1 Timothy

1 Timothy

¹ Pawlux pa mawh kawncau pa ting Yesux Khrit, kheu pa nhie Siyiex Cao Taoh ex mai Yesux Khrit pa mawh ceu pa keud pot jun pot ex, ² tawx ka Timose,pa mawh kawn aux tete ka daux krax yum rhawm heue. Kieh koe bwanson, pa caux rhawm mai pa nhim pa kaoh khaing Siyiex, Keeing Cao mai Simiang ex Yesux Khrit liak. ³ Awm khyox khaw aux ti nhie maix kawn baox ot ka daux veng Efesux yam hu aux ka meung Makedonix, sonsang gau maix ka pui tix blah, son ang kix sang gau ceu pa gau pa tang pa siyox, ⁴ son ang sang nghiet ka lox been pa ang tie mawh mai ka grawng doeh ru pa ang jud ang jai khankix, pa nie kieh thung thiang paox tix, khaing grawh grawng pa yuh ceu pa hoik een Siyiex rhawm kah, pa koe ka daux krax yum rhawm heue. ⁵ Dee sidah lox tawm an, mawh krax moh, pa lih kaoh khaing rhawm rhi pa singax singeh, dee chix keud chix tawng pa mhawm, krax yum rhawm pa mawh meh heue. ⁶ Ka grawng ceu an khankix tix blah hoik via hoik lud hu ka daux pa sikah lox giex going. ⁷ Kix mie ti mawh sara cao gau lox lai beenli, viang kix ang tawng grawng pa ah tix mai ceu pa dhua kix mawh pa nie mawh heue. ⁸ Ex tawng grawh grawng lox lai beenli mawh pa mhawm, phan pui chix shiao awm pa caw pa khaw mai been, ⁹ mai een ti tawng grawh grawng lox lai beenli ang mawh pa hoik yuh son pui rahsee, mawh son pui pa ang hawt beenli mai pa ang chix cu chix nghiet, son pui pa ang nab ang yam pa yuh ceu pa ang khaw ka Siyiex, pui ting map, son pui pa ang singax singeh son pui pa ang chix nab chix yam son pui pa tap toi miex keeing tix khankix, son pui pa pah pui yum, ¹⁰ son pui pa phit vao, son pui pa phit vao ka paox simex tix, son pui pa briex pui, son pui pie lhen, son pui pa kham mhai rug pa ang mawh ang meh, tang ceu can pa ang caw ka lox ceu pa gau, pa mawh pa meh, ¹¹ pa khaw ka lox bwan gaux rhawm pa ting min plakngai cie Siyiex pa ting bwanson, pa hoik tawx hoik pong ka aux heue. ¹² Aux yaogyaw bwanson Nawh Cao, pa mawh Simiang ex Yesux Khrit, pa hoik kieh aux koe riang rao heue. Mawh kheu hoik sawn Nawh aux mawh pa kaux sijax mai ciak ti kieh aux yuh kaing jhaw Nawh, ¹³ viang aux hoik mawh, pui pa salao ka Siyiex, pui pa tuktiak tukte, pui pa nieb pon yuh pa ang cee ang cak glang ka in kawx heue. Aux hoik pon krax caux rhawm mawh kheu hoik yuh aux khankix kheu ang tix tawng, ka daux pa ang yum rhawm heue. ¹⁴ Bwanson Simiang Siyiex ex kied ting kied nie tau mai krax yum rhawm mai krax moh pa koe ka daux Yesux Khrit heue. ¹⁵ Lox in mawh pa kaux sijax mai pa keung ti rieb ti teei khawmuik, pa ah, "Yesux Khrit hoek ka piang haktiex sonsang taoh pui phimap khankix," mai aux mawh kun pui phimap heue. ¹⁶ Mawh kheu in aux hoik pon bwanson pa caux rhawm, sonsang plak jhi Yesux Khrit ceu pa lang gun lang yeung Nawh Cao ka daux aux pa mawh kun pui phimap, sonsang mawh mhai son pui pa tak sang yum rhawm ka Nawh Cao tom pon ju leeing ju khaix in sax heue. ¹⁷ Yam in kieh Simiang leeing ju, pa ang chix laux chix yum mai pa ang chix yaox ka ngai, pa mawh Siyiex tix kaux khaing, koe krax yung yi mai min pakngai ku ju leeing ju liak! Amen. ¹⁸ Kawn aux Timose eue, lox tawm in aux tawx pong ka maix, awm pa khaw mai pa hoik dawg grux keud grawh grawng maix, yuh ka mawx kheu an kix maix tak pon yuh naing, pa mawh naing pa mhawm heue. ¹⁹ Jhawp ka krax yum rhawm mai ka dee chix keud chix tawng pa mhawm, pui tiblah hoik tik khaing kix mai hoik kieh reu krax yum rhawm laux leeing kheu heue. ²⁰ Humene mai Alezandre ankiex kawx mawh ka daux kix, pa hoik tawx hoik pong aux ka Satan, sonsang gau kiex, ti ang salao ka Siyiex heue.

