Amos

Amos

¹ Gumlox plak jhi pa hoik pon Amot cao liang yung yaong Tekua ka son grawng haktiex Isarelax ka baux singaix kwang Uziyax, simiang haktiex Yudax mai ka baux singaix Yerobom, kawn simex Yawsha, simiang haktiex Isarelax sivoe yam tok kla reem ra num heue. ² Nawh ah nin, "Siyiex briah lox tix lih khaing ka piang gawng Zion mai yo lox tix lih khaing daux veng Yerusaliem, biang dee klai rib cao pa liang yung khankix koe krax khi rhawm mai choek gawng Kharamelax tak sang kroh kroing ti fit hu heue. ³ Siyiex ah nin, "Mawh kheu lud veng Damase ang joeng mawh loe ceu, mawh pon ceu, aux tak ang yoi krax song rhawm aux ka piang kix heue. Grawh grawng nawh, kix hoik pah haktiex Gilat ka kraung cag rhiem pah nghox heue. ⁴ Aux tak sang ploi ngu lih ka daux nyiex haw Hazalax, pa sang proe ti tik nyiex haw simiang Benhadat khankix heue. ⁵ Aux tak sang raig pot ka jhong siviex veng Damase mai tat ti tik pui pa ot baoh tan khaing daux lung Avin mai khawm pui pa jhawp sibrawm khaox krong pliah khaing veng Bieteden an heue. Pui haktiex Surix tak sang yaox ti hu awm pui pa giex laung ka veng Kirax heue." ⁶ Siyiex ah nin, "Mawh kheu lud veng Gaza ang joeng mawh loe ceu, mawh pon ceu, Aux tak ang lai yoi krax song rhawm aux ka piang kix heue. Grawh grawng nawh, kix hoik giex ti viex pui khawmuik hu ap ti tawx kix ka haktiex Edom heue. ⁷ Aux tak ploi ngu lih ka piang guh veng Gaza, pa tak sang proe ti tik nyiex haw nawh khankix heue. ⁸ Aux tak sang tat ti tik pui pa ot ka daux veng Ashadawt mai pui pa jhawp sibrawm khaox krong pliah khaing daux veng Ashakelon, Aux tak sang deeh veeh taix tix hoek ka piang Ekaron mai pui Philitix, pa kawn deuk an khankix, tak grai heue. Siyiex ah nan heue. ⁹ Siyiex ah nin, "Mawh kheu lud veng Turux, ang joeng mawh loe ceu mawh pon ceu, Aux tak ang lai yoi krax song rhawm aux ka piang kix heue. Grawh grawng nawh, kix hoik ap ti tawx pui khawmuik ka haktiex Edom mai ang koe krax doh keud ka sijax mukheu pa yuh paox pie puxaik tix heue. ¹⁰ Aux tak sang ploi ngu hoek ka piang guh veng Turux, pa tak sang proe ti tik nyiex haw nawh khankix heue. ¹¹ Siyiex ah nin "Mawh kheu lud haktiex Edom, ang joeng mawh loe ceu mawh pon ceu, aux tak ang lai yoi krax song rhawm aux ka piang kix heue. Grawh grawng nawh, nawh hoik hawt ti pheet puxaik tix ka vaig mai ang koe krax pa caux rhawm, krax pa song rhawm nawh mai pa riah nawh ti tik koe sijheung mai nawh hoik deuh krax pa saux rhawm koe leeing ju heue. ¹² Aux tak sang ploi ngu hoek ka piang veng Teman, pa tak sang proe ti tik nyiex haw veng Bawzarax khankix heue. ¹³ Siyiex ah nin "Mawh kheu lud pui haktiex Amon khankix, ang joeng mawh loe ceu mawh pon ceu, aux tak ang lai yoi krax song rhawm aux ka piang kix heue. Grawh grawng nawh, kix hoik pih daux vaig bun pa koe kaux khankix ka daux haktiex Gilat, sonsang yuh kix dee kwang tix vieh va heue. ¹⁴ Aux tak sang keeig ngu ka piang guh veng Raba, pa tak sang proe ti tik nyiex haw nawh khankix ka daux singaix koe naing pa riag yo mai yam phlu bhaung ting kang lux heue. ¹⁵ Simiang mai simiang kix tak sang kham ti hu ka daux krax pa giex laung tau heue. "Siyiex ah nin heue.

