Wafilipi

Wafilipi

¹ Mimi Paulo na Timoteo, hwiwo wahumisi wa Kirist̯o Yesu, hwakumworeani nywinywi wantu wa Muungu nyonse mwiwo Filipi na mwiwokuishini hariani mwa Kirist̯o Yesu. Hwakumworeani nanywi nywinywi wahumisi na wayongozi wa matsanganiko. ² Muungu Baba na Ḅwana jwehu Yesu Kirist̯o nawamuvodhye na kumumpa naghea nto. ³ Kula mweedha nipfonamut̯ara nywinywi, namuyaviza ḍuḍa huyu Muungu jwangu. ⁴ Na kula nikwakumuyombeani nyonse, nakaa nikamuyombea na tsekea ⁵ kwa dzambo ḍya ḍuḍa niyonayo kwa namuna mugijananiyevyo nami kwa hi kazi ya kusumwiiya haya Maagu Mema, hangu nsiku ya d̯ura muhikiziyeyo hat̯a hi hii saasambi. ⁶ Ndookomu nina uhakika kwamba, huyu Muungu aḍabvisiye kazi nyema myojoni mwenu, anagija kuihenda hat̯a idzepfosia Nsiku ya Kirist̯o Yesu adzepfokudza. ⁷ Gula nina hachi ya kumuhwaiya dzevihivi, koro nimutsaka muno. Na hangu nipfokuwa huru kuyahehea na kuyangizia nguvu haya Maagu Mema, na hat̯a hivi hivi niivyo mufungwa, nywinywi nyonse mushirikiana pfamodza nami hizi mvoni za Muungu animpiyezo. ⁸ Hat̯a Muungu mwenye kamanya kwamba nyakunenani hachi, nikyamba nimutsaka na tsako dza hiḍiḍe ḍya Kirist̯o Yesu mwenye. ⁹ Na nyakumuyombeani kwamba, tsako ḍyenu kwa wangine ḍikuye zaid̯i na zaid̯i na muweze kumanya na kuimuka mambo ya kiruhu, ¹⁰ ili kwamba muweze kutsana hayaḍe yeyo mema ya mwiso. Ndookomu nanywi ntamuwe na kat̯amba kaḍekonse wala alano hat̯a nsiku ya Kirist̯o adzepfokudza. ¹¹ Maisha yenu yadzadzaa mahendo mema ya ḍugha yeyonayehegwa ni Yesu Kirist̯o mwenye. Na kwa hi hii njia, Muungu anashad̯wa na kuhilwa. ¹² D̯ubva wandugu zangu, natsaka mumanye kwamba hivi vinihendekeeyevyo, visaiḍia muno kud̯achaa kwa haya Maagu Mema. ¹³ Falaulaye, hawa asikari wonse wa hapfa nyumbani pfa haju, pfamodza na hawa wantu wangine wonse, wamanya kwamba ningizwa gerenzani kwa dzambo ḍya kumuuḅa Kirist̯o. ¹⁴ Na kwa dzambo ḍya kufungwa kwangu, wenji wa hawa wandugu wagija kumuserefat̯a Ḅwana na wanjia mojo wa kuchisumwiiya hichi chuuwo cha Muungu pfasipfo oga. ¹⁵ Gula ni ḍugha kwamba wangine wanasumwiiya dzuu ya Kirist̯o kwa dzambo ḍya ḍea na kuhendeza wantu wayawane mama, ela wangine wakuyasumwiiyani kwa nia nyema. ¹⁶ Hawa hawa wakuvihendani wakiwa na matsako, koro wamanya kwamba Muungu kainimpa hi hii kazi ya kuyahehea haya Maagu Mema. ¹⁷ Ela hao wangine