JEMES

JEMES

¹ Mi Jemes, wakaman blong God an blong Jisas Kraes Masta blong yumi. Mi sei halo long olketa pipol blong God wea yufala stap long evri ples long wol. ² Olketa Kristin fren, taem enikaen trabol hemi kasem yufala, yufala mas ting long hem olsem samting hemi gud fo yufala. ³ Yufala save, sapos yufala biliv strong nomata olketa trabol i kasem yufala, bae hemi mekem yufala fo gohed strong olowe ya. ⁴ So yufala mas gohed strong olowe nao, go-go yufala barava gud finis an no save sot long enisamting long wei blong God. ⁵ Bat sapos eniwan long yufala hemi no garem gudfala tingting, hemi mas askem God. An bae God hemi save givim gudfala tingting long hem, bikos God hemi hapi tumas fo givim kam olketa samting, an hemi no save raosim olketa hu i askem hem. ⁶ Bat taem eniwan hemi askem God fo gudfala tingting, hemi mas biliv strong long God nao ya. Sapos hemi no biliv strong long God, man ya hemi olsem olketa wev long si wea win hemi bloum olketa olobaot. ⁷ Diskaen man hemi garem tufala maen an tingting blong hem hemi no save stap strong long wanfala samting. So nogud hemi tingse Masta bae hemi givim enisamting long hem. Nomoa nao. ⁹ Olketa Kristin fren, yufala hu i lou mas hapi taem God hemi apem yufala, ¹⁰ an yufala hu i ris mas hapi taem God hemi putum yufala daon. Nomata man hemi ris tumas, hemi save dae enitaem nomoa, nomata hemi gohed yet long bisnis blong hem. Hemi olsem olketa naes flaoa wea olketa no save stap longtaem nomoa. Taem san hemi kamap an hotem olketa flaoa ya, bae olketa dae an foldaon an kala blong olketa hemi lus nomoa. ¹² Man hu hemi gohed fo stanap strong taem enikaen hadtaem hemi kasem hem, hem nao hemi hapi. Taem hemi stanap strong long evri hadtaem, God bae hemi givim hem laef wea hemi promis fo givim long olketa hu i lavem hem. ¹³ Taem enikaen hadtaem hemi kasem wanfala man, hemi mas no tingse God nao hemi trae fo mekem hem gorong. Bikos God hemi no save mekem eniwan fo gorong, an no enisamting tu hemi save mekem God fo gorong. ¹⁴ Bat man seleva nao hemi save tingting fo duim wanem hemi rong. Taem wanfala man hemi laekem tumas olketa ravis samting, hemi had nao fo hemi sensim tingting blong hem. ¹⁵ An sapos disfala nogud tingting hemi gohed nomoa, hemi save mekem man fo duim olketa ravis samting. An sapos hemi gohed fo duim nomoa olketa ravis samting, bae olketa save kilim hem dae. ¹⁶ So olketa gudfala Kristin fren blong mi, yufala mas tingting stret abaotem olketa samting ya. ¹⁷ Evrisamting wea hemi gud tumas hemi save kamdaon from heven. God nao hemi givim kam olketa gudfala samting, an hemi no save sensim wei blong hem. Olketa samting long skae wea God hemi bin mekem fo saen kam, olketa save sens olowe, bat wei blong God, hemi no save sens. ¹⁸ God hemi falom nao plan blong hem, so hemi givim yumi laef long disfala tru toktok. Hemi duim olsem, mekem yumi kamap nambawan winim eni narasamting wea hemi mekem. ¹⁹ Olketa gudfala fren blong mi, yufala mas save long diswan. Yufala