingnyap pa hoik tawm Maix Cao ka aux khawmuik. Aux ang lud ka gumlox pingnyap Maix Cao mai aux ang nyang piawm ka ankix. ¹⁴ Aux ang sax ih ceu ankix tix ceu kawx, yam koe krax laux rhawm aux mai aux ang sax teei ceu an kix lih yam ang tix singax mai aux ang tawx ankix tix ceu kawx ka son pui yum, aux hoik cu nghiet ka gumlox Simiang Siyiex aux mai aux hoik yuh awm pa hoik tawm Maix Cao ka aux. ¹⁵ Num tix jhak khaing dee pa singax singeh ot Maix Cao khaing daux meung raoma mai nawb bwan piang pui ceu Maix Isarelax khankix mai piang haktiex pa hoik tawx Maix Cao ka yix, pa hoik tiextu Maix Cao ka keeing yix khankix, pa mawh haktiex dee lih rawm teeih mai rawm hia. ¹⁶ Ka daux singaix in Simiang Siyiex maix, hoik tawm gumlox beenli mai lox tat jhawm prawng tix sonsang hawt maix ti yuh, mawh kheu nan maix tak priex ti hawt khawm rhawm tix mai khawm ju tix khawmuik. ¹⁷ Daux in singaix maix hoik rieb Simiang Siyiex mawh Siyiex maix mai hawt lawng ka daux krax Nawh Cao mai priex ti hawt gumlox beenli Nawh Cao khankix mai lox tat jhawm prawng Nawh Cao mai cu nghiet ka gumlox Nawh Cao. ¹⁸ Lheu khaing an daux in singaix, Simiang Siyiex hoik rieb maix mawh ceu pui Nawh Cao, pa tang siyox khaing pui tang ceu, awm hoik yuh Nawh Cao mukheu ka maix, sonsang priex maix ti hawt gumlox pingnyap Nawh Cao khawmuik, ¹⁹ Nawh Cao tak deuh maix lhaong piang ceu pui khankix, pa hoik phan hoik deuh Nawh Cao, ka daux krax pa yaogyaw mai ka daux krax pa ao min mai ka daux krax pa koe min plakngai mai sonsang kieh maix mawh ceu pui pa singax singeh, son Simiang Siyiex maix, awm pa hoik koe sijax mukheu Nawh Cao ka maix heue.

¹ Khaix an Mose mai kwad song ceu pui Isarelax khankix tawm lox ka pui khankix ah nin. "Priex tix hawt gumlox pingnyap pa tawm aux ka pex khankix daux in singaix awx." ² Ka daux singaix yam tiang maix ka plak toi rawm klawng Yawdan, ka haktiex pa sang tawx Simiang Siyiex pex, ka maix, maix tak sum ti deuh lon simaox ting mai kraix simaox ceed piang an kix. ³ Maix tak tiiem gumlox beenli inkix khawmuik piang, yam hoik tiang maix toi plak an, sonsang pon maix ti laig daux haktiex pa sang tawx Simiang Siyiex ka maix, pa mawh haktiex lih rawm teeih mai rawm hia, awm pa hoik yuh Simiang Siyiex sijax mukheu tix ka keeing maix khankix. ⁴ Yam hoik tiang maix ka plak toi rawm klawng Yawdan, yam hoik hoek maix piang gawng Ebalax maix tak sum lon simaox inkix, awm pa tawm aux maix daux in singaix mai maix tak kraix simaox ceed piang. ⁵ Maix tak sum khu dee tan ka lon simaox son Simiang Siyiex maix tan tix mu maix tak ang pon ti shiao kraung rhiem tix ceu kawx piang simaox an. ⁶ Maix tak sum khu dee tan Simiang Siyiex maix ka simaox pa ang max mai maix tak tan krax tan pa gleeing piang son Simiang Siyiex maix. ⁷ Maix tak tan krax tan pa nhim khankix mai maix tak ih tan tau mai krax gaux rhawm tix ka plak sivoe Simiang Siyiex. ⁸ Mai maix tak tiiem gumlox beenli in khawmuik sidawng laing piang lon simaox an. ⁹ Khaix an, Mose mai cao giex kaing li khankix mai ceu pui Lewix krai ka ceu pui Isarelax khankix ah nin. "Ceu pui Isarelax khankix eue, jawg tix nghiet, singaix in maix hoik lih mawh ceu pui Simiang Siyiex maix." ¹⁰ Mawh kheu nan maix tak cu nghiet ka lox Simiang Siyiex maix mai hawt ti yuh gumlox pingnyap Nawh Cao mai ka gumlox been Nawh Cao khankix, pa tawm aux ka maix, ka daux in singaix heue. ¹¹ Mose tawm ka pui khankix daux singaix an ah nin, ¹² inkix tak mawh pa cung piang gawng Gerazim mai pa sang nawb bwan piang pui khankix, yam hoik tiang maix ka plak toi rawm klawng Yawdan, pui inkix mawh Simion, Lewix, Yudax, Issakha, Yosiep mai Binyamin khankix. ¹³ Inkix mawh pa cung piang gawng Ebalax, sonsang krai pao pa jhax lawg mai pui kix mawh Rubin, Gat, Asha, Zebulun, Dan mai Napthalix khankix. ¹⁴ Ceu pui Lewix khankix, yo lox ting sinum ah nin ka pui Isarelax khankix, ¹⁵ "Kieh krax pa jhax lawg koe piang pui pa yuh riang grang pa saik ang ah, riang pa raug ang ah, pa mawh ceu pa seeing Simiang Siyiex ka mai kaing jhaw pa yuh ka taix, cao yuh kaing taix mai pa jung ti deuh an khankix ka dah dee pa glip, pui khawmuik deeh pawk lox mai ah Amen! ¹⁶ Kieh pa jhax lawg koe piang pui pa yuh pa ang khaw ang jiet ka miex keeing tix mai pui khawmuik deeh pawk lox mai ah Amen! ¹⁷ Kieh pa jhax lawg koe piang pui pa gah rong mee haktiex paox plawg tix, mai pui khawmuik deeh pawk lox mai ah Amen! ¹⁸ Kieh pa jhax lawg koe piang pui pa kieh pui dug ngai lud hu khaing daux krax mai pui khawmuik deeh pawk lox mai ah Amen! ¹⁹ Kieh pa jhax lawg koe piang pui pa tieh lox prawng pa rahsee piang nyo sinie mai piang miexmai kawn doe khankix mai pui khawmuik deeh pawk lox mai ah Amen! ²⁰ Kieh pa jhax lawg koe piang pui pa it tau mai moeng keeing tix, mawh kheu hoik peeik nawh kraung ceep keeing tix mai pui khawmuik deeh pawk lox mai ah Amen! ²¹ Kieh pa jhax lawg koe piang pui pa lud vao mai totiag tix ceuceu mai pui khawmuik deeh pawk lox mai ah Amen! ²² Kieh pa jhax lawg koe piang pui pa it tau mai pux bun tix pa mawh kawn bun pa hawt keeing tix ang ah mai kawn bun hawt miex tix ang ah mai pui khawmuik deeh pawk lox mai ah Amen! ²³ Kieh pa jhax lawg koe piang pui pa it tau mai miex moeng tix mai pui khawmuik deeh pawk lox mai ah Amen! ²⁴ Kieh pa jhax lawg koe piang pui pa tawk ka paox plawg tix ka dah dee glip mai pui khawmuik deeh pawk lox mai ah Amen! ²⁵ Kieh pa jhax lawg koe piang pui pa ih mau chun praok, sonsang pah ka pui pa ang koe phimap tix kaux mai pui khawmuik deeh pawk lox mai ah Amen! ²⁶ Kieh pa jhax lawg koe piang pui pa ang kaux sijax ka gumlox beenli in khawmuik mai pui khawmuik deeh pawk lox mai ah Amen heue."

