1 Samuel

1 Samuel

¹ Koe pui veng Ramathaimzophim tix kaux ka ton Epharem, ceu kaux nawh mawh Elakanax kawn simex Yeroham, pa mawh kawn simex Elihu, kawn simex Tawhu, kawn simex Zupha pa mawh ceu pui Epharem. ² Mai nawh koe moeng ra kaux, ceu kaux mawh Hanax mai Penina, Penina koe kawn praix mai Hanax ang koe kawn praix. ³ Pui in lih khaing veng ot tix ku num sonsang krub mai tan ka Simiang Siyiex pa ting piang khawmuik ka veng Shilaw, kawn simex Elix ra kaux mawh Hawphanix mai Phiniet, pa mawh cao giex kaing li Siyiex. ⁴ Singaix yam yuh Elakanax krax tan nawh tawx nyum son moeng tix Penina mai son kawn simex kawn bun tix. ⁵ Nawh tawx nyum cie Hanax ra son kheu jao moh nawh Hanax, viang mawh nan, Siyiex ang kieh nawh koe kawn. ⁶ Penina nie song rhawm ka Hanax sonsang kieh khrup rhawm kheu ang Simiang Siyiex kieh nawh koe kawn. ⁷ Ceu an hoik lih mawh ku num, yam laig nawh ka daux nyiex bwan Simiang Siyiex mai so Hanax khrup rhawm. Mai Hanax yiiem ang lai ih priex preem heue. ⁸ Mai Elakanax mex nawh ah nin, "Hanax eue, yiiem maix kheu patix? ang maix ih nyaux kheu tix? laux rhawm maix kheu tix? aux hoik lheu mhawm son maix khaing kawn simex kao kaux ang mawh lie?" ⁹ Khaix hoik ih nyaux Hanax daux veng Shilaw, nawh yaog ti kaoh, Elix cao giex kaing li ngawm piang khaox gaong praok rong siviex nyiex bwan Simiang Siyiex. ¹⁰ Hanax kied laux rhawm sigrien mai rawg bwan ka Siyiex, yiiem mai pa khrup rhawm tix. ¹¹ Nawh tiextu ah nin, "Simiang Siyiex Cao pa ting piang khawmuik eue, phan Maix koe rhawm ti kia ngien ka krax kham geu siliex bun tix, doh keud ka aux, paw piawm ka siliex bun Maix, phan Maix tawx kawn simex ka siliex bun Maix tix kaux, aux tak ap nawh ka Simiang Siyiex glang singaix im ju nawh mai ang khlao ka kaing nawh." ¹² Yam rawg Hanax bwan ang jud ang jai plak sivoe Simiang Siyiex, Elix cao giex kaing li dong ngai tix ka jheeh nawh. ¹³ Hanax rawg bwan daux rhawm tix, mawh ngie siyieb jheeh nawh pa chuh mai ang mhong ka lox nawh, Elix cao giex kaing li keud nawh yoek. ¹⁴ Elix cao giex kaing li ah nin ka nawh, "Mawh kawn sang yoek maix miex grheung lie? teei ti tik rawm plix siiet singai khaing maix." ¹⁵ Hanax deeh pawk ah nin, "simiang eue, ang mawh, aux mawh bun pa laux rhawm, aux ang nyaux rawm plix siiet mai plai khiien, aux hieh plih rhawm tix ka plak sivoe simiang Siyiex. ¹⁶ "Paw doh keud siliex bun maix, mawh bun pa caox, aux krai ka daux pa laux rhawm mai pa khi rhawm tix tom nie." ¹⁷ Elix deeh pawk ah nin, "Kieh maix hu nhim mai Siyiex pui Isarelax tak tawx ka maix awm pa rawg maix ka Nawh Cao." ¹⁸ Mai Hanax ah nin, "Kieh siliex bun maix, yaox pa koe min plak sivoe ngai maix." Khaix an Hanax deeh hu krax hu tix mai ih priex mai ngai baoh nawh ang lai koe krax laux rhawm heue. ¹⁹ Mai kix kaoh ponngawb caocao mai krub ka Simiang Siyiex mai kix deeh ing ka nyiex tix daux veng Ramax, Elakanax dex dawd tau mai moeng tix Hanax mai Simiang Siyiex doh keud ka nawh, ²⁰ khaix an, Hanax koe kaux mai keh kawn simex tix kaux mai kok ceu kaux nawh mawh Samoelax ah nin, "Mawh kheu hoik mhaing nawh ka Simiang Siyiex." ²¹ Elakanax mai pui nyiex nawh haok yuh krax tan sijax mukheu awm pa yuh ku num ka Simiang Siyiex. ²² Viang mawh nan, Hanax ang cu ti hu, nawh ah nin ka mex tix, "Aux ang nyang hu, kieh kawn nyawm prah peuex ha, aux tak viex nawh hoek sivoe Siyiex mai prah nawh ot tan leeing ju." ²³ Mai mex nawh Elakanax deeh ah nin, "Yuh awm pa koe rhawm maix, pau tom prah kawn nyawm peuex, yuh tom grum naog gumlox Siyiex." Mai Hanax ot ka nyiex tom hoek bawg yam prah nawh peuex. ²⁴ Yam hoik prah kawn nyawm ka peuex miex tix, kiex viex kawn nyawm hu mai tix, tau mai mawie mhaing naog loe num tix mu, nghox ca tix e pha mai singiien hak plix siiet tix mu mai viex hoek ka nyiex bwan Simiang Siyiex daux veng Shilaw, kawn nyawm an kawn awn ju. ²⁵ Khaix an, kix pah mawie mhaing an mai viex kawn nyawm hoek ka Elix. ²⁶ Mai Hanax ah nin, "simiang aux eue, awm im ju maix cao simiang aux, aux mawh bun pa hoik cung hawt maix tin mai pa rawg bwan ka Simiang Siyiex. ²⁷ Mawh kheu aux rawg bwan sonsang pon kawn nyawm in mai Simiang Siyiex hoik tawx awm pa rawg aux ka Nawh Cao. ²⁸ Mawh kheu aux hoik pon nawh khaing Simiang Siyiex, aux tak deeh ap nawh ka Simiang Siyiex, glang yam im ju nawh kieh mawh pa yuh kaing jhaw Siyiex." Mai kix krub ka Simiang Siyiex tan heue.

¹ Hanax rawg bwan ah nin, "Aux kied gaux rhawm mai kied ting riang daux Simiang Siyiex, jheeh aux yaw rangdi tix ka pui pa koeng aux, mawh kheu aux gaux rhawm daux pa taoh Maix Cao. ² Ang koe pui pa singax singeh awm Simiang Siyiex, lheu khaing Maix ang lai koe Siyiex mai rang dee een ex rhawm awm Maix ang koe. ³ Paw lai krai lox ting lhaong mai paw kieh lox ca nyhau lih khaing jheeh tix, mawh kheu Simiang Siyiex mawh pa tawng mai Nawh Cao mawh pa ciang ka kaing kuceu." ⁴ Ak pui ting riang khankix, hoik graig mai pui pa awn riang khankix, tak deeh koe riang. ⁵ Pui pa kub ih tak deeh cang, pui pa cai rhawm tak yaox ti sak, pui neh tak keh kawn aliah kaux mai pui koe kawn tom nie tak deeh iak riang. ⁶ Siyiex pon kieh yum mai pon kieh deeh im, Nawh Cao pon kieh hu meung yum mai pon kieh deeh kaoh, ⁷ Simiang Siyiex chix kieh pui hot mai chix kieh pui mi, Nawh chix kieh tiem mai chix kieh lhaong. ⁸ Nawh Cao yaog pui hot khaing phawng tiex mai yaog pui caung khaing pum nyhee mai kieh ngawm tau mai cao Simiang mai pon dee ngawm dangngeung pa koe min mawh sinngao tix. Mawh kheu rong haktiex mawh cie Siyiex mai Nawh deuh haktiex piang an. ⁹ Nawh Cao kia ngien ka caong pui pa singax tix, pui pa ang rahsee tak ot jiiep ka daux pa faik, pui ang chix pex ka riang rao cao tix. ¹⁰ Pui pa koeng Simiang Siyiex ka khankix tak laux phawng vid, Nawh Cao kieh sinum praix khaing raoma tuh ka kix, Simiang Siyiex ciyang tom sidah haktiex, Nawh tak mawh riang rao ka simiang Nawh Cao mai yaog siawp sibrawm pui pa hoik groi Nawh Cao bee ka." ¹¹ Khaix an Elakanax deeh ing ka nyiex tix, ka Ramax, mai kawn nyawm an yuh kaing jhaw Simiang Siyiex ka sivoe Elix cao giex kaing li. ¹² Kawn simex Elix khankiex mawh pui caox mai kiex ang nab yam ka Simiang Siyiex. ¹³ Been pa deuh cao giex kaing li son pui hun mawh nin, yam yuh pui tix kaux kaux krax tan pa appong, kawncau cao giex kaing li tak viex lawk tuh koe kak loe mu hoek ka taix tix yam kawn ngaik ka nex. ¹⁴ Khaix an nawh tak cih lawk tuh koe kak loe mu ka daux aw khang, aw ting mai aw iak khankix, phan lawk tuh koe kak loe mu caw ti pug patix ang ah, cao giex kaing li tak teei ti cie ka an, kix yuh ceu an ka pui Isarelax pa hoek ka daux Shilaw. ¹⁵ Sivoe sang gleeing, kix tik khlawp bee, kawncau cao giex kaing li hoek ah nin ka pui pa yuh krax tan, "Tawx nex pa sang tong cao giex kaing li ti ih, mawh kheu nawh ang teei nex hoik ngaik ka maix, teei ngie nex im." ¹⁶ Mai phan pui an ah nin ka nawh, "Kieh kix gleeing khlawp bee sivoe, khaix an maix pon teei tom nie awm pa koe rhawm tix, " mai nawh ah nin, "Ang chix, maix caw ti tawx yam in, phan ang mawh nan aux tak yuh tom pon teei tix an." ¹⁷ Mai phimap pui awn ju an kiex kied ting sivoe Simiang Siyiex, mawh kheu kiex map ka krax tan ka Simiang Siyiex. ¹⁸ Samoelax ceep sibex dhah dawd taix mai yuh kaing jhaw sivoe Siyiex, yam mawh kawn nyawm. ¹⁹ Miex nawh caing sibex iak tix pheen mai viex ti tawx ka nawh ku num, yam hu nawh yuh krax tan pa appong mai miex tix ku num. ²⁰ Elix nawb bwan ka Elakanax mai moeng nawh ah nin, "Kieh Simiang Siyiex tawx ru ka khaing bun in, sonsang ap kawn nyawm pa hoik rawg tix ka Simiang Siyiex, khaix an kix deeh ing ka nyiex tix. ²¹ Simiang Siyiex hoek kia ngien ka Hanax, nawh baox koe kaux mai keh kawn simex loe kaux kawn bun ra kaux mai kawn nyawm pa mawh Samoelax ting hwan sivoe ngai Simiang Siyiex heue. ²² Elix hoik kied kuad mai nawh mhong can pa yuh kawn simex tix ka pui Isarelax, grawng it kiex mai bun yuh kaing jhaw ka diang siviex laig nyiex gox bwan man bang kum, ²³ nawh ah nin ka kiex, "Pax lai yuh ceu in yuh ka mawh? Mawh kheu aux hoik mhong grawng pa caox yuh pax ka pui khankix." ²⁴ Kawn simex aux eue, ang mawh, pa mhong aux grawng kieh pui hun Simiang Siyiex lud ang lai mawh pa mhawm. ²⁵ Phan pui tix kaux lud ka paox kawn pui tix Simiang Siyiex tak prawng ca ka nawh mai phan pui tix kaux lud ka Simiang Siyiex, pui mawx pa sang khyox khaw ka son nawh? Viang mawh nan kiex ang nghiet ka lox keeing tix, mawh kheu Simiang Siyiex koe rhawm ti sang pah kiex yum. ²⁶ Samoelax hwan ting lhaong mai koe min pakngai ka sivoe Simiang Siyiex mai sivoe ngai pui khankix. ²⁷ Pui Siyiex tix kaux lih bleeh ka Elix ah nin ka nawh, "Siyiex ah nin, aux hoik jhi tokaux Cao tix sidawng, ka nyiex ma keeing pex khankix, yam ot kix ka nyiex Pharaw meung Ejiptux. ²⁸ Aux hoik laug nawh khaing doeh nyiex ma pui Isarelax, sonsang mawh cao giex kaing li Aux, sonsang yuh krax tan piang khu dee tan Aux mai gleeing kix nyawng bhawng mai ceep sibex dhah dawd taix plak sivoe Aux, Aux hoik ap krax tan pa yuh ka ngu khaing pui Isarelax ka doeh nyiex ma keeing maix. ²⁹ Kheu maix lai dig krax tan mai can pa tan pa hoik tawm Aux mai tawx min ka kawn tix lheu ting khaing Aux mai kieh cao tix kluing ka krax tan pa kied mhawm khaing pui Aux, pui Isarelax lie? ³⁰ Siyiex pui Isarelax ah nin, Aux hoik krai tete, doeh ru maix mai doeh ru keeing maix tak hu ing sivoe ngai Aux leeing ju, Simiang Siyiex ah nin, kieh an singai khaing Aux, pui pa tawx min ka Aux mai pui pa nunai ka Aux, tak pon krax nunai. ³¹ Jhak heue, sang hoek singaix tat Aux ka plawng taix maix mai plawng taix doeh nyiex ma keeing maix mai pui riex ju ang lai koe daux doeh nyiex ma maix. ³² Maix tak koe krax khi rhawm mai khoi rhawm yam yaox ti nawb Siyiex bwan ka pui Isarelax, mai pui riex ju tak ang koe ka daux doeh nyiex ma maix leeing ju. ³³ Pui maix pa ang Aux nyang tat ti tik khaing khu dee tan Aux, Aux tak deuh ju sonsang yiiem tom uah ngai mai kieh maix voe rhawm mai doeh nyiex ma maix tak yum mai yam awn ju tix, ³⁴ in tak mawh mhai rug ka maix, pa sang lih mawh ka kawn maix Hawphanix mai Phinehat ra kaux, khawm ra kaux tak yum daux tix ngaix khaing. ³⁵ Aux tak kieh cao giex kaing li pa kaux sijax lih hoek, pa hoek yuh awm alo rhawm Aux, Aux tak sum doeh ru nawh kaux cong mai nawh tak hu ing sivoe ngai pui pa hoik groi Aux rawm bee ka leeing ju. ³⁶ Pui pa kawn deuk ka daux nyiex ma maix khankix hoek krub ka nawh, sonsang rawg mau tix piak mai blah tix lon ah nin yuh bwanson yaog aux mawh ara cao giex kaing li sonsang yaox aux ti ih blah tix lon heue."

¹ Samoelax pa mawh kawn nyawm yuh kaing jhaw Simiang Siyiex sivoe ngai Elix. Yam an gumlox Siyiex hoek ngie ceeix, riang susai ang hoek sijheeng. ² Daux tix ngaix Elix it ka dee it tix, ngai nawh jah tix vu vi ang chix yaox, ³ kawk ngu Siyiex ang nyang yeet, daux nyiex bwan Simiang Siyiex ka dee koe teug bwan sijax mukheu Siyiex, Samoelax hoik laig it dee it tix. ⁴ Khaix an Simiang Siyiex kok ka Samoelax, Samoelax ah nin, "Aux ot tin." ⁵ Mai nawh to hu ka Elix ah nin, "Aux ot tin, mawh kheu kok maix aux. "Mai Elix ah nin, "Aux ang kok maix, baox deeh hu it ha. "Mai nawh kawx deeh hu it. ⁶ Mai Simiang Siyiex baox ah nin, "Samoelax, mai Samoelax kaoh hu ka Elix ah nin, "Aux ot tin, mawh kheu kok maix aux. "Mai Elix ah nin, "Aux ang kok ka maix, kawn simex aux eue, baox deeh hu it ha." ⁷ Samoelax ang nyang sax tawng ka Simiang Siyiex mai gumlox Simiang Siyiex ang nyang sax plak jhi tix ka nawh. ⁸ Simiang Siyiex baox kok ka Samoelax loe bawg tix bawg. Mai nawh kaoh hu ka Elix ah nin. "Aux ot tin, mawh kheu kok maix aux, " mai Elix hoik tawng Siyiex kok ka kawn nyawm an. ⁹ Mawh kheu nan, Elix ah nin ka Samoelax, "Hu it ha, phan nawh deeh kok maix, maix pawk ah nin, Simiang Siyiex eue, krai heue, mawh kheu kawncau Maix hoik mhong, mai Samoelax deeh hu it ka dee it tix. ¹⁰ Simiang Siyiex hoek mai cung kok awm phao voe ah nin, "Samoelax, Samoelax, mai Samoelax pawk ah nin, krai heue mawh kheu kawncau Maix hoik mhong." ¹¹ Simiang Siyiex ah nin ka Samoelax, "Jhak heue, Aux tak yuh tix ceuceu ka daux pui Isarelax mai yhaok pui pa mhong ku kaux tak lak lheet yhaok ka mhong tix khawm ra plak. ¹² Daux singaix an Aux tak yuh ceu an ka Elix awm pa hoik krai tix grawng pa dex mai nyiex ma nawh, jah tom yam jah tom hoek dee sidah. ¹³ Mai Aux tak krai grawng sang ciyang Aux ka doeh nyiex ma nawh leeing ju, kheu pa caox caig pa hoik tawng nawh, mawh kheu kawn simex nawh khawm ra kaux nunai ka Siyiex mai nawh ang ne raw ka kiex. ¹⁴ Mawh kheu nan, Aux tom tiextu ka doeh nyiex ma Elix mai phimap pa caox caig yuh doeh nyiex ma nawh tak ang pon pluat ploi tix ka krax tan mai ka ceu pa tan leeing ju. ¹⁵ Samoelax laig it tom hoek ponngawb, mai nawh paoh siviex nyiex bwan Simiang Siyiex. Samoelax lhat krai riang susai yaox tix ka Elix. ¹⁶ Elix kok ka Samoelax ah nin, "Kawn simex aux Samoelax eue, mai nawh pawk ah nin, "Aux ot tin." ¹⁷ Elix ah nin, "Simiang Siyiex hoik ah ceu patix ka maix? Paw mox an khaing aux. Phan maix mox can pa krai Siyiex ka maix khaing aux khankix kieh Siyiex ciyang ka maix nie lheu khaing an." ¹⁸ Samoelax krai kuceu ka nawh, ang lai mox tix ceu kawx khaing nawh, Elix ah nin, "In mawh Siyiex, kieh Nawh Cao yuh awm pa yaox tix mawh pa mhawm." ¹⁹ Samoelax ting hwan mai Siyiex ot mai nawh mai ang kieh lox nawh cod ka tiex tix gum kawx. ²⁰ Pui Isarelax khawmuik jah ka veng Dan tom hoek ka veng Berashibax hoik tawng yaox ka Samoelax mawh cao jhai Siyiex. ²¹ Mai Siyiex baox bleeh ka veng Shilaw, mawh kheu Siyiex jhi tokaux tix ka Samoelax ka veng Shilaw ka daux gumlox Simiang Siyiex mai Samoelax krai gumlox inkix tah daux haktiex Isarelax khawmuik heue.

¹ Gumlox Samoelax hoek ka pui Isarelax khawmuik mai pui Isarelax lih puing ka pui Philitix, kix yuh tab ka Ebaneza mai pui Philiti yuh tab ka veng Aphiet. ² Pui Philitix khre rien naing puing ka pui Isarelax, yam hoik tah naing kudah pui Isarelax hoik som ka pui Philitix mai pui Philitix hoik pah pui kix yum ka biang naing been pon rheng kaux. ³ Yam deeh hoek kru naing ka daux tab, cub kwad riex ju pui Isarelax ah nin, "Kheu Simiang Siyiex lai kieh ex som ka pui Philitix daux singaix lie? Kieh ex viex teug sijax mukheu Simiang Siyiex khaing veng Shilaw hoek ka ex, yam hoek sinax ex tak taoh ex khaing tawm taix pui koeng. ⁴ Mai kix ploi pui hu ka veng Shilaw mai viex teug sijax mukheu Siyiex Cao kru naing raoma, pa ngawm piang dangngeung cub Cherubin, mai kawn simex Elix Hawphanix mai Phinehat ra kaux ot tan mai teug sijax mukheu Siyiex. ⁵ Yam hoek teug sijax mukheu Siyiex daux tab, pui Isarelax kok yo lox sinum mai lox sinum tah piang haktiex. ⁶ Yam hoik mhong pui Philitix ka lox yo lox ting sinum, kix ah nin, "Lox kok yo lox ting sinum daux tab pui Hebrie mawh patix lie?" mai kix tawng teug sijax mukheu Simiang Siyiex hoik hoek ka daux tab, ⁷ pui Philitix kied lhat ah nin. "Siyiex hoik hoek ka daux tab, "mai kix ah nin, "Krax kha rhawm hoik hoek ka ex, ceu in ang nyang sax mawh sivoe in tix bawg kawx." ⁸ Krax kha rhawm hoik hoek ka ex, Pui mawx sang pon taoh ex khaing Siyiex pa ting siawp sibrawm in lie? Siyiex in mawh pa pah pui Ejiptux ka jhawm saux preng daux tiag. ⁹ Pui Philitix eue, kieh koe rhawm kwa yuh kieh awm simex, son ang pex mawh siliex pui Hebrie awm hoik sax mawh kix siliex pex, yuh kieh awm simex mai puing ka." ¹⁰ Pui Philitix puing naing mai pui Isarelax som mai kix tang to hu ka nyiex tix ku kaux, mai koe krax pah pa kied ting tan mai kru naing caong pui Isarelax yum loe mheen kaux. ¹¹ Kix pon giex teug sijax mukheu Siyiex mai kawn simex Elix Hawphanix mai Phinehat khawm ra kaux mai pah kiex yum. ¹² Pui Binyamin tix kaux to khaing biang naing hu ka Shilaw daux tix ngaix khaing tau mai kraung griah mai phawng tiex piang kaing nawh. ¹³ Yam hoek nawh Elix ngawm piang khaox ngawm, ka praok krax, mai pau ti jhak, mawh kheu nawh hoik sikua rhawm ka son teug sijax mukheu Simiang Siyiex. Yam hoek pui an ti krai grawng satang daux veng, pui veng khawmuik kawx yiiem yo. ¹⁴ Yam mhong Elix lox yiiem yo mai chawk ah nin, "Lox sinum yiiem yo an mawh patix?" Pui tix kaux nied ti hoek krai ka Elix. ¹⁵ Elix hoik koe tixdim daix num mai ngai nawh vu vi, ang lai chix yaox, ¹⁶ pui an ah nin ka Elix, "Aux mawh pui pa to tix hoek khaing biang naing in singaix." Elix ah nin, "Kawn simex eue koe grawng yuh ka mawx?" ¹⁷ Pui pa viex lox satang hoek mai pawk lox ah nin, "Pui Isarelax hoik to sivoe pui Philitix, koe krax pah pa kied ting tan sinax pui hun, kawn simex maix Hawphanix mai Phinehat khawm ra kawx hoik yum mai hoik pon giex ka teug sijax mukheu Siyiex." ¹⁸ Yam mhong Elix grawng teug sijax mukheu Siyiex, Elix goh ka plak khaix khaing khaox ngawm tix ka praok guh veng, nawh pot ngawg mai yum, mawh kheu hoik riex ju nawh mai tokaux nawh kawx cien. Nawh hoik prawng ca ka pui Isarelax tix pon num. ¹⁹ Mai mun Elix moeng Phiniehat koe kaux hoik dex bawg yam keh. Yam mhong nawh lox satang pon giex ka teug sijax mukheu Siyiex mai yum paox nawh mai mex tix, nawh nom keh kawn tix, mawh kheu pa saux keh hoek ka nawh. ²⁰ Yam dex sang yum nawh, bun cao pau nawh khankix ah nin, "Paw lhat, mawh kheu maix keh kawn simex tix kaux, " mai nawh ang pawk ang nghiet ka. ²¹ Nawh kok ceu kaux kawn nyawm mawh Ikhabok, ah nin, "Min plakngai hoik li hu khaing pui Isarelax, " mawh kheu hoik pon giex ka teug sijax mukheu Siyiex mai mawh kheu jao paox nawh mai mex nawh. ²² Mai nawh ah nin, "Min plakngai hoik lih hu khaing pui Isarelax, mawh kheu hoik pon giex teug sijax mukheu Siyiex heue.

