Daniel

Daniel

¹ Daux num kwang Yawyakim simiang meung Yudax loe num tix num, Nebukhaneza simiang haktiex Babulon hoik hoek ka veng Yerusaliem mai lai lawm ka veng heue. ² Siyiex hoik ap ti tawx Yawyakim simiang meung Yudax ka daux tawm taix nawh mai khawm kraung khrai pa shiao daux nyiex bwan Siyiex khankix tiblah mai nawh hoik teei ti viex ankix ing ka daux haktiex Shina ka dee koe nyiex siyiex nawh mai nawh hoik sau kraung khrai ankix laig ka daux nyiex krao sinngao siyiex nawh heue. ³ Khaix an simiang tawx lox ka Ashapenat pa mawh cao kaing ting pui sieh pa kwang cub laux simiang khankix, sonsang teei nawh tix viex kawn praix ceu pui Isarelax khankix tiblah mai khawm doeh ru simiang tiblah mai khawm can pui ting lhaong khankix tiblah. ⁴ Pui awn ju pa ang koe dee ne raw mai pa mhawm grang khankix, pa hoik grum naog ka pingnya cuyi mai pa koe krax tawng yung mai pa lhak lhiem tiem phai sonsang pon yuh kaing jhaw ka daux nyiex haw mai pa mawh pui pa tak sang pon gau tix chix lox mai lai ceu pui Khaladie khankix heue. ⁵ Simiang hoik deuh priex pa ih pa nyawm pa tie cie tix ka son kix ku singaix mai khawm rawm plix siiet pa nyaux nawh mai tawx krax gau ka kix loe num mai yam hoik sidah ka daux bawg yam an, kix tak pon yaox ti yuh kaing jhaw ka plak sivoe simiang heue. ⁶ Khaing daux sinax kix koe ceu pui Yudax pa mawh Danyelax, Hananix, Mishelax mai Azariyax khankix heue. ⁷ Cao kaing ting pui sieh pa kwang cub laux simiang khankix hoik sum ceu kaux pa khraox ka kix, Danyelax kok mawh Belatashaza, Hananix kok mawh Shadariet, Mishelax kok mawh Meshak mai Azariyax kok mawh Abedanego heue. ⁸ Viang mawh nan, Dayelax hoik but rhawm tix, son ang nawh yuh tokaux tix seeing ka priex pa ih pa nyawm pa tie cie simiang mai ka rawm plix siiet pa nyaux nawh khankix heue. Mawh kheu nan, nawh hoik rawg akhwang ka cao kaing ting pui sieh pa kwang ka cub laux simiang khankix son ang nawh sang yuh tokaux tix seeing heue. ⁹ Siyiex hoik kieh Dayelax pon bwanson krax caux rhawm ka plak sivoe ngai cao kaing ting pui sieh pa kwang ka cub laux simiang khankix heue. ¹⁰ Cao kaing ting pa kwang cub laux simiang khankix ah nin ka Danyelax, "Aux lhat graung ka cao aux pa mawh simiang mai pa hoik tat ti deuh ceu pa ih mai pa nyaux pex heue. Grawh grawng nawh, phan nawh yaox ka pakngai baox pex koe krax mhawm grang awm pui awn ju paox graoh paox gru pex sang yuh ka mawh lie? Khaix an pex tak kieh aux se kaing tix ka plak sivoe simiang heue. ¹¹ Danyelax deeh ah nin ka cao khan kheu priex piang Danyelax, Hananix, Mishelax, Azariyax khankix, pa hoik deuh cao kaing ting pui sieh pa kwang ka laux simiang khankix heue. ¹² Yuh bwanson, cheu ti yaox siliex maix khankix son kao singaix mai tawx ih taux lhax mai rawm nyaux ngie, ¹³ Khaix an kieh maix jhak ti yaox pakngai yix mai khawm pakngai pui awn ju khankix, pa yaox ti ih priex nyawm priex tie cie simiang mai yuh awm pa yaox ka mawh pa khaw caw ka siliex maix khankix liak." ¹⁴ Nawh hoik koe krax khaw rhawm ka kix ka grawng in mai hoik cheu ti yaox kix kao singaix heue. ¹⁵ Yam hoik sidah kao singaix, pakngai kix hoik nie lheu mhawm mai nie lheu kluing khaing pui awn ju an khankix, pa hoik ih priex pa nyawm pa tie cie simiang heue. ¹⁶ Mawh kheu nan, cao khan kheu priex hoik teei priex pa nyawm pa tie cie kix mai rawm plix siiet pa caw kix tix sang nyaux khankix hu mai tawx kix ih taux lhax heue. ¹⁷ Ka pui awn ju inkix pon kaux, Siyiex hoik tawx kix koe krax tawng kra yung mai krax lhak lhiem ka ngai lai mai pingnya cuyi khawmuik mai Danyelax hoik koe krax chix tawng pa plak jhi mai grawng dee bleeh camaox khankix khawmuik heue. ¹⁸ Yam hoik naog singaix pa ah simiang ti kieh kix mawh pa viex ti hoek ka daux nyiex haw, cao kaing ting pui sieh pa kwang cub laux simiang khankix hoik viex kix hoek ka plak sivoe Nebukhaneza heue. ¹⁹ Simiang chawk ti yaox kix, ka daux sinax kix ang lai yaox pa sidu awm Danyelax Hananix Mishielax mai Azariyax khankix tix kaux kawx heue. Mawh kheu nan, kix hoik yaox ti yuh kaing plak sivoe simiang heue. ²⁰ Grawng pingnya cuyi mai krax pa tawng pa yung pa hoik chawk cheng simiang ti yaox ka kix, nawh hoik yaox nie lheu chix kix kao son khaing pui ting pingnya cuyi mai cao pa chix sibawk khankix khawmuik pa hoik koe ka daux haktiex pa kwang nawh khawmuik heue. ²¹ Mawh kheu nan, Danyelax hoik yaox ti ot tan, tom hoek num jah simiang Kurux ti kwang ka haktiex heue.

¹ Ka daux num kwang simiang Nebukhaneza ka haktiex ra num tix num, nawh hoik camaox mai rhawm nawh hoik kied lukliak mai nawh ang lai pon ti laig it ka jao heue. ² Khaix an simiang tawx lox tix hu sonsang kok ka pui ting pingnya cuyi khankix mai cao pa chix sibawk mai cao pa chix simeed chix sat khankix mai khawm pui Khaladie khankix hoek, sonsang krai pa camaox simiang heue. Mawh kheu nan, kix hoik hoek cung ka plak sivoe simiang heue. ³ Simiang ah nin ka kix, "Aux hoik camaox tix ceu mai rhawm aux hoik kied koe krax pa khi ka sang tawng ka grawng camaox an heue." ⁴ Pui ting pingnya cuyi Khaladie khankix, sikah mai simiang ka plak lox ceu pui Asurix ah nin, "Kieh simiang lang ju heue. Krai siliex maix khankix mhong grawng pa camaox an kix mai ex tak sang deeh krai dee bleeh heue." ⁵ Simiang deeh pawk lox pui Khaladie khankix ah nin, "Grawng in aux hoik tat ti deuh phan pex ang pon krai grawng camaox mai khawm dee bleeh ka aux, tak sang gaing pex tom phawng, mai nyiex ma pex tak sang mawh pum phon heue. ⁶ Phan pex pon krai grawng camaox an mai dee bleeh nawh pex tak pon rieb ti teei totaix khankix khaing aux mai khawm pa yaog min plakngai pa ting lhaong khankix heue. Mawh kheu nan, krai aux mhong grawng camaox mai khawm dee bleeh nawh khankix heue." ⁷ Kix deeh pawk lox ra bawg tix bawg ah nin, "Kieh simiang krai grawng pa camaox ka siliex tix khankix mai ex tak sang krai dee bleeh heue." ⁸ Simiang deeh pawk lox ah nin, "Au tawng su pex ti yuh bawg yam rheung, mawh kheu tawng pex aux hoik piawm ka camaox an heue. ⁹ Phan pex ang pon krai grawng camaox an ka aux, krax pa keud koe ngie tix ceu son pex heue. Grawh grawng nawh, pex hoik khre tix sang krai lox pie lhen mai lox pa ang koe cee khankix ka plak sivoe aux tom hoik tieh loh bawg yam tix heue. Mawh kheu nan, krai aux mhong grawng pa camaox an mai aux tak tawng pon krai pex dee bleeh nawh khankix ka aux heue." ¹⁰ Pui Khaladie khankix deeh pawk lox simiang ah nin, "Pui pa pon krai grawng pa chawk simiang ang lai koe tix kaux kawx piang haktiex heue. Mawh kheu simiang ang ah, mai cao pa kwang ang ah, ang koe tix kaux kawx pasax mhaing grawng ceu pa awm in ka pui pa ting pingnya cuyi mai pa chix sibawk khankix ang ah mai ka pui Khaladie khankix heue. ¹¹ "Grawng pa chawk simiang in mawh pa kied nu, lheu khaing Siyiex ang koe pui tix kaux kawx pa sang pon krai ka plak sivoe simiang heue." ¹² Kheu jao grawng in, simiang hoik kied song rhawm mai kied saux rhawm mai tawx gumlox sonsang yuh pui pa ting pingnya cuyi, khaing daux haktiex Babulon khankix laux leeing khawmuik heue. ¹³ Mawh kheu nan, hoik tawx gumlox lih hu, sonsang pah ka pui pa ting pingnya cuyi khankix yum mai kix hu sawg ka Danyelax mai paox grawm nawh khankix, sonsang pah kix yum heue. ¹⁴ Khaix an Danyelax deeh pawk tix krai lox mhawm ka Arok, pa mawh cao kaing naing cub lien pa pau simiang khankix, pa hoik lih hu ti sang pah pui ting pingnya cuyi haktiex Babulon khankix yum, ¹⁵ Nawh pawk lox mai ah nin ka Arok, pa mawh cao kaing naing cub lien pa pau simiang khankix, gumlox pa tawx simiang kied phai yuh nin yuh ka mawx lie? "Khaix an Arok hoik kieh Danyelax tawng ka grawng lox pa hoik tat tix heue. ¹⁶ Danyelax hu laig ka daux nyiex haw mai rawg mhaing bawg yam ka simiang, sonsang pon krai dee bleeh grawng camaox an ka simiang heue. ¹⁷ Khaix an Danyelax deeh ing ka dee ot tix mai krai grawng in ka Hananix, Mishielax mai Azariyax, pa mawh paox grawm nawh khankix, ¹⁸ sonsang rawg mhaing kix krax caux rhawm ka Siyiex piang raoma, sonsang plak jhi grawng pa raux mox in mai son ang Danyelax mai can paox grawm nawh khankix pon tix laux leeing tau mai pui pa ting pingnya cuyi ka daux haktiex Babulon pa kawn deuk an khankix heue. ¹⁹ Grawng pa raux mox in, hoik plak jhi kieh Danyelax yaox riang susai ka daux pon sawm heue. Mawh kheu nan, Danyelax hoik yaogyaw bwanson ka Siyiex piang raoma heue. ²⁰ Danyelax ah nin, "Kieh ceu kaux Siyiex mawh pa koe bwanson leeing ju heue. Grawh grawng nawh, pingnya cuyi mai riang rao sibrawm mawh cie Nawh Cao heue. ²¹ Nawh Cao tieh loh ka bawg yam mai khawm ka praix klawng khankix, Nawh Cao gah ti tik simiang mai pa yaog ti deuh simiang khankix, Nawh Cao tawx pingnya cuyi ka pa koe pingnya cuyi mai krax tawng ka pui an kix pa koe krax lhak lhiem heue. ²² Nawh Cao hoik jhi ceu pa raux mox khankix, Nawh Cao tawng ka ceu pa koe ka daux pa faik mai pa riang ot ka daux Nawh Cao heue. ²³ "Siyiex keeing aux khankix eue, aux ting bwanson ka Maix Cao mai yaogyaw ka Maix Cao heue. Maix Cao hoik tawx aux koe pingnya cuyi mai riang rao sibrawm khankix mai hoik kieh aux tawng ka ceu pa rawg mhaing ex ka Maix Cao heue. Grawh grawng nawh, Maix Cao hoik kieh yix tawng ka grawng ceu pa chawk simiang heue." ²⁴ Mawh kheu nan, Danyelax hu ka Arok, pa mawh pui pa hoik tawx simiang beeh glawm pa sang yuh pui ting pingnya cuyi haktiex Babulon khankix laux leeing, ah nin ka nawh, "Paw yuh pui ting pingnya cuyi haktiex Babulon khankix laux leeing liak. Viex aux hu ka plak sivoe simiang mai aux tak sang krai simiang mhong dee bleeh grawng pa camaox an heue." ²⁵ Khaix an Arok nied ti viex Danyelax hoek ka plak sivoe simiang mai ah nin ka nawh, "Aux hoik yaox pui tix kaux khaing daux pui pa giex laung ceu pui Yudax pa mawh pui pa tak sang pon krai simiang mhong ka dee bleeh grawng camaox an heue." ²⁶ Simiang deeh ah nin ka Danyelax, pa hoik kok ceu kaux mawh Delatashaza heue. "Mawh pon krai maix aux mhong grawng pa caomaox pa hoik yaox aux mai khawm dee bleeh nawh lie?" ²⁷ Danyelax deeh pawk lox ka plak sivoe ngai simiang ah nin, "Grawng ceu pa raux mox pa hoik chawk maix simiang khankix pui ting pingnya cuyi khankix, cao pa chix sibawk, cao pa chix jhak lai taix mai cao pa chix tawng singaix pa sang hoek khankix ang pon krai grawng ankix ka simiang heue. ²⁸ "Mawh ngie Siyiex piang raoma tix kaux khaing pa pon plak jhi grawng pa raux mox an khankix mai Nawh hoik jhi simiang Nebukhaneza tawng ka ceu pa tak sang lih ti koe ka daux singaix pa sang hoek khaix in heue. Grawng pa camaox maix mai riang susai pa koe daux dong maix piang dee it maix hoik awm inkix heue." ²⁹ "Simiang eue, phan mawh pa keud maix grawng pa tak sang hoek yam kawn ot maix piang dee it tix mai Nawh Cao hoik plak jhi ceu pa raux mox khankix mai hoik jhi maix tawng ka grawng ceu pa tak sang lih ti koe khaix in heue." ³⁰ Phan mawh ka son aux grawng pa raux mox in hoik plak jhi ka aux, mawh kheu nie lheu koe pingnya cuyi aux khaing can ceu pa im ju khankix khawmuik ang mawh, hoik mawh sonsang kieh simiang tawng ka dee bleeh grawng pa camaox an mai krax keud maix ka rhawm tix heue." ³¹ Simiang eue, maix hoik camaox ti yaox riang grang pa ting tix mu, pa kied ting lhaong, pa kied pruh riang mai an hoik jung ti ot ka plak