¹ Phan maix priex rhawm tix nghiet ka lox Simiang Siyiex tix mhawm mhawm mai hawt yuh awm gumlox pingnyap Nawh Cao khawmuik, awm pa tawm aux ka maix daux in singaix, Simiang Siyiex maix tak deuh maix lhaong khaing ceu pui khawmuik ka piang ca haktiex in. ² Phan maix cu nghiet ka lox Simiang Siyiex maix, bwanson inkix khawmuik tak lih hoek piang maix mai hawt khaix maix, ³ maix ot daux veng, daux yaong ka tak pon bwanson ot ka daux kaung daux ma ka tak pon bwanson. ⁴ Kawn praix tokaux maix mai can ceu plix pa lih khaing daux haktiex maix mai cub tobrie maix khankix, pa mawh kawn mawie mai kawn yung maix khankix, tak pon bwanson pa pre haoh hun, ⁵ ka daux khrawng maix mai ka daux tawg klong ku klao maix blah khankix kawx, tak mawh pa pon bwanson. ⁶ Yam laig maix ka daux nyiex tix maix ka pon bwanson mai yam lih maix khaing nyiex tix kawx maix ka pon bwanson. ⁷ Simiang Siyiex tak kieh pui koeng maix, pa yaog tix tieh feen ka maix khankix, mawh pa som nai khaing sivoe ngai maix, kix lih hoek puing maix ka daux krax tix nyaing mai kix tak yaox ti to daux krax aliah nyaing ka plak sivoe maix. ⁸ Simiang Siyiex tak nawb bwanson hoek piang maix, ka daux krao pa priex maix kraung khrai tix mai ka can pa yuh maix ka taix ti khawmuik. Nawh Cao tak nawb bwanson piang maix, daux haktiex pa sang tawx Simiang Siyiex pex ka maix. ⁹ Phan maix priex ti hawt gumlox pingnyap Simiang Siyiex maix khankix mai phan hawt hu ka daux krax Cao Simiang Siyiex, tak deuh maix mawh pui pa singax ka son tix, awm pa hoik tiextu Nawh Cao ka maix. ¹⁰ Khaix an pui haktiex khawmuik tak yaox ka mawh maix pa hoik kok tix ka daux ceu kaux Simiang Siyiex mai kix tak koe krax lhat graung ka maix. ¹¹ Simiang Siyiex tak sang tawx maix magmi tom nie mai kawn prai maix mai tobrie eei maix khankix mai plix khaox plix ox pa lih khaing haktiex maix, daux haktiex pa hoik tiextu Simiang Siyiex ka keeing maix, son pa sang tawx ka maix. ¹² Simiang Siyiex tak paoh krao raoma khaing dee priex Nawh Cao kraung khrai ceu pa mhawm, sonsang tawx Nawh Cao rawm lhiex lih ka piang tiex maix, ka daux bawg yam praix klawng an khankix mai nawb bwan piang kaing jhaw pa yuh maix ka taix tix. Maix tak pon ti tawx ceuk rom ka ceu pui tom nie, viang mawh nan maix tak ang pon ti ceuk ka kix. ¹³ Phan maix koe krax cu nghiet ka gumlox pingnyap Simiang Siyiex maix, ka pa tawm aux ka maix daux in singaix mai phan maix priex rhawm tix hawt yuh ka ceu an khankix, Simiang Siyiex tak kieh maix mawh kaing ang kieh maix mawh sidax maix tak ot ka piang mai ang ot ka greem. ¹⁴ Mawh kheu nan maix tak ang pon veeh ti khaing lox pa tawm aux khankix ka maix, ka daux in singaix, ka plak khawn gwiex, khawn dawm mai hu hawt khaix siyiex tang kaux mai yuh kaing jhaw kix heue. ¹⁵ Viang mawh nan, phan maix ang cu ang nghiet ka lox Simiang Siyiex tix mai ang hawt ti yuh awm gumlox pingnyap Nawh Cao mai been pa deuh Nawh Cao, ka pa tawm aux ka maix, daux in singaix khawmuik, krax pa jhax lawg tak hawt maix mai hoek piang maix. ¹⁶ Mawx ot daux veng daux yaong ka pon pa jhax lawg, ot ka daux kaung daux ma ka pon pa jhax lawg. ¹⁷ Krax pa jhax lawg tak koe ka daux khrawng maix mai ka daux tawg klong ku klao maix blah, ¹⁸ krax pa jhax lawg tak koe piang kawn praix maix mai piang plix khaox plix ox pa lih khaing daux haktiex maix, khawm piang tobrie eei maix, pa mawh mawie, yung maix khankix. ¹⁹ Yam laig maix ka daux nyiex tix ka pon pa jhax lawg mai yam lih maix khaing nyiex tix ka pon pa jhax lawg, ²⁰ Simiang Siyiex tak kieh pa jhax lawg mai pa tuktiak mai pa map nai hoek piang maix, daux kaing jhaw pa yuh maix ka taix ti tak pon pa laux leeing mai tom hoik khran grai grup maix, kheu jao pa caox caig yuh maix ka pa hoik tik vud maix Nawh Cao, ²¹ Simiang Siyiex tak kieh jhawm saux preng hoek piang maix, tom sidah yuh Nawh Cao maix but khaing haktiex pa sang hu teei maix ti cie. ²² Simiang Siyiex tak sivied maix mai tawx krax kham geu jhawm saux nhao, jhawm saux hoek, jhawm saux uah mai jhawm saux ngu, pa kied lang teung khaing lawm vaig mai bhaung si oh, pa yum yuh pang khaox, jhawm saux lih rawm im, an kix tak hawt khaix maix tom sidah grai grup maix. ²³ Mai raoma piang kaing maix, tak lih ti mawh tawng lheung mai tiex ka greem caong maix tak lih ti mawh rhiem, ²⁴ Simiang Siyiex tak kieh rawm lhiex pa sang lih piang haktiex maix, deeh tieh ti mawh phawng tiex phawng tug lih khaing raoma mai hoek piang maix, tom sidah laux leeing maix. ²⁵ Simiang Siyiex tak kieh maix som nai ka plak sivoe pui koeng maix, maix lih hu sonsang puing kix ka daux krax tix nyaing mai maix tak to sivoe kix ka daux krax aliah nyaing maix tak lih ti mawh pui pa vung viang piang haktiex khawmuik. ²⁶ Tokaux yum maix tak mawh priex ih sim raoma mai totiag piang haktiex, pui mawx kawx tak ang pon ti grheu an kix. ²⁷ Simiang Siyiex tak kieh maix kham geu jhawm saux muad haktiex Ejiptux, jhawm saux glhua nex, jhawm saux ngoi, jhawm saux dao, pa ang maix lai pon pai moi. ²⁸ Simiang Siyiex tak kieh maix kham geu jhawm saux yhot, jhawm sau dug ngai, jhawm saux lung lang rhawm khankix, ²⁹ mai maix tak pu pi ti hu bawg yam jung singaix, awm pui dug ngai pa pu pi ti hu ka daux krax pa faik, kaing pa yuh maix khankix tak ang koe krax pa haok hwan maix tak kha rhawm tix, pui tak tud rhim maix jheung jheung mai ang koe pui pa pon taoh maix. ³⁰ Viang maix hoik teei ti koe moeng kawx, pui tang kaux tak it tau mai nawh, viang maix hoik sum sipeem plix siiet kawx maix tak ang yaox ti ih plix khankix, ³¹ mawie eei maix viang pah ka plak sivoe ngai maix kawx maix tak ang yaox ti ih nex, la eei maix viang mawh pa tud rhim khaing plak sivoe maix kawx, tak ang lai deeh tawx ka maix, yung eei maix tak tawx ka pui koeng maix mai ang lai koe pui pa sang deeh taoh ka ankix tix kaux kawx. ³² Kawn simex kawn bun maix, tak mawh pa hoek ka pui tang kaux mai ngai maix maong ti jhak ka kix, leeing lang singaix mai koe krax pa laux rhawm mai taix maix kawx tak mawh pa ang lai koe riang. ³³ Ceu pui pa ang maix sax tawng, tak teei ti ih plix khaox plix ox haktiex maix, khawm can ceu pa pon maix khaing riang tokaux ti mai maix tak mawh pa kham geu krax pa khin pa thux pui jheung jheung. ³⁴ Mawh kheu nan maix tak mawh pa yhot, kheu jao pa yaox maix ka ngai cao tix khankix. ³⁵ Siyiex tak sivied maix ka krax pa kham geu jhawm saux muad pa lang teung pa ang maix pon pai moi ka nge ngawng mai ka gawng caong maix khankix, jah ka tiag caong maix tom hoek ka piang kaing maix. ³⁶ Simiang Siyiex tak viex tokaux maix khawm simiang pa hoik yaog maix kwang ka piang tix, hoek ka ceu pui pa ang maix, mai keeing maix nyang sax tawng mai maix tak yuh kaing