FILIPAE

FILIPAE

¹ Mi Pol wetem Timoti wea mitufala wakaman blong Jisas Kraes, mitufala raet go long yufala olketa lida an olketa man fo waka long sios long Filipae. Ya, mitufala raet go long yufala evriwan long Filipae wea yufala blong God an yufala stap joen wetem Jisas Kraes. ² Letem kaenfala lav an piis blong God Dadi blong yumi an blong Jisas Kraes Masta blong yumi, hemi stap wetem yufala. ³ Mi tengkiu long God blong mi evritaem mi tingim yufala. ⁴ An mi hapi tumas evritaem mi prea fo yufala evriwan. ⁵ Mi hapi tumas, bikos stat kam long fas de, yufala waka tugeta wetem mi long waka blong disfala Gudnius. ⁶ An mi barava save dat God hu hemi bin statem disfala gudfala waka long laef blong yufala, bae hemi gohed fo finisim long datfala De blong Jisas Kraes. ⁷ Yufala stap olowe long maen blong mi, so hemi fitim fo mi tingim yufala olsem. Yufala evriwan nao i joen wetem mi long disfala waka wea God hemi givim kam long yumi. An diswan hemi tru nomata mi stap insaet long prisin. An hemi tru tu taem mi stap fri fo somaot long olketa pipol dat Gudnius hemi truwan an mi helpem olketa fo biliv long hem. ⁸ God hemi luksave dat mi lavem yufala tumas long sem wei wea Jisas Kraes hemi lavem yufala. ⁹ Mi prea dat lav blong yufala hemi mas gohed fo grou moa, mekem yufala garem gudfala save an evri stretfala tingting. ¹⁰ An bae yufala save long evrisamting wea hemi stret gudfala. Long wei ya, bae yufala save stap klin an stret tumas long datfala De blong Kraes. ¹¹ An bae yufala save falom gud olketa stretfala wei wea Jisas Kraes hemi helpem yumi long hem, mekem evriwan liftimap nem blong God an preisim hem. ¹² Olketa Kristin fren, mi laekem yufala fo savegud long wanem hemi hapen long mi distaem, hemi mekem disfala Gudnius fo gohed gudfala moa. ¹³ Evri soldia long haos blong bikfala King wetem olketa nara pipol moa, olketa save nao dat mi stap long prisin bikos mi wakaman blong Kraes. ¹⁴ An bikos olketa Kristin long hia olketa save dat mi stap long prisin, plande long olketa i bin kamap strong moa long biliv blong olketa long Masta. An olketa no save fraet, bat olketa gohed strong fo talemaot toktok blong God. ¹⁵ Hemi tru dat samfala talemaot toktok abaotem Kraes bikos olketa joles long mi an olketa traehad fo mekem trabol nomoa. Bat nomata olsem, samfala moa i talemaot toktok abaotem Kraes bikos olketa garem stretfala tingting fo duim waka ya. ¹⁶ Olketa lavem mi, an olketa save dat God hemi mekem mi fo somaot long olketa pipol dat disfala Gudnius hemi truwan. ¹⁷ Olketa nara pipol ya olketa no garem eni stretfala tingting, olketa laekem olketa seleva nomoa fo kamap bikfala, an olketa laek fo mekem evrisamting had go moa long mi, taem mi stap insaet long prisin. ¹⁸ Bat nomata olsem, hemi gud nomoa fo olketa talemaot toktok abaotem Kraes long enikaen wei. Mi hapi long hem, nomata olketa falom rong tingting blong olketa seleva o olketa falom stretfala tingting. An bae mi gohed fo hapi moa, ¹⁹ bikos mi save, from prea blong yufala fo mi an from help blong Spirit blong Jisas Kraes, bae mi goaot from prisin moa. ²⁰ Mi barava laekem tumas an mi tingim strong dat mi no laek fo duim enisamting wea bae mi filsem long hem long ae blong Kraes. Mi laek gohed fo