1 Pet̯ero

¹ Mimi Pet̯ero niiye ntumi jwa Yesu Kirist̯o, nyakumworeani nywinywi wantu wonse wa Muungu mwiwokukaani nsi garagara za ugenini, za Ponto, Galatia, Kapadokia, Asia na Bitinia. ² Muungu Baba jwehu kamutsana hangu kae, na mut̯engwa ni Ruhu jwakwe. Nanywi mumut̯ii Yesu Kirist̯o nae kamudheresa na mwaziwe. Muungu namuvodhye na kumumpa nagheaye kwa winji. ³ Nahumuyavizeni ḍuḍa Muungu, eye Baba jwa Ḅwana jwehu Yesu Kirist̯o; koro kahufwiya t̯ei muno, hat̯a kahupfa maisha mapfya. Kwa dzambo ḍya kwamba kamufufuya Yesu Kirist̯o kuyawa kwa wafu, kahupfa madzikwat̯yo makuu. ⁴ Ndookomu hwakuindiiyani kupfokea hizi mvoni za Muungu aziwawekeeyezo wantuwe. Kazihuwekea mbinguni, pfantu zisipfowowa, wala kunangika, nolawe kujara. ⁵ Kwa dzambo ḍya kumuserefat̯a kwenu, Muungu kakumwamiani na uwezowe, hat̯a saa kudzepfokudza hu mupfonyo wiwo hafufi kuyanganywa kwenu ngera za mwiso. ⁶ Kwa dzambo ḍyevihivi, tsekeani muno ingawa hi saasambi ni had̯i mupatwe ni kula namuna ya maḍemo kwa muḍa. ⁷ Haya maḍemo yadza t̯u, kuzipima hizi faro zenu kuyanga kwamba mumuserefat̯a Muungu ḍugha. Dza vya dhahaḅu ivyonapimwa na kudhereswa na moho, ndivyo vya faro zenu zivyokupimwani na kudhereswa, kuchiiya na kwa haya maḍemo. Na faro zenu kwa Muungu zina thamani kuchia dhahaḅu ambayo nsiku modza idzanangwa. Ndookomu ikiwa kwamba faro zenu zionegwa kwamba ni karit̯u, mudzapata shad̯u, marembo na hila nkuu, nsiku ya Yesu Kirist̯o adzeyokudza. ⁸ Ingawa ntamukumuona Yesu na matso, mumutsaka. Na ingawa hi hii saasambi ntamukwakumuonani, mumuhikiza. Mwakutsekeani na tsaiko kuu muno, ḍisiḍyoweza hat̯a kuneneka, ⁹ koro mwakupfokeani t̯ubvo ḍya kuhikiza kwenu kwa kupata mupfonyo wenu. ¹⁰ Dzuu yohuu mupfonyo, hawa manabii wat̯aḅiriyeo dzuu ya hi t̯ei ya Muungu idzeyokudza kwenu, ¹¹ walacha na kut̯apakura na hiḍu dzuu ya hiḍi hiḍi dzambo. Walacha kumanya kwamba ni muntu ga ambu ni ngera ga, za ayu Ruhu jwa Kirist̯o ezoakinena, epfoakiwamba wat̯aḅiri dzuu ya d̯ina adzezokunta Kirist̯o, na maremboni adzemonjia ḅaad̯aye. ¹² Muungu kawapfenuiya hawa manabii kwamba haya haya mambo ntayakwakuhendeka ngera zao, ela yadzahendeka ngera zenu. Na sasa, haya Maagu Mema yesakusumwiijwa kwenu ni wantu wayongowejweo ni Ruhu Mudheru asusijwe na yuwinguni. Haya ni mambo ambayo kwamba hat̯a malaika wakuyakamiani wayamanye. ¹³ D̯ubva pfenuyani matso muyat̯ariye haya haya urembo, na madzikwat̯yo yenu yonse yawe kwa hi t̯ei mudzeyofwijwa ni Yesu Kirist̯o, adzepfokudza. ¹⁴ Wani wana wat̯iifu kwa Muungu. Na mahendo yenu nayatset̯awaligwa ni hiziḍe t̯amaa mwizokuwa nazo musidzaimanya hi