1 Chronicles

1 Chronicles

¹ Adam, Sheta, Enok, ² Ka-inax, Mahalelax, Zarit, ³ Enawk, Mathusalax, Lamek, ⁴ Noax, Semax, Hamax mai Yaphiet. ⁵ Kawn simex Yaphiet, khankix mawh Gawmax Magawgax, Madie, Yavan, Tubalax, Meshiet mai Tirat Ashakeniet heue. ⁶ Kawn simex Gawmax, khankix hoik mawh Ashakeniet, Diphat mai Tawgama heue. ⁷ Kawn simex Yavan khankix mawh Elisha Tasu, Kitim mai Rawdanim heue. ⁸ Kawn simex Hamax khankix mawh Kusha, Mizareng, Puta mai Khanan heue. ⁹ Kawn simex Kusha khankix mawh Sebax Havilax, Sabata, Ramax mai Shatekha heue. kawn simex Ramax mawh Shebax mai Dedan heue. ¹⁰ Kusha hoik baox pon kawn simex tix Neyawdax; nawh jah tix mawh pui pa kied ting riang rao tix kaux piang haktiex heue. ¹¹ Nizareng hoik pon kawn simex tix Ludim, Anamim, Lehabim, Naptuhim, ¹² Patarusim, Khasaluhim, ceu pui Philitix khankix mawh pa kaox khaing doeh Kaptorim heue. ¹³ Khanan hoik pon kawn Ai tix Sidon mai khaix an baox pon kawn simex tix Heta; ¹⁴ Ceu pui Yebusix, ceu pui Amawrix mai ceu pui giragashix khankix, ¹⁵ Ceu pui Hiwix ceu pui Akix mai ceu pui Sinix, ¹⁶ Ceu pui Avadix, ceu pui Zemarix mai ceu pui Hamatix khankix heue. ¹⁷ Kawn simex Semax khankix mawh Elam, Ashux, Aphazat, Ludax, Aram, Uzax, Hulax, Geta mai Meshiet khankix heue. ¹⁸ Aphazat hoik pon kawn simex tix Salax mai Salax pon kawn simex tix Heba. ¹⁹ Hebax koe kawn simex ra kaux, ceu kaux an tix kaux mawh Phalek, grawh grawng nawh, ka daux baux singaix ju nawh kix hoik gwieh ka haktiex mai ceu kaux pux nawh mawh Yoktan heue. ²⁰ Yoktan pon kawn simex tix khankix pa mawh Alamodak, Shelat, Hazamaviet, Yerax, ²¹ Hadawram, Uzalax, Dikalax, ²² Ebalax, Abimelax, Shebax, ²³ Awphirax, Havilax mai Yawbap, inkix mawh kawn simex Yoktan khawmuik heue. ²⁴ Shemax, Aphazat, Salax, ²⁵ Hebax, Halek, Ragau, ²⁶ Seraok, Nakhaw, Terax, ²⁷ mai Abram pa mawh Abraham heue. ²⁸ Kawn simex Abraham khankix mawh Icak mai Ishamelax heue. ²⁹ Inkix mawh cub doeh nyiex ma kix kawn Ai Ishamelax, mawh Natayok mai khaix an hoik mawh Kedax, Adabelax, Mibasan, ³⁰ Mishamax, Duma, Masa, Hadat, Temax, ³¹ Yeturax, Naphisha mai Kedama khankix heue. Inkix mawh cub kawn simex Ishamelax heue. ³² Yam in cub kawn simex pa hoik keh khaing Keturax pa mawh moeng iak Abraham, mawh Zemaran, Yokshan, Medan, Midian, Ishabiet mai Shua khankix heue. kawn simex Yokshan, khankix mawh Shebax mai Dedan heue. ³³ Kawn Midian khankix mawh Epha, Epharax, Hanok, Abidax mai Eladax heue. Inkix khawmuik mawh kawn praix Keturax heue. ³⁴ Abraham pon kawn simex tix Icak heue. Kawn simex Icak mawh Esaw mai Isarelax heue. ³⁵ Kawn simex Esaw khankix mawh Eliphat, Yoelax, Yushax, Yalam mai Korax heue. ³⁶ Kawn simex Eliphat khankix mawh Teman, Awma, Zepho, Gatam mai Kenat mai khaing Timna, nawh pon kawn simex tix Amaliet heue. ³⁷ Kawn smex Yoelax khankix mawh Nahat, Zerax, Shamma mai Miza heue. ³⁸ Kawn simex Sirax khankix mawh Lawtan, Shawbax, Zibeon, Anax, Dishon, Eza mai Dishan heue. ³⁹ Kawn simex Lawtan, khankix mawh Hawrix mai Hawman; Timna, mawh nan Lawtan heue. ⁴⁰ Kawn simex Shawbax khankix, mawh Alavan, Manahat, Ebalax, Shephaw mai Awnam heue. Kawn simex Zebion, khankix mawh Ayax mai Anax heue. ⁴¹ Kawn simex Anax mawh Dishon, kawn simex Deshon khankix mawh Hamran, Eshaban, Itaran mai Heran heue. ⁴² Kawn simex Eza khankix mawh Bilahan, Zavan mai Akan heue. Kawn simex Dishan mawh Uzax mai Aram heue. ⁴³ Inkix mawh simiang pa kwang ka haktiex Edom, sivoe ang simiang tix kaux kawx nyang bax koe ti kwang piang ceu pui Isarelax khankix Belax kawn simex Bawrax mawh simiang mai ceu kaux veng ot nawh mawh Dinhaba heue. ⁴⁴ Khaix hoik yum Belax, Yawbap kawn simex Zerax khaing baoh haktiex Bawzarax, hoik plud ti kwang ka dah dee ot nawh heue. ⁴⁵ Khaix hoik yum Yawbap, Husham pa kaoh khaing haktiex pui Teman, hoik plud ti kwang ka dah dee ot nawh heue. ⁴⁶ Khaix hoik yum Husham, Hadat, kawn simex Bedat, pa plud ka pui Midian ka daux tong Mawbax, hoik plud ti kwang ka dah dee ot nawh heue. Ceu kaux veng ot nawh mawh Avit heue. ⁴⁷ Khaix hoik yum Hadat, Samalax pa kaoh khaing baoh haktiex Masariet deeh plud ti kwang ka dah dee ot nawh heue. ⁴⁸ Khaix hoik yum Samalax, Shawlax pa kaoh khaing haktiex pui Rehobot pa ot hawt rawm klawng, hoik plud ti kwang ka dah dee pa ot nawh heue. ⁴⁹ Khaix yum Shawlax, Balax Hanan kawn simex Akhabaw hoik deeh plud ti kwang ka dah dee ot nawh heue. ⁵⁰ Khaix hoik yum Balax Hanan, Hadat hoik plud ti kwang ka dah dee ot nawh mai ceu kaux veng ot nawh mawh veng paw heue. Ceu kaux moeng nawh mawh Mahetabalax pa mawh kawn bun Matariet, kawn bun Mezahat heue. ⁵¹ Hadat hoik yum heue. cub cao kaing ting haktiex pui Edom mawh cao kaing ting Timna, cao kaing ting Alavax, cao kaing ting Yetiet, ⁵² cao kaing ting Ahawlibamax, cao kaing ting Ela, cao kaing ting Pinon, ⁵³ cao kaing ting Kenat, cao kaing ting Teman, cao kaing ting Mibazax, ⁵⁴ cao kaing ting Magadilax mai cao kaing ting Iram heue. Inkix mawh cub cao kaing ting haktiex pui khawmuik heue.

¹ Cub kawn simex Isarelax khankix mawh Rubin, Simion, Lewix, Yudax, Zebulun, ² Dan, Yosiep, Benyamin, Napthalix, Gat mai Asha heue. Jah Khaing Yudax Tom Hoek Ka Davit ³ Kawn simex Yudax khankix mawh Erax, Awnan mai Shelax heue. Kawn simex inkix loe kaux mawh pa keh son nawh khaing kawn bun Shua pa mawh ceu pui Khanan heue. Kawn Ai Yudax pa mawh Erax, hoik yuh pa caox caig ka plak sivoe ngai Siyiex mai Nawh Cao hoik pah nawh heue. ⁴ mun nawh Tama hoik keh Pheret mai Zerax, ka son nawh heue. Kawn simex Yudax khawmuik koe phwan kaux heue. ⁵ Kawn simex Pharek khankix mawh Hezaron mai Hamulax. ⁶ Kawn simex Zerax khankix mawh Zimarix, Ethan, Heman, Kalakawlax mai Darax, kix khawmuik koe phwan kaux heue. ⁷ Kawn simex Khamix, pa mawh Akhan, pa tawx krax kha rhawm ka Isarelax mai pa lud ka daux ceu pa jhax lawgheue. ⁸ Kawn simex Ethan, mawh Azarix. ⁹ Kawn simex Hezaron, khankix mawh Yeramelax, Ram mai Kherubie heue. ¹⁰ Ram pon kawn simex tix Aminadat mai Aminadat baox pon kawn simex tix Nashon pa mawh cao bung cao thong kawn praix ceu pui Yudax khankix heue. ¹¹ Nashon pon kawn simex tix Sawlamon mai Sawlamon pon kawn simex tix Bawzax. ¹² Bawzax pon kawn simex Obet mai Obet pon kawn simex tix Yessie, ¹³ Yessie pon kawn Ai tix Eliabax mai Abinadat mawh kawn Nyi mai Simax mawh kawn Sam, ¹⁴ Natanelax mawh kawn Sai mai Radie mawh kawn Ngox. ¹⁵ Awzim mawh kawn Log mai Dawix mawh kawn Ciet heue. ¹⁶ Nan kix mawh Zeruya mai Abigelax mai kawn simex Zeruya mawh Abishie, Yuabax mai Asahelax khankix loe kaux heue. ¹⁷ Abigelax keh Amasa mai keeing Amasa, mawh Yeta, pa mawh ceu pui Ishamelax heue. ¹⁸ Kaliep kawn simex Hezaron, hoik pon kawn praix tix khaing moeng nawh Azubax mai Yerot, kawn simex kiex Yesha, Shobap mai Adon khankix heue. ¹⁹ Khaix hoik yum Ashubax, Kaliep deeh teei ti moeng Epharat, pa hoik keh Hurax ka son nawh, ²⁰ Hurax, pon kawn simex Urix mai Urix pon kawn simex tix Bizarelax heue. ²¹ Khaix an Hezaron, hu laig ti ot tau mai kawn bun Makhirax koe ju tigliah num mai bun an keh Segop ka son nawh, ²² Segop pon kawn simex tix Ya irax, pa hoik koe veng khankix tixnga loe veng ka daux haktiex Gilat heue. ²³ Pui Geshurax mai pui veng Aram teei veng baoh haktiex Ya irax khaing kix, tau mai veng Kenat mai khawm veng pa koe hawt baoh an khawmuik tigliah veng heue. Inkix khawmuik mawh ceu cub kawn simex Makhirax, pa mawh keeing ka Gilat heue. ²⁴ Khaix hoik yum Hezaron, ka daux veng Kasiep, Epharat, moeng Hezaron pa mawh Abiyax hoik keh Ashurax, pa mawh keeing ka Tekaw, ka son nawh heue. ²⁵ Kawn simex Yeramelax, pa mawh kawn Ai Hezaron kawn Ai nawh mawh Ram mai khaix an Bonax, Oren, Ozem mai Ahiyax khankix heue. ²⁶ Yeramelax koe moeng tang kaux tix kaux, ceu kaux nawh mawh Atarax; nawh mawh miex ka Onam heue. ²⁷ Kawn simex Ram pa mawh kawn Ai Yeramelax mawh Mazax, Yam in mai Eka khankix heue. ²⁸ Kawn simex Onam mawh Shammie mai Yadax, kawn simex Shamie mawh Nadat mai Abishurax heue. ²⁹ Ceu kaux moeng Abishurax mawh Abihielax mai nawh keh Aban mai Mawlit, ka son nawh heue. ³⁰ Kawn simex Nadat, mawh Seliet mai Appem, Seliet hoik yum mai nawh ang koe kawn heue. ³¹ Kawn simex Appem mawh Ishi mai kawn simex Ishi, mawh Sheshan mai kawn simex Sheshan mawh Alie heue. ³² Kawn simex Yadax pa mawh pux Shammie mawh Yedax mai Yanashan, Yetax hoik yum mai nawh ang koe kawn heue. ³³ Kawn simex Yawnasan khankix mawh Peliet mai Zaza, inkix mawh doeh nyiex ma Yeramelax heue. ³⁴ Shesham ang koe kawn simex mawh ngie kawn bun khaing mai Shesham koe kawncau ceu pui Ejiptux tix kaux, ceu kaux nawh mawh Yaha heue. ³⁵ Sheshan tawx kawn bun tix mex ka Yaha pa mawh kawncau nawh mai nawh keh kawn simex Atie ka son nawh heue. ³⁶ Atie hoik pon kawn simex tix Natan mai Natan hoik pon kawn simex tix Zabat; ³⁷ Zabat hoik pon kawn simex tix Ephalalax mai Ephlalax hoik pon kawn simex tix Obet, ³⁸ Obet hoik pon kawn simex tix Yehu mai Yehu hoik pon kawn simex tix Azarix; ³⁹ Azarix hoik pon kawn simex tix Helet mai Helet hoik pon kawn simex tix Eleasa, ⁴⁰ Eleasa pon kawn simex tix Sisamie mai Sisamie pon kawn simex tix Shalum; ⁴¹ Shalum pon kawn simex tix Yekamix mai; Yekamix pon kawn simex tix Elishama heue. ⁴² Doeh sime ru Kaliep pa mawh pux Yeramelax kawn Ai nawh mawh Mesha, Mesha pa mawh keeing Zipha, Zipha pa mawh keeing Maresha, Maresha pa mawh keeing Hebron heue. ⁴³ Kawn simex Hebron khankix mawh Korax, Tapua, Rekem mai Shemax heue. ⁴⁴ Shemax pon kawn simex tix Raham pa mawh keeing Yokam mai Rekem pon kawn simex tix Shammie heue. ⁴⁵ Kawn simex Shammie mawh Maon mai Maon mawh keeing Biet Zurax heue. ⁴⁶ Epha pa mawh moeng iak Kaliep hoik keh Haran, Moza mai Gaziet; mai Haran hoik pon kawn simex tix Gaziet heue. ⁴⁷ Kawn simex Yadie, khankix mawh Regem, Yotham, Geshan, Peliet, Epha mai Shapha heue. ⁴⁸ Makha pa mawh moeng iak Kaliep, hoik keh Shebax mai Tirahalax heue. ⁴⁹ Nawh hoik baox keh Shapha pa mawh keeing Madamanax, Shevax pa mawh keeing Makhabenax mai Gibe-a heue. Kawn bun Kaliep mawh Akhasa heue. ⁵⁰ Inkix mawh doeh ru Kaliep kawn sime Hurax, pa mawh kawn Epharat, hoik mawh Shawbax, pa mawh keeing Kirayat Yarim, ⁵¹ Salama pa mawh keeing Bietliehiem mai Harep, pa mawh keeing Bietgadax heue. ⁵² Shawbax pa mawh keeing Kirayat Yarim hoik koe doeh sime ru khankix pa mawh Haraw mai cub doeh nyiex ma Manohawt khankix tix plak heue. ⁵³ Deh nyiex Kirayat Ya im khankix mawh pui Itarix pui Putix, pui Shumatix mai pui Misharix heue. Jah khaing pui inkix, hoik lih mawh pui Zoratix mai pui Eshatawlix heue. ⁵⁴ Kawn simex Salamax pa mawh ceu pui Bietliehiem, pa mawh ceu pui Netawphah, ceu pui Atarot Biet Yuabax, ceu pui Manahetix, khankix tix plak mai khawm ceu pui Zorix heue. ⁵⁵ doeh nyiex ma cao pa tiiem lai pa ot ka daux veng Yabiet, khankix mawh pui Tiratix, pui Shimeti mai pui Sukhatix heue. Inkix mawh pui Kenix, pa kaoh khaing Hamat, pa mawh keeing doeh nyiex ma cub pui Rekhap heue.

¹ Inkix mawh kawn simex Davit pa hoik keh ka son nawh ka veng Hebron, kawn Ai nawh mawh Amanon, pa keh khaing Ahinawm pa mawh bun veng Yezerelax; kawn Nyi nawh mawh Dayelax pa keh khaing Abigelax pa mawh bun veng Kharamelax; ² Kawn Sam nawh mawh Apsalom, pa keh khaing Makha, pa mawh kawn bun Talamie Simiang haktiex Geshurax; kawn sai nawh mawh Adoniyax pa keh khaing Hagit; ³ Kawn Ngox nawh mawh Shephatix pa keh khaing Abitalax mai kawn Log nawh mawh Itaram pa keh khaing moeng nawh Egalax heue. ⁴ Inkix liah kaux mawh pa keh son nawh ka daux veng Hebron heue. Nawh kwang tan aliah num mai liah khix mai nawh kwang ka daux veng Yerusaliem tixngoe loe num heue. ⁵ Inkix mawh pa keh son nawh ka daux veng Yerusaliem pa mawh Shammua, Shobap, Natan mai Sawlamon, In pon kaux mawh pa keh khaing Batashebax pa mawh kawn bun Amelax heue. ⁶ Lheu khaing an nawh baox koe kawn simex khankix pa mawh Ibaha, Elishua, Elipaliet, ⁷ Nawgax, Nephiet, Yaphia, ⁸ Elishama, Eliadax mai Elipaliet khawmuik dim kaux heue. ⁹ Inkix mawh kawn simex Davit, pa ang sawn tix tau mai kawn simex pa pon nawh khaing moeng iak tix khankix mai Tama pa mawh nan kix heue. ¹⁰ Kawn simex Sawlamon mawh Rehobom, kawn simex Rehobom mawh Abiyax, kawn simex Abiyax mawh Asa mai kawn simex Asa mawh Yehoshaphat, ¹¹ Kawn simex Yehoshaphat mawh Yoram, kawn simex Yoram mawh Ahaziyax, kawn simex Ahaziyax mawh Yosha, ¹² Kawn simex Yosha mawh Amazix, kawn simex Amazix mawh Azarix mai kawn simex Azarix mawh Yotham, ¹³ Kawn simex Yotham mawh Ahaza, kawn simex Ahaza mawh Hezakiyax, kawn simex Hezakiyax mawh Manashe, ¹⁴ Kawn simex Manashe mawh Amon, kawn simex Amon mawh Yosiyax, ¹⁵ Kawn Ai Yosiyax mawh Yohanan mai kawn Nyi nawh mawh Yehoyakem, kawn Sam nawh mawh Zedekiyax mai kawn Sai nawh mawh Shalum heue. ¹⁶ Kawn simex Yehoyakim mawh Yekhoniyax mai Zedekiyax heue. ¹⁷ Kawn simex Yekhoniyax pa hoik kham ka pa giex laung mawh Shelapelax, ¹⁸ Mai Malakhiram, Pedayax, Shenaza, Yekhamiyax, Hoshama mai Nedabiyax khankix heue. ¹⁹ Kawn simex Betayax mawh Zerubabelax mai Shimix, kawn simex Zerubabelax mawh Meshulam, Hananiyax mai khawm nan kiex Shelomit, ²⁰ Mai tang kaux kawn koe mawh Hashubax, Pohelax, Bedekhiyax, Hasadiyax mai Yushap, Hesiep khankix phwan kaux heue. ²¹ Kawn simex Hananeyax mawh Pelapeyax mai Yeshayax mai cub kawn simex Yeshayax mawh Rephayax, kawn simex Rephayax mawh Anan, kawn simex Anan Obadiyax mai kawn simex Obadiyax mawh Shekhaniyax heue. ²² Kawn simex Shekhaniyax, mawh Shemayax, kawn simex Shemayax mawh Hatusha, Igalax, Bariyax, Neriyax mai Shaphat khankix liah kaux heue. ²³ Kawn simex Neriyax mawh Eliawnie, Hezakiyax mai Azarikam khankix loe kaux heue. ²⁴ Kawn simex Eliawnie mawh Hodayax, Iliaship, Belayax, Akkop, Yohanan, Delayax mai Anane khankix aliah kaux heue.

¹ Kawn simex Yudax khankix mawh Pheret, Hezaron, Khamix, Hurax mai Shawbalax heue. ² Reyax pa mawh kawn simex Shawbax kawx pon kawn simex tix, Yahat mai Yahat pon kawn simex tix Ahumie mai Lahat, inkix mawh doeh nyiex ma paox ru Shuratix heue. ³ Inkix mawh cub kawn simex keeing kix Etham pa mawh Yezerelax, Ishamax mai Idabax mai ceu kaux nan kix mawh Hezelelapawnix; ⁴ mai Penuelax mawh keeing Gedaw mai Eza mawh keeing Husha heue. Inkix mawh cub kawn simex Hurax, pa mawh kawn Ai Epharat pa mawh keeing Bieliehiem heue. ⁵ Ashurax pa mawh keeing Tekaw koe moeng ra kaux pa mawh Helax mai Narax heue. ⁶ Narax keh Asuzam, Hepha, Temanix mai Hahashatarix son nawh, Inkix mawh kawn simex Narax heue. ⁷ Kawn simex Helax khankix mawh Zeriet, Zoha mai Etanan; ⁸ mai Kawzax pon kawn simex tix Anok, Zobelax mai Harom mawh kawn simex doeh nyiex ma Aharelax heue. ⁹ Yabiet nie Lheu koe min khaing puxaik nawh khankix mai miex nawh tom kok ceu kaux nawh mawh Yebiet pa koe dee bleeh pa ah nin, "Mawh kheu kied tuk kied kha aux tix yam keh nawh heue." ¹⁰ Yabiet kok yo ka Siyiex mai ah nin "Maix Cao tak mawh pa nawb bwan piang aux mai kieh mee haktiex dee kwang aux vieh va mai kieh plawng taix Maix cao ot tau mai aux, sonsang priex jhung Maix Cao aux khaing pa caox caig mai sonsang ang aux hoek krax tuk krax kha heue. "Mawh kheu nan Siyiex tawx can ceu pa hoik khyox khaw rawg mhaing nawh khankix heue. ¹¹ Khelop pa mawh pux Sua pon kawn tix Mahirax, pa mawh keeing Eshaton heue. ¹² Eshaton hoik pon kawn tix Biet, Rapha, Pashiea mai Tehinnax pa mawh keeing Iranaha, inkix mawh cub pui Rekha khankix heue. ¹³ Kawn simex Kenat mawh Awtanelax mai Sirayax, kawn simex Awtanelax mawh Hatat mai Mawnawtie, ¹⁴ Mawnawtie pon kawn tix Awpharax, Serayax pon kawn tix Yuabax pa mawh keeing Geharasim, mawh kheu kix hoik mawh pui pa yuh kaing cangmai heue. ¹⁵ Kawn simex Yephunie mawh Kaliep kawn simex Kaliep khankix mawh Irux, Ela mai Namax, kawn simex Ela mawh Kenat heue. ¹⁶ Kawn simex Yahalarelax khankix mawh Zipha, Ziphaha, Tiriyax mai Asarelax heue. ¹⁷ Kawn simex Ezarax khankix mawh Yeta, Meriet, Epha mai Yalon mai moeng Meriet keh Meriam, Shammie mai Ishabax, pa mawh keeing Eshatemaw heue. ¹⁸ Moeng nawh Yehodiyax, hoik keh Yeriet pa mawh Gedaw mai Hebax, pa mawh keeing Sawkhaw mai Yekutilax pa mawh keeing Zanaw heue. Inkix mawh kawn simex pa pon nawh mai Bitiyax pa mawh kawn bun Pharaw pa hoik teei Meriet tix moeng heue. ¹⁹ Kawn simex moeng Hawdiyax pa mawh nan Naham mawh cub keeing Kilax pa mawh pui yaong Gamix mai Eshatemaw pa mawh pui veng Nakha heue. ²⁰ Kawn simex Shimon khankix mawh Anon, Rina, Benhanan mai Tilon mai kawn simex Ishix mawh Sawhiep mai Bensawhiep heue. ²¹ Kawn simex Shelax pa mawh kawn simex Yudax khankix mawh Erax, pa mawh keeing ka Lekha mai Ladax pa mawh keeing Maresha mai khawm doeh nyiex ma Ashabax pui pa yuh kaing taing man khankix; ²² mai khawm Yokhim pa mawh ceu pui Khozebax khankix mai Yosha Saraphax pa kwang ka haktiex Mawbax mai Yashubix, Lehem, in kix mawh grawng pa hoik tiem ti deuh tom didix heue. ²³ Inkix mawh cao pa yuh aw tiex mai kix mawh pui pa ot ka daux veng Netem (dee bleeh mawh khaox im) mai veng Gedelax (deeh bleeh mawh khaox vie lawng) heue. Kix ot tau mai simiang sonsang yuh kaing jhaw nawh heue. ²⁴ Kawn simex Simion khankix mawh Nemoelax, Yam in, Yarit, Zerax mai Shawlax, ²⁵ mai kawn simex Shawlax mawh Shalum, kawn simex Shalum mawh Mibasham mai kawn simex Mibasham mawh Mishamax heue. ²⁶ Kawn simex Mishamax mawh Hamoelax, kawn simex Hamoelax mawh Zakhorax, kawn simex Zakhorax mawh Simix heue. ²⁷ Shimix koe kawn simex kao aliah kaux mai kawn bun liah kaux heue. Viang mawh nan, puxaik nawh khankix ang koe tom nie mai doeh nyiex ma kix ang tie nie kawn awm doeh cub nyiex ma ceu pui Yudax khankix heue. ²⁸ Kix ot ka daux veng Berashebax, veng Mawlada, veng Hazashawlax, ²⁹ Veng Dilaha, veng Ezem, veng Tawlat, ³⁰ Veng Betoelax, veng Hawma, veng Zikalat, ³¹ Veng Biet Makhabok, veng Hzarasusim, veng Biet Birix mai ka daux veng Sharem heue. Inkix mawh veng ot kix daux baux ju kwang Davit ka haktiex heue. ³² nyiex yaong veng ot kix mawh Etham, Ain, Rimmon, Tawkhim mai Ashan, khawmuik phwan veng. ³³ nyiex yaong khankix pa koe hawt vung viang veng in khankix tom singai hoek hawt baoh veng Balax heue. Inkix mawh dee ot dee koe kix mai dee hoik bang kix doeh ru tix khankix, ³⁴ Meshawbap, Yamaliet mai Yawshax, pa mawh kawn simex Amazix, ³⁵ Yawlax mai Yehu, pa mawh kawn simex Yawshibix, Yawshibix pa mawh kawn simex Sereyax, Seleyax pa mawh kawn simex Aselax, ³⁶ Eliamie, Yakawbax, Yeshawhayax, Asayax, Adelax, Yesumilax mai Beneyax khankix, ³⁷ Ziza mawh kawn simex Shiphi, Siphi mawh kawn simex Alalon, Alalon mawh kawn simex Yedeyax, Yedeyax mawh kawn simex Shimirix, Shimirix mawh kawn simex Shemeyax heue. ³⁸ Inkix pa hoik tiem ti deuh ka ceu kaux kix, mawh cao pa thong bungka daux doeh nyiex ma kix mai doeh nyiex ma keeing kix hoik kied haoh hun sigrien sigre heue. ³⁹ Mawh kheu nan, kix hu ka daux krhax laig ka veng Gedo, tom hoek kix ka plak lih singaix khaing daux ngawd, sonsang sawg kix gwang rib riem son cub yung tix khankix heue. ⁴⁰ mai kix hoik yaox dee nie mhawm gwang rib riem mai dee vieh va haktiex, dee yiien yawg mai dee koe krax pa nhim, mawh kheu ceu pui Hamax khankix hoik dawg ot sivoe kix tan heue. ⁴¹ Grawng pa hoik mhai ti deuh ceu kaux in khankix hoik dawg jah tix ka daux baux singaix ju Hezakiyax simiang Yudax mai puing ka nyiex yaong ot kix mai yaox ka ceu pui Meunix khankix baox tan mai yuh kix laux lak pak leeing mai deeh plud ti ot tan tom hoek daux in singaix, mawh kheu mhawm gwang rib riem ka son cub phung yung kix tan heue. ⁴² cub pui Simion tiblah, been phwan yieh kaux hu ka plak gawng Sirax, tau mai cao kaing kix pa mawh Pelatiyax, Nerix, Rephayax mai Ozelax, khankix pa mawh cub kawn simex Ishix heue. ⁴³ Kix phah ka ceu pui Amaliet khankix, pa kawn deuk tix ot baoh an mai pa hoik pon tix klawd glang ka an khankix, kix ot tan tom hoek daux in singaix heue.

