Acts

Acts

¹ Thawphilux eue, lai pa hoik tiiem aux phao ka, mawh grawng pa jah Yesux ti yuh mhai grawng pa gau Nawh khawmuik, ² Tom sidah hoek singaix pa rieb ti teei Nawh Cao haok, khaix hoik tawm Nawh lox ka daux Khuan Singax, ka kawncau pa ting Nawh khankix, pa hoik laug Nawh ti teei heue. ³ Ka kix kawx Nawh Cao jhi yaox tokaux pa im tix, khaix hoik geu Nawh ti yum, ka daux mhai rug pa mawh meh tom nie mai kieh kix yaox tokaux tix, ka daux tixpon ngaix mai krai grawng ceu pa dex dawd mai Meung Siyiex heue. ⁴ Yam khrawm Nawh Cao tau mai kix, Nawh tawm lox ka kix son ang kix sang lih khaing veng Yerusaliem, krox tom hoik pon, awm lox mukheu pa tawx Keeing Cao, pa ah Nawh, "Hoik mhong pex ka Aux. ⁵ Grawh grawng nawh Yohan cubcom ka rawm tete heue, viang mawh nan, khaix in ang awt rheung miex ngaix tix, pex tak sang cubcom ka daux Khuan Singax heue." ⁶ Mawh kheu nan, yam hoik khrawm kix paox tix, kix chawk Nawh Cao ah nin, "Simiang eue, Maix sang deeh tawx meung ka pui Isarelax yam in lie?" ⁷ Nawh Cao deeh ah nin ka kix, "Bawg yam khankix pa hoik ciak Keeing Cao ti deuh, daux sibrawm tokaux tix, ang mawh pa sang tawx pex tawng. ⁸ Viang mawh nan pex tak sang pon sibrawm, yam hoik hoek Khuan Singax Singeh piang pex mai pex tak sang mawh pui pa kham mhai rug son Aux, jah ka veng Yerusaliem khawm meung Yudax khawmuik mai meung Samarix mai hoek tom dee sidah haktiex heue." ⁹ Khaix hoik krai Nawh Cao ceu an khankix, yam kawn jhak kix, teei Nawh Cao haok mai paiawm rieb ti teei Nawh khaing dee chix yaox kix. ¹⁰ Yam kawn maong kix ti jeung ka raoma, jhak heue, pui ra kaux pa ceep kraung pa paing cung liep kix, ¹¹ pa ah nin, "Pui Galilie khankix eue, pex cung ti jhak ka raoma yuh ka mawx? Yesux in, pa hoik rieb ti teei haok ka daux meung raoma khaing pex, tak sang deeh hoek, awm yaox pex Nawh haok hu ka daux meung raoma heue." ¹² Yam an kix deeh khaing gawng pa kok mawh Sanlun, pa dex ka veng Yerusaliem, pa singai krax singaix twah, tix singaix heue. ¹³ Yam hoik laig kix tan, kix haok daux lawg plak piang, dee ot kix, khawm Petrux, Yohan, Yakop, Andare, Philipux, Thomax, Bathawlamie mai Mathiex, Yakop kawn Alaphie mai Simon Zelot mai Yudax pux Yakop heue. ¹⁴ Kix khawmuik ih rhawm paox tix, nied ti rawg bwan, tau mai bun khankix, khawm Marix miex Yesux mai pux Nawh Cao khankix heue. ¹⁵ Ka daux ngaix bawg yam an, Petrux kaoh cung sinax puxaik khankix, pui pa khrawm ti tan dex koe tiyieh tixnga kaux mai nawh ah nin, ¹⁶ "Puxaik khankix eue, lox Phuk lai singang khri, pa hoik krai Khuan Singax Singeh ka jheeh Davit grawng Yudax, pa thong kix pa hoik hu giex Yesux, phan ang naog ang doh pon heue. ¹⁷ Grawh grawng nawh, hoik simin nawh tau ka daux ex mai nawh hoik pon ti yuh kaing cao sidiex gau in, pa mawh son cie tix heue. ¹⁸ Pui in teei ngawh riang phimap ceu pa hoik yuh tix mai liag haktiex ti dah mai nawh goh gup kaing tix mai vaig nawh bih mai kraung vaig nawh glhua khawmuik heue. ¹⁹ Pui pa ot ka daux veng Yerusaliem khawmuik tawng grawng an, tom hawt ka daux lox kix kok haktiex an mawh, Akeladamax, pa ah nan sang ah "Haktiex Nham" heue.) ²⁰ Mawh kheu hoik tiiem ka daux phuk lai Yaogyaw ah nin, "Kieh yuh dee ot nawh yi, ang koe tidtix mai paw kieh pui ot tan tix kaux kawx," mai "Kaing pa giex nawh kieh pui tang kaux teei heue." ²¹ "Mawh kheu nan ka daux pui khankix pa hoik rom tau mai ex, yam ot Simiang Yesux ti lai ling tau mai ex, glang gleeing ku bawg yam, ²² jah ka yam cubcom Nawh mai Yohan,tom sidah hoek singaix, yam rieb ti teei Nawh haok khaing ex.Ka daux kix tix kaux tak lai mawh, pui kham mhai rug tau mai ex, grawng pa kaoh Nawh Cao khaing krax yum heue." ²³ Kix laug ra kaux pa mawh Yosiep, pa kok mawh Basabax, ceu kaux ru nawh mawh Yusatu mai Matthix heue. ²⁴ Kix rawg bwan ah nin, "Simiang eue, Maix pa tawng rhawm kawn pui khawmuik, ka daux kiex ra kaux pa hoik laug Maix, mawh kaw pa yuh ka mawx jhi ex yaox liak. ²⁵ Sonsang kieh nawh teei kaing cao sidiex cao gau in mai sonsang yuh kawncau pa ting, ka dee hoik rau hoik gwieh Yudax, yuh ka mawx sonsang pon hu nawh ti ot dee ot cie tix heue." ²⁶ Kix nieb ti yaox grawng kiex mai caw ka Matthix heue. Simin nawh tau mai kawncau pa ting kao tix kaux an heue.

¹ Yam ngaix pawie Pientekote hoik hoek ti grum naog, kix khawmuik ot tau tix dah heue. ² Dom mawx dom an lox lih hoek khaing raoma awm lox phlu bhaung ting mai naog daux nyiex khawmuik ka dee ngawm kix heue. ³ Kix yaox bleeh dak kukak khankix pa awm ngu mai tum piang kix ku kaux heue. ⁴ Kix khawmuik naog ka Khuan Singax Singeh mai jah ti sikah ka daux lox tang ceu khankix, awm pa tawx Khuan kix ah heue. ⁵ Ka daux bawg yam an koe pui Yudax ka daux veng Yerusaliem, pa mawh pui pa chix nab yam ka Siyiex, pa kaoh khaing meung pui ku meung pa koe greem raoma heue. ⁶ Yam mhong lox pa sinum an, pui hun khrawm paox tix mai daox deng ka kheu kix ku kaux daux pui, mhong kawncau khankix sikah ka daux lox tokaux tix heue. ⁷ Kix khawmuik kied daox deng kah mai ah nin ka paox tix, tix kaux lai tix kaux, "Jhak heue, pui pa sikah khankix khawmuik, mawh pui Galilie ang mawh lie? ⁸ Phan mawh nan, ex ku kaux daux pui pon mhong lox tokaux tix, dee hoik keh ex yuh ka mawx? ⁹ Ex pa mawh pui meung Pathi mai pui meung Mede mai pui meung Elam mai pui pa ot ka daux meung Mesopotemia mai ka daux meung Yudax mai meung Kapadosia mai ka daux meung Pawntux mai meung Asix, ¹⁰ mai ka daux meung Pharuki mai meung Pampuli, ka daux meung Ejiptux mai haktiex meung Libya mai sivie veng Kurene mai nyo sinie khankix pa kaoh khaing veng Romax, pui Yudax mai khawm pui pa hoik laig li kix. ¹¹ Pui meung Karete mai pui meung Arebia khankix mai ex mhong kix sikah ka daux lox ex, krai grawng pa ting lhaong pa hoik yuh Siyiex heue." ¹² Kix khawmuik kied daox deng ka mai ah nin ka paox tix, "Dee bleeh grawng in mawh pa yuh ka mawx?" ¹³ Tang kaux tix blah nieb ah pa ang cee ang cak ah nin, "Kix sak kix yoek ka rawm plix siiet pa tie heue." ¹⁴ Petrux cung tau mai kawncau kao tix kaux mai kieh lox tix sinum mai sidiex ka kix ah nin, "Pui meung Yudax mai pui pa ot ka daux veng Yerusaliem khawmuik eue, kieh pex tawng grawng ceu in mai nghiet gumlox aux heue. ¹⁵ Grawh grawng nawh kix yoek awm pa ce pex ang mawh, kheu kawn tak hoek ngie ponngawb loe nari heue. ¹⁶ Viang mawh nan in mawh grawng ceu pa hoik grux krai cao jhai Yoelax ah nin, ¹⁷ Siyiex ah, ka daux bawg yam ngaix sidah khankix, Aux tak kieh Khuan Aux lih piang pui khawmuik heue. Kawn simex kawn bun pex tak sang krai lox jhai mai pui pa awn ju pex, tak sang yaox riang susai mai pui kuad song pex tak sang camaox ti yaox heue. ¹⁸ Mawh heue, Aux tak sang kieh Khuan Aux lih piang kawncau simex cie Aux mai kawncau bun cie Aux ka daux ngaix Aux khankix mai kix tak sang krai lox jhai heue. ¹⁹ Aux tak jhi yaox mhai pa daox deng, ka raoma dee long mai mhai ka greem piang haktiex, pa mawh nham mai ngu mai taox ngu heue. ²⁰ Singaix tak tieh loh ti mawh pa faik mai khix tak sang mawh nham, phao ka sivoe sang hoek ngaix pa ting lhaong Simiang an heue. ²¹ Pui mawx ang ah pa kok ka ceu kaux Siyiex, tak sang hoek krax taoh heue. ²² "Pui Isarelax eue, nghiet gumlox in khankix heue. Yesux Pui veng Nazariet, Pui tix kaux pa hoik jhi Siyiex pex yaox grawng pa khaw caw rhawm Nawh, ka daux kaing pa ting sibrawm mai ka daux mhai pa daox deng, pa hoik yuh Siyiex ka daux Nawh Cao sinax pex, awm tokaux pex kawx hoik tawng heue. ²³ Kaw pa hoik dud keud Siyiex, grux tawng mai tawx, pex hoik teei ti tawk Nawh yum piang khaox lhak, ka tawm taix pui ceu pa ang koe lai beenli heue. ²⁴ Viang mawh nan Siyiex hoik deeh kieh Nawh kaoh im, khaix hoik yah ceu pa saux krax yum, mawh kheu krax yum ang lai chix pon giex pong gang Nawh heue. ²⁵ Mawh kheu Davit hoik krai grawng Nawh yuh nin, Aux yaox Siyiex sivoe pakngai aux jheung jheung Kheu Nawh ot plak taix khawn dawm aux, son ang pon ti yung yiang aux. ²⁶ Mawh kheu nan rhawm aux gaux kah mai dak aux tom gaux rhawm heue. Lheu khaing an nex aux kawx, tak ot ka daux krax keud pot jun pot heue. ²⁷ Mawh kheu Maix tak ang grham ju aux ka daux meung yum. Lheu khaing an Kaw Pa Singax Singeh cie Maix kawx, tak ang kieh pon cux pon sium heue. ²⁸ Maix hoik kieh aux tawng krax pa im ju khankix heue. Maix tak sang kieh aux naog mai pa gaux rhawm, ka pakngai Maix heue. ²⁹ "Puxaik khankix eue, aux pon ti krai grawng tax ex Davit ka pex mhawm mhawm, grawng hoik yum hoik sipaung nawh mai simeeig nawh koe tau mai ex tom yam in heue. ³⁰ Mawh kheu mawh nawh cao jhai mai kheu tawng nawh Siyiex hoik tiextu ti krai grawng Nawh tak sang kieh ru nawh tix kaux ngawm piang dang ngeung nawh heue. ³¹ Kheu nawh hoik grux yaox ceu in, nawh tom krai grawng pa sang deeh kaoh im Cao Khrit mai grawng tak ang grham Nawh daux meung yum mai grawng nex Nawh kawx tak ang hoek krax cux krax sium heue. ³² Yesux in, Siyiex hoik deeh kieh kaoh im mai ex khawmuik mawh pui pa kham mhai rug grawng an heue. ³³ Mawh kheu hoik yaog Nawh mai kheu ot Nawh plak taix khawn dawm Siyiex mai kheu hoik pon awm lox mukheu pa hoik tawx Keeing Cao grawng Khuan Singax Singeh, pa hoik kieh Nawh ceu in lih, pa yaox pa mhong pex kah heue. ³⁴ Grawh grawng nawh, Davit ang haok ka daux meung raoma, viang mawh nan tokaux nawh ah nin, Siyiex ah nin ka Simiang aux, ngawm plak taix khawn dawm Aux, ³⁵ tom Aux kieh pui pa koeng ka Maix, mawh ngot dee deuh Maix caong tix heue. ³⁶ "Mawh kheu nan kieh geh pui Isarelax khawmuik, tawng mhawm mhawm, grawng Yesux pa hoik tawk pex piang khaox lhak, Siyiex hoik kieh Nawh mawh Siyiex mai Khrit heue." ³⁷ Yam mhong kix lox an, dung ka rhawm kix mai kix chawk ah nin ka Petrux mai kawncau pa ting tang kaux khankix, "Puxaik khankix eue, ex tak sang yuh ka mawx?" ³⁸ Petrux deeh ah nin ka kix, "Doh keud ka phimap pex mai cubcom pex ku kaux ka daux ceu kaux Yesux Khrit, sonsang pon luan khaing daux phimap pex mai pex tak sang pon totaix Khuan Singax Singeh heue. ³⁹ Mawh kheu lox mukheu pa hoik tawx an, mawh son pex mai son kawn praix pex mai pui pa ot dee singai khawmuik. Awm kok Siyiex ex hoek ka Nawh miex ding ang ah, mawh ding heue." ⁴⁰ Nawh teei lox tang ceu tom nie mai kham mhai rug, sidiex gau ka kix ah nin, "Taoh tokaux pex khaing ju pa kawk vawk in heue." ⁴¹ Kix pa rieb ti teei gumlox nawh, cubcom daux rawm mai ka daux ngaix an pui pa baox tiien kix dex koe loe rheng heue. ⁴² Kix nghiet lox pa sidiex kawncau pa ting khankix jheung jheung mai yuh paox pie ka daux pa sivit blah mai pa rawg bwan heue. ⁴³ Pui ku kaux daux pui lhat graung ka, ceu pa daox deng tom nie mai mhai pa daox deng pa hoek ti mawh ka tawm taix kawncau pa ting khankix heue. ⁴⁴ Pui pa yum rhawm khawmuik ot tau mai pa koe kix khawmuik kix rom ti shiao tau heue. ⁴⁵ Kix coh haktiex kix mai kraung khrai cie kix mai gwieh ka paox tix khawmuik, awm pa lo pui mawx pui an heue. ⁴⁶ tix ngaix hoik tix ngaix kix khaw caw rhawm paox tix, ot ka daux nyiex bwan mai kix sivit blah tau ka daux nyiex kix. Kix gaux sile he sivoek, ih pa ih kix mai ih rhawm, ang tang lox siyox moing, ⁴⁷ yaogyaw Siyiex mai pon pa khaw caw rhawm pui khawmuik heue. tix ngaix hoik tix ngaix Siyiex baox tiien ka kix pa hoek krax taoh heue.

¹ Petrux mai Yohan haok hu ka nyiex bwan, bawg yam nari rawg bwan, yam mawh dim nari heue. ² Kix klawm pui hoek tix kaux pa hoik laux caong tom yam ot ka daux vaig miex tix, pa deuh kix dex siviex nyiex bwan ku ngaix pa kok mawh pa "Mhawm grang,"sonsang rawg sang mhaing ka pui pa laig ka nyiex bwan heue. ³ Yam nawh yaox Petrux mai Yohan dex sang laig ka daux nyiex bwan, nawh rawg mhaing ka kiex heue. ⁴ Petrux jawg ti jeung ngai tix piang kaw an, tau mai Yohan, ah nin, "Jhak ka yiex heue." ⁵ Nawh yaog ti jhak kiex, kheu ce ti sang pon tix ceu ceu khaing kiex heue. ⁶ Petrux ah nin, "Aux ang koe mau khri, viang mawh nan, pa koe aux, aux sang tawx ka maix heue. Ka daux ceu kaux Yesux Khrit Pui veng Nazariet, kaoh hu ka caong tix heue." ⁷ Nawh giex taix khawn dawm kaw an mai yaog nawh kaoh mai dom mawx dom an caong nawh mai ngai liag nawh koe riang heue. ⁸ Nawh jalo ti kaoh cung mai nawh jah ti hu ka caong tix heue. Nawh laig ka daux nyiex bwan tau mai kiex, hu ka caong tix mai jaloh tix mai yaogyaw Siyiex heue. ⁹ Pui khawmuik yaox nawh hu ka caong tix mai yaogyaw Siyiex heue. ¹⁰ Kix tawng nawh mawh kaw pa ngawm ti caung ka dex Siviex Mhawm grang nyiex bwan mai kix khawmuik daox deng ka ceu pa hoik mawh ka nawh heue. ¹¹ Yam jhawp kaw an ka Petrux mai Yohan mai pui khawmuik kied daox deng kah mai to hu ka kix, piang grah pa kok mawh "Grah Sawlamon"heue. ¹² Yam yaox Petrux pa yuh nan, nawh deeh ah nin ka kix, "Pex pa mawh pui Isarelax eue, pex lai daox deng ka pui in yuh ka mawx? Yuh pa tix? pex lai jawg ti jeung ngai pex ka yiex, awm pa hoik mawh sibrawm mai pa rahsee yiex, pa hoik kieh nawh deeh chix hu ka caong tix, ¹³ Siyiex Abraham, Icak mai Yakop. Siyiex tax du ex, hoik yaog min pakngai Kawn Nawh Yesux, pa teei pex ti tawx mai thiang ti tik sivoe Pilat, yam nawh keud ti sang ploi Nawh Cao heue. ¹⁴ Viang mawh nan, pex thiang ti tik Kaw pa singax singeh, Pa Rahsee mai pex rawg sonsang tawx ka pex, pui tix kaux pa mawh pui pa pah pui yum heue. ¹⁵ Pex hoik teei Simiang pa im ju yum, Kaw pa hoik kieh Siyiex nawh deeh kaoh im khaing krax yum mai yiex mawh pa kham mhai rug grawng an heue. ¹⁶ Mawh kheu krax yum rhawm ka daux ceu kaux Nawh Cao, ceu kaux Nawh hoik kieh pui in koe riang rao, pa yaox mai pa tawng pex heue. Mawh heue, krax yum rhawm ka Nawh Cao, hoik tawx pa grum mhawm ka nawh, sivoe ngai pex khawmuik heue. ¹⁷ Yam in puxaik khankix eue, aux tawng grawng pex mai simiang pex kawx, hoik yuh nan kheu ang pex tawng. ¹⁸ Ceu pa hoik grux jhi Siyiex ka jheeh cao jhai khankix, grawng Khrit tak sang kham geu, Nawh hoik kieh naog yuh nan heue. ¹⁹ Mawh kheu nan doh keud ka phimap tix mai deeh tieh tix, sonsang preet phimap tix, sonsang hoek bawg yam pa kieh nyawm ot, pa kaoh khaing Siyiex heue. ²⁰ Kheu sonsang ploi Nawh Khrit pa hoik laug Nawh son pex, pa mawh Yesux heue. ²¹ Kaw pa raoma tak sang rieb ti priex, tom hoek bawg yam pa hoik cox kuceu khawmuik, pa Siyiex hoik krai ka jheeh cao jhai pa singax khankix, jah tom di dix heue. ²² Mose hoik ah nin, Siyiex tak sang kieh Cao jhai lih tix kaux, khaing ka daux puxaik pex, pa awm aux heue. Pex tak sang nghiet pa krai Nawh ka pex kuceu khawmuik heue. ²³ Pui pa ang nghiet lox Cao jhai an ku kaux daux pui, tak sang kieh nawh laux lak pak leeing khaing sinax pui ceu nawh heue. ²⁴ Mawh heue, jah ka cao jhai Samoelax mai cao jhai pa koe khaix nawh khawmuik, cao pa krai koe miex kaux ang ah, kix kawx hoik krai grawng bawg yam ngaix in khankix heue. ²⁵ Pex mawh kawn praix cao jhai khankix mai mukheu pa hoik yuh Siyiex tau mai tax du pex, pa ah nin ka Abraham, Ka daux ru maix, geh pui piang haktiex khawmuik khawm leeing tak sang pon bwanson heue. ²⁶ Phaox ka Siyiex hoik ploi Kawn Nawh Yesux lih ka pex, sonsang tawx bwanson ka pex, ka daux pa kieh pex ku kaux, deeh tieh khaing phimap tix heue."

¹ Yam sidiex gau kiex ka pui khankix, cao giex kaing li khankix, cao giex kaing nyiex bwan mai Sadukie khankix hoek ka kiex, ² Kix sung sang rhawm kheu sidiex gau kiex pui khankix, ka grawng pa deeh kaoh im pui khaing krax yum ka daux Yesux heue. ³ Kix giex ti sau kiex daux thawng tom hoek pasax, kheu hoik mawh yam ponbo heue. ⁴ Viang mawh nan pui pa mhong gumlox an tom nie yum rhawm ka mai simex giex dex koe phwan rheng heue. ⁵ Ngaix pasax simiang kix khankix mai kuad song khankix mai pui tiiem lai khankix khrawm paox tix ka daux veng Yerusaliem, ⁶ mai Anax cao giex kaing li pa ting mai Kayaphax mai Yohan mai Alezandru mai can pa mawh paox ru cao giex kaing li pa ting khawmuik ot tan heue. ⁷ Yam hoik deuh kix kiex ka sinax, kix chawk kiex ah nin, "Pax teei sibrawm pa yuh ka mawx, phan ang mawh nan, pax hoik yuh ceu in ka daux ceu kaux pui mawx?" ⁸ Yam an Petrux naog ka Khuan Singax Singeh mai ah nin ka kix, "Pex pa mawh simiang giex kaing pui khankix mai kuad song khankix eue, ⁹ Phan chawk cheng yiex ka daux singaix in, ka grawng ceu pa mhawm pa hoik yuh ka pui pa laux maung mai pui in pon ti deeh moi ka pa yuh ka mawx, ¹⁰ Kieh pex khawmuik mai pui Isarelax khawmuik een ti tawng, grawng mawh ka daux ceu kaux Yesux Khrit Pui veng Nazariet, Kaw pa hoik tawk pex piang khaox lhak, pa Siyiex hoik deeh kieh kaoh im khaing krax yum, mawh ka daux ceu kaux Nawh, kaw in tom moi mai cung sivoe pex heue. ¹¹ Kaw in mawh simaox, pa hoik tik pex pa mawh cao yuh nyiex, pa hoik kieh mawh kaing ka daog heue. ¹² Ang koe ceu pa taoh ka daux tang kaux tix kaux kawx, mawh kheu ang koe ceu kaux tang kaux greem raoma, pa hoik tawx ka sinax kawn pui, ka daux dee sang hoek ex krax taoh heue." ¹³ Yam yaox kix grawng ceu pa kwa rhawm Petrux mai Yohan mai tawng grawng kiex ang tie tawng lai mai mawh pui pheem, kix daox deng kah mai kix doh rhawm ka, grawng mawh kiex pa hoik ot tau mai Yesux heue. ¹⁴ Mawh kheu kix yaox kaw pa hoik cox moi cung tau mai kiex, kix ang nieb pon ah tidtix heue. ¹⁵ Viang mawh nan khaix hoik nhie kix kiex lih hu plak praix, khaing cub kuad pa prawng see, kix kum kawng paox tix, ¹⁶ Ah nin, "Ex tak sang yuh ka mawx ka pui in kiex? Mawh kheu kiex hoik yuh mhai pa daox deng pa koe cee mai hoik sidawng ka pui pa ot ka daux veng Yerusaliem khawmuik mai ex ang pon thiang ka grawng an heue. ¹⁷ Son ang sang nie baox tah ka sinax pui khankix, ex ghlat kiex ka lox, yuh ka mawx, khaix in, son ang kiex sang baox sidiex ka pui tix kaux kawx, ka daux ceu kaux in heue." ¹⁸ Kix kok kiex mai tawm lox ka kiex, son ang sang baox sidiex gau ka daux ceu kaux Yesux, ceeix kawx heue. ¹⁹ Viang mawh nan Petrux mai Yohan pawk lox mai ah nin ka kix, "Pex keud ti yaox, mawh pa yuh ka mawx lheu khaw ka sivoe ngai Siyiex, ceu pa nghiet lox pex khaing lox Siyiex lie? ²⁰ Mawh kheu grawng ceu pa hoik yaox hoik mhong yiex, phan ang krai ang doh pon heue." ²¹ Khaix kix hoik baox ghlat kiex, kix ploi kiex hu, kheu kix ang yaox tidtix grawng sang pon ti ciyang kiex, mawh kheu pui khankix heue. Kheu pui khawmuik yaogyaw Siyiex, son grawng ceu pa hoik mawh an heue. ²² Mawh kheu pui pa kiex hoik yuh mhai pa daox deng, ceu pa kieh moi an ka, hoik koe tixpon num haoh heue. ²³ Yam hoik ploi kiex hu, kiex hoek ka paox cub kiex mai krai grawh grawng ceu pa hoik ah cao giex kaing li pa ting khankix mai kuad song khankix ka kiex khawmuik heue. ²⁴ Yam hoik mhong kix grawng an, kix yuh lox tix gum cum tix dah, pa sinum ka Siyiex ah nin, "Simiang eue, Maix hoik yuh raoma mai haktiex mai rawm sigrit sigra mai can pa koe ka daux khankix khawmuik. ²⁵ Kaw pa hoik krai ka daux Khuan Singax Singeh, ka jheeh keeing ex Davit pa mawh kawncau Maix ah nin, Pui tang ceu cong rhawm ka grawng pa yuh ka mawx? Ceu pui khankix nieb keud grawng pa giex going yuh ka mawx? ²⁶ Laux simiang haktiex in khankix bre tokaux tix mai cao giex kaing khankix khrawm paox tix, tiex cha ka Siyiex mai Khrit cie Nawh heue. ²⁷ Grawh grawng nawh, ka daux veng inkix hoik tiex cha ti yuh ka Kawn Maix Yesux, pa singax singeh tete heue. Kaw pa hoik groi Maix rawm bee kah, khawm Herut mai Pawnti Pilat, tau mai pui tang ceu khankix mai pui Isarelax khrawm paox tix, ²⁸ ti yuh awm taix Maix mai pa keud Maix hoik grux ciak ti kieh mawh heue. ²⁹ Yam in, Siyiex eue, jhak piang pa ghlat kix liak mai tawx kawncau Maix khankix, rhawm pa cong pa kwa ti sidiex gau lox bwan Maix. ³⁰ Yam nyeu Maix taix tix, ti cox moi heue. Yuh ka mawx sonsang pon yuh mhai mai ceu pa daox deng, ka daux ceu kaux pa singax singeh Kawn Maix Yesux heue." ³¹ Khaix hoik rawg kix bwan, dee khrawm kix paox tix yung yiang mai kix khawmuik naog ka Khuan Singax Singeh mai kix kwa ti sidiex gumlox Siyiex heue. ³² Cub pui hun pa yum rhawm, mawh rhawm tix mu khaing mai tix kaux kawx, ang ah kraung ceu pa koe ti mawh cie tix, viang mawh nan kix rom paox tix shiao ceu pa koe khawmuik heue. ³³ Kawncau pa ting khankix kham mhai rug ka daux sibrawm pa ting grawng pa deeh kaoh im Simiang Yesux mai bwanson pa ting koe piang kix khawmuik heue. ³⁴ Ka daux kix pa ang kub ang koe tix kaux kawx, mawh kheu kix pa koe haktiex, phan ang mawh nan pa koe nyiex, coh khankix mai viex ngawh can pa hoik coh kix hoek, ³⁵ mai deuh ka caong kawncau pa ting khankix mai kix gwieh ka ku kaux awm pa lo nawh heue. ³⁶ Yosiep kaw pa tawx kawncau pa ting khankix ceu kaux nawh mawh Banabax, phan toe lox an dee bleeh mawh, "Kawn simex pa khu rhawm"heue. Nawh mawh pui Lewix, ceu pui meung Kuparux, ³⁷ pa hoik coh haktiex pa koe nawh tix dah mai viex mau ngawh mai deuh ka caong kawncau pa ting khankix heue.

