1 Thessalonians

¹ Pawlux mai Silwanux mai Timose, tawx ka ceu cao pui veng Thesalonix pa ot ka daux Siyiex Keeing Cao mai Simiang Yesux Khrit heue. Kieh bwanson mai pa nhim koe ka pex liak. ² Ex yaogyaw bwanson Siyiex son pex khawmuik ku jheeng jheeng, simawd ka pex ka daux pa rawg ex bwan, ³ Ca doh keud pot grawng kaing krax yum rhawm pex, pa yuh daux krax moh krax rhawm krax gun krax yeung, ka krax keud pot jun pot ka daux Simiang ex Yesux Khrit, ka sivoe Siyiex ex heue. ⁴ Puxaik pa moh Siyiex khankix eue, ex tawng grawng hoik laug Nawh Cao ka pex, ⁵ mawh kheu lox bwan gaux rhawm pa sidiex ex, ang mawh ngie lox giex ka pex, mawh khawm ka daux sibrawm, ka daux Khuan Singax Singeh mai ka daux pa nie fah rhawm kheu tawng mawh awm pa tawng pex grawng ex mawh pui pa yuh ka mawx ka son pex, yam ot ex mai pex heue. ⁶ Pex hoik lih mawh pui pa hawt jawh ka ex, ka Simiang, khaix hoik rieb pex lox bwan ka daux pa kha rhawm tom nie, tau mai pa gaux rhawm Khuan Singax Singeh, ⁷ tom hoik lih pex ti mawh mhai ti hawt jawh, ka pui pa yum rhawm khawmuik pa ot ka daux meung Makedonix mai meung Akhayax heue. ⁸ Lox bwan Simiang hoik tah hoik sinum hu khaing pex, ang joeng mawh ngie ka daux meung Makedonix mai meung Akhayax, krax yum rhawm pex ka plak Siyiex hoik tah hu kudah kudee, mawh kheu in ang ex lai shiao ah tidtix heue. ⁹ Mawh kheu tokaux kix krai lao, grawng pa laig ex ka pex mawh pa yuh ka mawx, grawng pa deeh tieh pex ti hoek ka Siyiex, khaing riang grang khankix, sonsang yuh son Siyiex pa im ju mai pa mawh pa meh, ¹⁰ sonsang krox son Kawn Nawh Cao khaing raoma, pa hoik deeh kieh Nawh Cao kaoh im khaing krax yum, pa mawh Yesux, pa sang taoh ex khaing pa song rhawm songrhi pa tak sang hoek heue.

¹ Puxaik khankix eue, tokaux pex hoik tawng grawng pa laig ex ka pex ang mawh pa giex going. ² Awm pa hoik tawng pex, viang ex hoik yaox ti kham geu mai viang hoik yuh pa ang cee ang cak ka ex ka daux veng Philippix kawx, ex viex rhawm kwa ka daux Siyiex ex ti sidiex gau lox bwan gaux rhawm Siyiex ka pex, ka daux pa kied nie ngah paox tix heue. ³ Lox pa sidiex ex ang mawh ceu pa lud, pa ang singax singeh, ka daux pie lhen, ⁴ awm pa hoik khaw hoik caw ex ka rhawm Siyiex ti sang tawx sang pong lox bwan gaux rhawm ka ex, ex tom sidiex sonsang khaw ka rhawm kawn pui ang mawh, sonsang khaw ka rhawm Siyiex, kaw pa cheu ti yaox rhawm rhi ex heue. ⁵ Awm pa hoik tawng pex, ang ex sax shiao lox pa nieb lak yaw tix bawg kawx, ang sax sawg son sang nieb mi koe, grawng in Siyiex mawh mhai rug kah heue. ⁶ Mawh kheu mawh ex kawncau pa ting Cao Khrit, viang ex teei chix mawh beeh glawm kawx, khaing pex ang ah, khaing tang kaux ang ah, ang ex sax sawg min plakngai khaing kawn pui heue. ⁷ Yam ot ex sinax pex, ex hoik yuh pa awn pa nge, awm miex pa kawn kieh kawn tix peuex, kia ngien ka kawn tix khankix heue. ⁸ Awm an, kheu kied moh ex ka pex, ex gaux rhawm ti tawx lox bwan gaux rhawm Siyiex ka pex khaing ang joeng mawh khawm ju ex kawx mie ti tawx kah, mawh kheu kied moh ex ka pex heue. ⁹ Puxaik khankix eue, pex doh keud ka pa hoik nyhap hoik mao ex, yam yuh ex kaing ku ngaix, son ang ex sang mawh beeh glawm ka pex tix kaux kawx mai ex sidiex gau lox bwan gaux rhawm ka pex heue. ¹⁰ Pex mawh pa kham mhai ruk, khawm Siyiex kawx kham mhai rug, grawng pa singax singeh mai pa rahsee, pa ang koe dee deuh phimap, ka daux ceu pa hoik yuh tokaux ex ka pex pa yum rhawm khankix, mawh pa yuh ka mawx. ¹¹ Awm pa hoik tawng pex grawng hoik yuh ex ka mawx ka pex ku kaux, awm yuh keeing ka kawn praix tix, sidiex gau jeeh nyaw kham mhai rug ka pex, ¹² sonsang hu pex awm pa keung ka Siyiex, kaw pa hoik kok pex laig ka daux meung mai min plakngai