¹ Yam in Rubin pa mawh kawn Ai Isarelax viang nawh mawh kawn Ai kawx mawh kheu hoik kieh dee it tum keeing tix seeing brai, sinngao pa caw kawn Ai ti pon khankix hoik mawh pa deeh loe ti tawx ka Yosiep pa mawh kawn simex Isarelax, sonsang ang doeh ru kix lai mawh pa sawn tix mawh kawn Ai pa pon sinngao khankix heue. ² Yudax hoik mawh pa blon piang puxaik nawh khankix, cao pa kwang haktiex tak lih khaing daux nawh; viang mawh nan, sinngao pa pon kawn Ai hoik mawh cie Yosiep heue. ³ Kawn simex Rubin pa mawh kawn Ai Isarelax khankix mawh Hanok, Phalu, Hezaron mai Khamix heue. ⁴ Kawn Ai Yawlax mawh Shemiyax, kawn simex Shemiyax mawh Gawgax, kawn simex Gawgax mawh Shimix, ⁵ Kawn simex Shimix mawh Mikha, kawn simex Mikha mawh Rayax mai kawn simex Rayax mawh Balax, ⁶ Kawn simex Balax mawh Berax, pa hoik teei Tigalat Pilesa, pa mawh simiang Asurix, nawh hu mawh pa giex laung heue. Nawh hoik mawh cao thong cao bung ka ceu pui Rubin khankix heue. ⁷ Yam teei kix carang doeh ru puxaik nawh khankix khaing cao kaing ting ka daux doeh nyiex ma kix mawh Yeyelax mai Zakharix, ⁸ Belax mawh kawn simex Azat, mawh kawn simex Shemax, Shemax mawh kawn simex Yawlax pa ot ka daux veng Araw tom hoek ka veng Nebaw mai veng Balax Mawn heue. ⁹ Kix bang ti ot baoh plak lih singaix tom hoek ka dee laig kix ka daux tiag praok rawm klawng Yobrethix plak in, kheu kied haoh hun tobrie eei kix ka daux haktiex Gilat heue. ¹⁰ Ka daux baux singaix glang im ju Sawlux, kix hoik yuh naing ka pui Hagrax mai pui Hagrax som ka daux taix kix; mai hoik ot ka daux nyiex gox kix pa koe hawt baoh haktiex ankix khawmuik ka plak lih singaix haktiex Gilat heue. ¹¹ Kawn praix Gat khankix ot ka see pui Rubin ka haktiex Bashan, tom hoek ka veng Salakha heue. ¹² Yawlax mawh cao kaing pa ting mai greem nawh mawh Shapham mai khaix an mawh Yanie mai Shaphat pa ot ka haktiex Bashan, ¹³ mai puxaik kix khaing doeh nyiex ma keeing kix, Mikhelax, Meshulam, Shebax, Yawrie, Yakha, Zayax mai Hebax khawmuik aliah kaux heue. ¹⁴ Inkix mawh cub kawn praix Abihelax, Abihelax mawh kawn simex Hurix, Hurix mawh kawn simex Yaraw, Yaraw mawh kawn simex Gilat, Gilat mawh kawn simex Mikhalax, Mikhalax mawh kawn simex Yeshishie, Yeshishie mawh kawn simex Yahadaw mai Yahadaw mawh kawn simex Buza; ¹⁵ Ahix mawh kawn simex, Abadelax mawh kawn simex Gonix mawh cao kaing pa ting khaing daux doeh nyiex ma keeing kix heue. ¹⁶ Cub kix ot ka daux haktiex Gilat, ka daux haktiex nyiex yaong Bashan khankix hawt vung viang haktiex ot pui hun khankix da veng Shalon, plak daux mee haktiex cie kix heue. ¹⁷ Inkix khawmuik hoik mawh carang pa teei ti priex khaing daux ru kix ka daux baux singaix kwang Yerobom simiang Isarelax ka haktiex heue. ¹⁸ Ceu pui Rubin, Ceu pui Gat mai khawm doeh ru Manashe khankix tix plak, pui pa koe rhawm vao rhawm kwa mai pui pa pon giex plah tie naok mai vaig lawm, pa pon puing ka ak mai pa min ka daux naing pa pon hu daux naing khankix hoik koe pon mheen pon rheng liah yieh tigliah kaux heue. ¹⁹ Kix yuh naing ka pui Hagarax, pui Yeturax pui Naphishax mai Nawdat khankix heue. ²⁰ Kix pon krax teem khaing Siyiex, cub ceu pui Hagarax mai can pui pa ot tau mai kix khankix hoik mawh pa ap ti ka daux tawm taix kix heue. Mawh kheu kix kok yo ka Siyiex ka daux biang naing, Nawh Cao nghiet lox rawg kix bwan kheu een kix rhawm tix ka daux Nawh Cao heue. ²¹ Khaix an, kix hoik rhim tix viex tobrie eei kix pa mawh Kala uk phwan mheen mu, yung ra sien phwan mheen mu, la ra rheng mu mai khawm pui kix tix sien kaux. ²² Kheu hoik kied nie goh pui koeng kix tix yum, grawh grawng nawh naing an hoik mawh naing cie Siyiex mai kix ot ka dah dee pa ot kix tom hoek bawg yam mawh kix pa giex laung heue. ²³ Mawh kheu nan, kawn praix doeh ru Manashe khankix tix plak ot ka daux haktiex an, krax pa hu kix jah khaing veng Bashan tom hoek ka veng Balax, Hamon mai ka veng Senira piang gawng Hamon khankix heue. ²⁴ Inkix mawh cao kaing doeh nyiex ma keeing kix, pa mawh Epha, Ishe, Elelax, Azarelax, Yeramix, Hodaviyax mai Yadelax khankix, kix mawh pui ting riang rao pa koe rhawm kwa rhawm vao mai pui pa ao min mai mawh cao kaing khankix ka daux doeh nyiex ma keeing kix heue. ²⁵ Kix ang lai kaux sijax ka Siyiex keeing kix mai hoik lud vao mai siyiex ceu pui pa ot ka daux haktiex an khankix ka pui pa hoik yuh Siyiex laux leeing ka plak sivoe kix heue. ²⁶ Mawh kheu nan, Siyiex ceu pui Isarelax so ka rhawm Pulax pa mawh simiang haktiex Asurix mai Tigalat Pilesa simiang Surix heue. Nawh hoik rhim ti teei ceu pui Rubin ceu pui Gat mai khawm ceu pui Manashe khankix tix plak hu mawh pui pa giex laung, nawh viex kix hu ka veng Halax, veng Habo, veng Harax mai ka hawt rawm klawng Gozan khankix tom hoek daux singaix in heue.

¹ Kawn simex Lewix khankix mawh Deshon, Kawhat mai Merarix heue. ² Kawn simex Kawhat khankix mawh Amaram, Izarax, Hebron mai Zelax heue. ³ Kawn praix Amaram khankix mawh Arun, Mose mai Meriam mai kawn simex Arun khankix mawh Nadat, Abihux, Elaza mai Itama heue. ⁴ Elaza pon kawn tix Phinahat mai Phinahat pon kawn tix Abishua; ⁵ Abishua pon kawn tix Bokkix mai Bokkix pon kawn tix Uzix; ⁶ Uzix pon kawn tix Zerahiyax mai Zerahiyax pon kawn tix Merayok; ⁷ Merayok pon kawn tix Amariyax mai Amariyax pon kawn tix Ahitup; ⁸ Ahitup pon kawn tix Zadok mai Zadok pon kawn tix Ahemaza; ⁹ Ahimaza pon kawn tix Azariyax mai Azariyax pon kawn tix Yohanan, ¹⁰ Yohana pon kawn tix Azariyax nawh mawh pa yuh kaing jhaw Siyiex Cao giex kaing li ka daux nyiex bwan sum Sawlamon, ka daux veng Yerusaliem; ¹¹ Azariyax pon kawn tix Amariyax mai Amariyax pon kawn tix Ahitup; ¹² Ahitop pon kawn tix Zadok mai Zadok pon kawn tix Shalum; ¹³ Shalum pon kawn tix Hilakiyax mai Hilakiyax pon kawn tix Azariyax; ¹⁴ Azariyax pon kawn tix Serayax mai Serayax pon kawn tix Yehozadak. ¹⁵ Yehozadak hu ka daux pa giex laung yam kieh Siyiex pui haktiex Yudax mai pui Yerusaliem khankix hoek ka daux pa giex laung ka daux tawm taix Nebukhaneza heue. ¹⁶ Kawn simex Lewix khankix mawh Geshon, Kawhat mai Merarix heue. ¹⁷ In mawh ceu kaux kawn simex Geshon pa mawh Libanix mai Shimix khankix heue. ¹⁸ Kawn simex Kawhat khankix mawh Amaram, Izaha, Hebron mai Uzelax heue. ¹⁹ Kawn simex Merarix mawh Mahalix mai Mushix kix mawh doeh nyiex ma ceu pui Lewix khankix awm koe doeh nyiex ma keeing kix heue. ²⁰ Kawn simex Goshon mawh Lipanix, kawn simex Lipanix mawh Yahat, kawn Yahat mawh Zimma heue. ²¹ Kawn simex Zimma mawh Joah, kawn simex mawh Ido, kawn simex Ido mawh Zerax kawn simex Zerax mawh Yerarie heue. ²² Kawn simex Kawhat mawh Aminadat, kawn simex Aminadat mawh Korax mai kawn simex Korax mawh Asirax, ²³ Kawn simex Asirax Elakanax, kawn simex Elakanax mawh Ebiasap mai kawn simex Ebiasap mawh Asirax, ²⁴ Kawn simex Asirax mawh Tahat, kawn simex Tahat mawh Urilax, kawn simex Urilax mawh Uziyax, kawn simex Uziyax mawh Shawlax heue. ²⁵ Kawn simex Elakanax mawh Amashie mai Ahimot khankix heue. ²⁶ Kawn simex Ahimot mawh Elakanax, kawn simex Elakanax mawh Zophie, kawn simex Zophie mawh Nahat, ²⁷ Kawn simex Nahat mawh Eliabax, kawn simex Eliabax mawh Yeroham, kawn simex Yeroham mawh Elakanax heue. ²⁸ Kawn Ai Samoelax mawh Yolax mai kawn Nyi nawh mawh Abiyax heue. ²⁹ Kawn simex Merarix mawh Mahalix, kawn simex Mahalix mawh Lebanix, kawn simex Lebanix mawh Simix, kawn simex Simix mawh Uzax, ³⁰ Kawn simex Uzax mawh Simax, kawn simex Simax mawh Hagiyax mai kawn simex mawh Asayax heue. ³¹ Inkix mawh can pui pa hoik laug Davit ti deuh sonsang kia ngiien kix kaing jhaw pa ah lai rax ka daux nyiex bwan Siyiex khaix hoek teug bwan sijax mukheu tan heue. ³² Kix yuh kaing jhaw Siyiex tau mai ah tix lai rhax, ka plak sivoe nyiex gox bwan man bang kum pui hun, tom hoek bawg yam hoik sum simiang Sawlamon ka nyiex bwan Siyiex ka daux veng Yerusaliem mai kix yuh kaing awm bawg yam pa koe beeh glawm cie mawx cie an heue. ³³ Inkix ku kaux mawh pui yuh kaing jhaw Siyiex tau mai kawn simex kix, ka daux kawn simex ceu pui Kawhat khankix koe cao pa rhax lai mawh Heman. Heman mawh kawn simex Yolax, Yolax mawh kawn simex Samoelax, ³⁴ Samoelax kawn simex Yehoram, Yehoram mawh kawn simex Elilax mai Elilax mawh kawn simex Toa, ³⁵ Toa mawh kawn simex Zophax, Zophax mawh kawn simex Elakanax, Elakanax mawh simex Mahat, Mahat mawh kawn simex Amashie, ³⁶ Amashie mawh kawn simex Elakanax, Elakanax mawh kawn simex Yolax, Yolax mawh kawn simex Azariyax, Azariyax mawh kawn simex Zephaniyax, ³⁷ Zephaniyax mawh kawn simex Tahat, Tahat mawh kawn simex Asirax, Asirax mawh kawn simex Ebiasap, Ebiasap mawh kawn simex Korax, ³⁸ Korax mawh kawn simex Ezaha, Ezaha mawh kawn simex Kawhat, Kawhat mawh kawn simex Lewix, Lewix mawh kawn simex Isarelax heue. ³⁹ Haman puxaik Asapha, pa cung ka plak khawn dawm nawh mawh Asapha, pa mawh kawn simex Berakhiyax, Berakhiyax mawh kawn simex Sima, ⁴⁰ Sima mawh kawn simex Mikhalax, Mikhalax mawh kawn simex Baseyax, Baseyax mawh kawn simex Malakhiyax, ⁴¹ Malakhiyax mawh kawn simex Etane, Etane mawh kawn simex Zerax, Zerax mawh kawn simex Adiyax, ⁴² Adiyax mawh kawn simex Ethan, Ethan mawh kawn simex Zimma, Zimma mawh kawn simex Simi, ⁴³ Simi mawh kawn simex Yahat, Yahat mawh kawn simex Geshon, Geshon mawh kawn simex Lewix heue. ⁴⁴ Puxaik kix pa mawh cub kawn simex Merarix, pa ot ka plak khawn gwiex khankix mawh Ethan, Ethan mawh kawn simex Kisix, Kisix mawh kawn simex Abadix, Abadix mawh kawn simex Maluk, ⁴⁵ Maluk mawh kawn simex Hashabiyax, Hashabiyax mawh kawn simex Amazix, Amazix mawh kawn simex Hilakiyax, ⁴⁶ Hilakiyax mawh kawn simex Amazix, Amazix mawh kawn simex Banix, Banix mawh kawn simex Shama, ⁴⁷ Shama mawh kawn simex Mahalix, Mahalix mawh kawn simex Mushix, Mushix mawh kawn simex Merarix, Merarix mawh kawn simex Lewix heue. ⁴⁸ Puxaik kix pa mawh ceu pui Lewix khankix, mawh pa laug tix sonsang yuh kix kaing kuceu daux nyiex gox bwan man ka daux nyiex gox bwan Siyiex heue. ⁴⁹ Arun mai cub kawn simex nawh khankix appong krax tan pa gleeing, piang khu dee tan mai krax tan pa gleeing nyawng bhawng piang khu dee tan dee pa kied singax singe khawmuik mai yuh pa pluat ploi phimap son ceu pui Isarelax, awm gumlox pa hoik tawm Mose pa mawh kawncau Siyiex ka kix khawmuik heue. ⁵⁰ Inkix mawh kawn simex doeh nyiex ma Arun, kawn simex Arun mawh Elaza, kawn simex Alaza mawh Phinahat, kawn simex Phinahat mawh Abishua, ⁵¹ Kawn simex Abishua mawh Bokhi, kawn simex Bokhi mawh Uzix, kawn simex Uzix mawh Zerahiyax, ⁵² Kawn simex Zerahiyax mawh Merayok, kawn simex Merayok mawh Amariyax, kawn simex Amariyax mawh Ahitup, ⁵³ Kawn simex Ahitup mawh Zadok, kawn simex Zadok mawh Ahimaza heue. ⁵⁴ Inkix mawh dee ot dee koe kix, ka mee haktiex pa gwieh kix awm pa hoik pon cawk kix silak, son kawn simex Arun khankix, khaing doeh nyiex ma Kawhat heue. ⁵⁵ Kix hoik pon veng Hebron ka daux haktiex Yudax mai haktiex pa koe hawt rawb rim an heue. ⁵⁶ Viang mawh nan, tong kaung veng mai khawm nyiex yaong khankix kix hoik tawx ka Kaliep kawn simex Yephunie heue. ⁵⁷ Son kawn simex Arun khankix kix hoik tawx veng tix veng khaing daux veng an hankix pa sang to pui khankix ti paung ka pa mawh veng Hebron mai baox pon khawm veng Libanax tau mai haktiex rawb nawh khankix, veng Yatirax, veng Eshatemaw, tau mai haktiex rawb rim nawh khankix, ⁵⁸ Veng Hilin tau mai haktiex rawb rim nawh khankix veng Debirax, tau mai haktiex rawb rim nawh khankix, ⁵⁹ Veng Ashan tau mai haktiex rawb rim nawh khankix mai veng Bietshemiet tau mai haktiex rawb rim nawh khankix heue. ⁶⁰ khaing daux cub cie doeh ru Benyamin khankix, kix hoik tawx veng Gebax tau mai haktiex rawb rim nawh khankix, veng Alamiet, tau mai haktiex pui hun nawh khankix mai khawm veng Anatot tau mai haktiex rawb rim nawh, veng cie kix khawmuik ka daux doeh nyiex ma kix koe kao loe veng heue. ⁶¹ Son pa kawn deuk khaing daux doeh nyiex ma Kawhat khankix, kix hoik pon veng kao veng, ka daux pa cawk kix silak khaing daux haktiex cie doeh ru Manashe tix plak heue. ⁶² Son kawn simex Geshon mai doeh nyiex ma kix khankix, kix hoik tawx kix cie veng kao loe veng khaing daux haktiex cie doeh ru Issakha mai khaing daux cie doeh ru Asha mai khaing daux cie doeh ru Napthalix mai khaing daux doeh ru Manashe, pa koe ka daux haktiex Bashan heue. ⁶³ Son kawn simex Merarix mai doeh nyiex ma kix, kix hoik tawx kix cie veng kao ra veng khaing daux cie doeh ru Rubin, khaing daux cie doeh ru Gat mai khaing daux cie doeh simiex ru Zebulun khankix heue. ⁶⁴ Mawh kheu nan, kawn praix ceu pui Isarelax khankix hoik tawx veng inkix, tau mai haktiex rawb rim nawh khankix ka ceu pui Lewix heue. ⁶⁵ kix hoik veng an khankix ka kix ka daux pa cawk silak, khaing cie ru kawn praix Yudax, khaing daux cie doeh ru kawn praix Simion mai khaing daux cie doeh ru kawn praix Benyamin khankix pa mawh veng awm pa hoik kok kix ka ceu kaux veng heue. ⁶⁶ Cub doeh nyiex ma kawn simex Kawhat khankix tiblah hoik tawx kix cie veng haktiex khaing daux cie doeh ru Ephanrem khankix heue. ⁶⁷ Hoik tawx kix cie veng tix veng sonsang to pui tix paung ka pa mawh veng Shekhim, tau mai haktiex pa koe rawb rim nawh khankix pa koe piang gawng Epharem mai khawm veng Geza, tau mai haktiex rawb rim nawh khankix, ⁶⁸ Veng Yokmam tau mai haktiex rawb rim nawh khankix, veng Biethoron tau mai haktiex rawb rim nawh khankix, ⁶⁹ Veng Ayalon tau mai haktiex rawb rim nawh khankix mai veng Gatrimon tau mai haktiex rawb rim nawh khankix heue. ⁷⁰ Khaing daux cie doeh ru Manashe tix plak, kix hoik tawx veng Anax tau mai haktiex rawb rim nawh khankix mai veng Biliam, tau mai haktiex rawb rim nawh khankix son pa kawn deuk khaing daux doeh nyiex ma kawn simex Kawhat khankix heue. ⁷¹ Khaing daux doeh simex ru Manashe an tix plak, kix hoik tawx kawn simex Geshon khankix cie veng Golan pa koe ka daux haktiex Bashan tau mai haktiex rawb rim nawh khankix mai khawm veng Ashatarot tau mai haktiex rawb rim nawh khankix heue. ⁷² khaing daux cie doeh ru Issakha khankix kix hoik tawx kix cie veng Kedeshax tau mai haktiex rawb rim nawh khankix, veng Dabarat tau mai haktiex rawb rim pui hun nawh khankix, ⁷³ Veng Ramot tau mai haktiex rawb rim nawh khankix mai khawm veng Amen tau mai haktiex rawb rim nawh khankix heue. ⁷⁴ khaing daux cie doeh ru Asha khankix, hoik tawx veng Mashala tau mai haktiex rawb rim nawh khankix, veng Abadon tau mai haktiex rawb rim nawh khankix, ⁷⁵ veng Hukok tau mai haktiex rawb rim nawh khankix mai veng Rehop tau mai haktiex rawb rim nawh khankix heue. ⁷⁶ Daux cie doeh ru Napthalix khankix; kix hoik tawx veng Kedasha pa koe ka daux haktiex Galilie tau mai haktiex rawb rim nawh khankix, veng Hamon tau mai haktiex rawm rim nawh khankix mai veng Kirayatim tau mai haktiex rawb rim nawh khankix heue. ⁷⁷ Son kawn praix Merarix pa kawn deuk khankix, kix hoik pon haktiex khaing daux doeh ru Zebolon, pa mawh veng Rimmon tau mai haktiex rawb rim nawh khankix mai veng Tabo tau mai haktiex rawb rim nawh khankix heue. ⁷⁸ Ka praok rawm klawng Yawdan pa koe ka plak sivoe Yerikho ka plak lih singaix hoik tawx kix cie veng khaing daux cie doeh ru Rubin; pa mawh veng Beza pa koe ka daux tiagtu tau mai haktiex rawb rim nawh khankix, veng Yahaza, tau mai haktiex rawb rim nawh khankix, ⁷⁹ veng Kedemot tau mai haktiex rawb rim nawh khankix mai veng Mephat tau mai haktiex rawb rim nawh khankix heue. ⁸⁰ Khaing daux doeh ru Gat khankix hoik tawx kix cie veng Ramot pa koe ka daux haktiex Gilat tau mai haktiex rawb rim nawh khankix, veng Mahanem tau mai haktiex rawb rim nawh khankix, ⁸¹ veng Heshabon tau mai haktiex rawb rim nawh khankix mai veng Yaza tau mai haktiex rawb rim nawh khankix heue.

