2 Watesalonike

¹ Mimi Paulo, pfamodza na Sila na Timoteo, hwakumworeani nywinywi wantu wa tsanganiko ḍya Muungu Baba na Ḅwana jwehu Yesu Kirist̯o, ḍiḍyo Tesalonike. ² Muungu Baba na Ḅwana jwehu Yesu Kirist̯o nawamuvodhye na kumumpa naghea nto. ³ Wandugu zangu, swiswi hunamala kumuyaviza ḍuḍa Muungu kut̯wa kwa dzambo ḍyenu. Ni hachi kwehu kuhenda hivi, kwa dzambo ḍya kwamba faro yenu igija kukuya zaid̯i na zaid̯i na mwakugijani kutsakana zaid̯i na zaid̯i. ⁴ Ndiyo maana naswi, hunadziona nanywi kwa wantu wa matsanganiko yangine ya Muungu. Hunakaa hukiwasumwiiya namuna mugijiyevyo kumuserefat̯a Muungu na kuit̯isa, hat̯a ingawa mwakukuntiswani d̯ina muno kwa dzambo ḍya faro yenu. ⁵ Wantu wadzaona tswee kwamba, Muungu anamuhukumu kula muntu dza evyonamala. Nywinywi hi saasambi mwakufwani kuit̯isa mad̯inani kwa dzambo ḍya hu Uhaju wa Muungu. Na kwa dzambo ḍyevyohivyo, Muungu nae anamut̯ala kuwa wantu mwiwonamala kuunjia uhajuwe. ⁶ Na kwa kwamba Muungu si Muungu eyenanyima muntu hachiye, jeje kadzawaipfisa na mad̯ina hawaḍe wonse weokumukuntisani d̯ina nywinywi. ⁷ Makisa swiswi nanywi kadzazihunwiiya hizi hizi d̯ina na hunapata kusoha. Haya yadzahendeka ngera za Ḅwana jwehu Yesu adzepfot̯upuka kuyawa mbinguni. Jeje na malaikawe wenye nguvu, wadzasuka kuyawa dzuu ⁸ wakiwa waringwa ni maḅiliḅili ya moho. Kadzawahukumu hawaḍe wonse wasiomumanya Muungu na weonayadziza haya Maagu Mema ya Ḅwana jwehu Yesu. ⁹ Wadzahukumigwa hukumu isiyosia wakit̯anywa kuye na Ḅwana na maremboye makuu. ¹⁰ Haya yanahendeka nsiku ya Ḅwana adzeyokudza, kudzayanga maremboye kwa wantuwe wamuhikiziyeo. Wao wadzamumakia na kumushad̯a kwa dzambo ḍya maremboye. Nanywi pia mudzamushad̯a hiyo hiyo nsiku kwa kwamba muyahikiza haya huyamusumwiiyeyo dzuuye. ¹¹ D̯ubva naswi, hunamuyombea kwa Muungu kut̯wa, apate kumuhwaa dza wantu muishiyeo haya maisha amuhaniiyeyo muishi. Na pia, hunamuyombea ili Muungu kwa nguvuze amuwezese kuhenda kula dzema mwiḍyonatsaka kuhenda kwa dzambo ḍya kumuserefat̯a Ḅwana Yesu. ¹² Hunamuyombea ili kwamba, muḍihendeze sari ḍya Ḅwana jwehu Yesu ḍishad̯we na kukuzwa, nanywi pia mupate kushad̯wa kwa dzamboḍye. Na haya yonse yanawezekana kwa t̯ei ya Muungu na Ḅwana jwehu Yesu Kirist̯o.

