MAK

MAK

¹ Hem ya nao stat long Gudnius abaotem Jisas Kraes, San Blong God. ² God hemi talem profet Aesaea fo raetem olsem, “Bae mi sendem go niusman blong mi fo go fastaem long yu, an hem nao bae hemi mekredi long rod fo yu.” ³ “Wanfala man hemi toktok bikfala insaet long drae eria, an hemi sei, ‘!Yufala mas mekredi long rod fo Masta, an yufala mas stretem olketa smolfala rod fo hem!’” ⁴ So Jon hemi kam long wanfala drae eria, an hemi go-gohed nao fo baptaesim olketa pipol an talemaot toktok blong God long olketa olsem, “Yufala evriwan mas lusim ravis wei blong yufala an yufala mas baptaes, mekem God save fogivim olketa sin blong yufala.” ⁵ Nao long taem ya nomoa, evri pipol long Jerusalem an olketa nara ples long provins long Jiudia olketa kam an lisin long hem. Olketa talemaot olketa sin blong olketa an Jon hemi baptaesim olketa insaet long riva long Jodan. ⁶ Jon hemi werem olketa raf kaleko wea olketa wakem long hea blong kamel, an strap blong hem hemi skin blong animol nomoa. An kaikai blong hem nao hemi grashopa wetem wael hani. ⁷ Nao hemi talemaot toktok blong God long olketa pipol olsem, “Bae wanfala man hemi kam, an hem nao hemi bikfala moa winim mi. Mi barava nating fitim hem, nomata fo bendaon an tekemaot sandol blong hem. ⁸ Mi baptaesim yufala long wata nomoa, bat man ya bae hemi baptaesim yufala long Holi Spirit.” ⁹ No longtaem bihaen, Jisas hemi lusim kam Nasaret long provins long Galili, an Jon hemi baptaesim hem long riva long Jodan. ¹⁰ Taem Jisas hemi kamaot long wata nomoa, hemi lukim skae hemi open nao, an Holi Spirit hemi kamdaon long hem olsem wanfala kurukuru. ¹¹ Long semtaem nomoa, toktok hemi kamdaon long heven wea hemi sei, “Yu nao barava San blong mi wea mi lavem yu tumas, an mi hapi tumas long yu.” ¹² Bihaen nomoa, Holi Spirit hemi lidim Jisas fo go insaet long drae eria ya nao. ¹³ An ples ya tu olketa wael animol olketa stap long hem. Jisas hemi stap long ples ya fo foti de, an oltaem nomoa Seitan hemi gohed fo traem hem. An olketa enjel i kam an helpem hem. ¹⁴ Taem olketa putum Jon Baptaes long prisin finis, Jisas hemi go long Galili nao an hemi go-gohed fo talemaot Gudnius blong God. ¹⁵ Hemi sei olsem, “!Barava taem blong God hemi kamtru nao! !Kingdom blong God, hemi kolsap kam nao! !Yufala mas lusim ravis wei blong yufala, an biliv nomoa long Gudnius!” ¹⁶ Nao taem Jisas hemi wakabaot go long saet long leik long Galili nomoa, hemi lukim tufala brata wea waka blong tufala nao fo fising. Wanfala hemi Saemon an narawan hemi brata blong hem Andru. Tufala go-gohed fo fising wetem net long leik ya. ¹⁷ An Jisas hemi sei long tufala olsem, “Yutufala kam falom mi. Mi bae mi som yutufala hao fo fising fo kasem pipol.” ¹⁸ So long semtaem nomoa, tufala lusim olketa net blong tufala an go wetem Jisas nao. ¹⁹ Nao Jisas hemi wakabaot lelebet go moa an hemi lukim Jemes an Jon, tufala san blong Sebedi. Tufala sidaon insaet long bot blong olketa, an go-gohed fo mekem gud moa net blong olketa. ²⁰ Nao taem ya nomoa, Jisas hemi kolem tufala brata ya fo falom hem tu. So semtaem nomoa, tufala lusim dadi blong tufala Sebedi insaet long bot ya wetem olketa wakaman blong olketa, an tufala go wetem Jisas nao. ²¹ Nao Jisas wetem olketa disaepol blong hem olketa kam kasem taon long Kapaneam. Nao long Sabat de nomoa, Jisas hemi go insaet long preahaos, an hemi stat fo tisim olketa pipol nao. ²² An olketa pipol wea olketa herem toktok blong hem ya, olketa barava sapraes long tising blong hem, bikos wei wea hemi toktok ya hemi somaot klia dat hemi garem paoa ya. Toktok blong hem ya hemi barava no olsem tising blong olketa tisa blong Lo. ²³ Nao long taem ya tu, wanfala man wea ravis devol hemi stap long hem, hemi stap insaet long preahaos ya an hemi singaot bikfala olsem, ²⁴ “?Jisas blong Nasaret, wanem nao yu wande fo duim long mifala ya? !Ating yu kam fo spoelem mifala ya! !Mi save long yu finis nao, olsem yu barava Holi Man blong God ya!” ²⁵ So Jisas hemi tokstrong long devol ya olsem, “!Yu kuaet, yu kamaot from man ya!” ²⁶ Nao ravis devol ya hemi mekem bodi blong man ya barava seksek fogud. An semtaem hemi mekem hem fo singaot bikfala moa, an hemi kamaot from hem nao. ²⁷ Evriwan olketa barava sapraes fogud nao an olketa stat fo tok olsem tugeta long olketa seleva, “?Wanem nao ya? !Ating niu kaen tising moa ya, an hemi tokstrong olsem man hu hemi garem paoa nao! Nomata olketa ravis devol ya tu, taem hemi tokstrong long olketa, olketa save obeim hem nomoa.” ²⁸ An kuiktaem nomoa ya, nius abaotem Jisas hemi go kasem evri ples long provins long Galili nao. ²⁹ Taem Jisas wetem Jemes an Jon an olketa nara disaepol moa olketa kamaot long preahaos ya nomoa, olketa go stret nao long haos blong Saemon an Andru. ³⁰ Taem Jisas hemi go kasem haos nomoa, olketa talem hem dat mami-inlo blong Saemon hemi leidaon long bed, from hemi sik wetem fiva nao. ³¹ So Jisas hemi go long hem an hemi holem han blong hem fo mekem hem stanap. An semtaem nomoa, disfala fiva ya hemi finis from hem nao ya. An bihaen, hemi redim kaikai fo olketa. ³² Kasem ivining, bihaen san hemi godaon nomoa, olketa pipol tekem kam enikaen man wea olketa garem sik an olketa wea devol i stap long olketa. ³³ Evri pipol long taon ya olketa kam hipap long frant blong haos ya nao. ³⁴ An Jisas hemi mekem plande pipol wea olketa garem deferen kaen siknis fo gudbaek moa. An hemi raosim tu plande devol fo goaot from olketa pipol. Bat hemi no letem olketa devol ya fo toktok, bikos olketa save long hem finis. ³⁵ Long barava eli moning, taem san hemi no kamap yet, Jisas hemi wekap nomoa an hemi go nao long wanfala ples wea no eniwan stap long hem, an hemi prea. ³⁶ Bihaen nomoa, Saemon an olketa fren blong hem olketa go-gohed fo lukaotem Jisas nao. ³⁷ An taem olketa faendem hem nomoa, olketa talem hem olsem, “!Evriwan ya olketa gohed fo lukaotem yu ya!” ³⁸ Bat Jisas hemi sei long olketa olsem, “Yumi mas go moa long olketa nara taon, mekem mi save talemaot toktok blong God long olketa tu, dastawe nao mi kam long hia.” ³⁹ So hemi go-goraon long evri ples insaet long Galili fo talemaot toktok blong God insaet long olketa preahaos, an hemi gohed fo raosim olketa devol goaot from olketa pipol. ⁴⁰ Long wanfala taem, wanfala man hu hemi garem ravis sik blong skin hemi kam an nildaon long frant blong Jisas an kraeaot, “Plis, sapos yu wiling, yu save mekem mi gudbaek moa.” ⁴¹ Nao Jisas hemi sore tumas long hem, so hemi tasim man ya an hemi sei long hem, “Ya, mi wiling. !Yu gudbaek nao!” ⁴² An semtaem nomoa disfala ravis sik blong skin ya, hemi finis nao from man ya an bodi blong hem hemi gudbaek moa. ⁴³ An Jisas hemi tokstrong long man ya olsem, “Yu no stori abaotem diswan long eniwan. Bat yu mas go an letem prist fo lukluk long bodi blong yu fastaem. An bihaen, yu mas go an mekem sakrifaes olsem Mosis hemi bin talem, mekem olketa save dat yu gudbaek finis nao.” Nao semtaem nomoa, Jisas hemi sendem go man ya nao. ⁴⁵ Bat taem man ya hemi go nomoa, hemi stat fo talemaot nius ya long evri ples nao. So from diswan nao Jisas hemi no save wakabaot go insaet long eni vilij long ae blong olketa pipol. Hemi stap aotsaet nomoa long olketa ples wea no eniwan hemi stap long hem, bat olketa pipol ya olketa kakam from evri ples fo lukim hem nomoa.

¹ Nao bihaen samfala de moa, Jisas hemi kambaek moa long Kapaneam. Olketa pipol olketa herem nius wea Jisas hemi stap nao long haos blong hem. ² So plande long olketa kam hipap long haos ya, an nomata long aotsaet long doa ya hemi barava fulap fogud nao. An taem Jisas hemi gogohed fo talemaot toktok blong God long olketa pipol nomoa, ³ fofala man olketa karim kam wanfala man wea bodi blong hem hemi no save muv. ⁴ Bat bikos plande pipol tumas, hemi barava had fo olketa tekem man ya go long Jisas. So olketa karim man ya antap long haos nomoa, an olketa openem wanfala hol long ruf ya stret antap long ples wea Jisas hemi stanap long hem. Taem olketa mekem hol ya finis nomoa, olketa tekem man ya wetem bed blong hem an mekem hem godaon insaet long haos ya nao. ⁵ Taem Jisas hemi luksave long biliv blong olketa, hemi sei olsem long sikman ya, “Fren, mi fogivim nao olketa sin blong yu.” ⁶ Long taem ya, samfala long olketa tisa blong Lo, olketa stap long ples ya tu, an olketa tingting olsem long maen blong olketa seleva. ⁷ “!Maewat! ?Hao nao disfala man ya hemi tok olsem? !Hemi barava tokspoelem God ya! !God nomoa hemi save fogivim olketa sin!” ⁸ Long semtaem ya, Jisas hemi save finis wanem olketa tingim, so hemi sei olsem, “?Waswe nao yufala garem tingting olsem long maen blong yufala? ⁹ Hemi isi tumas fo sei long disfala sikman, ‘Mi fogivim nao olketa sin blong yu’. Bat hemi had tumas fo sei, ‘Yu stanap an tekem bed blong yu, an yu wakabaot go’. ¹⁰ Bat distaem bae mi barava somaot long yufala wea mi San Blong Man, mi garem paoa long disfala wol fo fogivim olketa sin.” Nao Jisas hemi sei long disfala sikman ya olsem, ¹¹ “!Mi talem long yu, yu stanap, tekem bed blong yu an yu gobaek long haos blong yu!” ¹² Long semtaem nomoa, man ya hemi stanap an tekem bed blong hem an hemi wakabaot go nao. Olketa pipol barava sapraes fogud taem olketa lukim diswan, an olketa mekhae long God, an olketa sei, “!Maewat, bifoa kam, yumi nating lukim enisamting olsem yet ya!” ¹³ Nao Jisas hemi gobaek moa long saet long leik long Galili. Taem ya nomoa, plande pipol nao olketa kam long Jisas an hemi gohed fo tisim olketa. ¹⁴ An taem hemi wakabaot go moa, hemi lukim wanfala man nem blong hem Livae, san blong Alfeas. Long taem ya, Livae hemi sidaon long ples wea olketa pipol save peim taks long hem ya. An Jisas hemi tok olsem long hem, “Yu kam falom mi.” So Livae hemi getap an falom Jisas nao. ¹⁵ Plande taem nao, olketa man fo tekem taks an olketa nara ravis pipol moa olketa save go wetem Jisas. Nao long taem ya, Jisas hemi go kaikai long haos blong Livae an plande long olketa ravis pipol nao olketa kam fo kaikai wetem Jisas an olketa disaepol blong hem. ¹⁶ Nao samfala tisa blong Lo wea olketa i Farasi tu, olketa lukim dat Jisas hemi kaikai wetem olketa ravis pipol ya. Taem ya nomoa, olketa tok olsem nao long olketa disaepol blong Jisas, “?Ei, waswe nao man ya hemi kaikai wetem olketa man fo tekem taks an olketa nara ravis pipol olsem ya?” ¹⁷ An taem Jisas hemi herem diswan, hemi tok olsem long olketa nao, “Yufala save, pipol hu i no sik olketa no wande lukim dokta. Bat pipol hu i sik nao olketa wande fo lukim dokta. So mi no kam fo kolem olketa stretfala pipol, bat mi kam fo kolem olketa pipol wea olketa garem sin.” ¹⁸ Long wanfala taem, olketa disaepol blong Jon Baptaes an olketa Farasi, olketa stop fo no kaikai. Nao samfala pipol olketa kam askem Jisas olsem, “Olketa disaepol blong Jon Baptaes an olketa disaepol blong olketa Farasi, olketa stop fo no kaikai ya. ?Bat waswe nao olketa disaepol blong yu olketa nating duim diswan?” ¹⁹ An Jisas hemi ansarem olketa olsem, “?Waswe, hemi oraet nomoa fo olketa pipol wea olketa stap long fist blong marit fo stop fo no kaikai? !Nomoa ya! Taem man hu hemi marit hemi stap wetem olketa fren blong hem, hemi no fitim fo olketa stop fo no kaikai. ²⁰ Bat bae hemi kasem taem wea olketa tekem hem go from olketa. An long taem ya nao, bae olketa save stop fo no kaikai. ²¹ “Hemi no fitim fo yumi tekem niufala pis kaleko fo somap long wanfala olfala kaleko wea hemi garem hol long hem finis. Sapos yumi duim olsem, taem yumi wasim, bae niufala pis kaleko ya save brekem moa nara pis long olfala kaleko ya. An hol ya bae hemi bikfala moa winim bifoa. ²² “An narasamting moa, yumi no save fulumapem niufala waen insaet long olketa olfala skin blong nanigot fo kipim waen long hem. Bikos taem niufala waen ya hemi go saoa, hemi save mekem olketa olfala skin ya fo suelap an bae olketa brek, an waen wetem skin ya bae tufala evriwan nogud nao. So yumi mas fulumapem niufala waen insaet long olketa niufala skin.” ²³ Long wanfala Sabat de, Jisas hemi wakabaot long samfala gaden blong wit, an semtaem ya, olketa disaepol blong hem olketa gohed nao fo tekem samfala wit. ²⁴ So taem olketa Farasi olketa lukim nomoa, olketa tok olsem long Jisas nao, “!Ei, yu lukim! ?Waswe nao olketa duim waka long Sabat de wea hemi tambu long Lo?” ²⁵ Nao Jisas hemi tok olsem long olketa, “?Waswe, yufala no ridim nomoa samting King Deved hemi duim taem Abaeata hemi Haeprist yet ya? Long taem ya, Deved an olketa man blong hem olketa hanggre an olketa sot long kaikai. An Deved hemi go insaet long haos blong God an hemi kaikaim tambu bred ya nao, an hemi givim tu long olketa man blong hem. Bat falom tising blong Lo ya, olketa prist nomoa save kaikaim diskaen bred.” ²⁷ An Jisas hemi talem long olketa olsem moa, “Sabat ya, God hemi mekem fo helpem pipol nomoa, bat hemi no mekem Sabat fo bos ovarem olketa. ²⁸ So mi San Blong Man nao mi Masta blong Sabat.”

