2 Kings

2 Kings

¹ Khaix hoik yum Ahap, pui meung Mawbax deeh yaog ti tieh feen ka pui Isarelax khankix heue. ² Yam in Ahaziyax rau khaing daux siviex iak lawg plak piang ot nawh ka daux veng Samarix mai nawh mat; mawh kheu nan, nawh ploi cao cau khankix hu, ah nin ka kix, "Hu, chawk ti yaox ka sang deeh pon aux ti moi khaing krax pa mat aux, ka Balazebuk, pa mawh siyiex Ekaron heue." ³ Viang mawh nan, kawncau Siyiex ah nin ka Eliyax, pui veng Tishabix, kaoh, hu pub ka kawncau simiang Samarix mai ah nin ka kix, mawh ang Siyiex lai koe ka daux haktiex pui Isarelax khankix, pex tom sang ah ti hu chawk Balazebuk, pa mawh siyiex Ekaron ang mawh lie? ⁴ Yam in Siyiex ah awm in, "Maix tak ang pon ti lih khaing piang ku it pa hoik haok ot tix, viang mawh nan maix tak yum tete heue. "Mawh kheu nan, Eliyax hoik lih hu khaing kix heue. ⁵ Yam deeh hoek cao cau khankix ka nawh, nawh chawk ah nin ka kix, deeh hoek pex kheu jao patix lie? ⁶ Kix dee ah nin ka nawh, "Pui tix kaux hoek ti pub yix ah nin, deeh ing ka simiang pa ploi pex hoek mai ah nin ka nawh, Siyiex ah awm in mawh ang Siyiex lai koe ka daux haktiex pui Isarelax khankix, pex hoik mawh cao cau pa ploi lih hu sonsang chawk cheng ka Balazebuk, pa mawh siyiex veng Ekaron lie? Mawh kheu nan maix tak ang lai pon lih khaing ka piang ku it pa hoik haok ot maix mai maix tak yum tete heue" ⁷ Nawh ah nin ka kix, "Mawh pui pa yuh ka mawx pa hoek ti pub pex mai krai gumlox ka pex lie?" ⁸ Kix deeh pawk ah nin ka nawh, "Nawh mawh pui pa kied pu hauk mai nawh rawd nyoi tix ka maox khlax hak tix mu mai nawh ah nin, an mawh Eliyax pui veng Tishabix heue." ⁹ Khaix an, simiang ploi cao kaing naing tix kaux kwang ka piang nyawm liien khankix tixphwan kaux, hu tau mai haok ka Eliyax dee ngawm nawh ka piang gawng tix mu mai ah nin ka nawh, pui Siyiex eue, simiang ah nin, lih hoek heue" ¹⁰ Viang mawh nan, Eliyax deeh pawk lox ah nin ka cao kaing naing tixphwan kaux; "Phan aux mawh pui Siyiex tix kaux, khaix an kieh ngu lih khaing Raoma mai gleeing ti tik maix mai khawm pui maix khankix tixphwan kaux, "ai ngu lih khaing raoma mai gleeing ti tik nawh khawm pui nawh tixphwan kaux heue. ¹¹ Nawh deeh ploi cao kaing naing tang kaux pa kwang ka piang nyawm liien tixphwan kaux hu ka nawh tau mai pui nawh khankix tixphwan kaux mai nawh deeh pawk lox mai ah nin ka nawh, "Pui Siyiex eue, simiang hoik ah awm in, nied lih hoek phai phai" ¹² Viang mawh nan, Eliyax deeh pawk lox mai ah nin ka kix, "Phan aux mawh pui Siyiex tix kaux, kieh ngu lih khaing Raoma mai gleeing ti tik maix, khawm pui maix khankix tixphwan kaux, " Mai ngu Siyiex hoik lih khaing Raoma mai gleeing ti tik nawh mai pui nawh khankix tixphwan kaux heue. ¹³ Nawh baox ploi cao kaing naing loe kaux tix kaux, pa kwang ka piang nyawm liien khankix tixphwan kaux, hu ka nawh tau mai nyawm liien khankix tixphwan kaux mai cao kaing naing loe kaux tix kaux an, pa kwang piang nyawm liien tixphwan kaux haok hoek mai grux ngawng tix ka plak sivoe Eliyax mai khyox khaw ka nawh ah nin, "Pui Siyiex eue, yuh bwanson kieh ju aux mai khawm ju kawncau maix khankix tixphwan kaux, mawh pa koe ngawh koe jum ka daux ngai maix liak. ¹⁴ Jhak heue, ngu kaoh khaing Raoma mai hoik gleeing ti tik cao kaing naing pa hoek bawg phao voe Ra kaux, pa kwang ka piang cub nyawm liien khankix tixphwan kaux tau mai pui pa tang viex kiex hawt tix tixphwan kaux, viang mawh nan, kieh ju aux mawh pa koe ngawh koe jum ka daux ngai maix daux yam in liak." ¹⁵ Kawncau Siyiex ah nin ka Eliyax, "Lih hu tau mai nawh; paw lhat graung ka nawh, " Mawh kheu nan, Eliyax kaoh lih hu tau mai nawh ka simiang heue. ¹⁶ Nawh ah nin ka simiang, "Siyiex ah yuh nin, mawh kheu maix hoik ploi cao cau khankix lih hu, sonsang chawk cheng tix ka Balazebuk pa mawh siyiex Ekaron, kheu ang Siyiex lai koe ka daux sinax pui Isarelax khankix sonsang chawk cheng tix gumlox Nawh Cao lie? Mawh kheu nan maix tak ang lai pon ti lih khaing ka piang ku it pa hoik haok maix ti ot mai maix tak yum tete heue." ¹⁷ Mawh kheu nan, Ahaziyax yum awm gumlox pa ah Siyiex ka Eliyax, mawh kheu ang nawh koe kawn simex, Yehoram deeh yaog ti mawh simiang ka dah dee ot nawh, daux num yam kwang Yehoram pa mawh kawn simex Yehoshaphat, pa mawh simiang meung Yudax ra num tix num heue. ¹⁸ Yam in grawng kaing pa deuk Ahaziyax mai pa hoik yuh nawh khankix, mawh pa tiiem ti deuh daux phuk lai been simiang pui Isarelax khankix heue?

¹ Khaix hoik luan ceu ankix, yam hoek bawg yam sang teei Siyiex ka Eliyax haok daux raoma ka bhaung keu kang lux, Eliyax hu tau mai Elishie daux veng Gilagalax heue. ² Khaix an Eliyax ah nin ka Elishie, "Yuh bwanson ot tin, mawh kheu Siyiex ploi aux hu ka veng Betelax heue." Elishie ah nin, "Awm krax pa im ju Siyiex mai krax pa im ju maix, aux tak ang lai pon gwieh maix heue." Mawh kheu nan, kiex khawm ra lih hu tau ka veng Betelax heue. ³ Cub cao jhai khankix pa ot ka daux veng Betelax khrawm paox tix hoek ka Elishie ah nin, "Mawh hoik tawng maix ka sang teei Siyiex, cao simiang maix pa mawh cao kaing maix hu khaing maix daux in singaix lie?" Nawh ah nin, "Mawh heue, aux hoik tawng; ot yiien yawg heue." ⁴ Eliyax ah nin ka nawh, "Elishie eue, ot tin, mawh kheu Siyiex hoik ploi aux hu ka veng Yerikho heue." Nawh deeh ah nin, "Awm krax pa im ju Siyiex mai krax pa im ju maix aux tak ang pon ti gwieh khaing maix heue." Mawh kheu nan, kiex khawm ra lih hu tau ka veng Yerikho heue. ⁵ Cub cao jhai khankix pa ot ka daux veng Yerikho, khrawm paox tix hoek ka Elishie mai ah nin ka nawh, "Mawh hoik tawng maix ka sang teei Siyiex, cao kaing maix hu khaing maix daux in singaix lie?" Nawh ah nin, "Mawh heue, aux hoik tawng, ot yiien yawg heue." ⁶ Khaix an Eliyax deeh ah nin ka nawh, "Yuh bwanson ot tin, mawh kheu Siyiex hoik ploi aux hu ka rawm klawng Yawdan heue." Nawh deeh ah nin, "Awm krax pa im ju Siyiex mai krax pa im ju maix, aux tak ang pon ti gwieh khaing maix, " Mawh kheu nan, kiex khawm ra lih hu tau heue. ⁷ Cub cao jhai khankix tixphwan kaux, hu mai kix cung ka plak sivoe kix dee singai, yam kawn cung kiex ra kaux hawt rawm klawng Yawdan heue. ⁸ Yam in Eliyax teei sibex dhah ceep tix, pua mai sivied ka rawm; mai rawm tang gwieh tix plak in plak an mai kiex ra kaux tiang ti hu ka plak toi an ka piang tiex kroh heue. ⁹ Ceu ankix hoik lih ti mawh yam tiang kiex ka plak toi rawm, Eliyax ah nin ka Elishie, "Rawg mhaing mawh sang yuh aux ceu patix ka son maix, sivoe ang aux nyang bax hu khaing maix?" Mai Elishie ah nin, "Yuh bwanson kieh khwan maix koe ka piang aux ra son heue." ¹⁰ Mawh kheu nan, Eliyax ah nin, "Maix hoik rawg ceu pa kied nu, viang yuh ka mawh kawx phan maix yaox yam li aux ti hu khaing maix, maix tak pon awm an, phan ang mawh nan, phan maix ang yaox maix tak ang lai pon ka heue. ¹¹ Yam kawn lailing kiex ti sikah tau mai paox tix, ling lawx ngu tix lhang bleeh sijaox tau mai brung ngu, gwieh ka kiex ra kaux; Eliyax haok tau mai bhaung keu kang lux teei nawh haok ka raoma heue. ¹² Elishie hoik yaox ka ceu ankix mai nawh kok yo ah nin, "Keeing aux eue, keeing aux eue, ling lawx naing mai khawm pui naing brung pui Isarelax, " Khaix an nawh ang lai yaox ka nawh tix bawg kawx heue. Nawh giex ti riah sibex dhah tix koe ra plak heue. ¹³ Nawh sut ti teei sibex dhah Eliyax pa cod khaing nawh mai deeh ing cung ka praok rawm klawng Yawdan heue. ¹⁴ Nawh teei sibex dhah Eliyax pa hoik cod khaing nawh mai sivied rawm ka ah nin, "Siyiex Eliyax ot dee mawx lie?" Mai yam hoik sivied nawh rawm ka sibex dhah an, rawm hoik tang gwieh ti hu plak in plak an mai Elishie tiang ka plak toi an heue. ¹⁵ Yam hoik yaox cub cao jhai khankix pa ot ka veng Yerikho ka nawh, kix ah nin, "Khwan Eliyax hoik ot ka piang Elishie mai kix gup tix ka piang tiex ka plak sivoe nawh heue." ¹⁶ Khaix an, kix ah nin ka nawh, "Yam in, pui ting riang rao khankix tixphwan kaux ot tau mai kawn cau mau soi maix, yuh bwanson kieh kix lih sawg ka cao simiang maix, ha khwan Siyiex teei nawh haok mai deuh nawh ka piang gawng tidah dah heue." Nawh ah nin, "Ang shiao ploi pui hu tix kaux kawx heue." ¹⁷ Yam sigleeig kix ka nawh, tom ang nawh lai tawng ka pa sang ah tix mai nawh ah nin, "Ploi kix lih hu heue." Mawh kheu nan, kix ploi pui hu tixphwan kaux mai kix sawg ka nawh loe singaix, viang mawh nan, kix ang yaox ka nawh heue. ¹⁸ Yam deeh hoek kix ka Elishie yam kawn ot nawh ka daux veng Yerikho, nawh ah nin ka kix, "Ang shiao hu, aux hoik ah nan ka pex ang mawh lie?" ¹⁹ Khaix an pui daux veng khankix ah nin ka Elishie, "Dah dee veng in mawh pa mhawm grang, awm krax pa hoik yaox cao simiang aux; viang mawh nan, rawm ang mhawm mai tiex ang chix plix heue." ²⁰ Nawh ah nin, "Teei klong khraox tix mu hoek ka aux mai sau kih ka daux an, " Mawh kheu nan, kix viex klong an hoek ka nawh heue. ²¹ Elishie lih hu ka dee lih rawm mai sau kih ka daux ah nin, "Siyiex ah nin, aux hoik cox rawm in mhawm; khaix in krax yum ang ah, krax pa ang tie chix plix ang ah, tak ang lai koe khaing tan heue." ²² Mawh kheu nan, rawm an hoik mawh pa mhawm tom hoek ka daux in singaix, awm lox pa hoik ah Elishie ti deuh heue. ²³ Nawh haok khaing tan mai hoek ka veng Betelax, yam lawng nawh krax kawn nyawm simex tiblah hoek khaing ka daux veng mai ah lox sibriem ka nawh ah nin, "Pui pa pak kaing eue haok heue, pui pa pak kaing eue haok heue." ²⁴ Nawh deeh veeh tix mai jhak ka kix mai nawh jhax lawg ka kix ka daux min ceu kaux Siyiex mai krih miex ra mu lih khaing daux nong mai paig ka kawn nyawm ankix, tixpon ra kaux heue. ²⁵ Khaix an, nawh deeh lih hu khaing tan mai hoek ka gawng Khamelax, kaoh khaing tan, nawh deeh ing ka veng Samarix heue.

¹ Yam in Yehoram kawn simex Ahap yaog ti mawh simiang ka meung Isarelax, ka daux veng Samarix daux yam kwang Yehoshaphat simiang Yudax, ka haktiex kao daix num mai nawh kwang ka haktiex kao ra num heue. ² Nawh hoik yuh pa caox caig ka daux ngai Siyiex, viang mawh nan, nawh ang yuh awm miex keeing tix, mawh kheu nawh hoik teei ti tik riang rao simaox Balax khankix, pa yuh keeing nawh heue. ³ Nawh kawn ot ka daux phimap phighram pa yuh Yerobom, kawn simex Nebat, pa hoik kieh pui Isarelax khankix lud koe map grham, nawh ang yoi tix khaing heue. ⁴ Yam in Mesha simiang haktiex Mawbax mawh pa eei yung tom nie mai nawh yaox ti tawx kawn yung khankix tix sien mu mai yung pa koe hauk tix sien mu ku num ka simiang Isarelax heue. ⁵ Yam hoik yum Ahap, simiang haktiex Mawbax yaog ti tieh feen ka simiang Isarelax heue. ⁶ Mawh kheu nan, simiang Yehoram lih khaing veng Samarix, ka daux bawg yam an mai teei carang pui Isarelax heue. ⁷ Nawh ploi pui hu ka Yehoshaphat simiang meung Yudax ah nin, "Simiang haktiex Mawbax hoik deeh tieh feen ka aux heue. Sang hu puing tau maix haktiex Mawbax mai aux lie?" Yehoshaphat ah nin, "Aux tak haok heue; aux hoik mawh awm mawh maix pui aux khankix hoik awm pui maix, brung aux khankix kawx hoik awm brung cie maix heue. ⁸ Nawh ah nin, "Sang haok ex ka krax plak mawx lie?" Nawh deeh ah nin, "Haok ka plak krax daux tiagtu Edom heue." ⁹ Simiang Isarelax hoik hu tau mai simiang meung Yudax tau mai simiang Edom mai kix hoik hu hawt baoh daux krax an aliah singaix, rawm ang lai koe son cub kru naing khankix mai son to brie khankix pa viex kix hawt tix heue. ¹⁰ Simiang Isarelax ah, "Eue! Siyiex hoik kok simiang inkix loe kaux hoek tau, sonsang ap Nawh Cao ti tawx kix ka daux tawm taix pui Mawbax heue." ¹¹ Yehoshaphat ah nin, "Ang cao jhai Siyiex koe tin, sonsang chawk cheng ex ti yaox grawh grawng ceu inkix ka Siyiex khaing nawh lie? "Pui tix kaux khaing sinax kawncau simiang pui Isarelax pawk lox ah nin, "Kawn simex Shaphat pa mawh Elishie pa hoik lhauk rawm ka piang taix Eliyax koe tin heue." ¹² Mai Yehoshaphat ah nin, "Gumlox Siyiex koe tau mai nawh heue." Mawh kheu nan simiang pui Isarelax mai Yehoshaphat mai simiang Edom hoik khrawm paox tix lih hu ka nawh heue. ¹³ Khaix an Elishie ah nin ka simiang pui Isarelax "Mawh koe aux ceu pa yuh patix tau mai maix lie? Hu ka cub cao jhai keeing maix khankix mai ka cao jhai miex maix khankix, " Mai simiang pui Isarelax ah nin ka nawh, "Ang mawh nan mawh kheu Siyiex hoik kok simiang inkix hoek tau, sonsang ap Nawh Cao ti tawx kix ka daux tawm taix pui Mawbax heue." ¹⁴ Elishie ah nin, "Awm krax pa im ju Siyiex Cao pa ting lhaong ka piang khawmuik mai pa hoik cung aux ti ot ka plak sivoe Nawh mai phan aux ang jhak pakngai Yehoshaphat simiang meung Yudax, aux tak ang lai jhak, lai simi ka maix heue." ¹⁵ Yam in viex pui chix tah ting hoek ka aux tix kaux liak! mai ceu ankix lih ti mawh yam tah pui chix tah ting an ka ting, taix Siyiex hoek ka piang Elishie heue. ¹⁶ Nawh ah nin, "Siyiex ah yuh nin, yuh rawng naog ka daux lung in heue. ¹⁷ Mawh kheu Siyiex ah yuh nin, viang pex ang yaox bhaung mai ang yaox ka lhiex kawx, daux lung in tak mawh pa naog ka rawm, sonsang pon to brie maix mai totiag khankix ti nyaux rawm heue." ¹⁸ Ceu inkix mawh pa iak pa liied daux ngai Siyiex, Nawh Cao tak baox ap pui Mawbax ka daux tawm taix maix heue. ¹⁹ Pex tak puing ka veng pa kaux cong khankix ku veng mai pa hoik yuh tix mhawm ku veng mai pex tak kid khaox ceu pa mhawm khankix mai thox daux lih rawm klawng khankix mai pex tak kieh gwang haktiex pa mhawm khankix laux leeing ka lon simaox heue. ²⁰ Ceu ankix lih ti mawh ka daux ponngawb, yam yuh pex krax tan phawng nghox ca im mai rawm tak hoek sijaox ka plak haktiex Edom mai haktiex hoik mawh pa naog ka rawm khawmuik heue. ²¹ Yam mhong pui Mawbax khankix ka hoek cub simiang ti puing ka kix, can pui iak pui ting pa giex kraung naing khawmuik khrawm paox tix mai kix cung ti ot ka piang mee haktiex heue. ²² Kix yaog ti kaoh caocao plak ponngawb mai singaix hoik jhan riang ka piang rawm, mai pui Mawbax khankix yaox ka raoh rawm awm nham ka toi praok plak an heue. ²³ Kix ah nin, "In mawh nham heue!" Simiang mug paox tix mai ralai pah paox tix yum mawh kheu nan, yam in pui Mawbax khankix eue, hu rhim ti teei kraung khrai heue." ²⁴ Yam hoek kix ka bang pui Isarelax, pui Isarelax yaog ti puing ka pui Mawbax khankix, mawh kheu nan, kix to ka plak sivoe kix mai pui Isarelax laig puing kix tom hoek ka haktiex kix mai pah pui Mawbax khankix heue. ²⁵ Kix yuh veng khankix laux leeing mai pui ku kaux tang tik simaox naog ka piang haktiex mhawm ku dah, kix thox daux lih rawm klawng khankix khawmuik mai kix hoik kid ti tik khaox khawmuik, lheu khaing an simaox pa koe ka piang guh veng Kira Harasiet ngie, viang mawh nan, cub cao pa viex maox yang yit khankix hoik lai lawm ka veng mai puing ka veng an heue. ²⁶ Yam hoik yaox simiang Mawbax ka mawh naing an pa kied kin tete ka son nawh, nawh kok pui aliah yieh kaux, can pa giex vaig hoek tau mai tix sonsang pon preeng nawh ti puing ka daux sinax cub pui naing simiang Edom, viang mawh nan kix ang pon preeng heue. ²⁷ Khaix an nawh teei kawn Ai tix pa sang caw ti kwang ka dah dee ot nawh mai nawh hoik tan ti tawx kawn Ai tix awm krax tan pa gleeing ka piang guh veng; krax pa song rhawm lih ti koe ka piang pui Isarelax khankix, mawh kheu nan, kix hoik lih hu khaing nawh mai tang ing ka haktiex tix heue.

