REVELESIN

REVELESIN

¹ Disfala buk hemi talemaot olketa samting wea hemi staphaed bifoa, bat distaem Jisas Kraes hemi somaot klia. God hemi som diswan long Jisas, mekem hemi save somaot moa long olketa wakaman blong hem. Hemi somaot olketa samting wea bae no longtaem nomoa, olketa mas hapen. Nao Kraes hemi sendem enjel blong hem fo somaot olketa samting ya long mi Jon, wea mi nao wakaman blong hem. ² So mi gohed nao fo raetemdaon olketa samting wea mi lukim. An hem ya nao toktok blong God, olsem tru toktok wea Jisas Kraes hemi talem kam. ³ Man wea hemi ridim olketa toktok ya wea God hemi talem, hemi save hapi fogud. An olketa hu i herem an obeim toktok ya, olketa tu save hapi fogud. Bikos taem blong olketa samting ya fo hapen, hemi kam kolsap nao. ⁴ Mi Jon, mi raet go long yufala evriwan long sevenfala sios long provins long Esia. Letem kaenfala lav an piis hemi stap wetem yufala. Lav an piis ya hemi stat kam long God wea hemi stap olowe bifoa, an wea hemi stap distaem, an wea bae hemi kam. Lav an piis ya hemi kam from seven gudfala spirit tu, wea olketa stap long frant long tron blong God wea hemi sidaon fo rul. ⁵ An lav an piis hemi kam tu from Jisas Kraes wea hemi man fo talemaot stret olketa toktok blong God, an hemi fas man fo laefbaek moa from dae, an wea hemi garem paoa ovarem evri king long wol. Jisas Kraes hemi lavem yumi tumas, an taem hemi dae olsem wanfala sakrifaes hemi peimaot yumi evriwan from olketa sin blong yumi. ⁶ Hemi bin mekem yumi wan pipol wea hemi King ovarem, an hemi bin mekem yumi fo kamap olketa prist fo wosipim God Dadi blong hem. Bae yumi liftimap nem blong hem an preisim hem evritaem an olowe fo bikfala paoa blong hem. Amen. ⁷ !Yufala save! Jisas bae hemi kambaek antap long olketa klaod. An evriwan bae lukim hem, nomata olketa hu i spiarem hem bifoa. An evri pipol long evri ples long wol bae olketa sore an krae bikfala taem olketa lukim hem. Bae hemi olsem nao. Amen. ⁸ God Masta blong yumi hu hemi garem evri paoa an hu hemi stap olowe bifoa, an hu hemi stap distaem, an hu bae hemi kam, hem nao hemi talem olsem, “Mi nao mi faswan bifoa evrisamting, an bae mi laswan tu bihaen evrisamting ya.” ⁹ Mi Jon, mi brata blong yufala bikos yumi evriwan biliv long Jisas. Yumi evriwan fren tugeta, nomata olketa mekem yumi safa bikos yumi biliv long Jisas. Olketa bin putum mi long smolfala aelan long Patmos, bikos mi bin talemaot toktok blong God an olketa tru toktok abaotem Jisas. ¹⁰ Nao long De blong Masta blong yumi, paoa blong Holi Spirit hemi kam long mi. An mi herem wanfala toktok wea hemi tok kam bikfala bihaen long mi, an hemi here olsem wanfala trampet. ¹¹ Hemi sei olsem, “Olketa samting wea bae yu lukim, yu mas raetemdaon long wanfala buk. An bihaen, yu mas sendem diswan go long olketa sios wea i stap long sevenfala taon, Efesas an Smana an Pegamam an Taeataera an Sadis an Filadelfia an Leodisia.” ¹² Nao mi taneraon fo lukim hu nao hemi tok kam long mi, an taem mi luk go, mi lukim sevenfala bikfala lam wea olketa wakem long gol. ¹³ An long midol long olketa lam ya, mi lukim wanfala man wea hemi luk olsem san blong man. Hemi werem longfala kaleko wea hemi kasem graon an hemi garem wanfala gol strap raonem sest blong hem. ¹⁴ Hed an hea blong hem hemi barava waet tumas olsem hea blong sipsip, an ae blong hem hemi olsem faea wea hemi laet. ¹⁵ An lek blong hem hemi saen olsem bras wea olketa klinim an hemi saen fogud, an voes blong hem hemi meknoes tumas olsem olketa bikfala wev. ¹⁶ Hemi holem sevenfala sta long raet han blong hem. An wanfala naef fo faet wea hemi sap tumas long tufala saet evriwan, hemi kamaot long maos blong hem. An fes blong hem hemi saen olsem san long midol de. ¹⁷ Nao taem mi lukim nomoa, mi foldaon long frant long lek blong hem, an mi stap olsem wanfala man wea hemi dae finis. Bat hemi tasim mi wetem raet han blong hem an hemi tok olsem, “Yu no fraet. Mi nao mi faswan bifoa evrisamting, an bae mi laswan tu bihaen evrisamting. ¹⁸ !Mi man wea mi barava laef! Long bifoa, mi dae finis bat mi laefbaek moa an mi no save dae enitaem. Mi nao mi garem paoa ovarem Dae an mi garem paoa ovarem ples blong olketa pipol hu i dae finis. ¹⁹ Yu mas raetemdaon olketa samting wea yu lukim, olketa samting wea i hapen distaem wetem olketa samting wea bae hemi hapen moa bihaen. ²⁰ Yu lukim sevenfala sta wea mi holem long raet han blong mi, an sevenfala bikfala gol lam. Olketa garem mining wea hemi haed. Olketa sevenfala sta ya hemi minim olketa enjel blong sevenfala sios ya. An sevenfala bikfala lam ya hemi minim sevenfala sios ya nomoa.”

¹ Disfala man hemi tok olsem moa, “Nao yu mas raet go long enjel blong sios long Efesas, an yu mas sei olsem, ‘Hem nao toktok blong mi wea mi holem sevenfala sta long raet han blong mi, an wakabaot long midol long sevenfala bikfala gol lam. ² Mi save abaotem yufala finis, yufala barava wakahad tumas an yufala gohed nomoa fo stap strong. Mi save dat yufala nating laekem olketa pipol hu i falom ravis wei. An mi save dat yufala traem finis olketa hu i laea an talem dat olketa i aposol, an yufala faendemaot dat olketa barava laea nomoa. ³ Mi save tu dat yufala barava stanap strong, an yufala no givap nomata olketa pipol mekem yufala safa. ⁴ ‘Bat wanfala samting nao mi no laekem long yufala. Disfala gudfala wei blong yufala bifoa wea yufala lavem mi tumas, yufala lusim nao. ⁵ Yufala mas tingimbaek gudfala wei wea yufala bin stap long hem fastaem. Nao yufala mas lusim olketa ravis wei blong yufala, an yufala mas gohed moa fo duim wanem yufala bin duim kam fastaem. Bat sapos yufala no lusim olketa ravis wei blong yufala, bae mi kam an tekemaot disfala bikfala lam blong yufala. ⁶ Bat wanfala samting yufala duim gud nao hemi olsem. Yufala barava les long wei blong olketa pipol hu i falom tising blong Nikolas, olsem mi tu mi barava les long wei blong olketa. ⁷ ‘Eniwan hu hemi garem ia, hemi mas heremgud nao olketa toktok wea Holi Spirit hemi talem long olketa sios ya. Olketa hu i winim faet, bae mi letem olketa fo kaikaim frut blong disfala tri blong laef wea hemi grou long gaden blong God.’ ” ⁸ Disfala man hemi tok olsem moa, “An yu mas raet go long enjel blong sios long Smana, an yu mas sei olsem, ‘Hem nao toktok blong mi wea mi nao faswan bifoa evrisamting, an mi laswan tu bihaen evrisamting. Long bifoa, mi dae finis, bat distaem, mi laefbaek moa. ⁹ Mi save finis long olketa trabol blong yufala an dat yufala pua tumas. !Bat yufala ris tumas tu! An mi save tu long olketa ravis toktok blong olketa pipol wea olketa gohed fo toknogud long yufala. Olketa sei olketa nao Jiu, bat wea, olketa barava laea nomoa. Olketa nao barava seksin wea olketa mekhae long Seitan. ¹⁰ Yufala mas no fraet long enisamting wea bae hemi kam fo mekem yufala safa. Yufala save, Seitan bae hemi putum samfala long seksin blong yufala insaet long prisin fo traem yufala. An olketa trabol blong yufala bae hemi gohed fo tenfala de. Bat yufala mas biliv strong long mi nomoa, nomata yufala dae long hem. An sapos yufala duim diswan, bae mi givim yufala niufala laef wea hemi olsem nambawan praes olketa givim long man hu hemi win long resis. ¹¹ ‘Eniwan hu hemi garem ia, hemi mas heremgud nao olketa toktok wea Holi Spirit hemi talem long olketa sios ya. Olketa hu i winim faet, bae disfala mektu dae hemi no save kasem olketa.’ ” ¹² Disfala man hemi tok olsem moa, “An yu mas raet go long enjel blong sios long Pegamam, an yu sei olsem, ‘Hem nao toktok blong mi wea mi garem naef fo faet wea hemi sap tumas long tufala saet evriwan. ¹³ Mi save finis dat yufala stap long ples wea Seitan hemi rul ovarem, bat yufala nao i stanap long saet blong mi. Olketa long taon blong yufala wea Seitan hemi stap long hem, olketa bin kilim dae Antipas hu hemi save talemaot stret toktok blong mi. Bat nomata hem olsem long taem ya, yufala nating lusim biliv blong yufala long mi. ¹⁴ ‘Bat samfala samting nomoa mi no laekem long yufala. Samfala pipol long yufala, olketa gohed fo falom nomoa tising blong profet Balam, wea bifoa hemi tisim King Balak abaotem wei fo trikim pipol blong Israel fo foldaon long sin. Hemi mekem olketa kaikaim mit wea olketa bin sakrifaesim finis long laea god, an hemi mekem olketa fo durong wetem olketa woman. ¹⁵ An samfala long yufala hu i gohed fo falom tising blong seksin blong Nikolas, i duim semkaen samting tu. ¹⁶ So yufala mas lusim olketa ravis wei olsem. An sapos yufala no duim diswan, no longtaem nomoa, bae mi kam long yufala an bae mi faetem olketa pipol ya wetem naef fo faet wea hemi kamaot long maos blong mi. ¹⁷ ‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios. Eniwan wea hemi winim faet, bae mi givim hem mana fo kaikaim. Hemi disfala mana blong bifoa, wea hemi staphaed. An bae mi givim hem tu wanfala waet ston wea wanfala niu nem hemi stap long hem. Niu nem ya, no eni man nao hemi save long hem, bat man hemi garem ston ya nomoa hemi save long nem ya.’” ¹⁸ Disfala man hemi tok olsem moa, “An yu mas raet go long enjel blong sios long Taeataera, an yu sei olsem, ‘Hem nao toktok blong mi San Blong God, wea ae blong mi hemi olsem faea wea hemi laet, an lek blong mi hemi olsem bras wea hemi saen fogud. ¹⁹ Mi save abaotem yufala finis, dat yufala lavem tumas olketa pipol an yufala biliv long mi. An mi save tu dat yufala gohed fo helpem yufala evriwan, an gohed nomoa fo stanap strong. An olketa gudfala waka yufala duim distaem hemi barava winim olketa waka wea yufala bin duim kam fastaem. ²⁰ ‘Bat wanfala samting nomoa mi no laekem long yufala. Yufala bin letem woman ya Jesebel fo stap long yufala yet. Hemi laea an sei hem nao wanfala profet blong God. Hemi pulum olketa pipol blong mi fo falom rong tising blong hem, mekem olketa durong wetem eniwan an mekem olketa kaikaim mit wea olketa bin sakrifaesim long laea god. ²¹ Mi givim taem long hem finis fo sensim tingting blong hem, bat hemi no wande lusim disfala ravis wei blong hem fo durong wetem eniwan. ²² So bae mi mekem hem fo sik bikfala. An olketa hu i durong wetem hem, sapos olketa no lusim ravis wei wea olketa save falom, bae mi mekem olketa fo safa bikfala tumas. ²³ An olketa disaepol blong woman ya tu bae mi kilim olketa dae. Long taem ya, bae olketa sios save lukim dat mi luksave long olketa tingting blong evri pipol. An bae mi sensimbaek long wan-wan long yufala falom wanem hemi duim. ²⁴ ‘Bat evriwan long yufala long Taeataera wea yufala no falom ravis tising ya, an wea yufala no lanem olketa wei olketa kolem “Dip tokhaed blong Seitan”, mi laek fo talem samting long yufala. Mi no givim eni had samting moa long yufala fo falom. ²⁵ Yufala mas holemstrong olketa gudfala wei wea yufala garem finis, go-go kasem taem mi kambaek. ²⁶ Olketa pipol wea olketa save winim faet an olketa gohed fo duim waka blong mi go-go kasem en blong disfala wol, bae mi givim paoa long olketa fo rul ovarem olketa kantri long wol. ²⁷ An bae olketa strik tumas taem olketa rulim olketa kantri ya, an bae olketa brekemdaon paoa blong olketa, olsem yumi save brekem olketa kap nomoa. ²⁸ Bikos paoa wea bae mi givim olketa ya, hemi wankaen wetem paoa wea Dadi blong mi hemi givim long mi, an bae mi givim disfala sta blong eli moning long olketa tu. ²⁹ ‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ”