ntawakae na kusumwiiya dzuu ya Kirist̯o na myojo myema hat̯a. Wanakaa na kusumwiiya kwa kudzilachia makuu, wakit̯ara kwamba wananyongezea tsungu wiwokunipatani humu gerenzani niimo. ¹⁸ Ae muntu akisumwiiya kwa nia nyema ambu akidzihendeza ḅasi, ami nina d̯ina ga? Ḅora t̯u haya maagu dzuu ya Kirist̯o yasumwiijwe. Na kwa dzambo ḍyevihivi mimi nina tsekea muno! Kisa amaale nagija kutsekea, ¹⁹ koro nimanya kwamba kwa dzambo ḍya haya mayombo yenu na hu ugijo wa huyu Ruhu jwa Kirist̯o Yesu, nayatsigwa huru. ²⁰ Hamu yangu nkuu na madzikwat̯yo yangu ni kwamba nitsehenda kiḍechonse cha kunigiza yutswa. Ela meshi natsaka kumuhumikia Kirist̯o pfasipfo oga uḍewonse dza nivyonikihenda iiḍe. Na natsaka kwamba nikikaa mojo ambu nikifwa, mimi nimukuzye Kirist̯o na haya mahendo yangu. ²¹ Koro ami kivyangu, ninkiishi nagija kumukuzya Kirist̯o na nikifwa pia ni faiḍa kwangu. ²² Ela ikiwa kwamba nikwakuishini naweza kuhenda kazi iyo na faiḍa zaid̯i, d̯ubva sidzi kwamba nyambe natsaka vi! ²³ Ndookomu nyakuḍanganikani kwamba, kahi ya haya haya mambo mowii nyambe natsaka ḍi. Nyakut̯amanini kufwa ili ninkakae pfamodza na Kirist̯o, dzambo ḍiḍyo dzema muno kwangu. ²⁴ Ela kawii kwa dzambo ḍyenu, ni urembo zaid̯i ninkikaa mojo. ²⁵ Nina uhakika weḍihiḍi dzambo, ndookomu nimanya kwamba nagija kuishi pfamodza nanywi nyonse ili mupate kukuya kiruhu na kutsekea zaid̯i kwa dzambo ḍya kuhikiza kwenu. ²⁶ Ḅasi nidzepfowa pfamodza nanywi kawii, munapata saḅaḅu nkuu zaid̯i ya kumushad̯a Kirist̯o Yesu kwa dzambo ḍyangu. ²⁷ Cha mud̯a t̯u ni kwamba, maisha yenu ni yaingane ḍa na hivi vya hi injili ya Yesu Kirist̯o ivyonatsaka. Ni yawe hivi ili kwamba, ninkiweza kudza kwenu ambu ninkitsaweza kudza, nangaa nisikiye kwamba musumama urembo mukiwa na kusuḍi modza, na mukiwa kuiheheani kwa umodza hi faro yenu mwiyonayo kwa haya Maagu Mema. ²⁸ Hawa weokumupfingani namutsewashooga hat̯a kachuchu. Na hivi vinawahendeza wanahambuya tswee kwamba wao wanashindwa ela nywinywi munashinda, koro eyenamumpa kushinda ni Muungu. ²⁹ Koro hi hii namfasi maalumu mupfegejweyo, ntamukuipfegwa kwa kumuhikiza Kirist̯o t̯u, ela hat̯a na kwa kukuntiswa d̯ina kwa dzambo ḍyakwe. ³⁰ Mimi nanywi hwakujwanani viha vimodza! Ni viviḍe viha mwivyoniona ninkijwana hangu iiḍe. Na dza mwivyokusikiani, ndivyo nivyokuvijwanani hat̯a hi hii saasambi.