¹ Yam giex pui Philitix ka teug sijax mukheu Siyiex, kix viex lih hu khaing Ebaneza ka veng Ashadok. ² Pui Philitix teei teug sijax mukheu Siyiex mai viex hu daux nyiex bwan siyiex Dagon mai deuh ka praok Dagon. ³ Yam kaoh pui Ashadok ponngawb cao singaix khaix jhak heue, siyiex Dagon goh piang tiex sivoe ngai teug sijax mukheu Simiang Siyiex. Mai kix deeh yaog ti deuh siyiex Dagon ka deeh ot nawh. ⁴ Yam kaoh kix caocao ponngawb singaix khaix, jhak heue, siyiex Dagon goh piang tiex sivoe ngai teug sijax mukheu Siyiex, kaing siyiex Dagon mai taix nawh khawm ra hoik pot piang sikun siviex, mawh ngie tokaux pa deuk nong nong. ⁵ Mawh kheu jao in cao giex kaing li siyiex Dagon mai pui laig daux nyiex bwan siyiex Dagon ang pon dig ka sikun siviex nyiex bwan Dagon tom in singaix. ⁶ Taix Siyiex hoik cien piang pui Ashadok mai Nawh Cao yuh kix laux leeing mai kieh krax kham geu jhawm saux muad hoek piang pui veng Ashadok mai haktiex baoh an khankix. ⁷ Yam yaox pui Ashadok ceu an, kix ah nin ka paox tix, "Teug sijax mukheu Siyiex pui Isarelax ang khaw tix ot mai ex, mawh kheu taix nawh cien piang ex mai piang siyiex ex Dagon." ⁸ Kix ploi pui hu kok ka cao kaing pui Philitix mai khrawm kix chawk paox tix ah nin, "Ex sang yuh ka mawx ka teug sijax mukheu Siyiex pui Isarelax?" kix pawk lox ah nin, "Kieh ex viex teug sijax mukheu Siyiex Isarelax hu ka veng Gata. "Khaix an, kix viex teug sijax mukheu Siyiex pui Isarelax hu tan. ⁹ Khaix viex kix an hu, taix Simiang Siyiex yuh veng an laux leeing ka krax kha rhawm pa kied ting mai kieh kix kham geu ka jhawm saux muad pui ting khawm pui iak ku kaux. ¹⁰ Mai kix tawx teug sijax mukheu Siyiex ka Ekaron, yam hoek teug sijax mukheu Siyiex ka Ekaron mai pui Ekaron yiiem yo ah nin, "Kix viex teug sijax mukheu Siyiex pui Isarelax hoek sonsang pah ka ex mai pui hun khankix." ¹¹ Kix ploi pui hu kok cao kaing pui Philitix mai khrawm kix chawk paox ti ah nin, "Tawx teug sijax mukheu Siyiex pui Isarelax hu singai, deeh ing ka dee ot tix, son ang lai pah ka ex mai pui hun, mawh kheu taix Siyiex cien ka dee an, krax yum mai krax laux leeing hoik tah hu daux veng khawmuik." ¹² Pui pa ang yum kawx pon jhawm saux muad mai lox yiiem yo pui veng an hoek tom ka raoma heue.

¹ Teug Simiang Siyiex hoik ot ka haktiex Philitix aliah khix. ² Pui Philitix kok ka cao giex kaing li mai cao jhai ah nin, "Ex tak sang yuh ka mawx ka teug sijax mukheu Siyiex? ex sang deeh tawx an ing ka dee ot nawh yuh ka mawx krai ex mhong liak." ³ Kix pawk ah nin, "Phan pex tawx teug sijax mukheu Siyiex pui Isarelax dee singai, paw ploi hu giex, yuh ka mawx kawx, kieh deeh ing mai krax tan pa pluat ploi phimap, khaix an pex tak moi khaing jhawm saux mai an tak kieh pex tawng ka ang Nawh Cao nyang gah taix tix khaing pex." ⁴ Mai kix ah nin, "Mawh krax tan pa pluat ploi phimap ceu tix pa sang tawx ex ka nawh, " kix pawk ah nin, "Rieng saux muad khri phwan mu mai riang kiang khri phwan mu, awm ding koe cao kaing pui Philitix, mawh kheu jhawm saux tix ceu khaing koe piang pex mai piang cao kaing khankix. ⁵ Mawh kheu nan, pex tak yuh riang saux muad mai riang kiang pa yuh laux ka haktiex mai tawx min plakngai ka Siyiex pui Isarelax, phan pex yuh nan, Nawh tak kieh taix tix chaong khaing pex mai piang siyiex pex mai haktiex pex, ⁶ kheu pex lai kieh rhawm tix kiien, awm kiien rhawm pui Ejiptux mai Pharaw lie? Yam hoik yuh Nawh Cao ceu pa daox deng ka sinax kix, kix kieh pui hun lih hu ang mawh lie?" ⁷ "Teei lawx khraox tix lhang mai sau ka mawie miex ra mu, pa koe kawn pa ang nyang sax tok iak ka mai tuk kawn mawie iak deeh ing ka nyiex singai khaing miex tix. ⁸ Mai teei teug sijax mukheu Siyiex deuh piang lawx mai sau kraung khri pa sang tan ka Nawh Cao, son krax tan pa pluat ploi phimap mai deuh an ka daux praok teug mai ploi an kieh lih hu dee singai. ⁹ Mai pau ti jhak ka an, phan teug sijax mukheu lih hu ka haktiex cao tix, ka veng Bietshemiet mai Nawh Cao mawh pa yuh ceu pa caox pa kied ting in piang kaux ex mai phan ang cu ti hu ex tak tawng ang mawh taix Nawh Cao pa yuh ex, ex tak tawng an mawh pa tang lih ti mawh piang ex, pa ang ex keud ce." ¹⁰ Pui khankix kawx yuh awm an mai teei mawie miex koe kawn ra mu tok ka lawx an mai laung kawn ka daux kawg, ¹¹ kix sau teug sijax mukheu Siyiex piang lawx, khawm teug mai riang kiang mai riang saux muad. ¹² Mawie miex ra mu hu see see ka krax hu ka Bietshemiet mai hu ka krax ting mai bawh tix, mai ang lai veh plak dawm plak gwiex, cao kaing pui Philitix kawx hawt khaix tom hoek ka meu haktiex Bietshemiet. ¹³ Pui veng Bietshemiet kawn tawk vawk nghox ca ka daux ngawd, yam maong kix ti jhak mai yaox ka teug sijax mukheu, kix gaux rhawm ka yaox tix an. ¹⁴ Lawx an hoek daux kaung Yawsux, pui Bietshemiet mai kaog tan praok rang ting. Kix lug khix ka khaox lawx an mai tan mawie miex an ra mu son krax tan pa gleeing ka Simiang Siyiex. ¹⁵ Pui Lewix teei teug sijax mukheu Siyiex mai teug koe ka praok an, pa koe kraung khri lih mai deuh an piang rang ting an, pui veng Bietshemiet tan krax tan pa gleeing mai appong ka Simiang Siyiex. ¹⁶ Yam hoik yaox cao kaing pui Philitix phwan kaux ka an, kix deeh ing ka Ekaron daux singaix an. ¹⁷ In khankix mawh riang saux muad khri pa tan pui Philitix son krax tan pa pluat ploi phimap ka Simiang Siyiex son veng Ashadok tix mu, son veng Gaza tix mu, son veng Ashakelon tix mu, son veng Gata tix mu, son veng Ekaron tix mu, ¹⁸ awm riang kiang khri kawx, pa kwang veng pui Philitix mai veng pa kaux cong mai ka yaong pa ang koe guh veng, rang ting pa deuh kix teug sijax mukheu Siyiex ka tong kaung Yawsux, pui veng Bietshemiet kawn koe tom hoek ka daux in singaix. ¹⁹ Nawh Cao pah ka pui veng Bietshemiet phwan mheen mai atixgliah kaux, kheu jhak kix teug sijax mukheu Siyiex, pui hun yiiem grai mawh kheu Simiang Siyiex pah ka pui hun tom nie heue. ²⁰ Pui veng Bietshemiet chawk paox tix ah nin, "Mawh pui mawx pa pon cung plak sivoe Simiang Siyiex pa singax singeh in lie? Sonsang lih hu khaing yix mai pui mawx caw ti hu?" ²¹ Kix ploi pui cau khankix hu ka pui ot ka veng Kirayatyarim ah nin, "Pui Philitix deeh viex teug sijax mukheu Siyiex lih hoek mai deeh viex an ing tau mai pex heue."

¹ Pui Kirayatyarim hoek mai teei teug sijax mukheu Siyiex hu mai viex laig daux nyiex Abinadat, piang gawng mai kix kieh kawn simex nawh Elaza singax sonsang priex ka teug sijax mukheu Simiang Siyiex. ² Teug sijax mukheu rheung ot ka Kirayatyarim tixnga num mai nyiex ma pui Isarelax yiiem grai ka Simiang Siyiex, ³ mai Samoelax ah nin ka doeh nyiex ma Isarelax, "Phan pex deeh veeh ti hoek ka Simiang Siyiex khawm rhawm tix khawmuik mai tik siyiex pui tang ceu siyiex Ashatariet khaing sinax tix mai ap tokaux tix yuh kaing Nawh nong nong mai Nawh Cao tak deeh taoh pex khaing tawm taix pui Philitix." ⁴ Pui Isarelax tik ka siyiex Balax mai siyiex Ashatariet dee singai mai yuh kaing jhaw Simiang Siyiex nong nong. ⁵ Samoelax ah nin, "Khrawm pui Isarelax khawmuik ka veng Mizapa mai aux tak rawg bwan son pex ka Simiang Siyiex." ⁶ Kix khrawm paox ti ka Mizapa mai kin rawm hieh tan ka plak sivoe Simiang Siyiex mai twah pa ih daux singaix an mai kix ah nin ka dee an, "Ex khawmuik hoik lud ka Simiang Siyiex, mai Samoelax hoik prawng see ka pui Isarelax ka Mizapa. ⁷ Yam mhong pui Philitix khrawm pui Isarelax paox ti ka Mizapa, cao kaing pui Philitix haok puing ka pui Isarelax. Yam mhong pui Isarelax ka grawng an, kix lhat ka pui Philitix. ⁸ Pui Isarelax ah nin ka Samoelax, "Paw nyang naox krax rawg maix bwan ka Simiang Siyiex ka son ex, sonsang taoh Nawh Cao ka ex khaing tawm taix pui Philitix." ⁹ Mai Samoelax teei kawn yung pa kawn peux tix mu mai tan an khawm mu, son krax tan pa gleeing ka Simiang Siyiex, Samoelax rawg bwan khyox khaw ka Siyiex son pui Isarelax mai Simiang Siyiex pawk ka lox nawh. ¹⁰ Yam kawn tan Samoelax krax tan pa gleeing pui Philitix greed tix dex sonsang puing ka pui Isarelax, viang mawh nan, Simiang Siyiex kieh sinum praix ting lih piang pui Philitix mai kieh kix prung prang som ka sivoe pui Isarelax. ¹¹ Pui Isarelax lih khaing Mizapa mai pheet pui Philitix mai pah kix tom hoek ka Bietkha. ¹² Samoelax teei simaox tix lon mai sum sinax Mizapa mai Shen, kok ceu kaux mawh Ebaneza ah nin, awm an Simiang Siyiex hoik teem ex tom hoek yam in." ¹³ Pui Philitix hoik som ang lai hoek ka mee haktiex pui Isarelax. Mai taix Simiang Siyiex tiebtie ka pui Philitix yam kawn im ju Samoelax. ¹⁴ Veng pa hoik rhim pui Philitix khaing Isarelax hoik deeh hoek ka pui Isarelax, jah ka veng Ekaron tom hoek ka veng Gata mai pui Isarelax deeh puing ka haktiex an khankix khaing tawm taix pui Philitix. Yam an pa nhim koe sinax pui Isarelax mai pui Amawrix. ¹⁵ Samoelax prawng see ka pui Isarelax glang yam im ju nawh, ¹⁶ mai nawh lailing ing tiang ku num tom hoek ka veng Betelax, veng Gilagalax mai veng Mizapa mai prawng see ka pui Isarelax mai ka dee in khawmuik. ¹⁷ Nawh ing ka veng Ramax jheung jheung, kheu koe nyiex nawh tan mai nawh kawx prawng see ka pui Isarelax tan mai sum khu dee tan son Simiang Siyiex heue.

¹ Yam hoik kuad Samoelax nawh deeh kieh kawn simex tix prawng see ka pui Isarelax. ² Ceu kaux kawn Ai nawh mawh Yawlax mai ceu kaux kawn Nyi mawh Abiyax, kiex khawm ra mawh cao pa prawng see ka veng Berashibax. ³ Kawn simex nawh ang lai hawt khaix keeing tix mai moh ka mau pa ang rahsee mai rieb mau cun praok mai tik been pa mawh meh. ⁴ Khaix an kwad riex ju pui Isarelax khrawm paox tix hoek ka Samoelax daux veng Ramax, ⁵ ah nin ka nawh, "Jhak heue, maix hoik riex ju kawn simex maix kawx ang hawt daux krax maix, yam in yaog simiang son yix tix kaux sonsang yuh cao prawng see ka yix, awm pui tang ceu." ⁶ Yam ah kix, "Tawx simiang tix kaux sonsang prawng see ka yix, " viang mawh nan, Samoelax ang khaw rhawm mai rawg bwan ka Siyiex. ⁷ Mai Simiang Siyiex ah nin ka Samoelax, "Nghiet ka lox pui Isarelax pa krai kix ka maix, mawh kheu kix ang lai thiang ti tik ka maix, kix hoik thiang ti tik ka Aux, son ang Aux lai kwang piang kix." ⁸ "Awm kaing pa hoik yuh kix ka Aux khawmuik, jah yam viex Aux kix lih hu khaing Ejiptux, tom hoek ka daux in singaix, kix tik vud ka Aux mai yuh kaing jhaw siyiex pui tang kaux mai kix yuh nang nan ka maix. ⁹ Mawh kheu nan nghiet ka lox kix, mawh ngie tawx maix satix ka kix mai jhi grawng been pa sang kwang simiang piang kix." ¹⁰ Samoelax krai gumlox Simiang Siyiex khawmuik ka pui hun, pa hoik mhaing simiang tix kaux ka nawh. ¹¹ Nawh ah nin, "In mawh been pa yuh simiang sonsang kwang piang pex. Nawh tak teei kawn simex pex mai kieh kix mawh cao kia ngien ling lawx brung mai ka brung naing nawh khankix mai kix tak to ka sivoe ling lawx naing nawh. ¹² Nawh tak yaog cao kaing naing pa kwang pui tix rheng, cao kaing naing pa kwang pui tix yieh, cao kaing naing pa kwang pui tixphwan mai cao kaing naing pa kwang pui kao kaux son tix mai kieh pui tiblah mawh cao thai ma kaung, cao vawg nghox mai pui pa sang yuh kraung naing son nawh tiblah mai pui pa sang yuh kraung ling lawx naing brung nawh khankix. ¹³ Nawh tak teei kawn bun pex mawh pa khre sidah bhawng, cao yuh priex mai cao ping blah. ¹⁴ Nawh tak teei kaung, sipeem plix siiet pex mai sipeem khaox salon pa mawh cie pex mai tawx ka kawncau tix. ¹⁵ Nawh tak teei kao son tix son khaing nghox mai plix siiet pex mai tawx an ka cao kaing mai kawncau nawh khankix. ¹⁶ Nawh tak teei kawncau simex, kawncau bun pex khankix mai pui awn ju pa mhawm pex khankix, khawm la pex mai kieh yuh kaing jhaw nawh. ¹⁷ Nawh tak teei kao son tix son khaing phung yung pex mai pex tak mawh siliex nawh. ¹⁸ Pex tak yiiem yo kheu simiang, ka hoik laug pex son tix daux singaix an, viang mawh nan Siyiex ang pawk ka lox pex singaix an." ¹⁹ Pui hun ang nghiet ka lox Samoelax mai kix ah nin, "Ang mawh, yix tak caw tix koe simiang pa kwang piang yix, ²⁰ sonsang awm yix pui tang ceu mai simiang, tak kwang ka yix mai lih hu sivoe yix, puing naing ka son yix." ²¹ Mai Samoelax mhong ka lox pui hun mai deeh krai lox an ka Simiang Siyiex. ²² Mai Simiang Siyiex ah nin ka Samoelax, "Nghiet lox kix mai yaog simiang tix kaux ka son kix. Samoelax deeh ah nin ka pui Isarelax, pui ku kaux tang ing ka veng tix heue.

¹ Koe pui Binyamin tix kaux pa kaux Kisha kawn simex Abielax, kawn simex Zeraw, kawn simex Bekhawrat, kawn simex Aphi, pui Binyamin pa mawh pui mi. ² Nawh koe kawn simex tix kaux ceu kaux nawh mawh Sawlux, mawh kawn simex awn ju pa mhawm grang, ka daux pui Isarelax ang koe pui mhawm grang awm nawh tix kaux kawx, nawh lhaong khaing pui khawmuik jah khaing klip haok ka plak piang. ³ Yam grai la Kisha keeing Sawlux, Kisha ah nin ka kawn simex tix Sawlux, "Kaoh viex kawncau hu mai maix tix kaux hu sawg ka la." ⁴ Kieh tiang ka gawng Epharem mai haktiex Shalisha mai kiex ang pub ka la mai kiex baox tiang baoh haktiex Shalim mai la ang ot tan mai kiex baox tiang ka haktiex Binyamin, viang mawh nan kiex ang yaox ka la. ⁵ Yam hoek kiex ka haktiex Zupha, Sawlux ah nin ka kawncau tix pa ot mai nawh, "Hoek, ax deeh ing, keeing aux ang tau tix lai khi rhawm grawng la, nawh tak deeh khi rhawm ka son ax." ⁶ Mai kawncau nawh ah nin, "Jhak heue, koe pui Siyiex pa ao min ka daux veng tix kaux, lox pa ah nawh mawh pa rug tete, kieh ax hu tan, ax bak nawh pon jhi daux krax pa sang caw ax tix hu." ⁷ Mai Sawlux ah nin ka kawncau tix, "Phan ax hu sang viex ax patix hu ka pui an lie? mawh kheu blah pa viex ax hoik uik, totaix pa sang viex ax ka pui Siyiex ang lai koe, kawn koe ceu patix ka ax lie?" ⁸ Kawncau an deeh pawk lox Sawlux ah nin, "Aux kawn koe mau Shekhe tix mat, aux tak tawx mau an ka pui Siyiex, sonsang krai krax hu ax." ⁹ Tom yam jah pui Isarelax, yam chawk pui tix kaux kaux ka Siyiex, nawh ah nin, "Hoek heue, kieh ex hu ka kaw pa chix yaox" mawh kheu kaw an yam in pui kok nawh mawh cao jhai, yam jah dix kix kok mawh kaw pa chix yaox. ¹⁰ Mai Sawlux ah nin ka kawncau tix, "Mhawm heue, hoek, kieh ax hu." Mai kiex hu ka daux veng ka dee ot pui Siyiex. ¹¹ Mai kiex haok piang ton hu ka daux veng, kiex sipub kawn bun krih kin rawm tiblah mai chawk ah nin ka kix, "Koe kaw pa chix yaox tin lie?" ¹² Kix pawk ah nin, "Koe heue, nawh ot sivoe pax tan. Nied pax hu yam in, kheu kawn taug hoek nawh khaing daux veng, mawh kheu yuh pui krax tan dee pa kied ting lhaong daux in singaix. ¹³ Yam hoek pax daux veng, pax tak yaox nawh, sivoe sang haok ih nawh priex ka dee pa lhaong, mawh kheu pui ang nyang pon ih priex sivoe ang nawh nyang hoek, kheu caw nawh ti nawb bwan ka krax tan, khaix an pui pa ghaok nawh khankix pon ti ih priex. Yam in haok plak piang pax tak pub ka nawh dom mawx dom an." ¹⁴ Kiex khawm ra laig ka daux veng. Yam hoek kiex ka daux veng Samoelax lih hoek ka see kiex, ka krax hu nawh ka dee pa lhaong. ¹⁵ Simiang Siyiex hoik gruh krai ceu an ka Samoelax sivoe sang hoek Sawlux ah nin, ¹⁶ "Bawg yam in pasax, aux tak ploi pui tix kaux khaing haktiex Binyamin hoek ka maix, maix tak groi rawm bee piang nawh, sonsang kwang piang pui Aux Isarelax. Nawh tak deeh taoh ka pui Aux khaing daux taix pui Philitix, mawh kheu Aux hoik yaox krax kha pui Aux rhawm tix mai lox yiiem yo kix hoik hoek ka Aux." ¹⁷ Yam yaox Samoelax ka Sawlux, Simiang Siyiex ah nin ka nawh, "In mawh pui kaw pa hoik krai Aux ka maix! Nawh mawh pui pa sang kwang piang pui Aux." ¹⁸ Mai Sawlux greed tix dex Samoelax ka diang siviex ah nin, "Krai aux mhong koe nyiex kaw pa chix yaox dee mawx?" ¹⁹ Samoelax pawk lox Sawlux ah nin, "Aux mawh kaw pa chix yaox, haok sivoe aux ka dee pa lhaong maix tak ih priex mai aux ka daux in singaix, pasax aux tak deeh ploi maix hu mai sang krai maix mhong can pa koe ka daux rhawm maix khawmuik." ²⁰ "Phan mawh la maix pa hoik grai daux loe singaix nhaox, paw maix khi rhawm ka, mawh kheu hoik yaox kix ka. Pa mie pui Isarelax mawh pui mawx lie? ang hoik mawh tokaux maix mai doeh nyiex ma keeing maix ang mawh lie?" ²¹ Sawlux pawk lox ah nin, "Ang aux mawh pui Binyamin, pa kied iak khaing doeh pui Isarelax ang mawh lie? mai paox nyiex aux mawh pa iak khaing doeh nyiex ma pui Binyamin ang mawh lie? yuh ka mawx maix lai krai ceu in ka aux?" ²² Mai Samoelax viex Sawlux mai kawncau nawh mai kok kiex laig ka daux nyiex haw, tawx kiex ngawm ka dee pa mhawm sinax pui pa ghaok nawh kix, pui pa ot tan koe tixgoe kaux. ²³ Samoelax ah nin ka cao yuh priex, "Viex nyum pa hoik tawx aux pex priex, pa hoik kieh aux pex tang deuh nong nong." ²⁴ Cao yuh priex viex ba mai nyum pa koe plak piang ba khankix hoek sivoe Sawlux mai Samoelax ah nin, "Can pa tang deuh tix khankix hoik deuh ka sivoe ngai maix, ih heue, mawh kheu an deuh tix son maix tom hoek bawg yam pa tat ti deuh, aux hoik ghaok pui khankix, " Mai Sawlux ih priex tau mai Samoelax singaix an. ²⁵ Yam lih kix khaing dee pa lhaong mai laig kix ka daux veng Samoelax sikah tau mai Sawlux piang braux nyiex. ²⁶ Kiex khawm ra kaoh caocao, yam bah riang praix, Samoelax kok ka Sawlux piang braux nyiex, "Kaoh heue, aux sang tawx maix hu ka krax hu tix." Mai Sawlux kawx kaoh mai kiex khawm ra hu tau mai Samoelax ka plak praix. ²⁷ Awm hoik lih hu kix ka praok veng, Samoelax ah nin ka Sawlux, kieh kawncau maix hu sivoe ex, "Yam hoik luan nawh maix cung tin ha, aux tak krai maix mhong gumlox Siyiex heue."