hachi. ¹⁵ Ishinu nanywi, wani wadheru kwa kula njia dza hiviḍe vya huyu amuhaniye aivyo mudheru. ¹⁶ Koro haya matsoro yamba, “Wani wadheru kwa kwamba mimi ni mudheru.” ¹⁷ Muungu anahukumu kula muntu kuuḅana na mahendoye pfasipfo kumuhendea kind̯eḍi. D̯ubva ikiwa kwamba Muungu munakaa na kumuhana Baba, ḅasi ni had̯i hapfa lumwenguni mwipfokukaani dza wageni, muishi kwa kumuhila. ¹⁸ Mumanya kwamba muipfijwa rando mupate kuwa huru kuyawana na haya mambo yasiyo maana muyaḍaliyeyo kuyawa kwa wabibi zenu. Ntamukugujwa na vija vivyonanangika dza fwedha ambu dhahaḅu, ¹⁹ ela mugujwa na mwazi wa thamani wa Kirist̯o, wiwo dza mwazi wa mvuugiya ya mwanambuzi asiye na kapet̯a wala t̯amba. ²⁰ Eetsanwa ni Muungu hangu kae, kaḅila kuumbwa kwa lumwengu, ela kayanganywa hizi hizi ngera za mwiso kwa dzambo ḍyenu. ²¹ Na kuchiiya na kwa Kirist̯o, mumuserefat̯a Muungu. Jeje ndiye amufufwiiye Kirist̯o kuyawa kwa wafu akimumpa marembo, ili nanywi muwe na faro na madzikwat̯yo kwa Muungu. ²² Na sasa, kwa dzambo muit̯ii hi hachi, mudhereswa kuyawana na nabvise zenu, na muwatsaka na mojo hawa wahikiza wenzenu. D̯ubva tsakanani na mojo ḍugha, ²³ koro mumaavyajwa yupfii, kuchiiya na kwa chuuwo cha Muungu, chichonapfa wantu maisha ya kuunga na yuungo. Huku kuvyajwa kwenu yupfii si kuvyajwa kimwii ni benaad̯amu hat̯a, ela ni kuvyajwa kiruhu kuchiiya na kwa chuuwo cha Muungu chichonakaa maishi. ²⁴ Dza vya matsoro yaneneyevyo yakyamba, “Wanaad̯amu wonse waa dza mani, na rembo ḍyao ḍyonse ḍyaa dza kiyuwa. Mani yananyuuka, na kiyuwa kinaharachaa, ²⁵ Ela chuuwo cha Muungu kinakaa maishi.” Na hichi ndicho chuuwo kisumwiijwecho kwenu.

¹ D̯ubva, dzikanyeni na kula namuna ya mazuka. Dzikanyeni na makulekule na umbiimbii, na muyatse nyano na kufwiyana ḍea. ² Kamiani kuḍya chakuḍya cha kiruhu dza hiviḍe vya wana vilelehea wevyonakamia kununa, ili kwamba mugije kukuya kiruhu; ³ koro mumaut̯at̯a wema wa Ḅwana. ⁴ Kirist̯o ka dza iwe muhimu ḍya mwiso ḍya kumbakia Hekalu ya Muungu. Katsanigwa dza iwe ḍya thamani ḍya kumbakia ela wantu waḍidziza. Kenge nywinywi nzoni kwakwe. ⁵ Nanywi wani dza mawe ya maana ya kumbakia Hekalu ya kiruhu, ili muwe wakohani wa kuyavya mvuugiya za kiruhu, zizonakuḅaligwa ni Muungu kuchiiya na kwa Yesu Kirist̯o. ⁶ Koro haya matsoro yamba, “T̯ayowa, nyakuwekani iwe ḍya musinji mudzini Sayuni. Ni iwe muhimu ḍya thamani niḍitsaniyeḍyo. Na yuḍejwonse amuhikiziye huyu eye dza iwe, nkanagizwa yutswa meshi.” ⁷ Huyu eye dza iwe ḍya musinji, njwa thamani kwenu nywinywi mumuhikiziyeo. Ela kwa hawaḍe wasiomuhikiza, haya matsoro yamba, “Hiḍi iwe ḍidzizijweḍyo