¹ D̯ubva ikiwa kwamba kumuhikiza kwenu Kirist̯o kunakaa na kumungiza mojo, na tsakoḍye ḍinamuingamaza, na ikiwa kwamba munakaa na kuwa na haria na huyu Ruhu Mudheru, na munatsakana na kufwiyana t̯ei nywinywi na nywinywi, ² namuyomba munitsekeze kaḅisa kaḅisa. Nitsekezani kwa kuwa na mat̯aro mamodza, na kwa kutsakana nywinywi na nywinywi na muwe na mojo mumodza na kuhenda kumodza. ³ Namutsehenda dzambo ḍiḍeḍyonse na umimi ambu kwa kulacha kudziona. Ela wani na myojo ya umpowe, mukiwahwaa wangine kuwa ḅora zaid̯i kumuchia nywinywi wenye. ⁴ Kula mumodza jwenu natsemuud̯amia haya mamboye jeje heket̯u ḅasi, ela wamuud̯amiyeni na wenzenu pia. ⁵ Wani na mojo dza uuḍe wa Kirist̯o Yesu eokuwa nao. ⁶ Ingawa ewa na asili ya Umuungu, ela jeje hukuḍe kuwa sawa na Muungu, nkakukuhwaiya kuwa dzambo ḍya kuḍihabvaka gu. ⁷ Kwa kutsaka kwakwe jeje mwenye, hayo hayo yonse kayajibat̯a. Kadziweka dza muhumisi, na kawa dza mwanaad̯amu. ⁸ Na akimaawa dza mwanaad̯amu, kadzisusya nsii, na kat̯ii hat̯a adzepfoakifwa, kifo cha kinyaya muhini mwa mpatsa. ⁹ Na kwa dzambo hiḍyo, Muungu kamukuzya, na kamuhendeza akae pfantu pfa hila nkuu pfa mwiso. Kamumpa sari ḍiiḍyo kuu kuchia masari yonse. ¹⁰ Ndookomu kwa kuḍihila sari ḍya Yesu, kula ḍikihadzwa viumbe vyonse, viivyo mbinguni dzuu, nsii lumwenguni, na hat̯a viivyo lumwengu jwa wafu, ni had̯i vimuvunziye nkuhi. ¹¹ Na kula mumodza anene kwamba Yesu Kirist̯o ni Ḅwana kwa dzambo ḍya kumumpa shad̯u Muungu Baba. ¹² D̯ubva watsakwa, dza mwiivyomukinit̯ii kut̯wa nipfokuwa pfamodza nanywi, ḅasi hat̯a hivi hivi niivyo kuye nanywi gijani kunit̯ii. Gijani kuhenda mema, mukimushooga Muungu muno kuzimuni mwa maisha yenu ya mupfonyo. ¹³ Koro Muungu ndiye eyekuhendani kazi kuzimuni mwenu, apate kumumpa mojo na nguvu za kuhendea hayaḍe yeyonamutsakiza jeje. ¹⁴ Hendani kula kintu pfasipfo kuḅuguma wala kushindana ¹⁵ ili kwamba muweze kuwa wantu wasio t̯amba ambu alano iḍeyonse. Ni muwe dza wana wema wa Muungu weokuishini lumwengu jwa wantu wazuka na wanangikiyeo. Yangaani