1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

1 Peter

1

1 Petrux, pa mawh kawncau pa ting Cao Yesux Khrit tiiem ka nyo sinie, can pa prung prang ti ot ka daux meung Pawntux, meung Kalatix, meung Kappadawkix, meung Asix mai meung Bisunix, 2 pa hoik laug awm pa khaw mai pa grux tawng Siyiex Keeing Cao sonsang kieh singax singeh ka daux Khuan Cao, sonsang koe krax cu nghiet mai pa phruah ka nham Yesux Khrit heue. Kieh bwanson mai pa nhim baox thiem thie ka pex liak awx. 3 Kieh Siyiex mai Keeing Simiang ex Yesux Khrit ting bwanson, pa hoik kieh ex deeh keh awm pa khaw mai krax caux rhawm Nawh pa kied ting, ti koe krax keud pot jun pot pa im, ka daux krax pa deeh kaoh im Yesux Khrit khaing krax yum, 4 sonsang pon sin pa ang chix laux leeing mai pa ang seeing, pa ang chix bheet laix, pa hoik priex son pex ka daux meung raoma, 5 pa mawh pui pa pau Siyiex ka sibrawm Nawh kheu krax yum rhawm sonsang kieh pon krax taoh, pa hoik rien khre ti plak kieh sidawng bawg yam sidah khaix sax heue. 6 Pex kied koe krax gaux rhawm ka daux an, viang mawh yam in son bawg yam tix vud ngie, phan pex tak lai yaox krax khi kawx, ka daux krax cheuk cheu tom nie ceu, 7 sonsang cheu ti yaox krax yum rhawm pex, pa lheu mhawm lheu ngawh khaing khri, pa chix laux leeing, viang hoik cheu ti yaox ka ngu kawx, yuh ka mawx tak yaox pa mawh ceu pa yaogyaw mai min pakngai mai pa nab yam, yam lih bleeh Yesux Khrit heue. 8 Kaw pa ang pex sax yaox mai moh ka heue. Viang pex ang pon yaox Nawh yam in kawx, pex yum rhawm ka Nawh mai kied koe krax gaux rhawm pa ang chix uik krai, pa naog min pakngai, 9 mai pex sang pon bwanson krax yum rhawm tix, pa mawh krax taoh ju pex heue. 10 Grawh grawng krax taoh in cao jhai khankix hoik nied ti sawg chawk cheng mai krai lox jhai grawng bwanson pa sang pon pex heue. 11 Kix sawg ti tawng bawg yam, mawh yam pa yuh ka mawx, Khuan Cao Khrit pa ot ka daux kix, pa jhi yaox yam grux kham Nawh mhai rug, grawh grawng pa tak sang kham geu Cao Khrit mai min pakngai pa tak sang koe khaix hoik kham geu ceu an khankix heue. 12 Hoik plak kieh kix tawng grawh grawng pa yuh kix ang mawh son tokaux tix, viang mawh nan mawh son pex, yam grux krai kix grawh grawng ceu pa hoik krai sidawng ka pex yam in, ka pui pa hoik sidiex gau lox bwan gaux rhawm ka pex, ka daux