Yakobo

Yakobo

¹ Mimi Yakobo, niiye muhumisi jwa Muungu na jwa Ḅwana Yesu Kirist̯o, nyakumworeani nywinywi wahikiza mwiwo wa vyeet̯i kumi na viwii vya Wayahud̯i mut̯amisaiyeo nsi garagara. Nyonse nimukedhya nto! Ntamu untu? ² Wandugu zangu, mwipfonapatwa ni maḍemo ya kula namuna, nywinywi tsekeani t̯u, ³ koro ni mumanye ya kwamba, kupimigwa kwa hi faro yenu kunamukumiiza myojo, na munagija kumuserefat̯a Muungu. ⁴ Nywinywi ni mugije kuit̯isa hat̯a mwiso, mupate kukuya, mungore na mukamilike kwa kula njia, mutsepfungukijwa ni kiḍechonse. ⁵ Muntu akitsowa mvidhyo ya kumanya namuna ya Muungu evyonatsaka huishi, namuyombe Muungu, nae anaimumpa. Koro Muungu akwakumumpani muntu kintu, anakimumpa na mojo mumodza, wala nkawezi kumuajaisa. ⁶ Ela muntu akwakuyombani, ni had̯i amuserefat̯e Muungu, ni kutsaawa na umbiimbii. Maanaye, muntu eye na umbiimbii ni dza wimbi ḍya ḅahari ḍiḍyonabigwa ni mpepfo ḍikapfiikwa huku na huku. ⁷ D̯ubva muntu dzae, natset̯ara ya kwamba anaweza kupata kintu kuyawa kwa Ḅwana. ⁸ Muntu jwa umbiimbii meshi ni muntu asiye musumamo. ⁹ Huyuḍe muhikiza eye masikini, natsekeye kwamba Muungu kamukuzya. ¹⁰ Ela muntu jabva, namanye kwamba Muungu kadzamususya nsii. Maanaye, dza hiviḍe vya kiyuwa chivyonawaa kisa kikaharachaa, ndivyo vya muntu jabva adzevyokaa kisa atsekudzaonekana kawii. ¹¹ Dzuwa ḍipfonawaa kali, ḍinaibiga mimea hat̯a kiyuwa kikaharachaa kisa nayo ikafwa, na remboḍye ḍikaara kaḅisa! Hat̯a kwa muntu jabva vinawa dzevyo. Jeje anawa kakuchiiyani-chiiyani shuulize na kufwa kunamudzia. ¹² Heri muntu eyenapatwa ni maḍemo na akait̯isa! Koro akiit̯isa hat̯a akiyashinda, Muungu anamumpa t̯ubvo ḍya maisha ya kuunga na yuungo. Hiḍi ni t̯ubvo ḍya Muungu aahid̯iyeḍyo kuḍiwapfa hawaḍe wonse wamutsakiyeo. ¹³ Muntu akipatwa ni maḍemo, natsekwamba Muungu ndiye eyekumuḍemani. Koro Muungu nkawezi kuḍemegwa anjie kuhendani mazuka, na wala nae nkawezi kumuḍema muntu amungize kuhendani mazuka. ¹⁴ Ela muntu anaḍemegwa ni t̯amaa zakwe jeje mwenye! Zinamukulakula, zikamuhendeza atsake kuhenda mazuka. ¹⁵ Muntu akisakumiha t̯amaa nzuka, hizi t̯amaa zinavyaa nabvise. Na hi nabvise ikikuya hat̯a ikyenda ikingora, inavyaa kufwa. ¹⁶ Wandugu zangu watsakwa, namutsekulika-kulika hat̯a! ¹⁷ Kula chicho chema na kisicho kapet̯a kinayawa kwa Muungu, aumbiye hiḍi dzuwa, mwezi na nyoha. Ela Muungu jeje nkakwaa dza hiḍi dzuwa, mwezi na nyoha, vivyonaperuka-peruka. Na wala nkakwaa dza vivwii vivyonaperuka-peruka! ¹⁸ Kwa miroye mwenye, kahupfa kuvyajwa upfya kuchiiya na kwa hichi chuuwoche cha hachi. Kahenda hivi ili kwamba, kahi ya vyonse aumbiyevyo, swiswi huwe ndiswi viumbe vya maana vya mwiso kwakwe. ¹⁹ D̯ubva wandugu zangu watsakwa, kula mumodza jwenu nawe mupesi jwa kusikiiya, ela natseewa muharaka jwa kut̯amuka ambu jwa