2 Chronicles

2 Chronicles

¹ Sawlamon mawh kawn simex Davit, hoik kied koe riang rao ka daux meung haktiex kwang nawh mai Siyiex ot tau mai nawh mai yaog nawh ting heue. ² Sawlamon, krai lox ka ceu pui Isarelax khawmuik, ka cub cao kaing naing pa kwang piang pui kaing rheng kaing yieh, ka cub cao pa prawng see khankix mai ka cub cao thong cao bung ku kaux pa koe ka daux ceu pui Isarelax khawmuik mai ka cao kaing daux doeh nyiex ma keeing kix khawmuik heue. ³ Khaix an, Sawlamon mai cub pui hun pa ot tau mai nawh khawmuik, hu ka dee pa lhaong pa koe daux veng Gibeon, mawh kheu bang kum nyiex gox bwan man Siyiex hoik koe tan, pa hoik yuh Mose kawncau Siyiex, ti deuh ka daux tiagtu heue. ⁴ Viang mawh kawx nan, Davit hoik teei ti viex teug bwan sijax mukheu Siyiex khaing veng Kirayat Yarim, hoek ka dee pa hoik khre Davit ti deuh son nawh, kheu hoik sum nawh tix tawx nyiex gox tix lhang ka son nawh, ka daux veng Yerusaliem heue. ⁵ Yam in khu tawng dee tan pa hoik yuh Bezalelax, kawn simex Uzix, pa mawh kawn simex Hurax, hoik deuh ka plak sivoe nyiex gox bwan man Siyiex Sawlamon mai cub pui hun khankix sawg Nawh Cao tan heue. ⁶ Sawlamon haok bleeh ka khu tawng dee tan pa koe plak sivoe Siyiex pa hoik koe ka daux bang kum nyiex gox bwan man mai nawh gleeing ti tan tobrie tix rheng piang an heue. ⁷ Ka daux bo an, Siyiex hoek bleeh ka Sawlamon mai ah nin ka nawh, rawg heue, mawh sang simie maix Aux tawx ceu patix ka maix lie? ⁸ Sawlamon, ah nin ka Siyiex, "Maix Cao hoik jhi krax caux rhawm tix tom nie ka keeing aux Davit mai hoik kieh aux mawh simiang ka dee ot nawh heue. ⁹ Siyiex eue, kieh gumlox sijax mukheu Maix Cao, mawh pa kaux cong ka keeing aux Davit, kheu hoik kieh Maix Cao aux mawh simiang piang pui ceu in, pa kied nie haoh hun awm phawng tiex khankix heue. ¹⁰ Yam in tawx pingnya cuyi mai krax tawng ka aux, sonsang pon aux ti lih mai laig ka plak sivoe pui inkix, phan ang mawh nan, mawh pui mawx pa pon prawng ca ka pui pa kied haoh hun cie Maix Cao lie?" ¹¹ Siyiex deeh ah nin ka Sawlamon; "Kheu hoik koe rhawm maix yuh nin mai ang tie mhaing krax magmi mai sinngao krax pa koe min plakngai khawm ju pui pa koeng maix khankix mai kheu ang maix tie mhaing krax pa lang ju tix, viang mawh nan maix mhaing ngie pingnya cuyi mai krax tawng son tokaux cao maix, sonsang pon maix ti prawng ca ka pui Aux khankix, piang pui pa hoik kieh Aux maix mawh simiang; ¹² Pingnya cuyi mai krax tawng yung tak tawx ka maix mai Aux tak tawx krax magmi mai pa koe sinngao mai pa koe ka maix; pa awm in, simiang pa dawg koe voe maix khankix mai simiang pa tak sang kwang khaix maix khankix ang koe pa awm maix pie tix kaux kawx heue. ¹³ Mawh kheu nan, Sawlamon kaoh khaing dee pa lhaong pa koe ka daux veng Gibeon mai khaing plak sivoe bang kum nyiex gox bwan man mai hoek ka daux veng Yerusaliem piang meung Isarelax heue. ¹⁴ Sawlamon kraix khrawm ling lawx naing brung mai cub pui naing brung khankix, nawh koe ling lawx naing brung tix rheng pon yieh lhang mai khawm cub pui naing brung khankix tix mheen ra rheng kaux, pa mawh pui pa hoik pang nawh ti deuh ka daux veng ling lawx naing brung mai pa hoik deuh nawh tau mai simiang ka daux veng Yerusaliem heue. ¹⁵ Simiang yuh mau mai khri khankix haoh hun awm lon simaox ka daux veng Yerusaliem mai nawh yuh khaox Arit, haoh hun awm khaox ruh khankix pa koe ka dee tiiem haktiex khankix heue. ¹⁶ Brung cie Sawlamon khankix mawh pa viex hoek khaing daux meung Ejiptux mai daux veng Kevie; mawh cao yuh lai geu simiang khankix pa liag ti viex hoek khaing veng Kevie, pa koe ngawh jum baux yam an heue. ¹⁷ Kix baox deeh mhaing teei ti tawx ling lawx tix lhang ka mau liah yieh shekhe mai brung tix mu, ka mau tixyieh tixphwan shekhe, khaing meung Ejiptux, mawh kheu nan, khaing ka daux tawm taix cao pa yuh lai geu son tang kix, kix hoik pon teei ti viex ceu ankix hoek ka cub simiang ceu pui Hitix mai cub simiang ceu pui Surix, khankix heue.

¹ Khaix an, Sawlamon tat rhawm tix sum nyiex bwan tix lhang ka daux ceu kaux Siyiex mai nyiex haw tix lhang son cao nawh heue. ² Sawlamon laug ti deuh pui aliah mheen kaux, sonsang klawm glawm cien mai sawg tix don lon simaox piang gawng daix mheen kaux mai cao pa kia ngien piang pui yuh kaing loe rheng liah yieh kaux heue. ³ Khaix an, Sawlamon ploi pui hu ka Hiram, pa mawh simiang meung Turux ah nin, awm hoik tawx maix nawh cie khaox Arit khankix, sonsang sum nawh tokaux cao tix ot nyiex tix lhang, mawh kheu nan, deeh baox yuh bwanson ka aux liak! ⁴ Jhak heue, aux tak sang sum nyiex bwan tix lhang ka daux ceu kaux Siyiex aux mai sonsang appong aux tix tawx ka Nawh Cao mai sonsang gleeing aux nyawng pa sioe bhawng ka plak sivoe Nawh Cao mai sonsang sitoe aux tix khan blah sijheeng mai sonsang tan aux tix tawx krax tan pa gleeing khankix, plak ponngawb mai plak ponbo yam hoek daux singaix twah khankix mai yam haok khix khraox mai yam hoik hoek bawg yam pawie Siyiex ex khankix heue. In mawh been pa hoik tat ceu pui Isarelax ti yuh leeing ju heue. ⁵ Nyiex bwan pa ah aux tix sang sum, tak mawh pa ting lhaongheue. Mawh kheu Siyiex ex mawh pa nie lheu ting khaing siyiex tang kaux tang hak khawmuik heue. ⁶ Viang mawh nan, mawh pui mawx pa sang pon sum ti tawx nyiex bwan tix lhang ka son Nawh Cao, pie raoma pa nie lheu blon ting khaing raoma ang lai kub Nawh Cao ot, khaix an aux tak sang mawh pui pa yuh ka mawx? son tak sang sum aux ti tawx nyiex bwan tix lhang ka son Nawh Cao, mawh ngie sonsang gleeing aux tix tawx krax pa appong tix khankix ka plak sivoe Nawh Cao khaing heue. ⁷ Mawh kheu nan, yam in, ploi pui pa min yuh kaing hoek ka aux tix kaux, sonsang yuh nawh kaing khri kaing mau mai kaing rhiem khankix mai kaing taing man pa lung pliex raoh mai man pa raoh mai man pa klai raoma khankix, pa hoik min yuh kaing sonsang pon laig ti yuh kaing tau mai pui pa min yuh kaing khankix, pa koe tau mai aux ka daux meung Yudax mai ka daux veng Yerusaliem, pa mawh pui pa hoik khre rien keeing aux Davit ti deuh khankix heue. ⁸ Baox tix tawx aux cie khaox Arit mai khaox gix mai khaox Alagum, khankix khaing piang gawng Lebanon liak. Mawh kheu aux tawng ka min kawncau mau soi maix ka grawng kaing yuh khaox piang gawng Lebanon mai kawncau mau soi aux khankix tak ot tau mai kawncau mau soi maix khankix, ⁹ sonsang khre rien kix tix tawx khaox ka son aux tom kied haoh hun, mawh kheu nyiex bwan pa sang sum aux tak mawh pa kied ting lhaong mai pa kied koe pa daox deng heue. ¹⁰ Ka cub kawncau mau soi maix pa kid khaox khankix mai aux tak tawx phawng gaox nghox ca ra mheen kawrax, nghox koi ra mheen kawrax, rawm plix siiet ra mheen bat mai bee ra mheen bat heue. ¹¹ Khaix an, Hiram simiang meung Turux deeh tiem tix pawk lai tawx hu ka Sawlamon ah nin, mawh kheu moh Siyiex ka pui Nawh Cao khankix, Nawh Cao hoik kieh maix mawh simiang piang kix heue. ¹² Hiram baox deeh ah nin, kieh Siyiex ceu pui Isarelax cao pa phan raoma mai haktiex koe bwanson, mawh kheu Nawh Cao hoik tawx kawn simex pa koe pingnya cuyi tix kaux ka simiang Davit, pa koe krax keud dong sawn mai krax tawng yung, cao sum ti tawx nyiex bwan tix lhang son Siyiex mai nyiex haw tix lhang son cao nawh heue. ¹³ Yam in aux hoik ploi pui pa min ka kaing tix kaux mai pa koe krax tawng, pa mawh Huram cao pa yuh kaing nyiex kaing ma aux, ¹⁴ mai nawh mawh kawn simex bun tix kaux khaing daux kawn bun ceu pui Dan mai keeing nawh mawh pui khaing veng Turux mai nawh hoik chix hoik min ka yuh tix kaing khri kaing mau kaing tawng mai kaing rhiem mai kaing yuh simaox mai kaing khaox, kaing yuh man pa lung pliex mai kaing pa yuh man ceu pa klai raoma, khawm kaing taing man ceu pa mhawm mai kaing taing man ceu pa raoh mai sonsang yuh nawh kaing saik kuceu mai sonsang grum naog yuh nawh kaing pa hoik khre rien tix khankix kuceu, pa sang mawh pa tawx tix ka nawh, tau mai cub pui pa min yuh kaing cie maix khankix, tau mai pa min yuh kaing keeing maix pa mawh simiang aux Davit heue. ¹⁵ Yam in gaox nghox ca mai nghox koi, bee mai rawm plix siiet pa hoik krai simiang aux, kieh nawh tawx ka kawncau mau soi nawh khankix heue. ¹⁶ Yix tak sang kid tix tawx khaox khaing piang gawng Lebanon, awm pa sang lo maix, yix tak yuh ankix mawh kram viex hoek ka maix ka daux rawm sigrit sigra tom hoek ka veng Yawppax mai maix deeh don hu ka veng Yerusaliem heue. ¹⁷ Khaix an, Sawlamon deeh simin ti yaox pui tang ceu, pa ot ka daux haktiex Isarelax khawmuik, khaix hoik koh keeing nawh Davit ti teei carang pui khankix; mai nawh hoik yaox koe pui tix sien phwan mheen loe rheng liah yieh kaux heue. ¹⁸ Kieh pui aliah mheen kaux mawh cao pa klawm kraung pa cien mai pui daix mheen kaux mawh cao pa sawg tix don simaox khaing piang gawng mai pui loe rheng liah yieh kaux mawh cao pa kia ngien piang pui yuh kaing heue.

¹ Yam in Sawlamon jah tix sum nyiex bwan Siyiex ka daux veng Yerusaliem piang gawng Mawrix, dee pa hoik jhi Siyiex tix ka keeing nawh Davit mai ka dee pa hoik khre rien Davit ti deuh piang gwang glah pah nghox Awnan, ceu pui Yebusix heue. ² Nawh jah ti sum nyiex bwan an ka daux khix ra, ra ngaix yam hoik naog kwang nawh ka haktiex daux pon num tix num heue. ³ In mawh num riah pa sum Sawlamon, ti deuh son nyiex bwan Siyiex heue. plak lang koe tigliah sawk, awm sawk prim pa hoik shiao ju dix mai plak vieh koe tixnga sawk heue. ⁴ Sidub koe ka plak sivoe nyiex bwan, plak lang koe tixnga sawk, sidu vieh awm plak vieh nyiex bwan mai krax lhaong koe tixyieh tixnga sawk heue. Nawh hoik om plak daux ka khri nawnaw heue. ⁵ Son daux lawg pa ting, nawh hoik kab ka phia khaox gix mai kraix om ka khri pa mhawm mai nawh saik ti deuh riang khaox sanlun mai riang maox soi khankix piang heue. ⁶ Nawh jawg khre nyiex bwan ka siang simaox pa kied laoh lie sonsang mhawm ti yaox mai khri khankix mawh khri pa kaoh khaing plak meung Paravem heue. ⁷ Nawh baox deeh kraix om nyiex bwan, lat mai pang siviex, ding mai siviex ting ka khri mai nawh saik ti deuh riang Cherubin ka ding nyiex heue. ⁸ Nawh baox deeh yuh dee pa kied singax singeh heue. Krax lang koe tixnga sawk, awm krax vieh nyiex bwan mai krax vieh koe tixnga sawk heue. Nawh hoik kraix om ti deuh ankix ka khri ceu pa mhawm liah yieh talantan heue. ⁹ Krax ciien jim rhiem khri koe tixphwan shekhe mai nawh kraix om plak piang khankix ka khri heue. ¹⁰ Ka daux dee pa kied singax singeh, nawh yuh ti deuh riang Cherubin ra mu pa saik awm paox tix mai kraix om ankix ka khri heue. ¹¹ Pruik Cherubin, krax lang khawmuik koe tixnga sawk, pruik Cherubin tix plak son tix mu koe phwan sawk, hoik teeh ding daux lawg; mai pruik an tix plak koe phwan sawk mai hu teeh pruik Cherubin an tix mu, ¹² Pruik Cherubin an tang mu tix plak koe phwan sawk mai pruik an hoik hu teeh ka ding daux lawg mai pruik an tix plak kawx koe phwan sawk mai hoik teeh pruik Cherubin an tang mu heue. ¹³ Pruik Cherubin inkix hoik di tix koe tixnga sawk khawmuik, kix cung ka caong cao kix mai kix veeh pakngai tix plak daux heue.. ¹⁴ Nawh yuh ti deuh man tie pa klai raoma mai man lheung pliex mai man pa raoh mai man keei ceu pa mhawm mai kix taing tix sau riang Cherubin ka daux man ankix heue. ¹⁵ Nawh baox yuh ti deuh rong pa lhaong tixngoe phwan sawk ra mu, ka plak sivoe nyiex bwan mai kaing rong pa koe toeh rong ankix ku mu plak lang koe phwan sawk heue. ¹⁶ Nawh yuh maox ceng khankix awm pa hoik koe ka plak daux dee pa singax singeh mai deuh ankix piang toeh rong mai nawh baox yuh riang pakpeung plix kla jiang tixyieh mu mai sau ti deuh piang maox ceng khankix heue. ¹⁷ Khaix an, nawh sum rong an khankix ka plak sivoe nyiex bwan, ka plak khawn dawm tix mu mai ka plak khawn gwiex tix mu, nawh kok ceu kaux rong pa koe plak khawn dawm mawh Yakhim mai rong pa koe plak khawn gwiex kok ceu kaux mawh Bawzax heue.

¹ Lheu khaing an nawh yuh khu tawng dee tan tix mu, piak lang koe tixnga sawk, plak vieh koe tixnga sawk mai plak lhaong koe kao sawk heue. ² Khaix an, nawh baox raug ti yuh dung rawm ka tawng lheung pa lak lo pakpeung, krax vieh koe kao sawk, krax lhaong koe phwan sawk mai hawt vung viang moing koe tixngoe sawk heue. ³ Ka plak greem hawt praok moing an, koe grang pakpeung jiet awm riang mawie khankix khawmuik, hawt paw dung rawm tawng an daux tix sawk koe riang grang mawie ka kao mu, riang grang mawie khankix mawh pa raug tix koe ra tia yam hoik raug kix ti yuh heue. ⁴ Rawm dung an hoik deuh tix piang riang moi kao ra mu, loe mu vai ngai tix ka plak laong, loe mu vai ngai tix ka plak klip singaix, loe mu vai ngai tix ka plak seh mai loe mu vai ngai tix ka plak lih singaix rawm dung hoik deuh ti ot piang kix mai kix ghaix kre tix ka plak daux khawmuik heue. ⁵ Krax pu dung rawm koe tix tiag taix mai moing nawh awm pakpeung moing klong, awm kho tai kraox nhawng, rawm hoik kub laig ka daux loe rheng bat heue. ⁶ Nawh baox yuh pan khoek kao mu mai phwan mu deuh ka praok plak dawm mai an phwan mu deuh ka praok plak gwiex, sonsang yaox kix tix sigrhah krax tan pa gleeing khankix ka daux an, viang mawh nan, dung rawm an mawh sonsang khoek heem cao giex kaing li tix ka daux heue. ⁷ Nawh yuh jawk ten khri kao mu awm pa hoik koe pakpeung kix mai nawh deuh kix ka daux nyiex bwan, phwan mu ka praok plak dawm mai phwan mu ka praok plak gwiex heue. ⁸ Nawh baox yuh pheen kao mu mai deuh ka daux nyiex bwan, phwan mu ka praok plak dawm mai phwan mu ka praok plak gwiex heue. Nawh baox yuh klong khri tixyieh mu heue. ⁹ Baox nie lheu khaing ankix, nawh yuh vang ot cao giex kaing li khankix mai vang pa kied ting mai siviex ting son vang an mai nawh hoik kraix om siviex ting an khankix ka tawng lheung heue. ¹⁰ Nawh deuh dung rawm an ka praok plak dawm, plak seh plak lih singaix heue. ¹¹ Khaix an Huram, yuh aw, kawk pug rawm mai klong khankix heue. Mawh kheu nan, Huram, hoik yuh kaing pa caw nawh ti yuh son simiang Sawlamon ka daux nyiex bwan Siyiex; ¹² Pa hoik yuh tix mawh rong khankix ra mu mai kaing rong ankix pa awm grang pakpeung klong, pa lang chup tix piang toeh rong an ra mu, plah dieb ngai rub pa sang tawb ti deuh kaing rong pa awm pakpeung klong an ra mu pa hoik koe piang doeh rong khankix, ¹³ pakpeung plix kla jiang pon yieh mu, son plah dieb ngai rub ra mu, pakpeung plix kla jiang ra tia son plah dieb ngai rub ankix ku mu, sonsang mawh pa kheem ka kaing rong pa awm klong ra mu, pa hoik koe piang toeh rong an khankix, ¹⁴ mai nawh baox yuh ling lawx iak khankix mai deuh pan ting piang ling lawx iak an, ¹⁵ dung rawm tix mu mai riang moi kao ra mu ka plak greem an, ¹⁶ mai khawm aw, kawk pug rawm, sigawng nex mai khawm kraung pa shiao kix khawmuik, Huram cao pa min ka kaing taix kuceu, yuh ti tawx tawng lheung pa kied plang son simiang Sawlamon mai nyiex bwan Siyiex heue. ¹⁷ Ka daux lung Yawdan, simiang hoik kieh kix raug ti yuh ankix ka daux tiex glaox baoh sinax veng Sukok mai veng Zeredax khankix heue. ¹⁸ Sawlamon hoik pon tix koe kraung khrai inkix khawmuik ka pa hoik yuh tix khankix ka daux pa kied haoh hun mai nawh hoik ang lai tawng tix sawn ka krax diang cien tawng lheung khankix heue. ¹⁹ Mawh kheu nan, Sawlamon hoik koe kraung shiao pa hoik yuh ti deuh son nyiex bwan Siyiex, pa mawh khu khri dee tan mai pheen pa sang khan ti deuh blah khankix, ²⁰ jawk ten khri tau mai kawk ngu pa hoik yuh tix ka khri nawnaw, sonsang tok tix ka daux krax pa hoik koe been ti deuh plak sivoe dee pa singax singeh, ²¹ tau mai tai mai kawk ngu mai gip kong ngu, pa yuh tix ka khri nawnaw khankix, ²² Sigiiep ngu, klong, jaok pa lang mai pan daong nyaox pa yuh tix ka khri nawnaw khankix heue. Awm diang krax dee laig kix ka dee pa singax singeh, siviex ting plak daux an, tom hoek ka dee pa kied singax singeh mai siviex ting plak daux num lawg ting nyiex bwan khankix, hoik mawh pa jawg tix ka khri khawmuik heue.

¹ Mawh kheu nan, can kaing pa hoik yuh Sawlamon, son nyiex bwan Siyiex hoik hoik mai Sawlamon, viex can ceu pa hoik appong keeing nawh ti tan khankix khawmuik, pa mawh mau mai khri mai kraung shiao khankix hoek heue. Nawh sau ti priex ceu ankix ka daux sinngao nyiex bwan Siyiex heue. ² Yam in Sawlamon deeh kraix khrawm cub kuad riex ju pui Isarelax, khawm cao kaing ting doeh ru kix, khawm cao kaing ting doeh nyiex ma keeing riex ju pui Isarelax khankix ka daux veng Yerusaliem, sonsang pon kix ti deeh viex teug bwan sijax mukheu Siyiex hoek khaing veng Davit pa mawh Zion heue. ³ Mawh kheu nan, pui Isarelax khankix hoik khrawm paox tix tau mai simiang ka daux pawie pa yuh kix ka daux khix aliah heue. ⁴ Mawh kheu nan, cub kuad song ceu pui Isarelax khankix khawmuik hoik hoek mai cub ceu pui Lewix, khankix hoik teei ti viex teug bwan heue. ⁵ Khaix an, kix teei teug bwan hoek daux bang kum nyiex gox bwan man mai khawm kraung shiao pa singax singeh an khankix khawmuik, pa hoik dawg priex ti deuh ka daux nyiex gox bwan man khankix heue. Cao giex kaing li mai pui Lewix khankix hoik teei ti viex ankix laig ka plak daux heue. ⁶ Khawm simiang Sawlamon mai cub pui hun ceu pui Isarelax khawmuik, pa hoik krawk khrawm paox tix tau ka plak sivoe teug bwan mai kix appong tix tan yung mai moi khankix, pa ang lai dak uik simin, kheu jao pa hoik kied haoh hun kix heue. ⁷ Khaix an, cao giex kaing li viex teug bwan sijax mukheu Siyiex laig ka daux dee ot nawh, ka plak daux nyiex bwan, dee pa kied singax singeh greem pruik Cherubin heue. ⁸ Cherubin di pruik tix piang dee koe teug bwan mai Cherubin hoik kheem teug bwan mai khawm khaox glawm heue. ⁹ Khaox glawm an, kix hoik yuh lang sonsang pon yaox kix toeh khaox glawm khankix khaing dee pa singax singeh ka plak sivoe daux lawg plak daux, viang mawh nan, kix ang pon tix chix yaox khaing plak praix heue. Kix ot hawt tan, tom hoek ka daux in singaix heue. ¹⁰ Ka daux teug bwan, lheu khaing khlawp simaox ra khlawp, pa hoik sau Mose ti deuh hawt baoh Hawrax ang koe tidtix tan, yam hoik yuh Siyiex gumlox sijax mukheu tau mai kawn praix ceu pui Isarelax khankix yam lih hu kix khaing meung Ejiptux heue. ¹¹ Yam hoik luan ceu ankix, yam hoik lih hoek cao giex kaing li khaing dee pa kied singax singeh, mawh kheu can cao giex kaing li khankix hoek daux bang kum khawmuik, hoik yuh tokaux cao tix singax singeh, ang lai priex lai rien ti yuh kaing jhaw awm pa koe cub caw kix heue. ¹² Ceu pui Lewix cao rhax lai, pui kaoh khaing Asaphax mai Heman mai Yedutun khankix tau mai kawn simex kix khawm puxaik kix khawmuik, cung tix it ka toeh plak lih singaix khu dee tan, kix ceep ka kraung man paing, giex chiang, ting mai ting feuk mai cub cao giex kaing li pa phlu teettawng sinum tiyieh tixnga kaux ot tau mai kix, ¹³ Yam cao phlu teettawng mai cao rhax lai khankix mawh tix cub, sonsang yuh kix lox tix sinum tix dum, sonsang mawh pa yaogyaw kix bwanson Siyiex mai yam yaog kix lox tix khaw tau mai teettawng mai chiang mai kraung ting pa koe maox khankix yaogyaw Siyiex ka daux pa ah nin, mawh kheu Nawh Cao mawh pa mhawm, mawh kheu krax pa caux rhawm Nawh Cao kaux cong leeing ju heue. Nyiex bwan an pa mawh nyiex bwan Siyiex hoik naog ka pa ceep paiawm, ¹⁴ Mawh kheu cao giex kaing li ang lai pon sitoe ti yuh kaing jhaw kheu jao pa ceep paiawm, kheu jao hoik naog min sibrawm Siyiex ka dau nyiex bwan Siyiex heue.