¹ Kawn simex Issakha khankix mawh Tolax, Pu-a, Yashu mai Shimarom khawmuik pon kaux heue. ² Kawn simex Tolax khankix mawh Uzix, Rephayax, Yerelax, Yamie, Yibasan mai Shemoelax, pa mawh cao kaing ka daux doeh nyiex ma keeing kix heue. kawn simex Tolax khankix mawh cub pui pa ting riang mai pa vao rhawm ka daux doeh ru kix; baux singaix ju simiang Davit kix koe ra mheen ra rheng liah yieh kaux heue. ³ Kawn simex Urix mawh Izarahix mai kawn simex Izarahix khankix mawh Mikhelax, Obadiyax, Yolax mai Ishayax, kix phwan kaux khawmuik mawh cao kaing pui heue. ⁴ Khaing daux doeh ru nyiex ma keeing kix khankix cub kru naing kix pa sang puing naing koe loe mheen liah rheng kaux, mawh kheu koe moeng koe kawn kix tom nie heue. ⁵ Puxaik kix ka daux sinax doeh nyiex ma Issakha, khawmuik mawh cub pui ting riang rao mai pa koe rhawm vao rhawm kwa awm pa koe carang khaing daux doeh ru khankix khawmuik koe pui daix mheen aliah rheng kaux heue. ⁶ Kawn simex Benyamin khankix mawh Belax, Bekha mai Yedayelax khawmuik loe kaux heue. ⁷ Kawn simex Belax khankix mawh Ezabon, Uzix, Uzelax, Yerimot mai Irix khawmuik phwan kaux heue. Kix mawh cao kaing ka daux doeh nyiex ma keeing kix mai mawh pa ting riang rao mai koe rhawm vao rhawm kwa, awm pa koe carang khaing daux doeh ru kix, khawmuik koe pui ra mheen ra rheng tixngoe pon kaux heue. ⁸ Kawn simex Bekha khankix mawh Zemirax, Yosha, Eliaza, Eliawnie, Omrix, Yerimot, Abiyax, Anatot mai Alemiet, inkix khawmuik mawh cub kawn simiex Bekha heue. ⁹ Kix mawh cao kaing khaing daux doeh nyiex ma keeing kix mai mawh pui pa ting riang mai pa koe rhawm vao rhawm kwa, awm pa koe carang khaing daux doeh ru kix khawmuik koe pui ra mheen mai ra yieh kaux heue. ¹⁰ Kawn simex Yedayelax mawh Bilahan mai kawn simex Bilahan khankix mawh Yusha, Benyamin, Ehut, Khenanax, Zetan, Tashishax mai Ahishaha heue. ¹¹ Inkix mawh kawn simex Yedayelax khawmuik pa mawh cao kaing ka daux doeh nyiex ma keeing kix, mawh pui pa ting riang mai pa koe rhawm vao rhawm kwa khankix sonsang hu puing naing ka daux biang naing koe tix mheen aliah rheng ra yieh kaux heue. ¹² Shupim mai Hupim mawh kawn simex Erax mai Hushim mawh kawn simex Aha heue. ¹³ Kawn simex Napthalix khankix mawh Yazelax, Gonix, Yezax mai Shalum, pa mawh kawn simex pa kaoh khaing doeh nyiex ma Bilaha heue. ¹⁴ Asirelax kawn simex Manashe pa pon nawh khaing moeng iak tix ceu pui Surix mai baox keh ka Nakhirax pa mawh keeing Gilat heue. ¹⁵ Makhirax teei ti moeng pux bun Hupin mai Shupin pa kaux Makha, ceu kaux kawn Nyi nawh mawh Zelawphenat, viang mawh nan, Zelawphenat koe ngie kawn bun tix kaux khaing heue. ¹⁶ Nakha pa mawh moeng Nakhirax keh kawn simex tix kaux mai kok ceu kaux nawh mawh Periet, ceu kaux pux nawh mawh Sheriet mai kawn simex Sheriet mawh Ulam mai Rekem heue. ¹⁷ Kawn simex Ulam mawh Pedan, inkix mawh doeh ru Gilat kawn simex Makhirax, Makhirax mawh kawn simex Manashe heue. ¹⁸ Nan Gilat Hamawlekiet keh Ishahawt, Abeza mai Malax khankix heue. ¹⁹ Kawn simex Shemidax khankix mawh Ahi an, Shekhem, Likahix mai Aniam heue. ²⁰ Kawn simex Epharem mawh Shutelax mai kawn simex Shutelax mawh Pheret mai kawn simex Pheret mawh Tahat mai kawn simex Tahat Eladax mai kawn simex Aladax mawh Tahat, ²¹ Kawn simex Tahat mawh Zabat mai kawn simex Zabat mawh Shudelax, khaix an Epharem baox koe kawn simex pa mawh Eza mai Elat, pui veng Gat khankix ka daux haktiex an, pah ti tik kix kheu jao lih hoek kix tix tud rhim tobrie eei kix hu heue. ²² Khaix an, keeing kix Epharem kied koe krax khrup rhawm tom rheung singaix sawm mai puxaik nawh khankix hoek ti khu rhawm nawh heue. ²³ Yam hoik deeh laig ot nawh mai moeng tix, bun an deeh koe kaux mai keh kawn simex tix kaux mai kok ceu kaux nawh mawh Beriyax, mawh kheu hoek krax pa khi rhawm piang nyiex ma nawh heue. ²⁴ Kawn bun nawh Sherax, mawh pa hoik sum veng Biet Horom plak seh mai veng Biet Horom plak laong mai veng Uzen Sherax, ²⁵ Kawn simex Epharim mawh Repha, kawn simex Repha mawh Reshiep, kawn simex Reshiep mawh Telax, kawn simex Telax mawh Tahan, ²⁶ Kawn simex Tahan mawh Ladan, kawn simex Ladan mawh Amihut, kawn simex Amihut mawh Elishama. ²⁷ Kawn simex Elishama mawh Nun mai kawn simex Nun mawh Yawsux heue. ²⁸ Haktiex sinngao mai dee ot dee koe kix mawh veng Betelax mai khawm nyiex yaong cie nawh khankix, pa koe ka plak lih singaix veng Naran mai khawm plak klip singaix veng Geza mai khawm nyiex yaong cie nawh khankix mai veng Shekhem khawm nyiex yaong cie nawh khankix, tom hoek ka veng Kaza mai khawm nyiex yaong cie nawh khankix, ²⁹ mai baox hoek tom baoh mee haktiex kawn praix Manashe pa mawh veng Bietshan mai khawm nyiex yaong cie nawh khankix, veng Tanak mai nyiex yaong cie nawh khankix, veng Megido mai nyiex yaong cie nawh khankix, veng Dora mai khawm nyiex yaong cie nawh khankix, ka daux nyiex yaong veng in kix mawh dee ot dee koe cub kawn praix Yosiep, pa mawh kawn simex Isarelax khankix heue. ³⁰ Cub kawn simex Asha khankix mawh Imanax, Ishava, Ishavi, Beliyax mai nan kix Sherax heue. ³¹ Kawn simex Beriyax khankix mawh Heba mai Malakhelax, pa mawh keeing Birazek heue. ³² Heba pon kawn tix Yephaliet, Shoma, Hotam mai nan kix Shoa heu. ³³ Kawn simex Yaphaliet khankix mawh Pasiet, Bomahalax mai Ashaliet, inkix mawh cub kawn praix Yephaliet heue. ³⁴ Kawn simex Shoma khankix mawh Ahix, Rukax, Yehobax mai Aram heue. ³⁵ Kawn simex pux nawh Helim mawh Zophax, Imanax, Sheliet mai Amalax heue. ³⁶ Kawn simex Zophax khankix mawh Soa, Hanepha, Sholax, Berix, Imarax, ³⁷ Beza, Hodax, Shama, Shilashax, Yetaran mai Birax heue. ³⁸ Cub kawn simex Yata khankix mawh Yephunie, Pisapax mai Arax heue. ³⁹ Kawn simex Ulalax khankix mawh Arax, Hanelax mai Riziyax heue. ⁴⁰ Inkix khawmuik mawh kawn praix Asha mai pa mawh cao kaing doeh nyiex ma keeing kix, ka pui pa laug kix pa kied ting riang mai pa koe rhawm kwa khankix, mawh cao kaing ting mai kix mawh pa teei carang khaing daux sinax doeh ru pa mawh cub kru naing pa keung tix hu daux naing, kix koe ra mheen liah rheng kaux heue.

¹ Benyamin hoik pon kawn Ai tix Belax, kawn Nyi mawh Ashabelax, kawn Sam mawh Aharax, ² Kawn Sai mawh Nohax mai kawn Ngox mawh Raphax heue. ³ Kawn simex Belax khankix mawh Adax, Gerax, Abihut, ⁴ Abishua, Naman, Ahaw, ⁵ Gera, Shekhuphan mai Huran heue. ⁶ Inkix mawh kawn simex Ehut, pa mawh cao kaing khaing daux nyiex ma keeing kix, pa ot ka daux veng Gebax mai pa hoik dheen kix gah ti hu ka veng Manahat ⁷ Naman, Ahiyax mai Gera khankix hoik mawh pui pa dheen kix gah ti hu heue. Gera pon kawn tix Uzax mai Ahihut heue. ⁸ Shaharem hoik een kawn praix tix khankix ka daux haktiex Mawbax, khaix hoik tik nawh Hushim mai Barax khankix pa mawh moeng nawh heue. ⁹ Khaing moeng nawh Hodesha nawh pon kawn tix Yobap, Zibia, Mesha, Malakham, ¹⁰ Yuza, Shakhix mai Miramax khankix heue. Kawn simex nawh in khankix mawh cao kaing khaing daux doeh nyiex ma keeing kix heue. ¹¹ Khaing Hushim nawh pon kawn tix Abitup mai Elapalax heue. ¹² Kawn simex Elapalax khankix mawh Eba, Misham mai Shemiet, pa hoik pang veng Ono mai veng Lodax, tau mai nyiex yaong pa koe hawt rawb rim nawh khankix; ¹³ Beriyax mai Shemax khankix pa mawh cao kaing khaing daux doeh nyiex keeing kix pui pa ot ka veng Ayalon mai pa grheu pui Gat pa ot baoh tan khankix to khaing veng heue. ¹⁴ Ahio, Shashak, Yeremot, ¹⁵ Zebadix, Arat, Ada, ¹⁶ Mikhelax Asata mai Yawha khankix mawh kawn simex Beriyax heue. ¹⁷ Zebadix, Meshulam, Hizakix, Heba, ¹⁸ Isamerie Yezaliyax mai Yobap, khankix hoik mawh kawn simex Elapalax heue. ¹⁹ Yakhim, Zikharix, Zabadix, ²⁰ Elinie, Ziletie, Elilax, ²¹ Adayax, Berayax mai Shimarat, khankix hoik mawh kawn simex Shimix heue. ²² Ishaphan, Heba, Elilax, ²³ Abadon, Zikharix, Hanan, ²⁴ Hananix, Elam, Antotiyax, ²⁵ Iphadiyax mai Penuelax, khankix hoik mawh kawn simex Shashak heue. ²⁶ Shamsherie, Shehariyax, Atalix, ²⁷ Yareshix, Eliyax mai Zikharix, khankix hoik mawh kawn simex Yeroham heue. ²⁸ Inkix hoik mawh cao kaing khaing daux nyiex ma keeing kix awm pa koe doeh ru kix, pa mawh cao kaing ting heue. Pui inkix hoik mawh pa ot ka daux veng Yerusaliem heue. ²⁹ Yam in keeing Gibeon mawh Yelax pa ot ka daux veng Gibeon mai ceu kaux moeng nawh mawh Makha heue. ³⁰ Kawn simex nawh mawh Abadon, khaix an, kawn simex nawh khankix baox mawh Zorax, Kishax, Balax, Nadap, ³¹ Gido, Ahio, Sekha, Mikhalot, ³² Mikhalot pon kawn tix Siman, kix ot see dee ot paox nyiex ma tix khankix ka daux veng Yerusaliem tau mai puxaik kix heue. ³³ Nerax pon kawn tix Kishax mai Kishax pon kawn tix Sawlux mai Sawlux pon kawn tix Yawnasan, Malakhishua, Abinadat mai Eshabalax khankix heue. ³⁴ Kawn simex Yawnasan mawh Marip balax mai Marip balax pon kawn tix Mikha heue. ³⁵ Kawn simex Mikha khankix mawh Midon, Miliep, Tarat mai Ahaza heue. ³⁶ Ahaza pon kawn tix Yehoadax mai Yehoadax pon kawn tix Alamiet, Azamaviet mai Zimarix mai Zimarix pon kawn tix Moza heue. ³⁷ Moza pon kawn tix Binax mai kawn simex Raphax mawh Eleasa mai kawn simex Eleasa mawh Azelax heue. ³⁸ Azelax koe kawn simex liah kaux mai ceu kaux kix mawh Azarikham, Bokheru, Eshamelax, Shariyax, Obadix mai Hanan, inkix khawmuik mawh cub kawn simex Azelax heue. ³⁹ Cub kawn simex pux nawh Eshiet khankix mawh Ulam, pa mawh kawn Ai Yusha mawh kawn Nyi mai Elipheliet mawh kawn Sam nawh heue. ⁴⁰ Kawn simex Ulam mawh pa ting riang rao mai pa koe rhawm kwa, mawh pui pa min ka ak heue. Kix koe kawn simex kawn saux khankix tom nie, khawmuik koe tiyieh tixphwan kaux, in kix khawmuik mawh cub kawn simex Benyamin heue.

¹ Mawh kheu nan ceu pui Isarelax khankix mawh pa mhai ti deuh awm pa koe doeh ru kix, grawng kix hoik mawh pa tiiem ti deuh ka daux phuk lai been cub simiang Isarelax khankix, mawh kheu pui Yudax khankix mawh pa viex ti hu mawh pa giex laung ka veng Babulon, kheu jao ang kix koe krax pa kaux sijax heue. ² Cub pui pa liang tix hoek ot ka daux singao haktiex ka daux veng cie kix mawh ceu pui Isarelax, cub cao giex kaing li ceu pui Lewix mai ceu pui khankix pa kham ti yuh kaing jhaw nyiex bwan Siyiex heue. ³ Yam in cub kawn praix ceu pui Yudax khankix hoik ot ka daux veng Yerusaliem, tau mai cub kawn praix ceu pui Benyamin tiblah mai cub kawn praix Epharem khankix mai ceu pui Manashe khankix, ⁴ Utie mawh kawn simex Amihut, Amihut mawh kawn simex Omri, Omri mawh kawn simex Imarix, Imarix mawh kawn simex Banix, khaing daux doeh ru Pheret pa mawh kawn simex Yudax heue. ⁵ Khaing daux ceu pui Shilawnix, Ashayax pa mawh kawn Ai mai khawm kawn simex nawh khankix heue. ⁶ Khaing daux kawn simex Zerax khankix mawh Yuelax mai puxaik nawh pa koe liah yieh tixdim kaux heue. ⁷ Khaing daux kawn simex Benyamin khankix Sawlux kawn simex Meshulam, Meshulam mawh kawn simex Odavix, Odavix mawh kawn simex Hasenu, ⁸ Ibaniyax mawh kawn simex Yerawham mai Elam mawh kawn simex Uzix, Uzix mawh kawn simex Mikharix mai Mishulam mawh kawn simex Shephatiyax, Shephatiyax mawh kawn simex Ruelax, Ruelax mawh kawn simex Ibaniyax, ⁹ puxaik kix khankix awm pa koe doeh ru kix koe been dim yieh tixphwan liah kaux, pui inkix khawmuik mawh cao kaing nyiex ma keeing tix kaux khaing daux doeh nyiex ma keeing kix heue. ¹⁰ Khaing daux cub cao giex kaing li khankix mawh Yedayax, Yehoyarip mai Yakhin, ¹¹ Azariyax mawh kawn mawh simex Hilakiyax, Hilakiyax mawh kawn simex Meshulam, Meshulam mawh kawn simex Zadok, Zadok mawh kawn simex Merayok, Merayok mawh kawn simex Ahitup pa mawh cao kwang nyiex bwan Siyiex. ¹² Adayax mawh kawn simex Yeroham, Yeroham mawh kawn simex Pashurax, Pashurax mawh kawn simex Malakhiyax mai Mashie mawh kawn simex Adelax mai Adelax mawh kawn simex Yazerax, Yazarax mawh kawn simex Meshulam, Meshulam mawh kawn simex Meshilenit, Meshilenit mawh kawn simex Immerax, ¹³ puxaik kix mawh cao kaing ka daux doeh nyiex ma keeing kix mai kix koe tix rheng aliah yieh tigliah kaux, kix mawh pui pa kied koe riang rao ti yuh kaing jhaw ka daux nyiex bwan Siyiex heue. ¹⁴ Khaing daux cub pui Lewix mawh Shemayax kawn simex Hashup, Hashup mawh kawn simex Azarikam, Azarikam mawh kawn simex Hashabiyax khaing daux kawn simex Merarix, ¹⁵ Bakbakka, Heresha, Galax mai Mataneyax, pa mawh kawn simex Nikha, Nikha mawh kawn simex Zikharix, Zikharix mawh kawn simex Asapha, ¹⁶ Obadix mawh kawn simex Shemayax, Shemayax mawh kawn simex Galax, Galax mawh kawn simex Yedudun mai Berekhix, mawh kawn simex Asa, Asa mawh kawn simex Elakanax pa ot daux yaong ceu pui Netawphah khankix heue. ¹⁷ Cao pa pau siviex khankix mawh Shalon, Akop, Talamon, Ahiman mai khawm puxaik kix, Shalum mawh cao kaing heue. ¹⁸ Glang ka an, kix mawh cao pau siviex simiang ka plak lih singaix mai yam in, kix mawh pa pau siviex son dee pan dee paung cub kawn praix pui Lewix khankix heue. ¹⁹ Shalum mawh kawn simex Kore, Kore mawh kawn simex Ebiyasap mawh kawn simex Korax mai puxaik nawh khankix khaing daux doeh nyiex ma keeing nawh pa mawh ceu pui Kawritix khankix, mawh cao pa teei beeh glawm son kaing jhaw cao pau siviex ka daux nyiex gox bwan man, keeing kix hoik dawg mawh cao pau diang laig dee pan dee paung cub pui naing Siyiex heue. ²⁰ Phinihat kawn simex Eliaza, mawh cao kaing pa kwang piang kix ka daux bawg yam pa hoik luan mai Siyiex ot tau mai nawh heue. ²¹ Zakharix mawh kawn simex Meshelemiyax mawh cao pa pau siviex nyiex gox bwan bang kum heue. ²² Can pui pa hoik laug kix mawh cao pau siviex khawmuik koe ra yieh kao ra kaux, kix hoik mhai ti deuh carang kix awm pa koe doeh ru nyiex ma kix, khaing ka daux nyiex yaong kix, simiang Davit mai cao jhai Samoelax, pa yaog kix mawh pui yuh kaing ka daux pa deuh rhawm tix ka kix heue. ²³ Mawh kheu nan, tokaux mai kawn praix kix khankix mawh cao pa teei beeh glawm pau siviex nyiex bwan Siyiex, ka daux nyiex gox bwan man pa hoik tawx kix beeh glawm heue. ²⁴ Cao pau siviex khankix ot ti pau plak lih singaix, plak klip singaix, plak laong mai plak seh khawm pon plak heue. ²⁵ Puxaik kix pa ot ka daux nyiex daux yaong khankix hoek ti pau tau mai kix aliah ngaix tix bawg awm bawg yam pa hoik tat kix heue. ²⁶ Cao kaing ting pa pau siviex ceu pui Lewix khankix pon kaux mai mawh pa een kix rhawm tix ka sonsang mawh pa teei beeh glawm ti priex lawg mai kraung khrai sinngao khankix, pa koe ka daux nyiex bwan Siyiex heue. ²⁷ Kix khawmuik paung hawt vung viang nyiex bwan Siyiex kheu mawh pa koe beeh glawm mai kix yaox ti paoh siviex ku ngawb heue. ²⁸ Khaing daux kix tiblah mawh cub cao pa teei beeh glawm ti priex kraung shiao khankix, kix simin ka kraung an khankix ku bawg yam, teei lih mai yam deeh viex kix hoek heue. ²⁹ Khaing daux kix tiblah hoik mawh pa kwang ka kraung shiao kuceu mai kraung shiao ka dee pa singax singeh mai ka phawng nghox ceu pa mhawm, rawm plix siiet, bee, sidah bhawng Lawban mai nyawng bhawng pa sang tok kix heue. ³⁰ Khaing daux kawn simex cao giex kaing li khankix tiblah mawh cao pa yuh bee pa krai ka ceu pa sioe bhawng khankix heue. ³¹ Matithix, ceu pui Lewix pa mawh kawn Ai Shalum, paox nyiex ma Korax mawh cao pa een kix rhawm tix mawh pa kwang ka ceu blah pa tong tix ka plah rhiem heue. ³² Puxaik kix tiblah khaing daux kawn simex Kawhat khankix, mawh cao teei beeh glawm khre rien blah pa sang khan ku singaix twah heue. ³³ Pui inkix mawh cao pa rhax lai mai mawh cao kaing khaing daux doeh nyiex ma keeing kix ceu pui Lewix khankix, pa paung pa ot ka daux lawg nyiex bwan khankix mai kix ang lai yaox ti yuh kaing tang ceu; mawh kheu yaox kix ti teei beeh glawm yuh kaing jhaw nyiex bwan ku singaix heue. ³⁴ Cub pui inkix daux doeh nyiex keeing kix ceu pui Lewix hoik mawh cao kaing leeing ju ka daux doeh ru kix heue. Kix hoik ot ka veng Yerusaliem heue. ³⁵ Yelax pa mawh keeing Gibeon hoik pang ka veng Gibeon mai ceu kaux moeng nawh mawh Makha heue. ³⁶ Kawn Ai nawh mawh Abadon mai khaix an mawh Zurax, Kisha, Balax, Nerax, Nadat, ³⁷ Gedo, Ahio, Zekharix mai Mikalot khankix heue. ³⁸ Mikalot hoik pon kawn simex tix Shimean heue. Kix ot dex baoh paox nyiex ma tix khankix ka daux veng Yerusaliem, tau mai puxaik tix khankix heue. ³⁹ Nerax pon kawn tix Kishax, Kishax pon kawn simex tix Sawlux mai Sawlux pon kawn simex tix Yawnasan, Makhishua, Abinadat mai Eshabalax khankix heue. ⁴⁰ Kawn simex Yawnasan mawh Meritbalax mai Meritbalax pon kawn tix Mikha, ⁴¹ Kawn simex Mikha khankix mawh Piton, Meliet, Tarix mai Ahaza heue. ⁴² Ahaza pon kawn tix Yarax mai Yarax pon kawn tix Alimiet, Azamaviet mai Zimrix mai Zimrix pon kawn tix Moza, ⁴³ Moza pon kawn tix Binea, Binea pon kawn tix Rephayax, Rephayax pon kawn tix Eleasa, Eleasa pon kawn tix Azelax heue. ⁴⁴ Azelax koe kawn simex liah kaux mai ceu kaux kix mawh Azarikam, Bokherux, Ishamelax, Sheriyax, Awbadix mai Hanan heue. Inkix hoik mawh kawn simex Azalax heue.

¹ Yam in ceu pui Philitix puing naing ka ceu pui Isarelax khankix mai pui Isarelax hoik to sivoe ceu pui Philitix mai kix hoik goh yum ka daux pa hoik mat tix piang gawng Gilabaw heue. ² Khaix an ceu pui Philiti yuh lung ti pheet Sawlux mai kawn simex nawh khankix heue. Ceu pui Philitix hoik pah ka Yawnasan, Abinadat mai Makhishua kan simex Sawlux khankix heue. ³ Sawlux pa kied yaox ti kham pa puing cub pui naing ak khankix ka nawh daux naing mai nawh mat ka te pa puing cub pui naing ak khankix heue. ⁴ Khaix an, Sawlux ah nin ka cao pa viex kraung naing ceep tix "Lawd vaig maix mai suat aux ka, phan ang mawh nan, pui inkix pa ang nyang bax pat hak khankix tak hoek ah lox sibriem mai nieb pon yuh ka aux heue. "Viang mawh kawx nan, cao viex kraung ceep nawh ang cu ti yuh kheu jao kied lhat graung tix, mawh kheu nan, Sawlux teei vaig an mai nawh gup ti yum piang heue. ⁵ Yam hoik yaox cao viex kraung naing ceep nawh ka hoik yum Sawlux, nawh baox gup ti piang vaig cao nawh mai yum heue. ⁶ Mawh kheu nan, Sawlux yum tau mai kawn simex tix loe kaux mai cub paox nyiex ma nawh khawmuik heue. ⁷ Yam hoik yaox pui Isarelax pa ot ka daux ngawd khankix ka to kru naing Isarelax mai ka hoik yum Sawlux khawm kawn simex nawh khankix, kix prah veng tix mai to, khaix an ceu pui Philitix khankix hoek tix ot tan heue. ⁸ Yam hoek singaix pasax ceu pui Philitix khankix hoek ti peeik kraung ceep pui yum khankix, kix yaox ka goh Sawlux mai kawn simex nawh khankix ti yum piang gawng Gilabaw heue. ⁹ Kix peeik kraung ceep nawh mai viex kaing nawh khawm kraung naing ceep nawh khankix mai kix tawx lox hu ku sidah ka daux haktiex ceu pui Philitix sonsang pao kix grawh grawng an ka daux nyiex bwan dee koe riang krub kix mai ka daux sinax pui khankix heue. ¹⁰ Khaix an, kix deuh kraung naing ceep nawh ka daux nyiex bwan siyiex kix mai teuk teue kaing nawh ka daux nyiex bwan Dagon heue. ¹¹ Yam mhong pui veng Yabiet pa ot ka daux haktiex Gelat khankix, ka grawh grawng pa hoik yuh ceu pui Philitix ka Sawlux, ¹² Can pui pa koe rhawm kwa khankix yaog ti kaoh mai teei tokaux yum Sawlux khawm tokaux yum kawn simex nawh khankix mai kix viex hoek ka veng Yadiet mai sipaung si-ang kix greem khaox piak van pa koe daux veng Yabiet mai kix twah pa ih aliah singaix heue. ¹³ Mawh kheu nan, Sawlux yum kheu ang nawh kaux sijax mai lud ka Siyiex, mawh kheu nawh ang priex rien ka gumlox Siyiex mai kheu jao hoik chawk cheng nawh krax keud ka bun cao pa koe si ngie sonsang hawt ti yuh ka heue. ¹⁴ Nawh ang chawk cheng ka Siyiex; mawh kheu nan, Nawh Cao tom pah nawh mai teei ti tawx meung haktiex nawh khankix ka simiang Davit kawn simex Yessie heue.

