2 Samuel

2 Samuel

¹ Khaix hoik yum Sawlux Davit deeh hoek khaing pah tix pui Amaliet, nawh ot ka daux veng Zikalat ra singaix, ² yam hoek ka daux loe singaix, jhak heue, pui tix kaux khaing tab Sawlux riah kraung ceep tix mai sau phawng tiex ka plak khaix tix, yam hoek nawh ka Davit nawh gup tix piang tiex mai tawx krax nab yam ka Davit. ³ Davit chawk nawh ah nin, "Kaoh maix khaing dee mawx?" mai pui an ah nin ka Davit, "Aux hoik to khaing tab pui Isarelax." ⁴ Davit deeh ah nin ka nawh, "Mawh koe grawng ceu pa yuh ka mawx? krai aux mhong liak, " mai nawh pawk ah nin, pui hoik to khaing daux bang naing mai hoik goh ti yum tom nie, Sawlux mai kawn simex nawh Yawnasan kawx hoik yum." ⁵ Davit deeh ah nin Sawlux mai kawn simex nawh Yawnasan yuh ka mawx? ⁶ Pui awn ju an krai ah nin, "Yam hoek aux piang gawng Gilabaw, daux pa ang tix keud ce, aux yaox hoik sigup Sawlux ka piang pliah cao tix mai cub kru naing ling lawx brung, pui naing brung khankix niied ti pheet nawh. ⁷ Yam veeh Sawlux ti jhak ka plak khaix tix, nawh yaox aux mai kok ka aux mai aux deeh pawk ah nin, aux ot tin, ⁸ nawh ah nin ka aux, mawh maix pui mawx? aux deeh pawk ah nin, aux mawh pui Amaliet. ⁹ Mai nawh ah nin ka aux, hoek tin mai pah aux yum, mawh kheu aux kied kha rhawm tix, kheu ang aux chix dud rhawm, ¹⁰ mawh kheu nan aux hu ka nawh mai pah nawh yum, kheu hoik kriem tawng aux ang nawh lai pon im ka dee goh tix mai aux hoik peeik mhok khri khaing kaing nawh mai ble pa ceep nawh ka taix ti mai aux hoik viex an hoek tin ka cao simiang aux." ¹¹ Yam an Davit riah kraung ceep tix mai pui pa ot tau mai nawh kawx yuh awm an. ¹² Kix yiiem doe mai twah pa ih tom hoek plak bo, son Sawlux mai son kawn simex nawh Yawnasan mai son pui Siyiex khankix mai son pui nyiex ma pui Isarelax, mawh kheu hoik goh kix ti yum ka lawm vaig khawmuik. ¹³ Davit chawk ka pui awn ju pa hoik krai grawng ceu an ah nin, "Mawh maix pui kaoh khaing dee mawx?" mai nawh deeh pawk ah nin, "Aux mawh kawn simex pui tang ceu pui Amaliet." ¹⁴ Davit ah nin ka nawh, "Maix ang koe krax lhat graung, sonsang nyeu maix taix tix, pah ka pui pa hoik groi Simiang Siyiex rawm bee piang yuh ka mawx?" ¹⁵ Davit kok kawn nyawm awn ju ah nin, "Hu mai pah nawh yum, " mai kawn nyawm awn ju an pah nawh yum. ¹⁶ Mawh kheu nan, Davit ah nin ka nawh, "Kieh nham maix deeh hoek piang cao maix, mawh kheu jheeh cao maix mawh pa kham mhai rug son cao maix, kheu ah maix nin, aux hoik pah pui pa hoik groi Siyiex rawm bee piang yum heue." ¹⁷ Davit yiiem doe mai ah lox rhax in ka son Sawlux mai ka kawn simex nawh Yawnasan, ¹⁸ Nawh krai sonsang gau pui Yudax ka lox lai rhax ah in, lai rhax in mawh pa hoik tiiem ti deuh ka daux phuk lai Yasha. ¹⁹ "Pui Isarelax khankix eue, min plakngai maix hoik yum piang dee pa lhaong maix, pui naing pa vao rhawm kawx hoik goh ti yum. ²⁰ Paw krai grawng an ka daux veng Gata, paw krai pao grawng in, ka daux krax veng Ashakelon, aux lhat kawn bun pui Philitix koe krax pa gaux rhawm, phan ang mawh nan, aux lhat kawn bun pui pa ang nyang pat hak, koe krax pa nyawm rhawm. ²¹ Gawng Gilabaw khankix eue, paw kieh rawm ciex mai rawm lhiex cod piang pex mai paw kieh plix khaox plix ox, pa sang tan koe ka daux kaung, grawh grawng nawh, plah rhiem pa tiebtie, cao pa ting riang rao khankix, hoik mawh pa nu nai pui ka, pliah rhiem pa tiebtie cie Sawlux, pa kraix bee kawx hoik rhaw." ²² "Ak cie Yawnasan ang lai deeh hoek giex mai lawm vaig cie Sawlux kawx ang mawh pa deeh ing yi, khaing nham pui yum mai khaing klon bee pui ting riang rao khankix." ²³ Yam kawn im ju Sawlux mai Yawnasan hoik mawh pa koe krax moh krax rhawm mai pa khaw rhawm pui ka mai yam yum kiex kawx, kiex ang gwieh khaing paox ti, kiex nie lheu phai khaing klang krih mai nie lheu ting riang khaing sivai sangsi." ²⁴ "Kawn bun Isarelax khankix eue, yiiem grai son Sawlux, pa hoik kieh pex yaox ti ceep kraung pa raoh rawt mai pa mhawm grang mai pa hoik jawg bre kraung khri piang kraung ceep pex." ²⁵ Pui pa kied ting riang rao, hoik goh ti yum, ka daux sigreung bang naing, "Yawnasan pa yum ka dee pa lhaong pex khankix." ²⁶ Pux aux Yawnasan eue, aux hoik laux rhawm ka son maix, maix mawh pa tawx krax nyawm rhawm ka aux, krax moh maix mawh pa daox deng ka son aux, mawh pa nie lheu blon khaing krax moh bun khankix." ²⁷ Pui pa ting riang rao hoik goh ti yum mai kraung naing hoik mawh pa som nai heue."

¹ Khaix an, Davit chawk ka Simiang Siyiex ah nin, "Mawh sang yaox aux t haok ka veng pa koe ka daux meung Yudax tix veng veng lie?" mai Simiang Siyiex ah nin ka nawh, "Hu heue, " Davit deeh ah nin, "Mawh sang yaox aux tix haok ka veng mawx lie?" Mai Nawh Cao ah nin, "Hu ka veng Hebron." ² Mawh kheu nan Davit haok ka dee an, tau mai moeng nawh ra kaux Ahinawm bun veng Yezerelax mai Abigelax miexmai moeng Nabalax bun veng Kharamelax. ³ Mai Davit viex pui pa ot mai nawh haok tau mai pui nyiex ma kix ku kaux mai ot ka daux nyiex yaong veng Hebron. ⁴ Pui Yudax hoek mai kix groi bee piang Davit, sonsang yaox nawh ti mawh simiang piang nyiex ma pui Yudax mai kix ah nin ka Davit, "Pui veng Yabiet khaing ka daux haktiex Gilat, hoik yaox ti sipaung ka Sawlux." ⁵ Mawh kheu nan Davit ploi pui cau tix hu ka pui veng Yabiet pa ot ka daux haktiex Gilat ah nin ka kix, "Kieh Simiang Siyiex nawb bwan piang pex, mawh kheu pex hoik jhi krax caux rhawm tix ka cao simiang aux Sawlux mai sipaung nawh." ⁶ "Kieh Simiang Siyiex deeh jhi krax caux rhawm tix mai pa mawh meh ti piang pex, mawh kheu hoik yuh pex ceu in, aux tak deeh viiet krax caux rhawm ka pex." ⁷ Mawh kheu nan teei riang pex kieh koe rhawm kaux cong mai rhawm kwa rhawm vao, mawh kheu simiang Sawlux hoik yum mai daux nyiex ma pui Yudax hoik groi bee piang aux mai hoik yaog aux mawh simiang piang kix." ⁸ Abana kawn simex Nerax cao kaing naing ting Sawlux khankix teei Ishabawshiet kawn simex Sawlux mai viex nawh hu ka veng Mahanem, ⁹ Kix yaog nawh mawh simiang piang pui Gilat, pui Asha, pui Yezerelax, pui Epharem, pui Binyamin, pui Isarelax khawmuik. ¹⁰ Yam koe ju Ishabawshiet kawn simex Sawlux tixpon num, nawh jah ti kwang piang haktiex Isarelax, nawh yaox ti kwang ra num, mawh ngie cub doeh nyiex ma pui Yudax pa hawt khaix Davit. ¹¹ Yam mawh Davit simiang daux veng Hebron piang doeh nyiex ma pui Yudax, koe aliah num mai liah khix. ¹² Abana kawn simex Nerax mai kawncau Ishabawshiet kawn simex Sawlux, lih khaing veng Mahanem mai hu ka veng Gibion. ¹³ Yuabax kawn simex Zeruya mai kawncau Davit lih hu rieb kix hawt rawm nhawng Gibion mai kix ngawm piang toi rawm nhawng plak in tix cub, plak an tix cub. ¹⁴ Abana ah nin ka Yuabax, "Kieh pui awn ju in khankix, yaog ti kaoh mai silah paox tix, ka plak sivoe ex" mai Yuabax ah nin, "Kieh kix silah heue." ¹⁵ Mawh kheu nan, kix yaog ti kaoh hu awm pa hoik simin kix khaing pui Binyamin kao ra kaux, pa hawt khaix Ishabawshiet kawn simex Sawlux mai khaing pui daux cub kawncau Davit kao ra kaux. ¹⁶ Ku mawx ku an ra lai jhawp kaing paox tix mai blung paw paox tix ka vaig mai goh ti yum tau khawmuik, Mawh kheu nan, dee an tom kok mawh Helaka Hazurim bang lawm vaig, pa koe baoh veng Gibion. ¹⁷ Daux singaix an naing hoik kied kin tete, Abana khawm pui Isarelax hoik som ka plak sivoe kawncau cub Davit. ¹⁸ Kawn simex Zeruya loe kaux, pa mawh Yuabax, Abishie mai Asahelax ot tan khawmuik, Asahelax mawh pa kied phai caong awm cak. ¹⁹ Asahelax niied ti hawt khaix Abana mai nawh ang lai veeh tix plak gwiex plak dawm ka hawt tix Abana. ²⁰ Abana deeh gi plak khaix tix ah nin, "Mawh maix Asahelax lie?" mai nawh deeh pawk ah nin, "Mawh aux heue." ²¹ Abana deeh ah nin ka nawh, "Veeh maix hu plak gwiex phan ang mawh nan plak dawm mai giex pui naing tix kaux mai teei kraung naing nawh son maix, " viang mawh nan, Asahelax ang cu ti veeh tix khaing hawt tix khaix nawh. ²² Abana baox ah nin ka Asahelax, "Veeh maix hu tang dah, khaing hawt tix khaix aux, aux sang chix pah maix yum piang tiex kheu grawng ceu patix? Mai aux sang pon jhi ngai tix ka puxke maix Yuabax yuh ka mawx?" ²³ Asahelax ang cu ti veeh tix plak khaix, mawh kheu nan Abana blung vaig nawh ka pliah tix mai pliah an phlat plak blawg nawh mai nawh goh ti yum tan, yam hoek pui hun dee goh Asahelax tix yum, kix cung ka praok nawh tan. ²⁴ Yuabax mai Abishie kawx, pheet khaix Abana, singaix klip ka kiex yam hoek kiex piang gawng Ama, pa koe sivoe veng Gi-a ka daux krax hu pui ka daux tiag Gibion. ²⁵ Pui Binyamin khrawm paox tix tau mai Abana mai hoik deeh mawh cub kru naing tix cub mai kix teei dee ot tix piang choek gawng tix mu. ²⁶ Abana kok yo ka Yuabax ah nin, "Mawx sang kieh lawm vaig kiied ti ih ex jheung jheung lie? mawh ang maix tawng sang mawh ceu in pa song daux bawg yam dee sidah praix sax, mawh kawn sang rheung miex grheung pa tak sang kieh maix pui hun deeh blak ti ing khaing pa hawt pheet tix khaix puxaik kix?" ²⁷ Mai Yuabax deeh pawk ah nin, "Awm im ju Siyiex, phan maix ang deeh krai lox in, pui khawmuik tak naox pa hawt pheet puxaik tix, yam bah riang praix ponngawb tete." ²⁸ Mai Yuabax phlu teettawng mai pui khankix kaok mai kix ang lai hawt pheet pui Isarelax, kix ang lai yuh naing. ²⁹ Abana mai pui nawh lih hu leeing sawm ka daux lung mai kix tiang rawm klawng Yawdan mai hoek ka veng Mahanem. ³⁰ Yuabax deeh blak tix khaing hawt pheet tix Abana, yam deeh khrawm nawh pui tix khankix, kix yaox grai cub kawncau Davit kao dim kaux, khawm Asahelax. ³¹ Kawncau Davit pon pah pui Binyamin, khawm pui Abana yum loe yieh tixgliah kaux. ³² Kix teei tokaux yum Asahelax mai sipaung ka daux simeeig keeing nawh, ka veng Bieliehiem, Yuabax mai pui nawh hu krax leeing sawm mai hoek ka veng Hebron yam jah praix ti riang heue.

¹ Daux sinax paox nyiex Sawlux mai paox nyiex Davit koe naing tom rheung, Davit nie ting riang khaing kix, paox nyiex Sawlux niied ti iak riang. ² Kawn simex pa hoik keh ka son Davit ka daux veng Hebron, kawn Ai nawh mawh Amanon pa keh khaing Ahinawm kawn bun pui veng Yezerelax, ³ Kawn nyi nawh mawh Khilat pa keh khaing Abigelax, kawn miexmai moeng Nabalax pui veng Kharamelax mai kawn Sam nawh mawh Apsalom, pa keh khaing Makha, kawn bun Talamie, pa mawh simiang haktiex Geshurix, ⁴ kawn sai nawh mawh Adoniyax pa mawh kawn simex Hagit mai kawn ngox nawh mawh Shephatix kawn simex Abitalax, ⁵ Kawn Log nawh mawh Itaram, pa keh khaing Egalax, inkix mawh pa keh ka son Davit daux veng Hebron heue. ⁶ Yam kawn koe naing daux sinax paox nyiex Sawlux mai paox nyiex Davit, Abana kieh kru naing tix kaux cong ka plak paox nyiex Sawlux. ⁷ Ishabawshiet ah nin ka Abana, "Kheu maix lai laig it tau mai moeng iak keeing aux, pa kaux Rizapa kawn bun E-a?" ⁸ Abana kied song rhawm ka lox krai Ishabawshiet mai deeh ah nin, "Mawh aux kaing sox pui Yudax lie? aux hoik jhi krax pa kaux sijax tix ka paox nyiex keeing maix Sawlux mai ka puxaik nawh mai ka paox grawm nawh, tom in singaix mai aux ang ap kix ka Davit, daux in singaix maix hoik deuh phimap ka aux grawng bun in?" ⁹ Phan aux ang yuh ceu an son Davit awm pa hoik tiextu Simiang Siyiex ka nawh, kieh Siyiex yuh ceu pa nie kin piang Abana. ¹⁰ Tak teei meung haktiex khaing paox nyiex Sawlux mai deeh pang ti deuh dangngeung Davit piang haktiex Isarelax mai haktiex Yudax, jah ka veng Dan tom hoek ka veng Berashebax." ¹¹ Ishabawshiet ang lai pawk lox Abana, kheu hoik kied lhat tix. ¹² Khaix an Abana ploi pui cau hu ka Davit mai kieh kix ah nin, "Cao simiang haktiex in mawh pui mawx?" Mai baox ah nin, "Yuh sijax mukheu maix tau mai aux, jhak heue, riang rao plawng taix aux tak ot plak maix mai aux tak viex pui Isarelax hoek ka maix khawmuik." ¹³ Davit ah nin, "Mhawm heue, aux tak yuh sijax mukheu tau mai maix, viang mawh nan aux sang mhaing tix ceu ka maix, yam hoek maix ti yaox pakngai aux, phan maix ang viex Mikhalax kawn bun Sawlux hoek, maix tak ang pon ti yaox pakngai aux." ¹⁴ Mawh kheu nan, Davit ploi pui cau tix hu ka Ishabawshiet kawn simex Sawlux ah nin, "Deeh tawx moeng aux Mikhalax ka aux, pa hoik loh aux ka haktiex pui Philitix tix yieh kaux. ¹⁵ Mai Ishabawshiet ploi pui hu teei Mikhalax khaing mex nawh Palatix kawn simex Lesha. ¹⁶ Mex nawh hawt yiiem khaix nawh tom hoek ka veng Bahurim, Abana ah nin ka nawh, "Deeh ing heue, " mai nawh deeh ing. ¹⁷ Abana kum mai kwad riex jux pui Isarelax ah nin, "Bawg yam pa hoik luan, pex sawg ti yaog Davit mawh simiang piang pex. ¹⁸ Yam in yaog heue, Simiang Siyiex hoik sikah ka Davit ah nin, ka daux tawm taix kawncau Aux Davit, Aux tak taoh ceu pui Aux pa mawh pui Isarelax khaing daux tawm taix pui Philitix mai khaing daux tawm taix pui koeng kix khawmuik." ¹⁹ Abana krai pui Binyamin mhong grawng ceu an mhawm mhawm, khaix an Abana deeh krai Davit mhong grawng ceu pa lo son pui Isarelax mai ka son paox nyiex pui Binyamin ka daux veng Hebron. ²⁰ Mawh kheu nan, Abana mai pui nawh tixnga kaux, hoek ka Davit daux veng Hebron, Davit yuh pawie khan kheu pa ting, ka son Abana mai pui nawh khankix. ²¹ Mai Abana ah nin ka Davit, "Aux sang deeh ing khrawm pui Isarelax son cao simiang aux, sonsang yuh kix sijax mukheu tau mai maix, sonsang pon maix ti kwang piang kix, awm pa koe rhawm maix, " mawh kheu nan, Davit deeh ploi Abana ing mai nawh deeh yaog ti ing daux pa nhim. ²² Yam an kawncau Davit mai Yuabax hoek khaing hawt tix pui koeng mai viex kraung pa pon tud rhim deeh hoek, viang mawh nan, Abana ang lai caw tix ot tau mai Davit daux veng Hebron, mawh kheu Davit hoik ploi nawh ing mai nawh ing ka daux pa nhim. ²³ Yam deeh hoek Yuabax mai pui naing nawh khankix, kix krai grawng ceu an ka Yuabax ah nin, "Abana kawn simex Nerax hoik hoek ka simiang mai simiang deeh ploi nawh ing mai nawh ing ka daux pa nhim." ²⁴ Khaix an Yuabax hoek ka simiang ah nin, "Mawh yuh ka mawx? jhak heue, Abana hoik hoek ka maix jao patix maix hoik deeh ploi nawh ing mai nawh hoik pon glawt khaing taix ex. ²⁵ Maix khaw tix tawng ka hoek Abana kawn simex Nerax ti pie lhen ka maix, sonsang pon tawng nawh krax lih krax laig maix mai sonsang tawng nawh ka pa sang yuh maix khawmuik." ²⁶ Khaix hoik lih hu Yuabax khaing plak sivoe ngai Davit, nawh ploi kawncau tix hu hawt khaix Abana, kix krup nawh ka hawt rawm daux Sirax mai deeh giex nawh hoek, viang mawh nan, Davit ang tawng ka grawng an. ²⁷ Yam deeh hoek Abana ka daux veng Hebron, Yuabax kok nawh hoek ka diang siviex veng, sonsang briex mox ti sikah tau mai nawh mai blung vaig nawh kieh yum tan, kheu jao hoik pah pux nawh Asahelax. ²⁸ Yam hoik mhong Davit ka grawng in, nawh ah nin, "Meung haktiex aux khawm cao aux ang lai koe phimap ka plak sivoe Simiang Siyiex, ka son phimap pa pah Abana kawn simex Nerax." ²⁹ Kieh phimap an hoek piang kaing Yuabax mai doeh nyiex ma keeing nawh mai kieh pui pa koe jhawm saux lih nham seeing ang ah, pui pa koe jawm saux sipawg ang ah, pui pa kawk nyoi ang ah mai pui pa yum ka lawm vaig ang ah mai pui pa cud cha pa ih ang ah, kieh mawh pa ang jud ang jai ka daux nyiex ma Yuabax." ³⁰ Mawh kheu nan, Yuabax mai pux nawh Abishie hoik pah Abana, kheu jao hoik pah nawh ka pux kix Asahelax ka daux naing Gibion. ³¹ Davit ah nin ka Yuabax mai pui pa ot mai nawh, "Riah kraung ceep pex mai ceep ka man chee rhix mai yiiem doe ka son Abana, " mai Davit kawx hu yam sipaung ka Abana. ³² Kix sipaung Abana ka daux veng Hebron mai simiang yiiem hawt simeeig Abana tan, pui khawmuik kawx yiiem kah. ³³ Mai simiang yiiem doe ka son Abana ah nin, "Mawh sang keung Abana ti yum, awm yum pui caox tix kaux lie? ³⁴ Taix maix ka ang phyawk tix, caong maix ka ang vien tix maix hoik yaox ti yum awm yum pui ka plak sivoe ngai pui caox khankix, khaix an pui khawmuik deeh baox yiiem ka son nawh." ³⁵ Yam hoek pui ti sang tawx Davit ih priex pon ngaix, Davit tiextu ah nin, "Phan aux cim blah ang ah, pa ih tix ceuceu ang ah, ka sang klip singaix kieh Siyiex yuh pa nie lheu kin khaing in piang aux." ³⁶ Pui khawmuik een ti tawng grawng ceu an mai khaw rhawm ka can pa hoik yuh simiang khawmuik. ³⁷ Pui khawmuik mai pui Isarelax tak tawng grawng ang simiang tie koe rhawm ti sang pah ka Abana kawn simex Nerax daux singaix an. ³⁸ Khaix an simiang ah nin ka kawncau tix, "Mawh ang pex tawng ka yum simiang tix kaux, pui ting daux pui Isarelax daux in singaix?" ³⁹ Viang aux mawh simiang pa hoik groi pex bee ka kawx, aux mawh pa iak riang ka daux singaix, pui inkix pa mawh kawn simex Zeruya mawh pa ting riang khaing aux, kieh Simiang Siyiex deeh plud ka kix awm yuh kix pa caox heue."