¹ Mawh kheu nan, ka paox tix khawmuik aux nhie maix, khyox khaw, rawg bwan, mhaing mai yaogyaw bwanson, son pui khawmuik heue. ² Son simiang khankix mai can pui pa giex kaing khawmuik, sonsang pon ex ti ot yiien yawg mhawm mhawm ka daux pa yuh ceu pa khaw mai Siyiex mai pa chix priex rhawm tix heue. ³ In mawh pa mhawm mai pa khaw sivoe Siyiex Cao Taoh ex, ⁴ pa koe rhawm ti kieh pui khawmuik hoek krax taoh mai tawng ka pa mawh meh heue. ⁵ Grawh grawng nawh koe ngie Siyiex tix kaux khaing mai pui sinax, sinax Siyiex mai kawn pui kawx koe ngie tix kaux khaing, pui an, mawh Yesux Khrit, ⁶ pa hoik tawx tokaux tix sonsang taoh ka pui khawmuik heue. Pa kham mhai rug ka yam caw bawg yam heue. ⁷ Mawh ka son an hoik ciak ti kieh aux mawh cao sidiex cao gau mai kawncau pa ting, Aux ah lox pa mawh pa meh, aux ang pie ang lhen, sonsang mawh aux cao gau, grawng krax yum rhawm mai pa mawh pa meh, ka pui tang ceu khankix heue. ⁸ Mawh kheu nan aux mie ti kieh simex khankix rawg bwan kudah kudee mai yaog taix pa singax singeh, pa ang koe krax song rhawm songrhi mai krax thung thiang heue. ⁹ Awm an aux mie ti kieh bun khankix chix koe krax kaig mai priex rhawm tix, ti ceep kraung pa ang hiex jawg tix mai ang simie ti kieh dieh hauk kaing mai ceep kraung khri, phan ang mawh nan siang pa koe daux jawx, phan ang mawh nan kraung ceep pa ting ngawh ¹⁰ Kieh krax twah krax klaung pa mhawm mawh pa jawg tix, awm pa khaw pa nyawm ti jhak son bun khankix pa hoik ah ti mawh pa chix nab chix yam mai pa yuh pa khaw caw ka Siyiex heue. ¹¹ Kieh bun gau tix ka daux krax pa yiien pa yawg mai ka krax pa grum chix cu chix nghiet heue. ¹² Aux ang cu ti kieh bun mawh cao gau mai cao giex kaing piang simex, kieh nawh ot yiien yawg tix heue. ¹³ Kheu hoik phan hoik yuh Adam phao ka, tom yuh Evax khaix heue. ¹⁴ Lheu khaing an Adam ang mawh pa nghiet lox pie, bun hoik nghiet lox pie mai laig ka daux pa lud heue. ¹⁵ Bun tak hoek krax taoh, ka daux pa keh kix kawn, phan kix kawn ot ka daux krax yum rhawm mai krax moh mai krax singax singeh tau mai krax pa chix priex rhawm rhi tix heue.

