1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 Corinthians

1

1 Pawlux pa mawh kawncau pa ting Yesux Khrit kheu alo Siyiex mai puxaik ex Timose, tawx ka ceucao Siyiex pa koe ka daux veng Kawrinthux mai ka khawm pui pa singax khawmuik pa ot ka daux meung Akhayax kudah kudee heue. 2 Kieh pex koe bwanson mai pa nhim pa kaoh khaing Keeing ex Siyiex mai Simiang Yesux Khrit liak. 3 Kieh Siyiex pa mawh Keeing Simiang ex Yesux Khrit, pa mawh Keeing ceu pa caux rhawm mai Siyiex ceu pa nyawm rhawm khawmuik, koe bwanson liak. 4 Kaw pa kieh ex nyawm rhawm ka daux ceu pa kha rhawm ex khawmuik, yuh ka mawx son sang pon ex ti kieh kix pa koe krax kha rhawm kuceu nyawm rhawm kah, kheu krax nyawm rhawm pa hoik kieh Siyiex ex nyawm rhawm kah heue. 5 Grawh grawng nawh awm krax kham krax geu Cao Khrit hoik kied nie ka ex, awm an krax nyawm rhawm ex kawx, hoik kied nie kheu Cao Khrit heue. 6 Phan ex yaox ti kham krax kha rhawm, mawh sonsang nyawm rhawm pex mai krax taoh pex heue. Phan kieh ex nyawm rhawm, mawh sonsang nyawm rhawm pex, pa yuh ka daux krax pa chix gun yeung ti kieh pon kham ceu pa kham geu khankix, awm ex kawx yaox ti kham geu heue. 7 Krax keud pot jun pot ex ka son pex kaux cong kah, kheu tawng ex grawng awm mawh pex pa rom ti kham krax pa kham pa geu khankix, awm an pex kawx mawh pa rom ti pon krax nyawm rhawm heue. 8 Grawh grawng nawh, puxaik khankix eue, ang ex rhawm kieh pex mawh pa ang tawng ka grawng, krax pa kha rhawm pa hoik hoek ka piang ex ka daux meung Asix, pa mawh grawng pa raux yeen gut ex tiem, pa nie luan khaing sibrawm pa koe ex ti kham, tom hoik laux rhawm ex, pie grawng pa sang pon klawd ex kah heue. 9 Tokaux ex hoik koe pa prawng pa ciyang krax yum ka daux tokaux ex tiru, son ang ex sang een rhawm ka tokaux tix, viang mawh nan sonsang een rhawm ka Siyiex pa kieh pa yum deeh kaoh kah, 10 pa hoik taoh ex khaing krax yum pa ting ding dod mai pa tak sang baox deeh taoh ka pa mawh Kaw pa hoik deuh ex krax keud pot jun pot ex kah, grawng kawn ca sang taoh Nawh ka ex. 11 Viang pex kawx, mawh pa teem tau, kheu pa rawg pex bwan ka son ex heue. Kheu pui tom nie tak sang yaog yaw bwanson ka son ex, son totaix bwanson pa hoik tawx ka ex, kheu pui pa rawg bwan tom nie heue. 12 Grawh grawng nawh krax pa yaw rangdi ex mawh in, mawh pa mawh mhai rug pa kham dee chix keud chix tawng ex, grawng pa twah pa klaung ex ka daux haktiex mai pa nie lheu mawh pa twah pa klaung ka pex, mawh pa hoik yuh ka daux pa singax mai ka daux pa viex khawm rhawm tix awm pa khaw mai Siyiex mai grawng ang lai mawh pa yuh ka daux pingnya pa dex mai nex nham, viang mawh nan mawh ka daux bwanson Siyiex heue. 13 Grawh grawng nawh ang ex lai tiiem tang ceu ka pex, lheu khaing pa hoik phat pex mai khawm pa hoik rieb pex ti teei mai aux koe krax keud pot jun pot grawng pa sang rieb pex ti teei, tom to sidah, 14 Awm pa hoik dha pex ti rieb teei ex ceeix, ti mawh dee sang yaw rangdi pex kah, viang pex kawx awm mawh dee sang yaw rangdi ex, ka daux singaix Simiang ex Yesux heue. 15 Kheu hoik yum rhawm aux yuh nin, aux hoik bak ti sang hoek ka pex ka sivoe, sonsang pon pex bwanson ra bawg tix bawg heue. 16 Aux hoik bak ti sang hu plak pex mai phlat hu ka meung Makedonix mai baox yaog khaing meung Makedonix mai deeh hoek ka pex mai sonsang kieh pex hu tawx aux ka krax hu ka meung Yudax heue. 17 Mawh kheu nan yam keud aux nan, aux hoik koe rhawm pa keud jee keud blaong lie? Phan ang mawh nan ceu pa hoik bak aux ti sang yuh khankix, aux hoik bak ti sang yuh awm pa khaw mai nex nham, kheu hoik koe pa "Mawh heue, mawh heue," mai pa "ang mawh, ang mawh heue," mai aux lie? 18 Viang mawh nan awm pa kaux sijax Siyiex, gumlox pa krai ex ka pex ang lai mawh, "Mawh heue," mai "ang mawh heue." 19 Grawh grawng nawh, grawng Kawn Siyiex, pa mawh Yesux Khrit pa hoik sidiex ex ka pex, pa mawh aux mai Siluanux mai Timose, ang lai mawh, "Mawh heue," mai "Ang mawh heue," viang mawh nan, hoik mawh, "Mawh heue," ka daux Nawh Cao heue. 20 Grawh grawng nawh, can lox mukheu pa tawx Siyiex khawmuik mawh, "Mawh heue," ka daux Nawh Cao, mawh kheu nan ka daux Nawh Cao mawh khawm, "Amen," tom sang koe min plakngai Siyiex kheu ex heue. 21 Kaw pa hoik kieh ex rom tix kaux cong tau mai pex ka daux Cao Khrit mai pa hoik groi rawm bee ka ex, mawh Siyiex, 22 pa hoik tawk cum ka ex mai hoik tawx gawng pa dex mai Khuan Cao ka daux rhawm rhi ex heue. 23 Aux kok Siyiex son sang mawh cao pa kham mhai rug ka ju aux, grawng pa ang aux nyang bax hoek ka veng Kawrinthux, hoik mawh son sang deuh bawg yam ka pex heue. 24 Pa ah nan, ang lai mawh kheu ting ex ka piang krax yum rhawm pex, ex mawh ngie pa teem ka krax gaux rhawm pex, grawh grawng nawh pa cung pex tom kaux, hoik mawh kheu krax yum rhawm pex heue.