¹ Yam hoik mhong kawn simex Sawlux pa mawh Ishabawshiet ka hoik yum Abana ka daux veng Hebron, nawh dah rhawm mai pui Isarelax kawx hoik khi rhawm kah. ² Kawn simex Sawlux koe ra kaux, Bana mai Rekhap kiex mawh cao kaing kru naing nawh, kiex mawh kawn simex Rimon khaing pui Berawti mai mawh pui Binyamin, Kheu hoik mawh veng Berot, pa hoik laig ka daux haktiex cie doeh ru pui Binyamin. ³ Mawh kheu pui Berawti hoik to hu ka veng Gitem mai paung tan tom in singaix. ⁴ Yawnasan kawn simex Sawlux koe kawn simex tix kaux, koe jhawm saux chawh caong, yam koe ju tix phwan num, kix mhong grawng Sawlux mai Yawnasan khaing veng Yezerelax mai bun cao priex nawh, yaog ti viex nawh to yam hoik niied nawh ti to, kawn nyawm an rau piang tiex mai caong nawh khluik, ceu kaux nawh mawh Mephibawshiet. ⁵ Kawn simex Rimon pa mawh Rekhap mai Bana pui Berawti lih hu ka nyiex Ishabawshiet, bawg yam hax koek ponngaix, caw bawg yam it kawn nyawm an. ⁶ Yam hoek kiex tan, kiex laig daux nyiex mai yuh tix awm pui pa sang don ngox ca mai kiex blung vaig Ishabawshiet ka gawn, Rekhap mai pux nawh Bana to khaing tan. ⁷ Yam hoik laig kiex daux nyiex yam an, Ishabawshiet kawn nyawm it piang ku it tix, ka daux lawg, khaix an kiex blung vaig nawh ka gawn mai kiex kid ti viex kaing nawh ing mai to leeing sawm ka daux lung daux ngawd. ⁸ Mai kiex viex kaing Ishabawshiet hoek ka Davit, ka daux veng Hebaron mai kiex ah nin, "In mawh kaing Ishabawshiet kawn simex Sawlux, pui koeng maix pa hoik sawg ka ju maix, Simiang Siyiex hoik pawk bix cao simiang aux, daux in singaix khaing Sawlux mai doeh ru nawh khankix." ⁹ Davit deeh pawk ah nin ka Rakhap mai pux nawh Bana kawn simex Rimon pui Berawti, "Awm im ju Simiang Siyiex, pax hoik taoh ju aux khaing pui koeng aux khankix, ¹⁰ yam krai pui tix kaux grawng an ka aux ah nin, "Jhak heue, Sawlux hoik yum, kix hoik keud ti viex grawng pa mhawm hoek ka aux, aux deeh giex nawh mai pah nawh ka daux veng Zikalat, pui an keud aux sang tawx totaix ka tix son grawng an." ¹¹ Lheu khaing an yam pah pui caox ka pui pa rahsee, yam it nawh ka daux nyiex cao tix, tak nie lheu mawh pui kwa miex ding? Mawh kheu nan, yam in aux sang deeh mhaing nham nawh khaing pax mai sang teei pax khaing piang haktiex in." ¹² Mawh kheu nan, Davit tawx lox tix ka pui awn ju khankix mai kix pah kiex yum mai kix kid taix caong kiex mai tak teue hawt rawm nhawng Hebron, kix teei kaing Ishabawshiet mai sipaung daux simeeig Abana, pa koe daux veng Hebron heue.

¹ Khaix an doeh ru pui Isarelax, hoek ka Davit daux veng Hebron ah nin, "Yix mawh si-ang maix mai nex nham maix. ² Bawg yam pa hoik luan yam mawh Sawlux simiang piang yix maix hoik mawh pa thung bung ka pui Isarelax lih hu mai thung kix deeh laig mai Simiang Siyiex ah nin ka maix, "Maix tak mawh cao liang yung cub pui Isarelax mai mawh cao pa kwang piang pui Isarelax." ³ Cub kwad riex ju pui Isarelax khawmuik hoek bleeh ka simiang daux veng Hebron, simiang Davit yuh sijax mukheu tau mai kix, ka plak sivoe Simiang Siyiex mai kix yaog nawh mawh simiang piang pui Isarelax. ⁴ Yam jah Davit ti kwang piang kix, nawh koe ju tixgoe num mai nawh kwang piang kix tixpon num. ⁵ Nawh ot Ka daux veng mai kwang ka haktiex pui Yudax aliah num mai liah khix mai ot ka daux veng Yerusaliem mai kwang ka haktiex pui Isarelax mai haktiex pui Yudax tixgoe num. ⁶ Simiang mai pui nawh khankix lih hu ka veng Yerusaliem sonsang puing ka pui Yebusix, pui pa ot ka daux haktiex an hoek ah nin ka Davit, "Maix ang pon ti laig tin, pui dug ngai mai pui pa laux caong tak pon tiebtie maix, " mai kix keud, "Davit ang doh pon laig." ⁷ Viang mawh nan Davit pon rhim ti teei tab dee pa kaux pa cong kix Zion pa mawh veng Davit. ⁸ Yam an Davit ah nin, koe pui tix kaux kaux pa sang puing ka pui Yebusix khankix, kieh nawh haok hawt klawng mai puing ka pui laux caong mai pui dug ngai pa mawh pui koeng rhawm Davit ka, mawh kheu nan, pui ah nin ka paox tix, paw kieh pui dug ngai mai pui laux caong laig daux nyiex bwan." ⁹ Davit ot ka dee pa kaux pa cong mai kix kok dee an mawh veng Davit, khaix an Davit deeh cox sum hawt vung viang Milaw, khawm plak daux khawmuik. ¹⁰ Simiang Siyiex Cao pa ting piang khawmuik ot tau mai nawh, mawh kheu nan, Davit haok hwan sipie mai mawh pui pa kied ting riang. ¹¹ Simiang Hiram khaing veng Taira, ploi pui cau tix khankix hu tau mai khaox gix mai pa chix kaing khaox sum nyiex mai cao pa sang simaox, hoek ka Davit mai kix sum nyiex haw tix lhang ka son Davit. ¹² Davit hoik tawng ka yaog Simiang Siyiex nawh mawh simiang piang pui Isarelax mai hoik tawx meung haktiex ka son pui Nawh Isarelax. ¹³ Mai Davit baox teei ti koe moeng iak daux veng Yerusaliem, khaix hoik gah nawh ti khaing veng Hebron mai nawh baox koe kawn simex kawn bun tom nie. ¹⁴ Inkix mawh ceu kaux kawn pa hoik keh son nawh ka daux veng Yerusaliem, mawh Shammua, Shobap, Natan, Sawlamon, ¹⁵ Ibaha, Elishua, Nephiet, Yaphia, ¹⁶ Elishama, Elidax mai Eliphaliet khankix heue. ¹⁷ Yam hoik mhong pui Philitix ka groi kix bee mai hoik yaog Davit mawh simiang piang pui Isarelax, pui Philiti hu sawg ka Davit, Davit mhong grawng an, nawh hu laig ka dee pa kaux cong. ¹⁸ Pui Philitix hoek tom nie mai phruk phrat ti ot ka daux lung daux ngawd Repharen. ¹⁹ Davit chawk Simiang Siyiex ah nin, "Mawh sang caw aux ti hu puing ka pui Philitix inkix lie? mawh sang ap Maix Cao kix ka daux taix aux?" Mai Simiang Siyiex deeh ah nin ka Davit, "Lih hu heue, Aux sang ap kix ka daux taix maix tete." ²⁰ Davit hu ka veng Balax Perazem mai yuh kix laux tan mai nawh ah nin, "Siyiex yuh pui koeng aux laux ka plak sivoe aux, awm puk pak rawm, mawh kheu nan, nawh kok dee an mawh Balax Perazem. ²¹ Pui Philitix hoik prah riang rao pa krub tix tan, Davit mai pui nawh teei ti tik dee singai. ²² Pui Philitix baox hoek tix bawg mai phruk phrat ti ot daux lung daux ngawd Repharem. ²³ Yam chawk Davit ka Simiang Siyiex, Nawh Cao pawk ah nin, "Paw hu see dee ot kix, lai lawm plak khaix kix mai haok ka plak sivoe dee koe nong khaox liah." ²⁴ Yam mhong maix ka lox sinum hu pui naing ka rao khaox liah maix niied ti sau riang tix, mawh kheu Simiang Siyiex tak hu ka plak sivoe maix sonsang pah Nawh Cao tab pui Philitix." ²⁵ Davit hawt ti yuh awm lox pa hoik tawm Simiang Siyiex ka nawh mai nawh hoik pon grheu pui Philitix lih khaing daux veng Gebax, tom hoek ka veng Gezerax heue.

¹ Davit khrawm pui pa hoik laug nawh khaing daux pui Isarelax loe mheen kaux. ² Davit yaog ti kaoh hu tau mai pui pa koe tau mai nawh khaing veng Balax pa koe daux haktiex Yudax, sonsang deeh nawh teei ti viex teug bwan sijax mukheu Siyiex khaing tan, pa hoik kok kix ceu kaux mawh min ceu kaux Simiang Siyiex Cao pa ting piang khawmuik, pa koe sinax riang Cherubin. ³ Kix deuh teug bwan sijax mukheu Siyiex piang ling lawx pa khraox tix lhang mai kix viex lih khaing daux nyiex Abinadat pa koe piang gawng, Awza mai Ahio, kawn simex Abinadat mawh cao pa grheu ling lawx khraox an. ⁴ Kix viex teug bwan sijax mukheu an lih hu khaing nyiex Abinadat pa koe piang ton gawng, Awza hawt hu praok teug bwan sijax mukheu Siyiex, Ahio, mawh cao pa hu sivoe teug bwan sijax mukheu an. ⁵ Davit mai pui Isarelax tah ting kuceu, pa mawh ting plah khaox sideed maox, ting pawd, kraung, pi biang mai chiang mai yuh krax gaux rhawm ka plak sivoe Simiang Siyiex. ⁶ Yam hoek kix ka gwang dee dig Nakhon nghox, kheu sideeing moi caong tix Awza nyeu taix tix, giex ka teug bwan sijax mukheu Siyiex. ⁷ Krax song rhawm Simiang Siyiex lih piang Awza mai Siyiex ciyang ka nawh, kheu phimap nawh mai nawh yum tan praok teug bwan sijax mukheu Siyiex. ⁸ Mai Davit song rhawm kheu jao ciyang Simiang Siyiex ka Awza mai nawh kok dee an mawh "Pereza Awza tom hoek daux in singaix." ⁹ Davit koe krax lhat graung ka Simiang Siyiex, ka daux singaix an ah nin, "Teug bwan sijax mukheu Simiang Siyiex sang pon hoek ka aux yuh ka mawx?" ¹⁰ Mawh kheu nan, Davit ang lai pon gah tix viex teug bwan sijax mukheu Simiang Siyiex hoek tau mai tix daux veng Davit, Davit deeh viex teug bwan sijax mukheu an deuh daux nyiex Obet Dedom pui Gitix. ¹¹ Teug bwan sijax mukheu Simiang Siyiex ot daux nyiex Obet Dedom pui Gitix loe khix, Simiang Siyiex nawb bwan piang Obet Dedom mai khawm piang pui daux nyiex ma nawh. ¹² Yam mhong simiang Davit, ka nawb Simiang Siyiex bwan piang nyiex ma Obet Dedom mai piang can pa koe nawh, kheu jao teug bwan sijax mukheu Siyiex, mawh kheu nan, Davit deeh hu mai teei teug bwan sijax mukheu Siyiex khaing daux nyiex Obet Dedom, hoek ka veng Davit tau mai krax pa gaux rhawm tix. ¹³ Khaix hoik klawm pui teug bwan sijax mukheu Simiang Siyiex hu liah diang, nawh yuh krax tan pa appong ka mawie mai kawn yung pa kluing. ¹⁴ Davit ceep sibex dhah pa caing ka man tix pheen mai sau riang rao tix graoh ka plak sivoe Simiang Siyiex. ¹⁵ Mawh kheu nan, Davit mai pui Isarelax, viex teug bwan sijax mukheu Simiang Siyiex hoek tau mai lox sinum pa yo tix mai khawm lox luah teettawng. ¹⁶ Yam laig teug bwan sijax mukheu an daux veng Davit, Mikhalax kawn bun Sawlux kok jhak nawh khaing daux siviex iak, nawh yaox ka yaog Davit tix graoh khawm rhawm tix ka plak sivoe Simiang Siyiex mai nawh sibriem Davit ka daux rhawm tix. ¹⁷ Kix viex teug bwan sijax mukheu Simiang Siyiex hoek tan mai deuh daux sigreung nyiex gox bwan man pa hoik sum Davit mai Davit tan krax tan pa gleeing mai krax tan pa nhim ka plak sivoe Simiang Siyiex. ¹⁸ Khaix hoik tan Davit ka krax tan pa gleeing mai krax tan pa nhim, nawh nawb bwan piang pui daux min ceu kaux Simiang Siyiex Cao pa ting piang khawmuik. ¹⁹ Mai nawh tawx blah tix kaux tix lon mai nex tix kaux tix khik mai khlawp blah plix siiet kroh tix kaux tix khlawp, ka pui Isarelax khawmuik simex khawm bun, khaix an pui khankix deeh ing ka nyiex ma cao tix. ²⁰ Davit deeh ing sonsang nawb bwan piang kawn nyiex ma tix, Mikhalax kawn bun Sawlux hoek rieb Davit ah nin, "Simiang pui Isarelax yuh sonsang koe min plakngai tix singaix tau mai pa hoik peeik kraung ceep tix ka plak sivoe ngai kawncau simex kawncau bun tix daux pa ang tawng ti kaig tua mai ang ceep kraung ceep tix." ²¹ Mawh kheu nan, Davit ah nin ka Mikhalax, "Aux yuh an ka plak sivoe Simiang Siyiex pa hoik laug aux, tang keeing maix mai khaing daux nyiex ma nawh, sonsang yaog Nawh Cao aux mawh cao pa kwang piang pui Simiang Siyiex mai piang pui Isarelax, mawh kheu nan, aux tak tah ting mai graoh ka plak sivoe Simiang Siyiex. ²² Mai aux tak nie lheu mawh pa iak min plakngai khaing in mai aux yeen rhawm tix tiem, viang mawh nan, kawncau bun pa ah maix, mawh pa koe krax pa yaogyaw ka aux." ²³ Mawh kheu nan, Mikhalax kawn bun Sawlux ang lai chix koe kawn tom hoek bawg yam yum nawh heue.

¹ Simiang Davit hoik laux lee yiien yawg daux nyiex haw tix, kheu hoik kieh Simiang Siyiex nawh luad luan khaing pui koeng, pa koe hawt rawb rim nawh khawmuik, ² Simiang Davit ah nin ka cao jhai Natan, "Jhak heue, aux yaox ti ot nyiex haw khaox gix, viang mawh nan, teug bwan sijax mukheu Siyiex kawn ca yaox ti ot ka daux nyiex gox man." ³ Natan deeh ah nin ka simiang, "Hu heue, yuh awm pa koe rhawm maix, mawh kheu Simiang Siyiex tak ot tau mai maix." ⁴ Viang mawh nan, daux sawm an, gumlox Simiang Siyiex hoek ka Natan ah nin, ⁵ "Hu mai krai grawng in ka kawncau Aux Davit, awm pa hoik krai Simiang Siyiex, mawh sang yaox maix ti sum nyiex sonsang ot Aux lie? ⁶ Aux ang nyang yaox ti ot daux nyiex, glang bawg yam hoik viex Aux pui Isarelax lih khaing daux meung Ejiptux, tom hoek ka daux in singaix, Aux hoik vung viang ti ot daux nyiex gox man. ⁷ Can dee hoik hu Aux tau mai pui Isarelax, hoik sax krai Aux ka cao prawng see doeh ru pui Isarelax, pa hoik tawx priex ih ka pui Aux Isarelax, yuh ka mawx maix lai ang sum nyiex khaox gix son Aux." ⁸ Mawh kheu nan maix ah nin ka kawncau Aux Davit, Simiang Siyiex Cao pa ting piang khawmuik ah nin, Aux hoik teei maix lih khaing dee pa liang maix yung, sonsang mawh maix cao pa kwang piang pui Aux Isarelax." ⁹ Aux hoik ot tau mai maix, ka can dee hu maix kudah mai hoik yuh pui koeng maix laux plak sivoe maix mai Aux hoik yuh min ceu kaux maix ting lhaong awm min ceu kaux pui pa kied ting lhaong pa ot piang haktiex in. ¹⁰ Lheu khaing an Aux tak laug dah dee tix dah ka son pui Aux Isarelax mai Aux tak kieh kix ot kaux cong tan mai kix tak yaox ti ot ka daux dee cie cao kix mai ang lai yaox ti gah tix, tix bawg kawx mai pui caox caig tak ang lai pon tuktiak kix tix bawg kawx, awm bawg yam pa hoik luan, ¹¹ Daux bawg yam hoik ap Aux cao prawng see, mawh cao pa kwang piang pui Aux Isarelax, Aux tak kieh maix yiien yawg tix khaing pui koeng pex, lheu khaing an Simiang Siyiex baox krai grawng pa sang kieh Nawh Cao mawx koe nyiex haw. ¹² Yam hoik naog singaix ju maix, maix tak yaox ti laux lee tix tau mai cub keeing maix, Aux tak yaog ti deuh doeh ru pa lih khaing cao maix mai Aux tak kieh meung haktiex nawh kaux cong. ¹³ Nawh tak sum nyiex tix lhang ka son min ceu kaux Aux mai Aux tak pang ti deuh dang ngeung meung haktiex nawh leeing ju. ¹⁴ Aux tak mawh keeing nawh mai nawh tak mawh kawn simex Aux, phan nawh lud, Aux tak sivied ti gau nawh ka khaox puat awm sidiex kawn pui kawn tix. ¹⁵ Viang mawh nan, krax pa caux rhawm Aux tak ang lai gah tix khaing nawh, awm hoik teei Aux ti tik Sawlux khaing ka plak sivoe pex. ¹⁶ Mai doeh nyiex ma maix khawm meung haktiex maix, tak mawh pa kaux leeing ju ka plak sivoe maix, dang ngeung maix tak mawh pa kaux cong leeing ju" ¹⁷ Mawh kheu nan, Natan hoik krai grawng pa plak jhi Simiang Siyiex ka Davit. ¹⁸ Yam an simiang Davit laig ka plak daux mai ngawm ka plak sivoe Simiang Siyiex ah nin, "Simiang Siyiex eue, mawh aux pui pa yuh ka mawx? Mai nyiex ma aux mawh pa yuh ka mawx? Maix Cao hoik yaog aux hoek ka dee pa kied ting lhaong in yuh ka mawx?" ¹⁹ Simiang Siyiex eue, in mawh ceu pa iak plak sivoe ngai Maix Cao, Maix Cao baox krai grawng in, ka doeh nyiex ma kawncau Maix, son bawg yam pa tak sang hoek, Simiang Siyiex eue, mawh in grawng pasax yuh kawn pui lie? ²⁰ Yam in Davit kawn sang pon ah patix ka Maix Cao lie? Maix Cao hoik tawng ka kawncau Maix. ²¹ Son min plakngai gumlox Maix Cao mai awm pa koe alo Maix Cao, Maix hoik yuh ceu pa ting lhaong inkix, sonsang kieh Maix kawncau tix tawng grawng ceu in. ²² "Mawh kheu nan, Simiang Siyiex eue, Maix Cao mawh pa ting lhaong, mawh kheu ang lai koe Siyiex pa awm Maix tix kaux kawx, awm pa hoik sax mhong yix ka yhaok tix, lheu khaing Maix Cao Siyiex tang kaux ang lai koe." ²³ Mawh pui mawx pa sang awm pui Maix pui Isarelax, pa hoik taoh Maix mawh pui tix khaing piang haktiex in? Maix hoik jhi min ceu kaux tix daux kaing jhaw pa ting lhaong, khawm ceu pa kied lhat graung ka son haktiex Cao tix ka plak sivoe pui Maix, pa hoik taoh Maix ka son Cao tix khaing meung Ejiptux mai khaing sinax pui khankix mai khaing sinax siyiex kix. ²⁴ Mawh kheu Maix Cao hoik yuh pui Isarelax mawh pui tix, sonsang mawh kix pui Maix leeing ju, Maix Cao hoik mawh Simiang Siyiex kix." ²⁵ Simiang Siyiex eue, lox pa hoik krai Maix Cao grawng pa dex mai kawncau Maix Cao mai pa dex mai doeh nyiex ma nawh, kieh mawh pa kaux leeing ju awm pa hoik krai Maix Cao." ²⁶ Kieh min ceu kaux Maix Cao mawh pa yaogyaw ting lhaong leeing ju, tau mai pa ah nin, kieh Simiang Siyiex Cao pa ting piang khawmuik mawh Siyiex ka piang pui Isarelax mai kieh doeh nyiex ma kawncau Maix Davit mawh pa kaux cong ka plak sivoe Maix Cao. ²⁷ Grawh grawng nawh, Simiang Siyiex Cao pa ting lhaong piang mai pa mawh Siyiex pui Isarelax khankix eue, Maix Cao hoik plak jhi grawng ceu inkix ka kawncau Maix ah nin, "Aux tak sang kieh nyiex haw koe ka son Maix, " kheu hoik kieh Maix Cao aux yaox ceu in ka daux rhawm cao tix, aux tom rawg bwan ka Maix Cao." ²⁸ "Yam in kawx Simiang Siyiex eue, Maix Cao mawh Siyiex tete mai gumlox Maix kawx, mawh pa mawh meh, Maix Cao hoik yuh gumlox pa kaux sijax tix ka kawncau Maix Cao. ²⁹ Mawh kheu nan, kieh ceu in mawh pa khaw rhawm Maix Cao, nawb bwan piang doeh nyiex ma kawncau Maix, Simiang Siyiex eue, awm pa koe rhawm Maix Cao, kieh doeh nyiex ma kawncau Maix mawh pa pon bwanson Maix Cao leeing ju plak sivoe Maix Cao liak."

