LUK

LUK

¹ Plande pipol olketa traehad fo raetem abaotem olketa samting wea hemi bin gohed long mifala. ² Olketa raetem olketa samting wea mifala bin herem long olketa pipol hu i barava lukim olketa samting ya an hu i stat fo talemaot disfala Gudnius ya tu. ³ So, Bikman Tiofilas, mi tu mi bin traehad fo luksave gudfala abaotem evrisamting ya from taem olketa samting jes stat. So mi tingse hemi gud sapos mi raetem olketa samting ya long gudfala wei fo yu, ⁴ mekem yu save dat evrisamting wea yu bin lanem ya hemi barava truwan ya. ⁵ Long taem wea Herod hemi king ovarem kantri long Israel, Sekaraea nao hemi wanfala prist wea hemi stap long taem ya. Hemi stap long seksin blong olketa prist wea olketa kolem Abaeja. Waef blong hem tu hemi bon kam long laen blong Eron, an nem blong hem nao Elisabet. ⁶ Wei blong tufala ya hemi barava stret long ae blong God, bikos tufala barava falom nao evri lo an rul blong hem. ⁷ Bat tufala no garem eni pikinini, bikos Elisabet hemi no save babule an distaem tufala go-go fo olo fogud tu. ⁸ Long wanfala taem, hemi taem blong seksin blong Sekaraea fo duim olketa waka long disfala Tambuhaos blong God. So Sekaraea hemi gohed fo waka olsem olketa save duim evri de. ⁹ An falom kastom blong olketa prist, olketa mas rolem spesol ston fo faendemaot hu nao man fo go insaet long Tambuhaos ya fo bonem insens. An long taem ya, tufala ston somaot Sekaraea, so hem nao hemi go insaet long Tambuhaos ya. ¹⁰ An taem ya evri pipol olketa hipap long aotsaet, an olketa gohed fo prea long taem wea Sekaraea hemi bonem disfala insens ya. ¹¹ Nao wanfala enjel blong God hemi kam an stanap long raetsaet long disfala olta wea olketa save bonem insens long hem ya. ¹² Taem Sekaraea hemi lukim nomoa hemi sek nao, an hemi barava fraet fogud. ¹³ Bat enjel ya hemi tok olsem long hem, “Sekaraea, yu no fraet. God hemi herem prea blong yu finis nao, so bae waef blong yu Elisabet hemi bonem wanfala pikinini boe fo yu. An bae yu kolem hem Jon. ¹⁴ Bae yu hapi fogud an plande pipol tu bae olketa hapi fogud taem hemi bon. ¹⁵ Evriwan bae i hapi bikos bae hemi wanfala bikman long ae blong God, an bae hemi mas no dringim waen o enisamting olsem. An nomata taem hemi stap yet long bele blong mami blong hem, bae hemi fulap long Holi Spirit nao. ¹⁶ Bae man ya hemi mekem plande pipol blong Israel fo kambaek long Masta hu hemi God blong olketa. ¹⁷ An bae hemi wakabaot kam fastaem long Masta, an bae hemi garem semkaen tingting an semkaen paoa wea profet Elaeja hemi garem bifoa kam. An bae man ya hemi mekem olketa dadi fo lavem moa olketa pikinini blong olketa. An bae hemi mekem olketa pipol hu i no obeim God, fo olketa falom nomoa gudfala wei wea hemi stret long ae blong God. Bae hemi mekredi long olketa pipol blong Masta fo taem wea bae hemi kam.” ¹⁸ Taem ya, Sekaraea hemi tok olsem long disfala enjel nao, “?Hao nao mi save dat diswan bae hemi barava tru? Bikos mi ya, mi olo finis nao, an waef blong mi hemi olo finis tu ya.” ¹⁹ Nao enjel ya hemi tok olsem, “Mi enjel Gebriel ya, wea mi stap oltaem wetem God. An God nao hemi sendem mi kam fo toktok wetem yu, an fo talem yu disfala gudfala nius ya. ²⁰ Wanem mi bin talem, bae hemi kamtru long barava taem blong hem. Bat bikos yu nating bilivim nomoa, bae yu no save toktok nao, go-go kasem taem wea disfala samting hemi barava hapen.” ²¹ Long taem ya, olketa pipol gohed fo weit yet fo Sekaraea fo kamaot. An olketa barava sapraes tumas nao, from hemi stap longtaem tumas insaet long Tambuhaos ya. ²² Nao taem Sekaraea hemi kam aotsaet nomoa, hemi no save toktok wetem olketa pipol ya. So olketa save dat hemi bin lukim kam wanfala samting insaet long Tambuhaos ya. Long taem ya, hemi jes mekem saen nomoa fo olketa bikos hemi no save toktok nao. ²³ Taem disfala wik blong hem fo bonem insens hemi go finis, hemi gobaek long haos blong hem nao. ²⁴ An no longtaem nomoa, waef blong hem Elisabet hemi babule nao, an hemi stap kuaet nomoa long haos blong tufala fo faefala mans. An Elisabet hemi sei olsem, ²⁵ “Oo, distaem nao God hemi helpem mi. From hemi tingim mi nao, hemi mekem mi fo no filsem moa long ae blong olketa pipol.” ²⁶ Long meksiks mans bihaen Elisabet hemi babule, God hemi sendem enjel Gebriel go long Nasaret, wanfala taon long provins long Galili. ²⁷ Enjel ya hemi tekem go nius fo wanfala yang gele, wea olketa mektambu long hem fo hemi maritim wanfala man, nem blong hem Josef hu hemi bon kam long laen blong King Deved. Nem blong disfala yang gele ya nao Meri. ²⁸ So taem enjel ya hemi go kasem Meri, hemi sei, “Piis blong God hemi stap wetem yu. God hemi stap wetem yu an hemi blesim yu.” ²⁹ Bat Meri hemi wari fogud long toktok ya, an hemi traehad fo tingim wanem nao disfala toktok ya hemi minim. ³⁰ Nao enjel ya, hemi tok olsem long hem moa, “Meri, yu no fraet. God hemi barava hapi tumas wetem yu. ³¹ Bae yu babule, an bae yu bonem wanfala pikinini boe. An bae yu kolem nem blong hem Jisas. ³² Bae hemi wanfala bikman ya, an bae olketa kolem hem San Blong God Antap. An God Masta blong yumi, bae hemi mekem hem fo kamap wanfala king olsem olo blong hem Deved. ³³ An bae hemi rul ovarem olketa pipol blong Israel olowe, an disfala rul blong hem bae hemi no save finis.” ³⁴ Nao Meri hemi tok olsem, “?Bat mi ya, mi no bin stap wetem eni man ya, so hao nao bae diswan hemi save hapen?” ³⁵ Nao enjel ya hemi sei, “Bae Holi Spirit hemi kamdaon antap long yu, an bae paoa blong God Antap hemi stap wetem yu. So bikos hemi olsem, disfala pikinini bae hemi holi an bae olketa kolem hem “San Blong God”. ³⁶ Yu save long anti blong yu Elisabet, olketa sei bae hemi no save babule nao, bat distaem hemi babule long wanfala pikinini boe. An hemi meksiks mans blong hem nao ya, nomata hemi olo fogud. ³⁷ Yu save, no enisamting hemi had fo God fo duim ya.” ³⁸ Nao Meri hemi sei, “Mi ya, mi wakaman blong God ya, so letem samting ya hemi hapen long mi olsem yu talem nao.” Bihaen diswan nomoa, enjel ya hemi lusim Meri nao. ³⁹ No longtaem bihaen, Meri hemi hariap go nao long wanfala taon long eria antap long olketa hil long Jiudia. ⁴⁰ Taem hemi kasem ples ya, hemi go insaet long haos blong Sekaraea an hemi mitim Elisabet. ⁴¹ Taem Elisabet hemi herem toktok blong Meri nomoa, pikinini long bele blong hem, hemi seksek nao. An taem ya nomoa, Elisabet hemi fulap long Holi Spirit, ⁴² mekem hemi tok bikfala olsem, “!God hemi blesim yu winim evri nara woman moa, an hemi blesim go moa pikinini wea yu babule long hem! ⁴³ ?Waswe nao disfala bikfala samting tumas hemi hapen long mi, wea yu mami blong Masta blong mi, yu kam fo lukim mi? ⁴⁴ Yu save, semtaem mi herem toktok blong yu nomoa, pikinini long bele blong mi ya, hemi seksek nao from hemi hapi tumas. ⁴⁵ Yu mas hapi tumas ya, bikos yu bilivim olketa samting wea bae hemi kamtru, olsem God hemi bin talem long yu.” ⁴⁶ Nao Meri hemi tok olsem, “Long ful laef blong mi, mi preisim nem blong God. ⁴⁷ Long tingting blong mi, mi hapi tumas long God wea hemi sevem mi. ⁴⁸ Mi wakaman blong hem nomoa ya, bat nomata olsem, hemi gohed fo sore long mi. Stat long distaem, bae evri pipol olketa sei mi hapi tumas ya, ⁴⁹ from God wea hemi garem evri paoa, hemi duim olketa bikfala samting tumas fo mi. Nem blong hem hemi holi tumas. ⁵⁰ Hemi sore an kaen long olketa pipol hu i tinghae long hem, stat long evri pipol wea olketa stap kam bifoa, go-go kasem olketa wea olketa no bon kam yet. ⁵¹ Long paoa blong hem hemi duim olketa bikfala samting, hemi raosim olketa wea i praod tumas long tingting blong olketa. ⁵² An hemi pulum daon olketa king from paoa blong olketa, bat hemi haemapem olketa hu putum olketa seleva fo lou. ⁵³ Hemi helpem olketa hu i hanggre fo fulap wetem olketa gudfala samting, bat hemi mekem olketa hu i ris fo goawe wetem emti han nomoa. ⁵⁴ Hemi kam fo helpem olketa pipol blong Israel wea olketa i wakaman blong hem. ⁵⁵ An hemi no foget fo sore an kaen long Ebraham an long olketa long laen blong hem olowe, go-go hemi no save finis. Hemi duim diswan olsem hemi bin promisim olketa olo blong yumi bifoa kam nao.” ⁵⁶ Nao Meri hemi stap wetem Elisabet fo trifala mans. Bihaen, hemi gobaek moa long hom blong hem. ⁵⁷ Taem Elisabet hemi kasem taem blong hem nomoa, hemi bonem wanfala pikinini boe nao. ⁵⁸ An olketa hu stap kolsap long hem, an olketa long laen blong hem, evriwan barava hapi wetem hem nao, taem olketa herem dat God hemi kaen tumas long hem. ⁵⁹ Bihaen long mekeit de, olketa pipol kam hipap fo mekem pikinini ya fo kate. An taem ya tu, olketa laek fo kolem nem blong hem Sekaraea falom nem blong dadi blong hem. ⁶⁰ Bat mami blong hem, hemi sei, “Nomoa ya. !Nem blong hem Jon!” ⁶¹ Nao olketa pipol ya tok olsem long Elisabet, “Ei, yu no garem eni nem olsem long laen blong yu ya.” ⁶² Nao olketa mekem saen fo dadi blong pikinini ya, fo askem hem watkaen nem nao bae hemi givim long pikinini ya. ⁶³ So Sekaraea hemi mekem saen, fo olketa givim kam wanfala samting fo raet long hem, an hemi raetem olsem nao, “Nem blong hem Jon.” An long taem ya, olketa pipol i barava sapraes nao. ⁶⁴ Long semtaem nomoa, Sekaraea hemi save toktok nao, an hemi stat fo mekhae long God. ⁶⁵ Bihaen, olketa pipol hu i stap kolsap olketa fraet nao, an nius abaotem olketa samting ya hemi goraon long evriwea long eria antap long olketa hil long Jiudia. ⁶⁶ An evriwan hu olketa herem diswan olketa tingting abaotem an olketa sei, “?Bae pikinini ya hemi kamap olsem wanem nao ya?” Olketa tok olsem bikos olketa barava save nao dat paoa blong God hemi stap long pikinini ya. ⁶⁷ Nao dadi blong Jon, Sekaraea, hemi fulap long Holi Spirit, an God hemi mekem hem fo talemaot toktok blong hem, wea hemi sei, ⁶⁸ “!Yumi mekhae long Masta blong yumi, God blong Israel! Hemi kam fo helpem olketa pipol blong hem, an hemi mekem olketa fo stap fri moa. ⁶⁹ Hemi givim wanfala man long yumi hu hemi garem paoa fo sevem yumi, man ya hemi long laen blong King Deved, disfala wakaman blong God. ⁷⁰ Hemi bin promisim diswan long yumi long toktok blong olketa holi profet blong hem. ⁷¹ Hemi promis bae hemi sevem yumi from olketa enemi blong yumi, an from paoa blong olketa hu i heitem yumi. ⁷² Hemi promis fo sore an kaen long olketa olo blong yumi bifoa, an hemi tingim yet disfala spesol agrimen blong hem ya. ⁷³ Disfala promis wea God hemi mekem wetem olo blong yumi Ebraham, ⁷⁴ hemi promis fo sevem yumi from olketa enemi blong yumi, mekem yumi save mekhae long hem wea yumi nating fraet. ⁷⁵ An mekem yumi holi an stret fogud long ae blong hem long evri de long laef blong yumi.” ⁷⁶ An Sekaraea hemi sei moa, “Yu, pikinini blong mi, bae olketa kolem yu “Profet Blong God Antap”. Yu, bae yu go fastaem long Masta fo mekredi long rod fo hem. ⁷⁷ an fo talem olketa pipol blong hem wea bae hemi sevem olketa, taem hemi fogivim olketa from sin blong olketa. ⁷⁸ An hemi olsem bikos God blong yumi hemi barava sore an kaen tumas long yumi. So bae hemi kamdaon long yumi from antap ⁷⁹ olsem san hemi kamap an saen long olketa wea i stap long tudak, an andanit long paoa blong dae. An bae hemi lidim yumi go long rod, wea bae yumi kasem piis long hem.” ⁸⁰ Nao pikinini ya hemi grouap kam an tingting blong hem hemi kamap strong moa. An hemi stap long drae eria go-go kasem taem wea hemi statem waka blong hem long midol long olketa pipol blong Israel.

¹ Long disfala taem ya, bikfala King long Rom wea nem blong hem nao Ogastas, hemi mekem wanfala lo wea olketa mas mekem wanfala sensas long evri kantri wea olketa stap andanit paoa blong hem. ² Diswan hemi fas sensas olketa mekem ya an hemi gohed taem Kuaerinias hemi Primia long provins long Siria. ³ So olketa pipol evriwan i mas go long barava homtaon blong olketa seleva, mekem gavman save raetemdaon nem blong olketa. ⁴ Nao Josef hemi bon kam long laen blong King Deved, so hemi lusim taon long Nasaret long provins long Galili an hemi go long taon long Betlehem long provins long Jiudia, bikos hem nao ples wea King Deved hemi bon kam long hem. ⁵ Josef hemi tekem Meri wetem hem, wea olketa mektambu long hem fo maritim Josef, an tufala go fo mekem olketa save raetem nem blong tufala. Meri hemi babule finis, ⁶ an taem tufala stap yet long Betlehem, hemi kasem taem blong hem fo bonem pikinini nao. ⁷ Bat no eni ples nao hemi stap wea olketa save slip long hem insaet long reshaos ya. So long taem hemi bonem fasbon boe blong hem finis, hemi putum olketa kaleko raonem hem an leim hem daon insaet long boks fo putum kaikai blong olketa buluka long hem. ⁸ Samfala man blong ples ya, olketa stap aotsaet long taon wea olketa gohed fo lukaftarem olketa sipsip blong olketa long naet. ⁹ Nao wanfala enjel blong God hemi kam long olketa an bikfala paoa blong God hemi saen kam raonem olketa. So olketa barava fraet fogud nao, ¹⁰ bat enjel ya hemi tok olsem long olketa, “!Yufala no fraet! Mi kam wetem gudfala nius fo yufala ya, an bae diswan hemi mekem olketa evri pipol fo barava hapi. ¹¹ Wanfala man fo sevem yufala, hemi bon kam distaem nao long taon blong King Deved. !An hem nao hemi Kraes hu hemi Masta blong yumi! ¹² An bae yufala lukim wanfala saen wea hemi olsem: bae yufala faendem pikinini ya wea olketa putum olketa kaleko raonem hem, an hemi slip insaet long boks fo putum kaikai blong olketa buluka long hem.” ¹³ Seknomoa, bikfala seksin long olketa enjel long heven, olketa kam an joen wetem disfala enjel ya nao, an olketa evriwan gohed fo singsing an mekhae long God olsem, ¹⁴ “!Yumi preisim God antap long heven, an piis hemi mas stap long wol ya wetem olketa pipol wea God hemi hapi wetem olketa!” ¹⁵ Nao taem olketa enjel ya i gobaek moa long heven, olketa man ya fo lukaftarem sipsip, olketa tok olsem tugeta long olketa seleva nao, “Yumi hariap go long Betlehem nao, mekem yumi lukim samting ya wea hemi hapen wea God hemi talemaot long yumi.” ¹⁶ So olketa go kuiktaem nao, an olketa faendem Meri an Josef wetem disfala pikinini wea hemi slip insaet long boks fo putum kaikai blong olketa buluka long hem. ¹⁷ Taem olketa lukim pikinini ya nomoa, olketa stori abaotem wanem nao enjel hemi talem kam abaotem disfala pikinini ya. ¹⁸ An evriwan hu i herem diswan, olketa sapraes tumas nao long wanem olketa man fo lukaftarem olketa sipsip olketa talem. ¹⁹ Bat Meri hemi gohed fo kipim nomoa evrisamting ya long maen blong hem seleva, an hemi barava tingting had tu abaotem olketa samting ya. ²⁰ An olketa man fo lukaftarem sipsip olketa gobaek moa, an olketa gohed fo singsing an preisim God from olketa samting wea olketa bin herem an lukim, wea hemi hapen barava olsem enjel ya hemi talem long olketa nao. ²¹ Taem pikinini ya hemi kasem mekeit de blong hem wea hemi taem fo hemi kate, olketa kolem hem long Jisas nao. Diswan ya, hem nao nem wea disfala enjel hemi talemaot finis, taem Meri hemi no babule yet. ²² Nao hemi kasem taem fo Josef an Meri mas duim olketa samting wea Lo blong Mosis hemi talem fo duim bihaen wanfala woman hemi bonem pikinini boe. So tufala tekem pikinini ya go long Jerusalem fo givim hem go long God nao olsem Lo blong God hemi sei, “Yufala mas mektambu long evri fasbon boe fo God.” An olketa mekem sakrifaes tu fo mekem Meri hemi kamap klin moa long ae blong God, olsem Lo blong God hemi sei, “Yufala mas tekem kam tufala kurukuru o tufala yangfala pisin.” ²⁵ Long taem ya, wanfala man nem blong hem Simion hemi stap long Jerusalem. Hemi wanfala man wea laef blong hem hemi stret long ae blong God, an hemi stap fo prea olowe. An hemi gohed tu fo weit fo taem wea bae God hemi sevem olketa pipol blong Israel. An Holi Spirit hemi stap wetem man ya, ²⁶ an hemi bin talem hem finis wea bae hemi no save dae go-go kasem taem wea hemi lukim disfala Mesaea wea God hemi promis fo sendem kam. ²⁷ Nao Holi Spirit hemi lidim Simion fo go insaet long disfala Tambuhaos blong God. An semtaem tu mami an dadi blong Jisas, tufala tekem hem kam insaet long Tambuhaos ya, mekem olketa save duim wanem Lo hemi talem olketa fo duim long hem. ²⁸ Nao Simion hemi karim pikinini ya an hemi preisim God olsem, ²⁹ “God, promis blong yu hemi kamtru finis distaem ya, so yu save letem mi wakaman blong yu fo dae nao. Tingting blong mi hemi hapi nao. ³⁰ Disfala man wea yu bin siusim fo sevem evriwan, mi barava lukim long ae blong mi nao. ³¹ An yu nao mekredi long hem, mekem evriwan luksave long hem. ³² Hemi olsem wanfala laet wea hemi saen go long olketa pipol hu i no Jiu, mekem olketa luksave long yu, an mekem olketa preisim olketa pipol blong yu long Israel.” ³³ Taem ya, mami an dadi blong Jisas, tufala barava sapraes tumas nao long wanem Simion hemi talem abaotem disfala pikinini ya. ³⁴ An Simion hemi blesim trifala, an hemi tok olsem long Meri hu hemi mami blong pikinini ya, “Disfala pikinini ya, God nao hemi siusim hem fo hemi sevem plande pipol blong Israel, an plande long olketa tu fo hemi no sevem olketa. Bikos bae hemi wanfala saen blong God wea plande pipol nao bae olketa agensim, ³⁵ mekem evrisamting wea hemi staphaed insaet long olketa hemi soaot nao. An yu ya, bae yu sore tumas an barava filnogud tumas tu.” ³⁶ An wanfala olowoman tu hemi stap wea nem blong hem Ana. Disfala woman ya, hemi wanfala profet tu ya, an hemi dota blong Faniuel wea hemi bon kam long traeb blong Asa. Taem hemi yang yet, hemi marit fo sevenfala yia nomoa, ³⁷ an bihaen, hasban blong hem hemi dae. An disfala wido woman hemi stap kasem eiti-foa yia blong hem nao. Evritaem nomoa, woman ya hemi stap long Tambuhaos blong God. Long de an long naet hemi stop fo no kaikai an fo gohed fo prea. ³⁸ Nao long disfala taem ya, woman ya hemi kam an hemi gohed fo talem tengkiu long God nao. An hemi tokabaotem pikinini ya long evriwan hu i save weitem God fo mekem laen blong Israel fo stap fri moa. ³⁹ Taem Josef an Meri tufala mekem finis evrisamting ya falom wanem Lo blong God hemi talem, tufala gobaek moa long hom blong tufala long Nasaret. ⁴⁰ An pikinini ya hemi grouap kam, an tingting blong hem hemi kamap strong an hemi kamap barava waes fogud tu. An oltaem nomoa God hemi barava blesim hem. ⁴¹ Long evri yia, mami an dadi blong Jisas tufala save go long Jerusalem fo disfala Fist blong Pasova. ⁴² An taem Jisas hemi kasem tuelfala yia nomoa, olketa go nao long disfala bikde ya, wea olketa save go-go long hem oltaem. ⁴³ Taem olketa bikde ya hemi finis, an olketa pipol stat fo gobaek long hom blong olketa nomoa, Jisas hemi stapbaek yet long Jerusalem. Bat mami an dadi blong hem, tufala nating save long diswan. ⁴⁴ Tufala tingse hemi wakabaot go wetem samfala fren blong tufala, so tufala wakabaot go fo wanfala fulde nao. Bat long ivining nomoa, tufala jes stat fo lukaotem hem, an tufala go askem olketa wantok an olketa fren abaotem hem. ⁴⁵ Bat tufala nating faendem hem nao, so tufala gobaek moa long Jerusalem fo lukaotem hem. ⁴⁶ Long mektri de nao, tufala jes faendem Jisas insaet long disfala Tambuhaos blong God. Taem ya, hemi sidaon wetem olketa tisa blong Lo, an hemi lisin long toktok blong olketa an hemi gohed fo askem kuestin long olketa tu. ⁴⁷ An evriwan hu i herem toktok blong hem, olketa barava sapraes tumas long save blong hem an long olketa ansa blong hem. ⁴⁸ Mami an dadi blong hem, tufala barava sapraes fogud tu taem tufala lukim hem. So mami blong hem hemi tok olsem long hem, “?Pikinini blong mi, waswe nao yu duim olsem long mitufala? Mitufala dadi blong yu barava wari fogud ya, an mitufala bin traehad fo faendem yu.” ⁴⁹ Nao Jisas hemi tok olsem long tufala, “?Waswe nao yutufala lukaotem mi evriwea fo faendem mi? ?Yutufala i no save dat mi mas stap long haos blong Dadi blong mi?” ⁵⁰ Bat tufala nating minim nao toktok blong hem ya. ⁵¹ So taem ya, Jisas hemi gobaek long Nasaret wetem tufala nao, an hemi gohed fo duim wanem tufala talem long hem. An mami blong hem hemi gohed fo kipim olketa samting ya long maen blong hem nomoa. ⁵² An Jisas hemi gohed fo grouap moa, an hemi gohed fo kamap waes fogud tu. An God hemi barava hapi tumas wetem hem, an olketa pipol i hapi tumas long hem tu.

¹ Long mekf iftin yia wea Taebirias hemi stap olsem bikfala King long Rom, Pontias Paelat nao hemi Primia long provins long Jiudia. An Herod Antipas hemi rul ovarem provins long Galili, an brata blong hem Filip hemi rul ovarem tufala distrik long Iturea an Trakonaetis. An Lisanias hemi rul ovarem provins long Abilin, ² an Anas an Kaeafas ya tufala i Haeprist long taem ya. An long taem ya tu, Jon hu hemi san blong Sekaraea, God hemi toktok long hem long taem hemi stap long drae eria ya. ³ So Jon hemi go-goraon nao long evri ples raonem riva long Jodan, an hemi gohed fo talemaot toktok blong God long olketa pipol. An hemi tok olsem, “Yufala evriwan mas lusim olketa ravis wei blong yufala an yufala mas baptaes, mekem God save fogivim olketa sin blong yufala.” ⁴ An diswan hemi olsem wanem God hemi bin mekem profet Aesaea fo raetem kam, wea hemi sei, “Wanfala man hemi toktok bikfala insaet long drae eria an hemi sei, ‘!Yufala mas mekredi long rod fo Masta, an yufala mas stretem olketa smolfala rod fo hem! ⁵ Evri vali yufala mas kavaremap, an evri maonten an hil yufala mas levolem evriwan. Olketa rod wea hemi kruket olobaot yufala mas stretem, an olketa rod wea hemi nogud tumas yufala mas mekem gud. ⁶ Bikos evriwan long disfala wol bae olketa lukim dat God bae hemi kam an sevem olketa pipol.’” ⁷ Plande pipol tumas nao olketa kam long Jon fo hemi baptaesim olketa. Nao hemi tok olsem long olketa, “!Yufala olsem olketa snek ya! ?Waswe, yufala tingse sapos yufala baptaes, bae yufala save ranawe from disfala kros blong God wea bae hemi kam? ⁸ Bat yufala mas lusim olketa ravis wei blong yufala ya, mekem yufala garem olketa gudfala frut long laef blong yufala. Nogud yufala talem dat bae God hemi sevem yufala bikos yufala nao bon kam long laen blong Ebraham. Mi talem yufala stret, God hemi save mekem olketa ston ya fo kamap pipol fo mekem niufala laen blong Ebraham nomoa ya. ⁹ An God hemi redi finis nao fo katemdaon olketa tri long barava rut blong olketa. So evri tri wea hemi no garem gudfala frut bae hemi katemdaon an torowem go insaet long faea.” ¹⁰ Nao olketa pipol i askem hem olsem, “?Sapos olsem, wanem nao bae mifala mas duim?” ¹¹ Nao Jon hemi sei long olketa, “Eniwan long yufala hu hemi garem tufala kaleko, hemi mas givim wanfala fo man wea hemi no garem. An eniwan hu i garem kaikai, hemi mas searem wetem man hu hemi no garem eni kaikai.” ¹² An samfala man fo tekem taks olketa kam fo baptaes tu, an olketa askem Jon olsem, “?Tisa, wanem nao mifala mas duim?” ¹³ Nao Jon hemi sei, “Yufala mas no tekem eni taks winim wanem gavman hemi talem yufala fo tekem.” ¹⁴ An samfala soldia askem hem moa, “?Waswe long mifala? ?Wanem nao mifala mas duim?” Nao Jon hemi ansarem olketa olsem, “Yufala mas no laea long eniwan o fosim eniwan fo givim seleni long yufala. Bat yufala mas hapi nomoa long wejis wea yufala tekem.” ¹⁵ Nao olketa pipol ya barava lukluk fo eni bikfala samting wea bae hemi hapen an olketa stat fo tingting olsem, “Maet Jon nao hemi disfala Mesaea.” ¹⁶ Nao Jon hemi tok olsem long olketa, “Mi baptaesim yufala long wata nomoa, bat wanfala man wea bae hemi kam, hem nao hemi bikfala moa winim mi. Mi ya, mi barava nating fitim hem, nomata fo tekemaot sandol blong hem. Disfala man nao bae hemi baptaesim yufala long Holi Spirit an long faea. ¹⁷ Bikos hem nao hemi garem paoa fo jajem evriwan. Hemi olsem wakaman fo klinim olketa frut blong wit, mekem olketa stap deferen from skin blong olketa. Bae hemi tekem olketa frut ya an putum insaet long haos blong hem. Bat olketa skin blong wit ya, bae hemi bonem long faea wea hemi no save dae.” ¹⁸ An long plande deferen wei, Jon hemi talemaot disfala Gudnius ya long olketa pipol an hemi tokstrong long olketa tu, mekem olketa sensim tingting blong olketa. ¹⁹ Long taem ya tu, Jon hemi barava tokstrong tumas agensim King Herod Antipas, bikos Herod hemi stap wetem Herodias wea hemi waef blong brata blong hem, an hemi bin duim tu plande ravis samting moa. ²⁰ So Herod hemi duim wanfala samting wea hemi nogud go moa, wea hemi putum Jon insaet long prisin. ²¹ Taem olketa no putum Jon long prisin yet, wanfala de nao hemi baptaesim olketa pipol, an bihaen ya, hemi baptaesim Jisas tu. An taem Jisas hemi gohed fo prea, skae hemi open nao, ²² an Holi Spirit hemi kamdaon long hem olsem wanfala kurukuru. An semtaem nomoa, toktok blong God hemi kamdaon long heven, an hemi sei, “Yu nao, yu barava San blong mi wea mi lavem yu tumas an mi hapi tumas long yu.” ²³ Taem Jisas hemi kasem samting olsem teti yia finis, hemi stat fo duim olketa waka blong hem nao. An long tingting blong olketa pipol, Jisas hemi san blong Josef ya. Nao Josef hemi san blong Hilae. ²⁴ Hilae hemi san blong Matat. Matat hemi san blong Livae. Livae hemi san blong Melkae. Melkae hemi san blong Janae. Janae hemi san blong Josef. ²⁵ Josef hemi san blong Matataeas. Matataeas hemi san blong Emos. Emos hemi san blong Neiham. Neiham hemi san blong Eslae. Eslae hemi san blong Nagae. ²⁶ Nagae hemi san blong Meata. Meata hemi san blong Matataeas. Matataeas hemi san blong Semein. Semein hemi san blong Josek. Josek hemi san blong Joda. ²⁷ Joda hemi san blong Joanan. Joanan hemi san blong Risa. Risa hemi san blong Serababel. Serababel hemi san blong Sialtiel. Sialtiel hemi san blong Nirae. ²⁸ Nirae hemi san blong Melkae. Melkae hemi san blong Adae. Adae hemi san blong Kosam. Kosam hemi san blong Elmadam. Elmadam hemi san blong Ere. ²⁹ Ere hemi san blong Josua. Josua hemi san blong Eliesa. Eliesa hemi san blong Jorim. Jorim hemi san blong Matat. Matat hemi san blong Livae. ³⁰ Livae hemi san blong Simion. Simion hemi san blong Jiuda. Jiuda hemi san blong Josef. Josef hemi san blong Jonam. Jonam hemi san blong Elaeakim. ³¹ Elaeakim hemi san blong Milia. Milia hemi san blong Mena. Mena hemi san blong Matata. Matata hemi san blong Netan. Netan hemi san blong Deved. ³² Deved hemi san blong Jese. Jese hemi san blong Obed. Obed hemi san blong Boas. Boas hemi san blong Salmon. Salmon hemi san blong Nason. ³³ Nason hemi san blong Aminadab. Aminadab hemi san blong Admin. Admin hemi san blong Anae. Anae hemi san blong Hesron. Hesron hemi san blong Pires. Pires hemi san blong Jiuda. ³⁴ Jiuda hemi san blong Jekob. Jekob hemi san blong Aesak. Aesak hemi san blong Ebraham. Ebraham hemi san blong Tera. Tera hemi san blong Nehoa. ³⁵ Nehoa hemi san blong Serug. Serug hemi san blong Riu. Riu hemi san blong Pileg. Pileg hemi san blong Eba. Eba hemi san blong Sila. ³⁶ Sila hemi san blong Keinan. Keinan hemi san blong Afaksad. Afaksad hemi san blong Siem. Siem hemi san blong Noa. Noa hemi san blong Lamek. ³⁷ Lamek hemi san blong Metusala. Metusala hemi san blong Inok. Inok hemi san blong Jered. Jered hemi san blong Mahelalel. Mahelalel hemi san blong Kenan. ³⁸ Kenan hemi san blong Enos. Enos hemi san blong Set. Set hemi san blong Adam. An Adam hemi san blong God.