2

1 Aux hoik yiag yuh nin ka son tokaux tix, son ang aux lai baox deeh yaox ti hoek ka pex ka daux krax khi glawh heue. 2 Grawh grawng nawh phan aux kieh pex khi rhawm kah, lheu khaing kaw pa hoik kieh aux nawh khi kah, mawh kaw pa yuh ka mawx pa sang kieh aux gaux rhawm kah lie? 3 Kheu koe krax yum rhawm aux grawng krax gaux rhawm aux, hoik mawh nang krax gaux rhawm pex khawmuik, aux tom hoik tiiem lai ceu in, phan ang mawh nan yam hoek aux ka pex, ha kix pa khaw ti kieh aux gaux rhawm kox kieh aux khi rhawm kah heue. 4 Grawh grawng nawh pa tiiem aux lai ka pex, hoik mawh ka daux pa kied kha rhawm mai ka daux pa tug rhawm rhi mai ka khawm pa roik rawm ngai tix, ang lai mawh sonsang kieh pex khi rhawm kah, hoik tiiem sonsang tawng pex ka krax moh, pa kied lang teung moh aux ka pex heue. 5 Phan pui tix kaux kaux hoik kieh koe krax khi rhawm, nawh hoik kieh aux khi rhawm kah ang mawh, kieh pex kub khi rhawm ka khawmuik heue. 6 Pa hoik ciyang pui tom nie ka kaw pa yuh nan hoik kub heue. 7 Mawh kheu nan pex nie lheu khaw ti pluat ploi phimap nawh mai kieh nawh nyawm rhawm kah, phan ang mawh nan ha ceu pa cha nie khi rhawm nawh kox bleet ka pui pa yuh nan heue. 8 Mawh kheu nan aux tom khyox khaw ka pex, son sang baox deeh moh pex ka nawh heue. 9 Grawh grawng nawh aux hoik tiiem lai son sang sidah mawh nin, yuh ka mawx sonsang pon aux ti tawng grawng pa cheu ti yaox ka pex, grawng krax cu nghiet pex ka kuceu khawmuik koe nieh, ang koe nieh. 10 Pex pluat ploi phimap tix ceu ceu ka pui mawx ang ah aux kawx pluat ploi kah heue. Grawh grawng nawh pie aux, pa hoik pluat ploi aux, phan aux hoik pluat ploi tix ceu ceu, hoik mawh son pex ka plak sivoe Cao Khrit. 11 Kheu son ang Satan sang pon ti pex ex sipie, grawh grawng nawh ex ang mawh pa ang tawng ka jhawm ceu pa yuh nawh heue. 12 Yam hoek aux ka veng Troax ka son lox bwan gaux rhawm Cao Khrit mai yam hoik paoh siviex ka aux ka daux Simiang, 13 Aux ang koe krax nyawm rhawm ceeix kawx, kheu ang aux yaox pux aux Titux, aux tom ah lox gwieh ka kix mai hu ka daux meung Makedonix heue. 14 Yaog yaw ka bwanson Siyiex, pa thong ex ka daux pa pex, ka daux Cao Khrit ku jheeng jheeng mai kieh sidawng grawng mawh ex ceu pa sioe baux krax tawng ka Nawh Cao kudah kudee heue. 15 Ex mawh ceu pa sioe baux cie Cao Khrit ka Siyiex, ka daux kix pa hoek krax taoh mai ka daux kix pa hoek krax laux leeing heue. 16 Ka kix pa hoek krax laux leeing mawh ceu pa sioe baux krax yum tom hoek krax yum heue. Ka kix pa hoek krax taoh mawh ceu pa sioe baux, krax im ju tom hoek krax im ju heue. Mawh mawx pa dak pon yuh ceu in khankix? 17 Ex ang lai awm ka pui tom nie, pa nieb lak baox, lak teei lih khaing gumlox Siyiex, ex viex khawm rhawm tix sidiex ka daux Cao Khrit, awm pa khaw mai Siyiex, ka plak sivoe Siyiex heue.

3

1 Ex baox deeh jah ti yaw ka tokaux tix lie? Phan ang mawh nan ex lo lai pa yaw pui ka ex, ti tawx ka pex, phan ang mawh nan khaing pex lie? 2 Pex mawh lai ex, pa hoik tiiem ka daux rhawm rhi ex, pa tawng mai pa phat pui khawmuik kah heue. 3 Tokaux pex sidawng mawh lai Cao Khrit pa hoik yuh ex, ang lai mawh pa hoik tiiem ka rawm nam meug, viang mawh nan mawh pa hoik tiiem ka Khuan Siyiex pa im ju heue. Ang lai mawh pa hoik tiiem ka khlawp simaox khankix, viang mawh nan mawh pa hoik tiiem ka daux khlawp rhawm rhi nex heue. 4 Ex koe krax yum rhawm yuh nin, kheu Cao Khrit ka plak Siyiex heue. 5 Ang lai mawh kheu kub sibrawm ex ti pon yuh ka tokaux tix, ti sang keud tix ceu ceu mawh pa mawh khaing tokaux tix, viang mawh nan pa to pon ex ti yuh mawh khaing Siyiex. 6 Kaw pa hoik kieh ex kub sibrawm ti pon yuh pui cau pui soi ka sijax mukheu pa khraox heue. Ang lai mawh ka pa dex mai lox ngai lai beenli, viang mawh nan mawh pa dex mai Khuan, grawh grawng nawh, lox ngai lai beenli mawh pa chix teei yum, Khuan mawh pa chix tawx pa im heue. 7 Phan lox been krax yum pa hoik tiiem hoik saik ka simaox, hoik hoek tau mai min plakngai, tom ang pui Isarelax pon jawg ti jhak ka pakngai Mose, kheu min plakngai pa jhan khaing pakngai nawh, pa mawh min plakngai pa chix grai grhup. 8 Lox been pa dex mai Khuan, tak ang nie lheu tawx tau mai min plakngai yuh ka mawx? 9 Grawh grawng nawh phan lox been pa dex mai pa prawng pa ciyang phimap hoik koe min plakngai, lox been pa dex mai pa rahsee tak sang kied nie lheu koe min plakngai heue. 10 Pa hoik kieh koe min plakngai phao ka, hoik kieh ti ang koe min plakngai, kheu min plakngai pa nie lheu ting an heue. 11 Grawh grawng nawh phan ceu pa chix grai grup an, hoik hoek tau mai min plakngai, ceu pa kawn ca koe an mawh pa nie lheu koe min plakngai heue. 12 Mawh kheu nan, kheu koe ex krax keud pot jun pot yuh nan, ex tom shiao lox pa sidawng, 13 ang awm Mose pa hoik tawb pakngai tix ka man tawb, son ang kawn praix Isarelax khankix sang pon jawg ti jhak ka dee sidah dee ghoik ceu pa grai grhup hu, 14 viang mawh nan rhawm kix hoik kiien, grawh grawng nawh sidah tom hoek singaix yam in yam phat ka lox sijax mukheu pa prim, man tawb an kawn ca koe, mawh kheu ang nyang plak jhi kix yaox, grawng pa sang teei ti tik man tawb an mawh ka daux Cao Khrit heue. 15 Tom hoek singaix yam in kawx, yam phat lai Mose lai mawx ang ah, man tawb hoik tawb ka rhawm rhi kix heue. 16 Yam deeh veeh pui tix ka plak Simiang lai mawx ang ah, teei ti tik man tawb an khaing heue. 17 Simiang kienie, mawh Khuan heue. Dee ot Khuan Simiang koe ceu pa ploi luan heue. 18 Can ex khawmuik pa hoik bhang tix ang tawb pakngai, mawh pa deeh jhan gaih min plakngai Simiang awm siliak mai ca tieh loh ex ti awm riang grang Nawh Cao, khaing min plakngai ka min plakngai, awm pa kaoh khaing Simiang, pa mawh Khuan heue.