¹ Disfala man hemi tok olsem moa, “An yu mas raet go long enjel blong sios long Sadis, an yu sei olsem, ‘Hem nao toktok blong mi wea mi garem seven gudfala spirit blong God, wetem sevenfala sta. Mi save abaotem yufala finis, an mi save dat yufala dae, nomata olketa sei yufala laef. ² So yufala mas wekap an mekem lelebet laef wea hemi stap yet long yufala fo kamap strong moa, bikos hemi kolsap dae finis. Bikos mi faendemaot dat olketa waka blong yufala hemi no stret yet long ae blong God blong mi. ³ Nao yufala mas tingim moa olketa gudfala toktok wea olketa talemaot long yufala an yufala herem finis. Yufala mas obeim gud olketa toktok ya, an yufala mas lusim olketa ravis wei blong yufala nao. Bat sapos yufala no wekap, bae mi kam kasem yufala. An bae yufala no save long wataem nao bae mi kam, bikos bae mi kam olsem wei wea man fo stil hemi save kam. ⁴ ‘Bat samfala pipol long yufala long Sadis olketa lukaftarem kaleko blong olketa, mekem olketa no doti. Olketa nao bae werem waet kaleko an bae olketa wakabaot wetem mi, bikos olketa nao fitim diswan from gudfala waka blong olketa. ⁵ Olketa pipol hu i winim faet olsem, olketa nao bae werem waet kaleko ya. An bae mi no tekemaot nem blong olketa from disfala buk blong laef. An long ae blong Dadi blong mi an ae blong olketa enjel blong hem, bae mi talemaot dat olketa nao barava blong mi. ⁶ ‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ” ⁷ Disfala man hemi tok olsem moa, “Yu mas raet go long enjel blong sios long Filadelfia, an yu sei olsem, ‘Hem nao toktok blong mi wea mi holi an mi kipim promis olowe, an mi garem ki olsem ki blong King Deved. Taem mi openem doa, no eni man save satem moa, an taem mi satem, no eni man tu save openem moa. ⁸ Mi save abaotem yufala finis, dat nomata paoa blong yufala hemi smol nomoa, yufala bin gohed fo falom tising blong mi an no filsem fo sei yufala i pipol blong mi. So mi openem wanfala doa fo yufala, wea no eniwan save satem. ⁹ Yufala save. Seksin wea olketa mekhae long Seitan, olketa talem dat olketa nao Jiu, bat hemi no tru. Olketa barava laea nomoa. Bae mi mekem olketa fo kam an baodaon long frant long yufala, an bae olketa luksave dat mi barava lavem yufala tumas. ¹⁰ Nao bikos yufala falom tising blong mi fo gohed fo stanap strong olowe, bae mi lukaftarem yufala, mekem yufala stap sef long taem trabol hemi kam long disfala wol fo testem olketa pipol. ¹¹ No longtaem nomoa, bae mi kambaek moa long yufala. So yufala mas holemstrong olketa gudfala wei wea yufala garem finis, nogud eniwan hemi stopem yufala from winim nambawan praes ya. ¹² Man hu hemi winim faet, bae mi mekem hem kamap olsem wanfala pos insaet long Tambuhaos blong God blong mi, an bae hemi stap olsem olowe nomoa. Bae mi raetem olketa nem fo stap long hem, olsem niu nem blong mi an nem blong God blong mi an nem blong bikfala taon blong hem. Bikfala taon ya nao hemi niu Jerusalem wea bae God blong mi hemi sendem kamdaon long heven. ¹³ ‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ” ¹⁴ Disfala man hemi tok olsem moa, “An yu mas raet go long enjel blong sios blong Leodisia, an yu sei olsem, ‘Hem nao toktok blong mi wea mi nao man fo somaot dat olketa promis blong God hemi tru. An mi nao man fo talemaot stret olketa toktok blong hem, an mi tok tru nomoa. An evrisamting wea God hemi mekem, hemi stat kam long mi nao. ¹⁵ Mi save abaotem yufala finis, dat yufala no hot an yufala no kol tu. Sapos yufala barava hot o yufala barava kol, hem nao hemi gud long mi. ¹⁶ Bat bikos yufala hafhaf long evrisamting an lelebet hot nomoa, bae mi toraotem yufala from maos blong mi. ¹⁷ Yufala sei yufala barava ris fogud an yufala garem finis evrisamting yufala laekem. Bat yufala nating save nomoa, dat yufala pua tumas, an neket, an ae blong yufala tu hemi blaen. Hemi fitim fo olketa pipol fo sore long yufala, bikos evrisamting nao yufala sot long hem. ¹⁸ Bat mi talem yufala stret, yufala mas peim barava gudfala gol long mi, mekem yufala kamap ris. An yufala mas peim waet kaleko long mi fo yufala werem, mekem yufala no save filsem moa long neket bodi blong yufala. An yufala mas peim tu samfala meresin long mi fo putum long ae blong yufala, mekem yufala save lukluk gud moa. ¹⁹ Olketa pipol wea mi lavem olketa tumas, mi save tokstrong long olketa, an mi save panisim olketa tu. So yufala mas tinghevi long mi an lusim olketa ravis wei blong yufala. ²⁰ Yufala save, mi stanap aotsaet long doa, an mi gohed fo noknok. Nao sapos wanfala man hemi herem toktok blong mi an hemi openem doa fo mi, bae mi kam insaet long haos blong hem, an bae mitufala kaikai tugeta. ²¹ Man wea hemi winim faet, bae mi mekem hem fo sidaon fo rul wetem mi, bikos mi winim faet finis an mi gohed fo rul wetem Dadi blong mi. ²² ‘Eniwan hu hemi garem ia, hemi mas heremgud olketa toktok wea Holi Spirit hemi talem long olketa sios.’ ”

¹ Bihaen long olketa samting ya, mi lukim moa wanfala doa long heven hemi open. Nao disfala toktok wea hemi tok kam long mi fastaem an hemi here olsem wanfala trampet, hemi talem mi olsem moa, “Yu kamap long hia, an bae mi som yu olketa samting wea bae olketa mas hapen.” ² Semtaem nomoa, paoa blong Holi Spirit hemi kam long mi, an mi lukim wanfala tron wea hemi stap long heven wea wanfala man hemi sidaon long hem. ³ An man hu hemi sidaon long tron ya, fes blong hem hemi saen olsem tufala naesfala ston, jaspa an kanilian. An raonem tron ya mi lukim wanfala renbou wea hemi saen olsem disfala naesfala ston emaral. ⁴ An raonem tron ya tu, tuenti-foa nara tron hemi stap. Nao long olketa tron ya mi lukim tuenti-foa bikman nao sidaon long olketa. An olketa werem olketa waet kaleko an olketa werem gol kraon. ⁵ Nao long tron ya, mi lukim tu laetning hemi gohed fo laet kam long hem, an mi herem bikfala noes blong tanda wea hemi bosta. Long frant long tron ya, mi lukim moa sevenfala lam olketa gohed fo laet. Olketa ya nao seven gudfala spirit blong God. ⁶ An long frant long tron ya moa, hemi garem wanfala leik wea hemi olsem glas wea hemi saen fogud. Fofala animol nao olketa stanap raonem tron ya long fofala saet long hem. Fofala animol ya i garem plande ae long frant blong olketa an long bihaen blong olketa tu. ⁷ Fas animol ya hemi luk olsem laeon. An mektu animol hemi luk olsem buluka. An mektri animol nao, fes blong hem hemi olsem fes blong man. An mekfoa animol hemi luk olsem wanfala igol taem hemi flae. ⁸ Nao fofala animol ya olketa evriwan garem siksfala wing, an olketa garem plande ae wea i stap evriwea long bodi blong olketa, nomata andanit long olketa wing tu. Olowe nomoa long de an naet, olketa no save res bat olketa gohed fo singsing olsem, “God Masta blong yumi, hemi holi tumas an hemi garem evri paoa. Hemi stap olowe bifoa an hemi stap distaem, an bae hemi kambaek moa.” ⁹ Nao fofala animol ya olketa gohed fo liftimap nem blong man hu hemi laef oltaem an hemi no save dae, an hemi sidaon long disfala tron. Olketa gohed fo mekhae long hem an talem tengkiu long hem. An evritaem olketa duim diswan, ¹⁰ tuenti-foa bikman ya olketa nildaon long frant long man hu hemi laef oltaem an hemi no save dae, an hemi sidaon long tron ya. An olketa mekhae long hem an putumdaon olketa kraon blong olketa long frant long tron ya, an olketa gohed fo singsing olsem, ¹¹ “Yu nao God an Masta blong mifala. Yu mekem evrisamting long wol ya, an yu givim laef long olketa samting, bikos hem nao wanem yu laek fo duim. So hemi fitim fo mifala singsing fo liftimap nem blong yu an fo mekhae long yu an fo preisim yu from bikfala paoa blong yu.”

¹ Mi lukim moa wanfala skrol wea man hu hemi sidaon long tron hemi holem long raet han blong hem. Disfala skrol ya olketa bin raetem olketa toktok long tufala saet blong hem. Skrol ya, olketa satem finis wetem sevenfala tambu mak. ² Nao mi lukim moa wanfala enjel hu hemi garem bikfala paoa an hemi singaot bikfala olsem, “?Hu nao hemi fit fo brekem olketa tambu mak ya an fo openem skrol ya?” ³ Bat no eni man long heven o long wol o long ples blong olketa man dae, hemi save openem skrol ya fo luk insaet long hem. ⁴ Taem ya nomoa, mi krae fogud nao, bikos olketa no faendem eni man hu hemi fit fo openem skrol ya fo luk insaet long hem. ⁵ Bat wanfala long olketa bikman ya hemi tok olsem long mi, “Yu no krae. !Lukim! Laeon blong traeb blong Jiuda, disfala nambawan man wea hemi bon kam long traeb blong Jiuda an hemi nambawan lida hu hemi save falom olo blong hem Deved, hem nao hemi winim faet ya finis. So hem nao hemi save brekemaot sevenfala tambu mak ya an openem disfala skrol.” ⁶ Nao mi lukim moa wanfala Smolfala Sipsip wea hemi stanap long frant long tron ya wea fofala animol ya an olketa bikman i stap raonem hem. An Smolfala Sipsip ya hemi luk olsem olketa bin kilim hem dae. Hemi garem sevenfala hon long hem an sevenfala ae tu. Olketa ya nao seven gudfala spirit blong God, wea hemi sendem olketa fo goaot evriwea long wol. ⁷ Smolfala Sipsip ya hemi go nomoa an tekemaot skrol ya from raet han blong man hu hemi sidaon long tron ya. ⁸ An taem hemi tekem skrol ya, fofala animol ya wetem tuenti-foa bikman ya, olketa nildaon long frant long Smolfala Sipsip ya fo mekhae long hem. Evriwan olketa garem gita, an olketa holem tu olketa gol baol. Olketa baol ya olketa fulap long insens wea hemi olsem olketa prea blong olketa pipol blong God. ⁹ An olketa gohed fo singim wanfala niufala singsing wea hem sei olsem, “Yu nao man wea yu fit fo tekem skrol ya an brekem olketa tambu mak long hem. Bikos olketa bin kilim yu dae, an disfala blad blong dae blong yu hemi peimaot olketa pipol fo God. Olketa pipol ya i stap kam long evri traeb an long evri langguis an long evri laen long wol an long evri kantri. ¹⁰ Yu bin mekem olketa fo kamap wan pipol wea yu King ovarem, an yu bin mekem olketa fo kamap prist fo mekhae long God blong yumi. An bae olketa nao gohed fo rul ovarem olketa pipol long wol.” ¹¹ Nao taem mi luk go moa, mi herem singsing blong plande milion enjel an blong plande moa wea hemi had fo kaontem olketa. Olketa stanap raonem tron wetem fofala animol an olketa bikman ya. ¹² An olketa gohed fo singsing bikfala olsem, “Hem nao Smolfala Sipsip wea olketa pipol bin kilim hem dae. Hemi fitim fo yumi preisim hem, from bikfala paoa blong hem an olketa risis blong hem an waes tingting blong hem an strong blong hem. So hemi fitim fo yumi mekhae long hem an liftimap nem blong hem an preisim hem.” ¹³ Nao mi herem toktok blong evri laef samting wea God hemi bin mekem. Olketa samting wea i stap insaet long heven an long wol an long solwata an long ples blong man dae, evriwan long olketa gohed fo singsing olsem, “Disfala man hu hemi sidaon long tron wetem disfala Smolfala Sipsip tu, yumi preisim tufala evritaem an olowe. Yumi mekhae long tufala an liftimap nem blong tufala, an preisim tufala fo bikfala paoa blong tufala.” ¹⁴ Den fofala animol ya olketa ansa olsem, “Amen.” An olketa bikman ya olketa nildaon an wosipim tufala.