ni wambaka, ndiḍyo ḍigaliyeḍyo iwe muhimu ḍya kumbakia.” ⁸ Na kawii yamba, “Ni iwe ḍiḍyonahendeza wantu wakolasike wagwe.” Wanakolasika, koro ntawat̯ii chuuwo cha Muungu, ndookomu Muungu kawapangia kwamba wakolasike na kugwa dzevihivi. ⁹ Kenge nywinywi mu kyeet̯i kidheru cha wantu watsanijweo ni Muungu. Kamuyavya kizani kamungiza muyangani muwe wakohani wa hila nkuu, ili muweze kulalabva haya mafara yakwe ya kumakisa. ¹⁰ Kae ntamwiiwa wantu wa Muungu, ela sasa mumaawa wantu wa Muungu. Kae ntamwiimanya t̯ei ya Muungu, kenge sasa mumapata t̯eiye. ¹¹ Wandugu zangu mwiwokukaani dza wageni humu lumwenguni, nyakumuyombani mudzichinge na t̯amaa nzuka nzuka za kimwii zizokujwanani na hizi ruhu zenu kut̯wa. ¹² Ikaani na t̯aḅia nyema kahi ya hawa walumwengu, ili kwamba hat̯a wakimunenea mazuka, wayaone haya mahendo yenu mema na waweze kumushad̯a Muungu nsiku adzeyokudza. ¹³ Dziwekeni nsii ya kula mukuu, koro ndivyo vya Ḅwana evyonatsaka muhende. Mut̯iini huyu haju mukuu ¹⁴ pfamodza na hawa maliwali awekeyeo kuwakuzya hawaḍe weonahenda mema na kuwahukumu hawaḍe weonahenda mazuka. ¹⁵ Koro miro ya Muungu ni kwamba, mukihenda mema, munawasumisa hawa wantu maḍyura weonadzibobochea vyuuwo ḅasi pfasipfo kuimuka. ¹⁶ Ikaani dza wantu weo huru. Ela namutseutumia hu uhuru wenu kuhenda mazuka; kenge ikaani dza wahumisi wa Muungu. ¹⁷ Wahileni wantu wonse, na muwatsake hawa wahikiza wenzenu. Mushoogeni Muungu na mumuhile huyu haju. ¹⁸ Nanywi mwiwo wahumwa, wahileni hawa maḅwana wenu na kuwat̯ii. Namutsewahila na kuwat̯ii hawaḍe maḅwana weo wema na wabalicha ḅasi, ela hat̯a hawaḍe weo wazuka. ¹⁹ Muungu anatsakizwa nanywi, ikiwa kwamba muit̯isa mad̯ina yasiyomumala kukunta, kwa dzambo ḍya kwamba muimanya miroye. ²⁰ Koro kuna d̯aha ga, muntu akibigwa kwa dzambo ḍya tsowa ahendeeḍyo ḍugha kisa akait̯isa? Ikiwa kwamba muntu kakunta d̯ina kwa dzambo ḍya kuhenda mema, na kait̯isa, Muungu anatsakizwa nae. ²¹ Muungu kamuhana muishi dzevihivi, koro hat̯a Kirist̯o kakuntiswa d̯ina kwa dzambo ḍyenu; akiyanga mufaano ili nanywi mumugwe mongo. ²² Jeje nka nabvise ahendeeyo, na wala ntaku hat̯a nsiku modza akuliyeokuliyeo muntu. ²³ Epfotsolwa, nkakwambukuya na kitsolo; na epfokuntiswa d̯ina nkakuwakakat̯ia wantu mazuka, ela kadzimukwat̯ya Muungu t̯u, eyenahukumu na hachi. ²⁴ Jeje mwenye kazipfagaaza nabvise zehu mwiini mwakwe epfofwa hapfaḍe muhini mwa mpatsa, ili kwamba hutseewa wahumwa wa nabvise kawii, ela huishi udheruni. Kwa kumad̯aiswa kwakwe hupata kupfowa. ²⁵ Koro mwiiwa dza mbuzi ziariyezo, ela sasa mumagala kwa huyu Mut̯ikisa eyenazit̯ikisa hizi ruhu zenu.