4

1 Mawh kheu nan, kheu koe ex kaing cau kaing soi in, awm pa hoik pon ex krax caux rhawm, ex ang lai khrup rhawm kah heue. 2 Ex hoik tik ka ceu pa kaig pa tua pa mox khankix mai ang hu ka daux ceu pa lak keud ti yuh cuyi, viang ka gumlox bwan Siyiex kawx ang nieb muan ti pie lhen kah, viang mawh nan kheu plak jhi pa mawh meh sidawng, ex yuh ti kieh tokaux ex caw rhawm ka dee chix keud chix tawng pui ku kaux ka plak sivoe Siyiex heue. 3 Phan hoik tawb ka lox bwan gaux rhawm ex ka man tawb, hoik tawb ka daux kix pa hoek krax laux leeing khankix heue. 4 Ka daux kix pa ang yum rhawm khankix siyiex haktiex in hoik kieh rhawm dee chix tawng kix dug kah, son ang pa riang lox bwan gaux rhawm min plakngai Cao Khrit, pa mawh riang grang Siyiex, sang jhan ka piang kix heue. 5 Grawh grawng nawh pa sidiex ex ang lai mawh grawng tokaux tix, mawh grawng mawh Yesux Khrit Simiang mai grawng mawh ex siliex pex, ka son Yesux heue. 6 Grawh grawng nawh Siyiex pa hoik ah, "Kieh pa riang lih jhan khaing daux pa faik," hoik jhan riang ka daux rhawm rhi ex, son sang tawx pa riang krax tawng ka min plakngai Siyiex, ka daux pakngai Yesux Khrit heue. 7 Ex koe sinngao in ka daux aw tiex, son siawp sibrawm pa kied ting sigrien sigre an, tak sang mawh cie Siyiex mai ang mawh pa kaoh khaing tokaux ex heue. 8 Viang hoik yeen ka ex ku plak kawx, ang ot hoek krax kha rhawm. Viang keud ang doh kawx, ang ot hoek krax laux rhawm lauxrhi. 9 Viang tuktiak kawx, ang lai tik lai grham. Viang lah bang lia kawx, ang lai hoek krax laux leeing heue. 10 Ex ca dai ti viex ka ceu pa teei Yesux yum ka daux tokaux tix jheeng jheeng, son sang sidawng khawm ceu pa im Yesux ka daux tokaux ex heue. 11 Grawh grawng nawh hoik tawx pong ex pa im khankix ka krax yum ku jheeng jheeng son Yesux, son sang sidawng khawm ceu pa im Yesux ka daux nex pa chix yum ex heue. 12 Mawh kheu nan krax yum ca yuh kaing ka daux ex, viang mawh nan yuh pa im ju ka daux pex heue. 13 Kheu koe rhawm pa yum rhawm awm pa khaw mai pa hoik tiiem ti deuh ah nin, "Mawh kheu yum rhawm aux, aux tom hoik krai heue," mawh kheu ex kawx yum rhawm, ex tom krai heue. 14 Mawh kheu hoik tawng grawng Kaw pa hoik kieh Simiang Yesux deeh kaoh, tak sang kieh khawm ex deeh kaoh tau mai Yesux, tak sang teei ti tawx ex tau mai pex heue. 15 Grawh grawng nawh ku ceu khawmuik hoik mawh son pex, son sang nie haoh nie teen bwanson, mawh kheu pui nie lheu yaogyaw bwanson, tom nie lheu kieh min plakngai Siyiex koe kah heue. 16 Mawh kheu nan ex tom ang lai khrup rhawm kah, Viang pui plak praix cie ex ca rau ti laux hu kawx, pui plak daux cie ex baox cox ti khraox tix ngaix hoik tix ngaix heue. 17 Grawh grawng nawh krax kha rhawm pa chaong cie ex, pa mawh ti vud ti cu khaing, yuh son sang kieh ex nie lheu ting koe sinyek sinyek ka min plakngai pa cien leeing ju heue. 18 Ang ex jhak ka ceu pa chix yaox tix khankix, jhak ka ceu pa ang tix chix yaox khankix, grawh grawng nawh ceu pa chix yaox khankix mawh pa chix laux leeing, ceu pa ang chix yaox khankix mawh pa kaux pa koe leeing ju heue.

5

1 Grawh grawng nawh ex hoik tawng phan yieh laux ka nyiex gox ex pa mawh nyiex pa dex mai haktiex, ex koe nyiex pa yuh Siyiex, pa mawh nyiex pa ang yuh ka taix, pa kaux pa koe leeing ju ka daux meung raoma heue. 2 Yam kawn ot ka daux nyiex gox in, ex ngia mai mie ti ceep ka dee sang ot cie ex ka meung raoma. 3 Phan yaox ti ceep kraung yuh nan, tak ang yaox ex mawh pa kakaong heue. 4 Grawh grawng nawh kheu klawm ex kraung cien, ex pa kawn ot ka daux nyiex gox in ngia tete heue, ang lai mawh kheu mie ex ti peeik kraung ceep tokaux tix, mawh kheu mie ex ti baox kieh ceep kraung kah, son sang bleet ceu pa im ka ceu pa chix yum uik heue. 5 Kaw pa hoik yuh hoik cox ex ka son ceu in mawh Siyiex, pa hoik tawx gawng pa dex mai Khuan Cao ka ex heue. 6 Ex tawng grawng yam kawn ot ka daux tokaux tix, ex tang ot khaing Simiang, mawh kheu nan ex tom koe rhawm kwa ku jheeng jheeng heue. 7 Grawh grawng nawh ex hu kheu krax yum rhawm mai ang mawh kheu pa chix yaox heue. 8 Mawh kheu nie lheu koe rhawm ex ti sang tang ot khaing tokaux tix mai ti sang ot tau mai Simiang, aux tom ah, "Ex koe rhawm kwa heue." 9 Mawh kheu nan ex tom hoik een rhawm tix, ti sang yuh ceu pa khaw caw rhawm Nawh Cao, viang ex yaox ti ot ang ah, tang ot ang ah heue. 10 Grawh grawng nawh tak sang kieh ex khawmuik sidawng ka sivoe dee ngawm ti prawng ca cie Cao Khrit, son sang pon kaux pui mawx pui an, ka ceu pa hoik yuh tix ka daux tokaux, awm pa khaw mai pa hoik yuh nawh, pa mhawm ang ah, pa caox ang ah heue. 11 Mawh kheu tawng ex ka krax lhat graung pa dex mai Simiang, ex tom jeeh nyaw ka kawn pui khankix mai hoik sidawng ex ka Siyiex heue. Aux keud pot jun pot son sang sidawng ex kah, khawm ka daux dee chix keud chix tawng pex heue. 12 Ex baox deeh yaw tokaux tix ka pex ang mawh, viang mawh nan ex tawx jao dee sang pon pex ti yaw rangdi ka ex, sonsang koe ceu pa pawk pex ka kix pa yaw rangdi ngie ka ceu pa chix yaox mai ang yaw rang di ka pa koe ka daux rhawm heue. 13 Grawh grawng nawh, phan ex mawh pui yhot kawx, hoik mawh ka son Siyiex, phan ex mawh pui pa ang yhot kawx, hoik mawh ka son pex heue. 14 Grawh grawng nawh krax moh Cao Khrit pex ka ex, mawh kheu hoik deuh rhawm ex grawng phan tix Kaux hoik yum ka son pui khawmuik, pui khawmuik kawx hoik yum kheu an, 15 Nawh Cao hoik yum son khawmuik, kix pa im tak ang lai baox im ka tokaux tix tiru, son sang im ka Nawh Cao pa hoik yum son kix mai pa hoik deeh kaoh im heue. 16 Jah tom yam in, ex ang lai tawng ka pui tix kaux kawx hawt nex nham, viang ex hoik tawng ka Cao Khrit hawt nex nham kawx, yam in ex ang lai baox tawng ka Nawh Cao yuh nan heue. 17 Phan pui tix kaux kaux ot ka daux Cao Khrit, nawh mawh ceu pa khraox heue. Ceu pa prim khankix hoik grai hoik grup hu mai jhak heue, ceu an kix hoik lih mawh pa khraox heue. 18 Ku ceu khawmuik hoik mawh kheu Siyiex, Kaw pa hoik kieh ex deeh khaw caw paox tix ka tokaux Nawh, kheu Cao Khrit mai hoik tawx ex kaing pa sidiex grawng ceu pa deeh khaw caw paox tix an ka ex heue. 19 Pa mawh grawng pa hoik ot Siyiex ka daux Cao Khrit, ti kieh pui haktiex deeh khaw caw paox tix ka tokaux Nawh Cao mai pa ang Nawh sawn ti deuh phimap kix ka kix mai grawng pa hoik tawx hoik pong gumlox bwan grawng deeh khaw caw paox tix an ka ex heue. 20 Mawh kheu nan ex tom mawh pui pa yuh tang, ka son Cao Khrit heue. Mawh awm hoik teei Siyiex ti kieh ex jeeh nyaw ka pex heue. Ex khyox khaw ka pex tang Cao Khrit, son sang kieh pex deeh khaw caw paox tix ka Siyiex heue. 21 Siyiex hoik kieh Kaw pa ang tawng phimap, mawh phimap ka son ex, son sang lih mawh ex pa rahsee Siyiex ka daux Nawh heue.