¹ Nao taem Jisas hemi lusim riva long Jodan, Holi Spirit hemi stap wetem hem an lidim hem go long wanfala drae eria. ² Hemi stap long ples ya fo foti de, an oltaem nomoa Seitan hemi gohed fo traem hem. An long taem ya tu hemi nating kaikai, so kasem en blong taem ya hemi hanggre fogud nao. ³ Nao Seitan hemi tok olsem long hem, “Sapos hemi tru wea yu San Blong God, yu talem disfala ston ya fo hemi sens go olsem wanfala bred.” ⁴ Bat Jisas hemi ansarem Seitan olsem, “Buktambu hemi sei, ‘Man hemi no save laef long kaikai seleva nomoa.’” ⁵ Nao Seitan hemi lidim Jisas go moa long wanfala ples wea hemi hae tumas, an hemi som hem kuiktaem evri kantri long disfala wol. ⁶ An Seitan hemi tok olsem long Jisas, “Bae mi givim yu evri paoa an evri gud samting wea olketa kantri ya i garem. Bikos evrisamting ya, olketa bin givim long mi ya, an mi save givim go moa long eniwan nomoa wea mi laek fo givim go long hem. ⁷ So sapos yu mekhae long mi, bae evrisamting ya hemi blong yu nao.” ⁸ Bat Jisas hemi ansarem Seitan olsem, “Buktambu hemi sei, ‘Yufala mas mekhae long God Masta blong yufala, an hem nomoa yufala mas mekhae long hem.’” ⁹ Bihaen diswan, Seitan hemi lidim Jisas go moa long Jerusalem, an hemi mekem hem fo stanap long wanfala hae ples tumas antap long disfala Tambuhaos ya. An Seitan hemi tok olsem long Jisas, “Sapos hemi tru wea yu San Blong God, yu jam godaon longwe. ¹⁰ Bikos Buktambu hemi sei olsem, ‘God bae hemi talem go long olketa enjel blong hem fo olketa lukaftarem yu gudfala. ¹¹ An bae olketa karim yu go wetem han blong olketa, mekem yu no bangam lek blong yu long olketa ston ya.’” ¹² Bat Jisas hemi ansarem Seitan olsem, “Buktambu hemi talem tu, ‘Yufala mas no traem God Masta blong yufala.’” ¹³ Taem Seitan hemi traem Jisas finis long olketa wei olsem, hemi lusim hem nao, weitem narataem wea hemi save traem hem moa. ¹⁴ Jisas hemi gobaek moa long Galili, an paoa blong Holi Spirit hemi stap long hem. An nius abaotem hem hemi goraon long evri ples long provins ya nao. ¹⁵ An Jisas hemi tisim olketa pipol long olketa preahaos blong olketa, an evriwan i stat fo mekhae long hem nao. ¹⁶ Nao Jisas hemi go moa long Nasaret, disfala taon wea hemi grouap kam long hem. An long Sabat de, hemi go long preahaos nao olsem hemi save duim olowe. An taem ya, hemi stanap fo ridim Buktambu, ¹⁷ an olketa givim hem disfala buk wea profet Aesaea nao hemi bin raetem. Hemi openem buk ya, an hemi lukim ples fo rid long hem, wea hemi tok olsem, ¹⁸ “Spirit blong God hemi stap wetem mi, bikos hemi siusim mi fo talemaot Gudnius long olketa pua pipol. Hemi sendem mi fo talemaot long olketa hu i stap long prisin dat bae olketa fri nao, an fo talem olketa hu i blaen dat bae olketa save lukluk moa, an fo talem olketa hu i stap andanit long paoa blong olketa nara pipol dat bae olketa fri moa. ¹⁹ An fo talemaot moa dat hemi kasem taem nao wea bae God hemi blesim olketa pipol blong hem.” ²⁰ Nao Jisas hemi satem buk ya an hemi givim go nao long man hu hemi waka long preahaos ya, an hemi sidaon fo tisim olketa pipol nao. Long taem ya, evriwan hu i stap insaet long preahaos ya olketa barava lukluk strong go long hem nao. ²¹ An Jisas hemi tok olsem long olketa, “Tude ya, disfala toktok ya hemi barava kamtru nao long semtaem wea yufala herem mi ridim kam long yufala.” ²² An evriwan olketa talem hemi gudfala man ya, bikos olketa sapraes tumas long olketa nambawan toktok wea hemi talemaot. An olketa sei olsem moa, “!Bat man ya hemi san blong Josef nomoa ya!” ²³ Nao Jisas hemi tok olsem long olketa, “Ating kolsap yufala talem disfala toktok wea hemi sei, ‘Dokta, yu mekem yu seleva fo gudbaek fastaem.’ An bae yufala talem mi tu, ‘Olketa samting yu bin duim kam long Kapaneam, hemi gud sapos yu duim long hia tu long ples blong yu.’” ²⁴ “Bat mi talem yufala tru samting nao, eniwan wea hemi profet, olketa pipol long hom blong hem olketa nating save bilivim hem. ²⁵ “Mi talem yufala, long taem blong profet Elaeja, hemi no ren fo trifala yia an siksfala mans, go-go bikfala taem blong hanggre hemi kamap nao. An long taem ya, plande wido woman olketa stap nomoa long Israel, ²⁶ bat God hemi no sendem Elaeja fo go long eniwan long olketa. Hemi sendem hem go nomoa long wanfala wido woman hu hemi no Jiu, wea hemi stap long taon long Serefat long eria long Saedon. ²⁷ An long taem blong profet Elaesa, plande pipol long Israel nao i garem ravis sik blong skin, bat no eniwan long olketa hemi mekem fo gudbaek from sik ya. Bat wanfala man wea Elaesa hemi mekem hem fo gudbaek nao, hemi disfala Naaman wea hemi blong kantri long Siria.” ²⁸ Taem olketa herem wanem Jisas hemi talem nomoa, evriwan hu i stap long preahaos ya i barava kros fogud nao. ²⁹ So olketa stanap an olketa raosim Jisas fo go aotsaet long taon ya. Nao taon ya hemi stap long wanfala hil, so olketa tekem Jisas fo torowem hem godaon long ples wea hemi had tumas fo godaon long hem. ³⁰ Bat Jisas hemi wakabaot go long midol long olketa pipol nomoa, an hemi goawe from olketa nao. ³¹ Bihaen diswan, Jisas hemi go moa long Kapaneam, wanfala taon wea hemi stap long provins long Galili. An long Sabat de nomoa Jisas hemi stat fo tisim olketa pipol nao. ³² An olketa pipol barava sapraes tumas long tising blong hem, bikos wei wea hemi toktok ya hemi somaot klia dat hemi garem paoa ya. ³³ Long taem ya tu, wanfala man wea wanfala ravis devol hemi stap long hem, hemi stap insaet long preahaos ya. Nao hemi singaot bikfala olsem, ³⁴ “?Jisas blong Nasaret, wanem nao yu wande fo duim long mifala? !Ating yu kam fo spoelem mifala ya! !Mi save long yu finis, olsem yu barava Holi man blong God ya!” ³⁵ So Jisas hemi tokstrong long devol olsem, “!Yu kuaet, an yu kamaot from man ya!” Nao devol ya hemi torowem man ya i godaon long midol long olketa, an devol hemi kamaot from hem nao bat hemi no spoelem hem nomoa. ³⁶ Evri pipol barava sapraes tumas nao an olketa tok olsem long midol long olketa seleva, “?Watkaen toktok nao diswan? Hemi toktok olsem man wea hemi garem paoa tumas wea hemi tokstrong long olketa ravis devol olsem ya. !An olketa save goaot falom toktok blong hem tu!” ³⁷ An nius abaotem Jisas hemi go kasem evri ples raonem eria ya. ³⁸ Nao Jisa s hemi lusim preahaos ya an hemi go long haos blong Saemon. Long taem ya, mami-inlo blong Saemon hemi sik, from fiva hemi barava bikfala tumas long hem ya. An olketa askem Jisas fo go an helpem hem. ³⁹ So Jisas hemi go an stanap long saet long bed blong woman ya, an hemi tokstrong long fiva ya, an fiva ya hemi finis from hem nao. An semtaem nomoa woman ya hemi stanap, an hemi redim kaikai fo olketa. ⁴⁰ Taem san hemi stat fo godaon nomoa, olketa pipol tekem kam long Jisas olketa pipol hu i garem olketa enikaen siknis long olketa. An Jisas hemi putum han blong hem antap long evri sikman ya, an hemi mekem olketa fo gudbaek moa. ⁴¹ An narasamting moa, olketa devol ya olketa lusim olketa pipol an olketa singaot bikfala olsem, “!Yu ya, yu San Blong God ya!” Bat Jisas hemi tokstrong long olketa an hemi stopem olketa fo no toktok, bikos olketa save finis wea Jisas nao hemi disfala Mesaea. ⁴² Taem hemi jes stat fo delaet kam, Jisas hemi lusim taon ya, an hemi go long wanfala ples wea no eniwan hemi stap long hem. Bat long taem ya, olketa pipol stat fo lukaotem hem go-go olketa faendem hem nomoa, an olketa talem hem dat hemi mas no lusim olketa moa. ⁴³ Bat Jisas hemi tok olsem long olketa, “Long olketa nara taon tu mi mas go an talemaot Gudnius abaotem kingdom blong God. Dastawe nao God hemi sendem mi fo kam.” ⁴⁴ So Jisas hemi go-goraon nao fo talemaot toktok blong God insaet long olketa preahaos long kantri ya.

¹ Long wanfala taem, Jisas hemi stanap long saet long leik long Genesaret. An plande pipol nao olketa kam raonem hem, wea olketa pus strong fo kam long hem, mekem olketa save herem toktok blong God. ² Long taem ya tu, Jisas hemi lukim tufala bot wea olketa pulum goap long saet long leik ya. An olketa fisingman wea olketa livim tufala bot ya, olketa gohed fo wasim olketa net ya. ³ Nao Jisas hemi go insaet long wanfala long tufala bot ya wea hemi blong Saemon. An hemi askem Saemon fo tekem bot ya fo goaot lelebet from soa. Nao Jisas hemi sidaon insaet long bot ya, an hemi gohed fo tisim olketa pipol hu i hipap kam. ⁴ Taem Jisas hemi toktok finis long olketa pipol nomoa, hemi tok olsem moa long Saemon, “Yu tekem bot ya go long dipwata, an yufala torowe godaon olketa net, mekem yufala save kasem samfala fis.” ⁵ Nao Saemon hemi tok olsem, “Masta, mifala bin wakahad tumas long fulnaet ya, bat mifala nating kasem eni fis nomoa. Bat from yu talem mi olsem, oraet, bae mi torowe godaon olketa net ya moa.” ⁶ Taem olketa torowe godaon olketa net nomoa, plande fis tumas nao olketa pas long hem, go-go olketa net blong olketa kolsap brek nao. ⁷ So olketa mekem saen fo olketa fren blong olketa long nara bot ya fo kam an helpem olketa. An nara bot ya hemi kam an olketa fulumapem tufala bot ya long olketa fis, go-go tufala kolsap singdaon nao. ⁸ Taem Saemon Pita hemi lukim diswan nomoa, hemi nildaon long frant blong Jisas, an hemi tok olsem, “Masta, yu goawe from mi nao, bikos mi man wea mi garem sin.” ⁹ Hemi tok olsem, bikos hem an olketa man wea olketa waka wetem hem ya, olketa sapraes tumas nao long plande fis wea olketa bin kasem. ¹⁰ An tufala san blong Sebedi, Jemes an Jon, wea tufala waka wetem Saemon, tufala tu i sapraes tumas long hem. Nao Jisas hemi tok olsem long Saemon, “Yu no fraet. Stat long distaem nao, bae yu go fo fising fo kasem pipol nomoa.” ¹¹ So olketa man ya pulum tufala bot ya go long soa nomoa, an olketa lusim evrisamting an olketa go falom Jisas nao. ¹² Nao Jisas hemi stap long wanfala taon, wea wanfala man hu hemi garem ravis sik blong skin hemi stap long hem ya. Taem man ya hemi lukim Jisas, hemi kam an nildaon long frant blong hem, an hemi krae long Jisas olsem, “Plis masta, sapos yu wiling, yu save mekem mi fo gudbaek moa.” ¹³ So Jisas hemi tasim man ya, an hemi sei, “Ya, mi wiling. !Yu gudbaek nao!” Semtaem nomoa, ravis sik blong skin ya hemi finis from man ya nao. ¹⁴ An Jisas hemi tokstrong long hem olsem, “Yu no talem eniwan abaotem diswan, bat yu mas go an letem prist fo lukluk long bodi blong yu. An bihaen, yu mas go an mekem sakrifaes olsem Mosis hemi bin talem, mekem olketa save dat yu gudbaek finis nao.” ¹⁵ Bat nomata olsem, nius abaotem Jisas hemi go-goraon an kasem plande ples nao. So plande pipol tumas nao, olketa kam from olketa laek fo herem toktok blong hem an olketa laekem hem fo mekem olketa gudbaek moa from siknis blong olketa. ¹⁶ Bat plande taem tu, Jisas hemi go seleva fo prea long olketa ples wea no eniwan hemi stap long hem. ¹⁷ Long wanfala taem moa, Jisas hemi gohed fo tisim olketa pipol. An samfala Farasi an samfala tisa blong Lo tu, olketa stap long haos ya. An olketa ya kam from evri ples long provins long Galili an long provins long Jiudia an biktaon long Jerusalem. An paoa blong God hemi stap long Jisas, mekem hemi save mekem olketa sik pipol fo gudbaek moa. ¹⁸ Nao samfala man olketa karim kam wanfala bed wetem wanfala man wea bodi blong hem hemi no save muv. An long taem ya, olketa traehad fo tekem man ya go insaet long haos, mekem olketa save putum hem long frant blong Jisas. ¹⁹ Bat bikos plande pipol tumas, olketa no faendem eni wei fo tekem man ya fo go insaet. So olketa karim hem go antap long ruf blong haos ya nomoa. Bihaen, olketa mekem wanfala hol, an olketa tekem man ya wea hemi leidaon insaet long bed ya an olketa mekem hem godaon long midol long olketa pipol long frant blong Jisas nao. ²⁰ Taem Jisas hemi luksave long biliv blong olketa, hemi sei nao, “Fren, mi fogivim nao olketa sin blong yu.” ²¹ Nao olketa Farasi an olketa tisa blong Lo, olketa stat fo tingting olsem nao, “?Watkaen man nao ya hemi tokspoelem God olsem? !God nomoa hemi save fogivim olketa sin!” ²² Jisas hemi save nomoa long tingting blong olketa ya, so hemi sei olsem, “?Waswe nao yufala garem tingting olsem ya long maen blong yufala? ²³ Hemi isi tumas ya fo sei long man, ‘Mi fogivim nao olketa sin blong yu’. Bat hemi had tumas fo sei, ‘Yu stanap an yu wakabaot go nao’. ²⁴ Bat distaem bae mi barava som tru long yufala nao, wea mi San Blong Man, mi garem paoa long disfala wol fo fogivim olketa sin tu.” Nao Jisas hemi tok olsem long disfala sikman ya, “Mi talem yu, yu stanap an tekem bed blong yu, an yu wakabaot gobaek nao long haos blong yu.” ²⁵ Semtaem nomoa, man ya hemi stanap long frant blong olketa, an hemi tekem bed wea hemi leidaon long hem an hemi wakabaot gobaek nao long haos blong hem, wea hemi gohed fo mekhae long God. ²⁶ Nao evri pipol olketa barava sapraes tumas nao, an olketa gohed fo mekhae long God tu. Bat olketa fraet tu an olketa sei, “!Maewat, wanem yumi lukim tude ya, yumi nating lukim bifoa ya!” ²⁷ Bihaen diswan, Jisas hemi go moa an hemi lukim wanfala man nem blong hem Livae. Waka blong man ya nao fo tekem taks, an hemi gohed fo sidaon long ples wea olketa pipol save peim taks long hem. Nao Jisas hemi tok olsem long hem, “Yu kam falom mi.” ²⁸ So Livae hemi getap an lusim evrisamting blong hem an hemi falom Jisas nao. ²⁹ Bihaen diswan, Livae hemi mekem wanfala bikfala fist long haos blong hem fo Jisas. An long taem ya, plande long olketa man fo tekem taks, an samfala pipol moa olketa hipap fo kaikai wetem tufala. ³⁰ Bat olketa Farasi wea samfala long olketa i tisa blong Lo, olketa kros an olketa tok olsem long olketa disaepol blong Jisas, “?Waswe nao yufala kaikai an dring wetem olketa man fo tekem taks ya an wetem olketa nara ravis pipol ya moa?” ³¹ Nao Jisas hemi tok olsem long olketa, “Yufala save, pipol wea olketa i no sik, olketa no wande fo lukim dokta. Bat pipol wea olketa sik nao olketa wande fo lukim dokta. ³² So mi no kam fo kolem olketa stretfala pipol, bat mi kam fo kolem olketa pipol wea olketa garem sin, mekem olketa save lusim olketa ravis wei blong olketa.” ³³ Nao samfala pipol olketa sei long Jisas olsem, “Oltaem olketa disaepol blong Jon olketa save stop fo no kaikai an fo prea, an olketa disaepol blong olketa Farasi tu olketa duim semsamting. ?Waswe nao olketa disaepol blong yu olketa gohed fo kaikai an dring nomoa?” ³⁴ Nao Jisas hemi ansarem olketa olsem, “Olketa pipol wea olketa stap long fist blong marit ya, hemi no fitim fo olketa stop fo no kaikai long disfala taem wea man hu hemi marit hemi stap yet tugeta wetem olketa. ³⁵ Bat bae hemi kasem taem wea olketa tekem hem go from olketa. Long taem ya nao, bae olketa stop fo no kaikai.” ³⁶ Nao Jisas hemi gohed fo tisim olketa olsem, “Hemi no fitim fo yumi tekem niufala kaleko blong yumi an brekem wanfala pis long hem fo somap long olfala kaleko wea hemi garem hol long hem finis. Sapos yumi duim olsem, bae yumi spoelem niufala kaleko nomoa ya. An disfala niufala pis kaleko ya tu, hemi nating wankaen nomoa wetem olfala kaleko ya. ³⁷ “An narasamting moa, yumi no save fulumapem niufala waen insaet long olketa olfala skin blong nanigot fo kipim waen long hem. Bikos taem niufala waen ya hemi go saoa, hemi save mekem olketa olfala skin ya fo suelap an bae olketa brek, an waen bae hemi kapsaet an olketa skin ya bae olketa nogud nao. ³⁸ So yumi mas fulumapem niufala waen insaet long olketa niufala skin. ³⁹ An man wea hemi dringim olfala waen oltaem, hemi nating wiling fo dringim moa niufala waen. Bikos hemi sei, ‘Olfala waen nao hemi nambawan.’”

¹ Long wanfala Sabat de, Jisas hemi wakabaot long samfala gaden blong wit. An semtaem tu olketa disaepol blong hem olketa gohed fo brekem samfala wit, an olketa tekemaot skin blong hem an olketa stat fo kaikaim nao. ² Nao samfala Farasi olketa ask olsem, “?Waswe nao yufala duim waka long Sabat de wea hemi tambu long Lo?” ³ Nao Jisas hemi tok olsem long olketa, “?Waswe, yufala nating rid abaotem samting wea King Deved hemi duim, taem hem an olketa man blong hem olketa hanggre? ⁴ Taem ya, Deved hemi go insaet long Haos blong God, an hemi kaikaim tambu bred ya an hemi givim tu long olketa man blong hem. Bat falom tising blong Lo ya, olketa prist nomoa save kaikaim diskaen bred ya.” ⁵ Nao Jisas hemi tok olsem long olketa moa, “Mi San Blong Man nao mi Masta long Sabat.” ⁶ Nao long nara Sabat de moa, Jisas hemi go insaet long wanfala preahaos fo tisim olketa pipol. An wanfala man nao hemi stap insaet, wea raet han blong hem hemi dae finis. ⁷ An olketa Farasi an olketa tisa blong Lo, olketa barava lukluk falom Jisas nao, fo faendemaot sapos hemi mekem man ya fo gudbaek moa long Sabat de, mekem olketa save ripotem hem. ⁸ Bat Jisas hemi save nomoa long tingting blong olketa, so hemi talem olsem long man ya wea han blong hem hemi dae finis, “Yu stanap an kam long frant.” So man ya hemi getap an stanap long frant nao. ⁹ An Jisas hemi tok olsem long olketa Farasi an olketa tisa blong Lo, “?Mi askem yufala, wanem nao Lo blong yumi hemi letem yumi fo duim long Sabat de? ?Hemi letem yumi fo helpem man o fo spoelem hem? ?Fo mekem man fo laef o fo letem hem dae?” ¹⁰ Bihaen ya, hemi lukluk go long olketa evriwan an hemi sei long disfala man ya olsem, “Yu stretem han blong yu.” An semtaem man hemi trae fo stretem go han blong hem nomoa, han blong hem hemi gudbaek moa. ¹¹ Bat olketa ya barava kros fogud nao, an olketa stat fo toktok tugeta long olketa seleva abaotem wanem nao bae olketa duim long Jisas. ¹² Nao long semtaem ya nomoa, Jisas hemi goap nao fo prea antap long wanfala hil. An wanfala fulnaet nao hemi stap long ples ya wea hemi gohed fo prea long God. ¹³ Taem hemi kasem delaet nomoa, hemi kolem olketa disaepol fo kam long hem, an hemi siusim tuelfala long olketa, wea hemi kolem olketa long aposol. ¹⁴ An nem blong tuelfala man ya nao hemi olsem, Saemon wea Jisas hemi givim nara nem long hem Pita, an Andru hu hemi brata blong Pita, an Jemes, an Jon, an Filip, an Batolomiu, ¹⁵ an Matiu, an Tomas, an Jemes hu hemi san blong Alfeas, an Saemon wea hemi memba long seksin wea olketa wande fo raosim gavman blong Rom, ¹⁶ an Jiudas hu hemi san blong Jemes, an Jiudas Iskariot, hu long bihaen ya, hemi givim Jisas go long han blong olketa enemi blong hem. ¹⁷ Nao Jisas wetem olketa aposol blong hem, olketa wakabaot kamdaon from hil ya go-go olketa kasem flat ples. An long taem ya, plande long olketa disaepol blong Jisas olketa hipap kam tu. An plande nara pipol moa olketa kam from Jerusalem an from olketa nara ples long Israel an from olketa ples long saet si raonem tufala taon long Taea an Saedon. ¹⁸ An evriwan ya olketa kam from olketa laek fo herem toktok blong Jisas an olketa laekem hem fo mekem olketa gudbaek moa from olketa siknis blong olketa. An nomata olketa pipol wea olketa ravis devol i spoelem olketa, Jisas hemi mekem olketa fo gudbaek moa. ¹⁹ An evriwan long olketa pipol ya olketa traehad fo tasim hem, bikos paoa blong God wea hemi stap long hem, hemi mekem evri sikman fo kamap gudbaek moa. ²⁰ Nao Jisas hemi lukluk go long olketa disaepol blong hem an hemi sei, “Yufala hu i pua, yufala save hapi ya, bikos yufala stap finis insaet long kingdom blong God. ²¹ Yufala hu i hanggre distaem, yufala save hapi ya, bikos bihaen ya, bae yufala fulap moa. Yufala hu i krae distaem, yufala save hapi ya, bikos bihaen ya, bae yufala laf moa. ²² “An yufala wea olketa pipol i heitem yufala an barava aotem yufala an barava tokspoelem yufala an talem nem blong yufala hemi barava nogud bikos yufala falom mi San Blong Man, yufala save hapi ya. ²³ Taem diswan hemi hapen, yufala mas barava hapi fogud nomoa an dans, bikos God bae hemi barava givim olketa gudfala samting long yufala long heven. Yufala ya, yufala wankaen wetem olketa tru profet long bifoa kam, bikos semsamting nao hemi hapen long olketa. ²⁴ !Bat yufala hu i ris, yufala lukaot! Bikos yufala bin kasem taem blong hapi blong yufala finis nao. ²⁵ !An yufala hu i fulap distaem, yufala lukaot! Bikos bihaen ya, bae yufala hanggre moa. !An yufala hu i laf distaem, yufala lukaot! Bikos bihaen ya, bae yufala krae bikfala moa. ²⁶ “!An yufala wea olketa pipol i sei yufala olketa gudfala pipol, yufala lukaot! Yufala ya, yufala wankaen wetem olketa laea profet long bifoa kam, bikos semsamting nao hemi hapen long olketa.” ²⁷ An Jisas hemi sei moa, “Bat mi talem long yufala hu i lisin long toktok blong mi, yufala mas lavem olketa enemi blong yufala, an yufala mas duim gudfala samting long olketa hu i heitem yufala. ²⁸ An yufala mas blesim olketa hu i tokspoelem yufala, an yufala mas prea fo olketa hu i spoelem yufala. ²⁹ An sapos eniwan hemi hitim yu long raetsaet long fes, yu tanem go narasaet fo hemi hitim moa. An sapos eniwan hemi tekem longfala kaleko blong yu, yu no stopem hem moa fo tekem sote blong yu tu. ³⁰ An sapos eniwan hemi askem yu fo enisamting, yu mas helpem hem nao. An sapos eniwan hemi tekem enisamting blong yu, yu no askem hem fo givimbaek moa long yu. ³¹ An wanem yufala laekem olketa nara pipol fo duim long yufala, yufala mas duim long olketa tu. ³² “?Waswe, yufala tingse God bae hemi blesim yufala sapos yufala lavem nomoa olketa pipol hu i lavem yufala? Nomoa ya, bikos olketa pipol wea olketa garem sin tu olketa save lavem nomoa olketa pipol wea olketa lavem olketa. ³³ ?Waswe, yufala tingse God bae hemi blesim yufala sapos yufala duim gudfala samting nomoa long olketa pipol wea olketa duim gudfala samting long yufala? Nomoa ya, bikos olketa pipol wea olketa garem sin, olketa save duim semsamting tu. ³⁴ ?Waswe, yufala tingse God bae hemi blesim yufala sapos yufala givim samting nomoa long olketa pipol wea yufala save dat bae olketa givimbaek samting moa long yufala? Nomoa ya, bikos olketa pipol wea olketa garem sin tu, olketa save givim olketa samting long olketa nara pipol wea olketa garem sin, wea olketa save dat bae olketa givimbaek evrisamting moa long olketa. ³⁵ Bat yufala mas lavem olketa enemi blong yufala, an yufala mas duim gudfala samting long olketa tu. An yufala mas givim enisamting blong yufala fo olketa nara pipol, wea yufala no tingim moa wea bae olketa mas givimbaek long yufala. Sapos yufala duim olsem, bae God hemi barava blesim yufala ya, an bae yufala nao kamap barava pikinini blong God Antap. Bikos God hemi kaen olowe long olketa pipol, nomata olketa no save kaen long hem an nomata wei blong olketa hemi barava ravis tumas. ³⁶ Yufala mas kaen an sore long evri pipol, olsem Dadi blong yufala long heven hemi kaen an sore long evri pipol tu.” ³⁷ An Jisas hemi sei moa, “Yufala mas no jajem nara man, nogud God hemi jajem yufala tu. An yufala mas no panisim nara man, nogud God hemi panisim yufala tu. An yufala mas fogivim nara man, mekem God hemi save fogivim yufala tu. ³⁸ Yufala mas givim olketa samting long olketa nara pipol, mekem God hemi save givim olketa samting long yufala tu. Ya, God hemi save givim olketa samting long yufala, olsem wanfala man hemi fulumapem gud wanfala basket wea hemi sekem an presim godaon fo fulumapem moa. So diskaen wei wea yufala givim olketa samting long olketa nara pipol nao, bae God hemi falom tu taem hemi givim olketa samting long yufala.” ³⁹ Nao Jisas hemi gohed moa fo talem wanfala tokpiksa long olketa, “?Waswe, wanfala blaen man hemi save lidim go nara blaen man moa? Nomoa ya. Sapos hemi duim diswan, bae tufala evriwan foldaon insaet long wanfala hol ya. ⁴⁰ Man wea hemi skul, hemi no save winim tisa blong hem. Bat taem hemi skul gudfala go-go hemi barava savegud, long taem ya nao hemi save kamap wankaen wetem tisa blong hem. ⁴¹ “?Waswe nao yu lukim wanfala smol pisgraon wea hemi kasem ae blong brata blong yu, bat yu ya, yu nating lukim nomoa bikfala pisgraon wea hemi kasem ae blong yu seleva? ⁴² An hao nao yu save talem olsem long brata blong yu, ‘Ei, brata. Letem mi tekemaot disfala smol pisgraon from ae blong yu ya.’ Bat yu ya, yu nating lukim nomoa disfala bikfala pisgraon wea hemi kasem ae blong yu seleva. !Yu man fo laea tru nao! Yu mas aotem bikfala pisgraon ya from ae blong yu seleva fastaem. An bihaen, bae yu save lukluk gud an yu save aotem moa smolfala pisgraon ya wea hemi kasem ae blong brata blong yu.” ⁴³ An Jisas hemi sei moa, “Gudfala tri hemi no save garem ravis frut, an ravis tri hemi no save garem gudfala frut. ⁴⁴ So evri tri, yumi luksave long hem from frut blong hem seleva. An yumi no save faendem frut blong fig tri an frut blong grep tri long olketa ravis tri olobaot. ⁴⁵ Gudfala man hu hemi garem gudfala tingting long maen blong hem, hemi save duim olketa gudfala samting. Bat nogud man hu hemi garem olketa ravis tingting long maen blong hem, hemi save duim nomoa olketa ravis samting. Bikos wanem hemi fulap long maen blong wanfala man nao, hemi save kamaot long toktok blong hem. ⁴⁶ “?Waswe nao yufala sei, ‘!Masta, yu nao Masta blong mifala!’ bat yufala nating save duim nomoa wanem mi talem long yufala? ⁴⁷ Nao man wea hemi kam long mi an herem toktok blong mi an barava gohed fo falom olketa samting ya tu, mi save talem yufala abaotem wei blong man olsem ya. ⁴⁸ Hemi olsem wanfala man hu hemi laek fo wakem haos blong hem. Hemi dig godaon fogud nao, mekem hemi wakem faondesin long haos antap long bikfala ston. Nao taem ren hemi kam an bikfala wata hemi ran kam an bangam haos ya, haos ya hemi nating seksek. Bikos man ya hemi mekem disfala haos barava strong fogud. ⁴⁹ Bat man wea hemi herem toktok blong mi an hemi nating falom nomoa wanem mi talem, hemi olsem wanfala man hu hemi wakem wanfala haos antap long graon nomoa, wea hemi nating wakem eni faondesin long hem. So taem bikfala wata hemi ran kam an bangam haos ya, haos ya hemi foldaon an hemi barava pisis finis nao.”

