1 John

1 John

¹ Mawh pa koe tom yam jah, pa hoik mhong ex, pa hoik yaox ex ka ngai tix pa hoik pon ex ti jhak kah mai pa hoik pon giex ex ka taix tix, pa dex dawd mai gumlox pa im ju heue. ² Ju Pa Im an hoik plak kieh sidawng mai ex hoik yaox kah mai kham mhai rug mai krai ka pex grawng ju pa im an, pa mawh ju leeing ju leeing phan, pa hoik ot tau mai Keeing Cao mai pa hoik plak kieh sidawng ka ex heue. ³ Pa hoik yaox hoik mhong ex kawx ex krai ka pex, pex kawx sang yaox ti yuh paox pie tau mai ex mai pa yuh paox pie ex mawh tau mai Keeing Cao, tau mai Kawn Nawh Yesux Khrit heue. ⁴ Ex tiiem grawng ceu in khankix ka pex sonsang naog krax gaux rhawm ex kah heue. ⁵ In mawh lox bwan pa hoik mhong ex khaing Nawh mai krai ka pex, Siyiex mawh pa riang mai ka daux Nawh Cao pa faik ang koe ceeix kawx heue. ⁶ Phan ex ah, "Ex yuh paox pie tau mai Nawh Cao"mai hu ka daux pa faik, ex mawh pa pie lhen mai ang yuh pa mawh meh. ⁷ Viang mawh nan phan ex hu ka daux pa riang, awm ot Nawh Cao ka daux pa riang, ex yaox ti mawh paox pie ka paox tix mai nham Kawn Nawh Yesux sigrhah ex singax khaing phimap khawmuik heue. ⁸ Phan ex ah, "Ex ang koe phimap,"ex deeh pie ka tokaux tix tiru mai pa mawh meh ang koe ka daux ex heue. ⁹ Phan ex krai doh grawng phimap ex, Nawh kaux sijax mai rahsee sonsang pluat ploi phimap ex mai sonsang kieh ex singax khaing pa ang rahsee khawmuik heue. ¹⁰ Phan ex ah, "Ex ang sax yuh phimap,"ex yuh Nawh Cao mawh pa pie lhen mai gumlox Nawh ang koe ka daux ex heue.

¹ Kawn nyawm pa moh aux khankix eue, aux tiiem grawh grawng ceu in khankix ka pex, son ang pex lai yuh phimap heue. Phan pui tix kaux kaux yuh phimap, ex koe Cao khyox khaw son ex ka Keeing Cao pa mawh Yesux Khrit pa rahsee heue. ² Tokaux Nawh mawh pa tan pa sang kieh ex luan khaing phimap tix mai ang joeng mawh ngie son phimap ex khaing, viang mawh nan mawh son phimap khawm beu haktiex khawmuik heue. ³ Phan ex priex ti hawt lox tawm jhawm krai Nawh, kheu in ex tom tawng mawh grawng pa tawng ex ka Nawh heue. ⁴ Kaw pa ah, "Aux tawng Nawh"mai ang priex ti hawt lox tawm jhawm krai Nawh, mawh pui pa pie lhen mai pa mawh meh ang koe ka daux nawh. ⁵ Viang mawh nan pui mawx ang ah pa priex ti hawt gumlox Nawh, krax moh krax rhawm Siyiex hoik grum naog ka daux nawh tete heue. Mawh kheu in ex tom tawng grawng pa ot ex ka daux Nawh heue. ⁶ Kaw pa ah "Aux ot ka daux Nawh,"tokaux nawh kawx khaw ti hu awm pa hoik hu Nawh Cao heue. ⁷ Pui pa moh aux khankix eue, aux ang tiiem ti tawx lox pingnyap pa khraox ka pex, viang mawh nan mawh lox pingnyap pa prim pa hoik koe pex khaing tom yam jah. Pingnyap pa prim an mawh gumlox pa hoik mhong pex heue. ⁸ Viang mawh nan lox pingnyap pa baox deeh tiiem aux ka pex mawh pa khraox, grawh grawng nawh mawh pa khraox ka daux Nawh mai ka daux pex, mawh kheu pa faik uik grai