pa teem Khuan Cao pa hoik ploi lih khaing raoma heue. Grawh grawng ceu an khankix kawncau Siyiex mie ti jhak mai tawng heue. 13 Mawh kheu nan nhawt maox rawd nyoi rhawm pex mai priex rhawm tix, keud pot jun pot tom sidah, son bwanson pa tak sang viex hoek ka pex, yam lih bleeh Yesux Khrit heue. 14 Kieh awm kawn praix pa chix nghiet chix cu lox mai paw yuh tokaux tix yaung awm alo nex nham, ceu pa sax yuh pex glang ka, yam ang pex lai tawng. 15 Viang mawh nan, awm singax singeh Kaw pa hoik kok pex, kieh tokaux pex singax singeh yuh nan ka daux can pa yuh tix khawmuik heue. 16 Mawh kheu hoik tiiem ti deuh ah nin, "Kieh tokaux pex singax singeh, kheu singax singeh Aux heue." 17 Phan pex kok ka Nawh awm pa mawh Nawh Keeing, pa mawh Kaw pa ang jhak pakngai pui mai prawng ca awm pa khaw mai pa yuh kaux pui mawx kaux pui an, kieh koe krax lhat graung yam kawn ot koe pex heue. 18 Mawh kheu tawng pex, grawng ang teei mau khri ceu pa chix laux leeing mai taoh pex khaing pa giex going pa yuh tix, pa hoik toe ti tawx ka pex khaing tax du pex dix heue. 19 Viang mawh nan hoik taoh pex ka nham pa ngawh, pa awm nham kawn yung pa ang koe dee ne pa loig, pa mawh nham Cao Khrit heue. 20 Cao Khrit an, mawh pa hoik grux ciak ti deuh ka sang jah ti kaw haktiex, viang mawh nan pa hoik kieh sidawng, daux bawg yam sidah in, son pex, 21 pa mawh pui pa hoik yum rhawm ka Siyiex ka daux Nawh, pa hoik kieh Nawh deeh kaoh im khaing krax yum mai tawx min plakngai ka Nawh, son krax pa yum rhawm mai krax keud pot jun pot pex, tak mawh ka daux Siyiex heue. 22 Kheu hoik kieh pex ju tix singax singeh ka daux krax cu nghiet pex ka pa mawh meh, tom sang koe krax moh krax rhawm pa ang pie lhen ka puxaik khankix, pex nied ti moh paox tix, tix kaux lai tix kaux tom daux rhawm tix mhawm mhawm heue. 23 Mawh kheu pex hoik baox deeh keh ka daux simie pa chix laux leeing ang mawh, viang mawh nan pex hoik deeh keh ka daux simie pa ang chix laux leeing, pa mawh gumlox Siyiex pa im pa tak kaux leeing ju heue. 24 Grawh grawng nawh, ceu kawn pui khawmuik awm num rib num riem mai min pakngai kawn pui awm tai rib tai riem heue. Rib kienie, chix kroh chix fit hu mai tai nawh chix khrom hu, 25 viang mawh nan gumlox Siyiex tak kaux leeing ju heue." in mawh gumlox gaux rhawm pa hoik sidiex gau ka pex heue.