¹ Siyiex ah nin "Mawh kheu lud haktiex Mawbax, ang joeng mawh loe ceu mawh pon ceu, Aux tak ang lai yoi krax pa song rhawm tix khaing kix heue. Grawh grawng nawh, nawh hoik gleeing si ang simiang haktiex Edom lih mawh nyaox heue. ² Aux tak sang ploi ngu hoek ka piang haktiex Mawbax, pa tak sang proe ti tik nyiex haw veng Kerok khankix, pui haktiex Mawbax tak sang yum tau mai lox lawh maw, pa riag yo mai lox luah teettawng khankix heue. ³ Aux tak sang tat ti tik cao prawng see khaing daux sigreung haktiex Mawbax mai pah cub simiang greem nawh yum khawmuik tau mai nawh heue. ⁴ Siyiex ah nin, "Mawh kheu lud ceu pui Yudax ang joeng mawh loe ceu mawh pon ceu, aux tak ang lai yoi krax song rhawm tix khaing kix heue. Grawh grawng nawh, kix hoik tik ka gumlox beenli Siyiex mai ang tie koe krax priex rien, ka gumlox pingnyap Nawh khankix heue. Krax pie lhen pa hawt keeing kix ti yuh, hoik kieh kix lud hu krax tix heue. ⁵ Aux tak sang ploi ngu hoek ka piang haktiex Yudax, pa tak sang proe ti tik nyiex haw khankix pa koe ka daux veng Yerusaliem heue." ⁶ Siyiex ah nin, "Mawh kheu lud ceu pui Isarelax, ang joeng mawh loe ceu mawh pon ceu, Aux tak ang lai veeh krax pa sang kham geu kix luan heue. Grawh grawng nawh, kix coh pui pa rahsee ka son mau mai coh pui pa hot shia sonsang pon kiiep tix ku heue." ⁷ Kix kied koe rhawm ti sang dig kaing pui hot shia laig ka daux phawng tiex mai deeh tieh daux krax pui pa awn rhawm khankix hu tix plak heue. Keeing mai kawn rom ti phit vao tau mai bun tix kaux ngie, seeing yuh ceu kaux pa singax singeh Aux heue. ⁸ Kix tawm ti it hawt khu dee tan ku mu, ka kraung ceep pa hoik tang pui ti deuh son ceuk mai nyaux rawm plix siiet pa hoik se pui pa krox sux ka daux nyiex bwan Siyiex kix heue. ⁹ Aux teei ti tik ceu pui Amawrix khankix laux leeing khaing plak sivoe ceu pui Isarelax heue. Viang mawh pui pa ting lhaong awm khaox piak van kawx mai hoik mawh pa kaux cong awm khaox tiah kawx, Aux hoik laux yuh plix plak piang nawh mai khawm riah pa koe greem nawh khankix heue. ¹⁰ Aux hoik viex pex hoek khaing meung Ejiptux mai hoik thong pex daux tixpon num, ka daux tiagtu, kieh pex pon ti cie haktiex ceu pui Amawrix heue. ¹¹ Aux hoik yaog ti deuh kawn simex pex khankix tix blah mawh cao jhai mai pui pa awn ju pex khankix tix blah mawh pui Nazarix heue. Isa it Ceu pui Isarelax khankix eue, Mawh ang mawh lie? Siyiex ah nan heue. ¹² Pex hoik tawx pui Nazarix khankix nyaux rawm plix siiet mai hoik tawx lox tix ka cao jhai ka daux pa nhim, "Paw lai krai lox jhai heue." ¹³ "Jhak heue, Aux hoik gut ka dee ot pex awm ling lawx pa hoik naog lhiiem nghox khankix pa gut ka kuceu heue. ¹⁴ Mawh kheu nan, pui pa phai to tak sang glawd, pui pa ting riang, ang lai pon ti shiao riang pa ting tix mai pui pa vao pa kwa kawx ang pon taoh ka tokaux tix heue. ¹⁵ Pui pa giex ak khankix ang lai pon cung, pui pa phai caong, tak ang lai pon glawd mai pa brug brung kawx, tak ang lai pon taoh ka tokaux tix heue. ¹⁶ Pui pa kied koe rhawm kwa khankix, tak sang yaox ti to ka kaong ka daux singaix an, "Siyiex ah nan heue.

¹ Ceu pui Isarelax khankix eue, nghiet ka gumlox pa hoik ah Siyiex ka pex mai ka pui nyiex pui ma pa hoik viex Aux hoek khaing daux meung Ejiptux khankix, ka daux krax pa ah nin, ² Aux hoik tawng ngie ka pex nong nong khaing ka daux nyiex ma pa koe ka piang haktiex heue. Mawh kheu nan, Aux tak sang tawx krax pa kham geu ka pex, son phimap pa yuh pex khawmuik heue." ³ Pui ra kaux phan kiex ang sidu rhawm, kiex sang pon hu tau lie? ⁴ Mawh tak sang brum sivai sangsi lox tix ka daux nong phan nawh ang yaox ti giex totiag lie? Mawh tak sang riag sivai sangsi pa awn ju lox tix lih khaing daux doh tiex ot nawh phan nawh ang yaox ti pon ceu pa ih tix ceu kawx lie? ⁵ Phan ang taong jhawk ka piang tiex, khex sang chix krix sim kah lie? Phan jhawk ang koe ceu pa krix, khex sang chix sivuat ti haok khaing piang tiex lie? ⁶ Phan teettawng hoik phlu tix ka dau veng, khex ang pui khankix yaoh yeu kah lie? Phan preng krax kha rhawm hoek bleeh ka daux veng tix veng, khex ang mawh pa yuh Siyiex lie? ⁷ Phan Siyiex, ang plak