Colossians

Colossians

¹ Pawlux pa mawh kawncau pa ting Yesux Khrit, kheu alo Siyiex mai Timose pa mawh puxaik, ² tawx ka puxaik pa singax mai pa kaux sijax daux Yesux Khrit pa ot ka daux veng Kawlawsie khankix heue. Kieh pex koe bwanson mai pa nhim pa kaoh khaing Keeing ex Siyiex liak. ³ Ex yaogyaw bwanson Siyiex pa mawh Keeing Simiang ex Yesux Khrit mai rawg bwan, son pex ku jheeng jheeng, ⁴ kheu hoik mhong grawng krax yum rhawm pex ka daux Yesux Khrit mai krax moh pex ka pui singax khawmuik, ⁵ mawh kheu pa keud pot jun pot, pa hoik een son pex ka daux meung raoma, awm pa hoik mhong pex phao ka ka daux gumlox pa mawh meh, lox bwan gaux rhawm, ⁶ pa hoik hoek ka pex, awm hoik hoek ka daux haktiex khawmuik, pex tak plix plix mai haok huan, awm hoik mawh khawm ka daux pex, singaix tom yam jah pex ti mhong mai tawng bwanson Siyiex ka daux pa mawh meh, ⁷ Awm hoik gau pex khaing Epaphrax, paox siliex pa moh ex, pa mawh cao sidiex gau pa kaux sijax Cao Khrit ka son ex, ⁸ Kaw pa hoik krai ka ex khawm grawng krax moh pex ka daux Khuan Cao heue. ⁹ Mawh kheu jao in, ex kawx, jah tom singaix pa mhong ex grawng an, rawg bwan ka son pex ang jud jai, mhaing yuh ka mawx sonsang naog pex krax tawng ka alo Nawh Cao ka daux pingnya mai pa chix tawng sidawng khawmuik pa dex mai khuan, ¹⁰ sonsang hu pex awm pa keung ka Simiang, sonsang caw rhawm Nawh ka khawmuik mai plix plix ka daux kaing pa mhawm ku ceu mai haok huan ka daux krax tawng Simiang Siyiex, ¹¹ kieh baox koe riang ka daux siawp sibrawm khawmuik, awm pa khaw mai riang rao min plakngai Nawh, sonsang chix grum yeung mai chix lang gun yeung tau mai krax gaux rhawm, ¹² yaogyaw bwanson Keeing Cao, Kaw pa hoik yuh ex mawh pa keung ti rom ti pon sin pui pa singax singeh ka daux pa riang, ¹³ kaw pa hoik taoh ex lih khaing siawp sibrawm pa faik, hoik loh ti sau ex ka daux meung Kawn pa moh Nawh Cao heue. ¹⁴ Ka daux Kawn Nawh an ex hoek krax taoh krax pluat ploi phimap. ¹⁵ Kaw an mawh riang pak peung Siyiex pa ang chix yaox ka, pa mawh pa liang ti keh sivoe can pa phan ti deuh khawmuik, ¹⁶ grawh grawng nawh hoik phan hoik yuh ku ceu khawmuik ka daux Nawh Cao, can pa koe ka raoma mai can pa koe ka piang haktiex, ceu pa chix yaox khankix, khawm ceu pa ang chix yaox khankix, viang mawh dang ngeung khankix ang ah, simiang haktiex khankix ang ah, simiang giex kaing khankix ang ah, siawp sibrawm khankix ang ah, ku ceu khawmuik hoik phan hoik yuh kheu Nawh mai son Nawh heue. ¹⁷ Nawh Cao hoik dawg mawh ka sivoe ku ceu khawmuik mai ku ceu khawmuik grum ka daux Nawh Cao heue. ¹⁸ Nawh mawh kaing tokaux pa mawh ceu cao, kaw pa mawh pa jah, pa liang ti keh khaing pa yum, sonsang ting tokaux Nawh khaing ku ceu khawmuik heue. ¹⁹ Grawh