2 Timoteo

¹ Mimi Paulo, nitsanijwee ntumi jwa Kirist̯o Yesu kwa miro ya Muungu, nisumwiiye dzuu ya hi ahad̯i ya maisha hwiyonayo, hukiishi hariani mwa Kirist̯o Yesu, ² nyakukworeani wewe Timoteo, mwanangu nitsakiye. Muungu Baba na Kirist̯o Yesu, eye Ḅwana jwehu, nakuvodhye nto, akufwiye t̯ei na kukupfa maisha ya naghea. ³ Nyakumuyavizani ḍuḍa Muungu, niyekumuhumikiani na mojo mumodza, dza viviḍe vya wabibi zangu wevyowakihenda. Kula nikwaakuyombani, namuyaviza ḍuḍa siku na musikahi kwa dzamboḍyo. ⁴ Nyakukumbukani mitsozi iyokubiga ḅagwi, hwipfohukiḍamana, nami nyakut̯amanini kukuona muno, nipate kudzajwa ni tsekea. ⁵ Nyakukumbukani hi faro karit̯u wiyonayo, faro dze ya yaayejo Luise na mamajo Yunaisi weyokuwa nayo. Nina hakika ya kwamba hi hii faro unayo. ⁶ Ndiyo maana niyokukumbusyani, uitumie vya kut̯osa hi t̯ola ya Muungu akupfiyeyo, nipfokupfaza mikono. ⁷ Koro Muungu nkakuhupfa Ruhu jwa woga hat̯a. Jeje kahupfa Ruhu jwa kuhungiza nguvu na eyenahupfa matsako na kuhupfa kudzimiza hutsehenda mazuka. ⁸ D̯ubva, sione yutswa kushuhuḍia kwa dzambo ḍya Ḅwana, na wala nkudzonioneye yutswa mimi kwamba nifungwa kwa dzambo ḍyakwe. Ishinu, dzifunge kukunta d̯ina dze vyangu, kwa dzambo ḍya haya Maagu Mema, na Muungu anakupfa hizi nguvu za kuit̯isia. ⁹ Jeje kahupfonya na kahuhana huwe wantuwe mwenye. Ela si kwa dzambo ḍya mahendo yehu, kenge ni kwa kusuḍi ḍyakwe mwenye na kwa dzambo ḍya t̯eiye. Kahufwiya t̯ei kwa njia ya Kirist̯o Yesu, hat̯a kaḅila lumwengu ntajudzaumbwa. ¹⁰ Ela sasa, hi t̯eiye huiona kwa kudza kwa Kirist̯o Yesu, mupfonya jwehu. Na kuyawana na haya Maagu Mema, humanya ya kwamba Kirist̯o kazishinda nguvu za kifo na kahuwezesa kuwa na maisha yasiyosia. ¹¹ Muungu kanitsana mimi dza ntumi, nisumwiiye na kuyayongweeza haya Maagu Mema. ¹² Ndiyo maana niyokukuntani d̯ina dzevihivi. Ela sidzafwa mojo, koro huyu nimuhikiziye nimumanya ya kwamba ni ga. Nina uhakika wa kwamba, ana uwezo wa kuyamia haya animpiyeyo, mumpaka nsiku ya mwiso. ¹³ Vigije na nguvu hivi vyuuwo vya hachi nikuyongweezeyevyo. Hivi vyuuwo navikae dza mufaano wako wa kuuḅa na ugije kumuhikiza Kirist̯o na kuwatsaka wangine, koro hwaa hariani mwa Kirist̯o Yesu. ¹⁴ It̯unze hi nkandi ya maana ya haya Maagu Mema uipfegejweyo ni Muungu. It̯unze kwa nguvu za Ruhu Mudheru, huyu eyenaishi kuzimuni mwehu. ¹⁵ Dza umanyiyevyo, wantu wonse wa ḍyimbo ḍya Asia wanifat̯ula. Na wangine wao ni aḍe Figelo na Hamogene. ¹⁶ Ela Ḅwana naifwiye t̯ei nyumba ya Onesiforo, kwa dzambo ḍya kuningiza mojo kwakwe myeedha minji. Wala kuwa gerenzani kwangu, ntakukumugiza jeje yutswa. ¹⁷ Ishinu epfokudza Rumi t̯u, kanjia kunilachani hat̯a adzepfoakiniona. ¹⁸ Nawe kumanya urembo muno namuna animpiyevyo ugijo hukuḍe Efeso. Nyakumuyombani Ḅwana amufwiye t̯ei hiyo hiyo nsiku ya hukumu!

