TAETAS

TAETAS

¹ Mi Pol, mi wakaman blong God an aposol blong Jisas Kraes. Hemi sendem mi fo helpem olketa pipol wea God hemi siusim finis, mekem olketa biliv long hem an savegud long tru toktok. Tru toktok ya hemi mekem yumi falom laef wea hemi stret long ae blong God. ² Tru toktok ya hemi abaotem laef wea hemi no save finis. Yumi weitem disfala laef bikos God hu hemi no save laea hemi promisim finis taem hemi no mekem disfala wol yet. ³ An long barava taem blong hem, hemi somaot klia disfala toktok blong hem long Gudnius. God hu hemi sevem yumi, hem nao hemi talem mi fo talemaot disfala Gudnius long evriwan. ⁴ Mi raet go long yu Taetas. Yu barava olsem san blong mi long Kristin biliv blong yumi. Letem kaenfala lav an piis blong God Dadi blong yumi an Jisas Kraes Sevia blong yumi, hemi stap wetem yu. ⁵ Mi letem yu stap long aelan long Krit, mekem yu stretem samfala waka wea yumi no finisim yet. Yu mas siusim samfala man fo kamap lida insaet sios long evri taon, olsem mi talem yu finis. ⁶ No enisamting mas rong long laef blong lida long sios an hemi mas garem wanfala waef nomoa. Olketa pikinini blong hem mas biliv long Jisas Kraes. An olketa ya mas no bikhed an mas no falom ravis wei. ⁷ Man hu hemi lida long sios hemi lukaftarem waka blong God. Dastawe nao laef blong hem mas stret gudfala. Hemi mas no bikhed an hemi mas no kros kuiktaem. Hemi mas no dring tumas, an hemi mas no man fo faet, an hemi mas no aftarem seleni. ⁸ Bat lida long sios mas lukaftarem gud olketa pipol hu i kam long ples blong hem. An hemi mas laekem gudfala wei, an hemi mas kontrolem kros blong hem. Laef blong hem mas stret, an hemi mas falom wei blong God an hemi mas kontrolem hem seleva. ⁹ Hemi mas holemstrong disfala tru tising wea yumi bin tisim hem. Sapos olsem, lida ya bae hemi fit fo tisim olketa pipol abaotem disfala tru tising, mekem tingting blong olketa kamap strong moa. An bae hemi save somaot tu olketa rong blong olketa pipol hu i agensim tru tising. ¹⁰ Yu save, plande pipol hu i stap wetem yufala i agensim disfala tru tising. Plande long olketa nao i olsem. Man fo toktok nating, an man fo laea. Kaen man ya hemi plande long grup blong olketa hu i sei evriwan mas kate. ¹¹ Yu mas stopem olketa laea tisa olsem bikos olketa gohed fo spoelem finis biliv blong samfala famili. Olketa gohed fo tisim pipol long diskaen rong tising, mekem olketa save tekem plande seleni fo olketa seleva nomoa. ¹² An nomata wanfala profet blong olketa pipol long Krit, hemi bin toktru taem hemi sei, “Olketa pipol long Krit, i pipol fo laea nomoa. Olketa save les tumas, an save kaikai bik tumas. Olketa i olsem wael animol nomoa.” ¹³ So yu mas tokhad long olketa laea tisa ya, mekem olketa biliv moa long disfala tru tising. ¹⁴ An tokhad long olketa mekem olketa no falom laea kastom stori blong olketa Jiu an toktok blong olketa hu i agensim finis tru toktok. ¹⁵ Man wea tingting blong hem hemi klin gud, hemi tingse evrisamting hemi klin an fit fo yusim. Bat eniwan wea tingting blong hem hemi no klin an no biliv long God, hemi tingse no enisamting nao hemi klin. Bikos maen blong hem an tingting blong hem hemi nogud finis. ¹⁶ Nomata hemi talem hemi barava save long God, wei blong hem hemi somaot dat hemi nating save long God. Olketa pipol olsem, i barava nogud tumas an nating wiling fo obeim God an olketa no save duim eni gud samting.