¹ Taem Jisas hemi talem olketa samting ya finis long olketa pipol nomoa, hemi go moa long taon long Kapaneam. ² Long taon ya nao wakaman blong wanfala bikman blong ami blong Rom, hemi sik tumas an hemi kolsap fo dae nao. Disfala bikman blong ami ya hemi lavem tumas disfala wakaman ya. ³ So taem hemi herem nius abaotem Jisas nomoa, hemi sendem go samfala bikman blong olketa Jiu, fo go an askem Jisas fo kam an mekem wakaman blong hem fo gudbaek moa. ⁴ Taem olketa kasem Jisas, olketa krae long hem olsem, “Disfala bikman hemi wanfala gudfala man ya so hemi gud tumas sapos yu kam an helpem hem. ⁵ Hemi barava lavem tumas olketa pipol blong yumi, an hem seleva hemi bin givim seleni fo bildim preahaos blong mifala ya.” ⁶ So Jisas hemi go wetem olketa man ya nao. Bat taem hemi kolsap kasem haos blong bikman ya, bikman ya hemi sendem go samfala fren blong hem fo talem Jisas olsem, “Masta, yu no hadwaka fo kam nomoa, bikos mi ya mi nating fitim fo yu kam insaet long haos blong mi. ⁷ Dastawe nao mi tingse mi no fit fo kam an tok wetem yu. Bat sapos yu talem kam toktok nomoa, bae wakaman blong mi hemi gudbaek moa ya. ⁸ Yu save, mi tu mi stap andanit long paoa blong olketa bikman. An mi garem olketa soldia hu olketa stap andanit paoa blong mi tu. An taem mi sei long wanfala soldia, ‘!Yu go longwe!’ bae hemi go nao. An taem mi sei long narafala soldia, ‘!Yu kam long hia!’ bae hemi kam nao. An taem mi sei long wakaman blong mi, ‘!Yu duim disfala waka!’ bae hemi duim nao.” ⁹ Taem Jisas hemi herem diswan ya, hemi barava sapraes long man ya nao. An hemi taneraon go long olketa pipol hu i go wetem hem, an hemi sei, “!Maewat! Mi talem long yufala, mi nating lukim kam eni man blong Israel hu i save biliv long paoa blong mi olsem disfala man.” ¹⁰ An taem olketa fren blong disfala bikman olketa gobaek long haos blong hem nomoa, olketa lukim wakaman blong hem ya hemi gudbaek nao from sik blong hem. ¹¹ No longtaem bihaen moa, Jisas an olketa disaepol blong hem olketa go long taon long Nein. An long taem ya tu, plande pipol nao olketa go wetem olketa. ¹² Taem olketa kolsap kasem geit blong taon ya, olketa mitim wanfala bikfala seksin wea olketa kamaot long disfala taon an olketa karim kam wanfala man hu hemi dae finis. Man hu hemi dae ya, hemi san blong wanfala wido woman ya an hem nomoa wanfala pikinini blong hem. ¹³ Taem Masta hemi lukim disfala wido woman ya nomoa, hemi sore tumas long hem nao an hemi tok olsem long hem, “Yu no krae.” ¹⁴ Nao hemi kam an tasim bed ya nomoa, an olketa hu i karim bodi blong boe ya, olketa stop nao. Nao Jisas hemi sei, “!Fren, mi talem yu, yu getap nao!” ¹⁵ Seknomoa, boe wea hemi dae ya hemi getap nao, an hemi stat fo toktok moa. So Jisas hemi givim boe ya go long mami blong hem nao. ¹⁶ Nao evri pipol barava fraet fogud nao, an olketa gohed moa fo mekhae long God. An olketa tok olsem, “!Maewat! Wanfala bikfala profet nao hemi kam an stap wetem yumi. God hemi kam nao fo helpem olketa pipol blong hem.” ¹⁷ An disfala nius abaotem Jisas hemi go kasem evri ples long kantri ya, an olketa nara ples moa. ¹⁸ Olketa disaepol blong Jon olketa bin stori long hem abaotem evrisamting wea Jisas hemi duim. So Jon hemi kolem kam tufala disaepol blong hem, ¹⁹ an hemi sendem tufala go long Masta fo askem hem olsem, “?Yu nao disfala man wea God hemi promis fo sendem kam ya, o mifala mas weitem narafala man moa?” ²⁰ Taem tufala kasem Jisas nomoa, tufala sei olsem, “Jon Baptaes nao hemi sendem mifala kam fo askem yu olsem, ‘?Waswe, yu nao disfala man wea God hemi promis fo sendem kam ya, o mifala mas weitem nara man moa?’” ²¹ Long barava taem ya tu, Jisas hemi mekem gudbaek moa plande pipol hu i garem enikaen siknis, an plande pipol tu wea olketa ravis devol stap long olketa. An plande pipol hu ae blong olketa hemi blaen, hemi mekem olketa fo lukluk moa. ²² So Jisas hemi tok olsem long tufala, “Yutufala gobaek an talem long Jon evrisamting wea yutufala bin lukim an herem long hia. Bikos olketa hu i blaen, olketa save lukluk nao. An olketa hu lek blong olketa dae, olketa save wakabaot nao. An olketa hu i garem ravis sik blong skin, bodi blong olketa hemi gudbaek moa. An olketa hu ia blong olketa hemi pas, olketa save herehere nao. An olketa hu i dae finis, olketa laefbaek moa. An olketa pipol hu i pua tumas, olketa save herem Gudnius nao. ²³ An olketa hu i lukim mi an olketa no lusim biliv blong olketa, bae olketa save hapi tumas ya.” ²⁴ Taem tufala man blong Jon tufala gobaek nomoa, Jisas hemi stat fo tokabaotem Jon long olketa pipol hu i hipap ya, an hemi sei, “?Waswe, taem yufala go insaet long drae eria ya, wanem nao yufala go fo lukim? ?Yufala go fo lukim wanfala man hu hemi olsem longfala gras wea hemi seksek olobaot, taem win hemi bloum? ²⁵ ?O waswe, wanem nao yufala go fo lukim? ?Wanfala man wea hemi werem olketa spesol kaleko? Bat yufala save nao dat olketa hu i werem olketa barava spesol kaleko an garem plande enikaen samting moa, olketa ya save stap long haos blong olketa king ya. ²⁶ ?O waswe, wanem nao yufala go fo lukim? ?Wanfala profet? !Ya, hemi tru ya! Bat Jon hemi bikfala winim moa olketa nara profet long bifoa kam ya. ²⁷ An Jon ya nao, God hemi tokabaotem hem insaet long Buktambu olsem, ‘Bae mi sendem go niusman blong mi fo go fastaem long yu, an hem nao bae hemi mekredi long rod fo yu.’ ²⁸ Mi talem long yufala, Jon nao hemi hae winim eniwan hu hemi bon kam long wol. Bat nomata eniwan hu hemi lou nomoa insaet long kingdom blong God, hemi hae moa winim Jon.” ²⁹ Nao olketa man fo tekem taks wetem olketa nara pipol moa wea olketa herem olketa toktok ya, olketa tingse wei blong God hemi stret fogud. An olketa nao letem Jon fo hemi baptaesim olketa. ³⁰ Bat olketa Farasi an olketa tisa blong Lo, olketa no wiling fo duim wanem God hemi laekem. An olketa nating letem Jon fo hemi baptaesim olketa. ³¹ An Jisas hemi sei moa, “?Waswe, yufala olketa pipol blong distaem ya, yufala olsem wanem ya? ³² Mi talem long yufala, yufala olsem olketa pikinini wea olketa sidaon long maket, wea wanfala seksin gohed fo singaot long nara seksin olsem, ‘Yufala ya, taem mifala pleim olketa hapi singsing fo yufala, yufala nating hapi an nating dans nomoa. An taem mifala singim olketa singsing fo sore, yufala nating sore an nating krae nomoa.’ ³³ Taem Jon Baptaes hemi kam, hemi no save kaikaim bred an hemi no save dringim waen tu. An yufala sei, ‘Man ya, wanfala devol hemi stap long hem ya.’ ³⁴ An taem mi San Blong Man mi kam, mi save kaikai an mi save dring, an yufala sei moa, ‘!Yufala lukim! Disfala man ya, kaikai an dring nomoa hemi nambawan samting blong hem ya. An olketa fren blong hem nao olketa man fo tekem taks an olketa nara ravis pipol moa.’ ³⁵ Bat olketa pipol hu i falom gudfala tingting blong God nao olketa somaot dat gudfala tingting ya hemi barava truwan ya.” ³⁶ Nao wanfala Farasi hemi askem Jisas fo go an kaikai long haos blong hem. So Jisas hemi go insaet long haos blong man ya, an olketa sidaon fo kaikai nao. ³⁷ Long taon ya, wanfala woman tu hemi stap wea hemi save olobaot tumas. Taem hemi herem dat Jisas hemi kaikai long haos blong Farasi ya, hemi tekem kam wanfala nambawan botol wea hemi fulap long oel wea hemi smelgud tumas. ³⁸ Woman ya hemi kam kolsap long lek blong Jisas, an hemi gohed fo krae nao. An tias blong hem nao hemi randaon an mekem lek blong Jisas fo tuwet, an woman ya hemi mekem drae wetem longfala hea blong hem ya. An hemi kisim moa lek blong hem, an hemi kapsaetem oel go antap long lek ya moa. ³⁹ Nao disfala Farasi hu hemi bin askem Jisas fo kam, hemi lukim wanem woman ya hemi duim nomoa, an hemi tingting olsem long hem seleva nao, “Sapos disfala man ya hemi profet tru, hemi mas luksave long woman ya hu hemi tasim hem. Bikos hemi wanfala woman fo olobaot ya.” ⁴⁰ Bat Jisas hemi tok olsem long hem, “Saemon, mi garem wanfala samting fo talem long yu ya.” Nao Saemon hemi sei, “?Wanem ya, Tisa?” ⁴¹ So Jisas hemi sei, “Tufala man nao i kaonem seleni long wanfala ris man. Wanfala long tufala hemi bin kaonem 500 seleni, an narawan hemi kaonem nomoa fifti seleni. ⁴² Bat tufala no garem eni seleni fo sensim kaon blong tufala ya, so ris man ya hemi aotem kaon blong tufala nao. ?Nao waswe, hu nao long tufala man ya bae hemi lavem man ya bikfala?” ⁴³ Nao Saemon hemi sei, “Ating disfala man wea kaon blong hem hemi bik tumas ya, an wea ris man hemi sei hemi mas no wari fo sensim nomoa.” So Jisas hemi sei, “Ya, yu barava talem tru samting nao ya.” ⁴⁴ Bihaen, hemi tane go long woman ya, an hemi tok olsem long Saemon, “?Yu lukim disfala woman ya? Taem mi kam insaet long haos blong yu, yu nating givim mi eni wata fo wasim lek blong mi. Bat woman ya hemi mekem lek blong mi fo tuwet long tias blong hem, an hemi draem moa wetem hea blong hem. ⁴⁵ An yu ya yu nating kisim mi tu, bat stat long taem mi kam insaet long haos ya, woman ya hemi gohed fo kisim lek blong mi nao. ⁴⁶ An yu nating kapsaetem oel antap long hed blong mi, bat woman ya hemi bin kapsaetem oel wea hemi smel naes tumas antap lek blong mi. ⁴⁷ So mi talem yu, bikfala lav blong woman ya nao hemi somaot dat olketa sin blong hem, God hemi barava fogivim nao. Bat eniwan wea God hemi fogivim hem fo lelebet samting nomoa, bae lav blong hem hemi smolfala tu.” ⁴⁸ Nao Jisas hemi tok olsem long woman ya, “Olketa sin blong yu hemi finis from yu nao.” ⁴⁹ Nao olketa nara pipol hu i kaikai wetem hem, olketa toktok olsem tugeta long olketa seleva, “?Watkaen man nao ya hemi save fogivim olketa sin blong nara man?” ⁵⁰ Bat Jisas hemi sei long woman ya, “God hemi sevem yu bikos yu biliv long hem. Nao yu go an yu no wari moa.”

¹ Nao bihaen olketa samting ya, Jisas hemi go long evri taon an evri vilij long provins ya fo talemaot disfala Gudnius abaotem kingdom blong God. An tuelfala disaepol blong hem ² an samfala woman tu olketa go wetem hem. An olketa woman ya nao, Jisas hemi bin mekem olketa fo gudbaek moa from olketa ravis devol an enikaen siknis. Wanfala nao hemi Meri wea hemi stap kam long taon long Magdala, wea Jisas bin raosim sevenfala devol from hem. ³ An narawan hemi Joana, hu hemi waef blong Kusa hu hemi save lukaftarem olketa bisnis blong King Herod Antipas. An wanfala moa, nem blong hem Susana, wetem plande woman moa. An olketa woman ya, olketa save helpem Jisas an olketa disaepol blong hem wetem olketa samting wea olketa garem. ⁴ Nao plande pipol nao olketa gohed fo kam from evri taon, wea olketa kam hipap raonem Jisas. So taem ya, Jisas hemi gohed nao fo talem wanfala tokpiksa long olketa, wea hemi sei, ⁵ “Wanfala man hemi go fo plantem olketa sid blong wit long gaden blong hem. Taem hemi torowem olketa sid ya, samfala sid olketa foldaon long rod, an olketa pipol olketa step antap long olketa sid ya nomoa, an olketa bed tu olketa kam an kaikaim finis nomoa. ⁶ An samfala long olketa sid ya olketa foldaon long graon wea hemi stap antap long bikfala ston, an olketa grou kam bat kuiktaem tu olketa dae moa from hemi drae tumas. ⁷ An samfala moa long olketa sid ya, olketa foldaon long ples wea rut blong nilagras hemi stap long hem. An nilagras ya hemi grou kam wetem olketa wit ya tu, an go-go hemi stopem olketa wit fo no grou nao. ⁸ Bat samfala sid olketa foldaon long gudfala graon nao, so olketa grou gudfala wea olketa garem frut long evriwan.” An Jisas hemi finisim toktok blong hem olsem moa, “Eniwan hu hemi garem ia, hemi mas heremgud toktok ya nao.” ⁹ Nao olketa disaepol blong Jisas olketa askem hem wanem nao mining blong disfala tokpiksa ya. ¹⁰ Bat Jisas hemi sei, “God hemi bin givim yufala save finis fo luksave long olketa tru samting wea hemi staphaed insaet long kingdom blong God. Bat olketa nara pipol nao mas herem olketa samting ya long tokpiksa nomoa. Long diskaen wei nao, nomata olketa lukluk, bae olketa nating luksave nomoa, an nomata olketa lisin, bae olketa nating heresave nomoa.” ¹¹ An Jisas hemi sei moa, “Mining blong disfala tokpiksa hemi olsem ya, disfala sid ya hemi olsem toktok blong God nao ya. ¹² An olketa sid wea olketa foldaon long rod, hemi olsem taem olketa pipol olketa herem toktok ya, bat Seitan hemi kam an hemi tekemaot toktok ya from maen blong olketa, mekem olketa no save biliv an God hemi no save sevem olketa. ¹³ An olketa sid wea olketa foldaon long graon wea hemi stap antap long bikfala ston nao, hemi olsem taem olketa pipol olketa herem toktok ya, an olketa tekem an hapi wetem, bat hemi no go dip insaet long maen blong olketa nomoa. Olketa biliv fo lelebet taem nomoa, an taem hadtaem hemi kam, olketa lusim go evrisamting nao. ¹⁴ An olketa sid wea olketa foldaon long ples wea rut blong nilagras hemi stap long hem nao, hemi olsem taem olketa pipol herem toktok ya, bat olketa wari tumas nomoa abaotem enikaen samting. An olketa lavem tu olketa risis long disfala wol, an enikaen samting moa fo mekem olketa hapi. So toktok ya hemi no save garem eni frut long hem nomoa. ¹⁵ Bat olketa sid wea olketa foldaon long gudfala graon nao, hemi olsem taem olketa pipol olketa herem toktok ya, an olketa gohed fo kipim long maen blong olketa wea hemi gud an hemi stret fogud. An olketa gohed olsem, go-go olketa garem gudfala frut long olketa nao.” ¹⁶ An Jisas hemi sei moa, “No eniwan hemi save laetem kam lam an haedem andanit long baket o putum andanit long bed. Bat hemi mas putum antap long ples blong hem nao, mekem olketa pipol wea olketa kam insaet long haos ya olketa save lukim laet blong hem ya. ¹⁷ “So hemi olsem tu long enisamting wea hemi staphaed distaem, bae hemi save kamaot long klia ples nomoa ya. An enisamting wea olketa haedem, bae olketa pipol save luksave long hem nomoa taem hemi kamaot long klia ples. ¹⁸ “So bikos hemi olsem, yufala mas heremgud, bikos eniwan wea hemi garem save finis, bae God hemi givim hem samfala moa. Bat eniwan wea hemi no garem save ya, nomata lelebet save dat hemi garem, God bae hemi tekemaot from hem nomoa.” ¹⁹ Long taem ya nomoa, mami wetem olketa brata blong Jisas olketa kam fo lukim hem, bat olketa nating save go kolsap long hem nao bikos plande pipol tumas i hipap raonem hem ya. ²⁰ Nao olketa pipol ya olketa talem long Jisas olsem, “Mami blong yu wetem olketa brata blong yu olketa stanap aotsaet ya, an olketa laekem tumas fo lukim yu.” ²¹ Bat Jisas hemi tok olsem, “Olketa hu i herem toktok blong God an duim wanem God hemi laekem olketa fo duim, olketa ya nao mami blong mi an olketa brata blong mi.” ²² Nao long wanfala taem, Jisas hemi go insaet long wanfala bot wetem olketa disaepol blong hem an hemi sei, “Yumi katkros go long narasaet long leik ya.” So olketa sel go nao, ²³ an taem olketa katkros go long leik ya nomoa, Jisas hemi slip nao. Go-go nao bikfala win hemi blou kamdaon long leik ya an bot ya hemi stat fo fulap wetem wata go-go olketa kolsap singdaon nao. ²⁴ Nao olketa disaepol olketa go an wekapem Jisas, an olketa sei, “!Masta, Masta! Kolsap yumi dae nao.” Nao Jisas hemi stanap an hemi tokstrong long win ya an olketa wev ya, an semtaem nomoa, win ya hemi stop nao an wata ya hemi kuaet moa. ²⁵ An Jisas hemi talem olketa disaepol olsem, “?Waswe, wea nao biliv blong yufala?” Bat olketa fraet an sapraes tumas nao an olketa askem olketa seleva olsem, “?Maewat, watkaen man nao ya? !Hemi tokstrong long win an olketa wev an tufala save obeim hem nomoa!” ²⁶ Olketa gohed fo katkros long leik ya, go-go olketa kasem eria long Gerasa nao, wea hemi stap long narasaet long leik long Galili. ²⁷ Taem Jisas hemi go long soa, hemi mitim wanfala man blong taon ya wea samfala devol stap long hem. Longtaem nao man ya hemi nating werem eni kaleko an hemi nating stap insaet long eni haos tu. Bat hemi bin stap kam long olketa kev wea olketa putum bodi blong man dae long hem. ²⁸ An plande taem nao devol ya hemi bin kam strong long man ya. Nomata olketa bin taemapem han an lek blong hem long sen an olketa putum olketa man fo gadem hem, hemi save brekem nomoa olketa sen ya. An devol ya hemi mekem man ya fo go an stap long olketa drae eria nao. Taem hemi lukim Jisas nomoa, hemi singaot bikfala an hemi nildaon long frant blong hem. An Jisas hemi tokstrong long ravis devol ya fo kamaot from man ya nao. So man ya hemi singaot bikfala olsem, “!Ei Jisas, San Blong God Antap! ?Bae yu waswe long mi ya? Plis, mi askem yu, yu no spoelem mi.” ³⁰ Nao Jisas hemi askem hem, “?Hu nao nem blong yu?” Nao man ya hemi sei, “Nem blong mi nao Bikfala Seksin.” Hemi talem olsem bikos plande devol tumas nao olketa stap long hem. ³¹ An olketa gohed fo krae long Jisas fo no raosim olketa fo godaon long hel ³² Nao long wanfala hil wea hemi kolsap nomoa, plande pikpik nao olketa gohed fo kaikai long hem. An olketa devol ya olketa krae long Jisas fo hemi mas letem olketa fo go insaet long olketa pikpik ya, so hemi letem olketa nao. ³³ An olketa devol ya olketa kamaot from man ya nomoa, an olketa go insaet long olketa pikpik ya nao. An evri pikpik ya olketa resis godaon long saet hil wea hemi had tumas fo godaon long hem, an olketa foldaon insaet long leik ya an olketa evriwan i dae nao. ³⁴ Taem olket a man hu i lukaftarem olketa pikpik, olketa lukim wanem hemi hapen, olketa ranawe nao, an olketa talemaot nius ya long taon ya an long olketa ples raonem taon ya moa. ³⁵ So olketa pipol olketa kam nao fo lukim wanem hemi hapen ya. An taem olketa kasem Jisas, olketa lukim man ya wea Jisas hemi raosim olketa devol from hem. Man ya hemi sidaon kolsap long lek blong Jisas. An hemi werem olketa kaleko, an tingting blong hem tu hemi stret nao distaem. So olketa pipol ya olketa fraet nao. ³⁶ An olketa wea i lukim finis hao Jisas hemi mekem disfala man hu hemi garem olketa devol ya fo gudbaek moa, olketa gohed nao fo stori abaotem diswan fo olketa pipol. ³⁷ Long taem ya nomoa, evriwan wea olketa stap long eria ya long Gerasa, olketa askem Jisas nao fo goawe from olketa, bikos olketa barava fraet fogud. So Jisas hemi go insaet long bot ya, an hemi lusim olketa moa. ³⁸ Nao disfala man wea olketa devol bin goaot from hem, hemi askem Jisas olsem, “Mi laek go wetem yu.” Bat Jisas hemi stopem man ya, an hemi tok olsem long hem, ³⁹ “Yu gobaek long hom blong yu an yu talem olketa pipol abaotem olketa samting wea God hemi bin duim fo yu.” So man ya hemi go long evri ples insaet long taon ya, an hemi talemaot olketa samting wea Jisas hemi bin duim fo hem. ⁴⁰ Taem Jisas hemi gobaek kasem moa long narasaet long leik ya, plande pipol nao olketa weit fo mitim hem. ⁴¹ Long semtaem ya nomoa, wanfala man, nem blong hem Jaeras, hemi kam. Man ya hemi wanfala lida blong preahaos long ples ya. Hemi kam an nildaon long frant blong Jisas, an hemi askem hem fo go long haos blong hem. ⁴² Man hemi duim olsem, bikos gele blong hem ya hemi kolsap dae nao. An gele ya, hem nao wanfala pikinini blong hem nomoa an hemi kolsap tuelfala yia nao. Nao taem Jisas hemi stat fo wakabaot go nomoa, plande pipol tumas nao olketa pus strong fo kam long hem. ⁴³ An wanfala woman tu hemi stap, wea hemi bin sik long blad fo tuelfala yia nao. Hemi lusim finis evri seleni blong hem long olketa dokta, bat no eniwan hemi save hao fo mekem hem fo gudbaek moa. ⁴⁴ Woman ya hemi wakabaot kam bihaen long Jisas, an hemi tasim en long kaleko blong hem nao. An semtaem nomoa, siknis ya hemi finis nao. ⁴⁵ Nao Jisas hemi ask olsem, “?Hu nao hemi tasim mi?” Taem ya, evriwan talem olketa no duim, an Pita hemi sei, “Masta, plande pipol tumas nao olketa hipap raonem yu, an olketa gohed fo pus strong fo kam long yu.” ⁴⁶ Bat Jisas hemi sei, “Samwan nao hemi tasim mi ya. Mi filim wea paoa blong mi hemi mekem samwan fo gudbaek moa.” ⁴⁷ Nao taem woman ya hemi luksave dat hemi no save staphaed, hemi barava seksek fogud nao, an hemi kam an nildaon long frant blong Jisas. Nao long frant blong olketa pipol ya, woman ya hemi talemaot long Jisas waswe nao hemi tasim kaleko blong hem. An hemi talemaot tu, dat semtaem hemi tasim hem nomoa, sik blong hem hemi barava finis from hem nao. ⁴⁸ Nao Jisas hemi talem hem olsem, “Woman, biliv blong yu hemi mekem yu fo gudbaek moa. Yu go an yu no wari moa.” ⁴⁹ Taem Jisas hemi gohed yet fo toktok, wanfala man wea hemi stap kam long haos blong Jaeras, hemi kam kasem olketa nao. An hemi tok olsem long Jaeras, “!Ei, gele blong yu hemi dae finis nao! Yu no mekem Tisa fo hadwaka moa.” ⁵⁰ Taem Jisas hemi herem diswan nomoa, hemi sei long Jaeras olsem nao, “Yu no wari tumas bat yu mas biliv long paoa blong mi nomoa, an bae gele ya hemi laefbaek moa.” ⁵¹ Nao taem Jisas hemi kasem haos blong Jaeras, hemi stopem olketa pipol fo no go insaet long haos wetem hem. Bat Pita an Jon an Jemes wetem mami an dadi blong gele ya nomoa, Jisas hemi letem olketa fo go insaet long haos ya wetem hem. ⁵² Nao olketa evri pipol olketa gohed fo krae an singaot bikfala tumas fo gele ya, so Jisas hemi sei, “Yufala no krae tumas olsem. Gele ya hemi no dae, hemi slip nomoa ya.” ⁵³ Bat olketa pipol ya olketa laf long Jisas bikos olketa save dat gele ya hemi dae finis nao. ⁵⁴ Bat Jisas hemi go insaet an hemi holem han blong gele ya, an hemi sei, “Smolfala gele, yu getap nao.” ⁵⁵ Nao win blong hem hemi kambaek, an semtaem tu hemi stanap. An Jisas hemi talem olketa fo givim kaikai long hem. ⁵⁶ Nao mami an dadi blong gele ya, tufala barava sapraes tumas nao. Bat Jisas hemi tokstrong long olketa fo no stori long eniwan abaotem wanem hemi hapen.