jhaw siyiex tang kaux, pa mawh siyiex pa yuh tix ka khaox mai siyiex pa yuh tix ka simaox khankix tan. ³⁷ Mai maix tak lih ti mawh pa daox deng mai been lox tiag mai ka lox map lox sibriem, ka daux sinax ceu pui khankix, ka dee sang grheu Simiang Siyiex maix hu, ³⁸ maix tak viex simie nghox tom nie lih hu daux tong kaung mai deeh yaox ti kraix khrawm ceeix khaing, mawh kheu sido tak ih ankix khawmuik, ³⁹ viang maix sum sipeem plix siiet mai priex rien mhawm mhawm kawx maix tak ang yaox ti nyaux rawm plix siiet mai ang yaox ti khrawm, grawh grawng nawh viag tak ih ankix. ⁴⁰ Viang maix koe khaox sanlun daux haktiex dee pa sang kwang maix khawmuik maix tak ang yaox ti kraix bee an ka tokaux tix, mawh kheu plix khaox sanlun maix hoik khrum sivoe sang teem. ⁴¹ Viang maix keh kawn simex kawn bun kawx, kix tak ang mawh cie maix. Grawh grawng nawh, kix luan ti mawh pui pa giex laung ka daux taix pui koeng maix khankix, ⁴² Sido tak ih pang khaox maix, khawm ceu pa sang pon maix khaing daux haktiex maix khankix. ⁴³ Ceu pui tang ceu pa ot ka daux sinax pex khankix, tak yaog tix lheu laong mai baox nie lheu laong khaing maix, maix tak mawh pa tiiem mai baox nie lheu tiiem khaing kix. ⁴⁴ Nawh tak pon tawx maix ceuk rawm, viang mawh nan maix tak ang pon tawx nawh ceuk rom, nawh tak mawh kaing mai maix tak mawh sidax, ⁴⁵ krax pa jhax lawg inkix khawmuik, tak hoek piang maix mai hawt khaix maix mai krup maix, tom hoek maix krax laux leeing, kheu jao ang maix cu nghiet ka lox Simiang Siyiex maix, ang priex rien tix hawt yuh awm gumlox pingnyap Nawh Cao mai ka beenli pa deuh Nawh Cao khankix, ka pa hoik tawm Nawh Cao ka maix. ⁴⁶ Ceu pa jhax lawg ankix tak mawh mhai pa tang siyox mai pa daox deng piang maix, khawm piang doeh ru maix leeing ju. ⁴⁷ Grawh grawng nawh, yam magmi maix mai ang gaux rhawm ti yuh kaing jhaw Simiang Siyiex tix, ⁴⁸ mawh kheu nan maix tak yaox ti yuh kaing jhaw pui pa koeng tix khankix, pa ploi Siyiex hoek ka maix, ka daux pa cai rhawm tix mai pa sang nyaux nie rawm mai pa ang koe kraung ceep mai ka pa cud cha kuceu mai Nawh Cao tak sau iak rhiem piang ngawg maix, tom sidah yuh Nawh Cao maix laux leeing. ⁴⁹ Siyiex tak viex ceu pui tix ceu khaing dee singai dee sidah haktiex mai kieh kix hoek puing ka maix, awm phai pu klang ting, pa mawh ceu pui pa ang maix sax tawng ka lox sikah kix. ⁵⁰ Ceu pui in mawh pa riex hak pakngai, pa ang koe krax nab yam ka kwad song khankix mai pa ang koe krax caux rhawm ka kawn nyawm khankix. ⁵¹ Mai kix tak ih tobrie eei maix mai plix khaox pa lih ka daux haktiex maix khankix, tom hoek maix krax laux leeing, nghox koi ang ah, rawm plix siiet pa khraox ang ah, rawm bee ang ah mai can tobrie pa eei maix ang ah mai kawn yung kawn mawie maix ang ah, kix tak ang lai prah maix cie tom sidah hoik yuh maix laux leeing. ⁵² Kix tak lai lawm ka maix hawt diang siviex maix, tom hoek bawg yam grhup guh veng pa lhaong pa kaux pa cong maix, ka piang tiex khawmuik, ka dah dee pa een maix rhawm tix ka mai kix tak lai lawm maix hawt diang siviex veng pex, pa koe ka daux haktiex pex, ka dee pa hoik tawx Simiang Siyiex pex ka maix. ⁵³ Yam ot maix ka daux pa lai lawm pui koeng maix khankix, ka daux pa nied tix kin kha rhawm khankix maix tak ih ka kawn praix tokaux ti, pa mawh nex kawn simex kawn bun maix, pa hoik tawx Simiang Siyiex maix ka maix. ⁵⁴ Simex pa awn nex nham kaux hak ka daux sinax pex, tak koe rhawm pa koeng ka puxaik nawh mai ka moeng pa koe piang naok nawh mai khawm kawn praix pa kawn deuk khankix, ⁵⁵ Nawh ang lai rhawm tawx nex kawn praix tix khankix sonsang ih pui pa dex mai nawh, kheu jao ang nawh lai koe ceu pa ih tix ceu kawx, ka daux bawg yam ot nawh, ka daux pa lai lawm pui koeng khankix mai ka daux pa hoik kied kin yuh pui koeng maix, krax kha rhawm ka daux veng ot pex khawmuik. ⁵⁶ Bun pa awn nex nham kaux hak ka daux sinax pex pa ang sax pon kieh caong tix dig piang tiex kheu jao pa awn nex nham kaux hak an, tak koe rhawm pa koeng ka mex pa koe piang naok tix mai ka kawn simex kawn bun tix, ⁵⁷ rheem pa lih ka sinax ba nawh mai kawn praix pa keh nawh an, nawh tak mox ti ih dee glip, kheu jao hoik cud cha ceu pa ih yam ot nawh ka daux pa lai lawm pui mai ka pa kied kin tix ot son nawh, yam yuh pui koeng maix khankix krax kha rhawm daux veng ot pex khawmuik. ⁵⁸ Phan maix ang yuh satix tix mai ang hawt ti yuh awm lox lai beenli pa hoik tiiem ti deuh daux phuk lai, sonsang koe krax lhat graung tix ka ceu kaux SIMIANG SIYIEX MAIX, pa ting min mai lhat graung ka. ⁵⁹ Simiang Siyiex tak viex jhawm saux preng pa lang teung, pa daox deng, jhawm saux preng pa kied rheung, jhawm saux pa nie lheu kin mai pa kied rheung bawg yam hoek piang maix mai piang doeh ru maix khankix. ⁶⁰ Lheu khaing an Nawh Cao tak deeh viex jhawm saux haktiex meung Ejiptux pa lhat graung maix ka, hoek piang maix, jhawm saux ankix tak haok kawp piang maix. ⁶¹ Jhawm saux kuceu mai jhawm saux preng kuceu, pa ang nyang bax tiiem ka daux phuk lai beenli in khankix kawx, Simiang Siyiex tak viex hoek piang maix, tom hoek maix krax laux leeing. ⁶² Viang maix nie haoh hun awm simuing raoma kawx maix tak lih ti mawh pui tux, pui iak pa deuk ceeix khaing, mawh kheu ang maix cu nghiet ka lox Simiang Siyiex maix khankix. ⁶³ Awm hoik khaw rhawm Simiang Siyiex ti yuh maix mawh pa mhawm mai pre haoh hun, awm an Simiang Siyiex tak khaw rhawm ti yuh maix laux lak pak leeing mai ang lai kieh maix koe ceu koe cak mai tak deeh reeig ti tik maix khaing daux haktiex pa sang hu teei maix ti cie. ⁶⁴ Simiang Siyiex tak kieh pex prung prang rairuat sinax ceu pui khankix, jah ka haktiex plak in tom sidah hoek ka haktiex plak an mai maix tak yuh kaing jhaw siyiex tang kaux pa ang tokaux maix mai keeing maix sax tawng, pa mawh siyiex khaox mai siyiex simaox tan. ⁶⁵ Daux sinax ceu pui ankix maix tak ang yaox krax laux lee rhawm tix mai caong maix kawx, tak ang koe dee sang laux lee tix, Simiang Siyiex tak tawx rhawm pa sikua mai iak riang ngai mai pa khrup rhawm maix tan. ⁶⁶ Ju maix tak koe krax khi glawh ka sivoe ngai maix, maix tak koe krax lhat graung ku singaix mai ang lai deeh pon taoh ka son ju tix. ⁶⁷ Yam hoek plak ponngawb maix tak ah nin, kieh niied hoek plak ponbo mai yam hoek plak ponbo maix tak ah nin, kieh niied hoek plak ponngawp maix tak ah nan kheu jao pa lhat graung pa yaoh daux rhawm maix, pa yaox maix ka ngai tix. ⁶⁸ Simiang Siyiex tak deeh teei maix ing ka meung Ejiptux ka reu ting, awm pa hoik sax krai Aux ka maix yuh nin maix tak ang lai baox yaox daux krax an. Maix tak mawh pa coh tix ka pui koeng maix khankix, mawh siliex simex siliex bun, viang mawh nan, tak ang koe pui liag ka maix heue.