¹ Nao mi lukim Smolfala Sipsip ya hemi brekem mekwan tambu mak long olketa sevenfala tambu mak long skrol ya. An mi herem wanfala long olketa fofala animol ya hemi singaot bikfala, an voes blong hem hemi here olsem tanda. Hemi sei olsem, “Yu kam.” ² Mi luk go nomoa, an mi lukim wanfala waet hos hemi kamaot. An man wea hemi sidaon antap long hem, hemi holem wanfala bou an aro, an olketa givim hem wanfala kraon fo putum long hed blong hem. Hemi raed go long hos ya olsem man hu hemi winim faet finis, an hemi go fo winim nara faet blong hem moa. ³ Nao mi lukim Smolfala Sipsip ya hemi brekem moa mektu tambu mak long skrol ya, an mi herem mektu animol hemi sei olsem, “Yu kam.” ⁴ An wanfala hos moa hemi kamaot, wea hemi red fogud. An man wea hemi sidaon antap long hem, olketa givim hem wanfala bikfala naef fo faet an olketa givim hem paoa fo bringim faet kam long wol, mekem olketa pipol gohed fo kilim dae olketa seleva. ⁵ Nao Smolfala Sipsip ya hemi brekem moa mektri tambu mak long skrol ya, an mi herem mektri animol hemi sei olsem, “Yu kam.” Mi luk go moa, an mi lukim wanfala blak hos hemi kamaot. An man wea hemi sidaon antap long hem, hemi holem wanfala skel long han blong hem. ⁶ Nao mi herem olsem wanfala toktok long midol long olketa fofala animol ya, wea hemi sei olsem, “Bae olketa pipol sot tumas long kaikai, mekem wejis fo wan fulde bae hemi fit fo baem wanfala smol sosa flaoa blong wit, o sapos flaoa blong bali bae hemi fitim nomoa trifala smol sosa. Bat yu mas no spoelem olketa oliv tri an olketa grep tri blong olketa.” ⁷ Nao Smolfala Sipsip ya hemi brekem moa mekfoa tambu mak long skrol ya, an mi herem mekfoa animol hemi sei olsem, “Yu kam.” ⁸ Mi luk go moa, an mi lukim wanfala hos hemi kamaot wea kala blong hem hemi luknogud, olsem hemi dae finis. An man hu hemi sidaon antap long hem, nem blong hem “Dae”, an narawan wea hemi kam wetem hem, nem blong hem “Ples blong man dae.” An God hemi givim paoa long tufala fo kilim dae smolfala haf long olketa pipol long wol. Tufala save kilim olketa dae, long olketa samting olsem bikfala faet an taem blong hanggre an olketa nogud siknis an olketa wael animol. ⁹ Nao Smolfala Sipsip ya hemi brekem moa mekfaev tambu mak long skrol ya, an mi lukim plande spirit andanit long olta. Olketa spirit ya, i spirit blong olketa pipol wea olketa bin kilim dae bifoa, bikos olketa nao bin biliv long toktok blong God an olketa bin gohed fo talemaot disfala toktok ya. ¹⁰ An olketa spirit gohed fo singaot olsem, “Bikfala Masta, yu barava holi tumas an yu kipim promis olowe. Plis yu no weit moa fo jajem olketa pipol long wol ya. Yu mas panisim olketa distaem, an sensimbaek olketa, fo dae blong mifala.” ¹¹ Nao olketa givim wanfala waet kaleko long evriwan long olketa spirit ya, an olketa talem olketa olsem, “Yufala mas weit lelebet fastaem. Olketa Kristin fren hu olketa waka olsem yufala ya, olketa pipol gohed yet fo kilim olketa dae olsem olketa bin duim long yufala. Taem namba blong yufala olketa Kristin hemi inaf, God bae hemi sensimbaek olketa pipol, fo dae blong yufala evriwan.” ¹² Nao mi lukim moa Smolfala Sipsip ya hemi brekem meksiks tambu mak long skrol ya. An wanfala bikfala etkuek hemi barava seksek fogud, an san hemi no saen, an evriwea hemi barava tudak, an mun hemi kamap red olsem blad. ¹³ An olketa sta long skae tu olketa foldaon kam long graon, olsem olketa frut blong fig tri olketa foldaon taem bikfala win hemi sekem olketa. ¹⁴ An skae tu hemi goawe, olsem wanfala mat wea man hemi rolemap. An olketa maonten an olketa aelan tu, olketa evriwan goawe from ples olketa stap fastaem. ¹⁵ Nao olketa king long wol, wetem olketa bikfala sif an olketa komanda, wetem olketa ris pipol an olketa pipol hu i garem paoa, wetem evri nara pipol moa, nomata olketa slev o olketa fri man, olketa haedem olketa seleva insaet long olketa kev, an long olketa bikfala ston long olketa maonten. ¹⁶ Nao olketa singaot go long olketa bikfala maonten an long olketa bikfala ston olsem, “Yufala foldaon kam antap long mifala, mekem yufala save haedem mifala from disfala man hu hemi sidaon long tron an from kros blong Smolfala Sipsip ya. ¹⁷ Bikos distaem, hemi kasem nao bikfala de blong tufala fo panisim mifala. ?So hu nao bae hemi save laef long diswan?”

¹ Bihaen, mi lukim moa fofala enjel wea olketa gohed fo stanap long fofala kona blong wol ya. Olketa stanap fo satem fofala win long wol, mekem no eni win hemi save blou kam long graon an long olketa tri an long si. ² Nao mi lukim nara enjel wea hemi stat kamap long saet long ist, an hemi holem samting fo putum mak long pipol blong God hu hemi laef. Enjel ya hemi singaot go long nara fofala enjel ya, wea God hemi givim paoa long olketa finis, mekem olketa save spoelem graon wetem si ya. ³ Hemi sei olsem long olketa, “Yufala no spoelem yet graon wetem olketa tri an si. Mifala mas putum wanfala mak long fohed blong olketa pipol blong God fastaem.” ⁴ Nao olketa talem mi dat namba blong olketa pipol wea mak blong God hemi stap long olketa, hemi kasem 144,000. An olketa ya, kamaot long evri traeb blong pipol blong Israel. ⁵ Long traeb blong Jiuda hemi garem 12,000, an long traeb blong Ruben hemi garem 12,000, an long traeb blong Gad hemi garem 12,000, ⁶ an long traeb blong Asa hemi garem 12,000, an long traeb blong Naftali hemi garem 12,000, an long traeb blong Manase hemi garem 12,000, ⁷ an long traeb blong Simion hemi garem 12,000, an long traeb blong Livae hemi garem 12,000, an long traeb blong Isaka hemi garem 12,000, ⁸ an long traeb blong Sebulun hemi garem 12,000, an long traeb blong Josef hemi garem 12,000, an long traeb blong Benjamin hemi garem 12,000. ⁹ Den mi luk go moa, an mi lukim plande pipol tumas, wea no eniwan save kaontem olketa. Olketa pipol ya olketa kam from evri traeb an evri laen an evri kantri an evri langguis long wol. Olketa werem waet kaleko an olketa holem lif blong pam tri long han blong olketa, an olketa gohed fo stanap long frant long tron ya, an long frant long Smolfala Sipsip ya. ¹⁰ Nao olketa singaot bikfala olsem, “God blong yumi hu hemi sidaon long tron wetem Smolfala Sipsip ya, tufala nao sevem yumi.” ¹¹ Nao olketa enjel stanap raonem disfala tron wetem olketa bikman an fofala animol ya. Olketa nildaon long graon long frant long tron, an olketa gohed fo wosipim God ¹² olsem, “Ya, hemi tru ya. God blong mifala, mifala preisim yu an liftimap nem blong yu an talem tengkiu long yu an mekhae long yu. Mifala preisim yu from waes tingting blong yu an bikfala paoa blong yu an strong blong yu. Evrisamting ya hemi gohed evritaem an olowe. Amen.” ¹³ Nao wanfala long olketa bikman ya hemi askem mi olsem, “?Hu nao olketa pipol wea olketa werem waet kaleko ya? ?An olketa stap kam long wea ya?” ¹⁴ An mi ansarem hem olsem, “Masta, yu nomoa yu save.” So hemi sei long mi olsem, “Hem nao olketa pipol hu i bin gotru long bikfala trabol ya. An long distaem olketa wasim finis kaleko blong olketa long blad blong Smolfala Sipsip ya, an kaleko blong olketa hemi kamap waet moa. ¹⁵ Dastawe olketa gohed fo stanap long frant long tron blong God. An olowe, nomata de an naet, olketa gohed fo wosipim hem insaet long tambuhaos blong hem. An God hu hemi sidaon long tron, bae hemi stap wetem olketa fo lukaftarem olketa. ¹⁶ Bae olketa no save hanggre an no save dae long wata moa. An bae hot san hemi no save spoelem olketa moa. ¹⁷ Bikos Smolfala Sipsip wea hemi stap long tron, bae hemi lukaftarem olketa olsem man hu hemi lukaftarem sipsip blong hem. An bae hemi lidim olketa go fo dring long olketa springwata wea hemi save givim laef. An God bae hemi draem evri tias long ae blong olketa, mekem olketa no save sore moa.”

¹ Nao Smolfala Sipsip ya hemi brekem moa mekseven tambu mak long skrol ya, an long taem ya nomoa, no eni noes nao long heven, go-go kolsap haf-aoa hemi finis. ² An bihaen, mi lukim dat olketa givim go sevenfala trampet long olketa sevenfala enjel wea olketa gohed fo stanap long frant blong God. ³ Nao narafala enjel moa hemi kam an stanap kolsap long olta ya. An hemi holem wanfala sosa blong insens wea olketa mekem long gol. Olketa givim hem plande insens moa fo hemi adem go wetem olketa prea blong olketa pipol blong God. An hemi mekem sakrifaes long hem long disfala olta wea olketa mekem long gol, wea hemi stap long frant blong tron ya. ⁴ An smok blong insens ya wetem olketa prea blong olketa pipol blong God, hemi goap from sosa long han blong enjel ya an hemi go kasem God. ⁵ Bihaen nomoa, enjel ya hemi tekem sosa blong insens an hemi fulumapem long faea long olta. Hemi tekem nomoa, an hemi torowem godaon long wol. Taem ya nomoa, bikfala noes nao hemi kam an laetning hemi laet an tanda hemi bosta an wanfala etkuek hemi sekem graon. ⁶ Nao sevenfala enjel wea olketa holem sevenfala trampet ya, olketa mekredi fo bloum. ⁷ Den fas enjel hemi bloum trampet blong hem. An aes an faea wea tufala miks wetem blad hemi foldaon kam long wol olsem ren. An insaet long wol ya, bikfala haf blong graon nao faea hemi bonem wetem bikfala haf blong olketa tri an evri grin gras. ⁸ Nao mektu enjel hemi bloum trampet blong hem. An wanfala samting wea hemi luk olsem wanfala bik maonten wea hemi bone, hemi foldaon go insaet long si. An bikfala haf blong si ya hemi kamap blad, ⁹ an bikfala haf blong olketa fis insaet long si olketa dae. An bikfala haf tu blong olketa sip long si olketa barava nogud. ¹⁰ Nao mektri enjel hemi bloum trampet blong hem. An wanfala bikfala sta wea hemi laet olsem bikfala faea, hemi kamdaon long skae an foldaon antap long bikfala haf blong olketa riva, an antap long olketa springwata tu. ¹¹ An nem blong bikfala sta ya nao olketa kolem “Saoa”. Bikfala haf blong olketa wata ya hemi kamap saoa fogud, an plande pipol dae bikos olketa dringim olketa saoa wata ya. ¹² Nao mekfoa enjel hemi bloum trampet blong hem. An bikfala haf blong san an bikfala haf blong mun hemi dae. An hemi olsem tu long olketa sta, wea bikfala haf blong olketa hemi dae. So bikfala haf long de hemi no garem eni laet long hem, an bikfala haf long naet hemi olsem tu. ¹³ Bihaen mi luk go moa, an mi herem wanfala igol wea hemi flae antap tumas, hemi gohed fo singaot bikfala olsem, “!Sore tumas! !Sore tumas! Sore tumas long olketa pipol long wol, bikos taem nara trifala enjel moa olketa bloum trampet blong olketa, bae hemi barava nogud tumas long olketa ya.”