¹ Khaix an Samoelax teei kawk rawm bee mai see piang kaing nawh mai ngheet ka nawh ah nin, "Pa groi Simiang Siyiex bee piang maix, sonsang mawh maix cao kaing piang sinngao Nawh Cao ang mawh lie?" ² Yam lih hu maix khaing aux in singaix maix tak yaox pui ra kaux ka simeeig Rakhelax ka haktiex pui Binyamin, ka Zelaza mai kiex ah nin ka maix, la pa sawg maix ka hoik yaox tix, yam in keeing maix ang lai khi rhawm grawng la, nawh deeh tieh ti khi rhawm ka grawng maix ah nin, "Aux sang yuh ka mawx ka kawn simex tix?" ³ Mai maix tak luan khaing tan, tom hoek ka khaox tiah ka Tabaw, pui loe kaux pa hu ka Siyiex ka Betelax, tak pub ka maix tan, tix kaux tak viex kawn pex loe mu, an tix kaux tak viex blah loe lon mai tix kaux tak viex singiien rawm plix siiet tix mu. ⁴ Kix tak rieb ti singeuh taix maix mai tawx blah ka maix ra lon maix tak rieb ti teei an khaing taix kix. ⁵ Khaix an maix tak deeh hoek ka gawng Kipehatelohim ka dee koe tab kru naing pui Philitix, yam hoek maix ka veng tan maix tak pub cao jhai tix cub, pa lih khaing dee pa lhaong mai viex ting pawd, kraung lawk leh mai ting plah khaox pa sideet maox hoek tah sivoe kix mai kix tak ah lox jhai. ⁶ Khaix an, khwan Simiang Siyiex tak hoek piang maix, maix tak ah lox jhai mai kix maix tak deeh tieh ti mawh pui pa tang si yox tix kaux. ⁷ Yam lih mhai rug in khankix ka maix, maix hawt yuh awm khaw maix ti yuh, mawh kheu Siyiex ot tau mai maix. ⁸ Maix tak lih hu ka sivoe aux ka Gilagalax, jhak heue, aux tak hoek ka maix sonsang yuh krax tan pa gleeing mai yuh krax tan pa nhim. Maix tak yaox ti pau aliah singaix, tom hoek aux ka maix mai jhi maix yaox ceu pa sang caw maix ti yuh. ⁹ Yam veeh nawh khaix tix lih hu khaing Samoelax, Siyiex hoik tawx rhawm keud pa tang si yox ka nawh, mhai rug in khawmuik lih mawh daux singaix an. ¹⁰ Yam hoek kix ka Gibat, jhak heue, cao jhai tix cub rieb ka Sawlux mai khwan Siyiex lih hoek piang nawh mai ah lox jhai ka sinax kix. ¹¹ Yam hoik yaox pui khankix, hoik dawg tawng tix ka nawh kix yaox ah nawh lox jhai sinax cao jhai khankix, pui hun ah nin ka paox ti, "In mawh patix pa lih mawh ka kawn simex Kisha lie? Mawh Sawlux pa ot sinax cao jhai ang mawh lie?" ¹² Pui ot tan tix kaux pawk ah nin, "Keeing kix mawh pui mawx lie?" mawh kheu nan, lox kab tom lih ti koe ah nin, "Mawh Sawlux pa ot sinax cao jhai ang mawh lie?" ¹³ Yam hoik ah Sawlux lox jhai, nawh hoek ka dee pa lhaong. ¹⁴ Khaix an keeing iak Sawlux ah nin ka nawh mai kawncau nawh, "Kaoh pax khaing hu tix dee mawx lie?" Mai nawh ah nin, "Hu sawg ka la, mawh kheu ang yiex yaox ka la, yiex tom hoek ka Samoelax." ¹⁵ Keeing iak Sawlux ah nin, "Krai aux mhong ka ceu pa ah Samoelax ka maix liak." ¹⁶ Sawlux pawk ah nin ka keeing iak tix, "Nawh krai ngie yiex mhong ka hoik yaox tix ka la." Viang mawh nan, nawh ang krai grawng pa dex mai been haktiex, pa krai Samoelax ka nawh heue. ¹⁷ Samoelax kok pui hun khrawm paox tix ka Simiang Siyiex ka Mizapa, ¹⁸ nawh ah nin ka pui Isarelax, "Simiang Siyiex, Siyiex pui Isarelax ah nin, Aux hoik viex pui Isarelax lih khaing Ejiptux mai aux hoik taoh pex khaing daux taix pui Ejiptux mai khaing taix meung haktiex, pui pa yuh pa kin pa khin ka pex ¹⁹ Viang mawh nan, pex hoik tik ka Siyiex tix, pa hoik taoh pex khaing krax kha rhawm mai krax laux leeing, mai pex ah nin, "Ang mawh! viang mawh nan, yaog simiang piang yix yam in thong paox pex hoek ka plak sivoe Simiang Siyiex awm pa koe doeh nyiex ma pex mai doeh ru pex." ²⁰ Mai Samoelax kieh doeh ru pui Isarelax hoek dex mai yuh nieb, caw ka doeh ru Binyamin. ²¹ Nawh viex doeh ru pui Binyamin hoek dex mai yuh nieb, caw ka doeh ru Matarix mai kix baox viex doeh nyiex ma Matarix ku kaux hoek dex mai yuh nieb, caw ka Sawlux kawn simex Kisha, yam an kix sawg ka Sawlux ang yaox. ²² Kix chawk cheng Siyiex ah nin, "Mawh ang pui an nyang bax hoek tin lie?" Simiang Siyiex ah nin, "Jhak heue, nawh mox tix sinax kraung." ²³ Mai kix to hu teei nawh khaing tan, yam cung nawh sinax pui khankix, nawh lheu lhaong khaing pui ku kaux, jah mee klip nawh tom hoek plak piang. ²⁴ Mai Samoelax ah nin ka pui khankix, "Mawh yaox pex ka pui pa hoik laug Simiang Siyiex lie? pui pa awm nawh ang lai koe sinax pui hun tix kaux kawx." Pui hun yo lox sinum ah nin, "Kieh simiang lang ju liak!" ²⁵ Mai Samoelax krai pui hun mhong grawng been pa dex mai simiang, mai nawh tiiem ti deuh ka daux phuk lai mai deuh sivoe Siyiex. Mai Samoelax deeh kieh pui hun ing ka nyiex ma tix ku kaux. ²⁶ Mai Sawlux ing ka nyiex tix ka Gibat mai pui vao pa so Siyiex rhawm kawx ing tau mai nawh. ²⁷ Viang mawh nan, koe pui caox tiblah ah nin, "Pui in sang pon taoh ex yuh ka mawx lie?" Mai kix nunai nawh, ang viex totaix ka nawh. Viang mawh nan, Sawlux ang lai een ka daux rhawm tix heue.

¹ Nahat pui Ammonix mai haok deuh tab ka veng Yabiet haktiex Gilat mai pui veng Yabiet khankix ah nin ka Nahat, "Yuh sijax mukheu mai yix mai yix tak yuh kaing jhaw son maix." ² Nahat pui Amon pawk lox kix ah nin, "Phan aux koh sok ngai khawn dawm pex khawmuik mai yuh krax ang cee ang cak ka pui Isarelax, son in aux tak yuh sijax mukheu mai pex." ³ Mai kwad riex ju veng Yabiet ah nin ka nawh, "Pau been aliah singaix, sonsang ploi yix pui cau hu ka haktiex pui Isarelax ku sidah phan pui taoh ka yix ang koe tix kaux kawx, yix tak ap tix ka maix." ⁴ Yam hoek cao cau ka Gibe-a veng Sawlux, kix krai grawng an hoek ka yhaok pui hun, mai pui hun yiiem grai khawmuik. ⁵ Jhak heue, Sawlux hoek khaing daux kaung hawt khaix mawie tix, mai nawh ah nin, "Mawh yuh pui hun patix, kix lai yiiem grai lie?" mai kix krai lox pa ah pui veng Yabiet ka nawh. ⁶ Yam mhong Sawlux ka lox an, khwan Siyiex lih ti hoek piang nawh mai nawh kied song rhawm sigrien sigre. ⁷ Mai nawh teei mawie mhaing tix brawm pat lih mawh khik mawx khik an mai kieh pui cau khankix roi hu ka haktiex Isarelax ku sidah ah nin, pui mawx ang ah pa ang hawt khaix Sawlux mai Samoelax, tak yuh awm ceu in ka mawie kix! mai krax lhat graung Simiang Siyiex hoek piang pui hun mai kix lih hoek ka daux pa grum rhawm tix dum. ⁸ Yam khrawm Sawlux tix yaox ka carang daux veng Beziet, pui Isarelax koe loe sien, pui Yudax koe loe mheen kaux. ⁹ Kix ah nin ka pui pa hoek khankix, "Pex ing ah nin ka pui veng Yabiet haktiex Gilat, bawg yam hax koek pasax, pex tak pon krax luad luan. "yam hoek krai pui cau khankix grawng an ka pui veng Yabiet kix koe krax gaux rhawm kah. ¹⁰ Mawh kheu nan pui Yabiet ah nin, "Ex tak ap ti ka maix pasax maix pon ti yuh ka yix awm pa simie maix ti yuh." ¹¹ Bah riang praix ngaix khaix, Sawlux gwieh pui tix loe cub mai kix hoek sigreung tab pui koeng bawg yam pau daux ponngawb mai pah ka pui Amon tom hoek bawg yam hax koek, pui pa kawn deuk khankix, hoik prung prang tom ang kix lai pon khrawm paox tix ot tau tix dah ra kaux. ¹² Pui hun ah nin ka Samoelax, "Mawh pui mawx pa ah nin, Sawlux tak sang kwang piang ex lie? Viex pui an hoek, sonsang pah ex kix yum." ¹³ Viang mawh nan, Sawlux ah nin, "Paw pah ka pui in singaix tix kaux kawx, mawh kheu in singaix mawh singaix taoh lawd Simiang Siyiex ka pui Isarelax." ¹⁴ Mai Samoelax ah nin ka pui hun, "Hoek, kieh ex hu ka veng Gilagalax mai deeh cox pang meung haktiex khraox tan." ¹⁵ Pui hun khawmuik haok hu ka veng Gilagalax mai yaog Sawlux mawh simiang sivoe Simiang Siyiex, ka Gilagalax. Kix tan krax tan pa nhim ka Simiang Siyiex, Sawlux mai pui Isarelax kied koe krax gaux rhawm tan heue.

¹ Samoelax ah nin ka pui Isarelax, "Jhak heue, aux hoik nghiet lox pex mai grawng pa ah pex ka aux khawmuik mai hoik yaog simiang piang pex." ² Jhak heue, simiang hoik ot tau mai pex, yam in aux hoik kuad mai hoik paing hauk kaing, kawn simex aux kawx hoik ot tau mai pex, aux hoik lailing ka plak sivoe pex, jah yam mawh aux kawn nyawm tom hoek in singaix. ³ "Yam in aux hoik ot tin, kieh pex kham mhai rug grawng aux sivoe Simiang Siyiex mai sivoe pui pa hoik groi Nawh Cao bee piang. Mawh hoik sax teei aux mawie pui lie? hoik sax teei aux la pui lie? hoik sax pie lhen aux kraung pui lie? hoik sax khin aux pui mawx, hoik sax rieb aux mau cun praok, khaing taix pui pa sang kieh ngai aux dug lie? Aux tak deeh plud an ka pex." ⁴ Kix deeh ah nin, "Maix ang sax pie lhen kraung yix, ang sax khin ka yix mai ang sax teei tix ceuceu khaing taix pui tix kaux kawx." ⁵ Mai nawh deeh ah nin ka kix, "Simiang Siyiex mawh mhai rug ka pex mai nawh pa hoik groi Nawh Cao bee piang hoik kham mhai rug ka daux in singaix, pa ang pex yaox tix ceu kawx, ka daux taix aux. "Mai kix deeh ah nin, "Nawh Cao hoik mawh mhai rug." ⁶ Mai Samoelax ah nin ka pui hun, "Simiang Siyiex mawh pa yaog Mose mai Arun mai pa viex keeing pex lih khaing meung Ejiptux." ⁷ Mawh kheu nan, ot pex yiien yawg, aux tak ka kum grawng see pex sivoe ngai Simiang Siyiex pa dex mai pa rahsee pa hoik yuh Simiang Siyiex mai pa hoik yuh Nawh Cao ka pex mai ka keeing pex khankix. ⁸ Yam hu laig Yakop ka Ejiptux, pui Ejiptux yuh pa khin ka kix mai keeing pex khankix riag yo ka Simiang Siyiex mai Simiang Siyiex ploi Mose mai Arun pa viex keeing pex khankix lih khaing Ejiptux mai kix kieh pex ot dee in. ⁹ Viang mawh nan, kix piawm ka Simiang Siyiex tix, Nawh Cao coh kix ka daux tawm taix Sirax, cao kaing naing ting pui Hazaw mai ka daux tawm taix pui Philitix mai ka daux tawm taix simiang Mawbax, mai pui an khankix puing ka kix. ¹⁰ Kix yiiem ka Simiang Siyiex ah nin, "Yix hoik yuh phimap, mawh kheu yix hoik tik vud ka Simiang Siyiex mai hoik yuh kaing jhaw siyiex Balax mai siyiex Ashatariet, viang mawh nan, taoh yix luan khaing daux tawm taix pui koeng yix mai yix tak yuh kaing jhaw Maix Cao." ¹¹ Mai Simiang Siyiex ploi Yerubalax, Barak, Yephathax mai Samoelax hoek mai taoh pex lih khaing dau tawm taix pui koeng pex khaing ku plak mai pex hoik yaox ti ot yiien yawg mhawm mhawm. ¹² Yam hoik yaox pex hoek Nahat simiang pui Amon puing ka ti, pex ah nin ka aux, ang mawh, cawh tix koe simiang pa kwang piang yix, viang Simiang Siyiex mawh kawx simiang piang pex. ¹³ Jhak heue, simiang pa laug pex mai pa mhaing pex, yam in Simiang Siyiex hoik yaog simiang tix kaux piang pex. ¹⁴ Phan pex lhat graung ka Simiang Siyiex mai yuh kaing jhaw, cu nghiet ka lox Nawh Cao mai paw tieh feen ka lox tawm pingnyap Simiang Siyiex mai phan pex mai simiang pa kwang piang pex hawt khaix Simiang Siyiex tix mawh pa mhawm, ¹⁵ phan pex ang nghiet ka lox Simiang Siyiex mai tieh feen ka lox tawm pingnyap Simiang Siyiex, plawng taix Simiang Siyiex tak tiebtie pex mai keeing pex khankix. ¹⁶ Yam in cung sijung mai jhak pa ting lhaong ceu pa yuh Simiang Siyiex ka sivoe ngai pex khankix. ¹⁷ In ngaix mawh bawg yam vawg nghox ca ang mawh lie? aux tak kok ka Simiang Siyiex son ang Nawh Cao kieh sinum praix mai rawm lhiex lih mai deeh chix kieh pex yaox ka phimap krax lud pa kied ting tix, pa hoik yuh pex ka sivoe ngai Simiang Siyiex, ka daux pa chawk pex simiang son tix." ¹⁸ Samoelax kok yo ka Simiang Siyiex mai Simiang Siyiex kieh sinum praix mai rawm lhiex lih ka daux singaix an mai pui hun kied koe krax lhat graung ka Simiang Siyiex mai Samoelax. ¹⁹ Pui hun khawmuik ah nin ka Samoelax, "Rawg bwan ka Siyiex son kawncau maix khankix, sonsang ang yix yum, mawh kheu yix hoik baox yuh phimap pa caox in, ka hoik mhaing tix simiang son cao tix." ²⁰ Mai Samoelax ah nin ka pui hun, "Paw lhat graung, viang pex hoik yuh kawx phimap pa caox, paw lai veeh khaing pa hawt ti khaix Simiang Siyiex, viang mawh nan, yuh kaing jhaw Simiang Siyiex khawm rhawm tix, ²¹ paw lai veeh ti hawt khaix ceu pa giex going pa ang koe bwanson mai pa ang pon taoh, mawh kheu ceu an mawh pa giex going. ²² Mai Simiang Siyiex ang tik vud ka pui kheu min ceu kaux pa ting lhaong Nawh Cao, mawh kheu Simiang Siyiex hoik khaw rhawm ti kieh pex mawh pui Nawh Cao. ²³ Lheu khaing an phan mawh aux pa yuh phimap mai pa ang rawg bwan ka Simiang Siyiex son pex, kieh singai khaing aux, aux tak sidiex pex ka pa mhawm mai krax pa rahsee. ²⁴ Kieh lhat graung ngie ka Simiang Siyiex mai yuh kaing jhaw Nawh Cao ka daux pa kaux sijax mai khawm rhawm tix, mai doh keud ka pa kied ting lhaong pa hoik yuh Nawh Cao son pex. ²⁵ Phan pex ca kawn yuh pa caox caig, pex mai simiang tak hoek krax laux leeing heue."

¹ Yam koe ju Sawlux tixgoe num, nawh mawh simiang mai kwang piang pui Isarelax tixpon ra num, ² Sawlux laug pui khaing Isarelax loe rheng kaux, ra rheng kaux, ot tau mai Sawlux ka Mikhamat piang gawng Betelax mai tix rheng kaux ot mai Yawnasan ka Gibat haktiex Binyamin, pui pa kawn deuk nawh ploi ing ka nyiex ma cao kix. ³ Yawnasan puing ka kru naing pui Philitix pa koe ka Gibat mai pui Philitix mhong ka grawng an, Sawlux phlu teettawng ka haktiex kudah ah nin, "Kieh pui Hebrie khankix mhong." ⁴ Pui Isarelax mhong grawng hoik puing Sawlux ka tab kru naing, pui Philitix mai pui Isarelax lih ti mawh pa seeing pui Philitix kah. Pui hun khrawm paox tix hoek ka Sawlux ka veng Gilagalax. ⁵ Pui Philitix khrawm paox tix sonsang puing ka pui Isarelax, ka ling lawx naing loe mheen mai pui naing brung liah rheng kaux mai lien kix haoh hun awm mhaik praok rawm sigrit sigra, kix haok yuh tab ka Mikhamat, plak lih singaix veng Bietavin. ⁶ Yam yaox pui Isarelax sikhawp sikhiep krax kha rhawm, mawh kheu kix pub ka krax pa kin mai pui khankix mox tix ka daux rang ka dee nhik mai sinax rang daux o mai daux tiex. ⁷ Pui Hebrie tiblah tiang ka toi rawm klawng Yawdan ka haktiex Gat mai haktiex Gilat. Sawlux kawn ot ka Gilagalax, pui hun hawt khaix nawh mai sikua rhawm tix. ⁸ Sawlux pau aliah singaix, tom hoek bawg yam tin Samoelax, viang mawh nan, Samoelax ang hoek ka Gilagalax mai pui hun hoik prung prang khaing nawh. ⁹ Sawlux ah nin, "Viex krax tan pa gleeing mai krax tan pa nhim hoek ka aux tin. Mai nawh yuh krax tan pa gleeing. ¹⁰ Ang rheung nawh hoik yuh krax tan pa gleeing, Samoelax kawx hoek, mai Sawlux rieb ti singeuh taix nawh. ¹¹ Mai Samoelax chawk ah nin, mawh hoik yuh maix patix lie? mai Sawlux pawk ah nin, yam yaox aux hoik prung prang pui khaing tix, mawh kheu ang maix lai hoek bawg yam pa tin ti deuh mai pui Philitix khrawm paox tix hoek ka veng Mikhamat, ¹² Aux ah nin, "Yam in pui Philitix tak lih hoek puing ka aux ka Gilagalax, aux ang nyang yaox ti khyox khaw ka Simiang Siyiex, aux khin ti yuh krax tan pa gleeing." ¹³ Samoelax ah nin ka Sawlux, "Maix hoik yuh kaing pa daox pa aw, maix ang lai priex hawt lox pingnyap Simiang Siyiex, Siyiex tix pa hoik tawm Nawh ka maix, phan maix hawt ti yuh awm an, Simiang Siyiex tak kieh meung haktiex maix kaux cong piang Isarelax leeing ju." ¹⁴ Yam in meung haktiex maix ang lai kaux sijung, Simiang Siyiex hoik sawg pui tix kaux pa khaw rhawm alo Nawh, mai Simiang Siyiex hoik yaog nawh mawh cao kaing piang pui Nawh, mawh kheu ang maix lai priex hawt lox tawm Simiang Siyiex ka tix." ¹⁵ Mai Samoelax yaog ti lih hu khaing Gilagalax mai hu ka Gibat ka haktiex Binyamin, Sawlux simin pui ot mai nawh koe been liah yieh kaux. ¹⁶ Sawlux mai kawn simex nawh Yawnasan, khawm pui ot mai kix khawmuik, ot ka Gibat haktiex Binyamin mai pui Philitix deuh tab ka Mikhamat. ¹⁷ Pui naing tud rhim loe cub, haok ka tab pui Philitix, tix cub deeh veeh tix ka see Awpharax ka haktiex Shulax, ¹⁸ mai tang cub deeh veeh tix see Biethawron mai cub pa deuk veeh tix see mee haktiex daux ngawd Zebaw ka see daux tiag. ¹⁹ Yam an ang lai yaox ka pui yuh kraung rhiem ka haktiex Isarelax ku sidah, mawh kheu pui Philitix ah nin, "Lhat pui Hebrie yuh vaig mai pliah khankix, " ²⁰ pui Isarelax lih hu ka pui Philitix, sonsang klaing ka to thai, khaw, moe mai sivawg, ²¹ ngawh klaing ka to thai, khaw, moe mai sivawg mawh tix pheen, tix pheen situ mai mau Shekhe ra loe Shekhe. ²² Mawh kheu nan, yam hoek singaix yuh naing vaig lawm mai pliah ang koe ka daux taix pui ot mai Sawlux mai Yawnasan, mawh ngie Sawlux mai kawn simex nawh Yawnasan pa koe. ²³ Mai tab pau veng pui Philiti hu ka krax tiang ka Mikhamat heue.