¹ Narataem moa Jisas hemi go insaet long preahaos. An wanfala man hemi stap wea han blong hem hemi dae finis. ² Nao olketa laekem tumas fo ripotem Jisas so olketa barava lukluk falom hem nao fo faendemaot sapos hemi mekem man ya fo gudbaek moa long Sabat de. ³ Nao taem ya nomoa, Jisas hemi talem olsem long man wea han blong hem hemi dae finis, “Yu kam long hia an stanap long frant.” ⁴ An Jisas hemi askem olketa pipol olsem moa, “?Waswe, wanem nao Lo blong yumi hemi letem yumi fo duim long Sabat de? ?Hemi letem yumi fo helpem man o fo spoelem hem? ?Fo mekem man fo laef o fo letem hem dae?” Bat olketa nating talem enisamting nao. ⁵ An Jisas hemi lukstrong long olketa, an hemi kros tumas long olketa bikos olketa barava bikhed tumas. Bat semtaem tu hemi sore tumas long olketa. An hemi talem olsem long man ya, “Yu stretem han blong yu.” Taem man ya hemi stretem han blong hem nomoa, han blong hem hemi barava gudbaek nao. ⁶ Taem ya nomoa, olketa Farasi ya olketa lusim preahaos ya an joen wetem seksin blong King Herod. An olketa gohed fo toktok abaotem wei wea olketa save kilim Jisas dae. ⁷ Nao Jisas wetem olketa disaepol blong hem olketa goawe from taon an go moa long leik long Galili. An plande pipol nao olketa go-go wetem hem. Olketa pipol ya olketa kam from Galili, an Jiudia, ⁸ an Jerusalem, an olketa ples kolsap long Idumia, an olketa ples long narasaet long riva long Jodan, an olketa ples raonem tufala taon long Taea an Saedon. Evri pipol ya olketa kam long Jisas, bikos olketa herem finis nius abaotem olketa samting wea hemi duim kam. ⁹ An bikos olketa pipol ya barava plande tumas, Jisas hemi talem olketa disaepol blong hem fo mekredi long wanfala bot fo hem, mekem olketa pipol no save pus strong fo kam long hem. ¹⁰ Hemi bin mekem plande sik pipol fo gudbaek moa, an dastawe nao samfala sikman moa olketa go-gohed fo pusum olketa seleva fo go long hem, mekem olketa save tasim hem. ¹¹ An olketa pipol wea olketa ravis devol i stap long olketa ya, taem olketa kam lukim Jisas, olketa nildaon long frant blong hem an olketa singaot olsem, “!Yu nao barava San Blong God ya!” ¹² Bat Jisas hemi tokstrong long olketa devol ya, an stopem olketa fo no talemaot watkaen man nao Jisas. ¹³ Nao Jisas hemi go antap long wanfala hil, an hemi kolem olketa man hu hemi laekem olketa. An taem olketa kam long hem, ¹⁴ hemi siusim tuelfala man ya hu hemi kolem olketa long aposol nao. An Jisas hemi talem olketa olsem, “Mi siusim yufala fo kam falom mi ya. An bae mi sendem yufala fo goaot an talemaot toktok blong God, ¹⁵ an bae yufala garem paoa tu fo raosim olketa devol.” ¹⁶ Hem ya nao nem blong tuelfala man wea hemi siusim olketa, Saemon wea Jisas hemi givim nara nem long hem Pita, ¹⁷ an Jemes an Jon tufala san blong Sebedi, wea Jisas hemi givim tufala disfala nem Boanejis wea hemi minim man hu i save kros kuiktaem, ¹⁸ an Andru, an Filip, an Batolomiu, an Matiu, an Tomas, an Jemes san blong Alfeas, an Tadeas, an Saemon wea hemi memba long seksin wea olketa wande fo raosim gavman blong Rom, ¹⁹ an Jiudas Iskariot, hu long bihaen ya, hemi givim Jisas long han blong olketa enemi blong hem. ²⁰ Nao, Jisas hemi kambaek moa long haos blong hem. An taem ya, plande pipol tumas nao olketa kam moa raonem hem. An Jisas wetem olketa disaepol blong hem olketa no garem taem fo kaikai. ²¹ So taem olketa famili blong Jisas olketa herem disfala nius ya nomoa, olketa go fo tekem hem nao, bikos samfala pipol olketa talem olsem, “Hemi barava krangge tru nao.” ²² Nao samfala tisa blong Lo wea olketa stap kam long Jerusalem, olketa talem olsem, “Yufala save, Bielsebul nao hemi stap long man ya. Bielsebul, hu hemi disfala bos blong olketa devol ya, hem nao hemi givim paoa long man ya, mekem hemi save raosim olketa devol.” ²³ So Jisas hemi kolem olketa pipol fo kam kolsap long hem an hemi tisim olketa long olketa tokpiksa, wea hemi sei, “?Waswe, yufala tingse Seitan save raosim Seitan tu? ²⁴ Sapos olketa pipol long wanfala kantri olketa faetem olketa seleva, bae kantri ya hemi no save stanap strong nao. ²⁵ An sapos wanfala famili olketa faetem olketa seleva, bae famili ya no save stapgud moa. ²⁶ An hemi olsem tu, sapos olketa long gavman blong Seitan olketa faetem olketa seleva, oraet, bae gavman ya hemi no save stap strong, an bae hemi foldaon finis nomoa. ²⁷ “Bat hemi olsem tu, no eni man save go insaet long haos blong wanfala strongfala man an stilim olketa gudfala samting blong hem. Hemi mas taemapem strongfala man ya fastaem, an bihaen nao hemi save go insaet long haos fo stilim olketa gudfala samting blong hem. ²⁸ “Mi talem yufala tru samting nao, God hemi save fogivim nomoa evri sin wea man hemi mekem an enikaen toktok nogud wea hemi talem. ²⁹ Bat sapos eniwan hemi tokspoelem waka blong Holi Spirit, bae God hemi nating save fogivim hem nao, bikos sin ya bae hemi stap long hem olowe go-go hemi no save finis.” ³⁰ Jisas hemi tok olsem, bikos samfala pipol olketa sei, “Wanfala ravis devol nao hemi stap long hem.” ³¹ Long taem ya nomoa, mami wetem olketa brata blong Jisas olketa kam kasem ples ya nao. Olketa stanap aotsaet long haos ya, an olketa sendem go nius nomoa fo askem hem fo kam aotsaet. ³² An taem ya plande pipol nao olketa sidaon raonem Jisas, so olketa talem hem olsem, “Ei man, mami an olketa brata an olketa sista blong yu nao olketa stap aotsaet ya, an olketa wande fo lukim yu tumas.” ³³ Bat Jisas hemi tok olsem fo olketa, “?Hu nao mami blong mi an hu nao olketa brata blong mi?” ³⁴ Nao Jisas hemi luklukraon long olketa pipol wea olketa sidaon raonem hem, an hemi sei olsem, “!Yufala lukim! !Hem ya nao mami blong mi an olketa brata blong mi! ³⁵ Eniwan hu hemi duim wanem God hemi laekem hem fo duim, hem nao hemi brata blong mi an sista blong mi an mami blong mi.”

¹ Jisas hemi gohed moa fo tisim olketa pipol long saet long leik long Galili. An taem ya plande pipol nao olketa kam hipap raonem hem, so hemi go insaet long wanfala bot wea hemi stap insaet long leik ya nomoa, an hemi sidaon insaet long hem nao. An olketa pipol ya olketa stanap go nomoa long soa. ² An Jisas hemi gohed nao fo tisim olketa long plande samting long olketa tokpiksa. Hemi talem olketa olsem, ³ “Yufala lisin gudfala fastaem. Wanfala man hemi go fo plantem olketa sid blong wit long gaden blong hem. ⁴ Taem hemi torowem olketa sid ya, samfala sid olketa foldaon long rod, an olketa bed kam an kaikaim evriwan. ⁵ An samfala long olketa sid ya olketa foldaon long ples wea graon hemi smolfala tumas, bikos hemi stap antap long bikfala ston nomoa. An olketa stat fo grou kuiktaem bikos graon ya hemi no dip nomoa. ⁶ Bat taem san hemi hot tumas, olketa dae nao bikos rut blong olketa i no godaon tumas. ⁷ Samfala moa long olketa sid ya, olketa foldaon long ples wea rut blong nilagras hemi stap long hem. An nilagras ya hemi grou bikfala antap long olketa wit ya nomoa, an hemi stopem olketa wit fo no grou, mekem olketa nating garem eni frut long olketa. ⁸ Bat samfala sid olketa foldaon long gudfala graon nao, so olketa grou gudfala an garem frut long olketa. Samfala wit olketa garem teti frut an samfala garem siksti frut an samfala moa garem wan handred frut.” ⁹ Nao Jisas hemi sei, “Eniwan hu hemi garem ia, hemi mas heremgud toktok ya nao.” ¹⁰ Taem Jisas hemi stap seleva, samfala pipol hu i bin herem toktok blong hem finis, olketa kam long hem wetem tuelfala disaepol blong hem. Olketa kam fo askem hem abaotem mining blong olketa tokpiksa ya. ¹¹ Nao Jisas hemi talem olketa olsem, “God hemi bin givim yufala save finis fo luksave long olketa samting wea hemi staphaed insaet long kingdom blong God. Bat olketa nara pipol olketa mas herem olketa samting ya long tokpiksa nomoa. ¹² Long diskaen wei nao, ‘Nomata olketa lukluk, bae olketa nating luksave nomoa long enisamting. an nomata olketa lisin, bae olketa nating heresave nomoa long enisamting. From diswan nao olketa no save lusim ravis wei blong olketa, an dastawe God hemi no save fogivim olketa tu.’” ¹³ An Jisas hemi askem olketa olsem, “?Waswe, yufala no heremsave yet mining blong disfala tokpiksa ya? ?So hao nao bae yufala heremsave olketa nara tokpiksa moa? ¹⁴ Disfala man hu hemi plantem sid ya, hemi plantem toktok blong God. ¹⁵ Olketa sid wea olketa foldaon long rod ya, hemi olsem taem olketa pipol olketa herem toktok ya, an semtaem nomoa Seitan hemi kam an tekemaot toktok ya from maen blong olketa nomoa. ¹⁶ An olketa sid wea olketa foldaon long graon wea hemi stap antap long bikfala ston, hemi olsem taem olketa pipol olketa herem toktok ya an olketa kuiktaem nomoa fo tekem an hapi wetem. ¹⁷ Bat hemi no go dip nomoa insaet long maen blong olketa, so hemi no save stap longtaem nomoa. Taem hadtaem hemi kasem olketa, an taem olketa pipol meksave long olketa from toktok ya, olketa kuiktaem tu fo lusim go evrisamting nao. ¹⁸ An olketa sid wea olketa foldaon long ples wea rut blong nilagras hemi stap long hem, hemi olsem taem samfala pipol olketa herem toktok ya, ¹⁹ bat olketa wari tumas abaotem enikaen samting. An olketa lavem tumas tu olketa risis blong disfala wol, an olketa kavetem enikaen narasamting moa. So toktok ya hemi no save grou an hemi no garem eni frut long hem. ²⁰ Bat olketa sid wea olketa foldaon long gudfala graon, hemi olsem taem olketa pipol olketa herem toktok blong God ya, an olketa barava biliv long hem nao. An olketa garem frut olsem olketa wit wea samfala long olketa garem teti frut an samfala garem siksti frut an samfala moa garem wan handred frut long olketa.” ²¹ Nao Jisas hemi gohed fo talem olketa olsem moa, “?Waswe, eniwan hemi save laetem kam lam an putum andanit long dis o putum andanit long bed? !Nomoa ya! Hemi mas putum antap long ples blong hem nao. ²² So nomata enisamting wea hemi staphaed, bae hemi save kamaot long klia ples nomoa. An nomata enisamting wea no eniwan save lukim, bae evriwan save luksave long hem nomoa. ²³ An eniwan hu hemi garem ia, hemi mas heremgud toktok ya nao.” ²⁴ An Jisas hemi talem olketa olsem moa, “Yufala mas tingting gud abaotem disfala toktok wea yufala herem. Olketa lo wea yufala yusim fo jajem nara man ya, bae God hemi yusim olketa tu fo jajem yufala long hem, bat bae God hemi barava strik tumas moa. ²⁵ An eniwan hu hemi garem disfala save finis, bae God hemi givim hem plande moa. Bat eniwan hu hemi no garem disfala save ya, nomata lelebet save dat hemi garem, God bae hemi tekemaot from hem nomoa.” ²⁶ An Jisas hemi gohed moa fo tok olsem, “Kingdom blong God, hemi olsem wanfala man wea hemi plantem olketa sid long gaden blong hem. ²⁷ Long naet, man ya hemi slip, an long moning hemi wekap an evritaem nomoa hemi olsem, bat olketa sid ya stat fo kamap an grou nao. An man ya hemi nating save nomoa hao nao olketa sid ya olketa save grou olsem. ²⁸ Bat samting ya, graon seleva nao hemi mekem olketa sid ya fo grou an garem frut. Fas samting fo kamap nao lif blong hem, an bihaen moa flaoa blong hem, an las samting nao frut blong hem. ²⁹ An taem frut blong hem hemi redi nomoa, man ya hemi stat nao fo aotem wetem naef blong hem bikos hemi kasem taem blong hem nao.” ³⁰ An Jisas hemi askem olketa olsem moa, “?Kingdom blong God, hemi olsem wanem long tingting blong yufala? ?Watkaen tokpiksa nao yumi yusim fo somaot klia? ³¹ Hemi olsem wanfala sid blong mastad tri wea wanfala man hemi plantem insaet long gaden blong hem. Disfala sid hemi smolfala nomoa long olketa nara sid long disfala wol. ³² Bat taem hemi grouap kam nomoa, hemi kamap bikfala winim olketa narasamting insaet long gaden. Disfala mastad tri ya hemi garem olketa bikfala brans an olketa bed save kam an mekem haos blong olketa insaet long hem.” ³³ Jisas hemi talemaot toktok blong God long plande tokpiksa olsem long olketa pipol. Hemi tisim olketa, falom haomas nao olketa save heresave long tising blong hem. ³⁴ Hemi nating talem enisamting long olketa pipol ya wea hemi no save yusim tokpiksa long hem. Bat taem hemi stap seleva wetem olketa disaepol blong hem nomoa, hemi jes talemaot gud nao olketa mining blong olketa samting ya. ³⁵ Long sem de ya nomoa, bifoa san hemi godaon, Jisas hemi talem long olketa disaepol blong hem olsem, “Yumi krosim leik ya go long narasaet.” ³⁶ So olketa disaepol blong hem olketa lusim olketa pipol ya nao. An olketa go insaet long bot wea Jisas hemi sidaon finis long hem, an olketa go wetem hem. Samfala bot moa olketa gogo wetem olketa tu. ³⁷ Bihaen nomoa, bikfala win hemi kamap strong fogud nao. An olketa wev tu barava go-gohed fo kam insaet long bot blong olketa, go-go hemi kolsap singdaon nao. ³⁸ Bat Jisas hemi barava slip bihaen long bot nomoa wetem pilo andanit long hed blong hem. An olketa disaepol blong hem olketa wekapem hem an olketa sei, “!Ei, Tisa! ?Waswe nao yu no wari nomoa? !Yumi kolsap dae nao!” ³⁹ Nao taem ya nomoa, Jisas hemi stanap an tokstrong long win ya olsem, “!Yu mas stop nao!” An hemi sei moa long olketa wev ya, “!Yufala mas kuaet nao!” An taem ya nomoa, win ya hemi stop an wata ya barava kuaet fogud nao. ⁴⁰ Nao Jisas hemi sei long olketa disaepol blong hem, “?Waswe nao yufala fraet tumas olsem? ?Yufala no biliv yet?” ⁴¹ Bat nomata olsem, olketa barava fraet fogud an olketa gohed fo toktok olsem tugeta long olketa seleva, “?Watkaen man nao ya? !Nomata win an olketa wev ya, olketa save obeim toktok blong hem nomoa!”

¹ Nao Jisas an olketa disaepol blong hem olketa kasem long narasaet long leik long Galili, insaet long eria long Gerasa. ² Taem Jisas hemi go long soa nomoa, wanfala man nao hemi kakam fo mitim hem. Man ya hemi kamaot long olketa kev wea olketa putum bodi blong man dae long hem. Disfala man ya wanfala ravis devol hemi stap long hem ya, ³ an man ya hemi stap olowe nomoa long olketa kev ya. An bikos hemi strong tumas olsem, nomata eniwan hemi putum sen long hem, hemi no save holem hem nomoa ya. ⁴ Plande taem nao olketa traehad fo taemapem lek an han blong hem long sen. Bat evritaem nomoa, hemi brekem olketa sen wetem olketa aean long lek blong hem. No eni man hemi strong fitim hem nao, mekem hemi save stap kuaet. ⁵ De an naet, man ya hemi gogoraon olobaot long olketa kev ya an olketa hil ya tu, wea hemi gogohed fo singaot an katem bodi blong hem seleva wetem ston. ⁶ Taem Jisas hemi farawe yet, man ya hemi lukim hem nao. So hemi resis go long Jisas, an hemi nildaon long frant blong hem. ⁷ An Jisas hemi sei olsem, “!Yu ravis devol, yu kamaot from man ya!” So man ya hemi singaot bikfala olsem, “!Ei, Jisas, San Blong God Antap ya! ?Bae yu waswe long mi nao ya? !Long nem blong God mi askem strong long yu, plis yu no spoelem mi!” ⁹ Nao Jisas hemi askem hem moa, “?Hu nao nem blong yu?” Man ya hemi tok olsem, “Nem blong mi nao Bikfala Seksin, bikos mifala barava plande tumas ya.” ¹⁰ An hemi gohed fo askem strong long Jisas fo no raosim olketa devol ya from ples ya. ¹¹ Nao taem ya tu, plande pikpik nao olketa gohed fo kaikai long wanfala hil wea hemi kolsap nomoa long ples ya. ¹² So olketa devol ya olketa krae long Jisas olsem moa, “Plis, yu sendem mifala go long olketa pikpik ya, mekem mifala save go insaet long olketa.” ¹³ Jisas hemi letem olketa go nomoa, an semtaem olketa ravis devol ya olketa goaot from man ya nao, an olketa go insaet long olketa pikpik ya. An evri pikpik ya olketa resis godaon long saet hil wea hemi had tumas fo godaon long hem, an olketa foldaon insaet long leik ya nao. So kolsap 2,000 pikpik nao olketa dae evriwan insaet long leik ya. ¹⁴ Long taem ya nomoa, olketa man hu i lukaftarem olketa pikpik ya, olketa resis go long taon ya an olketa nara ples raonabaot fo talem nius ya nao. So olketa pipol kam fo lukim nao wanem hemi bin hapen. ¹⁵ Taem olketa kasem Jisas nomoa, olketa lukim tu disfala man wea bikfala seksin long olketa devol bin stap long hem bifoa. Bat distaem tingting blong hem hemi gud nao, an hemi werem tu kaleko, an hemi gohed fo sidaon kuaet nomoa. So olketa pipol ya barava fraet fogud nao. ¹⁶ An olketa man wea olketa bin lukim olketa samting ya fastaem, olketa storim nao long olketa pipol abaotem wanem hemi hapen long man wea olketa devol bin stap long hem bifoa. An olketa stori tu abaotem wanem hemi hapen long olketa pikpik ya. ¹⁷ Long taem ya nomoa, olketa pipol olketa kam long Jisas an krae long hem nao fo hemi goaot from ples blong olketa. ¹⁸ Taem Jisas hemi go insaet long bot nomoa, man hu hemi garem olketa devol long hem bifoa ya, hemi kam an askem Jisas olsem nao, “?Man, yu letem mi fo go wetem yu?” ¹⁹ Bat Jisas hemi no letem hem, an hemi talem hem olsem, “Yu mas gobaek long hom blong yu fo lukim olketa pipol blong yu. An yu mas go an talem olketa wanem nao God hemi bin duim fo yu finis, wea hemi duim gudfala samting tumas long yu.” ²⁰ So disfala man ya hemi go nao, an hemi goraon evriwea long eria long Dekapolis an talem evriwan wanem nao Jisas hemi duim long hem finis. An taem olketa pipol olketa herem olketa samting ya nomoa, olketa barava sapraes tumas nao. ²¹ Jisas an olketa disaepol blong hem olketa katkros gobaek moa long narasaet long leik ya. Nao taem Jisas hemi go long soa, plande pipol nao olketa kam hipap raonem hem. ²² An wanfala man nao hemi kam fo lukim Jisas, wea nem blong hem Jaeras hu hemi wanfala lida blong preahaos long ples ya. Hemi kam an nildaon long frant blong Jisas, ²³ an hemi krae long hem olsem, “!Ei masta, smolfala gele blong mi hemi kolsap dae nao ya! !Plis yu kam an putum han blong yu long hem, mekem hemi save laef an gudbaek moa!” ²⁴ Long taem ya nomoa, Jisas hemi go wetem man ya nao. An plande pipol tu olketa go-go falom Jisas, wea olketa trae fo pus strong long evri saet fo kam long hem. ²⁵ An wanfala woman tu hemi stap hu hemi bin sik long blad fo tuelfala yia nao. ²⁶ Oltaem nomoa hemi safa tumas taem olketa dokta trae fo mekem sik ya fo finis from hem. Nomata hemi lusim evri seleni blong hem, sik ya hemi nating finis nomoa, bat hemi jes go-gohed fo bikfala go moa. ²⁷ Woman ya hemi herem nius abaotem Jisas so hemi wakabaot kam bihaen long hem long midol long olketa pipol ya, an hemi tasim go kaleko blong hem. ²⁸ Hemi tingse, sapos hemi tasim nomoa kaleko blong Jisas bae hemi save gudbaek moa. ²⁹ An semtaem nomoa, blad ya hemi stop, an woman ya hemi save dat sik blong hem ya hemi barava finis from hem nao. ³⁰ An semtaem tu, Jisas hemi save dat paoa blong hem hemi bin mekem samwan fo gudbaek moa. So hemi taneraon long midol long olketa pipol ya an askem olketa olsem, “?Hu nao tasim kaleko blong mi?” ³¹ Nao olketa disaepol blong hem olketa ansarem hem olsem, “Maewat, yu lukim dat plande pipol nao olketa pus olobaot kam raonem yu, so waswe nao yu sei, ‘?Hu nao tasim mi?’” ³² Bat Jisas hemi gohed fo luklukraon fo faendemaot hu nao hemi tasim hem. ³³ An woman ya hemi save finis long wanem hemi hapen long hem, so hemi kam long Jisas nao, bat hemi barava fraet an seksek fogud tu. Hemi kam an nildaon long frant blong Jisas, an hemi talemaot stret long hem wanem nao hemi hapen long hem. ³⁴ An Jisas hemi talem hem olsem, “Woman, biliv blong yu hemi mekem yu fo gudbaek moa. Yu go an yu no wari moa, bikos sik blong yu hemi finis from yu nao.” ³⁵ Nao taem Jisas hemi no finisim toktok blong hem yet, samfala man wea olketa stap kam long haos blong Jaeras, olketa kam kasem olketa an talem Jaeras olsem, “!Ei, gele blong yu hemi dae finis nao! Yu no mekem Tisa fo hadwaka moa.” ³⁶ Bat Jisas hemi no wande fo lisin long wanem olketa ya talem, so hemi sei long Jaeras olsem, “Yu no wari tumas, bat yu gohed fo biliv nomoa.” ³⁷ Nao Jisas hemi stopem evriwan fo no kam wetem hem, bat Pita an Jemes an brata blong hem Jon nomoa olketa go wetem hem. ³⁸ An taem olketa kasem haos blong Jaeras, Jisas hemi lukim dat plande pipol nao olketa mekem tumas noes an olketa krae tumas an singaot bikfala tu. ³⁹ So Jisas hemi go insaet long haos an talem long olketa olsem, “?Fo wanem nao yufala gohed fo mekem tumas noes, an krae olsem? !Gele ya hemi no dae, hemi slip nomoa!” ⁴⁰ Nao olketa pipol ya jes laf nomoa long hem. So Jisas hemi raosim olketa pipol ya fo goaot from haos ya. An bihaen, hemi go wetem mami an dadi blong gele ya an trifala disaepol blong hem, an olketa go insaet long rum wea gele ya hemi stap long hem. ⁴¹ An Jisas hemi holem han blong gele ya an talem long hem olsem, “Talita kum.” Mining blong toktok ya hemi olsem, “Smolfala gele, mi talem yu fo getap nao.” ⁴² Nao semtaem nomoa, disfala gele wea hemi kasem tuelfala yia finis ya, hemi stanap an stat fo wakabaot go nao. An taem olketa lukim diswan ya, olketa barava sapraes fogud nao. ⁴³ Bat Jisas hemi tokstrong long olketa olsem, “!Yufala no stori abaotem diswan long eniwan moa!” An bihaen hemi sei moa, “Yufala givim samfala kaikai long hem.”