¹ Khaix an, Sawlamon ah nin; "Siyiex hoik ah nin, Nawh Cao tak ot ka daux pa faik paiawm heue. ² Viang mawh nan, aux hoik sum ti tawx nyiex bwan pa kied ting lhaong tix lhang ka Maix Cao mai dah dee sonsang ot Maix Cao ka daux an leeing ju heue." ³ Khaix an, simiang deeh vai ti jhak hawt vung viang tix mai nawb bwan piang ceu pui hun Isarelax khankix khawmuik, glang yam cung cub pui hun pui Isarelax khankix khawmuik heue. ⁴ Nawh ah nin, kieh krax pa yaogyaw bwanson koe ka Siyiex ceu pui Isarelax, pa hoik grum naog yuh ceu ankix ka taix Nawh Cao mai ceu pa hoik sikah Nawh Cao ka jheeh tix ka keeing aux Davit pa ah nin, ⁵ Tom yam viex Aux pui ceu tix khankix lih hu khaing daux meung Ejiptux, Aux ang nyang bax laug veng pie tix veng kawx, khaing daux doeh ru pui Isarelax khankix pie tix cub kawx ka daux pa sang sum kix nyiex tix lhang sonsang koe ceu kaux Aux tix ot tan mai Aux ang nyang bax laug pui pie tix kaux kawx, sonsang mawh cao pa kwang piang ceu pui Aux Isarelax khankix; ⁶ Viang mawh kawx nan, Aux hoik laug veng Yerusaliem sonsang pon hu ceu kaux Aux tix ot tan mai Aux hoik laug Davit mawh cao pa kwang piang ceu pui Aux Isarelax heue. ⁷ "Yam in ceu ankix hoik koe ka daux rhawm keeing aux Davit, sonsang sum nawh nyiex bwan tix lhang ka son ceu kaux Siyiex ceu pui Isarelax heue. ⁸ "Viang mawh nan, Siyiex ah nin ka keeing aux Davit, awm hoik koe ceu ankix ka daux rhawm maix sonsang sum tix nyiex bwan tix lhang son ceu kaux Aux maix hoik yuh ceu pa mhawm ka daux rhawm maix heue. ⁹ Viang yuh ka mawx kawx maix ang pon ti sum nyiex, mawh kawn simex lih maix pa tak sang pon tix sum nyiex bwan son ceu kaux Aux heue. ¹⁰ "Yam in, Siyiex hoik grum naog yuh gumlox pa ah Nawh Cao mai hoik kieh aux deeh plud glawk ot keeing aux Davit mai ngawm piang dang ngeung meung Isarelax, awm mukheu Siyiex mai aux hoik sum nyiex bwan son ceu kaux Siyiex ceu pui Isarelax heue. ¹¹ "Aux hoik deuh teug bwan tan, ka daux pa koe gumlox sijax mukheu Siyiex, pa hoik yuh Nawh Cao tau mai pui Isarelax khankix heue. ¹² Khaix an, Sawlamon cung ka plak khu dee tan Siyiex ka plak sivoe cub pui hun Isarelax khawmuik mai nawh nih taix tix lih heue. ¹³ Sawlamon hoik yuh ti deuh grah tawng tix mu, plak lang phwan sawk plak vieh phwan sawk mai plak lhaong loe sawk mai nawh hoik yaog ti deuh daux sigreung biang bang mai nawh cung piang an, grux ngawng tix ka plak sivoe cub pui hun ceu pui Isarelax mai nih taix tix lih ka plak raoma, ¹⁴ ah nin, "Siyiex ceu pui Isarelax eue, Siyiex tang kaux pa awm maix ang lai koe pie tix kaux kawx ka daux raoma mai piang haktiex, Maix hoik priex ti hawt gumlox sijax mukheu Maix mai pa caux rhawm tau mai kawncau mau soi Maix, pa lawng ti hu plak sivoe Maix khawm rhawm cao kix khawmuik heue. ¹⁵ "Maix Cao hoik priex gumlox sijax mukheu pa hoik yuh Maix ka keeing aux Davit pa mawh kawncau Maix, Maix sikah ka jheeh tix mai hoik kieh gumlox an grum naog tau mai taix tix, awm ka daux singaix in heue. ¹⁶ Mawh kheu nan, Siyiex pui Isarelax eue, yam in priex ka gumlox sijax mukheu pa hoik yuh Maix ka keeing aux Davit pa mawh kawncau Maix, pa ah nin, Maix tak ang pon tix koe pa cud cha, sonsang pon pui tix kaux, pa sang ngawm plak sivoe Aux piang dang ngeung meung Isarelax, phan kawn simex maix khankix chix yuh satix tix ka daux krax pa yuh cao kix mai lawng ti hu ka daux gumlox beenli Aux awm hoik lawng maix ti hu plak sivoe Aux heue. ¹⁷ "Khaix in Siyiex pui Isarelax eue, kieh gumlox sikah Maix ka kawncau Maix Davit lih mawh tete liak! ¹⁸ "Viang mawh nan, mawh tak sang ot Siyiex tau mai pui khankix piang haktiex tete lie? Jhak heue, raoma mai raoma piang raoma khankix ang lai kub son Maix Cao, nyiex bwan pa hoik sum aux in tak sang mawh pa kied iak miex ding, ¹⁹ "Viang yuh nan kawx, jhak simi ka lox bwan rawg kawncau Maix mai ka lox khyox khaw nawh, Siyiex eue, Nghiet ka lox pa kok yo mai ka lox bwan rawg kawncau Maix ka plak sivoe Maix, ²⁰ Kieh ngai Maix Cao kia ngien ka plak see nyiex bwan in ku singaix mai ka plak see dee pa hoik ah Maix Cao tix sang deuh ceu kaux Cao tix, sonsang pon Maix Cao tix mhong lox bwan pa rawg kawncau Maix ka plak see dee in heue. ²¹ Maix nghiet pa khyox khaw khaing kawncau Maix mai khaing ceu pui Maix Isarelax khankix, yam rawg kix bwan ka see dee in, nghiet lox rawg lox mhaing kix khaing dee ot dee koe Maix Cao ka daux meung raoma mai yam mhong Maix Cao lox ankix, pluat ploi phimap kix liak! ²² "Phan pui tix kaux kaux koe pa lud ka paox plawg tix khankix mai phan kix khin nawh yuh pa tiextu mai bleeh mai yuh pa tiextu ka plak sivoe khu dee tan Maix ka daux nyiex bwan in, ²³ "Khaix an, nghiet lox kix khaing daux meung raoma mai yuh ti tawx krax prawng ka kawncau mau soi Maix khankix mai viex krax pa pawk bix piang pa caox caig mai kieh krax pa hoik yuh nawh deeh hoek piang kaing cao nawh mai tawx krax prawng ca pa rahsee piang nawh, awm koe pa rahsee nawh heue. ²⁴ "Phan ang mawh nan, phan ceu pui Isarelax khankix hoik koe pa som nai ka plak sivoe pui pa koeng kix tix cub, kheu jao grawng hoik lud kix ka Maix Cao mai deeh hoek mai krai doh ka ceu kaux Maix Cao mai rawg bwan mai yuh pa khyox khaw ka plak sivoe Maix ka daux nyiex bwan in, ²⁵ Khaix an, nghiet lox kix khaing meung raoma mai pluat ploi phimap ceu pui Maix Isarelax khankix mai deeh viex kix hoek ka haktiex pa hoik tawx Maix ka kix mai khawm ka keeing kix heue. ²⁶ "Yam hoik nyeep raoma tix mai yam ang rawm lhiex lai lih kheu jao grawng krax pa hoik lud kix ka Maix, yam deeh rawg kix bwan ka plak see dee in mai koe krax pa krai doh ka ceu kaux Maix mai phan kix deeh veeh tix khaing phimap pa hoik yuh tix khankix kheu jao grawng pa hoik tawx Maix krax tug krax kha piang kix, ²⁷ "Khaix an, nghiet lox kix khaing meung raoma mai pluat ploi phimap kawncau mau soi Maix, pa mawh ceu pui Maix Isarelax khankix, Maix Cao gau kix ka daux krax pa mhawm pa tak sang khaw kix ti hu mai ploi rawm lhiex khankix lih piang haktiex Maix, ka pa hoik tawx Maix ka ceu pui Maix khankix, awm sinngao pa sang pon kix ti cie heue. ²⁸ Yam koe sibhawm praix ka daux haktiex, yam koe jhawm saux preng, yam koe jhawm saux laux sium khaox yam koe muad mie ang ah mai yam hoek sigrit sido, yam lai lawm pui pa koeng ka daux haktiex veng cao kix khankix, phan koe preng ceu tix ang ah, jhawm saux ceu tix ang ah, ²⁹ Phan rawg bwan son patix ang ah, rawg mhaing son ceu patix ang ah, hoik mawh pa yuh tix khaing pui tix kaux kaux ang ah, khaing ceu pui Maix Isarelax khawmuik ang ah, yam tawng pui ku kaux ka beeh cien cao tix khankix mai nih taix tix ka plak see nyiex bwan in, ³⁰ Khaix an, nghiet lox kix khaing meung raoma dee ot dee koe Maix Cao, pluat ploi phimap nawh mai tawx ka pui ku kaux, awm pa hoik yuh nawh khawmuik, Maix Cao hoik tawng daux rhawm pui, mawh Maix nong nong pa tawng rhawm kawn pui. ³¹ Kieh kix lhat graung ka Maix Cao mai lawng daux krax Maix Cao glang kawn ot kix ka daux haktiex pa hoik tawx Maix ka keeing yix khankix heue. ³² Lheu khaing an, phan mawh grawng pui tang meung pa ang mawh ceu pui Maix Isarelax khankix, pa kaoh khaing haktiex dee pa kied singai, son min ceu kaux pa kied ting lhaong Maix Cao mai taix pa kied ting riang rao Maix Cao mai plawng taix pa hoik di Maix Cao lih yam bleeh kix tix hoek rawg bwan ka daux nyiex bwan in; ³³ Khaix an, nghiet lox kix khaing meung raoma dee ot dee koe Maix Cao mai yuh ti tawx awm krax pa kok yo pui tang meung ka Maix Cao khawmuik, sonsang tawng pui haktiex khawmuik ka min ceu kaux Maix mai sonsang lhat graung kix ka Maix Cao, awm yuh ceu pui Maix Isarelax khankix mai sonsang tawng kix ka nyiex bwan in pa hoik sum aux nawh mawh pa hoik kok tix ka min ceu kaux Maix Cao heue. ³⁴ Yam lih hu pui Maix khankix ti sang puing ka pui koeng ka daux naing mai yam ploi Maix kix hu dee mawx ang ah mai yam rawg kix bwan ka Maix Cao, ka plak see veng in pa hoik laug Maix ti deuh ka plak see nyiex bwan pa hoik sum aux ti tawx son min ceu kaux Maix Cao, ³⁵ Khaix an, nghiet lox rawg kix bwan mai khawm lox rawg mhaing kix khaing daux meung raoma mai pau rien priex ka grawng see cie kix liak! ³⁶ Yam lud kix ka Maix, kheu pui pa ang lud ang koe pie tix kaux kawx mai yam lih krax song rhawm Maix piang kix mai yam ap Maix ti tawx kix ka pui koeng mai yam teei pui koeng kix hu mawh pui pa giex laung ka haktiex dee singai dee dex ang ah, ³⁷ viang mawh nan, yam hoek kix khawm kaux cao tix ka daux haktiex dee pa hoik viex kix nawh mawh pui pa giex laung khankix mai yam deeh doh keud kix mai rawg mhaing tix ka Maix Cao, ka daux haktiex pa giex laung ka kix mai phan kix ah nin, "Yix hoik koe phimap heue. Yix hoik yuh pa lud mai hoik yuh pa caox caig khankix, ³⁸ mai yam deeh hoek kix ka Maix tau khawm rhawm tix mai khawm ju tix khawmuik ka daux haktiex pa giex laung kix, ka dee pa hoik viex kix hu awm pui pa giex laung mai phan kix rawg bwan ka plak see haktiex cao kix, pa hoik tawx Maix ka keeing kix khankix mai ka plak see veng pa hoik laug Maix ti deuh mai ka plak see nyiex bwan pa hoik sum aux ti tawx son min ceu kaux Maix Cao, ³⁹ Khaix an, nghiet lox bwan rawg kix mai khawm krax pa rawg mhaing kix khaing daux meung raoma dee ot dee koe Maix Cao mai pau rien ka grawh grawng see cie kix mai pluat ploi phimap ceu pui Maix khankix pa hoik lud ka Maix Cao heue. ⁴⁰ Yam in, Siyiex eue, aux rawg bwan, kieh ngai maix blah ti jhak mai kieh yhaok Maix nghiet ka lox bwan rawg pa hoik yuh tix ka dah dee in liak! ⁴¹ Yam in, Siyiex eue, yaog ti kaoh mai hu ka dee laux lee, Maix Cao, Maix mai khawm teug bwan riang rao Maix khankix heue. Siyiex eue, kieh cao giex kaing li Maix khankix mawh pa ceep kraung krax taoh mai kieh pui singax singeh Maix khankix gaux rhawm ka daux ceu pa mhawm heue. ⁴² Siyiex eue, paw doh veeh ti hu dee singai khaing plakngai pui pa hoik groi Maix rawm bee piang, deeh doh keud ka pa caux rhawm tix khankix ka pa hoik yuh Maix ka kawncau Maix Davit heue.

¹ Yam Sawlamon hoik rawg bwan, ngu lih hoek khaing daux raoma mai gleeing krax tan pa gleeing mai can ceu pa appong khankix mai min sibrawm Siyiex hoik naog daux nyiex bwan heue. ² Cao gaix kaing li khankix ang lai chix laig ka daux nyiex bwan Siyiex, mawh kheu hoik naog min sibrawm Siyiex ka daux nyiex bwan heue. ³ Yam hoik yaox kawn praix ceu pui Isarelax khawmuik ka hoik lih hoek ngu mai lih hoek min sibrawm Siyiex piang nyiex bwan, kix gup pakngai tix piang tiex see dee tawm kix simaox mai krub mai yaogyaw Siyiex ah nin, "Mawh kheu Nawh Cao mawh pa mhawm, krax caux rhawm Nawh Cao kaux cong leeing ju heue." ⁴ Khaix an, simiang mai pui hun khawmuik tan tobrie khankix ka plak sivoe Siyiex heue. ⁵ Simiang Sawlamon tan moi ra mheen ra rheng mu mai yung tix sien ra mheen mu, mawh kheu nan, simiang mai pui hun khawmuik yuh krax appong nyiex bwan Siyiex heue. ⁶ Cao giex kaing li hoek ti yuh kaing jhaw tix, ceu pui Lewix baox deeh hoek tau mai kraung ting pa tah tix lai rhax Siyiex, pa hoik yuh simiang ti deuh sonsang yaogyaw tix Siyiex ah nin, "Mawh kheu krax pa caux rhawm Nawh Cao kaux cong leeing ju, "yam tan Davit ti tawx pa yaogyaw tix ka kaing jhaw cie kix, cao giex kaing li khankix phlu teettawng sinum ka plak sivoe ngai kix, glang kawn cung pui Isarelax khawmuik heue. ⁷ Mai Sawlamon yuh daux sigreung bang pa koe ka plak sivoe nyiex bwan Siyiex singax singeh mai nawh tan krax tan pa gleeing mai klawn bee krax tan pa nhim khankix tan, mawh kheu jao ang khu tawng dee tan pa yuh Sawlamon lai uik rieb krax tan pa gleeing khankix mai khawm krax tan khaing nghox ca im mai khawm klon bee khankix heue. ⁸ Ka daux bawg yam an, Sawlamon khan kheu pawie aliah singaix mai pui Isarelax khankix ot tau mai nawh khawmuik, pa mawh cub pui hun pui pa kied ting tix cub jah ka khaing krax dee laig kix daux veng Hamat, tom hoek ka rawm klawng iak Ejiptux heue. ⁹ Ka daux daix singaix kix yuh pawie pa singax singeh tix mu, kheu yuh kix krax pa appong khu dee tan aliah singaix mai khan kheu pawie aliah singaix heue. ¹⁰ Ka daux khix aliah tixnga loe ngaix, nawh ploi pui khankix deeh ing ka nyiex gox cao kix, ka daux pa nyawm rhawm mai ka daux pa gaux rhawm kheu bwanson pa mhawm pa yuh Siyiex son Davit mai Sawlamon mai ceu pui nawh Isarelax khankix heue. ¹¹ Sawlamon hoik kaing sum tix nyiex bwan Siyiex mai nyiex ot simiang mai hoik grum naog yuh ceu ankix, pa kaoh khaing daux rhawm nawh khawmuik, sonsang yuh tix nyiex bwan Siyiex mai nyiex ot cao nawh heue. ¹² Khaix an, Simiang jhi tix ka Sawlamon, ponsawm mai ah nin ka nawh, "Aux hoik mhong lox bwan rawg maix mai hoik laug dee in mawh awm nyiex dee tan tix lhang son Tokaux Cao Aux heue. ¹³ Yam hoik nyeep Aux raoma mai yam ang rawm lhiex lai koe ang ah mai yam tawm Aux sido khankix ih to ma to koi ka haktiex ang ah mai yam ploi Aux jhawm saux uah hoek ka daux sinax pui khankix ang ah, ¹⁴ Phan pui pa kok ka min ceu kaux Aux khankix, yuh tokaux tix tiem mai rawg bwan mai sawg ka plakngai Aux mai deeh blak tix khaing krax pa caox caig pa yuh tix khankix, khaix an, Aux tak nghiet lox kix khaing daux raoma mai pluat ploi phimap kix mai pai jhawm saux kix moi khaing daux haktiex kix heue. ¹⁵ Yam in, ngai Aux tak blah ti jhak mai yhaok Aux tak daong ti nghiet ka lox rawg bwan pa yuh tix ka dee in heue. ¹⁶ Mawh kheu yam in, Aux hoik laug ti teei mai yuh nyiex in singax singeh, sonsang pon min ceu kaux Aux tix ot tan leeing ju mai ngai Aux, rhawm Aux tak ot tan sijheeng heue. ¹⁷ Phan mawh son maix, lawng ti hu ka plak sivoe Aux awm hoik lawng keeing maix Davit hu hawt ti yuh, awm can ceu pa hoik tawm Aux ka maix mai phan maix priex ti hawt ka been pa deuh Aux mai lox tat jhawm prawng Aux khankix, ¹⁸ mai Aux tak pang ti deuh dang ngeung meung haktiex maix kaux cong awm yuh Aux sijax mukheu tau mai keeing maix Davit ka daux pa ah Aux nin maix tak ang cud ang cha tix bawg kawx ka pui pa kwang ka daux meung Isarelax heue. ¹⁹ Phan pex veeh ti hu dee singai mai tik been pa deuh Aux khankix mai khawm lox tawm pingnyap pa hoik deuh Aux ka plak sivoe maix mai yuh kaing jhaw siyiex tang kaux tang hak khankix mai krub ka kix, ²⁰ Khaix an, Aux tak reeig ti tik kix khaing haktiex pa tawx Aux ka kix mai nyiex pa yuh Aux mawh pa singax singeh in, son min ceu kaux, Aux tak teei ti tik luan khaing plak sivoe ngai Aux mai tak yuh lox kab pa salao ka daux sinax ceu pui khankix heue. ²¹ Phan mawh son nyiex in, pa yaog Aux mawh pa kied ting lhaong, pui ku kaux pa tiang tix hu hawt nawh khankix tak koe krax pa daox deng mai ah nin; "Siyiex chix yuh nin ka haktiex in mai ka nyiex in kheu jao grawng ceu patix lie? ²² Khaix an, kix pawk ti ah nin, mawh kheu hoik tik hoik vud kix ka Siyiex keeing kix, pa viex kix lih hu khaing daux meung Ejiptux mai kix hu peung ka siyiex tang kaux tang hak mai krub ka kix mai yuh kaing jhaw kix, mawh kheu nan, Nawh Cao hoik viex krax tug krax kha in khawmuik hoek piang kix heue.

¹ Yam hoik sidah tixnga num, ka daux bawg yam hoik sum Sawlamon nyiex bwan Siyiex mai nyiex ot cao nawh. ² Veng pa hoik deeh tawx Hiram ka Sawlamon, Sawlamon deeh cox tix sum veng ankix mai deuh ceu pui Isarelax khankix ot tan heue. ³ Sawlamon hu ka veng Hamat Zawbax mai hoik rhim ti teei veng an heue. ⁴ Nawh baox deeh sum veng Tamaw ka daux tiagtu mai hoik sum veng pa sang priex kraung khrai sinngao tix khankix ka daux meung Hamat heue. ⁵ Nawh sum veng Biet Hawron plak laong, veng Biet Hawron plak seh, mawh veng pa kaux cong tau mai guh veng, siviex veng mai jhong siviex khankix, ⁶ Khawm veng Balat mai veng dee priex khraung khrai sinngao khawmuik pa hoik koe ka Sawlamon mai veng priex ling lawx khawmuik mai veng pui naing brung khankix mai can veng pa koe rhawm Sawlamon ti sang sum ka daux veng Yerusaliem mai piang gawng Lebanon mai ka daux haktiex dee kwang dee pang nawh khawmuik khawm leeing heue. ⁷ Pui khawmuik pa kawn deuk mawh ceu pui Hitix, ceu pui Amawrix, ceu pui Perazix, ceu pui Hiwix mai ceu pui Yebusix, pa ang tie mawh ceu pui Isarelax, ⁸ an mawh cub doeh ru kix pa deuk ka daux haktiex khaix kix, pa ang pui Isarelax khankix nyang bax uik yuh kix laux leeing khaing ceu pui ankix, Sawlamon hoik thux kix yuh kaing jhaw, pa nu pa kin tom hoek daux in singaix heue. ⁹ Sawlamon ang kieh pui Isarelax khankix mawh siliex son kaing jhaw nawh, tiblah mawh pui naing, cao kaing naing ka daux cub cao kaing pui nawh khankix, cao kaing naing cub ling lawx naing nawh khankix mai pui naing brung nawh khankix heue. ¹⁰ Tang kaux khankix mawh cao kaing ting pa yaog simiang Sawlamon ka ra yieh tixphwan kaux, sonsang mawh pa kwang piang pui khankix heue. ¹¹ Yam in simiang Sawlamon deeh viex kawn bun Pharaw hoek ka nyiex pa hoik sum nawh khaing veng Davit. Mawh kheu nawh ah nin "Moeng aux tak ang pon ti ot ka daux nyiex Davit pa mawh simiang ceu pui Isarelax, grawh grawng nawh, pa deeh hoek teug bwan Siyiex mawh pa singax singeh heue. ¹² Khaix an, Sawlamon tan krax tan pa gleeing ka Siyiex, piang khu dee tan pa sum ti deuh sivoe sidub nyiex bwan, ¹³ awm koe been krax ku singaix mai tan awm koe lox tawm pingnyap Mose, son singaix twah, yam haok khix khraox mai son pawie pa hoik tat kix ti yuh loe bawg ku num, pawie ih blah pa ang viex susaix, pawie Azumax ka daux aliah vang twah tix bawg, pawie nghox khraox mai pawie nyiex gox bwan, pawie Takene khankix heue. ¹⁴ awm pa hoik tawm keeing nawh Davit, nawh tawx beeh glawm ka cao gaix kaing li khankix son kaing jhaw cie cao kix, cub pui Lewix son kaing jhaw cie cao kix sonsang yaogyaw mai yuh kaing jhaw plak sivoe cub cao giex kaing li khankix, awm beeh glawm pa lo kix ngaix mawx ngaix an mai cao pau diang siviex cub mawx cub an hawt diang siviex ku mu heue. Grawh grawng nawh, Davit pa mawh pui Siyiex hoik tawm an ka kix heue. ¹⁵ Kix ang cu ti gwieh khaing gumlox pa tawm simiang ka cub cao giex kaing li khankix mai cub pui Lewix khankix, son grawng ceu ankix mai son grawng sinngao khankix heue. ¹⁶ Yam in grawng kaing pa hoik yuh Sawlamon khankix hoik grum khre tix mhawm, jah singaix sum nawh jaong nyiex bwan Siyiex, tom hoek bawg yam hoik yuh nawh nyiex an mhawm heue. Mawh kheu nan, nyiex bwan Siyiex hoik grum hoik khawmuik heue. ¹⁷ Khaix an, Sawlamon hu ka veng Ezion Gebax mai veng Elok, pa koe praok rawm sigrit sigra daux Edom heue. ¹⁸ Hiram ploi reu ting khankix hu ka nawh daux tawm taix kawncau nawh khankix tau mai kawncau nawh khankix pa hoik tawng grawng rawm sigrit sigra, kix hu taux mai kawncau Sawlamon, ka veng Awphirax mai kix pon teei ti viex khri pon yieh tixphwan talantan khaing tan mai viex hoek ka simiang Sawlamon heue.

¹ Yam mhong nang laux simiang Shebax ka grawng pa ao min Sawlamon, nawh hoek ka veng Yerusaliem sonsang cheuk tix yaox Sawlamon ka gumlox chawk pa kied nu mai cub pui pa hawt khaix nawh khankix tom nie, cub kala uk pa tang ti viex ceu pa sioe bhawng, khri tom nie mai siang simaox pa kied laoh lie khankix heue. Yam hoek nawh ka Sawlamon, nawh sikah can grawng ceu pa koe daux rhawm tix khankix mai nawh heue. ² Mawh kheu nan, Sawlamon deeh pawk lox pa chawk nawh khawmuik; can pa kied nu tix ceu kawx ang koe ka son Sawlamon mai pa ang nawh pon krai ang koe tix ceu kawx heue. ³ Yam yaox nang laux simiang Shebax ka koe pingnya cuyi Sawlamon, grawng pa hoik sum nawh nyiex khankix, ⁴ pa ih piang pheen sawm nawh, dee ngawm kawncau nawh khankix, kaing jhaw cao pa pau tix khan kheu nawh khankix mai kraung ceep kix, cao pa giex kawk nyaux nawh mai kraung ceep kix mai krax diang laig nawh sonsang hu nawh ka nyiex bwan Siyiex, nawh hoik tua khwan luan paux ka sipiag heue. ⁵ Khaix an, nawh ah nin ka simiang, "An mawh grawh grawng pa hoik mhong aux ka daux haktiex ot tix, pa mawh lox maix mai pingnya cuyi maix khankix hoik mawh tete heue. ⁶ Viang yuh ka mawx kawx, aux ang nyang yum rhawm ka gumlox kix, tom ang aux nyang bax hoek yaox ceu inkix ka ngai cao tix; yam in grawng pa kied ting lhaong pingnya cuyi maix khankix tix plak, ang nyang mawh pa hoik krai tix ka aux tete heue. Maix kawn nie blon koe krax pa ao min khaing krax pa hoik mhong aux heue. ⁷ Kieh pui maix mai kawncau mau soi maix khankix pa cung ti ot sijheeng ka plak sivoe maix mai pa mhong ka gumlox pingnya cuyi maix khankix koe bwanson heue. ⁸ Kieh yaogyaw bwanson ka Siyiex maix, pa hoik koe krax pa khaw rhawm ka daux maix mai pa hoik yaog ti deuh maix piang dang ngeung Nawh Cao, sonsang mawh maix simiang son Siyiex maix heue. Mawh kheu Siyiex maix hoik moh ka ceu pui Isarelax khankix, sonsang pang Nawh Cao ti deuh kix leeing ju, mawh kheu nan, Nawh Cao hoik kieh maix mawh simiang piang kix, sonsang prawng ca maix kix ka daux pa rahsee heue." ⁹ Khaix an, nawh tawx khri tixyieh tixnga talantan mai can ceu pa sioe bhawng tom nie mai siang simaox pa kied koe ngawh koe jum khankix ka simiang; ceu pa sioe bhawng pa awm pa hoik tawx laux simiang Shebax ka simiang Sawlamon, ang lai koe heue. ¹⁰ Cub kawncau mau soi Hirix mai kawncau mau soi Sawlamon pa hoik viex khri khaing veng Awphirax, viex khaox Alagum mai siang simaox pa laoh lie khankix baox hoek ka nawh heue. ¹¹ Simiang yuh plawng khaox tieb hawt daux krax ka khaox Alagum, son nyiex bwan Siyiex mai son nyiex haw simiang, nawh baox deeh yuh ting mai ting koe maox khankix ka khaox an son pui pa ah lai rhax khankix mai ceu inkix mawh pa ang sax yaox tix sivoe in ka daux haktiex Yudax heue. ¹² Yam in simiang Sawlamon, hoik tawx can ceu pa simie laux simiang Shebax khawmuik, can ceu pa mhaing nawh ti cie khankix, caw tix kied lheu khaing pa hoik viex nawh tix tawx ka simiang heue. Mawh kheu nan, laux simiang deeh veeh ti ing ka haktiex cao nawh mai cub kawncau mau soi nawh khankix heue. ¹³ Krax cien khri pa hoik hoek ka Sawlamon ku num hoik koe liah yieh tixnga liah talantan, ¹⁴ Lheu khaing an can pa hoik viex cao lai pa hu krax mai cao yuh lai geu khankix hoek mai simiang haktiex Arebia, khawmuik mai simiang pa kwang haktiex khankix hoik viex ti tawx khri mai mau ka Sawlamon yam an heue. ¹⁵ Simiang Sawlamon, yuh ti deuh plah tiebtie naing pa kied ting ra yieh plah, ka khri pa hoik tawk tix mawh plah khankix; son plah tiebtie naing an khankix ku mu, khri hoik uik ka liah yieh shekhe heue. ¹⁶ Nawh baox deeh yuh plah tiebtie naing pa iak an khankix ka khri pa hoik tawk tix mawh plah khankix loe yieh plah, son plah tiebtie naing an khankix ku mu, khri hoik uik ka loe yieh shekhe heue. Simiang hoik deuh tix priex ankix ka daux nyiex pa koe ka daux nong piang gawng Lebanon heue. ¹⁷ Lheu khaing an simiang baox yuh dang ngeung pa kied ting ka nga sang tix mu mai hoik om nawh ka khri nawnaw heue. ¹⁸ Dangngeung an koe liah glawk tau mai dee dig pa yuh tix ka khri mai plawng khaox neung taix khankix hoik koe ka plaok dee ngawm plak mawx plak an mai sivai sangsi ra mu hoik cung tix ot plaok plawng khaox neung taix an khankix heue. ¹⁹ Sivai sangsi kao ra mu hoik cung ti ot piang praok glawk bawng ankix liah glawk, ceu pa awm in mawh pa ang sax yuh tix ka meung haktiex tang dah tang dee pie tix meung kawx heue. ²⁰ Kawk nyaux simiang Sawlamon khankix hoik mawh pa yuh tix ka khri khawmuik mai khawm kawk nyaux pa koe ka daux nyiex daux nong piang gawng Lebanon hoik mawh pa yuh tix ka khri nawnaw heue. Ang mawh pa yuh tix ka mau pie tix mu kawx; mawh kheu hoik sawn mau awm pa ang koe ceu ka daux singaix baux ju kwang Sawlamon ka haktiex yam an heue. ²¹ Mawh kheu reu ting cub simiang khankix, hoik hu ka veng Tashi, tau mai cub kawncau mau soi Hiram heue. Ka daux loe num tix bawg, reu ting pa yuh lai geu an khankix, hoik bleeh tix hoek mai viex khri, mau, nga sang, rao khaox mai kaong khankix hoek heue. ²² Mawh kheu nan, simiang Sawlamon kied nie blon magmi mai koe pingnya cuyi khaing simiang piang haktiex khawmuik heue. ²³ cub simiang piang haktiex khawmuik, sawg tix hoek ka plak sivoe ngai Sawlamon, sonsang nghiet tix ka pingnya cuyi nawh khankix, pa hoik sau Siyiex tix priex ka daux rhawm nawh heue. ²⁴ Pui ku kaux hoik viex totaix tix, kraung mau kraung khri mai kraung ceep, kraung naing mai ceu pa sioe bhawng khankix, brung mai la khankix, awm pa hoik tat kix tix num hoik tix num heue. ²⁵ Simiang Sawlamon koe kawg brung pon rheng lhang son ling lawx naing brung mai khawm pui naing brung khankix tix mheen ra rheng kaux, pa hoik pang nawh ti deuh ka daux veng priex ling lawx naing brung mai pa koe tau mai simiang ka daux veng Yerusaliem heue. ²⁶ Mawh kheu nan, nawh kwang piang cub simiang an khawmuik, jah khaing rawm klawng Yufrethix, tom hoek ka haktiex pui Philitix mai hoek tom dee singai ka mee haktiex meung Ejiptux heue. ²⁷ Simiang yuh mau ang lai koe ngawh jum awm lon simaox ka daux veng Yerusaliem mai nawh yuh pang khaox Arit haoh hun awm khaox ruh, pa koe ka daux lung haktiex heue. ²⁸ Kix viex brung khankix hoek ka simiang Sawlamon, khaing meung Ejiptux mai khaing meung haktiex ku meung khawmuik heue. ²⁹ Yam in grawng kaing pa deuk simiang Sawlamon ti yuh yam jah tom hoek dee sidah khankix, ang mawh pa hoik tiem ti deuh ka daux phuk lai cao jhai Natan, ka daux phuk lai lox jhai Ahiyax pa mawh pui veng Shilaw mai ka daux phuk lai cao pa yaox riang susai Idado, pa dex dawd mai pa plak jhi grawng Yerobom kawn simex Nebat lie? ³⁰ Simiang Sawlamon kwang piang ceu pui Isarelax khankix ka daux veng Yerusaliem tixpon num heue. ³¹ Khaix an, simiang Sawlamon laux lee tix taux mai keeing nawh khankix mai kix sipaung nawh ka aux veng keeing nawh simiang Davit heue. kawn simex nawh Rehobom deeh plud ti kwang haktiex ka dee ot nawh heue.

¹ Rehobom hu ka veng Shekhim, mawh kheu ceu pui Isarelax khawmuik lih hu ka veng Shekhim sonsang deeh yaog nawh mawh simiang heue. ² Ceu ankix hoik lih ti koe, yam mhong Yerobom kawn simex Nebat ka grawng an, nawh deeh yaog tix ing khaing meung Ejiptux, ka daux dee hoik to nawh mox tix khaing simiang Sawlamon yam an heue. ³ Kix ploi pui hu kok nawh hoek mai Yerobom mai ceu pui Isarelax khankix bleeh tix hoek ma Rehobom ah nin, ⁴ "Keeing maix hoik yuh beeh glawm yix cien, mawh kheu nan, yam in deeh kieh kaing beeh glawm cien keeing maix mai beeh glawm cien nawh khankix, pa sau nawh ti deuh ka piang yix, deeh kieh chaong liak. yix tak yuh kaing jhaw maix heue. ⁵ Nawh ah nin ka kix, "Deeh hoek ka aux khaix in daux loe singaix, "mai pui khankix lih hu khaing nawh heue. ⁶ Khaix an, simiang Rehobom kum tau mai cub kuad song pa cung tix ot ka plak sivoe keeing nawh simiang Sawlamon, glang yam kawn im ju nawh ah nin, "Mawh sang tawx pex krax keud ka aux sonsang pon pawk aux gumlox pui inkix yuh ka mawx lie? ⁷ Kix krai ah nin ka nawh, "Phan maix koe pa caux rhawm ka pui inkix mai koe pa khaw rhawm ka kix, sikah lox ceu pa mhawm ka kix, kix tak mawh kawncau mau soi maix leeing ju heue. ⁸ Nawh thiang gumlox krax keud pa tawx kuad riex ju khankix ka nawh mai nawh deeh kum tau mai pui awn ju pa ting lhaong tau mai nawh khankix mai cung ti ot ka plak sivoe nawh heue. ⁹ Nawh ah nin ka kix, "Mawh sang tawx pex krax keud ceu patix ka aux lie? ex tak sang deeh pawk gumlox pui inkix pa hoik sikah ka aux ka daux krax pa ah kix nin, kieh beeh glawm pa hoik sau keeing maix ti deuh piang yix deeh chaong liak. ¹⁰ Khaix an, pui awn ju pa ting lhaong tau mai nawh khankix sikah ka nawh ah nin, "Awm krax pa yuh nin maix tak sikah ka pui pa hoik sikah lox ankix ka maix ka daux krax pa ah nin, keeing maix yuh beeh glawm yix cien, viang mawh nan maix yuh ankix chaong piang yix liak. Mai maix tak ah nin ka kix, giien tiah aux tak mawh pa nie lheu ting khaing nyoi keeing aux heue. ¹¹ Yam in awm hoik sau keeing aux ti deuh beeh glawm pa cien piang pex, aux tak baox naok ti sau khaox glawm pa lheu cien piang pex, keeing aux hoik sivied pex ka khaox puat, viang mawh nan, aux tak sivied pex ka tamtim heue ¹² Mawh kheu nan, Yerobom mai pui khawmuik deeh hoek ka Rehobom, daux loe ngaix tix ngaix, awm bawg yam pa hoik tat simiang ti deuh ah nin, "Deeh hoek ka aux ka daux loe ngaix tix ngaix heue. ¹³ Khaix an, simiang deeh pawk lox kix daux krax pa kied kin sigrien sigre, simiang Rehobom, thiang ka krax keud pa tawx kuad riex ju khankix, ¹⁴ mai nawh sikah ka kix awm krax keud pa tawx pui awn ju khankix ka nawh ka daux pa ah nin, keeing aux hoik yuh beeh khaox glawm pex cien, viang mawh nan, aux tak deeh baox naok piang an; keeing aux hoik sivied pex ka khaox puat, viang mawh nan, aux tak sivied pex ka tamtim heue. ¹⁵ Mawh kheu nan, simiang ang cu ti nghiet ka gumlox pui khankix, kheu jao hoik mawh grawng pa kaoh khaing Siyiex, sonsang pon Siyiex ti kieh gumlox Nawh Cao grum naog, ka pa hoik sikah Nawh Cao ti deuh ka daux tawm taix Ahiyax pa mawh pui veng Shilaw, ka Yerobom kawn simex Nebat heue. ¹⁶ Yam in, yam yaox pui Isarelax khawmuik ka ang simiang lai cu ti nghiet ka gumlox kix, pui khankix hoik deeh pawk ti ah nin ka simiang heue. Nyum cie yix khaing daux Davit mawh ceu patix lie? Yix ang koe krax pa sang pon sinngao ka daux kawn simex Yessie heue. Pui ku kaux deeh ing ka nyiex gox cao tix heue, mawh kheu nan, pui Isarelax khankix deeh ing ka nyiex gox cao kix yam an heue. ¹⁷ Viang mawh nan, Rehobom ca kawn kwang piang ceu pui Isarelax, pa ot ka daux veng meung Yudax heue. ¹⁸ Khaix an, simiang Rehobom, ploi Hadawram, pa mawh cao kiang pa koh keen hu, viang mawh nan, ceu pui Isarelax khankix dheem nawh ka lon simaox mai nawh yum heue. Mawh kheu nan, simiang Rehobom nied ti haok piang ling lawx naing brung nawh, sonsang to ti ing ka veng Yerusaliem heue. ¹⁹ Mawh kheu nan, ceu pui Isarelax khankix hoik tieh feen ka doeh nyiex ma Davit tom hoek daux singaix in heue.