kudzirejea ḅasi ḅasi. ²⁰ Koro muntu akireja, nkawezi kuhenda yeyo ya hachi usoni kwa Muungu. ²¹ Ndookomu nanywi, dzyapfuseni na kula aina ya hendo zuka na mambo yasiyokuwa mema. Ipfokeyeni na umpowe hi mbeju ya chuuwo cha Muungu ihodzejweyo myojoni mwenu. Koro ndicho chuuwo chichonaweza kumupfonya. ²² Mukiwa wantu wa kusikiiya chuuwo cha Muungu na kuchiyatsia pfapfo, mwakudzikulanikulani wenye. Ni muwe wantu wa kusikiiya chuuwo cha Muungu na kuhenda chivyokunenani. ²³ Koro muntu eyenasikiiya chuuwo cha Muungu na kutsahenda chivyokunenani, ni sawa na muntu eyenadziyowa kiyooni akaona namuna akaiyevyo, ²⁴ kisa iyo saa akinuka na hapfo akaarerwa kwamba ewa kakaadze. ²⁵ Ela muntu akigija kuyauḅa haya mayongweezo yeyo mema na yeyonahuweka huru, na akitsakwaarerwa kuhenda hivi vya hichi chuuwo chivyonamwambia, Muungu anamuvodhya. ²⁶ Muntu akwakudzihwaani kwamba jeje ni muntu muchuuwo na huku nkawezi kut̯unza jwiimijwe, huyo kakudzikulanikulani mwenye, na kuwa muntu muchuuwo kwakwe, ntaku maana yaḍeyonse. ²⁷ Muntu jwa Muungu Baba jwehu eyenamuhwaa kuwa muntu muchuuwo jwa ḍugha na asiye t̯amba, ni huyuḍe eyenat̯unza wake wachiwa na wana wachiwa weo na d̯ina, na kudzit̯unza mwenye atsedzinanga kwa kuhenda mazuka ya wantu wa huju huju lumwengu.

¹ Wandugu zangu, nywinywi dza wantu mumuhikiziyeo Ḅwana jwehu Yesu Kirist̯o, mwenye marembo yonse, namutseewa wantu wa upend̯eleo. ² Kwa mufaano, nahuhwaiye kwamba humu tsanganikoni mwenu kudza muntu avwaiye t̯ele za dhahaḅu, akivwaa na nguo nyema nyema. Kisa kudza na muntu masikini avwaiye nguo nzuka nzuka! ³ Mukimumuud̯amia huyu muntu avwaiye urembo ḅasi, mukimumpa kiti chema cha kukaiya, kisa mumwambe huyu muntu masikini, “Wewe sumama hapfaḍe!” Ambu mumwambe, “Wewe ikaa chihako hapfo mutsangani hapfo.” ⁴ Mukihenda hivyo hivyo ntamukwakuyangani uḅaguzi hat̯a? Mwakuwahwaani wantu wangine kuwa ḅora zaid̯i kuchia wangine kwa njia nzuka. ⁵ Wandugu zangu watsakwa, nisikiiyani! Muungu katsana hawa weonahwajwa kuwa wantu makowesa wa huju lumwengu na kawahendeza kuwa majabva ya faro. Na ndiwo wadzeouḍala uhajuwe aahid̯iiyeo hawaḍe wonse wamutsakiyeo. ⁶ Anywi mukidzamukinuka, mwakumuhwaani kowesa dza muntu asiye maana! Dzaambia awa wantu majabva mwiwonahila muno, siwo weokumukaiyani chihako na kumusharut̯isa na nguvu mwende magasani wakamusit̯aki? ⁷ Siwo pia weonaḍikufuru eḍi sari ḍya hila ḍya ayu mwiye wakwe? ⁸ Haya, ikiwa kwamba hivi mwivyokuhendani mwakuuḅani hi amuri nkuu ya Muungu iyo humu matsoroni, na yambiyeyo, “Mutsake mwenziwo dza udzitsakiyevyo mwenye,” ḅasi mwakuhendani sawa! ⁹ Ela ikiwa kwamba munakaa na kuyanga wantu upend̯eleo, ḅasi mwakuhendani nabvise na vyaa wazi kwamba muna tsowa ḍya kuvunza amuri za Muungu. ¹⁰ Koro muntu akiiuḅa hi Sharia urembo, kisa adzeavunze kaamuri