jhi krax ceu pa raux pa mox Nawh Cao, ka kawncau Nawh pa mawh cao jhai khankix, Nawh Cao ang yuh tix ceu kawx heue. ⁸ Yam graox sivai sangsi lox tix, mawh pui mawx pa ang lhat graung kah lie? Yam tawx Siyiex lox tix, mawh pui mawx pa ang pon krai lox jhai lie? ⁹ "Pao ti krai lox ka daux nyiex haw khankix pa koe ka daux veng Ashadok mai ka daux nyiex haw pa koe ka daux meung Ejiptux ah nin, pex khrawm ti hoek ka piang gawng Samarix khankix, pex tak yaox grawng krax pa lawh maw ting luah pa koe ka daux sigreung veng mai ceu pa kha rhawm pa koe ka daux veng heue." ¹⁰ Kix pa khrawm ti priex kraung pa yuh tix krax khin mai krax pa yuh con ka daux nyiex haw, cao kix ang tawng ti yuh krax pa rahsee heue. "Siyiex ah nan heue." ¹¹ Mawh kheu nan Siyiex, ah nin "Pui koeng khoi tak hoek ti lai lawm haktiex mai nawh tak sang kieh riang rao maix dieh hu khaing maix mai nyiex haw pex khankix tak sang mawh pa hoik tud rhim tix heue." ¹² Siyiex ah nin, awm rhim cao liang yung caong yung ra khawn, phan ang mawh nan, plah yhaok tix plak khaing daux jheeh sivai sangsi, awm an ceu pui Isarelax khankix pa ot ka daux veng Samarix, ka pa it daog ku mai pa tawm ti it ka piang bi tawm pa mhawm, tak sang pon krax taoh yuh nin heue. ¹³ Siyiex, pa mawh cao raoma ah nin "Nghiet mai kham mhai rug ka piang nyiex ma Yakop, ¹⁴ Ka daux singaix tawx Aux krax pa kham geu ceu pui Isarelax khankix ka son phimap kix Aux tak sang baox deeh tawx krax pa kham geu ka piang khu dee tan Betelax khankix ka son phimap kix mai rong khu dee tan khankix, tak sang mawh pa tat tix mai cod ti rau ka piang tiex heue. ¹⁵ Aux tak sang laux yuh nyiex ot kix yam kwat praix mai nyiex ot kix yam rung praix nyiex nga sang khankix kawx tak sang mawh pa grhup ti laux mai nyiex pa ting lhaong khankix, tak sang hoek dee laux leeing heue. "Siyiex ah nan heue.

¹ Pex pa awm miex mawie Bashan khankix, pa ot ka piang gawng Samarix eue, pa yuh krax kha rhawm pui hot shia, pa yuh krax kha rhawm pui cud cha pa ah nin ka mex pex viex rawm plix siiet hoek! kieh ex nyaux liak! nghiet ka gumlox in heue. ² Siyiex hoik tiextu ka krax pa singax singeh Nawh Cao ah nin, "Jhak heue, singaix an khankix, hoik dex hoek ka piang pex, pui tak sang teei pex luan ka miiet mai teei khawm kawn praix pex khankix hu ka rub heue." ³ Pex kaux mawx kaux an tak sang yaox ti lih hu khaing ka daux guh veng laux, pui ku kaux tak yaox ti hu see see ka plak sivoe tix mai pex tak sang to ti laig ka daux meung Hamon heue. "Siyiex ah nin heue. ⁴ Hu ka veng Betelax mai yuh pa lud, baox deeh hu ka veng Gilagalax mai baox naok ti yuh krax pa lud tom nie, viex krax pa appong pex khankix hoek ku ngawb mai viex krax tan kao son tix son pex hoek ku singaix heue. ⁵ Tan ti tawx krax tan pa yaogyaw pa koe susaix, pao ti krai krax tan pa tang koe rhawm rhi pui khankix liak! pex pa mawh ceu pui Isarelax khankix eue, Grawh grawng nawh, in mawh krax pa moh pex ti yuh heue. "Siyiex ah nan heue. ⁶ Aux tak sang kieh rhang pex singax ka daux veng cao pex khankix mai deeh baox kieh krax cud cha ka pa ih, koe ka dah dee ot pex khawmuik, pex kawn ang cu ti deeh ing ka Aux heue. "Siyiex ah nan heue. ⁷ Aux tak sang tieb tie rawm lhiex khaing pex, yam kawn koe loe khix sivoe ang bawg yam vawg nghox nyang hoek heue. Aux hoik kieh rawm lhiex lih ka piang veng tix veng mai Aux hoik tieb tie rawm lhiex khaing veng an tang veng haktiex an tix dah, mawh pa pon lih rawm lhiex ka piang mai ka haktiex an tang dah mawh pa ang lhiex lih mai ka piang an mawh pa kroh heue. ⁸ Mawh kheu nan, pui veng khankix ra loe veng, tak vu vie ti hu ka veng tang veng, sonsang sawg ti nyaux rawm, viang mawh nan, kix ang lai yaox ti koe krax pa fah rhawm fah rhi kah heue. Viang mawh nan, pex tak ang lai deeh ing hoek ka Aux heue. "Siyiex ah nan heue. ⁹ Aux kieh bhaung si aox phlu pex laux ka krax pa kroh yum khaox mai krax pa yum khaox kheu jhawm saux pa si-um heue. Ka daux sipeem taux pui tom nie, sipeem plix siiet pex khankix, khaox ruh pex mai khaox sanlun pex, sido tak kiied ti ih heue. Viang mawh nan, pex hoik ang cu ti deeh ing hoek ka Aux heue. "Siyiex