6

1 Kheu rom ti yuh kaing tau mai Nawh Cao, ex tom khyox khaw ka pex, son pa rieb pex ti teei bwanson Siyiex tak ang lai mawh pa giex going. 2 Grawh grawng nawh, Nawh Cao hoik ah nin, "Daux bawg yam pa khaw caw Aux hoik nghiet ka maix, ka daux singaix pa taoh, hoik teem ka maix." Jhak heue, yam in mawh bawg yam pa khaw caw heue; jhak heue, yam in mawh singaix pa taoh heue. 3 Son ang koe jao dee sideeing ka daux tix ceu kawx, son ang lai koe dee deuh phimap ka kaing cau ex. 4 Daux kuceu khawmuik ex kieh sidawng grawng mawh tokaux ex pui cau Siyiex, ka daux pa gun yeung tom nie, ka daux pa tug pa kha, ka daux pa hot sia, ka daux pa kha rhawm. 5 Ka daux pa sivied, ka daux pa laung daux thawng, ka daux pa lawh maw, ka daux kaing pa nyhap mao, ka daux pa pau khawm ang yaox ti it, ka daux pa siya tix, 6 ka daux pa singax, ka daux krax tawng, ka daux pa lang gun yeung, ka daux pa mhawm rhawm, ka daux Khuan Singax Singeh, ka daux krax moh tete, 7 ka daux gumlox pa mawh meh, ka daux siawp sibrawm Siyiex, kheu kraung naing pa rahsee ka taix plak khawn dawm mai ka plak khawn gwiex, 8 kheu min plakngai mai pa ang koe min plakngai, kheu pa map kah, pa yaw kah, awm pui pie lhen mai mawh pa mawh meh, 9 Awm pa ang tawng kawx, mawh pa tawng mhawm mhawm, awm pa dex yum kawx, jhak heue; ex im heue, awm pa kham ceu pa pheuk pa ciyang sidiex kawx, ang lai teei yum, 10 Awm pa khi rhawm kawx, mawh pa gaux rhawm jheeng jheeng, awm pa hot sia kawx, mawh pa kieh pui tom nie mi koe kah, awm pa ang lai koe tidtix kawx, mawh pa koe ku ceu khawmuik heue. 11 Pui Kawrinthux khankix eue, jheeh ex hoik ang tix ka son pex, rhawm ex kawx hoik ting vieh kah heue. 12 Pex ang lai sikhiep sikhawp ka daux ex, viang mawh nan pex hoik sikhiep sikhawp ka daux krax moh pex khaing heue. 13 Aux sikah ka pex awm ka kawn praix tix, rhawm pex kawx kieh ting vieh kah heue. 14 Paw rom tix sau iak tau mai pui pa ang yum rhawm khankix, grawh grawng nawh ceu pa rahsee chix yuh paox pie ka pa lheu lox been yuh ka mawx? Phan ang mawh nan pa riang chix yuh paox pie ka pa faik yuh ka mawx? 15 Cao Khrit mai Belialax chix khaw ka paox tix yuh ka mawx? Phan ang mawh nan pui pa yum rhawm mai pui pa ang yum rhawm chix dex mai paox tix yuh ka mawx? 16 Nyiex bwan Siyiex mai riang grang chix khaw paox tix yuh ka mawx? Grawh grawng nawh ex mawh nyiex bwan Siyiex pa im ju, awm pa khaw mai pa hoik ah Siyiex yuh nin, "Aux tak ot ka daux kix mai hu ka daux kix mai Aux tak mawh Siyiex kix mai kix tak mawh pui cie Aux heue." 17 Mawh kheu nan, Simiang baox ah nin, "Pex lih hoek khaing ka daux kix mai tang tiah tix awx. Paw vi teeh ka ceu pa ang singax mai Aux tak rieb ti teei ka pex heue. 18 Aux tak mawh Keeing ka pex mai pex tak mawh kawn simex kawn bun ka Aux, Simiang pa ting Pa Koe Sibrawm Piang Khawmuik ah nan heue."

7

1 Pui pa moh aux khankix eue, kheu koe lox mukheu inkix, kieh ex kieh tokaux tix singax khaing ceu pa seeing brai khawmuik pa dex mai nex mai khuan mai kieh grum ka pa singax ka daux pa lhat graung ka Siyiex heue. 2 Yuh ti kieh dee ot ex koe ka daux rhawm pex, ex ang lai phit ka pui tix kaux kawx, ex ang lai yuh pui laux tix kaux kawx, ex ang nieb pie ti teei kraung khaing pui tix kaux kawx heue. 3 Pa ah aux nin, ang lai mawh sonsang deuh phimap ka pex, grawh grawng nawh glang ka in kawx aux hoik krai, ka grawng ot pex ka daux rhawm rhi ex, son sang yum tau mai im tau heue. 4 Aux kied ting kwa lox ka plak pex, krax yaw rangdi aux kied ting kheu pex, aux naog ka krax nyawm rhawm, ka daux krax tug kha ex khawmuik, krax gaux rhawm aux uik kreh heue. 5 Grawh grawng nawh, pie yam hoek ex ka daux meung Makedonix kawx, tokaux nex ex ang koe dee nghie rhawm ceeix kawx, ex yaox krax tug kha ku plak heue. Plak praix koe krax naing krax silah paox tix, plak daux koe krax lhat graung heue. 6 Kaw pa kieh pui pa tiem rhawm nyawm rhawm, pa mawh Siyiex, hoik kieh ex nyawm rhawm kheu pa hoek Titux heue. 7 Ang joeng mawh ngie kheu hoek nawh khaing, mawh kheu khawm krax nyawm rhawm pa hoik pon nawh tix nyawm rhawm kheu pex. Grawh grawng nawh, nawh krai ka ex grawng pa ca byaong pex mai grawng pa khi rhawm pex mai grawng pa viex pex khawm rhawm tix ka son aux, mawh kheu nan aux tom nie lheu gaux rhawm kheu heue. 8 Grawh grawng nawh viang aux hoik kieh pex khi rhawm kheu lai aux kawx, ang aux lai khi kah Viang aux hoik khi ka yam yaox aux grawh grawng lai an hoik kieh pex koe krax khi rhawm tivud ticu heue. 9 Pa gaux rhawm aux yam in, ang lai mawh kheu hoik kieh pex khi rhawm kah, mawh kheu pa hoik kieh pex khi rhawm an hoik kieh pex doh keud ka phimap heue. Grawh grawng nawh hoik kieh pex khi rhawm awm pa khaw ka Siyiex, son ang pex sang pon dee laux kheu ex ceeix kawx heue. 10 Krax khi rhawm pa khaw ka Siyiex, yuh ti kieh doh keud ka phimap tom pon krax taoh mai ang mawh dee tak khi ka heue. Krax khi rhawm pa dex mai haktiex, mawh pa yuh ti kieh yum heue. 11 Jhak heue; ceu in pa mawh pa kieh khi rhawm awm pa khaw ka Siyiex, hoik kieh pex koe rhawm pa nied ti coca pa yuh ka mawx, mawh heue; hoik kieh tiebtie phimap yuh ka mawx, mawh heue; hoik kieh saux rhawm yuh ka mawx, mawh heue; hoik kieh koe krax lhat graung yuh ka mawx, mawh heue; hoik kieh byaong yuh ka mawx, mawh heue; hoik kieh viex khawm rhawm tix yuh, mawh heue; hoik kieh pawk bix heue. Ka daux kuceu khawmuik pex hoik kieh sidawng grawng pa singax pex ka daux grawng an heue. 12 Viang aux hoik tiiem lai ka pex kawx, ang lai tiiem son kaw pa hoik lud an, viang son kaw pa hoik yaox ti kham pa lud kawx ang lai mawh, hoik mawh sonsang sidawng ceu pa nied pex ti keud son ex, ka tokaux pex, ka plak sivoe Siyiex heue. 13 Ex hoik koe krax nyawm rhawm kah mai ka krax nyawm rhawm ex an baox nie lheu koe krax gaux rhawm, kheu krax gaux rhawm Titux, mawh kheu pex khawmuik hoik kieh rhawm nawh deeh haing deeh nghie heue. 14 Phan aux hoik yaw ka grawng pex ka nawh tix ceu ceu, ang lai kieh aux kaig tua kah, awm ceu pa hoik krai ex ka pex khawmuik mawh pa mawh pa meh, viang pa hoik yaw ex pex ka sivoe Titux kawx, hoik sidawng grawng mawh pa mawh meh heue. 15 Nawh nie lheu koe krax moh krax rhawm ka pex, yam doh keud nawh ka krax pa chix cu nghiet pex khawmuik mai grawh grawng pa hoik rieb pex nawh ka daux pa lhat pa siyaung heue. 16 Aux gaux rhawm kheu pon aux ti yum rhawm ka pex ka daux ku ceu heue.

