1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 Timothy

1

1 Pawlux pa mawh kawncau pa ting Yesux Khrit, kheu alo Siyiex, awm pa khaw mai lox sijax mukheu grawng ju pa im pa koe ka daux Yesux Khrit. 2 Tawx ka Timose, kawn pa moh aux heue. Kieh koe bwanson mai pa caux rhawm mai pa nhim, pa kaoh khaing Siyiex Keeing Cao mai Simiang ex Yesux Khrit liak. 3 Aux yaogyaw ka Siyiex, pa yuh aux kaing krub kah, ka daux rhawm dee keud pa singax singeh, awm hoik yuh tax keeing aux khankix, yam doh keud aux ka maix, ka daux pa rawg aux bwan ang jud ang jai khawm ponngaix ponsawm, 4 kied byaong mai simie ti yaox maix, yam doh keud aux ka pa lih rawm ngai maix, sonsang naog krax gaux rhawm aux heue. 5 Kheu hoik kieh aux doh keud ka krax yum rhawm pa ang koe dee ne, pa koe ka daux maix, pa hoik koe phao ka ka daux yiex Lo-ix maix mai ka daux miex maix Unik mai pa hoik yum rhawm aux grawng pa koe ka daux maix khawm heue. 6 Mawh kheu jao in aux tom kieh maix deeh doh keud, sonsang sigwiex maix tix so totaix Simiang Siyiex, pa hoik koe ka daux maix, kheu deuh aux taix kah heue. 7 Siyiex hoik tawx rhawm pa chix lhat chix graung ka ex ang mawh, hoik tawx rhawm pa koe sibrawm, pa moh rhawm, pa chix priex rhawm tix heue. 8 Mawh kheu nan paw kaig ka pa kham mhai ruk grawng Simiang ex mai ka grawng aux pa mawh pui pa hoik laung cie Nawh, viang mawh nan neuex mai aux daux pa kham geu pa nu son lox bwan gaux rhawm, awm pa khaw mai sibrawm Siyiex, 9 pa hoik taoh ex mai pa hoik kok ex kah, pa kok pa singax singeh, ang mawh ka pa khaw mai kaing pa yuh ex, mawh pa khaw mai pa hoik yiag hoik bak Nawh mai bwanson pa hoik tawx ka ex ka daux Yesux Khrit, tom ka sivoe yam jah ti koe bawg yam, 10 hoik sidawng yam in ka pa lih bleeh Cao Taoh ex Yesux Khrit, kaw pa hoik kieh kloi krax yum mai pa viex pa im mai pa ang chix yum, ti kieh sidawng ka daux lox bwan gaux rhawm, 11 pa hoik ciak ti kieh aux mawh cao sidiex mai kawncau pa ting mai sara cao gau ka pui tang ceu khankix heue. 12 Mawh kheu grawng in aux tom yaox ti kham geu ceu in khankix, aux ang lai kaig tua, mawh kheu hoik tawng aux kaw pa hoik yum rhawm aux kah mai aux tawng grawng chix pau Nawh ka ceu pa hoik tawx hoik pong aux ka Nawh tom singaix an heue. 13 Giex tom sied ka gumlox pa mawh pa meh, ceu pa hoik mhong maix khaing aux, ka daux pa yum rhawm mai pa moh rhawm pa koe ka daux Yesux Khrit heue. 14 Ceu pa mhawm pa hoik tawx hoik pong ka maix an, pau ka daux Khuan Singax Singeh pa ot ka daux ex heue. 15 Maix hoik tawng grawh grawng pui meung Asix khawmuik hoik tieh ti hu khaing aux, khawm kiex pa mawh Pukilux mai Heramogen heue. 16 Kieh Siyiex leeing ju caux rhawm ka piang nyiex Awnesiphaw liak, mawh kheu hoik kieh nawh aux nyawm rhawm law lawx mai ang lai kaig ka grawng ceng cie aux heue. 17 Viang mawh nan yam hoek aux ka veng Romax nawh nied ti coca sawg aux mai yaox ka aux heue. 18 Kieh Siyiex Leng ju kieh nawh pon pa caux rhawm khaing Simiang Siyiex ka daux singaix an liak. Maix hoik tawng mhawm mhawm grawng hoik yuh nawh miex ceu son aux ka daux veng Efesux heue.