¹ Davit deeh puing pui Philitix mai pex ka kix mai nawh rhim ti teei veng Mategama khaing pui Philitix. ² Khaix an nawh pex haktiex Mawbax mai khinkix it piang tiex mai tiag ti yaox kix ka maox, khaing daux loe cub nawh pah kix ra cub mai nawh kieh an tix cub klawd, mawh kheu nan, pui Mawbax yuh siliex cawng Davit mai yaox ti tawx keun ka nawh. ³ Davit baox pex ka Hadadeza kawn simex Rehawbax simiang veng Zawbax, yam an mawh bawg yam hu rhim Hadadeza haktiex kwang tix hawt rawm klawng Yufrethix. ⁴ Davit pon rhim ling lawx brung naing tix rheng lhang mai lien naing brug brung aliah yieh, cub lien piang tiex ra mheen. Davit yuh ling lawx brung naing laux leeing khawmuik mai nawh teei ling lawx brung naing son cao tix, tix yieh lhang khaing. ⁵ Yam hoek pui Shurix khaing veng Damase ti sang teem ka Hadadeza pa mawh simiang Zawbax, Davit baox pah pui Shurix ra mheen ra rheng kaux. ⁶ Khaix an Davit deuh cub lien pau veng ot ka daux veng Damase, pa koe daux haktiex Shurix tan mai pui Shurix deeh mawh siliex cawng Davit mai yaox ti tawx keun ka nawh, Simiang Siyiex priex jhung Davit ka can dee hu nawh. ⁷ Davit rhim ti teei plah khri tiebtie cie kawncau Hadadeza mai viex ing ka veng Yerusaliem. ⁸ Khaing daux veng Betax mai veng Berawtie pa hoik kwang veng Hadadeza ka, simiang Davit hoik rhim ti teei tawng lheung ing tom nie. ⁹ Yam mhong Taw-ix pa mawh simiang veng Hamat ka hoik pex Davit ka kru naing Hadadeza khawmuik, ¹⁰ khaix an Taw-ix ploi Yawram kawn simex ti hu ka simiang Davit mai Yawram viex kraung mau, kraung khri mai tawng lheung sonsang rieb nawh mai sonsang nawb bwan piang nawh, kheu jao pex Davit ka Hadadeza, mawh kheu Hadadeza hoik yuh naing ka Taw-ix, glang ka singaix an. ¹¹ Simiang Davit hoik appong ceu ankix ka Simiang Siyiex, tau mai mau khri pa hoik pon nawh khaing haktiex pa hoik pex tix khankix, ¹² khaing haktiex Shurix haktiex Mawbax, haktiex Amon, haktiex Philitix, haktiex Amaliet kawn simex Rehawbax, pa mawh simiang veng Zawbax. ¹³ Davit hoik pon min ceu kaux tix, yam deeh ing nawh khaing pah tix pui Shurix, pui Edom tix mheen dim rheng kaux ka daux ngawd kih. ¹⁴ Nawh hoik deuh cub lien pa pau veng ka haktiex Edom khawmuik, pui Edom hoik mawh siliex cawng Davit khawmuik mai Simiang Siyiex hoik priex jhung Davit, ka can dee hu nawh. ¹⁵ Mawh kheu nan, Davit kwang piang haktiex Isarelax khawmuik mai prawng rahsee piang pui nawh khawmuik. ¹⁶ Yuabax kawn simex Zeruya mawh cao kaing naing ting piang kru naing khankix mai Yehoshaphat kawn simex Ahilut mawh cao kaing pa priex ca rang, ¹⁷ Zadok kawn simex Ahitut mai Ahimaliet kawn simex Abyatha mawh cao giex kaing li mai Seraya mawh cao kaing tiiem lai, ¹⁸ mai Benaya kawn simex Yehawyadax mawh cao kaing pa kwang piang pui Kherati mai piang pui Pelati khankix, kawn simex Davit mawh cao giex kaing li heue.

¹ Davit ah nin, sonsang pon aux ti jhi krax caux rhawm tix ka son min ceu kaux Yawnasan, "Mawh kawn koe pui tix kaux kaux khaing daux paox nyiex Sawlux lie?" ² Koe pui tix kaux pa mawh kawncau daux nyiex ma Sawlux ceu kaux nawh mawh Zibax, yam kok kix nawh hoek ka Davit, simiang ah nin ka nawh, "Mawh maix Zibax lie?" nawh ah nin, "Mawh awm pa ah maix." ³ Khaix an simiang ah nin, "Sonsang pon jhi aux krax caux rhawm Siyiex, mawh ang pui tix kaux kawx khaing daux nyiex ma Sawlux lai koe lie? mai Zibax deeh ah nin ka simiang, kawn simex Yawnasan pa koe jhawm saux laux caong kawn koe tix kaux."s ⁴ Simiang ah nin ka nawh, "Mawh ot nawh dee mawx?" mai Zibax deeh ah nin, "Nawh ot daux nyiex Makhirax kawn simex Amelax daux yaong Lawdebarax." ⁵ Davit ploi pui hu teei nawh hoek khaing daux nyiex Makhirax kawn simex Amelax khaing daux yaong Lawdebarax. ⁶ Yam hoik hoek Mephibawshiet kawn simex Yawnasan, pa mawh kawn saux Sawlux, ka plak sivoe Davit, nawh gup pakngai tix mai krub ka Davit, Davit ah nin, "Mephibawshiet eue, " nawh pawk ah nin, "Kawncau maix ot tin." ⁷ Mai Davit ah nin ka nawh, "Paw lhat, mawh kheu aux tak jhi krax caux rhawm tix ka maix, son min ceu kaux keeing maix Yawnasan mai aux tak deeh tawx haktiex tax maix Sawlux ka maix, maix tak yaox ti ih blah piang pheen sawm aux ku singaix jheung jheung." ⁸ Yam an Mephibawshiet gup tix ah nin, "Mawh kheu grawng ceu patix maix lai sang kia ngiien ka kawncau maix pa awm sox yum lie?" ⁹ Mai simiang kok Zibax kawncau Sawlux ah nin ka nawh, "Aux hoik tawx can pa mawh cie Sawlux mai cie paox nyiex nawh khawmuik ka kawn simex cao simiang maix." ¹⁰ Maix mai kawn simex maix khawm kawncau maix, tak yaox ti yuh kaung ma son nawh mai viex ti tawx plix nghox plix koi ka kawn simex cao simiang maix, sonsang yaox nawh ti ih pa ih, mawh kheu nan, Mephibawshiet kawn simex cao simiang maix, tak ih blah piang pheen aux ku singaix jheung jheung. Zibax hoik koe kawn simex kao phwan kaux, tau mai kawncau nawh tixnga kaux. ¹¹ Zibax deeh ah nin ka simiang, "Awm hoik tawm cao simiang aux ka kawncau tix, kawncau maix tak yuh." Mai simiang deeh ah nin, phan mawh Mephibawshiet nawh tak ih priex tau mai aux piang pheen sawm cao aux, awm kawn simex simiang. ¹² Mephibawshiet koe kawn simex iak pa kaux Mikha, pui pa hoik ot ka daux nyiex Zibax khankix mawh kawncau Mephibawshiet khawmuik. ¹³ Mawh kheu nan, Mephibawshiet ot ka daux veng Yerusaliem mai yaox ti ih priex jheung jheung piang pheen sawm simiang, nawh mawh pa laux caong khawm ra khawn heue.

¹ Khaix hoik yum simiang, Amon kawn simex nawh Hanun deeh plud ti kwang haktiex piang dangngeung keeing tix. ² Davit ah nin, "Aux sang jhi krax caux rhawm tix ka Hanun kawn simex Nahasha, awm pa hoik jhi keeing nawh krax caux rhawm tix ka aux, " mawh kheu nan, Davit ploi kawncau ti hu ka nawh mai kieh kix ah lox pa nyawm rhawm ka grawng pa dex dawt tau mai pa yum keeing nawh, kawncau Davit hu laig ka daux haktiex pui Amon. ³ Cub cao kaing pui Amon khankix hoek ah nin ka cao simiang kix Hanun, "Mawh keud maix Davit sang yaog min plakngai keeing tix kheu ploi nawh pui tix hoek ah lox pa khu rhawm ka maix lie? ang mawh Davit pa hoik ploi kawncau tix hoek sonsang sawg khrieh kix ka veng mai jiang ti yaox grawng sang yuh kix pa laux leeing ang mawh lie?" ⁴ Mawh kheu nan, Hanun teei kawncau Davit hoek ka tix nawh khlao hauk bheup kix tix plak mai baox rhip sigreung kraung ceep kix tom hoek ka beem kre kix mai ploi kix ing. ⁵ Yam deeh krai kix grawng an ka Davit, nawh ploi pui hu rieb kix daux krax, kheu kied kaig kix mai simiang ah nin, "Jun ti ot ka daux veng Yerikho tan, tom hoik deeh kuah hauk bheup pex mai deeh hoek khaix awx." ⁶ Yam yaox pui Amon hoik yuh tix pa seeing brai ka Davit, kix ploi pui hu vai ka pui Shurix khaing veng Bietrehawbax mai khaing veng Zawbax ra mheen kaux mai kru naing caong khaing simiang Makha tix rheng kaux mai khaing veng Tawbax tix mheen ra rheng kaux. ⁷ Yam hoik mhong Davit ka grawng an, nawh ploi Yuabax mai kru naing pui pa kied ting riang khankix lih hu. ⁸ Pui Amon hoek mai khre rien ti sang puing naing hawt diang laig siviex veng mai pui Shurix pa kaoh khaing veng Zawbax, veng Rehawbax mai veng Tawbax mai pui simiang Makha hoik tang teei dee ot tix daux lung. ⁹ Yam yaox Yuabax koe meu ka plak sivoe mai plak khaix nawh, nawh laug teei pui pa hoik laug nawh khaing pui Isarelax mai ploi kix yuh naing ka pui Shurix. ¹⁰ Nawh ap pui pa deuk khankix ka greem pa kwang pux nawh Abishie, sonsang ploi kix yuh naing ka pui Amon. ¹¹ "Phan pui Shurix ting riang khaing aux maix tee yaox ti teem ka aux, phan pui Amon kied ting riang khaing maix, aux kawx tak teem ka maix." ¹² Kieh koe rhawm kwa rhawm vao mai kieh ex ting riang ka son pui ex mai son veng Siyiex ex, kieh Simiang Siyiex yuh awm pa koe alo Nawh Cao." ¹³ Yuabax mai pui ot tau mai nawh, greed tix dex sonsang yuh naing ka pui Shurix, kix hoik to ka sivoe nawh. ¹⁴ Yam yaox pui Amon hoik to pui Shurix, kix kawx deeh to ka sivoe Abishie mai laig daux veng, mawh kheu nan, Yuabax deeh ing khaing puing tix pui Amon mai deeh hoek ka Yerusaliem. ¹⁵ Yam yaox pui Shurix som tix ka pui Isarelax, kix deeh khrawm paox tix. ¹⁶ Khaix an Hadadeza deeh ploi pui kok ka pui Shurix pa ot toi rawm klawng Yufrethix mai kix hoek ka veng Helam mai Shawbiet cao kaing kru naing Hadadeza mawh cao thong kix. ¹⁷ Yam krai kix an ka Davit nawh deeh khrawm pui Isarelax mai kix tiang klawng Yawdan mai hoek ka veng Helam, pui Shurix rieb ti puing ka cub Davit. ¹⁸ Khaix an pui Shurix to ka sivoe pui Isarelax mai Davit pon pah cao phat ling lawx naing brung kix aliah yieh kaux mai khawm pui naing brung kix pon mheen kaux mai nawh baox pah Shawbiet cao kaing kru naing kix yum tan. ¹⁹ Cub simiang pa hoek yuh siliex Hadadeza, hoik yaox som tix ka pui Isarelax, kix deeh yuh pa nhim mai pui Isarelax mai yuh siliex kix, mawh kheu nan, pui Shurix lhat mai ang lai kan teem ka pui Amon tix bawg kawx heue.

¹ Khaix hoik luan bawg yam raux praix daux num an mai hoek bawg yam yuh simiang naing, Davit ploi Yuabax mai kawncau tix mai pui Isarelax hu daux naing mai kix pex ka pui Amon mai lai lawm ka veng Rabax, viang mawh nan, Davit kawn ot khaix kix daux veng Yerusaliem. ² Daux tix ngaix plakbo Davit kaoh khaing it tix mai lailing piang braux nyiex haw tan, nawh yaox ka heem bun tix, bun an kied mhawm grang. ³ Mawh kheu nan, Davit ploi pui hu chawk grawng bun an mai pui an deeh hoek ah nin, "In mawh Batashebax kawn bun Eliam mai mawh moeng Uriyax pui Heta." ⁴ Davit ploi pui cau tix hu kok bun an hoek, yam bleeh bun an Davit it tau mai nawh, khaix an bun an deeh yuh tokaux tix singax khaing pa seeing brai tix mai deeh ing ka nyiex tix. ⁵ Mai bun an hoik koe kaux, mawh kheu nan, nawh ploi pui hu krai Davit mhong ah nin, "Aux hoik koe kaux." ⁶ Davit deeh ploi Yuabax ah nin ka nawh, "Ploi Uriyax pui Heta hoek ka aux, " mai Yuabax ploi Uriyax hu ka Davit. ⁷ Yam hoek Uriyax, Davit chawk grawng nyawm ot Yuabax mai grawng krax ot krax koe pui khankix mai grawng pa hoik pex nawh khankix. ⁸ Davit ah nin ka Uriyax, "Deeh ing ka nyiex cao maix mai khoek caong tix, " mawh kheu nan, Uriyax lih khaing daux nyiex simiang mai simiang hoik kieh kix hawt ti tawx totaix pa ih khaix nawh. ⁹ Viang mawh nan, Uriyax ang ing ka nyiex cao tix mai nawh it hawt diang siviex nyiex haw simiang tau mai kawncau simiang khankix. ¹⁰ Yam krai kix grawng ang Uriyax ing ka nyiex ka Davit, Davit ah nin ka Uriyax, "Mawh ang maix mawh pa kaoh khaing hu tix krax lie? yuh ka mawx maix lai ang hu ka nyiex cao tix." ¹¹ Mai Uriyax ah nin ka Davit, "Teug bwan sijax mukheu mai pui Isarelax mai pui Yudax kawn ot daux nyiex gox mai cao simiang aux Yuabax mai kawncau nawh, kawn pan daux ngawd daux lung, mawh sang khaw aux ti hu ka nyiex cao tix, sonsang ih nyaux mai it tau mai moeng tix lie? awm kawn im ju maix aux ang pon yuh ceu in." ¹² Khaix an Davit ah nin ka Uriyax, "Baox ot tin daux in singaix pasax, aux tak kieh maix hu, " mawh kheu nan, Uriyax ot ka daux veng Yerusaliem singaix an tom hoek pasax. ¹³ Davit kok nawh ih nyaux tau plak sivoe tix mai nawh hoik kied nie nyaux tom yoek tix, hoek plak bo nawh deeh hu piang ku it tix tau mai kawncau cao simiang nawh mai nawh ang ing ka nyiex cao tix. ¹⁴ Yam hoek plak ponngawb, Davit tiiem lai ka Yuabax mai tawx Uriyax viex hu. ¹⁵ Nawh tiem ah nin daux lai, "Tawx Uriyax hu sivoe dee kin naing mai deeh dak ti ing khaing nawh, sonsang laig daux tawm taix pui koeng mai yaox ti yum kah." ¹⁶ Yam hoik lih hu Yuabax ti lai lawm ka veng, nawh ap beeh glawm ka Uriyax, ka dee hoik tawng nawh koe cub pa koe rhawm vao rhawm kwa. ¹⁷ Pui daux veng an lih hoek ti puing ka cub Yuabax mai kawncau Davit yum tan tiblah mai Uriyax pui Heta kawx yum tan. ¹⁸ Yuabax ploi pui deeh ing krai Davit mhong grawng pa dex mai naing khankix, ¹⁹ Mai nawh tawm lox ka cao cau an ah nin, "Yam hoik krai maix grawng naing khankix ka simiang, ²⁰ phan simiang meet rhawm, nawh tak ah nin ka maix, yuh ka mawx pex lai greed ti hu dex veng mai puing naing, ang pex tawng ka sang deeh puing kix pex khaing piang guh veng lie? ²¹ Mawh pui mawx pa pon pah Abimaliet kawn simex Yerubeshiet? Ang hoik mawh bun veng Tebiet tix kaux pa dheem kaing nawh ka simaox mhaw tix plak khaing piang guh veng, tom yum nawh ang mawh lie? yuh ka mawx pex greed tix dex guh veng?, khaix an maix tak ah nin, kawncau maix Uriyax pui Heta hoik yum" ²² Mawh kheu nan, pui cau an lih hu khaing tan mai hoek krai can pa hoik tawm Yuabax ka Davit. ²³ Pui cau an ah nin ka Davit, "Pui koeng hoik pex ka yix mai kix hoik pheet yix tom hoek ka daux lung, yix kawx deeh pheet kix deeh khaix tom hoek diang siviex veng. ²⁴ Cao pa puing ak pa ot piang guh veng puing ka kawncau maix mai kawncau simiang tiblah hoik yum, Uriyax pui Heta kawncau simiang kawx hoik yum. ²⁵ Davit ah nin ka pui cau an, "Maix ah nin ka Yuabax, paw koe krax laux rhawm ka grawng in, mawh kheu lawm vaig hoik lai loh ti yuh pui laux leeing tix kaux lai tix kaux, deeh teei riang rao ti puing mai yuh tom laux leeing veng an, mawh kheu nan tawx riang rao ka nawh." ²⁶ Yam hoik mhong moeng Uriyax ka hoik yum mex tix, nawh yiiem doe ka son mex tix. ²⁷ Yam hoik luan krax pa yiiem doe nawh, Davit ploi pui hu teei nawh hoek ka nyiex haw tix mai nawh mawh moeng Davit mai nawh keh kawn simex tix kaux, viang mawh nan, pa yuh Davit mawh pa ang Simiang Siyiex khaw rhawm kah.