¹ Lox pa ah nin, "Phan pui tix kaux kaux sawg ti pon ara cao giex kaing ceu cao, nawh simie kaing pa mhawm,"mawh lox pa kaux sijax heue. ² Mawh kheu nan pui pa giex kaing ceu cao tak lai mawh pui pa ang koe dee deuh phimap kah, pa koe moeng tix kaux khaing mai pa yuh satix, pa chix priex rhawm tix, pa chix keud chix sawn, pa chix khre ka nyo sinie, pa chix gau heue. ³ Ang lai mawh pui pa nieb pleung ka plai rawm plix siiet, pa nieb tap toi ka pui, tak lai mawh pa awn rhawm awn rhi, pa ang simah simiang, pa ang moh ka mau heue. ⁴ Tak lai mawh kaw pa chix giex kaing nyiex tix, pa koe rhawm pa chix keud chix sawn ti kieh kawn praix cu nghiet tix heue. ⁵ Viang mawh nan phan mawh pui pa ang chix giex kaing nyiex tokaux tix, nawh tak chix priex ceu cao Siyiex yuh ka mawx? ⁶ Pa ang mawh pui khraox ih li, ha nawh kox ting rhawm vao tix mai rau ka daux pa sang ciyang ka phicaox. ⁷ Lheu khaing an nawh tak lai mawh, pa pui plak praix kham mhai ruk pa mhawm kah, phan ang mawh nan ha nawh kox rau ka daux pa deuh pui phimap mai ka daux kie phicaox heue. ⁸ Awm an pui bung kaing ceu cao khankix kawx, tak lai mawh pui pa chix keud chix priex rhawm tix, pa ang mawh pui pa koe dak ra mu, pa ang nieb nyaux plai rhawm plix siiet tom nie, pa ang keud ti pon mau yie ka krax pa ang khaw. ⁹ Tak lai mawh pui pa jhawp ka pa raux pa mox krax yum rhawm ka daux dee chix keud chix tawng tix pa singax singeh heue. ¹⁰ Viang mawh inkix kawx kieh cheu ti yaox phao ka, khaix an phan ang koe dee deuh phimap kah, kieh kix yuh pui pa bung kaing ceu cao heue. ¹¹ Awm an moeng kix kawx, tak lai mawh pa chix keud chix priex rhawm tix mai pa ang nieb bied ti ah grawng pui mai pa chix yuh satix mai pa kaux sijax ka daux ku ceu khawmuik heue. ¹² Kieh pui pa bung kaing ceu cao khankix, mawh pa koe moeng tix kaux khaing, pa chix giex kaing piang kawn praix mai piang nyiex tix mhawm mhawm heue. ¹³ Grawh grawng nawh kix pa hoik yuh kaing cao bung kaing ceu cao mhawm mhawm pon pakngai pa mhawm son tokaux tix mai rhawm pa kied kwa daux krax yum rhawm pa koe ka daux Yesux Khrit heue. ¹⁴ Viang aux keud pot jun pot ti sang hoek ka maix laung laung kawx, aux tiiem grawh grawng ceu in khankix hu ka maix, ¹⁵ yuh ka mawx phan aux ang khran hoek maix tak lai tawng grawng pui khaw ti yuh ka mawx ka daux nyiex Siyiex, pa mawh ceu cao Siyiex pa im ju mai rong mai jaong cie pa mawh meh heue. ¹⁶ Ceu pa chix nab chix yam mai pa yuh pa khaw ka Siyiex, mawh pa kied ting raux mai ang koe dee ne dee ah ka grawng an heue. Nawh Cao hoik lih bleeh ka daux nex. Khuan Cao hoik kham mhai ruk kah, pa hoik yaox kawncau Siyiex khankix kah, pa hoik sidiex grawng Nawh ka pui tang ceu, pa hoik yum rhawm pui haktiex kah, pa hoik teei haok ka daux min pakngai heue.

