Waefeso

Waefeso

¹ Mimi Paulo nitsanijwee kwa miro ya Muungu kuwa ntumi jwa Kirist̯o Yesu, nyakumworeani nywinywi wantu wa Muungu mwiwo Efeso musumamiyeo imara kumuuḅa Kirist̯o Yesu. ² Muungu Baba na Ḅwana jwehu Yesu Kirist̯o nawamuvodhye na kumumpa naghea nto. ³ Nahumushad̯eni Muungu eye Baba jwa Ḅwana jwehu Yesu Kirist̯o, ahuvodhyeye na kula kintu cha kiruhu cha kuyawa mbinguni, kwa kwamba hwaa hariani mwa Kirist̯o. ⁴ Jeje kahutsana huwe wantuwe hangu lumwengu ntajudzaumbwa ili ahungize hariani mwa Kirist̯o. Kahutsana huwe wantu wadheru na husiwo t̯amba zuka ḍiḍeḍyonse usoni kwakwe. Na kwa kwamba Muungu kahutsaka, ⁵ kahuna hangu kae na kae kuhuhendeza wanawe kuchiiya na kwa haya ya Yesu Kirist̯o ahendeeyo. Muungu kahenda hivi kwa kwamba iwa ndiyo miroye. ⁶ D̯ubva nahumushad̯eni Muungu kwa dzambo ḍya namuna ahufwiiyevyo t̯ei muno kuchiiya na kwa huyu Mwanawe mutsakwa. ⁷ Muungu kahukombowa na mwazi wa Kirist̯o ehiyeo epfofwa muhini mwa mpatsa na kahuweka huru. Yani kahuyatsia nabvise zehu. Na kwa hi hii njia, Muungu kahuyanga namuna aivyo mut̯ei kwehu ⁸ pfasipfo chima. Na kwa mvidhyoye na umanyiwe, ⁹ kaihupfenwiiya hi ngadziye kuchiiya na kwa Kirist̯o. Kahenda hivi kwa kwamba wiwa ni mupangowe. ¹⁰ Kapanga kwamba ngeraye ikifika, anatsanganya kula kintu kiumbijwecho, chicho mbinguni na lumwenguni kiwe nsii ya mut̯awala mumodza, yani Kirist̯o. ¹¹ Kula dzambo Muungu anaḍihenda dza evyonatsaka. Jeje kahuna kuhutsana hangu kae na kae huwe wantuwe kwa kuhungiza hariani mwa Kirist̯o. ¹² Muungu kahenda hivi ili kwamba, swiswi Wayahud̯i, hwiwokuwa wa d̯ura wa kumuserefat̯a Kirist̯o, huwahendeze na wantu wangine wamushad̯e Muungu kwa dzambo ḍya wemawe. ¹³ Hat̯a nanywi nywinywi wantu wa vyeet̯i vingine, mwipfoyasikia haya Maagu Mema muyahikiza na Muungu kamupfonya. Na kwa kwamba mumuhikiza Kirist̯o, Muungu kamungiza alama kwa kumumpa huyu Ruhu jwakwe eyemuahid̯ia wantuwe. ¹⁴ Muungu kamuhupfa huyu huyu Ruhu dza dhamana ya kudzahupfa hayaḍe mema yonse ahuahid̯iiyeyo. Haya haya mema kadzayahupfa swiswi hwiwo wantuwe ngera adzeyohuweka huru kaḅisa. Na hivi vinawahendeza wantu wamushad̯e Muungu. ¹⁵ Hangu nipfosikia kwamba mumuhikiza Ḅwana jwehu Yesu na nipfosikia kwamba muwatsaka wantu wonse wa Muungu, ¹⁶ mimi sidzayatsa kumuyaviza ḍuḍa Muungu kwa dzambo ḍyenu. Nakaa nikimuyombea kwa Muungu kut̯wa. ¹⁷ Nyakumuyombeani kwa Baba jwehu mwenye marembo, eye Muungu jwa Ḅwana jwehu Yesu Kirist̯o. Nyakumuyombeani kwamba Muungu amumpe huyu Ruhu jwa kumumpa mvidhyo na uimufu wa kumumanya jeje zaid̯i na zaid̯i. ¹⁸ Pia nyakumuyombeani kwamba amupfenuye akili zenu, mupate kuyaimuka haya madzikwat̯yo amumpiyeyo epfomuhana muwe wantuwe. Na nyakumuyombeani muweze kumanya haya mema menji na menji aahid̯iyeyo kuyawapfa wantuwe. ¹⁹ Na pia nyakumuyombeani muzione hizi nguvuze, zichiiyezo nguvu zonse, za kuhugijiija swiswi humuhikiziyeo. Hizi ndizo ziziḍe nguvu ²⁰ za Muungu amufufwiiyezo nazo Kirist̯o kuyawa kwa wafu. Na kwa zizo nguvu, Muungu kamuweka Kirist̯o mukono wakwe wa kuyume mbinguni. ²¹ Kirist̯o ana mamulaka na nguvu dzuu ya mahaju ya mpepfo nzuka na dzuu ya sirikali na nguvu zonse za kiruhu. Sariḍye ni kuu kuchia masari yangine yonse, hangu huju huju lumwengu hat̯a lumwengu judzejokudza. ²² Na Muungu kamumpa Kirist̯o mamulaka ya kut̯awala kula kintu. Kamuhendeza awe kitswa cha hiḍi tsanganiko, ²³ ḍiḍyo dza hu mwiiwe. Kirist̯o ndiye eyenakipfa ukamilifu kula kintu chicho kula pfantu. Na jeje mwenye kakamilika kwa kuungana na hu mwiiwe, yani hiḍi tsanganiko.