ah nan heue. ¹⁰ "Aux hoik ploi jhawm saux preng hoek ka daux sinax pex, awm pa yaox meung Ejiptux ti kham, aux tak sang pah pui awn ju pex khankix yum ka vaig lawm mai hoik kieh brung pex viex ti hu heue. Aux hoik kieh pa sioe cux daux tab pex khankix haok ka daux gawng meeh pex, viang yuh nan kawx, pex ang cu ti deeh ing hoek ka Aux heue. "Siyiex ah nan heue. ¹¹ "Aux hoik pluk pliak ti tik veng pex khankix tix blah, awm hoik pluk pliak Aux ti tik veng Sawdom mai veng Gawmawrax mai kieh pex awm nge khix tix nge pa hoik teei ti lih khaing daux ngu viang yuh nan kawx, pex ang cu ti deeh ing hoek ka Aux heue. "Siyiex ah nan heue. ¹² "Mawh kheu nan, ceu pui Isarelax khankix eue, Aux tak sang yuh nin ka pex heue. Kheu tak sang yuh Aux nin ka pex, ceu pui Isarelax khankix eue, khre rien pex, sonsang hu si pub pex ti yaox ka Siyiex pex heue." ¹³ Grawh grawng nawh, jhak heue, Cao pa phan gawng lua khankix mai pa phan ka bhaung, pa pao ti krai rhawm keud tix ka kawn pui mai pa kieh pa riang plak ponngawb mawh pa faik, pa dig dee pa lhaong piang haktiex khankix, ceu kaux Nawh Cao mawh Siyiex pa mawh Siyiex Cao kru naing raoma heue.

¹ Nyiex ma ceu pui Isarelax khankix eue, nghiet ka gumlox in, pa teei Aux ti ah ka piang pex, pa mawh lox rhax khi rhawm in heue. ² Bunkrih Isarelax hoik goh mai ang lai pon yaog ti kaoh khaix in tix bawg kawx heue. Nawh sigrub tix ka piang tiex pui pa sang deeh yaog nawh kaoh ang lai koe tix kaux kawx heue. ³ Grawh grawng nawh Siyiex, ah nin, "Viang pui khankix lih hu tix rheng kawx, tak sang deuk ngie pui tiyieh kaux mai pui pa lih hu khankix tiyieh kaux, tak sang deuk ngie pui kao kaux son nyiex ma ceu pui Isarelax heue. ⁴ Mawh kheu Siyiex ah nin ka nyiex ma ceu pui Isarelax khankix, "Pex sawg ti yaox Aux, tak koe krax im ju kah heue." ⁵ Paw lai sawg ti yaox veng Betelax, paw lai laig ka daux veng Gilagalax, paw lai tiang ti hu ka veng Beshabax, grawh grawng nawh, veng Gilagalax, tak sang mawh pa rhim ti hu mai veng Betelax tak sang hoek krax pa ang lai mawh tidtix heue. ⁶ Sawg ka Siyiex mai tak koe krax im ju kah heue. Phan ang yuh nan, Nawh Cao tak lih awm ngu ka daux nyiex ma Yosiep mai gleeing ka veng Betelax tom ang lai koe pui pa pon preet ka tix kaux kawx heue. ⁷ Pex pa kieh krax pa rahsee deeh tieh ti mawh lhax sup mai pa tik krax pa rahsee ka piang tiex khakix, ⁸ Sawg Nawh Cao pa hoik yuh cub simuing sigiang bo mai cub simuing grawng lat, pa tieh veei pa yum mawh krax jhan riang plak ponngawb mai kieh plak ponngaix faik awm plak ponsawm, pa kok rawm sigrit sigra khankix mai see lih ka piang ca haktiex, Siyiex mawh ceu kaux Nawh Cao heue. ⁹ Nawh Cao tawx krax pa laux leeing hoek ka piang pui pa koe riang rao, tom sidah laux leeing nyiex tab lhaong heue. ¹⁰ Kix koeng ka pui pa sidiex gau pa ot ka daux diang siviex veng mai kix seeing ka pui pa sikah lox pa rahsee heue. ¹¹ Mawh kheu dig pex pui hot shia mai rhim ti teei gha nghox koi khaing kix, viang pex hoik sum ti ot nyiex ka lon simaox pa hoik saik tix kawx mai pex tak ang lai yaox ti ot ka daux ankix, viang pex hoik sum ti cie sipeem plix siiet pa mhawm kawx mai pex tak ang lai yaox ti nyaux rawm plix siiet ankix heue. ¹² Grawh grawng nawh Aux tawng ka krax phit krax lud pa hoik yuh pex khankix nie khaing nie mai khawm ka phimap pa kied ting kied lhaong pex heue. Pex yuh krax kin ka pui pa rahsee mai teei ti ih mau pa cun praok khankix, pex kheem ti ih pui pa cud cha khaing daux krax pa rahsee hawt daux diang siviex veng heue. ¹³ Mawh kheu nan, pui pa chix rien tix, tak ot yiien yawg ka daux bawg yam an heue. Grawh grawng nawh, an mawh bawg yam pa kied caox caig heue. ¹⁴ Pex sawg ka ceu pa mhawm mai paw sawg ka ceu pa caox, sonsang pon pex ti im ju heue. Mawh kheu nan, Siyiex, pa mawh Siyiex cao kru naing raoma, tak ot tau mai pex awm krax pa hoik krai pex ti deuh heue. ¹⁵ Koeng ka pa caox, moh ka ceu pa mhawm, yuh ti deuh pa rahsee ka daux diang siviex veng heue. Phan yuh nan Siyiex pa mawh Siyiex cao kru naing raoma, tak sang koe krax caux rhawm ka ceu pui Yosiep, pa kawn deuk an khankix heue. ¹⁶ Mawh kheu nan, Siyiex cao