¹ Bun tix kaux pa mawh moeng kawn simex cao jhai khankix yiiem ka Elishie ah nin, "Mex aux kawncau mau soi maix hoik yum mai maix tawng ka lhat graung kawncau maix ka Siyiex mai cao pa tawx ceuk hoek ti teei kawn simex aux ra kaux, sonsang mawh siliex tix heue." ² Elishie ah nin ka miexmai, "Sang kieh maix aux yuh ceu patix ka son maix lie? Krai aux mhong koe ceu patix ka daux nyiex maix lie?" Mai miexmai ah nin, "Kawncau maix ang koe tidtix, lheu khaing ngoi bee tix mu khaing pa koe daux nyiex heue." ³ Khaix an, Elishie ah nin, "Hu heue, teei maix vai aw khaing paox plawg maix khawmuik, kieh mawh aw pa yi, paw vai ngie ceeix ceeix awx." ⁴ "Khaix an maix laig ka daux nyiex mai nyeep siviex ka plak khaix tix tau mai kawn simex maix; mai rauk rawm bee ka daux aw khankix mai deuh pa hoik naog praok maix heue." ⁵ Bun an lih hu khaing nawh mai nyeep siviex ka plak khaix tix tau mai kawn simex nawh; pa hoik teei ti viex aw tawng an khankix hoek ka nawh mai nawh rauk rawm bee ka daux aw ankix heue. ⁶ Khaix an, yam hoik naog aw ankix, bun an deeh ah nin ka kawn simex tix, "Baox viex aw hoek ka aux heue. Nawh ah nin, "Aw pa yi ang lai koe heue." Mawh kheu nan, bee hit ang lai lih heue. ⁷ Bun an hoek krai ka pui Siyiex mai nawh ah nin, "Hu coh bee an khankix mai viied ceuk maix kah, eei ju maix khawm kawn simex maix ka pa kawn deuk heue." ⁸ Tix singaix; Elishie hu ka veng Shunam, dee ot bun pa mi tix kaux mai bun an khin nawh ih priex preem, mawh kheu nan, nawh brax hoek tan ti vud ti vud, yie viex ti ih priex preem tan heue. ⁹ Bun an ah nin ka mex tix, "Yam in jhak heue, aux tawng ka pui pa yie tiang ti hoek ka baoh ex sijheeng mawh pui Siyiex pa singax singeh tix kaux heue. ¹⁰ Yuh bwanson kieh ex yuh lawg plak piang tix mu mai yuh ti deuh dee it ka son nawh tan mai pheen khawm khaox ngawm mai jawk ten tix mu, mawh kheu yam hoek nawh ka ex yam mawh ang ah, nawh tak laig ka daux lawg plak piang an heue. ¹¹ Ka daux tix singaix, yam hoek nawh tan mai nawh veh laig ka daux lawg plak piang mai nyat tix heue. ¹² Khaix an nawh ah nin ka kawncau tix Gehazix, kok ka bun Shunam heue. Yam kok nawh bun an hoek, bun an cung ka plak sivoe Elishie heue. ¹³ Elishie ah nin ka kawncau tix, "Ah nin ka bun an, maix hoik nyhap rhawm rhi tix khre rien ka yix, sang yuh aux ceu patix son maix lie? Sang kieh maix aux sikah tang tix ka simiang, phan ang mawh nan, ka cao kaing kru naing khankix lie? Bun an deeh pawk ah nin, "Aux hoik nyawm ot sinax ceu pui tix khankix heue." ¹⁴ Elishie deeh ah nin, "Phan ang mawh nan, sang pon yuh ex tix tawx ceu patix ka son bun an lie? Gehazix deeh ah nin, "Bun in ang koe kawn simex tix kaux kawx mai mex nawh kawx hoik kuad heue." ¹⁵ Nawh ah nin, "Baox kok nawh hoek, "Yam hu kok nawh bun an hoek, bun an cung ka daux diang siviex heue. ¹⁶ Elishie deeh ah nin, "Ka daux num khaix bawg yam in maix tak yaox ti teem kawn simex tix kaux mai bun an deeh ah nin, Cao simiang aux mai pui Siyiex eue, paw doh pie lhen ka kawncau bun maix yuh nan liak!" ¹⁷ Bun an koe kaux mai nawh keh kawn simex tix kaux, yam hoek bawg yam pa krai Elishie ka nawh heue. ¹⁸ Kawn simex an ting sipie, ka daux tix ngaix, nawh lih hu ka keeing tix mai ka cao pa vawg nghox khankix heue. ¹⁹ Nawh ah nin ka keeing tix, "Keeing aux, keeing aux, " Mawh kheu nan, keeing nawh ah nin ka kawncau tix, "Viex nawh ing ka miex nawh heue." ²⁰ Yam viex kix kawn simex an ing ka miex nawh, nawh ngawm ka piang ngawng miex tix tom hoek greung ngaix mai khaix an nawh yum heue. ²¹ Miex nawh teem nawh haok ka plak piang mai deuh nawh ka piang dee it pui Siyiex mai nyeep siviex lih hu plak praix heue. ²² Khaix an, nawh kok ka mex tix ah nin, "Yuh bwanson ploi pui awn ju tix kaux hoek ka aux tau mai la tix mu, sonsang nied aux ti hu ka pui Siyiex mai deeh nied ti hoek phaiphai heue." ²³ Mex nawh ah nin, "In ngaix ang nyang mawh haok khix khraox mai singaix twah maix sang hu ka nawh yuh ka mawx?" Nawh ah nin, "Ang yuh tidtix, mhawm heue." ²⁴ Nawh sau an brug tix ka piang la mai ah nin ka kawncau tix, "Grheu la hu phaiphai, phan aux ang nyang ah tidtix ka maix paw nyang nhim heue." ²⁵ Kheu nan, nawh lih mai hu ka pui Siyiex ka piang gawng Khamelax mai yam yaox pui Siyiex ka yam hoek nawh dee singai, nawh ah nin ka kawncau tix Gehazix, "Bun veng Shunam hoek heue." ²⁶ "Yuh bwanson yam in to ti rieb nawh mai ah nin ka nawh, nyawm ot maix lie? Nyawm ot mex maix lie? Nyawm ot kawn simex maix lie?" Mai bun an deeh pawk ah nin, "Nyawm ot heue." ²⁷ Yam hoik hoek bun an ka pui Siyiex ka piang gawng, nawh kawm ka caong pui Siyiex mai Gehazix hoek dex mai sang nyheen ka bun an heue. Viang mawh nan, pui Siyiex ah nin, "Ploi nawh, mawh kheu nawh laux rhawm sigrien sigre mai Siyiex hoik mox grawng ceu an khaing aux mai ang bax krai grawng ceu an ka aux heue." ²⁸ Bun an ah nin, "Mawh sax mhaing aux kawn simex ka cao simiang aux lie? Aux hoik sax ah nin paw pie lhen ka aux ang mawh lie?" ²⁹ Khaix an nawh ah nin ka Gehazix, khre rien tokaux cao maix mai teei ti giex khaox gix aux ka daux taix maix mai lih hu ka daux krax hu maix heue. Phan maix pub pui tix kaux kaux, paw vi sikah mai nawh awx. Phan pui tix kaux kaux sikah mai maix paw vi pawk ka, deuh khaox gix aux ka piang ngai baoh kawn nyawm an heue. ³⁰ Miex kawn nyawm an deeh ah nin, "Awm pa im ju Siyiex mai awm pa im ju maix, aux tak ang pon lih hu khaing maix, " Mawh kheu nan, nawh yaog ti kaoh mai hawt khaix kiex heue. ³¹ Gehazix hu sivoe kix mai deuh khaox gix an ka piang ngai baoh kawn nyawm an, viang mawh nan, kawn nyawm an ang lai chix sikah mai ang lai chix mhong pie tix ceu kawx heue. Mawh kheu nan, nawh deeh ing pub ka nawh mai krai ah nin, "Kawn nyawm ang lai siduad heue." ³² Yam hoek Elishie ka nyiex, kawn nyawm an koe sivoe nawh tan, hoik noi ti yum ka piang dee it cao nawh heue. ³³ Mawh kheu nan, nawh laig ka daux lawg mai nyeep siviex plak khaix kiex khawm ra kaux mai rawg bwan ka Siyiex heue. ³⁴ Nawh haok ka piang dee it kawn nyawm an mai gup ti it ka piang kawn nyawm an mai nawh deuh jheeh tix ka piang jheeh nawh mai deuh ngai tix ka piang ngai nawh mai deuh taix tix ka piang taix nawh mai nawh naih kaux cao tix ka piang kawn nyawm an mai nham kawn nyawm an deeh siu heue. ³⁵ Nawh lih khaing ka piang kawn nyawm an mai hu hu hoek hoek ka daux nyiex, khaix an, nawh deeh baox laig ka daux nyiex mai nawh deeh baox haok ka piang kawn nyawm an mai deeh naih tokaux cao tix piang nawh, khaix an, kawn nyawm an miah aliah bawg mai blah ngai tix heue. ³⁶ Elishie deeh kok ka Gehazix ah nin, kok ka bun Shunam an heue. Mawh kheu nan, hu kok ka bun an mai yam laig bun an ka dee ot nawh, nawh ah nin, "Yaog ti klien kawn simex pax heue." ³⁷ Bun an laig ka plak daux mai grux ngawng tix hawt caong nawh mai gup tix ka piang tiex, khaix an, kiex yaog ti klien kawn simex tix mai lih hu plak praix heue. ³⁸ Elishie deeh ing ka veng Gilagalax mai krax sibhawm praix lih ti koe ka daux haktiex an mai kawn simex cao jhai khankix hoik ngawm ka plak sivoe nawh mai nawh ah nin ka kawncau tix, "Tang ti deuh aw pa ting mai ngaik taux lhax son kawn simex cub cao jhai khankix heue." ³⁹ Pui tix kaux lih hu daux tong kaung sonsang caik taux lhax mai yaox pang num plix siiet tiag tix nhu mai caik taux lhax ankix mai nawh baox pieh ti viex plix singiien tiag khankix tom naog ka daux khawn taix nawh mai khawp ankix deeh hoek, khaix an plix singiien tiag an mai sau ka daux aw ngaik taux viang ang kix tawng ka mawh ankix ceu patix heue. ⁴⁰ Khaix an, kix khankheu ti tawx ka pui khankix sonsang ih kix, yam in ceu an khankix lih ti mawh yam kawn ih kix ka taux ngaik an, kix riag yo lox tix lih ah nin, "Pui Siyiex eue, ceu pa yum koe ka daux aw in;" Mai kix ang lai pon ih ka taux an heue. ⁴¹ Nawh ah nin, "Viex phawng gaox nghox ca hoek ceeix, " Mai nawh sau phawng gaox nghox ca an ka daux aw ah nin, "Khan kheu ti tawx ka pui khankix sonsang pon ti ih mai can ceu pa awp khankix, tak ang lai koe tix ceu kawx ka daux aw an heue." ⁴² Khaix an pui tix kaux hoek khaing veng Balax Shalisha nawh viex ti tawx blah phawng gaox nghox ca cao tixnga lon mai simie nghox ca pa khraox ankix, ka daux chee hoek ka pui Siyiex mai nawh ah nin, "Tawx ceu ankix ka pui khankix sonsang yaox kix ti ih heue." ⁴³ Kawncau nawh ah nin, "Mawh ceu patix lie? Mawh sang deuh aux ceu inkix ka plak sivoe pui tiyieh kaux lie?" Nawh baox ah nin, "Tawx ceu ankix ka pui khankix sonsang pon kix ti ih; mawh kheu Siyiex ah nin, kix tak ih tom sak tix mai tak kawn lheu ka heue." ⁴⁴ Kheu nan, nawh hu deuh ceu ankix ka plak sivoe kix mai kix ih tom sak tix mai prah pa lheu tom nie awm gumlox ah Siyiex heue.

¹ Yam in Ne man pa mawh cao kaing naing ting cub kru naing simiang meung Surix, mawh pa kied ting lhaong mai mawh pui pa koe min ka plak sivoe ngai simiang nawh, mawh kheu Siyiex tawx krax pa pex nawh ka son meung Surix, nawh baox mawh pui pa ting riang rao mai pa koe rhawm kwa rhawm vao tix kaux, viang mawh nan, nawh mawh pui pa koe jhawm saux sipawg tix kaux heue. ² Cub pui Surix khankix lih hu puing naing mai giex ti viex bun pa awn ju tix kaux khaing daux meung Isarelax, nawh mawh kawncau moeng Ne man tan heue. ³ Kawn bun an ah nin ka miex cao nyiex tix, "Phan cao simiang aux pon ti ot tau mai cub cao jhai pa ot ka daux veng Samarix! mawh kheu cao jhai an, tak pon pai nawh moi khaing jhawm saux sipawg in heue." ⁴ Ne man laig ka dee ot simiang cao tix mai krai nawh mhong ah nin, "Bun Isarelax an hoik ah awm Grawng pa yuh nin, " ⁵ Mawh kheu nan, simiang meung Surix ah nin, "Hu yam in heue, aux sang tiiem ti tawx lai tix pheen ka simiang pui Isarelax, " Mawh kheu nan, Ne man lih hu khaing tan mai viex mau kao talantan, khri liah rheng shekhe mai kraung ceep kao jung tau mai tix heue. ⁶ Nawh viex lai an hu ka simiang pui Isarelax pa hoik tiiem ah nin, "Yam in koe krax keud krax sawn yam bleeh lai in ti hoek ka maix, Grawng ploi aux kawncau tix Ne man hoek ka maix, sonsang pon pai maix nawh khaing jhawm saux sipawg nawh heue." ⁷ Yam phat simiang pui Isarelax ka lai an, nawh riah kraung ceep tix ah nin, "Mawh aux Siyiex pa chix kieh pui yum mai pa deeh kieh pui im ju, kheu pui in hoik ploi pui hoek ka aux, sonsang pai nawh moi khaing jhawm saux sipawg nawh lie? Mawh kheu nan, yuh bwanson keud ti yaox mai nawh sawg krax simah simiang ka aux heue." ⁸ Ceu ankix hoik lih ti mawh yam mhong Elishie ka riah simiang pui Isarelax kraung ceep tix nawh ploi pui hu ah nin ka simiang, "Maix hoik riah ti tik kraung ceep tix kheu jao patix lie? Yuh bwanson kieh pui an hoek ka aux mai nawh tak sang tawng ka koe cao jhai tix kaux ka daux meung Isarelax heue." ⁹ Khaix an, Ne man lih hu tau mai brung nawh khankix mai khawm ling lawx naing brung cie nawh khankix mai nawh cung diang siviex nyiex Elishie heue. ¹⁰ Elishie ploi cao cau nawh tix kaux hoek ka nawh ah nin, "Hu mai heem maix ka daux rawm klawng Yawdan aliah bawg mai nex nham maix tak deeh mawh pa mhawm ka son maix mai tokaux maix tak deeh mawh pa singax heue." ¹¹ Viang mawh nan, Ne man kied koe krax pa song rhawm nawh deeh veeh ti hu ka plak dee singai ah nin, "Aux keud ah nin ka daux rhawm tix tete, nawh tak mawh pa caw ti lih hoek ka aux, cung mai kok ka ceu kaux Siyiex nawh mai vuh vied taix tix ka piang dee saux an mai pai ka jhawm saux sipawg aux heue. ¹² Ang awm klawng Abana mai rawm klawng Phapa khankix, pa koe ka daux haktiex Damase, mawh pa nie lheu mhawm khaing can rawm klawng pa koe ka daux Isarelax lie? Mawh ang aux pon khoek tix daux rawm klawng ankix mai deeh pon tix singax lie? Mawh kheu nan, nawh deeh veeh ti ing khawm song rhawm tix heue." ¹³ Kawncau nawh khankix greed tix hoek dex mai ah nin ka nawh, "Keeing aux eue, phan cao jhai hoik krai sonsang yuh ceu pa ting lhaong ti ceuceu, mawh ang maix yuh ceu ankix lie? Khaix an, mawh ang maix caw ti yuh ceu pa nie lheu khaing an yam ah nawh lie? Heem mai deeh mawh pa singax heue." ¹⁴ Mawh kheu nan, Ne man lih hu mai com cao tix ka daux rawm klawng Yawdan aliah bawg, awm gumlox pa ah pui Siyiex; mai nex nham nawh hoik deeh mhawm awm nex nham kawn nyawm iak tix kaux; mai nawh hoik singax heue. ¹⁵ Khaix an nawh deeh ing ka pui Siyiex mai cao pa teem pa coi ka nawh khankix mai kix deeh hoek mai cung ka plak sivoe nawh ah nin, "Yam in aux tawng ka ang siyiex tang kaux lai koe ka piang haktiex in, lheu khaing daux haktiex Isarelax tete; mawh kheu nan, yuh bwanson rieb ti teei totaix in tix ceu khaing kawncau maix liak!" ¹⁶ Elishie an nin, "Awm pa im ju Siyiex ka kaw pa cung aux ti ot sivoe Nawh, aux tak ang lai pon ti priex tix ceu kawx, " Mai Ne man baox khin nawh teei kraung ankix, viang mawh nan, nawh thiang ka heue. ¹⁷ Ne man deeh ah nin, "Phan ang mawh nan, yuh bwanson kieh aux kawncau maix deeh tang ti viex tiex baoh tin ing ra mu law liak; mawh kheu aux kawncau maix tak ang lai tawx krax tan pa gleeing ang ah mai krax tan pa appong tix khankix ang ah, ka siyiex tang kaux khankix, lheu khaing Siyiex heue. ¹⁸ Ka daux ceu inkix, kieh Siyiex pluat phimap kawncau maix, yam hu laig Cao simiang aux ka daux nyiex bwan Rimmon, sonsang krub tan mai nawh neung tix ka piang khawn taix aux mai phan aux yaox ti krub ka daux nyiex bwan Rimmon mai yam krub aux ka daux nyiex bwan Rimmon, yam an kieh bwanson Siyiex pluat phimap kawncau maix ka daux ceu inkix heue." ¹⁹ Nawh deeh ah nin ka nawh, "Hu ka daux pa nhim heue." Mawh kheu nan, nawh lih hu khaing nawh mai hoek ka daux pa ang singai tix dah heue. ²⁰ Gehazix kawncau Elishie pa mawh pui Siyiex ah nin, "Jhak heue, Cao simiang aux deeh ploi Ne man, pa mawh pui Surix in mai ang lai cu ti rieb pa viex nawh khankix, khaing daux taix nawh; aux tak to ti hawt khaix nawh, mai teei ti cie tix ceuceu khaing nawh heue." ²¹ Mawh kheu nan, Gehazix hawt khaix Ne man, yam yaox Ne man to nawh ti hawt khaix tix, nawh lih khaing ling lawx naing brung tix, rieb ka nawh ah nin, "Mawh mhawm khawmuik lie?" ²² Gehazix deeh ah nin, "Mhawm khawmuik, cao simiang aux deeh ploi aux deeh hoek ka maix mai nhie aux ah nin, pui awn ju ra kaux pa mawh kawn simex cub cao jhai khankix taug khraox hoek ka aux ka piang gawng Epharem yam in, yuh bwanson tawx mau pa viex maix khankix tix talantan mai kraung ceep pa sang loh kix ra jung liak!" ²³ Ne man deeh ah nin, "Yuh bwanson teei maix viex mau ra talantan, " Mai nawh khyox khaw ka nawh mai puak ti sau mau ankix dau bau mau tau mai kraug ceep pa loh kix ra jung mai nawh tawx ka kawncau nawh ra kaux; mai kiex klawm ankix hu ka plak sivoe nawh heue. ²⁴ Yam hoek kix hawt guh veng, teei ankix mai hu deuh ka daux nyiex, khaix an, nawh deeh kieh kix hu mai kix lih hu heue. ²⁵ Gehazix laig ka daux nyiex mai cung ka plak sivoe simiang tix mai Elishie ah nin ka nawh, "Gehazix eue, mawh hu maix dee mawh lie?" Nawh ah nin, "Kawncau maix ang tie hu dee mawx tix heue." ²⁶ Khaix baox deeh ah nin ka nawh, "Mawh ang rhawm aux hu tau mai yam deeh veeh pui an ti lih khaing ling lawx naing brung nawh, sonsang rieb nawh ti yaox maix lie? Khex mawh bawg yam sonsang rieb tix mau mai rieb tix kraung ceep mai rieb tix sipeem khaox sanlon khankix mai khawm sipeem plix siiet, yung mai mawie khankix mai khawm siliex simex bun khankix lie?" ²⁷ Mawh kheu nan, jhawm saux sipawg Ne man tak deeh haok ka piang maix mai ka piang doeh ru maix khankix leeing ju mai Gehazix lih hu khaing ka plak sivoe ngai nawh mai hoik pon ti jhawm saux sipawg pa hoik paing awm rawm rha heue.

¹ Cub kawn simex cao jhai khankix ah nin ka Elishie, "Yam in jhak dee ot koe yix, hoik kied sikhawp ka son yix heue." ² Yuh bwanson kieh yix hu hawt rawm klawng Yawdan liak! Mai kieh pui ku kaux kid ti teei khaox khankix khaing tan mai kieh yix yuh dee tix dah sonsang mawh dee sang pon yix ti ot, mai nawh deeh pawk ah nin, "Hu heue." ³ Pui tix kaux ah nin, "Yuh bwanson nyhap rhawm hu tau mai kawncau khankix liak!" Mai nawh deeh pawk, "Aux tak sang hu heue." ⁴ Mawh kheu nan, nawh hu tau mai kix, yam hoek kix hawt rawm klawng Yawdan, kix gu pang khaox khankix goh heue. ⁵ Yam gu pui tix kaux ka pang khaox tix pang, kaing moe shiao nawh cod daux rawm mai nawh riag yo ah nin, "Amiex eue, simiang eue, moe an mawh kraung pa vai aux heue." ⁶ Pui Siyiex deeh ah nin, "Mawh cod see dee mawx?" Nawh jhi Elishie yaox dee cod moe an, Elishie kid khaox tix gawng mai taing ka dee an mai kieh moe an sibloe ti lih ka piang rawm heue. ⁷ Nawh ah nin, "Sut ti teei an son cao maix, " Nawh nyeu taix tix sut ti teei moe an heue. ⁸ Yam in simiang meung Surix yuh naing ka meung Isarelax mai kum tau mai kawncau nawh khankix ah nin, "Dee peung pan tab aux khankix, tak mawh baoh tan tix dah heue." ⁹ Pui Siyiex hoik ploi pui hu ka simiang pui Isarelax ah nin, "Yuh satix maix, son ang maix pon tiang ti hu see dee in, mawh kheu cub pui Surix khankix lih dung ti hoek tan heue." ¹⁰ Simiang pui Isarelax deeh ploi pui tix kaux khaing daux kix, hu ka dee pa krai pui Siyiex an ka nawh, mawh kheu nan, nawh tawx satix ka nawh mai nawh pau ti jhak baoh tan, pa hoik tawx nawh satix khankix ang lai joeng mawh tix bawg ra bawg heue. ¹¹ Mawh kheu nan, simiang Surix kied koe krax pa laux rhawm son grawng ceu inkix mai nawh kok ka kawncau tix khankix ah nin, "Mawh ang pex pon jhi aux yaox pui pa ot plak simiang pui Isarelax khankix khaing daux cub ex lie?" ¹² Kawn nawh tix kaux ah nin, "Simiang eue, O! cao simiang aux eue, ang koe tix kaux kawx, viang mawh nan, cao jhai Elishie pa ot ka daux meung Isarelax, mawh cao pa krai gumlox pa hoik sikah maix khankix ka daux lawg it tix ka simiang Isarelax heue." ¹³ Nawh deeh ah nin, "Hu jiang ti yaox dee ot nawh, aux tak sang ploi pui khankix hu giex ka nawh, " Mai koe pui krai ka nawh ah nin, "Nawh ot ka daux veng Dawtan heue." ¹⁴ Mawh kheu nan, nawh ploi pa ting riang cub pui naing ling lawx brung khankix hu tan, kix hoek tan plak pon sawm mai lai lawm ka veng heue. ¹⁵ Yam kaoh kawncau pui Siyiex ka plak praix ponngawb caocao, nawh yaox ka cub kru naing tix cub lai lawm ka veng, tau mai pui naing brung, cub pui naing ling lawx brung khankix mai kawncau nawh ah nin ka nawh, "Amiex eue, cao simiang eue, sang yuh ex ka mawx lie?" ¹⁶ Elishie pawk ah nin, "Paw lhat graung, mawh kheu pui pa ot tau mai ex nie lheu khaing pui pa ot tau mai kix heue." ¹⁷ Elishie rawg bwan ah nin, "Siyiex eue! aux rawg maix paoh ngai nawh, kieh nawh chix yaox liak!" Siyiex paoh ngai pui awn ju an mai nawh jhak hoik yaox gawng lua hoik naog ka brung ngu mai ling lawx naing ngu khankix, hawt vung viang Elishie heue. ¹⁸ Yam rob pui Surix khankix ka nawh, Elishie rawg bwan ka Siyiex ah nin, "Aux rawg Maix kieh pui inkix dug ngai, " Nawh Cao kieh kix dug ngai awm lox rawg Elishie bwan heue. ¹⁹ Elishie ah nin ka kix, "In ang mawh krax mai ang mawh veng an, hawt khaix aux mai aux tak viex pex hoek ka pui sawg pex heue." ²⁰ Ceu ankix lih ti mawh yam hoek kix ka veng Samarix mai Elishie deeh ah nin, "Siyiex eue, paoh Ngai pui inkix kieh kix deeh yaox liak." Siyiex deeh paoh ngai kix mai kix deeh chix yaox khawmuik mai kix tawng ka ot tix ka daux veng Samarix heue. ²¹ Yam yaox simiang Isarelax ka kix, nawh ah nin ka Elishie, "Keeing aux eue, mawh sang pah aux kix yum lie?" ²² Nawh pawk ah nin, "Maix tak ang pon ti pah kix yum, mawh sang pah maix pui pa giex maix ti viex awm pui pa laung maix khankix, ka lawm vaig maix; khawm ka ak maix lie? Tawx kix ih, nyaux, mai kieh kix deeh ka simiang kix heue." ²³ Nawh khan kix ih priex mai khaix hoik ih, nyaux kix, nawh ploi kix hu singai ka simiang kix, khaix an cub kru naing Surix khankix ang lai hoek ka haktiex pui Isarelax heue. ²⁴ Benhadat simiang haktiex Surix deeh khrawm cub kru naing nawh khankix mai lih hu lai lawm ka veng Samarix heue. ²⁵ Sibhawm praix pa kied ting koe ka daux veng Samarix mai kix lai lawm ka veng an, tom hoek ka bawg yam hoik coh kix kaing la tix mu tidaix shekhe ka mau mai kram tix mawk phwan shekhe ka mau heue. ²⁶ Khaix an yam lailing simiang Isarelax ka piang guh veng, bun tix kaux riag yo ka nawh ah nin, "Simiang aux eue, teem aux liak." ²⁷ Nawh ah nin, "Phan Siyiex ang teem maix, aux tak pon sawg krax teem son maix khaing dee mawx lie? Mawh kaoh khaing daux gwang pah nghox lie? Phan ang mawh nan, khaing daux dung biiet rawm plix siiet lie?" ²⁸ Simiang deeh chawk nawh ah nin, "Maix koe krax kha rhawm ceu patix lie?" Bun an deeh pawk lox ah nin, "Bun in ah nin ka aux, Tawx kawn simex maix sonsang ih ex ka in singaix mai tak ih kawn simex aux pasax heue ²⁹ Mawh kheu nan, yix hoik ngaik ti ih kawn simex aux mai aux ah nin ka nawh ka daux singaix khaix, tawx kawn simex maix sonsang ih yix nawh, viang mawh nan, nawh mox ka kawn simex tix heue." ³⁰ Yam mhong simiang ka lox bun an, nawh riah kraung ceep tix mai lailing ka piang guh veng, pui khankix jhak mai yaox ka ceep nawh chee ka greem tokaux tix heue. ³¹ Simiang ah nin, "Phan kaing Elishie kawn simex Shaphat kawn koe ka piang tokaux cao nawh ka daux in singaix, kieh Siyiex yuh awm ceu an ka aux lheu khaing an heue." ³² Elishie kawn ngawm ka daux nyiex mai kuad riex ju khankix ngawm tau mai nawh, simiang ploi pui tix kaux hu ka plak sivoe nawh, sivoe sang hoek cao cau an, Eliishie ah nin ka cub kuad riex ju khankix, "Yaox pex ka kawn simex cao pa pah pui in tix kaux pa ploi pui hoek sonsang kid tix viex kaing aux hu dee singai lie? Jhak! yam hoek cao cau an, nyeep siviex mai giex nawh daux diang siviex, ang mawh lox diang caong simiang nawh pa hoek ka plak khaix nawh lie?" ³³ Yam kawn sikah nawh tau mai kix, cao cau an bleeh ka nawh nin, "Krax pa kha rhawm in mawh pa kaoh khaing Siyiex tete, aux lai kawn krox jun ka Siyiex yuh ka mawx lie?"

