ROM

ROM

¹ Mi Pol, wakaman blong Jisas Kraes. God hemi kolem mi fo kamap aposol, an hemi siusim mi fo talemaot Gudnius blong hem. ² Disfala Gudnius ya God hemi promisim kam bifoa, wea olketa profet i raetemdaon insaet long Buktambu. ³ Gudnius ya hemi abaotem San blong hem, Jisas Kraes Masta blong yumi. Hemi barava man hu hemi bon kam long laen blong King Deved. ⁴ An Holi Spirit hemi somaot klia dat Jisas hemi barava San blong God, bikos God hemi mekem hem laefbaek moa long bikfala paoa blong hem. ⁵ Long nem blong Kraes nao mi tekem disfala blesing blong God, wea hemi mekem mi waka olsem aposol fo kolem olketa pipol long evri kantri fo bilivim an obeim hem. ⁶ An yufala long Rom, God bin kolem yufala tu fo falom Jisas Kraes. ⁷ Mi raet go long yufala evriwan hu i stap long Rom, wea God hemi lavem an kolem yufala fo stap olsem pipol blong hem. Letem kaenfala lav an piis blong God Dadi blong yumi an Jisas Kraes Masta blong yumi, hemi stap wetem yufala. ⁸ Fastaem, mi laek fo talem dat nius abaotem wei wea yufala biliv long God hemi kasem evri ples nao. So long nem blong Jisas Kraes mi toktengkiu long God fo yufala. ⁹ Mi waka fo God wetem evri tingting blong mi, fo talemaot Gudnius abaotem San blong hem. An God hemi save, mi tingim yufala oltaem long prea blong mi. ¹⁰ Mi prea wea sapos hemi stret long tingting blong God, hemi mas helpem mi fo kam kasem yufala. ¹¹ Bikos longtaem nao mi laekem tumas fo lukim yufala, mekem mi save searem go spesol paoa blong Holi Spirit long yufala, mekem biliv blong yufala hemi strong. ¹² Wanem mi minim nao hemi olsem, biliv blong yufala bae hemi save helpem mi fo gohed strong, an biliv blong mi bae hemi save helpem yufala fo gohed strong tu. ¹³ Olketa Kristin fren, mi laekem yufala fo save dat plande taem nao mi tingting fo kam long yufala, bat kam kasem distaem, samting hemi stopem mi fo duim. Long plande ples nao mi helpem olketa pipol fo biliv long God finis, an mi laek fo duim diswan long ples blong yufala tu. ¹⁴ Mi mas helpem evri pipol, nomata olketa stap long taon o olketa stap long bus, nomata olketa skul gud o olketa no skul. ¹⁵ Dastawe nao mi laekem tumas fo talemaot tu disfala Gudnius long yufala hu i stap long Rom. ¹⁶ Mi nating filsem long disfala Gudnius, bikos hem ya nao paoa blong God fo sevem evriwan hu i biliv long hem. Fastaem, olketa Jiu nao i herem, an bihaen nao, olketa pipol hu i no Jiu herem tu. ¹⁷ Gudnius ya, hemi somaot disfala wei wea God hemi mekem olketa pipol stret long ae blong hem. Disfala wei nao hemi stat long biliv an hemi finis long biliv tu. Olsem hemi talem finis insaet long Buktambu, “Man hu hemi biliv, bae hemi stret long ae blong God an bae hemi garem tru laef.” ¹⁸ God hemi somaot dat kros blong hem bae hemi kamdaon from heven. Bae hemi panisim olketa pipol hu i agensim hem an duim enikaen ravis samting. Bikos diskaen nogud wei blong olketa hemi stopem tru toktok blong God. ¹⁹ Bae hemi panisim olketa, bikos olketa save finis abaotem wei blong hem olsem evri pipol i save. Bikos God nao hemi somaot diswan klia finis long olketa. ²⁰ Stat kam taem God hemi mekem disfala wol, olketa samting long wei blong God wea yumi no save lukim, olketa kamaot klia long olketa samting wea hemi mekem finis. Olsem, yumi save dat hem nao hemi tru God an hemi garem paoa wea hemi stap olowe. Dastawe nao olketa pipol kanot sei wea olketa no save long olketa samting ya. ²¹ Bat nomata olketa save finis long God, olketa nating mekhae long hem olsem God, an olketa nating toktengkiu long hem. !Nomoa ya! No eni gud samting nao hemi stap insaet long tingting blong olketa, an maen blong olketa hemi barava tudak. ²² Nomata olketa sei olketa waes tumas, bat olketa krangge finis. ²³ Olketa lusim finis disfala wei fo mekhae long God hu hemi laef olowe. An olketa wakem olketa kaving wea i luk olsem man, an olketa wakem olketa kaving wea i luk olsem bed an snek an enikaen animol moa, an gohed fo wosipim olketa. ²⁴ Dastawe nao God hemi letem olketa fo falom olketa ravis tingting hemi stap insaet long maen blong olketa. So olketa gohed fo durong olobaot an fo spoelem bodi blong olketa seleva. ²⁵ Olketa les fo biliv moa long disfala tru toktok abaotem God, an olketa bilivim nomoa olketa laea toktok. Olketa gohed fo wosipim an mekhae long olketa samting wea God hemi mekem, bat olketa fogetem nao God hu hemi mekem evrisamting ya. Bat evriwan mas preisim God olowe. Amen. ²⁶ From disfala wei ya nao, God hemi letem olketa fo duim olketa ravis samting falom tingting blong olketa seleva. Nomata olketa woman, olketa durong olobaot nomoa wetem olketa seleva. ²⁷ Long sem wei tu, olketa man i lusim barava wei fo slip wetem olketa woman, an olketa laekem tumas nomoa fo durong olobaot wetem olketa seleva. Olketa man ya i barava duim olketa rong samting long olketa seleva, so God hemi panisim olketa, falom olketa ravis samting wea olketa duim. ²⁸ An bikos olketa les fo save long God, God hemi letem olketa fo falom nomoa ravis tingting blong olketa seleva, an olketa duim nomoa olketa samting wea no fit fo pipol i duim. ²⁹ Olketa fulap long enikaen ravis wei, an olketa laekem evrisamting fo olketa seleva nomoa, an olketa save spoelem olketa pipol. Olketa joles tumas, an olketa kilim dae nara pipol, an olketa raoa nomoa, an olketa save trikim evriwan, an olketa tingnogud oltaem abaotem nara pipol, an olketa gosip abaotem nara pipol. ³⁰ Olketa tokspoelem nara pipol, an olketa heitem God, an olketa spoelem nem blong nara man, an olketa praod tumas, an olketa tinghae long olketa seleva nomoa. Olketa save tingabaotem enikaen wei fo duim olketa ravis samting, an olketa nating obeim mami an dadi blong olketa. ³¹ Olketa nating garem gudfala tingting, an olketa save raverave nomoa, an olketa no save kaen, an olketa no filsore long eniwan. ³² Olketa save finis wea stretfala toktok blong God hemi sei olketa pipol hu i duim olketa samting olsem, hemi fit fo olketa dae nomoa. Bat nomata olsem, olketa gohed nomoa fo duim olketa samting ya, an olketa hapi tu long olketa nara pipol hu i duim semsamting.

¹ Yufala hu i jajem olketa nara pipol, yufala no save talem enisamting nao. Taem yufala jajem olketa nara man, yufala jajem yufala seleva nomoa, bikos yufala tu duim olketa semsamting. ² Yumi save, God hemi duim stret samting taem hemi jajem olketa pipol hu i duim olketa samting olsem. ³ !Bat yufala tu, yufala gohed fo duim olketa semsamting wea yufala jajem nara pipol long hem! ?Waswe, yufala tingse bae God hemi no panisim yufala? ⁴ Ating yufala tingdaonem nomoa wei blong God, wea hemi barava kaen tumas an hemi no save kros kuiktaem, an hemi save gohed fo weit nomoa. ?Waswe, yufala no luksave nomoa wea God hemi kaen tumas, bikos hemi laekem yufala fo lusim olketa ravis wei blong yufala? ⁵ Bat yufala bikhed tumas an yufala no wande sensim nomoa tingting blong yufala. So yufala mekem panis blong yufala hemi kamap bikfala moa, an bae hemi kasem yufala long datfala de wea God bae hemi somaot kros blong hem an stretfala wei blong hem fo jajem evriwan. ⁶ Bae God hemi peimbaek evri pipol falom wanem nao olketa duim. ⁷ Olketa pipol hu i gohed fo duim gudfala waka fo mekem God hemi mekhae long nem blong olketa an tinghae long olketa an mekem olketa no save dae, olketa ya nao bae God hemi givim disfala tru laef wea hemi no save finis. ⁸ Bat olketa pipol hu i tingim olketa seleva nomoa, an olketa no laekem wanem hemi barava tru, bat olketa falom nomoa olketa ravis wei, olketa ya nao bae God hemi barava kros long olketa an panisim olketa. ⁹ Evri pipol hu i duim olketa ravis samting nao, bae samting nogud hemi kasem olketa an bae olketa filpein. Diswan bae hemi hapen fastaem long olketa Jiu, an bae hemi hapen tu long olketa pipol hu i no Jiu. ¹⁰ Bat evri pipol hu i duim olketa gud samting, bae God hemi mekhae long nem blong olketa an tinghae long olketa an givim piis long olketa. Diswan bae hemi hapen fastaem long olketa Jiu, an bae hemi hapen tu long olketa pipol hu i no Jiu. ¹¹ Bikos God hemi no save fevarem eniwan. ¹² Evri pipol hu i garem Lo blong Mosis, Lo nao bae hemi jajem olketa from sin blong olketa. An evri pipol hu i no garem Lo blong Mosis, olketa tu bae i barava lus from sin blong olketa, nomata olketa no garem Lo ya. ¹³ Olketa pipol hu i lisin nating long Lo ya, olketa no save stret long ae blong God. Bat olketa pipol hu i obeim Lo ya nao, bae God hemi mekem olketa stret long ae blong hem. ¹⁴ Olketa pipol hu i no Jiu, olketa no garem Lo blong Mosis. Bat taem olketa ya i falom tingting wea hemi semsem wetem wanem Lo blong Mosis hemi talem, hemi klia nao wea olketa garem lo long tingting blong olketa, nomata olketa no save long Lo blong Mosis. ¹⁵ Diswan hemi somaot wanem Lo hemi talem, hemi stap finis insaet long haat blong olketa. An gudfala tingting blong olketa ya hemi somaot diswan tu. Tingting blong olketa hemi mekem olketa save wanem olketa duim hemi stret o hemi no stret. ¹⁶ An falom wanem mi talemaot long Gudnius, bae diswan hemi hapen long de wea God hemi jajem wanem hemi staphaed insaet long haat blong pipol. Bae hemi givim paoa long Jisas Kraes fo jajem evriwan. ¹⁷ ?Nao waswe long yufala olketa pipol blong Jiu? Yufala trastem tumas Lo an praod bikos yufala blong God. ¹⁸ Yufala save long tingting blong God, an yufala save long olketa samting wea hemi stret, bikos Lo nao hemi talem yufala. ¹⁹ Yufala tingse yufala nao save lidim olketa blaen pipol, an yufala olsem wanfala lam fo olketa pipol hu i stap long dak ples. ²⁰ An yufala tingse yufala nao tisa blong olketa krangge pipol an olketa hu i no garem gudfala save. Yufala tingse long Lo nao yufala garem evri save an evri tru toktok. ²¹ ?Sapos yufala tisim olketa nara pipol olsem, waswe nao yufala no save tisim yufala seleva? Yufala talem olketa pipol fo no stil, bat yufala seleva duim nomoa. ²² Yufala talem olketa fo no brekem lo blong marit, bat yufala seleva duim nomoa. Yufala barava no laekem olketa laea god, bat yufala save stil long tambuhaos blong olketa. ²³ Yufala tokpraod tumas bikos yufala garem Lo blong God, bat yufala lukdaon long hem taem yufala brekem Lo ya. ²⁴ Insaet long Buktambu hemi sei, “Bikos yufala Jiu duim olketa rong samting, olketa pipol hu i no Jiu save tokspoelem nem blong God.” ²⁵ Disfala wei fo mekem olketa boe fo kate hemi garem mining sapos yufala barava falom wanem Lo hemi talem. Bat sapos yufala brekem Lo, diskaen wei fo kate hemi no garem eni mining nomoa. ²⁶ An olketa pipol hu i no Jiu an no garem disfala kastom fo kate, sapos olketa falom lo blong God, bae God hemi lukim olsem olketa kate finis. ²⁷ An olketa hu i falom wanem Lo hemi talem, nomata olketa no barava kate long bodi, wei blong olketa nao bae jajem yufala, bikos nomata yufala garem Lo long Buk an nomata yufala kate, yufala gohed nomoa fo brekem Lo. ²⁸ Sapos man hemi Jiu long nem nomoa, hemi no barava man blong Jiu nao. An wei fo kate, hemi no samting blong aotsaet long bodi nomoa. ²⁹ Barava man blong Jiu nao, hemi mas Jiu insaet long maen blong hem, an hemi minim haat blong man ya hemi sens. Diswan hemi no kamaot long Lo long Buk, bat Spirit blong God nao hemi duim diswan. An God nao hemi tokhae long man olsem, bat olketa pipol no tokhae long man ya.