¹ Pui tix kaux pa kaux Ananix mai moeng nawh Sapphirax coh ceu pa koe kiex tix ceu, ² mai nawh khawm moeng nawh, awm caw rhawm kiex paox tix mai mox ti een ngawh an tix blah mai viex ngie tix blah hu een ka caong kawncau pa ting khankix heue. ³ Viang mawh nan Petrux ah nin, "Ananix eue, yuh ka mawx maix lai kieh Satan naog ka rhawm maix, sonsang pie ka Khuan Singax Singeh mai mox ti een ngawh haktiex an tix blah? ⁴ Yam kawn koe haktiex an mawh cie maix ang mawh lie? Khaix hoik coh haktiex an maix sang yuh ka mawx ka ngawh an koe ka maix ang mawh lie? Kheu maix lai keud ti yuh ceu in ka daux rhawm maix? Maix hoik pie ka kawn pui ang mawh, viang mawh nan, hoik pie ka Siyiex heue." ⁵ Yam mhong Ananix lox ceu an khankix nawh goh mai dud rhawm heue. Pui pa mhong grawng an khawmuik kied lhat ka heue. ⁶ Pui pa awn ju khankix kaoh mai pua nawh mai klawm nawh lih hu mai sipaung nawh heue. ⁷ Khaix an rheung dex koe loe nari, moeng nawh ang tawng grawng pa hoik mawh an mai hoek ti laig tan. ⁸ Petrux chawk nawh ah nin, "Krai ka aux, pax coh haktiex an pon ngie ding khaing lie? Nawh deeh krai ah nin, "Mawh, pon ding khaing heue." ⁹ Petrux baox chawk ah nin ka nawh, "Kheu pax lai kum ti mawh rhawm tix mu, sonsang cheuk sang nyaw ka Khuan Siyiex lie? Jhak heue, caong kix pa hoik sipaung mex maix ot ka siviex mai kix tak sang klawm maix lih heue. ¹⁰ Bun an goh dom mawx dom an ka liep caong nawh mai dud rhawm heue. Pui pa awn ju an khankix laig mai yaox pa hoik yum nawh mai kix klawm nawh lih mai sipaung nawh liep mex nawh heue. ¹¹ Pui ceu cao khawmuik mai pui pa mhong grawng ceu in khankix khawmuik die lhat kah heue. ¹² Ka tawm taix kawncau pa ting khankix yuh mhai tom nie mai pa daox deng tom nie, ka sinax pui khankix mai kix khawmuik ih rhawm paox tix ot piang grah Sawlamon heue. ¹³ Pa deuk pa taik khankix, ring yuh paox pie mai kix, viang mawh nan pui khankix yaogyaw ka kix heue. ¹⁴ Cub pui pa yum rhawm Siyiex khawm simex khawm bun, baox nie haoh hun heue. ¹⁵ Kix klawm pui pa koe jhawm saux hu ka daux krax mai een kix piang ku, piang bi, yuh ka mawx yam lawng Petrux krax, peue nawh sang kheem sang veei ka kix tix blah heue. ¹⁶ Pui haoh hun pa ot daux veng khankix pa koe sivie siveng veng Yerusaliem khrawm paox tix viex pui pa koe jhawm saux mai pui pa laig phi pa seeing pa tuktiak khankix mai kiex cox kix ku kaux daux pui khawmuik moi heue. ¹⁷ Cao giex kaing li pa ting mai pui pa ot tau mai nawh khawmuik pa mawh cub pui Sadukie kaoh mai naog krax boh rhawm heue. ¹⁸ Kix giex kawncau pa ting khankix mai sau kix ka daux thawng. ¹⁹ Kawncau Siyiex tix kaux hoek yam pon sawm, paoh siviex thawng mai viex kix lih ah nin, ²⁰ "Pex hu mai cung ka daux nyiex bwan mai sidiex gau ka pui khankix, grawng gumlox pa im ju khawmuik heue." ²¹ Yam mhong kix grawng ceu in, kix laig ka daux nyiex bwan yam dex sang riang praix mai sidiex gau heue. Cao giex kaing li pa ting mai kix pa ot tau mai nawh hoek mai kok cub kuad song pa prawng see mai kuad pui Isarelax pa giex kaing khankix khrawm paox tix khawmuik mai ploi kix hu ka nyiex thawng, sonsang viex kawncau pa ting khankix hoek heue. ²² Yam hu pui cau soi khankix ka daux thawng kix ang yaox mai kix deeh hoek krai, ²³ Ah nin, "Ex yaox pa hoik song siviex nyiex thawng mhawm mhawm mai pui pa pau cung dex ka siviex khankix heue. Viang mawh nan yam ex paoh siviex ex ang yaox pui ka daux tix kaux kawx heue." ²⁴ Yam mhong cao giex kaing nyiex bwan mai cao giex kaing li pa ting khankix ka lox an, kix keud ang doh, grawng in tak sang yuh ka mawx. ²⁵ Pui tix kaux hoek mai krai ka kix, "Jhak heue, pui pa hoik sau pex daux thawng, cung ka daux nyiex bwan mai sidiex gau ka pui khankix heue." ²⁶ Khaix an cao giex kaing nyiex bwan mai pui cau soi khankix, hu mai viex kawncau pa ting khankix hoek, viang mawh nan kix ang nieb yuh, nieb khin ka kix, kheu lhat kix pui khankix teei simaox dheem kix kah heue. ²⁷ Yam hoik viex kix kawncau pa ting khankix, kix deuh kix sivoe cub kuad song pa prawng see heue. Cao giex kaing li pa ting chawk kix, ²⁸ Ah nin, "Ex hoik tawm lox ka pex, ang kieh sidiex gau ka daux ceu kaux in mai jhak heue, pex hoik kieh veng Yerusaliem naog ka lox sidiex gau pex mai keud ti sang viex nham Pui in hoek piang ex heue." ²⁹ Viang mawh nan Petrux mai kawncau pa ting tang kaux khankix, pawk lox ah nin, "Ex tak lai nghiet lox Siyiex khaing lox kawn pui heue. ³⁰ Siyiex tax ex, keeing ex, hoik kieh Yesux deeh kaoh im, Kaw pa hoik preue pex ka khaox mai teei yum heue. ³¹ Siyiex hoik yaog Nawh Cao deuh ka taix khawn dawm Nawh, sonsang kieh mawh Simiang mai Cao Taoh, sonsang tawx krax doh keud mai pluat ploi phimap ka pui Isarelax heue. ³² Ex mawh pui pa kham mhai rug grawng ceu in khankix mai Khuan Singax Singeh pa tawx Siyiex ka pui pa nghiet lox Nawh kawx, mawh pa kham mhai rug heue." ³³ Kix pa mhong lox an dung ka rhawm kix mai kix koe rhawm tix sang pah kawncau pa ting khankix yum heue. ³⁴ Viang mawh nan, pui tix kaux ka daux cub kuad song pa prawng see, pa mawh Pharishie, pa kaux Gamalelax, pa mawh cao gau lai been, pa yungyi pui kah khawmuik, kaoh cung mai tawx lox kieh kawncau pa ting khankix lih hu tivud heue. ³⁵ Nawh ah nin ka kix, "Pui Isarelax khankix eue, rien rhawm tokaux tix, ka grawng pa dex sang yuh pex ka pui inkix heue. ³⁶ Grawh grawng nawh, glang ka ngaix in khankix dix, pui pa kaux Thudax tix kaux lih hoek mai yaw tokaux tix mawh pa koe min plakngai mai pui tix blah pa dex koe pon yieh, neuex tokaux kix mai nawh heue. Hoik pah kaw an yum mai pui pa nghiet lox nawh khawmuik prung prang mai laux leeing heue. ³⁷ Khaix an ka daux bawg yam singaix yam teei yam tiiem ceu kaux an kix, pui meung Galilie pa kaux Yudax tix kaux lih hoek mai nyaw glaw pui tom nie hawt khaix nawh heue. Tokaux nawh kawx hoik laux leeing mai pui pa nghiet lox nawh khawmuik kawx, prung prang hu heue. ³⁸ Yam in aux krai ka pex, grham, paw chuh ka pui inkix mai kieh kix ot nong nong heue. Mawh kheu can pa yuh pa keud kix, phan mawh pa kaoh khaing kawn pui tak laux leeing heue. ³⁹ Phan mawh pa kaoh khaing Siyiex, pex ang pon yieh laux heue. Phan ang mawh nan ha pex kox tak awm pui pa cha pa yuh ka Siyiex heue." ⁴⁰ Kix nghiet lox nawh mai yam hoik kok kix kawncau pa ting khankix hoek, kix sivied kix mai tawm lox ka kix, son ang kix sang sidiex gau ka daux ceu kaux Yesux mai ploi kix hu heue. ⁴¹ Kawncau pa ting khankix lih khaing cub kuad song pa prawng see mai gaux rhawm kheu hoik sawn kix pa keung ti kham geu pa kaig tua, son Ceu kaux an heue. ⁴² Ku ngaix kix sidiex gau grawng Yesux mawh Cao Khrit ka daux nyiex bwan mai ka daux nyiex kix, ang jud ang jai heue.

¹ Ka daux singaix an khankix, yam kawncau khankix baox nie haoh hun, pui Yudax pa dex dawd mai Helasax salao pui Hebrie, yam khan kheu kix ku ngaix, kix ang kia ngien ka miexmai kix mhawm mhawm heue. ² Kawncau pa ting kao ra kaux kok cub kawncau khankix hoek ka kix ah nin, "Ex ang khaw ti tik ti grham gumlox Siyiex mai khan kheu ngie ka pheen khankix heue. ³ Mawh kheu nan puxaik khankix eue, pex sawg pui aliah kaux khaing ka daux pex, pa yaw pui kah, pa naog Khuan Cao mai pingnya cuyi mai laug kix kieh bung kaing piang ceu in heue. ⁴ Viang mawh nan ex kawn sang nied ti rawg bwan mai sidiex gau gumlox bwan jheung jheung heue." ⁵ Pui khawmuik khaw rhawm ka lox an mai kix laug ti teei Sathephan, pa mawh pui tix kaux pa naog krax yum rhawm mai Khuan Singax Singeh mai Philipux mai Prawkhaw mai Nikanaw mai Timon mai Pamenax mai Nikawlax pa mawh pui veng Antiuk, pa hoik laig ka beenli pui Yudax heue. ⁶ Kix deuh kix sivoe kawncau pa ting khankix mai khaix hoik rawg kix bwan, kix teei taix tix deuh piang kix heue. ⁷ Gumlox bwan Siyiex baox nie tah hu mai kawncau mau soi baox nie haoh hun ka daux veng Yerusaliem mai cub cao giex kaing li tom nie koe krax cu nghiet ka krax yum rhawm in heue. ⁸ Sathephan naog ka bwanson mai sibrawm mai yuh ceu pa daox deng pa ting mai mhai ka sinax pui khankix heue. ⁹ Viang mawh nan kix tix blah pa dex dawd mai nyiex sidiex, pa kok mawh Liberatin mai pui meung Kurene mai pui veng Alezandre mai kix pa mawh pui meung Kiliki mai meung Asix tix blah, thung thiang mai Sathephan heue. ¹⁰ Kix ang pon tieb tie ka pingnya cuyi pa krai pa sidiex nawh ka daux Khuan Cao heue. ¹¹ Kix briex chun praok ka pui tix blah pa kham mhai rug ah nin, "Ex hoik mhong nawh salao ka Mose mai ka Siyiex heue." ¹² Kix cheeik ka pui khankix, pa mawh kuad song mai pui tiiem lai khankix mai kix hoek ka Sathephan mai giex nawh mai viex nawh ka cub kuad song pa prawng see, ¹³ mai kix kok pui pa kham mhai rug pa ang mawh meh khankix pa ah nin, "Pui in ah lox salao ang jud ka grawng dee singax in mai grawng lai beenli heue. ¹⁴ Grawh grawng nawh ex hoik mhong nawh ah, Yesux Pui veng Nazariet an, tak sang yieh dee in laux mai deeh loh ka beenli pa hoik tawx Mose ka ex heue." ¹⁵ Pui pa ngawm ka daux cub kuad song pa prawng see khawmuik, jeung ngai tix ka nawh mai yaox pakngai nawh awm hoik mawh pakngai pakbaox kawncau Siyiex heue.

¹ Cao giex kaing li pa ting chawk ah nin, "Grawng ceu in khankix mawh tete lie?" ² Nawh deeh ah nin, "Puxaik khankix mai keeing khankix eue, nghiet heue, Siyiex pa ting min plakngai hoik bleeh ka keeing ex Abraham yam ot nawh ka daux meung Mesopotemia, ka sang ot nawh ka daux veng Haran, ³ mai ah nin ka nawh, maix lih khaing daux haktiex maix mai paox ru maix mai hoek ka daux haktiex pa tak sang jhi Aux maix yaox heue. ⁴ Khaix an nawh lih khaing haktiex pui Kaladie mai hu ot ka daux veng Haran mai khaix hoik yum keeing nawh, Siyiex gah nawh khaing tan, bleeh ka daux haktiex in, dee ot pex yam in heue. ⁵ Nawh ang tawx sinngao ka nawh daux haktiex in. Viang mawh dee kub dig nawh caong tix, tix khawn kawx ang tawx mai Nawh hoik grux tawx lox mukheu ka nawh, grawng sang tawx haktiex in ka nawh mai ka ru nawh khankix, yam ang nawh nyang bax koe kawn tix kaux kawx heue. ⁶ Siyiex hoik ah nin, Doeh ru nawh tak sang mawh nyo sinie ka daux meung pui tang ceu mai kix tak sang mawh siliex cawng mai kham geu ceu pa khin pui, son pon yieh num heue. ⁷ Ceu pui kix tak sang yuh siliex cawng, Siyiex ah nin, "Aux tak sang prawng ca mai khaix an kix tak sang lih hu mai kix tak sang krub Aux ka dee in heue". ⁸ Siyiex tawx lox mukheu pa mawh been pa pat hak ka Abraham heue. Nawh koe kawn pa mawh Icak mai yam uik hoek daix ngaix, nawh pat hak nawh heue. Icak koe kawn pa mawh Yakop mai Yakop koe kawn pa mawh tax du kao ra kaux heue. ⁹ Tax du khankix boh rhawm ka Yosiep mai coh ti tawx nawh ka daux meung Ejiptux, viang mawh nan Siyiex ot tau mai nawh. ¹⁰ Taoh nawh khaing krax kha rhawm nawh khawmuik mai tawx ceu pa khaw caw rhawm nawh mai pingnya cuyi sivoe Pharaw, pa mawh simiang meung Ejiptux mai nawh kieh nawh mawh, simiang giex kaing piang meung Ejiptux mai piang nyiex haw nawh khawmuik heue. ¹¹ Yam an meung Ejiptux khawmuik mai meung Khanan hoek sibhawm ting mai kied kha rhawm mai tax du ex sawg ang lai yaox pa ih heue. ¹² Yam mhong Yakop, grawng koe pa ih ka daux meung Ejiptux, nawh ploi tax du ex bawg phao ka heue. ¹³ Yam hu ra bawg tix bawg, Yosiep kieh puxaik nawh khankix tawng tokaux nawh. Pharaw tawng grawng ru Yosiep heue. ¹⁴ Yosiep ploi kix hu kok keeing nawh Yakop mai ru nawh khawmuik, pa koe atixgliah phwan kaux heue. ¹⁵ Yakop lih hu ka daux meung Ejiptux nawh mai tax du ex khankix yum tan heue. ¹⁶ Kix klawm kix hu ka daux veng Shekhim mai deuh kix ka daux simeeig pa hoik liag Abraham ti teei ka mau khaing kawn simex Hamaw khankix, ka daux veng Shekhim heue. ¹⁷ Bawg yam pa hoik grux tawx Siyiex lox mukheu ka Abraham dex sang hoek, pui baox nie haoh hun ka daux meung Ejiptux, ¹⁸ tom lih koe simiang tix kaux piang meung Ejiptux, pa ang tawng ka Yosiep heue. ¹⁹ Kaw an yuh cuyi lukliak lukle ka pui ceu ex mai yuh pa ang khaw ang jiet ka tax du ex, yuh ka mawx kix sang tik kawn ngie kix khankix, son ang kix sang im heue. ²⁰ Ka daux bawg yam an, Mose keh mai kied jiet mhawm grang heue. Eei tix ka daux nyiex keeing nawh loe khix heue. ²¹ Yam tik nawh, kawn bun Pharaw teei nawh mai eei nawh awm pa mawh kawn lih tix heue. ²² Gau Mose ka pingnya cuyi pui meung Ejiptux khawmuik mai nawh ting sibrawm ka daux gumlox mai khawm kaing pa yuh tix heue. ²³ Yam dex hoek ju nawh tixpon num, nawh koe rhawm ti sang hu fi ka puxaik nawh, pa mawh pui Isarelax heue. ²⁴ Nawh yaox kix tix kaux kham geu pa ang caw mai nawh ot plak nawh mai pawk bix kaw pa khin an mai pah pui Ejiptux an yum heue. ²⁵ Nawh ce puxaik nawh khankix tawng grawng Siyiex sang tawx pa kieh kix luan ka tawm taix nawh, viang mawh nan kix ang tawng. ²⁶ Ngaix pasax nawh hoek mai yaox pui pa simah ka paox tix mai nawh sang kieh raw kieh yiien nhim, ah nin, pui eue, pax mawh puxaik, pax lai yuh pa ang khaw ka paox tix, tix kaux lai tix kaux yuh ka mawx? ²⁷ Viang mawh nan kaw pa yuh pa ang khaw ka paox plawg nawh an, nyheen nawh yoi, ah nin, mawx pa kieh maix mawh cao giex kaing mai cao prawng ca piang ex? ²⁸ Maix khex mie ti pah aux yum awm pah maix pui Ejiptux yum kawx kawx lie? ²⁹ Mose to kheu lox an mai mawh pui pa hu ot ka daux haktiex Midian, dee koe nawh kawn simex ra kaux heue. ³⁰ Khaix hoik naog tixpon num, kawncau Siyiex tix kaux lih bleeh ka nawh, ka daux tiag gawng Sina, ka daux raongu, ka daux yeem khaox heue. ³¹ Yam yaox Mose ceu an, nawh daox deng ka pa yaox tix mai yam nawh greed ti jhak dee dex, lox Siyiex lih hoek ti ah nin, ³² Aux mawh Siyiex tax du maix khankix, pa mawh Siyiex Abraham, Siyiex Icak mai Siyiex Yakop heue. ³³ Siyiex ah nin ka nawh, Peeik kiep khaing caong maix, mawh kheu dee cung maix mawh haktiex pa singax singeh heue. ³⁴ Aux hoik yaox pui cie Aux pa kha rhawm, pa ot ka daux meung Ejiptux tete mai hoik mhong lox riag lox ngia kix mai Aux hoik lih hoek sonsang kieh kix luan heue. Hoek yam in heue, Aux sang ploi maix hu ka daux meung Ejiptux. ³⁵ Mose kaw pa ang kix rieb ti teei ah nin, mawx pa kieh maix mawh cao giex kaing mai cao prawng ca piang ex? Kaw an Siyiex hoik kieh mawh khawm cao giex kaing mai cao pa taoh, ka tawm taix kawncau Siyiex, pa hoik lih bleeh ka nawh ka daux yeem khaox an heue. ³⁶ Pui in hoik thong kix lih, khaix hoik yuh ceu pa daox deng mai mhai ka daux meung Ejiptux mai ka daux rawm sigrit sigra raoh mai ka daux tiagtu tixpon num heue. ³⁷ In mawh Mose, kaw pa hoik ah nin ka pui Isarelax, Siyiex tak sang kieh Cao jhai lih tix kaux, khaing ka daux puxaik pex, pa awm aux heue. ³⁸ Kaw in mawh pa hoik ot ka daux cub an, daux tiagtu, tau mai kawncau Siyiex an, pa hoik sikah mai nawh ka gawng Sina tau mai tax du ex khankix, pa hoik pon ti tawx lox pa im ju ka ex heue. ³⁹ Tax du ex ang nghiet mai nyheen khaing kix mai koe rhawm ti sang deeh ing ka meung Ejiptux, ⁴⁰ mai ah nin ka Arun, Yuh siyiex son ex, pa sang hu sivoe ex, grawng nawh kheu Mose in, pa hoik thong ex lih khaing daux meung Ejiptux, ex ang tawng, hoik mawh pa yuh ka mawx ka nawh heue. ⁴¹ Ka daux bawg yam ngaix an khankix, kix yuh riang kawn mawie mai kix viex pa tan ka riang grang mai kix gaux rhawm ka daux khaix taix pa hoik yuh tix heue. ⁴² Mawh kheu nan Siyiex deeh veeh khaing kix mai grham kix krub cub raoma, awm hoik tiiem ka daux phuk lai cao jhai khankix ah nin, geh pui Isarelax eue, pex hoik tan Aux ka tobrie pa hoik pah yum ka daux tiagtu tixpon num lie? ⁴³ Pex hoik yaog nyiex gox Molawk mai simuing siyiex Rephan, riang pa hoik yuh pex ti krub ka khankix. Mawh kheu nan Aux tak viex pex hu ka veng Babulon heue. ⁴⁴ "Tax du ex khankix hoik koe nyiex gox bwan, pa kham mhai rug ka daux tiagtu, awm hoik krai Nawh ka Mose, yuh ka mawx, son nawh, sang yuh hawt riang pa hoik yaox nawh heue. ⁴⁵ Tax du ex hoik toe ti viex nyiex gox an laig yam caw bawg yam kix, yam hu kix greem Yawsux ti teei haktiex pui tang ceu, pa grheu Siyiex ti tik sivoe ngai tax du ex, tom hoek bawg yam ngaix Davit khankix heue. ⁴⁶ Kaw pa pon bwan sivoe ngai Siyiex mai rawg mhaing sonsang pon ti yaox dee ot son Siyiex Yakop heue. ⁴⁷ Mawh Sawlamon pa yuh nyiex son Nawh heue. ⁴⁸ Viang mawh nan Kaw pa ting lhaong khaing khawmuik, ang ot ka daux nyiex pa yuh ka taix, awm hoik krai cao jhai ah nin, ⁴⁹ Raoma mawh dang ngeung Aux mai haktiex mawh ngot dee deuh Aux caong tix heue. Siyiex ah nin, tak sang sum nyiex pa yuh ka mawx son Aux? Phan ang mawh nan, Aux tak koe dee laux lee pa yuh ka mawx? ⁵⁰ Taix Aux hoik yuh ceu in khankix khawmuik ang mawh lie? ⁵¹ "Pui pa cong ngawg mai pa ang pat hak ka daux rhawm mai yhaok eue, pex sidien ka Khuan Singax Singeh jheung jheung, pex yuh awm pa sax yuh tax du pex heue. ⁵² Hoik koe cao jhai kaw pa yuh ka mawx, pa ang tax du pex tuktiak kah? Kix pah kix yum pa jhi sivoe ka sang hoek. Kaw pa rahsee heue. Kaw pa pex hoik lih mawh pui pa tik vud mai pui pa teei yum heue. ⁵³ Pex pa hoik pon lai beenli pa hoik tawx kawncau Siyiex khankix, viang mawh nan pex ang priex ti hawt heue." ⁵⁴ Yam hoik mhong kix lox grawng ceu in khankix, dung ka rhawm kix mai kix song rhawm mai greeik rhang tix ka Sathephan heue. ⁵⁵ Viang mawh nan nawh naog ka Khuan Singax Singeh mai jawg ti maong ka raoma mai yaox min plakngai Siyiex mai yaox Yesux cung plak tai khawn dawm Siyiex, ⁵⁶ ah nin, "Jhak heue, aux yaox raoma uik baoh mai Kawn kawn pui cung plak taix khawn dawm Siyiex heue." ⁵⁷ Viang mawh nan kix kok yo lox sinum mai thox yhaok tix mai kix khrawm paox tix tau mai hu plab ka nawh. ⁵⁸ Kix taing nawh plak praix veng mai teei simaox dheem nawh kah mai pui pa kham mhai rug khankix teei kraung ceep tix mai een dex caong pui pa awn ju tix kaux, pa kaux Sawlux heue. ⁵⁹ Kix dheem Sathephan ka simaox, yam rawg nawh bwan ah nin, "Simiang Yesux eue, rieb ti teei khuan aux liak." ⁶⁰ Nawh grux ngawng tix, kok yo lox sinum ah nin, "Simiang eue, paw teei ti deuh phimap in piang kix liak."Khaix hoik ah nawh nan, nawh man ti it heue.