¹ Nao mekfaev enjel hemi bloum trampet blong hem. An mi lukim wanfala sta wea hemi bin lusim heven an foldaon finis long wol. Disfala sta olketa givim hem wanfala ki fo openem hol wea hemi barava dip tumas. ² Nao taem hemi openem hol ya, bikfala smok nao hemi kamaot long hem, olsem smok blong bikfala faea. An smok ya hemi satem laet blong san an hemi mekem skae fo tudak. ³ Staka grashopa nao kamaot long smok ya, an olketa kamdaon long wol. An olketa givim paoa long olketa grashopa ya wea hemi semsem wetem paoa blong skopion. ⁴ An olketa talem olketa grashopa ya fo no spoelem olketa gras an olketa tri an olketa nara plant. Bat olketa letem olketa fo spoelem nomoa olketa pipol wea mak blong God hemi no stap long fohed blong olketa. ⁵ An olketa save mekem pipol ya fo garem pein tumas fo faefala mans, bat olketa mas no kilim dae olketa pipol ya. An pein wea olketa grashopa save mekem, hemi olsem bikfala pein wea skopion hemi save mekem. ⁶ Nao insaet long faefala mans ya, olketa pipol ya trae fo faendem eni wei fo dae, bat olketa no save faendem. Bae olketa laekem tumas fo dae, bat bae olketa nating save dae nomoa. ⁷ An olketa grashopa ya i luk olsem olketa hos wea olketa redi fo go long faet. Long hed blong olketa, olketa garem samting olsem gol kraon, an fes blong olketa hemi olsem fes blong man. ⁸ Hea blong olketa hemi longfala olsem hea blong woman, an tit blong olketa hemi bikfala olsem tit blong laeon. ⁹ Olketa werem kaleko fo faet wea olketa mekem long aean. An noes blong wing blong olketa, hemi olsem bikfala noes blong plande kaat fo faet wea olketa hos save pulum taem olketa ran go long faet. ¹⁰ An olketa garem tel olsem skopion, wea hemi garem nila long hem. Tel blong olketa nao hemi garem paoa fo spoelem olketa pipol fo faefala mans. ¹¹ Olketa garem tu wanfala king hu hemi rul ovarem olketa, wea hemi wanfala enjel hu hemi bos long disfala hol wea hemi barava dip tumas. An long langguis long Hibru, nem blong enjel ya “Abadon”, an long langguis long Grik, hemi “Apolion” wea hemi minim “Man fo spoelem evrisamting.” ¹² Fas bikfala sore hemi go finis nao, bat tufala bikfala sore moa bae kam. ¹³ Nao meksiks enjel hemi bloum moa trampet blong hem. An mi herem wanfala toktok long fofala kona blong gol olta ya wea hemi stap long frant long God. ¹⁴ Hemi tok olsem long meksiks enjel ya, “!Yu mas letem gofri fofala enjel wea olketa stap long prisin long Yufretis riva!” ¹⁵ Den, meksiks enjel ya hemi letem fofala enjel ya gofri fo kilim dae bikfala haf long pipol long wol. Fofala enjel ya, olketa redi longtaem finis an weit nomoa fo disfala taem long disfala yia an mans an de fo kam. ¹⁶ Nao olketa talem mi dat namba blong olketa soldia blong fofala enjel ya hemi kasem 200 milion. ¹⁷ Mi lukim moa olketa hos wetem olketa man wea olketa sidaon antap long olketa. Olketa man ya olketa werem kaleko fo faet wea olketa mekem long aean, an kala blong olketa kaleko ya hemi red olsem faea, an blu olsem skae, an yalo olsem ston olketa kolem salfa. Hed blong olketa hos ya i olsem hed blong laeon, an faea an smok an salfa wea hemi laet, hemi kamaot long maos blong olketa. ¹⁸ Long trifala bikfala panis ya nao, olketa kilim dae bikfala haf long olketa pipol. Olketa dae long faea an long smok an long salfa hemi laet, wea i kamaot long maos blong olketa. ¹⁹ An paoa wea olketa hos ya i garem, hemi long maos blong olketa, an hemi long tel blong olketa tu. Tel blong olketa hemi garem hed olsem snek, an hem nao olketa yusim fo spoelem olketa pipol long hem. ²⁰ Bat evri pipol wea olketa no dae long bikfala panis ya, olketa no lusim ravis wei blong olketa fo wosipim olketa laea god wea olketa seleva i wakem. Olketa gohed nomoa fo wosipim olketa devol an olketa tambu kaving blong gol an silva an bras an ston an stik. Olketa tambu kaving ya i nating save lukluk o herem enisamting o wakabaot tu. ²¹ An olketa nating lusim olketa nara ravis wei blong olketa fo kilim man dae, an fo mekem majik, an fo durong wetem eniwan, an fo stil.

¹ Mi lukim moa wanfala enjel hu hemi garem bikfala paoa, hemi lusim heven an kamdaon. Wanfala klaod hemi raonem hem olsem kaleko, an hemi garem wanfala renbou antap hed blong hem. An fes blong hem hemi saen olsem san, an tufala lek blong hem hemi olsem bikfala pos wea i laet long faea. ² Long han blong hem hemi holem wanfala smol skrol wea hemi open finis. Nao hemi putum raet lek blong hem antap long si, an lef lek blong hem antap long lan. ³ An hemi singaot bikfala olsem taem laeon hemi singaot. Taem hemi singaot finis, sevenfala tanda olketa talemaot toktok blong olketa. ⁴ Taem olketa toktok finis nomoa, mi redi fo raetemdaon wanem olketa talem. Bat semtaem nomoa, mi herem wanfala toktok long heven, wea hemi sei olsem, “Yu mas haedem gud olketa toktok wea sevenfala tanda ya i talem. Yu mas no raetemdaon.” ⁵ Nao disfala enjel wea hemi stanap antap long si an antap long lan, hemi liftimap raet han blong hem goap long heven. ⁶ An hemi mekem wanfala strongfala promis long nem blong God hu hemi laef evritaem an olowe, an hu hemi mekem heven an graon an si an evrisamting wea hemi stap long olketa. Nao enjel ya hemi sei olsem, “!Taem fo weit hemi finis nao! ⁷ Taem mekseven enjel hemi bloum trampet blong hem nomoa, disfala plan blong God wea hemi staphaed, bae hemi kamtru olsem hemi talemaot bifoa long olketa profet hu i wakaman blong hem.” ⁸ Den voes wea mi herem finis long heven, hemi tok kam moa long mi olsem, “Yu go tekem disfala smol skrol wea hemi open finis an hemi stap long han blong disfala enjel hu hemi stanap antap long si an antap long lan.” ⁹ So mi go long enjel ya, an mi askem hem fo givim smolfala skrol ya long mi. Den hemi sei long mi, “Yu tekem an kaikaim. Insaet long maos blong yu bae hemi suit olsem hani, bat taem yu kaikaim finis, bele blong yu bae hemi filnogud long hem.” ¹⁰ Mi tekem smolfala skrol ya from han blong hem an mi kaikaim nao. An long maos blong mi, hemi barava suit olsem hani. Bat taem mi sualomdaon finis, mi filim bele blong mi barava filnogud long hem. ¹¹ Den olketa sei olsem long mi, “Yu mas talemaot moa olketa toktok blong God, wea hemi tokabaotem olketa pipol blong plande deferen kantri an traeb an langguis, an olketa king tu.”

¹ Nao olketa givim wanfala longfala stik long mi moa, fo mesarem olketa samting long hem. An olketa talem mi olsem, “Yu go mesarem Tambuhaos blong God wetem olta blong hem. An yu kaontem tu olketa pipol hu i gohed fo wosip insaet long Tambuhaos ya. ² Bat yu no mesarem eria aotsaet long Tambuhaos ya, bikos ples ya olketa bin givim fo olketa pipol hu i no Jiu. An olketa nao bae i rul ovarem Jerusalem fo foti-tu mans. ³ An insaet long 1,260 de, bae mi givim paoa fo tufala profet blong mi fo talemaot toktok blong God. An tufala bae werem kaleko blong sore.” ⁴ An tufala profet ya, tufala olsem tufala oliv tri an tufala bikfala lam wea tufala stanap long frant long Masta blong wol. ⁵ Sapos eniwan hemi trae fo spoelem tufala, bae faea hemi kamaot long maos blong tufala an bonem enemi blong tufala. So eniwan hu hemi trae fo spoelem tufala, bae hemi dae olsem. ⁶ An tufala garem paoa fo stopem ren long skae, mekem ren hemi no save foldaon taem tufala gohed fo talemaot toktok blong God. An tufala garem tu paoa fo tanem olketa wata long blad. An tufala garem tu paoa fo mekem enikaen bikfala trabol fo spoelem pipol long wol, long enitaem tufala laekem. ⁷ Nao taem tufala talemaot toktok blong God finis, disfala wael animol bae hemi kamaot long hol ya wea hemi barava dip tumas, an bae hemi faetem tufala. An bae hemi winim tufala an kilim tufala dae. ⁸ An bodi blong tufala bae leidaon nomoa long rod insaet long bikfala taon wea olketa bin nilam Masta blong tufala long kros. Nem blong bikfala taon ya, hemi “Sodom” an “Ijip” wea i olsem tokpiksa nomoa. ⁹ Nao fo tri an haf de, bae pipol blong olketa deferen traeb, an laen, an langguis an kantri, bae olketa lukluk long bodi blong tufala. An bae olketa no letem eniwan fo berem tufala. ¹⁰ An taem olketa pipol long wol, olketa herem dat tufala profet ya dae finis, bae olketa barava hapi fogud. Bae olketa mekem fist an gohed fo givim olketa presen long olketa seleva. Bikos tufala profet ya i bin mekem plande pipol long wol fo barava safa tumas. ¹¹ Bat bihaen long tri an haf de ya, God hemi mekem win blong laef fo go insaet long tufala moa. An taem olketa pipol lukim tufala wakabaot moa, olketa barava fraet fogud nao. ¹² Den tufala profet ya i herem wanfala voes from heven, wea hemi singaot olsem, “!Yutufala kam antap long hia!” Nao taem olketa enemi blong tufala gohed fo luk falom tufala, tufala goap nao long heven insaet long wanfala klaod. ¹³ An long semtaem nomoa, bikfala etkuek hemi sekem graon nao. An long bikfala taon ya, wanfala smolfala haf long hem hemi barava nogud, an 7,000 pipol nao olketa dae long etkuek ya. An olketa nara pipol olketa barava fraet fogud nao, an olketa gohed fo preisim nem blong God long heven. ¹⁴ Mektu sore hemi go finis nao, bat no longtaem, bae mektri sore hemi kam moa. ¹⁵ Nao mekseven enjel hemi bloum trampet blong hem. An mi herem olketa toktok long heven, wea olketa singaot olsem, “Evrisamting long wol ya hemi barava kam andanit long paoa blong Masta blong yumi wetem disfala Mesaea blong hem. An bae hemi rul ovarem evrisamting evritaem an olowe.” ¹⁶ Nao tuentifoa bikman ya, wea olketa sidaon long olketa tron long frant long God, olketa foldaon long fes blong olketa an wosipim hem. ¹⁷ An olketa sei olsem, “God Masta blong mifala, yu nao yu garem evri paoa. Yu stap olowe bifoa an yu stap distaem tu. Mifala talem tengkiu long yu, bikos yu stat fo yusim bikfala paoa blong yu, wea yu gohed fo rul olsem King. ¹⁸ Olketa pipol blong olketa narafala kantri i kros tumas, bat hemi taem fo kros blong yu fo kam. Hemi taem fo jajem olketa pipol hu i dae finis. Hemi taem fo givim pei long olketa wakaman blong yu, olketa profet, evriwan long olketa pipol blong yu hu i tinghae long yu, nomata bikman o man nating. An hemi taem fo spoelem olketa pipol wea olketa bin spoelem wol ya.” ¹⁹ Nao Tambuhaos blong God long heven hemi open, an olketa pipol lukim disfala boks blong spesol agrimen blong God. An taem ya tu, bikfala noes hemi kam an laetning hemi laet olobaot an tanda hemi bosta. An wanfala etkuek nao hemi sekem graon, an olketa bikfala pis aes i foldaon kam long hem.

¹ Nao wanfala bikfala saen hemi kamap long skae. Hemi wanfala woman wea san hemi saen raonem hem olsem wanfala kaleko. An mun hemi stap andanit long lek blong hem, an tuelfala sta stap long hed blong hem olsem wanfala kraon. ² Woman ya hemi babule an hemi singaot bikfala long pein bikos hemi stat fo bonem pikinini. ³ An nara saen hemi kamap moa long skae. Hemi wanfala bikfala snek wea bodi blong hem hemi red fogud. An hemi garem sevenfala hed wetem tenfala hon, an long sevenfala hed blong hem hemi garem kraon long evriwan. ⁴ Nao hemi wip go long skae wetem tel blong hem, an pulumaot bikfala haf long olketa sta, mekem olketa foldaon kam long graon. An hemi kam an stanap long frant long woman ya, mekem taem woman ya hemi bonem pikinini blong hem, long semtaem bae hemi save kaikaim pikinini ya. ⁵ Nao woman ya hemi bonem wanfala pikinini boe, wea bae hemi rul ovarem evri kantri long wol, an bae hemi strik tumas taem hemi rulim olketa. Bat taem pikinini ya hemi jes bon kam, olketa tekem hem goap long God hu hemi sidaon long tron. ⁶ An woman ya hemi ranawe go long wanfala drae eria, wea God hemi mekem redi wanfala ples fo hem. Long ples ya nao bae olketa lukaftarem hem gudfala fo 1,260 de. ⁷ Den wanfala bikfala faet hemi stat long heven. Maekol wetem olketa enjel blong hem, olketa stat fo faet agensim bikfala snek ya. An bikfala snek ya wetem olketa enjel blong hem, olketa traehad fo faetem olketa tu. ⁸ Bat Maekol nao hemi winim bikfala snek ya. An stat long taem ya, bikfala snek ya an olketa enjel blong hem olketa no save stap moa long heven. ⁹ Olketa raosim hem wetem olketa enjel blong hem an torowem olketa godaon long wol. Bikfala snek ya, hem nao disfala snek blong bifoa kam yet. An hem nao olketa kolem hem “Devol” o “Seitan”, wea hemi save trikim evri pipol long wol fo duim olketa nogud samting. ¹⁰ Nao mi herem moa wanfala voes long heven, wea hemi singaot olsem, “Distaem, God blong yumi hemi sevem yumi nao, an hemi somaot dat hemi garem paoa fo rul olsem King. An disfala Mesaea blong hem, hemi somaot dat hemi garem paoa ovarem evrisamting. Hemi olsem, bikos disfala man fo tokagensim olketa Kristin, olketa bin raosim hem finis from heven. Bifoa ya, nomata de an naet, hemi save tokagensim olketa long frant long God. ¹¹ Bat olketa Kristin olketa bin winim hem finis long paoa blong blad blong Smolfala Sipsip ya, an long paoa blong tru toktok wea olketa bin talemaot. An olketa wiling fo givim laef blong olketa an letem olketa seleva fo dae. ¹² So yufala evriwan long heven, yufala mas hapi. !Bat sore tumas long evriwan hu i stap long graon an long si! Bikos Devol ya hemi bin kamdaon long yufala finis an hemi barava kros tumas ya, bikos hemi save dat lelebet taem nomoa hemi stap yet fo hem.” ¹³ Nao taem bikfala snek ya hemi luksave dat olketa bin torowem hem godaon long wol, hemi stat fo ronem woman ya hu hemi jes bonem disfala pikinini boe. ¹⁴ Bat God hemi givim tufala wing blong bikfala igol long woman ya, mekem hemi save flae go long ples blong hem long drae eria wea hemi farawe from bikfala snek ya. Long ples ya nao bae olketa lukaftarem hem gudfala long trifala yia an siksfala mans. ¹⁵ Nao bikfala snek ya hemi toraotem go wata from maos blong hem, wea hemi olsem wata hemi ran bikfala. Hemi trae fo draonem woman ya. ¹⁶ Bat graon nao hemi helpem woman ya. Wanfala bikfala hol nao hemi open long graon, an evri wata wea i kamaot long maos blong bikfala snek ya, hemi godaon falom hol ya. ¹⁷ Nao bikfala snek ya hemi kros tumas long woman ya, so hemi go an faet agensim olketa nara pikinini blong hem. Olketa ya nao olketa pipol hu i obeim olketa lo blong God an trastem olketa tru toktok wea Jisas hemi talemaot. ¹⁸ Den bikfala snek ya hemi go stanap long sanbis kolsap long si.