¹ ?Waswe nao hemi moabeta fo stap olsem wanfala man blong Jiu? ?An watkaen gudfala samting nao save kamaot long disfala kastom fo kate? ² !Oo plande gudfala samting ya! Nambawan samting nao hemi olsem, God bin givim kam olketa toktok blong hem long olketa Jiu fo lukaftarem. ³ An nomata samfala long olketa no falom disfala toktok, bat hemi no minim God hemi lusim promis blong hem. ⁴ !Nomoa ya! Nomata evri pipol save laea, wanem God hemi talem hemi barava tru, olsem Buktambu hemi sei, “Bae olketa pipol luksave dat toktok blong yu hemi stret tumas, an bae yu win long evritaem olketa tekem yu long kot.” ⁵ ?Waswe sapos nogud wei blong yumi hemi save somaot klia moa wea God nao hemi stret? ?Waswe, bae yumi tingim God hemi olsem wanfala man nomoa, mekem yumi sei hem nao hemi rong taem hemi panisim yumi? ⁶ !Nomoa ya, hemi nating tru! ?Sapos God hemi no stret, hao nao bae hemi save jajem disfala wol? ⁷ ?Waswe, sapos wei blong mi fo laea hemi mekem klia moa disfala tru toktok blong God, an hemi mekem pipol fo mekhae long God bikfala moa? ?Sapos hemi tru, waswe nao God hemi jajem mi from sin blong mi? ⁸ ?An waswe nao yumi no sei nomoa, “Yumi mas gohed fo duim olketa ravis samting, mekem gud samting kamap?” Diskaen toktok hemi nogud tumas. Bat samfala pipol nao olketa tokspoelem mi, an sei mi nao mi talem disfala samting ya. Hemi stret nomoa fo God hemi panisim olketa from diswan. ⁹ ?So wanem nao yumi save talem? ?Waswe, yumi olketa Jiu nao yumi gudfala moa winim olketa nara pipol? !Nomoa ya! Mi talemaot finis nao wea olketa Jiu an olketa pipol hu i no Jiu, tingting fo duim enikaen ravis samting hemi bosim evriwan. ¹⁰ Buktambu hemi talem finis, “Evri nogud pipol nomoa i stap, an olketa gohed fo duim evri ravis samting. ¹¹ No eniwan luksave long wanem hemi stret, an no eniwan tinghae long God. ¹² Evriwan i go rong finis nao, an olketa evriwan nomoa i nogud. No eniwan long olketa, hemi duim eni gud samting. ¹³ Wanem olketa talem, pipol i save dae long hem, enikaen laea nomoa hemi kam long tang blong olketa, an olketa ravis toktok olsem poesen blong snek hemi kamaot long maos blong olketa. ¹⁴ Maos blong olketa hemi fulap long olketa nogud toktok fo spoelem pipol. ¹⁵ Olketa kuik tumas fo kilim pipol dae, ¹⁶ an long evri ples olketa save spoelem pipol an mekem olketa filpein. ¹⁷ Olketa nating save nomoa long wei blong piis, ¹⁸ an olketa no save tinghae long God.” ¹⁹ Yumi save finis nao, wanem Lo hemi talem hemi talem long evri pipol hu i stap andanit long Lo ya. Dastawe nao no eniwan save sei hemi no rong, bat God bae hemi jajem evriwan long disfala wol. ²⁰ No eniwan save stret long ae blong God from hemi falom Lo nomoa. Bikos Lo ya, hemi mekem yumi luksave nomoa long sin blong yumi. ²¹ No eniwan save kamap stret bikos hemi obeim Lo, bat distaem nao God hemi somaot deferen wei fo mekem pipol stret long ae blong hem. Lo blong Mosis an olketa profet nao bin tokabaotem diswan. ²² God seleva nao hemi mekem olketa pipol hu i biliv, fo olketa stret long ae blong hem. Diswan hemi duim long evriwan hu i biliv long Jisas Kraes. An no enisamting nomoa hemi deferen long olketa pipol ya, ²³ bikos evriwan olketa stap long wei blong sin, an stap farawe long God hu hemi garem paoa fo givim niu laef. ²⁴ Bat long kaenfala lav blong God hemi mekem olketa kamap stret. An olketa no duim enisamting fo kamap olsem, bat God nao hemi duim fri bikos Jisas Kraes hemi mekem olketa stret long ae blong hem. ²⁵ God hemi givim kam Jisas fo dae olsem wanfala sakrifaes fo finisim sin, an from diswan nao God hemi save fogivim sin blong evri pipol hu i biliv long Jisas. God hemi duim diswan fo somaot hemi stret tumas. God hemi wiling fo weit nomoa an hemi no kuiktaem fo panisim pipol from sin blong olketa long bifoa. ²⁶ Bat distaem hemi somaot stretfala wei blong hem, an bikos hemi stret hemi mekem evri pipol hu i biliv long Jisas fo stret long ae blong hem. ²⁷ ?So wa nem nao y umi save tokpraod long hem? !No enisamting nao! ?Waswe, from yumi falom Lo nao yumi save tokpraod? Nomoa ya, bat bikos yumi biliv nomoa. ²⁸ Yumi save finis nao dat yumi save stret long ae blong God from yumi biliv nomoa, an i no from yumi falom Lo ya. ²⁹ ?Waswe, God hemi God blong olketa Jiu nomoa? !Nomoa ya! Hemi God blong olketa pipol hu i no Jiu tu, ³⁰ bikos wanfala God nomoa hemi stap. An evriwan hu i biliv, nomata olketa Jiu o olketa no Jiu, bae hemi mekem olketa evriwan fo stret long ae blong hem. ³¹ ?Bikos yumi biliv nao, waswe, yumi save fogetem Lo? Nomoa ya, taem yumi biliv yumi mekem Lo hem strong go moa.

¹ ?Wanem nao yumi save talem abaotem laef blong Ebraham, olo blong yumi olketa Jiu? ² Sapos God hemi mekem Ebraham kamap stret from olketa gudfala waka wea hemi duim, hemi garem samting fo praod long hem. Bat nomoa. Hemi no save praod long ae blong God. ³ Bikos Buktambu hemi talem olsem, “Ebraham hemi biliv long God, an bikos hemi biliv olsem, God hemi lukim hem olsem wanfala stretfala man.” ⁴ Taem eniwan waka, hemi no tekem wejis blong hem olsem presen, bat hemi tekem wejis from waka wea hemi duim. ⁵ Nomata man hemi no waka fo kamap stret, bat hemi biliv nomoa long God hu hemi save mekem nogud pipol fo kamap stret, bae God hemi helpem hem. From hemi biliv nao, bae God hemi lukim hem olsem wanfala stretfala man. ⁶ Deved hemi talem semsamting. Hemi tokabaotem olketa pipol hu i hapi tumas bikos God nao hemi lukim olketa olsem stretfala pipol, nomata olketa duim gudfala waka o nomoa. ⁷ Deved hemi tok olsem, “Olketa pipol wea God hemi fogivim rong blong olketa, an hemi finisim sin blong olketa, olketa save hapi tumas. ⁸ Man wea God hemi no save tingim moa sin blong hem, hemi save hapi tumas ya.” ⁹ ?Waswe, diskaen wei fo stap hapi, hemi fo olketa Jiu hu i kate nomoa? !Nomoa ya! Hemi fo evri pipol, nomata olketa no garem disfala kastom fo kate. Yumi lukim finis long Buktambu wea hemi sei, “Ebraham hemi biliv long God, an bikos hemi biliv olsem, God hemi lukim hem olsem wanfala stretfala man.” ¹⁰ ?Long wataem nao God hemi lukim hem olsem stretfala man? ?Long taem hemi no kate yet o long taem hemi kate finis? God hemi duim diswan taem Ebraham hemi no kate yet. ¹¹ Long taem Ebraham hemi no kate yet, hemi biliv long God, an God hemi lukim hem olsem stretfala man. An bihaen, hemi tekem disfala mak blong kate wea hemi saen blong stretfala man. So Ebraham hemi olsem nambawan olo blong evri pipol hu i no kate bat olketa biliv long God, bikos God hemi lukim olketa olsem stretfala pipol. ¹² An Ebraham hemi olo blong yumi olketa Jiu tu hu i kate, sapos biliv blong yumi hemi olsem biliv blong hem taem hemi no kate yet. ¹³ God hemi promisim Ebraham an olketa laen blong hem bihaen, dat disfala wol bae hemi blong olketa. Bat God hemi no mekem promis ya bikos Ebraham hemi duim wanem Lo hemi talem. Nomoa. Hemi bikos Ebraham hemi biliv long God, an God hemi lukim hem olsem stretfala man. ¹⁴ Sapos God hemi givim promis ya long pipol hu i duim wanem Lo hemi talem nomoa, hemi minim disfala biliv long God hemi samting nating nomoa ya. An sapos olsem, disfala promis ya hemi samting nating tu. ¹⁵ Lo nao hemi mekem God fo somaot kros blong hem. Bat sapos no eni lo hemi stap, bae olketa pipol no save brekem eni lo tu. ¹⁶ Dastawe disfala promis hemi kam long saet blong biliv nomoa, mekem hemi samting God hemi givim fri nomoa. An promis ya hemi save kasem evriwan hu i long laen blong Ebraham. Hemi no blong olketa pipol hu i falom Lo blong Mosis, bat hemi blong evriwan hu i biliv long God olsem Ebraham. Bikos hem ya nao olo blong yumi evriwan, ¹⁷ olsem God hemi talem long Buktambu, “Mi mekem yu kamap olo blong olketa pipol long plande ples.” So long ae blong disfala God hu Ebraham hemi biliv long hem, disfala promis hemi tru nao. Hem nao God hu hemi givim laef long olketa pipol hu i dae finis, an hu hemi save mekem enisamting wea i no stap bifoa fo olketa i stap. ¹⁸ Ebraham hemi gohed fo biliv long God an trastem hem fo duim wanem hemi promisim, nomata disfala samting ya hemi luk had tumas fo kamtru. Dastawe nao God hemi mekem hem fo olo blong olketa pipol long plande ples, olsem hemi talem insaet long Buktambu, “Bae olketa pipol long laen blong yu, bae olketa staka fogud olsem olketa sta ya.” ¹⁹ Ebraham hemi kolsap kasem 100 yia, wea bodi blong hem olsem hemi dae finis, an waef blong hem Sera no save garem eni pikinini. Bat nomata Ebraham lukim diswan, hemi no wikdaon long biliv blong hem. ²⁰ Taem hemi tingim promis blong God, hemi no lusim biliv an no garem tufala tingting long diswan, bat hemi kamap strong long biliv blong hem. Hemi mekhae long God ²¹ bikos hemi savegud dat God hemi save duim wanem hemi bin promisim. ²² “Dastawe nao God hemi lukim hem olsem stretfala man.” ²³ Disfala toktok ya, “hemi lukim hem olsem stretfala man,” hemi no fo Ebraham nomoa, ²⁴ bat hemi fo yumi tu. Yumi biliv long God hu hemi mekem Jisas Masta blong yumi fo laefbaek moa, an from diswan nao bae God hemi lukim yumi olsem stretfala pipol. ²⁵ God hemi givim kam Jisas fo dae fo finisim olketa sin blong yumi, an hemi mekem hem laefbaek moa fo mekem yumi stret long ae blong God.