¹ Inkix mawh gumlox sijax mukheu pa hoik tawm Simiang Siyiex ka Mose, sonsang yuh inkix tau mai ceu pui Isarelax khankix, daux haktiex Mawbax, pa lheu khaing gumlox sijax mukheu pa hoik yuh Nawh Cao tau mai kix ka daux baoh haktiex Hawrax. ² Mose kok ka ceu pui Isarelax khankix hoek ah nin. "Pex hoik yaox ceu pa hoik yuh Simiang Siyiex ka plak sivoe ngai pex khawmuik, ka daux meung Ejiptux ka Pharaw mai ka kawncau mau soi nawh khankix mai ka haktiex nawh khankix, " ³ grawng pa cheuk cheu pa hoik yaox pex ka ngai tix mai mhai rug pa daox deng, pa ting lhaong ankix. ⁴ Viang mawh nan, Simiang Siyiex ang nyang tawx pa chix keud sawn daux rhawm pex mai pa chix yaox ka ngai tix mai pa chix mhong ka yhaok tix khankix tom hoek daux in singaix. ⁵ Aux hoik thong pex hu daux tiag tixpon num, kraung ceep pex ang nyang griah khaing pex mai kiep pex kawx ang nyang laux khaing pex, ⁶ pex ang yaox ti ih blah mai ang yaox ti nyaux rawm plix siiet mai plai, sonsang tawng pex mawh Aux Simiang Siyiex pex. ⁷ Yam hoik hoek pex dah dee in, Sihon simiang haktiex Heshabon mai Awgax simiang haktiex Bashan khankix hoek ti puing ka ex daux bang naing mai ex hoik pex ka kix, ⁸ Ex hoik teei haktiex kix mai hoik tawx ka ceu pui Rubin mai ceu pui Gat mai ceu pui Manashe tix plak mawh sinngao son kix. ⁹ Mawh kheu nan, priex ti hawt gumlox sijax mukheu in khankix mai hawt ti yuh, sonsang pon pex tix haok hwan ka daux krax pa sang yuh pex kuceu. ¹⁰ Daux in singaix pex khawmuik hoik cung ka plak sivoe Simiang Siyiex pex, jah ka cao thong pex mai cao kaing doeh ru pex khankix mai kuad riex ju khawm cao pa kwang pex mai cub kawn simex ceu pui Isarelax khankix, ¹¹ mai kawn pex, moeng pex mai nyo sinie pa ot ka daux bang pex, khawm pui kid khix pex, tom hoek ka pui pa kin rawm pex khankix, ¹² sonsang pon pex tix laig ka daux been gumlox sijax mukheu tau mai Simiang Siyiex pex mai daux krax pa tiextu Nawh Cao khankix, pa yuh Simiang Siyiex pex tau mai pex daux in singaix, ¹³ mai Nawh Cao hoik yaog ti deuh maix mawh ceu pui tix cub son cao tix daux in singaix mai Nawh Cao mawh Siyiex maix awm pa hoik krai Nawh Cao ka pex mai krax pa hoik tiextu Nawh Cao ka keeing pex Abraham, Icak mai Yakop khankix. ¹⁴ Aux ang joeng yuh gumlox sijax mukheu in mai krax pa tiextu in tau mai pex khaing. ¹⁵ Aux hoik yuh tau mai can kix pa cung tin tau mai ex ka daux in ngaix, ka plak sivoe Simiang Siyiex ex, khawm kix pa ang ot tau mai ex ka daux in singaix. ¹⁶ Pex hoik tawng ka ot ex daux meung Ejiptux mai ex hoik lih khaing sinax pui tang ceu pa hoik yaox ex nawh, yam hoik tiang ex ti hu, ¹⁷ mai pex hoik yaox ka ceu pa seeing pa koe daux sinax kix, pa mawh khaox, simaox khankix mai mau khri khankix, ¹⁸ mai khi rhawm ka daux sinax pex, simex, bun mai kawn nyiex ma pex ka daux doeh ru pex khankix, pa tang tiah rhawm tix singai khaing Simiang Siyiex pex daux in singaix mai pa sang hu yuh kaing jhaw siyiex pui tang ceu khankix mai lhat riah khaox ghin pa song lih kuah ka daux sinax pex, ¹⁹ yam mhong nawh ka lox pa jhax lawg in, nawh tang nawb bwanson ka tokaux cao tix daux rhawm tix ah nin, aux koe pa nhim, viang aux yuh alo tix, awm pon cao pa yoek ka plai tix viex ka daux sinax pui pa twah plai khankix. ²⁰ Simiang Siyiex tak ang pluat ploi ka nawh, krax song rhawm Simiang Siyiex mai krax pa bak pa viang Nawh Cao, tak lih awm taox ngu piang pui an mai pa jhax lawg kuceu pa hoik tiiem ti ka daux phuk lai in, tak koe ka piang nawh, mai Simiang Siyiex tak preet ti tik ceukau nawh khaing greem raoma. ²¹ Simiang Siyiex tak gwieh nawh khaing doeh ru ceu pui Isarelax khankix, sonsang kham geu phimap, awm pa jhax lawg pa koe ka daux gumlox sijax mukheu in khankix, pa hoik tiiem ti ka daux phuk lai beenli in, ²² doeh ru kawn praix maix, pa yaog ti kaoh khaix maix khankix mai pui tang meung pa hoek khaing daux haktiex dee singai khankix, yam yaox kix jhawm saux preng daux haktiex an mai jhawm saux pa hoik deuh Simiang Siyiex ka pui ankix. ²³ Ka daux haktiex khawmuik hoik kieh mawh dee koe mhat mai khaix hax ngu, ang koe pa pon sum plix simie nghox koi mai ang koe plix koe tai mai ang koe rib riem pa kuah baoh tan tix ceu kawx, awm pluk pliak Simiang Siyiex ti tik ka veng Sawdom mai veng Gawmawrax, veng Adama mai veng Zibo-im ka daux pa song rhawm tix mai pa meet rhawm tix. ²⁴ Can ceu pui khankix tak ah nin, "Simiang Siyiex hoik yuh ceu inkix ka haktiex in, kheu jao patix lie? Krax pa hax krax song rhawm ting in mawh pa koe dee bleeh yuh ka mawx lie?" ²⁵ Pui khankix ah nin. "Mawh kheu hoik tik vud kix ka gumlox sijax mukheu Simiang Siyiex keeing kix, pa hoik yuh Nawh Cao tau mai kix, yam hoik viex Nawh Cao kix lih khaing meung Ejiptux. ²⁶ Mawh kheu kix hoik yuh kaing jhaw siyiex tang kaux mai hu krub ka siyiex pa ang kix tawng mai pa ang Nawh Cao sax tawx ka kix. ²⁷ Mawh kheu nan, krax song rhawm Simiang Siyiex, hoik yaog ti lih ka daux haktiex in mai kieh Nawh Cao pa jhax lawg kuceu, pa hoik tiiem ti deuh daux phuk lai in lih hoek piang haktiex an kix. ²⁸ Simiang Siyiex hoik reeig ti tik kix khaing daux haktiex kix, ka daux krax pa song rhawm mai daux pa meet rhawm tix mai daux pa kied song rhawm tix mai teei ti tik kix ka daux haktiex tang dah, awm pa koe an daux in singaix. ²⁹ Can kaing pa glip khankix mawh pa dex mai Simiang Siyiex ex mai ceu an khankix pa deeh plak jhi kieh sidawng hoik mawh pa dex ka ex mai ka kawn praix ex leeing ju, sonsang pon yuh ex awm gumlox beenli in khawmuik heue.