cie tokaux Nawh Cao heue. ¹³ Mawh kheu in, ex kawx yaogyaw ka bwanson Siyiex ang jud ang jai, kheu hoik rieb pex ti teei gumlox pa mhong khaing ex, pa mawh gumlox bwan Siyiex, pa ang rieb ti teei awm mawh gumlox kawn pui, hoik rieb awm mawh gumlox Siyiex pa mawh pa meh, pa yuh kaing ka plak daux pex pa yum rhawm khankix heue. ¹⁴ Puxaik khankix eue, pex hoik lih ti mawh pa hawt jawh, awm ceu cao Siyiex pa ot ka daux meung Yudax, daux Yesux Khrit, mawh kheu pex kawx hoik yaox ti kham geu ceu pa awm paox tix khaing tawm taix pui meung tokaux pex, awm kix kawx hoik yaox ti kham geu khaing tawm taix pui Yudax khankix, ¹⁵ pa mawh pui pa hoik pah ka Simiang Yesux mai khawm cao jhai khankix yum, ka ex kawx kix tuktiaktukte kah, kix ang khaw ka rhawm Siyiex, mawh pa ang caw ka kawn pui khawmuik. ¹⁶ Kix kieh raw ka pa sidiex ex ka pui tang ceu sonsang hoek kix krax taoh, sonsang grum naog phimap kix jheeng jheeng, pa song rhawm songrhi hoik hoek ka piang kix tom grum naog heue. ¹⁷ Puxaik khankix eue, viang ex yaox ti siyang ot khaing pex ti vud ti cu daux tokaux, rhawm ex ang siyang ot khaing pex, ex kied byaong mai mie ti yaox pex, nie lheu lang teung coca sonsang yaox pakngai pakbaox pex heue. ¹⁸ Mawh kheu nan ex tom simie ti hoek ka pex, aux Pawlux mie ti hoek ka pex tix bawg hoik tix bawg, viang mawh nan Satan kieh raw ka ex heue. ¹⁹ Pa keud pot jun pot ex, phan ang mawh nan pa gaux rhawm ex, phan ang mawh nan mhok khri pa yaw rangdi ex kah, mawh pa yuh ka mawx? Pex mawh pa yuh nan ka sivoe Simiang ex Yesux Khrit yam sang hoek Nawh ang mawh lie? ²⁰ Pex mawh min plakngai ex mai pa gaux rhawm ex heue.

¹ Mawh kheu nan yam ang ex lai baox pon yeung, ex keud mhawm ti sang ot khaix ka daux veng Athen nong nong, ² mai ploi Timose puxaik ex, pa mawh kawncau pa yuh kaing jhaw Siyiex ka pa sidiex lox bwan gaux rhawm cie Cao Khrit, hu sonsang kieh pex kaux cong mai nyawm rhawm ka krax yum rhawm pex, ³ son ang pex sang laux rhawm tix kaux kawx, kheu krax kha rhawm inkix heue. Tokaux pex hoik tawng, grawng hoik ciak ti deuh ex son pa yuh nin heue. ⁴ Yam ot ex tau mai pex, ex hoik grux krai ka pex, grawng dex sang yaox ex ti kham geu ka krax tug krax kha mai hoik lih ti mawh nan, awm pa hoik tawng pex heue. ⁵ Mawh kheu jao in aux kawx, yam ang aux baox pon ti yeung, aux ploi pui hu, sonsang tawng grawng krax yum rhawm pex, phan ang mawh nan ha cao pa nyaw glaw kox nyaw glaw ka pex mai kieh kaing pa hoik yuh ex mawh pa giex going. ⁶ Viang mawh nan Timose hoik deeh hoek khaing pex, ka ex yam in mai viex lox gaux rhawm ka ex grawng krax yum rhawm mai krax moh krax rhawm pex mai grawng pa doh keud pex ka ex jheeng jheeng mai kied byaong ti yaox ka ex, ex kawx byaong ti yaox ka pex heue. ⁷ Puxaik khankix eue, mawh kheu jao in, ex tom nyawm rhawm grawng pex, ka daux pa khi rhawm mai pa tug pa kha ex khawmuik, kheu krax yum rhawm pex heue. ⁸ Phan pex kaux cung sijung ka daux Simiang, ex hoik im heue. ⁹ Ex tak sang baox deeh pon yaogyaw bwanson ka Siyiex son pex, son krax gaux rhawm khawmuik, pa gaux rhawm ex kah kheu pex, sivoe Siyiex ex, ¹⁰ sonsang pon ex ti yaox pakngai pakbaox pex mai sonsang pon ti kieh grum naog, ka pa kawn cha daux krax yum rhawm pex, ex tom nied ti rawg bwan ku ngaix heue. ¹¹ Yam in kieh tokaux Keeing ex Siyiex mai Simiang ex Yesux Khrit, jhi krax sang hu ex ka pex liak, ¹² Simiang Yesux kieh krax moh krax rhawm pex nie baox ting ka paox tix mai ka pui khawmuik, awm ex kawx moh ka pex, ¹³ sonsang sidah kieh Nawh Cao rhawm rhi pex kaux cong mai ang koe dee deuh phimap ka daux pa singax singeh sivoe Keeing ex Siyiex, yam sang hoek Simiang ex Yesux, tau mai pui pa singax singeh Nawh khawmuik liak.

