1 Timoteo

¹ Mimi Paulo, ni ntumi jwa Kirist̯o Yesu kwa amuri ya Muungu mupfonya jwehu na kwa amuri ya Kirist̯o Yesu, huyu hwiyekudzimukwat̯yani. ² Nyakukworeani wewe Timoteo, wiye dza mwanangu hachi faroni mwa Kirist̯o. Muungu Baba jwehu na Kirist̯o Yesu, eye Ḅwana jwehu, nakuvodhye nto, akufwiye t̯ei na kukupfa maisha ya naghea. ³ Dza nivyokwambia nipfonikyenḍa Makedonia, natsaka ukae kuko Efeso. Huko huko, kuna wantu weokuyongweezani mayongweezo ya nsuwe, na ni had̯i uwambe wayatse haya mayongweezo yao ya nsuwe. ⁴ Wambe watsekaiya ngano za nsuwe na milongo miyeya miyeya ya masari ya wabibi zao. Haya yanayeha yuḍaat̯o jusijo maana. Ntaiwapfe wantu kuimuka mupango wa Muungu, wiwonaimukika kwa njia ya faro. ⁵ Na maana ya hi hii amuri ni kuhuhendeza swiswi na swiswi hutsakane na mojo mumodza. Ni had̯i hutsakane na myojo iyo na faro ya ḍugha na iyonahuhendeza humanye yeyo mema na mazuka. ⁶ Huko huko, kuna wantu wayayatsiyeo haya haya, na waara njia, wakaiya yuḍaat̯o jusijo maana. ⁷ Wanatsaka kuwa wayongweeza wa Sharia, ela ntawadzi maana ya hivi vyuuwo vyao wenye wala haya mambo weyonanena na muvuku. ⁸ Humanya ya kwamba hi Sharia ya Musa ni nyema ikiwa kwamba itumika urembo. ⁹ Na ni had̯i huimuke ya kwamba, sharia iḍeyonse iyonawekwa, ntaiwekwe kwa dzambo ḍya wantu wahachi hat̯a. Inawekwa kwa dzambo ḍya wavunza sharia na wahenda mazuka, wasiomumanya Muungu, wanabvise wasiokuwa na ḍini, na weo walumwengu. Na pia, inawekwa kwa dzambo ḍya wantu weonayaga wababa zao na wamama zao, na kwa dzambo ḍya wayaji wangine. ¹⁰ Na kawii, hi sharia inawekwa kwa dzambo ḍya wantu waḅari, wantu weonayaana na nyuma, na weonakwiwa wantu, weonanena nsuwe na weonayavya ushaahiḍi wa nsuwe, ambu wantu waḍewonse weonahenda mambo yeyo tsonso na haya mayongweezo ya hachi. ¹¹ Haya haya mayongweezo, yaa humu mwa haya Maagu Mema nipfegejweyo ni Muungu niyasumwiiye wantu. Ni Maagu Mema dzuu ya Muungu jwa marembo asiyepfungukijwa ni kintu. ¹² Namumpa ḍuḍa Kirist̯o Yesu, Ḅwana jwehu, animpiye nguvu za kuhendea hi kazi yangu. Namumpa ḍuḍa kwa kunihwaa nami dza muntu, akinitsana nimuhumikiye, ¹³ hat̯a ingawa hapfaḍe d̯ura niimunenea mazuka, niimukuntisa d̯ina na kumutsola. Ela Muungu kawa munanso kwangu, kwa dzambo ḍya kwamba niwa sidzamuhikiza Kirist̯o, na niwa sidzi niyonikihenda. ¹⁴ Ḅwana kanifwiya t̯ei muno na kaniyanga kwamba kanitsaka. Kanihendeza nimuhikize na mojo na kanimpa kuwatsaka wahikiza wenzangu, koro hwonse hwakuishini hariani mwa Kirist̯o Yesu. ¹⁵ Hu muneno wambiyeo, Kirist̯o Yesu kadza lumwenguni adzeawapfonye wanabvise, ni muneno wa ḍugha wa kwamba wantu wauhikize. Nami mimi mwenye, niiwa ndimi munabvise mukuu jwa mwiso. ¹⁶ Ela kwa hiḍi hiḍi dzambo, Muungu ewa mut̯ei kwangu. Na kanipfonya ili kwamba Kirist̯o Yesu