¹ Sawlux khaw rhawm ka teei kix nawh yum heue. Ka ngaix an, krax tuktiak pa ting lih ti mawh piang ceucao pa koe ka daux veng Yerusaliem mai lheu khaing kawncau pa ting khankix khawmuik prung prang hu ku dah dee ka daux meung Yudax mai meung Samarix heue. ² Pui pa chix nab yam tix blah, sipaung Sathephan mai kix yiiem riag yiiem yo lox sinum son nawh heue. ³ Viang mawh nan Sawlux yieh ceucao laux, laig ka daux ku nyiex mai reu simex mai bun mai hu sau kix ka daux thawng heue. ⁴ Mawh kheu nan kix pa hoik prung prang ku dah dee, hu sidiex gau gumlox bwan heue. ⁵ Philipux lih hu ka veng Samarix mai sidiex gau grawng Cao Khrit ka kix heue. ⁶ Cub pui hun khankix, ih rhawm paox tix, nghiet tau, grawng ceu pa krai Philipux, yam mhong kix mai yaox mhai pa daox deng pa yuh nawh heue. ⁷ Grawh grawng nawh pui pa laig phi pa seeing tom nie, kok yo lox sinum mai lih hu heue. Pui pa yum tix plak ton nie mai pa laux caong khankix deeh moi heue. ⁸ Ka daux veng an kied koe krax gaux rhawm heue. ⁹ Viang mawh nan pui tix kaux pa kaux Simon, pa hoik ot ka daux veng an phao ka mai yuh cao sibawk mai pa hoik kieh pui Samarix khankix daox deng kah, pa hoik yaw tokaux tix mawh pa ting lhaong tix kaux. ¹⁰ Pui khawmuik hoik nghiet ka nawh, jah ka pa iak tom hoek ka pa ting khaing paox tix, ka ah nin, "Pui in mawh sibrawm Siyiex an, pa kok mawh Pa Ting heue." ¹¹ Kix nghiet ka nawh, kheu nawh hoik kieh kix daox deng ka ceu sibawk pa yuh nawh, rheung nyao heue. ¹² Yam yum rhawm kix ka lox pa mhawm mhiem, pa sidiex gau Philipux, grawng pa dex dawd mai Meung Siyiex mai ceu kaux Yesux Khrit, kix cubcom khawm simex khawm bun heue. ¹³ Tokaux Simon kawx yum rhawm heue. Nawh cubcom tix ka rawm, ot tau mai Philipux mai nawh daox deng ka mhai pa yuh nawh mai sibrawm pa ting pa yuh nawh heue. ¹⁴ Kawncau pa ting khankix, pa ot ka daux veng Yerusaliem, yam mhong kix grawh grawng Samarix hoik rieb ti teei gumlox bwan Siyiex, kix ploi Petrux mai Yohan hu ka kix heue. ¹⁵ Yam lih hoek kiex ka kix, kiex rawg bwan son kix, sonsang pon kix Khuan Singax Singeh heue. ¹⁶ Mawh kheu Nawh ang nyang bax lih piang kix tix kaux kawx, kix hoik cubcom ngie rawm ka daux ceu kaux Simiang Yesux khaing. ¹⁷ Yam an kiex deuh taix tix piang kix mai kix pon Khuan Singax Singeh heue. ¹⁸ Simon yaox grawng deuh taix kawncau pa ting ankiex hoik tawx khuan Singax Singeh, nawh tom tawx ti yaox mau ka kiex, ¹⁹ ah nin, "Ka aux kawx tawx sibrawm in, son sang deuh aux taix tix piang pui mawx ang ah, sonsang pon nawh Khuan Singax Singeh heue." ²⁰ Petrux ah nin ka nawh, "Kieh mau maix laux leeing tau mai maix, kheu maix ce ti sang pon totaix Siyiex ka mau heue. ²¹ Maix ang kleuk ang neuex ka grawng ceu in, kheu rhawm maix ang caw sivoe ngai Siyiex heue. ²² Mawh kheu nan, doh keud ka phimap ceu pa caox pa yuh maix in, mai rawg bwan ka Siyiex, sonsang ploi Nawh phimap pa hoik keud maix daux rhawm tix heue. ²³ Grawh grawng nawh aux yaox hoik ot maix ka daux ghin pa song mai ka daux ceu pa hoik phyawk phimap heue." ²⁴ Simon deeh pawk lox ah nin, "Pax rawg bwan son aux ka Siyiex liak, son ceu pa hoik ah maix khankix tak ang hoek piang aux tix ceu kawx heue." ²⁵ Mawh kheu nan yam hoik kham kix mhai rug mai hoik sidiex gau gumlox Siyiex, kix deeh ing ka veng Yerusaliem mai sidiex gau lox bwan gaux rhawm ka daux yaong Samarix tom nie heue. ²⁶ Yam an kawncau Siyiex tix kaux sikah mai Philipux ah nin, "Kaoh mai hu plak caong ma seh, ka krax pa kaoh khaing veng Yerusaliem mai bleeh ka veng Gaza, pa mawh krax daux tiag heue." ²⁷ Nawh kaoh mai hu. jhak heue, pui meung Ethiopia tix kaux, pa mawh pui sieh pa kied ting sibrawm ka greem laux simiang Kandeki, pa mawh simiang pui meung Ethiopia, kaw an mawh pa kia piang sinngao an khawmuik, nawh hoik hoek ti krub ka veng Yerusaliem heue. ²⁸ Nawh deeh khaing tan, ngawm daux ling brung cie tix mai phat lai cao jhai Isayax heue. ²⁹ Khuan Cao ah nin ka Philipux, "Hu dex mai neuex tokaux maix ka ling an heue. ³⁰ Philipux to hu dex ka mai mhong kaw an phat lai cao jhai Isayax mai chawk ah nin ka nawh, "Maix tawng dee bleeh pa phat maix lie?" ³¹ Kaw an deeh ah nin, "Phan ang koe cao pa jhi aux yaox, aux chix tawng yuh ka mawx?"Nawh khyox khaw ka Philipux, nhie nawh haok ngawm tau mai tix heue. ³² Phuk lai sigang khri pa phat nawh mawh nin, "Hoik tuk Nawh hu awm yung pa yum heue. Awm kawn yung ang nye ka sivoe cao rhip hauk, Nawh ang ang jheeh tix heue. ³³ Ka daux krax tiem rhawm Nawh, rud ti teei pa prawng ca, ceu pa mawh meh khaing Nawh heue. Mawh mawx pa sang krai grawng ju Nawh? Mawh kheu hoik teei ju Nawh khaing haktiex heue." ³⁴ Pui sieh an deeh chawk Philipux ah nin, "Aux khyox khaw ti chawk maix, cao jhai in krai grawng pui mawx? Krai grawng tokaux tix lie, phan ang mawh nan, krai grawng tang kaux lie? ³⁵ Philipux ang moing tix mai jah ti sidiex ka nawh khaing lox phuk lai sigang khri an, lox bwan gaux rhawm grawng Yesux heue. ³⁶ Yam kawn lawng kix krax kix hoek ka dee koe rawm tix dah mai pui sieh an ah nin, rawm koe tin, mawh pa yuh ka mawx pa sang kieh tie aux khaing pa cubcom?" ³⁷ Philipux ah nin, "Phan maix yum rhawm khawm rhawm tix, chix maix heue. Nawh deeh pawk lox ah nin, "Aux yum rhawm grawng Yesux Khrit mawh Kawn Siyiex heue." ³⁸ Nawh tawx lox kieh ling brung an kaog heue. Kiex khawm ra kaux lih hu ka daux rawm, kiex pa mawh Philipux mai pui sieh an mai nawh cubcom kaw an ka rawm heue. ³⁹ Yam kaoh kiex khaing ka daux rawm, Khuan Siyiex loe Philipux hu mai pui sieh an ang lai baox yaox nawh heue. Kheu nawh gaux rhawm mai kawn hu krax hu nawh heue. ⁴⁰ Philipux yaox tokaux tix ot ka daux veng Asado mai nawh sidiex gau lox bwan gaux rhawm ka veng khawmuik tom hoek nawh ka daux veng Kesarix heue.

¹ Viang mawh nan Sawlux kawn blin lox ghlat, grawng pa sang pah kawncau Simiang Yesux yum mai hu ka cao giex kaing li pa ting, ² mai rawg mhaing ka nawh, son lai pa sang tawx ka nyiex sidiex khankix ka daux veng Damase, yuh ka mawx phan nawh yaox simex ang ah, bun ang ah, pa hawt Krax An tix kaux kaux, nawh sang pon ti phyawk mai viex kix hoek ka veng Yerusaliem heue. ³ Yam kawn hu nawh krax nawh hoek dex ka veng Damase mai dom mawx dom an pa riang pa lih khaing raoma jhan rob nawh heue. ⁴ Nawh goh gup piang tiex mai mhong lox pa ah nin ka nawh, "Sawlux eue, Sawlux eue, maix lai tuktiak Aux yuh ka mawx?" ⁵ Nawh chawk ah nin, "Simiang eue, Maix mawh mawx?"Nawh Cao deeh ah nin, "Aux mawh Yesux pa tuktieak maix kah heue. ⁶ Kaoh mai laig ka daux veng mai tak sang krai ka maix grawng maix tak lai yuh pa yuh ka mawx." ⁷ Pui pa hu tau mai nawh khankix, cung mai ang pon nye, kheu viang kix mhong lox an kawx, kix ang yaox pui tix kaux kawx heue. ⁸ Sawlux kaoh khaing piang tiex mai yam blah nawh ngai tix, nawh ang chix yaox tidtix mai kix tuk taix nawh mai viex nawh laig ka daux veng Damase heue. ⁹ Ka daux loe ngaix nawh ang chix yaox mai ang ih ang nyaux heue. ¹⁰ Yam an koe kawncau tix kaux pa kaux Ananix, pa ot ka daux veng Damase mai Simiang Yesux ah nin ka nawh ka daux riang susai, "Ananix eue."Ananix deeh ah nin, "Jhak heue, Simiang eue, aux ot tin heue." ¹¹ Simiang Yesux baox ah nin ka nawh, "Kaoh mai hu ka daux krax pa kok mawh pa see mai hu sawg ti chawk ka nyiex Yudax, son pui veng Tasux tix kaux pa kaux Sawlux, mawh kheu rawg nawh bwan heue. ¹² Nawh hoik yaox pui tix kaux pa kaux Ananix hoek ti laig mai deuh taix tix piang nawh, sonsang deeh chix yaox nawh heue." ¹³ Viang mawh nan Ananix deeh pawk lox ah nin, "Simiang Yesux eue, aux hoik mhong grawng pui in khaing pui tom nie, grawng pa hoik yuh nawh pa caox tom nie, ka pui singax singeh pa ot ka veng Yerusaliem. ¹⁴ Nawh hoik koe akhwang khaing cao giex kaing li pa ting khankix, ti phyawk pui pa kok ka ceu kaux Maix tin khawmuik heue." ¹⁵ Viang mawh nan Simiang baox ah nin ka nawh, "Maix hu heue. Kheu mawh nawh aw pa hoik laug Aux, sonsang viex ceu kaux Aux hu sivoe ka pui tang ceu khankix mai simiang khankix mai pui Isarelax khankix heue. ¹⁶ Grawh grawng nawh Aux tak sang jhi nawh yaox, grawng nawh tak sang kham geu miex ceu son ceu kaux Aux heue." ¹⁷ Ananix lih hu mai laig ka daux nyiex an mai deuh taix tix piang Sawlux ah nin, "Pux Sawlux eue, Simiang Yesux pa hoik lih bleeh ka maix, daux krax pa hoek maix, ploi aux sonsang pon maix ti deeh yaox mai naog ka Khuan Singax Singeh heue." ¹⁸ Dom mawx dom an ceu pa awm sibriak cod khaing ngai nawh mai nawh pon ti deeh yaox mai nawh kaoh mai cubcom ka rawm heue. ¹⁹ Nawh ih pa ih mai baox koe riang heue. Nawh ot tau mai kawncau mau soi ka daux veng Damase tix vong heue. ²⁰ Dom mawx dom an nawh jah ti sidiex gau ka daux nyiex sidiex khankix grawh grawng Yesux, grawng mawh Nawh Kawn Siyiex heue. ²¹ Pui pa mhong nawh khawmuik daox deng kah ah nin, "In ang mawh kaw pa yieh kix laux pa kok ka Ceu kaux in ka daux veng Yerusaliem lie? Nawh hoik hoek tin ti yuh ceu an, sonsang phyawk ti viex kix hu ka sivoe cao giex kaing li pa ting khankix heue. ²² Sawlux nie baox ting riang mai kieh pui Yudax pa ot ka daux veng Damase khankix daox deng ka mhai rug grawng Yesux mawh Cao Khrit heue. ²³ Khaix hoik naog ngaix tom nie, pui Yudax khankix kum kawng paox tix grawng sang teei nawh yum. ²⁴ Sawlux pon ti tawng grawng ceu pa hoik yiag kix, kix pau siviex veng khankix ku ngaix, sonsang pon ti teei nawh yum heue. ²⁵ Viang mawh nan kawncau nawh khankix teei nawh yam ponsawm mai koi ploi nawh daux phliex plak praix guh veng heue. ²⁶ Yam hoik hoek nawh ka veng Yerusaliem, nawh keud ti sang neuex tokaux tix mai kawncau khankix mai kix khawmuik lhat ka nawh, kheu ang kix yum rhawm grawng hoik mawh nawh kawncau heue. ²⁷ Viang mawh nan Banabax teei nawh mai viex nawh hoek ka kawncau pa ting khankix mai krai kix grawng pa hoik yaox nawh Simiang Yesux ka daux krax mai grawng pa hoik sikah Nawh Cao ka nawh mai grawng hoik viex nawh rhawm kwa ti sidiex gau ka daux ceu kaux Yesux, ka daux veng Damase heue. ²⁸ Nawh ot tau mai kix ka veng Yerusaliem, lih lih laig laig, ²⁹ Viex rhawm kwa ti sidiex gau ka daux ceu kaux Simiang Yesux heue. Nawh sikah mai thung thiang ka pui Yudax meung Helasax, viang mawh nan kix sawg ti teei nawh yum heue. ³⁰ Yam hoik tawng puxaik khankix grawng ceu an, kix viex nawh lih hu ka veng Kesarix mai ploi nawh hu ka veng Tasux heue. ³¹ Ceucao pa koe ka daux meung Yudax mai meung Galilie mai meung Samarix khawmuik koe krax nhim mai baox ting lhaong mai kix hu ka daux pa lhat ka Simiang Yesux mai ka daux ceu pa nyawm rhawm pa khu Khuan Singax Singeh mai baox nie haoh hun heue. ³² Yam an Petrux hu lailing ku dah dee, ka pui singax singeh pa ot ka daux veng Ludax kawx, nawh hoek kah heue. ³³ Ka dee an Petrux yaox pui pa kaux Enex, pa hoik it dee it tix daix num, kheu hoik yum nawh tix plak heue. ³⁴ Petrux ah nin ka nawh, "Enex eue, Yesux Khrit kieh maix moi, kaoh mai cox dee it maix heue."nawh kaoh dom mawx dom an heue. ³⁵ Pui pa ot ka daux veng Ludax mai veng Sharon yaox kaw an mai kix deeh tieh tix hoek plak Simiang Yesux heue. ³⁶ Ka daux veng Yawppax koe kawncau tix kaux pa kaux Tabithax, phan toe lox an kok mawh Dawka heue. Bun in naog ka kaing jhaw ceu pa mhawm mai pa yuh bwanson tan pa yuh tix heue. ³⁷ Ka daux singaix an khankix nawh saux mai yum heue. Khaix hoik heem kix nawh, kix deuh nawh daux lawg plak piang heue. ³⁸ Mawh kheu veng Ludax, dex ka veng Yawppax, kawncau mau soi khankix mhong grawng Petrux ot tan mai ploi pui ra kaux hu ka nawh, ti khyox khaw ka nawh ah nin, "Paw vi jun ti baox nien hoek ka ex heue." ³⁹ Petrux kaoh mai hu tau mai kiex heue. Yam hoik hoek nawh tan, kix viex nawh haok ka daux lawg plak piang mai miexmai khawmuik cung yiiem liep Petrux mai jhi nawh yaox sibex mai kraung ceep, pa hoik yuh Dawka, yam kawn ot nawh tau mai kix heue. ⁴⁰ Viang mawh nan Petrux kieh kix lih khawmuik mai grux ngawng tix rawg bwan mai veeh plak tokaux yum an ah nin, "Tabithax eue, kaoh heue."Bun an blah ngai tix mai yam yaox nawh Petrux, nawh yaog ti ngawm heue. ⁴¹ Nawh tawx taix tix ka bun an mai yaog nawh kaoh mai kok pui singax mai miexmai khankix, nawh deeh tawx bun pa im an ka kix heue. ⁴² Pui pa ot ka daux veng Yawppax khawmuik tawng grawng an mai pui tom nie yum rhawm ka Yesux Khrit heue. ⁴³ Petrux rheung ot tom nie singaix ka daux veng Yawppax, tau mai Simon pa cox hak tix kaux heue.

¹ Ka daux veng Kesarix koe pui tix kaux pa kaux Kawnilix, pa mawh cao giex kaing naing, pui naing tix yieh kaux, pa kok mawh cub pui naing Itali heue. ² Nawh mawh pui pa chix nab yam. Mai pa chix lhat ka Siyiex mai khawm pui daux nyiex nawh khawmuik kawx awm an. Nawh mawh pa sax yuh bwanson tan tom nie, ka pui khankix mai rawg bwan ka Siyiex jheung jheung heue. ³ tix singaix yam dex hoek dim nari nawh sidawng yaox ka daux riang susai, kawncau Siyiex tix kaux laig hoek ka nawh ah nin, "Kawnilix eue." ⁴ Nawh lhat ka, jeung ngai tix piang kawncau Siyiex an ah nin, "Mawh patix, Simiang eue?"kawncau Siyiex an ah nin ka nawh, "Ceu pa rawg maix bwan mai ceu pa tan maix, hoik haok, sonsang mawh ceu pa doh keud, ka sivoe Siyiex heue. ⁵ Yam in ploi pui hu ka veng Yawppax mai viex Simon pa kok ceu kaux mawh Petrux. ⁶ Nawh ot tau mai Simon, pa mawh pui coh hak tix kaux mai nyiex nawh koe dex rawn sigrit sigra heue." ⁷ Khaix hoik hu kawncau Siyiex pa sikah mai nawh, Kawnilix kok kawncau daux nyiex tix ra kaux mai pui naing pa chix nab yam tix kaux, pa rien khre ka nawh jheung jheung, ⁸ Khaix hoik krai grawng kuceu khawmuik ka kix, nawh ploi kix hu ka veng Yawppax heue. ⁹ Ngaix pasax, yam kawn hu kix krax mai uik dex sang hoek ka veng an, yam dex hoek liah nari Petrux haok piang braux nyiex sonsang rawg bwan heue. ¹⁰ Nawh hoik cai rhawm mai mie ti sawm, viang mawh nan yam kawn tak khre kix nawh, nawh lip lu, ¹¹ mai nawh yaox baoh raoma mai tix ceu pa awm man tawm pa ting, pa hoik phyawk pon daog mai ploi lih piang haktiex heue. ¹² Ka daux an koe totiag pa koe caong pon khawn kuceu mai pa chix hu mu ka piang tiex mai khawm sim raoma khankix heue. ¹³ Lox lih hoek ka nawh yuh nin, "Petrux eue, kaoh mai pah ti ih heue." ¹⁴ Viang mawh nan Petrux deeh ah nin, "Ang doh mawh Simiang eue, kheu ang aux sax ih ceu pa seeing brai mai ceu pa ang singax heue." ¹⁵ Lox baox deeh hoek ka nawh ra bawg tix bawg ah nin, "Ceu pa hoik kieh Siyiex singax singeh maix paw kok mawh pa seeing brai heue." ¹⁶ Khaix hoik yuh nan loe bawg, rieb ti deeh teei ceu an haok ka daux meung raoma dom mawx dom an heue. ¹⁷ Yam kied daox deng Petrux ka daux tokaux tix, grawng deeh bleeh riang susai pa hoik yaox nawh mawh pa yuh ka mawx, jhak heue, pui pa ploi Kawnilix hoik chawk nyiex Simon mai cung sivoe siviex, ¹⁸ mai kok chawk grawng Simon pa kok mawh Petrux, ot tan lie, ang ot lie. ¹⁹ Yam kawn keud Petrux grawng riang susai an, Khuan Cao ah nin ka nawh, "Jhak heue, pui loe kaux sawg maix. ²⁰ Kaoh, lih heue. Paw lai keud jee keud blaong, hu tau mai kix, mawh kheu Aux hoik ploi kix hoek heue." ²¹ Petrux lih hu ka pui khankix ah nin, "Jhak heue, aux mawh kaw pa sawg pex, mawh kheu nan pex hoek kheu grawng pa yuh ka mawx? ²² Kix deeh ah nin, "Kawnilix pa mawh cao giex kaing naing tix kaux, pa mawh pui rahsee, pa chix lhat ka Siyiex pa yaw pui Yudax ka khawmuik, Siyiex hoik ploi kawncau pa singax tix hu nhie nawh ploi pui hu kok maix hoek ka daux nyiex tix mai sonsang kieh mhong gumlox pa kaoh khaing maix khankix heue." ²³ Mawh kheu nan nawh kok kix laig paung mai tix heue. Pasax nawh kaoh mai lih hu tau mai kix mai puxaik pa mawh pui veng Yawppax tix blah kawx hu tau mai nawh heue. ²⁴ Khaix an tix singaix kix laig ka daux veng Kesarix. Kawnilix hoik kok paox ru nawh mai paox grawm nawh khankix khrawm paox tix mai krox jun son kix heue. ²⁵ Yam laig Petrux ka daux nyiex, Kawnilix rieb nawh mai gup ti krub ka caong nawh heue. ²⁶ Viang mawh nan Petrux yaog nawh kaoh ah nin, "Cung heue, tokaux aux kawx mawh ngie pui." ²⁷ Yam kawn sikah Petrux mai nawh, nawh laig mai yaox pui pa hoik khrawm paox tix tan tom nie, ²⁸ mai nawh ah nin ka kix, "Tokaux pex hoik tawng grawng ang khaw mai been, son pui Yudax ti neuex rom, phan ang mawh nan ti hoek ka pui pa mawh pui tang ceu, Siyiex hoik jhi aux yaox, son ang aux tak mawh pa ang singax singeh heue. ²⁹ Mawh kheu in yam ploi ti kok aux, aux ang thiang mai hoek heue. Mawh kheu nan aux tom chawk pex, pex ploi ti kok aux kheu keud pex yuh ka mawx?" ³⁰ Kawnilix ah nin, "Khaix in pon ngaix, aux twah pa ih tom hoek nari in mai yam hoek dim nari aux rawg bwan ka daux nyiex aux mai jhak heue, pui tix kaux pa ceep kraung pa jhan riang cung sivoe aux, ³¹ ah nin, Kawnilix eue, hoik mhong lox rawg maix bwan mai ceu pa tan maix khankix kawx, Siyiex hoik doh keud ka heue. ³² Mawh kheu nan ploi pui hu ka veng Yawppax, ti kok Simon, pa kok mawh Petrux hoek tin heue. Nawh ot ka daux nyiex Simon pui pa cox hak, pa ot praok rawm sigrit sigra, yam hoik hoek nawh, nawh tak sang sidiex ka maix heue. ³³ Mawh kheu nan aux tom ploi pui hu ka maix dom mawh dom an heue. Kheu hoek maix tin maix hoik yuh mhawm mhawm. Mawh kheu in ex khawmuik ot tin sivoe Siyiex, sonsang mhong sang nghiet kuceu pa hoik tawm Simiang Yesux ka maix heue." ³⁴ Petrux ang moing tix ah nin, "Aux hoik tawng tete, grawng mawh Siyiex pa ang jhak ka pakngai kawn pui heue. ³⁵ Ka daux pui kuceu, pui pa chix lhat graung ka Nawh mai pa yuh pa rahsee, Nawh sang rieb ti teei heue. ³⁶ Nawh hoik ploi lox ka ru pui Isarelax khankix mai kieh kix tawng, lox bwan gaux rhawm pa dex dawd mai pa nhim, ka daux Yesux Khrit, pa mawh Simiang piang khawmuik heue. ³⁷ Pex hoik tawng grawng gumlox bwan an, pa hoik tah hu kudah dee ka daux meung Yudax, pa jah ka meung Galilie, khaix krax pa tawx cubcom, ceu pa sidiex gau Yohan heue. ³⁸ Grawng hoik groi Siyiex rawm bee ka Yesux pui veng Nazariet, ka Khuan Singax Singeh mai sibrawm, Kaw pa hoik hu lailing yuh ceu pa mhawm mai cox pui pa tuktiak phicaox khawmuik moi, mawh kheu Siyiex ot tau mai Nawh heue. ³⁹ Ex mawh pui pa kham mhai rug grawng ceu pa hoik yuh Nawh khawmuik, ka daux veng Yerusaliem mai khawm daux meung pui Yudax khawmuik, Kaw pa hoik preue kix ti teei yum piang khaox heue. ⁴⁰ Siyiex hoik kieh Nawh deeh kaoh im, ka daux loe ngaix mai kieh Nawh sidawng heue. ⁴¹ Viang mawh nan ang kieh sidawng ka pui khawmuik, mawh ngie ka pui pa hoik laug Siyiex, sonsang kieh kham mhai rug, pa mawh ex, pa hoik ih hoik nyaux tau mai Nawh, khaix hoik kaoh Nawh khaing krax yum heue. ⁴² Nawh Cao tawm lox ka ex nhie ex sidiex gau ka pui khankix mai sonsang kham mhai rug grawng mawh Nawh Kaw pa hoik ciak Siyiex ti mawh Cao Prawng ka pui pa im mai khawm pui yum khankix heue. ⁴³ Cao jhai khawmuik kham mhai rug grawng pui pa yum rhawm ka daux ceu kaux Nawh ku kaux daux pui, tak sang hoek krax pa luan khaing phimap heue." ⁴⁴ Yam kawn tak ah Petrux gumlox ceu in khankix, Khuan Singax lih piang kix pa mhong gumlox an khawmuik heue. ⁴⁵ Kix pa dex dawd mai been pa pat hak, pa hoik yum rhawm mai pa hoek tau mai Petrux khankix daox deng kah, mawh kheu piang pui tang ceu kawx, totaix Khuan Singax hoik prauk lih heue. ⁴⁶ Kheu kix mhong kix sikah ka lox pui tang ceu khankix mai yaogyaw Siyiex heue. Yam an Petrux baox ah nin, ⁴⁷ "Kaux pui mawx sang pon sidien rawm, son ang pon ti tawx krax cubcom ka pui inkix, pa hoik pon Khuan Singax Singeh awm hoik pon ex?" ⁴⁸ Nawh tawx lox nhie kix cubcom ka daux ceu kaux Yesux Khrit. Khaix an kix khyox khaw mai nhie nawh ot tan tix vong heue.

