Tito

Tito

¹ Mimi Paulo, muhumisi jwa Muungu na ntumi jwa Yesu Kirist̯o, nyakukworeani wewe Tito. Nihumigwa niwambake faroni watsanwa wa Muungu na niwayongoze kuimanya hi hachi iyonayongweezwa ni ḍini yehu. ² Hi hii hachi inahupfa madzikwat̯yo ya kupata maisha ya kuunga na yuungo. Muungu ndiye ahuahid̯iiye swiswi haya haya maisha hangu lumwengu ntajudzaumbwa. Na jeje nkanene nsuwe. ³ Muungu mupfonya jwehu kayahuyanga haya haya Maagu Mema kwa wakati mwema. Kayanimpa haya haya Maagu Mema niyasumwiiye, nami ndivyo nivyokuhendani. ⁴ Nyakukworeani wewe Tito, wiye mwanangu hachi kwa haya huhikiziyeyo hwonse. Muungu Baba na Kirist̯o Yesu mupfonya jwehu, nawakuvodhye na kukupfa naghea nto. ⁵ Nikuyatsa Kirete upate kuyaelekanya hayaḍe mambo yeyokuwa tsonso na utsane wazee wa matsanganiko kula mudzi. Yaweke akilini haya nikuḍamiyeyo: ⁶ Muzee jwa tsanganiko ni kutsaawa na untu muzuka uḍewonse. Ni had̯i awe muyume jwa muke mumodza. Wanawe ni had̯i wawe wantu wahikiziyeo, wasio t̯aḅia nzuka na weonat̯ii wavyazi wao. ⁷ Na kwa kwamba muyongozi jwa tsanganiko ni muntu jwa kusumamia kazi ya Muungu, nka ruhusa ya kuwa na t̯amba zuka. Na ni had̯i atseewa muntu jwa kudziona, atseewa muntu jwa ngoro za mpuyani, atseewa muntu jwa kuruma, atseewa muntu mundwani ambu muntu muhamile jwa kudzilachia fwedha. ⁸ Ishinu, ni had̯i awe muntu jwa kukaraḅisha wageni nyumbani mwakwe, na awe muntu atsakiye mema. Ni had̯i awe muntu jwa kudzimiza, muntu jwa kuhenda yeyo ya hachi, muntu mudheru na muntu jwa kuwa na chima. ⁹ Ni had̯i akigije gu hichi chuuwo chichonahikizika dza viviḍe chivyoyongweezwa. Na kwehii namuna anawangiza mojo na wantu wangine kwa haya mayongweezo ya hachi na kuwakanyera hawaḍe weokuyapfingani haya mayongweezo. ¹⁰ Koro kuna wantu wenji wapinzani na weonawakulakula wenzao na vyuuwo visivyo maana, na hawa haswa ni hawa Wakirist̯o weokuwa wantu wa ḍini ya Kiyahud̯i. ¹¹ Ni had̯i wanyamazwe, kwa kwamba wakunangani faro za madzumba mazima mazima, kwa kuyongweeza haya mayongweezo ya nsuwe yasiyomala kuyongweezwa. Huju huju yutswa wakujuhendani kudzilachia fwedha. ¹² Hat̯a mumodza jwao wao wenye, eyekuwa nabii, ewa kamba, “Wakirete meshi wananena nsuwe, waa dza binensa, ni wantu malafa na ni wachaka muno.” ¹³ Na hivi aneneevyo ni ḍugha. D̯ubva hawa wayongweeza nsuwe wabuse vyumuni, wapate kuwa na faro nyema ya Kikirist̯o, ¹⁴ na watsekaiya kusikiiya ngano za nsuwe za Kiyahud̯i na maamuri ya wantu waidziziyeo hi hachi. ¹⁵ Kwa hawaḍe weo wadheru, ntaku kisichokuwa kidheru. Ela kwa hawaḍe wanangijweo ni nabvise na wasiohikiza, ntaku chicho kidheru, koro akili zao na myojo yao inangwa ni nabvise. ¹⁶ Wanakwamba wamumanya Muungu na huku mahendo yao yanayanga ya kwamba ntawamudzi. Hawa ni wantu wa Muungu at̯ukiiyeo, wasiomut̯ii na wala wasioweza kuhenda dzambo dzema ḍiḍeḍyonse.