¹ Bat yu Taetas, yu mas tisim olketa pipol abaotem gudfala wei wea hemi falom stretfala tising blong God. ² Olketa oloman mas save hao fo lukaftarem olketa seleva gud an hao fo kontrolem olketa seleva, an olketa mas somaot barava gudfala wei long laef blong olketa. Biliv blong olketa mas stret gudfala, an olketa mas barava lavem pipol an stanap strong long hadtaem. ³ Yu mas tisim tu olketa olowoman fo gohed long gudfala wei, olsem wea hemi fitim olketa Kristin. Olketa mas no tokspoelem pipol, an mas no dringim tumas waen, bat olketa mas tisim olketa pipol abaotem gudfala wei. ⁴ Olketa mas tisim olketa yangwoman fo lavem hasban an pikinini blong olketa, ⁵ an fo somaot gudfala wei long laef. Olketa olowoman mas tisim olketa yangwoman fo kipim wei blong olketa klin an fo lukaftarem gud famili an fo obeim hasban blong olketa. Olketa yangwoman mas duim olsem, mekem no eniwan hemi tokspoelem toktok blong God. ⁶ Yu mas tisim olketa yangman fo somaot gudfala wei long laef blong olketa. ⁷ Yu Taetas, yu mas somaot gudfala wei long olketa, mekem olketa save falom yu. An tising blong yu mas stret oltaem, mekem olketa pipol save tinghevi long hem. ⁸ Yu mas talem tru samting nomoa mekem pipol no save lukim enisamting rong long hem. Olsem nao bae olketa enemi i filsem taem olketa no save talem eni nogud samting agensim yumi. ⁹ Yu mas tisim olketa wakaman fo obeim bos blong olketa. Olketa mas duim evri waka wea hemi mekem bos hapi, an mas no tokbaek agensim olketa ¹⁰ an no stilim enisamting blong olketa. Bat olketa mas duim evri gudfala samting olowe, mekem bos blong olketa save trastem olketa. So long evri gudfala samting wea olketa wakaman i duim, bae olketa mekem pipol wande falom tising abaotem God hu hemi Sevia blong yumi. ¹¹ Yumi mas duim olsem, bikos God hemi somaot finis kaenfala lav blong hem fo sevem evri pipol long wol. ¹² Kaenfala lav blong God ya, hemi tisim yumi fo lusim olketa wei wea hemi no stret long ae blong God, an fo no falom olketa ravis tingting blong disfala wol. Yumi mas somaot barava gudfala wei long laef blong yumi, an yumi mas duim evrisamting wea hemi stret an hemi mekem God hapi long yumi. ¹³ Yumi mas gohed olsem taem yumi weitem yet datfala De wea yumi biliv bae hemi kam. Long datfala De, Jisas Kraes hu hemi bikfala God an Sevia blong yumi, bae hemi kambaek wetem saen blong bikfala paoa blong hem. ¹⁴ Jisas Kraes hemi letem hem seleva fo dae fo sensim yumi an peimaot yumi evriwan from evri sin blong yumi. Hemi mekem laef blong yumi barava klin, mekem yumi kamap pipol blong hem an barava wande duim evri gud samting. ¹⁵ Oltaem yu mas tisim olketa pipol abaotem evrisamting mi tokabaotem. Yu mas yusim evri paoa wea yu garem fo strongim tingting blong olketa an fo tokhad long olketa taem olketa no falom toktok ya. Nogud nao samfala man save tingdaonem yu.

¹ Yu mas talem gud long evri Kristin fo tinghae long olketa bikman long gavman an olketa narafala bikman moa. Olketa mas obeim olketa, an mas redi nomoa fo duim enikaen gudfala waka. ² An olketa mas no tok nogud agensim eniwan, an mas no raoa. Bat olketa mas kaen an frengud long evriwan. ³ Long bifoa, Seitan hemi laea long yumi tu, an yumi nating tingting stret an no wiling fo obeim eniwan. Long taem ya, enikaen samting wea yumi seleva laekem tumas nomoa, hemi bosim yumi. An enikaen samting wea yumi filgud tumas long hem, hemi bosim yumi tu. An laef blong yumi hemi somaot enikaen joles an ravis wei long nara pipol. Olketa save heitem yumi, an yumi tu bin heitem olketa. ⁴ Bat nomata olsem, God hu hemi Sevia blong yumi, hemi duim diswan taem hemi somaot lav an wei blong hem fo kaen long evriwan. ⁵ Hemi no sevem yumi bikos yumi bin duim eni gudfala samting. !Nomoa ya! Hemi bin sevem yumi bikos hem seleva nomoa hemi sore an kaen long yumi. Holi Spirit nao hemi mekem yumi klin so yumi save bon moa, an Holi Spirit hemi mekem yumi garem niu laef. ⁶ Ya, from waka blong Jisas Kraes hu hemi Sevia blong yumi, Holi Spirit nao, God hemi givim kam fri long yumi, ⁷ mekem yumi save kasem disfala tru laef wea hemi no save finis. Yumi save kasem disfala laef wea yumi barava biliv long hem, bikos God hemi kaen tumas long yumi an hemi mekem yumi kamap stret long ae blong hem. ⁸ Disfala toktok hemi barava tru tumas. Mi laekem yu fo gohed strong fo talemaot olketa tising olsem, mekem olketa pipol hu i biliv long God olketa save gohed olowe fo duim evri gud samting. Olketa samting wea hemi gud olsem, hemi save helpem evri pipol. ⁹ Bat yu mas tanem baeksaet long enikaen krangge toktok, an long olketa stori abaotem olketa laen blong olketa olo long bifoa, an long enikaen faet o raoa abaotem mining blong Lo blong Mosis. Olketa toktok olsem hemi no garem eni gud samting long hem, an hemi nating save helpem eniwan. ¹⁰ Yu mas trae fo stretem eniwan hu hemi tisim pipol abaotem samting wea hemi mekem olketa raoa an divaed olobaot. Sapos yu wonem hem tufala taem finis, bat hemi no wiling fo obeim yu, yu mas tanem baeksaet long hem. ¹¹ Yumi save, kaen man olsem hemi lusim finis tru tising. An olketa nogud samting wea hemi gohed fo duim, hem nao hemi somaot dat hemi rong tumas. ¹² Nao long taem wea bae mi sendem Atemas o Tikikas go kasem yu, yu mas traehad fo kam lukim mi long taon long Nikopolis. Long taon ya nao mi tingting fo go stap long hem long taem blong raf si. ¹³ An yu mas traehad fo helpem Apolos an disfala loea ya Sinas. Yu mas meksua tufala no sot long enisamting wea tufala nidim long gogo blong tufala. ¹⁴ Olketa Kristin fren blong yumi, olketa mas lanem wei fo duim gudfala waka, mekem olketa save helpem narafala pipol hu i sot long enisamting. Nogud olketa les fo duim olketa gudfala waka. ¹⁵ Evri Kristin wea mifala stap long hia, olketa talem go halo long yu. Plis talem halo go long olketa gudfala Kristin fren hu i lavem mifala. Letem kaenfala lav blong God hemi stap wetem yufala evriwan.