¹ Dza vivyo, nywinywi wake, ni had̯i mudziweke nsii ya mamulaka ya wayume wenu, hat̯a ikiwa kwamba wangine wao si wahikiza wa chuuwo cha Muungu. Koro wakiona namuna mwiivyo kukaani nao na hila na kuwahendea mahendo mema, wananuhika kuwa wahikiza, hat̯a pfasipfo nywinywi kuwambukuya chuuwo. ³ Namutsekaiya kudzirembosa hi mii yenu kwa kusuka nywii, na kuvwaa nguo nyema nyema ambu kudzifayat̯a na vija vya dhahaḅu. ⁴ Ela rembo ḍyenu naḍiwe kuzimu ya myojo yenu. Naḍiwe rembo ḍisiḍyosia, ḍya myojo mimpowe na iingamaiyeyo, iyo ya thamani nkuu usoni kwa Muungu. ⁵ Koro hawa wake wadheru wa kae wadzimukwat̯iyeo Muungu, wekidzirembosa kwa kuwat̯ii woome zao. ⁶ Hat̯a Sara ewa dzevihivi. Kamuhila Iburahimu hat̯a ekimuhana “Ḅwana jwangu.” Nanywi yeo, ikiwa kwamba muhenda hachi pfasipfo kushooga kiḍechonse, munawa dzae. ⁷ Nywinywi wayume nanywi, ikaani na umpowe na wakazenu, mukimanya kwamba wake ni viumbe vidhaifu. Wahileni, koro hi t̯ola ya Muungu ya maisha ya kuunga na yuungo, wanaipfokea pfamodza nanywi. Mukikaa nao dza hivi, ntakuwe na kiḍechonse cha kut̯iidhya mayombo yenu kusikijwa. ⁸ Mwiso nyakumwambiani nywinywi nyonse mwiwo Wakirist̯o, ikaiyanani urembo, mukifwiyana t̯ei na kutsakana dza ndugu. Wani wampowe kahi yenu nywinywi na nywinywi. ⁹ Muntu akikuhendea dzambo zuka, simugalichizie dzambo zuka. Akikutsola, simugalichizie kitsolo; ishinu muvodhye, koro ndivyo vya Muungu evyonatsaka. Mukihenda hivi, Muungu anamuvodhya. ¹⁰ Dza vya matsoro yaneneyevyo yakyamba, “Yuḍejwonse atsakiye kuḍya raha wa maisha, na kuishi maisha ya tsekea, ni had̯i adzikanye kunena mazuka, na ayatse kunena nsuwe. ¹¹ Ni had̯i ayatse kuhenda mazuka na ahende mambo mema. Ni had̯i alache naghea na ailache na hiḍu. ¹² Koro matso ya Ḅwana yanawaona hawaḍe weo wadheru, na masikiyoye yanasikia mayombo yao. Ela weonahenda mazuka jeje anat̯aragiana nao.” ¹³ D̯ubva, ikiwa kwamba meshi munakamia kuhenda mema, ni ga jwa kumudhuru? ¹⁴ Kenge hat̯a ikiwa kwamba mukuntiswa d̯ina kwa dzambo ḍya kuhenda mema, tsekeani muno! Namutseshooga kiḍechonse, nolawe kuhangaika myojoni mwenu. ¹⁵ Ishinu muhileni Kirist̯o koro ndiye huyu Ḅwana jwenu. Saa zonse wani t̯ayari kumusumwiiya muntu yuḍejwonse adzeemuuza dzuu ya haya madzikwat̯yo yenu mwiyonayo. ¹⁶ Ela viwambieni na umpowe na kwa njia ya hila. Ni had̯i mukimanya mwichokuhendani ili kwamba kwa dzambo ḍya t̯aḅia zenu nyema za Kikirist̯o, muwagize yutswa hawaḍe weonamunenea mazuka. ¹⁷ Koro ikiwa kwamba ni miro ya Muungu kwamba mukunte d̯ina, d̯ubva ni heri kukunta d̯ina kwa dzambo ḍya kuhenda mema, kuliko kukunta d̯ina kwa dzambo ḍya kuhenda mazuka. ¹⁸ Koro Kirist̯o mwenye, kafwa mweedha mumodza t̯u kwa dzambo ḍya wanabvise. Jeje eye muhachi kafwa kwa dzambo ḍya wantu wasikwaa wahachi. Kahenda hivi ili aweze kumuyeha kwa Muungu. Wamuyaga hu mwii, ela kafufuka, na ruhuye yaa mojo. ¹⁹ Na kwa umboḍye ḍya kiruhu, kenda kazilalabvia ruhu zifungijwezo gerenzani. ²⁰ Hizi ziwa ni ruhu za hawaḍe wadziziyeo kumut̯ii Muungu hangu kae, ngera za Nuhu. Nuhu epfoakielekanya hi safina, Muungu kawaindiiya muno wapfyehuze mama wapfone. Ela wantu wanjiiyeo humu safinani wewa ni wanane t̯u, nao ndiwo wapfoneyeo na hi zuruwa. ²¹ Haya madzi ye zuruwa yayanga mufaano wa kut̯opyegwa kwenu kwa hizi hizi ngera. Kut̯opyegwa si kudheresa nongo ḍya mwii hat̯a; ela ni hukuḍe kuahid̯i na mojo mumodza kudziyavya kwa Muungu. Huku kut̯opyegwa kunamupfonya kuchiiya na kufufuka kwa Yesu Kirist̯o. ²² Kirist̯o kenda mbinguni na kakaa mukono kuyume wa hila wa Muungu. Ana mamulaka dzuu ya malaika wonse na nguvu zonse za kiruhu zizo yuwinguni.