¹ Khaix an, Elishie ah nin, "Nghiet ka gumlox Siyiex; Siyiex ah awm in, yam hoek bawg yam in daux pasax, phawng gaox nghox ca tix phliex mawh pa coh tix ka mau tix shekhe mai gaox nghox ca Ra phliex tak mawh pa coh tix ka mau tix shekhe hawt diang sivie veng Samarix heue. ² Cao kaing pa hoik een simiang rhawm tix, tix kaux, deeh pawk lox ka pui Siyiex ah nin, "Jhak heue, Phan Siyiex paoh siviex iak daux raoma, ceu inkix tak pon ti koe yuh ka mawx lie?" Mai nawh deeh ah nin, "Aux krai lox tete maix tak yaox ceu ankix ka ngai cao maix, viang mawh nan maix tak ang yaox ti ih ceu ankix heue." ³ Pui koe jhawm saux sipawg pon kaux ot ka daux diang siviex veng; mai kix ah nin ka paox tix, tix kaux hoik tix kaux, "Kheu jao patix ex kawn ngawm tin tom yum ex lie?" ⁴ Phan ex ah, ex sang laig daux veng, krax sibhawm praix hoik koe ka daux veng mai ex tak yum tan heue. Phan ex ca kawn ngawm tin, ex kawx yum heue. Mawh kheu nan, hoek yam in, kieh ex laig ap tix ka daux cub kru naing pui Samarix khankix, phan kix deuh ex im ju, ex tak im ju mai phan kix pah ex yum, ex tak yum heue. ⁵ Kix yaog ti kaoh yam kawn vhaik praix, sonsang laig tix ka daux tab cub kru naing pui Samarix khankix; yam hoek kix ka plak praix tab kru naing Surix, kix daox deng kheu ang kix lai yaox pui tix kaux kawx tan heue. ⁶ Kheu hoik kieh Siyiex cub kru naing pui Surix mhong lox sinum ling lawx naing brung mai lox sinum cub kru naing brung khankix mai lox sinum cub kru naing ting tix cub, kix ra lai ah nin ka paox tix, "Jhak heue, simiang pui Isarelax hoik vai cub simiang pui Hetax mai cub simiang pui Ejiptux khankix hoek sonsang puing ka ex heue." ⁷ Mawh kheu nan, kix yaog ti kaoh mai to sivoe yam kawn vu viex praix mai kix prah tab, nyiex goh tix mai brung la kix mai to sonsang klawd ju kix heue. ⁸ Yam hoek cub pui saux sipawg inkix ka plak praix tab, kix laig ka daux nyiex gox tix lhang, ih, nyaux mai teei ti viex mau, khri mai kraung ceep khankix khaing tan mai hu mox ceu ankix; khaix an, kix deeh hoek mai baox laig ka daux nyiex gox tang dah baox teei ti viex kraung khrai tang ceu khankix tiblah khaing tan mai baox deeh hu mox ceu ankix heue. ⁹ Khaix an, kix ra lai ah nin ka paox tix, pa yuh ex ang lai mawh ceu pa mhawm, singaix in mawh singaix koe satang pa mhawm mai ex chix kawn ot yiien yawg yuh nin, phan ex pau ti ot tin tom hoik riang praix plak ponngawb, krax pa ciyang tak hoek ka piang ex, mawh kheu nan, yam in hoek heue, kieh ex hu krai inkix ka pui doeh nyiex ma simiang khankix heue. ¹⁰ Kheu nan, kix hu kok ka cao pau diang siviex veng khankix mai krai ka kix ah nin, "Yix hoik hu ka daux tab pui Surix khankix mai daox deng ka ang pui lai ot tan tix kaux kawx, ang mhong ka lox pui, mawh ngie brung mai la pa phyawk tix khankix mai nyiex gox pa ang nyang laux khankix heue." ¹¹ Cub cao pau diang siviex khankix kok yo lox tix lih mai kix hu krai ankix ka daux nyiex simiang heue. ¹² Khaix an, simiang yaog ti kaoh ponsawm ah nin ka kawncau tix khankix, "Yam in kieh aux krai pex mhong grawng ceu pa hoik yuh pui Surix khankix ka ex, kix tawng ka hoik cai rhawm ex; mawh kheu kix lih hu plak praix tab sonsang hu mox tokaux tix ka daux tiag ah nin, yam lih kix khaing daux veng, ex giex im kix mai laig ka daux veng heue." ¹³ Ka daux kawncau nawh khankix tix kaux pawk lox ah nin, "Yuh bwanson kieh pui hun khankix deeh ing teei brung pa kawn deuk ankix phwan mu, pa hoik prah tix ka daux veng liak! Brung ankix tak lih ti awm pui Isarelax, pa kawn deuk ka daux veng, phan ang mawh nan, aux krai lox tete brung ankix tak sang awm cub pui hun pui Isarelax pa deuk khaing ceu ankix pa hoik laux leeing, mawh kheu nan, kieh ex ploi kix hu jhak heue." ¹⁴ Mawh kheu nan, kix teei ti viex ling lawx naing brung ra lhang mai simiang ploi kix hu ka plak dee ot cub kru naing pui Surix ah nin, "Hu jhak ti yaox heue." ¹⁵ Kix hu hawt khaix kix tom hoek ka rawm klawng Yawdan kix yaox hoik naog kraung ceep kix mai kraung naing kix ka pa hoik tik vud pui Surix ka hawt sidah krax khawmuik yam nied kix ti to, cao cau khankix deeh ing krai ankix ka simiang heue. ¹⁶ Khaix an, pui khankix lih hu rhim ti teei nyiex gox pui Surix, mawh kheu nan, phawng gaox nghox ca tix phliex coh tix ka mau tix shekhe mai gaox nghox ca ra phliex coh tix shekhe; awm gumlox pa hoik ah Siyiex heue. ¹⁷ Simiang yaog ti deuh cao kaing tix kaux ka pa een nawh rhawm rhi tix sonsang teei nawh beeh glawm pau diang siviex, viang mawh nan, pui khankix hoik dig ka nawh, daux diang siviex mai nawh yum, awm pa hoik ah pui Siyiex, yam lih hoek simiang ka nawh heue. ¹⁸ Awm pa hoik ah pui Siyiex ka simiang yuh nin, "Daux bawg yam in pasax daux diang siviex veng Samarix, gaox nghox ca ra phliex mawh pa coh tix ka mau tix shekhe mai phawng gaox nghox ca tix phliex mawh pa coh tix ka mau tix shekhe heue." ¹⁹ Khaix an, cao kaing deeh pawk lox ka pui Siyiex ah nin, "Yam in jhak heue, phan Siyiex paoh siviex iak khankix daux raoma, ceu inkix tak pon ti koe yuh ka mawx lie?" Nawh dee ah nin, "Aux krai lox tete! Maix tak yaox ceu ankix ka ngai tix, maix tak ang yaox ti ih ceu ankix heue." ²⁰ Mawh kheu hoik dig pui ka nawh, daux diang siviex, nawh yum heue.

¹ Khaix an Elishie sikah ka bun pa hoik deeh kieh nawh kawn simex nawh deeh im ah nin, "Maix kaoh hu mai khrawm pui daux nyiex ma maix khankix, hu peung ka dee sang pon peung maix ti ot tix dahdah, mawh kheu Siyiex hoik tawm pa sang koe krax sibhawm praix, lheu khaing an krax sibhawm praix tak lih ti koe ka piang haktiex in aliah num heue." ² Mawh kheu nan, bun an yaog ti kaoh mai yuh ceu ankix awm pa hoik ah pui Siyiex mai nawh lih hu tau mai pui daux nyiex ma tix khankix mai hu peung ka daux haktiex pui Philitix khankix aliah num heue. ³ Khaix hoik sidah aliah num, bun an deeh ing khaing haktiex pui Philitix mai nawh hu khyox khaw mhaing nyiex nawh mai haktiex nawh ka simiang heue. ⁴ Yam an simiang krai lox tau mai Gehazix kawncau pui siyiex ah nin, "Yuh bwanson krai aux mhong ceu pa kied ting kied lhaong pa hoik yuh Elishie liak!" ⁵ Nawh krai grawng hoik deeh kieh pui yum deeh im ka simiang mai grawng hoek bun pa hoik kieh kawn simex kiex deeh im, sang khyox khaw ka simiang, son grawng nyiex ma kiex mai haktiex kiex mai Gehazix deeh ah nin, "Cao simiang mai simiang aux eue, in mawh bun an mai kawn simex kiex pa hoik deeh kieh Elishie nawh deeh im heue." ⁶ Yam chawk simiang ka bun an, kiex deeh krai simiang mhong grawng ankix khawmuik, mawh kheu nan, simiang yaog ti deuh cao kaing son kiex ah nin, "Deeh tawx can ceu pa mawh cie kiex khawmuik mai deeh sawn tix tawx can ceu pa lih khaing tong kaung kiex khankix, jah khaing daux singaix hoik lih hu kiex khaing daux haktiex in tom hoek yam in heue." ⁷ Khaix an, Elishie hu ka veng Damase mai Benhadat simiang haktiex Surix saux mai kix krai gawng hoek pui Siyiex ka nawh ah nin, "Pui siyiex hoik hoek tin heue." ⁸ Simiang ah nin ka Hazalax, "Teei ti viex totaix ka daux taix maix mai hu pub ka pui Siyiex mai kiex chawk ti yaox ka Siyiex ah nin, mawh sang deeh pon moi aux khaing jhawm saux in lie?" ⁹ Mawh kheu nan, Hazalax lih hu sonsang pub tix ka nawh mai nawh teei ti viex totaix ceu pa mhawm khankix kuceu hu tau mai tix khaing daux veng Damase mai tang ka piang kala uk tixpon mu mai nawh hoek mai cung sivoe nawh ah nin, "Kawn simex maix Benhadat simiang haktiex Surix ploi aux hoek ka maix ah nin, mawh sang deeh pon moi aux khaing jhawm saux in lie?" ¹⁰ Elishie deeh ah nin ka nawh, "Hu krai ka nawh maix tak deeh pon moi tete, " Viang mawh nan, Siyiex hoik jhi aux yaox ka tak sang yum nawh tete heue. ¹¹ Nawh jeung ngai tix jhak ka nawh, tom hoik kaig nawh mai pui Siyiex yiiem heue. ¹² Hazalax ah nin, "Simiang aux yiiem kheu jao patix lie?" Nawh deeh pawk ah nin, "Mawh kheu aux tawng ka pa caox caig pa tak sang yuh maix ka kawn praix pui Isarelax khankix maix tak gleeing ka dee kaux cong kix ka ngu mai maix tak pah ka pui awn ju kix yum ka vaig mai maix tak siblat kawn nyawm ka piang tiex mai maix tak pih vaig bun pa koe kaux khankix heue." ¹³ Mawh kheu nan, Hazalax deeh ah nin, "Khex sang pon yuh grawng see pa ting yuh nin lie?" Elishie deeh pawk lox ah nin, "Siyiex hoik jhi aux yaox, ka tak sang pon maix ti mawh simiang piang haktiex Surix heue." ¹⁴ Khaix an, Hazalax lih hu khaing Elishie mai deeh ing hoek ka simiang nawh mai simiang nawh chawk ah nin, "Hoik ah Elishie ceu patix ka maix lie?" Nawh deeh pawk ah nin, "Nawh hoik krai aux mhong ka tak sang moi maix tete heue." ¹⁵ Ka daux singaix khaix, nawh teei man pu tix pheen cub ka rawm mai kheem ka piang ngai simiang, khaix an, simiang yum mai Hazalax plud ti kwang haktiex ka dah dee ot nawh heue. ¹⁶ Ka daux num hoik kwang Yoram kawn simex Ahap simiang pui Isarelax khankix daux phwan num, Yehoshaphat mawh simiang ka daux haktiex meung Yudax, khaix an Yoram kawn simex Yehoshaphat jah ti yuh simiang ka daux haktiex meung Yudax heue. ¹⁷ Nawh koe ju tixngoe ra num, yam yaog nawh tix mawh simiang, nawh kwang ka daux veng Yerusaliem daix num heue. ¹⁸ Nawh hu ka daux krax pa hoik yuh cub simiang pui Isarelax khankix, awm krax pa yuh daux nyiex ma Ahap, mawh kheu nawh teei ti moeng kawn bun Ahap mai nawh yuh ceu pa caox caig ka daux ngai Siyiex heue. ¹⁹ Siyiex tak ang lai yuh meung Yudax laux leeing, kheu jao min ceu kaux kawncau nawh simiang Davit, awm hoik tawx Nawh Cao sijax mukheu ka nawh sonsang ang kawk ngu pa riang Nawh Cao lai jud ka daux kawn simex nawh khankix leeing ju heue. ²⁰ Glang bawg yam singaix kwang nawh, meung Edom yaog tix tieh feen ka simiang Yudax mai kix tang deeh yaog simiang tix kaux ka piang cao kix heue. ²¹ Yoram lih hu ka veng Zairax, tau mai ling lawx naing brung nawh khankix mai nawh yaog ti kaoh ponsawm mai puing ka pui Edom khankix, pa lai lawm ka nawh, mai cub cao kaing naing ling lawx naing brung khankix, viang mawh nan, pui Edom khankix hoik tang to ka plak nyiex gox ot tix heue. ²² Pui Edom hoik tieh feen ka meung Yudax tom hoek daux in singaix mai meung Libana deeh yaog ti tieh feen ka kix ka daux bawg yam an heue. ²³ Grawng kaing pa deuk simiang Yoram mai can ceu pa yuh nawh khankix, ang mawh pa tiiem tix ka daux phuk lai been simiang meung Yudax lie? ²⁴ Yoram laux lee tix tau mai keeing nawh mai sipaung tau mai keeing nawh ka daux veng Davit, khaix an, kawn simex nawh Ahaziyax hoik deeh plud ti kwang khaix dee ot nawh heue. ²⁵ Ka daux num yam kwang Yoram kawn simex Ahap; simiang meung Isarelax kao ra num, Ahaziyax kawn simex Yehoram simiang meung Yudax hoik jah ti kwang ka haktiex heue. ²⁶ Ahaziyax koe ju tixnga ra num, yam mawh nawh simiang, nawh kwang ka daux veng Yerusaliem tix num, ceu kaux miex nawh mawh Athaliyax kawn saux bun Onerix, simiang meung Isarelax heue. ²⁷ Nawh hu ka daux krax pa hoik yuh Ahap mai hoik yuh ceu pa caox caig ka daux ngai Siyiex, awm pa hoik yuh paox nyiex ma Ahap khankix kheu jao mawh nawh kheue Ahap heue. ²⁸ Nawh hu tau mai Yoram kawn simex Ahap sonsang yuh naing ka Hazalax, simiang meung Surix, ka daux veng Ramot haktiex Gilat mai pui Surix hoik kieh Yoram mat heue. ²⁹ Khaix an, simiang Yoram deeh ing ka veng Yezerelax, sonsang pai dee mat tix khaing cub pui Surix, hawt veng Ramax, yam hu puing nawh ka Hazalax simiang haktiex Surix mai Ahaziyax kawn simex Yehoram simiang meung Yudax, lih hu jhak Yoram, kawn simex Ahap ka daux Yezerelax, mawh kheu saux nawh heue.

¹ Cao jhai Elishie kok kawn simex cao jhai tix kaux mai ah nin ka nawh, "Nhawt nyoi maix, teei kawk bee in ka daux taix maix mai hu ka daux veng Ramot haktiex Gilat heue." ² Yam hoek maix ka dee an, sawg ti yaox Yehu, kawn simex Yehoshaphat; kawn simex Nimashi mai laig ka dee ot nawh mai kieh nawh yaog ti kaoh hu khaing paox grawm tix khankix mai viex nawh laig ka daux lawg plak daux awx. ³ Khaix an, teei kawk bee viex maix mai groi ka piang kaing nawh ah nin, Siyiex ah nin, "Aux hoik groi bee ka piang maix mai yaog maix mawh simiang ka piang pui Isarelax, " Khaix an, paoh siviex mai to, paw lai nhim liak. ⁴ Mawh kheu nan, pui awn ju kawncau cao jhai lih hu ka veng Ramot haktiex Gilat heue. ⁵ Yam hoek nawh tan, cao kaing kru naing khankix ngawm ti kum tau mai nawh ah nin, "Cao kaing kru naing khankix eue, aux koe lox krai ka pex, " Mai Yehu deeh ah nin, "Mawh pui mawx ka daux pui yix lie?" Nawh deeh ah nin, "Cao simiang kru naing ting eue, mawh maix heue." ⁶ Khaix an, Yehu kaoh mai laig ka daux nyiex mai cao jhai groi bee ka piang kaing nawh mai ah nin ka nawh, "Aux hoik groi bee ka piang kaing maix mai yaog maix mawh simiang ka piang ceu pui Siyiex, pui Isarelax khankix heue. ⁷ Maix tak pah doeh nyiex ma cao simiang maix Ahap, sonsang pon aux tix pawk bix tang nham kawncau cao jhai Aux khankix mai nham kawncau mau soi Siyiex khankix, ka daux Yezabelax heue. ⁸ Mawh kheu doeh nyiex ma Ahap khawmuik tak laux leeing. Aux tak teei ti tik simex ka daux pui Isarelax khankix mai khawm pa ot ka plak praix khaing Ahap heue. ⁹ Mawh kheu nan, Aux kieh doeh nyiex ma Ahap awm doeh nyiex ma Yerobom, kawn simex Nebat mai tak baox kieh awm doeh nyiex ma Basha, kawn simex Ahiyax heue. ¹⁰ Sox tak ih nex Yezabelax ka daux; gwang haktiex veng Yezerelax mai pui sipaung tokaux yum kiex ang koe mai nawh paoh siviex mai to heue." ¹¹ Yehu lih hoek ka kawncau cao simiang tix khankix mai an tix kaux ah nin ka nawh, "Mhawm khawmuik lie? Pui yhot in, hoek ka maix kheu jao grawng patix lie?" Yehu ah nin ka kix, "Pex tawng ka pui an mai tawng lox ceu pa sikah nawh heue." ¹² Kix ah nin, "An mawh lox pie lhen; maix krai ka yix tete, " Nawh ah nin, "Nawh krai yuh nin ka aux, ka lox pa ah nin, Siyiex ah yuh nin, " Aux hoik groi bee ka piang kaing maix mai yaog maix mawh simiang ka piang pui Isarelax heue." ¹³ Pui ku kaux nied ti peeik kraung ceep tix mai tawm ka piang glawk bawng greem caong Yehu mai kix phlu teettawng ah nin, "Yehu mawh simiang heue." ¹⁴ Mawh kheu nan, Yehu kawn simex Yehoshaphat kawn simex Nimashi tieh feen ka piang Yoram, mawh kheu jao Hazalax simiang haktiex Surix, Yoram mai pui Isarelax khawmuik hoik tiebtie ka veng Ramot haktiex Gilat heue. ¹⁵ Simiang Yoram deeh ing ka veng Yezerelax sonsang pai nawh mat tix, pa hoik mat nawh khaing pui Surix yam hu puing nawh ka Hazalax, simiang haktiex Surix heue. Yehu ah nin, "Phan pex khaw rhawm tete, paw kieh pui boek tix klawd tix kaux kawx khaing daux veng, sonsang hu krai nawh grawh grawng ankix ka veng Yezerelax heue." ¹⁶ Yehu brug ling lawx naing brung mai hu ka veng Yezerelax, mawh kheu Yoram nyat tix tan mai Ahaziyax simiang meung Yudax hoek sonsang jhak tix ka Yoram heue. ¹⁷ Koe cao pau veng tix kaux cung ka piang nyiex pau ka daux veng Yezerelax mai nawh yaox cub pui Yehu khankix ah nin, "Aux yaox cub pui khankix tix cub heue." Yoram deeh ah nin, "Kok ka pui naing brung tix kaux mai ploi nawh hu rieb ka kix mai kieh nawh ah nin, koe pa nhim lie?" ¹⁸ Mawh kheu nan, pui naing brung hu rieb ah nin, "Simiang ah yuh nin; koe pa nhim lie?" Yehu deeh ah nin, "Koe ang koe pa nhim mawh sang yuh maix tix ka lie? Veeh maix hawt khaix aux khaing heue." Pui pa pau tix jhak deeh krai grawh grawng an ah nin, "Cao cau hoik hu ka kix tan, viang mawh nan, nawh ang nyang bax hoek heue." ¹⁹ Simiang baox ploi pui naing brung ra kaux tix kaux hu mai hoek ka kix ah nin, "Simiang ah yuh nin Koe pa nhim lie?" Yehu pawk ah nin, "Koe ang koe pa nhim mawh sang yuh maix patix ka lie? Deeh veeh maix hawt khaix aux khaing heue." ²⁰ Pui pau krai grawng an ka simiang ah nin, "Nawh hoik haok ka kix mai ang nyang bax hoek khaing tan mai ling lawx naing brung phat nawh awm pa phat Yehu, kawn simex Nimashi mai nawh phat kied sidaing phai heue." ²¹ Yoram ah nin, "Khre rien tix heue." Mai kix khre rien ling lawx naing brung, khaix an, Yoram simiang pui Isarelax mai Ahaziyax simiang meung Yudax lih hu tau mai ling lawx naing brung cie kiex mai lih hu rieb ka Yehu mai kix pub nawh ka biang haktiex Nabok pui veng Yezerelax heue. ²² Khaix an, yam yaox Yoram ka Yehu ah nin, "Yehu eue, koe pa nhim lie?" Yehu deeh pawk ah nin, "Pa nhim lai koe yuh ka mawx? Miex maix hoik yuh pa lud vao mai kaing simeed nie ding nie dod heue." ²³ Yoram deeh veeh mai to tix ing mai ah nin ka Ahaziyax, "An mawh krax pa tieh feen heue." ²⁴ Yehu sau riang tix vaik ak mai puing ka Yoram krox ka plak khaix see sinax klip nawh mai goh ka daux ling lawx naing brung tix heue. ²⁵ Yehu ah nin ka cao kaing naing tix Bidaka, "Sileed ti tik nawh ka daux biang haktiex Nabok, pui veng Yezerelax mai kieh maix doh keud kah, yam brug maix ling lawx brung tau mai aux ka plak khaix keeing nawh Ahap, Siyiex hoik ah ti deuh krax ciyang in ka piang nawh heue." ²⁶ Aux yaox nham Nabok mai nham kawn simex nawh kawx; Siyiex ah nin, "Aux tak pawk bix ka maix daux biang haktiex in, in mawh pa hoik ah Siyiex heue. Mawh kheu nan, yam in teei nawh mai tik ka piang haktiex in, awm gumlox pa hoik ah Siyiex heue." ²⁷ Yam yaox Ahaziyax meung Yudax ceu in, nawh to hu ka krax Biet Hagan daux sipeem taux mawh kheu nan, Yehu hawt leue nawh ah nin, "Puing nawh ka daux ling lawx naing brung, " Mai kix hawt puing nawh mat ka blaong veng Gurax, hawt veng Ibalam, khaix an, nawh to ka veng Megidaw mai yum tan heue. ²⁸ Kawncau nawh khankix tang nawh daux ling lawx naing brung ing ka veng Yerusaliem mai sipaung nawh ka daux simeeig keeing nawh ka daux veng Davit heue. ²⁹ Ka daux num yam kwang Yoram kawn simex Ahap ka haktiex kao tix num, Ahaziyax deeh yaog ti mawh simiang ka piang meung Yudax heue. ³⁰ Yam hoek Yehu ka daux veng Yezerelax, Yezabelax mhong ka grawng ceu an mai Yezabelax kraix sidah bhawng mai sat hauk kaing tix mai kok jhak ka plak praix khaing daux siviex iak heue. ³¹ Yam laig Yehu daux diang siviex, Yezabelax ah nin, "Koe pa nhim ka Zimarix pa pah cao simiang tix lie?" ³² Yehu maong ti jhak ka daux diang siviex iak ah nin, "Mawh pui mawx pa ot plak aux lie? Mawh pui mawx lie?" Pui sieh ra loe kaux kok jhak nawh khaing daux siviex iak heue. ³³ Yehu ah nin, "Cot kiex rau!" mawh kheu nan, kix cot kiex rau mai nham kiex hoik phrit ka guh veng mai ka piang brung, mai brung hoik dug dig kiex heue. ³⁴ Yam laig nawh plak daux, nawh hoik ih nyaux, khaix an, nawh ah nin, "Hu yam in, jhak pex sipaung ka bun pa hoik pon pa jhax lawg in, mawh kheu mawh kiex kawn bun simiang ti kaux heue." ³⁵ Mawh kheu nan, kix hu sipaung ka kiex, viang mawh nan, kix ang yaox tokaux kiex, lheu khaing si-ang kaing mai caong mai taix kiex heue. ³⁶ Kix deeh hoek krai ka nawh mai Yehu ah nin, "In mawh gumlox Siyiex, pa hoik krai Nawh Cao ka kawncau Nawh Eliyax pui veng Tishabix pa ah nin, sox khankix tak ih nex Yezabelax, ka biang haktiex Yezerelax heue." ³⁷ Tokaux yum Yezabelax tak mawh pa awm aing ka daux tong kaung, biang haktiex Yezerelax tom ang kix lai pon tix ah nin, "In mawh Yezabelax heue."