¹ D̯ubva wewe mwanangu, haya matsako ya Muungu hwiyonayo hariani mwa Kirist̯o Yesu, nayakungize nguvu. ² Hayaḍe mayongweezo nikupfiyeyo usoni ya mashaahiḍi wenji na wenji, yahwae uyawayongweeze wantu weonahikizika, wadzeoweza kuwayongweeza na wantu wangine. ³ Dzifunge kukunta d̯ina dzaswi, dza asikari mut̯iifu jwa Kirist̯o Yesu. ⁴ Ntaku asikari eyenawa kazini, akayatsa kudzitsakiza kwa mukuuwe, akanjia kudzingizani-ngizani kwa maisha ya wantu wa kawaiḍa. ⁵ Na muntu anjiiye mashindano ya mbio, nkawezi kushinda apfegwe t̯ubvo, ikiwa kwamba nkakuuḅa hizi sharia za mbio. ⁶ Dza vivyo, muntu jabva jwa kuima ndiye eyenamala kupata haya mavuno ya d̯ura. ⁷ Yat̯arie haya mambo nikwambiiyeyo, na Ḅwana anakuwezesa kuimuka kula kintu. ⁸ Kumbuka kwamba Yesu Kirist̯o, kayawa sindo wa haju D̯aud̯i na kafufujwa kuyawa kwa wafu. Na haya ndiyo haya Maagu Mema niyonasumwiiya. ⁹ Na kwa dzambo ḍya haya haya Maagu Mema niyonasumwiiya, nyakukuntiswani d̯ina, na ninjia hat̯a kufungwani minyoro dza kwamba niwa muhenda mazuka. Ela chuuwo cha Muungu ntakiwezi kufungwa minyoro. ¹⁰ D̯ubva, nabea mazuka yonse kwa dzambo ḍya watsanwa wa Muungu, ili nao wapate kupata mupfonyo kuyawa kwa Kirist̯o Yesu, pfamodza na maisha ya kuunga na yuungo. ¹¹ Hu muneno hu ni muneno wa ḍugha: Ikiwa kwamba hufwa na Kirist̯o, pia hudzaishi pfamodza nae. ¹² Ikiwa kwamba hugija kuit̯isa, pia hudzat̯awala pfamodza nae. Ikiwa kwamba humukana jeje, nae pia anahukana. ¹³ Hukitsowa kuwa wahikizika, jeje nkayatse kuwa muhikizika, kwa kwamba jeje nkawezi kuvunza ahad̯i yakwe. ¹⁴ Hawa wantuwo, wakumbusye haya mambo. Wakanye kwa sari ḍya Ḅwana, watsekaiya kuḍaat̯ia vyuuwo. Huko kuḍaat̯iana ntakumusaiḍie yuḍejwonse, ishinu kunananga faro za wantu wadzeovisikia. ¹⁵ Ḍema mala wiyonaweza upate kuhikizika kwa Muungu, uwe muhumisi asiyeionea yutswa kaziye na eyenaiyongweeza urembo hi hachi ya haya Maagu Mema ya Muungu. ¹⁶ Dzit̯anye na vyuuwo visivyo maana, vivyonangiza wantu kuhendani mazuka zaid̯i na zaid̯i. ¹⁷ Mayongweezo dzayo, ni dza kilonda ndugu kisichopfowa. Na wangine weonayongweeza hayo hayo mayongweezo ni aḍe Hamena na Fileto. ¹⁸ Hawa wantu wowii waiyatsa hi njia ya hachi, na wakunangani-nangani faro za hawa wahikiziyeo. Wanayongweeza kwamba, hu ufufuo si dzambo ḍidzeḍyohendeka, ela wanakwamba wisakuhendeka. ¹⁹ Ela Muungu kaḍisumamisa hiḍi tsanganiko ḍyakwe dza musinji mumu gu usiosukusika. Na hu musinji woregwa hivi vyuuwo hivi: “Ḅwana kamanya weo wakwe.” Na kawii woregwa hivi: “Yuḍejwonse ambiye njwa Ḅwana, ni had̯i ayayatse mazukaye.” ²⁰ Kuzimuni mwa nyumba nkuu, kunakaa kukiwa na vija vya namuna garagara. Vingine vinaelekanywa na fwedha ambu dhahaḅu, na vingine vikawa vya muhi ambu vya haka. Vija vingine vinatumika byeka kwa mambo ya hila, na vingine vikatumika kwa mambo ya kawaiḍa. ²¹ Na muntu akidzidheresa na mazuka yonse, anawa dza kija cha kutumika byeka kwa mambo ya hila. Anatsanigwa ni Muungu na anawa muntu jwa maana kwa Ḅwana, jwa kuhenda kula aina ya kazi nyema. ²² Timoteo, nkudzohekwe ni t̯amaa za uḍyana, ela jwania kuishi maisha mema, uwe muhikizika kwa Kirist̯o, na uwatsake Wakirist̯o wenziwo na kuwa na naghea nao. Wewe pfamodza na hawaḍe wonse weonamuyomba Ḅwana na mojo mumodza hendani dzevihivi. ²³ Ela wantu weo na yuḍaat̯o jwa uḍyura na jusijo maana, wakaiye kuye. Koro kumanya ya kwamba yuḍaat̯o dzajo, mwiso junasia na kuheha. ²⁴ Na muhumisi jwa Ḅwana ni kutsaawa muntu jwa kuheha. Ni had̯i awe mumpowe kwa wantu wonse, na awe mwaalimu mwema na eyenait̯isa. ²⁵ Akwakuwafundani hawa weonamupfinga, ni awafunde na umpowe. Pfangine Muungu anawapfa kupfyehuza mama, na wanaimanya hi hachi. ²⁶ Na ndipfo pfa akili zao zidzepfowagalia na wadzepfoweza kumud̯arama Shaat̯ani, eyewaheka akiwahendeza wahende miroye.