8

1 Lheu khaing an, puxaik khankix eue, ex kieh pex tawng grawng bwanson Siyiex pa hoik tawx ka daux ceu cao meung Makedonix khankix. 2 Viang cheu ti yaox kix ka krax tug krax kha tom nie, kix kied ting gaux rhawm mai ceu pa kied hot sibhawm kix, nie lheu kieh ceu pa sibieh kix mi koe heue. 3 Aux kham mhai rug grawng ang joeng mawh awm pa chix kix, pie pa lheu khaing pa chix kix kawx, kix lak tawx heue. 4 Kix teei lox jeeh nyaw tom nie mai khyox khaw ka ex son sang kieh kix rom ti yuh paox teem ka bwanson in mai kaing pa teem ka pui pa singax khankix heue. 5 Pa yuh nan, ang lai mawh awm pa keud pot jun pot ex, kix teei ti tawx tokaux tix ka Simiang mai ka ex phao ka, awm pa khaw mai alo Siyiex heue. 6 Ex tom khyox khaw ka Titux, yuh ka mawx son sang yuh nawh kaing bwanson in ka daux pex tom hoik sidah, mawh kheu hoik jah nawh ti yuh phao ka heue. 7 Awm pa pre pex ka ku ceu, ka daux krax yum rhawm mai ka daux pa sikah mai ka daux krax tawng mai ka daux pa chix viex rhawm tix yuh khawmuik mai ka daux krax moh pex ka ex, viang ka daux khawm bwanson in kawx yuh tix kieh pre kah awx. 8 Pa ah aux nin ang mawh lox tawm pa nhie pex yuh, aux teei grawng pa viex pui tang kaux khawm rhawm tix yuh mai cheu ti yaox grawng krax moh krax rhawm pex mawh pa mawh meh nieh, ang mawh nieh. 9 Grawh grawng nawh pex tawng grawng bwanson Simiang ex Yesux Khrit, grawng hoik mawh Nawh pa mi pa koe kawx, Nawh Cao hoik lih mawh pa hot pa sibhawm, sonsang lih mawh pex pa mi pa koe, kheu pa hot pa sibhawm Nawh Cao heue. 10 Aux krai ceu pa keud pa sawn aux ka pex grawng ceu in, grawh grawng nawh in mawh pa mhawm son pex, pa ang joeng mawh ngie pa liang ti jah yuh, khawm pa mie ti yuh, tom num pa luan heue. 11 Yam in yuh pa yuh pex tom hoik sidah, awm pa hoik koe rhawm pa mie pex ti yuh, sonsang koe khawm pa hoik yuh tom sidah, awm pa chix tix heue. 12 Grawh grawng nawh phan koe rhawm ti yuh, pa tan an mawh ceu pa khaw rhawm pa rieb ti teei kah, mawh awm pa khaw mai pa koe pui mai ang lai mawh awm pa khaw mai pa ang koe nawh heue. 13 Pa ah aux nin ang lai mawh son sang kieh pui tang kaux nghie rhawm mai kieh pex khi rhawm kah, 14 Mawh kheu grawng pa kieh sidu koe, son pa lheu pex yam in sang mawh pa thiien thie ka pa cud kix, son pa lheu kix kawx, tak sang mawh pa thiien thie ka pa cud pex, son sang koe ceu pa sidu heue. 15 Awm pa hoik tiiem ti deuh ah nin, "Kaw pa hoik pon tom nie ang lai lheu mai kaw pa hoik pon ceeix ngie ang lai cud kah heue." 16 Yaogyaw bwanson Siyiex, pa hoik kieh Titux koe rhawm pa sang nied ti yuh son pex, awm pa koe aux heue. 17 Nawh hoik rieb ti teei lox pa khyox khaw ex kah, kheu tokaux nawh koe rhawm pa sang nied ti yuh, nawh tom hoik tang hu ka pex awm pa khaw mai alo tix heue. 18 Ex ploi puxaik an hu tau mai nawh, ka ceu pa yaw ka nawh ka daux lox bwan gaux rhawm hoik tah ka ceu cao khawmuik heue. 19 Ang joeng mawh ngie nan, pa mawh kaw pa hoik laug ti ciak ceu cao ti sang hu mai ex, ka grawng pa dex mai bwanson pa tan in, pa hoik teei ex ti yuh son sang koe min plakngai Simiang kah mai son sang plak jhi pa koe rhawm ex ti yuh heue. 20 ex rien rhawm tix son ang lai sang koe dee deuh pui phimap kah, ka grawng pa tan pa nie in, pa hoik kieh ex kia ngien kah. 21 Grawh grawng nawh ex keud ka grawh grawng ceu pa khaw ka plak sivoe ngai Simiang khaing ang lai mawh, ex keud ka grawng khawm pa khaw plak sivoe ngai kawn pui heue. 22 Ex ploi puxaik ex tang kaux hu mai kiex, pa hoik cheu ex ti yaox ka daux tom nie ceu, tom nie bawg mai tawng grawng pa chix viex nawh khawm rhawm tix yuh heue. Phan mawh yam in nawh nie lheu viex khawm rhawm tix, ti nied yuh, kheu kied yum rhawm nawh ka pex heue. 23 Phan pui tix kaux kaux chawk ka grawng Titux, nawh mawh paox grawm aux mai paox pa rom ti yuh kaing tau mai aux ka plak pex, phan ang mawh nan phan chawk ka grawng puxaik ex an kiex, kiex mawh pui cau pui soi ceu cao khankix mai min plakngai Cao Khrit heue. 24 Mawh kheu nan pex jhi mhai rug grawng krax moh pex mai ceu pa yaw rangdi ex ka pex, ka kix plak sivoe ngai ceu cao khankix awx.