dza muyanga kahi yao, ¹⁶ huku mukikigija gu hichi chuuwo chichonawapfa wantu maisha. Mukihenda dza hivi, ndipfo nami nsiku ya Kirist̯o adzeyokudza nawa na saḅaḅu ya kudzivunia, koro idzayanga tswee kwamba hi kazi nihendeyeyo sikufwa ḅasi. ¹⁷ Hat̯a ikiwa kwamba mimi ni kuyavigwa dza sehemu ya hi mvuugiya mwiyokumuyavizani Muungu kwa dzambo ḍya serefano yenu kwakwe, mimi nya t̯ayari na natsaika pfamodza nanywi nyonse. ¹⁸ Dza vivyo nanywi ni had̯i mutsekeye pfamodza nami. ¹⁹ Nyakuyoweeyani kwamba, Ḅwana akitsaka, namuhuma Timoteo kwenu si hat̯a kae ili kwamba niweze kunjia mojo nidzepfopata maagu dzuu yenu. ²⁰ Hapfa si muntu yungine eyenamumuud̯amia nywinywi na mojo dza Timoteo. ²¹ Hawa wangine wonse wakumuud̯amiani mambo yao wao wenye ḅad̯ala ya kumuud̯amia haya mambo ya Yesu Kirist̯o. ²² Ela nywinywi wenye mumanya namuna ya Timoteo aivyo muntu mwema. Mimi nae hwiiwa dza muntu na mwanawe. Kanigijiija kuhenda kazi ya kuyasumwiiya haya Maagu Mema. ²³ Nina madzikwat̯yo kwamba nidzepfomanya namuna ya haya mambo yadzevyonyendea t̯u, namuhuma kwenu. ²⁴ Nina hakika kwamba, Ḅwana akitsaka, nakudza huko huko kwenu si hat̯a kae. ²⁵ Niona urembo kwamba nguzi nimugaliche ndugu Epafurodito kwenu. Jeje ni muhenda kazi mwenzangu hwiyekuijwaniani pfamodza hi injili. Na ndiye muhumiyee kudzanigija ninkiwa na t̯uri. ²⁶ Nyakumuhumani kwenu, kwa dzambo ana hamu muno ya kudzamuona nyonse. Jeje kakuhangaikani kwamba mumupata maagu kwamba ni mujwazi. ²⁷ Gula ndivyo ḍugha. Ewa mujwazi muno hat̯a echamba afwe. Ela Muungu kamufwiya t̯ei, na hat̯a nami pia kanifwiya t̯ei nitsekudzapatwa ni tsungu zaid̯i ya hu nionao. ²⁸ Ndookomu nyakutsakani muno kumuhuma kwenu haraka ili kwamba mudzepfomuona, munjie tsekea kawii na hi ngiru yangu iniyawe. ²⁹ D̯ubva mupfokeyeni na tsekea yonse dza muntu jwa Ḅwana. Wahileni na wangine wonse weo dzae, ³⁰ koro ewa kayangiza hat̯arini haya maishaye hat̯a echamba afwe kwa dzambo ḍye kazi ya Kirist̯o, ili aweze kuunimpa hu ugijo musioweza kuuniyeheya nywinywi wenye na mukono.