¹ Yam hoek ceu inkix piang maix, can krax pa nawb bwanson mai pa jhax lawg, pa hoik deuh aux plak sivoe maix, maix tak deeh keud ceu an khankix daux sinax ceu pui khankix, ka dee pa grheu Simiang Siyiex maix lih hu, ² phan maix mai kawn praix maix, deeh hoek ka Simiang Siyiex maix mai cu nghiet ka lox Nawh Cao, khawm rhawm tix mai khawm ju tix khawmuik, awm lox pa tawm aux ka maix daux in singaix, ³ mai Simiang Siyiex tak deeh viex maix ing khaing krax pa giex laung mai Nawh Cao tak koe krax caux rhawm piang maix mai deeh khrawm maix khaing ceu pui khawmuik, dee pa hoik kieh Simiang Siyiex pex prung prang rairuat. ⁴ Phan pui maix tix kaux kaux mawh pa hoik grheu ti tik ka dee pa kied singai khaing greem raoma, Simiang Siyiex maix tak deeh khrawm maix hoek khaing tan, ⁵ Siyiex maix tak deeh viex maix hoek ka haktiex pa hoik tawx Nawh Cao keeing maix cie, mai maix tak sang pon ti cie ankix. Nawh Cao tak kieh maix haok hwan mai kieh maix baox nie lheu pre haoh hun khaing keeing maix. ⁶ Simiang Siyiex maix tak pat hak rhawm maix mai khawm hak rhawm doeh ru maix, sonsang moh maix ka Simiang Siyiex tix khawm rhawm tix mai khawm ju tix khawmuik sonsang pon maix ti im ju. ⁷ Simiang Siyiex maix, tak deuh pa jhax lawg inkix khawmuik piang pui koeng maix khankix mai piang pui pa koeng ka maix mai piang pui pa tuktiak ka maix khankix. ⁸ Maix tak cu nghiet ka lox Siyiex mai hawt yuh awm gumlox pingnyap Nawh Cao khawmuik, ka pa tawm aux ka maix daux in singaix. ⁹ Phan maix koe krax cu nghiet ka lox Simiang Siyiex tix mai priex ti hawt gumlox tawm pingnyap Nawh Cao mai beenli pa deuh Nawh Cao khankix mai lox tat jhawm prawng pa hoik tiiem ti ka daux phuk lai in mai phan maix deeh veeh ti ing ka Simiang Siyiex tix, khawm rhawm tix mai khawm ju tix khawmuik, ¹⁰ Simiang Siyiex maix, tak kieh maix nie baox haok hwan, daux kaing pa yuh maix ka taix tix khawmuik mai kawn praix maix mai tobrie eei maix khankix, khawm plix nghox plix koi pa lih khaing daux haktiex maix, son ceu pa mhawm khankix, mawh kheu Simiang Siyiex tak deeh koe krax khaw rhawm ka maix mai nawb bwan piang maix, awm hoik koe krax khaw rhawm Nawh Cao piang keeing maix khankix heue. ¹¹ Gumlox pingnyap pa tawm aux ka maix daux in singaix, ang mawh ceu pa nu son maix mai ang mawh pa koe dee singai khaing maix. ¹² Ankix mawh pa ang koe piang raoma, sonsang ah maix nin. "Pui mawx sang haok piang raoma mai deeh viex ceu an lih ka son ex, sonsang pon ex ti mhong mai hawt ti yuh ceu ankix?" ¹³ Ceu ankix mawh pa ang koe ka plak toi rhawm sigrit sigra, sonsang ah maix nin, "Pui mawx pa sang tiang hu ka plak toi rhawm sigrit sigra mai deeh viex ceu ankix hoek ka son ex, sonsang pon ex ti mhong mai hawt ti yuh ceu ankix?" ¹⁴ Gumlox in mawh pa kied dex hawt maix mai mawh pa koe daux jheeh maix, khawm daux rhawm maix, sonsang pon maix ti hawt yuh ankix. ¹⁵ "Jhak heue, aux hoik deuh krax im ju mai pa mhawm, krax yum mai pa caox caig plak sivoe maix daux in singaix, ¹⁶ Aux tawm maix moh ka Siyiex tix, sonsang hawt maix grawng, lawng khaix Nawh Cao mai sonsang priex rien maix ti hawt gumlox pingnyap Nawh Cao mai gumlox beenli pa deuh Nawh Cao khankix mai lox tat jhawm prawng Nawh Cao, sonsang pon maix ti im ju mai baox nie pre haoh hun, Simiang Siyiex maix tak nawb bwan ka maix, daux haktiex pa sang hu teei maix ti cie. ¹⁷ Viang mawh nan, phan rhawm maix veeh ti hu singai mai ang nghiet lox Nawh Cao mai tieh ti hu krub ka siyiex tang kaux mai hawt ti yuh kaing jhaw kix, ¹⁸ Aux krai pao sidawng ka maix daux in singaix maix tak sang grai grup tete maix tak ang lang ju daux haktiex pa sang tiang maix plak toi rawm klawng Yawdan, sonsang laig maix teei ti cie an. ¹⁹ Aux kok yo raoma mai haktiex kham sakse son maix daux in singaix, Aux hoik deuh krax im ju mai krax yum, krax nawb bwan mai krax pa jhax lawg khankix plak sivoe maix, mawh kheu nan, laug maix teei krax im ju, sonsang pon maix ti im ju khawm doeh ru maix khankix, ²⁰ sonsang moh maix ka Simiang Siyiex tix, sonsang cu nghiet ka lox Nawh Cao, sonsang een maix rhawm tix ot dex Nawh Cao, mawh kheu Nawh Cao mawh krax im ju maix mai krax lang ju maix, sonsang pon maix ti ot daux haktiex pa tiextu Simiang Siyiex tix tawx ka keeing maix Abraham, Icak mai Yakop heue.

¹ Khaix an, Mose hu krai gumlox inkix ka ceu pui Isarelax khankix, ² ah nin, yam in aux hoik koe ju tix yieh tixnga num, aux ang lai pon lih pon laig awm ku bawg sivoe ngai pex, Simiang Siyiex hoik ah nin ka aux, "Maix tak ang pon ti tiang plak toi rawm klawng Yawdan in, " ³ Simiang Siyiex pex tak tiang mai thong pex hu toi plak an plak sivoe pex, Nawh Cao tak kieh ceu pui inkix laux leeing, khaing plak sivoe pex mai pex tak teei ti cie haktiex cie kix, tokaux Yawsux tak tiang ti hu plak sivoe pex, awm pa hoik krai Simiang Siyiex ka pex. ⁴ Simiang Siyiex tak yuh ceu an piang kix, awm pa hoik yuh Nawh Cao piang Sihon mai Awgax, pa mawh simiang haktiex Amawrix mai piang haktiex kix, yam yuh Nawh Cao kix laux leeing. ⁵ Simiang Siyiex tak ap kix ka pex, sonsang yuh pex ka kix, awm gumlox pingnyap pa hoik tawm aux ka pex khawmuik. ⁶ Teei riang rao tix mai kieh koe rhawm kwa, paw khi rhawm mai paw lhat graung ka kix, Simiang Siyiex pex tak hu tau mai pex, Nawh Cao tak ang prah pex mai ang tik vud pex. ⁷ Mose kok ka Yawsux ah nin, ka nawh ka plak sivoe ngai ceu pui Isarelax khankix, "Teei riang rao tix mai kieh koe rhawm kwa, mawh kheu maix tak sang yaox ti hu tau mai pui inkix ka daux haktiex pa tiextu Simiang Siyiex ka keeing pex, sonsang tawx Nawh Cao haktiex an ka kix mai kieh kix pon ti cie sinngao an khankix. ⁸ "Tokaux Simiang Siyiex tak hu ka plak sivoe maix, Nawh Cao tak ot tau mai maix, Nawh Cao tak ang prah maix mai ang tik vud maix, paw lhat graung mai paw laux rhawm ka." ⁹ Mawh kheu nan, Mose tiiem ti deuh gumlox beenli in mai ap ka cao giex kaing li, pa mawh kawn simex ceu pui Lewix khankix, pa teei beeh glawm tix klawm teug bwan gumlox sijax mukheu Simiang Siyiex mai ka kwad song ceu pui Isarelax khankix. ¹⁰ Mose tawm lox ah nin, "Yam hoik naog aliah num daux num pa hoik tat ti deuh, sonsang ploi pex luad luan yam hoik hoek bawg yam yuh pex pawie nyiex gox bang khankix, ¹¹ yam hoek bleeh ceu pui Isarelax plak sivoe Simiang Siyiex pex ka dah dee pa hoik laug Nawh Cao ti deuh, pex tak phat gumlox beenli inkix plak sivoe ceu pui Isarelax khankix, sonsang mhong kix ka. ¹² Khrawm pui khankix tau, simex, bun, kawn nyawm mai nyo sinie pa ot ka