¹ Bikos yumi biliv long God nao, hemi mekem yumi stret long ae blong hem. Dastawe Jisas Kraes Masta blong yumi, hemi mekem yumi stap long piis wetem God. ² An bikos yumi biliv, Kraes hemi mekem yumi save long kaenfala lav blong God wea yumi stap long hem distaem. An yumi hapi tumas dat yumi barava save dat bae yumi joen wetem God long heven. ³ An yumi hapi tu long olketa trabol blong yumi, bikos yumi save hemi mekem yumi fo stanap strong moa. ⁴ An taem yumi gohed fo stanap strong, God hemi save hapi long yumi. An hem nao mekem yumi biliv strong moa long promis blong hem. ⁵ An disfala biliv hemi no mekem yumi fo weit nating nomoa. Bikos God hemi somaot finis lav blong hem long yumi, wea hemi givim kam Holi Spirit long yumi. ⁶ Long barava taem wea God hemi siusim, Kraes hemi dae fo helpem yumi pipol blong sin, wea yumi nating save helpem yumi seleva. ⁷ Ating no eniwan hemi laek fo dae fo wanfala stretfala man, bat maet samwan hemi wiling fo dae fo wanfala gudfala man. ⁸ Bat God nao hemi barava somaot lav blong hem long yumi, wea Kraes hemi dae fo mekem yumi fri taem yumi pipol blong sin yet. ⁹ Blad blong Kraes hemi mekem yumi stret long ae blong God. So yumi savegud dat Kraes bae hemi sevem yumi taem God hemi somaot kros blong hem. ¹⁰ Fastaem, yumi stap olsem enemi blong God. Bat bikos San blong hem hemi dae, God hemi mekem yumi kamap fren blong hem finis. An yumi hu i stap fren wetem God finis, yumi savegud dat bikos Kraes hemi laef distaem, bae God hemi sevem yumi. ¹¹ An narasamting moa, bikos Jisas Kraes Masta blong yumi hemi mekem yumi stap fren wetem God finis, yumi save hapi tumas long God nao. ¹² Sin hemi kam insaet long wol falom rong blong wanfala man nomoa, an sin nao hemi mekem hem dae. An long sem wei nao, evri pipol mas dae bikos evriwan sin finis. ¹³ Sin hemi stap finis long wol bifoa God hemi givim Lo long Mosis. Bat God hemi no tingim olketa sin taem no eni Lo hemi stap yet. ¹⁴ Bat stat kam long taem blong Adam go kasem taem blong Mosis, evri pipol mas dae, nomata olketa no duim rong samting olsem Adam hu hemi no obeim toktok blong God. Adam hemi olsem piksa blong disfala man Kraes, hu hemi kam bihaen long hem. ¹⁵ Bat tufala i no barava wankaen, bikos sin blong Adam hemi no olsem disfala presen God hemi givim kam fri long yumi. Sin blong wanfala man hemi mekem evri pipol fo dae, bat kaenfala lav blong God an presen blong hem ya hemi bik samting moa. From kaenfala lav blong disfala wan man Jisas Kraes, God hemi givim kam presen long evri pipol. ¹⁶ An wanem hemi kamaot long sin blong Adam hemi no wankaen wetem wanem hemi kamaot long disfala presen blong God. Taem disfala wan man Adam hemi mekem sin, God hemi jajem hem an sei hemi barava rong. Bat long bihaen, taem olketa pipol i bin mekem plande sin finis, God hemi somaot kaenfala lav blong hem, wea hemi givim presen long olketa an lukim olketa olsem stretfala pipol nomoa. ¹⁷ Nao from sin blong disfala wan man Adam, evri pipol mas dae. Bat wanem God hemi duim from waka blong disfala wan man Jisas Kraes, hemi bikfala moa. God hu hemi kaen an lavem pipol tumas, bae hemi givim presen long olketa wea hemi mekem olketa stret long ae blong hem, an bae hemi mekem olketa stap strong long tru laef. ¹⁸ So from sin blong wan man nomoa, God hemi jajem evri pipol. An long sem wei tu, from stretfala wei blong wan man, God hemi mekem evri pipol fri an givim tru laef long olketa. ¹⁹ Bikos wan man hemi no obeim God, evri pipol stap long wei blong sin. An long sem wei tu, bikos wan man hemi obeim God, evri pipol bae olketa stret long ae blong hem. ²⁰ God hemi givim kam Lo mekem olketa pipol save dat olketa duim plande rong samting. Bat taem sin i kamap plande moa, kaenfala lav blong God hemi gohed bikfala moa winim sin ya. ²¹ So nomata sin blong olketa pipol i garem paoa fo kilim olketa dae, bat kaenfala lav blong God hemi garem moa paoa fo mekem evri pipol stret long ae blong hem. So God hemi mekem yumi fo garem laef wea hemi no save finis from waka blong Jisas Kraes Masta blong yumi.

¹ ?So wanem nao yumi save talem? ?Bae yumi gohed fo sin nomoa, mekem kaenfala lav blong God hemi gohed bikfala moa? ² !Nomoa ya! Hemi olsem yumi dae finis an lusim disfala wei blong sin. ?Sapos olsem, hao nao yumi save gohed yet fo stap long wei blong sin? ³ Ating yufala save finis wea yumi evriwan hu i baptaes an joen wetem Jisas Kraes finis, yumi joen wetem dae blong hem tu. ⁴ Taem yumi baptaes, hemi olsem yumi dae wetem hem an olketa berem yumi wetem hem finis. An yumi save laefbaek moa long sem wei wea Dadi God hemi mekem Kraes fo laefbaek moa long bikfala paoa blong hem. An from diswan nao, yumi tu stap long niu laef. ⁵ Bikos yumi joen wetem hem finis long dae blong hem, yumi save joen wetem hem tu long wei wea hemi laefbaek moa. ⁶ Yumi save, hemi olsem olketa nilam olfala laef blong yumi long kros wetem Kraes nao, mekem God hemi finisim paoa blong sin wea hemi stap long olfala laef blong yumi. Long wei ya nao sin hemi no save gohed fo bosim yumi. ⁷ Taem man hemi dae finis, hemi fri nao long paoa blong sin. ⁸ An bikos yumi dae finis wetem Kraes, yumi biliv dat bae yumi stap laef wetem hem tu. ⁹ Yumi save dat Kraes hemi laef baek finis an hemi no save dae moa. Dae hemi no garem paoa ovarem hem nao. ¹⁰ Taem hemi dae, hemi finisim paoa blong sin. An long laef blong hem, hemi stap laef tugeta wetem God. ¹¹ Long sem wei, yufala mas tingim dat yumi dae finis an lusim disfala wei blong sin. Bikos yufala joen wetem Jisas Kraes, sin hemi no garem paoa ovarem yufala, an yufala save stap laef wetem God. ¹² Yufala mas no letem sin fo bos ovarem bodi blong yufala wea hemi save dae. Nogud sin mekem yufala falom nomoa olketa ravis tingting blong yufala seleva. ¹³ An yufala mas no letem eni pat long bodi blong yufala fo gohed sin an duim olketa ravis samting. Yufala laefbaek finis from dae. So yufala mas givim yufala seleva long God, wea yufala mas givim evri pat long bodi blong yufala long God fo duim stretfala samting nomoa. ¹⁴ Sin hemi mas no bosim yufala moa, bikos yufala no stap andanit long Lo, bat yufala stap andanit long kaenfala lav blong God. ¹⁵ ?So wanem nao bae yumi duim distaem, wea yumi andanit long kaenfala lav blong God an yumi no andanit long Lo moa? ?Waswe, hemi oraet fo yumi gohed sin nomoa? !Nomoa ya! ¹⁶ Yufala save finis, taem yufala mekem yufala seleva fo obeim eniwan, bae hemi bosim yufala ya. Sapos yufala stap olsem wakaman blong sin, bae hemi mekem yufala fo dae. Sapos yufala stap olsem wakaman blong God fo obeim hem, bae hemi mekem yufala stret long ae blong hem. ¹⁷ Long bifoa, yufala ya wakaman blong sin, bat distaem, yufala barava falom nao olketa tru toktok wea olketa tisim yufala finis. !Yumi mas toktengkiu long God from diswan! ¹⁸ God hemi mekem yufala fri from paoa blong sin finis, an hemi mekem yufala kamap olketa wakaman fo duim wanem hemi stret. ¹⁹ Mi yusim disfala tokpiksa abaotem wakaman wea yufala evriwan save long hem, bikos yufala wik long tingting blong yufala. Long bifoa, yufala letem evri pat long bodi blong yufala fo stap wakaman blong olketa ravis wei, an enikaen rong samting moa. Bat distaem yufala mas mekem evri pat long bodi blong yufala fo wakaman blong stretfala wei an fo evrisamting wea hemi holi. ²⁰ Long bifoa, taem yufala i wakaman blong sin yet, stretfala wei blong God hemi no save bosim yufala. ²¹ An yufala nating tekem eni gudfala samting nomoa from olketa sin wea yufala bin mekem. An distaem, yufala filsem nao long olketa samting ya. Olketa kaen wei ya, hemi mekem pipol fo dae nomoa. ²² Bat distaem, God hemi mekem yufala fri finis from paoa blong sin an hemi mekem yufala kamap wakaman blong hem. An frut wea hemi kamaot long diswan hemi olsem, laef blong yufala hemi kamap holi an yufala garem tru laef wea hemi no save finis. ²³ Bikos taem eniwan hemi stap long wei blong sin, wejis blong hem nao dae. Bat from yumi joen wetem Jisas Kraes Masta blong yumi, God hemi givim fri nao disfala presen long yumi, wea yumi save garem laef wea hemi no save finis.