kamodza t̯u, huyo ana tsowa ḍya kuzivunza amuri zonse! ¹¹ Maanaye, huyu Muungu ambiye, “Nkudzonjie rangani,” ndiye yuyo ambiye, “Nkudzoyage.” D̯ubva, ikiwa kwamba muntu nkakuvunza ukwe, ela kayaga muntu, ni sawa na kwamba huyo ana tsowa ḍya kuzivunza amuri zonse za Muungu. ¹² Nywinywi kumbukani kwamba, hakika Muungu kadzamuhukumu kuuḅana na kwamba aya mayongweezoye yeyonahuweka huru, muyauḅa ambu hat̯a. D̯ubva, vyuuwo vyenu na mahendo yenu ni had̯i viuḅe hayo mayongweezo. ¹³ Koro muntu asiyekuwa mut̯ei kwa wangine, Muungu nae nkawezi kuwa mut̯ei kwakwe nsiku ya hukumu. Na muntu mut̯ei kwa wangine, nkawezi kuwa na oga wa kuhukumigwa. ¹⁴ Wandugu zangu, ina maana ga kwa muntu kunena kwamba kamuhikiza Yesu Kirist̯o na huku mahendoye ntayayange faro eyonayo? Dze, faro dzeyohiyo inamupfonyadze? ¹⁵ Kwa mufaano, nahuhwaiye kwamba kuona muhikiza mwenziwo eye na d̯ara na pia hat̯a cha kupfiika mohoni nka kintu. ¹⁶ Kisa nawe unuke na kumwamba, “Ikaa naghea. Muungu nakupfe kuḍya na kunwa na akuvwike.” Na huku wewe nkukumumpa hikiḍe echo na t̯uri nacho. D̯ubva avi umwambiiyevyo vinamusaiḍia na? ¹⁷ Hat̯a faro nayo, ikitsakwenda na mahendo, ni sawa na kwamba ifwa! ¹⁸ Wewe unaweza kunena kwamba, wangine wakiwa na faro ni sawa, na wangine wakiwa na mahendo mema ni sawa. Ela niyanga namuna ya muntu evyonaweza kuwa na faro pfasipfo kuwa na mahendo mema, nami nakuyanga hi faro yangu kwa haya mema niyonahenda. ¹⁹ Wewe kuhikiza kwamba kuna Muungu mumodza t̯u, sivyo? Haya, gula ni sawa! Ela hat̯a mpepfo nzuka nazo, zihikiza kwamba kuna Muungu mumodza na zinakuka kuhehema na oga. ²⁰ E ḍyurawe! Nkwaimuka hat̯a kwamba muntu akiwa na faro kisa akitsahenda mema, hiyo faro yakwe ntai maana? ²¹ T̯anahuhwaeni mufaano wa bibi jwehu Iburahimu. Jeje, Muungu kamuhwaa kuwa muhachi kwa dzambo ḍya hiviḍe ahendeevyo, vya kutsaka kumuyavya mwanawe Isaka dza mvuugiya kwa Muungu. ²² Kwakuonani? Iburahimu ewa kamuserefat̯a Muungu chima cha kwamba, ewa t̯ayari kuhenda kiḍechonse cha Muungu amwambiiyecho. Ndookomu hi faroye ikamilika na haya mahendoye. ²³ Hivi viyanga wazi kwamba, hivi vya haya matsoro yaneneyevyo ni ḍugha. Koro yamba, “Iburahimu kamuserefat̯a Muungu, nae Muungu kamuhwaa kuwa muntu muhachi.” Hat̯a wantu nao wekimuhana ḅamu jwa Muungu. ²⁴ Mwakuonani d̯ubva? Muntu anahwajwa kuwa muhachi kwa mahendoye na kwa faroye pia! ²⁵ Hat̯a huyuḍe muke shudha eyeakihanwa Rahabi, Muungu kamuhwaa dza muntu muhachi kwa dzambo ḍya hiviḍe ahendeyevyo, vya kuwahwaa wad̯ozi wa Kiisiraeli akiwafitsa nyumbani mwakwe, kisa akiwagonzoza na siri na njia ingine. ²⁶ D̯ubva nichokunenani ni kwamba, ruhu ikimuyawa muntu, ḅasi muntu huyo anawa nkakwaa mojo kawii, kesakufwa. Na hat̯a faro ya muntu ikitsayangwa na mahendo, nayo pia inawa dzevyo. Yani inawa kwamba ifwa!