aweze kuwayanga wantu wangine namuna aivyo mwema na mumpowe. Na kwa dzambo ḍya kwamba mimi ndimi niyekuwa munabvise mukuu jwa mwiso, nikaa dza mufaano wa kuyanga kula muntu, kwamba yuḍejwonse adzeyemuhikiza Kirist̯o anapata maisha ya kuunga na yuungo. ¹⁷ Huyu Haju eyenat̯awala maishi na kuunga na yuungo, asiyeonekana, na eye Muungu jeje heket̯u, hunamumpa shad̯u na hila maishi na maishi! Amina. ¹⁸ Timoteo mwanangu, hi amuri nyakuikupfani wewe. Iuḅana na hivi vyuuwo vya unabii vinenejwevyo hangu kae na kae dzuuyo. Vigije hivi vyuuwo viwe dza vyeera vya kujwania ndwani nyema, ¹⁹ na ugije kumuhikiza Kirist̯o na uwe na mojo wa kukuhambwiiza mema na mazuka. Wantu wangine wayatsa kuuḅa mama zao nyema na wainanga hi faro yao. ²⁰ Wangine wao ni aḍe Hamena na Alekizanda, niwangiziyeo mikononi mwa Shaat̯ani, wapate kudziyongweeza kutsamukufuru Muungu.

¹ D̯ubva chikuu nichonatsaka kumwambia ni kwamba, mukae mukimuyaviza Muungu ḍuḍa kwa dzambo ḍyenu na ḍya wantu wangine na kumuyomba kwa haḍya zenu nywinywi na za wantu wangine wonse. ² Wayombeyeni na mahaju na wonse weo na mamulaka, hupate kuishi maisha ya utuvu na ya naghea. Ni humuhile Muungu na huwe na t̯aḅia nyema kwa wangine. ³ Hivi ni urembo, na vinamutsakiza Muungu mupfonya jwehu, ⁴ eyenatsaka kula muntu apfonywe na aimanye hi hachi. ⁵ Koro kuna Muungu mumodza, na kuna na muntu jwa kahi mumodza kahi ya Muungu na wanaad̯amu, nae ni huyu muntu eyenahanwa Kirist̯o Yesu. ⁶ Jeje kayavya maisha yakwe kuwa ḍiba ḍya kuwapfonya wantu wonse. Na huu ndiwo ushaahiḍi udziyeo na wakati mwema kuyanga kwamba Muungu anatsaka wantu wonse wapfonywe. ⁷ Ndiyo maana nitsanijweyo dza ntumi na mwaalimu jwa wantu wa vyeet̯i vingine, niwasumwiiye haya maagu ye faro ya hachi. Na haya niyokunenani ni ḍugha, si nsuwe hat̯a! ⁸ D̯ubva, kula saa ya mayombo, natsaka hawa wayume wadziyaviyeo kwa Muungu wawe ndiwo wa kuyomba. Na wepfonanwiiya dzuu mikono yao kuyomba, nawatseewa na ngoro ambu ngongea. ⁹ Na hawa wake natsaka wakae wakivwaa urembo. Ni wakae wakivwaa nguo za hila. Nawatsekaiya kurembosa nywii kuchia chima, ambu kudzifayat̯a na vija vya dhahaḅu, lulu na marinda ghali ghali. ¹⁰ Ishinu, wake Wakirist̯o, ni had̯i watsakize na mahendo yao mema, dza ivyonawamala wake wahuniyeo kudziyavya kwa Muungu. ¹¹ Wake ni had̯i wawe wantu wa kudziyongweeza na ukimyamya na kwa umpowe. ¹² Sit̯aki muke jwa kuyongweeza ambu jwa kuwa na mamulaka dzuu ya wayume. Wake ni had̯i wakae wakinyamaa mya saa ya mayombo. ¹³ Koro Ad̯amu ndiye aumbijwe d̯ura, kisa kukiumbwa Hawa. ¹⁴ Na Ad̯amu siye akulijwekulijwe hat̯a. Huyu muke ndiye akulijwekulijwe akigwa nabviseni. ¹⁵ Ela muke anapfonywa kuchiiya na kwa kuvyaa wana, ikiwa kwamba kait̯isa faroni mwa Yesu, akiwa na matsako na udheru, na wema wa t̯aḅia.