¹ Nywinywi, d̯ura mwiiwa dza wantu mufwiyeo kwa dzambo ḍya kutsamut̯ii Muungu kwenu na kwa dzambo ḍya mahendo yenu yangine ya nabvise mwiyomukihenda. ² Mwikiuḅa mazuka ya wantu wa huju lumwengu na kumut̯ii mut̯awala jwa hizi mpepfo nzuka zizonaishi humu angani. Hii ndiyo ruhu ya mazuka iyokuwat̯awalini hawaḍe wonse wasiotsaka kumut̯ii Muungu. ³ Naswi swiswi, hwonse d̯ura hwiiwa dzao. Hwikidzitsekeza myojo yehu na kula zuka, hukiuḅa t̯amaa zehu nzuka nzuka na mat̯aro yehu ya kiwanaad̯amu. Swiswi, dza wanaad̯amu wangine wonse, hwiiwa wantu wa kwamba Muungu andehuadhiḅu kwa dzambo ḍya kumurejesa na nabvise zehu. ⁴ Ela hat̯a vivyo, kwa dzambo ḍya matsakoye makuu kwehu, Muungu kahufwiya t̯ei muno. ⁵ Ingawa hwiwa dza wantu hufwiyeo kwa dzambo ḍya mazuka hwiyohukihenda, Muungu kahufufuya dza viviḍe amufufwiiyevyo Kirist̯o na kahupfa maisha mapfya pfamodza nae. Mupfonywa kwa t̯ei ya Muungu t̯u. ⁶ Jeje kahufufuya dza hiviḍe vya Kirist̯o na kahupfa kukaa pfamodza nae mbinguni kwa kwamba hwaa hariani mwa Kirist̯o. ⁷ Muungu kahenda hivi ili kwamba, ngera zonse zidzezokudza, wantu waone namuna aivyo mut̯ei kuchia chima kuchiiya na kwa Kirist̯o Yesu. ⁸ Mupfonywa kwa t̯ei ya Muungu t̯u kwa kwamba mumuhikiza Kirist̯o. Ela ntamukupfonywa kwa dzambo ḍya mema yaḍeyonse muhendeyeyo. Hu mupfonyo mupatiyeo ni t̯ola ya Muungu amumpiyeyo. Ndookomu nakutseewa jwa kudziona. ¹⁰ Muungu ndiye ahuhendezeye kuwa kintu kimodza na Kirist̯o Yesu, ili hupate kukaa na kuhenda haya mema ahutsaniiyeyo kwamba huyahende. ¹¹ Nywinywi musiokuwa Wayahud̯i hangu kuvyajwani kwenu, kumbukani mwivyokuwa hapfaḍe d̯ura. Hawa Wayahud̯i, weonadzihana wantu wa Muungu kwa kwamba wahinywa, nywinywi wekimuhana wantu musiwodzahinywa. Ela muntu akihinywa, anaperuka na hapfa dzuu t̯u, maanaye hiḍyo ni hendo ḍya kiwanaad̯amu. ¹² Kumbukani kwamba mwiiwa ntamumudzi Kirist̯o kwamba ni ga. Na ntamwiiwa wantu wa kyeet̯i cha Muungu atsaniyecho, mwiiwa dza wageni. Ntamwiiwapfo kwa haya maḍamano ya Muungu ahendeyeyo na wantuwe akiwapfa ahad̯i ya kuwapfonya. Muishi humu lumwenguni pfasipfo madzikwat̯yo yaḍeyonse, na wala ntamwimumanya Muungu. ¹³ D̯ura mwiiwa wantu mwiwokuwa kuye na Muungu. Ela sasa mwaa hariani mwa Kirist̯o Yesu. Muungu kamunuha hafufi nae kuchiiya na kwa hu mwazi wa Kirist̯o ehiyeo muhini mwa mpatsa kwa dzambo ḍyenu. ¹⁴ Kirist̯o mwenye kangiza naghea kahi