¹ Nao, Jisas hemi lusim ples ya an gobaek moa long barava hom blong hem. An olketa disaepol blong hem nao olketa gogo wetem hem. ² Nao long Sabat de nomoa, hemi gohed nao fo tisim olketa pipol insaet long preahaos. An plande pipol nao olketa hipap, an taem olketa herem tising blong hem nomoa, olketa barava sapraes fogud nao an olketa sei, “?Maewat, hao nao disfala man hemi save long olketa samting ya? ?An hao nao hemi kamap waes tumas olsem ya? ?An hao nao hemi garem paoa fo mekem olketa mirakol ya? ³ Yumi save dat man ya hemi disfala kapenta hu hemi bon long Meri nomoa ya. An olketa brata blong hem nao Jemes an Josef an Jiudas an Saemon. An olketa sista blong hem tu olketa stap nomoa long hia.” So olketa barava lukdaonem hem nomoa. ⁴ Bat Jisas hemi sei long olketa, “Eniwan hu hemi profet, evriwan save tinghae long hem. Bat olketa pipol long hom blong hem, an olketa long laen blong hem, an olketa long haos blong hem nao, olketa nomoa i nating save tinghae long hem.” ⁵ So Jisas hemi no save mekem eni mirakol long ples ya, bat samfala sik pipol nomoa hemi putum han blong hem antap long olketa, an mekem olketa fo gudbaek moa. ⁶ Jisas hemi barava sapraes tumas, bikos olketa pipol long ples blong hem olketa nating biliv long hem. Bihaen, Jisas hemi goraon moa long olketa vilij fo tisim olketa pipol. ⁷ Nao Jisas hemi kolem tuelfala disaepol blong hem, an hemi sei long olketa olsem, “Mi sendem yufala, olsem tufala man fo wanfala ples, an tufala moa fo nara ples. An mi givim paoa long yufala tu fo raosim olketa ravis devol.” ⁸ An Jisas hemi tokstrong long olketa olsem moa, “Taem yufala goaot long gogo blong yufala, yufala mas no tekem enisamting olsem bred o basket o seleni wetem yufala. Bat yufala save tekem nomoa wokingstik ⁹ an sandol an wanfala kaleko nomoa.” ¹⁰ An hemi talem olsem long olketa moa, “Long eni haos yufala kasem, yufala mas stap long hem nomoa, go-go kasem taem yufala goaot from ples ya moa. ¹¹ An sapos yufala kasem wanfala ples wea olketa pipol no laekem yufala fo stap wetem olketa, an olketa no wande fo herem toktok blong yufala, oraet, yufala mas go from ples ya nomoa. An taem yufala goaot, yufala mas sekemaot graon from lek blong yufala. Diswan ya hemi olsem saen fo wonem olketa.” ¹² So olketa disaepol olketa goaot an talemaot toktok blong God nao long olketa pipol an olketa sei, “Yufala evriwan mas lusim ravis wei blong yufala nao.” ¹³ An olketa gohed moa fo raosim plande devol, an olketa putum oel long plande sikman tu an mekem olketa fo gudbaek moa. ¹⁴ Long taem ya, King Herod Antipas hemi herem plande nius nao abaotem Jisas, bikos evriwea nao nius abaotem hem hemi go kasem. Nao samfala pipol olketa sei olsem, “Ating disfala man ya hemi Jon Baptaes ya hu hemi laefbaek moa. Dastawe nao hemi garem paoa fo mekem olketa mirakol ya.” ¹⁵ Bat samfala pipol moa olketa sei, “Ating man ya hemi Elaeja moa ya.” Samfala moa olketa sei, “Ating man ya hemi wanfala long olketa profet blong bifoa kam ya.” ¹⁶ Taem Herod hemi herem olketa nius ya hemi tok olsem, “!Jon, disfala man wea mi katem nek blong hem finis, hemi laefbaek moa nao!” ¹⁷ Long bifoa ya, Herod nao hemi bin talem olketa fo go an kasholem Jon an putum sen long hem insaet long prisin. Herod hemi bin duim diswan bikos long saet blong Herodias, waef blong brata blong hem Filip. Bikos Herod nao hemi maritim Herodias ya, ¹⁸ an Jon nao hemi bin tok long Herod olsem, “Hemi tambu long Lo fo yu stap wetem waef blong brata blong yu ya.” ¹⁹ From diswan nao Herodias hemi barava kros tumas an hemi laekem tumas fo kilim Jon dae. Bat hemi no save duim, ²⁰ bikos Herod hemi fraetem Jon from hemi save dat hemi wanfala gud an stretfala man, so Herod hemi lukaftarem Jon gudfala. An evritaem nomoa, Herod hemi laek fo herem toktok blong Jon, nomata olketa toktok ya save mekem Herod fo wari tumas. ²¹ Nao wanfala taem, Herod hemi mekem bikfala fist fo makem de wea hemi bon long hem. Hemi talem evri bikman long gavman blong hem an evri Kapten long ami an evri sif blong Galili fo kam long fist ya. An long taem ya nao, Herodias hemi faendem wei fo kilim Jon dae. ²² Gele blong Herodias hemi kam insaet long fist ya an hemi gohed nao fo dans, mekem olketa lukluk long hem. An Herod an olketa fren blong hem, olketa barava hapi tumas wetem nao. So Herod hemi askem gele ya olsem, “?Waswe, watkaen samting nao yu laekem? Mi bae mi givim long yu enisamting yu laekem nomoa ya.” ²³ An hemi mekem wanfala strongfala promis nao fo gele ya an hemi sei, “Mi bae mi givim yu enisamting nomoa wea yu askem long mi, nomata barava haf long evrisamting wea mi rul ovarem.” ²⁴ Taem ya, gele ya hemi go aotsaet an hemi askem mami blong hem olsem, “?Watkaen samting nao bae mi askem?” Nao mami blong hem hemi talem olsem, “Mi laekem yu fo askem hed blong Jon Baptaes.” ²⁵ Semtaem nomoa, gele ya hemi resis gobaek nao long King an talem long hem olsem, “!Mi laekem yu fo givim kam hed blong Jon Baptaes long wanfala plet fo mi distaem nao!” ²⁶ King ya hemi barava sore tumas nao. Bat bikos hemi mekem promis finis an olketa fren blong hem olketa bin herem, hemi no save go agensim wanem gele hemi laekem ya. ²⁷ So semtaem nomoa, hemi sendem go wanfala soldia fo tekem kam hed blong Jon Baptaes. Nao soldia ya hemi go insaet long prisin nomoa, an katem nek blong Jon nao. ²⁸ Bihaen moa, hemi putum hed blong Jon long wanfala plet an givim go long gele ya. An gele ya hemi go an givim long mami blong hem. ²⁹ Nao taem olketa disaepol blong Jon olketa herem wanem hemi hapen finis, olketa kam an tekem bodi blong hem, an olketa go fo berem hem nao. ³⁰ Taem olketa aposol blong Jisas olketa kambaek moa long hem, olketa gohed nao fo stori abaotem evrisamting wea olketa bin duim an evrisamting wea olketa bin tisim long olketa pipol. ³¹ Bat plande pipol tumas nao olketa kakam long Jisas, an olketa go moa. So Jisas an olketa disaepol blong hem olketa nating garem enitaem fo kaikai nao. An Jisas hemi talem olsem long olketa disaepol blong hem, “Ating yumi go long wanfala ples wea hemi kuaet, mekem yumi save stap seleva an yumi save res lelebet.” ³² So olketa go seleva insaet long wanfala bot an olketa go nao long wanfala ples wea no eniwan stap long hem. ³³ Bat nomata olsem, plande pipol nao olketa lukim olketa taem olketa go, an olketa luksave long olketa. So olketa pipol ya lusim olketa taon blong olketa nomoa an olketa resis go nao. An olketa nao kasem ples ya fastaem long Jisas wetem olketa disaepol blong hem. ³⁴ Taem Jisas hemi go long soa nomoa, hemi lukim plande pipol tumas nao, so hemi sore tumas long olketa bikos olketa olsem olketa sipsip wea no eni man hemi lukaftarem olketa. So hemi gohed fo tisim olketa long plande samting nao. ³⁵ Taem hemi kolsap fo tudak nomoa, olketa disaepol blong hem olketa kam long hem, an olketa sei, “Hemi leit tumas nao an disfala ples ya hemi no garem eni haos long hem ya. ³⁶ ?Waswe nao yu no sendem olketa pipol ya fo go long olketa ples an olketa vilij raonabaot, mekem olketa save baem kaikai fo olketa seleva?” ³⁷ Bat Jisas hemi sei, “Yufala nao mas givim kaikai long olketa.” Nao olketa tok olsem, “?Maewat, hao nao yumi save givim kaikai long olketa? Nomata 200 seleni hemi no fitim fo mekem yumi save baem bred fo evriwan.” ³⁸ An Jisas hemi askem olketa moa, “Yufala go an faendemaot haomas bred nao yufala garem.” Taem olketa faendemaot nomoa, olketa talem hem olsem nao, “Mifala garem nomoa faefala bred an tufala fis ya.” ³⁹ Nao Jisas hemi talem olketa disaepol blong hem fo mekem olketa pipol ya fo divaed long olketa seksin an sidaon nomoa long gras ya. ⁴⁰ So olketa pipol ya olketa sidaon long olketa seksin nao, an samfala seksin olketa garem 100 pipol, an samfala moa olketa garem fifti pipol long hem. ⁴¹ An Jisas hemi holem faefala bred ya wetem tufala fis ya, an hemi luk goap long heven an hemi talem tengkiu long God. An bihaen, hemi brekem olketa bred ya an hemi givim go nao long olketa disaepol, mekem olketa searemaot long olketa pipol ya. An hemi searemaot tu tufala fis ya fo olketa pipol ya. ⁴² Evriwan olketa kaikai an olketa fulap fogud nao. ⁴³ An olketa fulumapem tuelfala basket nao long olketa pis bred an fis wea olketa no finisim. ⁴⁴ An 5, man nao olketa kaikai long taem ya. ⁴⁵ Semtaem nomoa, Jisas hemi talem long olketa disaepol blong hem fo olketa mas go insaet long bot an go fastaem long hem long narasaet long leik ya long taon long Betsaeda. Bat hem seleva hemi stap go bihaen fo sendem olketa pipol ya fo gobaek long hom blong olketa. ⁴⁶ Taem hemi sendem olketa pipol ya fo gobaek nomoa, hemi goap long wanfala hil fo prea nao. ⁴⁷ An taem ya, hemi stat fo tudak nao an disfala bot ya hemi long midol long leik ya, bat Jisas hemi stap seleva nomoa antap long hil ya. ⁴⁸ Nao taem hemi kolsap kasem delaet nomoa, Jisas hemi lukim dat olketa disaepol blong hem olketa barava hadwaka tumas nao fo padolem bot ya agensim win. So Jisas hemi kam long olketa, wea hemi wakabaot kam nomoa antap long wata ya. Hemi wakabaot kam, an hemi kolsap gopas long olketa nao. ⁴⁹ Bat taem olketa lukim dat hemi wakabaot kam antap long wata ya nomoa, olketa tingse hemi wanfala devol. So olketa barava singaot bikfala nao. ⁵⁰ An evriwan barava fraet fogud taem olketa lukim hem. Bat semtaem nomoa, Jisas hemi tok kam long olketa olsem, “!Yufala no seksek! Mi nomoa ya. !Yufala no fraet!” ⁵¹ An hemi go insaet long bot wetem olketa nomoa, an win ya hemi finis nao. Bat olketa disaepol olketa barava sapraes tumas nao, ⁵² bikos olketa no save luksave long mining blong disfala mirakol wea hemi duim long faefala bred ya. Nomoa. Tingting blong olketa nao hemi tudak yet. ⁵³ Nao taem olketa katkros go kasem long narasaet long leik ya nomoa, olketa go long soa long wanfala eria wea olketa kolem Genesaret. Long ples ya nao olketa anggam bot blong olketa long hem. ⁵⁴ Taem olketa lusim bot ya nomoa, olketa pipol long ples ya olketa luksave long Jisas nao. ⁵⁵ So olketa pipol resis go nao long evri ples insaet long eria ya fo talem nius abaotem hem. An nomata watkaen ples olketa pipol herem dat Jisas hemi stap long hem, olketa save karim kam olketa sik pipol wea olketa leidaon nomoa long bed blong olketa. ⁵⁶ An long evri ples wea Jisas hemi go long hem, olsem long olketa taon an olketa vilij an olketa nara ples moa, olketa pipol save hipap wetem hem nao long olketa open ples. Olketa karim kam olketa sik pipol ya long Jisas, an askem hem fo letem olketa fo tasim nomoa en blong longfala kaleko blong hem. An evriwan wea olketa tasim hem ya, olketa barava gudbaek nao.