¹ Kawncau pa ting khankix mai puxaik khankix pa ot ka daux meung Yudax, mhong grawng pui tang ceu kawx, hoik rieb ti teei gumlox bwan Siyiex. ² Mawh kheu nan Petrux haok hu ka veng Yerusaliem, cub pui been pa pat hak, thung thiang mai nawh, ³ Ah nin, "Maix hoik laig ka daux nyiex pui pa ang pat hak khankix mai hoik sawm tau mai kix heue." ⁴ Petrux plak jhi kix mhong grawng ceu an jah ka num tom sidah ah nin, ⁵ "Yam ot aux ka daux veng Yawppax mai rawg bwan, yam lip lu aux yaox riang susai, pa mawh tix ceu pa awm man tawm pa ting, pa hoik phyawk pon daog, mai ploi lih khaing raoma mai hoek dex ka aux heue. ⁶ Yam jeung aux ngai tix kah, aux jhak ti yaox mhawm mhawm mai yaox totiag pa koe caong pon khawn piang haktiex mai totiag pa chix hu chix mu khankix mai sim raoma khankix heue. ⁷ Lox kawx, aux mhong pa ah nin ka aux, Petrux eue, kaoh mai pah ti ih heue. ⁸ Aux ah nin, Ang doh mawh Simiang eue, mawh kheu ceu pa seeing, phan ang mawh nan ceu pa ang singax ang sax laig ka daux jheeh aux heue. ⁹ Lox an baox deeh pawk khaing raoma ra bawg tix bawg ah nin, Ceu pa hoik kieh Siyiex singax singeh, maix paw kok mawh pa seeing heue. ¹⁰ Khaix hoik yuh nan loe bawg, deeh bluh khawmuik haok ka daux meung raoma heue. ¹¹ Jhak heue. dom an, pui loe kaux cung sivoe nyiex dee ot ex an, pa hoik ploi hoek ka aux khaing veng Kesarix heue. ¹² Khuan Cao nhie aux hu tau mai kix mai paw yuh tang siyox heue. Puxaik liah kaux kawx hu tau mai aux mai ex laig ka daux nyiex pui an, ¹³ mai nawh krai ka ex grawng hoik yaox nawh kawncau Siyiex pa cung ka daux nyiex nawh ah nin, ploi hu ka veng Yawppax mai viex Simon pa kok mawh Petrux heue. ¹⁴ Nawh tak sang krai gumlox ka maix, pa sang pon maix mai pui nyiex maix khawmuik krax taoh heue. ¹⁵ Yam jah aux ti sidiex, Khuan Singax Singeh lih piang kix, awm hoik lih piang ex yam jah heue. ¹⁶ Aux doh keud ka gumlox Simiang, pa hoik ah Nawh nin, Yohan cubcom ka rawm tete heue. Pex tak sang cubcom ka daux Khuan Singax Singeh heue. ¹⁷ Mawh kheu nan phan Siyiex hoik tawx totaix ka kix, awm hoik tawx Nawh ka ex, yam yum rhawm ex ka Simiang Yesux Khrit, aux mawh pui pa yuh ka mawx, pa sang pon tieb tie ka Siyiex?" ¹⁸ Yam mhong kix grawng ceu an khankix, kix ang nye kah, mai yaogyaw Siyiex ah nin, "Phan mawh nan ka pui tang ceu khankix kawx, hoik tawx ceu pa doh keud, tom pon ju pa im heue." ¹⁹ Kix pa hoik prung prang rairuat hu ku dah dee, kheu krax kha rhawm pa hoik mawh kheu grawng Sathephan, hu tom hoek ka meung Phinit mai ka meung Kuparux mai ka veng Antiuk, sidiex gau ngie gumlox bwan ka pui Yudax khaing heue. ²⁰ Kix tix blah pa mawh pui meung Kuparux mai meung Kurene, yam hoek kix ka veng Antiuk, kix sidiex gau grawng Simiang Yesux ka khawm pui Helasax kawx heue. ²¹ Taix Simiang ot tau mai kix mai pui tom nie pa yum rhawm deeh tieh ti hoek ka Siyiex heue. ²² Grawh grawng lox inkix hoek ka yhaok ceu cao pa koe ka daux veng Yerusaliem mai kix ploi Banabax hu tom hoek ka veng Antiuk heue. ²³ Yam hoek nawh tan mai hoik yaox bwanson Siyiex, nawh gaux rhawm kah mai sidiex gau kix khawmuik, sonsang deuh kix rhawm tix kaux mai kawm ka Siyiex tom sied. ²⁴ Kheu mawh nawh pui pa mhawm mai pa naog ka Khuan Singax Singeh mai pa yum rhawm heue. Pui tom nie baox haoh hun yum rhawm ka Simiang Siyiex heue. ²⁵ Banabax lih hu ka veng Tasux, sonsang sawg Sawlux, ²⁶ Yam hoik yaox nawh ka nawh, nawh viex nawh hoek ka veng Antiuk. Kix khrawm ti ot tau mai ceucao tan, tom naog tix num mai sidiex gau ka pui tom nie. Mawh ka daux veng Antiuk, dee jah ti kok kawncau mau soi khankix, mawh kawn Khrit phao ka heue. ²⁷ Ka daux singaix an khankix cao jhai tix blah yaog ti lih khaing veng Yerusaliem hoek ka veng Autiuk heue. ²⁸ Ka daux kix tix kaux pa kaux Agabux kaoh cung mai grux krai lox jhai ka daux Khuan, grawng tak sang kied sibhawm praix piang haktiex khawmuik heue. Sibhawm ting an hoek ti mawh ka daux bawg yam singaix simiang Kesa Klawdi heue. ²⁹ Kawncau khankix, ku kaux daux pui, keud ti sang sipaox ceu pa teem ka puxaik khankix pa ot ka daux meung Yudax, awm pa chix tix kaux mawx kaux an heue. ³⁰ Kix kawx yuh awm an mai sipaox ceu pa teem hu tawx ka kuad song khankix, ka daux tawm taix Banabax mai Sawlux heue.

¹ Yam an simiang Herut, nyeu taix tix sonsang tuktiak ka pui ceu cao tix blah. ² Nawh teei Yakop puxke Yohan yum ka vaid heue. ³ Yam yaox nawh pa khaw caw rhawm pui Yudax khankix grawng an, viang mawh Petrux kawx nawh baox giex heue. Bawg yam an caw bawg yam singaix blah pa ang sau susaix khankix heue. ⁴ Yam hoik teei nawh Petrux, nawh sau Petrux daux thawng mai tawx nawh ka pui naing kao kaux liah, sonsang kieh kix pau nawh mai nawh keud ti sang viex nawh lih ka pui khankix khaix hoik hoik pawie Pasakha heue. ⁵ Mawh kheu nan kawn laung Petrux ka daux thawng, pui ceucao khankix nied ti rawg bwan ka Siyiex son nawh heue. ⁶ Yam dex sang viex Herut nawh lih, daux sawm an Petrux it ka sinax pui naing ra kaux mai hoik phyawk ka ceng ra nyaing mai pui pa pau khankix ot sivoe siviex mai pau thawng an heue. ⁷ Kawncau raoma cie Siyiex leeing ju tix kaux cung liep nawh mai pa riang jhan ka daux thawng kawncau raoma an dieh paw Petrux mai kieh nawh siduad ah nin, "Nied ti kaoh heue."Kieh ceng an grhuah khaing taix nawh heue. ⁸ Kawncau Siyiex ah nin ka nawh, "Nhawt maox rawd nyoi maix mai ceep kiep maix heue."nawh yuh awm ah nawh. Kawncau Siyiex an baox ah nin ka nawh, "Fua man fua maix mai hawt aux heue." ⁹ Nawh lih hawt hu heue. Nawh ang tawng grawng pa yuh kawncau Siyiex an mawh ceu pa mawh meh tete, nawh ce mawh yaox tix riang susai heue. ¹⁰ Khaix hoik luan kiex khaing cub pui pa pau sivoe mai pui pa pau ra cub tix cub, kiex hoek ka siviex rhiem pa bleeh ti laig ka daux veng mai siviex an lak baoh nong son kiex mai kiex lih hu lawng krax ti nyaing mai dom mawx dom an kawncau Siyiex an gwieh hu khaing nawh heue. ¹¹ Yam doh rhawm Petrux nawh ah nin, "Yam in aux hoik tawng grawng Siyiex hoik ploi kawncau tix hoek ti taoh aux khaing tawm taix Herut mai ceu pa hoik keud pui Yudax khankix khawmuik tete heue." ¹² Yam hoik keud nawh grawng ceu an, nawh hoek ka nyiex Marix pa mawh miex Yohan pa kok ceu kaux ru nawh mawh Makux, dee hoik khrawm pui tom nie paox tix mai rawg bwan heue. ¹³ Yam gleuh nawh ka siviex brawk, nyawm bun pa kaux Rode tix kaux hoek ti pawk. ¹⁴ Yam tawng nawh mawh lox Petrux, nawh ang paoh siviex kah, kheu gaux rhawm nawh, to laig ka daux mai krai grawng Petrux cung ka sivoe siviex heue. ¹⁵ Kix ah nin ka nawh, "Yhot maix"nawh nied ti ah mawh tete heue, mai kix ah, "Mawh kawncau raoma cie Petrux heue." ¹⁶ Petrux baox gleuh siviex mai yam hoik paoh kix siviex, yaox nawh mai kix kied daox deng kah heue. ¹⁷ Viang nawh teei taix tix ne kix, nhie kix paw nye mai krai kix mhong grawng Siyiex hoik viex nawh lih khaing daux thawng yuh ka mawx heue. Nawh ah nin, "Krai grawng ceu inkix ka Yakop mai ka puxaik khankix heue."Khaix an nawh lih hu mai hu tang dah heue. ¹⁸ Yam hoik bah riang praix, pui naing khankix lawh maw ceeix ngie ang mawh, grawng hoik mawh pa yuh ka mawx ka Petrux. ¹⁹ Khaix hoik sawg Herut Petrux mai ang yaox nawh, nawh chawk cheng grawng an ka pui pa pau khankix mai tawx lox nhie teei kix yum heue. Khaix an nawh lih hu khaing meung Yudax mai hu ka veng Kesarix mai ot tan heue. ²⁰ Yam an Herut kied song rhawm ka pui veng Turux mai veng Sidom mai kix viex rhawm tix mu khrawm paox tix hoek mai khaix hoik pon Balasatux, pa mawh kawncau pa rien khre lawg dee it simiang kieh nawh mawh paox grawm kix, kix khyox khaw son pa nhim, kheu kix een rhawm tix ka haktiex simiang an son pa ih heue. ²¹ Ka daux pa hoik ciak ti deuh tix singaix, Herut ceep kraung ceep simiang mai ngawm piang dang ngeung mai krai lox ka kix heue. ²² Pui khankix yo ah nin, "Lox in mawh lox siyiex tix kaux, ang mawh lox pui heue." ²³ Dom mawx dom an kawncau raoma cie Siyiex tix kaux dieh nawh kah, kheu ang nawh tawx min pakngai ka Siyiex, viag ih kaux nawh mai yum kheu heue. ²⁴ Gumlox Siyiex haok huan mai baox nie haoh hun heue. ²⁵ Banabax mai Sawlux deeh khaing veng Yerusaliem, khaix hoik yuh kiex kaing pa teem pa khan mai kiex viex Yohan pa kok ceukau ru nawh mawh Makux ing mai tix heue.

¹ Ka daux ceucao pa koe ka daux veng Antiuk, koe pui pa mawh cao jhai mai cao gau, pa mawh Banabax mai Simeon pa kok mawh Nika. Mai Lukix pui meung Kurene mai Manaen pa hoik yuh ti mawh puxaik simiang Herut mai Sawlux heue. ² Yam kawn tak krub kix ka Simiang Yesux mai twah pa ih. Khuan Singax Singeh ah nin, "Gwieh ti een Banabax mai Sawlux, son kaing pa hoik kok Aux kiex yuh heue." ³ Khaix hoik twah kix pa ih mai rawg bwan. Mai hoik deuh taix tix piang kiex. Kix ploi kiex hu heue. ⁴ Mawh kheu Khuan Singax Singeh ploi kiex hu. Kiex lih hu ka veng Selukix mai kiex brug reu tan hu ka klawn tiex Kuparux heue. ⁵ Yam ot kiex ka daux veng Salamix, kiex sidiex gau lox bwan Siyiex ka daux nyiex sidiex pui Yudax khankix. Viang mawh Yohan kawx kiex koe son cao teem heue. ⁶ Khaix hoik lai ling kix ka daux klawn tiex an khawmuik, kix hoek ka veng Phapux mai yaox cao sibawk tix kaux, pa mawh cao jhai pa ang mawh ang meh, pa mawh pui Yudax, pa kaux Bayesux heue. ⁷ Nawh ot tau mai simiang Seragix Pawlux pa mawh pui pa lhak pa tawng. Simiang aux kok Banabax mai Sawlux hoek ka tix mai sawg ti mhong ti nghiet gumlox Siyiex heue. ⁸ Eluma cao sibawk an mawh kheu toe ceu kaux nawh dee bleeh mawh nan heue. Kieh tie kix mai sawg ti kieh simiang an via khaing krax yum rhawm heue. ⁹ Viang mawh nan Sawlux, pa kok khawm ceu kaux Pawlux, naog ka Khuan Singax Singeh mai jeung ngai tix piang kaw an, ¹⁰ ah nin, "Pui pa naog mai pa nieb pie lhen mai pa caox caig kuceu khawmuik, kawn phicaox eue, maix pa mawh pa koeng ka pa rahsee khawmuik maix tak ang naox, ceu pa yieh krax pa rahsee Simiang Yesux lie? ¹¹ Yam in, jhak heue, taix Simiang hoik koe piang maix mai maix tak dug ngai ang chix yaox singaix tix vong heue." Dom mawx dom an paiawm mai pa faik grhup piang nawh mai nawh vuvie sawg pui pa sang tuk taix tix heue. ¹² Yam yaox simiang an grawng pa hoik yuh nan, nawh yum rhawm kheu daox deng nawh ka lox sidiex lox gau Simiang Yesux heue. ¹³ Pawlux mai cub nawh brug reu kaoh khaing veng Phapux mai hoek ka veng Perage pa koe ka daux meung Pampuli mai Yohan gwieh khaing kiex tan mai deeh ing ka veng Yerusaliem heue. ¹⁴ Kiex kaoh khaing veng Perage mai hoek ka veng Antiuk ka daux meung Pisidix mai kiex laig ka daux nyiex sidiex singaix twah mai ngawm heue. ¹⁵ Khaix hoik phat lai beenli mai lai cao jhai khankix, pui giex kaing nyiex sidiex an khankix, ploi pui hu ka kiex ah nin, "Puxaik eue, phan pax koe lox sidiex ka pui khankix tix ceu ceu, sidiex heue." ¹⁶ Pawlux kaoh cung yuh kix yaox taix tix ah nin, "Pui Isarelax mai pui pa lhat ka Siyiex khankix eue, nghiet ha. ¹⁷ Siyiex pui ceu Isarelax in, hoik laug tax du ex mai yaog pui khankix ting, yam mawh kix nyo ka daux haktiex meung Ejiptux mai Nawh teei plawng taix pa hoik yaog lhaong tuk kix lih khaing tan heue. ¹⁸ Son dex tixpon num Nawh priex kix ka daux tiag awm Keeing pa chix eei heue. ¹⁹ Khaix hoik yieh Nawh pui aliah ceu laux ka daux haktiex meung Khanan, Nawh tawx haktiex ankix ka kix, sonsang mawh sin, son dex pon yieh tixphwan num heue. ²⁰ Khaix an Nawh tawx cao prawng ca ka kix, tom hoek ka cao jhai Samoelax heue. ²¹ Khaix an kix rawg mhaing son simiang mai Siyiex tawx Sawlux kawn Kiesa ka kix, pa mawh pui ceu Binyamen, son bawg yam tixpon num heue. ²² Khaix hoik gah ti tik nawh, Siyiex yaog ti kieh Davit mawh simiang kix, pa hoik kham Nawh mhai rug ka kix ah nin, Aux hoik yaox Davit pa mawh kawn Yessie, pui pa khaw pa hawt rhawm Aux, pa tak sang yuh alo Aux khawmuik heue. ²³ Ka daux ru pui an Siyiex hoik viex Yesux pa mawh Cao Taoh ka pui Isarelax khankix awm pa khaw mai lox mukheu heue. ²⁴ Ka sang hoek Nawh Cao Yohan hoik sidiex gau been cubcom daux rawm, pa dex dawd mai krax doh keud ka phimap ka pui Isarelax khawmuik heue. ²⁵ Yam kawn tak yuh Yohan sonsang naog pa yuh tix, nawh ah nin, Pex ce aux mawh pa yuh ka mawx? Aux ang mawh Kaw an. Viang mawh nan jhak heue, khaix aux tak sang hoek tix Kaux, pie maox kiep caong Nawh ang aux keung ti kah heue. ²⁶ Puxaik khankix pa mawh kawn ru Abraham mai pui ka daux pex pa lhat ka Siyiex eue, gumlox bwan grawng krax pa taoh in hoik sipaox ka pex heue. ²⁷ Mawh kheu kix pa ot ka daux veng Yerusaliem mai simiang kix khankix ang tawng Nawh Cao, kheu ang kix tawng lox pa hoik grux krai cao jhai khankix, pa phat ku singaix twah, kix kieh gumlox an kix naog, ka daux pa prawng ca kix ka Nawh heue. ²⁸ Viang kix ang yaox grawng pa khaw Nawh ti yum kawx, kix rawg mai nhie Pilat teei Nawh yum heue. ²⁹ Khaix hoik yuh kix kuceu khawmuik naog, pa hoik tiiem ti deuh grawng Nawh Cao, kix teei Nawh lih khaing khaox an mai een Nawh ka daux simeeig heue. ³⁰ Viang mawh nan Siyiex hoik kieh Nawh deeh kaoh im khaing krax yum heue. ³¹ Kix pa hoik haok ti hoek tau mai Nawh, khaing meung Galilie ka veng Yerusaliem, hoik yaox Nawh tom nie singaix, yam in kix mawh pui pa kham mhai rug grawng Nawh ka pui khankix heue. ³² Yiex viex lox gaux rhawm ka pex, pa dex dawd mai lox mukheu pa hoik dawg tawx ka tax du ex. ³³ Grawng hoik kieh Siyiex lox an naog ka kawn praix ex, ka daux pa hoik kieh Nawh, Yesux deeh kaoh im, awm pa hoik tiiem ti deuh ka daux Lai Yaogyaw simin ting ra, ah nin, Maix mawh Kawn simex Aux, Aux hoik kieh Maix keh ka daux singaix in heue. ³⁴ Hoik kieh Nawh Cao deeh kaoh khaing krax yum, son ang sang baox deeh hoek ka krax cux krax sium, Nawh hoik ah nin, Aux tak tawx bwanson pa singax mai pa kaux cong cie Davit ka maix heue. ³⁵ Mawh kheu Nawh baox ah nin ka daux Lai Yaogyaw tang pheen, Maix tak ang tawx kieh Kaw Pa Singax Singeh cie Maix sium heue. ³⁶ Kheu khaix hoik hawt yuh Davit alo Siyiex ka daux bawg yam ju tix, nawh laig it mai deuh nawh tau mai tax du nawh khankix mai nawh yaox krax cux sium heue. ³⁷ Kaw pa hoik kieh Siyiex nawh deeh kaoh, ang yaox krax pa cux sium heue. ³⁸ Mawh kheu nan puxaik khankix eue, kieh pex tawng grawng ceu pa sidiex gau in ka pex, grawng pa pluat ploi phimap, mawh ka daux Kaw an heue. ³⁹ Pa yum rhawm ka Nawh ku kaux daux pui, pon hoek krax rahsee khaing kuceu khawmuik, pex ang tau pon rahsee kheu lox lai beenli Mose heue. ⁴⁰ Mawh kheu nan, rien rhawm tix, yuh son ceu pa hoik krai daux lai cao jhai, tak ang sang hoek piang pex, pa ah nin, ⁴¹ jhak heue, pex pa mawh pui ang nab yam khankix eue, daox deng mai laux leeing heue. Kheu Aux tak yuh kaing tix ceu daux bawg yam singaix ju pex. Viang pui krai kaing an ka pex kawx, pex tak ang tau ti yum rhawm kah heue. ⁴² Yam lih hu kiex, kix khyox khaw kiex sonsang baox deeh sidiex lox ceu in khankix, daux singaix twah hoek heue. ⁴³ Yam gwieh pui, pui pa khrawm paox tix ka daux nyiex dee sidiex an, pui Yudax tom nie mai khawm pui pa laig been kix, hawt Pawlux mai Banabax, kiex sikah ka kix, nhie kix ot kaux cong daux bwanson Siyiex heue. ⁴⁴ Yam hoek ngaix twah khaix, pui dex khawm veng khrawm paox tix sonsang nghiet gumlox bwan Siyiex heue. ⁴⁵ Yam yaox pui Yudax khankix pui hun khankix, kix naog krax boh rhawm mai thiang grawng ceu pa krai Pawlux khankix mai salao kah heue. ⁴⁶ Pawlux mai Banabax viex rhawm kwa sidiex gau ah nin, "Tak lai sidiex gau gumlox bwan Siyiex in ka pex phao ka heue. Viang mawh nan kheu nyhot pex ti tik khaing, pex prawng ca tokaux tix, mawh pa ang keung pon ju leeing ju. Yiex tom veeh ka pui tang ceu khankix heue. ⁴⁷ Mawh kheu Simiang hoik tawm lox ka yiex ah nin. Aux hoik deuh Maix sonsang mawh pa riang ka pui tang ceu khankix, sonsang mawh Maix ceu pa taoh tom sidah ghoik haktiex heue." ⁴⁸ Yam mhong pui tang ceu lox an khankix, kix gaux rhawm mai yaogyaw gumlox bwan Siyiex. Kix pa hoik ciak laug sonsang pon ju leeing ju khawmuik yum rhawm heue. ⁴⁹ Gumlox bwan Simiang Yesux tah hu daux praix an khawmuik. ⁵⁰ Pui Yudax khankix, chuik bun pa chix nab yam ka Siyiex, pa ting min plakngai khankix, pui ting ka veng an khankix, kieh lih koe krax tuktiak ka Pawlux mai Banabax mai grheu kiex lih khaing haktiex kix heue. ⁵¹ Kiex khruah phawng tiex khaing caong tix sonsang mawh mhai rug ka kix mai hu hoek ka veng Ikawnix heue. ⁵² Kawncau khankix naog ka pa gaux rhawm mai ka Khuan Singax Singeh heue.

¹ Ka daux veng Ikawnix kix khrawm ti laig tau ka daux nyiex sidiex pui Yudax mai sidiex gau tom yum rhawm pui hun, pa mawh pui Yudax mai khawm pui Helasax heue. ² Viang mawh nan pui Yudax pa ang koe krax cu nghiet khankix, cheeik rhawm pui tang ceu khankix mai kieh kix caox ka puxaik khankix heue. ³ Mawh kheu nan kix ot tan tom rheung mai viex rhawm kwa sidiex gau ka daux Siyiex. Siyiex kawx, kham mhai rug ka gumlox bwan Nawh, kieh yuh mhai mai ceu pa daox deng, ka taix kix heue. ⁴ Viang mawh nan pui veng an ang khaw caw paox tix, tix blah ot plak pui Yudax khankix mai tix blah ot plak kawncau pa ting heue. ⁵ Yam sang khrawm pui tang ceu mai pui Yudax khawm simiang giex kaing kix khankix, ti hu sonsang yuh ceu pa ang cee cak ka kawncau pa ting mai dheem kix ka simaox. ⁶ Kix mhong grawng an mai to hu ka veng Lusatra mai veng Derabe mai haktiex sivie siveng tan, daux meung Lukawnix, ⁷ mai kix sidiex gau lox bwan gaux rhawm tan heue. ⁸ Ka daux veng Lusatra koe pui pa ngawm tan tikaux, pa laux caong, pa hoik laux maung khaing vaig miex tix mai pa ang sax hu ka caong tix, tix bawg kawx heue. ⁹ Kaw an mhong pa sidiex Pawlux heue. Pawlux jeung ngai tix piang kaw an mai kheu yaox grawng nawh koe krax yum rhawm sonsang kieh tix deeh mhawm, ¹⁰ Mai kok lox sinum ah nin, "Kaoh cung ka caong tix rahsee heue."kaw an jaloh kaoh mai hu ka caong tix heue. ¹¹ Yam yaox pui hun ceu pa hoik yuh Pawlux, kix yo lox sinum ka lox meung Lukawnix ah nin, "Siyiex khankix hoik lih hoek ka ex, awm riang kawn pui heue." ¹² Kix kok Banabax mawh "Zusa,"mawh kheu Pawlux mawh pa nie lheu sidiex, kix kok nawh mawh "Heumi"heue. ¹³ Yam an cao giex kaing li Zusa, pa ot sivoe veng, viex mawie mai tai pa hoik taing laklo khankix, ka siviex mai koe rhawm ti sang tan tau mai cub pui hun khankix heue. ¹⁴ Viang mawh nan yam mhong kawncau pa ting Banabax mai Pawlux grawng an, kiex riah kraung ceep tix mai hu plab sinax cub pui hun khankix, kok yo, ¹⁵ ah nin, "Pui khankix eue, pex lai yuh ceu inkix yuh ka mawx? Yiex kawx mawh kawn pui, pa koe ceu pa chix keud awm pex mai viex lox gaux rhawm hoek ka pex, sonsang deeh tieh pex khaing ceu pa giex going inkix, ka Siyiex pa im ju, Kaw pa hoik yuh raoma mai haktiex mai rawm sigrit sigra mai can pa koe ka daux kix khawmuik heue. ¹⁶ Daux ju pa hoik luan khankix, Nawh hoik kieh ceu pui kuceu khawmuik, hawt yuh krax pa lak keud kix heue. ¹⁷ Viang mawh nan Nawh ang grham tokaux tix, ti ang koe ceu pa kham mhai rug, kheu Nawh hoik yuh pa mhawm mai tawx rawm lhiex khaing raoma ka pex mai bawg yam pa piien plix, kieh rhawm pex sak ka pa ih mai pa gaux rhawm heue." ¹⁸ Kiex ne raw cub pui hun khankix ka lox ceu in, son ang sang yuh krax tan ka kiex heue. ¹⁹ Yam an pui Yudax khankix hoek khaing veng Antiuk mai veng Ikawnix mai khaix hoik nyaw glaw kix mai pon cub pui haoh, kix dheem Pawlux ka simaox mai kheu ce kix nawh hoik yum, tom reu nawh lih khaing veng an heue. ²⁰ Viang mawh nan yam cung kawncau khankix rob nawh, nawh kaoh cung mai deeh laig ka daux veng heue. Ngaix pasax nawh lih hu khaing tan, tau mai Banabax mai hu ka veng Derabe heue. ²¹ Yam hoik sidiex gau kiex lox bwan gaux rhawm ka veng an mai hoik yuh kieh koe kawncau mau soi tom nie, kiex deeh ing ka veng Lusatra mai ka veng Ikawnix mai ka veng Antiuk. ²² Kieh rhawm kawncau mau soi khankix kaux cong mai sidiex gau kix yuh ka mawx son kawn sang ot ka daux krax yum rhawm mai krai ka kix yuh nin, "Ex tak lai kham geu pa kha rhawm tix tom nie, mai laig ka daux meung Siyiex heue." ²³ Kiex laug ti teei pui pa bung kaing ceu cao, ka daux ku ceu cao son kix mai khaix hoik rawg kix bwan mai twah pa ih, kiex tawx pong kix ka Simiang Yesux Khrit pa hoik yum rhawm kix kah heue. ²⁴ Kiex hu preeng ka daux meung Pisidix mai hoek ka meung Pampuli. ²⁵ Khaix hoik sidiex gau kiex lox bwan ka daux veng Perage, kiex lih hu ka veng Attali, ²⁶ mai kiex brug reu hu khaing tan ka veng Antiuk, ka dee hoik tawx hoik pong kiex ka bwanson Siyiex, son kaing pa hoik yuh kiex heue. ²⁷ Khaix hoik hoek kiex tan mai hoik raug rum grum phroik tau mai pui ceu cao khawmuik, kiex krai grawng ceu pa hoik yuh Siyiex tau mai kiex kuceu khawmuik mai grawng hoik paoh Nawh siviex krax yum rhawm ka pui tang ceu khankix heue. ²⁸ Kiex ot tau mai kawncau mau soi khankix tan rheung nyao heue.