¹ Olketa Kristin fren, ating yufala klia nomoa long wanem mi laek fo talem, bikos yufala save finis long lo. Taem man hemi laef nomoa, lo hemi garem paoa ovarem hem. ² Sapos wanfala woman hemi marit an hasban hemi laef yet, lo blong marit hemi taengem woman ya long hasban blong hem. Bat sapos hasban hemi dae finis, woman hemi fri from lo blong marit. ³ Sapos woman hemi go maritim nara man taem hasban hemi laef yet, hemi brekem lo blong marit. Bat sapos hasban hemi dae finis, woman ya hemi fri from lo blong marit, an hemi no brekem lo ya nomata hemi maritim nara man moa. ⁴ So olketa Kristin fren blong mi, from yufala joen wetem dae blong Kraes, yufala tu i dae finis an fri long saet blong Lo. So Kraes wea hemi laefbaek moa from dae, hem nao hemi onam yufala, mekem yumi save waka gud fo God. ⁵ Taem yumi bin falom wei blong yumi seleva, olketa ravis tingting hemi kamap strong moa insaet long bodi blong yumi, bikos yumi save long Lo. So yumi duim olketa nogud samting fo kilim yumi dae nomoa. ⁶ Bat distaem, yumi fri long saet blong Lo, bikos yumi dae finis from disfala Lo wea hemi holem yumi strong tumas bifoa. An yumi save waka long niufala wei distaem, wea yumi falom Holi Spirit an no falom wanem olketa raetem insaet long Lo. ⁷ ?Waswe, diswan hemi minim dat Lo hemi nogud samting? !Nomoa ya! Bat Lo nao hemi mekem mi save long wanem nao sin. Sapos Lo hemi no sei “Yu mas no kavetem olketa samting blong nara pipol,” bae mi no save long diskaen wei ya. ⁸ Bat disfala wei blong sin hemi yusim toktok insaet long Lo fo mekem mi fo garem enikaen ravis tingting fo kavetem olketa samting. Sapos no eni Lo hemi stap, sin hemi samting nating nomoa ya. ⁹ Long bifoa, mi laef nomoa nomata mi no save long Lo, bat taem mi stat fo save long Lo blong God, disfala wei blong sin hemi kamap strong tumas insaet long mi, an hemi kilim mi dae nao. ¹⁰ Disfala Lo wea hemi sapos fo mekem mi fo garem laef, hemi mekem mi fo dae nomoa. ¹¹ Bikos wei blong sin nao hemi yusim toktok insaet long Lo, an hemi trikim mi an kilim mi dae. ¹² Nao Lo ya hemi holi, an evri toktok blong Lo hemi holi an stret an gudfala nomoa. ¹³ ?Waswe, diswan hemi minim olketa gudfala samting nao i kilim mi dae? !Nomoa ya! Bat wei blong sin nao hemi yusim olketa gudfala samting fo kilim mi dae, mekem mi luksave dat sin hemi nogud. An long disfala wei ya nao, toktok blong Lo hemi somaot dat wei blong sin hemi barava nogud samting. ¹⁴ Yumi save, Lo ya hemi blong God. Bat mi, mi man nomoa ya wea mi stap olsem wakaman blong sin. ¹⁵ Mi nating savegud long wei blong mi. Bikos mi no save duim wanem mi wande duim, bat oltaem mi duim nomoa wanem mi les fo duim. ¹⁶ Taem mi duim wanem mi les fo duim, hemi somaot dat mi bilivim Lo hemi stret. ¹⁷ So hemi no mi seleva nao duim disfala samting, bat disfala wei blong sin wea hemi stap insaet long mi nao hemi duim. ¹⁸ Long saet blong mi, mi save, mi wanfala man blong wol nomoa. No eni gud samting hemi stap insaet long mi. Bikos nomata mi garem tingting fo duim gudfala samting, bat mi nating save duim nomoa. ¹⁹ Nao wanem mi duim oltaem, hemi no disfala gudfala samting wea mi wande duim, bat hemi disfala ravis samting wea mi les fo duim. ²⁰ An bikos mi duim nomoa wanem mi les fo duim, hemi minim i no mi seleva nao mi duim olketa samting ya, bat wei blong sin wea hemi stap insaet long mi nao hemi duim. ²¹ So mi luksave dat disfala nogud wei nao hemi bosim mi. Taem mi wande duim gudfala samting, olketa ravis tingting nomoa hemi stap insaet long mi. ²² Barava insaet long tingting blong mi, mi hapi long Lo blong God nomoa. ²³ Bat mi luksave dat disfala nogud wei hemi waka insaet long bodi blong mi, an hemi faetem Lo blong God wea hemi stap insaet long tingting blong mi. So mi stap wakaman blong wei blong sin wea hemi gohed fo waka insaet long bodi blong mi. ²⁴ !Mi ya, mi barava nogud nao! ?Hu nao bae sevem mi from disfala bodi wea bae hemi dae? ²⁵ !Yumi mas toktengkiu long God wea hem nao duim diswan long waka blong Jisas Kraes Masta blong yumi! So mi seleva, long saet long maen blong mi, mi wakaman blong Lo blong God. Bat long saet blong mi long wei blong sin, mi wakaman blong disfala nogud wei long sin.

¹ Nao yumi stap joen wetem Jisas Kraes finis, so no eniwan save jajem yumi moa an sei yumi rong. ² Bikos gudfala wei blong Holi Spirit hemi givim yumi tru laef bikos yumi joen wetem Jisas Kraes, an hemi sevem yumi from wei blong sin wea hemi kilim yumi dae. ³ Lo hemi no garem paoa fo tekemaot sin blong yumi, bikos yumi no save obeim. Bat God nao hemi duim diswan taem hemi mekem San blong hem fo kamap man olsem yumi man, bat yumi nao i man blong sin. Hemi sendem hem kam olsem wanfala sakrifaes fo tekemaot sin blong yumi. Long wei ya nao, God hemi jajem wei blong sin blong yumi man. ⁴ God hemi duim diswan, mekem stretfala samting blong Lo i save kamtru long yumi, wea yumi save falom wei blong Holi Spirit an no falom nogud wei blong sin. ⁵ Olketa pipol hu i falom nogud wei blong sin, olketa tingting tumas long olketa nogud samting blong wol. Bat olketa pipol hu i falom Holi Spirit, olketa tingting tumas long wanem Holi Spirit hemi laekem. ⁶ Sapos wei blong sin hemi kontrolem maen blong man, bae hemi dae long hem. Bat sapos Holi Spirit hemi kontrolem maen blong man, bae hemi garem laef an piis. ⁷ Bikos man hu hemi tingting tumas long nogud wei blong sin, hemi enemi blong God. Hemi no save obeim Lo blong God, an hemi had tumas fo hemi duim diswan. ⁸ An pipol wea wei blong sin hemi kontrolem olketa, olketa no save mekem God fo hapi long olketa. ⁹ Bat wei blong sin hemi no kontrolem yufala. Nomoa. Holi Spirit nao hemi kontrolem yufala, bikos Spirit blong God hemi stap insaet long yufala finis. An sapos eniwan hemi no garem Spirit blong Kraes, hemi no blong Kraes nao. ¹⁰ Bodi blong yufala bae hemi dae bikos yufala bin sin. Bat bikos Kraes nao hemi stap insaet long yufala, Holi Spirit hemi mekem yufala laef, wea yufala stret long ae blong God finis. ¹¹ God hemi bin mekem Jisas Kraes fo laefbaek moa from dae. An sapos Spirit blong God hemi stap insaet long yufala, bae God hemi givim laef moa long bodi blong yufala wea i save dae. Hemi duim diswan from Spirit blong hem wea hemi stap insaet long yufala. ¹² So olketa Kristin fren, yumi garem samting wea yumi mas duim. Bat diswan hemi no fo falom wei blong sin. ¹³ Sapos yufala falom wei blong sin, bae yufala dae. Bat sapos yufala falom wei blong Holi Spirit an yufala kilim dae olketa ravis wei blong yufala, bae yufala laef. ¹⁴ Olketa pipol hu Spirit blong God hemi lidim olketa, olketa nao pikinini blong God. ¹⁵ An Holi Spirit wea God hemi givim finis long yufala, hemi no save bosim yufala an mekem yufala fraet. Bat hemi mekem yufala fo kamap pikinini blong God. An long paoa blong Holi Spirit yumi save kolem God olsem, “Aba, Dadi.” ¹⁶ Holi Spirit nao hemi talem spirit blong yumi dat yumi pikinini blong God. ¹⁷ Bikos yumi olketa pikinini blong hem nao, bae yumi garem olketa blesing wea hemi laek givim long yumi. Hem nao olketa blesing wea brata blong yumi Kraes, hemi garem finis. Sapos yumi laek fo kasem disfala nambawan laef long heven wea Kraes hemi kasem finis, yumi tu mas safa long sem wei wea Kraes hemi safa long hem. ¹⁸ Mi savegud ya, olketa samting wea yumi filpein long hem distaem, olketa samting nating nomoa taem yumi tingim disfala nambawan laef wea God bae hemi mekem kamtru long yumi. ¹⁹ Evrisamting God hemi mekem, olketa gohed weit nomoa fo taem wea God bae hemi somaot hu nao olketa pikinini blong hem. ²⁰ Hem olsem bikos evrisamting ya i stap fo nogud. Diswan hemi no minim olketa samting ya laekem fo olsem, bat falom tingting blong God. Bat God hemi mekem plan finis, ²¹ long wanfala taem bihaen, bae hemi mekem evrisamting long disfala wol fo stap fri from paoa wea hemi gohed fo spoelem evrisamting ya. An bae evrisamting ya i kasem nambawan laef long heven, olsem yumi olketa pikinini blong God bae kasem. ²² Yumi save, kam kasem distaem, evrisamting God hemi bin mekem, olketa kraeaot bikfala from olketa pein tumas, olsem woman wea hemi kolsap fo bonem pikinini. ²³ Bat i no olketa samting ya nomoa i kraeaot olsem. Yumi tu, wea God hemi givim yumi Holi Spirit olsem fas blesing blong hem, yumi tu kraeaot insaet long maen blong yumi. Bikos yumi gohed fo weitem taem wea God bae hemi mekem bodi blong yumi fo no safa moa, an mekem yumi kamap barava pikinini blong hem. ²⁴ God hemi sevem yumi finis so yumi gohed fo weitem olketa samting hemi promisim long yumi. Bat sapos yumi kasem finis wanem yumi weitem, bae yumi no save gohed fo weitem moa. ?Hu nao i save gohed fo weitem samting wea hemi garem finis? ²⁵ Bat yumi barava bilivim dat bae yumi kasem olketa samting wea yumi no lukim yet ya, dastawe yumi wiling fo gohed weitem nomoa. ²⁶ Long sem wei, Holi Spirit hemi helpem yumi bikos yumi no strong. Yumi no save hao fo prea, bat Holi Spirit seleva nao hemi gohed fo prea gud fo yumi long olketa toktok blong hem wea yumi no save minim. ²⁷ God hu hemi save long evri tingting insaet long maen blong yumi, hemi save long tingting blong Holi Spirit. Dastawe Holi Spirit hemi save prea fo olketa pipol blong God long barava wei wea God hemi laekem. ²⁸ An yumi save dat long evrisamting wea hemi save kasem yumi, God hemi duim olketa gudfala samting fo olketa pipol hu i lavem hem. Olketa nao pipol wea hemi kolem olketa, falom plan blong hem. ²⁹ An olketa pipol God hemi siusim olketa bifoa kam, hemi planem fo olketa kamap wankaen wetem San blong hem. Long wei ya nao, San blong hem hemi fasbon long plande brata blong hem. ³⁰ An olketa pipol wea God hemi bin siusim, hemi bin kolem olketa tu. An hemi mekem olketa stret long ae blong hem, an mekem nambawan laef blong hem saenaot long laef blong olketa. ³¹ ?Wanem nao bae yumi talem abaotem olketa samting ya? ?Sapos God hemi teksaet wetem yumi, hu nao hemi save agensim yumi? ³² God hemi no holem baek San blong hem, bat hemi mekem hem fo dae fo sevem yumi evriwan. So hemi save givim kam evrisamting fri long yumi nomoa. ³³ ?Hu nao hemi save tok agensim yumi pipol hu God hemi siusim yumi finis? God seleva nao hemi mekem yumi stret long ae blong hem. ³⁴ So no eniwan save jajem yumi an sei yumi rong. Bikos Jisas Kraes hu hemi dae an laefbaek moa, hemi stap long raetsaet blong God wea hemi prea gud fo helpem yumi. ³⁵ ?Watkaen samting nao i save tekem yumi aot from lav blong Kraes? ?Sapos yumi kasem trabol o hadtaem, o sapos olketa pipol mekem yumi safa, o sapos yumi hanggre tumas o yumi no garem eni kaleko, o sapos olketa laek fo spoelem yumi o kilim yumi dae, waswe, bae olketa samting i save tekem yumi aot from lav blong Kraes? !Nomoa nao! ³⁶ Buktambu hemi talemaot finis dat olketa samting olsem i save kasem yumi, wea hemi sei, “Bikos mifala blong yu, olketa pipol i laekem tumas fo kilim mifala dae evri de nomoa, olketa tingting long mifala olsem mifala sipsip fo olketa busarem dae.” ³⁷ Bat yumi no givap long enisamting olsem. !Kraes hu hemi lavem yumi, hemi helpem yumi fo winim olketa samting ya oltaem! ³⁸ Mi bilivim tumas dat no enisamting save tekem yumi aot from lav blong God. Nomata yumi laef o yumi dae, nomata enisamting olsem olketa enjel o olketa nara paoa moa, nomata samting wea i stap distaem o bae hemi kamap bihaen, ³⁹ nomata eni paoa hae antap o eni paoa dip insaet long graon, ya nomata enisamting moa long evrisamting wea God hemi bin mekem, no enisamting nao i save tekem yumi aot from lav blong God. Disfala lav nao, Jisas Kraes Masta blong yumi hemi somaot long yumi finis.