hu mai pa riang pa mawh meh hoik jhan riang heue. ⁹ Kaw pa ah ot tix ka daux pa riang mai koeng ka puxaik tix, kawn ot ka daux pa faik tom yam in heue. ¹⁰ Kaw pa moh ka puxaik tix ot ka daux pa riang mai ang lai koe dee sideeing ka daux nawh heue. ¹¹ Viang mawh nan kaw pa koeng ka puxaik tix, ot ka daux pa faik mai hu ka daux pa faik mai nawh ang tawng dee hu tix, mawh kheu pa faik hoik kieh ngai nawh dug heue. ¹² Kawn nyawm pa moh aux khankix eue, aux tiiem lai ka pex, mawh kheu hoik pluat ploi aux phimap pex, kheu ceu kaux Nawh heue. ¹³ Keeing khankix eue, aux tiiem lai ka pex, mawh kheu hoik tawng pex ka Kaw pa hoik koe khaing tom yam jah heue. Simex pa awn ju khankix eue, aux tiiem lai ka pex, mawh kheu hoik pex, pex ka kaw pa caox heue. Kawn nyawm iak khankix eue, aux tiiem lai ka pex, mawh kheu hoik tawng pex ka Keeing Cao heue. ¹⁴ Keeing khankix eue, aux hoik tiiem lai ka pex, mawh kheu hoik tawng pex ka Kaw pa hoik koe khaing tom yam jah heue. Simex pa awn ju khankix eue, aux hoik tiiem lai ka pex, mawh kheu ting riang pex mai kheu ot gumlox Siyiex ka daux pex mai kheu hoik pex, pex ka kaw pa caox heue. ¹⁵ Paw vi moh ka haktiex, viang ceu pa koe ka daux haktiex kawx, paw vi moh ka heue. Phan pui tix kaux kaux moh ka haktiex, krax moh krax rhawm Keeing Cao ang koe ka daux nawh heue. ¹⁶ Mawh kheu can pa koe ka daux haktiex khawmuik, mawh pa hawt alo nex nham mai pa hawt alo ngai mai pa yuh ti ting rhawm yam im ju, ang mawh pa dex dawd mai Keeing Cao, viang mawh nan mawh pa dex dawd mai haktiex heue. ¹⁷ Haktiex mai alo pa dex dawd mai haktiex tak grai hu, viang mawh nan kaw pa hawt yuh alo Siyiex, tak kaux leeing ju heue. ¹⁸ Kawn nyawm iak khankix eue, bawg yam in hoik mawh bawg yam nari sidah heue. Awm hoik mhong pex grawng sang hoek antikhrit, viang mawh yam in kawx antikhrit hoik lih koe tom nie, mawh kheu nan ex tom tawng hoik mawh bawg yam nari sidah heue. ¹⁹ Kix hoik lih hu khaing ex, viang mawh nan kix ang dex dawd mai ex, grawh grawng nawh phan kix hoik dex dawd mai ex, kix tak kawn ot tau mai ex heue. Viang mawh nan kix hoik lih hu, sonsang sidawng grawng kix khawmuik ang dex dawd mai ex heue. ²⁰ Pex hoik pon pa groi rawm bee khaing Kaw Pa Singax Singeh mai pex hoik tawng ku ceu khawmuik heue. ²¹ Aux hoik tiiem lai in ka pex, kheu ang pex tawng ka pa mawh meh ang lai mawh, viang mawh nan mawh kheu hoik tawng pex ka pa mawh meh mai grawng pa pie lhen pa dex dawd mai pa mawh meh ang koe tix ceu kawx heue. ²² Pui mawx pa mawh pui pie lhen, phan ang mawh kaw pa thiang ti tik grawh grawng mawh Yesux Cao Khrit? Kaw pa thiang ti tik Keeing Cao mai Kawn Cao, mawh antikhrit heue. ²³ Pui mawx ang ah pa thiang ti tik ka Kawn Cao, ang lai koe ka Keeing Cao, kaw pa kham ti teei ka Kawn Cao, kham ti teei khawm Keeing Cao heue. ²⁴ Phan mawh pex, kieh pa hoik