¹ Khaix an Simiang Siyiex ploi cao jhai Natan hu ah nin ka Davit, "Ka daux veng tix veng koe pui ra kaux, tix kaux mawh pui magmi mai an tix kaux mawh pui hot shia. ² Pui mi an koe cub yung cub mawie tom nie. ³ Viang mawh nan, pui hot shia an, lheu khaing kawn yung shiang iak pa hoik liag nawh ti eei nawh ang koe sinngao tix ceu kawx mai kawn yung shiang iak an, haok hwan ting tau mai kawn praix nawh, hoik ih priex cao tix, hoik nyaux rawm khaing daux kawk cao tix mai hoik it piang naok nawh awm kawn bun nawh. ⁴ Yam hoek nyo nyiex ka cao mi an, nawh hoik lhawk ti teei khaing daux cub mawie cub yung cao tix sonsang khre pa ih ka son nyo nyiex pa hoek ti paung ka nawh, viang mawh nan, nawh hu teei kawn yung shiang iak pui hot shia an mai khre ka son nyo nyiex pa hoek ka nawh." ⁵ Davit kied song rhawm ka cao mi an ah nin ka Natan "Awm im ju Simiang Siyiex pui pa yuh ceu in keung ti yum tete." ⁶ Kieh nawh deeh plud pon son tix son piang son kawn yung shiang iak an, kheu hoik yuh nawh ceu in mai ang tix koe krax caux rhawm." ⁷ Khaix an Natan ah nin ka Davit, "Maix mawh pui an heue, "Simiang Siyiex pui Isarelax ah yuh nin, Aux hoik groi bee mai hoik yaog maix mawh simiang piang pui Isarelax mai Aux hoik taoh maix khaing daux tawm taix Sawlux." ⁸ "Aux hoik tawx sin nyiex ma cao simiang maix mai moeng cao simiang maix piang naok maix mai Aux hoik tawx doeh nyiex ma pui Isarelax mai pui Yudax ka maix, phan ceu ankix ang nyang kub ka son maix, Aux tak baox tawx tang ceu tom nie ka maix." ⁹ "Maix lai yuh krax pa ang khaw ang jiet ka gumlox pingnyap Simiang Siyiex mai yuh pa caox caig ka plak sivoe ngai Nawh Cao yuh ka mawx? Maix hoik pah Uriyax, pui Heta ka vaig maix hoik teei moeng nawh mawh moeng tix maix hoik pah nawh yum ka lawm vaig pui Amon." ¹⁰ "Mawh kheu maix hoik yuh ceu pa ang khaw ang jiet ka Aux mai hoik teei moeng Uriyax pui Heta mawh moeng tix, doeh nyiex ma maix tak ang luan khaing lawm vaig tix bawg kawx." ¹¹ Simiang Siyiex ah nin, "Jhak heue, Aux tak kieh pa khi rhawm hoek piang maix, khaing daux doeh paox nyiex cao maix mai Aux tak teei moeng maix ka plak sivoe ngai maix mai tawx ka paox plawg maix mai kix tak it tau mai moeng maix, plak sivoe maix yam kawn riang praix." ¹² "Viang maix hoik yuh ceu in ka daux pa glip, Aux tak yuh ceu in ka plak sivoe ngai pui Isarelax ka daux pa sidawng yam riang praix." ¹³ Khaix an Davit ah nin ka Natan "Aux hoik lud ka Simiang Siyiex, " mai Natan deeh ah nin ka Davit, "Simiang Siyiex hoik teei phimap maix, maix tak ang yum ka grawng in." ¹⁴ "Viang yuh ka mawx kawx, kheu hoik tawx maix akhwang pa sang koe lox sibriem ceu pa koeng Simiang Siyiex kah, mawh kheu nan, kawn pa keh son maix yam in tak yum." ¹⁵ Khaix an Natan deeh ing ka nyiex cao tix mai Simiang Siyiex tawx krax kham geu ka kawn simex Davit, pa hoik keh khaing moeng Uriyax mai kieh nawh kied nie saux tete heue. ¹⁶ Davit deeh khyox khaw ka Siyiex, son kawn tix, Davit twah pa ih mai laig it daux lawg piang tiex leeing sawm. ¹⁷ Cub kuad pa ot ka daux nyiex haw khankix hu yaog nawh kaoh khaing piang tiex, viang mawh nan, nawh ang cu ti kaoh mai ang cu ti ih priex tau mai kix. ¹⁸ Yam hoik naog aliah ngaix kawn nyawm an yum mai kawncau nawh khankix lhat graung mai ang krai ka hoik yum kawn nyawm an ka nawh mai kix ah nin, "Yam kawn im kawn nyawm an, ex hoik krai mai nawh ang tie nghiet lox krai ex, ex sang pon krai grawng yum kawn nyawm an ka nawh yuh ka mawx? Nawh tak yuh krax pa kha rhawm ka cao tix, tix ceuceu." ¹⁹ Yam yaox Davit ka suk shiep kawncau tix, nawh tawng ka hoik yum kawn nyawm, mawh kheu nan, nawh chawk kawncau tix, "Mawh hoik yum kawn nyawm an lie? Mai kix deeh ah nin, "Nawh hoik yum." ²⁰ Khaix an Davit yaog ti kaoh khaing piang tiex mai heem tix mai kraix bee mai loh kraung tix laig ka daux nyiex bwan mai krub ka Simiang Siyiex, khaix an nawh deeh ing ka nyiex cao tix, yam mhaing nawh pa ih, kix khan priex ka plak sivoe nawh mai nawh ih ka. ²¹ Kawncau nawh ah nin ka nawh, "Jao patix maix yuh nin maix hoik twah priex mai hoik yiiem son kawn nyawm yam kawn im nawh, viang mawh nan, khaix hoik yum kawn nyawm an maix deeh yaog ti kaoh ih priex." ²² Nawh deeh ah nin, "Yam kawn im kawn nyawm in, aux twah priex mai yiiem ah nin, mawh pui mawx pa sang pon krai grawng sang koe krax pa caux rhawm Simiang Siyiex piang aux, sonsang deeh pon kawn nyawm an tix im?" ²³ "Viang mawh nan, yam in nawh hoik yum, aux lai kawn sang twah priex yuh ka mawx? mawh sang deeh pon baox kieh aux nawh im? aux tak hu ka nawh, viang mawh nan, nawh tak ang lai deeh hoek ka aux." ²⁴ Khaix an Davit kieh moeng tix Batashebax koe krax pa nyawm rhawm mai nawh laig it tau mai nawh, nawh keh kawn simex tix kaux mai kok ceu kaux nawh mawh Sawlamon mai Simiang Siyiex moh ka Sawlamon. ²⁵ Yam an Nawh Cao deeh ploi cao jhai Natan hu mai kieh sum ceu kaux mawh Yedidi, awm gumlox pa tawm Simiang Siyiex ka nawh, dee bleeh gumlox Yedidi an, mawh krax pa moh Simiang Siyiex heue. ²⁶ Yuabax hu puing ka veng Rabax, veng pui Amon mai dex sang pex ka veng an. ²⁷ Yuabax ploi pui cau ing ah nin ka Davit, "Aux puing veng Rabax mai hoik pon rhim rawm dung nyaux veng ting an." ²⁸ Mawh kheu nan, "Yam in khrawm can pui pa kawn deuk tau mai maix hu yuh tab hawt veng mai puing ti teei kah, phan ang mawh nan, aux rhim veng an mai tak kok ceu kaux veng an mawh kaux aux." ²⁹ Davit deeh khrawm pui khawmuik hu ka veng Rabax, nawh puing mai pon rhim ka veng an. ³⁰ Nawh peeik mhok khri simiang veng an khaing kaing nawh, mhok khri an ciien tix talantan mai siang pa laoh lie kawx koe ka mhok khri an mai kix ceep mhok khri an piang kaing Davit, nawh baox teei kraung pa rhim khaing daux veng an hoek tom nie. ³¹ Nawh viex pui pa ot ka daux veng an khankix hu mai kieh kix yuh kaing leu khaox, kaing yuh kraung rhiem, kaing moe mai khinkix lai loh ti yuh kaing gleeing lon tiex, mawh kheu nan, nawh hoik kieh pui Amon pa ot ka daux veng daux yaong yuh awm in, khaix an Davit mai pui nawh khankix deeh ing ka veng Yerusaliem heue.

¹ Apsalom kawn simex Davit, koe nan pa kied mhawm grang tix kaux, ceu kaux nawh mawh Tama mai Amanon kawn simex Davit tang kaux kied moh ka nawh. ² Amanon kied luan moh nan tix Tama mai saux kheu jao, nan pux nawh Tama mawh bun krih loik, nawh ang tawng sang yuh ka mawx ka bun an. ³ Amanon koe paox grawm meed tix kaux pa kaux Yawnadat, kawn simex Shima, puxke Davit, nawh mawh pa kied lhak lhiem tix kaux. ⁴ Mai nawh chawk ah nin ka nawh, "Maix hoik mawh kawn simex simiang kheu jao pa yuh ka mawx maix lai dieh hu sipie tix ngaix hoik tix ngaix, ang maix koe rhawm tix sang krai aux mhong lie?" mai Amanon deeh ah nin ka nawh, "Aux kied moh ka Tama, nan puxke aux Apsalom." ⁵ Yawnadat deeh ah nin ka nawh, "Maix it piang ku it tix mai yuh tix awm pui saux, yam hoek keeing maix ti jhak maix, " maix ah nin ka nawh, "Kieh nan aux Tama hoek tawx aux ih priex mai kieh nawh mawh cao khre rien pa ih, ka plak sivoe ngai aux dee pon aux tix yaox ka mai sonsang yaox aux tix ih pa khre nawh" ⁶ Khaix an Amanon it mai yuh ti awm grang pui saux, yam hoek simiang ti jhak ka nawh, Amanon ah nin ka simiang, "Yuh bwanson kieh nan aux Tama hoek ti priex rien aux mai yuh blah khlawp ra khlawp son aux, ka plak sivoe ngai aux, sonsang pon aux ti ih khaing daux taix nawh." ⁷ Mai Davit ploi pui hu kok ka Tama ah nin, "Yam in hu ka nyiex puxke maix Amanon mai khre rien pa ih son nawh." ⁸ Mawh kheu nan, Tama hu ka nyiex puxke tix Amanon mai yaox kawn it nawh, khaix an Tama teei phawng gaox nghox ca mai ku klao tau mai yuh khlawp blah ka plak sivoe ngai Amanon mai ping sin ka ngu. ⁹ Tama teei pan mai sau ti deuh blah ka plak sivoe Amanon, viang mawh nan nawh ang cu ti ih blah an, Amanon ah nin, "Kieh pui ku kaux lih khaing dee ot aux?" mai pui lih khawmuik. ¹⁰ Khaix an Amanon ah nin ka Tama "Viex pa ih pa yuh maix laig daux lawg plak daux, sonsang pon aux ti ih khaing daux taix maix, " mai Tama teei khlawp blah pa hoik yuh tix mai viex laig daux lawg it puxke tix Amanon. ¹¹ Yam viex Tama ti sang tawx nawh ih, Amanon bluh taix nan tix ah nin ka nawh, "Nan aux eue, hoek ti it tau mai aux." ¹² Mai Tama ah nin ka nawh, "Puxke aux eue, paw doh yuh pa khin ka aux liak, mawh kheu ang koe been ti yuh ceu in ka daux pui Isarelax, paw doh yuh ceu pa caox caig in liak." ¹³ "Aux sang pon deuh krax pa kaig tix dee mawx? maix tak awm pui kwa ka daux pui Isarelax, mawh kheu nan, krai grawng in ka simiang, simiang tak ang teei aux hu khaing maix." ¹⁴ Viang yuh ka mawx kawx nawh ang nghiet, mawh kheu hoik ting riang Amanon khaing nan tix, nawh hoik yuh pa khin ka Tama mai hoik pon ti it tau mai nawh. ¹⁵ Amanon deeh koeng ka nan tix, pa koeng nawh ka Tama hoik nie lheu khaing pa moh nawh glang ka an mai Amanon ah nin ka nawh, "Lih hu heue." ¹⁶ Mai nan nawh deeh ah nin ka nawh, "Aux ang hu, pa grheu maix aux lih hu in, mawh pa nie lheu caox khaing grawng pa hoik yuh maix ka aux nox," viang mawh nan, Amanon ang nghiet. ¹⁷ Khaix an nawh kok kawncau tix ah nin, "Grheu bun in hu singai khaing tin mai deeh song jhong siviex khaix nawh." ¹⁸ Tama ceep sibex pa koe pakpeung kuceu piang tokaux tix, awm pa ceep kawn bun simiang yam an, kawncau nawh hoik grheu nawh lih hu plak praix mai song jhong siviex ka nawh. ¹⁹ Tama sau nyaox piang kaing tix mai riah kraung ceep pa koe grang kuceu khaing piang tokaux tix mai deuh taix tix piang kaing tix, nawh ing mai yiiem yo tix. ²⁰ Puxke nawh Apsalom ah nin ka nawh, "Mawh yuh puxke aux Amanon pa ang mawh ang meh ka maix lie? pux aux eue, ot yawg tix, kheu mawh nawh puxke maix, paw lai keud grawng in ka daux rhawm tix, " mawh kheu nan, Tama ot yiien yawg daux nyiex puxke nawh Apsalom tan. ²¹ Yam mhong simiang Davit ka grawng an, nawh kied song rhawm kah. ²² Mai Apsalom ang lai sikah lox mhawm lox caox ka puxke tix Amanon tix gum kawx, mawh kheu Apsalom kied koeng ka Amanon kheu hoik lud nawh mai nan tix Tama heue. ²³ Yam hoik naog ra num, Apsalom yuh krax khan kheu pawie rhip hauk yung ka daux yaong Balax Hazaw, pa koe hawt dex veng Epharem tan mai nawh ghaok cub kawn simex simiang hoek ti ih pawie tau mai tix tan khawmuik. ²⁴ Apsalom hoek ka simiang Davit ah nin, "Yam in aux yuh krax khan kheu pawie rhip hauk yung, yuh bwanson kieh simiang mai kawncau maix hoek ti ih pawie tau mai aux pa mawh kawncau maix." ²⁵ Mai simiang deeh ah nin ka Apsalom, "Kawn simex aux eue, ang mawh, paw kieh ex hu khawmuik, ex lhat mawh beeh glawm cien ka son maix, " simiang ang cu ti hu mai nawh nawb bwan piang nawh. ²⁶ Apsalom deeh ah nin, "Phan ang mawh nan, yuh bwanson, kieh puxke aux Amanon hu tau mai yix mai simiang deeh ah nin ka nawh, " "Kheu jao grawng pa yuh ka mawx aux lai sang kieh nawh hu mai maix." ²⁷ Mawh kheu Apsalom ca khyox khaw ka nawh, Davit kieh Amanon mai cub kawn simex ti hu tau mai nawh khawmuik. ²⁸ Apsalom tawm lox ka kawncau tix ah nin, "Yam in pau ti jhak yam yoek Amanon ka rawm plix siiet, yam ah aux nin ka pex mug Amanon yum, khaix an pex mug nawh yum, paw lhat kah, hoik mawh aux pa tawx lox ka pex, "Teei riang pex mai kieh koe rhawm kwa." ²⁹ Mai kawncau Apsalom khankix hoik yuh ceu an ka Amanon, awm pa hoik tawm Apsalom ka kix, cub kawn simex simiang hoik prung prang mai tang yaog ti brug law cie tix to ing ku kaux. ³⁰ Yam kawn ot kix daux krax, pui tix kaux hoek krai grawng an ka Davit "Apsalom hoik pah cub kawn simex simiang yum, ang lai deuk tix kaux kawx." ³¹ Simiang riah ka kraung ceep tix mai it piang tiex mai kawncau nawh khankix kawx yuh awm an mai ot vung viang nawh. ³² Mai Yawnadat kawn simex Shimi, puxke Davit ah nin, "Paw kieh simiang aux yum rhawm ka lox krai kix, hoik pah kix ka kawn simex simiang khankix! mawh ngie Amanon pa yum khaing, grawng in hoik mawh pa bak Apsalom daux rhawm tix, jah tom singaix lud Amanon ka nan nawh Tama." ³³ "Paw kieh cao simiang aux keud mai laux rhawm ka yum cub kawn simex tix, mawh ngie Amanon pa yum." ³⁴ Khaix an Apsalom kawx to mai pui awn ju cao pa pau veng yaog ti jhak mai yaox hoek pui hawt caong gawng plak khaix tix tom nie. ³⁵ Yawnadat deeh ah nin ka simiang, "Jhak heue, kawn simex simiang khankix hoik deeh hoek awm pa hoik krai kawncau ka simiang." ³⁶ Khaix hoik krai nawh ceu an, dom mawx dom an kawn simex simiang khankix bleeh mai kix yiiem, simiang mai kawncau nawh kawx yiiem tau ku kaux. ³⁷ Apsalom to ka Talamie kawn simex Amihut pa mawh simiang meung Geshurax, Davit kied khrup rhawm son kawn simex tix ku singaix. ³⁸ Apsalom to ka veng Geshurax mai ot tan loe num. ³⁹ Simiang Davit hoik piawm ka grawng yum Amanon mai deeh byaong doe ka Apsalom heue.

¹ Yuabax kawn simex Zeruya tawng ka byaong rhawm simiang ka Apsalom. ² Yuabax ploi pui hu ka veng Tekaw mai kieh viex bun tix kaux pa koe pingnya cuyi hoek khaing tan ah nin ka nawh, "Yuh grang maix awm pui khrup rhawm mai ceep kraung khi rhawm son pui yum, paw kraix bee ka tokaux tix, yuh maix awm grang bun khrup rhawm tom rheung son pui yum." ³ "Hu ah nin ka simiang awm lox pa tawm aux, " mawh kheu nan, Yuabax dha ti gau lox pa sang khaw nawh ti krai. ⁴ Yam hoek bun veng Tekaw ka simiang, nawh gup ngai tix piang tiex mai krub ka nawh ah nin, "Simiang eue, Teem ka aux liak, " ⁵ khaix an simiang chawk nawh ah nin, "Koe ceu lo maix patix, " mai nawh deeh ah nin, "Aux mawh miexmai pa hoik yum mex." ⁶ "Kawncau bun maix koe kawn simex ra kaux, kiex simah paox ti daux tiag ang koe pui kieh ka kiex tix kaux kawx, tix kaux tom pah an tix kaux yum. ⁷ "Jhak heue, paox nyiex aux hoik yuh see ka kawncau bun maix ah nin, deeh ap pui pa pah puxke tix yum, sonsang deeh pah yix nawh tang puxke nawh, pa hoik pah nawh yum, yix tak yuh pui plud sinngao nawh laux leeing, mawh kheu nan, kix tak sang preet gaox ngu pa kawn deuk ka aux mai ang lai kieh mex aux koe ceu kaux mai ang lai kieh simie nawh deuk piang haktiex." ⁸ Simiang deeh ah nin ka bun an, "Deeh ing ka nyiex maix, aux tak prawng ca ka son maix." ⁹ Bun veng Tekaw deeh ah nin ka simiang, "Cao simiang aux eue, kieh phimap in koe piang aux mai piang paox nyiex aux khankix, paw kieh phimap koe piang simiang mai piang dangngeung maix." ¹⁰ Simiang ah nin, "Kok pui pa deuh phimap ka maix hoek ka aux mai nawh tak ang lai pon tuktiak ka maix tix bawg kawx." ¹¹ Bun an deeh ah nin, "Simiang eue, rawg bwan ka Simiang Siyiex mai paw tawx akhwang ka pui pa sang pawk bix nham ti yuh krax laux leeing ka kawn simex aux, sonsang ang kix hoek ti yuh kawn simex aux laux leeing, " mai simiang ah nin, "Awm im ju Simiang Siyiex, hauk kaing kawn simex maix tak ang khrum piang tiex tix gawng kawx." ¹² Mai an bun an deeh ah nin, "Kieh kawncau bun maix deeh krai lox ka cao simiang liak, " mai simiang deeh ah nin, "Krai heue." ¹³ Mai bun an baox ah nin, "Yuh tix maix lai keud ti yuh pui Isarelax laux leeing, mawh kheu lox krai maix ka simiang an hoik awm deuh maix phimap ka cao tix, kheu jao ang maix lai deeh kok ka pui pa hoik grheu maix to deeh hoek ka nyiex. ¹⁴ Ex tak mawh pa yum tau ku kaux mai awm rawm pa hoik hieh piang tiex, pa ang lai chix khrawm Siyiex ang lai teei ju pui pa yum tix kaux kawx, viang mawh nan, Siyiex sawg daux krax son ang Nawh Cao tik vud ka pui pa hoik grheu Nawh khaing tix. ¹⁵ Mawh kheu aux hoek krai grawng in ka cao simiang tix, jao ghlat pui aux lhat, aux kawncau hoek krai grawng in ka maix simiang, aux keud maix simiang pon yuh in awm pa khyox khaw aux ka maix. ¹⁶ Mawh kheu maix simiang tak nghiet mai taoh aux pa mawh kawncau bun maix mai kawn simex aux luad luan khaing pui pa sang yuh aux laux leeing, khaing sinngao Siyiex." ¹⁷ Kawncau bun maix keud yuh nin, gumlox cao simiang aux, kieh rhawm aux nyawm, mawh kheu cao simiang aux hoik tawng ti gwieh ceu pa mhawm mai pa caox, awm kawncau Simiang Siyiex mai kieh Simiang Siyiex maix ot tau mai maix." ¹⁸ Simiang pawk ah nin ka bun an, paw lai mox can pa chawk aux ka maix tix ceu kawx, mai bun an ah nin, kieh cao simiang aux krai pa sang chawk tix khankix." ¹⁹ Mai simiang ah nin, "In khankix mawh pa kaoh khaing rhawm keud Yuabax lie?" Mai bun an deeh pawk ah nin, "Awm im ju maix, cao simiang aux eue, pui tix kaux kawx tak ang pon via tix gwiex dawm khaing gumlox cao simiang aux tix kaux kawx, mawh kawncau maix Yuabax pa hoik tawm hoik gau aux ka lox inkix khawmuik, sonsang krai kawncau bun maix ka. ²⁰ Sonsang tieh loh tix grawng ceu in, mawh kawncau maix Yuabax pa gau khawmuik, simiang aux mawh pa koe pingnya cuyi, awm koe pingnya cuyi kawncau Siyiex mai chix tawng ka pa koe piang haktiex khawmuik." ²¹ Simiang deeh ah nin ka Yuabax, "Jhak heue, aux hoik tat grawng in, hu kok pui awm ju Apsalom deeh hoek." ²² Yuabax gup ngai tix piang tiex mai krub ka nawh mai ah lox ting bwanson ka simiang, Yuabax ah nin, "Cao aux mai cao simiang aux eue, in singaix kawncau maix hoik tawng ka pon tix bwanson ka sivoe ngai maix, kheu hoik yuh maix can pa khyox khaw kawncau tix grum naog." ²³ Mawh kheu nan, Yuabax kaoh mai hu ka veng Geshurax mai deeh viex Apsalom hoek ka veng Yerusaliem. ²⁴ Mai simiang ah nin, "Kieh nawh deeh hoek ka nyiex tix, paw kieh nawh yaox ka pakngai aux, " mawh kheu nan, Apsalom deeh hoek ka nyiex tix mai nawh ang pon ti yaox ka pakngai simiang. ²⁵ Ka daux pui Isarelax, pui pa mhawm grang mai pa yaogyaw pui ang koe tix kaux kawx awm Apsalom, jah ka caong tom hoek ka kaing, ang koe dee ne tix ceu kawx. ²⁶ Yam rhip nawh hauk kaing tix, tix num tix bawg yam sidah num, kheu jao ciien ka piang nawh, yam rhip nawh hauk tix, krax ciien hauk nawh koe ra yieh shekhe. ²⁷ Apsalom koe kawn simex loe kaux mai kawn bun tix kaux, ceu kaux nawh mawh Tama, nawh mawh bun pa kied mhawm grang pakpeung tix kaux. ²⁸ Apsalom ot ka daux veng Yerusaliem ra num, viang mawh nan, nawh ang bax yaox pakngai simiang. ²⁹ Mawh kheu nan, Apsalom kok Yuabax, sonsang ploi nawh hu ka simiang, viang mawh nan, nawh ang cu tix hoek, nawh deeh baox ploi pui hu kok ra bawg tix bawg, kawx ang cu tix hoek. ³⁰ Mai nawh deeh ah nin ka kawncau tix khankix, "Jhak heue, kaung cie Yuabax koe dex kaung aux mai koe nghox ca kah, hu mai keeig ngu kah, " mai kawncau Apsalom hu keeig kaung Yuabax ka ngu. ³¹ Khaix an Yuabax yaog ti kaoh mai hu ka daux nyiex Apsalom ah nin, yuh ka mawx "Kawncau maix lai keeig kaung nghox ca aux ka ngu. ³² Mai Apsalom deeh pawk ah nin ka Yuabax, "Jhak heue, aux hoik ploi pui hu kok maix hoek tin, sonsang kieh maix hu krai ah nin ka simiang, "Maix hoik kieh aux hoek khaing veng Geshurax kheu jao patix, ot aux tan lheu mhawm son aux, "mawh kheu nan yam in, kieh ex yaox pakngai simiang, phan aux koe phimap kieh nawh pah aux yum." ³³ Mawh kheu nan, Yuabax lih hu ka simiang mai krai grawng an kix ka nawh mai yam kok nawh Apsalom hoek ka simiang nawh hoik gup pakngai tix piang tiex, plak sivoe simiang mai simiang ngheet ka Apsalom heue.