¹ Mi toktru ya bikos mi blong Kraes. Mi no save laea. An Holi Spirit hemi mekem klia long tingting blong mi dat mi no laea taem mi sei ² mi filsore tumas an haat blong mi hemi filnogud tumas long olketa Jiu. ³ Bikos olketa nao wantok blong mi, an olketa nao barava laen blong mi. Letem God hemi panisim mi an tekem mi aot from Kraes, sapos diswan hemi save helpem olketa Jiu fo kam kolsap long hem moa. ⁴ Olketa nao God hemi siusim olketa, an hemi adoptem olketa olsem pikinini blong hem, an olketa tu bin lukim saen blong bikfala paoa blong hem. God hemi mekem olketa spesol agrimen blong hem wetem olketa, an hemi givim Lo long olketa. An olketa nao save long gudfala wei fo prea, an olketa bin herem olketa promis blong God. ⁵ Evriwan i kamaot long laen blong olketa nambawan olo blong bifoa, an Kraes tu hemi bon kam olsem man long laen blong olketa ya. Letem evriwan preisim God olowe, wea hem nao hemi Masta blong evrisamting. Amen. ⁶ Promis blong God hemi no rong, bikos hemi no evri pipol blong Israel nao i pipol blong God. ⁷ An hemi no evri pipol hu i bon kam long laen blong Ebraham nao i pipol blong God. Bat olsem olketa raetem finis insaet long Buktambu, “Barava laen blong yu, bae hemi kamaot long laen blong Aesak nomoa.” ⁸ Diswan hemi minim dat i no evriwan hu i bon kam long laen blong Ebraham nao i pikinini blong God, bat olketa pikinini hu i bon kam falom disfala promis blong God, olketa nao barava pikinini blong God. ⁹ An disfala promis blong God hemi sei olsem, “Neks yia, long disfala sem mans, bae mi kambaek fo lukim yutufala moa, an long taem ya, bae waef blong yu hemi garem wanfala pikinini boe.” ¹⁰ An narasamting moa, Ribeka hemi bonem tuin from wanfala man nomoa, an hem nao grandadi blong yumi Aesak. ¹¹ Bat God hemi laek fo falom plan blong hem an hemi siusim wanfala long tufala pikinini ya. Taem tufala no bon kam yet an tufala no duim enisamting gud o nogud, ¹² God hemi sei long Ribeka, “Fasbon bae hemi waka fo mektu pikinini ya.” Long wei ya nao, God hemi no siusim Jekob falom enisamting wea Jekob hemi duim, bat hemi siusim Jekob falom plan blong hem seleva. ¹³ Hemi olsem toktok blong God long Buktambu wea hemi sei, “Mi lavem Jekob, bat mi les long Iso.” ¹⁴ ?Wanem nao bae yumi talem? ?Waswe, God hemi duim samting wea hemi no stret long pipol? !Nomoa ya! ¹⁵ Bikos God hemi talem go long Mosis olsem, “Man wea mi siusim fo mi kaen long hem, bae mi kaen long hem, an man wea mi siusim fo mi sore long hem, bae mi sore long hem” ¹⁶ So taem God hemi siusim eniwan, hemi no sius falom wanem man ya hemi laekem o wanem man ya hemi traehad fo duim, bat God hemi falom kaenfala wei blong hem seleva. ¹⁷ Insaet long Buktambu God hemi talem disfala King long Ijip olsem, “Mi mekem yu kamap king, bikos long yu nao mi laek fo somaot paoa blong mi, mekem evri pipol long wol olketa save long mi.” ¹⁸ So yumi save nao, taem God hemi laek fo kaen long eniwan, bae hemi duim. An taem hemi laek fo mekem eniwan fo no save lisin, bae hemi duim olsem tu. ¹⁹ Maet yufala askem mi olsem, “?Sapos olsem, waswe nao God hemi gohed nomoa fo talem mifala rong? Bikos no eniwan save agensim tingting blong God.” ²⁰ Bat mi ansarem olsem, ?Yu tingse yu hu ya, mekem yu save tokbaek long God? Ating pot wea man hemi wakem long graon, hemi no save tokbaek long man ya olsem, “?Waswe nao yu mekem mi olsem?” ²¹ Man hu hemi mekem pot, hemi garem paoa fo falom tingting blong hem seleva, nomata hemi mekem tufala deferen pot long wanfala pis long graon. Maet wanfala pot fo yusim long spesol taem, an wanfala pot fo yusim long enitaem nomoa. ²² God tu hemi olsem. Hemi garem paoa fo somaot kros blong hem an fo mekem olketa pipol save long paoa blong hem. Bat hemi gohed yet fo kontrolem kros blong hem, nomata hemi fit fo hemi barava spoelem pipol hu hemi kros long olketa. ²³ An hemi garem paoa tu fo somaot saen blong bikfala paoa blong hem long olketa pipol wea hemi kaen long olketa an siusim olketa finis fo hemi mekhae long olketa. ²⁴ Yumi nao olketa pipol ya. God hemi kolem yumi, wea yumi kamaot long olketa Jiu an long olketa hu i no Jiu tu. ²⁵ Olsem God hemi talem insaet long Buk blong profet Hosia, “Olketa pipol hu i no blong mi bifoa, bae mi kolem olketa pipol blong mi. Olketa pipol wea mi nating lavem bifoa, bae mi kolem olketa pipol wea mi lavem tumas. ²⁶ An long ples wea mi talem olketa olsem, ‘Yufala ya no pipol blong mi.’ bae mi talem olketa olsem moa, ‘Yufala nao i pikinini blong mi God, hu i givim laef.’” ²⁷ An Aesaea hemi tokabaotem olketa pipol blong Israel, wea hemi singaot olsem, “Nomata pipol blong Israel olketa plande tumas olsem sanbis long saet si, bae samfala nomoa God hemi sevem olketa. ²⁸ Bikos no longtaem, bae God hemi barava jajem disfala wol.” ²⁹ An Aesaea hemi tok moa abaotem diswan olsem, “Sapos Masta hu hemi garem evri paoa, hemi no letem samfala man long laen blong yumi fo stap, bae yumi lus finis olsem tufala taon Sodom an Gomora.” ³⁰ Nao wanem mifala talem hemi olsem. Olketa pipol hu i no Jiu an hu i no trae fo kamap stret falom Lo, olketa stret finis long ae blong God bikos olketa biliv nomoa. ³¹ Bat pipol blong Israel, hu i traehad fo falom Lo fo stret long ae blong God, olketa nating kamap stret nomoa. ³² ?Waswe nao olketa no kamap stret? Bikos olketa traehad nomoa fo kamap stret falom Lo, an olketa no falom wei fo biliv long God. Olketa banga nogud long ston wea hemi save mekem pipol fo banga nogud long hem. ³³ God hemi tokabaotem ston ya long Buktambu olsem, “Yufala lisin, mi stanemap wanfala ston long Saeon wea bae olketa pipol i save garem trabol tumas long hem, an bae olketa save banga nogud long hem. Bat eniwan hu hemi biliv long hem, bae hemi no save filsem long hem.”

¹ Olketa Kristin fren, mi laekem tumas fo God bae hemi sevem olketa wantok blong mi, an mi prea go long God oltaem fo diswan hemi hapen. ² Mi savegud long olketa, an mi save talemaot klia dat olketa traehad tumas fo falom wei blong God, bat olketa no barava save hao nao fo duim. ³ Olketa nating luksave long wei blong God fo mekem pipol stret long ae blong hem. Olketa traehad fo duim diswan falom wei blong olketa seleva nomoa, an olketa nating letem God fo mekem olketa stret long ae blong hem. ⁴ Kraes nao hemi finisim disfala wei blong Lo, mekem evriwan hu i biliv bae God hemi mekem olketa kamap stretfala pipol. ⁵ Mosis hemi raet abaotem hao Lo hemi save mekem pipol fo stret long ae blong God, an hemi sei, “Man hu hemi obeim Lo mas falom evrisamting long Lo long laef blong hem.” ⁶ Bat toktok abaotem hao pipol save stret long ae blong God long biliv blong olketa, hemi sei olsem, “Yu no sei insaet long tingting blong yu, ‘?Hu nao bae hemi goap long skae?’” Diswan hemi minim yumi no wari fo goap an tekem Kraes kamdaon fo sevem yumi. ⁷ “An yu no sei moa, ‘?Hu nao bae i godaon insaet long ples blong pipol hu i dae finis?’” Diswan hemi minim yumi no wari fo godaon fo mekem Kraes laefbaek moa. ⁸ Bat toktok hemi sei olsem moa, “Toktok blong God hemi kasem yu finis. Hemi stap long maos blong yu an hemi stap insaet long haat blong yu.” Hem nao disfala nius abaotem biliv, wea yumi gohed fo talemaot. ⁹ Sapos yu talemaot gudfala olsem, “Jisas nao hemi Masta,” an sapos yu barava biliv wea God hemi bin mekem hem laef baek moa from dae, bae hemi sevem yu nao. ¹⁰ Bikos yumi biliv nao, God hemi mekem yumi stret long ae blong hem. An bikos yumi talemaot biliv blong yumi nao, God hemi sevem yumi. ¹¹ Buktambu hemi tok olsem abaotem diswan, “Eniwan hu hemi biliv long hem, bae hemi no save filsem.” ¹² Olketa Jiu olketa i no deferen long olketa pipol hu i no Jiu. Evriwan nao i garem wanfala Masta nomoa, hu hemi save givim olketa gudfala samting long evriwan hu i prea go long hem. ¹³ Hemi olsem Buktambu hemi sei, “Evriwan hu i prea go long Masta fo hemi helpem olketa, bae hemi sevem olketa.” ¹⁴ ?Bat hao nao olketa save prea go long hem, sapos olketa no biliv long hem yet? ?An hao nao olketa save biliv long hem, sapos olketa no herem eni nius abaotem hem yet? ?An hao nao olketa save herem nius, sapos no eniwan hemi talemaot nius ya long olketa? ¹⁵ ?An hao nao eniwan i save talemaot nius, sapos olketa no sendem eniwan fo talemaot? Olsem olketa raetem long Buktambu, “!Hemi gudfala samting tumas, taem olketa pipol kam fo talemaot Gudnius!” ¹⁶ Bat i no evri pipol blong Israel nao olketa biliv long Gudnius ya. Hemi olsem Aesaea hemi talem insaet long Buktambu, “?Masta, haomas pipol nao i bin bilivim nius blong mifala?” ¹⁷ So pipol save biliv taem olketa herem Gudnius, an olketa save herem Gudnius taem eniwan hemi talemaot toktok abaotem Kraes. ¹⁸ Bat mi askem moa, ?Waswe, olketa pipol blong Israel i no herem nius ya? Nomoa, olketa herem finis ya, olsem Buktambu hemi sei, “Mesij blong olketa hemi goaot finis long evri pipol long wol, toktok blong olketa hemi go kasem evri ples long wol nao.” ¹⁹ Bat mi askem moa, ?Waswe, olketa pipol blong Israel i no luksave nomoa long nius ya? Nomoa ya. Fastaem, Mosis hemi talemaot toktok blong God olsem, “Bae mi yusim pipol hu i samting nating fo mekem yufala joles. An bae mi mekem yufala kros long olketa pipol hu i no garem eni gudfala save.” ²⁰ An Aesaea hemi tokstrong moa olsem, “Olketa pipol hu i no lukaotem mi, olketa nao faendem mi. Mi somaot mi seleva long olketa pipol hu i no ask abaotem mi.” ²¹ An hemi tokabaotem pipol blong Israel olsem, “Long evri de nao mi singaotem olketa pipol hu i no save obei an hu i save bikhed tumas, bikos mi laekem olketa fo kambaek long mi.”