¹ Wandugu, hunatsaka kumuimusya zaid̯i dzuu ya kuuja yupfii kwa Ḅwana jwehu Yesu Kirist̯o na kutsanganika kwehu kuwa pfamodza nae. Hunamuyomba ² mutseewa wapesi wa kugija vyuuwo vya kumwaarya mat̯aro yenu ambu vya kumuhusya kwamba, Nsiku ya kuuja kwa Ḅwana jwehu Yesu isakufika iiḍe. Na hat̯a kukidza muntu, akidzaakyamba kaviyangwa ni huyu Ruhu, ambu huvimusumwiiya, ambu humworea ḅaruwa dzuu ya hiḍi hiḍi dzambo, namutsemuhikiza. ³ Muntu natsemuḍyuurisa kwa njia iḍeyonse! Maanaye hiyo Nsiku ya kuuja kwa Ḅwana isidzafika, nguzi d̯ura wantu wenji wadzayatsa kumuvunzia nkuhi Muungu. Kisa kudzat̯upuka muntu muzuka adzeyedziza kuuḅa sharia iḍeyonse. Jeje ni muntu jwa kwamba kadzangizwa mohoni. ⁴ Anadzikuzya na kumukufuru Muungu, akiwasharut̯isa na wantu kutsamuyomba Muungu wala miungu ingine iḍeyonse. Ananjia humu Hekaluni mwa Muungu, anadziweka dza Muungu na kuwamba wantu jeje ni Muungu. ⁵ Munakumbuka kwamba nipfokuwa huko huko kwenu, haya haya niyamwambia. Sivyo? ⁶ Na pia, mumanya chichokumuvingirani huyu muntu muzuka eyenamupfinga Muungu atset̯upuka hi hii saasambi. Jeje ngeraye ikifika, Muungu anamuyanganya. ⁷ Hat̯a hivi hivi haya mananzi ya huyu huyu muntu muzuka yesakuḍabva kisiri-siri kuwahendeza wantu wadzize kumut̯ii Muungu. Ela hi hii saasambi yakuvunzwani nguvu, na yanagija kuvunzwa nguvu hat̯a ngera ya huyu eyekuyavunzani nguvu adzepfonujwa. ⁸ Kisa rhefu, ndipfo pfa huyu muntu muzuka adzepfot̯upuka. Ela Ḅwana jwehu Yesu adzepfokudza, anamuyaga huyu muntu muzuka na chuuwo t̯u. Anamunanga-nanga na maremboye makuu. ⁹ Huyu muntu muzuka akidza, anakudza na uwezo wa Shaat̯ani, wa kuhenda mambo makuu na mafara ya kumakisa, na vihambwiizo vya kukulakula wantu. ¹⁰ Anakudza na kula aina ya makulekule, awakulekule hawaḍe weokwaarani wadzeohukumigwa. Wakwaarani kwa dzambo ḍya kwamba waidziza hi hachi ya kwamba indeweza kuwapfonya. ¹¹ D̯ubva Muungu nae anawahendeza wakulwekulwe viwi muno, wapate kuhikiza mambo ya nsuwe. ¹² Na kwa dzambo ḍya kwamba waidziza hi hachi, na wanaona kwamba ni urembo kuhenda nabvise, Muungu kadzawahukumu wonse. ¹³ Nywinywi wandugu mwiwo watsakwa wa Ḅwana, hunatsaka kumwambia ya kwamba, swiswi hunamala kumuyaviza ḍuḍa Muungu kut̯wa kwa dzambo ḍyenu. Muungu kamutsana hangu ḍabvu ili aweze kumupfonya kuchiiya na kwa kudhereswa ni Ruhu Mudheru na kwa kuihikiza hi hachi. ¹⁴ Muungu kamuhana kuchiiya na kwa hi Injili humusumwiiyeyo, mupate kunjia maremboni mwa Ḅwana jwehu Yesu Kirist̯o. ¹⁵ D̯ubva wandugu, yagijeni na nguvu haya mayongweezo humuyongweezeyeyo hwipfokuwa huko kwenu na hayaḍe huyamworeeyo ḅaruwani. ¹⁶ Swiswi hwakumuyombeani kwamba, Ḅwana jwehu Yesu Kirist̯o na Muungu Baba jwehu wamungize mojo na kumumpa nguvu, mugije kunena na kuhenda mema. Koro kwa dzambo ḍya kwamba Muungu kahutsaka, kahufwiya t̯ei isiyosia na kahupfa madzikwat̯yo mema ya kudzaishi nae.