¹ Hu muneno huu ni muneno wa ḍugha: Yuḍejwonse eye na hamu ya kuwa muyongozi jwa tsanganiko kadzitsania kazi nyema. ² Muyongozi jwa tsanganiko ni had̯i awe muntu asiyealat̯ika. Ni had̯i awe muyume jwa muke mumodza t̯u, awe mutuvu, awe na mvidhyo, awe muntu jwa kuhilwa, awe muntu jwa kukaraḅisha wageni nyumbani mwakwe na awe muntu eyenaweza kuyongweeza wantu. ³ Ni had̯i atseewa muntu jwa kuruma ambu muntu mundwani wala muchikodzo. Ela ni kuwa muntu mumpowe, na ni had̯i atseewa muntu jwa kutsaka fwedha. ⁴ Ni had̯i awe muntu amanyiye kuisumamia nyumbaye urembo na kuwahendeza wanawe wamut̯ii na kumuhila. ⁵ Koro ikiwa kwamba muntu nkadzi hat̯a namuna ya kuisumamia nyumbaye, kadzawezadze kuḍisumamia aḍi tsanganiko ḍya Muungu? ⁶ Ni had̯i atseewa Mukirist̯o mwanana. Ambu sivyo, anaweza kunjijwa ni kudziona na ahukumigwe ni Muungu, dza vya Shaat̯ani evyohukumigwa. ⁷ Pia muyongozi jwa tsanganiko ni had̯i awe muntu jwa kwamba anahilwa ni wantu wa nze ya hiḍi tsanganiko, ambu sivyo, anaajaiswa na anagwa mikononi mwa Shaat̯ani. ⁸ Wahumisi wa matsanganiko nao, ni kuwa wantu wa t̯aḅia nyema na weonahikizika. Ni had̯i watseewa wantu wa kunwa mvinyo muno ambu wantu wahamile wa kudzilachia fwedha. ⁹ Ni had̯i wagije kuihikiza hi faro ya Kikirist̯o iyanganyijweyo kwehu na wawe na mojo wa kumanya wechokuhendani. ¹⁰ Ni had̯i wapimigwe nguzi tswee, na wakionekana ya kwamba ntawa t̯amba zuka, d̯ubva wayatsigwe wahumike. ¹¹ Hawa wakazao nao, ni had̯i wawe wantu wa t̯aḅia nyema, na watseewa wantu wa nyano. Ni had̯i wawe wantu watuvu na weonahikizika kwa kula kintu. ¹² Muhumisi jwa tsanganiko ni had̯i awe muyume jwa muke mumodza, na eyenaweza kuwasumamia wanawe na nyumbaye urembo. ¹³ Hawaḍe wahumisi wa matsanganiko wadzeohenda kazi nyema, wanadzipatia hila kahi ya Wakirist̯o wenzao, na wanaweza kunena pfasipfo oga dzuu ya hivi wamuhikiziyevyo Kirist̯o Yesu. ¹⁴ Hivi nivyokukworeani hi hii ḅaruwa, nyakuyoweeyani kwamba nidzakudza nidze huonane si hat̯a kae. ¹⁵ Ela ikiwa kwamba nikawa kudza, hi ḅaruwa inakumanyisa hivi hwivyonamala kudzihwaa kuzimuni mwa tsanganiko ḍya wantu wa huyu Muungu eye mojo. Hiḍi tsanganiko ndiḍyo hi nguzo na musinji wa faro ya Kikirist̯o. ¹⁶ Na ya kwamba hi ngadzi ye faro yehu ni nkuu, hayo hayo ntaya kajela. Kirist̯o kadza lumwenguni dza mwanaad̯amu, na kayanganywa ni huyu Ruhu kwamba ni muhachi. Kaonegwa ni malaika, na nsumwiizi dzuuye zisumwiijwa kwa vyeet̯i vingine vyonse. Kahikizwa ni wantu wa lumwengu yuzima, na kahwajwa kwenda kwa Muungu mbinguni dzuu.