¹ Nao mi a skem moa . ?Waswe, God hemi les long olketa pipol blong hem nao? !Hemi had ya! Mi seleva tu mi man blong Israel, wea mi bon kam long laen blong Ebraham long traeb blong Benjamin. ² God hemi no save les long olketa pipol blong hem wea hemi siusim olketa longtaem kam finis. Yufala save finis abaotem stori blong Elaeja long Buktambu, wea hemi prea long God an tokstrong agensim pipol blong Israel olsem, ³ “Masta, olketa kilim dae olketa profet blong yu, an olketa bin brekemdaon olketa olta blong yu. Mi nomoa mi stap an olketa traehad fo kilim mi dae tu.” ⁴ An ansa blong God nao hemi olsem, “Mi garem yet 7,000 man wea i nating baodaon long disfala laea god Baal.” ⁵ Long sem wei tu, distaem, samfala pipol stap hu God hemi siusim olketa finis long kaenfala lav blong hem. ⁶ Hemi no siusim olketa from gudfala waka blong olketa, bat from kaenfala lav blong hem seleva nomoa. Bikos sapos hemi siusim olketa from gudfala waka blong olketa, bae kaenfala lav blong God hemi no truwan ya. ⁷ Diswan hemi minim olketa pipol blong Israel nating faendem nomoa wanem olketa lukaotem tumas. Samfala pipol nomoa hu God hemi siusim, olketa nao i faendem. Bat olketa nara pipol i no wiling fo lisin, ⁸ olsem Buktambu hemi talem, “God hemi mekem maen blong olketa fo no save tingting gud. Kam kasem distaem, ae blong olketa i no save lukluk, an ia blong olketa i no save herehere.” ⁹ An Deved tu hemi tok olsem, “Letem bikfala fist blong olketa, hemi olsem trap long olketa. Letem bikde blong olketa i mekem olketa foldaon nogud, an letem God panisim olketa. ¹⁰ Letem ae blong olketa i blaen, mekem olketa no lukluk. An letem olketa safa nogud long enikaen trabol nomoa.” ¹¹ So mi sei moa, ?Waswe, bikos olketa foldaon nogud, hemi minim olketa nogud olowe nao? !Nomoa ya! Bat bikos olketa pipol blong Jiu i duim rong samting, God hemi gohed fo sevem olketa pipol hu i no Jiu, mekem olketa Jiu i joles long olketa. ¹² Bikos olketa Jiu i duim rong samting, God hemi givim olketa gudfala samting long pipol long wol. An from olketa Jiu i lusim wei blong God, God hemi givim olketa gudfala blesing long olketa hu i no Jiu. !So taem barava namba blong olketa pipol blong Israel i kambaek long God, plande gudfala samting tumas moa bae hemi kasem yumi! ¹³ Nao mi tok go long yufala olketa pipol hu i no Jiu. Mi tinghae long waka blong mi, wea mi aposol fo yufala pipol hu i no Jiu. ¹⁴ Mi laek mekem olketa wantok blong mi fo joles long yufala, mekem samfala long olketa save kam long God fo hemi sevem olketa. ¹⁵ Bikos taem God hemi les long olketa Jiu, hemi mekem olketa nara pipol long wol fo save kamap fren blong God moa. ?Olsem wanem nao bae hemi hapen taem God hemi hapi wetem olketa Jiu moa? !Bae hemi olsem olketa laefbaek moa from dae! ¹⁶ Taem yumi givim fas pat long bred olsem sakrifaes long God, hemi olsem ful bred ya hemi blong God. An sapos rut blong wanfala tri hemi blong God, olketa brans blong tri ya i blong God tu. ¹⁷ Samfala brans blong barava oliv tri God hemi brekemaot finis. An yufala, nomata yufala olsem olketa brans blong wael oliv tri, God hemi joenem yufala go long disfala barava oliv tri ya. An distaem yufala tu i save garem olketa gudfala samting wea hemi kamaot long olketa Jiu ya. ¹⁸ Dastawe yufala mas no lukdaon long olketa nara brans ya. Bikos yufala no save givim laef long rut blong oliv tri ya. Bat rut ya nao hemi save givim laef long yufala. ¹⁹ Yufala maet talem, “God hemi brekemaot olketa brans blong barava oliv tri ya, mekem hemi save joenem mifala go long ples blong olketa.” ²⁰ Hemi tru, bat God hemi brekemaot olketa bikos olketa no biliv, an yufala moa stap long oliv tri ya bikos yufala biliv. So yufala mas no praod long diswan, bat yufala mas lukaot. ²¹ Bikos nomata olketa barava brans blong oliv tri ya, God hemi no letem olketa fo stap taem olketa no biliv. ?Waswe, yufala tingse bae God hemi letem yufala fo stap nomoa sapos yufala no biliv? ²² Yufala mas tingim gud dat God hemi save sore an kaen tumas, bat hemi save jajem yumi tu. Hemi jajem olketa hu i lusim wei blong hem, bat hemi sore an kaen long yufala sapos yufala gohed fo falom gudfala wei blong hem. Bat sapos yufala no duim diswan, bae hemi katemaot yufala tu. ²³ An sapos olketa Jiu olketa stat fo biliv moa, bae God hemi joenem olketa moa insaet long oliv tri ya. Bikos God hemi garem paoa fo joenem olketa baek moa. ²⁴ God hemi bin joenem yufala go long disfala barava oliv tri ya, nomata yufala kamaot long wanfala wael oliv tri. So bae hemi isi nomoa fo God joenem baek olketa Jiu wea olketa olsem tru brans blong disfala barava oliv tri ya. ²⁵ Olketa Kristin fren, mi laekem yufala fo save long disfala bikfala samting wea hemi staphaed, mekem yufala no tingim yufala barava save tumas. Hemi olsem ya, disfala wei blong pipol blong Israel fo no lisin, bae hemi stap nomoa go kasem taem evriwan hu i no Jiu wea God hemi siusim, i kam finis long hem. ²⁶ An long datfala taem, bae God hemi sevem evriwan blong Israel, olsem God hemi talem finis insaet long Buktambu, “Man fo sevem olketa pipol ya bae hemi kamaot long Saeon, an disfala ravis tingting fo no biliv, bae hemi tekemaot from olketa pipol long laen blong Jekob. ²⁷ Long taem ya, bae mi mekem wanfala spesol agrimen wetem olketa, wea bae mi finisim sin blong olketa.” ²⁸ Bikos olketa Jiu i agensim disfala Gudnius, olketa i enemi blong God nao, an diswan hemi fo gud blong yufala pipol hu i no Jiu. Bat bikos God hemi siusim olketa, hemi lavem olketa yet falom promis blong hem long olketa olo blong olketa. ²⁹ Bikos taem God hemi siusim eniwan an hemi givim gudfala samting long hem finis, bae hemi no save sensim tingting blong hem. ³⁰ Long bifoa, yufala no obeim God, bat distaem olketa pipol blong Israel nao olketa no obeim hem, dastawe nao God hemi sore an kaen long yufala. ³¹ Long sem wei tu, olketa Jiu hu i no obeim God distaem, bae God hemi sore an kaen long olketa moa long sem wei wea hemi sore an kaen long yufala. ³² Wei fo no obei, hemi olsem wanfala prisin wea God hemi mekem evriwan stap long hem, mekem hemi save sore an kaen long olketa evriwan. ³³ !God hemi gud tumas long evriwan, an save blong hem hemi bikfala tumas an tingting blong hem hemi waes tumas! !Yumi no luksave long tingting blong hem, yumi no save minimgud olketa wei blong hem! ³⁴ Olsem Buktambu hemi talem, “?Hu nao i save long tingting blong Masta? ?Hu nao i save tisim hem long enisamting?” ³⁵ “?Hu nao i bin givim enisamting long God, mekem God hemi mas givimbaek samting long hem?” ³⁶ God nao hemi mekem evrisamting, an evrisamting stanap long paoa blong hem, an evrisamting i blong hem nomoa. !Yumi mas mekhae long God olowe nao! Amen.

