1234567891011121314151617181920212223242526272829303132333435363738394041424344454647484950
12345678910111213141516171819202122232425262728293031323334353637383940
123456789101112131415161718192021222324252627
123456789101112131415161718192021222324252627282930313233343536
12345678910111213141516171819202122232425262728293031323334
123456789101112131415161718192021222324
123456789101112131415161718192021
1234
12345678910111213141516171819202122232425262728293031
123456789101112131415161718192021222324
12345678910111213141516171819202122
12345678910111213141516171819202122232425
1234567891011121314151617181920212223242526272829
123456789101112131415161718192021222324252627282930313233343536
12345678910
12345678910111213
12345678910
123456789101112131415161718192021222324252627282930313233343536373839404142
123456789101112131415161718192021222324252627282930313233343536373839404142434445464748495051525354555657585960616263646566676869707172737475767778798081828384858687888990919293949596979899100101102103104105106107108109110111112113114115116117118119120121122123124125126127128129130131132133134135136137138139140141142143144145146147148149150
12345678910111213141516171819202122232425262728293031
123456789101112
12345678
123456789101112131415161718192021222324252627282930313233343536373839404142434445464748495051525354555657585960616263646566
12345678910111213141516171819202122232425262728293031323334353637383940414243444546474849505152
12345
123456789101112131415161718192021222324252627282930313233343536373839404142434445464748
123456789101112
1234567891011121314
123
123456789
1
1234
1234567
123
123
123
12
1234567891011121314
1234
12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

1 Corinthians

1

1 Pawlux pa hoik kok ti kieh mawh kawncau pa ting Yesux Khrit kheu alo Siyiex mai puxaik ex Sotsen, 2 tawx ka ceucao Siyiex pa koe ka daux veng Kawrinthux, pa mawh kix pa hoik singax ka daux Yesux Khrit, pa hoik kok ti kieh mawh pui singax, tau mai can kix pa kok ka ceu kaux Simiang ex Yesux Khrit kudah kudee, pa mawh Simiang kix mai Simiang ex heue. 3 Kieh pex koe bwanson mai pa nhim pa kaoh khaing Keeing ex Siyiex mai Yesux Khrit liak. 4 Aux yaog yaw bwanson Siyiex aux ku jheung ka grawh grawng pex, mawh kheu bwanson Siyiex pa hoik tawx ka pex ka daux Yesux Khrit. 5 Mawh kheu hoik koe pex ka kuceu ka daux Nawh Cao, ka daux pa chix sikah kuceu khawmuik mai krax tawng yung khawmuik heue. 6 Awm pa khaw mai mhai rug grawh grawng Cao Khrit pa hoik kaux cong ka daux pex. 7 Mawh kheu nan pex tom ang lai da khaix ka daux totaix bwanson tix ceu kawx, yam ca krox jun pex son bawg yam sang deeh lih bleeh Simiang ex Yesux Khrit. 8 Kaw pa tak sang kieh pex kaux cong tom sidah, sonsang mawh pex pa ang koe dee deuh phimap, ka daux singaix Simiang ex Yesux Khrit heue. 9 Siyiex pa hoik kok pex ti neuex ka daux pa yuh paox pie tau mai Kawn Nawh Simiang ex Yesux Khrit mawh pa kaux sijax heue. 10 Puxaik khankix eue, aux khyox khaw ka pex ka daux ceu kaux Simiang ex Yesux Khrit, sonsang sikah pex khawmuik ka lox tix ceu khaing mai son ang sang koe krax tang gwieh paox tix ka daux pex, sonsang rom pex ti grum mhawm tau, ka daux rhawm tix mu mai krax keud tix blawng khaing heue. 11 Grawh grawng nawh, puxaik aux khankix eue, kix pa mawh pui geh nyiex Khlawe hoik krai lao ka aux grawng pex, grawng pa koe krax simah pa ang khaw paox tix ka daux pex heue. 12 Pa sang ah aux mawh nin, pex kaux pui mawx kaux pui an lai nieb tang ah nin, "Aux mawh pa dex mai Pawlux," mai "Aux mawh pa dex mai Apawlux," mai "Aux mawh pa dex mai Kephax," mai "Aux mawh pa dex mai Cao Khrit" heue. 13 Khex mawh Cao Khrit pa hoik tang gwieh kah lie? Hoik teei Pawlux yum ka piang khaox lhak ka son pex lie? Phan ang mawh nan hoik cubcom pex rawm ka daux ceu kaux Pawlux lie? 14 Aux yaog yaw bwanson Siyiex, kheu ang aux cubcom pex ka rawm tix kaux kawx, lheu khaing Karipux mai Kayux heue. 15 Ha pui tix kaux kaux kox sang ah, pex hoik cubcom ka daux ceu kaux aux heue. 16 Viang ka geh nyiex Sathephanax kawx, aux hoik cubcom kah, phan mawh pa lheu khaing an, ka pui tang kaux, cubcom aux nieh, aux ang cubcom nieh, ang lai tawng heue. 17 Grawh grawng nawh Cao Khrit ploi aux son sang tawx krax cubcom ang mawh, viang mawh nan ploi aux son sang sidiex gau lox bwan gaux rhawm, ang mawh ka daux pingnya pa chix lox sikah, phan ang mawh nan, ha sang kieh khaox lhak Cao Khrit kox mawh pa giex going heue. 18 Grawh grawng nawh gumlox pa dex mai khaox lhak mawh pa daox aw ka kix pa hoek krax laux leeing, viang mawh nan ka ex pa hoek krax taoh mawh lox sibrawm Siyiex heue. 19 Grawh grawng nawh hoik tiiem ti deuh ah nin, "Ka pa koe pingnya Aux tak yuh pingnya kix laux mai krax pa chix tawng kix, Aux tak sang kieh lih mawh pa ang koe ceu heue." 20 Kaw pa koe pingnya koe dee mawx? Pui pa tiiem lai koe dee mawx? Cao pa thiang daux ju in koe dee mawx? Siyiex hoik kieh pingnya haktiex in lih mawh pa daox aw ang mawh lie? 21 Grawh grawng nawh, mawh kheu hoik yaox grawng ka daux pa khaw mai pingnya Siyiex, haktiex in ang lai tawng ka Siyiex kheu pingnya tix tiru, hoik caw ka rhawm Siyiex ti sang kieh kix pa yum rhawm hoek ka krax taoh, kheu ceu pa daox aw pa sidiex gau heue. 22 Mawh kheu hoik yaox grawng rawg pui Yudax khankix son mhai pa daox am mai grawng sawg pui Helasax khankix ka pingnya, 23 viang mawh nan ex sidiex grawng Cao Khrit pa hoik teei yum piang khaox lhak, pa hoik mawh dee sideeing ka pui Yudax khankix mai ceu pa daox aw ka pui tang ceu khankix heue. 24 Viang mawh nan, ka kix pa hoik kok ti teei khankix, ka pui Yudax mai ka khawm pui Helasax, Cao Khrit mawh sibrawm Siyiex mai pingnya Siyiex heue. 25 Grawh grawng nawh ceu pa daox aw Siyiex mawh pa nie lheu ting pingnya khaing kawn pui mai ceu pa iak riang rao Siyiex mawh pa nie lheu ting riang rao khaing kawn pui heue. 26 Puxaik khankix eue, keud ka grawng pa hoik kok ti teei ka pex, ang koe pui pa koe pingnya awm pa khaw mai nex nham tom nie, ang koe pui pa ting ao min tom nie mai ang koe doeh ru simiang tom nie heue. 27 Siyiex hoik laug ti teei ceu pa daox aw pa dex mai haktiex in, sonsang kieh Nawh kix pa koe pingnya kaig tua kah heue. Siyiex hoik laug ceu pa iak riang rao pa dex mai haktiex in, sonsang kieh Nawh ceu pa ting riang rao kaig tua kah heue. 28 Sonsang kieh Nawh pui pa koe ceu kaig twa, Nawh hoik laug ti teei pa ang koe bwanson pa dex mai haktiex in mai ceu pa deuh ti ang koe ceu khankix lih ti mawh pa koe ceu heue. 29 Son ang pui tix kaux kawx sang yaw tix, sivoe Siyiex heue. 30 Hoik mawh kheu Nawh Cao, pa ot pex daux Yesux Khrit, pa hoik kieh mawh pingnya pa rahsee, pa singax mai pa taoh, pa kaoh khaing Siyiex ka son ex, 31 Sonsang khaw mai lox pa hoik tiiem ti deuh ah nin, "Kieh kaw pa yaw, yaw rangdi tix ka daux Simiang heue."

2

1 Puxaik khankix eue, yam hoek aux ka pex, aux viex lox nyawm, phan ang mawh nan viex pingnya, hoek ti sidiex grawng mhai rug Siyiex ka pex ang mawh heue. 2 Grawh grawng nawh, aux hoik een rhawm tix ang tawng tidtix, ka daux pex, lheu khaing Yesux Khrit mai grawng pa hoik yum Nawh piang khaox lhak heue. 3 Aux hoik ot tau mai pex ka daux pa iak riang rao, ka daux pa lhat graung mai ka daux pa nie siyaung heue. 4 Lox sikah aux mai lox sidiex aux, ang mawh lox pa chix nyaw glaw pa dex mai pingnya, viang mawh nan hoik mawh ka daux pa plak jhi Khuan Cao mai sibrawm heue. 5 Son ang krax yum rhawm pex sang mawh ka daux pingnya kawn pui, viang mawh nan sonsang mawh ka daux sibrawm Siyiex heue. 6 Viang mawh nan, ex tom ah lox pingnya ka pui pa grum naog heue. Ang mawh pingnya pa dex mai haktiex in mai ang mawh pingnya simiang giex kaing haktiex in pa chix laux grai heue. 7 Viang mawh nan pa ah ex mawh pingnya Siyiex pa raux, mawh pingnya pa hoik mox, pa hoik grux ciak Siyiex ti deuh, ka sang koe haktiex, sonsang mawh min plakngai ex heue. 8 Simiang giex kaing haktiex in ang lai tawng ka pingnya an tix kaux kawx, grawh grawng nawh phan kix hoik tawng, kix ang tau ti tawk Simiang ka piang khaox lhak heue. 9 Viang mawh nan awm pa khaw mai pa hoik tiiem ti deuh ah nin, "Ceu pa hoik cox khre Siyiex ka son kix pa moh ka Nawh, mawh ceu pa ang ngai sax yaox mai pa ang yhaok sax mhong mai pa ang sax laig ka daux rhawm rhi kawn pui heue." 10 Viang mawh nan, Siyiex hoik plak jhi ceu an khankix ka ex ka daux Khuan Cao. Grawh grawng nawh, Khuan Cao an sawg liiem ka grawng kuceu khawmuik, khawm ka ceu pa raux pa nu pa dex mai Siyiex heue. 11 Ka daux kawn pui khankix, mawh mawx pa tawng, ceu pa dex mai kawn pui, lheu khaing khuan pui, pa koe ka daux Nawh? Awm an ceu pa dex mai Siyiex khankix kawx, ang koe pui tawng, lheu khaing Khuan Siyiex heue. 12 Ex hoik pon khuan pa dex mai haktiex in ang mawh, viang mawh nan hoik pon Khuan pa kaoh khaing Siyiex, sonsang tawng ex ka ceu pa hoik yuh Siyiex bwanson ti tawx giex ka ex heue. 13 Ang ex krai grawh grawng ceu an khankix ka lox pingnya pa gau kawn pui, viang mawh nan krai ka lox pa gau Khuan Cao mai krai dee bleeh ceu pa dex mai Khuan, ka lox pa dex mai Khuan heue. 14 Pui pa dex mai nex nham ang rieb ti teei ceu pa dex mai Khuan Siyiex, grawh grawng nawh ceu an kix mawh pa daox aw ka nawh mai nawh ang pon ti tawng grawng khankix, mawh kheu ceu an khankix mawh pa chix liiem chix chawk ti tawng ka khuan khaing heue. 15 Viang mawh nan pui pa dex mai khuan chix liiem chix chawk ti tawng grawh grawng kuceu khawmuik, viang mawh nan ang pui chix liiem chix chawk ti tawng ka tokaux nawh tix kaux kawx heue. 16 "Grawh grawng nawh, mawh mawx pa tawng ka rhawm Simiang ti sang chix gau ka Nawh Cao?"Viang mawh nan ex hoik pon rhawm Cao Khrit heue.