yehu swiswi Wayahud̯i na wantu wasikwaa Wayahud̯i. D̯ura hu uad̯ui wiwokuwapfo kahi yehu, wiwa ukaa dza kiwambaa kihugawiyecho. Ela sasa, hichi hichi kiwambaa Kirist̯o kachivunza, na kahuhendeza huwe wantu wamodza. ¹⁵ Kwa kufwakwe, Kirist̯o kainuya hi Sharia ya Kiyahud̯i yonse. Kahenda hivi ili kwamba awahendeze hawa wantu wowii, yani Wayahud̯i na wantu wasiokuwa Wayahud̯i, wawe wantu wamodza waungananiyeo nae. Na kwa kuhenda hivi, kangiza naghea kahi yao wao na wao. ¹⁶ Kwa kufwakwe muhini mwa mpatsa, Kirist̯o kanuya uad̯ui kahi yao na kangiza mapatano yao wao na Muungu. ¹⁷ Kirist̯o kadza lumwenguni, na kasumwiiya Maagu Mema ya naghea kwenu nywinywi mwiwokuwa kuye na Muungu na kwehu swiswi Wayahud̯i hwiwokuwa hafufi na Muungu. ¹⁸ Na kwa dzambo ḍya hivi vya Kirist̯o ahendeyevyo, hwonse hupata njia ya kumwendea Muungu Baba jwehu, hukigijiijwa ni yuyo Ruhu mumodza. ¹⁹ D̯ubva, nywinywi musiokuwa Wayahud̯i, sasa ntamukwaa wageni ambu wantu wa nze kawii. Mugala wantu wa nyumba modza ya wantu wonse wa Muungu. ²⁰ Nywinywi mwaa dza mawe yambakijweyo dzuu ya hu musinji uwekejweo ni hawa ntumi na manabii. Na Yesu Kirist̯o mwenye ndiye hiḍi iwe muhimu ḍya mwiso. ²¹ Na kwa dzambo ḍyakwe, hiḍi mbako ḍyonse ḍigijana gu. Kakuḍihendezani ḍikuye na ḍiwe Hekalu nd̯eru ya Ḅwana. ²² Ndookomu kuchiiya na kwa Kirist̯o, nywinywi musiokuwa Wayahud̯i nanywi mwakuunganywani na hawa wantu wonse wa Muungu, muwe Hekalu ya Muungu ya kukaa kuchiiya na kwa huyu Ruhu jwakwe.

¹ Mimi Paulo nifungwa gerenzani kwa dzambo ḍya kuhenda kazi ya Kirist̯o Yesu animpiyeyo, ya kumusumwiiya nywinywi musiokuwa Wayahud̯i. ² Nina hakika musikia kwamba, Muungu kaunimpa hu huu muzigo wa kumusumwiiya nywinywi dzuu ya hi t̯eiye. ³ Muungu kainipfenwiiya hi ngadziye iyofitsika kwa wantu. Nami nisakumworea kwa uchuchu dzuu ya hi hii ngadzi. ⁴ Na mukisoma hivi nyoreyevyo, munaona kwamba niimuka hi ngadzi ya Muungu, ambayo kwamba ni dzuu ya Kirist̯o. ⁵ Hangu kae na kae hi hii ngadzi ntaikumanyigwa ni muntu. Ela sasa, Ruhu Mudheru kaiwapfenwiiya hawaḍe wantu watsanijweo byeka ni Muungu kuwa ntumi na manabii wakwe. ⁶ Hi ngadzi ni hi ya kwamba, kuchiiya na kwa kuyahikiza haya Maagu Mema, wantu wa vyeet̯i nao pia wanazipfokea hizi mvoni za Muungu ezonawaḍalisa wanawe. Kuchiiya na kwa Kirist̯o Yesu, wonse wagala dza viiriiri vya mwii mumodza, na wanazipfokea hizi