¹ Ahap koe kawn simex atixgliah kaux daux veng Samarix, Yehu tiiem lai tawx hu ka veng Samarix mai ka cao kwang ka veng Yezerelax mai kuad riex ju khankix mai ka pui pa eei ka kawn simex Ahap khankix ah nin, ² "Yam in awm hoik koe kawn simex cao simiang pex khankix tau mai pex mai pa koe ling lawx naing brung pex khankix mai brung pex khankix mai veng pa kaux cong mai pa koe kraung naing pex khankix, mawh kheu nan, yam hoek lai in ka pex. ³ Laug ti teei kawn simex pa kied mhawm pa kied khaw cao simiang pex mai kieh nawh ngawm ka piang dang ngeung keeing nawh mai puing naing son doeh nyiex ma cao simiang pex heue." ⁴ Kix kied koe krax lhat graung ah nin, "Simiang ra kaux ang lai pon cung plak sivoe nawh mai ex sang pon cung yuh ka mawx lie?" ⁵ Pa mawh cao kaing ka daux nyiex ma mai pa mawh cao kaing ka daux veng mai kuad riex ju an khankix mai pui pa eei kawn simex nawh ploi pui hu ka Yehu ah nin, "Yix mawh siliex cawng maix, yix tak sang yuh can ceu pa krai maix ka yix khawmuik mai yix tak ang lai yaog pui tix kaux kawx mawh simiang, yuh can ceu pa khaw caw ka rhawm maix heue." ⁶ Khaix an Yehu baox tiiem lai ka kix ra bawg tix bawg ah nin, "Phan pex mawh pui aux mai cu nghiet lox aux daux bawg yam in pasax, teei kaing pui ankix pa mawh kawn simex cao simiang pex mai hoek ka aux daux veng Yezerelax, " Yam an kawn simiex simiang khankix atixgliah kaux koe tau mai pui ting daux veng khankix, pa hoik eei ka kix heue. ⁷ Yam hoek lai ka kix, kix teei kawn simex simiang khankix mai pah kix yum khawm atixgliah kaux mai sau kaing kix ka daux khrawng mai tawx hoek ka daux veng Yezerelax heue. ⁸ Khaix an, cao cau khankix hoek ka Yehu ah nin, "Kix hoik viex kaing kawn simex simiang khankix hoek heue." Yehu ah nin, "Pum ti deuh ra pum hawt diang laig daux siviex veng tom hoek ponngawb heue." ⁹ Ka daux ponngawb, Yehu lih hu ka plak praix mai cung ah nin ka pui khankix, "Pex mawh pa rahsee heue. Aux hoik tieh feen ka cao simiang tix mai hoik pah nawh yum, viang mawh nan, mawh pui mawx pa hoik pah ka pui inkix khawmuik lie?" ¹⁰ "Deuh pex tawng gumlox Siyiex pa hoik sikah Nawh Cao ka grawng pa dex dawd mai doeh nyiex ma Ahap khankix, tak ang mawh pa giex going tix gum kawx, mawh kheu Siyiex hoik yuh ceu an awm pa hoik krai Nawh cao ka kawncau tix Eliyax heue." ¹¹ Mawh kheu nan, Yehu hoik pah ti tik pui pa kawn deuk khaing doeh nyiex ma Ahap khawmuik ka daux veng Yezerelax mai khawm pui ting lhaong nawh mai paox grawm paox gru pa kied dex mai nawh mai cao giex kaing li khankix, tom ang lai prah kix deuk tix kaux kawx heue. ¹² Yehu yaog ti kaoh mai hu ka veng Samarix, daux krax yam hoek nawh ka veng Bietekedax, ka dee ot cub cao liang yung khankix, ¹³ Yehu sipub ka cub puxaik Ahaziyax, simiang meung Yudax mai chawk kix ah nin, "Mawh pex pui mawx lie?" Mai kix deeh pawk ah nin, "Yix mawh cub puxaik Ahaziyax, yix lih hoek ti yaox ka kawn simex simiang khankix mai ka kawn simex miex laux simiang khankix heue." ¹⁴ Yehu ah nin, "Giex im kix heue." Mawh kheu nan, kix tom giex im kix tixpon ra kaux mai pah kix yum hawt rawm daux veng Bietekedax mai nawh ang lai prah kix deuk tix kaux kawx heue. ¹⁵ Yam lih hu nawh khaing tan, nawh sipub ka Yehonadat kawn simex Rekhap, hoek tix rieb nawh; mawh koe rhawm rahsee maix ka aux awm koe pa rahsee aux ka piang maix lie? Yehonadat deeh pawk ah nin, "Mawh heue." Yehu deeh ah nin, "Phan mawh nan, yaog taix maix ka aux mai Yehu tuk nawh haok mai tix daux ling lawx naing brung heue." ¹⁶ Khaix an nawh ah nin, "Hu tau mai aux, jhak ti yaox krax pa kied koe rhawm aux ka son Siyiex, " Mawh kheu nan, kix kieh nawh ngawm ling lawx naing brung tau mai nawh heue. ¹⁷ Yam hoek nawh ka veng Samarix, nawh pah can pui pa kawn deuk khaing daux doeh nyiex ma Ahap khawmuik, pa ot ka daux veng Samarix, tom hoik laux lak pak leeing kix awm gumlox Siyiex, pa hoik krai Nawh Cao ka Eliyax heue. ¹⁸ Khaix an, Yehu khrawm cub pui hun khawmuik mai ah nin ka kix heue. "Ahap yuh kaing jhaw Balax ceeix ngie khaing, viang mawh nan, Yehu tak sang yuh kaing jhaw nawh tom nie heue. ¹⁹ Yam in kok cub cao jhai Balax khawmuik mai kawncau nawh khawmuik mai cub cao giex kaing li nawh khawmuik, hoek ka aux, paw kieh deuk tix kaux kawx, mawh kheu aux koe krax tan appong pa ting ka Balax can pui pa ang hoek khankix tak ang lai deuh im, viang mawh nan, Yehu hoik yuh cuyi tau mai pa keud nawh tix sang pah pui pa krub Balax khankix laux leeing heue." ²⁰ Yehu ah nin, "Baox cox khre krax yuh pa krub ka son Balax, " Mawh kheu nan, kix ao krai ka grawng an heue. ²¹ Khaix an Yehu ploi pui hu kudah kudee ka daux haktiex Isarelax mai pui pa krub ka Balax khankix hoek khawmuik, ang koe pui deuk pa ang hoek tix kaux kawx, mawh kheu nan, kix hoek ka daux nyiex bwan Balax mai pui hoik naog ka daux nyiex bwan Balax jah ka daux plak in tom hoek plak an heue. ²² Yehu ah nin ka cao kaing pa priex kraung ceep, viex kraung ceep ankix tawx ka son pui pa krub ka Balax khankix, mawh kheu nan, nawh viex kraung ceep an tawx son kix heue. ²³ Khaix Yehu mai Yehonadat kawn simex Rekhap laig ka daux nyiex bwan Balax mai ah nin ka pui pa krub Balax khankix, "Sawg mai jhak paw lai kieh kawncau mau soi Siyiex koe tin tau mai pex mai kieh mawh ngie pui pa krub ka Balax pa koe tin nong nong heue." ²⁴ Kix laig ka daux, sonsang tan krax tan pa appong mai krax tan pa gleeing, Yehu hoik deuh pui tidaix kaux ka plak praix ah nin, "Phan pui ankix pa hoik ap aux ka daux tawm taix pex tix kaux kaux pon ti glawd mai pui pa kieh nawh glawd, tak deeh plud ju son ju pui an heue." ²⁵ Yam hoik tan nawh krax tan pa gleeing, khaix an, Yehu ah nin ka pui pa pau diang khankix heue. "Laig ka plak daux mai pah kix, paw kieh pui tix kaux kawx pon tix lih plak praix, " Mai pah kix yum ka lawm vaig, khaix an cub cao pau diang mai cub cao kaing naing khankix teei ti tik kix lih mai laig tom ka daux lawg nyiex bwan Balax heue. ²⁶ Kix viex riang grang ankix lih khaing nyiex bwan Balax mai gleeing heue. ²⁷ Khaix an, kix raig riang grang mai yieh nyiex bwan Balax mai yuh dee an mawh dang aing tom hoek daux in singaix heue. ²⁸ Awm an Yehu hoik yuh Balax laux leeing khaing daux haktiex Isarelax heue. ²⁹ Viang mawh Yehu ang lai veeh tix singai khaing phimap phighram pa yuh Yerobom kawn simex Nebat mai pa hoik kieh pui Isarelax khankix lud ka riang kawn mawie khri, pa ot ka daux veng Betelax mai veng Dan heue. ³⁰ Siyiex ah nin ka Yehu, "Kheu jao yuh maix ceu pa mhawm mai ceu pa khaw caw ka daux ngai Aux mai maix hoik yuh ceu ankix ka doeh nyiex ma Ahap ka ceu pa khaw ka daux rhawm Aux khawmuik, kawn simex maix khankix tak yaox ti ngawm ka piang dang ngeung pui Isarelax tom hoek pon ju heue." ³¹ Yehu ang lai cu ti hawt khaix gumlox tat jhawm Prawng Siyiex Isarelax tau mai khawm rhawm rhi tix khawmuik; mawh kheu ang nawh cu ti gah khaing phimap phighram pa hoik yuh Yerobom, pa hoik kieh pui Isarelax khankix lud heue. ³² Ka daux bawg yam singaix ankix, Siyiex hoik jah ti gwieh haktiex Isarelax mai Hazelax hoik pex ka dah dee pa hoik kwang pui Isarelax khawmuik, ³³ Jah khaing plak lih singaix rawm klawng Yawdan mai haktiex Gilat khawmuik, dee ot pui Gilat, pui Rubin mai pui Manashe khankix, jah khaing veng Araw hawt rawm klawng Anon mai khawm haktiex Gilat haktiex Bashan khawmuik heue. ³⁴ Yam in, grawng kaing pa kawn deuk Yehu mai can ceu pa yuh nawh khawmuik mai pa hoik koe riang rao nawh khawmuik, ang hoik mawh pa tiiem tix ka daux phuk lai been cub simiang pui Isarelax lie? ³⁵ Mawh kheu nan, Yehu hoik laux lee tix tau mai keeing nawh khankix mai kix sipaung nawh ka daux veng Samarix, khaix an, kawn simex nawh Yehohaza deeh plud tix kwang ka dah dee ot nawh heue. ³⁶ Baux yam kwang Yehu ka pui Isarelax daux veng Samarix koe tixnga daix num heue.

¹ Yam yaox Athaliyax miex Ahaziyax ka yum kawn simex tix, kiex yaog ti kaoh yuh doeh nyiex ma simiang laux leeing khawmuik heue. ² Viang mawh nan, Yehoshebax kawn bun simiang Yoram nan Ahaziyax, hoik briex teei Yosha kawn simex Ahaziyax mai hu dee singai khaing daux sinax cub kawn simex simiang khankix, ka pa sang pah kix nawh yum mai kix mox nawh tau mai miex pa kia ngien ka nawh ka daux lawg it, khaing Athaliyax sonsang ang kix pon pah nawh yum heue. ³ Mawh kheu nan, nawh hoik mox tix tau mai miex pa kia ngien nawh ka daux nyiex bwan Siyiex liah num glang kwang Athaliyax ka haktiex heue. ⁴ Ka daux aliah num tix num, Yehoyadax ploi pui hu kok ka cao kaing naing pa kwang lien tixyieh, khaing daux cub lien cao pa pau nawh mai khaing daux cub lien cao pa pau veng khankix, hoek ka daux nyiex bwan Siyiex mai nawh yuh sijax mukheu tau mai kix mai kieh kix tiextu tix ka daux nyiex bwan Siyiex mai jhi kix yaox kawn simex simiang heue. ⁵ Khaix an, nawh tawm lox ka kix ah nin, "In mawh pa tak sang caw pex ti yuh ka daux pex loe son tix son, pa hoek ti teei beeh glawm ka daux singaix twah, tak mawh pa khre rien ka nyiex haw simiang heue. ⁶ Loe son tix son tak mawh pa pau diang siviex Surax mai loe son tix son tak mawh cao pa pau diang siviex ka plak khaix cub lien cao pa pau veng khankix, pex tak mawh cao pa priex rien tix tiebtie ka nyiex haw sonsang ang hoek krax laux heue. ⁷ Khaing ka daux pex ra cub, pa hoik pluat beeh glawm tix khaing daux singaix twah tak mawh cao pa priex rien tix jhak ka nyiex bwan Siyiex son simiang heue. ⁸ Pex tak ot rawb rim simiang ku daog ku dawn tau mai kraung naing ka daux taix tix ku kaux daux pui mai can pui pa preeng tix laig sinax pex tak pah nawh yum heue. Pex tak ot tau mai simiang yam lih yam laig nawh heue." ⁹ Cao kaing piang pui tixyieh kaux khankix hawt ti yuh can ankix, awm pa hoik tawm cao giex kaing li Yehoyadax khawmuik, kaux pui mawh kaux pui an tang viex ka pui cao tix khankix, pa hoik koe beeh glawm singaix twah mai khawm pui ankix pa hoik pluat beeh glawm tix khaing singaix twah mai hoek ka cao giex kaing li Yehoyadax heue. ¹⁰ Cao giex kaing li teei ti tawx pliah mai plah tieb cie simiang Davit khankix, pa koe ka daux nyiex bwan Siyiex ka cub cao kaing naing pa kwang ka lien tixyieh kaux heue. ¹¹ Khaix an, cub pa pau khankix, cung ku kaux daux pui mai kraung naing cie tix, pa koe daux taix mai ot rawb rim hawt vung viang simiang, jah khaing praok plak dawm nyiex bwan tom hoek ka praok plak gwiex nyiex bwan hawt dex khu dee tan mai nyiex bwan heue. ¹² Cao giex kaing li hoik viex kawn simex simiang lih plak praix mai ceep mhok khri ka piang nawh mai ap phuk lai sijax mukheu ka nawh, kix yaog nawh mawh simiang mai groi rawm bee ka piang nawh mai kix dieh taix tix ah nin, "Kieh simiang lang ju heue." ¹³ Yam mhong Athaliyax ka lox sinum cao pa pau mai cub pui hun khankix, nawh hoek ka pui khankix pa ot ka daux nyiex bwan Siyiex heue. ¹⁴ Yam yaox nawh ka ankix, simiang cung ti ot hawt rong, awm pa koe been simiang haktiex Yudax khankix mai cao thong cao bung cub cao phlu teettawng khankix ot hawt simiang, pui haktiex khawmuik hoik koe krax gaux rhawm mai phlu teettawng khankix, Athaliyax riah kraung ceep tix mai riag yo ah nin, krax pa tieh feen! Krax pa tieh feen! ¹⁵ Khaix an, cao giex kaing li Yehoyadax tawx lox ka cub cao kaing naing piang pui tixyieh khankix mai ka cao kaing kru naing khankix mai ah nin ka kix, "Teei kiex lih plak praix sinax cao pa pau khankix mai pah kiex yum tau mai can pui pa hawt khaix kiex khankix ka lawm vaig heue." Mawh kheu cao giex kaing li ah nin, "Paw pah kiex ka daux nyiex bwan Siyiex." ¹⁶ Kix giex kiex mai kiex lih hu krax laig brung ka daux nyiex haw simiang mai pah kiex yum tan heue. ¹⁷ Khaix an, Yehoyadax yuh sijax mukheu sinax Siyiex mai simiang mai pui hun khankix, sonsang mawh kix pui Siyiex mai baox yuh sijax mukheu sinax simiang mai pui khankix heue. ¹⁸ Pui haktiex khawmuik hu ka nyiex bwan Balax mai kix yieh ti tik ankix mai kix raig ti tik khu dee tan mai riang grang khawmuik mai pah Mattan cao giex kaing li Balax ka plak sivoe khu dee tan mai cao giex kaing li Yehoyadax deuh cao pa pau tix jhak nyiex bwan Siyiex heue. ¹⁹ Khaix an, nawh viex cao kaing naing pa kwang ka piang pui tixyieh khankix mai cub lien pa pau nawh khankix mai khawm cub lien pa pau khankix mai khawm pui haktiex khawmuik mai kix viex simiang lih khaing daux nyiex bwan Siyiex mai viex nawh hu ka plak krax diang siviex dee ot lien cub pa pau veng khankix ka nyiex haw simiang mai nawh ngawm ka piang dang neung simiang heue. ²⁰ Mawh kheu nan, pui haktiex khawmuik koe krax gaux rhawm mai veng hoik yiien mai kix hoik pah Athaliyax yum ka vaig, daux nyiex haw simiang heue. ²¹ Yehosha koe ju aliah num, yam yaog nawh tix mawh simiang heue.

¹ Ka daux yam kwang Yehu ka haktiex aliah num tix num, Yehosha yaog ti mawh simiang mai nawh kwang ka daux veng Yerusaliem tixpon num, ceu kaux miex nawh mawh Zibiyax pui veng Berashebax heue. ² Yehosha yuh pa khaw caw ka daux ngai Siyiex, glang singaix kawn im ju nawh tau mai krax pa sidiex gau cao giex kaing li Yehoyadax ka nawh khawmuik heue. ³ Viang mawh nan, can dee pa lhaong khankix ang nyang bax teei ti tik dee singai, pui khankix kawn tan krax pa appong mai gleeing nyawng bhawng ka piang dee pa lhaong khankix heue. ⁴ Yehosha ah nin ka cub cao giex kaing li khankix, pa hoik viex kix nawh hoek ka daux nyiex bwan Siyiex mai mau pa hoik tat pui ku kaux jum ngawh cao tix khankix, khawm mau pa tang viex pui tix tan khawm rhawm tix khawmuik, son pa viex hoek ka daux nyiex bwan Siyiex, ⁵ kieh cao giex kaing li khankix rieb ti priex ankix, khaing paox meed paox tawng tix mai kieh kix deeh cox nyiex bwan, can dee pa hoik yaox kix dee laux heue. ⁶ Viang mawh nan, yam hoik kwang simiang Yehosha ka haktiex tixnga loe num, cao giex kaing li khankix ang nyang bax cox ka dee pa laux nyiex bwan khankix heue. ⁷ Mawh kheu nan, simiang Yehosha kok ka cao giex kaing li Yehoyadax mai cao giex kaing li tang kaux mai ah nin ka kix, "Pex ang nyang bax cox pa laux nyiex bwan khankix yuh ka mawx lie? Mawh kheu nan, yam in paw lai baox koh mau khaing paox meed paox tawng pex, viang mawh nan, deeh tawx ankix sonsang deeh cox dee laux nyiex bwan khankix heue." ⁸ Cao giex kaing li khankix hoik khaw rhawm ka ang tix lai rieb mau khaing pui khankix mai kix ang lai cox dee pa laux nyiex bwan khankix heue. ⁹ Khaix an cao giex kaing li Yehoyadax teei teug tix mu mai toh daux ka piang dawb teug mai deuh hawt praok khu dee tan ka praok plak dawm dee laig pui ku kaux ka daux nyiex bwan Siyiex heue. Cao giex kaing li pa pau hawt diang siviex khankix tak sau mau pa viex pui khankix laig ka daux nyiex bwan Siyiex khawmuik ka daux teug an heue. ¹⁰ Mawh kheu nan, yam yaox kix nie mau ka daux teug, cao pa tiiem lai simiang mai cao giex kaing li pa ting hoek tix simin mau pa hoik yaox kix ka daux nyiex bwan Siyiex mai sau ti priex ka daux bau heue. ¹¹ Khaix an, kix ap mau pa hoik ciang tix khankix ka daux tawm taix cao pa yuh kaing, pa pau ti jhak ka daux nyiex bwan Siyiex heue. Kix tawx ngawh riang cangmai mai cao pa yuh kaing khankix ka nyiex bwan Siyiex, ¹² mai khawm ngawh riang cao pa yuh kaing tiex mai cao saik lon simaox mai son pa sang liag kix khaox mai lon simaox pa saik khankix, sonsang deeh cox dee pa laux nyiex bwan Siyiex mai son ngawh riang pa sang caw kix ti tawx khawmuik ka kaing dee cox nyiex bwan Siyiex heue. ¹³ Viang mawh nan, mau tan pa viex hoek ka daux nyiex bwan Siyiex, pa ang nyang yuh mawh kawk mau, sigiiep, ban khoek, klong mai teettawng mai kraung mau, kraung khri khankix son nyiex bwan Siyiex heue. ¹⁴ kix tawx mau ankix ka cao yuh kaing mai kix cox nyiex bwan Siyiex ka heue. ¹⁵ Lheu khaing an, kix ang lai lo krax pa ciied carang khaing pui pa ap ti tawx mau ka daux tawm taix pui pa yuh kaing khankix, kheu hoik yuh kix kaing ka daux pa kaux sijax tix heue. ¹⁶ Mau pon khaing pa taoh ka pa lud khankix mai pa pon khaing pa taoh ka phimap khankix, pa ang viex laig ka daux nyiex bwan Siyiex, an mawh son cao giex kaing li khankix heue. ¹⁷ Yam an Hazelax simiang haktiex Surix haok mai puing ka veng Gat mai hoik pon rhim ka, mawh kheu nan, Hazelax veeh pakngai tix haok ka veng Yerusaliem heue. ¹⁸ Yehosha simiang haktiex Yudax teei ti viex kraung tan pa singax singeh pa hoik appong keeing nawh khankix, Yehoshaphat mai Yehoram mai Ahaziyax ti deuh mai khawm kraung tan ceu pa singax cie cao nawh mai khri khankix, pa mawh kraung pa hoik yaox nawh khaing daux sinngao kaung khrai pa koe daux nyiex bwan Siyiex khankix mai can ceu pa koe ka daux nyiex haw simiang hu khawmuik heue. Nawh tawx ceu ankix ka Hazelax, simiang haktiex Surix khawmuik heue. Khaix an, Hazelax lih hu dee singai khaing veng Yerusaliem heue. ¹⁹ Grawng kaing pa deuk Yehosha khankix mai can ceu pa hoik yuh nawh khawmuik, ang mawh pa hoik tiem ti deuh ka daux phuk lai been cub simiang pui Yudax lie? ²⁰ Kawncau nawh yaog tix tieh feen mai pah Yehosha yum ka daux nyiex Milaw hawt krax lih hu ka yaong Silax heue. ²¹ Mawh kheu Yozakha kawn simex Shimat mai Yehozadat, kawn simex Shawma, pa mawh kawncau nawh khankix mai pah nawh yum, mawh kheu nan, nawh hoik yum mai kix sipaung nawh tau mai keeing nawh ka daux veng Davit, Khaix an kawn simex nawh Amazix deeh plud tix kwang ka dah dee ot nawh heue.

¹ Ka daux num kwang Yehosha kawn simex Ahaziyax simiang haktiex Yudax tixnga loe num tix num, Yehohaza kawn simex Yehu, yaog ti mawh simiang ka piang pui Isarelax daux veng Samarix mai kwang ka piang kix kao aliah num heue. ² Nawh yuh pa caox caig daux ngai Siyiex mai hawt phimap pa yuh Yerobom kawn simex Nebat, pa kieh pui Isarelax khankix koe phimap nawh ang gwieh tix khaing ceu an heue. ³ Khaix an, krax song rhawm songrhi Siyiex lih ka piang pui Isarelax khankix mai Nawh Cao ap kix ka daux tawm taix Hazelax simiang Surix mai ka daux tawm taix Benhadat kawn simex Hazelax, baux singaix im ju kix heue. ⁴ Mawh kheu nan, Yehohaza khyox khaw ka Siyiex mai Siyiex nghiet ka nawh, kheu yaox Nawh Cao krax pa kha rhawm pui Isarelax khankix, grawh grawng nawh, simiang haktiex Surix hoik yuh krax kheem krax gut ka kix heue. ⁵ Khaix an, Siyiex tawx pui pa taoh tix kaux, ka pui Isarelax sonsang pon luat luan kix khaing greem tawm taix pui Surix mai pui Isarelax khankix deeh yaox ti ot ka daux nyiex gox tix, awm glang ka an heue. ⁶ Viang yuh ka mawx kawx, kix ang lai gah tix khaing phima pa hoik yuh doeh nyiex ma Yerobom khankix, pa hoik kieh pui Isarelax khan kix koe pa lud mai lawng ka daux ankix; mai khaox rong riang grang siyiex Asherax khankix kawn koe ka daux veng Samarix heue. ⁷ Mawh kheu nan, simiang Surix prah ngie kru naing ka son Yehohadat, cub pui naing brung tixphwan kaux mai ling lawx naing brung kao lhang, khawm cub lien piang tiex khankix tix mheen kaux kheu hoik yuh simiang Surix kix laux leeing mai hoik dugdig kix awm phawng tiex pa koe ka glah pah ngoh heue. ⁸ Yam in, grawng kaing pa deuk Yehohaza mai can ceu pa hoik yuh nawh khankix mai khawm krax pa jhi nawh riang rao tix, ang mawh pa tiiem ti deuh ka daux phuk lai been cub simiang pui Isarelax lie? ⁹ Mawh kheu nan, Yehohaza laux lee tix tau mai cub keeing nawh khankix mai kix sipaung nawh ka daux veng Samarix, khaix an, kawn simex nawh Yehosha deeh plud ti kwang ka dah dee ot nawh heue. ¹⁰ Ka daux num pa kwang Yehosha simiang ka haktiex tixngoe aliah num tix num, Yehosha kawn simex Yehohaza deeh yaog ti mawh simiang ka piang pui Isarelax ka daux veng Samarix mai nawh kwang haktiex kao liah num heue. ¹¹ nawh yuh pa caox caig ka daux ngai Siyiex mai ang gah ti khaing phimap pa hoik yuh Yerobom kawn simex Nebat mai pa kieh pui Isarelax khankix koe phimap mai hoik lawng ka daux ceu ankix heue. ¹² Yam in, grawng kaing pa deuk Yehosha mai can ceu pa yuh nawh khankix, khawm pa koe riang rao nawh yam puing nawh ka Amazix simiang Yudax, ang mawh pa tiiem ti deuh ka daux phuk lai cub simiang pui Isarelax khankix lie? ¹³ Mawh kheu nan, Yehosha laux lee tix tau mai keeing nawh khankix, khaix an Yerobom yaog ti ngawm ka piang dang ngeung nawh mai sipaung Yehosha ka daux veng Samarix tau mai cub simiang pui Isarelax heue. ¹⁴ Elishie pon jhawm saux pa tak sang kieh nawh yum, khaix an, Yehosha simiang pui Isarelax lih hoek ka nawh mai yiiem ka sivoe ngai nawh ah nin, "Keeing aux eue, keeing aux eue, ling lawx naing brung pui Isarelax mai cub pui naing brung cie kix khankix eue, " ¹⁵ mai Elishie ah nin ka nawh, "Teei ak mai te heue." Mawh kheu nan nawh teei ak mai te hoek heue. ¹⁶ Ah nin ka simiang pui Isarelax, "Deuh khawn taix maix ka piang ak heue." Mawh kheu nan, nawh deuh taix tix ka piang ak mai Elishie deuh taix tix ka piang simiang heue. ¹⁷ Elishie ah nin, "Paoh siviex iak pa koe plak lih singaix, " Mai nawh paoh ka heue. Khaix an, Elishie ah nin, "Puing heue." Nawh puing ka heue. Elishie deeh ah nin, "In mawh te pa pex Siyiex mai pa pex maix ka haktiex Surix, mawh kheu maix tak puing ka pui Surix ka veng Aphet tom sidauh ka hoik yuh maix kix laux leeing heue." ¹⁸ Khaix an, Elishie deeh ah nin, "Teei te khankix, " Kheu nan, nawh teei ankix heue. Nawh ah nin ka simiang pui Isarelax, "Lah ka piang tiex heue." Mawh kheu nan, nawh lah loe bawg mai kaog khaix heue. ¹⁹ Pui Siyiex song rhawm ka nawh ah nin, "Maix khaw tix lah phwan liah bawg, khaix an maix tak pon pah pui Surix tom sidah hoik laux leeing kix, viang mawh nan, yam in maix tak pon pah pui Surix loe bawg ngie heue." ²⁰ Khaix an, Elishie yum mai kix sipaung nawh mai cub pui naing khaing haktiex Mawbax hoik laig puing ka haktiex daux raux num an heue. ²¹ Mawh kheu nan, yam kawn sipaung kix pui tix kaux, kix yaox ka cub pui jawm tix cub dom an; mai kix ploi tokaux yum an lih ka plak greem tiex mai yam krox teeh tokaux yum an ka si-ang Elishie, nawh deeh kaoh im mai cung heue. ²² Hazelax simiang Surix yuh krax kheem krax gut ka pui Isarelax khankix ka daux glang baux kwang Yehohaza ka kix khawmuik heue. ²³ Viang mawh nan, Siyiex doh keud doh sawn ka kix mai koe krax caux rhawm ka piang kix mai kia ngien ka kix, kheu sijax mukheu pa hoik yuh Nawh Cao tau mai Abraham, Icak mai Yakop mai ang lai yuh kix laux leeing mai ang lai tik vud kix khaing plak sivoe ngai Nawh Cao heue. ²⁴ Yam in, Hazelax simiang Surix hoik yum, khaix an kawn simex nawh Benhadat deeh plud ti kwang ka dah dee ot nawh heue. ²⁵ Yehosha kawn simex Yehohaza rhim veng ankix khaing daux taix Benhadat kawn simex Hazelax, ka veng pa hoik rhim nawh khaing daux taix keeing tix Yehohaza ka daux naing, Yehosha hoik pex ka nawh loe bawg mai pon rhim veng pui Isarelax heue.

