1 Kings

1 Kings

¹ Simiang Davit riex ju mai hoik kuad hu sipie, viang kix lhop prux ka piang nawh kawx, nawh ang siu ka heue. ² Mawh kheu nan, kawncau nawh khankix ah nin ka nawh, "Kieh yix sawg bun krih awn ju tix kaux son simiang ex! kieh sibun an mawh cao priex rien ka maix, kieh nawh it ka piang naok maix, sonsang pon simiang ti siu ka heue." ³ Mawh kheu nan, kix hu sawg sibun mhawm grang pa awn ju tix kaux, ka daux haktiex pa kwang pui Isarelax, kix yaox Abisha sibun veng Shunam kix viex sibun an hoek ka simiang heue. ⁴ Sibun pa awn ju an, kied mhawm grang tete, nawh hoik priex rien ka simiang, viang mawh nan, simiang ang dex dawd mai nawh heue. ⁵ Adawniyax kawn simex Hagit yaw ti ah nin, "Aux tak yaog ti mawh simiang heue." Nawh khre rien ling lawx naing brung mai cub pui naing brung khankix pa sang to ka plak sivoe nawh tixphwan kaux heue. ⁶ Keeing nawh Davit ang sax ah nin ka nawh tom saux rhawm nawh tix bawg kawx, "Kheu maix lai yuh ceu in" Jao mawh nawh pa kied mhawm grang tix kaux, nawh mawh pux Apsalom heue. ⁷ Khaix an nawh hu kum tau mai Yuabax kawn simex Zeruya mai ka cao giex kaing li Abiata khankiex, kix hawt khaix nawh mai teem ka Adawniyax heue. ⁸ Viang mawh nan, cao giex kaing li Zadok mai Beneyax kawn simex Yehawyadax mai cao jhai Natan, Shimix, Re-i mai pui kwa pui vao Davit khankix, ang cu ti ot plak Adawniyax heue. ⁹ Adawniyax yuh krax tan ka yung mai mawie pa kluing khankix hawt rang Zawheliet pa ko hawt baoh haktiex Enrawgelax tan, nawh ghaok pux nawh pa mawh kawn simiang mai pui Yudax mai kawncau simiang khawmuik heue. ¹⁰ Viang mawh nan, nawh ang ghaok cao jhai Natan mai Beneyax pui kwa pui vao mai pux nawh Sawlamon heue. ¹¹ Yam an Natan hu krai grawng in ka Batashebax miex Sawlamon ah nin, "Ang maix nyang mhong grawng pa keud kawn simex Hagit Adawniyax ti sang yuh simiang lie? cao simiang ex Davit kawx ang nyang tawng ka grawng in heue." ¹² Sonsang klawd ju maix mai kawn simex maix Sawlamon, yam in kieh aux tawx krax keud ka maix liak? ¹³ Nied ti hu ka simiang Davit ah nin ka nawh, simiang cao simiang aux eue, maix hoik tiextu ka kawncau bun maix ah nin, "Kawn simex maix Sawlamon tak mawh pa plud ti kwang haktiex khaix aux mai nawh tak yaox ti ngawm ka piang dangngeung aux ang mawh lie? "Jao patix Adawniyax yaog ti mawh simiang lie? ¹⁴ Yam kawn sikah maix tau mai simiang tan, aux tak hawt khaix maix mai aux tak joh jhan lox maix khankix heue." ¹⁵ Mawh kheu nan, Batashebax laig ka daux lawg it simiang, simiang hoik kied kuad mai Abisha kawn sibun veng Shunam hoik priex rien ka simiang heue. ¹⁶ Mai Batashebax num kaing tix sivoe nawh mai krub ka simiang, khaix an, simiang ah nin, "Sang lo maix patix?" ¹⁷ Mai Batashebax ah nin ka nawh, "Simiang eue, maix hoik tiextu ka Simiang Siyiex maix mai hoik yuh sijax pa ah nin ka kawncau sibun maix, kawn simex maix Sawlamon tak mawh pa kwang haktiex khaix aux mai nawh tak mawh pa ngawm ka piang dangngeung aux heue." ¹⁸ Yam in Adawniyax yaog ti mawh simiang maix simiang aux kawx ang nyang tawng ka grawng in heue. ¹⁹ Nawh yuh krax tan ka mawie, yung pa kluing khankix tom nie mai ghaok cub kawn simiang khankix mai cao giex kaing li Abiata mai Yuabax cao kaing naing ting kru naing maix khankix, viang mawh nan, nawh ang ghaok ka kawncau maix Sawlamon heue. ²⁰ "Cao simiang aux mai simiang aux eue, pui Isarelax hoik jhak ka maix, sonsang krai maix pui mhong grawng sang mawh pui mawx pa plud ti ngawm ka piang dang ngeung cao simiang aux khaix maix heue. ²¹ Phan ang mawh nan, khaix hoik laig it simiang tau mai keeing tix, kawn simex aux Sawlamon mai khawm tokaux aux tak sawn mawh pui pa lud heue." ²² Yam kawn sikah Batashebax mai simiang, cao jhai Natan hoek laig ka dee an heue. ²³ Kix krai grawng hoek Natan ka simiang ah nin, "Cao jhai Natan hoik hoek, " Yam hoek nawh ka plak sivoe simiang, nawh gup ngai tix piang tiex mai krub ka simiang heue. ²⁴ Mai Natan ah nin, "Cao simiang mai simiang aux eue, mawh hoik ah maix nin, aux tak kieh Adawniyax plud ti kwang haktiex khaix aux mai ngawm ka piang dangngeung aux heue." ²⁵ Mawh kheu lih hu nawh daux in singaix mai yuh krax tan ka mawie mai yung pa kluing tom nie mai ghaok kawn simex simiang khankix mai cao kaing naing mai cao giex kaing li Abiata mai kix hoik ih nyaux ka plak sivoe nawh ah nin, kieh simiang lang ju heue. ²⁶ Viang mawh aux kawncau maix mai cao giex kaing li Zadok, Beneyax kawn simex Yehawyadax mai kawncau maix Sawlamon nawh ang ghaok heue. ²⁷ Mawh in pa hoik yuh simiang aux lie? Mai simiang ang nyang krai ka kawncau tix, mawh pui mawx pa sang ngawm ka piang dangngeung cao simiang khaix maix heue. ²⁸ Khaix an simiang Davit ah nin, "Kok Batashebax hoek ka aux" mawh kheu nan, Batashebax hoek mai cung ka plak sivoe simiang heue. ²⁹ Mai simiang tiextu ti ah nin, "Awm im ju Simiang Siyiex, pa hoik taoh ju aux khaing pa kha rhawm kuceu heue. ³⁰ Awm hoik tiextu aux ka Simiang Siyiex pui Isarelax mai hoik yuh aux sijax ka maix ah nin, kawn simex maix Sawlamon tak mawh simiang khaix aux mai nawh tak ngawm ka piang dangngeung aux mai mawh cao pa plud dee ot aux, mawh kheu nan aux tak yuh awm an daux in singaix heue." ³¹ Khaix an Batashebax num kaing tix ka piang tiex, krub ka simiang ah nin, "Kieh simiang cao aux Davit im ju leeing ju heue." ³² Mai simiang Davit ah nin, "Kok cao giex kaing li Zadok mai cao jhai Natan mai Beneyax kawn simex Yehawyadax hoek ka aux, " Mai kix hoek ka plak sivoe simiang heue. ³³ Simiang ah nin ka kix, "Kok kawncau cao simiang pex khankix hu tau mai pex mai kieh kawn simex aux Sawlamon brug law cie aux mai viex nawh hu ka veng Gihon heue. ³⁴ Kieh cao giex kaing li Zadok mai cao jhai Natan groi bee ka piang nawh tan, mai yaog nawh mawh simiang ka piang pui Isarelax mai phlu teettawng ah nin, kieh simiang Sawlamon lang ju lang phan heue. ³⁵ Khaix an pex tak hawt khaix nawh mai nawh tak ngawm ka piang dangngeung aux mai plud ti mawh simiang dee ot aux, mawh kheu aux hoik yaog nawh mawh pa kwang ka piang pui Isarelax mai ka pui Yudax heue." ³⁶ Mai Beneyax kawn simex Yehawyadax deeh ah nin ka simiang, "Amen, kieh Simiang Siyiex Cao simiang aux ah awm an heue." ³⁷ Awm hoik ot Simiang Siyiex tau mai simiang aux, kieh Nawh Cao nie baox ot tau mai Sawlamon mai kieh dangngeung nawh nie ting lhaong khaing dangngeung cie simiang aux Davit heue. ³⁸ Cao giex kaing li Zadok mai cao jhai Natan mai Beneyax kawn simex Yehawyadax mai pui Kheretix, pui Peletix lih hu mai kieh Sawlamon brug piang law cie simiang Davit mai viex nawh hu ka veng Gihon heue. ³⁹ Khaix an cao giex kaing li Zadok teei bee pa koe daux kawk rung khaing daux nyiex bwan man mai groi ka piang kaing Sawlamon mai kix phlu teettawng ah nin, "Kieh simiang Sawlamon. ⁴⁰ Pui pa hawt khaix nawh khawmuik, phlu lawk leh mai kied gaux rhawm tix mai haktiex awm pa dex sang bih, kheu kied riag yo kix lox tix sinum heue. ⁴¹ Khaix hoik naox kix ih nyaux tix Adawniyax mai can nyo sinie pa ot tau mai nawh tan, kix mhong lox ceu an mai yam mhong Yuabax ka lox teettawng nawh ah nin, "Veng sinum siaox yuh nin kheu grawng pa yuh ka mawx lie?" ⁴² Yam kawn sikah Yawnatan kawn simex cao giex kaing li pa kaux Abiata hoek ka nawh tan mai Adawniyax ah nin ka nawh, "Laig heue maix mawh pui mhawm tix kaux mai viex lox gaux rhawm hoek heue." ⁴³ Yawnatan pawk ah nin ka Adawniyax, "Ang mawh, simiang ex Davit hoik yaog Sawlamon mawh simiang phao heue." ⁴⁴ Mai simiang ploi cao giex kaing li Zadok mai cao jhai Natan mai Beneyax kawn simex Yehawyadax, pui Kheretix, pui Peliti hu tau mai Sawlamon mai kix kieh simiang Sawlamon brug law cie simiang heue. ⁴⁵ Mawh kheu cao giex kaing li pa kaux Zadok mai cao jhai Natan hoik groi bee ka piang kaing nawh mai hoik yaog nawh mawh simiang ka daux veng Gihon mai kix lih hu khaing tan mai krax pa gaux rhawm, mawh kheu nan, veng sinum siaox jao lox riag yo pui khankix, awm pa hoik mhong maix heue. ⁴⁶ Simiang Sawlamon hoik ngawm ka piang dangngeung haktiex heue. ⁴⁷ Lheu khaing an cub kawncau simiang khankix hu nawb bwan ka simiang ex Davit ah nin, "Kieh Siyiex yaog min ceu kaux simiang Sawlamon nie lheu khaing min ceu kaux maix, mai kieh Nawh Cao yuh dangngeung nawh nie lheu ting khaing dangngeung maix, khaix an simiang gup kaing tix ka piang ku it tix heue. ⁴⁸ Mai simiang rawg bwan ah in, kieh Simiang Siyiex pui Isarelax koe bwanson, kheu hoik tawx Nawh pui tix kaux, sonsang ngawm ka piang dangngeung aux daux in singaix, glang kawn yaox ngai aux ka ceu an heue" ⁴⁹ Khaix an cub nyo sinie pa ot tau mai Adawniyax, koe krax lhat graung mai kix tang yaog ti ing krax hu tix kaux mawx kaux an heue. ⁵⁰ Adawniyax lhat graung ka simiang Sawlamon heue. Mawh kheu nan, nawh yaog ti kaoh mai hu giex ka rung khu dee tan heue. ⁵¹ Kix krai grawng an ka simiang Sawlamon ah nin, "Adawniyax hoik lhat graung ka maix simiang Sawlamon tete heue. Nawh hoik giex ka rung khu dee tan ah nin, kieh simiang Sawlamon yuh krax tiextu ka aux daux in singaix, son ang nawh sang pah aux yum ka vaig heue" ⁵² Khaix an simiang Sawlamon ah nin, "Phan nawh pon jhi mhai ruk pa mawh tix pui mhawm, hauk kaing nawh tak ang cod piang tiex tix gawng kawx, viang mawh nan, phan yaox pa caox ka daux tokaux nawh, nawh tak mawh pa yum tete heue." ⁵³ Simiang Sawlamon ploi pui hu teei nawh lih khaing khu dee tan mai nawh hoek gup kaing tix sivoe simiang Sawlamon mai simiang ah nin ka nawh, "Deeh ing ka nyiex maix heue."

¹ Yam hoek bawg yam dex sang yum Davit mai nawh ghoik ti tawm lox ka kawn simex tix Sawlamon ah nin, ² "Aux tak hu ka daux krax pa hu kawn pui haktiex khankix, mawh kheu nan, teei riang rao tix mai kieh maix awm simex heue. ³ Mai priex ti hawt lox tawm jhawm krai Simiang Siyiex maix mai lawng hu daux krax Nawh Cao mai priex ti hawt lox lai beenli pa deuh Nawh Cao mai gumlox pingnyap Nawh Cao mai lox tat jhawm prawng Nawh Cao mai mhai ruk Nawh Cao, awm pa tiiem ti deuh ka daux gumlox been Mose, sonsang haok hwan ting lhaong maix ka daux ceu pa yuh tix khawmuik mai ka can dee hu maix, ⁴ sonsang kieh Simiang Siyiex gumlox Nawh Cao grum naog awm pa hoik krai Nawh Cao ka grawng pa dex mai aux yuh nin, phan kawn praix maix chix yuh satix tix mai lawng ti hu plak sivoe Aux daux krax pa mawh pa meh khawm rhawm rhi mai khawm ju tix khawmuik, ru maix tak ang jud khaing dangngeung pui Isarelax khankix heue. ⁵ Lheu khaing an maix hoik tawng ceu pa hoik yuh Yuabax, kawn simex Zeruya ka aux mai pa hoik yuh nawh ka cao kaing naing ting pui Isarelax pa kaux Abana kawn simex Nerax mai Amasa kawn simex Yeta pa hoik pah nawh ka kiex mai hoik kieh nham kiex jauh ka daux bawg yam pa yiien yawg mai nawh hoik kraix nham kiex ka piang maox rawd nyoi tix mai ka piang kiep pa ceep nawh ka caong tix heue. ⁶ Mawh kheu nan yuh awm pa koe pingnya cuyi maix mai paw kieh hauk kaing paing nawh, laig ka daux meung yum ka daux pa yiien yawg heue. ⁷ Viang mawh nan, jhi krax caux rhawm maix ka kawn simex Bazilie pui Gilat mai kieh kix ot sinax pui pa ih priex preem ka pheen sawm maix, mawh kheu hoek kix ti yuh bwanson ka aux, yam lih to aux ti luan khaing puxke maix Apsalom heue. ⁸ Shimix kawn simex Gerax pui Benyamin khaing yaong Bahurim ot tau mai maix, nawh hoik jhax lawg mai sibriem ka aux, yam hu aux ka veng Mahanem, nawh hoek ti rieb aux ka rawm klawng Yawdan mai aux hoik tiextu ka nawh, plak sivoe Simiang Siyiex ah nin, aux tak ang kieh maix yum ka vaig heue. ⁹ Paw keud nawh awm pa ang koe phimap, mawh kheu mawh maix pui koe pingnya cuyi maix tawng ceu pa sang khaw maix ti yuh ka nawh, mawh kheu nan pah ka pui pa paing hauk kaing an laig daux meung yum tau mai nham nawh heue." ¹⁰ Simiang Davit laig it tau mai keeing tix mai sipaung nawh ka daux veng Davit heue. ¹¹ Nawh hoik kwang ka piang pui Isarelax tixpon num, nawh kwang ka daux veng Hebron aliah num mai kwang ka daux veng Yerusaliem tixngoe loe num heue. ¹² Simiang Sawlamon ngawm ka piang dangngeung keeing tix simiang Davit mai haktiex pa kwang nawh khankix mawh pa haok hwan kaux cong heue. ¹³ Adawniyax kawn simex Hagit hoek ka Batashebax pa mawh miex simiang Sawlamon mai Batashebax ah nin ka nawh, "Mawh hoek maix ka daux krax pa nhim lie?" Mai nawh deeh ah nin, "Aux hoek daux krax pa nhim heue." ¹⁴ Nawh deeh ah nin, "Aux koe lox pa sang chawk ka maix tix ceu, "Mai Batashebax deeh ah nin, "Chawk heue." ¹⁵ Khaix an nawh ah nin, "Maix hoik tawng ka caw aux ti mawh simiang mai pui Isarelax khankix kawx hoik koe krax keud pot jun pot ka aux, sonsang mawh aux pa kwang ka piang kix heue." Viang mawh nan haktiex in hoik veeh ti khaing aux mai hoik deeh lih ti mawh cie pux aux, mawh kheu an hoik mawh alo Simiang Siyiex heue. ¹⁶ Yam in "Aux simie ti rawg tix ceuceu ka maix, paw doh thiang liak!" mai Batashebax ah nin ka nawh, "Krai heue." ¹⁷ Mai nawh krai ah nin, "Yuh bwan son krai ka simiang Sawlamon, mawh kheu nawh ang pon thiang ka lox maix, kieh nawh tawx aux moeng Abisha kawn bun veng Shunam heue." ¹⁸ Mai Batashebax ah nin, "Mhawm, aux tak sang krai son maix ka simiang heue." ¹⁹ Mawh kheu nan, Batashebax hu ka simiang Sawlamon, sonsang krai grawng Adawniyax mai simiang kaoh ti rieb ka Batashebax mai num kaing tix tawx krax nab yam ka nawh mai tawx dee ngawm dangngeung tix mu son miex tix mai Batashebax ngawm ka plak taix khawn dawm simiang heue. ²⁰ Khaix an nawh ah nin, "Aux sang rawg totaix pa iak tix ceu ka maix, paw thiang ka liak!" Mai simiang ah nin ka nawh, miex aux eue, "Rawg heue, aux ang thiang ka lox maix heue." ²¹ Mai nawh ah nin, "Tawx Abisha kawn bun veng Shunam, mawh moeng puxke maix Adawniyax heue." ²² Mai simiang Sawlamon pawk lox miex tix ah nin, "Jao patix maix lai mhaing Adawniyax moeng Abisha kawn bun veng Shunam, deeh baox mhaing meung haktiex in ka son nawh ha, nawh mawh puxke aux, rawg ka son nawh mai son cao giex kaing li Abiata mai son Yuabax kawn simex Zeruya heue." ²³ Khaix an simiang Sawlamon tiextu ka daux ceu kaux Simiang Siyiex ah nin, "Phan lox pa ah Adawniyax ang mawh pa keung nawh ti yum ka, kieh Siyiex yuh ceu pa nie lang teung ka piang aux heue. ²⁴ Awm im ju Simiang Siyiex mai hoik yaog aux ngawm ka piang dangngeung keeing aux simiang Davit mai hoik tawx aux ot ka daux nyiex haw, awm lox mukheu pa hoik yuh Nawh Cao, Adawniyax tak mawh pa yum daux in singaix heue." ²⁵ Mawh kheu nan simiang Sawlamon ploi Beneyax kawn simex Yehawyadax hu mai kieh pah Adawniyax yum heue. ²⁶ Mai son cao giex kaing li Abiata simiang ah nin, "Hu ka veng Anadok ka haktiex cao maix, mawh kheu maix keung ti mawh pa yum, viang mawh nan, aux ang nyang pah maix yum yam in, jao hoik klawm maix teug bwan sijax mukheu Simiang Siyiex ka plak sivoe keeing aux simiang Davit mai maix hoik kham krax kha rhawm ku bawg tau mai keeing aux heue." ²⁷ Sawlamon pluat ara Abiata khaing cao giex kaing li Simiang Siyiex mai sonsang pon kieh nawh gumlox Simiang Siyiex grum naog, ka pa hoik krai Nawh Cao grawng pa dex mai doeh nyiex ma Elix ka daux veng Shilaw heue. ²⁸ Yam hoik mhong Yuabax grawng ceu an, nawh ot ka plak Adawniyax, viang mawh nan, nawh ang ot plak Apsalom mawh kheu nan, Yuabax to laig daux nyiex gox bwan man Simiang Siyiex mai giex ka rung khu dee tan heue. ²⁹ Mai kix krai grawng an ka simiang Sawlamon ah nin, "Yuabax hoik to laig daux nyiex gox bwan man Simiang Siyiex, nawh ot hawt khu dee tan, khaix an simiang Sawlamon ploi Beneyax kawn simex Yehawyadax hu pah nawh yum heue." ³⁰ Beneyax hu ka nyiex gox bwan man Simiang Siyiex ah nin ka nawh, "Simiang nhie maix lih plak praix, " Mai Yuabax ah nin, "Ang aux lih, aux sang yum tin, " Mai Beneyax ing krai ka simiang ah nin, "Yuabax krai mai deeh pawk ah nin ka aux heue." ³¹ Mai simiang deeh ah nin ka nawh, "Yuh awm pa ah nawh, pah nawh yum mai sipaung nawh sonsang luan nham pa ang koe phimap pa hoik kieh Yuabax jauh singai khaing aux mai khaing paox nyiex keeing aux khankix heue. ³² Mawh kheu nan, Simiang Siyiex kieh nham phimap pa yuh nawh hoek ka piang kaing cao nawh, mawh kheu hoik pah nawh pui ra kaux pa nie rahsee nie mhawm khaing nawh yum ka vaig, pa mawh Abana kawn simex Nerax cao kaing naing ting pui Isarelax mai Amasa kawn simex Yeta, cao kaing naing ting pui Yudax, daux pa ang keeing aux simiang Davit tawng ka heue. ³³ Mawh kheu an nham phimap kix tak hoek ka piang kaing Yuabax mai ka piang kaing doeh ru nawh leeing ju, viang mawh nan, ka piang simiang Davit mai doeh ru nyiex ma nawh mai ka piang dangngeung nawh, krax pa nhim khaing Simiang Siyiex tak koe leeing ju heue." ³⁴ Mawh kheu nan, Beneyax kawn simex Yehawyadax haok daux nyiex gox bwan man mai pah nawh yum mai sipaung nawh ka daux nyiex cao nawh pa koe daux tiag heue. ³⁵ Simiang deeh yaog Abeneyax kawn simex Yehawyadax mawh cao kaing naing ting ka piang ka dee ot Yuabax mai yaog Zadok mawh cao giex kaing li ka dee ot Abiata heue. ³⁶ Khaix an simiang deeh ploi pui kok Shimix hoek ah nin ka nawh, "Sum maix ot nyiex daux veng Yerusaliem tix lhang mai paw lih hu khaing tan heue. ³⁷ Deuh maix tawng lox in mhawm mhawm, singaix lih hu maix khaing tan mai tiang ka rawm klawng Kidron maix tak yum tete, nham phimap maix tak hoek ka piang kaing maix heue." ³⁸ Shimix deeh ah nin ka simiang, "Ceu pa krai maix mawh pa mhawm, kawncau maix tak yuh awm pa krai maix simiang, " Mawh kheu nan, Shimix ot ka daux veng Yerusaliem tom rheung heue. ³⁹ Khaix hoik luan loe num siliex Shimix ra kaux to hu ka Akhi kawn simex Makha simiang veng Gata mai krai grawng an ka Shimix ah nin, "Siliex maix ot daux veng Gata heue." ⁴⁰ Shimix kaoh mai sau an brug tix ka piang la mai hu ka Akhi daux veng Gata, sonsang hu sawg ka siliex tix khankiex, Shimix hu mai deeh viex kiex hoek heue. ⁴¹ Mai kix krai grawng lih Shimix khaing veng Yerusaliem mai hu ka veng Gata mai grawng deeh hoek nawh khaing tan ka simiang heue. ⁴² Khaix an, simiang ploi pui kok Shimix ah nin ka nawh, "Aux hoik kieh maix tiextu ka daux ceu kaux Simiang Siyiex mai hoik tawx satix ka maix, deuh ti tawng mhawm mhawm singaix yam lih maix plak praix mai yam hu dee mawx ang ah maix tak yum tete ang mawh lie? Yam an maix deeh ah nin ka aux, lox krai maix ka aux mawh pa mhawm heue. ⁴³ Yuh ka mawh maix lai ang priex ti hawt lox sijax pa yuh tix ka Simiang Siyiex mai ka lox pingnyap pa tawx aux ka maix, " ⁴⁴ Simiang baox ah nin ka Shimix, "Maix hoik tang tawng daux rhawm tix, ka pa caox caig pa hoik yuh maix khankix ka keeing aux Davit, mawh kheu nan, Simiang Siyiex tak kieh pa caox caig pa yuh maix khankix hoek ka piang kaing maix heue." ⁴⁵ Viang mawh nan, simiang Sawlamon mawh pa pon bwanson mai dangngeung Davit tak mawh pa kaux cong plak sivoe Simiang Siyiex leeing ju heue. ⁴⁶ Mawh kheu nan, simiang tawx lox ka Beneyax kawn simex Yehawyadax, nawh hu mai pah Shimix yum, awm nan, meung haktiex mawh pa kaux cong daux tawm taix simiang Sawlamon heue.