stap strong an mekhae long Kraes long evrisamting mi duim, olsem mi save duim olowe. So nomata mi gohed fo laef o mi dae, bae mi mekhae long Kraes. ²¹ Mi tingim olsem, sapos mi laef, mi save duim gudfala waka fo Kraes, an sapos mi dae, bae mi kasem gudfala samting moa. ²² Bat sapos mi gohed fo laef longtaem, bae mi save duim plande gudfala waka moa. So mi no save wanem nao fo siusim. ²³ Mi barava stap long midol long tufala gudfala samting nao. Mi laekem tumas fo lusim laef an go stap wetem Kraes, bikos hem nao hemi barava nambawan samting. ²⁴ Bat bikfala samting moa, hem nao fo mi stap laef, mekem mi save helpem yufala. ²⁵ Ya, mi barava save dat hemi olsem. An mi save dat bae mi stap yet wetem yufala evriwan, mekem mi helpem yufala fo gohed moa an stap hapi olowe long biliv blong yufala. ²⁶ An bikos mi save kam moa long yufala, bae yufala save barava hapi tumas moa long Jisas Kraes. ²⁷ Yufala ya mas meksua dat wei blong yufala hemi falom disfala Gudnius blong Kraes. So nomata mi kam fo lukim yufala o nomoa, bae mi laek fo herem kam dat yufala i gohed strong tugeta long semkaen tingting nomoa, an yufala waka tugeta fo helpem olketa pipol fo biliv long Gudnius. ²⁸ Mi laekem yufala fo no fraetem olketa enemi bat stanap strong olowe. Sapos yufala duim olsem, bae olketa luksave dat God bae hemi sevem yufala, bat olketa seleva nao bae panis. ²⁹ Bikos God hemi no mekem yufala fo waka fo Kraes long wei wea yufala biliv long hem nomoa, bat long wei wea yufala safa long nem blong hem tu. ³⁰ So distaem yufala save joen wetem mi long disfala faet. Hemi semkaen faet wea yufala lukim mi gohed long hem bifoa an yufala herem mi gohed long hem yet.

¹ Tingting blong yufala hemi kamap strong moa bikos yufala joen wetem Kraes an hemi lavem yufala. Yufala stapgud tugeta wetem Holi Spirit, an yufala kaen an filsore long olketa pipol. ² So mi askem yufala fo falom diskaen wei wea hemi save mekem mi hapi go moa. Yufala evriwan mas stap wanmaen nomoa an yufala mas lavem yufala evriwan, an laef an tingting blong yufala hemi mas wankaen nomoa. ³ Yufala mas no tingim yufala seleva nomoa an no trae fo haemapem yufala seleva. Bat yufala mas hambol an tingim olketa nara pipol olsem olketa nao gudfala winim yufala. ⁴ An yufala mas no tingting long wanem hemi gud fo yufala seleva nomoa, bat yufala mas tingting long wanem nao hemi gud fo nara pipol. ⁵ Tingting an wei blong yufala hemi mas wankaen olsem tingting an wei blong Kraes. ⁶ Kraes hemi barava God, bat hemi no holetaet long disfala wei wea hemi wankaen wetem God. ⁷ So Kraes hemi lusim go evrisamting blong disfala biknem blong hem, an hemi kamap olsem wakaman nomoa. Hemi bon kam olsem man, ⁸ an hemi barava olsem wanfala man blong wol nomoa. Hemi hambol tumas an hemi obeim God olowe, go-go hemi dae taem olketa nilam hem long wanfala kros. ⁹ From diswan nao, God hemi liftimapem hem fo stap long nambawan ples long heven, an God hemi givim hem wanfala biknem wea hemi bikfala winim evriwan. ¹⁰ Dastawe nao evriwan long heven wetem evriwan long disfala wol an evriwan moa long ples blong olketa man dae, bae evriwan ya nildaon fo mekhae long Jisas. ¹¹ An bae evriwan talemaot dat Jisas Kraes nao hemi Masta long evrisamting. An