¹ Lox pa deuk mawh nin, puxaik khankix eue, ex khyox khaw mai jeeh nyaw pex ka daux Simiang Yesux, sonsang hu pex awm pa hoik rieb pex ti teei khaing ex grawng pa khaw pex ti hu sonsang khaw mai rhawm Siyiex, awm pa hu pex yam in, pex sang nie lheu baox chix hu khaing an sinyek sinyek heue. ² Pex tawng grawng hoik tawm ex lox pa yuh ka mawx ka pex ka daux Simiang Yesux heue. ³ Ceu pa khaw ka alo Siyiex, mawh pa singax singeh pex, pa ang dex ang yuh ceu pa lud vao, ⁴ pa chix tawng kaux pui mawx kaux pui an ti priex ka kraung cie tokaux tix, ka daux pa singax singeh mai pa yung yi. ⁵ Ang mawh ka daux pa hawt ti yuh alo nex nham, awm yuh pui tang ceu khankix, pa ang tawng ka Siyiex, ⁶ pui tix kaux kawx, tak ang sang nieb nie luan yuh mai lud ka puxaik tix ka daux grawh grawng in, mawh kheu Simiang mawh cao pa ciyang ka ceu in khankix khawmuik, awm hoik grux krai ex mai hoik kham ex mhai ruk ka pex heue. ⁷ Siyiex ang kok ex son pa ang singax singeh, kok ka daux pa singax singeh heue. ⁸ Kaw pa thiang ti tik, thiang ti tik ka kawn pui ang mawh, thiang ti tik ka Simiang Siyiex, pa tawx Khuan Singax Singeh Nawh Cao ka pex heue. ⁹ Grawh grawng krax moh krax rhawm ka puxaik khankix, ang pex lo pa tiiem pui lai ka pex tix kaux kawx, mawh kheu Siyiex hoik gau ka pex grawng pa moh ka paox tix, tix kaux lai tix kaux heue. ¹⁰ Pex hoik yuh nan ka puxaik khawmuik pa ot ka daux meung Makedonix khawmuik heue. Puxaik khankix eue, ex sidiex jeeh nyaw ka pex sonsang nie lheu baox koe krax moh sinyek sinyek. ¹¹ Sonsang gau pex ti chix ot yiien mhawm mhawm, sonsang yuh kaing cie tokaux tix, sonsang yuh kaing ka taix tix, awm pa hoik tawm ex ka pex, ¹² sonsang hu pex, awm pa nyawm ti jhak, ka kix pa ot plak praix mai son ang lai baox lo tidtix heue. ¹³ Puxaik khankix eue, ang ex rhawm kieh pex ang tawng ka grawh grawng kix pa laig it khankix, son ang pex sang khi rhawm, awm pui tang kaux pa deuk khankix pa ang koe krax keud pot jun pot heue. ¹⁴ Phan ex yum rhawm ka grawng pa hoik yum Yesux mai pa hoik baox deeh kaoh tix bawg, awm an kix pa hoik laig it ka daux Yesux kawx, Simiang Siyiex tak viex hoek tau mai Nawh Cao heue. ¹⁵ Ex ah nin ka pex kheu hoik pon ex lox Simiang Siyiex, grawng ex pa kawn klawd mai pa kawn deuk tom yam hoek Simiang Siyiex, ang tau lai pon hoek ka sivoe kix pa hoik laig it khankix heue. ¹⁶ Tokaux Simiang Siyiex tak sang lih khaing raoma tau mai lox yo tau mai lox simiang kawncau mai lox teet tawng Siyiex, pui pa hoik yum ka daux Cao Khrit tak sang deeh kaoh phao ka heue. ¹⁷ Khaix an ex pa kawn klawd pa kawn deuk khankix, tak sang teei haok tau mai kix, ka daux paiawm, sonsang sipub ka Simiang Siyiex ka daux bhaung dee long mai ex tak sang ot tau mai Simiang Siyiex leeing ju heue. ¹⁸ Mawh kheu nan teei gumlox in mai khu rhawm ka paox tix, tix kaux lai tix kaux awx.