2

1 Mawh kheu nan tik ka pa caox khawmuik mai pa kheem pa veux mai pie kheem khawmuik mai pa boh rhawm mai pa sikah lox caox khawmuik, 2 Awm kawn ngie pa tak khraox keh khankix, simie ka rawm teeih gumlox bwan pa singax singeh, sonsang haok hwan pex tom pon krax taoh. 3 Phan pex hoik cim ti yaox grawh grawng mawh Simiang Yesux pa koe rhawm ti tawx bwanson heue. 4 Mawh kheu nan hoek ka Nawh, pa mawh Simaox pa im ju, pa hoik tik kawn pui ka tete, viang mawh nan pa hoik laug Siyiex mai een ti mawh pa ting min plakngai heue. 5 Pex kawx awm simaox pa im pa sum ti yuh nyiex pa dex dawd mai khuan, sonsang mawh cub cao giex kaing li pa singax singeh, pa sang tan, ceu pa tan pa dex dawd mai khuan, pa khaw caw ka Siyiex ka daux Yesux Khrit heue. 6 Mawh kheu hoik koe ka daux phuk lai sigang khri yuh nin, "Jhak heue, Aux hoik deuh Simaox kaing ka daog ka daux Zion, pa hoik laug ti teei mai ting min pakngai mai kaw pa yum rhawm ka Nawh tak ang hoek krax kaig tua heue." 7 Mawh kheu nan min pakngai an mawh son pex pa yum rhawm khankix heue. Viang mawh kawx nan son pui pa ang yum rhawm khankix, "Simaox pa hoik tik pui pa yuh nyiex hoik yuh kieh mawh kaing ka daog heue." 8 "Simaox dee sideeing mai Rang pa kieh lud heue." Kix sideeing caong tix ka gumlox bwan, kheu ang kix cu nghiet kah mai hoik ciak ka kix tix sang mawh nan heue. 9 Viang mawh nan pex mawh ceu pui pa hoik laug, pa mawh cao giex kaing li Siyiex, pa mawh ceu pui pa singax singeh, pa mawh pui Siyiex tete, sonsang jhi pex grawh grawng ceu pa ting lhaong, pa mhawm, Kaw pa hoik kok pex lih khaing daux pa faik mai laig ka daux pa riang pa daox deng cie tix heue. 10 Ka daux bawg yam pa hoik luan, pex ang mawh ceu pui pa yuh nan, viang mawh nan yam in pex hoik mawh ceu pui Siyiex heue. Glang ka in viang pex ang pon bwanson pa caux rhawm kawx, yam in pex hoik pon bwanson pa caux rhawm heue. 11 Pa moh aux khankix eue, aux khyox khaw ka pex pa awm nyo sinie, son ang sang yuh ceu pa dex dawd mai alo nex nham khankix, pa yuh krax naing ka ju heue. 12 Kieh pa yuh pex mawh pa nyawm ti jhak ka sinax pui tang ceu khankix, yuh ka mawx viang kix ah lox deuh phimap ka piang pex awm mawh pex pui pa yuh pa caox kawx, kix tak sang yaox kaing pa yuh pex pa mhawm mai yaogyaw Siyiex ka daux singaix pa kia pa prawng heue. 13 Kieh koe krax cu nghiet ka been kawn pui ku ceu son Siyiex, ka simiang pa ting khaing paox tix ang ah, 14 mai ka simiang giex kaing khankix ang ah, pa hoik ploi Nawh, sonsang ciyang pui pa yuh pa caox khankix mai sonsang yaogyaw kix pa yuh pa mhawm heue. 15 Pex tak lai pon kieh lox pui daox pa ang chix tawng khankix yiien glaik tix kheu ceu pa yuh tix pa mhawm grawh grawng nawh Siyiex koe alo yuh nan heue. 16 Kieh mawh pui ploi, viang mawh nan paw vi teei ceu pa ploi pex, yuh mawh dee du dee jhan, sonsang mawh sibex pa tawb ceu pa caox pa yuh tix, viang mawh nan kieh awm siliex Siyiex heue. 17 Yungyi ka pui khawmuik heue. Moh ka puxaik khankix heue. Lhat ka Siyiex heue. Yungyi ka simiang heue. 18 Kawncau khankix eue, kieh koe krax lhat mai cu nghiet ka cao pex khankix heue. Ang lai mawh ngie ka pa mhawm rhawm awn rhawm khankix, viang ka pa riex khankix kawx, kieh koe krax cu nghiet kah heue. 19 Phan pui tix kaux kaux jhak ka pakngai Siyiex mai kham geu ceu pa ang khaw, mawh pa khaw ti yaogyaw nawh kah heue. 20 Mawh kheu phan pex chix viex rhawm gun yeung mai kham geu pa tap toi, yam lud, chix yaogyaw yuh ka mawx? Viang mawh kawx nan yam yuh pex ceu pa mhawm mai yaox ti kham geu kheu an, pex tak lai viex rhawm gun yeung, kheu in mawh pa khaw caw mai Siyiex heue. 21 Grawh grawng nawh, hoik kok pex sonsang yuh nan heue. Mawh kheu Cao Khrit kawx hoik kham geu son pex mai hoik deuh ceu pa jhak ti hawt jawh son pex, sonsang hawt pex ka khaix caong Nawh heue. 22 Kaw pa ang sax yuh phimap mai pa ang sax yaox lox pie lhen ka jheeh Nawh heue. 23 Yam yuh pa ang cee cak ka Nawh, Nawh ang deeh pawk ti yuh pa ang cee cak mai yam kham geu Nawh, Nawh ang deeh bak deeh viang ti yuh tidtix, viang mawh nan Nawh tawx pong tokaux tix ka Kaw pa chix prawng ca rahsee heue. 24 Kaw pa hoik kham geu phimap ex piang khaox, ka daux tokaux tix, sonsang mawh ex pa hoik yum ka phimap mai deeh im ka pa rahsee heue. Kheu khaix rhoi Nawh, pex hoik pon ti deeh moi heue. 25 Grawh grawng nawh, glang ka in pex lud krax hu awm yung, viang mawh nan yam in pex hoik deeh hoek ka Cao liang pex, pa mawh Cao giex kaing ju pex heue.