¹ Tix singaix Yawnasan kawn simex Sawlux ah nin ka pui awn ju pa viex kraung naing nawh, "Hoek heue, hu ex ka tab pui Philitix ka plak an, mai nawh ang krai keeing tix mhong. ² Mai Sawlux ngawm ka dee sidah Gibat greem khaox kla jiang pa koe ka yaong Migaron, pui pa ot mai nawh koe been liah yieh kaux, ³ Ahiyax kawn simex Ahituk puxke Ikhabok, kawn simex Phinehat, kawn simex Elix, cao giex kaing li Simiang Siyiex ka veng Shilaw, ceep sibex dhah dawd taix, pui khankix ang nyang tawng lih hu Yawnasan, ⁴ krax sinax gawng dee hu sawg Yawnasan ka kru naing Philitix, koe rang choek ka toi plak in plak an, tix mu mawh Bawziet mai an tix mu mawh Sena. ⁵ Rang choek an tix mu veeh tix plak laong, see ka Mikhamat mai an tix mu veeh tix plak seh see ka Gebax. ⁶ Mai Yawnasan ah nin ka pui awn ju pa viex kraung naing tix, "Hoek heue, kieh ax tiang ka tab pau veng pa ang pat hak, tee rien Simiang Siyiex ti yuh tix ceuceu ka son ax, mawh kheu Simiang Siyiex tak ang mox tiebtie krax pa taoh Simiang Siyiex, viang pui nie ang ah, viang pui tux ang ah." ⁷ Cao pa viex kraung naing nawh ah nin ka nawh, "Yuh awm pa koe rhawm maix ti yuh khawmuik, hu heue, aux tak hawt khaix maix awm pa koe rhawm maix." ⁸ Yawnasan ah nin, "Jhak heue, kieh ax hu tiang mai sawg ka pui an khankix mai jhi tokaux ax ka kix. ⁹ Phan kix ah yuh nin ka ax, pau tom hoek ex ka pax, khaix an ax tak cung ka dee ot tix mai ax tak ang lai haok sawg ka kix. ¹⁰ Phan kix ah nin, haok ka yix heue mai ax tak haok ka kix, mawh kheu Simiang Siyiex tak ap kix ka daux taix ax. Mai an tak mawh mhai rug ka son ax." ¹¹ Kiex khawm ra jhi tokaux tix ka kru naing pau veng pui Philitix, mai pui Philitix ah nin, "Jhak heue, pui Hebrie hoek khaing daux dee mox kix tix." ¹² Mai kru naing pau veng yo ka Yawnasan mai cao viex kraung naing nawh ah nin, "Haok ka yix heue, yix tak jhi maix yaox tix ceuceu, " mai Yawnasan ah nin ka cao viex kraung naing tix, "Haok hawt khaix aux, mawh kheu Simiang Siyiex hoik ap kix ka daux taix Isarelax." ¹³ Yawnasan mu tix haok mai cao pa viex kraung naing kawx hawt khaix nawh. Pui Philitix hoik goh ka plak sivoe Yawnasan mai cao viex kraung naing pah kix hawt khaix nawh. ¹⁴ Haktiex dee pah Yawnasan mai cao viex kraung naing nawh ka pui tixnga kaux, bawg tix koe tix plak e-kax hatiex pon thai ka mawie. ¹⁵ Mai krax yaoh yee lih koe ka daux tab, ka daux kaung mai ka sinax pui khankix, kru naing pau veng mai pui naing tud rhim kawx koe krax siyaung, mai haktiex yung yang, krax yaoh yee pa ting lih koe. ¹⁶ Pui pau ka yam Sawlux ka Gibat haktiex Binyamin maong ti jhak, jhak heue, pui Philiti hu jee hu blaong tap toi ka paox tix. ¹⁷ Mai Sawlux ah nin ka pui pa ot tau mai nawh khankix, "Simin tix yaox ka pui pa hoik hu khaing ex, " yam hoik simin kix tix yaox pui, jhak heue, Yawnasan mai cao viex kraung naing nawh ang lai koe tan. ¹⁸ Mai Sawlux ah nin ka Ahiyax, "Viex teug sijax mukheu Siyiex hoek tin, mawh kheu singaix an, teug sijax mukheu Siyiex koe tau mai pui Isarelax. ¹⁹ Yam kawn sikah Sawlux ka cao giex kaing li, lox sinum baox nie lih sinyek ka daux tab Philitix, mai Sawlux ah nin ka cao giex kaing li, "Deeh yoi taix maix." ²⁰ Sawlux mai pui ot mai nawh khawmuik khrawm paox ti mai hu daux naing, jhak heue, pui Philitix pa giex vaig khankix ra lai pah paox tix, tix kaux lai tix kaux mai krax sivix ting lih tix koe tan. ²¹ Pui Hebrie pa hoik sax ot mai pui Philitix tom sivoe yam an mai pui pa hu tau mai kix ka daux tab, deeh tieh tix hoek tau mai pui Isarelax pa ot tau mai Sawlux mai Yawnasan. ²² Awm an pui Isarelax pa mox tix ka gawng Epharem mhong ka to pui Philitix mai hawt pheet kix daux naing. ²³ Simiang Siyiex deeh taoh ka pui Isarelax ka daux singaix an mai naing tiang tom hoek ka Bietavin. ²⁴ Pui Isarelax hoik kha rhawm tix singaix an, kheu kieh Sawlux pui khankix tiextu ah nin, "Phan pui mawx ih priex sivoe ang nyang hoek plak bo, sivoe ang aux nyang pawk bix ka pui koeng tix kieh pui an pon pa jhax lawg, " mawh kheu nan, pui khakix tom ang ih priex. ²⁵ Pui khawmuik hoek ka daux tiag ka dee koe rawm hia. ²⁶ Yam laig pui khankix ka daux tiag, jhak heue, rawm hia hoik jauh tix lih, viang mawh nan, ang koe pui teei ka taix mai sau daux jheeh tix, kheu lhat kix ka lox pa tiextu. ²⁷ Viang mawh nan Yawnasan ang nyang mhong ka lox tiextu keeing tix ka pui khankix mai nawh teei khaox gix pa koe ka taix tix cih ka khlawp rawm kaing hia mai teei ka taix sau ka daux jheeh tix, mai ngai nawh riang haing kah. ²⁸ Pui tix kaux ah nin, "Keeing maix hoik yuh krax tiextu pa kied kin ka pui khankix ah nin, kieh krax jhax lawg hoek ka pui pa ih priex ka daux in singaix "Pui khankix kawx hoik peue riang ku kaux. ²⁹ Mai Yawnasan ah nin, "Keeing aux hoik tawx krax pa kha rhawm ka pui haktiex, jhak ti yaox ngai aux hoik riang haing kheu hoik cim aux ka rawm hia in ceeix ngie." ³⁰ "Phan pui khankix ih ka can pa pon rhim tix khaing pui koeng kix daux in singaix mawh pa kied mhawm miex ding, mawh kheu yam in ex tak pon pah ka pui Philitix tom nie miex ding?" ³¹ Daux singaix an kix pah ka pui Philitix, jah ka Mikhamat tom hoek Ayalon. Pui khankix hoik kied peue riang, ³² pui ku kaux nied ti hu teei kraung tud rhim tix khankix, pa mawh yung, mawie mai kawn mawie khankix mai pah piang tiex tan mai ih mai nham tau. ³³ Mai kix ah nin ka Sawlux, "Jhak heue, pui khankix hoik yuh phimap mai lud ka Simiang Siyiex, kheu hoik ih kix priex tau mai nham, " mai nawh ah nin, "Pex hoik lud mai ang kaux sijax mai hoek bang lia simaox ting hoek ka aux ka daux singaix." ³⁴ Sawlux ah nin, "Hu pex ka sinax pui kudah ah nin ka kix, kieh pui ku kaux viex mawie mai yung mai pah khankix tin mai ih paw yuh phimap mai lud ka Simiang Siyiex ka pa ih nex tau mai nham, pui ku kaux tang viex mawie tix hoek daux sawm an mai pah khankix tan. ³⁵ Mai Sawlux sum khu dee tan son Simiang Siyiex, in mawh khu dee tan pa sum nawh bawg tix son Simiang Siyiex. ³⁶ Mai Sawlux ah nin, "Kieh ex lih hu hawt khaix pui Philitix daux ponsawm mai rhim yuh kix laux leeing tom bah riang praix, paw lai kieh ex prah kix tix kaux kawx. Mai kix pawk ah nin, yuh awm pa hoik yaox maix mawh pa mhawm ka maix. Cao giex kaing li ah nin, "Kieh ex greed tix dex Siyiex." ³⁷ Mai Sawlux chawk cheng ka Siyiex, "Mawh khaw aux lih pheet ka pui Philitix lie? Mawh sang ap Maix kix ka daux taix pui Isarelax lie? mai Nawh Cao ang pawk lox nawh singaix an. ³⁸ Mai Sawlux ah nin, "Pex pa mawh cao kaing pui hun hoek tin, kieh ex tawng mawh pui mawx pa yuh phimap in singaix." ³⁹ Awm im ju Simiang Siyiex Cao pa taoh ka Isarelax, viang krax lud an koe ka kawn simex aux Yawnasan kawx nawh tak yum tete. Viang mawh nan, khaing daux sinax pui ang koe pui pawk lox nawh tix kaux kawx. ⁴⁰ Mai Sawlux ah nin ka pui Isarelax khawmuik, "Kieh pex ot tix plak, aux mai kawn simex aux Yawnasan, tak ot tix plak. Pui khankix deeh pawk ah nin ka Sawlux, "Yuh awm pa yaox maix mawh pa mhawm ka maix." ⁴¹ Mawh kheu nan, Sawlux ah nin, Simiang Siyiex, Siyiex pui Isarelax eue, "Jhi daux krax pa khaw ka aux liak, mai nieb caw ka Sawlux mai Yawnasan, viang mawh nan, pui hun khankix klawd cie tix. ⁴² Sawlux ah nin, "Yuh nieb ka sinax aux mai kawn simex aux Yawnasan, " mai nieb caw ka Yawnasan. ⁴³ Khaix an Sawlux ah nin ka Yawnasan, "Krai pa hoik yuh maix ka aux." Yawnasan krai ah nin ka nawh, "Aux cim ti yaox rawm hia kawb mai toh khaox gix pa koe daux taix tix ceeix khaing, son in aux tak kham tix yum ka." ⁴⁴ Sawlux ah nin, "Yawnasan eue, phan maix ang yum tete, Siyiex nie lheu yuh pa nie lheu khaing an ka aux." ⁴⁵ Pui khankix ah nin ka Sawlux, mawh sang khaw Yawnasan pa hoik yuh bwanson krax taoh pa kied ting ka pui Isarelax tix yum lie? Ang doh khaw ti mawh nan! awm im ju Simiang Siyiex hauk kaing nawh tak ang cod piang tiex tix nyaing kawx, mawh kheu hoik yuh nawh kaing pa kied koe min mai Siyiex tom in singaix. Pui hun khankix deeh taoh Yawnasan mai ang lai yaox ti yum. ⁴⁶ Sawlux deeh ing khaing pheet ti pui Philitix, mai pui Philitix kawx deeh ing ka dee ot cao tix heue. ⁴⁷ Yam kwang Sawlux ka pui Isarelax, nawh puing ka pui koeng tix ku sidah, pa mawh pui Mawbax, pui Amon, pui Edom mai simiang Zawba mai pui Philitix, yam veeh simiang tix plak mawx ang ah nie kieh kix som. ⁴⁸ Mai nawh koe rhawm vao rhawm kwa mai puing ka pui Amaliet mai deeh taoh pui Isarelax khaing taix pui tud rhim ka kix. ⁴⁹ Kawn simex Sawlux mawh Yawnasan mai Ishavi mai Malakhishua mai kawn bun nawh mawh in, ceu kaux kawn bun liang mawh Merabax, ceu kaux kawn bun iak mawh Mikhalax, ⁵⁰ Mai ceu kaux moeng Sawlux mawh Ahinawm kawn bun Ahimat. Mai ceu kaux cao kaing naing nawh mawh Abana kawn simex Nerax pa mawh keeing ting Sawlux. ⁵¹ Kisha mawh keeing Sawlux mai Nerax mawh keeing Abana kawn simex Abielax. ⁵² Glang baux im ju Sawlux nawh yaox ti yuh naing tom kin mai pui Philitix, yam yaox Sawlux pui pa ting riang tix kaux kaux, phan ang mawh nan pui vao tix kaux kaux nawh laug ti deuh sonsang shiao cao tix heue.

¹ Samoelax ah nin ka Sawlux, "Simiang Siyiex kieh aux hoek groi rawm bee mai yaog maix mawh simiang piang pui Isarelax. Yam in nghiet ka lox Simiang Siyiex." ² Simiang Siyiex Cao kru naing raoma ah nin, "Aux tak ciyang ka Amaliet ka tiebtie kix krax pa lih pui Isarelax khaing Ejiptux. ³ Yam in hu puing ka pui Amaliet mai yuh can pa koe kix laux leeing khawmuik, mai paw lhawk ka kix, pah kix khawm simex bun, kawn nyawm iak mai kawn ngie peuex, khawm mawie mai yung, kala-uk mai la khankix." ⁴ Mai Sawlux khrawm ka pui khankix mai simin ti yaox kix ka veng Teleng mai pon lien kru naing caong ra sien kaux mai lien pui Yudax tix mheen kaux. ⁵ Sawlux hoek ka veng pui Amaliet mai kix pau ti yuh naing jawm ka daux ngawd. ⁶ Sawlux ah nin ka pui Keni, "Lih hu, gah pex khaing sinax pui Amaliet, aux lhat ti yuh pex laux leeing mai kix, mawh kheu hoik jhi pex krax caux rhawm ka pui Isarelax yam lih kix khaing Ejiptux." Mawh kheu nan, pui Keni kawx lih hu khaing sinax pui Amaliet. ⁷ Sawlux puing ka pui Amaliet, jah khaing Havilax tom hoek ka Shurax, ka plak lih singaix Ejiptux. ⁸ Nawh giex im ka Agat simiang pui Amaliet mai pah pui meung yum ka lawm vaig. ⁹ Sawlux mai pui nawh khankix, lhawk ka simiang Agat mai yung pa kied mhawm, mawie, kawn yung pa kied kluing mai can pa mhawm khawmuik, kix ang rhawm yuh laux leeing khawmuik, kix yuh ngie pa seeing tix ka mai pa ang koe ngawh jum khankix laux leeing heue. ¹⁰ Gumlox Simiang Siyiex lih hoek ka Samoelax, ¹¹ "Aux laux rhawm ka hoik kieh tix Sawlux mawh simiang, mawh kheu hoik veeh ti khaing pa hawt khaix Aux mai ang yuh hawt awm lox pingnyap Aux." Samoelax kied laux rhawm mai nawh yiiem ka plak sivoe Simiang Siyiex leeing sawm. ¹² Mai Samoelax kaoh ponngawb caocao sonsang pub ka Sawlux mai pui tix kaux ah nin ka Samoelax, "Sawlux hoik hu ka veng Khamelax, jhak heue, nawh sum mhai pa doh keud ka son tix mai deeh veeh ti, tiang mai hu ka plak veng Gilagalax." ¹³ Samoelax hoek ka Sawlux mai Sawlux ah nin ka nawh, "Kieh Simiang Siyiex nawb bwan ka maix, aux hoik yuh awm lox pingnyap Simiang Siyiex." ¹⁴ Mai Samoelax ah nin, "Phan mawh nan lox riag yung mai lox bawh mawie pa mhong Aux ka yhaok tix mawh patix?" ¹⁵ Sawlux ah nin, kix hoik viex an khankix, khaing pui Amaliet, mawh kheu pui khankix lhawk ka yung pa kied mhawm mai mawie sonsang tan ka Simiang Siyiex maix, mai pa kawn deuk yix yuh laux leeing." ¹⁶ Khaix an Samoelax ah nin ka Sawlux, "Ot yawg ha, Aux krai maix mhong pa hoik krai Simiang Siyiex ka aux daux sawm in, " Sawlux ah nin ka nawh, "Krai heue, " ¹⁷ Samoelax ah nin, "Viang maix mawh pa iak ka daux ngai cao tix kawx maix hoik mawh cao kaing doeh nyiex ma pui Isarelax mai Simiang Siyiex hoik groi rawm bee ka maix sonsang mawh maix simiang piang pui Isarelax ang mawh lie? ¹⁸ Simiang Siyiex ploi maix hu yuh kaing ah nin, hu mai yuh pui Amaliet pui phimap laux leeing mai puing ka kix tom laux leeing kix, ¹⁹ maix ang lai cu nghiet ka lox Simiang Siyiex mai maix lai teei kraung pa tud rhim an mai yuh pa caox caig ka plak sivoe ngai Simiang Siyiex yuh ka mawh lie?" ²⁰ Sawlux ah nin ka Samoelax, "Aux hoik cu nghiet ka lox Simiang Siyiex mai aux hoik hu yuh ka kaing pa ploi Simiang Siyiex aux yuh mai hoik viex Agat simiang pui Amaliet mai aux hoik yuh pui Amaliet khankix laux leeing." ²¹ Viang mawh nan, pui khankix hoik teei kraung pa tud rhim pa mawh yung, mawie mai can pa kied mhawm pa caw ti yuh laux leeing, sonsang tan ka Simiang Siyiex, Siyiex maix ka Gilagalax." ²² Samoelax ah nin, "Mawh pa khaw rhawm Simiang Siyiex ka krax tan pa gleeing mai krax tan pa appong khaing pa cu nghiet ka lox Simiang Siyiex lie? Jhak heue, krax cu nghiet nie lheu mhawm khaing krax pa appong mai pa nghiet nie lheu mhawm khaing khlawp bee yung mhaing. ²³ Mawh kheu pa tieh feen awm phimap pa yuh phicaox mai pa kiien rhawm awm phimap pa caox mai pa krub riang grang, mawh kheu hoik thiang maix ka gumlox Simiang Siyiex, Nawh kawx thiang ka simiang mawh maix." ²⁴ Sawlux ah nin ka Samoelax, "Aux hoik yuh phimap, mawh kheu aux hoik lud ka lox tawm pingnyap Simiang Siyiex mai maix, mawh kheu lhat graung aux ka pui hun mai cu nghiet ka lox kix. ²⁵ Yam in aux rawg maix pluat ploi ka phimap tix, deeh hoek mai aux, sonsang krub aux ka Simiang Siyiex." ²⁶ Samoelax pawk ah nin ka Sawlux, "Aux tak ang deeh hoek mai maix, mawh kheu maix hoik thiang ka gumlox Simiang Siyiex mai Simiang Siyiex hoik thiang maix khaing pa mawh maix simiang piang pui Isarelax." ²⁷ Samoelax veeh ti sang hu, Sawlux hawt bluh caong sibex nawh mai sibex nawh kawx griah. ²⁸ Samoelax ah nin, "Simiang Siyiex hoik riah meung haktiex Isarelax khaing maix in singaix mai tawx ka paox plawg maix, pui pa nie mhawm khaing maix." ²⁹ Nawh Cao pa mawh riang rao Isarelax ang lai pie lhen mai ang tieh loh krax keud tix, mawh kheu ang Nawh mawh kawn pui mai ang tieh loh krax keud tix." ³⁰ Sawlux ah nin, "Aux hoik yuh phimap, yam in deeh tawx min plakngai ka aux ka plak sivoe ngai kwad song pui aux khankix mai ka plak sivoe pui Isarelax deeh hoek mai aux, sonsang krub aux ka Simiang Siyiex, Siyiex maix." ³¹ Samoelax deeh hawt khaix Sawlux, mai Sawlux krub ka Simiang Siyiex. ³² Samoelax ah nin, "Viex Agat simiang pui Amaliet hoek ka aux." Agat hoek ka nawh mai pa gaux rhawm, ah nin, "Krax yum pa kied lang teung hoik luan tete." ³³ Samoelax ah nin, "Awm hoik yuh lawm vaig maix bun khankix ang koe kawn, mawh kheu nan, miex maix tak ang lai koe kawn sinax bun khankix." Mai Samoelax gaing ka Agat lih mawh baux mawx baux an sivoe Simiang Siyiex ka Gilagalax. ³⁴ Khaix an, Samoelax hu ka Ramax mai Sawlux kawx deeh ing ka nyiex haw tix ka Gibat. ³⁵ Samoelax ang lai yaox ka Sawlux, tom hoek singaix yum nawh tix bawg kawx mai Samoelax hoik khrup rhawm son Sawlux. Simiang Siyiex kawx laux rhawm grawng kieh tix Sawlux mawh simiang piang pui Isarelax heue.

¹ Simiang Siyiex ah nin ka Samoelax, "Mawh kawn sang khrup rhawm maix son Sawlux miex grheung aux hoik thiang nawh khaing pa mawh nawh simiang piang pui Isarelax ang mawh lie? Sau bee naog ka daux rung teet mai lih hu, Aux sang ploi maix hu ka Yessie, pui veng Bieliehiem, mawh kheu Aux hoik khre rien simiang son tix khaing sinax kawn simex nawh khankix." ² Samoelax ah nin, "Aux sang pon hu yuh ka mawx? Phan Sawlux mhong ka an, nawh tak pah ka aux." Simiang Siyiex ah nin, "Teei mawie shiang viex hu mai maix tix mu ah nin, aux hoek ti tan ka Simiang Siyiex, ³ mai ghaok Yessie hoek ka dee yuh krax tan, Aux tak jhi maix yaox pa sang caw maix ti yuh maix tak groi rawm bee ka pui pa ciak Aux ceu kaux ka maix." ⁴ Samoelax hoik yuh ceu an awm pa hoik tawm Simiang Siyiex mai hoek ka Bieliehiem, mai kwad riex ju veng an khankix hoek rieb nawh mai sikua ti ah nin, mawh hoek maix ka daux pa nhim lie?" ⁵ Samoelax pawk ah nin, "Hoek daux pa nhim, aux hoek sonsang yuh krax tan ka Simiang Siyiex, kieh tokaux pex singax mai hoek ka aux, ka dee yuh krax tan." Nawh yuh kieh Yessie mai kawn simex nawh khankix singax mai ghaok kix hoek ka krax tan. ⁶ Yam hoik hoek kix, nawh jhak ka Eliabax mai keud ah nin, "Pui pa sang groi Simiang Siyiex bee ka hoik ot plak sivoe Siyiex tete." ⁷ Viang mawh nan, Siyiex ah nin ka Samoelax, "Paw jhak pakpeung ngai baoh mai krax lhaong jung, Aux hoik thiang ka nawh, mawh kheu pa yaox Siyiex ang awm pa yaox kawn pui, kawn pui jhak ka grang pakpeung ka praix, viang mawh nan, Simiang Siyiex jhak ka daux rhawm." ⁸ Mai Yessie kok ka Abinadat mai kieh nawh hu ka sivoe Samoelax mai nawh ah nin, "Simiang Siyiex ang laug ka pui in." ⁹ Yessie baox kieh Shama tiang ti hu, nawh ah nin, "Simiang Siyiex ang laug ka pui in." ¹⁰ Yessie kieh kawn simex tix aliah kaux tiang hu ka plak sivoe Samoelax, Samoelax ah nin ka Yessie, "Simiang Siyiex ang laug ka pui in khankix." ¹¹ Samoelax chawk ka Yessie ah nin, "Mawh koe kawn simex maix tin khawmuik lie?" mai nawh ah nin, "Kawn deuk ngie kawn ghoik, jhak heue, nawh kawn liang yung khankix." Samoelax ah nin ka Yessie, "Ploi pui hu kok ka nawh, mawh kheu ex tak ang nyang ngawm tom hoek nawh tin." ¹² Nawh ploi pui hu kok mai viex nawh hoek plak daux. Davit raoh hauk kaing mai ngai baoh nawh jiet mhawm, pakpeung grang tokaux nawh nyawm ti jhak, Simiang Siyiex ah nin, "Kaoh mai groi bee ka nawh, in mawh nawh." ¹³ Samoelax teei bee khaing rung teet mai groi piang nawh ka sigreung puxke nawh khankix, mai Simiang Siyiex lih hoek piang Davit jah singaix an tom hu sivoe, Samoelax yaog ti kaoh deeh ing ka veng Ramax. ¹⁴ Khwan Simiang Siyiex lih hu khaing Sawlux mai khwan caox khaing Simiang Siyiex tuktiak ka nawh. ¹⁵ Kawncau Sawlux ah nin ka nawh, khwan caox khaing Siyiex hoik tuktiak ka maix. ¹⁶ Kieh cao simiang ex tawm lox ka kawncau tix khankix, pa ot ka sivoe maix, sonsang sawg ka pui min pa jiet chix tah ting mhawm lox, nawh tak tah ting an yam hoek khwan caox khaing Siyiex ti tuktiak ka maix, maix tak nyawm rhawm ka." ¹⁷ Sawlux ah nin ka kawncau tix khankix, "Sawg pui pa jiet chix tah ting tix kaux mai viex nawh hoek ka aux." ¹⁸ Pui tix kaux khaing daux kawncau nawh, pawk lox ah nin, "Jhak heue, aux hoik yaox kawn simex Yessie pui veng Bieliehiem, pa mawh pui min pa chix tah ting mhawm mhawm, nawh mawh pui vao ka naing tix kaux mai pa chix sikah mai mawh pui mhawm ngai mhawm baoh, Simiang Siyiex ot tau mai nawh." ¹⁹ Mawh kheu nan, Sawlux ploi kawncau ti hu ka Yessie ah nin, "Ploi kawn simex maix Davit, pa mawh cao liang yung hoek ka aux." ²⁰ Yessie teei la tix mu mai tang blah piang an, tau mai singiien hak rawm plix siiet, mai kawn pex mai ap an ka Davit sonsang tawx ka Sawlux. ²¹ Davit hoek ka Sawlux mai cung ka plak sivoe nawh, Sawlux kied moh ka nawh sigrien sigre mai nawh lih ti mawh pa klawm kraung naing Sawlux. ²² Mai Sawlux ploi pui hu ka Yessie ah nin, "Kieh Davit ot tau mai aux, mawh kheu aux khaw rhawm ka nawh." ²³ Yam hoek khwan caox khaing Siyiex piang Sawlux yam mawx ang ah, Davit teei ting mai tah ka taix tix, mawh kheu Sawlux lih tix nyawm rhawm mai deeh moi nyawm ot, khwan caox kawx lih khaing nawh heue.