¹ Wandugu, chingine nichokutsakani kumwambia ni kwamba, tsekeani kwa dzambo mu wantu wa Ḅwana. Mimi sione d̯ina kumworea kawii viviḍe nivyomworea d̯ura, koro ni urembo nikimukumbusya kawii. ² Dzit̯unzeni na hawa wantu weonahenda mazuka. Wao waa dza machughe! Ni wantu weonangizia mukazo dzuu ya wantu kuhinywa. ³ Ela swiswi hwiwonakaa na kumuyomba Muungu kwa njia ya huyu Ruhu jwakwe, ndiswi huhinyijweo ḍugha, siwo. Swiswi hunadzivunia haya ya Kirist̯o Yesu ahuhendeeyo. Mambo ya kuuḅa adha zizonahwajwa kuwa muhimu ni wanaad̯amu ntahu nayo. ⁴ Nyakunenani hivi, hat̯a ingawa mimi mwenye nina saḅaḅu za kuemeeya hizi hizi adha za kibenaad̯amu. Na muntu akit̯ara kwamba ana saḅaḅu za kuemeeya hizi hizi adha, ḅasi mimi nina saḅaḅu nyinji zaid̯i. ⁵ Koro mimi ni Muisiraeli, jwa kyeet̯i cha Benyamini. Ni Mueburania libve na nihinywa nipfokuwa na nsiku nane. Kuhusu kuuḅa Sharia ya Kiyahud̯i, mimi niwa ni Mufarisayo. ⁶ Mimi niwa muhiḍu muno jwa kuḍikuntisa d̯ina hiḍi tsanganiko ḍya Muungu. Na dzuu ya kuonegwa muhachi kwa njia ya kuiuḅa hi Sharia ya Musa, ntaku muntu jwa kuniona na tsowa ḍiḍeḍyonse. ⁷ Ela haya haya yonse niyonikiyaona dza faiḍa kwangu, sasa nayaona kwamba ntaya maana, kwa dzambo ḍya Kirist̯o. ⁸ Gula si hayo t̯u, ela kula kintu nakiona dza hansara ntupfu kwa kwamba natsaka kumumanya Kirist̯o Yesu Ḅwana jwangu, dzambo ḍiiḍyo na thamani kuchia mambo yangine yonse. Nikuḅali kujibat̯a kula kintu kwa dzambo ḍyakwe, koro hayo hayo yonse niyaona kwamba ni kinyenye ili niweze kumupata Kirist̯o. ⁹ Mimi si haḍya kawii ya kudzihwaa kuwa muhachi kwa dzambo ḍya kuiuḅa hi Sharia, koro sasa nahwajwa kuwa muhachi kwa njia ya kumuhikiza Kirist̯o. Hivi ndivyo vya Muungu evyonahuhendeza wahachi kwa kuwa na faro. ¹⁰ Nichokutsakani t̯u ni kugija kumumanya Kirist̯o zaid̯i na zaid̯i, na nizione hizi nguvu zimufufwiiyezo. Na nya t̯ayari kukunta d̯ina kut̯wa dza viviḍe akuntisijwevyo d̯ina, na hat̯a nifwe kwa dzambo ḍyakwe dza viviḍe afwiyevyo kwa dzambo ḍyangu. ¹¹ Ndookomu, mimi nina madzikwat̯yo ya kwamba, kwa hi hii njia, nami nafufujwa kuyawa kwa wafu. ¹² Sikwakunenani kwamba nimaḍipata hiḍi niḍyokulachani ambu nimaawa mugulufu hat̯a, ela amaale nyakuhendani hiḍu ili nipate hikiḍe cha Kirist̯o anitsaniiyecho kunimpa. ¹³ Ela kunena hiḍe ya hachi, wandugu zangu, mimi mwenye sit̯are kwamba hikiḍe cha Kirist̯o anitsaniiyecho kunimpa nimakipata. Dzambo niḍyokuhendani ni kwamba, nyakuyaarerwani hayaḍe yonse yeyo nyuma yangu, na nyakuḍemani dza nivyonaweza ili niweze kuyapata hayaḍe yeyo usoni. ¹⁴ D̯ubva nyakujwaniani kuḍit̯imiza hiḍi lengo ḍyangu, ili nipate hiḍi t̯ubvo ḍya kuhanigwa ni Muungu kuchiiya na kwa Kirist̯o Yesu, niishi maisha ya kimbinguni. ¹⁵ Ndookomu hwonse hungoreyeo kiruhu hunamala kuwa na mat̯aro dzayahaya. Na ikiwa kwamba wangine wenu wana mat̯aro yangine, Muungu anayawapfenwiiya haya niyokumwambiani. ¹⁶ Ela swiswi ni had̯i hugije kuuḅa haya mayongweezo ya hachi huyongweezejweyo. ¹⁷ Wandugu zangu, t̯aḅani hu mufaano wa haya maisha yangu. Hwisakumuyanga mufaano mwema, ndookomu dziyongweezeni kuyawana na hawaḍe weokuuḅani hu huu mufaano. ¹⁸ Hiḍi hiḍi dzambo nisakuḍimwambia myeedha minji, na nyakuḍiujiani kawii na tsungu mwinji. Kuna wantu wenji weokuishini maisha ya kukuhendeza huku kufwa kwa Kirist̯o afwiyeko muhini mwa mpatsa kutsowe maana. ¹⁹ Wao chikuu wechonauḅa ni t̯amaa zao za kimwii. Wanaziuḅa dza kwamba ndizo miungu yao. Haya mambo ya kwamba wayaoneye yutswa, ndiyo yao weyonadzishad̯a nayo. Chao t̯u wechonat̯aria ni mambo ya huju huju lumwengu. Hakika mwisowe Muungu kadzawananga-nanga! ²⁰ Ela swiswi hunaishi dza wantu wa mbinguni. Hwakumuindiiyani na hamu nkuu muno huyu Mupfonya jwehu, Ḅwana Yesu Kirist̯o, adze kuyawa mbinguni. ²¹ Adzepfokudza, hi mii yehu midhaifu kadzaiperuya na uwezowe, iwe dza hu mwiiwe wa marembo. Hu huu uwezowe ndiwo adzeoutumia awe mut̯awala jwa kula kintu.