mhong pex tom yam jah ot ka daux pex heue. Phan pa hoik mhong pex tom yam jah ot ka daux pex, pex kawx tak sang ot ka daux Kawn Cao mai ka daux Keeing Cao heue. ²⁵ In mawh lox sijax mukheu pa hoik tawx Nawh ka ex, pa mawh ju leeing ju heue. ²⁶ Aux hoik tiiem ceu in khankix ka pex, grawh grawng kix pa sang thong ti kieh pex lud heue. ²⁷ Phan mawh pex, pa groi rawm bee pa hoik pon pex khaing Nawh Cao, ot ka daux pex, ang pex lo pui pa gau ka pex tix kaux kawx, viang mawh nan awm rawm bee pa groi Nawh, gau pex ka grawng ku ceu khawmuik mai mawh pa mawh meh mai ang mawh pa pie lhen mai awm pa gau an ka pex, pex ot ka daux Nawh heue. ²⁸ Yam in, kawn nyawm pa moh aux khankix eue, ot ka daux Nawh Cao, yuh ka mawx phan Nawh Cao tak sang lih bleeh, ex tak koe rhawm pa kwa pa ang ring mai ang koe krax kaig tua sivoe Nawh Cao yam hoek Nawh heue. ²⁹ Phan pex tawng grawng mawh Nawh pa rahsee, can pui pa yuh pa rahsee ku kaux daux pui kawx, pex tawng grawng mawh pa hoik keh ka daux Nawh Cao heue.

¹ Jhak heue, Keeing Cao hoik tawx krax moh krax rhawm piang ex miex ding miex glhaong sonsang kok ex mawh kawn Siyiex mai mawh ex nan. Mawh kheu jao in haktiex ang tawng ka ex, kheu ang haktiex tawng ka Nawh Cao heue. ² Pui pa moh aux khankix eue, yam in ex hoik mawh kawn Siyiex, pa tak sang mawh ex bawg khaix ang nyang bax plak kieh sidawng heue. Viang mawh nan ex tawng grawng sang awm ex Nawh yam sang plak kieh Nawh sidawng, mawh kheu ex tak sang yaox Nawh awm mawh Nawh heue. ³ Ku kaux daux pui pa koe krax keud pot jun pot pa yuh nan ka Nawh, nawh yuh tokaux tix singax, awm singax singeh Nawh Cao heue. ⁴ Pa yuh phimap ku kaux daux pui, yuh khawm pa lheu tix lox been mai phimap kienie, mawh pa lheu lox been heue. ⁵ Pex hoik tawng sidawng grawh grawng teei Nawh ti klawm phimap ex hu mai ka daux Nawh Cao ang koe phimap ceeix kawx heue. ⁶ Pui mawx ang ah pa ot ka daux Nawh Cao ang yuh phimap. Pui pa yuh phimap ang nyang sax yaox Nawh Cao mai ang nyang bax tawng ka Nawh Cao heue. ⁷ Kawn nyawm aux khankix eue, paw kieh pui tix kaux kawx thong ti kieh pex lud awx. Kaw pa yuh pa rahsee, mawh pa rahsee, awm rahsee Nawh Cao heue. ⁸ Kaw pa yuh phimap mawh pa dex dawd mai phicaox, mawh kheu phicaox hoik yuh phimap khaing tom yam jah heue. Kawn Siyiex hoik lih bleeh, sonsang yieh Nawh kaing pa yuh phicaox heue. ⁹ Pui mawx ang ah pa hoik kieh Siyiex kix keh, ang yuh phimap, mawh kheu mie Nawh Cao hoik ot ka daux nawh mai ang nawh chix yuh phimap kheu Siyiex hoik kieh nawh keh heue. ¹⁰ Ka daux ceu in kawn praix Siyiex mai khawm kawn praix phicaox hoik sidawng kah. Pui mawx ang ah pa ang yuh pa rahsee mai ang moh ka puxaik tix, ang dex dawd mai Siyiex heue. ¹¹ Grawh grawng nawh in mawh lox bwan pa hoik mhong pex tom khaing yam jah, sonsang moh ex ka paox tix heue. ¹² Ang awm Ka-inax pa dex