¹ Pui tix blah lih hoek khaing meung Yudax mai gau ka puxaik khankix ah nin, "Phan pex ang pat hak hawt been Mose, pex ang tau ti hoek krax taoh heue." ² Khaix Pawlux mai Banabax hoik thung thiang kix mai ang khaw mai kix ceeix ngie ang mawh, puxaik khankix laug ti ploi Pawlux mai Banabax mai pui tang kaux tix blah, sonsang haok hu ka veng Yerusaliem ka kawncau pa ting khankix mai ka pui pa bung kaing ceu cao khankix, ka grawng ceu an heue. ³ Pui ceucao tawx kix ka krax tix baux mai kix hu preeng ka meung Phinit mai khawm meung Samarix mai krai grawng pui tang ceu khankix hoik tieh ti ih li heue. Kix kieh puxaik khankix kied gaux rhawm kah heue. ⁴ Lheu khaing an yam hoek ka veng Yerusaliem, kawncau pa ting khankix mai pui pa bung kaing ceucao mai pui ceu cao khankix caong rieb kix heue. Kix kawx krai grawng ceu pa hoik yuh Siyiex tau mai kix kuceu khawmuik heue. ⁵ Viang mawh nan pui tix blah daux cub Pharishie, pa hoik yum rhawm kaoh cung ah nin, "Tak lai pat hak kix mai tawm lox nhie kix priex ti hawt lox lai beenli Mose heue." ⁶ Kawncau pa ting khankix mai pui pa bung kaing ceu cao khankix khrawm paox tix, sonsang keud grawng an heue. ⁷ Khaix hoik chawk cheng paox tix tom nie, Petrux kaoh cung mai ah nin ka kix, "Puxaik khankix eue, pex tawng grawng Siyiex hoik laug ti teei khaing ka daux ex, daux yam nhaox nhaox, sonsang kieh pui tang ceu khankix mhong gumlox bwan gaux rhawm khaing daux jheeh aux mai yum rhawm heue. ⁸ Siyiex Kaw pa tawng rhawm, kham mhai rug son kix mai tawx Khuan Singax Singeh ka kix, awm pa hoik tawx Nawh ka ex heue. ⁹ Nawh ang yuh tang siyox sinax ex mai kix mai yuh rhawm kix singax singeh kheu krax yum rhawm heue. ¹⁰ Mawh kheu nan, yam in, pex lai cheuk ti yaox Siyiex, sonsang sau pex iak piang ngawg kawncau mau soi khankix, pa ang ex mai tax du ex pon kham ti fak yuh ka mawx? ¹¹ Viang mawh nan ex yum rhawm grawng sang hoek ex krax taoh ka daux bwanson Simiang Yesux Khrit awm kix heue." ¹² Cub pui hun khawmuik ang nye kah mai nghiet lox krai Banabax mai Pawlux grawng mhai ceu pa daox deng, pa hoik yuh Siyiex sinax pui tang ceu ka daux kiex heue. ¹³ Khaix hoik ah kiex nan, Yakop ah nin, "Puxaik khankix eue, nghiet lox aux liak, ¹⁴ Simon hoik krai grawng hoik lai ling Siyiex ti teei ka pui tang ceu tix ceu phao ka, ka son ceu kaux tix heue. ¹⁵ Gumlox cao jhai khankix kawx, khaw ka grawng an, pa hoik tiiem ti deuh ah nin, ¹⁶ Khaix ceu in khankix Aux tak sang deeh hoek mai deeh sum nyiex gox Davit pa hoik grhup hoik goh. Aux tak deeh sum nyiex gox pa hoik laux an mai deeh kieh nawh jung heue. ¹⁷ Kheu son kawn pui pa deuk khankix, tak sang sawg Simiang Yesux mai pui tang ceu khawmuik, pa hoik kok ceu kaux Aux piang kix heue. ¹⁸ Siyiex pa hoik kieh tawng ceu in khankix tom didix, ah nin heue. ¹⁹ Mawh kheu nan, pa keud aux mawh nin, ex ang khaw ti lak lheut kix, ka daux pui tang ceu pa deeh tieh ti hoek ka Siyiex heue. ²⁰ Viang mawh nan ex khaw ti tiiem lai ka kix, son kix tak ang dex ang teeh ka ceu pa hoik seeing kheu riang grang mai khaing pa lud vao mai khaing pa hoik rhawt ghok mai khaing nham heue. ²¹ Grawh grawng nawh tom ju didix, Mose hoik koe pui pa sidiex grawng nawh ku veng mai phat lai nawh ka daux nyiex sidiex khankix ku ngaix twah heue." ²² Yam an kawncau pa ting khankix mai pui bung kaing ceu cao mai pui ceu cao khawmuik, ce mhawm ti laug pui khaing ka daux cub kix Yudax pa kok mawh Basabax mai Silax pa ao min plakngai ka daux puxaik khankix mai ploi kiex hu ka veng Antiuk, tau mai Pawlux mai Banabax heue. ²³ Kix viex lai pa yuh nin hu mai kix, "Kawncau pa ting, khankix mai pui bung kaing ceu cao khankix mai puxaik khankix, sipaox lai in sonsang nawb hu ka puxaik khankix pa mawh pui tang ceu, ka daux veng Antiuk mai ka meung Surix mai ka meung Kiliki heue. ²⁴ Mawh kheu ex hoik mhong grawng pui tix blah pa lih hu khaing ex, pa ang ex tie nhie hu, hoik lak lheut pex ka lox mai kieh rhawm pex sung sang kah, ²⁵ ex tom ih rhawm ka paox tix mai keud mhawm ti laug pui mai ploi kiex hu ka pex, tau mai Banabax mai Pawlux pa moh ex, ²⁶ pa mawh pui pa hoik koe rhawm ti pon yum tang ceu kaux Simiang Yesux Khrit heue. ²⁷ Mawh kheu nin ex tom ploi Yudax mai Silax, tokaux kiex kawx, tak sang krai grawng lox ceu in khankix ka jheeh tix heue. ²⁸ Mawh kheu Khuan Singax Singeh mai khawm ex, keud mhawm ti ang deuh kraung pa lheu cien, khaing ceu in khankix pa phan ang pon.ti deuh. ²⁹ Pa mawh pa ang pex khaw ti dex ti teeh, ka ceu pa hoik tan ka riang grang mai khaing nham mai khaing ceu pa hoik rhawt ghok mai khaing pa lud vao. Phan pex priex tokaux tix mai via khaing ceu in khankix tak sang mhawm son pex heue. Kieh nyawm ot liak." ³⁰ Mawh kheu ploi kix hu, kix lih hu ka veng Antiuk mai kieh pui khankix raug rum grum phroik mai kix tawx lai an kah heue. ³¹ Yam hoik phat kix lai an, kix gaux rhawm, kheu lox nyawm rhawm an heue. ³² Yudax mai Silax, kheu tokaux kiex kawx mawh cao jhai, kiex gau puxaik khankix ka lox tom nie mai kieh kix kaux cong kah heue. ³³ Khaix hoik ot kiex tan tix vong, puxaik khankix deeh ploi kiex ing ka kix pa hoik ploi kiex hoek nhim mhawm mhawm heue. ³⁴ Viang mawh nan Silax koe rhawm ti kawn ot tan heue. ³⁵ Pawlux mai Banabax kawn ot ka daux veng Antiuk mai sidiex gau lox bwan Simiang Yesux Khrit, tau mai pui tang kaux tom nie heue. ³⁶ Khaix an uik kub rheung singaix, Pawlux ah nin ka Banabax, "Hu ax lai ling ka puxaik khankix pa ot ka daux veng ku veng, dee hoik sidiex ax lox bwan Simiang Yesux, sonsang yaox yuh kix ka mawx nieh." ³⁷ Banabax koe rhawm ti sang viex Yohan pa kok mawh Makux hu mai kiex heue. ³⁸ Viang mawh nan Pawlux keud ang khaw ti viex hu mai kiex, kaw pa hoik grham mai lih khaing kiex ka daux meung Pampuli mai ang hu mai kiex dee yuh kaing heue. ³⁹ Mawh kheu grawng an kiex ang khaw paox tix mai gwieh paox tix tang hu mai Banabax viex Makux hu mai tix mai brug reu hu ka klawn tiex Kuparux heue. ⁴⁰ Viang mawh nan Pawlux laug ti teei Silax mai lih hu, khaix puxaik khankix hoik tawx pong ka bwanson Simiang Yesux heue. ⁴¹ Nawh hu lai ling ka meung Surix mai meung Kiliki mai kieh ceucao khankix kaux cong heue.

¹ Viang mawh ka veng Derabe mai veng Lusatra kawx nawh hoek kah mai nawh yaox kawncau tix kaux tan, pa kaux Timose, nawh mawh kawn simex bun Yudax pa yum rhawm, viang mawh nan keeing nawh mawh pui Helasax heue. ² Nawh mawh pui pa yaw puxaik khankix pa ot ka daux veng Lusatra mai veng Ikawnix kah heue. ³ Pawlux koe rhawm ti sang viex nawh hu tau mai tix mai nawh teei ti pat hak nawh, kheu pui Yudax khankix, pa ot baux haktiex ankix, kheu kix khawmuik hoik tawng grawng keeing nawh mawh pui Helasax heue. ⁴ Yam hu lai ling kix daux veng khankix, kix tawx lox pa hoik tawm kawncau pa ting khankix mai pui bung kaing ceu cao khankix, pa ot ka daux veng Yerusaliem, sonsang priex kix ti hawt heue. ⁵ Mawh kheu nan ceu cao khankix baox kaux cong ka daux krax yum rhawm mai pui baox nie haoh hun ku ngaix heue. ⁶ Kix hu lai ling ka daux meung Pharuki mai meung Kalatix, kheu Khuan Singax Singeh hoik ne ang kieh kix sidiex gau lox bwan ka daux meung Asix. ⁷ Yam hoek kix ka meung Musia mai yam keud kix ti sang hu ka meung Betuni, Khuan Yesux ang kieh kix hu. ⁸ Kix via khaing meung Musia mai lih hu ka veng Troax heue. ⁹ Yam ponsawm Pawlux yaox riang susai pa yuh nin, pui Makedonix cung mai khyox khaw nawh ah nin, "Tiang ti hoek ka meung Makedonix mai teem ex liak." ¹⁰ Khaix hoik yaox nawh riang susai an, dom mawx dom an ex khru khrieh sawg ti sang yaog ti hu ka daux meung Makedonix, kheu ex yiag Siyiex hoik kok ex, sonsang sidiex gau lox bwan gaux rhawm ka kix heue. ¹¹ Mawh kheu nan ex yaog ti brug reu hu khaing veng Troax, hu see see ka klawn tiex Samawtharit mai ngaix pasax hoek ka veng Napawlix heue. ¹² Khaix baox hoik yaog khaing tan hoek ka veng Philippix, pa mawh veng tix veng ka daux meung Makedonix, pa mawh veng ting ka daux kien nyhawm an, mawh pa hoik pang pui meung Romax mai ex ot ka daux veng an tix vong heue. ¹³ Ngaix twah ex lih hu plak praix khaing siviex veng, ka praok rawm klawng ting tix klawng, pa ce ex koe dee rawg bwan mai ex ngawm mai sidiex ka bun pa khrawm paox tix tan heue. ¹⁴ Bun tix kaux pa kaux Ludi, pa mawh pui coh kraung raoh klai, pa mawh pui veng Shwatire, pa krub ka Siyiex tix kaux, nghiet lox ex, Siyiex paoh rhawm bun an, sonsang koe krax cu nghiet ka grawng ceu pa sidiex gau Pawlux khankix heue. ¹⁵ Khaix kiex mai pui khawm nyiex kiex hoik cubcom, kiex khyox khaw ka ex ah nin, "Phan pex yiag aux hoik yum rhawm ka Siyiex hoek ti ot daux nyiex aux heue."Kiex khin ex hu tan heue. ¹⁶ Khaix an, yam kawn tak hu ex ka dee rawg bwan, bun siliex tix kaux pa koe phi jhai si pub ex, pa pon ngawh tom nie son cao tix ka lox jhai heue. ¹⁷ Nawh hawt khaix Pawlux mai ex, yo ah nin, "Pui in khankix mawh siliex Siyiex pa ting khaing khawmuik, pa sidiex gau ka pex grawng krax pa sang hoek krax taoh heue." ¹⁸ Nawh yuh nan tom nie singaix mai kheu lulax rhawm Pawlux kah, nawh tom veeh ti ah nin ka phi an, "Aux nhie maix daux ceu kaux Yesux Khrit lih hu khaing daux nawh heue."Phi an lih hu dom mawx dom an heue. ¹⁹ Viang mawh nan yam yaox cao nawh khankix grawng ang koe dee sang keud pot jun pot mai grawng sang pon kix ngawh hoik grai nai, kix giex Pawlux mai Silax mai reu kiex hu ka daux lah, sivoe simiang giex kaing khankix heue. ²⁰ Yam hoik viex kix kiex hu ka simiang khankix, kix ah nin, "Pui in kiex, pa mawh pui Yudax, kied lak lheut veng ex heue. ²¹ Mai sidiex gau been, ka ex pa mawh pui Romax ang koe akhwang ti rieb ti yuh heue." ²² Pui khawmuik kaoh caox ka kiex mai simiang khankix riah ti tik kraung ceep kiex mai tawx lox sonsang sivied kiex ka khaox heue. ²³ Khaix hoik sivied kiex tom nie taix, kix sau kiex daux thawng mai kix tawm lox ka cao giex kaing thawng, nhie nawh jawg ti pau kiex mhawm mhawm heue. ²⁴ Kheu cao giex kaing thawng an hoik pon lox tawm yuh nan, nawh tom sau kiex daux lawg thawng plak daux mai sau caong kiex daux gang heue. ²⁵ Viang mawh nan yam dex hoek yam greung sawm, Pawlux mai Silax rawg bwan mai rhax lai yaogyaw ka Siyiex mai pui pa hoik laung daux thawng nghiet lox kiex heue. ²⁶ Dom an tuk kla reem ting, tom num jaong nyiex thawng yung yiang kah, mai dom mawx dom an can siviex baoh khawmuik mai gang mai ceng ku kaux daux pui hoik gah heue. ²⁷ Yam siduad cao giex kaing thawng khaing it mai yaox siviex thawng khankix hoik baoh, nawh lawd vaid tix mai dex sang plaux tokaux tix yum, kheu ce nawh pui pa hoik laung daux thawng khankix hoik lih luan heue. ²⁸ Viang mawh nan Pawlux yo lox sinum ah nin, "Paw vi yuh tokaux tix laux, kheu yix khawmuik ot tin heue." ²⁹ Nawh rawg ngu mai grhawm ti laig ka daux mai nawh siyaung kheu lhat tix mai gup sivoe Pawlux mai Silax, ³⁰ Nawh viex kiex lih plak praix mai chawk ah nin, "Simiang eue, aux tak sang yuh ka mawx sonsang hoek krax taoh?" ³¹ Kiex deeh ah nin, "Yum rhawm ka Simiang Yesux Khrit mai maix khawm pui nyiex maix, tak hoek krax taoh heue." ³² Kiex sidiex gau lox bwan Siyiex ka nawh mai khawm pui pa ot ka daux nyiex nawh khawmuik heue. ³³ Nawh teei kiex daux sawm an, nari dom an mai khoek rhoi khaix dee hoik sivied ka kiex mai tokaux nawh mai khawm pui nyiex ma nawh khawmuik, cubcom dom mawx dom an heue. ³⁴ Nawh viex kiex haok ka daux nyiex tix mai khan pa ih sivoe kiex mai kiex gaux rhawm, tau mai khawm pui nyiex ma nawh khawmuik, kheu hoik yum rhawm ka Siyiex heue. ³⁵ Yam hoek ponngawb simiang khankix ploi pui greem kix hu ti ah nin, "Ploi pui in kiex hu heue." ³⁶ Cao giex kaing thawng an, krai grawng lox an ka Pawlux ah nin, "Simiang khankix hoik ploi pui hoek ti kieh ploi pax heue. Mawh kheu nan, yam in, lih hoek mai hu nhim mhawm mhawm heue." ³⁷ Viang mawh nan Pawlux ah nin ka pui pa ot greem simiang khankix, "Kix hoik tap toi yiex sivoe, yam ang bax prawng ca pui pa mawh pui Romax mai sau yiex ka daux thawng mai yam in, kix lai briex mox ti ploi yiex lie? Ang doh mawh nan, kieh tokaux kix hoek ti teei yiex lih heue." ³⁸ Pui pa ot greem simiang khankix viex lox an hu krai ka simiang khankix mai kix lhat kah yam mhong kix mawh kiex pui Romax heue. ³⁹ Kix hoek mai khyox khaw kiex mai khaix hoik viex kix kiex lih, kix mhaing mai nhie kiex lih hu khaing daux veng an heue. ⁴⁰ Kiex lih hu khaing daux thawng an mai laig ka daux nyiex Ludi mai khaix hoik yaox kiex puxaik khankix mai hoik kieh kix nyawm rhawm, kiex lih hu heue.

¹ Yam kiex hoik hu preeng veng Amphipawlix mai Apawlawni, kiex hoek ka veng Thesalonix, dee koe nyiex sidiex pui Yudax tix lhang heue. ² Pawlux laig ka kix, awm sax koe been nawh mai son loe ngaix twah, nawh kum mai kix khaing phuk lai sigang khri, ³ mai plak jhi grawng Cao Khrit tak lai kham geu mai deeh kaoh khaing krax yum mai nawh ah, "Yesux in pa sidiex aux ka pex mawh Khrit heue." ⁴ Kix tix blah koe krax cu nghiet mai neuex tau mai Pawlux mai Silax mai khawm pa mawh pui Helasax pa nab yam ka Siyiex tom nie mai khawm bun pa ao min plakngai, ceeix ngie ang mawh kawx, koe krax cu nghiet heue. ⁵ Viang mawh kawx nan, kheu pui Yudax khankix boh rhawm ka, kix kok ti teei pui pa ang koe bwanson, pa nieb ot giex going mai khrawm ti yuh cub mai kieh veng an lawh maw heue. Kix yieh ti laig ka nyiex Yason mai sawg ka Pawlux mai Silax, sonsang viex kiex lih ka pui khankix heue. ⁶ Yam ang kix yaox kiex, kix reu Yason mai puxaik tix blah hu sivoe simiang giex kaing veng an khankix mai yo ah nin, "Pui in pa hoik kieh haktiex tieh cu ci, dee in kawx hoik hoek heue. ⁷ Yason hoik rieb ti teei kiex mai khinkix khawmuik yuh pa ang khaw ka lox tawm simiang Kesa ah nin, Koe simiang tang kaux tix kaux, pa mawh Yesux heue." ⁸ Yam cub pui hun mai simiang giex kaing veng an khankix mhong grawng in khankix, kix sung sang rhawm ka heue. ⁹ Khaix hoik teei kix ceu pa tang khaing Yason mai pa deuk khankix kix ploi kix hu heue. Pawlux hu ka veng Berix ¹⁰ puxaik khankix ploi Pawlux mai Silax hu dom mawx dom an yam ponsawm ka veng Berix, yam kiex hoik hoek tan kiex laig ka daux nyiex sidiex pui Yudax heue. ¹¹ Pui Yudax pa ot tan lheu mhawm rhawm khaing kix pa ot ka daux veng Thesalonix, ka daux pa viex khawm rhawm tix mai rieb gumlox bwan, sawg mai tiag ti yaox ka daux phuk lai sigang khri ku ngaix, sonsang tawng grawng ceu in khankix mawh lie, ang mawh lie. ¹² Mawh kheu nan kix yum rhawm tom nie mai khawm pui Helasax, pa mawh bun pa ao min plakngai mai simex kawx, yum rhawm ceeix ngie ang mawh heue. ¹³ Viang mawh nan yam tawng pui Yudax pa ot ka daux veng Thesalonix khankix grawng hoik sidiex gau Pawlux lox bwan Siyiex ka daux veng Berix, dee an kawx kix hoek mai tawx riang so rhawm pui khankix heue. ¹⁴ Yam an dom mawx dom an puxaik khankix ploi kieh Pawlux hu, tom tiang ti hu ka krax rawm sigrit sigra, viang mawh nan Silax mai Timose kawn ot tan heue. ¹⁵ Viang mawh nan kix pa hu tawx Pawlux, viex nawh hu tom hoek ka veng Athen mai khaix hoik pon kix lox tawm, sonsang tawx ka Silax mai Timose, pa nhie kiex nied ti hoek laung laung, kix yaog ti ing heue. Pawlux ot daux veng Athen. ¹⁶ Yam kawn krox jun Pawlux ka kiex daux veng Athen mai yaox riang grang hoik naog daux veng an, nawh chu rhawm kah heue. ¹⁷ Mawh kheu nan nawh tom kum kawng ka daux nyiex sidiex tau mai pui Yudax khankix mai ka pui pa chix nab yam ka Siyiex khankix mai ka kix pa sipub nawh ka daux lah ku ngaix heue. ¹⁸ Pui Epikurux mai khawm pui Satawek, pa mawh pui ting pingnya cuyi ka grawng been tix blah cha ka Pawlux heue. Tix blah ah nin, "Pui caung haoh jheeh in, sang ah pa yuh ka mawx?"Tang kaux tix blah ah, "Nawh awm pui pa sang sidiex gau grawng siyiex tang praix tang meung heue."Mawh kheu Pawlux sidiex gau grawng Yesux mai krax deeh kaoh im, kix tom ah nan heue. ¹⁹ Kix teei nawh mai viex nawh hoek ka gawng Are ah nin, "Ex pon ti tawng grawng lox gau pa khraox pa sidiex maix liak lie? ²⁰ Kheu maix viex ceu pa ang ex sax tawng sax mhong ka yhaok ex, mawh kheu nan ex tom simie ti tawng dee bleeh ceu in khankix heue." ²¹ Pui veng Athen mai nyo pa ot ka dee an khawmuik, ang yuh tidtix ka daux bawg yam pa koe kix, lheu khaing pa krai, phan ang mawh nan pa nghiet grawng pa khraox tix ceu ceu heue. ²² Pawlux cung ka sigreung gawng Are mai sidiex ah nin, "Pui veng Athen eue, aux yaox grawng jiet chix nab yam pex ka siyiex khankix khawmuik, ka grawng kuceu heue. ²³ Kheu yam lawng aux krax, aux bliex ti yaox ceu pa krub pex kah mai aux yaox khu tix mu pa hoik tiiem ti deuh lai ah nin ka, SON SIYIEX PA ANG EX TAWNG Mawh kheu nan pa ang pex tawng mai krub kah, aux krai mai plak jhi pex tawng heue. ²⁴ Siyiex pa phan pa yuh haktiex mai can pa koe ka dee an khawmuik, kheu mawh Nawh Siyiex raoma mai haktiex, Nawh ang ot ka daux nyiex bwan khankix pa hoik yuh ka taix. ²⁵ Ang pon khan kheu ka Nawh ka taix pui, awm mawh Nawh pa lo tix ceu ceu, kheu mawh Nawh pa tawx ju pa im mai pa toek bhawm mai kuceu khawmuik heue. ²⁶ Nawh hoik yuh kawn pui kuceu ka nham tix mu khaing, sonsang ot piang haktiex khawmuik mai hoik ciak ti deuh bawg yam kix mai mee dee sang ot kix, ²⁷ Sonsang sawg kix Siyiex mai phan kix sang pon ti pupi hawt Nawh, pon ti yaox Nawh nieh, kheu Nawh ang singai khaing ex ku kaux daux pui heue. ²⁸ Mawh kheu ka daux Nawh ex pon ti im ju mai chix chuh mai pon ti mawh ti koe, awm pui chix kab chix kai lox leng pex tix blah hoik ah, Ex mawh ru Siyiex heue. ²⁹ Mawh kheu mawh ex ru Siyiex, ex ang khaw ti ce Siyiex awm khri, phan ang mawh nan mau, phan ang mawh nan simaox, pa hoik keud kawn pui ti saik ti yuh heue. ³⁰ Mawh kheu nan daux bawg yam luan khankix yam daox yam ang pui tawng, Siyiex blha kix, viang mawh nan yam in Nawh tawx lox nhie pui kudah dee khawmuik, doh keud ka phimap tix heue. ³¹ Mawh kheu hoik ciak Nawh ti deuh tix ngaix, yam tak sang prawng ca Nawh haktiex in ka daux pa rahsee, ka Pui pa hoik laug Nawh tix kaux, Nawh hoik plak pui khawmuik yaox mhai rug pa kaux, ka daux ceu pa hoik kieh Nawh Cao deeh kaoh khaing krax yum heue." ³² Yam mhong kix grawng pui yum deeh kaoh im, tix blah nie yuh pa ang cee cak, viang mawh nan tang kaux tix blah ah nin, "Ex tak baox deeh loi ti nghiet grawng ceu in khankix tix bawg ha." ³³ Yam ah kix nan Pawlux lih hu khaing sinax kix heue. ³⁴ Viang mawh nan pui tix blah kawb tokaux tix mai nawh mai hoek krax yum rhawm heue. Pa neuex daux kix mawh Diyawnusi pa mawh simiang gawng Are tix kaux mai bun pa kaux Damarix tix kaux mai pui tang kaux kawx, ka mawh tau mai kiex heue. Pawlux Ot Daux Veng Kawrinthux.