grawng nawh hoik khaw hoik caw ka rhawm Siyiex ti kieh pa grum khawmuik ot ka daux Nawh Cao. ²⁰ Kieh ku ceu khawmuik deeh khaw ka tokaux tix kheu Nawh Cao, kheu hoik kieh nhim, kheu nham khaox lhak Nawh Cao, aux ah kheu Nawh Cao, ceu pa koe ka piang haktiex khankix ang ah, ceu pa koe ka daux raoma khankix ang ah. ²¹ Pex, pa hoik tang tiah paox tix daux bawg yam pa hoik luan, mawh pui pa koeng ka daux rhawm pex, ka daux kaing pa caox pa yuh pex, ²² yam in Nawh Cao hoik deeh kieh khaw paox tix, ka daux tokaux nex nham Nawh, kheu pa yum Nawh, sonsang pon tix tawx pex mawh pa hoik singax singeh pa loig pa ang koe dee deuh phimap ka plak sivoe Nawh Cao. ²³ Phan pex ca kawn ot ka daux krax yum rhawm mai kaux cong kah mai ang gah hu khaing krax keud pot jun pot lox bwan gaux rhawm pa hoik mhong pex, pa hoik sidiex ka can pa hoik phan hoik deuh khawmuik ka greem raoma, pa hoik kieh aux Pawlux mawh kawncau pa diex pa gau kah heue. ²⁴ Yam in aux gaux rhawm ka daux pa kham geu aux son pex, kieh ceu pa kha rhawm Cao Khrit pa ang nyang grum naog, naog ka daux nex nham aux, son tokaux Nawh Cao, pa mawh ceu cao heue. ²⁵ Hoik kieh aux mawh kawncau pa diex pa gau ka an, awm pa khaw mai ara kawncau pa tawx Siyiex ka aux son pex, sonsang kieh gumlox Siyiex grum naog, ²⁶ pa mawh pa raux pa hoik mox ka daux bawg yam mai ju pa hoik luan khankix khawmuik, yam in hoik plak jhi ka pui pa singax singeh cie Nawh khankix. ²⁷ Pa hoik caw alo Siyiex ti kieh kix tawng, pa mi pa koe min plakngai ceu pa raux pa hoik mox in, ka daux pui tang ceu khankix mawh pa yuh ka mawx, pa mi pa koe an mawh pa ot Cao Khrit ka daux pex, pa mawh krax keud pot jun pot son min plakngai heue. ²⁸ Ex krai grawh grawng Nawh mai sidiex ka pui ku kaux mai gau ka pui ku kaux ka daux pingnya cuyi khawmuik, sonsang pon ex ti tawx pui ku kaux mawh pa hoik grum mhawm ka daux Cao Khrit heue. ²⁹ Aux kawx, nied ti coca yuh sonsang mawh nan, awm can pa teei Nawh sibrawm mai yuh ka daux aux heue.

¹ Aux mie ti kieh pex tawng grawng ngah aux paox tix ka son pex miex ding, son kix ka daux veng Lawdikix, son kix can pa ang sax yaox pakngai aux ka daux nex nham, ² sonsang nyawm rhawm kix, kheu hoik kleuk kix tau ka daux krax moh krax rhawm, tom pon pa mi pa koe khawmuik, pa fah rhawm ka grawng krax tawng, sonsang tawng kix pa raux pa mox cie Siyiex, pa mawh Cao Khrit, ³ kraung laoh lie pingnya cuyi mai pa tawng khawmuik hoik mox ka daux Nawh heue. ⁴ Aux ah nin, son ang pui tix kaux kawx sang pon pie pon lhen pex ka lox nyaw lox glaw heue. ⁵ Viang aux tang ot khaing pex ka daux kaux nex nham, aux ot tau mai pex ka daux khuan, gaux rhawm mai yaox grawng pa chix ot pex mhawm mhawm, grawng kaux cong krax yum rhawm pex ka