2 Pet̯ero

¹ Mimi Simioni Pet̯ero, niiye muhumisi na ntumi jwa Yesu Kirist̯o, nyakumworeani nywinywi nyonse mumuhikiziyeo Yesu Kirist̯o, eye Muungu na mupfonya jwehu. Yesu kamuhendeza muwe na faro iyo na thamani dza hi ahupfiyeyo swiswi kwa dzambo ḍya wemawe. ² Muungu namuvodhye zaid̯i na zaid̯i na kumumpa naghea nto kwa kwamba mumumanya jeje na Ḅwana jwehu Yesu. ³ Kwa uwezo wa Muungu amumpiyeo, Yesu kahupfa kula kintu hwichonamala kuwa nacho ili huweze kuishi maisha ya udheru. Kavihupfa kuchiiya na kwa kumumanya jeje ahuhaniye huwe na maremboye na wemawe. ⁴ Na kwa dzambo ḍya haya haya maremboye na memaye, kahuahid̯ia kuhupfa mambo makuu muno ya thamani. Na haya ahuahid̯iiyeyo kayahupfa ili kwamba muweze kuishi dza wana wa Muungu. Haya haya kayamumpa ili muweze kupfona kuyawana na haya mambo yeyonawananga wantu wa huju lumwengu, yeyonayehegwa ni t̯amaa nzuka nzuka. ⁵ Kwa dzambo muhanigwa muishi maisha ya kimuungu na mumuhikiza Kirist̯o, ḅasi hendani kula mudzeḍyoweza ili kwamba muwe na t̯aḅia nyema pia. Na zaid̯i ya kuwa na t̯aḅia nyema, muwe wantu wa kumumanya Muungu. ⁶ Na zaid̯i ya kumumanya Muungu, ni had̯i muwe wantu wa kudzimiza na t̯amaa zenu. Na namutseewa wantu wa kudzimiza t̯u, ela wani pia na wantu wa kuit̯isa mad̯inani. Na mukimaawa wantu wa kuit̯isa, ni had̯i muishi maisha ya kumutsakiza Muungu. ⁷ Mukwakuishini maisha ya kumutsakiza Muungu, ni had̯i muwatsake na mojo mumodza hawa wahikiza wenzenu, na muwatsake wantu wonse pia. ⁸ Ndookomu haya haya yonse yakimudzaa, munawa wantu wa kumuhendea Muungu kazi nyema, na maisha yenu yanamuvyaiya Muungu matunda mema, huku mukigija kumumanya Ḅwana jwehu Yesu Kirist̯o zaid̯i na zaid̯i. ⁹ Ela yuḍejwonse asiyekuwa na myenendo dza hii, ka dza muntu eyenaona mawizawiza kaḅisa na hat̯a ka dza ntumbu matso haswa! Muntu dzae kaarerwa kwamba nabviseze za kae kaziyatsijwa. ¹⁰ D̯ubva wandugu zangu, hendani kula mwichonaweza ili muyange kwamba Muungu kamutsana na kamuhana ḍugha! Mukihenda hivyo ntamunagwa nabviseni meshi. ¹¹ Ndookomu nanywi mudzapfokejwa urembo, muunjie hu uhaju wa kuunga na yuungo, wa Ḅwana na mupfonya jwehu Yesu Kirist̯o. ¹² Ndiyo maana nisiyoyatsa kumukumbusya kawii na kawii dzuu ya haya haya mambo, ingawa muyamanya, na muigija na mikono miwii hi hachi muisumwiijweyo. ¹³ Ndookomu niona vyema kwamba nikae na kumukumbusya-kumbusya dzuu ya haya haya mambo mala niiyo mojo. ¹⁴ Koro Ḅwana jwehu Yesu Kirist̯o kesakuniyanga tswee kwamba si nsiku nyinji za kuishi amaale. ¹⁵ Nami nahenda kula nidzevyoweza kumulachia njia ya kwamba meshi mudzayakumbuka haya mambo, hat̯a nikidza nikifwa. ¹⁶ Hwipfomwambia dzuu ya uwezo wa Ḅwana jwehu Yesu Kirist̯o na kudza kwakwe yupfii, ntahukumwambia mambo ya kamba na ambigwa hat̯a. Huyaona maremboye na matso yehu swiswi wenye. ¹⁷ Koro saa ya Muungu Baba jwehu epfomuhendeza Yesu ayangae na marembo na akimuyanganya kwamba ni mukuu, swiswi wenye hwiiwa pfamodza nae hapfaḍe dzuu ya hu murima mudheru. Husikia idzwi kuu kuyawa mbinguni ḍikyamba, “Huyu ni Mwanangu mutsakwa, nitsakizijwee nae muno.” ¹⁹ Ndookomu huna uhakika kwamba hivi vyuuwo vya hawa manabii waneneyevyo dzuu ya Kirist̯o mvya ḍugha. Na ni urembo kwamba muvigije na mojo koro vyaa dza tsaa iyonayangaa kizani hat̯a nsi ikacha. Vigijeni na mikono miwii mumpaka saa ya hu muyanga wa Kirist̯o, huyu eye dza nyoha ya magura udzepfomuyangaiya. ²⁰ Na zaid̯i ya hayo yonse, natsaka muimuke kwamba ntaku yuḍejwonse eyenaweza kuyaimuka haya matsoro ya hawa manabii na akili yakwe jeje mwenye, pfasipfo kuyongojwa ni Ruhu jwa Muungu. ²¹ Koro ntaku unabii uḍewonse udziyeo kwa miro ya mwanaad̯amu. Kenge hawa manabii wayongojwa ni Ruhu Mudheru, na wanena vyuuwo viyawiyevyo kwa Muungu.

