2 Thessalonians

¹ Pawlux mai Silwanux mai Timose, tawx ka ceu cao pui veng Thesalonix pa ot ka daux Keeing ex Siyiex mai Simiang Yesux Khrit heue. ² Kieh pex koe bwanson mai pa nhim khaing Siyiex Keeing Cao mai Simiang Yesux Khrit liak. ³ Puxaik khankix eue, ex yaogyaw bwanson ka Siyiex, son pex ku jheeng jheeng, kheu pa kied haok huan krax yum rhawm pex mai kheu kied nie moh pex ku kaux khawmuik ka paox tix, tix kaux lai tix kaux heue. ⁴ Mawh kheu nan ex tom yaw rangdi grawng pex ka daux ceucao Siyiex khankix, kheu krax chix gun chix yeung pex mai krax yum rhawm pex, ka daux pa yaox pex tix kham krax tuktiaktukte mai krax kha rhawm khawmuik, ⁵ ceu inkix mawh mhai ka grawng pa rahsee ceu pa prawng ca Siyiex mai grawng pa een pa sawn pex mawh pa keung son meung Siyiex, pa yaox pex ti kham geu yam in kawx mawh son meung an heue. ⁶ Phan mawh pa khaw mai pa rahsee Siyiex tak deeh tawx pa tug pa kha ka kix, pa hoik yuh pa tug pa kha ka pex, ⁷ kieh pex pa yaox krax tug krax kha laux lee tau mai ex, yam lih bleeh Simiang Yesux khaing raoma, tau mai kawncau Siyiex pa ting sibrawm cie tix khankix ka daux rao ngu, ⁸ mai pawk bix ka kix pa ang tawng ka Simiang Siyiex, ka kix pa ang cu nghiet ka lox bwan gaux rhawm Simiang ex Yesux Khrit. ⁹ Kix tak sang yaox ti kham geu krax ciyang pa mawh krax pa laux leeing ju mai pa gwieh khaing pakngai Simiang mai khaing min plakngai Nawh Cao pa koe sibrawm, ¹⁰ yam hoek Nawh Cao sonsang koe min plakngai ka daux pui singax singeh Nawh khankix mai son pui pa yum rhawm khawmuik sang daox deng kah, mawh kheu hoik yum rhawm pex ka lox pa kham ex mhai rug ka pex, ka daux singaix an heue. ¹¹ Mawh kheu in, ex rawg bwan ka son pex, ka Simiang Siyiex ex ku jheeng jheeng, sonsang een sang sawn pex mawh pa keung ka ceu pa hoik kok pex kah, kieh ceu pa mie pex pa mhawm ku ceu, kieh kaing krax yum rhawm ku ceu tau mai siawp sibrawm, kieh grum naog heue. ¹² Sonsang koe min plakngai ceu kaux Simiang ex Yesux ka daux pex, sonsang koe min plakngai pex ka daux Nawh Cao, awm pa khaw mai bwanson Siyiex ex mai Simiang Yesux Khrit heue.

¹ Puxaik khankix eue, ex khyox khaw ka pex grawng pa dex mai pa sang hoek Simiang ex Yesux Khrit, grawng pa sang krawk khrawm ex tau ka Nawh Cao, ² son ang rhawm pex sang khran sung sang mai son ang sang khi rhawm, kheu khuan ang ah, kheu lox sikah, kheu lai awm pa pon khaing ex, grawng uik sang hoek singaix Simiang Siyiex heue. ³ Paw kieh pui tix kaux kawx pie lhen pex ka grawng tix ceu kawx, singaix an tak ang sang hoek, phan ceu pa deeh tieh deeh thui phao ka ang nyang bax hoek mai ka ang pui phimap pa mawh kawn simex pa laux leeing lih bleeh heue. ⁴ Kaw an mawh pa kieh raw, pa cha, ka can pa kok mawh Simiang Siyiex mai ka ceu pa krub pui ka khawmuik mai yaw tokaux tix ting, tom ngawm nawh daux nyiex bwan Siyiex mai yuh grang tokaux tix mawh Siyiex heue. ⁵ Ang pex doh keud ka grawng pa hoik krai aux, grawh grawng ceu in khankix ka pex, yam kawn ot aux tau mai pex lie? ⁶ Yam in pex tawng mawh patix pa kieh sidien ka nawh, sonsang lih bleeh nawh yam hoek bawg yam tix heue. ⁷ Pa raux pa mox, pa ang hawt been an, ca kawn ot daux kaing, viang koe tix kaux pa tak ca kawn kieh kawn sidien tom hoek yam teei nawh lih heue. ⁸ Yam an kaw pa ang hawt been sang lih bleeh, Simiang Yesux tak sang pah Nawh yum ka bhawm jheeh Nawh Cao, mai yuh kaw an laux ka ceu pa toh riang yam hoek Nawh heue. ⁹ Pa hoek kaw pa ang hawt been, tak khaw mai kaing pa yuh Satan tau mai sibrawm khawmuik, mhai mai ceu pa daox am pie lhen khankix, ¹⁰ tau mai pie lhen mai pa ang rahsee khawmuik ka son kix pa sang hoek krax laux leeing, mawh kheu ang kix rieb ti teei pa moh ceu pa mawh pa meh, sonsang hoek kix krax taoh heue. ¹¹ Kheu jao in, Siyiex tom ploi ceu pa yuh kaing pie lhen ka kix, sonsang yum rhawm kix ka pie lhen heue. ¹² Sonsang pon ti prawng ca ka kix ku kaux khawmuik pa ang yum rhawm ka pa mawh pa meh, pa hoik gaux rhawm ka daux pa ang rahsee heue. ¹³ Puxaik pa moh Simiang Siyiex khankix eue, ex yaogyaw bwanson ka Siyiex, son pex ku jheeng jheeng, kheu Siyiex hoik laug pex khaing tom yam jah sonsang hoek ka krax taoh, ka daux pa kieh Khuan Cao pex singax singeh mai ka daux pa yum rhawm ka pa mawh meh heue. ¹⁴ Nawh Cao hoik kok pex ka an, ka daux lox bwan gaux rhawm ex, sonsang pon min plakngai Simiang ex Yesux Khrit heue. ¹⁵ Puxaik khankix eue, cung cong sijung mai jhawp ka been pa hoik gau ka pex khankix, ka lox sikah ang ah, ka lai pa tawx ex ang ah heue. ¹⁶ Kieh tokaux Simiang ex Yesux Khrit mai Keeing ex Simiang Siyiex, pa hoik moh ex mai hoik tawx ex krax nyawm rhawm leeing ju mai krax keud pot jun pot pa mhawm ka daux bwanson, ¹⁷ Kieh rhawm pex nyawm rhawm mai kieh pex kaux cong, ka daux kaing pa mhawm ku ceu mai gumlox ku ceu heue.