¹ Nao Jisas hemi kolem tuelfala disaepol blong hem fo kam long hem, an hemi givim paoa long olketa fo raosim evri devol, an fo mekem evriwan wea olketa garem sik fo gudbaek moa. ² Jisas hemi sendem olketa disaepol ya fo goaot an talemaot toktok abaotem kingdom blong God, an fo mekem olketa pipol fo gudbaek moa from sik blong olketa. ³ An hemi talem long olketa olsem, “Yufala mas no tekem enisamting wetem yufala, olsem wokingstik o basket o bred o seleni. An yufala save tekem wanfala kaleko nomoa. ⁴ Long eni ples yufala kasem, yufala mas stap long sem haos ya nomoa, go-go kasem taem yufala lusim ples ya moa. ⁵ An sapos yufala kasem wanfala ples wea olketa no laekem yufala fo stap wetem olketa, yufala mas sekemaot graon from lek blong yufala an go from ples ya nomoa. Diswan ya hemi saen fo wonem olketa ya.” ⁶ So olketa goaot nao an olketa go long evri vilij fo talemaot Gudnius long olketa pipol, an fo mekem tu olketa sikman fo gudbaek moa. ⁷ Nao long taem ya tu, King Herod Antipas hemi herem nius abaotem evrisamting wea hemi gogohed ya. An hemi barava no save nao, bikos samfala pipol olketa sei, “Jon Baptaes nao hemi laef baek moa.” ⁸ An samfala moa olketa sei, “Profet Elaeja nao hemi kambaek moa.” An samfala moa olketa sei, “Wanfala long olketa profet blong bifoa nao hemi laefbaek moa.” ⁹ Bat Herod hemi sei, “Jon ya, mi nao mi katem nek blong hem finis. ?So hu nao man ya wea mi bin herem olketa stori abaotem hem ya?” An taem ya, Herod hemi traehad fo lukim Jisas nao. ¹⁰ Taem tuelfala aposol olketa kambaek moa long Jisas, olketa gohed fo talem hem nao abaotem evrisamting wea olketa bin duim. Nao Jisas hemi laekem olketa fo go seleva wetem hem, an olketa go fo kasem taon long Betsaeda. ¹¹ Bat taem olketa pipol olketa herem diswan nomoa, olketa go bihaen long olketa nao. An Jisas hemi hapi fo lukim olketa, so hemi gohed fo talem olketa abaotem kingdom blong God. An hemi gohed fo mekem gudbaek tu olketa pipol hu i sik. ¹² Taem hemi no ivining yet, tuelfala disaepol blong Jisas olketa kam long hem an olketa sei, “Yu sendem olketa pipol ya fo go long olketa vilij an olketa haos raonabaot, mekem olketa save go an faendem kaikai an ples fo slip long hem. Bikos disfala ples yumi stap long hem nao ya, hemi no garem eni haos long hem.” ¹³ Bat Jisas hemi sei, “Yufala nao mas givim kaikai long olketa.” Nao olketa disaepol olketa sei, “Bat mifala garem faefala bred an tufala fis nomoa ya. ?Waswe, yu laekem mifala fo go an baem kaikai fitim plande pipol olsem ya?” ¹⁴ Bikos taem ya, samting olsem 5,000 man nao olketa stap. Bat Jisas hemi tok olsem long olketa disaepol blong hem, “Yufala talem olketa pipol ya fo sidaon long olketa seksin, wea samting olsem fifti man nao long wanfala seksin.” ¹⁵ So olketa disaepol olketa go an duim nao wanem Jisas hemi talem, an evriwan i sidaon long olketa seksin nao. ¹⁶ An Jisas hemi holem faefala bred an tufala fis ya, an hemi luk goap long heven an hemi talem tengkiu long God. Bihaen nomoa, hemi brekem olketa an hemi givim go long olketa disaepol fo olketa searemaot long olketa pipol. ¹⁷ An evriwan olketa kaikai an olketa fulap fogud nao. An olketa fulumapem tuelfala basket nao long olketa pis kaikai wea olketa no finisim. ¹⁸ Nao wanfala taem, Jisas hemi stap seleva an hemi prea, an olketa disaepol blong hem olketa kam long hem. Nao Jisas hemi askem olketa olsem, “?Waswe, olketa pipol olketa tingse hu nao mi?” ¹⁹ Nao olketa disaepol olketa sei, “Samfala olketa sei yu Jon Baptaes ya. An samfala moa olketa sei yu profet Elaeja ya. An samfala moa olketa sei yu wanfala long olketa nara profet blong bifoa kam nao wea hemi laefbaek moa.” ²⁰ Nao Jisas hemi askem olketa moa, “?Bat waswe long yufala? ?Yufala tingse hu nao mi?” Nao Pita hemi sei, “Yu ya, yu barava disfala Mesaea ya wea God hemi sendem kam.” ²¹ Bat Jisas hemi tokstrong long olketa fo no talem eniwan abaotem diswan. ²² An Jisas hemi sei moa, “Mi San Blong Man, bae olketa mas meksave long mi fogud. An olketa hedprist an olketa tisa blong Lo an olketa nara bikman moa, bae olketa no laekem mi. An olketa mas kilim mi dae tu, bat long mektri de bae mi laefbaek moa.” ²³ An Jisas hemi tok olsem moa long evriwan, “Sapos eniwan hemi wande fo kam falom mi, hemi mas no tingim hem seleva nomoa, bat hemi mas wiling fo karim kros blong hem an falom mi evri de. ²⁴ Bikos eniwan wea hemi wande fo sevem laef blong hem seleva nomoa, bae hemi lusim tru laef ya. Bat sapos eniwan hemi lusim laef blong hem fo mi, bae hem nao hemi sevem tru laef blong hem. ²⁵ ?Nao sapos eniwan hemi winim evrisamting long disfala wol, bat hemi mas lusim laef blong hem from diswan ya, bae olketa samting ya i save helpem hem? Nomoa ya. ²⁶ Sapos eniwan hemi filsem tumas long mi an hemi filsem long toktok blong mi, oraet, taem mi San Blong Man mi kambaek wetem saen blong bikfala paoa blong mi an blong Dadi blong mi an blong olketa holi enjel, bae mi filsem long man tu ya. ²⁷ An mi talem yufala tru samting nao, samfala wea olketa stanap long hia, bifoa olketa dae, bae olketa lukim disfala kingdom blong God.” ²⁸ Samting olsem wan wik bihaen, Jisas hemi tekem Pita an Jon an Jemes, an olketa go antap long wanfala maonten fo prea. ²⁹ Taem Jisas hemi gohed fo prea nomoa, fes blong hem hemi sens nao, an kaleko blong hem hemi barava waet fogud. ³⁰ Semtaem nomoa, tufala man Mosis an Elaeja, tufala stap an stori wetem hem nao. ³¹ Bikfala paoa blong God hemi saen raonem tufala, an tufala gohed fo stori wetem Jisas abaotem olketa samting wea bae hemi mekem kamtru long Jerusalem, an hao hemi bae lusim disfala wol. ³² Pita wetem tufala fren blong hem ya olketa barava slip ya, bat taem olketa wekap, olketa lukim bikfala paoa blong God hemi saen raonem Jisas, an olketa lukim tu tufala man ya wea tufala stanap wetem hem. ³³ Taem tufala man ya i stat fo lusim Jisas an gobaek, Pita hemi tok olsem long Jisas, “Masta, hemi gud tumas nao mifala stap long hia. Bae mifala wakem trifala smol haos, wanfala fo yu an wanfala fo Mosis an wanfala fo Elaeja.” Pita hemi talem olsem from hemi no minimgud wanem hemi go-gohed. ³⁴ Taem Pita hemi gohed fo toktok yet, wanfala klaod hemi kam kolsap antap long olketa. An trifala disaepol ya olketa barava fraet fogud nao taem olketa lukim dat klaod ya hemi kavarem olketa. ³⁵ An olketa herem toktok wea hemi kam insaet long klaod ya, wea hemi sei, “Hem ya nao barava San blong mi wea mi bin siusim. !Yufala mas heremgud wanem hemi talem!” ³⁶ Taem toktok ya hemi finis nomoa, olketa lukim dat Jisas hemi stap seleva nao. An long taem ya, olketa disaepol olketa stap kuaet nao an olketa no talemaot long eniwan wanem nao olketa bin lukim ya. ³⁷ Long neks de, taem Jisas wetem trifala disaepol blong hem ya olketa kamdaon long maonten ya nomoa, olketa mitim plande pipol wea olketa hipap fo weitem Jisas. ³⁸ Nao wanfala man long olketa, hemi singaot kam olsem, “Tisa, mi laekem tumas fo yu helpem boe blong mi, bikos hem nomoa wanfala pikinini mi garem ya. ³⁹ Yu save, wanfala devol nao hemi save kam strong long hem, wea hemi save mekem hem fo singaot bikfala tumas. An devol ya hemi save mekem boe ya fo seksek fogud, an plande spit nao hemi kamaot long maos blong hem. An devol ya hemi nating save lusim hem ya, wea hemi gohed fo spoelem hem olowe nomoa. ⁴⁰ Mi askem olketa disaepol blong yu fo raosim devol ya, bat olketa nating save duim nomoa.” ⁴¹ Nao Jisas hemi sei, “Maewat, y ufala olket a pipol blong distaem ya, wei blong yufala hemi ravis tumas, an yufala nating save biliv long God tu. ?Haomas taem nao mi mas stap wetem yufala? !Hemi had tumas distaem fo mi stap wetem yufala! !Tekem kam boe blong yu long hia!” ⁴² Nao taem boe ya hemi kam long ples wea Jisas hemi stanap long hem nomoa, devol ya hemi mekem boe ya fo foldaon long graon, an hemi mekem hem fo seksek olobaot nao. Bat Jisas hemi tokstrong long ravis devol ya, an hemi mekem boe ya fo gudbaek nao. An hemi givim boe ya gobaek moa long dadi blong hem. ⁴³ An evri pipol ya barava sapraes tumas long bikfala paoa blong God. Taem olketa pipol i gohed fo sapraes yet long evrisamting wea Jisas hemi duim, Jisas hemi tok olsem long olketa disaepol blong hem, ⁴⁴ “Yufala lisin gudfala long wanem bae mi talem long yufala distaem. Mi San Blong Man, bae olketa givim mi go long han blong olketa pipol ya.” ⁴⁵ Bat olketa nating save nomoa wanem Jisas hemi talem long olketa, bikos mining hemi staphaed from olketa, mekem olketa no save minim gudfala. An olketa fraet tu fo askem Jisas abaotem mining long toktok blong hem. ⁴⁶ Long taem ya, olketa disaepol olketa stat fo raoa tugeta long olketa seleva abaotem hu nao hemi nambawan man long olketa. ⁴⁷ Bat Jisas hemi save nomoa long tingting blong olketa, so hemi tekem wanfala pikinini an mekem hem stanap kolsap long hem. ⁴⁸ Bihaen, hemi tok olsem long olketa disaepol, “Eniwan hu hemi kaen long disfala pikinini ya long nem blong mi, hemi kaen long mi nao ya. An eniwan wea hemi kaen long mi, hemi kaen long man hu hemi sendem mi kam tu ya. So hemi olsem tu, eni man long yufala wea hemi mekem hem seleva fo lou, hem nao hemi nambawan man long yufala evriwan.” ⁴⁹ Nao Jon hemi sei, “Masta, mifala lukim wanfala man wea hemi yusim nem blong yu fo raosim olketa devol from olketa pipol ya. Bat man ya hemi no blong seksin blong yumi ya, so mifala stopem hem nao fo no duim diskaen samting ya moa.” ⁵⁰ Nao Jisas hemi sei, “Yufala no stopem hem, bikos eniwan wea hemi no agensim yufala, hem nao hemi fren blong yufala.” ⁵¹ Hemi kolsap kasem taem fo God bae hemi tekem Jisas gobaek moa long heven. Nao Jisas hemi tingting strong fo go long Jerusalem, ⁵² so hemi sendem samfala niusman fo go fastaem long hem. Olketa go kasem wanfala vilij long Samaria fo mekredi long evrisamting fo weitem Jisas. ⁵³ Bat olketa pipol long vilij ya olketa nating laekem hem fo kam long ples blong olketa, bikos olketa luksave dat hemi go-goap nao long Jerusalem ya. ⁵⁴ Taem tufala disaepol ya Jemes an Jon i lukim diswan, tufala askem Jisas olsem, “?Waswe Masta, yu laekem mitufala fo talem faea fo kamdaon long skae an spoelem olketa ya?” ⁵⁵ Bat Jisas hemi taneraon an hemi luk go long tufala an hemi tokstrong long tufala. ⁵⁶ Bihaen diswan, olketa lusim ples ya an olketa go moa long nara vilij. ⁵⁷ Taem olketa gohed fo wakabaot falom rod, wanfala man hemi tok olsem long Jisas, “Mi bae mi falom yu go long eni ples nomoa wea bae yu go long hem.” ⁵⁸ Bat Jisas hemi sei long hem, “Olketa wael animol olketa garem ples blong olketa seleva fo slip long hem, an olketa bed tu olketa garem ples blong olketa seleva. Bat mi San Blong Man, mi nating garem eni ples blong mi seleva wea mi save slip long hem.” ⁵⁹ An bihaen, Jisas hemi tok olsem moa long nara man, “Yu kam falom mi.” Bat man ya hemi sei, “Yu letem mi fastaem fo gobaek fo berem dadi blong mi.” ⁶⁰ Bat Jisas hemi sei long man ya, “Yu letem olketa pipol hu i dae finis fo berem olketa seleva. Bat yu ya, yu mas go an talemaot nius abaotem kingdom blong God.” ⁶¹ An nara man moa hemi sei, “Masta, bae mi falom yu ya, bat yu letem mi fastaem fo gobaek an sekhan wetem olketa long haos blong mi.” ⁶² Bat Jisas hemi sei, “Sapos man wea hemi holem stia long bot, hemi lukluk go long bihaen olowe, bae hemi no fit fo duim waka long saet blong kingdom blong God.”

¹ Bihaen long diswan, Masta hemi siusim seventi-tu man moa, an hemi sendem olketa fo go olsem tufala man long wanfala ples, an tufala moa long nara ples. Diswan hemi fo mekem olketa fo go fastaem long evri taon an long evri ples wea Jisas bae hemi go long hem bihaen. ² Nao Jisas hemi talem olketa olsem, “Plande kaikai tumas hemi redi finis long gaden, bat olketa wakaman fo tekem olketa i no plande nomoa. So yufala mas askem Masta blong gaden ya, mekem hemi sendem kam plande wakaman moa fo go tekem kaikai blong hem wea hemi redi finis. ³ !Yufala go nao! Bat yufala mas save dat mi sendem yufala goaot olsem olketa smolfala sipsip wea olketa goaot long midol long olketa wael dog. ⁴ An yufala mas no tekem eni paos o eni basket o sandol wetem yufala. An yufala no stop tu fo stori wetem eniwan wea yufala mitim long rod. ⁵ Taem yufala go insaet long eni haos, yufala mas tok olsem fastaem, ‘Piis blong God hemi stap wetem yufala long haos ya.’ ⁶ Sapos man hemi stap wea hemi wiling fo garem piis, bae disfala piis hemi stap wetem hem. Bat sapos man olsem hemi no stap, bae piis ya hemi kambaek long yufala moa. ⁷ An yufala mas stap long sem haos ya nomoa, an yufala mas no go olobaot long olketa nara haos moa. An yufala gohed tu fo kaikai an dringim enisamting nomoa wea olketa givim long yufala, bikos man wea hemi waka, hemi fitim fo hemi tekem pei blong hem. ⁸ Taem yufala go insaet long wanfala taon, an olketa laekem yufala fo stap, yufala mas kaikaim enisamting wea olketa givim long yufala. ⁹ An yufala mas mekem olketa sikman hu i stap long ples ya fo gudbaek moa, an yufala mas tok olsem long olketa, ‘Kingdom blong God, hemi kam kolsap long yufala nao.’ ¹⁰ Bat eni taon wea yufala go long hem an olketa no laekem yufala fo stap wetem olketa, yufala mas go long olketa bikrod long taon ya, an toktok long olketa olsem, ¹¹ ‘Nomata graon blong taon blong yufala wea hemi pas long lek blong mifala, mifala rabemaot fo olsem saen fo wonem yufala ya. Bat yufala mas savegud long diswan. Kingdom blong God, hemi barava kam kolsap nao ya.’ ¹² Mi talem long yufala, long Lasde ya, bae panis blong olketa pipol long taon ya, hemi bikfala moa winim panis blong olketa pipol long taon long Sodom.” ¹³ An Jisas hemi sei moa, “!Yufala pipol long Koresin, yufala lukaot! !Yufala long Betsaeda, yufala lukaot! Olketa mirakol wea olketa hapen long yufala ya, sapos olketa hapen long olketa pipol long Taea an Saedon, ating longtaem nao olketa save sidaon wetem ravis kaleko an putum asis long bodi blong olketa, fo somaot dat olketa lusim ravis wei blong olketa. ¹⁴ Bat long taem wea God bae hemi jajem evriwan, bae panis blong yufala hemi bikfala moa winim panis blong olketa pipol long Taea an Saedon. ¹⁵ ?An yufala pipol long Kapaneam, waswe, yufala tingse God bae hemi liftim yufala goap long heven? !Nomoa ya! !Bae God hemi torowem yufala godaon long hel ya!” ¹⁶ An Jisas hemi sei moa, “Eniwan hu hemi herem toktok blong yufala, hemi save herem toktok blong mi tu ya. An eniwan hu hemi nating laekem yufala, hemi nating laekem mi tu ya. An eniwan hu hemi nating laekem mi, hemi nating laekem disfala man hu hemi sendem mi kam tu.” ¹⁷ Nao taem seventi-tu man ya olketa kambaek kasem Jisas, olketa barava hapi fogud nao. An olketa tok olsem long Jisas, “Masta, nomata olketa devol, olketa barava obeim mifala taem mifala raosim olketa long nem blong yu.” ¹⁸ Nao Jisas hemi sei, “Mi lukim finis dat Seitan hemi foldaon kam from heven olsem laetning hemi kamdaon long skae. ¹⁹ Yufala lisin gud fastaem. Mi givim paoa long yufala finis, mekem yufala save step antap long olketa poesen snek an antap long olketa skopion. An mi givim yufala paoa wea hemi barava winim moa paoa blong Seitan. An bae no enisamting hemi save spoelem yufala. ²⁰ Bat yufala mas no hapi bikos olketa devol olketa save obeim yufala, bat yufala mas hapi bikos God hemi raetem nem blong yufala finis long heven.” ²¹ Nao long taem ya, Holi Spirit hemi mekem Jisas barava hapi fogud nao, an hemi tok olsem, “Dadi, yu nao yu Masta blong evrisamting long heven an long disfala wol. Mi tengkiu tumas long yu, bikos yu haedem olketa samting long olketa pipol hu i waes an save tumas, bat yu somaot olketa samting ya long olketa hu i olsem smolfala pikinini. Tru ya Dadi, hem nao wanem yu laekem tumas fo hapen.” ²² An Jisas hemi sei moa, “Dadi blong mi nao hemi putum evrisamting long han blong mi. An Dadi nao hemi save long San blong hem, bat no eniwan moa hemi save long San ya. An San blong hem hemi save long Dadi, bat no eniwan moa hemi save long Dadi ya. Bat olketa wea San blong hem hemi laek fo somaot Dadi long olketa, olketa nomoa save long hem.” ²³ Nao Jisas hemi tane go long olketa disaepol blong hem an hemi talem olsem long olketa nomoa, “Yufala save hapi tumas ya bikos ae blong yufala barava lukim olketa samting ya distaem. ²⁴ An mi talem yufala, plande profet an plande king olketa bin laekem tumas fo lukim wanem yufala lukim, bat olketa no lukim. An olketa bin laekem tumas fo herem tu wanem yufala herem, bat olketa no herem.” ²⁵ Long wanfala taem, wanfala tisa blong Lo hemi kam an hemi trae fo trikim Jisas. Nao hemi tok olsem, “?Tisa, wanem nao bae mi duim, mekem mi save kasem disfala tru laef wea hemi no save finis?” ²⁶ Nao Jisas hemi sei, “?Wanem nao hemi stap long Lo, an wanem nao yu save ridim long hem?” ²⁷ Nao man ya hemi sei, “Yu mas lavem God Masta blong yu, long evrisamting long maen blong yufala, an long evri tingting blong yufala, an long evri strong blong yufala, an long evri save blong yu. An yu mas lavem tu olketa wantok blong yu long sem wei yu lavem yu seleva.” ²⁸ Nao Jisas hemi sei, “Ya, yu barava talem tru nao ya. Sapos yu duim olsem, bae yu garem tru laef ya.” ²⁹ Bat man ya hemi wande fo somaot dat wei blong hem hemi stret nomoa, so hemi askem Jisas olsem moa, “?Hu nao wantok blong mi wea mi mas lavem ya?” ³⁰ Nao Jisas hemi tok olsem, “Wanfala man hemi lusim Jerusalem an godaon fo kasem Jeriko. Taem hemi wakabaot go nomoa, samfala man fo stil olketa kasholem hem long rod nao, an olketa aotem evri kaleko blong hem an olketa ki-kilim hem. Taem olketa lusim hem, hemi hafded nomoa long saet long rod. ³¹ Nao bihaen nomoa, wanfala prist hemi wakabaot kam falom rod ya, an taem hemi lukim man ya, hemi katkros go long narasaet long rod. ³² Semsamting hemi hapen moa, taem wanfala Livaet hemi kam kasem ples ya. Taem hemi lukim man ya, hemi katkros go long narasaet long rod moa. ³³ Bat bihaen, wanfala man blong Samaria hemi kam kasem man ya wea hemi leidaon long saet long rod. Taem hemi lukim man ya nomoa, hemi barava sore tumas long hem nao. ³⁴ So hemi go long man ya, an hemi kapsaetem oel an waen long olketa ples wea hemi garekil, an hemi taemapem. Nao hemi putum man ya antap long dongki blong hem, an hemi tekem hem go nao long wanfala reshaos, mekem hemi save lukaftarem hem. ³⁵ Nao long neks de, hemi tekem tufala seleni an hemi givim long man hu hemi onam reshaos ya, an hemi sei, ‘!Bae yu lukaftarem man ya, an taem mi kambaek moa, bae mi save sensimbaek eni seleni moa wea yu yusim fo baem enisamting fo man ya!’” ³⁶ An Jisas hemi sei moa, “?Waswe, hu long trifala man ya nao yu tingse hemi tru wantok blong disfala man wea olketa man fo stil olketa bin kilim hem?” ³⁷ Nao disfala tisa blong Lo hemi sei, “Disfala man wea hemi sore an kaen long hem ya.” An Jisas hemi sei, “So yu go an yu duim semsamting tu olsem man ya hemi duim.” ³⁸ Taem Jisas an olketa disaepol blong hem olketa gohed long gogo blong olketa nomoa, olketa kam kasem wanfala vilij wea wanfala woman, nem blong hem Mata, hemi stap. So woman ya hemi askem Jisas nao fo kam long haos blong hem. ³⁹ Woman ya hemi garem wanfala sista tu ya, hu nem blong hem nao Meri. An Meri hemi kam an hemi sidaon kolsap long lek blong Masta, an hemi gohed fo lisin long toktok blong hem. ⁴⁰ Bat Mata hemi wari fogud bikos hemi garem plande samting fo mekredi long hem, so hemi go an hemi tok olsem long Jisas, “!Masta! ?Waswe yu no wari nomoa, wea sista blong mi hemi mekem mi seleva nomoa fo duim evri waka ya? Yu talem hem fo kam an helpem mi.” ⁴¹ Nao Masta hemi sei, “Mata, Mata, yu save wari tumas ya, an yu tingting tumas abaotem plande samting, ⁴² bat wanfala samting nomoa hemi bikfala samting ya. An Meri nao hemi bin siusim samting wea hemi nambawan, an no eniwan bae hemi tekemaot diswan from hem ya.”

¹ Long wanfala taem nao, Jisas hemi stap long wanfala ples fo prea. Taem hemi prea finis, wanfala long olketa disaepol blong hem hemi sei, “?Waswe Masta, yu save tisim mifala hao fo prea, olsem Jon hemi bin tisim olketa disaepol blong hem?” ² So Jisas hemi sei, “Taem yufala prea, yufala tok olsem, ‘Dadi blong mifala, nem blong yu nao hemi mas stap bikfala. Yu mekem kingdom blong yu fo kam. ³ Yu givim kam kaikai wea hemi fitim mifala fo evri de. ⁴ Yu fogivim mifala long olketa sin blong mifala, bikos mifala tu fogivim evriwan hu i duim olketa ravis samting long mifala. Plis, yu no letem enikaen samting fo kam traem mifala.’” ⁵ An Jisas hemi tok olsem long olketa, “Sapos yu garem wanfala fren an yu go kasem haos blong hem long midol long naet, an yu tok olsem long hem, ‘!Fren! ?Waswe, yu save givim mi trifala bred? ⁶ Bikos yu save, wanfala fren blong mi hemi go-go fo wanfala ples ya, an hemi jes kam kasem haos blong mi, bat mi nating garem eni kaikai fo mi save givim long hem ya.’ ⁷ Nao man wea hemi stap insaet long haos ya hemi tok olsem, ‘!Ei man! Yu no mekem mi fo hadwaka moa. Doa hemi sat finis ya, an mi wetem olketa pikinini blong mi, mifala slip finis nao. Mi talem yu stret, mi no save getap an givim enisamting long yu nao.’ ⁸ Nao mi talem long yufala moa, maet man ya hemi no laek fo getap an givim enisamting long yu, nomata yu fren blong hem. Bat from yu no filsem fo gogohed fo askem hem, bae hemi save getap nomoa an bae hemi givim go enisamting yu laekem long hem. ⁹ “So mi talem yufala moa, yufala mas askem God fo olketa samting, an bae hemi givim long yufala. An yufala mas kam long God fo lukaotem olketa samting, an bae yufala faendem. An yufala mas kam noknok long doa blong God, an bae hemi openem fo yufala. ¹⁰ Bikos eniwan hu hemi askem God fo enisamting, bae God hemi givim long hem, an eniwan hu hemi kam long God fo lukaotem enisamting, bae hemi save faendem, an eniwan hu hemi noknok long doa blong God, bae God hemi openem doa fo hem. ¹¹ “?Waswe, yufala olketa dadi? ?Sapos san blong yu hemi askem yu fo wanfala fis, bae yu givim hem wanfala snek nomoa? ¹² ?O sapos hemi askem yu fo wanfala eg, bae yu givim hem wanfala skopion nomoa? ¹³ Nomata yufala nogud olsem wanem, yufala save givim olketa gudfala samting long olketa pikinini blong yufala nomoa. So Dadi blong yufala long heven wea hemi winim evriwan nao, bae hemi givim Holi Spirit long eniwan hu askem hem.” ¹⁴ Long wanfala taem, Jisas hemi raosim wanfala devol wea hemi mekem wanfala man fo no save toktok. An taem devol ya hemi goaot from man ya nomoa, man ya hemi save toktok moa nao. So plande pipol wea olketa hipap, olketa barava sapraes tumas nao. ¹⁵ Bat samfala long olketa i sei, “Bielsebul, disfala bos blong olketa devol ya, hem nao hemi givim paoa long man ya, mekem hemi save raosim olketa devol.” ¹⁶ Samfala pipol moa olketa laek fo trikim Jisas, so olketa askem hem fo mekem wanfala mirakol fo somaot sapos hemi barava kam long God. ¹⁷ Bat Jisas hemi save nomoa long tingting blong olketa, so hemi tok olsem long olketa, “Sapos olketa pipol long wanfala kantri olketa faetem olketa seleva, bae kantri ya hemi barava nogud nao. An sapos wanfala famili olketa faetem olketa seleva, bae famili ya no save stapgud moa ya. ¹⁸ ?So sapos olketa long gavman blong Seitan olketa faetem olketa seleva, hao nao gavman blong hem hemi save gohed moa? Mi talem diswan bikos yufala nao sei mi raosim olketa devol long paoa blong Bielsebul. ¹⁹ ?Nao sapos hemi tru wea Bielsebul nao hemi givim paoa long mi fo raosim olketa devol, oraet, hu nao hemi givim paoa long olketa man blong yufala fo duim semsamting nomoa? !So wanem olketa duim ya, hemi somaot dat yufala rong nao ya! ²⁰ Mi ya, mi raosim olketa devol long paoa blong God ya. An diswan hemi somaot long yufala wea kingdom blong God, hemi kam long yufala finis. ²¹ “Sapos wanfala strongfala man hemi garem evrisamting fo faet an hemi stap fo gadem haos blong hem, bae evrisamting blong hem hemi stapgud nomoa ya. ²² Bat taem wanfala man wea hemi strong moa, hemi kam an faetem man ya an winim hem, bae hemi tekem go evrisamting blong faet wea strongfala man ya hemi tingse hemi save sev long hem. An bae hemi searemaot evrisamting ya long olketa fren blong hem nao. ²³ “Eniwan hu hemi no falom mi, hemi agensim mi nao. An eniwan hu hemi no helpem mi fo tekem olketa pipol kam long God, hemi raosim olketa pipol fo no kam long God nao ya.” ²⁴ An Jisas hemi sei moa, “Taem ravis devol hemi lusim wanfala man, hemi save goraon long olketa drae eria fo faendem eni ples wea hemi save stap long hem. Nao sapos hemi nating faendem eni ples, bae hemi sei olsem nao, ‘Ating mi mas gobaek nomoa long haos blong mi long man wea mi bin lusim ya.’ ²⁵ Nao taem devol hemi gobaek kasem man ya, hemi lukim dat man ya hemi olsem haos wea olketa suipim an stretem evrisamting insaet finis nao. ²⁶ So hemi go an tekem kam sevenfala devol moa, wea olketa barava nogud moa winim hem seleva. An olketa go an stap insaet long man ya nao. An long taem ya, disfala man ya hemi barava nogud tumas winim bifoa nao.” ²⁷ Taem Jisas hemi talem olketa samting ya finis, wanfala woman long olketa evriwan hu i hipap ya, hemi singaot olsem, “!Woman wea hemi bonem yu an givim susu long yu, hemi hapi tumas ya!” ²⁸ Bat Jisas hemi sei, “Nomoa, olketa hu i herem toktok blong God an duim wanem hemi talem, olketa ya nao save hapi tumas ya.” ²⁹ Taem plande pipol moa olketa gohed fo hipap kam, Jisas hemi sei, “Yufala olketa pipol blong distaem, wei blong yufala hemi ravis. Yufala ask fo lukim nomoa wanfala spesol saen. Bae mi no som eni spesol saen long yufala, bat saen wea yufala save lukim nomoa hemi wanfala man olsem Jona. ³⁰ Bikos Jona hemi olsem wanfala saen fo olketa pipol blong Nineve, an long sem wei nao mi San Blong Man, mi olsem wanfala saen fo yufala olketa pipol blong distaem. ³¹ Long taem wea God bae hemi jajem evriwan, bae disfala Kuin long Seba bae hemi stanap fo talemaot dat yufala olketa pipol blong distaem yufala barava rong tru. Bikos nomata hemi stap long farawe ples tumas, hemi kam fo lisin long olketa waes toktok blong King Solomon. !Bat mi talem long yufala, wanfala samting wea hemi bikfala moa winim Solomon, hemi long hia nao! ³² An hemi olsem tu, long taem wea God bae hemi jajem evriwan, bae olketa pipol blong Nineve olketa stanap fo talemaot dat yufala olketa pipol blong distaem yufala barava rong tru. Bikos taem Jona hemi talemaot toktok blong God long olketa, olketa lusim olketa ravis wei blong olketa nao. !Bat mi talem long yufala, wanfala samting wea hemi bikfala moa winim Jona, hemi long hia nao!” ³³ An Jisas hemi sei moa, “Taem eniwan hemi laetem kam wanfala lam, hemi no save putum long ples wea hemi staphaed o andanit long dis. !Nomoa ya! Hemi mas putum antap long barava ples blong hem nao, mekem olketa pipol wea olketa kam insaet long haos ya olketa save lukim laet blong hem ya. ³⁴ Ae blong yu nao hemi mekem bodi blong yu fo garem laet. So sapos ae blong yu hemi gud, bae bodi blong yu hemi laet tu ya. Bat sapos ae blong yu hemi nogud, bae bodi blong yu hemi tudak tu. ³⁵ Yu mas lukaot, nogud yu tingse yu laet, bat yu tudak nomoa. ³⁶ Sapos bodi blong yu hemi laet, an no eni ples long bodi hemi tudak, hemi olsem taem wanfala lam hemi saen kam long yu, mekem yu barava laet nao ya.” ³⁷ Taem Jisas hemi finisim toktok blong hem nomoa, wanfala Farasi hemi askem Jisas nao fo kam kaikai long haos blong hem. So Jisas hemi go wetem hem an hemi sidaon fo kaikai nao. ³⁸ Bat Farasi ya hemi sapraes tumas taem hemi lukim dat Jisas hemi nating wasim han blong hem bifoa hemi kaikai. ³⁹ Nao Masta hemi tok olsem long hem, “Yufala olketa Farasi ya, yufala save wari tumas fo klinim aotsaet long kap an plet, bat insaet long yufala hemi fulap long tingting fo laekem enikaen samting fo yufala seleva, an hemi fulap long enikaen ravis tingting moa. ⁴⁰ Yufala barava krangge tumas ya. ?Waswe, yufala tingse God hu hemi bin mekem aotsaet hemi no mekem insaet tu? ⁴¹ Bat yufala ya, yufala mas givim kaikai wea hemi stap long olketa plet blong yufala fo go long olketa pua pipol. Sapos yufala duim olsem, bae evrisamting ya hemi save klin tu ya. ⁴² “!Yufala olketa Farasi, yufala lukaot! Yufala save givim go long God wan-tent long olketa smolfala kaen samting fo suitim kaikai wea yufala save tekem kam long gaden. Bat yufala nating wari nomoa fo mekem evrisamting stret fo olketa pipol, an yufala nating wari tu fo lavem God. Olketa smolfala samting yufala mas duim ya, bat yufala mas no fogetem tu olketa bikfala samting ya moa. ⁴³ “!Yufala olketa Farasi, yufala lukaot! Bikos taem yufala go insaet long preahaos, yufala laekem tumas fo sidaon long olketa nambawan ples. An taem yufala wakabaot go long maket, yufala laekem tumas olketa pipol fo mekhae long yufala. ⁴⁴ !Yufala lukaot! Bikos yufala olsem olketa grev wea olketa no bin makem gudfala, so olketa pipol i no lukim an olketa step antap long olketa, an hemi mekem olketa fo no klin.” ⁴⁵ Nao wanfala long olketa tisa blong Lo hemi tok olsem, “Tisa, taem yu tok olsem yu barava tokspoelem mifala tu ya.” ⁴⁶ Nao Jisas hemi sei, “!Yufala olketa tisa blong Lo, yufala tu yufala lukaot! Yufala mekem plande rul wea hemi had tumas fo pipol fo falom, wea hemi olsem yufala putum olketa hevi samting tumas antap long solda blong olketa pipol fo karim nao. An yufala seleva, yufala nating save helpem olketa pipol lelebet fo karim olketa hevi samting ya. ⁴⁷ !Yufala lukaot! Bikos yufala mekem olketa gudfala samting antap long olketa grev blong olketa profet, wea olketa olo blong yufala nao bin kilim olketa dae. ⁴⁸ From wei ya, hemi olsem yufala somaot nao dat yufala barava wanmaen long wanem olketa olo blong yufala long bifoa olketa bin duim ya. Bikos olketa nao i bin kilim dae olketa profet ya, an yufala nao i gohed fo mekem olketa gudfala samting antap long olketa grev ya. ⁴⁹ Dastawe nao God wea hemi waes tumas hemi talem finis olsem, ‘Bae mi sendem kam olketa profet an olketa niusman blong mi long olketa pipol. An bae olketa kilim dae samfala long olketa, an bae olketa meksave long samfala long olketa moa.’ ⁵⁰ So bikos hemi olsem, bae yufala olketa pipol blong distaem, bae God hemi panisim yufala from dae blong olketa profet wea olketa bin kilim olketa dae, stat kam taem disfala wol hemi jes stat. ⁵¹ Olketa bin kilim dae evri profet, stat long disfala man Ebol an go kasem Sekaraea, disfala man wea olketa kilim hem dae kolsap long olta long Tambuhaos blong God. Tru mi talem yufala olketa pipol blong distaem, bae God hemi panisim yufala from dae blong olketa evriwan ya. ⁵² “!Yufala olketa tisa blong Lo, yufala lukaot! Bikos yufala nao i haedem ki blong haos wea pipol i save luksave long wei blong God. An yufala seleva tu i no wari nomoa fo go insaet long haos ya, an yufala stopem moa olketa wea i traehad fo go insaet.” ⁵³ Taem Jisas hemi lusim ples ya nomoa, olketa tisa blong Lo an olketa Farasi olketa gohed moa fo tokspoelem hem, an fo askem tu enikaen kuestin long hem. ⁵⁴ Olketa traehad fo trikim hem, mekem hemi save talem samting wea hemi no stret.