¹ Nao samfala Farasi an samfala tisa blong Lo, olketa stap kam long Jerusalem an olketa hipap kam long Jisas. ² Olketa bin lukim dat samfala disaepol blong Jisas olketa gohed fo kaikai wetem han blong olketa wea hemi no klin nomoa. Diswan hemi minim wea olketa no wasim han blong olketa falom wei wea olketa Farasi olketa laekem pipol fo falom. ³ Olketa Farasi wetem evriwan long olketa nara Jiu, olketa falom kastom blong olketa oloman blong olketa bifoa kam nao, wea olketa mas wasim han blong olketa long gudfala wei bifoa olketa save kaikai. ⁴ An enisamting wea olketa tekem kam long maket olketa mas wasim fastaem bifoa olketa save kaikaim. An olketa falom tu plande kastom wea olketa garem, olsem gudfala wei fo wasim olketa kap an olketa sospen an olketa dis ⁵ So olketa Farasi an olketa tisa blong Lo olketa askem Jisas olsem, “?Waswe nao olketa disaepol blong yu olketa no save falom nomoa kastom wea hemi stat kam long olketa olo blong yumi? !Olketa gohed nomoa fo kaikai wetem han blong olketa wea hemi no klin!” ⁶ Nao Jisas hemi talem olketa olsem, “Yufala save laea tumas ya. Wanem God hemi talem profet Aesaea fo raetem abaotem yufala hemi tru tumas ya, wea hemi sei, ‘Pipol ya, long toktok nomoa olketa mekhae long mi, bat maen blong olketa hemi barava stap farawe from mi nao. ⁷ Olketa barava hadwaka nating nomoa taem olketa mekhae long mi, bikos olketa gohed fo tisim pipol long olketa lo blong olketa seleva nomoa.’” ⁸ An Jisas hemi sei moa, “Yufala save, distaem yufala barava bin lusim nao olketa lo blong God, an yufala falom nomoa olketa kastom tising blong olketa man. ⁹ “Yufala ya barava save tumas long wei fo sensim olketa lo blong God, mekem yufala save falom nomoa kastom tising blong yufala seleva. ¹⁰ Yufala save finis wea Mosis hemi talem olsem, ‘Yu mas tinghae long mami an dadi blong yu.’ An hemi sei tu, ‘Eniwan wea hemi tokspoelem mami an dadi blong hem, olketa mas kilim hem dae nao.’ ¹¹ Bat yufala sei, ‘Sapos eniwan hemi garem wanfala samting wea hemi save givim fo helpem mami an dadi blong hem, bat hemi sei, “Diswan nao mi makem finis fo givim go long God ya,” ¹² oraet, hemi mas no helpem mami o dadi nao ya.’ ¹³ From yufala tisim olketa pipol fo falom kastom olsem, yufala mekem toktok blong God fo kamap olsem samting nating nomoa ya. An plande wei olsem moa yufala garem wea yufala gogohed fo duim.” ¹⁴ Nao Jisas hemi talem long olketa pipol fo olketa kam kolsap long hem moa, an hemi sei long olketa, “Yufala mas lisin gudfala, mekem yufala save minim. ¹⁵ Olketa samting wea hemi kam from aotsaet an go insaet long maos blong man, hemi no save mekem hem fo no klin. Bat wanem hemi kamaot long maos blong man, hem nao hemi save mekem hem fo no klin.” ¹⁷ Nao taem hemi lusim olketa pipol ya an hemi go insaet long haos nomoa, olketa disaepol i askem hem abaotem mining blong disfala tokpiksa ya. ¹⁸ An Jisas hemi sei olsem, “!Maewat! Yufala ya, hed blong yufala hemi tudak olsem olketa ya tu. ?Waswe, yufala no minim yet? Olketa samting wea hemi kam from aotsaet an go insaet long maos blong man, hemi no save mekem man fo no klin, ¹⁹ bikos hemi no go insaet long maen blong hem, bat hemi godaon olowe insaet long bele blong hem. An bihaen, bae hemi goaot moa from bodi blong hem nomoa.” Taem Jisas hemi tok olsem ya, hemi minim olsem evri kaikai hemi klin long ae blong God. ²⁰ An hemi gohed moa fo tok olsem, “Yufala save, wanem hemi kamaot long maos blong man, hem nao hemi save mekem man fo no klin. ²¹ Bikos olketa samting wea hemi save kamaot long insaet long maen blong man, hemi olsem olketa ravis tingting wea hemi save mekem man fo durong wetem eniwan, an fo stil, an fo kilim dae nara man, ²² an fo brekem lo blong marit, an fo tekem evrisamting fo hem seleva, an fo talem enikaen ravis samting nomoa, an fo raverave tumas, an fo duim olketa nogud samting long ae blong pipol, an fo joles tumas, an fo stori nogud abaotem nara man, an fo praod tumas, an fo duim tu enikaen krangge samting nomoa. ²³ Evri ravis samting ya, hemi kamaot long insaet long maen blong man, an hem nao hemi save mekem man fo no klin.” ²⁴ Bihaen moa, Jisas hemi lusim ples ya an go moa long eria kolsap long bikfala taon long Taea. Hemi go insaet long wanfala haos from hemi no laekem eniwan fo save long wea nao hemi stap, bat nomata olsem, hemi had tumas fo hemi staphaed ya. ²⁵ Nao wanfala woman wea wanfala ravis devol hemi stap long gele blong hem hemi herem nius abaotem Jisas. Semtaem nomoa, hemi kam nao an nildaon long frant blong Jisas. ²⁶ Woman ya, hemi no Jiu bat hemi bon long Fonisia long kantri blong Siria. An hemi krae long Jisas fo mekem hem raosim devol ya from gele blong hem. ²⁷ Bat Jisas hemi tok olsem long hem, “Olketa pikinini nao mas garem kaikai blong olketa fastaem ya. Hemi no stret sapos yumi tekem kaikai blong pikinini an torowem go long olketa dog nomoa.” ²⁸ An woman ya hemi tok olsem long hem, “Tru tumas ya, masta. Bat nomata olketa dog save kaikaim olketa kaikai blong olketa pikinini wea hemi foldaon andanit long tebol.” ²⁹ So Jisas hemi talem woman ya olsem, “Bikos yu tok olsem, mi talem long yu nao, yu save gobaek long haos blong yu nao. Distaem ya, devol ya hemi goaot from gele blong yu nao.” ³⁰ Nao taem woman ya hemi gobaek kasem haos blong hem, hemi lukim dat gele blong hem hemi leidaon long bed, bat devol ya hemi goaot finis from hem nao. ³¹ Nao bihaen, Jisas an olketa disaepol blong hem olketa lusim eria long taon long Taea, an olketa wakabaot go moa an kasem taon long Saedon. An olketa goraon moa an gopas long eria long Dekapolis, bifoa olketa kam kasem leik long Galili. ³² Nao samfala pipol olketa tekem kam wanfala man hu ia blong hem hemi pas, an hemi no save toktok gudfala tu. An olketa askem Jisas fo putum han blong hem antap long man ya. ³³ So Jisas hemi talem man ya fo tufala go seleva from olketa pipol ya. Nao hemi putum fingga blong hem insaet long tufala ia blong man ya, an hemi spit long fingga blong hem, an hemi tasim tang blong man ya. ³⁴ An Jisas hemi luk goap long skae an tekwin bikfala olsem man hu hemi sore, an hemi tok olsem long man ya, “!Efata!” Mining blong toktok ya hemi olsem, “!Yu open nao!” ³⁵ Long semtaem nomoa, ia blong man ya hemi open nao. An tang blong hem tu hemi no pas moa, wea hemi save toktok gudfala nao. ³⁶ Bihaen, Jisas hemi stopem olketa pipol fo no go storim disfala samting ya long eniwan moa. Bat nomata Jisas hemi go-gohed fo tokstrong long olketa olsem ya, olketa jes go-gohed moa fo talemaot. ³⁷ An evriwan hu i herem nius ya, olketa barava sapraes tumas nao an olketa sei, “!Maewat, evrisamting disfala man hemi duim ya hemi barava gud tumas ya! Nomata olketa hu ia blong olketa i pas fastaem, distaem olketa save herem toktok nao, an olketa pipol wea fastaem olketa no save toktok, distaem olketa save toktok moa.”

¹ No longtaem bihaen, plande pipol moa olketa kam long Jisas. Nao long taem ya, olketa pipol barava nating garem eni kaikai nao, so Jisas hemi kolem olketa disaepol blong hem fo kam long hem an hemi sei long olketa olsem, ² “Mi barava sore tumas long olketa pipol ya, bikos olketa stap kam wetem yumi fo trifala de nao, an olketa no garem eni kaikai. ³ An sapos mi sendem olketa fo go hom taem olketa hanggre olsem, bae olketa hafded long rod, bikos samfala long olketa barava kam farawe tumas ya.” ⁴ Nao olketa disaepol blong Jisas olketa sei, “?Long disfala ples no eni haos hemi stap long hem ya, wea nao yumi save faendem kaikai fitim plande pipol olsem ya?” ⁵ Bat Jisas hemi askem olketa olsem, “?Haomas bred nao yufala garem?” An olketa sei, “Sevenfala bred nomoa ya.” ⁶ Nao Jisas hemi talem olketa pipol ya fo sidaon long graon. An hemi tekem sevenfala bred ya nomoa an hemi talem tengkiu long God, an hemi brekem bred ya an hemi givim long olketa disaepol blong hem. An olketa disaepol olketa searemaot nao olketa kaikai ya fo olketa pipol. ⁷ An olketa garem tu samfala smol fis moa. So Jisas hemi talem tengkiu long God, an hemi givim long olketa disaepol fo searemaot long olketa pipol ya moa. ⁸ An evriwan kaikai an olketa fulap fogud nao. An olketa fulumapem sevenfala basket nao long olketa pis kaikai wea olketa no finisim. ⁹ An 4, man nao olketa stap long taem ya. Nao taem Jisas hemi sendem olketa pipol ya fo gobaek finis nomoa, ¹⁰ hemi go insaet long wanfala bot wetem olketa disaepol blong hem an olketa go moa long eria long Dalmanuta. ¹¹ Samfala Farasi olketa kam long Jisas an olketa stat fo stori wetem hem from olketa wande fo trikim hem. So olketa askem hem fo mekem wanfala saen fo somaot sapos hemi tru wea God nao hemi sendem hem fo kam ¹² Bat Jisas hemi tekwin bikfala, an hemi sei, “!Maewat! ?Waswe nao yufala pipol blong distaem yufala ask oltaem fo lukim wanfala spesol saen? Mi talem yufala tru samting nao, mi bae no mekem eni saen fo yufala fo lukim.” ¹³ Bihaen Jisas hemi lusim olketa Farasi ya, hemi go insaet long bot an hemi stat fo katkros go moa long narasaet long leik ya. ¹⁴ Taem ya, olketa disaepol barava fogetem nao fo tekem samfala kaikai wetem olketa. Wanfala bred nomoa olketa garem wetem olketa insaet long bot. ¹⁵ An Jisas hemi wonem olketa olsem, “Yufala mas lukaot long diskaen yist blong olketa Farasi, an yist blong King Herod.” ¹⁶ Olketa disaepol olketa gohed fo toktok tugeta long olketa seleva olsem, “Ating Jisas talem olsem bikos yumi no garem eni bred ya.” ¹⁷ Jisas hemi save nomoa wanem olketa talem, so hemi sei moa, “?Waswe nao yufala wari tumas from diswan wea yufala no garem eni bred? ?Yufala nating minim yet? ?Waswe, hed blong yufala hemi tudak yet? ¹⁸ ?Yufala garem ae? ?So waswe nao yufala no luksave long samting ya? ?Yufala garem ia? ?So waswe nao yufala no heresave long samting ya? Ating yufala fogetem nao ¹⁹ taem mi searemaot faefala bred nomoa long 5,000 man ya. ?Haomas basket nao yufala fulumap long olketa kaikai wea olketa no finisim?” An olketa sei, “Tuelfala basket.” ²⁰ An Jisas hemi sei moa, “?An haomas basket nao yufala fulumap long olketa kaikai wea olketa no finisim, taem mi searemaot sevenfala bred nomoa long 4 man ya?” Olketa sei, “Sevenfala basket.” ²¹ Nao Jisas hemi sei long olketa olsem moa, “?So waswe, yufala nating minim yet olketa samting ya?” ²² Taem olketa kam kasem Betsaeda, samfala pipol olketa tekem kam long Jisas wanfala man wea ae blong hem hemi blaen. An olketa askem Jisas fo tasim man ya. ²³ Nao Jisas hemi holem han blong man ya nomoa an lidim hem goaot nao from vilij ya. Hemi putum spit blong hem long ae blong man ya, an hemi putum han blong hem long hem tu an hemi askem hem olsem, “?Waswe, yu save lukim enisamting?” ²⁴ Nao man ya hemi lukluk go an hemi sei, “!Ya! Mi save lukim olketa pipol, bat lukluk blong olketa hemi olsem olketa tri wea olketa wakabaot.” ²⁵ Nao Jisas hemi putum moa han blong hem long ae blong man ya. Distaem nomoa, man ya hemi save lukluk gudfala nao wea hemi save lukim evrisamting klia moa. ²⁶ An Jisas hemi tokstrong long hem olsem, “Yu mas go stret nao long haos blong yu. Bat yu no gobaek moa insaet long vilij ya.” ²⁷ Bihaen moa, Jisas an olketa disaepol blong hem olketa go long olketa vilij kolsap long bikfala taon long Sisaria Filipae. Taem olketa wakabaot go long rod yet, Jisas hemi askem olketa olsem, “?Waswe, olketa pipol olketa tingse hu nao mi?” ²⁸ An olketa sei, “Samfala pipol olketa sei yu nao Jon Baptaes ya. An samfala pipol olketa sei yu nao profet Elaeja ya. An samfala moa olketa sei yu nao wanfala long olketa nara profet blong bifoa kam ya.” ²⁹ An Jisas hemi askem olketa olsem moa, “?Bat waswe yufala? ?Yufala tingse hu nao mi?” So taem ya nomoa, Pita hemi sei nao, “Masta, yu barava Mesaea ya.” ³⁰ An Jisas hemi tokstrong nao long olketa fo no talem long eniwan abaotem hem. ³¹ Long taem ya, Jisas hemi gogohed fo tisim olketa disaepol olsem, “Bae mi San Blong Man, olketa mas meksave long mi fogud nao. An bae olketa hedprist an olketa tisa blong Lo an olketa nara bikman moa olketa no laekem mi moa. An bae olketa kilim mi dae tu, bat long mektri de bihaen ya, bae mi laefbaek moa.” ³² Wanem Jisas hemi talemaot ya hemi barava klia tumas long olketa nao. So Pita hemi tekem Jisas go seleva nomoa an tokstrong agensim tingting blong hem ya. ³³ Bat Jisas hemi taneraon an luk go long olketa disaepol blong hem nao, an hemi tokstrong long Pita olsem, “!Giraot from mi, Seitan! Wanem yu talem ya, hemi no tingting blong God ya bat hemi tingting blong man nomoa.” ³⁴ Bihaen moa, Jisas hemi kolem olketa pipol wetem olketa disaepol blong hem fo kam long hem an talem olketa olsem, “Sapos eniwan hemi wande fo kam falom mi, hemi mas no tingim hem seleva nomoa, bat hemi mas wiling fo karim kros blong hem an falom mi. ³⁵ Bikos eniwan wea hemi wande fo sevem laef blong hem seleva nomoa, bae hemi lusim tru laef ya. Bat sapos eniwan hemi lusim laef blong hem fo mi, an fo Gudnius ya, bae hem nao hemi sevem tru laef blong hem. ³⁶ ?Nao sapos eniwan hemi winim evrisamting long disfala wol, bat hemi lusim laef blong hem from diswan, waswe, bae olketa samting ya save helpem hem? Nomoa ya. ³⁷ ?An wanem nao bae hemi givim, mekem hemi save tekembaek laef blong hem moa? ³⁸ Olketa pipol blong distaem ya, olketa duim enikaen ravis samting an olketa no kipim olketa seleva fo God. Nao sapos eniwan hemi filsem tumas long mi an olketa toktok blong mi, oraet, taem mi San Blong Man, mi kambaek wetem saen blong bikfala paoa blong Dadi blong mi an wetem olketa holi enjel, bae mi filsem long man tu ya.”