¹ Ka daux num pa kwang Yehosha kawn simex Yehohaza simiang pui Isarelax ra num tix num, Amazix kawn simex Yehosha simiang Yudax deeh yaog ti mawh simiang heue. ² Nawh koe ju tixnga phwan num yam yaog nawh ti mawh simiang mai nawh kwang daux veng Yerusaliem tixnga dim num, ceu kaux miex nawh mawh Yehodadan pui veng Yerusaliem heue. ³ Nawh yuh pa khaw caw daux ngai Siyiex, viang mawh nan, ang nyang awm keeing nawh simiang Davit; nawh yuh kuceu awm pa yuh keeing tix Yehosha heue. ⁴ viang mawh nan, nawh ang nyang bax tik dee pa lhaong khankix luan dee singai mai pui khankix kawn ca tan krax tan pa appong mai gleeing nyawng bhawng ka piang dee pa lhaong heue. ⁵ Yam hoik pang nawh meung kaux cong ka daux tawm taix tix, nawh hoik pah ka kawncau pa hoik pah ka keeing nawh simiang heue. ⁶ Viang mawh nan, nawh ang pah kawn praix cao pa pah pui khankix, hawt awm pa hoik tiem ka daux phuk lai been Mose, gumlox pa hoik tawm Siyiex pa ah nin, "Keeing tak ang pon ti yum son kawn mai kawn tak ang pon tix yum son keeing, viang mawh nan, pui mawx pui an tak mawh pa yum son phimap tokaux tix heue." ⁷ Nawh pah pui Edom yum ka daux ngawd tix mheen kaux mai nawh pon rhim veng Selax ka daux naing mai kok ceu kaux veng an mawh Yokathilax tom hoek daux in singaix heue. ⁸ Khaix an, Amazix ploi cao cau khankix hu ka Yehosha, kawn simex Yehohaza kawn simex Yehu, simiang pui Isarelax ah nin, "Hoek heue kieh ex yaox ngai baoh paox tix ka daux biang naing heue." ⁹ Yehosha simiang pui Isarelax ploi pui hu ka Amazix simiang haktiex Yudax ah nin, "Pang kat pa hoik koe ka daux Lebanon ploi kawncau tix hu ka khaox Arit, pa koe ka daux Lebanon ah nin, tawx kawn bun maix mawh moeng kawn simex aux mai totiag pa koe ka daux nong Lebanon an tix mu, hoik tiang mai dugdig ka pang kat an heue. ¹⁰ Maix hoik pex haktiex Edom tete mai rhawm maix hoik koe krax pa lhaong kah, teei min ka grawng pa pex maix khankix mai ot ka daux nyiex, mawh kheu maix lai sawg ti yaox krax kha rhawm pa som pa nai tix, tau mai haktiex Yudax lie? ¹¹ Viang mawh nan, Amazix ang lai cu ti nghiet ka lox ankix, mawh kheu nan, Yehosha simiang Isarelax haok ti puing naing, kheu jao an nawh mai Amazix simiang haktiex Yudax hoik sipub paox tix ka daux veng Bietshemiet pa mawh cie pui Yudax heue. ¹² Pui Yudax hoik som ka pui Isarelax mai pui ku kaux hoik tang to ti ing ka nyiex gox cao tix heue. ¹³ Khaix an, Yehosha simiang pui Isarelax pon giex ka Amazix simiang haktiex Yudax mai pa mawh kawn simex Yehosha kawn simex Ahaziyax ka daux veng Bietshemiet mai nawh hu ka veng Yerusaliem mai yuh guh veng Yerusaliem; jah khaing siviex veng Epharem tom hoek ka daog siviex veng an khawmuik pon yieh sawk heue. ¹⁴ Nawh teei khri mai mau khawmuik mai can kraung shiao pa koe khawmuik ka daux nyiex bwan Siyiex mai can pa koe ka daux nyiex haw simiang khawmuik mai khawm pui pa kham khankix mai deeh ing ka veng Samarix heue. ¹⁵ Grawng kaing pa deuk Yehosha mai ceu pa hoik yuh nawh khankix mai grawng pa koe riang rao nawh mai grawng pa hoik yuh nawh naing tau mai Amazix simiang haktiex Yudax, ceu ankix ang mawh pa tiiem ti deuh ka daux phuk lai been simiang pui Isarelax khankix lie? ¹⁶ Mawh kheu nan, Yehosha hoik laux lee tix tau mai keeing nawh khankix mai sipaung ka daux veng Samarix tau mai cub simiang pui Isarelax, khaix an kawn simex nawh Yerobom plud ti kwang ka dah dee ot nawh heue. ¹⁷ Amazix kawn simex Yawsha simiang haktiex Yudax im ju kao phwan num, khaix hoik yum Yehosha kawn simex Yehohaza simiang pui Isarelax heue. ¹⁸ Yam in grawng kaing pa deuk Amazix ang mawh pa tiiem tix ka daux phuk lai been cub simiang haktiex Yudax khankix lie? ¹⁹ Kix rom paox tix tieh feen Amazix ka daux veng Yerusaliem mai nawh to ka veng Lakhisha, viang mawh nan, kix ploi pui hawt khaix nawh daux veng Lakhisha mai pah nawh heue. ²⁰ Khaix an, kix viex nawh ing ka piang brung mai sipaung nawh ka daux veng Yerusaliem tau mai keeing nawh khankix ka daux veng Davit heue. ²¹ Pui Yudax khankix yaog Azarix pa koe ju kao liah num, mawh simiang tang keeing nawh Amazix heue. ²² Nawh hoik sum veng Elat mai priex nawh ka daux haktiex Yudax, khaix hoik laux lee simiang tix tau mai keeing nawh heue. ²³ Daux num yam kwang Amazix kawn simex Yosha simiang haktiex Yudax kao phwan num tix num, Yerobom kawn simex Yosha simiang pui Isarelax yaog ti mawh simiang ka daux veng Samarix mai nawh kwang ka piang kix tixpon tix num heue. ²⁴ Nawh yuh pa caox caig ka daux ngai Siyiex, nawh ang gah ti khaing phimap phighram pa yuh Yerobom, kawn simex Nebat mai pa hoik kieh pui Isarelax koe phimap heue. ²⁵ Nawh deeh teei mee praix dee kwang pui Isarelax, jah khaing diang laig ka veng Hamat, tom hoek ka rawm sigrit sigra Arabax, awm gumlox Siyiex pui Isarelax, pa hoik sikah Nawh Cao ka kawncau tix Yonax, kawn simex Amitie, cao jhai pa kaoh khaing veng Gathepha heue. ²⁶ Mawh kheu Siyiex hoik yaox ka pa kied lang teung kha rhawm pui Isarelax mai pui pa giex laung ang ah, pui pa lawt luan ang ah, pui pa teem pa coi pui Isarelax ang koe pie tix kaux kawx heue. ²⁷ Siyiex ang bax ah ti sang preet ceu kaux pui Isarelax khankix khaing greem raoma; mai Nawh Cao teei tawm taix Yerobom, kawn simex Yosha taoh ka kix heue. ²⁸ Yam in grawng kaing pa deuk Yerobom khankix mai grawng ceu pa hoik yuh nawh khankix mai grawng pa koe riang rao nawh mai grawng pa hoik yuh nawh naing mai pa hoik pon rhim nawh tix deeh teei veng Damase mai veng Hamat son pui Isarelax, pa hoik dawg mawh cie haktiex Yudax, simiang pui Isarelax khankix lie? ²⁹ Mawh kheu nan, Yerobom hoik laux lee tix tau mai keeing nawh, cub simiang pui Isarelax heue. Khaix an kawn simex nawh Zakharix deeh kwang haktiex ka dah dee ot nawh heue.

¹ Ka daux num pa kwang Yerobom simiang pui Isarelax ka haktiex tixnga aliah num tix num, Azarix kawn simex Amazix, simiang Yudax deeh yaog ti mawh simiang heue. ² Nawh koe ju kao liah num yam mawh tix simiang mai nawh kwang ka daux veng Yerusaliem tixphwan ra num heue. Ceu kaux miex nawh mawh Yekhoriyax pui veng Yerusaliem heue. ³ Nawh hoik yuh pa rahsee ka daux ngai Siyiex, awm pa hoik yuh keeing nawh Amazix khawmuik, ⁴ lheu khaing an nawh ang nyang gah ti tik dee pa lhaong khankix, pui khankix kawn tan krax tan pa appong mai krax tan pa gleeing nyawng bhawng ka piang dee pa lhaong khankix heue. ⁵ Khaix an, Siyiex tawx krax kha rhawm ka simiang, kieh nawh pon jhawm saux sipawg tom sidah hoek singaix yum nawh; mawh kheu nan, nawh tak ot nyiex haw nong nong heue. Yotham kawn simex simiang kwang ka piang nyiex ma simiang mai hoik prawng see ka pui haktiex khankix heue. ⁶ Yam in grawng kaing pa deuk Azarix mai can ceu pa hoik yuh nawh khankix ang mawh pa tiiem ti deuh ka daux phuk lai been simiang haktiex Yudax khankix lie? ⁷ Mawh kheu Azarix hoik laux lee tix tau mai keeing nawh mai kix sipaung tau mai keeing nawh ka daux veng Davit heue. Khaix an, kawn simex nawh Yotham deeh plud tix kwang ka dah dee ot nawh heue. ⁸ Ka daux num pa kwang Azarix, simiang Yudax haktiex tixngoe daix num tix num, Zakharix kawn simex Yerobom kwang ka piang pui Isarelax ka daux veng Samarix liah khix heue. ⁹ Nawh yuh pa caox caig ka daux ngai Siyiex, awm pa yuh keeing nawh khankix, nawh ang gah ti khaing phimap yuh Yerobom kawn simex Nebat, pa hoik kieh pui Isarelax yuh phimap heue. ¹⁰ Khaix an, Shalum kawn simex Yabiet khrawm rom paox tix, tieh feen ka nawh mai pah nawh yum ka plak sivoe pui mai deeh plud ti kwang ka dah dee ot nawh heue. ¹¹ Yam in grawng kaing pa deuk Zakharix hoik mawh pa tiiem ti deuh ka daux phuk lai been cub simiang haktiex Isarelax khankix heue. ¹² In mawh gumlox Siyiex, pa hoik krai Nawh Cao ka Yehu ah nin, "Kawn simex maix khankix tak yaox ti ngawm ka piang dang ngeung pui Isarelax tom hoek pon ju heue." ¹³ Shalum kawn simex Yabiet yaog ti mawh simiang ka daux num hoik kwang Azarix, simiang Yudax ka haktiex tixngoe dim num tix num mai nawh kwang ka haktiex Samarix tix khix mhawm mhawm heue. ¹⁴ Menahim kawn simex Gadix lih hu khaing veng Tiraza, hoek ka veng Samarix mai phah Shalum, kawn simex Yabiet yum ka daux veng Samarix mai nawh cax ti kwang haktiex ka dah dee ot nawh heue. ¹⁵ Yam in grawng kaing pa deuk Shalum khankix mai grawng pa hoik rom nawh ti yuh krax pa tieh feen khankix, kix hoik tiem ti deuh grawng ceu ankix ka daux phuk lai been cub simiang pui Isarelax heue. ¹⁶ Yam in jah khaing veng Tiraza, Menahim hoik puing ka veng Tiphasa mai can pui pa ot hawt baoh an khawmuik mai mee haktiex veng an khawmuik, kheu ang kix cu ti paoh veng ka son nawh, mawh kheu nan, nawh tom puing ka veng an heue. Nawh pih ka vaig bun pa koe kaux khankix, pa ot tan khawmuik heue. ¹⁷ Daux num yam kwang Azarix simiang Yudax ka haktiex tixngoe dim num tix num, Menahim kawn simex Gadix yaog ti mawh simiang ka piang pui Isarelax mai kwang ka veng Samarix kao num heue. ¹⁸ Nawh hoik yuh pa caox caig ka daux ngai Siyiex, nawh ang cu ti gah khaing phimap pa yuh Yerobom, kawn simex Nebat pa hoik kieh pui Isarelax khankix koe phimap heue. ¹⁹ Pulax simiang haktiex Asurix hoek ti puing ka haktiex Isarelax mai Menahim tawx mau ka Pulax, tixrheng talantan sonsang teem Pulax nawh pang meung kaux cong heue. ²⁰ Menahim koh mau khaing pui mag mi khankix ku kaux ka daux pui Isarelax khawmuik mai kieh kix tang tawx mau tix kaux tixphwan shekhe mai tawx ka simiang haktiex Asurix heue. Mawh kheu nan, simiang Asurix deeh veeh ti ing mai ang lai ot daux haktiex tan heue. ²¹ Yam in grawng kaing Menahim khankix mai can grawng kaing pa hoik yuh nawh khawmuik, ang mawh pa tiiem ka daux phuk lai been cub simiang pui Isarelax lie? ²² Mawh kheu nan, Menahim hoik laux lee tix tau mai keeing nawh heue. Khaix an, kawn simex nawh Pekahiyax deeh plud ti kwang ka dah dee ot nawh heue. ²³ Daux num yam kwang Azarix simiang Yudax ka haktiex tixphwan num tix num, Pekahiyax kawn simex Menahim yaog ti mawh simiang ka piang pui Isarelax ka daux veng Samarix mai kwang haktiex ra num heue. ²⁴ Nawh yuh pa caox caig ka daux ngai Siyiex, nawh ang cu ti gah khaing phimap pa hoik yuh Yerobom kawn simex Nebat mai pa hoik kieh pui Isarelax khankix koe phimap heue. ²⁵ Khaix an, Peka kawn simex Remariyax, cao kaing naing nawh tix kaux, hoik rom ti tieh feen mai pah nawh yum ka daux veng Samarix, dah dee pa pau kix nyiex haw simiang tau mai Agawbax mai Areha mai khawm pui nawh khankix tixphwan kaux, pui haktiex Gilat heue. Nawh pah ka Pekahiyax yum mai cax ti kwang ka dah dee ot nawh heue. ²⁶ Yam in grawng kaing pa deuk Pekahiyax khankix mai can ceu pa hoik yuh nawh khawmuik, hoik mawh pa tiiem ti deuh ka daux phuk lai been cub simiang pui Isarelax heue. ²⁷ Daux num yam kwang Azarix, simiang Yudax ka haktiex tixphwan ra num tix num, Peka kawn simex Remariyax yaog ti mawh simiang ka piang pui Isarelax mai kwang ka veng Samarix tixnga num heue. ²⁸ Nawh yuh pa caox caig daux ngai Siyiex; nawh ang cu ti gah khaing phimap pa hoik yuh Yerobom, kawn simex Nebat, pa hoik kieh pui Isarelax koe phimap heue. ²⁹ Daux singaix baux ju Peka, simiang pui Isarelax, Tigalatpilesa, simiang haktiex Asurix mai hoek rhim ka veng Iyong, veng Abelax Bietmakha, veng Yanaw, veng Kedesha, veng Hazaw hakiex Gilat mai haktiex Galilie, khawm baoh haktiex Naphatalix mai nawh viex pui ot daux haktiex inkix awm pui pa giex laung ka daux haktiex Asurix heue. ³⁰ Khaix an yam kwang Yotham kawn simex Awziyax ka haktiex tixnga num tix num Hoshe kawn simex Elax rom ti tieh feen ka Peka kawn simex Remariyax mai pah nawh yum mawh kheu nan, nawh cax ti kwang ka dah dee ot nawh heue. ³¹ Yam in grawng kaing pa deuk Peka khankix mai can grawng kaing pa hoik yuh nawh khankix, mawh pa tiiem ti deuh ka daux phuk lai been cub simiang Isarelax heue. ³² Daux num yam kwang Peka kawn simex Remariyax simiang pui Isarelax ka haktiex ra num tix num, Yotham kawn simex Awziyax simiang Yudax jah ti kwang ka haktiex heue. ³³ Nawh koe ju tixnga phwan num yam yaog nawh tix mawh simiang mai nawh kwang ka veng Yerusaliem kao liah num heue. Ceu kaux miex nawh mawh Yerusha kawn bun Zadok heue. ³⁴ Nawh yuh pa khaw caw ka daux ngai Siyiex; nawh hawt yuh awm krax pa yuh keeing nawh Awziyax khawmuik heue. ³⁵ Viang mawh nan, can dee pa lhaong khankix ang gah ti tik, pui khankix ca kawn tan krax tan pa appong mai gleeing nyawng bhawng khankix ka dee pa lhaong, nawh sum siviex plak piang ka daux nyiex bwan Siyiex heue. ³⁶ Yam in grawng kaing pa deuk Yotham khankix mai can ceu pa hoik yuh nawh khankix ang mawh pa tiiem ti deuh ka daux phuk lai been cub simiang haktiex Yudax khankix lie? ³⁷ Daux singaix ankix, Siyiex jah tix ploi Rezin, simiang haktiex Surix mai Peka kawn simex Remariyax hu puing ka haktex Yudax heue. ³⁸ Mawh kheu nan, Yotham hoik laux lee tix tau mai keeing nawh mai sipaung tau mai cub keeing nawh khankix ka daux veng keeing nawh Davit heue. Khaix an, kawn simex nawh Ahaza deeh plud ka dah dee ot nawh heue.

¹ Daux num yam kwang Peka kawn simex Remariyax ka haktiex kao aliah num tix num, Ahaza kawn simex Yotham, simiang Yudax jah ti kwang ka haktiex heue. ² Ahaza koe ju tixnga num yam yaog nawh ti mawh simiang mai nawh kwang ka daux veng Yerusaliem kao liah num, nawh ang yuh pa khaw caw daux ngai Siyiex, awm pa hoik yuh keeing nawh Davit heue. ³ Nawh lawng ka daux krax pa yuh cub simiang pui Isarelax, nawh kieh kawn simex tix mawh pa tan tix gleeing ka ngu, awm pa seeing brai ceu pui khankix, pa hoik tik vud Siyiex khaing ka plak sivoe pui Isarelax heue. ⁴ Nawh tan krax pa appong mai gleeing nyawng bhawng ka piang can dee pa lhaong khankix, pa koe piang gawng mai ka greem khaox pa kawn klai khankix heue. ⁵ Khaix an, Rezin simiang haktiex Surix mai Peka simiang pui Isarelax, hoek ka veng Yerusaliem son yuh naing; mai kix hoik lai lawm ka Ahaza, viang mawh nan, kix ang pex nawh heue. ⁶ Ka daux bawg yam an, Rezin simiang haktiex Surix, hoik pon rhim veng Elat son haktiex Surix mai grheu ti tik pui Yudax khankix khaing veng Elat mai kix ot tan tom hoek daux in singaix heue. ⁷ Mawh kheu nan, Ahaza ploi cao cau khankix hu ka Tikalat Pilesa, simiang haktiex Asurix ah nin "Aux mawh kawncau maix mai kawn simex maix heue. Hoek heue. deeh taoh aux lih khaing daux tawm taix simiang Surix mai khaing daux tawm taix simiang pui Isarelax pa yaog ti tieh feen ka aux heue." ⁸ Ahaza teei khri mai mau khankix pa koe ka daux nyiex bwan Siyiex mai khaing ka daux nyiex sinngao nyiex simiang khankix mai tawx ceu ankix mawh totaix ka simiang haktiex Asurix heue. ⁹ Mawh kheu nan, simiang haktiex Asurix cu nghiet ka nawh, mawh kheu simiang haktiex Asurix haok puing ka veng Damase mai rhim ka veng an mai nawh giex ti viex pui veng an khankix hu ka veng Kirax mai pah simiang Rezim yum heue. ¹⁰ Yam in Ahaza hu ka veng Damase sonsang pub ka simiang Tikalat Pilesa simiang haktiex Asurix mai yaox ka khu dee tan tix mu ka daux veng Damase, mai simiang Ahaza jhi riang pakpeung khu dee tan an awm khaix taix pa yuh pui khankix mai tawx hu ka cao giex kaing li Uriyax heue. ¹¹ Khaix an, cao giex kaing li Uriyax, sum khu dee tan tix lhang, awm pakpeung riang pa tawx simiang Ahaza khaing veng Damase, mawh kheu nan, cao giex kaing li yuh hoik sivoe ang simiang Ahaza nyang hoek khaing daux veng Damase heue. ¹² Yam hoek simiang khaing veng Damase, simiang yaox khu dee tan mai simiang greed tix dex hawt khu dee tan mai tan ka piang an heue. ¹³ Mawh kheu nan, nawh gleeing krax tan pa gleeing mai krax tan phawng nghox ca mai groi krax tan pa nyaux mai phruah nham krax tan pa nhim ka piang khu dee tan heue. ¹⁴ Nawh deeh teei khu tawng dee tan pa koe ka plak sivoe Siyiex, khaing plak sivoe nyiex bwan mai khaing daux sinax khu dee tan pa khraox an mai nyiex bwan Siyiex mai deuh ka praok plak laong khu dee tan pa khraox an heue. ¹⁵ Khaix an, simiang Ahaza tawx lox ka cao giex kaing li Uriyax ah nin, "Gleeing krax tan pa gleeing ponngawb mai krax tan phawng nghox ca im ponbo mai krax tan pa gleeing cie simiang mai krax tan phawng nghox ca mai krax tan pa gleeing cie pui haktiex khankix mai khawm krax tan phawng nghox ca mai krax tan pa nyaux khankix ka piang khu dee tan khraox pa kied ting an heue. Phruah nham to tan pa gleeing mai nham to tan pa appong khawmuik ka piang an mai khu tawng dee tan an, tak mawh dee pa chawk cheng ka Siyiex heue. ¹⁶ Cao giex kaing li Uriyax hoik yuh awm pa tawm simiang Ahaza ka nawh khawmuik heue. ¹⁷ Simiang Ahaza lah ti tik dang ling lawx an khankix mai gah tawg pheung khaing ka piang an heue. Nawh teei dung tawng an lih khaing riang mawie tawng khankix, pa koe ka greem mai deuh ka piang simaox pa hoik tawm tix heue. ¹⁸ Nawh hoik deeh gah nyiex bwan son singaix twah, pa sum kix ti deuh ka daux nyiex bwan mai nawh deeh hoik gah pa koe daux krax laig simiang pa koe plak praix nyiex bwan Siyiex kheu jao simiang haktiex Asurix heue. ¹⁹ Yam in grawng kaing pa deuk Ahaza khankix, ang hoik mawh pa tiiem ti deuh ka daux phuk lai been cub simiang haktiex Yudax khankix lie? ²⁰ Khaix an, Ahaza laux lee tix tau mai keeing nawh mai sipaung tau mai keeing nawh ka daux veng Davit heue. Khaix an, kawn simex nawh Hezakiyax hoik plud ti kwang haktiex ka dah dee ot nawh heue.