¹ Yam hoik hoek Rehobom ka veng Yerusaliem, nawh kraix khrawm pui, khaing daux doeh nyiex ma Yudax mai doeh nyiex ma Binyamin khankix 180, 000 Kaux, pa mawh pui pa hoik laug tix son pui naing khankix mai sonsang deeh pon taoh kix ti teei meung haktiex an hoek ka Rehobom heue. ² Viang mawh nan, gumlox Siyiex hoek ka Shemayax, pa mawh pui Siyiex ah nin, ³ "Krai ka Rehobom kawn simex Sawlamon, pa mawh simiang Yudax mai ka ceu pui Isarelax khawmuik pa ot ka daux haktiex Yudax mai baoh haktiex Binyamin khankix ah nin, ⁴ Siyiex ah awm in; Maix tak ang pon ti hu puing ka puxaik maix khankix heue. Kieh pui ku kaux deeh blak ti ing ka nyiex tix, mawh kheu ceu in mawh pa kaoh khaing Aux heue." Mawh kheu nan, kix hoik cu nghiet ka gumlox Siyiex mai hoik deeh blak ti ing khaing krax pa sang hu puing tix Yerobom heue. ⁵ Mawh kheu nan, Rehobom ot ka daux veng Yerusaliem mai nawh deeh cox sum ti deuh veng khankix son krax pa tieb tie ka daux meung Yudax heue. ⁶ Nawh cox sum veng Bieliehiem, veng Etham, veng Tekaw, ⁷ Veng Biet, Zurax, veng Sokhaw Veng Adulam, ⁸ Veng Gat, veng Maresha, veng Ziphax, ⁹ Veng Adawrem, veng Lakhishax, veng Azeka, ¹⁰ Veng Zora, veng Ayalon mai veng Hebron, pa koe ka daux haktiex Yudax mai baoh haktiex Binyamin khankix deeh mawh veng pa kaux cong khawmuik heue. ¹¹ Nawh baox deeh yuh nyiex tab tix khankix kaux cong mai nawh deuh cao kaing naing khankix ka daux kix mai priex ti deuh krax ih krax un, rawm bee mai rawm plix siiet khankix tan heue. ¹² Ka daux veng ku veng, nawh hoik priex ti deuh kraung plah tiebtie rhiem mai pliah khankix mai yuh ankix kied kaux cong, kheu hoik ot ceu pui Yudax mai ceu pui Binyamin khankix ka plak nawh heue. ¹³ Khaing haktiex dee kwang pang kix khawmuik cao giex kaing li mai pui Lewix, pa hoik koe ka daux meung Isarelax khawmuik hoik ot tau mai nawh heue. ¹⁴ Pui Lewix khankix hoik prah haktiex dee ot tix mai kraung khrai sinngao tix mai kix hoik hoek ti ot ka daux meung Yudax mai ka daux veng Yerusaliem heue. Mawh kheu Yerobom mai cub kawn simex nawh khankix hoik thiang ti tik kix, khaing kaing pa yuh kix cao giex kaing li son Siyiex heue. ¹⁵ Khaix an, nawh deeh yaog ti deuh cao giex kaing li son tokaux cao nawh, son dee pa lhaong, son phicaox mai son riang kawn moi pa hoik yuh nawh khankix heue. ¹⁶ Khaix hoik lih hu cub pui Lewix, can pui khaing daux ru ceu pui Isarelax khawmuik, hoik tat rhawm ti sawg ka Siyiex ceu pui Isarelax, kix hoek ka veng Yerusaliem, sonsang appong kix krax tan ka Siyiex keeing kix dix heue. ¹⁷ Mawh kheu nan, kix hoik yuh meung Yudax kaux cong mai kix yuh krax ot Rehobom pa mawh kawn simex Sawlamon, ting riang rao loe num kheu jao grawng lawng kix ti hu ka daux krax hu Davit mai Sawlamon khankix son loe num heue. ¹⁸ Khaix an, Rehobom, teei ti moeng Mahalat, kawn bun Yerimot, kawn simex Davit, khaing Abihelax pa mawh kawn bun Eliabax, kawn simex Yessie, son tokaux cao tix heue. ¹⁹ Nawh keh ti tawx kawn simex loe kaux, pa mawh Yushax, Shamariyax mai Zaham ka son nawh heue. ²⁰ Khaix Mahalat, nawh baox teei ti moeng Makha, pa mawh kawn saux Apsalom mai nawh keh ti tawx Abiyax, Atie, Ziza mai Shelawmit, ka son nawh heue. ²¹ Yam in Rehobom moh Makha pa mawh kawn saux Apsalom, lheu khaing moeng iak nawh khankix khawmuik heue. Mawh kheu Rehobom hoik teei ti koe moeng ting kao daix kaux mai moeng iak tigliah kaux mai nawh hoik pon kawn simex tix tixnga daix kaux mai kawn bun tigliah kaux heue. ²² Rehobom yaog ti deuh Abiyax pa mawh kawn simex Makha mawh cao kaing ting, sonsang mawh nawh cao pa thong bungka daux sinax puxaik nawh khankix, grawh grawng nawh, nawh hoik keud ti sang kieh nawh mawh simiang heue. ²³ Nawh yuh kaing ka daux pa lhak lhiem tix mai nawh tawx kawn simex tix khankix tah ot ka baoh haktiex kwang pui Yudax mai pui Binyamin, ka dee koe veng pa kaux cong an khankix mai nawh tawx priex preem tom nie ka kix heue. Nawh baox deeh sawg ti tawx kix koe moeng tom nie heue.

¹ Yam in khaix hoik luan ceu ankix, Rehobom hoik pang meung haktiex kwang tix kaux cong, yam hoik kied koe riang rao nawh, nawh hoik tik hoik vud ka lox tat jhawm prawng Siyiex mai ceu pui Isarelax khawmuik kawx hoik hu tau mai nawh heue. ² Ceu ankix hoik lih ti mawh ka daux phwan num tix num yam hoik kwang Rehobom ka haktiex, Shishak pa mawh simiang meung Ejiptux, hoek ti puing ka veng Yerusaliem kheu jao hoik lud kix ka Siyiex, ³ tau mai ling lawx naing brung tix rheng ra yieh lhang, cub pui naing brung liah mheen kaux mai khawm can pui pa ang lai uik simin khankix, pa hoek tau mai nawh khaing daux meung Ejiptux, pa mawh pui meung Lubim, pui meung Sukim mai pui meung Ethiopia khankix heue. ⁴ Nawh hoik rhim ti teei veng pa kaux cong meung Yudax khankix mai hoek ka veng Yerusaliem heue. ⁵ Khaix an cao jhai Shemayax, hoek bleeh ka Rehobom mai cub cao kaing pui Yudax khankix, pa hoik kraix khrawm paox ti hoek ka daux veng Yerusaliem, kheu jao grawng Shishak, nawh tom ah nin ka kix, "Siyiex ah nin, pex hoik tik vud Aux, mawh kheu nan, Aux baox deeh prah pex ka daux tawm taix Shishak heue. ⁶ Mawh kheu nan, cao kaing pui Isarelax khankix mai simiang hoik yuh tokaux tix tiiem mai kix ah nin, Siyiex mawh pa rahsee heue. ⁷ Yam in, yam hoik yaox Siyiex ka hoik yuh kix tokaux tix tiiem, gumlox Siyiex hoik deeh hoek bleeh ka Shemayax ah nin, kix hoik yuh tokaux tix tiiem, mawh kheu nan, Aux tak yuh ti tawx krax pa sang luad luan kix tiblah heue. Krax pa song rhawm Aux ang pon ti hoek piang veng Yerusaliem, khaing tawm taix Shishak heue. ⁸ Viang yuh nan kawx, kix tak sang mawh kawncau nawh, sonsang pon kix ti chix gwieh ti tawng kaing jhaw Aux, khaing kaing jhaw haktiex ceu pui khankix heue. ⁹ Mawh kheu nan, Shishak, pa mawh simiang meung Ejiptux, hoik hoek ti puing ka veng Yerusaliem mai teei sinngao nyiex bwan Siyiex mai khawm sinngao nyiex simiang khankix mai nawh hoik teei kuceu hu khawmuik heue. Nawh baox deeh teei ti viex kraung tiebtie plah khri pa hoik yuh Sawlamon khankix heue. ¹⁰ Son tang ankix, simiang Rehobom hoik deeh yuh kraung tiebtie plah tawng lheung khankix mai nawh ap ti tawx ankix ka daux tawm taix cub cao kaing naing pa pau veng khankix pa hoik pau diang laig daux nyiex simiang heue. ¹¹ Yam laig simiang ka daux nyiex bwan Siyiex yam mawx ang ah, cao pau diang khankix hu mai viex kraung tiebtie plah ankix lih; khaix an, kix deeh teei ti priex nawh ka daux lawg cao pa pau diang khankix heue. ¹² Yam yuh nawh tokaux tix tiiem, krax pa song rhawm Siyiex hoik deeh veeh ti hu khaing nawh, sonsang ang Nawh Cao lai yuh krax laux leeing piang nawh khawmuik mai ceu pa mhawm lih koe ka daux meung Yudax heue. ¹³ Mawh kheu nan, simiang Rehobom, hoik kieh riang rao tokaux cao tix ting lhaong mai kwang ka daux veng Yerusaliem heue. Yam yaog Rehobom ti mawh simiang, ju nawh hoik koe tixpon tix num mai nawh hoik kwang ka daux veng Yerusaliem pa mawh veng pa hoik laug Siyiex ti deuh khaing daux ru pui Isarelax khankix, sonsang deuh Nawh Cao min ceu kaux tix tan heue. Ceu kaux miex nawh mawh Nemax kawn bun ceu pui Amon heue. ¹⁴ Nawh yuh pa caox caig kheu jao grawng ang nawh lai priex rien rhawm tix, sonsang sawg nawh ti yaox Siyiex heue. ¹⁵ Grawng kaing pa yuh Rehobom, khankix tom jah tom sidah, ang hoik mawh kix pa tiiem ti deuh grawng ankix ka daux phuk lai cao jhai Shemayax mai ka daux phuk lai cao pa yaox riang susai Idado, pa dex dawd mai grawng doeh ru pui khankix lie? naing khankix hoik koe sinax Rehobom mai Yerobom glang baux singaix im ju kix heue. ¹⁶ Mawh kheu Rehobom, hoik laux lee tix tau mai keeing nawh mai kix sipaung nawh ka daux veng Davit heue. Khaix an, kawn simex nawh Abiyax deeh plud ti kwang haktiex ka dah dee ot nawh heue.

¹ Ka daux num hoik kwang simiang Yerobom, ka haktiex kao daix num tix num, Abiyax yaog ti mawh simiang piang meung Yudax heue. ² Nawh kwang daux Yerusaliem loe num heue. Ceu kaux miex nawh mawh Makha, kawn bun Awrelax, khaing veng Gibia heue. naing koe sinax Abiyax mai Yerobom yam an heue. ³ Abiyax laug ka pui naing pa koe rhawm vao rhawm cong pon sien kaux, sonsang yuh naing heue. Yerobom kawx laug pui naing pa koe rhawm vao rhawm cong daix sien kaux sonsang deeh puing ka nawh heue. ⁴ Khaix an, Abiyax cung piang gawng Zemarem, pa koe ka daux baoh haktiex gawng lua ceu pui Epharem ah nin, "Yerobom mai ceu pui Isarelax khankix eue, Nghiet ka aux heue. ⁵ Mawh ang pex nyang tawng ka hoik tawx Siyiex ceu pui Isarelax, krax kwang krax pang piang haktiex Isarelax ka Davit leeing ju, ka nawh mai ka kawn simex nawh khankix, ka sijax mukheu pa hoik yuh ka kix lie? ⁶ Viang yuh nan kawx, Yerobom kawn simex Nebat, pa mawh kawncau Sawlamon kawn simex Davit, hoik yaog ti kaoh mai tieh feen ka simiang cao nawh heue. ⁷ Khaix an, pui pa lu lhia jhawm khankix kraix khrawm ti hoek ka nawh mai hoik yuh tokaux cao kix koe riang rao, sonsang tieh feen tix ka Rehobom kawn simex Sawlamon, yam kawn awn ju Rehobom mai yam ang nawh nyang bax koe krax tawng yung mai yam ang nawh nyang bax pon ti tiebtie ka kix heue. ⁸ Yam in maix keud ti sang pon khre ti puing meung haktiex Siyiex, pa koe ka daux tawm taix cub kawn simex Davit khankix; mai maix mawh pa kied nie haoh hun mai riang kawn mawie hoik koe tau mai maix tan heue. ⁹ Ang hoik mawh maix pa tik cub cao giex kaing li Siyiex, pa mawh cub kawn simex Arun mai ceu pui Lewix khankix mai hoik deeh yaog ti deuh cao giex kaing li khankix son tokaux cao tix awm ceu pui haktiex tang dah tang dee khankix mai can pui pa hoek ti appong tokaux cao tix tau mai kawn mawie iak tix mu mai khawm yung aliah mu, tak pon ti mawh cao giex kaing li tix kaux, khaing ceu ankix pa ang mawh Siyiex khankix lie? ¹⁰ Viang mawh nan, phan mawh son yix, Siyiex mawh Siyiex yix mai yix ang tik vud ka Nawh Cao; mai cao giex kaing li pa yuh kaing jhaw son Siyiex khankix, mawh cub kawn simex Arun mai pui Lewix, khankix pa pau ti yuh beeh glawm kaing jhaw cie cao kix heue. ¹¹ Kix gleeing krax tan pa gleeing mai ceu pa nyawm sioe bhawng khankix son Siyiex ku ngawb ku bo, kix hoik khan ti deuh blah piang pheen pa singax mai deeh khre jawk ten khri tau mai kawk ngu nawh khankix sonsang mawh pa tok ti riang ku bo mawh kheu ex priex ti een lox tawm pingnyap Siyiex ex, viang mawh nan, pex hoik tik vud ka Nawh Cao heue. ¹² Jhak heue, Tokaux Siyiex ot tau mai ex, mawh cao kaing ex mai cao giex kaing li Nawh khankix kieh lox teettawng sinum sonsang tawx lox rien rhawm ka pex heue. Kawn praix Isarelax khankix eue, paw doh puing ka Siyiex keeing pex khankix liak! mawh kheu pex tak ang pon ti pex heue. ¹³ Viang mawh nan, Yerobom yuh naing jawm sonsang hu lai lawm tix ka plak khaix kix heue. Mawh kheu nan, kix ot ka plak sivoe pui Yudax mai pa yuh naing jawm ot ka plak khaix kix heue. ¹⁴ Jhak pui Yudax khankix ka hawt vung viang tix, kix hoik daox deng ka hoik koe pui naing ka plak sivoe tix mai khawm ka plak khaix tix khawm ra plak; mai kix riag yo lox tix ka Siyiex mai cao giex kaing li hoik phlu lox teettawng tix sinum heue. ¹⁵ Khaix an, pui Yudax khankix riag yo awm hoik riag yo pui Yudax khankix, ceu ankix hoik lih ti mawh mai Siyiex tawx krax pa som ka Yerobom mai ceu pui Isarelax khawmuik, sivoe Abiyax mai pui Yudax khankix heue. ¹⁶ Ceu pui Isarelax khankix to sivoe pui Yudax mai Siyiex ap ti tawx kix ka daux tawm taix pui Yudax heue. ¹⁷ Khaix an, Abiyax mai cub pui nawh khankix hoik mug kix yum ka daux krax pa kied ting; mawh kheu nan, pui pa hoik laug kix ti teei khaing pui Isarelax khankix hoik goh ti yum phwan sien kaux heue. ¹⁸ Mawh kheu nan, ceu pui Isarelax khankix hoik som nai ka daux bawg yam an mai ceu pui Yudax khankix hoik pex ka kix, kheu jao hoik een kix rhawm tix ka Siyiex keeing kix heue. ¹⁹ Abiyax hoik pheet ti hawt khaix Yerobom mai nawh teei veng khankix, pa mawh veng Betelax, tau mai nyiex yaong nawh khankix mai veng nyiex yaong nawh khankix, khaing nawh heue. ²⁰ Mawh kheu nan, Yerobom, ang lai koe riang rao ka daux baux ju Abiyax mai Siyiex ciyang ka nawh mai nawh yum heue. ²¹ Viang mawh kawx nan, Abiyax hoik nied ti baox koe riang rao mai nawh teei ti koe moeng kao pon kaux mai pon kawn simex tix tixnga ra kaux mai khawm kawn bun kao liah kaux heue. ²² Yam in grawng kaing pa deuh Abiyax, ti yuh mai grawng krax ot krax koe nawh khankix mai grawng krax pa ah nawh khankix, hoik mawh pa tiiem tix ka daux phuk lai cao jhai Idado heue.

¹ Mawh kheu nan, Abiyax hoik laux lee tix tau mai keeing nawh khankix mai kix sipaung nawh ka daux veng Davit heue. Khaix an, kawn simex nawh Asa, deeh plud ti kwang haktiex ka dah dee ot keeing nawh heue. Ka daux baux singaix nawh khankix, haktiex hoik koe krax yiien yawg kao num heue. ² Asa hoik yuh ceu pa mhawm mai pa rahsee ka daux ngaix Siyiex heue. ³ Mawh kheu nawh hoik gah ti tik khu dee tan siyiex tang meung khankix mai khawm dee pa lhaong khankix mai raig ti tik rong pa singax khankix mai kid ti tik riang rao pa mawh khaox khankix heue. ⁴ Nawh tawm lox ka pui Yudax, sonsang sawg kix Siyiex keeing kix mai sonsang priex rien kix ka gumlox beenli mai gumlox tawm pingnyap khankix heue. ⁵ Nawh baox deeh gah ti tik dee pa lhaong khankix mai dee tan nyawng khankix khaing daux veng haktiex Yudax mai meung an hoik yiien yawg ti ot greem krax pa kwang nawh heue. ⁶ Nawh sum ti deuh veng pa kaux cong khankix ka daux meung Yudax, kheu hoik yiien yawg haktiex nawh ang lai koe krax pa sang puing naing ka daux num an khankix, mawh kheu hoik tawx Siyiex krax pa yiien yawg ka nawh heue. ⁷ Mawh kheu nan, nawh ah nin ka pui Yudax khankix kieh ex deeh sum veng inkix mai yuh guh veng hawt rawb rim kix mai nyiex pa pau ti jhak siviex veng mai khaox jhong siviex, glang kawn yiien haktiex plak sivoe ex, grawh grawng nawh, ex hoik sawg ka Siyiex tix, ex hoik yaox ka Nawh Cao mai nawh hoik tawx ex laux lee tix ku praok ku plak heue. Mawh kheu nan, kix hoik sum ti deuh ceu ankix mai hoik kied koe krax pa haok hwan heue. ⁸ Asa koe cub kru naing tix cub, koe pui loe sien kaux khaing pui Yudax khankix pa hoik viex plah tiebtie naing mai pliah khankix mai khaing daux cub pui Binyamin, hoik koe ra sien daix mheen mai pui pa giex ak khankix inkix hoik mawh pui pa kied ting riang rao pa koe krax vao rhawm khawmuik heue. ⁹ Khaix an, Zerax pa mawh simiang Ethiopia, hoik lih hoek ti sang puing kix tau mai cub kru naing pa koe tix lan kaux mai khawm ling lawx naing brung khankix loe yieh lhang mai nawh hoek ka veng Maresha heue. ¹⁰ Mawh kheu nan, Asa lih hu rieb ti puing nawh mai kix hoik khre ti deuh nyawm lien khankix ka daux ngawd Zephatax, pa koe hawt veng Maresha heue. ¹¹ Asa kok yo ka Siyiex ah nin "Siyiex eue, ka daux simex pui pa ting riang rao mai pui pa iak riang rao, lheu khaing Maix ang koe pui pa sang teem ka yix heue. Siyiex ex eue, Teem coi ka yix liak! mawh kheu yix een rhawm tix ka Maix Cao mai ka daux min ceu kaux Maix Cao yix tak hu puing pui pa hun in khankix heue. Siyiex eue, Maix Cao mawh Siyiex ex heue. Paw doh kieh pui pex ka Maix Cao liak!" ¹² Mawh kheu nan, Siyiex hoik kieh ceu pui Ethiopia khankix som ka plak sivoe Asa mai pui Yudax khankix mai pui Ethiopia khankix hoik to heue. ¹³ Asa mai cub pui pa ot tau mai nawh khankix hawt ti pheet kix tom hoek ka veng Gerax heue. Mawh kheu nan, pui Ethiopia khankix hoik som mai kix ang lai pon ti deeh koe Siyiex mai plak sivoe cub kru naing Nawh Cao tom nie heue. Pui Yudax khankix hoik pon tud rhim ti viex kraung tom nie heue. ¹⁴ Khaix an, kix hoik pex ka veng an khankix pa koe hawt rawb rim veng Gerax, mawh kheu jao hoik tawx Siyiex krax pa lhat graung hoek piang pui daux veng an mai kix pon rhim ti teei veng khankix khawmuik, kheu kraung pa koe daux veng hoik kied nie heue. ¹⁵ Kix deeh baox puing ti teei kawg tobrie khankix mai teei ti viex yung mai kala uk hu tom nie mai kix hoik deeh blak ti ing ka veng Yerusaliem heue.

¹ Yam in khwan Siyiex hoik lih hoek piang Azariyax kawn simex Awdiet heue. ² Nawh hu pub ka Asa ah nin, "Asa mai pui Yudax pui Binyamin khankix eue, Nghiet lox aux heue. Phan pex sawg ka Nawh Cao, Nawh Cao tak kieh pex yaox tix; viang mawh nan, phan pex tik vud ka Nawh Cao, Nawh Cao tak tik vud ka pex heue. ³ "Ka daux bawg yam pa kied rheung, pui Isarelax khankix ang lai koe Siyiex pa mawh meh mai ang lai koe cao giex kaing li pa gau mai ang lai koe gumlox beenli khankix heue. ⁴ "Viang mawh nan, yam hoek kix ka daux krax pa kha rhawm khankix, kix deeh veeh ti ing ka Siyiex ceu pui Isarelax mai sawg ti yaox Nawh Cao mai Nawh Cao hoik kieh kix yaox tix heue. ⁵ "ka daux bawg yam ankix, krax pa nhim ang lai koe ka pui pa lih laig tix kaux kawx, viang mawh nan, krax pa kied suk sag hoik koe ka pui pa ot ka daux haktiex an khankix heue. ⁶ Mawh kheu nan, tix meung mai tix meung, tix veng mai tix veng ra lai yuh paox tix laux, mawh kheu Siyiex hoik tawx krax kha rhawm kix tau mai krax pa kham geu kuceu heue. ⁷ Viang mawh nan, phan mawh pex, kieh ti koe riang rao mai paw doh kieh taix pex khankix mawh pa dieh riang, mawh kheu kaing jhaw yuh pex tak mawh pa pon totaix heue. ⁸ Yam hoik mhong Asa ka gumlox inkix mai khawm gumlox cao jhai Awdiet, nawh yuh ti koe rhawm vao rhawm kwa mai nawh hoik yieh ti tik riang rao pa seeing brai an khankix khaing daux haktiex Yudax mai daux haktiex Binyamin khawmuik mai khaing daux veng khankix pa hoik rhim nawh ti teei piang gawng Epharem heue. Nawh deeh cox khre khu dee tan Siyiex pa hoik koe ka plak sivoe bang laig daux nyiex bwan Siyiex heue. ⁹ Khaix an, nawh deeh kraix khrawm pui Yudax mai pui Binyamin khawmuik mai pui ankix pa hoek ti ot tau mai kix tivud ticu khaing baoh haktiex Epharem baoh haktiex Manashe mai baoh haktiex Simeon, mawh kheu kix hoek ka nawh ka daux krax pa kied nie haoh hun khaing daux ceu pui Isarelax khankix yam hoik yaox kix ka hoik ot Siyiex tau mai Asa heue. ¹⁰ Mawh kheu nan, kix kraix khrawm paox tix ka daux veng Yerusaliem, daux khix loe, bawg yam kwang Asa ka haktiex kao phwan num heue. ¹¹ Kix tan moi aliah yieh mu mai yung aliah rheng mu, khaing kraung pa pon tud rhim tix, pa hoik viex kix hoek tau mai tix ka Siyiex ka daux bawg yam an heue. ¹² Khaix an, kix laig ka daux sijax mukheu, sonsang sawg kix ti yaox Siyiex keeing kix khawm rhawm tix mai khawm ju tix khawmuik khawm leeing; ¹³ Can pui pa ang koe rhawm ti sawg ka Siyiex ceu pui Isarelax, viang mawh simex bun pa iak pa ting ang ah tak pah yum heue. ¹⁴ Khaix an, kix tiextu ka plak sivoe Siyiex tau mai lox yo pa kied sinum mai khawm lox teettawng mai lox teet rung kawn yung khankix heue. ¹⁵ Pui Yudax khankix gaux rhawm ka daux krax pa hoik tiextu tix; mawh kheu kix hoik tiextu khawm rhawm rhi tix khawmuik khawm leeing mai kix sawg ti yaox Nawh Cao khawm ju tix khawmuik mai Nawh Cao hoik kieh kix yaox tix mai Siyiex tawx krax pa yiien yawg koe hawt rawb rim kix khawmuik heue. ¹⁶ Nawh pluat ti tik ara Makha, pa mawh miex simiang Asa khaing pa mawh kiex miex simiang, kheu jao yuh kieh riang grang Asherax pa seeing brai mai Asa kid ti tik riang rao pa seeing brai kiex mai yuh ankix phawng mai nawh gleeing ti tik an hawt rawm klawng Kidarom heue. ¹⁷ Viang mawh nan, dee pa lhaong khankix ang nyang bax gah ti tik khaing daux haktiex Isarelax heue. Viang yuh ka mawx kawx, rhawm Asa hoik koe krax pa kaux sijax ka daux ju tix heue. ¹⁸ Nawh baox deeh viex can ceu pa hoik appong keeing nawh khankix mai khawm can ceu pa hoik appong tokaux cao nawh khankix, pa mawh mau mai khri mai kraung pa shiao, laig ka daux nyiex bwan Siyiex khawmuik heue. ¹⁹ naing ang lai koe khaix an pie tix bawg kawx tom hoek baux num hoik kwang Asa haktiex tixngoe phwan num heue.

¹ Ka daux num kwang Asa ka haktiex tixngoe liah num, Basha pa mawh simiang haktiex Isarelax hoek ti sang puing ka haktiex Yudax mai nawh sum ti deuh veng Ramax, sonsang ang nawh lai pon kieh pui tix kaux kawx lih hu mai deeh hoek ka Asa, pa mawh simiang haktiex Yudax heue. ² Khaix an, Asa teei mau khri, khaing daux sinngao nyiex bwan Siyiex mai khaing daux nyiex simiang mai nawh tawx ankix hu ka Benhadat, pa mawh simiang meung Surix pa ot ka daux veng Damase mai ah nin; ³ Kieh sijax mukheu koe daux sinax maix mai aux, awm hoik koe daux sinax keeing aux mai keeing maix heue. In heue, Aux hoik sipaox mau mai khri ka maix; hoek heue, Deeh preet sijax mukheu pa yuh maix tau mai Basha, pa mawh simiang Isarelax, sonsang deeh veeh nawh ti hu khaing aux heue. ⁴ Mawh kheu nan, Benhadat cu nghiet ka lox simiang Asa mai ploi cao kaing naing cub kru naing nawh khankix deeh hu puing ka veng an khankix pa koe ka daux meung Isarelax khankix heue. Kix puing veng Iyon, veng Abemaem mai can veng pa koe krao sinngao khankix khawmuik, ka daux meung Napthalix heue. ⁵ Yam in ceu ankix lih ti mawh yam hoik mhong Basha ka grawng ankix, nawh ang lai sum veng mai yuh kaing yuh tix khankix heue. ⁶ Khaix an, simiang Asa kok pui Yudax, khawmuik don lon simaox mai khaox veng Ramax pa hoik shiao Basha, son pa sum tix nyiex khankix; mai nawh deeh sum veng Gebax mai veng Mizapa, ka ankix heue. ⁷ Ka daux bawg yam an Hananix pa mawh cao pa yaox riang susai bleeh ti hoek ka Asa, pa mawh simiang Yudax mai ah nin ka nawh, "Mawh kheu jao grawng hoik een maix rhawm tix ka simiang Siriya mai kheu jao ang maix lai een rhawm tix ka Siyiex Cao tix, mawh kheu nan, cub kru naing simiang haktiex Siriya khankix, hoik pon ti boek khaing tawm taix maix heue. ⁸ Mawh ang pui Ethiopia mai pui Lubim khankix hoik mawh cub kru naing pa kied ting tix cub tau mai pa koe tix ling lawx naing brung mai pui naing brung khankix tom kied nie haoh hun lie? Viang mawh nan, kheu hoik een maix rhawm tix ka Siyiex, Nawh Cao hoik ap ti tawx kix ka daux tawm taix maix heue. ⁹ Mawh kheu ngai Siyiex hoik simi ti jhak plak in plak an piang haktiex khawmuik, sonsang jhi Nawh Cao krax pa koe riang rao Tokaux tix, son pui ankix pa koe rhawm pa kaux sijax ka Nawh Cao heue. Ka daux in maix hoik yuh ceu pa daox pa aw heue. Mawh kheu nan, jah yam in hu sivoe, naing sivai tak koe ka maix heue. ¹⁰ Khaix an, Asa song rhawm ka pa yaox riang susai kheu jao grawng in mai sau nawh daux thawng heue. Asa hoik yuh krax pa kha rhawm pui khankix tiblah ka daux bawg yam an heue. ¹¹ Grawng krax pa hoik yuh Asa, khankix tom yam jah mai tom sidah, hoik tiem tix ka daux phuk lai cub simiang meung Yudax mai meung Isarelax khankix heue. ¹² Ka daux baux num kwang nawh haktiex tixngoe dim num, Asa hoik pon jhawm saux ka caong nawh mai jhawm saux nawh hoik kied kin, viang mawh nan, yam koe jhawm saux nawh, nawh ang lai sawg Siyiex mai nawh hoik sawg ti peung cao sidax khaing heue. ¹³ Mawh kheu nan, Asa hoik laux lee tix tau mai cub keeing nawh khankix, nawh hoik yum ka dux num yam kwang nawh haktiex tixpon num heue. ¹⁴ Kix sipaung nawh ka daux simeeig, pa yuh nawh ti deuh ka son tokaux cao tix ka daux veng Davit; mai kix deuh nawh piang ku, pa hoik naog tau mai ceu pa sioe bhawng mai khawm sidah bhawng pa hoik kru krao tix kuceu ka pa hoik khre tix awm bee sidah kraix, kix yuh pawie gleeing ngu pa kied ting son nawh heue.