sivoe maix mai grang pakpeung nawh mawh pa koe krax pa lhat kah heue. ³² "Kaing riang grang in mawh khri ceu pa mhawm, naok nawh mai plawng taix nawh mawh mau, vaig nawh mai nyoi nawh mawh tawng lheung, ³³ ba nawh mawh rhiem mai caong nawh mawh rhiem tix plak mai tiex tix plak heue. ³⁴ Yam jhak maix lon simaox tix lon pa ang pui yuh ka taix tix lih dheem piang caong riang grang an, pa mawh rhiem tix plak mai tiex tix plak pot phawng heue. ³⁵ Khaix an rhiem, tawng lheung mai mau khri khankix hoik phawng tix max tau mai hoik lih ti awm grhip nghox khaing daux biang pauh pui nghox daux bawg yam rung mai bhaung hoik phlu khankix luan tom ang lai yaox rhoi heue. Lon simaox pa hoik dheem riang grang an hoik lih ti mawh gawng pa ting lhaong tix mu mai hoik naog piang haktiex khawmuik khawm leeing heue. ³⁶ "In mawh grawng pa camaox maix heue. Yam in, yix tak sang krai dee bleeh grawng pa camaox an ka plak sivoe simiang heue. ³⁷ Simiang eue, maix mawh simiang piang simiang khankix heue. Siyiex pa ot piang meung raoma, hoik tawx maix cie meung haktiex khawm siawp sibrawm mai riang rao pa ting lhaong mai min pakngai khankix, ³⁸ mai kawn pui khankix pa ot dee mawx ang ah, totiag piang haktiex mai sim daux raoma khankix ang ah, Nawh Cao hoik tawx an kix ka daux tawm taix maix mai hoik kieh maix kwang piang ankix khawmuik heue. Maix tom mawh kaing khri an heue. ³⁹ Khaix maix meung tang meung tak sang yaog tix deeh kaoh tix meung khaix an, meung pa ang awm maix, pa mawh meung tawng lheung an loe meung tix meung tak sang lih ti koe mai tak sang kwang piang haktiex khawmuik heue. ⁴⁰ Meung pon meung tix meung tak sang awm rhiem pa kiien mai awm krax pon kieh rhiem ceu an khankix pot tix max mai phawng, meung an tak sang yuh laux mai phawng yuh meung tang dah khankix khawmuik heue. ⁴¹ Ka dee hoik yaox maix caong mai gien caong khankix pa mawh tiex glaox pa shiao cao pa yuh aw tix, tix plak mai rhiem tix plak, meung an tak sang mawh pa gwieh tix hu heue. Viang mawh nan, krax pa kaux cong rhiem tak sang kawn koe ka daux nawh awm hoik yaox maix klu klao rhiem tix mai tiex glaox tau heue. ⁴² Awm hoik mawh giien caong an khankix rhiem tix plak mai tiex glaox tix plak, awm an meung an tak sang mawh pa kaux cong tix plak mai pa chix max chix laux leeing tix plak heue. ⁴³ Awm hoik yaox maix ka hoik klu klao rhiem tix tau mai tiex glaox, kix tak mawh pa klu klao tix tau mai pui tang ceu khankix mai kix tak ang pon neuex tix ot tau mai paox tix, awm ang rhiem chix neuex tix tau mai tiex glaox heue. ⁴⁴ Ka daux baux ju singaix simiang inkix, Siyiex piang raoma tak sang yaog tix pang meung pa tak ang chix koe krax laux leeing tix meung mai meung an tak ang lai mawh pa prah tix ka daux pui tang ceu khankix heue.Meung in tak sang yuh laux leeing mai phawng yuh meung ankix mai nawh tak kaux cong leeing ju heue. ⁴⁵ Awm pa hoik yaox maix mawh lon simaox tix lon pa hoik lih khaing gawng ka pa ang yuh ka taix tix mai lon simaox an hoik dheem rhiem, tawng lheung mai tiex glaox, mau mai khri khankix phawng, Siyiex pa ting lhaong, hoik jhi simiang tawng ka ceu pa tak sang bleeh tix hoek khaix in heue. Grawng pa camaox in rug mawh tete mai dee bleeh nawh khankix kawx mawh pa mawh meh tete heue." ⁴⁶ Yam an, simiang Nebukhaneza, gup ti krub ka Danyelax mai tawx lox tix sonsang yuh kix tix tawx krax tan mai nyawng bhawng ka son nawh heue. ⁴⁷ Simiang deeh pawk lox ka Danyelax ah nin, "Siyiex maix mawh Siyiex piang Siyiex khankix tete mai mawh Siyiex piang simiang khankix mai cao pa plak jhi ceu pa raux mox khankix, mawh kheu maix hoik plak jhi ka ceu pa raux mox in heue." ⁴⁸ Khaix an simiang hoik ghaok Ara Danyelax mai hoik tawx totaix ceu pa ting lhaong khankix tom nie mai hoik kieh nawh mawh cao pa kwang piang baoh haktiex veng Babulon khankix khawmuik khawm leeing mai mawh cao kaing ting pa kwang piang pui pa ting pingnya cuyi haktiex veng Babulon khankix khawmuik heue. ⁴⁹ Danyelax deeh khyox khaw lox ka simiang mai nawh hoik yaog ti deuh Shadariet, Meshak mai Abedanego, khankix kwang ka piang kaing jhaw haktiex veng Babulon khankix heue. Viang mawh nan, Danyelax hoik yaox ti ot ka daux nyiex haw simiang heue.

¹ Nebukhaneza pa mawh simiang hoik yuh riang grang khri tix mu, krax lhaong koe tixgliah sawk mai krax vieh koe liah sawk heue. Nawh yaog tix hu deuh an, ka daux lung Dura, daux haktiex veng Babulon khankix heue. ² Simiang Nebukhaneza hoik ploi pui hu kraix khrawm cub simiang cao fa khankix mai cao pa kwang haktiex khankix, cao pa kwang veng khankix, cao pa tawx krax khankix, cao pa koh keun khankix, cao pa prawng see khankix, cao pa koe sibrawm khankix mai cao kaing haktiex khankix hoek tau, sonsang yuh pawie pa appong ka riang grang pa hoik jung simiang Nebukhaneza ti deuh heue. ³ Mawh keu nan, simiang cao fa khankix, cao pa kwang haktiex khankix, cao pa kwang veng khankix, cao pa tawx krax keud khankix, cao pa koh keun khankix, cao pa prawng see khankix, cao pa koe sibrawm khankix mai cao kaing haktiex khankix khawmuik hoik khrawm paox tix hoek sonsang yuh pawie pa appong riang grang pa hoik jung simiang Nebukhaneza ti deuh mai kix hoik cung ka plak sivoe riang rao pa hoik jung Nebukhaneza heue. ⁴ Khaix an cao pa pao ti krai lox tix kaux hoik kok yo lox tix tom ting ah nin, "Pui khankix, ceu pui khankix mai pa chix sikah lox kuceu khankix eue, koe gumlox pa tawx son pex, ⁵ yam mhong pex lox sinum teet, shiao, ting si, kraung, pi byang mai ting plah khaox khankix, pa luah tix sinum tau mai lox rhax khankix kuceu, pex tak gup tix krub ka riang grang khri pa hoik jung simiang Nebukhaneza heue. ⁶ Can pui pa ang gup ti krub ka riang grang an tak sang taing tik ti sau dom mawx dom an ka daux glah ngu pa kied hax an heue." ⁷ Mawh kheu nan, yam hoik mhong pui khankix ka lox sinum luah teet, shiao, ting si, kraung mai pi byang khankix ka lox lai rhax kuceu khawmuik, pui khawmuik mai ceu pui khankix mai pa sikah lox kuceu khankix hoik gup tix krub ka riang grang khri pa hoik jung simiang Nebukhaneza heue. ⁸ Yam an, pui Khaladie khankix tiblah hoek ka plak sivoe mai deuh phimap piang pui Yudax khankix heue. ⁹ Kix ah nin ka simiang Nebukhaneza, "Kieh simiang lang ju heue. ¹⁰ Simiang eue, maix hoik tawx gumlox ti ah nin, can pui pa mhong lox sinum luah teet, shiao, ting si, kraung, pi byang mai ting plah khaox khankix yam sinum lox lai rhax khankix tix dom neh, pui khankix tak gup ti krub ka riang grang khri an, ¹¹ mai can pui pa ang gup ti krub ka riang grang an, tak sang taing ti sau ka daux glah ngu pa kied hax an heue. ¹² Yam in koe pui Yudax tiblah pui pa hoik deuh maix mawh cao pa kwang piang grawng kaing haktiex daux veng Babulon khankix, Shadariet, Meshak mai Abedanego, pui inkix ang cu ti tawx krax nab yam ka son grawng ceu pa dex dawd ka maix heue. Kix ang cu ti yuh kaing jhaw siyiex maix khankix mai ang cu tix krub ka riang grang khri pa hoik jung maix heue." ¹³ Yam an, simiang Nebukhaneza, hoik kied song rhawm mai kied saux rhawm mai nawh hoik tawx lox tix hu kok Shadariet, Meshak mai Abedanego khankix hoek heue. Mawh kheu nan, kix hoik viex pui inkix hoek ka plak sivoe simiang heue. ¹⁴ Nebukhaneza ah nin ka kix, "Shadariet, Meshak mai Abedanego khankix eue, mawh su pex tix ang yuh kaing jhaw siyiex aux khankix mai ang cu tix krub ka riang grang khri pa hoik jung aux lie? ¹⁵ Yam in phan pex baox mhong lox sinum luah teet, shiao, ting si, kraung, pi byang mai ting plah khaox khankix, tau mai lox lai rhax khankix kuceu phan pex gup ti krub ka riang grang pa hoik yuh aux ti deuh an tak mawh ceu pa mhawm heue. Viang mawh nan, phan pex ang cu ti krub ka an, pex tak mawh pa taing ti sau ka daux glah ngu pa kied hax an dom mawx dom an heue. Mawh Siyiex mawx pa tak sang pon taoh ti teei pex khaing daux tawm taix aux lie?" ¹⁶ Shadariet, Meshak mai Abedanego, khankix, deeh pawk lox ah nin ka simiang, "Nebukhaneza eue, yix ang lai koe lox sang deeh pawk ka maix ka daux son grawng in heue. ¹⁷ Phan an lih ti mawh nin, Siyiex pa krub yix mai pa yuh yix ti tawx kaing jhaw, mawh pa pon deeh taoh yix khaing daux glah ngu pa kied hax an, simiang eue, Nawh Cao tak deeh taoh yix khaing daux tawm taix maix heue. ¹⁸ Viang ang mawh nan kawx, simiang eue, kieh maix tawng ka ang yix yuh ti tawx kaing jhaw siyiex maix khankix mai ang yix krub ka riang khri pa hoik jung maix ti deuh awx." ¹⁹ Yam an, Nebukhaneza hoik kied naog ka daux pa song rhawm mai hoik tieh ngai baoh tix ka Shadariet, Meshak mai Abedanego khankix heue. Mawh kheu nan, nawh tawx lox tix mai kieh kix deeh seeh glah ngu an nie lheu hax khaing sivoe an aliah son heue. ²⁰ Nawh tawx lox ka pui ting riang rao pa cong khankix, pa koe daux cub kru naing nawh sonsang phyawk ka Shadariet, Meshak mai Abedanego mai taing kix ka daux glah ngu pa kied hax an heue. ²¹ Pui inkix hoik phyawk ti tau mai khawm sibex, khlax, mhok mai kraung ceep tang ceu kix mai taing tix sau kix ka daux glah ngu pa kied hax an heue. ²² Mawh kheu kied nied gumlox pa tawx simiang mai kheu jao kied hax glah ngu an, rao ngu khankix hoik voeg pui an kix pa teei ti sau Shadariet, Meshak mai Abedanego khankix yum heue. ²³ Pui inkix loe kaux pa mawh Shadriet, Meshak mai Abedanego khankix hoik phyawk ti tau mai hoik cod ka daux glah ngu pa kied hax an heue. ²⁴ Yan an simiang Nebukhaneza, hoik kied daox deng mai nied yaog ti kaoh ah nin ka cao pa tawx krax keud nawh khankix, "Pui pa phyawk ex ti taing daux glah ngu ang mawh loe kaux lie?" Kix deeh pawk ah nin ka simiang, "Simiang eue, mawh heue." ²⁵ Simiang deeh pawk ah nin, "Jhak heue, aux yaox pui pon kaux pa ang tie phyawk tix mai lailing ti hu ka daux glah ngu mai kix ang tie mat pie ceeix kawx mai pakpeung pui pon kaux tix kaux an mawh pa awm kawn Siyiex heue." ²⁶ Khaix an simiang Nebukhaneza hu hawt dex daux moing glah ngu pa kied hax an ah nin, "Shadariet, Meshak mai Abedanego, pa mawh siliex Siyiex pa kied ting lhaong eue, lih mai hoek tin!" Shadriet, Meshak mai Abedanego, khankix hoik lih khaing daux glah ngu heue. ²⁷ Simiang cao fa khankix, cao pa kwang haktiex khankix, cao pa kwang veng khankix mai cub cao pa tawx krax keud ka simiang khankix hoik kraix khrawm paox tix hoek jhak mai kix hoik yaox pui inkix ang ngu tie koe sibrawm ti hax yuh tokaux kix mai hauk kaing kix ang lai koe khaix hax mai kraung ceep kix kawx ang lai koe krax pa sioe meet ngu heue. ²⁸ Simiang Nebukhaneza ah nin, "Kieh Siyiex Shadariet, Meshak mai Abedanego koe bwanson heue. Nawh Cao ploi kawncau tix taoh ka siliex Nawh khankix pa koe krax yum rhawm mai een rhawm ka Nawh Cao mai kix hoik lheu ka gumlox simiang mai hoik ap ti tawx tokaux tix son ang kix pon yuh ti tawx kaing jhaw mai ang cu ti krub ka siyiex tang kaux lheu khaing Siyiex kix heue. ²⁹ Yam in, aux tawx lox tix ka ceu pui tix ang ah, pui meung mawx ang ah mai pa sikah lox kuceu khankix ang ah, pa ah lox lud ka Siyiex Shadariet, Meshak mai Abedanego khankix tak sang mawh pa gam tix phawng mai nyiex kix tak sang mawh pum phon, mawh kheu ang lai koe siyiex tang kaux tang hak pa pon yuh krax taoh awm in heue." ³⁰ Yam an, simiang hoik deeh yaog Ara Shadariet, Meshak mai Abedanego, khankix ting ka daux haktiex veng Babulon heue.