¹ Khaix ceu in khankix Pawlux lih hu khaing veng Athen mai hoek ka veng Kawrinthux heue. ² Nawh yaox pui Yudax tix kaux pa kaux Akulax pa mawh ceu pui meung Pontux pa tak khraox hoek khaing meung Itali, tau mai moeng nawh Prisikilax, mawh kheu simiang Klawdi hoik tawx lox kieh pui Yudax lih khaing veng Romax khawmuik mai nawh hoek ka kiex heue. ³ Mawh kheu ceu pa tang yuh nawh ti ih, awm kiex, nawh tom ot tau mai kiex mai yuh kaing tau, kheu ceu pa yuh kiex mawh pa yuh nyiex gox man heue. ⁴ Nawh kum kawng sidiex ka daux nyiex sidiex ku ngaix twah mai jeeh nyaw pui Yudax mai pui Helasax khankix heue. ⁵ Yam hoik lih hoek Silax mai Timose khaing meung Makedonix mai hoek tan, Pawlux nied ti coca sidiex mai kham mhai rug ka pui Yudax khankix grawng Yesux mawh Khrit heue. ⁶ Yam sidien kix mai salao, nawh teei ti sibluat kraung ceep tix mai ah nin ka kix, "Kieh nham pex koe piang kaing pex tiru, aux kienie singax heue. Jah tom yam in aux tak sang hu ka pui tang ceu heue." ⁷ Nawh lih hu khaing tan mai laig ka daux nyiex pui tix kaux pa kaux Titux Yusatu, pa mawh pa krub ka Siyiex tix kaux, pa koe nyiex nawh liep nyiex sidiex heue. ⁸ Karipux pa mawh pui giex kaing nyiex sidiex an mai khawm pui nyiex nawh khawmuik yum rhawm ka Siyiex heue. Pui veng Kawrinthux tom nie pa mhong yum rhawm ka mai cubcom ka rawm heue. ⁹ Siyiex ah nin ka Pawlux yam ponsawm ka daux riang susai, "Paw lhat graung, sidiex gau mai paw ot giex, ¹⁰ kheu Aux ot tau mai maix, pui tix kaux kawx ang pon si nyhup ti yuh maix laux, mawh kheu Aux koe pui tom nie ka daux veng in heue." ¹¹ Nawh ot tan tix num mai liah khix mai sidiex gau gumlox bwan Siyiex sinax kix heue. ¹² Viang mawh nan yam Galio mawh simiang giex kaing meung Akhayax, pui Yudax khankix khrawm paox tix tau kaoh yuh ka Pawlux mai viex nawh hoek sivoe dee ngawm ti prawng ca, ¹³ ah nin, "Pui in, mawh pa nyaw glaw ka pui, sonsang krub ka Siyiex, ka daux ceu pa ang khaw mai lox lai beenli heue." ¹⁴ Yam dex ang Pawlux moing tix, Galio ah nin ka pui Yudax khankix, "Pui Yudax khankix eue, phan grawng in mawh pa ang khaw, phan ang mawh nan pa caox, pa seeing tete, aux kawx khaw ti nghiet lox pex heue. ¹⁵ Viang mawh nan phan ceu an kix mawh grawng pa chawk grawng gumlox khankix mai ceu kaux khankix mai lox lai beenli pex, aux ang rhawm mawh cao prawng ka grawng ceu in khankix heue." ¹⁶ Nawh grheu kix lih khaing dee ngawm ti prawng ca an heue. ¹⁷ Kix khawmuik giex Sawtsani pui giex kaing nyiex sidiex mai tap toi nawh sivoe dee ngawm ti prawng ca heue. Galio ang keud tidtix ka grawng ceu an khankix heue. ¹⁸ Khaix an Pawlux ot tan tom nie singaix nyao mai khaix hoik ah nawh lox gwieh ka puxaik khankix mai nawh brug reu sonsang hu ka meung Surix, tau mai Akulax mai Prisikilax, nawh khlao kaing tix ka daux veng Kinkhre, kheu hoik koe lox tiex tu nawh heue. ¹⁹ Kix hoek ka veng Efesux mai Pawlux prah Akulax mai Prisikilax tan mai tokaux nawh laig ka daux nyiex sidiex mai kum kawng jeeh nyaw ka pui Yudax khankix heue. ²⁰ Yam mhaing kix nawh baox ot mai kix, nawh ang cu, ²¹ nawh ah lox gwieh ka kix ah nin, "Phan Siyiex koe alo aux tak sang baox deeh hoek ka pex sax."Khaix hoik ah nawh nan nawh brug reu lih hu khaing veng Efesux heue. ²² Yam hoik hoek nawh ka veng Kesarix, nawh haok hu ka veng Yerusaliem mai nawb ka ceu cao tan mai deeh lih hoek ka veng Antiuk heue. ²³ Khaix hoik ot tan tix vong, nawh lih hu mai hu preeng ka daux haktiex meung Kalatix mai meung Pharuki, sonsang kieh kawncau mau soi kaux cong khawmuik heue. ²⁴ Pui Yudax tix kaux pa kaux Apawlux pa mawh ceu pui veng Alezandre, pa mawh pui pa jiet chix lai, hoek ka veng Efesux mai nawh kied tawng phuk lai sigang khri heue. ²⁵ Pui in hoik sax gau ka been krax Siyiex, nawh koe rhawm rien nied ti coca ti sidiex gau ceu pa dex dawd mai Yesux rahsee mhawm mhiem, viang mawh nan nawh tawng ngie krax cubcom Yohan khaing. ²⁶ Nawh viex rhawm kwa jah ti sidiex gau ka daux nyiex sidiex. Yam Prisikilax mai Akulax mhong lox nawh, kiex viex nawh ing mai gau nawh kieh nawh baox nie lheu tawng krax beenli Siyiex rahsee mhawm mhiem heue. ²⁷ Yam koe rhawm nawh ti sang hu ka meung Akhayax, puxaik khankix baox nie kieh nawh mie ti sang hu mai tiiem lai ka puxaik khankix sonsang rieb kix ti teei nawh mai yam hoik hoek nawh tan, nawh teem pui pa hoik yum rhawm kheu bwanson khankix tom nie heue. ²⁸ Mawh kheu nawh pon ti thiang pui Yudax ka daux sibrawm mai nawh teei phuk lai sigang khri mai plak jhi pui yaox sidawng grawng Yesux mawh Khrit heue.

¹ Yam kawn ot Apawlux ka daux veng Kawrinthux, khaix hoik lai ling Pawlux ka meung plak blaong nawh hoek ka veng Efesux mai yaox kawncau mau soi tix blah tan. ² Mai nawh ah nin ka kix, "Yam yum rhawm pex, pex pon Khuan Singax lie?"Kix deeh ah nin ka nawh, "Ang, viang mawh pie pa sang tawx Khuan Singax Singeh kawx, ang ex sax pon ti mhong heue." ³ Nawh baox chawk ah nin, "Phan mawh nan pex cubcom ka pa yuh ka mawx?"Kix deeh ah nin, "Ka krax cubcom Yohan heue." ⁴ Pawlux baox ah nin, "Yohan cubcom, ka krax cubcom pa doh keud ka phimap mai krai ka pui khankix grawng kix tak sang yum rhawm ka Kaw pa tak sang hoek khaix nawh, pa ah nawh nan, sang ah ka Yesux heue." ⁵ Yam hoik mhong kix lox in, kix cubcom ka daux ceu kaux Simiang Yesux heue. ⁶ Yam hoik deuh Pawlux taix tix ka piang kix, Khuan Singax Singeh lih hoek piang kix mai kix sikah ka lox pa tang pa siyox khankix mai krai lox jhai heue. ⁷ Kix dex mawh pui kao ra kaux heue. ⁸ Khaix an Pawlux laig ka daux nyiex sidiex mai viex rhawm kwa sidiex gau son loe khix mai kum kawng jeeh nyaw, ka ceu pa dex dawd mai Meung Siyiex heue. ⁹ Viang mawh nan kix tix blah kiien rhawm mai yam ang koe krax cu nghiet ah pa caox caig ka grawng krax Been an, sivoe cup pui hun khankix, Pawlux lih hu khaing kix mai gwieh ti deuh kawncau mau soi khankix, kum kawng mai kix ku ngaix ka daux nyiex gau lai Turannu heue. ¹⁰ Nawh ca kawn yuh nan been ra num, tom pon pui pa ot ka daux meung Asix khawmuik khawm leeing ti mhong gumlox bwan Simiang Yesux, pa mawh pui Yudax mai khawm pui Helasax heue. ¹¹ Siyiex yuh mhai ceu pa daox deng pa lheu tang ka tawm taix Pawlux, ¹² Tom viex kix man kawt, phan ang mawh nan man klieb khaing tokaux nawh, ka pui pa saux ngia mai jhawm saux kix grai mai phi caox khankix kawx lih hu heue. ¹³ Pui Yudax pa mawh pui vung viang praix tix blah, pa mawh pui grheu phicaox, ah ti yaox ceu kaux Simiang Yesux piang kix pa laig phicaox ah nin, "Aux nhie maix lih ka daux Yesux, Kaw pa sidiex gau Pawlux heue." ¹⁴ Kawn simex cao giex kaing li pa ting pa mawh pui Yudax, pa kaux Sakeva, aliah kaux kawx yuh nan. ¹⁵ Phicaox deeh pawk lox ah nin ka kix, "Yesux aux uik tawng mai Pawlux kawx aux tawng mhawm mhawm, viang mawh nan pex mawh mawx?" ¹⁶ Pui pa laig phicaox an phoh piang kix ra kaux mai pex kiex khawm ra kaux, tom sidah to lih kiex khaing nyiex mai kakaong tix khaing daux nyiex mai saux mat tix heue. ¹⁷ Pui khawmuik pon ti tawng grawng in, khawm pui Yudax mai pui Helasax pa ot ka daux veng Efesux mai kix khawmuik kied lhat graung kah mai ceu kaux Simiang Yesux nied ti ting lhaong heue. ¹⁸ Pui pa hoik yum rhawm tom nie kawx, hoek ti krai doh phimap tix mai ceu pa hoik yuh kix heue. ¹⁹ Kix ceeix ngie ang mawh pa yuh sibawk simeed, khrawm ti viex phuk lai kix khankix gleeing ka ngu sivoe pui khawmuik mai kix simin sawn ti yaox ngawh lai an khankix mai yaox grawng caw mau phwan mheen bliah heue. ²⁰ Mawh kheu nan gumlox bwan Siyex nied ti haok huan mai pre hu heue. ²¹ Khaix hoik mawh ceu in khankix, Pawlux keud ti sang hu ka daux rhawm tix, preeng ka meung Makedonix mai meung Akhayax, yam hu nawh ka veng Yerusaliem. Nawh ah nin, "Yam hoik hoek aux tan, viang mawh veng Romax kawx aux tak lai yaox kah heue." ²² Khaix hoik ploi pui ra kaux hu ka daux meung Makedonix khaing ka daux pui pa khrien khre ka nawh, pa mawh Timose mai Erattu, tokaux nawh kawn ot ka daux meung Asix tix vong heue. ²³ Daux bawg yam an koe krax lawh maw cuci ceeix ngie ang mawh ka grawng Krax Been an. ²⁴ Mawh kheu pui tix kaux, pa kaux Demetri, pa mawh pui chix yuh kraung mau, pa yuh nyiex bwan Atemi ka mau, pa pon kaing ceeix ngie ang mawh, son pui pa yuh mau khankix heue. ²⁵ Nawh khrawm kix tau mai pui pa yuh kaing awm an khankix mai ah nin ka kix, "Pui khankix eue, pex tawng ex pon ti mi ti koe kheu kaing ceu in heue. ²⁶ Pex yaox mai mhong grawng ang mawh ngie ka daux veng Efesux, viang mawh nan khawm meung Asix kawx dex khawmuik, Pawlux in hoik nyaw glaw mai kieh pui tom nie tieh, kheu nawh dhua siyiex pa yuh ka taix ang koe heue. ²⁷ Kwe dee lhat grawng kaing ceu pa yuh ex in tak hoek krax laux min plakngai ngie ang mawh, viang mawh nan, viang nyiex bwan nyiex siyiex Atemi pa ting kawx tak hoek krax ang nab yam mai pa mhawm grang nawh cao pa krub pui meung Asix khawmuik mai pui haktiex ka, koe dee lhat dee khi grawng sang hoek krax laux heue." ²⁸ Yam mhong kix grawng ceu in, kix naog krax song rhawm mai kok yo ah nin, "Atemi cie pui Efesux mawh pa ting lhaong heue." ²⁹ Veng an naog krax sung sang lulax mai kix ih rhawm paox tix plab ti laig tau, ka nyiex dee khrawm pui ti jhak krax gaux rhawm mai giex ka Kayux mai Arittakhux, pui meung Makedonix, pa mawh paox pa hu krax tau mai Pawlux heue. ³⁰ Yam koe rhawm Pawlux ti sang laig hu ka pui khankix, kawncau mau soi khankix ang kieh nawh hu heue. ³¹ Simiang meung Asix tix blah kawx, pa mawh paox pie Pawlux, ploi pui hu khyox khaw nhie nawh paw hu ka daux nyiex dee khrawm pui ti jhak krax gaux rhawm heue. ³² Mawh kheu nan tix blah kok tix ceu mai tang kaux tix blah kok tang ceu, kheu cub pui pa khrawm tix tan sung sang lulax mai pui plak nie ang tawng grawng kix hoik khrawm paox tix tan ka grawng yuh ka mawx heue. ³³ Kix viex Alezandre lih khaing daux cub pui hun an, mawh pui Yudax pa nyheun nawh hu sivoe kix heue. Alezandre yuh kix yaox taix tix mai keud ti sang krai lox peeik map ka pui khankix. ³⁴ Viang mawh nan yam tawng kix grawng mawh nawh pui Yudax, kix khawmuik kok yo lox tix mu, dex ra nari ah nin, "Atemi cie pui Efesux mawh pa ting lhaong heue." ³⁵ Cao tiiem lai veng an yam hoik kieh nawh cub pui khawmuik yiien yawg tix, nawh ah nin, "Pui veng Efesux eue, koe kaux pui mawx pa ang tawng grawng veng pui Efesux in, mawh cao pa priex nyiex bwan Atemi pa ting lhaong mai riang grang pa hoik cod khaing Cusa? ³⁶ Mawh kheu grawng in mawh ceu pa ang pon ti thiang, pex khaw ti yiien yawg tix mai ang khaw ti nieb yuh tix ceu kawx heue. ³⁷ Mawh kheu pex hoik viex pui in kiex tin, pa ang mawh pui briex ka nyiex bwan khankix, viang mawh ka yiex siyiex ex kawx ang mawh pui salao heue. ³⁸ Mawh kheu nan phan Demetri mai pui pa yuh kraung mau tau mai nawh, koe see koe lox ka pui tix kaux kaux, nyiex dee prawng ca hoik paoh mai simiang kawx koe heue. Kieh kix deuh phimap ka paox tix tan. ³⁹ Viang mawh nan phan pex baox koe lox koe see tang ceu tang cawng, tak lai prawng dud, ka daux cub cao prawng, pa khaw ti prawng heue. ⁴⁰ Mawh kheu mawh pa lawh maw cuci singaix, ex koe dee lhat grawng sang deuh phimap piang ex, kheu ang koe grawh grawng mai ex ang koe lox ti sang krai ka grawng ceu pa ang khaw ang caw in tix ceu kawx heue." ⁴¹ Khaix hoik ah nawh nan nawh ploi cub pui pa rom tix tan heue.

¹ Khaix hoik yiien ceu pa lawh maw cuci an, Pawlux kok kawncau mau soi khankix mai khaix hoik gau kix, nawh grham kix mai lih hu ka daux meung Makedonix heue. ² Khaix hoik hu lailing nawh preeng ka daux haktiex baux an khankix mai khaix hoik sidiex gau kix tom nie, nawh hoek ka meung Helasax heue. ³ Khaix hoik ot nawh tan loe khix, yam nawh dex sang brug reu hu ka meung Surix, kheu pui Yudax keud grawng ti sang yuh pa caox ka nawh, nawh tom keud ti sang deeh ing preeng ka meung Makedonix heue. ⁴ Sopatarux, kawn simex Purux, pa mawh pui veng Berix mai Arittakhux mai Sekhuntux, pa mawh pui veng Thesalonix mai Kayux pui veng Derabe mai Timose mai Tukhix mai Trawphimux pui meung Asix, hu tau mai Pawlux tom hoek meung Asix heue. ⁵ Pui an khankix hoik hu sivoe mai krox ex ka daux veng Troax. ⁶ Ex brug reu hu khaing veng Philippix, khaix ngaix blah pa ang sau susaix khankix mai khaix phwan ngaix ex hoek ka kix ka veng Troax mai ex ot tan aliah ngaix heue. ⁷ Daux aliah ngaix ngaix tix, yam hoik khrawm ex paox tix song sang sivit blah. Pawlux sidiex gau kix, kheu ce ti sang yaog ti hu pasax, nawh sidiex kix tom hoek greung sawm heue. ⁸ Kwe kawk ngu tom nie daux lawg plak piang ka dee khrawm ex paox tix tan heue. ⁹ Pui awn ju tix kaux pa kaux Utukhux ngawm ka diang siviex iak mai laig it tix, yam nie baox sidiex Pawlux tom rheung, kaw an lhiak it mai rau khaing dee koe loe thaix tan, yam yaog ti kliien, nawh hoik yum heue. ¹⁰ Pawlux lih hu mai gup piang nawh mai kawm nawh ah nin, "Pex paw lawh maw, kheu ju nawh kawn koe daux nawh heue." ¹¹ Khaix hoik deeh haok nawh mai hoik sivit ti ih blah mai sikah mai kix tom rheung nyao, uik hoek tom yam riang praix mai nawh lih hu heue. ¹² Kix viex kawn nyawm pa hoik im an hoek mai koe krax nyawm rhawm kheu, ceeix ngie ang mawh heue. ¹³ Ex hu ka reu sivoe mai brug hu ka veng Asux mai keud ti sang rieb Pawlux laig daux reu tan mawh kheu hoik bak nawh nan. ¹⁴ Yam nawh sidah ex ka veng Asux, ex rieb nawh laig daux reu mai hu hoek ka veng Mitulen heue. ¹⁵ Ex brug reu hu khaing tan mai ngaix pasax ex hoek sidieb klawn tiex Khiux mai khaix an tix ngaix ex hoek ka klawn tiex Samaox mai paung liep klawn tiex Trawkuli mai khaix an tix ngaix ex hoek ka veng Milet heue. ¹⁶ Mawh kheu Pawlux keud ti sang brug reu via khaing veng Efesux, son ang nawh lai uik bawg yam ka daux meung Asix, kheu nawh nied ti hu ka veng Yerusaliem, sonsang pon ti ot tan ngaix pawie Pientekote, phan chix tix heue. ¹⁷ Nawh ploi pui khaing veng Milet ti hu kok pui bung kaing ceucao veng Efesux khankix hoek ka nawh heue. ¹⁸ Yam hoek kix ka nawh, nawh ah nin ka kix, "Tokaux pex hoik tawng, jah tom ngaix, yam dig caong aux ka meung Asix, aux lawk ot mai pex awm pa yuh ka mawx jheung jheung. ¹⁹ Grawng hoik viex aux rhawm awn rhawm tiem mai jah rawm ngai ti yuh son Siyiex, kheu ceu pa cheuk pa nyaw pa hoik kham geu aux ka grawng pa caox pa pui Yudax khankix hoik keud ti yuh ka aux, ²⁰ Grawng pa ang aux lhat krai ka pex grawng pa koe bwanson kuceu mai gau ka pex sivoe pui mai khawm tix nyiex hoik tix nyiex, ²¹ Kham mhai rug ka pui Yudax khankix mai ka pui Helasax khankix grawng ceu pa doh keud ka phimap tix plak Siyiex mai krax yum rhawm plak Simiang ex Yesux Khrit heue. ²² Jhak heue, yam in, aux hu ka daux pa hoik phyawk Khuan ka veng Yerusaliem mai ang tawng grawng ceu pa sang hoek piang aux tan, ²³ lheu khaing pa kham Khuan Singax Singeh mhai rug ka aux ka daux ku veng mai krai aux grawng pa phyawk mai pa kha rhawm krox son aux heue. ²⁴ Viang mawh nan, nyawk ka mawh ju aux, ang aux lai lhawk ka ju aux, sonsang pon yuh aux tom hoik, kaing sidiex gau pa hoik pon aux khaing Simiang Yesux, sonsang pon ti kham mhai rug grawng lox bwan gaux rhawm pa dex dawd mai bwanson Siyiex heue. ²⁵ Jhak heue, yam in aux tawng grawng pex khawmuik, pa hoik hu lai ling aux sinax ti sidiex gau, grawng meung Siyiex, tak ang lai baox yaox pakngai aux heue. ²⁶ Mawh kheu nan aux tom kham mhai rug ka pex singaix, grawng singax singeh aux khaing nham pui khawmuik heue. ²⁷ Grawh grawng nawh, ang aux sax lhat krai lox tawm jhawm krai Siyiex khawmuik ka pex heue. ²⁸ Mawh kheu nan rien rhawm ka tokaux tix mai ka cub yung khawmuik, pa hoik kieh Khuan Singax Singeh pex mawh cao bung cao kia, sonsang tawx ceu cao sawm pa hoik liag Simiang ka nham tokaux tix heue. ²⁹ Aux tawng khaix hoik lih hu aux, grawng soxla pa caox khankix tak laig ka sinax pex mai tak ang deuh cub yung, ³⁰ mai pui tix blah tak sang kaoh khaing ka daux pex mai krai grawng ceu pa lud, sonsang bluh kawncau mau soi khankix hawt khaix tokaux tix heue. ³¹ Mawh kheu nan pex pau ti jhak mai doh keud grawng son loe num khawm yam ponngaix, ponsawm, aux ang laux lee tix, jah rawm ngai mai sidiex gau ka ku kaux daux pui heue. ³² Puxaik khankix eue, yam in aux tawx pong pex ka Siyiex mai ka gumlox bwanson Nawh, pa chix kieh pex ting lhaong mai tawx sin ka pex, ka sinax kix pa singax singeh khawmuik heue. ³³ Aux ang sax ghoing ka mau, ka khri, phan ang mawh nan ka kraung ceep pui tix kaux kawx heue. ³⁴ Tokaux pex kawx hoik tawng grawng taix aux in, hoik yuh ti pon ceu pa lo aux mai kix pa ot tau mai aux khankix heue. ³⁵ Ka daux kuceu khawmuik aux hoik tawx ceu pa hawt jawh pex ti yuh, sonsang yuh pex kaing pa khaw ti teem ka pui pa iak riang rao khankix mai sonsang doh keud ka lox Simiang Yesux, pa hoik ah tokaux Nawh nin, Ceu pa tawx lheu ting bwanson khaing ceu pa pon heue." ³⁶ Khaix hoik ah nawh nan, nawh grux ngawng mai rawg bwan tau mai kix khawmuik heue. ³⁷ Kix khawmuik nied ti yiiem mai kawm ngawg nawh mai ngheut nawh, ³⁸ mai kix nie lheu khi rhawm kheu lox pa hoik ah nawh grawng kix tak ang lai baox yaox pakngai nawh mai kix viex ti hu tawx nawh ka reu heue.

¹ Khaix hoik pon preeng ex ti gwieh khaing kix, ex brug reu hu ka klawn tiex Kawsax rahsee mai ngaix pasax hoek ka klawn tiex Rawdax mai yaog khaing tan hoek ka veng Patarax heue. ² Kheu yaox ex reu pa sang hu ka meung Phinit, ex laig ka reu an mai baox brug hu heue. ³ Yam hoek dee pon ex ti yaox klawn tiex Kuparux, ex grham klawn tiex an plak khawn gwiex mai brug reu hu ka meung Surix. Mai paung ka veng Turux, mawh kheu sang teei kraung lih khaing daux reu an tan heue. ⁴ Khaix hoik sawg ex ti yaox kawncau mau soi khankix, ex ot tan aliah ngaix mai kix ne Pawlux ka daux Khuan son ang nawh sang hu ka veng Yerusaliem heue. ⁵ Yam hoik naog singaix ex khankix tan, ex lih hu mai kawncau mau soi khankix, khawm moeng khawm kawn kix khawmuik, hu tawx ex tom hoek plak praix veng mai ex grux ngawng tix ka caong raog tan mai rawg bwan mai ah lox gwieh ka paox tix tan heue. ⁶ Ex haok piang reu mai kix deeh ing ka nyiex kix heue. ⁷ Khaix hoik sidah brug ex reu hoek khaing veng Turux mai hoek ka veng Patalemie, ex nawb bwan ka puxaik khankix mai ot tan tix ngaix heue. ⁸ Ngaix pasax ex lih hu mai hoek ka veng Kesarix mai laig ka daux nyiex Philipux, pa mawh cao sidiex, ka daux kix aliah kaux tix kaux, ex ot tau mai nawh heue. ⁹ Pui in koe kawn bun pa mawh bunkrih pon kaux pa chix krai lox jhai heue. ¹⁰ Yam kawn ot ex tan ngaix tix blah, cao jhai tix kaux, pa kaux Akabu lih hoek khaing meung Yudax, ¹¹ Hoek ka ex mai nawh teei maox rhawt nyoi Pawlux mai phyawk caong phyawk taix tokaux tix kah ah nin, "Khuan Singax Singeh ah ceu in, Pui pa mawh cao maox rhawt nyoi in, pui Yudax khankix tak phyawk awm in ka daux veng Yerusaliem mai teei ti tawx nawh ka daux tawm taix pui tang ceu khankix heue." ¹² Yam hoik mhong ex lox ceu in, ex khawm pui pa ot dee an khyox khaw ka nawh son ang nawh sang haok hu ka veng Yerusaliem heue. ¹³ Yam an Pawlux deeh pawk ah nin, "Kheu pex lai yiiem mai kieh rhawm aux laux ka? Mawh kheu aux hoik rien ti pon kham geu pa phyawk ngie ang mawh, viang mawh phan tak lai yum son ceu kaux Simiang Yesux ka veng Yerusaliem kawx pon tix heue." ¹⁴ Yam ang nawh nghiet lox nyaw glaw, ex glaik ti ah nin, "Kieh mawh alo pa khaw rhawm Simiang heue." ¹⁵ Khaix ngaix inkix, ex khre kraung tix mai haok hu ka veng Yerusaliem heue. ¹⁶ Viang mawh kawncau mau soi khaing veng Kesarix tix blah kawx hu mai ex mai tawx ex ka Manason pui Kuparu, pa hoik dawg mawh kawncau, sonsang tum ex tau mai nawh heue. ¹⁷ Yam hoek ex ka veng Yerusaliem, puxaik khankix gaux rhawm mai rieb ti teei ex heue. ¹⁸ Yam hoek ngaix pasax Pawlux laig tau mai ex ka nyiex Yakop mai pui bung kaing ceucao khawmuik kawx ot tan heue. ¹⁹ Khaix hoik nawb Pawlux bwan ka kix, nawh krai grawng tix ceu hoik tix ceu pa hoik yuh Siyiex ka sinax pui tang ceu, ka daux kaing sidiex pa hoik yuh nawh heue. ²⁰ Yam hoik mhong kix grawng an, yaogyaw Siyiex mai ah nin ka nawh, "Puxaik eue maix tawng grawng pui pa yum rhawm ka daux pui Yudax koe miex mheen miex rheng mai kix khawmuik mawh pa nied ti hawt twah lox lai beenli. ²¹ Pui hoik krai kix mhong grawng maix, grawng sidiex maix ka pui Yudax khawmuik, pa ot ka sinax pui tang ceu, sonsang tik ka Mose mai nhie kix paw pat hak kawn praix kix mai viang mawh been khankix kawx nhie paw hawt heue. ²² Mawh kheu in khaw ti yuh ka mawx? Kix tee sang mhong grawng hoek maix tete heue. ²³ Mawh kheu nan yuh awm pa krai ex ka maix. Ex koe pui pon kaux tin pa ot greem lox tiex tu, ²⁴ teei kix mai hu yuh kieh tokaux maix singax tau mai kix mai tawx ngawh son kix, sonsang pon khlao kaing kix, phan yuh nan khawmuik tak pon ti tawng, grawng lox pa hoik mhong kix grawng maix, ang mawh pa mawh meh mai grawng tokaux maix kawx, twah klaung mai priex ti hawt lox lai beenli heue. ²⁵ Viang mawh nan ex hoik tiiem lai ka pui tang ceu pa hoik yum rhawm khankix, prawng ca tawx nhie kix paw dex paw teeh ka riang grang mai khaing nham, khaing ceu pa hoik rawd ghok mai khaing pa lud vao heue." ²⁶ Ngaix pasax Pawlux teei pui an kix, yuh ti kieh tokaux tix singax tau mai kix, laig ka daux nyiex bwan mai krai grawng hoik naog singaix pa kieh singax khankix, tom hoik tan son kix ku kaux daux pui heue. ²⁷ Yam hoik dex naog aliah ngaix an, pui Yudax khankix pa kaoh khaing meung Asix, yaox Pawlux ka daux nyiex bwan, cheeik ka cub pui hun mai giex nawh, ²⁸ mai yo ah nin, "Pui Isarelax khankix eue, teem yix liak, mawh pui in pa gau ka pui khawmuik ku dah dee, sonsang koeng ka pui ceu ex mai ka lox lai beenli mai ka dee in mai lheu khaing an viang mawh pui Helasax kawx nawh hoik viex laig ka daux nyiex bwan mai hoik kieh dee singax singeh in seeing brai heue." ²⁹ Mawh kheu sivoe an, kix hoik yaox nawh ka daux veng an, tau mai Trawphimux, pa mawh pui Efesux, kix tom ce Pawlux hoik viex kaw an laig daux nyiex bwan heue. ³⁰ Pui veng an khawm veng lulax mai khrawm tix to hoek tau mai giex Pawlux mai reu nawh lih plak praix nyiex bwan mai klab siviex dom mawx dom an heue. ³¹ Yam sawg kix ti teei nawh yum, cao giex kaing naing piang pui tix rheng, pon lox grawng sung sang veng Yerusaliem khawmuik heue. ³² Dom mawx dom an nawh teei pui naing mai cao giex kaing naing greem nawh khankix mai to lih hu ka kix heue. Yam yaox kix cao giex kaing naing pa ting mai pui naing khankix, kix bloi bleue pa tap Pawlux heue. ³³ Yam cao giex kaing naing pa ting an hoek dex, nawh giex Pawlux mai tawx lox sonsang phyawk nawh ka ceng ra nyaing mai chawk ah nin, "Kaw in mawh mawx? mai nawh hoik yuh pa yuh ka mawx?" ³⁴ Pui daux cub pui an, tix blah yo tix ceu mai tang kaux tix blah yo tang ceu mai yam ang nawh pon tawng grawng sidawng, kheu lox lawh maw, nawh tawx lox nhie kix viex Pawlux hu ka dee ot pui naing heue. ³⁵ Yam hoek Pawlux piang bawng, kheu kied nieb yuh cub pui khankix, pui naing khankix tom kliien nawh hu heue. ³⁶ Mawh kheu cub pui hun hawt khaix mai yo ah nin, "Teei ti tik nawh heue." ³⁷ Yam dex viex Pawlux laig ka daux dee ot pui naing, nawh chawk ka cao giex kaing naing pa ting ah nin, "Khex pon krai aux lox ka maix ceeix lie?"Cao giex kaing naing an chawk ah nin, "Chix maix lox Helasax lie? ³⁸ Phan mawh nan ang maix mawh pui Ejiptux pa hoik cheeik kieh pui tieh feen mai thong kix pon rheng pa mawh pui pa plaux pui yum hu daux tiagtu, bawg yam singaix glang ka in khankix lie?" ³⁹ Pawlux deeh ah nin, "Aux mawh pui Yudax, pa mawh pui veng Tasux meung Kiliki, aux mawh pui veng pa ang lak law tix mawh veng mai aux khyox khaw ka maix, kieh aux sikah ka pui khankix liak." ⁴⁰ Khaix hoik tawx cao giex kaing naing an akhwang ka nawh, Pawlux cung piang bawng mai yuh pui khankix yaox ka taix tix mai khaix hoik yiien singiet, nawh sikah ka kix, ka lox Hebrie ah nin,