¹ Sawlamon yuh paox pie tau mai Pharaw meung Ejiptux mai nawh teei ti moeng kawn sibun Pharaw, khaix an nawh viex sibun an ing ka veng Davit mai kiex ot tan tom hoik sum nawh nyiex haw tokaux tix mai nyiex bwan Simiang Siyiex mai guh veng vung viang veng Yerusaliem heue. ² Yam an mawh kheu ang nyang sum nyiex bwan son ceu kaux Simiang Siyiex tan tix lhang kawx, pui khankix yuh krax tan pa appong ka dee pa lhaong heue. ³ Sawlamon moh ka Simiang Siyiex mai nawh hawt grawng lawng khaix beenli pa deuh keeing nawh Davit mhawm mhawm, lheu khaing an nawh appong krax tan mai gleeing nyawng bhawng ka dee pa lhaong heue. ⁴ Yam an simiang lih hu ka veng Gibun, sonsang appong krax tan tix, mawh kheu dee an mawh dee pa kied ting lhaong, Sawlamon tan to tan pa gleeing ka piang khu dee tan tix rheng mu heue. ⁵ Simiang Siyiex lih bleeh ka Sawlamon daux veng Gibun, ka daux camaox ponsawm ah nin, "Simie maix Aux tawx ceu patix ka maix leh." ⁶ Mai Sawlamon ah nin, "Maix Cao hoik jhi krax pa caux rhawm tix ka kawncau Maix keeing aux Davit, mawh kheu nawh hawt grawng lawng khaix Maix Cao daux krax pa mawh meh mai pa rahsee mai pa rah rhawm tix sivoe Maix Cao, Maix Cao hoik tawx krax caux rhawm pa ting lhaong ka son nawh mai hoik tawx kawn simex ka nawh pa sang ngawm ka piang dangngeung nawh, awm pa koe daux in singaix heue. ⁷ Simiang Siyiex eue, Maix Cao hoik yaog kawncau Maix mawh simiang pa plud keeing aux Davit, viang mawh nan, aux kawn mawh kawn nyawm, aux ang tawng grawng pa sang lih sang laig tix heue. ⁸ Mai kawncau Maix Cao ot sigreung pui Maix pa hoik laug Maix ti teei mawh pui ting mai pa ang lai uik simin heue. ⁹ Mawh kheu nan, tawx pingnya krax tawng ka kawncau Maix, sonsang chix prawng ca aux ka pui Maix khankix mai sonsang chix gwieh aux ka pa mhawm mai pa caox, mawh pui mawx pa sang pon prawng ka cup pui haoh pui hu nie ding nie dod lie?" ¹⁰ Lox bwan pa rawg Sawlamon an, mawh pa khaw rhawm Simiang Siyiex ka heue. ¹¹ Simiang Siyiex ah nin ka nawh, "Mawh kheu maix ang rawg krax lang ju lang phan mai ang rawg krax mag mi mai ang rawg sonsang laux ju pui pa koeng ka maix khankix, viang mawh nan maix rawg ngie pingnya krax tawng sonsang chix prawng ca tix ka daux pa rahsee, ¹² Aux tak tawx awm pa rawg maix, jhak heue, Aux hoik tawx rhawm pa naog mai pingnya cuyi ka maix, ang koe pui pa awm maix sivoe in tix kaux kawx mai ang lai koe pa awm maix khaix in tix kaux kawx heue. ¹³ Mai Aux baox deeh tawx ceu pa ang maix rawg, krax mag mi mai min plakngai ka maix, glang singaix yam im ju maix, simiang pa awm maix tak ang koe tix kaux kawx heue. ¹⁴ Phan maix lawng hu daux krax Aux mai priex ti hawt beenli Aux mai lox pingnyap Aux khankix, awm hoik lawng keeing maix Davit khaix Aux, Aux tak kieh singaix im ju maix lang heue." ¹⁵ Yam siduad Sawlamon khaing it tix, nawh tawng ka mawh camaox, khaix an nawh hu ka veng Yerusaliem mai cung ka plak sivoe teug bwan sijax mukheu Simiang Siyiex mai tan krax tan pa gleeing mai krax tan pa nhim mai yuh pawie khan kheu son kawncau tix khankix heue. ¹⁶ Yam an sibun coh kaux ra kaux hoek cung ka plak sivoe simiang heue. ¹⁷ Sibun an tix kaux ah nin, "Simiang eue, sibun in mai aux ot daux nyiex tix lhang, aux hoik keh glang yam ot yiex tau heue. ¹⁸ Yam hoik naog loe singaix, sibun in kawx keh mai yiex ot tau, pui tang kaux ang ot tau mai yiex tix kaux kawx daux nyiex heue. ¹⁹ Mai kawn simex sibun in hoik yum ponsawm, kheu jao gut nawh yam it tix heue. ²⁰ Mawh kheu nan, nawh kaoh greung sawm, yam laig it aux mai teei kawn simex aux khaing aux mai deuh kawn simex aux ka piang naok tix mai deuh kawn simex yum tix ka piang naok aux heue. ²¹ Yam kaoh aux khaing it tix ponngawb, sonsang tawx kawn simex tix peue, aux yaox ka hoik yum nawh, viang mawh nan, yam jawg aux ti jhak ponngawb, kawn an ang mawh kawn simex pa keh aux heue." ²² Khaix an, bun tang kaux an tix kaux ah nin "Ang mawh, kawn ngie pa im ju an, mawh kawn simex aux, kawn simex pa yum an mawh kawn simex maix, " Mai bun sivoe an deeh ah nin, "Ang mawh, kawn simex pa yum an mawh kawn simex maix, kawn simex pa im an mawh kawn simex aux, " Awm an kiex thung thiang paox ti ka plak sivoe simiang heue. ²³ Mai simiang ah nin, bun tix kaux ah nin, "Kawn simex im in mawh kawn aux, kawn simex pa yum an mawh kawn maix mai bun tang kaux ah nin, ang mawh, kawn simex pa yum an mawh kawn maix mai kawn simex pa im mawh kawn aux heue" ²⁴ Khaix an simiang ah nin, "Viex vaig hoek ka aux tix kre, " Mawh kheu nan, kix viex vaig tix kre hoek ka simiang heue. ²⁵ Mai simiang ah nin, "Lug kawn ngie pa im an koe ra plak mai tawx ka bun an kiex tix kaux tix plak heue." ²⁶ Khaix an, miex pa im kawn simex an, krai ah nin ka simiang, mawh kheu kied caux rhawm kiex ka kawn simex tix, kiex ah nin, "Simiang aux eue, tawx kawn pa im an ka kiex, paw doh pah kawn simex an liak!" Viang mawh nan, bun tang kaux an pawk ah nin, "Paw kieh mawh cie aux mai paw kieh mawh cie maix, kieh gwieh heue." ²⁷ Simiang deeh pawk lox nawh ah nin, "Tawx kawn pa im an ka bun sivoe, paw doh pah kawn simex an, nawh mawh miex kawn ngie an tete heue." ²⁸ Pui Isarelax khankix mhong grawng pa prawng ca simiang, kix kied koe krax lhat graung kah, mawh kheu yaox kix koe pingnya cuyi Siyiex ka daux nawh, sonsang pon kwang nawh haktiex daux pa rahsee heue.

¹ Sawlamon mawh simiang ka piang pui Isarelax heue. ² Mai inkix mawh pa kwang greem nawh khankix, Azarix kawn simex Zadok mawh cao giex kaing li heue. ³ Elihawrap mai Ahiyax kawn simex Shisha mawh cao tiiem lai, Yehoshaphat kawn simex Ahilut mawh cao kaing priex carang heue. ⁴ Beneyax kawn simex Yehawyadax mawh cao kaing naing ting ka piang kru naing, Zadok mai Abiata mawh cao giex kaing li heue. ⁵ Azarix kawn simex Natan mawh cao kwang ka piang cub cao kaing, Zabuk kawn simex Natan mawh cao giex kaing li mai mawh paox grawm simiang heue. ⁶ Ahisha mawh cao kwang ka daux nyiex haw mai Adawniram kawn simex Abada mawh cao kwang ka piang cub pui yuh kaing heue. ⁷ Mai Sawlamon deuh cao pa kwang piang haktiex pui Isarelax kao ra kaux, pa sang tawx pa ih son simiang mai son pui pa ot daux nyiex haw nawh, daux tix num, tix khix tix kaux, mawh cao teei beeh glawm khre rien ka pa ih heue. ⁸ In mawh ceu kaux kix, Hurax mawh cao kwang ka piang gawng Epharem, ⁹ Bendeka mawh cao kwang ka veng Makat, veng Shalabim, veng Bietshemiet mai veng Elonbiethanan khankix, ¹⁰ Benhashiet mawh cao kwang ka veng Arubot mai veng Sawkhaw mai haktiex pa koe hawt veng Hepha khankix, ¹¹ Benabinadat mawh cao kwang haktiex Dawrax khawmuik, nawh teei ti moeng kawn bun Sawlamon pa kaux Taphat heue. ¹² Banax kawn simex Ahilut mawh cao kwang veng Tanak, veng Magidaw mai veng Bashan khawmuik, pa koe praok veng Zaretan pa koe greem veng Yezerelax khankix, jah ka veng Bietshan tom hoek ka veng Abelamehawla hu tom hoek ka plak laong veng Yawkanam heue. ¹³ Begebax mawh cao kwang ka veng Ramat pa koe ka daux haktiex Gilat mai dee ot doeh ru Manashe yaong Ya-irax pa koe ka daux haktiex Gilat mai veng Aragawbax, pa koe ka haktiex Bashan mai khawm veng ting tixgliah veng, pa koe guh veng mai pa yuh jhong siviex veng ka tawng lheung khankix heue. ¹⁴ Ahinadat kawn simex Idaw, mawh cao kwang ka veng Mahanem, ¹⁵ Ahima mawh cao kwang ka daux kien Napthalix, nawh kawx teei ti moeng Basemat kawn bun Sawlamon, ¹⁶ Banax kawn simex Hushie mawh cao kwang ka daux kien Asha mai veng Alot, ¹⁷ Yehoshaphat kawn simex Parua mawh cao kwang ka daux kien Issakha, ¹⁸ Shimix kawn simex Elax, mawh cao kwang ka daux kien Benyamin, ¹⁹ Gebax kawn simex Urix, mawh cao kwang ka daux haktiex Gilat, haktiex cie simiang Sihong pui Amawrix mai cie Awgax khaing haktiex Bashan mai nawh mawh cao kwang ka haktiex an nong nong heue. ²⁰ Pui Yudax mai pui Isarelax hoik kied haoh hun awm mhaik praok rawm sigrit sigra, kix ih nyaux mai gaux rhawm ti heue. ²¹ Sawlamon kwang haktiex khawmuik, jah ka rawm klawng Yufrethi tom hoek ka haktiex pui Philitix, tom hoek ka mee haktiex Ejiptux, kix viex keen hoek mai yuh kaing jhaw son Sawlamon, glang yam im ju nawh heue. ²² Priex ih Sawlamon tix ngaix uik phawng gaox nghox ca tixngoe kawrax mai phawng gaox koi tixgliah kawrax heue. ²³ Mawie pa laung kieh kluing kao mu mai mawie bla sawm daux gwang rib tixnga mu mai yung tix yieh mu, lheu khaing an mawh cak, pex rang, kiah mai sim ceu pa bee khankix heue. ²⁴ Mawh kheu hoik pon kwang nawh haktiex plak klip singaix rawm klawng Yufrethi khawmuik, jah ka veng Tiphasa tom hoek ka veng Gaza mai nawh hoik kwang ka piang simiang haktiex can pa koe ka plak klip singaix rawm klawng Yufrethi mai hoik kieh haktiex koe hawt vung viang nawh yiien yawg tix heue. ²⁵ Pui Yudax mai pui Isarelax yaox ti ot yiien yawg ka greem veei nhu plix siiet mai greem veei khaox ruh tix, jah ka veng Dan, tom hoek ka veng Berashebax, glang bawg yam kwang nawh haktiex heue. ²⁶ Sawlamon koe kawg brung pon mheen lhang, son ling lawx naing nawh mai pui naing brung tix mheen ra rheng kaux heue. ²⁷ Cao kwang kao ra kaux hoik tang teei beeh glawm tix kaux tix khix mai khre rien pa ih son Sawlamon mai son pui pa ot daux nyiex haw khawmuik mai yaox ti khre grum naog heue. ²⁸ Kix baox viex nghox koi mai brex nghox hoek ka son brung mai law kaux mawh kaux an, awm koe beeh glawm kix heue. ²⁹ Mai Siyiex tawx pingnya cuyi ka Sawlamon mai pa vieh va rhawm awm mhaik rawm sigrit sigra heue. ³⁰ Mawh kheu nan, pingnya cuyi Sawlamon lheu khaing pingnya cuyi pui pa ot ka plak lih singaix mai khaing pui pa koe pingnya cuyi pa ot ka daux meung Ejiptux heue. ³¹ Sawlamon nie lheu koe pingnya cuyi khaing pui khawmuik mai khaing Ethan pui Ezarahi mai Heman, Khalakhawla mai Narada kawn simex Mahawla khankix mai min ceu kaux nawh hoik tah hu ka piang haktiex khawmuik heue. ³² Nawh ah lox kab loe rheng gum mai lai rhax tix rheng mai phwan phuk heue. ³³ Nawh baox krai grawng khaox khankix, jah ka khaox gix pa koe ka haktiex Lebanon, tom hoek ka khaox taux im krim pa kuah ka piang guh veng, nawh baox krai grawng totiag kuceu mai grawng sim kuceu mai viag pa chix chuh chix mu mai grawng kax daux rawm khankix heue. ³⁴ Mai simiang pui ka piang haktiex khawmuik, pa hoik mhong ka grawng pingnya cuyi nawh khankix, hoek sonsang nghiet tix pingnya cuyi pa chix simiang Sawlamon heue.

¹ Yam mhong Hiram simiang veng Turux ka groi kix bee ka Sawlamon mai plud dee ot keeing tix, nawh ploi kawncau ti hu ka Sawlamon, mawh kheu moh Hiram ka simiang Davit jheung jheung heue. ² Mai Sawlamon ploi pui ti hu ah nin ka Hiram, ³ Maix tawng ka ang keeing aux Davit pon sum nyiex bwan ka daux ceu kaux Simiang Siyiex nawh, kheu yaox nawh ti puing naing kudah tom hoek bawg yam kieh Simiang Siyiex pui koeng nawh khankix, ot greem tiag caong nawh heue. ⁴ Yam in Simiang Siyiex kieh haktiex hawt vung viang an yiien yawg, mawh kheu ang pui koeng pui khoi mai pui caox caig khankix lai koe heue. ⁵ Aux keud ti sang sum nyiex bwan ka daux ceu kaux Simiang Siyiex aux, awm pa hoik ah Simiang Siyiex ka keeing aux Davit, kawn simex maix pa sang yaog aux mawh cao pa ngawm piang dangngeung maix mai pa sang plud maix an, nawh tak sum nyiex bwan ka daux ceu kaux Aux heue. ⁶ Mawh kheu nan, tawx lox ka kawncau maix, sonsang kid kix khaox piak van son aux, khaing gawng Lebanon mai kawncau aux khankix tak teem kawncau maix mai aux tak tawx ngawh riang kawncau maix, maix tawng ang pui yix chix kid khaox awm chix kid pui Sidom heue. ⁷ Yam mhong Hiram ka lox Sawlamon, nawh kied koe krax gaux rhawm ah nin, "Kieh krax pa yaogyaw bwanson koe ka Simiang Siyiex ka daux in singaix, mawh kheu Nawh Cao hoik tawx kawn simex Davit pa koe pingnya cuyi tix kaux, kwang ka piang pui ting heue." ⁸ Khaix an, nawh ploi pui hu ah nin ka Sawlamon, "Aux hoik keud ti yaox lox pa tawm maix ka aux, aux tak tawx khaox piak van mai khaox gix awm pa lo maix heue." ⁹ "Kawncau aux khankix tak teei khaox an lih khaing gawng Lebanon mai viex hoek krax rawm sigrit sigra, aux tak kieh kix sibloe khaox an ka piang kram daux rawm sigrit sigra mai viex hoek dee tin mai kix tak rieb khaox an ka dee an mai tak yaox ti tawx pa ih grum naog ka son pui aux khankix, sonsang fah rhawm aux ka heue." ¹⁰ Mai Hiram tawx khaox piak van mai khaox gix awm pa simie nawh ti lo heue. ¹¹ Son priex pa sang ih pui Hiram tix num hoik tix num, Sawlamon tawx gaox nghox ca ra mheen kawrax mai bee pa hoik ciied singax tixnga kawrax heue. ¹² Mawh kheu nan, Simiang Siyiex tawx pingnya cuyi ka Sawlamon, awm pa hoik koe lox mukheu Nawh Cao, son ang naing lai koe, Hiram mai Sawlamon yuh sijax mukheu tau mai paox tix heue. ¹³ Simiang Sawlamon laug pui pa sang yuh kaing ka daux pui Isarelax mai pui pa hoik laug nawh koe loe mheen kaux heue. ¹⁴ Mai nawh ploi kix lai loh ti ot ka gawng Lebanon, tix khix tix mheen kaux mai kix yaox ti ot piang gawng Lebanon tix khix mai kix yaox ti deeh ing ot ka daux nyiex tix ra khix mai Adawniram mawh cao kaing pa kwang ka pui yuh kaing heue. ¹⁵ Pui pa cau Sawlamon kieh klawm khaox koe aliah mheen kaux mai pui pa kaong simaox ka piang gawng koe daix mheen kaux heue. ¹⁶ Mai Sawlamon kieh pui loe rheng loe yieh kaux mawh cao kaing pa bung ka piang pui pa yuh kaing khankix heue. ¹⁷ Simiang tawx lox ka kix mai kieh kaong simaox ting mai simaox koe ngawh koe jum mai simaox pa hoik saik tix khankix hoek, sonsang kaw jaong num nyiex bwan ka heue. ¹⁸ Mawh kheu nan, cub cangmai Sawlamon mai cangmai Hiram tau mai pui Gebalax khre rien khaox mai simaox sonsang sum ka nyiex bwan heue.

¹ Khaix hoik lih hu pui Isarelax khaing meung Ejiptux pon yieh tixdaix num, yam kwang simiang Sawlamon ka piang pui Isarelax pon num, ka daux khix Zepha khix ra, nawh jah tix sum nyiex bwan Simiang Siyiex heue. ² Nyiex bwan pa sum simiang Sawlamon son Simiang Siyiex, krax lang tix gliah sawk, krax vieh tixnga sawk, krax lhaong tixngoe sawk heue. ³ Sim dub pa koe sivoe nyiex bwan, plak lang tixnga sawk, plak vieh kao sawk, plak vieh an sidu mai nyiex bwan heue. ⁴ Mai nawh yuh siviex iak sonsang riang ka daux nyiex bwan heue. ⁵ Nawh sum lawg jawn hawt vung viang plak praix ding nyiex bwan, hawt vung viang lawg pa singax singeh mai lawg pa plak jhi khawm ra dah, lawg jawn hoik rawb vung viang an heue. ⁶ Lawg plak greem vieh phwan sawk, lawg sigreung vieh liah sawk mai lawg plak piang vieh aliah sawk, nawh yuh lat ngip paox ti hawt vung viang plak praix nyiex bwan, son ang lat khankix chun tix laig ka ding nyiex bwan heue. ⁷ Yam sum ka nyiex bwan, kix sum ka simaox pa saik pa hoik khre tix sivoe ang nyang viex hoek, mawh kheu nan, ang lai chix mhong lox daix, lox moe mai lox kraung rhiem yam sum ka nyiex bwan heue. ⁸ Krax laig ka lawg plak greem koe ka plak dawm nyiex bwan, kix haok ka lawg sigreung ka bawng vawk vek, khaing lawg sigreung haok ka lawg plak piang glawk loe heue. ⁹ Mai nawh sum nyiex bwan hoik grum naog mai nawh yuh braux plak greem nyiex rawg bwan mai lhop rong, nuk ka phia khaox piak van heue. ¹⁰ Nawh sum lawg rawb vung viang nyiex bwan lhaong phwan sawk mai lawg an sitoe tix mai nyiex bwan ka lat khaox piak van heue. ¹¹ Gumlox Simiang Siyiex hoek ka simiang Sawlamon ah nin, ¹² pa dex mai nyiex bwan sum maix in, phan maix hawt lox lai beenli Aux mai nghiet lox tat jhawm prawng Aux mai priex ka lox tawm pingnyap Aux mai hawt yuh ceu an khawmuik, Aux tak kieh gumlox pa hoik krai Aux ka keeing maix Davit kaux cong mai maix heue. ¹³ Mai Aux tak ot sinax pui Isarelax mai ang tik vud ka pui Aux Isarelax heue." ¹⁴ Simiang Sawlamon hoik sum nyiex bwan tom grum naog heue. ¹⁵ Mai nawh tawb ding plak daux khankix ka phia khaox piak van, jah khaing phia tawm daux nyiex bwan tom hoek ka braux plak daux yuh tix ka khaox mai nawh tawm ka piang bing daux nyiex bwan ka phia khaox gix pu heue. ¹⁶ Nawh yuh lawg dee pa kied singax singeh, krax lang krax vieh tixnga sawk awm paox, ka plak khaix daux nyiex bwan ka phia khaox piak van heue. ¹⁷ Mai lawg pa koe daux sigreung nyiex bwan, sivoe ngai dee pa kied singax plak lang koe tixpon sawk heue. ¹⁸ Plak daux nyiex bwan koe khaox piak van pa hoik bre tix saik awm tux tai mai riang tai pa hoik pruh pa yuh tix ka khaox piak van, ka ding an ang lai chix yaox ka simaox heue. ¹⁹ Mai nawh khre rien dee pa kied singax singeh daux nyiex bwan, sonsang deuh teug sijax mukheu Simiang Siyiex tan heue. ²⁰ Krax lang lawg dee pa kied singax singeh koe tixnga sawk, plak vieh tixnga sawk mai plak lhaong tixnga sawk, nawh om an ka khri nawnaw mai yuh khu dee tan ka khaox piak van heue. ²¹ Simiang Sawlamon om plak daux nyiex bwan ka khri nawnaw, nawh takteue soi khri ka sivoe ngai dee pa kied singax an mai om ka khri heue. ²² Nawh om nyiex bwan ka khri, tom sidah hoik sum ka nyiex bwan heue. Mai baox om khu dee tan mai lawg dee pa kied singax singeh ka khri heue. ²³ Nawh yuh riang Cherubin ra mu pa lhaong kao sawk ka khaox sanlun ka dee pa kied singax singeh heue. ²⁴ Pruik Cherubin an tix plak koe phwan sawk mai plak an tix plak koe phwan sawk, mawh kheu nan jah ka toeh pruik plak in tom hoek toeh pruik plak an lang kao sawk heue. ²⁵ Rieng Cherubin tang mu hoik tiag tix koe kao sawk, Cherubin an khawm ra mawh pa sidu awm paox tix mai awm riang grang Asherax paox tix heue. ²⁶ Krax lhaong riang Cherubin an tix mu koe kao sawk mai riang Cherubin an tang mu kawx sidu awm paox tix heue. ²⁷ Nawh deuh riang Cherubin an ka daux lawg pa kied singax, mai pruik riang Cherubin an di tix lih mai pruik Cherubin an tix mu cux ka ding plak in mai pruik Cherubin tang mu an cux ka ding plak an mai pruik ankiex khawm ra hoik cux paox ti, tix mu tix plak ka daux sigreung lawg an heue. ²⁸ Mai nawh om riang Cherubin an ka khri heue. ²⁹ Mai nawh saik riang Cherubin mai khaox jhie yaong mai pruh tai hawt vung viang plak praix plak daux nyiex bwan heue. ³⁰ Nawh om phia tawm nyiex bwan ka khri khawm plak daux plak praix heue. ³¹ Son krax laig ka dee pa kied singax singeh nawh yuh siviex ka khaox sanlun, plah phia siviex mai pang siviex khankix koe phwan son tix son khaing ding heue. ³² Nawh yuh siviex an ra mu ka khaox sanlun mai saik riang Cherubin mai riang khaox jhie yaong mai riang pruh tai khankix ka piang siviex mai om an kix ka khri mai baox phruah rawm khri ka piang riang Cherubin mai ka khaox jhie yaong heue. ³³ Son pang siviex laig ka daux, nawh yuh ka khaox sanlun, pa vieh khaing ding pon son tix son heue. ³⁴ Mai siviex an ra mu yuh tix ka khaox gix mai plah siviex an ra mu chix niiep ti mawh tix mu mai plah siviex pa deuk an ra mu kawx chix niiep ti awm an heue. ³⁵ Mai nawh saik riang Cherubin mai riang khaox jhie yaong mai riang pruh tai ka piang ceu an khankix, mai nawh om an khankix ka khri mai nawh baox om khri ka piang rhoi saik khankix heue. ³⁶ Mai nawh hoik kaw jaong ding ka simaox pa hoik saik tix loe thaix mai jaong ding khankix ka phia khaox piak van tix thaix heue. ³⁷ Ka daux pon num tix num khix Zipha khix ra, kix jah tix kaw num riah nyiex bwan Simiang Siyiex heue. ³⁸ Ka daux kao tix num ka khix Bulax khix daix, nyiex bwan hoik sum ti khawmuik mai hoik hoik awm pa bak pa keud kix heue. Kix sum nyiex bwan an aliah num heue.