mvoni za Muungu aahid̯iyezo. ⁷ Muungu kanihendeza muhumisijwe jwa kusumwiiya haya haya Maagu Mema. Kainimpa hi hii kazi kwa dzambo ḍya t̯eiye na kwa uwezowe mukuu eo nao. ⁸ Na hali kahi ya wantu wonse wa Muungu, mimi ndimi nisiyekuwa na maana jwa mwiso. Ela hat̯a vivyo, Muungu kanimpa kazi ya maana ya kuwasumwiiya wantu wa vyeet̯i dzuu ya mema makuu na makuu ya Kirist̯o yasiyo chima. ⁹ Nipfegwa kuwaimusya wantu wonse dzuu ya hi hii ngadzi ya Muungu aumbiye kula kintu. Hi ni ngadzi eyoiwafitsa wantu hangu myaka na myaka ichiiyeyo. ¹⁰ Muungu kahenda hivi ili kwamba, kuchiiya na kwa hiḍi tsanganiko aweze kuziyanga nguvu zonse za kiruhu ziizo dzuu kwamba, kula echonahenda kinayanga namuna aivyo na mvidhyo. ¹¹ Muungu kahuna kuhenda hivi hangu kae na kae kaḅila lumwengu ntajudzaumbwa. Ne saasambi kesakuvit̯imiza kuchiiya na kwa Kirist̯o Yesu Ḅwana jwehu. ¹² Kwa dzambo ḍya Kirist̯o na hivi humuhikiziyevyo, hunamwendea Muungu pfasipfo oga, hukiwa na uhakika kwamba anahusikia. ¹³ D̯ubva, nyakumuyombani mutseefwa mojo mudzepfosikia dzuu ya hizi d̯ina nizokukuntiswani kwa dzambo ḍyenu. Ishinu dzivuniyeni hizi d̯ina nizokukuntiswani kwa faiḍa yenu. ¹⁴ Nipfonamamat̯a haya haya yonse ya Muungu ahendeyeyo hat̯a nikyenda nikisa, navunza nkuhi nikamuyomba Muungu Baba jwehu. ¹⁵ Koro jeje ndiye aumbiye kula kiumbe chicho mbinguni na lumwenguni. ¹⁶ Nyakumuyombeani kwamba, kuyawana na winji wa memaye yasiyo chima, amumpe nguvu za kut̯osa za kumukumiiza hi myojo yenu kuchiiya na kwa Ruhu jwakwe. ¹⁷ Na nyakumuyombeani kwamba Kirist̯o aweze kuishi myojoni mwenu maishi kwa dzambo ḍya kumuserefat̯a kwenu. Nyakumuyombeani kwamba muweze kukumiiya na matsako na mutseweza kugwa. ¹⁸ Muungu namumpe nywinywi na wantu wangine wonse wa Muungu, uwezo wa kuimuka namuna ya Kirist̯o ahutsakiyevyo. Koro jeje kahutsaka tsako ḍisiḍyo chima wala ḍisiḍyopimika. ¹⁹ Nyakumuyombeani kwamba muweze kuḍiimuka hiḍi hiḍi tsako ḍya Kirist̯o ḍichiiyeḍyo kuimuka kwa wanaad̯amu, ili kwa kula namuna muweze kuwa na hu ukamilifu wa Muungu eo nao. ²⁰ D̯ubva Muungu nashad̯we! Koro ana uwezo wa kuhenda makuu kuchiya hayaḍe hwiyonamuyomba ambu hwiyonamamat̯a. Na haya anayahenda kwa nguvuze nkuu zizokuhendani kazi kuzimuni mwehu. ²¹ Jeje nashad̯we maishi na maishi kwa dzambo ḍya mafaraye eyokuhendani kuchiiya na kwa tsanganikoḍye na kuchiiya na kwa Kirist̯o Yesu. Amina.