¹ Bihaen, mi lukim moa wanfala wael animol hemi kamaot long si. Hemi garem sevenfala hed an tenfala hon. Long olketa hon blong hem, hemi garem kraon long evriwan. An long olketa hed blong hem, hemi garem olketa nem wea olketa barava tokspoelem God. ² Wael animol mi lukim ya, hemi luk olsem bikfala lepad. Bat olketa lek blong hem, hemi olsem lek blong wanfala bikfala bea. Maos blong hem, hemi olsem maos blong laeon. Nao bikfala snek ya, hemi givim go strong blong hem long wael animol ya, an hemi givim bikfala paoa tumas long hem fo rul olsem hem seleva. ³ An wael animol ya hemi garem mak long wanfala hed blong hem, wea hemi luk olsem olketa bin kilim hem dae. Bat soa long disfala hed ya hemi gudbaek finis. An evri pipol long wol, olketa barava sapraes tumas long wael animol ya, an olketa gohed nao fo falom hem. ⁴ Evri pipol olketa wosipim bikfala snek ya, bikos hemi bin givim paoa blong hem long wael animol ya. Olketa wosipim tu wael animol ya, an olketa sei, “No eniwan nao hemi olsem wael animol ya. No eniwan tu hemi strong fo faetem hem.” ⁵ Nao wael animol ya hemi save mekem enikaen praod toktok an hemi save barava tokspoelem God, bat hemi save yusim paoa blong hem fo foti-tu mans nomoa. ⁶ An wael animol ya hemi gohed fo tokspoelem God. Hemi tokspoelem nem blong God wetem ples blong hem an olketa hu i stap wetem hem long heven. ⁷ God hemi letem wael animol ya fo faet agensim olketa pipol blong hem, an fo winim olketa. An God hemi letem hem fo rul ovarem olketa pipol long evri laen an evri traeb an evri langguis an evri kantri. ⁸ Nao evri pipol wea olketa stap long wol ya, bae olketa wosipim wael animol ya. Hem nao olketa pipol wea nem blong olketa no stap insaet long buk blong laef stat kam long taem wea God hemi mekem disfala wol. Disfala buk ya hemi blong Smolfala Sipsip wea olketa bin kilim hem dae bifoa. ⁹ “Eniwan hu hemi garem ia, hemi mas heremgud toktok ya nao. ¹⁰ Sapos God hemi siusim eniwan fo go long prisin, oraet, bae hemi go long prisin. An sapos God hemi siusim eniwan fo dae long naef fo faet, oraet, bae hemi dae long naef fo faet. Taem olketa samting olsem hemi hapen, yufala olketa pipol blong God mas stanap strong nomoa an yufala mas biliv strong long God.” ¹¹ Nao mi lukim moa nara wael animol wea hemi kamaot long graon. Hemi garem tufala hon long hem, wea tufala luk olsem hon blong smolfala sipsip. An toktok blong hem hemi olsem toktok blong bikfala snek ya. ¹² Nao mektu wael animol hemi gohed fo yusim evri paoa wea fas wael animol ya hemi garem. Hemi fosim evri pipol long wol fo wosipim fas wael animol ya, wea hemi garem nogud soa long hem bat hemi gudbaek finis. ¹³ An mektu wael animol ya hemi save mekem bikfala mirakol fo somaot paoa blong hem. An long ae blong evri pipol, hemi mekem faea fo kamaot long skae an kam kasem graon. ¹⁴ Bikos hemi garem paoa fo mekem olketa mirakol long saet blong fas wael animol ya, hemi trikim evri pipol long wol. Hemi talem olketa pipol fo mekem wanfala kaving fo luk olsem fas wael animol ya, wea olketa bin kilim hem dae wetem naef fo faet bat hemi laefbaek moa. ¹⁵ Bihaen, mektu wael animol ya hemi garem paoa moa fo bloum win blong hem go insaet long kaving ya. Long wei olsem, disfala kaving blong fas wael animol ya, hemi save garem paoa fo tok, an paoa fo kilim dae olketa pipol hu i no save wosipim hem. ¹⁶ An evri pipol, nomata bikman o man nating, nomata ris man o pua man, nomata fri man o slev, evriwan nao, mektu wael animol ya hemi fosim olketa fo garem wanfala mak long raet han o long fohed blong olketa. ¹⁷ Nao sapos eniwan hemi no garem disfala mak ya, hemi no save baem enisamting o salem enisamting. An disfala mak ya hemi nem blong wael animol ya, o hemi namba wea hemi saen fo nem blong hem. ¹⁸ Yufala mas waes gudfala abaotem olketa samting ya. Sapos eni man hemi garem gudfala tingting, hemi save faendemaot mining blong namba blong wael animol ya, bikos hemi namba blong wanfala man. An namba ya nao hemi 666.

¹ Nao mi luk go moa, an mi lukim Smolfala Sipsip ya hemi stanap antap long maonten long Saeon, an 144,000 pipol ya i stanap wetem hem. An nem blong Smolfala Sipsip ya wetem nem blong Dadi blong hem, hemi stap long fohed blong olketa pipol ya. ² An mi herem wanfala saon long heven, wea hemi meknoes tumas olsem olketa bikfala wev an olketa bikfala tanda. An disfala saon ya hemi here olsem plande gita wea olketa gohed fo pleim. ³ Olketa 144,000 pipol ya olketa stanap long frant long God wea hemi sidaon long tron, an long frant long fofala animol an olketa bikman ya. An olketa pipol ya i gohed fo singim wanfala niufala singsing wea no eni man moa hemi save long hem. Olketa pipol ya hu God hemi bin peimaot olketa finis from pipol long wol, olketa nomoa i save singim. ⁴ Olketa man ya, no enitaem nao olketa bin durong wetem eni woman. Olketa bin stap klin olowe. An oltaem olketa falom Smolfala Sipsip ya long evri ples wea hemi go. God hemi bin peimaot olketa finis from pipol long wol, mekem olketa nao olsem fas kaikai fo ofarem long God an long Smolfala Sipsip ya. ⁵ No enitaem nao olketa bin talemaot eni laea toktok. Olketa barava stret long ae blong God. ⁶ Nao mi lukim nara enjel moa wea hemi flae antap long skae, an hemi garem Gudnius wea hemi no save finis enitaem. Waka blong hem nao fo talemaot Gudnius ya long evri pipol long wol, olketa long deferen traeb an laen an langguis an kantri. ⁷ Hemi gohed fo singaot olsem, “Yufala mas tinghae long God an liftimap nem blong hem, bikos taem blong hem fo jajem olketa pipol, hemi kam finis nao. Yufala mas wosipim hem, hu hemi mekem heven an graon an si an olketa springwata.” ⁸ Nao mi lukim moa mektu enjel wea hemi kam bihaen long fas enjel ya, an hemi tok olsem, “Bikfala taon Babilon ya wea hemi garem paoa, hemi foldaon nao. !Hemi foldaon finis! Olketa pipol long evri kantri long wol olketa bin kamap olsem drang bikos olketa falom disfala nogud wei blong hem fo durong wetem eniwan.” ⁹ Nao mi lukim moa mektri enjel wea hemi kam bihaen long tufala enjel ya, an hemi singaot olsem, “Sapos eni man hemi wosipim wael animol ya wetem kaving blong hem, an hemi tekem disfala mak blong wael animol ya long fohed o long raet han blong hem, ¹⁰ bae God hemi panisim hem. Bae man ya hemi dringim disfala kap waen, wea hem nao olsem ful paoa blong kros blong God. Olketa bae safa nogud tumas long barava hot faea wea hemi laet long diskaen ston salfa. An olketa holi enjel an Smolfala Sipsip ya bae lukim diswan. ¹¹ An smok blong faea wea hemi mekem olketa fo safa tumas, hemi gohed oltaem an hemi no save finis. Evriwan hu i wosipim wael animol ya wetem kaving blong hem an garem disfala mak blong nem blong hem, bae olketa no save garem eni res long panis ya. Bae hemi gohed olowe nomoa, nomata de an naet.” ¹² Long olketa samting ya, yufala pipol blong God wea yufala obeim olketa lo blong hem an yufala gohed tu fo biliv long Jisas, yufala mas stanap strong nomoa. ¹³ Nao mi herem moa wanfala voes long heven, wea hemi sei, “Yu raetemdaon olketa toktok ya. ‘Stat long distaem, olketa pipol hu i biliv long Masta blong yumi an olketa dae, olketa nao i hapi tumas.’” Ya, Holi Spirit hemi tok olsem, “!Hemi tru tumas ya! Bae olketa hapi fo res from hadwaka blong olketa, bikos bae olketa garem olketa gudfala samting from waka blong olketa.” ¹⁴ Den, mi lukim moa wanfala waet klaod, an mi lukim wanfala man wea hemi sidaon antap long hem, wea hemi luk olsem san blong man. Long hed blong hem, hemi garem wanfala gol kraon, an long han blong hem, hemi holem wanfala huknaef wea hemi sap fogud. ¹⁵ Nao mi lukim nara enjel moa wea hemi kamaot long tambuhaos, wea hemi singaot olsem long man hu hemi sidaon antap long klaod ya, “Yu yusim huknaef blong yu, an katemaot olketa kaikai wea olketa redi finis. Distaem hemi barava taem fo havest, bikos evri kaikai long wol hemi redi nao.” ¹⁶ Den man hu hemi sidaon antap long klaod ya, hemi yusim huknaef blong hem, an hemi havestem olketa kaikai wea i redi finis long wol. ¹⁷ Nao mi lukim moa nara enjel wea hemi kamaot long tambuhaos long heven, an hem tu hemi garem wanfala huknaef wea hemi sap fogud. ¹⁸ Nao nara enjel moa hu hemi lukaftarem faea long olta, hemi lusim olta ya an hemi kam. Hemi singaot go long nara enjel hu hemi garem disfala sap huknaef an hemi sei, “Yu yusim huknaef blong yu fo havestem olketa frut blong grep tri. Bikos olketa frut i raep nao.” ¹⁹ So enjel ya hemi yusim huknaef blong hem fo havestem olketa frut blong olketa grep tri long wol. Hemi torowem olketa frut ya insaet long bikfala hol long ston wea olketa yusim fo wakem waen long hem. Ples ya hemi saen blong kros blong God. ²⁰ An olketa gohed fo step antap long olketa frut insaet long hol wea hemi stap aotsaet long biktaon ya, go-go blad nao hemi ranaot from disfala hol. Blad ya hemi ran bikfala, hemi ran goaot farawe go kasem 300 kilomita, an dip blong hem hemi kasem kolsap tu mita.

¹ Den mi lukim moa wanfala bikfala saen long skae, wea mi barava sapraes tumas long hem. Mi lukim sevenfala enjel wea olketa tekem kam sevenfala bikfala panis. Olketa panis ya olketa laswan, bikos taem olketa finis, kros blong God tu bae hemi finis. ² Nao mi lukim moa samting wea hemi luk olsem bikfala leik, bat hemi olsem glas wea faea hemi miks wetem. An mi lukim olketa pipol hu i bin winim finis disfala faet agensim wael animol ya wetem disfala kaving blong hem, an disfala namba fo nem blong hem. Olketa stanap kolsap long bikfala leik wea hemi olsem glas, an olketa holem olketa gita wea God hemi givim long olketa. ³ Olketa singim disfala singsing wea Mosis, wakaman blong God, hemi bin singim, an wea Smolfala Sipsip ya tu save singim. Hemi sei olsem, “God Masta, yu nao garem evri paoa. Olketa waka blong yu, i barava bik tumas, an evriwan i sapraes tumas long hem. Yu nao King blong evri kantri long wol, an olketa wei blong yu i stret an tru tumas. ⁴ Masta, yu nomoa yu holi. So evriwan bae tinghae long yu, an liftimap nem blong yu. Bae olketa pipol long evri kantri long wol olketa save kam an wosipim yu, bikos yu bin somaot stretfala wei blong yu.” ⁵ Den mi lukim disfala tambuhaos long heven hemi open, disfala tambu haostent wea God hemi stap long hem. ⁶ An sevenfala enjel wea olketa tekem kam sevenfala bikfala panis, olketa kamaot nao long tambuhaos ya. Olketa werem waet kaleko wea hemi saen fogud, an olketa werem tu gol strap raonem sest blong olketa. ⁷ Long taem ya nomoa, wanfala long fofala animol ya, hemi givim sevenfala gol baol long sevenfala enjel ya. Olketa baol ya i fulap long kros blong God hu hemi laef olowe. ⁸ An insaet long tambuhaos ya hemi barava fulap long smok from bikfala paoa blong God wea hemi saen long hem. An no eniwan save go insaet long tambuhaos ya, go-go sevenfala bikfala panis ya hapen fastaem.