¹ Sawlamon sum nyiex haw tix kao loe num mai nawh hoik kied grum naog khawmuik heue. ² Nawh sum nyiex haw ka khaox daux nong gawng Lebanon khankix, krax lang tix yieh sawk, krax vieh tixphwan sawk mai krax lhaong tixngoe sawk, tau mai rong pon tia mai kab lat ka piang rong heue. ³ Mai nawh yuh braux ka phia khaox piak van, lawg plak piang pa koe ka piang rong tixpon phwan lawg, tix tia koe kao phwan lawg heue. ⁴ Siviex iak koe loe tia mai siviex iak an hoik ra lai see ka paox ti heue. ⁵ Siviex mai siviex iak mai pang nawh khankix mawh pakpeung pon daog mai siviex iak loe tia ra lai see ka paox ti heue. ⁶ Nawh sum nyiex kum pa koe rong, krax lang tixphwan sawk mai krax vieh tixngoe sawk, koe sidub ka plak siviex iak an loe tia tau mai rong khawm glawk bawng heue. ⁷ Mai nawh yuh nyiex kum dangngeung pa mawh dee prawng see, nawh tawm an ka phia khaox piak van, jah ka bing nyiex tom hoek ka braux plak daux heue. ⁸ Mai nyiex haw ot nawh koe plak khaix nyiex kum, rhoi khaix taix pa yuh kix awm paox tix mai nawh baox yuh nyiex tix lhang pa awm nyiex kum dee prawng see, son kawn bun Pharaw pa mawh moeng nawh heue. ⁹ An khawmuik sang ti ka simaox pa koe ngawh mai saik sidu awm paox tix mai rid plak khaix mai sivoe ka jhi, jah khaing plak jaong tom hoek plak piang mai baox sang simaox jah ka plak praix tom hoek ka brawk ting heue. ¹⁰ Jaong num an sang tix ka simaox pa kied ting pa koe ngawh jum mai simaox an tiblah lang kao sawk, tiblah lang daix sawk heue. ¹¹ Ka piang an mawh simaox pa koe ngawh jum, pa hoik saik tix sidu awm paox tix mai khaox piak van heue. ¹² Nawh vie vung viang brawk nyiex haw ka simaox pa hoik saik tix loe tia mai ka khaox piak van tix tia, pak daux brawk nyiex bwan mai sidub nyiex bwan kawx vie tix awm an heue. ¹³ Simiang Sawlamon ploi pui hu kok ka Hiram khaing Turux heue. ¹⁴ Nawh mawh kawn simex miexmai pui Napthalix mai keeing nawh mawh pui veng Turux cao yuh kaing kraung tawng lheung, nawh grum naog ka pingnya cuyi mai krax tawng krax yung mai min ka kaing kraung tawng lheung heue. Nawh hoek ka simiang Sawlamon mai yuh kaing son nawh khawmuik heue. ¹⁵ Nawh raug rong tawng ra mu, rong tix mu lhaong kao daix sawk, plak ting kao ra sawk heue. ¹⁶ Nawh baox raug kaing rong ra mu ka tawng sonsang sau ka piang toeh rong, krax lhaong kaing rong tix mu koe phwan sawk mai plak lhaong an tix mu kawx koe phwan sawk heue. ¹⁷ Nawh yuh ngai rub tawng mai maox ceng tawng mai lhop ngai rub tawng aliah mu ka piang choek rong tix mu ka ku mu rong heue. ¹⁸ Nawh yuh riang plix kla jiang mai sau ka piang ngai rub ra tia vung viang kaing rong khankix, sonsang tawb ka piang kaing rong pa koe ka piang toeh rong khankix mai ka kaing rong pa kawn deuk an tix mu kawx yuh awm an heue. ¹⁹ Mai kaing rong pa koe piang toh rong sidub khankix mawh kho tai kraox nhawng pa koe ka pon sawk heue. ²⁰ Nawh sau plix kla jiang khankix ka piang kaing rong pa koe piang toh rong an ra mu, hawt dee peem rong dex dee koe ngai rub hawt vung viang ji koe riang plix kla jiang ka ra tia, khawm ra tia koe ra yieh mu heue. ²¹ Nawh sum rong sidub nyiex bwan, mai jung rong tix mu ka plak dawm kok an mawh Yakhim mai baox jung rong tix mu ka plak gwiex mai kok an mawh Bawzax heue. ²² Toh kaing rong koe kho tai kraox nhawng ka heue. Mai kaing yuh rong khankix hoik sidah heue. ²³ Nawh baox raug dung rawm tawng lheung lak lo, krax vieh kao sawk, lhaong phwan sawk mai hawt vung viang moing koe tixngoe sawk heue. ²⁴ Hawt greem praok moing hoik yuh t sau riang loi plix singiien hawt vung viang moing tix sawk kao mu, riang loi plix singiien an ra tia hoik raug tix tau ka moing dung rawm heue. ²⁵ Mai deuh dung rawm an ka piang riang mawie kao ra mu, riang mawie an loe mu veeh ngai tix plak laong, loe mu veeh ngai tix plak klip singaix, loe mu veeh ngaix tix plak seh mai an loe mu veeh ngai tix ka plak lih singaix mai deuh dung rawm an ka piang riang mawie khankix mai kieh mawie khankix ghaix kre tix ka plak daux heue. ²⁶ Krax pu dung rawm an, koe tix tiag taix mai moing awm pakpeung moing klong mai awm kho tai kraox nhawng mai pon sau rawm ka daux ra rheng bat heue. ²⁷ Nawh yuh khaox ngawm tawng lheung kao mu, lang pon sawk, vieh pon sawk, lhaong loe sawk heue. ²⁸ Nawh yuh pakpeung khaox ngawm awm in, vung viang daog khaox ngawm an koe daux sang sau lat rhiem ka heue. ²⁹ Ka piang dee sau lat an koe riang sivai sangsi, riang mawie, riang Cherubin ka heue. Ka piang daog khaox ngawm an koe dang tix mu, ka plak greem riang sivai sangsi, koe mawie mai riang kho tai ka heue. ³⁰ Khaox ngawm tix mu koe jaong lawx tawng lheung pon mu mai khawm gawng lat tawng ka mai khawm pon daog koe dang pa sang deuh pan ka heue. Dang pa deuh pan hoik raug tix kab ka khaox ngawm an mai koe riang kho tai ka ku mu heue. ³¹ Moing dang pa ting an vieh tix sawk, mai lak lo daux mai pakpeung awm khaox ngawm, lang tix sawk, mai tix diex mai ka piang praok moing khankix mawh pa bre tix saik, dang pa deuh pan an koe pakpeung pon daog mai ang lak lo daux heue. ³² Greem lat khankix koe jaong lawx pon mu, gawng jaong lawx an hoik kleuk tix mai khaox ngawm, lhaong jaong lawx ku mu koe tix sawk mai tix diex heue. ³³ Jaong lawx an khankix yuh awm pakpeung jaong ling lawx naing brung, gawng lat, jim, plawng mawng mai khawm gawng joh khawmuik mawh pa raug tix heue. ³⁴ Khaox ngawm an tix mu koe caong pa joh ka pon daog, caong an mawh pa raug tix kab mai khaox ngawm heue. ³⁵ Ka piang caong khaox ngawm an sau kangkaw lak lo pa koe tix diex ka, caong mai lat khankix kawx hoik mawh pa raug kleuk tix tau mai toeh khaox ngawm an heue. ³⁶ Ka piang pakngai dang mai phia tawm khankix, hoik saik riang Cherubin mai sivai sangsi mai khaox jhie yaong tau mai riang kho tai hawt vung viang heue. ³⁷ Nawh yuh khaox ngawm pa awm paox tix kao mu an khawmuik hoik raug awm paox tix, diang mai pakpeung kawx awm paox tix heue. ³⁸ Nawh yuh pan ting kao mu ka tawng, pan ting an tix mu hoik kub sau rawm daux tix pon bat mai pan ting an vieh pon sawk, ka piang khaox ngawm kao mu nawh deuh pan ting ka piang ku mu heue. ³⁹ Mai nawh deuh khaox ngawm plak dawm nyiex bwan phwan mu, plak gwiex phwan mu mai deuh dung rawm plak dawm nyiex bwan plak seh krax lih singaix heue. ⁴⁰ Hiram hoik yuh aw, bug rawm mai pan khankix mai nawh hoik yuh kaing son simiang Sawlamon mai nyiex bwan Simiang Siyiex heue. ⁴¹ Ceu pa hoik yuh nawh khankix, mawh rong ting ra mu toeh peem kaing rong ra mu mai ngai rub pa tawb piang toeh rong an ra pheen, ⁴² mai riang plix kla jiang khankix pon yieh mu, pa sau ka piang ngai rub an ra pheen, tix pheen ra tia ka piang ngai rub pa sang tawb ka piang toeh peem kaing rong an khawm ra heue. ⁴³ Khaox ngawm kao mu mai pan ting kao mu, pa koe ka piang khaox ngawm khankix, ⁴⁴ dung rawm tix mu mai riang mawie kao ra mu, pa koe plak greem dung rawm an, ⁴⁵ mai aw, bug rawm mai pan ting khankix mai kraung ceu in khawmuik hoik mawh pa kieh simiang Sawlamon Hiram yuh son nyiex bwan Simiang Siyiex, pa hoik raug tix ka tawng lheung heue. ⁴⁶ Simiang hoik kieh kix raug ceu inkix ka dee koe tiex klox ka daux lung Yawdan, sinax veng Sukot mai veng Zaretan heue. ⁴⁷ Sawlamon ang lai ciang tix yaox ka kraung an khankix, kheu hoik kied nie, krax cien tawng lheung ang lai dak uik tawng ka heue. ⁴⁸ Sawlamon yuh kraung shiao ka daux nyiex bwan Simiang Siyiex khawmuik, pa mawh khu khri dee tan mai pheen khri son pa khan blah plak sivoe Nawh Cao, ⁴⁹ mai jawk ten khri nawnaw, pa koe plak dawm phwan mu mai plak gwiex phwan mu, ka plak sivoe dee pa kied singax, riang kho tai, kawk ngu khawm gip kong khri, ⁵⁰ kawk, sigiiep ngu, klong, lawk tuh mai pan pa yuh ka khri nawnaw mai jhong siviex khri, son siviex ting pa koe ka daux lawg plak daux dee pa kied singax mai son siviex laig daux lawg ting bang kum pa koe ka daux nyiex bwan heue. ⁵¹ Khaix hoik yuh simiang Sawlamon kaing jhaw khawmuik ka son nyiex bwan Simiang Siyiex, nawh viex pa hoik appong keeing nawh Davit tix tan pa mawh mau, khri mai kraung khrai pa shiao khawmuik, hoek daux nyiex bwan mai sau ka daux krao sinngao nyiex bwan Simiang Siyiex heue.

¹ Simiang Sawlamon khrawm kwad riex ju pui Isarelax mai cub cao kaing ru ceu pui khawmuik mai cao kaing keeing nyiex ma pui Isarelax khankix hoek ka tix, ka daux veng Yerusaliem sonsang viex teug bwan sijax mukheu Simiang Siyiex khaing veng Davit pa mawh Zion tan heue. ² Pui Isarelax khawmuik khrawm paox tix hoek ka simiang Sawlamon, daux bawg yam pawie daux khix Etanim khix aliah heue. ³ Kuad riex ju pui Isarelax khawmuik hoek mai cao giex kaing li khankix teei ti klawm teug sijax mukheu Simiang Siyiex heue. ⁴ Mai kix viex teug sijax mukheu Simiang Siyiex hoek ka daux nyiex gox bwan man bang kum mai kix viex kraung shiao pa singax hoek ka daux nyiex gox bwan man, cao giex kaing li mai pui Lewix khankix mawh cao pa viex hoek heue. ⁵ Simiang Sawlamon mai pui hun Isarelax khrawm tix hoek ka plak sivoe teug sijax mukheu mai kix tan yung, mawie khankix tom ang lai uik simin mu heue. ⁶ Mai cao giex kaing li khankix viex teug sijax mukheu Simiang Siyiex laig ka dee ot nawh, ka daux nyiex bwan ka dee pa kied singax mai kix deuh teug sijax mukheu an ka greem pruik Cherubin heue. ⁷ Cherubin an khankix di pruik tix ka piang teug sijax mukheu mai Cherubin an khankix tawb ka piang teug sijax mukheu mai khawm ka piang khaox glawm nawh heue. ⁸ Khaox glawm an kied lang mai pon yaox toh khaox glawm an khaing dee pa kied singax, ka sivoe lawg dee pa singax, viang mawh nan ang chix yaox ka plak praix mai an koe tan tom in singaix heue. ⁹ Ang koe tidtix daux teug sijax mukheu, lheu khaing khlawp simaox an ra khlawp, pa sau Mose tix priex yam ot ka baoh Hawrap, yam yuh Simiang Siyiex gumlox sijax mukheu tau mai pui Isarelax, yam lih kix khaing meung Ejiptux heue. ¹⁰ Khaix hoik lih cao giex kaing li khankix khaing ka dee pa singax singeh, paiawm naog ka daux nyiex bwan Simiang Siyiex heue. ¹¹ Kheu jao hoik ceep paiawm mai naog min siawp sibrawm Simiang Siyiex ka daux nyiex bwan, cao giex kaing li ang lai pon cung ti yuh kaing jhaw heue. ¹² Sawlamon ah nin, "Simiang Siyiex hoik krai ti deuh, Nawh Cao tak sang ot ka daux paiawm pa faik heue. ¹³ Aux hoik sum nyiex bwan ka son Maix Cao, sonsang ot Maix Cao ka daux leeing ju heue." ¹⁴ Yam cung pui hun Isarelax, simiang veeh ngai tix mai nawb bwan ka piang kix heue. ¹⁵ Mai nawh ah nin, "Kieh Simiang Siyiex pui Isarelax koe bwanson, pa hoik yuh Nawh Cao grum naog ka taix Tix, awm hoik koe lox mukheu Nawh ka keeing aux Davit ka jheeh tix, ¹⁶ jah ka singaix hoik viex Aux pui Isarelax lih khaing meung Ejiptux, Aux ang nyang bax laug veng tix veng kawx, khaing doeh ru pui Isarelax, sonsang sum ka nyiex bwan, sonsang ot min ceu kaux Aux tan, viang mawh nan Aux hoik laug Davit, sonsang kwang ka pui Aux Isarelax heue. ¹⁷ Grawng ceu an hoik mawh pa koe ka daux rhawm rhi keeing aux Davit, sonsang sum nawh nyiex bwan ka son min ceu kaux Simiang Siyiex, Siyiex pui Isarelax heue." ¹⁸ Viang mawh nan, Simiang Siyiex ah nin ka keeing aux Davit, "Awm hoik koe rhawm rhi maix ti sang sum nyiex bwan ka son min ceu kaux Aux maix hoik yuh ceu pa mhawm pa koe ka daux rhawm rhi tix. ¹⁹ Viang yuh ka mawx kawx maix tak ang pon ti sum nyiex bwan, tak mawh kawn simex li maix pa sum nyiex bwan son min ceu kaux Aux heue. ²⁰ Simiang Siyiex hoik yuh grum naog awm gumlox pa hoik krai Nawh Cao ti deuh mai kieh aux plud dee ot keeing aux Davit mai hoik kieh aux ngawm ka piang dangngeung pui Isarelax awm lox mukheu hoik yuh Simiang Siyiex mai aux hoik sum nyiex bwan son min ceu kaux Simiang Siyiex, Siyiex pui Isarelax heue. ²¹ Mai aux hoik khre dah dee tix dah, son teug sijax mukheu, pa hoik koe lox mukheu Siyiex ka daux pa hoik yuh Nawh Cao sijax mukheu tau mai keeing ex, yam viex Nawh Cao kix lih khaing meung Ejiptux heue." ²² Sawlamon cung ka plak sivoe khu dee tan Simiang Siyiex mai ka plak sivoe pui hun Isarelax mai nawh yaog taix tix khawm ra khawn ka raoma, ²³ ah nin, "Simiang Siyiex pui Isarelax eue, ka daux raoma long mai ka piang haktiex in greem raoma, Siyiex pa awm Maix ang lai koe tix kaux kawx mai pa priex rien lox sijax mukheu mai jhi krax pa caux rhawm tix ka kawncau Maix Cao pa hawt grawng lawng khaix Maix Cao khawm rhawm rhi tix ka plak sivoe Maix Cao heue. ²⁴ Maix Cao hoik priex gumlox sijax mukheu pa hoik yuh tix ka kawncau Maix keeing aux Davit, Maix Cao hoik yuh ceu an grum naog ka taix Tix heue. Awm mukheu pa krai Maix ka jheeh tix, awm pa koe daux in singaix heue." ²⁵ Simiang Siyiex pui Isarelax eue, yam in priex rien ka lox sijax mukheu pa hoik yuh Maix Cao ka kawncau tix keeing aux Davit mai pa hoik ah Maix Cao nin, "Phan kawn praix maix khankix chix yuh satix tix mai lawng hu plak sivoe Aux, awm lawng maix sivoe Aux, ru maix tak ang jud khaing ka piang dangngeung pui Isarelax khankix heue." ²⁶ Siyiex pui Isarelax eue, kieh gumlox mukheu pa yuh Maix Cao ka kawncau Maix keeing aux Davit grum naog liak. ²⁷ Viang mawh nan, mawh sang ot Siyiex ka piang haktiex tete lie? Jhak heue, raoma mai raoma pa kied lhaong ang lai kub dee ot son Maix Cao, nyiex bwan pa hoik sum aux in, Maix Cao nie sang chix ot ka yuh ka mawx? ²⁸ Simiang Siyiex eue, doh keud ka lox rawg kawncau Maix bwan mai nghiet ka lox khyox khaw kok yo aux kawncau Maix ka plak sivoe Maix Cao daux in singaix, ²⁹ Maix Cao jhak ka nyiex bwan in ku singaix, ka dah dee pa hoik ah Maix Cao nin, min ceu kaux Aux tak koe tan, yam veeh aux ngai tix plak nyiex bwan mai rawg bwan, nghiet ka lox rawg kawncau Maix bwan liak. ³⁰ Nghiet ka lox khyox khaw kawncau Maix Cao mai pui Maix Isarelax yam hoek rawg kix bwan ka dee in, nghiet ka lox rawg kix bwan khaing raoma ka dee ot Maix Cao liak, yam mhong Maix ka lox kix, pluat ploi phimap kix liak. ³¹ "Yam lud pui tix kaux kaux ka paox plawg tix mai khin tix kieh nawh tiextu mai kix tak hoek ti tiextu ka plak sivoe khu dee tan Maix ka daux nyiex bwan in, ³² Maix Cao nghiet khaing daux raoma mai prawng ca ka kawncau Maix khankix, ciyang ka pa yuh pa caox caig mai kieh pa caox yuh nawh deeh hoek ka piang kaing nawh mai prawng ca pui rahsee ka daux pa rahsee mai deeh tawx bwanson ka pa rahsee yuh nawh heue. ³³ "Yam som pui Maix Isarelax ka sivoe pui koeng tix, kheu koe phimap tieh feen kix ka Maix Cao, yam veeh kix tix hoek ka Maix, phan kix riep ka ceu kaux Maix mai rawg bwan khyox khaw ka Maix ka daux nyiex bwan in, ³⁴ nghiet khaing daux raoma mai pluat ploi phimap pui Maix Isarelax mai deeh viex kix hoek ka haktiex pa hoik tawx Maix Cao ka keeing kix heue. ³⁵ "Yam caox praix ang lhiex lih kheu jao phimap lud kix ka Maix Cao, yam deeh hoek kix tix rawg bwan ka dee in, phan kix rieb ka min ceu kaux Maix Cao mai deeh veeh ti khaing phimap tix, yam ciyang Maix Cao ka kix, ³⁶ Maix Cao nghiet khaing daux raoma mai pluat ploi phimap kawncau Maix pui Isarelax mai sonsang lawng hu kix daux krax pa mhawm, mai deeh kieh lhiex lih ka piang haktiex, pa hoik tawx ka ceu pui Maix pa mawh sinngao pa pon kix heue. ³⁷ Yam sibhawm praix ka piang haktiex ang ah, jhawm saux preng ang ah, jhawm saux muad ang ah mai yam yum khaox ox ka bhaung pa si aoh mai khaox yum kheu jauh rawm tix lih khaing ang ah, yam lih sido nghox ti yuh ka ma koi laux ang ah mai yam hoek pui koeng tix lai lawm ka veng kix ang ah mai khawm jhawm saux ceu pa yuh ka mawx ang ah, ³⁸ pui Maix Isarelax tix kaux kaux ang ah, yam hoik tawng nawh ka krax ciyang pa hoek ka piang tix ka daux rhawm nawh mai phan nawh hoik yaog taix tix rawg bwan khyox khaw ka ceu patix ang ah, ka daux nyiex bwan in, ³⁹ nghiet khaing daux raoma ka dee ot Maix Cao mai pluat ploi phimap kix mai yuh mai tawx ka pui ku kaux, ka pui pa tawng Maix Cao rhawm nawh, mawh kheu Maix Cao tix kaux khaing pa tawng rhawm kawn pui khawmuik, ⁴⁰ sonsang lhat graung kix ka Maix Cao, glang singaix im ju kix ka daux haktiex pa hoik tawx Maix Cao ka keeing ex heue. ⁴¹ "Awm an son pui tang ceu, pa ang mawh pui Isarelax pui Maix Cao kawx, pa hoek khaing haktiex dee singai son min ceu kaux Maix Cao, ⁴² kheu kix tak mhong min ceu kaux pa ting lhaong Maix Cao mai ka riang rao taix Maix Cao mai plawng taix pa nyeu Maix Cao lih, yam hoek kix tix rawg bwan daux nyiex bwan in, ⁴³ nghiet khaing daux raoma ka dee ot Maix Cao, yuh awm can pa rawg pui tang ceu ka Maix Cao, sonsang tawng pui haktiex khawmuik ka ceu kaux Maix Cao mai lhat graung ka Maix Cao, awm pa yuh Maix Cao ka pui Isarelax khankix mai sonsang tawng kix ka nyiex bwan pa sum aux in, mawh dee pa kok ka min ceu kaux Maix Cao heue. ⁴⁴ "Yam ploi Maix Cao ceu pui tix khankix hu puing ka pui koeng khankix ka dee mawx ang ah, yam rawg kix bwan ka Simiang Siyiex, kix tak veeh ngai tix plak see veng pa hoik laug Maix Cao ka nyiex bwan pa hoik sum aux ka son ceu kaux Maix Cao, ⁴⁵ "Maix Cao nghiet ka lox pa rawg kix bwan mai lox pa khyox khaw kix khaing daux raoma mai caux rhawm ka kix liak. ⁴⁶ "Yam lud kix ka Maix Cao, ang koe pui pa ang lud tix kaux kawx, yam song rhawm Maix Cao ka kix mai ap kix ka pui koeng khankix mai kix mawh pui pa giex laung ka haktiex pui koeng, viang singai ang ah, dex ang ah, ⁴⁷ yam hoek kix ka haktiex dee mawh kix pa giex laung, phan kix doh keud ka pa lud daux rhawm tix mai deeh khyox khaw ka Maix Cao, ka daux haktiex pa viex kix mawh pa giex laung, ah nin, yix hoik lud mai hoik yuh pa caox caig mai pa ang rahsee, ⁴⁸ yam veeh kix tix hoek ka Maix Cao khawm rhawm tix, ka daux haktiex pui koeng pa giex laung kix mai rawg bwan ka Maix Cao ka plak see haktiex cao kix, pa hoik tawx Maix Cao ka keeing kix mai ka veng pa laug Maix Cao, ka nyiex bwan pa hoik sum aux son ceu kaux Maix Cao, ⁴⁹ nghiet khaing daux raoma ka dee ot Maix Cao mai nghiet ka lox rawg kix bwan mai lox pa khyox khaw kix mai caux rhawm ka kix liak! ⁵⁰ Mai pluat ploi phimap pui Maix Cao khankix, pa koe phimap krax lud ka Maix Cao mai khawm pa lud loe kix, pa hoik lud kix ka Maix Cao, mai deeh caux rhawm ka kix ka plak sivoe pui pa viex kix mawh pui pa giex laung, sonsang koe krax caux rhawm pui ankix ka piang kix, ⁵¹ kheu jao mawh kix pui Maix Cao mai sinngao Maix Cao, pui pa hoik viex Maix lih khaing meung Ejiptux mai khaing ka daux glah ngu rhiem, ⁵² kieh ngai Maix Cao jhak ka kawncau tix mai nghiet ka can ceu pa khyox khaw pui Maix Isarelax ka Maix Cao heue. ⁵³ Simiang Siyiex eue, mawh kheu hoik tang tiah Maix kix khaing sinax ceu pui, pa ot ka piang ca haktiex in khawmuik, sonsang mawh kix sinngao Maix Cao, awm pa hoik krai Maix ka kawncau Maix Mose yam viex Maix keeing ex lih khaing meung Ejiptux heue." ⁵⁴ Yam hoik naox Sawlamon ka krax rawg tix bwan mai krax pa khyox khaw tix ka Simiang Siyiex, nawh yaog ti kaoh khaing ka plak sivoe khu dee tan Simiang Siyiex, khaing pa grux ngawng mai yaog taix tix ka raoma, ⁵⁵ nawh cung mai nawb bwan ka pui Isarelax ka lox pa kied ting ah nin, ⁵⁶ "Kieh Simiang Siyiex koe bwanson, pa tawx krax pa nhim ka pui Nawh Isarelax, awm pa hoik yuh Nawh lox mukheu, lox mukheu mhawm yuh Nawh tau mai kawncau Nawh Cao Mose, ang lai cod tix gum kawx heue." ⁵⁷ Kieh Simiang Siyiex ex ot tau mai ex, awm ot Nawh Cao tau mai keeing ex, paw kieh Nawh Cao tik vud ka ex mai prah ka ex, ⁵⁸ sonsang kieh Nawh Cao rhawm ex deeh veeh ti hoek ka Nawh Cao mai sonsang pon hu ex ka daux krax Nawh Cao mai priex gumlox pingnyap Nawh khankix mai beenli Nawh Cao khawm lox tat jhawm prawng pa tawm Nawh ka keeing ex khankix heue. ⁵⁹ Kieh gumlox pa khyox khaw aux ka plak sivoe Simiang Siyiex, mawh pa dex mai Simiang Siyiex, Siyiex ex ku singaix, sonsang caux rhawm Nawh ka kawncau tix mai ka pui Nawh Isarelax khankix, awm pa lo kix ku singaix, ⁶⁰ mai sonsang pon tawng pui piang haktiex khawmuik ka mawh Nawh Cao Simiang Siyiex, Siyiex tix kaux khaing heue. ⁶¹ Mai kieh rhawm rhi pex mawh pa kaux sijax ka Simiang Siyiex ex mai hawt hu ka daux lox lai beenli Nawh Cao mai priex ka gumlox pingnyap Nawh Cao, awm pa hoik koe ka daux in singaix heue." ⁶² Simiang mai pui Isarelax khankix tan krax tan pa appong ti ka plak sivoe ngai Simiang Siyiex heue. ⁶³ Sawlamon yuh krax tan pa nhim, ka mawie ra mheen ra rheng mu mai yung tix sien ra mheen mu ka Simiang Siyiex heue.Mai ap nyiex bwan ka Simiang Siyiex heue. ⁶⁴ Ka daux singaix an simiang appong lawg daux sigreung pa koe sivoe nyiex bwan Simiang Siyiex mawh pa singax singeh, mai simiang tan krax tan pa gleeing mai krax tan phawng nghox ca mai khawm khlawp bee krax tan pa nhim tan, mawh kheu iak khu dee tan tawng lheung pa koe ka plak sivoe Simiang Siyiex ang kub tan krax tan pa gleeing mai krax tan phawng nghox ca mai khlawp bee krax pa nhim khankix ka piang heue. ⁶⁵ Yam an Sawlamon khan kheu pawie ting, ka pui Isarelax pa kied haoh hun, pa hoek jah khaing dee laig ka veng Hamat tom hoek ka rawm klawng iak Ejiptux, pa hoek ka pawie plak sivoe Simiang Siyiex ex, aliah singaix ra bawg khawmuik kao pon singaix heue. ⁶⁶ Yam hoek daux daix singaix, nawh ploi pui khankix deeh ing mai kix nawb bwan ka simiang mai tang ing ka nyiex tix, ka daux pa nyawm rhawm nyawm mai ka daux pa gaux rhawm ti, son krax pa mhawm pa yuh Simiang Siyiex ka kawncau Nawh simiang Davit mai ka pui Nawh Isarelax khawmuik heue.