¹ An Jisas hemi gohed moa fo tok olsem, “Mi talem yufala tru samting nao, samfala long yufala wea i stanap long hia, bifoa yufala dae, bae yufala lukim kingdom blong God bae hemi kam wetem bikfala paoa blong hem.” ² Long meksiks de bihaen, Jisas hemi tekem Pita an Jemes an Jon wetem hem, an olketa seleva i goap long wanfala hae maonten. Taem trifala ya i lukluk go nomoa, bodi blong Jisas hemi sens nao, ³ an olketa kaleko blong hem olketa barava waet fogud. No eni man long disfala wol hemi save wasim kaleko, mekem hemi kamap waet olsem. ⁴ Taem ya, trifala ya i lukim Mosis an Elaeja tufala gohed fo stori wetem Jisas nao. ⁵ So Pita hemi sei long Jisas olsem, “Tisa, hemi gud tumas nao mifala stap long hia. Bae mifala wakem trifala smol haos, wanfala fo yu an wanfala fo Mosis an wanfala fo Elaeja.” ⁶ Pita hemi tok olobaot olsem bikos trifala ya barava fraet fogud nao. ⁷ Long taem ya nomoa, wanfala klaod hemi kam kolsap antap long olketa nao. An olketa herem toktok wea hemi kamaot long klaod ya wea hemi sei, “Hem ya nao barava San blong mi wea mi lavem tumas. !Yufala mas heremgud wanem hemi talem!” ⁸ Nao semtaem nomoa, olketa lukraonem olketa bat olketa no lukim eniwan moa, bat Jisas nomoa hemi stap wetem olketa. ⁹ Taem olketa wakabaot godaon from maonten ya, Jisas hemi tokstrong long trifala disaepol blong hem olsem, “Disfala samting wea yufala bin lukim ya, yufala mas no talem long eniwan, go-go kasem taem mi San Blong Man, mi laefbaek moa from dae.” ¹⁰ Trifala ya barava falom nao toktok blong Jisas, bat long midol long olketa seleva nomoa olketa stat fo tokabaotem samting ya olsem, “?Wanem nao mining blong ‘Laefbaek moa from dae’?” ¹¹ An trifala ya askem Jisas olsem, “?Waswe nao olketa tisa blong Lo olketa sei Elaeja nao bae hemi mas kam fastaem?” ¹² Nao Jisas hemi sei, “Hemi tru ya, Elaeja nao hemi mas kam fastaem, mekem hemi stretem evrisamting moa. ?Bat waswe nao Buktambu hemi talem olsem, bae olketa meksave long San Blong Man, an bae olketa lukim hem olsem wanfala man nogud ya? ¹³ Nao mi talem yufala ya, Elaeja hemi kam finis nao, bat olketa pipol olketa duim enikaen ravis samting long hem falom tingting blong olketa seleva nomoa, olsem Buktambu hemi talemaot finis.” ¹⁴ Taem Jisas wetem trifala disaepol blong hem olketa kam kasem olketa nara disaepol nomoa, olketa lukim dat plande pipol nao olketa hipap raonem olketa. An samfala tisa blong Lo olketa gogohed fo raoa wetem olketa tu. ¹⁵ Nao taem olketa pipol ya olketa lukim Jisas nomoa, olketa barava sek tumas long hem nao an olketa resis kam fo mitim hem. ¹⁶ An Jisas hemi askem olketa olsem, “?Wanem nao yufala raoa long hem?” ¹⁷ Nao wanfala man long olketa pipol ya hemi tok olsem kam long hem, “Tisa, mi tekem kam boe blong mi long yu ya, bikos wanfala devol hemi stap long hem nao an hemi mekem hem fo no save toktok ya. ¹⁸ Taem devol ya hemi kam strong long hem, hemi mekem boe ya fo foldaon long graon. An plande spit nao save kamaot long maos blong hem, an hemi save baetem tit blong hem tu, an bodi blong hem hemi save strong olsem stik. Mi askem olketa disaepol blong yu fo raosim devol ya, bat olketa nating save duim nomoa.” ¹⁹ Nao Jisas hemi sei long olketa olsem, “Maewat, yufala ya nating save biliv long God. ?Haomas taem nao mi mas stap wetem yufala? !Hemi had tumas distaem fo mi stap wetem yufala! !Yufala tekem kam boe ya long mi!” ²⁰ So olketa tekem kam boe ya long Jisas nao. Nao semtaem wea devol ya hemi lukim Jisas nomoa, hemi sekem boe ya fogud nao. An hemi mekem hem fo foldaon long graon an fo rol olobaot, an plande spit nao hemi kamaot long maos blong hem. ²¹ Nao Jisas hemi askem dadi blong boe ya olsem, “?Wataem nao disfala samting ya hemi kasem hem?” An dadi blong hem hemi ansarem hem olsem, “Hemi kasem hem taem hemi smolfala boe yet ya. ²² Plande taem nao devol ya hemi mekem hem foldaon long faea an insaet long wata fo kilim hem dae. Sapos yu save duim, plis, yu sore long mifala an helpem mifala kam.” ²³ An Jisas hemi sei olsem, “Yu askem mi sapos mi save duim. Eniwan hu hemi biliv long God, hemi save duim evrisamting nomoa ya.” ²⁴ Semtaem nomoa, dadi blong boe ya hemi singaot bikfala olsem, “Mi biliv, bat plis yu mekem biliv blong mi fo strong moa.” ²⁵ Jisas hemi luksave dat plande pipol olketa stat fo kakam kolsap long hem, so hemi tokstrong long ravis devol ya olsem, “Yu nao devol wea ia blong yu hemi pas an yu no save toktok. Mi talem long yu stret: !Yu kamaot from boe ya, an yu nating gobaek insaet long hem long enitaem moa!” ²⁶ Nao devol ya hemi singaot bikfala nomoa an hemi mekem boe ya hemi seksek fogud nao. Bihaen nomoa, devol ya hemi kamaot from boe ya. An boe ya hemi luk olsem hemi dae nao, so plande long olketa sei olsem, “Hemi dae finis nao ya.” ²⁷ Bat Jisas hemi holem han blong hem nomoa, an hemi helpem hem fo getap, an boe ya hemi stanap nao. ²⁸ An bihaen Jisas hemi go insaet long wanfala haos, olketa disaepol olketa kam lukim hem seleva an askem hem olsem nao, “?Waswe nao mifala no save raosim disfala devol ya?” ²⁹ Jisas hemi talem olketa olsem, “Yufala save, wei blong prea nomoa hemi save raosim olketa devol olsem ya.” ³⁰ Taem Jisas an olketa disaepol blong hem olketa lusim ples ya nomoa, olketa gopas long olketa nara vilij long Galili nao. Jisas hemi no laekem pipol fo save dat hemi wakabaot kam long ples blong olketa, ³¹ bikos hemi go-gohed fo tisim olketa disaepol blong hem nomoa. Hemi talem olketa olsem, “Bae mi San Blong Man, olketa givim mi go long han blong olketa man fo kilim mi dae. Bat bae mi laef baek moa long mektri de.” ³² Nomata olsem, olketa disaepol blong hem olketa nating save lelebet nao long mining blong toktok ya, an olketa fraet fo askem hem tu. ³³ Taem Jisas an olketa disaepol blong hem olketa kasem Kapaneam, olketa go insaet long wanfala haos. Nao Jisas hemi askem olketa disaepol blong hem olsem, “?Watkaen samting nao yufala go-gohed fo raoa kam long hem, taem yumi wakabaot kam long rod ya?” ³⁴ Bat olketa stap kuaet nomoa, bikos taem olketa wakabaot kam long rod ya, olketa bin gohed fo raoa tugeta long olketa seleva abaotem hu nao hemi nambawan man long olketa. ³⁵ So Jisas hemi sidaon an hemi kolem tuelfala disaepol blong hem, an hemi tok long olketa olsem, “Sapos wanfala long yufala hemi wande fo kamap bikfala man long yufala, hemi mas mekem hem seleva fo lou an hemi mas waka olsem haosboe blong evriwan.” ³⁶ An Jisas hemi tekem wanfala pikinini an hemi mekem hem fo stanap long frant blong olketa. An hemi putum han blong hem goraonem pikinini ya nomoa, an hemi talem olketa olsem, ³⁷ “Eniwan wea hemi kaen long wanfala pikinini olsem ya long nem blong mi, hemi kaen long mi nao ya. An eniwan hu hemi kaen long mi, hemi no kaen long mi seleva nomoa bat hemi kaen long man hu hemi sendem mi kam tu.” ³⁸ Nao Jon hemi tok olsem long Jisas, “Tisa, mifala lukim wanfala man hu hemi yusim nem blong yu fo raosim olketa devol from olketa pipol ya. Bat man ya hemi no blong seksin blong yumi ya, so mifala stopem hem nao fo no duim diskaen samting.” ³⁹ Nao Jisas hemi talem olketa olsem, “Yufala no trae fo stopem hem. Man hu hemi mekem mirakol long nem blong mi, hemi no save talem nogud samting abaotem mi ya. ⁴⁰ Bikos eniwan hu hemi no agensim yumi, hem nao hemi fren blong yumi ya. ⁴¹ Mi talem yufala tru samting nao, sapos eniwan hemi givim yufala kapwata bikos yufala olketa disaepol blong mi, God bae hemi blesim disfala man ya.” ⁴² An Jisas hemi sei moa, “Sapos wanfala man hemi mekem wanfala long olketa pikinini ya fo lusim biliv blong hem long mi, hemi moabeta sapos olketa taemapem wanfala bikfala ston long nek blong man ya an torowem godaon insaet long si. ⁴³ An sapos han blong yu hemi mekem yu fo lusim biliv blong yu, yu mas katemaot nomoa. Moabeta yu garem wanfala han nomoa an yu save go insaet long tru laef. Nogud yu garem tufala han bat yu mas go insaet long hel wea faea hemi no save dae. ⁴⁵ An sapos lek blong yu hemi mekem yu fo lusim biliv blong yu, yu mas katemaot nomoa. Moabeta yu garem wanfala lek nomoa an yu save go insaet long tru laef. Nogud yu garem tufala lek bat olketa torowem yu go long hel. ⁴⁷ An sapos ae blong yu hemi mekem yu fo lusim biliv blong yu, yu mas pulumaot nomoa. Moabeta yu garem wanfala ae nomoa an yu save go insaet long kingdom blong God. Nogud yu garem tufala ae bat olketa torowem yu go long hel. ⁴⁸ Long ples ya, olketa smolfala wom wea olketa gohed fo kaikaim olketa man ya olketa no save dae, an faea ya tu hemi no save dae enitaem. ⁴⁹ “Bae God hemi mekem evriwan fo klin wetem faea, olsem yumi putum solt long sakrifaes fo mekem hem klin. ⁵⁰ “Solt hemi wanfala gud samting, bat sapos hemi lusim strong blong hem, bae yu no save mekem hem fo gudbaek moa. “So yufala mas garem solt long laef blong yufala evriwan, an piis mas stap long yufala oltaem.”

¹ Bihaen Jisas hemi lusim ples ya, hemi go falom narasaet long riva long Jodan an katkros kambaek moa long provins long Jiudia. An plande pipol tumas nao olketa gohed fo kam moa long hem, so hemi gohed fo tisim olketa olsem hemi save duim oltaem. ² Nao samfala Farasi olketa kam fo trikim Jisas nomoa, so olketa askem hem olsem, “?Waswe, Lo blong yumi hemi save letem man fo lusim waef blong hem?” ³ Nao Jisas hemi ansarem olketa olsem moa, “?Watkaen lo nao Mosis hemi givim long yufala bifoa kam?” ⁴ Olketa sei, “Mosis hemi save letem man fo lusim waef blong hem sapos hemi givim wanfala pepa blong divos fastaem.” ⁵ Nao Jisas hemi sei long olketa, “Mosis hemi bin raetem lo ya fo yufala, bikos hemi had tumas fo tisim yufala ya. ⁶ Bat Buktambu hemi sei, ‘Long stat long evrisamting, God hemi mekem man an woman. ⁷ An bikos hemi olsem, man hemi mas lusim mami an dadi blong hem an hemi mas joen wetem waef blong hem, ⁸ an tufala bae i kamap wanfala nomoa.’ So tufala i no tufala bodi, bat tufala kamap wanfala bodi nao. ⁹ An samting wea God nao hemi joenem finis olsem, hemi no blong eniwan fo brekem moa ya.” ¹⁰ Nao taem olketa gobaek insaet long wanfala haos, olketa disaepol olketa gohed fo askem Jisas abaotem mining blong disfala tising ya. ¹¹ An Jisas hemi tok olsem long olketa, “Sapos wanfala man hemi lusim waef blong hem an maritim moa narafala woman, man ya hemi brekem lo blong marit nao ya. ¹² Hemi olsem tu, sapos wanfala woman hemi lusim hasban blong hem an maritim moa narafala man, woman ya hemi brekem lo blong marit nao.” ¹³ Samfala pipol olketa tekem kam olketa pikinini long Jisas, mekem hemi putum han blong hem antap long olketa. Bat olketa disaepol blong Jisas olketa tokhad long olketa pipol ya. ¹⁴ Nao taem Jisas hemi lukim diswan nomoa, hemi barava kros tumas long olketa disaepol blong hem an hemi talem olketa olsem, “Yufala letem olketa pikinini fo kam long mi. Yufala no stopem olketa. Bikos olketa wea i olsem olketa pikinini ya, olketa nao fitim fo stap insaet long kingdom blong God. ¹⁵ Mi talem yufala tru samting nao, sapos eniwan hemi no olsem wanfala pikinini hu hemi hapi fo mekhae long God, bae hemi nating fit fo stap insaet long kingdom blong God.” ¹⁶ An Jisas hemi holem olketa pikinini ya kolsap long hem, an hemi putum han blong hem antap long olketa fo blesim olketa. ¹⁷ Taem Jisas hemi stat fo go moa, wanfala ris man nao hemi kam an nildaon long frant blong hem, an askem hem olsem, “!Gudfala Tisa! ?Wanem nao mi mas duim, mekem mi kasem tru laef wea hemi no save finis?” ¹⁸ Nao Jisas hemi tok olsem long hem, “?Waswe nao yu talem dat mi gudfala? God nomoa hemi gudfala. ¹⁹ Yu save finis long olketa lo wea hemi sei, ‘Yu mas no kilim nara man dae. Yu mas no brekem lo blong marit. Yu mas no stil. Yu mas no laea long kot. Yu mas no laea fo stil. An yu mas tinghae long mami an dadi blong yu.’” ²⁰ Nao man ya hemi tok olsem, “Tisa, stat kam taem mi smolfala boe yet, mi obeim evri lo ya nao.” ²¹ Nao Jisas hemi luk go long man ya an hemi lavem hem tumas, so hemi talem hem olsem, “Wanfala samting nomoa yu mas duim. Yu mas go an salem evrisamting blong yu, an givim go seleni long olketa pua pipol. From diswan nao bae yu garem olketa risis moa long heven. An bihaen ya, yu save kam an falom mi.” ²² Bat man ya hemi garem plande samting tumas ya, so taem hemi herem disfala toktok ya, hemi barava sore fogud an hemi go from Jisas nao. ²³ Nao Jisas hemi luk go long olketa disaepol blong hem an hemi tok olsem, “Bae hemi had tumas ya fo olketa pipol wea olketa garem risis fo go insaet long kingdom blong God.” ²⁴ Olketa disaepol blong hem olketa barava sapraes tumas nao long olketa toktok ya, bat hemi gohed moa fo talem olketa olsem, “!Olketa fren, hemi had tumas ya fo eniwan fo go insaet long kingdom blong God! ²⁵ Ya, fo wanfala kamel fo go insaet long smolfala hol blong wanfala nila hemi had tumas ya, bat hemi barava had moa fo man hu hemi ris fo go insaet long kingdom blong God.” ²⁶ Taem olketa disaepol olketa herem diswan, olketa barava sapraes fogud moa. An olketa sei, “!Maewat! ?Sapos olsem, hu nao bae hemi save kasem tru laef ya?” ²⁷ Bat Jisas hemi luk go long olketa an hemi sei, “Hemi had tumas fo eni man fo duim ya, bat fo God hemi no had, bikos hemi save duim evrisamting nomoa.” ²⁸ Nao Pita hemi askem Jisas olsem, “?Waswe long mifala? Mifala lusim evrisamting blong mifala finis, an mifala falom yu nao.” ²⁹ An Jisas hemi talem long olketa olsem, “Ya, mi talem yufala tru samting nao, eniwan hu hemi tinghae long mi an long Gudnius, mekem hemi mas lusim haos blong hem o olketa brata an olketa sista blong hem o mami an dadi blong hem o olketa pikinini blong hem o olketa pisgraon blong hem, ³⁰ bae hemi save garem moa wan handred taem winim olketa samting wea hemi lusim. Long disfala taem, bae hemi garem olketa haos an olketa brata an olketa sista an olketa mami an olketa pikinini an olketa pisgraon blong hem, an bae olketa meksave long hem tu. Bat long niufala wol wea bae hemi kam, bae man ya hemi garem tru laef wea hemi no save finis. ³¹ An plande pipol hu olketa nambawan long distaem, bae olketa kamap las moa. An plande pipol hu olketa las long distaem, bae olketa kamap nambawan moa.” ³² Nao taem olketa wakabaot goap long Jerusalem, Jisas hemi wakabaot go fastaem long olketa disaepol blong hem. Olketa disaepol olketa barava sapraes tumas nao long hem. An olketa pipol wea olketa wakabaot kam wetem Jisas tu, olketa fraet. Nao Jisas hemi talem tuelfala disaepol blong hem fo olketa go seleva wetem hem an hemi talem olketa abaotem watkaen samting nao bae hemi kasem hem. ³³ Hemi tok olsem, “Yumi go-goap fo Jerusalem, an long ples ya nao bae olketa givim mi San Blong Man, go long han blong olketa hedprist an olketa tisa blong Lo. Bae olketa jajem mi fo mi mas dae. An bae olketa givim mi go moa long han blong olketa pipol wea olketa no Jiu, ³⁴ mekem olketa mekfan long mi, an spit long mi, an wipim mi moa. An bae olketa kilim mi dae tu, bat long mektri de bae mi laefbaek moa.” ³⁵ Bihaen, Jemes an Jon tufala san blong Sebedi, tufala kam fo askem Jisas olsem, “Tisa, mitufala garem wanfala samting ya wea mitufala laekem yu fo duim fo mitufala.” ³⁶ So Jisas hemi sei, “?Wanem nao yutufala laekem mi fo duim fo yutufala?” ³⁷ An tufala sei, “Taem yu stap wetem saen blong bikfala paoa blong God, mitufala laekem yu fo letem mitufala fo sidaon wetem yu, wanfala long raetsaet blong yu an narawan long lefsaet blong yu.” ³⁸ Nao Jisas hemi sei long tufala ya olsem, “Disfala samting wea yutufala askem ya, yutufala nat ing minim ya. ?Wa swe, yutufala save safa long semkaen wei wea bae mi safa long hem, an yutufala save go insaet long samting olsem baptaes wea bae mi dae long hem?” ³⁹ An tufala sei, “Ya, mitufala save duim nomoa.” So Jisas hemi sei moa long tufala, “Hemi tru, bae yutufala safa long diskaen wei wea bae mi safa long hem ya, an bae yutufala go insaet long samting olsem baptaes wea bae mi dae long hem. ⁴⁰ Bat fo sidaon long raetsaet blong mi an long lefsaet blong mi, hemi no samting blong mi nao fo givim long eniwan ya. God nao bae hemi givim olketa ples ya long olketa wea hemi siusim finis.” ⁴¹ Taem nara tenfala disaepol ya olketa herem diswan nomoa, olketa kros tumas nao long Jemes an Jon. ⁴² So Jisas hemi kolem olketa evriwan fo kam long hem an hemi sei, “Yufala save finis wea olketa bikman long disfala wol olketa save bosim tumas pipol blong olketa. An olketa lida tu i save fosim tumas pipol blong olketa. ⁴³ Bat yufala mas no duim olsem long midol long yufala. Man hu hemi wande fo kamap bikman long yufala, hemi mas waka olsem haosboe blong yufala nao. ⁴⁴ An man hu hemi wande fo kamap nambawan man long yufala, hemi mas waka olsem wakaman blong yufala evriwan nomoa. ⁴⁵ Nomata mi San Blong Man, mi no kam mekem olketa pipol i waka fo mi. Mi kam fo waka fo olketa, an fo letem mi fo dae fo peimaot plande pipol from sin blong olketa.” ⁴⁶ Nao Jisas an olketa disaepol blong hem olketa kasem taon long Jeriko. Taem olketa lusim taon ya moa, plande pipol olketa go-go wetem olketa. Nao wanfala blaen man hu nem blong hem nao Batimeas, hemi sidaon long saet long rod. Man ya hemi san blong Timeas, an oltaem nomoa hemi stap fo askem seleni long olketa pipol. ⁴⁷ Nao taem hemi herem nius wea Jisas blong Nasaret hemi kam long rod ya, hemi gohed fo singaot olsem, “!Jisas, San Blong King Deved, plis yu sore kam long mi!” ⁴⁸ Nao plande pipol olket a hatem hem an olketa talem hem fo stap kuaet. Bat hemi jes singaot bikfala moa olsem, “!San Blong King Deved, plis yu sore kam long mi!” ⁴⁹ Nao Jisas hemi stop an hemi sei long olketa, “Yufala kolem man ya fo kam.” So olketa go an talem long blaen man ya olsem, “Yu no wari man, yu stanap, Jisas hemi singaotem yu ya.” ⁵⁰ Nao blaen man ya hemi getap kuiktaem an torowem longfala kaleko blong hem nomoa, an hemi kam nao long Jisas. ⁵¹ An Jisas hemi askem hem olsem, “?Wanem nao yu laekem mi fo duim fo yu?” An blaen man ya hemi sei, “Tisa, mi laekem yu fo mekem ae blong mi fo lukluk moa.” ⁵² So Jisas hemi talem hem olsem, “Yu save go nao, bikos biliv blong yu nao hemi mekem yu fo gudbaek moa.” Long semtaem ya nomoa, ae blong hem hemi lukluk gudfala nao, an hemi go wetem Jisas long rod.