daux Cao Khrit heue. ⁶ Awm hoik rieb pex ti teei Yesux Khrit pa mawh Simiang, hu ka daux Nawh heue. ⁷ Kieh koe riah mai kieh sum haok huan ka daux Nawh Cao, kieh krax yum rhawm pex kaux cong awm pa hoik gau ka pex, tau mai krax yaogyaw bwanson pa kreh heue. ⁸ Rien rhawm tix ha kox sang koe pui tix kaux kaux pa sang nieb giex tix rhim pex, ka been nawh pie lhen pa ang koe bwanson, pa hawt been lox lao kawn pui, been haktiex pa ang grum naog, pa ang hawt Cao Khrit heue. ⁹ Grawh grawng nawh ka daux Nawh Cao hoik ot pa grum naog Simiang Siyiex khawmuik ka daux riang pak peung tokaux, ¹⁰ hoik kieh pex grum naog ka daux Nawh Cao, pa mawh simiang giex kaing mai sibrawm khawmuik, ¹¹ khawm ka daux Nawh Cao hoik pat hak pex, ka been pat hak pa ang yuh ka taix, ka daux pa peeik ti tik tokaux pa dex mai nex nham, ka daux pa pat hak Cao Khrit, ¹² kheu hoik sipaung pex tau mai Nawh Cao ka daux krax cubcom rawm heue. Ka daux krax cubcom rawm hoik deeh yaog pex kaoh tau mai Nawh Cao, kheu pa yum rhawm pex ka daux pa yuh Simiang Siyiex, Kaw pa kieh Nawh Cao deeh kaoh khaing krax yum heue. ¹³ Pex pa hoik yum kheu phimap tix, kheu ang pat hak pa dex mai nex nham tix, Nawh Cao hoik kieh pex deeh im tau mai Nawh mai pluat ploi phimap ex khawmuik, ¹⁴ hoik preet lai khaix taix been, pa koeng pa ang khaw ka ex, hoik teei an khaing sinax ex, tawk ka khaox lhak, ¹⁵ khaix hoik peeik ti tik simiang giex kaing mai sibrawm khankix khaing tokaux tix, Nawh teei ti plak jhi khankix sidawng, yam pex Nawh ka piang kix kheu khaox lhak heue. ¹⁶ Paw kieh pui tix kaux kawx prawng ca ka pex, grawng pa ih pa nyaux, grawng singaix pawie, grawng khix khraox, grawng singaix twah khankix, ¹⁷ grawng ceu an mawh pang peue ceu pa tak sang hoek sax, viang mawh nan tokaux mawh cie Cao Khrit heue. ¹⁸ Paw kieh pui tix kaux kawx pie lhen ti teei totaix pex khaing pex, kheu pa nieb yuh pa awn rhawm awn rhi, pa krub ka kawncau Siyiex khankix, pa ca keud grawng pa hoik yaox nawh, nieb krox ti ting rhawm giex going kheu rhawm pa dex mai nex nham, ¹⁹ ang giex tom cong ka pa mawh kaing, khaing Nawh pa mawh dee lih pon tawx riang ka tokaux khawmuik, kleuk paox tix tau ka jhong mai siniag khankix, haok huan ka pa kieh Siyiex haok huan heue. ²⁰ Phan pex hoik yum tau mai Cao Khrit khaing been haktiex pa ang grum naog khankix, pex lai ot awm pa kawn im ka daux haktiex, cu nghiet ka been khankix, ²¹ Paw giex, paw cim, paw teeh, ²² can ceu pa chix laux leeing ka pa shiao khawmuik, pa hawt lox tawm lox gau kawn pui. ²³ Ceu an khankix mawh ceu pa koe grang pingnya hawt ceu pa krub pa keud sipie tix, pa tiem rhawm tiem rhi, pa lak nieb yuh ka tokaux, ang koe bwanson tidtix ka pa ngah ka ceu pa yuh hawt alo nex nham heue.