¹ Ka daux num yam kwang Ahaza simiang Yudax ka haktiex kao ra num tix num, Hoshe kawn simex Elat deeh yaog ti mawh simiang ceu pui Isarelax ka daux veng Samarix mai kwang haktiex dim num heue. ² Nawh yuh pa caox caig ka daux ngai Siyiex, viang mawh nan, nawh ang awm cub simiang ceu pui Isarelax khankix pa hoik koe phao ka nawh heue. ³ Shalamaneza simiang haktiex Asurix hoek ti puing ka nawh mai Hoshe kham ti mawh siliex nawh mai tawx keen ka nawh heue. ⁴ Simiang haktiex Asurix hoik pon tawng Grawng pa tieh feen Hoshe; mawh kheu Hoshe ploi cao cau tix hu ka Sua simiang haktiex Ejiptux mai nawh ang lai tawx keen ka simiang Asurix awm pa yuh nawh ku num heue. Mawh kheu nan, simiang haktiex Asurix hoik giex nawh mai laung ka daux kawg heue. ⁵ Yam in simiang haktiex Asurix hu puing ka haktiex Isarelax ku dax mai haok lai lawm ka veng Samarix loe num heue. ⁶ Ka daux num yam kwang Hoshe ka haktiex dim num, simiang haktiex Asurix hoik rhim ka veng Samarix mai teei ceu pui Isarelax khankix hu ka haktiex Asurix mai deuh kix ot ka daux veng Halax mai hawt baoh veng Habo, hawt rawm klawng Gozan mai ka daux veng pa koe ka daux haktiex Midix heue. ⁷ Mawh kheu kawn praix ceu pui Isarelax hoik lud hoik lud ka Siyiex kix, pa hoik viex kix lih khaing haktiex Ejiptux, luan khaing greem tawm taix Pharaw simiang haktiex Ejiptux mai kix lhat graung ka siyiex tang kaux tang hak khankix, ⁸ mai hoik hawt ka daux been ceu pui an khankix, pa hoik grheu Siyiex plak sivoe ngai pui Isarelax khankix mai khaing been pa deuh cub simiang Isarelax khankix heue. ⁹ Pui Isarelax khankix hoik moh ti yuh kaing ceu pa ang khaw ang caw mai tieh feen ka cie Siyiex kix mai kix hoik sum dee pa lhaong khankix ka daux veng khawmuik, jah khaing daux nyiex pau daux veng pa kaux cong heue. ¹⁰ Kix sum riang rong simaox mai riang khaox siyiex Asherax khankix ka piang gawng lhaong ku gawng mai ka greem khaox klai ku pang son tix heue. ¹¹ Gleeing nyawng bhawng ka piang dee pa lhaong khawmuik, awm pa hoik yuh ceu pui pa hoik grheu Siyiex lih khaing sivoe ngai kix mai kix hoik yuh ceu pa caox caig sonsang so ka pa song rhawm songrhi Siyiex heue. ¹² Mawh kheu kix hoik yuh kaing jhaw son riang rao pa hoik ah Siyiex ka kix yuh nin, "Maix tak ang pon ti yuh ceu in heue." ¹³ Viang Siyiex hoik kieh cao jhai Maix Cao pa plak jhi khankix, tawx satix ka ceu pui Isarelax mai ka ceu Yudax ah nin, "Deeh veeh tix khaing pa caox caig yuh pex khankix mai priex rien ti hawt lox tawm ping nyap Aux khankix, pa hoik tawm Aux ka keeing pex khawmuik mai pa hoik ploi Aux hoek ka keeing pex khaing kawncau mau soi cao jhai Aux khankix heue." ¹⁴ Viang yuh ka mawh kawx kix ang cu nghiet kah, kix hoik kieh ngawg tix kiien awm keeing kix, ang yum rhawm ka Siyiex kix heue. ¹⁵ Kix tik vud beenli lox tat jhawm Prawng Nawh Cao khankix mai sijax mukheu pa hoik yuh Nawh Cao ka keeing kix khankix, pa hoik kham Nawh Cao mhai ruk ka piang kix heue. Kix hawt grawng lawng khaix riang rao khankix mai hoik lih ti mawh pa ang koe ceu koe cak mai kix hoik hawt khaix cub ceu pui khankix pa ot hawt vung viang kix pui pa hoik ah Siyiex ti deuh ka kix mai son ang kix sang yuh ceu an awm kix heue. ¹⁶ Mawh kheu kix hoik tik vud gumlox ping nyap Siyiex khankix mai kix hoik rawg tix cie riang kawn mawie iak ra mu mai kix baox yuh riang khaox siyiex Asherax tix mu mai krub ka can ceu pa koe piang raoma mai yuh kaing jhaw siyiex Balax heue. ¹⁷ Kix hoik gleeing ti tan kawn simex kawn bun tix khankix mai yuh sibawk chawk jhai mai simeed mai coh tokaux tix yuh ceu pa caox caig daux ngai Siyiex mai so krax pa song rhawm Nawh Cao heue. ¹⁸ Mawh kheu nan, Siyiex kied song rhawm ka ceu pui Isarelax khankix mai grheu kix lih khaing plak sivoe ngai Nawh Cao, lheu khaing doeh ru pui Yudax khankix, Nawh Cao ang lai deuh kix pie tix kaux kawx heue. ¹⁹ Pui Yudax baox ang cu ti priex rien ka lox pingnyap Siyiex kix mai kix hoik hawt hu ka daux krax been yungyi ceu pui Isarelax khankix ka pa hoik yuh kix ti deuh heue. ²⁰ Siyiex hoik tik vud ka doeh ru Isarelax khawmuik mai kieh kix kha rhawm tix mai ap kix ka daux tawm taix pui tud rhim tom sidax grheu Nawh cao kix lih khaing ka plak sivoe ngai Nawh Cao heue. ²¹ Mawh kheu nan, Nawh Cao riah ti tik ceu pui Isarelax khankix khaing doeh nyiex ma Davit mai kix yaog Yerobom kawn simex Nebat mawh simiang heue. Khaix an, Yerobom nyaw glaw ceu pui Isarelax khankix khaing pa hawt kix khaix Siyiex mai kieh kix lud ka daux phimap pa kied ting heue. ²² Mawh kheu hoik hawt pui Isarelax ti yuh phimap phighram pa hoik yuh Yerobom khankix, kix ang lai gah ti khaing ceu an, ²³ tom hoek bawg yam gah Siyiex ti tik ceu pui Isarelax khaing plak sivoe ngai Nawh Cao, awm pa hoik ah Nawh Cao ka kawncau mau soi cao jhai Nawh khankix heue. Mawh kheu nan, ceu pui Isarelax hoik teei tix hu dee singai, khaing daux haktiex kix ka haktiex Asurix tom hoek daux in singaix heue. ²⁴ Khaix an, simiang haktiex Asurix viex pui khankix hoek khaing veng Babulon, veng Kutax, veng Avax, veng Hamat mai veng Sepharavim mai deuh kix ot ka daux nyiex yaong veng Samarix khankix son tang pui Isarelax, mai kix hoik rhim ti cie kraung khrai sinngao veng Samarix mai ot ka daux nyiex yaong an khankix heue. ²⁵ Yam jah kix ti pang krax ot tix baoh tan, kix ang koe krax lhat graung ka Siyiex, mawh kheu nan, Siyiex ploi sivai sangsi hoek ka sinax kix mai kied kix yum tiblah heue. ²⁶ Mawh kheu nan, koe pui krai lox ka simiang Asurix ah nin, "Ceu pui pa hoik gah maix ot ka daux nyiex yaong Samarix khankix ang tawng ka lox jhai Siyiex haktiex an, mawh kheu nan, Nawh Cao hoik ploi sivai sangsi hoek ka daux sinax kix mai kiied kix yum kheu jao ang kix tawng ka lox jhai Siyiex haktiex an heue." ²⁷ Khaix an, simiang Asurix tawm lox ah nin, "Ploi cao giex kaing li tix kaux pa hoik viex pex hoek khaing tan, kieh nawh hu ot tan mai kieh nawh gau kix ka lox jhai Siyiex haktiex an heue." ²⁸ Khaix an, cao giex kaing li tix kaux pa hoik viex kix hoek khaing daux veng Samarix hoik deeh ing ot ka daux veng Betelax mai gau kix sonsang koe krax lhat graung ka Siyiex heue. ²⁹ Viang yuh ka mawh kawx, ceu pui ankix ku cub hoik tang yuh riang grang siyiex cao tix mai hoik deuh kix nyiex dee pa lhaong khankix, pa sum ceu pui Samarix ti deuh, ceu pui ku cub hoik tang deuh riang grang siyiex tix, ka daux nyiex yaong veng dee ot tix heue. ³⁰ Pui veng Babulon yuh ti cie riang pakpeung siyiex Suhok, Banot mai pui veng Kutax, yuh ti cie riang pakpeung siyiex Nerahalax mai pui veng Hamat hoik yuh ti cie riang pakpeung siyiex Ashimax khankix heue. ³¹ Pui Avax khankix yuh riang siyiex Nebahaza mai riang siyiex Ta-tak khankix mai pui veng Sephanaviem khankix gleeing ti tan kawn praix kix daux ngu, ka siyiex Adarameliet mai ka siyiex Anameliet khankix pa mawh siyiex Sepharavim heue. ³² Mawh kheu nan, kix lhat graung ka Siyiex mai kix yaog ti deuh cao giex kiang li dee pa lhaong khankix, son pa sang appong ti tawx krax tan son kix ka daux nyiex meeig pa koe dee pa lhaong khankix heue. ³³ Kix lhat graung ka Siyiex viang mawh nan, kix kawn yuh kaing jhaw Siyiex tang kaux tang hak, awm hoik koe been cub ceu pui khankix khaing daux sinax pui pa hoik viex kix hu khankix heue. ³⁴ Tom hoek ka daux singaix in, kix ca kawn yuh awm been pa dawg koe phao voe, kix ang lai koe krax lhat graung ka Siyiex mai kix ang lai tah hawt khaix been yungyi kix mai khawm lox tat jhawm prawng kix mai ang lai hawt lox been pingnyap khankix, pa hoik tawm Siyiex nawh ka kawn praix Yakop khankix, pa hoik sum Nawh Cao ceu kaux mawh Isarelax, ³⁵ awm pa hoik yuh Siyiex sijax mukheu tau mai kix ah nin, pex ang pon ti lhat graung ka siyiex tang kaux tang hak khankix mai ang pon ngeuh kaing ka kix mai ang pon ti yuh kaing jhaw kix mai ang pon t appong krax tan ka kix heue. ³⁶ "Viang mawh nan, Siyiex pa hoik viex pex lih khaing daux haktiex Ejiptux tau mai pa kied ting sibrawm mai plawng taix pa hoik nyeu Nawh Cao, pex tak koe krax lhat graung ka Nawh Cao, pex tak krub ka Nawh Cao mai pex tak appong ti tan ka Nawh Cao heue. ³⁷ "Been yungyi, been lox tat jhawm prawng khankix, gumlox beenli pingnyap pa hoik tiem Nawh Cao ti tawx ka pex khankix, pex tak priex ti hawt yuh leeing ju, pex tak ang pon ti lhat graung ka siyiex tang kaux tang hak heue. ³⁸ "Sijax mukheu pa hoik yuh Aux tau mai pex, pex tak ang pon ti piawm mai pex tak ang pon ti lhat graung ka siyiex tang kaux tang hak heue. ³⁹ Viang mawh nan, pex tak lhat graung ka Siyiex, Nawh Cao tak taoh pex khaing daux tawm taix pui koeng pex khankix heue." ⁴⁰ Viang ah yuh nin kawx kix ang cu nghiet ka mai kix hoik hawt khaix been cie kix phao voe heue. ⁴¹ Mawh kheu nan, ceu pui inkix lhat graung ka Siyiex, viang mawh nan, kix hoik yuh kaing jhaw riang grang pa hoik saik kix, kawn praix kawn saux kawn sex kix hoik toe ti yuh kaing jhaw ankix awm pa hoik yuh keeing kix tom hoek ka daux in singaix heue.

¹ Yam in khaix hoik luan ka daux num yam kwang Hoshe kawn simex Elax, simiang ceu pui Isarelax ka haktiex loe num tix num, Hezakiyax kawn simex Ahaza, simiang Yudax, jah ti kwang ka haktiex heue. ² Nawh koe ju tixnga phwan num, yam yaog nawh ti mawh simiang mai kwang ka haktiex tixnga daix num ka daux veng Yerusaliem heue. Ceu kaux miex nawh mawh Abix kawn bun Zakharix heue. ³ Nawh yuh pa khaw caw ka daux ngai Siyiex, awm pa hoik yuh keeing nawh Davit heue. ⁴ Nawh teei ti tik dee pa lhaong khankix mai raig ka riang rong simaox mai riang grang khaox siyiex Asherax khankix mai lah phawng ka riang siuing tawng pa yuh Mose, mawh kheu kawn praix ceu pui Isarelax khankix, kawn gleeing nyawng bhawng ka plak sivoe riang siuing an, daux singaix yam an mai kok riang siuing tawng an mawh Nehushatan ceu pa yuh tix ka tawng heue. ⁵ Nawh een rhawm tix ka Siyiex ceu pui Isarelax, mawh kheu nan, pui pa awm nawh ka daux sinax cub simiang haktiex Yudax, ang koe pie tix kaux kawx khaix nawh mai sivoe nawh heue. ⁶ Mawh kheu hoik kaux cong nawh ka daux Siyiex, nawh ang lai gah khaing pa hawt ti khaix Nawh Cao mai nawh hoik priex lox pingnyap Nawh Cao, pa hoik tawm Siyiex ka Mose heue. ⁷ Siyiex ot tau mai nawh, nawh haok huan ka can dee pa hu nawh kudauh heue. Nawh tieh feen ka simiang Asurix mai ang cu ti yuh kaing jhaw nawh heue. ⁸ Nawh pex ceu pui Philitix khankix, tom hoek dee singai ka veng Gazax mai khawm dee pa kwang nawh khankix, jah khaing nyiex lhaong pau tab khankix tom hoek ka veng pa kaux cong heue. ⁹ Ka daux yam kwang simiang Hezakiyax, haktiex pon num tix num, mawh yam hoik kwang Hoshe kawn simex Elax, simiang haktiex Isarelax aliah num tix num, Shalamaneza, simiang haktiex Asurix, hoek puing veng Samarix mai lai lawm ka heue. ¹⁰ Yam hoik sidah loe num, kix hoik pon rhim ka veng an heue. Ka daux num yam hoik kwang Hezakiyax, ka haktiex Hoshe simiang ceu pui Isarelax ka haktiex dim num tix num, veng Samarix hoik mawh pa pon rhim tix heue. ¹¹ Khaix an, simiang haktiex Asurix, viex ceu pui Isarelax khankix hu ka haktiex Asurix mai deuh kix ot daux veng Halax mai veng Habaw, pa koe hawt rawm klawng Gozan mai daux nyiex yaong veng pa koe ka daux haktiex Medix khankix, ¹² Kheu jao ang kix cu nghiet ka lox Siyiex kix, kix hoik lud ka sijax mukheu Nawh Cao mai pa hoik tawm kawncau mau soi Siyiex Mose ka kix khawmuik, kix ang cu nghiet mai ang hawt yuh ka heue. ¹³ Ka daux num yam kwang simiang Hezakiyax ka haktiex kao pon num tix num, Senakherix, simiang haktiex Asurix hoek puing ka veng pa kaux cong khawmuik ka daux haktiex Yudax mai rhim ka veng an khankix heue. ¹⁴ Khaix an Hezakiyax simiang haktiex Yudax ploi pui hu ka simiang haktiex Asurix ka daux veng Lakhisha ah nin, "Aux hoik lud hoik lud, deeh veeh pex ing khaing aux liak! Can pa sang sux maix aux khankix aux tak sang tawx khawmuik, " Mai simiang haktiex Asurix sux ka Hezakiyax, simiang haktiex Yudax ka mau loe yieh talatan mai khri tixngoe talatan heue. ¹⁵ Mawh kheu nan, Hezakiyax hoik tawx mau pa koe ka daux nyiex bwan Siyiex mai can sinngao pa koe daux nyiex haw simiang khawmuik ka nawh heue. ¹⁶ Ka daux yam an, Hezakiyax hoik kheet khri khaing piang siviex nyiex bwan Siyiex khankix mai khaing piang rong pa hoik om Hezakiyax simiang haktiex Yudax lih mai tawx ankix ka simiang haktiex Asurix heue. ¹⁷ Khaix an, simiang haktiex Asurix ploi cao kaing naing ting pa mawh Taratan mai cao kaing ting pa yuh kaing son nawh pa mawh Rabasarix mai khawm cao kaing ting pa kwang haktiex nawh pa mawh Rabashakhie lih hu khaing veng Lakhisha tau mai cub kru naing ting tix cub mai hu ka veng Yerusaliem sonsang puing ka simiang Hezakiyax heue. Kix hoik hu hoek ka veng Yerusaliem, yam hoik hoek bleeh kix tan mai cung hawt rawm pa kaoh khaing plak laong rawm dung pa koe ka piang daux krax pa si dau man khankix heue. ¹⁸ Yam kok yo kix ka simiang mai Eliakim kawn simex Helakiyax, pa mawh cao kaing pa kwang ka daux cub nyiex ma simiang Shabanax, pa mawh cao kaing tiiem lai mai Joah kawn simex Asaphax pa mawh cao mhai ti deuh lox kum khankix hoik lih hoek ka kix heue. ¹⁹ Khaix an Rabashakhie, ah nin ka kix, "Pex ah nin ka Hezakiyax, simiang pa ting lhaong simiang haktiex Asurix hoik ah nin, grawng krax pa een maix rhawm ti yuh nin koe dee bleeh yuh ka mawh? ²⁰ Maix krai lox grawng krax keud tix mai grawng koe riang rao tix son naing, viang mawh nan, ankix mawh lox pa giex going heue. Mawh een maix rhawm tix ka pui mawx sonsang tieh feen tix ka aux lie?" ²¹ Jhak heue! maix lai kawn een rhawm tix ka khaox gix priem pa hoik pot in pa mawh haktiex Ejiptux, ka pui pa een rhawm tix ka gawng priem an mai phlat ti laig daux taix nawh, mawh kheu nan, Pharaw haktiex Ejiptux, tak mawh pa sang yuh nan ka kix khawmuik ka pui pa een rhawm tix ka nawh heue. ²² Viang mawh nan, phan pex ah nin ka aux, yix een rhawm ka daux Siyiex yix, ang hoik mawh Hezakiyax pa teei ti tik dee pa lhaong Nawh Cao mai khu dee tan an khankix hu dee singai mai pa ah nawh nin ka haktiex Yudax mai ka veng Yerusaliem, maix tak krub ka sivoe khu dee tan ka daux veng Yerusaliem lie?" ²³ Yam in tawx ceu pa kham maix mhai ruk ka cao simiang aux, simiang haktiex Asurix mai aux sang tawx brung ka maix ra rheng mu, jhak ka pon ang maix pon sawg ka pui pa brug brung khankix brug ka piang ka son plak cie maix heue. ²⁴ Phan ang mawh nan maix sang pon deeh tieh cao kaing naing pa kied iak cao simiang aux yuh ka mawx? Maix kawn een rhawm tix ka ling lawx naing brung mai pui naing brung haktiex Ejiptux yuh ka mawx lie? ²⁵ Yam in mawh hoek aux ti yuh haktiex dee in laux leeing ka daux pa ang Siyiex tawx akhwang lie? Siyiex ah nin ka aux, hu puing ka haktiex in mai yuh laux leeing heue" ²⁶ Khaix an, Eliyakim kawn simex Hilakhix mai Shabanax mai Joah khankix, ah nin ka Rabashakhie, "Yuh bwanson sikah ka kawncau mau soi maix khankix ka plak lox Aramix, lox Surix liak, mawh kheu tawng yix ka lox ankix, mai paw doh sikah lox Hebrie, Yudax ka yix, sonsang mhong pui khankix pa ot ka piang guh veng ka awx, ²⁷ viang mawh nan, Rabashakhie ah nin ka kix, cao simiang aux ploi aux hoek ka cao simiang maix sonsang krai ka lox inkix mai ang hoik mawh khawm pui ankix pa ngawm tix ot ka piang guh veng, ka pui pa tak sang ih mai nyaux ka aing neem cao tix tau mai maix lie?" ²⁸ Khaix an, Rabashakhie yaog ti cung mai kok yo lox pa kied ting ka plak lox Hebrie, Yudax ah nin, "Nghiet ka lox simiang pa ting Haktiex Asurix heue. ²⁹ Mawh kheu nan, simiang ah nin, paw doh kieh Hezakiyax pie lhen ka pex mawh kheu nawh ang pon taoh pex khaing daux tawm taix aux heue. ³⁰ Paw kieh Hezakiyax yuh pex koe krax een rhawm ka Siyiex, ka pa ah nin, Siyiex tak sang taoh ex tete, veng in tak mawh pa ang lai pon hoek ka daux tawm taix simiang haktiex Asurix heue. ³¹ Paw nghiet ka lox Hezakiyax mawh kheu simiang haktiex Asurix hoik ah nin yuh pa mhawm tau mai aux mai lih hoek ka aux, mai pui ku kaux tak deeh tang ih khaing nhu plix siiet cao tix mai pui ku kaux tang deeh nyaux rawm khaing daux dung cao nawh, ³² tom hoek bawg yam teei aux pex hu dee singai ka haktiex tix dah pa awm haktiex cao pex, haktiex pa koe simie nghox koi dee lih rawm plix siiet pa khraox khankix mai haktiex dee koe blah mai sipeem plix siiet khankix, dee koe khaox sanlun mai dee lih rawm hia khankix, sonsang im pex mai sonsang ang pex yum heue. Paw nghiet ka lox Hezakiyax, phan ang mawh nan, nawh tak jeeh nyaw pex ah nin, Siyiex tak sang taoh ka ex heue ³³ Mawh hoik deeh pon taoh siyiex haktiex ceu pui mawx tix kaux kaux haktiex cao tix khaing daux tawm taix simiang haktiex Asurix lie! ³⁴ Mawh koe siyiex haktiex Hamat mai haktiex Apat dee mawx lie? Mawh koe siyiex haktiex Sepharavim haktiex Henax mai haktiex Iva khankix dee mawx lie? Mawh hoik deeh pon taoh kix veng Samarix khaing daux tawm taix aux lie? ³⁵ Mawh siyiex khaing daux haktiex ceu pui mawx pa pon taoh haktiex cao tix khaing daux tawm taix aux, sang deeh taoh Siyiex ti teei veng Yerusaliem khaing daux tawm taix aux lie?" ³⁶ Viang mawh nan, pui khankix hoik yiien yawg tix mai ang lai pawk lox tix gum kawx, mawh kheu simiang hoik tawm lox ah nin, paw lai pawk lox nawh heue. ³⁷ Khaix an, Eliyakim kawn simex Hilakhix, cao pa kwang ka daux nyiex simiang, Shabanax pa mawh cao tiiem lai mai Joah kawn simex Asaphax, pa mawh cao tiem ti deuh lox bang kum khankix, hoik riah kraung ceep tix mai hoek ka Hezakiyax mai krai lox pa ah Rabashakhie ka nawh heue.