¹ Khaix hoik sum Sawlamon ka nyiex bwan Simiang Siyiex mai nyiex haw ot tix, awm pa koe rhawm nawh ti sang yuh khawmuik, ² Simiang Siyiex deeh jhi tokaux tix ka Sawlamon ra bawg tix bawg, awm jhi Nawh tokaux tix ka nawh daux veng Gibun heue. ³ Mai Simiang Siyiex ah nin ka nawh, "Aux mhong lox rawg maix bwan mai lox pa khyox khaw maix khankix, pa hoik yuh maix ka plak sivoe Aux, Aux yuh nyiex pa hoik sum maix ka min ceu kaux Aux singax singeh leeing ju, ngai Aux mai rhawm Aux tak koe tan jheung jheung heue. ⁴ Phan maix lawng hu ka plak sivoe Aux, awm hu keeing maix Davit mai hawt yuh awm pa tawm Aux ka maix mai phan maix priex ti hawt lox lai beenli pa deuh Aux mai lox tat jhawm prawng Aux khankix, ⁵ Aux tak kieh dangngeung haktiex maix ka piang pui Isarelax khankix kaux cong leeing ju, awm hoik yuh Aux lox mukheu mai keeing maix Davit, pa ah in, ru maix tak ang jud khaing ka piang dangngeung pui Isarelax khankix heue. ⁶ Phan ang mawh nan, phan kawn simex maix khankix deeh veeh ti khaing daux pa hawt ti khaix Aux mai ang lai priex rien ka lox tawm pingnyap cie Aux mai ka lox lai beenli pa deuh Aux plak sivoe maix mai hu yuh kaing jhaw siyiex tang kaux mai krub ka kix, ⁷ "Khaix an Aux tak tik pui Isarelax khankix khaing haktiex pa tawx Aux ka kix, mai nyiex bwan pa yuh Aux mawh pa singax singeh ka son ceu kaux Aux in, Aux tak tik an khaing plak sivoe ngai Aux, pui Isarelax khawmuik tak lih awm lox been praix mai lox sibriem ka plak sivoe pui heue. ⁸ Mai nyiex pa lhaong in, pui pa lailing hawt baoh in ku kaux, tak koe pa daox deng mai koe lox sibriem ah nin, Simiang Siyiex yuh nin ka haktiex in mai ka nyiex bwan in kheu jao patix lie? ⁹ "Khaix an, kix tak deeh pawk ah nin, mawh kheu hoik tik vud kix ka Simiang Siyiex, Siyiex tix pa hoik viex keeing kix lih khaing meung Ejiptux mai een rhawm tix ka siyiex tang kaux mai krub mai yuh kaing son kix, mawh kheu nan, Simiang Siyiex viex krax pa laux leeing hoek ka piang kix heue" ¹⁰ Yam hoek ka daux tixnga num, khaix hoik sum Sawlamon nyiex ra lhang, pa mawh nyiex bwan Simiang Siyiex mai nyiex haw ot tix, ¹¹ Hiram simiang veng Turux teem Sawlamon ka khaox Arit mai khaox gix mai khri tom nie awm pa koe rhawm nawh ti sang cie, simiang Sawlamon kawx deeh tawx Hiram cie veng khankix tixnga veng, pa koe ka daux haktiex Galilie heue. ¹² Simiang Hiram lih khaing veng Turux mai hu jhak ka veng pa hoik tawx Sawlamon ka nawh, viang mawh nan, nawh ang khaw rhawm ka heue. ¹³ Mawh kheu nan, nawh ah nin, "Pux aux eue, veng pa hoik tawx maix ka aux khankix, mawh veng pa yuh ka mawh? " Mai nawh kok haktiex baoh an mawh Khabulax, tom in singaix heue. ¹⁴ Hiram ploi pui hu tawx khri tix yieh tixnga talantan ka simiang, tix yieh talantan koe tix yieh tixnga coi heue. ¹⁵ Grawng pa koh simiang Sawlamon mau ka pui khankix mawh sonsang sum nyiex bwan Simiang Siyiex mai nyiex haw ot nawh mai veng Milaw mai guh veng Yerusaliem, veng Hazaw, veng Megidaw mai veng Geza khankix heue. ¹⁶ Pharaw simiang Ejiptux hu puing ka veng Geza, gleeing veng an ka ngu mai pah pui Khanan pa ot ka daux veng mai nawh tawx veng an awm totaix ka kawn bun tix, moeng simiang Sawlamon, ¹⁷ Sawlamon deeh sum veng Geza mai veng Biethawron plak seh, ¹⁸ veng Baliet mai veng Tama pa koe ka daux tiag haktiex Yudax, ¹⁹ veng deuh Sawlamon krao kraung khrai mai veng deuh ling lawx naing brung mai veng deuh kru naing brung mai can pa koe rhawm Sawlamon tix sum ka daux veng Yerusaliem mai Lebanon mai ka daux meung haktiex dee pa kwang nawh khawmuik heue. ²⁰ Pui pa kawn deuk khaing pui Amawrix, pui Hetax, pui Perazix, pui Hewix mai pui Yebusix pa ang mawh pui Isarelax khankix, ²¹ mai cub kix mawh pa deuk ka daux haktiex pa ang Isarelax nyang pon yuh kix laux leeing khawmuik, Sawlamon kieh kix yuh siliex tom hoek daux in singaix heue. ²² Mai Sawlamon ang lai kieh pui Isarelax yuh siliex, nawh kieh kix mawh pui naing mai kawncau nawh mai cao kaing pa kwang greem nawh pui naing vao, kaing naing mai cao kaing naing ting cub ling lawx naing brung mai cub pui naing brung khankix heue. ²³ Cao kaing pa kwang ka piang kaing jhaw koe phwan yieh tixphwan kaux, kix mawh cao kwang ka piang pui yuh kaing jhaw khankix heue. ²⁴ Kawn bun Pharaw lih khaing veng Davit mai hu ot ka nyiex cao tix pa hoik sum Sawlamon ka son nawh, khaix Sawlamon deeh cox sum ka veng Milaw heue. ²⁵ Sawlamon yuh krax tan pa gleeing mai krax tan pa nhim tix num loe bawg ka piang khu dee tan pa sum nawh ka son Simiang Siyiex mai gleeing nyawng bhawng ka plak sivoe Simiang Siyiex mai nawh hoik sum nyiex bwan heue. ²⁶ Sawlamon yuh reu ting ka daux veng Ezion Gebax pa koe praok rawm sigrit sigra raoh, ka daux haktiex Edon heue. ²⁷ Hiram ploi kawncau ti pa tawng krax rawm sigrit sigra, hu yuh kaing tau mai pui Sawlamon khankix heue. ²⁸ Mai kix hu ka veng Awphirax mai pon viex khri pon yieh tixnga talantan coi khaing tan mai kix viex tawx ka Simiang Sawlamon heue.

¹ Yam mhong laux simiang Shebax ka ao min ceu kaux Sawlamon kheu ceu kaux Simiang Siyiex, nawh hoek ti cheuk cheu Sawlamon ka lox pa kied nu tix pawk heue. ² Nawh hoek ka veng Yerualiem tau mai pui pa hawt tom nie mai Kala uk pa tang pa sioe bhawng kuceu mai khri tom nie mai siang simaox pa ngawh mai yam bleeh nawh Sawlamon krai can pa koe daux rhawm tix khawmuik heue. ³ Sawlamon deeh pawk pa chawk nawh khankix, can pa ang Sawlamon pon pawk ang koe tix ceu kawx heue. ⁴ Yam yaox laux simiang Shebax ka pingnya cuyi pa koe Sawlamon mai ka nyiex haw pa hoik sum nawh, ⁵ mai pa ih pa koe ka piang pheen sawm nawh khankix mai dee ngawm cao giex kaing mai kawncau pa khan kheu nawh mai kraung ceep kix mai pa giex kawk nyaux nawh mai krax pa khre nawh krax tan pa gleeing tix, ka daux nyiex Simiang Siyiex, nawh hoik daox deng ka tom ang tix koe lox krai heue. ⁶ Mai nawh ah nin ka simiang, "Can ceu pa hoik mhong aux yam ot aux ka haktiex tix, grawng kaing pa yuh maix mai pingnya cuyi pa koe maix rug mawh tete heue." ⁷ Viang mawh nan, aux ang nyang yum rhawm ka lox ankix, sivoe ang aux nyang yaox ka ngai tix mai ceu ankix ang nyang mawh tix plak awm pasax mhong aux, pingnya cuyi maix mai kraung khrai sinngao maix, hoik nie lheu khaing pa mhong aux heue. ⁸ Kieh pui maix mai kawncau pa cung plak sivoe maix jheung jheung mai pa mhong gumlox pingnya cuyi maix khankix koe bwanson! ⁹ Kieh Simiang Siyiex koe bwanson, khaw rhawm rhi ka maix mai pa yaog maix ka piang dangngeung pui Isarelax! Mawh kheu Simiang Siyiex moh ka pui Isarelax leeing ju, Nawh Cao yaog maix mawh simiang sonsang prawng ca maix daux pa rahsee heue." ¹⁰ Mai nawh tawx khri tix yieh tixnga talantan mai sidah bhawng tom nie mai siang simaox pa kied ngawh, ceu sidah bhawng pa kied nie awm in, pa tawx laux simiang Shebax ka simiang Sawlamon, ang lai hoek khaix an tix bawg kawx heue. ¹¹ Lheu khaing an reu ting Hiram, viex khri mai khaox Alagun khankix mai siang simaox pa kied ngawh hoek khaing Awphirax tom nie heue. ¹² Mai simiang yuh rong ka khaox Alagun, son nyiex bwan Simiang Siyiex mai son nyiex haw mai yuh ting feuk mai ting pawd son pui rhax lai heue. Ceu khaox Alagun khankix ang lai sax hoek mai ang lai sax yaox tom hoek in singaix heue. ¹³ Simiang Sawlamon tawx ceu pa koe rhawm laux simiang ti sang cie khawmuik, lheu khaing an simiang Sawlamon baox tawx ceu pa mhaing laux simiang ti cie khankix, khaix an nawh deeh ing mai kawncau tix ka haktiex tix heue. ¹⁴ Krax cien khri pa pon simiang Sawlamon ka daux tix num, koe liah yieh tixgliah liah talantan heue. ¹⁵ Lheu khaing an nawh baox pon khaing pui pa yuh lai geu khankix mai khaing keen pa tawx caox lai geu khankix mai khaing simiang Arebia khankix mai khaing cao kwang haktiex khankix heue. ¹⁶ Simiang Sawlamon yuh pliah tieb pa ting ka khri ra yieh plah, pa cien tix plah liah yieh shekhe heue. ¹⁷ Nawh baox yuh plah tieb pa iak ka khri loe yieh plah, pa cien tix plah loe yieh mina, mai simiang deuh an khankix ka daux nyiex haw pa hoik sum ka khaox khaing nong Lebanon heue. ¹⁸ Lheu khaing an simiang yuh dangngeung ting ka nga sang mai om an ka khri nawnaw heue. ¹⁹ Dangngeung an koe bawng liah glawk mai dee neung plak khaix lawm le, dangngeung khawm ra plak koe dee deuh taix tix, ka praok dee deuh nawh taix tix riang sivai sangsi ra mu cung ka heue. ²⁰ Riang sivai sangsi kao ra mu cung ka piang glawk bawng ku glawk plak in mai plak an heue. Pa yuh awm in ang koe ka meung tang dah tix meung kawx heue. ²¹ Kawk nyaux simiang Sawlamon yuh ka khri mai can kawk nyaux yuh nawh ti deuh ka daux nyiex haw pa sum nawh ka khaox khaing nong Lebanon, yuh tix ka khri nawnaw mai ang lai yuh ka mau, Mawh kheu baux ju Sawlamon ang sawn mau mawh pa koe jum heue. ²² Mawh kheu simiang koe cub reu ting pa yuh lai geu ka veng Tasux daux rawm sigrit sigra tau mai cub reu ting Hiram ka veng Tasux heue. Mai cub reu ting an hoek bleeh mai viex khri, mau, nga sang, rao khaox mai sim kawng khankix hoek ka nawh loe num tix bawg heue. ²³ Simiang Sawlamon kied magmi mai koe pingnya cuyi khaing simiang ka piang haktiex khawmuik heue. ²⁴ Pui piang haktiex khawmuik hoek plak sivoe ngai Sawlamon, sonsang nghiet ka pingnya cuyi nawh, pa hoik tawx Siyiex ka daux rhawm nawh heue. ²⁵ Pui ku kaux viex totaix tix, pa mawh kraung khri kraung mau, kraung ceep, kraung naing, sidah bhawng kuceu, brung mai la khankix hoek ka nawh mai keen pa caw ti tawx tix num hoik tix num heue. ²⁶ Sawlamon khrawm ling lawx naing brung mai pui naing brung khankix, nawh koe ling lawx naing brung tix rheng pon yieh lhang mai pui naing brung tix mheen ra rheng kaux, nawh priex ka daux veng pa deuh ling lawx naing brung tau mai tix ka daux veng Yerusaliem heue. ²⁷ Simiang kieh mau pa koe daux veng Yerusaliem khankix awm lon simaox mai kieh khaox Arit awm khaox ruh pa kwah ka daux ngawd daux lung heue. ²⁸ Mai brung pa koe simiang Sawlamon mawh diang lai pa laig khaing meung Ejiptux mai veng Kaw cao lai simiang hoik liag awm jum pa hoik tat kix ti deuh khaing veng Kaw heue. ²⁹ Diang lai laig ling lawx naing brung tix lhang kix liag khaing meung Ejiptux, jum mawh liah yieh mau shekhe, brung tix mu tix yieh tixphwan shekhe, diang lai pa lih ling lawx naing mai brung khankix, kix deeh coh ka simiang Hetax mai simiang Sirix heue.