¹ Khaix an, ceu pui Isarelax khankix khrawm paox tix hoek ka Davit ka daux veng Hebron ah nin, "Yix mawh si-ang maix mai mawh nex nham maix tete heue. ² Ka daux bawg yam pa hoik luan yam kawn mawh Sawlux simiang piang yix maix hoik mawh pui pa thong bung ka pui Isarelax khankix lih hu mai deeh viex kix laig mai Siyiex ah nin ka maix, maix tak mawh cao pa liang ceu pui aux Isarelax mai mawh cao kwang piang ceu pui aux Isarelax khankix heue" ³ Mawh kheu nan, kwad riex ju pui Isarelax khankix hoek ka simiang daux veng Hebron mai Davit yuh sijax mukheu tau mai kix ka daux veng Hebron ka plak sivoe ngai Siyiex, khaix an, kix groi rawm bee ka Davit mai yaog nawh mawh simiang piang ceu pui Isarelax, awm gumlox pa hoik tawm Siyiex ti deuh ka Samoelax heue. ⁴ Davit mai ceu pui Isarelax khankix hu ka veng Yerusaliem, daux haktiex Yebusix mai ka dee ot ceu pui Yebusix khankix heue. ⁵ Khaix an, pui haktiex Yebusix ah nin ka Davit "Maix tak ang pon ti laig ka daux veng in heue. "Viang yuh nan kawx Davit rhim ti teei nyiex tab Zeon pa kaux cong khankix Zeon mawh veng Davit heue. ⁶ Davit ah nin "Pui mawx pon ti hu puing ka ceu pui Yebusix tak pon ti mawh cao giex kaing naing ting heue. "Yuabax kawn simex Zeruya lih hu phao voe mai nawh yaox ti mawh cao kaing naing ting heue. ⁷ Khaix an, Davit ot ka daux nyiex tab pa kaux cong an, mawh kheu nan, kix kok dee an mawh veng Davit heue. ⁸ Nawh cox sum veng hawt rawb rim baoh an, jah ka haktiex Milo mai ka haktiex pa koe hawt rawb rim khankix, veng pa kawn deuk khankix mawh Yuabax pa cox sum heue. ⁹ Khaix an, Davit nied ti haok hwan mai ting riang sipie, mawh kheu Siyiex Cao haktiex raoma ot tau mai nawh heue. ¹⁰ Yam in, pui inkix mawh cao kaing pa kied ting riang rao pa koe tau mai Davit mai pui pa kied sau riang rao tix tau mai nawh ka daux meung haktiex tau mai ka daux haktiex nawh mai ceu pui Isarelax khawmuik sonsang yaog nawh mawh simiang, awm lox pa tawm Siyiex ti deuh ka ceu pui Isarelax heue. ¹¹ Inkix mawh carang pui pa kied ting riang rao pa koe mai Davit, Yashoban kawn simex ceu pui Hakhamo, mawh cao kaing naing ting piang cub cao kaing naing khankix nawh mawh pui pa yaog gawng pliah tix pah ka pui loe yieh kaux tidom neh heue. ¹² Khaix nawh mawh Eliaza kawn simex Dodo, ceu pui Ahohix, pa mawh pui pa kied ting riang rao khaing ka daux kix loe kaux tix kaux heue. ¹³ Nawh hoik ot tau mai Davit ka daux veng Pasadamim, yam in cub pui Philitix khankix khrawm paox tix sonsang puing naing mai tan koe gwang kaung pa naog ka nghox ca lang sidax tix gwang mai pui khankix to khaing ceu pui Philitix heue. ¹⁴ Viang mawh nan, kix kaog ka daux sigreung gwang kaung an mai deeh pon pah ka ceu pui Philitix khankix yum mai Siyiex deeh taoh kix ka daux krax pa pex pa kied ting heue. ¹⁵ Yam in cao kaing loe kaux khaing daux cub cao kaing ting khankix tixngoe kaux lih hu ka rang dee ot Davit ka daux Adulam mai cub kru naing ceu pui Philitix khankix pang tab ka daux ngawd Rephen heue. ¹⁶ Yam an, Davit ot ka daux tab pa kaux cong ti mai kru naing ceu pui Philitix khankix yuh tab ka daux veng Bieliehiem heue. ¹⁷ Davit ah nin ka daux pa kied keud ce tix, "Mawh pui mawx tix kaux kaux pa sang pon tawx aux nyaux rawm tix kawk khaing daux rawm veng Bieliehiem, pa koe hawt diang siviex veng lie? ¹⁸ Mawh kheu nan, pui ting riang rao loe kaux preeng tix laig ka daux sinax dee pang dee paung ceu pui Philitix khankix mai kix kin ti viex rawm khaing daux veng Bieliehiem pa koe hawt diang siviex veng ma viex rawm an ing ka Davit, viang yuh nan kawx, nawh ang cu ti nyaux rawm an, nawh see ti tan rawm an ka plak sivoe Siyiex heue. ¹⁹ Nawh ah nin, "Siyiex aux eue, kieh in mawh pa singai hu khaing aux, mawh sang pon nyaux aux nham pui inkix, pa ang lhawk ka ju tix ka daux pa yaox kix krax kha rhawm sonsang viex kix rawm in hoek lie? "mawh kheu nan, nawh ang nyaux, in mawh pa yuh pui pa ting riang rao an loe kaux heue. ²⁰ Yam in Abishie pux Yuabax mawh cao kaing ting khaing daux kix loe kaux, nawh yaog gawng pliah pah ka pui khankix loe yieh kaux mai nawh pon krax pa ao min khaing ka daux pui inkix loe kaux heue. ²¹ Khaix daux cub kix tixngoe kaux nawh mawh pa nie lheu koe min, mawh kheu nan, nawh pon ti mawh cao kaing naing ting kix, viang mawh nan, nawh ang krup ka pui loe kaux ankix heue. ²² Pui veng Kapzelax, Benayax kawn simex Yehoyadax mawh pui pa koe rhawm kwa pa yuh kaing ao min, nawh pah pui Mawbax ra kaux pa kied kwa awm sivai sangsi, nawh baox lih hu mai pon pah sivai sangsi tix mu ka daux tiex bawg yam lih rawm rha heue. ²³ Nawh pah pui Ejiptux tix kaux pa lhaong phwan sawk, ka daux tawm taix pui Ejiptux an koe gawng pliah pa awm blax taing heue. Benayax viex khaox gix tix lih hu ka nawh mai rhim ti teei pliah an khaing daux taix pui Ejiptux mai deeh pah nawh yum ka gawng pliah nawh heue. ²⁴ Ceu in hoik mawh pa yuh Benayax kawn simex Yehoyadax mai nawh pon pa ao min ka daux pui pa ting riang rao khankix loe kaux heue. ²⁵ Nawh mawh pa nie lheu koe min khaing pui ankix tixngoe kaux, viang mawh nan, nawh ang nyang krup pui phao voe ankix loe kaux mai Davit yaog nawh mawh cao kaing piang cub pui naing pa pau ju nawh khankix heue. ²⁶ Pui naing pa kied ting riang rao khankix mawh Asahelax pux Yuabax mai Elahanan pa mawh kawn simex Dodo khaing daux veng Bieliehiem, ²⁷ Shammot pa mawh ceu pui Harorix mai Heliet pa mawh ceu pui Pelon, ²⁸ Irax kawn simex Ikhesha pa mawh ceu pui Tekaw mai Abeza pa mawh ceu pui Aneto, ²⁹ Sibekhie ceu pui Husha mai Ilie, ceu pui Aho, ³⁰ Maharie ceu pui Netawphah mai Heliet kawn simex Banax, ceu pui Netawpha, ³¹ Ethie kawn simex Rebie khaing veng Gibax, pa mawh kawn praix Benyamin mai Binayax ceu pui Piratawn, ³² Hurie mawh pui kaoh khaing baoh rawm klawng iak Gasha mai Abyelax, ceu pui Arabax, ³³ Azamaviet ceu pui Barumix mai Eliabax ceu pui Shalabo, ³⁴ Cub kawn simex Hashen, pa mawh ceu pui Gezawnix mai Yawnatan kawn simex Shagie ceu pui Harax, ³⁵ Ahiam kawn simex Sakha, ceu pui Harax mai Eliphalax kawn simex Urax, ³⁶ Hepha ceu pui Mekherax mai Ahiyax, ceu pui Pelawn, ³⁷ Hezaraw, ceu pui Kharame mai Narie, kawn simex Ezabie, ³⁸ Yawlax pux Nasan mai Mibaha, kawn simex Hagarix, ³⁹ Zeliet, ceu pui Amawnix mai Naharie, ceu pui Bero cao pa klawm kaung ceep naing Yuabax, pa mawh kawn simex Zeruya, ⁴⁰ Irax ceu pui Isarix mai Gariet ceu pui Isarix, ⁴¹ Uriyax ceu pui Hitix mai Zabax kawn simex Alie, ⁴² Adinax kawn simex Shiza, ceu pui Rubin, nawh mawh cao kaing ting tix kaux khaing ka daux ceu pui Rubin mai pa kwang ceu pui Rubin khankix tixngoe kaux, ⁴³ Hanan kawn simex Makha mai Yoshaphat, ceu pui Mitanix, ⁴⁴ Uziyax ceu pui Ashatharax, Shama mai Yehelax, mawh kawn simex Hoshan ceu pui Aro, ⁴⁵ Yedelax kawn simex Shimrix mai pux nawh Yawha pa mawh ceu pui Tizix, ⁴⁶ Elelax ceu pui Mahvi, Yeribie mai Yawshaviyax, pa mawh kawn simex Elanaam mai Itamma, ceu pui Mawbax, ⁴⁷ Elelax, Obet mai Yasilax ceu pui Mezawbek khankix heue.

¹ Inkix mawh can pui pa hoek ti hawt khaix Davit ka daux veng Zikalat, yam via nawh ti mox tix khaing Sawlux, pa mawh kawn simex Kishax mai kix hoik mawh pui pa kaox khaing daux sinax cub pui pa kied ting riang rao khankix mai cao pa teem pa coi nawh ka daux naing, ² Kix mawh pa min puing ak khankix mai pa chix shiao taix khawn dawm taix khawn gwiex tix khawm ra, yam sivuat kix ka lon simaox khankix mai yam puing kix te ak heue. Kix mawh ceu pui Benyamin, pa mawh puxaik Sawlux heue. ³ Cao kaing ting kix mawh Aheza mai khaix an tom mawh Yawsha, pa mawh kawn simex Shemax khaing veng Gibax, Yezilax mai Peliet, kawn simex Azamaviet khankix, Berakha mai Yehu ceu pui Anato, ⁴ Ishameyax pui veng Gibeon, nawh mawh pui pa kied ting riang tix kaux khaing daux sinax pui ankix tixngoe kaux mai pa lheu khaing pui ankix tixngoe kaux tom mawh Yeremix, Yahazilax, Yohanan mai Yozabat ceu pui Gedarat, ⁵ Eluzie, Yerimot, Belia, Shemarix mai Shephatix ceu pui Haruphix, ⁶ Elakanax, Yeshia, Azarelax, Yawza mai Yashaban, ceu pui Korax khankix, ⁷ Yawlax mai; Zebadix kawn simex Yerawham khaing veng Gedo heue. ⁸ Ceu pui Gat khankix tiblah hoik hoek si toe tix mai Davit, ka daux nyiex tab pa kaux cong nawh, pa koe ka daux tiagtu, kix hoik mawh pui pa kied ting riang, pa koe rhawm kwa mai kix mawh pui pa hoik gau tix son naing mai pa pon giex kraung tieb rhiem mai pliah mai ngai baoh kix hoik awm ngai baoh sivai sangsi mai kix hoik mawh pa kied phai tete, awm to cak khankix piang gawng heue. ⁹ Eza mawh cao kaing liang, Awbadiyax mawh ra kaux tix kaux mai Eliabax mawh loe kaux tix kaux, ¹⁰ Mishamannax mawh pon kaux tix kaux mai Yeremix mawh phwan kaux tix kaux, ¹¹ Atie mawh liah kaux tix kaux mai Elelax mawh aliah kaux tix kaux, ¹² Yohanan, mawh daix kaux tix kaux mai Elazabat mawh dim kaux tix kaux, ¹³ Yeremix mawh kao kaux tix kaux mai Makhabanai mawh kao tix kaux tix kaux heue. ¹⁴ Inkix mawh pa kaoh khaing cub kawn simex Gat, pa mawh cao kaing naing cub kru naing khankix, pa kied iak cao pa kwang piang cub pui tixyieh kaux mai pa kied ting mawh cao pa kwang piang cub pui tix rheng kaux heue. ¹⁵ Kix mawh cub pui pa hoik tiang rawm klawng Yawdan, ka daux khix tix, yam hwan rawm ti kheem ka praok klawng khankix mai kix hoik pon kieh pui pa ot ka daux lung daux ngawd khankix to ka plak lih singaix mai ka plak klip singaix heue. ¹⁶ Khaix an kawn praix ceu pui Benyamin tiblah mai pui Yudax khankix hoik hoek ka Davit ka daux nyiex tab pa kaux cong nawh tan heue. ¹⁷ Davit lih hu rieb ka kix mai ah nin ka kix, "Phan pex hoek ka aux ka daux krax pa nhim mai sonsang teem ka aux, rhawm aux tak mawh tix mu ngie tau mai pex, viang mawh nan phan pex sang ah tix ap aux ka pui koeng khankix, awm pa ang aux koe krax lud, kieh Siyiex keeing ex jhak ti yaox mai prawng ca heue. ¹⁸ Khaix an khwan Siyiex hoek piang Amashie, pa mawh cao kaing ting ah nin, "Davit! yix mawh pui maix, kawn simex Yessie eue. Yix mawh pui pa ot plak maix, kieh krax pa nhim koe piang maix mai kieh pa nhim koe piang cao pa teem maix khankix! Mawh kheu Siyiex maix teem ka maix heue. "Mawh kheu nan, Davit rieb ti teei kix mai kieh kix mawh cao kaing naing piang nyawm lien khankix heue. ¹⁹ cub pui pa kaoh khaing ceu pui Manashe tiblah, hoik blak ti hoek ka Davit, yam hoik hu nawh tau mai ceu pui Philitix khankix ka daux naing sonsang puing ka Sawlux heue. Viang mawh nan, kix ang cu ti teem kix kheu jao hoik kum cub simiang ceu pui Philitix khankix ti ploi nawh hu dee singai, ka daux lox pa ah nin, "Nawh tak deeh plak ti viex ex hu ka simiang cao nawh Sawlux mai deeh tawx pa kha rhawm ka cub cao kaing ex khankix heue." ²⁰ Yam hu nawh ka veng Zikalat cub ceu pui Manashe, pa deeh blak tix deeh hoek ka nawh khankix mawh Adana, Yozabat, Yedayelax, Mikhelax, Yozabat Elihu mai Ziletie, pa mawh cao kaing naing khankix piang pui tix rheng kaux pa hoik kaoh khaing ceu pui Manashe heue. ²¹ Kix hoik teem Davit puing ka cub pui con khankix heue. Kix hoik mawh cub pui pa kied ting riang pa koe rhawm kwa mai kix hoik mawh cao kaing naing ka daux kru naing heue. ²² Tix ngaix hoik tix ngaix kix hoek ka Davit, sonsang teem ka nawh, tom hoik pon kix ti mawh cub kru naing pa kied ting tix cub, awm cub kru naing Siyiex heue. ²³ Inkix mawh carang cub kru naing tab ting an, pa hoik ceep ti deuh kraung naing pa hoik grum naog ka kraung naing heue. Kix hoek ka Davit ka daux veng Hebron, sonsang deeh tawx kix meung haktiex Sawlux ka nawh awm gumlox pa hoik tawm Siyiex ti deuh, ²⁴ Khaing daux cub ceu pui Yudax, pa giex kraung plah tieb rhiem mai pliah khankix khawm can pa hoik grum naog ka kraung naing khankix hoik koe liah rheng daix yieh kaux, ²⁵ Khaing daux cub ceu pui Simion, pa kied ting riang mai pa koe rhawm vao rhawm kwa mai pa pon hu daux naing khankix koe been aliah rheng tiyieh kaux, ²⁶ Khaing daux cub ceu pui Lewix, khankix hoik koe pon rheng liah yieh kaux, ²⁷ Yehawyadax pa mawh cao kaing pa bung ka ceu pui Aon mai pa ot tau mai nawh khankix hoik koe loe rheng aliah yieh kaux, ²⁸ Zadok pa mawh pui pa kawn awn ju tix kaux mai pui pa koe rhawm vao rhawm kwa ka daux naing mai khaing pui daux doeh nyiex ma keeing nawh khankix, pa mawh cao kaing naing tixnga ra kaux, ²⁹ Khaing daux cub Benyamin, pa mawh paox nyiex ma Sawlux khankix hoik koe been loe rheng kaux, lheu khaing an cub pui hun khaing daux kix plak nie ca kawn dhah ti ot mai krax pa kaux sijax tix ka doeh nyiex ma Sawlux heue. ³⁰ Khaing daux cub ceu pui Epharem, hoik koe been ra mheem mai daix yieh kaux, kix mawh pui pa kied ting riang mai pa koe rhawm kwa mai pa kied ao min ka daux sinax doeh nyiex ma keeing kix, ³¹ Khaing daux doeh ceu pui Manashe tix plak, tix mheen dim rheng kaux, hoik mawh pa koe carang mai sonsang hoek yaog kix Davit mawh Simiang, ³² Khaing daux cub Issakha pa hoik tawng ti keud bawg yam, sonsang tawng kix ka ceu pa sang caw pui ceu Isarelax ti yuh mai cao kaing ting kix hoik koe ra yieh kaux mai can puxaik kix khawmuik hoik ot greem pa kwang kix heue. ³³ khaing daux ceu pui Zebulon khankix hoik koe been pui phwan mheen kaux, pa pon hu daux naing mai kix mawh cub pui pa kied min ka naing tau mai kraung naing khankix mai kix mawh pui pa cong rhawm pa ang koe tidtix khankix heue. ³⁴ Khaing daux ceu pui Napthalix, koe cub cao kaing naing tix rheng kaux mai pui pa giex kraung tieb rhiem mai pliah khankix ot taux mai kix loe mheen liah rheng kaux, ³⁵ Khaing daux ceu pui Dan, pa chix priex rien tix ka grawh grawng yuh naing khankix koe ra mheen daix rheng liah yieh kaux, ³⁶ Khaing daux ceu pui Asha, can pui pa pon hu daux naing mai pa chix priex rien tix ka grawh grawng pa yuh naing khankix, koe pui pon mheen kaux, ³⁷ Khaing daux ceu pui Rubin mai ceu pui Gat mai ceu pui Manashe khankix tix plak, pa kaox khaing plak lih singaix toi rawm klawng Yawdan koe pui tix sien ra mheen kaux, kix hoik mawh cub pui pa giex kraung naing ku kaux son naing heue. ³⁸ Cub pui naing inkix khawmuik pa chix priex chix rien ka cao tix khankix, hoek bleeh ka veng Hebron tau mai krax pa kaux sijax tix, sonsang yaog kix Davit mawh simiang piang ceu pui Isarelax khankix heue. Can pui pa kawn deuk ka daux ceu pui Isarelax khankix kawx hoik mawh rhawm tix mu, sonsang yaog kix Davit mawh simiang heue. ³⁹ Kix ot tan tau mai Davit loe singaix mai ih mai nyaux tix heue, Mawh kheu puxaik kix hoik khre rien ti tawx pa ih son kix heue. ⁴⁰ Lheu khaing an, can pui ankix pa ot hawt dex kix, tom dee pa kied singai baoh haktiex Issakha mai baoh haktiex Zebulun mai Napthalix khankix, tang pa ih piang law mai kala uk mai piang la mai moi khankix heue. Pa ih pa tang kix tix viex hoek khankix mawh phawng gaox nghox ca mai blah plah plix ruh mai blah plah an pa yuh tix ka plix siiet pa kroh mai rawm plix siiet mai rawm bee khankix mai khawm moi khawm yung tom nie, kheu jao hoik koe krax pa gaux rhawm ka daux sinax ceu pui Isarelax khankix heue.

¹ Khaix an, Davit kum tau mai cub cao kaing naing pa kwang piang pui kaing rheng mai kaing yieh khawm ka cao kaing pa thong bungkhankix ku kaux heue. ² Davit ah nin ka cub pui hun Isarelax khankix, "Phan ceu an mawh pa mhawm ka son pex mai phan mawh pa kaoh khaing Siyiex ex, kieh ex ploi pui hu ka puxaik ex khankix kudah dee, pa mawh pui pa kawn dhah ka daux haktiex meung Ejiptux mai khawm cao giex kaing li khankix mai ceu pui Lewix khankix, pa ot taux mai kix ka daux veng cao kix mai pa ot ka daux haktiex pui hun khankix, sonsang pon kraix khrawm kix paox tix hoek ka ex, ³ "kieh ex deeh viex teug sijax mukheu Siyiex deeh hoek ka ex, mawh kheu ang sax chawk cheng ti yaox ka teug sijax mukheu glang daux singaix baux yam kwang Sawlux ka haktiex heue." ⁴ Khaix an, cub pui hun khawmuik ah ti sang yuh awm an heue. Mawh kheu ceu an mawh pa khaw caw ka plak ngai pui khankix heue. ⁵ Mawh kheu nan, Davit kraix khrawm ceu pui Isarelax khawmuik tau, jah khaing mee rawm klawng Shihaw pa koe ka daux haktiex meung Ejiptux, tom hoek krax laig kix daux veng Amat, sonsang deeh viex tix teug sijax mukheu Siyiex hoek khaing veng Kirayatyarim heue. ⁶ Davit mai ceu pui Isarelax khawmuik haok ka veng Balax, pa mawh veng Kirayatyarim pa mawh cie ceu pui Yudax, sonsang deeh viex teug sijax mukheu Siyiex hoek khaing tan pa ot daux sinax riang Cherubin ka dee deuh Nawh Cao min ceu kaux tix heue. ⁷ Mawh kheu nan, kix tang ti viex teug sijax mukheu Siyiex piang ling lawx moi pa khraox tix lhang khaing daux nyiex Abinadat Uzax mai Ahio, mawh cao pa grheu ling lawx moi heue. ⁸ Khaix an Davit mai ceu pui Isarelax khankix tah ting lox rhax khankix ka plak sivoe Siyiex tau mai krax pa koe riang rao tix mai khawm pa ah tix lai rhax tau mai ting pawd ting pa hun lah khankix, bra, chiang mai khawm teettawng khankix heue. ⁹ Yam hoek kix ka gwang glah dee pah nghox Kidom, Uzax neh taix tix lih giex ka teug sijax mukheu, kheu jao sideeing moi caong tix heue. ¹⁰ Khaix an, krax song rhawm Siyiex hoik lih piang Uzax mai Nawh Cao ciyang ka nawh kheu neh nawh taix tix giex ka teug sijax mukheu mai nawh yum tan ka plak sivoe Siyiex heue. ¹¹ Davit koe krax pa voi rhawm, jao grawng krax kham geu pa ciyang Siyiex ka Uzax, mawh kheu nan, dee an hoik kok mawh Periet Uzax tom in singaix heue. ¹² Davit lhat graung ka Siyiex daux singaix an ah nin, "Aux tak sang pon viex teug sijax mukheu Siyiex hoek ka ti yuh ka mawx?" ¹³ Davit ang lai kieh teug sijax mukheu gah ti hu tau mai tix ka daux veng Davit, viang mawh nan, nawh deeh blak ti tawx hu ka daux nyiex Obetdedom ceu pui Gitix heue. ¹⁴ Teug sijax mukheu Siyiex ot ka daux nyiex ma Obetdedom, loe khix heue. Siyiex nawb bwan piang nyiex ma Obetdedom mai khawm piang can ceu pa koe nawh khankix khawmuik heue.