long diswan bae evriwan liftimapem nem blong God Dadi blong yumi. ¹² Olketa fren blong mi, yufala bin obeim mi olowe taem mi stap wetem yufala. So yufala mas gohed fo duim diswan tu nomata mi no stap wetem yufala. God hemi sevem yufala, so yufala mas tinghevi an tinghae long hem an gohed nomoa fo wakahad fo kasem wanem hemi makem fo yufala. ¹³ Yufala save, God nao hemi gohed fo waka insaet long yufala, mekem yufala save siusim an duim wanem hemi falom plan blong hem. ¹⁴ Taem yufala gohed fo duim olketa samting, yufala mas no komplen o raoa abaotem. ¹⁵ Long diskaen wei nao bae yufala save klin long ae blong God an yufala no save garem enisamting rong long yufala. Long wei ya tu bae yufala i olketa pikinini blong God wea olketa gudfala tumas, nomata yufala stap wetem olketa pipol wea wei blong olketa hemi nating stret an olketa duim olketa ravis samting. Ya, bae yufala saen go gudfala long olketa, olsem olketa sta i saen long skae, ¹⁶ bikos yufala gohed fo talemaot disfala toktok blong laef long olketa. Sapos yufala duim olsem, bae mi save filpraod long yufala long datfala De blong Kraes. Bikos bae hemi somaot long de ya, dat mi no bin wakahad nating. ¹⁷ Biliv blong yufala hemi olsem wanfala sakrifaes wea yumi ofarem go long God. Nao sapos olketa kilim mi dae, an blad blong mi hemi kapsaet olsem waen blong ofaring wea hemi joen tugeta wetem biliv blong yufala, bae mi hapi nomoa tugeta wetem yufala evriwan long diswan. ¹⁸ So yufala tu mas hapi tugeta wetem mi. ¹⁹ Sapos hemi gud long tingting blong Jisas Masta blong yumi, bae no longtaem, mi sendem go Timoti fo visitim yufala, mekem mi save filgud moa long taem mi herem samfala gudfala nius abaotem yufala. ²⁰ No eni nara man hemi olsem Timoti wea hemi barava laekem tumas fo save, sapos evrisamting hemi gohed gud long laef blong yufala. ²¹ Olketa narawan tingim olketa seleva nomoa, an no save lukaftarem olketa samting wea Jisas Kraes hemi laekem. ²² Bat yufala luksave finis dat Timoti hemi no olsem olketa kaen pipol ya. Hemi bin helpem mi gudfala long disfala waka blong Gudnius, olsem wanfala pikinini hemi save helpem dadi blong hem. ²³ Mi plan fo sendem hem go long yufala, taem mi savegud long wanem bae hemi hapen long mi. ²⁴ Mi trastem Masta, dat no longtaem nomoa, bae mi kam lukim yufala. ²⁵ Mi mas sendem brata blong yumi Epafrodaetas gobaek long yufala. Yufala sendem hem kam bifoa fo helpem mi, an hemi waka wetem mi an barava stap tugeta wetem mi long disfala faet. ²⁶ Bat hemi laekem tumas fo lukim yufala moa, an hemi filnogud from yufala herem dat hemi bin sik tumas. ²⁷ Hemi tru, hemi bin sik bikfala tumas an kolsap dae long hem. Bat God nao hemi sore an kaen long hem. An God hemi sore an kaen long mi tu, fo hemi stopem enikaen bikfala sore fo kasem mi. ²⁸ So mi laekem tumas fo sendem hem gobaek long yufala nao, mekem yufala save hapi taem yufala lukim hem moa, an mekem mi no wari tumas moa abaotem hem. ²⁹ Bae yufala mas welkamem hem moa long nem blong Masta. An yufala mas tinghae long olketa pipol olsem hem, ³⁰ bikos hemi kolsap dae taem hemi waka fo Kraes. Hemi nating wari sapos hemi lusim laef blong hem, taem hemi helpem mi long wei wea hemi had long yufala fo helpem mi long hem.