2

1 Kawn aux eue, kieh baox thien riang ka daux bwanson pa koe ka daux Yesux Khrit heue. 2 Ceu pa hoik mhong maix khaing aux khankix, ka sinax pui kham mhai rug tom nie maix tawx pong ka pui pa kaux sijax khankix, pa sang chix gau ka khawm pui tang kaux khankix heue. 3 Kham geu ka ceu pa nu tau mai aux, awm pui naing pa mhawm cie Yesux Khrit awx. 4 Pui mawx ang ah pa yuh pui naing, yuh ti ang kieh tokaux tix koe dee tuh dee fak ka grawng pa tang yuh tix, sonsang pon yuh nawh pa khaw caw rhawm ka kaw pa hoik kieh nawh mawh pui naing. 5 Phan pui tix kaux kaux cha paox tix ka daux pa klieh, ang lai tawx nawh ceep mhok khri, phan nawh ang hawt yuh awm pa koe been. 6 Pui pa yuh kaing ka daux ma, tak lai mawh pa pon plix ka sivoe paox tix heue. 7 Keud ka grawng pa krai aux. Grawh grawng nawh Siyiex Leeing ju tak sang tawx krax tawng ka maix ka daux ku ceu khawmuik heue. 8 Doh keud ka Yesux Khrit pa mawh ru Davit, pa hoik deeh kaoh im khaing krax yum, awm pa khaw mai lox bwan gaux rhawm pa sidiex aux heue. 9 Mawh kheu lox sidiex an, aux yaox ti kham geu pa nu, tom phyawk aux awm pui caox, viang mawh nan ang pon ti phyawk ka gumlox Siyiex heue. 10 Aux tom kham geu ku ceu khawmuik, son pui pa hoik laug khankix, yuh ka mawx kix kawx, sang pon krax taoh pa koe ka daux Yesux Khrit tau mai min plakngai leeing ju heue. 11 Lox pa ah nin mawh pa kaux sijax, "Phan ex hoik yum tau mai Nawh, ex tak sang im tau mai Nawh heue. 12 Phan ex gun pa kham pa geu, ex tak sang pon ti giex kaing tau mai Nawh heue. Phan ex thiang ti tik Nawh, Nawh Cao kawx tak sang thiang ti tik ex heue. 13 Viang ex ang kaux sijax kawx, Nawh Cao kawn kaux sijax, mawh kheu ang Nawh pon thiang ti tik tokaux tix heue. 14 Kieh kix deeh doh keud ka grawh grawng ceu in khankix mai tawm lox ka kix sivoe Simiang Siyiex, son ang kix sang coca grawng pa thung thiang ka lox pa ang tie koe bwanson tidtix, pa kieh pui pa nghiet khankix laux leeing kah heue. 15 Nied ti coca sonsang pon maix ti tawx tokaux tix ka Siyiex, pa mawh pui pa hoik cheu ti yaox kah, pa mawh pui yuh kaing pa ang koe dee kaig tua pa chix gwieh ka gumlox pa mawh meh awm pa khaw heue. 16 Via khaing lox bied pa caox khankix, mawh kheu gumlox khankix sang nie kieh lud hu ka daux pa ang khaw ka Siyiex. 17 Lox kix chix sawm hu awm kaman. Kiex Humenex mai Philit kawx mawh ka daux kix heue. 18 Pa mawh pui pa hoik lud hu khaing pa mawh meh mai ah "Krax pa deeh kaoh im hoik luan," mai kieh krax yum rhawm pui tix blah laux kah heue. 19 Viang mawh nan jaong num Siyiex kaux cong, pa koe cum yuh nin, "Simiang Siyiex tawng kix pa mawh cie tix," mai khawm pa ah, "Kieh pa kok ka ceu kaux Simiang Siyiex ku kaux daux pui lih hu khaing pa ang rahsee heue." 20 Ka daux nyiex pa ting koe ngie klong khri klong mau khaing ang mawh, koe khawm tawg khaox klong tiex, tix blah mawh pa koe min plakngai mai tix blah mawh pa ang koe min plakngai heue. 21 Phan pui tix kaux kaux kieh tokaux tix singax khaing in khankix, nawh tak mawh klong pa koe min plakngai, pa singax mai pa mhawm sonsang shiao cao nyiex, pa hoik cox khre ka son kaing pa mhawm ku ceu heue. 22 To khaing alo nex nham sinaw mai hawt khaix pa rahsee mai krax yum rhawm mai krax moh krax rhawm mai krax nhim tau mai kix pa kok ka Simiang Siyiex, khaing daux rhawm rhi pa singax singeh heue. 23 Via khaing pa chawk cheng pa daox pa aw mai tawng grawng khankix mawh pa chix kieh simah simaing heue. 24 Siliex Simiang Siyiex tak ang lai simah simiang, tak lai viex rhawm awn ka pui khawmuik, pa jiet chix gau mai pa pon gun pon yeung, 25 tak lai viex rhawm awn rhawm tiem mai gau ka kix pa deeh kieh raw ka tokaux tix, ha Siyiex kox deeh kieh kix doh keud ka phimap tix hoek ka pa tawng pa mawh pa meh, 26 sonsang pon kix ti deeh taoh tokaux tix khaing daux kie phicaox, pa hoik giex kix sonsang kieh hawt alo nawh heue.