¹ Yam in Hiram simiang haktiex Turux ploi cao cau tix khankix hu ka Davit tau mai khaox Arit mai khawm cao pa chix yuh kaing sang tiex mai khawm cangmai khankix, sonsang sum tix tawx nyiex haw tix lhang ka nawh heue. ² Davit tawng ka yaog Siyiex ti deuh nawh mawh simiang piang ceu pui Isarelax khankix, mawh meung haktiex nawh mawh pa kied yaog tix lhaong mai pui nawh pa mawh ceu pui Isarelax heue. ³ Khaix an, Davit teei ti koe moeng tom nie ka daux veng Yerusaliem mai pon kawn simex kawn bun tix tom nie heue. ⁴ Inkix mawh ceu kaux kawn praix nawh khankix, pa koe ka daux veng Yerusaliem, pa kaux Shamua, Shawbat, Natan, Sawlamon, ⁵ Ibaha, Ilishua, Epeliet, ⁶ Noganie, Nephiet, Yaphia, ⁷ Ilishama, Biliadax mai Elipheliet khankix heue. ⁸ Yam hoik mhong ceu pui Philitix khankix ka yaog Davit ti mawh simiang piang ceu pui Isarelax khawmuik, ceu pui Philitix lih hu sawg ka Davit mai Davit mhong grawng ceu ankix mai nawh hu puing ka kix heue. ⁹ Khaix an, ceu pui Philitix khankix hoek naog daux ngawd Rephen heue. ¹⁰ Davit chawk cheng ka Siyiex ah nin, "Mawh sang pon hu puing aux ka ceu pui Philitix, mawh sang ap Maix Cao kix ka daux tawm tai aux lie? "Siyiex ah nin ka nawh, "Hu heue, mawh kheu Aux tak sang ap ti tawx kix ka daux tawm taix maix heue." ¹¹ Mawh kheu nan, kix lih hu ka veng Balax, Perazin mai Davit pex kix tan heue. Khaix an, Davit ah nin, "Siyiex prung prangti tik pui koeng khankix ka taix aux, awm pa prung prang rawm khankix heue. "Mawh kheu nan, kix kok ceu kaux dee an mawh Balax Perazin ka heue. ¹² Yam prah kix siyiex krub kix tan, Davit tawx lox ka kix mai nhie kix gleeing ti tik riang siyiex an ka ngu heue. ¹³ Ceu pui Philitix khankix baox deeh hoek naog ka daux ngawd an heue. ¹⁴ Mawh kheu nan, Davit deeh chawk cheng ka Siyiex mai Siyiex ah nin ka nawh, "Maix tak ang pon ti haok see see dee ot kix via ti, hu ka praok kix mai hoek tix kuan kix ka plak sivoe dee koe khaox liah khankix heue. ¹⁵ Ceu an tak lih ti koe yam mhong maix ka lox sinum hu pui piang rao khaox liah, khaix an maix tak lih hu ka daux biang naing heue. Siyiex hoik lih hu sivoe maix, sonsang pah ka cub tab ceu pui Philitix khankix heue." ¹⁶ Davit yuh awm gumlox pa tawm Siyiex ka nawh mai kix hoik deeh pheet ka cub kru naing ceu pui Philitix khankix khaing veng Gibion, tom hoek ka veng Gezarax heue. ¹⁷ Khaix an, krax pa ao min Davit hoik tah hu ka daux haktiex an khankix khawmuik mai Siyiex hoik kieh pui khawmuik lhat graung ka nawh heue.

¹ Davit sum nyiex haw khankix son tix ka daux veng Davit heue. Hoik khre ti deuh dah dee son teug bwan sijax mukheu Siyiex mai sum nyiex gox bwan man tix lhang son an heue. ² Khaix an, Davit ah nin, "Pui tix kaux kawx tak ang pon ti klawm teug bwan sijax mukheu Siyiex lheu khaing cub ceu pui Lewix, mawh kheu Siyiex hoik laug ti deuh sonsang mawh kix cao pa klawm teug bwan sijax mukheu Siyiex mai yuh kaing jhaw ka plak sivoe Nawh Cao leeing ju heue." ³ Davit kraix khrawm ceu pui Isarelax khankix tau ka daux veng Yerusaliem, sonsang viex teug bwan sijax mukheu Siyiex hoek ka dee pa ot tix, ka pa khre rien nawh ti deuh heue. ⁴ Khaix an, Davit khrawm ka kawn praix Arun mai ceu pui Lewix khankix hoek; ⁵ Khaing daux cub kawn simex Kawhat, Urelax pa mawh cao kaing ting kix mai puxaik nawh khankix hoik koe tixyieh tixnga kaux, ⁶ Khaing daux cub kawn simex Merarix, Asayax cao kaing ting kix mai puxaik nawh khankix hoik koe ra yieh tixnga kaux; ⁷ Khaing daux cub kawn simex Gerashon, Yawlax cao kaing ting kix mai puxaik nawh khankix koe tixyieh tixngoe kaux; ⁸ Khaing daux cub kawn simex Elizaphan, Shemayax cao kaing ting kix mai puxaik nawh khankix koe ra yieh kaux; ⁹ Khaing daux cub kawn simex Hebaron, Elialax cao kaing ting kix mai puxaik nawh khankix koe tidaix kaux, ¹⁰ Khaing daux cub kawn simex Awzalax, Aminadat cao kaing ting kix mai puxaik nawh khankix koe tixyieh kao ra kaux heue. ¹¹ Davit kok ka cao giex kaing li Zadok mai Abita khawm ceu pui Lewix; mai khawm Awrelax, Asayax, Yawlax, Shemayax, Elialax mai Aminadat khankix hoek ka tix heue. ¹² Khaix an, nawh hoik ah nin ka kix "Pex mawh cao kaing khaing daux doeh nyiex ma keeing pex khankix pa kaoh khaing ceu pui Lewix, kieh tokaux pex singax mai khawm puxaik pex khankix, pex tak pon viex teug bwan sijax mukheu Siyiex ceu pui Isarelax khankix hoek ka dee pa hoik khre rien aux ti deuh son nawh heue. ¹³ "Mawh kheu ang pex nyang yuh ceu in phao voe, Siyiex tom tawx krax kha rhawm piang ex, grawh grawng nawh, mawh kheu ang ex hawt yuh awm pa khaw mai been Nawh Cao heue." ¹⁴ Mawh kheu nan, cao giex kaing li khankix mai ceu pui Lewix khankix hoik kieh tokaux tix singax sonsang viex ka teug bwan sijax mukheu Siyiex can pui Isarelax heue. ¹⁵ Ceu pui Lewix khankix klawm teug bwan sijax mukheu Siyiex piang klip tix ka khaox glawm nawh, pa tawm Mose ti deuh awm hoik koe gumlox Siyiex heue. ¹⁶ Khaix an, Davit hoik krai ka cao kaing ceu pui Lewix sonsang tawx beeh glawm ka puxaik tix khankix, mawh cao rhax lai mai pa tah ting khankix, pa mawh ting khaox feuk, ting pawd mai khawm chiang khankix, sonsang yaog kix lox rhax sinum ka daux pa gaux rhawm heue. ¹⁷ Mawh kheu nan, pui Lewix khankix hoik yaog ti tawx beeh glawm ka Heman, kawn simex Yawlax mai puxaik nawh khankix, ka Asapha kawn simex Berakhix; mai khawm puxaik kix cub kawn simex Merarix mai Eta kawn simex Kusha khankix, ¹⁸ daux puxaik kix pa yaog kix ara glawk ra mawh Zakharix, Benax, Yalelax, Shemiramot, Yehelax, Unix, Eliabax, Benayax, Maseyax, Matithix, Eliphelie, Mikneyax, Obetdedon mai Yelax pa mawh cao pau siviex khaing heue. ¹⁹ Cao rhax lai khankix mawh Heman, Asapha mai cub Ethan khankix mawh pa tah chiang tawng kieh lox sinum, ²⁰ Zakharix, Azilax, Shemiramot, Yehalax, Unix, Eliabax, Maseyax mai Beneyax khankix mawh cub cao pa tah ting pawd Alamot, ²¹ Matithix, Eliphelie, Mikneyax, Obetdedon, Yelax, Azalix, khankix mawh cao pa tah ting feuk Sheminix, ²² Khenanix, pa mawh cao thong cao bung can pui Lewix khankix hoik mawh cao kaing pa gau kix ah lai rhax, mawh kheu hoik mawh nawh pui pa min ka lai rhax; ²³ Berikhix mai Elakanax hoik mawh cao pa pau siviex son teug bwan sijax mukheu, ²⁴ Shebanix, Yoshaphat, Netanelax, Amashie, Zakharix, Benayax mai Eliabax cub cao giex kaing li khankix mawh cao phlu teettawng ka plak sivoe teug bwan sijax mukheu Siyiex; Osetdedon, Awbedax, Edom mai Yehix, mawh cao pau siviex son teug bwan sijax mukheu heue. ²⁵ Mawh kheu nan, Davit mai kwad riex ju ceu pui Isarelax khankix mai cao kaing naing khankix pa kwang piang lien tix kaing rheng, lih hu sonsang teei teug bwan sijax mukheu Siyiex khaing daux nyiex Obetdedon tau mai krax pa gaux rhawm tix heue. ²⁶ Siyiex hoik teem ka pui Lewix khankix cao pa klawm teug bwan sijax mukheu Siyiex, kix hoik tan moi aliah mu mai kawn yung pex aliah mu heue. ²⁷ Davit hoik ceep ka sibex man ceu pa mhawm mai pui Lewix khankix pa klawm ka teug bwan sijax mukheu mai cao pa rhax lai khawmuik Khenanix pa mawh cao kaing pa thong bung cao rhax lai khankix hoik ceep ka sibex man ceu pa mhawm awm nawh heue. Davit baox ceep sibex lang jung pa hoik yuh tix ka man ceu pa mhawm heue. ²⁸ Mawh kheu nan, can pui Isarelax khankix hoik teei ti viex teug bwan sijax mukheu Siyiex hoek tau mai lox pa kok yo tix, khawm lox teet mai lox teettawng mai khawm lox chiang mai lox tah ting mai khawm lox ting feuk khaox khankix heue. ²⁹ Yam hoik hoek teug bwan sijax mukheu Siyiex ka daux veng Davit, Mekhalax kawn bun Sawlux, si mi ti jhak kix khaing daux siviex iak mai yaox ka graoh simiang Davit mai tah ka ting mai nawh hoik sibriem nawh ka daux rhawm tix heue.

¹ Mawh kheu nan, kix hoik viex teug bwan sijax mukheu Siyiex hoek mai hoik deuh ka daux greung nyiex gox bwan man pa hoik grux sum Davit son an heue. Khaix an, kix tan krax tan pa gleeing mai krax tan pa nhim khankix ka plak sivoe Siyiex heue. ² Yam hoik tan Davit krax tan pa gleeing mai krax tan pa nhim, nawh nawb bwan piang pui khankix ka daux min ceu kaux Siyiex heue. ³ Khaix an, nawh roi ti tawx blah tix lon mai nex mawie tix khik mai khlawp blah plix siiet tix khlawp ka ceu pui Isarelax khankix khawm simex khawm bun heue. ⁴ Nawh tawx beeh glawm ka ceu pui Lewix tiblah, sonsang yuh kix kaing ka plak sivoe teug bwan sijax mukheu Siyiex mai sonsang khre rien sonsang lai loh kix ti yaogyaw ka bwan son Siyiex ceu pui Isarelax heue. ⁵ Asapha, mawh cao kaing ting kix, khaix nawh tom mawh Zakharix mai khaix an mawh Yelax, Shemiramot, Yehalax, Matithix, Eliabax, Benayax mai Obetdedon mai Yenelax, khankix mawh cao pa tah ting mai ting feuk khankix tau mai nawh, viang mawh nan, Asapha mawh cao pa tah chiang heue. ⁶ Cao giex kaing li Benayax mai Yahazilax khankiex mawh cao phlu teettawng ka plak sivoe teug bwan sijax mukheu Siyiex sijeeng heue. ⁷ Ka daux singaix an Davit hoik liang ti ap lai rhax yaogyaw in ka daux tawm taix Asapha mai puxaik nawh khankix sonsang yaogyaw kix ka bwanson Siyiex heue. ⁸ Yaogyaw ka bwanson Siyiex, kok yo ka min ceu kaux Nawh Cao mai jhi kaing jhaw pa yuh Nawh Cao ka sinax pui khankix heue. ⁹ Rhax lai ka Nawh Cao, rhax lox yaogyaw ka Nawh Cao mai krai grawng krax pa daox deng kaing pa yuh Nawh Cao khawmuik heue. ¹⁰ Yaogyaw tawx min ka daux ceu kaux pa singax singeh Nawh Cao heue. Kieh rhawm pui pa sawg ka Siyiex, koe krax pa gaux rhawm heue. ¹¹ Sawg ka Siyiex mai riang rao Nawh Cao khankix! sawg ka pakngai Nawh Cao ku bawg yam! ¹² Doh keud ka kaing jhaw pa daox deng Nawh Cao mai ka pa hoik yuh Nawh Cao mai ka pa daox deng krax prawng ca pa hoik lih khaing jheeh Nawh Cao khankix, ¹³ Doeh ru pui Isarelax siliex Nawh Cao khankix eue, Can pex pa mawh kawn praix Yakop mai pui pa hoik laug Nawh Cao khankix eue, ¹⁴ Nawh Cao mawh Siyiex ex, mawh cao pa prawng ca piang ca haktiex in khawmuik heue. ¹⁵ Doh keud ka gumlox mukheu Nawh Cao jheung jheung mai ka gumlox pa tawx Nawh Cao ka son kaing rheng baux ju pui khankix, ¹⁶ Gumlox sijax mukheu pa hoik yuh Nawh Cao tau mai Abraham mai gumlox pa tiextu Nawh Cao ka Icak khankix, ¹⁷ Nawh hoik kieh an kaux cong ka daux ru Yakop mai gumlox sijax mukheu an hoik mawh ka can pui Isarelax pa kaux cong leeing ju, ¹⁸ pa ah nin, "Aux tak tawx haktiex Khanan, sonsang mawh sinngao cie pex, ". ¹⁹ Pex ang mawh pui hun, pex mawh pa kied tux khaing pui tete mai yam mawh pex nyo sinie ka daux haktiex an heue. ²⁰ Yam hoik lih hu kix khaing ceu pui tix cub an, hoek ka dee ot cub pui tang cub tix cub mai khaing meung haktiex tix mu, tom hoek pex ka ceu pui tang ceu tix ceu, ²¹ Nawh Cao ang lai kieh pui tix kaux kawx nunai map grham ka kix, mawh heue, Nawh Cao hoik sidiex gau ka simiang khankix kheu jao kix, ²² pa ah nin, "Paw doh teeh ka pui pa hoik groi Aux rawm bee ka mai paw yuh krax kha rhawm ka cao jhai Aux khankix heue." ²³ Kawn pui haktiex khankix eue, rhax lai yaogyaw ka Siyiex mai krai pao gumlox grawng krax taoh pa mhawm Nawh Cao khankix tixngaix hoik tixngaix heue. ²⁴ Plak jhi min sibrawm Nawh Cao ka daux sinax can pui khankix mai pa daox deng Nawh Cao ka daux sinax pui khankix heue. ²⁵ Mawh kheu Siyiex mawh pa kied ting lhaong mai mawh pa khaw ti yaogyaw tom kied ting lhaong. Nawh Cao mawh pa khaw ti lhat graung kah, khaing siyiex tang ceu khankix heue. ²⁶ Siyiex pui tang ceu khankix mawh siyiex riang pa giex going, viang mawh nan, Siyiex mawh cao pa phan raoma khankix heue. ²⁷ Min plakngai mai min sibrawm khankix koe ka plak sivoe Nawh; riang rao pa ting mai krax pa gaux rhawm khankix koe ka dah dee ot Nawh Cao heue. ²⁸ Pui kuceu khankix eue, yaogyaw ka Siyiex, yaogyaw ka min sibrawm mai riang rao pa ting Siyiex heue. ²⁹ Yaogyaw ka meung Siyiex mai yaogyaw ka sibrawm mai min ceu kaux pa ting Nawh Cao, viex krax tan mai hoek ka plak sivoe Nawh Cao heue. Krub Siyiex ka daux krax pa mhawm grang pa singax singeh, ³⁰ Kawn pui haktiex khankix eue, kieh koe krax pa lhat graung ka plak sivoe Nawh Cao, haktiex pa phan pa deuh Nawh Cao ang chix gah chix greed mai tak kaux cong, ³¹ Kieh raoma haktiex gaux rhawm mai kieh haktiex koe pa nyawm rhawm mai kieh kix ah nin ka sinax ceu pui khankix, "Siyiex mawh cao pa kwang heue." ³² Kieh rawm sigrit sigra mai can ceu pa naog ka daux nawh khankix ah lox sinum, kieh tong kaung mai khawm can ceu pa koe ka daux nawh khankix gaux rhawm heue. ³³ Khaix an, khaox khankix pa koe daux tiag, tak sang koe krax pa gaux rhawm ka plak sivoe Siyiex heue. Mawh kheu Nawh Cao tak hoek prawng ca ka khawm haktiex in heue. ³⁴ Yaogyaw mai ting bwanson ka Siyiex, kheu mawh Nawh Cao pa mhawm, krax caux rhawm Nawh kaux cong leeing ju heue. ³⁵ ah nin, Siyiex Cao taoh ka ex eue, "Deeh taoh ka yix mai deeh taoh yix lih khaing pui tang ceu khankix mai deeh kraix khrawm yix ot tau sonsang yaogyaw mai ting bwanson ka min ceu kaux pa singax singeh Maix Cao mai sonsang koe krax pa yaw yix rangdi ka daux pa yaogyaw tix min ceu kaux Maix Cao heue." ³⁶ Kieh Yaogyaw bwanson ka Siyiex ceu pui Isarelax khankix jah yam in leeing ju tom sidah leeing ju heue. Pui khawmuik ah Amen mai yaogyaw Siyiex heue. ³⁷ Mawh kheu nan, nawh hoik prah Asapha mai pux nawh khankix tan ka plak sivoe teug bwan sijax mukheu Siyiex sonsang yuh kaing jhaw ka plak sivoe teug bwan sijax mukheu jheung jheung awm pa hoik koe been pa yuh kix ku ngaix, ³⁸ Nawh hoik deuh Obetdedon mai puxaik nawh khankix tix gliah daix kaux tau, Obetdedon kawn simex Yedutum mai Hosa, khankix mawh cao pau siviex, ³⁹ Zadok cao giex kaing li mai khawm puxaik nawh cao giex kaing li khankix ot ka sivoe nyiex gox bwan man Siyiex ka dee pa lhaong an pa koe ka veng Gibion, ⁴⁰ Sonsang tan krax tan pa gleeing ka Siyiex piang khu dee tan krax pa gleeing plak ponngawb mai ponbo ku ngaix mai sonsang hoek yuh kix awm pa hoik koe been pa hoik tiem ti deuh ka daux gumlox tat jhawm prawng Siyiex, pa hoik tawm Nawh Cao ti deuh ka can pui Isarelax khankix, ⁴¹ Pui ot tau mai kix mawh Heman mai Yedutum, khawm pui pa hoik laug kix mai can pui pa hoik ciak ti deuh awm pa koe ceu kaux kix, sonsang yaogyaw mai ting bwanson ka Siyiex, grawh grawng nawh, krax caux rhawm Nawh Cao tak mawh pa kaux cong tom sidah leeing ju, ⁴² Pui ot tau mai kix pa mawh Heman mai Yedutum khankix phlu teettawng mai tah chiang mai tah ting tau mai pa kied ting sinum sonsang yaogyaw ka Siyiex heue. Yam an, kawn simex Yedutum mawh cao pau siviex heue. ⁴³ Khaix an, pui khawmuik lih hu mai kix tang ing ka nyiex tix mai Davit kawx deeh ing sonsang nawb bwan piang kawn nyiex ma cao tix heue.

¹ Khaix hoik luan ceu an khankix mai yam ot Davit ka daux nyiex haw tix, Davit ah nin ka cao jhai Natan, jhak heue, yam in Aux ot ka daux nyiex khaox Arit, viang mawh nan, teug bwan sijax mukheu Siyiex kawn ot ka greem nyiex gox bwan man tieb heue." ² Khaix an, Natan ah nin ka Davit, "Yuh awm can ceu pa koe ka daux rhawm maix, mawh kheu Siyiex ot tau mai maix heue." ³ Viang mawh nan, ceu an hoik lih ti koe ka daux sawm an mai gumlox Siyiex hoek bleeh ka Natan ah nin, ⁴ "Hu mai krai ka kawncau Aux Davit, "Maix tak ang pon ti sum nyiex sonsang ot Aux ka heue. ⁵ "Aux ang sax yaox ti ot ka daux nyiex glang bawg yam viex Aux ceu pui Isarelax khankix lih hu khaing haktiex meung Ejiptux, tom hoek ka daux singaix, viang mawh nan, Aux hoik lai loh ti ot daux nyiex gox khankix tix mu hoik tix mu mai khaing nyiex gox bwan man tix mu heue. ⁶ "Can dah dee hoik gah Aux ti hu tau mai ceu pui Isarelax, mawh hoik sax krai Aux ka cao prawng see ceu pui Isarelax khankix tix kaux kaux, ka pa hoik tawm Aux kix mawh cao liang yung pui Aux khankix ka daux krax pa ah nin, mawh ang pex nyang sum nyiex khaox Arit ka son Aux lie?" ⁷ Yan in maix krai ka kawncau Aux Davit, Siyiex Cao kru naing mai raoma ah nin, "Aux hoik laug ti teei maix khaing daux kawg yung mai khaing dee liang yung, sonsang mawh maix cao kwang piang pui Aux Isarelax khankix heue. ⁸ "Aux ot tau mai maix ka can dee hu maix khankix mai grheu ti tik pui koeng maix khankix ka plak sivoe maix mai kieh ceu kaux maix koe min awm ceu kaux pui ting lhaong khankix pa koe piang ca haktiex heue. ⁹ "Lheu khaing an, Aux tak sang laug ti deuh dah dee tix dah ka son pui Aux Isarelax khankix mai Aux tak sum kix kaux cong sonsang pon ot kix ka dah dee cie cao kix mai ang lai yaox ti gah khaing tan tix bawg kawx mai pui caox khankix tak ang lai pon yeen ya ka kix khaix in tix bawg kawx awm glang singaix pa hoik luan khankix, ¹⁰ "Jhak ka bawg yam tawm Aux lox ka cao prawng see, sonsang kwang kix piang pui Aux Isarelax khankix heue. Aux tak grheu ti tik pui koeng pex khankix heue. Lheu khaing an Aux sang krai maix mhong ka sang sum Siyiex nyiex ka son maix heue. ¹¹ "Ceu an tak lih ti mawh yam naog singaix baux ju maix khankix mai yam hu ot maix tau ka dee ot keeing maix khankix, Aux tak yaog ti deuh ru maix khaix maix, ka daux kawn simex maix khankix mai Aux tak sang pang ti deuh meung haktiex nawh heue. ¹² "Nawh tak mawh pa sum nyiex ka son Aux mai Aux tak pang ti deuh dang ngeung nawh leeing ju heue. ¹³ "Aux tak mawh keeing nawh mai nawh tak mawh kawn simex Aux mai Aux tak ang lai teei krax pa caux rhawm tix hu khaing nawh, awm hoik teei Aux krax pa caux rhawm tix khaing pui pa hoik dawg koe ka sivoe maix heue. ¹⁴ Aux tak tawx nawh ot ka daux nyiex Aux mai ka daux meung Aux leeing ju mai dang ngeung nawh tak kaux cong leeing ju heue." ¹⁵ Nawh tom deeh krai ka Davit awm koe gumlox pa plak jhi in kix khawmuik heue. ¹⁶ Khaix an simiang Davit laig ka daux mai ngawm ka plak sivoe Siyiex heue. Mawh aux pui pa yuh ka mawx lie? mawh doeh nyiex ma aux pa yuh ka mawx, Maix Cao lai yaogyaw aux ting yuh nin lie? ¹⁷ Siyiex eue, in hoik mawh ceu pa iak pa liied ka plak sivoe ngai Maix Cao; Siyiex eue, Maix Cao hoik gruh krai grawng doeh nyiex ma kawncau tix, son bawg yam pa sang hoek an mai Maix Cao hoik deuh aux mawh pui pa kied ting min plakngai heue. ¹⁸ "Davit tak sang baox pon ah patix ka Maix Cao grawng yaog Maix Cao min plakngai kawncau tix lie? grawh grawng nawh, Maix Cao tawng grawng kawncau tix heue. ¹⁹ "Siyiex eue, mawh kheu jhak Maix Cao ka bwanson kawncau tix, hoik koe rhawm Maix Cao, Maix Cao hoik yuh ceu pa ting lhaong in khawmuik ka daux pa sidawng laing laing ka daux pa kied ting lhaong in khawmuik heue. ²⁰ Siyiex eue, Siyiex pa awm Maix Cao ang koe tix kaux kawx, awm pa hoik sax mhong ka yhaok tix khawmuik, lheu khaing Maix Cao ang lai koe Siyiex tang kaux heue. ²¹ "Ka piang haktiex in, mawh koe pui tang ceu khankix pa awm pui Maix Isarelax, ka pui pa hoik laug Maix Cao ti teei ka son cao tix, sonsang kieh Maix Cao ceu kaux pa kied ting lhaong tix sidawng mai grawng kaing pa daox deng khankix ka daux pa Maix Cao grheu pui kuceu lih hu khaing plak sivoe pui Maix Cao khankix, pa hoik deeh taoh Maix Cao kix lih khaing haktiex meung Ejiptux lie? ²² "Grawh grawng nawh, Maix Cao hoik kieh pui Isarelax khankix mawh pui cie tix leeing ju mai Maix Cao, pa mawh Siyiex hoik mawh Siyiex kix heue. ²³ "Siyiex eue, gumlox pa hoik krai Maix Cao son kawncau Maix mai ka son doeh nyiex ma nawh khankix, kieh ankix mawh pa kaux cong leeing ju mai yuh awm pa hoik krai Maix Cao heue. ²⁴ "Mawh kheu nan, kieh min ceu kaux Maix Cao pa ting lhaong kaux cong leeing ju, Siyiex Cao kru naing raoma mai mawh Siyiex ceu pui Isarelax khankix mai kieh doeh nyiex ma kawncau Maix Davit mawh pa sum tix kaux cong ka plak sivoe Maix Cao heue ²⁵ Grawh grawng nawh, Siyiex aux eue, Maix Cao hoik krai grawng sang sum tix nyiex ka son kawncau Maix Cao heue. Mawh kheu nan, kawncau Maix hoik yaox ka ceu ankix, ka daux rhawm tix sonsang rawg bwan ka plak sivoe Maix Cao heue. ²⁶ "Yam in, Siyiex eue, Maix Cao mawh Siyiex mai Maix hoik yuh sijax mukheu pa mhawm in khankix ka kawncau Maix Cao heue. ²⁷ Yam in Maix Cao mawh pa koe rhawm tix nawb bwan piang doeh nyiex ma kawncau Maix khankix, sonsang pon ceu an pa kaux cong ka plak sivoe Maix Cao leeing ju heue. Grawh grawng nawh, Siyiex eue, Maix Cao nawb bwan piang ankix mai ceu ankix tak mawh pa pon bwan son leeing ju heue."