¹ Huyu Ruhu Mudheru kavinena wazi wazi tswee, ya kwamba, nsiku za mwiso, wantu wangine wadzaiyatsa faro ya Kikirist̯o; wadzakaiya kuuḅa ruhu zizonanena nsuwe na mayongweezo ya Shaat̯ani. ² Haya haya mayongweezo yanayawa na kwa makulekule ya wantu wansuwe, weo na akili zifwiyezo dza kwamba zitsiizwa na vyuma vya moho, koro ntawawezi kuhambuya mema wala mazuka. ³ Hawa hawa wantu wanayongweeza wantu ya kwamba ntawa ruhusa ya kuhwaa wake ambu kuḍya vyakuḍya aina nsiku. Ela Muungu kaumba hivi vyakuḍya vyonse hupate kuviḍya. Naswi hwiwo wahikiza na humanyiyeo hi hachi ni kuviḍya ḅaad̯a ya mayombo ya ḍuḍa kwa Muungu. ⁴ Koro kula cha Muungu aumbiyecho ni chema. Ntaku ruhusa ya kintu cha kudzizigwa, ela kula kintu ni kupfokejwa kwa mayombo ya ḍuḍa. ⁵ Kwa dzambo ḍya kwamba, hichi chuuwo cha Muungu na haya mayombo, yanavihendeza viwe vidheru. ⁶ Haya mambo ukiyawambia hawa wahikiza wenziwo, unawa muhumisi mwema jwa Kirist̯o Yesu, afalijwe kiruhu kwa mayongweezo ya faro ya Kikirist̯o na mayongweezo mema ugijiyeo kuuḅa. ⁷ Ela nkudzokaiye kusikiiya ngano za nsuwe za kilumwengu. Ishinu dziyongweeze kuishi maisha ya kimuungu. ⁸ Mazowezi ya mwii yana maana, kwa dzambo ḍya kwamba yanaungiza nguvu hu mwii. Ela mazowezi ya kiruhu yana maana zaid̯i, koro yanayeha faiḍa kwa haya haya maisha ye saasambi na kwa maisha yadzeyokudza. ⁹ Hivi vyuuwo nineneyevyo ni vyuuwo vya ḍugha vivyonamala kuhikizwa tswee. ¹⁰ Ndiyo maana hwiyokumuud̯amani na kuhenda kazi na hiḍu kwa kwamba hwakudzimukwat̯yani Muungu eye mojo. Jeje ndiye mupfonya jwa wantu wonse, na haswa jwa hawaḍe wahikiziyeo. ¹¹ Wapfe hawa wantu hizi amuri na uyawayongweeze haya mambo. ¹² Nkudzowayatse wantu wakubalife kwa dzambo ḍya kwamba u mwana, ela ikaa dza mufaano kwa hawa wahikiza, kwa kunena kwako, t̯aḅia yako, matsakoyo, na kwa kuhikizika kwako na uishi maisha yasiyo alano. ¹³ Gija kuḍisomea hiḍi tsanganiko haya matsoro madheru, ukiḍifunda na kuḍiyongweeza, hat̯a nidzepfokudza. ¹⁴ Nkudzoyatse kuitumia hi t̯ola ya Ruhu upfegejweyo. Hi hii t̯ola iyanganywa hapfaḍe pfa hawa manabii wepfot̯aḅiri na hawa wazee wepfokupfaza mikono. ¹⁵ Henda haya mambo, na nkudzotsoke kuyahenda ili kwamba wantu wonse wapate kuona kwenda usoni kwa hi kazi yako. ¹⁶ Dzit̯unze mwenye, Timoteo, na uyat̯unze haya mayongweezoyo. Ukigija kuhenda hivi, unadzipfonya wewe na hawa weonakusikiiya.