¹ Wandugu zanguni, si kula muntu kwamba atsake kuwa mwaalimu jwa tsanganiko hat̯a! Koro dza mumanyiyevyo, swiswi waalimu, Muungu kadzahuhukumu vyumuni kuchia wantu wangine kwa hayaḍe mazuka hwiyonahenda. ² Gula ni ḍugha, kwamba wantu wonse hunakaa hukahenda matsowa kut̯wa, ela hawaḍe weonaweza kuzit̯unza hizi nyiimi zao, wao wangora na wanaweza kudzimiza kwa kula hali. ³ Kwa mufaano, ukitsaka kuḍihendeza farasi ḍikut̯ii, unaḍifunga mfunaura na ndookomu unaweza kuḍipfiika kuḍekwonse wikonatsaka. ⁴ Hat̯a mashuwa nayo, na ukuuwe wonse, na kupfiikwa ni mpepfo nkali kwakwe, inaweza kuperujwa na kasukani kachuuchu na yende kuḍekwonse kwa huyu nahudha ekonatsaka yende. ⁵ Huju jwiimi najo, ni kiungo kiḍoḍo muno cha hu mwii, ela junahenda mambo makuu na makuu. Hat̯a nsetse modza t̯u ya moho inaweza kugiza moho bad̯a nzima! ⁶ Jwiimi najo jwaa dza moho. Judzaa kula aina ya mazuka yeyonaweza kunanga maisha ya muntu mazima! Junagiza moho maisha ya muntu, jukayananga dza kwamba jugizwa moho usiwozimika dza huḍe wa Jehanamu. ⁷ Benaad̯amu hangu kae wekit̯awala viumbe vyonse, na mumpaka saambi wakut̯awalani waḍondo wa bad̯ani, weonaguuka, weonahambaa na wa madzini. ⁸ Ela ntaku awezeye kujut̯awala jwiimijwe. Hu jwiimi ni yuzuka, ntajugijike. Juna hat̯ari dza sumu nkali. ⁹ Kwa jujo jwiimi yumodza hunamushad̯a Ḅwana Muungu, eye Baba jwehu. Na kwa jujo jwiimi hunawaḍuwa wanaad̯amu wenzehu waumbijweo dzaswi kwa mufaano wa Muungu. ¹⁰ Kako kanwa kamodza kanaḍuwa na kako kanwa kakamushad̯a Muungu. Wandugu zanguni, sivyo! ¹¹ Ni tsana ga ya mutsangani kuzimu, iyonakakanyika madzi mema na kukakanyika madzi yeyonatsama viwi na pfapfo pfantu pfamodza? ¹² Wandugu zanguni, ni muhi ga wa mutini wiwonaweza kuvyaa matunda ya mizeituni? Ni muhi ga wa muzabibu wiwonaweza kuvyaa matunda ya mutini? Ambu, ni tsana ga ya mutsangani kuzimu, iyonakakanyika madzi ya munyu, na iyo tsana modza ikakakanyika na madzi mema? ¹³ Kukiwa yuḍejwonse kahi yenu, eye na mvidhyo na uimufu wa njia za Muungu, naviyange na t̯aḅiaye kwamba anakaa akiishi dza muntu mumpowe na eye na mvidhyo. ¹⁴ Ela humu myojoni mukiwa na wivu mwinji na t̯amaa ya kudzikuzya nywinywi ḅasi, namutsedziona mwambe muna mvidhyo, na hali huku mwakuikanani hi hachi ya Muungu. ¹⁵ Mvidhyo dzayo ntaiyawe kwa Muungu na wala si ya kiruhu, ni mvidhyo ya kilumwengu iyonayawa kwa Shaat̯ani. ¹⁶ Koro pfaḍepfonse pfepfonawa na wivu na t̯amaa ya kudzikuzya, kunawa kutsaimukana na kula aina ya dzambo zuka. ¹⁷ Ela hi mvidhyo iyonayawa kwa Muungu, nguzi d̯ura inamumpa muntu kuishi maisha yasiyo t̯amba zuka ḍiḍeḍyonse. Kisa, inamumpa kutsaka kuishi na wantu na naghea, inamumpa kut̯aria wenziwe na inamumpa mojo wa kusikiiya na kuhwaa vyuuwo vya wangine. Mvidhyo ya Muungu inamumpa muntu kufwia t̯ei wenziwe na kuwahendea mema kut̯wa, na nkawezi kuwa na uḅaguzi wala umbiimbii. ¹⁸ Na hawaḍe wantu watsakiyeo kuishi na wantu na naghea, wanahodza mbeju ya naghea kahi ya wantu, na wechonavuna ni wema wiwonamutsakiza Muungu.