¹ D̯ubva mimi niye mufungwa kwa dzambo ḍya kumuhumikia Ḅwana, nyakumuyombani muishi maisha ya kuyanga kwamba mu wantu wa Muungu ahaniyeo ḍugha! ² Nywinywi meshi wani wantu wa kutsadziona na muwe wampowe kwa wangine. Wani wantu wa kuit̯isa, na yanganani matsako kwa kutsadhimwana. ³ Huyu Ruhu kamuunganya mugala dza kintu kimodza. D̯ubva ḍemani muno kuishiana na naghea mupate kukaa dza kintu kimodza. ⁴ Hwonse pfamodza hu mwii mumodza na hupfokea yuyo Ruhu mumodza. Huna madzikwat̯yo mamodza ya kudzapfokea hayaḍe yonse ya Muungu ahuahid̯iiyeyo epfohuhana kuwa wantuwe. ⁵ Hwonse Ḅwana jwehu ni mumodza, faro yehu ni modza na hut̯opyegwa mat̯opyo mamodza. ⁶ Muungu jwehu na Baba jwehu hwonse ni mumodza. Anawat̯awala wantuwe wonse na kuhenda kazize kuchiiya na kwao wonse, na anaishi kuzimuni mwao wonse. ⁷ Kula mumodza jwehu kapfegwa t̯ola ya kivyakwe kuuḅana na hiviḍe vya Kirist̯o atsakiyevyo kumumpa. ⁸ Ndiyo maana haya matsoro yamba, “Epfopfaa dzuu, ewa kahwaa maheka ya wantu wenji na wenji na kagawia wantu nt̯unu garagara.” ⁹ Aya matsoro yakyamba, “Kapfaa dzuu,” yana maana ga? Yana maana ya kwamba, Kirist̯o ewa kasuka huku nsi lumwenguni. ¹⁰ Na huyu muntu asukiye akidza lumwenguni, ndiye yuyo apfaiye akyenda akikaa pfantu pfa hila nkuu ya mwiso mbinguni dzuu, ili kwamba akamilishe na kut̯awala kula kintu. ¹¹ Ndiye apfiye wantu mat̯ola ya kuwa ntumi, wangine wawe manabii na wangine wawe wainjilisti. Wangine kawapfa mat̯ola ya kuwa wat̯ikisa na waalimu. ¹² Kazi yao ni kuwaelekanya wantu wa Muungu kumuhumikia Muungu ili hu mwii wa Kirist̯o, yani hiḍi tsanganiko, ḍipate kumbakika. ¹³ Wanahenda hivi mumpaka hwonse huwe kintu kimodza, kwa dzambo ḍya hivi humumanyiyevyo na humuserefat̯iyevyo huyu Mwana jwa Muungu. Ndookomu hwonse hunawa wantu hungoreyeo faroni, na hunawa na ukamilifu dza huḍe wa Kirist̯o eo nao. ¹⁴ Ntahuwezi kuwa dza wana vichuchu kawii wa kukulwakulwa kirahisi ni wantu weonadziona makaro wakayongweeza mayongweezo ya kwaarya wantu. Ntahuwezi kuwa dza chombo cha kubigwa ni mpepfo na mawimbi chikapfiikwa huku na huku. ¹⁵ Ishinu hunagija kuiuḅa hi hachi huku hukiwa na mojo wa kutsakana. Ndookomu kwa kula njia, hunakuya hunawa dza Kirist̯o, eye kitswa cha hiḍi tsanganiko. ¹⁶ Wonse wamuhikiziyeo kawaunganya pfamodza dza hiviḍe vya mwii wa muntu wivyonagijaniswa ni haya makano ya mwii. Na kula kiiriiri kikihenda kaziye dza chivyonamala, mwii wonse unambakika na matsako na unawa na nguvu. ¹⁷ Mimi nyakumukanyani muno dza muhumisi jwa Ḅwana, mutsekaiya kuishi dza hivi vya hawa walumwengu wevyonaishi. Wao mat̯aro yao ni mafu. ¹⁸ Ntawadzi kintu na ntawa wechonaimuka kwa dzambo ḍya myojo yao myumu ya kutsaatsaka kuuḅa njia za Muungu. Ndookomu ntawa haya maisha mapfya ya Muungu eyonapfa wantuwe. ¹⁹ Wao ntawa yutswa kawii wakwakuhendani mazuka. Muḍa wao wonse unasiiya kuhendani haya mazuka weyonat̯amani