9

1 Phan mawh grawng pa dex mai kaing teem ka pui singax khankix, ang aux shiao lai tiiem ka pex, 2 grawh grawng nawh aux tawng grawng pa koe rhawm pex ti sang yuh, pa yaw rangdi aux ka grawng pex ka pui meung Makedonix khankix, grawh grawng meung Akhayax hoik dawg cox rien tix been tix num pa hoik luan mai ceu pa viex pex khawm rhawm tix yuh an hoik so kaoh ka rhawm kix tom nie heue. 3 Aux hoik ploi puxaik khankix hu, son ang pa yaw rangdi ex ka pex tak mawh pa giex going ka grawng in mai sonsang cox rien pex awm pa hoik krai aux heue. 4 Phan pui meung Makedonix tix blah hoek tau mai aux mai yaox pa ang pex cox rien tix, pie ex kawx tak sang hoek krax kaig tua, ka pa yum rhawm grawng ceu in heue. 5 Mawh kheu nan aux tom yiag grawng tak lai khyox khaw ka puxaik khankix, son sang grux hu kix ka pex sivoe mai son sang grux dha cox, pa tan pa hoik tawx pex lox mukheu kah, yuh ka mawx son sang tak mawh an pa tan pa hoik cox khre mai son ang sang mawh pa khin ti kieh tan heue. 6 Phan mawh grawng in, kaw pa rhuat ngie ceeix ceeix khaing, tak sang yaox ti vawg ngie ceeix ceeix heue. Kaw pa rhuat tom nie, tak sang yaox ti vawg tom nie heue. 7 Kieh kaux pui mawx kaux pui an yuh awm pa keud nawh ti sang yuh ka daux rhawm tix, ang lai mawh ka daux pa lhawk ti tawx, phan ang mawh nan ka daux pa khin ti kieh tawx, grawh grawng nawh Siyiex moh ka kaw pa gaux rhawm ti tawx heue. 8 Siyiex chix kieh bwanson khawmuik pre ka pex, sonsang grum kub pex ka ku ceu mai son sang pre ka krax twah krax klaung pa mhawm ku ceu, 9 Awm hoik tiiem ti deuh ah nin, "Nawh hoik roi ka kudah kudee, nawh hoik tawx ka pui hot pui sibhawm. Pa rahsee nawh ca ot koe leeing ju heue." 10 Kaw pa tawx simie ka cao pa rhuat mai tawx blah son cao pa ih, tak sang tawx mai nie lheu kieh simie son sang rhuat pex haoh sinyek sinyek mai kieh plix pa rahsee pex piien kah heue. 11 Pex tak sang mi koe ka ceu pa mhawm ku ceu khawmuik, tom grum koe rhawm sibieh ti tawx pa yuh tix, kieh koe krax yaog yaw bwanson Siyiex, kheu ex heue. 12 Kaing pa teem in, ang joeng mawh ngie pa kieh ceu pa lo pui pa singax khankix grum naog, viang mawh nan mawh pa kieh koe khawm pa yaog yaw bwanson Siyiex tom nie heue. 13 Mawh kheu yaox grawng ceu pa cheu ti yaox pex kheu kaing pa teem in, mawh kheu pa yaog yaw kix bwanson Siyiex, kheu grawng pa chix cu nghiet pex ka lox bwan gaux rhawm Cao Khrit pa hoik rieb pex ti teei mai kheu grawng pa sibieh pex ti tan ka kix mai ka pui khawmuik heue. 14 Tokaux kix kawx rawg bwanson pex mai ca byaong son pex, kheu bwanson Siyiex pa kied ting ka piang pex heue. 15 Yaog yaw bwanson Siyiex son totaix Nawh Cao pa ang lai dak chix uik krai heue.

10

1 Tokaux aux Pawlux, pa tiem rhawm rhi yam ot mai pex, pa koe rhawm kwa yam tang ot khaing pex, khyox khaw ka pex ka ceu pa awn rhawm mai ceu pa mhawm rhawm mhawm rhi Cao Khrit heue. 2 Aux khyox khaw ka pex, son ang aux sang koe rhawm kwa yam hoek aux dee ot pex awm pa hoik deuh aux rhawm tix viex rhawm kwa mai yuh ka kix tix blah, pa een ex mawh pa hu awm pa khaw mai nex nham heue. 3 Viang ex mawh ka daux nex nham kawx, ang ex yuh naing awm pa khaw mai nex nham, 4 Kraung naing pa shiao ex daux naing, ang mawh pa dex mai nex nham, mawh pa ting sibrawm Siyiex sivoe pa chix yieh laux dee kaux cong khankix heue. 5 Yam yieh ex ka ceu pa lak keud laux mai can ceu pa lhaong ku ceu pa hoik yuh ti tieb tie ka krax pa tawng ka Siyiex mai teei ti viex ka pa keud ku ceu son sang giex gang ka pa cu nghiet ka Cao Khrit heue. 6 Ex hoik rien rhawm tix, ti sang pawk bix ka can pa ang chix cu chix nghiet khawmuik, yam hoik grum naog ceu pa chix cu nghiet pex heue. 7 Pex jhak ngie ka grang plak praix khaing lie? Phan pui tix kaux kaux yum rhawm ka tokaux tix grawng mawh nawh cie Cao Khrit, kieh nawh baox deeh loi keud ka tokaux tix, grawh grawng awm mawh nawh cie Cao Khrit, viang ex kawx mawh nang cie Cao Khrit heue. 8 Viang aux nie lheu yaw ka grawng sibrawm pa hoik tawx Simiang ka ex, sonsang kieh pex ting lhaong mai ang lai mawh sonsang yieh pex laux, aux ang koe dee sang kaig twa heue. 9 Aux ang rhawm kieh mawh awm grang pa glhat aux ka pex ka lai pa tawx aux khankix heue. 10 Mawh kheu kix tix blah ah nin, "Lai nawh tom mawh pa cien pa koe sibrawm tete, phan tokaux nawh ot, mawh pa iak riang mai lox sikah nawh mawh pa ang tie koe ceu." 11 Kieh pui pa awm an keud sawn grawng lox lai ex mawh pa yuh ka mawx yam tang ot ex, viang yam ot ex kawx pa yuh ex tak sang mawh nang nan heue. 12 Ex ang koe rhawm kwa ti sawn ti tiag tokaux ex ka kix pa yaw tokaux kix tix blah, viang mawh nan tokaux kix ra lai teei tokaux kix ti tiag ka tokaux tix mai ra lai teei tokaux kix ti tiag ka tokaux tix khankix mawh pa ang koe krax tawng heue. 13 Ex tak ang nie luan yaw rangdi khaing diag ex, tak sang tiag awm pa khaw mai diag pa hoik gwieh Siyiex ti tawx ka ex, tom glang pa hoek ka pex heue. 14 Ex ang lai chax nie luan sinied tokaux ex, awm ang ex lai hoek glang dee ot pex, grawh grawng nawh tom dee ot pex kawx ex hoik hoek ti sidiex lox bwan gaux rhawm Cao Khrit heue. 15 Ex ang nie luan yaw rangdi khaing diag ex, ka daux kaing pa yuh pui tang kaux khankix, ex koe krax keud pot jun pot grawh grawng yam sang haok huan krax yum rhawm pex sipie sipie, ex tak sang nie ting ka daux pex awm pa khaw mai diag tiag ex, tom sang nie lheu ting vieh, 16 sonsang yaox ti sidiex gau lox bwan gaux rhawm baux haktiex pa luan khaing pex plak tieh mai son ang lai sang yaw rangdi ka daux diag pa tiag pui tang kaux, pa hoik cox hoik khre kah heue. 17 "Kieh kaw pa yaw, yaw rangdi ka daux Simiang heue." 18 Ang lai mawh kaw pa yaw ka tokaux tix, pa mawh pa rieb ti teei kah, viang mawh nan mawh kaw pa yaw Simiang kah, pa mawh pa rieb ti teei heue.