¹ Apsalom khre rien ling lawx brung naing mai brung naing mai pui naing tix phwan kaux, pa to hu plak sivoe nawh. ² Apsalom kaoh caocao mai cung hawt yam hoek pui ti sang kieh simiang prawng see tix, Apsalom kok pui an hoek ka tix ah nin, "Mawh kaoh maix khaing veng mawx, " mai nawh tak deeh pawk ah nin, "Kawncau maix mawh doeh nyiex ma pui Isarelax." ³ Apsalom deeh ah nin ka nawh, "Jhak heue, grawng see maix mawh pa mhawm mai pa khaw caw, viang mawh nan, pui pa hoik laug simiang sonsang prawng see maix ang koe tix kaux kawx." ⁴ Lheu khaing an Apsalom baox ah nin, "Phan aux yaox ti mawh cao prawng see daux haktiex in, pui pa koe grawng see kuceu khankix nawh tak hoek ka aux mai aux tak prawng rahsee ka son nawh." ⁵ Yam hoek tix kaux kaux dex nawh, sonsang hoek krub ka nawh, nawh nyeu taix ti lih giex nawh mai ngheet kah. ⁶ Ka daux pa yuh nin, Apsalom hoik pon priex rhawm pui Isarelax khawmuik, pa sang hoek prawng see tix ka simiang. ⁷ Khaix hoik luan pon num, Apsalom ah nin ka simiang, "Kieh aux hu ka veng Hebron, sonsang deeh cox aux lox sijax pa hoik yuh tix ka Simiang Siyiex." ⁸ Mawh kheu kawncau maix hoik dawg yuh ti deuh lox sijax tix ceu, yam kawn ot aux ka veng Geshurax ka daux haktiex Shurix, phan Simiang Siyiex deeh viex aux hoek ka veng Yerusaliem tete, aux tak yuh kaing jhaw son Simiang Siyiex" ⁹ Mai simiang deeh ah nin ka nawh, "Hu ka daux krax pa nhim, "mawh kheu nan, nawh yaog ti kaoh mai lih hu ka veng Hebron. ¹⁰ Viang mawh nan, Apsalom ploi pui hu jiang can dee ot doeh ru pui Isarelax khawmuik ah nin, "Yam mhong pex lox teettawng dom mawx dom an, pex ah nin, Apsalom kwang ka daux veng Hebron" ¹¹ Apsalom mai pui ra yieh kaux pa hoik ghaok lih hu khaing veng Yerusaliem tau mai nawh, kix hu mai pa ang tix tawng tidtix khawm rhawm rah rhawm see tix. ¹² Khaix an Apsalom kok ka Ahitawphelax pui Gilaw cao pa tawx rhawm keud ka Davit, pa ot daux veng Gilaw, yam kawn tan nawh krax tan pa appong, pui pa deeh tieh feen khankix niied ti ting riang mai pui Apsalom kawx, niied ti baox haoh hun sinyek sinyek. ¹³ Pui viex sitang tix kaux hoek ka Davit ah nin, "Rhawm rhi pui Isarelax khankix hoik koe tau mai Apsalom." ¹⁴ Mawh kheu an Davit ah nin ka kawncau tix pa ot tau mai nawh ka daux veng Yerusaliem, "Yaog ti kaoh mai kieh ex to, niied yuh phai phai, phan ang mawh nan, ex ang lai boek khaing Apsalom, phan ang yuh nan, aux lhat nawh krup ex mai viex pa laux leeing hoek piang ex mai yuh veng in kha rhawm ka lawm vaig tix." ¹⁵ Mai kawncau simiang khankix deeh ah nin ka nawh, "Yix pa mawh kawncau maix tak yuh awm pa tat maix daux rhawm tix." ¹⁶ Simiang lih hu tau mai pui daux nyiex haw tix khawmuik, viang mawh nan, simiang prah moeng iak tix kao kaux, priex nyiex haw khaix tix. ¹⁷ Simiang lih hu tau mai pui tix khawmuik mai hu bang plak praix veng ka yaong Petham. ¹⁸ Khaix an kawncau nawh khankix hu ka plak sivoe nawh mai pui Kheretix pui Peletix, pui Gitix khawmuik koe liah yieh kaux, pa hawt khaix nawh khaing daux veng Gata, hu ka plak sivoe nawh. ¹⁹ Mai simiang deeh ah nin ka Itie pui Gitix, "Maix lai hawt hu tau mai yix kheu jao patix, deeh ing ot tau mai simiang khraox, mawh kheu mawh maix pui tang meung mai mawh nyo sinie pa ang koe dee ot koe. ²⁰ Phan ah tete maix tak hoek ngie kawxkawx, daux singaix aux sang pon kieh maix lailing hu jee hu blaong tau mai yix yuh ka mawx, mawh kheu ang aux nyang bax tawng dee sang hu tix, deeh ing mai viex puxaik maix khankix ing, kieh pa caux rhawm mai pa mawh meh koe tau mai maix." ²¹ Mai Itie deeh pawk lox simiang ah nin, "Awm im ju Simiang Siyiex mai awm im ju cao simiang aux, can dee ot cao simiang aux dee mawx ang ah, yum ang ah, im ang ah, kawncau maix tak ot tan tau." ²² Mawh kheu nan, Davit deeh ah nin ka Itie, "Hu sivoe heue. "Khaix an Itie pui Gitix mai pui nawh khankix khawm kawn pa iak pa ting yaog ti hu sivoe. ²³ Pui haktiex khankix yiiem sigrien sigre mai pui pa hu tau mai nawh khankix yaog ti hu, tokaux cao simiang tiang rawm klawng Kidaron mai pui khankix tiang ti hu ka daux tiag khawmuik. ²⁴ Zadok mai pui Lewix pa ot tau mai nawh khawmuik kawx, klawm teug bwan sijax mukheu Siyiex hoek mai kix tah ti deuh teug bwan sija mukheu Siyiex tan mai Abyatha kawx krox tan, tom hoek lih hu simiang khaing daux veng. ²⁵ Khaix an simiang ah nin ka Zadok, "Deeh yaog ti klawm teug bwan sijax mukheu Siyiex ing ka daux veng, phan aux pon bwanson krax pa caux rhawm plak sivoe ngai Simiang Siyiex, Nawh Cao tak deeh teei aux ing mai Nawh Cao tak jhi aux yaox teug bwan in khawm dee ot Nawh Cao." ²⁶ Viang mawh nan, phan Nawh Cao ah nin, Aux ang khaw rhawm ka maix, mawh kheu nan, aux tak ot tin, kieh Nawh Cao yuh awm pa koe alo tix piang aux." ²⁷ Nawh deeh ah nin ka cao giex kaing li Zadok, "Ang maix mawh cao jhai lie? deeh ing daux veng daux krax pa nhim tau mai kawn praix maix ra kaux, pa mawh Ahimat kawn simex cao maix mai Yawnasan kawn simex Abyatha. ²⁸ Jhak heue, Aux tak pau maix ka daux lung daux tiag, tom hoek bawg yam deeh mhong aux lox tix ceuceu khaing maix." ²⁹ Mawh kheu nan Zadok mai Abyatha deeh yaog tix klawm teug bwan sijax mukheu Siyiex ing ka veng Yerusaliem mai kix ot tan. ³⁰ Khaix an Davit tawb kaing tix mai peeik kiep tix piang gawng Sanlon mai yiiem mai can pui pa ot tau mai nawh khankix kawx tawb kaing tix ku kaux mai haok piang gawng tau mai pa yiiem yo tix. ³¹ Yam an pui tix kaux hoek krai Davit mhong ah nin, "Ahitawphelax ot ka sinax pui tieh feen tau mai Apsalom, "mai Davit ah nin, "Simiang Siyiex eue, aux rawg bwan ka Maix Cao, kieh krax keud Ahitawphelax mawh pa giex going." ³² Yam hoek Davit piang choek gawng, ka dee krub nawh ka Siyiex tan, yam an pui veng Akhit pa mawh Hushie hoik hoek rieb nawh tau mai riah sibex tix mai khawm phawng tiex piang kaing nawh. ³³ Davit ah nin, phan maix hu tau mai aux, tak mawh beeh glawm ciien ka aux. ³⁴ Mawh kheu nan maix deeh ing ka daux veng ah nin ka Apsalom, simiang eue, aux tak mawh kawncau maix, awm hoik sax mawh aux kawncau keeing maix glang ka singaix pa hoik luan, khaix an maix tak pon yuh krax keud Ahitawphelax laux leeing ka son aux. ³⁵ Zadok mai Abyatha cao giex kaing li kawx ot tau mai maix tan ang mawh lie? can ceu pa mhong maix khaing daux nyiex simiang maix tak krai ka Zadok mai Abyatha. ³⁶ Kawn simex kix ra kaux pa mawh Ahimaza kawn simex Zadok mai Yawnasan kawn simex Abyatha kawx hoik ot tau mai kix tan, can pa mhong maix kuceu maix tak kieh kiex deeh hoek ti krai ka aux." ³⁷ Mawh kheu nan, Hushie paox grawm Davit deeh ing ka daux veng mai Apsalom kawx laig daux veng Yerusaliem yam an heue.

¹ Yam hoik luan Davit khaing choek gawng ceeix, Zibax kawncau Mephibawshiet hoek rieb nawh tau mai la pa viex lhang ra mu mai nawh tang khlawp blah ra yieh khlawp mai sigleem plix siiet kroh tix yieh sigleem mai khlawp plix ruh tix yieh khlawp mai si ngiien hak rawm plix siiet tix mu. ² Mai simiang ah nin ka Zibax, "Mawh sang viex maix ti yuh tix ka in?" Zibax deeh ah nin, "La in kiex mawh sonsang brug paox nyiex simiang, khlawp blah plix ruh mawh sonsang ih pui awn ju khankix mai rawm plix siiet mawh sonsang nyaux pui pa taug mao ka daux tiag." ³ Simiang deeh ah nin, "Mawh ot cub kawn simex cao simiang maix dee mawx?" mai Zibax pawk lox ah nin, "Nawh ot ka daux veng Yerusaliem, mawh kheu nawh ah nin, daux in singaix doeh nyiex ma pui Isarelax tak deeh tawx meung haktiex keeing aux ka aux" ⁴ Mawh kheu nan, simiang deeh ah nin ka Zibax, "Mawh heue, kraung khrai cie Mephibawshiet khawmuik, tak mawh cie maix, " mai Zibax deeh ah nin, "Cao simiang aux eue, aux hoek krub ka plak sivoe maix, daux pa viex tix rhawm awn rhawm tiiem, sonsang pon aux bwanson pa caux rhawm plak sivoe maix." ⁵ Yam hoek simiang Davit ka veng Bahurim, pui tix kaux khaing doeh nyiex ma Sawlux, pa kaux Shimi kawn simex Gerax lih hoek khaing tan, tau mai lox pa jhax lawg ang jud jai. ⁶ Mai khwang Davit mai kawncau nawh khankix ka simaox, pui khankix ot plak dawm mai plak gwiex simiang khawm ra plak. ⁷ Shimi jhax lawg ah nin, "Maix mawh pa kieh nham pui jauh mai mawh pui caox lih hu heue, lih hu heue." ⁸ Simiang Siyiex hoik viex nham phimap doeh nyiex ma Sawlux hoek piang maix, ka dee pa hoik plud maix ti kwang mai Simiang Siyiex deeh ap meung haktiex in, daux tawm taix kawn simex maix Apsalom, mawh kheu mawh maix pa kieh nham pui jauh, ceu pa laux leeing hoik hoek piang maix." ⁹ Abishie kawn simex Zeruya ah nin ka Davit, "Jao pa yuh ka mawx maix lai kieh sox yum an jhax lawg ka tix?, kieh aux hu kid ti teei kaing nawh." ¹⁰ Mai simiang deeh ah nin, "Kawn simex Zeruya khan kiex eue, mawh dex dawd pax mai aux ka ceu patix?, kieh nawh jhax lawg heue, phan mawh Simiang Siyiex pa ah nin ka nawh, jhax lawg ka Davit, mawh pui mawx pa sang pon ah nin, maix hoik yuh ceu an kix kheu jao patix?" ¹¹ Davit deeh ah nin ka Abashie mai kawncau nawh khawmuik, "Jhak heue, kawn simex cao aux, hoik sawg ka ju aux, pui Binyamin in, tak sang nie lheu pon yuh ceu in mie ding, grham nawh, kieh nawh jhax lawg heue, mawh kheu Simiang Siyiex hoik tawm gumlox tix ka nawh." ¹² Kheu pa jhax lawg in singaix, ha mawh Simiang Siyiex pa sang kia ngien piang pa khaw aux rhawm tix mai tak deeh tawx pa mhawm ka aux pleue." ¹³ Yam lih Davit krax tau mai pui nawh khankix khaing tan, Shimi hawt khaix kix ka praok gawng plak sivoe nawh mai baox jhax lawg nawh mai khwang nawh ka lon simaox mai ruat phawng tiex piang nawh. ¹⁴ Yam bleeh simiang mai pui pa hu tau mai nawh ka veng Bahurim, kix kied taug mao mai laux lee tix tan heue. ¹⁵ Yam hoek Apsalom mai pui nawh khawmuik, ka veng Yerusaliem mai Ahitawphelax kawx hoek tau mai kix. ¹⁶ Yam hoek Hushie pui Akhix paox grawm Davit ka Apsalom mai Hushie ah nin ka Apsalom, "Kieh simiang lang ju, kieh simiang lang ju." ¹⁷ Mai Apsalom ah nin ka Hushie, "In mawh sijax pa yuh maix piang paox grawm tix lie? kheu jao patix maix laix ang hu tau mai paox grawm tix." ¹⁸ Mai Hushie deeh ah nin ka Apsalom, "Ang mawh, aux tak ot tau mai pui pa hoik laug Simiang Siyiex mai pui pa hoik laug pui Isarelax khawmuik mai aux tak ot mai nawh. ¹⁹ Lheu khaing an, aux tak sang yuh kaing jhaw pui mawx? mawh ang aux caw ti yuh kaing ka son kawn simex nawh lie? Awm hoik yuh aux kaing plak sivoe keeing maix mawh kheu nan, aux tak yuh kaing ka plak sivoe ngai maix." ²⁰ Khaix an Apsalom ah nin ka Ahitawphelax, "Sang caw aux ti yuh ka mawx, tawx krax keud liak." ²¹ Mai Ahitawphelax deeh ah nin ka Apsalom "Hu laig ka daux dee ot moeng iak keeing maix khankix, pa hoik prah nawh kix mawh cao pau nyiex haw, yam mhong pui Isarelax khawmuik ka yuh maix pa seeing brai keeing tix kah, khawn taix pui pa ot plak maix tak nie koe riang rao kah." ²² Mawh kheu nan, kix sum nyiex gox tix lhang ka son Apsalom piang choek nyiex haw mai Apsalom hu laig dee ot moeng iak keeing tix ka plak sivoe ngai pui Isarelax khankix. ²³ Mai krax keud pa tawx Ahitawphelax, daux yam an, awm lox pa hoik chawk pui ka Siyiex, mawh kheu nan, krax keud pa tawx Ahitawphelax, Davit mai Apsalom hoik priex ti hawt mhawm mhawm heue.

¹ Khaix an Ahitawphelax baox ah nin ka Apsalom, "Kieh aux laug pui tix mheen ra rheng kaux mai aux tak yaog ti hawt khaix Davit daux sawm in. ² Aux tak krup yam kawn taug mao nawh mai yam iak riang nawh mai yuh nawh lhat graung mai pui pa ot tau mai nawh tak to khawmuik mai aux tak pah ngie ka simiang. ³ Aux tak deeh viex pui khawmuik hoek ka maix, yam pon ex pui pa sawg maix cao simiang tix kaux an, awm hoik pon ex pui deeh hoek khawmuik, khaix an pui khawmuik tak koe krax pa yiien yawg. ⁴ Gumlox an hoik mawh pa khaw rhawm Apsalom mai khawm kwad riex ju pui Isarelax ka. ⁵ Yam an Apsalom ah nin, "Kok Hushie pui Akhix hoek kieh ex nghiet ceu pa sang ah nawh." ⁶ Yam hoik hoek Hushie ka Apsalom, nawh ah nin, "Ahitawphelax hoik tawx krax keud yuh nin, mawh sang yuh ex awm pa krai nawh lie? Phan ang mawh nan, krai cie maix." ⁷ Hushie deeh pawk ah nin ka Apsalom, "Krax keud pa tawx Ahitawphelax bawg in ang mawh pa mhawm." ⁸ Hushie deeh ah nin maix hoik tawng grawng keeing tix mai pui nawh khankix, mawh pa kied ting riang rao mai kix kied song rhawm awm krih pa hoik grai kawn ka daux tiag, keeing maix mawh pui pa yuh naing tix kaux mai ang sax pan sax it daux sinax pui khankix. ⁹ Yam in nawh kawn mox tix ka daux tiex, phan ang mawh nan, nawh tak mox tix tang dah, yam yum pui khankix tiblah phao voe, can pui pa mhong ka grawng ceu an, tak ah nin, pui pa hawt khaix Apsalom hoik som hoik nai ¹⁰ Pie pui pa koe rhawm vao rhawm kwa ang ah mai pa koe rhawm awm rhawm sivai sangsi kawx, tak lhat graung, mawh kheu pui Isarelax khawmuik tawng ka mawh keeing maix pui pa kied ting riang rao mai pui pa ot tau mai nawh khankix kawx mawh pa koe rhawm vao rhawm kwa. ¹¹ Mawh kheu nan, aux tawx krax keud ka maix, pui Isarelax khawmuik hoek ka maix jah ka veng Dan tom hoek ka veng Berashibax, kieh haoh hun awm mhaik praok rawm sigrit sigra, kaux cao maix kawx, caw ti hu ka daux naing. ¹² Mawh kheu nan, ex tak krup nawh tix dahdah, ka dee sang pon ex ti yaox nawh mai ex tak yuh naing ceep ka nawh, awm jauh rawm ciex piang tiex, tokaux cao nawh mai pui pa ot tau mai nawh tak ang lai deuk tix kaux kawx. ¹³ Phan nawh phrut tix laig ka daux veng tix veng, pui Isarelax khankix tak viex maox hoek ka daux veng an mai ex tak sileed ka veng an laig ka daux rawm klawng, tom ang lon simaox lai deuk pie tix lon kawx khaing tan." ¹⁴ Apsalom mai pui Isarelax khawmuik ah nin, "Krax keud sawn pa tawx Hushie pui Akhix lheu mhawm khaing krax keud Ahitawphelax, "mawh kheu Simiang Siyiex sang kieh krax laux leeing hoek piang Apsalom mai yuh krax keud pa tawx Ahitawphelax mawh pa som nai. ¹⁵ Hushie ah nin ka Zadok mai Abyatha cao giex kaing li, "Ahitawphelax hoik tawx krax keud ka Apsalom mai ka kwad song pui Isarelax, awm an aux deeh baox tawx krax keud ka nawh. ¹⁶ Mawh kheu nan, niied ploi pui hu krai ka Davit ah nin, daux sawm in paw lai ot daux lung daux tiag, niied ti to hu ka plak toi an, phan ang mawh nan, simiang mai khawm pui pa ot tau mai nawh, krax yum tak bleet ka kix khawmuik" ¹⁷ Yawnasan mai Ahimat ot ka daux yaong Enrawgelax, kheu ang rhawm kieh pui yaox yam laig tix daux veng, mawh kheu nan, kawncau bun tix kaux hoek ti krai grawng kuceu ka kix mai kix deeh krai lox an ka Davit. ¹⁸ Viang mawh nan, kawn nyawm tix kaux hoik yaox ka kiex mai nawh deeh hu krai grawng an ka Apsalom, kiex khawm ra niied ti hu khaing tan mai hoek ka veng Bahurim daux nyiex pui pa koe rawm daux ka brawk nyiex mai kiex laig mox tix daux rawm daux an. ¹⁹ Bun cao nyiex teei dawb tawb mai tawb piang moing rawm daux mai nawh hok nghox piang, ang koe pui tawng tix kaux kawx. ²⁰ Yam hoek kawncau Apsalom ka daux nyiex bun an kix ah nin, "Ot Ahimat mai Yawnasan dee mawx, "bun an deeh ah nin ka kix, "Kiex hoik tiang toi klawng, "yam sawg kix ka kiex mai ang yaox, kix deeh ing ka veng Yerusaliem. ²¹ Mai khaix hoik lih hu kix khaing tan, Ahimat mai Yawnasan deeh lih khaing daux rawm daux mai kiex hu krai grawng an ka simiang Davit ah nin, "Yaog ti kaoh mai niied tix tiang plak toi rawm, mawh kheu Ahitawphelax hoik tawx krax keud pa deeh tieh feen ka son maix." ²² Mawh kheu nan, Davit mai pui nawh khawmuik, yaog ti kaoh mai tiang hu toi rawm klawng Yawdan mai yam hoik bah riang praix ponngawb, pui pa ang nyang bax tiang toi rawm klawng Yawdan, ang lai deuk tix kaux kawx. ²³ Yam hoik yaox Ahitawphelax ka ang kix lai hawt ti yuh awm krax keud pa hoik tawx tix, nawh sau an brug tix piang la mai yaog ti ing ka daux veng ot tix ka nyiex cao tix, khaix hoik khre rien nawh kuceu son pui daux nyiex ma tix mai nawh rawd ngawg tix yum ka maox mai kix sipaung nawh ka daux simeeig keeing nawh. ²⁴ Yam bleeh Davit ka veng Mahanem, Apsalom tau mai Isarelax kawx tiang hu plak toi rawm klawng Yawdan. ²⁵ Apsalom yaog Amasa plud tix mawh cao kaing naing ting daux cub kru naing nawh tang Yuabax, Amasa mawh kawn simex Yetara pui Ishamelax pa hoik teei ti moeng Abigelax, kawn bun Nahat pux o Zeruya miex Yuabax. ²⁶ Mawh kheu nan, pui Isarelax mai Apsalom hoik bang ti ot ka daux haktiex Gilat. ²⁷ Yam bleeh Davit ka veng Mahanem, Shawbi kawn simex Nahat pui veng Rabax pui Amon mai Makhirax kawn simex Amelax pui veng Lawdebax mai Bazilie pui Gilat khaing veng Rawgelim khankix, ²⁸ hoik viex kraung it kraung tawm mai tawg klong, aw tiex, gaox nghox ca mai gaox nghox koi mai phawng blah mai gaox diag mai ceem, ceem raoh mai ceem pa hoik diag khankix, ²⁹ Rawm hia mai bee rawm teeih pa klon, yung mai khlawp rawm teeih, hoek ka Davit mai pui pa ot tau mai nawh ih ka mai kix ah nin, "Pui khankix hoik cai rhawm mai hoik taug mao mai sang nyaux nie rawm ka daux tiag heue."