¹ Ela wewe ni had̯i uyongweeze haya mayongweezo ya hachi. ² Wambe hawa wazee wa kiyume wawe wantu watuvu, wantu wa t̯aḅia nyema, wantu wa mvidhyo, na wawe wantu wa faro, wantu wa matsako, na wantu wa kuit̯isa. ³ Na dza vivyo, wambe hawa wake wakuu waishi maisha ya udheru na watsekaiya mambo ya nyano ambu wawe wahumwa wa mvinyo. Ni had̯i wayongweeze yeyo mema, ⁴ ili kwamba wake waḍoḍo wadziyongweeze kuwatsaka wayume wao na wana wao. ⁵ Ni had̯i wawayongweeze kuwa wake wa akili na wadheru na kuwa wahiḍu, weonawat̯ii wayume wao, ili kutseewa muntu jwa kuchinenea mazuka chuuwo cha Muungu. ⁶ Dza vivyo, wafunde hawa wayume waḍoḍo wawe wantu wa kudzimiza. ⁷ Wewe mwenye ni had̯i uwe mufaano wa mahendo mema kwao kwa kula dzambo udzeḍyohenda. Waa muntu jwa kuhikizika na wiyenamuud̯ama ukwakuyongweezani. ⁸ Ikaa ukiyongweeza mambo yeyo sawa kaḅisa, ya kwamba ntayawezi kukungiza kualat̯wani, ili upate kuwakanyera hawa nyabvao, watseepata kintu kizuka kiḍechonse cha kunena dzuu yehu. ⁹ Wambe hawa weo wahumwa, wawat̯ii maḅwana wao na wawatsakize kwa kula kintu. Ntawa ruhusa ya kwambukuyana nao ¹⁰ ambu kuwakwiwiya. Ishinu, ni had̯i wayange kuwa wahikizika kwa kula kintu. Na kwe hi hii namuna, mahendo yao yanayeha shad̯umea kwa hichi chuuwo cha Muungu mupfonya jwehu. ¹¹ Koro Muungu kayanga matsakoye makuu kwa kuwayehea mupfonyo wantu wonse. ¹² Hayo hayo matsakoye, yakuhuyongweezani kwamba huyatse kuishi maisha mazuka na t̯amaa za kilumwengu, huishi maisha ya kudzimiza, yeyo madheru, na ya kimuungu humu humu lumwenguni, ¹³ huku hukiindiiya hiyo Nsiku ya tsekea hwiyokuieghat̯ani. Hiyo hiyo Nsiku, marembo ya Muungu jwehu mukuu na mupfonya jwehu Yesu Kirist̯o yanaonekana. ¹⁴ Jeje kadziyavya maishaye kwa dzambo ḍyehu, ahupfonye na mazuka yonse na kuhudheresa na nabvise zehu, huwe wantuwe jeje heket̯u weo na hamu ya kuhenda mambo mema. ¹⁵ Haya ndiyo haya mambo wiyonamala kuyongweeza. Na kwa uwezo wako wonse wiwo nao, wafunde na kuwabusa hawa weonakusikiiya. Dziza muntu jwa kukubalifa.

¹ Wakumbusye hawa wantuwo wawe wakiwat̯ii kwa kula namuna hawa wat̯awala na wantu weo na mamulaka, na wadzifunge kuhenda kula aina ya dzambo dzema. ² Nawatsekaiya nyano na kuwa wantu wasio na naghea, ela nawawe wantu wa kusikiana, na meshi wawe wampowe kwa kula muntu. ³ Koro swiswi wenye d̯ura hwiiwa wantu maḍyura, husiwomut̯ii Muungu na hwaariyeo. Hwiiwa wahumwa wa t̯amaa zehu za kudzitsekeza na wahumwa wa kula aina ya raha. Maisha yehu yonse yasiiya mazukani na kufwiyanani ḍea; wantu wehukeva naswi hwiiwakeva. ⁴ Ela wema na matsako ya Muungu mupfonya jwehu yepfohudzia, ⁵ hupfonywa. Na nkakuhupfonya kwa dzambo ḍya mambo mema huhendeyeyo, ela ni kwa dzambo ḍya kuhufwiya t̯ei. Muungu kahupfonya kuchiiya na kwa nguvu za Ruhu Mudheru, eyenahupfa kuvyajwa upfya na kuwa na maisha mapfya kwa kuhudheresa kiruhu. ⁶ Muungu kamuhukakanyia Ruhu Mudheru kwa winji, kuchiiya na kwa Yesu Kirist̯o mupfonya jwehu, ⁷ ili kwamba, kwa kuhufwiya t̯ei kwakwe, hupate kungizwa hariani mwa sawa na Muungu, kisa hupfokee haya maisha ya kuunga na yuungo hudzikwat̯iyeyo kuyapata. ⁸ Hivi ni vyuuwo vya ḍugha. Natsaka uyangizie hiḍu haya mambo, ili kwamba hawaḍe wamuhikiziyeo Muungu, wamuud̯amie kuhenda mambo mema. Wakihenda hivi ni urembo na vina maana kwa kula muntu. ⁹ Ela wewe, dzit̯anye na yuḍaat̯o jwa uḍyura na utsekaiya milongo miyeya miyeya ya masari ya wabibi zenu na wala utsenjia matsowanoni na kuhehani dzuu ya hi Sharia. Haya ni mambo ya uḍyura na yasiyo maana. ¹⁰ Na muntu jwa kuyeha migawikano, mukanye ḍya d̯ura na ḍya pfii, na akitsasikia, yawana nae. ¹¹ Kumanya ya kwamba muntu dzae kaara hi njia, na kakuhendani nabvise, na vyakuyangani tswee kwamba kakutsoweani. ¹² Nikisa kumuhuma Atema ambu Tukiko kwako, ḍema kula njia udze Nikopoli, huku nihuniyeko kwendakaa huyu sika. ¹³ Ḍema kula udzevyoweza, kumumpa ugijo huyu wakili Zena na Apolo wakiwa charoni mwao, na ut̯unze kwamba ntawa t̯uri wa kintu. ¹⁴ Hawa wantu wehu ni kudziyongweeza kuhendea wantu mema, wayavye vyao kwa wantu weo na t̯uri wa ḍugha. Nawatsekaiya kuishi maisha yasiyo maana. ¹⁵ Hawa wonse weo pfamodza nami hapfa wakukedhya nto. Hukedhyeye hawa weo waḅamu zehu wa faro. T̯ei ya Muungu naiwe pfamodza nanywi nyonse.