dawd mai kaw pa caox mai pa hoik pah pux tix yum. Ka-inax pah pux tix yum kheu grawng patix? Mawh kheu pa yuh tokaux nawh mawh pa caox mai pa yuh pux nawh mawh pa rahsee heue. ¹³ Puxaik khankix eue, phan pui haktiex koeng ka pex, paw vi daox deng kah. ¹⁴ Ex tawng grawh grawng hoik lih ex khaing pa yum mai hoik laig ka daux pa im ju, mawh kheu moh ex ka puxaik khankix heue. Kaw pa ang koe krax moh krax rhawm ot ka daux pa yum heue. ¹⁵ Pui mawx ang ah pa koeng ka puxaik tix, mawh pui pa pah pui yum heue. Pex tawng grawh grawng ju leeing ju ang ot ka daux pui pa pah pui yum tix kaux kawx heue. ¹⁶ Ex tom tawng krax moh krax rhawm, mawh kheu Nawh Cao hoik deuh ju tix yum son ex mai ex kawx khaw ti deuh ju tix yum son puxaik khankix heue. ¹⁷ Viang mawh nan pui mawx ang ah pa koe kraung khrai haktiex mai yaox puxaik tix hot sibhawm mai lo tix mai nyeep krax caux rhawm tix khaing nawh, krax moh krax rhawm Siyiex tak chix ot ka daux nawh yuh ka mawx? ¹⁸ Kawn nyawm aux khankix eue, paw kieh ex moh ka lox dak lox jheeh khaing, kieh moh ka daux ceu pa yuh tix pa mawh meh heue. ¹⁹ Ka daux pa yuh nin ex tak tawng, grawh grawng mawh ex pa dex dawd mai pa mawh meh mai tak kieh rhawm ex fah sivoe Nawh Cao heue. ²⁰ Mawh kheu phan rhawm ex deuh phimap piang tokaux ex, Siyiex lheu ting khaing rhawm ex mai tawng ku ceu khawmuik heue. ²¹ Pui pa moh aux khankix eue, phan rhawm ex ang koe dee deuh phimap ka tokaux tix, ex koe rhawm pa kwa pa ang ring ka plak Siyiex heue. ²² Can pa rawg ex, ex pon khaing Nawh Cao, mawh kheu priex ex ti hawt lox tawm jhawm krai Nawh Cao mai yuh ceu pa khaw caw ka sivoe ngai Nawh Cao heue. ²³ Lox tawm jhawm krai Nawh Cao mawh pa nhie ex yum rhawm ka ceu kaux kawn nawh Yesux Khrit mai sonsang moh ka paox tix, awm hoik tawm Nawh lox ka ex heue. ²⁴ Kaw pa priex ti hawt lox tawm jhawm krai Nawh Cao, ot ka daux Nawh Cao mai Nawh Cao kawx ot ka daux nawh heue. Mawh kheu in ex tom tawng grawng ot Nawh Cao ka daux ex kheu Khuan Cao pa hoik tawx Nawh ka ex heue.

¹ Pui pa moh aux khankix eue, paw vi yum rhawm ka can khuan pa koe khawmuik, viang mawh nan cheu ti yaox ka khuan khankix grawng mawh kix pa dex dawd mai Siyiex lie, ang dex dawd lie. Mawh kheu cao jhai pa ang mawh ang meh hoik lih hu ka daux haktiex tom nie heue. ² Pex pon ti tawng Khuan pa dex dawd mai Siyiex ka daux pa yuh nin. Khuan ku mu pa kham grawh grawng hoik hoek Yesux Khrit ka daux nex daux nham mawh pa dex dawd mai Siyiex heue. ³ Khuan ku mu pa ang kham grawng Yesux yuh nan ang dex dawd mai Siyiex mai khuan pa yuh nin, mawh khuan antikhrit, pa hoik mhong pex grawng tak sang hoek mai yam in kawx nawh hoik ot ka daux haktiex heue. ⁴ Kawn nyawm aux khankix eue, pex mawh pa dex dawd mai Siyiex mai hoik pex ka kix, mawh kheu Kaw pa hoik ot ka daux pex, lheu ting khaing kaw pa ot ka daux haktiex