¹ Long wanfala taem, plande taosen pipol nao olketa hipap kam, go-go ples ya hemi barava ful fogud nao. An Jisas hemi tok olsem fastaem long olketa disaepol blong hem, “Yufala mas lukaot long diskaen yist wea hemi olsem wei blong olketa Farasi wea olketa save laea tumas long olketa pipol. ² Evrisamting wea man hemi haedem, bae evriwan save luksave long hem nomoa. Ya, evrisamting wea hemi staphaed distaem, bae evriwan save long hem nomoa. ³ An wanem yufala bin talemhaed, bae olketa pipol olketa heresave long hem. An wanem yufala bin talem smol long ia blong nara man insaet long rum blong yufala seleva, bae olketa talemaot bikfala fo olketa pipol herem.” ⁴ An Jisas hemi sei moa, “Mi talem long yufala olketa fren blong mi, yufala mas no fraetem olketa pipol wea olketa save kilim dae bodi blong yufala, an bihaen ya, bae olketa no save duim enisamting wea hemi nogud moa fo spoelem yufala. ⁵ Bat bae mi som yufala watkaen man nao yufala mas fraetem. Yufala mas fraetem God hu hemi save kilim dae bodi blong yufala, an hu hemi garem paoa tu fo torowem yufala go long hel. Ya, mi talem long yufala moa, yufala mas fraetem hem. ⁶ “Yufala save, faefala smolfala bed olketa save salem fo tufala blaksens nomoa. Bat nomata olsem, no eniwan long olketa bed ya God hemi fogetem ya. ⁷ Yufala save, nomata olketa hea long hed blong yufala, God hemi save long evriwan. So yufala mas no fraetem enisamting, bikos yufala nao bikfala winim go moa plande bed ya.” ⁸ An Jisas hemi sei moa, “Mi talem long yufala, sapos eniwan hemi talemaot long olketa pipol wea hemi blong mi, bae mi San Blong Man tu mi talem long olketa enjel blong God wea disfala man ya hemi blong mi. ⁹ Bat eniwan hu hemi talemaot long olketa pipol wea hemi no blong mi, bae mi San Blong Man tu mi talem long olketa enjel blong God wea disfala man ya hemi nating blong mi. ¹⁰ “An sapos eniwan hemi talem samting agensim mi San Blong Man, God hemi save fogivim hem nomoa. Bat eniwan hu hemi tokspoelem waka blong Holi Spirit, bae God hemi nating save fogivim hem. ¹¹ “Bae olketa tekem yufala go long kot long olketa preahaos, an long frant blong olketa primia an long olketa nara man hu i rulim yufala. Bat long taem ya, yufala no wari abaotem wanem nao fo talem an hao nao fo ansarem toktok blong olketa. ¹² Bikos long taem ya, Holi Spirit nao bae hemi tisim yufala long wanem yufala mas talem.” ¹³ Nao, wanfala long olketa hu hemi stanap fo herem toktok blong Jisas, hemi talem Jisas olsem, “Tisa, yu talem brata blong mi fo hemi mas divaedem olketa samting wea dadi blong mitufala hemi lusim taem hemi dae, mekem hemi givim kam haf long mi.” ¹⁴ Nao Jisas hemi sei, “!Man! Mi no garem paoa ya fo jajem bisnis blong yutufala an fo searemaot olketa samting long yutufala.” ¹⁵ An Jisas hemi gohed fo tok olsem long olketa, “Yufala mas lukaot gudfala, nogud yufala garem diskaen tingting fo tekem enikaen samting fo yufala seleva nomoa. Bikos tru laef blong man hemi no stap long olketa samting wea hemi garem, nomata hemi garem plande samting tumas.” ¹⁶ Bihaen, Jisas hemi talem wanfala tokpiksa long olketa olsem, “Wanfala ris man hemi stap an graon blong hem hemi gudfala graon, so hemi garem plande frut nao wea hemi redi long gaden blong hem. ¹⁷ So go-go hemi tingting olsem long hem seleva nao, ‘?Wanem nao bae mi duim? Mi nating garem eni ples wea hemi fitim fo mi save kipim evri kaikai blong mi long hem.’ ¹⁸ So hemi sei long hem seleva olsem, ‘Hem nao wanem bae mi duim ya. Olketa haos blong mi fo kipim kaikai long olketa, bae mi brekemdaon nomoa an bae mi wakem olketa haos wea olketa barava bikfala go moa. Bihaen, bae mi tekem olketa kaikai ya wetem evri narasamting blong mi moa an bae mi hipimap insaet long olketa haos ya nao. ¹⁹ An bae mi tok olsem long mi seleva, yu garem plande gud samting fitim plande yia nao. So long distaem yu save stapgud an no wari. Yu save kaikai an dring an stap hapi nomoa evritaem.’ ²⁰ Bat God hemi tok olsem long man ya, ‘!Yu krangge man! Long disfala naet ya, bae yu barava lusim laef blong yu ya. ?An yu tingse hu nao bae hemi tekem olketa samting wea yu bin hipimap fo yu seleva?’” ²¹ An Jisas hemi tok olsem nao, “Hemi olsem tu ya fo eniwan hu hemi hipimap olketa risis fo hem seleva nomoa, bat long saet blong God hemi nating garem enisamting.” ²² Jisas hemi tok olsem long olketa disaepol blong hem, “Dastawe nao mi talem long yufala, yufala mas no wari abaotem wanem nao bae yufala kaikaim, mekem yufala stap laef. An yufala mas no wari tu abaotem wanem nao bae yufala save werem long bodi. ²³ Bikos laef nao hemi bikfala samting moa winim kaikai, an bodi nao hemi bikfala samting moa winim kaleko yu werem. ²⁴ Yufala tingting fastaem long olketa bed ya. Olketa nating wari fo wakem eni gaden o fo tekem kaikai kam long gaden, an olketa no garem eni haos tu fo kipim kaikai long hem. Bat nomata olsem, God nao hemi fidim olketa. Bat yufala ya, yufala nao bikfala samting long ae blong God winim olketa bed ya. ²⁵ An nomata yufala wari tumas long laef blong yufala, yufala no save mekem laef blong yufala fo stap lelebet longtaem moa. ²⁶ ?Sapos yufala no save fo duim olketa smolfala samting olsem ya, fo wanem nao yufala wari tumas abaotem olketa narasamting ya? ²⁷ Yufala tingting fastaem long olketa flaoa wea olketa grou olobaot. Olketa no duim eni waka an olketa no mekem eni kaleko. Bat mi talem long yufala, olketa flaoa ya barava lukgud tumas winim King Solomon hu hemi ris tumas an hemi werem enikaen barava spesol kaleko blong hem. ²⁸ Olketa flaoa olobaot ya, olketa save stap fo lelebet taem nomoa, an bihaen ya, olketa pipol save torowem olketa go long faea nomoa. Bat nomata olketa olsem, God hemi givim samting wea hemi lukgud tumas fo olketa werem. ?Bat yufala tingse bae God hemi no save givim kaleko long yufala? Biliv blong yufala hemi smolfala tumas ya. ²⁹ “An yufala no wari tumas, an yufala no tingting olowe long wanem nao bae yufala kaikaim an wanem nao bae yufala dringim. ³⁰ Olketa pipol long disfala wol wea olketa no biliv long God, olketa save wari oltaem abaotem olketa samting olsem ya. Bat yufala ya, Dadi blong yufala hemi save finis wea yufala laekem olketa samting ya. ³¹ So yufala mas tingting oltaem long kingdom blong God. An evrisamting wea yufala laekem ya bae God nao hemi givim kam long yufala.” ³² An Jisas hemi sei moa, “Yufala no fraet, nomata yufala smolfala seksin nomoa, bikos Dadi blong yufala hemi hapi tumas fo letem yufala stap insaet long kingdom blong hem. ³³ So yufala mas salem evrisamting wea yufala garem, an yufala mas givim evri seleni ya fo go long olketa pua pipol. Yufala mas yusim diskaen paos wea hemi no save olo an brek. Long disfala wei ya, yufala hipimap olketa risis blong yufala long heven wea bae olketa no save finis enitaem. An long heven ya, bae no eni man fo stil i save kam an no eni kokoros tu i save spoelem olketa samting. ³⁴ Bikos ples wea olketa risis blong yufala hemi stap long hem, long ples ya nao tingting blong yufala hemi stap long hem tu.” ³⁵ An Jisas hemi sei moa, “Evritaem, yufala mas stap redi nomoa olsem man wea lam blong hem hemi laet an hemi putum redi kaleko blong hem finis. ³⁶ Yufala mas olsem olketa wakaman hu olketa weitem bikman blong olketa fo kambaek from fist blong marit, mekem taem hemi kam an noknok long doa, semtaem nomoa olketa save openem doa fo hem. ³⁷ Olketa wakaman ya olketa hapi tumas taem bikman blong olketa hemi kambaek an lukim dat olketa redi finis weitem hem. Mi talem yufala tru samting nao, bae bikman blong olketa hemi talem olketa fo sidaon fastaem, an bae hemi putum redi kaleko blong hem an gohed fo mekem kaikai fo olketa nao. ³⁸ Olketa wakaman i save hapi ya taem bikman blong olketa hemi lukim dat olketa redi finis weitem hem, nomata hemi kambaek long midol long naet o long eli moning, taem hemi tudak yet. ³⁹ “An yufala save, sapos man wea hemi onam haos hemi save long taem wea man fo stil bae hemi kam, bae hemi stopem disfala man fo no go insaet long haos blong hem. ⁴⁰ So yufala tu yufala mas redi olowe, bikos mi San Blong Man bae mi kambaek long taem wea yufala i nating save long hem.” ⁴¹ Nao Pita hemi sei, “?Masta, yu minim disfala tokpiksa ya fo mifala nomoa, o fo evriwan hu i hipap ya?” ⁴² Nao Masta hemi tok olsem, “?Hu nao wakaman hu hemi waes an hemi save kipim promis olowe? Hem nao disfala man wea bos blong hem hemi putum hem fo lukaftarem olketa nara wakaman blong hem, mekem hem nao save givim kaikai long olketa long barava taem fo kaikai. ⁴³ Disfala wakaman ya, hemi save hapi tumas taem bos blong hem hemi kambaek an lukim dat hemi gohed fo duim waka blong hem gudfala. ⁴⁴ Ya, mi talem yufala tru samting nao, bae bos blong hem hemi putum hem fo lukaftarem evrisamting blong hem nao ya. ⁴⁵ Bat sapos wakaman ya hemi tok olsem long hem seleva, ‘Bos blong mi hemi no save kambaek kuiktaem ya.’ So hemi gohed fo ki-kilim olketa nara man an olketa nara woman wea olketa waka ya, an hemi gohed fo kaikai an dring go-go hemi drang fogud nao. ⁴⁶ Bat seknomoa, bos blong hem hemi kambaek nao long de an long taem wea wakaman ya hemi nating redi long hem. Bae disfala bos ya hemi panisim fogud disfala wakaman. Bae hemi panisim hem tugeta wetem olketa nara pipol wea olketa no duim waka blong olketa gudfala. ⁴⁷ “Nao sapos wanfala wakaman hemi save nomoa long olketa samting wea bos blong hem hemi laekem hem fo duim, bat hemi nating mekredi an hemi no duim olketa samting ya, bae olketa mas panisim hem fogud. ⁴⁸ Bat wanfala wakaman wea hemi no save wanem bos blong hem hemi laekem hem fo duim, an hemi duim rong samting ya tu, bae olketa no panisim hem tumas ya. Hemi olsem, bikos man wea God hemi givim plande samting long hem, bae God hemi laekem man ya fo hemi mas mekem plande samting ya. An man wea God hemi givim barava plande samting tumas moa long han blong hem, bae God hemi laekem man ya fo mekem plande samting tumas moa tu.” ⁴⁹ An Jisas hemi sei moa, “Mi ya, mi kam fo mekem faea long disfala wol. An mi laekem tumas fo disfala faea ya fo laet gudfala, bat hemi no kam yet. ⁵⁰ Bat fastaem, mi mas go insaet long samting olsem baptaes wea bae mi safa an dae long hem. An oltaem nomoa, mi wari fogud go-go kasem taem disfala samting ya hemi gopas. ⁵¹ ?Waswe, yufala tingse mi kam fo mekem evriwan stap long piis long disfala wol? Nomoa ya. Bat mi kam fo divaedem olketa pipol ya. ⁵² Stat long distaem, raoa bae hemi stap insaet long olketa famili. Trifala bae i raoa wetem tufala, an tufala bae i raoa wetem trifala. ⁵³ An bae dadi i raoa wetem san blong hem, an san i raoa wetem dadi blong hem. An bae mami i raoa wetem dota blong hem, an dota i raoa wetem mami blong hem. An bae mami-inlo hemi raoa wetem dota-inlo blong hem, an dotainlo hemi raoa wetem mami-inlo blong hem.” ⁵⁴ Nao Jisas hemi tok olsem long olketa pipol ya tu, “Sapos yufala lukim olketa klaod kamap long west, semtaem yufala tok olsem, ‘Oo, bae hemi ren ya.’ An go-go hemi ren tru nao. ⁵⁵ An taem win hemi blou kam long saot, yufala talem olsem nao, ‘Oo, bae hemi hot ya.’ An go-go hemi hot tru nao. ⁵⁶ Yufala barava krangge tru ya. Yufala save luksave long olketa samting long disfala wol an long skae tu. ?So waswe nao yufala no save luksave nomoa long wanem hemi go-gohed long distaem?” ⁵⁷ An Jisas hemi sei moa, “?Waswe nao yufala no save jajem fo yufala seleva wanem hemi stret samting fo yufala duim? ⁵⁸ Taem wanfala man hemi tekem yu go long kot, yu mas traehad fo stretem disfala trabol wetem hem, taem yutufala no kasem kot yet. Nogud hemi tekem yu go long frant blong jaj, an jaj hemi givim yu go long han blong olketa pulis, an olketa pulis i putum yu go insaet long prisin. ⁵⁹ Mi talem long yufala, sapos olsem, bae yu no save goaot from prisin nao, go-go kasem taem wea yu givim las seleni wea hemi stap fo finisim faen blong yu.”

¹ Long taem ya tu, samfala pipol olketa kam an talem Jisas abaotem samfala man from provins long Galili, wea Paelat hemi bin kilim dae olketa taem olketa gohed fo mekem sakrifaes long God. ² Nao Jisas hemi sei, “?Waswe, yufala tingse disfala wei wea olketa dae long hem ya, hemi somaot dat wei blong olketa nao hemi rong moa winim olketa nara pipol long Galili? ³ !Nomoa ya! Bat mi talem long yufala, sapos yufala no lusim olketa ravis wei blong yufala, bae yufala evriwan i dae olsem olketa tu ya. ⁴ ?O waswe long eitinfala pipol ya hu olketa dae long taem disfala hae haos long Saeloam hemi foldaon antap long olketa? ?Waswe, yufala tingse olketa nao rong moa winim olketa nara pipol long Jerusalem? ⁵ !Nomoa ya! Bat mi talem long yufala, sapos yufala no lusim olketa ravis wei blong yufala, bae yufala evriwan i dae olsem olketa tu ya.” ⁶ Nao Jisas hemi talem disfala tokpiksa long olketa, “Wanfala man hemi garem wanfala fig tri wea hemi grou long plantesin blong grep tri blong hem. Long wanfala taem nao hemi go fo lukaotem frut long hem, bat hemi nating faendem eni frut nomoa. ⁷ So hemi tok olsem long wakaman hu hemi lukaftarem disfala gaden ya, ‘Distaem, hemi mektri yia nao wea mi bin kam an lukaotem frut long disfala fig tri ya, bat mi nating faendem eni frut long hem nomoa. Hemi gud sapos yu katemaot tri ya, nogud hemi yusim gudfala graon ya nating nomoa.’ ⁸ Bat man hu hemi lukaftarem gaden ya hemi sei, ‘Masta, yu livim tri ya fo stap fastaem fo wanfala yia moa, mekem mi save lukaftarem hem gud an putum moa gudfala graon raonem hem. ⁹ Sapos olsem, maet hemi save garem frut long hem long neks yia. Bat sapos nomoa, oraet, long taem ya nao yumi jes katemaot tri ya.’” ¹⁰ Long wanfala Sabat de, Jisas hemi gohed fo tisim olketa pipol insaet long wanfala preahaos. ¹¹ Long taem ya, wanfala woman hemi stap wea wanfala devol hemi stap long hem, an hemi bin mekem hem fo sik fo eitinfala yia nao. An baeksaet blong woman ya hemi ben fogud wea hemi nating save stanap stret. ¹² Taem Jisas hemi lukim woman ya nomoa, hemi kolem hem kam, an hemi sei long hem, “Woman, yu fri nao from siknis wea hemi spoelem yu.” ¹³ An hemi putum tufala han blong hem antap long woman ya an semtaem nomoa woman ya hemi stanap stret nao an hemi gohed fo mekhae long God. ¹⁴ Taem bikman blong preahaos ya hemi lukim dat Jisas hemi mekem woman ya fo gudbaek moa long Sabat de, hemi barava kros fogud nao. An hemi tok olsem long olketa pipol ya, “Siksfala de nao yumi save duim waka long hem. So sapos yufala laekem eniwan fo tekemaot siknis blong yufala, yufala save kam long olketa de olsem. !Bat yufala no kam fo diswan long Sabat de!” ¹⁵ Nao Masta hemi ansarem hem olsem, “Yufala ya, yufala save laea tumas ya. Eniwan long yufala, nomata long Sabat de, bae hemi save tekemaot rop from buluka o dongki blong hem an lidim hem go long wata, mekem hemi save dring. ¹⁶ Disfala woman ya hemi bon long laen blong olo blong yumi Ebraham, an Seitan hemi bin taemapem hem olsem fo eitinfala yia nao. ?So waswe nao hemi rong fo mekem hem fri from disfala siknis long Sabat de?” ¹⁷ Taem Jisas hemi tok olsem, olketa enemi blong hem olketa barava filsem fogud nao, bat olketa pipol i hapi tumas long olketa nambawan samting wea Jisas hemi duim. ¹⁸ Nao Jisas hemi askem olketa pipol olsem, “?Kingdom blong God, hemi olsem wanem ya? ?Watkaen samting nao mi save yusim fo somaot klia? ¹⁹ Hemi olsem wanfala sid blong mastad tri wea wanfala man hemi tekem an plantem insaet long gaden blong hem. Nao taem sid hemi grouap kam an hemi bikfala olsem tri, olketa bed olketa kam an mekem haos blong olketa long olketa brans blong hem.” ²⁰ An Jisas hemi sei moa, “?Watkaen samting nao mi save yusim fo somaot kingdom blong God? ²¹ Hemi olsem lelebet yist wea wanfala woman hemi tekem an miksim wetem wanfala ful baeg long flaoa. Bihaen nomoa, yist ya hemi mekem flaoa ya fo kamap bikfala tumas nao.” ²² Bihaen moa, Jisas hemi gogohed fo kasem Jerusalem. An taem hemi wakabaot gopas long olketa taon an olketa vilij, hemi gohed fo tisim olketa pipol. ²³ Nao wanfala man hemi askem hem, “?Waswe masta, samfala pipol nomoa bae God hemi sevem olketa?” Nao Jisas hemi ansarem olketa ya olsem, ²⁴ “Yufala mas traehad fo go insaet long disfala doa wea hemi smolfala tumas. Bikos mi talem long yufala, bae plande pipol tumas nao olketa traehad fo go insaet, bat bae olketa no save fo go insaet. ²⁵ Taem man hu hemi onam haos ya hemi go an satem doa, bae yufala stanap aotsaet an gohed fo noknok an askem hem olsem nao, ‘Plis masta. ?Yu save openem doa fo mifala?’ Bat bae hemi ansarem yufala olsem, ‘!Mi nating save long yufala ya!’ ²⁶ Nao bae yufala tok olsem moa, ‘Mifala bin kaikai an dring wetem yu, an yu bin tisim mifala insaet long taon blong mifala.’ ²⁷ Bat bae man ya hemi tok olsem moa, ‘Mi nating save long yufala ya. !Yufala giraot from ples ya, bikos wei blong yufala hemi ravis tumas ya!’ ²⁸ Bae yufala go-gohed fo krae nomoa an fo sore bikfala, taem yufala lukim Ebraham an Aesak an Jekob wetem olketa profet blong bifoa wea olketa stap insaet long kingdom blong God. Bat yufala ya, bae olketa raosim yufala fo goaot nomoa from ples ya. ²⁹ Bae olketa pipol olketa kam from evri ples long wol an bae olketa kam fo kaikai tugeta long bikfala fist insaet long kingdom blong God. ³⁰ Mi talem long yufala, samfala pipol hu olketa las long distaem, bae olketa kamap nambawan moa. An samfala pipol hu olketa nambawan long distaem, bae olketa kamap las moa.” ³¹ Long semtaem ya, samfala Farasi olketa kam long Jisas an olketa tok olsem long hem, “Hemi gud sapos yu goawe distaem an go kasem nara ples moa, bikos King Herod Antipas hemi laekem tumas fo kilim yu dae.” ³² Nao Jisas hemi sei, “Yufala go long Herod hu hemi olsem wael dog, an talem hem olsem, ‘Distaem nao mi gohed nomoa fo raosim olketa devol an fo mekem olketa pipol fo gudbaek moa, an bihaen nao bae mi finisim waka blong mi.’ ³³ Bat tude an tumoro an samfala nara de moa, mi mas gohed nomoa long gogo blong mi. Bikos hemi no fitim fo olketa kilim dae profet long eni deferen ples, bat long Jerusalem nomoa.” ³⁴ An Jisas hemi sei moa, “!Jerusalem, Jerusalem! Yu nao kilim dae olketa profet an yu nao sutim dae olketa niusman long ston. Plande taem mi laekem yufala fo kam long mi, mekem mi lukaftarem yufala olsem taem kokorako hemi haedem olketa smolfala pikinini blong hem andanit long wing blong hem. Bat yufala nating wiling nomoa. ³⁵ So yufala herem, God bae hemi goawe from Tambuhaos blong yufala ya. An mi talem long yufala, bae yufala nating save lukim mi moa, go-go kasem taem wea yufala evriwan talem olsem, ‘!God, yu blesim disfala man hu hemi kam long nem blong yu!’”

¹ Long wanfala Sabat de, Jisas hemi go fo kaikai long haos blong wanfala bikman blong olketa Farasi. An long taem ya, olketa pipol barava lukluk falom Jisas nao. ² Nao wanfala man hemi kam long Jisas wea tufala han an tufala lek blong hem olketa boela fogud. ³ So Jisas hemi askem olketa Farasi an olketa tisa blong Lo olsem fastaem, “?Waswe, Lo hemi letem yumi fo mekem olketa sikman fo gudbaek moa long Sabat de?” ⁴ Bat olketa man ya olketa nating toktok nomoa. So Jisas hemi tasim sikman ya an hemi mekem hem fo gudbaek moa from sik ya. Bihaen, hemi letem man ya fo go nao. ⁵ An Jisas hemi askem olketa man ya olsem moa, “?Waswe, sapos san blong yu o buluka blong yu hemi foldaon long wel long Sabat de, yu save go long semtaem an pulum hem goap?” ⁶ Bat taem ya, olketa man nating talem enisamting long Jisas nao, olketa stap kuaet nomoa. ⁷ Nao long taem ya, Jisas hemi lukim samfala pipol wea olketa kam fo kaikai wea olketa siusim nomoa olketa nambawan ples fo sidaon long hem. So hemi talem olketa olsem, ⁸ “Taem eniwan hemi askem yu fo go kaikai wetem hem long fist blong marit, yu no go an sidaon long olketa nambawan ples. Nogud man wea hemi mekem fist ya, hemi bin askem kam wanfala man hu hemi bikman winim yu moa. ⁹ Sapos olsem, bae hemi sei long yu, ‘Yu go from ples ya an letem man ya fo sidaon long hem.’ So bae yu barava filsem fogud nao, taem yu muv go an sidaon long las ples ya. ¹⁰ Bat wanem yu mas duim nao hemi olsem. Taem olketa askem yu fo kam long eni fist, yu mas go nomoa an sidaon long olketa las ples. Nao taem man hu hemi mekem fist ya hemi kam, hemi save tok olsem long yu, ‘Fren, yu kam sidaon long disfala nambawan ples.’ Taem ya nomoa, bae evriwan wea olketa sidaon long fist ya, bae olketa luksave nao dat man ya hemi tinghae long yu. ¹¹ So hemi olsem tu, sapos eniwan hemi mekem hem seleva fo hae, bae God hemi mekem hem fo lou, bat eniwan hu hemi mekem hem seleva fo lou, bae God hemi mekem hem fo hae moa.” ¹² An Jisas hemi tok olsem long man hu hemi mekem fist ya, “Taem yu mekem wanfala fist, yu no askem kam olketa fren blong yu o olketa brata blong yu o olketa laen blong yu o olketa ris man hu i stap kolsap long yu. Bikos olketa save mekem olketa nara fist fo sensimbaek long yu nomoa ya. ¹³ Bat taem yu mekem fist, yu mas askem olketa pua pipol, an olketa hu lek blong olketa i dae, an olketa hu ae blong olketa hemi blaen, an olketa nara pipol wea bodi blong olketa hemi nogud. ¹⁴ Olketa ya nao i no save sensimbaek disfala fist wea yu mekem fo olketa. So sapos yu duim olsem, yu save hapi nao ya, bikos God nao bae hemi sensimbaek long yu long taem wea bae olketa stretfala pipol olketa laefbaek moa.” ¹⁵ Taem wanfala man hu hemi sidaon kaikai hemi herem wanem Jisas hemi talem, hemi sei nao, “Man wea bae hemi kam long fist insaet long kingdom blong God, hemi save hapi ya.” ¹⁶ Nao Jisas hemi tok olsem long hem, “Wanfala man hemi mekem wanfala bikfala fist, an hemi askem plande pipol nao fo kam long fist ya. ¹⁷ Taem evrisamting hemi redi finis, hemi sendem go wakaman blong hem fo go an talem olsem long olketa pipol wea hemi bin askem olketa finis fo kam, ‘Yufala kam nao, bikos evrisamting hemi redi finis.’ ¹⁸ Bat olketa stat fo toktok olobaot an talem enikaen samting wea hemi stopem olketa fo no kam. Wanfala hemi sei, ‘Oo, mi jes baem wanfala pisgraon ya, so mi mas go lukim fastaem. So yu talem man ya, mi sore tumas nao.’ ¹⁹ Narawan moa hemi sei, ‘Mi jes baem tenfala buluka an distaem mi go fo lukim sapos olketa save waka gud o nomoa. So yu talem man ya, mi sore tumas nao.’ ²⁰ An narawan moa hemi sei, ‘Mi ya, mi jes marit ya, so hemi had fo mi fo kam.’ ²¹ “Taem wakaman ya hemi kambaek an talem evrisamting ya, bos blong hem hemi barava kros tumas nao, so hemi talem olsem long wakaman ya, ‘Yu go kuiktaem long olketa bikfala rod an olketa smolfala rod long taon ya, an yu tekem kam olketa pipol hu i pua, an olketa hu ae blong olketa hemi blaen, an olketa hu lek blong olketa hemi dae, an olketa nara pipol wea bodi blong olketa hemi nogud.’ ²² Nao taem wakaman ya hemi kambaek, hemi tok olsem nao, ‘Bikman, wanem yu talem mi fo duim, mi duim finis nao, bat plande ples hemi emti yet ya.’ ²³ Nao bikman ya hemi sei moa, ‘Yu go moa long olketa rod long baekwe an long olketa smolfala rod long bus, an yu tekem kam olketa pipol, mekem haos blong mi hemi fulap. ²⁴ Mi talem long yu, no eniwan long olketa wea mi bin askem fastaem ya, bae olketa save kam an kaikai long fist blong mi.’” ²⁵ Wanfala taem nao plande pipol tumas olketa go-go wetem Jisas. Nao Jisas hemi taneraon an hemi tok olsem long olketa, ²⁶ “Eniwan hu hemi kam long mi wea hemi laek fo kamap disaepol blong mi, hemi mas lavem mi moa winim hao hemi save lavem mami an dadi blong hem an waef blong hem an olketa pikinini blong hem an olketa brata an sista blong hem, an nomata laef blong hem seleva tu. ²⁷ An eniwan hu hemi no wiling fo karim kros blong hem an falom mi, disfala man ya hemi no save kamap wanfala disaepol blong mi. ²⁸ “Sapos wanfala long yufala hemi wande fo wakem wanfala haos, hemi mas sidaon fastaem fo faendemaot haomas seleni nao hemi fitim fo wakem haos ya. Long wei ya, hemi save luksave sapos hemi garem naf seleni fo finisim disfala haos o nomoa. ²⁹ Nao sapos hemi no duim olsem, nomata hemi finisim faondesin blong haos ya, bae hemi no save fo finisim haos ya. An bae olketa pipol i lukim nomoa an bae olketa tokspoelem hem olsem, ³⁰ ‘!Maewat! Man ya, hemi stat fo wakem haos ya, bat go-go hemi no save finisim.’ ³¹ “Nao sapos wanfala king hu hemi garem 10,000 soldia, hemi laek fo goaot fo faet agensim nara king hu hemi garem 20, soldia, oraet, bae hemi mas sidaon fastaem an tingting gud sapos hemi strong fitim, mekem hemi save winim nara king ya. ³² Sapos hemi tingse hemi no strong fitim diswan, bae hemi mas sendem go samfala niusman fastaem nao, taem nara king ya hemi farawe kam yet, mekem olketa save stretem evrisamting long tufala fo no faet. ³³ So yufala tu mas tingting gud fastaem olsem, bikos man hu hemi no wiling fo lusim evrisamting wea hemi garem, hemi no save kamap wanfala disaepol blong mi ya.” ³⁴ An Jisas hemi sei moa, “Solt hemi wanfala gud samting ya, bat sapos hemi lusim strong blong hem, bae yu no save mekem hem fo gudbaek moa. ³⁵ Bae hemi nating fit fo yusim fo enisamting moa, nomata fo miksim wetem graon long gaden, o fo putum wetem olketa ravis wea hemi save roten fo mekem graon gudfala moa. Hemi fitim nomoa fo torowem. So eniwan hu hemi garem ia, hemi mas heremgud toktok ya nao.”