¹ Pui Philitix khrawm kru naing tix son naing, kix khrawm paox tix ka Sawkhaw haktiex Yudax mai yuh tab sinax Sawkhaw mai Azeka ka haktiex Ephidamim. ² Sawlux mai pui Isarelax khrawm paox tix, mai yuh tab ka daux ngawd Elax, sonsang yuh naing ka pui Philitix. ³ Pui Philitix cung piang gawng tix plak mai pui Isarelax kawx cung piang gawng an tix plak mai ngawd khan sinax kix. ⁴ Koe pui tix kaux pa kaux Gawliax mawh pui vao ka naing, pa mawh pui veng Gata pa lhaong liah sawk mai tix diex, lih khaing tab pui Philitix. ⁵ Nawh ceep mhok tawng lheung ka kaing tix mai ceep sibex plah tawng pa cien phwan rheng shekhe. ⁶ Chup tawng lheung ka caong tix mai kawg pliah tawng ka klip tix. ⁷ Krong pliah an awm blax taing mai to pliah cien liah yieh shekhe mai pui giex pliah rhiem tiebtie tix kaux hu sivoe nawh, ⁸ nawh cung yo lox ti hu ka plak pui Isarelax ah nin, "Pex lai hoek ti yuh naing yuh ka mawx lie? Ang aux mawh pui Philitix mai ang pex mawh kawncau Sawlux lie? Laug pui tix kaux khaing pex mai ploi nawh lih hoek ka aux. ⁹ Phan nawh pex puing ka aux mai pah ka aux, yix tak mawh siliex pex, mai phan aux pex nawh mai pon pah nawh, pex tak mawh siliex yix mai yuh kaing jhaw yix." ¹⁰ Pui Philitix an ah nin, "Aux tak grhiem kru naing pui Isarelax in singaix, tawx pui tix kaux sonsang puing yiex paox tix." ¹¹ Yam mhong Sawlux mai pui Isarelax ka lox krai pui Philitix an, kix kied voi rhawm mai lhat graung ka. ¹² Davit mawh kawn simex pui Epharax veng Bieliehiem haktiex Yudax, pa kaux Yessie mai nawh koe kawn simex daix kaux. Pui an hoik kuad sipie mai hoik rie ju hu sivoe baux singaix im ju Sawlux. ¹³ Kawn simex ting Yessie loe kaux hoik hawt khaix Sawlux ka biang naing, ceu kaux kawn simex loe kaux pa hu daux naing, mawh Eliabax kawn Ai mai khaix nawh mawh Aminadat mai an loe kaux tix kaux mawh Shana. ¹⁴ Davit mawh kawn ghoik, pa ting loe kaux hoik hawt Sawlux. ¹⁵ Viang mawh nan, Davit deeh ing khaing Sawlux, sonsang ing liang ka yung keeing tix ka Bieliehiem. ¹⁶ Pui Philitix an lih jhi tokaux tix ka daux tixpon ngaix, ponngawb tix bawg mai ponbo tix bawg. ¹⁷ Yessie ah nin ka kawn simex tix Davit, "Teei maix viex nghox ca diag tix e pha mai blah kao lon mai nied ti hu tawx ka puxke maix khankix ka biang naing, ¹⁸ viex kang rawm teeih kao khlawp son cao kaing pui naing tix rheng. Jhak tix yaox krax ot krax koe puxke maix khankix mai deeh viex grawng tix ceuceu khaing kix." ¹⁹ Sawlux mai pui nawh khawm pui Isarelax ot ka daux ngawd Elax mai puing paox tix tau mai pui Philitix. ²⁰ Davit kaoh ponngawb caocao mai prah yung khankix ka cao liang yung mai viex pa ih, lih hu awm lox tawm Yessie ka nawh mai nawh hoek ka daux tab bawg yam kawn taug hu kix sonsang puing tix naing mai kix yo lox sinum son naing. ²¹ Pui Isarelax mai pui Philitix tang khre kru naing sonsang puing ka paox tix. ²² Davit ap pa ih pa viex tix, ka cao priex pa ih tab mai nied tix laig sinax pui naing mai singeuh taix puxke ti khankix. ²³ Yam kawn sikah nawh mai kix, pui vao khaing pui Philitix pui veng Gata, pa mawh Gawliax, lih hoek khaing pui naing Philitix mai krai lox awm pa hoik krai tix sivoe, mai Davit kawx mhong kah. ²⁴ Yam yaox pui Isarelax ka pui an mai kix to hu khaing nawh, kheu lhat graung kix ka tete. ²⁵ Pui Isarelax khankix ah nin, "Hoik yaox pex ka pui pa lih hoek an lie? Nawh hoik lih hoek, si lah ka pui Isarelax tete, pui pa pon pah ka nawh, simiang tak tawx mau khri ka nawh tom nie mai nawh tak tawx kawn bun tix ka nawh mai kieh nyiex ma keeing nawh luad luan khaing kaing jhaw daux pui Isarelax." ²⁶ Davit ah nin ka pui pa cung dex nawh, "Son pui pa sang pah ka pui Philitix in mai teei ti tik pa salao khaing pui Isarelax, tak sang pon bwanson pa yuh ka mawx lie? mawh kheu pui Philitix pa ang pat hak in, nawh khex pon si lah ka kru naing Siyiex pa im ju lie?" ²⁷ Pui hun pawk lox nawh awm pa hoik ah kix sivoe ah nin, "Pui pa pon pah ka nawh tak pon bwanson pa hoik ah kix." ²⁸ Eliabax puxke ting Davit, hoik mhong yam sikah nawh ka pui khankix mai Eliabax kied song rhawm ka Davit ah nin, "Mawh lih hoek yuh maix ti? prah maix yung pa ang nie an ka daux tiag mai pui mawx? Aux tawng pa ca nyhau mai pa caox caig khaing daux rhawm maix, mawh kheu lih hoek maix sonsang kia tix ka naing." ²⁹ Davit ah nin, "Mawh hoik yuh aux patix? mawh ang aux pon sikah tix gum kawx lie?" ³⁰ Davit deeh veeh tix khaing nawh mai hu ka tang kaux mai krai awm pa krai sivoe mai pui hun pawk ka nawh awm sivoe. ³¹ Yam mhong kix lox krai Davit, kix hu krai an ka sivoe ngai Sawlux, mai ploi pui hu kok ka Davit. ³² Davit ah nin ka Sawlux, "Paw kieh pui khrup rhawm kheu in tix kaux kawx, kawncau maix tak hu puing ka pui Philitix." ³³ Mai Sawlux ah nin ka Davit, "Maix ang tau tix pon hu, sonsang puing tix ka pui Philitix in, mawh kheu kawn mawh maix kawn nyawm mai nawh hoik sax mawh pui naing jah tom yam iak tix." ³⁴ Davit deeh pawk ah nin ka Sawlux, "Kawncau maix hoik dawg mawh cao liang yung keeing tix, yam hoek sivai sangsi mai krih ti sang kied ka kawn yung khaing cub yung, ³⁵ aux hawt pheet an mai pah ka mai deeh taoh kawn yung khaing daux jheeh nawh, yam kaoh yuh nawh ka aux mai aux giex hauk jheeh nawh mai lah nawh tom yum. ³⁶ Kawncau maix hoik pah sivai sangsi mai krih mai pui Philitix pa ang nyang pat hak in, tak awm totiag an tix mu khaing, mawh kheu nawh hoik silah ka kru naing Siyiex pa im ju." ³⁷ Davit ah nin, "Simiang Siyiex Cao pa taoh aux khaing taix sivai sangsi mai krih, tak taoh aux khaing taix pui Philitix." Sawlux ah nin ka Davit, "Hu heue, Simiang Siyiex tak ot tau mai maix." ³⁸ Mai Sawlux tawx Davit ceep kraung naing tix mai ceep mhok tawng lheung piang kaing nawh mai kieh ceep sibex rhiem. ³⁹ Davit phyawk vaig tau mai kraung naing, nawh cheu ti hu kawx ang chix, mawh kheu ang nawh sax ceep, Davit ah nin ka Sawlux, "Aux ang pon hu ka ceep tix in, mawh kheu ang aux nyang meed, " mai Davit peeik ka an. ⁴⁰ Mai giex khaox gix ka taix ti mai laug simaox lawmle phwan mu ka daux klawng mai sau ka daux bau liang yung, pa koe mai tix, nawh giex ak maox vuh vied daux taix mai greed hoek dex pui Philitix. ⁴¹ Pui Philitix hoek dex Davit mai cao giex plah rhiem tiebtie nawh lih hu ka plak sivoe nawh. ⁴² Yam jhak pui Philitix an ka Davit mai ang koe krax nab yam ka nawh, kheu mawh Davit pui awn ju mai raoh hauk kaing, pakpeung grang tokaux nyawm ti jhak. ⁴³ Pui Philitix ah nin ka Davit, "Mawh aux sox lie? maix lai viex khaox hoek ka aux." Pui Philitix an jhax lawg Davit ka daux ceu kaux Siyiex tix. ⁴⁴ Pui Philitix ah nin ka Davit, "Hoek ka aux, aux tak tawx nex maix ka sim raoma mai ka totiag ka daux tiag." ⁴⁵ Davit ah nin ka pui Philitix, "Maix hoek ka aux tau mai vaig pliah mai plah rhiem tiebtie, viang mawh nan, aux hoek ka maix ka daux min ceu kaux Simiang Siyiex Cao kru naing raoma, Siyiex pui Isarelax, pui pa silah maix kah, " ⁴⁶ in singaix Simiang Siyiex tak ap maix ka daux tawm taix aux, aux tak pah maix mai kid kaing maix, aux tak tawx tokaux yum kru naing pui Philitix khankix, ka sim raoma mai ka totiag pa koe piang haktiex, sonsang tawng pui haktiex koe Siyiex ka daux pui Isarelax. ⁴⁷ Pui hun tak tawng Simiang Siyiex ang taoh pui ka vaig lawm mai pliah, mawh kheu pa yuh naing mawh cie Simiang Siyiex mai Nawh tak ap maix ka daux taix yix." ⁴⁸ Pui Philitix kaoh greed tix dex sonsang puing Davit, Davit nied tix to ka see pui naing, sonsang puing ka pui Philitix. ⁴⁹ Davit cawk ti teei simaox mu daux bau ka taix ti mai vuh vied simaox an, simaox kawx krox ka dong re pui Philitix, lon simaox an laig ka dong re nawh mai nawh goh gup pakngai tix piang tiex. ⁵⁰ Davit hoik pex pui Philitix ka ak maox vuh vied mai lon simaox tix mu, hoik krox ka pui Philitix mai pah ka nawh, yam an vaig lawm ang koe ka daux taix Davit. ⁵¹ Davit nied ti to cung piang pui Philitix an mai lawd vaig cao nawh khaing daux phak vaig, pah nawh mai kid kaing nawh ka vaig. Yam yaox pui Philitix hoik yum pui naing vao tix, kix tang to hu. ⁵² Pui Isarelax mai pui Yudax kaoh mai yo lox tix pheet ka pui Philitix, tom singai hoek ka Gata mai hoek ka siviex veng Ekaron, pui Philitix pa mat khankix goh hawt krax ka veng Sharem tom singai hoek ka veng Gata mai veng Ekaron. ⁵³ Pui Isarelax kaoh khaing pheet tix ka pui Philitix mai kix rhim ka nyiex gox kix. ⁵⁴ Davit teei kaing pui Philitix an mai viex hoek ka veng Yerusaliem, viang mawh nan, nawh deuh kraung naing Gawliax ka nyiex gox man tix. ⁵⁵ Yam yaox Sawlux lih hu puing Davit ka pui Philitix an, nawh chawk ka Abana cao kaing naing ting tix ah nin, "Abana eue, kawn nyawm in mawh kawn simex pui mawx?" Mai Abana pawk ah nin, "Simiang eue, awm im ju maix aux ang tawng." ⁵⁶ Simiang ah nin, "Chawk cheng tix yaox ka kawn nyawm in mawh kawn simex mawx." ⁵⁷ Yam deeh hoek Davit khaing pah tix pui Philitix an, Abana teei ka nawh mai viex hoek ka plak sivoe Sawlux, tau mai kaing pui Philitix pa koe daux taix nawh. ⁵⁸ Mai Sawlux ah nin ka nawh, "Kawn nyawm eue, mawh maix kawn simex pui mawx. "Davit deeh pawk ah nin, "Aux mawh kawn simex kawncau maix Yessie pui veng Bieliehiem heue."

¹ Yam hoik sikah nawh ka Sawlux, Yawnasan hoik pid rhawm ka Davit mai Yawnasan hoik moh nawh awm moh ka ju tix. ² Sawlux hoik teei nawh ot mai tix ka daux singaix an mai ang lai kieh nawh ing ka nyiex keeing tix. ³ Khaix an Yawnasan yuh sijax mukheu mai Davit, mawh kheu moh nawh Davit awm moh nawh ka ju tix. ⁴ Yawnasan peeik sibex dhah tix tawx ka Davit tau mai kraung naing ceep nawh, vaig, ak mai maox rawd nyoi nawh. ⁵ Mai Davit hoik lih hu yuh kaing jhaw haok hwan ka dee ploi Sawlux nawh hu dee mawx ang ah, mai Sawlux deuh nawh mawh cao kaing naing piang pui khankix mai in mawh pa khaw ka plak sivoe ngai pui mai ka plak sivoe ngai kawncau Sawlux khankix. ⁶ Yam deeh hoek Davit khaing pah tix pui Philitix, bun khankix lih hoek khaing veng pui Isarelax mai rhax lai graoh sonsang rieb ka simiang Sawlux, tau mai tah ting, tah kraung mai pa gaux rhawm. ⁷ Mai bun khankix ah lai rhax graoh ah nin, "Sawlux hoik pah pui ting riang kaing rheng mai Davit hoik pah pui kaing mheen." ⁸ Mai Sawlux kied song rhawm, ang nyawm rhawm ka lox ah nin, "Kix yaogyaw Davit pah pui kaing mheen kaing mheen mai ka son aux mawh ngie kaing rheng kaing rheng, lheu khaing meung haktiex nawh kawn sang pon patix." ⁹ Jah ka singaix an tom hoek sivoe ngai, Sawlux hoik krix ngai ka yaox tix Davit. ¹⁰ Singaix pasax khwan caox khaing Siyiex, lih hoek piang Sawlux mai nawh nieb krai lox jhai ka daux nyiex haw, Davit tah ting awm pa hoik sax tah nawh sivoe mai Sawlux giex pliah daux taix tix. ¹¹ Mai Sawlux puah nawh ka pliah mai keud ah nin, "Aux tak blung Davit ka ding." Viang mawh nan, Davit via tix khaing sivoe nawh ra bawg. ¹² Sawlux lhat ka Davit, mawh kheu Siyiex ot mai Davit, viang mawh nan, Simiang Siyiex hoik lih khaing Sawlux. ¹³ Sawlux dux Davit khaing sivoe ngai tix mai kieh nawh mawh cao kaing naing piang pui tix rheng mai Davit lih plak praix sivoe pui hun. ¹⁴ Mai kaing jhaw yuh Davit haok hwan ting lhaong khawmuik, kheu Simiang Siyiex ot tau mai nawh. ¹⁵ Yam yaox Sawlux haok hwan kaing jhaw yuh Davit, nawh lhat ka Davit. ¹⁶ Pui Isarelax mai pui Yudax khankix, kied moh ka Davit, mawh kheu Davit laig lih ka sivoe ngai kix. ¹⁷ Sawlux ah nin ka Davit, "Kawn bun ting aux Merat ot tin, aux tak tawx maix moeng, kieh maix mawh ngie pui vao ka son aux mai puing naing son Simiang Siyiex khaing." Sawlux hoik keud yuh nin, "paw lai kieh taix aux hoek piang nawh, kieh taix pui Philitix hoek piang nawh." ¹⁸ Davit ah nin ka Sawlux, "Mawh aux pui mawx daux pui Isarelax mai mawh paox nyiex keeing aux pui pa yuh ka mawx, aux lai khaw ti mawh kheue simiang lie?" ¹⁹ Yam hoek bawg yam tawx kix Davit moeng Merat, kix deeh tieh ti tawx Merat mex ka Adrelax pui Mehawlatix. ²⁰ Kawn bun Sawlux Mikhalax moh ka Davit, kix krai grawng an ka Sawlux mai nawh khaw rhawm kah. ²¹ Mai Sawlux keud ah nin, "Aux tak tawx kawn bun tix ka Davit sonsang mawh kie ka son nawh mai taix pui Philitix tak hoek yuh ka nawh. Sawlux ah nin ka Davit ra bawg tix bawg, "Maix tak mawh kheue aux daux in singaix." ²² Mai Sawlux tawx lox ka kawncau tix khankix, "Briex pex sikah ka Davit ah nin, jhak heue, simiang khaw rhawm ka maix mai kawncau nawh khankix kawx moh ka maix, yam in rieb maix mawh kheue simiang" ²³ Mai kawncau Sawlux khankix krai Davit mhong ceu in. Davit pawk ah nin, "Mawh keud pex grawng mawh aux kheue simiang mawh ceu pa iak pa lied lie? Aux mawh pui hot mai mawh pui pa ang koe min plakngai." ²⁴ Mai kawncau Sawlux khankix krai grawng "Pa krai Davit ka nawh ah nin." ²⁵ Sawlux ah nin, "Pex tak krai awm inkix ka Davit, simiang ang koe rhawm ti teei kraung tidtix ka son kapaox, lheu khaing toh hak pui Philitix tix yieh kaux, sonsang pawk bix tix piang pui koeng nawh." Mawh kheu Sawlux hoik keud tix kieh Davit yum ka daux taix pui Philitix. ²⁶ Yam krai kawncau Sawlux khankix lox in ka Davit, mawh pa khaw rhawm Davit sonsang mawh kheue simiang. sivoe ang bawg yam tat ti deuh nyang hoek. ²⁷ Davit kaoh hu tau mai pui nawh khankix mai pah pui Philitix ra yieh mai Davit viex toh hak kix mai tawx ka simiang tom naog, sonsang mawh tix kheue simiang. Mai Sawlux tawx nawh moeng kawn bun tix Mikhalax. ²⁸ Yam yaox Sawlux mai hoik tawng ot Simiang Siyiex tau mai Davit mai kawn bun Mikhalax hoik moh ka nawh, ²⁹ Sawlux kawn nie baox lhat ka Davit. Mawh kheu nan, Sawlux lih ti mawh pui koeng Davit hu sipie. ³⁰ Cub cao kaing pui Philitix khankix lih hu puing naing, yam lih hu kix daux naing yam mawx ang ah, Davit nie lheu haok hwan kaing jhaw yuh khaing kawncau Sawlux khankix mai ceu kaux Davit kied ao min tete heue.

¹ Sawlux sikah ka kawn simex tix Yawnasan mai ka kawncau nawh khankix, sonsang pah kix ka Davit. Viang mawh nan, kawn simex nawh Yawnasan kied moh ka Davit. ² Mai Yawnasan krai ka Davit, "Keeing aux Sawlux sawg ti pah ka maix, mawh kheu nan, yuh satix ka tokaux maix tom hoek plak ponngawb pasax mai mox tix ot dee glip, " ³ "Mai aux tak lih cung hawt praok keeing tix daux kaung dee ot maix mai aux tak krai grawh grawng maix ka keeing aux, aux tak krai maix tawng ka can pa yaox tix." ⁴ Yawnasan krai grawng Davit ka keeing tix Sawlux mhawm mhawm ah nin, "Paw kieh simiang yuh krax lud ka kawncau tix Davit, mawh kheu nawh ang yuh krax lud ka maix mai nawh yuh kaing pa mhawm piang maix." ⁵ "Mawh kheu nawh ang lai lhawk ka ju tix mai pah ka pui Philitix khankix, Simiang Siyiex kieh yuh bwanson krax taoh ka son ceu pui Isarelax khawmuik maix hoik yaox ceu an gaux rhawm ka, yuh patix maix lai yuh krax lud ka nham pa ang koe phimap, sonsang pah Davit ka daux pa ang koe grawng tidtix?" ⁶ Sawlux kawx nghiet ka lox Yawnasan, nawh hoik tiextu ah nin, "Awm im ju Simiang Siyiex, tak ang pah ka Davit." ⁷ Mai Yawnasan kok ka Davit mai krai nawh mhong grawng in khawmuik. Yawnasan deeh viex Davit hoek ka Sawlux mai yaox ti ot sivoe ngai nawh awm phao voe. ⁸ Yam baox koe naing, Davit hu puing ka pui Philitix mai pah kix tom nie mai kix hoik to khaing nawh. ⁹ Khwan caox khaing Siyiex lih hoek piang Sawlux, yam ngawm nawh ka daux nyiex haw mai giex pliah ka daux taix tix, mai Davit kawx tah ting. ¹⁰ Sawlux coca ti blung Davit ka pliah ka ding, viang mawh nan, Davit via tix khaing Sawlux mai nawh blung pliah laig ka ding. Mai Davit to sonsang luad luan ka daux sawm an. ¹¹ Sawlux ploi cao cau khankix hu ka nyiex Davit, sonsang pau kix ti pah nawh ka daux ponngawb. Mai Mikhalax moeng Davit ah nin ka nawh, "Phan maix ang to sonsang taoh ju tix daux sawm in, pui tak pah maix yum pasax." ¹² Mikhalax kieh Davit lih khaing daux siviex iak, mai nawh to singai sonsang luad luan tix. ¹³ Mikhalax teei riang Terax tix mu mai deuh piang ku it mai deuh mhawn gaong hauk pex ka kaing an mai lhop riang an ka prux. ¹⁴ Yam ploi Sawlux cao cau khankix hu teei Davit, Mikhalax ah nin, "Nawh kawn saux." ¹⁵ Khaix an Sawlux baox ploi cao cau khankix hu ka Davit ah nin, "Viex hoek ka aux khawm ku it nawh, sonsang pah aux ka nawh." ¹⁶ Yam laig cao cau khankix ka daux, jhak heue, riang Terax koe piang ku it tau mai mhawn gaong hauk pex pa koe ka kaing an. ¹⁷ Sawlux ah nin ka Mikhalax, "Kheu maix lai luk lik ka aux mai kieh pui koeng aux hu sonsang luad luan lie? " "Mikhalax pawk ka Sawlux ah nin, nawh ah nin, ploi aux hu, phan ang mawh nan, aux tak pah ka maix." ¹⁸ Mai Davit to sonsang luad luan tix mai nawh hu ka Samoelax ka veng Ramax mai krai nawh mhong grawng pa yuh Sawlux ka tix. Nawh mai Samoelax lih hu ot ka yaong Nayok. ¹⁹ Kix krai Sawlux mhong grawng ot Davit ka yaong Nayok haktiex Ramax. ²⁰ Sawlux ploi cao cau khankix hu giex Davit, yam yaox kix cao jhai khankix ah lox jhai mai Samoelax cung ti mawh cao kaing ka kix, khwan Simiang Siyiex lih hoek piang cao cau Sawlux khankix mai kix kawx ah lox jhai. ²¹ Yam krai kix an ka Sawlux, nawh deeh ploi cao cau tang kaux khankix mai kix kawx ah lox jhai. Mai Sawlux ploi cao cau khankix bawg loe mai kix kawx ah lox jhai. ²² Khaix an, tokaux nawh hu ka veng Ramax mai hoek ka rawm daux ting pa koe ka Sekhu, mai nawh chawk ah nin, "Ot Samoelax mai Davit dee mawx?" mai pui tix kaux ah nin, "Kix ot haktiex Ramax." ²³ Nawh lih khaing tan mai hu ka yaong Nayok haktiex Ramax mai khwan Siyiex kawx hoek piang nawh, nawh ah lox jhai mai lawng tix krax tom hoek ti ka yaong Nayok haktiex Ramax. ²⁴ Nawh peeik kraung ceep tix mai ah lox jhai sivoe Samoelax, nawh it mai ang ceep kraung ku singaix. Mawh kheu nan, kix tom ah nin, "Mawh ot Sawlux sinax cao jhai khankix lie?"