¹ Simiang Sawlamon moh ka bun tang praix tom nie, lheu khaing kawn bun Pharaw, nawh baox moh bun Mawbax, bun Amawnix, bun Edom, bun Sidom, bun Hetax khankix, ² Simiang Siyiex krai grawng pa dex mai pui tang praix ka pui Isarelax ah nin, "Pex tak ang pon teei ti mex moeng ka kix mai kix kawx tak ang pon ti teei pex, "Mawh kheu kix tak kieh sok rhawm pex veeh tix singai mai hawt khaix siyiex kix, simiang Sawlamon kied koe rhawm ghoing ka bun tang praix heue. ³ Mai nawh koe moeng aliah kaux mai moeng iak loe yieh kaux mai moeng nawh khankix hoik kieh sok rhawm nawh veeh hu heue. ⁴ Yam hoik kuad Sawlamon moeng nawh khankix kieh rhawm nawh veeh hu khaix siyiex tang kaux khankix, mai rhawm nawh ang lai kaux sijax ka Simiang Siyiex, awm rhawm pa koe keeing nawh Davit heue. ⁵ Mawh kheu jao in, simiang hawt khaix Ashatariet siyiex pui Sidom mai Milakbom, siyiex pa seeing brai pui Amonix khankix heue. ⁶ Sawlamon yuh pa caox plak sivoe ngai Simiang Siyiex mai ang lai hawt grawng lawng khaix Simiang Siyiex grum naog, awm pa yuh keeing nawh Davit heue. ⁷ Sawlamon sum dee pa lhaong son Khemawsha siyiex pa seeing brai pa krub pui Mawbax, ka piang gawng pa koe ka plak lih singaix ka veng Yerusaliem mai ka son Mawliet siyiex pa seeing brai pa krub pui Amawnix khankix heue. ⁸ Mai nawh yuh khu ka son moeng tix pui tang praix khankix, sonsang gleeing nyawng bhawng mai tan ka siyiex kix heue. ⁹ Mai Simiang Siyiex song rhawm ka Sawlamon, kheu jao hoik veeh rhawm nawh ti singai khaing Simiang Siyiex pui Isarelax, pa hoik lih bleeh ka nawh ra bawg, ¹⁰ mai hoik tawm grawng pa dex son in ka nawh, sonsang ang nawh lai hawt khaix siyiex tang kaux khankix, viang mawh nan, nawh ang lai cu nghiet ka lox pa hoik tawm Simiang Siyiex heue. ¹¹ Mai Simiang Siyiex ah nin ka Sawlamon, "Kheu jao yuh maix ceu in mai kheu jao ang maix priex rien ka sijax mukheu Aux mai lox lai beenli pa hoik tawx Aux ka maix khankix, Aux tak teei meung haktiex khaing maix mai tawx ka kawncau maix heue. ¹² Viang mawh nan, Aux kawn kia pakngai keeing maix Davit mai ang nyang yuh ceu an yam kawn im ju maix, viang mawh nan, Aux tak deeh teei meung haktiex ka daux tawm taix kawn simex maix heue. ¹³ Viang mawh nan, Aux tak ang teei meung haktiex khawmuik, mai Aux tak tawx ceu pui tix cub ka kawn simex maix, kheu jao jhak Aux pakngai kawncau Aux keeing maix Davit mai veng Yerusaliem pa hoik laug Aux ti deuh heue." ¹⁴ Simiang Siyiex so rhawm Hadat pui Edom, pa mawh doeh ru simiang Edom tieh feen ka Sawlamon heue. ¹⁵ Mawh kheu yam ot Davit ka daux Edom daux bawg yam pa hoik luan, Yuabax cao kaing naing ting lih hu sonsang sipaung ka simex pui Edom pa hoik pah kix ka heue. ¹⁶ Mawh kheu Yuabax mai pui Isarelax, kawn ot tan liah khix, tom hoik sidah pah nawh simex Edom ku kaux heue. ¹⁷ Yam an Hadat lih to ka meung Ejiptux tau mai pui Edom pa mawh kawncau keeing nawh, yam an Hadat kawn iak ka heue. ¹⁸ Kix lih khaing haktiex Midian mai hoek ka haktiex Param mai viex pui Param hu mai ti tom hoek ka Ejiptux, bleeh ka Pharaw meung Ejiptux, mai simiang tawx nyiex tix lhang mai pa ih mai haktiex ka son nawh heue. ¹⁹ Hadat yuh pa khaw ka sivoe Pharaw, mawh kheu nan, nawh tom tawx Hadat moeng pux moeng tix, bun an mawh pux laux simiang Tapheniet heue. ²⁰ Mai pux Tapheniet keh kawn simex pa kaux Genubat, Tapheniet hoik eei nawh ting ka daux nyiex haw Pharaw mai Genubat ot tau mai kawn nyiex ma Pharaw mai sinax kawn simex Pharaw heue. ²¹ Yam mhong Hadat ka yum Davit tau mai keeing nawh mai yam hoik yum Yuabax cao kaing naing ting pui Isarelax, yam ot kix ka daux meung Ejiptux, Hadat ah nin ka Pharaw, "Kieh aux lih sonsang ing aux ka haktiex tix heue." ²² Pharaw deeh ah nin ka nawh, glang ot maix tin ang maix fah rhawm ka ceu tix maix lai sawg krax pa sang deeh ing tix, ka haktiex cao tix? "Nawh deeh pawk lox ah nin, ang koe tidtix, ca kieh aux ing ngie heue." ²³ Mai Siyiex deeh so rhawm tang kaux pa mawh Rezon kawn simex Eliyadax pa to khaing cao simiang tix Hadadeza simiang haktiex Zawbax tieh feen ka nawh heue. ²⁴ Nawh khrawm pui khankix hoek ka tix, mai mawh cao kaing ka piang cub pui pa tieh feen, yam pah Davit pui ka haktiex Zawbax mai kix hu ka veng Damase mai ot tan, nawh mawh simiang ka veng Damase heue. ²⁵ Rezon tieh feen ka pui Isarelax, singaix yam kawn im ju Sawlamon, nawh yuh pa caox awm pa hoik yuh Hadat mai, nawh kwang ka haktiex Surix mai seeing ka pui Isarelax heue. ²⁶ Kawncau Sawlamon Yerobom kawn simex Nebat, pui Epharem yaong Zeredax yaog tix tieh feen ka simiang, ceu kaux miex nawh mawh Zerua pa mawh miexmai heue. ²⁷ Mai in mawh grawng pa tieh feen nawh ka simiang, kheu sum Sawlamon veng Milaw mai deeh cox guh veng pa laux leeing keeing nawh Davit heue. ²⁸ Yerobom mawh pui pa ting riang mai pui vao tix kaux mai Sawlamon yaox mawh pui pa awn ju pa kied coca tix mai yaog nawh mawh cao kwang ka piang cao yuh kaing nyiex Yosiep heue. ²⁹ Ka daux tix ngaix yam lih hu Yerobom khaing Yerusaliem, cao jhai Ahiyax pui veng Shilaw ceep kraung khraox mai hoek rieb nawh ka daux krax, mai kiex ot ka daux kaung nong nong heue. ³⁰ Ahiyax peeik kraung khraox ceep tix mai riah lih kao ra siag heue. ³¹ Nawh ah nin ka Yerobom, "Teei ti cie in kao siag, mawh kheu Simiang Siyiex pui Isarelax ah nin, aux rud ti teei meung haktiex khaing daux tawm taix Sawlamon mai tak tawx ceu pui kao ceu ka maix, ³² viang mawh nan, nawh tak pon ti cie tix ceu ngie, mawh kheu jhak Aux ngai kawncau tix Davit mai veng Yerusaliem pa mawh veng pa hoik laug Aux lih khaing daux ceu pui Isarelax, ³³ mawh kheu nawh hoik tik vud ka Aux mai krub ka siyiex Ashatariet, siyiex pui Sidom mai ka Milakhom siyiex pui Amawrix khankix mai ang lai lawng daux krax Aux, sonsang yuh tix ceu pa mawh pa meh ka sivoe ngai Aux mai nawh ang lai hawt lox lai beenli mai lox tat jhawm prawng pa deuh Aux awm keeing tix Davit heue. ³⁴ Viang yuh nan kawx Aux tak ang lai teei meung haktiex khaing daux taix nawh khawmuik, mawh kheu Aux hoik yaog nawh mawh cao kwang baux singaix im ju nawh, kheu jao kawncau Aux Davit, pa hoik laug Aux pa hoik hawt lox tawm pingnyap mai lox lai beenli pa deuh Aux heue. ³⁵ Aux tak teei meung haktiex khaing tawm taix kawn simex Sawlamon mai deeh tawx ceu pui ka maix kao ceu heue. ³⁶ Son kawn simex nawh, Aux tak tawx ceu pui tix ceu, sonsang riang kawk ngu kawncau Aux Davit jheung jheung, plak sivoe Aux ka veng Yerusaliem, pa mawh veng pa hoik laug Aux sonsang deuh ceu kaux tix tan heue. ³⁷ Aux tak teei maix mawh cao kwang awm pa koe rhawm maix khawmuik mai maix tak mawh simiang ka piang pui Isarelax heue ³⁸ Phan maix nghiet lox tawm Aux mai lawng daux krax Aux mai yuh pa rahsee ka plak sivoe Aux mai priex ka lox lai beenli pa deuh Aux mai lox tawm pingnyap Aux khankix, awm pa hoik yuh kawncau Aux Davit, Aux tak ot tau mai maix mai Aux tak sum ti tawx nyiex pa kaux cong ka son maix, awm pa hoik sum Aux son Davit mai Aux tak tawx ceu pui Isarelax ka maix heue. ³⁹ Kheu jao in Aux tak tawx krax kha rhawm ka doeh ru Davit, viang mawh nan, ang mawh leeing ju heue." ⁴⁰ Sawlamon sawg ti pah ka Yerobom, viang mawh nan, Yerobom to ka simiang Shishak meung Ejiptux mai ot tan tom yum Sawlamon heue. ⁴¹ Grawng kaing pa deuk mai can pa hoik yuh Sawlamon mai grawng pa koe pingnya cuyi nawh khankix, hoik tiem ti deuh ka daux phuk lai simiang Sawlamon ang mawh lie? ⁴² Mai nawh ot ka veng Yerusaliem mai kwang ka piang pui Isarelax tixpon num heue. ⁴³ Sawlamon hoik laux lee tix tau mai keeing tix khankix mai kix sipaung nawh ka daux veng keeing nawh Davit, mai Rehobom kawn simex nawh deeh plud ti kwang khaix nawh heue.

¹ Rohobom hu ka veng Shekhim, mawh kheu pui Isarelax hoik lih hu ka Shekhim khawmuik, sonsang deeh yaog nawh mawh simiang heue. ² Yam mhong Yerobom kawn simex Nebat ka grawng an, nawh kawn ot ka daux meung Ejiptux, kheu jao hoik to nawh khaing sivoe simiang Sawlamon mai Yerobom deeh hoek khaing meung Ejiptux heue. ³ Kix ploi pui hu kok nawh deeh ing, khaix an Yerobom mai cub pui hun Isarelax hoek ah nin ka Rehobom, ⁴ "Keeing maix hoik kieh khaox glawm yix mawh pa cien, mawh kheu nan yam in deeh kieh beeh glawm kaing ceu pa yuh keeing maix khankix deeh chaong mai deeh yuh khaox glawm cien nawh khankix, pa hoik sau nawh ka piang yix, deeh mawh pa chaong liak! Mai yix tak yuh kaing jhaw maix heue." ⁵ Mai nawh ah nin ka kix, "Lih hu ha, khaix an loe singaix deeh hoek ka aux heue." Pui khankix lih hu khaing nawh heue. ⁶ Khaix an, simiang Rehobom kum tau mai kwad riex ju pa tawx krax keud ka keeing nawh Sawlamon, glang yam im ju nawh ah nin, "Mawh sang tawx pex krax keud krax sawn ceu pa yuh ka mawh sonsang deeh pon pawk aux lox pui ankix?" ⁷ Mai kix deeh ah nin ka nawh, "Phan maix mawh kawncau pui inkix ka daux in singaix mai hawt ti yuh kaing jhaw kix, kix tak mawh kawncau maix leeing ju heue." ⁸ Mai nawh thiang ka lox kwad riex ju pa tawx krax keud krax sawn ka nawh mai nawh hu kum ka cub pui pa awn ju pa ting tau mai nawh pa tawx krax keud ka nawh khankix heue. ⁹ Mai nawh ah nin ka kix, "Mawh sang tawx pex krax keud ka aux yuh ka mawh? Sonsang deeh pawk lox pui inkix pa ah nin ka aux, kieh khaox glawm pa hoik sau keeing maix ka piang yix deeh chaong liak" ¹⁰ Mai cub pui pa awn ju pa ting tau mai nawh khankix ah nin ka nawh, "Maix tak krai ka pui pa hoik ah nin ka maix, keeing maix hoik kieh khaox glawm yix mawh pa cien, viang mawh nan maix deeh kieh chaong ka piang yix liak maix tak deeh pawk ah nin ka kix, giien tiah iak aux nie lheu pu khaing nyoi keeing aux heue. ¹¹ Yam in keeing aux hoik sau khaox glawm cien ka piang pex, aux tak sang baox naok khaox glawm piang pex, keeing aux hoik sivied pex ka khaox saux, viang mawh nan, aux tak sivied pex ka tamtim heue" ¹² Mawh kheu nan, Yerobom mai cub pui hun khankix deeh hoek ka Rehobom awm pa hoik tin simiang, "Khaix an daux loe singaix deeh hoek ka aux heue." ¹³ Simiang deeh pawk lox kiien ka pui khankix mai thiang ka krax keud krax sawn pa hoik tawx kwad riex ju ka nawh heue. ¹⁴ Mai nawh deeh krai ka kix awm krax keud krax sawn pa hoik tawx cub pui pa awn ju ka nawh ah nin, "Keeing aux hoik sau khaox glawm cien ka piang pex, aux tak sang baox naok khaox glawm cien ka piang pex, keeing aux hoik sivied pex ka khaox saux, viang mawh nan, aux tak sivied pex ka tamtim heue." ¹⁵ Simiang ang lai nghiet ka lox pui an khankix, mawh kheu hoik mawh pa kaoh khaing Simiang Siyiex, sonsang kieh Nawh Cao gumlox tix grum naog, awm pa hoik krai Simiang Siyiex ka Ahiyax, pui veng Shilaw ka son Yerobom kawn simex Nebat heue. ¹⁶ Yam yaox pui Isarelax khawmuik ka ang simiang lai nghiet ka lox kix, pui khankix deeh pawk lox ah nin, "Been pa hoik pon ex khaing Davit mawh ceu patix? Ex ang koe sinngao, ka daux simiex Yessie heue. Pui Isarelax khankix eue, deeh ing ka nyiex gox pex! Davit eue, kia ngien ka nyiex cao maix! "Mawh kheu nan, pui Isarelax khankix deeh ing ka nyiex goh cao tix heue." ¹⁷ Mai Rerobom kwang ka piang pui Isarelax khankix, pa ot ka daux meung Yudax heue. ¹⁸ Khaix an simiang Rehobom ploi Adawram pa mawh cao kaing pa koh keen hu ka pui Isarelax khankix mai kix dheem nawh ka simaox heue. Mawh kheu nan, simiang Rehobom nied ti haok ka piang ling lawx naing brung cao tix mai to ing ka veng Yerusaliem heue. ¹⁹ Pui Isarelax khankix hoik tieh feen ka nyiex ma simiang Davit tom in singaix heue. ²⁰ Yam mhong pui Isarelax ka deeh hoek Yerobom, kix ploi pui hu kok nawh hoek ka daux bang kum pui hun mai kix yaog nawh mawh simiang ka piang pui Isarelax khankix heue. Pui pa hawt khaix doeh nyiex ma Davit mawh ngie pui Yudax khaing heue. ²¹ Yam hoek Yehobom ka veng Yerusaliem, nawh khrawm nyiex ma pui Yudax khawmuik tau mai pui Biyamin mai nawh laug ti deuh pui naing tix sien daix mheen kaux, sonsang puing ka cub doeh nyiex ma pui Isarelax mai sonsang deeh teei kix meung haktiex khaing Rehobom kawn simex Sawlamon heue. ²² Mai gumlox Siyiex bleeh ka Shemayax pa mawh pui Siyiex ah nin, ²³ krai ka Rehobom kawn simex Sawlamon mai simiang pui Yudax doeh nyiex ma Yudax mai Biyamin khawmuik mai ka pui pa kawn deuk khankix ah nin, ²⁴ Simiang Siyiex ah in, "Maix tak ang pon ti hu puing ka puxaik maix pui Isarelax, kieh pui ku kaux deeh ing ka nyiex tix, mawh kheu ceu inkix mawh pa kaoh khaing Aux heue." Mawh kheu nan, kix nghiet ka gumlox Simiang Siyiex mai deeh ing awm gumlox Simiang Siyiex heue. ²⁵ Yerobom sum veng Shekhim ka piang gawng Epharem mai ot tan, mai lih khaing tan mai baox sum veng Penuelax heue. ²⁶ Mai Yerobom ah nin ka daux rhawm tix, "Yam in meung haktiex in, tak mawh pa deeh hoek ka doeh nyiex ma Davit heue. ²⁷ Phan pui haktiex khankix hu yuh krax tan appong ka daux nyiex bwan Simiang Siyiex daux veng Yerusaliem, rhawm pui tak veeh ti hu ka cao simiang Rehobom pa mawh simiang pui Yudax mai kix tak pah aux yum mai deeh ing ka Rehobom pa mawh simiang pui Yudax heue." ²⁸ Mawh kheu nan, simiang kum tau mai pui tang kaux mai yuh riang kawn mawie khri ra mu ah nin ka pui khankix, "Grawng pa haok hu ka veng Yerusaliem mawh pa nu heue. Pui Isarelax khankix eue, jhak ka Siyiex pa viex pex lih khaing meung Ejiptux heue." ²⁹ Mai nawh deuh ka daux veng Betelax tix mu mai ka daux veng Dan tix mu heue. ³⁰ Mai in hoik lih mawh phimap tix ceu, mawh kheu pui khankix hu krub riang kawn mawie khri an ka Betelax, pa singai tom hoek ka veng Dan heue. ³¹ Nawh hoik sum nyiex krub ka dee lhaong mai yaog cao giex kaing li khaing cub pui pa ang mawh cub kawn simex pui Lewix khankix heue. ³² Yerobom yuh pawie ting ka daux khix daix singaix phwan, awm pawie pa hoik yuh kix ka daux meung Yudax mai nawh tan krax tan pa appong ka piang khu dee tan, mawh kheu nan, nawh yuh krax tan pa appong ka riang kawn mawie khri, pa hoik yuh tix ka daux veng Betelax mai deuh cao giex kaing li khankix ot ka dee lhaong pa hoik yuh tix ka daux veng Betelax heue. ³³ Nawh tan krax tan ka piang khu dee tan yuh tix ka daux khix daix singaix kao phwan, pa mawh khix singaix hoik tat nawh ka daux rhawm tix mai nawh yuh pawie tix mu, son pui Isarelax mai gleeing nyawng bhawng khankix ka piang khu dee tan an heue.

¹ Mai jhak heue, pui Siyiex tix kaux lih hu khaing meung Yudax mai hoek ka daux veng Betelax awm gumlox pa tawm Simiang Siyiex, yam cung Yerobom hawt khu dee tan sonsang gleeing nyawng bhawng heue. ² Mai nawh deuh phimap ka khu dee tan an kok yo gumlox pa tawm Simiang Siyiex ah nin, "Khu dee tan, khu dee tan eue, Simiang Siyiex ah nin, jhak heue, kawn simex pa kaux Yosiyax tak keh khaing doeh nyiex ma Davit, kaw an tak pah cao giex kaing li pa appong krax tan ka dee pa lhaong khankix, pa gleeing nyawng ka piang maix mai si-ang pui khankix tak gleeing tix ka piang maix heue." ³ Mai nawh hoik tawx mhai tix ceu ka daux singaix an ah nin, "In mawh mhai pa hoik krai Simiang Siyiex, khu dee tan in tak max mai nyaox pa koe piang nawh khankix tak roik heue" ⁴ Yam mhong Yerobom ka lox pa ah pui Siyiex, pa deuh phimap ka khu dee tan daux veng Betelax, nawh nyeu taix tix lih piang khu dee tan ah nin, "Giex nawh, "taix pa nyeu nawh lih, hoik kroh hu mai ang lai deeh pon bluh hoek ka tokaux tix heue. ⁵ Mai khu dee tan an hoik max mai nyaox khankix roik khaing piang khu dee tan, awm mhai pa krai pui Siyiex an, kheu gumlox Simiang Siyiex heue. ⁶ Simiang ah nin ka pui Siyiex an, "Yuh bwanson deeh khyox khaw ka Simiang Siyiex maix mai rawg bwan ka son aux, sonsang deeh mawie taix aux!" Mai pui Siyiex deeh khyox khaw ka Simiang Siyiex mai taix simiang deeh mawie mai deeh awm phao voe heue. ⁷ Mai simiang ah nin ka pui Siyiex, "Hoek ka nyiex tau mai aux, kieh tokaux maix koe riang rao mai aux tak tawx totaix ka maix heue." ⁸ Pui Siyiex deeh ah nin ka simiang, "Viang maix sang tawx nyiex haw ka aux tix plak kawx, aux ang pon hu tau mai maix, Aux ang pon ih blah mai ang pon nyaux rawm baoh in, ⁹ mawh kheu Simiang Siyiex hoik tawm lox ka aux ah nin, maix tak ang pon ti ih blah, ang pon ti nyaux rawm mai ang pon ti deeh ing ka krax pa hoek maix heue" ¹⁰ Mawh kheu nan, nawh deeh hu ka krax tang nyaing mai nawh ang lai ing ka krax kaoh tix khaing veng Betelax heue. ¹¹ Yam an cao jhai pa riex ju tix kaux, pa ot daux veng Betelax kawn simex nawh hoek mai krai keeing tix mhong kaing pa yuh pui Siyiex khawmuik ka daux veng Betelax, mai lox pa hoik krai nawh ka simiang heue. ¹² Mai keeing kix deeh ah nin, "Mawh ing nawh krax mawx?" Mai kawn simex nawh jhi krax ing pui Siyiex, pa kaoh khaing meung Yudax heue. ¹³ Nawh ah nin ka kawn simex tix, "Sau an brug son aux ka piang la, " Mai kix sau an brug son nawh mai nawh brug la, ¹⁴ mai hawt khaix pui Siyiex mai yaox ka ngawm nawh greem khaox tiah ah nin ka nawh, "Mawh maix pui Siyiex pa kaoh khaing meung Yudax lie?" Mai nawh ah nin, "Aux mawh pui an heue." ¹⁵ Mai nawh ah nin ka nawh, "Hoek daux nyiex mai ih priex tau mai aux heue." ¹⁶ Mai nawh ah nin, "Aux ang pon ing, ang pon ih priex mai ang pon nyaux rawm tau mai maix baoh in heue. ¹⁷ Mawh kheu gumlox khaing Simiang Siyiex krai ah nin ka aux, maix tak ang pon ti ih blah mai ang pon ti nyaux rawm baoh tan mai ang lai pon ti ing ka krax kaoh maix heue." ¹⁸ Nawh ah nin ka nawh, "Aux kawx mawh cao jhai tix kaux awm maix mai kawncau Siyiex hoek ti krai gumlox pa tawm Simiang Siyiex ka aux ah nin, viex nawh hoek tau mai maix ka daux nyiex sonsang ih priex mai nyaux rawm heue." Viang mawh nan, nawh hoik pie lhen ka nawh heue. ¹⁹ Nawh deeh ing tau mai nawh mai ih priex mai nyaux rawm ka daux nyiex nawh heue. ²⁰ Yam ngawm hawt pheen, gumlox Simiang Siyiex bleeh ka cao jhai pa viex nawh hoek tan, ²¹ mai nawh kok ah nin ka pui Siyiex pa kaoh khaing meung Yudax, Simiang Siyiex ah nin, mawh kheu jao ang maix nghiet lox Simiang Siyiex mai ang priex ka lox tawm pingnyap pa tawm Simiang Siyiex ka maix, ²² viang mawh nan, deeh hoek ti ih priex mai nyaux rawm ka dah dee pa hoik tawm Simiang Siyiex ka maix yuh nin, "Paw ih priex mai paw nyaux rawm, tokaux yum maix tak ang pon ti hoek ka simeeig keeing maix khankix heue" ²³ Khaix hoik ih nawh priex mai nyaux rawm, cao jhai viex nawh hoek dee an, sau an brug ka piang la son nawh heue. ²⁴ Yam lih hu nawh khaing tan, sivai sangsi sipub nawh ka daux krax mai kiied nawh mai tokaux yum nawh cod ka daux krax, la brug nawh mai sivai sangsi cung hawt praok nawh heue. ²⁵ Pui hu hawt baoh tan, yaox ka tokaux yum pa cod daux krax mai sivai sangsi pa cung praok nawh, kix krai grawng an ka daux veng ot cao jhai riex ju heue. ²⁶ Yam mhong cao jhai pa deeh viex nawh hoek khaing daux krax, ka grawng an, nawh ah nin, "An mawh pui Siyiex pa nghiet ka gumlox Simiang Siyiex, mawh kheu nan, Simiang Siyiex hoik ap ka sivai sangsi, kieh kiied nawh yum, awm gumlox pa hoik krai Simiang Siyiex ka nawh heue." ²⁷ Mai nawh ah nin ka kawn simex tix khankix, "Sau an brug ka piang la son aux, " Mai kix kawx sau an brug ka piang la heue. ²⁸ Nawh lih hu mai yaox tokaux yum an ka daux krax, la mai sivai sangsi kawn cung praok tokaux yum an, sivai sangsi ang nyang ih tokaux yum an mai ang nyang kiied ka la an heue. ²⁹ Mai cao jhai riex ju an yaog ti teei tokaux yum pui Siyiex, tang nawh ka piang la mai viex nawh ing ka daux veng, nawh yiiem doe mai sipaung ka nawh heue. ³⁰ Mai nawh deuh tokaux yum ka daux simeeig tix mai kix yiiem doe ka son nawh ah nin, "O pux aux eue, " ³¹ Khaix hoik sipaung kix ka nawh, nawh ah nin ka kawn simex tix khankix, "Yam yum aux sax sipaung aux ka daux simeeig dee sipaung aux pui Siyiex in mai deuh si-ang aux ka praok si-ang nawh heue." ³² Mawh kheu lox pa riag yo nawh kheu gumlox Simiang Siyiex pa deuh phimap ka khu dee tan, ka veng Betelax mai ka nyiex krub khankix pa koe ka dee pa lhaong mai pa koe ka veng Samarix grum naog tete heue. ³³ Khaix hoik ceu an, Yerobom ang nyang veeh tix khaing krax pa caox caig yuh tix, lheu khaing an nawh baox yaog cao giex kaing khankix khaing daux cub pui kuceu, son dee pa lhaong khankix, can pui pa koe rhawm rhi ti yuh cao giex kaing li khankix nawh hoik yuh kix singax mai kieh kix mawh cao giex kaing li ka dee pa lhaong heue. ³⁴ Mai ceu in hoik mawh phimap ka doeh nyiex ma Yerobom, sonsang tat ti tik mai yuh nawh laux leeing khaing piang haktiex in heue.