¹ Khaix an, kawn simex nawh Yehoshaphat, deeh kwang ka dah dee ot nawh mai kieh riang rao tokaux cao tix kaux cong sonsang cha ka meung Isarelax heue. ² Nawh deuh nyawm lien ka daux veng pa kaux cong meung Yudax mai deuh cub tab lien pau veng ka daux meung Yudax mai daux veng pa koe ka daux meung Epharem, ka pa hoik pon keeing nawh Asa khankix heue. ³ Yam in Siyiex hoik ot tau mai Yehoshaphat, kheu hoik lawng nawh ka daux krax pa hoik lawng tax du nawh Davit phao voe nawh ang sawg ka siyiex Balax khankix; ⁴ Viang mawh nan, nawh sawg ka Siyiex keeing nawh mai lawng ka daux krax lox tawm pingnyap Nawh Cao mai nawh ang yuh awm pa yuh ceu pui Isarelax khankix heue. ⁵ Mawh kheu nan, Siyiex hoik pang meung haktiex kaux cong ka daux tawm taix nawh mai pui Yudax khankix hoik viex ti tawx totaix ka Yehoshaphat mai nawh koe krax pa magmi ting min tom nie heue. ⁶ Nawh gaux rhawm ka daux krax pa hoik yuh Siyiex, lheu khaing an nawh gah ti tik can dee pa lhaong khankix mai riang grang Asherax khaing daux meung Yudax heue. ⁷ Yam kwang nawh ka haktiex loe num tix num, nawh baox deeh ploi cao kaing pa thong bungkhankix, pa mawh Benhelax, Obadix, Zekharix, Netane mai Mikhaya khankix, hu gau sawn pui khankix ka daux veng pa koe daux meung Yudax heue. ⁸ Pui Lewix pa ploi nawh hu tau mai kix mawh Shemayax, Netaniyax, Zebadiyax, Asahe, Shemiramot, Yehonatan, Asoniyax Tobiyax mai Tobadonix, khankix mai cao giex kaing li pa ploi nawh hu tau mai kix mawh Elishama mai Yehoram heue. ⁹ Mawh kheu nan, kix gau sawn pui khankix ka daux meung Yudax mai kix viex phuk lai beenli Siyiex hu tau mai tix, kix hu ka daux veng meung Yudax khawmuik mai gau sawn ka pui khankix heue. ¹⁰ krax pa lhat graung kix ka Siyiex hoik koe piang haktiex, pa koe hawt vung viang meung Yudax khawmuik, mawh kheu nan, kix ang lai kan yuh naing ka Yehoshaphat heue. ¹¹ Pui Philitix tiblah viex totaix mai mau hoek ka Yehoshaphat, awm pa tawx tix keun mai pui Arabi viex tobrie khankix, pa mawh yung mhaing aliah reng aliah yieh mu mai pex mhaing aliah reng aliah yieh mu hoek ka nawh heue. ¹² Mawh kheu nan, Yehoshaphat, baox nie koe sibrawm mai nawh sum nyiex tab mai nyiex priex kraung khankix ka daux meung Yudax heue. ¹³ Nawh hoik kied nie koe kaing jhaw ka daux veng pa koe ka daux meung Yudax mai cub pui pa yuh naing mai pui pa ting riang rao pa koe rhawm vao rhawm kwa khankix, hoik ot ka daux veng Yerusaliem heue. ¹⁴ In mawh carang kix awm pa koe doeh nyiex ma keeing kix heue. Daux doeh nyiex ma Yudax, cao kaing naing pa kwang piang pui kaing rheng; Adanax mawh cao kaing naing kix mai pui ting riang rao pa koe rhawm vao rhawm kwa hoik ot tau mai nawh loe sien kaux; ¹⁵ Khaix nawh tom mawh Yehohanan, pa mawh cao kaing naing kix mai pui naing hoik ot tau mai nawh ra sien daix mheen kaux, ¹⁶ Khaix nawh tom mawh Amasiyax, kawn simex Zikharix, pa hoik koe rhawm ti tan tokaux cao tix ka Siyiex mai pui naing hoik ot tau mai nawh ra sien kaux, pa hoik mawh pui pa ting riang rao pa koe rhawm vao rhawm kwa khankix heue. ¹⁷ Daux doeh nyiex ma Binyamin mawh Eliyadax, pui pa ting riang rao pa koe rhawm vao rhawm kwa mai pui naing pa giex ak mai plah tiebtie naing hoik ot tau mai nawh ra sien kaux, ¹⁸ Khaix nawh tom mawh Yehozabat mai pui naing pa hoik khre tix son naing hoik ot tau mai nawh tix sien daix mheen kaux heue. ¹⁹ Pui inkix, hoik mawh pa yuh kaing jhaw simiang, lheu khaing pui ankix pa hoik deuh simiang ka daux veng pa kaux cong khankix pa koe ka daux meung Yudax khawmuik, mawh pui yuh kaing jhaw simiang heue.

¹ Yehoshaphat hoik kied mi mai koe min plakngai sigrien sigre mai ka daux pa teei nawh ti koe moeng, tokaux nawh yuh paox pie tau mai Ahap heue. ² Khaix hoik luan num khankix, nawh lih hu fi ka Ahap daux veng Samarix; mai Ahap pah yung mai moi tom nie son nawh mai son pui pa hu tau mai nawh khankix mai hak nawh hu tau mai tix ka veng Ramot meung Gilat heue. ³ Mawh kheu nan, Ahap simiang meung Isarelax ah nin ka Yehoshaphat simiang meung Yudax, mawh sang hu puing maix veng Ramot meung Gilat tau mai aux lie? nawh deeh pawk lox ah nin; aux mawh awm pa mawh maix mai pui aux khankix hoik awm pui maix; yix tak ot tau mai maix ka daux naing heue. ⁴ Yehoshaphat deeh ah nin ka simiang Isarelax; "Yuh bwanson chawk cheng ti yaox Siyiex ka daux in singaix liak, " ⁵ Khaix an, simiang Isarelax kraix khrawm cub cao jhai khankix hoek tau pon yieh kaux mai nawh ah nin ka kix, "Mawh sang khaw ex ti hu yuh naing ka veng Ramot, meung Gilat lie? Phan ang mawh nan, mawh sang gun ti ang hu lie? "kix ah nin "Hu haok ka kix, mawh kheu Siyiex tak sang ap ti tawx veng an ka daux tawm taix simiang heue. ⁶ Viang mawh nan, Yehoshaphat deeh ah nin, mawh ang cao jhai Siyiex lai koe pie tix kaux kawx tin, sonsang pon ex ti chawk cheng ka Nawh Cao lie? ⁷ Mawh kheu nan, simiang meung Isarelax ah nin ka Yehoshaphat, pui pa tak sang pon chawk cheng ex ti yaox ka Siyiex kawn koe tix kaux, viang mawh nan, aux koeng ka nawh, grawh grawng nawh, nawh ang sax krai lox jhai ceu pa mhawm son grawng aux mai nawh krai lox pa caox caig sijheeng heue. Nawh mawh Mikha kawn simex Imla heue. "Yehoshaphat deeh ah nin "Paw nyang kieh simiang ah nan liak?" ⁸ Khaix an, simiang Isarelax kok cao kaing pa ot greem nawh tix kaux mai ah nin; viex Mikha kawn simex Imla hoek launglaung heue. ⁹ Simiang Isarelax mai Yehoshaphat, simiang meung Yudax, hoik ceep kraung simiang mai kiex tang ngawm piang dang ngeung cao tix ka daux biang glah dee pah nghox pa koe hawt diang laig daux siviex veng Samarix; mai cao jhai khawmuik hoik krai lox jhai tix ka plak sivoe kiex heue. ¹⁰ Yam in Zedekix kawn simex Khenanax, yuh rung teet rhiem ka son cao tix mai nawh ah nin, Siyiex ah nin, maix tak shiao ceu inkix blung pui Surix khankix tom hoik laux lak pak leeing kix heue" ¹¹ Cub cao jhai khawmuik, hoik krai lox jhai ti ah nin; haok hu ka veng Ramot, meung Gilat mai yuh ti pex, mawh kheu Siyiex tak sang ap ti tawx veng an ka daux tawm taix simiang heue. ¹² Khaix an, nghiet heue. Gumlox pa ah cao jhai khankix hoik mawh lox tix gum ngie pa tawx krax koe riang rao simiang heue. Mawh kheu nan, yuh bwanson kieh gumlox maix mawh pa awm gumlox khaing daux cub kix tix kaux kaux mai sikah lox pa koe riang rao heue. ¹³ Mikha ah nin, "Awm krax pa im ju Siyiex, can ceu pa ah Siyiex aux khankix mai aux tak sikah awm an heue. ¹⁴ Khaix an, nawh hoek ka simiang mai simiang ah nin ka nawh, "Mikha eue, Mawh sang khaw ex ti hu yuh naing ka veng Ramot, meung Gilat lie? Phan ang mawh nan, mawh sang gun aux ti ang hu lie? mai nawh ah nin "Hu mai teei krax pex heue. Kix tak mawh pa ap tix ka daux tawm taix maix heue. ¹⁵ Mawh kheu nan, simiang deeh ah nin ka nawh, mawh tak sang kieh aux maix tiextu tix miex bawg, sonsang ang maix krai ceu ankix pie tix ceu kawx ka aux, lheu khaing gumlox pa mawh meh ka daux ceu kaux Siyiex lie? ¹⁶ Khaix an, nawh ah nin, aux yaox ka hoik prung prang ceu pui Isarelax khawmuik piang gawng awm cub yung pa ang lai koe cao liang heue. Siyiex ah nin, "Pui inkix ang lai koe cao heue. Kieh kix tang deeh ing ka nyiex cao tix ka daux krax pa nhim heue. ¹⁷ simiang Isarelax deeh ah nin ka Yehoshaphat; "Mawh ang aux hoik krai maix mhong ka ang nawh sax krai lox jhai ceu pa mhawm, son grawng aux lheu khaing lox caox caig lie." ¹⁸ Khaix an, Mikha deeh ah nin "Mawh kheu nan, nghiet ka lox Siyiex heue. Aux hoik yaox ka ngawm Siyiex piang dang ngeung Nawh Cao mai pa ot raoma khankix khawmuik hoik cung ka plak taix khawn dawm Nawh mai ka plak taix khawn gwiex Nawh heue. ¹⁹ Siyiex ah nin, mawh pui mawx pa tak sang pon nyaw ka Ahap simiang Isarelax, sonsang haok hu nawh ti yum ka daux veng Ramot meung Gilat lie? tix kaux sikah ah nin mai tang kaux sikah ah nin heue. ²⁰ Khaix an, khwan tix mu hoek phao ka mai cung sivoe Siyiex ah nin, aux hu nyaw nawh heue. Siyiex ah nin ka nawh, mawh ka daux krax ceu patix lie? ²¹ Mawh kheu nan, nawh ah nin, aux tak lih hu mai yuh ti mawh khwan pa chix pie lhen ka daux jheeh cao jhai nawh khankix heue. Siyiex deeh ah nin; maix tak pon ti nyaw glaw nawh mai tak baox deeh pex ka nawh, lih hu mai yuh awm an heue." ²² Mawh kheu nan, yam in jhak heue, Siyiex hoik sau ti deuh khwan pa chix pie lhen ka daux jheeh cao jhai maix khankix mai Siyiex hoik pao krai krax pa laux leeing in ka son maix heue. ²³ Khaix an, Zedekiyax kawn simex Khenanax hu dex mai simang sibax Mikha mai ah nin; mawh hoik lih hu khwan pa kaoh khaing Siyiex khaing aux sonsang sikah tix ka maix ka daux krax pa yuh ka mawx lie?" ²⁴ Mikha deeh ah nin maix tak yaox ceu ankix ka daux singaix an, yam hu laig maix ka lawg plak daux sonsang mox maix tokaux cao tix heue. ²⁵ Khaix an, simiang ceu pui Isarelax ah nin, teei Mikha mai deeh tawx nawh ka Amon cao pa kwang veng mai ka Yawshax kawn simex simiang, ²⁶ simiang ah nin, sau kaw in ka daux thawng mai tawx nawh ih blah ka daux pa kha rhawm mai tawx nawh nyaux rawm ka daux pa kha rhawm tom deeh ing hoek aux ka daux pa nhim sax heue. ²⁷ Khaix an, Mikha ah nin phan maix deeh yaox tix ing ka daux pa nhim, Siyiex ang tau lih krai lox inkix khaing aux heue. "nawh baox deeh ah nin "Can pex pa mawh pui hun khawmuik eue, Nghiet heue." ²⁸ Mawh kheu nan, simiang Isarelax mai Yehoshaphat, pa mawh simiang Yudax haok hu ka veng Ramot meung Gilat heue. ²⁹ simiang Isarelax ah nin ka Yehoshaphat, "Aux tak loh grang pakpeung tix mai hu ka daux naing; viang mawh nan maix ca kawn ceep kraung simiang cao maix heue. Mawh kheu nan, simiang Isarelax, loh grang pakpeung cao tix mai kix hu ka daux biang naing heue. ³⁰ Yam in simiang Surix, tawx lox ka cub cao kaing naing ling lawx naing brung an khankix, pa hoik ot tau mai nawh mai ah nin "Paw doh puing ka pui pa iak pa ting khankix pie tix kaux kawx; viang mawh nan, puing ka simiang Isarelax nong nong heue. ³¹ Mawh kheu nan, ceu an khankix hoik lih ti mawh, yam hoik yaox cao kaing naing cub ling lawx naing brung khankix ka Yehoshaphat, kix tom ah nin "An mawh simiang Isarelax heue. "Mawh kheu nan, kix lai lawm ti sang puing ka nawh; viang nawh nan, Yehoshaphat, riag yo mai Siyiex teem ka nawh, Siyiex gah kix hu sonsang via kix tix hu dee singai khaing nawh heue. ³² Mawh kheu ceu inkix hoik lih tix mawh, yam hoik yaox cub cao kaing naing ling lawx naing brung ka ang an mawh simiang meung Isarelax, kix hoik deeh veeh ti ing khaing pa hawt pheet tix ka nawh heue. ³³ Yam in pui tix kaux vaik ti puing ak tix mai ang tie nyeu mai te an hu krox simiang Isarelax, ka daux sinax dee sidoe kix ti caing sibex plah rhiem nawh heue. Mawh kheu nan, nawh ah nin ka cao pa grheu ling lawx naing brung tix, deeh veeh ti ing mai viex aux lih hu ka plak praix biang naing, mawh kheu aux hoik mat heue. ³⁴ Naing hoik kied kin ka daux singaix an mai simiang meung Isarelax hoik neung tokaux cao tix ot ka daux ling lawx naing brung nawh tau mai jhak simi ka pui Surix khankix, tom hoek plak bo heue. Yam hoik hoek ka daux bawg yam sang laig singaix nawh yum heue.

¹ Khaix an, Yehoshaphat, pa mawh simiang Yudax, hoik deeh ing tau mai krax pa yiien yawg tix ka nyiex nawh daux veng Yerusaliem heue. ² Cao pa yaox riang susai Yehu kawn simex Hananix lih hu rieb nawh mai ah nin ka simiang Yehoshaphat, mawh sang caw maix ti teem ka pui caox mai hu mox ka pui pa koeng ka Siyiex lie? mawh kheu nan, pa song rhawm Siyiex koe piang maix yam in heue. ³ Viang yuh ka mawx kawx, ceu pa mhawm kawn yaox tix ka daux maix, ka krax pa hoik gah maix ti tik khaox riang grang Asherax khaing daux haktiex mai ka pa hoik khre maix rhawm tix sonsang sawg ka Siyiex heue. ⁴ Mawh kheu nan, Yehoshaphat ot ka daux veng Yerusaliem mai nawh deeh baox lih hu lailing sinax pui khankix, jah ka veng Berashebax, tom hoek piang gawng Epharem mai deeh viex kix ing ka Siyiex keeing kix heue. ⁵ Khaix an, nawh yaog ti deuh cao prawng see khankix ka daux veng pa hoik kaux cong khawmuik ka daux haktiex Yudax tix veng hoik tix veng, ⁶ Nawh ah nin ka cao prawng see khankix; "Yuh satix tix ka can ceu pa yuh pex, mawh kheu pex ang tie mawh pa prawng see son kawn pui, viang mawh nan, mawh son Siyiex Cao pa ot tau mai pex ka daux grawng krax prawng ca heue. ⁷ Mawh kheu nan, yam in kieh pa lhat graung pex ka Siyiex koe piang pex, yuh satix tix mai yuh ankix mai Siyiex ex, krax pa jhak plakngai pui ang chix koe mai krax pa sang teei ti ih mau cun praok khankix ang chix koe ka daux Nawh Cao heue. ⁸ Lheu khaing an, son krax prawng ca Siyiex mai son see pa koe sinax kix ka daux veng Yerusaliem, Yehoshaphat yaog ti deuh cub pui Lewix mai cao giex kaing li mai khawm cao kaing ting daux doeh nyiex keeing kix ceu pui Isarelax, yam hoik deeh ing kix ka veng Yerusaliem heue. ⁹ Nawh tawm lox ka kix ah nin; mawh kheu nan, pex tak yuh ceu ankix, ka daux pa lhat graung ka Siyiex mai ka daux pa yum rhawm tix mai ka daux pa kaux sijax tix heue. ¹⁰ Grawng see patix ang ah, phan hoek ka plak sivoe pex khaing pux aik pex khankix pa ot ka daux veng cao kix, viang see an mawh grawng pa jauh nham ang ah, grawng lud ka beenli mai lox tawm pingnyap ang ah, pa lud ka lox tat jhawm prawng mai been pa priex pa deuh pui khankix ang ah, pex tak tawx satix ka kix phan ang mawh nan, aux lhat kix koe krax lud ka Siyiex mai pa song rhawm tak hoek piang pex mai piang puxaik pex khankix heue. Phan yuh nin pex tak ang lai koe krax lud ka heue. ¹¹ deuh ti tawng, Amariyax, cao giex kaing li pa ting mawh cao pa kwang piang pex, ka daux grawng ceu pa dex dawd mai Siyiex khawmuik mai Zebadiyax kawn simex Isarelax mai cao kwang piang doeh nyiex ma Yudax khankix, tak mawh cao pa kwang son grawng ceu pa dex dawd mai cie simiang khawmuik; pui Lewix khankix tak mawh cao pa yuh cao kaing ka plak sivoe pex, kieh koe rhawm haing hiah mai Siyiex tak ot tau mai pui pa mhawm heue.

¹ Khaix hoik ceu an khankix, pui Mawbax, pui Amon mai pui tang ceu pa ot tau mai kix ceu pui Amawrix khankix hoek ti sang yuh naing ka Yehoshaphat heue. ² Khaix an, pui tiblah hoek mai krai grawng ankix ka Yehoshaphat ah nin, cub pui pa kied hun tix cub hoek ti sang puing ka maix khaing plak toi rawm sigrit sigra, khaing meung Surix mai kix hoik ot ka daux veng Hazaron Tama, pa kok mawh veng Eng Gedi heue. ³ Yehoshaphat hoik kied koe krax lhat graung mai nawh tat rhawm tix sonsang sawg nawh ka Siyiex mai pao ti krai kieh pui twah pa ih ka daux meung Yudax khawmuik heue. ⁴ Mawh kheu nan, pui Yudax khankix hoik khrawm paox tix sonsang rawg mhaing kix krax teem khaing Siyiex mai pui khaing veng meung Yudax khankix khawmuik, hoek sawg ka Siyiex heue. ⁵ Khaix an, Yehoshaphat, hoik cung ti ot ka daux sigreung pui hun Yudax mai pui veng Yerusaliem ka daux nyiex bwan Siyiex sivoe bang pa khraox an, ⁶ Nawh ah nin, Siyiex keeing ex eue, mawh ang Maix mawh Siyiex pa ot ka daux raoma mai mawh ang Maix mawh cao pa kwang piang meung haktiex ceu pui khankix khawmuik, mawh ang sibrawm mai krax pa ting riang rao khankix koe ka daux tawm taix Maix son ang pui tix kaux kawx sang pon yaog tix tiebtie ka Maix lie? ⁷ Mawh ang Maix mawh Siyiex ex, pa hoik grheu ti tik pui pa ot ka daux haktiex in khankix, ka plak sivoe ceu pui Maix Isarelax mai hoik tawx haktiex in ka doeh ru Abraham, pa mawh paox grawm Maix leeing ju lie? ⁸ Kix ot ka daux haktiex an mai sum ti tawx dee pa singax tix dah ka daux haktiex an, son min ceu kaux Maix ah nin; ⁹ Phan krax laux leeing khaing vaig lawm krax prawng krax ciyang jhawm saux preng mai krax sibhawm praix khankix hoek piang yix, yix tak cung ka plak sivoe nyiex bwan in mai ka plak sivoe ngai Maix Cao, (son min ceu kaux Maix Cao ka daux nyiex bwan in) mai kok yo ka Maix Cao ka daux krax pa kham pa geu tix khankix, Maix Cao tak nghiet mai tak deeh taoh yix heue. ¹⁰ Yam in pui Amon, pui Mawbax mai pui piang gawng Sirax khankix, pa ang Maix Cao kieh ceu pui Isarelax khankix puing yam lih hoek kix khaing haktiex Ejiptux, viang mawh nan, pui Isarelax khankix hoik veeh ti hu khaing kix mai ang lai yuh kix laux leeing, ¹¹ Inkix mawh pa caw ti tawx krax pa koe bwanson piang yix, kix sang theen yix lih khaing haktiex sinngao Maix Cao, ka pa hoik tawx Maix Cao ka yix, sonsang mawh sinngao pa sang pon yix ti cie heue. ¹² O, Siyiex eue, Mawh ang Maix koe rhawm ti sang ciyang ka kix lie? Mawh kheu yix ang lai koe riang rao sibrawm ti sang puing ka cub pui pa kied haoh hun inkix, pa sang hoek ti puing ka yix mai yix ang lai tawng ka ceu pa sang yuh tix, viang mawh nan, ngai yix maong ti jhak ka Maix Cao heue. ¹³ Pui Yudax khankix mai kawn nyawm iak mai khawm moeng kix mai khawm kawn praix kix khawmuik, hoek ti cung tau ka plak sivoe Siyiex heue. ¹⁴ Khwan Siyiex hoik hoek piang Yahaze kawn simex Zokharix, kawn simex Benayax kawn simex Yeyelax, kawn simex Matania, pa mawh pui Lewix khaing daux cub kawn simex Asa ka daux sigreung cub pui hun khankix, ¹⁵ Nawh ah nin "Can pex pui Yudax khankix, can pui pa ot ka daux veng Yerusaliem mai simiang Yehoshaphat eue. Nghiet heue, Siyiex ah nin ka pex; paw koe krax lhat graung mai paw koe pa khi rhawm kheu jao grawng pui pa kied haok hun in khankix; mawh kheu naing ang tie mawh son cie pex, mawh ngie son cie Siyiex heue. ¹⁶ Singaix pasax lih hu mai puing ka kix heue. Kix tak bleeh tix hoek ka krax haok pui plak veng Ziza mai pex tak yaox kix hoek dee die rawm klawng iak an, pa koe ka plak sivoe daux tiagtu Yeruelax heue. ¹⁷ Pex tak ang lo ti yuh naing ka daux naing in, cung yiien yawg ka dee ot cao pex mai jhak ka krax taoh Siyiex pa ot tau mai pex, pui Yudax mai pui veng Yerusaliem khankix eue, paw doh koe krax lhat graung mai paw doh koe krax laux rhawm, lih hu ka kix daux singaix pasax, mawh kheu Siyiex tak sang ot tau mai pex heue. ¹⁸ Yehoshaphat ngeuh kaing mai gup pakngai tix piang tiex mai pui Yudax khankix mai khawm pui pa ot ka daux veng Yerusaliem khawmuik, hoik gup pakngai tix ka plak sivoe Siyiex mai krub ka Siyiex heue. ¹⁹ Khaix an, pui Lewix khankix, pa kaoh khaing daux cub kawn praix Kohat mai cub kawn praix Korax khankix, yaog ti cung sonsang yaogyaw ka Siyiex ceu pui Isarelax tau mai lox pa kied ting si num heue. ²⁰ Kix yaog ti kaoh caocao ka daux plak ponngawb mai lih hu laig ka daux tiagtu Teko; mai yam lih hu kix, Yehoshaphat, yaog ti cung ah nin, pui Yudax mai can pui veng Yerusaliem khankix eue, Nghiet heue, Yum rhawm ka Siyiex pex mai pex tak mawh pa kaux cong, yum rhawm ka cao jhai Nawh Cao khankix mai pex tak koe krax pa pex ka heue. ²¹ Yam hoik kum nawh tau mai pui khankix, nawh yaog ti deuh can pui pa tak sang ah lai rhax ka Siyiex, kheu kix ceep kraung pa mhawm grang pa singax singeh mai yaogyaw bwanson Nawh Cao, hu ka plak sivoe cub kru naing khankix mai ah nin "Yaogyaw ka Siyiex, mawh kheu krax caux rhawm Nawh Cao kaux cong leeing ju heue." ²² Yam in yam hoik jah kix ti ah lai rhax mai ah lox yaogyaw tix khankix, Siyiex yuh ti deuh pui pa yuh naing jawm khankix ka pui Amon, pui Mawbax mai pui piang gawng Sirax khankix, pa hoek ti sang puing ka pui Yudax mai kix hoik som nai heue. ²³ Grawh grawng nawh, pui Amon mai pui Mawbax, yaog ti cung mai puing ka cub pui pa ot piang gawng Sirax khankix mai pah kix pak lawg mai yuh kix laux leeing khawmuik heue. Yam hoik sidah yuh kix ka pui pa ot piang gawng Sirax khawmuik, kix ra lai yuh paox tix laux leeing tix kaux lai tix kaux heue. ²⁴ Mawh kheu nan, yam hoek pui Yudax khankix ka dee pa sang kok puan kix ti yaox ka daux tiagtu, kix yaox ka plak see pui haok pui hun an khankix mai kaux yum kix hoik goh lih yum piang tiex heue. Pui tix kaux kawx ang lai koe krax pa glawd ka heue. ²⁵ Yam hoek Yehoshaphat mai pui nawh khankix ti teei kraung pa tud rhim cie kix hu dee singai, kix hoik yaox ka kraung pa kied ngawh mai pa koe jum tom nie piang kaux yum an khankix ka daux sinax kix mai khawm siang simaox pa laoh liean khankix mai kix peeik ti teei kraung ankix ka son tokaux cao tix nie lheu khaing krax pon klawm kix nawh hu mai kix khrawm ti teei kraung pa tud rhim an khankix loe singaix kheu jao kied nie heue. ²⁶ Yam hoek ka daux pon singaix tix ngaix, kix deeh khrawm paox tix ka daux ngawd Berakha, mawh kheu kix hoik yaogyaw bwanson Siyiex tan heue. Mawh kheu nan, ceu kaux dee an kok mawh daux ngawd Berakha, tom hoek ka daux in singaix heue. ²⁷ Khaix an, kix deeh blak ti ing khaing tan, pui Yudax mai pui veng Yerusaliem khankix ku kaux, khawm Yehoshaphat, hoik ot ka plak sivoe kix, sonsang deeh ing kix ka veng Yerusaliem, tau mai pa gaux rhawm, mawh kheu Siyiex hoik yuh kix koe pa gaux rhawm piang pui pa koeng kix heue. ²⁸ Mawh kheu nan, kix hoek ka veng Yerusaliem tau mai pa tah tix ting mai khawm ting feuk mai khawm phlu tix teettawng khankix hoek ka daux nyiex bwan Siyiex heue. ²⁹ Pa lhat graung ka Siyiex lih ti koe piang meung haktiex an, yam mhong kix ka puing Siyiex pui koeng ceu pui Isarelax khankix heue. ³⁰ Khaix an, baoh dee ot dee koe Yehoshaphat hoik koe pa yiien yawg, kheu hoik tawx Siyiex pa nhim ka hawt vung viang nawh khawmuik heue. ³¹ Mawh kheu nan, Yehoshaphat, mawh simiang piang meung Yudax heue. Nawh koe ju tixngoe phwan num yam yaog nawh tix mawh simiang mai nawh kwang haktiex tixnga phwan num ka daux veng Yerusaliem heue. Ceu kaux miex nawh mawh Azuha kawn bun Shilahix heue. ³² Nawh hawt lawng ka daux krax keeing nawh Asa mai ang lai gwieh tix hu ka praok mai nawh hoik yuh ceu pa rahsee ka daux plak sivoe ngai Siyiex heue. ³³ Viang yuh ka mawx kawx, dee pa lhaong khankix ang nyang bax teei ti tik, kheu jao ang pui khankix nyang bax viex rhawm ti hawt khaix Siyiex keeing kix heue. ³⁴ Yam in grawng kaing pa deuk Yehoshaphat, yam jah tom sidah, kix hoik tiem ti deuh grawng ankix hoik mhai tix ka daux phuk lai been cub simiang ceu pui Isarelax khankix heue. ³⁵ Khaix an, Yehoshaphat simiang meung Yudax hoik yuh paox pie tau mai Ahaziyax simiang meung Isarelax, pa kied yuh ceu pa caox caig khankix heue. ³⁶ Nawh rom tix tau mai nawh sonsang yuh reu ting khankix sonsang hu ka veng Tasux mai kix hoik yuh reu ting khankix ka daux veng Ezion Geba heue. ³⁷ Viang mawh nan, Eliza kawn simex Dodava, pui veng Maresha, pa hoik krai lox jhai Yehoshaphat pa ah nin, "Mawh kheu hoik rom maix cao tix tau mai Ahaziyax, Siyiex tom yuh kaing jhaw maix khankix laux leeing heue. "Khaix an, reu ting khankix hoik laux leeing ang pon hu ka veng Tasux heue.