¹ Khuan Cao hoik grux krai sidawng, grawh grawng daux bawg yam phao khaix, pui tix blah tak deeh tieh khaing krax yum rhawm, nghiet lox khuan pie lhen khankix, lox ceu pa gau phicaox khankix, ² pa lih khaing pui pie lhen khankix, pa ah lox pie lox lhen, pa dee chix keud chix tawng kix hoik susi gleeing ka rhiem hax, ³ pa ang cu kieh pui mex moeng mai nhie pui twah pa ih, pa hoik phan Siyiex ti deuh, pui ceu pa hoik yum rhawm mai pa tawng ka pa mawh pa meh, khaw ti yaogyaw bwanson mai ih heue. ⁴ Mawh kheu can pa hoik phan hoik yuh Siyiex kuceu mawh pa mhawm mai ang koe pa khaw ti tik vud, phan rieb ti teei ka daux pa yaogyaw bwanson. ⁵ Ceu an kix kieh singax ka daux gumlox Siyiex mai pa rawg bwan heue. ⁶ Phan maix krai puxaik khankix mhong grawng ceu in khankix maix tak mawh cao sidiex cao gau pa mhawm cie Yesux Khrit mai tak baox tiien riang rao tix ka daux lox pa yum rhawm khankix mai lox gau pa mhawm, pa hoik hawt maix tom yam in heue. ⁷ Paw dex mai lox been pa seeing brai, lox been pa ang tie mawh pa lao yiex kuad khankix, gau tokaux tix sonsang chix nab chix yam mai yuh pa khaw ka Siyiex heue. ⁸ Pa gau plak tokaux koe bwanson ceeix ceeix, viang mawh nan pa chix nab chix yam mai pa yuh pa khaw ka Siyiex, koe bwanson son ku ceu khawmuik mai koe lox sijax mukheu son ju in, son ju pa tak sang hoek khaix heue. ⁹ Lox pa ah nin mawh pa kaux sijax mai pa khaw ti rieb ti teei khawmuik heue. ¹⁰ Pa nied ti yuh kaing mai pa yuh lung ex mawh jao in, mawh kheu ex hoik deuh pa keud pot jun pot ex ka Siyiex pa im ju, pa mawh Cao Taoh pui khawmuik mai pa nie mawh son pui pa yum rhawm khankix heue. ¹¹ Tawm lox mai gau ka ceu in khankix awx. ¹² Paw kieh pui tix kaux kawx nunai maix kheu awn ju maix, kieh maix mawh ceu pa hawt jawh pui pa yum rhawm khankix ti yuh, ka daux pa sikah, ka daux pa yuh maix, ka daux pa moh, ka daux pa yum rhawm, ka daux pa singax singeh heue. ¹³ Nied ti coca phat lai mai jeeh nyaw, sidiex gau, tom hoek aux awx. ¹⁴ Paw yuh ti dah rhawm ka totaix pa koe ka daux maix, pa hoik tawx ka maix, ka daux pa hoik grux keud, yam deuh kuad ceu cao taix tix ka piang maix heue. ¹⁵ Viex rhawm tix khawmuik mai nied ti coca yuh ceu in khankix, sonsang sidawng pa haok pa huan maix ka pui khawmuik heue. ¹⁶ Rien rhawm ka tokaux tix mai ka ceu pa gau maix awx. Kaux cong ka daux ceu in khankix, mawh kheu ka daux pa yuh nin maix tak taoh khawm tokaux tix mai kix pa mhong ka maix heue.

¹ Paw vi ah ka kuad, jeeh nyaw ti sidiex nawh, awm mawh nawh keeing, ka sinaw khankix awm mawh kix puxaik, ² ka yiex kuad khankix awm mawh kix miex, ka bunkrih khankix, awm mawh kix nan ka daux pa singax singeh khawmuik awx. ³ Yungyi ka miex mai pa mawh miexmai tete awx. ⁴ Phan miexmai koe kawn, phan ang mawh nan kawn saux, kieh kawn khankix gau ti yuh ka cub geh nyiex tix phao ka mai deeh plud bwanson ka miex keeing tix, grawh grawng nawh pa yuh nan mawh pa khaw plak sivoe ngai Siyiex heue. ⁵ Bun pa mawh miexmai tete, pa deuk tix kaux khaing mai pa ang koe tidtix, hoik een krax keud