kru naing raoma pa mawh Siyiex ah nin "Krax ngia krax ngheeik tak sang koe ka daux biang pa vieh va khawmuik mai kix tak sang ah nin ka daux krax ting khankix, "Akiex eue, Akiex eue, kix tak kok cao yuh kaung hoek yiiem yo mai kok cao pa chix doe ka lox jhaox khi rhawm hoek ti ah heue. ¹⁷ Ka daux sipeem plix siiet khankix, tak sang koe krax pa yiiem yo, grawh grawng nawh, Aux tak sang tiang ti hu ka daux sinax pex heue. Siyiex ah nan heue. ¹⁸ Pui pa simie singaix Siyiex hoek khankix, koe krax kha rhawm heue. Pex lai simie singaix Siyiex yuh ka mawx lie? An tak sang mawh pa faik mai ang lai mawh pa riang ka son pex heue. ¹⁹ An tak sang mawh pa awm pui tix kaux, pa ot ti klawd khaing sivai sangsi mai hu sipub ti yaox krih, phan ang mawh nan, awm pa hoik hu laig nawh ka daux nyiex, yam hoik neung nawh tix ka piang ding mai siuing tut ka nawh heue. ²⁰ Singaix Siyiex mawh pa faik mai ang tie mawh pa riang ang mawh lie? An mawh pa kied faik mai pa ang jhan riang pie ceeix kawx ang mawh lie? ²¹ "Aux koeng mai seeing ka singaix pawie yuh pex khankix mai Aux ang lai khaw rhawm ka krax khrawm pa singax pex heue. ²² Viang pex tan ti tawx krax tan pa gleeing mai krax tan phawng nghox ca im ka Aux kawx, Aux tak ang lai rieb ti teei ankix mai Aux tak ang lai koe krax dex dawd tau mai to brie kluing pa tan pex ti tawx son krax tan pa nhim khankix heue. ²³ Kieh lox sinum lai rhax pa ah pex khankix luan khaing Aux, grawh grawng nawh, Aux ang lai rhawm nghiet ka lox ting pa tah pex khankix heue. ²⁴ Kieh ngie krax pa rahsee lih hu awm rawm mai kieh krax pa mawh meh awm rawm klawng pa kied riex riang heue. ²⁵ Nyiex ma ceu pui Isarelax khankix eue, Mawh hoik sax tan pex krax tan pa appong tix khankix mai krax tan an khankix ka Aux, yam ot pex ka daux tiag tixpon num lie? ²⁶ Pex hoik klawm teei ti viex nyiex gox Molawk pa mawh cie siyiex riang grang krub pex khankix mai pa mawh siyiex simuing pex, pa hoik yuh pex ka son tokaux pex heue. ²⁷ Mawh kheu nan, Aux tak sang kieh pex hoek ti mawh pui pa giex laung ka daux veng Damase heue. Siyiex pa mawh ceu kaux Siyiex cao kru naing raoma ah nin heue.

¹ Pa ot nyawm nyiem ka daux veng Zion mai pa een rhawm tix ot kaux cong ka gawng Samarix, ka kaw pa ting min khankix, pa mawh cao kaing ting ka daux ceu pui, ka pa peung nyiex ma ceu pui Isarelax khankix kah, tak koe krax kha rhawm heue. ² Pex hu ka plak veng Khalanie mai jhak ti yaox mai kaoh khaing tan dee hu ka veng ting Hamat heue. Khaix an lih hu ka veng Gilat, ka dee ot pui Philitix khankix heue. Mawh nie lheu mhawm meung ankix khaing meung pa ot pex lie? Mawh nie lheu vieh va dee kwang kix khaing dee kwang pex lie? ³ Pex pa greed singaix pa caox luan singai, pa kieh dee ngawm krax pa kin hoek dee dex koe krax kha rhawm heue. ⁴ Pa it ka piang ku nga sang khankix, pa nyat tix ka piang bi tawm, pa ih kawn yung iak khankix khaing daux cub phung yung mai pa teei ti ih kawn mawie iak khaing daux kawg mawie, ⁵ pa silao ti ah lai rhax tau mai tah ting khankix mai pa tang yuh ting pa khraox son tokaux tix, awm simiang Davit, ⁶ pa nyaux rawm plix siiet ka kawk ting mai pa kraix tokaux tix ka rawm bee pa kied mhawm mai ang tie koe krax khi rhawm son krax pa kha rhawm ceu pui Yosiep khankix heue. ⁷ Mawh kheu nan, kix tak sang yaox ti hu laig ka daux krax pa giex laung phao voe ka daux cub pa giex laung an khankix mai pui ankix pa nyhot tix ka daux bang pawie tak sang that grai hu heue. ⁸ Siyiex pa mawh Siyiex hoik tiextu ka tokaux cao tix, pa mawh Siyiex cao kru naing raoma mai ah nin "Aux seeing ka krax pa ting min Yakop mai koeng ka nyiex haw nawh khankix, mawh kheu nan, Aux tak sang ap ti tawx veng nawh mai can pa koe ka daux an khankix khawmuik ka pui koeng heue. ⁹ Yam an phan pui kawn deuk kao kaux ka daux nyiex tix lhang, kix tak sang yum khawmuik heue. ¹⁰ Yam teei paox nyiex kaw pa yum an ti gleeing tokaux yum an khankix mai pui pa sang gah tokaux yum an khankix lih khaing daux nyiex, nawh tak chawk ka pui pa ot ka daux nyiex ah nin "Mawh kawn koe pui tix kaux kaux mai maix lie? "Khaix an, nawh tak ah nin "Ang lai koe pie tix kaux