mas wiling fo lisin, an yufala mas no kuiktaem fo tok an no kuiktaem fo kros. ²⁰ Kros blong man hemi no save helpem eniwan fo duim wanem God hemi laekem. ²¹ So yufala mas no olobaot moa, an yufala mas no gohed moa long evri ravis wei. Bat yufala mas hambol an wiling fo obeim toktok wea God hemi putum insaet long tingting blong yufala. Disfala toktok nao save sevem yufala. ²² Yufala no krangge fo lisin nating long disfala toktok, bat yufala mas duim wanem hemi talem. ²³ Eniwan hu hemi herem disfala toktok bat hemi nating duim wanem hemi talem, hemi olsem wanfala man wea hemi luk insaet long glas fo lukim fes blong hem. ²⁴ Hemi lukim hem seleva, bat taem hemi goawe moa, semtaem nomoa hemi fogetem nao watkaen fes hemi garem. ²⁵ Disfala lo wea hemi barava gud tumas, hemi save mekem pipol fri from sin. So man hu hemi lukluk gud olowe insaet long lo ya, an hemi no fogetem enisamting bat hemi duim wanem disfala lo hemi talem, hem nao bae God hemi blesim hem long evrisamting wea hemi duim. ²⁶ Eniwan hu hemi tingse hemi falom wei blong God bat hemi no save kontrolem wanem hemi talem, hemi hadwaka nating nomoa ya, an hemi laea long hem seleva. ²⁷ Bat gudfala wei blong Kristin wea hemi barava stret long God Dadi blong yumi, hem nao fo helpem olketa wido woman an olketa pikinini wea mami an dadi blong olketa i dae finis, an fo no letem olketa ravis samting long wol fo spoelem gudfala laef blong yumi.

¹ Olketa Kristin fren, yufala mas no fevarem samfala pipol nomoa. Bikos yufala nao i biliv long Masta blong yumi Jisas Kraes hu hemi bikman long heven. ² Sapos tufala man i kam long miting blong yufala, wanfala hemi ris an narawan hemi pua. Maet disfala risman hemi werem kam enikaen gol ring an olketa kaleko wea i barava luknaes fogud. An taem yufala lukim hem, yufala tinghae long hem nao, so yufala sei, “Oo, yu kam sidaon gud long hia.” Bat nara man hu hemi pua, hemi werem kam olketa ravis kaleko nomoa. So yufala sei nomoa, “Yu stanap dea, o yu sidaon long bihaen nomoa.” ⁴ Hem nao wei wea yufala rong ya, bikos yufala fevarem pipol falom olketa ravis tingting blong yufala seleva. ⁵ Olketa gudfala fren blong mi, yufala lisin fastaem. God hemi siusim pipol hu i pua long wol, mekem olketa kamap ris long biliv blong olketa. Hemi siusim olketa, fo stap insaet long kingdom blong God, olsem wea hemi promisim finis long olketa hu i lavem hem. ⁶ Bat yufala lukdaon tumas long olketa hu i pua. ?Waswe, hu nao save ravem yufala olowe an tekem yufala go long kot? ⁷ ?Waswe, hu nao tokspoelem disfala gudfala nem blong Kraes Masta blong yufala? Olketa ris pipol nao. ⁸ Wanem yufala mas duim nao, yufala mas obeim wanem disfala nambawan lo hemi talem insaet long Buktambu, wea hemi sei, “Yu mas lavem olketa wantok blong yu long sem wei wea yu lavem yu seleva.” ⁹ Bat sapos yufala fevarem samfala pipol nomoa, yufala duim wanem hemi nating stret ya. Disfala lo ya nao hemi somaot dat yufala rong. ¹⁰ Sapos wanfala man hemi obeim evri