kuhenda. Wakigija kuhenda uḅari ntawasikiye. ²⁰ Ela nywinywi mwipfomumanya Kirist̯o, hayo hayo siyo muyongweezejweyo kuhenda. ²¹ Nina hakika kwamba musumwiijwa dzuu ya Yesu, na mwipfomuserefat̯a muyongweezwa hi ya hachi dzuuye. ²² Ndookomu haya maisha mazuka mwiyomukiishi d̯ura yayatseni. Ndiyo mala yamuwozya! Mwiiwa mwaara kwa dzambo ḍya kuuḅa t̯amaa zenu nzuka nzuka. ²³ Ela sasa muyatseni Muungu aiperuye hi myojo yenu na mat̯aro yenu. ²⁴ Ishini haya maisha mapfya mupfegejweyo kwa miro ya Muungu. Haya ni maisha ya kuhenda yeyo ya hachi na kuyanga udheru wa ḍugha kwa dzambo ḍya kuimanya hi hachi. ²⁵ D̯ubva, mambo ya kwambiana nsuwe yayatseni. Kula muntu namwambiye mwenziwe hi ya hachi, koro hwonse hu viiriiri vya mwii mumodza. ²⁶ Siyatse ngoro ikut̯awale uhende nabvise. Na ngoroyo naitsetswesa dzuwa. ²⁷ Nkudzomumpe Shaat̯ani namfasi ya kukuḍema akugise nabviseni. ²⁸ Ikiwa kwamba wiwa u mwivi, sasa yatsa wivi. Yavya hwekaḍyo kudzilachia kantu na upate cha kuwapfa na hawaḍe weo na t̯uri. ²⁹ Namutseewa wantu wa vyuuwo vizuka vizuka. Ishinu mwipfonat̯amuka kunena, nenani vyuuwo vya kuwambaka hawaḍe weonamusikiiya ili vipate kuwafaiḍi. ³⁰ Namutsemusikit̯isa huyu Ruhu jwa Muungu. Koro huyu Ruhu ndiyo alama ya Muungu amungiziyeyo kuyanga kwamba mu wantuwe. Anakaa kuzimuni mwenu hat̯a nsiku ya Muungu adzeyomuweka huru kaḅisa kuyawana na mazuka. ³¹ Yatsani kuwekeana ngooko, yatsani mambo ya ngoro, yatsani mambo ya kuheha na vitsolo. Na wala namutseewa na kevo kwa yuḍejwonse. ³² Ishinu wani wantu wa kuhendea wenzenu mema na muwe wat̯ei kwa wangine. Wani wantu wa kuyatsiana dza vya Muungu amuyatsiiyevyo kuchiiya na kwa Kirist̯o.

¹ Kwa kwamba nywinywi mu wana wa Muungu atsakiyeo, mut̯aḅeni jeje kwa haya maisha yenu. ² Ishini maisha ya kuwa na matsako kwa wangine dza vya Kirist̯o ahutsakiyevyo hat̯a akidziyavya maishaye dza mvuugiya kwa dzambo ḍyehu. Hii ni mvuugiya imutsakizieyo Muungu. ³ Kahi yenu nakutseewa uḅari ambu mahendo machafu machafu yangine yaḍeyonse na wala nakutseewa uhamile. Mambo dza haya ni kutsawapfo kaḅisa kahi ya wantu wa Muungu. ⁴ Na wala ni kutsaawa na vyuuwo vichafu vichafu ambu visivyo maana na maḍasa mazuka mazuka. Ishinu ni muwe wantu wa kumuyaviza ḍuḍa Muungu kwa haya eyokumuhendeani. ⁵ Ni mumanye hakika kwamba, muntu muḅari ambu eye na mahendo machafu machafu ambu muntu muhamile, huyo nkawezi kuwa na uḍalo Uhajuni mwa Muungu na Kirist̯o. Koro muntu muhamile ni sawa na muntu eyenayomba masanamu. ⁶ D̯ubva muntu natsemuḍyuurisa na nsuwe, koro Muungu kadzawahukumu hawaḍe wonse wasiomut̯ii wakakaiya kuhenda mambo mazuka mazuka dzayahaya. ⁷ Wantu dzao namutsegijana nao. ⁸ Koro d̯ura mwiiwa mwa kizani, ela sasa hangu mukimaawa wantu wa Ḅwana, munjia muyangani. D̯ubva ishini dza wantu mwiwo muyangani. ⁹ Maanaye muntu eyekuishini muyangani anawa muntu mwema, anahenda mambo