¹ Yam an Abiyax kawn simex Yerobom saux heue. ² Mai Yerobom ah nin ka moeng tix, "Kaoh mai loh grang tokaux maix son ang kix tawng mawh maix moeng Yerobom mai hu ka veng Shilaw, cao jhai Ahiyax pa krai sang mawh aux simiang ka piang pui inkix ot tan heue. ³ Teei ti viex blah kao lon mai blah rhi khlawp tiblah mai rawm hia tix kawng mai hu ka nawh, nawh tak krai maix mhong pa sang lih ti mawh ka kawn nyawm an heue." ⁴ Mai moeng Yerobom yuh awm an, nawh yaog ti hu ka veng Shilaw mai hoek ka nyiex Ahiyax, viang mawh nan, Ahiyax ang chix yaox, mawh kheu hoik pu pi ngai nawh jao riex ju nawh heue. ⁵ Simiang Siyiex ah nin ka Ahiyax, "Moeng Yerobom sang hoek chawk grawng kawn simex tix ka maix, kheu jao saux kawn simex nawh maix caw ti ah nin ka nawh heue. Mawh kheu ceu an tak mawh yam hoek nawh, nawh tak yuh grang awm bun tang kaux heue." ⁶ Yam mhong Ahiyax ka luah caong hu nawh mai yam laig nawh ka diang siviex, nawh ah nin, "Moeng Yerobom eue, laig heue maix loh grang tix awm pui tang kaux jao patix? Mawh kheu aux hoik ploi kix krai lox laux rhawm ka maix heue. ⁷ Hu kraix Yerobom mhong, Simiang Siyiex, Siyiex pui Isarelax ah in, mawh kheu Aux hoik yaog maix lhaong khaing daux sinax pui khankix mai kieh maix mawh cao kwang ka piang pui Aux Isarelax, ⁸ aux hoik teei meung haktiex khaing doeh nyiex ma Davit mai Aux tawx ka maix, viang mawh nan maix ang awm kawncau Aux Davit, pa priex gumlox pingnyap Aux khankix mai hawt grawng lawng khaix Aux khawm rhawm ti mai yuh pa khaw plak sivoe ngai Aux, ⁹ viang mawh nan maix yuh pa nie lheu caox khaing pui pa koe sivoe maix, mawh kheu maix hoik hu mai yuh riang siyiex tang kaux son tokaux tix mai raug ti deuh riang grang Asherax khankix, sonsang deeh so maix krax song rhawm Aux mai hoik tik vud Aux ka plak khaix tix, ¹⁰ aux tak kieh krax laux leeing hoek ka piang doeh nyiex ma Yerobom mai tat ti tik kawn simex daux Yerobom ku kaux, pa koe ka daux pui Isarelax, pa mawh pui pa giex laung mai pui pa glawd khaing Yerobom mai Aux tak teei ti tik doeh nyiex ma Yerobom, awm tik pui ka aing heue. ¹¹ Sox tak ih ka pui Yerobom pa yum ka daux veng mai sim raoma tak ih ka pui pa yum ka daux tiag, Mawh kheu Siyiex hoik krai ti deuh heue." ¹² Kaoh mai ing ka nyiex tix, yam dig caong maix ka daux veng, kawn nyawm an tak yum heue. ¹³ Pui Isarelax tak yiiem doe mai sipaung nawh, kheu mawh nawh kawn Yerobom tix kaux khaing, pa sang hoek ka daux simeeig, mawh kheu kawn yaox ceu pa mhawm ka daux nawh ka plak sivoe Simiang Siyiex pui Isarelax ka daux doeh nyiex ma Yerobom heue. ¹⁴ Lheu khaing an Simiang Siyiex tak yaog simiang tix kaux son tix ka daux pui Isarelax, pa sang tat ti tik doeh nyiex ma Yerobom ka daux singaix heue. "Mawh yam mawx?" Nawh Cao ah nin, "Mawh yam in heue" ¹⁵ Simiang Siyiex tak sivied ka pui Isarelax, kieh kix vuhvied awm gawng priem ka daux rawm mai tak reeig ti tik pui Isarelax khaing haktiex in, pa hoik tawx Nawh Cao ka keeing kix mai kieh prung prang ka plak toi rawm klawng Yufrethi kheu jao yuh kix riang Asherax mai so kieh Simiang Siyiex song rhawm heue. ¹⁶ Mai Nawh Cao tak tik vud ka pui Isarelax, kheu phimap Yerobom pa yuh nawh phimap mai kieh pui Isarelax lud. ¹⁷ Moeng Yerobom yaog ti ing khaing tan, yam hoek nawh ka diang siviex veng Tiraza, kawn nyawm an hoik yum heue. ¹⁸ Pui Isarelax sipaung nawh mai yiiem doe son nawh, awm gumlox pa hoik krai Simiang Siyiex ka kawncau tix cao jhai Ahiyax heue. ¹⁹ Pa yuh Yerobom khankix mai pa yuh nawh naing pa kwang nawh ka haktiex khankix, hoik tiem ti deuh ka daux phuk lai been simiang pui Isarelax heue. ²⁰ Yerobom kwang ka haktiex tixnga ra num mai laux lee tix tau mai keeing nawh khankix mai kawn simex nawh Nadat deeh plud khaix nawh heue. ²¹ Rehobom kawn simex Sawlamon kwang meung Yudax, yam jah Rehobom ti kwang haktiex koe tixpon tix num mai kwang ka veng Yerusaliem kao aliah num, veng pa hoik laug Simiang Siyiex ti deuh khaing daux ceu pui Isarelax mai pa sonsang deuh min ceu kaux tix tan, miex nawh mawh Nema pui Amonix heue. ²² Pui Yudax khankix yuh ceu pa caox caig ka plak sivoe ngai Simiang Siyiex mai kix hoik kieh Nawh Cao song rhawm ka phimap pa yuh tix mai lheu khaing pa yuh keeing kix heue. ²³ Mai kix baox deeh sum dee pa lhaong khankix mai rong khaox sigang khankix mai riang grang Asherax ka piang gawng piang lua pa lhaong ku mu mai ka greem khaox klai khankix ka son tix heue. ²⁴ Mai simex coh kaux khankix koe ka daux haktiex an, kix hawt yuh pa seeing brai pa yuh pui khankix, pa hoik grheu Simiang Siyiex khaing sivoe pui Isarelax heue. ²⁵ Yam kwang simiang Rerobom ka haktiex phwan num tix num, Shishak simiang Ejiptux, hoek ti puing ka veng Yerusaliem heue. ²⁶ Yam rhim ti viex sinngao daux nyiex bwan Simiang Siyiex mai sinngao nyiex haw simiang mai kraung kuceu ing mai tix, nawh baox viex kraung plah tiebtie khri pa yuh Sawlamon heue. ²⁷ Simiang Rehobom deeh plud ti yuh plah tiebtie tawng mai ap an ka cao kaing pau ju simiang, pa pau diang siviex nyiex simiang heue. ²⁸ Yam laig simiang ka nyiex bwan Simiang Siyiex yam mawx ang ah, cao pau ju khankix viex kraung plah pa tiebtie hawt khaix nawh, kix deeh viex hoek priex ka daux lawg dee pau kix heue. ²⁹ Can kaing pa deuk mai pa hoik yuh Rehobom khankix mai khaing pa yuh nawh khankix hoik tiem ti deuh daux phuk lai been simiang pui Yudax ang mawh lie? ³⁰ Mai naing koe sinax Rehobom mai Yerobom sijheeng heue. ³¹ Rehobom laux lee ti tau mai keeing ti mai sipaung tau mai keeing nawh Davit, ceu kaux miex nawh mawh Nema pui Amawrix, Abiyax kawn simex nawh deeh plud khaix nawh heue.

¹ Yam hoik kwang simiang Yerobom kawn simex Nebat ka haktiex kao daix num, Abijam jah ti kwang ka piang pui Yudax heue. ² Nawh kwang ka veng Yerusaliem loe num, ceu kaux miex nawh mawh Makha kawn saux Apsalom heue. ³ Nawh lawng ka daux phimap pa hoik yuh keeing tix kuceu, rhawm nawh ang lai grum naog ka Simiang Siyiex tix, awm rhawm tax du nawh Davit heue. ⁴ Viang mawh nan, mawh kheu jhak Simiang Siyiex ka pakngai Davit, Simiang Siyiex tom tawx kawk ngu tix mu ka nawh ka veng Yerusaliem mai yaog kawn simex nawh plud khaix nawh mai pang veng Yerusaliem kaux cong son nawh heue. ⁵ Mawh kheu Davit yuh pa khaw ka plak sivoe ngai Simiang Siyiex mai ang veeh tix, khaing lox tawm Nawh Cao glang singaix im ju nawh, lheu khaing grawng see Uriyax pui Hetax heue. ⁶ Naing hoik koe ka sinax Rehobom mai Yerobom glang singaix im ju nawh heue. ⁷ Can pa yuh Abiyax mai kaing pa yuh nawh khankix, hoik tiem ti deuh ka daux phuk lai been simiang pui Yudax heue. Mai naing koe sinax Abiyax mai Yerobom heue. ⁸ Mai Abijam laux lee ti tau mai keeing tix khankix mai sipaung ka veng Davit, khaix an Asa kawn simex nawh dee plud khaix nawh heue. ⁹ Yam hoik kwang Yerobom simiang pui Isarelax haktiex tixnga num, Asa jah ti kwang ka piang pui Yudax heue. ¹⁰ Nawh kwang ka veng Yerusaliem tixpon tix num, ceu kaux miex nawh mawh Makha, kawn bun Apsalom heue. ¹¹ Asa yuh pa khaw ka plak sivoe Simiang Siyiex awm tax du nawh Davit heue. ¹² Nawh grheu simex coh kaux khankix khaing daux haktiex mai yieh ti tik ka riang grang Asherax pa yuh keeing nawh ti deuh khawmuik heue. ¹³ Nawh plud miex tix Makha khaing pa mawh laux simiang, kheu jao yuh nawh riang grang Asherax pa seeing brai son Asherax, Asa yieh riang grang Asherax pa yuh nawh mai gleeing ka praok rawm klawng Kidaron heue. ¹⁴ Viang mawh nan, ka dee lhaong khankix ang nyang yieh tix, glang yam kawn im ju Asa, rhawm nawh koe pa grum naog ka Simiang Siyiex heue. ¹⁵ Nawh viex krax tan pa hoik yuh keeing nawh sijax tix, ti sang tan cao nawh, pa mawh khri, mau, kraung pa shao tix khankix hoek ka daux nyiex bwan Simiang Siyiex heue. ¹⁶ Mai naing koe sinax Asa mai Basha simiang pui Isarelax glang singaix im ju kiex heue. ¹⁷ Basha simiang Isarelax hu puing ka meung Yudax mai sum ti deuh veng Rama, sonsang ang kieh pui tix kaux kawx lih laig ka Asa simiang Yudax heue. ¹⁸ Asa teei mau mai khri pa kawn deuk khaing daux nyiex krao sinngao nyiex bwan Simiang Siyiex, nyiex krao sinngao simiang mai ap ankix ka daux tawm taix kawncau nawh khankix mai Asa ploi kix hu ka Benhadat kawn simex Tabarimon kawn simex Hezon, simiang Surix pa ot ka daux veng Damase ah nin, ¹⁹ "Kieh ax yuh paox pie sinax maix mai aux, awm pa yuh keeing aux mai keeing maix mai paox ti heue. Jhak heue, Aux ploi pui hu tawx totaix pa mawh mau mai khri khankix, maix deeh yieh pa yuh tix paox pie ka Basha simiang Isarelax, sonsang deeh yaog pui naing ti ing khaing aux heue." ²⁰ Benhadat nghiet ka lox Asa mai nawh ploi cao kaing kru naing tix khankix hu puing ka veng pui Isarelax mai puing ka veng Iyon, Dan, Abelabiet-makha mai baoh haktiex Khinirot tau mai baoh haktiex Napthalix khawmuik heue. ²¹ Yam mhong Basha ka ceu an, nawh ang lai sum ka veng Rama mai ing ot ka daux veng Tiraza heue. ²² Simiang Asa kieh pui krai pao ka daux meung Yudax khawmuik, ang via pui tix kaux kawx mai kieh kix don simaox khaing veng Rama mai khaox khankix pa hoik shiao Basha sonsang sum tix veng, mai Asa deeh viex ti sum veng Gebax, pa koe ka daux meung pui Binyamin mai veng Mizapa tau ka an heue. ²³ Grawng kaing pa deuk mai can pa hoik yuh simiang Asa khawm riang rao nawh khankix mai can kaing pa yuh nawh mai veng pa hoik sum nawh khankix, hoik tiem ti deuh ka daux phuk lai been simiang pui Yudax heue. Viang mawh nan, yam riex ju nawh, nawh pon jhawm saux ka caong tix heue. ²⁴ Asa laux lee tix mai keeing nawh khankix mai sipaung nawh tau mai keeing nawh khankix ka daux veng keeing nawh Davit mai Yehoshaphat kawn simex nawh deeh plud ti kwang khaix nawh heue. ²⁵ Mai Nadat kawn simex Yerobom yaog ti kwang ka piang pui Isarelax, yam kwang Asa simiang Yudax ka haktiex ra num, mai nawh kwang ka piang pui Isarelax ra num heue. ²⁶ Mai nawh yuh pa caox caig ka plak sivoe ngai Siyiex mai lawng krax hu keeing nawh mai ka daux phimap pa kieh pui Isarelax yuh phimap heue. ²⁷ Basha kawn simex Ahiyax, khaing doeh nyiex ma pui Issakha keud ti tieh feen ka simiang Nadat, mai Basha hoik pah ka nawh ka daux veng Gibeton veng cie pui Philitix, yam lai lawm Nadat mai pui Isarelax khankix ka veng Gibeton heue. ²⁸ Basha pah nawh yum yam kwang simiang Asa ka meung Yudax loe num tix num mai nawh plud ti kwang khaix nawh heue. ²⁹ Yam mawh nawh simiang, nawh pah ka doeh nyiex ma Yerobom khankix heue. Nawh ang prah kix im ju tix kaux kawx, tom sidah yuh nawh kix laux leeing pak lawg, awm gumlox pa hoik krai Simiang Siyiex ka kawncau tix Ahiyax pui veng Shilaw. ³⁰ Mawh kheu phimap Yerobom pa hoik lud nawh mai pa hoik kieh pui Isarelax khankix lud mai pa hoik so Simiang Siyiex pui Isarelax khankix song rhawm heue. ³¹ Grawng kaing pa deuk mai can pa hoik yuh Nadat khankix, hoik tiem ti deuh ka daux phuk lai been simiang pui Isarelax khankix heue. ³² Mai naing koe sinax Asa mai Basha pa mawh simiang pui Isarelax glang singaix im ju kiex heue. ³³ Yam hoik kwang Asa simiang Yudax ka haktiex loe num tix num, Basha kawn simex Ahiyax jah ti kwang ka piang pui Isarelax khankix, ka daux veng Tiraza mai kwang haktiex tixnga pon num heue. ³⁴ Nawh yuh pa caox caig ka plak sivoe ngai Simiang Siyiex mai lawng daux krax pa hu Yerobom mai daux phimap pa yuh nawh pa kieh pui Isarelax yuh phimap heue.

¹ Gumlox Simiang Siyiex hoek ka Yehu kawn simex Hananix ne raw ka Basha ah nin, ² "Aux yaog maix lih khaing daux phawng tiex mai kieh maix kwang ka piang pui Aux Isarelax khankix mai hoik lawng daux krax pa hu Yerobom mai kieh pui Aux Isarelax lud mai so Aux song rhawm ka phimap kix heue. ³ Aux tak tat ti tik doeh nyiex ma Basha mai Aux tak kieh doeh nyiex ma maix khankix awm doeh nyiex ma Yerobom kawn simex Nebat heue. ⁴ Sox tak ih ka can pui Basha pa yum ka daux veng mai sim raoma tak ih pui pa yum ka daux tiag heue." ⁵ Mai kaing pa deuk pa yuh Basha mai kaing pa hoik yuh nawh khankix mai riang rao nawh khankix hoik tiem ti deuh ka daux phuk lai been simiang pui Isarelax khankix heue. ⁶ Basha laux lee tix tau mai keeing nawh khankix mai sipaung nawh ka daux veng Tiraza mai kawn simex nawh Elax deeh plud ti kwang khaix nawh heue. ⁷ Mai gumlox Simiang Siyiex hoek ka cao jhai Yehu kawn simex Hananix, ka son Basha mai ka doeh nyiex ma nawh, kheu jao pa caox caig yuh nawh ka plak sivoe ngai Simiang Siyiex khankix hoik kieh Nawh Cao song rhawm, ka kaing pa yuh nawh ka taix ti awm pa yuh doeh nyiex ma Yerobom kheu jao hoik pah nawh doeh nyiex ma kix yum heue. ⁸ Yam hoik kwang Asa simiang Yudax ka haktiex tixnga liah num, Elax kawn simex Basha deeh jah ti mawh simiang ka piang pui Isarelax mai kwang ka daux veng Tiraza ra num heue. ⁹ Kawncau nawh Zimarix pa mawh cao kaing ting pa kwang ling lawx naing brung nawh tix plak, keud ti deeh tieh feen ka nawh yam ot nawh ka daux veng Tiraza mai yam nyaux nawh tom yoek tix daux nyiex Aza, cao pa kwang ka daux nyiex haw daux veng Tiraza, ¹⁰ mai Zimarix laig mug nawh ka daux nyiex mai pah nawh yum yam kwang simiang Asa ka meung Yudax tixnga aliah num mai plud ti kwang haktiex nawh heue. ¹¹ Yam jah nawh ti kwang ka haktiex, mai ngawm ka piang dangngeung mai nawh pah doeh nyiex Basha khawmuik, nawh ang lai prah simex tix kaux kawx mai khawm pao nyiex mai puxaik nawh khawmuik heue. ¹² Zimarix doeh nyiex ma Basha, awm gumlox Simiang Siyiex, pa krai Nawh Cao ka cao jhai Yehu ka son Basha heue. ¹³ Mawh kheu phimap pa yuh Basha mai phimap kawn simex nawh Elax mai pa lud kix, pa hoik kieh pui Isarelax koe phimap mai kieh Simiang Siyiex pui Isarelax song rhawm kheu riang grang Asherax pa krub kix heue. ¹⁴ Grawng kaing pa deuk mai pa hoik yuh Elax mai kaing pa yuh nawh khankix, hoik tiem ti deuh ka daux phuk lai been simiang pui Isarelax heue. ¹⁵ Yam hoik kwang Asa simiang haktiex Yudax tixnga aliah num, Zimarix kwang ka daux veng Tiraza aliah ngaix mai pui Isarelax khankix yuh tab mai rawb ka veng Gibeton veng pui Philitix heue. ¹⁶ Pui khankix pa yuh tab mhong ka grawng tieh feen Zimarix mai ka hoik pah simiang yum, mawh kheu nan, pui Isarelax khankix yaog Omrix pa mawh cao kaing naing ting, mawh simiang ka piang Isarelax daux singaix an ka dee bang kix heue. ¹⁷ Omrix mai pui Isarelax pa ot tau mai nawh khawmuik, lih hu khaing veng Gibeton mai kix lai lawm ka veng Tiraza heue. ¹⁸ Yam yaox Zimarix ka pon rhim kix ka veng, nawh laig ka daux nyiex haw mai gleeing nyiex haw ka piang tix mai nawh yum tan, ¹⁹ kheu phimap pa caox caig yuh nawh ka plak sivoe ngai Simiang Siyiex mai lawng daux krax hu Yerobom mai kieh pui Isarelax khankix lud heue. ²⁰ Grawng kaing pa deuk Zimarix mai can kaing pa hoik tieh feen nawh, hoik tiem ti deuh ka daux phuk lai been simiang pui Isarelax khankix heue. ²¹ Khaix an pui Isarelax gwieh tix ra plak tix plak hawt khaix Tibanix kawn simex Ginat, sonsang yaog kix nawh mawh simiang mai tix plak hawt khaix Omrix heue. ²² Viang mawh nan, pui pa hawt khaix Omrix pex ka pui pa hawt khaix Tibanix kawn simex Ginat, mawh kheu nan, Tibanix yum mai Omrix yaog ti kwang ka haktiex heue. ²³ Yam hoik kwang Asa simiang Yudax ka haktiex tixngoe tix num, Omrix yaog ti kwang ka piang pui Isarelax kao ra num, nawh kwang ka daux veng Tiraza liah num heue. ²⁴ Nawh liag gawng Samarix khaing Shemarax, ka mau ra talantan mai sum veng ka piang gawng an mai kok ceu kaux veng an mawh Samarix hawt ceu kaux Shemarax cao gawng an heue. ²⁵ Omrix yuh pa caox caig sivoe ngai Simiang Siyiex nie lheu yuh khaing pui pa koe sivoe nawh khankix heue. ²⁶ Mawh kheu nawh lawng daux krax Yerobom kawn simex Nebat mai phimap pa yuh nawh kieh pui Isarelax khankix lud mai so Simiang Siyiex, Siyiex pui Isarelax song rhawm kheu riang grang Asherax pa krub kix heue. ²⁷ Grawng kaing pa deuk mai can kaing pa yuh Omrix mai riang rao pa jhi nawh khankix, hoik tiem ti deuh ka daux phuk lai been simiang pui Isarelax heue. ²⁸ Mai Omrix laux lee ti tau mai keeing nawh khankix, kix sipaung nawh ka daux veng Samarix, khaix an kawn simex nawh Ahap deeh plud ti kwang khaix nawh heue. ²⁹ Yam hoik kwang Asa simiang Yudax ka haktiex tixngoe daix num, Ahap kawn simex Omrix jah ti kwang ka piang pui Isarelax khankix, mai nawh kwang ka piang Isarelax ka daux veng Samarix tixnga ra num heue. ³⁰ Ahap kawn simex Omrix nie lheu yuh pa caox caig plak sivoe ngai Simiang Siyiex, khaing pui pa koe sivoe nawh heue. ³¹ Pa lawng nawh ti hu ka daux phimap pa yuh Yerobom kawn simex Nebat, nawh sawn mawh pa iak son tix, kheu nawh teei ti moeng Yezabelax kawn bun Etabalax simiang Sidom, nawh hu yuh kaing jhaw Balax mai krub ka nawh heue. ³² Mai nawh sum khu dee tan tix lhang ka son Balax, ka daux nyiex bwan siyiex Balax pa hoik sum nawh ka daux veng Samarix heue. ³³ Mai Ahap yuh riang grang Asherax heue. Ahap nie lheu yuh pa so ka rhawm Simiang Siyiex, Siyiex pui Isarelax, sonsang nie lheu song rhawm Nawh Cao ka piang nawh lheu khaing simiang pui Isarelax khankix pa koe sivoe nawh heue. ³⁴ Ka daux bawg yam kwang nawh ka haktiex, Hilax pui veng Betelax hoik deeh sum veng Yerikho, yam kaw nawh num riah veng an kawn Ai nawh Abiram yum mai yam jung nawh pang siviex kawn simex ghoik nawh Segub yum, awm gumlox pa hoik krai Simiang Siyiex ka Yawsux kawn simex Nun heue.

¹ Eliyax pui veng Tishabix pa ot meung Gilat ah nin ka Ahap, "Awm im ju Simiang Siyiex, Siyiex pui Isarelax pa krub aux kah, phan ang mawh khaing gumlox Aux, rawm ciex mai rawm lhiex tak ang koe ka daux num in heue." ² Mai gumlox Simiang Siyiex lih hoek ka nawh ah nin, ³ "Lih hu khaing tin, mai veeh ti hu ka plak lih singaix mai mox tix ka praok rawm klawng iak Kherit, plak toi rawm klawng Yawdan heue. ⁴ Maix tak nyaux rawm klawng iak an mai Aux tawx lox ka lak, sonsang hoek tawx maix ih pa ih tan heue." ⁵ Mawh kheu nan, nawh lih hu mai yuh awm gumlox pa tawm Simiang Siyiex ka nawh, nawh hu mai ot ka praok rawm klawng iak Kherit, plak toi rawm klawng Yawdan heue. ⁶ Lak viex blah mai nex hoek ka nawh, ponngawb mai ponbo mai nawh nyaux rawm klawng iak an heue. ⁷ Khaix an, rawm klawng iak an hit, jao ang lhiex lai lih ka daux haktiex an heue. ⁸ Mai gumlox Simiang Siyiex hoek ka nawh ah nin, ⁹ "Kaoh hu ka veng Zarephat, pa mawh veng pui Sidom mai ot tan, Aux tawm lox ka miexmai tix kaux, pa ot tan sonsang tawx maix ih heue." ¹⁰ Nawh kaoh hu ka veng Zarephat mai yam hoek nawh ka siviex veng, nawh yaox ka miexmai tix kaux, pa kraix khix tan, nawh kok miexmai an ah nin, "Viex aux nyaux rawm ka daux kawk ceeix heue." ¹¹ Yam sang hu bun an ti teei rawm nawh baox kok ka bun an ah nin, "Viex aux ih blah tix shiag ka daux taix maix ceeix heue." ¹² Bun an pawk ah nin, "Awm pa im ju Simiang Siyiex mai aux ang lai koe khlawp blah, mawh ngie phawng gaox nghox ca been tix jhawp daux aw mai rawm bee ceeix ka daux ngoi, yam in aux khraix khix ra nge sonsang khre pa ih son tix mai son kawn simex aux, ih mai yum khaix heue." ¹³ Mai Eliyax ah nin ka bun an, "Paw khi, hu khre awm pa ah maix, yuh khliep blah iak tix mu phao voe mai viex hoek ka aux, khaix an yuh son cao maix mai kawn simex maix heue. ¹⁴ Simiang Siyiex pui Isarelax ah yuh nin, phawng nghox ca daux aw tak ang chix uik mai bee daux ngoi tak ang chix dieh tom hoek tom sidah kieh Simiang Siyiex rawm lhiex lih ka piang ca haktiex heue." ¹⁵ Bun an hu yuh awm pa krai Eliyax, bun an mai khawm kawn nyiex nawh khankix, yaox ti ih tom rheeng singaix heue. ¹⁶ Phawng gaox nghox ca daux aw ang chix uik mai bee daux ngoi kawx ang chix dieh awm gumlox pa hoik krai Simiang Siyiex ka Eliyax heue. ¹⁷ Khaix an kawn simex miexmai an saux, saux nawh kied kin mai nawh ang lai toek bhawm tix heue. ¹⁸ Mai bun an ah nin ka Eliyax, "Pui Siyiex eue, mawh koe ceu pa yuh maix patix ka aux lie? Mawh hoek maix ka aux sonsang doh keud aux ka phimap tix, sonsang pah kawn simex aux yum heue." ¹⁹ Mai nawh deeh ah nin ka bun an, "Tawx kawn simex maix ka aux heue." Nawh teei kawn simex an lih khaing naok bun an mai kliien nawh haok lawg plak piang dee paung tix mai deuh nawh ka piang ku heue. ²⁰ Nawh kok yo ka Simiang Siyiex ah nin, "Simiang Siyiex aux eue, mawh viex Maix ceu pa caox hoek ka piang miexmai, pa paung aux nyiex kheu pa pah kawn simex nawh lie?" ²¹ mai nawh nyat tokaux tix ka piang kawn nyawm an loe bawg mai kok yo ah nin, "Simiang Siyiex, Siyiex aux eue, kieh khwan kawn nyawm in deeh hoek ka daux nawh heue." ²² Mai Simiang Siyiex mhong lox kok yo Eliyax mai khwan kawn nyawm deeh hoek ka daux nawh mai nawh deeh im heue. ²³ Mai Eliyax klien kawn nyawm an lih khaing lawg plak piang mai hoek daux nyiex mai ap kawn nyawm an ka miex nawh, Eliyax ah nin, "Jhak kawn simex pax hoik im phao heue." ²⁴ Khaix an bun an deeh ah nin ka Eliyax, "Yam in aux tawng mawh maix pui Siyiex mai gumlox Simiang Siyiex pa kaoh khaing daux jheeh maix mawh pa mawh pa meh heue."