¹ Yehoshaphat hoik laux lee laig it tau mai keeing nawh khankix mai hoik sipaung nawh taux mai keeing nawh ka daux veng Davit heue, Khaix an, kawn simex nawh Yehoram deeh plud ti kwang dee ot nawh heue. ² Nawh koe pux simex khankix, pa mawh cub kawn simex Yehoshaphat khankix, Azariyax, Yehilax, Zakharix, Azarihux, Mikhalax mai Shephatiyax khankix heue. In kix khawmuik mawh cub kawn simex Yehoshaphat pa mawh simiang Isarelax heue. ³ Keeing kix hoik tawx totaix pa mawh mau mai khri mai ceu pa kied laoh lie ka kix tau mai veng pa kaux cong khankix pa koe ka daux meung Yudax; viang mawh nan, nawh hoik tawx meung haktiex tix ka Yehoram, kheu jao mawh nawh kawn Ai heue. ⁴ Yam hoik deeh pang Yehoram ka meung haktiex keeing nawh khankix, nawh yuh tokaux cao tix ting riang mai pah ti tik pux nawh khawmuik ka vaid mai khawm pui tang kaux khankix pa mawh simiang ka daux meung Isarelax heue. ⁵ Yehoram koe ju tixngoe ra num yam yaog nawh ti mawh simiang mai nawh hoik kwang haktiex daix num ka daux veng Yerusaliem heue. ⁶ Nawh hoik lawng daux krax cub simiang Isarelax khankix, awm pa hoik yuh doeh nyiex ma Ahap, mawh kheu nawh hoik teei ti moeng kawn bun Ahap mai nawh hoik yuh pa caox caig khankix ka daux plak sivoe ngai Siyiex heue. ⁷ Viang mawh nan, Siyiex ang nyang bax yuh doeh nyiex ma Davit laux leeing, kheu koe sijax mukheu pa hoik yuh Nawh Cao tau mai Davit mai lox mukheu pa ah Nawh Cao ti sang tawx kawk ngu sonsang riang ka nawh mai ka kawn simex nawh khankix leeing ju heue. ⁸ Ka daux baux singaix nawh khankix, ceu pui Edom, hoik deeh tieh feen ka pui Yudax luan khaing sibrawm nawh mai tang deeh yaog simiang kwang piang cao kix heue. ⁹ Mawh kheu nan, Yehoram lih hu tau mai cao kaing tix khankix mai ling lawx naing brung nawh khankix hoik koe tau mai nawh khawmuik heue. Nawh yaog ti kaoh ka daux ponsawm mai puing ka ceu pui Edom, pa hoik lai lawm ka nawh mai ka cub cao kaing naing ling lawx naing brung khankix heue. ¹⁰ Awm an, ceu pui Edom khankix hoik deeh tieh feen ka pui Yudax luan khaing greem sibrawm nawh tom hoek ka daux singaix in heue. Ka daux bawg yam an meung Libanax, deeh tieh feen ka pa kwang nawh, kheu jao grawng hoik tik vud nawh ka Siyiex keeing nawh khankix heue. ¹¹ Lheu khaing an, nawh yuh dee pa lhaong khankix piang gawng meung Yudax mai hoik kieh pui pa ot daux veng Yerusaliem khankix lud vao mai hoik thong pui Yudax khankix hu ka daux krax pa lud loe heue. ¹² lai hoek ka nawh tix pheen khaing cao jhai Eliyax ah nin, "Siyiex keeing maix Davit ah in, mawh kheu jao ang maix lai lawng ka daux krax hu keeing maix Yehoshaphat mai daux krax hu Asa pa mawh simiang pui Yudax, ¹³ viang mawh nan maix hoik lawng daux krax hu cub simiang pui Isarelax mai hoik kieh pui Yudax khankix yuh krax lud vao awm pa lud vao doeh nyiex ma Ahap mai baox deeh pah ka pux maix khankix pa mawh pui pa kaoh khaing daux nyiex ma keeing maix, pa hoik nie lheu mhawm khaing tokaux cao maix, ¹⁴ Jhak heue, Siyiex tak tawx krax tug kha pa kied kin ka pui maix ka moeng kawn maix mai piang can kraung khrai cie maix khankix khawmuik, ¹⁵ maix tak pon pa kied nie saux ka jhawm saux daux vaig maix, tom hoik lih kraung vaig kraung tu maix tix ngaix hoik tix ngaix heue. ¹⁶ Lheu khaing an, Siyiex hoik tawx riang ceu pui Philitix khankix mai khawm ceu pui Arap pa ot hawt dex ceu pui Ethiopia khankix, sonsang deeh tieh feen ka Yehoram heue. ¹⁷ kix hoek ka daux meung Yudax mai preung ti laig ka daux an mai teei ti viex kraung khrai khawmuik, pa hoik yaox tix ka daux nyiex simiang mai khawm kawn simex nawh khankix mai khawm moeng nawh khankix, son ang kawn simex lai mawh pa prah tix pie tix kaux kawx ka son nawh, lheu khaing Yehohaza kawn simex pa nghoik nawh heue. ¹⁸ Khaix ceu inkix, Siyiex tawx krax tug kha ka daux vaig daux tu nawh pa mawh jhawm saux pa ang lai pon pai ka heue. ¹⁹ Khaix an, ceu ankix hoik lih ti mawh ka daux bawg yam khaix hoik sidah ra num kraung vaig nawh khankix hoik glhua ti lih ka plak praix kheu jhawm saux nawh; mawh kheu nan, nawh yum ka daux pa kied saux tix heue. Pui nawh khankix ang yuh krax pa gleeing ka son nawh pie tix ceu kawx awm krax pa gleeing pa hoik yuh kix son keeing nawh heue. ²⁰ Nawh hoik koe tixngoe num, yam yaog nawh ti mawh simiang, nawh hoik kwang haktiex ka daux veng Yerusaliem daix num mai pui tix kaux kawx ang koe krax laux rhawm ka pa yum nawh heue. Viang yuh ka mawx kawx, kix hoik sipaung nawh ka daux veng Davit, viang mawh nan, kix ang sipaung nawh ka daux simeeig cub simiang khankix heue.

¹ Khaix an, pui ot ka daux veng Yerusaliem khankix yaog kawn simex nghoik nawh Ahazix mawh simiang ka daux dee ot nawh kheu hoik pah cub pui naing pa hoik bleeh ti hoek tau mai ceu pui Arepia daux tab ka cub kawn simex kuad an khankix heue. Mawh kheu nan, Ahazix kawn simex Yehoram, pa hoik mawh simiang Yudax kwang ka haktiex heue. ² Ahazix hoik koe ju tixpon ra num, yam yaog nawh ti mawh simiang mai nawh kwang haktiex veng Yerusaliem tix num heue. Ceu kaux miex nawh mawh Athaliyax, pa mawh kawn saux bun Omri heue. ³ Nawh kawx baox lawng ka krax hu doeh ngiex ma Ahap, mawh kheu miex nawh hoik tawx krax keud ka nawh sonsang yuh nawh ceu pa caox caig heue. ⁴ Mawh kheu nan, nawh yuh pa caox caig ka plak sivoe ngai Siyiex, awm krax pa hoik yuh doeh nyiex ma Ahap; mawh kheu kix mawh cao pa tawx krax keud ka nawh, khaix hoik yum keeing nawh, sonsang hoek nawh krax laux leeing heue. ⁵ Nawh hoik lawng krax keud pa tawx kix mai hawt hu tau mai Yehoram kawn simex Ahap, simiang Isarelax, sonsang yuh naing ka Hazalax simiang Surix daux veng Ramot, meung Gilat mai pui Surix mat yuh Yoram heue. ⁶ Khaix an, nawh deeh ing ka veng Yezerelax, sonsang deeh pai khaix mat tix, pa hoik pon nawh ka daux veng Ramax, yam hu puing nawh ka Hazalax, simiang Surix heue. Azariyax kawn simex Yehoram simiang meung Yudax, kix hu jhak Yehoram kawn simex Ahap, ka daux veng Yezarilax, kheu saux nawh heue. ⁷ Grawng krax hu nawh ka Yehoram, hoik mawh pa yuh Siyiex sonsang som nai Ahazix; grawh grawng nawh, yam hoik bleeh nawh tan, nawh hoik lih hu tau mai Yehoram mai puing ka Yehu kawn simex Nimshi pa Siyiex groi rawm bee piang, sonsang tat nawh ti tik cub doeh nyiex ma Ahap khankix heue. ⁸ Ceu ankix hoik lih ti mawh yam hoik prawng ca Yehu tix pah ka cub doeh nyiex ma Ahap khankix mai yam hoik yaog nawh ka cub Siyiex pui Yudax khankix mai khawm cub kawn simex puxke Ahazix pa yuh kaing jhaw Ahazix khankix nawh hoik pah kix yum heue. ⁹ Khaix an, nawh sawg ka Ahazix mai kix hoik giex nawh, (nawh hoik mox ti ot ka daux meung Samarix yam an, ) mai hoik viex nawh hoek ka Yehu, yam hoik pah kix ka nawh kix sipaung nawh, kix ah nin, nawh mawh kawn simex Yehoshaphat, pa hoik sawg ka Siyiex khawm rhawm nawh khawmuik heue. Mawh kheu nan, pui daux nyiex ma Ahazix khankix ang lai koe pie tix kaux kawx, sonsang deeh teei tix sibrawm kwang piang meung haktiex heue. ¹⁰ Yam hoik yaox Atariyax miex Ahazix ka hoik yum kawn simex tix, kiex yaog ti kaoh mai yuh pa sang plud ti mawh cao pa sitoe simiang doeh nyiex ma Yudax khankix laux leeing khawmuik heue. ¹¹ Viang mawh nan, Yeshabax kawn bun simiang yaog ti teei Yoshax kawn simex Ahazix mai briex nawh hu khaing daux sinax cub kawn simiang pa hoik pah tix yum mai deuh nawh tau mai bun priex ka nawh ka daux lawg it tix heue. Mawh kheu nan, Yeshabax kawn bun simiang Yehoram, moeng cao giex kaing li, mawh kheu nawh, mawh pux nan Ahaziyax mox ti deuh nawh khaing Athaliyax, son ang nawh pon ti pah nawh yum heue. ¹² Nawh hoik mox tix tau mai kix ka daux nyiex bwan Siyiex liah num glang yam kawn kwang Athaliyax, piang haktiex heue.

¹ Ka daux aliah num tix num, Yehoyadax sau riang rao tokaux cao tix ting mai nawh yuh sijax mukheu tau mai cao kaing naing pa kwang piang kru naing kaing yieh pa mawh Azariyax, kawn simex Yeroham, Isarelax kawn simex Yehohanan, Azariyax, kawn simex Obedax, Maseyax kawn simex Adayax mai Elishaphat, kawn simex Zikharix heue. ² Kix lih hu lailing ka daux meung Yudax mai deeh khrawm ceu pui Lewix khankix khaing daux veng khawmuik pa koe ka daux meung Yudax mai khawm cao kaing ceu pui Isarelax khankix mai bleeh ka veng Yerusaliem khawmuik heue. ³ Khaix an, cub pui hun pa kum khawmuik yuh sijax mukheu tau mai simiang ka daux nyiex bwan Siyiex heue. Nawh ah nin ka kix "Jhak heue. kawn simex simiang tak sang kwang haktiex, awm hoik ah Siyiex ti deuh ka cub kawn simex Davit khankix heue. ⁴ "In mawh ceu pa tak sang yuh pex daux cub pex cao giex kaing li mai pui Lewix khankix loe son tix son tak mawh cao pau ti jhak diang siviex, yam laig yuh kaing jhaw daux singaix twah; ⁵ "Loe son tix son tak mawh pa ot ka daux nyiex simiang mai loe son tix son tak mawh pa ot diang siviex lawng heue. Pui khawmuik tak mawh pa ot ka daux biang nyiex bwan Siyiex heue. ⁶ Viang mawh nan, lheu khaing cao giex kaing li mai cub ceu pui Lewix pa yuh kaing jhaw Siyiex, paw doh kieh pui tix kaux kawx laig daux nyiex bwan Siyiex awx. Kix tak pon ti laig kheu mawh kix pa singax singeh; viang mawh nan, pui khawmuik tak pau ti jhak ka Siyiex heue. ⁷ Pui Lewix khankix tak ot vung viang simiang ku plak, pui ku kaux tak giex kraung naing ka daux taix tix; pui mawx ang ah, pa laig ka daux nyiex, kieh pah nawh yum heue. Pex tak mawh pa ot tau mai simiang yam laig yam lih nawh plak praix heue." ⁸ Mawh kheu pui Lewix mai pui Yudax khankix yuh ceu an awm pa hoik tawm cao giex kaing li Yehoyadax heue. kaux pui mawx kaux pui an hoik tang teei pui nawh khankix, sonsang teei beeh glawm ka daux singaix twah, tau mai pui khankix, pa tak sang deeh plud beeh glawm tix ka daux singaix twah kheu ang cao giex kaing li Yehoyadax nyang bax preet ka cub caw an khankix heue. ⁹ Cao giex kaing li Yehoyadax tawx pliah khankix mai khawm kraung tiebtie rhiem pa ting pa iak pa hoik mawh cie simiang Davit pa hoik koe ka daux nyiex bwan Siyiex ka cub cao kaing naing pui kaing yieh khankix heue. ¹⁰ Khaix an, nawh gwieh ti deuh pui khankix, pa tang giex kraung naing tix khankix ku kaux, jah ka praok plak dawm nyiex bwan tom hoek ka praok plak gwiex nyiex bwan hawt baoh khu dee tan mai hawt baoh nyiex bwan mai hawt vung viang simiang khawmuik heue. ¹¹ Kix viex kawn simex simiang lih plak praix mai ceep mhok khri simiang piang nawh, tawx lai kham sakse ka nawh mai yaog nawh mawh simiang heue. Khaix an, Yehoyadax mai cub kawn simex nawh khankix groi rawm bee piang nawh mai ah nin; "Kieh simiang lang ju heue. ¹² Yam mhong Atariyax ka lox sinum to pui mai lox pa yaogyaw kix ka simiang, nawh bleeh ka pui khankix ka daux nyiex bwan Siyiex heue. ¹³ Yam jhak nawh ka kix, simiang cung ti ot hawt rong simaox ka daux diang laig daux nyiex bwan mai cao kaing pa thong bungkhankix mai cao pa phlu teettawng khankix hoik ot hawt simiang heue. Pui haktiex khawmuik hoik gaux rhawm mai phlu teettawng mai cao pa ah lai rhax khankix giex kraung tah ting mai thong bung pui ka lox pa yaogyaw, hoik ot hawt tan heue. Mawh kheu nan, Athaliyax, riah ti tik kraung ceep tix khankix mai riag yo ah nin "Krax pa tieh feen! krax pa tieh feen!" ¹⁴ Khaix an, cao giex kaing li Yehoyadax viex cub cao kaing naing pa kwang pui kaing yieh mai kru naing pa hoik deuh nawh tix priex khankix lih hu ka plak praix mai ah nin ka kix; "Teei nawh lih plak praix mai pau nawh mai can pui pa hawt tix hu khaix nawh khankix khawmuik pah yum ka vaig heue. "Mawh kheu cao giex kaing li ah nin, paw doh pah nawh yum ka daux nyiex bwan Siyiex liak! ¹⁵ Mawh kheu nan, kix giex nawh mai viex nawh hu ka plak krax dee laig daux diang siviex brung pa koe ka daux nyiex simiang mai kix pah nawh yum tan heue. ¹⁶ Khaix an, Yehoyadax, yuh sijax mukheu daux sinax tokaux cao nawh mai pui khankix mai khawm simiang sonsang mawh kix pui Siyiex heue. ¹⁷ Pui khawmuik hu ka nyiex vad Balax mai yieh ti tik ankix grhup, kix raig ti tik khu dee tan nawh mai riang rao khankix mai pah yum ka Mattan, pa mawh cao giex kaing li Balax ka plak sivoe khu dee tan heue. ¹⁸ Yehoyadax deeh baox tawx beeh glawm krax pa sang kia ngien nyiex bwan Siyiex ka daux tawm taix cao giex kaing li mai ka pui Lewix khankix, ka pa hoik yaog Davit ti deuh ka daux nyiex bwan Siyiex, sonsang tan krax tan pa gleeing khankix ka Siyiex, awm krax pa hoik tiem ti deuh ka daux lox lai been Mose, tau mai krax pa gaux rhawm mai krax pa ah lox lai rhax, awm pa hoik pang Davit ti deuh heue. ¹⁹ Nawh deuh cao pa pau diang siviex khankix ka daux diang sivex nyiex bwan Siyiex, son ang pui pa ang singax ka grawng tix ceuceu lai pon ti laig pie tix kaux kawx heue. ²⁰ Khaix an, nawh teei cub cao kaing naing piang pui kaing yieh mai pui pa ting lhaongmai cao kaing pa kwang piang pui khankix mai pui haktiex khawmuik mai viex simiang lih khaing nyiex bwan Siyiex mai kix phlat ti hu daux diang siviex plak piang tom hoek ka nyiex simiang mai deuh simiang piang dang ngeung meung haktiex heue. ²¹ Mawh kheu nan, pui haktiex khawmuik hoik gaux rhawm mai veng hoik yiien yawg, kheu hoik pah kix Athaliyax yum ka vaig heue.

¹ Yoshax hoik koe ju aliah num yam yaog nawh ti mawh simiang mai nawh hoik kwang haktiex tixpon num ka daux veng Yerusaliem heue. Ceu kaux miex nawh mawh Zibiyax pui veng Berashebax heue. ² Yoshax yuh ceu pa khaw caw ka daux plakngai Siyiex, glang daux baux singaix cao giex kaing li Yehoyadax heue. ³ Yehoyadax teei nawh koe moeng ra kaux mai nawh hoik pon kawn simex mai kawn bun khankix heue. ⁴ Yam in ceu ankix hoik lih ti mawh khaix in, Yoshax hoik tat rhawm tix sonsang deeh cox ka nyiex bwan Siyiex heue. ⁵ Khaix an, nawh khrawm cub cao giex kaing li mai khrawm cub pui Lewix khankix mai ah nin ka kix "Lih hu ka veng Yudax khankix mai khrawm ti viex mau khaing pui Isarelax khankix khawmuik, sonsang deeh cox ka nyiex bwan Siyiex pex, jah tix num hoik tix num mai jhak ti yaox ka daux krax pa sang pon pex ti yuh ankix phaiphai heue. "Viang yuh ka mawx kawx, pui Lewix khankix ang cu ti yuh ceu ankix phaiphai heue. ⁶ Mawh kheu nan, simiang kok ka Yehoyadax cao giex kaing li pa ting mai ah nin ka nawh "Maix ang tie tawm pui Lewix khankix viex mau tan mau lu son pa kham sakse nyiex gox bwan meung Yudax mai khaing daux veng Yerusaliem, awm pa koe lox tawm Mose, pa mawh kawncau Siyiex mai khaing cub pui hun Isarelax yuh ka mawx lie? ⁷ Mawh kheu kawn simex Athaliyax bun pa caox caig an, hoik preeng tix laig ka daux nyiex bwan Siyiex mai hoik baox teei ti tawx can ceu pa hoik appong tix khankix daux nyiex bwan Siyiex ka siyiex Balax khankix heue. ⁸ Khaix an, simiang tawm lox kieh kix yuh teug tix mu mai deuh plak praix hawt diang siviex nyiex bwan Siyiex heue. ⁹ kix hoik yuh ti tawx lox pao hu ka daux meung Yudax mai ka veng Yerusaliem, sonsang viex kix krax tan hoek ka Siyiex, awm krax pa hoik gwieh Mose ti tawx piang ceu pui Isarelax khankix ka daux tiagtu heue. ¹⁰ Khaix an, cao kaing khankix mai pui khawmuik hoik koe krax pa gaux rhawm mai viex krax tan ti hoek mai sau ti priex ka daux teug tom hoik tawx kix nawh khawmuik heue. ¹¹ Mawh kheu nan, ceu an hoik lih ti mawh, ka daux bawg yam an ceu pui Lewix khankix viex teug an hoek ka daux lum simiang mai yam yaox kix ka hoik kied nie mau, cao tiiem lai simiang mai cao giex kaing li pa ting khankix hoek mai thawk teug an yi mai deeh teei ti deuh teug an ka daux dee ot prim heue, Kix hoik yuh awm an tix ngaix hoik tix ngaix mai hoik khrawm mau tom nie heue. ¹² Khaix an, simiang mai Yehoyadax tawx mau ka pui pa yuh kaing jhaw nyiex bwan Siyiex mai kix cang kix cao pa yuh kaing kaw tiex mai cao pa yuh kaing khaox sonsang deeh cox kix ka nyiex bwan Siyiex mai ka pui pa yuh kaing rhiem kaing tawng sonsang deeh cox priex ka nyiex bwan Siyiex heue. ¹³ Mawh kheu nan, pui yuh kaing khankix hoik sau riang rao ti yuh kaing mai kaing hoik mawh pa grum naog, kix hoik deeh pon cox nyiex bwan Siyiex awm grang pakpeung phao voe mai hoik deeh kieh nawh mawh pa kaux cong heue. ¹⁴ Khaix hoik yuh kix nawh, kix viex mau pa kawn deuk khankix hoek ka plak sivoe simiang mai Yehoyadax, khaix an, kix yuh kraung pa sang shiao tix khankix son nyiex bwan Siyiex mai son kraung pa sang shiao kix daux kaing jhaw mai son krax pa tan tix, pa mawh cawx mai tawg khri tawg mau khankix heue. Kix hoik tan krax tan pa gleeing ka daux nyiex bwan Siyiex sijheeng glang baux singaix Yehoyadax heue. ¹⁵ Viang mawh nan, Yehoyadax, hoik kuad hu sipie mai singaix nawh hoik naog mai nawh hoik yum, nawh koe ju tixyieh tixngoe num yam yum nawh heue. ¹⁶ kix sipaung nawh ka daux veng Davit daux sinax cub simiang khankix, grawh grawng nawh, nawh hoik yuh ceu pa mhawm ka daux sinax ceu pui Isarelax khankix, ka plak sivoe Siyiex mai nyiex bwan Nawh Cao heue. ¹⁷ Khaix hoik yum Yehoyadax, cub cao kaing pui Yudax hoek mai krub ka simiang mai simiang nghiet lox sikah kix heue. ¹⁸ Mawh kheu nan, kix hoik prah ka nyiex bwan Siyiex keeing kix mai hawt ti yuh kaing jhaw khaox riang grang Asherax mai krax song rhawm hoik hoek piang meung Yudax mai veng Yerusaliem kheu jao grawng phimap kix heue. ¹⁹ Viang yuh nan kawx, Nawh Cao ploi cao jhai khankix hoek ka kix sonsang deeh viex kix ing ka Siyiex mai kix hoik jhi krax pa kham sakse tix ka kix heue. Viang mawh nan, kix hoik ang lai koe krax cu nghiet ka heue. ²⁰ Khaix an, khwan Siyiex hoek piang Zekharix kawn simex Yehoyadax, nawh yaog tix cung ka dee lhaong mai ah nin ka kix, "Siyiex ah nin, pex lud ka gumlox pingnyap Siyiex, son ang pex lai pon ti koe krax haok hwan yuh ka mawh lie? Grawh grawng nawh, pex hoik tik hoik vud ka Siyiex heue. Nawh Cao kawx hoik tik vud ka pex heue. ²¹ Mawh kheu nan, kix kum kawng ti yuh ceu pa ang mhawm piang nawh mai ka daux gumlox pa tawm simiang, kix dheem nawh yum ka simaox ka biang nyiex bwan Siyiex heue. ²² Awm an simiang Yoshax, ang lai koe krax doh keud ka krax pa caux rhawm hoik yuh keeing nawh Yehoyadax ka tix mai hoik pah kawn simex nawh yum mai sivoe sang yum Zakharix nawh ah nin "Siyiex tak jhak piang grawng see in mai tak deeh plud ka nawh heue. ²³ Mawh kheu nan, ceu ankix hoik lih ti mawh ka daux bawg yam raux praix daux num an, cub kru naing meung Surix hoek ti puing nawh mai kix hoek ka meung Yudax mai veng Yerusaliem mai kix yuh cao kaing pui khankix laux leeing khawmuik khaing daux sinax pui khankix mai ploi pui hu tawx kraung pa pon tud pon rhim tix khankix ka simiang veng Damase heue. ²⁴ Cub kru naing pui Surix khankix viang mawh cub pui pa iak kawx, Siyiex ap tix tawx cub kru naing pa kied nie ting ka daux tawm taix kix kheu jao grawng hoik tik hoik vud kix ka Siyiex keeing kix heue. Mawh kheu nan, pui Surix khankix prawng ca ka Yoshax heue. ²⁵ Yam hoik deeh lih hu kix khaing nawh, kheu kix prah nawh ot khawm saux mat sigrien sigre, kawncau nawh khankix kawx hoik deeh yuh krax pa tieh feen ka nawh kheu jao grawng nham phimap kawn simex cao giex kaing li Yehoyadax mai pah nawh yum piang ku it nawh, mawh kheu nan, nawh hoik yum heue. Kix sipaung nawh ka daux veng Davit, viang mawh nan, kix ang sipaung nawh ka daux simeeig cub simiang khankix heue. ²⁶ Inkix mawh cub pui pa hoik tieh feen ka nawh; kix mawh Zabat, kawn simex Shimat bun Amon mai Yehozabat kawn simex bun ceu pui Mawbax heue. ²⁷ Yam in phan mawh grawng kawn simex nawh khankix mai been lox ah pui plak nie son grawng nawh khankix mai grawng krax deeh cox khre nawh ka nyiex bwan Siyiex, kix hoik tiem ti deuh grawng been ankix ka daux phuk lai been simiang heue. Khaix an, kawn simex nawh Amazix, hoik deeh kwang haktiex ka dee ot nawh heue.

¹ Amazix koe ju tixnga phwan num yam yaog nawh ti mawh simiang mai nawh kwang haktiex tixnga dim ka daux veng Yerusaliem heue. Ceu kaux miex nawh mawh Yehodan pui veng Yerusaliem heue. ² Nawh yuh ceu pa khaw caw ka plak sivoe ngai Siyiex; viang mawh nan, nawh ang yuh khawm rhawm rhi tix heue. ³ Yam in ceu an khankix hoik lih ti mawh awm an, yam hoik pang kix ti deuh haktiex son nawh, nawh ciyang kawncau nawh khankix pa hoik pah ka keeing nawh pa mawh simiang heue. ⁴ Viang yuh ka mawx kawx, nawh ang pah ti tik kawn praix kix, viang mawh nan, nawh yuh awm krax pa hoik tiem tix ka daux gumlox beenli pa koe ka daux phuk lai Mose pa hoik tawm Siyiex ti deuh ah nin "Keeing khankix tak ang pon ti yum son kawn tix, kawn khankix tak ang pon ti yum son keeing, pui tak tang yum son phimap cao tix heue. ⁵ Lheu khaing an Amazix khrawm pui Yudax khankix mai yaog ti deuh cao kaing naing khankix piang pui kaing yieh, awm krax pa koe doeh nyiex ma keeing kix ka daux cub ceu pui Yudax mai cub ceu pui Binyamin; mai nawh simin ti deuh kix, jah ka pui pa koe ju tixnga num haok plak piang mai pui pa hoik laug nawh ti deuh khankix koe loe sien kaux pa mawh pui sang pon hu daux naing mai pa mawh pui pa pon giex pliah mai pa pon viex plah tiebtie rhiem khankix heue. ⁶ Nawh baox deeh cang pui pa kied ting riang rao, pa koe rhawm vao rhawm kwa khankix tix sien kaux khaing meung Isarelax ka mau tiyieh talantan heue. ⁷ Viang mawh nan, pui Siyiex tix kaux hoek ka nawh ah nin. "Simiang eue, Paw kieh cub kru naing Isarelax hu tau mai maix, grawh grawng nawh Siyiex ang ot tau mai pui Isarelax khankix mai ang ot tau mai kawn praix ceu pui Epharem pie tix kaux kawx heue. ⁸ Viang mawh nan, phan maix sang hu, lih hu heue. Kieh maix koe riang rao kaux cong ka daux naing, viang yuh nan kawx, Siyiex tak kieh maix som nai plak sivoe pui koeng; mawh kheu Siyiex koe sibrawm ti sang teem mai sang pluk pliak ti tik kix heue. ⁹ Khaix an, Amazix ah nin ka pui Siyiex an "Viang mawh nan, ex tak sang yuh ka mawx ka grawng mau tixyieh talantan an, ka pa hoik tawx aux ka cub lien pui Isarelax khankix lie? "pui Siyiex deeh pawk ah nin "Siyiex mawh pa nie lheu pon tawx ceu ankix ka maix heue. ¹⁰ Mawh kheu nan, Amazix tang gwieh ti deuh pui naing an khankix pa hoik hoek ka nawh khaing haktiex Epharem, sonsang deeh ing kix ka nyiex ma tix heue. Mawh kheu jao an, krax pa song rhawm kix hoik kied lih piang pui Yudax mai kix hoik deeh blak ti ing ka nyiex ma tix ka daux krax pa kied song rhawm tix heue. ¹¹ Khaix an, Amazix sau riang rao tokaux cao tix kaux mai thong bung ka pui nawh khankix; nawh hu ka daux ngawd kih mai pah pui ot piang gawng Sirax khankix yum tix mheen kaux heue. ¹² Kawn praix pui Yudax khankix teei pui pa im pa giex laung kix tix mheen kaux mai viex kix haok piang choek rang, cot kix rau sonsang pot sang phawng kix khawmuik heue. ¹³ Viang mawh nan, son nyawm lien cub kru naing pa hoik gwieh Amazix tix priex mai sonsang ang kix lai pon ti hu tau mai nawh ka daux bang naing, kix puing ti teei veng Yudax khankix, jah ka veng Samarix, tom hoek ka veng Biet Horom mai pah pui pa ot ka daux veng loe rheng kaux yum mai hoik teei kraung pa tud rhim khankix tom nie heue. ¹⁴ Yam in ceu ankix hoik baox lih ti mawh, khaix hoik hoek Amazix khaing pah tix pui Edom yum, nawh teei ti viex siyiex ceu pui Sirax hoek mai jung ti deuh ankix mawh Siyiex Cao nawh mai ngeuh kaing tix ka plak sivoe kix mai gleeing ti tawx nyawng bhawng ka kix heue. ¹⁵ Mawh kheu nan, krax song rhawm Siyiex hoik lih piang Amazix mai Nawh Cao ploi cao jhai hoek ka nawh tix kaux, ah nin ka nawh "Maix sawg ti yaox siyiex tang ceu khankix pa ang pon taoh ka pui tokaux cao nawh khaing daux tawm taix maix yuh ka mawx lie? ¹⁶ Mawh kheu nan, ceu ankix hoik lih ti mawh yam sikah nawh tau mai simiang ah nin ka nawh, "Mawh hoik kieh yix maix mawh cao pa tawx krax keud ka simiang lie? paw nye! maix lai sang sawg ti yum kheu jao patix lie? "Khaix an, cao jhai yawg tix mai deeh ah nin "Aux tawng ka hoik tat Siyiex rhawm ti sang yuh maix laux leeing, kheu jao hoik yuh maix ceu in mai kheu jao ang maix lai cu ti nghiet ka krax keud pa tawx aux khankix heue. Pui Isarelax Pex Ka Pui Yudax ¹⁷ Khaix hoik kum kawng Amazix simiang meung Yudax mai nawh ploi pui hu ka Yoshax kawn simex Yehohaza, kawn simex Yehu, pa mawh simiang meung Isarelax ah nin, "Hoek heue, Kieh ex yaox paox tix daux bang naing heue. ¹⁸ Yoshax simiang Isarelax ploi pui hu ka Amazix simiang meung Yudax ah nin khaox kat lawm pa koe ka daux Lebanon, hoik ploi hu ka khaox Arit, pa koe ka daux Lebanon ah nin, tawx kawn bun maix mawh moeng kawn simex aux; mai totiag khaing Lebanon hoik tiang ti hu mai dig piang khaox kat lawm an heue. ¹⁹ Maix ah ka hoik pex tix ceu pui Edom khankix tete mai rhawm maix hoik yaog tix yaw rangdi tix heue. Ot maix daux nyiex khaing! Maix chix sang sawg ti yaox krax pa kha rhawm sonsang som nai tix mai khawm pui Yudax pa ot tau mai maix khankix yuh ka mawx lie? ²⁰ Viang mawh nan, Amazix ang cu ti nghiet ka lox ankix, mawh kheu ceu ankix hoik kaoh khaing Siyiex, sonsang tawx Nawh Cao kix ka daux tawm taix pui koeng kix kheu jao grawng hoik sawg kix ka siyiex haktiex Edom khankix heue. ²¹ Mawh kheu nan, Yoshax simiang meung Isarelax, lih hu; nawh mai Amazix, simiang meung Yudax yaox paox tix ka daux veng Bieshemiet, pa mawh cie meung Yudax heue. ²² Pui Yudax khankix hoik som ka pui Isarelax mai pui ku kaux tang to ka nyiex gox cao tix heue. ²³ Khaix an, Yoshax simiang meung Isarelax hoik pon giex ka Amazix simiang meung Yudax, pa mawh kawn simex Yoshax, kawn simex Yehohaza, ka daux veng Bietshemiet mai hoik viex nawh hoek ka veng Yerusaliem mai hoik yieh ti tik veng Yerusaliem, plak diang siviex Epharem, tom hoek ka caong daog diang siviex an pon yieh sawk heue. ²⁴ Nawh teei khri mai mau khankix, khawm kraung khrai pa hoik yaox nawh ka daux nyiex bwan Siyiex tau mai Obed-edom mai kraung khrai sinngao daux nyiex simiang khankix khawm can pui pa laung nawh ti deuh khankix mai deeh ing ka veng Samarix heue. ²⁵ Amazix kawn simex Yoshax, simiang meung Yudax, im ju kao phwan num khaix hoik yum Yoshax, kawn simex Yehohaza, simiang meung Isarelax heue. ²⁶ Yam in grawng kaing pa deuh Amazix ti yuh, jah tom hoek dee sidah, ang hoik mawh kix pa hoik tiem ti deuh ka daux phuk lai been simiang meung Yudax mai meung Isarelax lie? ²⁷ Khaix hoik yam deeh viex Amazix khaing krax hawt tix khaix Siyiex, kix yuh cub caw pa deeh tieh feen ka nawh ka daux veng Yerusaliem mai nawh to ka veng Lakhishax; viang mawh nan, kix hoik ploi pui khankix hawt khaix nawh ka daux veng Lakhishax mai pah nawh yum heue. ²⁸ Khaix an, kix tang tix viex nawh hoek piang brung mai sipaung nawh tau mai keeing nawh ka daux veng Yudax heue.