daux veng pex khankix, sonsang pon kix tix mhong mai sonsang gau kix tix chix koe krax lhat graung ka Simiang Siyiex pex mai sonsang priex hawt ti yuh, awm gumlox pa koe ka daux lox lai beenli in khawmuik, ¹³ sonsang mhong kawn nyawm pa ang nyang sax tawng khankix mai sonsang hoek gau kix tix koe krax lhat graung ka Simiang Siyiex, glang yam kawn im ju pex daux haktiex pa sang tiang pex ti hu, plak toi rawm klawng Yawdan, pa sang teei pex ti cie khankix. ¹⁴ Simiang Siyiex deeh ah nin ka Mose, "Jhak heue, singaix sang yum maix hoik dex, kok Yawsux hoek tau mai daux nyiex gox bwan man bang kum pui hun, sonsang tawx aux beeh glawm ka nawh." Mawh kheu nan, Mose mai Yawsux laig daux nyiex gox bwan man bang kum pui hun tau tan, ¹⁵ Simiang Siyiex lih bleeh ka daux rong paiawm, hawt nyiex gox bwan man mai rong paiawm an ot piang diang siviex nyiex gox bwan man. ¹⁶ Simiang Siyiex ah nin ka Mose, "Jhak heue, maix tak yaox ti laig it tau mai keeing maix khankix, pui inkix tak yaog ti kaoh hu yuh pa lud tau mai siyiex tang meung khankix, daux haktiex pa sang hu pex ti ot daux sinax kix mai kix tak tik vud Aux mai yuh gumlox sijax mukheu Aux laux leeing ka pa hoik yuh Aux tau mai kix. ¹⁷ Krax song rhawm Aux lih piang kix daux singaix an mai Aux tak tik vud kix mai mox pakngai tix khaing kix mai kix tak hoek krax laux leeing, pa caox caig mai pa kha rhawm, tak hoek piang kix mai kix tak ah nin daux singaix an, "Mawh kheu ang Siyiex ex lai koe ka daux sinax ex, ceu pa caox caig inkix tom hoek piang ex ang mawh lie?" ¹⁸ Kheu ceu pa caox caig pa hoik yuh kix grawng pa hoik veeh ti hu ka siyiex tang kaux khankix Aux tak mox pakngai tix daux ngaix an tete. ¹⁹ Yam in tiiem ti deuh lai rhax in son pex mai gau kawn praix Isarelax khankix, kieh kix pon rhax glip ngai, sonsang mawh lai rhax in mhai rug son Aux, ka sinax kawn praix ceu pui Isarelax khankix. ²⁰ Yam hoik viex Aux kix hoek ka daux haktiex dee lih rawm teeih mai rawm hia, pa hoik tiextu Aux ka keeing kix mai khaix hoik ih kix ceu an tom sak mai kluing ka, khaix an kix tak veeh ti hu ka siyiex tang kaux mai hawt ti yuh kaing jhaw kix mai kix tak map ka Aux mai thiang ti tik ka gumlox sijax mukheu Aux. ²¹ Yam lih ceu pa cao caig mai pa kha rhawm tom nie piang kix, lai rhax in tak mawh jhi mhai rug ka kix, tak ang yaox ti piawm khaing daux jheeh doeh ru kawn praix pex, yam in Aux tawng krax keud kix, sivoe ang Aux nyang viex kix hoek ka daux haktiex pa hoik tiextu Aux ti tawx ka kix. ²² Mawh kheu nan, Mose hoik tiiem ti deuh lai rhax in, ka daux singaix an mai gau pui Isarelax khankix ka. ²³ Nawh Cao tawx lox ka Yawsux kawn simex Nun ah nin, "Teei riang rao tix mai kieh koe rhawm kwa, mawh kheu maix tak yaox ti viex ceu pui Isarelax khankix laig ka daux haktiex pa hoik tiextu Aux ka kix mai Aux tak ot tau mai maix. ²⁴ Yam an Mose tiiem gumlox beenli in tom grum naog ka daux phuk lai tix pheen tom hoik. ²⁵ Mose tawx lox ka ceu pui Lewix khankix, pa sang klawm ka teug bwan sijax mukheu Simiang Siyiex mai nawh ah nin ka kix. ²⁶ "Teei phuk lai been in mai deuh praok teug bwan sijax mukheu Simiang Siyiex, sonsang mawh mhai rug ka son pex." ²⁷ "Mawh kheu tawng aux pex koe rhawm pa tieh feen mai grawng pa kiien ngawg pex, glang yam kawn im ju Aux tau mai pex, daux in singaix, pex hoik tieh feen ka Simiang Siyiex, khaix hoik yum aux pex tak sang baox nie yuh miex ding?" ²⁸ Khrawm kwad song, dohdoe pex mai cao kaing pex khankix hoek ka aux, sonsang krai aux kix mhong gumlox in khankix mai kok raoma mai haktiex mawh mhai rug ka daux sinax kix. ²⁹ Grawh grawng nawh khaix yum aux sax, aux tawng grawng sang tieh feen pex mai veeh ti khaing daux krax pa hoik tawm aux ka pex mai kieh pa kha rhawm hoek piang pex khaix singaix in, jao yuh pa caox caig plak sivoe ngai Simiang Siyiex, sonsang nie kieh pex krax pa song rhawm Nawh Cao koe daux kaing pa yuh pex ka taix ti khankix. ³⁰ Lai rhax pa krai Mose ka ceu pui Isarelax khankix mhong, tom grum tom naog ah nin.

¹ Raoma eue, veeh yhaok tix nghiet mai aux sang krai, Haktiex eue, nghiet gumlox pa kaoh khaing daux jheeh aux, ² Kieh lox pa sidiex gau aux lih awm rawm lhiex mai kieh gumlox aux, jauh lih awm rawm ciex mai jauh awm rawm lhiex piang khaox pa awn mai lih awm lhiex poe piang rib riem. ³ Mawh kheu aux krai pao min ceu kaux Simiang Siyiex mai aux yaogyaw krax pa ting lhaong Siyiex, ⁴ Nawh Cao mawh rang ting, kaing jhaw Nawh Cao mawh pa grum pa naog, daux krax Nawh Cao mawh pa khaw caw mai mawh Siyiex pa mawh meh mai pa ang koe krax lud, Nawh Cao mawh pa rahsee mai pa kaux sijax. ⁵ Kix hoik yuh pa caox caig ka Nawh, mawh kheu koe krax pa lud kix mai kix mawh doeh ru pa tieh feen mai ang kaux sijax. ⁶ Pui pa daox aw pa ang koe pingnya khankix eue, mawh sang deeh pawk maix bwanson ka Simiang Siyiex yuh nin lie? Nawh Cao mawh keeing pa hoik kieh pex koe ang mawh lie? Nawh Cao hoik mawh pa phan pa deuh pex mai pa deuh pex kaux cong ang mawh lie? ⁷ Deeh doh keud ka singaix pa hoik luan mai deeh keud tix yaox num pa hoik luan, chawk tix yaox keeing maix mai nawh tak jhi maix yaox, chawk tix yaox kwad song khankix mai kix tak krai ka maix, ⁸ yam jah Siyiex dee pa kied ting lhaong tix gwieh sinngao ka ceu pui khankix, pa mawh doeh ru Adam khankix, Nawh Cao tat ti deuh mee haktiex ka son ceu pui khankix, awm diag koe pui Isarelax khankix. ⁹ Grawh grawng nawh son nyum cie Simiang Siyiex mawh ceu pui Nawh Cao khankix mai Yakop hoik mawh sinngao Nawh Cao. ¹⁰ Nawh Cao hoik yaox nawh daux haktiex dee yiien, dee riag yo totiag khankix, Nawh Cao hoik vie hoik lawm nawh mai priex rien ka nawh mai kia ngiien ka nawh awm kawn ngai tix. ¹¹ Awm kraix klang mheem tix mai di pruik tix piang kawn tix mai priex kix mai viex kix hu piang pruik tix. ¹² Mawh Simiang Siyiex tix kaux khaing pa thong bung Yakop hu mai siyiex tang dah tang meung khankix ang lai ot tau mai nawh. ¹³ Nawh Cao kieh nawh brug ti ot ka dah dee pa kied ting lhaong haktiex mai nawh tak pon ti ih can ceu pa lih khaing daux tong kaung nawh khankix, Nawh Cao tak kieh nawh teei rawm hia khaing daux rang mai rawm bee khaing daux rang. ¹⁴ Klon bee rawm teeih mawie mai rawm teeih yung mai khlawp bee kawn yung mai kawn yung mhaing pa keh khaing tobrie Bashan mai pex mhaing, khawm nghox ca ceu pa mhawm pa hoik laug ti deuh maix tak yaox ti nyaux rawm plix siiet, khaing plix siiet khankix. ¹⁵ Viang mawh nan, Yeshurun baox nie kluing nie bee mai deeh tiied ka caong ti, khaix nie kluing