lo ya, bat hemi brekem wanfala nomoa, hemi olsem hemi barava brekem evri lo ya nao. ¹¹ God hu hemi sei, “Yufala mas no brekem lo blong marit,” hemi sei tu, “Yufala mas no kilim man dae falom ravis plan.” Nomata yu no brekem lo blong marit, bat sapos yu kilim man dae, yu kamap man fo brekem Lo nao ya. ¹² God bae hemi jajem yufala falom narafala lo wea hemi save mekem pipol fri from sin. So yufala mas lukaot long wanem yufala talem an wanem yufala duim. ¹³ Sapos yufala no sore an kaen long eniwan, God bae hemi no sore an kaen long yufala tu. Bat man hu hemi save sore an kaen long olketa nara pipol, hemi no nid fo fraetem panis blong God. ¹⁴ Olketa Kristin fren blong mi, nogud eniwan hemi talem hemi biliv long God, bat hemi nating duim nomoa eni gudfala samting fo somaot biliv blong hem. Diskaen biliv ya hemi no save sevem hem. ¹⁵ Nao sapos wanfala Kristin fren hemi sot long kaleko an no garem inaf kaikai, ¹⁶ an yufala sei long hem, “Yu no wari tumas, yu go faendem kaleko an kaikai.” ?Waswe, yufala tingse diskaen toktok nating ya hemi save helpem hem? Nomoa ya. Yufala mas givim olketa samting fo helpem hem nao. ¹⁷ Wei fo biliv hemi olsem tu. Sapos man hemi biliv nating nomoa an hemi no duim eni gudfala samting, diskaen biliv hemi dae finis ya. ¹⁸ Maet wanfala man hemi sei, “Samfala man biliv nomoa long God, an samfala moa i duim olketa gudfala samting.” Sapos hemi olsem, yufala som kam long mi, hao nao eniwan save biliv long God sapos hemi no duim eni gudfala samting. Mi nao bae mi som long yufala dat olketa gudfala samting mi duim hemi somaot mi biliv long God. ¹⁹ Mi save, yufala biliv dat wanfala God nomoa hemi stap, an diswan hemi gud ya. Bat olketa devol tu olketa bilivim semsamting, an dastawe nao olketa fraet an seksek. ²⁰ !Yufala krangge tumas! Sapos yufala biliv long God nomoa, bat yufala nating duim eni gudfala samting, diskaen biliv hemi yusles. Bae mi mekem yufala luksave long diswan. ²¹ ?Hao nao olo blong yumi Ebraham hemi stret wetem God? Hemi stret wetem God long wei wea hemi wiling fo sakrifaesim san blong hem antap long olta. ²² Yufala luksave nao dat Ebraham hemi biliv long God an hemi duim gudfala samting. An disfala gud samting wea hemi duim, hem nao somaot strongfala biliv blong hem. ²³ So wanem Buktambu hemi talem hemi tru, wea hemi sei, “Ebraham hemi biliv long God, dastawe nao God hemi sei hemi stretfala man.” Dastawe God hemi kolem Ebraham fren blong hem. ²⁴ So yufala lukim, man hemi save stret long ae blong God from olketa gudfala samting hemi duim, an i no long biliv nating nomoa. ²⁵ Nao semkaen samting hemi hapen tu long disfala juri woman Rehab. Hemi letem tufala man blong Israel fo haed long haos blong hem, an hemi helpem tufala fo ranawe long deferen rod. Dastawe nao God hemi sei hemi stretfala woman. ²⁶ Bodi wea hemi no garem spirit long hem, hemi dae finis. Long sem wei, sapos man hemi biliv nating nomoa an hemi no duim eni gudfala samting, diskaen biliv hemi dae finis tu.