¹ Lox pa deuk mawh nin, puxaik khankix eue, rawg bwan ka son ex, gumlox bwan Simiang Siyiex sang to tah hu mai koe min plakngai, awm hoik mawh mai pex, ² mai sonsang taoh ex khaing pui pa nieb keud pa ang khaw mai pa caox khankix, grawh grawng nawh ang pui khawmuik doh koe krax yum rhawm heue. ³ Simiang Siyiex mawh pa kaux sijax, pa tak sang kieh pex kaux cong mai pau pex sonsang luan khaing kaw pa caox heue. ⁴ Ex yum rhawm ka daux Simiang, ka grawh grawng pa hawt yuh pex yam in mai grawng baox sang hawt yuh pex, ceu pa hoik tawm ex ka pex khankix heue. ⁵ Kieh Simiang thong jhi rhawm rhi pex laig ka daux pa moh Siyiex mai ka daux pa gun pa yeung Cao Khrit liak. ⁶ Puxaik khankix eue, yam in ex tawm lox ka pex, ka daux ceu kaux Simiang ex Yesux Khrit, sonsang gwieh pex ti lih khaing puxaik pa hu ang khaw, pa ang hawt lox been pa hoik rieb kix khaing ex heue. ⁷ Tokaux pex hoik tawng, grawng pa khaw pex ti hawt jawh ex, mawh kheu ang ex lai yuh pa ang khaw ka sinax pex, ⁸ mai ang ex sax ih giex blah khaing tawm taix pui tix kaux kawx, ex nyhap mao yuh kaing ku ngaix, son ang ex sang mawh beeh glawm ka pex tix kaux kawx, ⁹ pa yuh ex nan ang mawh kheu ang ex koe akhwang, yuh sonsang kieh tokaux ex mawh mhai ti hawt jawh ka son pex, sonsang hawt jawh pex ka ex heue. ¹⁰ Yam ot ex tau mai pex kawx, ex hoik tawm lox pa ah nin ka pex, "Phan pui tix kaux kaux ang cu ti yuh kaing, paw kieh nawh sawm. " ¹¹ Ex mhong grawng hu pui tix blah ka sinax pex, daux pa yuh pa ang khaw, pa ang yuh kaing tidtix, pa nieb ah nieb yuh ceu pa ang dex ka tokaux tix heue. ¹² Ex tawm lox mai jeeh nyaw ka kix pa yuh kix kaing yiien yiien mhawm mhawm, tang ih blah cie tokaux tix heue. ¹³ Puxaik khankix eue, paw laux rhawm rhi kheu yuh ceu pa mhawm mhiem heue. ¹⁴ Phan pui tix kaux kaux ang cu ang nghiet ka lox ex, daux lai in, een ti tawng pui an, paw yuh paox pie mai nawh, sonsang kaig tua nawh kah heue. ¹⁵ Paw sawn nawh mawh pui koeng, tawx satix ka nawh, awm mawh puxaik heue. ¹⁶ Kieh tokaux Simiang pa nhim, tawx pa nhim ka pex ka daux grawng ku ceu, ku jheeng jheeng liak, Kieh Simiang Siyiex ot tau mai pex khawmuik liak. ¹⁷ Aux Pawlux teei ti tiiem lox nawb in ka taix tix, pa mawh mhai ka daux lai ku phuk, aux tom tiiem yuh nin heue. ¹⁸ Kieh bwanson Simiang ex Yesux Khrit ot tau mai pex khawmuik liak, Amen.