¹ Phan hoik yaog pex kaoh tau mai Cao Khrit, nied ti sawg ceu pa koe dee long, dee ngawm Cao Khrit ka plak taix khawn dawm Siyiex heue. ² Kieh rhawm pex keud grawng ceu pa koe dee long, paw keud grawng ceu pa koe ka piang haktiex khankix heue. ³ Pex hoik yum, hoik mox ju pex tau mai Cao Khrit ka daux Siyiex. ⁴ Yam hoik sidawng Cao Khrit pa mawh ju ex sax, pex kawx tak sang sidawng ka daux min plakngai tau mai Nawh Cao heue. ⁵ Mawh kheu nan teei kraung pakpeung tokaux pex yum ka ceu pa koe ka piang haktiex, pa mawh pa phit vao, pa ang singax singeh, alo nex nham, pa mie pa caox, pa ghoing, pa mawh ceu pa krub riang grang heue. ⁶ Mawh kheu grawng ceu an khankix, pa song rhawm songrhi Siyiex hoek ka piang kawn pa lieh lox khankix. ⁷ Pex kawx hoik sax hu ka ceu an khankix yam kawn im pex ka daux pa awm an heue. ⁸ Yam in pex tik ka ceu an khawmuik, pa song rhawm songrhi pa hax rhawm, pa koeng riang ciang khoi, pa nieb ah nieb yuh pakngai pui laux, pa ah lox seeing lox brai khaing daux jheeh pex heue. ⁹ tix kaux lai tix kaux paw pie paw lhen ka paox tix, kheu pex hoik peeik ti tik pui prim, khawm ceu pa yuh nawh, ¹⁰ hoik ceep pui khraox, pa kawn yuh pa khraox pot tom pon krax tawng, awm riang pakpeung kaw pa phan pa yuh nawh heue. ¹¹ Ka daux pa phan pa yuh an, ang lai pon koe pui Helasax, pui Yudax, pa pat hak, pa ang pat hak, pui pheem, pui Sakusix, siliex, pui ploi, Cao Khrit mawh khawmuik mai ot ka daux khawmuik heue. ¹² Awm pui pa hoik laug Simiang Siyiex, pa singax singeh, pa moh kah, pex ceep ceu pa moh rhawm, pa caux rhawm, pa mhawm rhawm, pa tiem rhawm tiem rhi, pa awn rhawm awn rhi, pa lang gun lang yeung heue. ¹³ Phan pui tix kaux kaux koe dee deuh phimap ka pui tix kaux kaux, tix kaux lai tix kaux yeung ka paox tix, pluat ploi phimap ka paox tix, awm hoik pluat ploi Cao Khrit phimap pex, pex kawx yuh awm an heue. ¹⁴ Ka piang ceu in khawmuik ceep pa moh rhawm, pa mawh ceu pa vien pa grum mhawm heue. ¹⁵ Kieh pa nhim Cao Khrit giex kaing ka daux rhawm rhi pex, pa hoik kok pex ka, khawm ka tokaux tix mu khaing, kieh pex yaogyaw bwanson heue. ¹⁶ Kieh gumlox Cao Khrit ot ka daux rhawm rhi pex tom nie, sidiex gau ka paox tix ka daux krax pingnya cuyi khawmuik, ka lox rhax yaogyaw, lox rhax lai, lox rhax bwan, kieh koe krax yaogyaw bwanson ka daux rhawm rhi pex mai ah lox rhax ka Siyiex heue. ¹⁷ Pex yuh patix ang ah, ka daux gumlox ang ah, ka daux pa yuh ang ah, yuh khawmuik ka daux ceu kaux Simiang Yesux mai yaogyaw bwanson ka Siyiex pa mawh Keeing Cao ka daux Nawh heue. ¹⁸ Moeng khankix eue, kieh koe krax cu nghiet ka mex tix, awm pa khaw ka daux Simiang Siyiex. ¹⁹ Mex khankix eue, moh ka moeng tix mai paw nieb kieh kix koe krax song rhawm heue. ²⁰ Kawn nyawm khankix eue, nghiet lox miex keeing tix ka daux ku ceu khawmuik, grawh grawng nawh pa yuh nan mawh pa khaw caw rhawm ka daux Simiang heue. ²¹ Keeing khankix eue, paw cheeik tix kieh kawn pex song rhawm, ha kix kox laux rhawm kah heue. ²² Siliex khankix eue, nghiet lox kix pa mawh cao pex ka daux nex nham, ka daux ku ceu khawmuik, ang mawh ceu pa yuh pa yaox ka ngai khaing, yuh ka daux pa viex rhawm tix khawmuik, ka daux pa lhat pex ka Simiang heue. ²³ Pex yuh patix ang ah, viex rhawm coca ti yuh, awm pa yuh son Simiang Siyiex, paw yuh awm pa yuh son kawn pui heue. ²⁴ Mawh kheu hoik tawng pex grawng tak sang pon bwanson pa mawh sin khaing Simiang. Pa yuh pex mawh son Simiang Cao Khrit heue. ²⁵ Kaw pa yuh pa ang khaw, tak sang deeh pon son pa ang khaw pa hoik yuh nawh an mai ang koe ceu pa jhak ka pakngai pui heue.