¹ D̯ubva wandugu zangu watsakwa, gijani kumuserefat̯a Ḅwana dzevyo. Mimi nina kaja ya kumuona muno! Munakaa na kunitsekeza muno na nakaa na kudzihonga nanywi muno! ² Eyodia na Suntike, nyakumuyombani muvinene hivi vyuuwo vyenu na mupatane kawii dza wake wamuhikiziyeo Ḅwana. ³ Nawe pia ndugu muhikizika, wiye muhenda kazi mwenzangu, natsaka uwasaiḍie hawa wake hawa waimukane. Koro wahenda kazi na hiḍu kunigijiija nikwakuyasumwiiyani haya Maagu Mema. Wanigijiija wao na Kilementi, na hawa wahenda kazi wenzangu wangine wonse, ambao masari yao yoregwa kuzimuni mwa Chuo cha Maisha. ⁴ Meshi tsekeani muno kwa kwamba mwaa hariani mwa Ḅwana. Makisa nyakuvimwambiani kawii, tsekeani! ⁵ Wani wampowe kwa wantu wonse. Ḅwana ka hafufi kudza. ⁶ Namutsemuud̯ama dzuu ya dzambo ḍiḍeḍyonse, ela kwa kula hali, ikaani na kumuyomba Muungu mukimwambia haḍya zenu. Na ikaani mukimuyaviza ḍuḍa kut̯wa. ⁷ Ndookomu hi naghea ya Muungu husiyoiimuka na mama za kiwanaad̯amu, inamuingamaza. Kwa njia ya hi hii naghea, Kirist̯o Yesu anagija kumut̯awala myojo yenu na akili zenu. ⁸ Mwiso wandugu zanguni, ikaani mukit̯aria mambo mema, mambo ya hachi na mambo yasiyohwajwa kuwa mazuka. T̯ariani mambo yeyo ya ḍugha, kuwa na t̯aḅia nyema, mambo ya udheru, mambo ya kutsakiza na mambo yeyo ya hila. ⁹ Meshi ikaani mukiyahenda haya mudziyongweezeyeyo kuyawa kwangu. Hangu mambo munisikiiyeyo ninkinena, na hat̯a munioneyeyo ninkiyahenda. Na Muungu, huyu eyenahupfa naghea anawa nanywi. ¹⁰ Nina tsekea nkuu muno kwa Ḅwana, kwa dzambo nangaa sasa mupata namfasi ya kuyanga muud̯ama mwiyonayo kwangu. Nimanya kwamba hangu iiḍe mwikinimuud̯amia, ela ntamwikipata hi namfasi t̯u ya kudziyanga. ¹¹ Sikwakunenani hivi at̯i kwa dzambo nina t̯uri hat̯a. Mimi nidziyongweeza kufuruma na kula hali niyonawa nayo. ¹² T̯uri niumanya na hali ya kuwa na vinji pia niimanya. Nidziyongweeza hi hii siri ya kwamba ngera zonse na pfaḍepfonse nipfonawa, ninkiwa na kufa ambu ninkiwa na nzaa, ninkiwa na vya kut̯osa ambu ninkiwa na t̯uri, mimi nafuruma na kula hali. ¹³ Naweza kuit̯isa kwa hali zonse kuchiiya na kwa Kirist̯o eyenanimpa nguvu. ¹⁴ Gula muhenda urembo muno kuyanga ushirikiano wenu nami kwa kunimpa ugijo ninkiwa mad̯inani. ¹⁵ Nywinywi Wafilipi wenye muvimanya urembo kwamba, nipfonuka na ḍyimbo ḍya Makedonia hiziḍe ngera nidziyezo ninkimusumwiiya haya Maagu Mema mweedha wa d̯ura, hiḍi tsanganiko ḍyenu ndiḍyo ḍiḍyo heket̯u ḍinimpiyeḍyo ugijo. ¹⁶ Koro hat̯a nipfokuwa Tesalonike, nipfonikitsaka ugijo, nywinywi muniyehea ugijo hat̯a zaid̯i ya mweedha mumodza. ¹⁷ Si ya kwamba nyakutsakani munit̯oleye vyenu ḅasi, ela nichokutsakani ni kwamba Muungu amuvodhye muno, kwa dzambo ḍya kunimpa ugijo. ¹⁸ Nisakupfokea ugijo mwema muno kuyawa kwenu, ndookomu sasa nina vinji kuchia hivi nivyonatsaka. Si t̯uri kawii kwa dzambo hizi nt̯unu mumumpiyezo Epafurodito aniyeheye nisakuzipfokea. Hachi zinatsakiza dza harufu nyema ya mvuugiya ya kutsomwa iyonayavigwa kwa Muungu, ikamutsakiza nae akaikuḅali. ¹⁹ Na huyu Muungu jwangu niyenamuhumikia namut̯imiziye haḍya zenu zonse kuyawana na jabvawe mwinji eo nao, eonamumpa kuchiiya kwa Kirist̯o Yesu. ²⁰ Muungu Baba jwehu ashad̯we maishi na maishi, Amina. ²¹ Nikedhyeani hawa wantu wonse weo wa Kirist̯o Yesu. Hawa wandugu nionao huku wamukedhya nto. ²² Na hawa wantu wa Muungu wonse wa huku nao pia wamuyehea kedhya zao, haswa hawa weonahenda kazi nyumbani mwa huyu haju. ²³ T̯ei ya Ḅwana jwehu Yesu Kirist̯o naiwe pfamodza nanywi nyonse.