¹ Taem Jisas an olketa disaepol olketa kolsap kasem Jerusalem, olketa lukim go tufala vilij, Betfeis an Betani wea hemi kolsap long hil blong Oliv tri. Nao Jisas hemi sendem go tufala long olketa disaepol blong hem, ² an hemi sei, “Yutufala go long vilij wea yumi lukim go ya. An semtaem yutufala go kasem ples ya, bae yutufala lukim wanfala yang dongki wea no eni man hemi bin raed antap long hem yet. Olketa bin taemapem hem ya, so yutufala tekemaot rop ya, an lidim hem kam long mi. ³ An sapos eniwan hemi askem yutufala olsem, ‘?Waswe nao yutufala tekemaot?’ yutufala mas sei long hem, ‘Masta nao hemi laekem ya, bat bae hemi sendem hem kambaek kuiktaem nomoa.’” ⁴ Nao tufala disaepol ya, tufala go an lukim nao yangfala dongki wea hemi stanap nomoa long rod an wea olketa bin taemapem hem kolsap long doa long wanfala haos. Taem tufala go-gohed fo tekemaot rop ya, ⁵ samfala man hu olketa stanap kolsap long ples ya, olket a askem tufala olsem nao, “?Ei, waswe nao yutufala tekemaot dongki ya?” ⁶ Bat taem tufala talem olketa toktok wea Jisas hemi bin talem tufala, olketa letem tufala fo go nao. ⁷ An tufala lidim go yangfala dongki ya long Jisas. Nao tufala putum samfala kaleko blong tufala long baeksaet blong dongki ya, an Jisas hemi sidaon antap long hem. ⁸ An plande pipol tu olketa spredem kaleko blong olketa long rod, an samfala moa olketa katem olketa smolfala brans blong olketa tri wea i stap long ples ya an olketa putum moa long rod. ⁹ Nao olketa pipol hu i wakabaot fastaem an olketa hu i ka-kam bihaen long Jisas, olketa go-gohed fo singaot olsem, “!Preisim God! !God, yu blesim disfala man ya hu hemi kam long nem blong yu! ¹⁰ !God blesim disfala man wea bae hemi kamap King olsem olo blong mifala Deved! !Preisim God long heven!” ¹¹ Jisas hemi go kasem Jerusalem an hemi go insaet long disfala Tambuhaos blong God an hemi luklukraon long evrisamting insaet. Bat bikos hemi kolsap fo tudak nao, Jisas an olketa tuelfala disaepol blong hem olketa go long Betani moa. ¹² Long neks de, taem olketa lusim kam Betani, Jisas hemi hanggre nao. ¹³ Nao hemi lukim go wanfala fig tri, wea hemi stap farawe kam wea hemi garem plande lif long hem, so hemi go fo lukim sapos hemi garem eni frut long hem. Bat taem hemi kam kolsap long fig tri ya nomoa, hemi lukim dat hemi garem lif nating nomoa. Long taem ya, hemi no barava taem fo disfala frut blong olketa fig tri fo olketa redi yet. ¹⁴ Nao Jisas hemi tok long fig tri ya olsem, “!Bae no eniwan save kaikaim frut blong yu moa!” An olketa disaepol olketa herem nao toktok blong hem ya. ¹⁵ Taem olketa kasem Jerusalem, Jisas hemi go insaet long eria long Tambuhaos ya an raosimaot olketa pipol hu i salem olketa samting an olketa hu i peim olketa samting insaet long eria ya. An hemi gohed tu fo kapsaetem olketa tebol blong olketa man wea olketa go-gohed fo sensim olketa deferen seleni, an hemi kapsaetem tu olketa stul blong olketa man wea olketa go-gohed fo salem olketa kurukuru. ¹⁶ An hemi stopem tu olketa pipol fo no karim olketa samting an katkros go wetem long eria long Tambuhaos ya. ¹⁷ Bihaen, hemi tisim olketa pipol olsem, “Toktok blong God insaet long Buktambu hemi sei, ‘Haos blong mi ya bae olketa kolem hem haos blong evri kantri long wol fo prea long hem.’ !Bat yufala ya, yufala mekem haos ya fo kamap olsem ples wea olketa pipol hu i save stil olketa save haed long hem ya!” ¹⁸ Olketa hedprist an olketa tisa blong Lo, olketa herem disfala samting ya, so olketa stat nao fo trae fo tingim wanfala wei wea olketa save kilim Jisas dae. Bat olketa fraet lelebet long hem tu, bikos plande pipol nao olketa barava sapraes long tising blong hem. ¹⁹ Nao taem hemi kolsap fo tudak nomoa, Jisas an olketa disaepol blong hem olketa lusim moa biktaon ya. ²⁰ Long neks de long eli moning yet, taem olketa wakabaot moa long sem rod ya, olketa lukim fig tri ya barava dae go-go kasem olketa rut blong hem nao. ²¹ Taem ya nomoa Pita hemi tingim go disfala toktok ya blong Jisas nao, so hemi sei long hem olsem, “!Tisa, yu lukim go disfala fig tri ya wea yu tokstrong long hem ya, hemi dae finis nao!” ²² Nao Jisas hemi sei long olketa, “Yufala mas biliv long God nomoa. ²³ Ya, mi talem yufala tru samting nao, sapos wanfala man hemi no garem tufala tingting bat hemi biliv wea wanem hemi talem hemi save kamtru, bae hemi save talem go long hil ya olsem, ‘Yu getap an jam go long solwata ya.’ An bae disfala samting ya hemi mas kamtru nao. ²⁴ Dastawe mi talem long yufala ya, wea taem yufala prea an ask fo enisamting, yufala mas biliv olsem yufala garem samting ya finis nao, an bae God hemi save givim fo yufala nomoa ya. ²⁵ An taem yufala stanap an prea, sapos yufala kros long eniwan, yufala mas fogivim hem fastaem. Sapos olsem nao, bae Dadi blong yufala long heven hemi save fogivim olketa ravis samting wea yufala duim tu.” ²⁷ Nao olketa kambaek moa long Jerusalem. An taem Jisas hemi wakabaot go long eria long disfala Tambuhaos ya nomoa, olketa hedprist an olketa tisa blong Lo an olketa nara bikman olketa kam long hem nao. ²⁸ An olketa askem hem olsem, “?Watkaen paoa nao yu garem fo duim olketa samting ya? ?An hu nao hemi givim paoa ya long yu?” ²⁹ Nao Jisas hemi sei long olketa olsem, “Mi tu, mi wande fo askem yufala wanfala kuestin fastaem. Sapos yufala save ansarem kuestin blong mi, oraet, bae mi save talem yufala abaotem watkaen paoa nao mi garem fo duim olketa samting ya. ³⁰ ?Nao waswe, hu nao hemi givim paoa long Jon fo baptaesim olketa pipol? ?God o man nomoa?” ³¹ So olketa gohed nao fo toktok tugeta long olketa seleva olsem, “Sapos yumi sei, ‘God nao hemi givim paoa ya long Jon,’ bae hemi sei, ‘?Sapos olsem, waswe nao yufala no bilivim hem?’ ³² An yumi no save sei tu, ‘Man nomoa hemi givim paoa ya long hem.’” Olketa tok olsem bikos olketa fraet long olketa pipol, from olketa nao biliv wea Jon hemi tru profet. ³³ So olketa sei nomoa long Jisas, “Oo, mifala no save ya.” Nao Jisas hemi tok olsem long olketa moa, “Sapos olsem, mi tu bae mi no talem yufala abaotem watkaen paoa nao mi garem fo duim olketa samting ya.”

¹ Long taem ya, Jisas hemi talem olketa moa samfala tokpiksa. Hemi sei, “Wanfala man hemi plantem wanfala plantesin long grep tri. Hemi wakem wanfala fens raonem plantesin ya, an hemi mekem wanfala ples fo wakem waen long hem an hemi wakem wanfala hae gadhaos long hem tu. Bihaen, hemi letem samfala man fo haerem plantesin blong hem ya. An hemi go fo stap long nara ples. ² Nao kasem taem wea olketa frut olketa redi fo tekem, man ya hemi sendem go wanfala wakaman blong hem nao fo tekem kambaek wanem olketa man hu i haerem plantesin ya olketa mas peim long hem. ³ Bat olketa kasholem wakaman ya nomoa, an olketa ki-kilim hem an sendem hem gobaek nating nomoa. ⁴ So man ya hemi sendem go nara wakaman blong hem moa, an distaem olketa kilim wakaman ya long hed blong hem an olketa barava spoelem hem nao. ⁵ So man ya hemi sendem go moa nara wakaman blong hem, bat olketa kilim hem dae nomoa. An plande wakaman blong hem moa, semsamting ya nomoa hemi hapen long olketa, wea samfala olketa ki-kilim olketa an samfala olketa kilim olketa dae. ⁶ Nao go-go, man ya hemi garem wanfala man nomoa hemi stap, hem ya nao san blong hem wea hemi lavem hem tumas. So hemi sendem hem olsem laswan fo go long olketa nao, wea hemi tingse, ‘Bae olketa tinghae long san blong mi ya.’ ⁷ Bat olketa man hu i haerem plantesin ya olketa tok olsem tugeta long olketa seleva nao, ‘Hem nao man hu bae hemi sensim dadi blong hem fo onam plantesin ya. Yumi mas kilim hem dae, mekem plantesin ya hemi blong yumi nao.’ ⁸ So olketa kasholem disfala man ya nomoa an olketa kilim hem dae nao, an olketa torowem go aotsaet long plantesin ya.” ⁹ Nao Jisas hemi askem olketa olsem moa, “?Wanem nao bae man hu hemi onam plantesin ya hemi duim? Bae hemi kam kilim olketa man ya fo dae, an bae hemi letem olketa nara man nao fo haerem plantesin ya moa. ¹⁰ ?Waswe, yufala nating ridim nomoa wanem Buktambu hemi sei? ‘Disfala ston wea olketa man fo wakem haos olketa no laekem, hemi kamap barava nambawan ston long haos nao. ¹¹ Disfala samting ya God nao hemi duim, an hemi barava lukgud tumas long ae blong yumi.’” ¹² Nao olketa lida blong olketa pipol blong Jiu olketa wande fo kasholem Jisas, bikos olketa luksave dat toktok blong hem ya i barava agensim olketa stret. Bat olketa fraet nomoa long olketa pipol ya, so olketa lusim hem an go nomoa. ¹³ Nao olketa lida blong olketa pipol blong Jiu olketa sendem samfala Farasi an samfala man blong seksin blong King Herod fo go long Jisas, mekem olketa askem hem samfala kuestin fo trikim hem. ¹⁴ So olketa kam long hem an olketa sei, “Tisa, mifala save dat yu wanfala stretfala man ya. An yu no save wari nomoa long enikaen tingting blong man nomata hemi bikman, an yu tisim nomoa tru samting abaotem wei blong God. ?So waswe, hemi oraet nomoa long Lo blong yumi fo yumi peim go taks long bikfala King long Rom o nomoa?” ¹⁵ Bat Jisas hemi luksave finis wea olketa wande fo trikim hem nomoa, so hemi sei olsem, “?Waswe nao yufala wande fo trikim mi? Yufala tekem kam wanfala seleni mekem mi lukim.” ¹⁶ So olketa givim long hem, an hemi askem olketa olsem, “?Piksa an nem blong hu nao hemi stap long seleni ya?” Nao olketa sei, “Hemi bikfala King long Rom ya.” ¹⁷ So Jisas hemi sei long olketa nao, “Sapos olsem, samting wea hemi blong bikfala King ya, yufala mas givim gobaek long hem. An wanem hemi blong God, yufala mas givim gobaek long hem.” Taem olketa herem diswan nomoa, olketa barava sapraes fogud long Jisas nao. ¹⁸ Bihaen moa, samfala Sadiusi olketa kam long Jisas. Olketa ya, olketa talem man hemi no save laefbaek moa, so olketa askem Jisas olsem, ¹⁹ “Tisa, Mosis hemi raetem finis wanfala lo fo yumi wea hemi sei, ‘Sapos wanfala man hemi dae from waef blong hem taem tufala no garem eni pikinini yet, bae brata blong hem hemi mas sensim hem an maritim moa disfala woman ya. Long wei ya, bae olketa pikinini blong tufala ya bae olketa kamap olsem olketa pikinini blong nara brata hu hemi dae finis ya.’ ²⁰ Nao, sevenfala brata olketa stap. Fasbon brata hemi maritim wanfala woman, bat hemi no garem eni pikinini nomoa an hemi dae. ²¹ Bihaen, mektu brata hemi maritim moa wido woman ya, an hem tu hemi no garem eni pikinini nomoa an hemi dae. Semsamting tu hemi hapen long mektri brata, ²² go-go sevenfala brata ya evriwan olketa maritim nomoa wido woman ya, an olketa no garem eni pikinini an olketa dae evriwan. Bihaen nomoa, wido woman ya hemi dae tu. ²³ ?Nao long taem wea evriwan i laefbaek moa, bae woman ya hemi barava waef blong hu nao long olketa ya? Bikos sevenfala brata ya nao evriwan bin maritim disfala woman ya.” ²⁴ Nao Jisas hemi ansarem olketa olsem, “Ating yufala ya, yufala nating save long Buktambu an yufala nating save long paoa blong God ya, dastawe yufala garem rong tingting olsem. ²⁵ Long taem wea evriwan olketa laefbaek moa, bae olketa man an woman olketa no save marit moa. Bat bae olketa stap nomoa olsem olketa enjel long heven. ²⁶ Nao abaotem wei wea man hemi laefbaek moa, ating yufala nating ridim nomoa long buk blong Mosis abaotem smolfala tri wea faea hemi bone olobaot long hem. Long taem ya, God hemi talem Mosis olsem, ‘Mi nao mi God blong Ebraham an Aesak an Jekob ya.’ ²⁷ An God ya hemi no God blong man wea hemi dae ya, bat hemi God blong man wea hemi laef. !So yufala barava rong nao ya!” ²⁸ Nao wanfala tisa blong Lo hemi stap hu hemi lisin long olketa toktok ya long Jisas an olketa Sadiusi. An hemi herem dat Jisas hemi givim gudfala ansa nao long olketa. So hemi kam long Jisas an hemi askem hem olsem, “?Watkaen lo nao hemi nambawan long evri lo?” ²⁹ Nao Jisas hemi sei, “Nambawan lo hemi olsem, ‘Yufala pipol blong Israel, yufala mas lisin gudfala. Masta hu hemi God blong yumi, hem nomoa hemi Masta. ³⁰ An yu mas lavem God Masta blong yu, long evrisamting long maen blong yufala, an long evri tingting blong yufala, an long evri strong blong yufala.’ ³¹ An mektu lo wea hemi nambawan moa hemi olsem, ‘Yu mas lavem tu olketa wantok blong yu long sem wei yu lavem yu seleva.’ No eni lo moa hemi bikfala winim tufala lo ya.” ³² Nao tisa blong Lo ya hemi talem long Jisas olsem, “!Tru tumas ya Tisa! Samting yu talem hemi barava tru ya, wea yu sei wanfala God nomoa hemi stap, an no eni narawan moa. ³³ An yumi mas lavem God long ful maen blong yumi, an long evri save blong yumi, an long evri strong blong yumi. An yumi mas lavem tu olketa wantok blong yumi long sem wei yumi lavem yumi seleva. Tufala lo ya nao barava nambawan winim evri sakrifaes wea yumi bonem, an olketa nara sakrifaes tu.” ³⁴ Jisas hemi luksave nao dat man ya barava waes tumas taem hemi ansarem olketa toktok blong hem. So Jisas hemi talem hem olsem, “Man, yu kolsap insaet long kingdom blong God.” Bihaen nomoa, evriwan olketa fraet fo askem kuestin long Jisas moa. ³⁵ Taem Jisas hemi gohed fo tisim olketa pipol insaet long disfala Tambuhaos blong God, hemi askem olketa olsem, “?Waswe nao olketa tisa blong Lo olketa sei disfala Mesaea bae hemi bon kam long laen blong King Deved nomoa? ³⁶ Bikos Holi Spirit hemi givim tingting long King Deved fo hemi sei, ‘God hemi tok long Masta blong mi olsem, “Yu sidaon kam long raetsaet blong mi. An bae mi putum olketa enemi blong yu andanit long paoa blong yu.”’ ³⁷ Nao Deved hemi kolem disfala Mesaea ya Masta blong hem. ?So hao nao man hu hemi bon kam long laen blong Deved hemi save kamap Masta blong hem moa?” Nao plande pipol hu olketa herem toktok blong Jisas ya olketa barava hapi tumas long hem. ³⁸ Nao taem ya, Jisas hemi gohed fo tisim olketa olsem, “Yufala mas lukaot long olketa tisa blong Lo, hu i praod fo werem olketa longfala kaleko, an taem olketa wakabaot go long maket, olketa laekem olketa pipol fo mekhae long olketa. ³⁹ An taem olketa go long preahaos an long taem blong fist, olketa laekem tumas fo sidaon long olketa nambawan ples nomoa. ⁴⁰ An olketa save ravem tu evrisamting blong olketa wido woman. An nomata olsem, olketa save mekem longfala prea fo laea long olketa pipol. !Yufala save, panis blong olketa bae hemi bik tumas moa ya!” ⁴¹ Taem Jisas hemi sidaon kolsap long boks fo putum koleksin long hem wea hemi stap insaet long Tambuhaos ya, hemi lukim plande pipol nao olketa putum seleni blong olketa insaet. An plande ris man nao olketa putum plande seleni tumas. ⁴² An long taem ya tu, hemi lukim wanfala wido woman hemi kam. Woman ya hemi pua fogud an hemi putum go tufala blaksens nomoa. ⁴³ Nao Jisas hemi kolem olketa disaepol blong hem fo kam an hemi sei long olketa, “Mi talem yufala tru samting nao, wanem pua woman ya hemi putum, hem nao hemi barava bikfala winim moa olketa seleni wea olketa nara man ya olketa putum. ⁴⁴ Bikos olketa nara man ya, olketa putum nomoa lelebet haf long olketa risis blong olketa. Bat disfala woman wea hemi no garem naf samting, hemi putum nao evrisamting wea hemi garem fo laef long hem.”