¹ Den mi herem moa wanfala voes long tambuhaos, wea hemi singaot olsem long sevenfala enjel ya, “Sevenfala baol wea olketa fulap long kros blong God ya, yufala go kapsaetem antap long wol ya.” ² So fas enjel hemi go kapsaetem baol blong hem antap long wol. An olketa pipol hu i garem disfala mak blong wael animol ya an olketa save wosipim kaving blong hem, olketa ravis soa kasem bodi blong olketa, wea olketa filpein tumas long hem. ³ Nao mektu enjel hemi go kapsaetem baol blong hem insaet long si. An si hemi kamap blad nao, wea hemi olsem blad blong man dae. An evri laef samting long si, olketa dae nao. ⁴ Den mektri enjel hemi go kapsaetem baol blong hem insaet long olketa riva an olketa springwata. An evriwan ya kamap blad tu. ⁵ An mi herem enjel hu hemi bos ovarem olketa wata ya hemi tok olsem, “God, yu nao yu holi tumas, yu stap olowe bifoa an yu stap distaem tu. Olketa panis wea yu sendem kam, olketa stret nomoa. ⁶ Olketa hu i bin kilim dae olketa profet an olketa nara pipol blong yu, yu givim blad nao fo olketa dringim. Hem nao stret wei fo peim olketa.” ⁷ Mi herem moa wanfala voes long olta hemi tok olsem, “!Ya, hemi tru! God Masta, yu nao garem evri paoa. Olketa wei blong yu fo jajem olketa pipol, hemi tru an stret tumas.” ⁸ Den mekfoa enjel hemi go kapsaetem baol blong hem long san. An hemi mekem strong moa paoa blong hem fo bonem olketa pipol. ⁹ Taem hot blong san hemi bonem olketa pipol olsem, olketa gohed fo tokspoelem nem blong God hu hemi garem paoa ovarem olketa bikfala panis ya. An olketa no wari nomoa fo sensim tingting blong olketa an liftimap nem blong God. ¹⁰ Nao mekfaev enjel hemi go kapsaetem baol blong hem antap long ples wea wael animol hemi stap king long hem. An evri ples wea wael animol ya hemi rul ovarem, i kamap tudak nao. An olketa pipol long olketa ples ya i gohed fo baetem tang blong olketa bikos olketa barava filpein long bodi blong olketa. ¹¹ An olketa gohed fo tokspoelem God long heven, bikos olketa barava filpein tumas, an olketa garem nogud soa long bodi blong olketa. Bat olketa no wari nomoa fo sensim tingting blong olketa an lusim olketa ravis wei blong olketa. ¹² Nao meksiks enjel hemi go kapsaetem baol blong hem insaet long Yufretis Riva. An bikfala riva ya hemi kamap drae nao. Long wei ya hemi openem rod, mekem olketa king hu i stap kam long ist wetem olketa ami blong olketa, i save wakabaot kam. ¹³ An mi lukim trifala ravis devol wea olketa luk olsem frog. Olketa kamaot long maos blong bikfala snek ya an long maos blong wael animol ya an long maos blong laea profet ya. ¹⁴ Trifala ravis devol ya, olketa nogud tumas an olketa garem paoa fo mekem enikaen mirakol. Nao trifala devol ya olketa go fo lukim olketa king long evri ples long wol, mekem olketa hipap fo faet long bikfala De blong God hu hemi garem evri paoa. ¹⁵ (Jisas hemi tok olsem, “!Yufala lisin gudfala! !Bae mi kambaek long yufala, olsem man fo stil hemi save kam! Man hu hemi lukaot olowe an hemi lukaftarem gud kaleko blong hem, bae hemi hapi long taem ya. Bikos hemi no neket, an bae hemi no filsem long ae blong olketa pipol.”) ¹⁶ Den trifala ravis devol ya olketa mekem olketa king fo hipap long wanfala ples, wea long langguis long Hibru olketa kolem Amagedon. ¹⁷ Nao mekseven enjel hemi go kapsaetem baol blong hem long ea. An mi herem wanfala voes long tron insaet long tambuhaos, hemi singaot olsem, “!Hemi finis nao!” ¹⁸ An taem ya, bikfala noes hemi kam, an laetning hemi laet, an tanda hemi bosta, an bikfala etkuek hemi sekem wol ya. Disfala etkuek hemi barava bik tumas ya. Stat kam long taem God hemi mekem pipol fo stap long wol, no eni etkuek hemi bikfala olsem. ¹⁹ Nao biktaon long Babilon, hemi brek long trifala haf. An olketa nara taon long evri kantri long wol, olketa tu foldaon nogud long graon. God hemi no fogetem Babilon, so hemi mekem hem fo dringim disfala kap waen, wea hemi olsem ful paoa blong kros blong hem. ²⁰ An evri aelan an evri maonten tu olketa go lus. ²¹ An olketa bikfala pis aes tu olketa foldaon kam from skae antap long olketa pipol. Olketa pis aes ya olketa hevi olsem fifti kilo. Olketa pipol gohed fo tokspoelem God taem hemi sendem kam olketa pis aes ya, bikos panis ya hemi barava nogud tumas.

¹ Wanfala long olketa sevenfala enjel ya, hemi kam long mi an hemi tok olsem, “Yu kam, mekem mi som yu panis wea bae mi givim long disfala biktaon wea hemi kolsap long plande riva. Disfala taon ya hemi olsem barava nogud juri. ² Evri king long wol bin durong wetem hem, an olketa pipol long wol tu i kamap olsem drang bikos olketa falom disfala nogud wei blong hem fo durong wetem eniwan.” ³ Nao paoa blong Holi Spirit hemi kam long mi, an enjel ya hemi tekem mi go long wanfala drae eria. Long ples ya nao mi lukim wanfala woman hu hemi sidaon antap long wanfala wael animol wea bodi blong hem, hemi red fogud. Wael animol ya hemi garem olketa nem olobaot long bodi blong hem, wea olketa nem ya i barava tokspoelem God. Hemi garem sevenfala hed an tenfala hon. ⁴ An kaleko wea woman ya hemi werem hemi blu an red, an hemi werem tu olketa naes samting wea olketa mekem long gol an long olketa naesfala ston an long olketa gudfala pel. Long han blong hem hemi holem wanfala gol kap, wea hemi fulap long olketa samting nogud wea hemi doti tumas. An olketa samting ya, hemi olketa ravis wei blong woman ya fo durong wetem eniwan. ⁵ An nem blong hem hemi stap long fohed blong hem. Mining blong disfala nem ya, hemi bin staphaed. Hemi olsem: “Biktaon Babilon. Mami blong evri juri. Mami blong evri ravis wei blong wol.” ⁶ An mi lukim dat woman ya hemi olsem drang bikos hemi dringim blad blong olketa pipol blong God. Hemi blad blong olketa pipol hu i dae bikos olketa biliv strong long Jisas. Taem mi lukim woman ya olsem nomoa, mi barava sapraes tumas nao. ⁷ So enjel ya hemi askem mi, “?Waswe nao yu sapraes tumas olsem? Disfala woman wetem wael animol wea hemi garem sevenfala hed an tenfala hon, an hemi karim woman ya, tufala olsem piksa blong wanfala samting. Bae mi talemaot mining blong disfala piksa wea hemi bin staphaed. ⁸ Wael animol wea yu lukim ya, hemi laef fastaem bat distaem hemi no laef nao. An no longtaem nomoa, bae hemi kamaot moa long hol ya wea hemi barava dip tumas. Bat bihaen, bae hemi lusim paoa blong hem go-go hemi nomoa nao. Taem olketa lukim moa wael animol ya, samfala pipol i sapraes an tingse hemi bikfala mirakol nao. Olketa ya nao i pipol wea nem blong olketa no stap insaet long buk blong laef stat kam long taem wea God hemi mekem disfala wol. Olketa ya sapraes bikos wael animol ya, fastaem hemi stap, an distaem hemi no stap, bat bae hemi kambaek moa. ⁹ “Long olketa samting ya, yu mas waes fo luksave long hem. Yu save, sevenfala hed blong animol ya, hemi olsem sevenfala hil wea woman ya hemi sidaon antap long olketa. An sevenfala hed ya hemi olsem sevenfala king tu. ¹⁰ Faefala long olketa king ya olketa dae finis, an wanfala nao hemi gohed fo rul distaem. Narawan hemi no kam yet, bat taem hemi kam, bae hemi rul fo lelebet taem nomoa. ¹¹ Wanfala long sevenfala king ya nao hemi disfala wael animol wea hemi laef fastaem an distaem hemi no laef nao. Diswan nao bae hemi kamap mekeit king long olketa. Bat bihaen moa, bae hemi lusim paoa blong hem go-go hemi nomoa nao. ¹² “An tenfala hon wea yu lukim finis ya, hemi tenfala king wea olketa no rul olsem king yet. Bat bihaen, bae olketa garem paoa fo rul olsem king wetem disfala wael animol ya, an bae olketa rul fo wanfala aoa nomoa. ¹³ Nao tenfala king ya bae olketa wanmaen nomoa. An disfala paoa blong king wea olketa garem, bae olketa givim go long wael animol ya. ¹⁴ Tenfala king ya an disfala wael animol ya bae i faet agensim Smolfala Sipsip ya. Bat Smolfala Sipsip wetem pipol blong hem, bae olketa winim olketa king ya nomoa. Bikos Smolfala Sipsip ya hemi Masta ovarem evri masta, an hemi King ovarem evri king. An olketa pipol blong Smolfala Sipsip ya bae stap wetem hem bikos hemi bin siusim olketa, an hemi bin kolem olketa, an olketa tinghevi long hem olowe.” ¹⁵ Nao enjel ya hemi tok olsem long mi moa, “Yu save, olketa riva wea yu lukim disfala juri hemi sidaon kolsap long olketa ya, hem nao olketa pipol blong evri kantri an evri ples long wol, an olketa blong enikaen traeb an enikaen langguis tu. ¹⁶ Nao wael animol ya bae hemi heitem disfala juri ya. An olketa tenfala hon wea yu lukim ya, olketa tu bae olketa heitem hem. Bae olketa tekem evrisamting wea hemi garem, an bae olketa livim hem fo stap neket nomoa. An bae olketa kaikaim tu mit long bodi blong hem an bonem hem long faea. ¹⁷ Olketa duim olsem, bikos God nao hemi putum tingting ya long maen blong olketa, fo olketa duim wanem hemi laekem. An hemi mekem olketa kamap wanmaen fo givim disfala paoa blong king, fo go long wael animol ya. Bae olketa letem wael animol ya fo rul, go-go kasem taem wea olketa toktok blong God hemi kamtru. ¹⁸ An woman wea yu lukim ya, hem nao disfala biktaon wea hemi rul ovarem olketa king long wol.”