¹ Dza kwivyokuwa na manabii ya nsuwe kahi ya wantu wa Muungu ngera zichiiyezo, ndivyo kudzevyot̯upuka waalimu wa nsuwe kahi yenu. Wadzadzinyeeza na mayongweezo ya nsuwe ya kumwaarya. Na wadzamukana huyu Ḅwana awapfonyeye nabviseni mwao. Ndookomu Muungu nkat̯owainda, kadzawahukumu vyumuni. ² Hat̯a vivyo, wenji wa hawa wantu wahikiziyeo wadzat̯aḅa hi myenendo yao mizuka. Na kwa dzambo ḍya mahendo yao, wantu wadzainenea mazuka hi Njia ya hachi. ³ Kwa dzambo ḍya uhamile wao, hawa waalimu wa nsuwe wadzamusumwiiya mambo menji ya nsuwe ili mupate kuwapfa fwedha. Ela hukumu yao Muungu kaiwawekea iiḍe na hakika anawananga-nanga. ⁴ Koro ikiwa kwamba malaika wagwiyeo nabviseni t̯u, Muungu nkakuwayatsa, ishinu kawafunga-funga na minyoro na kawafat̯ula simo ḍya kiza. Na humuhumuḍe ndimo wemokuindiiyani hi Nsiku yao ya kuhukumigwa. ⁵ Na Muungu nkakuyatsa kuwahukumu wantu wa kae wasiomuhila. Ndookomu kaiyeha hi zuruwa iwayagiyeo wantu wazuka wonse, ela kamupfonya Nuhu, pfamodza na hawa wantu wangine wafungahe t̯u, kwa kwamba Nuhu ndiye eyeakisumwiiya dzuu ya kuishi maisha ya kumutsakiza Muungu. ⁶ Muungu kaihukumu midzi ya Sod̯oma na Gomora kwa kuinanga na moho. Kaihenda dza hivi ili ikae dza mufaano wa hayaḍe yadzeyohendeka kwa wantu wonse weo walumwengu. ⁷ Ela hat̯a vivyo kamupfonya Loti, koro ewa muntu mwema eyeakiishi kahi ya wantu wazuka muno. Loti ekihangaika muno mojoni mwakwe dzuu ya haya mahendo mazuka mazuka eyoakiyaona na hawa wantu, nsiku ḅaad̯a ya nsiku. ⁹ D̯ubva haya yonse yanahuyanga namuna ya Muungu amanyiyevyo kuwayavya mad̯inani hawaḍe weonamuhila. Na pia kamanya namuna ya kuwaadhiḅu wantu wazuka, hali wakwakuindiiyani hi nsiku halisi ya hukumu. ¹⁰ Hi adhaḅu inawa haswa kwa hawaḍe weonauḅa t̯amaa zao nzuka nzuka za kimwii na kubalifa uwezo wa Muungu. Hawa waalimu wa nsuwe wanadziona, na ni wavikodzo. Wala ntawa hila kwa viumbe vya mbinguni. Ishinu wanakaa na kuvitsola-tsola. ¹¹ Ḅela hawa malaika t̯u, weo na nguvu na uwezo kuchia hawa waalimu wa nsuwe, ntawavitsole-tsole hivi viumbe usoni ya Ḅwana! ¹² Hawa waalimu wa nsuwe wanadzihendea mambo ḅasi dza