¹ Khaix an Davit puing ka ceu pui Philitix khankix mai pex ka kix mai teei veng Gat mai nyiex yaong khankix khaing daux tawm taix ceu pui Philitix heue. ² Khaix an nawh hoik puing haktiex Mawbax mai pui Mawbax khankix hoik lih mawh siliex Davit mai kix hoik yaox ti tawx keen heue. ³ Davit hoik deeh puing Hadadeza pa mawh simiang haktiex Zawbax tom hoek ka veng Hamat, sonsang lih hu pang nawh meung haktiex tix piang hawt baoh rawm klawng Yufrethi heue. ⁴ Davit hoik rhim ti teei ling lawx naing brung khankix tix rheng, cub kru naing brung khankix aliah rheng kaux mai kru naing caong khankix ra mheen kaux heue. Khaix hoik yuh Davit ling lawx naing brung tang dah khankix laux mai nawh deeh teei ling lawx naing brung tixyieh lhang khaing heue. ⁵ Yam hoek pui Surix khankix khaing veng Damase, sonsang teem Hadadeza simiang Zawbax, Davit pah cub pui Surix khankix yum ra mheen ra rheng kaux heue. ⁶ Khaix an Davit deuh cub tab pa pau veng khankix ka veng Damase, ka haktiex Surix mai ceu pui Surix khankix hoik lih mawh siliex Davit mai kix hoik tawx keen ka nawh heue. Mawh kheu nan, Siyiex kia ngien Davit ka can dee hu nawh heue. ⁷ Davit hoik rhim ti teei kraung naing tiebtie plah khri kix khaing siliex Hadadeza mai viex kix ing ka veng Yerusaliem heue. ⁸ Khaing veng Tibahat mai khaing veng Khun, pa mawh veng Hadadeza khankix, Davit hoik teei ti viex tawng lheung ing tom nie heue. Sawlamon tom yuh rawm dung tawng, rong tawng mai kraung shiao ka tawng khankix tom nie heue. ⁹ Yam mhong Tou pa mawh simiang veng Hamat ka grawng hoik pex Davit ka cub kru naing Hadadeza, simiang haktiex Zawbax khankix khawmuik, ¹⁰ Nawh ploi kawn simex tix Hadoram, hu ka simiang Davit, sonsang rieb tix pub nawh mai nawb bwan piang nawh, grawh grawng nawh Davit hoik puing Hadadeza mai hoik pex ka nawh, mawh kheu Hadadeza hoik yuh naing ka nawh glang ka an heue. Hadoram viex kraung khrai mau mai kraung tawng lheung kuceu khankix hoek heue. ¹¹ Simiang Davit hoik tan tix tawx khankix ka Siyiex, tan khri mai mau pa hoik viex kix hoek khaing haktiex Edom, haktiex Mawbax, pui Arun khankix mai khaing cau pui Philitix mai khaing ceu pui Amaliet khankix khawmuik heue. ¹² Lheu khaing an, Abishie kawn simex Zeruya, hoik pah ka ceu pui Edom khankix yum ka daux ngawd kih, tix mheen daix rheng kaux heue. ¹³ Nawh baox deuh cub tab pau veng khankix hoik lih mawh siliex Davit khawmuik heue. Siyiex hoik kia ngien Davit ka can dee hu nawh heue. ¹⁴ Mawh kheu nan, Davit kwang piang ceu pui Isarelax khankix mai hoik prawng rahsee piang pui nawh khankix khawmuik heue. ¹⁵ Yuabax kawn simex Zeruya mawh cao kwang piang cub kru naing mai Yehashaphat, kawn simex Ahilut mawh cao pa mhai ti deuh carang, ¹⁶ Zadok kawn simex Ahitut mai Abimaliet kawn simex Abiata khankix mawh cao giex kaing mai Shavasha, mawh cao tiiem lai, ¹⁷ Benayax kawn simex Yehoyadax mawh cao kwang piang pui Kheretix mai pui Peletix mai kawn simex Davit khankix kawx mawh cao kaing pa ting pa kwang ka kaing ka plak sivoe simiang heue.

¹ Khaix hoik yum simiang Nahat pa mawh ceu pui Amon mai kawn simex nawh deeh yaog tix kwang haktiex ka dah dee ot nawh heue. ² Khaix an, Davit ah nin, "Aux tak jhi krax caux rhawm tix ka Hanun kawn simex Nahat, mawh kheu hoik jhi keeing nawh krax caux rhawm tix ka aux heue. "Mawh kheu nan, Davit ploi cao cau hu sonsang yuh kix krax pa nyawm rhawm nawh ka son grawng keeing nawh heue. Siliex Davit khankix hoek ka Hanun ka haktiex dee ot pui Amon sonsang khu rhawm nawh heue. ³ Cub simiang Amon khankix ah nin ka Hanun, "Mawh keud maix Davit sang tawx krax yungyi ka keeing tix kheu jao ploi nawh pui pa khu rhawm maix khankix hoek lie? Ang maix tawng siliex nawh khankix mawh pa sang sawg ti jiang ti yaox ka haktiex mai pa sang hoek yuh maix laux leeing khankix lie?" ⁴ Mawh kheu nan, Hanun giex ka siliex Davit khankix mai khlao hauk bheup kix mai tat kraung ceep kix tom hoek sigreung piang ba viang kix mai deeh ploi kix hu dee singai heue. ⁵ Khaix an, pui tiblah hu krai Davit mhong grawng pui an khankix mai nawh ploi pui hu pub kix, kheu jao hoik kied koe krax kaig tua pui an khankix heue. simiang ah nin, ot tan ka daux veng Yerikho, tom hoek bawg yam kuah hauk bheup pex mai khaix an deeh hoek awx." ⁶ Yam yaox pui Amon khankix ka hoik yuh kix krax pa seeing brai ka Davit, Hanun mai pui Amon khankix hoik sipaox mau tixrheng talantan hu sonsang vai tix ling lawx naing brung mai cub pui naing brung khankix son tokaux kix, khaing haktiex Mesopotemia mai khaing haktiex Surix Makha mai khaing haktiex Zawbax khankix heue. ⁷ Mawh kheu nan, kix hoik vai ling lawx naing brung khankix loe mheen ra rheng lhang, tau mai simiang Makha mai khawm pui nawh khankix, hoik hoek ti yuh tab ka plak sivoe veng Medabax heue. Pui Amon khankix hoik deeh baox khrawm paox tix tau khaing ku veng dee ot cao kix mai hoek ka biang naing heue. ⁸ Yam mhong Davit ka grawng an, nawh ploi Yuabax mai kru naing pa kied ting riang khawmuik hu heue. ⁹ Khaix an, tokaux pui Amon khankix lih hu ti yuh naing ka plak sivoe siviex veng mai cub simiang pa hoek ti teem khankix hoik tang teei dee ot tix ka daux tong heue. ¹⁰ Yam yaox Yuabax ka hoik khre kix biang naing ka plak sivoe mai ka plak khaix tix, nawh hoik laug pui Isarelax pa cheung khankix tiblah mai nawh ploi kix hu ka biang naing sonsang puing ka ceu pui Surix khankix heue. ¹¹ Son can pui pa kawn deuk khankix, nawh ap kix ot greem pa kwang pux nawh Abishie mai kix yuh naing ka pui Amon khankix heue. ¹² Khaix an, nawh ah nin, "Phan pui Surix mawh pa ting riang khaing aux maix tak caw ti teem ka aux, viang mawh nan, phan pui Amon khankix mawh pa ting riang khaing maix, khaix an, aux tak teem maix heue. ¹³ "Kieh koe krax pa kwa rhawm ka daux pa mhawm mai kieh ex mawh pa koe riang rao ka son pui ex khankix mai son veng Siyiex ex khankix heue. Kieh Siyiex yuh ceu pa mhawm awm pa koe alo Nawh Cao heue." ¹⁴ Mawh kheu nan, Yuabax mai pui pa ot tau mai nawh khankix, hoik greed tix dex sonsang puing naing ka pui Surix khankix mai kix hoik to khaing plak sivoe nawh heue. ¹⁵ Yam yaox pui Amon khankix ka hoik to pui Surix khankix, kix kawx baox to sivoe pux nawh Abishie mai laig ka daux veng heue. Khaix an, Yuabax hoik deeh ing ka veng Yerusaliem heue. ¹⁶ Yam hoik yaox pui Surix khankix hoik som ti ka ceu pui Isarelax khankix, kix ploi cao cau khankix hu mai kieh kix kok ka pui Surix pa ot toi klawng Yufrethi mai Shophat pa mawh cao kaing naing ting, cub kru naing simiang Hadadeza khankix hu ka plak sivoe kix heue. ¹⁷ Yam krai kix grawng an ka Davit, nawh deeh kraix khrawm ceu pui Isarelax khankix mai nawh tiang hu ka toi rawm klawng Yawdan mai hoek ka kix mai kix puing naing ka kix heue. Mawh kheu nan yam puing Davit ka pui Surix khankix, kix deeh puing naing tau mai nawh heue. ¹⁸ Khaix an, pui Surix khankix hoik to sivoe ceu pui Isarelax mai Davit pah cub pui naing ling lawx brung khankix yum aliah rheng kaux mai khawm kru naing caong ceu pui Surix khankix yum pon mheen kaux mai nawh pah Shaphat cao kaing naing kru naing kix heue. ¹⁹ Yam yaox siliex Hadadeza khankix ka som tix ka ceu pui Isarelax khankix, kix yuh pa nhim tan mai Davit mai kix hoik lih mawh siliex nawh heue. Mawh kheu pui Surix khankix ang lai koe rhawm sang teem ka pui Amon khaix an pie tix bawg kawx heue.

¹ Yam hoik naog tix num bawg yam rung praix ka daux num an, yam hoek bawg lih hu cub simiang khankix tix puing naing, Yuabax thong cub kru naing khankix yieh ti tik haktiex Amon khankix laux leeing mai kix hoek ti lai lawm ka veng Raba heue. Yam an Davit ot ka daux veng Yerusaliem heue. Yuabax hoik pex ka veng Raba mai yuh veng an laux leeing heue. ² Khaix an, Davit peeik ti teei mhok khri khaing kaing simiang mai ciang tix yaox krax cien khri nong nong koe tix talantan mai shiang pa laoh lie kix kawx koe ka daux an heue. Ceep mhok khri an piang kaing Davit heue. Nawh baox teei kraung pa pon tud rhim Pa haoh hun khankix lih khaing daux veng heue. ³ Nawh teei pui pa ot ka daux veng khankix hu yuh kaing leu khaox, kaing rhiem mai kaing shiao moe khankix heue. Mawh kheu nan, Davit hoik kieh pui veng Arun khankix yuh ceu an heue. Khaix an, Davit mai pui khankix khawmuik, deeh ing ka veng Yerusaliem heue. Yerusaliem heue. ⁴ Khaix an mai naing hoik lih ti koe ka daux veng Geza tau mai pui Philitix khankix, ka daux bawg yam an, Sibekhie ceu pui Hushitix pah ka Sipie pa mawh cub kawn simex pui Rephen an tix kaux heue. Pui Philitix hoik som heue. ⁵ Naing baox lih ti koe mai pui Philitix khankix mai Elahanan kawn simex Ya irax hoik pah Lahamix pa mawh pux Golia ceu pui Gitix mai gawng pliah pa giex nawh hoik ting awm blax taing heue. ⁶ Khaix an, naing hoik baox deeh koe ka daux veng Gatax, ka dee hoik koe pui pa kied ting lhaong tix kaux, pa koe giien taix giien caong khankix tixnga pon giien, ka taix nawh tix khawn koe liah giien mai caong nawh tix khawn koe liah giien heue. Nawh mawh pui pa keh khaing ceu pui Rephen heue. ⁷ Mawh kheu nan, yam kawn jhax lawg nawh ka ceu pui Isarelax khankix, Shima puxke Davit pa mawh kawn simex Shima pa kaux Yawnatan hoik pah nawh yum heue. ⁸ Inkix hoik mawh pa keh khaing ceu pui Rephen pui pa ting khankix ka daux veng Gatax mai kix hoik yum ka daux tawm taix Davit mai ka daux tawm taix siliex nawh khankix heue.

¹ Yam an, satan hoik yaog ti kaoh sonsang kieh ceu pui Isarelax khankix laux leeing mai hoik so rhawm Davit kieh nawh simin ka ceu pui Isarelax heue. ² Mawh kheu nan, Davit ah nin ka Yuabax mai ka cao kaing pui khankix, "Hu heue, simin ti yaox ceu pui Isarelax khankix, jah ka veng Bereshabax tom hoek ka veng Dan mai viex carang kix hoek ka aux sonsang tawng aux ka ankix heue." ³ Yuabax pawk lox ah nin, kieh Siyiex yuh pui Nawh Cao nie haoh hun khaing pa koe kix tixyieh son heue. Mawh kheu nan, simiang aux eue, "Ang kix khawmuik mawh siliex simiang aux lie? Simiang aux sang deeh mhaing ka ceu in khankix jao grawng pa yuh ka mawx lie? Kheu lai sang kieh mawh grawng ceu pa koe phimap ka daux ceu pui Isarelax lie?" ⁴ Viang mawh kawx nan, gumlox simiang hoik pex ka Yuabax heue. Mawh kheu nan, Yuabax lih khaing tan mai hu ka daux sinax ceu pui Isarelax khawmuik mai deeh hoek ka veng Yerusaliem heue. ⁵ Khaix an, Yuabax deeh tawx carang pui khankix ka Davit heue. Ceu pui Isarelax pa giex vaig khankix koe tix lan tix sien kaux mai ceu pui Yudax pa giex vaig khankix koe pon sien aliah mheen kaux heue. ⁶ Viang mawh nan, nawh ang nyang simin ka ceu pui Lewix mai ceu pui Benyamin pa koe ka sinax kix, mawh kheu jao seeing Yuabax ka gumlox simiang heue. ⁷ Siyiex ang lai khaw rhawm ka ceu in, mawh kheu nan, Nawh Cao hoik tawx krax kham geu ka ceu pui Isarelax khankix heue. ⁸ Mawh kheu nan, Davit deeh ah nin ka Siyiex, "Aux hoik lud ka pa kied ting lhaong kheu jao grawng yuh aux ceu in heue. Viang mawh nan, yam in aux rawg bwan, teei ti tik phimap siliex Maix Cao liak, grawh grawng nawh, aux hoik kied yuh ceu pa vao pa caox heue." ⁹ Siyiex sikah ka Gat, pa mawh cao jhai Davit ah nin, "Hu krai ka Davit ah nin, Siyiex ah nin; ¹⁰ "Aux tak tawx ceu in loe ceu ka maix mai laug ti teei an tix ceuceu ka son cao maix, Aux tak sang yuh ceu an ka maix heue." " ¹¹ Mawh kheu nan, Gat hoek ka Davit mai ah nin ka nawh, "Siyiex ah nin; laug ti teei an ka son cao maix, ¹² Pa sang mawh sibhawm praix loe num mai pa sang pex pui koeng maix khankix ka maix loe khix tau mai lawm vaig pa hoik hoek ti pheet khaix maix, phan ang mawh nan, jhawm saux preng pa sang viex kawncau Siyiex tau mai vaig lawm Siyiex sonsang yuh haktiex ceu pui Isarelax khankix laux leeing heue. Yam in keud ti yaox ka lox ceu pa sang deeh krai aux ka cao pa ploi aux hoek heue." ¹³ Davit ah nin ka Gat, "Aux kied koe pa laux rhawm! yuh bwanson kieh aux glup ka daux tawm taix Siyiex heue. Pa caux rhawm Nawh Cao mawh pa kied ting lhaong, viang mawh nan, paw doh kieh aux glup ka daux tawm taix kawn pui liak?" ¹⁴ Mawh kheu nan, Siyiex ploi jhawm saux preng lih hoek piang ceu pui Isarelax khankix mai pui Isarelax hoik goh ti yum aliah mheen kaux heue. ¹⁵ Siyiex ploi kawncau tix hu ka veng Yerusaliem, sonsang yuh veng an laux leeing heue. Yam tak sang yuh kawncau Siyiex veng an laux leeing, Siyiex jhak ti yaox mai koe krax pa voi rhawm mai Nawh Cao ah nin ka kawncau Siyiex, "Ding heue paw lai yuh krax pa laux leeing an, yoi taix maix heue. "kawncau Siyiex cung hawt biang glah nghox Aronax ceu pui Yebusix heue. ¹⁶ Khaix an, Davit maong ti jhak mai yaox cung kawncau Siyiex ot daux sinax haktiex raoma mai nawh nyeu vaig lawm pa koe daux taix ti piang veng Yerusaliem heue. Mawh kheu nan, Davit mai kwad song khankix ceep ka chee rhix mai gup ngai tix piang tiex heue. ¹⁷ Davit ah nin ka Siyiex, "Ang hoik mawh aux pa tawx lox ka pui khankix mai kieh kix simin ka pui haktiex ang mawh lie? Aux hoik mawh pui yuh phimap mai hoik yuh ceu pa caox caig tete, viang mawh nan, mawh hoik yuh kawn yung in khankix patix lie? Siyiex aux eue, aux rawg bwan mai kieh taix Maix Cao ot piang aux mai piang doeh nyiex ma keeing aux khankix, viang mawh nan, paw kieh jhawm saux preng krax kham geu in khankix hoek piang ceu pui Maix Cao liak!" ¹⁸ Khaix an, kawncau Siyiex hoik tawm lox ka Gat mai kieh ah nin ka Davit, kieh Davit haok sum khu dee tan tix lhang son Siyiex piang biang glah nghox Aronax ceu pui Yebusix heue. ¹⁹ Mawh kheu nan, Davit hoik lih hu awm lox pa hoik tawm Gat, ka pa hoik krai nawh ka daux min ceu kaux Siyiex heue. ²⁰ Yam kawn pah Aronax ka nghox, nawh gi tix jhak mai yaox kawncau Siyiex mai kawn simex nawh pon kaux pa ot mai nawh khankix hoik mox tix heue. ²¹ Khaix an, Davit hoek ka Aronax mai Aronax jhak mai yaox ka Davit heue. Nawh lih hu khaing glah pah nghox ca mai gup kaing tix piang tiex plak sivoe ngai Davit heue. ²² Khaix an, Davit ah nin ka Aronax, tawx dah dee glah pah nghox in ka aux, sonsang sum aux khu dee tan tix lhang piang an son Siyiex heue. Maix coh ka aux awm ngawh jum pa simie maix ti pon, mawh sonsang ang jhawm saux preng hoek piang pui khankix heue." ²³ Aronax ah nin ka Davit, "Teei an ka son maix mai kieh simiang aux yuh an khankix awm pa khaw caw ka daux ngai nawh heue. Jhak heue, aux tak baox tawx moi son krax tan pa gleeing mai tawx kraung shiao biang glah pah nghox mawh son khix mai nghox ca son krax tan phawng nghox ca, aux tawx ceu an khawmuik heue. ²⁴ Khaix an, simiang Davit ah nin ka Aronax, "Ang mawh, mawh kheu nan, aux tak liag awm ngawh jum nawh tom naog, grawh grawng nawh, aux tak ang teei kraung khrai cie maix son Siyiex mai ang tan krax tan pa gleeing pa ang koe ngawh koe jum khankix ka son tix heue." ²⁵ Mawh kheu nan, Davit ciang ti tawx khri liah yieh shekhe ka Aronax ka son dee an heue. ²⁶ Davit sum khu dee tan tix lhang ka son Siyiex tan mai nawh tan krax tan pa gleeing mai krax tan pa nhim khankix mai nawh kok ka Siyiex, Nawh Cao pawk lox ka nawh tan mai ngu khaing raoma cod piang khu dee tan pa gleeing heue. ²⁷ Khaix an, Siyiex tawx lox ka kawncau Siyiex mai nawh deeh teei vaig sau daux phak vaig heue. ²⁸ Ka daux bawg yam an yam yaox Davit ka pawk Siyiex lox tix, ka biang glah pah nghox Aronax ceu pui Yebusix, nawh yuh krax tan pa appong tan heue. ²⁹ Mawh kheu nyiex gox bwan man Siyiex mai khu dee tan krax tan pa gleeing, pa yuh Mose ti deuh ka daux tiag kawn koe piang dee pa lhaong ka veng Gibion daux bawg yam an heue. ³⁰ Viang mawh nan, Davit ang pon hu ka plak sivoe an sonsang chawk cheng ka Siyiex, kheu jao lhat graung nawh ka vaig lawm kawncau Siyiex heue.

¹ Khaix an, Davit ah nin, "In mawh nyiex Siyiex mai in mawh khu dee tan krax tan pa gleeing pui Isarelax heue." ² Mawh kheu nan, Davit tawx lox sonsang kraix khrawm ka pui tang ceu pa ot ka daux haktiex pui Isarelax khankix mai nawh cau cao yuh kaing phawng tiex pid khankix saik simaox sonsang sum ka nyiex bwan Siyiex heue. ³ Davit khre ti deuh rhiem sonsang yuh jim rhiem pa sang tawk ka siviex iak mai siviex ting mai tawng lheung tom nie tom ang lai dak uik ciang ka, ⁴ khaox Arit khankix tom nie, mawh kheu pui veng Sidon mai pui khaing veng Taira viex khaox Arit khankix hoek ka Davit tom nie heue. ⁵ Yam in Davit ah nin, "Kawn simex aux Sawlamon kawn awn ju mai ang nyang koe krax lhak haing mai nyiex pa sang sum ka son Siyiex mawh pa kied ting lhaong mai pa kied ao min, piang haktiex an khawmuik heue. Aux tak khre rien ka son an yam in heue." Mawh kheu nan Davit hoik khre rien ceu an khankix tom nie sivoe sang yum nawh heue. ⁶ Khaix an, nawh kok kawn simex tix Sawlamon mai ap beeh glawm ka nawh sonsang sum nyiex ka son Siyiex pui Isarelax heue. ⁷ Davit ah nin ka Sawlamon, "Kawn simex eue, aux hoik koe rhawm mai keud ti sang sum nyiex tix lhang son min ceu kaux Siyiex aux; ⁸ "Viang mawh nan, gumlox Siyiex hoek ka aux ah nin, maix hoik yuh naing ting mai hoik kieh nham pui jauh tom nie maix tak ang pon ti sum nyiex son min ceu kaux Aux, grawh grawng nawh kheu hoik pah maix pui tom nie piang haktiex ka daux ngai Aux heue. ⁹ Jhak heue, kawn simex tix kaux tak keh ka son maix mai nawh tak mawh pui chix ot yiien yawg mai Aux tak kieh pui koeng pa ot hawt vung viang nawh khankix khawmuik ot yiien yawg tix heue. Ceu kaux nawh tak mawh Sawlamon, dee bleeh mawh pa nhim, mawh kheu Aux tak tawx krax pa nhim mai pa yiien yawg ka ceu pui Isarelax khankix ka daux baux ju nawh heue. ¹⁰ Nawh tak sum nyiex son min ceu kaux Aux mai nawh tak mawh kawn simex Aux mai Aux tak mawh keeing nawh mai Aux tak pang ti deuh dang ngeung meung haktiex nawh piang ceu pui Isarelax khankix leeing ju heue. ¹¹ "Mawh kheu nan, kawn simex eue, kieh Siyiex ot tau mai maix mai kieh maix haok hwan ting lhaong mai sum nyiex Siyiex maix, awm pa hoik krai Nawh Cao ka maix heue. ¹² "Kieh Siyiex tawx pingnya cuyi mai krax tawng yung ka maix mai tawx beeh glawm kwang maix ka ceu pui Isarelax khankix mai sonsang pon priex maux ti hawt ka gumlox tat jhawm prawng Siyiex tix heue. ¹³ "Khaix an maix tak haok hwan ting lhaong, phan maix priex ti hawt ka gumlox lai beenli mai lox tat jhawm prawng pa hoik tawm Siyiex ti deuh ka Mose son grawng ceu pui Isarelax khankix heue. Teei riang tix mai kieh koe rhawm kwa rhawm vao ceu pa mhawm, paw koe krax lhat graung mai paw koe krax laux rhawm heue. ¹⁴ "Aux hoik yaox krax kham geu ka krax kha rhawm tete, sonsang khre rien aux ti deuh khri tix sien talantan mai mau khankix tix lan talantan mai khawm tawng lheung mai rhiem khankix pa ang lai dak chix uik ciang son nyiex bwan Siyiex, kheu kied nie, aux hoik baox khre ti deuh khaox mai simaox mai maix tak baox yuh ka an khankix heue. ¹⁵ "Lheu khaing an pui yuh kaing tak ot tau mai maix tom nie, pa mawh pui saik simaox mai pui yuh kaing simaox mai kaing khaox khankix mai khawm pui pa min ka kaing kuceu khawmuik heue. ¹⁶ "Pa mawh pa yuh kaing khri kaing mau, kaing tawng mai kaing rhiem khankix pa ang lai dak uik simin heue. Yaog tix kaoh mai jah ti yuh kaing, kieh Siyiex ot tau mai maix heue." ¹⁷ Davit baox tawm lox ka cao kaing ceu pui Isarelax sonsang teem ka kawn simex nawh Sawlamon mai ah nin; ¹⁸ "Ang hoik mawh Siyiex pa ot tau mai pex lie? ang hoik mawh Nawh Cao pa tawx krax yiien yawg ka pex ku daog ku dawn lie? Grawh grawng nawh, Nawh Cao hoik ap ti tawx pui pa ot ka daux haktiex an khankix ka daux tawm taix aux mai haktiex an hoik mawh pa yaog tix ka plak sivoe Siyiex mai ka plak sivoe pui Nawh Cao khankix heue. ¹⁹ Yam in so rhawm maix mai khwan maix sonsang sawg ka Siyiex pex heue. Mawh kheu nan, yaog ti kaoh mai sum dee pa singax singeh cie Siyiex, sonsang viex maix teug bwan sijax mukheu Siyiex hoek mai khawm kraung khrai pa singax singeh cie Siyiex khankix laig ka daux nyiex pa sang sum son min ceu kaux Siyiex heue."