yeyonamutsakiza Muungu na anawa muntu muhachi. ¹⁰ Ḍemani kulacha hikiḍe chichonamutsakiza Ḅwana na mukihende. ¹¹ Namutsegijana na wantu weo kizani muhende haya weyonahenda yasiyokuwa na maana. Ishinu viwambieni tswee kwamba hivi wevyokuhendani ni matsowa! ¹² Koro haya weyonahenda sirini, hat̯a kuyahadza vyaa yutswa. ¹³ Ela mambo dzayo yakiyavigwa wekeani, wantu wanayaona na wanamanya kwamba ni mambo yeyodze, ¹⁴ koro muyanga meshi ukikiyangaiya kintu kinamanyikana hiviḍe kiivyo haswa. Ndiyo maana vyambigwa: “Yamuka wewe wiyekuyaani! Sikae dza mufu, fufuka! Na Kirist̯o anakuyangaiya dza dzuwa.” ¹⁵ D̯ubva dzit̯unzeni mwenendo wenu! Namutseishi dza wantu maḍyura, ela ishini dza wantu mwiwo na mvidhyo. ¹⁶ Kula mwipfonapata namfasi ya kuhendea wantu dzema, ḍihendeni, koro hizi ni nsiku za wantu wezokuhendani mazuka menji. ¹⁷ Namutseewa maḍyura, lachani hikiḍe chichonamutsakiza Ḅwana mukihende. ¹⁸ Namutsekaiya kuruma, koro ulevi unananga maisha yenu. Ishinu muyatseni huyu Ruhu amudzaze na nguvuze. ¹⁹ Ngizanani mojo na meya ya zaburi na meya yangine ya kumushad̯a Muungu. Mushad̯eni Ḅwana na meya ya kuyawa myojoni mwenu. ²⁰ Muyavizeni ḍuḍa Muungu Baba jwehu kut̯wa kwa kula ḍiḍyokuhendekani, kwa kwamba mu wantu wa Ḅwana jwehu Yesu Kirist̯o. ²¹ Kula mumodza namut̯ii mwenziwe kwa dzambo ḍya kumuhila Kirist̯o. ²² Nywinywi wake, kula mumodza ni kumut̯ii muumewe dza hiviḍe mwivyonamut̯ii Ḅwana. ²³ Koro muyume ni kitswa cha muke, dza hiviḍe vya Kirist̯o aivyo kitswa cha hiḍi tsanganiko ḍiḍyo dza hu mwiiwe. Na jeje ndiye mupfonya jwa hiḍi tsanganiko. ²⁴ D̯ubva nywinywi wake ni muwat̯ii wayume wenu kwa kula kintu, dza hiviḍe vya hiḍi tsanganiko ḍivyonamut̯ii Kirist̯o. ²⁵ Nywinywi wayume nanywi, watsakeni wakazenu dza vya Kirist̯o aḍitsakiyevyo hiḍi tsanganiko hat̯a akiḍifwiya. ²⁶ Kaḍifwiya ili apate kuḍihendeza ḍiwe dheru kwa kuḍit̯opya na madzi na kuchiiya na kwa chuuwoche. ²⁷ Kahenda hivi apate kuḍipfa rembo ḍya kusumamia usoni kwakwe ḍikiwa ntaḍi uchafu wala t̯amba ambu zuka ḍingine ḍiḍeḍyonse. Ekitsaka hiḍi tsanganiko ḍiwe dheru na ḍitseewa na t̯amba zuka ḍiḍeḍyonse. ²⁸ Dza vya Kirist̯o aḍitsakiyevyo hiḍi tsanganiko, kula muyume nae anamala kumutsaka mukaziwe dza adzitsakiyevyo mwenye. Koro muntu akimutsaka mukaziwe kadzitsaka jeje mwenye. ²⁹ Ntaku aukeveye mwiiwe mwenye. Ishinu muntu anaumuud̯amiya mwiiwe na chakuḍya na kuut̯unza na kula njia dza vya Kirist̯o evyonaḍit̯unza hiḍi tsanganiko. ³⁰ Koro swiswi hu viiriiri vya mwii wa Kirist̯o. ³¹ Na haya matsoro yamba, “Ndiyo maana muntu anamuyatsa ise na nina, anaungana na mukaziwe, nao wowii wanawa mwii mumodza.” ³² Hapfa kuna siri nkuu iyokuneneani namuna ya Kirist̯o na hiḍi tsanganiko waivyo kintu kimodza. ³³ Hat̯a vivyo, haya yanamuhusu nanywi pia. D̯ubva kula muyume ni had̯i amutsake mukaziwe dza adzitsakiyevyo mwenye, na kula muke ni had̯i amuhile muumewe.