¹ Nao olketa man fo tekem taks an olketa nara ravis pipol olketa kam long Jisas fo lisin long toktok blong hem. ² Bat olketa Farasi an olketa tisa blong Lo, olketa stat fo tok agensim Jisas olsem, “Man ya hemi save fren wetem olketa ravis pipol ya an hemi save kaikai wetem olketa tu.” ³ So Jisas hemi talem disfala tokpiksa long olketa, ⁴ “?Sapos wanfala long yufala hemi garem 100 sipsip, an gogo wanfala long olketa hemi lus, waswe, wanem nao bae man ya hemi duim? Bae hemi lusim olketa nara 99 sipsip ya long ples wea olketa kaikai, an bae hemi go an lukaotem sipsip wea hemi lus ya, go-go hemi faendem. ⁵ An taem hemi faendem, hemi barava hapi fogud nao, an bae hemi putum antap long solda blong hem ⁶ an karim gobaek long haos blong hem nao. Bihaen moa, hemi kolem kam olketa fren blong hem an olketa hu stap kolsap long hem, an hemi sei, ‘Yufala kam an hapi wetem mi. Yufala save, disfala sipsip wea hemi lus ya, mi faendem nao.’ ⁷ Mi talem long yufala, hemi olsem long heven tu ya, bikos olketa long heven bae olketa barava hapi moa, taem wanfala man wea hemi garem sin hemi lusim olketa ravis wei blong hem. Ya, bae hapi blong olketa wetem man ya, hemi winim hapi blong olketa wetem 99 pipol wea olketa stretfala olowe an olketa no save duim eni ravis samting wea olketa mas lusim.” ⁸ An Jisas hemi sei moa, “?Sapos wanfala woman hemi garem tenfala seleni an go-go wanfala hemi lus, wanem nao bae hemi duim? Bae hemi laetem fastaem wanfala lam, an bae hemi suipim haos ya an lukaotem gudfala, gogo hemi save faendem. ⁹ An taem hemi faendem nomoa, bae hemi kolem kam olketa fren blong hem an olketa hu i stap kolsap long hem an bae hemi sei, ‘Yufala kam an hapi wetem mi. Yufala save, seleni wea hemi lus ya, mi faendem nao.’ ¹⁰ Mi talem long yufala, hemi olsem long heven tu ya, bikos olketa enjel blong God bae olketa hapi moa taem wanfala man wea hemi garem sin hemi lusim olketa ravis wei blong hem.” ¹¹ An Jisas hemi sei moa, “Wanfala man hemi stap wea hemi garem tufala san. ¹² Nao lasbon hemi tok olsem long dadi blong hem, ‘Dadi, plis yu givim mi disfala haf wea mi sapos fo tekem long olketa samting blong yu taem yu dae.’ So dadi blong hem hemi divaedem evrisamting ya fo tufala san blong hem nao. ¹³ No longtaem bihaen, lasbon ya hemi salem evrisamting blong hem, an hemi tekem seleni ya an hemi lusim hom blong hem nao. Hemi go long wanfala kantri wea hemi farawe tumas, an hemi spoelem seleni blong hem long enikaen ravis samting nomoa. ¹⁴ Taem hemi spoelem evri seleni blong hem finis, bikfala taem blong hanggre nao hemi kamap long ples ya, an boe ya hemi no garem enisamting moa. ¹⁵ So hemi go an askem waka long wanfala man blong disfala kantri ya. Nao man ya hemi sendem hem go fo lukaftarem olketa pikpik blong hem long ples blong olketa. ¹⁶ Boe ya hemi laekem tumas fo kaikaim olketa kaikai blong olketa pikpik, bat no eniwan nao hemi givim enisamting long hem. ¹⁷ Gogo maen blong hem hemi jes ting gobaek long hom blong hem nao, an hemi tingim olsem, ‘!Maewat! Evriwan wea olketa waka fo dadi blong mi olketa garem plande kaikai tumas, bat mi ya mi kolsap dae long hanggre nao. ¹⁸ Bae mi lusim ples ya an mi gobaek nao long dadi blong mi, an bae mi tok olsem long hem, “Dadi, wanem mi bin duim hemi nating stret long ae blong yu an long ae blong God tu. ¹⁹ Distaem mi nating fitim fo yu kolem mi san blong yu. Bae yu mekem mi kamap olsem wanfala wakaman blong yu nomoa.”’ ²⁰ So hemi lusim ples ya an hemi gobaek nao long dadi blong hem. “Bat taem hemi ka-kam farawe yet, dadi blong hem hemi lukim hem, an hemi sore tumas long san blong hem nao. So hemi ran go fo mitim hem, an hemi putum han blong hem raonem hem an hemi kisim hem. ²¹ Nao man ya hemi tok olsem long dadi blong hem, ‘Dadi, wanem mi bin duim hemi nating stret long ae blong yu an long ae blong God tu. Distaem mi nating fitim fo yu kolem mi long san blong yu nao.’ ²² Bat dadi blong hem hemi singaot go long olketa wakaman blong hem olsem, ‘!Kuiktaem! Yufala tekem kam disfala nambawan kaleko an putum long hem. An yufala putum wanfala ring long fingga blong hem, an yufala putum olketa sandol long lek blong hem tu. ²³ An yufala go an kilim disfala nambawan buluka ya nao, mekem yumi mekem bikfala fist fo makem disfala taem blong hapi. ²⁴ Bikos disfala san blong mi wea hemi lus from mi an wea hemi olsem hemi dae, distaem hemi kambaek an hemi olsem hemi laefbaek moa.’ So olketa gohed fo kaikai an fo hapi nao. ²⁵ “Taem evrisamting ya hemi gogohed olsem, fasbon ya hemi stap kam yet long olketa gaden. Taem hemi kambaek an hemi kolsap kasem haos, hemi herem nao olketa pipol wea olketa gohed fo singsing an dans. ²⁶ So hemi kolem kam wanfala wakaman, an hemi askem hem, ‘Wanem nao hemi gohed ya.’ ²⁷ Nao wakaman ya hemi sei, ‘Oo diswan ya hemi from brata blong yu hu hemi kambaek nao. An dadi blong yu hemi kilim disfala nambawan buluka ya, bikos lasbon ya hemi kambaek an hemi laef gudfala nomoa.’ ²⁸ “Taem fasbon ya hemi herem diswan, hemi barava kros tumas nao, an hemi nating laekem fo go insaet long haos ya. So dadi blong hem hemi go long hem an hemi traehad fo talem hem fo kam insaet. ²⁹ Bat fasbon ya hemi jes tok olsem long dadi blong hem, ‘!Yu lukim! Plande yia nao mi bin hadwaka fo yu, an evritaem nomoa mi obeim evrisamting wea yu talem mi fo duim. Bat no enitaem nao yu bin givim mi enisamting, nomata smolfala nanigot fo mi mekem fist wetem olketa fren blong mi. ³⁰ Bat disfala san blong yu ya, hemi bin spoelem evri seleni blong yu long olketa gele hu olketa juri ya, an taem hemi kambaek, yu jes kilim nambawan buluka ya fo hem nao.’ ³¹ Nao dadi blong hem hemi tok olsem, ‘San blong mi, yu ya yu stap wetem mi evritaem nomoa, an evrisamting wea mi garem ya hemi blong yu tu ya. ³² Bat mifala mas mekem fist an mifala mas hapi, bikos brata blong yu ya hemi lus from yumi an hemi olsem hemi dae finis, bat distaem hemi kambaek an hemi olsem hemi laefbaek moa.’”

¹ Nao Jisas hemi talem olketa disaepol blong hem olsem, “Wanfala ris man hemi stap, an hemi garem wanfala man hu hemi bos long olketa waka blong hem. Bat go-go olketa talem long ris man ya wea disfala bos hemi spoelem olketa seleni blong hem. ² So ris man ya hemi kolem kam bos ya, an hemi talem hem olsem, ‘?Hao nao disfala nius wea mi bin herem abaotem yu ya? Bae yu no save gohed fo holem disfala waka moa ya. So yu mas mekem wanfala ripot fo mi long olketa samting wea yu bin lukaftarem.’ ³ Bihaen, man ya hemi tingting olsem, ‘?Wanem nao bae mi duim taem bikman blong mi hemi raosim mi from waka blong mi ya? Mi nating fit fo digim dren ya, an mi sem tumas fo askem seleni long olketa pipol. ⁴ Oo, mi save nao wanem mi mas duim. An long wei ya, bae mi save garem samfala fren hu i save askem mi fo kam long haos blong olketa, nomata mi finis from disfala waka.’ ⁵ “So hemi kolem kam evriwan wea olketa kaon long bikman blong hem nao. An hemi askem wanfala long olketa, ‘?Haomas nao yu kaonem long bikman blong mi?’ ⁶ Nao man ya hemi sei, ‘Mi kaonem 800 galon long oliv oel ya.’ So bos ya hemi sei, ‘Olsem, yu tekem disfala pepa long kaon blong yu an yu sidaon distaem an yu sensim go long 400 galon nomoa.’ ⁷ Bihaen ya, hemi askem nara man moa, ‘?Haomas nao yu kaonem ya?’ Nao man ya hemi sei, ‘Mi kaonem 1,000 baeg long wit ya.’ So bos ya hemi sei, ‘Yu tekem pepa long kaon blong yu an yu sensim go long baeg nomoa.’ ⁸ “Nao bihaen nomoa, bikman blong disfala bos hu hemi bin raverave ya, hemi preisim hem nao bikos hemi kleva tumas fo duim olketa samting ya. Bikos olketa pipol blong disfala wol ya olketa barava save tumas hao fo lukaftarem bisnis blong olketa, winim olketa pipol blong laet.” ⁹ An Jisas hemi gohed fo tok olsem moa, “So mi talem long yufala, yufala mas yusim olketa risis blong wol ya fo mekem olketa pipol kamap fren wetem yufala, mekem taem yufala no save yusim moa olketa risis blong wol ya, bae olketa save fren wetem yufala moa long ples wea laef hemi no save finis. ¹⁰ Eniwan wea olketa pipol save trastem hem fo lukaftarem olketa smolfala samting, bae olketa save trastem hem fo lukaftarem olketa bik samting tu ya. An eniwan wea olketa pipol nating save trastem hem fo lukaftarem olketa smolfala samting, bae olketa nating save trastem hem fo lukaftarem olketa bik samting tu ya. ¹¹ ?So sapos olketa no save trastem yu fo lukaftarem risis blong disfala wol, hao nao bae olketa save trastem yu fo lukaftarem olketa risis wea hemi barava truwan? ¹² ?An sapos olketa no save trastem yu fo lukaftarem samting blong nara man, hao nao bae God hemi givim long yu olketa samting blong yu seleva? ¹³ “No eni wakaman hemi save waka fo tufala deferen masta ya. Bae hemi laekem wanfala an bae hemi no laekem narawan. An bae hemi tinghae long wanfala an bae hemi no tinghae long narawan. So yu no save tinghae long God an long risis blong wol ya olsem tufala masta blong yu.” ¹⁴ Olketa Farasi olketa herem diswan an olketa gohed fo tokspoelem Jisas nao, bikos olketa ya olketa lavem seleni tumas ya. ¹⁵ So Jisas hemi talem olketa olsem, “Yufala save traehad fo mekem olketa pipol fo tinghae long yufala, bat God hemi save nomoa long maen blong yufala. Bikos wanem yufala olketa pipol i tingse hemi bikfala samting tumas, long ae blong God hemi olsem samting nating nomoa ya.” ¹⁶ An Jisas hemi sei moa, “Taem blong Lo blong Mosis an toktok blong olketa profet hemi finis nao. Bat stat long Jon Baptaes, olketa gohed fo talemaot Gudnius ya abaotem kingdom blong God. An olketa pipol olketa barava traehad tumas fo kam insaet long disfala laef. ¹⁷ Nao hemi had tumas ya fo heven an disfala wol fo lus finis, bat hemi barava had moa fo eni smolfala samting long Lo fo hemi lus. ¹⁸ “Nao sapos wanfala man hemi lusim waef blong hem an hemi maritim moa narafala woman, man ya hemi brekem lo blong marit nao ya. An sapos wanfala ma n hemi ma r it im wa nfa la woman wea hasban blong hem hemi bin lusim hem finis, man ya hemi brekem lo blong mar it tu ya.” ¹⁹ An Jisas hemi sei moa, “Wanfala ris man hemi stap hu hemi save werem olketa kaleko wea hemi barava dia tumas. An long evri de hemi kaikaim olketa nambawan kaikai tumas tu. ²⁰ Nao wanfala pua man tumas hu nem blong hem Lasaros, hemi stap tu ya. An bodi blong hem hemi garem plande soa long hem. Evritaem nomoa, hemi leidaon long doa blong haos blong ris man ya. ²¹ An hemi laekem tumas fo kaikaim eni haf kaikai wea hemi foldaon from tebol blong ris man ya. An evritaem nomoa, olketa dog olketa save kam an wasim olketa soa blong hem long tang blong olketa. ²² “Go-go nao disfala pua man ya hemi dae an olketa enjel i karim hem go fo sidaon wetem Ebraham long heven. An go-go ris man ya tu hemi dae an olketa berem hem. ²³ Nao ris man ya hemi barava safa tumas wea hemi stap long ples blong olketa man wea i dae finis. An taem hemi luk goap, hemi lukim Ebraham wea hemi stap farawe tumas, an hemi lukim Lasaros tu hemi stap long saet long hem. ²⁴ So hemi singaot go long Ebraham olsem, ‘Dadi Ebraham, mi safa tumas nao insaet long disfala faea ya. Plis, yu sore kam long mi an talem Lasaros fo mekem fingga blong hem fo tuwet insaet long wata, an fo hemi putum kam long tang blong mi, mekem hemi kol lelebet.’ ²⁵ “Bat Ebraham hemi tok olsem, ‘San, yu save long taem yu laef yet, yu bin garem evri gud samting nomoa, bat Lasaros hemi bin garem evri ravis samting nao. Bat long distaem, Lasaros hemi hapi tumas nao, bat yu gohed fo safa fogud nomoa. ²⁶ An narasamting moa, wanfala bikfala hol tumas nao hemi stap long midol long yumi, so hemi had tumas fo eniwan long saet long mifala fo go kasem saet long yufala. An hemi had tumas tu fo eniwan long saet long yufala fo katkros kam long saet long mifala.’ ²⁷ Nao ris man ya hemi sei, ‘Sapos olsem, mi askem yu, plis yu sendem Lasaros fo go long haos blong dadi blong mi, ²⁸ bikos mi garem faefala brata ya. Hemi save wonem olketa, mekem olketa no kam long disfala ples ya wea olketa save safa tumas long hem.’ ²⁹ “Bat Ebraham hemi sei, ‘Olketa brata blong yu olketa garem wanem Mosis an olketa profet olketa bin raetem ya, so letem olketa seleva nao herem olketa toktok ya.’ ³⁰ Nao ris man ya hemi sei moa, ‘Nomoa ya Ebraham, bat sapos eniwan hemi laefbaek moa from dae an hemi go long olketa, bae long taem ya nao olketa save lusim olketa ravis wei blong olketa.’ ³¹ Bat Ebraham hemi sei, ‘Sapos olketa no save bilivim wanem Mosis an olketa profet olketa talem, nomata wanfala man hemi laefbaek moa from dae, bae hemi had tumas fo olketa bilivim toktok blong hem tu ya.’”

¹ Nao Jisas hemi tok olsem moa long olketa disaepol blong hem, “Olketa samting wea hemi save mekem olketa pipol fo sin, bae olketa mas hapen ya. !Bat disfala man hu hemi mekem olketa samting ya fo hapen, hemi mas lukaot! ² Sapos wanfala man hemi mekem wanfala long olketa pikinini wea olketa biliv long mi fo foldaon long sin, hemi moabeta sapos olketa taemapem wanfala bikfala ston long nek blong man ya an torowem godaon insaet long si. ³ So yufala mas lukaot gud long wanem yufala duim. “Sapos wanfala brata blong yu hemi duim enisamting agensim yu, yu mas stretem hem. An sapos hemi sensim tingting blong hem, oraet, yu mas fogivim hem. ⁴ Sapos hemi duim enisamting agensim yu long sevenfala taem insaet wanfala de, an sevenfala taem hemi kambaek long yu an hemi sei, ‘Mi sensim tingting blong mi nao,’ oraet, yu mas fogivim hem tu.” ⁵ Olketa aposol olketa tok olsem long Masta, “Plis, yu mekem biliv blong mifala fo kamap strongfala moa.” ⁶ Nao Masta hemi ansarem olketa olsem, “Nomata yufala garem biliv wea hemi smolfala olsem sid blong mastad tri, yufala save tok long tri longwe olsem, ‘Yu pulum yu seleva aot from graon, an yu go an plantem yu seleva insaet long solwata.’ An bae hemi save obeim yufala nao ya.” ⁷ An Jisas hemi sei moa, “Sapos wanfala long yufala hemi garem wanfala wakaman hu hemi waka long gaden, o hu hemi lukaftarem olketa sipsip. ?Nao taem hemi kambaek long haos nomoa, waswe, bae bos blong hem hemi talem hem fo sidaon an kaikai long semtaem? ⁸ Nomoa ya. Fastaem bae hemi talem hem olsem ya, ‘Yu redim kaikai blong mi fastaem. An yu werem gudfala kaleko blong yu an yu gohed fo tekem kam kaikai an dring fo mi ya. An taem yu duim olketa samting ya finis, oraet, yu seleva save go an kaikai an dring nao.’ ⁹ An bae bos ya hemi no sei tengkiu long wakaman blong hem, bikos hemi duim nomoa wanem hemi talem hem fo duim ya. ¹⁰ So long distaem, yufala mas duim olsem tu. Taem yufala duim evrisamting wea olketa talem yufala fo duim, yufala mas sei olsem nomoa, ‘Yumi olketa wakaman nomoa ya, an hemi no fitim fo eniwan fo mekhae long yumi, bikos yumi duim nomoa olketa samting wea yumi mas duim.’” ¹¹ Taem Jisas hemi wakabaot go fo kasem Jerusalem, hemi kam long spialaen long midol long Samaria an Galili. ¹² An taem hemi kam kolsap long wanfala vilij nomoa, tenfala man wea olketa garem ravis sik blong skin nao olketa kam fo mitim hem. So olketa stanap kam farawe nomoa an ¹³ olketa singaot bikfala kam fo Jisas olsem nao, “!Jisas, Masta! Plis, yu sore kam long mifala.” ¹⁴ Nao taem Jisas hemi lukim olketa nomoa, hemi tok olsem long olketa nao, “Yufala mas go an letem olketa prist fo lukluk long bodi blong yufala fastaem.” Taem olketa lusim Jisas an olketa go-go long rod yet, bodi blong olketa hemi gudbaek moa nao. ¹⁵ Nao taem wanfala man long olketa ya hemi luksave dat hemi gudbaek moa, hemi kambaek long Jisas an hemi gohed fo singaot an mekhae long God nao. ¹⁶ An hemi kam an hemi nildaon long frant blong Jisas an hemi talem tengkiu long hem. Bat disfala man ya hemi wanfala man blong Samaria ya. ¹⁷ Nao Jisas hemi sei, “Tenfala man nao mi mekem olketa fo gudbaek moa ya. ?Wea nao nara naenfala man ya? ¹⁸ ?An waswe nao disfala man wea hemi no Jiu ya, hem nomoa hemi kambaek an preisim God?” ¹⁹ So Jisas hemi sei long man ya, “Yu stanap an yu go nao, biliv blong yu nao hemi mekem yu fo gudbaek moa.” ²⁰ Long wanfala taem, samfala Farasi olketa askem Jisas olsem, “Long wataem nao bae kingdom blong God, hemi kam.” Nao Jisas hemi sei, “Kingdom blong God, hemi no olsem samting yu save lukim long ae blong yu ya. ²¹ An bae no eniwan tu hemi save sei, ‘!Hem long hia!’ o ‘!Hem longwe!’ Nomoa ya. Bikos hemi samting wea hemi stap finis insaet long yufala.” ²² Nao hemi tok olsem long olketa disaepol blong hem, “Long wanfala taem wea bae hemi kam, bae yufala laekem tumas fo lukim mi San Blong Man, nomata fo wanfala de nomoa, bat bae yufala no save lukim mi ya. ²³ An bae samfala pipol olketa tok olsem long yufala, ‘!Hem longwe!’ o ‘!Hem long hia!’ Bat yufala no wari fo go an falom olketa. ²⁴ Bikos taem mi San Blong Man mi kambaek, bae ka-kam blong mi hemi olsem laetning wea hemi laet bikfala long skae an hemi saen kam long wanfala saet go kasem long narasaet. ²⁵ Bat fastaem, olketa mas meksave long mi an bae olketa pipol blong distaem bae olketa nating laekem mi nao. ²⁶ Nao wanem hemi hapen long taem blong Noa, hem tu bae hemi hapen long taem mi San Blong Man mi kambaek. ²⁷ Yu save, long taem blong Noa, olketa pipol olketa gohed fo kaikai an dring an mekem marit, go-go kasem barava de wea Noa hemi go insaet long bikfala sip ya. Nao long taem ya nomoa, bikfala flad ya hemi kam an hemi kilim dae evriwan nao. ²⁸ An hemi olsem tu long taem blong Lot. Olketa pipol olketa gohed nomoa fo kaikai an dring an mekem bisnis blong olketa, an olketa gohed tu fo plantem gaden an wakem haos. ²⁹ Bat long de wea Lot hemi ranawe from Sodom, faea wetem diskaen ston salfa hemi laet, olketa foldaon kam from skae an olketa bonem evriwan nao. ³⁰ So bae hemi olsem tu long de ya wea bae mi San Blong Man mi kambaek, mekem olketa pipol luksave long mi. ³¹ “Long de ya, man hu hemi stap kam aotsaet long haos blong hem, hemi mas no go insaet long haos moa fo tekem olketa samting blong hem. An hemi olsem tu fo man hu hemi stap kam long gaden blong hem, hemi mas no gobaek long haos moa fo tekem olketa samting blong hem. ³² Yufala mas tingim gud wanem hemi hapen long waef blong Lot. ³³ So hemi olsem tu, eniwan hu hemi traehad fo sevem laef blong hem seleva, bae hemi lusim tru laef ya. Bat eniwan hu hemi lusim laef blong hem, bae hem nao hemi save sevem tru laef blong hem. ³⁴ Mi talem long yufala, long naet ya bae tufala man i slip long wanfala bed, an bae olketa tekem go wanfala, bat narawan bae hemi stap nomoa bihaen. ³⁵ An bae tufala woman i waka tugeta fo mekem flaoa, an bae olketa tekem go wanfala, bat narawan bae hemi stap nomoa bihaen.” ³⁷ Nao olketa disaepol olketa askem Jisas olsem, “?Masta, wea nao bae samting ya hemi hapen?” Nao Jisas hemi sei, “Long eni ples wea samting wea hemi dae hemi stap long hem, bae olketa igol i kam hipap raonem hem nao ya.”

¹ Bihaen, Jisas hemi talem wanfala tokpiksa long olketa disaepol blong hem fo tisim olketa wea olketa mas no wikdaon bat gohed fo prea olowe. ² Nao Jisas hemi tok olsem, “Long wanfala taon wanfala jaj hemi stap hu hemi nating wari fo tinghae long God an hemi nating wari long olketa pipol tu. ³ Long taon ya tu wanfala wido woman hemi stap an hemi save kam olowe nomoa long jaj ya fo askem hem olsem, ‘Plis, yu helpem mi fo stretem trabol wea mi garem wetem enemi blong mi.’ ⁴ Longtaem nao jaj ya hemi no wiling fo duim diswan. Bat bihaen, hemi sei nao long hem seleva, ‘!Maewat! Mi barava taet tumas long wanem wido woman ya hemi gohed fo talem mi nao. Nomata mi no save tinghae long God an long olketa pipol, ⁵ mi mas helpem hem fo stretem trabol ya nao. Sapos mi no stretem trabol ya, bae hemi kam olowe nomoa an mekem mi krangge long hem nao.’” ⁶ An Masta hemi gohed fo tok olsem moa, “Yufala herem finis nao wanem disfala jaj hemi talem, nomata wei blong hem hemi no stret. ⁷ ?Nao waswe, yufala tingse bae God hemi no save stretem trabol blong olketa pipol wea hemi bin siusim olketa an wea olketa krae long hem oltaem? ?Waswe, yufala tingse bae hemi no save kuiktaem fo helpem olketa? ⁸ Mi talem long yufala, bae hemi helpem olketa fo stretem trabol blong olketa ya kuiktaem nomoa. ?Bat waswe taem mi San Blong Man mi kambaek, bae mi save lukim plande pipol hu olketa biliv long mi tu o nomoa?” ⁹ Nao Jisas hemi talem nara tokpiksa moa long olketa pipol hu olketa tingse olketa seleva nao barava stret, bat olketa lukdaon long evri pipol nomoa. So Jisas hemi gohed fo sei, ¹⁰ “Long wanfala taem, tufala man nao go long disfala Tambuhaos blong God fo prea. Wanfala nao hemi Farasi an narawan hemi man fo tekem taks. ¹¹ “Disfala Farasi ya hemi stanap seleva long midol long Tambuhaos ya an hemi prea olsem, ‘God, mi tengkiu tumas long yu, bikos mi no olsem olketa nara man wea olketa laekem olketa samting fo olketa seleva, an olketa save laea tumas long olketa pipol, an olketa save brekem lo blong marit. An mi tengkiu tumas tu bikos mi no olsem disfala man fo tekem taks hu hemi stanap longwe. ¹² Mi ya, mi save stop fo no kaikai long tufala de insaet long evri wik ya. An mi save givim go long yu, wan-tent long evrisamting wea mi garem.’ ¹³ “Nao disfala man fo tekem taks ya, hemi stanap farawe kam nomoa, an hemi sem fo luk goap long heven. Hemi bitim sest blong hem fo somaot dat hemi barava sore fogud, an hemi sei, ‘God, plis yu sore long mi, mi wanfala man wea mi garem sin ya.’” ¹⁴ An Jisas hemi sei moa, “Mi talem yufala, taem disfala man fo tekem taks hemi gobaek long haos, hem nao hemi barava stret long ae blong God, bat disfala Farasi ya, barava nomoa nao. Bikos eniwan hu hemi mekem hem seleva fo hae, bae God hemi mekem hem fo lou, bat eniwan hu hemi mekem hem seleva fo lou, bae God hemi mekem hem fo hae moa.” ¹⁵ Nao olketa tekem kam olketa smolfala pikinini long Jisas, mekem hemi save putum han blong hem antap long olketa. Taem olketa disaepol olketa lukim diswan, olketa tokhad long olketa pipol ya nao. ¹⁶ Bat Jisas hemi kolem olketa pikinini ya fo kam long hem, an hemi sei, “Yufala letem olketa pikinini ya fo kam long mi. Yufala no stopem olketa. Bikos olketa hu i olsem olketa pikinini ya, olketa nao fitim fo stap insaet long kingdom blong God. ¹⁷ Mi talem yufala tru samting nao, sapos eniwan hemi no olsem wanfala pikinini wea hemi hapi fo mekhae long God, bae hemi nating fit fo stap insaet long kingdom blong God.” ¹⁸ Nao wanfala lida blong olketa Jiu hemi askem Jisas olsem, “!Gudfala Tisa! ?Wanem nao mi mas duim, mekem mi kasem tru laef wea hemi no save finis?” ¹⁹ Nao Jisas hemi sei, “?Waswe nao yu sei mi gudfala? God nomoa hemi gudfala. ²⁰ Yu save finis long olketa lo wea hemi sei, ‘Yu mas no brekem lo blong marit. Yu mas no kilim man dae. Yu mas no stil. Yu mas no laea long kot. An yu mas tinghae long mami an dadi blong yu.’” ²¹ Nao man ya hemi tok olsem, “Stat kam taem mi smolfala yet, mi obeim evri lo ya nao.” ²² Taem ya, Jisas hemi sei, “Wanfala samting nao yu mas duim. Yu mas go an salem evrisamting blong yu, an yu mas givim go seleni ya long olketa pua pipol. From diswan nao bae yu garem olketa risis moa long heven. An bihaen ya, bae yu save kam an falom mi.” ²³ Bat man ya hemi wanfala ris man tumas ya, so taem hemi herem diswan nomoa, hemi barava sore fogud nao. ²⁴ Jisas hemi lukim dat man ya hemi barava sore tumas, so hemi sei, “Hemi had tumas ya fo olketa pipol wea olketa garem risis fo go insaet long kingdom blong God. ²⁵ Yufala save, fo wanfala kamel fo go insaet long smolfala hol blong wanfala nila hemi had tumas ya, bat hemi barava had moa fo man hu hemi ris fo go insaet long kingdom blong God.” ²⁶ Nao olketa pipol hu olketa herem toktok ya olketa sei olsem, “!Maewat! ?Sapos olsem, hu nao bae hemi save kasem tru laef ya?” ²⁷ Bat Jisas hemi sei, “Olketa samting wea hemi had tumas fo eni man fo duim ya, God hemi save duim nomoa ya.” ²⁸ Nao Pita hemi askem Jisas, “?Waswe long mifala? Mifala bin lusim evrisamting blong mifala finis, an mifala falom yu nao.” ²⁹ So Jisas hemi talem olketa olsem nao, “Mi talem yufala tru samting nao, eniwan hu hemi tinghae long kingdom blong God, mekem hemi mas lusim haos blong hem, o waef blong hem, o olketa brata blong hem, o mami an dadi blong hem, o olketa pikinini blong hem, ³⁰ bae God hemi givim plande gudfala samting long hem. Man ya bae hemi garem plande samting moa long disfala taem, winim olketa samting wea hemi lusim ya, an long niufala wol wea bae hemi kam, man ya bae hemi garem tru laef wea hemi no save finis.” ³¹ Nao Jisas wetem tuelfala disaepol blong hem olketa go seleva, an hemi tok olsem long olketa, “Yumi go-goap fo Jerusalem nao ya, an long ples ya bae evrisamting wea olketa profet bin raetem abaotem mi San Blong Man, bae hemi kamtru nao. ³² An bae olketa givim mi go long han blong olketa pipol wea olketa no Jiu, an bae olketa mekfan long mi an suea long mi, an spit long mi, ³³ an wipim mi moa. An bae olketa kilim mi dae tu, bat long mektri de bae mi laefbaek moa.” ³⁴ Taem ya, olketa disaepol olketa nating minim nomoa wanem Jisas hemi talem. Mining blong disfala toktok ya hemi olsem hemi haed from olketa, so olketa nating save wanem nao Jisas hemi toktok abaotem. ³⁵ Taem Jisas hemi kam kolsap long taon long Jeriko nomoa, wanfala blaen man hemi sidaon long saet long rod an askem seleni long olketa pipol. ³⁶ Man ya hemi herem dat plande pipol nao olketa go-gohed fo wakabaot gopas long hem, so hemi askem olketa olsem nao, “?Wanem nao ya?” ³⁷ Nao olketa tok olsem long hem, “Oo, Jisas disfala man blong Nasaret nao hemi kam ya.” ³⁸ So man ya hemi singaot olsem, “!Jisas, San Blong King Deved, plis yu sore kam long mi!” ³⁹ Olketa pipol hu olketa stap kolsap long hem olketa hatem hem an talem hem fo stap kuaet. Bat hemi jes singaot bikfala moa olsem, “!San Blong King Deved, plis yu sore kam long mi!” ⁴⁰ Nao Jisas hemi stop an hemi talem olketa fo lidim man ya fo kam long hem. Taem man ya hemi kam kolsap, Jisas hemi askem hem, ⁴¹ “?Wanem nao yu laekem mi fo duim fo yu?” Nao man ya hemi sei, “Masta, mi laekem yu fo mekem ae blong mi fo lukluk moa.” ⁴² So Jisas hemi talem hem olsem, “!Yu lukluk nao! Biliv blong yu nao hemi mekem yu fo gudbaek moa.” ⁴³ Long semtaem ya nomoa, ae blong man ya hemi lukluk gudfala nao, an hemi go wetem Jisas long rod an hemi gohed fo mekhae long God. An taem olketa pipol olketa lukim diswan, olketa tu olketa gohed fo preisim God.