heue. ⁵ Kix mawh pa dex dawd mai haktiex heue, mawh kheu nan kix tom krai grawh grawng pa dex dawd mai haktiex mai pui haktiex kawx nghiet lox kix heue. ⁶ Ex kienie, mawh pa dex dawd mai Siyiex heue. Kaw pa tawng ka Siyiex nghiet lox ex, kaw pa ang dex dawd mai Siyiex ang nghiet lox ex heue. Kheu in ex tom tawng ka khuan pa mawh meh mai khuan pa lud heue. ⁷ Pui pa moh aux khankix eue, kieh ex moh ka paox tix, tix kaux lai tix kaux, mawh kheu krax moh krax rhawm mawh pa dex dawd mai Siyiex heue. Pa koe krax moh krax rhawm ku kaux, mawh pa hoik kieh Siyiex kix keh mai pa tawng ka Siyiex heue. ⁸ Kaw pa ang koe krax moh krax rhawm, ang tawng ka Siyiex, mawh kheu Siyiex mawh krax moh krax rhawm heue. ⁹ Krax moh krax rhawm Siyiex ka ex hoik plak kieh sidawng, ka daux pa ploi Nawh Kawn tix pa koe tix kaux khaing hoek ka daux haktiex, sonsang pon ex tix im ju kheu Nawh heue. ¹⁰ Krax moh krax rhawm kienie, mawh kheu moh ex ka Siyiex ang lai mawh, viang mawh nan mawh kheu moh Nawh Cao ka ex mai hoik ploi Kawn Nawh hoek sonsang mawh pa tan pa sang kieh ex luan khaing phimap tix heue. ¹¹ Pui pa moh aux khankix eue, phan Siyiex hoik moh ka ex nie ding nie dod, viang ex kawx khaw ti moh ka paox tix heue. ¹² Pui tix kaux kawx ang sax yaox ka Siyiex tix bawg kawx heue. Phan ex moh ka paox tix Siyiex ot ka daux ex mai krax moh krax rhawm Nawh grum naog ka daux ex heue. ¹³ Mawh kheu in ex tom tawng grawng pa ot ex ka daux Nawh Cao mai grawng pa ot Nawh ka daux ex, kheu Nawh Cao hoik tawx Khuan Nawh ka ex heue. ¹⁴ Ex hoik yaox mhai pa kham mhai rug grawh grawng hoik ploi Keeing Cao ka Kawn Cao, sonsang mawh Cao Taoh haktiex heue. ¹⁵ Pui mawx ang ah pa kham grawng mawh Yesux Kawn Siyiex, Siyiex ot ka daux nawh mai nawh ot ka daux Siyiex heue. ¹⁶ Ex tawng mai hoik yum rhawm ka krax moh krax rhawm Siyiex ka son ex heue. Siyiex mawh krax moh krax rhawm mai kaw pa ot ka daux krax moh krax rhawm ot ka daux Siyiex mai Siyiex ot ka daux nawh heue. ¹⁷ Krax moh krax rhawm in hoik naog ka daux ex, sonsang koe rhawm pa kwa ex pa ang ring ka daux ngaix prawng ciyang heue. Mawh kheu awm ex Nawh, yam ot ex ka haktiex in heue. ¹⁸ Ang koe ceu pa lhat ka daux krax moh krax rhawm, viang mawh nan krax moh krax rhawm ceu pa grum naog, taing ti tik ceu pa lhat graung, mawh kheu pa lhat graung koe pa prawng ciyang mai kaw pa koe krax lhat graung ang nyang bax grum naog ka daux krax moh krax rhawm heue. ¹⁹ Ex moh ka Nawh Cao, mawh kheu hoik moh Nawh ka ex sivoe heue. ²⁰ Phan pui tix kaux kaux ah, "Aux moh ka Siyiex,"mai koeng ka puxaik tix, nawh mawh pui pa pie lhen, mawh kheu kaw pa ang moh ka puxaik tix pa hoik yaox nawh, ang tau ti chix moh ka Siyiex pa ang nawh sax yaox heue. ²¹ Ex hoik koe lox tawm pingnyap in khaing Nawh Cao, kaw pa moh ka Siyiex, viang ka puxaik nawh kawx tak lai moh kah heue.