¹ Nywinywi wana, wat̯iini wavyazi wenu dza vya Ḅwana evyonatsaka, koro ndivyo mwivyonamala kuhenda. ² Vyoregwa kwamba, “Muhile babajo na mamajo ili uwe na naghea na upate kuishi maisha mayeya hapfa lumwenguni.” Hi ndiyo amuri ya d̯ura iyo na ahad̯i kahi ya amuri zonse. ⁴ Nanywi wababa, namutsekaa na kuwahendea wana wenu mambo ya kuwarejesa. Ishinu wayeyeni na njia ya kuwayongweeza aḍaḅu na kuwafunda wauḅe haya mayongweezo ya Ḅwana. ⁵ Nanywi mwiwo wahumwa, wat̯iini maḅwana zenu wa humu lumwenguni. Wat̯iini na kuwahila na mojo mumodza kwa kula kintu dza mwivyonamut̯ii Kirist̯o. ⁶ Namutsehenda hivi wakiwa kumuonani ḅasi ili wapate kumushad̯a, ela hendani hivi kwa kwamba mu wahumwa wa Kirist̯o mwiwokuhendani miro ya Muungu na nguvu zenu zonse. ⁷ Humikani na mojo wonse, dza kwamba ntamukwaa kumuhumikiani mwanaad̯amu ela mwakumuhumikiani Ḅwana. ⁸ Ukiwa muhumwa ambu hat̯a, kumbuka kwamba Ḅwana anamumpa t̯ubvo kula muntu kuuḅana na hayaḍe mema ahendeyeyo. ⁹ Dza vivyo, nywinywi mwiwo na wahumwa wahwaeni wahumwa wenu na njia nyema. Namutsewakakat̯ia kwamba munawakuntisa d̯ina. Ni mukumbuke kwamba nywinywi nao Ḅwana jwenu ni mumodza, nae ni huyuḍe eye mbinguni. Jeje wantu wonse anawahwaa vimodza. ¹⁰ Chuuwo changu cha mwiso ni kwamba, Ḅwana namumpe nguvu kuyawana na uwezowe mukuu. ¹¹ Vwaani silaha zonse mupfegejwezo ni Muungu ili mupate kuid̯angara mipango mizuka ya Shaat̯ani. ¹² Koro viha vyehu hwivyokujwanani ntahukwakujwanani na mwazi na nyama dzaswi! Ela hwakujwanani na mahaju ya mpepfo nzuka na sirikali zao. Hwakujwanani na nguvu za kiza zizokujut̯awalani huju lumwengu na nguvu za mpepfo nzuka ziizo humu angani dzuu. ¹³ D̯ubva vwaani silaha zonse za Muungu amumpiyezo, ili kwamba mazuka yakimufika mutseuja na nyuma. Na mukijwana hat̯a mwiso munasumama imara dza viviḍe. ¹⁴ Ndookomu dzifungeni mukae t̯ayari. Hi hachi naiwe dza mulao wa kudzifunga chunoni. Maisha yenu ya kuhenda yeyo ya hachi nayamuchinge dza hiviḍe vya nguo ya chuma ivyonamuchinga asikari humu ḅagwini. ¹⁵ Na haya Maagu Mema yeyonamumpa naghea, nayawe dza viyahu vyenu vya kuvwaa vimumpe kut̯araga gu! ¹⁶ Zaid̯i ya hayo, faro yenu naiwe dza ngao ya kugija mukononi ipate kumuchinga na vyembe vya moho vya Muzuka Shaat̯ani evyonamupfanukia. ¹⁷ Upfokeyeni mupfonyo wa Muungu amumpiyeo, uwe dza nkofia ya chuma ya kumuchinga kitswa. Na gijani hichi chuuwo cha Muungu kiwe dza yupfanga mwijonapfegwa ni Ruhu Mudheru. ¹⁸ Yombani kut̯wa dza vya Ruhu Mudheru evyonamuwezesa, mukimuyomba Muungu kwa haḍya zenu zonse. Wani matso na mugije kuyomba kut̯wa! Na mukwakuyombani wayombeyeni na wantu wonse wa Muungu. ¹⁹ Niyombeani nami, ili kwamba kula nipfonapata kut̯amuka kunena, Muungu animpe hivi vyuuwo vya kunena, nipate kuwasumwiiya wantu pfasipfo oga dzuu ya hi ngadzi ya haya Maagu Mema. ²⁰ Mimi ni ḅalozi jwa Kirist̯o Yesu jwa kusumwiiya haya haya maagu. Ela nifungwa gerenzani kwa dzambo ḍya kuyasumwiiya. D̯ubva niyombeani, niweze kusumwiiya pfasipfo oga uḍewonse dza ivyonanimala. ²¹ Nyakumuhumani Tukiko kwenu amuyeheye maagu dzuu ya hali yangu na haya niyokuhendani huku. Jeje ni muhumisi muhikizika jwa Ḅwana na ni ndugu humutsakiyee muno. D̯ubva nyakumuhumani kwenu adzeamumpe maagu, mumanye hali huiyo na apate kumungiza mojo. ²³ Muungu Baba jwehu na Ḅwana jwehu Yesu Kirist̯o nawamumpe naghea nywinywi wandugu, na wamumpe kutsakana nywinywi na nywinywi na kugija kuwa na faro. ²⁴ Muungu nawavodhye hawaḍe wonse wamutsakiyeo Ḅwana jwehu Yesu Kirist̯o na tsako ḍisiḍyosia.