¹ Nkudzomubuse muntu mukuu, ela nena nae na umpowe dza kwamba kwakunenani na babajo. Hawa wayume waḍoḍo wahwae dza wanduguzo, ² hawa wake wazee uwahwae dza wamamazo, na hawa wake waḍoḍo wahwae dza waimbuzo pfasipfo kuwa na mat̯aro mazuka nao. ³ Wapfe ugijo wake wachiwa weo wachiwa hachi! ⁴ Ela ikiwa kwamba muke muchiwa ana wana ambu wadzukuu, wao ni had̯i nguzi wadziyongweeze kuit̯unza hi nyumba yao kwa kumushooga Muungu. Na kwe hi namuna wanawagalichia ḍuḍa wavyazi wao na wabibi zao, koro ndivyo vya Muungu evyonatsaka. ⁵ Huyu muke eye muke muchiwa jwa ḍugha, asiye muntu jwa kumut̯unza, madzikwat̯yo yakwe kayaweka kwa Muungu. Siku na musikahi anagija kumuyomba Muungu na kumulacha ugijo. ⁶ Ela muke muchiwa adzingizie maisha ya kudzitsekeza, huyo kesakufwa, hat̯a ingawa kakuishini. ⁷ Wapfe hi hii amuri ili kwamba kutseewa na muntu jwa kuwaona na tsowa. ⁸ Ela muntu akitsawat̯unza hawa wantu eo na yuuko nao, na fat̯i wantu wa nyumbani mwao, huyo kesakuikana hi faro ya Kikirist̯o na kakuhendekani viwi kuchia muntu asiyedzahikiza. ⁹ Muke muchiwa jwa kungizwa kwa hi orodha ya wake wachiwa wa tsanganiko, ni huyuḍe t̯u eye na myaka miyongo mihandahu na zaid̯i. Na ni had̯i awe ewa kahwajwa mweedha mumodza t̯u. ¹⁰ Na ni had̯i awe muke amanyikaniye kwa mahendoye mema, dza mahendo ya kuyeya wanawe urembo, kukaraḅisha wageni nyumbani mwakwe, kukosa maguu ya wantu wa Muungu, kugija wantu weo d̯inani, na kudziyavya kuhendea wantu kula aina ya hendo dzema. ¹¹ Ela wake wachiwa weo nsii ya myaka miyongo mihandahu, namutsewangiza humu mwa hi orodha ya wake wachiwa wa tsanganiko. Koro hamu zao za kimwii zikiwanjia, wadzat̯amani kuhwajwa. Ndookomu wanamuyatsa Kirist̯o, ¹² na wanapata hukumu kwa kuvunza ahad̯i yao wawekeyeo kwa Kirist̯o. ¹³ Na kawii wanadziyongweeza kudzikaiya ḅasi na kutsumpa-tsumpa huku na huku, wakinjia na kuyawa madzumba ya wantu. Na si hivyo t̯u, ela wanadziyongweeza na kuwa wantu wa nyano na vitsampizi, wakinjiiya mambo yasiyowamala. ¹⁴ D̯ubva, ami nindetsaka hawa wake wachiwa waḍoḍo wahwajwe kawii, wavyae wana na wat̯unze madzumba yao, wapate kutsawapfa nyabva wehu kapfango ka kuhunenea mazuka. ¹⁵ Koro wake wachiwa wangine wesakuperuka na wakumuuḅani Shaat̯ani. ¹⁶ Muke Mukirist̯o yuḍejwonse, nyumbani mwao kukiwa wake wachiwa, ni had̯i awat̯unze. Hu muzigo nka ruhusa ya kuupfaza tsanganiko, ili kwamba hiḍi tsanganiko ḍipate kuwat̯unza hawa wake wachiwa