11

1 Aux mie ti kieh pex yeung ka aux, ka grawng ceu pa daox pa aw ceeix ceeix, viang mawh nan pex hoik yeung ka aux tete heue. 2 Grawh grawng nawh aux viang ka pex, ka krax viang pa dex mai Siyiex, mawh kheu aux hoik teei ti tawx pex ka mex tix kaux khaing, sonsang pon aux ti tawx pex ka Cao Khrit awm pa mawh bunkrih pa singax heue. 3 Viang mawh nan aux lhat pa keud pex sang laux hu khaing ceu pa viex khawm rhawm mai pa singax ka plak Cao Khrit, awm siuing hoik lak yuh cuyi ti pie lhen ka Evax heue. 4 Grawh grawng nawh phan kaw pa hoek ti sidiex, grawng Yesux tang kaux, khaing Yesux pa sidiex ex, phan ang mawh nan phan pex pon Khuan pa tang pa siyox, pa ang pex sax pon, phan ang mawh nan lox bwan gaux rhawm pa tang pa siyox pa ang pex sax rieb ti teei, pa yeung pex ka nawh mhawm heue. 5 Grawh grawng nawh aux sawn tokaux tix ang lai doh da khaix kawncau pa ting pa blon ting khaing paox tix khankix heue. 6 Viang aux ang chix sikah ti krai lox kawx, aux ang mawh pa ang koe krax tawng, ka daux krax ku blawng ex hoik kieh grawng ceu in sidawng ka daux ku ceu khawmuik ka pex heue. 7 Mawh hoik yuh aux phimap, ka pa yuh tokaux tix tiem sonsang yaog pex ting, kheu hoik sidiex aux lox bwan gaux rhawm Siyiex ka pex giex giex mai ang teei ngawh lie? 8 Aux hoik briex ka ceu cao tang ceu cao khankix, ka pa teei aux mau riang khaing kix, son sang pon aux ti yuh kaing jhaw son pex heue. 9 Yam ot aux tau mai pex mai koe dee lo dee cud, aux ang mawh beeh glawm ka pui tix kaux kawx, grawh grawng nawh yam hoek puxaik khankix khaing meung Makedonix kix tawx ceu pa lo pa cud aux. ka daux can ku ceu aux hoik priex tokaux tix son ang sang mawh beeh glawm ka pex mai aux tak ca kawn priex tokaux tix yuh nan heue. 10 Awm koe pa mawh meh Cao Khrit ka daux aux, pui tix kaux kawx ang pon kieh aux naox yawg tix ka pa yaw rangdi aux in, grawng baux haktiex meung Akhayax khankix heue. 11 Mawh kheu patix? Mawh kheu ang aux moh ka pex lie? Siyiex hoik tawng heue. 12 Pa hoik yuh aux, aux tak ca kawn yuh nan, son sang pon aux ti tat dud ka jao kix, pa mie ti koe jao pa yuh ka mawx son sang yaox sidawng grawng kix pa yaw rangdi tokaux tix, mawh pa awm ex heue. 13 Pui pa mawh nan, mawh kawncau pa ting pa ang mawh ang meh, pa mawh pui yuh kaing pie kheem, pa loh tokaux kix mawh awm grang kawncau pa ting Cao Khrit heue. 14 Ang koe dee daox deng kah, grawh grawng nawh pie Satan kawx loh tokaux ti mawh awm grang kawncau Siyiex pa riang heue. 15 Mawh kheu nan ang ot koe dee daox deng kah, phan pui cau pui soi nawh, loh tokaux kix mawh awm grang pui cau pa rahsee. Dee sidah kix tak sang mawh awm pa khaw mai kaing pa yuh kix heue. 16 Aux baox deeh ah tix bawg, paw kieh pui tix kaux kawx ce aux mawh pui daox aw, viang mawh nan phan pex ce aux mawh pui daox pui aw, rieb ti teei aux awm pa mawh aux pui daox aw, son aux kawx sang pon ti yaw tix ceeix ceeix heue. 17 Ceu pa krai aux, aux krai hawt Simiang ang mawh, mawh ka daux ceu pa daox pa aw mai ka daux pa yum rhawm ka grawng pa yaw tix heue. 18 Kheu yaox grawng pui tom nie yaw rangdi ka grawng pa dex mai nex nham, tokaux aux kawx sang yaw rangdi kah heue. 19 Mawh kheu mawh pex pui lhak lhiem, pex tom gaux rhawm ti yeung ka pui daox aw heue. 20 Grawh grawng nawh pex chix yeung ka pui, viang nawh kieh pex mawh siliex ang ah, viang nawh ih mai pex ang ah, viang nawh giex gang pex ang ah, viang nawh yaog tokaux ti ting ang ah, viang nawh simang pakngai pex ang ah heue. 21 Pa krai aux mawh ka daux krax pa map tix, awm pa hoik mawh pa iak riang. Pui tix kaux kaux kwa ka daux ceu pa yuh ka mawx ang ah, aux kawx kwa kah heue. 22 Kix mawh pui Hebrie lie? Aux ka mawh heue. Kix mawh pui Isarelax lie? Aux kawx mawh heue. Kix mawh ru Abraham lie? Aux ka mawh heue. 23 Kix mawh pui cau pui soi Cao Khrit lie? Aux ka nie lheu mawh heue. Aux nie lheu mawh ka daux kaing pa nyhap pa mao khankix mai ka pa nie lheu ot ka daux thawng mai ka pa sivied pa lheu khaing pa chix tiag ti yaox mai ka pa dex yum tom nie bawg heue. 24 Ka tawm taix pui Yudax khankix aux hoik pon kham pa sivied ka tixpon taix, yawm tix taix khaing, tom sidah phwan bawg heue. 25 Hoik tap toi aux ka khaox loe bawg, hoik dheem aux ka simaox tix bawg, aux hoik yaox ti kham geu pa laux reu loe bawg, aux hoik yaox ti ot ka daux rawm sigrit sigra tix ngaix mai tix sawm, 26 Ka daux pa hu krax tom nie bawg, ka daux krax lhat graung ka rawm klawng ting khankix, ka daux krax lhat graung ka pui tud rhim khankix, ka daux krax lhat graung khaing pui ceu aux khankix, ka daux krax lhat graung khaing pui tang ceu khankix, ka daux krax lhat graung ka daux veng, ka daux krax lhat graung ka daux tiagtu, ka daux krax lhat graung ka daux rawm sigrit sigra, ka daux krax lhat graung khaing puxaik pa ang mawh ang meh khankix, 27 Ka daux kaing pa nyhap pa mao, ka daux pa krox pa pau law lawx, ka daux pa cai rhawm mai pa sang nyaux nie rawm, ka daux pa twah pa ih law lawx, ka daux pa kuat mai pa ot kakaong heue. 28 Lheu khaing ceu pa mawh ka plak praix khankix, kawn koe ceu pa yeen ka piang aux ku ngaix, pa mawh krax khi son ceu cao khawmuik heue. 29 Mawh kaux pui mawx pa iak riang, pa ang aux rom ti iak riang tau? Mawh kaux pui mawx pa hoik kieh sideeing ka, pa ang aux hax rhawm chu rhawm kheu? 30 Phan aux tak lai yaw tix, aux tak sang yaw ka grawh grawng ceu pa iak riang aux khankix heue. 31 Siyiex pa mawh Keeing Simiang ex Yesux Khrit, pa ting bwanson leeing ju, tawng grawng ang aux pie lhen heue. 32 Ka daux veng Damase simiang giex kaing pa ot greem simiang Aretax, pau ka veng pui Damase an son sang giex sang teei aux, 33 hoik koi ploi aux lih khaing siviex ka daux phliex, ka guh veng mai pon ti luan khaing tawm taix nawh heue.