¹ Taem Jisas hemi lusim Tambu haos ya nomoa, wanfala long olketa disaepol blong hem, hemi talem hem olsem, “!Tisa, lukim olketa nambawan haos long Tambuhaos ya wetem olketa naesfala ston long hem!” ² Nao Jisas hemi ansarem hem olsem, “Yu lukim olketa bikfala haos ya. Bat mi talem long yu, olketa wol long ston ya bae olketa brekemdaon finis ya, an bae no eni lelebet ston nao hemi save stap long ples wea hemi stap long hem distaem.” ³ Wanfala taem, Jisas hemi sidaon long hil blong Oliv tri wea olketa save luk stret kam long Tambuhaos ya. Nao Pita an Jemes an Jon an Andru olketa kam seleva long Jisas an askem hem olsem, ⁴ “?Wataem nao bae olketa samting ya hemi hapen? ?An watkaen saen nao bae hemi kamap fo somaot dat olketa samting ya hemi kolsap kamtru?” ⁵ Nao Jisas hemi ansarem olketa olsem, “Yufala mas lukaot gudfala, nogud eniwan hemi trikim yufala. ⁶ Bikos bae plande pipol olketa yusim nem blong mi, an bae olketa sei, ‘!Mi nao ya!’ An bae plande pipol nao i bilivim olketa. ⁷ Bae yufala herem noes blong olketa woa kolsap long yufala, an bae yufala herem tu olketa nius abaotem olketa woa long olketa farawe ples. Bat yufala no wari tumas, bikos olketa samting ya mas hapen olsem nao, bat diswan hemi no minim wea hemi en blong disfala wol yet ya. ⁸ Bae olketa pipol long wanfala ples olketa faetem olketa pipol long nara ples, an wanfala kantri bae hemi faetem nara kantri. An bae olketa etkuek hemi sekem plande ples long wol, an bae bikfala taem blong hanggre hemi kasem plande pipol long wol tu. Bat olketa samting ya, hemi olsem taem woman hemi jes stat fo filsoa fo bonem pikinini. ⁹ “Yufala mas lukaot, bikos bae olketa tekem yufala go long kot, an bae olketa ki-kilim yufala moa insaet long olketa preahaos. An bikos olketa laek fo spoelem nem blong mi, bae olketa kotem yufala long ae blong olketa primia an olketa king tu. So bae yufala mas talemaot nao Gudnius long olketa ya, ¹⁰ bikos Gudnius ya olketa mas talemaot long evri pipol long wol bifoa Lasde hemi kam. ¹¹ An taem olketa kasholem yufala an tekem yufala go long kot, yufala no wari tumas long wanem bae yufala talem. Long taem ya, yufala mas talemaot stret nao toktok wea hemi kam long tingting blong yufala, bikos bae yufala no toktok seleva ya, bat Holi Spirit nao bae hemi toktok long maen blong yufala. ¹² An bae olketa pipol save givim olketa brata blong olketa fo go long han blong olketa enemi, fo kilim olketa dae. An bae olketa dadi tu save givim olketa pikinini blong olketa fo dae olsem moa. Olketa pikinini tu olketa save go agensim mami an dadi blong olketa, an givim olketa go long han blong olketa enemi, fo kilim olketa dae. ¹³ An bae evri pipol nao olketa heitem yufala, bikos yufala i blong mi. Bat eniwan hu hemi gohed fo stap strong olowe kasem en, bae God hemi sevem hem.” ¹⁴ Jisas hemi sei moa, “Bae yufala save lukim wanfala nogud samting tumas wea hemi save spoelem God, bae hemi stanap insaet long ples wea hemi no fitim hem.” Eniwan hu hemi ridim disfala toktok ya hemi mas save gudfala long mining blong hem. “Oraet, long taem ya, olketa pipol hu i stap long provins long Jiudia olketa mas ranawe go fo haed long olketa maonten nao. ¹⁵ An eniwan hu hemi stap aotsaet long haos blong hem, hemi mas no go insaet long haos moa fo tekem samfala samting blong hem. ¹⁶ An eniwan hu hemi stap kam long gaden blong hem, hemi mas no gobaek long haos moa fo tekem kaleko blong hem. ¹⁷ !An olketa woman hu i babule o garem olketa smolfala pikinini wea olketa susu yet long taem ya, olketa mas lukaot! ¹⁸ Bat yufala mas prea, mekem olketa samting ya hemi no kasem yufala long taem blong kol. ¹⁹ Bikos disfala trabol ya, bae hemi nogud tumas moa winim eni trabol bifoa kam, stat long taem God hemi mekem disfala wol ya, kam kasem tude. An nomata long bihaen, bae no eni bikfala trabol olsem moa hemi kam. ²⁰ Sapos God hemi no katemsot taem blong bikfala trabol ya, bae no eniwan hemi save laef nao ya. Bat bikos God hemi tingim olketa pipol wea hemi siusim olketa finis, bae hemi katemsot disfala taem ya. ²¹ “Long taem ya, sapos eniwan hemi sei long yufala, ‘Lukim, Mesaea nao long hia,’ o hemi sei, ‘Lukim, hem nao longwe,’ yufala mas no bilivim hem. ²² Bikos olketa laea Mesaea an olketa laea profet bae olketa kamap. An bae olketa mekem olketa saen an olketa mirakol wea olketa trae fo trikim olketa pipol wea God hemi siusim olketa finis. ²³ Hem nao mi talem yufala abaotem wanem bae hemi hapen. !So yufala mas lukaot!” ²⁴ An Jisas hemi sei moa, “Bihaen disfala taem blong bikfala trabol ya nomoa, bae san hemi stat fo dak nao, an bae mun tu hemi no save saen kam moa. ²⁵ An bae olketa sta long skae olketa foldaon an evri strongfala samting long skae bae olketa seksek nao. ²⁶ Bihaen nomoa, bae olketa save lukim dat mi San Blong Man, bae mi kambaek antap long olketa klaod long skae wetem saen blong bikfala paoa blong God. ²⁷ An long taem ya nomoa, bae mi sendem olketa enjel fo go long evri ples long disfala wol ya, stat long wanfala en go-go kasem nara en, fo olketa tekem kam olketa pipol wea mi siusim olketa finis.” ²⁸ Jisas hemi sei moa, “Long wei blong fig tri nao mi garem wanfala tising wea yufala mas lanem. Taem olketa brans blong hem olketa stat fo grou an olketa lif blong hem olketa stat fo kamaot niufala moa, yufala save dat taem fo evrisamting fo grou gudfala hemi kam kolsap nao. ²⁹ Long semkaen wei tu, taem yufala lukim olketa samting ya hemi stat fo hapen, yufala save dat hemi kolsap tumas fo kam nao. ³⁰ An mi talem yufala tru samting, bae evrisamting ya hemi hapen taem samfala pipol blong distaem olketa no dae yet. ³¹ Skae wetem disfala wol bae hemi finis nomoa, bat toktok blong mi bae hemi nating save finis.” ³² Jisas hemi sei moa, “De blong olketa samting an taem blong hem ya, no eniwan hemi save long hem. Dadi nomoa hemi save, bat mi San blong hem wetem olketa enjel long heven, mifala no save tu. ³³ So yufala mas lukaot gudfala, an evritaem yufala mas redi nomoa, bikos yufala nating save long taem blong olketa samting ya. ³⁴ Bae hemi olsem wanfala man hu hemi redi fo go long nara ples. Bifoa hemi goawe from haos blong hem, hemi putum evrisamting blong hem long han blong olketa wakaman blong hem, wea hemi givim deferen kaen waka fo evriwan. An hemi talem long man hu hemi lukaftarem geit wea hemi mas lukaot gudfala. ³⁵ Nao long sem wei ya, yufala tu mas lukaot gudfala, bikos yufala no save wataem nao masta blong haos ya bae hemi kambaek long hem. Maet hemi kambaek long ivining o long midol long naet o long eli moning taem kokorako hemi krae o maet long taem wea san hemi kamap. ³⁶ Nogud yufala seknomoa taem hemi kambaek an lukim dat yufala barava slip nomoa. ³⁷ So wanem mi talem long yufala distaem, mi talem tu fo evriwan. !Yufala mas lukaot olowe!”

¹ Nao tufala de nomoa hemi stap bifoa hemi kasem taem blong Fist blong Pasova an Bikde blong Bred wea hemi No Garem Eni Yist long hem. Nao olketa hedprist an olketa tisa blong Lo olketa traehad fo tingim wanfala wei fo kasholem Jisas haed an fo kilim hem dae. ² Bat olketa sei moa, “Yumi mas no kasholem hem long olketa bikde ya, nogud olketa pipol i statem bikfala raoa.” ³ Long taem ya, Jisas hemi stap long Betani long haos blong Saemon wea hemi bin garem ravis sik blong skin bifoa. Nao taem hemi gohed fo kaikai, wanfala woman hemi kam long hem. Woman ya hemi tekem kam wanfala nambawan botol blong oel wea hemi smelgud tumas an wea hemi dia tumas tu. An hemi openem botol ya, an kapsaetem oel antap long hed blong Jisas nao. ⁴ Bat taem samfala pipol lukim diswan, olketa kros long hem an olketa toktok tugeta long olketa seleva olsem, “?Ei, waswe nao woman ya hemi spoelem nomoa gudfala oel ya olsem? ⁵ Sapos hemi salem, bae hemi save kasem winim 300 seleni, wea hemi save givim long olketa pua pipol.” An olketa barava tokspoelem woman ya nao. ⁶ Bat Jisas hemi talem olketa olsem, “!Ei, yufala no stopem woman ya! ?Waswe nao yufala tokspoelem hem? Gudfala samting nao hemi duim fo mi ya. ⁷ Olketa pua pipol ya, olketa stap olowe nomoa wetem yufala ya, so yufala save helpem olketa long enitaem yufala laekem nomoa. Bat mi ya, bae mi no stap olowe wetem yufala. ⁸ Woman ya hemi duim gudfala samting ya, wea hemi kapsaetem oel long bodi blong mi fo mekem mi redi fo taem wea bae olketa berem mi. ⁹ Mi talem yufala tru nao, long evri ples long disfala wol wea bae olketa talemaot Gudnius ya long hem, bae olketa stori tu abaotem wanem disfala woman hemi duim, an bae olketa save tingim hem.” ¹⁰ Nao bihaen, Jiudas Iskariot, hu hemi wanfala man long olketa tuelfala disaepol ya, hemi go long olketa hedprist from hemi laek fo givim go Jisas long han blong olketa. ¹¹ Taem olketa herem nomoa, olketa barava hapi tumas, an olketa promisim hem dat bae olketa givim hem samfala seleni. Nao stat long taem ya, Jiudas hemi trae fo tingim wei wea hemi save givim Jisas go long han blong olketa. ¹² Nao taem hemi kasem fas de long olketa Bikde blong Bred wea hemi No Garem Eni Yist long hem, hemi taem tu fo olketa kilim dae olketa smolfala sipsip fo kaikai blong Pasova. Nao olketa disaepol blong Jisas olketa askem hem olsem, “?Waswe, long wea nao yu laekem mifala fo go an mekredi long disfala kaikai blong Pasova fo yu?” ¹³ Nao Jisas hemi sendem go tufala disaepol blong hem an hemi sei, “Yutufala go long biktaon ya, an bae yutufala mitim wanfala man hu hemi karim bikfala botol long wata. Yutufala mas go bihaen long hem, ¹⁴ go-go yutufala kasem haos wea hemi go insaet. An bae yutufala talem olsem long man wea hemi onam haos ya, ‘Tisa nao hemi askem yu kam olsem, ?Wea nao rum fo mi wetem olketa disaepol blong mi bae mifala kaikaim disfala kaikai blong Pasova long hem?’ ¹⁵ Bae hemi tekem yutufala fo go long wanfala bikfala rum wea hemi stap antap, wea evrisamting blong hem hemi stap finis. Long ples ya nao bae yutufala mekredi long olketa samting fo yumi.” ¹⁶ So taem tufala disaepol ya go insaet long biktaon ya nomoa, tufala lukim evrisamting hemi hapen olsem Jisas hemi bin talem. So tufala gohed nao fo mekredi long kaikai blong Pasova. ¹⁷ Long ivining nomoa, Jisas wetem tuelfala disaepol olketa kam nao. ¹⁸ An taem olketa gohed fo kaikai, Jisas hemi tok olsem long olketa, “Mi talem yufala tru samting nao, bae wanfala long yufala hu hemi kaikai wetem mi distaem, hem nao bae hemi givim mi go long han blong olketa enemi blong mi.” ¹⁹ Long taem ya, olketa sore tumas nao. An evriwan olketa gohed nao fo askem Jisas olsem, “?Waswe, nogud yu tingse mi nao ya?” ²⁰ So hemi sei moa, “Man ya hemi wanfala long yufala olketa tuelfala disaepol hu hemi tekem kaikai long plet tugeta wetem mi. ²¹ Mi San Blong Man, mi mas dae olsem Buktambu hemi talem kam. !Bat disfala man wea bae hemi givim mi go long han blong olketa enemi blong mi, hemi mas lukaot! !Moabeta sapos disfala man hemi no bon nomoa!” ²² Taem olketa gohed fo kaikai, Jisas hemi holem wanfala bred an hemi talem tengkiu long God nao. Hemi brekem bred ya an hemi givim go long olketa an hemi sei, “Yufala kaikaim, hem ya nao bodi blong mi.” ²³ Nao Jisas hemi holem wanfala kap long waen an hemi talem tengkiu long God. An hemi givim go long olketa, an evriwan olketa dringim. ²⁴ Nao hemi sei olsem, “Hem ya nao blad blong mi wea hemi mekem disfala spesol agrimen blong God hemi kamtru, an wea hemi ranaot fo sevem plande pipol. ²⁵ Mi talem yufala tru samting nao, bae mi no dringim moa waen ya, go-go kasem taem wea mi dringim niufala waen insaet long kingdom blong God.” ²⁶ Taem ya, olketa singim wanfala singsing, an bihaen ya, olketa goaot nao long hil ya long Oliv tri. ²⁷ Nao Jisas hemi tok long olketa olsem moa, “Bae yufala evriwan ranawe from mi, bikos toktok blong God insaet long Buktambu hemi sei, ‘Bae God hemi kilim dae man hu hemi lukaftarem sipsip, an bae olketa sipsip i ranawe olobaot.’ ²⁸ Bat mi, bihaen mi laefbaek moa, bae mi go fastaem long yufala long Galili.” ²⁹ So Pita hemi tok long hem olsem, “!Nomata sapos olketa ranawe from yu, mi nao mi no save fo duim diswan ya!” ³⁰ Bat Jisas hemi sei long hem, “Pita, mi talem yu tru samting ya, bae long disfala naet, taem kokorako hemi no krae mektu taem yet, bae trifala taem nao yu talem yu nating save long mi.” ³¹ Nao Pita hemi tokstrong moa olsem, “!Nomoa ya, nomata olketa kilim mi dae wetem yu, bae mi no save sei mi no save long yu!” An evri disaepol olketa talem semsamting tu. ³² Nao olketa kasem wanfala ples nem blong hem Getsemani, an Jisas hemi sei long olketa disaepol olsem, “Yufala sidaon long hia, mekem mi go fo prea.” ³³ Bat hemi tekem Pita, Jemes an Jon fo go wetem hem. An long taem ya, Jisas hemi filnogud tumas an tingting blong hem hemi barava dak fogud nao. ³⁴ So hemi sei long trifala ya olsem, “Oo, sore blong mi hemi bikfala tumas nao, an kolsap mi dae long hem. Yufala mas stap long hia fo lukaot.” ³⁵ An Jisas hemi go farawe lelebet from olketa, an hemi nildaon long graon an hemi prea. Hemi askem God, sapos hemi garem eni deferen wei fo mekem disfala hadtaem ya fo no kasem hem. ³⁶ So hemi prea olsem, “Oo Aba, Dadi blong mi, yu nao garem paoa fo duim evrisamting nomoa. Plis yu no letem mi fo safa long diskaen wei ya. Bat yu no falom wanem mi laekem, bat yu falom nomoa wanem yu laekem.” ³⁷ Jisas hemi gobaek long trifala disaepol ya an hemi lukim olketa sislip nomoa. So hemi tok long Pita olsem, “?Waswe Saemon, yu slip nomoa? ?Hao nao yu no save lukaot wetem mi, nomata fo wan aoa nomoa? ³⁸ Yufala mas lukaot olowe an prea, mekem no enisamting save traem yufala. Bikos hemi tru, tingting blong man hemi wiling, bat bodi blong hem nao hemi wik.” ³⁹ Bihaen, Jisas hemi gobaek moa fo prea an hemi gohed fo talem semsamting nomoa. ⁴⁰ Nao taem hemi kambaek moa, hemi lukim trifala ya gohed fo slip nomoa, bikos ae blong trifala barava hevi fogud nao. Bat trifala no talem enisamting long hem. ⁴¹ An taem Jisas hemi kambaek moa long mektri taem, hemi sei long trifala ya olsem, “!Maewat! ?Yufala go-gohed fo res an slip yet ya? !Naf nao! Hemi kasem taem fo olketa givim mi San Blong Man, go long han blong olketa pipol wea olketa garem sin ya. ⁴² !Stanap, yumi go nao! Lukim, disfala man hu bae hemi givim mi go long han blong olketa, hemi kam nao.” ⁴³ Taem Jisas hemi gohed fo toktok yet, Jiudas hu hemi wanfala long tuelfala disaepol ya, hemi kam nao. An olketa hedprist an olketa tisa blong Lo an olketa nara bikman nao, olketa bin sendem kam plande man wetem Jiudas, wea olketa holem kam olketa naef fo faet wetem olketa stik fo faet. ⁴⁴ An Jiudas hemi bin talem olketa finis long wanfala saen wea hemi sei, “Man hu bae mi kisim, hem ya nao man wea yufala mas kasholem hem. An taem yufala tekem hem go, yufala mas holem hem strong.” ⁴⁵ So semtaem Jiudas hemi kasem ples ya nomoa, hemi go long Jisas nao an hemi sei, “!Tisa!” An semtaem hemi kisim hem nao. ⁴⁶ So olketa ya i kam an kasholem Jisas nao. ⁴⁷ Bat taem ya, wanfala long olketa disaepol hu hemi stap kolsap nomoa, hemi tekem naef fo faet blong hem an hemi katemaot wanfala ia blong wanfala wakaman blong Haeprist. ⁴⁸ Nao Jisas hemi sei long olketa olsem, “?Waswe, yufala tingse mi man fo mekem trabol ya, mekem yufala kam fo kasholem mi wetem olketa naef an stik fo faet? ⁴⁹ Evri de nao mi stap wetem yufala insaet long Tambuhaos blong God fo tisim olketa pipol, bat yufala nating kasholem mi nomoa. Bat olketa samting ya, hemi mekem Buktambu hemi kamtru nao.” ⁵⁰ Long semtaem nomoa, evri disaepol olketa lusim Jisas an olketa ranawe nao. ⁵¹ Bat wanfala yangman nao hemi go bihaen long Jisas, wea hemi werem nomoa wanfala lavalava. An taem olketa ya traehad fo kasholem hem, ⁵² hemi lusim lavalava blong hem, an hemi ranawe neket go nao. ⁵³ Bihaen, olketa tekem Jisas go nao long haos blong Haeprist. Long ples ya, olketa hedprist an olketa tisa blong Lo an olketa nara bikman moa olketa hipap long hem. ⁵⁴ Pita hemi go bihaen long olketa, bat hemi no wakabaot kolsap long olketa. Hemi go insaet long eria long midol long bikfala haos blong Haeprist ya, an hemi sidaon wetem olketa sekiuriti blong Haeprist an hemi gohed fo hotem bodi blong hem long faea nao. ⁵⁵ Nao olketa hedprist wetem evri memba long Kansol, olketa barava traehad fo faendem eni stori agensim Jisas, mekem olketa save jajem hem fo kilim hem dae. Bat olketa no save faendem enisamting agensim hem. ⁵⁶ Plande man nao olketa stanap fo talem laea stori abaotem Jisas, bat toktok blong olketa nao hemi nating wankaen. ⁵⁷ Bihaen, samfala man olketa stanap an laea olsem, ⁵⁸ “Mifala herem disfala man hemi sei, ‘Mi ya, bae mi brekemdaon nomoa disfala Tambuhaos ya, wea olketa man olketa bin mekem. An insaet trifala de nomoa, bae mi wakem wanfala niuwan moa, wea man hemi no save mekem.’” ⁵⁹ Bat nomata olsem, olketa stori wea olketa talem ya, hemi nating wankaen tu. ⁶⁰ Long taemya nomoa, Haeprist ya hemi stanap long midol long olketa, an hemi tok olsem long Jisas, “?Waswe, yu no garem eni ansa long olketa samting ya wea olketa talem agensim yu?” ⁶¹ Bat Jisas hemi stap kuaet nomoa, an hemi no talem enisamting. An Haeprist ya hemi askem hem olsem moa, “?Waswe, yu nao Kraes hu hemi San Blong God Antap?” ⁶² Nao Jisas hemi sei, “!Mi nao ya! An bae yufala save lukim dat mi San Blong Man, bae mi sidaon long raetsaet blong God hu hemi garem evri paoa, an bae mi kambaek antap long olketa klaod long skae.” ⁶³ Long taem ya, Haeprist hemi barava kros tumas, so hemi brekem kaleko blong hem, an hemi sei, “!Hemi naf nao! Yumi no lukaotem eni man moa fo tok agensim hem. ⁶⁴ Yufala herem seleva finis nao wea hemi tokspoelem God ya. ?So wanem nao yufala talem?” Nao olketa jajem hem an olketa sei, “Man ya hemi mas dae ya.” ⁶⁵ Nao samfala long olketa stat fo spit long hem, an samfala long olketa taemapem ae blong hem an hitim hem. An olketa askem hem olsem, “?Profet, hu nao hemi hitim yu?” An olketa sekiuriti tu olketa gohed fo hitim fes blong hem. ⁶⁶ Nao Pita hemi sidaon yet long eria ya long midol long haos ya. An long taem ya, wanfala haosgele blong Haeprist ya nao hemi kam. ⁶⁷ Taem hemi lukim Pita hu hemi gohed fo hotem bodi blong hem long faea ya nomoa, hemi lukstrong long hem an hemi sei, “Yu tu yu bin stap wetem Jisas blong Nasaret ya.” ⁶⁸ Bat Pita hemi sei, “!Nomoa ya! Mi nating save long wanem yu talem ya.” Bihaen nomoa, Pita hemi go stap kolsap long geit. An semtaem nomoa kokorako hemi krae nao. ⁶⁹ Nao haosgele ya hemi lukim hem moa, an hemi talem moa long olketa pipol hu i stanap long ples ya olsem, “Man ya hemi wanfala long olketa ya.” ⁷⁰ Bat Pita hemi sei moa, “Mi nating save long man ya.” Bihaen lelebet taem moa, olketa pipol ya hu i stanap long ples ya olketa talem Pita olsem moa, “Ya, hemi tru ya, yu nao wanfala long olketa, bikos yu man blong Galili tu ya.” ⁷¹ Bat Pita hemi sei, “!Tru antap long God nao! !Bae God hemi panisim mi sapos mi laea! !Mi nating save long disfala man yufala talem ya!” ⁷² Bat semtaem nomoa, kokorako hemi krae mektu taem moa. An taem ya nao Pita hemi tingimbaek toktok blong Jisas bifoa, wea hemi sei long hem, “Taem kokorako hemi no krae mektu taem yet, bae trifala taem nao yu talem yu nating save long mi.” So Pita hemi filnogud long hem nomoa an hemi krae fogud nao.