¹ Khaix hoik rheeng singaix bawg yam, gumlox Simiang Siyiex deeh hoek ka Eliyax yam naog loe num tix num ah nin, "Hu mai jhi tokaux maix ka Ahap, mai Aux tak kieh lhiex lih ka piang haktiex heue." ² Mawh kheu nan, Eliyax hu jhi tokaux tix ka Ahap heue. Yam in sibhawm praix pa kied kin sigrien ka daux veng Samarix heue. ³ Ahap kok ka Obadix cao kaing pa kwang ka daux nyiex haw heue. Obadix mawh pui pa kied lhat kied graung ka Simiang Siyiex heue. ⁴ Yam grheu Yezabelax ti tik ka cao jhai Simiang Siyiex khankix, Obadix teei cao jhai tix yieh kaux mai mox kix ka daux rang ti dah tixphwan kaux mai eei kix ka blah mai rawm heue. ⁵ Mai Ahap ah nin ka Obadix, "Hu ka daux haktiex dee lih rawm keut mai ka deeh koe rawm klawng iak khankix, ha ex sang yaox dee koe rib sonsang eei ka brung law klawd ka mai son ang to brie som nai tix mu kawx heue." ⁶ Ahap mai Obadix gwieh paox tix hu sawg ka haktiex koe rib tix kaux tix plak heue. ⁷ Yam kawn hu Obadix ka krax hu nawh, Eliyax caong rieb ti pub nawh mai Obadix pon ci ka nawh, nawh gup ngai tix ah nin, "Mawh maix simiang aux Eliyax lie?" ⁸ Eliyax pawk ah nin ka nawh, "Mawh aux heue. Hu mai krai simiang maix mhong kah ot Eliyax tin heue" ⁹ Obadix ah nin, "Mawh hoik koe ceu pa lud aux ka tix maix lai ap kawncau tix ka daux tawm taix Ahap, sonsang pah nawh ka aux heue." ¹⁰ Awm im ju Simiang Siyiex maix, dee ot pui mawx ang ah mai haktiex mawx ang ah, dee ang cao simiang aux ploi pui hu sawg ka maix, ang koe ti dah kawx maix hoik kieh pui haktiex tiextu ah nin kix ang yaox ka maix heue. ¹¹ Yam in maix lai ah nin, hu mai krai cao simiang maix mhong, "Eliyax ot tin heue" ¹² Yam hoik hu aux khaing maix phan khwan Simiang Siyiex viex maix hu ka dee ang aux tawng, yam hu krai aux ka Ahap, mai phan ang yaox ka maix nawh tak pah ka aux, mawh kheu aux kawncau maix hoik dawg lhat ka Simiang Siyiex tom yam iak tix heue. ¹³ Ang aux hoik krai grawng an ka cao simiang tix, yam pah Yezabelax ka cao jhai Simiang Siyiex khankix mai grawng pa hoik mox aux cao jhai Simiang Siyiex tix yieh kaux, ka daux rang tix dah tixphwan kaux mai hoik eei kix ka blah mai rawm ang mawh lie? ¹⁴ Yam in maix lai ah nin, "Hu krai cao simiang maix mhong, Eliyax ot tin heue. Mai nawh tak pah aux heue." ¹⁵ Eliyax ah nin, "Awm im ju Simiang Siyiex Cao kru naing raoma pa krub aux ka, aux tak jhi tokaux tix ka nawh daux in singaix tete heue." ¹⁶ Mawh kheu nan, Obadix hu krai ka Ahap mai Ahap lih rieb ka Eliyax heue. ¹⁷ Yam yaox Ahap ka Eliyax, Ahap ah nin ka nawh, "Mawh mawh maix pa tuktiak ka pui Isarelax lie?" ¹⁸ Eliyax deeh pawk ah nin, "Aux ang mawh pa tuktiak ka pui Isarelax, mawh maix mai doeh nyiex ma keeing maix pa tuktiak tik vud lox tawm pingnyap Simiang Siyiex mai hawt khaix siyiex Balax heue. ¹⁹ Yam in ploi pui hu khrawm pui Isarelax mai cao jhai Balax pon yieh tixphwan kaux mai cao jhai Asherax pon yieh kaux, pa sawm tau ka pheen Yezabelax khawmuik hoek ka aux ka gawng Khamelax heue." ²⁰ Mai Ahap ploi pui hu khrawm ka pui Isarelax khawmuik mai cao jhai khankix hoek ka gawng Khamelax heue. ²¹ Eliyax hoek ka pui khawmuik ah nin, "Mawh kawn ku kax rhawm pex sinax beenli in ra ceu miex greung lie? Phan Simiang Siyiex mawh Siyiex hawt khaix Nawh Cao mai phan Balax mawh siyiex hawt khaix nawh heue. "Pui khankix ang pon pawk lox nawh tix gum kawx heue. ²² Khaix an, Eliyax ah nin ka pui khankix, "Cao jhai Simiang Siyiex deuk ngie aux nong nong, viang mawh nan, cao jhai Balax kawn koe pon yieh tixphwan kaux heue. ²³ Mai kieh kix tawx mawie mhaing ra mu ka ex, kieh kix laug son cao tix, tix mu mai pat lih mawh shiag mawx shiag an deuh ka piang khix, viang mawh nan, paw vi sau ngu, mai aux tak khre mawie tix mu deuh ka piang khix mai ang sau ngu ka heue. ²⁴ Mai pex kok ceu kaux siyiex tix mai aux kawx tak kok ka ceu kaux Simiang Siyiex, Siyiex pa sang pawk ka ngu, Nawh tak mawh Siyiex heue. "Pui khankix pawk lox ah nin, "In mawh pa mhawm heue." ²⁵ Eliyax ah nin ka cao jhai Balax khankix, "Laug mawie son cao pex tix mu mai khre ka son pex sivoe, mawh kheu mawh pex pui hun, mai kok ka ceu kaux siyiex pex, viang mawh nan, paw vi sau ngu heue." ²⁶ Kix teei mawie mhaing an pa hoik tawx ka kix mai khre ka an mai kok ka ceu kaux Balax jah ponngawb tom hoek jung singaix ah nin, "Balax eue, nghiet lox yix liak! "viang mawh nan, lox tidtix ang koe, mai ang koe cao pawk, kix graoh hawt vung viang khu dee tan tix heue. ²⁷ Yam hoek yam jung singaix Eliyax ah lox ang cee ang cak ka kix ah nin, "Yo lox pex tom ting, mawh kheu mawh nawh siyiex, nawh kawn keud rhawm tix, phan ang mawh nan, nawh kawn nie kaing, phan ang mawh nan, nawh kawn hu krax, phan ang mawh nan, nawh kawn laig it pleue, pex khaw ti so nawh kaoh heue. ²⁸ Kix baox nie yo lox sinum mai pat tokaux tix ka vaig ka rhiem lawm tom lih nham awm hoik koe been kix heue. ²⁹ Yam luan jung singaix, kix ah lox jhai tom hoek plak bo yam yuh kix krax tan pa appong, viang mawh nan lox tidtix ang koe mai ang koe cao pawk, ang koe cao nghiet heue. ³⁰ Eliyax ah nin ka pui ku kaux, "Hoek dex aux, "pui ku kaux kawx hoek dex nawh mai nawh cox khu dee tan Simiang Siyiex pa hoik grhup heue. ³¹ Mai Eliyax teei simaox kao ra lon, awm koe doeh ru kawn simex Yakop mai ka pui pa hoek gumlox Simiang Siyiex ka ah nin, "Ceu kaux maix tak mawh Isarelax heue." ³² Nawh sum khu dee tan ka lon simaox inkix ka daux ceu kaux Simiang Siyiex, mai nawh kaong rawng hawt rawb rim khu dee tan son pa kub simie nghox tix glawm Ra Sirax heue. ³³ Nawh grux khix mhawm mhawm mai pat nex mawie mhaing shiag mawx shiag an mai deuh ka piang khix ah nin, "Sau rawm naog ka daux pung pon mu mai lhauk ka piang krax tan pa gleeing mai piang khix khankix heue." ³⁴ Khaix an nawh ah nin, "Baox lhauk tix bawg" mai kix kawx baox lhauk ra bawg, nawh baox ah nin, "Baox lhauk loe bawg, " mai kix kawx baox lhauk loe bawg heue. ³⁵ Mai rawm hoik ba hawt rawb rim khu dee tan mai nawh baox deeh sau rawm naog ka daux rawng heue. ³⁶ Yam hoek bawg yam tan krax tan plak bo, cao jhai Eliyax hoek dex ah nin, "Simiang Siyiex, Siyiex Abraham, Icak mai Isarelax eue, daux singaix kieh pui khankix tawng ka mawh Maix Siyiex pui Isarelax mai ka mawh aux kawncau Maix Cao, ka pa yuh aux in awm gumlox Maix Cao heue. ³⁷ Simiang Siyiex eue, nghiet ka lox aux sonsang tawng pui khankix ka mawh Maix Simiang Siyiex mai tawng ka mawh Maix Cao pa kieh kix deeh veeh rhawm tix heue. ³⁸ Khaix an ngu Simiang Siyiex lih mai gleeing ka krax tan pa gleeing mai khix, simaox mai phawng tiex khankix kroh yuh rawm ka daux rawng heue. ³⁹ Yam yaox pui ka ankix gup ngai tix ah nin, "Simiang Siyiex mawh Siyiex heue. Simiang Siyiex mawh Siyiex heue." ⁴⁰ Mai Eliyax ah nin ka kix, "Giex ka cao jhai Balax paw kieh boek tix kaux kawx, " Mai kix giex ka kix, Eliyax viex ti hu pah kix ka rawm klawng Kishon heue. ⁴¹ Mai Eliyax ah nin ka Ahap, "Haok plak piang ih mai nyaux, mawh kheu sinum praix lhiex ting sang lih heue." ⁴² Ahap haok ka piang sonsang ih nyaux mai Eliyax kawx haok ka choek gawng Khamelax, mai nawh gup tix ka piang tiex mai deuh pakngai tix ka sinax ngawng tix, ⁴³ mai ah nin ka kawncau nawh, "Kaoh mai jhak ka plak rawm sigrit sigra, " Nawh kaoh jhak ah nin, "Ang koe tidtix tan heue." Mai Eliyax ah nin, "Baox hu jhak aliah bawg heue." ⁴⁴ Yam hoek aliah bawg nawh ah nin, "Paiawm iak pa awm taix pui pa haok khaing daux rawm sigrit sigra, " Mai nawh ah nin ka kawncau tix, "Hu krai ka Ahap, khre ka ling lawx brung maix mai lih hu sivoe ang lhiex nyang lih son ang maix sang lan ka lhiex heue" ⁴⁵ Daux tivud khaing raoma paiawm lih lung, bhaung mai lhiex ting kawx lih mai Ahap brug ling lawx brung tix hu ka veng Yezerelax heue. ⁴⁶ Taix Simiang Siyiex hoek ka piang Eliyax, mai nawh nhawt nyoi tix to hoek sivoe Ahap ka diang siviex laig daux veng Yezerelax heue.

¹ Mai Ahap deeh krai grawng pa hoik yuh Eliyax khawmuik ka Yezerelax mai grawng pa pah nawh ka cao jhai khankix ka vaig heue. ² Yezerelax ploi cao cau hu ah nin ka Eliyax, "Ka daux bawg yam in pasax, phan aux ang kieh ju maix awm ju cao jhai kieh Siyiex nie lheu ciyang ka piang aux heue." ³ Yam mhong nawh ka lox an nawh kied lhat mai to sonsang klawd ju tix mai hoek ka veng Berashebax meung Yudax mai nawh prah kawncau tix tan heue. ⁴ Viang mawh nan, nawh hu ka daux tiag been tix ngaix krax mai nawh hoek ngawm greem khaox gix ia khaox ratan mai nawh rawg bwan sonsang yum tix ah nin, "Ding heue, Simiang Siyiex eue teei ju aux yam in liak! Mawh kheu aux ang blon mhawm khaing keeing aux khankix heue." ⁵ Mai nawh lhiak it ka greem khaox gix ia, kawncau Siyiex tix kaux hoek teeh ka nawh ah nin, "Kaoh mai ih heue." ⁶ Mai nawh maong ti jhak mai yaox ka blah tong ka ngu tix khlawp mai singiien rawm tix mu, koe plak kaing gaong nawh, mawh kheu nan, nawh teei ti ih mai nyaux mai baox lhiak it heue. ⁷ Mai kawncau Simiang Siyiex baox hoek ra bawg tix bawg mai teeh ka nawh ah nin, "Kaoh mai ih, mawh kheu krax pa hu maix kawn kied singai heue." ⁸ Nawh kaoh mai ih nyaux, mai nawh koe riang rao ka pa ih an mai pon hu tixpon ngaix tixpon sawm, tom hoek nawh ka Hawrax pa mawh gawng cie Siyiex heue. ⁹ Mai nawh hoek daux rang mai laig peung tan daux sawm an, jhak heue, gumlox Simiang Siyiex bleeh ka nawh ah nin, "Eliyax eue, yuh maix patix tin?" ¹⁰ Mai nawh deeh ah nin, "Aux hoik kied sau riang rao tix ka Simiang Siyiex, Siyiex Cao kru naing raoma, mawh kheu pui Isarelax hoik tik vud ka sijax mukheu Maix Cao mai hoik yieh khu dee tan Maix Cao mai hoik pah ka cao jhai Maix Cao ka lawm vaig, mawh ngie aux pa deuk nong nong, kix sawg ti teei ju aux heue." ¹¹ Mai Nawh Cao ah nin, "Hu mai cung ka piang gawng sivoe Simiang Siyiex heue." Simiang Siyiex tak lailing mai bhaung ting phlu ka gawng khankix mai kieh simaox max phawng ka plak sivoe Simiang Siyiex, viang mawh nan, Simiang Siyiex ang ot ka daux bhaung, mai khaix hoik bhaung, kla reem tok, viang mawh nan, Simiang Siyiex ang ot ka daux kla reem, ¹² mai khaix hoik tok kla reem koe ngu, viang mawh nan, Simiang Siyiex ang ot ka daux ngu, mai khaix ngu koe lox koi sikah heue. ¹³ Yam mhong Eliyax ka lox an, nawh tawb ngai tix ka sibex tix mai lih cung ka moing rang mai lox hoek ka nawh ah nin, "Eliyax eue, yuh maix tix tin?" ¹⁴ Nawh deeh ah nin, "Aux hoik kied sau riang rao tix ka son Simiang Siyiex, Siyiex Cao kru naing raoma, mawh kheu pui Isarelax hoik tik vud sijax mukheu Maix Cao mai yieh khu dee tan Maix Cao mai pah ka cao jhai Maix Cao khankix ka lawm vaig, mawh ngie aux pa kawn deuk nong nong mai kix hoik sawg ti teei ka ju aux heue." ¹⁵ Simiang Siyiex ah nin ka nawh, "Hu heue, deeh ing krax daux tiag Damase, mai yam hoek maix groi bee ka piang Hazelax mai yaog nawh mawh simiang Surix heue. ¹⁶ "Maix tak baox groi bee ka piang Yehu kawn simex Nimshi mai yaog nawh mawh simiang pui Isarelax maix tak baox groi bee ka piang Elishie kawn simex Shaphat pui veng Abelamehawla mai yaog nawh plud cao jhai tang maix heue. ¹⁷ Can pui pa glawt khaing lawm vaig Hazelax khankix, Yehu tak pah kix yum mai can pui pa glawd khaing lawm vaig Yehu khankix, Elishie tak pah kix yum heue. ¹⁸ Viang mawh nan, aux tak prah kieh pui deuk aliah rheng kaux ka daux pui Isarelax, pa ang sax grux ngawng krub ka Balax mai jheeh pa ang sax ngheet ka nawh heue. ¹⁹ Mawh kheu nan, Eliyax lih hu khaig tan mai pub ka Elishie kawn simex Shaphat pa thai kaung ka mawie kao ra brawm ka plak sivoe nawh, mai nawh ot plak khaix mawie kao ra brawm tix brawm, khaix an Eliyax hu hawt praok nawh tan, mai taing sibex lang jung tix ka piang nawh heue. ²⁰ Nawh prah mawie tix khankix mai hawt khaix Eliyax ah nin, "Kieh aux ing ngheet ka miex keeing tix ha, khaix an aux tak hawt maix heue. "Eliyax deeh ah nin ka Elishie, "Ing heue mai deeh hoek, mawh yuh aux patix ka maix?" ²¹ Elishie deeh veeh ti ing khaing nawh mai pah mawie an tix brawm mai ngaik nex mawie ka kraung thai mai tawx pui khankix ih, khaix an, nawh kaoh mai hawt khaix Eliyax mai yuh kaing tau mai nawh heue.

¹ Benhadat simiang Surix khrawm kru naing tix mai simiang tixngoe ra kaux rom tix tau mai nawh, khawm pui naing brung mai ling lawx naing brung, nawh hu lai lawm ka veng Samarix mai yuh naing ka veng an heue. ² Khaix an nawh ploi pui cau khankix hu ka veng Ahap simiang Isarelax ah nin ka nawh, Benhadat ah yuh nin, ³ "Mau khri maix mawh cie aux, moeng pa mhawm grang maix mai kawn praix maix kawx mawh cie aux heue." ⁴ Simiang Isarelax pawk ah nin, "Simiang aux eue, awm pa ah mai can pa koe aux khankix mawh cie maix heue." ⁵ Pui cau khankix deeh hoek ah nin, "Benhadat ah yuh nin, aux ploi pui hu ah nin ka maix, "Ap mau khri maix mai moeng kawn maix ka aux heue." ⁶ Bawg yam in pasax aux tak ploi kawncau tix khankix hoek khrieh daux nyiex maix mai nyiex ma kawncau maix khankix mai can pa mhawm ka ngai maix khankix kix tak viex hu khaing maix heue. ⁷ Khaix an simiang Isarelax kok ka kwad riex ju daux haktiex tix ah nin, "Yam in keud pex yaox mai jhak pui in sawg ti yuh krax kha rhawm ka ex, mawh kheu nawh ploi pui teei moeng aux mai kawn praix aux khankix, mau khri aux, aux ang thiang ka heue." ⁸ Kuad riex ju mai pui khankix ah nin ka nawh, "Paw nghiet mai paw khaw rhawm ka heue." ⁹ Ahap deeh ah nin ka pui cau Benhadat khankix, "Krai simiang cao simiang aux mhong, can pa hoik tawm maix ka kawncau tix bawg phao ka, aux tak yuh, phan mawh ceu in aux ang pon yuh heue." Pui cau an lih hu mai viex lox an ka nawh heue. ¹⁰ Benhadat baox ploi pui hu ka nawh ah nin, "Phan phawng tiex ka daux veng Samarix kub tix kaux tix jhawp ka son pui pa hawt khaix aux, kieh siyiex khankix yuh pa nie lheu kin ka piang aux heue." ¹¹ Simiang Isarelax pawk lox ah nin, "Krai ka nawh paw kieh pui ceep kraung naing yaw ka tokaux tix awm pui pa peeik kraung naing ceep tix heue" ¹² Yam mhong Benhadat ka an, caw yam nyaux nawh plai mai cub simiang ka daux nyiex bang, nawh tawx lox ka kawncau tix khankix, "Khre rien tix mai kix khre rien tix sonsang puing ka veng heue." ¹³ Cao jhai tix kaux hoek ka Ahap simiang Isarelax, "Simiang Siyiex ah nin, mawh hoik yaox maix cub pui pa kied hun khankix lie? jhak heue, aux tak ap kix ka daux taix maix in singaix maix tak tawng mawh Aux Simiang Siyiex heue." ¹⁴ Ahap deeh ah nin, "Sang ap ka pui mawx?" Mai kawncau an krai, "Simiang Siyiex ah yuh nin, mawh khaing cao kaing pui awn ju daux kien haktiex in heue." Ahap baox ah nin, "Mawh pui mawx pa sang bung tix puing naing lie?" Mai kawncau deeh pawk, "Mawh maix heue." ¹⁵ Nawh simin cao kaing pa kawn awn ju khankix, pa kaoh khaing daux kien haktiex nawh koe ra yieh tixngoe ra kaux, khaix pui an khankix, nawh baox simin pui Isarelax khawmuik koe aliah rheng kaux heue. ¹⁶ Kix lih yam jung singaix, Benhadat mai pa teem ka nawh tixngoe ra kaux, kawn yoek ka plai ka daux nyiex bang heue. ¹⁷ Pui awn ju daux kien haktiex khankix lih sivoe, Benhadat ploi cao jiang khankix hu mai kix ing krai ka nawh ah nin, "Pui khankix lih hoek khaing veng Samarix heue." ¹⁸ Nawh ah nin, "Phan kix lih hoek son krax pa nhim ang ah, sonsang puing naing ang ah giex im kix heue." ¹⁹ Khaix an, cao kaing pui pa kawn awn ju daux kien haktiex, lih khaing daux veng mai cub kru naing hawt khaix kix heue. ²⁰ Kix tang pah ka pui naing tix kaux taw tix kaux ku kaux, mawh kheu nan, pui Surix to mai pui Isarelax pheet ka kix, viang mawh nan, Benhadat simiang Surix pon brung brug tix mai pui naing brung nawh khankix to ti glawd heue. ²¹ Simiang pui Isarelax lih puing ka pui naing brung mai ka pui naing ling lawx brung khankix mai kix pah pui Surix yum tom nie heue. ²² Khaix an, cao jhai hoek ka simiang pui Isarelax ah nin ka nawh, "Hu kieh riang rao maix kaux cong, een ti tawng mai jhak ka pa sang khaw maix ti yuh, mawh kheu simiang Surix tak deeh hoek puing yam sidah num sax heue. ²³ Kawncau simiang Surix khankix ah nin ka nawh, "Siyiex kix mawh siyiex gawng, mawh kheu nan, kix tom ting riang khaing ex, viang mawh nan, phan ex deeh baox puing kix ka daux lung phan yuh nan, ex tak ting riang khaing kix tete heue. ²⁴ Khaw ti yuh nin, pluat cub simiang ku kaux khaing ara kix mai deeh yaog cao kaing naing khankix plud dee ot kix, ²⁵ Sawg pui pa sang deeh plud pui pa hoik yum mai pui naing brung son pui naing brung ling lawx brung son ling lawx brung, khaix an ex tak deeh puing kix ka daux tong, ex tak nie ting riang khaing kix tete heue." Nawh nghiet lox mai hawt ti yuh heue. ²⁶ Yam hoik sidah num Benhadat deeh simin pui Surix mai nawh haok ka veng Aphiet sonsang puing ka pui Isarelax heue. ²⁷ Pui Isarelax simin pui naing mai tawx priex ih kix mai hu puing ka kix, pui Isarelax bang tix ot ka plak sivoe kix awm phung pex ra cub, pui Surix hoik naog ka haktiex khawm bee heue. ²⁸ Khaix an pui Siyiex tix kaux hoek dex ah nin ka simiang Isarelax, "Simiang Siyiex yuh nin kheu jao hoik ah pui Surix nin, Simiang Siyiex mawh Siyiex gawng mai Nawh Cao ang mawh Siyiex daux lung, mawh kheu nan, Aux tak ap pui tom nie ka daux taix maix, maix tak tawng ka mawh Aux Simiang Siyiex heue." ²⁹ Kix bang ti ot see paox ti aliah ngaix, yam hoek ka daux aliah ngaix kix ra lai puing ka paox tix mai pui Isarelax pah pui naing caong Surix tix sien ka daux tix ngaix khaing heue. ³⁰ Pui pa kawn deuk to ka daux veng Aphiet, khaix an guh veng grhup ka piang pui pa kawn deuk ra mheen aliah rheng kaux, Benhadat to mai laig ka daux veng mai mox tix ka daux lawg heue. ³¹ Mai kawncau nawh khankix ah nin ka nawh, "Jhak heue, yam in, ex mhong grawng simiang pui Isarelax mawh simiang pa koe krax caux rhawm, kieh ex vien nyoi tix ka chee rhix mai vhua kaing tix ka maox mai lih hu ka simiang pui Isarelax, phan ex yuh nan, nawh tee deuh maix klawd pleue heue." ³² Mawh kheu nan, kix vien nyoi tix ka chee rhix mai vhua kaing tix ka maox mai hu ka simiang pui Isarelax ah nin, "Kawncau maix Benhadat ah nin, yuh bwanson deuh ju aux liak" Mai nawh ah nin, "Mawh kawn im ju nawh lie? nawh mawh puxke aux heue." ³³ Pui ankix bre tix nghiet lox nawh mai nied ti jhawp ka lox nawh ah nin, "Benhadat mawh puxke maix heue. Hu kok nawh hoek ka aux heue." Khaix an Benhadat hoek ka nawh mai kieh nawh haok ka piang ling lawx brung heue. ³⁴ Khaix an Benhadat ah nin ka nawh, "Veng pa hoik teei keeing aux khaing maix khankix aux tak deeh tawx, maix pon ti sum biang lah ka son tix ka daux veng Damase, awm pa hoik sum keeing aux ka daux veng Samarix heue." Mai Ahap ah nin, "Aux tak deeh ploi maix ing heue." Mawh kheu nan, nawh yuh sijax mukheu mai nawh mai deeh ploi nawh ing heue. ³⁵ Koe simex tix kaux ka daux cao jhai, ah nin ka paox cao jhai tix awm gumlox tawm Simiang Siyiex heue. "Yuh bwanson tawk aux liak!" Mai pui an thiang tix ang tawk ka nawh heue. ³⁶ Mai cao jhai an ah nin ka nawh, "Mawh kheu ang maix cu nghiet ka lox Simiang Siyiex, yam lih hu maix khaing aux dom mawx dom an, sivai sangsi tak kied maix." Yam hoik lih hu nawh dom mawx dom an, sivai sangsi pub ka nawh mai kied nawh heue. ³⁷ Khaix an nawh yaox ka pui tang kaux ah nin, "Yuh bwanson tawk aux liak, " mawh kheu nan, pui an tawk nawh, tom kied saux kied mat nawh heue. ³⁸ Khaix an, cao jhai an lih hu mai nawh loh grang ti mai vhua ngai tix ka man mai pau simiang daux krax heue. ³⁹ Yam preeng simiang baoh an, nawh kok yo ka simiang ah nin, "Kawncau maix hoik hu ka daux naing lien tix kaux viex pui tix kaux hoek ka aux ah nin, priex pui in, phan pui in grai son grawng ceu pa yuh ka mawx ang ah, ju maix tak mawh son ju nawh, phan ang mawh nan maix tak plud mau tix talantan heue. ⁴⁰ Yam kawn nie kaing pa yuh kawncau maix tan, nawh hoik grai heue." Simiang Isarelax ah nin ka nawh, "Krax prawng ca tak koe ka piang maix, awm hoik tat maix an ka son cao tix heue." ⁴¹ Nawh nied ti yah man vhua khaing ngai tix, yam an simiang Isarelax tawng ka mawh nawh cao jhai heue. ⁴² Mai cao jhai ah nin ka nawh, "Simiang Siyiex aux ah nin, mawh kheu ploi maix pa deuh Aux mawh pa laux leeing, lih khaing daux tawm taix maix, mawh kheu nan, ju maix tak mawh son ju nawh mai pui maix khankix kawx tak mawh son pui nawh heue" ⁴³ Mawh kheu nan, simiang pui Isarelax deeh ing ka nyiex haw tix ka veng Samarix mai pa laux pakngai mai voi rhawm tix heue.