pot jun pot tix ka Siyiex mai nied ti rawg bwan mhaing ku singaix heue. ⁶ Miexmai pa nieb yuh krax gaux rhawm haktiex, nawh hoik yum yam kawn klawd tix heue. ⁷ Ceu in khankix kawx tawm ti deuh sonsang luan kix khaing krax pa deuh phimap heue. ⁸ Phan pui tix kaux kaux ang kia ngien ka tokaux tix mai nie lheu mawh ka pui nyiex tokaux tix, nawh hoik thiang ti tik krax yum rhawm mai nie lheu caox khaing pui pa ang yum rhawm heue. ⁹ Paw sau miexmai pa ang nyang hoek ju tigliah num ka daux carang mai kiex tak lai mawh pa hoik koe ngie mex tix kaux khaing, ¹⁰ pa kham pui mhai ruk ka grawng pa hoik yuh kiex pa mhawm, phan kiex hoik eei kawn tix ting, phan kiex hoik chix kia nyo sinie, phan kiex hoik khoek caong pui pa singax singeh khankix, phan kiex hoik kia ngien ka pui pa yaox krax tug krax kha, phan kiex hoik nied ti coca yuh kaing pa mhawm ku ceu, sau kiex daux carang heue. ¹¹ Paw rieb ti sau miexmai pa awn ju khankix, grawh grawng nawh, ha kix kox ang pon kut rhawm ka grawng pa gau Cao Khrit mai koe rhawm tix sang baox koe mex, ¹² mai lih ti mawh phimap, kheu laux yuh kix lox sijax pa hoik tawx phao ka heue. ¹³ Lheu khaing an kix lailing ka tix nyiex hoik tix nyiex, gau ti nieh, nieh khaing ang mawh, viang mawh nan mawh pui bied, pa krai grawng pa ang kix khaw ti krai, pa nieb chuh grawng pa ang dex ang dawd mai kix heue. ¹⁴ Aux simie miexmai pa awn ju khankix baox koe mex mai koe kawn mai bung ti kia nyiex tix, son ang sang koe dee map pa koeng kah heue. ¹⁵ Grawh grawng nawh pui tix blah hoik via hu mai hawt khaix Satan heue. ¹⁶ Phan bun tix kaux kaux pa yum rhawm, koe miexmai pa caw paox ceu, kieh nawh teem kix mai paw kieh mawh beeh glawm ceu cao, sonsang pon ceu cao ti kia ngien ka pa mawh miexmai tete heue. ¹⁷ Kuad ceu cao khankix pa giex kaing mhawm mhawm, sawn kix mawh pa keung ti pon min pakngai pa yaw ra son, nie lheu mawh ka kix pa nied ti yuh kaing pa sidiex pa gau heue. ¹⁸ Grawh grawng nawh phuk lai singang khri ah nin, "Maix tak ang jup jheeh mawie ka jup yam dig nawh nghox lih,"mai baox ah nin, "Pui yuh kaing keung ti pon ngawh riang tix heue." ¹⁹ Phan ang koe cao kham mhai ruk ra loe kaux, paw rieb pa deuh phimap ka piang kuad ceu cao. ²⁰ Ah ka kix pa yuh phimap sivoe ngai pui khawmuik, yuh ka mawx son pui pa deuk khankix kawx, sang lhat graung kah heue. ²¹ Aux tawm lox ka maix ka sivoe ngai Siyiex mai Yesux Khrit mai kawncau Siyiex pa hoik laug khankix nhie maix hawt yuh ceu in khankix, paw vi yuh tang siyox mai paw jhak ka pakngai pui heue. ²² Paw khran deuh taix ti tawx ara ka piang pui tix kaux kawx mai paw neuex tokaux tix ka daux phimap pui tang kaux, kieh tokaux tix singax singeh awx. ²³ Paw lai baox mawh pui nyaux rawm, viang mawh nan nyaux rawm plix siiet ceeix ceeix, son vaig maix mai ceu pa saux maix law lawx heue. ²⁴ Phimap pui tix blah sidawng mai hu sivoe ka dee prawng dee ciyang phimap, phimap pui tix blah hawt khaix kix heue. ²⁵ Awm an viang mawh kaing ceu pa mhawm kawx koe pa sidawng mai pa ang sidawng kawx ang pon ti mox heue.