¹ Yaweke akilini haya: Nsiku za mwiso kudzawa ngera za d̯ina. ² Wantu wadzawa na umimi, uhamile, kudziona na uchikodzo. Wadzawa wantu wa vitsolo, wasiowasikia wavyazi wao, wasio ḍuḍa, na kuwa wanabvise wasio ḍini. ³ Wadzawa wantu wa myojo myumu na wasiofwiya t̯ei wenzao. Wadzawa wantu wa nyano, weo wavwoku na weo na ugaiḍi. Dzambo ḍiḍeḍyonse ḍiḍyo dzema wanaḍit̯ukia. ⁴ Wadzawa wantu wasiohikizika, weo na musindiiyo na weo na kudziona kwinji. Wadzatsaka raha, zaid̯i ya kumutsaka Muungu. ⁵ Nanze wanaonekana wantu wachuuwo, ela mahendo yao yanayanga kwamba wakuikanani hi nguvu ye chuuwo cha Muungu. Dzit̯anye na wantu dzao. ⁶ Wangine wao wanadzingiza madzumbani mwa wantu, wakaheka akili za wake wasio musumamo, wazihopfejweo ni mpuha ya nabvise zao na wakit̯awaligwa ni kula aina ya t̯amaa. ⁷ Hawa wake meshi wakuḍemani kudziyongweeza mambo mapfya, ela hi hachi ntawawezi kuimanya meshi! ⁸ Dza hiviḍe vya Yenesi na Yambure wamupfingiyevyo Musa, ndivyo vya hawa wantu wevyokuipfingani hi hachi. Hawa ni wantu weo na akili zifwiyezo na wasiomuhikiza Kirist̯o ḍugha. ⁹ Ela kufaulu kwao ntakuwezi kwenda kuye. Hivi viwahendekeyevyo aḍe Yenesi na Yambure, ndivyo vidzevyowahendekea hawa hawa wantu. Na kula muntu anamanya namuna waivyo waḍyinga. ¹⁰ Ela wewe Timoteo, kuyamanya haya mayongweezo yangu, kuumanya hu mwenendo wangu, na kuyamanya haya yeyonanimud̯a maishani mwangu na haya nihikiziyeyo. Kumanya namuna niit̯isiyevyo mya mya mad̯inani, kumanya namuna ya matsako yangu yaivyo na namuna niyonikidzimiza. ¹¹ Kumanya namuna nionesejwevyo tsungu na kukuntiswa d̯ina nipfokuwa Antiokia, Ikonio na Lusitira. Yewa mad̯ina mazuka muno niit̯isiyeyo! Ela Ḅwana kaniyavyanya na haya haya mad̯ina yonse. ¹² Hawaḍe wonse weonatsaka kuishi maisha madheru hariani mwa Kirist̯o Yesu, wanakuntiswa d̯ina. ¹³ Ela hawa wantu wazuka na weo na makulekule wanahamat̯a kuwa wazuka, wakikulakula wantu wangine na kukulwakulwa wao wenye. ¹⁴ Ela wewe igije hi hachi uyongweezejweyo na uihikiziyeo, koro hawa wakuyongweezeyeo kuwamanya kwamba ni wahikizika! ¹⁵ Na haya matsoro madheru kuyamanya hangu uḍyanani mwako. Haya matsoro yanaweza kukupfa mvidhyo, iyonakuwezesa kupata mupfonyo, kwa kumuhikiza Kirist̯o Yesu. ¹⁶ Matsoro yonse yana nguvu za Muungu, na yana maana kwa kuyongweezea, kumukanyia muntu, kumuyangia muntu njia na kwa kumufundia muntu apate kuishi maisha ya kumutsakiza Muungu. ¹⁷ Ndookomu muhumisi jwa Muungu akisakuyamanya haya yonse, anawa kaimanya kaziye urembo, na anaweza kuhenda kula aina ya kazi nyema.