¹ Simiang Nebukhaneza tawm lox ka pui khawmuik kudah dee ku meung mai ceu pui pa sikah lox kuceu khankix, pa ot piang haktiex khawmuik kieh krax pa nhim haoh hun naog piang pex heue. ² Aux gaux rhawm ti krai pao ka grawng mhai rug pa daox deng, pa hoik yuh Siyiex pa kied ting lhaong ka son aux heue. ³ Mhai rug Nawh khankix mawh pa ting miex ding, krax pa daox deng Nawh khankix mawh pa koe sibrawm miex ding, meung Nawh mawh pa koe leeing ju mai sibrawm Nawh Cao mawh pa koe ku ju leeing ju heue. ⁴ Aux pa mawh Nebukhaneza, hoik laux lee tix ka daux nyiex haw aux mai yaox ti magmi haok hwan ka daux nyiex haw tix heue. ⁵ Aux hoik koe grawng pa camaox tix ceu pa hoik kieh aux koe krax lhat graung mai krax pa keud khankix ka piang dee it tix mai riang susai ka daux dong aux kankix hoik tawx krax sikua rhawm aux heue. ⁶ Mawh kheu nan, aux hoik tawx Gumlox tix sonsang kok pui pa koe pingnya cuyi haktiex Babulon khankix hoek ka plak sivoe ngai aux khawmuik, nhie kix krai aux mhong dee bleeh grawng pa camaox aux heue. ⁷ Khaix an pui ting pingnya cuyi khankix, cao pa chix sibawk, cao pa chix tawng singaix sang hoek khankix, hoek mai aux hoik krai kix mhong grawng pa camaox aux heue. Viang mawh kawx nan, kix ang pon krai aux tawng dee bleeh heue. ⁸ Ghoik khaix Danyelax hoek ka plak sivoe aux, pa kok nawh mawh Balatashaza, awm ceu kaux siyiex aux, ka daux nawh koe khwan singax Siyiex mai aux hoik krai nawh mhong grawng pa camaox ah nin, ⁹ Balatashaza, pa mawh cao kaing ting cub pui pa koe pingnya cuyi khankix eue, kheu tawng aux koe khwan singax Siyiex ka daux maix mai ceu pa raux mox ankix ang lai mawh pa nu pa khawm ka maix, ¹⁰ "Inkix hoik mawh riang susai pa koe daux dong aux, yam kawn it aux piang ku it tix heue. Aux hoik yaox ka koe gaw khaox tix gaw ka daux sigreung haktiex, pa kied ting lhaong heue. ¹¹ Gaw khaox an haok huan mai lih ti mawh pa kaux cong, lhaong tom hoek ka raoma mai pon ti yaox an ka dee sidah sidu haktiex khawmuik heue. ¹² Lhax nawh khankix kied mhawm grang, plix nawh khankix hoik kied teen mai ka daux an, hoik koe ceu pa ih son ceu pa im ju khawmuik heue. Totiag daux tiagtu khankix hoik yaox ti ot greem veei nawh heue. Sim sai daux raoma khankix hoik ban tix ot piang kak nawh khankix mai ceu pa koe nex nham khankix hoik yaox ti ih ceu pa ih khaing khaox an heue. ¹³ Aux hoik yaox riang susai ka daux dong aux, yam kawn it aux piang ku it tix mai yaox ka cao pa pau tix kaux pa singax singeh, pa lih hoek khaing daux raoma heue." ¹⁴ Nawh kok yo lox ting pa ah nin, "Kid khaox in goh mai kid tik kak nawh khankix, puat lhax nawh khankix khrum mai prung prang ti tik plix nawh heue. Kieh totiag khankix lih hu khaing greem nawh mai kieh sim khankix lih hu khaing piang kak nawh khankix heue. ¹⁵ Viang mawh nan, ca kawn prah num khaox an mai riah nawh khankix ka daux tiex mai vie ti deuh nawh ka rhiem mai maox tawng lheung khankix mai deuh nawh ka daux sinax rib riem pa klai khankix ka daux tong heue. Kieh nawh caux ka rawm ciex daux raoma mai kieh nawh sawm tau mai totiag khankix piang rib riem pa koe piang tiex heue. ¹⁶ Kieh rhawm nawh tieh loh tix, ang lai mawh rhawm pui, tawx nawh koe rhawm totiag tix mu mai kieh bawg yam khankix tiang tix luan piang nawh aliah num heue. ¹⁷ Grawng lox pa hoik tat in mawh pa kaoh khaing cao pa pau mai mawh gumlox pa tawx pa kaoh khaing Kaw pa singax singeh, sonsang pon ceu pa im ju khankix tix tawng, ka kwang Siyiex pa kied ting lhaong ka daux meung haktiex mai kawn pui khankix, tawx an kix ka pui pa koe rhawm Nawh Cao ti tawx mai hoik yuh ti deuh pui pa kied tiem min sibrawm khankix kwang piang haktiex heue. ¹⁸ In mawh grawng pa camaox aux simiang Nebukhaneza heue. Belatashaza eue, krai grawng dee beeh camaox an ka aux liak, mawh kheu ang pui koe pingnya cuyi daux meung haktiex aux khankix lai pon krai aux tawng dee bleeh grawng pa camaox an heue. Mawh ngie maix pa pon krai dee bleeh grawng camaox aux, kheu koe khwan singax Siyiex ka daux maix heue." ¹⁹ Khaix an Danyelax, pa kok ceu kaux mawh Belatashaza, hoik kied koe pa daox deng ka been ticu mai nawh khi rhawm ka heue. Mawh kheu nan, simiang ah nin, "Belatashaza eue, paw kieh grawng pa camaox in mai khawm dee bleeh nawh khankix tawx krax pa khi rhawm ka maix liak." Belatashaza deeh pawk ah nin, "Cao aux eue, kieh grawng pa camaox an mawh pa dex dawd mai pui ankix pa koeng ka maix, mai kieh dee bleeh nawh mawh son pa dex dawd ka pui koeng pui khoi maix khankix heue. ²⁰ Ka gaw khaox pa hoik yaox maix haok hwan mai hoik lih ti mawh pa kaux cong mai pa lhaong hoek tom ka raoma mai pa hoik pon ti yaox sidawng piang haktiex khawmuik, ²¹ lhax pa kied mhawm grang nawh khankix mai plix pa kied teen nawh khankix ka pa mawh ceu pa ih son can ceu pa im ju khankix khawmuik, pa hoik ot totiag daux tiagtu khankix ka greem mai pa hoik ot sim sai daux raoma khankix piang kak nawh, ²² simiang eue, khaox pa hoik ting lhaong pa hoik lih ti mawh pa kaux cong an, mawh maix heue. Krax pa ting lhaong maix hoik haok hwan tom hoek ka raoma mai min sibrawm pa kwang maix hoek tom sidah sidu haktiex heue. ²³ Awm krax pa hoik yaox maix ka cao pa pau tix kaux an, pa mawh kawn pa singax singeh mai pa lih hoek khaing daux raoma pa ah nin, "Kid ti tik gaw khaox an mai yuh laux leeing heue. Viang mawh nan, prah num nawh mai khawm riah nawh khankix ka daux tiex mai vie nawh ka maox rhiem mai maox tawng lheung mai deuh nawh ka dah dee klai rib riem khankix ka daux tong, kieh nawh mawh pa caux ka rawm ciex pa kaoh khaing daux raoma mai kieh nawh sawm tau mai totiag khankix ka daux tong kaung tom hoik tiang ti luan aliah num, ²⁴ simiang eue, dee bleeh in mawh nin mai in mawh gumlox pa kaoh khaing Siyiex Cao pa kied ting lhaong, pa hoik bleeh tix hoek piang cao simiang aux. ²⁵ Maix tak kham krax grheu khaing daux pui khankix mai ot tau mai totiag daux tiagtu khankix mai sawm rib riem awm mawie, kham krax pa caux ka rawm ciex daux raoma mai bawg yam tak sang tiang tix luan khaing piang maix aliah num, tom hoek bawg yam tawng maix ka kwang Cao pa kied ting lhaong ka daux meung haktiex kawn pui khankix mai tawx meung haktiex ka can pui pa koe rhawm Nawh Cao tix tawx heue. ²⁶ Awm pa hoik tawx cao pau gumlox tix, sonsang prah ti deuh num khaox an mai khawm riah khaox an khankix, meung haktiex maix tak mawh pa kawn koe ka son maix, khaix hoik pon maix ti tawng ka mawh raoma pa kwang heue. ²⁷ Mawh kheu nan, simiang eue, kieh maix rieb ti teei krax keud aux heue. Pluat ti tik phimap maix kankix sonsang yuh pa rahsee mai tik khawm krax pa lud maix khankix, sonsang jhi tix krax caux rhawm ka pui pa hot shia khankix liak, phan yuh nan, krax haok hwan magmi maix tak sang toe ti lang heue. ²⁸ Grawng in khawmuik hoik bleeh ti hoek piang simiang Nebukhaneza heue. ²⁹ Khaix hoik sidah kao ra khix, nawh hoik lailing hawt baoh nyiex haw haktiex Babulon heue. ³⁰ Simiang ah nin, "Ang in mawh veng ting haktiex Babulon pa hoik sum aux ti deuh sonsang mawh dee ot dee koe simiang ka riang rao sibrawm cao aux mai sonsang yaw aux min plakngai sibrawm krax pa kwang aux lie?" ³¹ Yam kawn sikah simiang gumlox in ka jheeh tix lox lih hoek khaing raoma ah nin, "Simiang Nebukhaneza eue, koe lox pa krai ka son maix heue. Meung haktiex maix hoik gah ti hu khaing maix, ³² maix tak kham krax grheu khaing daux pui khankix mai ot tau mai totiag daux tiagtu khakix mai sawm rib riem awm mawie mai bawg yam tak sang tiang ti luan khaing piang maix aliah num, tom hoek bawg yam tawng maix ka kwang Cao pa kied ting lhaong ka daux meung haktiex kawn pui khankix mai tawx meung haktiex ka can pui pa koe rhawm Nawh Cao ti tawx heue." ³³ Ka daux bawg yam an tix dum neh, gumlox in hoik lih ti mawh piang simiang Nebukhaneza mai nawh mawh pa hoik grheu ti lih khaing pui khankix mai sawm rib riem awm mawie mai tokaux nawh hoik caux ka rawm ciex pa kaoh khaing daux raoma, tom hoik lang hauk kaing nawh khankix awm hauk klang krih mai nghim taix nghim caong nawh hoik lang awm nghim caong sim khankix heue. ³⁴ Yam hoik sidah bawg yam aux Nebukhaneza, hoik yaog ngai tix maong ka plak raoma mai krax tawng yung aux hoik deeh hoek ka aux mai aux ting bwanson ka Siyiex Cao pa kied ting lhaong mai yaogyaw tawx krax nab yam ka Nawh Cao, pa im ju leeing ju heue. Grawh grawng nawh, sibrawm Nawh koe leeing ju mai meung haktiex Nawh mawh pa koe ku ju leeing ju heue. ³⁵ Can pui pa ot piang haktiex khankix khawmuik, mawh pa hoik sawn tix ang mawh tidtix Nawh yuh awm krax pa koe rhawm Nawh Cao ti yuh ka cub kru naing raoma mai ka can pui pa ot piang haktiex khankix heue. Pui tix kaux kawx ang pon tiebtie ka plawng taix Nawh mai ang pon chawk ah nin ka Nawh Cao heue. "Mawh yuh Maix Cao ceu patix lie?" ³⁶ Ka daux bawg yam an, krax tawng aux khankix hoik deeh hoek ka daux rhawm aux mai son sibrawm meung haktiex aux mai min plakngai aux mai krax pa riang min aux khankix hoik deeh hoek ka daux rhawm aux heue. Cao pa tawx krax keud aux khankix mai pui ting lhaong aux khankix hoik deeh tawx riang rao ka aux mai aux hoik deeh koe riang rao ka son meung haktiex aux mai sibrawm ceu pa kied mhawm hoik baox naok piang aux heue. ³⁷ Yam in, aux Nebukhaneza hoik tawx krax pa yaogyaw bwanson mai krax pa yungyi nab yam tix ka simiang daux raoma mai can kaing pa yuh Nawh khankix mawh ceu pa mawh meh khawmuik mai daux krax Nawh khankix kawx, mawh pa rahsee heue. Can pui ankix pa hu ka daux krax ting rhawm khankix, Nawh Cao pon yuh ti kieh tiem tom hoek ka plak greem heue."