3

1 Puxaik khankix eue, aux ang pon ti sikah ka pex awm mawh pui pa dex mai khuan, viang mawh nan tak sikah ka pex awm pui pa dex mai nex nham mai awm mawh ka kawn ngie khankix ka daux Cao Khrit heue. 2 Aux hoik tawx pex nyaux rawm teeih mai ang lai tawx pa ih kah, mawh kheu ang pex nyang bax pon kham. Pie yam in kawx pex ang nyang bax pon kham, 3 kheu kawn mawh pex pa dex mai nex nham heue. Mawh kheu koe pa boh rhawm mai pa simah ka daux pex, ang pex lai mawh pa dex mai nex nham mai pa hawt hu ka been kawn pui lie? 4 Grawh grawng nawh yam tix kaux ah, "Aux mawh pa dex mai Pawlux," mai tang kaux tix kaux ah, "Aux mawh pa dex mai Apawlux," pex kawn mawh pa dex mai nex nham ang mawh lie? 5 Phan mawh nan Apawlux mawh pa yuh ka mawx? mai Pawlux mawh pa yuh ka mawx? Mawh pui cau pui soi pa hoik kieh pex yum rhawm, awm pa tang tawx Simiang ka kaux pui mawx kaux pui an heue. 6 Aux mawh cao pa sum, Apawlux mawh cao pa see rawm, viang mawh nan Siyiex mawh cao pa kieh haok huan heue. 7 Mawh kheu nan kaw pa sum ang ah, kaw pa see rawm ang ah, ang lai mawh tidtix, viang mawh nan mawh Siyiex pa kieh haok huan heue. 8 Lheu khaing nan kaw pa sum mai kaw pa see rawm mawh tix kaux khaing, viang mawh nan kaux pui mawx kaux pui an tak sang pon bwanson awm pa khaw mai kaing pa yuh tix heue. 9 Grawh grawng nawh yiex mawh paox pa rom ti yuh kaing tau mai Siyiex mai pex mawh ma Siyiex mai nyiex Siyiex heue. 10 Awm pa khaw mai bwanson Siyiex pa hoik tawx ka aux, aux hoik kaw num awm cao pa chix sum nyiex pa koe pingnya mai pui tang kaux hoik baox gawp ti sum ka piang an heue. Kieh pui ku kaux yuh satix ka grawng pa baox gawp nawh ti sum ka piang an heue. 11 Grawh grawng nawh pui tix kaux kawx ang chix kaw num pa tang, pa lheu khaing num pa hoik kaw, pa mawh Yesux Khrit heue. 12 Viang mawh nan, phan pui tix kaux kaux baox gawp ti sum ka piang num an, ka khri, mau, siang simaox pa ngawh, khaox, rib mai brex nghox ang ah, 13 Kaing pa yuh kaux pui mawx kaux pui an tak sang kieh sidawng heue. Grawh grawng nawh, Singaix An tak sang kieh sidawng kah, mawh kheu tak sang plak jhi nawh ka daux ngu mai ngu an nong nong tak sang cheu ti yaox, kaing yuh, kaux pui mawx kaux pui an, grawng mawh kaing pa yuh ka mawx heue. 14 Phan kaing pui tix kaux kaux pa hoik gawp nawh ti sum ka piang num an kawn kaux cong, kaw an tak sang pon bwanson heue. 15 Phan kaing pui tix kaux kaux hoik proe, nawh tak sang som nai heue. Viang mawh nan tokaux nawh tak sang hoek krax taoh, mawh awm pa hoik bhoek nawh khaing ngu heue. 16 Ang pex tawng grawng mawh pex nyiex bwan Siyiex mai grawng pa ot Khuan Siyiex ka daux pex lie? 17 Phan pui tix kaux kaux yieh nyiex bwan Siyiex laux, ka nawh kawx Siyiex tak sang yuh laux heue. Grawh grawng nawh nyiex bwan Siyiex mawh pa singax singeh, pex kawx mawh nyiex bwan an heue. 18 Paw kieh pui tix kaux kawx deeh pie ka tokaux tix tiru. Phan pui tix kaux kaux ka daux pex ce tokaux tix mawh pa koe pingnya ka daux haktiex in, kieh nawh lih mawh pa daox pa aw, sonsang lih mawh nawh pa koe pingnya heue. 19 Grawh grawng nawh pingnya pa dex mai haktiex in mawh ceu pa daox pa aw ka sivoe Siyiex heue. Kheu hoik tiiem ti deuh ah nin, "Nawh giex kix ka jhawm lhak tokaux kix heue." 20 Baox ah nin tix bawg, "Simiang tawng grawh grawng pa keud pui pa koe pingnya, grawng mawh kix pa giex going heue." 21 Mawh kheu nan paw kieh pui tix kaux kawx yaw rangdi ka daux kawn pui heue. Grawh grawng nawh ku ceu khawmuik mawh cie pex heue. 22 Viang mawh Pawlux ang ah, Apawlux ang ah, Kephax ang ah, haktiex in ang ah, pa im ang ah, pa yum ang ah, ceu pa koe yam in khankix ang ah, ceu pa sang hoek ti mawh khaix khankix ang ah, khawmuik khawm leeing mawh cie pex, 23 pex mawh cie Cao Khrit mai Cao Khrit mawh cie Siyiex heue.

4

1 Kieh pui een ex mawh pui cau Cao Khrit mai kawncau cao pa priex ceu pa raux pa mox Siyiex heue. 2 Lheu khaing an, pa mawh kawncau cao pa priex, tak sang yaox grawng mawh nawh pa kaux sijax heue. 3 Pa prawng ca pex aux ang ah, phan ang mawh nan pa prawng ca pui tang kaux ang ah, mawh ngie pa iak pa lied ka aux khaing. Mawh heue, pie ka tokaux aux kawx aux ang prawng ca heue. 4 Grawh grawng nawh aux ang tawng ceu pa lud tokaux tix tidtix, viang mawh nan aux hoik rahsee kheu an ang mawh heue. Viang mawh nan Kaw pa prawng ca ka aux mawh Simiang heue. 5 Mawh kheu nan, paw prawng ca tidtix ka sivoe sang hoek bawg yam nawh, viang mawh nan krox tom yam hoek Simiang, pa tak sang kieh pa riang jhan ka piang ceu pa hoik mox ka daux pa faik khankix mai kieh khawm pa keud daux rhawm rhi khankix sidawng. Yam an kaux pui mawx kaux pui an tak sang pon pa yaogyaw khaing Siyiex heue. 6 Puxaik khankix eue, ceu in khankix aux hoik yuh riang lox tiag ka tokaux aux mai Apawlux, ka son pex heue. Kheu sonsang pon pex ti gau ka daux yiex, ang lai lheu ka ceu pa hoik tiiem khankix mai son ang pex sang yuh ti ting rhawm, ti yaw ka tix kaux mai map ka tang kaux heue. 7 Grawh grawng nawh, mawh mawx pa kieh maix tang siyox? Maix koe ceu pa yuh ka mawx, pa ang maix pon khaing pui? Phan hoik pon khaing pui maix lai yuh ti yaw awm grang pa ang maix pon khaing pui yuh ka mawx? 8 Pie yam in kawx pex hoik grum naog mai lih mawh pa mi koe heue. Pie yam tang ot aux khaing pex kawx, pex hoik lih mawh pa giex kwang, aux simie pex lih mawh awm an tete, viang ex kawx sang pon rom ti lih mawh pa giex kwang tau mai pex heue. 9 Grawh grawng nawh, aux ce Siyiex hoik kieh ex pa mawh kawncau pa ting khankix da khaix pui khawmuik, awm pui pa tak lai hoek krax yum, mawh kheu hoik yuh ex mawh ceu pa lak nieb jhak ka son haktiex mai son kawncau Siyiex mai khawm son kawn pui heue. 10 Ex mawh pui daox aw ka son Cao Khrit, viang mawh nan pex mawh pa koe pingnya ka daux Cao Khrit heue. Ex mawh pa iak riang rao, viang mawh nan pex mawh pa ting riang rao heue. Pex mawh pa kied ting min plakngai, viang mawh nan ex mawh pa ang koe min plakngai heue. 11 Tom hoek pie bawg yam nari dom in kawx, ex cai rhawm mai sang nyaux nie rawm mai ot kakaong mai kham geu ceu pa tap toi mai mawh pui vung vieang praix pa ang koe dee ot heue. 12 Ex nyhap mao, yuh kaing ka taix tokaux tix heue. Yam yuh pui pa ang cee ang cak ka ex, ex nawb bwan ka kix heue. Yam tuktiak ka ex, ex gun yeung heue. 13 Yam ah lox map ka ex, ex deeh khyox khaw ka heue. Hoik kieh ex mawh awm ceu pa seeing brai cie haktiex, pa mawh sibroe pa hoik pih lih khaing kuceu khawmuik, tom hoek ka bawg yam in heue. 14 Aux tiiem ceu in khankix sonsang kieh pex kaig tua ang mawh, viang mawh nan aux sidiex gau ka pex awm mawh pex kawn praix pa moh aux kah heue. 15 Grawh grawng nawh viang pex koe cao pa gau grawng Cao Khrit tix mheen kawx, ang pex koe keeing tom nie, mawh kheu hoik mawh aux pa kieh pex keh ka daux Yesux Khrit kheu lox bwan gaux rhawm heue. 16 Mawh kheu nan aux tom khyox khaw ka pex, sonsang mawh pex pa hawt jawh ti yuh khaix aux heue. 17 Mawh kheu jao in aux tom hoik ploi Timose, pa mawh kawn pa moh aux kah mai pa kaux sijax ka daux Simiang hu ka pex, nawh tak sang kieh pex doh keud ka jhawm krax pa yuh aux ka daux Cao Khrit, awm pa sidiex aux ka ku ceu cao pa koe kudah kudee heue. 18 Pex tix blah krox ti ting rhawm, awm pa ang aux lai sang hoek ka pex heue. 19 Phan caw ka alo Simiang aux tak sang khran hoek ka pex mai yam an aux tak tawng ka lox kix pa kroh ti ting rhawm khankix ang mawh, viang mawh nan tak tawng ka sibrawm kix heue. 20 Grawh grawng nawh meung Siyiex ang lai mawh ka daux gumlox, mawh ka daux sibrawm heue. 21 Pex mie pa yuh ka mawx? Aux tak sang viex khaox hoek ka pex lie? Phan ang mawh nan sang hoek ka daux krax moh krax rhawm mai pa mhawm rhawm lie?

5

1 Hoik tah krai lao grawng koe ceu pa phit vao ka daux pex, pa mawh ceu pa lang teung phit vao, pie pa ang koe ka daux pui tang ceu khankix, pa mawh, pui ka daux pex tix kaux, pa nieb teei ka moeng keeing tix heue. 2 Jalao pex sang khi rhawm kah mai grheu ti tik kaw pa yuh nan khaing daux pex, pex briex ti ting rhawm kah heue. 3 Viang tokaux aux ang ot mai pex kawx, aux hoik ot daux khuan mai aux hoik prawng ca ka kaw pa yuh ceu an, awm hoik ot aux tau mai pex heue. 4 Yam khrawm pex paox tix ka daux ceu kaux Simiang ex Yesux mai yam ot khuan aux mai pex, tau mai sibrawm Simiang ex Yesux, 5 tawx pong pui pa yuh nan ka Satan ti kieh yuh nex nham nawh laux, yuh ka mawx sonsang hoek khuan nawh krax taoh ka daux singaix Simiang Yesux heue. 6 Pa yaw rangdi pex ang lai mhawm. Ang pex tawng grawng susaix ceeix ngie chix laig ti kieh blah ploh khawm pum lie? 7 Khawt ti tik susaix pa prim singax pak lawg, sonsang mawh pex pum blah pa khraox, awm pa mawh pex blah pa ang sau susaix heue. Grawh grawng nawh, Kawn Yung Pasakha ex, pa mawh Cao Khrit, hoik tan heue. 8 Mawh kheu nan kieh ex priex ti yuh pawie an, ang mawh ka susaix pa prim mai viang ka susaix ceu pa ang khaw ang jiet mai pa caox caig kawx ang mawh, viang mawh nan mawh ka blah pa ang sau susaix pa singax mai pa mawh meh heue. 9 Daux lai pa hoik tiiem aux ti tawx ka pex, hoik nhie pex ang yuh paox pie ka pui pa phit vao heue. 10 Pa ah aux nan, ang lai ah ka pui phit vao pa dex mai haktiex, phan ang mawh nan ka pui pa ghoing, ka pui pa tud rhim, ka pui pa krub riang grang khankix, phan raux ah nan, pex tak lai lih hu khaing haktiex heue. 11 Viang mawh nan, lai pa hoik tiiem aux ka pex, mawh pa nhie pex ang yuh paox pie ka pui pa hoik kok mawh puxaik, pa mawh pui phit vao, phan ang mawh nan pui pa ghoing, pui pa krub riang grang, pui pa salao, pui pa yoek ka plai, pui pa tud rhim heue. Pui pa yuh nan pie sawm kawx paw sawm tau mai nawh awx. 12 Grawh grawng nawh, pa prawng ca ka kix pa ot plak praix, chix dex mai aux yuh ka mawx? Pex prawng ca ka kix pa ot plak daux ang mawh lie? 13 Viang mawh nan ka kix pa ot plak praix khankix, Siyiex prawng ca kah heue. "Grheu ti tik pui pa caox caig an khaing ka daux pex heue."