¹ D̯ubva, kwa dzambo Kirist̯o mwenye kakuntiswa d̯ina, ḅasi nanywi pia dziwekeni t̯ayari kukunta d̯ina; koro ikiwa kwamba mwaa t̯ayari kukuntiswa d̯ina kwa dzambo ḍya Kirist̯o, ḅasi muhuna kudzit̯anya na nabvise. ² Ndookomu ntamuwezi kuishi maisha ya kunuhwa ni t̯amaa za kibenaad̯amu kawii, ela munaishi maisha ya kuwa na hamu ya kuhenda miro ya Muungu. ³ Koro mukaa muḍa muyeya wa kut̯osa, mukihenda mambo ya kilumwengu. Muishi maisha ya uḅari, t̯amaa, kuruma na kuhenda jila za ranga na t̯aḅia nzuka za kuyomba masanamu. ⁴ Na sasa hawa walumwengu wakumakani, wakimuona kwamba ntamukwakugijanani nao na kuhenda haya mambo mazuka mazuka weyonahenda; ndookomu wanjia kumutsezeani. ⁵ Ela idzawamala kudzihehea usoni kwa Muungu eye t̯ayari kuwahukumu weo mojo na wafwiyeo. ⁶ Koro ndiyo maana haya Maagu Mema yasumwiijwa hat̯a kwa hawaḍe wafwiyeo kae, ili kwamba ingawa mii yao ifwa, ela ruhu zao ziweze kuishi dza vya Muungu evyokuishini. ⁷ Mwiso wa lumwengu umaawa hafufi. Ndookomu ni had̯i muzigwaze akili zenu na muwe wantu wa kudzimiza ili muweze kukaa na kuyomba. ⁸ Zaid̯i ya vyonse, tsakanani na mojo, koro matsako yanayeha mayatsiyo ya nabvise nyinji. ⁹ Karaḅishanani madzumbani mwenu na myojo misafi, pfasipfo kuḅugumiana. ¹⁰ Kula mumodza ni had̯i awahumikie wangine na haya mat̯ola ya kiruhu apfegejweyo ni Muungu. Haya haya mat̯ola garagara muyapfokeeyo kwa t̯eiye ni had̯i muyatumie urembo. ¹¹ Muntu akiwa na t̯ola ya kunena vyuuwo vya Muungu, ni had̯i akivinena dza vyuuwo viyawiyevyo kwa Muungu. Muntu akiwa na t̯ola ya uhumisi, ni had̯i ahumike na hizi nguvu apfegejwezo ni Muungu. Na kwa hayo yonse, Muungu mwenye nguvu na uwezo, apate kushad̯wa kuchiiya na kwa Yesu Kirist̯o hat̯a pfasipfosia. Amina. ¹² Wandugu zangu watsakwa, namutsemaka dza kwamba haya mad̯ina mwiyokukuntani mwakuhendekejwani ni dzambo geni. ¹³ Ishinu tsekeani kwamba nanywi mwakuyakuntani haya mad̯ina ya Kirist̯o akuntiyeyo, ili kwamba nanywi mudzae tsekea, ngera adzeyokudza na maremboye. ¹⁴ Munapata mvoni iyodze, mukitsolwa kwa dzambo ḍya kumuhikiza Kirist̯o, koro Ruhu ya marembo ya Muungu yaa pfamodza nanywi! ¹⁵ Mukwakukuntiswani d̯ina, ntamu ruhusa ya kukuntiswa d̯ina kwa dzambo ḍya uyaji, wivi, kuvunza sharia, ambu untuntu. ¹⁶ Na wala muntu akwakukuntiswani d̯ina kwa dzambo ḍya kuwa Mukirist̯o, natseona yutswa. Ishinu namushad̯e Muungu kwa dzambo ḍya kuwa Mukirist̯o. ¹⁷ Koro ngera ya hukumu imafika, na hawa wantu wa Muungu ndiwo wa kuḍabva kuhukumigwa d̯ura. D̯ubva ikiwa kwamba ijwakuḍabva naswi, au mwiso unawadze kwa hawaḍe wasiohikiza aya Maagu Mema ya Muungu? ¹⁸ Dza vya matsoro yaneneyevyo yakyamba, “Ikiwa kwamba wadheru t̯u, wanapfona na mbaa na mojo, ehe fat̯i wanabvise na wasiomuhila Muungu wanawa ku?” ¹⁹ D̯ubva ikiwa kwamba Muungu kaona vyema kwamba mukunte d̯ina, ḅasi gijani kuhenda yeyo ya hachi na kumuserefat̯a jeje, koro ndiye amuumbiye, nae ni muhikizika.