¹ Belashieza pa mawh simiang yuh pawie pa khan kheu pa ting lhaong son cub simiang greem nawh khankix tix rheng kaux mai yaux rawm, plai plix siiet ka plak sivoe ngai pui an kix tix rheng heue. ² Yam kawn cim nawh ti yaox rawm plix siiet, simiang Belashieza tawx gumlox tix nhie pui teei ti viex kawk nyaux khri mai mau khankix, pa hoik rhim keeing nawh simiang Nebukhaneza ti viex hoek khaing daux nyiex bwan veng Yerusaliem, sonsang nyaux simiang mai simiang greem nawh khankix mai moeng nawh mai khawm moeng iak nawh khankix rawm plix siiet khaing daux kawk ankix heue. ³ Khaix an kix hoik teei ti viex kawk nyaux khri an khankix pa mawh kawk nyaux pa hoik khaing daux krao nyiex bwan Siyiex, pa koe ka daux veng Yerusaliem mai simiang mai khawm simiang greem nawh khankix, khawm moeng nawh mai moeng iak nawh khankix hoik nyaux rawm plix siiet khaing daux kawk nyaux ankix heue. ⁴ Kix hoik nyaux ka rawm plix siiet mai hoik yaogyaw ka siyiex khri, siyiex mau, siyiex tawng, siyiex rhiem mai siyiex khaox, siyiex lon simaox khankix heue. ⁵ Ka daux bawg yam an tix taix neh, giien taix pui hoik bleeh tix hoek mai tiiem lai piang ding tiex phawng pid daux nyiex haw pa koe see rong jung kawk ngu mai simiang hoik yaox giien taix pa tiiem lai an heue. ⁶ Pakngai simiang hoik tieh loh tix mai rhawm nawh hoik siyaoh mai jhong si-ang nyoi nawh khankix hoik dex bheeik mai nge ngawng nawh khawm ra khawn hoik deeh ra lai klah paox tix heue. ⁷ Simiang hoik riag yo lox tix pa ting mai tawx lox kieh kix hu kok cao pa chix tawng singaix pa sang hoek khankix, pui Khaladie khankix mai cao pa sibawk khankix hoek heue. Simiang krai ka pui ting pingnya cuyi haktiex veng Babulon khankix ah nin, "Pui pa pon phat ngai lai in mai pon krai aux tawng dee bleeh, tak mawh pa sang ceep kraung pa raoh rawt mai tak yaox ti tauk maox soi khri ka ping ngawg nawh mai nawh tak mawh cao pa kwang haktiex loe kaux tix kaux ka daux meung haktiex in heue." ⁸ Pui ting pingnya cuyi simiang khankix khawmuik hoik bleeh tix hoek heue. Viang mawh kawx nan, kix ang pon phat ngai lai an mai ang pon krai dee bleeh ka simiang heue. ⁹ Khaix an simiang Belashaza pa kied koe krax yaoh yeu mai pakngai nawh hoik tieh loh tix mai cub simiang greem nawh khankix hoik daox deng ka heue. ¹⁰ Yam an, kheu mhong miex simiang lox sikah simiang mai cub simiang greem nawh khankix, tom hoek ka daux bang pawie khan kheu an ah nin, "Simiang eue, kieh maix lang ju heue, paw kieh rhawm maix yaoh yeu mai paw kieh pakngai maix tieh loh tix liak, ¹¹ koe pui tix kaux ka daux meung haktiex maix mai ka daux pui an koe khwan singax Siyiex ka heue. Kadaux baux ju keeing maix nawh hoik mawh pa kied lhak lhiem mai koe krax tawng yung mai koe pingnya cuyi awm koe pingnya cuyi Siyiex heue. Simiang Nebukhaneza pa mawh keeing maix hoik kieh nawh mawh cao kaing ting ka ping pui ting pingnya cuyi khankix, cao pa chix tawng singaix pa sang hoek khankix, pui Khaladie khankix mai khawm ka piang cao pa sibawk khankix heue. ¹² Mawh kheu koe khwan pa kied mhawm ka daux nawh mai krax tawng yung mai krax lhak haing mai krax pa chix tawng ka dee bleeh grawng pa camaox khankix, krax pa pon krai lox nieb mai pa krai ceu pa daox deng khankix, hoik yaox ka daux Danyelax in, ka pui pa hoik tawx simiang ceu kaux nawh mawh Belateshaza mai yam in kieh pui kok Danyelax hoek mai nawh tak krai dee bleeh lox an heue." ¹³ Khaix an Danyelax hoik viex ti hoek ka plak sivoe simiang heue. simiang chawk ka Danyelax ah nin, "Mawh maix Danyelax khaing daux pui Yudax pa giex laung an khankix lie? Ka pa mawh can pui pa hoik viex keeing aux nawh hoek khaing haktiex Yudax lie? ¹⁴ Aux hoik mhong grawng maix mai koe khwan singax Siyiex ka daux maix mai krax pa riang mai krax tawng yung an kix mai khawm pingnya cuyi pa kied mhawm khankix, hoik mawh pa yaox ti ka daux maix heue. ¹⁵ Yam in, pui ting pingnya cuyi an khankix cao pa chix tawng singax pa sang hoek khankix hoik dawg viex tix hoek ka plak sivoe aux sonsang phat tix ngai lai in mai krai dee bleeh ka aux heue. Viang mawh kawx nan, kix ang pon krai dee bleeh heue. ¹⁶ "Aux hoik mhong grawng maix mai ka pon krai maix dee bleeh lox ankix mai ka pon krai grawng krax pa daox deng khankix heue. Yam in, phan maix chix phat ngai lai an mai pon krai dee bleeh khankix maix tak mawh pa ceep ka kraung raoh rawt mai pa tauk ka maox soi khri piang ngawg maix mai tak sang mawh cao pa kwang haktiex loe kaux tix kaux ka daux meung haktiex aux heue." ¹⁷ Khaix an Danyelax deeh pawk lox mai ah nin ka plak sivoe simiang, "Kieh totaix pa ah maix khankix mawh son tokaux maix mai tawx totaix ankix ka pui tang kaux, viang mawh nan, aux tak sang phat ngai lai an ka son simiang mai kieh maix tawng ka dee bleeh lox an heue. ¹⁸ Simiang eue, Siyiex pa kied ting lhaong hoik tawx keeing maix Nebukhaneza koe meung haktiex mai sibrawm krax kwang mai sibrawm mai min plakngai heue." ¹⁹ Mawh kheu grawng sibrawm pa hoik tawx Siyiex ka nawh pui khankix, ceu pui ku meung mai can pui pa sikah lox kuceu khankix hoik siyang mai koe krax lhat graung ka plak sivoe nawh heue. Can pui pa simie nawh tix pah khankix, nawh pah yum heue. Can pui pa simie nawh tix im khankix, nawh kieh im ju heue. Can pui pa simie nawh tix yaog lhaong khankix, nawh yaog lhaong heue. can pui pa simie nawh ti kieh tiem khankix, nawh kieh tiem heue. ²⁰ Viang mawh nan, yam hoik yaog nawh rhawm tix ting lhaong mai rhawm nawh hoik kiien ka daux krax pa lhaong rhawm lhaong rhi tix, nawh hoik mawh pa grheu ti lih khaing dang ngeung simiang pa mawh nawh mai teei min plakngai nawh luan ti hu khaing nawh heue." ²¹ "Nawh hoik mawh pa grheu tix lih khaing ka daux kawn pui khankix mai rhawm nawh hoik tieh loh tix awm rhawm totiag khankix mai ot tau mai la tiag khankix heue. Nawh sawm rib riem awm mawie khankix mai tokaux nawh hoik caux ka rawm ciex pa kaoh khaing daux raoma, tom hoek daux bawg yam hoik tawng nawh ka kwang Siyiex pa kied ting lhaong ka daux meung haktiex kawn pui khankix mai yaog ti deuh can pui pa koe rhawm Nawh Cao ti deuh kwang piang meung haktiex heue." ²² "Belashaza eue maix mawh kawn simex nawh mai ang cu ti viex rhawm awn rhawm tiem heue. Viang maix hoik tawng ka grawng inkix khawmuik kawx, ²³ maix hoik yaog min tokaux tix lhaong khaing piang Siyiex daux raoma, kieh pui viex kawk nyaux daux nyiex bwan Nawh Cao khankix hoek ka plak sivoe maix mai cao maix khawm cub simiang greem maix khankix, moeng maix khawm moeng iak maix khankix, hoik nyaux rawm plix siiet khaing daux kawk nyaux ankix heue. Cao maix kawx hoik yaogyaw ka siyiex khri mai siyiex mau, siyiex tawng lheung mai siyiex rhiem, siyiex khaox mai siyiex lon simaox khankix, pa chix yaox chix mhong mai pa ang chix koe krax tawng heue. Siyiex pa jhawp ti deuh ka bhawm toek maix khankix ka daux tawm taix Nawh Cao mai kwang ka grawng pa yuh maix khankix maix ang tie tawx krax pa yaogyaw min plakngai ka heue. ²⁴ Mawh kheu nan, Nawh Cao hoik ploi ngien taix tix lih hoek mai tiiem ka ngai lai in heue." ²⁵ "Ngai lai pa hoik tiiem tix mawh nin, "MENE, MENE, TEKALA, UPHARASIN." ²⁶ "Dee bleeh lox ngai lai an khankix mawh nin, MENE, koe dee bleeh yuh nin, Siyiex hoik simin ti yaox meung haktiex maix mai hoik sidah phao heue. ²⁷ "TEKALA, koe dee bleeh yuh nin maix hoik ciang tix ka daux jiang yoi mai yaox ka krax pa cud cha maix heue. ²⁸ "PERIET, pa mawh ngai lai UPHARASIN an, koe dee bleeh yuh nin, meung haktiex maix hoik gwieh tix mai hoik tawx ka pui Medix mai ka pui Pasha khankix heue. ²⁹ Khaix an simiang Belashaza, tawx gumlox tix mai kieh kix ceep Danyelax ih kraung raoh rawt mai sau nawh tauk maox soi khri piang ngawg nawh mai tawx lox kieh pao ti krai grawng mawh nawh cao pa kwang haktiex loe kaux tix kaux ka daux meung haktiex heue. ³⁰ Ka daux sawm an tix dom neh Belashaza pa mawh simiang pui Khaladie khankix, hoik mawh pa pah tix yum heue. ³¹ Darix pa mawh ceu pui Medix hoik pon teei meung haktiex Khaladie yam hoik koe ju nawh tigliah ra num heue.