6

1 Phan pex koe lox koe see ka paox tix, pex khex ang ring ti hu prawng ca ka sivoe pui pa ang rahsee, khaing ka sivoe pui pa singax lie? 2 Phan ang mawh nan ang pex tawng grawng pui singax khankix tak sang prawng ca ka haktiex lie? Phan pex tak sang prawng ca ka haktiex, ang pex keung ti prawng ca ka ceu pa nie iak khaing paox tix khankix lie? 3 Ang pex tawng grawng ex tak sang prawng ca ka kawncau Siyiex khankix lie? Mawh kheu nan tak sang nie lheu yaox ti prawng ca ka ceu pa dex mai ju in miex ding? 4 Mawh kheu nan phan pex tak sang prawng ca ka ceu pa dex mai ju in khankix, pex lai teei kix pa ang koe bwanson ka daux ceu cao, ti kieh mawh cao prawng ca lie? 5 Aux ah nin sonsang kieh pex kaig tua kah, khex ang koe pui pa koe pingnya ka daux pex, pa chix ti prawng ca ka sinax puxaik tix khankix lie? 6 Ang joeng mawh ngie yuh see ka paox puxaik tix pex yuh nang nan ka sivoe pui pa ang yum rhawm khankix heue. 7 Pa yuh pex see ka paox tix mawh pa som nai son pex. Kheu lai yuh nan, khaing pa kham pex ka ceu pa lud? Khaing pa kham pex ka ceu pa lhen ti teei kraung tix? 8 Ka piang ang yuh nan, pex yuh pa lud mai lhen ti teei kraung puxaik tix heue. 9 Phan ang mawh nan ang pex tawng grawng pui pa ang rahsee ang pon ti cie sin pa mawh meung Siyiex lie? Paw kieh pie lhen phit vao, pui pa krub riang grang ang ah, pui pa phit vao mai moeng pui ang ah, pui simex bun ang ah, pui pa deeh phit vao ka paox simex tix ang ah, 10 Pui briex ang ah, pui pa ghoing ang ah, pui pa yoek ka plai ang ah, pui pa salao ang ah, pui pa tud rhim ang ah, tak ang pon ti cie sin pa mawh meung Siyiex heue. 11 Glang ka in, viang pex tix blah kawx hoik mawh pui pa awm an, hoik sigrhah ka pex, hoik kieh pex singax, hoik kieh pex rahsee ka daux ceu kaux Simiang Yesux Khrit mai ka daux Khuan Siyiex ex heue. 12 Aux koe akhuang ti pon yuh kuceu khawmuik, viang mawh nan to mhawm son aux khawmuik ang mawh. Aux koe akhuang ti pon yuh kuceu khawmuik, aux ang doh kieh ot ka greem sibrawm tix ceu kawx heue. 13 Pa ih mawh son vaig tu mai vaig tu mawh son pa ih, viang mawh nan Siyiex tak sang kieh laux khawm ra ceu heue. Tokaux ang lai mawh son pa phit vao, viang mawh nan mawh son Simiang mai Simiang mawh son tokaux heue. 14 Lheu khaing an Siyiex hoik kieh Simiang deeh kaoh mai ka khawm ex kawx tak sang kieh deeh kaoh kheu sibrawm Nawh heue. 15 Ang pex tawng grawng tokaux pex mawh kraung grang Cao Khrit lie? Phan mawh nan aux tak sang teei kraung grang Cao Khrit mai kieh kix mawh kraung grang bun coh kaux lie? Paw doh kieh mawh nan. 16 Phan ang mawh nan, ang pex tawng grawng kaw pa hu kleuk tix tau mai bun pa coh kaux, hoik mawh tokaux tix mu khaing mai nawh lie? Grawh grawng nawh, Nawh Cao hoik ah nin, "Kiex ra kaux tak mawh nex nham tix mu khaing. " 17 Kaw pa kleuk tokaux tix tau mai Simiang, mawh khuan tix mu khaing mai Nawh heue. 18 To khaing pa phit vao awx. can pa yuh pui ku ceu mawh pa koe plak praix tokaux, kaw pa phit vao yuh phimap ka tokaux tix tiru heue. 19 Phan ang mawh nan, ang pex tawng grawng mawh tokaux pex nyiex bwan Khuan Singax, pa ot ka daux pex, pa hoik pon pex khaing Siyiex lie? Pex ang lai mawh cie tokaux tix, 20 Grawh grawng nawh hoik liag pex ka pa ngawh, mawh kheu nan kieh Siyiex koe min pakngai ka daux tokaux pex awx.

7

1 Phan mawh grawng ceu pa hoik tiiem pex ka aux, mhawm son simex, ti ang teeh ang dex mai bun heue. 2 Kheu haoh pa phit vao, kieh simex ku kaux tang koe moeng cie tokaux tix mai kieh bun ku kaux tang koe mex cie tokaux tix heue. 3 Kieh pa mawh mex tawx ka pa mawh moeng awm pa keung nawh ti pon awm an pa mawh moeng kawx, kieh nawh tawx nang nan ka pa mawh mex heue. 4 Pa mawh moeng ang koe sibrawm ka piang tokaux tix, mawh mex pa koe heue. Awm an pa mawh mex kawx ang koe sibrawm ka piang tokaux tix, mawh moeng pa koe heue. 5 Paw vi yuh ti ang cu ti tawx ka paox tix phan ang mawh ka pa hoik caw rhawm khawm ra kaux, ti yuh nan tix vong, sonsang teei bawg yam tix rawg bwan mai baox deeh ot mai paox tix khaix, phan ang mawh nan, ha Satan kox pon nyaw glaw pex, kheu ang pex pon ti priex rhawm tix heue. 6 Aux ah nin kheu koe akhwang mai ang lai mawh kheu lox pa tawm kah heue. 7 Ka pui khawmuik kawx, aux simie ti kieh awm aux. Viang mawh nan, kaux pui mawx pui an tang pon totaix khaing Siyiex, tix kaux ceu in mai tang kaux ceu an heue. 8 Aux ah nin ka pui pa ang koe mex koe moeng mai ka miexmai khankix, phan kix ot awm aux mhawm son kix heue. 9 Phan kix ang chix priex rhawm tix, kieh kix teei mex teei moeng, grawh grawng nawh nie lheu mhawm ti sang teei mex teei moeng khaing pa haok rhawm silao heue. 10 Phan mawh ka pa koe mex moeng khankix, aux tawm lox kah, ang mawh aux pa tawm, mawh Simiang, yuh ka mawx pa mawh moeng tak ang gwieh ti tang ot khaing mex tix, 11 Phan bun hoik gwieh ti tang ot, kieh nawh ot giex nong nong mai ang lai baox koe mex, phan ang mawh nan kieh nawh deeh khaw ka mex tix. Mai yuh ka mawx pa mawh mex kawx tak ang lai tik ka moeng tix heue. 12 Ka pa deuk khankix, aux ah nin, ang lai mawh Simiang pa ah, phan puxaik tix kaux kaux koe moeng pa ang yum rhawm mai phan moeng nawh koe rhawm ti sang ot mai nawh, paw kieh nawh grheu moeng tix hu. 13 Phan pa mawh moeng, koe mex pa ang yum rhawm mai phan mex nawh koe rhawm tix sang ot mai nawh, paw kieh nawh grham mex tix lih hu heue. 14 Grawh grawng nawh mex pa ang yum rhawm lih mawh pa singax ka daux moeng tix mai moeng pa ang yum rhawm lih mawh pa singax ka daux puxaik pa mawh mex nawh heue. Phan ang mawh nan kawn praix pex tak lai mawh pa ang singax, yam in kix mawh pa singax heue. 15 Phan pui pa ang yum rhawm sang lih hu, kieh nawh lih hu heue. Pa mawh puxaik, pa mawh nan ang ah, ang mawh pa giex gang ka ceu pa yuh nan heue. Siyiex hoik kok ex sonsang khaw caw paox tix heue. 16 Pa mawh moeng eue maix chix tawng grawng pa sang pon taoh, ang maix pon taoh, ka mex tix yuh ka mawx? Phan ang mawh nan, pa mawh mex eue maix chix tawng pa sang pon taoh, ang maix pon taoh, ka moeng tix yuh ka mawx? 17 Awm hoik gwieh Simiang ti tang tawx ka kaux pui mawx kaux pui an mai awm pa hoik tang kok Siyiex ka kaux pui mawx kaux pui an, kieh nawh hu yuh nan heue. Aux tawm lox yuh nin, ka daux ceu cao khawmuik heue. 18 Hoik kok ka pa hoik pat hak tix kaux kaux lie? Paw kieh nawh lih mawh pa ang pat hak. Hoik kok ka pa ang pat hak tix kaux kaux lie? Paw kieh nawh pat hak heue. 19 Pa pat hak ang tie mawh tidtix mai pa ang pat hak kawx ang tie mawh tidtix, viang mawh nan mawh ngie pa priex ti hawt lox tawm jhawm krai Siyiex khaing pa koe bwanson heue. 20 Kieh kaux pui mawx kaux pui an ot ka daux ceu pa kok, pa hoik kok nawh kah heue. 21 Mawh maix siliex yam kok ka maix lie? Paw lai khi kah, viang mawh nan phan maix koe sibrawm ti lih mawh pui pa ploi, shiao ka sibrawm an heue. 22 Grawh grawng nawh, kaw pa hoik kok ka daux Simiang, yam mawh nawh siliex, hoik mawh pui pa ploi cie Simiang, awm an kaw pa hoik kok yam mawh nawh pui ploi, mawh siliex cie Cao Khrit heue. 23 Pex mawh pa hoik liag ka pa ngawh, paw vi kieh lih mawh siliex kawn pui heue. 24 Puxaik khankix eue, kieh kaux pui mawx kaux pui an, ot tau mai Siyiex, ka daux ceu pa hoik kok nawh kah heue. 25 Phan mawh grawh grawng bun krih aux ang lai koe lox tawm khaing Simiang, viang mawh nan, aux pa mawh pui pa hoik pon bwanson khaing Simiang tix mawh pui pa kaux sijax, tawx jhawm pa keud tix kah heue. 26 Mawh kheu ceu pa prawng yam in, aux ce mhawm kieh ca ot awm pa ot nawh heue. 27 Maix hoik mawh pa phyawk moeng kah lie? Paw lai sawg ti luan khaing nawh awx. Maix mawh pa hoik kah tix luan khaing moeng lie? Paw lai baox sawg ti moeng awx. 28 Phan maix teei ti koe moeng maix ang lud heue. Phan bun krih teei ti koe mex kawx, nawh ang lud heue. Pui pa yuh nan khankix, tak sang yaox krax kha rhawm ka daux nex nham, aux tom simie ti kieh pex luan khaing ceu an kix heue. 29 Puxaik khankix eue, aux ah nin, bawg yam pa kawn deuk ka ex hoik dawd, mawh kheu nan kieh khawm kix pa koe moeng, yuh awm pa ang kix lai koe heue. 30 Kieh kix pa yiiem grai, yuh awm kix pa ang yiiem grai heue. Kieh kix pa gaux rhawm, yuh awm ang kix lai gaux rhawm heue. Kieh kix pa liag, yuh awm pa ang kix lai koe heue. 31 Kieh kix pa shiao haktiex in, yuh awm pa ang shiao tom grum, grawh grawng nawh riang haktiex in mawh pa grai grhup hu heue. 32 Aux simie ti kieh pex luan khaing krax khi glawh heue. Pui pa ang koe moeng chix keud grawng ceu pa dex mai Simiang mai yuh ka mawx sonsang khaw caw nawh ka rhawm Simiang heue. 33 Pui pa koe moeng chix keud grawng ceu pa dex mai haktiex mai yuh ka mawx sonsang chix khaw caw nawh ka rhawm moeng tix, 34 mai jhawm keud nawh hoik tang gwieh tix heue. Awm an bun pa ang koe mex mai khawm bun krih, chix keud grawng ceu pa dex mai Simiang, son tokaux nawh mai khuan nawh, khawm ra ceu, tak sang mawh pa singax heue. Bun pa koe mex, chix keud grawng ceu pa dex mai haktiex, sonsang chix khaw caw nawh ka rhawm mex tix heue. 35 Pa ah aux nin, aux ah ngie sonsang koe bwanson son pex mai ang mawh sonsang taing singoe sawt ka piang pex, aux ah sonsang teem pex ti chix yuh pa khaw pa mawh son Simiang pa ang koe dee luk liak heue. 36 Phan pui tix kaux kaux ce nawh yuh pa ang khaw ka bun krih tix mai phan bun an hoik luan krih, kieh nawh yuh awm pa khaw caw ka rhawm bun an, pa yuh nawh nan ang koe phimap. Kieh teei paox tix heue. 37 Pa hoik een rhawm tix kaux, phan ang koe dee kin lox mai phan nawh pon ti yuh awm alo tix mai hoik dud keud ka daux rhawm tix, ti ang kieh kawn bun krih ti koe mex, yuh pa mhawm heue. 38 Mawh kheu nan kaw pa teei ti tawx kawn bunkrih, ti koe mex yuh pa mhawm heue. Kaw pa ang tawx kawn bun krih tix, koe mex nie lheu yuh pa mhawm heue. 39 Pa mawh moeng hoik phyawk ka mex tix, yam kawn klawd mex nawh, phan mex nawh hoik yum, ka pui mawx ang ah, nawh pon ti baox deeh mex, awm pa khaw rhawm nawh, pon ti teei ngie pa ot ka daux Simiang heue. 40 Phan awm pa keud aux, nawh nie lheu koe krax gaux rhawm, phan nawh ca ot awm pa ot tix, tokaux aux kawx aux ce koe Khuan Siyiex heue.