¹ D̯ubva nyakumuusiani nywinywi wazee wa matsanganiko, nikimufunda dza muzee mwenzenu, na ninkiwa dza shaahiḍi jwa mad̯ina ya Kirist̯o akuntiyeyo. Na kawii nyakumuusiani ninkiwa dza mumodza jwa hawaḍe wakupfokea haya marembo ya Ḅwana yadzeyoyanganywa ngera adzeyokudza. ² Wani wat̯ikisa wa hu mwona wa Muungu auyatsiyeo mikononi mwenu. Namutseut̯ikisa dza kwamba mwakusharut̯iswani, ela ut̯ikiseni na hiari yenu, dza vya Muungu evyonatsaka. Hi kazi yenu namutseihenda kwa dzambo ḍya kupata fwedha, ela ihendeni na mojo kindindi wa kutsaka kuhumika. ³ Namutsedzihendeza wakuu kwa hawaḍe weo nsii yenu, kenge uyangeni hu mwona mufaano mwema wa maisha ya Kikirist̯o. ⁴ Makisa ngera ya huyu Mut̯ikisa Mukuu adzeyokudza, munapfegwa t̯ubvo ḍya d̯aha ḍisiḍyonangika maishi. ⁵ Nanywi wayume waḍoḍo ni had̯i muwat̯ii hawa wazee wenu. Na nyonse ni had̯i muwe wampowe, mukihumikiana nywinywi na nywinywi. Koro matsoro yamba, “Muungu anawafwia t̯ei hawaḍe weo wampowe, ela wavikodzo anat̯aragiana nao.” ⁶ D̯ubva wani wampowe mukidziweka nsii ya mamulaka ya Muungu, ili kwamba ngeraye ikifika, nae anamukuzya. ⁷ Na mirumiru zenu zonse zimuyatsieni jeje, koro ndiye eyenamumuud̯amia. ⁸ Pfyenuyani matso na muchimize! Koro huyu nyabva jwenu, Shaat̯ani, kakuzingani dza nsimba eyekuvumiizani, akilacha muntu jwa kumuḍya. ⁹ D̯ubva zigijeni faro zenu muno, na mut̯aragiane nae; mukimanya ya kwamba hat̯a hawa wahikiza wenzenu wa lumwengu yuzima, nao wakukuntanani nezihizi d̯ina mwizokukuntani nywinywi. ¹⁰ Muungu kamufwiya t̯ei kuchiiya na kwa Kirist̯o na kamuhana munjie maremboni mwakwe mudzemokaa maishi. Mukisa kukunta d̯ina kwa kat̯emo kachuchu, kadzamuhwaa na kumumbaka kipfya, kadzamut̯aragisa na kumukomeza faroni, na kumungiza nguvu kawii. ¹¹ Muungu ndiye mwenye uwezo wonse, sasa na hat̯a pfasipfosia. Amina. ¹² Nyakumworeani hi hii ḅaruwa mfufi kwa ugijo wa Sila, nimuserefat̯ie dza ndugu. Nyakumworeani kumungiza mojo na nikishuhuḍia kwamba haya ndiyo matsako ya ḍugha ya Muungu. D̯ubva yagijeni na nguvu. ¹³ Pfokeani kedhya kuyawa kwa imbu ḍyenu, tsanganiko ḍya Babeli, ḍitsanijweḍyo ni Muungu dzanywi. Marko eye muurani wangu jwa kiruhu nae pia kamukedhya nto. ¹⁴ Kedhyanani na matsako ya Kikirist̯o. Naghea gulufu naiwe kwenu nyonse mumuhikiziyeo Kirist̯o.