¹ Nao Jisas hemi go-gohed long gogo blong hem fo kasem Jerusalem an hemi go insaet long Jeriko nao. ² Long taon ya tu wanfala man hemi stap wea nem blong hem Sakias, hu hemi bos long olketa man fo tekem taks, an hemi wanfala ris man tu ya. ³ Nao hemi laekem tumas fo lukim Jisas, bat bikos plande pipol tumas olketa hipap, an Sakias hemi wanfala sotfala man nomoa, hemi faendem had tumas fo lukim Jisas. ⁴ So hemi ran go fastaem long olketa pipol an hemi klaemap wanfala tri, mekem hemi save lukim Jisas hu hemi kakam fo gopas long ples ya. ⁵ Taem Jisas hemi kasem andanit long tri ya nomoa, hemi luk goap long Sakias, an hemi sei, “Sakias, yu kamdaon distaem. Mi mas go stap long haos blong yu tude ya.” ⁶ So Sakias hemi godaon kuiktaem nao wea hemi hapi fogud, an hemi tekem Jisas go long haos blong hem. ⁷ An taem olketa pipol olketa lukim diswan nomoa, olketa stat fo toktok agensim Jisas olsem, “!Lukim! Man ya hemi go stap long haos blong ravis man ya nao.” ⁸ Bat Sakias hemi stanap an hemi tok olsem long Masta, “!Lukim Masta! Bae mi givim haf long evrisamting blong mi long olketa pua pipol. An olketa wea mi ravem olketa long enisamting, bae mi sensimbaek foa taem moa winim wanem mi tekem long olketa.” ⁹ Nao Jisas hemi sei, “Tude, God hemi bin sevem olketa pipol long disfala haos, bikos man ya tu hemi bon long laen blong Ebraham. ¹⁰ Mi San Blong Man, mi kam fo lukaotem olketa pipol hu olketa lus an fo sevem olketa.” ¹¹ Nao Jisas hemi ka-kam kolsap long Jerusalem, an olketa pipol olketa tingse disfala kingdom blong God, bae hemi kam nao. So taem olketa pipol olketa go-gohed fo herem toktok blong Jisas yet, hemi gohed moa fo talem wanfala tokpiksa long olketa, ¹² wea hemi sei, “Wanfala man hu hemi bon long famili blong olketa sif, hemi redi fo go long wanfala bikfala king wea hemi stap long farawe kantri an askem paoa long hem, mekem taem hemi kambaek long ples blong hem moa, hemi save stap olsem king long hem nao. ¹³ So bifoa hemi go, hemi kolem kam tenfala long olketa wakaman blong hem, an hemi givim wanfala bikfala seleni long olketa evriwan. An hemi sei long olketa, ‘Taem mi stap long farawe ples ya, yufala mas traehad fo winim samfala seleni moa wetem seleni ya.’ ¹⁴ Bat olketa pipol blong hem olketa heitem hem, an olketa sendem go samfala niusman bihaen long hem fo talem olsem long disfala bikfala king ya, ‘Mifala nating laekem man ya fo kamap king blong mifala ya.’ ¹⁵ “Bat nomata olsem, bikfala king ya hemi mekem man ya fo kamap king ovarem ples blong hem nao. An taem hemi kambaek moa long hom blong hem, hemi sendem nius fo olketa wakaman ya hu hemi bin givim seleni long olketa. Hemi laekem olketa fo kam, mekem hemi save lukim haomas seleni nao olketa bin winim wetem seleni ya. ¹⁶ Nao fas wakaman hemi kam an hemi sei, ‘Bos, mi bin winim moa tenfala bikfala seleni wetem disfala seleni wea yu givim long mi ya.’ ¹⁷ Nao bos blong hem hemi tok olsem, ‘!Oo, gud tumas! Yu wanfala gudfala wakaman ya. Yu bin lukaftarem gud disfala smolfala waka ya, olsem, bae mi putum yu fo lukaftarem tenfala biktaon nao.’ ¹⁸ Nao mektu wakaman hemi kam an hemi sei, ‘Bos, mi bin winim moa faefala bikfala seleni wetem disfala seleni wea yu givim long mi ya.’ ¹⁹ Nao bos blong hem hemi sei, ‘Olsem, bae yu lukaftarem faefala biktaon moa ya.’ ²⁰ “Bihaen, nara wakaman moa hemi kam an hemi sei, ‘Bos, seleni blong yu nao long hia. Mi haedem nomoa insaet long wanfala pis kaleko. ²¹ Yu save, mi fraetem yu ya bikos yu wanfala had man tumas. An yu save tekem samting wea nara man hemi putum stap, an yu save tekem tu kaikai wea olketa nara man olketa plantem.’ ²² Nao bos blong hem hemi tok olsem, ‘!Yu ravis wakaman! Bae mi falom toktok wea yu talem finis nao fo jajem yu ya. Ya, yu save nao dat mi wanfala had man wea mi save tekem samting wea nara man hemi putum stap, an mi save tekem tu kaikai wea olketa nara man olketa plantem. ²³ ?So waswe nao yu no putum seleni blong mi long bank, mekem distaem mi kambaek, mi save tekem seleni ya wetem lelebet seleni moa wea hemi winim?’ ²⁴ “Bihaen nomoa, hemi tok olsem long olketa hu i stanap kolsap long hem, ‘Yufala tekem bikfala seleni ya from hem, an yufala givim go long man ya hu hemi garem tenfala seleni ya.’ ²⁵ Nao olketa tok olsem, ‘Bat bos, hemi garem plande finis ya.’ ²⁶ Nao bos ya hemi sei, ‘Mi talem long yufala, eniwan hu hemi yusim gud wanem hemi garem, bae mi givim samfala moa long hem. Bat eniwan hu hemi no yusim gud wanem hemi garem, nomata lelebet samting wea hemi garem, bae mi tekemaot from hem nomoa. ²⁷ Nao olketa enemi blong mi wea olketa no laekem mi fo king ovarem olketa ya, mi talem long yufala, yufala tekem olketa kam long hia, an yufala kilim olketa dae long frant long mi.’” ²⁸ Bihaen Jisas hemi tok olsem finis nomoa, hemi go fastaem nao long olketa fo go long Jerusalem. ²⁹ Taem hemi kolsap kasem tufala vilij ya Betfeis an Betani, wea tufala stap kolsap long hil blong Oliv tri, hemi sendem go tufala disaepol blong hem fo go fastaem nao. An hemi tok olsem long tufala, ³⁰ “Yutufala go long vilij wea yumi lukim go ya. Nao taem yutufala go kasem, bae yutufala lukim wanfala yang dongki wea no eni man hemi bin raed antap long hem yet. Olketa bin taemapem hem, so yutufala tekemaot rop ya an lidim hem kam long mi. ³¹ An sapos eniwan hemi askem yutufala olsem, ‘?Fo wanem nao yutufala tekemaot dongki ya?’, yutufala mas sei long hem, ‘Masta nao hemi laekem ya.’” ³² So tufala ya i go nao an tufala lukim dat evrisamting hemi barava olsem wanem Jisas bin talem. ³³ Taem olketa gohed fo tekemaot disfala yangfala dongki ya, olketa man hu olketa onam dongki ya olketa tok olsem, “?Ei, waswe nao yutufala tekemaot dongki ya?” ³⁴ Nao tufala tok olsem, “Masta nao hemi laekem ya.” ³⁵ Bihaen, tufala lidim yangfala dongki ya fo go long Jisas nao, an tufala putum samfala kaleko blong tufala long baeksaet blong dongki ya, an tufala helpem Jisas fo sidaon antap long hem. ³⁶ An taem Jisas hemi raed go long rod, olketa pipol olketa spredem kaleko blong olketa long rod tu. ³⁷ Taem hemi kolsap kasem ples wea rod hemi godaon long saet long hil blong Oliv tri nomoa, olketa disaepol blong hem wea olketa plande tumas, olketa stat fo hapi an mekhae long God nao. An olketa barava singaot an preisim God fo olketa bikfala samting wea olketa bin lukim. ³⁸ An olketa tok olsem, “!God, yu blesim disfala King hu hemi kam long nem blong yu! !Piis mas stap long heven, an yumi preisim God!” ³⁹ Nao samfala long olketa Farasi, wea olketa stap long taem ya, olketa tok olsem long Jisas, “Tisa, yu talem olketa disaepol blong yu fo stap kuaet.” ⁴⁰ Bat Jisas hemi sei, “Mi talem long yufala, sapos olketa ya i stap kuaet, bae olketa ston nao i gohed fo preisim God.” ⁴¹ Nao Jisas hemi kam kolsap long Jerusalem, an taem hemi lukim taon ya, hemi krae nao bikos hemi sore tumas long hem. ⁴² An hemi tok olsem long taon ya, “Hemi gud tumas ya sapos yu luksave distaem long wei wea hemi save mekem yu fo garem piis, bat evrisamting hemi haed long yu nao. ⁴³ Bae wanfala taem hemi kam wea bae olketa enemi blong yu olketa kam fo faet. An bae olketa stap raonem yu an olketa satem yu long evri saet, mekem no eniwan save ranawe. ⁴⁴ An bae olketa spoelem yu finis, wetem evriwan wea olketa stap insaet long olketa wol long ston blong yu. Bae no eni lelebet ston nao i save stap long ples wea hemi stap long hem distaem, bikos yu ya, yu nating luksave long taem wea God hemi kam fo sevem yu.” ⁴⁵ Nao Jisas hemi go insaet long eria blong disfala Tambuhaos ya, an hemi stat fo raosimaot olketa pipol hu olketa maket insaet long hem nao. ⁴⁶ An hemi tok olsem long olketa, “Toktok blong God insaet long Buktambu hemi sei, ‘Haos blong mi bae hemi haos fo prea long hem ya.’ Bat yufala ya, yufala mekem haos ya fo kamap olsem ples wea olketa pipol hu i save stil olketa save haed long hem ya.” ⁴⁷ Evri de Jisas hemi gohed fo tisim olketa pipol insaet long Tambuhaos ya. Bat olketa hedprist an olketa tisa blong Lo an olketa nara lida blong olketa Jiu, olketa traehad fo tingim wanfala wei wea olketa save kilim Jisas dae long hem. ⁴⁸ Bat olketa no save faendem eni wei fo duim diswan, bikos evri pipol olketa stap wetem hem oltaem fo herem evri toktok blong hem.

¹ Long wanfala de, Jisas hemi gohed moa fo tisim olketa pipol long Tambuhaos ya. Taem hemi gohed fo talemaot disfala Gudnius ya, olketa hedprist an olketa tisa blong Lo an olketa nara bikman moa, olketa kam long hem nao. ² An olketa askem hem olsem, “?Watkaen paoa nao yu garem fo duim olketa samting ya? ?An hu nao hemi givim paoa ya long yu?” ³ Nao Jisas hemi sei long olketa olsem, “Mi tu mi wande fo askem yufala wanfala kuestin fastaem. ⁴ ?Waswe, hu nao hemi givim paoa long Jon fo baptaesim olketa pipol? ?God o man nomoa?” ⁵ So olketa gohed fo toktok tugeta long olketa seleva olsem, “Sapos yumi sei, ‘God nao hemi givim paoa ya long Jon,’ bae hemi sei, ‘?Sapos olsem, waswe nao yufala no bilivim hem?’ ⁶ Bat sapos yumi sei, ‘Man nomoa hemi givim paoa long hem,’ bae olketa pipol olketa sutim yumi dae long ston ya, bikos olketa biliv wea Jon hemi barava profet ya.” ⁷ So olketa ansarem Jisas olsem nao, “Oo, mifala no save ya.” ⁸ Nao Jisas hemi tok olsem long olketa moa, “Sapos olsem, mi tu bae mi no talem yufala abaotem watkaen paoa nao mi garem fo duim olketa samting ya.” ⁹ Bihaen, Jisas hemi gohed moa fo talem disfala tokpiksa long olketa, “Wanfala man hemi plantem wanfala plantesin long grep tri an hemi letem samfala man fo haerem plantesin blong hem ya. An hemi go fo stap long nara ples fo longtaem. ¹⁰ Nao kasem taem wea olketa frut olketa redi fo tekem, man ya hemi sendem go wanfala wakaman blong hem nao fo tekem kambaek wanem olketa man hu i haerem plantesin ya olketa mas peim long hem. Bat olketa ki-kilim disfala wakaman ya an olketa sendem hem gobaek nating nomoa. ¹¹ So man ya hemi sendem go wanfala wakaman moa, bat olketa ki-kilim disfala wakaman ya tu an olketa barava spoelem hem fogud an sendem hem gobaek nating nomoa. ¹² So man ya hemi sendem go mektri wakaman moa, bat olketa mekem wakaman ya fo garekil an olketa torowem hem goaot from ples ya. ¹³ Bihaen nomoa, man hu hemi onam plantesin ya hemi sei nao, ‘?Wanem nao bae mi duim? Ating bae mi sendem go san blong mi ya wea mi lavem tumas, hem nao bae olketa save tinghae long hem ya.’ ¹⁴ Bat taem olketa man hu i haerem plantesin ya olketa lukim man ya, olketa tok olsem tugeta long olketa seleva nao, ‘Hem ya nao man hu bae hemi sensim dadi blong hem fo onam plantesin ya. Yumi kilim hem dae, mekem plantesin ya hemi blong yumi nao.’ ¹⁵ So olketa tekem man ya fo go aotsaet long plantesin ya an olketa kilim hem dae nao.” An Jisas hemi askem olketa olsem moa, “?Wanem nao bae man hu hemi onam plantesin ya hemi duim long olketa man ya? ¹⁶ Bae hemi kam an kilim olketa man ya fo dae, an bae hemi letem olketa nara man nao fo haerem plantesin ya moa.” Taem olketa pipol olketa herem diswan nomoa, olketa sei nao, “!Nomoa ya, hemi no save olsem ya!” ¹⁷ Bat Jisas hemi lukstrong long olketa an hemi sei nao, “?Oraet, wanem nao mining blong disfala toktok ya long Buktambu? ‘Disfala ston wea olketa man fo wakem haos olketa no laekem, hemi kamap barava nambawan ston long haos nao.’ ¹⁸ Eniwan hu hemi foldaon nogud bikos long disfala nambawan ston ya, bae ston ya hemi spoelem hem fogud ya. An man wea ston ya hemi foldaon antap long hem, bae hemi smas finis nao.” ¹⁹ Nao long taem ya nomoa, olketa hedprist an olketa tisa blong Lo olketa luksave dat toktok blong Jisas hemi barava agensim olketa tru nao. So olketa wande fo kasholem hem long semtaem, bat olketa fraet tu long olketa pipol. ²⁰ Nao olketa lida olketa gohed fo faendemaot gudfala wei fo kasholem Jisas. So olketa peim samfala man fo laea fo go an askem samfala kuestin fo trikim hem, bikos olketa laekem hem fo talem samting wea hemi no stret, mekem olketa save givim hem go long paoa blong Primia long provins ya. ²¹ So olketa man ya olketa tok olsem long Jisas nao, “Tisa, mifala save dat wanem yu talemaot an wanem yu tisim hemi barava stret ya. An yu no save wari nomoa long enikaen tingting blong man, an yu tisim nomoa tru samting abaotem wei blong God. ²² ?So waswe, hemi oraet nomoa long Lo blong yumi fo yumi peim go taks long bikfala King long Rom o nomoa?” ²³ Bat Jisas hemi luksave finis wea olketa wande fo trikim hem nomoa, so hemi sei, ²⁴ “Yufala som kam wanfala seleni long mi fastaem. ?Oraet, piksa an nem blong hu nao hemi stap long disfala seleni ya?” Nao olketa sei, “Hemi blong bikfala King long Rom ya.” ²⁵ So Jisas hemi sei long olketa nao, “Sapos olsem, samting wea hemi blong bikfala King ya, yufala mas givim gobaek long hem. An samting wea hemi blong God, yufala mas givim gobaek long hem.” ²⁶ So olketa stap kuaet nao, bikos olketa barava sapraes tumas long ansa wea hemi talem kam long olketa. An olketa nating save trikim hem moa long enisamting long frant blong olketa pipol. ²⁷ Nao samfala Sadiusi olketa kam long Jisas tu, wea olketa talem man hemi no save laefbaek moa. Nao olketa askem Jisas olsem, ²⁸ “Tisa, Mosis hemi raetem wanfala lo fo yumi wea hemi sei, ‘Sapos wanfala man hemi dae from waef blong hem taem tufala no garem eni pikinini yet, bae brata blong hem hemi mas sensim hem an maritim moa woman ya. Long wei ya, bae olketa pikinini blong tufala ya olketa kamap olsem olketa pikinini blong nara brata hu hemi dae finis ya.’ ²⁹ Nao wanfala taem, sevenfala brata olketa stap. Fasbon hemi maritim wanfala woman, bat hemi no garem eni pikinini nomoa an hemi dae. ³⁰ So mektu brata hemi maritim moa wido woman ya, ³¹ an bihaen, mektri brata hemi maritim tu woman ya. An go-go sevenfala brata ya evriwan olketa maritim wido woman ya nao. Bat evriwan olketa no garem eni pikinini nomoa an olketa dae. ³² An bihaen, wido woman ya hemi dae tu. ³³ ?Nao long taem wea evriwan i laefbaek moa, bae woman ya hemi barava waef blong hu nao long olketa ya? Bikos sevenfala brata ya nao evriwan bin maritim disfala woman ya.” ³⁴ Nao Jisas hemi tok olsem long olketa, “Yumi olketa man an woman long disfala wol, yumi save marit. ³⁵ Bat olketa man an olketa woman wea olketa fit fo laefbaek moa from dae an fo stap long niufala wol wea bae hemi kam, bae olketa no save marit moa long taem ya. ³⁶ An bae olketa no save dae tu, bat bae olketa stap olsem olketa enjel nomoa. God nao hemi bin mekem olketa laefbaek finis, an from diswan nao olketa save stap olsem olketa pikinini blong hem. ³⁷ Nao Mosis hemi barava somaot klia dat man hemi save laefbaek moa from dae ya. Long disfala stori abaotem smolfala tri wea faea hemi bin bone olobaot long hem, Mosis hemi raetem olsem, ‘God ya hemi God blong Ebraham an Aesak an Jekob.’ ³⁸ An God ya hemi no God blong man wea hemi dae ya, bat hemi God blong man wea hemi laef, bikos long saet blong God, evriwan olketa laef nomoa ya.” ³⁹ Nao samfala long olketa tisa blong Lo, olketa tok olsem nao, “Gudfala ansa nao ya, Tisa.” ⁴⁰ An evriwan olketa fraet fo askem eni kuestin moa long Jisas. ⁴¹ Bihaen, Jisas hemi tok olsem long olketa, “?Waswe nao olketa talem dat disfala Mesaea bae hemi bon kam long laen blong King Deved nomoa? ⁴² Bikos King Deved seleva nao hemi talem long buk blong olketa singsing olsem, ‘God hemi tok long Masta blong mi olsem, “Yu sidaon kam long raetsaet blong mi. ⁴³ An bae mi putum olketa enemi blong yu andanit long paoa blong yu.”’ ⁴⁴ Deved hemi kolem disfala Mesaea ya Masta blong hem. ?So hao nao man wea hemi bon kam long laen blong Deved hemi save kamap Masta blong hem moa?” ⁴⁵ Taem olketa pipol i gohed fo lisin yet, Jisas hemi tok olsem long olketa disaepol blong hem nao, ⁴⁶ “Yufala mas lukaot long olketa tisa blong Lo, wea olketa praod fo werem olketa longfala kaleko, an taem olketa wakabaot go long maket, olketa laekem olketa pipol fo mekhae long olketa. An taem olketa go long preahaos an long taem blong fist, olketa laekem tumas fo sidaon long olketa nambawan ples nomoa. ⁴⁷ An olketa save ravem tu evrisamting blong olketa wido woman. An nomata olsem, olketa save mekem longfala prea fo laea long olketa pipol. !Yufala save, panis blong olketa bae hemi bik tumas moa ya!”

¹ Nao taem Jisas hemi lukluk goraon, hemi lukim olketa ris pipol wea olketa kam an putum seleni blong olketa insaet long boks fo putum koleksin long hem, wea hemi stap insaet long Tambuhaos. ² Hemi lukim tu wanfala wido woman wea hemi pua fogud. Woman ya, hemi putum go tufala blaksens nomoa insaet long boks ya. ³ Nao hemi tok olsem, “Mi talem yufala tru samting nao, wanem pua woman ya hemi putum nao hemi barava bikfala tumas moa winim olketa seleni wea olketa nara pipol ya olketa putum. ⁴ Olketa nara pipol ya olketa putum nomoa lelebet haf long olketa risis blong olketa. Bat disfala woman wea hemi no garem naf samting, hemi putum nao evrisamting wea hemi garem fo laef long hem.” ⁵ Nao samfala disaepol blong Jisas, olketa gohed nao fo tokabaotem Tambuhaos ya, wea hemi barava luk gudfala tumas wetem olketa nambawan ston blong hem an wetem enikaen gud samting wea olketa pipol i givim fo mekhae long God. Bat Jisas hemi tok olsem long olketa, ⁶ “Mi talem long yufala, evrisamting wea yufala lukim long hia ya, bae long samfala taem bihaen, olketa wol long ston ya bae olketa brekemdaon finis ya, an bae no eni lelebet ston nao hemi save stap long ples wea hemi stap long hem distaem.” ⁷ Nao olketa disaepol olketa askem hem olsem, “?Tisa, long wataem nao bae olketa samting ya hemi hapen? ?An watkaen saen nao bae hemi kamap fo somaot dat olketa samting ya hemi kolsap fo kamtru?” ⁸ Nao Jisas hemi sei, “Yufala mas lukaot gudfala, nogud eniwan hemi trikim yufala. Bikos bae plande pipol olketa yusim nem blong mi an bae olketa sei, ‘!Mi nao ya!’ an bae olketa sei moa, ‘!Olketa samting ya olketa kamtru nao!’ Bat yufala no falom olketa ya. ⁹ An taem yufala herem nius abaotem olketa woa o yufala herem dat olketa pipol i faetem gavman blong olketa, yufala mas no fraet, bikos olketa samting ya i mas hapen fastaem ya. Bat diswan hemi no minim wea hemi en blong disfala wol yet ya.” ¹⁰ An hemi sei moa, “Bae olketa pipol long wanfala ples olketa faetem olketa pipol long nara ples, an wanfala kantri bae hemi faetem nara kantri. ¹¹ An bae olketa bikfala etkuek tumas tu olketa sekem olketa ples long disfala wol. An olketa bikfala taem blong hanggre an olketa nogud siknis tu bae olketa spoelem plande pipol long plande ples. An bae enikaen nogud samting hemi hapen fo mekem pipol fraet tumas, an bae enikaen bikfala saen olketa soaot kam long skae tu. ¹² Bat bifoa evrisamting olsem hemi hapen, bae olketa pipol i kasholem yufala an meksave long yufala. An bae olketa tekem yufala go long kot long olketa preahaos, an bae olketa putum yufala insaet long prisin tu. An bikos olketa laek fo spoelem nem blong mi, bae olketa kotem yufala long ae blong olketa king an olketa primia. ¹³ So long taem ya, yufala save talemaot Gudnius ya long olketa nao. ¹⁴ An wanfala samting nao yufala mas tingim, yufala no wari tumas long wanem nao bae yufala talem fo sevem yufala. ¹⁵ Bikos mi nao bae mi givim toktok an gudfala tingting long yufala, mekem no eniwan long olketa enemi blong yufala hemi save tok agensim toktok blong yufala o tokdaonem toktok blong yufala. ¹⁶ Bae olketa mami an dadi blong yufala, an olketa brata blong yufala, an olketa long laen blong yufala, an olketa fren blong yufala nao, bae olketa givim yufala go long han blong olketa enemi blong yufala. An bae olketa kilim dae samfala long yufala tu. ¹⁷ An bae evri pipol nao olketa heitem yufala, bikos yufala blong mi. ¹⁸ Bat nomata olsem, no eni lelebet hea long hed blong yufala nao hemi save lus. ¹⁹ Bae yufala kasem tru laef ya from yufala stanap strong olowe.” ²⁰ An Jisas hemi sei moa, “Taem yufala lukim olketa soldia olketa stap evriwea raonem Jerusalem, bae yufala save nao dat hemi kolsap fo olketa spoelem biktaon ya finis nao ya. ²¹ Long taem ya, olketa hu i stap long Jiudia olketa mas ranawe go fo haed long olketa maonten. An olketa hu i stap long biktaon ya, olketa mas ranawe from ples ya nao. An olketa hu i stap long olketa eria raonem biktaon ya, olketa mas no kam moa long biktaon ya. ²² Bikos taem ya, hemi taem blong God fo panisim olketa pipol ya, mekem evrisamting wea Buktambu hemi talem, hemi save kamtru. ²³ !So olketa woman hu i babule o garem olketa smolfala pikinini wea olketa susu yet long taem ya, olketa mas lukaot! Bae bikfala sore hemi kam long olketa pipol long disfala kantri an bae kros blong God hemi kasem olketa tu. ²⁴ Samfala long olketa bae olketa kilim olketa dae wetem naef fo faet, an samfala moa bae olketa kasholem olketa an tekem olketa go long olketa deferen kantri. An olketa pipol wea olketa no Jiu, bae olketa nao i rul ovarem evri ples long Jerusalem go-go kasem en long taem blong olketa.” ²⁵ An Jisas hemi sei moa, “An bae samfala saen olketa soaot long san an long mun an long olketa sta antap long skae. An long olketa kantri long wol, bae evriwan olketa barava fraet fogud nao long bikfala noes blong solwata wetem olketa bikfala wev blong hem. ²⁶ Bae olketa pipol olketa hafded from olketa fraet, taem olketa weitem olketa samting wea bae hemi kam fo spoelem disfala wol ya. Bikos evri strongfala samting long skae, bae olketa seksek tumas nao. ²⁷ Nao bihaen nomoa, bae olketa save lukim dat mi San Blong Man, bae mi kambaek antap long wanfala klaod wetem saen blong bikfala paoa blong God. ²⁸ Taem olketa samting ya i stat fo hapen, yufala mas stanap stret an luk goap, bikos God bae hemi kolsap kam fo sevem yufala nao.” ²⁹ Bihaen, Jisas hemi talem disfala tokpiksa ya long olketa olsem, “Yufala ting fastaem abaotem olketa fig tri ya an olketa nara tri ya moa. ³⁰ Taem yufala lukim olketa lif wea olketa stat fo kamaot niufala moa, yufala save dat taem fo evrisamting fo grou hemi kam kolsap nao. ³¹ Long semkaen wei tu, taem yufala lukim olketa samting ya hemi hapen, yufala save dat kingdom blong God, hemi kolsap tumas fo kam nao. ³² “An mi talem yufala tru samting nao, bae evrisamting ya hemi hapen taem olketa pipol blong distaem olketa no dae yet. ³³ Skae wetem disfala wol bae hemi finis nomoa, bat toktok blong mi bae hemi nating save finis.” ³⁴ An Jisas hemi sei moa, “Yufala mas lukaot, nogud yufala gohed nomoa fo kaikai an dring an wari nomoa abaotem olketa samting long disfala laef. Nogud yufala seknomoa long de wea olketa samting ya hemi kasem yufala, ³⁵ olsem animol hemi save sek taem hemi pas insaet long trap. Bikos bae disfala de hemi kam kasem evriwan long disfala wol ya. ³⁶ Yufala mas lukluk gudfala an gohed fo prea oltaem, mekem yufala save stanap strong nomata evrisamting ya bae hemi hapen. Sapos olsem, bae yufala save kam an stanap long frant blong mi San Blong Man.” ³⁷ Nao long evri de, Jisas hemi gohed fo tisim olketa pipol long disfala Tambuhaos blong God. An long olketa ivining, Jisas hemi goaot fo stap long disfala hil wea olketa kolem “Hil blong Oliv tri”. ³⁸ Long eli moning long evri de, olketa pipol olketa save kam fo hipap long Tambuhaos ya fo herem toktok blong hem.