8

1 Phan mawh grawng ceu pa hoik tan ka riang grang, ex tawng grawng ex khawmuik hoik koe krax tawng heue. Pingnya mawh pa chix kieh ting rhawm, krax moh krax rhawm mawh pa chix kieh ting lhaong haok huan heue. 2 Phan pui tix kaux kaux ce ti hoik tawng tix ceu ceu, nawh ang nyang bax tawng awm pa khaw nawh ti tawng, 3 Phan pui tix kaux kaux moh ka Siyiex, Nawh Cao tawng ka nawh heue. 4 Mawh kheu nan grawh grawng ih ceu pa hoik tan ka riang grang, ex tawng grawng riang grang ang mawh tidtix ka daux haktiex in mai grawng ang koe siyiex tang kaux lheu khaing Siyiex tix kaux khaing heue. 5 Grawh grawng nawh viang koe pa kok mawh siyiex ka daux raoma ang ah, phan ang mawh nan ka piang haktiex ang ah, mawh tete, koe siyiex pa yuh nan tom nie mai simiang pa yuh nan tom nie, 6 Ka ex koe ngie Siyiex tix kaux khaing, pa mawh Keeing Cao, can pa koe kuceu khawmuik hoik lih mawh ka daux Nawh Cao, ex kawx mawh son Nawh heue. Koe ngie Simiang tix kaux khaing, pa mawh Yesux Khrit, can pa koe ku ceu khawmuik hoik lih mawh kheu Nawh mai ex kawx lih mawh kheu Nawh heue. 7 Pui khawmuik hoik koe krax tawng yung ka grawng an ang mawh, pui tix blah viang kix hoik tawng grawng riang grang tom yam in kawx, yam ih ceu pa hoik tan ka riang grang, kix kawn keud ce grawng pa dex mai riang grang mai kheu dee chix keud chix tawng kix iak riang, kix seeing brai sipiag heue. 8 Pa ih tak sang kieh ex koe plakngai ka Siyiex ang mawh. Phan ex ang ih, ex ang lai nie lheu caox, phan ang mawh nan, phan ex ih, ex ang lai nie lheu mhawm heue. 9 Rien rhawm tix, yuh ka mawx ceu pa koe akhwang pex ti yuh, tak ang lih mawh pa sideeing ka pa iak riang khankix heue. 10 Grawh grawng nawh phan pui yaox maix pa koe krax tawng ngawm neung ti sawm ka daux nyiex vad riang grang, phan nawh iak riang rao, dee chix keud chix tawng nawh, tak sang nie baox kwa ti ih ceu pa tan ka riang grang ang mawh lie? 11 Phan mawh nan, kaw pa iak riang, pa mawh puxaik pa hoik yum Cao Khrit son nawh, hoek krax laux leeing kheu krax tawng maix heue. 12 Kheu phit ka puxaik khankix yuh nan, pex kieh dee chix keud chix tawng kix mat, yam iak riang nawh mai pex phit ka Cao Khrit sipiag heue. 13 Phan pa ih kieh puxaik aux sideeing kah, aux tak ang ih nex leeing ju, son ang aux sang kieh puxaik tix sideeing kah heue.

9

1 Aux ang mawh pui ploi lie? Aux ang mawh kawncau pa ting lie? Aux ang bax yaox ka Simiang ex Yesux lie? Ang pex mawh kaing aux ka daux Simiang lie? 2 Viang aux ang mawh kawncau pa ting ka pui tang kaux kawx, phan mawh ka pex aux tom mawh tete heue. Grawh grawng nawh pa ot pex daux Simiang, mawh cum grawng mawh aux kawncau pa ting heue. 3 In mawh lox pa sang tieb tie aux ka kix pa chawk cheng ka aux grawng in heue. 4 Ex ang koe akhwang ti pon ih pon nyaux lie? 5 Ex ang koe akhwang ti pon viex ka moeng tix lai ling, pa mawh pui yum rhawm, awm kawncau pa ting pa deuk khankix mai pux Simiang khankix mai Kephax lie? 6 Phan ang mawh nan, mawh aux mai Banabax ngie, pa ang koe akhwang ti ang yuh kaing lie? 7 Pui naing mawx sax ih mau tokaux tix, ti yuh kaing pui naing? Mawh mawx pa sum sipeem plix siiet mai ang ih ka plix nawh? Phan ang mawh nan, mawh mawx pa liang cub yung mai ang ih rawm teeih cub yung an? 8 Aux ah ceu in khankix hawt ka been kawn pui lie? Phan ang mawh nan, lox lai beenli kawx, ang lai ah nang nan lie? 9 Grawh grawng nawh hoik tiiem ti deuh yuh nin ka daux lai beenli Mose, "Maix tak ang jup jheeh mawie ka jhup yam dig nawh nghox lih." Siyiex keud ngie ka son mawie lie? 10 Phan ang mawh nan ah Nawh ka son ex lie? Mawh heue, hoik tiiem ka son ex, mawh kheu kaw pa thai ma khaw ti thai ka daux krax keud pot jun pot mai kaw pa pah nghox, khaw ti pah ka daux krax keud pot jun pot, ti sang pon ih nyum nghox cie tix heue. 11 Phan ex hoik rhuat ceu pa dex mai khuan son pex, phan ex pon ti vawg ceu pa dex mai nex nham, mawh grawng pa ting lie? 12 Phan pui tang kaux koe akhwang ti ting ka piang pex, ex nie lheu koe ang mawh lie? Ex ang lai shiao ka akhwang an, ex hoik gun yeung ku ceu khawmuik, son ang ex lai sang kieh raw ka lox bwan gaux rhawm Cao Khrit heue. 13 Ang pex tawng grawng kix pa yuh kaing cau kaing soi pa dex mai been pa singax khankix, pon ti ih ceu pa koe ka daux nyiex bwan mai kix pa yuh kaing kia ka khu dee tan, rom ti pon nyum pa tan cie kix tau mai khu dee tan lie? 14 Awm an Simiang kawx hoik ciak ti kieh kix pa sidiex gau lox buan gaux rhawm, pon ti eei ju kix ka lox bwan gaux rhawm heue. 15 Aux ang lai shiao ka akhwang ceu in tix ceu kawx, aux ang tiiem ceu inkix sonsang kieh pex yuh nan ka aux, grawh grawng nawh phan aux yum nie lheu mhawm son aux khaing pa kieh pui tix kaux kawx kieh ceu pa yaw aux ka in mawh pa giex going heue. 16 Pa sidiex gau aux lox bwan gaux rhawm ang koe dee yaw tix kah, kheu hoik tum piang aux mai phan ang sidiex ang doh pon. Phan aux ang sidiex gau lox bwan gaux rhawm aux tak sang pon pa kha rhawm heue. 17 Grawh grawng nawh phan aux tang koe rhawm tix sang yuh nin, aux koe bwanson heue. Phan aux ang koe rhawm ti yuh mai yuh, aux hoik yuh kaing kawncau pa priex, pa hoik tawx pong ka aux heue. 18 Phan mawh nan, bwanson aux mawh pa yuh ka mawx? Mawh nin heue, aux tak sang kieh lox bwan gaux rhawm mawh pa pon giex pa ang uik ngawh mai aux tak ang phlat shiao akhwang pa koe aux ka daux lox bwan gaux rhawm tom uik heue. 19 Viang aux hoik mawh pui ploi khaing pui khawmuik kawx, aux hoik kieh tokaux tix mawh siliex ka khawmuik, son sang nie lheu pon aux pui tom nie heue. 20 Ka pui Yudax, aux hoik lih mawh awm pui Yudax, son sang pon aux ka pui Yudax khankix heue. Ka kix pa ot greem lox lai beenli, viang aux ang ot greem lox lai beenli kawx, aux hoik lih mawh awm pui pa ot greem lox lai beenli, son sang pon aux ka kix pa ot greem lox lai beenli heue. 21 Ka kix pa ang koe lox lai beenli aux hoik lih mawh awm pui pa ang koe lox lai beenli, viang ang aux mawh pa ang koe lox lai beenli Mose, viang mawh nan aux ot greem lox lai beenli Cao Khrit. Kheu son sang pon aux ka kix pa ang koe lox lai beenli heue. 22 Ka pa iak riang rao, aux hoik lih mawh pa iak riang rao, sonsang pon aux ka pa iak riang rao khankix heue. Aux hoik lih mawh kuceu khawmuik, ka pui khawmuik, sonsang pon kieh aux pui tix blah hoek krax taoh heue. 23 Aux yuh kuceu khawmuik ka son lox bwan gaux rhawm, sonsang pon aux ti mawh pa rom ti pon ka lox bwan gaux rhawm heue. 24 Pex ang tawng lie? Kix pa silah paox tix to, to khawmuik, viang mawh nan pa pon totaix mawh ngie tix kaux khaing. Mawh kheu nan to heue, sonsang pon pex totaix. 25 Pui ku kaux, pa cheu paox tix ka daux ceu pa klieh priex rhawm tix ka daux ku ceu khawmuik heue. Pa yuh kix nan, kix yuh sonsang pon mhok khri pa chix laux leeing, viang mawh nan ex yuh sonsang pon mhok khri pa ang chix laux leeing heue. 26 Mawh kheu nan aux ang to awm pa keud jee keud blaong mai pa klah aux, aux ang klah awm klah ka bhawm heue. 27 Aux tap ka tokaux tix, sonsang kieh mawh siliex, phan ang mawh nan khaix hoik sidiex aux ka pui tang kaux, ha tokaux aux kox sang mawh pa tik vud heue.