¹ Bihaen long olketa samting ya, mi lukim moa narafala enjel wea hemi kamdaon from heven. Hemi garem bikfala paoa, an saen blong bikfala paoa blong hem hemi saen raonem hem, go kasem evri ples long wol. ² Hemi singaot bikfala olsem, “Biktaon long Babilon wea hemi garem paoa tumas, hemi foldaon finis. Hemi barava nogud nao, an distaem hemi kamap ples blong olketa devol. Hemi ples blong olketa ravis devol an olketa ravis bed wea i nogud tumas. ³ Olketa pipol long evri kantri long wol i bin kamap olsem drang bikos olketa falom disfala krangge wei blong hem fo durong wetem eniwan. Olketa king long wol olketa bin durong wetem hem tu. An olketa bisnisman long wol olketa kamap ris fogud from wei blong hem wea hemi laekem nomoa evrisamting.” ⁴ Den mi herem moa nara voes long heven hemi tok olsem, “!Olketa pipol blong mi, yufala mas kamaot from Babilon! Yufala mas no joen wetem hem long olketa sin blong hem, nogud yufala searem nogud panis blong hem. ⁵ Bikos olketa sin blong hem barava hipap fogud go-go kasem heven. An God hemi no save fogetem olketa ravis wei blong hem. ⁶ Bat taem yufala sensimbaek, yufala mas dabolem olketa samting wea hemi bin duim long yufala. Dring wea hemi givim long yufala, yufala mas dabolem moa strong blong hem an givimbaek fo hemi dringim. ⁷ Yufala mas mekem plande trabol fo kasem hem, fitim disfala wei blong hem fo haemapem hem seleva an fo garem hapi taem wetem olketa gudfala samting blong hem. Ya, yufala mas mekem hem filnogud tumas, bikos hemi gohed fo tokpraod long hem seleva olsem, ‘Mi nao kuin an mi sidaon gud long tron blong kuin. Mi no olsem wido woman wea hemi save sore an krae.’ ⁸ Dastawe nao plande bikfala panis bae i kasem hem insaet long wanfala de nomoa. Bae plande pipol dae, an bae hemi krae long dae ya. An bikfala taem blong hanggre bae hemi kam, an bae faea hemi bonem hem. Bikos God Masta wea hemi jajem hem, hem nao hemi garem strongfala paoa.” ⁹ Nao evri king long wol wea olketa durong wetem Babilon, an wea olketa searem olketa gudfala samting blong hem finis, bae olketa krae fogud an singaot bikfala, taem olketa lukim smok blong faea wea bae hemi gohed fo bonem hem. ¹⁰ Bae olketa stanap farawe, bikos olketa fraetem tumas panis wea hemi kasem biktaon ya. An bae olketa sei olsem, “!Maewat, sore tumas long yu Babilon! Yu biktaon wea yu strong tumas, bat long wanfala aoa nomoa yu kasem panis blong yu nao.” ¹¹ An olketa bisnisman long wol tu, bae olketa krae an sore long hem, bikos no eniwan moa save baem kago blong olketa. ¹² Olketa deferen kaen kago olsem: gol, an silva, an olketa naesfala ston, an olketa naesfala pel, an olketa spesol kaleko olsem silk, an olketa naesfala kaleko wea olketa waet an blu an red. An olketa garem tu olketa stik wea hemi smelgud tumas, an olketa deferen kaen kaving wea olketa mekem long bikfala tit blong elifan, an long wankaen timba wea hemi dia tumas, an long bras, an long aean, an long naesfala waet ston. ¹³ An olketa garem nara kago blong olketa moa, olsem olketa kaen samting fo suitim kaikai, an olketa deferen kaen insens, an waen, an oel, an flaoa, an wit, an olketa buluka, an sipsip, an hos, an olketa kaat blong hos, an olketa pipol wea olketa slev. ¹⁴ An olketa bisnisman ya bae olketa krae olsem, “Olketa gudfala samting wea yu laekem tumas ya hemi nomoa nao. Olketa samting wea yu ris tumas long hem, an luknaes tumas long yu, olketa lus nao. An bae yu no save lukim olketa samting ya moa.” ¹⁵ An olketa bisnisman wea olketa kamap ris tumas from olketa kago long biktaon ya, bae olketa fraet tumas long panis wea hemi kasem hem. So bae olketa stanap farawe an olketa sore an krae. ¹⁶ An bae olketa sei, “!Maewat, sore tumas long biktaon ya! Bifoa yu werem olketa nambawan kaleko wea olketa waet an blu an red. An yu luknaes long olketa gudfala samting olsem gol, an olketa naesfala ston, an olketa pel. ¹⁷ Bat wea, long wanfala aoa nomoa, evri gudfala samting blong yu i lus nao.” An olketa kapten blong olketa sip, an olketa pasenja, an olketa kru, an olketa man hu i garem sip fo mekem bisnis, bae olketa tu i stanap farawe an lukluk. ¹⁸ An taem olketa lukim smok blong faea wea i bonem hem, bae olketa singaot olsem, “!No eni biktaon hemi olsem biktaon ya! ?Hao nao hem olsem?” ¹⁹ Olketa putum samfala dast long hed blong olketa bikos olketa barava sore tumas, an olketa krae bik olsem, “!Maewat, sore tumas long biktaon ya! Evriwan hu i garem sip, olketa nao bin kamap ris tumas long evri gudfala samting blong yu. Bat long wanfala aoa nomoa, yu barava luknogud nao.” ²⁰ Yufala long heven, an yufala pipol blong God, an yufala aposol, an yufala profet, yufala mas hapi tumas long disfala panis, bikos God hemi jajem woman ya from olketa samting wea hemi bin duim long yufala. ²¹ Den wanfala maeti enjel hemi tekem wanfala bikfala ston an hemi torowem godaon long si, an hemi sei, “Babilon, yu biktaon, long diskaen wei tu, bae olketa torowem yu godaon, mekem yu lus olowe nao. ²² Insaet long yu, bae no eniwan moa fo pleim gita, o singsing, o bloum moa bambu an trampet. No eniwan bae hemi waka long yu moa, an bae no enitaem moa olketa save mekem flaoa blong bred long yu. ²³ Bae no eni lam hemi laet moa long yu, an bae no eniwan hemi save marit insaet long yu tu. Bat bifoa, olketa bisnisman blong yu, olketa nao barava bikman long wol. An yu bin trikim olketa pipol long evri kantri wetem majik blong yu. ²⁴ Panis ya, hemi kasem Babilon from blad wea hemi stap long hem. Hem nao blad blong olketa profet, an olketa nara pipol blong God, wea olketa bin kilim dae long wol ya.”

¹ Nao bihaen long olketa samting ya, mi herem bikfala noes blong plande pipol tumas long heven hu i singaot bikfala olsem, “!Haleluya! God blong yumi hu hemi sevem yumi, nem blong hem hemi haeap tumas, an hemi garem bikfala paoa. ² An olketa wei blong hem fo jajem olketa pipol hemi tru an hemi barava stret. Hemi jajem finis disfala barava nogud juri ya. Disfala ravis wei blong juri ya fo durong wetem eniwan, hemi spoelem tingting blong olketa pipol long wol. God hemi bin panisim juri ya bikos hemi kilim dae olketa wakaman blong God.” ³ Nao olketa singaot bikfala an talem olsem moa, “!Haleluya! Disfala smok blong faea wea hemi bonem biktaon ya, bae hemi gohed evritaem an olowe.” ⁴ Den tuenti-foa bikman ya wetem fofala animol ya, olketa nildaon fo wosipim God hu hemi sidaon long tron. An olketa sei, “!Amen! !Haleluya!” ⁵ An mi herem wanfala voes from tron wea hemi tok olsem, “Yufala evri wakaman blong God wea yufala tinghae long hem, nomata yufala bikman o man nating, yufala evriwan mas preisim hem.” ⁶ Nao mi herem moa noes blong plande pipol tumas wea olketa singaot bikfala. Hemi meknoes tumas olsem bikfala wev an bikfala tanda. Olketa sei olsem, “!Haleluya! God Masta blong yumi hu hemi garem evri paoa, hem nomoa hemi King. ⁷ Yumi mas filgud an hapi tumas nao, an yumi mas liftimap nem blong hem, bikos hemi taem nao fo marit fist blong Smolfala Sipsip ya. An disfala gele fo hemi maritim, hemi redi finis nao. ⁸ Gele ya, God hemi givim hem finis nambawan waet kaleko fo werem, wea hemi klin an saen fogud.” (Nambawan kaleko ya, hemi piksa blong olketa stretfala wei blong olketa pipol blong God.) ⁹ Den enjel hemi tok olsem long mi moa, “Yu raetemdaon toktok ya. ‘Olketa pipol wea God hemi kolem olketa fo kam long marit fist blong Smolfala Sipsip ya, olketa save hapi ya.’ ” An enjel ya hemi sei moa, “Disfala toktok ya hemi tru toktok blong God nao.” ¹⁰ Nao mi nildaon long frant blong enjel ya fo wosipim hem, bat hemi tok olsem long mi, “!Nomoa, yu no wosipim mi! Mi wanfala wakaman olsem yu nomoa ya. Mi olsem olketa Kristin fren blong yu nomoa, wea olketa gohed fo trastem olketa tru toktok wea Jisas hemi talemaot. !Yu mas wosipim God nomoa! Bikos olketa tru toktok wea Jisas hemi talemaot ya, hem nao paoa wea hemi helpem olketa profet fo talemaot profesi. ¹¹ Den mi lukim moa heven hemi open, an mi lukim wanfala waet hos. An man hu hemi sidaon antap long hos ya, nem blong hem: “Kipim Promis an Tru Toktok.” Taem hemi jajem pipol an go long faet tu, wei blong hem hemi barava stret. ¹² Ae blong hem hemi laet olsem faea, an hemi garem plande kraon long hed blong hem. Wanfala nem hemi stap long bodi blong hem, bat hem seleva nomoa hemi save long nem ya an no eniwan moa hemi save. ¹³ An kaleko wea hemi werem, hemi tuwet long blad. Olketa kolem nem blong hem: “Toktok Blong God.” ¹⁴ An olketa soldia blong heven olketa go bihaen long hem, wea olketa raed antap long olketa waetfala hos an olketa werem nambawan waet kaleko wea hemi klin. ¹⁵ Wanfala naef fo faet wea hemi sap tumas, hemi kamaot long maos blong hem, an bae hemi yusim diswan fo winim evri kantri. An bae hemi strik tumas taem hemi rul ovarem olketa ya. An bae hemi mekem bikfala kros blong God hu hemi garem evri paoa, fo kasem olketa. Bae hemi olsem taem wanfala man hemi step antap long olketa frut blong grep tri ya, go-go wata blong frut ya hemi kamaot. ¹⁶ Long kaleko blong hem an antap long ni blong hem, olketa raetem wanfala nem olsem: “King ovarem evri king, an Masta ovarem evri masta.” ¹⁷ Bihaen, mi lukim moa wanfala enjel wea hemi stanap long san. Hemi singaot bikfala long olketa bed wea olketa flae olobaot long skae, an hemi sei long olketa, “Yufala kam an hipap long bikfala fist wea God bae hemi mekem. ¹⁸ Yufala kam an kaikaim mit blong bodi blong olketa king an olketa komanda an olketa soldia, an mit blong olketa hos wetem olketa man hu i bin raedem. Bae yufala kaikaim mit blong bodi blong evri pipol, wetem olketa slev an olketa fri man, nomata olketa bikman o man nating.” ¹⁹ Nao mi lukim moa wael animol ya, wetem olketa king long wol an olketa ami blong olketa, olketa bin hipap long wanples fo faet. Olketa redi fo faet agensim disfala man hu hemi sidaon antap long hos ya, wetem ami blong hem. ²⁰ Bat disfala man ya hemi kasholem disfala wael animol wetem laea profet ya. Hem nao disfala laea profet wea bifoa hemi mekem olketa mirakol long frant long wael animol ya. An long wei olsem nao hemi bin trikim olketa pipol wea olketa garem disfala mak blong wael animol ya, an olketa save wosipim disfala kaving blong hem. Nao wael animol ya an laea profet ya, nomata tufala laef yet, hemi torowem tufala insaet long bikfala hol blong barava hot faea wea hemi laet long diskaen ston salfa. ²¹ An disfala man wea hemi sidaon antap long hos ya, hemi kilim olketa soldia dae wetem disfala naef fo faet wea hemi kamaot long maos blong hem. An olketa bed kamdaon an kaikaim mit blong bodi blong olketa soldia ya, go-go olketa fulap fogud.

¹ Den mi lukim wanfala enjel wea hemi kamdaon from heven. Long han blong hem, hemi holem ki blong lok blong disfala hol wea hemi barava dip tumas, an hemi holem tu wanfala bikfala sen. ² Nao enjel ya hemi winim bikfala snek ya, an hemi taengem hem long bikfala sen ya. Snek ya, hem nao disfala snek blong bifoa, an hem nao yumi kolem: “Seitan” o “Devol.” ³ Den enjel ya hemi torowem snek ya insaet long hol ya, an hemi satem doa blong disfala ples an hemi lokem strong. Bikfala snek ya bae hemi stap insaet long hol ya fo 1,000 yia, mekem hemi no save laea moa long olketa pipol long wol. Bat bihaen long 1,000 yia, bae enjel ya mas letem hem fri moa fo lelebet taem. ⁴ An mi lukim moa samfala tron. An mi lukim tu olketa spirit blong olketa pipol wea olketa bin katemaot hed blong olketa bifoa, bikos olketa bin talemaot tru toktok abaotem Jisas an olketa bin obeim toktok blong God. Olketa ya, olketa no wosipim wael animol ya o kaving blong hem. An olketa no tekem tu disfala mak blong wael animol ya long fohed o long han blong olketa. Olketa laefbaek moa long taem ya, an God hemi mekem olketa fo sidaon long olketa tron fo rulim olketa pipol. Olketa stap fo rul wetem Kraes fo 1,000 yia. ⁵ Diswan hemi fas taem wea God hemi mekem pipol fo laefbaek moa from dae. (Evri nara pipol moa wea olketa dae finis, God hemi no mekem olketa fo laefbaek yet, bat olketa mas weit go-go 1,000 yia hemi finis.) ⁶ Olketa pipol wea God hemi mekem olketa fo laefbaek moa from dae long disfala fas taem ya, olketa save hapi bikos bae mektu dae hemi no garem eni paoa fo kasem olketa. Olketa ya nao bae kamap prist blong God an blong Kraes, an bae olketa rul wetem Kraes fo 1,000 yia. ⁷ Bihaen 1,000 yia, enjel ya i letem Seitan fo fri moa from prisin. ⁸ An bae hemi goaot fo trikim olketa pipol long evri ples long wol, wea olketa kolem laen blong Gog an Megog. Seitan bae hemi mekem olketa pipol ya fo kam hipap fo faetem olketa pipol blong God. Olketa soldia blong Seitan bae olketa plande tumas olsem sanbis long saetsi. ⁹ Nao bae olketa goraon long evri ples long wol, an bae olketa raonem disfala ples wea olketa pipol blong God i stap long hem. Hem nao disfala biktaon wea God hemi lavem tumas. Bat nomata olsem, bae faea hemi kamaot long heven an bonem evri ami ya. ¹⁰ Den Seitan hu hemi bin trikim olketa pipol, olketa torowem go long bikfala hol blong barava hot faea wea hemi laet long diskaen ston salfa. Long ples ya nao, wael animol ya an laea profet ya tufala stap finis long hem. Evritaem an olowe, nomata de an naet, bae trifala ya barava safa fogud long faea ya. ¹¹ Den mi lukim wanfala bikfala tron wea hemi waet fogud, an mi lukim tu God hu hemi sidaon long hem. An wol wetem skae tufala ranawe from God, an no eniwan save faendem tufala long eni ples. ¹² An mi lukim evri pipol hu i dae finis. Evriwan ya, nomata olketa bikman o man nating, olketa stanap long frant long bikfala tron ya. Den olketa openem disfala buk blong laef. An olketa openem olketa nara buk tu wea i talemaot olketa samting wea evriwan i bin duim kam long laef blong olketa. An God hemi jajem evriwan falom olketa samting ya. ¹³ Dae an ples blong man dae, tufala givim kam evri pipol hu i stap insaet, an si tu hemi givim kam evri pipol wea olketa dae insaet. An God hemi jajem evriwan ya, falom olketa samting wea olketa bin duim kam long laef blong olketa. ¹⁴ Nao Dae an disfala ples blong man dae, olketa torowem go tufala ya insaet long disfala bikfala hol blong faea. Disfala bikfala hol blong faea ya, hem nao mektu dae. ¹⁵ An olketa torowem go insaet long disfala bikfala hol blong faea tu olketa pipol wea nem blong olketa i no stap insaet long disfala buk blong laef.