¹ Hemi go-go kolsap fo kasem taem blong Bikde blong Bred wea hemi No Garem Eni Yist long hem, wea olketa save kolem Fist blong Pasova. ² An long taem ya, olketa hedprist an olketa tisa blong Lo, olketa traehad fo tingim wanfala wei wea olketa save kilim Jisas dae, bat olketa fraet long olketa pipol ya. ³ Nao Seitan hemi kam an stap long Jiudas, wea nara nem blong hem hemi Iskariot an hemi wanfala long olketa tuelfala disaepol blong Jisas. ⁴ An Jiudas hemi go long olketa hedprist an long olketa bikman blong seksin fo gadem Tambuhaos ya, an hemi talem olketa abaotem hao hemi save givim Jisas go long han blong olketa. ⁵ Taem ya, olketa barava hapi fogud nao, an olketa talem dat bae olketa save givim seleni long hem. ⁶ So Jiudas hemi wanmaen wetem olketa an hemi trae fo tingim wei wea hemi save givim Jisas go long han blong olketa, taem olketa pipol no stap wetem hem. ⁷ Nao hemi kasem fas de long olketa Bikde blong Bred wea hemi No Garem Eni Yist long hem. An long de ya nao olketa mas kilim dae olketa smolfala sipsip fo disfala kaikai blong Pasova. ⁸ So Jisas hemi sendem go Pita an Jon, an hemi tok olsem long tufala, “Yutufala go an mekredi long kaikai fo yumi fo disfala Pasova ya.” ⁹ Nao tufala askem hem, “?Long watkaen ples insaet long biktaon ya nao mitufala save mekredi long evrisamting ya?” ¹⁰ Nao Jisas hemi sei, “Taem yutufala go insaet long biktaon ya, bae yutufala mitim wanfala man hu hemi karim bikfala botol long wata. Yutufala go bihaen long hem an yutufala go insaet long haos wea hemi go insaet long hem. ¹¹ An yutufala tok olsem long man wea hemi onam haos ya, ‘Tisa nao hemi askem yu kam olsem, ?Wea nao r um fo mi wetem olketa disaepol blong mi, bae mifala kaikaim disfala kaikai blong Pasova long hem?’ ¹² Bae man ya nao hemi som yutufala wanfala bikfala rum long antap wea evrisamting hemi stap long hem finis. Long ples ya nao bae yutufala mekredi long kaikai.” ¹³ So tufala go an tufala lukim dat evrisamting hemi hapen nao olsem Jisas hemi bin talem. So tufala gohed nao fo mekredi long kaikai blong Pasova. ¹⁴ Taem hemi kasem taem fo kaikai, Jisas hemi go an sidaon wetem olketa aposol blong hem nao. ¹⁵ An Jisas hemi talem olsem long olketa, “Mi bin laekem tumas fo kaikaim disfala kaikai blong Pasova wetem yufala bifoa hemi kasem taem blong mi fo dae. ¹⁶ Nao mi talem long yufala, bae mi no kaikaim disfala kaikai blong Pasova moa, go-go kasem taem wea hemi garem ful mining blong hem insaet long kingdom blong God.” ¹⁷ An Jisas hemi holem wanfala kap long waen an hemi talem tengkiu long God, an hemi sei, “Yufala tekem diswan an yufala evriwan dring long hem. ¹⁸ Nao mi talem long yufala, bae mi no save dringim moa waen ya, go-go kasem taem kingdom blong God hemi kam finis.” ¹⁹ Nao hemi holem wanfala bred an hemi talem tengkiu long God fo hem. Hemi brekem bred ya an hemi givim go long olketa, an hemi sei, “Diswan ya hemi bodi blong mi wea mi givim fo sevem yufala. Yufala mas kaikaim diswan, mekem yufala save go-gohed fo tingim mi.” ²⁰ Long sem wei tu, long taem olketa kaikai finis, hemi holem moa wanfala kap long waen an hemi tok olsem, “Disfala kap ya hemi niufala spesol agrimen blong God, wea mi mekem hem fo kamtru wetem blad blong mi wea hemi ranaot fo sevem yufala. ²¹ “Bat yufala save, man wea bae hemi givim mi go long han blong olketa enemi blong mi, hemi sidaon long hia wetem mi nomoa. ²² An bae mi San Blong Man, mi mas dae olsem God hemi bin talem finis. !Bat disfala man wea bae hemi givim mi go long han blong olketa enemi blong mi, hemi mas lukaot!” ²³ An olketa disaepol olketa stat fo ask olobaot long olketa seleva fo save hu nao bae hemi duim diswan. ²⁴ Bihaen, olketa disaepol olketa stat fo raoa tugeta long olketa seleva abaotem hu nao hemi nambawan man long olketa. ²⁵ So Jisas hemi tok olsem long olketa, “Yufala save finis wea olketa king long disfala wol olketa save bosim tumas olketa pipol blong olketa. An samfala long olketa king i laek fo garem gudfala nem olsem “fren blong olketa pipol”. ²⁶ Bat yufala mas no duim olsem. Eniwan hu hemi bikman long yufala, hemi mas kamap olsem man hu hemi smolfala long yufala. An man wea hemi lida long yufala hemi mas kamap olsem wanfala wakaman blong yufala nomoa. ²⁷ ?Waswe, hu nao hemi bikman long tufala, man wea hemi sidaon fo kaikai o man hu hemi karim kam kaikai ya? Yu save, hemi man wea hemi sidaon fo kaikai nao ya. Bat mi ya, mi stap wetem yufala olsem wakaman wea hemi karim kam kaikai nomoa ya. ²⁸ “Yufala ya, yufala stap olowe wetem mi nomoa, nomata yumi bin go insaet long enikaen hadtaem. ²⁹ So olsem, bae mi givim paoa long yufala fo rul ovarem olketa pipol ya, olsem Dadi blong mi hemi givim paoa long mi. ³⁰ An bae yufala sidaon raonem tebol wetem mi fo kaikai an dring, long taem wea bae mi King ovarem wol. An bae yufala kamap bikman nao long tuelfala laen blong Israel fo rul ovarem olketa.” ³¹ An Jisas hemi tok olsem moa, “!Saemon, Saemon! Yu save, God hemi letem Seitan fo traem yufala evriwan ya fo faendemaot hu nao hemi save stanap strong. ³² Bat mi bin prea fo yu Saemon, mekem yu no lusim biliv blong yu. An taem yu tanebaek kam long mi, yu mas gohed fo helpem olketa brata blong yu fo kamap strong moa.” ³³ Bat Pita hemi sei, “Masta, mi redi nomoa fo go wetem yu long prisin, an fo dae wetem yu tu.” ³⁴ Nao Jisas hemi ansarem hem olsem, “Mi talem long yu Pita, taem kokorako hemi no krae long naet yet, bae trifala taem nao yu talem yu nating save long mi.” ³⁵ An Jisas hemi sei moa, “Lastaem, taem mi sendem yufala fo goaot, mi stopem yufala fo no tekem eni paos an basket an sandol. ?Waswe, yufala sot long enisamting?” Nao olketa sei, “Nomoa ya.” ³⁶ An Jisas hemi sei, “Bat long distaem, sapos eniwan long yufala hemi garem paos o basket, hemi mas tekem wetem hem nao. An sapos eniwan long yufala hemi no garem naef fo faet, hemi mas salem longfala kaleko blong hem nao, fo baem wanfala naef fo faet. ³⁷ An mi talem long yufala, Buktambu hemi sei, ‘Olketa pipol i talem dat hemi wanfala man fo mekem trabol nomoa ya,’ an diswan bae hemi barava kamtru long mi ya. Wanem olketa bin raetem abaotem mi hemi gohed fo hapen tru nao.” ³⁸ Nao olketa disaepol olketa tok olsem, “!Lukim, Masta! Tufala naef fo faet long hia nomoa.” So Jisas hemi sei, “Oraet. !Hemi naf nao!” ³⁹ Nao Jisas hemi lusim biktaon ya an hemi go long disfala hil blong Oliv tri, olsem hemi save duim olowe nao. An long taem ya, olketa disaepol olketa go wetem hem tu. ⁴⁰ Taem hemi kasem ples ya, hemi talem long olketa olsem, “Yufala mas prea, mekem no enisamting hemi kam fo traem yufala.” ⁴¹ An hemi go farawe lelebet from olketa, an hemi nildaon long graon an hemi gohed fo prea olsem, ⁴² “Oo, Dadi blong mi, sapos yu wiling, yu no letem mi fo safa long diskaen wei ya. Bat yu no falom wanem mi laekem, bat yu falom nomoa wanem yu laekem.” ⁴³ An wanfala enjel long heven hemi kam long Jisas an hemi helpem hem fo strong moa. ⁴⁴ An from hemi barava sore bikfala tumas, hemi gohed fo prea strong moa, an suet blong hem hemi olsem blad nao wea hemi randaon long graon. ⁴⁵ Bihaen hemi prea finis, hemi stanap, an hemi gobaek moa long olketa disaepol blong hem, an hemi lukim olketa gohed fo slip nomoa, bikos olketa taet tumas from olketa sore tumas. ⁴⁶ So Jisas hemi sei long olketa, “?Waswe nao yufala slip? Yufala getap an prea, mekem no enisamting hemi kam fo traem yufala.” ⁴⁷ Taem Jisas hemi gohed fo toktok yet, wanfala bik seksin long olketa pipol olketa kam. An man wea hemi lidim olketa kam nao hemi Jiudas, hu hemi wanfala long olketa tuelfala disaepol blong hem. An Jiudas hemi go kolsap long Jisas fo kisim hem nao. ⁴⁸ Bat Jisas hemi talem hem olsem, “!Waswe Jiudas! ?Yu kam fo kisim mi San Blong Man, fo givim mi go long han blong olketa enemi blong mi?” ⁴⁹ Taem olketa disaepol olketa luksave long wanem bae hemi hapen nomoa, olketa tok olsem nao, “?Waswe Masta, bae mifala faetem olketa wetem olketa naef fo faet ya?” ⁵⁰ An wanfala long olketa hemi tekem naef fo faet blong hem nomoa, an hemi katemaot raet ia blong wanfala wakaman blong Haeprist. ⁵¹ Bat Jisas hemi sei, “!Ei, naf nao!” An hemi tasim ia blong man ya, an hemi mekem gudbaek moa. ⁵² Nao Jisas hemi tok olsem long olketa hedprist, an olketa bikman blong seksin fo gadem Tambuhaos, an long olketa nara bikman moa, “?Waswe, yufala tingse mi man fo mekem trabol ya, mekem yufala kam wetem olketa naef an stik fo faet? ⁵³ Long evri de mi stap nomoa wetem yufala long Tambuhaos ya, bat yufala nating trae fo kasholem mi nomoa. Bat distaem, hemi taem blong yufala fo duim samting nao, an hemi taem fo paoa blong tudak fo gohed fo rul nao ya.” ⁵⁴ So olketa kasholem Jisas nao, an olketa lidim hem go insaet long haos blong Haeprist. Pita hemi go bihaen long olketa, bat hemi no wakabaot kolsap long olketa. ⁵⁵ Nao olketa laetem wanfala faea long midol long eria blong haos ya, so Pita hemi sidaon wetem olketa pipol wea olketa sidaon raonem faea ya. ⁵⁶ Taem ya nao, wanfala haosgele hemi lukim Pita taem hemi sidaon kolsap long faea, an hemi lukstrong long Pita an hemi sei, “Disfala man ya hemi bin stap wetem Jisas tu ya.” ⁵⁷ Bat Pita hemi laea olsem, “Woman, mi nating save long disfala man ya.” ⁵⁸ Lelebet taem go moa, wanfala man tu hemi lukim Pita an hemi sei, “Yu wanfala long olketa tu ya.” Bat Pita hemi sei, “Nomoa, hemi no mi ya.” ⁵⁹ Nao fitim wan aoa bihaen, nara man moa hemi tokstrong olsem, “Hemi tru ya, man ya hemi stap wetem Jisas tu ya, bikos hemi man blong Galili tu ya.” ⁶⁰ Bat Pita hemi sei, “Man, mi nating save long wanem yu tokabaotem ya.” Taem hemi gohed fo toktok yet, wanfala kokorako hemi krae nao. ⁶¹ An taem ya nomoa, Masta hemi taneraon an hemi luk stret go long Pita, an Pita hemi jes tingimbaek nao toktok ya wea Masta hemi bin talem hem olsem, ‘Taem kokorako hemi no krae long naet yet, bae trifala taem nao yu talem yu nating save long mi.’ ⁶² So Pita hemi go aotsaet an hemi gohed fo krae bikfala nao. ⁶³ Nao long taem ya tu, olketa man hu i gadem Jisas olketa stat fo mekfan long hem, an olketa tokspoelem hem an ki-kilim hem nao. ⁶⁴ An olketa taemapem ae blong hem an olketa gohed tu fo askem hem olsem, “?Oraet profet, yu talem long mifala fastaem, hu nao hemi hitim yu?” ⁶⁵ An olketa talem plande samting moa wea hemi nogud agensim Jisas fo spoelem hem. ⁶⁶ Taem hemi jes stat fo delaet nomoa, olketa hedprist an olketa tisa blong Lo an olketa nara bikman moa, olketa hipap tugeta nao. An samfala man olketa lidim Jisas kam nao fo stanap long frant blong olketa memba long Kansol. ⁶⁷ An olketa askem hem olsem, “?Yu talem mifala fastaem, waswe, yu nao disfala Mesaea?” Nao Jisas hemi tok olsem, “Sapos mi ansarem yufala, bae yufala no bilivim mi ya. ⁶⁸ An nomata mi askem yufala enisamting, bae yufala no wiling fo ansa nomoa. ⁶⁹ Bat mi San Blong Man, stat long distaem, bae mi sidaon long raetsaet blong God hu hemi garem evri paoa.” ⁷⁰ Nao evriwan olketa askem hem moa, “?Yu nao San Blong God ya?” An Jisas hemi sei, “Yufala seleva nao yufala talem olsem.” ⁷¹ So olketa tok olsem nao, “Hemi naf nao. Yumi no lukaotem eni man moa fo tok agensim hem. Yumi seleva bin herem wanem hemi talem finis nao.”

¹ Bihaen long diswan, evriwan i stanap an olketa lidim Jisas go long Paelat nao, mekem hemi jajem hem. ² An olketa man ya olketa stat fo talem plande samting agensim Jisas, an olketa tok olsem, “Mifala bin faendemaot wea man ya hemi bin lidim olketa pipol blong mifala fo go agensim bikfala King long Rom ya. An hemi bin talem olketa pipol tu fo no peim taks long bikfala King ya. An narasamting moa, hemi talem hem nao hemi disfala Mesaea wea hemi wanfala king.” ³ So Paelat hemi askem Jisas, “?Waswe, so yu nao yu King blong olketa Jiu?” Nao Jisas hemi ansarem hem olsem, “Yu seleva nao yu talem olsem ya.” ⁴ Bihaen, Paelat hemi tok olsem long olketa hedprist an long olketa pipol wea olketa hipap fo lukluk ya, “Mi no faendem enisamting wea man ya hemi duim wea hemi fitim fo yumi panisim hem long hem ya.” ⁵ Bat olketa gohed moa fo tokstrong olsem, “Tising blong man ya hemi mekem plande trabol kamap long olketa pipol long evriwea long Israel ya. Hemi bin statem diswan long provins long Galili go-go hemi kam kasem long hia nao.” ⁶ Nao taem Paelat hemi herem diswan nomoa, hemi ask olsem, “?Waswe, man ya hemi man blong Galili ya?” ⁷ Taem hemi herem dat Jisas hemi kam from eria wea King Herod Antipas hemi rul ovarem, hemi sendem hem go long Herod nao. Bikos taem ya, Herod hemi stap long Jerusalem tu. ⁸ Herod hemi hapi fogud fo lukim Jisas bikos longtaem nao hemi bin herem plande stori abaotem hem an hemi laekem tumas fo lukim hem. An hemi laekem tumas tu fo lukim taem Jisas hemi mekem wanfala mirakol. ⁹ So hemi askem plande kuestin nao long Jisas, bat Jisas hemi nating talem enisamting long hem. ¹⁰ An taem ya, olketa hedprist an olketa tisa blong Lo olketa stanap kolsap long tufala nao, an olketa gohed fo tokstrong long Jisas an talem enikaen samting agensim hem. ¹¹ So Herod an olketa soldia blong hem, olketa stat fo mekfan long Jisas an fo tokdaonem hem. Bihaen, olketa mekem hem fo werem wanfala nambawan kaleko olsem kaleko blong king, an olketa sendem hem gobaek moa long Paelat. ¹² Long bifoa ya, Herod an Paelat tufala barava enemi fogud ya, bat stat long distaem ya nomoa, tufala barava gudfren nao. ¹³ Nao Paelat hemi kolem kam olketa hedprist an olketa nara lida blong Jiu wetem olketa pipol moa fo kam long wanples, ¹⁴ an hemi tok olsem long olketa, “Yufala bin tekem kam man ya long mi, an yufala sei hemi lidim olketa pipol fo go agensim bikfala King long Rom. Nao mi bin askem samfala kuestin long hem long ae blong yufala, bat mi nating faendem enisamting rong wea hemi duim olsem yufala talem hemi duim. ¹⁵ Herod tu hemi no faendem enisamting rong wea man ya hemi bin duim, so dastawe nao hemi sendem hem kambaek long yumi. Man ya hemi no duim enisamting rong wea hemi fitim fo dae long hem ya. ¹⁶ So bae mi talem olketa fo wipim hem nomoa. Bihaen, bae mi letem hem fo go fri nao.” ¹⁸ Bat evri pipol ya olketa singaot bikfala olsem nao, “!Kilim hem dae! !Barabas nao mifala laekem yu fo letem hem go fri!” ¹⁹ Nao Barabas ya hemi bin stap long prisin from hem nao wanfala long olketa hu i bin mekem bikfala faet agensim gavman an kilim samfala pipol dae. ²⁰ Bat Paelat hemi wande tumas fo letem Jisas fo go fri, so hemi toktok moa long olketa. ²¹ Bat olketa singaot kam long hem olsem, “!Nilam hem long kros! !Nilam hem long kros!” ²² Nao mektri taem moa, Paelat hemi toktok go long olketa olsem, “?Bat waswe, watkaen samting nao hemi duim wea hemi rong? Mi nating faendem enisamting nogud wea hemi bin duim wea hemi mas dae long hem ya. So bae mi talem olketa fo wipim hem nomoa. An bihaen, mi letem hem fo go fri nao.” ²³ Bat olketa jes gohed fo singaot bikfala tumas moa, an fo talem dat olketa mas nilam Jisas long kros. An bihaen nomoa, olketa win nao, ²⁴ so Paelat hemi wanmaen fo duim wanem olketa askem hem fo duim. ²⁵ An hemi letem fo go fri disfala man hu olketa laekem, wea hemi stap long prisin from hemi bin mekem bikfala faet agensim gavman an kilim samfala pipol dae. An hemi givim Jisas go long han blong olketa soldia, mekem olketa save duim wanem olketa pipol i askem long hem. ²⁶ Taem olketa soldia olketa lidim Jisas go nao, olketa mitim wanfala man nem blong hem Saemon, hu hemi kam from biktaon long Saerin. An man ya hemi bin stap kam aotsaet long Jerusalem. Nao olketa putum kros blong Jisas antap long solda blong hem, an olketa fosim hem nao fo karim go bihaen long Jisas. ²⁷ Plande pipol tumas nao olketa go wetem Jisas long taem ya, an samfala woman tu wea olketa gohed fo sore tumas an fo krae bikfala fo Jisas. ²⁸ Nao Jisas hemi taneraon go long olketa an hemi sei, “!Olketa woman blong Jerusalem! Yufala no krae fo mi, bat yufala krae fo yufala seleva an fo olketa pikinini blong yufala. ²⁹ Bikos wanfala taem bae hemi kam, wea bae olketa pipol olketa tok olsem ya, ‘Yufala olketa woman wea yufala no save garem eni pikinini, wea yufala nating babule enitaem an yufala nating givim susu long eni pikinini, yufala hapi tumas ya.’ ³⁰ Long taem ya tu, bae olketa pipol olketa singaot go long olketa maonten olsem, ‘!Plis yufala foldaon kam antap long mifala!’ an bae olketa singaot long olketa hil olsem, ‘!Plis yufala kavaremap mifala!’ ³¹ ?Bikos yufala save, from olketa man olketa duim diswan long mi wea mi olsem tri wea hemi laef, wanem nao bae hemi hapen long yufala wea yufala olsem olketa tri wea i dae finis?” ³² Nao olketa soldia olketa tekem go tu tufala man wea tufala save mekem trabol, mekem olketa kilim tufala dae wetem Jisas. ³³ Taem olketa kasem ples wea olketa kolem “Bon blong hed blong man,” olketa soldia olketa nilam Jisas long kros nao. An tufala man fo mekem trabol tu, olketa nilam tufala long tufala kros, an olketa putum wanfala long raetsaet blong Jisas an narawan long lefsaet blong hem. ³⁴ An Jisas hemi sei, “Dadi, yu fogivim olketa bikos olketa nating save long wanem olketa duim ya.” An bihaen, olketa soldia ya olketa divaedem olketa kaleko blong hem long olketa seleva, wea olketa pleim daes fo olketa. ³⁵ Olketa pipol olketa stanap long ples ya an olketa lukluk go nomoa, bat olketa lida blong olketa Jiu olketa gohed fo mekfan long Jisas, an olketa sei olsem, “!Maewat! Hemi sevem olketa nara pipol finis. So sapos hemi tru wea hem nao disfala Mesaea wea God hemi siusim, letem hem sevem hem seleva.” ³⁶ An olketa soldia tu olketa mekfan long Jisas, an olketa givim hem wankaen waen wea hemi saoa. ³⁷ An olketa tok olsem long hem, “Sapos yu barava King blong olketa Jiu, yu sevem yu seleva.” ³⁸ An olketa raetem wanfala notis an putum antap long kros blong Jisas wea hemi sei olsem, “Hem nao King blong olketa Jiu.” ³⁹ Nao wanfala long tufala man fo mekem trabol hu hemi hang long kros long saet long Jisas, hemi tokspoelem Jisas olsem tu, “?Waswe, yu nao yu disfala Mesaea o nomoa? Yu sevem yu seleva an yu sevem mitufala tu.” ⁴⁰ Bat narafala man hu hemi hang long kros tu hemi tokstrong long nara man ya olsem, “?Waswe, yu no save tinghae long God? Yumi evriwan yumi garem semkaen panis nomoa ya. ⁴¹ Wanem yumitufala tekem panis fo hem, hemi stretwan ya, bikos olketa panisim yumitufala fo olketa ravis samting wea yumitufala bin duim. Bat man ya, hemi nating duim enisamting wea hemi rong ya.” ⁴² Nao hemi tok olsem long Jisas, “Jisas, taem yu kamap King yu mas tingim mi.” ⁴³ An Jisas hemi tok olsem long man ya, “Mi talem yu tru samting nao, tude bae yu stap wetem mi long heven.” ⁴⁴ Taem hemi kasem samting olsem tuelklok nomoa long de ya, san hemi no saen nao an hemi tudak long evri ples long kantri ya, go-go kasem triklok long aftanun. ⁴⁵ An disfala bikfala kaleko wea hemi hangdaon insaet long Tambuhaos ya, hemi brek long midol nao. ⁴⁶ An Jisas hemi singaot bikfala olsem, “Dadi, bae spirit blong mi nao hemi stap long han blong yu.” Bihaen nomoa, hemi dae nao. ⁴⁷ Taem bikman blong ami hemi lukim wanem hemi hapen, hemi mekhae long God, an hemi sei, “Hemi tru nao, man ya hemi wanfala gudfala man tumas ya.” ⁴⁸ An olketa pipol hu olketa bin hipap fo lukluk long wanem hemi gohed ya, taem olketa lukim wanem hemi hapen, olketa bitim sest blong olketa nao fo somaot dat olketa barava sore fogud, an olketa gobaek long haos blong olketa nao. ⁴⁹ An evriwan wea olketa savegud long Jisas, wetem olketa woman ya hu i go wetem hem stat kam long Galili, olketa stanap farawe kam nomoa an olketa lukluk long evrisamting wea hemi gohed. ⁵⁰ Long taem ya, wanfala man hemi stap, nem blong hem Josef, wea hemi kam from wanfala taon long Jiudia wea olketa kolem Arimetia. Hemi wanfala stretfala an gudfala man, hu hemi weitem taem wea kingdom blong God, bae hemi kam. An hemi wanfala memba long disfala Kansol tu ya, bat hemi nating wanmaen wetem olketa samting wea olketa bin talem an duim long Jisas. ⁵² Nao Josef hemi go long Paelat an hemi askem hem fo bodi blong Jisas. ⁵³ Bihaen, hemi go an hemi aotem bodi ya from kros, an hemi paselem long wanfala waet kaleko. An hemi putum bodi ya insaet long wanfala kev wea olketa bin wakem insaet long bikfala ston. Disfala kev ya, olketa no putum yet eni man insaet long hem. ⁵⁴ Nao hemi de wea olketa save mekredi long evrisamting fo Sabat de, an Sabat hemi kolsap fo stat nao. ⁵⁵ An olketa woman hu i bin go wetem Jisas stat kam long Galili, olketa go wetem Josef an olketa lukim kev ya an olketa lukim hao olketa putum bodi blong Jisas insaet long hem. ⁵⁶ Bihaen, olketa woman ya olketa gobaek long haos nomoa, an olketa gohed fo mekredi long insens an samfala oel wea hemi smel naes tumas fo putum long bodi blong Jisas. Nao long Sabat de olketa res olsem Lo hemi talem olketa mas duim.

¹ Long fas de long wik long eli moning yet, olketa woman ya olketa tekem insens ya wea olketa bin mekredi long hem finis, an olketa go long kev blong Jisas nao. ² An taem olketa kasem kev ya nomoa, olketa lukim ston ya olketa bin rolem go finis, an kev ya hemi open nomoa. ³ So olketa go insaet long kev ya, bodi blong Jisas Masta blong olketa, olketa no lukim nao. ⁴ An taem olketa trae fo tingting abaotem diswan, seknomoa, tufala man i stanap long saet long olketa woman ya nao. Kaleko blong tufala i barava saen fogud. ⁵ Long taem ya, olketa woman ya olketa fraet fogud nao, an olketa luk godaon long graon. Bat tufala man ya tufala tok olsem long olketa, “?Waswe nao yufala lukaotem man wea hemi stap laef long disfala ples blong olketa dae man? ⁶ Hemi no stap long hia nao, bikos hemi laefbaek finis. Yufala tingimbaek wanem hemi bin talem long yufala taem hemi stap wetem yufala yet long Galili. Hemi bin sei, ⁷ ‘Bae olketa mas givim mi San Blong Man, go long han blong olketa pipol wea olketa garem sin fo nilam mi dae long kros. An bihaen ya, long mektri de bae mi laefbaek moa.’” ⁸ An taem ya nomoa, olketa woman ya olketa jes tingimbaek toktok wea Jisas hemi bin talem. ⁹ So olketa lusim kev ya, an olketa gobaek nao fo talem evrisamting ya long levenfala aposol an long olketa nara pipol wea olketa stap long taem ya. ¹⁰ An olketa woman wea olketa talem samting ya long olketa aposol ya nao, Meri blong Magdala, Joana, Meri hu hemi mami blong Jemes, an samfala woman moa. ¹¹ Bat olketa aposol ya olketa nating bilivim toktok blong olketa woman ya nomoa, from olketa tingse olketa woman ya olketa toktok krangge nomoa. ¹² Bat Pita hemi getap, an hemi ran go long kev ya. Taem hemi kasem kev ya, hemi bendaon an hemi luk go insaet, an hemi lukim olketa kaleko nomoa i stap, bat hemi no lukim enisamting moa. So hemi lusim ples ya nomoa, an hemi sapraes tumas nao long olketa samting wea hemi hapen ya. ¹³ Long sem de tu, tufala disaepol i wakabaot go long wanfala vilij wea olketa kolem Emeas, wea hemi stap samting olsem levenfala kilomita aotsaet long Jerusalem. ¹⁴ An long taem ya, tufala gohed fo stori abaotem evrisamting wea hemi bin hapen. ¹⁵ An taem tufala gohed fo stori, Jisas seleva nao hemi kam kolsap an hemi wakabaot go wetem tufala. ¹⁶ Tufala man ya i lukim Jisas bat tufala nating luksave long hem. ¹⁷ Nao Jisas hemi tok olsem long tufala, “?Wanem nao yutufala toktok abaotem ya taem yutufala wakabaot kam ya?” Nao tufala stop nomoa, an tufala barava luk sore fogud nao. ¹⁸ An wanfala long tufala wea nem blong hem Kleopas, hemi talem Jisas olsem, “Maewat, plande man olketa bin kam long Jerusalem long disfala taem ya. Bat ating yu wanfala nomoa yu nating save long olketa samting wea hemi hapen long olketa de wea hemi go finis ya.” ¹⁹ Nao Jisas hemi askem tufala olsem, “?Watkaen samting nao ya?” Nao tufala sei, “Olketa samting wea hemi bin kasem Jisas blong Nasaret ya. Man ya hemi wanfala profet ya, an olketa waka blong hem an olketa toktok blong hem barava gudfala tumas long ae blong God an long ae blong olketa pipol tu. ²⁰ Bat olketa hedprist an olketa lida blong yumi, olketa givim hem go long han blong olketa man blong Rom, wea olketa jajem hem fo hemi mas dae, an olketa nilam hem long kros tu. ²¹ Bat mifala ya, mifala tingse hem nao disfala man wea bae hemi kam fo mekem olketa pipol blong Israel fo stap fri moa. An yu save, tude hemi mektri de nao bihaen diswan hemi hapen. ²² An samfala long olketa woman long seksin blong mifala i bin mekem mifala fo sapraes tumas tu. Long eli moning tude, olketa bin go long kev blong man ya, ²³ bat olketa nating lukim bodi blong hem insaet. An olketa kam an olketa talem mifala dat olketa bin lukim samfala enjel hu i talem olketa dat Jisas hemi laefbaek moa. ²⁴ Bihaen, samfala long seksin blong mifala, olketa tu olketa go long kev ya an olketa lukim dat evrisamting hemi stap olsem olketa woman ya bin talem nao. Bat olketa nating lukim Jisas.” ²⁵ Nao Jisas hemi tok olsem long tufala, “Man, yutufala no save tingting gud ya, an yutufala slou tumas fo bilivim evrisamting wea olketa profet bin talemaot bifoa. ²⁶ Hemi fitim fo yutufala save finis wea disfala Mesaea hemi mas filpein fastaem bifoa hemi save tekem saen blong bikfala paoa blong hem.” ²⁷ An Jisas hemi stat fo talemaot klia nao long tufala ya wanem nao olketa bin raetem abaotem hem insaet long Buktambu, stat kam long olketa buk blong Mosis an olketa buk blong olketa profet. ²⁸ Nao olketa kam kolsap long vilij wea tufala go-go fo hem, bat Jisas hemi luk olsem hemi wande fo lusim tufala an gohed moa. ²⁹ So tufala ya i talem hem strong olsem, “!Yumi stap fastaem, bikos hemi go-go fo ivining nao an kolsap hemi tudak!” So Jisas hemi go long haos blong tufala an hemi stap wetem tufala nao. ³⁰ Nao taem olketa sidaon fo kaikai nomoa, hemi holem bred an hemi talem tengkiu long God, an hemi brekem bred ya an hemi searemaot long tufala. ³¹ An semtaem nomoa, ae blong tufala i open nao an tufala jes luksave long Jisas. Bat taem ya nomoa, hemi lusim tufala an tufala nating lukim hem moa. ³² Nao tufala gohed fo toktok olsem, “Maewat, taem hemi toktok long yumitufala long rod ya an hemi gohed fo talemaot klia olketa samting long Buktambu ya, yumitufala heremgud tumas mekem yumitufala hapi long hem ya.” ³³ So tufala getap long semtaem, an tufala hariap an gobaek moa long Jerusalem. Nao long ples ya, tufala lukim olketa levenfala disaepol an olketa nara pipol hu olketa hipap tugeta, ³⁴ wea olketa ya gohed fo tok olsem, “Hemi barava tru ya, Masta blong yumi hemi laefbaek moa. Hemi bin som hem seleva long Saemon.” ³⁵ Bihaen, tufala ya i gohed fo talemaot evrisamting wea hemi bin hapen taem tufala wakabaot go long rod, an hao tufala jes luksave long Masta long semtaem hemi gohed fo brekem bred. ³⁶ Taem tufala gohed fo stori yet long olketa ya, seknomoa, Jisas hemi stanap long midol long olketa, an hemi tok olsem long olketa, “Piis hemi stap wetem yufala.” ³⁷ Long taem ya, olketa sek an olketa barava fraet fogud nao bikos olketa tingse olketa lukim wanfala devol. ³⁸ Nao Jisas hemi tok olsem long olketa, “?Waswe nao yufala fraet fogud olsem? ?Waswe nao yufala garem tufala tingting? ³⁹ Yufala luk kam long tufala han blong mi an long tufala lek blong mi ya. !Mi nomoa ya! Yufala holem bodi blong mi fastaem, mekem yufala savegud. Wanfala devol hemi no save garem bon wetem mit ya, olsem yufala lukim mi garem.” ⁴⁰ Bihaen, hemi som nao tufala han blong hem an tufala lek blong hem long olketa. ⁴¹ An olketa barava hapi fogud nao. Bat nomata olsem, olketa nating bilivim hem nomoa, bikos olketa no minim nomoa bikfala samting ya. So Jisas hemi askem olketa, “?Waswe, yufala garem eni kaikai?” ⁴² So olketa givim hem wanfala haf fis wea olketa bonem finis, ⁴³ an hemi tekem an hemi kaikaim nao long ae blong olketa. ⁴⁴ Nao hemi tok olsem long olketa, “Disfala samting wea hemi hapen long mi ya, mi bin talem long yufala finis taem mi stap yet wetem yufala ya. Mi bin sei evrisamting hemi mas kamtru olsem wanem olketa bin raetem abaotem mi long Lo blong Mosis, an long olketa buk blong olketa profet, an long olketa buk blong olketa singsing.” ⁴⁵ Nao hemi openem tingting blong olketa, mekem olketa save minimgud olketa toktok insaet long Buktambu. ⁴⁶ An hemi tok olsem long olketa, “Hem nao wanem Buktambu hemi sei, ‘Disfala Mesaea hemi mas dae, an long mektri de hemi mas laefbaek moa from dae. ⁴⁷ An long nem blong Mesaea ya, bae olketa pipol mas talemaot toktok ya wea hemi sei olketa pipol mas lusim olketa ravis wei blong olketa, mekem God save fogivim sin blong olketa. An disfala nius ya hemi mas go long olketa pipol long Jerusalem fastaem, an bihaen ya, bae hemi mas go long olketa pipol long evri kantri long wol.’ ⁴⁸ Yufala nao mas go an talemaot olketa samting ya long olketa pipol. ⁴⁹ An bae mi sendem kam long yufala wanem Dadi blong mi hemi bin promisim finis. Bat yufala mas weit long biktaon ya, go-go taem paoa blong heven hemi kamdaon antap long yufala.” ⁵⁰ Bihaen diswan, Jisas hemi lidim olketa fo goaot nao from biktaon ya fo go kasem vilij long Betani. Nao hemi liftimap tufala han blong hem an hemi blesim olketa. ⁵¹ An taem hemi gohed fo blesim olketa yet, hemi lusim olketa nao, an God hemi tekem hem goap long heven. ⁵² An olketa ya i gohed fo mekhae long hem, an olketa gobaek nao long biktaon ya wea olketa barava hapi fogud. ⁵³ An evritaem nomoa, olketa stap insaet long Tambuhaos ya, an olketa gohed fo preisim God.