¹ Simiang Darix khaw rhawm ti sang deuh cao pa kwang veng khankix tix yieh tixnga kaux, sonsang mawh kix cao pa kwang ka daux meung haktiex nawh khawmuik khawm leeing, ² mai piang kix, nawh hoik deuh cao kwang ting loe kaux mai ka daux kix hoik mawh Danyelax tix kaux heue. Cao kwang veng khankix tak tawx grawh grawng haktiex kuceu ka kix, son ang simiang lai yaox tix som nai heue. ³ Khaix an Danyelax in, hoik sidawng blon ting lhaong khaing piang cao kwang meung an kix mai cao kwang veng khankix, kheu jao hoik koe khwan pa kied mhawm ka daux nawh mai simiang hoik keud ti sang deuh nawh mawh pa kwang piang meung haktiex nawh khankix khawmuik heue. ⁴ Mawh kheu nan, cao kwang meung mai cao kwang veng khankix sawg ti yaox dee deuh phimap piang Danyelax, son grawng pa kwang ka meung haktiex heue. Viang mawh nan, kix ang yaox krax pa lud nawh, kheu jao grawng hoik kaux sijax nawh mai ang yaox krax pa lud nawh tix ceu kawx heue. ⁵ Khaix an pui inkix ah nin, "Ex ang lai yaox grawng pa sang deuh phimap piang Danyelax in, phan ang mawh son grawng gumlox been pa dex dawd mai Siyiex nawh heue." ⁶ Mawh kheu nan, cao kwang meung khankix mai cao kwang veng khankix, khrawm paox tix hoek ka plak sivoe Simiang ah nin ka nawh, "Simiang Darix eue, kieh maix lang ju heue." ⁷ "Cao kaing ting pa kwang meung khankix mai simiang cao fa khankix mai cao pa kwang haktiex khankix, cao pa tawx krax keud mai cao pa kwang veng khankix, hoik kum paox tix tau, sonsang kieh simiang yuh ti deuh gumlox pa kaux cong koe tix ceu, ka can pui pa rawg bwan ka Siyiex ang ah, pui ang ah, ka daux tixngoe singaix, lheu khaing maix simiang tak sang teei tix sau nawh ka daux kawg sivai sangsi heue. ⁸ Yam in Simiang eue, tawx gumlox mai tawk cum piang lai pa tiiem an, son ang lai pon ti deeh tieh awm koe been ceu pui Medix mai ceu pui Pasha pa ang chix tieh loh tix heue." ⁹ Mawh kheu nan, simiang Darix tawk cum tix piang gumlox pa hoik tiiem tix heue. ¹⁰ Yam in viang Danyelax tawng ka hoik tawk cum piang lai an, nawh hu ka nyiex tix. Laig ka daux lawg plak piang daux nyiex nawh mai paoh siviex iak tix ka plak see veng Yerusaliem, nawh grux ngawng tix rawg bwan mai tawx krax pa yaogyaw ka plak sivoe Siyiex nawh, tix ngaix loe bawg awm hoik koe been pa deuh nawh singaix phao voe khankix heue. ¹¹ Khaix an pui inkix khrawx khrawm paox tix hoek mai yaox ka rawg Danyelax bwan mai krax pa yuh nawh krax khyox khaw ka plak sivoe Siyiex heue. ¹² Kix deeh hu ka plak sivoe simiang mai krai son grawng gumlox pa hoik tawx simiang ah nin, "Ang mawh maix pa hoik tawk ti deuh cum ka gumlox in, son pui ku kaux, pa rawg bwan ka Siyiex ang ah mai ka pui ang ah, ka daux bawg yam tixngoe singaix, lheu khaing maix pa mawh simiang tak sang mawh pa teei ti sau ka daux kawg sivai sangsi lie? Simiang deeh pawk lox ah nin, "Ceu an mawh tete, awm krax koe gumlox been ceu pui Medix mai ceu pui Pasha, pa ang chix tieh loh tix heue." ¹³ Mawh kheu nan, kix deeh pawk lox ka plak sivoe nawh ah nin, simiang eue, Danyelax pa mawh pui tix kaux khaing daux pui pa giex laung khaing daux meung Yudax, ang tie tawx krax nab yam tix ka son maix, pa mawh simiang mai son gumlox pa hoik tawk maix cum mai ca yuh krax pa rawg bwan tix ngaix loe bawg heue." ¹⁴ Yam mhong simiang gumlox inkix, nawh kied koe krax pa khi rhawm mai hoik tat rhawm tix, sonsang deeh taoh ka Danyelax mai hoik kied sau riang tix tom hoek bawg yam klip singaix sonsang deeh pon taoh tix ka nawh heue. ¹⁵ Khaix an pui inkix, hoik greed ti dex hawt simiang mai ah nin ka nawh, "Simiang eue, tawng ka mawh an, been gumlox ceu pui Medix mai ceu pui Pasha, ka ang gumlox mai been tat been prawng pa hoik yuh simiang ti deuh, mawh pa ang lai pon tix tieh loh heue." ¹⁶ Mawh kheu nan, simiang tawx gumlox tix mai kix viex Danyelax hoek mai sau nawh ka daux kawg sivai sangsi heue. Simiang ah nin ka Danyelax, "Kieh Siyiex maix pa yuh maix ti tawx kaing jhaw sijheeng, Nawh Cao tak deeh taoh ka maix heue." ¹⁷ Khaix an kix viex khlawp simaox hoek tix khlawp mai deuh piang moing kawg sivai sangsi an mai simiang hoik tawk ti deuh cum cao nawh mai ka cum simiang greem nawh khankix, son ang grawng Danyelax lai mawh pa pon deeh tieh loh tix heue. ¹⁸ Yam in, simiang deeh ing ka nyiex haw nawh mai twah pa ih leeing sawm mai lox tah ting kawx hoik mawh pa ang lai viex ti hoek ka plak sivoe nawh, ang lai laig it laig tum heue. ¹⁹ Ngaix khaix simiang yaog ti kaoh khaing dee it tix caocao yam jah praix tix riang mai nied ti hu ka daux kawg sivai sangsi heue. ²⁰ Yam hoik hoek nawh ka praok kawg an, nawh yiiem mai kok yo ka Danyelax ah nin ka Danyelax, "Danyelax pa mawh siliex Siyiex pa im ju eue, mawh hoik pon taoh Siyiex maix, pa yuh maix ti tawx kaing jhaw sijheeng ka maix luan khaing sivai sangsi lie?" ²¹ Khaix an Danyelax deeh ah nin ka simiang, kieh simiang lang ju heue." ²² "Siyiex aux hoik ploi kawncau Nawh hoek mai thox daux jheeh sivai sangsi son ang pon mat yuh aux, kheu hoik yaox Siyiex ang aux koe phimap ka plak sivoe Nawh Cao heue. Simiang eue, lheu khaing an, aux ang tie mawh pui pa yuh krax pa lud loe ka plak sivoe ngai maix heue. ²³ Yam an simiang kied koe krax gaux rhawm ka son nawh mai tawx gumlox tix, sonsang deeh teei kix Danyelax lih khaing daux kawg sivai sangsi mai krax pa mat tix ceu kawx ang yaox piang nawh, mawh kheu yum rhawm nawh ka Siyiex Cao tix heue. ²⁴ Simiang tawx lox tix mai viex pui pa hoik kao Danyelax hoek mai tik kix khawm moeng khawm kawn praix kix ka daux kawg sivai sangsi khawmuik heue. Sivoe ang kix nyang bax pon ti hoek ka daux tiex mai sivai sangsi khankix hoik pex kix mai kraing si-ang kix pot phawng vid heue. ²⁵ Yam an simiang Darix hoik tiiem tix tawx lai ka pui khawmuik, ceu pui khankix mai ceu pa sikah lox kuceu, pa ot piang haktiex khawmuik ah nin, "Kieh krax pa nhim pa haok hwan grum naog ka pex heue. ²⁶ Yam in aux yuh ti tawx gumlox ka pui meung haktiex dee kwang dee pang aux khankix kudah dee, sonsang koe krax lhat graung pui ka plak sivoe Siyiex Danyelax, mawh kheu Nawh Cao mawh Siyiex pa im ju mai pa kaux cong leeing ju. Meung haktiex Nawh, ang chix laux leeing, mai krax pa kwang Nawh ang koe dee sidah sidu heue. ²⁷ Nawh Cao tawx krax teem mai tawx krax taoh ka kawn pui, mai Nawh Cao yuh mhai rug pa daox deng koe, piang raoma mai piang haktiex mai deeh taoh Danyelax khaing jheeh sivai sangsi heue. ²⁸ Mawh kheu nan, Danyelax in, hoik haok hwan ka daux baux kwang simiang Darix mai ka daux baux kwang simiang Kurux, pa mawh ceu pui Pasha heue."

¹ Ka daux num jah Belashaza pa mawh simiang Babulon tix kwang ka haktiex, Danyelax camaox mai yaox riang susai ka daux dong tix, yam kawn it nawh piang ku dee it tix heue. Khaix an nawh tiiem ti deuh grawng pa camaox an mai krai grawng kaing ting heue. ² Danyelax krai ah nin, "Aux yaox riang susai ka daux pon sawm mai yaox ka kaoh sijaox bhaung pon plak ka raoma, phlu piang rawm sigrit sigra ting heue. ³ "Totiag pa ting pon mu hoik lih hoek khaing daux rawm sigrit sigra mai ang awm paox tix ku mu heue." ⁴ "Totiag phao voe hoik awm sivai sangsi mai koe pruik klang krih heue. Aux hoik pau tix jhak tom hoek bawg yam hoik reeig kix hauk pruik nawh mai totiag an hoik yaog ti kaoh khaing piang tiex mai cung ka caong tix ra khawn awm pui mai hoik tawx rhawm pui ka an heue. ⁵ Totiag tang mu pa mawh totiag ra mu tix mu an, awm krih, nawh hoik ngawm vak ve mai koe si-ang praok loe mu ka daux jheeh nawh pa sikhap sinax rhang nawh khankix heue. Koe gumlox pa tawx ka nawh ah nin, "Yaog ti kaoh kiied tix ih nex tom nie heue." ⁶ Khaix in aux jhak mai yaox totiag tang mu pa awm sivai simuing, pa koe pruik sim pon mu piang blawg nawh heue. Totiag an koe kaing pon mu mai tawx sibrawm pa kwang ka nawh heue. ⁷ "Khaix in ka daux riang susai ponsawm, aux jhak mai hoik yaox ka totiag pon mu tix mu, pa koe krax lhat kah, mai pa lang teung ting sibrawm koe krax pa ting riang heue. Nawh koe rhang rhiem pa kied ting khankix mai kiied tix ih tom phawng mai dig pa kawn deuk khankix ka caong tix heue. Nawh hoik mawh pa ting siyox khaing totiag pa hoik koe phao voe nawh mai koe rung kao mu heue." ⁸ "Yam kawn jhak aux ti yaox rung an khankix mai aux yaox kuah rung pa iak tix mu ka daux sinax an kix, sivoe rung in, hoik reeig ti tik rung phao voe loe mu khawm num khawm riah heue. Rung in koe ngai pa awm ngai pui mai koe jheeh pa ah lox ting lhaong khankix heue. ⁹ "Yam kawn jhak aux mai yaox deuh dang ngeung tix mai pui pa riex ju tix kaux ngawm piang kraung ceep Nawh paing awm rawm rha mai hauk kaing Nawh hoik awm hauk yung pa singax, dang ngeung Nawh hoik mawh rao ngu, jaong ling nawh khankix mawh ngu pa cap pa hax heue. ¹⁰ Krax jhan riang ngu hoik lih khaing plak sivoe ngai Nawh tix grawng, pui pa yuh ti tawx kaing jhaw ka son Nawh, koe kaing mheen, pui ankix pa cung ti ot ka plak sivoe Nawh koe kaing sien heue. Nawh hoik ngawm ti sang ciyang mai phuk lai grawng see khankix hoik paoh tix heue. ¹¹ "Yam an aux kawn jhak mai yaox totiag an, kheu sinum luah lox pa ting lhaong pa hoik ah rung iak an, aux pau tix jhak tom hoek bawg yam hoik pah totiag an yum mai kaux nawh hoik mawh pa laux leeing mai hoik taing tix gleeing nawh ka daux ngu heue. ¹² "Totiag pa kawn deuk an khankix, hoik teei sibrawm cie kix luan heue. Viang mawh nan, ju kix kawn rheung lang im tom hoek singaix bawg yam pa hoik tat ti deuh heue." ¹³ "Ka daux riang susai ponsawm, aux jhak mai hoik yaox ka pui tix kaux pa awm kawn kawn pui mai brug paiawm raoma lih hoek mai viex Nawh hoek dee dex ka plak sivoe ngai pui riex ju an heue. ¹⁴ "Khaix an sibrawm, min plakngai mai meung haktiex, hoik tawx ka Nawh, sonsang hoek pui khankix mai ceu pui kuceu mai can pui pa sikah lox kuceu khankix ti yuh kaing jhaw Nawh heue. Siawp sibrawm Nawh mawh sibrawm pa kaux cong leeing ju, pa ang lai grai grup mai meung haktiex Nawh tak mawh meung haktiex pa ang chix laux leeing heue. ¹⁵ "Aux pa mawh Danyelax, hoik kied koe krax khi rhawm ka daux khwan aux mai koe krax yaoh yeu ka riang susai daux dong aux heue." ¹⁶ "Aux hoek dex ka pui ankix tix kaux pa hoik cung ti ot hawt baoh an mai mhaing ti yaox krax pa mawh meh in khawmuik ka nawh heue. Mawh kheu nan, nawh hoik krai grawng ankix ka aux mai hoik kieh aux tawng ka dee bleeh grawng ceu inkix, ¹⁷ totiag ting an kix pon mu mawh simiang pon kaux pa yaog ti kaoh khaing piang haktiex heue. ¹⁸ "Viang mawh nan, pui singax singeh Siyiex pa kied ting lhaong khankix, tak rieb ti teei meung haktiex mai tak yaox ti cie meung haktiex leeing ju tom sidah sidu leeing ju heue." ¹⁹ "Yam an, aux kied simie ti tawng ka grawh grawng krax pa mawh meh, totiag pon mu tix mu an, pa hoik ting siyox khaing an khankix tang mu khawmuik, pa kied koe krax lhat ka mai koe rhang rhiem mai koe nghim tawng lheung mai pa chix kiied ti ih tom phawng mai pa dig ceu pa kawn deuk an kix ka caong tix, ²⁰ mai grawng rung kao mu an, pa hoik koe piang kaing nawh mai grawng rung tang mu an pa hoik kuah tix lih, sivoe rung in koe rung loe mu nawh hoik tawk khrum heue. Rung in koe ngai mai koe jheeh ah lox ting lhaong mai pa koe grang pakpeung pa nie lheu ting khaing paox tix heue. ²¹ "Aux jhak mai yaox yuh rung an naing ka pui pa singax an khankix mai hoik pex ka kix, ²² "Tom hoek bawg yam hoik bleeh pui riex ju an ti hoek mai prawng see son pui pa singax singeh cie Siyiex pa kied ting lhaong mai bawg yam hoik hoek son pui pa singax singeh khankix, sonsang yaox kix tix cie meung haktiex heue." ²³ "Awm an nawh ah nin, totiag pon mu tix mu an, mawh meung haktiex pon meung tix meung piang haktiex, pa ting siyox khaing meung haktiex an khankix tang meung mai meung haktiex an, tak sang bleet ti ih haktiex khawmuik, dig an mai kiied ti ih an tom phawng heue." ²⁴ Rung kao mu mawh simiang kao kaux, pa tak sang yaog ti kaoh khaing meung haktiex in mai simiang tang kaux, tak yaog ti kaoh khaix kix, nawh tak tang siyox khaing simiang phao voe khankix mai tak sang yeen ti tik simiang an khankix loe kaux heue. ²⁵ Nawh tak ah lox ting lox lhaong ka Siyiex pa kied ting lhaong, tak sang yuh krax kha rhawm ka pui pa singax singeh Siyiex pa kied ting lhaong mai tak sang keud ti tieh loh bawg yam mai gumlox been khankix heue. Khaix an pui pa singax singeh khankix tak sang mawh pa tawx ka daux tawm taix nawh, son bawg yam tix baux mai bawg yam ra baux mai bawg yam tix plak heue. ²⁶ "Viang mawh nan, kaw pa ciyang tak ngawm tix ciyang mai tak teei sibrawm nawh hu, yuh nawh grai grup mai yuh nawh laux lak pak leeing heue. ²⁷ Khaix an meung haktiex mai sibrawm mai krax kwang meung haktiex pa ting lhaong an khankix pa koe greem raoma khawmuik tak sang mawh pa tawx ka pui khankix, pa mawh pui pa singax singeh cie Siyiex pa kied ting kieg lhaong heue. Meung haktiex Nawh mawh meung haktiex pa kaux cong leeing ju mai pa koe sibrawm khankix khawmuik, tak yuh tix tawx kaing jhaw Nawh mai koe krax cu nghiet ka Nawh heue. ²⁸ "In mawh dee sidah hoik grawng dee bleeh ceu an kix heue. Phan mawh ka son aux, Danyelax daux rhawm aux hoik kied koe krax khi rhawm ka mai pakngai aux hoik tieh loh tix ka jao heue. Viang mawh nan, aux hoik priex ti deuh grawng an kix ka daux rhawm tix heue.