¹ Pui pa yum rhawm grawng mawh Yesux Khrit, kawn Siyiex, mawh pa kieh Siyiex kix keh heue. Awm moh ka miex keeing mai tak moh ka kawn heue. ² Yam moh ex ka Siyiex mai priex ti hawt lox tawm Nawh, ex tom tawng grawh grawng moh ex ka kawn praix Siyiex khankix heue. ³ Grawh grawng nawh, pa priex ti hawt lox tawm Nawh mawh pa moh ka Siyiex heue. Lox tawm Nawh ang mawh pa nu ti hawt. ⁴ Mawh kheu pui mawx ang ah pa hoik kieh Siyiex kix keh, pex ka haktiex heue. Krax pa pex an kienie, mawh krax yum rhawm ex heue. ⁵ Mawh pui mawx pa pex haktiex, phan ang mawh kaw pa yum rhawm grawng mawh Yesux Kawn Siyiex? ⁶ Yesux Khrit mawh kaw pa hoek ka rawm mai ka nham mai ang mawh ka rawm giex khaing, mawh ka rawm mai nham heue. ⁷ Mawh Khuan Cao pa kham mhai rug, mawh kheu Khuan Cao mawh pa mawh meh heue. ⁸ Koe loe ceu pa kham mhai rug, pa mawh Khuan Cao mai rawm mai nham mai in khawm loe ceu mawh tix ceu khaing. ⁹ Phan ex rieb ti teei mhai rug pa kham kawn pui, mhai rug pa kham Siyiex mawh pa nie lheu ting. Grawh grawng nawh mhai rug pa kham Siyiex kienie, mawh mhai rug pa kham Nawh grawng Kawn tix heue. ¹⁰ Kaw pa yum rhawm ka Kawn Siyiex, hoik koe mhai rug ka daux tokaux tix heue. Kaw pa ang yum rhawm ka Siyiex, hoik yuh phimap pie lhen ka Siyiex, mawh kheu ang nawh yum rhawm ka mhai rug pa kham Siyiex grawng Kawn tix heue. ¹¹ Mhai rug in kienie, mawh pa hoik Siyiex tawx ju leeing ju ka ex mai ju in koe ka daux Kawn Nawh heue. ¹² Kaw pa pon Kawn Cao pon ju an heue. Kaw pa ang pon Kawn Siyiex ang pon ju an heue. ¹³ Aux hoik tiiem grawh grawng ceu in khankix ka pex, pa mawh pa hoik yum rhawm ka ceu kaux Kawn Siyiex, sonsang tawng pex, grawng koe pex ju leeing ju heue. ¹⁴ pa koe ex krax kwa mai pa ang ring plak Nawh Cao kienie, mawh nin, phan ex rawg tix ceu ceu pa khaw caw mai alo Nawh Cao, Nawh nghiet ka ex heue. ¹⁵ Phan ex tawng grawh grawng pa nghiet Nawh can pa rawg ex, ex tom tawng grawng pon ex ceu pa rawg ex ka Nawh Cao heue. ¹⁶ Phan pui tix kaux kaux yaox puxaik tix yuh phimap, pa ang mawh phimap tom hoek krax yum, kieh nawh rawg bwan mai Siyiex tak sang tawx ju ka nawh, son kix pa ang yuh phimap ceu pa tak kieh hoek krax yum. Koe phimap tom hoek krax yum heue. Ang aux ah nawh khaw ti rawg bwan, son pa yuh nan. ¹⁷ Pa ang rahsee khawmuik mawh phimap heue. Koe phimap ceu pa ang kieh hoek tom krax yum heue. ¹⁸ Ex tawng grawng pui ku kaux daux pui, pa hoik kieh Siyiex kix keh, ang yuh phimap viang mawh nan kaw pa hoik kieh Siyiex nawh keh, chix priex rien tokaux tix, kaw pa caox ang pon teeh pon chuh nawh heue. ¹⁹ Ex tawng grawng mawh ex pa dex dawd mai Siyiex mai grawng haktiex khawmuik ca ot ka daux kaw pa caox heue. ²⁰ Ex tawng grawh grawng hoik hoek Kawn Siyiex mai hoik tawx krax pa chix tawng ka ex, sonsang tawng ex Kaw pa mawh meh mai ex hoik ot ka daux Kaw pa mawh meh an, pa mawh ka daux Kawn Nawh Yesux Khrit heue. In mawh Siyiex pa mawh meh mai ju leeing ju heue. ²¹ Kawn nyawm aux khankix eue, rien tokaux tix khaing riang grang khankix awx.