¹ Nabok pui veng Yezerelax koe sipeem plix siiet tix gwang ka daux veng Yezerelax mai dex nyiex haw Ahap simiang Samarix heue. ² Ahap ah nin ka Nabok, "Tawx sipeem plix siiet maix ka aux, sonsang yuh aux sipeem taux ka, mawh kheu dex nyiex haw aux, son an aux tak tawx maix cie sipeem plix siiet pa nie lheu mhawm khaing an, phan maix khaw rhawm kah, aux tak tawx mau awm pa khaw jum ka maix heue." ³ Mai Nabok ah nin ka nawh, "Simiang Siyiex tak thiang ka pa sang tawx aux sinngao keeing tix ka maix heue." ⁴ Ahap deeh laig ka nyiex haw tix ka daux pa laux pakngai mai voi rhawm tix, kheu jao lox pa ah Nabok pui veng Yezerelax ka nawh, Aux tak ang pon tawx sinngao haktiex keeing tix ka maix heue. "Mai Ahap it ka piang ku it tix mai veeh ngai tix dee singai mai ang lai ih priex heue." ⁵ Mai moeng nawh Yezabelax hoek ah nin ka nawh, "Yuh tix, maix voi rhawm mai ang ih priex yuh ka mawh?" ⁶ Nawh deeh ah nin ka moeng tix, "Mawh kheu ah aux nin ka Nabok, pui veng Yezerelax, coh sipeem plix siiet maix ka aux, phan khaw rhawm maix, aux tak deeh plud gwang sipeem plix siiet son an ka maix, mai nawh pawk lox aux ah nin, aux ang pon tawx sipeem plix siiet tix ka maix heue" ⁷ Mai moeng nawh Yezabelax ah nin ka nawh, "Maix mawh pa koe siawp sibrawm ka piang pui Isarelax ang mawh lie? Kaoh ih priex mai kieh maix koe krax nyawm rhawm, aux tak tawx sipeem plix siiet Nabok pui veng Yezerelax ka maix heue." ⁸ Yezerelax tiiem lai ka min ceu kaux Ahap mai tawk cum Ahap ka mai tawx lai an hu ka kuad riex ju mai pui pa koe siawp khankix pa ot ka daux veng tau mai Nabok heue. ⁹ Mai ah nin ka daux lai, "Krai pao kieh twah pa ih mai kieh Nabok ngawm dee lhaong ka sinax pui khankix, ¹⁰ mai deuh pui caox ra kaux ngawm ka plak sivoe nawh, sonsang mawh kix pa kham mhai ruk ka son nawh ah nin, maix hoik jhax lawg ka Siyiex mai ka simiang mai teei nawh lih plak praix mai dheem yum ka simaox heue." ¹¹ Pui veng nawh khankix, kwad riex ju mai pui pa koe siawp sibrawm pa ot ka daux veng nawh khankix, yuh awm lox pa hoik tiem Yezerelax ka daux lai pa sipaox nawh hoek ka kix heue. ¹² Kieh kix krai pao twah pa ih mai kieh Nabok ngawm dee lhaong daux sinax pui heue. ¹³ Mai kieh pui caox ra kaux ngawm ka plak sivoe nawh, mai pui caox an kham mhai sakse grawng Nabok ka plak sivoe ngai pui khankix ah nin, "Nabok jhax lawg ka Siyiex mai ka simiang heue. "Mai kix teei nawh lih plak praix veng mai dheem nawh yum ka simaox heue. ¹⁴ Kix ploi pui hu ah nin ka Yezabelax, "Hoik dheem Nabok yum ka simaox heue." ¹⁵ Yam mhong Yezabelax ka hoik dheem kix "Nabok yum ka simaox Yezabelax ah nin ka Ahap, kaoh heue, teei sipeem plix siiet cie Nabok pui veng Yezerelax, pa ang nawh cu tix coh ka maix, mawh kheu Nabok ang lai im ju, nawh hoik yum heue." ¹⁶ Yam mhong Ahap ka hoik yum Nabok, Ahap yaog ti kaoh mai lih hu sonsang teei ka sipeem plix siiet Nabok pui veng Yezerelax heue. ¹⁷ Khaix an, gumlox Simiang Siyiex hoek ka Eliyax pui veng Tishabix ah nin, ¹⁸ "Kaox heue, lih hu pub ka Ahap simiang pui Isarelax, pa ot ka veng Samarix heue. Nawh ot ka daux sipeem plix siiet cie Nabok pa hoik teei nawh ti cie heue. ¹⁹ Maix tak krai ah nin ka nawh, Simiang Siyiex ah yuh nin, "Maix hoik pah cao sipeem yum mai teei ti cie sinngao nawh, "maix tak ah nin ka nawh, Simiang Siyiex ah nin, lied sox nham Nabok ka dee mawx, sox kawx tak lied nham maix ka dee an heue." " ²⁰ Khaix an, Ahap ah nin ka Eliyax, "Pui koeng aux eue, hoik yaox maix ka aux lie?" Nawh pawk ah nin, "Aux hoik yaox ka maix, mawh kheu hoik coh maix tokaux tix sonsang yuh pa caox ka plak sivoe ngai Simiang Siyiex heue. ²¹ Jhak heue, aux tak viex pa caox caig hoek ka piang maix, Aux tak teei ti tik pex dee singai, Aux tak teei ti tik simex ku kaux mai pa giex laung mai pui pa ploi ka daux pui Isarelax khaing Ahap heue. ²² Aux tak yuh doeh nyiex ma maix awm doeh nyiex ma Yerobom kawn simex Nebat mai awm doeh nyiex ma Basha kawn simex Ahiyax, kheu so maix pa song rhawm Aux mai kieh pui Isarelax yuh phimap heue. ²³ Simiang Siyiex ah nin ka grawng pa dex mai Yezabelax, sox khankix tak ih Yezabelax hawt guh veng Yezerelax heue. ²⁴ Sox tak ih pui Ahap khankix, pa yum ka daux veng mai sim raoma tak ih pui yum ka daux tong kaung heue." ²⁵ Ang koe pui pa coh tokaux tix sonsang yuh pa caox caig ka plak sivoe ngai Simiang Siyiex, awm Ahap ang koe tix kaux kawx, mawh kheu nghiet nawh lox jeeh nyaw moeng ti Yezabelax heue. ²⁶ Nawh hoik kied yuh pa seeing brai ka daux pa hawt tix khaix riang grang Asherax, awm pa hoik yuh pui Amawrix khankix, pa hoik grheu Simiang Siyiex khaing plak sivoe pui Isarelax khankix heue. ²⁷ Yam mhong Ahap lox Eliyax, nawh riah kraung ceep tix mai ceep chee rhix mai twah pa ih mai it khawm chee rhix mai lailing ka daux pa dah rhawm tix heue. ²⁸ Mai gumlox Simiang Siyiex hoek ka Eliyax pui veng Tishabix ah nin, ²⁹ "Hoik yaox maix Ahap koe rhawm awn rhawm tiiem ka plak sivoe ngai Aux lie? Mawh kheu nawh hoik koe rhawm awn rhawm tiiem ka plak sivoe ngai Aux, Aux tak ang viex pa caox hoek ka daux singaix pa im ju nawh, viang mawh nan, Aux tak viex pa caox hoek ka piang doeh nyiex ma singaix ju kawn nawh heue."

¹ Naing ang lai koe sinax Surix mai Isarelax loe num heue. ² Yam hoek loe num tix num, simiang meung Yudax pa mawh Yehoshaphat hu si pub ka simiang meung Isarelax heue. ³ Simiang Isarelax ah nin ka kawncau tix, "Tawng pex veng Ramot pa koe daux haktiex Gilat mawh cie ex lie? Mawh ot yawg ex tix mai ang nied ti teei khaing tawm taix simiang Surix lie?" ⁴ Nawh chawk Yehoshaphat ah nin, "Sang hu puing maix veng Ramot ka daux haktiex Gilat tau mai aux lie?" Mai Yehoshaphat ah nin ka simiang pui Isarelax, "Aux awm rhawm maix, pui aux awm pui maix, brung aux khankix awm brung maix heue." ⁵ Mai Yehoshaphat ah nin ka simiang pui Isarelax, "Chawk ti yaox ka Simiang Siyiex sivoe ha heue." ⁶ Khaix an, simiang pui Isarelax khrawm cao jhai pon yieh kaux tau ah nin ka kix, "Sang caw aux ti hu puing ka veng Ramot ka haktiex Gilat, phan ang mawh nan, ang caw ti hu lie?" Mai kix ah nin, "Lih hu heue, mawh kheu Simiang Siyiex tak ap tix tawx veng an ka daux taix simiang heue." ⁷ Yehoshaphat deeh ah nin, "Ang cao jhai Simiang Siyiex lai koe tin sonsang chawk cheng ex ka nawh lie?" ⁸ Mai simiang pui Isarelax ah nin ka Yehoshaphat, "Kawn koe Mikha kawn simex Imala pa sang chawk cheng ka Simiang Siyiex, viang mawh nan, aux koeng ka nawh mawh kheu ang nawh sax krai lox jhai pa mhawm ka grawng aux, nawh yie krai grawng pa caox heue." Mai Yehoshaphat deeh ah nin, "Simiang paw doh ah lox yuh nin liak." ⁹ Khaix an, simiang pui Isarelax kok cao kaing greem nawh tix kaux ah nin, viex Mikha kawn simex Imala hoek ka aux phaiphai liak! ¹⁰ Simiang pui Isarelax mai Yehoshaphat simiang meung Yudax ceep sibex simiang mai tang ngawm ka dangngeung ka biang glah nghox, ka diang siviex veng Samarix, mai cao jhai khankix hoik tang ah lox jhai ka plak sivoe kix heue." ¹¹ Zedikix kawn simex Khenana yuh teet rhiem son tix ah nin, "Simiang Siyiex ah yuh nin maix tak blung pui Surix tom sidah laux leeing kix ka teet in heue" ¹² Mai cao jhai khankix kawx krai lox jhai ah nin, "Hu puing ka veng Ramot haktiex Gilat, hu heue maix tak pex, mawh kheu Simiang Siyiex tak ap kix ka daux tawm taix simiang heue." ¹³ Pui cau pa hoik hu kok Mikha ah nin ka nawh, "Jhak heue, gumlox pa ah cao jhai khankix hoik mawh lox tix gum khaing ka simiang, kieh lox maix awm gumlox pa hoik krai kix, krai ngie grawng pa koe bwanson heue." ¹⁴ Mikha ah nin, "Awm pa im ju Simiang Siyiex mai aux tak sikah awm pa krai Simiang Siyiex ka aux heue." ¹⁵ Yam hoek nawh ka simiang mai simiang ah nin ka nawh, "Mikha eue, sang caw ex ti hu puing ka veng Ramot haktiex Gilat, phan ang mawh nan, ang caw ti hu lie? " Mai nawh deeh pawk ah nin, "Hu heue maix tak pex, Simiang Siyiex tak ap veng an ka daux taix simiang heue." ¹⁶ Mai simiang ah nin ka nawh, "Sang kieh maix aux tiextu miex bawg, sonsang krai maix pa mawh pa meh ka aux ka daux ceu kaux Simiang Siyiex heue." ¹⁷ Nawh ah nin, "Aux hoik yaox pui Isarelax prung prang ka piang gawng awm yung pa ang koe cao liang heue. "Mai Simiang Siyiex ah nin, pui inkix ang lai koe cao simiang, kieh kix deeh ing ka nyiex tix ka daux pa nhim heue." ¹⁸ Simiang pui Isarelax ah nin ka Yehoshaphat, "Ang aux hoik krai maix mhong ka ang nawh sax krai lox jhai pa mhawm grawng aux, lheu khaing grawng pa caox lie?" ¹⁹ Mikha deeh ah nin, "Mawh kheu nan, nghiet ka gumlox Simiang Siyiex, aux hoik yaox ngawm Simiang Siyiex ka piang dangngeung Nawh mai kru naing raoma khankix cung ka plak khawn dawm mai ka plak khawn gwiex Nawh Cao heue. ²⁰ Simiang Siyiex ah nin, "Mawh pui mawx pa sang pon nyaw glaw ka Ahap, sonsang hu yum nawh ka puing tix veng Ramot haktiex Gilat lie? mawh kheu grawng in tix kaux ah nin mai tang kaux ah nan heue. ²¹ Khwan tix mu hoek cung ka plak sivoe Simiang Siyiex ah nin, "Aux tak nyaw glaw ka nawh heue ²² Simiang Siyiex ah nin ka nawh, maix sang yuh ka mawx? mai nawh ah nin, aux tak lih hu mai deeh yuh tix mawh khwan tawb kheem ka daux jheeh cao jhai khawmuik heue Mai Nawh Cao ah nin, "Maix tak pon ti jheeh nyaw nawh mai pex ka nawh, lih hu mai yuh awm an heue ²³ Jhak heue, Simiang hoik sau khwan tawb kheem ka daux jheeh cao jhai maix khawmuik mai Simiang Siyiex hoik krai grawng pa caox caig maix heue." ²⁴ Khaix an Zedikix kawn simex Khenana hoek dex mai simang sibax Mikha ah nin, "Khwan Simiang Siyiex lih hu khaing aux, sonsang sikah ka maix yuh ka mawx heue." ²⁵ Mikha ah nin, "Maix tak yaox yam laig mox maix ti daux lawg singaix an sax heue." ²⁶ Simiang pui Isarelax ah nin, "Giex Mikha mai tawx nawh ka Amon, cao kwang veng mai ka Yawsha kawn simex simiang, ²⁷ mai ah yuh nin ka simiang, "Sau kaw in ka daux thawng mai tawx nawh ih priex nyaux rawm ka daux pa kha rhawm tom sidah deeh hoek aux mhawm mhawm heue." ²⁸ Mikha deeh ah nin, "Phan maix yaox ti deeh hoek mhawm mhawm, Simiang Siyiex ang tau tix sikah grawng in ka aux heue. Mai nawh ah nin, "Pui khawmuik eue, nghiet heue, " ²⁹ Simiang pui Isarelax mai Yehoshaphat simiang pui Yudax haok ka veng Ramot meung Gilat heue. ³⁰ Mai simiang pui Isarelax ah nin ka Yehoshaphat, "Aux tak tieh loh grang tix mai laig ka daux naing, viang mawh nan maix ceep kraung simiang heue." Mawh kheu nan, simiang pui Isarelax loh grang tix mai laig ka daux naing heue. ³¹ Mai simiang meung Surix tawm lox ka cao kaing naing lawx brung tixngoe ra kaux ah nin, "Lheu khaing simiang pui Isarelax paw puing pui tix kaux kawx heue." ³² Yam yaox cao kaing naing lawx brung khankix ka Yehoshaphat, kix ah nin, "An rug mawh simiang pui Isarelax heue." Mai kix deeh veeh ti puing ka nawh mai Yehoshaphat hoik riag yo heue. ³³ Yam yaox cao kaing naing lawx brung khankix, ka ang mawh simiang pui Isarelax, kix deeh ing plak khaix mai ang pheet nawh heue. ³⁴ Pui tix kaux vaik ak tix mai ang nyee ca nieb puing hu krox ka simiang pui Isarelax sinax dee kleuk kraung naing ceep nawh heue. Mai nawh ah nin ka cao grheu lawx naing brung tix, deeh veeh aux khaing daux naing, mawh kheu hoik mat aux heue. ³⁵ Naing baox nied ti kin singaix an mai simiang hoik neung tix ka pui tix kaux daux lawx naing brung nawh mai veeh ngai tix ka pui Surix khankix mai yum plak bo heue. Nham lih khaing dee mat nawh mai ba ka piang meeh lawx naing brung heue. ³⁶ Yam hoek bawg yam klip singaix, lox kok yo pui khankix hoik tah sinum ka daux tab ku tab ah nin, "Tang deeh ing ka veng mai ka haktiex cao tix ku kaux daux pui heue." ³⁷ Mawh kheu hoik yum simiang, kix viex nawh ing ka veng Samarix mai sipaung nawh tan heue. ³⁸ Kix phak lawx naing brung brug nawh ka rawm dung veng Samarix, ka dee heem bun coh kaux tix mai sox khankix lied nham nawh awm lox pa hoik krai Simiang Siyiex heue. ³⁹ Kaing pa deuk mai can pa yuh Ahap khankix nyiex haw nga sang pa hoik sum nawh khankix mai veng pa hoik pang nawh khawmuik, hoik tiem ti deuh ka daux phuk lai been simiang pui Isarelax heue. ⁴⁰ Ahap hoik laux lee ti tau mai keeing nawh khankix mai Ahazix kawn simex nawh deeh plud khaix nawh heue. ⁴¹ Yehoshaphat kawn simex Asa jah ti kwang meung Yudax, yam kwang Ahap simiang Isarelax ka haktiex pon num tix num heue. ⁴² Yehoshaphat koe ju tixngoe phwan num, yam jah nawh ti kwang haktiex mai nawh kwang veng Yerusaliem tixnga phwan num, ceu kaux miex nawh mawh Azubax kawn bun Shilahix heue. ⁴³ Nawh hawt khaix pa yuh keeing tix Asa, nawh ang lai via khaing krax ankix mai nawh yuh pa khaw caw ka plak sivoe ngai Simiang Siyiex, viang mawh nan, nawh ang nyang yieh ti tik dee pa lhaong khankix mai pui khankix kawn yuh krax tan mai gleeing nyawng bhawng ka dee pa lhaong heue. ⁴⁴ Yehoshaphat yuh pa nhim tau mai simiang meung Isarelax heue. ⁴⁵ Kaing pa deuk mai can pa hoik yuh Yehoshaphat khankix mai grawng pa ting riang siawp sibrawm nawh mai pa hoik yuh nawh naing khankix, hoik tiem ti deuh ka daux phuk lai been simiang pui Yudax heue. ⁴⁶ Mai cub simex coh kaux khankix, pa kawn deuk yam kwang keeing nawh Asa, nawh hoik grheu kix lih khaing daux haktiex heue. ⁴⁷ Yam an simiang ang lai koe ka haktiex Edom heue. Mawh ngie cao kwang greem simiang pa koe tix kaux khaing heue. ⁴⁸ Yehoshaphat yuh reu ting ka veng Tasux mai ploi hu ka veng Awphirax, sonsang tang khri, viang mawh nan kix ang bleeh tix bawg kawx, mawh kheu reu khankix hoik laux ka veng Eziongebax heue. ⁴⁹ Ahaziyax kawn simex Ahap ah nin ka Yehoshaphat, "Kieh kawncau aux khankix hu tau mai kawncau maix daux reu ting maix liak!" Viang mawh nan, Yehoshaphat ang cu heue. ⁵⁰ Yehoshaphat hoik laux lee ti tau mai keeing nawh khankix mai sipaung nawh tau mai keeing nawh ka daux veng Davit, Yehoram kawn simex nawh deeh plud khaix nawh heue. ⁵¹ Yam kwang Yehoshaphat simiang meung Yudax ka haktiex kao aliah num tix num, Ahazix kawn simex Ahap jah tix kwang ka pui Isarelax daux veng Samarix ra num, ⁵² Nawh hoik yuh pa caox caig plak sivoe ngai Simiang Siyiex mai hawt daux krax hu keeing tix mai miex tix mai krax hu Yerobom kawn simex Nebat, pa kieh pui Isarelax yuh phimap heue. ⁵³ Mai nawh yuh kaing jhaw siyiex Balax mai krub ka mai nawh hoik so Simiang Siyiex pui Isarelax song rhawm, awm pa hoik yuh keeing ti khawmuik heue.