¹ Olketa Kristin fren, bikos God hemi sore an kaen tumas long yumi, mi tokstrong long yufala. Yufala mas givim laef blong yufala olsem sakrifaes long God. Hemi wanfala sakrifaes wea hemi laef yet an hemi holi, mekem God hemi save hapi long hem. Diswan nao hemi barava wei fo yufala wosipim God. ² Yufala no letem yufala seleva fo falom wei blong disfala wol, bat yufala mas letem God hemi mekem yufala sens, mekem hemi givim niufala tingting long yufala. Long wei ya nao yufala save luksave long wanem God hemi laekem. From diswan, bae yufala save long olketa gudfala samting wea hemi stret an God hemi hapi long hem. ³ Long wanem God hemi givim kam long mi, mi talem long yufala, yufala no tinghae long yufala seleva tumas. Bat yufala mas tingabaotem yufala seleva long stretfala wei nomoa, falom biliv wea God hemi givim long yufala. ⁴ Yumi evriwan i garem wanfala bodi nomoa wea hemi garem plande pat long hem, an olketa pat ya garem deferen kaen waka fo duim. ⁵ Long sem wei tu, nomata yumi plande pipol, yumi olsem wanfala bodi nomoa wea yumi evriwan joen wetem Kraes. Long wei ya nao, evriwan long yumi joen wetem olketa narawan long disfala wanfala bodi. ⁶ Yumi garem olketa deferen kaen spesol paoa wea God hemi givim kam, falom kaenfala lav blong hem wea hemi givim long yumi. Sapos yumi garem spesol paoa fo talemaot toktok blong God olsem olketa profet, yumi mas talemaot toktok ya nao falom biliv blong yumi, nomata biliv ya hemi bikfala o smolfala. ⁷ Sapos yumi garem spesol paoa fo helpem olketa pipol, yumi mas duim nao. An sapos hemi spesol paoa fo tis, yumi mas tis nao. ⁸ Sapos God givim spesol paoa long yumi fo strongim tingting blong eniwan, yumi mas duim nao. An sapos hemi spesol paoa fo helpem pipol wetem enikaen samting, yumi mas duim long gudfala wei. Sapos yumi garem spesol paoa fo lidim pipol, yumi mas lukaftarem olketa gudfala. An sapos yumi garem spesol paoa fo sore an kaen long pipol, yumi mas duim nomoa an hapi long hem. ⁹ Taem yufala lavem olketa pipol, yufala mas barava minim. Yufala mas heitem wanem hemi ravis, an yufala mas holestrong long wanem hemi gudfala. ¹⁰ Yufala mas lavem yufala evriwan gudfala, olsem brata. Yufala mas tinghae long olketa nara Kristin winim yufala seleva. ¹¹ Yufala mas no les, bat yufala mas gohed strong long waka oltaem, an yufala mas letem ful laef blong yufala fo gohed strong long waka blong Masta. ¹² Yufala mas hapi oltaem long olketa samting wea God hemi promisim yufala. Taem trabol hemi kam, yufala mas stap kuaet nomoa, an yufala mas gohed fo prea oltaem. ¹³ Yufala mas searemaot wanem yufala garem wetem olketa pipol blong God, taem olketa sot long enisamting. An yufala mas lukaftarem gud olketa pipol hu i kam kasem ples blong yufala. ¹⁴ Yufala mas askem God fo blesim olketa pipol hu i mekem yufala safa. Yufala mas blesim olketa an no tokspoelem olketa. ¹⁵ Yufala mas hapi taem yufala stap wetem olketa pipol hu i hapi, an yufala mas krae taem yufala stap wetem olketa pipol hu i krae. ¹⁶ Yufala mas stapgud wetem evriwan. Yufala mas no praod, bat yufala mas wiling fo frengud wetem olketa pipol hu i stap lou. An yufala mas no tingim yufala nao i save tumas. ¹⁷ Sapos eniwan duim ravis samting long yufala, yufala mas no sensimbaek, bat yufala mas duim nomoa wanem hemi stret long ae blong evriwan. ¹⁸ An yufala mas traehad oltaem fo stapgud long piis wetem evri pipol. ¹⁹ Olketa fren blong mi, yufala mas no sensimbaek eni nogud samting long olketa pipol, bat letem God nao jajem olketa. Olsem Masta hemi talem long Buktambu, “Mi nomoa save sensimbaek trabol long olketa enemi blong yufala. Mi nao bae mi peimbaek long olketa.” ²⁰ An Buktambu hemi sei olsem tu, “Sapos enemi blong yu hemi hanggre, yu mas givim kaikai long hem. An sapos hemi dae long wata, yu mas givim wata fo hemi dringim. Sapos yu duim diswan, bae yu mekem hem filsem tumas.” ²¹ Yufala mas no letem olketa nogud wei fo winim yufala, bat yufala mas gohed strong long gudfala wei, mekem yufala winim olketa nogud wei.

¹ Evriwan mas putum olketa seleva andanit long paoa blong gavman, bikos no eniwan save garem paoa fo lukaftarem pipol sapos God hemi no letem hem. Olketa bikman hu i stap, God nao hemi putum olketa long waka fo rulim olketa pipol. ² Dastawe nao eniwan hu hemi agensim paoa blong gavman, hemi agensim wanem God hemi putum. An eniwan hu hemi duim diswan, bae hemi fit fo panis. ³ Olketa pipol hu i duim stretfala samting olketa no fraet long gavman. Bat olketa pipol hu i duim olketa nogud samting nao olketa fraet long hem. So sapos yufala no wande fraetem olketa long gavman, yufala mas duim nomoa olketa stret samting, mekem olketa save tokhapi long yufala. ⁴ Bikos olketa ya i wakaman blong God fo duim gudfala samting fo yufala. Bat sapos yufala duim samting nogud, yufala mas fraetem olketa ya, bikos olketa no holem paoa fo nating. Olketa i wakaman blong God, fo panisim pipol hu i duim olketa rong samting. ⁵ Dastawe nao hemi gud fo yufala putum yufala seleva andanit long paoa blong gavman. Bat yufala mas no duim bikos yufala fraetem panis nomoa, bat bikos hem kam long gudfala tingting blong yufala. ⁶ Dastawe nao yufala peim olketa taks, bikos olketa bikman ya i wakaman blong God, wea olketa waka oltaem fo lukaftarem olketa pipol. ⁷ So yufala mas peim olketa deferen kaen taks olsem lo hemi talem. An yufala mas tinghae long olketa bikman an onarem olketa evriwan. ⁸ Yufala mas no kaonem enisamting long eni man. Kaon wea yufala mas garem nomoa, hemi wea yufala mas lavem yufala evriwan. Bikos eniwan hu hemi lavem olketa pipol, hemi barava falom Lo. ⁹ Nao Lo hemi sei, “Yu mas no brekem lo blong marit, yu mas no kilim dae nara man, yu mas no stil, yu mas no kavetem enisamting blong nara man.” Nao olketa lo olsem wetem eni nara lo moa, olketa joen tugeta insaet wanfala lo wea hemi sei, “Yu mas barava lavem olketa wantok blong yu olsem yufala lavem yufala seleva.” ¹⁰ Man hu hemi lavem olketa nara pipol, hemi no save duim enisamting fo spoelem olketa. Dastawe disfala wei fo lavem nara man, hemi barava wei fo falom Lo blong God. ¹¹ Mi talem yufala fo duim olketa samting ya, bikos yufala save finis long disfala taem wea yumi stap long hem. Hemi kasem taem nao fo yufala wekap long slip blong yufala, bikos distaem hemi kolsap tumas nao fo God hemi kam fo sevem yumi, winim taem wea yumi jes stat fo biliv. ¹² Distaem, naet hemi kolsap finis an delaet hemi kolsap kam. So yumi mas lusim nao waka blong naet, an yumi mas holem moa olketa samting fo faet long delaet. ¹³ Yumi mas stap long gudfala wei olsem olketa pipol hu i stap long delaet. Yumi mas no mekem olketa ravis fist an gohed fo drang, an yumi mas no durong wetem eniwan o falom olketa nara ravis wei olsem. An yumi mas no raoa an yumi mas no joles. ¹⁴ Bat yufala mas holetaet long Masta blong yumi Jisas Kraes, mekem yufala redi fo faetem eni nogud samting. An yufala mas no tingting fo falom wei blong sin.

¹ Yufala mas mekfren long man hu i no strong long biliv blong hem, an yufala mas no raoa wetem hem abaotem enikaen samting hemi tingim. ² Biliv blong wanfala man hemi letem hem fo kaikaim enikaen kaikai. Bat nara man hu i no garem strong biliv, hemi no save kaikaim mit. ³ Man hu hemi save kaikaim enikaen kaikai, hemi mas no lukdaon long man hu hemi no save kaikaim mit. An man hu hemi no save kaikaim mit, hemi mas no jajem man hu hemi save kaikaim enikaen kaikai, bikos God hemi hapi long hem. ⁴ ?Waswe, yu tingse yu hu ya, mekem yu save jajem wakaman blong nara man? Bos blong hem nomoa save talem sapos wakaman ya hemi duim gudfala waka o nomoa. Bat bae man ya hemi gohed nomoa fo duim gudfala waka, bikos Masta blong yumi nao hemi garem paoa fo helpem hem long diswan. ⁵ Wanfala man hemi tingse wanfala de hemi spesol winim olketa nara de, an nara man hemi tingse evri de olketa semsem nomoa. Evriwan mas savegud long tingting blong hem seleva. ⁶ Man hu hemi tingim wanfala de hemi spesol, hemi duim diswan bikos hemi tinghae long Masta. An man hu hemi kaikaim enikaen kaikai, hemi duim diswan bikos hemi tinghae long Masta, an hemi save toktengkiu long God from olketa kaikai ya. An man hu hemi no kaikaim mit, hemi duim diswan bikos hemi tinghae long Masta tu, an hem tu i save toktengkiu long God. ⁷ No eniwan long yumi hemi bosim laef blong hem seleva nomoa, an no eniwan long yumi hemi bosim dae blong hem seleva nomoa. ⁸ Taem yumi laef, yumi laef fo mekhae long Masta. An taem yumi dae, yumi dae fo mekhae long Masta tu. So nomata yumi dae o yumi laef, yumi blong Masta nomoa. ⁹ Kraes hemi dae an hemi laefbaek moa, fo mekem hem nao Masta blong olketa pipol hu i laef an hu i dae finis. ¹⁰ ?So waswe nao yu jajem Kristin fren blong yu, an waswe nao yu lukdaon long hem? !Yumi evriwan nao bae stanap long ples wea God hemi sidaon fo jajem evri pipol! ¹¹ Bikos olketa raetem long Buktambu olsem, “Masta hemi sei, ‘Mi mekem strongfala promis long yufala. Bae evriwan mas nildaon long mi, an talemaot dat mi nao God.’” ¹² So hem nao ya, bae evriwan long yumi mas talemaot olketa wei blong hem long God. ¹³ So yumi mas stop fo jajem nara Kristin. An yufala mas no duim enisamting wea hemi save mekem Kristin fren blong yufala fo foldaon long sin. ¹⁴ From mi joen wetem Masta blong yumi Jisas, mi barava save dat no eni kaikai hemi nogud. Bat sapos eniwan hemi tingse samfala kaen kaikai hemi save mekem hem fo no klin, hemi mas no kaikaim samting ya. ¹⁵ Sapos yufala mekem Kristin fren blong yufala filnogud long wanem yufala kaikaim, hemi minim yufala no falom wei blong lav. Kraes hemi dae tu fo sevem Kristin fren ya, so yufala mas no spoelem hem long wanem yufala kaikaim. ¹⁶ Yufala mas no duim enisamting wea hemi save mekem pipol fo tokspoelem disfala gudfala wei blong yufala Kristin. ¹⁷ Bikos kaikai an dring, hemi no blong kingdom blong God. Bat olketa samting wea Holi Spirit hemi duim, hem nao blong disfala laef ya. Olsem, Holi Spirit hemi helpem yumi fo duim wanem hemi stret long ae blong God an fo stap long piis an fo hapi. ¹⁸ Eniwan hu hemi waka fo Kraes long wei olsem, bae God hemi hapi long hem an olketa pipol tu bae hapi long hem. ¹⁹ Dastawe yumi mas traehad nomoa fo duim olketa samting wea i save helpem yumi evriwan fo stap long piis an fo kamap strong moa long biliv. ²⁰ Yufala mas no letem kaikai blong yufala fo spoelem waka blong God. Evri kaikai, olketa gud fo kaikaim nomoa. Bat hemi nogud sapos yufala kaikaim samting wea hemi save mekem eniwan fo foldaon long sin. ²¹ So hemi gud sapos yufala no kaikaim mit an no dringim waen an no duim eni narasamting, wea bae hemi save mekem wanfala Kristin fren blong yufala fo garem trabol. ²² Wanem yu bilivim abaotem diswan, hemi saet blong yu wetem God. An eniwan hu hemi save duim wanem hemi tingse hemi stret an hemi no jajem hem seleva long diswan, bae hemi save hapi tumas. ²³ Bat eniwan hu hemi garem tufala tingting abaotem samting hemi kaikaim, hemi sin nao, bikos hemi no savegud sapos hemi stret o nomoa. So enisamting wea yufala bilivim dat hemi no stret fo duim, hemi sin nao ya.