binensa, pfasipfo kut̯ara. Wanadzinenea ḅasi uzuka wa mambo wasiyoyaimuka. Dza binensa weonavyaijwa kugijwa na kuyagwa ḅasi, nao pia wananangwa. ¹³ Wanakunta d̯ina kwa dzambo ḍya kuwangiza mazukani wangine. Koro wanat̯ara kwamba wakikaiya kuhenda mambo mazuka dza kuruma na kushobva na musikahi wa tswee ndiwo raha. Wakikaa mahaghani kuḍyani pfamodza nanywi, wanamungiza t̯amba zuka. Haya makulekule yao kwenu, kwao yanawa ni d̯aha. ¹⁴ Hawa ni wantu waḍuijweo, koro ntawa kazi ingine, kazi yao ni kwendea wake mashudha t̯u! Ntawafurume kuhenda nabvise maishi, koro myojo yao ibarat̯a uhamile. Wanawasarat̯a hawaḍe weonaheeka kiurahisi na wakawagisa nabviseni. ¹⁵ Waiyatsa hi njia nyema na wagija njia zao waara; koro wauḅa hi njia ya Balamu mwana jwa Beori, eyekuwa t̯ayari kuhenda mazuka apate kuipfwa fwedha. ¹⁶ Ela Balamu kabuswa ni hare kwa dzambo ḍya haya mazuka eyoakitsaka kuhenda. Hiḍi hareḍye ḍinena nae dza mwanaad̯amu na ḍimuvingira huyu nabii kuhenda haya mat̯areye eyoakitsaka kuhenda. ¹⁷ Hawa waalimu wa nsuwe waa dza matsana ya mutsangani kuzimu yakumiyeyo ḍama gu. Waa dza mawingu yeyonabigwa ni vut̯o kali yakavarika-varika. Nae Muungu kesakuwapangia kwamba wanakaa wahira, pfantu pfepfo na kiza cha go. ¹⁸ Humu manwani mwao, vyuuwo vya kudziona na visivyo maana vinawamba bvaa! Wanakaa na kuwagisa nabviseni hawa wahikiza wanana kwa kuwayongweeza kwamba wakikaa na kudzit̯oseza hizi t̯amaa zao za kimwii. ¹⁹ Wanawaahid̯ia wantu uhuru, na hali wao wenye ni wahumwa wa mambo yeyonayeha mananzi. Kwa dzambo ḍya kwamba muntu anawa muhumwa jwa dzambo ḍiḍeḍyonse ḍimut̯awaliyeḍyo. ²⁰ Koro wantu wakiyatsa mazuka ya lumwengu kwa kumuhikiza Yesu Kirist̯o dza Ḅwana na mupfonya jwao, makisa wakidziyatsa wahekwe ni lumwengu kawii, hachi wantu dzao wanawa d̯inani zaid̯i kuchia hiviḍe wevyokuwa d̯ura. ²¹ Hat̯a indeewa heri kwao kutsaimanya hi njia ya hachi, kuliko kwamba waimanye makisa waiyatse hi amuri waipfegejweyo ni Muungu. ²² Hivi wahendeyevyo ni ḍa na hivi vya hi nsimo yambieyo chughe ntainayatsa kugalia mahapfikaye, na nguyuwe eyenakoswa, anauja akanjia kukogani d̯oore kawii.