3

1 Awm an pex pa mawh moeng khankix, kieh koe krax cu nghiet ka mex tokaux tix, phan mex tix kaux kaux ang koe krax cu nghiet ka gumlox Siyiex, viang ang koe gumlox bwan kawx, kix tak sang pon ka ceu pa yuh moeng tix, 2 kheu yaox kix pa mhawm, pa singax singeh mai pa yung yi pex heue. 3 Pa jawg pex paw kieh mawh pa yuh plak praix, pa mawh pa dieh hauk tix mai vung vhien tix ve hoik tix ve mai pa ceep khao kraung khri, phan ang mawh nan pa ceep kraung ceep pa mhawm heue. 4 Viang mawh nan kieh mawh ceu pa jawg pa hoik moh ka daux rhawm pa mawh kraung pa ang chix laux leeing, pa mawh rhawm pa awn mai pa chix yawg rhawm tix, pa kied koe ngawh koe jum plak sivoe ngai Siyiex heue. 5 Mawh kheu bun pa singax singeh khankix, ka daux bawg yam glang ka dix, kawx hoik een rhawm ka Siyiex mai hoik jawg ti yuh nan mai hoik koe krax cu nghiet ka mex tix heue. 6 Awm Sa ra nghiet lox Abraham mai kok nawh mawh simiang, pex kawx mawh kawn bun Sa ra, phan pex yuh pa mhawm mhiem mai ang kieh koe krax lhat graung heue. 7 Awm an, pex pa mawh mex khankix eue, ot mai moeng tix ka daux krax pa chix tawng mai yuh ti tawng grawng mawh kix pa nie iak riang khaing pex, viang mawh nan mawh kheu pex mai kix mawh pa sang rom ti pon tau, ka sin ngao son pa im ju kieh koe krax yung yi ka bun, son ang pa rawg pex bwan sang koe krax tiebtie heue. 8 Lox pa ghoik mawh nin. Kieh pex khawmuik koe rhawm tix mu, pa koe rhawm khi mai pa chix khu rhawm paox tix mai pa koe krax moh krax rhawm awm puxaik khankix mai pa koe krax caux rhawm mai pa koe krax awn rhawm heue. 9 Paw deeh pawk pa caox son pa caox mai paw deeh pawk pa nieb yuh pa ang cee cak, son pa ang cee cak, viang mawh nan deeh pawk bwanson, kheu tawng pex grawng pa hoik kok pex ti yuh nan mai sonsang pon sinngao heue. 10 Grawh grawng nawh, "Kaw pa sang moh ju mai pa simie ti yaox ngaix pa mhawm khankix, kieh nawh rien dak tix khaing lox pa caox mai kieh nawh rien siyieb jheeh tix, son ang sang ah lox pie lhen. 11 Kieh nawh deeh tieh khaing pa caox mai yuh pa mhawm. Kieh nawh sawg ceu pa nhim mai leue nawh heue. 12 Grawh grawng nawh ngai Siyiex jhak ka piang pui rahsee khankix mai yhaok Nawh nghiet lox pa rawg mhaing kix heue. Viang mawh nan Siyiex deeh veeh pakngai tix khaing pui pa yuh pa caox khankix heue." 13 Phan pex nied ti yuh ceu pa mhawm, mawh kaw pa yuh ka mawx, pa sang yuh pex laux? 14 Viang mawh nan phan pex yaox ti kham geu kheu pa rahsee, pex ting bwanson heue. "Paw vi lhat ka ceu pa yuh kix pa lhat mai paw kieh koe krax lulax rhawm kah heue." 15 Viang mawh nan yuh pa singax tix, kieh Khrit mawh Siyiex ka daux rhawm pex mai kieh rien tix jheung jheung, sonsang pon ti pawk lox ka pui ku kaux, pa sang chawk pex ka grawh grawng krax keud pot jun pot pa koe ka daux pex, viang mawh nan viex rhawm awn mai pa chix lhat yungyi heue. 16 Kieh rhawm dee chix keud tawng pex ang koe dee deuh phimap ka tokaux tix, viang ah lox deuh phimap ka pex, awm mawh pex pui pa yuh pa caox kawx, kix pa nieb ah pa ang cee cak grawh grawng pa yuh pex ka daux Khrit, tak hoek krax kaig twa heue. 17 Grawh grawng nawh phan Siyiex koe alo, sonsang kieh pex kham geu kheu yuh ceu pa mhawm, lheu mhawm khaing kham geu kheu yuh ceu pa caox heue. 18 Mawh kheu Khrit kawx hoik kham geu son phimap ex tix bawg, Kaw pa rahsee, kham geu son pui pa ang rahsee, sonsang pon Nawh ti viex ex hoek ka Siyiex, kheu hoik teei Nawh yum ka daux nex nham, viang mawh nan Nawh hoik im ka daux Khuan. 19 Mawh ka daux khuan yam hu Nawh ti sidiex gau ka khuan pa hoik laung daux thawng khankix, 20 pa hoik lieh lox pa ang chix cu nghiet ka daux bawg yam pa hoik luan glang ka dix, yam viex Siyiex rhawm pa lang gun lang yeung mai krox jun kix ka daux bawg yam singaix Noax khankix, yam kawn yuh kawn cox nawh nyiex reu ting, dee pui tux, pa mawh daix kaux, pa pon hoek krax taoh khaing rawm. 21 Awm lox tiag an, daux bawg yam in pex pon hoek krax taoh, kheu krax cubcom rawm, ang mawh ka ceu pa sigrhax pa seeing tokaux tix, viang mawh nan mawh ceu pa mie ti cie rhawm deeh chix keud tawng pa ang koe dee deuh phimap plak Siyiex, ka daux krax deeh kaoh im Yesux Khrit, 22 Kaw pa hoik hu ka daux meung raoma mai ngawm ka plak taix khawn dawm Siyiex heue. Kawncau Siyiex khankix mai pa giex kaing khankix mai sibrawm khankix hoik kieh ot ka greem Nawh Cao heue.