¹ Yam hoik kuad Davit mai yam hoik naog bawg yam singaix nawh khankix, nawh yaog kawn simex tix Sawlamon mawh simiang piang ceu pui Isarelax heue. ² Nawh kraix khrawm cao kaing ceu pui Isarelax mai cao giex kaing li khankix tau mai ceu pui Lewix heue. ³ Yam ankix simin ka pui Lewix khankix, jah ka pui koe ju tixngoe num haok plak piang pa mawh kawn simex khawmuik, koe loe mheen daix rheng kaux heue. ⁴ Khaing daux pui ra mheen pon rheng kaux mawh cao kaing kia ngien ka kaing nyiex bwan Siyiex mai an liah rheng kaux mawh cao kaing ting mai cao prawng see khankix, ⁵ an pon rheng kaux mawh cao pa pau siviex mai an pon rheng kaux mawh cao pa yaogyaw bwanson Siyiex tau mai kraung ting "Pa hoik yuh aux ti deuh, " "Sonsang yaogyaw bwanson Siyiex heue." ⁶ Davit tang gwieh ka kix cub mawx cub an khaing daux sinax kawn simex pui Lewix khankix pa mawh cub Gerashon, Kawhat mai Merarix khankix heue. ⁷ Khaing daux ceu pui Gerashon mawh Ladan mai Shimix heue. ⁸ Kawn simex Ladan khankix Yehilax mawh kawn Ai nawh, Zetam mawh kawn Nyi mai Yawlax mawh kawn Sam, kix koe loe kaux heue. ⁹ Kawn simex Shimix mawh Shelomix, Hazalax mai Haran loe kaux heue. In mawh cao kaing doeh nyiex ma keeing Ladan heue. ¹⁰ Kawn simex Shimix khankix mawh Yahat, Zina, Yushax mai Beriyax heue. Inkix pon kaux mawh kawn simex Shimix heue. ¹¹ Yahat mawh kawn Ai mai Zizax mawh kawn Nyi nawh heue. Viang mawh nan, Yushax mai Beriyax ang koe kawn simex tom nie; mawh kheu nan, kix hoik kleuk tix awm doeh nyiex ma keeing tix kaux ngie heue. ¹² Kawn simex Kawhat khankix mawh Amaram, Izaha, Hebron mai Zilax khawmuik koe pon kaux heue. ¹³ Kawn simex Amaram khankiex mawh Arun mai Mose heue. Arun mai cub doeh kawn praix nawh khankix, hoik tang gwieh ti deuh kix sonsang yuh nawh pa singax singeh khankix mawh pa kied singax singeh mai sonsang gleeing nyawng bhawng ka plak sivoe Siyiex mai sonsang mawh pa yuh kaing jhaw son Nawh Cao mai sonsang nawb bwan ka daux min ceu kaux Nawh Cao leeing ju heue. ¹⁴ Yam in cub kawn simex pui Siyiex pa mawh Mose khankix hoik mhai ti deuh ka daux doeh ru pui Lewix heue. ¹⁵ Kawn simex Mose khankiex mawh Gerashon mai Eliaza heue. ¹⁶ Khaing daux cub kawn simex Gerashon, Sheboelax mawh kawn Ai nawh, ¹⁷ Khaing daux doeh ru Eliaza khankix Rehabix mawh kawn Ai nawh heue. Eliaza ang lai koe kawn simex tang kaux khaing an heue. Viang mawh nan, kawn simex Rehabi koe tom nie heue. ¹⁸ Khaing daux cub kawn simex Izaha, Shelomit mawh kawn Ai nawh heue. ¹⁹ Khaing daux kawn simex Hebron khankix Yeri mawh kawn Ai nawh mai Amarix mawh kawn Nyi, Yahaze mawh kawn Sam mai Yekaman mawh kawn Sai nawh heue. ²⁰ Khaing daux kawn simex Uzilax khankix, Mikha mawh kawn Ai mai Yeshi mawh kawn Nyi nawh heue. ²¹ Kawn simex Merarix khankix mawh Malalix mai Mushix heue. Kawn simex Malalix mawh Eliaza mai Kishax heue. ²² Eliaza tak ang koe kawn simex tix kaux kawx tom yum tix, koe ngie kawn bun khaing heue. puxaik kix, pa mawh cub kawn simex Kishax hoik teei ti moeng kawn bun nawh heue. ²³ Kawn simex Mushix mawh Mahalix, Eda mai Yerimot, loe kaux heue. ²⁴ Inkix mawh kawn praix ceu pui Lewix pa kaoh khaing daux doeh nyiex ma keeing kix, awm pa hoik koe carang kaux mawx kaux an, pa sang yaox ti yuh kaing jhaw son nyiex bwan Siyiex jah pa koe ju tixnga num haok plak piang heue. ²⁵ Davit ah nin, "Siyiex ceu pui Isarelax hoik tawx krax pa yiien yawg ka pui Nawh khankix mai kix tak ot ka daux veng Yerusaliem leeing ju." ²⁶ "Nawh baox ah nin ka ceu pui Lewix khankix, "Kix tak ang lai yaox ka nyiex gox bwan man mai kraung khrai nyiex gox bwan man khaix in tix bawg kawx heue." ²⁷ Awm gumlox pa ghoit Davit ti ah, ceu pui Lewix khankix yaox ti teei carang, jah ka pa koe ju tixnga num haok plak piang heue; ²⁸ Grawh grawng nawh, beeh glawm kix mawh sonsang teem ka cub kawn simex Arun ka daux kaing jhaw mai ka daux biang rawb rim nyiex bwan mai ka daux lawg khankix mai kieh kraung pa singax singeh khawmuik mawh pa singax mai khawm ka daux kaing jhaw nyiex bwan Siyiex, ²⁹ tau mai blah pa khan ka plak sivoe Nawh Cao mai phawng nghox ca ceu pa mhawm son krax tan nghox ca pa im tau mai khlawp blah pa ang sau susaix khankix mai can ceu pa hoik tong sin ka plah rhiem mai can ceu pa klu klao tix tau mai bee mai can ceu pa hoik tiag tong ti deuh diag nawh kuceu khawmuik, ³⁰ mai kix cung ti yaogyaw mai ting bwanson ka Siyiex ponngawp mai plak ponbo ku jheeng, ³¹ mai kix yaox ti gleeing krax tan pa gleeing plak sivoe ngai Siyiex jheung jheung ka daux singaix twah mai ka daux singaix haok khix khraox mai ka daux singaix pawie khankix, awm ka pa hoik tat kix ti deuh, pa koe daux beenli pa hoik yuh kix jheung jheung ka plak sivoe Siyiex. ³² Kix teei beeh glawm ka can ceu pa lo ka daux nyiex gox bwan man bang kum mai son pa lo ka dah dee pa singax singeh mai teem ka puxaik pa mawh kawn simex Arun khankix, ka son kaing jhaw ka daux nyiex bwan Siyiex khawmuik heue.

¹ In khankix mawh krax pa tang tiah cub kawn simex Arun tix koe heue. Kawn simex Arun mawh Nadat, Abihux, Eliaza mai Itama heue. ² Nadat mai Abihux yum voe keeing tix mai ang tien koe kawn praix mawh kheu nan, Eliaza yuh kaing jhaw cao giex kaing li heue. ³ Khaix an, Davit kieh Zadok pa kaoh khaing cub kawn simex Eliaza mai Ahimaliet, pa kaoh khaing cub kawn simex Itama, tang tiah ti deuh kaing jhaw awm pa khaw caw ka son kix heue. ⁴ Kix nie lheu yaox cao kaing ka daux cub kawn simex Eliaza khaing daux cub kawn simex Itama heue. Mawh kheu nan, kix tom gwieh yuh nin, khaing daux cub kawn simex Eliaza khankix cao kaing doeh nyiex ma keeing kix koe kao liah kaux mai khaing daux cub kawn simex Itama cao kaing doeh nyiex ma keeing kix koe daix kaux heue. ⁵ Mawh kheu nan, kix yuh niieb mai gwieh kaing ka kix tix cub hoik tix cub, ka cao kaing dah dee pa singax singeh mai cao kaing daux nyiex bwan Siyiex, hoik laug tix khaing kawn simex Eliaza mai khaing kawn simex Itama heue. ⁶ Cao tiiem lai Shemayax kawn simex Netanelax, ceu pui Lewix hoik tiem ti deuh ceu an khankix ka plak sivoe simiang mai ka plak sivoe cao thung cao bung khankix mai ka plak sivoe Abiata, plak sivoe cao kaing doeh nyiex ma keeing cub cao giex kaing li mai ka plak sivoe ceu pui Lewix mai kix lai loh ti yuh nieb khaing daux doeh nyiex ma keeing kix Eliaza mai khaing nyiex ma Itama heue. ⁷ Krax yuh nieb bawg tix caw ka Yehoyarip mai bawg ra caw ka Yedayax, ⁸ Bawg loe caw ka Harim mai bawg pon caw ka Sawrim, ⁹ bawg phwan caw ka Malakhiyax mai bawg liah caw ka Miyamin, ¹⁰ bawg aliah caw ka Hakkok mai bawg daix caw ka Abiyax, ¹¹ bawg dim caw ka Yeshua mai bawg kao caw ka Shakanix, ¹² bawg kaotix caw ka Eliaship mai bawg kao ra caw ka Yakim, ¹³ bawg kao loe caw ka Hupa mai bawg kao pon caw ka Yeshabat, ¹⁴ bawg kao phwan caw ka Bilaga mai bawg kao liah caw ka Imarax, ¹⁵ bawg kao aliah caw ka Hezirax mai bawg kao daix caw ka Hapiziet, ¹⁶ bawg kao dim caw ka Petahim mai bawg tixnga caw ka Yehezekelax, ¹⁷ bwa tixnga tix caw ka Yakhim mai bawg tixnga ra caw ka Gamulax, ¹⁸ bawg tixnga loe caw ka Delayax mai bawg tixnga pon caw ka Maziyax heue. ¹⁹ Inkix hoik mawh pui laug kix sonsang laig yuh kix kaing jhaw ka daux nyiex bwan Siyiex, awm pa hoik koe been pa deuh khaing tawm taix keeing kix Arun, pa hoik tawm Siyiex ceu pui Isarelax ka nawh heue. ²⁰ Yam in kawn simex ceu pui Lewix pa kawn deuk khankix mawh awm in heue. Kawn simex Amaram, mawh Shubalax mai kawn simex Shubalax mawh Yedeyax heue. ²¹ In mawh cub pa dex dawd mai Rehabix, kawn simex Rehabix mawh Isaya pa mawh cao kaing heue. ²² Kawn simex Izaha mawh Shelomot mai kawn simex Shelomot mawh Yahat, ²³ Kawn Ai Hebron mawh Yerix, kawn Nyi mawh Amarix, kawn Sam mawh Yahazilax, kawn Sai mawh Yekaman heue. ²⁴ Kawn simex Uzilax mawh Mikha mai kawn simex Mikha mawh Shamirax, ²⁵ pux Mikha mawh Isaya mai kawn simex Isaya tom mawh Zakharix, ²⁶ Kawn simex Merarix khankix mawh Mahalix mai Mushix, kawn simex Yaziyax mawh Benaw heue. ²⁷ Kawn simex Merarix mawh Yaziyax, kawn simex Yaziyax mawh Benaw, Shawham, Zakurax mai Ibarix khankix heue. ²⁸ Kawn simex Mahalix mawh Eliaza mai Eliaza ang lai koe kawn simex heue. ²⁹ Kawn simex Kishax mawh Yeramelax, ³⁰ Kawn simex Mushix mawh Mahalix, Eda mai Yerimot heue. Inkix mawh cub kawn simex ceu pui Lewix awm pa hoik koe doeh nyiex ma keeing kix heue. ³¹ Inkix mawh pa yuh kix nieb, awm pa hoik yuh puxaik kix cub kawn simex Arun khankix ka plak sivoe simiang Davit, Zadok, Ahimieliet mai ka plak sivoe cao kaing doeh nyiex ma keeing kix cao giex kaing li mai ceu pui Lewix khankix heue. Cao kaing ting ka daux nyiex ma keeing kix khankix yuh ka pui ting awm puxaik pa iak kix heue.

¹ Lheu khaing an, Davit mai cao kaing naing ting pui haoh hun khankix gwieh tix tawx kaing son kawn simex Asapha mai ka Heman, ka Yedutun khankix, pa sang krai lox bwan mai rhax lai tau mai ting khaox feuk, ting pawd mai chiang khankix heue. Pui pa yuh kaing khankix pa koe carang mawh awm in, ² khaing daux cub kawn simex Asapha khankix mawh Zakurax, Yosiep, Netanix mai Asharelax; kawn simex Asapha khankix hoik ot greem pa kwang keeing kix Asapha mai yuh kaing jhaw Siyiex awm lox pa hoik tawx simiang heue. ³ Khaix daux cub Yedutun kawn simex nawh khankix mawh Gedalix, Zerix, Yeshayax, Shimix, Hashabix mai Matithix, kix liah kaux mawh pa ot greem pa kwang keeing kix Yedutun, sonsang rhax lai tau mai ting khaox feuk ka daux pa yaogyaw mai ting bwanson ka Siyiex heue. ⁴ Khaing daux cub Heman, kawn simex nawh khankix mawh Bukkix, Matania, Uzilax, Sheboelax, Yerimot, Hananix, Hanan, Eliata, Gidatix, Romantiza, Oshabekashax, Malothi, Hotirax mai Mahaziot khankix heue. ⁵ Inkix khawmuik mawh cub kawn simex Heman, pa mawh cao jhai simiang ka plak gumlox Siyiex mai mawh cao phlu teettawng kawn simex khankix ka Heman kao pon kaux mai kawn bun khankix loe kaux heue. ⁶ Inkix khawmuik hoik mawh pa ot greem pa kwang keeing kix, sonsang tah ting rhax lai, ka daux nyiex bwan Siyiex, tau mai chiang, ting pawd mai ting khaox feuk, son kaing jhaw daux nyiex bwan Siyiex, Asapha, Yedutun mai Heman, hoik mawh pa ot greem sibrawm simiang heue. ⁷ Mawh kheu nan, carang kix mai puxaik kix pa hoik thong hoik gau pui ka lai rhax Siyiex mai can pui pa min ka ceu an khawmuik, koe ra yieh tixdaix daix kaux heue. ⁸ Kix hoik yuh nieb ka son beeh glawm pa sang caw kix ti yuh, jah khaing pui pa iak pa ting khankix mai sara cao gau khawm nyawm cawng khankix heue. ⁹ Yam in krax yuh nieb bawg tix ka cub Asapha caw ka Yosiep; bawg ra caw ka Gedalix, tau mai puxaik nawh mai kawn simex nawh khankix kao ra kaux heue. ¹⁰ Bawg loe caw ka Zakurax, tau mai kawn simex nawh mai puxaik nawh khankix kao ra kaux heue. ¹¹ Bawg pon caw ka Yizarix, tau mai kawn simex nawh mai puxaik nawh khankix kao ra kaux heue. ¹² Bawg phwan caw ka Netaniyax, tau mai kawn simex nawh mai puxaik nawh khankix kao ra kaux heue. ¹³ Bawg liah caw ka Bukkix, tau mai kawn simex nawh mai puxaik nawh khankix kao ra kaux heue. ¹⁴ Bawg aliah caw ka Yesharelax tau mai kawn simex nawh mai puxaik nawh khankix kao ra kaux heue. ¹⁵ Bawg daix caw ka Yeshayax, tau mai kawn simex nawh mai puxaik nawh khankix kao ra kaux heue. ¹⁶ Bawg dim caw ka Matania, tau mai kawn simex nawh mai puxaik nawh khankix kao ra kaux heue. ¹⁷ Bawg kao caw ka Shimix, tau mai kawn simex nawh mai puxaik nawh khankix kao ra kaux heue. ¹⁸ Bawg kao tix caw ka Azarelax, tau mai kawn simex nawh mai puxaik nawh khankix kao ra kaux heue. ¹⁹ Bawg kao ra caw ka Hashabix, tau mai kawn simex nawh mai puxaik nawh khankix kao ra kaux heue. ²⁰ Bawg kao loe caw ka Shubalax, tau mai kawn simex nawh mai puxaik nawh khankix kao ra kaux heue. ²¹ Bawg kao pon caw ka Matathix, tau mai kawn simex nawh mai puxaik nawh khankix kao ra kaux heue. ²² Bawg kao phwan caw ka Yeremot, tau mai kawn simex nawh mai puxaik nawh khankix kao ra kaux heue. ²³ Bawg kao liah caw ka Hananix, tau mai kawn simex nawh mai puxaik nawh khankix kao ra kaux heue. ²⁴ Bawg kao aliah caw ka Yoshakashax, tau mai kawn simex nawh mai puxaik nawh khankix kao ra kaux heue. ²⁵ Bawg kao daix caw ka Hananix, tau mai kawn simex nawh mai puxaik nawh khankix kao ra kaux heue. ²⁶ Bawg kao dim caw ka Malothi, tau mai kawn simex nawh mai puxaik nawh khankix kao ra kaux heue. ²⁷ Bawg tixnga caw ka Eliata, tau mai kawn simex nawh mai puxaik nawh khankix kao ra kaux heue. ²⁸ Bawg tixnga tix caw ka Hotirax, tau mai kawn simex nawh mai puxaik nawh khankix kao ra kaux heue. ²⁹ Bawg tixnga ra caw ka Gidalatix, tau mai kawn simex nawh mai puxaik nawh khankix kao ra kaux heue. ³⁰ Bawg tixnga loe caw ka Mahaziot, tau mai kawn simex nawh mai puxaik nawh khankix kao ra kaux heue. ³¹ Bawg tixnga pon caw ka Romantiza, tau mai kawn simex nawh mai puxaik nawh khankix kao ra kaux heue.

¹ Grawng gwieh kix cao pa pau siviex veng khankix khaing ceu pui, Korabix, mawh Meshalemix, kawn simex Korax pa kaoh khaing doeh ru kawn simex Asapha heue. ² Kawn simex Meshelemix khankix, kawn Ai mawh Zakharix, kawn Nyi mawh Yedelax, kawn Sam mawh Zebadix, kawn Sai mawh Yatanilax, ³ Kawn Ngox mawh Elam, kawn Log mawh Yehohanan mai kawn ciiet mawh Elayehonie heue. ⁴ Lheu khaing an kawn simex Obetdedon khankix, kawn Ai mawh Shemayax, kawn Nyi mawh Yehozabat, kawn Sam mawh Joah, kawn Sai mawh Sakha mai kawn Ngox mawh Netanelax, ⁵ Kawn Log mawh Amilax mai kawn ciiet mawh Issakha mai kawn cib mawh Pulatie, mawh kheu Siyiex nawb bwan ka Obetdedon heue. ⁶ Kawn Ai nawh Shemayax baox koe kawn simex mai kix hoik mawh cao pa kwang ka doeh nyiex keeing kix, grawh grawng nawh, kix hoik mawh cub pui pa kied ting riang rao mai pa koe rhawm kwa heue. ⁷ Kawn simex Shemayax khankix, mawh Otanix, Rephalax, Obet, Elazabat mai pux kix Elihux mai Semakhix khankiex mawh pui pa koe riang rao ti pon yuh kuceu heue. ⁸ In khawmuik mawh cub kawn simex Obetdedom mai cub kawn simex kix mai puxaik kix khawmuik mawh pui pa pon yuh kuceu mai pa kied ting riang son kaing jhaw mai kix khawmuik pa mawh kawn simex Obetdedom koe tigliah ra kaux heue. ⁹ Meshelemix koe kawn simex khankix mai puxaik kao daix kaux pa mawh pui pa kied ting riang rao pa pon yuh kuceu heue. ¹⁰ Hosa khaing doeh ru Merarix, baox koe kawn simex Shimarix, viang Shimarix ang mawh kawn liang kawx keeing nawh hoik yaog nawh mawh kawn Ai heue. ¹¹ Kawn Nyi nawh mawh Hilaki, kawn Sam nawh mawh Tebalix mai kawn Sai nawh mawh Zakharix, kawn simex mai puxaik Hosa khankix koe kao loe kaux heue. ¹² Cub cao pau siviex veng in khankix mawh cao kaing ting khaing sinax puxaik kix mai lai loh ti teei beeh glawm sonsang yuh kaing ka daux nyiex bwan Siyiex awm yuh puxaik kix heue. ¹³ Kix khawm pui iak pui ting ku kaux yuh nieb sonsang pau ka siviex veng ku mu, awm pa koe doeh nyiex ma keeing kix heue. ¹⁴ Siviex veng plak lih singaix caw ka Shelemix heue. Khaix an, kix baox yuh nieb son kawn simex nawh Zakharix pa mawh pui pa koe pingnya cuyi tix kaux mai caw ka siviex veng plak laong heue. ¹⁵ Son Obetdedom caw ka siviex veng plak seh mai kawn simex nawh khankix hoik caw cao pau nyiex Asupim, Asupim mawh nyiex priex kraung heue. ¹⁶ Son Shupim mai Hosa nieb hoik caw ka siviex veng plak klip singaix, tau mai siviex veng Shalekhiet hawt krax ting mai kix yaox ti pau khawm ra plak heue. ¹⁷ Ka plak lih singaix mawh pui Lewix khankix liah kaux cao pa pau mai ku singaix, plak laong pon kaux mai plak seh pon kaux mai plak Asupim ra kaux mai plak praix nyiex ra kaux heue. ¹⁸ Son krax laig plak klip singaix, cao pau koe pon kaux mai plak praix nyiex bwan, cao pau koe ra kaux hawt diang laig pui heue. ¹⁹ Inkix mawh pa hoik gwieh kix ti tawx beeh glawm cao pau siviex veng khankix, khaing daux sinax cub kawn simex Korax mai khaing ka daux sinax cub kawn simex Merarix khankix heue. ²⁰ Khaing ka daux ceu pui Lewix khankix Ahiyax mawh cao pa kwang piang sinngao nyiex bwan Siyiex mai khawm piang sinngao ceu pa hoik appong tix khankix heue. ²¹ Kawn simex Ladan pa kaoh khaing doeh ru Gerashon pa mawh Ladan mai cao kaing nyiex keeing kix Ladan pa mawh ceu pui Gerashon hoik mawh Yehelix heue. ²² Kawn simex Yehelix, Zetam mai pux nawh Yawlax, khankiex mawh cao pa kwang piang sinngao nyiex bwan Siyiex khankix heue. ²³ Khaing daux ceu pui Amram, ceu pui Izaha, ceu pui Hebron mai ceu pui Uzilax khankix, ²⁴ Sheboelax, kawn simex Gerashom, pa mawh kawn simex Mose, mawh cao pa kwang ka sinngao khankix heue. ²⁵ khaing puxaik nawh Eliaza, kawn simex nawh mawh Rehabix, kawn simex Rehabix mawh Yeshayax mai kawn simex Yeshayax mawh Yoram mai kawn simex Yoram mawh Zikharix mai kawn simex Zikharix mawh Shelomit heue. ²⁶ Shelomit mai puxaik nawh khankix mawh cao pa kwang piang sinngao can pa appong simiang Davit mai pa appong cao kaing daux doeh nyiex keeing kix mai cao kaing naing piang pui kaing rheng kaing yieh mai cao kaing naing khaing daux cub kru naing khankix heue. ²⁷ Kraung khrai pa pon rhim kix khaing daux naing khankix, kix appong tan sonsang cox ka nyiex bwan Siyiex heue. ²⁸ Can ceu pa appong cao jhai Samoelax, Sawlux kawn simex Kishax, Abena kawn simex Nerax mai Yuabax pa mawh kawn simex Zeruya khankix khawm tang ceu pa hoik appong kix khawmuik hoik ot greem pa kwang Shelomit mai puxaik nawh heue. ²⁹ Khaing daux cub ceu pui Isarelax khankix, Khenanix mai kawn simex nawh khankix hoik teei beeh glawm yuh cao kaing lum mai cao prawng see piang ceu pui Isarelax pa ot plak praix veng Yerusaliem khankix heue. ³⁰ Khaing daux ceu pui Hebron khankix, Hashabix mai puxaik nawh khankix, tix rheng aliah yieh kaux mawh cub pui koe riang rao ti yuh kuceu mai mawh cao kia ngien piang pui Isarelax khankix, pa ot plak toi rawm klawng Yawdan, plak klip singaix mai son kaing jhaw Siyiex khawmuik mai son kaing jhaw simiang khawmuik heue. ³¹ Khaing daux ceu pui Hebron, Yeriyax mawh cao kaing ceu pui Hebron awm pa hoik koe doeh ru keeing nawh heue. Ka daux baux yam kwang Davit ka haktiex tixpon num, kix teei ka carang pui an khankix mai kix yaox pui pa koe riang rao khankix ka daux veng Yaza pa koe ka haktiex Gilat heue. ³² puxaik nawh khankix koe been ra rheng aliah yieh kaux pa mawh pui pa ting riang rao mai cao kaing doeh nyiex ma keeing kix, pa hoik yaog simiang Davit kix mawh cao kaing piang ceu pui Rubin mai ceu pui Gat mai piang doeh ru Manashe tix plak, grawng pa dex dawd mai kaing jhaw Siyiex kuceu mai grawng kaing jhaw simiang heue.