¹ Wandugu zangu, hii ni ḅaruwa yangu ya pfii ya kumworea. Kuzimuni mwa ḅaruwa zangu zombii, nimworea kumukumbusya haya mambo muyamanyiyeyo hangu iiḍe ili kwamba muweze kuwa na mat̯aro mema. ² Natsaka kumukumbusya dzuu ya haya mambo yanenejweyo hangu kae ni hawa manabii wa Muungu. Ikumbukeni na hi amuri ya huyu Ḅwana na mupfonya jwehu, aimumpiyeyo nywinywi kuchiiya na kwa ntumi awahumiyeo kwenu. ³ Cha d̯ura ni had̯i muimuke kwamba ngera za mwiso kudzawa wantu wabalifit̯u, weonat̯awaligwa ni t̯amaa zao t̯u. Wadzamunonza ⁴ na kumwamba, “Ḅwana nkakumuahid̯i kwamba anakudza kawii? Mani d̯ubva kaku? T̯ahwaa hawa wababa zehu wamaafwa, ela kula kintu chaa dza viviḍe chivyokuwa hangu kuumbwa kwa lumwengu!” ⁵ Ela wanadziareresa nangere kwamba, kae Muungu kanena chuuwo t̯u, na mbingu ziumbika. Na pia kajuumba huju lumwengu kuyawana na madzi. ⁶ Na Muungu katumia yayo madzi kujunanga lumwengu jwa kae epfojuzamisa na hiḍe zuruwa nkuu. ⁷ Kwa chicho chuuwo kimodza cha Muungu, hizi mbingu na huju lumwengu jwa yeo vyakuwekwani kudzanangwa na moho nsiku ya hukumu. Judzanangwa pfamodza na wantu wonse wasiomumanya Muungu. ⁸ Ela wandugu zangu, hichi kintu kimodza hichi namutsechaarerwa: Kwa Ḅwana nsiku modza ni sawa na myaka elefu modza, na myaka elefu modza ni sawa na nsiku modza. ⁹ Si ya kwamba Ḅwana ni mumpompowe kut̯imiza ḍamanoḍye, dza vya wangine wevyonat̯ara hat̯a. Ela kakumuit̯isiani nywinywi ili muyatse nabvise zenu mupfyehuze mama, koro nkanatsaka hat̯a mumodza jwenu aare. ¹⁰ Nsiku ya Ḅwana ya kudza, anakudza dza hiviḍe vya mwivi evyonakudza pfasipfo kuḍama. Hiyo hiyo nsiku, hizi mbingu zinakwaara na kisindo chikuu, na vyonse vivyo kuzimu yakwe vinapfya moho wa bvibvibvibvi. Hat̯a huju lumwengu na vyonse vihendejwevyo kuzimuye, navyo pia vinatsomwa. ¹¹ D̯ubva ikiwa kwamba kula kintu kidzanangwa dzevihivi, mani munamala kuwa wantu weodze? Ntamunamala kudziyavya kwa Muungu na muishi maisha ya udheru hat̯a? ¹² Hendani hivi huku mukiindiya hi Nsiku ya Muungu iyokudzani. Hendani kula mwichonaweza muihendeze idze haraka. Koro hiyo hiyo nsiku, hizi mbingu zinanangwa kwa kugibvilwa moho, na vyonse vivyo kuzimuye vinaḍauswa ni hiḍi pwikopwiko. ¹³ Ela hwakuindiiyani kut̯imiya kwa hivi vya Muungu aahid̯iyevyo, kwamba kudzawa na mbingu mpya na lumwengu yupfya, kudzemokaa wantu wadheru wahupfu. ¹⁴ D̯ubva wandugu zangu, hali mwakuindiiyani hiyo hiyo nsiku, hendani kula mwichonaweza ili kwamba adzepfokudza amut̯onge mwakuishini maisha ya kutsaawa na tsowa, wala t̯amba ḍiḍeḍyonse, ela amut̯onge mwakuishini maisha ya naghea. ¹⁵ Huku kuit̯isa kwa Ḅwana ekokumuit̯isiani, kuhwaeni dza namfasi eyokumumpani mupate kupfonyegwa, dza vya ndugu yehu mutsakwa Paulo amworeevyo kwa mvidhyo aipfegejweyo ni Muungu. ¹⁶ Kuzimuni mwa ḅaruwaze zonse, kora dzevihivi kula akwakunenani dzuu ya haya haya mambo. Hizi ḅaruwa zakwe zina mambo yangine momu yasiyoimukika kirahisi. Wantu wasiomanya kintu na weonaheeka kirahisi, wanakaa na kuyeleza kimatsowa, dza wevyonahenda kwa haya matsoro yangine. Ndookomu wakudziyeheyani kufwa wao wenye. ¹⁷ D̯ubva wandugu zangu, kwa dzambo ḍya kwamba haya haya mambo mumayamanya na mapfema, ḅasi chimizani muno ili kwamba haya matsowa ya hawa wantu wazuka weyonahenda, yatsekudzamwaarya yamugise nanywi pia. ¹⁸ Ela gijani kudzikwat̯ya t̯ei ya Ḅwana na mupfonya jwehu Yesu Kirist̯o na mugije kumumanya jeje zaid̯i na zaid̯i. Ḅwana napfegwe shad̯u hangu hi hii saasambi, na hat̯a pfasipfosia. Amina.