¹ Nao olketa Kristin fren blong mi, mi laekem yufala fo stap hapi long Masta. Hemi gud nomoa long mi fo raetem moa wanem mi talem yufala finis bifoa, bikos hemi save helpem yufala. ² Yufala mas lukaot long olketa pipol hu i laekem tumas fo spoelem bodi wetem disfala kastom fo kate. Olketa olsem wael dog hu i gohed long olketa ravis samting. ³ Bat yufala save dat yumi nao yumi falom wei blong barava kate. Yumi wea Spirit blong God hemi helpem yumi fo wosipim hem, an yumi praod fo stap joen wetem Jisas Kraes, yumi nating trastem enisamting olsem kate wea man save duim long bodi. ⁴ Sapos mi wande trastem, mi save trastem olketa kaen samting ya olsem. An nomata eni man hemi sei hemi save trastem olketa samting long saet blong bodi, mi nao mi save trastem kaen samting ya winim hem. ⁵ Minao man blong Israel wea mi bon kam long traeb blong Benjamin, an mi wanfala barava Hibru. Long mekeit de blong mi, olketa mekem mi fo kate. An mi barava falom Lo blong olketa Jiu bikos mi wanfala Farasi. ⁶ Mi barava strong tumas long waka blong God, so mi mekem olketa Kristin fo safa. An long wei fo kamap stret falom Lo, mi no garem enisamting rong long laef blong mi. ⁷ Bat wea, from waka blong Kraes, olketa samting ya wea mi bin tingse i nambawan samting tumas, olketa i samting nating nomoa. ⁸ An evri narasamting moa long laef blong mi, mi tingim olsem samting nating nomoa. Hem olsem bikos mi savegud long Jisas Kraes Masta blong mi, wea hemi barava nambawan samting tumas moa. Bikos mi falom hem, mi lusim go evrisamting finis. Mi tingim evrisamting ya i olsem ravis nomoa, fo mi save kasem Kraes ⁹ an mekem mi save joen gudfala wetem hem. So mi no stap stret long ae blong God bikos mi falom disfala Lo ya. !Nomoa! Mi kamap stretfala man bikos mi biliv long Kraes, wea God nao hemi duim diswan bikos mi biliv nomoa. ¹⁰ Nao wanem mi laekem nomoa, fo savegud long Kraes an long disfala paoa wea hemi mekem hem laefbaek moa. Mi wande safa olsem hemi safa, an mi wande kamap olsem hem long wei hemi go kasem dae blong hem. ¹¹ Long wei ya nao mi trastem God bae hemi mekem mi laefbaek moa from dae. ¹² Mi no sei mi kasem finis disfala wei blong Kraes o mi stret finis nao. Nomoa. Bat bikos Kraes hemi bin mekem mi kamap man blong hem finis, mi gohed strong fo kasem evrisamting wea Kraes hemi garem fo mi. ¹³ Olketa fren, mi no tingim mi kasem diswan finis. Nomoa. Bat wanfala samting mi duim nao, mi fogetem evrisamting long bihaen an mi traehad fo kasem wanem mi no kasem yet. ¹⁴ Mi traehad fo kasem disfala mak fo tekem praes. Praes ya hemi blong evriwan hu i stap joen wetem Jisas Kraes, wea God hemi kolem yumi fo go kasem ples blong hem antap. ¹⁵ Yumi evriwan hu i grouap strong long biliv blong yumi finis, yumi mas tingabaotem olketa samting ya long diskaen wei. An sapos samfala long yufala garem deferen tingting long hem, God nao bae hemi stretem diswan long olketa. ¹⁶ Bat nomata olsem, yumi mas gohed nomoa long disfala wei yumi bin gohed long hem kasem distaem. ¹⁷ Nao olketa Kristin fren, yufala mas gohed fo falom wanem mi duim. Yufala mas lane gud long eksampol blong eniwan hu hemi falom wei wea mifala bin som finis long yufala. ¹⁸ Plande pipol i gohed long wei wea olketa i enemi long waka wea Kraes hemi bin duim long kros. Mi bin talem yufala diswan plande taem finis, an mi sore tumas bikos mi mas talem yufala moa. ¹⁹ Diskaen pipol ya, wanem olketa laekem fo bodi blong olketa seleva, hem nao olsem god blong olketa. An olketa praod fo duim olketa samting wea yumi save filsem tumas long hem. Olketa tingting olowe long evrisamting blong wol nomoa. Bae olketa kaen pipol olsem i go lus long hel. ²⁰ Bat yumi nao, yumi olketa barava pipol blong heven. An yumi weitem nomoa Masta an Sevia blong yumi Jisas Kraes, fo hemi kamdaon from heven. ²¹ An bae hemi mekem olketa wik bodi blong yumi fo sens an kamap nambawan tumas olsem bodi blong hem seleva. Bae hemi duim diswan long disfala bikfala paoa blong hem wea hemi save yusim fo kontrolem evrisamting.