¹ Nao long eli moning yet, olketa hedprist an olketa tisa blong Lo an olketa nara bikman an evri memba long Kansol, olketa miting fo mekem wanfala plan nao. Olketa taemap han blong Jisas an olketa lidim hem an givim hem go long han blong Paelat. ² Nao Paelat hemi askem Jisas olsem, “?Waswe, so yu nao yu King blong olketa Jiu?” An Jisas hemi ansarem hem olsem, “Yu seleva nao yu talem olsem ya.” ³ Nao olketa hedprist olketa talem plande samting moa agensim Jisas. ⁴ So Paelat hemi askem Jisas olsem moa, “?Waswe nao yu no ansarem olketa? !Yu lukim, plande samting nao olketa gohed fo talem agensim yu!” ⁵ Bat Jisas hemi no talem enisamting nomoa. So Paelat hemi barava sapraes tumas long diswan nao. ⁶ Nao long evri Fist blong Pasova, olketa pipol save askem Paelat fo letem wanfala man fo goaot from prisin. ⁷ An long taem ya, samfala man nao olketa stap long prisin bikos olketa bin mekem wanfala bikfala faet agensim gavman, an olketa kilim wanfala man i dae. An wanfala long olketa nao nem blong hem Barabas. ⁸ Nao olketa pipol kam long Paelat an askem hem fo duim diskaen wei wea hemi save duim oltaem. ⁹ So Paelat hemi askem olketa olsem, “?Waswe, yufala laekem mi fo letem disfala King blong yufala olketa Jiu nao fo hemi go fri?” ¹⁰ Hemi tok olsem bikos hemi save finis wea olketa hedprist nao olketa tekem kam Jisas long hem, from olketa joles tumas long hem. ¹¹ Bat olketa hedprist olketa gohed fo talem olketa pipol fo askem Paelat fo letem Barabas nao fo go fri. ¹² So Paelat hemi askem olketa moa, “?Sapos olsem, wanem nao bae mi duim long man ya, wea yufala sei hemi King blong yufala olketa pipol blong Jiu?” ¹³ Nao olketa singaot gobaek olsem, “!Nilam hem long kros!” ¹⁴ So Paelat hemi askem olketa moa, “?Watkaen samting nao hemi duim wea hemi rong?” Bat olketa singaot bikfala moa olsem, “!Nilam hem long kros!” ¹⁵ Nao Paelat hemi wande fo mekem olketa pipol fo hapi, so hemi letem Barabas fo go fri nao. An hemi talem olketa soldia fo wipim Jisas, an bihaen, hemi givim hem go long olketa fo nilam hem long kros. ¹⁶ Nao olketa soldia tekem Jisas go insaet long eria long midol long bikfala haos blong Paelat. An taem ya nomoa, olketa kolem olketa nara soldia fo kam wea olketa stap long ples ya. ¹⁷ Nao olketa mekem hem fo werem longfala red kaleko. An olketa mekem moa wanfala kraon long wankaen rop wea hemi garem plande nila long hem, an olketa putum long hed blong Jisas. ¹⁸ Bihaen ya, olketa gohed fo salutim hem an tok long hem olsem, “!Yu nao King blong olketa Jiu!” ¹⁹ An olketa hitim hed blong hem wetem stik an olketa spit long hem moa, an olketa nildaon long frant blong hem olsem fo mekhae long hem. ²⁰ An taem olketa mekfan long Jisas finis, olketa tekemaot longfala red kaleko ya from hem, an olketa mekem hem fo werem moa olketa kaleko blong hem seleva. Bihaen, olketa tekem hem go nao fo nilam hem long kros. ²¹ Taem olketa wakabaot go long rod, olketa mitim wanfala man wea nem blong hem Saemon hu hemi stap kam aotsaet long taon ya. Nao olketa soldia ya olketa fosim hem fo karim kros blong Jisas. Man ya, hemi kam from biktaon long Saerin an hemi dadi blong Aleksanda an Rufas. ²² Olketa tekem Jisas go long wanfala ples, nem blong hem Golgota, wea hemi minim “Bon blong hed blong man.” ²³ An olketa givim hem waen wea olketa miksim meresin insaet, bat Jisas hemi no dringim nomoa. ²⁴ Nao olketa soldia i nilam Jisas long kros, an olketa divaedem nao olketa kaleko blong hem long olketa seleva, wea olketa pleim daes fo faendemaot hu nao bae tekem olketa samting. ²⁵ Nao hemi naenklok long moning taem olketa nilam Jisas long kros. ²⁶ An olketa raetem wanfala notis fo somaot wanem olketa sei hemi duim rong. Olketa raetem olsem, “King blong olketa Jiu.” ²⁷ An tufala man fo mekem trabol, olketa nilam tu long tufala kros moa. Wanfala hemi stap long raetsaet blong Jisas an nara man long lefsaet blong hem. ²⁹ An olketa pipol hu i gopas long rod, olketa se-sekem hed blong olketa an olketa mekfan long hem, an olketa tok olsem, “!Hem nao ya! Yu nao sei yu save brekemdaon Tambu haos blong God a n wakembaek moa insaet trifala de nomoa. ³⁰ !Oraet, yu kamdaon nao from kros ya, mekem yu sevem yu seleva!” ³¹ An olketa hedprist an olketa tisa blong Lo, olketa mekfan long Jisas tu, olsem olketa pipol ya. Olketa sei long olketa seleva olsem, “Maewat, nara pipol nomoa hemi save sevem olketa, bat hemi no save sevem hem seleva. ³² ?Waswe, hem nao hemi disfala Kraes, King blong Israel? Sapos hemi kamdaon long kros ya distaem, oraet, bae yumi lukim an biliv long hem nao.” An tufala man ya tu wea olketa nilam tufala wetem Jisas, tufala tokspoelem hem fogud. ³³ Taem hemi kasem tuelklok long de nomoa, evri ples long kantri ya hemi tudak tumas nao. An diswan hemi go-gohed fo trifala aoa. ³⁴ Nao long triklok long aftanun nomoa, Jisas hemi singaot bikfala olsem, “!Eloi! !Eloi! ?Lama sabaktani?” wea hemi minim “!God blong mi! !God blong mi! ?Waswe nao yu lusim mi finis?” ³⁵ An samfala pipol wea olketa stanap long ples ya olketa herem toktok ya an olketa sei nao, “Ei, ating man ya hemi singaotem profet Elaeja ya.” ³⁶ Nao wanfala man hemi resis go fo tekem kam wanfala samting wea hemi save holem wata, an hemi mekem tuwet long waen wea hemi saoa. Bihaen, hemi putum go long longfala stik, an hemi givim goap long Jisas fo dringim an hemi sei, “!Weit! Yumi lukluk fastaem. Maet Elaeja bae hemi kam fo tekem hem aot from kros ya.” ³⁷ Nao Jisas hemi singaot bikfala nomoa an hemi dae nao. ³⁸ Long semtaem nomoa, disfala bikfala kaleko wea hemi hangdaon insaet long Tambuhaos ya, hemi brek long midol long hem nao, stat kam long antap go-go kasem long botom. ³⁹ An taem ya, wanfala bikman blong olketa soldia hemi stanap long frant blong kros ya. Taem hemi lukim hao nao Jisas hemi dae olsem, hemi sei nao, “!Disfala man ya hemi barava San Blong God tru ya!” ⁴⁰ An samfala woman tu olketa stanap farawe lelebet an lukluk go nomoa. Samfala long olketa nao, Meri blong Magdala, an Salome, an Meri hu hemi mami blong yangfala Jemes an Joses. ⁴¹ Trifala woman ya, olketa bin go wetem Jisas, an olketa bin helpem hem tumas taem hemi goraon long provins long Galili. An plande woman moa wea olketa bin kam long Jerusalem wetem hem, olketa stap tu long ples ya. ⁴² Nao hemi kolsap fo tudak an hemi de wea olketa save mekredi long evrisamting ya, from neks de hemi Sabat de. ⁴³ Taem ya, Josef blong Arimetia hemi kam. Hem nao hemi wanfala memba long Kansol an olketa pipol tinghae long hem tumas. An hem tu wanfala man hu hemi stap weit fo lukim kingdom blong God. So taem ya, Josef hemi lusim fraet nomoa an hemi go long Paelat, an hemi askem hem fo tekem nao bodi blong Jisas. ⁴⁴ Paelat hemi sapraes tumas taem hemi herem dat Jisas hemi dae kuiktaem olsem. So hemi kolem bikman blong olketa soldia an hemi askem hem olsem, “?Waswe, hemi tru wea Jisas hemi dae finis?” ⁴⁵ Nao taem Paelat hemi herem wanem bikman hemi talem nomoa, hemi letem nao Josef fo tekem bodi blong Jisas. ⁴⁶ So Josef hemi go nomoa an peim nao gudfala waet kaleko, an hemi aotem bodi ya long kros an paselem long kaleko nao. An hemi putum bodi ya insaet long wanfala kev wea olketa bin wakem insaet long bikfala ston. Bihaen, hemi rolem kam wanfala ston fo satem kev ya nao. ⁴⁷ An long taem ya, Meri blong Magdala an Meri mami blong Joses nao tufala lukim ples wea olketa putum bodi blong Jisas long hem.

¹ Taem Sabat de hemi finis nomoa, Meri blong Magdala an Salome an Meri mami blong Jemes, olketa go fo peim insens fo putum long bodi blong Jisas nao. ² Long fas de long wik ya, long eli moning taem san hemi jes stat fo kamap, olketa go nao long kev blong Jisas. ³ Nao olketa stat fo askem olketa seleva olsem, “?Waswe, hu nao bae hemi helpem yumi fo rolem go ston ya from kev ya?” ⁴ Bat taem olketa kasem ples ya nomoa, olketa lukim dat disfala bik ston ya olketa rolem go finis nao. ⁵ Nao taem olketa go insaet long kev ya, olketa lukim wanfala yangman hu hemi sidaon long raetsaet, wea hemi werem longfala kaleko wea hemi waet fogud. Taem ya nomoa, olketa woman ya i barava fraet fogud nao. ⁶ Bat yangman ya hemi tok long olketa olsem, “Yufala no fraet. Mi save dat yufala kam fo lukaotem Jisas blong Nasaret ya, wea olketa nilam hem long kros. Bat hemi no stap long hia nao, bikos hemi laefbaek finis. !Lukim! Hem nao ples wea olketa putum hem stap. ⁷ Nao yufala mas gobaek fo talem nius ya long Pita an olketa nara disaepol moa. An talem olsem long olketa, ‘Jisas hemi go fastaem long yufala long Galili nao. An long ples ya nao bae yufala save lukim hem, olsem hemi talem finis long yufala.’” ⁸ Nao taem olketa kamaot long kev ya nomoa, olketa ranawe nao bikos olketa barava fraet an seksek fogud. Bat olketa no talemaot enisamting long eniwan bikos olketa fraet tumas. ⁹ Long fas de long wik, long eli moning taem Jisas hemi laefbaek moa, hemi som hem seleva fastaem nao long Meri blong Magdala. Disfala woman ya nao Jisas hemi raosim sevenfala devol from hem bifoa. ¹⁰ Nao Meri blong Magdala hemi go an hemi talem diswan long olketa fren blong Jisas. Long taem ya, olketa stap nomoa fo sore an krae fo hem. ¹¹ An taem olketa herem hem sei hemi lukim dat Jisas hemi laefbaek finis, olketa barava no bilivim hem nao. ¹² Bihaen, Jisas hemi som hem seleva moa long tufala disaepol wea tufala gohed fo wakabaot long rod aotsaet long taon. Taem ya, tufala lukim Jisas hemi luk deferen nao. ¹³ Nao taem tufala kambaek, tufala talemaot nius ya long olketa nara disaepol, bat olketa no bilivim tufala tu. ¹⁴ An bihaen, Jisas hemi som hem seleva moa long levenfala disaepol blong hem taem olketa kaikai. Hemi barava tokstrong long olketa, bikos olketa no biliv long hem, an bikos hed blong olketa barava dak tumas fo bilivim olketa pipol wea olketa bin lukim hem taem hemi laefbaek moa. ¹⁵ Nao Jisas hemi tok olsem long olketa, “Yufala mas go long evri ples long disfala wol ya fo talemaot Gudnius long evri pipol. ¹⁶ An eniwan hu hemi biliv long Gudnius ya an hemi baptaes, hem nao God bae hemi sevem hem. Bat eniwan hu hemi no biliv, bae God hemi jajem hem. ¹⁷ An olketa pipol hu i biliv, bae God hemi givim paoa long olketa, mekem olketa save mekem olketa mirakol. Bae olketa save raosim olketa devol long nem blong mi, an bae olketa save toktok tu long enikaen langguis nomoa. ¹⁸ An nomata olketa holem poesen snek o dringim olketa poesen samting, bae olketa no save dae nomoa long hem. An bae olketa putum han blong olketa antap long olketa sikman, an bae olketa save gudbaek moa.” ¹⁹ Taem Jisas Masta blong olketa, hemi toktok long olketa finis nomoa, God hemi tekem hem go antap long heven nao. An hemi sidaon long raetsaet blong God. ²⁰ Nao bihaen nomoa, olketa disaepol olketa goaot nao, an olketa gohed fo talemaot Gudnius ya long evri ples. An Masta hemi helpem olketa, an hemi somaot dat wanem olketa tokabaotem ya hemi tru, bikos long semtaem, olketa save mekem plande mirakol long paoa blong hem.