¹ Pui Isarelax, awm pa hoik koe carang cao kaing doeh nyiex ma keeing kix mai cao kaing naing cub pui kaing rheng mai kaing yieh mai cao kwang piang kix khankix, hoik yuh kaing jhaw son simiang grawng kuceu awm pa hoik gwieh ti deuh cub pui naing khankix heue. Cub caw in kix mawh cub kru naing pa laig pa lih tix khix hoik tix khix ka daux leeing lang khix leeing lang num heue. Cub tab pa hoik gwieh kix koe lien ra mheen pon rheng kaux heue. ² Tab kru naing cub tix, son khix tix, mawh Yashoban, kawn simex Zabadalax, pa kwang ka tab kru naing cie nawh koe lien ra mheen pon rheng kaux heue. ³ Nawh mawh kawn praix khaing ceu pui Periet mai mawh cao kaing ting piang cao kaing naing cub kru naing khankix son daux khix tix heue. ⁴ Tab kru naing son khix ra mawh Dodie, khaing ceu pui Hohix, pa kwang heue. Khaing daux tab cub kru naing nawh khankix, Mikalot kawx mawh cao kaing tix kaux heue. Ka daux tab cub kru naing nawh khankix koe lien ra mheen pon rheng kaux heue. ⁵ Cao kaing naing loe kaux tix kaux daux cub kru naing son khix loe, mawh Benayax, kawn simex cao giex kaing li Yehoyadax, pa mawh cao kaing ting kix heue. Ka daux tab cub kru naing nawh khankix, koe lien ra mheen pon rheng kaux heue. ⁶ Benayax mawh pa kied ting riang khaing daux cub kix tixngoe kaux mai nawh kwang piang kix tixngoe kaux heue. Kawn simex nawh Amizabat kawx mawh cao kaing naing pa kwang ka daux cub kru naing heue. ⁷ Cao kaing naing pon kaux tix kaux, son khix pon mawh Asahelax pux Yuabax mai kawn simex nawh Zebadix kawx mawh cao kaing tix kaux heue. Ka daux tab cub kru naing nawh khankix koe lien ra mheen pon rheng kaux heue. ⁸ Cao kaing naing phwan kaux tix kaux, son khix phwan mawh Shamahut ceu pui Izarax; ka daux tab cub kru naing nawh khankix koe lien ra mheen pon rheng kaux heue. ⁹ Cao kaing naing liah kaux tix kaux, son khix liah mawh Irax kawn simex Ikesha khaing veng Teko heue. Ka daux tab cub kru naing nawh khankix koe lien ra mheen pon rheng kaux heue. ¹⁰ Cao kaing naing aliah kaux tix kaux, son khix aliah, mawh Heliet ceu pui Pelonix, khaing daux cub kawn praix Epharem ka daux tab cub kru naing nawh koe lien ra mheen pon rheng kaux heue. ¹¹ Cao kaing naing daix kaux tix kaux, son khix daix mawh Sibekhie doeh ru Hushatix mai ceu pui Zarax, ka daux tab cub kru naing nawh koe lien ra mheen pon rheng kaux heue. ¹² Cao kaing naing dim kaux tix kaux, son khix dim, mawh Abeza doeh ru Anatotix, khaing daux ceu pui Benyami ka daux tab cub kru naing nawh khankix koe lien ra mheen pon rheng kaux heue. ¹³ Cao kaing naing kao kaux tix kaux, son khix kao mawh Mahalie doeh ru Natophitix, khaing daux ceu pui Zara ka daux tab cub kru naing nawh khankix koe lien ra mheen pon rheng kaux heue. ¹⁴ Cao kaing naing kao tix kaux tix kaux, son khix kao tix, mawh Benayax doeh ru Piratonix, khaing daux cub kawn praix Epharem ka daux tab cub kru naing nawh khankix koe lien ra mheen pon rheng kaux heue. ¹⁵ Cao kaing naing kao ra kaux tix kaux, son khix kao ra mawh Heladie doeh ru Netophatix, khaing ceu pui Awtanelax ka daux tab cub kru naing nawh khankix koe lien ra mheen pon rheng kaux heue. ¹⁶ Lheu khaing an cao pa kwang piang ceu pui Isarelax mawh pui inkix simiang pa kwang piang ceu pui Rubin mawh Eliaza kawn simex Zikharix, piang ceu pui Simeon, mawh Shephatix pa mawh kawn simex Makha, ¹⁷ Ka piang ceu pui Lewix mawh Hashabix kawn simex Kemoelax; piang ceu pui Arun mawh Zadok, ¹⁸ Ka piang ceu pui Yudax, mawh Elihux puxke Davit piang ceu pui Issakha mawh Omrix kawn simex Mikhalax, ¹⁹ Ka piang ceu pui Zebulun, mawh Ishamayax kawn simex Obadix; piang ceu pui Napthalix mawh Yerimot kawn simex Azarelax; ²⁰ Ka piang ceu pui Epharem, mawh Hoshe kawn simex Azazix piang ceu pui Manashe an tix plak, mawh Yawlax kawn simex Pedayax, ²¹ Ka piang ceu pui Manashe an tix plak ka haktiex Gilat mawh Idadaw, kawn simex Zakharix piang ceu pui Benyamin mawh Yasilax kawn simex Abana, ²² Ka piang ceu pui Dan, mawh Azarelax kawn simex Yeroham heue. Inkix mawh cao thong cao bung ka ceu pui Isarelax heue. ²³ Viang mawh nan, Davit ang teei carang pui pa ang nyang naog ju tixnga num, mawh kheu Siyiex ah nin, Aux tak kieh ceu pui Isarelax khankix haoh hun awm simuing raoma khankix heue. ²⁴ Yuabax kawn simex Zeruya, tak jah tix koh carang pui khankix, viang mawh nan, nawh ang nyang bax hoik sidah, mawh kheu hoek krax meet rhawm piang ceu pui Isarelax grawng pa koh ka carang in heue. Carang pui pa hoik koh nawh khankix ang nyang sau ka daux carang phuk lai been simiang Davit heue. ²⁵ Azamaviet kawn simex Adelax mawh cao kwang piang sinngao simiang; mai Yehonatan, kawn simex Uzix mawh cao kwang piang nyiex krao koe ka daux kaung, ka daux veng, ka daux yaong mai ka daux tab khankix heue. ²⁶ Ezarix kawn simex Khelup mawh cao kwang piang pui pa yuh kaing thai kaung kaing thai ma khankix heue. ²⁷ Shimix pui veng Ramax mawh cao kwang piang ma sipeem plix siiet mai Zabadix pui veng Shiphami mawh cao kwang piang plix siiet pon khaing sipeem mai krao plix siiet heue. ²⁸ Balahanan ceu pui Gedarix mawh cao kwang piang khaox sanlon mai khaox ruh pa koe ka daux lung khankix mai Yawshax mawh cao kwang piang nyiex krao bee heue. ²⁹ Shitarie ceu pui Sharon mawh cao kwang piang haktiex baoh dee sawm tobrie Sharon mai Shaphat kawn simex Adalie mawh cao kwang piang tobrie pa sawm rib ka daux lung heue. ³⁰ Obilax ceu pui Ishamelax mawh cao kwang piang Kala uk mai Yedeyax ceu pui Meronotix mawh cao kwang piang La khankix, ³¹ mai Yazit ceu pui Hagarax mawh cao kwang piang yung khankix heue. Inkix khawmuik mawh cao kaing pa kwang piang kraung khrai sinngao simiang Davit heue. ³² Yehonatan keeing iak Davit mawh cao tawx rhawm keud riex ju pa koe pingnya mai cao tiiem lai mai Yehelax kawn simex Hakhamonix mawh pa yuh paox pie ot tau mai cub kawn simex simiang khankix heue. ³³ Ahitophelax mawh cao tawx rhawm keud dong sawn ka simiang mai Hushie pui veng Akhix mawh paox grawm pa yuh paox pie mai simiang heue. ³⁴ Khaix Ahitophelax mawh Yehawyadax kawn simex Benayax khaix nawh mawh Abiata heue. Cao kaing naing ting simiang mawh Yuabax heue.

¹ Khaix an, Davit kraix khrawm ka cao thong cao bung ceu pui Isarelax khawmuik mai cao kaing ceu pui khankix mai cao kaing naing pa yuh kaing jhaw simiang mai cao kaing naing pa kwang piang pui kaing rheng mai pa kwang piang pui kaing yieh khankix mai kawncau pa kwang piang kraung khrai sinngao simiang mai cie kawn simex nawh khankix, tau mai cao kaing mai pui pa koe rhawm kwa khankix mai pui pa kied ting riang rao khankix hoek ka daux veng Yerusaliem heue. ² Khaix an, simiang Davit yaog ti kaoh cung ah nin, aux hoik koe rhawm sonsang sum tix nyiex dee laux lee, son teug bwan sijax mukheu Siyiex mai son dee sang deuh Siyiex caong tix mai aux hoik grux khre rien khankix sonsang sum tix ka heue. ³ "Viang nawh nan, Siyiex ah nin ka aux maix tak ang pon ti sum nyiex son min ceu kaux Aux, grawh grawng nawh maix mawh pui pa yuh naing mai hoik kieh nham jauh heue ⁴ Viang yuh nan, Siyiex ceu pui Isarelax hoik laug aux khaing daux doeh nyiex ma keeing aux mai yaog aux mawh simiang piang ceu pui Isarelax leeing ju, mawh kheu Nawh Cao hoik laug ka ceu pui Yudax mawh cao kwang mai laug aux khaing doeh nyiex ma Yudax mai khaing daux nyiex ma keeing aux, khaing sinax kawn simex keeing aux heue. Nawh Cao khaw rhawm mai yaog aux mawh simiang piang ceu pui Isarelax khawmuik heue. ⁵ "Khaing daux cub kawn simex aux khankix, grawh grawng nawh, Siyiex hoik tawx kawn simex khankix tom nie ka aux mai khaing daux cub kawn simex aux khankix, Nawh Cao hoik laug ti teei kawn simex aux Sawlamon sonsang ngawm piang dang ngeung meung haktiex Siyiex ceu pui Isarelax heue. ⁶ "Nawh Cao ah nin ka aux, kawn simex maix Sawlamon tak mawh pa sum nyiex Aux mai biang nyiex Aux heue. Grawh grawng nawh, Aux hoik laug nawh mawh kawn simex Aux mai Aux tak mawh keeing nawh heue. ⁷ Lheu khaing an, Aux tak pang meung haktiex nawh kaux cong leeing ju, phan nawh hawt yuh awm gumlox pingnyap Aux mai been lox tat jhawm prawng Aux khankix, awm pa koe ka daux in singaix heue. ⁸ Mawh kheu nan, yam in, ka plak sivoe ngai ceu pui Isarelax, pa mawh cub pui hun cie Siyiex awm pa hoik mhong Siyiex ka mai sawg ti yaox ka lox tawm pingnyap Siyiex mai hawt ti yuh khawmuik, sonsang pon pex ti cie ka haktiex pa mhawm in mai sonsang yaox pex ti prah an khankix, mawh sinngao son kawn praix pex tix ju hoik tix ju heue. ⁹ Kawn simex aux Sawlamon eue, tawng ka Siyiex keeing maix awx mai yuh kaing jhaw Nawh Cao tau mai pa kaux sijax daux rhawm tix mai khawm rhawm pa grum naog tix heue. Mawh kheu Siyiex mawh cao pa sawg liem ka rhawm pui khawmuik mai tawng ka krax pa keud pui khawmuik heue. Phan maix sawg ti yaox Nawh Cao, Nawh Cao tak sang kieh maix yaox tix heue. Viang mawh nan, phan maix tik vud Nawh Cao, Nawh Cao tak tik maix leeing ju heue. ¹⁰ "Keud ti yaox yam in, mawh kheu Siyiex hoik laug maix mawh cao sang sum nyiex, ka son dee pa kied singax singeh mai teei riang tix mai yuh an heue." ¹¹ Khaix an, Davit ap pak peung plak sivoe nyiex mai pak peung nyiex ting mai pak peung lawg sinngao, pak peung lawg plak piang mai pak peung lawg plak daux mai pak peung dee deuh teug bwan krax caux rhawm khankix ka kawn simex nawh Sawlamon, ¹² mai pak peung pa pon nawh daux khwan singax pa mawh biang nyiex Siyiex mai khawm lawg pa koe hawt rawb rim nyiex an khankix khawmuik mai nyiex dee deuh kix sinngao Siyiex mai pak peung nyiex pa priex kix sinngao pa appong pui tix tan khankix, ¹³ ap grawng kaing jhaw cao giex kaing li ceu pui Lewix mai son kaing pa sang yuh kix ka daux nyiex bwan Siyiex khawmuik mai son kraung khrai pa sang shiao kix ka daux kaing jhaw nyiex bwan Siyiex khawmuik heue. ¹⁴ Nawh hoik ciang ti tawx khri sonsang yuh kraung khri, pa sang shiao ka daux kaing jhaw yuh tix kuceu mai nawh hoik baox deeh ciang ti tawx mau sonsang yuh kraung mau pa sang shiao ka daux kaing jhaw yuh tix kuceu, ¹⁵ Nawh hoik ciang ti tawx khri son dang kawk ngu khri pa mawh jawk ten khri mai son kawk ngu khri khankix, awm pa sang koe diang cien dang kawk ngu mai kawk ngu ku mu mai nawh deeh ciang ti tawx mau son dang kawk ngu mau mai son kawk ngu mau khankix, awm pa sang koe ding ciien dang kawk ngu mai kawk ngu ku mu heue. ¹⁶ Nawh ciang ti tawx khri son pheen khri blah khankix mai pheen ku mu mai nawh deeh ciang tix khri tawx mau son pheen mau ku mu, ¹⁷ Ciang ti tawx khri nawnaw, pa sang yuh khaox si gawng nex ka mai pa sang yuh pan ting, singiien rawm mai klong khankix heue. Nawh ciang ti tawx khri son klong khri ku mu mai ciang ti tawx mau son klong mau ku mu, ¹⁸ Ciang ti tawx khri nawnaw son khu tan dee gleeing nyawng bhawng mai son pa sang yuh ling lawx naing brung, pa mawh riang khri Cherubin, pa di pruik tix lih mai kheem piang teug bwan sijax mukheu Siyiex heue. ¹⁹ Davit ah nin, "In khawmuik, hoik mawh pa kieh Siyiex aux tawng ka grawng pa hoik tiem Taix Nawh Cao tau mai aux, awm koe grang pak peung inkix khawmuik heue." ²⁰ Davit ah nin ka kawn simex tix Sawlamon, "Teei riang rao tix mai kieh koe rhawm kwa ceu pa mhawm mai yuh ceu in heue. Paw koe krax lhat graung mai paw koe krax laux rhawm awx. Grawh grawng nawh Simiang Siyiex pa mawh Siyiex aux, tak ot tau mai maix heue. Nawh Cao tak ang prah maix nong nong mai tik vud ka maix, tom hoek bawg yam hoik sidah kaing jhaw nyiex bwan Siyiex in khawmuik heue. ²¹ "Inkix khawmuik mawh cub cao giex kaing li mai pui Lewix, pa yuh kaing jhaw nyiex bwan Siyiex mai pui pa chix yuh kaing taix kaing caong ku kaux, hoik ot tau mai maix, sonsang yuh kaing kuceu heue. Cao thong cao bung mai pui khawmuik hoik ot ka greem gumlox tawm maix heue."

¹ Lheu khaing an, simiang Davit ah nin ka cub pui haoh hun khawmuik "Kieh kawn simex aux Sawlamon, pa hoik laug Siyiex ti teei, mawh pa kawn awn ju mai ang nyang koe krax tawng yung mai kaing mawh pa kied ting lhaong, mawh kheu nyiex bwan in ang mawh son kawn pui mai mawh son Siyiex heue. ² Yam in son nyiex bwan Siyiex aux, aux hoik khre ti deuh awm pa koe riang rao tix khawmuik, khri khankix pa sang yuh kraung khri ka mai mau khankix pa sang yuh kraung mau ka mai tawng lheung khankix pa sang yuh kraung tawng mai rhiem khankix pa sang yuh kraung rhiem mai khaox khankix pa sang yuh kraung khaox mai simaox shahan pa mawh simaox son pa sang khaw tix sang yuh khankix mai simaox pa koe rawm siang kuceu mai simaox pa kied koe ngawh jum khankix mai khawm simaox paing pa kied haoh hun khawmuik heue. ³ "Lheu khaing an, mawh kheu kied koe rhawm aux ka nyiex bwan Siyiex aux, aux hoik Lheu tawx khaing ceu pa hoik khre rien aux ti deuh son nyiex bwan Siyiex pa singax singeh khaing ka daux sinngao cie aux pa mawh khri mai mau khankix, ⁴ "Khri ophirax pa koe aux loe rheng talantan mai mau nawnaw pa koe aux aliah rheng talantan, mawh pa sang om tix piang ding nyiex bwan khankix, ⁵ "Khri khankix sonsang yuh kraung khri mai mau khankix son pa sang yuh kraung mau, son kaing pa sang yuh tix kuceu khawmuik koe ka daux tawm taix cangmai pa yuh nyiex khawmuik heue. Khaix an, mawh pui mawx pa sang koe rhawm tix sang tan can pa koe tix mai appong tokaux tix ka Siyiex daux in singaix lie?" ⁶ Khaix an, cao thong cao bung daux nyiex keeing kix mai cao thong cao bung ceu pui Isarelax khankix mai cao kaing naing pui kaing rheng kaing yieh khankix, tau mai pa kwang piang kaing jhaw simiang khankix, hoik tan ceu an khankix ka daux pa fah rhawm tix heue. ⁷ Ka son kiang jhaw nyiex bwan Siyiex, kix hoik tawx khri phwan rheng talantan mai khawm lon mau khankix tix mheen talantan mai tawng lheung khankix tix mheen daix rheng talantan mai khawm rhiem khankix tix sien talantan heue. ⁸ Can pui pa koe siang simaox pa kied mhawm khankix kawx hoik ap ti tawx ka daux krao sinngao nyiex bwan Siyiex, ka daux tawm taix Yehelax, ceu pui Gerashon heue. ⁹ Khaix an, pui haoh hun kied koe krax gaux rhawm kheu hoik yaox kix ti tan ka ceu an khankix tau mai krax pa koe rhawm tix, mawh kheu hoik yaox kix ti tan tau mai pa kaux sijax tix ka Siyiex heue. simiang Davit hoik kied koe krax gaux rhawm ka heue. ¹⁰ Mawh kheu nan, Davit yaogyaw bwanson Siyiex sivoe pui haoh hun ah nin, "Siyiex keeing ex Isarelax eue, kieh Maix Cao mawh pa koe bwanson ku ju leeing jux leeing phan heue. ¹¹ Siyiex eue, Maix Cao mawh pa kied ting lhaong, sibrawm mai min plakngai Maix khankix krax pa pex mai krax pa koe sibrawm, can pa koe ka daux haktiex in mawh cie Maix Cao khawmuik, Siyiex eue, meung haktiex mawh cie Maix Cao, Maix Cao mawh pa ting lhaongmai mawh pa kied blon mhawm piang khawmuik heue. ¹² Krax pa magmi mai min plakngai mawh pa kaoh khaing Maix Cao mai Maix Cao mawh cao pa kwang piang kuceu khawmuik heue. Sibrawm mai krax pa kied ting riang rao koe ka daux tawm taix Maix Cao, tawm taix Maix Cao mawh pa yuh ceu pa ting lhaongmai tawx riang rao ka kuceu khawmuik heue. ¹³ "Mawh kheu nan, Siyiex ex eue, ex yaogyaw ting bwanson ka Maix Cao mai yaogyaw ka min sibrawm ceu kaux Maix Cao yam in heue. ¹⁴ Viang mawh nan, aux mai pui aux khankix mawh pui pa yuh ka mawx, sonsang pon tan ex, ka daux pa koe rhawm tix awm in lie? Mawh kheu kuceu khawmuik mawh pa kaoh khaing Maix Cao, ex hoik deeh tawx pa kaoh khaing Maix Cao ka Maix Cao heue. ¹⁵ Kheu mawh yix nyo sinie pui tang praix klawng pa vung viang ka plak sivoe ngai Maix Cao, awm daux baux ju keeing yix khankix; baux singaix im ju yix piang haktiex, mawh awm pang peue khaing; mai pa ang koe krax keud pot jun pot heue. ¹⁶ "Siyiex ex eue, can pa kied haoh hun pa hoik khre rien yix sonsang sum ka nyiex Maix Cao, son min ceu kaux pa singax singeh Maix Cao, mawh pa kaoh khaing daux tawm taix Maix Cao mai ceu an khawmuik mawh cie Maix Cao heue. ¹⁷ "Siyiex aux eue, aux tawng ka cheuk cheu Maix Cao ka rhawm yix mai Maix Cao hoik khaw rhawm ka daux pa rahsee heue. Phan mawh son aux, aux hoik tan tix tawx ceu in khankix ka rhawm pa rahsee tix; mai ka daux pa koe rhawm tix; tau mai krax pa gaux rhawm, aux hoik yaox pui Maix Cao hoek ka plak sivoe Maix sonsang tan kix ceu in ka daux pa koe rhawm tix ka Maix Cao heue. ¹⁸ "Siyiex keeing ex Abraham, Icak mai ceu pui Isarelax khankix eue, priex rien pui Maix Cao sonsang koe kix rhawm krax keud krax ce ka Maix Cao jheung jheung mai kieh rhawm kix kaung cong ka plak Maix Cao liak. ¹⁹ "Tawx rhawm kaux sijax ka kawn simex aux Sawlamon, sonsang hawt nawh gumlox tawm pingnyap Maix Cao mai khawm krax pa kham sakse Maix Cao mai lox lai beenli Maix Cao khankix, sonsang pon yuh nawh ceu inkix khawmuik mai sonsang pon sum nyiex bwan can pa hoik khre rien aux ti deuh khankix heue." ²⁰ Khaix an, Davit ah nin ka cub pui haoh hun, "Yam in, tawx krax pa yaogyaw bwanson ka Siyiex pex heue. "Mawh kheu nan, cub pui haoh hun hoik tawx krax pa yaogyaw bwanson ka Siyiex keeing kix mai hoik gum kaing mai gup tokaux tix ka plak sivoe Siyiex mai simiang heue. ²¹ Khaix singaix an, kix hoik yuh krax tan pa appong ka Siyiex mai hoik tan krax tan pa gleeing khankix ka Siyiex, ka moi tix rheng, yung tix rheng, kawn yung iak tix rheng mai krax tan pa nyaux mai kix tan appong tom nie son ceu pui Isarelax khawmuik heue. ²² Mawh kheu nan, kix ih mai nyaux ka plak sivoe Siyiex tau mai pa kied gaux rhawm tix ka daux singaix an heue. Kix yaog Sawlamon kawn simex Davit mawh simiang bawg ra mai kix groi rawm bee ka nawh ka plak sivoe Siyiex sonsang mawh cao thong cao bung mai sonsang mawh Zadok cao giex kaing li heue. ²³ Khaix an, Sawlamon ngawm piang dang ngeung Siyiex mawh simiang tang keeing nawh Davit mai koe krax haoh hwan ting lhaong mai ceu pui Isarelax khawmuik cu nghiet ka nawh heue. ²⁴ Cao kaing mai pui ting riang khankix mai kawn simex simiang Davit khankix, hoik ot ka greem pa kwang simiang Sawlamon yam an heue. ²⁵ Mawh kheu nan, Siyiex hoik yaog Sawlamon, ting lhaong ka plak sivoe ngai ceu pui Isarelax khankix khawmuik mai tawx sibrawm piang nawh, pa ang nyang sax yuh piang simiang pie tix kaux kawx phao voe an ka daux haktiex Isarelax heue. ²⁶ Mawh kheu nan, Davit kawn simex Yessie hoik kwang piang haktiex Isarelax khawmuik heue. ²⁷ Baux yam pa hoik kwang nawh piang haktiex Isarelax khankix hoik rheung tixpon num; mai nawh hoik kwang ka veng Hebron aliah num mai kwang ka veng Yerusaliem tixngoe loe num heue. ²⁸ Mawh kheu nan, nawh hoik yum yam kawn mhawm riex ju tix tau mai pa naog singaix sawm khankix, tau mai khawm pa magmi tix mai pa koe min sibrawm tix heue. kawn simex nawh Sawlamon deeh plud ti kwang haktiex ka dah dee ot nawh heue. ²⁹ Grawng kaing jhaw pa yuh simiang Davit, jah ka num tom hoek deeh sidah, kix hoik tiem ti deuh grawng an khawmuik ka daux phuk lai cao jhai Samoelax mai ka daux phuk lai cao jhai Natan mai ka daux phuk lai cao jhai Gat khankix, ³⁰ tau mai grawng pa kwang nawh mai pa kied koe riang sibrawm nawh khankix mai grawng can pa hoik lih ti mawh piang nawh mai piang haktiex Isarelax, khawm piang meung haktiex tang dah khawmuik heue.