¹ "Puxaik mai keeing khankix eue, nghiet lox pa sang tiebtie aux ka grawng ceu pa deuh phimap ka aux mai ka pex yam in heue. ² Yam mhong kix, nawh sikah ka kix, ka lox Hebrie, kix nie lheu yawg tix heue. Nawh ah nin, ³ "Aux mawh pui Yudax, pa keh ka daux veng Tasux, meung Kiliki, viang mawh nan hoik eei aux ting daux veng in, ka caong Gamalelax mai hoik gau aux ka lox been tax keeing mai ang kluik ang khluk khlaik mai koe rhawm tix son Siyiex, awm koe pex khawmuik singaix heue. ⁴ Aux tuktiak ka krax been in, tom teei yum mai phyawk khawm simex khawm bun tawx ti sau daux thawng khankix heue. ⁵ Awm cao giex kaing li pa ting mai khawm cub kuad song khankix mawh mhai rug son aux. Ka kix kawx aux pon lai son puxaik khankix mai lawng krax hu ka veng Damase sonsang phyawk ti viex kix hoek ka veng Yerusaliem, sonsang ciyang kix heue. ⁶ Yam hu aux krax mai hoek dex ka veng Damase, yam dex jung singaix, dom mawx dom an pa riang pa ting jhan lih khaing raoma mai jhan rob aux heue. ⁷ Aux goh gup piang tiex mai mhong lox pa ah nin ka aux, Sawlux eue, Sawlux eue, maix lai tuktiak Aux yuh ka mawx? ⁸ Aux deeh chawk ah nin, Simiang eue, Maix mawh mawx? Nawh deeh ah nin ka aux, Aux mawh Yesux pui veng Nazariet, pa tuktiak maix kah heue. ⁹ Kix pa ot tau mai aux yaox pa riang an tete mai lhat graung kah, viang mawh nan kix ang mhong lox Kaw pa sikah mai aux heue. ¹⁰ Aux deeh chawk ah nin, Simiang eue, aux tak lai yuh ka mawx? Simiang deeh ah nin ka aux, "Kaoh mai laig ka daux veng Damase mai tak sang krai grawng kuceu ka maix dee an, pa hoik ciak ti deuh sonsang yuh maix heue." ¹¹ Yam ang aux chix yaox kheu pruh pa riang an, pui pa hu tau mai aux tok taix aux hu mai aux tom hoek ka daux veng Damase heue. ¹² Pui tix kaux pa kaux Ananix, pa chix nab yam hawt lox lai beenli, pa yaw pui Yudax pa ot tan khawmuik kah, ¹³ hoek ka aux mai cung liep aux ah nin ka aux, "Pux Sawlux eue, kieh maix chix yaox heue. Daux nari dom an aux deeh chix yaox mai yaog ti jhak ka nawh heue. ¹⁴ Nawh baox ah nin, Siyiex tax keeing ex, hoik ciak tix kieh maix tawng alo Nawh Cao mai kieh maix yaox Kaw pa rahsee mai sonsang mhong lox pa lih khaing jheeh Nawh heue. ¹⁵ Mawh kheu maix tak lai mawh pui kham mhai rug son Nawh ka pui khawmuik khawm leeing, ka grawng pa hoik yaox hoik mhong maix heue. ¹⁶ Yam in maix kawn gla yuh ka mawx? Kaoh, kok ka ceu kaux Nawh mai cubcom ka daux rawm mai sigrhah phimap maix luan heue. ¹⁷ Khaix hoik deeh ing aux ka veng Yerusaliem mai yam rawg aux bwan ka daux nyiex bwan, aux liplu, ¹⁸ mai yaox Nawh ah nin ka aux, Nied ti lih hu khaing veng Yerusaliem laung laung, mawh kheu ang kix rieb ti teei lox pa kham maix mhai rug grawng Aux heue. ¹⁹ Aux deeh ah nin, "Simiang eue, tokaux kix hoik tawng grawng aux sau daux thawng mai tap toi ka kix pa yum rhawm ka Maix, ka daux nyiex sidiex ku lhang heue. ²⁰ Yam lih nham Sathephan pui pa kham mhai rug son Maix, aux kawx cung dex tan mai kieh yuh mai priex kraung ceep kix pa pah nawh yum heue. ²¹ Nawh Cao baox ah nin ka aux, "Lih hu heue, mawh kheu Aux sang ploi maix hu dee singai khaing tin, ka pui tang ceu khankix heue." ²² Kix nghiet lox nawh tom hoek lox pa ghoik an mai kix yaog lox tix yo ah nin, "Tik pui pa yuh nin khaing haktiex, kheu ang keung ti kieh nawh klawd heue." ²³ Yam kawn tak yo kix, kix peeik kraung ceep tix mai rhuat phawng tiex dee lhaong, ²⁴ mai cao giex kaing naing pa ting an tawx lox kieh viex Pawlux laig ka daux dee ot pui naing mai nhie sivied ti chawk nawh, sonsang tawng nawh grawng lox pa yo kix ti deuh phimap ka Pawlux mawh grawng pa yuh ka mawx. ²⁵ Khaix hoik phyawk kix nawh ka maox hak, Pawlux ah nin ka cao giex kaing naing pa cung dex tan, "Pa sivied maix pui pa mawh pui Romax, pa ang nyang bax prawng ca, khaw mai beenli lie?" ²⁶ Yam mhong cao giex kaing naing an lox an, nawh hu ka cao giex kaing naing pa ting mai krai ka nawh ah nin, "Maix dex sang yuh pa yuh ka mawx?"Mawh kheu pui in mawh pui Romax heue. ²⁷ Cao giex kaing naing pa ting an hoek mai chawk ah nin ka Pawlux, "Krai ka aux liak, mawh maix pui Romax lie?"nawh deeh ah nin, "Mawh heue." ²⁸ Cao giex kaing naing pa ting an deeh ah nin, "Aux pon tix mawh pui Romax, kheu hoik kied nie tawx mau heue."Pawlux baox ah nin, "Phan mawh aux, hoik keh tix mawh pui Romax heue." ²⁹ Yam an kix pa dex sang chawk cheng lih hu khaing nawh dom mawx dom an, cao giex kaing naing pa ting an kawx, lhat kah, yam tawng nawh, grawng mawh nawh pui Romax, kheu hoik phyawk nawh Pawlux heue. ³⁰ Viang mawh nan ngaix pasax, kheu simie nawh tix tawng sidawng, grawng deuh pui Yudax phimap ka nawh ka grawng pa yuh ka mawx, nawh tom kah maox ceeng khaing Pawlux mai tawx lox nhie cao giex kaing li pa ting khankix mai cub kuad song pa prawng ca khawmuik khrawm paox tix mai viex Pawlux lih mai deuh nawh sivoe kix heue.

¹ Pawlux jeung ka cub kuad song cao prawng ca khankix ah nin, "Puxaik khankix eue, aux hoik yuh ceu pa khaw aux ti yuh sivoe Siyiex tom sidah hoek ngaix in mai rhawm aux ang koe dee deuh phimap ka tokaux tix ka grawng an heue." ² Cao giex kaing li pa ting Ananix nhie kix pa cung liep nawh, simang jheeh nawh heue. ³ Yam an Pawlux ah nin ka nawh, "Siyiex tak sang lah ka maix, pa awm ding pa kraix simaox ceed eue maix ngawm sonsang prawng aux hawt lox lai beenli mai nhie pui lah aux ka pa ang khaw mai been lie?" ⁴ Kix pa cung dex tan chawk ah nin, "Maix lai map ka cao giex kaing li pa ting Siyiex lie?" ⁵ Pawlux deeh ah nin, "Puxaik khankix eue, aux ang tawng grawng mawh nawh cao giex kaing li pa ting, mawh kheu hoik tiiem ti deuh ah nin, maix tak ang ah lox pa caox grawng cao giex kaing pui ceu maix heue." ⁶ Viang mawh nan yam tawng Pawlux grawng cub kuad song cao prawng ca khankix, tix blah mawh Sadukie mai tix blah mawh Pharishie, nawh yo lox sinum sinax kix ah nin, "Aux mawh Pharishie, pa mawh kawn Pharishie mai aux kham geu pa chawk cheng tin, kheu keud pot jun pot aux ka ceu pa sang deeh kaoh im khaing krax yum heue." ⁷ Khaix hoik ah nawh nan, Pharishie mai Sadukie khankix thung thiang ang khaw paox tix mai cub kuad song cao prawng ca khankix, tang gwieh tix heue. ⁸ Mawh kheu Sadukie khankix dhua krax deeh kaoh khaing krax yum ang koe, viang mawh kawncau Siyiex mai khawm khuan kawx, kix dhua ang koe. Viang mawh nan, Pharishie khankix ah, koe khawm ra ceu heue. ⁹ Yam an lih mawh krax lawh maw pa ting mai pui tiiem lai plak Pharishie tix blah, kaoh cung mai riex thiang ah nin, "Ex ang yaox pa caox ka daux pui in ceeix kawx, viang mawh khuan phan ang mawh nan kawncau Siyiex hoik sikah mai nawh kawx, mawh pa yuh ka mawx?" ¹⁰ Yam kix nie ang khaw, ting thung thiang paox tix, cao giex kaing naing pa ting lhat kix rud Pawlux tom mawh khik mawh phoi, nawh tom tawx lox kieh pui naing hu teei nawh lih khaing sinax kix mai viex nawh laig ka dee ot pui naing heue. ¹¹ Daux sawm ngaix pasax, Simiang Yesux cung liep nawh ah nin, "Kieh koe rhawm kaux rhawm cong heue, awm hoik kham maix mhai rug grawng Aux ka veng Yerusaliem, viang mawh ka veng Romax kawx maix tak lai kham mhai rug yuh nan heue." ¹² Yam hoik riang praix pui Yudax tix blah yuh sijax mai vien rhawm tix tau greem lox tiex tu ah nin, "Ka ang ex nyang bax pon ti teei Pawlux yum ex ang ih ang nyaux heue." ¹³ Kix pa hoik yuh sijax yuh nan koe tixpon kaux haoh heue. ¹⁴ Kix hu ka cao giex kaing li pa ting khankix mai kuad song khankix ah nin, "Ex hoik vien rhawm tix tau greem lox tiex tu pa ting, son ang ex sang cim tix yaox tidtix, tom hoik teei Pawlux yum heue. ¹⁵ Mawh kheu nan pex khawm cub kuad song cao prawng ca khankix, nhie cao giex kaing naing pa ting viex Pawlux lih hoek ka pex mai yuh awm sang mie pex tix nie grum cox chawk nawh mai ka sang hoek nawh dex tin ex hoik rien tix pah nawh yum heue." ¹⁶ Viang mawh nan kawn simex nan Pawlux mhong grawng sang jawm kix nawh mai nawh hu laig dee ot pui naing mai krai ka Pawlux heue. ¹⁷ Pawlux kok cao giex kaing naing tix kaux hoek ka tix ah nin, "Viex pui awn ju in hu ka cao giex kaing naing pa ting liak, kheu koe nawh grawng pa sang krai ka nawh tix ceu ceu heue." ¹⁸ Mawh kheu nan nawh teei kaw an mai viex nawh hu ka cao giex kaing naing pa ting ah nin, "Pawlux pa hoik laung an kok aux hoek ka nawh mai nhie aux viex pui pa awn ju in hoek ka maix, pa koe lox pa sang krai ka maix tix ceu ceu heue." ¹⁹ Cao giex kaing naing pa ting an teei taix nawh mai hu dee ang pui ot mai chawk nawh nong nong ah nin, "Ceu pa koe maix ti sang krai ka aux, mawh pa yuh ka mawx?" ²⁰ Nawh ah nin, "Pui Yudax hoik ih rhawm paox tix, sonsang nhie maix viex Pawlux lih hu ka dee prawng ca pasax mai yuh awm sang simie kix tix nie grum cox chawk grawng nawh heue. ²¹ Mawh kheu nan maix paw cu lox kix liak, kheu pui ka daux kix tixpon kaux lheu pau tix jawm son nawh, pa hoik vien rhawm tix tau greem lox tiex tu, son ang sang ih sang nyaux tom hoik pah kix nawh yum heue. Yam in kix hoik rien tix mai krox son lox khaing maix heue." ²² Cao giex kaing naing pa ting an, ploi pui awn ju an hu, khaix hoik tawm nawh ka lox ah nin, "Paw krai ka pui tix kaux kawx, ceu pa hoik krai maix ka aux grawng ceu inkix heue." ²³ Cao giex kaing naing pa ting an kok cao giex kaing naing greem nawh ra kaux hoek ka tix ah nin, "Rien pui naing ra yieh sonsang hu tom hoek ka veng Kesarix, ka daux sawm in yam loe nari mai pui naing brug brung atixgliah kaux mai pui naing klawm pliah ra yieh awx." ²⁴ Brung pa sang brug Pawlux kawx nawh nhie kix khre, sonsang pon ti viex nawh hoek ka simiang Felit mhawm mhawm heue. ²⁵ Lai kawx nawh tiiem hu pa ah nin, ²⁶ "Aux pa mawh Klawdi Lusi tawx lai ka simiang Felit pa ting pa mhawm heue. Kieh nyawm ot siu koe liak. ²⁷ Pui Yudax khankix giex pui in mai yam dex sang pah kix nawh yum, aux teei pui naing mai lih hu ka kix mai taoh nawh, kheu hoik tawng aux grawng mawh nawh pui Romax heue. ²⁸ Kheu mie aux tix tawng, grawng deuh kix phimap pa yuh ka mawx ka nawh, aux tom viex nawh lih ka cub kuad song cao prawng ca kix heue. ²⁹ Aux yaox grawng pa deuh kix phimap ka nawh, mawh pa dex dawd mai been kix, viang mawh nan ang koe ceu pa deuh phimap ka nawh, ceu pa keung nawh tix yum, phan ang mawh nan pa keung ti phyawk ti laung nawh kheu heue. ³⁰ Yam pon aux ti mhong grawng hoik keud ti sang yuh pa ang mhawm ka pui in, aux tom ploi nawh hu ka maix dom mawx dom an mai nhie pui pa deuh phimap ka nawh, hu krai grawng nawh ka sivoe maix heue." ³¹ Pui naing khankix teei Pawlux, awm pa hoik nhie ka kix mai viex nawh hu yam ponsawm tawx ka Antipatri heue. ³² Viang mawh nan ngaix pasax kix prah pui naing brug brung khankix hu tau mai Pawlux mai deeh ing ka dee ot pui naing heue. ³³ Yam kix hoek ka veng Kesarix, teei ti tawx lai an ka simiang mai Pawlux kawx kix teei ti tawx sivoe nawh heue. ³⁴ Khaix hoik phat nawh lai an, nawh chawk ka Pawlux grawng mawh nawh pui meung mawx mai khaix hoik tawng grawng mawh nawh pui meung Kiliki, ³⁵ Nawh ah nin, "Aux tak nghiet maix grum ha, khaix pui pa hoik deuh phimap ka maix kawx hoik hoek."Simiang tawx lox nhie gang Pawlux ka daux nyiex haw simiang Herut heue.

¹ Khaix an phwan ngaix cao giex kaing li pa ting Ananix mai kuad song tix blah mai pui tix kaux pa kaux Teratulu, pa chix nih nai krai lox, lih hoek mai kix krai grawng Pawlux ka simiang heue. ² Yam hoik kok Pawlux, Teratulu jah ti deuh phimap ka nawh ah nin, "Simiang Felit pa ting pa mhawm eue, kheu yaox ex, mawh kheu maix ex pon ti ot ka daux pa nhim mhawm mhawm mai grawng mawh kheu bwanson maix ceu pa caox khankix, deeh cox mhawm son meung in, ³ ex tom yaogyaw bwanson maix mai rieb ti teei nawh, ka daux kuceu khawmuik mai ku dah dee heue. ⁴ Viang mawh nan son ang aux baox kieh maix nyhap, aux khyox khaw maix, viex rhawm awn caux rhawm mai nghiet lox ex tix gum ra gum liak ha. ⁵ Mawh kheu yaox ex, grawng pui in mawh preng lukliak mai pa kieh pui tieh feen ka daux pui Yudax khankix piang haktiex khawmuik mai cao bung cub beenli Nazariet heue. ⁶ Viang mawh nyiex bwan kawx nawh yuh ti yaox, sonsang kieh seeing, ex tom giex nawh mai mie ti prawng ca nawh hawt been ex. ⁷ Viang mawh nan Lusi cao giex kaing naing pa ting, hoek ka ex mai nied tix rud rhim nawh hu khaing tawm taix ex heue. ⁸ Kieh pui pa deuh phimap ka nawh hoek ka maix. Phan tokaux maix chawk cheng nawh maix sang tawng grawng pa deuh ex phimap ka nawh mawh pa yuh ka mawx heue." ⁹ Pui Yudax khankix kawx dhua ceu in khankix mawh pa caw heue. ¹⁰ Khaix hoik yuh simiang mhai ka taix tix nhie Pawlux sikah, Pawlux krai lox ah nin, "Mawh kheu tawng aux, grawng hoik mawh maix cao prawng ca son pui meung in tom nie num, aux nie lheu koe krax gaux rhawm ti sang krai lox tiebtie, son tokaux tix heue. ¹¹ Grawh grawng nawh maix pon ti tawng, grawng khaix hoik haok aux ti krub ka veng Yerusaliem, ang lheu khaing kao ra ngaix heue. ¹² Viang mawh ka daux nyiex bwan ang ah, phan ang mawh nan ka daux nyiex sidiex khankix ang ah mai ka daux veng an ang ah kix ang yaox aux thung thiang ka pui tix kaux kawx mai cheeik cub pui heue. ¹³ Viang mawh ceu pa deuh kix phimap ka aux yam in kawx, kix ang pon jhi mhai rug heue. ¹⁴ Viang mawh nan aux krai doh ka maix, grawng hawt aux ka krax been pa ah kix ang khaw mai krub ka Siyiex tax du ex mai yum rhawm ka kuceu khawmuik, pa dex dawd mai lox lai beenli mai pa hoik tiiem ti deuh ka daux lai cao jhai khankix heue. ¹⁵ Kwe krax keud pot jun pot plak Siyiex, awm tokaux kix kawx krox jun ka grawng pui rahsee mai khawm pui pa ang rahsee tak sang deeh kaoh khaing krax yum heue. ¹⁶ Mawh kheu nan aux tom nied ti coca son rhawm aux dee chix keud tawng tak ang koe pa lud ka plak Siyiex mai plak kawn pui ku jheung jheung heue. ¹⁷ Khaix hoik luan num tom nie, aux hoek ka pui ceu aux, sonsang viex totaix ti yuh bwanson kah mai sonsang yuh krax tan heue. ¹⁸ Yam kawn yuh aux nan, kix yaox aux ka daux nyiex bwan, khaix hoik singax singeh mai ang ot tau mai cub pui pa khrawm paox tix mai ang koe krax lawh maw heue. Viang mawh nan pui Yudax meung Asix tix blah, ¹⁹ Khaw ti ot tin sivoe maix mai krai grawng pa deuh kix phimap, phan kix koe pa sang deuh phimap ka aux. ²⁰ Phan ang mawh nan kieh tokaux pui pa ot tin khankix, krai grawng pa lud pa yaox kix, yam cung aux sivoe cub kuad song pa prawng ca. ²¹ Phan ang mawh lox in tix gum, pa hoik yo aux yam cung sinax kix, Aux kham geu ceu pa chawk cheng sivoe pex singaix, kheu grawng pa deeh kaoh im khaing krax yum heue." ²² Viang mawh nan kheu simiang Felit nie lheu tawng grawng krax been an, nawh kawn grham pa prawng ca tix ah nin, "Yam lih hoek Lusi cao giex kaing naing pa ting sax, aux koi prawng grawng see pex heue." ²³ Nawh tawx lox ka cao giex kaing naing tix kaux, sonsang gang Pawlux, viang mawh nan nyawk ka yuh nawh mai son sang kieh raw paox grawm nawh khankix hoek ti khre rien nawh heue. ²⁴ Khaix singaix tix blah simiang Felit hoek tau mai moeng nawh Drusila pa mawh pui Yudax mai kok Pawlux mai nghiet lox nawh grawng pa dex dawd mai krax yum rhawm ka daux Yesux Khrit heue. ²⁵ Yam sidiex gau Pawlux ka grawng pa rahsee mai ka grawng pa priex rhawm tix mai grawng krax prawng ca pa tak sang hoek sax, simiang Felit die lhat kah ah nin, "Phao in hu dee hu maix ha mai yam tien aux mai mhawm bawg yam, aux tak kok maix hoek ka aux heue." ²⁶ Nawh keud pot jun pot grawng sang tawx Pawlux mau ka nawh, mawh kheu nan nawh tom nie kok Pawlux law lawx mai kum tau mai nawh heue. ²⁷ Viang mawh nan khaix hoik naog ra num, Pawki Fittux, pon ti yuh simiang khaix simiang Felit mai kheu simiang Felit mie pui Yudax caw rhawm ka tix, nawh tom laung tix grham Pawlux heue.