¹ Yam in pui Yudax khawmuik teei Uziya pa koe ju liah num mai deeh yaog nawh mawh simiang tang keeing nawh Amazix heue. ² Nawh sum veng Elat mai deeh teei laig ka daux meung Yudax khaix hoik laux lee simiang tix tau mai keeing nawh khankix heue. ³ Uziya hoik koe ju kao liah num yam yaog nawh ti mawh simiang mai nawh kwang haktiex tixphwan ra num ka daux veng Yerusaliem heue. Ceu kaux miex nawh mawh Yekholix pui veng Yerusaliem heue. ⁴ Nawh yuh ceu pa khaw caw ka plak sivoe ngai Siyiex awm krax pa hoik yuh keeing nawh Amazix khawmuik heue. ⁵ Nawh sawg ka Siyiex ka daux singaix im ju Zekharix pa hoik koe krax tawng yung ka daux krax pa plak jhi Siyiex khankix; mai glang bawg yam hoik sawg nawh ka Siyiex, Siyiex yuh nawh haok hwan ting lhaong heue. ⁶ Yam in nawh lih hu mai yuh naing ka ceu pui Philitix khankix mai yieh ti tik guh veng Gat guh veng Yabane mai khawm guh veng Ashadat; mai nawh deeh sum veng khraox khankix hawt vung viang veng Ashadat mai ka daux sinax ceu pui Philitix khankix heue. ⁷ Siyiex teem nawh khaing ceu pui Philitix khankix mai khaing ceu pui Arap pa hoik ot ka daux veng Gura Balax mai ceu pui Mahunem khankix heue. ⁸ Ceu pui Amon hoik baox deeh viex ti tawx totaix khankix ka Uziya heue. Krax pa ao min nawh khankix hoik tah hu tom hoek ka haktiex Ejiptux kheu jao hoik yuh nawh riang rao tokaux cao tix kaux cong sigrien sigre heue. ⁹ Uziya sum nyiex pau dee lhaong ka daux veng Yerusaliem ka daog diang siviex veng mai ka daux ngawd guh veng ka dee gawk guh veng tix heue. Khaix an, nawh yuh ankix kaux cong heue. ¹⁰ Nawh sum nyiex pau pa lhaong ka daux tiagtu heue. Nawh kaong rawm daux tom nie, kheu jao hoik koe khawng eei brie liang nawh tom nie, ka daux ngawd mai ka dee phin haktiex, nawh baox koe cao yuh ma yuh kaung mai cao priex sipeem plix siiet piang gawng piang lua mai ka dah dee mhawm tiex khankix, kheu jao koe rhawm nawh ka kaing ankix heue. ¹¹ Lheu khaing an Uziya baox koe kru naing pa pon puing naing tix cub, pa hoik lih hu daux naing cub mawx cub an, awm pa koe carang kix, ka pa hoik simin cao tiiem lai Yeyelax mai cao kaing Maseyax ti deuh greem tawm taix Hananix pa mawh cao kaing naing simiang khankix heue. ¹² Carang cao kaing ting khawmuik pa mawh cub pui pa ting riang rao mai pa koe rhawm vao rhawm kwa khankix hoik koe ra rheng liah yieh kaux heue. ¹³ Ka daux greem tawm taix kix hoik koe cub kru naing loe sien aliah rheng phwan yieh kaux pa hoik pon yuh naing tau mai riang rao pa ting sibrawm tix khankix, sonsang teem kix simiang puing ka pui koeng heue. ¹⁴ Uziya khre tix tawx kraung tiebtie rhiem, mhok rhiem, ak mai ak yang yit pa puing ka lon simaox khankix heue. ¹⁵ Nawh kieh pui chix pui min khankix yuh cag ka daux veng Yerusaliem, sonsang deuh nawh ti priex ankix piang nyiex pau dee lhaong mai ka daog nyiex sonsang mawh pa puing te mai lon simaox pa ting khankix lih heue. Mawh kheu nan, grawng krax pa ao min nawh hoik tah hoek tom dee singai, hu kudah dee kheu jao hoik pon nawh krax teem pa kied ting lhaong tom hoik dee pon nawh tix koe riang rao heue. ¹⁶ Viang mawh kawx nan, yam hoik ting riang sibrawm Uziya, rhawm nawh hoik ting lhaong sonsang hoek tix ka daux krax pa laux leeing, kheu nawh hoik lud ka Siyiex nawh ka grawng laig tix ka daux nyiex bwan Siyiex sonsang gleeing tix nyawng bhawng piang khu dee tok nyawng bhawng heue. ¹⁷ Mawh kheu nan, cao giex kaing li Azarix hoik hoek laig khaix nawh mai cub cao giex kaing li Siyiex pa koe rhawm vao rhawm kwa khankix tix daix kaux hoik hoek ti hu tau mai nawh heue. ¹⁸ kix tiebtie ka simiang Uziya mai ah nin ka nawh, "Uziya eue, grawng krax pa gleeing nyawng bhawng an ang mawh kaing maix, mawh kaing pa sang yuh cub kawn simex Arun khankix pa hoik appong tix singax singeh, mawh kheu maix hoik lud heue. Maix tak ang lai pon ti koe min plakngai ka plak sivoe ngai Siyiex heue." ¹⁹ Khaix an, Uziya meet rhawm mai nawh giex tawg pheung tix mu ka daux taix tix, sonsang gleeing nawh nyawng bhawng an heue. glang song rhawm nawh ka cao giex kaing li khankix, jhawm saux sipawg hoik lih piang kaing re nawh sivoe cao giex kaing li khankix ka daux nyiex bwan Siyiex hawt praok khu nyawng bhawng an heue. ²⁰ Azarix cao giex kaing li pa ting khawm cao giex kaing li khawmuik hoik jhak nawh mai piang kaing re nawh hoik pon jhawm saux sipawg heue. Mawh kheu nan, kix dheen nawh lih hu plak praix heue. Nawh hoik nied ti lih hu plak praix kheu jao hoik ciyang Siyiex ka nawh heue. ²¹ Simiang Uziya koe jhawm saux sipawg tom hoek singaix yum nawh heue, Nawh ot ka daux nyiex pa khan tix singaix tix lhang nong nong kheu jao koe saux sipawg nawh, mawh kheu nan, nawh hoik ot singai khaing nyiex bwan Siyiex heue. Khaix an, kawn simex nawh Yotham yaog ti mawh cao kwang piang daux nyiex simiang mai prawng see ka pui haktiex heue. ²² Mawh kheu nan, can kaing pa deuh Uziya ti yuh yam jah tom dee sidah khankix, cao jhai Isayax kawn simex Amok hoik tiem ti priex heue. ²³ Mawh kheu nan, Uziya laux lee tix tau mai keeing nawh mai kix sipaung nawh tau mai keeing nawh ka daux gwang simeeig pa hoik mawh cie simiang khankix, mawh kheu kix ah nin "Nawh mawh pui saux sipawg tix kaux heue. "Khaix an, kawn simex nawh Yotham deeh yaog ti kwang haktiex ka dee ot nawh heue.

¹ Yotham hoik koe ju tixnga phwan num, yam yaog nawh ti mawh simiang mai nawh kwang ka daux veng Yerusaliem kao liah num heue. Ceu kaux miex nawh mawh Yerusha kawn bun Zadok heue. ² Viang ang nawh laig ka daux nyiex bwan Siyiex kawx, nawh yuh pa khaw caw ka plak sivoe ngai Siyiex awm pa hoik yuh keeing nawh Uziya khawmuik heue. Viang mawh nan, pui khankix kawn ca yuh krax pa caox heue. ³ Nawh sum diang siviex plak piang ka nyiex bwan Siyiex mai nawh sum guh veng Ophelax kaux cong heue. ⁴ Lheu khaing an, nawh sum ti deuh veng piang gawng Yudax mai nawh sum ti deuh nyiex tab mai nyiex pau dee lhaong ka daux tiag heue. ⁵ Nawh baox puing naing ka simiang ceu pui Amon mai pex kix heue. Pui Amon tawx mau tiyieh talantan nghox ca tix mheen kawrax mai khawm nghox koi tix mheen kawrax ka nawh, daux num an heue. Pui Amon khankix baox deeh tawx an ka nawh awm an ka daux ra num mai loe num heue. ⁶ Mawh kheu nan Yotham kied ting riang rao, kheu jao hoik cox khre nawh daux krax pa yuh ti khaw caw sivoe Siyiex nawh heue. ⁷ Yam in grawng kaing ghoik Yotham ti yuh mai grawng puing nawh naing mai grawng krax pa yuh nawh khawmuik, kix hoik tiem ti deuh grawng ankix ka daux phuk lai been cub simiang Isarelax mai simiang Yudax khankix heue. ⁸ Nawh hoik koe ju tixnga phwan num yam yaog nawh ti mawh simiang mai nawh kwang haktiex kao loe num, daux veng Yerusaliem heue. ⁹ Mawh kheu nan, Yotham laux lee it tau mai keeing nawh mai kix sipaung nawh ka daux veng Davit heue. Khaix an, kawn simex nawh Ahaza deeh plud ti kwang haktiex ka dee ot nawh heue.

¹ Ahaza hoik koe ju tixnga num yam yaog nawh ti mawh simiang mai nawh kwang haktiex kao liah num ka daux veng Yerusaliem; mai nawh ang cu ti yuh ceu pa khaw caw ka plak sivoe ngai Siyiex awm pa hoik yuh keeing nawh Davit heue. ² Mawh kheu nawh hawt lawng daux krax pa yuh simiang meung Isarelax mai raug ti yuh riang grang son siyiex Balax heue. ³ Nawh gleeing nyawng bhawng ka daux ngawd kawn simex Hinnom mai gleeing ti tan kawn praix nawh khankix ka daux ngu, awm krax pa seeing brai ceu pui ankix, pa hoik grheu Siyiex nawh lih khaing plak sivoe kawn praix ceu pui Isarelax khankix heue. ⁴ Nawh appong ti tan mai gleeing nyawng bhawng piang dee pa lhaong piang gawng mai ka greem num pang khaox klai lhax kudah heue. ⁵ Mawh kheu nan, Siyiex hoik ap ti tawx nawh ka daux tawm taix simiang meung Surix heue. Kix pex nawh mai teei ti viex cub pui hun hu awm pui pa giex laung mai hoik viex kix hoek ka veng Damase heue. Khaix an, nawh ap tix ka daux tawm taix simiang meung Isarelax pa hoek ka nawh taux mai krax pah yum pa kied ting heue. ⁶ Ka daux tix singaix ngie, Peka kawn simex Remalix hoik pah pui Yudax pa koe rhawm vao rhawm kwa tix sien ra mheen kaux yum, kheu jao grawng hoik tik vud kix ka Siyiex keeing kix heue. ⁷ Zikharix pa mawh pui pa kied ting riang rao daux Epharem hoik pah ka Maseyax kawn simex simiang Azarikam pa mawh cao kaing pa kwang ka daux nyiex nawh mai Elakanax pa mawh simiang ra kaux tix kaux heue. ⁸ Ceu pui Isarelax khankix giex ti teei puxaik puxo, kawn simex kawn bun kix ra sien kaux mai kix baox rhim ti teei kraung khrai tom nie viex hoek ka veng Samarix heue. ⁹ Viang mawh nan, cao jhai Siyiex pa ot tan tix kaux pa ceu kaux nawh mawh Odiet, mai nawh hu plak sivoe cub kru naing pa deeh hoek ka veng Samarix mai ah nin ka kix, "Jhak heue, mawh kheu jao grawng hoik song rhawm Siyiex keeing pex khankix ka meung Yudax, Nawh Cao hoik ap ti tawx ka daux tawm taix pex; viang mawh nan, pex hoik pah kix yum ka daux pa song rhawm tix tom hoek ka daux meung raoma heue. ¹⁰ Yam in pex sang khin kawn praix meung Yudax mai pui veng Yerusaliem mawh siliex simex siliex bun pex; viang mawh nan, mawh ang pex koe krax lud ka plak sivoe Siyiex Cao pex lie? ¹¹ "Yam in nghiet ka lox aux, pex deeh tawx pui pa giex laung pa hoik rhim pex ti teei khaing puxaik pex khankix ing, phan ang mawh nan, krax pa kied song rhawm Siyiex tak hoek piang pex heue. ¹² Khaix an, cao kaing kawn praix Epharem khankix tiblah pa mawh Asariya kawn simex Yohanan, Berekhiya kawn simex Hadalie khankix pa hoik cung tix tieb can pui ankix pa hoik hoek khaing daux naing, ¹³ ah nin ka kix, "Pex tak ang pon ti viex pa giex laung inkix hoek tin, mawh kheu ex hoik koe krax pa lud loe ka Siyiex heue. Pex sang baox naok ankix piang phimap ex mai piang pa lud tix khankix, mawh kheu nawh, krax pa lud ex hoik mawh pa kied ting mai krax pa kied meet rhawm an koe piang ceu pui Isarelax khankix heue." ¹⁴ Mawh kheu nan, cub pui naing khankix, hoik prah ka pui pa giex laung tix khankix mai khawm kraung pa pon tud rhim tix khankix ka plak sivoe cao kaing mai cub phung pui hun khankix khawmuik heue. ¹⁵ Khaix an, can pui pa hoik mhai kix ceu kaux khankix yaog ti kaoh mai hoik teei pui pa giex laung an khankix mai khaing daux kraung pa tud rhim ankix teei ti tawx pui pa ang koe kraung ceep khankix daux sinax kix mai tawx kix ceep kraung, tawx kix ceep kiiep mai tawx pa ih ka kix khawm rawm nyaux khankix mai kraix bee ka kix heue. Hoik kieh kaux pui pa ang koe riang khankix brug la heue. Mawh kheu nan, kix hoik deeh viex kix hoek ka puxaik kix ka daux veng Yerikho, pa mawh veng pa koe pang khaox jhie yaong khankix heue, Khaix an, kix deeh ing ka veng Samarix heue. ¹⁶ Ka daux bawg yam an, Simiang Ahaza ploi cao cau khankix hu kok cub simiang meung Asurix khankix sonsang teem ka nawh heue. ¹⁷ Mawh kheu pui Edom khankix baox hoek puing ka meung Yudax mai giex ti viex pui khankix hu heue. ¹⁸ Can pui Philitix khankix baox deeh laig tix puing veng khankix pa koe ka dee lung haktiex mai ka plak seh meung Yudax khankix mai hoik rhim ti teei veng Biet-shemiet, veng Ayalon, veng Gederot, veng Sawkhaw, khawm nyiex yaong nawh khankix, veng Timna khawm nyiex yaong nawh khankix mai veng Gimzaw khawm nyiex yaong nawh khankix mai kix pang ti ot tan heue. ¹⁹ Siyiex yeen meung Isarelax tiiem kheu jao Ahaza simiang Isarelax mai kheu jao hoik laux jhawm mhawm ka daux meung Yudax mai nawh ang lai baox koe krax pa kaux sijax ka Siyiex heue. ²⁰ Tigalatpilesa pa mawh simiang meung Asurix hoek ka nawh mai hoik yuh krax pa laux rhawm nawh mai ang cu tix tawx krax teem ka nawh heue. ²¹ Grawh grawng nawh, Ahaza hoik gwieh ti teei sinngao kraung khrai khankix khaing daux nyiex bwan Siyiex mai khaing daux nyiex simiang mai khaing daux cie cao kaing an khankix mai nawh hoik tawx ankix ka simiang meung Asurix; viang mawh nan, nawh ang teem ka nawh heue. ²² Yam in ka daux bawg yam laux rhawm simiang Ahaza, nawh kied nie ang koe krax pa kaux sijax ka Siyiex heue. In mawh grawng krax pa yuh simiang Ahaza heue. ²³ Mawh kheu nawh hoik appong ti tan ka siyiex veng Damase pa hoik pex ka nawh ah nin, "Mawh kheu teem siyiex simiang meung Surix ka kix, aux tak sang appong krax tan tix ka kix, sonsang pon kix tix teem ka aux heue. "Viang mawh nan, siyiex ankix hoik mawh pa kieh simiang Ahaza mai ceu pui Isarelax khankix khawmuik laux leeing heue. ²⁴ Mawh kheu nan, Ahaza deeh kraix khrawm kraung khrai nyiex bwan Siyiex khankix tau, hoik pat ti tik kraung khrai nyiex Siyiex khankix phawng mai hoik nyeep ti deuh siviex nyiex bwan Siyiex khankix mai yuh ti deuh khu dee tan khankix son tokaux cao nawh daux veng Yerusaliem ku daog ku dawn heue. ²⁵ Ka daux veng Yudax khankix ku veng, nawh hoik yuh ti deuh dee pa lhaong khankix sonsang gleeing tix nyawng bhawng ka siyiex tang kaux tang hak mai kieh pa song rhawm Siyiex keeing nawh lih heue. ²⁶ Yam in grawng kaing pa ghoik nawh ti yuh khankix mai grawng krax pa yuh nawh khankix khawmuik yam jah tom sidah, kix hoik tiem ti deuh grawng ankix ka daux phuk lai been cub simiang meung Yudax mai meung Isarelax khankix heue. ²⁷ Mawh kheu nan, Ahaza hoik laux lee it tau mai keeing nawh mai kix sipaung nawh ka daux veng Yerusaliem; viang mawh nan, kix ang viex nawh laig ka daux simeeig cub simiang meung Isarelax khankix heue. Khaix an, kawn simex nawh Hezakiyax hoik deeh plud ti kwang haktiex ka dah dee ot nawh heue.

¹ Hezakiyax yaog ti mawh simiang yam koe ju nawh tixnga phwan num mai nawh hoik kwang haktiex tixnga dim num, ka daux veng Yerusaliem heue. Ceu kaux miex nawh mawh Abiyax kawn bun Zakharix heue. ² Nawh yuh can ceu pa khaw caw ka daux plak sivoe ngai Siyiex awm krax pa hoik yuh keeing nawh Davit khawmuik heue. ³ Ka daux num pa kwang nawh dau num jah ka daux khix tix, nawh paoh siviex nyiex bwan Siyiex mai deeh cox ka heue. ⁴ Khaix an, nawh deeh viex cao giex kaing li mai pui Lewix khankix hoek mai khrawm kix ka daux bing pak plak lih singaix, ⁵ mai ah nin ka kix, "Pui Lewix khankix eue, nghiet ka aux, "yam in yuh tokaux cao pex singax mai yuh nyiex bwan Siyiex keeing pex khankix singax mai teei ti tik kraung pa seeing khankix khaing dee pa singax singeh heue. ⁶ Mawh kheu keeing ex khankix hoik lud mai hoik yuh pa caox caig ka plak sivoe ngai Siyiex ex; kix hoik tik hoik vud ka nawh mai hoik veeh plakngai tix hu dee singai khaing dee ot dee koe Siyiex mai veeh blawg tix plak nawh cao heue. ⁷ Kix baox nyeep ti deuh siviex sidub nyiex bwan mai hoik preet kawk ngu mai ang lai gleeing nyawng bhawng mai ang lai tan krax tan pa gleeing khankix ka dah dee pa singax singeh ka nyiex ceu pui Isarelax khankix heue. ⁸ Mawh kheu nan, krax pa song rhawm Siyiex hoik lih piang meung Yudax mai piang veng Yerusaliem mai tawx krax pa kha rhawm ka kix mai yuh kix daox deng mai yuh kix koe lox sa lox lao, awm yaox pex nawh ka ngai tix heue. ⁹ Mawh kheu jao grawng in, keeing ex hoik goh ti yum ka vaig mai kawn simex kawn bun ex khankix mai moeng ex hoik yaox ti ot ka daux pa giex laung heue. ¹⁰ Yam in aux koe rhawm tix sang yuh, sijax mukheu tau mai Siyiex ceu pui Isarelax, mawh sonsang kieh krax pa kied song rhawm Nawh Cao veeh tix hu singai khaing ex heue. ¹¹ "Kawn simex aux khankix eue, paw kieh pex koe rhawm nieh rhawm ciien yam in liak, mawh kheu Siyiex hoik laug ti teei pex, sonsang pon cung pex ti yuh kaing jhaw ka plak sivoe Nawh Cao mai sonsang yuh kaing jhaw pa tok nyawng bhawng ka son Nawh Cao heue. ¹² Khaix an, pui Lewix inkix pa mawh Mahat kawn simex Amashie mai Yawlax kawn simex Azarix, doeh ru Kawhat; doeh ru kawn simex Merarix pa mawh Kishax kawn simex Abadix mai Azarix kawn simex Yehalelax; daux doeh ru Geshon pa mawh Joah kawn simex Zimma mai Edem kawn simex Joah, ¹³ doeh ru kawn simex Elizaphan, mawh Shimri mai Yeyelax; doeh ru kawn simex Asapha, pa mawh Zakharix mai Matannia, ¹⁴ doeh ru kawn simex Heman, pa mawh Yehilax mai Shemix; doeh ru kawn simex Yedutum, pa mawh Shemayax mai Uzilax, ¹⁵ kix yaog ti kaoh kraix khrawm ti deuh puxaik kix mai yuh tokaux cao kix singax mai hoik hawt awm lox tawm simiang ka daux gumlox Siyiex ti deuh, sonsang singax singeh yuh kix pa nyiex bwan Siyiex heue. ¹⁶ Khaix an, cao giex kaing li khankix laig ka plak daux nyiex bwan Siyiex sonsang yuh tix nawh singax singeh mai teei can nyhee pa yaox kix ka daux nyiex bwan Siyiex heue. Pui Lewix khankix, teei ceu ankix lih mai don ti tik ka daux rawm klawng iak Kidaron heue. ¹⁷ Yam in, kix jah ti yuh krax pa singax singeh ka daux khix tix, tix ngaix mai ka daux daix singaix khix an, kix hoek ka sidub nyiex bwan Siyiex heue. Khaix an, kix yuh nyiex bwan Siyiex singax singeh ka daux daix ngaix mai ka daux kao liah singaix daux khix tix, kix hoik yuh ankix hoik heue. ¹⁸ Khaix an, kix hu laig ka dee ot simiang Hezakiyax ah nin, "Yix hoik yuh nyiex bwan Siyiex khankix singax singeh khawmuik mai khu krax tan pa gleeing khankix, khawm kraung pa shiao khankix mai pheen pa khan blah, khawm kraung pa shiao nawh khankix khawmuik heue." ¹⁹ Lheu khaing an, can ceu kraung shiao pa hoik tik hoik vud simiang Ahaza khankix, dau baux yam kwang nawh, ka haktiex yam hoik lud nawh khankix, yix hoik cox khre cox priex mai hoik mawh pa singax singeh mai can ceu ankix, mawh pa koe tan plak sivoe krax krub dee tan Siyiex heue. ²⁰ Khaix an, simiang Hezakiyax yaog ti kaoh caocao mai khrawm cao pa kwang ka daux veng khankix mai kix haok ka nyiex bwan Siyiex heue. ²¹ Kix teei ti viex moi aliah mu, yung aliah mu, kawn yung iak aliah mu mai khawm pex mhaing aliah mu, yung krax tan pa pluat ploi phimap, son haktiex mai son dee pa singax singeh mai son meung Yudax khankix heue. Khaix an nawh tawm lox ka cao giex kaing li khankix pa mawh kawn simex Arun, sonsang tan ceu ankix piang khu dee tan Siyiex heue. ²² Mawh kheu nan, kix pah mawie khankix mai cao giex kaing li rieb ti teei nham mai phruat ankix piang khu dee tan an heue. Awm an, kix hoik pah yung khankix mai phruat nham piang khu dee tan heue. Kix baox deeh pah kawn yung iak khankix mai phruat nham piang khu dee tan heue. ²³ Khaix an, kix viex pex mhaing khankix lih, yuh krax tan pa pluat ploi ka sivoe simiang mai ka plak sivoe pui hun mai kix deuh taix tix piang ankix heue. ²⁴ cao giex kaing li pah ankix yum mai kix tan ti deuh nham piang khu dee tan son krax tan pa pluat ploi phimap, krax pa khyox khaw son ceu pui Isarelax khawmuik, mawh kheu simiang hoik tawm lox ka kix, sonsang yuh kix krax tan pa gleeing mai krax tan pa pluat ploi phimap ka son ceu pui Isarelax khankix khawmuik heue. ²⁵ Khaix an, nawh tawx pui Lewix khankix ka daux nyiex bwan Siyiex tau mai chiang, ting pa koe maox mai ting plah kaox feuk khankix, awm gumlox tawm Davit mai cao jhai cie simiang pa mawh Gat mai cao jhai Natan heue. Grawh grawng nawh, an hoik mawh lox tawm ping nyap Siyiex ti deuh khaing cao jhai khankix heue. ²⁶ Pui Lewix khankix yaog tix cung tau mai kraung ting pa hoik yuh Davit ti deuh mai cao giex kaing li khankix cung tau mai teettawng heue. ²⁷ Khaix an, Hezakiyax tawm lox ka kix, son song tan kix krax tan pa gleeing piang khu dee tan heue. Yam jah kix ti yuh krax tan pa gleeing, kix kawx ah lai rhax yaogyaw Siyiex tau mai teettawng mai kraung ting pa hoik yuh Davit pa mawh simiang ceu pui Isarelax ti deuh heue. ²⁸ Mawh heu nan, cub pui hun khawmuik krub ka Siyiex mai cao pa ah lai rhax khankix hoik ah lox rhax kix mai cao phlu teettawng kix hoik kieh teettawng si num; kix khawmuik sitoe ti hu tom hoek bawg yam yuh kix krax tan pa gleeing heue. ²⁹ Yam hoik naox kix krax tan khankix, simiang mai can pui pa ot tau mai nawh khankix, hoik gup kaing tix mai krub ka heue. ³⁰ Lheu khaing an, simiang Hezakiyax mai cub cao kaing khankix, tawx lox tix ka pui Lewix, sonsang rhax kix lai rhax yaogyaw ka Siyiex ka gumlox kab Davit mai cao jhai Asapha heue. Mawh kheu nan, kix hoik rhax lai rhax yaogyaw tau mai krax gaux rhawm mai kix gup kaing tix mai krub ka heue. ³¹ Khaix an, Hezakiyax deeh pawk lox ah nin, "Yam in, pex hoik appong tokaux cao tix ka Siyiex, hoek dee dex mai viex krax pa appong tix khankix mai krax tan pa yaogyaw khankix laig ka daux nyiex bwan Siyiex heue. "Mawh kheu nan, cub pui hun khankix, viex krax pa appong mai viex krax tan pa gleeing tix khankix hoek heue. ³² carang krax tan pa gleeing pa hoik viex cub pui hun khankix mawh mawie atixgliah mu, yung tiyieh mu mai kawn yung iak ra yieh mu; inkix khawmuik mawh son krax tan pa gleeing ka Siyiex heue. ³³ Can ceu pa appong ti tan khankix, mawh mawie liah yieh mu mai yung khankix loe rheng mu heue. ³⁴ Viang mawh kawx nan, cao giex kaing li khankix hoik kied tux, kix ang pon peeik hak tobrie krax tan pa gleeing khankix khawmuik; mawh kheu nan, puxaik kix pui Lewix khankix yaox tix teem ka kix yam hoik sidah yuh kix kaing mai tom hoek bawg yam hoik yuh cao giex kaing li tang kaux khankix tokaux cao tix singax singeh, mawh kheu pui Lewix khankix, hoik nie lheu sau riang rao tokaux cao tix ka grawng pa yuh tix nawh singax singeh khaing cao giex kaing li khankix heue. ³⁵ Krax tan pa gleeing khankix hoik baox lheu tom nie mai klon bee, krax tan pa nhim, khawm krax tan pa nyaux khankix, son krax tan pa gleeing kuceu heue. Mawh kheu nan, kaing jhaw daux nyiex bwan Siyiex hoik mawh pa grum yuh tix heue. ³⁶ Khaix an, Hezakiyax mai pui khankix koe krax pa gaux rhawm ka pa hoik khre rien Siyiex ti tawx ka pui khankix, kheu hoik kied phai hoik grawng ankix heue.