¹ Wandugu zangu, zaid̯i ya yonse, hwakumuyombani mugije kuhuyombea, ili hichi chuuwo cha Ḅwana kipate kud̯achaa haraka. Gijani kuhuyombea ili hawaḍe hudzeowasumwiiya wakihikize hichi chuuwo dza hivi vyenu mukihikiziyevyo. ² Na pia huyombeyeni, ili Muungu ahuchinge hutsekudzadhurigwa ni hawa wantu wazuka. Koro si kula muntu kwamba anahikiza hichi chuuwo hwichonasumwiiya. ³ Ela Ḅwana jeje ni muhikizika. Anamungiza nguvu na kumuchinga na mazuka ya Shaat̯ani. ⁴ Ḅwana jwehu Yesu kahupfa uhakika wa kwamba, haya hwiyokuyamwambiani, nywinywi mwakuyauḅani na munagija kuyauḅa dzevyo hivyo. ⁵ Nae namumpe kumanya namuna yakwe jeje ait̯isiyevyo mad̯inani na namuna ya Muungu amutsakiyevyo nywinywi. ⁶ Wandugu zangu, swiswi hwakumuamuruni kwa sari ḍya Ḅwana jwehu Yesu Kirist̯o, kwamba, mudzit̯anye na Mukirist̯o yuḍejwonse asiyetsaka kuhenda kazi. Koro muntu dzae anawa nkakwakuyauḅani haya mayongweezo humuyongweezeyeyo. ⁷ Hwakunenani hivi kwa dzambo ḍya kwamba, nywinywi wenye mumanya urembo muno, namuna mwivyonamala kut̯aḅa haya maisha yehu huishiyeyo nanywi. Swiswi ntahwiiwa wantu wa kudziyekeza ḅasi maguu na mikono! ⁸ Na wala ntahukuḍya cha muntu ḅure pfasipfo kuchiipfia. Ishinu swiswi, hufwa kuhenda kazi siku na musikahi kudzilachia riziki, ili hutseewa muzigo kwa yuḍejwonse kahi yenu. ⁹ Huhenda kazi dza hivi, hupate kuwa mufaano kwenu wa kuuḅa, wala si kwa kwamba ntahwiiwa na hachi ya kumulacha nywinywi ugijo dzao. ¹⁰ Koro hat̯a hwipfokuwa huko kwenu, humumpa amuri ya kwamba, muntu asiyetsaka kuhenda kazi hat̯a kuḍya ni kutsaaḍya. ¹¹ Hwakunenani hivi kwa dzambo ḍya kwamba, husikia kwamba wangine wenu wakaiya lafa t̯u! Ntawa kazi weyokuhendani, kazi yao ni kunjiiya-njiiya mambo ya wantu t̯u! ¹² Hwakuwaamuruni na kuwafunda hao hao wantu kwa sari ḍya Ḅwana jwehu Yesu Kirist̯o, ya kwamba waḍabve kudzihendea kazi na mikono yao kudzilachia riziki na waingamae. ¹³ Ela nanywi wandugu zangu, namutsetsoka kuhenda mema. ¹⁴ Yuḍejwonse kahi yenu, adzeyedziza kuhenda hivi humwambiiyevyo humu ḅaruwani, muyoweni mumanye kwamba ni ga! Kisa namutsenjiiyana nae kwa kiḍechonse, ili apate kugijwa ni yutswa na aperuye mwenendowe. ¹⁵ Ela hat̯a vivyo, namutsemuhwaa dza nyabva jwenu. Mukanyeni dza Mukirist̯o mwenzenu. ¹⁶ Hwakumuyombeani ili Ḅwana jwehu eyenahupfa naghea, amumpe naghea kut̯wa kwa kula namuna. Ḅwana nawe nanywi nyonse. ¹⁷ Mimi Paulo, nyakuimworeani hi hii kedhya na mukono wangu mwenye. Hivi ndivyo nivyonazisa hizi ḅaruwa zangu zonse, zipate kumanyikana kwamba ndimi nizyoreye. ¹⁸ T̯ei ya Ḅwana jwehu Yesu Kirist̯o naiwe pfamodza nanywi nyonse.