nie plang kaux hak nawh, klon bee hoik kheem piang nawh, khaix an nawh tik vud ka Siyiex, pa phan deuh nawh mai nunai ka rang ting pa mawh krax taoh nawh. ¹⁶ Kix hoik yuh ti kieh Nawh Cao song rhawm kheu krub siyiex tang kaux, ceu pa seeing brai yuh kix, hoik so krax pa song rhawm Nawh Cao. ¹⁷ Kix hoik tan ka phicaox pa ang mawh siyiex mai ka siyiex pa ang kix sax tawng khankix mai ka siyiex ang keeing kix sax koe krax lhat graung ka. ¹⁸ Maix hoik piawm ka rang ting dee keh kung maix khaing maix ang lai doh keud ka Siyiex pa mawh keeing maix. ¹⁹ Yam hoik yaox Simiang Siyiex an, Nawh Cao song rhawm ka kix mai tik vud ka kawn simex kawn bun Nawh Cao khankix. ²⁰ Nawh Cao ah nin, "Aux tak mox pakngai tix khaing kix mai jhak tix yaox dee sidah ceu pa sang lih mawh kix, mawh kheu kix mawh doeh ru pa kiien rhawm mai ang kaux sijax. ²¹ Kix hoik so krax pa song rhawm Aux lih, ka ceu pa ang mawh siyiex. Kix hoik kieh krax pa song rhawm Aux lih kheu pa caox caig pa yuh kix ka riang grang ceu pa giex going, mawh kheu nan, Aux tak deeh teei pui pa ang koe cee koe cak kieh yuh kix laux rhawm ka mai teei pui pa ang koe pingnya cuyi kieh yuh kix koe krax pa song rhawm ka. ²² Mawh kheu krax pa song rhawm Aux hoik lih rup awm ngu mai an tak gleeing, tom hoek dee pa kied raux meung yum mai an tak gleeing haktiex laux leeing, tau mai plix khaox plix ox pa koe daux haktiex, tom hoek ka caong gawng. ²³ Aux tak pum krax pa laux leeing piang kix mai puing te ak tix piang kix khawmuik. ²⁴ Kix tak krawx rao kheu cai rhawm mai laux leeing ka jhawm saux mai hoek ka daux pa kied laux leeing, Aux tak ploi rhang totiag hoek ka kix, tau mai jai siuing piang haktiex ot kix. ²⁵ Plak praix tak mawh lawm vaig, plak daux tak mawh krax pa lhat graung, son nyawm sinaw mai bun krih, son kawn nyawm pa kawn peuex mai son pui pa hoik paing hauk kaing khankix tak kieh laux leeing khawmuik. ²⁶ "Aux tak sang kieh kix prung prang rairuat mai Aux tak yuh krax pa ang pui lai doh keud ka kix, sonsang grai min ceu kaux kix khaing daux sinax pui khankix." ²⁷ Aux ang lhat ka krax pa song rhawm pui pa koeng Aux khankix, phan ang mawh nan pui koeng khankix tak koe krax pa yaw rangdi ka tokaux tix, phan ang mawh nan kix tak ah nin, "Riang rao khawn taix yix mawh pa ting lhaong mai inkix ang mawh Simiang Siyiex, pa hoik yuh inkix khawmuik." ²⁸ Mawh kheu kix mawh ceu pui pa ang koe krax keud mai pa ang koe krax tawng ceeix kawx. ²⁹ Kieh kix mawh pa koe pingnya cuyi mai tawng ka ceu inkix, sonsang pon keut gau kix dee sidah tix khaix in sax. ³⁰ Pui tix kaux sang pon pheet ka pui tix rheng yuh ka mawx? mai pui ra kaux sang pon kieh pui tix mheen to yuh ka mawx? Phan rang ting kix ang coh ti tawx ka kix mai phan Simiang Siyiex ang ap kix, ceu an tak lih koe yuh ka mawx? ³¹ Mawh kheu rang ting kix, ang awm rang ting cie ex, pui koeng ex khankix kawx, tokaux cao kix, tak pon krax prawng ca. ³² Mawh kheu nhu plix siiet kix, mawh simie plix siiet Sawdom mai mawh pa kuah daux haktiex Gawmawrax, plix siiet kix mawh pa song awm ghin, sigleem plix siiet kix mawh pa kied song tete. ³³ Rawm plix siiet kix mawh pa koe jai siyawng mai jai siuing pa kied caox khankix. ³⁴ In mawh pa priex ti deuh tau mai Aux mai mawh pa hoik tawk ti deuh cum ka daux krao sinngao cie Aux ang mawh lie? ³⁵ Pa pawk bix mai pa deeh plud khankix mawh cie Aux, caong kix tak cang klad yam hoek bawg yam. Mawh kheu singaix pa sang laux leeing kix hoik dex mai can pa sang hoek khankix, hoik mawh pa kied phai son kix. ³⁶ Mawh kheu Simiang Siyiex tak prawng ca ka ceu pui Nawh Cao mai koe krax caux rhawm piang siliex Nawh Cao khankix. Yam yaox Nawh Cao ka hoik grai siawp sibrawm kix mai ang lai koe pa pon luan khaing pa phyawk pa laung tix kaux kawx. ³⁷ Nawh Cao tak ah nin, "Siyiex krub kix koe dee mawx mai rang ting pa sawk kix tix peung koe dee mawh?" ³⁸ Pui mawx pa hoik ih ka pa appong kix mai pa hoik nyaux ka rawm plix siiet krax tan pa nyaux kix ot dee mawx? Kieh kix yaog ti kaoh mai teem ka pex mai kieh mawh dee peung pex. ³⁹ "Jhak ka krax pa mawh Aux, lheu khaing Aux, Siyiex tang kaux ang lai koe, Aux pah ju mai Aux deeh kieh im ju, Aux tawx krax mat mai Aux deeh pai moi, pui pa pon ti taoh glawd khaing daux tawm taix Aux ang koe tix kaux kawx. ⁴⁰ Aux yaog taix ti piang raoma mai tiextu ah nin, "Aux mawh pa im ju leeing ju. ⁴¹ Aux tak klaing vaig tix plang, taix Aux tak giex ka krax prawng krax ciyang, Aux tak deeh pawk bix tix, ka pui pa koeng Aux khankix mai deeh viied ka can pui pa koeng ka Aux. ⁴² Aux tak kieh te ak Aux khankix yoek ka nham mai vaig lawm Aux ih nex tau mai nham pa hoik pah tix mai ka pui pa giex laung Aux khankix, tom hoek ka kaing cao kaing pui pa koeng Aux khankix. ⁴³ Ceu pui tang ceu khankix eue, gaux rhawm tau mai ceu pui Nawh Cao, grawh grawng nawh, Nawh Cao tak deeh pawk bix tix ka son nham siliex tix khankix mai Nawh tak deeh prawng ca ka pui koeng pui khoi Nawh Cao khankix, Nawh Cao tak sigrhah pa seeing brai, khaing haktiex Nawh Cao mai khaing ceu pui Nawh Cao." ⁴⁴ Mawh kheu nan, Mose hoek tau mai Yawsux kawn simex Nun mai krai lox lai rhax in sonsang mhong pui khankix. ⁴⁵ Khaix hoik krai Mose gumlox in ka ceu pui Isarelax khankix, ⁴⁶ Nawh baox ah nin ka kix, "Gumlox pa hoik kham Aux mhai rug ka sinax pex daux in singaix, een ka rhawm pex mai tawm kawn praix tix, sonsang priex kix ti yuh, awm lox pa krai aux pa koe ka daux lox lai beenli khawmuik. ⁴⁷ Mawh kheu ankix, ang mawh ceu pa giex going ka son pex, mawh pa dex dawd mai ju pex, gumlox in tak kieh singaix im ju pex lang daux haktiex pa sang tiang pex plak toi rawm klawng Yawdan mai pon pex ti cie heue." ⁴⁸ Ka daux singaix an Simiang Siyiex krai ah nin ka Mose. ⁴⁹ "Haok ka gawng Abarim piang choek gawng Nebo, pa koe ka daux haktiex Mawbax see veng Yerikho mai simi tix yaox ka meung Khanan, pa tawx Aux ka kawn praix Isarelax awm pa sang pon kix tix cie, ⁵⁰ maix tak yum piang gawng pa hoik haok maix mai mawh pa deeh khrawm ti ka dee ot pui ceu maix khankix, awm hoik yum puxke maix Arun piang gawng Hawrax mai nawh hoik mawh pa deeh khrawm ti dee ot pui ceu nawh khankix. ⁵¹ Mawh kheu hoik lud maix ka Aux, sinax kawn praix Isarelax khankix, hawt dee lih rawm Meribax, ka yaong Kadesha, daux tiag Zina. Mawh kheu ang maix nab yam ka Aux, ka daux sinax pui Isarelax. ⁵² Viang maix yaox haktiex pa ah Aux ti sang tawx ka pui Isarelax khankix ka ngai tix kawx, maix tak ang yaox ti laig ka daux haktiex an heue."