10

1 Puxaik khankix eue, aux ang mie ti kieh pex mawh pa ang tawng, grawh grawng tax du ex khawmuik hoik ot greem paiawm mai khawmuik hoik hu preeng ka rawm sigrit sigra, 2 grawng khawmuik hoik cubcom ka Mose, ka daux paiawm mai ka daux rawm sigrit sigra, 3 grawng khawmuik hoik yaox ti ih pa ih khuan tix ceu khaing, 4 grawng khawmuik hoik yaox ti nyaux rawm nyaux khuan tix ceu khaing, grawh grawng nawh kix yaox ti nyaux khaing rang khuan pa hawt khaix kix mai rang an mawh Cao Khrit heue. 5 Siyiex ang khaw rhawm ka kix plak nie, grawh grawng nawh hoik kieh kix laux leeing ka daux tiagtu heue. 6 Ceu in khankix hoik mawh riang mhai rug ka ex, yuh ka mawx son ang ex sang ghoing ka ceu pa caox khankix, awm pa hoik ghoing kix kah heue. 7 Paw vi lih mawh pui pa krub riang grang, awm hoik lih mawh kix tix blah. Awm hoik tiiem ti deuh ah nin, "Pui khankix ngawm ti ih mai nyaux mai kaoh ti yuh krax klieh heue." 8 Paw kieh ex phit vao, awm hoik phit vao kix tix blah mai hoik goh ti yum ra mheen mai loe rheng ka daux tix singaix khaing. 9 Paw kieh ex cheu ti yaox ka Simiang, awm hoik cheu kix ti yaox tix blah mai laux leeing ka tawm taix siuing khankix. 10 Paw salao awm hoik salao kix tix blah mai laux leeing ka tawm taix cao pa yuh laux heue. 11 Ceu in khankix hoik lih ti kieh mawh riang mhai rug ka son kix mai hoik tiiem ti deuh grawng khankix son sang gau ka ex, pa mawh pui pa dee sidah bawg yam ju khankix, hoik hoek ka piang heue. 12 Mawh kheu nan kieh kaw pa ce nawh cung, rien rhawm tix phan ang mawh nan, ha nawh kox goh heue. 13 Krax nyaw glaw ang lai hoek ka piang pex tix ceu kawx pa ang kawn pui pon kham kah, Siyiex mawh pa kaux sijax, pa tak ang kieh pex yaox krax nyaw glaw, pa lheu khaing pa pon pex ti kham, viang mawh nan tau mai krax nyaw glaw, tak sang kieh koe khawm krax dee chix luan kah, sonsang pon pex ti kham ka krax nyaw glaw heue. 14 Mawh kheu nan, pui pa moh aux khankix eue, to khaing ceu pa krub riang grang awx. 15 Aux sikah ka pex, awm pa mawh pex pui pa tawng pa yung, pex keud prawng ti yaox grawng pa krai aux heue. 16 Kawk bwanson pa nawb ex bwan kah, mawh sijax mukheu pa dex mai nham Cao Khrit ang mawh lie? Blah pa sivit ex kah, mawh sijax mukheu pa dex mai tokaux Cao Khrit ang mawh lie? 17 Mawh kheu ex pa mawh pui hun, ih ka blah an tix lon khaing, ex tom mawh blah tix lon khaing, tokaux tix mu khaing heue. 18 Jhak ka ceu pui Isarelax pa khaw mai nex nham heue. Kix pa ih pa tan, mawh pa yuh paox pie mai khu dee tan ang mawh lie? 19 Phan mawh nan pa ah aux mawh pa yuh ka mawx? Sang ah, ceu pa tan ka riang grang khankix, mawh tix ceu ceu, phan ang mawh nan riang rao mawh tix ceu ceu lie? 20 Ang lai mawh nan, ceu pa tan pui tang ceu khankix, mawh pa tan ka phi caox mai ang lai mawh pa tan ka Siyiex. aux ang rhawm kieh pex yuh paox pie mai phi caox khankix heue. 21 Pex ang pon ti nyaux ka kawk Simiang mai ka khawm kawk phi caox khankix, pex ang pon ti ih ka pheen Simiang mai ka khawm pheen phi caox khankix heue. 22 Phan ang mawh nan ex cheeik ti kieh Simiang boh rhawm rhi kah lie? Ex nie lheu ting riang khaing Nawh Cao lie? 23 Koe akhwang ti pon yuh ku ceu khawmuik, to mhawm ku ceu khawmuik ang mawh. Koe akhwang ti pon yuh ku ceu khawmuik, to mawh ku ceu khawmuik pa chix kieh ting lhaong ang mawh? 24 Paw kieh pui tix kaux kawx sawg bwanson son tokaux tix, kieh nawh sawg son pui tang kaux heue. 25 Can pa coh ka daux lah, ih awx mai paw chawk cheng ka tidtix, kheu son dee chix keud chix tawng tix heue. 26 "Grawh grawng nawh kawn pui haktiex mai can pa koe ka daux nawh mawh cie Simiang heue." 27 Phan pui tix kaux kaux pa ang yum rhawm ghaok ka pex mai phan pex mie ti hu, can pa deuh sivoe pex ih awx mai paw chawk cheng ka tidtix, kheu son dee chix keud chix tawng tix heue. 28 Viang mawh nan phan pui tix kaux kaux ah nin ka maix "In mawh pa hoik tan ka riang grang," paw vi ih, ka son kaw pa hoik krai an mai kheu son dee chix keud chix tawng heue. 29 Dee chix keud chix tawng, pa ah aux, ang lai ah ka cie maix viang mawh nan ah ka cie tang kaux an heue. Kheu lai prawng ca ka akhwang aux ka dee chix keud chix tawng pui tang kaux? 30 Phan aux yaog yaw bwanson mai ih, yuh ka mawx lai ah lox caox grawh grawng aux, ka grawng ceu pa hoik yaogyaw aux bwanson kah? 31 Mawh kheu nan pex ih ang ah, nyaux ang ah, pex yuh ceu patix ang ah, yuh sonsang koe min plakngai Siyiex kah heue. 32 Paw vi kieh mawh dee sideeing, ka son pui Yudax khankix ang ah, ka son pui Helasax khankix ang ah, ka son ceucao Siyiex ang ah heue. 33 Awm tokaux aux kawx, yuh son sang khaw sang caw ka rhawm pui khawmuik, ka daux kuceu khawmuik mai ang lai sawg bwanson son tokaux tix, viang mawh nan sawg bwanson son pui tom nie, son sang hoek kix krax taoh heue.

11

1 Mawh kheu nan kieh pex mawh pa hawt jawh ti yuh khaix aux, awm tokaux aux kawx, mawh pa hawt jawh ti yuh ka Cao Khrit heue. 2 Aux yaog yaw ka pex, mawh kheu doh keud pex ka aux ka daux ku ceu khawmuik mai kheu giex tom cong ka lox been pa hoik tawx aux ka pex khankix heue. 3 Aux simie ti kieh pex tawng, grawng kaing simex ku kaux mawh Cao Khrit mai kaing bun mawh simex mai kaing Cao Khrit mawh Siyiex heue. 4 Simex kaux pui mawx ang ah, yam rawg bwan, phan ang mawh nan yam ah lox jhai, phan tawb kaing tix, mawh pa yuh pa ang yung yi ka kaing tix heue. 5 Bun kaux pui mawx ang ah, yam rawg bwan, yam ah lox jhai, phan ang tawb kaing tix ka man tawb, mawh pa yuh pa ang yung yi ka kaing tix. Grawh grawng nawh, awm mawh tix ceu khaing mai ang lai siyox khaing hoik khlao nawh kaing tix heue. 6 Grawh grawng nawh phan bun ang tawb kaing tix ka man tawb, kieh nawh rhip ti tik ka khawm hauk kaing nawh, phan pa hoik rhip hauk kaing, phan ang mawh nan pa hoik khlao kaing mawh pa kaig tua ka son bun, kieh nawh tawb kaing tix ka man tawb heue. 7 Grawh grawng nawh, simex tom ang khaw ti tawb kaing tix ka man tawb, kheu mawh nawh riang pakpeung mai min plakngai Siyiex, bun mawh min plakngai simex heue. 8 Grawh grawng nawh simex ang lai lih mawh khaing bun, bun hoik lih mawh khaing simex heue. 9 Viang mawh pa phan pa yuh ka simex kawx, ang lai mawh son bun, hoik phan hoik yuh bun, ka son simex heue. 10 Mawh kheu jao in bun khaw ti koe mhai ka piang kaing nawh, grawng ot nawh greem sibrawm mex tix, kheu kawncau Siyiex khankix heue. 11 Ka daux Simiang bun mawh pa tang tiah khaing simex ang mawh, viang simex kawx ang mawh pa tang tiah khaing bun heue. 12 Grawh grawng nawh awm bun hoik lih mawh khaing simex, viang simex kawx lih mawh kheu bun. Viang mawh nan ku ceu khawmuik mawh, pa mawh khaing Siyiex heue. 13 Tokaux pex prawng ca ti yaox, phan bun pa ang tawb kaing tix ka man tawb mai rawg bwan ka Siyiex khaw lie? 14 Viang been pa lak tawng pui kawx gau ka pex, grawng phan simex koe hauk kaing pa lang mawh pa yuh min plakngai nawh laux ang mawh lie? 15 Phan bun koe hauk kaing pa lang, mawh min plakngai ka nawh, mawh kheu hoik tawx hauk kaing ka nawh, tang man tawb heue. 16 Phan pui tix kaux kaux koe rhawm ti sang thiang ka grawng been in, viang ex mai khawm ceucao Siyiex khankix kawx ang lai koe been pa yuh nan heue. 17 Pa tawx aux lox tawm in, ang mawh sonsang yaogyaw ka pex. Mawh kheu pa khrawm pex paox tix ang mawh sonsang nie lheu mhawm, mawh sonsang nie lheu caox heue. 18 Grawng phao ka yam khrawm pex daux ceu cao, aux mhong grawng lih koe krax tang gwieh pex paox tix mai aux kub yum rhawm ka ceeix heue. 19 Grawh grawng nawh tak lai koe cub pa tang keud ka daux pex, sonsang sidawng kix pa mawh pa mhawm ka daux pex heue. 20 Mawh kheu nan viang pex krawk khrawm paox tix ka daux tix dah khaing kawx, ang lai mawh son sang ih Priex bo Simiang. 21 Grawh grawng nawh kaux pui mawx kaux pui an tang grux ih priex bo tokaux tix, tix kaux kaux cai rhawm mai tang kaux yoek kah heue. 22 Kheu, ang pex koe nyiex son dee sang ih, sang nyaux lie? Phan ang mawh nan pex nieb yuh ti ang nab yam ka ceu cao Siyiex mai yuh ti kieh kix pa ang koe tidtix kaig tua kah lie? Aux tak sang ah ka mawx ka pex grawng in? Aux tak sang yaog yaw pex kah lie? Aux ang lai yaog yaw pex kah heue. 23 Grawh grawng nawh, ceu pa hoik tawx hoik pong aux ka pex, mawh pa hoik pon aux khaing Simiang. Pa mawh grawng pa teei Simiang Yesux blah tix lon, ka daux sawm pa tik pa tawx ka Nawh, 24 khaix hoik yaog yaw Nawh bwanson, Nawh sivit blah an ah nin, "Teei, ih, in mawh tokaux Aux, pa hoik sivit son pex, yuh ceu in son sang doh keud ka Aux heue." 25 Awm an Nawh Cao teei ka khawm kawk, khaix priex bo ah nin, "Kawk in mawh sijax mukheu pa khraox ka daux nham Aux, yuh yuh nin awx, pex nyaux miex bawg ang ah, son sang doh keud ka Aux heue." 26 Grawh grawng nawh pex ih ka blah in mai nyaux ka kawk in miex bawg ang ah, pex jhi grawng pa yum Simiang, tom sang hoek Nawh Cao heue. 27 Mawh kheu nan kaux pui mawx ang ah, pa ih ka blah mai nyaux ka kawk Simiang, ka daux krax pa ang keung, tak sang mawh pa phit ka tokaux mai nham Simiang heue. 28 Kieh pui chawk ka tokaux tix ka ha, khaix hoik yuh nan kieh nawh ih ka blah mai nyaux ka kawk heue. 29 Grawh grawng nawh kaw pa ih mai pa nyaux, ih mai nyaux krax prawng ciyang ka piang tokaux tix tiru, phan nawh ang tawng ang yaox ka Tokaux An heue. 30 Mawh kheu jao in pui tom nie, tom koe krax iak riang mai krax saux nyia, mai yum kah heue. 31 Viang mawh nan phan ex chawk cheng ka tokaux tix rahsee, ex tak ang yaox krax pa prawng ca heue. 32 Viang mawh nan, yam yaox ex pa prawng ca khaing Simiang Siyiex, mawh Simiang pa sivied ti gau ka ex, son ang ex hoek krax pa prawng ciyang phimap tau mai pui haktiex khankix heue. 33 Mawh kheu nan, puxaik aux khankix eue, yam krawk khrawm pex paox tix ti sang ih, tix kaux lai tix kaux krox ka paox tix awx. 34 Phan pui tix kaux kaux cai rhawm, kieh nawh sawm ka nyiex tix ha, yuh ka mawx son pa khrawm pex paox tix, tak ang mawh pa kieh pex pon krax prawng ciyang heue. Can pa deuk khankix, aux hoek lai mawx ang ah, aux tak kawie cox yam an heue.