4

1 Mawh kheu nan awm Khrit hoik kham geu ka daux nex nham, tokaux pex kawx, rien kraung naing pa mawh rhawm pa awm an heue. Grawh grawng nawh kaw pa hoik kham geu ka daux nex nham, ang lai deeh yuh phimap heue. 2 Kheu pex tak ang baox deeh ot ka daux bawg yam pa hawt pex alo nex nham pa koe kawn pui, viang mawh nan hawt ti yuh alo Siyiex heue. 3 Mawh kheu ex hoik hawt yuh alo pui tang ceu, ka daux bawg yam ju ex pa hoik luan tom kub, pa mawh pa chax nie lheu yuh mai pa hawt yuh alo nex nham mai pa chax nie miag ka plai mai pa yuh pawie pa chax nie luan mai pa chax nie luan ih mai pa krub riang grang khankix pa seeing heue. 4 Kix daox deng kah, kheu ang pex to hu tau mai kix, ka daux pa chax nie luan yuh kix mai kix ah pa caox pa ang khaw ang jiet grawng pex heue. 5 Kix tak lai krai grawng pa yuh tix, ka Kaw pa hoik rien ti sang prawng ca, khawm ka pui im pui yum khankix heue. 6 Mawh kheu nin viang ka pui pa hoik yum khankix kawx hoik sidiex gau lox bwan gaux rhawm, sonsang pon prawng ca ka kix, awm pui pa ot ka daux nex nham, viang mawh nan sonsang pon im kix awm pa khaw ka Siyiex ka daux khuan heue. 7 Dee sidah ku ceu khawmuik dex sang hoek, mawh kheu nan, priex rhawm tix mai rawg bwan heue. 8 Lheu khaing ku ceu khawmuik kieh koe krax pa nied ti moh paox tix. Grawh grawng nawh krax moh chix tawb kheem phimap tom nie heue. 9 Paw kieh koe rhawm pa siviien mai kia ngien ka paox tix heue. 10 Awm hoik pon kaux pui mawx kaux pui an totaix, shiao sonsang koe bwanson son paox tix, awm kawncau pa mhawm pa kia pa priex bwanson Siyiex pa nie ceu heue. 11 Phan pui tix kaux kaux sidiex gau, kieh nawh sidiex gau lox tawm jhawm krai Siyiex heue. Phan pui tix kaux kaux yuh son pui tang kaux, kieh nawh yuh ka daux riang rao pa tawx Siyiex heue. Kheu sonsang koe min plakngai Siyiex ka daux ku ceu khawmuik kheu Yesux Khrit, kieh Nawh koe min plakngai mai sibrawm ku ju leeing ju. Amen. 12 Pui pa moh aux khankix eue, yam yaox pex ti kham krax kham krax geu awm ngu, pa hoek piang pex sonsang cheu ti yaox pex, paw ce mawh pa khaw ti daox deng kah, awm pa hoik mawh ceu pa daox deng ka pex. 13 Viang mawh nan, mawh kheu mawh pex pa pon ti neuex ka daux krax kham krax geu Cao Khrit gaux rhawm kah, Kheu yam lih bleeh min pakngai Nawh, pex kawx tak kied koe krax gaux rhawm heue. 14 Phan pex yaox ti kham pa ang cee ang cak kheu ceu kaux Cao Khrit, pex ting bwanson, mawh kheu Khuan ting min pakngai, pa mawh Khuan Siyiex ot piang pex heue. 15 Paw kieh pex yaox ti kham geu, tix kaux kawx, kheu pa pah pui yum, phan ang mawh nan kheu yuh pui briex, phan ang mawh nan kheu yuh pa caox, phan ang mawh nan kheu ceu pa chuh ka pa yuh pui tang kaux heue. 16 Viang mawh nan phan pui tix kaux kaux yaox ti kham krax kham geu kheu mawh nawh kawn Khrit, paw kieh nawh koe krax kaig twa kah, viang mawh nan kieh nawh yaogyaw Siyiex ka daux ceu kaux in heue. 17 Bawg yam pa sang jah ti prawng ca, ka pui geh nyiex Siyiex hoik hoek mai phan krax prawng ca an jah ka ex phao ka, dee sidah kix pa ang koe krax cu nghiet ka lox bwan gaux rhawm Siyiex, tak sang mawh pa yuh ka mawx? 18 Phan pui rahsee nu ti hoek krax taoh, pui pa sang chix nab yam mai pa ang khaw ka Siyiex mai pui phimap khankix tak sang bleeh dee mawx? 19 Mawh kheu nan kieh kix pa yaox ti kham krax kham geu awm pa khaw mai alo Siyiex, pong ti tawx ju tix, ka daux pa yuh pa mhawm, ka Cao phan Cao yuh pa kaux sijax heue.