¹ Davit simin pui pa ot tau mai tix mai yaog cao kaing naing khankix pa kwang piang pui tix rheng kaux mai cao kaing naing piang pui tix yieh kaux. ² Khaix an Davit ploi cub pui khankix lih hu loe cub, tix cub ot greem tawm tai Yuabax mai an tix cub ot greem Abashie kawn simex Zeruya pux Yuabax mai tix cub ot greem Itie ceu pui Gitix mai simiang ah nin ka pui khankix, "Tokaux aux tak hu tau mai pex." ³ Viang mawh nan cub pui hun deeh ah nin, "Tokaux cao maix tak ang pon ti lih hu, mawh kheu phan yix yaox ti to, kix ang deuh yix koe ceu mai phan yix yum tix plak kawx, kix ka ang nyang deuh koe ceu, viang mawh nan, tokaux maix nie lheu ngawh khaing yix tix mheen kaux, mawh kheu nan, phan maix ot ka daux veng khaix yix mai tawx krax teem ka son yix lheu mhawm." ⁴ Simiang deeh ah nin ka kix, "Can pa yaox pex mawh pa mhawm, aux tak hawt ti yuh, "mawh kheu nan, simiang cung praok siviex veng mai cub pui kaing yieh mai cub pui kaing rheng li hu. ⁵ Simiang tawm lox ka Yuabax mai Abishie, Itie ah nin, "Viex rhawm vieh va ka kawn simex aux Apsalom, tau mai pa jhak tix pakngai aux. "Pui khankix mhong yam tawm simiang lox ka cub cao kaing naing khankix, son grawng Apsalom. ⁶ Pui khankix lih hu sonsang puing naing ka pui Isarelax mai kix sipub tix puing paox tix ka daux tiag daux nong Epharem. ⁷ Pui Isarelax khankix hoik som ka plak sivoe kawncau Davit, krax pa pah yum hoik kied ting ka daux singaix an mai can pui pa yum baoh tan koe ra mheen kaux. ⁸ Naing hoik tah hu ka baoh haktiex an ku daog diem, pui pa yum daux tiag singaix an nie lheu khaing pui pa yum ka lawm vaig khankix. ⁹ Apsalom sipub ka cub kawncau Davit, yam an Apsalom brug law cie tix to mai law an laig ka greem kak khaox piak van ting mai kaing nawh sighap tix sinax kak khaox, khaix hoik to law brug nawh khaing nawh, nawh teuk teue tix dee lhaong tan. ¹⁰ Pui tix kaux hoek ti yaox ka nawh mai deeh hu krai ka Yuabax ah nin, "Aux taug yaox Apsalom teuk teue tix piang khaox piak van ting tan." ¹¹ Yuabax ah nin ka pui pa hoek ti krai an ka nawh, "Mawh rug yaox maix nawh tete lie? yuh ka mawx maix lai ang blung nawh cod piang tiex, phan maix yuh nan, aux tak sang tawx maix cie mau kao shekhe mai maox rawd nyoi." ¹² Pui an deeh ah nin ka Yuabax, "Viang aux yaox ti rieb mau tix rheng shekhe khaing daux taix maix kawx, aux tak ang pon tawx taix tix ka kawn simex simiang, mawh kheu hoik mhong ex lox tawm simiang ka maix mai ka Abishie mai Itie ah nin, viex rhawm vieh va piang kawn simex aux Apsalom tau mai jhak tix pakngai aux awx, ¹³ phan aux yuh nan, aux tak awm pui tawb kheem mai hoek krax som ju, mawh kheu ceu pa glip khaing simiang ang koe tix ceu kawx maix mai aux kawx tak mawh pui koeng ka paox tix." ¹⁴ Yuabax ah nin, "Aux ang lai gla bawg yam tom rheung tau mai maix, " mai nawh teei pliah loe giang mai hu blung sok rhawm Apsalom, yam kawn im nawh sinax kak khaox piak van. ¹⁵ Pui awn ju kao kaux, pa klawm kraung naing ceep Yuabax khankix, vung viang ka Apsalom mai pah nawh yum. ¹⁶ Yuabax phlu teettawng mai tiebtie ka kix, mawh kheu nan, pui naing deeh ing khaing hawt pheet tix pui Isarelax. ¹⁷ Mai kix teei tokaux yum Apsalom, hu tik ka daux o pa ting, pa koe ka daux nong mai pum simaox piang simeeig nawh, pui Isarelax kawx deeh to ti ing ka nyiex gox tix ku kaux. ¹⁸ Yam kawn im ju Apsalom, nawh sum rong simaox tix mu, son cao tix ka daux ngawd simiang tan, mawh kheu nawh hoik ah nin, "Aux ang koe kawn simex tix kaux kawx, sonsang plud tix doh keud ka aux, " nawh kok rong simaox an awm ceu kaux cao tix, tom hoek in singaix hoik kok mawh rong simaox Apsalom ka heue. ¹⁹ Ahimat kawn simex Zadok ah nin, "Kieh aux to ti ing krai grawng ka simiang, grawng hoik pawk Simiang Siyiex bix ka pui koeng nawh khankix." ²⁰ Yuabax deeh ah nin ka nawh, "Maix ang pon ti viex satang in ing daux in singaix, kheu jao mawh ngaix yum kawn simiang, viang mawh nan maix tak pon ti viex grawng satang in singaix tang ngaix." ²¹ Yuabax ah nin ka Kushi, "Hu heue, ing krai grawng pa hoik yaox maix ka simiang, " mai Kushi ngeuh kaing tix ka Yuabax mai to hu. ²² Ahimat kawn simex Zadok baox ah nin ka Yuabax, "Viang yuh ka mawx kawx, kieh aux baox to hawt khaix Kushi, " Yuabax ah nin, "Kawn simex eue maix ang tie koe satang grawng pa koe bwanson tix sang krai maix lai sang to yuh ka mawx?" ²³ Mai Ahimat ah nin, "Viang yuh ka mawx kawx, ca kieh aux to hu liak, " Yuabax ah nin ka nawh, "To ti hu heue, " khaix an Ahimat kawx to ti hu krax daux lung mai luan khaing Kushi. ²⁴ Davit ngawm sinax diang siviex veng ra mu mai cao pau veng haok piang braux nyiex pau veng piang guh veng, yam yaog nawh ti jhak nawh yaox ka to pui tix hoek tix kaux. ²⁵ Cao pau veng yo mai krai ka simiang mai simiang ah nin, "Phan nawh mawh tix kaux khaing nawh tee mawh pa viex grawng satang tix ceuceu, " nawh hoik nie hoek dex phao. ²⁶ Khaix an cao pau veng baox yaox ka to pui tang kaux tix kaux ti hoek mai cao pau veng yo ti krai ka cao pau siviex veng ah nin, "Pui tang kaux tix kaux baox to tix hoek, " mai simiang deeh ah nin, "Nawh kawx baox mawh pa viex satang hoek." ²⁷ Mai cao pau veng an ah nin, "Aux keud pui pa to tix hoek phao voe an sang mawh Ahimat kawn simex Zadok, " mai simiang ah nin, "Nawh mawh pui mhawm mai nawh tak hoek tau mai grawng lox satang ceu pa mhawm." ²⁸ Mai Ahimat kok yo ah nin ka simiang, "Kieh nyawm ot, " khaix nawh gup pakngai tix piang tiex plak sivoe simiang ah nin, "Kieh pa yaogyaw bwanson koe ka Simiang Siyiex maix, pa hoik ap pui pa yaog plawng taix tix ka maix mai pa tieh feen ka simiang aux." ²⁹ Mai simiang ah nin, "Mawh kawn klawt kawn simex awn ju aux Apsalom nang lie?" Ahimat deeh pawk ah nin, "Yam ploi cao kaing naing Yuabax aux hoek ka maix, aux yaox sinum lawh lox pa kied ting, viang mawh nan, aux ang kriem tawng mawh grawng ceu patix." ³⁰ Mai simiang deeh ah nin, "Greed maix cung ti ot tin, " mai nawh greed tix cung tan. ³¹ Khaix an tivud Kushi hoek bleeh ah nin, "Cao Simiang aux eue, koe satang ceu pa mhawm, mawh kheu Simiang Siyiex hoik pawk bix maix ka daux singaix in, ka pui khankix pa yaog ti kaoh mai tieh feen ka maix." ³² Mai simiang ah nin ka Kushi, "Mawh kawn klawd kawn simex awn ju aux Apsalom nang lie?, " Kushi pawk ah nin, "Kieh pui koeng cao simiang aux khankix mai can pui pa yaog ti kaoh tieh feen mai pa yuh krax kha rhawm ka maix, awm pa yaox kawn nyawm simex awn ju maix." ³³ Khaix an simiang kied koe krax pa saik rhawm mai nawh haok daux lawg pa koe piang guh veng ka see daux diang siviex mai yiiem ah nin, "Kawn simex aux Apsalom eue, kawn simex, kawn simex aux Apsalom eue, aux mie ti mawh pa yum tang maix, kawn simex aux Apsalom, kawn simex aux eue mai nawh yiiem sigrien sigre tan heue."

¹ Mai kix deeh krai grawng an ka Yuabax ah nin, "Jhak heue, simiang hoik kied yiiem doe mai hoik kied khrup rhawm ka son Apsalom." ² Mawh kheu nan, grawng pa pex kix naing daux singaix an, hoik deeh tieh ti mawh pa khrup rhawm ka son pui khawmuik, mawh kheu pui hoik mhong grawng kied laux rhawm simiang son kawn simex tix daux singaix an. ³ Daux singaix an pui khankix briex mox ti ing daux veng awm pui pa koe krax kaig tua pa hoik mox tix to khaing daux bing naing. ⁴ Simiang hoik tawb ngai baoh tix mai riag yo ti yiiem lox kied ting sigrien sigre, "Kawn simex aux Apsalom eue, Apsalom eue, kawn simex aux eue." ⁵ Yuabax laig ka daux nyiex simiang ah nin, "Ka daux in singaix maix hoik kieh kawncau tix khankix, pa hoik taoh ju maix mai ju kawn simex kawn bun maix mai khawm ju moeng maix kaig tua, ⁶ maix kawn ca moh ka pui pa koeng ka tix mai deeh tieh tix koeng ka pui pa moh ka tix khankix, mawh kheu maix hoik krai pao grawng ang maix lai keud son grawng cao kaing naing mai son kawncau tix daux singaix, aux hoik tawng grawng ceu in phao, phan Apsalom kawn im ju mai phan yix hoik mawh pa yum khawmuik daux in singaix, grawng ceu an tak sang mawh pa kieh maix nyawm rhawm ka. ⁷ Mawh kheu nan, yam in yaog ti kaoh mai hu tawx lox nyawm rhawm ka kawncau maix khankix liak, mawh kheu aux hoik tiextu ka Simiang Siyiex, phan maix ang hu, pui tix kaux kawx tak ang lai ot tau mai maix sawm in, "Mai an tak nie lheu mawh pa caox ka son maix khaing can pa caox caig pa hoik sax yaox maix ti kham jah tom awn ju maix tom hoek yam in." ⁸ Khaix an simiang yaog ti kaoh mai ngawm ka diang siviex veng, yam mhong kix grawng ngawm simiang ka diang siviex veng tan, mawh kheu pui khankix hoek ka plak sivoe simiang khawmuik mai pui Isarelax hoik tang to ti hu ka nyiex gox cao tix ku kaux. ⁹ Ka daux cub doeh pui Isarelax hoik thung thiang paox ti ah nin, "Simiang hoik taoh ex khaing daux tawm taix pui koeng ex mai hoik kieh ex luad luan khaing daux tawm taix pui Philitix khankix mai yam in nawh hoik deeh yaox ti to khaing daux haktiex cao tix jao Apsalom. ¹⁰ Apsalom mawh pui pa hoik groi ex bee piang mai pa hoik yaog ex nawh mawh simiang piang tix, hoik yum ka daux naing, yuh ka mawx pex lai ang ah grawng pa sang deeh viex ex simiang ing." ¹¹ Simiang Davit ploi pui hu ah nin ka cao giex kaing li Zadok mai Abiata, "Pax krai ka kwad song pui Yudax ah nin, yuh ka mawx pex lai tuk bawg yam, sonsang deeh viex simiang ing ka nyiex cao nawh, lox krai pui Isarelax khankix hoek bleeh ka simiang khawm ka nyiex haw nawh. ¹² Pex mawh puxaik aux, mawh si-ang aux mai nex nham aux, yuh ka mawx pex lai kawn ca tuk bawg yam tom rheung sonsang deeh viex simiang ing, ¹³ mai kieh ah nin ka Amasa, "Ang maix mawh si-ang aux mai nex nham aux lie? phan maix ang yaox ti mawh cao kaing naing ting pa plud Yuabax daux cub kru naing aux ka plak sivoe aux, kieh Siyiex yuh ceu pa nie lheu khaing an piang aux." ¹⁴ Mawh kheu nan, Davit hoik kieh pui Yudax khawmuik khaw rhawm awm rhawm pui tix kaux, kix ploi pui hu krai lox in ka simiang, "Sonsang deeh ing maix mai khawm kawncau maix khawmuik." ¹⁵ Simiang deeh ing mai hoek ka rawm klawng Yawdan mai pui Yudax hoek ka veng Gilagalax, sonsang rieb ti simiang mai viex nawh tiang rawm klawng Yawdan. ¹⁶ Mai Shimi kawn simex Gerax pui Binyamin, pa kaoh khaing veng Bihurim niied ti lih hoek tau mai pui Yudax, sonsang rieb ti ka simiang Davit. ¹⁷ Pui Binyamin khankix hoek tau mai nawh tix rheng kaux, khawm Zibax kawncau daux nyiex ma Sawlux mai khawm kawn simex nawh kao phwan kaux, khawm kawncau nawh khankix tixnga kaux, hoek tau mai nawh yam an, kix tiang ti hu ka plak toi rawm klawng Yawdan sivoe simiang. ¹⁸ Kix vai reu tiang ti hu sonsang tang kix cub kawn nyiex ma simiang khankix hoek mai sonsang priex rien ka kix mhawm mhawm. Shimi kawn simex Gerax hoek grux ngawng tix ka plak sivoe simiang, yam tiang nawh rawm klawng Yawdan. ¹⁹ Nawh ah nin ka simiang, "Paw nyang kieh simiang aux deuh phimap ka aux liak, mai paw lai keud ka grawng pa lud loe kawncau maix ka daux singaix, yam lih hu cao simiang aux khaing daux veng Yerusaliem mai paw lai een grawng ceu an daux rhawm tix. ²⁰ Aux pa mawh kawncau maix hoik tawng ka hoik yuh tix phimap, jhak heue, aux mawh pa hoek sivoe paox tix ka daux in singaix khaing daux pao nyiex pui Yosiep, sonsang hoek rieb ti ka simiang." ²¹ Yam an Abishie kawn simex Zeruya deeh pawk ah nin, "Shimi caw tix yum kheu jao hoik jhax lawg nawh ka simiang pa hoik groi Simiang Siyiex bee piang ang mawh lie?" ²² Mai Davit deeh ah nin, "Kawn simex Zeruya khankix eue, aux hoik yuh ceu tix ka pax, sonsang deeh mawh pax pui koeng ka aux daux in singaix lie? Mawh sang yaox pui Isarelax ti yum tix kaux kaux daux in singaix lie?, mawh ang aux tawng hoik mawh tix simiang piang pui Isarelax daux in singaix lie?" ²³ Simiang deeh ah nin ka Shimi, "Maix tak ang pon ti yum, " mai simiang hoik tiextu tix ka nawh. ²⁴ Mephibawshiet kawn saux Sawlux hoek ti rieb ka simiang, nawh ang khoek caong tix, ang khlao hauk jheeh tix mai ang sidaux kraung ceep tix, jah singaix lih hu simiang, tom deeh hoek simiang ka daux krax pa nhim. ²⁵ Yam hoek rieb Mephibawshiet ka simiang daux veng Yerusaliem, simiang chawk ka nawh ah nin, "Jao patix maix ang hu tau mai aux?" ²⁶ Mai nawh deeh pawk ah nin, "Cao simiang aux eue, aux mawh pa laux caong, "Aux keud sang sau an brug son tix mai hawt khaix simiang, kawncau aux hoik pie lhen ka aux. ²⁷ Mai nawh hoik coh lox ka cao simiang grawng kawncau maix, viang mawh nan, simiang aux mawh pa awm kawncau Siyiex, mawh kheu nan yuh awm pa koe rhawm maix. ²⁸ Mawh kheu paox nyiex keeing aux khankix, hoik mawh pa keung tix yum ka plak sivoe cao simiang aux, viang mawh nan maix hoik deuh kawncau maix ka daux sinax can pui pa ih priex piang pheen sawm tokaux cao maix, aux kawn sang koe akhwang tix baox rawg ceu patix, ka daux pa yiien tix sivoe simiang yuh ka mawx?" ²⁹ Mai simiang deeh ah nin ka nawh, "Maix deeh baox krai grawng cao ti yuh ka mawx? Aux hoik tat ah nin maix mai Zibax tak gwieh tix cie haktiex." ³⁰ Khaix an, Mephibawshiet deeh ah nin ka simiang, kieh nawh teei ti cie ankix khawmuik, kheu hoik deeh hoek cao simiang aux ka daux krax pa nhim rhawm ka nyiex ma cao tix." ³¹ Mai Bazilie pui haktiex Gilat lih hoek khaing veng Rawgelim sonsang tawx nawh simiang tiang rawm klawng Yawdan. ³² Bazilie mawh pui pa kied kuad tix kaux mai ju nawh koe tixdaix num, nawh hoik yuh ti tawx pa ih ka simiang glang yam ot nawh ka daux veng Mahanem, kheu mawh nawh pui pa kied mi. ³³ Simiang ah nin ka Bazilie, "Tiang ti hu tau mai aux, aux tak khre rien pa ih ka son maix, glang yam kawn ot maix ka daux veng Yerusaliem tau mai aux heue." ³⁴ Viang mawh nan, Bazilie hoik deeh ah nin ka simiang, "Aux tak sang pon ti im ju miex ding, sonsang khaw aux ti hu tau mai simiang ka veng Yerusalie lie?" ³⁵ "Ju aux hoik koe tixdaix num daux in singaix heue. Mawh kawn sang chix gwieh aux ti tawng ka ceu pa mhawm mai ceu pa caox lie? Mawh kawn sang cim kawncau maix ka ceu pa ih tix khankix mai khawm ceu pa nyaux tix khankix lie? Mawh kawn sang chix mhong aux lox lai rhax pa ah cub kawn bun khankix rheung been miex ding lie? Khaix an, aux tak sang kieh kawncau maix khankix deeh koe beeh glawm pa ciien tix ceu, tom rheung bawg yam ka son cao simiang aux yuh ka mawx lie? ³⁶ Kawncau maix tak sang tiang ti hu ka plak toi rawm klawng Yawdan tau mai simiang ceeix ngie mai simiang chix sang deeh tawx totaix ceu in ka aux yuh ka mawx lie? ³⁷ Yuh bwanson deeh kieh kawncau maix ing, sonsang pon aux ti deeh ing yum ka daux veng tokaux cao tix mai deeh kieh aux mawh pa sipaung tokaux yum tix hawt simeeig keeing aux khankix heue, viang mawh nan, in mawh kawncau maix Khimaham awx, kieh nawh tiang ti hu tau mai simiang mai yuh ti tawx pa yaox maix mawh ceu pa mhawm son nawh liak." ³⁸ Mai simiang deeh pawk lox ah nin, "Khimaham tak mawh pa tiang ti hu tau mai aux mai aux tak yuh tix tawx ceu pa lo nawh khankix, awm pa yaox aux mawh pa mhawm ka son maix heue. Yam in, can ceu pa hoik khyox khaw maix ti mhaing ka aux khankix, aux tak yuh tix tawx son maix heue." ³⁹ Khaix an, pui khankix hoik tiang ti hu khawmuik ka plak toi rawm klawng Yawdan daux bawg yam an heue. Yam hoik tiang simiang ti hu ka plak toi an, simiang hoik kawm tix ngheet ka Bazilie mai nawb bwan piang nawh mai nawh deeh ing ka dee ot cao tix heue. ⁴⁰ Yam in, simiang hu ka veng Gilagalax mai Khimaham hoik hawt hu tau mai nawh heue. Pui Yudax khankix khawmuik hoik hu tawx simiang tau mai pui Isarelax khankix tix plak heue. ⁴¹ Khaix an, pui Isarelax khankix khawmuik, hoek ka simiang ah nin nawh, puxaik ex pui Yudax khankix hoik briex maix hu dee singai mai hoik deeh viex simiang khawm pao nyiex maix khankix mai khawm pui Davit khankix khawmuik, pa ot tau mai simiang khankix tiang toi rawm klawng Yawdan, kheu jao pa yuh ka mawx lie? ⁴² Mawh kheu nan, pui Yudax khawmuik deeh pawk lox ka pui Isarelax ah nin, "Grawh grawng nawh, simiang mawh paox nyiex pa kied dex mai yix heue. Khaix an, pex chix koe krax pa song rhawm piang kix kheu jao pa yuh ka mawx lie? Khex hoik ih yix pa ih cie simiang lie? Phan ang mawh nan, khex hoik tawx simiang totaix tix ceuceu ka yix lie?" ⁴³ Pui Isarelax deeh pawk lox ka pui Yudax ah nin, "Yix hoik koe krax pa dex tau ka simiang kao son, mawh kheu nan, yix hoik baox nie lheu koe krax pa dex ka Davit khaing pex heue. Kheu pex hoik yuh ti koe lox pa sibriem piang yix mai ang hoik mawh yix pa jah ti tawx grawng keud grawng gau, sonsang deeh viex yix simiang ti ing lie?" Viang mawh nan, gumlox ah pui Yudax khankix hoik nie riex khaing gumlox ah pui Isarelax khankix heue.