¹ Hezakiyax kok ceu pui Isarelax mai pui Yudax khankix hoek mai nawh tiem ti tawx lai hu ka ceu pui Epharem mai ceu pui Manashe khankix, sonsang pon kix tix hoek ka nyiex bwan Siyiex daux veng Yerusaliem, sonsang pon yuh kix pawie Pasakha ka Siyiex ceu pui Isarelax heue. ² Grawh grawng nawh, simiang mai cao kaing nawh mai cub pui hun khawmuik hoik grum rhawm ti sang yuh pawie Pasakha daux khix ra heue. ³ Mawh kheu kix ang nyang bax pon ti yuh ka pawie daux bawg yam an, kheu jao grawng ang cub cao giex kaing li pa hoik yuh tokaux cao tix singax singeh khankix nyang bax kub mai pui khankix ang nyang bax hoik khrawm paox tix tau ka daux veng Yerusaliem tan heue. ⁴ grawng an hoik mawh pa khaw rhawm simiang mai cub pui hun khankix khawmuik heue. ⁵ Mawh kheu nan, kix hoik tat rhawm ti sang yuh pa pao lox hu ka daux meung Isarelax khawmuik, jah ka veng Brashebax tom hoek ka veng Dan, sonsang hoek kix ti yuh pawie Pasakha ka son Siyiex ceu pui Isarelax ka daux veng Yerusaliem, kheu rheung ang kix lai sax yuh pawie an, awm pa hoik tat kix ti deuh heue. ⁶ Khaix an, cao to tix tawx lai lih hu ka daux meung Isarelax mai meung Yudax khawmuik, tau mai lai pa kaoh khaing simiang mai cao kaing mai hoik krai grawng ankix, awm gumlox pa tawm simiang ah nin, "Kawn praix Isarelax khankix eue, deeh ing ka Siyiex Abraham, Icak mai Isarelax heue. Khaix an, Nawh Cao tak sang deeh hoek ka can pex pa kawn deuk mai pa hoik glawd khaing daux tawm taix simiang meung Asurix heue. ⁷ paw kieh pex awm keeing pex mai puxaik pex khankix, pa hoik lud ka Siyiex keeing kix mai tom hoik yuh Nawh Cao kix laux leeing khawmuik awm hoik yaox pex nawh ka ngai tix heue. ⁸ Yam in paw koe krax kiien ngawg awm keeing pex khankix, viang mawh nan, appong ti tawx kaux cao pex ka Siyiex mai laig ka dah dee pa singax singeh Nawh Cao, pa hoik yuh Nawh Cao mawh pa singax singeh leeing ju mai yuh kaing jhaw Siyiex pex, sonsang deeh pon veeh Nawh Cao pa song rhawm tix luan dee singai khaing pex heue. ⁹ Phan pex deeh ing ka Siyiex, puxaik pex khankix mai kawn praix pex khankix, tak sang mawh pa yaox krax pa caux rhawm ka plak sivoe ngai pui pa giex laung ka kix, son tak deeh pon kix ti hoek ka daux haktiex in; mawh kheu Siyiex pex, mawh pa chix tawx bwanson mai pa caux rhawm mai pakngai Nawh Cao tak ang lai veeh tix khaing pex, phan pex deeh ing ka nawh heue. ¹⁰ Mawh kheu nan, cao to ti tawx lai khankix hoik tiang ti hu tix veng hoik tix veng ka daux haktiex Epharem mai haktiex Manashe, tom hoek dee singai ka baoh haktiex Zebulun; viang mawh nan, pui haktiex khankix nyiah sibriem ka kix mai ne ka kix heue. ¹¹ Viang yuh nan kawx, pui khankix khaing baoh haktiex Asha, Manashe mai baoh haktiex Zebulun khankix hoik yuh tokaux cao tix tiiem mai hoek ka veng Yerusaliem tan heue. ¹² Taix Siyiex koe piang pui Yudax khankix, sonsang kieh kix koe rhawm tix mu, sonsang hawt kix ti yuh ankix, awm lox tawm simiang mai cao kaing khankix, ka daux gumlox Siyiex heue. ¹³ Yam in pui tom nie pa mawh cub pui hun pa kied ting tix cub, hoik khrawm paox ti hoek ka daux veng Yerusaliem sonsang yuh kix pawie blah pa ang sau susaix ka daux khix ra heue. ¹⁴ Kix yaog ti kaoh mai teei khu dee tan khankix pa hoik koe ka daux veng Yerusaliem hu dee singai mai kix hoik teei khu dee tan nyawng bhawng khankix hu khawmuik mai hu tik ceu ankix daux rawm klawng iak Kidaron heue. ¹⁵ Khaix an, kix pah kawn yung iak Pawie Pasakha ka daux khix ra kao pon ngaix heue. Cao giex kaing li mai pui Lewix khankix viex krax tan pa gleeing khankix hoek ka nyiex bwan Siyiex heue. ¹⁶ Kix cung ti ot ka dee ot tix, awm pa koe been kix, awm gumlox beenli pa hoik tawm Mose pui Siyiex; cao giex kaing li khankix phruat nham pa hoik rieb kix ti teei khaing tawm taix Lewix khankix heue. ¹⁷ Mawh kheu pui pa ang nyang bax yuh tokaux tix singax singeh kawn koe tom nie ka daux cub pui hun khankix; mawh kheu nan, pui Lewix khankix hoik mawh pa teei beeh glawm ti pah kawn yung iak pawie Pasakha son ku kaux, pui pa ang nyang mawh pa singax mai sonsang deeh yuh kix singax singeh son Siyiex heue. ¹⁸ Mawh kheu pui pa kied haoh hun tix cub hoik mawh pa kied nie khaing daux ceu pui Epharem, ceu pui Manashe, ceu pui Isarelax mai ceu pui Zebulun khankix, mawh pa ang nyang bax yuh tokaux cao tix singax singeh, viang yuh nan kawx, kix hoik ih ka kawn yung iak pawie Pasakha mawh pa tang siyox khaing pa hoik tiem ti deuh heue. Viang mawh nan, Hezakiyax rawg bwan ka son kix ka daux krax ah nan, "Kieh Siyiex pa mhawm yuh ti tawx krax pluat ploi son pui ku kaux, ¹⁹ "Pa khre rien rhawm tix sonsang sawg Siyiex pa mawh Siyiex keeing kix khankix, viang nawh ang mawh pa singax singeh, awm hoik singax dee pa singax singeh an heue. ²⁰ Siyiex nghiet ka Hezakiyax mai cox pai pui khankix heue. ²¹ Mawh kheu nan, kawn praix ceu pui Isarelax khankix, pa hoik ot ka daux veng Yerusaliem, hoik yuh pawie blah pa ang sau susaix aliah ngaix tau mai krax pa gaux rhawm tix; pui Lewix khankix mai cao giex kaing li khankix, hoik yaogyaw ka Siyiex tix ngaix hoik tix ngaix mai ah nin ka son Siyiex tau mai kraung ting khankix, pa ting sinum heue. ²² Hezakiyax tawx riang rao pui Lewix khankix pa hoik gau krax tawng yung, pa mhawm Siyiex mai hoik ih, hoik nyaux ka daux aliah singaix mai tawx krax tan pa nhim mai yuh krax pa khyox khaw ka Siyiex keeing kix heue. ²³ Khaix an, can pui hoik kraix khrawm tix hoek daux bang kum khawmuik, hoik khaw rhawm tix sang deeh baox yuh pawie an, aliah singaix mai kix hoik baox yuh pawie an aliah singaix ka daux pa gaux rhawm tix heue. ²⁴ Hezakiyax simiang meung Yudax tawx moi tix rheng mu mai yung aliah rheng mu ka cub pui hun khankix mai cub cao kaing khankix kawx tawx moi tix rheng mu mai yung tix mheen mu, ka cub pui hun khankix; mai cao giex kaing li pa kied hun khankix hoik yuh tokaux cao tix singax singeh heue. ²⁵ Cub pui hun Yudax khawmuik, hoik gaux rhawm tau mai cao giex kaing li mai pui Lewix khankix mai cub pui hun khawmuik pa hoek khaing meung Isarelax, nyo sinie pa hoek khaing haktiex Isarelax mai pa ot ka daux meung Yudax khankix heue. ²⁶ Mawh kheu nan, krax pa kied ting gaux rhawm hoik koe ka daux veng Yerusaliem, jah tom glang bawg yam Sawlamon kawn simex Davit, pa mawh simiang haktiex Isarelax, can pa awm in ang sax koe ka daux veng Yerusaliem heue. ²⁷ Khaix an, cao giex kaing li mai pui Lewix khankix yaog ti kaoh mai nawb bwan piang pui hun khankix mai lox sinum kix, hoik mawh pa mhong tix mai lox bwan rawg kix hoik haok tom hoek ka dee ot dee koe pa singax singeh Nawh Cao ka daux meung raoma heue.

¹ Yam in, yam hoik ceu inkix khawmuik, pui Isarelax pa hoik hoek tan khawmuik, lih hu ka veng meung Yudax mai raig ti tik rong simaox singax tom phawng mai kid ti tik khaox riang grang siyiex Asherax mai yieh ti tik dee pa lhaong khawm khu dee tan ka daux meung Yudax khawmuik mai haktiex Binyamin haktiex Epharem mai haktiex Manashe, tom hoek bawg yam yuh kix, ceu ankix laux leeing pak lawg khawmuik heue. Khaix an, kawn praix ceu pui Isarelax khankix deeh ing ka veng cao tix mai pui ku kaux hoik tang deeh ing ka haktiex brex brum cie tix heue. ² Hezakiyax tang gwieh ti tawx beeh glawm cub mawx cub an, ka cao giex kaing li mai pui Lewix khankix, awm pa hoik gwieh khaing cub caw mai pui ku kaux awm pa koe kaing jhaw nawh, cao giex kaing li mai pui Lewix khankix, tan krax tan pa gleeing mai krax tan pa nhim, yuh kaing jhaw pa yaogyaw bwanson mai ah lox rhax yaogyaw ka daux diang siviex Nyiex bwan Siyiex heue. ³ Simiang baox teei khaing daux sinngao ka plak cie nawh, son krax tan pa gleeing pa mawh son krax tan pa gleeing ka daux plak ponngawb mai plak ponbo mai krax tan pa gleeing khankix, son singaix twah mai son singaix haok khix khraox mai yam hoek bawg pawie, awm pa hoik tiem tix ka daux gumlox been Siyiex heue. ⁴ Lheu khaing an nawh tawx lox tix ka pui pa ot ka daux veng Yerusaliem khankix, sonsang tan kix ti tawx nyum ka son cao giex kaing li mai pui Lewix khankix, sonsang pon sau kix riang rao tix ka gumlox been Siyiex heue. ⁵ Yam hoik roi kix lai gumlox an, hu kudah dee dom mawx dom an, kawn praix Isarelax khankix, viex plix khaox pa pon kix phao voe mai rawm plix siiet khawm rawm bee mai khawm rawm hia khawm can pa pon kix khaing daux kaung daux ma khankix kao son tix son tom nie heue. ⁶ Ceu pui Isarelax mai ceu pui Yudax khankix, viex moi mai yung khankix, hoek kao son tix son mai gwieh mawh ceu pa singax singeh, pa hoik appong kix ti tawx, ka Siyiex kix kao son tix son mai kix hoik pum ti deuh ceu ankix heue. ⁷ Ka daux khix loe, kix jah tix pum ankix mai kix hoik naox krax yuh tix ka daux khix aliah heue. ⁸ Yam hoek yaox Hezakiyax mai cub cao kaing khankix, krax pa hoik pum ti deuh khankix, kix yaogyaw ka Siyiex mai nawb bwan ka ceu pui nawh Isarelax khankix heue. ⁹ Khaix an, Hezakiyax chawk ti yaox cao giex kaing li mai pui Lewix khankix, son grawng sinngao krax pa hoik cu kix tix pum khankix heue. ¹⁰ Azarix pa mawh cao kaing ting cub cao giex kaing li khankix pa kaoh khaing daux nyiex Zadok, pawk lox ka nawh ah nin, "Glang hoik jah pui khankix ti viex krax tan hoek ka daux nyiex bwan Siyiex, yix hoik kub ih kub un mai kawn deuk tom nie heue. Mawh kheu Siyiex hoik nawb bwanson piang pui Nawh khankix mai can ceu pa kawn deuk in tom mawh pa kied haoh hun heue. ¹¹ Yam in Hezakiyax tawx lox ka kix, sonsang khre kix ti priex lawg khankix, ka daux nyiex bwan Siyiex mai kix hoik khre ti priex ceu ankix heue. ¹² Khaix an, kix viex krax tan tix khankix, hoek kao son tix son, ka daux krax pa kaux sijax tix mai appong ti tawx ceu an khankix, pui Lewix pa mawh Kawnanix hoik mawh cao pa kwang piang kix mai puxaik nawh Shimix mawh cao pa kwang greem nawh heue. ¹³ Yehilax, Azazix, Nahat, Asahelax, Yerimot, Yawzabat, Elelax, Isamakhiyax, Mahat mai Beneyax khankix hoik mawh cao pa jhak pa ngiien kaing khankix, greem tawm taix Kawnanix mai pux nawh Shimix, ka daux lox tawm simiang mai Azariyax cao pa kwang ka daux nyiex bwan Siyiex heue. ¹⁴ Korax kawn simex Imnax, pa mawh pui Lewix cao pa pau diang siviex plak li singaix hoik mawh cao pa kwang piang krax tan pa koe rhawm pui khankix ti tan ka Siyiex mai sonsang deeh gwieh nawh ti tawx krax tan cie Siyiex khankix khawm can ceu pa kieh singax singeh khankix heue. ¹⁵ greem nawh khankix mawh Eden, Minimin, Yeshua, Shemayax, Amariyax mai Shekhaniyax pa mawh cao teem pa kaux sijax nawh ka cao giex kaing li daux veng khankix mai sonsang mawh kix cao pa roi ti tawx kraung ceu pa gwieh tix khankix, ka puxaik kix awm krax pa koe cub caw mawx cub caw an, ka cub ting mai cub iak khankix heue. ¹⁶ Lheu khaing simex an khankix, jah ka pa koe ju loe num haok plak piang mai pa hoik tiem tix laig ka daux carang doeh ru mawx ceu cat an, kix hoik roi ti tawx ankix ka pui ku kaux, pa hoik laig ka daux nyiex bwan Siyiex mai krax pa pon nawh tix ngaix son grawng kaing jhaw pa yuh nawh, ka daux cub caw nawh, ¹⁷ Cao giex kaing li an khankix pa hoik tiem ti laig ka daux carang doeh ru kix, awm pa koe doeh nyiex ma keeing kix mai son pui Lewix an khankix jah khaing pui pa koe ju tixnga num haok plak piang, awm pa koe kaing kix ka daux cub daux caw kix, ¹⁸ son pui khawmuik pa hoik tiem tix laig ka daux carang doeh ru kix, khawm kawn nyawm iak mai moeng kix, khawm kawn simex kawn bun kix mai cub caw kix khawmuik, mawh kheu ka daux krax pa kaux sijax, kix hoik singax yuh tokaux cao kix ka daux krax pa singax singeh heue. ¹⁹ Awm an, son kawn simex cao giex kaing li Arun khankix, pa ot daux tong kaung haktiex pui hun veng cie kix khankix mai pa ot ka daux veng ku veng mai can simex khankix, pa hoik teei carang pa koe ceu kaux sonsang roi kix ti tawx nyum pa pon kix, ka kawn nyawm simex khankix, pa koe ka daux sinax cao giex kaing li mai pui pa hoik laig carang doeh ru kix khawmuik, ka daux sinax pui Lewix khankix heue. ²⁰ Mawh kheu nan, Hezakiyax hoik yuh ceu ankix ka daux meung Yudax mai nawh hoik yuh can ceu pa mhawm mai pa rahsee mai pa mawh meh haktiex kix ka plak sivoe Siyiex heue. ²¹ Ka daux kaing ceu pa yuh nawh khankix kuceu, nawh hoik jah ankix ka daux kaing jhaw nyiex bwan Siyiex mai ka daux gumlox beenli mai ka daux lox tawm pingnyap khankix mai sawg nawh ka Siyiex tix, nawh hoik yuh ceu an khawm rhawm khawm rhi tix khawmuik heue. Mawh kheu nan, nawh hoik koe krax pex krax pon ka heue.

¹ Khaix hoik luan khaing pa kaux sijax inkix, Senakharip simiang meung Asurix hoek mai laig ka daux meung Yudax mai lai lawm ka veng pa kaux cong an khankix mai keud ti sang pex ka kix mai puing ti teei son tokaux cao nawh heue. ² Yam yaox Hezakiyax ka hoek Senakharip mai ka hoik mawh krax keud nawh ti sang yuh naing ka veng Yerusaliem, ³ Nawh kum kawng tau mai cub cao kaing ting khankix, sonsang klat tix rawm khaing daux dee lih rawm klawng iak, pa koe ka plak praix veng mai kix hoik tawx krax teem ka nawh heue. ⁴ Mawh kheu nan, pui klat dee lih rawm khankix khawmuik khrawm paox tix hoek tom nie mai klat rawm klawng iak pa hoik lih hu ka daux haktiex ah nin, "Simiang meung Asurix tak sang pon hoek ti yaox rawm ankix tom nie yuh ka mawx lie? ⁵ Hezakiyax hoik kieh riang rao tokaux cao tix kaux cong mai hoik deeh cox sum guh veng pa hoik bhieh khankix mai yaog ankix lhaong tom hoek ka nyiex pau tab khankix mai deeh sum ti deuh guh veng tang mu plak praix heue. Nawh hoik deeh cox nyiex tab Milaw ka daux veng Davit mai hoik yuh ti priex kraung naing tieb plah rhiem khankix tom nie heue. ⁶ Khaix an, nawh yaog ti deuh cub cao kaing naing pa kwang piang pui khankix mai deeh kraix khrawm ti priex kix ka nawh, ka daux bing pak diang siviex veng, nawh hoik tawx lox pa koe riang rao ka kix ah nin, ⁷ Kieh koe riang rao mai kwa rhawm, paw doh lhat graung ka plak sivoe simiang Asurix mai ka plak sivoe cub pui hun pa ot tau mai nawh awx. Grawh grawng nawh, pa ot tau mai ex kawn nie lheu khaing pa ot koe tau mai nawh heue. ⁸ "Pa ot tau mai nawh, mawh kraung naing nex nham; viang mawh nan, pa ot tau mai ex mawh Siyiex ex, pa sang teem ka ex mai pa sang puing naing son ex heue. "pui khankix teei riang rao tix ka gumlox Hezakiyax simiang meung Yudax heue. ⁹ Khaix an, Senakharip simiang meung Asurix mai riang rao cub kru naing pa ot tau mai nawh khankix lai lawm ti deuh veng Lakhishax heue. Viang mawh kawx nan, tokaux cao nawh ploi kawncau mau soi nawh khankix hu ka veng Yerusaliem ka Hezakiyax simiang meung Yudax mai pui pa ot ka daux veng Yerusaliem khawmuik ah nin, ¹⁰ Senakharit simiang meung Asurix ah awm in, mawh een pex riang tix ka ceu patix pex ca kawn gun ti ot greem pa lai lawm daux veng Yerusaliem lie? ¹¹ Ang mawh Hezakiyax pa nyaw glaw pex sonsang ap pex ti tawx tokaux cao pex sonsang yum tix ka krax cai rhawm mai ka krax pa sang nyaux nie rawm, awm pa ah nin, Siyiex ex tak deeh taoh ex khaing daux tawm taix simiang meung Asurix lie? ¹² Ang hoik mawh Hezakiyax pa teei ti tik dee pa lhaong Nawh Cao mai khawm khu dee tan Nawh Cao khankix mai tawx lox ka pui meung Yudax mai ka pui veng Yerusaliem khankix ka daux pa ah nin; pex tak krub ka plak sivoe khu dee tan tix mu khaing mai gleeing nyawng bhawng piang an ang mawh lie? ¹³ Ang pex tawng ceu pa yuh aux mai keeing aux khankix ka pui haktiex tang dah tang dee khankix khawmuik lie? Mawh sax deeh pon taoh Siyiex haktiex ceu pui ankix ka haktiex cao tix khaing daux tawm taix aux lie? ¹⁴ Mawh Siyiex mawx pa koe ka daux sinax Siyiex ceu pui ankix, pa hoik yuh keeing aux khankix laux leeing pak lawg, sonsang deeh pon taoh nawh pui tix khankix, khaing daux tawm taix aux mai sonsang deeh pon taoh Siyiex ka pex khaing daux tawm taix aux lie? ¹⁵ Mawh kheu nan, paw doh kieh Hezakiyax pie lhen ka pex mai paw kieh nawh pon ti nyaw glaw pex awm in mai paw yum rhawm ka nawh, mawh kheu Siyiex ceu pui mawx ang ah, Siyiex meung haktiex mawx ang ah, ang lai pon taoh ceu pui nawh khankix, khaing daux tawm taix aux mai khaing daux tawm taix keeing aux khankix heue. Krax pa tak sang pon taoh Siyiex pex, hoik kied nie lheu iak miex ding khaing daux tawm taix aux lie?" ¹⁶ Kawncau mau soi nawh khankix, hoik nie lheu ah lox ang koe cee cag ka Siyiex mai ka kawncau mau soi Nawh Hezakiyax heue. ¹⁷ Nawh baox tiem ti tawx lai hu sonsang ah nawh lox sibriem ka Siyiex ceu pui Isarelax mai sonsang krai tix lox pa ang koe cee cag ka Nawh Cao ka daux pa ah nin "Awm ang Siyiex ceu pui haktiex tang dah tang dee pon taoh ka pui ceu kix khaing daux tawm taix aux, mawh kheu nan, Siyiex Hezakiyax kawx tak ang pon taoh pui Nawh Cao khaing daux tawm taix aux heue. ¹⁸ Khaix an, kix kok yo lox pa ting ti lih ka plak lox Hebrie ka pui veng Yerusaliem, pa ot piang guh veng, sonsang ghlat ka kix mai sonsang tawx krax pa suk sag rhawm ka kix, sonsang pon rhim kix ti teei veng heue. ¹⁹ kix ah lox pa ang koe cee koe cak ka Siyiex veng Yerusaliem, awm ah tix ka Siyiex ceu pui haktiex khankix mai ka pa yuh pui khankix ka taix tix heue. ²⁰ Mawh kheu jao grawng ceu in, simiang Hezakiyax mai cao jhai Isayax kawn simex Amok rawg bwan mai kok yo lox tix ka plak raoma heue. ²¹ Khaix an, Siyiex ploi kawncau Siyiex hu tix kaux sonsang yuh laux ka can pui koe rhawm vao rhawm kwa, cao kaing mai cub cao kaing naing khankix, pa ot ka daux tab dee peung dee pan simiang Asurix heue. Mawh kheu nan, nawh hoik deeh ing mai krax kaig tua tix ka haktiex cao tix heue. Nawh laig ka daux nyiex bwan Siyiex Cao tix, kawn praix nawh tiblah, hoik mug nawh yum ka vaig tan heue. ²² Mawh kheu nan, Siyiex deeh taoh Hezakiyax khawm can pui pa ot ka daux veng Yerusaliem, khaing daux tawm taix Senakharip simiang meung Asurix mai khaing daux tawm taix pui koeng tang kaux khankix mai deeh kia ngiien ka kix ku plak ku praok heue. ²³ Pui khankix hoik viex khawng tan tix khankix, hoek ka Siyiex ka daux veng Yerusaliem mai tawx totaix ka Hezakiyax simiang meung Yudax, khaix an, nawh mawh pa ting lhaongka plak sivoe ngai ceu pui khawmuik heue. Grawng Yuh Hezakiyax Tokaux Cao tix Tiiem ²⁴ Ka daux singaix an khankix, Hezakiyax hoik saux ngia mai dex sang yum mai nawh rawg bwan ka Siyiex mai Nawh Cao sikah ka nawh mai tawx mhai sakse tix ceu ka nawh heue. ²⁵ Viang mawh kawx nan, Hezakiyax ang lai pawk ti yuh ceu ankix, awm pa hoik pon tix bwanson ka pa hoik jhi Nawh Cao piang nawh, kheu jao lhaong rhawm nawh, mawh kheu nan, krax pa song rhawm lih hoek piang nawh mai piang meung Yudax mai veng Yerusaliem heue. ²⁶ Khaix an, Hezakiyax deeh doh keud kheu koe nawh pa lhaong rhawm, nawh mai can pui pa ot daux veng Yerusaliem khankix, yuh tokaux cao tix awn sonsang ang krax pa song rhawm Siyiex lai pon ti hoek piang kix ka daux singaix ju Hezakiyax heue. ²⁷ Hezakiyax kied magmi mai koe min plakngai heue. Nawh yuh ti deuh krao sinngao son mau khri mai son siang simaox ceu pa laoh liemai son sidah bhawng mai son kraung khrai pa koe rhawm nawh ti sang priex kuceu khawmuik. ²⁸ Nyiex krao son nghox koi, son rawm plix siiet mai bee mai nyiex kawg son tobrie pa eei tix khankix mai khawm kawg yung heue. ²⁹ Lheu khaing an, nawh baox deeh sum veng son tokaux cao tix mai nawh baox koe cub yung mai cub tobrie khankix tom kied haoh hun, mawh kheu Siyiex hoik tawx sinngao kraung khrai ka nawh tom nie heue. ³⁰ Awm in Hezakiyax baox deeh klat rawm klawng iak Gihon plak laong mai deeh teei rawm an lih hu daux rawng tom hoek ka baoh praok plak klip singaix, ka veng Davit khawmuik heue. Can kaing pa yuh Hezakiyax hoik pex hoik pon khawmuik heue. ³¹ Viang yuh nan kawx, son grawng cao cau tang cub simiang Babulon khankix, pa hoik ploi kix hoek ti chawk grawh grawng pa daox deng pa hoik yuh nawh ka daux haktiex an, Siyiex hoik deeh yoi tix khaing nawh, sonsang cheuk ti yaox nawh mai sonsang pon tawng Nawh Cao pa koe ka daux rhawm nawh khawmuik heue. ³² Yam in, can kaing pa ghoik Hezakiyax ti yuh mai kaing pa mhawm yuh nawh, mawh heue. Kix hoik tiem ti deuh grawng ankix ka daux phuk lai plak jhi cao jhai Isayax kawn simex Amok mai ka daux phuk lai been cub simiang Yudax mai meung Isarelax heue. ³³ Mawh kheu nan, Hezakiyax hoik laux lee it tau mai cub keeing nawh khankix mai kix sipaung nawh ka daux simeeig pa lhaong cub kawn simex Davit khankix mai khawm can pui pa ot ka daux veng Yerusaliem khankix khawmuik hoik yaogyaw min plakngai nawh yam yum nawh heue. Khaix an, kawn simex nawh Manashe hoik deeh plud ti kwang haktiex ka dee ot nawh heue.