¹ Aya matsowano na nkondo za kut̯wa kahi yenu, vyakuyehegwani ni kintu ga? Ntavikwakuyehegwani ni azi t̯amaa zenu nzuka nzuka zizokujwanani kuzimuni mwenu hat̯a? ² Munat̯amani musivyokuwa navyo, ela ntamuvipate. Ndookomu mwaa t̯ayari hat̯a kuyaga. Munamiiya mahe vya wantu, ela ntamuvipate. Ndookomu munanjia kutsowanani nywinywi na nywinywi na kujwana. Na maana musiyopata hikiḍe mwichonatsaka, ni kwa kwamba ntamudzakimuyomba Muungu. ³ Na hat̯a mwipfonayomba ntamupate mwichokuyombani, maanaye munayomba na nia nzuka. Munayomba ili mukivipata mupate kudzitsekeza myojo yenu. ⁴ Nywinywi mwiwo dza wake waḅari! Ntamudzi kwamba kutsaka lumwengu ni kudziwekea uad̯ui na Muungu? Ndivyo, yuḍejwonse atsakiye kuwa ḅamu jwa huju lumwengu, huyo anawa ad̯ui jwa Muungu. ⁵ Ambu avi vya aya matsoro yaneneyevyo yakyamba, “Huyu Ruhu jwa Muungu amuwekeye kuzimuni mwehu ni mwivu,” mwakut̯arani kwamba ni vyuuwo vya ḅasi? ⁶ Ela Muungu anahufwiya t̯ei zaid̯i na zaid̯i. Ndiyo maana haya matsoro yamba, “Muungu anawafwia t̯ei hawaḍe weo wampowe, ela wavikodzo anat̯aragiana nao.” ⁷ D̯ubva nywinywi dziwekeni nsii ya mamulaka ya Muungu. T̯aragianani na Shaat̯ani, nae anamud̯arama. ⁸ Mudziyeni Muungu hafufi, nae anamudziya hafufi. Ela nywinywi wanabvise na mwiwo wambiimbii, yatsani mahendo yenu mazuka na muyavye mat̯aro mazuka myojoni mwenu! ⁹ Sikit̯ikani na kuiya na tsungu kwa dzambo ḍya mazuka yenu! Kitseko chenu nakiwe chiiyo, na tsekea yenu iwe masikit̯iko. ¹⁰ Muhambaiyeni Ḅwana, nae anamukuzya. ¹¹ Wandugu zangu, yatsani kuneneana mazuka. Koro yuḍejwonse eyenamunenea mazuka muhikiza mwenziwe na kumukizia hukumu, huyo kakuineneani mazuka Sharia ya Muungu na kakuiyavyani matsowa. Wewe ukwakuiyavyani matsowa hi Sharia, nkukwakuiuḅani! Kwakudzihendezani muntu jwa kuiyavya matsowa t̯u. ¹² Muungu jeje heket̯u ndiye eyenaweka Sharia na kuhukumu wantu. Na ndiye jeje t̯u eyenaweza kupfonya wantu ambu kuwananga-nanga. Ehe wewe nawe, hivi hivi u ga hat̯a umukizie hukumu mwenziwo? ¹³ Sikiani, nywinywi mwiwonakwamba, “Yeo ambu keso hunakwenda mudzi musiku na musiku, hunakaa mwaka muzima. Hunadzihendea guzi, hunadzitsumia-tsumia fwedha.” ¹⁴ Mumanya kidzechohendeka keso? Ambu, aya maisha yenu muyamanya yaivyo? Maisha yenu yaa dza muvuke wiwonaonekana iyo saa na iyo saa ukaara. ¹⁵ D̯ubva nywinywi mwivyonamala kunena ni hidzaa, “Ḅwana akitsaka, na akihuweka mojo, hunahenda visiku na visiku.” ¹⁶ Ela nywinywi sivyo, mukaiya kupanga mipango mikuu mikuu na kudziona. Manyani, kudziona dzako ni kuzuka! ¹⁷ D̯ubva, muntu amanyiye hi ya hachi ya kuhenda kisa akatsaihenda, huyo kakuhendani nabvise.