12

1 Puxaik khankix eue, aux ang rhawm kieh pex mawh pa ang tawng ka grawng totaix pa dex mai khuan khankix. 2 Pex tawng grawng yam mawh pex pui tang ceu, lak keud ti yuh ka mawx ang ah, tom hoik tok pex hu ka riang grang pa aw pa ang chix sikah yuh nan heue. 3 Mawh kheu nan aux tom kieh pex tawng, grawng pui tix kaux kawx pa sikah ka daux Khuan Siyiex ang lai ah, "Yesux mawh pa jhax lawg," mai pui tix kaux kawx ang chix ah, "Yesux mawh Simiang," phan ang mawh ka daux Khuan Singax Singeh heue. 4 Koe totaix tom haoh ceu, Khuan Cao koe ngie tix kaux khaing heue. 5 Koe kaing pa cau pa soi tom haoh ceu mai Simiang mawh tix kaux khaing heue. 6 Koe kaing yuh tom haoh ceu, Siyiex mawh tix kaux khaing, pa mawh Cao pa yuh ku ceu khawmuik, ka daux khawmuik heue. 7 Ka kaux pui mawx kaux pui an, hoik tawx ceu pa plak jhi Khuan Cao, sonsang pon bwanson heue. 8 Grawh grawng nawh, tawx gumlox pingnya ka tix kaux kheu Khuan Cao mai tawx gumlox pa tawng ka tang kaux, awm pa khaw mai Khuan an tix mu khaing heue. 9 Ka tang kaux tix kaux tawx krax yum rhawm ka daux Khuan Cao an tix mu khaing mai ka tang kaux tix kaux tawx totaix ti sang chix kieh jhawm saux moi, ka daux Khuan Cao an tix mu khaing, 10 ka tang kaux tix kaux tawx pa chix yuh kaing sibrawm mai ka tang kaux tix kaux tawx pa chix krai lox jhai, ka tang kaux tix kaux tawx pa chix cheu ti tawng ka khuan khankix, ka tang kaux tix kaux tawx ceu pa chix tawng lox ceu pa tang pa siyox khankix tom nie ceu mai ka tang kaux tix kaux tawx ceu pa chix teei lih dee bleeh lox ceu pa tang pa siyox khankix heue. 11 Ceu in khawmuik mawh pa yuh Khuan tix mu khaing mai gwieh ti tang tawx ka kaux pui mawx kaux pui an awm pa khaw mai alo Nawh heue. 12 Grawh grawng nawh, awm mawh tokaux tix mu khaing mai koe kraung pakpeung tom nie mai can kraung grang tokaux khawmuik pa koe tom nie, mawh tokaux tix mu khaing, Cao Khrit kawx awm an heue. 13 Grawh grawng nawh hoik mawh ka daux Khuan tix mu khaing ex khawmuik pa hoik cubcom ka daux Tokaux tix mu khaing, viang mawh pui Yudax ang ah, pui Helasax ang ah, viang mawh siliex ang ah, pui ploi ang ah mai hoik kieh khawmuik nyaux ka Khuan tix mu khaing heue. 14 Grawh grawng nawh tokaux ang joeng mawh ngie kraung grang tix mu khaing, mawh tom nie heue. 15 Phan caong ah, "Mawh kheu ang aux mawh taix, ang aux lai dex mai tokaux," mawh kheu ah nan ang nawh dex mai tokaux lie? 16 Phan yhaok ah, "Mawh kheu ang aux mawh ngai, aux ang dex mai tokaux," mawh kheu ah nan ang nawh dex mai tokaux lie? 17 Phan tokaux khawmuik mawh ngai, pa chix mhong tak koe dee mawx? Phan tokaux khawmuik mawh pa chix mhong, pa chix ngheut tak koe dee mawx? 18 Yam in Siyiex hoik ciak ti deuh can kraung grang an ku mu ka daux tokaux, awm pa khaw caw rhawm Nawh heue. 19 Lheu khaing an phan kraung grang khankix khawmuik hoik mawh ngie kraung grang tix mu khaing, tokaux tak koe dee mawx? 20 Yam in koe kraung grang tom nie, viang mawh nan koe tokaux tix mu khaing heue. 21 Ngai ang pon ah ka taix, "Aux ang lo ka maix," phan ang mawh nan kaing kawx ang pon ah ka caong, "Aux ang lo ka maix," heue. 22 Ang lai mawh nan, kraung grang pa mawh awm grang pa iak riang khankix, mawh pa nie lheu lo heue. 23 Ka kraung pakpeung tokaux khankix, pa ce ex mawh pa yawm min plakngai, ex nie lheu ting tawx min plakngai ka khankix heue. Kraung grang ex pa ang nyawm ti jhak khankix, mawh pa nie lheu nyawm ti jhak heue. 24 Kraung pakpeung ex pa nyawm ti jhak khankix, ang lai koe dee lo kah, Siyiex hoik klao hoik kleuk tokaux tau mai tawx min plakngai ka kraung grang pa cud kah, 25 yuh ka mawx son tak ang lai koe dee ang khaw mai pa tang gwieh paox tix, viang mawh nan sonsang chix ra lai keud ti kia ngien ka paox tix, awm paox tix heue. 26 Phan kraung grang tix mu yaox krax kham krax geu, kraung grang khawmuik kawx kham geu tau mai kraung grang an heue. Phan ang mawh nan, phan tix mu pon min plakngai, kraung grang khawmuik kawx gaux rhawm tau mai kraung pakpeung an heue. 27 Pex mawh tokaux Cao Khrit mai tang mawh kraung pakpeung ka Nawh heue. 28 Siyiex hoik ciak ti deuh ka daux ceucao, phao ka tix ceu, ka kawncau pa ting khankix mai ra ceu tix ceu, cao jhai khankix mai loe ceu tix ceu, sara cao gau khankix, khaix an, kaing sibrawm khankix, khaix an, totaix pa kieh jhawm saux moi khankix mai pa teem khankix mai pa bung pa giex kaing khankix mai pa chix tawng ka lox ceu pa tang pa siyox khankix tom nie ceu heue. 29 Mawh kawncau pa ting khawmuik lie? mawh cao jhai khawmuik lie? mawh sara cao gau khawmuik lie? mawh pa yuh kaing sibrawm khawmuik lie? 30 Koe totaix pa chix kieh jhawm saux moi khawmuik lie? Chix sikah ka lox ceu pa tang pa siyox khankix khawmuik lie? Chix teei dee bleeh lox lih khawmuik lie? 31 Nied ti simie ka totaix, pa nie lheu ting khaing paox tix khankix awx. Viang mawh nan aux tak jhi pex yaox krax pa nie lheu lang teung mhawm heue.

13

1 Viang aux chix sikah ka lox pui khankix mai ka lox kawncau Siyiex khankix kawx, phan ang koe krax moh krax rhawm, aux hoik lih mawh awm lox brax tawng, phan ang mawh nan awm lox luah chiang heue. 2 Viang aux koe totaix pa chix krai lox jhai mai tawng ka pa raux pa mox khawmuik mai ka krax tawng khawmuik kawx mai viang aux koe krax yum rhawm ti sang chix gah ka gawng khankix kawx, phan ang koe krax moh krax rhawm, aux mawh pa ang koe bwanson tidtix heue. 3 Viang aux gwieh ti tawx kraung aux, ti tawx pui ih kawx mai viang aux tawx tokaux tix, ti sang kieh gleeing ka ngu, phan ang koe krax moh krax rhawm ang koe bwanson ka son aux tidtix heue. 4 Krax moh krax rhawm kienie, mawh pa chix gun chix yeung tom lang mai chix yuh bwanson. Krax moh krax rhawm ang lai chix ghoing kah, Krax moh krax rhawm ang lai yaw ka tokaux tix mai ang lai ting rhawm, 5 Ang lai nieb pon yuh pa ang khaw, ang lai sawg bwanson son tokaux tix, ang lai song rhawm rhi, ang lai keud lai sawn grawng pa caox caig, 6 Ang lai gaux rhawm ka daux krax pa ang rahsee, viang mawh nan chix gaux rhawm ka daux pa mawh pa meh. 7 Tawb kheem ka kuceu khawmuik, yum rhawm ka ku ceu khawmuik, keud pot jun pot ka kuceu khawmuik mai chix gun yeung ka kuceu khawmuik heue. 8 Krax moh krax rhawm kienie, ang chix jud jai, viang koe lox jhai khankix kawx, kix tak sang grai grhup heue. Viang koe pa chix ka lox ceu pa tang pa siyox khankix kawx, tak sang jud jai heue. Viang koe krax tawng kawx, tak sang grai grhup heue. 9 Grawh grawng nawh pa tawng ex ang lai grum naog mai pa krai ex lox jhai ang lai grum naog, 10 Yam hoik hoek ceu pa grum naog, tak sang kieh pa ang grum naog an grai grhup heue. 11 Yam mawh aux kawn nyawm, aux sikah awm kawn nyawm, aux keud awm kawn nyawm mai krax keud krax sawn aux awm kawn nyawm heue. Yam in kheu hoik riex ju aux, aux hoik tik ka ceu pa dex mai kawn nyawm heue. 12 Yam in ex yaox ngie vuvi ka daux siliak khaing, viang mawh nan, yam an tak sang yaox ka pakngai taw pakngai heue. Pa tawng aux yam in ang lai grum naog, viang mawh nan yam an aux tak sang grum tawng, awm pa hoik tawng ka aux heue. 13 Yam in ca kawn koe, krax yum rhawm, krax keud pot jun pot mai krax moh krax rhawm, in loe ceu mai ka daux ceu in khankix, mawh krax moh krax rhawm pa nie lheu ting heue.