¹ Kieh pui can pa mawh siliex khankix, een cao kix mawh pa keung ti pon pa yungyi khawmuik, ceu kaux Siyiex mai lox ceu pa gau khankix tak ang koe dee salao kah heue. ² Kix pa koe cao pa yum rhawm, paw kieh kix yuh ti ang nab yam ka kix, kheu mawh kix puxaik, viang mawh nan nie kieh kix yuh son kix, mawh kheu kix pa pon bwanson kah, mawh pa yum rhawm mai pa moh heue. Sidiex mai gau ceu in khankix awx. ³ Phan pui tix kaux kaux gau lox ceu pa gau pa tang pa siyox mai ang cu ka lox pa mawh pa meh, pa mawh gumlox Simiang ex Yesux Khrit mai ka lox ceu pa gau pa khaw mai pa nab yam pa yuh ceu pa khaw ka Siyiex. ⁴ Nawh kroh ti ting rhawm mai ang tawng tidtix, nawh miag ka pa chawk mai ka pa thung thiang lox, pa lih ti mawh pa boh rhawm, pa simah simiang, pa salao, pa keud grawng pa caox pa ang tie mawh, ⁵ mai pa nie thung thiang pui rhawm pa dee keud kix hoik cux hoik sium mai pa ang koe pa mawh pa meh, pa ce ceu pa nab yam pa yuh pa khaw ka Siyiex mawh pa sang pon rao kah heue. ⁶ Viang mawh nan phan fah rhawm ka ceu pa nab yam pa yuh pa khaw ka Siyiex, mawh pa kied pon rao pa ting heue. ⁷ Grawh grawng nawh ex ang viex tidtix hoek ka piang haktiex mai ex ang pon ti viex tidtix lih hu heue. ⁸ Mawh kheu nan phan ex koe pa ih mai pa ceep, ex sang fah rhawm kah heue. ⁹ Viang mawh nan kix pa koe rhawm ti sang mi sang koe, rau ka daux pa nyaw glaw mai ka daux kie mai alo nex nham pa daox pa aw pa chix yuh laux tom nie, ceu an khankix mawh pa kieh pui com nok ti yum ka daux pa laux pa leeing heue. ¹⁰ Pa moh ka mau mawh riah pa caox ku ceu khawmuik mai pui tix blah kheu simie ti pon ka ceu an, hoik lud hu khaing krax yum rhawm mai hoik cun tokaux tix, pang phlat ka ceu pa khi rhawm tom nie heue. ¹¹ Mawh kheu nan maix pa mawh pui Siyiex eue, to khaing ceu in khankix mai hawt khaix pa rahsee mai ceu pa nab yam pa yuh pa khaw ka Siyiex mai pa yum rhawm mai pa moh mai pa gun pa yeung mai pa awn rhawm heue. ¹² Yuh naing, naing pa mhawm pa dex dawd mai pa yum rhawm awx. Jhawp ka ju leeing ju, pa hoik kok ti teei maix kah, pa hoik kham maix ti teei, yam kham maix mhai ruk pa mhawm ka sivoe pui pa kham mhai ruk tom nie heue. ¹³ Aux tawm lox ka maix ka sivoe Siyiex, pa tawx ju pa im ka ku ceu khawmuik, ka sivoe Yesux Khrit, pa hoik kham mhai ruk sivoe Pawntix Pilat, ka grawng pa rieb ti teei pa mhawm an heue. ¹⁴ Sonsang priex maix ti hawt lox tawm an, ka daux pa ang koe dee pliag dee ne mai dee deuh phimap kah, tom lih bleeh Simiang ex Yesux Khrit heue. ¹⁵ Pa tak sang jhi Nawh Cao yaox yam hoek bawg yam pa khaw cie tix, kaw pa mawh Simiang pa koe tix kaux khaing, pa ting bwanson, pa mawh Simiang piang simiang, Siyiex piang siyiex, ¹⁶ pa mawh tix kaux khaing pa ang chix yum, pa ot ka daux pa riang, pa ang pon ti hu dex kah, pa ang pui sax yaox, pa ang chix yaox kah kieh Nawh koe krax yung krax yi mai sibrawm leeing ju liak. Amen. ¹⁷ Tawm lox ka kix pa mi pa koe ka daux haktiex in, son ang kix sang ting rhawm, son ang kix sang een krax keud pot jun pot ka sinngao pa ang kaux cong, kieh een krax keud pot jun pot ka piang Siyiex, pa tawx ku ceu khawmuik ka ex, sonsang gaux rhawm kah heue. ¹⁸ Sonsang yuh kix pa mhawm, sonsang mi sang koe kix daux kaing pa mhawm, sonsang koe rhawm kix ti sang gwieh ti tawx ka pui mai pa koe rhawm ti sang yuh paox pie heue. ¹⁹ Khrawm ti deuh kraung khrai pa mhawm mai jaong pa kaux son tokaux kix son ju phao khaix, sonsang pon kix ju pa im, pa mawh ju tete heue. ²⁰ Timose eue, pau pa hoik tawx hoik pong aux ka maix awx. Via khaing lox bied pa kieh raw ka pa tawng, pa lud kok pui mawh krax tawng, ²¹ Pui tix blah pa hoik rieb ti teei mai lud loe khaing pa yum rhawm heue. Kieh bwanson koe mai maix liak heue.