¹ Yam hoik mhong Hezakiyax ka lox ah kix, nawh riah kraung ceep tix mai vhua tokaux tix ka chee mai hu laig ka daux nyiex bwan Siyiex heue. ² Khaix an, nawh ploi Eliyakim cao kwang daux nyiex ma simiang mai Shebanax cao tiiem lai mai khrawm cub kuad cao giex kaing li khankix, hu ka cao jhai Isayax, kawn simex Amok heue. ³ Kix ah nin ka nawh, "Hezakiyax ah awm in singaix in mawh singaix pa kha rhawm mai pa koe lox ah lox ne mai lox sibriem awm hoik hoek bawg yam keh kawn ngie, viang mawh nan, ang lai koe riang rao tix keh heue. ⁴ Ha Siyiex maix mhong ka lox krai Rabashakhie, pa hoik ploi cao simiang nawh pa mawh simiang haktiex Asurix, hoek ti bleeh ka Siyiex pa im ju mai Siyiex maix tak deeh ne ka gumlox pa mhong Nawh Cao khawmuik heue. Mawh kheu nan maix rawg bwan son pui pa kawn deuk khankix heue" ⁵ Mawh kheu nan, kawncau mau soi simiang Hezakiyax khankix hoik bleeh ka Isayax heue. ⁶ Isayax ah nin ka kix, "Pex krai yuh nin ka cao simiang pex, Siyiex ah nin, paw lhat graung ka lox pa hoik mhong maix khankix, khaing cub kawncau mau soi simiang haktiex Asurix pa hoik si briem ka Aux awx." ⁷ Aux tak kieh rhawm nawh sung sang mai nawh tak mhong lox satang mai deeh ing ka haktiex cao tix heue. Aux tak sang kieh nawh yum ka lawm vaig ka daux haktiex cao nawh heue. ⁸ Mawh kheu nan, Rabashakhie deeh ing mai yaox puing simiang haktiex Asurix ka veng Libanax, kheu hoik mhong nawh lox hu simiang khaing veng Lakhisha heue. ⁹ Simiang mhong grawng hoek Tirakax, simiang haktiex Ethiopia haktiex Kusax mai nawh hoik ah nin, "Jhak heue, nawh hoek ti sang yuh naing ka maix heue." Mawh kheu nan, nawh deeh baox ploi cao cau tix khankix hu ka Hezakiyax ah nin, ¹⁰ "Pex krai ah nin ka Hezakiyax simiang haktiex Yudax paw doh kieh Siyiex een maix rhawm tix pie lhen ka maix ah nin, veng Yerusaliem tak ang pon ap tix ka daux tawm taix simiang Asurix heue. ¹¹ Jhak heue, mawh hoik mhong maix pa yuh cub simiang Asurix ka haktiex an khankix khawmuik mai pa ah nawh ti yuh kix laux leeing khawmuik, mai maix khex sang pon ti glawd khaing lie? ¹² Haktiex pa hoik yuh keeing aux laux leeing khankix, pa mawh haktiex Gozan, Haram mai haktiex Rezat mai ceu pui Eden khankix pa ot daux veng Telasa mawh hoik sax taoh siyiex ceu pui inkix ka kix lie? ¹³ Mawh koe simiang haktiex Hamat mai simiang haktiex Arapat mai simiang veng Sepharavim, veng Hanax mai veng Iva khankix dee mawx lie?" ¹⁴ Hezakiyax pon rieb lai khaing daux tawm taix cao cau khankix mai hoik phat ka lai an, mai Hezakiyax, haok ka daux nyiex bwan Siyiex mai nih lai an ka plak sivoe Siyiex heue. ¹⁵ Khaix an, Hezakiyax rawg bwan ka plak sivoe ngai Siyiex ah nin, "Siyiex ceu pui Isarelax pa ot ka daux sinax Cherubim eue, mawh ngie Maix Cao pa mawh Siyiex ka piang meung haktiex khawmuik, Maix Cao hoik phan raoma mai haktiex heue." ¹⁶ "Siyiex eue, daong yhaok Maix Cao mai nghiet heue. Simiang Siyiex eue, blah ngai Maix Cao mai jhak heue, mai nghiet ka lox kawncau Sanakherit, pa hoik ploi nawh hoek sibriem ka Siyiex pa im ju heue." ¹⁷ "Siyiex eue, mawh tete, cub simiang Asurix khankix hoik yuh ceu pui khankix mai khawm haktiex khankix laux leeing, ¹⁸ hoik tik kix ka daux ngu, mawh kheu siyiex ankix ang tie mawh siyiex mai an hoik mawh pa yuh pui ka taix tix khankix, pa mawh khaox mai simaox khankix, mawh kheu nan, kix hoik yuh laux leeing heue. ¹⁹ Siyiex ex eue, yam in aux rawg bwan, Maix Cao deeh taoh yix khaing tawm taix nawh, sonsang tawng meung haktiex pa koe piang ca haktiex in khawmuik ka Maix Cao Siyiex tix kaux khaing heue." ²⁰ Khaix an, Isayax kawn simex Amok hoik ploi pui hu ka Hezakiyax ah nin, "Siyiex ceu pui Isarelax ah nin, grawng pa hoik rawg maix bwan ka Aux sonsang puing ti ka Senakharit simiang haktiex Asurix Aux hoik mhong ka heue." ²¹ In mawh gumlox pa krai Siyiex son nawh bun krih loig kawn bun Zion, hoik nu nai ka maix hoik nyiah ka maix, kawn bun veng Yerusaliem, hoik vuh vied kaing tix ka plak khaix maix! ²² Maix deuh phimap ka pui mawx mai hoik sibriem ka pui mawx? Mawh hoik riag yo maix lox tix ka pui mawx! Mai hoik yaog ngai tix lhaong ka piang pui mawx lie? Maix hoik yuh ceu ankix ka Siyiex pa singax singeh ceu pui Isarelax heue. ²³ Maix kieh cao cau tix khankix, sibriem ka Siyiex mai hoik ah nin "Aux viex ling lawx naing brung pa kied haoh cie aux khankix, laig ka choek gawng tom bleeh ka dee pa kied singai Lebanon; Aux tak kid ti tik khaox lhaong Arit khankix mai khawm khaox gix pa kied mhawm khankix, Aux sang laig ka daux nong pa kied singai ka daux haktiex khankix, ka dee raug khaox plix khankix ka daux nong heue. ²⁴ Aux kaong rawm daux mai hoik nyaux rawm pui tang praix klawng mai tiag caong aux, dig ka rawm klawng Ejiptux khankix hit, ²⁵ mawh ang maix sax mhong ka grawng pa hoik yuh Aux tom didix lie? Jah ka tom yam an, Aux hoik yuh ceu ankix mawh sonsang mawh maix pa sang yuh veng pa kaux cong an khankix laux mai awm pum simaox pa nai nawk heue. ²⁶ Mawh kheu nan, pui veng khankix kix hoik iak riang heue. Kix hoik Sikua rhawm mai kaig tua, kix hoik awm rib riem daux tiagtu mai taux lhax pa klai khankix, hoik awm rib kuah ka piang braux nyiex mai awm kawn nghox hoik fit sivoe ang nyang ting heue. ²⁷ Aux tawng dui ot dui koe maix, khawm dee lih dee laig maix mai krax song rhawm maix ka Aux heue. ²⁸ Mawh kheu krax song rhawm songrhi maix ka Aux mai lox pa nu nai maix khankix hoik hoek ka daux yhaok Aux, mawh kheu nan, Aux tak sau gok mai feuk ka meeh maix mai jup jheeh maix ka jup mai Aux tak deeh kieh maix ing plak krax haok maix heue. ²⁹ In tak mawh mhai ruk ka son maix, maix tak ih can ceu pa tang kuah ka daux num in mai ka daux ra num tix num maix tak yaog ti ih pa kuah awm an heue. Ka daux loe num tix num kawx mawh bawg yam ruat simie mai vawg, sum sipeem plix siiet mai ih plix an khankix heue. ³⁰ Can pui pa kawn deuk mai pa glawd khaing daux nyiex ma Yudax khankix, tak baox kaux riah tom hoek plak greem mai tak deeh plix ka piang heue. ³¹ Can pui pa kawn deuk khankix tak lih hu khaing veng Yerusaliem mai pui pa glawd khankix tak lih hoek khaing gawng Zion heue. Krax koe rhawm rhi Siyiex Cao pa ting lhaongka piang khawmuik, ³² "Mawh kheu nan, Siyiex ah awm in ka grawng simiang haktiex Asurix, nawh tak ang pon ti laig daux veng in mai ang pon tix puing te tin mai ang pon ti hoek ka plak sivoe veng tau mai kraung pa tiebtie mai ang pon ti pum tiex sonsang puing ka veng an heue. ³³ Nawh kaoh khaing krax mawx, nawh tak deeh ing krax an mai nawh tak ang pon ti laig ka daux veng in, in mawh pa ah Siyiex heue. ³⁴ Grawh grawng nawh, Aux tak tiebtie mai taoh ka veng in son min tokaux Aux mai son min pakngai kawncau Aux Davit heue" ³⁵ Ka daux sawm an kawncau Siyiex lih hu mai pah cub pui Asurix khankix tix sien daix mheen phwan rheng kaux ka dah dee bang kix, mai yam kaoh pui plak ponngawb caocao jhak heue, pui khankix hoik mawh tokaux yum heue. ³⁶ Mawh kheu nan, Senakharit simiang haktiex Asurix lih hu dee singai mai hoik deeh ing ka nyiex tix mai dah ti ot ka daux veng Nineve heue. ³⁷ Tix singaix yam kawn krub nawh ka siyiex tix Nisarot ka daux nyiex bwan, kawn simex nawh khankix pa mawh Adarameliet mai Sharezap hoik pah nawh yum ka vaig, mai kiex hoik to ka haktiex Ararat heue. Khaix an, kawn simex nawh Esarahadon deeh plud ti kwang haktiex ka dah dee ot nawh heue.

¹ Ka daux singaix an Hezakiyax saux mai dex yum heue. Cao jhai Isayax kawn simex Amok hu ka nawh mai ah nin ka nawh, "Siyiex ah nin, khre rien ti deuh kaing nyiex maix, mawh kheu maix tak sang yum mai ang lai im ju heue." ² Khaix an, Hezakiyax veeh pakngai tix ka plak ding nyiex mai rawg bwan ka Siyiex ah nin heue. ³ "Siyiex eue, aux rawg bwan doh keud ka aux ka daux krax lawng aux ka plak sivoe ngai Maix Cao, ka daux pa khaw caw mai krax pa kaux sijax khawm rhawm tix mai aux hoik yuh can ceu pa hoik mhawm khankix ka daux ngai Maix Cao heue." Hezakiyax yiiem sigrien sigre heue. ⁴ Khaix an, Isayax lih hu yam ang nawh nyang bleeh ka daux sigreung nyiex haw gumlox Siyiex lih bleeh ka nawh ah nin, ⁵ deeh ing mai krai ka Hezakiyax, pa mawh cao thong cub ceu pui Aux khankix, Siyiex pa mawh, Siyiex keeing maix Davit ah nin, "Aux hoik mhong ka pa rawg maix bwan, Aux hoik yaox ka rawm ngai maix, Aux tak deeh pai maix moi tete heue. Yam hoek loe ngaix tix ngaix maix tak haok bleeh ka daux nyiex bwan Siyiex heue. ⁶ Aux tak baox naok singaix pa im ju maix kao phwan num, Aux tak taoh maix khawm veng in khaing daux tawm taix simiang haktiex Asurix, Aux tak tieb mai taoh ka veng in son min tokaux Aux mai son min pakngai kawncau Aux Davit heue." ⁷ Khaix an, Isayax deeh ah nin, "Teei sigleem plix ruh hoek tix sigleem heue. Mawh kheu nan, kix teei ankix mai kraix ka dee saux muad mai nawh deeh moi khaing saux tix heue." ⁸ Hezakiyax deeh ah nin ka Isayax, "Mawh koe mhai ruk ceu patix sonsang pai Siyiex aux deeh moi mai sonsang pon haok aux ka nyiex bwan Siyiex ka daux loe gaix tixngaix lie?" ⁹ Khaix an, Isayax ah nin, "In mawh mhai rug son maix khaing Siyiex sonsang yuh Siyiex ceu inkix, pa hoik ah Nawh Cao heue. Mawh tak sang hu veei pang peue, sivoe kao taix, phan ang mawh nan, sang deeh plak khaix kao taix lie?" ¹⁰ Hezakiyax deeh pawk lox ah nin, "Lih hu veei sivoe kao taix mawh pa yie, viang mawh nan, aux simie veei deeh plak khaix kao taix heue." ¹¹ Mawh kheu nan, cao jhai Isayax rawg bwan ka Siyiex mai Nawh Cao deeh kieh veei deeh plak khaix kao taix, ka pa hoik luan hu ka piang nari singaix cie Ahaza heue. ¹² Ka daux bawg yam an, Berodak Baladan, kawn simex Baladan simiang haktiex Babulon tawx lai mai totaix hoek ka Hezakiyax, mawh kheu mhong nawh saux Hezakiyax heue. ¹³ Hezakiyax gaux rhawm mai rieb ka kix mai jhi kix yaox nyiex krao sinngao nawh khankix mai khri, mau mai sidauh bhawng mai bee kraix pa kied koe jum mai khawm nyiex krao kraung naing nawh khankix, khawm can ceu pa hoik mox nawh khankix, pa koe daux sinax kraung sinngao nawh khawmuik heue. Can pa koe ka daux nyiex mai can pa koe ka daux meung haktiex nawh khankix, pa ang Hezakiyax, jhi kix yaox ang lai koe pie tix ceu kawx heue. ¹⁴ Khaix an, cao jhai Isayax hu ka simiang Hezakiyax mai ah nin ka nawh, "Mawh ah pui inkix patix? mai mawh hoek kix ti yaox ka maix khaing dee mawx lie?" Hezakiyax ah nin, "Kix hoek khaing haktiex dee pa kied singai khaing Babulon heue." ¹⁵ Isayax ah nin, "Mawh hoik yaox kix patix ka daux nyiex maix lie?" Mawh kheu nan, Hezakiyax deeh pawk lox ah nin, kix hoik yaox ka can ceu pa koe ka daux nyiex aux khawmuik, pa ang aux jhi kix yaox khaing daux sinngao pa koe aux khankix, ang lai koe pie tix ceu kawx heue. ¹⁶ Khaix an, Isayax deeh ah nin ka Hezakiyax, nghiet ka lox Siyiex heue. ¹⁷ Jhak heue, singaix bawg yam tak sang hoek, can pa koe daux nyiex maix khankix khawmuik mai can ceu pa hoik khrawm keeing maix ti deuh tom hoek daux in singaix, tak teei hu ka veng Babulon, ang lai deuk pie tix ceu kawx, in mawh pa ah Siyiex heue. ¹⁸ Kix tak sang teei kawn simex maix khankix hu dee singai tiblah, pa mawh kawn pa kaoh khaing maix mai kix tak mawh pui sieh ka daux nyiex haw simiang haktiex Babulon heue." ¹⁹ Khaix an, Hezakiyax ah nin ka Isayax, "Gumlox Siyiex pa hoik krai maix mawh pa mhawm!" Nawh keud yuh nin, "Mawh ang krax pa nhim mai pa mawh meh peung lai koe ceeix kawx ka daux singaix im ju aux lie?" ²⁰ Yam in grawng kaing pa deuk Hezakiyax ti yuh khankix mai riang rao pa koe nawh mai grawng pa yuh nawh dung rawm mai dawng rawm rawng pa viex rawm laig ka daux veng khankix, ang hoik mawh pa tiiem ti deuh ka daux phuk lai cub simiang haktiex Yudax khankix lie? ²¹ Mawh kheu nan, Hezakiyax hoik laux lee tix tau mai keeing nawh, khaix an, kawn simex nawh Manashe hoik deeh plud ti kwang ka dah dee ot nawh heue.

¹ Manashe koe ju kao ra num yam yaog nawh ti mawh simiang mai nawh kwang ka veng Yerusaliem tixphwan phwan num heue. Ceu kaux miex nawh mawh Hephazibax heue. ² Nawh yuh pa caox caig ka daux ngaix Siyiex, awm pa seeing brai ceu pui an khankix pa hoik grheu Siyiex lih khaing plak sivoe ngai pui Isarelax khankix heue. ³ Nawh deeh sum dee pa lhaong khankix, pa hoik yuh keeing nawh Hezakiyax laux leeing, nawh deeh sum khu dee tan khankix son Balax mai yuh khaox riang grang siyiex Asherax khankix awm pa yuh Ahap simiang haktiex Isarelax, mai nawh krub ka pa koe piang raoma khankix mai yuh kaing jhaw kix heue. ⁴ Nawh baox sum khu dee tan ka daux nyiex bwan Siyiex, pa hoik sax ah Siyiex yuh nin, "Aux tak deuh min ceu kaux tix ka daux veng Yerusaliem heue." ⁵ Nawh sum khu dee tan son pa koe piang raoma khankix, ka daux sigreung biang nyiex bwan Siyiex khawm ra plak heue. ⁶ Nawh gleeing ti tan kawn simex tix ka ngu mai gau tix ka lox sibawk mai shiao ka pa chix meed mai yuh paox pie tau mai krax keud krax sawn khaing phicaox mai khawm pa yuh singie khankix heue. Nawh hoik nie yuh pa caox caig ka plak ngai Siyiex sonsang so pa song rhawm Nawh Cao heue. ⁷ Nawh kawn deuh riang grang Asherax pa yuh nawh ka khaox tix mu ka daux nyiex bwan, awm pa hoik sax ah Siyiex ka Davit mai ka kawn simex nawh Sawlamon yuh nin, "Ka daux nyiex bwan in mai ka daux veng Yerusaliem, pa hoik laug Aux ti deuh khaing doeh ru pui Isarelax khankix, Aux tak deuh min ceu kaux ti tan leeing ju heue. ⁸ Phan kix priex rhawm ti hawt yuh awm gumlox pa hoik tawm Aux ti deuh ka kix mai awm gumlox been pa hoik tawm kawncau Aux Mose ti deuh ka kix mai aux tak ang lai kieh caong ceu pui Isarelax khankix vung viang khaing haktiex pa hoik tawx Aux ka keeing kix heue." ⁹ Viang mawh nan, kix ang cu ti nghiet mai Manashe hoik nyaw glaw kix yuh pa caox caig nie lheu khaing ceu pui khankix pa hoik yuh Siyiex kix laux leeing ka plak sivoe pui Isarelax heue. ¹⁰ Siyiex krai khaing cao jhai pa mawh kawncau mau soi Nawh khankix ah nin, ¹¹ "Mawh kheu hoik yuh Manashe simiang haktiex Yudax ka ceu pa seeing brai inkix, nawh hoik yuh pa nie lheu caox khaing pui Amorix khankix pa koe ka phao ka nawh mai nawh baox yuh pui Yudax, koe pa lud tau mai riang grang pa krub nawh heue." ¹² Mawh kheu nan Siyiex ceu pui Isarelax ah nin, jhak heue, Aux tak sang viex krax pa kha rhawm hoek ka piang veng Yerusaliem mai haktiex Yudax, can pui pa mhong grawng an khankix tak lak lheet yhaok ka khawm ra khawn heue. ¹³ Aux tak tuk ka maox tiag Samarix mai maox diag tiag ka nyiex ma Ahap ka piang veng Yerusaliem, Aux tak awt ka veng Yerusaliem awm awt pui ka tawg klong mai gup ka heue. ¹⁴ Aux tak teei ti tik pui pa mawh sinngao Aux khankix mai ap tix tawx kix ka daux tawm taix pui koeng kix mai kix tak mawh pui pa kham pa giex gang ka pui koeng kix khawmuik, ¹⁵ mawh kheu hoik yuh kix pa caox caig ka daux ngai Aux mai yuh Aux song rhawm, jah tom singaix lih hu kix khaing haktiex Ejiptux, tom hoek in singaix heue. ¹⁶ Lheu khaing an, Manashe hoik jauh yuh nham pui pa ang koe pa lud khankix tom nie, tom hoik kieh veng Yerusaliem naog ka nham jah khaing plak in tom hoek ka plak an, lheu khaing phimap pa yuh nawh mai kieh pui Yudax khankix lud, ka daux pa yuh kix pa caox caig ka daux ngai Siyiex heue. ¹⁷ Yam in, grawng kaing pa deuk Manashe mai can pa hoik yuh nawh khankix mai phimap pa hoik lud nawh khankix, ang hoik mawh pa tiiem ti deuh ka daux phuk lai been cub simiang haktiex Yudax lie? ¹⁸ Mawh kheu nan, Manashe hoik laux lee ti tau mai keeing nawh mai sipaung nawh ka daux sipeem nyiex haw cao nawh, ka daux sipeem Awza heue. Khaix an, kawn simex nawh Amon deeh plud ti kwang ka dah dee ot nawh heue. ¹⁹ Amon hoik koe ju kao ra num yam mawh nawh simiang mai nawh kwang ka veng Yerusaliem ra num heue. Ceu kaux miex nawh mawh Meshulemiet kawn bun Haruza khaing veng Yotaba heue. ²⁰ Nawh yuh pa caox caig ka daux ngai Siyiex, awm pa yuh keeing nawh Manashe heue. ²¹ Mawh kheu nan, nawh hawt hu ka daux krax pa lawng keeing tix khawmuik mai nawh yuh kaing jhaw pa hoik yuh keeing tix mai krub ka ankix heue. ²² Nawh hoik tik vud ka Siyiex keeing tix khankix mai nawh ang lai hawt grawng lawng khaix Siyiex heue. ²³ Khaix an, kawncau mau soi Amon khankix hoik rom ti tieh feen ka nawh mai pah simiang yum ka daux nyiex haw cao nawh heue. ²⁴ Pui haktiex khankix pah ka pui pa rom ti tieh feen ka Amon khankix heue. Khaix an pui haktiex an khankix yaog kawn simex nawh Yosiyax mawh simiang ka dah dee ot nawh heue. ²⁵ Yam in, grawng kaing pa deuk Amon mai pa hoik yuh nawh khankix, ang hoik mawh pa tiiem ti deuh ka daux phuk lai been cub simiang haktiex Yudax khankix lie? ²⁶ Sipaung nawh ka daux simeeig cao nawh pa koe ka daux sipeem Awza heue. Khaix an, kawn simex nawh Yosiyax deeh plud ti kwang ka dah dee ot nawh heue.

¹ Yosiyax hoik koe ju daix num yam yaog nawh ti mawh simiang mai nawh kwang ka veng Yerusaliem tixngoe tix num heue. Ceu kaux miex nawh mawh Yedidax kawn bun Adeyax khaing veng Bozakat heue. ² Nawh hoik yuh pa khaw caw ka daux ngai Siyiex mai hawt grawng lawng khaix keeing nawh Davit, nawh ang lai veei ti ka praok plak dawm mai plak khawn gwiex heue. ³ Yam hoik kwang simiang Yosiyax ka haktiex kao num tix num, simiang ploi cao tiiem lai tix Shaphan, pa mawh kawn simex Azaliyax kawn simex Meshulam, hu ka nyiex bwan Siyiex ah nin, ⁴ "Hu ka cao giex kaing li ting Hilakhix kieh nawh simin ka mau pa hoik viex tix laig ka daux nyiex bwan Siyiex, pa hoik khrawm cao pau siviex khaing pui khankix heue." ⁵ Kieh kix ap ka daux tawm taix pui pa yuh kaing, pa kia ngien ka nyiex bwan Siyiex, kieh kix tawx ankix ka pui pa yuh kaing ka daux nyiex bwan Siyiex, sonsang deeh cox ka dee laux nyiex bwan, ⁶ son cangmai mai son pui sum nyiex khankix mai son cao pa yuh kaing mai son pa liag kix khaox mai lon simaox pa hoik saik tix khankix sonsang deeh cox nyiex bwan heue. ⁷ "Viang yuh ka mawx kawx kix ang lai ji carang mai ap ti tawx mau ka daux tawm taix kix kheu mawh kix pui pa yuh kaing mai pa kaux sijax tix heue." ⁸ Khaix an, cao giex kaing li ting Hilakhix ah nin ka Shaphan pa mawh cao pa tiiem lai, "Aux hoik yaox phuk lai lox tat jhawm prawng ka daux nyiex bwan Siyiex heue." Hilakhix tawx phuk lai an ka Shaphan mai nawh phat ka heue. ⁹ Mawh kheu nan, Shaphan cao pa tiiem lai hu ka simiang mai viex grawng an hoek ka simiang ah nin, "Kawncau mau soi maix khankix hoik khrawm ti simin mau pa koe ka daux nyiex bwan mai hoik ap ka daux tawm taix pui pa yuh kaing mai pui pa kia ngien ka nyiex bwan khankix heue." ¹⁰ Khaix an, Shaphan cao tiiem lai jhi simiang yaox ah nin, "Cao giex kaing li Hilakhix tawx phuk lai ka aux tix pheen heue." Shaphan phat lai an plak sivoe simiang heue. ¹¹ Yam hoik mhong simiang ka gumlox phuk lai lox tat jhawm Prawng an mai nawh riah ka kraung ceep tix heue. ¹² Khaix an, simiang tawm lox ka cao giex kaing li Hilakhix mai ka Ahikam kawn simex Shaphan mai ka Akhabaw kawn simex Mikhayax mai ka Shaphan cao pa tiiem lai mai ka Asiyax kawncau simiang ah nin, ¹³ "Hu chawk ka Siyiex ka son aux mai son pui khankix son ceu pui Yudax khawmuik, son grawng gumlox phuk lai in pa hoik yaox ti mawh kheu jao hoik kied song rhawm Siyiex ka piang ex, grawh grawng nawh keeing ex khankix hoik ang cu nghiet ka gumlox pa koe ka daux phuk lai in, ang hawt yuh awm pa hoik tiem ti khawmuik ka grawng pa dex dawd Hilakhix mai ex heue." ¹⁴ Mawh kheu nan, cao giex kaing li Hilakhix, Ahikam, Akhabaw, Shaphan mai Asiyax khankix hu ka Hulata cao jhai bun, pa mawh moeng Shalum kawn simex Tikava, kawn simex Harahap, pa mawh cao pa pau nyiex deuh sibex heue. Bun an ot ka daux veng Yerusaliem plawg ra heue. Kix sikah tau mai bun an heue. ¹⁵ Bun an ah nin ka kix, "Siyiex ceu pui Isarelax ah nin, krai ka pui pa hoik ploi pex hoek ka aux heue." ¹⁶ Siyiex ah yuh nin, jhak heue, Aux tak viex krax pa kha rhawm ka dee in mai ka piang pui ot baoh in mhong ka gumlox pa koe ka daux phuk lai pa hoik phat simiang Yudax khawmuik heue. ¹⁷ Mawh kheu kix hoik tik hoik vud ka Aux mai kix gleeing nyawng bhawng ka siyiex pui tang kaux tang hak khankix, sonsang so kix Aux song rhawm ka kaing pa yuh kix ka taix tix khankix heue. Mawh kheu nan, krax song rhawm Aux tak lih ka dee in mai ang chix yeet heue" ¹⁸ "Viang mawh nan, son simiang haktiex Yudax pui pa hoik ploi pex hoek ti chawk ka Siyiex, ka grawng in pex tak deeh ing krai ka nawh yuh nin, Siyiex ceu pui Isarelax ah nin, " Ka son grawng lox pa hoik mhong maix khankix, ¹⁹ "Mawh kheu hoik mhong maix ka lox ghlat Aux ka dee in mai ka pui pa ot baoh tin khankix tak sang lih mawh pa prah ti riem mai pa jhax lawg mai tom koe pa awn rhawm awn rhi mai pa tiiem rhawm mai riah kraung ceep tix yiiem yo ka plak sivoe Aux, mawh kheu nan, Aux tom nghiet ka lox maix, " In mawh lox ah Siyiex heue. ²⁰ "Mawh kheu nan, Aux tak khrawm maix hu ka keeing maix khankix mai maix tak mawh pa khrawm ti ka simeeig mai ka daux pa nhim mai ngai maix tak ang yaox pa kha rhawm an khankix, ka pa sang viex Aux hoek ka piang dee in, " Mawh kheu nan, gumlox an hoek ka simiang heue.