¹ So olketa Kristin fren blong mi, from olketa samting olsem nao, yufala mas gohed strong fo biliv long Masta. Mi lavem yufala tumas ya, an mi barava wande kam lukim yufala. Olketa fren, mi hapi tumas long yufala, an mi filpraod tumas long laef blong yufala. ² Mi askem st rong tufala woman ya, Yuodia wetem Sindiki fo tufala mas finisim raoa blong tufala nao, bikos tufala evriwan i blong Masta. ³ An yu Susuge, wea yu stap tugeta wetem mi long waka, yu tu mas helpem tufala woman ya. Tufala bin wakahad fo talemaot Gudnius wetem mi an wetem Klemen an olketa narawan moa wea nem blong olketa i stap insaet long buk blong laef. ⁴ Yufala mas barava hapi olowe bikos yufala joen finis wetem Masta. Mi talem yufala moa, yufala mas hapi nomoa. ⁵ Yufala mas kaen gudfala long evri pipol, bikos Masta hemi kolsap kam nao. ⁶ Yufala mas no wari long enisamting, bat evritaem yufala prea long God, yufala mas tengkiu long hem an talem hem wanem yufala nidim. ⁷ Long wei ya, bae disfala piis blong God, wea hemi bikfala tumas winim save blong yumi, bae hemi mekem tingting blong yufala fo no wari moa, bikos yufala stap joen wetem Jisas Kraes. ⁸ Olketa fren, mi laek fo talem wanfala samting moa. Yufala mas tingabaotem nomoa olketa gudfala wei wea pipol i tinghae long hem. Olketa gudfala wei olsem: wanem hemi tru, an wanem hemi fitim fo tinghae long hem, an wanem hemi stret, an wanem hemi klin gudfala, an wanem hemi somaot tru lav, an wanem hemi stret fo laekem, an wanem hemi barava nambawan tumas, an wanem hemi fitim fo tokhae long hem. ⁹ Yufala mas gohed long olketa wei wea mi bin tisim yufala an yufala tekem finis, olsem olketa samting yu herem from mi an lukim mi duim. An God hu hemi save givim piis long yumi, bae hemi stap wetem yufala. ¹⁰ Mi wande talem yufala dat mi barava hapi tumas long Masta, bikos nomata longfala taem hemi go finis, yufala stat fo helpem mi moa. Mi save dat yufala bin tingim mi olowe, nomata yufala no garem eni wei fo helpem mi. ¹¹ Taem mi talem diswan, i no bikos mi sot long enisamting. Nomoa. Mi lanem finis hao fo stap hapi nomoa, nomata watkaen samting mi garem. ¹² Mi save finis long wei fo stap pua an long wei fo stap ris. Mi save hao fo stap hapi evritaem nomoa, nomata mi hanggre o mi fulap tumas, nomata mi sot long evrisamting o mi garem plande samting. ¹³ Disfala paoa wea Kraes hemi givim kam long mi, hem nao mekem mi strong fo gohed nomoa, nomata watkaen samting nao hemi kasem mi. ¹⁴ Bat nomata olsem, hemi gud tumas wea yufala bin helpem mi taem mi stap insaet long hadtaem. ¹⁵ Yufala long Filipae, yufala seleva save finis dat taem mi jes stat fo talemaot disfala Gudnius an mi lusim Masedonia, no eni sios bin helpem mi long taem ya. Bat yufala nomoa tingim mi an helpem mi. ¹⁶ Tu-tri taem nao yufala helpem mi taem mi stap long Tesalonaeka an mi sot long olketa samting. ¹⁷ Mi no talem diswan bikos mi laek fo tekem samfala samting moa. Bat mi barava laekem tumas fo God hemi blesim yufala bikos yufala bin duim plande gudfala samting olsem. ¹⁸ Mi kasem plande samting nao winim wanem mi barava nidim. Distaem Epafrodaetas hemi givim mi wanem yufala sendem kam wetem hem, so mi no sot long enisamting. Diswan hemi olsem wanfala sakrifaes wea hemi smel naes tumas an God hemi laekem an hapi tumas long hem. ¹⁹ God blong mi bae hemi givim go evrisamting wea yufala nidim, falom evri nambawan samting long Jisas Kraes. ²⁰ Nao yumi mas liftimap nem blong God Dadi blong yumi evritaem an olowe. Amen. ²¹ Mi laekem yufala fo sei halo long olketa pipol blong Jisas Kraes. Olketa Kristin wea mifala stap tugeta distaem, olketa sei halo go long yufala tu. ²² Olketa Kristin tu long haos blong bikfala King long Rom, an evri pipol blong God long hia, olketa sei halo long yufala. ²³ Letem kaenfala lav blong Jisas Kraes Masta blong yumi, hemi stap wetem yufala.