kawx heue. "Nawh baox ah nin paw lai nye, grawh grawng nawh, ex ang lai koe akhwang ti krai ceu kaux Siyiex heue. ¹¹ Grawh grawng nawh, jhak heue. Siyiex tawx gumlox tix lih, nyiex pa ting lhaong tak mawh pa yieh ti laux mai nyiex pa iak tak phawng hu ku plak heue. ¹² Mawh chix to brung ka piang rang lie? Mawh chix thai pui ka mawie ka piang rang an lie? Pex hoik deeh teei pa rahsee mawh ghin pa song mai hoik deeh tieh pa khaw caw mawh plix lhax sup song heue. ¹³ Pex pa koe krax gaux rhawm ka daux Lawdebarax, pa ah nin, "Mawh ang yix hoik teei ti koe sibrawm ka riang rao tokaux yix lie?" ¹⁴ Jhak heue, nyiex ma ceu pui Isarelax khankix eue, Aux tak sang yaog ceu pui tix cub hoek ti puing ka pex heue. Siyiex Cao kru naing raoma ah nin "Kix tak sang yuh krax pa kha rhawm ka pex, jah khaing daux diang laig ka veng Hamat, tom hoek ka rawm klawng daux ngawd Arabax heue.

¹ Siyiex hoik jhi aux yaox, jhak heue, Nawh Cao hoik phan ti deuh cub sido khankix ka daux bawg yam jah rib ti glaoh khaix hoik pat simiang ka rib khankix heue. ² Yam hoik ih sido khankix ka rib haktiex an mai Aux hoik ah nin, "Siyiex leeing ju eue, aux khyox khaw Maix pluat ploi phimap liak, mawh kheu Yakop hoik iak riang rao, nawh tak sang pon cung yuh ka mawx lie?" ³ Siyiex leeing ju hoik deeh tieh rhawm tix ka son grawng in "An tak ang lai pon ti koe heue. "Siyiex ah nan heue. ⁴ Siyiex hoik baox jhi aux yaox, jhak heue, Siyiex tak kok ngu krax pa kha rhawm hoek mai ngu an hoik proe ti ih dee pa kied raux khankix mai tak sang gleeing yuh haktiex dee pang dee kwang khankix heue. ⁵ Aux ah nin "Siyiex leeing ju eue, aux khyox khaw Maix deeh yoi ti deuh an liak, mawh kheu Yakop hoik iak riang rao, nawh tak sang pon cung yuh ka mawx lie? ⁶ Siyiex leeing ju hoik deeh tieh rhawm rhi tix ka son grawng in, "In tak baox deeh ang lai koe heue. "Siyiex leeing ju ah nan heue. ⁷ Nawh Cao hoik baox jhi aux yaox, jhak heue, Siyiex hoik cung ti ot ka piang guh veng, pa hoik yuh tix ka maox pa tiag an tix nyaing tau ka daux taix Nawh Cao heue. ⁸ Siyiex chawk ah nin, "Amot eue, mawh yaox maix ka ceu patix lie? "Mai aux deeh ah nin yaox maox pa iak tix nyaing heue. Khaix an Siyiex deeh ah nin jhak heue, Aux tak preue ti deuh maox pa tiag an tix nyaing ka daux sinax pui aux khankix pa mawh ceu pui Isarelax heue. Aux tak ang lai gun yeung ka kix khaix in baox tix bawg heue." ⁹ Dee pa lhaong Icak khankix tak sang mawh dee pa yiien mai dee pa singax pui Isarelax khankix, tak sang mawh pa laux leeing heue. Aux tak sang yaog ti kaoh tau mai vaid ka piang nyiex ma Yerobom heue. ¹⁰ Cao giex kaing li Amazi khaing daux veng Betelax, hoik ploi pui hu ka Yerobom pa mawh simiang haktiex Isarelax, ah nin, "Amot hoik keud ti sang yuh pa caox ka piang maix daux sinax nyiex ma ceu pui Isarelax khankix heue, Meung in ang pon kan ti kham gumlox nawh heue. ¹¹ "Amot hoik ah nin, "Yerobom tak sang yum ka vaid mai ceu pui Isarelax tak sang mawh pa giex laung ti hu khaing daux haktiex cao kix heue." ¹² Amazi ah nin ka Amot maix pa mawh cao jhai eue, hu heue. To ka meung Yudax heue. Cang jheeh tix son pa ih tan mai krai lox jhai tan heue. ¹³ Khaix in paw lai baox krai lox jhai ka daux veng Betelax awx, ka dee an koe dee pa singax singeh simiang mai dee an koe nyiex haw ot simiang heue. ¹⁴ Amot deeh pawk lox ka Amazi ah nin, aux ang tie mawh cao jhai mai ang tie mawh kawn simex cao jhai. Aux mawh ngie cao pa liang yung mai cao pa priex khaox ruh heue. ¹⁵ Siyiex hoik laug aux, yam kawn hawt aux khaix cub phung yung mai Siyiex ah nin ka aux, maix hu krai lox jhai ka pui Aux khankix pa mawh ceu pui Isarelax heue." ¹⁶ Amazi eue, yam in nghiet ka gumlox Siyiex awx. Maix lai ah nin, "Paw doh krai lox jhai ka ceu pui Isarelax mai paw jah lox jhai ka nyiex ma Icak awx." ¹⁷ "Mawh kheu nan, Siyiex ah nin moeng maix tak sang mawh bun pa coh kaux ka daux veng, kawn simex kawn bun maix khankix, tak goh ti yum ka vaig, haktiex maix tak sang mawh pa tiag ti gwieh ka maox maix tak yum ka daux haktiex pa seeing brai mai ceu pui Isarelax tak sang mawh pa giex ti hu tete khaing daux haktiex cao kix heue."