¹ In mawh bwanson pa nawb Mose pa mawh pui Siyiex ka piang pui Isarelax khankix, sivoe sang yum nawh. ² Nawh ah nin, "Simiang Siyiex lih hoek khaing gawng Sina mai kieh singaix lih piang kix khaing gawng Sirax, Nawh Cao jhan riang tix khaing choek gawng Paran mai Nawh Cao lih hoek tau mai pui pa singax singeh tix mheen, khaing ka plak taix khawn dawm Nawh Cao, ngu gumlox beenli hoik lih ka son pui Isarelax. ³ Nawh Cao moh ka pui ceu ankix tete, pui pa singax singeh khawmuik hoik koe ka daux tawm taix Nawh Cao, kix ngawm hawt greem caong Nawh Cao mai kix nghiet lox sikah Nawh Cao. ⁴ Mose tawm gumlox beenli pa mawh sinngao ka son cub pui hun ceu pui Yakop khankix. ⁵ Yam khrawm cao kaing pui inkix mai doeh ceu pui Isarelax khankix paox tix tau, Nawh Cao mawh simiang ka daux Yeshurun. ⁶ "Kieh ceu pui Rubin khankix im ju paw kieh hoek krax yum mai paw kieh pui nawh tux." ⁷ Nawh krai ah nin ka ceu pui Yudax, "Simiang Siyiex eue, nghiet ka lox ceu pui Yudax khankix liak! mai viex nawh hoek ka pui ceu nawh, kieh taix nawh mawh pa yuh naing son nawh liak, kieh Maix Cao mawh pa teem nawh mai yuh pui koeng nawh khankix laux." ⁸ Mai nawh ah nin ka pui Lewix khankix, Simiang Siyiex eue, "Kieh Tumin mai Urim, be maix mawh pa koe tau mai pui pa singax maix pa hoik cheuk Maix tix yaox hawt baoh Masa ka pui pa hoik tieh feen ka Maix khankix, ka dee lih rawm keut Neribax liak." ⁹ Nawh mawh pui pa ah nin ka miex keeing tix, ang aux sax yaox pex mai ang tawng ka puxaik ti mai ka kawn praix tix, viang mawh nan, kix hoik mawh pa hawt ti yuh, awm gumlox Maix Cao mai hoik priex rien ka gumlox sijax mukheu Maix Cao. ¹⁰ Kix tak gau ceu pui Yakop khankix, ka lox tat jhawm prawng Maix Cao mai gau pui Isarelax khankix ka gumlox beenli Maix Cao, kix tak deuh nyawng bhawng plak sivoe Maix Cao mai pa appong kix son krax tan pa gleeing piang khu dee tan Maix Cao. ¹¹ Simiang Siyiex eue, nawb bwan piang kraung khrai nawh liak! mai rieb ti teei kaing ceu pa yuh nawh, ka taix ti khankix, raig ti tik nyoi pui pa yaog ti kaoh tieh feen ka nawh khankix, son ang kix lai baox pon yaog ti kaoh. ¹² Son ceu pui Binyamin nawh ah nin, "Ceu pui pa moh Simiang Siyiex yaox ti ot yiien yawg dex Nawh Cao, Nawh Cao tak priex rien nawh leeing lang singaix mai nawh tak ot ka sinax klip Nawh Cao, " ¹³ son pui Yosiep nawh ah nin, kieh Simiang Siyiex nawb bwan ka haktiex nawh, sinngao khaing raoma tau mai rawm ciex khankix mai can pa koe dee raux greem tiex, ¹⁴ plix khaox plix ox ceu pa laoh pa lie, pa kaoh khaing singaix, tau mai ceu pa laoh pa lie, pa kaoh khaing khix, ¹⁵ ceu pa nie lheu mhawm, pa kaoh khaing daux gawng didix, tau mai ceu pa laoh pa lie, pa kaoh khaing gawng lua leeing ju, ¹⁶ ceu pa laoh pa lie, pa kaoh khaing daux tiex mai ceu pa grum naog khankix mai bwanson Nawh Cao pa koe ka daux yeem khaox, kieh lih hoek piang kaing Yosiep mai piang mhok khri nawh pa mawh cao kaing daux puxaik tix. ¹⁷ Siawp sibrawm nawh, tak awm riang mawie mhaing Utapha mai rung nawh awm rung mawie praix, nawh tak teei ti tik ceu pui khankix, tom hoek dee sidah haktiex, kix mawh pui kaing mheen khaing ceu pui Epharem mai kix mawh pui kaing rheng khaing ceu pui Manashe. ¹⁸ Son ceu pui Zebulun nawh ah nin, "Ceu pui Zebulun khankix eue, gaux rhawm ka daux krax lih hu maix ka plak praix, ceu pui Issakha eue, gaux rhawm ka ot maix daux nyiex gox tix. ¹⁹ Kix tak kok ceu pui khankix hoek piang gawng mai tan krax tan pa appong ti khankix, ka daux pa rahsee, kix tak tik ceu pa naog ka daux rawm sigrit sigra mai kraung khrai pa mox tix daux mhaik khankix. ²⁰ Son ceu pui Gat nawh ah nin, "Kieh bwanson koe piang cao pa kieh haktiex pui Gat nie vieh mai nie ting, pui ceu an ot awm sivai sangsi mai riah ti tik plawng taix mai mhok khri pa koe piang kaing. ²¹ Nawh hoik laug ti teei nyum cie son tokaux cao tix sivoe, mawh kheu Simiang cao pa rahsee hoik gwieh ti deuh tan, Nawh hoik hoek tau mai cao kaing pui khankix mai nawh kwang ka pa rahsee Simiang Siyiex mai khawm krax prawng ca Nawh Cao, tau mai ceu pui Isarelax khankix." ²² Son ceu pui Dan nawh ah nin, pui Dan mawh kawn sivai sangsi, nawh tak yaog ti lih khaing haktiex Bashan." ²³ Son pui Napthalix nawh ah nin, "Ceu pui Napthalix khankix eue, kieh koe krax mag mi, tau mai pa nyawm rhawm mai pa grum naog ka daux bwanson Simiang Siyiex mai teei ti cie haktiex plak klip singaix, khawm baoh haktiex plak seh khankix." ²⁴ Son ceu pui Asha nawh ah nin, "Pui Asha kieh koe kawn praix pa kied koe bwanson, kieh nawh mawh pa khaw rhawm khaing puxaik nawh khankix mai kieh nawh cub caong tix daux rawm bee. ²⁵ Pang siviex maix khankix tak mawh pa yuh ka rhiem mai tawng, baux singaix im ju maix mai riang rao maix tak mawh pa koe awm an. ²⁶ Pui pa awm Siyiex Yeshurun pa brug meung raoma hoek, sonsang teem ka maix, tau mai siawp sibrawm tix piang paiawm ang lai koe pa lheu khaing nawh tix kaux kawx, ²⁷ Siyiex leeing ju, mawh dee een maix rhawm tix mai plawng taix leeing ju Nawh mawh pa teem ka maix, Nawh Cao tak grheu pui koeng khaing plak sivoe maix mai Nawh Cao kieh maix yuh kix laux leeing." ²⁸ Pui Isarelax khankix tak yaox ti ot daux pa yiien yawg, ka dee lih rawm keut pui Yakop nong nong mai daux haktiex pa koe nghox koi, khawm dee koe plix siiet pa khraox khankix, raoma tak kieh rawm ciex lih piang nawh. ²⁹ Pui Isarelax khankix eue, kieh maix koe krax gaux rhawm, pui pa hoik taoh Simiang Siyiex pa awm maix tak ang lai koe, Siyiex mawh pa tiebtie mai pa teem ka maix mai mawh vaig lawm cie maix, pui koeng maix khankix tak som plak sivoe maix, maix tak dig dee pa kied ting lhaong pa singax kix khawmuik heue.

¹ Mose lih khaing daux lung Mawbax mai haok piang gawng Nebo, ka choek gawng Pisaga, pa koe see plak toi veng Yerikho, Simiang Siyiex jhi nawh yaox haktiex Gilat khawmuik tom hoek ka veng Dan, ² tom hoek ka haktiex Napthalix mai haktiex Epharen khawm haktiex Manashe mai ka haktiex Yudax khawmuik, tom hoek ka rawm sigrit sigra plak klip singaix, ³ mai haktiex pa koe baoh plak seh, khawm daux lung daux ngawd pa koe baoh veng Yerikho pa mawh veng khaox jhie yaong, tom hoek ka baoh Zawrax. ⁴ Simiang Siyiex ah nin ka nawh, "In mawh haktiex pa hoik tiextu Aux ti tawx ka Abraham, Icak mai Yakop mai Nawh baox ah nin, "Aux tak sang tawx inkix ka doeh ru maix khankix, Aux hoik kieh maix yaox inkix, ka ngai tix, viang mawh nan maix tak ang pon ti tiang plak an." ⁵ Mawh kheu nan, Mose pa mawh siliex Simiang Siyiex yum daux haktiex Mawbax tan, awn gumlox sikah Simiang Siyiex. ⁶ Nawh Cao sipaung nawh ka daux ngawd, daux haktiex Mawbax, plak toi veng Biet Pegurax, viang mawh nan pui tix kaux kawx ang tawng ka dah dee simeeik nawh tom in singaix. ⁷ Yam yum Mose ju nawh hoik koe tix yieh tixnga num, ngai nawh ang nyang bax vuvi mai riang rao nawh kawx ang nyang bax dieh. ⁸ Kawn praix pui Isarelax khankix, doh keud mai yiiem doe son Mose ka daux lung Mawbax, tixngoe ngaix, mawh kheu nan, singaix yiiem kix mai singaix doh keud kix hoik sidah tin. ⁹ Yawsux kawn simex Nun naog mai khwan pingnya cuyi, kheu hoik deuh Mose taix tix piang nawh, mawh kheu nan, pui Isarelax khankix, cu nghiet ka nawh mai hawt yuh awm pa tawm Simiang Siyiex ka Mose. ¹⁰ Viang mawh nan, jah khaix singaix an, cao jhai pa awm Mose, ang lai lih tix koe daux pui Isarelax khankix tix kaux kawx, pa hoik yaox Simiang Siyiex plakngai taw plakngai, ¹¹ mhai rug mai khawm pa daox deng pa hoik ploi Simiang Siyiex nawh hu daux meung Ejiptux, plak sivoe Pharaw mai plak sivoe cao kaing greem nawh khankix mai daux haktiex nawh khawmuik, ¹² tau mai siawp sibrawm pa ting riang rao ankix khawmuik mai krax lhat graung pa kied ting an kix khawmuik, pa hoik yuh Mose plak sivoe ngai ceu pui Isarelax khankix heue.