3

1 Een ti tawng ceu in, ka daux bawg yam singaix sidah khankix sax, tak mawh bawg yam pa lang teung nu heue. 2 Pui tak sang mawh pui pa moh tokaux tix, pa moh mau, pa yaw tix, pa ting rhawm, pa salao, pa ang nghiet lox miex keeing, pa ang tawng bwanson, pa ang singax singeh, 3 pa ang koe krax moh, pie been moh pa sax koe pui, pa ang rhawm pluat phimap pui, pa nieb deuh phimap ka pui, pa ang chix priex rhawm tix, pa lang teung caox, pa ang moh ka pa mhawm, 4 Pui lulie pa ang kaux sijax, pui pa nieb yuh ti tawng uik, pui ca nyhau, pui pa nie lheu moh krax gaux rhawm haktiex khaing pa moh ka Siyiex, 5 pui pa yuh grang awm mawh kix pa nab yam pa yuh pa khaw ka Siyiex, kix hoik thiang ti tik ka sibrawm cie an heue. Via hu khaing khawm inkix awx. 6 Inkix mawh pa laig daux nyiex khankix miep miep, giex ka bun daox khankix, pa peeh phimap, pa tuk hu alo nex nham ka ku ceu heue. 7 Viang kix meung ti gau kawx, kix ang sax hoek ka krax tawng yung ka pa mawh meh heue. 8 Awm Yanne mai Yambre kieh raw ka Mose, pui inkix kawx, kieh raw ka pa mawh meh heue. Pa mawh pui pa hoik sium daux rhawm dee chix keud tix, pa ang koe bwanson tidtix ka krax yum rhawm heue. 9 Kix tak ang pon ti baox yuh hu sivoe, mawh kheu pa nieb yuh kix tak sang sidawng ka pui khawmuik, awm pa hoik yuh kiex Yanne mai Yambre heue. 10 Viang mawh nan maix hoik hawt ti tawng ka pa gau aux, ka krax twah krax klaung, ka pa keud, ka krax yum rhawm, ka krax pa lang gun lang yeung, ka pa moh rhawm, ka pa gun pa yeung, 11 ka pa tuktiak tukte, ka pa kham pa geu, ceu pa hoik mawh ka aux khankix, ka daux veng Antiuk, ka veng Ikawnix, ka veng Lusatrax, grawng ceu pa tuktiak tukte pa hoik kham geu aux heue. Khaing ceu an khankix khawmuik Simiang Siyiex hoik taoh ka aux heue. 12 Mawh heue, can pui pa simie ti yuh pa khaw caw mai Siyiex ka daux Yesux Khrit khawmuik, tak sang yaox ti kham pa tuktiak tukte heue. 13 Pui caox khankix mai pui pa nieb kroh ti pie khankix, tak sang nie caox sinyek sinyek mai pie ka pui tang kaux mai kieh pie ka khawm tokaux tix heue. 14 Maix ot kaux cong ka daux ceu pa hoik gau maix mai pa hoik tawng maix mawh pa mawh tete, kheu hoik tawng grawng pa gau maix ceu an khankix khaing pui pa yuh ka mawx, 15 mai jah tom yam mawh maix kawn nyawm maix hoik tawng phuk lai sigang khri pa singax singeh, pa chix kieh maix koe pingnya tom hoek ka krax taoh kheu pa yum rhawm ka daux Yesux Khrit. 16 Phuk lai sigang khri can pa koe khankix, mawh pa hoik phlu Siyiex bhawm mai koe bwanson, son pa gau, sonsang plak jhi ti tawng phimap mai son pa cox dee lud mai son pa gau ceu pa rahsee, 17 sonsang kieh pui Simiang Siyiex mawh pa grum naog mai pa hoik rien tix son kaing pa mhawm ku ceu heue.