14

1 Hawt leue ka krax moh krax rhawm, viang mawh nan nied ti mie ka totaix pa dex mai khuan khankix, viang mawh nan pex nie lheu mie ti sang pon pa chix ah lox jhai awx. 2 Grawh grawng nawh kaw pa sikah ka lox ceu pa ang pui tawng, ang lai sikah ka kawn pui, viang mawh nan sikah ka Siyiex, mawh kheu ang pui tix kaux kawx chix nghiet kah heue. Nawh ah ceu pa raux pa mox ka daux khuan heue. 3 Kaw pa krai lox jhai, sikah ka kawn pui, son sang ting lhaong son sang sidiex gau mai sonsang nyawm rhawm nyawm rhi kah heue. 4 Kaw pa sikah ka lox pa ang pui tawng, kieh ngie tokaux tix ting lhaong khaing, kaw pa krai lox jhai kieh ceu cao ting lhaong heue. 5 Aux koe rhawm ti sang kieh pex chix sikah ka lox ceu pa tang siyox khankix, viang mawh nan aux nie lheu koe rhawm ti sang kieh pex chix krai lox jhai heue. Grawh grawng nawh kaw pa chix krai lox jhai nie lheu ting khaing kaw pa chix sikah ka lox ceu pa tang siyox khankix, phan nawh ang plak jhi dee bleeh, son sang ting lhaong ceu cao kah heue. 6 Puxaik khankix eue, phan aux hoek ka pex mai sikah ka lox ceu pa tang siyox khankix, aux chix koe bwanson son pex yuh ka mawx? Phan aux ang lai sikah ka pex ka krax pa plak jhi pex yaox, phan ang mawh nan ka krax tawng, ka krax pa krai lox jhai, ka krax pa gau heue. 7 Awm an ceu pa ang koe ju pa chix luah lox, pa mawh pi lawk leh ang ah, phan ang mawh nan ting ang ah, phan lox pa luah kix ang koe dee tang, chix tawng grawng lox pa phlu pi, phan ang mawh nan lox pa tah ting, mawh lox pa yuh ka mawx lie? 8 Viang mawh teet tawng kawx phan luah lox pa ang sidawng, mawh mawx pa sang khre tokaux tix son naing. 9 Awm an pex kawx phan pex ang ah lox pa yie ti nghiet kah, chix tawng ka lox pa krai an yuh ka mawx? Grawh grawng nawh pex tak sang sikah ngie ka bhawm heue. 10 Tee koe ceu lox sikah tom nie hun ceu piang ca haktiex in mai ceu mawx ceu an koe dee bleeh nang heue. 11 Mawh kheu nan phan aux ang tawng dee bleeh lox an, aux tak mawh pui tang ceu ka kaw pa sikah an mai kaw pa sikah an kawx tak mawh pui tang ceu ka aux heue. 12 Mawh kheu nan viang pex kawx, viex khawm rhawm tix, ti mie ka totaix pa dex mai khuan khankix, nied ti sawg ti sang nie lheu grum ka daux ceu an khankix, pa sang kieh ceu cao ting lhaong kah heue. 13 Mawh kheu nan kieh kaw pa sikah ka daux lox ceu pa tang siyox, rawg bwan, sonsang chix krai nawh dee bleeh heue. 14 Grawh grawng nawh phan aux rawg bwan ka daux lox ceu pa tang pa siyox, mawh khuan aux pa rawg bwan, viang mawh nan krax tawng aux ang koe bwanson heue. 15 Tak sang yuh ka mawx? Aux tak sang rawg bwan ka daux khuan mai ka daux khawm krax tawng heue. Aux tak sang ah lox rhax ka daux khuan mai ka daux khawm krax tawng yung heue. 16 Phan ang mawh nan, phan maix nawb bwan ka daux khuan, kaw pa ang chix, chix ah "Amen," yam yaog yaw maix bwanson, kheu ang nawh tawng ka lox pa ah maix yuh ka mawx? 17 Grawh grawng nawh pa yaog yaw maix bwanson mhawm tete, pui tang kaux ang chix ting lhaong kheu heue. 18 Aux yaog yaw ka bwanson Siyiex, kheu sikah aux ka lox ceu pa tang siyox khankix, nie lheu khaing pex khawmuik heue. 19 Phan mawh daux ceu cao, aux nie lheu koe rhawm ti sang sikah ngie lox phwan gum ka krax tawng aux, sonsang gau ka pui tang kaux khankix khaing pa sikah lox ceu pa tang siyox tix mheen gum heue. 20 Puxaik khankix eue, paw kieh mawh kawn nyawm ka daux krax pa tawng pex, ka daux krax pa caox caig kieh pex mawh kawn ngie, ka daux krax pa tawng kieh mawh pa hoik riex ju awx. 21 Ka daux lai beenli hoik tiiem ti deuh ah nin, "Aux tak sang sikah ka pui ceu in ka dak ceu pa tang pa siyox mai ka siyieb jheeh pui pa tang pa ang meed ang tawng, viang yuh nan kawx kix ang nghiet ka Aux, Simiang ah nan heue." 22 Mawh kheu nan lox ceu pa sikah pa tang siyox khankix, mawh son sang mawh mhai ka kix pa yum rhawm khankix ang mawh, mawh son kix pa ang yum rhawm heue. Pa ah lox jhai mawh mhai son kix pa yum rhawm khankix mai ang mawh ka son kix pa ang yum rhawm heue. 23 Mawh kheu nan yam krawk khrawm pui ceu cao paox tix khawmuik, phan khawmuik lai sikah ka lox ceu pa tang pa siyox khankix mai phan pui pa ang chix, phan ang mawh nan pa ang yum rhawm hoek ti laig, kix tak sang ah, "Yhot pex heue." Ang mawh lie? 24 Phan khawmuik ah lox jhai mai phan pui tix kaux pa ang yum rhawm, phan ang mawh nan pa ang chix, hoek ti laig, pui ceu cao khawmuik plak jhi phimap nawh mai chawk cheng ti prawng ca ka nawh heue. 25 Ceu pa hoik mox ka daux rhawm rhi nawh, plak kieh sidawng Mawh kheu nan nawh tak sang goh gup, ti krub Ka Siyiex ah nin, "Siyiex ot ka sinax pex tete heue." 26 Puxaik khankix eue, tak sang yuh ka mawx? Yam krawk khrawm pex paox tix, kaux pui mawx kaux pui an tang koe, lox rhax yaogyaw, koe lox pa sang gau kah, koe pa sang plak jhi kieh yaox, koe pa sikah ka lox ceu pa tang pa siyox, koe pa teei lih dee bleeh heue. 27 Phan pui tix kaux kaux sikah ka lox ceu pa ang pui tawng, kieh sikah, ra kaux mai paw doh kieh lheu khaing loe kaux, kieh sikah tix kaux lai tix kaux mai kieh tix kaux krai dee bleeh heue. 28 Phan ang koe cao pa krai dee bleeh, kieh kaw pa sikah yuh nan yawg tix ka daux ceu cao mai kieh nawh sikah ka tokaux tix mai ka Siyiex khaing heue. 29 Kieh cao jhai khankix sikah ra kaux, phan ang mawh nan loe kaux mai kieh pui tang kaux khankix keud ti chix gwieh chix prawng ka lox an heue. 30 Phan plak jhi kieh yaox tix ceu ceu ka tang kaux yam ngawm nawh, kieh kaw phao ka yawg tix heue. 31 Grawh grawng nawh, can pex khawmuik pon ti krai lox jhai, tix kaux lai tix kaux, son khawmuik sang pon ti gau kah mai son sang pon pa nyawm rhawm khawmuik heue. 32 Khuan cao jhai khankix, mawh pa cu pa ot greem cao jhai khankix. 33 Grawh grawng nawh, Siyiex ang lai mawh Siyiex pa kieh sung sang, mawh Siyiex pa nhim heue. Awm ka daux ceu cao pui pa singax khankix khawmuik, 34 Kieh bun khankix yawg tix ka daux ceu cao khankix awx. Grawh grawng nawh ang kix koe akhwang ti sikah, kieh kix mawh pa ot greem, awm pa khaw mai lox pa krai lai beenli heue. 35 Phan kix mie ti gau ka tix ceu ceu, kieh kix chawk ka mex tix, ka nyiex, grawh grawng nawh phan bun sikah ka daux ceu cao mawh pa kaig tua heue. 36 Mawh pa yuh ka mawx? Khex kaoh gumlox Siyiex khaing pex lie? Phan ang mawh nan hoik hoek ngie ka pex nong lie? 37 Phan pui tix kaux kaux ce tokaux tix mawh cao jhai, phan ang mawh nan pa dex mai khuan, kieh nawh rieb ti teei grawng ceu pa tiiem aux ka pex khankix mawh lox tawm Simiang heue. 38 Phan pui tix kaux kaux mawh pa ang tawng, kieh nawh ca kawn mawh pa ang tawng awx. 39 Mawh kheu nan, puxaik aux khankix eue, nied ti mie ti chix krai lox jhai, mai paw kiex tieb tie ka pa sikah ka lox ceu pa tang siyox khankix. 40 Viang mawh nan kieh yuh kuceu khawmuik awm pa khaw mai pa nyawm ti jhak heue.