¹ Siyiex hoik jhi aux yaox, "jhak heue, koe plix khaox daux yam rung tix phliex heue. ² Nawh Cao ah nin, "Amot eue, mawh yaox maix ceu patix lie? "Aux deeh ah nin, "Yaox ka plix khaox daux yam rung tix phliex heue. "Siyiex ah nin ka aux, "Dee sidah ceu pui Aux Isarelax khankix hoik hoek heue. Aux tak ang lai gun yeung ka kix khaix in tix bawg kawx heue." ³ Siyiex ah nin, "Lox lai rhax daux nyiex bwan, lox pa riag yo ka daux singaix an. Tak koe tokaux yum pui tom nie ku dah ku dee, kix tak sang tik an kix lih ka dee pa hoik yiien pui heue." ⁴ Pex pa sang bleet ti ih pui pa cud cha khankix mai pa kieh pui pa hot sia pui nyiex yaong khankix koe krax som nai khankix eue, nghiet ka gumlox in, ⁵ Pex ah nin, "Mawh sang luan singaix haok khix khraox yam mawx? Sonsang pon ex ti coh nghox mai tak sang luan singaix twah yam mawx? Sonsang pon ex ti hoe ka nghox ca tix, yam coh yuh kawk Epha iak mai yam teei ngawh yuh kla ciang ting, shiao ciang yoi pa ang khaw pie lhen ka pui. ⁶ Son sang pon teei ex ti tawx pui pa hot shia ka mau mai pon loh pui pa cha ka kiep tix ku mai coh ti tawx nghox ca pa ang mhawm khankix ka pui ang mawh lie?" ⁷ Siyiex ah lox tiextu ka min plakngai Yakop ah nin, "Aux tak ang doh piawm ka can kaing pa yuh kix tix ceu kawx leeing ju heue. ⁸ Mawh ang haktiex yung yiang kheu grawng in lie? Ang pui pa ot ka daux an koe krax khi glawh kah lie? An khawmuik tak keeh ti haok awm hwan rawm klawng Nilax mai awm puk pak rawm klawng meung Ejiptux heue. ⁹ Siyiex ah nin, "ka daux singaix an Aux tak sang kieh singaix klip ka daux bawg yam jung singaix mai kieh haktiex faik yam plak pon singaix heue. ¹⁰ Aux tak deeh tieh pawie pa yuh pex mawh krax khi glawh mai tieh lox lai rhax pex khawmuik mawh lox pa yiiem doe heue. Aux tak sang kieh pui ku kaux rawd nyoi tix ka man chee rhix mai kieh pui ku kaux khlao ka kaing tix pak, Aux tak kieh krax pa khi rhawm in awm pa yum kawn simex pa koe tix kaux khaing mai dee sidah nawh tak awm singaix krax pa kied kin kha rhawm heue." ¹¹ Siyiex ah nin, "Jhak heue, singaix ankix tak sang hoek, Aux tak sang ploi krax sibhawm praix lih ka piang haktiex heue. Ang tie mawh krax sibhawm praix pa ih mai ang tie mawh krax pa sang nyaux nie rawm mai tak sang mawh krax sibhawm praix pa ang yaox ti mhong ka gumlox Siyiex heue. ¹² Kix tak sang vung viang ti hu, jah khaing rawm sigrit sigra in tix mu tom hoek ka rawm sigrit sigra an tix mu mai jah khaing plak laong tom hoek ka plak lih singaix, kix tak to jee to blaong, ka sawg tix gumlox Siyiex, viang mawh nan, tak ang pon ti yaox heue. ¹³ Ka daux singaix an, bun krih pa mhawm grang mai sinaw pui awn ju khankix, tak koe krax pa taug pa mao kheu pa sang nyaux nie rawm heue. ¹⁴ Pui khankix pa hoik tiextu tix ka phimap Samarix, pa ah nin, Dan eue, awm krax pa im ju Siyiex maix mai awm daux krax pa im ju Berashebax kix tak sang goh mai ang lai pon yaog ti kaoh khaix in tix bawg kawx heue."