¹ Puxaik khankix eue, grawh grawng bawg yam khankix, ang pex lo pa tiiem tidtix ka pex heue. ² Mawh kheu tokaux pex hoik tawng mhawm mhawm grawng singaix sang hoek Simiang Siyiex awm hoek pui briex yam pon sawm heue. ³ Yam kawn tak ah kix "Koe pa nhim mai ang koe dee lhat," yam an dom mawx dom an pa laux pa leeing sang hoek ka piang kix, awm pa saux yha hoek ka piang bun pa koe kaux mai ang kix tau ti pon luan heue. ⁴ Puxaik khankix eue, pex ang ot ka daux pa faik, singaix an sang krup pex awm pui briex, ⁵ pex khawmuik mawh kawn pa riang mai kawn ponngaix, ang ex mawh kawn ponsawm mai kawn pa faik heue. ⁶ Mawh kheu nan paw kieh ex laig it awm pui pa deuk khankix, viang mawh nan kieh ex pau ti jhak mai priex rhawm tix heue. ⁷ Kix pa laig it, laig it yam ponsawm, kix pa yoek, yoek yam ponsawm, ⁸ viang mawh nan kheu mawh ex pa dex dawd mai ponngaix kieh ex priex rhawm tix mai ceep kraung naing pa tie naok pa mawh krax yum rhawm mai krax moh krax rhawm mai son mhok rhiem ceep ka krax keud pot jun pot sonsang hoek krax taoh heue. ⁹ Siyiex hoik ciak ti deuh ex sonsang pon pa song rhawm songrhi ang mawh, hoik ciak ti deuh ex sonsang pon krax taoh kheu Simiang ex Yesux Khrit, ¹⁰ pa hoik yum son ex, viang ex siduad ang ah, laig it ang ah, ex sang pon ti im tau mai Nawh Cao heue. ¹¹ Mawh kheu nan jeeh nyaw ka paox tix, yuh ti kieh paox tix haok huan, awm pa yuh pex yam in heue. ¹² Puxaik khankix eue, ex khyox khaw ka pex, sonsang tawng pex ka kix pa yuh kaing ka sinax pex mai giex kaing ka piang pex ka daux Simiang Siyiex, pa sidiex ti tawx satix ka pex, ¹³ sonsang yungyi ka kix, ka daux krax moh krax rhawm pa kied ting, kheu kaing jhaw pa yuh kix heue. Kieh koe pa nhim mai pa ang simah simaing ka tokaux pex awx. ¹⁴ Puxaik khankix eue, ex jeeh nyaw ka pex, sonsang tawx satix ka kix pa yuh pa ang khaw mai sonsang tawx riang ka kix pa iak rhawm mai sonsang teem ka kix pa iak riang iak rao mai kieh koe rhawm pa lang gun lang yeung ka pui khawmuik heue. ¹⁵ Son ang pui sang deeh pawk pa caox, ka son pa caox tix kaux kawx, hawt ti yuh pa mhawm jheeng jheeng ka paox tix, tix kaux lai tix kaux mai ka pui khawmuik heue. ¹⁶ Gaux rhawm jheeng jheeng heue. ¹⁷ Rawg bwan ang jud ang jai. ¹⁸ Yaogyaw bwanson ka daux ku ceu, in mawh alo Siyiex ka daux Yesux Khrit ka son pex heue. ¹⁹ Paw preet yeet ka Khuan Cao. ²⁰ Paw een lox jhai khankix ang koe ceu. ²¹ Tiag cheu ti yaox ka ku ceu khawmuik, jhawp ka pa mhawm tom kaux. ²² Paw dex paw yuh, via khaing pa caox ku ceu awx. ²³ Kieh tokaux Siyiex Cao pa nhim, kieh pex grum singax khawmuik, sonsang priex khuan pex mai ju pex mai tokaux pex khawmuik, son ang sang koe dee deuh phimap kah, yam hoek Simiang ex Yesux Khrit heue. ²⁴ Kaw pa hoik kok pex, mawh pa kaux sijax, Nawh tak sang yuh nan heue. ²⁵ Puxaik khankix eue, rawg bwan ka son ex liak. ²⁶ Nawb ka puxaik khankix khawmuik ka pa ngheut pa singax singeh heue. ²⁷ Aux tawm lox ka pex ka daux Simiang Siyiex, sonsang kieh phat lai in ka puxaik pa singax singeh khawmuik heue. ²⁸ Kieh bwanson Simiang ex Yesux Khrit ot tau mai pex liak. Amen.