5

1 Mawh kheu nan, aux pa mawh kuad song ka daux ceu cao tix kaux mai pa mawh pui pa kham mhai rug grawng krax kham geu Cao Khrit mai pa mawh khawm pa sang pon ti neuex ti pon min pakngai, pa tak sang lih bleeh, sidiex gau ka kuad song ceu cao khankix ka daux pex heue. 2 Kia ngien ka cub yung Siyiex pa ot ka sinax pex mai giex kaing kix, viang mawh nan kieh koe rhawm tix sang yuh awm pa khaw mai alo Siyiex mai paw kieh mawh pa khin ti yuh, lheu khaing an paw kieh mawh kheu moh pex ti pon mau pa seeing, viang mawh nan kieh koe rhawm pa mie ti yuh heue. 3 Paw nieb yuh ti ting piang cub ceu cao pa hoik tang tawx ka pex, viang mawh nan, kieh tokaux pex mawh mhai pa hawt cub yung tix jawh kah heue. 4 Yam lih bleeh Cao liang yung pa ting, pex tak sang pon mhok khri min pakngai pa ang chix bheet laux heue. 5 Awm an pex pa awn ju khankix eue, kieh cu nghiet ka kuad song ceu cao heue. Lheu khaing an, pex khawmuik rawd nyoi tix ka pa awn rhawm ti sang yuh son paox tix, tix kaux lai tix kaux, mawh kheu, "Siyiex tiebtie ka pui pa ting rhawm, viang mawh nan Nawh tawx bwanson ka pui pa awn rhawm heue." 6 Mawh kheu nan yuh tokaux pex awn rhawm, greem taix Siyiex pa ting sibrawm, sonsang yaog Nawh pex ting yam hoek bawg yam heue. 7 Plee ceu pa khi rhawm pex khawmuik piang Nawh Cao, kheu kia ngien Nawh ka pex jheung jheung heue. 8 Rien rhawm tix mai pau tix jhak, mawh kheu pa koeng pex phicaox awm sivai sangsi pa graox mai hu lailing ti sawg kug pa sang kiied nawh ti ih heue. 9 Kieh kaux cong ka daux krax yum rhawm pex mai tiebtie nawh, kheu tawng pex puxaik pex khankix can pa ot piang haktiex khawmuik, yaox ti kham geu pa yuh nan heue. 10 Siyiex pa yuh bwanson khawmuik, pa hoik kok pex laig ka daux min pakngai leeing ju Nawh, ka daux Cao Khrit, khaix hoik yaox pex ti kham geu tix vud ngie, tokaux Nawh tak sang kieh pa grum mhawm mai kieh kaux cong mai baox thien thie riang rao kah heue. 11 Kieh Nawh koe min pakngai mai sibrawm ku ju leeing ju liak. Amen. 12 Aux hoik tiiem lai ka pex ceeix mai sipaox ka Silwanux, pa een aux mawh puxaik ex pa kaux sijax, sonsang sidiex gau mai kham mhai rug grawh grawng in mawh bwanson Siyiex pa mawh meh heue. Pex cung tom kaux ka daux an heue. 13 Ceu cao pa koe ka daux veng Babulon, pa hoik laug tau mai pex mai kawn simex aux Makux nawb ka pex heue. 14 Nawb ka paox tix, tix kaux lai tix kaux ka pa ngheut pa moh rhawm heue. Kieh pa nhim koe piang pex khawmuik can pa ot ka daux Cao Khrit heue. Amen.