¹ Ka daux num kwang simiang Belashaza ka haktiex loe num tix num, riang susai hoik plak jhi ka aux Danyelax, mawh khaix hoik yaox aux riang susai phao voe heue. ² Yam yaox aux ka riang susai an mai aux hoik yaox ka ot tix ka daux nyiex tab lhaong veng Shushan, pa koe ka daux haktiex Elam mai aux baox yaox ka hoik ot ti hawt rawm klawng Ulie, ka daux riang susai heue. ³ Yam yaog aux ngai tix jhak mai yaox ka yung mhaing pa koe rung ra mu pa cung hawt praok rawm klawng mai rung ra mu an hoik lhaong mai rung in tix mu nie lheu lhaong khaing an tix mu mai rung pa nie lhaong an tix mu, mawh pa ghoik tix kuah heue. ⁴ Aux hoik yaox preung yung mhaing an ti hu ka plak klip singaix, ka plak laong mai ka plak seh, totiag khankix tix mu kawx ang pon cung ka plak sivoe nawh mai pa pon glawd ti luan khaing daux taix nawh ang lai koe tix kaux kawx, viang mawh nan, nawh hoik yuh awm krax pa koe rhawm tix mai tang yaog tix ting lhaong heue. ⁵ Yam kawn keud aux ti yaox ka grawng ankix, pex mhaing tix mu hoik bleeh ti hoek sijaox khaing ka plak klip singaix mai hoik tah hu piang haktiex mai pa ang caong tix cux tiex mai pex an koe rung pa sidaing laoh lie ka daux sinax ngai nawh heue. ⁶ Khaix an nawh hu hoek ka yung mhaing pa koe rung ra mu, pa yaox aux cung hawt praok rawm klawng an mai to ti hoek glung ka nawh ka krax pa kied ting riang tix heue. ⁷ Aux hoik yaox ka hoek nawh dex yung mhaing an mai kied koe krax song rhawm ka nawh mai teed ka yung mhaing an mai hoik pot yuh rung nawh khawm ra mu heue. Yung mhaing an ang lai koe riang rao ti pon cung ka sivoe ngai nawh mai pex mhaing teed nawh goh piang tiex mai dig ti hu piang nawh mai pui tix kaux kawx ang lai pon ti taoh yung mhaing an khaing daux taix nawh heue. ⁸ Mawh kheu nan, pex mhaing an hoik yuh jhawm ti ting lhaong mai yam tak ting riang nawh rung pa ting an hoik pot mai khaix num rung an, rung pa sidaing laoh lie pon mu, hoik kuah ti haok ka plak see raoma pon pak heue. ⁹ Khaing ka daux an kix tix mu, hoik baox kuah rung pa iak tix mu mai hoik lhaong hu sinyek sinyek ka plak seh mai ka plak lih singaix mai ka plak dee pa kied mhawm haktiex heue. ¹⁰ Nawh hoik ting lhaong sinyek sinyek tom cux ka ceu pa koe raoma mai nawh teei ti tik ceu pa koe ka raoma khankix mai simuing khankix tiblah piang tiex mai dig ka an kix heue. ¹¹ Nawh tang yaog tokaux tix ting lhaong awm krax pa ting lhaong Kawn lauxsimiang cao raoma mai krax pa appong khankix ku singaix, nawh hoik teei ti tik mai dee pa singax singeh Nawh Cao kawx hoik teei ti tik heue. ¹² Kheu jao grawng koe krax pa lud, cub kru naing tix cub mai krax pa appong khankix ku singaix hoik ap ti tawx ka rung an heue. Nawh teei ti tik krax pa mawh meh lih piang tiex, nawh hoik yuh ceu inkix khawmuik mai hoik haok hwan ka heue. ¹³ Khaix an aux mhong sikah pui pa singax singeh tix kaux mai pui pa singax singeh tang kaux an tix kaux chawk ka pui pa hoik sikah lox an tix kaux ah nin, "Mawh tak sang rheung riang susai grawng krax tan pa appong ku singaix an mai krax lud pa laux leeing an, ka daux krax pa kieh ti dee pa singax singeh mai cub kru naing khankix mawh pa kham krax dig miex grheung lie? ¹⁴ Nawh ah nin ka aux, tak rheung ra rheng loe yieh singaix. Khaix an dee pa singax singeh tak deeh mawh pa singax heue. ¹⁵ Yam hoik yaox aux Danyelax ka riang susai an mai kawn sawg aux tix tawng ka dee bleeh grawng an kix, koe pui tix kaux pa awm grang pakpeung kawn pui, cung sijaox ka plak sivoe aux heue. ¹⁶ Aux mhong lox pui khaing daux sinax praok rawm klawng Ulie, pa kok yo lox tix ah nin, "Gabrelax eue, kieh pui in tawng ka grawng riang susai in heue." ¹⁷ Nawh hoek dex dee cung aux, mai yam hoek nawh, aux koe krax lhat graung mai gup pakngai tix piang tiex heue. Nawh ah nin ka aux, kawn pui eue, tawng ka grawng riang susai an, mawh pa dex dawd mai bawg yam sidah heue. ¹⁸ Yam kawn sikah nawh ka aux, aux gup pakngai tix piang tiex mai lhiak it tix heue. Nawh teeh aux ka taix tix mai yaog aux cung heue. ¹⁹ Nawh ah nin, "Jhak heue, aux sang kieh maix tawng ka ceu pa tak sang lih ti koe, ka daux bawg yam koe krax pa song rhawm daux singaix pa sang hoek heue. Grawh grawng nawh, in mawh pa hoik tat ti deuh bawg yam pa sidah du heue. ²⁰ "Yung mhaing pa hoik yaox maix, pa koe rung ra mu an, mawh simiang haktiex Medix mai haktiex Pasha heue. ²¹ Pex mhaing an, mawh simiang haktiex Helasax heue. Rung ting pa koe ka daux sinax ngai nawh mawh simiang phao voe heue. ²² Phan mawh son rung pon mu an pa hoik kuah ti lhaong khaing daux dee koe rung pa hoik pot an mawh meung haktiex pon meung, pa tak sang yaog ti kaoh khaing daux haktiex an heue. Viang mawh nan, ang koe sibrawm awm nawh heue. ²³ Ka daux bawg yam sidah sidu meung haktiex kix, yam hoik naog phimap pui pa lud khankix, simiang tix kaux tak sang yaog ti kaoh mai simiang an koe grang pa kied kin mai pa meed shiao tix krax ceu pie lhen heue. ²⁴ Sibrawm nawh tak mawh pa ting, viang mawh nan, an ang tie mawh ka riang rao nawh, nawh tak sang yuh laux leeing pa kied koe krax lhat mai tak koe krax haok hwan heue. Nawh tak laux leeing yuh cub pui pa singax singeh cao pa kied ting riang rao khankix heue. ²⁵ "Ka daux krax pa lhak lhiiem, nawh tak sang kieh pie lhen koe krax haok hwan greem taix nawh mai nawh koe rhawm pa ting lhaong ka daux tokaux tix, yam ang pui nyang tien khre rien tix, nawh yuh laux leeing tom nie heue. Nawh tak sang baox deeh yaox ti tieh feen ka simiang piang simiang, viang mawh nan, nawh tak mawh pa hoik pot tix laux, daux krax pa ang kawn pui yuh ka taix tix heue. ²⁶ Grawng riang susai pa yaox ponbo mai ponngawb an khankix, tak mawh grawng ceu pa mawh meh heue. Mawh kheu nan maix nyeep tix priex ka lox grawng riang susai an awx. Grawh grawng nawh, an mawh grawng pa dex dawd mai singaix pa sang hoek tom nie heue. ²⁷ Aux pa mawh Danyelax hoik yum pi mai koe krax saux ngia ka tom nie singaix heue. Khaix an aux yaog ti kaoh mai hu yuh ti tawx kaing jhaw simiang heue. Aux koe krax daox deng ka grawng riang susai an mai pui tix kaux kawx ang pon tawng ka dee bleeh an heue."

¹ Ka daux num jah simiang Darix kawn simex Ashoerux, ceu pui Medix kwang piang meung ceu pui Khaladie, ² ka daux num jah nawh kwang ka haktiex, aux pa mawh Danyelax hoik tawng grawng phuk lai gumlox Siyiex pa hoik tawx ka cao jhai Yeramix, sonsang grum naog yuh Nawh Cao grawng ceu ankix ka daux atixgliah num, ka daux dee pa laux leeing veng Yerusaliem an khankix heue. ³ Mawh kheu nan, aux hoik veeh pakngai tix ka see plak Siyiex, pa mawh Siyiex, khyox khaw mai rawg bwan mai twah pa ih khawm ceep tix chee rhix mai nyaox khankix heue. ⁴ Aux hoik rawg bwan ka Siyiex, pa mawh Siyiex aux mai hoik deeh doh keud ka phimap tix ah nin, "Siyiex pa kied ting lhaong mai Siyiex pa khaw ti lhat graung kah, pa priex rien ka gumlox sijax mukheu tix mai pa koe krax caux rhawm ka pui an kix pa moh ka Nawh Cao mai ka pui an kix pa priex ti hawt gumlox ping nyap Nawh Cao heue. ⁵ "Ex hoik lud mai koe phimap. Ex hoik yuh ceu pa caox mai hoik tieh feen ka Maix Cao mai hoik singai hu khaing daux been pa deuh Maix Cao mai khawm lox tat jhawm prawng Maix Cao khankix heue. ⁶ Ex ang koe krax cu nghiet ka lox krai kawncau cao jhai Maix khankix ka daux ceu kaux Maix Cao, ka simiang yix khankix mai simiang khankix mai ka cub keeing yix khankix mai ka pui haktiex khankix khawmuik heue. ⁷ Siyiex eue, Maix Cao mawh pa rahsee, pakngai yix mawh pa kaig tua, awm koe an kix ka daux singaix in, ka pui meung Yudax, ka can pui pa ot ka daux veng Yerusaliem mai ka ceu pui Isarelax khankix pa ot dee dex ang ah mai pa ot dee singai ang ah ka daux haktiex khankix khawmuik, ka pui pa hoik grheu Maix Cao kix, kheu pa ang kix kaux sijax mai pa hoik lud kix ka Maix Cao heue. ⁸ Siyiex eue, krax kaig tua hoik koe ka plakngai yix, ka simiang yix, ka kawn lauxsimiang yix khankix, mai ka cub keeing yix, kheu hoik lud yix ka Maix Cao heue. ⁹ Viang ex hoik tieh feen ka Nawh kawx, Nawh Cao pa mawh Siyiex ex, mawh pa caux rhawm pa pluat ploi phimap heue. ¹⁰ Ex ang tie koe krax cu nghiet ka lox Siyiex, pa mawh Siyiex ex, sonsang hawt tix ka daux gumlox been Nawh khankix, pa hoik deuh Nawh Cao ka plak sivoe ex khaing kawncau cao jhai Nawh khankix heue. ¹¹ Mawh heue, ceu pui Isarelax khawmuik hoik lud mai tang hu khaing been Maix Cao mai ang koe krax cu nghiet ka lox Maix Cao heue. Mawh kheu nan, krax pa jhax lawg mai krax pa tiextu, pa hoik tiiem ti ka daux gumlox been Mose, pa mawh kawncau Siyiex hoik glup piang yix, kheu hoik lud yix ka Nawh Cao heue. ¹² Nawh Cao hoik sidah yuh gumlox pa hoik krai Nawh ti deuh ka ex mai ka cao prawng see, pa kwang piang ex khankix, ka daux krax pa kieh ceu pa laux leeing pa ting hoek piang ex heue. Grawh grawng nawh, ceu pa awm an ang sax mawh pa yuh tix ka greem raoma khawmuik, awm krax ceu pa hoik