12

1 Aux tak lai yaw tix, viang ang lai koe bwanson kawx heue. Aux tak sang baox loi ti krai grawng riang susai mai ceu pa plak jhi yaox khankix, pa hoik plak jhi Simiang kah heue. 2 Aux tawng ka pui tix kaux ka daux Cao Khrit, hoik giex ti yaog ka pui an tom hoek ka raoma loe thaix glang ka in kao pon num heue. Hoik mawh ka daux khawm tokaux lie, aux ang tawng, phan ang mawh nan, ang mawh ka daux tokaux lie, aux ang tawng. Siyiex tawng heue. 3 Aux tawng ka pui pa yuh nan tix kaux, Hoik mawh ka daux khawm tokaux lie, phan ang mawh nan mawh ka pa tang tiah khaing tokaux lie, aux ang tawng. Siyiex tawng heue. 4 Grawh grawng pa hoik giex ti yaog nawh haok ka daux meung Paradisux mai pon ti mhong gumlox pa ang chix ah kah, pa ang kawn pui koe akhwang ti baox jiem ti krai heue. 5 Aux tak yaw rangdi ka grawng pui pa yuh nan, viang mawh nan aux tak ang yaw grawng tokaux tix lheu khaing ceu pa iak riang aux heue. 6 Grawh grawng nawh phan aux mie ti yaw tix, aux tak ang mawh pa daox pa aw, mawh kheu pa krai aux tak mawh ngie pa mawh pa meh, aux ang yuh, phan ang mawh nan ha pui tix kaux kaux kox een aux mawh pa nie lheu khaing pa yaox nawh aux mawh, phan ang mawh nan khaing pa mhong nawh khaing aux heue. 7 Kheu jao pa kied lang teung ting ceu pa plak jhi kieh yaox khankix, son ang aux sang chax nie luan yaog tokaux tix ting, hoik tawx kat lawm ka daux nex aux tix mu, pa mawh kawncau Satan, ti sang klah sang tap ka aux, son ang aux sang chax nie luan yaog tokaux tix ting heue. 8 Kheu ceu an sang lih hu khaing aux, aux hoik khyox khaw ka Simiang loe bawg heue. 9 Nawh Cao hoik ah nin ka aux, "Bwanson Aux hoik kub ka son maix. Yuh ti kieh sibrawm Aux grum ka daux ceu pa iak riang heue." Mawh kheu nan aux gaux rhawm tix nie lheu yaw rangdi ka daux ceu pa iak riang aux khankix, son sibrawm Cao Khrit sang tawb veei ka piang aux heue. 10 Mawh kheu in aux tom gaux rhawm ka daux ceu pa iak riang aux khankix mai ka daux pa yuh pa ang cee ang cak kah mai ka daux pa lo pa hot mai ka daux pa tuktiak kah mai ka daux pa tug kha, ka son Cao Khrit, grawh grawng nawh yam iak riang aux, yam an aux tom koe riang rao heue. 11 Aux hoik lih mawh pui daox pui aw, pex hoik khin aux mawh nan, grawh grawng nawh pex khaw ti hoik yaw aux kah, mawh kheu viang aux ang koe bwanson tidtix kawx, aux ang doh da khaix ka daux tix ceu kawx ka kawncau pa ting pa blon ting khaing paox tix khankix heue. 12 Hoik viex rhawm gun yeung khawmuik ti jhi mhai rug grawng mawh kawncau pa ting pa mawh pa meh, ka sinax pex, ka mhai mai ka ceu pa daox am mai ka kaing sibrawm khankix heue. 13 Grawh grawng nawh hoik koe ceu pa yuh ka mawx, pa hoik yuh ti kieh pex cud ti ang krup ka ceu cao pa kawn deuk khankix, phan mawh pa lheu khaing pa ang tokaux aux mawh beeh glawm ka pex? Pluat ploi ceu pa lud aux ka in liak. 14 Jhak heue, in mawh loe bawg tix bawg pa hoik khre hoik rien aux ti sang hoek ka pex heue. Aux tak ang lai mawh beeh glawm ka pex, mawh kheu ang aux sawg kraung cie pex, sawg ka pex khaing, grawh grawng nawh kawn praix khankix ang lai khaw ti mawh cao khrawm cao deuh sinngao son miex keeing tix, mawh miex keeing pa khaw ti khrawm deuh son kawn praix tix heue. 15 Phan mawh aux, aux tak sang gaux rhawm ti cai kah mai ti kieh khawm tokaux ti uik, ka son ju pex heue. Phan aux nie lheu ting moh ka pex, pa moh ka aux tak sang iak hu kheu lie? 16 Tokaux aux ang lai mawh beeh glawm ka pex, viang mawh nan kheu mawh aux pui lhak lhiem aux hoik pon taong pex ka ceu pa nieb pie lhen heue. 17 Khex hoik nieb yuh aux cuyi ti ih kaing pex, ka kix pa hoik ploi aux ka pex tix kaux kaux lie? 18 Aux hoik khyox khaw ka Titux mai hoik ploi puxaik an hu tau mai nawh heue. Khex hoik nieb yuh Titux cuyi ti ih kaing pex lie? Ex hoik hu ka daux Khuan tix mu khaing ang mawh lie? Ex hoik hu ka daux rhoi khaix caong pa awm paox tix ang mawh lie? 19 Pex lai ce jih jang glang gleeing ex hoik sawg ti tieb tie phimap tix ka pex nieh. Ex krai ka daux Cao Khrit ka plak sivoe Siyiex heue. Pui pa moh aux khankix eue, can ku ceu khawmuik mawh son sang kieh pex ting lhaong ka heue. 20 Grawh grawng nawh, aux lhat yam hoek aux ka pex, ha aux kox yaox kheu tix ceu ceu tak sang yaox pex mawh, awm pa ang aux mie pex ti mawh mai viang pex kawx tak yaox tokaux aux mawh, awm pa ang pex mie ti yaox aux mawh. Phan ang mawh nan ha kheu tix ceu ceu kox tak yaox pa koe krax simah, krax boh rhawm rhi, krax song rhawm songrhi, krax pa tang siyox, krax pa nieb yuh pakngai pui laux, krax pa ah lox suk siep, krax ca nyhau ting rhawm mai krax lawh maw cuci heue. 21 Phan ang mawh nan ha yam baox deeh hoek aux ka pex kox, Siyiex aux tak kieh aux tiem rhawm ka sivoe pex mai aux tak khi rhawm son kix pa haoh pa hun, pa hoik lud glang ka sivoe in mai ang doh keud ka pa ang singax mai ceu pa phit vao mai ceu pa hawt alo nex nham, pa hoik yuh kix heue.

13

1 In mawh pa hoek aux ka pex loe bawg tix bawg heue. "Tak sang kieh lox ku gum kaux cong ka jheeh cao pa kham mhai rug ra loe kaux heue." 2 Aux hoik grux krai mai aux baox grux krai, awm yam ot aux mai pex ra bawg tix bawg, yam in viang aux tang ot kawx, aux ah ka kix pa hoik lud glang ka sivoe in mai ka khawm pa deuk khankix khawmuik, phan aux baox deeh hoek, aux tak ang yam kix heue. 3 Kheu sawg pex mhai rug grawng pa sikah Cao Khrit ka daux aux, Kaw pa ang iak riang ka plak pex, viang mawh nan pa ting sibrawm ka daux pex, 4 grawh grawng nawh viang hoik teei Nawh Cao yum ka piang khaox lhak kheu pa iak riang kawx, Nawh im ju kheu sibrawm Siyiex heue. Grawh grawng nawh, viang iak riang ex ka daux Nawh Cao kawx, ex tak sang im tau mai Nawh kheu sibrawm Siyiex ka plak pex heue. 5 Chawk ka tokaux pex grawng kaux cong pex ka daux krax yum rhawm lie? Ang kaux lie? Cheu ti yaox ka tokaux pex heue. Phan ang mawh nan ang pex tawng grawng tokaux pex, grawh grawng pa ot Cao Khrit ka daux pex, phan pex ang lai mawh pa ang pon ti kham ceu pa cheu ti yaox an lie? 6 Aux koe krax keud pot jun pot son sang kieh pex tawng grawng pa ang ex mawh pa ang pon kham ka ceu pa cheu ti yaox an heue. 7 Ex rawg bwan ka Siyiex yuh ka mawx son ang pex sang yuh ceu pa caox caig tix ceu kawx, ang lai mawh son sang sidawng grawng pa pon ex ti kham ceu pa cheu tix yaox an, mawh son sang yuh pex ceu pa khaw pa mhawm, viang mawh ex awm pa ang pon ti kham ceu pa cheu ti yaox an kawx heue. 8 Grawh grawng nawh ex ang koe sibrawm ti cha ti yuh ka ceu pa mawh pa meh, ex pon ti yuh plak pa mawh meh khaing heue. 9 Grawh grawng nawh ex gaux rhawm yam iak riang iak rao ex mai ting riang pex mai sonsang grum mhawm pex kawx, ex rawg bwan heue. 10 Mawh kheu jao in aux tom tiiem lai grawng ceu in khankix, yam tang ot aux khaing pex, yam ot aux mai pex aux tak ang yaox ti yuh pa lang teung ka pex, awm pa khaw mai sibrawm pa hoik tawx Simiang ka aux, son sang yuh sang sum ting mai ang mawh sonsang yieh laux heue. 11 Puxaik khankix eue, in mawh lox pa ghoik pa sidah, gaux rhawm heue, kieh grum mhawm heue, kieh nyawm rhawm heue, kieh mawh rhawm tix mu khaing heue, ot ka daux pa nhim mai Siyiex krax pa moh rhawm mai krax pa nhim tak sang ot tau mai pex heue. 12 Nawb ka paox tix, tix kaux lai tix kaux, ka pa ngheut pa singax heue. 13 Pui pa singax singeh khawmuik nawb ka pex heue. 14 Kieh bwanson Simiang ex Yesux Khrit mai krax moh krax rhawm Siyiex mai pa yuh paox pie Khuan singax singeh ot tau mai pex khawmuik liak.