¹ Kwa dzambo ḍya kudza kwa Kirist̯o Yesu dza haju, nyakukuamuruni usoni kwa Muungu na kwa Yesu Kirist̯o, adzeewahukumu weo mojo na wafwiyeo: ² Sumwiiya hichi chuuwo. Wewe gija kukisumwiiya ngera zonse, uwe wakatiwe ambu utseewa wakatiwe. Kisumwiiye kuwafunda wantu, kuwabusa na kuwangiza mojo, na wayongweeze na umpowe. ³ Koro ngera zakudzani za wantu kudziza kusikiiya mayongweezo ya hachi. Ishinu wadzakaiya chaka cha kusikiiya mambo garagara, na wanadziundukizia waalimu wenji na wenji wa kuwambia haya weyonatsaka kuyasikia. ⁴ Wadzayatsa kuisikiiya hi hachi wananjia kusikiiyani ngano za nsuwe. ⁵ Ela wewe, zigwaze akilizo kwa kula hali. It̯isa mad̯inani, ugije kusumwiiya haya Maagu Mema. Henda kula kintu chichonakumala kuhenda dza muhumisi jwa Muungu. ⁶ Ami le, nsiku zangu za kuyavigwa dza mvuugiya zimaafika. Na nsiku zangu za kufwa zimaawa hafufi. ⁷ Dza vya muntu jwa mbio, nihenda kula niwezeyecho na hizi mbio nizid̯arama nizisa, na faro yangu sikuiyekeza. ⁸ Na sasa hiḍi t̯ubvo ḍya kushinda kwangu ḍyakuniindani. Naḍyo ni t̯ubvo ḍya kwamba niweza kuishi maisha ya udheru. Ḅwana, muhukumu jwa hachi, kadzaḍinimpa hiyo hiyo nsiku ya mwiso. Na nkakudzaḍinimpa mimi t̯u, ela na hawaḍe wonse weokuyoweeyani na hamu kuuja kwakwe. ⁹ Ḍema kula udzevyoweza udze huku haraka huonane. ¹⁰ Koro D̯ema kahekeka na mambo ya huju huju lumwengu, na kanid̯arama kachia Tesalonike. Ae Kireseni kenda Galatia, na Tito kachia Dalimatia. ¹¹ Na Tukiko nimuhuma Efeso. Ahafiye nami ni Luka jeje heket̯u. D̯ubva ukwakudzani, muhwae na Marko udze nae, kwa dzambo anaweza kunigijiija hi kazi. ¹³ Ukwakudzani, ḍiyehe hiḍi koti ḍyangu niḍiyatsiyeḍyo na Kapo hukuḍe Tiroa. Viyehe na hivi vyuo, haswa hiviḍe vielekanyijwevyo na nchingo. ¹⁴ Huyu Alekizanda mufuya vyuma, kanihendea mazuka menji muno. Ḅwana anamuipfa kwa haya ahendeyeyo. ¹⁵ Wewe mwenye dzit̯unze nae, kwa dzambo ewa kayapfinga vyumuni haya mayongweezo yehu. ¹⁶ Huḍe mweedha wa d̯ura nipfosumama d̯ubini kudzihehea, ntakwiwa muntu anineneeye. Kula muntu kanid̯arama. Nyakuyombani Muungu atseviwat̯alia. ¹⁷ Ela Ḅwana kanisumamia na kunimpa nguvu. Ndookomu haya Maagu Mema yonse niweza kuyasumwiiya yapate kusikijwa ni wantu wonse wa vyeet̯i vingine, na Muungu mwenye kanipfonya na kufwa. ¹⁸ Ḅwana ananipfonya na mazuka yonse, na ananipfiika salama kwa uhaju wakwe wa mbinguni. Ḅwana ashad̯we maishi na maishi! Amina. ¹⁹ Nikedhyea Pirisila na Akwila na nyumba ya Onesiforo. ²⁰ Erasto kahafa Korint̯o, na Tirofimo nimuyatsa Mileto, kwa kwamba ni mujwazi. ²¹ Ḍema kula njia, udze sika asidzaḍabva. Ebulo, Pudeni, Lino, Kilaudia na hawa wandugu wangine wonse, wamukedhya nto. ²² Ḅwana nawe pfamodza nawe ruhuni mwako. Na t̯ei ya Muungu naiwe pfamodza nanywi nyonse.