¹ Khaix an Davit to khaing yaong Nayok haktiex Ramax mai hoek ah nin ka Yawnasan. "Mawh hoik yuh aux patix lie? mawh hoik lud aux ka tix lie? mai hoik yuh aux phimap tix sivoe keeing maix, nawh lai sawg ka ju aux lie?" ² Mai Yawnasan pawk ah nin ka nawh, "Ang doh mawh nan maix tak ang yum. Jhak heue, keeing aux yuh ceu pa iak ang ah, pa ang nawh kieh aux tawng ang koe, keeing aux tak mox ceu in khaing aux yuh ka mawx? an ang doh mawh nan." ³ Mai Davit tiextu ah nin, "Keeing maix hoik tawng pon aux bwanson ka plak sivoe ngai maix mai nawh tak ah nin, "Paw kieh Yawnasan tawng ka grawng in, phan ang mawh nan, nawh tak laux rhawm awm im ju Simiang Siyiex mai awm im ju maix, sinax aux mai krax yum koe ngie tix diang khaing. ⁴ Mai Yawnasan ah nin ka Davit, "Koe rhawm maix yuh ka mawx, aux tak yuh ka son maix." ⁵ Davit ah nin ka Yawnasan, "Jhak heue, pasax mawh singaix haok khix khraox, aux ang khaw ti ngawm pheen mai simiang, viang mawh nan, kieh aux hu mox tix ka daux kaung tom hoek ponbo ka daux loe ngaix tix ngaix." ⁶ Phan keeing maix yaox ang aux ot maix tak ah nin, Davit hoik mhaing akhwang khyox khaw ka aux, sonsang ing ka Bieliehiem veng ot tix, mawh kheu pao nyiex nawh caw ti yuh krax tan pa yuh kix ku num ⁷ Phan nawh ah nin, mhawm heue, kawncau maix tak pon luad luan, phan nawh song rhawm, tak tawng nawh keud tix yuh pa caox. ⁸ Mawh kheu nan, caux rhawm ka kawncau maix liak, mawh kheu hoik yuh maix sijax mukheu mai kawncau tix plak sivoe Simiang Siyiex, phan krax lud koe ka daux aux, kieh cao maix pah ka aux, mawh kheu maix tak viex aux ka keeing tix yuh ka mawx lie?" ⁹ Yawnasan ah nin, "Kieh an singai khaing maix! phan aux hoik kriem tawng keeing aux keud ti sang yuh pa caox piang maix, aux tak ang krai ka maix lie?" ¹⁰ Mai Davit ah nin ka Yawnasan, "Phan keeing maix pawk lox kin ka maix, mawh pui mawx pa sang krai aux mhong lie?" ¹¹ Yawnasan ah nin ka Davit, "Hoek heue, kieh ax lih hu ka daux kaung." Mai kiex khawm ra kaux lih hu daux kaung. ¹² Mai Yawnasan ah nin ka Davit, "Kieh Simiang Siyiex pui Isarelax mawh mhai rug! yam mhong aux lox keeing tix bawg yam in pasax, phan ang mawh nan sikaox, jhak heue, phan mawh pa mhawm ka son Davit, aux tak ang ploi pui hoek krai ka maix lie? " ¹³ "Phan keeing aux keud ti sang yuh pa caox ka maix mai phan aux ang krai maix mhong sonsang luad luan maix, kieh Simiang Siyiex baox lheu yuh pa kin ka aux" Yawnasan, "Kieh Simiang Siyiex ot mai maix, awm ot Nawh Cao mai keeing aux." ¹⁴ "Phan aux kawn im ju jhi krax caux rhawm Simiang Siyiex ka aux, sonsang ang aux yum." ¹⁵ Paw tat krax caux rhawm maix pa koe ka pao nyiex aux leeing ju. Awm yam tat Simiang Siyiex ka pui koeng Davit khaing piang haktiex in, ¹⁶ Mai Yawnasan yuh sijax mukheu mai doeh nyiex ma Davit ah nin, "Kieh Simiang Siyiex pawk bix ka pui koeng Davit khankix." ¹⁷ Yawnasan baox kieh Davit tiextu kheu krax moh pa moh nawh ka Davit, mawh kheu nawh moh Davit awm moh nawh ka tokaux tix. ¹⁸ Khaix an, Yawnasan deeh ah nin ka Davit, "Daux pasax, mawh singaix khix khraox maix tak ang ot, mawh kheu khaox ngawm maix kawx tak yi. ¹⁹ Yam hoik ot maix loe ngaix maix tak nied ti lih hu ka dee mox maix tix ka daux singaix pa yuh ceu an mai pau hawt rang Ezelax." ²⁰ "Aux tak puing te loe taix hawt praok an, awm puing aux ka mhai. ²¹ Jhak heue, aux ploi kawn nyawm iak ah nin ka nawh, hu sawg ka te an phan aux ah nan ka kawn nyawm iak, jhak ka te pa koe ka praok maix hu teei viex hoek tin, awm im ju Simiang Siyiex maix kawx yaox ti luad luan mai krax lhat ang lai koe son maix." ²² "Phan aux ah nin ka kawn nyawm iak an, Jhak heue, te hoik luan ka sivoe maix, khaix an maix tak hu heue, mawh kheu Simiang Siyiex hoik ploi maix hu dee singai". ²³ "Mawh kheu grawng pa hoik sikah maix mai aux, jhak heue, Simiang Siyiex tak mawh mhai rug sinax maix mai aux leeing ju." ²⁴ Davit mox tix ka daux kaung mai yam hoik hoek singaix khix khraox, simiang ngawm sonsang ih priex. ²⁵ Simiang ngawm piang khaox ngawm tix awm ku bawg piang dee ngawm hawt ding, Yawnasan cung mai Abana ngawm ka praok Sawlux, viang mawh nan dee ngawm Davit hoik yi. ²⁶ Mai Sawlux ang lai ah lox tidtix ka daux singaix an, mawh kheu hoik keud nawh, Tee koe grawng tix ceu ka Davit, nawh tee ang singax, nawh tee ang singax. ²⁷ Daux singaix khaix, khix khraox ra ngaix tix ngaix, dee ngawm Davit hoik baox yi. Mai Sawlux ah nin ka kawn simex tix Yawnasan, "Kheu kawn simex Yessie ang hoek ti ih praix kawx tom in singaix jao patix?" ²⁸ Yawnasan pawk ka Sawlux ah nin, "Davit hoik mhaing akhwang khyox khaw ka aux, sonsang hu ka Bieliehiem, " ²⁹ Nawh ah nin, "Kieh aux hu yuh krax tan tau mai paox nyiex aux khankix ka daux veng mai puxke aux hoik tawm lox sonsang hoek aux tan. Phan mawh pa pon bwanson ka sivoe ngai maix kieh aux hu yaox ka puxke tix khankix Mawh kheu jao in nawh tom ang hoek ka pheen sawm simiang." ³⁰ Mai Sawlux kied song rhawm ka Yawnasan mai Sawlux ah nin ka nawh, "Maix pa mawh kawn simex khaing bun, pa ang nghiet lox mai pa tieh feen, mawh ang aux tawng laug maix kawn simex Yessie mawh krax kaig ka tokaux cao tix mai kieh vaig miex tix kaig lie?" ³¹ "Glang yam kawn im ju kawn simex Yessie piang haktiex in maix ang ah, meung haktiex maix ang ah, tak ang kaux cong. Yam in ploi pui hu sawg mai viex nawh hoek ka aux, mawh kheu nawh tak yaox ti yum tete." ³² Khaix an Yawnasan pawk lox keeing tix Sawlux ah nin, "Kheu nawh tak yaox ti yum lie? Mawh hoik yuh nawh patix lie?" ³³ Sawlux puah plia tix ka nawh sonsang pah Yawnasan, mawh kheu nan, Yawnasan hoik tawng keeing tix sang pah ka Davit. ³⁴ Mai Yawnasan yaog tix khaing pheen sawm mai pa kied song rhawm tix ang lai ih priex daux khix khraox ra ngaix tix ngaix, mawh kheu nawh koe krax voi rhawm son Davit, kheu jao yuh keeing nawh krax kaig ka nawh. ³⁵ Yawnasan hu daux kaung plak ponngawb, tau mai kawn nyawm iak ka bawg yam tin ti deuh mai Davit. ³⁶ Mai nawh tawx lox ka kawn nyawm an ah nin, "To maix hu sawg te pa hoik puing aux." Yam to kawn nyawm an, nawh puing te tix taix sivoe kawn nyawm iak an. ³⁷ Yam hoek kawn nyawm iak ka dee cod te puing Yawnasan, Yawnasan kok yo plak khaix kawn nyawm iak an ah nin, "Ang te koe sivoe maix lie?" ³⁸ Mai Yawnasan kok yo plak khaix kawn nyawm iak an, "Nied phai phai, paw lai kaog." Kawn nyawm iak cie Yawnasan sut ka te mai deeh hoek ka cao simiang tix. ³⁹ Mai kawn nyawm iak an ang tawng ka tidtix, mawh ngie Yawnasan mai Davit pa tawng ka grawng an. ⁴⁰ Khaix an Yawnasan tawx kraung naing tix ka kawn nyawm iak an ah nin ka nawh, "Viex in khankix ing ka daux veng." ⁴¹ Khaix hoik lih hu kawn nyawm iak an, Davit kaoh khaing dee ot tix ka plak seh mai gup pakngai tix piang tiex loe bawg mai kiex ngheet paox tix, kiex yiiem tau, Davit nie lheu yiiem khaing nawh. ⁴² Khaix an Yawnasan ah nin ka Davit, "Hu ka daux pa nhim, mawh kheu krax tiextu pa hoik yuh ax tau mai min ceu kaux Simiang Siyiex pa ah nin, Simiang Siyiex tak ot sinax aux mai maix mai sinax doeh ru aux mai doeh ru maix leeing ju." Mai Davit kaoh lih hu, Yawnasan kawx deeh ing ka daux veng heue.

¹ Davit hu ka cao giex kaing li Ahimaliet ka veng Nawbax, mai Ahimaliet hoek pub ka Davit mai lhat graung tix ah nin ka nawh. "Kheu maix lai hoek nong nong mai pui hoek mai maix ang koe tix kaux kawx lie?" ² Davit deeh ah nin ka cao gie kaing li Ahimaliet, "Simiang tawx lox ka aux grawng kaing tix ceu ah nin ka aux, paw kieh pui tix kaux kawx tawng ka grawng pa ploi aux maix yuh tix ceu kawx, ka pa hoik tawm aux ka maix. Mai aux hoik ploi pui awn ju khankix hu sivoe tix ka dee an." ³ Yam in, "Koe ti daux taix maix. Tawx blah ka aux phwan lon liak, phan ang mawh nan koe pa ih tang ceu lie?" ⁴ Cao giex kaing li pawk ka Davit ah nin, "Ang koe blah pa pon pui ti ih ku kaux ka daux taix aux, mawh ngie blah pa singax khaing, mawh ngie kawn nyawm simex pa via tix khaing bun pa pon ti ih." ⁵ Mai Davit pawk ka cao giex kaing li ah nin, "Yam lih yix krax yix kieh tokaux ti singax khaing bun ku bawg, tokaux kawn nyawm simex pa lih krax in mawh pa singax, lheu khaing an in singaix tokaux ex baox nie singax singeh." ⁶ Mawh kheu nan, cao giex kaing li tom tawx blah singax singeh an ka nawh, kheu ang blah tang ceu lai koe lheu khaing blah pa khan tix tan, pa teei lih khaing sivoe ngai Siyiex, sonsang deuh blah khraox singaix teei ka blah prim an lih. ⁷ Daux singaix an koe pui tix kaux pa pau tan nawh mawh kawncau Sawlux, koe beeh glawm pau plak sivoe Simiang Siyiex, ceu kaux nawh mawh Dawga pui Edom, mawh cao kaing cao liang yung Sawlux. ⁸ Mai Davit ah nin ka Ahimaliet, "Koe pliah phan ang mawh nan vaig ka daux taix maix tix mu lie? mawh kheu ang aux viex vaig mai kraung naing mai tix, kheu mawh kaing jhaw simiang pa caw pa nied ti yuh." ⁹ Cao giex kaing li ah nin, "Vaig Gawliax pui Philitix pa pah maix ka daux ngawd Elax, jhak heue, kawn pua tix ka man plak khaix dee koe sibex dhah tan, phan maix sang teei an teei heue, lheu khaing vaig an tang mu ang lai koe tin, " mai Davit ah nin, "Vaig pa awm an ang koe, tawx vaig an ka aux heue." ¹⁰ Mai Davit kaoh to hu khaing Sawlux daux singaix an mai hu ka Akhix simiang Gata. ¹¹ Mai kawncau Akhix khankix ah nin ka nawh, "In ang mawh Davit pa mawh simiang haktiex an lie?" Ang mawh kix pa rhax lai mai rieb nawh ah nin, "Sawlux hoik pah pui kaing rheng kaing rheng mai Davit hoik pah pui kaing mheen kaing mheen ang mawh lie?" ¹² Yam deuh Davit tix tawng ka lox an daux rhawm tix mai nawh kied lhat ka Akhix simiang Gata. ¹³ Nawh tieh loh jhawm yuh tix sivoe kix mai yuh tix awm pui yhot, kruk kried ti tiiem lai piang siviex mai kieh rawm mia tix jaw ka hauk bheep tix. ¹⁴ Akhix ah nin ka kawncau tix khankix, "Jhak heue, pex yaox pui in mawh pa yhot, pex lai viex nawh hoek ka aux lie?" ¹⁵ "Mawh lo aux ka pui yhot lie? pex lai viex pui in yuh pui yhot sivoe ngai aux, mawh keung pui in ti laig ka daux nyiex haw aux lie?"

¹ Davit lih hu khaing tan mai to ti luad luan mai hoek daux rang Adulam, yam mhong puxke nawh mai paox nyiex keeing nawh khankix ka an, kix lih hu ka nawh. ² Pui pa koe krax kha rhawm, pui pa koe ceuk mai pui pa ang fah rhawm khankix, khrawm paox tix hoek ka nawh, nawh lih ti mawh cao kaing kix. Pui pa ot mai nawh tan, koe pui pon yieh. ³ Davit lih khaing tan mai hu ka Mizapa haktiex Mawbax, nawh ah nin ka simiang Mawbax, "Yuh bwanson kieh miex keeing aux ot tin mai maix, tom hoek bawg yam tawng aux ka pa yuh Simiang Siyiex ka aux." ⁴ Nawh viex kix hoek mai prah kix ot mai simiang Mawbax, kiex ot tau mai nawh glang bawg yam kawn kaux cong ot Davit ka daux rang. ⁵ Mai cao jhai Gat ah nin ka Davit, "Paw lai ot ka daux rang dee pa kaux cong, lih hu mai hu ka haktiex Yudax." Mai Davit lih hu mai hu ot ka daux tiag Hariet. ⁶ Mai Sawlux hoik mhong yaox kix ka Davit, khawm pui pa ot mai nawh khankix, yam an Sawlux ot piang gawng Gebat, greem khaox, ka veng Ramax tau mai pliah pa koe daux taix nawh mai kawncau nawh khankix cung hawt vung viang nawh, ⁷ mai Sawlux ah nin ka kawncau tix khankix, pa cung hawt nawh, "Pui Binyamin khankix nghiet heue, mawh sang tawx kawn simex Yessie kaung mai sipeem plix siiet ka pex mai yaog pex mawh cao kaing naing pui kaing rheng mai pui kaing yieh lie?" ⁸ "Pex khawmuik hoik khrawm tix tieh feen yuh pa caox ka aux mai ang krai aux mhong tidtix, yam yuh kawn simex aux sijax mukheu mai kawn simex Yessie, ang koe pui laux rhawm mai aux mai ang krai aux mhong grawng pa so kawn simex aux ka kawncau khankix tieh feen mai jawm ka aux daux in singaix." ⁹ Khaix an Dawga pui Edom cao kaing kawncau Sawlux khankix, pawk ah nin, "Aux yaox kawn simex Yessie hoek ka veng Nawbax dee ot Ahimaliet kawn simex Ahitut." ¹⁰ "Ahimaliet chawk Simiang Siyiex ka son nawh mai tawx pa ih mai vaig Gawliax pui Philitix ka nawh." ¹¹ Mai simiang hu kok ka cao giex kaing li Ahimaliet kawn simex Ahitut mai pao nyiex keeing nawh tau mai cao giex kaing li pa ot ka veng Nawbax, mai kix hoek ka simiang khawmuik. ¹² Mai Sawlux ah nin, "Kawn simex Ahitut eue, nghiet heue, " nawh deeh ah nin, "Simiang aux eue, aux ot tin." ¹³ Mai Sawlux ah ka nawh, "Kheu pex mai kawn simex Yessie hoik khrawm ti yuh pa caox mai tieh feen ka aux mai maix lai tawx blah mai vaig ka nawh mai chawk cheng Siyiex ka son nawh, sonsang yaog ti tieh feen mai jawm ka aux, ka daux singaix lie?" ¹⁴ Ahimaliet pawk ah nin ka simiang, "Mawh pui mawx ka daux kawncau maix khankix pa kaux sijax awm Davit, pa mawh kheue simiang cao giex kaing li mai pa koe min plakngai ka daux nyiex maix lie? ¹⁵ In singaix mawh hoik chawk aux Siyiex ka son nawh lie? ang mawh pa kieh simiang deuh phimap ka kawncau tix mai paox nyiex keeing aux khankix, mawh kheu kawncau maix ang tawng ceu in mawh pa iak pa ting ang ah." ¹⁶ Simiang ah nin, "Ahimaliet eue maix khawm paox nyiex keeing maix tak yum tete." ¹⁷ Mai simiang ah nin ka cao pau pa cung tix pau vung viang nawh khankix, "Veeh tix mai pah cao giex kaing li Simiang Siyiex khankix, mawh kheu ot taix kix ka plak Davit mai tawng ka to nawh mai ang krai an ka aux." "Viang mawh nan, kawncau simiang khankix ang pon kieh taix tix hoek piang cao giex kaing li Simiang Siyiex sonsang pah ka kix." ¹⁸ Mai simiang ah nin ka Dawga, "Veeh ti pah ka cao giex kaing li khankix, " mai Dawga veeh ti pah cao giex kaing li khankix mai pah pui ceep sibex dhah tixdaix phwan kaux daux singaix an. ¹⁹ Nawh pah pui veng Nawbax, veng ot cao giex kaing li khankix, khawm simex bun mai kawn nyawm, kawn ngie mai mawie, la, yung khankix ka vaig. ²⁰ Viang mawh nan, kawn simex Ahimaliet, kawn simex Ahitut pa kaux Abiata pon ti klawd mai to ti hawt Davit. ²¹ Mai Abiata krai Davit mhong ka pah Sawlux cao giex kaing li Siyiex khankix. ²² Mai Davit ah nin ka Abiata, "Daux singaix an yam ot Dawga pui Edom tan, aux hoik tawng nawh tee krai ka Sawlux tete. Hoik mawh aux pa kieh nyiex ma keeing maix hoek krax yum. ²³ Ot tau mai aux, paw lhat graung, pui pa sawg ka ju aux tak mawh pa sawg ka ju maix, maix ot mai aux tak yaox tix luad luan heue."

¹ Kix krai ka Davit, "Jhak heue, pui Philitix puing ka veng Kilax mai rhim nghox ka daux glah." ² Mai Davit chawk Simiang Siyiex, "Mawh khaw aux ti hu puing ka pui Philitix in lie?" Mai Simiang Siyiex ah nin ka Davit, "Hu mai puing ka pui Philitix mai taoh veng Kilax." ³ Pui Davit khankix ah nin ka nawh, "Jhak heue, yam ot ex ka haktiex Yudax. ex kawn koe krax lhat graung miex ding lie?" ⁴ Mai Davit baox chawk cheng ka Simiang Siyiex. Simiang Siyiex pawk ka nawh ah nin, "Kaoh lih hu ka Kilax, mawh kheu Aux tak ap pui Philitix ka daux taix maix." ⁵ Davit mai pui nawh khankix hu ka Kilax, puing pui Philitix khankix mai viex tobrie kix hu mai pah ka kix tom nie. Mawh kheu nan, Davit tom taoh pui ot ka veng Kilax khankix. ⁶ Yam to Abiata kawn simex Ahimaliet ti hoek ka Davit ka Kilax, nawh viex sibex dhah tix pheen hoek mai tix. ⁷ Pui krai hoik hu Davit ka veng Kilax ka Sawlux. Mai Sawlux ah nin, "Siyiex hoik ap nawh ka daux taix aux, mawh kheu nawh hoik laig ot ka daux veng pa hoik nyeep jhong siviex, awm pa hoik laung cao tix." ⁸ Sawlux khrawm pui khankix sonsang yuh naing mai lih hu ka veng Kilax sonsang lai lawm Davit mai pui nawh khankix. ⁹ Davit tawng keud Sawlux ti yuh pa caox piang tix, nawh ah nin ka Abiata cao giex kaing li, "Viex sibex dhah an hoek tin." ¹⁰ Davit ah nin, "Simiang Siyiex pui Isarelax eue, kawncau Maix Cao hoik mhong kriem sawg Sawlux daux krax sang hoek ka veng Kilax mai yuh laux leeing ka veng kheu jao aux. ¹¹ Mawh sang ap pui veng Kilax aux ka daux taix nawh lie? Mawh sang lih hoek Sawlux, awm pa hoik mhong kawncau Maix Cao lie? Simiang Siyiex pui Isarelax eue, aux rawg bwan ka Maix Cao, krai ka kawncau Maix liak." Mai Simiang Siyiex ah nin, "Nawh tak lih hoek." ¹² Davit ah nin, "Mawh sang ap pui veng Kilax aux mai pui aux khankix ka daux taix Sawlux lie?" mai Simiang Siyiex ah nin, "Kix tak ap maix." ¹³ Davit mai pui nawh been liah yieh kaux, lih hu khaing veng Kilax, kix lih hu ka dee pon hu tix. Yam mhong Sawlux krai pui hoik to Davit khaing Kilax mai nawh ang lai hu tan. ¹⁴ Mai Davit ot ka daux tiag nong piang gawng daux tiag Zipha. Sawlux sawg nawh ku singaix, viang mawh nan, Simiang Siyiex ang nyang ap Davit ka daux taix Sawlux. ¹⁵ Davit yaox hoek sawg Sawlux ka ju tix mai nawh ot ka daux tiag Zipha haktiex Horiet. ¹⁶ Yawnasan kawn simex Sawlux kaoh hu ka Davit ka haktiex Horiet mai tawx riang sonsang koe riang nawh ka daux Siyiex. ¹⁷ Mai nawh ah nin ka Davit, "Paw lhat, mawh kheu taix keeing aux Sawlux tak ang hoek piang maix, maix tak mawh simiang piang pui Isarelax mai aux tak mawh cao kaing ting greem maix, viang keeing aux Sawlux tawng ka grawng in kawx." ¹⁸ Mai kiex khawm ra yuh sijax mukheu ka plak sivoe Simiang Siyiex, Davit ot ka haktiex Horiet mai Yawnasan deeh ing ka nyiex tix. ¹⁹ Pui Zipha haok hu sawg Sawlux ka Gibat ah nin, "Ang Davit mox tix mai yix, piang gawng Hakhilax, pa koe ka plak seh veng Yeshimon lie?" ²⁰ Simiang eue, lih hoek awm pa koe rhawm maix ti sang hoek, mai yix tak ap nawh ka daux taix simiang." ²¹ Mai Sawlux ah nin, "Kieh Siyiex nawb bwan piang pex, mawh kheu caux rhawm pex ka aux." ²² Hu sawg ti yaox tom kriem, mai jhak ti yaox ot nawh dee mawx, mawh pui mawx pa yaox nawh tan, mawh kheu pui krai aux mhong nawh kied lhak tete." ²³ "Mawh kheu nan, jawm ti jhak ka dee ot dee mox nawh tix mai deeh hoek krai aux mhong kriem kriem. Mai aux tak hu mai pex phan nawh ot ka daux haktiex an, aux tak sawg nawh khaing sinax pui Yudax kaing rheng kaing mheen." ²⁴ Kix kaoh mai dha ti hu sivoe Sawlux, ka Zipha. Davit mai pui nawh khankix ot ka daux tiag Mawnax, ka daux Arabax plak seh veng Yeshimon. ²⁵ Sawlux mai pui nawh khankix sawg ka Davit mai pui hoek krai an ka Davit mai nawh lih hu ka daux rang pa koe daux tiag Mawnax. Yam mhong Sawlux ka an, nawh hawt pheet khaix Davit ka daux tiag Mawnax. ²⁶ Sawlux hu ka gawng plak in mai Davit khawm pui nawh khankix hu ka gawng plak an, mawh kheu nan Davit nied ti hu singai khaing Sawlux mai Sawlux khawm pui nawh khankix lai lawm ka Davit mai pui nawh sonsang giex ka kix. ²⁷ Yam hoek pui cau tix kaux ka Sawlux ah nin, "Nied hoek phai, mawh kheu pui Philitix hoek laig ti puing ka haktiex." ²⁸ Sawlux deeh hoek khaing pheet tix khaix Davit mai hu puing ka pui Philitix, mawh kheu nan kix tom kok dee an mawh Selax Hamalekok. ²⁹ Mai Davit lih khaing tan mai ot ka dee kaux cong ka Engedi heue.