¹ Khaix an, simiang ploi kix kraix khrawm kwad riex ju haktiex Yudax mai veng Yerusaliem khawmuik hoek ka nawh heue. ² Simiang haok laig ka daux nyiex bwan Siyiex tau mai pui haktiex Yudax khankix mai can pui pa ot ka daux veng Yerusaliem khankix, khawm cao giex kaing li, cao jhai mai pui ting pui iak khawmuik mai nawh phat kix mhong gumlox phuk lai sijax mukheu, pa hoik yaox ka daux nyiex bwan Siyiex heue. ³ Simiang cung hawt rong mai yuh sijax mukheu ka plak sivoe ngai Siyiex, sonsang hawt khaix Siyiex mai priex rien ka gumlox pingnyap Nawh Cao khankix mai beenli mai lox tawm jhawm prawng, tau mai khawm rhawm mai khawm ju nawh khawmuik, sonsang hawt yuh awm lox sijax mukheu pa hoik tiem ka phuk lai in mai pui khawmuik cung mai kham ka lox sijax mukheu in heue. ⁴ Simiang tawx lox ka Hilakhix cao giex kaing li ting mai cao giex kaing li pa ot greem nawh khankix mai ka cao pau diang siviex, kieh kix gah kraung khrai pa hoik koe son Balax mai son siyiex Asherax mai son pa koe ka piang raoma khankix lih khaing ka daux nyiex bwan Siyiex mai nawh gleeing ankix ka plak praix veng Yerusaliem daux tiag Kidaron mai deeh viex nyaox an ing ka veng Petelax heue. ⁵ Nawh teei ti tik cao giex kaing li pa krub riang grang khankix, pa hoik yaog cub simiang haktiex Yudax ti deuh sonsang gleeing nyawng bhawng ka piang dee pa lhaong khankix pa koe ka daux veng haktiex Yudax mai pa koe hawt vung viang haktiex Yerusaliem mai pui pa hoik gleeing nyawng bhawng ka Balax, ka singaix, ka khix mai ka simuing pa koe ka piang raoma khawmuik heue. ⁶ Nawh gah ti tik riang grang Asherax pa yuh ka khaox khaing nyiex bwan Siyiex mai viex hoek ka praok rawm klawng Kidaron plak praix veng Yerusaliem mai veng ankix ka praok rawm klawng Kidaron mai tawk tom phawng awm nyaox mai rhuat ka piang simeeig pui hot heue. ⁷ Nawh yieh ti tik nyiex gox simex seeing mai simex pa koe ka daux nyiex bwan Siyiex ka dee taing bun khankix man pa teuk teue tix son khaox riang grang Asherax heue. ⁸ Nawh viex cao jhai cao giex kaing li khankix hoek khaing veng pa koe daux haktiex Yudax mai yuh pa seeing brai ka dee pa lhaong an khankix dee pa gleeing cao giex kaing li nyawng bhawng, jah ka veng Gebax tom hoek ka veng Berashebax khankix, nawh baox yieh ti tik dee pa lhaong khankix, pa koe hawt siviex veng dee laig ka siviex veng Yawsux pa mawh cao kwang veng, pa ot ka plak gwiex siviex veng heue. ⁹ Viang yuh ka mawx kawx, cao giex kaing li dee pa lhaong khankix ang lai hoek ka khu dee tan Siyiex ka daux veng Yerusaliem, viang mawh nan, kix ih blah pa ang viex susaix ka daux sinax puxaik kix heue. ¹⁰ Nawh kieh baoh haktiex Tawphiet pa koe ka daux ngawd kawn simex Hinon seeing brai son ang pui tix kaux kawx lai kieh kawn simex kawn bun ti tan gleeing daux ngu ka siyiex Moliet heue. ¹¹ Simiang teei ti tik brung khankix pa appong cub simiang haktiex Yudax tix tan ka singaix, pa koe hawt diang siviex nyiex bwan Siyiex hawt lawg nyiex Natameliet pa mawh cao kaing pa ot rawb biang nyiex an mai nawh gleeing ti tik ling lawx brung singaix khankix ka ngu heue. ¹² Khu dee tan pa koe piang braux thaix plak piang Ahaza pa yuh cub simiang haktiex Yudax khankix mai khu dee tan pa yuh Manashe ka biang nyiex bwan Siyiex khawm ra plak, simiang yieh ti tik ankix mai lah tom phawng mai tik phawng nyaox khankix ka daux rawm klawng Kidaron heue. ¹³ Simiang hoik kieh dee pa lhaong pa koe plak lih singaix khaing veng Yerusaliem seeing brai pa koe plak seh gawng pa laux leeing, pa hoik sum Sawlamon simiang ceu pui Isarelax ti deuh son Ashatawriet pa mawh siyiex pa seeing brai, cie ceu pui Sidon mai son Khemawsha, pa mawh siyiex pa seeing brai cie ceu pui Mawbax mai son Milakom pa mawh siyiex pa seeing brai cie pui Amon khankix, ¹⁴ Mai nawh tawk toing ka riang grang simaox khankix tom phawng mai kid ti tik khaox riang grang Asherax khankix mai hoik kieh dee an naog ka si-ang pui yum heue. ¹⁵ Lheu khaing an khu dee tan pa koe daux veng Betelax mai dee pa lhaong pa yuh Yerobom kawn simex Nebat ceu pui Isarelax koe krax phix krax lud, khawm khu dee tan mai dee pa lhaong an khankix, nawh yieh ti tik mai gleeing ka dee pa lhaong mai lah an kix tom phawng mai gleeing ti tik khaox riang grang Asherax khankix heue. ¹⁶ Yam deeh veeh Yosiyax ti jhak nawh yaox ka simeeig pa koe ka piang gawng mai nawh ploi pui hu kuah si-ang khankix khaing daux simeeig mai gleeing si-ang khankix ka piang khu dee tan mai yuh seeing brai awm gumlox pa gruh krai Siyiex pa hoik krai pao pui Siyiex khankix heue. ¹⁷ Khaix an, nawh ah nin, "Lon simaox simeeig pa yaox aux in mawh tix lie?" Mai pui veng khankix deeh krai ka nawh, "An mawh simeeig pui Siyiex pa hoek khaing haktiex Yudax mai pa hoik krai pao in kix pa hoik yuh maix ka piang khu dee tan veng Betelax heue." ¹⁸ Nawh ah nin, "Kieh nawh ot tan heue, paw kieh pui tix kaux kawx gah ka si-ang nawh heue." Mawh kheu nan, kix prah si-ang nawh ot tan tau mai si-ang cao jhai pui hoek khaing veng Samarix heue. ¹⁹ Khaix an, Yosiyax teei ti tik nyiex moeg dee pa lhaong khawmuik pa koe ka daux nyiex yaong veng Samarix, pa yuh cub simiang Isarelax ti kieh Siyiex song rhawm mai nawh yuh ka kix awm pa hoik yuh nawh ka veng Betelax heue. ²⁰ Nawh pah ka cao giex kaing li dee pa lhaong pa ot hawt khu dee tan khankix mai gleeing si-ang pui khankix ka piang khu dee tan mai nawh dee ing ka veng Yerusaliem heue. ²¹ Khaix an, simiang tawx lox ka pui khankix ah nin, "Priex ka pawie Pasakha Siyiex pex awm pa hoik tiem ti deuh ka daux phuk lai sijax mukheu in heue." ²² Pawie Pasakha pa awm in ang lai sax yuh tete glang kwang cao prawng see khankix ka ceu pui Isarelax mai ka glang kwang simiang Isarelax mai cub simiang Yudax khankix ka haktiex heue. ²³ Viang mawh nan, ka daux num yam kwang simiang Yosiyax ka haktiex kao daix num tix num mai yuh pawie Pasakha in ka plak sivoe Siyiex ka daux veng Yerusaliem heue. ²⁴ Lheu khaing an Yosiyax teei ti tik pui ankix, pa chix simeed mai pa koe khwan singie khankix mai khawm riang grang pa krub pui khankix mai can ceu pa seeing brai khawmuik pa hoik yaox ka daux Yudax mai ka daux veng Yerusaliem, nawh hoik hawt yuh awm gumlox beenli pa tiiem ka daux phuk lai an, pa yaox cao giex kaing li Hilakhix ka daux nyiex bwan Siyiex heue. ²⁵ Phao voe nawh ang lai koe simiang pa awm nawh tix kaux kawx, pa deeh veeh ti ing ka Siyiex tau mai khawm rhawm tix mai khawm ju tix mai riang rao tix khawmuik, awm lox tat jhawm prawng Mose khawmuik, khaix nawh pui pa lih ti kaoh awm nawh ang lai koe tix kaux kawx heue. ²⁶ Viang yuh ka mawx kawx Siyiex ang nyang veeh tix khaing pa kied song rhawm Nawh Cao, tau mai pa song rhawm ka pui Yudax khankix kheu pa lud pa hoik yuh Manashe so rhawm Nawh Cao meet heue. ²⁷ Siyiex ah nin, "Aux tak tik vud ceu pui Yudax khaing plak sivoe ngai Aux awm hoik tik vud Aux ka ceu pui Isarelax khankix mai aux tak tik vud ka veng Yerusaliem in pa hoik laug Aux mai ka nyiex bwan pa hoik ah Aux tix sum ka min ceu kaux Aux tan heue." ²⁸ Yam in, grawng kaing pa deuk Yosiyax mai can ceu pa hoik yuh nawh khankix an mawh pa tiiem ti deuh ka daux phuk lai been cub simiang ceu pui Yudax khankix heue? ²⁹ Ka daux baux ju mawh Yosiyax simiang, Pharaw Nekhaw simiang haktiex Ejiptux haok puing simiang haktiex Asurix, tom hoek ka rawm klawng Upharat mai simiang Yosiyax hu sipub ka nawh mai Pharaw Nekhaw yaox ka Yosiyax mai pah nawh yum ka daux veng Megidaw heue. ³⁰ Kawncau nawh khankix teei ti sau tokaux yum nawh ka piang ling lawx naing brung lih hu khaing veng Megidaw mai viex hoek ka veng Yerusaliem mai sipaung nawh ka daux simeeig cao nawh heue. Pui haktiex khankix deeh teei Yohohaza kawn simex Yosiyax mai groi rawm bee ka piang nawh mai yaog nawh mawh simiang ka dah dee ot keeing nawh heue. ³¹ Yehohaza koe ju tixnga loe num yam mawh nawh simiang mai nawh kwang ka veng Yerusaliem loe khix heue. Ceu kaux miex nawh mawh Hamotalax kawn bun Yeramix pui veng Lebanax heue. ³² Nawh yuh pa caox caig ka daux ngai Siyiex awm pa hoik yuh tax du nawh heue. ³³ Pharaw Nekhaw giex ti sau nawh ka daux thawng veng Rebalax ka daux haktiex Hamat, sonsang ang nawh pon kwang ka daux veng Yerusaliem, mai nawh mhaing keen ka daux haktiex Yudax, ka mau tixyieh talantan mai khri tix talantan heue. ³⁴ Pharaw Nekhaw deeh yaog Eliyakim kawn simex Yosiyax mawh simiang ka dah dee ot keeing nawh Yosiyax mai deeh loh ceu kaux nawh mawh Yehoyakim mai Pharaw viex Yohohaza ing ka haktiex Ejiptux mai Yehohaza yum tan heue. ³⁵ Mawh kheu nan, Yehoyakim tawx mau mai khri ka Pharaw, viang mawh nan, nawh koh keen ka pui haktiex sonsang tawx mau awm gumlox pa tawm Pharaw, nawh khin ti koh mau mai khri khaing pui haktiex, ka pui ku kaux awm pa gwieh nawh ti mhaing sonsang pon tawx nawh ka Pharaw Nekhaw heue. ³⁶ Yehoyakim koe ju tixnga phwan num, yam mawh nawh simiang mai nawh kwang ka veng Yerusaliem kao tix num heue. Ceu kaux miex nawh mawh Zebudax, kawn bun Petayax khaing veng Ruma heue. ³⁷ Nawh yuh pa caox caig ka plak ngai Siyiex awm pa hoik yuh tax du nawh khankix heue.

¹ Ka daux baux yam kwang simiang Yehoyakim ka haktiex Nebukhaneza simiang haktiex Babulon hoek ti yuh naing mai Yehoyakim hoik kham ti mawh siliex nawh loe num, khaix an mai nawh deeh pon tieh feen ka nawh heue. ² Siyiex ploi cub kru naing ceu pui Khaladie, cub kru naing ceu pui Surix, cub kru naing ceu pui Mawbax mai cub kru naing ceu pui Amon khankix, hoek ti puing ka nawh, Nawh Cao hoik ploi kix hu puing ka haktiex Yudax sonsang yuh haktiex an laux leeing awm gumlox Siyiex pa hoik krai ka cao jhai kawncau Nawh Cao khankix heue. ³ Grawng pa lih ceu in ti hoek ka piang haktiex Yudax, mawh sonsang gah Siyiex ti tik kix khaing plak sivoe ngai Nawh Cao, kheu jao phimap pa hoik yuh Manashe khankix heue. ⁴ Mawh kheu jao pah nawh pui pa ang koe phimap mai nawh hoik kieh nham pa ang koe phimap naog ka daux veng Yerusaliem, ankix hoik mawh pa ang Siyiex pon pluat ploi ka heue. ⁵ Grawng kaing pa deuk Yehoyakim khankix mai can pa hoik yuh nawh khawmuik, an mawh pa tiiem ti deuh ka daux phuk lai been cub simiang haktiex Yudax khankix heue? ⁶ Mawh kheu nan, Yehoyakim hoik laux lee ti tau mai keeing nawh, khaix an, kawn simex nawh Yehonix hoik plud ti kwang ka dax dee ot nawh heue. ⁷ Simiang haktiex Ejiptux, ang lai lih khaing daux haktiex tix khaix in tix bawg kawx, grawh grawng nawh, simiang haktiex Babulon hoik rhim ti teei haktiex cie simiang Ejiptux jah khaing mee rawm klawng Ejiptux tom hoek ka rawm klawng Yufrethix khankix heue. ⁸ Yehoyakim hoik koe ju kao daix num, yam mawh nawh simiang mai nawh kwang ka daux veng Yerusaliem loe num heue. Ceu kaux miex nawh Nehushata kawn bun Elanatan khaing veng Yerusaliem heue. ⁹ Nawh yuh pa caox caig ka plak ngai Siyiex awm pa hoik yuh keeing nawh heue. ¹⁰ Daux bawg yam an, kawncau Nebukhaneza simiang haktiex Babulon hoek puing ka veng Yerusaliem mai lai lawm ka veng an heue. ¹¹ Nebukhaneza simiang haktiex Babulon hoek puing veng, daux bawg yam lai lawm kawncau nawh khankix ka veng heue. ¹² Khaix an, Yehoyakim simiang Yudax, miex nawh, kawncau nawh, kawn simex nawh mai cao kaing lum nawh khankix lih hu ka simiang haktiex Babulon, mai baux yam kwang simiang haktiex Babulon ka haktiex daix num tix num, simiang haktiex Babulon hoik viex nawh ing awm pa giex laung heue. ¹³ Nawh hoik teei ti viex sinngao ka daux nyiex bwan Siyiex mai sinngao daux nyiex haw simiang khankix mai nawh gaing ti tik kraung khri pa hoik yuh Sawlamon simiang ceu pui Isarelax ti deuh daux nyiex bwan Siyiex khawmuik, awm pa hoik krai Siyiex heue. ¹⁴ Nawh giex ti viex pui veng Yerusaliem khankix tau mai pui naing pa vao mai pa koe riang rao khawmuik tix mheen kaux mawh pui pa giex laung mai pui pa yuh kaing taix kaing caong mai pa yuh kaing mau kaing khri khankix heue. Lheu khaing pui hot shia daux haktiex an ang lai prah tix kaux kawx heue. ¹⁵ Nawh giex ti viex Yehonix, ing ka Babulon tau mai miex simiang, moeng simiang, cao kaing lum nawh mai khawm pui haktiex pa koe riang koe rao nawh giex ti viex kix mawh pui pa giex laung khaing veng Yerusaliem hoek ka Babulon heue. ¹⁶ Can pui pa koe riang rao khankix aliah rheng kaux mai pui pa yuh kaing taix mai kaing mau kaing khri khankix, tix rheng kaux mai can pui pa koe riang rao ti puing naing khawmuik, simiang Babulon rhim ti viex kix ing, mawh pui pa giex laung ka haktiex Babulon heue. ¹⁷ Khaix an, simiang Babulon yaog Matania pa mawh keeing iak Yehonix mawh simiang ka dah dee ot nawh mai loh ceu kaux nawh mawh Zedekiyax heue. ¹⁸ Zedekiyax koe ju tixnga tix num, yam mawh nawh simiang mai nawh kwang ka daux veng Yerusaliem kao tix num heue. Ceu kaux miex nawh mawh Hamutalax kawn bun Yeramix khaing veng Libanax heue. ¹⁹ Nawh yuh pa caox caig plak ngai Siyiex awm pa hoik yuh Yehoyakim khawmuik heue. ²⁰ Mawh kheu jao pa song rhawm Siyiex, in hoik lih ti mawh ka daux veng Yerusaliem mai ka haktiex Yudax, sonsang ghoik ti tik vud kix, lih khaing plak sivoe Nawh Cao heue. Khaix an, Zedekiyax yaog ti tieh feen ka simiang Babulon heue.

¹ Daux bawg yam kwang Zedekiyax ka haktiex dim num ka daux khix kao, kaongaix tix ngaix, ka daux khix an, Nebukhaneza simiang Babulon mai cub kru naing nawh khawmuik, hoek puing ka veng Yerusaliem mai lai lawm ka vung viang veng mai kaong ka guh veng heue. ² Mawh kheu nan, kix hoik lai lawm ka veng an tom hoek baux num kwang simiang Zedekiyax ka haktiex kaotix num tix num heue. ³ Yam hoek ka daux khix pon dim ngaix sibhawm praix pa kied lang teung, lih koe ka daux veng mai pa ih khankix ang lai koe ka son pui haktiex heue. ⁴ Khaix an, guh veng hoik bhieh mai pui naing khankix hoik to daux sawm an ka diang siviex sinax guh veng ra mu, ka plak sipeem simiang, mawh kheu pui Khaladie khankix lai lawm vung viang mai yuh veng laux heue. Simiang to lih ka plak daux lung heue. ⁵ Viang mawh nan, cub kru naing Khaladie khankix hawt khaix simiang, kix krup nawh ka daux lung Yerikho heue. Cub kru naing nawh khawmuik hoik prung prang khaing nawh heue. ⁶ Mawh kheu kix pon giex simiang mai viex nawh hoek ka simiang Babulon ka veng Ribalax mai kix prawng ca ka nawh heue. ⁷ Khaix an kix pah ka kawn simex Zedekiyax ka plak sivoe ngai nawh mai kix koik ka sok ngai Zedekiyax lih mai phyawk nawh ka maox tawng mai viex nawh ing ka veng Babulon heue. ⁸ Yam kwang simiang Nebukhaneza ka haktiex Babulon kao dim num, khix phwan, daux aliah ngaix tixngaix Nebuza Radan cao kaing pa pau simiang mai kawncau simiang haktiex Babulon hoek ka veng Yerusaliem heue. ⁹ Nawh hoik gleeing nyiex bwan Siyiex mai nyiex haw simiang can nyiex pa koe ka daux veng Yerusaliem, can nyiex pui ting khankix hoik gleeing ka ngu heue. ¹⁰ Cub kru naing ceu pui Khaladie pa ot mai cao kaing naing cao pa pau simiang yieh ti tik vung viang guh veng Yerusaliem khawmuik heue. ¹¹ Khaix an, Nebuzaradan cao kaing naing pa pau simiang giex ti viex pui pa kawn deuk pa ot daux veng khankix mai pui pa hoik tieh ti hu ka plak simiang Babulon tau mai can pui pa ghoik ti ot daux sinax pui hun khankix heue. ¹² Viang mawh nan, cao kaing naing pa pau simiang hoik prah pui hot shia tiblah, sonsang priex ka sipeem plix siiet mai yuh kaung heue. ¹³ Rong tawng pa koe daux nyiex bwan Siyiex khankix mai ling lawx mai rawm dung tawng khankix pa koe ka daux nyiex bwan Siyiex pui Khaladie hoik tawk lih shiag mawh shiag an mai kix don tawng khankix ing ka veng Babulon heue. ¹⁴ Kix teei aw tawng, sipeed mai sigiiep ngu mai lawktuh mai kraung tawng pa shiao cao giex kaing li ka daux kaing jhaw pa yuh tix heue. ¹⁵ Pan ngu mai pan ting khankix, pa hoik yuh ka khri nawnaw mai mau nawnaw, cao kaing naing pa pau simiang hoik rhim ti teei hu heue. ¹⁶ Rong tawng ra mu mai rawm dung tix mu mai ling lawx khankix pa hoik yuh simiang Sawlamon ti deuh son nyiex bwan Siyiex kraung shiao pa hoik yuh ka tawng khawmuik, mawh pa ang lai pon tiag ka heue. ¹⁷ Krax lhaong rong an tix mu koe kao daix sawk mai pa chup ka toh rong an yuh tix ka tawng heue. Krax lhaong jup toh rong tawng an koe loe sawk mai plah tawng pa awm ngai rub vung viang jup toh rong an mai khawm riang plix kla jang pa koe hawt vung viang jup toh rong khankix yuh ti ka tawng heue. Rong an tix mu kawx hoik yuh awm paox tix heue. ¹⁸ Cao kaing naing pa pau simiang hoik gieh ti viex Serayax pa mawh cao kaing ting cub cao giex kaing li mai Zephniyax pa mawh cao kaing cao giex kaing li ra kaux tix kaux mai cao pau siviex loe kaux tix kaux ing tau mai tix heue. ¹⁹ Nawh hoit giex ti viex cao kaing naing tix kaux pa mawh cao kwang ka piang pui naing khankix lih khaing daux veng mai khawm pui phwan kaux cao tawx rhawm keud ka simiang pa sipub nawh ka daux veng mai cao kaing pui tiiem lai cub kru naing cao kraix khrawm pui haktiex khankix mai pui hakiex tigliah kaux pa sipub nawh ka daux veng khankix heue. ²⁰ Mawh kheu Nebuzaradan cao kaing pa pau simiang rhim ti viex kix ing ka simiang Babulon ka veng Ribalax heue. ²¹ Khaix an simiang Babulon ciyang ka kix mai pah kix ka veng Ribalax ka daux haktiex Hamat heue. Mawh kheu nan, pui Yudax, hoik teei ti hu awm pui pa giex laung khaing daux haktiex cao kix heue. ²² Khaix an, simiang Nebukhaneza kieh Gedaliyax kawn simex Ahikam pa mawh kawn simex Shaphan mawh cao pa kwang ka piang pui pa kawn deuk ka daux haktiex Yudax khankix, pa prah Nebukhaneza simiang Babulon heue. ²³ Yam hoik mhong cub cao kaing kru naing khankix mai pui kix khawmuik, ka hoik yaog simiang Babulon ti kieh Gedaliyax mawh cao pa kwang haktiex, kix hoek ka Gedaliyax ka daux veng Mizapa, tau mai Ishamelax, kawn simex Netaniyax, Yohanan kawn simex Khareyax mai Serayax kawn simex Tanhumiet pa mawh ceu pui Netawphah mai Yazaniyax kawn simex ceu pui Makhatix tix kaux, kix mai pui kix khawmuik heue. ²⁴ Gedaliyax yuh pa tiextu ka plak sivoe kix mai ah nin ka kix, "Paw lhat graung ka kawncau pui Khaladie khankix heue. Ot ka daux haktiex in mai yuh kaing jhaw simiang Babulon mai an tak mawh pa mhawm ka son pex heue." ²⁵ Ka daux khix aliah Ishamelax kawn simex Netaniyax, pa mawh kawn simex Elishama khaing daux nyiex ma doeh simiang hoek tau mai pui kao kaux nawh pah ka Gedaliyax yum, khawm pui Yudax mai pui Khaladie khankix pa ot tau mai nawh ka daux veng Mizapa heue. ²⁶ Pui khawmuik khawm pui ting pui iak mai cub cao kaing kru naing khankix, yaog ti kaoh hu ka plak haktiex Ejiptux, kheu jao lhat kix ka pui Khaladie khankix heue. ²⁷ Khaix hoik luan num pa giex laung kix ka Yehonix simiang Yudax tixngoe aliah num, khix kao ra tixnga aliah ngaix, Ewix Merawdiet simiang Babulon, ka daux num jah nawh ti kwang ka haktiex, nawh deeh ploi Yehonix simiang Yudax, lih khaing daux thawng heue. ²⁸ Nawh sikah lox nyawm rhawm ka nawh mai tawx dee ngawm pa blon mhawm ka nawh khaing cub simiang khankix pa ot tau mai nawh ka daux veng Babulon heue. ²⁹ Mawh kheu nan, Yehonix hoik loh kraung ceep ot tix daux thawng mai nawh yaox ti ih priex preem ka plak sivoe simiang sijheeng glang singaix im ju nawh heue. ³⁰ Simiang hoik tawx pa ih ka son nawh ku singaix, glang singaix yam im ju nawh heue.