¹ Manashe koe ju kao ra num yam yaog nawh tix mawh simiang nawh kwang haktiex ka daux veng Yerusaliem tixphwan phwan num heue. ² Viang mawh kawx nan, nawh yuh pa caox caig ka sivoe ngai Siyiex, awm koe krax pa seeing brai ceu pui an khankix pa hoik teei Siyiex ti tik ka plak sivoe kawn praix ceu pui Isarelax heue. ³ Mawh kheu nawh deeh cox sum ti tawx can dee pa lhaong, pa hoik yieh keeing nawh Hezakiyax ti tik khankix, nawh yaog ti pang khu dee tan siyiex Balax khankix mai hoik yuh khaox riang grang Asherax mai nawh hoik krub ka can pa koe ka raoma khawmuik mai yuh kaing jhaw kix heue. ⁴ Nawh baox sum khu dee tan ka daux nyiex bwan Siyiex, pa mawh dee pa hoik ah Siyiex ti deuh yuh nin "Min ceu kaux aux tak koe ka daux veng Yerusaliem leeing ju heue." ⁵ Nawh hoik sum ti deuh khu dee tan, ka son can ceu pa koe ka raoma khawmuik ka daux bang lawg ting nyiex bwan Siyiex ra dah heue. ⁶ Nawh baox gleeing tix tan kawn simex nawh ka daux ngu daux ngawd kawn simex Hinnom; nawh tawx sipawk chawk jhai, yuh pa chix jhak mhai, yuh simeed yuh sat, chix sikah mai singie mai chix pih heue. Nawh kied yuh ceu pa caox caig ka plak sivoe ngai Siyiex, sonsang so krax pa song rhawm Nawh Cao heue. ⁷ Nawh baox deuh riang rao pa hoik saik tix, tix mu pa mawh riang rao pa hoik yuh nawh ka daux nyiex bwan Siyiex, ka dee hoik ah Siyiex ti deuh ka Davit mai kawn simex nawh Sawlamon yuh nin, "Ka daux nyiex bwan in mai ka daux veng Isarelax khankix, Aux tak sang deuh ceu kaux aux tan leeing ju, ⁸ mai Aux ang lai baox deeh gah ti tik caong ceu pui Isarelax, khaing daux haktiex pa hoik tat Aux ti deuh son keeing pex khankix, phan pex priex rien rhawm ti yuh ka can ceu pa hoik tawm Aux ti deuh khawmuik ka pex, awm kra pa koe gumlox beenli khawmuik mai khawm lox tat jhawm prawng mai khawm krax pa koe beenli pa priex pa deuh tix khankix, khaing daux tawm taix Mose heue." ⁹ Mawh kheu nan, Manashe nyaw glaw pui meung Yudax mai can pui pa ot ka daux veng Yerusaliem khankix nie lheu yuh pa caox caig khaing cub pui an khankix, pa hoik yuh Siyiex kix laux leeing ka plak sivoe kawn praix ceu pui Isarelax heue. ¹⁰ Siyiex sikah mai Manashe mai cub pui nawh khankix, viang mawh nan, kix ang cu ang nghiet heue. ¹¹ Mawh kheu nan, Siyiex kieh cao kaing naing cub khu naing simiang meung Asurix hoek puing ka kix mai kix teei ti viex Manashe ka rhiem gok mai phyawk nawh ka maox ceng tawng pa lheung mai teei nawh lih ka veng Babulon heue. ¹² Yam yaox nawh tix kham krax pa kha rhawm, nawh deeh khyox khaw ka Siyiex Cao nawh mai kied yuh tokaux cao tix tiiem ka plak sivoe Siyiex keeing nawh khankix, ¹³ mai deeh rawg bwan ka Nawh Cao mai Nawh Cao deeh rieb ti teei krax pa mhaing nawh mai nghiet ka lox pa khyox khaw nawh mai deeh viex nawh ing ka veng Yerusaliem, ka daux meung haktiex cao nawh heue. Khaix an, Manashe tawng ka hoik mawh Siyiex, Siyiex heue. ¹⁴ Khaix in nawh sum ti deuh guh veng tix mu ka plak praix veng Davit, pa koe ka praok plak klip singaix khaing veng Gihon jah ka daux ngawd tom hoek ka daux laig diang siviex mai an hoik deeh rawb ti deuh nyiex tab pa lhaong Ophelax tan mai nawh yaog tix sum guh veng an khankix, mawh pa kied ting lhaong tix mu heue. Khaix an, nawh yaog ti deuh cao kaing cub pui naing khankix ka daux can veng pa kaux cong an khankix, daux meung Yudax khawmuik heue. ¹⁵ Nawh teei ti tik siyiex pui tang ceu mai riang rao khaing daux nyiex bwan Siyiex mai khu dee tan pa hoik sum nawh ti deuh ka piang gawng nyiex bwan Siyiex mai ka daux veng Yerusaliem; mai nawh hoik tik ceu ankix ka praix veng khawmuik heue. ¹⁶ Nawh deeh cox khre tix sum khu dee tan Siyiex mai appong tix tan krax tan pa nhim mai khawm krax tan pa yaogyaw bwanson khankix piang an mai tawx lox ka pui meung Yudax, sonsang yuh kix kaing jhaw Siyiex ceu pui Isarelax heue. ¹⁷ Viang yuh ka mawx kawx, pui khankix ca kawn appong ti tan piang dee pa lhaong khankix, viang mawh nan, mawh ngie ka Siyiex Cao kix nong nong heue. ¹⁸ Yam in grawng kaing pa ghoik Manashe ti yuh mai gumlox bwan rawg nawh ka Siyiex mai gumlox sikah cao jhai khankix, pa hoik sikah ka nawh ka daux ceu kaux Siyiex ceu pui Isarelax; mawh heue, kix hoik tiem ti deuh grawng ankix ka daux phuk lai been cub simiang Isarelax heue. ¹⁹ Lox bwan rawg nawh mai grawng pa hoik rieb Siyiex ti teei krax pa khyox khaw nawh mai phimap pa lud nawh khankix mai baoh dee pa sum nawh ti deuh dee pa lhaong khankix mai dee deuh nawh khaox riang grang Asherax mai riang rao pa hoik saik tix khankix, sivoe ang nawh nyang bax deeh kieh tokaux cao tix tiiem, grawng ceu ankix, hoik mawh pa tiiem ti deuh daux sinax gumlox phuk lai Hozie heue. ²⁰ Mawh kheu nan, Manashe hoik laux lee it tau mai cub keeing nawh khankix mai kix sipaung nawh ka daux nyiex cao nawh heue. Khaix an, kawn simex nawh Amon deeh yaog tix kwang haktiex ka daux dee ot nawh heue. ²¹ Amon koe tixnga ra num, yam yaog nawh tix mawh simiang mai nawh kwang ka daux veng Yerusaliem ra num heue. ²² Nawh yuh ceu pa caox caig ka plak sivoe ngai Siyiex, awm pa hoik yuh keeing nawh Manashe; mawh kheu Amon hoik appong ti tan ka riang rao pa saik keeing nawh Manashe ti deuh khawmuik mai yuh kaing jhaw kix heue. ²³ Nawh ang lai yuh tokaux tix tiiem ka plak sivoe Siyiex, awm pa hoik yuh keeing nawh Manashe tokaux cao tix tiiem; viang mawh nan, Amon baox nie lheu lud hu sipie heue. ²⁴ Khaix an, kawncau nawh khankix grum rhawm ti yuh pa tieh feen ka nawh mai pah nawh yum ka daux nyiex cao nawh heue. ²⁵ Viang mawh kawx nan, pui haktiex khankix, hoik pon pah ti tik cub pui ankix, pa hoik grum rhawm ti yuh pa tieh feen ka simiang Amon heue. Khaix an, pui haktiex deeh yaog kawn simex Yosiyax mawh simiang ka daux dee ot nawh heue.

¹ Yosiyax koe ju daix num, yam yaog nawh ti mawh simiang mai nawh kwang ka daux veng Yerusaliem tixngoe tix num heue. ² Nawh yuh can ceu pa khaw caw ka plak sivoe ngai Siyiex mai lawng ka daux krax daux grawng keeing nawh Davit; nawh ang lai gwieh tix hu ka plak gwiex plak dawm heue. ³ Ka daux daix num yam kwang nawh, ju nawh kawn awn nawh jah tix sawg ka Siyiex keeing tix Davit; mai ka daux yam hoek ka daux kao ra num tix num, nawh jah tix gah can dee pa lhaong mai riang grang Asherax pa yuh tix ka khaox mai riang grang pa saik tix, Khawm can riang grang pa hoik raug tix khankix singax khaing daux meung Yudax mai veng Yerusaliem heue. ⁴ Kix yieh ti tik khu dee tan siyiex Balax khankix, lih khaing ka plak sivoe ngai nawh mai khawm can khu dee tan nyawng bhawng, pa hoik koe ka plak piang ceu ankix, nawh hoik kid ti tik; mai riang grang pa mawh khaox Asherax mai riang grang pa hoik saik tix khankix, nawh hoik raig ti tik ankix laux leeing mai yuh ceu ankix phawng mai rhuat ankix piang simeeig can pui pa hoik appong ti tan ka kix heue. ⁵ Nawh deeh baox gleeing si-ang cao giex kaing li khankix piang khu dee tan kix mai hoik singax yuh meung Yudax mai veng Yerusaliem heue. ⁶ Mawh kheu nan, nawh baox yuh ankix ka daux hawt baoh veng Manashe, hawt baoh veng Epharem mai hawt baoh Simeon khankix, tom singai hoek baoh veng Napthalix mai hawt vung viang veng khankix khawmuik, laux leeing ka moe heue. ⁷ Yam khaix hoik gaing nawh ti tik khu dee tan mai riang rao pa mawh khaox Asherax mai khaix hoik pah nawh riang rao pa hoik saik khankix phawng mai khaix hoik kid nawh ti tik khu dee tan nyawng bhawng laux leeing khaing ka daux haktiex meung Isarelax khawmuik, nawh deeh ing ka veng Yerusaliem heue. ⁸ Yam in ka daux yam hoik kwang nawh ka haktiex kao daix num tix num, khaix hoik singax yuh nawh haktiex mai nyiex bwan, nawh ploi Shaphan kawn simex Azaliyax, Maseyax pa mawh cao kwang veng mai Joah kawn simex Yohaza pa mawh cao mhai ti deuh lox kum khankix, sonsang deeh cox tix ka nyiex bwan Siyiex Cao nawh heue. ⁹ Yam hoek kix ka Hilakilax cao giex kaing li pa ting kix ap ti tawx mau pa hoik viex tix laig ka daux nyiex bwan Siyiex, pa hoik khrawm pui Lewix cao pau diang siviex khankix khaing ceu pui Manashe ceu pui Epharem mai can pa kawn deuk khaing ceu pui Isarelax khankix, ceu pui Yudax, ceu pui Biyamin mai khawm ceu pui pa ot ka daux veng Yerusaliem khankix heue. ¹⁰ Khaix an, kix ap ankix ka daux tawm taix pui yuh kaing jhaw pa jhak ngiien nyiex bwan Siyiex mai kix tawx ankix, ka can pui pa yuh kaing ka daux nyiex bwan Siyiex, sonsang deeh cox priex kix ka nyiex bwan heue. ¹¹ Kix tawx ankix ka cao pa yuh kaing taix mai ka cao pa sum nyiex khankix, sonsang liag kix tix shiao lon simaox pa hoik saik tix mai khaox lat mai sonsang tawm kix meeh nyiex, pa hoik yuh cub simiang Yudax laux heue. ¹² Pui khankix yuh kaing ka daux krax pa kaux sijax tix heue. Cao pa jhak pa ngiien piang kix mawh Yahat mai Obadiyax pa mawh pui Lewix cub kawn simex Merarix mai Zekhariyax mai Meshulam cub kawn simex Kohat mawh cao bung tix jah kaing heue. Pui Lewix tang kaux pa hoik min ka grawng kraung pa tah ting mai ah lai rhax khankix, ¹³ Mawh cao pa teei beeh glawm mai mawh cao pa kia ngiien piang can pui pa hoik yuh kiang jhaw kuceu heue. Pui Lewix tiblah, hoik mawh cao pa tiiem lai mai cao kaing mai cao pa pau diang siviex khankix heue. ¹⁴ Yam teei kix mau pa hoik viex kix laig ka daux nyiex bwan Siyiex lih, cao giex kaing li Hilakiyax yaog pheen lai beenli Siyiex pa hoik tawx ka Mose heue. ¹⁵ Khaix an Hilakiyax deeh krai lox ah nin ka Shaphan cao pa tiiem lai, "Aux hoik yaox phuk lai beenli ka daux nyiex bwan Siyiex heue. "Hilakiyax tawx phuk lai an ka Shaphan heue. ¹⁶ Mawh kheu nan, Shaphan teei ti viex phuk lai an hu ka simiang khawm viex tix gumlox ka simiang ah nin, "Can ceu pa hoik tawm tix khawmuik ka cub kawncau mau soi maix khankix kix yuh nawh heue. ¹⁷ kix khrawm mau pa hoik yaox tix khankix ka daux nyiex bwan Siyiex mai ap ti tawx ka daux tawm taix cao pa kia ngiien kaing khankix mai ka pui pa yuh kaing khankix heue. ¹⁸ Khaix an, Shaphan cao pa tiiem lai krai grawng ankix ka simiang ah nin "Cao giex kaing li Hilakiyax hoik tawx lai tix pheen ka aux, "mai Shaphan phat lai an ka sivoe ngai simiang heue. ¹⁹ Yam in ceu ankix hoik lih ti mawh, yam hoik mhong simiang ka gumlox lai beenli an nawh riah kraung ceep cao tix heue. ²⁰ Khaix an, simiang tawx gumlox ka Hilakiyax, Ahikam kawn simex Shaphan; Abadon kawn simex Mikha, Shaphan cao tiiem lai mai Asayax pa mawh kawncau simiang ah nin, ²¹ "Hu mai chawk ti yaox Siyiex ka son aux mai khawm son can pui pa kawn deuk khankix ka daux meung Isarelax mai meung Yudax, son grawng gumlox phuk lai an pa hoik yaox tix, ka pa song rhawm Siyiex hoik lih piang ex, son ang cub keeing ex khankix priex ti hawt gumlox Siyiex, sonsang hawt yuh kix awm pa hoik tiem khawmuik ka daux phuk lai in heue." ²² Mawh kheu nan, Hilakiyax mai can pui khankix pa hoik tawx simiang beeh glawm ka kix, hu ka cao jhai bun Huladax pa mawh moeng Shalum, kawn simex Tikava kawn simex Hasharax cao pa pau nyiex deuh sibex lang jung heue. Nawh ot ka daux veng Yerusaliem plawg ra pa mawh dee ot pui hun mai kix sikah gumlox ankix ka nawh heue. ²³ Bun an deeh pawk ti ah nin ka kix Simiang Siyiex ceu pui Isarelax ah nin, "Deeh ing krai ka pui pa hoik ploi pex hoek ka aux awx. ²⁴ Siyiex ah nin jhak heue, Aux tak viex krax pa kha rhawm hoek piang pui in mai piang pui pa ot baoh in khankix awm can ceu pa jhax lawg khawmuik, pa tiiem tix ka daux phuk lai pa hoik phat kix sivoe simiang meung Yudax; ²⁵ Mawh kheu hoik tik vud kix ka Aux mai hoik gleeing kix ti tan nyawng bhawng ka siyiex tang kaux tang hak khankix, sonsang so kix Aux song rhawm ka kaing pa yuh kix ka taix tix khawmuik. Mawh kheu nan, krax song rhawm Aux tak lih piang dee in mai ang lai chix yeet heue. ²⁶ Ka son simiang meung Yudax pa ploi pex hu chawk ti yaox Siyiex ka grawng in, pex deeh ing krai ka nawh yuh nin, Siyiex ceu pui Isarelax ah nin, grawng gumlox can pa hoik mhong maix khankix, ²⁷ "Mawh kheu hoik awn rhawm maix mai yuh maix tokaux cao tix tiiem ka plak sivoe Siyiex yam ghlat Nawh Cao ka son dee in mai ka son ceu pui pa ot dee in khankix mai mawh kheu jao hoik viex mai krax tiiem rhawm cao tix ka plak sivoe Aux mai riah kraung ceep cao tix mai hoik yiiem ka plak sivoe Aux, Aux baox deeh mhong ka lox sikah maix, Siyiex ah nan heue. ²⁸ Aux tak kraix khrawm maix ing ka dee ot cub keeing maix khankix mai maix tak mawh pa kraix khrawm tix hoek ka daux simeeig ka daux pa nhim; mai ngai maix tak ang lai yaox ka pa kha rhawm an khankix pa tak sang viex Aux hoek piang baoh dee in mai khawm piang pui pa ot baoh dee in khankix heue." "Mawh kheu nan, kix deeh viex gumlox in hoek ka simiang heue. ²⁹ Khaix an, simiang kok mai khrawm kuad song meung Yudax mai veng Yerusaliem khawmuik heue. ³⁰ simiang haok ka nyiex bwan Siyiex tau mai meung Yudax mai can pui pa ot ka daux veng Yerusaliem khankix, cao giex kaing li pui Lewix khankix mai pui ting pui iak khawmuik mai nawh phat kix mhong lox pa koe ka daux phuk lai sijax mukheu pa hoik yaox ka daux nyiex bwan Siyiex heue. ³¹ Khaix an, simiang cung tix ot ka dah dee ot nawh mai yuh sijax mukheu ka plak sivoe Siyiex, sonsang hawt tix khaix Siyiex mai sonsang priex gumlox pingnyap Nawh Cao mai beenli pa deuh Nawh Cao khankix, khawm rhawm khawm rhi tix khawmuik mai khawm ju tix khawmuik, sonsang hawt yuh awm gumlox sijax mukheu can pa hoik tiem ka daux phuk lai in heue. ³² Nawh kieh can pui pa ot ka daux veng Yerusaliem mai pui Binyamin khawmuik, kham tix rieb ka sijax mukheu an heue. Mawh kheu nan, can pui pa ot ka daux veng Yerusaliem khankix yuh awm pa koe sijax mukheu pa koe Siyiex keeing kix heue. ³³ Mawh kheu nan, Yosiyax gah ti tik pa seeing brai khawmuik, khaing daux haktiex cie pui Isarelax khawmuik mai kieh pui pa ot ka daux meung Isarelax khawmuik, sau riang rao ti yuh kaing jhaw Siyiex Cao kix, ka daux baux singaix ju nawh khawmuik, kix ang phrat tix khaing hawt khaix Siyiex keeing kix heue.

¹ Yam in Yosiyax yuh pawie Pasakha son Siyiex ka daux veng Yerusaliem mai kix pah kawn yung pawie Pasakha khankix, ka daux khix tix kao pon ngaix heue. ² Nawh yaog ti deuh cao giex kaing li ka daux beeh glawm cao kix mai tawx riang rao kix, son kaing jhaw nyiex bwan Siyiex heue. ³ Khaix an, nawh ah nin ka pui Lewix khankix, pa hoik gau hoik sawn ka ceu pui Isarelax khawmuik, pa hoik mawh pui pa singax singeh ka son Siyiex; deuh deug bwan pa singax singeh ka daux nyiex bwan pa hoik sum simiang Sawlamon kawn simex Davit simiang meung Isarelax heue. An tak ang lai mawh beeh pa ciien piang klip pex tom rheung, yam in yuh kaing jhaw son Siyiex pex mai pui cie Nawh Cao Isarelax khankix heue. ⁴ Khre rien tokaux cao pex awm pa koe doeh nyiex ma keeing pex khankix mai awm krax pa gwieh pex tix koe cub koe caw mai hawt khaix pa hoik tiem Davit simiang Isarelax mai pa hoik tiem kawn simex nawh Sawlamon ti deuh khawmuik heue. ⁵ Cung ti ot ka dah dee pa singax singeh, awm koe cub koe caw doeh nyiex ma keeing pex, puxaik pex khankix pa hoik kham ti mawh pui pa yuh kaing jhaw awm krax pa koe cub caw nyiex ma pui Lewix khankix heue. ⁶ Mawh kheu nan, pah ka kawn yung pawie Pasakha khankix mai yuh tokaux cao pex singax singeh mai khre rien ceu ankix son puxaik pex, sonsang pon kix ti yuh awm koe gumlox Siyiex khaing daux tawm taix Mose heue. ⁷ Khaix an, Yosiyax tawx kawn yung khankix mai kawn pex khankix khaing daux kawg yung ka can pui pa kham ti yuh kaing jhaw khankix, son krax tan pawie Pasakha khawmuik ka son can pui pa bleeh tix tan khawmuik loe mheen mu mai khawm moi khankix loe rheng mu, inkix mawh pa kaoh khaing sinngao cie simiang heue. ⁸ Cao kaing nawh khankix koe rhawm tix tawx an khankix ka pui hun, ka cao giex kaing li mai ka pui Lewix khankix, Helakilax, Tekhariyax mai Yehalax pa kwang ka daux nyiex bwan Siyiex khankix, tawx yung ra rheng liah yieh mu mai moi loe yieh mu, ka cao giex kaing li sonsang tan ka pawie Pasakha heue. ⁹ Khawnaniyax pux nawh pa mawh Shamayax mai Natanelax mai Hashabiyax mai Yeyelax mai Yozabat, khankix pa mawh cub cao kaing ting cub ceu pui Lewix khankix kawx tawx yung phwan rheng mu mai moi phwan yieh mu ka pui Lewix sonsang tan ka pawie Pasakha heue. ¹⁰ Mawh kheu nan, grawng krax rawg bwan hoik khre tix mai cao giex kaing li khankix cung ka dah dee ot cao kix mai pui Lewix tang teei dee ot dee koe cub caw tix awm gumlox tawm simiang heue. ¹¹ Kix pah kawn yung sonsang tan in ka pawie Pasakha mai cao giex kaing li teei ti phruat nham ka taix tix, glang yam kawn peeik hak tobrie an khankix heue. ¹² Khaix an, kix gah krax tan pa gleeing khankix, sonsang tawx ceu an ka doeh nyiex ma keeing kix cub pa hoik kham ti yuh kaing mai sonsang tan ti tawx ka Siyiex, awm pa hoik tiem daux lai Mose, awm ankix hoik yuh nawh ka moi heue. ¹³ Kix ping krax tan pawie Pasakha ankix ka ngu, awm koe been phin beenli pa deuh khankix; viang mawh nan, phan mawh ka son krax tan tang ceu khankix, kix ngaik nawh sin ka daux aw, ka daux ngoi mai ka daux aw khang khankix mai nied ti gwieh ceu ankix ka daux sinax pui hun khawmuik heue. ¹⁴ Khaix hoik ceu ankix, kix khre tix daux pa caw kix ti pon son tokaux cao tix mai son cao giex kaing li khankix, mawh kheu cao giex kaing li cub kawn simex Arun khankix, hoik kied nie kaing yuh ka daux krax tan pa gleeing mai klon bee khankix tom hoek ka plak ponsawm, mawh kheu nan, pui Lewix khankix, hoik khre ti deuh pa caw kix ti pon son tokaux cao tix mai son cao giex kaing li cub kawn simex Arun khankix heue. ¹⁵ Pui pa ah lai rhax cub kawn simex Asapha khankix hoik tang ot ka dah dee ot cao kix awm gumlox pa tawm Davit, Asapha, Heman mai Yedutun pa mawh cub cao jhai simiang heue. Cao pau diang siviex khankix hoik tang ot ka daux diang siviex ku mu, kix ang lai pon hu khaing dee ot cao kix, kheu jao grawng hoik khre cub puxaik pui Lewix khankix ti tawx pa caw kix ti pon ka son kix heue. ¹⁶ Mawh kheu nan, kaing jhaw Siyiex hoik khre rien tix grum naog khawmuik ka daux singaix an, sonsang yuh ka pawie Pasakha mai sonsang tan kix krax tan pa gleeing piang khu dee tan Siyiex awm gumlox pa tawm simiang Yosiyax heue. ¹⁷ Kawn ceu pui Isarelax pa hoek tan pa rien ti yuh pawie Pasakha ka daux bawg yam an mai ka pawie blah pa ang sau susaix son aliah singaix heue. ¹⁸ Pawie Pasakha pa hoik yuh tix ka daux meung Isarelax, ang sax koe awm an glang daux singaix cao jhai Samoelax mai simiang meung Isarelax khankix tix bawg kawx; mai ang sax priex ti yuh pawie Pasakha an, awm pa hoik yuh pa hoik priex Yosiyax ti yuh tau mai cao giex kaing li mai pui Lewix khankix, pui Yudax khawmuik mai pui meung Isarelax khankix pa hoek tan mai can pui pa ot ka daux veng Yerusaliem khankix heue. ¹⁹ Ka daux num hoik kwang Yosiyax ka haktiex kao daix num tix num, hoik yuh ka pawie Pasakha in heue. ²⁰ Khaix hoik ceu in, yam hoik cox khre Yosiyax ka nyiex bwan, Nekha simiang meung Ejiptux hoek sonsang puing ka veng Khakhemit, pa koe hawt rawm klawng Yufrethix mai Yosiyax hu puing nawh heue. ²¹ Viang mawh nan, nawh ploi cao cau khankix hu ka nawh ah nin, "Simiang meung Yudax eue, mawh hoik yuh aux ceu patix ka maix lie? Aux ang tie hoek ti puing maix ka daux singaix, viang mawh nan, aux hoek ti puing ngie cub nyiex ma pa hoik yuh naing ka aux; mawh kheu Siyiex hoik tawx lox kieh aux nied ti yuh phaiphai, deeh yoi khaing krax pa ku kao tix Siyiex, cao pa ot tau mai aux, phan ang mawh nan, Nawh Cao tak yuh maix laux leeing heue. ²² Viang yuh ka mawh kawx, Yosiyax ang cu tix veeh ngai tix khaing nawh mai tieh loh tokaux cao tix sonsang pon nawh tix puing ka nawh mai ang lai cu ti nghiet gumlox Nekhaw pa kaoh khaing daux jheeh Siyiex heue. Mawh kheu nan, nawh hoek ti puing naing ka daux ngawd Magido heue. ²³ Pui puing naing ak khankix hoik krox puing simiang Yosiyax; mai simiang ah nin ka cub kawncau nawh khankix, "Teei aux hu dee singai, mawh kheu aux hoik kin mat heue." ²⁴ Mawh kheu nan, kawncau nawh khankix teei nawh lih khaing ling lawx naing brung mai deeh sau nawh ka daux ling lawx naing brung ra lhang mai viex nawh ing ka veng Yerusaliem heue. Mawh kheu hoik yum nawh mai kix hu sipaung nawh ka daux simeeig keeing nawh heue. Pui meung Yudax khawmuik mai pui veng Yerusaliem khankix hoik khi rhawm mai yiiem doe son Yosiyax heue. ²⁵ Yeramix baox deeh ah lox laux rhawm ka Yosiyax heue. Tom hoek ka daux singaix in, can simex mai bun pa ah lai rhax khankix krai grawh grawng Yosiyax ka daux lox pa laux rhawm heue. Kix yuh mawh been pa deuh kix ka daux meung Isarelax; mai grawng ceu ankix pa tiiem ti priex ka daux phuk lai pa yiiem doe khankix heue. ²⁶ Yam in grawng kaing pa ghoik Yosiyax ti yuh mai grawng pa mhawm yuh nawh khankix, awm ceu pa hoik tiem tix ka daux phuk lai beenli Siyiex, ²⁷ Can kaing pa yuh nawh khankix yam jah tom sidah grawng ceu ankix hoik tiiem ti priex ka daux phuk lai been simiang meung Isarelax mai meung Yudax heue.

¹ Khaix an pui haktiex yaog kawn simex Yosiyax pa mawh Yohohaza mawh simiang ka dee ot keeing nawh daux veng Yerusaliem heue. ² Yohohaza hoik koe ju tixnga loe num, yam yaog nawh ti mawh simiang mai nawh kwang ka daux veng Yerusaliem loe khix heue. ³ Yam in simiang meung Ejiptux hoik pluat ti tik nawh daux veng Yerusaliem mai nawh hoik khin tix koh keen mau tixyieh talatan mai khri tix talantan ka haktiex Yudax heue. ⁴ Khaix an, simiang meung Ejiptux hoik deeh yaog puxke Yohohaza pa mawh Eliyakam mawh simiang piang haktiex Yudax mai veng Yerusaliem mai deeh loh ceu kaux nawh mawh Yehoyakim heue. Nekhaw teei pux nawh Yehohaza mai viex nawh lih hu ka meung Ejiptux heue. ⁵ Yehoyakim koe ju tixnga phwan num, yam yaog nawh ti mawh simiang mai nawh kwang ka daux veng Yerusaliem been kao tix num heue. Nawh hoik yuh ceu pa caox caig ka plak sivoe ngai Siyiex nawh heue. ⁶ Nebukhaneza simiang veng Babulon hoek tix puing ka nawh mai phyawk nawh ka maox ceng tawng lheung sonsang viex nawh ing ka veng Babulon heue. ⁷ Nebukhaneza baox teei ti viex kraung khrai tiblah khaing daux nyiex bwan Siyiex ing ka veng Babulon mai deuh ti priex ankix ka daux nyiex bwan nawh daux veng Babulon heue. ⁸ Yam in grawng kaing pa ghoik Yehoyakim ti yuh mai khawm krax pa seeing brai can pa hoik yuh nawh khankix grawng ceu ankix hoik mawh pa tiiem tix ka daux phuk lai been cub simiang meung Isarelax mai meung Yudax heue. Khaix an, kawn simex nawh Yehoyakin hoik deeh yaog ti kwang haktiex ka daux dee ot nawh heue. ⁹ Yehoyakin koe ju kao daix num, yam yaog nawh ti mawh simiang mai nawh kwang ka daux veng Yerusaliem been loe khix mai kao ngaix heue. Nawh yuh ceu pa caox caig ka plak sivoe ngai Siyiex heue. ¹⁰ Yam hoik hoek ka daux tix num, simiang Nebukhaneza kok nawh hoek ka veng Babulon, tau mai kraung can ceu pa koe ngawh koe jum khankix khaing daux nyiex bwan Siyiex mai deeh yaog Zedekix pa mawh pux Yehoyakin mawh simiang piang meung Yudax mai veng Yerusaliem heue. ¹¹ Zedekix koe ju tixnga tix num, yam yaog ti mawh simiang mai nawh kwang ka daux veng Yerusaliem kao tix num heue. ¹² Nawh kawx baox yuh pa caox caig ka plak sivoe ngai Siyiex mai ang cu ti yuh tokaux cao tix tiiem ka plak sivoe cao jhai Yeramix, pa hoik sikah gumlox lih khaing daux jheeh Siyiex heue. ¹³ Nawh baox deeh tieh feen ka simiang Nebukhaneza, pa hoik yuh nawh krax pa tiextu ka Siyiex heue. Viang mawh kaw nan, nawh kieh ngawg tix kiien mai kieh rhawm tix kiien song sang deeh veeh nawh tix ing ka Siyiex ceu pui Isarelax heue. ¹⁴ Lheu khaing an, cao kaing cub cao giex kaing li khawmuik mai khawm pui hun khankix hoik lheu lud sipie, awm krax seeing krax brai yuh ceu pui khankix mai hoik seeing yuh nyiex bwan Simiang siyiex, pa hoik singax singeh yuh Nawh Cao ti deuh ka daux veng Yerusaliem heue. ¹⁵ Siyiex keeing kix kieh cao cau Nawh Cao tawx satix ka kix, kieh kix kaox caocao mai ploi kix hu kheu jao hoik koe krax pa caux rhawm Nawh Cao piang pui Nawh Cao khankix mai piang dee ot dee koe Nawh Cao heue. ¹⁶ Viang mawh nan, kix nyiah ka cao cau Siyiex khankix, ang een gumlox Nawh Cao koe ceu mai nunai ka cub cao jhai Nawh Cao khankix tom hoik lih pa song rhawm Siyiex piang pui Nawh Cao khankix, tom ang lai pon pai ka heue. ¹⁷ Mawh kheu nan, Nawh Cao viex simiang ceu pui Khaladie hoek tix puing kix, pui an pah can simex pa awn ju yum ka vaig, daux nyiex bwan dee singaix singeh kix mai ang lai koe krax pa caux rhawm piang simex awn ju mai bunkrih khankix mai piang pui pa riex ju mai pui pa iak riang iak rao khankix Nawh Cao hoik ap ti tawx kix ka daux tawm taix nawh heue. ¹⁸ Can kraung khrai pa ting pa iak khawmuik, khaing daux nyiex bwan Siyiex mai sinngao nyiex bwan Siyiex mai sinngao cie nyiex simiang mai cie cao kaing nawh khankix, nawh hoik rhim ti teei in khawmuik hu ka veng Babulon heue. ¹⁹ Khaix an, kix keeig nyiex bwan Siyiex mai yieh ti tik guh veng Yerusaliem tom grhup mai keeig ti tik dee an khawmuik ka ngu mai yuh can ceu pa laoh lie cie veng an khankix laux leeing khawmuik heue. ²⁰ Can pui pa hoik pon ti glawd khaing lawm vaig khankix, nawh teei ti viex kix ing ka veng Babulon ka dee sang mawh kix siliex nawh mai ka son kawn simex nawh khankix, tom hoek bawg yam ang krax meung haktiex Pasha nyang bax pang tix, ²¹ Sonsang grum naog gumlox Siyiex pa lih khaing jheeh Yeramix tom hoek sidah laux lee haktiex tix daux singaix twah nawh heue. Glang bawg yam kawn prah grham pui ka haktiex an, nawh pon ti twah klaung grum naog atixgliah num heue. ²² Ka daux num jah Kurux pa mawh simiang meung Pasha, sonsang grum naog gumlox pa hoik sikah Siyiex khaing daux jheeh Yeramix, Siyiex so kaoh ka khwan ngao rhawm simiang meung Pasha mai nawh pao gumlox ka daux meung nawh khawmuik mai baox sau gumlox ankix ka daux krax pa tiiem ti ah nin; ²³ Simiang meung Pasha ah nin! Siyiex meung raoma, hoik tawx meung haktiex can pa koe piang ca haktiex in khawmuik ka aux heue. Nawh Cao hoik tawx gumlox sonsang sum aux nyiex bwan tix lhang ka daux veng Yerusaliem meung Yudax heue. Pui mawx pa mawh pui Nawh Cao khawmuik daux sinax pex tan lie? Kieh Siyiex ot tau mai nawh mai kieh nawh yaog tix hu heue.