¹ Yam deeh hoek Sawlux khaing hawt tix khaix pui Philitix mai koe pui krai ka nawh ah nin, "Jhak heue, Davit ot ka daux tiag Engedi." ² Khaix an Sawlux teei pui loe rheng kaux pa hoik laug khaing pui Isarelax mai hu sawg Davit khawm pui nawh ka daux tiag dee ot pex rang khankix." ³ Mai Sawlux hoek ka kawg yung dex krax mai daux rang koe tix mu tan, mai Sawlux laig ka daux sonsang klawd tix. Davit mai pui nawh khankix ot ka dee raux daux rang. ⁴ Pui Davit khankix ah nin ka nawh, "In singaix mawh singaix ah Simiang Siyiex nin ka maix, jhak heue, aux tak ap pui koeng maix khankix ka daux taix maix, maix tak yuh can pa simie maix ti yuh ka nawh, awm pa khaw maix ti yuh." Davit kaoh mai briex pat toh sibex dhah Sawlux. ⁵ Khaix an Davit kied laux rhawm ka tix kheu jao pat nawh toh sibex dhah Sawlux. ⁶ Nawh ah nin ka pui tix khankix, "Kieh Simiang Siyiex tiebtie can pa sang yuh aux ka simiang tix, pa hoik groi Simiang Siyiex bee ka nawh, sonsang nyeu aux taix tix mai yuh nawh laux, jhak heue, kheu mawh nawh pui pa hoik groi Simiang Siyiex bee kah." ⁷ Davit tieb kawncau tix ka lox an mai ang tawx akhwang yuh laux ka Sawlux. Mai nawh kaoh khaing daux rang mai lih hu krax hu tix. ⁸ Khaix an Davit kaoh, mai lih hu khaing daux rang kok yo Sawlux ah nin, "Simiang aux eue, " yam gi Sawlux ka plak khaix tix, Davit gup pakngai tix piang tiex mai krub ka nawh. ⁹ Davit deeh ah nin ka Sawlux, "Maix ca kawn nghiet ka lox krai pui khankix pa ah nin, jhak heue, Davit sawg ti yuh maix laux leeing, kheu grawng pa yuh ka mawx?" ¹⁰ Ka daux in singaix, ngai maix hoik yaox ka ap Simiang Siyiex maix ka daux taix aux ka daux rang in, pui tiblah tawx riang aux, sonsang pah aux maix, viang mawh nan, aux caux rhawm ka maix mai aux ah nin, aux tak ang nyeu taix tix piang cao simiang aux, mawh kheu nawh mawh pui pa hoik groi Simiang Siyiex bee piang. ¹¹ Keeing aux eue, jhak ka toh sibex dhah maix pa koe daux taix aux in, mawh kheu aux pat ti teei ngie toh sibex maix mai ang pah maix, deuh ti tawng ka ang pa caox caig mai pa tieh feen koe ka daux taix aux, aux ang koe phimap krax lud piang maix, viang mawh nan maix ca kawn sawg ti teei ju aux yum." ¹² Kieh Siyiex prawng ca sinax maix mai aux, kieh Simiang Siyiex pawk bix aux piang maix, viang mawh nan, aux tak ang kieh taix tix hoek piang maix. ¹³ Awm koe lox kab pui didix ah nin. Ceu pa caox mawh pa kaoh khaing daux pui pa caox caig, viang mawh nan, aux tak ang kieh taix tix hoek piang maix. ¹⁴ Mawh lih hoek simiang pui Isarelax ti hawt khaix pui mawx? Mawh hawt pheet ka pui mawx? Mawh sawg maix sox yum lie? Mawh sawg maix ka diiep lie? ¹⁵ "Kieh Siyiex mawh cao prawng see mai prawng ka sinax aux mai maix, mai jhak teem ka see aux mai taoh aux khaing daux taix maix." ¹⁶ Yam hoik krai Davit lox khankix ka Sawlux mai Sawlux pawk ah nin, "Kawn simex aux Davit eue, in mawh lox maix lie? mai Sawlux yo lox tix mai yiiem." ¹⁷ Nawh ah nin ka Davit, "Maix mawh pa nie rahsee khaing aux, mawh kheu maix hoik yuh pa mhawm ka aux, yam yuh aux pa caox ka maix. ¹⁸ Maix hoik jhi pa mhawm yuh tix ka aux in singaix mai ang lai pah ka aux yam ap Simiang Siyiex aux ka daux taix maix. ¹⁹ Phan pui tix kaux kaux yaox ka pui koeng tix, mawh sang kieh nawh pui an luad luan lie? kieh Simiang Siyiex yuh bwanson pa mhawm ka maix, kheu pa hoik yuh maix ka aux in singaix." ²⁰ Yam in jhak heue, aux hoik tawng sang mawh maix simiang tete mai meung haktiex Isarelax tak kaux cong ka daux taix maix. ²¹ Mawh kheu nan, tiextu ka aux ka daux ceu kaux Simiang Siyiex, son ang maix tat doeh ru aux khankix khaix aux mai ang yuh min ceu kaux aux laux leeing khaing daux nyiex ma keeing aux khankix." ²² Mai Davit hoik tiextu ka Sawlux, khaix an Sawlux deeh ing ka nyiex tix, Davit mai pui nawh khankix kawx lih hu ka dee pa kaux cong heue.

¹ Samoelax hoik yum mai pui Isarelax khrawm paox tix mai yiiem doe ka son nawh, kix sipaung nawh ka nyiex nawh ka veng Ramax. Mai Davit kaoh hu ka daux tiag Paran. ² Koe pui tix kaux ka haktiex Maon pui yuh lai geu, ot ka veng Kharamelax mai nawh mawh pa kied magmi, nawh koe yung loe rheng mu mai pex tix rheng mu. Mai nawh rhip hauk yung ka veng Kharamelax. ³ Ceu kaux pui an mawh Nabalax mai ceu kaux moeng nawh mawh Abigelax. Bun an koe krax tawng pa mhawm mai mhawm grang, phan mawh simex an koe rhawm kiien mai yuh pa caox mai nawh mawh doeh ru Kaliep. ⁴ Yam ot Davit daux tiag nawh mhong Nabalax rhip ka hauk yung. ⁵ Davit ploi pui awn ju kao kaux ah nin ka kix, "Hu ka Nabalax veng Kharamelax mai rieb singeuh taix nawh ka daux ceu kaux aux. ⁶ Pex tak singeuh taix nawh ah nin, kieh pa nhim koe mai maix, kieh pa nhim koe piang nyiex ma maix mai kieh pa nhim koe piang can pa koe maix khawmuik. ⁷ Aux hoik mhong koe cao rhip hauk yung maix khankix, cao liang yung maix khankix ot tau mai yix tin mai yix yuh krax lud ka kix, yam ot kix ka Kharamelax kix ang grai kraung khrai tix ceu kawx. ⁸ Chawk ti yaox pui awn ju maix khankix, kix tak krai ka maix. Mawh kheu nan, kieh pui awn ju aux khankix pon bwanson plak sivoe ngai maix, mawh kheu hoek yix singaix yuh pawie. Yuh bwanson tawx pa koe daux taix maix tix ceuceu ka kawncau maix mai ka kawn simex maix Davit." ⁹ Yam hoek pui awn ju pui Davit, kix krai ceu an ka Nabalax, ka daux ceu kaux Davit, mai kix kawn pau tan. ¹⁰ Mai Nabalax pawk ah nin ka kawncau Davit khankix, "Davit mawh pui mawx? Kawn simex Yessie mawh pui mawx? yam in kawncau prung prang hu khaing cao simiang tix koe tom nie. ¹¹ Mawh khaw aux ti teei blah, rawm nyaux tix mai nex pa pah aux son cao rhip hauk yung tix khankix mai tawx an ka pui ang aux tawng ka plak kaoh kix khaing dee mawx lie?" ¹² Pui awn ju pui Davit khankix deeh veeh ti hu mai krai grawng an ka Davit. ¹³ Mai Davit ah nin ka pui tix khankix "Kawg vaig tix ku kaux, " pui ku kaux kawx kawg ka vaig tix, Davit kawx kawg ka vaig tix, mai pui been pon yieh kaux hu tau mai Davit, pui ra yieh kaux pau ka kraung khrai. ¹⁴ Koe pui awn ju tix kaux hoek krai ah nin ka Abigelax moeng Nabalax, "Jhak heue, Davit ploi cao cau khankix khaing daux tiag sonsang rieb singeuh taix cao simiang ex mai nawh hoik jhax lawg ka kix. ¹⁵ Pui khankix sax yuh pa mhawm ka yix, yam ot tau yix mai kix ka daux tiag, yix ang sax yaox pa caox mai ang sax grai kraung khrai tix ceu kawx, ¹⁶ kix mawh guh veng ka son yix ka plak pon sawm mai ponngaix, yam liang yix yung mai kix ku bawg. ¹⁷ Yam in kieh tawng mai keud ti yaox pa sang khaw maix ti yuh ka mawx, mawh kheu nawh keud ti yuh pa caox ka cao simiang yix mai piang nyiex ma nawh, mawh kheu mawh nawh pui caox tix kaux kawx ang pon sikah ka nawh." ¹⁸ Khaix an Abigelax nied khre teei blah ra yieh lon mai singiien hak rawm plix siiet ra mu mai nex yung pa hoik sin phwan mu mai nghox ca kroing pa hoik sin phwan e pha mai plix siiet kroh tix yieh sigleem mai khliep plix ruh ra yieh khliep mai nawh tang an khankix piang la. ¹⁹ Mai Abigelax ah nin ka kawncau tix khankix, "Hu sivoe aux, jhak heue, aux tak hawt khaix pex. "Viang mawh nan, nawh ang krai tidtix ka mex tix Nabalax. ²⁰ Mai Abigelax brug la lih ka caong gawng, jhak heue, Davit mai pui nawh khankix lih hoek see Abigelax mai kix pub ka paox tix. ²¹ Davit ah nin, "Aux hoik pau sinngao cie pui in giex going ka daux tiag, kraung khrai cie nawh ang koe pa grai tix ceu kawx, mai nawh pawk pa caox ka son pa mhawm. ²² Daux ponngawb pasax phan aux kawn deuh simex pui Nabalax tix kaux kaux klawd, kieh Siyiex ciyang ka Davit nie lheu khaing an." ²³ Yam yaox Abigelax ka Davit, nawh nied ti lih khaing la gup pakngai tix piang tiex plak sivoe Davit mai krub nawh. ²⁴ Abigelax gup tix ka dex caong Davit ah nin, "Cao simiang aux eue, kieh krax lud an koe piang aux nong nong, kieh kawncau bun maix krai maix mhong mai nghiet ka lox krai kawncau bun maix liak. ²⁵ Paw doh kieh cao simiang aux deuh Nabalax pui caox in koe ceu, mawh kheu jhawm nawh hawt awm ceu kaux nawh, pa mawh Nabalax mai pa caox hoik koe tau mai nawh, viang mawh nan, aux kawncau bun maix, ang caw ti yaox ka pui awn ju simiang aux pui ploi maix hoek." ²⁶ Mawh kheu nan, cao simiang aux eue, awm im ju Simiang Siyiex awm im ju maix, kheu hoik tieb Simiang Siyiex maix khaing krax lud pa kieh nham jauh mai khaing pa deeh pawk maix bix ka taix cao tix, mawh kheu nan, kieh pui koeng maix khankix mai pui sawg ti yuh pa caox ka cao simiang aux awm ka Nabalax." ²⁷ In mawh totaix pa viex kawncau bun maix ka son cao simiang aux mai ap ka pui awn ju pa hawt khaix cao simiang aux khankix. ²⁸ Yuh bwanson pluat ploi krax lud kawncau bun maix liak, mawh kheu Siyiex kieh nyiex ma cao simiang aux kaux cong, kheu jao puing cao simiang aux naing son Siyiex, glang baux yam im ju maix tak ang yaox pa caox ka daux maix." ²⁹ Viang koe pui haoh ti pheet ka maix mai sawg ju maix kawx, ju cao simiang aux tak vien tix tau daux gie kraung im ju pa ot ka daux pa priex rhawm Siyiex maix, mai Nawh Cao tak vud vied ju pui koeng maix khankix, awm vudvied ka simaox daux ak vuh vied. ³⁰ Yam yuh Simiang Siyiex ceu pa mhawm Nawh Cao hoik yuh mukheu ka maix mai yaog maix mawh simiang piang pui Isarelax. ³¹ Cao simiang aux tak ang yaox krax laux rhawm mai pa saux pa laux, mawh kheu kieh nham jauh ka daux pa ang koe krax lud mai mawh kheu pawk cao simiang aux bix tix mai yam yuh Simiang Siyiex ceu pa mhawm ka cao simiang aux mai doh keud ka kawncau bun maix liak?" ³² Mai Davit ah nin ka Abigelax, "Kieh Simiang Siyiex pui Isarelax pa ploi maix hoek pub aux daux in singaix koe bwanson liak! ³³ "Kieh krax keud pa tawx maix koe bwanson mai kieh cao maix koe bwanson, mawh kheu ka daux in singaix maix hoik kieh aux luad luan khaing krax lud pa kieh nham pui jauh mai khaing cao pa pawk bix cao tix, ³⁴ "Awm im ju Simiang Siyiex, Siyiex pui Isarelax, Cao pa kieh aux veeh tix khaing pa yuh pa caox ka maix, phan maix ang nied ti hoek pub ka aux, ponngawb caocao pasax ang lai tau tix koe simex pa lheu tix kaux kawx ka son Nabalax." ³⁵ Mai Davit rieb can pa viex Abigelax khaing taix nawh ah nin ka Abigelax, "Ing hu ka daux pa nhim ka nyiex maix, jhak heue, aux hoik nghiet ka lox maix mai aux kia ka pakngai maix mai nghiet ka lox khyox khaw maix." ³⁶ Mai Abigelax ing ka Nabalax mai yuh pawie awm pawie pa khan kheu ka simiang ka daux nyiex tix. Mai rhawm Nabalax kied koe krax gaux rhawm kheu nie yoek tix, mawh kheu nan, Abigelax ang krai tidtix ka nawh tom bah riang praix ponngawb. ³⁷ Ka daux ponngawb cao, yam hoik vai yoek Nabalax ka rawm plix siiet, moeng nawh krai ceu in khankix ka nawh mai rhawm nawh hoik yum plak daux mai nawh lih cong awm simaox. ³⁸ Khaix hoik luan kao singaix Simiang Siyiex tawx krax kham geu ka Nabalax mai nawh kawx yum. ³⁹ Yam mhong Davit ka hoik yum Nabalax nawh ah nin, "Kieh bwanson koe ka Simiang Siyiex, pa hoik kia ngien aux khaing pa sang yaox aux tix kham geu lox sibriem Nabalax mai pa tiebtie Nawh Cao kawn tix khaing pa caox caig, mawh kheu Simiang Siyiex hoik deeh viied ceu pa caox caig pa hoik yuh Nabalax hoek piang kaing cao nawh, mai Davit ploi pui hu mhaing Abigelax, sonsang teei nawh ti moeng kah. ⁴⁰ Yam hoik hoek kawncau Davit ka Abigelax, daux veng Kharamelax kix ah nin ka nawh, "Davit ploi yix hoek ka maix, sonsang viex yix maix mawh moeng nawh." ⁴¹ Abigelax kaoh mai gup pakngai tix piang tiex ah nin, "Kawncau bun maix mawh kawncau pa sang khoek caong kawncau simiang aux." ⁴² Mawh kheu nan, Abigelax nied ti kaoh mai brug la iak tix mu tau mai kawncau bun nawh phwan kaux mai hawt khaix cao cau Davit mai yaox ti mawh moeng Davit. ⁴³ Davit baox teei ti moeng Ahinawm kawn bun veng Yezerelax mai kiex khawm ra mawh moeng nawh. ⁴⁴ Yam an Sawlux tawx kawn bun tix Mikhalax moeng Davit ka Palatix, kawn simex Liesha pui veng Galim heue.

¹ Pui veng Zipha hoek ka Sawlux, daux veng Gebiah ah nin, "Davit mox tix piang gawng Hakhilax plak sivoe veng Yeshimon ang mawh lie?" ² Khaix an Sawlux kaoh mai hu ka daux tiag Zipha, tau mai pui Isarelax pa hoik laug nawh loe rheng kaux, sonsang sawg ka Davit daux tiag Zipha. ³ Mai Sawlux bang piang gawng Hakhilax praok krax, plak sivoe veng Yeshimon, Davit ot ka daux tiag mai nawh hoik mhong ka hoek sawg Sawlux tix ka daux tiag, ⁴ mawh kheu an, Davit ploi pui jiang hu jiang kix mai nawh tawng ka hoik hoek Sawlux tete. ⁵ Mawh kheu nan, Davit yaog ti hu daux tab dee bang Sawlux, Davit hoik yaox ka dee it Sawlux mai Abana kawn simex Nerax cao kaing naing ting kru naing nawh, Sawlux it sigreung tab mai pui ot vung viang nawh. ⁶ Yam an Davit chawk Ahimaliet pui Heta mai Abishie kawn simex Yeruya pux Yuabax ah nin, "Mawx pa sang hu tau mai aux dee bang tab Sawlux?" mai Abishie ah nin, "Aux tak hu tau mai maix." ⁷ Mawh kheu nan, Davit mai Abishie hoek ka dee ot pui an plak ponsawm mai Sawlux laig it daux sigreung tab tau mai blung ti deuh pliah viex tix hawt kaing gaong tix mai Abana khawm pui khankix hoik laig it vung viang nawh khawmuik. ⁸ Abishie ah nin ka Davit, "Daux singaix Siyiex ap pui koeng maix ka daux taix maix, yuh bwanson kieh aux blung nawh ka pliah tix taix neh tom phlat ka tiex mai aux tak ang baox blung nawh ra bawg." ⁹ Davit ah nin ka Abishie, "Paw yuh nawh laux leeing, mawh pui mawx pa pon nyeu taix tix piang pui pa hoik groi Simiang Siyiex bee ka ang koe krax lud ka lie?" ¹⁰ Mai Davit deeh ah nin, "Awm im ju Simiang Siyiex Nawh tak tawx krax kham geu ka nawh, phan ang mawh nan, singaix pa yum nawh tak hoek, phan ang mawh nan, nawh tak laux leeing ka daux naing." ¹¹ Kieh Simiang Siyiex tiebtie, son ang aux pon nyeu taix tix piang pui pa hoik groi Simiang Siyiex bee ka, viang mawh nan, teei pliah mai singiien rawm pa koe plak kaing gaong nawh mai kieh ax lih hu." ¹² Mawh kheu nan, Davit teei pliah mai singiien rawm, plak kaing gaong Sawlux pui tix kaux kawx ang yaox ang tawng mai pui tix kaux kawx ang siduad khaing it tix, mawh kheu Siyiex hoik kieh kix kied lhiag it mai kix hoik laig it khawmuik. ¹³ Khaix an, Davit tiang ti hu toi plak an mai cung piang choek gawng dee kied singai, khaing sinax kix. ¹⁴ Mai Davit kok yo ka pui mai ka Abana kawn simex Nerax ah nin, Abana eue, ang maix lai pawk lox lie?" mai Abana ah nin, "Mawh pui mawx pa kok yo ka simiang lie?" ¹⁵ Davit ah nin ka Abana, "Ang maix mawh simex lie? mawh pui mawx pa awm maix daux pui Isarelax, yuh ka mawx maix ang pau simiang cao tix mhawm mhawm, mawh kheu pui tix kaux laig ti sang yuh simiang cao maix laux leeing." ¹⁶ Ceu pa yuh maix in, mawh pa ang mhawm tete, awm im ju Siyiex maix hoik keung ti mawh pa yum, kheu ang maix pau ka simiang tix, pa hoik groi Simiang Siyiex bee ka, yam in jhak ti yaox, mawh koe pliah simiang maix mai singiien rawm nawh pa deuh plak kaing gaong it nawh koe dee mawx?" ¹⁷ Sawlux tawng ka lox Davit ah nin, "Kawn simex aux Davit eue, mawh an lox maix lie?" mai Davit pawk ah nin, "cao simiang aux eue, in mawh lox aux." ¹⁸ Mai Davit deeh ah nin, "cao simiang aux ca kawn hawt sawg kawncau tix yuh ka mawx? Mawh hoik yuh aux ceu patix? Mawh koe pa caox ceu tix ka daux taix aux. ¹⁹ Yam in yuh bwanson kieh cao simiang aux nghiet lox kawncau maix, phan mawh Simiang Siyiex pa hoik so rhawm maix yuh nin ka aux, kieh Nawh Cao rieb krax tan pa yuh kawn pui, phan ang mawh nan, phan mawh kawn pui pa so rhawm maix yuh nin ka aux kieh kix pon pa jhax lawg ka plak sivoe Simiang Siyiex, mawh kheu kix hoik grheu aux hu daux in singaix khaing pa sang pon aux sinngao haktiex cie Simiang Siyiex ah nin ka aux, hu yuh kaing jhaw Siyiex tang kaux khankix. ²⁰ Mawh kheu nan, paw kieh nham aux cod piang tiex, dee singai khaing plak sivoe ngai Simiang Siyiex liak, mawh kheu simiang pui Isarelax hoek ti sawg aux pa awm diiep sox tix mu, awm hu leue pui keed piang gawng." ²¹ Khaix an Sawlux ah nin, "Aux hoik lud tix, kawn simex aux Davit eue, deeh hoek, aux tak ang lai yuh krax pa kha rhawm ka maix, kheu jao kied koe ngawh jum ju aux ka daux ngai maix daux in singaix, jhak heue, aux hoik mawh pui pa caox mai kied lud." ²² Davit pawk ah nin, "Pliah simiang kawn koe tin, kieh kawn nyawm awn ju tix kaux hoek teei. ²³ Kieh Simiang Siyiex deeh plud ka pui ku kaux, son pa rahsee nawh mai son pa kaux sijax nawh, mawh kheu Simiang Siyiex hoik ap maix ka daux taix aux in singaix, viang mawh nan, aux ang pon nyeu taix tix lih piang pui pa hoik groi Simiang Siyiex bee ka." ²⁴ "Jhak heue, awm hoik kieh aux maix koe ngawh jum ju ka daux in singaix, plak sivoe ngai aux, mawh kheu nan, kieh ju aux mawh pa koe ngawh koe jum plak sivoe Simiang Siyiex mai kieh Nawh Cao deeh taoh aux lih khaing ceu pa kha rhawm khawmuik." ²⁵ Khaix an Sawlux ah nin ka Davit, "Kawn simex aux Davit eue, kieh maix mawh pa koe bwanson, kieh kaing pa yuh maix kuceu ting lhaong haok hwan." Mawh kheu nan, Davit hu krax hu tix mai Sawlux deeh ing ka dee ot tix heue.