yuh tix ka veng Yerusaliem heue. ¹³ Awm pa hoik tiiem tix ka daux gumlox been Mose, krax pa laux leeing in khawmuik hoik bleeh ti hoek piang ex heue. Ex lai ang tie sax yuh krax pa rawg mhaing bwanson ka plak sivoe Siyiex pa mawh Siyiex ex, sonsang pon veeh ex ti hu khaing phimap ex khankix mai koe krax tawng yung ka pa mawh meh Maix Cao heue. ¹⁴ Mawh kheu nan, Siyiex hoik rien ti kieh krax pa laux leeing an hoek piang ex heue. Grawh grawng nawh, Siyiex pa mawh Siyiex ex, koe krax pa rahsee ka daux kaing pa yuh Nawh Cao khankix khawmuik, ex kawn ang cu nghiet ka lox Nawh heue. ¹⁵ Yam in Siyiex pa mawh Siyiex ex eue, Maix hoik viex ceu pui Maix Cao lih hu khaing daux meung Ejiptux, ka taix pa kied ting riang rao tix mai pa hoik yuh min ceu kaux cao tix koe, awm krax pa koe an ka daux singaix in, yix hoik lud mai hoik yuh pa caox heue. ¹⁶ Siyiex eue, awm koe krax pa rahsee Maix, aux rawg mhaing ti khyox khaw heue. Kieh krax pa song rhawm Maix mai khawm krax pa kied saux rhawm Maix mawh pa veeh ti luan khaing veng Yerusaliem, pa mawh gawng pa singax singeh Maix heue. Grawh grawng nawh, kheu phimap yix mai krax pa lud keeing yix khankix, veng Yerusaliem mai pui Maix khankix hoik lih mawh ceu pa koe lox salao ka can pui pa ot hawt vung viang yix khawmuik heue. ¹⁷ Yam in, Siyiex ex eue, nghiet ka lox bwan rawg kawncau Maix mai krax pa khyox khaw nawh khankix mai son ceu kaux Maix, kieh pa riang pakngai Maix jhan piang dee pa singax singeh Maix Cao, pa mawh dee pa riem an heue. ¹⁸ Siyiex aux eue, daong yhaok Maix mai nghiet liak, blah ngai Maix mai jhak ka dee pa laux leeing yix khankix mai ka veng pa hoik kok ka ceu kaux Maix liak, Mawh kheu yix ang tie viex krax pa khyox tix hoek ka plak sivoe ngai Maix, kheu pa rahsee tix khankix ang mawh, viang mawh nan, mawh kheu krax caux rhawm pa kied ting lhaong Maix heue. ¹⁹ Siyiex eue, nghiet liak, Siyiex eue, pluat ploi liak, Siyiex eue, paw ghlat tom rheung, son ceu kaux cao Maix liak. Siyiex aux eue, mawh kheu veng Maix Cao mai pui maix khankix mawh pa hoik kok ka ceu kaux Maix Cao heue. ²⁰ Yam kawn sikah kawn rawg, kawn khyox khaw aux ka son phimap tix mai ka son phimap pui Isarelax khankix mai yam kawn pao aux lox pa khyox khaw ti ka plak sivoe Siyiex, ka son gawng pa singax singeh Siyiex aux heue. ²¹ Yam kawn rawg aux bwan, Gabrelax pa mawh pui, pa hoik yaox aux ka daux riang susai phao voe hoik nied ti pu hoek ka aux daux bawg yam krax tan plakbo heue. ²² Nawh krai lox ah nin ka aux, Danyelax eue, aux hoik bleeh ti hoek daux yam in, sonsang kieh maix koe pingnya cuyi mai krax lhak lhiem heue. ²³ "Yam jah maix tix pao krax pa khyox khaw, gumlox hoik lih hu mai aux hoik hoek ti sang krai maix mhong heue. Grawh grawng nawh maix mawh pui pa hoik pon krax pa kied ting lhaong, mawh kheu nan, keud ti yaox grawng an mai tawng ka riang susai an heue. ²⁴ Bawg yam atixgliah aliah bawg mawh pa hoik tat tix son pui maix khankix mai son veng pa singax singeh maix, sonsang naox yuh ti krax lud, sonsang sidah yuh phimap, sonsang yuh krax taoh son phimap, sonsang laig daux krax pa rahsee leeing ju, sonsang tawk ti deuh cum ka grawng riang susai an mai lox jhai an kix mai sonsang groi tix rawm bee ka dee pa kied singax singeh an heue. ²⁵ Mawh kheu nan koe krax tawng, ka khaing hoik lih hu gumlox, sonsang deeh sum veng Yerusaliem, tom hoek yam koe simiang pa hoik kham krax pa groi rawm bee, tak sang koe aliah, aliah bawg heue. Khaix hoik luan bawg yam tixgliah ra aliah bawg, krax daux veng mai veng tak sang mawh pa deeh cox sum tix ka daux bawg yam pa tuktiak khankix heue. ²⁶ Khaix hoik luan daux tixgliah ra aliah bawg, kaw pa hoik kham krax groi rawm bee an tak sang kham krax pah ti yum tom ang lai koe tidtix mai simiang pui khankix pa tak sang bleeh ti hoek, tak yuh veng mai dee pa singax singeh an khankix laux leeing heue. Dee sidah tak sang awm krax pa kheem rawm, mai tak koe naing tom hoek dee sidah mai krax laux leeing khankix mawh pa hoik tat tix heue. ²⁷ Khaix an nawh tak kaux cong yuh sijax mukheu tix mai pui khankix tom nie, son tix vang twah heue. Ka daux tix plak vang twah an, Nawh Cao tak sang kieh krax tan pa appong mai krax tan khankix grai grup heue. Ka son tang krax tan khankix koe pa seeing brai mai tak koe pui tix kaux, pa yuh krax laux leeing, tom hoek ka daux bawg yam krax pa grai grup an khankix, pa mawh ceu pa hoik tat ti deuh mai hoik klup ti lih piang kaw pa yuh pa laux leeing an heue."

¹ Ka daux num kwang simiang Kurux haktiex Pasha loe num tix num, koe grawng pa plak jhi ka Danyelax pa hoik kok ceu kaux mawh Belatashaza, grawng an hoik mawh pa mawh meh, mawh grawng pa plak jhi naing ting mai nawh hoik tawng ka grawng an mai hoik tawng sidawng ka riang susai an heue. ² Ka daux singaix ankix, aux pa mawh Danyelax hoik koe krax khi rhawm tom naog loe vang twah heue. ³ Aux ang lai ih priex preem pa nyawm tix ceu kawx mai khawm nex mai rawm plix siiet khankix ang lai laig ka daux jheeh aux mai ang lai awt tokaux tix ka rawm bee, tom hoik naog loe vang twah heue. ⁴ Ka daux khix tix tixnga pon ngaix, aux ot hawt rawm klawng ting Hetakelax heue. ⁵ Aux yaog ngai tix jhak mai yaox ka pui tix kaux pa ceep kraung man pa rhi, pa hoik rawd nyoi tix ka maox khri Upharax heue. ⁶ Kaux nawh awm siang simaox pa klai paing mai pakngai nawh awm riang pukplak praix mai ngai nawh awm kawk ngu mai plawng taix plawng caong nawh khankix, awm tawng lheung pa plang mai lox sikah nawh, awm lox sinum cub pui hun khankix heue. ⁷ Mawh ngie aux Danyelax tix kaux khaing pa hoik yaox ka riang susai heue. Can pui pa hoik ot tau mai aux khankix, ang tie pon ti yaox ka grawng an heue. Kix deeh tieh tix koe krax pa lhat graung pa kied ting lhaong mai kix to tix mox tokaux kix heue. ⁸ Mawh kheu nan, deuk ngie aux tix kaux khaing yam hoik yaox aux ka riang susai pa ting lhaong in mai aux hoik khrup ang lai koe riang rao pie ceeix kawx, pakngai aux kawx hoik khleep mai aux ang lai deeh pon ti koe riang ka heue. ⁹ Aux mhong lox nawh mai yam hoik mhong aux ka lox sikah nawh, aux hoik lhiak it mai gup pakngai tix piang tiex heue. ¹⁰ Khaix an taix tix khawn hoik teeh sijaox ka aux mai hoik kieh ngawng aux mai tawm taix aux siyaung heue. ¹¹ Nawh ah nin ka aux, "Danyelax pa mawh pui pa kied moh eue, tawng ka gumlox can pa krai aux ka maix mai kaoh cung heue. Grawh grawng nawh, yam in aux mawh pui pa hoik ploi ti hoek ka maix heue." Yam krai nawh gumlox in ka aux, aux hoik siyaung mai kaoh cung heue. ¹² Khaix an nawh ah nin ka aux, "Danyelax eue, paw lhat graung! grawh grawng nawh, tom singaix jah maix hoik viex rhawm tix sonsang tawng maix grawng singaix pa sang hoek mai hoik pon gun rhawm tix ka plak sivoe Siyiex maix mai Nawh Cao hoik mhong ka gumlox maix mai aux kawx hoik hoek kheu gumlox Maix heue. ¹³ Viang mawh nan, simiang meung Pasha hoik tiebtie aux tixnga tix ngaix, khaix an Mikhelax pa mawh cao kaing ting tix kaux khaing daux cub Simiang khankix, hoik hoek tix teem ka aux heue. Aux tom deeh pon ot tan tau mai cub simiang haktiex Pasha khankix heue. ¹⁴ Yam in aux hoek sonsang kieh maix tawng ka ceu pa tak sang lih ti koe piang ceu pui maix khankix ka daux singaix pa sang hoek, mawh kheu grawng riang susai an mawh pa dex dawd ka son singaix an tom nie mai son grawng pa sang hoek heue. ¹⁵ Yam krai nawh gumlox ankix ka aux, aux hoik gum pakngai tix lih piang tiex mai ang lai chix sikah heue. ¹⁶ Koe pui tix kaux pa awm kawn kawn pui hoik hu teeh sijaox siyieb jheeh aux mai aux hoik paoh daux jheeh tix mai ah nin ka nawh pa hoik cung ka plak sivoe aux heue. Cao Siyiex aux eue, mawh kheu jao yaox aux riang susai in, krax pa laux rhawm aux hoik kheem piang aux mai aux ang lai koe riang rao ka heue. ¹⁷ Kawncau cao Siyiex aux tak sang pon ti sikah tau mai maix, pa mawh cao Simiang aux yuh ka mawh lie? Phan mawh son aux, riang rao ang lai koe ka daux aux pie ceeix kawx, daux yam in mai krax pa toek bhawm kawx ang lai deuk pie ceeix kawx ka daux aux heue." ¹⁸ Khaix an kaw pa awm grang pui tix kaux hoik baox hu teeh ka aux mai hoik kieh aux koe riang rao heue. ¹⁹ Nawh ah nin, "Pui pa kied moh eue, paw lhat graung kieh krax pa nhim koe piang maix mai teei riang rao mai kieh koe riang rao kah heue." Yam sikah nawh ka aux, aux hoik koe riang rao mai aux ah nin, "Kieh cao Simiang aux krai lox tix heue. Mawh kheu maix hoik kieh aux koe riang rao heue. ²⁰ Khaix an nawh ah nin, mawh tawng maix ka grawng pa hoek aux ka maix lie? Yam in, aux sang yaox ti ing puing ka simiang haktiex Pasha mai khaix hoik lih hu aux, simiang haktiex Helasax tak sang hoek heue. ²¹ Viang mawh nan, aux tak sang krai maix mhong grawng ceu pa hoik tiiem tix khankix ka daux phuk lai pa mawh meh heue. Lheu khaing Mikhelax pa mawh simiang pex, pui tix kaux kawx ang pon teem aux tiebtie ka simiang an kiex heue."