¹ Khaix simiang Fittux hoik hoek ka daux haktiex an loe ngaix, nawh kaoh khaing veng Kesarix mai haok hu ka veng Yerusaliem heue. ² Cao giex kaing li pa ting khankix mai kuad giex kaing pui Yudax khankix, krai lox ka nawh deuh phimap ka Pawlux mai kix khyox khaw ka nawh, ³ rawg mhaing nhie nawh yuh bwanson mai ploi ti kieh Pawlux hoek ka veng Yerusaliem. Kix keud kix yiag ti sang pah nawh yum yam lawng nawh krax heue. ⁴ Viang mawh kawx nan simiang Fittux deeh pawk ti krai, grawng hoik gang Pawlux ka veng Kesarix mai grawng tokaux nawh uik dex sang hu tan heue. ⁵ Nawh tom ah nin, "Kieh kix pa koe sibrawm ka daux pex, lih hu tau mai aux mai phan koe dee lud ka pui an, kieh kix deuh phimap ka nawh heue." ⁶ Khaix hoik ot nawh sinax kix ang lheu khaing daix ngaix, phan ang mawh nan kao ngaix, nawh lih hu ka veng Kesarix mai ngaix pasax nawh ngawm piang dee ngawm tix prawng ca mai tawx lox nhie viex Pawlux hoek heue. ⁷ Yam hoik hoek nawh, pui Yudax khankix pa hoik lih hoek khaing veng Yerusaliem, cung rob nawh mai deuh phimap pa nu pa khawm tom nie ka nawh, pa ang kix pon ti jhi mhai rug kah heue. ⁸ Pawlux krai lox tiebtie phimap ti ah nin, "Viang mawh ka been pui Yudax ang ah, ka nyiex bwan ang ah, ka simiang Kesa ang ah, aux ang lud tidtix heue." ⁹ Mawh kheu mie simiang Fittux ti pon plakngai pa khaw rhawm pui Yudax, nawh tom deeh pawk ti chawk Pawlux ah nin. "Maix sang haok hu ka veng Yerusaliem mai kham pa prawng ca ka grawng ceu in khankix sivoe aux lie?" ¹⁰ Viang mawh nan Pawlux ah nin, "Aux uik cung sivoe dee ngawm ti prawng ca simiang Kesa, dee khaw ti prawng ca aux. Awm maix kawx hoik tawng mhawm mhawm, aux ang sax lud tidtix ka pui Yudax khankix heue. ¹¹ Mawh kheu nan phan aux mawh pui lud mai hoik yuh pa khaw ti yum tix ceu ceu, aux ang thiang ti yum, phan grawng pa deuh kix phimap ka aux khankix mawh pa ang mawh meh, pui tix kaux kawx ang pon ti tawx pong aux ka kix heue. Aux khyox khaw ti deuh rhawm ka simiang Kesa heue." ¹² Yam an khaix hoik kum kawng simiang Fittux mai cub kuad cao prawng ca, nawh deeh pawk ah nin, "Maix hoik khyox khaw ti deuh rhawm ka simiang Kesa maix tak hu ka simiang Kesa heue." ¹³ Khaix hoik luan ngaix tix blah ang awt rheung, simiang Akrippax mai Beranit hoek ka veng Kesarix, sonsang nawb ka simiang Fittux heue. ¹⁴ Kix ot tan tom nie rheung singaix nyao, simiang Fittux krai grawng see Pawlux ka simiang ah nin, "Koe pui tix kaux pa hoik laung simiang Felit ti prah ploi, ¹⁵ yam ot aux ka daux veng Yerusaliem, cao giex kaing li pa ting khankix mai kuad song pui Yudax khankix, krai grawng nawh mai mhaing tix kieh aux prawng phimap nawh heue. ¹⁶ Aux tom krai ka kix grawng ang khaw mai been pui Romax, ti tawx pong pui tix kaux kawx sonsang ciyang, ka ang nawh nyang bax pon ti taing tawx ka pakngai pui pa deuh phimap ka nawh mai hoik pon ti krai lox tiebtie ka grawng phimap ceu pa hoik deuh piang nawh heue. ¹⁷ Mawh kheu nan khaix hoik khrawm kix paox tix tin, aux ang lai nien mai ngaix pasax aux ngawm piang dee ngawm ti prawng ca mai tawx lox nhie kix viex pui an hoek heue. ¹⁸ Yam hoik kaoh cung pui pa deuh phimap ka nawh, kix ang deuh phimap ceu pa caox tidtix, awm pa hoik grux keud ce aux kix sang deuh heue. ¹⁹ Viang mawh nan kix deuh phimap ka nawh, grawng ceu pa dex dawd mai been bwan kix mai grawng Yesux tix kaux, pa hoik yum mai pa dhua Pawlux Nawh kawn im heue. ²⁰ Kheu sivix aux, keud ang doh, grawng khaw ti chawk cheng ka grawng ceu in khankix yuh ka mawx, aux tom chawk Pawlux, ka grawng nawh sang hu ka veng Yerusaliem mai kham pa prawng grawng ceu in khankix tan lie. ²¹ Mawh kheu Pawlux hoik khyox khaw sonsang priex tix, ti kieh simiang ting Awgutux prawng see nawh, aux tom tawx lox kieh priex nawh, tom sang ploi aux nawh hu ka simiang Kesa heue." ²² Simiang Akrippax ah nin ka simiang Fittux, "Tokaux aux kawx mie ti nghiet lox pui an heue."Simiang Fittux deeh pawk ah nin, "Ngaix pasax maix tak mhong nawh heue." ²³ Mawh kheu nan ngaix pasax yam simiang Akrippax mai Beranit hoik viex sinngao pa ting mai hoek, kiex laig dee nghiet lox see tau mai cao giex kaing naing pa ting khankix mai khawm pui pa ting lhaong ka daux veng an, yam tawx simiang Fittux lox, kix viex Pawlux hoek heue. ²⁴ Simiang Fittux ah nin, "Simiang Akrippax mai pui pa ot tau mai ex tin khawmuik eue, pex pon ti yaox pui in, pui Yudax pa ot ka daux veng Yerusaliem khawmuik mai pa ot tin kawx, hoik yo ti ah nin ka aux, kaw in ang keung ti kawn baox klawd heue." ²⁵ Viang mawh nan aux yaox grawng nawh ang yuh ceu pa keung nawh ti yum mai mawh kheu hoik khyox khaw nawh ti deuh rhawm ka simiang ting Awgutux, aux tom yiag tix sang ploi nawh hu tan heue. ²⁶ Aux ang koe ceu pa sidawng ti sang tiiem grawng nawh ka simiang ting ex tix ceu kawx, mawh kheu nan aux tom viex nawh lih sivoe pex mai lheu khaing paox tix, ka sivoe maix simiang Akrippax eue, yuh ka mawx khaix hoik chawk cheng ka nawh, aux tak koe grawng ceu pa tiiem tix heue. ²⁷ Mawh kheu phan aux keud ti yaox, ang khaw ti ploi pui pa hoik laung hu, phan ang jhi ang krai grawng pa deuh phimap ka nawh heue."

¹ Simiang Akrippax ah nin ka Pawlux, "Maix koe akhwang ti krai lox son tokaux tix heue." Yam an Pawlux nyeu taix tix mai krai lox tiebtie phimap tix ah nin, ² "Simiang Akrippax eue, phan aux keud ti yaox ka tokaux tix, aux koe son tom pon ti krai lox tiebtie phimap pa dex dawd mai ku ceu khawmuik pa hoik deuh pui Yudax khankix ka aux, ka plak sivoe ngai maix singaix. ³ Mawh kheu jiet tawng maix been mai ceu pa chawk cheng khawmuik ceu pa dex dawd mai pui Yudax, mawh kheu nan aux tom khyox khaw ka maix, yeung ti nghiet lox aux mhawm mhawm liak heue. ⁴ Grawng ju aux mawh pa yuh ka mawx, jah ka yam iak aux, tom haok hwan, pa hoik jah ka sinax ceu pui aux mai ka veng Yerusaliem, pui Yudax khawmuik hoik grum tawng. ⁵ Kheu hoik tawng kix grawng aux tom yam jah, phan kix koe rhawm ti sang kham mhai rug, grawng pa hoik hawt aux been bwan ex, pa lang teung nu khaing paox tix mai mawh Pharishie heue. ⁶ Yam in aux cung ti kham geu krax prawng ca tin, mawh kheu grawng pa keud pot son mukheu pa hoik yuh Siyiex ka tax du ex khankix heue. ⁷ Pa mawh mukheu pa nied yuh pui ex kao ra ceu, son Siyiex ku ngaix mai keud pot ti sang pon heue. Simiang eue, mawh kheu grawng pa keud pot in, pui Yudax khankix tom deuh phimap ka aux heue. ⁸ Kheu pex lai keud ang tau ti chix mawh, phan Siyiex kieh pui yum deeh kaoh im? ⁹ Glang ka in tokaux aux kawx ce aux khaw ti yuh, ceu pa ang khaw tom nie ka ceu kaux Yesux pui veng Nazariet tete heue. ¹⁰ Viang mawh ka veng Yerusaliem kawx aux hoik yuh nan mai aux laung pui singax tom nie ka daux thawng khankix, khaix hoik pon aux akhwang khaing cao giex kaing li pa ting khankix heue. Yam teei kix yum, aux kawx tawx lox deuh phimap piang kix heue. ¹¹ Aux grhiem kix law lawx ka daux nyiex sidiex khawmuik mai yuh ti kieh kix salao ka Siyiex heue. Mawh kheu kied song rhawm aux ka kix, aux tom tuktiak kix, tom hoek ka tang veng khankix ka praix pui heue. ¹² Yam viex aux akhwang mai ara khaing cao giex kaing li pa ting khankix mai hu ti yuh nan, yam tak kawn hu aux ka veng Damase. ¹³ Yam jung singaix, simiang eue, aux yaox pa riang khaing raoma, pa lheu riang khaing singaix, jhan rob aux mai kix pa hu tau mai aux hawt krax heue. ¹⁴ Khaix hoik goh gup yix ka piang tiex khawmuik, aux mhong lox pa ah nin ka aux daux lox Hebrie, Sawlux eue, Sawlux eue, maix lai tuktiak Aux yuh ka mawx? Pa thip ka khaox lawm toh, mawh pa kin nu son maix heue. ¹⁵ Aux deeh ah nin, Simiang eue, Maix mawh mawx? Simiang deeh ah nin, Aux mawh Yesux pa tuktiak maix kah heue. ¹⁶ Viang mawh nan kaoh mai cung ka caong tix, mawh kheu Aux hoik hoek ti jhi maix yaox tokaux Aux, sonsang ciak ti kieh maix mawh cao sidiex gau Aux mai cao kham mhai rug son Aux, grawng ceu pa hoik yaox maix mai grawng ceu pa tak sang lih bleeh ti kieh Aux maix yaox khankix. ¹⁷ Aux tak sang taoh maix khaing pui Yudax khankix mai pui tang ceu khankix, pa ploi Aux maix hu kah, ¹⁸ sonsang paoh ngai kix, sonsang deeh tieh kix ti lih khaing pa faik mai hoek ka pa riang mai khaing sibrawm Satan mai hoek ka Siyiex, sonsang pon kix krax pluat ploi phimap mai pon sin tau mai pui pa hoik singax singeh, kheu krax yum rhawm ka daux Aux heue. ¹⁹ Mawh kheu nan, simiang Akrippax eue, aux ang yuh ti ang nghiet ka riang susai khaing raoma an heue. ²⁰ Viang mawh nan aux jah ti sidiex ka kix pa ot ka daux veng Damase phao ka mai ka kix pa ot ka daux veng Yerusaliem mai ka pa ot daux meung Yudax ku dah dee khawmuik mai ka khawm pui tang ceu khankix, sonsang doh keud kix ka phimap mai deeh tieh ti hoek ka Siyiex mai yuh ceu pa keung ka pa doh keud ka phimap heue. ²¹ Mawh kheu grawng ceu in, pui Yudax khankix tom giex aux ka daux nyiex bwan mai keud ti sang pah aux yum heue. ²² Viang mawh nan kheu pon aux krax teem in pa kaoh khaing Siyiex, aux tom pon ot, pon cung tom ngaix in ti kham mhai rug, ka khawm pa iak pa ting mai ang krai tidtix, lheu khaing pa koe daux lai cao jhai khankix mai pa hoik krai Mose tak sang hoek ti mawh, ²³ Pa ah grawng Khrit tak sang kham geu mai grawng Nawh tak sang deeh kaoh im khaing krax yum ka paox tix mai viex hoek ti sidiex grawng pa dex dawd mai pa riang, ka pui Yudax khankix mai ka pui tang ceu khankix heue." ²⁴ Yam krai Pawlux lox pa tiebtie phimap tix yuh nan, simiang Fittux yo lox sinum ah nin, "Pawlux eue, yhot maix heue, pingnya pa hoik gau maix kied nie, kieh maix yhot kah heue." ²⁵ Pawlux deeh ah nin, "Simiang Fittux pa ting pa mhawm eue, aux ang yhot, aux krai lox pa mawh meh, pa jiet khaw heue." ²⁶ Mawh kheu simiang Akrippax tawng grawng ceu in khankix, aux tom ang ring krai sidawng ka nawh, mawh kheu aux keud ce, ceu in khankix ang mox khaing nawh tix ceu kawx, mawh kheu grawng ceu in ang mawh pa hoik yuh ka daog diem heue. ²⁷ Simiang Akrippax eue, yum rhawm maix ka lox cao jhai khankix lie. Aux uik tawng grawng yum rhawm maix ka heue." ²⁸ Simiang Akrippax deeh ah nin ka Pawlux, "Phan maix nyaw glaw aux pie ceeix ngie maix tee sang kieh aux mawh kawn Khrit heue." ²⁹ Pawlux deeh ah nin, "Ceeix ang ah, nie ang ah, phan lheu khaing ceng in maix khaing ang mawh, viang pui pa mhong ka aux singaix khawmuik kawx, aux rawg bwan ka Siyiex tix kieh awm aux heue." ³⁰ Simiang Akrippax mai simiang Fittux mai Beranit mai khawm pui pa ngawm tau mai kix kaoh, ³¹ mai khaix hoik lih hu kix dee glip, kix kum paox ti ah nin, "Pui in ang yuh tidtix, pa keung khaw ti yum, phan ang mawh nan, pa keung khaw ti phyawk tix gang nawh ka heue." ³² Simiang Akrippax ah nin ka simiang Fittux, "Phan pui in ang khyox ti deuh rhawm ka simiang Kesa, tee pon ti ploi nawh heue."

¹ Yam bak kix ti ploi ex brug reu hu ka meung Itali, kix teei ti tawx Pawlux mai pui pa hoik laung tang kaux khankix, ka cao giex kaing naing tix kaux pa kaux Yuxlix, pa dex dawd mai cub naing Awgutux heue. ² Ex laig ka daux reu Adramutix tix lhang, pa sang hu hawt dex meung Asix tix dah hoik tix dah mai ex yaog ti hu ka rawm sigrit sigra heue. Arittakhux pui veng Thesalonix, meung Makedonix kawx ot tau mai ex heue. ³ Ngaix pasax ex hoek ka veng Sidom mai Yuxlix yuh bwanson ka Pawlux mai tawx akhwang kieh nawh hu lai ling ka paox grawm nawh khankix, sonsang khan kheu ka nawh heue. ⁴ Ex yaog ti brug reu hu khaing tan mai kheu ang caw plak bhaung, ex tom hu plak laong klawn tiex Kuparux heue. ⁵ Khaix hoik brug ex reu, tiang rawm sigrit sigra, pa koe dex meung Kiliki mai meung Pampuli, ex hoek ka veng Mura meung Luki heue. ⁶ Cao giex kaing naing yaox reu Alezandre tan tix lhang, pa sang hu ka meung Itali mai nawh sau ex tan heue. ⁷ Khaix hoik koi hu ex tom nie singaix, ex kied nu tix hoek ka sidieb Kanidu, kheu bhaung klat ex, ex tom hu plak laong klawn tiex Karete, sidieb veng Salamon heue. ⁸ Ex kied nu ti hu hawt praok klawn tiex an mai hoek ka dee kok mawh dee bang pa mhawm grang, dex ka veng Lashie heue. ⁹ Khaix hoik uik bawg yam tix miex nyao mai hoik luan bawg yam pa twah pa ih, Pawlux tawx lox satix ka kix, ¹⁰ mai ah nin ka kix, "Pui khankix eue, aux tawng grawng pa hu ex yam in, kraung pa koe daux reu mai khawm reu mai viang mawh ju ex kawx tak hoek krax laux leeing mai krax som nai heue." ¹¹ Viang mawh nan, cao giex kaing naing nhie nghiet lox cao giex kaing reu mai cao reu khaing lox pa hoik krai Pawlux khankix heue. ¹² Mawh kheu ang mhawm dee ot son bawg yam kwat, pui plak nie ah mhawm ti baox yaog ti hu khaing tan piang rawm sigrit sigra, sonsang hu ti yaox, sonsang pon ti ot ka veng Phinit daux bawg yam kwat, pa mawh dee bang ka klawn tiex Karete, pa veeh ka plak sigreung caong ma laong plak klip singaix mai veeh ka plak sigreung caong ma seh plak lih singaix heue. ¹³ Yam bhaung briex koi phlu khaing plak caong ma seh, kheu kix ce, kix hoik pon pa bak kix ti yuh, kix deeh bluh rhiem ngak ngaw pa giex reu khaing daux rawm mai deeh brug reu hu dex hawt praok klawn tiex Karete heue. ¹⁴ Viang mawh nan yam ang nyang bax rheung, bhaung kang lux ting pa kok mawh Urawklux, lih hoek ti klah reu. ¹⁵ Giex reu mai kheu ang pon tie pon thang bhaung an, ex tom grham kieh bhaung phlu ex hu heue. ¹⁶ Yam ex hu plak laong klawn tiex iak pa kok mawh Klawde, viang nu kawx ex pon ti teei reu iak, ¹⁷ Khaix hoik pon bluh reu iak an haok deuh piang reu ting, kix teei maox vien ka reu ting, sonsang kieh kaux mai kheu lhat kix sang hu chun ka pak mhaik, kix tom teei man reu lih mai grham kieh bhaung phlu hu heue. ¹⁸ Kheu kied klah bhaung ting lhiex ting ka ex, ngaix pasax ex tom jah ti tik kraung khrai khaing reu heue. ¹⁹ Yam hoek loe ngaix kix teei ti tik kraung pa shiao daux reu ka taix tix heue. ²⁰ Kheu ang pon ti yaox singaix mai simuing tom nie singaix mai kheu bhaung pa klah ka ex, ang joeng mawh ceeix ngie, ceu pa keud pot jun pot ex grawng sang hoek krax taoh krax luan hoik grai uik heue. ²¹ Khaix ang kix ih pa ih rheung nyao, Pawlux cung sinax kix ah nin, "Pui khankix eue, phan pex hoik nghiet lox aux mai ang yaog ti lih khaing klawn tiex Karete, pex tee hoik luan khaing krax laux krax nai in heue. ²² Viang mawh nan yam in aux sang krai lox sonsang kieh pex nyawm rhawm heue. Grawh grawng nawh, lheu khaing reu in ju pex tix kaux kawx ang som nai heue. ²³ Mawh kheu daux sawm in kawncau Siyiex pa mawh aux cie Nawh mai Kaw pa yuh aux kaing son Nawh, hoek ti cung liep aux, ²⁴ ah nin, Pawlux eue, paw lhat graung, kheu maix tak cung sivoe simiang Kesa mai Siyiex hoik tawx ka maix pui pa brug reu tau mai maix khawmuik heue. ²⁵ Mawh kheu nan pui khankix eue, kieh nyawm rhawm heue. Mawh kheu yum rhawm aux ka Siyiex, grawng tak sang mawh awm pa hoik krai ka aux heue. ²⁶ Viang mawh nan, ex tak lai kham geu pa chun pa taing piang klawn tiex tix klawn heue." ²⁷ Viang mawh nan yam hoek kao pon sawm, yam bhaung phlu ex hu vu vied jee blaong ka daux rawm sigrit sigra Adri, yam dex hoek greung sawm pui reu khankix ce ex hoik hoek dex ka praok haktiex tix dah dah, ²⁸ mai kix tiag ti yaox rawm mai yaox raux dieang tixnga tawp mai khaix an tivud kix baox deeh tiag ti yaox rawm tix bawg mai yaox raux dieang kao phwan tawp heue. ²⁹ Kheu lhat ex sang chun sang taing ex, ka dee kruk khrek simaox, kix tom ploi rhiem ngak ngaw giex reu pon mu, khaing ka plak sidax reu mai mie praix riang heue. ³⁰ Yam sawg pui reu khankix ti to khaing reu ting mai hoik ploi reu iak ka daux rawm sigrit sigra, kix yuh grang awm sang ploi rhiem ngak ngaw giex reu, ka plak kaing reu heue. ³¹ Pawlux tom ah nin ka cao giex kaing naing mai ka pui naing khankix, "Phan pui inkix ang ot ka daux reu, pex ang tau ti pon hoek krax taoh krax luan heue." ³² Yam an pui naing khankix tat ti tik maox reu iak an khankix mai kieh rau heue. ³³ Yam dex sang riang praix Pawlux khyox khaw kix khawmuik nhie kix ih pa ih ceeix ah nin, "Singaix hoik mawh kao pon ngaix pa ca krox pex mai ang ih tidtix, ³⁴ mawh kheu nan aux tom khyox khaw pex ih pa ih ceeix, kheu mawh pa mhawm son pex heue. Grawh grawng nawh hauk kaing pex tix kaux kawx, tak ang hoek krax laux leeing tix gawng kawx heue." ³⁵ Khaix hoik ah nawh nan, nawh teei blah mai yaogyaw bwanson Siyiex ka sivoe kix khawmuik mai nawh sivit blah mai jah ti ih heue. ³⁶ Yam an kix khawmuik nyawm rhawm mai tokaux kix kawx ih pa ih heue. ³⁷ Ex pa ot ka daux reu khawmuik koe ra yieh atixgliah liah kaux heue. ³⁸ Khaix hoik ih kix tom sak tix, kix teei ti tik nghox ca ka daux rawm sigrit sigra, sonsang kieh reu chaong heue. ³⁹ Yam hoik riang praix, kix ang tawng haktiex an, kix yaox dee kawk rawm tix dah pa koe caong raog mai kix kum paox tix grawng sang pon ti kieh reu hu tum piang caong raog an lie. ⁴⁰ Kix tik rhiem ngak ngaw giex reu mai kix grham rhiem an kix ka daux rawm sigrit sigra mai bawg yam tix yam ngie, kix kah maox khaox saoh ting pa koe ka sidax reu mai kix yaog man reu, pa koe plak kaing reu, ti kieh bhaung phlu mai kix hu plak caong raog heue. ⁴¹ Viang mawh nan yam hoek dee sidah rawm sigrit sigra ra nyhawm mai kix kieh reu hu chun piang tiex mai kaing reu chun tan mai ang chix chuh, kheu kied ting puk pak rawm, plak sidax reu tom uik jah ti jieh heue. ⁴² Yam an pui naing khankix keud ti sang pah pui pa hoik laung khankix yum, mawh kheu lhat kix tix kaux kaux sang loe rawm to luan heue. ⁴³ Viang mawh nan kheu cao giex kaing naing simie ti taoh ti kieh Pawlux luan, nawh tom kieh raw pa bak kix mai nawh tawx lox nhie kix pa chix loe rawm, phoh khaing reu, sonsang hoek ka praok heue. ⁴⁴ Pui pa deuk khankix tix blah brug piang khaox piang phia mai tang kaux tix blah piang tang ceu khaing reu heue. Mawh kheu nan pui khawmuik pon ti hoek ka praok mhawm mhawm heue.

¹ Yam ex hoik pon luan, ex tawng grawng klawn tiex an, mawh pa kok mawh Melite heue. ² Pui tiag meung an, yuh bwanson kia ngien ka ex miex nyao, grawh grawng nawh kix phlu ngu mai rieb ti teei ex khawmuik, mawh kheu lih lhiex mai kheu kwat heue. ³ Viang mawh nan khaix hoik kraix Pawlux khix tix glien mai sau piang ngu, mawh kheu hax, siuing cai tom lih khaing nge khix mai vung vhien ka taix nawh heue. ⁴ Yam yaox pui tiag khankix, siuing pa cai an tak teue ka taix nawh, kix ah nin ka paox tix, "Pui in tee mawh pui pa pah pui yum mai viang nawh hoik luan khaing rawm sigrit sigra kawx, ceu pa rahsee ang doh lai kieh nawh im kah heue. ⁵ Viang mawh nan nawh sibluat siuing an ka daux ngu mai ang tie mawh tidtix. ⁶ Kix ce nawh sang uah, sang goh ti yum dom mawx dom an heue. Khaix hoik krox kix ti jhak rheung nyao mai ang yaox mawh pa ang mhawm tidtix ka nawh, rhawm kix deeh tieh mai kix dhua nawh mawh siyiex tix kaux heue. ⁷ Ka sivie tan koe haktiex pa mawh cie simiang giex kaing klawn tiex an, pa kaux Publi, pa rieb ti teei ex mai khan kheu ka ex loe ngaix mhawm mhawm heue. ⁸ Yam an keeing simiang Publi saux hoek mai saux vaig nham mai it heue. Pawlux laig hu ka nawh mai rawg bwan mai deuh taix tix piang nawh mai cox nawh moi heue. ⁹ Khaix hoik yuh nan, pui tang kaux khankix pa koe jhawm saux kawx pa ot piang klawn tiex an, hoek sonsang kieh cox tix moi heue. ¹⁰ Kix yuh ceu pa yaw tom nie mai yaw ex kah mai yam yaog ex ti brug reu hu, kix sau can ceu pa lo ex khankix piang reu heue. ¹¹ Khaix hoik luan loe khix ex brug reu Alezandre tix lhang, pa koe riang Siyiex puxaik kawn brawm, pa hoik bang ka klawn tiex an yam kwat heue. ¹² Yam hoek ex ka veng Suraku, ex ot tan loe ngaix heue. ¹³ Yam yaog ex ti hu khaing tan, ex nied ti hu mai hoek ka veng Regium, khaix an tix ngaix bhaung khaing caong ma seh hoek ti phlu mai bo ngaix khaix ex tom hoek ka veng Pawtilu heue. ¹⁴ Ex yaox puxaik khankix tan, pa khyox khaw nhie ex ot tau mai kix aliah ngaix mai ex baox hu hoek ka veng Romax heue. ¹⁵ Puxaik khankix pa ot daux veng Romax yam mhong kix grawng hoek ex, kix hoek ti rieb ex tom hoek ka lah Appi mai ka nyiex bang loe lhang mai yam yaox Pawlux kix nawh yaogyaw bwanson Siyiex mai rhawm nawh deeh haing hiah kah heue. ¹⁶ Yam laig ex ka daux veng Romax, Pawlux pon akhwang ti ot nong nong, tau mai pui naing tix kaux pa pau nawh heue. ¹⁷ Khaix an loe ngaix Pawlux kok pui ting lhaong pui Yudax khankix mai yam hoik khrawm kix paox tix, nawh ah nin ka kix, "Puxaik khankix eue, viang aux ang yuh pa lud loe ka ceu pui ex mai ka been tax du ex kawx, kix teei ti laung aux khaing veng Yerusaliem mai tawx aux ka daux tawm taix pui Romax khankix heue. ¹⁸ Khaix hoik chawk cheng kix aux, mawh kheu ang kix yaox grawng pa keung aux ti yum, kix tom koe rhawm ti sang ploi aux heue. ¹⁹ Yam ah pui Yudax khankix lox kieh raw ka grawng an, aux tom khyox khaw ti deuh rhawm ka simiang Kesa, phan ang mawh nan ang doh pon heue. Viang aux yuh nan kawx, ang mawh kheu koe phimap ceu pa deuh ka ceu pui aux heue. ²⁰ Mawh kheu jao in aux tom kok pex hoek ti yaox mai sikah tau mai aux, grawng nawh, mawh kheu ceu pa keud pot jun pot pui Isarelax, aux tom kham geu ceu pa phyawk ka ceng in heue." ²¹ Kix deeh ah nin ka nawh, "Ex ang nyang pon lai khaing meung Yudax grawng maix, viang mawh puxaik khankix kawx ang sax hoek ti krai pa ang khaw jiet grawng maix tix kaux kawx heue. ²² Viang mawh nan ex mie ti mhong khaing maix grawng pa keud pa ce maix, mawh kheu ex hoik tawng grawng been in, mawh pa map pui kah kudah dee heue." ²³ Yam hoek ngaix pa hoik bak kix ti een son nawh, kix hoek ka dee ot nawh tom nie heue. Nawh nih nai krai lao, kham mhai rug grawng meung Siyiex mai jeeh nyaw kix ka grawng Yesux, khaing lox lai beenli Mose mai khawm lai cao jhai khankix, jah yam ponngawb tom hoek yam ponbo heue. ²⁴ Tix blah yum rhawm ka grawng pa krai nawh, viang mawh nan tix blah ang yum rhawm kah. ²⁵ Kheu tokaux kix tang lox siyox moing, kix lih hu khaix hoik krai Pawlux lox tix gum, pa ah nin, "Khuan Singax Singeh hoik krai lox ka jheeh cao jhai Isayax, ka tax du pex mhawm mhawm pa ah nin, ²⁶ Maix hu ka ceu pui in khankix ah nin, Pex mhong kawx, mhong mai ang tix tawng ceeix kawx. Pex yaox kawx, yaox mai ang tix yaox ceeix kawx. ²⁷ Kheu rhawm pui ceu in hoik sivix mai yhaok kix ang hiex mhong mai kix hoik yip ngai tix, son ang kix sang yaox mai son ang yhaok kix chix mhong mai son ang rhawm kix chix tawng, deeh tieh hoek sonsang cox Aux ti kieh kix moi heue. ²⁸ Mawh kheu nan kieh pex een ti tawng, grawng krax pa taoh Siyiex in, hoik ploi ti tawx hu ka pui tang ceu khankix mai kix tak sang nghiet heue." ²⁹ Khaix hoik ah nawh lox ceu an, pui Yudax khankix lih hu khaix hoik thung thiang kix paox tix tom nie heue. ³⁰ Khaix an Pawlux ot tom naog ra num, daux nyiex pa hoik vai nawh ti cie mai nawh rieb ti teei pui can pa hoek ti laig ka nawh khawmuik. ³¹ Nawh viex rhawm kwa, sidiex grawng Meung Siyiex mai grawng ceu pa dex dawd mai Simiang Yesux Khrit mai pui tix kaux kawx ang kieh raw nawh heue.