¹ Mai Davit ah nin daux rhawm tix, "tix ngaix sax aux tee laux leeing daux taix Sawlux, pa nie lheu mhawm ka son aux ang lai koe, lheu khaing to aux ti luad luan daux haktiex pui Philitix, phan yuh nan, Sawlux tak ang lai koe rhawm tix sang deeh sawg aux daux haktiex pui Isarelax mai aux tak pon ti luad luan khaing daux taix nawh." ² Khaix an Davit kaoh hu tau mai pui nawh pa ot tau mai nawh liah yieh kaux mai hu ka Akhisha kawn simex Mawkha simiang Gata. ³ Davit mai pui nawh pa viex moeng kawn tix ot tau mai simiang Akhisha, Davit viex moeng ti Ahinawm kawn bun veng Yezerelax mai moeng Abigelax kawn bun veng Kharamelax, kiex mawh miexmai khawm ra kaux. ⁴ Pui krai grawng hoik to Davit daux veng Gata ka Sawlux mai nawh ang lai sawg ka nawh khaix in tix bawg kawx. ⁵ Davit ah nin ka simiang Akhisha, "Phan aux hoik mawh pa pon bwanson ka plak sivoe ngai maix, kieh kix tawx dee ot son aux ka daux yaong tix dah, daux haktiex kwang maix, mawh kheu kawncau maix sang chix pon ot daux veng ting mai maix yuh ka mawx." ⁶ Ka daux singaix an simiang Akhisha tawx veng Zikalat ka nawh, kheu jao an veng Zikalat mawh cie simiang pui Yudax tom hoek in singaix. ⁷ Baux yam ot Davit ka haktiex pui Philitix koe tix num mai pon khix. ⁸ Davit mai pui nawh khankix hu puing ka pui Geshurix, pui Gerazi mai pui Amaliet, pui an kix dawg mawh pui prim pa ot daux haktiex in tom didix, jah ka veng Shurax tom hoek ka daux meung Ejiptux. ⁹ Yam puing Davit ka haktiex an, nawh ang prah simex bun im ju tix kaux kawx, nawh rhim yung, mawie, la, brung, kala-uk mai kraung ceep khankix deeh ing ka simiang Akhix. ¹⁰ Simiang Akhix ah nin, "Mawh hu yuh pex naing plak mawx, daux in singaix, mai Davit pawk ah nin, yix hu puing haktiex plak seh meung Yudax, phan ang mawh nan Haktiex Yeramelax, phan ang mawh nan Haktiex plak seh meung Keni." ¹¹ Davit ang deuh simex bun im ju tix kaux kawx, son ang kix lai pon viex grawng ceu an hoek ka veng Gata, "Nawh lhat kix hu krai grawng ceu an, Davit hoik yuh awm an, " ceu inkix mawh grawng pa hoik yuh nawh glang yam kawn ot tix daux haktiex pui Philitix. ¹² Simiang Akhisha hoik yum rhawm ka Davit ah nin, "Nawh hoik yuh pui cie nawh pui Isarelax seeing brai piang nawh khawmuik, kheu jao an nawh tak mawh kawncau aux leeing ju heue."

¹ Ka daux singaix an pui Philitix khrawm kru naing tix, sonsang hu puing ka pui Isarelax mai simiang Akhisha ah nin ka Davit, "Kieh maix kriem tawng maix mai pui maix tak yaox ti hu ka daux naing tau mai aux." ² Mai Davit ah nin ka simiang Akhix, mhawm heue maix tak tawng ka ceu pa pon yuh kawncau maix tete mai simiang Akhix ah nin ka Davit, "Mhawm heue, aux tak kieh maix mawh cao kaing naing ting pa pau ju aux." ³ Yam an Samoelax hoik yum mai pui Isarelax yiiem doe ka son nawh mai kix sipaung nawh ka daux veng Ramax, pa mawh veng ot cao nawh mai Sawlux grheu pui singie mai pui pa koe khwan caox khaing daux haktiex. ⁴ Pui Philitix khrawm paox tix hoek mai kix bang ka daux veng Shunim, mawh kheu nan, Sawlux khrawm pui Isarelax mai kix hu bang ka daux veng Gilabaw. ⁵ Yam yaox Sawlux ka kru naing pui Philitix, nawh kied lhat mai rhawm nawh kawx, hoik kied sikua sigrien sigre. ⁶ Yam chawk cheng Sawlux tix yaox grawng pa sang yuh tix ka Simiang Siyiex, Siyiex ang pawk lox nawh daux camaox ang ah, ka daux Urim ang ah mai ka daux lox jhai ang ah, ⁷ Sawlux ah nin ka kawncau tix, "Hu sawg bun pa chix sibawk, sonsang yaox aux ti hu chawk nawh, mai kawncau nawh krai koe bun pa chix sibawk ka daux veng En Dawrax tix kaux tan." ⁸ Sawlux peeik kraung ceep tix mai loh ti ceep kraung tang ceu mai lih hu tau mai pui ra kaux mai hoek ka bun pa chix sibawk ponsawm ah nin, "Yuh bwanson chawk ti yaox khwan pui yum son aux mai kok ka pui pa krai aux ceu kaux ka maix." ⁹ Bun chix sibawk an ah nin ka nawh, "Jhak heue, maix tawng grawng pa hoik yuh Sawlux mai nawh hoik grheu pui singie mai pui pa koe khwan caox khaing daux haktiex in khawmuik, yuh ka mawx maix sang taong kie ka aux." ¹⁰ Sawlux tiextu ka nawh ka plak sivoe Siyiex ah nin, "Awm im ju Simiang Siyiex, krax pa ciyang tak ang hoek piang maix son grawng in." ¹¹ Bun an deeh ah nin, "Mawh sang kieh maix aux jhi tix yaox pui mawx?, " mai Sawlux deeh ah nin, "Kok Samoelax ka son aux." ¹² Yam hoik yaox bun an ka Samoelax, nawh riag yo ah nin ka Sawlux, "Kheu maix lai pie lhen ka aux maix mawh Sawlux." ¹³ Mai simiang deeh ah nin ka nawh, "Paw lhat graung kah, mawh yaox maix ceu patix, " bun an deeh ah nin ka Sawlux, "Aux yaox ka haok khwan tix ceu khaing daux tiex." ¹⁴ Mawh koe pakpeung grang nawh yuh ka mawx?" mai nawh ah nin ka bun an, bun an deeh pawk ah nin, "Mawh grang pakpeung pui pa kuad tix kaux pa haok khaing tan mai nawh ceep sibex dhah mai Sawlux tawng ka mawh an Samoelax, nawh gup pakngai tix piang tiex mai krub nawh. ¹⁵ Yam an Samoelax ah nin ka Sawlux, "Kheu maix lai kok tix tuktiak ka aux, " mai Sawlux pawk ah nin, "Aux kied koe krax laux rhawm, kheu sang yuh pui Philitix naing ka aux, Siyiex hoik tik vud aux mai ang lai pawk lox aux, ka daux lox jhai ang ah, ka daux camaox ang ah, mawh kheu nan, aux tom kok maix sonsang jhi maix aux yaox, pa sang caw aux ti yuh." ¹⁶ Samoelax ah nin, "Simiang Siyiex hoik tik vud maix yam mawh pui koeng ka maix, yuh ka mawx maix lai kawn chawk aux, ¹⁷ Simiang Siyiex hoik yuh ceu an ka maix awm hoik krai Nawh Cao ka aux, mawh kheu Simiang Siyiex hoik teei meung haktiex in daux tawm taix maix mai tawx ka paox plawg maix Davit." ¹⁸ Mawh kheu ang maix cu nghiet ka gumlox Simiang Siyiex mai ang hawt yuh awm pa kied song rhawm tix ka pui Amaliet mawh kheu nan, Simiang Siyiex yuh ceu in ka maix daux in singaix. ¹⁹ Lheu khaing an, Simiang Siyiex tak ap pui Isarelax, khawm maix ka daux tawm taix pui Philitix pasax maix khawm kawn simex maix tak ot tau mai aux mai Siyiex tak baox ap kru naing pui Isarelax ka daux taix pui Philitix." ²⁰ Khaix an Sawlux goh gup piang tiex dom mawx dom an, jao kied lhat graung nawh ka lox krai Samoelax mai riang rao nawh hoik uik khaing daux nawh, kheu ang nawh lai ih praix tix ngaix mai tix sawm. ²¹ Bun an hoek ka Sawlux mai yaox ka kied laux rhawm Sawlux, nawh ah nin ka Sawlux, "Jhak heue, kawncau bun maix hoik nghiet ka lox maix mai ang lai lhawk ka ju tix mai hoik nghiet ka lox pa krai maix khankix. ²² Mawh kheu nan, yam in nghiet ka lox krai kawncau bun maix, kieh aux khan blah ka plak sivoe maix ceeix, teei ti ih sonsang deeh koe riang rao yam deeh ing tix." ²³ Sawlux thiang ah nin, "Aux ang ih, " viang mawh nan kawncau nawh mai bun an, niied ti tawx riang nawh mai nawh nghiet ka lox kix mai nawh yaog ti kaoh khaing piang tiex mai ngawm piang ku it tix. ²⁴ Bun an koe mawie pa kluing tix mu ka nyiex, nawh niied ti pah kawn mawie an mai teei phawng gaox nghox ca mai ku klao tau mai yuh blah pa ang sau susaix ka, ²⁵ viex ti hoek tan kah Sawlux mai kawncau nawh, khaix hoik ih kix kah, kix yaog ti hu daux sawm an heue.

¹ Pui Philitix khrawm kru naing tix khawmuik daux veng Aphiet mai pui Isarelax hoik bang ti ot hawt dee lih rawm keut, pa koe daux veng Yezerelax. ² Mai cub simiang pui Philitix lih hu tau mai tab pa koe kaing yieh mai pa koe kaing rheng, viang mawh nan Davit mai pui nawh khankix hoik lih hu hawt khaix cub tab simiang Akhix. ³ Cub simiang pui Philitix ah nin, "Mawh hoek yuh pui Hebrie inkix tix tin, " mai simiang Akhix ah nin ka cub simiang pui Philitix, "In mawh Davit kawncau Sawlux simiang pui Isarelax, hoik ot tau mai aux tom rheung num ang mawh lie? jah tom singaix hoek bleeh nawh ka aux tom hoek daux in singaix, ang aux sax yaox ceu pa lud nawh. ⁴ Cub simiang pui Philitix kied song rhawm ka nawh ah nin, "Kieh pui inkix deeh ing ka dee tawx maix kix ot mai paw kieh kix hu daux naing tau mai ex, ex lhat kix deeh tieh ti mawh pui koeng ex daux naing, mawh kheu kix tak sang pon yuh ceu pa vah rhawm cao simiang tix yuh ka mawx? ang mawh kheu viex nawh grawng kaing pui ex inkix hu tau mai nawh lie?" ⁵ Pa hoik ah kix lai rhax tau mai paox tix yam graoh kix daux pa ah nin, Sawlux hoik pah cie tix kaing rheng kaing rheng, ang mawh Davit in lie pa hoik pah cie tix kaing mheen kaing mheen." ⁶ Khaix an, simiang Akhix kok Davit ah nin, "Awm im ju Simiang Siyiex maix hoik mawh pui rahsee, grawng pa lih hu maix tau mai aux daux kru naing, mawh pa mhawm plak sivoe ngai aux, mawh kheu jah tom singaix hoek mai tix ot tau mai aux tom hoek daux in singaix, aux ang yaox pa caox caig ka daux maix, viang mawh nan cao kaing simiang pui Philitix ang khaw rhawm ka maix, ⁷ mawh kheu nan, yam in deeh ing mai lih hu ka daux pa nhim son ang maix lai kieh cao kaing simiang pui Philitix koe krax pa song rhawm." ⁸ Khaix an, Davit deeh ah nin ka simiang Akhix, "Mawh hoik yuh aux ceu patix, jah tom singaix ot aux tau mai maix tom in singaix, mawh hoik yaox maix ceu patix ka kawncau maix, son ang aux pon puing ka pui koeng cao simiang aux yuh ka mawx?" ⁹ Simiang Akhix deeh pawk ah nin ka Davit, "Aux tawng ka mhawm pa yuh maix awm kawncau Siyiex plak sivoe ngai aux, viang mawh nan, cao kaing simiang pui Philitix ah nin, paw kieh nawh hu tau mai yix ka daux bang naing, ¹⁰ kaoh caocao plak ponngawb tau mai kawncau cao simiang maix, pa ot tau mai maix mai deeh ing yam bah riang praix dom mawx dom an." ¹¹ Mawh kheu nan, pui nawh khankix kaoh ponngawb caocao, sonsang deeh ing ka haktiex pui Philitix mai pui Philitix khankix kawx haok ka veng Yezerelax heue.

¹ Khaix hoik luan loe ngaix Davit mai pui nawh khankix hoek ka veng Zikalat, pui Amaliet lih hu puing ka baoh haktiex plak seh veng Zikalat, kix pex ka Zikalat mai gleeing veng an ka ngu, ² kix giex bun pa ot tan khawmuik, jah ka pui iak tom hoek ka pui ting, kix ang pah pui pie tix kaux kawx, kix rhim tix viex can ceu pa koe daux veng khawmuik mai deeh ing. ³ Yam deeh Davit mai pui nawh ka daux veng, nawh yaox hoik gleeing veng ka ngu mai hoik rhim moeng kix, khawm kawn simex kawn bun kix khawmuik hu mawh pa giex laung. ⁴ Davit mai pui pa ot tau mai nawh khankix hoik yiiem riag yo lox tix lih mai hoik yiiem tom ang lai koe riang tix sang baox yiiem. ⁵ Mai moeng Davit pa mawh Ahinawm mai kawn bun veng Yezerelax mai Abigelax miexmai moeng Nabalax, pui veng Kharamelax kawx hoik rhim mawh pui pa giex laung. ⁶ Davit kied koe krax khi rhawm, kheu jao ah pui khankix tix sang dheem nawh ka simaox, mawh kheu pui khawmuik hoik koe krax khi rhawm mai kied voi rhawm, son kawn simex kawn bun tix khankix, viang mawh nan, Davit teei riang rao tix ka Simiang Siyiex Cao nawh. ⁷ Davit ah nin ka cao giex kaing li Abitax kawn simex Amaliet, "Viex sibex dhah hoek ka aux tin, " Abitax kawx viex sibex dhah an hoek ka Davit. ⁸ Davit deeh chawk grawng an ka Simiang Siyiex ah nin, "Mawh sang yaox aux ti pheet cub lien naing inkix lie? Mawh sang pon krup aux kix lie?" Mai Nawh Cao deeh pawk ah nin, "Hawt heue, mawh kheu maix tak pon hawt krup kix mai deeh pon taoh kix khawmuik." ⁹ Mawh kheu nan, Davit mai pui nawh liah yieh kaux, lih hu hawt khaix kix, yam bleeh kix ka rawm klawng Besaw, kix kawn dah tix ot khaix tiblah tan. ¹⁰ Viang mawh nan, Davit mai pui nawh baox hawt khaix kix, pui ra yieh kaux pa kied taug kied mao mai dah tix ot plak khaix tan, jao ang kix pon tiang rawm klawng Besawrax, ¹¹ kix yaox pui Ejiptux tix kaux ka daux tong kaung mai kix giex nawh hoek ka Davit mai tawx nawh ih blah nawh kawx ih mai kix deeh tawx nawh nyaux rawm. ¹² Mai kix baox tawx blah plix ruh tix khlawp mai plix siiet kroh ra sigleem, yam hoik ih nawh ceu an, riang rao nawh hoik deeh koe, mawh kheu ang nawh lai yaox ti ih blah mai nyaux rawm loe ngaix loe sawm. ¹³ Davit ah nin ka nawh, "Mawh maix pa dex mai pui mawx, " mai nawh ah nin, "Aux mawh nyawm awn ju pui Ejiptux mai aux mawh kawncau Amaliet, cao simiang aux hoik prah aux ka plak khaix tix, kheu jao saux aux hoik koe loe ngaix phao. ¹⁴ Yix hoik puing haktiex Kherati plak seh mai haktiex dee kwang pui Yudax mai haktiex cie Khaliep plak seh mai yix hoik gleeing veng Zikalat ka ngu." ¹⁵ Mai Davit ah nin ka nawh, "Mawh pon viex maix aux hu dee ot kru naing in lie?, " mai nawh ah nin, yuh krax tiextu ka aux plak sivoe Siyiex, son ang maix sang pah aux mai son ang maix sang ap aux ka daux taix cao simiang aux mai aux tak viex maix hu ka kru naing inkix." ¹⁶ Yam viex nawh Davit hu ka tan, kix hoik ih nyaux mai graoh, kheu kraung pa hoik pon tud rhim kix tom nie, khaing haktiex pui Philitix mai haktiex Yudax. ¹⁷ Davit puing ka kix, jah plak ponngawb tom hoek plak bo ngaix khaix, lheu khaing pui awn ju pa pon brug kala-uk khankix to pon yieh, pui tix kaux kawx ang lai pon glawd. ¹⁸ Davit deeh pon teei kraung pa rhim pui Amaliet hu khawmuik mai Davit deeh pon taoh ka moeng tix khawm ra kaux. ¹⁹ Mai kraung khrai cie kix ang koe pa pa dieh tix ceu kawx, pui iak pui ting mai kawn simex kawn bun pa tud rhim kix khawmuik, Davit hoik deeh pon teei khawmuik. ²⁰ Davit teei yung, mawie mai tobrie pa hawh kix hoek plak sivoe nawh khankix ah nin, "In mawh kraung pa pon tud rhim cie Davit." ²¹ Yam deeh hoek Davit ka pui ankix ra yieh kaux, pa kied taug mao mai ang tix pon hawt khaix Davit khankix pa dah tix ot hawt rawm klawng Besaw tan, kix lih hu rieb Davit mai pui khankix pa ot tau mai nawh, yam hoek Davit dex pui pa hoek ti rieb ka nawh, nawh rieb ti singeuh taix kix khawmuik. ²² Pui caox caig mai pui lu lhia khankix pa hu tau mai Davit ah nin, "Mawh kheu ang kix hu tau mai ex, ex tak ang tawx kraung pa pon tud rhim ex ka kix tix ceu kawx, kieh kix tang teei moeng kawn tix mai lih hu." ²³ Mawh kheu nan, Davit ah nin ka kix, "Puxaik aux khankix eue, pex tak ang pon ti yuh nin ka ceu pa hoik tawx Simiang Siyiex ka ex, pa hoik priex rien Nawh ex mai pa hoik ap pui pa hoek ti puing ka ex khankix ka daux tawm taix ex. ²⁴ Mawh pui mawx pa sang nghiet lox pex grawng in?, viang mawh nan, awm koe nyum pa lih hu ka daux naing, nyum son pui pa ot mai kraung khrai kawx tak koe nang, ex tak gwieh sidu awm paox tix." ²⁵ Jah singaix an tom hoek daux in singaix, Davit hoik deuh mawh been ka son pui Isarelax. ²⁶ Yam hoek Davit ka veng Zikalat nawh tawx kraung pa pon tud rhim tiblah ka cao kaing kuad pui Yudax ka paox grawm nawh khankix ah nin, "In mawh totaix son pex, khaing kraung khrai pa hoik pon tud rhim khaing pui koeng Simiang Siyiex, ²⁷ mai tawx ka pui pa ot ka daux veng Betelax hawt baoh plak seh veng Ramot mai son pui pa ot ka daux veng Yatirax khankix, ²⁸ mai son pui pa ot daux veng Araw mai son pui pa ot daux veng Eshatamaw khankix, ²⁹ mai son pui pa ot daux veng Rakhelax mai son pui pa ot daux veng pui Yeramelax mai son pui pa ot daux veng pui Keni khankix, ³⁰ mai son pui pa ot daux veng Hawma mai son pui pa ot daux veng Khawrashan mai son pui pa ot daux veng Atiet khankix, ³¹ mai pui pa ot daux veng Hebron mai ka son can dee hoik sax paung pan Davit ku da kudee heue.

¹ Pui Philitix puing ka pui Isarelax, pui Isarelax to sivoe pui Philitix mai kix hoik goh ti yum piang gawng, Gilabaw tau mai pa kied mat tix. ² Pui Philitix hawt pheet Sawlux mai kawn simex nawh, kix krup mai pah ka Yawnasan, Abinadat mai Malakhishua kawn simex Sawlux. ³ Naing hoik kied kin dee ot Sawlux mai pui naing ak khankix hoik krox puing ka nawh. Mai nawh hoik kied mat ka ak pui naing khankix. ⁴ Khaix an, Sawlux ah nin ka cao klawng kraung naing tix, "Lawd vaig maix lih mai suat aux kah, phan ang mawh nan, aux lhat pui pa ang nyang pat hak khankix hoek suat aux mai nu nai ka aux, " viang mawh nan, cao klawm kraung naing nawh, ang cu tix suat, awm pa ah nawh, jao kied lhat tix, mawh kheu nan Sawlux lawd vaig tix tiru mai gup tix piang rao vaig. ⁵ Yam yaox cao klawm kraung naing nawh ka hoik goh Sawlux tix yum, nawh kawx baox gup ti yum piang rao vaig tix yum tau mai Sawlux. ⁶ Mawh kheu nan, Sawlux mai kawn simex nawh loe kaux mai cao klawm kraung naing hoik yum daux tix ngaix khaing. ⁷ Yam yaox pui Isarelax pa ot toi ngawd mai can pui pa ot toi rawm Yawdan ka hoik to pui Isarelax ka hoik yum Sawlux mai kawn simex nawh, yam an kix prah veng ot tix mai to khawmuik mai pui Philitix hoek plud ti ot dee an. ⁸ Yam hoek daux singaix pasax, pui Philitix hoek ti peeik kraung naing ceep pui yum khankix mai hoik yaox yum Sawlux mai kawn simex nawh loe kaux piang gawng Gilabaw. ⁹ Kix hoik kid kaing nawh mai peeik kraung naing ceep nawh, kix ploi pui hu ka haktiex Philitix kudah, sonsang pao kix grawng ceu an, daux nyiex vad riang grang siyiex kix mai daux sinax pui khankix. ¹⁰ Kix priex kraung naing ceep nawh daux nyiex vad Ashatariet mai kix preue tokaux yum nawh piang guh veng Bietshan. ¹¹ Yam mhong pui haktiex Gilat pa ot daux veng Yabiet, ka ceu pa yuh pui Philitix ka Sawlux, ¹² pui pa koe rhawm vao rhawm kwa khankix yaog ti lih hu leeing sawm mai kix teei tokaux yum Sawlux mai tokaux yum kawn simex nawh, hoek khaing piang guh veng Bietshan, kix deeh hoek ka veng Yabiet mai gleeing ti tik tokaux yum kix tan khawmuik. ¹³ Khaix an, kix deeh sut si-ang mai sipaung ka greem pang khaox plix phak pa koe ka daux veng Yabiet mai kix twah pa ih aliah singaix heue.