¹ Aux yaox ka cung Siyiex hawt khu dee tan mai nawh ah nin "Tawk rong kaing siviex laux, sonsang yung yiang siviex mai yuk yaig ankix rau ka piang kaing pui khawmuik heue. Aux tak sang pah pui pa kawn deuk khaing daux kix yum ka vaid khawmuik, ang lai koe pui pa pon to mai ang lai koe pui pa pon glawd ti luan tix kaux kawx heue. ² Viang kix kaong daux tom hoek ka daux meung yum kawx, taix Aux tak sang teei kix khaing tan, viang kix haok ka piang raoma kawx Aux tak deeh teei kix lih khaing tan heue. ³ Viang kix mox tix ka piang choek gawng Kharamelax kawx, aux tak sang sawg kix mai teei kix lih khaing tan, viang kix mox tix ka greem rawm sigrit sigra khaing plak sivoe ngai aux kawx, Aux tak sang tawx gumlox tix ka siyawng mai kieh lawd kix khaing tan heue. ⁴ Viang kix hu ka daux krax pa giex laung ka plak sivoe pui koeng kix kawx, Aux tak sang tawx gumlox tix ka vaid mai tak sang pah kix yum khaing tan heue. Aux tak sang jeung ngai tix jhak ka piang kix, sonsang tawx krax pa kha rhawm mai ang lai mawh son ceu pa mhawm heue." ⁵ Siyiex, pa mawh cao kru naing raoma hu teeh ka tiex mai tiex lih ti rawm mai can pui pa ot ka piang haktiex khankix khawmuik, tak sang koe krax khi glawh, an khawmuik, tak sang keeh ti haok awm rawm klawng Nilax mai awm puk pak rawm klawng meung Ejiptux heue. ⁶ Kaw pa sum lawg ot tix khankix ka piang raoma mai pa hoik pang num riah daog raoma ka piang haktiex pa kok rawm sigrit sigra khankix mai see lih ka piang haktiex, ceu kaux nawh mawh Siyiex heue. ⁷ Siyiex ah nin, "Ceu pui Isarelax khankix eue, mawh ang Aux jhak pex awm pui haktiex Ethiopiya khankix lie? Mawh ang Aux hoik teei ceu pui Isarelax khankix lih khaing daux meung Ejiptux mai khaing haktiex Kaptawrax mai pui Surix khankix lih khaing haktiex Kirax lie? ⁸ Ngai Siyiex hoik jhak ka piang meung haktiex pa koe map grham mai tak sang laux yuh meung an kix khaing ka piang haktiex heue. Aux tak ang lai laux yuh nyiex ma Yakop pak lawg. Siyiex ah nan heue. ⁹ "Grawh grawng nawh Aux tak sang tawx gumlox tix lih mai tak sang grheeng cub nyiex ma ceu pui Isarelax khankix khaing daux sinax ceu pui khankix khawmuik, awm grheeng nghox pa hoik grheeng tix ka daux grheeng mai ang tie cod ka piang tiex tix sok kawx heue. ¹⁰ Pui pa koe phimap khankix khaing daux pui aux pa ah nin, "Krax kha rhawm tak ang pon krup ka yix mai ang pon ti sipub yix, kix tak yum ka lawm vaid heue." ¹¹ Ka daux singaix an Aux tak deeh cox sum nyiex gox Davit pa hoik grhup hoik goh mai deeh cox dee pa laux leeing khankix heue. Aux tak sang deeh yaog ti sum dee pa laux leeing nawh mai deeh sum nawh, awm pa koe ka daux singaix an dix heue. ¹² Pa kieh ceu pui Isarelax pon ti cie ceu pui Edom, pa kawn deuk khankix mai ceu pui tang ceu khawmuik, pa hoik kok ka ceu kaux Aux heue. Siyiex pa yuh ceu inkix pa ah yuh nin heue. ¹³ "Singaix an khankix tak sang hoek, pa thai kaung tak sang krup bawg yam pa vawg nghox mai pa biiet rawm plix siiet tak sang krup bawg yam pa rhuat simie, gawng khankix tak sang jah lih rawm plix siiet pa tie mai ton tak sang rawm ti hu tau mai ankix heue. ¹⁴ Aux tak sang deeh viex pui pa giex laung ceu pui Aux Isarelax khankix hoek, kix tak sang deeh cox sum veng pa laux leeing an mai deeh pang ti ot ka daux veng an kix, kix tak sang sum ti cie sipeem plix siiet mai nyaux rawm plix siiet pa kaoh khaing ankix heue. Kix tak sang baox deeh yuh sipeem mai ih plix khaox plix ox khaing daux ankix heue. ¹⁵ Aux tak sum ti deuh kix ka daux haktiex cao kix mai kix tak ang lai mawh pa deeh reeig tix baox tix bawg khaix in, khaing daux haktiex pa hoik tawx Aux ka kix heue. "Siyiex pa mawh Siyiex maix ah nan heue.