¹ Hemi gud fo yumi hu i strong long biliv, fo yumi helpem olketa pipol hu i no strong. Yumi mas helpem olketa long wari blong olketa, an yumi mas no duim nomoa olketa samting wea yumi seleva laekem. ² Evriwan long yumi mas helpem Kristin fren blong hem, an mas duim gudfala samting long hem fo helpem hem fo strong moa long biliv blong hem. ³ Kraes hemi no tingim hem seleva nomoa, olsem olketa raetem long Buktambu, “Olketa ravis toktok wea olketa talemaot fo spoelem yu, hemi spoelem mi tu.” ⁴ Evrisamting wea olketa raetem long Buktambu bifoa, hem fo tisim yumi, mekem biliv blong yumi strong an mekem yumi wiling fo weit nomoa fo olketa samting wea God hemi promisim yumi. ⁵ God hemi save strongim tingting blong yufala, an helpem yufala gohed fo weit nomoa. Letem hem nao hemi helpem yufala fo stapgud tugeta taem yufala evriwan i falom wei blong Jisas Kraes. ⁶ Nao long wei ya, bae yufala evriwan save wanmaen an mekhae long God hu hemi Dadi blong Masta blong yumi Jisas Kraes. ⁷ Yufala mas fren tugeta long yufala seleva long sem wei wea Kraes hemi mekfren wetem yufala finis. Long wei ya nao bae olketa pipol save mekhae long God. ⁸ Mi minim olsem ya, Kraes hemi duim waka blong hem fo helpem olketa Jiu, wea hemi somaot dat olketa promis blong God i tru, bikos Kraes hemi mekem kamtru olketa promis wea God hemi mekem wetem olketa olo blong olketa. ⁹ An diswan hemi mekem olketa pipol hu i no Jiu fo mekhae long God bikos hemi somaot sore an kaen blong hem long olketa. Hemi olsem olketa raetem finis insaet long Buktambu, “Bae mi preisim yu long ae blong olketa hu i no Jiu, an bae mi singim olketa singsing fo preisim nem blong yu.” ¹⁰ An hemi sei moa long Buktambu, “Yufala evri pipol, yufala mas hapi wetem pipol blong God.” ¹¹ An Buktambu hemi sei tu ya, “!Evri pipol long evri kantri, mas preisim Masta! Evriwan long evri ples mas mekhae long hem!” ¹² An Aesaea hemi sei moa, “Wanfala man long laen blong Jese bae hemi kamap. Man ya bae hemi kamap fo rul ovarem olketa pipol hu i no Jiu, an bae olketa save trastem hem fo helpem olketa.” ¹³ Letem God hu hemi save mekem yumi bilivim promis blong hem, mekem yufala hapi an givim yufala piis, taem yufala trastem hem. An letem paoa blong Holi Spirit hemi mekem strong moa biliv blong yufala long olketa promis blong God. ¹⁴ Olketa Kristin fren, mi bilivim tumas dat yufala gohed fo tingim olketa gudfala samting oltaem an yufala garem enikaen save nomoa, mekem yufala save tisim yufala seleva. ¹⁵ Bat nomata olsem, mi raetem disfala strong leta long yufala fo mekem yufala tingim moa olketa samting ya. Hemi olsem bikos God hemi givim kam blesing blong hem long mi, ¹⁶ wea hemi mekem mi wakaman blong Jisas Kraes fo mi waka fo olketa pipol hu i no Jiu. Mi waka fo God olsem prist long Tambuhaos. Mi talemaot Gudnius blong God, mekem olketa pipol hu i no Jiu save kam long God, fo Holi Spirit mekem olketa kamap holi. Long wei ya, bae olketa kamap olsem sakrifaes wea God hemi hapi tumas long hem. ¹⁷ Bikos mi stap joen wetem Jisas Kraes, mi save praod long waka wea mi duim fo God. ¹⁸ Bat bae mi tokabaotem nomoa wanem Kraes hemi duim long waka blong mi, wea mi lidim olketa pipol hu i no Jiu fo obeim God. Taem Kraes hemi duim diswan long mi long paoa blong Holi Spirit, hemi waka long wanem mi talemaot an duim, an hemi yusim paoa blong olketa saen an mirakol. So long evri ples, stat kam long Jerusalem go kasem Ilirikam, mi talemaot finis Gudnius blong Kraes. ²⁰ An oltaem nomoa, mi traehad fo talemaot Gudnius long olketa ples wea pipol i no save abaotem Kraes yet, mekem mi no gohed fo waka long eniples wea nara man hemi statem sios finis. ²¹ Bikos Buktambu hemi talem finis olsem, “Bae olketa lukim nao wanem no eniwan bin talem long olketa bifoa, an bae olketa save gudfala wanem no eniwan bin herem bifoa.” ²² Dastawe, plande taem olketa waka ya i stopem mi fo no kam long yufala. ²³ Bat distaem nao mi finisim waka blong mi long olketa ples ya. Long plande yia nao mi wande kam lukim yufala, ²⁴ so mi tingting fo visitim yufala tu taem mi go long kantri long Spen. Bae mi stapgud wetem yufala fo lelebet taem nomoa, an bihaen mi laekem yufala fo helpem mi long gogo blong mi long Spen. ²⁵ Bat fastaem bae mi go long Jerusalem fo tekem go samfala seleni fo helpem olketa pipol blong God. ²⁶ Olketa Kristin pipol long Masedonia an Akaea olketa bin hapi fo givim olketa seleni fo helpem olketa pipol blong God long Jerusalem wea olketa pua tumas. ²⁷ Olketa seleva nao duim diswan bikos olketa garem kaon long olketa long Jerusalem. Bikos olketa Jiu i givim go fastaem long olketa, olketa gudfala samting blong Spirit long Gudnius. Dastawe nao olketa hu i no Jiu olketa givim go olketa gudfala samting blong wol. ²⁸ So bae mi go long Jerusalem fo givim go olketa seleni wea olketa kolektem finis. An taem mi finisim waka ya, bae mi go long Spen, an bae mi visitim yufala tu taem mi gopas long yufala. ²⁹ An mi save, taem mi kam long yufala, bae mi kam wetem evri gudfala blesing blong Kraes. ³⁰ Olketa Kristin fren, bikos yumi stap joen wetem Masta blong yumi Jisas Kraes, an bikos Holi Spirit hemi mekem yumi lavem yumi evriwan, mi askem yufala strong fo yufala wakahad wetem mi, wea yufala mas prea go long God fo hemi helpem mi. ³¹ Yufala mas prea fo olketa pipol long Jiudia hu i no biliv, mekem olketa no save spoelem mi. An yufala mas prea fo olketa pipol blong God long Jerusalem, mekem olketa save hapi long olketa seleni wea mi tekem kam fo helpem olketa ya. ³² An sapos God hemi laekem olsem, bae mi save kam fo lukim yufala, wea bae mi save hapi tumas an bae mi save res gudfala wetem yufala. ³³ Letem God hu hemi givim piis, hemi stap wetem yufala evriwan. Amen.

¹ Disfala sista blong yumi Fibi hu hemi waka fo helpem olketa pipol long sios long Senggria, hemi gudfala woman tumas ya. ² Hemi gud fo yufala tingim Masta blong yumi, an letem Fibi fo stap wetem yufala long wei wea hemi fitim olket a pipol blong God. An sapos hemi sot long enisamting, yufala mas helpem hem, bikos hemi helpem plande pipol finis an hemi helpem mi tu. ³ Yufala sei halo long Prisila an Akuila, wea tufala waka wetem mi fo Jisas Kraes. ⁴ Tufala kolsap dae from tufala wakahad fo helpem mi, an mi hapi tumas long tufala. An olketa sios blong olketa pipol hu i no Jiu olketa talem tengkiu long tufala tu. ⁵ Mi laek fo sei halo tu long olketa Kristin pipol hu i save hipap insaet long haos blong tufala. Yufala sei halo long nambawan fren blong mi Epenetas, hemi faswan fo biliv long Kraes long provins long Esia. ⁶ An yufala sei halo long Meri, hu hemi wakahad tumas fo helpem yufala. ⁷ An yufala sei halo long Andronikas an Jiulia, wea tufala i Jiu olsem mi tu, an tufala bin stap insaet long prisin wetem mi. Olketa aposol i tinghae tumas long tufala, an tufala biliv long Kraes fastaem long mi. ⁸ Yufala sei halo long Ambliatas, wea mi lavem hem long nem blong Masta. ⁹ An yufala sei halo long Obanas, hu hemi wakaman wetem yumi long saet blong Kraes. An yufala sei halo tu long nambawan fren blong mi Stakis. ¹⁰ An yufala sei halo long Apelis hu hemi somaot dat hemi barava falom Kraes. An yufala sei halo long famili blong Aristobiulas. ¹¹ An yufala sei halo long wantok blong mi, Herodion. An yufala sei halo long olketa Kristin long famili blong Nasisas. ¹² Yufala sei halo long Traefina an Traefosa, tufala woman hu i wakahad long saet blong Masta. An yufala sei halo long nambawan fren blong mi Pesis, hu hemi narafala woman hu hemi wakahad tumas long saet blong Masta. ¹³ An yufala sei halo long Rufas, wea hemi gudfala man tumas fo waka fo Masta, an long mami blong hem hu hemi lukaftarem mi olsem san blong hem. ¹⁴ An yufala sei halo long Asinggritas an Fligon an Hemas an Patrobas an Hemes an olketa nara Kristin hu i stap wetem olketa. ¹⁵ Yufala sei halo long Filologas wetem Julia an Nerias wetem sista blong hem an long Olimbas an evri pipol blong God hu i stap wetem olketa. ¹⁶ Yufala mas sei halo long olketa Kristin fren an kisim olketa long wei blong tru kristin brata o sista. Evri sios blong Kraes i sei halo go long yufala. ¹⁷ Mi talem strong long yufala olketa Kristin fren, yufala mas lukaot long olketa pipol hu i wande splitim sios an spoelem biliv blong yufala wetem tising wea hemi deferen long olketa tising wea yufala lanem finis. Yufala mas no lisin long olketa. ¹⁸ Olketa pipol olsem, olketa no waka wetem Kraes Masta blong yumi, bat olketa falom nomoa ravis tingting blong olketa seleva. Olketa save yusim suit toktok an olketa save laea nomoa fo trikim olketa pipol hu i no savegud long wei blong olketa. ¹⁹ Evriwan herem finis abaotem hao yufala holestrong long biliv blong yufala. Mi hapi tumas long yufala from diswan. Bat mi laekem yufala fo savegud moa abaotem olketa gud samting, an mi laekem yufala fo no tingting nomoa long olketa ravis samting. ²⁰ Bae no longtaem, God hu hemi givim piis, bae hemi mekem yufala garem paoa ovarem Seitan fo spoelem hem. Letem kaenfala lav blong Jisas Masta blong yumi, hemi stap wetem yufala. ²¹ Timoti hu hemi waka wetem mi, hemi sei halo long yufala. An Lusias an Jeson an Sosipata wea olketa i wantok blong mi, trifala sei halo long yufala tu. ²² Mi Tetias, hu mi raetemdaon disfala leta blong Pol, mi sei halo long yufala. ²³ Gaeas tu hemi sei halo long yufala. Mi nao stap long haos blong hem distaem, an sios tu olketa save miting long haos blong hem. Erastas hu hemi man fo lukaftarem seleni long biktaon long hia, an brata blong yumi Kuotas, tufala sei halo long yufala tu. ²⁵ !Yumi mekhae long God! Hem nao hemi save mekem yufala stanap strong long biliv blong yufala, falom Gudnius wea mi talemaot abaotem Jisas Kraes. Long Gudnius ya nao God hemi mekem klia disfala toktok wea hemi staphaed long bifoa kam yet. ²⁶ Bat distaem nao, God hu hemi laef olowe, hemi somaot disfala toktok long wanem olketa profet olketa raetem finis. An hemi talem yumi fo talemaot disfala toktok, mekem olketa pipol long evri ples long wol olketa save biliv long God an obeim hem. ²⁷ God seleva nomoa hemi waes tumas, an yumi mas mekhae long hem long nem blong Jisas Kraes, evritaem olowe. Amen.