¹ Sikiani, nywinywi wantu majabva! Ḍabvani kuiya chiiyo cha mabaanano koro mwakudzijwani ni d̯ina nkuu muno. ² Malit̯e yenu yonse yamawowa tswee na nkanzu zenu ziḍigwa ni mafunzi. ³ Dhahaḅu na fwedha zenu zihenda nkanga. Na hiyo hiyo nkanga idzakaa dza ushaahiḍi wa nabvise zenu nsiku ya hukumu. Nanywi mudzanangwa-nangwa dza kwamba munangwa-nangwa ni moho. Nywinywi munadziundukizia mali menji na menji, ntamudzi kwamba azi ni nsiku za mwiso? ⁴ Haya, t̯ayowani sasa! Wantu wamuvunia makonde yenu, anywi mukidzamukinuka, muwakulakula ntamukuwaipfa. T̯asikiani hiyo nabvise ikwakumusit̯akini kwa Muungu! Chiiyo cha hao wahenda kazi kimufikia Ḅwana, mwenye nguvu zonse. ⁵ Muishi na raha humu lumwenguni, mukidzitsekeza na kula mwichomukitsaka. Mudzit̯oseza hi myojo yenu, na sasa mwakuindiiyani nsiku ya kudzahukumigwa. ⁶ Muwahukumu na kuwayaga wantu wasio tsowa ḍiḍeḍyonse, wasioweza hat̯a kudzihehea usoni yenu. ⁷ Wandugu zanguni, nywinywi it̯isani huku mukwakuyoweeyani kudza yupfii kwa Ḅwana. T̯ayowani namuna ya wantu weonaima wevyonait̯isa mumpaka wakavuna makonde yao. Wao wanait̯isa mumpaka hi mvuya ya kuivyaza hi mimea ikanya, na wakapata bvaro. ⁸ Nanywi pia, namutseefwa mojo, it̯isani, koro nsiku ya kuuja kwa Ḅwana ntaikwaa kuye. ⁹ Wandugu zangu, namutsekaiya kuwawakiana nywinywi na nywinywi mutsekudzahukumigwa. Manyani, huyu Muhukumu Mukuu kamaawa hafufi kudza! ¹⁰ Yowani mufaano wa hawa manabii weowakikaa na kuyavya maagu ya Muungu eyoakiwapfa. Wao wakuntiswa d̯ina amoo wait̯isa. ¹¹ Hwonse, wantu wait̯isiyeo hunawahwaa kwamba ni wavodhyegwa. Na nywinywi wenye musikia namuna ya Ayubi ait̯isiyevyo mad̯inani na mumanya hayaḍe ya Muungu adzeyoakimuhendea mwisoni. Hakika Muungu ni Muungu mut̯ei na munanso. ¹² Ela zaid̯i ya vyonse wandugu zangu, mukwakunenani namutseyapfa kwa sari ḍya Muungu, kwa kulamba mutsanga ambu kwa njia ingine iḍeyonse. Mukyamba, “Ndivyo,” naiwe ndivyo, na mukyamba, “Sivyo,” naiwe sivyo, ili mutsekudzahukumigwa. ¹³ Ikiwa kwamba kahi yenu kuna yuḍejwonse eye d̯inani, namuyombe Muungu. Na ikiwa kwamba kuna yuḍejwonse eye na tsekea, namushad̯e Muungu na meya. ¹⁴ Yuḍejwonse kahi yenu akiwa mujwazi, nawahane wazee wa tsanganiko, wadzewamuyombeye na kumupfakaza mafuha kwa sari ḍya Ḅwana. ¹⁵ Na hayo mayombo, wakiyayomba wakiwa na serefano kwa Muungu, yanamupfoza huyu mujwazi na anapata matsea. Na hat̯a ikiwa kwamba kahenda nabvise, Ḅwana anamuyatsiya. ¹⁶ D̯ubva, nywinywi namutsefitsa kwambiana nabvise zenu na namutseyatsa kuyombeana ili Muungu apate kumupfoza. Mayombo ya muntu muhachi yana nguvu na yanahenda mambo makuu. ¹⁷ Kwa mufaano, nabii Eliya ewa ni mwanaad̯amu dzaswi, ela kamuyomba Muungu na mojo, kutseenya mvuya nsi yonse ya Isiraeli. Na hakika, ntakukunya mvuya kwa myaka mihahu na nusu. ¹⁸ Kisa kamuyomba Muungu anyese mvuya, nayo ikakanyika kuyawa dzuu, na nsi yonse ishauka mimea. ¹⁹ Wandugu zanguni, mumodza jwenu akyaara njia, akiiyatsa hi njia ya hachi, kisa yungine adzeamuudzye njiani, ²⁰ ḅasi huyu amuudziye njiani namanye kwamba, kula amuudziye njiani munabvise kamupfonya na kufwa. Na anamuhendeza Muungu atsemut̯alia nabvise huyu muntu munabvise.