wasio na wantu t̯u. ¹⁷ Hawa wazee weonahenda kazi nyema ya uyongozi, na haswa hawaḍe weonasumwiiya na kuyongweeza na hiḍu, wanamala kuhilwa na kuipfwa urembo. ¹⁸ Koro haya matsoro yamba, “Nkudzoifunge kanwa ngombe ikwakukuvuniani bvaro.” Na “Kula muhenda kazi anamala t̯ubvoḍye.” ¹⁹ Nkudzosikiiye masit̯aki yaḍeyonse dzuu ya muzee, lamud̯a yawe yayehegwa ni mashaahiḍi wawii ambu wahahu. ²⁰ Ela hawa wazee weonahenda nabvise, wabuse wekeani tswee, ili hawa wangine nao wanjie oga. ²¹ Nyakukuamuruni usoni kwa Muungu, usoni kwa Kirist̯o Yesu na kwa malaika wadheru, uzigije hizi amuri pfasipfo kuyatsa hat̯a modza. Na wala nkudzohende mambo kimwana abo na kimwana ano. ²² Nkudzorebve kumupfaza muntu mikono umuvodhye kwa kazi ya Ḅwana. Nkudzouwe na mukuruḅa na nabvise za wantu wangine, dziweke udheruni. ²³ Nkudzokaiye kunwa madzi ḅasi, ela ikaa na kunwa mvinyo kachuchu kachuchu kwa dzambo ḍya hiḍi humboḍyo, koro u muntu jwa kujwaa kut̯wa. ²⁴ Nabvise za wantu wangine zinaonekana tswee tswee, na zinawayanga wantu wazi kwamba hawa hawa wantu wadzahukumigwa. Ela nabvise za wantu wangine zinadzifitsa zikaonekana mwisoni. ²⁵ Vivyo, mahendo mema yanaonekana tswee tswee, na hat̯a hayaḍe yasiyoonekana tswee tswee, mwisowe ntayakudzafitsika.

¹ Hawaḍe Wakirist̯o wonse weo wahumwa, ni kuwahila maḅwana zao na kula njia. Ni wahende hivi, ili kutseewa na muntu jwa kumunenea mazuka Muungu ambu haya mayongweezo yehu ya Kikirist̯o. ² Na hawaḍe wahumwa weo na maḅwana Wakirist̯o, ni kutsawanyira, at̯i kwa dzambo ḍya kwamba wonse ni wandugu. Ishinu, ni wawahumikie urembo zaid̯i, kwa kwamba hawa maḅwana zao, weokufaiḍikani na hi kazi yao, ni watsakwa wenzao sarini mwa Kirist̯o. Ni had̯i uwayongweeze na kuwafunda hawa wantu, dzuu ya haya mambo haya. ³ Muntu yuḍejwonse eyenayongweeza mayongweezo ya nsuwe na asiyehikiza hivi vyuuwo vya hachi vya Ḅwana jwehu Yesu Kirist̯o, na eyenadziza haya mayongweezo yehu ya Kikirist̯o, ⁴ huyo kanjijwa ni kudziona na nka kintu amanyiyecho. Muntu dzae, ana yutsamutsamu yuzuka jwa kuheha na kuḍaat̯iana na wantu. Na hivi vinayeha kufwiana ḍea, kutsowana, kutsolana-tsolana, kukajelana kuzuka ⁵ na kuḍaat̯iana kusikosia. Haya yonse yanayawana na wantu weo na akili zifwiyezo na wasioimanya hi hachi. Wanat̯ara hat̯a ya kwamba ḍini ni njia ya kumuhendeza muntu awe jabva. ⁶ Gula kumuyomba Muungu na hachi kunamuhendeza muntu kuwa jabva ḍugha, ikiwa kwamba