15

1 Lheu khaing an, puxaik khankix eue, aux baox kieh pex tawng grawng lox bwan gaux rhawm pa hoik sidiex aux ka pex, pex kawx pa hoik rieb ti teei mai dee ot dee cung pex kah, 2 kheu pa mawh dee sang pon hoek pex krax taoh, phan pex giex tom kaux cong ka gumlox pa hoik sidiex aux ka pex mai phan pex ang hoik nieb yum rhawm kah giex going heue. 3 Grawh grawng nawh ka sivoe paox tix khawmuik, aux hoik tawx pong ka pex, pa mawh ceu pa hoik pon aux, grawng pa hoik yum Cao Khrit son phimap ex, awm pa khaw mai lox phuk lai sigang khri, 4 grawng pa hoik sipaung Nawh mai pa hoik kieh Nawh Cao deeh kaoh, khaix daux loe singaix, awm pa khaw mai lox phuk lai sigang khri, 5 grawng pa hoik lih bleeh Nawh ka Kephax mai khaix an ka kix kao ra kaux. 6 Khaix an Nawh Cao lih bleeh ka puxaik pa lheu phwan yieh tix dom neh mai kix plak nie kawn deuk kawn koe tom yam in, viang mawh nan tix blah hoik laig it heue. 7 Khaix an Nawh lih bleeh ka Yakop mai khaix an ka kawncau pa ting khawmuik. 8 Ghoik khaix khawmuik Nawh Cao lih bleeh khawm ka aux, pa mawh kawn pa keh daux bawg yam pa ang khaw heue. 9 Grawh grawng nawh aux mawh pa nie iak ka daux kawncau pa ting khankix, pa ang keung ti kok mawh kawncau pa ting, mawh kheu aux hoik tuktiak ka ceu cao Siyiex heue. 10 Mawh kheu bwanson Siyiex aux pon ti mawh, awm pa mawh aux mai bwanson cie Nawh pa hoik tawx ka aux, ang lai kieh mawh pa giex going, viang mawh nan aux hoik nied ti nie lheu blon yuh khaing kix khawmuik, viang mawh nan ang mawh aux pa yuh, mawh bwanson Siyiex pa ot tau mai aux pa yuh heue. 11 Mawh kheu nan viang mawh aux ang ah, mawh kix ang ah, ex sidiex nang yuh nin mai pex hoik yum rhawm kah yuh nin heue. 12 Yam in phan hoik sidiex grawh grawng pa deeh kaoh im Cao Khrit khaing krax yum, ka daux pex tix blah lai ah, "Ang lai koe ceu pa deeh kaoh im khaing krax yum," yuh ka mawx? 13 Phan ang lai koe pa dee kaoh im khaing krax yum, pie ka Cao Khrit kawx, ang lai kieh deeh kaoh heue. 14 Phan ang nyang kieh Cao Khrit deeh kaoh, ceu pa sidiex ex mawh pa ang koe bwanson, pa yum rhawm pex kawx ang koe bwanson heue. 15 Lheu khaing mawh nan, ex hoik mawh cao pa kham mhai rug pa ang mawh meh grawng Siyiex, mawh kheu ex hoik kham mhai rug grawng Siyiex, ka grawh grawng Nawh Cao hoik kieh Cao Khrit deeh kaoh, pa mawh Kaw pa ang Nawh Cao deeh kieh kaoh, phan ang lai kieh pa yum deeh kaoh kah tete. 16 Grawh grawng nawh phan ang lai kieh pa yum deeh kaoh kah, pie ka Cao Khrit kawx, ang lai kieh deeh kaoh kah heue. 17 Phan ang nyang kieh Cao Khrit deeh kaoh, krax yum rhawm pex ang koe bwanson tidtix mai pex ca kawn ot ka daux phimap tix heue. 18 Lheu khaing an, kix pa hoik laig it ka daux Cao Khrit khankix kawx, hoik laux leeing heue. 19 Phan ex hoik keud pot jun pot ngie ka daux Cao Khrit khaing ka daux ju in, ex mawh pa khaw tix caux rhawm kah, nie lheu khaing can pui khawmuik heue. 20 Yam in, hoik kieh Cao Khrit deeh kaoh im khaing krax yum, pa mawh plix pa liang ti plix khaing daux kix pa hoik laig it heue. 21 Grawh grawng nawh, mawh kheu krax yum hoik hoek kheu pui tix kaux, viang ceu pa deeh kaoh im khaing krax yum kawx, hoik hoek kheu Pui tix kaux heue. 22 Grawh grawng nawh, awm yum pui khawmuik ka daux Adam, awm an tak sang kieh pui im khawmuik ka daux Cao Khrit heue. 23 Kaux pui mawx kaux pui an, yam caw glhawk nawh, Cao Khrit pa mawh plix liang, khaix an yam hoek Nawh Cao, kix pa mawh cie Cao Khrit tak sang pon ti im heue. 24 Khaix an hoek bawg yam sidah, yam tak sang tawx pong Nawh Cao meung an ka Siyiex, pa mawh Keeing Cao, khaix hoik yuh Nawh laux pak lawg ka ceu pa giex kaing khawmuik mai min plakngai mai sibrawm khawmuik heue. 25 "Grawh grawng nawh, Nawh tak sang giex kaing tom sidah hoik kieh Nawh pui pa koeng ka Nawh khawmuik, ot greem caong Nawh heue." 26 Ceu pa koeng pa tak sang yuh laux ghoik khaix paox tix mawh krax yum heue. 27 "Grawh grawng nawh, Nawh Cao tak sang teei ti deuh can pa koe ku ceu khawmuik ka greem caong Nawh heue. " Yam ah Nawh Cao, " Tak sang teei ti deuh can pa koe ku ceu khawmuik ka greem Nawh," hoik sidawng grawng ang lai ah ka Kaw pa mawh Cao pa kieh can ku ceu khawmuik ot ka greem Nawh heue. 28 Khaix hoik kieh can ku ceu khawmuik ot ka greem Nawh, khaix an tokaux Kawn Cao kawx, tak sang ot ka greem Cao pa hoik kieh can ku ceu Siyiex ku ceu khawmuik, ka daux khawmuik heue. 29 Phan ang mawh nan kix pa cubcom tang pui pa hoik yum, tak sang yuh ka mawx? Phan raux ang kieh pui yum deeh kaoh kah tete, kix lai cubcom rawm ka tang kix yuh ka mawx? 30 Mawh kheu patix, ex kawx, lai yaox krax lhat krax caox ku nari? 31 Puxaik khankix eue, aux ca yum ku singaix, kheu pa yaw rangdi ka grawng pex, pa koe aux ka daux Simiang ex Yesux Khrit heue. 32 Phan aux hoik lah paox tix ka totiag hawt been pui ka veng Efesux, koe bwanson son aux yuh ka mawx? Phan pa yum ang lai deeh kaoh, "Kieh ex ih mai nyaux, grawh grawng nawh pasax ex tak yum heue." 33 Paw kieh pie ka tokaux tix, ceu pa yuh paox pie ka pa caox caig, chix kieh been pa yuh pa mhawm laux heue. 34 Siduad ti priex rhawm tix ka pa rahsee mai paw lai kawn baox yuh phimap, grawh grawng nawh pui tix blah ang lai tawng grawng Siyiex. Pa ah aux nan, mawh sonsang kieh pex kaig tua heue. 35 Viang mawh nan tix kaux kaux tee sang chawk ah nin, "Tak sang kieh pa yum deeh kaoh yuh ka mawx? yam deeh hoek kix, kix tak sang koe tokaux pa yuh ka mawx?" 36 Maix pa mawh pui daox eue, phan simie pa rhuat maix ang laux, nawh ang lai chix im chix kuah. 37 Yam rhuat maix simie maix ang lai rhuat tokaux pa tak sang mawh sax, viang mawh nan rhuat ngie simie giex, viang mawh simie nghox ca ang ah, simie tang ceu ang ah, 38 Mawh Siyiex heue, pa tawx tokaux ka simie an, awm pa khaw caw rhawm Nawh mai pa tang tawx tokaux ka simie ceu mawx simie ceu an heue. 39 Ceu nex khawmuik ang lai mawh ngie nex tix ceu khaing, koe nex pui tix ceu mai nex totiag tix ceu mai nex sim tix ceu mai nex kax tix ceu heue. 40 Viang tokaux raoma khankix kawx koe nang mai tokaux haktiex khankix kawx koe nang, viang mawh nan min plakngai tokaux raoma mawh tix ceu mai min plakngai tokaux haktiex mawh tang ceu heue. 41 Singaix koe min plakngai tix ceu mai khix koe min plakngai tang ceu mai simuing khankix kawx koe min plakngai tang ceu, ang mawh ngie nan, pie min plakngai simuing mawx simuing an kawx tang siyox kah heue. 42 Ceu pa deeh kaoh im khaing krax yum kawx awm an heue. Yam rhuat nawh mawh ka daux pa cux sium, yam deeh kieh nawh kaoh mawh ka daux pa ang chix cux sium heue. 43 Yam rhuat nawh mawh ka daux pa ang koe min plakngai, yam deeh kieh nawh kaoh mawh ka daux min plakngai heue. Yam rhuat nawh mawh ka daux pa iak riang, yam deeh kieh nawh kaoh mawh ka daux sibrawm heue. 44 Yam rhuat nawh mawh tokaux pa dex mai nex nham, yam deeh kieh nawh kaoh mawh tokaux pa dex mai khuan heue. Phan koe tokaux pa dex mai nex nham, viang tokaux pa dex mai khuan kawx koe heue. 45 Awm hoik tiiem ti deuh ah nin, " Adam pa mawh pui ka sivoe paox tix, hoik lih mawh ju pa im. " mai Adam pa mawh khaix, lih mawh khuan pa tawx ju pa im heue. 46 Ang lai mawh pa dex mai khuan ka sivoe paox tix, mawh pa dex mai nex nham phao ka mai khaix tom mawh pa dex mai khuan heue. 47 Pui pa koe ka sivoe paox tix an, kheu hoik mawh khaing tiex, tom mawh pa dex mai haktiex heue. Pui ra kaux tix kaux an, hoik mawh khaing raoma heue. 48 Kix pa dex mai haktiex khankix, awm kaw pa dex mai haktiex an heue. Viang kix pa dex mai raoma kawx, awm Kaw pa dex mai raoma an heue. 49 Awm hoik koe ex riang grang pa dex mai haktiex, viang riang grang pa dex mai raoma kawx, ex tak sang koe heue. 50 Puxaik khankix eue, aux ah nin, mawh kheu nex mai nham ang lai pon tix cie sin meung Siyiex, viang pa cux sium kawx, ang lai pon ti cie sin pa ang chix cux sium heue. 51 Jhak heue, aux tak sang krai ka pex, lox pa raux pa mox tix ceu. Ex can pa koe khawmuik tak ang lai laig it, ex khawmuik tak sang tieh loh, 52 Ka daux ti vud khaing, ka daux ti khiep ngai khaing, yam phlu teet tawng bawg ghoik khaix heue. Grawh grawng nawh tak sang phlu teet tawng mai tak sang deeh kieh pa yum kaoh, ka pa ang chix cux sium mai ex tak sang tieh sang loh kah heue. 53 Grawh grawng nawh ceu pa cux sium in tak sang ceep ka pa ang chix cux sium mai ceu pa chix yum in tak sang ceep ka ceu pa ang chix yum heue. 54 Viang mawh nan khaix ceu pa chix cux sium in hoik ceep ka ceu pa ang chix cux sium mai ceu pa chix yum in hoik ceep ka ceu pa ang chix yum, yam an tak sang mawh awm lox pa hoik tiiem ti deuh ah nin, "Ceu pa pex hoik bleet ka krax yum uik heue." 55 "Pa yum eue, pa pex maix koe dee mawx? Pa yum eue, nyeeig maix koe dee mawx?" 56 Nyeeig pa yum mawh phimap mai sibrawm mawh lox lai beenli heue. 57 Yaog yaw bwanson Siyiex, pa hoik tawx ex pex kheu Simiang ex Yesux Khrit heue. 58 Mawh kheu nan puxaik pa moh aux khankix eue, kaux cong, paw kieh chix gah greed mai nied ti yuh kaing Simiang ku jheeng jheeng, mawh kheu tawng pex grawng kaing pa yuh pex ka daux Simiang ang lai mawh pa giex going heue.

16

1 Grawh grawng krax tan son pui pa singax khankix, aux hoik tawx lox ka ceucao Kalatix khankix, pex kawx yuh awm an awx. 2 Daux aliah ngaix, ngaix tix, kieh pex kaux mawx kaux an gwieh ti een mai priex ka kraung tix, awm pa pon nawh ti koe, son ang lai koh pa tan yam hoek aux heue. 3 Yam hoik hoek aux, pex khaw caw rhawm ka pui mawx ang ah, aux tak sang ploi kix viex lai mai teei ti tawx bwanson pa tan pex ka veng Yerusaliem heue. 4 Viang mawh nan aux kawx khaw ti hu, kix tak sang hu tau mai aux heue. 5 Yam hu preeng aux ka meung Makedonix lai mawx ang ah, aux tak sang hoek ka pex, grawh grawng nawh aux tak sang hu preeng ka meung Makedonix heue. 6 Aux tee ot tau mai pex tix vong, phan ang mawh nan yaox ti ot tom sidah yam kuat yung, son sang pon hu tawx pex aux ka krax dee hu aux dee mawx ang ah heue. 7 Grawh grawng nawh ang aux mie ti yaox pex yam hu krax yam in, mawh kheu aux keud pot jun pot ti sang yaox ti ot mai pex tix vong, phan Simiang tawx akhwang heue. 8 Aux tak sang ot ka veng Efesux tom hoek yam pawie Pientekote. 9 Grawh grawng nawh hoik paoh siviex pa ting, dee sang pon aux ti yuh mai pui pa sang kieh sang raw kawx haoh hun heue. 10 Phan Timose hoek, yuh son sang ot nawh tau mai pex ka daux pa ang koe krax lhat graung awx, grawh grawng nawh, nawh kawx yuh kaing jhaw Simiang, awm yuh aux heue. 11 Mawh kheu nan paw kieh pui tix kaux kawx nieb pon yuh ka nawh awx. Pex ploi nawh phlat hoek ka aux nhim mhawm mhawm, kheu aux ca keud pot son sang hoek nawh tau mai puxaik khankix heue. 12 Phan mawh grawng Apawlux pa mawh puxaik, aux hoik khyox khaw nawh tom nie son sang hoek nawh ka pex tau mai puxaik khankix mai ang nawh doh rhawm hu ceeix kawx yam in, nawh tak sang hoek, phan nawh pon bawg yam ti sang pon hoek sax heue. 13 Pau ti jhak heue, cung kaux cong ka daux krax yum rhawm, yuh kieh awm simex, kieh ting riang awx. 14 Can pa yuh pex khawmuik kieh yuh ka daux krax moh krax rhawm heue. 15 Puxaik khankix eue, aux khyox khaw ka pex, pex hoik tawng grawng geh nyiex Sathephanax, pa mawh plix pa liang khankix ka daux meung Akhayax mai grawng hoik deuh kix tokaux tix, yuh son pui pa singax khankix, 16 Pex kawx cu nghiet ka kix pa awm khankix mai ka khawm ku kaux pa rom ti yuh kaing mai pa nyhap pa mao kah heue. 17 Aux gaux rhawm kheu hoik hoek Sathephanax mai Fawtunatux mai Akhayakhux, grawh grawng nawh ceu pa deuk pa cud pex, kix hoik baox tiien grum heue. 18 Grawh grawng nawh kix hoik kieh rhawm aux mai khawm rhawm pex nyawm rhawm kah heue. Mawh kheu nan yuh ti tawng mhawm mhawm ka pui pa yuh nan heue. 19 Ceu cao meung Asix khankix nawb ka pex heue. Akulax mai Prisikilax nawb ka pex tom nie ka daux Simiang, tau mai khawm ceu cao pa koe ka daux nyiex kiex heue. 20 Puxaik khawmuik nawb ka pex tix kaux lai tix kaux nawb ka paox tix ka pa ngheut pa singax awx. 21 Aux Pawlux tiiem lai nawb ka pex, ka taix tokaux tix heue. 22 Phan pui tix kaux kaux ang moh ka Simiang, kieh nawh mawh pa jhax lawg kah awx. Simiang ex eue hoek heue. 23 Kieh bwanson Simiang Yesux Khrit ot mai pex liak. 24 Kieh krax moh krax rhawm aux ot mai pex khawmuik ka daux Yesux Khrit. Amen.