¹ Mai krax tieh krax feen khankix hoik lih ti koe tan mai ceu kaux pui pa tieh feen an, hoik mawh Shebax, pa mawh kawn simex Bikharix mai pa mawh ceu pui Binyamin tix kaux heue. Mai nawh phlu teettawng ah nin, "Ceu pui Isarelax khankix eue, Ex ang koe nyum pa sang pon tix ceu kawx khaing Davit mai ex ang koe sinngao pa sang pon tix khaing ka daux kawn simex Yessie, " pui ku kaux tang deeh ing ka nyiex cao tix heue. ² Mawh kheu nan, pui Isarelax khankix ku kaux hoik prah ka Davit mai kix deeh hawt hu khaix Shebax pa mawh kawn simex Bikharix, viang mawh nan, jah khaing hawt rawm klawng Yawdan tom hoek ka dee singai ka veng Yerusaliem, pui Yudax khankix kawn hawt ti ot ka daux krax pa kaux sijax tix tau mai simiang kix. ³ Yam in, Davit hoik hoek ka nyiex cao tix ka daux veng Yerusaliem tan mai simiang hoik teei bun an khankix kao kaux pa mawh moeng iak nawh, pa hoik prah nawh kix priex rien ka nyiex haw, pa hoik laung ti deuh kix ka daux lawg nyiex haw mai tawx pa ih ka kix, viang mawh nan, nawh ang sax dex dawd mai kix heue. Mawh kheu nan, kix hoik mawh pa laung tix ka daux kawg awm miexmai tom hoek bawg yam singaix yum kix heue. ⁴ Khaix an, simiang ah nin ka Amasa, "Kraix khrawm ti priex pui Yudax khankix ka son aux, daux loe singaix in mai deeh hoek tin khawm tokaux cao maix heue." ⁵ Mawh kheu nan, Amasa, hoik lih hu ti kraix khrawm pui Yudax khankix, viang mawh nan, nawh hoik nie lheu tuk bawg yam khaing krax pa hoik tat Davit ti deuh ka son nawh. ⁶ Mai Davit baox deeh ah nin ka Abishie, "Yam in, Shebax pa mawh kawn simex Bikharix tak yuh krax pa kha rhawm ka ex mai an tak mawh pa nie lheu khaing krax pa yuh Apsalom piang ex heue. Kok kawncau mau soi simiang maix khankix mai nied ti hawt khaix nawh, phan ang mawh nan, nawh tak yaox veng pa kaux cong khankix son tokaux cao nawh mai nawh tak pon ti luad luan klawd khaing daux tawm taix ex." ⁷ Mawh kheu nan, cub pui Yuabax khankix tau mai cub pui Kheretix mai khawm cub pui Peletix mai khawm cub pui pa kied ting riang rao an khankix, hoik lih hu ti hawt khaix nawh khawmuik mai kix hoik lih hu khaing veng Yerusaliem, sonsang hawt pheet tix ka Shebax pa mawh kawn simex Bikharix. ⁸ Yam hoik hoek kix ka rang ting pa koe ka daux veng Gibun, Amasa hoik pon ti hoek sivoe kix tan. Yam in, Yuabax hoik ceep kraung naing tix mai nawh baox deeh rawd maox nyoi ti nyaing ka piang an tau mai vaig tix kre pa kawn koe kaux phak vaig tix mai an mawh pa hoik phyawk nawh ti deuh ka nyoi tix mai yam lih hu nawh vaig an hoik cod. ⁹ Khaix an, Yuabax deeh ah nin ka Amasa, "Pux aux eue, mawh nyawm ot maix lie?" Mai Yuabax jhawp ka hauk jheeh Amasa ka taix khan dawm tix, sonsang ngheet tix ka nawh. ¹⁰ Viang mawh nan, Amasa ang tawng tix rien tix ka vaig pa koe ka daux taix khawn gwiex Yuabax yam an, mai nawh suat tu Amasa ka vaig an mai kraung vaig nawh khankix hoik glhua tix lih piang tiex, nawh ang lai baox suat kawx, Amasa hoik yum tan heue. Khaix an, Yuabax mai pux nawh Abishie hoik nied tix hawt khaix Shebax, pa mawh kawn simex Bikharix. ¹¹ Glang daux bawg yam an, pui Yuabax tix kaux cung hawt dex Amasa ah nin, "Can pui pa koe rhawm ka Yuabax mai can pui pa koe rhawm ka Davit khankix, kieh nawh hawt ti hu khaix Yuabax heue." ¹² Viang mawh nan, Amasa hoik lulieh tix ka daux nham tix piang sigreung krax ting mai yam hoik yaox kaw an ka hoik cung pui khankix ti ot tan khawmuik, nawh gah ti tik tokaux yum Amasa khaing daux greung krax mai hu tik nawh ka daux kaung mai hoik kheem kraung ceep tix pheen piang tokaux yum nawh tan kheu hoik yaox nawh ka hoik hoek pui ku kaux ti cung ti jhak nawh. ¹³ Yam hoik gah kix tokaux yum khaing sigreung krax ting, pui khankix khawmuik hoik deeh lih hu ti hawt khaix Yuabax sonsang deeh pon hawt pheet kix ka Shebax pa mawh kawn simex Bikharix. ¹⁴ Mai Yuabax hoik lailing ti hu ka sinax doeh ceu pui Isarelax khankix khawmuik, tom hoek ka veng Abilax, pa koe ka daux haktiex Pietmakha mai kix deeh hoek ka dee khrawm paox tix tau mai kix deeh baox hu hawt khaix Shebax. ¹⁵ Khaix an, kix hoik hoek baoh tan mai kix hoik lai lawm ka Shebax pa hoik bang ti ot daux veng Abelax, pa koe ka daux haktiex Bietmakha tan mai kix hoik kaong tix pum tiex khankix hawt praok guh veng mai pum tiex ankix hoik pon jung tix, ti lhaong awm krax pa tiebtie son kix. Pui khankix khawmuik pa hoik ot tau mai Yuabax, hoik deeh preeng ti hu hawt dee dex guh veng, sonsang yieh kix ti tik guh veng an khankix grhup. ¹⁶ Khaix an, bun pa koe pingnya cuyi ti kaux, hoik riag yo lox tix lih khaing daux veng ah nin, "Nghiet heue, Nghiet heue, yuh bwanson deeh ing ah nin ka Yuabax, hoek dex aux, sonsang pon aux ti sikah tau mai nawh." ¹⁷ Yam hoik hoek Yuabax hawt dex nawh, bun an hoik deeh ah nin, "Mawh maix Yuabax lie? Nawh deeh pawk lox ah nin, "Mawh aux heue, "Khaix an, bun an baox deeh ah nin ka nawh, "Nghiet ka gumlox sikah kawncau bun maix liak, " mai Yuabax deeh pawk ti ah nin, "Aux nghiet nawh daux yam in heue." ¹⁸ Khaix an, bun an deeh krai lox ah nin, "Awm hoik koe lox lai been ah nin, kieh kix hu chawk cheng ka daux veng Abilax, khaix an, kix tak pon prawng ka kaing patix heue." ¹⁹ "Aux mawh pui pa viex krax pa nhim mai khawm krax pa kaux sijax, ka daux ceu pui Isarelax khankix maix sawg ti sang yuh krax laux leeing ka veng in tix veng ka miex ceu pui Isarelax khankix tix kaux maix tak sang bleet ti ih sinngao cie Simiang Siyiex kheu jao grawng ceu patix lie?" ²⁰ Mai Yuabax deeh pawk lox ah nin, "Kieh ceu inkix mawh pa singai hu khaing aux, sonsang bleeh aux ti ih ceu inkix mai sonsang yaox aux ti yuh krax pa laux leeing inkix heue." ²¹ Ang mawh awm an, viang mawh nan, pui tix kaux khaing piang gawng Epharem khankix, pa kok ceu kaux mawh Shebax pa mawh kawn simex Bikharix, hoik deeh yaog riang plawng taix tix, ka simiang mai nawh hoik yuh krax pa deeh tieh feen ka Davit, ap ti tawx ngie nawh ka aux mai aux tak deeh lih hu khaing veng in." Mai bun an deeh ah nin ka Yuabax, "Pau ti jhak heue, Kaing nawh tak mawh pa taing ti tawx ka maix khaing piang guh veng heue." ²² Khaix an, awm hoik koe pingnya cuyi nawh, bun an hoik deeh hu ka cub pui hun mai kix kid ti teei kaing Shebax pa mawh kawn simex Bikharix mai taing ti tawx ka Yuabax. Khaix an, Yuabax deeh phlu teettawng mai kix deeh ing khaing veng an, pui ku kaux hoik deeh ing ka nyiex gox cao tix, mawh kheu nan, Yuabax hoik deeh ing ka simiang daux veng Yerusalie heue. ²³ Mai Yuabax hoik mawh cao kaing naing ting piang cub kru naing ceu pui Isarelax khawmuik, Benayax pa mawh kawn simex Yehawdax, hoik mawh cao kaing pa kwang piang ceu pui Kheretix mai khawm piang ceu pui Peletix khankix, ²⁴ Adawram hoik mawh cao kaing pa kwang ti koh keen khankix, Jehawshaphat pa mawh kawn simex Ahilut, hoik mawh cao kaing pa priex carang khankix, ²⁵ Shevan hoik mawh cao pa tiiem lai, Zadok mai Abitax hoik mawh cao giex kaing li, ²⁶ mai Irax pa mawh pui veng Ya-irax, hoik mawh cao kaing pa kwang ka greem Davit heue.

¹ Sibhawm praix sidiiet tix loe num glang yam kwang Davit ka haktiex, Davit chawk grawng ceu an ka Simiang Siyiex mai Simiang Siyiex deeh pawk ka nawh ah nin, "An hoik lih ti koe kheu jao Sawlux mai kheu jao paox nyiex pa hoik kieh nham pui jauh, mawh kheu hoik pah nawh ka pui veng Gibeon khankix." ² Simiang kok ka pui veng Gibeon mai sikah tau mai kix, pui Gibeon khankix ang mawh kawn praix pui Isarelax, viang mawh nan, kix mawh cub pui pa kawn deuk khaing pui Amawrix mai pui Isarelax khankix hoik yuh sijax sonsang priex rien ka kix, viang mawh nan, Sawlux sawg ti pah kix, ka daux pa koe rhawm nawh ti yuh, son pui Isarelax mai ka son pui Yudax khankix. ³ Mawh kheu nan, Davit deeh ah nin ka pui Gibeon an khankix, "Aux tak yuh ceu patix ka son pex mai aux tak yaox ti yuh pa khyox khaw phimap ceu patix, sonsang pon pex ti deeh nawb bwan piang sinngao cie Simiang Siyiex." ⁴ Pui Gibeon khankix deeh ah nin ka nawh, "Yix ang mhaing mau ang ah, khri ang ah, khaing sinngao paox nyiex Sawlux khankix maix tak ang pon ti pah pui tix kaux kawx, khaing daux pui Isarelax khankix ka son yix." ⁵ Kix deeh pawk ah nin ka simiang, "Pui pa hoik yuh krax laux leeing piang yix mai pa hoik yuh krax pa kha rhawm piang yix, son ang yix lai yaox ti ot daux haktiex kwang pui Isarelax tix dah kawx, ⁶ kieh maix ap doeh ru nawh pa mawh kawn simex aliah kaux ka yix liak, yix tak sang teuk teue kix yum plak sivoe Simiang Siyiex, daux veng Gebiah pa mawh veng ot Sawlux, pa hoik laug Simiang Siyiex ti deuh, " mai simiang deeh an nin, "Aux tak tawx kix." ⁷ Viang mawh nan simiang hoik kieh Mephibawshiet, kawn simex Yawnasan, kawn saux Sawlux klawd ju, mawh kheu Davit mai Yawnasan hoik yuh krax tiextu sivoe Simiang Siyiex. ⁸ Mawh kheu nan, simiang tawx kawn simex Rizapa kawn saux Iea pa kaux Amawnix mai Mephibawshiet pa hoik keh ka son Sawlux mai khaing kawn bun Sawlux Mikhalax, pa mawh kawn saux Bazilie pui Mehawlati kawn Adarilax phwan kaux, ⁹ nawh ap kix daux tawm taix pui Gibeon mai kix teuk teue kix yum, plak sivoe Simiang Siyiex piang gawng, mawh kheu nan, kix hoik yum khawm aliah kaux tau tan daux tix ngaix khaing bawg yam jah kix ti vawg nghox. ¹⁰ Rizapa kawn bun E-a teei chee rhix tawm ka son tix, piang rang jah yam vawg kix nghox tom bawg yam lih lhiex, pon ngaix nawh ang kieh sim pon tum piang tokaux yum mai ponsawm ang kieh totiag khankix pon hoek ti ih. ¹¹ Mai kix hu krai grawng ceu pa hoik yuh Rizapa, kawn bun Eea moeng iak Sawlux ka Davit. ¹² Pui Philitix pah Sawlux piang gawng Gilabaw mai teuk teue tokaux nawh mai kawn simex nawh Yawnasan piang krax Bietshan, yam an pui veng Yabesha haktiex Gilat briex ti teei tokaux yum kiex hu mai Davit teei si-ang Sawlux mai si-ang kawn simex nawh Yawnasan khaing tan. ¹³ Mawh kheu nan, nawh deeh viex si-ang Sawlux mai si-ang kawn simex nawh Yawnasan hoek khaing tan mai deeh khrawm si-ang pui aliah kaux an pa hoik teuk teue kix yum khawmuik. ¹⁴ Kix sipaung si-ang Sawlux mai kawn simex nawh Yawnasan daux haktiex Binyamin, ka daux yaong Zelax, ka daux simeeig keeing kix Kisha tan, mawh kheu nan, kix hoik yuh can ceu pa hoik tawm simiang ka kix khawmuik, khaix an Siyiex deeh nghiet ka lox rawg kix bwan son haktiex an heue. ¹⁵ Pui Philiti yuh naing tau mai pui Isarelax, Davit mai kawncau nawh khankix, lih ti hu puing ka pui Philitix, Davit hoik kied taug mao. ¹⁶ Yam an Ishabi Benok doeh kawn praix pui pa ting kaux hak koe pliah tawng lheung pa ciien loe yieh shekhe mai nawh giex vaig pa khraox tix kre hoek keud ti sang pon pah Davit. ¹⁷ Yam an Abishie kawn simex Zeruya, hoek teem Davit mai nawh mug pui Philitix an yum, khaix an pui Davit khankix hoik tiextu ka Davit ah nin, "Khaix singaix in maix tak ang pon ti hu tau mai yix daux naing tix bawg kawx, ex lhat pa riang pui Isarelax khankix yeet." ¹⁸ Khaix an naing lih ti koe tix bawg ka pui Philitix ka daux veng Gawbax tan, khaix an Sibekhie pui Hushatix, pah ka Sapha doeh kawn praix pui pa ting kaux hak tix kaux. ¹⁹ Naing baox lih koe ka daux veng Gawbax tau mai pui Philitix tix bawg, Elahannan kawn simex Yareawregim, pui veng Bieliehiem pah ka pux Gawliyax pa kaux Lakhamix, pui Gitix pa koe krong pliah ting awm blax taing. ²⁰ Khaix an naing baox koe daux veng Gata, ka dee an koe pui tix kaux pa koe giien taix liah giien khawm ra plak mai pa koe giien caong liah giien khawm ra khawn, giien taix giien caong khawmuik koe tixnga pon giien, nawh mawh doeh kawn praix pui pa ting kaux hak tix kaux. ²¹ Yam sibriem nawh ka pui Isarelax, Yawnasan kawn simex Shimi puxke Davit hoik pah ka nawh. ²² Inkix pon kaux mawh pa keh khaing doeh pui pa ting kaux hak ka daux veng Gata, kix hoik goh ti yum ka daux riang rao plawng taix Davit mai ka riang rao plawng taix kawncau nawh khankix heue.