kat̯oseka na hivi evyonavyo. ⁷ Koro hwipfovyajwa ntahukuvyajwa na kintu, na hat̯a hukifwa, ntahufwe na kiḍechonse. ⁸ D̯ubva ikiwa kwamba huna chakuḍya na nguo, nahufurume nevyo hivyo. ⁹ Ela wantu weokutsakani kuwa majabva, wananjia maḍemoni, Shaat̯ani akawagiza. Anawagiza na hamu nyinji na nyinji nzuka nzuka na za uḍyura, zizonawangiza mananzini na kunangwani-nangwani. ¹⁰ Koro tsako ḍya kutsaka fwedha, ndiḍyo sina ḍya kula aina ya mazuka. Wantu wangine wapfajwa ni mwori wa kulacha fwedha mumpaka waiyekeza hi faro yao na mwiso wadzingiza sia ya mojo. ¹¹ Ela wewe Timoteo, wiye muntu jwa Muungu, dzit̯anye na hayo hayo mambo yonse. Jwania kuwa muntu jwa kuhenda miro ya Muungu. Jwania kuwa muntu mudheru, muntu jwa faro, muntu jwa matsako, muntu jwa kuit̯isa, na muntu mumpowe. ¹² Dza vya muntu jwa mbio evyonamuud̯ama akiwa kud̯aramani, nawe henda mala wiyonaweza uwe Mukirist̯o wiyenahikizika, upate kupata t̯ubvo ḍya maisha ya kuunga na yuungo. Koro ndiyo maisha ya Muungu akuhaniiyeyo, wipfot̯ima faro yako usoni ya mashaahiḍi wenji na wenji. ¹³ Na nyakukuamuruni usoni kwa Muungu, eyenapfa viumbe vyonse maisha, na usoni ya Kirist̯o Yesu, ayaviye ushuhuḍa wa hachi usoni ya Pontio Pilato: ¹⁴ Igije na kuit̯ii hi amuri pfasipfo kut̯et̯eleka mumpaka nsiku ya Ḅwana jwehu Yesu Kirist̯o adzepfouja. ¹⁵ Kuujakwe, kudzayehegwa ni Muungu, kwa wakatiwe mwenye. Jeje ni Muungu jwa marembo na ndiye jeje heket̯u eyenat̯awala, koro ni Haju jwa mahaju na Ḅwana jwa maḅwana. ¹⁶ Jeje heket̯u ndiye eyenaishi maishi. Anaishi kwiko muyanga usioweza kufikika hafufi. Ntaku muntu amuoneye wala adzeyeweza kumuona. Jeje napfegwe shad̯u na agije kut̯awala hat̯a pfasipfosia! Amina. ¹⁷ Waamuru hawaḍe weo majabva huju huju lumwengu, watsedziona na wala watsedzikwat̯ya hu huu ujabva usiwo maana. Ishinu nawadzimukwat̯ye Muungu, eye mubalicha jwa kuhupfa kula kintu cha kuhutsekeza. ¹⁸ Waamuru wahende mema, wawe majabva wa mahendo mema, wawe wabalicha na wawe wantu wa kugeana wevyonavyo. ¹⁹ Kwe hi namuna wanadziwekea nkandi idzeyowa musinji wa nguvu wa maisha yadzeyokudza. Na ndipfo wadzepfodzipatia maisha ya ḍugha. ²⁰ Timoteo, yat̯unze haya uyapfegejweyo kuyat̯unza. Dzit̯anye na vyuuwo vya kilumwengu na yuḍaat̯o jwa uḍyura, jwa wantu wangine wejonajuhana “umanyi,” kimatsowa. ²¹ Koro wangine wao wambiyeo wana hu huu umanyi, mwiso waiyekeza hi faro yao. T̯ei ya Muungu naiwe pfamodza nanywi nyonse.