4

1 Aux tawm lox ka maix ka sivoe Simiang Siyiex mai Yesux Khrit, pa tak sang prawng sang ca ka khawm pui im pui yum, kheu pa lih bleeh Nawh meung Nawh, 2 sidiex gumlox bwan, nied ti coca yam caw bawg yam ang ah, yam ang caw bawg yam ang ah, plak jhi pui yaox phimap mai ah, ne mai jeeh nyaw, gau ka krax pa lang gun lang yeung khawmuik heue. 3 Bawg yam tak sang hoek yam kix tak ang pon kham tix nghiet ka lox gau pa mawh pa meh, kheu ngiex yhaok kix, kix tak sang khrawm sang pum sara cao gau, pa sang hawt alo nex nham kix heue. 4 Kix tak sang veeh yhaok tix ang nghiet ka pa mawh pa meh, tieh ti nghiet ka lox been pa ang tie mawh khankix heue. 5 Maix priex rhawm tix ka daux ku ceu khawmuik, kham geu ka pa nu, yuh kaing sara cao sidiex, yuh ti kieh pa yuh maix grum naog heue. 6 Grawh grawng nawh uik tan aux awm pa prauk rawm tan mai bawg yam lih hu aux hoik hoek heue. 7 Aux hoik yuh naing, naing pa mhawm, aux hoik sidah to, ka krax dee to, aux hoik priex ka krax yum rhawm heue. 8 Jah tom yam in hoik deuh mhok khri pa rahsee son aux, Simiang Siyiex pa mawh cao prawng pa rah pa see tak sang tawx ka aux ka daux singaix an mai ang joeng mawh ngie ka aux viang mawh nan ka khawm pui pa moh ka pa lih bleeh Nawh Cao khawmuik heue. 9 Nied ti coca sonsang hoek ka aux laung laung, 10 mawh kheu Dema hoik prah aux, kheu moh nawh ka haktiex in mai hoik hu ka veng Thesalonix, Krisake hoik hu ka meung Kalatix, Titux hoik hu ka meung Dalamatix heue. 11 Mawh ngie Lukax pa ot tau mai aux khaing. Rieb ti teei Makux mai viex nawh hoek tau mai maix, kheu nawh koe bwanson son aux daux kaing sidiex aux heue. 12 Aux hoik ploi Tukhik hu ka veng Efesux heue. 13 Yam hoek maix viex sibex dhah pa deuh aux mai Kapux daux veng Troax mai phuk lai khankix, nie ting mawh ka lai hak khankix heue. 14 Alezandre cao tiiem tawng raoh hoik yuh pa caox ka aux tom nie, Simiang Siyiex tak sang deeh tawx ka nawh awm pa hoik yuh nawh heue. 15 Rien rhawm tix ka nawh khawm awx, kheu nawh hoik ting kieh raw ka lox ex heue. 16 Yam tiebtie aux grawng pa deuh phimap ka aux bawg phao ka, ang ot plak aux tix kaux kawx, grham aux khawmuik, paw awt kieh hoek ka piang kix liak. 17 Simiang Siyiex ot plak aux mai baox tiien riang rao ka aux, sonsang pon grum sidiex aux lox bwan mai sonsang pon mhong pui tang ceu khawmuik heue. Hoik taoh aux khaing daux jheeh sivai sangsi heue. 18 Simiang Siyiex tak sang taoh aux khaing kaing pa caox ku ceu mai priex aux tom hoek ka meung raoma cie Nawh heue. Kieh Nawh Cao koe min pakngai ku ju leeing ju liak. Amen. 19 Nawb ka Prisikilax mai Akulax mai pui nyiex Awnesiphaw khankix awx. 20 Erattux hoik ot khaix ka veng Kawrinthux, viang mawh nan kheu saux Trawphimux aux hoik prah nawh ka veng Meletux heue. 21 Nied ti coca hoek ka sivoe bawg yam kuat awx. Upulux mai Pudix mai Linux mai Klawdix mai puxaik khankix khawmuik, nawb ka maix heue. 22 Kieh Simiang ot tau mai khuan maix liak. Kieh bwanson koe mai maix heue.