¹ Khaix an Davit yaogyaw Simiang Siyiex ka lai rhax in khankix, yam hoik deeh taoh Simiang Siyiex nawh khaing daux tawm taix pui koeng khankix mai khaing daux tawm taix Sawlux. ² Mai nawh ah nin, Simiang Siyiex mawh rang ting dee deuh aux rhawm tix mai mawh guh veng pa kaux pa tiebtie ka aux. ³ Simiang Siyiex mawh riang rao aux, Nawh Cao mawh pa tiebtie aux mai rung pa lawm Nawh taoh ti teei aux mai mawh tab pa kaux son aux, Maix Cao hoik taoh aux khaing daux pa kha rhawm. ⁴ Mai aux tak kok yo ka Simiang Siyiex, pa khaw aux tix yaogyaw ka Nawh, mawh kheu hoik taoh Nawh aux luan khaing daux tawm taix pui koeng aux khankix. ⁵ Maox krax yum hoik rob vung viang aux mai aux lhat ka rawm klawng yum pa chix kieh laux, ⁶ maox meung yum hoik rob vung viang aux mai aux hoik krix ka kie krax yum, ⁷ yam yaox aux krax nu krax khawm aux kok yo ka Simiang Siyiex mai aux rawg mhaing ka Nawh mai Nawh mhong ka lox pa kok yo aux ka daux nyiex bwan Nawh mai lox pa kok yo aux sivoe ngai Nawh hoek daux yhaok Nawh Cao. ⁸ Yam an haktiex yung yang mai riah raoma hoik gah tix, mawh kheu kied song rhawm Nawh Cao. ⁹ Mai taox ngu lih khaing daux meeh Nawh mai ngu lih khaing daux jheeh Nawh mai gaox ngu rup kheu Nawh. ¹⁰ Nawh Cao plak raoma lih hoek ka greem caong Nawh mai lih ti mawh pa faik. ¹¹ Nawh Cao brug ka kawncau Siyiex Cherubin hoek mai po hu vung viang mai sidawng piang pruik bhaung. ¹² Nawh yuh pa faik mai mox ka daux rawm mai paiawm pa pu rob vung viang Nawh. ¹³ Mawh kheu jhan pa riang sivoe ngai Nawh, gaox ngu hoik rup ka. ¹⁴ Siyiex pa ting lhaong, kieh sinum praix lih piang raoma mai ploi lox sinum lih mawh mu pre mai gaox ngu. ¹⁵ Nawh puing ak hu ka kix mai ploi pluk plak praix mai kieh kix som mai tang to. ¹⁶ Siyiex eue, Maix deuh phimap ka kix, ka daux pa toek Maix bhawm ka daux meeh tix mai kieh greem rawm mai jaong num haktiex pruh. ¹⁷ Nawh Cao ot dee lhaong mai nyeu taix Ti tuk aux lih ka daux rawm pa ting pa raux, ¹⁸ mai taoh ti teei aux lih khaing pui pa koeng ka aux, pa nie lheu ting riang khaing aux mai pa koeng riang ciang khoi ka aux khankix, mawh kheu ang aux lai pex ka kix. ¹⁹ Kix hoek ti yuh pa caox ka aux mai singaix yam yaox aux krax khi rhawm, viang mawh nan, Simiang Siyiex mawh dee deuh aux rhawm tix. ²⁰ Nawh thung aux hu ka dee vieh va mai Nawh taoh aux, kheu moh Nawh aux. ²¹ Simiang Siyiex tawx bwanson, awm pa rahsee aux mai tawx awm taix pa singax singeh aux. ²² Grawh grawng nawh kheu hawt aux daux krax Simiang Siyiex jheung jheung mai ang yuh pa caox caig mai ang tik ka Siyiex. ²³ Krax prawng ca Nawh, hoik koe sivoe ngai aux mai aux ang tik ka beenli Nawh Cao. ²⁴ Aux hoik rahsee sivoe ngai Nawh mai aux hoik viex ka phimap pa caox. ²⁵ Grawh grawng nawh Siyiex tawx bwanson pa rahsee aux mai tawx awm taix pa singax singeh plak sivoe ngai Nawh Cao. ²⁶ Mai tawx pa caux rhawm ka kix, pui pa chix caux rhawm, Maix tawx krax grum naog ka kix pa grum naog. ²⁷ Mai tawx pa singax singeh ka kix pui pa singax singeh mai Maix tawx pa lo pa cha ka kix pui pa lo pa cha. ²⁸ Maix taoh ti teei ka pui pa hot pa sibhawm khankix mai yeen ka pui pa ting rhawm lhaong ngai khankix. ²⁹ Simiang Siyiex mawh kawk ngu aux mai jhan riang ka daux pa faik. ³⁰ Grawh grawng nawh aux to dex tab Maix mai pon jao ka guh veng, mawh kheu deuh aux rhawm tix ka Maix. ³¹ Mai daux krax Siyiex, mawh pa grum naog mai sijax mukheu Simiang Siyiex mawh pa hoik ciied tix singax kaux cong jheung jheung mai pa kaux sijax Nawh Cao mawh ceu pa tieb ka kix pui pa deuh rhawm ka Nawh. ³² Lheu khaing Siyiex, Siyiex mawx pa kawn koe tix kaux kaux, lheu khaing Siyiex ex, simaox rang mawx pa kawn ting khaing Nawh lie? ³³ Siyiex teei maox rawd nyoi mai nhawt ka nyoi aux mai kieh krax hu aux rahsee. ³⁴ Nawh kieh caong aux phai hu awm caong cak mai kieh aux cung ka dee lhaong aux. ³⁵ Nawh gau taix aux sonsang chix puing naing mai plawng taix aux pon raig ti tik ka ak tawng lheung. ³⁶ Nawh tawx ceu pa tiebtie pa taoh ka aux mai taix khawn dawm Nawh joh jhan ka aux, Nawh yaog aux ting ka daux krax gun yeung pa caux rhawm Nawh. ³⁷ Nawh Cao kieh krax hu aux blang, son ang caong aux cang klad. ³⁸ Aux pheet ka pui pa koeng ka aux tom krup mai phan aux ang nyang yuh kix laux lak pak leeing ang aux deeh hoek. ³⁹ Aux dig kix goh greem caong tix, tom ang kix lai pon kaoh. ⁴⁰ Grawh grawng nawh Maix nhawt maox rawd nyoi aux, sonsang koe riang tix puing naing ka kix pa ot tang plak goh greem caong aux. ⁴¹ Maix hoik kieh pui pa koeng ka aux khankix, to plak khaix aux mai aux sang yuh laux leeing ka pui koeng ka aux pak lawg. ⁴² Kix riag yo miex ding kawx, ang koe pui pa taoh, kix kok yo Simiang Siyiex kawx, Nawh Cao ang pawk. ⁴³ Yam an, aux krid kix phawng awm phawng tiex pa phlu bhaung mai klup ti tik kix daux krax awm nyheu nyhawk. ⁴⁴ Mai maix kieh aux luan khaing pui pa lah pa cha ka aux maix kieh aux mawh simiang cao pa giex kaing piang pui tang ceu, pui pa ang aux tawng khankix mawh siliex aux. ⁴⁵ Yam mhong kix lox aux, nghiet lox aux dom mawx dom an, pui tang ceu khyox khaw ka aux. ⁴⁶ Kix khleep ngai mai lih khawm siyaung tix khaing daux tab dee mox kix tix, ⁴⁷ Siyiex mawh cao pa im ju, mai rang ting aux, kieh koe bwanson liak, kieh yaog ka Siyiex Cao taoh aux ting lhaong liak. ⁴⁸ Siyiex Cao prawng ca plak aux, kieh cub pui khankix ot ka greem aux, ⁴⁹ mai Maix kieh aux luan khaing daux tawm taix pui pa koeng ka aux mai yaog aux ting lhaong piang pui pa ot tang plak mai kieh aux luan khaing daux tawm taix pui pa tud rhim khankix. ⁵⁰ Mawh kheu nan Simiang Siyiex eue, aux tak sang yaogyaw ka Maix mai aux tak sang rhax lai yaogyaw ka ceu kaux Maix. ⁵¹ Nawh Cao hoik tawx krax taoh pa ting lhaong ka simiang pa laug Nawh mai Nawh Cao hoik yuh bwanson jah ka Davit kaw pa hoik groi Nawh bee mai doeh ru nawh leeing ju heue.

¹ In mawh lox pa ghoit Davit tix ah, Davit kawn simex Yessie, pui pa hoik yaog Siyiex Yakop ting lhaong mai pa hoik groi bee ka mai nawh mawh pui pa thut lox rhax yaogyaw pa jiet mhawm son pui Isarelax, ² Khwan Simiang Siyiex ah nin ka aux mai gumlox Nawh Cao, hoik koe piang dak aux. ³ Siyiex pui Isarelax ah nin, rang ting pui Isarelax ah nin ka aux, pui pa kwang piang pui khankix, tak mawh pa kwang ka daux pa rahsee Nawh Cao, ⁴ Mai tak kwang ka daux krax pa lhat graung ka Siyiex, nawh tak awm pa riang yam lih singaix plak ponngawb, pa ang paiawm ceep ka mai nawh tak awm rib awn pa kuah khaing daux tiex, pa jhan singaix khaix hoik lih lhiex. ⁵ Ru aux hoik mawh pa kaux pa cong tau mai Siyiex ang mawh lie? Mawh kheu nan, Nawh Cao hoik yuh gumlox sijax mukheu leeing ju tau mai aux, kuceu hoik mawh pa kaux pa cong khawmuik. Mawh kheu in mawh krax pa taoh ka aux khawmuik mai mawh krax pa fah rhawm aux ka, Nawh Cao sang yuh ceu inkix grum naog ka son aux, ⁶ Viang mawh nan, can pui pa ang rahsee khankix, tak awm kat lawm pa tik vud ka, mawh kheu pui ang pon teeh ka taix tix. ⁷ Phan pui sang teeh ka pui an, nawh tak ceep ka kraung naing rhiem mai giex ka pliah mai tak gleeing kix khawmuik ka daux ngu." ⁸ Inkix mawh cub pui pa ting riang rao cie Davit, Yawsheba Basahibiet pui Takhawmoni, mawh cao kaing naing ting piang cub cao kaing naing loe kaux, ceu kaux nawh mawh Adinaw pui Ezanix, kheu hoik pon pah nawh pui yum daix yieh kaux tix dom neh. ⁹ Khaix nawh mawh Elaza kawn simex Dodo kawn saux Ahawhix, nawh mawh pui pa ting riang rao tix kaux ka daux cub kix loe kaux tix kaux, pa ot tau mai Davit, yam tieh kix ka pui Philitix pa khrawm paox tix, sonsang yuh naing, khaix an pui Isarelax deeh gah tix khaing tan. ¹⁰ Nawh yaog ti kaoh puing ka pui Philitix khankix tom hoik saux meue taix ti mai ang lai pon yah taix tix khaing vaig, Simiang Siyiex hoik kieh kix koe krax pex pa kied ting daux singaix an mai pui khankix deeh hawt khaix nawh, sonsang tud rhim ngie kraung cie pui koeng. ¹¹ Khaix nawh mawh Shama kawn simex Agix pui Hararix, pui Philitix khankix khrawm paox ka dah dee tix dah, ka dee hoik sum kix nghox mai sivawng khankix, pui Isarelax hoik to khaing pui Philitix. ¹² Viang mawh nan, Shama hoik cung ka dee an mai tiebtie ka pui Philitix khankix mai pah pui Philitix khankix, yam an Simiang Siyiex hoik tawx krax pex pa kied ting ka nawh. ¹³ Ka daux yam vawg nghox, pui loe kaux khaing daux cub cao kaing ting an khankix tixgoe kaux, lih hu ka Davit ka daux rang Adulam, cub pui naing Philitix khankix paung ka daux ngawd Rephem tan. ¹⁴ Yam an Davit hoik ot ka daux tab dee pa kaux pa cong tix mai cub pui naing Philitix khankix ot ka daux veng Bieliehiem. ¹⁵ Mai Davit ah nin, "Aux kied sang nyaux nie rawm, pui mawx tix kaux kaux pa sang hu kin khaing daux rawm daux veng Bieliehiem, pa koe hawt daux diang siviex veng an mai tawx aux nyaux ka." ¹⁶ Pui kwa pui vao an loe kaux, preeng tix laig ka daux sinax dee bang pui Philitix mai kin rawm khaing daux rawm daux veng Bieliehiem pa koe hawt daux diang siviex veng mai viex hoek ka Davit, viang mawh nan, nawh ang nyaux, nawh see tix tan rawm an ka plak sivoe Simiang Siyiex. ¹⁷ Mai nawh ah nin, "Simiang Siyiex eue, kieh in mawh pa singai khaing aux, phan aux nyaux ka rawm in, awm nyaux aux ka nham pui pa ang lai lhawk ka ju tix mai hu kin ka." Mawh kheu nan, nawh ang nyaux rawm an, grawng ceu in mawh pa yuh pui kwa pui vao an kix loe kaux. ¹⁸ Abishie pux Yuabax kawn simex Zeruya, yaox ti mawh cao kaing ting ka daux pui an khankix loe kaux, nawh teei pliah cao ti yuh ka pui loe yieh kaux mai pon pah kix yum khawmuik mai nawh hoik pon pa ao min ka sinax pui loe kaux in. ¹⁹ Ang hoik mawh nawh pa kied koe min khaing ka daux sinax kix loe kaux lie? Mawh kheu nan, nawh pon ti mawh cao kaing naing ting tix kaux piang kix, viang mawh nan, nawh ang nyang krup diang pui an sivoe loe kaux. ²⁰ Beneyax kawn simex Yehawyadax mawh pui pa koe rhawm vao tix kaux khaing veng Kazelax mai pa hoik yuh kaing pa ting lhaong, nawh hoik pah pui Mawbax ra kaux, pa kied koe rhawm vao awm sivai sangsi, nawh baox deeh hu tang dah mai hoik pon pah sivai sangsi tix mu ka daux o, bawg yam lih rawm sidap. ²¹ Nawh pah pui Ejiptux pa ting lhaong tix kaux khaing pui khankix, pui Ejiptux an giex pliah tix mu ka daux taix tix, viang mawh nan, Beneyax lih hu ka nawh tau mai khaox gix mai nawh pon rhim pliah khaing daux taix pui Ejiptux mai deeh pah pui an yum ka pliah cao nawh. ²² Khaix hoik yuh Beneyax kawn simex Yehawyadax ka ceu an khankix, nawh hoik ao min ka daux sinax pui ting riang rao an loe kaux. ²³ Nawh nie lheu koe min khaing cub pui an tixgoe kaux, viang mawh nan, nawh ang krup diang pui an kix sivoe loe kaux, Davit yaog nawh mawh cao kaing piang cao pa pau ju tix. ²⁴ Asahelax pux Yuabax mawh ka daux cub pui an kix tixgoe kaux tix kaux, Elahanan mawh kawn simex Dodo khaing veng Bieliehiem, ²⁵ Shama pui Harawdi mai Elika pui Harawdi, ²⁶ Heleza mawh pui Palatix mai Irax mawh kawn simex Ikesha pui Tekaw, ²⁷ Abeza mawh pui Anatawtix mai Mebunie mawh pui Hushatix, ²⁸ Zalamon mawh pui Ahawhix mai Maharie mawh pui Netawphah, ²⁹ Heliep mawh kawn simex Banax pui Netawphah mai Itie kawn simex Ribie khaing veng Gibia pui Binyamin, ³⁰ Beneyax pui Piratawni mai Hidie pa ot daux ngawd Gasha, ³¹ Abilabon pui Arabat mai Azamaviet pui Bahumix, ³² Eliabax pui Shalabawnix mai khaing cub kawn simex Yashin pa mawh Yawnasan, ³³ Shama pui Hararix mai Ahiam kawn simex Shara pui Hararix, ³⁴ Elipheliet kawn simex Ahasabie pui Makhatix mai Eliam kawn simex Ahitawphelax pui Gilawnix, ³⁵ Hezarie pui Kharamelax mai Parie pui Arabix, ³⁶ Igalax kawn simex Natan pui Zawbax mai Banix pui Gat, ³⁷ Zelek pui Amon mai Naharie pui Berawtix Nawh mawh pa klawm kraung naing ceep Yuabax kawn simex Zeruya. ³⁸ Irax pui Itarix mai Gariet pui Itarix, ³⁹ mai Uriyax pui Heta khawmuik koe pui tixgoe aliah kaux heue.

¹ Krax song rhawm Simiang Siyiex deeh lih piang pui Isarelax mai Nawh Cao so rhawm Davit sonsang puing ka kix ah nin ka nawh, "Lih hu heue, simin ti yaox pui Isarelax mai pui Yudax khankix." ² Simiang ah nin ka Yuabax, cao kaing naing ting piang kru naing pa ot mai nawh, "Hu ka sinax doeh ru pui Isarelax, jhak ka veng Dan tom hoek ka veng Berashebax, simin ti yaox ka ding koe pui, sonsang tawng aux ka koe pui miex ding." ³ Mai Yuabax ah nin ka simiang, "Kieh Simiang Siyiex maix baox pui tix yieh son, piang pui pa hoik koe khankix mai kieh Nawh Cao kieh simiang aux, yaox ceu an kix ka ngai tix, viang mawh nan, cao simiang aux lai khaw rhawm ti yuh kaing ceu in jao patix." ⁴ Viang mawh nan, lox tawm simiang hoik pex piang Yuabax mai piang cao kaing naing khankix, mawh kheu nan, Yuabax mai cao kaing naing khankix lih hu plak sivoe simiang sonsang hu simin ka pui Isarelax. ⁵ Mai kix tiang rawm klawng Yawdan mai hu bang ka veng Araw, ka plak khawn dawm veng, pa koe daux ngawd Gat ka see veng Yaza. ⁶ Khaix an kix deeh hoek ka haktiex Gilat mai haktiex Tathin Hawdashi, kix kaoh khaing tan mai hoek ka veng Daya mai hawt vung viang veng Sidon, ⁷ Mai kix hu bleeh ka tab pa kaux cong Turux mai ka veng pui Hiwix mai ka veng pui Khanan, khaix an kix deeh lih hu ka baoh seh haktiex Yudax tom hoek ka veng Berashabax. ⁸ Khaix hoik sidah hu kix ka haktiex an, hoik koe dim khix mai tixnga ngaix, kix deeh hoek ka veng Yerusaliem. ⁹ Khaix an Yuabax tawx carang pui pa hoik koh tix ka simiang, ka daux pui Isarelax pui naing pa vao pa giex vaig pliah khankix, koe daix sien kaux mai pui naing pui Yudax koe phwan sien kaux heue. ¹⁰ Khaix hoik koh Davit carang pui, nawh deeh doh keud ka krax lud tix ah nin ka Simiang Siyiex, "Can pa hoik yuh aux khankix hoik mawh phimap pa kied ting, yam in aux rawg bwan ka Maix Simiang Siyiex, rawg Maix pluat ploi ka phimap kawncau Maix liak, mawh kheu hoik yuh aux pa caox caig." ¹¹ Yam kaoh Davit khaing it tix ponngawb, lox Simiang Siyiex hoek ka cao jhai Gat, pa mawh cao pa chix yaox ka son Davit ah nin, ¹² "Hu krai ka Davit Simiang Siyiex ah nin, Aux koe pa sang krai ka maix loe ceu, laug ti teei tix ceuceu, sonsang yuh Aux ceu an piang maix." ¹³ Mai Gat hoek ka Davit krai grawng an ka nawh ah nin, "Mawh sang kieh maix krax hot sibhawm hoek piang haktiex tix, phan ang mawh nan, mawh sang to maix khaing sivoe pui koeng pa pheet maix loe khix, phan ang mawh nan, mawh sang kieh maix jhawm saux preng lih ka haktiex tix loe singaix lie? Yam in keud tix yaox mhawm mhawm mai deeh pawk lox pa sang caw aux tix viex ing ka Nawh Cao, pa ploi aux hoek ka maix." ¹⁴ Mai Davit pawk lox ah nin ka Gat, "Aux hoik tug rhawm ka tete, kieh yix hoek daux tawm taix Simiang Siyiex, mawh kheu krax caux rhawm Nawh Cao hoik kied ting lhaong, paw doh kieh aux hoek ka daux tawm taix kawn pui liak. ¹⁵ Mawh kheu nan, Simiang Siyiex ploi jhawm saux preng hoek piang pui Isarelax, jah ponngawb tom hoek bawg yam pa deuh Nawh Cao, jah ka veng Dan tom hoek ka veng Berashebax, pui hoik yum aliah mheen kaux. ¹⁶ Yam hoik nyeu kawncau Siyiex taix tix piang veng Yerusaliem, sonsang yuh veng an laux leeing, Simiang Siyiex deeh doh keud ka daux rhawm tix mai Nawh Cao ah nin ka kawncau Siyiex, pa sang hu yuh pui laux leeing, naox heue yoi taix Maix, " mai kawncau Siyiex an ot hawt biang pah nghox Arawrax pui Yebusix. ¹⁷ Yam yaox Davit kawncau Siyiex, pa lih hoek ciyang ka pui khankix, Nawh ah nin Aux hoik yuh ceu pa caox, cub yuh in khankix mawh yuh ceu patix, Aux rawg bwan ka Maix Cao kieh taix Maix hoek ngie piang aux mai ka doeh nyiex ma keeing aux khankix." ¹⁸ Ka daux singaix an Gat deeh hoek ka Davit ah nin ka nawh, "Hu mai sum khu dee tan tix lhang son Simiang Siyiex, ka glah nghox cie Arawnax pui Yebusix." ¹⁹ Davit lih hu mai yuh awm lox pa tawm Simiang Siyiex ka lox pa krai Gat ka nawh. ²⁰ Yam maong Arawnax tix jhak ka plak sivoe tix, nawh yaox hoek simiang tau mai kawncau tix ka plak sivoe nawh, mawh kheu nan, Arawnax lih plak praix mai gup ngai tix piang tiex sivoe simiang. ²¹ Mai Arawnax ah nin, "Mawh hoek simiang aux ka kawncau tix kheu jao tix?" Mai Davit deeh ah nin ka nawh, "Mawh sonsang liag aux glah nghox maix, sonsang sum khu dee tan son Simiang Siyiex, sonsang luan pui khankix khaing jhawm saux preng." ²² Mai Arawnax deeh ah nin ka Davit, "Kieh simiang aux teei mai tan can pa yaox maix mawh pa mhawm, jhak heue, mawie hoik koe tin, sonsang yuh krax tan pa gleeing kah, koe kraung pa shiao mai iak mawie ka glah nghox sonsang yuh khix taung kah." ²³ Simiang eue, ceu inkix aux hoik ap ka maix simiang, mai Arawnax deeh ah nin ka simiang, "Kieh Simiang Siyiex maix, rieb ti teei ka maix." ²⁴ Simiang deeh ah nin ka Arawnax, "Ang mawh nan, aux tak liag ka maix, aux ang rhawm tan krax tan pa gleeing ka Simiang Siyiex aux, ka pa ang koe ngawh tix ceu kawx, " mawh kheu nan, Davit liak glah nghox an mai mawie ka mau shekhe tix phwan plah. ²⁵ Mai Davit sum khu dee tan, son Simiang Siyiex ka dee an mai tan krax tan pa gleeing mai krax tan pa nhim, Simiang Siyiex nghiet lox rawg nawh bwan, son haktiex an mai jhawm saux preng hoik grai khaing pui Isarelax heue.