¹ Cao khankix eue, yuh pa khaw mai pa awm paox tix ka siliex pex khankix, kheu hoik tawng pex grawng koe Cao pex ka daux meung raoma heue. ² Ca nied ti rawg bwan mai pau ti jhak ka daux an tau mai krax yaogyaw bwanson, ³ son ex kawx rawg bwan, sonsang paoh Siyiex siviex ka ex, son gumlox bwan, ti sidiex pa raux pa mox grawng Cao Khrit, pa hoik phyawk aux ka kheu jao an, ⁴ sonsang chix kieh aux pa raux pa mox an sidawng, awm pa khaw aux ti sidiex heue. ⁵ Hu ka daux pingnya cuyi mai kix pa ot plak praix, taoh ka bawg yam heue. ⁶ Kieh lox sikah pex mhawm ku jheung jheung, pa hoik laoh awm kih, sonsang chix pex ti deeh pawk lox ka pui ku kaux heue. ⁷ Grawh grawng aux khawmuik, Tukhik pa mawh puxaik pa moh mai sara pa kaux sijax, paox siliex ka daux Simiang Siyiex, tak sang kieh pex tawng heue. ⁸ Kaw pa ploi aux hu ka pex son jao in, sonsang tawng pex ka grawng yix, sonsang kieh nawh pex nyawm rhawm kah, ⁹ pa ploi aux nawh hu tau mai Awnesimux, pa kaux sijax pa mawh puxaik pa moh, pa mawh pui khaing ka daux pex tix kaux heue. Kiex tak sang kieh pex tawng grawh grawng tin ku ceu khawmuik heue. ¹⁰ Arittakhux pa mawh paox pa laung tau mai aux nawb ka pex, Makux pa caw kawn nan Banabax, grawng Makux pex hoik pon lox grawng pa tawm aux ka pex. Phan nawh hoek ka pex rieb ti teei nawh awx. ¹¹ Yesux pa kok mawh Yusatux, pa dex mai cub pa pat hak kawx nawb ka pex. Mawh inkix khaing pa mawh paox pa yuh kaing son meung Siyiex mai pui pa kieh aux nyawm rhawm heue. ¹² Epaphrax pa mawh pui khaing ka daux pex tix kaux mai siliex Yesux Khrit nawb ka pex mai nawh nied ti rawg bwanson pex ku jheung jheung, sonsang kaux cong pex sijung mhawm mhawm mai uik grum tawng tom fah rhawm ka alo Siyiex khawmuik heue. ¹³ Aux kham mhai ruk grawng pa nied nawh ti yuh son pex, son pui veng Lawdikix mai veng Herapawlix heue. ¹⁴ Lukax cao sidah pa moh aux mai Demax nawb ka pex heue. ¹⁵ Nawb ka puxaik khankix pa ot ka daux veng Lawdikix, ka Numphax mai ka ceu cao pa khrawm paox tix ka daux nyiex nawh heue. ¹⁶ Khaix hoik phat lai in ka sinax pex, ka ceu cao veng Lawdikix kawx, kieh phat heue. Lai khaing veng Lawdikix pex phat awx. ¹⁷ Ah nin ka Akhippux, "Rien rhawm tix ka kaing jhaw cao sidiex pa hoik pon maix ka daux Simiang Siyiex, sonsang yuh maix tom grum naog." ¹⁸ Aux Pawlux tiiem lox nawb in ka taix tix heue. Doh keud ka ceu pa phyawk ka aux awx. Kieh bwanson ot tau mai pex liak. Amen.