¹ Ka daux num jah simiang Darix pa mawh ceu pui Medix ti kwang haktiex, Aux pa mawh kawn kawn pui, cung ti ot kaux cong mai tawx riang rao Mikhelax heue. ² Yam in aux sang krai maix mhong ceu pa mawh meh, jhak heue, simiang loe kaux tak sang yaog ti koe ka daux haktiex Pasha mai simiang pon kaux tix kaux an, tak sang nie lheu mi khaing kix khawmuik heue. Mawh kheu magmi ting riang nawh tom grum naog, nawh tak so pui khankix kaoh yuh naing ka haktiex Helasax heue. ³ Khaix an simiang pa kied kwa tix kaux tak sang yaog ti kaoh mai nawh tak sang kwang mai sibrawm pa ting tix mai yuh awm pa koe rhawm cao tix heue. ⁴ Yam yaog nawh ti kaoh, meung nawh tak sang jieh mai gwieh ti hu ka plak raoma pon daog mai ang lai mawh cie doeh ru nawh mai ang lai mawh awm sibrawm ka pa hoik kwang nawh, mawh kheu meung nawh tak sang mawh pa reeig tix lih mawh son pui tang kaux khaing doeh ru nawh heue. ⁵ Khaix an simiang plak seh tak sang koe riang rao ka daux cub simiang khankix tix kaux, nawh tak koe krax ting riang rao khaing mai sibrawm pa kwang nawh tak koe sibrawm pa ting lhaong heue. ⁶ Khaix hoik luan khix num khankix tiblah, kix tak sang ra lai yuh paox pie tau mai kawn bun simiang plak seh, tak sang hoek ti yuh sijax mukheu tau mai simiang plak laong heue. Viang mawh nan, riang rao krax pa teem kawn bun an ang kaux ang cong mai simiang an khawm doeh ru nawh tak ang lai kaux cong heue. Kawn bun an mai pui pa hoek tawx nawh khankix mai ka kawn pa hoik keh nawh mai ka mex nawh tak sang kham krax pah tix yum heue. ⁷ Viang mawh nan, khaing num riah bun an koe pui tix kaux tak sang yaog ti lih mawh simiang, nawh tak sang hoek tau mai cub kru naing tix cub mai laig ka daux nyiex tab lhaong simiang plak laong mai yuh naing ka kix mai koe krax pex heue. ⁸ Nawh tak sang teei ti viex siyiex riang grang kix hu ka daux meung Ejiptux mai khawm kraung khrai, mau khri pa kied ngawh cie kix mai khaix in ka daux ra loe num, nawh ang lai hoek tix puing ka simiang plak laong heue. ⁹ Khaix an simiang plak laong tak sang bleeh tix hoek ka meung simiang plak seh, viang mawh nan, tak sang deeh ing ka haktiex cao nawh heue. ¹⁰ Kawn simex simiang plak laong khankix deeh yaog kraung naing mai kraix khrawm cub pui hun khankix, mawh cub kru naing pa kied ting riang rao mai kawn simex an tix kaux tak sang preeng sivoe awm haok hwan rawm pa kheem tix laig plak daux heue. Nawh tak sang deeh jiem ti puing naing tom hoek ka tab lhaong simiang plak seh heue. ¹¹ Simiang plak seh tak sang koe krax pa song rhawm mai lih hu puing ka simiang plak laong, pa hoik kraix khrawm pui hun khankix heue. Pui hun khankix tak sang mawh pa tawx tix ka daux tawm taix pui koeng heue. ¹² Yam hoik pon kieh nawh pui hun khankix luan, rhawm nawh tak mawh pa yaog ti ting jhawm, viang nawh hoik pah ti tik pui kaing rheng kaing mheen yum kawx, viang mawh nan, nawh ang lai koe krax pex ka sijheeng heue. ¹³ Simiang plak laong tak sang deeh hoek mai cub pui hun khankix, pa nie lheu ting riang khaing cub phao voe mai tak sang hoek ka daux yam sidah num pa hoik tat tix, tau mai cub kru naing pa ting tix cub mai khawm kraung naing khankix tom nie heue. ¹⁴ Ka daux bawg yam an, pui tom nie tak sang yaog ti tieh feen ka simiang plak seh mai pui pa kied lang teung jhawm khankix khaing daux meung maix, tak yaog tokaux tix kaoh, sonsang kieh riang susai grum naog mai kix tak som nai heue. ¹⁵ Mawh kheu nan, simiang plak laong tak hoek mai sum tab lai lawm ti puing ka tab pa kaux cong an mai cub kru naing plak seh tak ang lai pon tiebtie nawh. Pie cub lien pa hoik laug nawh khankix kawx, ang lai pon thang heue. ¹⁶ Pa hoek ti puing ka nawh, tak hoek yuh krax pa koe rhawm tix mai pui tix kaux kawx ang pon cung ka plak sivoe nawh heue. Nawh tak cung ti ot ka daux haktiex pa kied mhawm grang an mai haktiex an hoik koe ka daux taix nawh khawmuik heue. ¹⁷ Nawh tak coca viex rhawm tix, sonsang hu laig tan tau mai riang rao meung haktiex tix khawmuik khawm leeing mai yuh paox pie pa rahsee tau mai kix mai hawt yuh awm an mai tawx kawn bun tix mawh moeng simiang plak seh, sonsang yuh nawh laux leeing heue. Viang mawh nan, grawng krax keud in ang tie tum mai ang mawh tidtix son nawh heue. ¹⁸ Khaix in, nawh deeh veeh ti hu rhim ti teei ka klawn tiex rawm sigrit sigra khankix tom nie heue. Viang mawh nan, cao kaing naing tix kaux tak sang grai yuh lox pa salao kix mai kix ang lai pon deeh kieh lox pa salao hoek piang cao kaing naing an heue. ¹⁹ Khaix an nawh tak deeh veeh ti ing ka plak nyiex tab lhaong pa koe daux haktiex cao nawh, viang mawh nan, nawh sideeing caong tix goh mai grai grup heue. ²⁰ Yam an tak koe pui tix kaux pa plud ti yuh simiang khaix nawh, tak kieh pui pa kin jhawm lailing tix koh keen ka daux haktiex pa kied mhawm grang an heue. Ka daux krax pa ang lai rheung singaix, nawh tak mawh pa laux leeing mai ang tie mawh ka daux krax pa song rhawm mai ka daux biang naing heue. ²¹ Ka dee ot nawh, tak sang yaog ti koe, pui pa kin jhawm tix kaux, ka pui pa ang kix tawx min sibrawm simiang ka heue. Nawh jawm yam ang pui nyang khre rien rhawm tix mai pon teei meung haktiex ka daux krax pa nyaw glaw heue. ²² Lien kru naing khawmuik tak sang mawh pa siman ti luan khaing ka plak sivoe nawh mai tak mawh pa laux leeing mai gumlox sijax mukheu yuh simiang tak laux heue. ²³ Khaix hoik yuh nawh paox pie tau mai kix, nawh tak yuh ceu pie lhen, mawh kheu nawh tak sang lih mawh pa ting lhaong tau mai pui pa koe tix ceeix heue. ²⁴ Nawh jawm yam ang pui nyang khre rien rhawm tix mai hoek ka dah dee pa kied mhawm an khankix mai nawh tak sang yuh can ceu pa ang keeing nawh yuh mai pa ang tax du nawh yuh heue. Nawh tak sang roi ti tawx kix cie kraung pa tud rhim mai kraung pa pon daux naing mai khawm krax pa magmi an khankix mai nawh tak sang keud ti deuh grawng pa sang puing tix ka veng dee pa kaux cong. Viang mawh nan, an tak mawh ngie bawg yam tivud ngie heue. ²⁵ Nawh tak yaog ti kaoh mai krax pa vao rhawm tix, viex kru naing tix khankix lih puing ka simiang plak seh heue. Simiang plak seh, tak sang yaog ka kru naing pa kied ting lhaong mai pa kied ting riang rao lih puing naing ka nawh, viang mawh nan, tak ang pon ti mawh pa kaux cong heue. Grawh grawng nawh, kix hoik yuh ti deuh krax grawng pa sang yuh tix piang simiang plak seh heue. ²⁶ Pui an kix pa ih nyum pa ih pa nyawm pa tie nawh tak sang deeh laux leeing yuh nawh mai cub kru naing nawh khankix tak sang mawh pa siman ti luan mai pui khankix tom nie tak sang goh ti yum heue. ²⁷ Rhawm simiang in kiex khawm ra, tak sang keud ceu pa caox mai kiex tak krai lox pie lhen piang pheen tau heue. Viang mawh nan, grawng an ang tie tum, grawh grawng nawh hoik hoek dee sidah bawg yam pa hoik tat tix heue. ²⁸ Nawh dee veeh ti ing ka haktiex cao tix, tau mai krax pa magmi mai kraung khrai tom nie, rhawm nawh tak sang deeh tieh khaing sijax mukheu pa singax singeh, mawh kheu nan, nawh yuh awm pa mie nawh ti yuh mai deeh ing ka haktiex cao tix heue. ²⁹ Ka daux bawg yam pa hoik tat ti deuh, nawh tak dee hoek ka plak seh. Viang mawh nan, bawg khaix in ang lai awm bawg phao voe heue. ³⁰ Grawh grawng nawh, reu naing khaing haktiex Khettem tak sang hoek ti puing nawh, mawh kheu nan, nawh koe krax pa laux rhawm mai deeh ing ka daux pa song rhawm tix ka sijax mukheu pa singax singeh an mai yuh pa simie nawh ti yuh heue. Mawh kheu nan, nawh tak deeh ing mai sitoe ti tau mai pui pa hoik tik vud ka sijax mukheu pa singax singeh an heue. ³¹ Nawh tak kraix khrawm kru naing khankix mai kix tak seeing yuh dee pa singax singeh nyiex tab lhaong an heue. Kix tak sang teei ti tik krax tan pa appong ku singaix mai yaog ti deuh ceu pa seeing krax pa laux leeing tan heue. ³² Can pui an kix pa yuh krax pa caox pa lud ka sijax mukheu an, nawh tak nyaw glaw ka kix heue. Mawh ngie pui pa tawng ka Siyiex Cao kix, tak koe krax pa kaux cong mai yuh kaing heue. ³³ Pui pa koe pingnya cuyi ka daux sinax pui khankix, tak sang sidiex gau ka pui tom nie heue. Viang mawh nan, daux singaix pa rheung kix tak goh ti yum ka lawm vaig mai rao ngu mai ka krax pa giex laung mai ka pa tud rhim heue. ³⁴ Yam goh kix, kix tak sang pon krax pa joh jhan teem ceeix ngie heue. Mai pui plak nie tak sang nyaw glaw kix, yam dex dawd mai kix heue. ³⁵ Pui pa koe pingnya cuyi tiblah tak sang goh sonsang deeh ciied ti yaox mai sonsang deeh kieh kix singax mai deeh paing tom hoek bawg yam sidah heue. Grawh grawng nawh, bawg yam pa hoik tat ti deuh hoik sidah heue. ³⁶ Simiang an tak yuh awm pa mie nawh ti yuh mai yaog tokaux cao tix ting lhaong piang siyiex khawmuik mai ah lox pa ang ceu cak ka Siyiex piang Siyiex heue. Nawh tak sang koe krax haok hwan tom hoek bawg yam hoik naog krax pa song rhawm Nawh heue. Grawh grawng nawh, can ceu pa hoik tat tix, tak sang lih ti mawh heue. ³⁷ Nawh tak ang lai koe rhawm pa sang dex dawd ka siyiex krub keeing nawh khankix mai ang lai koe rhawm ka bun khankix mai ang lai dex dawd mai siyiex tang kaux pie tix kaux kawx. Mawh kheu nawh tak yaog tokaux cao tix ting lhaong piang khawmuik heue. ³⁸ Nawh tak yaog min plakngai siyiex nyiex tab lhaong mai ka siyiex pa ang keeing nawh khankix tawng mai nawh tak yaog min bwan siyiex an ka khri, ka mau mai ka siang simaox pa laoh lie mai khawm ka ceu pa mhawm khankix heue. ³⁹ Nawh tak een rhawm tix ka siyiex pui tang ceu mai yieh laux ka nyiex tab lhaong pa kaux cong an, can pui pa rieb ti teei nawh mai nawh tak sang baox tawx min plakngai ka kix mai kieh kix kwang piang pui tom nie mai gwieh ti tawx haktiex son pa sang koe rao kix ka heue. ⁴⁰ Ka daux bawg yam hoik hoek dee sidah, simiang plak seh tak sang hoek ti puing ka nawh mai simiang plak laong tak viex ling lawx naing brung, pui naing brung khankix mai reu naing tom nie awm phlu bhaung ting mai hoek ti puing ka nawh mai tak laig ka daux haktiex an khankix awm kheem rawm ti hu heue. ⁴¹ Tak baox deeh laig ka daux haktiex pa mhawm grang an mai haktiex khankix plak nie, tak sang kham krax pa som nai heue. Viang mawh nan, pui haktiex Edom, pui haktiex Mawbax mai pui haktiex Amon pa ting lhaong an khankix tak sang mawh pa luad luan khaing daux tawm taix nawh heue. ⁴² Nawh tak nyeu taix tix piang haktiex an khankix mai meung Ejiptux tak ang pon tix luad luan heue. ⁴³ Nawh tak kwang piang sinngao khri mai mau mai piang can ceu pa koe ngawh jum meung Ejiptux khankix, pui haktiex Libia mai pui haktiex Ethiopia, khankix tak sang hawt khaix nawh heue. ⁴⁴ Viang mawh nan, lox satang pa kaoh khaing plak lih singaix mai plak laong, tak tawx krax pa khi rhawm ka nawh. Mawh kheu nan, nawh tak sang lih hu mai krax pa song rhawm tix, sonsang yuh krax laux leeing mai grai yuh pui tom nie heue. ⁴⁵ Nawh tak sang sum nyiex gox man pa awm nyiex haw nawh ka daux sinax rawm sigrit sigra mai gawng singax singeh pa mhawm grang an heue. Viang mawh nan, yam hoek dee sidah nawh mai pui tix kaux tak ang lai teem ka nawh heue.

¹ Ka daux bawg yam an, simiang ting Mikhelax, pa pau pui maix tak sang yaog ti kaoh cung, mai bawg yam pa kha rhawm tak sang koe pa mawh ceu pa ang sax koe jah tom kaw haktiex tix koe tom hoek ka daux bawg yam in, can pui maix khankix pa hoik koe ceu kaux ka daux phuk lai tak sang hoek krax taoh heue. ² Pui pa laig it daux phawng tiex tom nie, tak siduad heue. Pui tiblah tak pon krax pa im ju leeing ju mai pui tiblah tak pon krax pa kaig tua mai krax pa laux min plakngai leeing ju heue. ³ Pui pa koe pingnya cuyi khankix, tak jhan riang awm pa pruh riang plak raoma mai pa kieh pui tom deeh veeh tix ka plak pa rahsee, tak jhan riang awm simuing khankix leeing ju heue. ⁴ "Danyelax eue, nyeep ti priex gumlox an khankix mai tawk ti priex cum ka phuk lai an tom hoek bawg yam sidah heue. Pui tom nie tak to jee to blaong mai sawg ti yaox mai krax pa tawng tak sang baox naok ti koe kah heue." ⁵ Khaix an aux pa mawh Danyelax jhak mai yaox pui tang kaux ra kaux cung ti ot tan heue. An tix kaux cung ti ot ka praok rawm klawng plak in mai an tang kaux cung ti ot ka praok rawm plak an heue. ⁶ An tix kaux chawk ah nin ka pui pa ceep kraung man rhi pa ot piang rawm klawng. "Ceu pa daox deng inkix tak sang rheung miex grheung lie?" ⁷ Khaix an aux mhong lox pui pa hoik ceep kraung man rhi pa ot ka piang rawm klawng an, yam yaog nawh taix khawn dawm mai khawn gwiex tix ka plak raoma mai tiextu ka Nawh Cao pa im ju leeing ju ah nin, tak sang mawh bawg yam tix baux, bawg yam ra baux mai bawg yam tix plak mai yam hoik sidah rairuat sibrawm pui pa singax singeh an khankix, ceu inkix khawmuik tak sang mawh pa hoik yuh ti heue. ⁸ Viang aux mhong ka lox an kawx aux ang tawng, khaix an aux chawk ah nin, "Cao Simiang aux eue, yuh ka mawx lie? Yam sidah ceu inkix tak sang mawh yuh ka mawx lie?" ⁹ Nawh ah nin "Danyelax eue, hu maix heue. Grawh grawng nawh, gumlox inkix mawh pa hoik nyeep tix mai pa hoik tawk ti priex cum, tom hoek bawg yam sidah heue. ¹⁰ Pui khankix tak sang mawh pa kieh ti singax mai paing mai pa hoik ciied ti tom mawh meh heue. Viang mawh nan, pui caox tak grham kix yuh ceu pa caox mai pui pa caox khankix tix kaux kawx tak ang pon ti tawng, mawh ngie pui pa koe pingnya cuyi pa pon tawng heue. ¹¹ Jah khaing daux bawg yam hoik tik krax tan pa appong ku singaix an mai yam hoik yuh kix ti deuh krax laux leeing pa seeing an, tak sang koe tix rheng ra yieh tixdim singaix heue. ¹² Pui pa pau tom hoek tix rheng loe yieh tixngoe phwan singaix an khankix koe bwanson heue. ¹³ Phan mawh maix, hu tom hoek dee sidah heue. Grawh grawng nawh maix tak pon laux lee tix. Maix tak sang yaog ti kaoh mai pon sinngao maix ka daux singaix sidah sidu heue.