¹ Den mi lukim moa wanfala niu wol wetem niu skae, bat no eni si long hem. An disfala wol wetem skae wea hemi stap fastaem, tufala barava nomoa nao. ² An mi lukim bikfala holi taon ya, niu Jerusalem. Mi lukim hemi stap wetem God an hemi kamdaon from heven. Taon ya hemi stap redi finis olsem gele wea bae hemi marit, wea hemi werem olketa nambawan kaleko blong hem an hemi redi fo maritim hasban. ³ Nao mi herem wanfala voes from tron, wea hemi singaot olsem, “Lukim, ples blong God hemi stap wetem olketa pipol nao. An bae hemi stap oltaem wetem olketa, an olketa nao i barava pipol blong hem. God seleva nao bae hemi stap wetem olketa, an bae hemi barava God blong olketa. ⁴ An bae hemi draem evri tias from ae blong olketa. An no eni pipol save dae moa, an no enitaem nao olketa save sore o krae o filpein moa. Bikos evrisamting blong bifoa, hemi nomoa nao.” ⁵ Nao God hu hemi sidaon long tron, hemi tok olsem, “Yu save, mi gohed fo mekem evrisamting kamap niufala moa.” An hemi tok olsem moa, “Yu raetemdaon olketa toktok ya, bikos olketa truwan ya, an evriwan save trastem.” ⁶ An hemi talem olsem moa, “Ya, evrisamting hemi finis nao. Mi nao mi faswan bifoa evrisamting, an bae mi laswan tu bihaen evrisamting ya. Ya, mi nao statem evrisamting an bae mi nao finisim evrisamting tu. Sapos eniwan hemi laek fo dring, bae mi letem hem fo dring fri long disfala springwata blong laef. ⁷ Eniwan wea hemi winim faet blong hem bae mi givim hem olketa samting ya, an mi nao bae mi God blong hem, an hem nao bae hemi pikinini blong mi. ⁸ “Bat olketa pipol hu i sem long mi, an olketa hu i lusim biliv, an olketa hu i mekem olketa ravis wei, an olketa hu i kilim man dae, an olketa hu i durong wetem eniwan, an olketa hu i mekem majik, an olketa hu i wosipim olketa nara god, an olketa hu i laea tumas, olketa ya nao bae mektu dae kasem olketa. Bae olketa go long bikfala hol blong barava hot faea wea hemi bone long diskaen ston salfa.” ⁹ Nao wanfala enjel hemi kam long mi. Hemi wanfala long sevenfala enjel ya, wea bifoa olketa holem sevenfala baol wea i fulap long sevenfala las bikfala panis. Nao hemi tok olsem long mi, “Yu kam, mekem mi som yu disfala waef blong Smolfala Sipsip ya wea hemi jes maritim.” ¹⁰ Nao paoa blong Holi Spirit hemi kam long mi, an enjel ya hemi lidim mi go antap long wanfala bik maonten wea hemi hae fogud. Nao hemi som long mi Jerusalem, disfala bikfala Holi Taon wea hemi kamdaon from God long heven. ¹¹ An saen blong bikfala paoa blong God hemi saen kam long biktaon ya. Hemi barava saen fogud olsem naesfala ston jaspa wea hemi klia fogud olsem glas. ¹² Biktaon ya hemi garem bikfala wolston raonem hem wea hemi hae fogud. An hemi garem tuelfala geit long hem, an tuelfala enjel nao stanap fo gadem tuelfala geit ya. An olketa nem blong tuelfala traeb blong pipol blong Israel nao i stap long olketa geit ya. ¹³ Trifala geit nao stap long saet long ist, an trifala geit long saet long saot, an trifala geit long saet long not, an nara trifala geit moa long saet long west. ¹⁴ Faondesin blong wolston ya hemi tuelfala bikfala ston, wea nem blong tuelfala aposol blong Smolfala Sipsip ya i stap long hem. ¹⁵ Disfala enjel wea hemi tok kam long mi, hemi garem wanfala longfala gol stik fo mesarem biktaon ya wetem wolston blong hem an tuelfala geit blong hem. ¹⁶ Biktaon ya hemi garem fofala kona. Nao waed blong hem an longfala blong hem, tufala barava semsem nomoa. Nao enjel ya hemi mesarem biktaon ya, an hemi kasem 12,000 stadia. Long blong hem an waed blong hem an hae blong hem, trifala evriwan barava semsem nomoa. ¹⁷ An enjel ya hemi mesarem moa wolston blong hem, wea hae blong hem hemi 144 peikos. (Wei wea enjel ya hemi mesarem olketa samting, hemi olsem hao yumi mesarem enisamting.) ¹⁸ Wolston ya, olketa mekem long naesfala ston jaspa, an taon ya olketa mekem long nambawan gol, wea hemi saen olsem glas. ¹⁹ An faondesin blong wolston ya, hemi lukgud tumas bikos hemi garem olketa nambawan ston long hem. Fas ston blong faondesin ya hemi jaspa, an mektu ston hemi safae, an mektri ston hemi agit, an mekfoa hemi emaral. ²⁰ An mekfaev ston hemi onikis, an meksiks ston hemi kanilian, an mekseven ston hemi kuots, an mekeit ston hemi beril, an meknaen ston hemi topas, an mekten ston hemi kalsedoni, an mekleven ston hemi tokoes, an mektuel ston hemi amitis. ²¹ An tuelfala bikfala geit ya olketa mekem long tuelfala pel. Evri geit olketa mekem long wanfala bikfala pel nomoa. An bikfala rod insaet long biktaon ya olketa wakem long nambawan gol wea hemi klia tumas olsem glas. ²² Bat mi no lukim eni tambuhaos insaet long biktaon ya, bikos God Masta hu hemi garem evri paoa wetem Smolfala Sipsip ya, tufala nao i olsem tambuhaos blong hem. ²³ An olketa no nidim san an mun fo saen kam long biktaon ya, bikos bikfala paoa blong God hemi saen kam long hem. An Smolfala Sipsip ya tu hemi laet blong biktaon ya. ²⁴ An pipol blong evri kantri long wol bae olketa wakabaot long disfala laet wea hemi saen kam long bikfala taon ya. An olketa king long wol bae olketa tekem kam risis blong olketa insaet long taon ya. ²⁵ Olketa geit blong hem bae i no save sat enitaem, bikos ples ya hemi no save naet. ²⁶ Olketa risis wetem enikaen gudfala samting blong pipol blong evri kantri long wol, bae olketa tekem kam insaet long biktaon ya. ²⁷ Bat olketa samting wea hemi no klin an olketa pipol hu i gohed fo duim olketa ravis samting, o gohed fo laea, olketa ya nao olketa no save kam insaet long biktaon ya. Bat olketa pipol wea nem blong olketa hemi stap insaet long disfala buk blong laef wea Smolfala Sipsip ya hemi garem, olketa pipol ya nao save go insaet long biktaon ya.

¹ Nao enjel ya hemi som mi wanfala riva wea hemi saen olsem glas. An riva ya nao hemi wata blong laef. Hemi ran kamaot long tron blong God an blong Smolfala Sipsip ya, ² an hemi ran godaon long midol long bikfala rod blong biktaon ya. An long tufala saet long hem, olketa tri blong laef nao grou long hem. Olketa save garem frut long evri mans, olsem tuelfala taem long wanfala yia. An lif blong olketa tri ya, olketa pipol long evri kantri long wol i save yusim fo tekemaot sik blong olketa. ³ Bat olketa samting wea God hemi no laekem, hemi no save stap insaet long biktaon ya. Tron blong God an blong Smolfala Sipsip ya nao hemi stap insaet long biktaon ya. An olketa wakaman blong God bae olketa gohed fo wosipim hem. ⁴ An olketa bae lukim fes blong hem olowe, an nem blong hem bae hemi stap long fohed blong olketa. ⁵ Long ples ya, bae no eni naet long hem, an bae olketa no nidim laet blong lam o laet blong san, bikos God Masta nao bae hemi laet blong olketa. An bae olketa rul olsem king evritaem an olowe. ⁶ Bihaen, enjel ya hemi tok olsem moa long mi, “Olketa toktok ya i barava tru tumas, an yu save trastem. God Masta hu hemi givim Spirit blong hem long olketa profet, hem nao hemi sendem mi kam fo som long olketa wakaman blong hem, olketa samting wea bae no longtaem nomoa hemi mas hapen.” ⁷ Nao Jisas hemi sei, “Yu lisin gudfala, no longtaem nomoa, bae mi kambaek moa. An olketa pipol hu i obeim olketa toktok wea God hemi talem insaet long disfala skrol ya, olketa nao save hapi.” ⁸ Mi Jon nao mi herem an lukim olketa samting ya. Nao taem mi herem an lukim nomoa olketa samting ya, mi nildaon fo wosipim enjel hu hemi som olketa samting ya long mi. ⁹ Bat hemi tok olsem long mi, “!Nomoa, yu no wosipim mi! Mi wanfala wakaman olsem yu nomoa. Mi olsem olketa profet hu i brata blong yu, an mi olsem olketa nara pipol hu i obeim olketa toktok wea hemi stap insaet long disfala skrol ya. !Yu mas wosipim God nomoa!” ¹⁰ An hemi tok olsem long mi moa, “Yu no haedem olketa toktok ya wea God hemi talem insaet long disfala skrol ya, bikos bae no longtaem nomoa, evrisamting ya bae hemi hapen. ¹¹ An olketa nogud pipol, bae olketa gohed nomoa fo duim olketa samting nogud. An olketa ravis pipol, bae olketa gohed nomoa fo duim ravis samting. Bat olketa stretfala pipol, bae olketa gohed nomoa fo stap stret, an olketa holi pipol, bae olketa gohed nomoa fo stap holi.” ¹² Nao Jisas hemi tok olsem, “Yu lisin gudfala, no longtaem nomoa, bae mi kambaek moa. An bae mi tekem kam olketa pei blong olketa pipol fo givim long olketa, falom wanem evriwan hemi bin duim. ¹³ Mi nao mi faswan bifoa evrisamting an bae mi laswan tu bihaen evrisamting ya. Ya, mi nao faswan an laswan. Mi statem evrisamting an bae mi finisim evrisamting tu.” ¹⁴ Olketa pipol hu i wasim kaleko blong olketa, olketa save hapi tumas. Bikos olketa nao i fit fo kaikaim frut blong tri blong laef, an olketa fit tu fo go insaet long olketa geit blong biktaon ya. ¹⁵ Bat olketa nara pipol moa olketa no save go insaet. Hem nao olketa hu i falom olketa ravis wei, an olketa hu i gohed fo mekem majik, an olketa hu i durong wetem eniwan, an olketa hu i kilim man dae, an olketa hu i gohed fo wosipim olketa narafala god, an olketa hu i save laea tumas long toktok an long laef blong olketa. ¹⁶ “Mi Jisas, mi nao sendem enjel blong mi fo go an talemaot olketa samting ya long yufala long olketa sios. Mi nao mi bon kam long laen blong olo blong yumi Deved. An mi nao disfala sta blong eli moning wea hemi barava saen fogud.” ¹⁷ An Holi Spirit wetem niufala waef blong Kraes, tufala tok olsem, “Yufala kam.” An evriwan wea olketa herem toktok ya, olketa mas tok olsem tu, “Yufala kam.” Yufala wea yufala dae fo wata, yufala kam. Ya, yufala wea yufala laekem tumas fo dring, yufala save kam tekem fri disfala wata blong laef. ¹⁸ Mi Jon mi tokstrong fo wonem olketa pipol hu bae olketa herem olketa toktok wea God hemi talem insaet long disfala skrol ya. Sapos eniwan hemi adem samfala toktok moa insaet long skrol ya, olketa panis wea skrol ya hemi talemaot, bae God hemi mekem olketa kasem disfala man tu. ¹⁹ An sapos eniwan hemi tekemaot samfala toktok from profesi blong disfala skrol ya, bae God hemi tekemaot from hem olketa gudfala samting wea disfala skrol ya hemi talem. Man ya bae hemi no save stap long bikfala Holi Taon ya, an hemi no save tekem eni frut blong tri blong laef. ²⁰ Man hu hemi talemaot olketa samting ya hemi sei, “Ya, hemi tru ya. No longtaem nomoa bae mi kambaek moa.” Amen. !Jisas Masta blong mifala, plis yu kam! ²¹ Letem kaenfala lav blong Jisas Masta blong yumi, hemi stap wetem yufala pipol blong God. Amen.