¹ Olketa Kristin fren, plande long yufala mas no trae fo kamap tisa insaet long sios, bikos yufala save dat God bae hemi jajem yumi olketa tisa winim evri nara pipol. ² Yumi evriwan save duim olketa rong samting. Sapos wanfala man hemi no save talem eni nogud samting, man ya nao hemi barava gud tumas, an hem nao hemi barava save lukaftarem laef blong hem gudfala. ³ Nomata bikfala hos, yumi save taengem smolfala pis aean nomoa insaet long maos blong hem, mekem hemi obeim yumi. Olsem, yumi save tanem hem long eni saet yumi laekem hem fo go. ⁴ An bikfala sip hemi olsem tu. Nomata hemi bikfala, an win hemi blou strong long hem, bat smolfala stia nomoa hemi save tanem sip ya falom tingting blong kapten. ⁵ Maos blong yumi hemi olsem tu. Nomata hemi smolfala pat nomoa long bodi, bat hemi save tokpraod tumas abaotem plande samting. An faea hemi olsem tu. Nomata hemi stat smolfala nomoa, bat hemi save laet go-go hemi save bonem evri bikfala tri long bus. ⁶ Maos blong man hemi olsem faea tu, bikos hemi save talem enikaen ravis samting nomoa. Nomata hemi wanfala smolfala pat nomoa long bodi, bat hemi save spoelem ful bodi blong yumi fo nogud. An hemi save barava spoelem tu laef blong yumi, wetem samting wea hemi barava kam from hel. ⁷ Man save kontrolem enikaen wael animol an enikaen bed an enikaen fis an enikaen samting wea i krol long bele olsem snek. ⁸ Bat maos nao no eniwan save kontrolem hem, bikos hemi wanfala ravis samting wea no eniwan garem paoa ovarem. Maos hemi olsem poesen tu fo kilim man dae. ⁹ Man save yusim maos fo preisim Masta an Dadi blong yumi, an hemi save yusim tu fo tokspoelem nara man, nomata God bin mekem yumi evriwan olsem hem seleva. ¹⁰ ?Hao nao gudfala toktok an ravis toktok i save kamaot long wanfala maos nomoa? !Olketa Kristin fren, diskaen samting hemi nating fitim yumi fo duim ya! ¹¹ Freswata an solwata no save kamaot long wanfala springwata nomoa. ¹² An sapos wanfala springwata hemi garem solwata long hem, hemi had tumas fo hemi sens moa. Olketa fren, fig tri tu hemi no save garem frut blong oliv tri long hem, an grep tri hemi no save garem frut blong fig tri. ¹³ Sapos eniwan long yufala hemi tingse hemi garem gudfala tingting an hemi waes, hemi mas somaot diswan. Laef blong hem mas gudfala, an hemi mas duim evrisamting long hambol wei bikos hemi waes. ¹⁴ Bat sapos tingting blong yufala hemi fulap long enikaen wei fo joles an kros, an yufala tingting long yufala seleva nomoa, oraet, yufala mas lukaot. Nogud yufala praod nating nomoa an yufala sei yufala garem waes tingting, bat hemi nating tru. ¹⁵ Diskaen tingting hemi no kam from God, bat hemi samting blong wol nomoa. Hemi kam from ravis tingting blong man an from Seitan. ¹⁶ Taem tingting blong pipol i fulap long enikaen wei fo joles an selfis, bae evrisamting hemi olobaot an enikaen ravis samting nao save hapen. ¹⁷ Nao man wea hemi garem disfala waes tingting wea hemi kam from God, hemi no save duim eni ravis samting. Hemi no fevarem samfala pipol nomoa, an hemi no trae fo laea long wei blong hem, an hemi no wande raoa. Bat hemi kuaet long wei blong hem, an hemi fren gudfala long evriwan, an hemi barava sore long pipol, an hemi duim evri gudfala samting fo evriwan. ¹⁸ An olketa hu i stretem raoa long wei blong piis, olketa nao i stretfala pipol.

¹ ?Waswe, yufala save wanem nao hemi mekem yufala fo raoa an wande faet olowe? !Hem nao diskaen tingting fo laekem plande gudfala samting fo yufala seleva ya! Diswan nao save kamap olowe long tingting blong yufala. ² Yufala laekem tumas plande samting bat yufala no garem, so diswan hemi mekem yufala wande kilim dae nara man. An taem yufala no save tekem wanem yufala laekem, yufala stat fo raoa an faet nao. ?Bat wanem nao mekem yufala fo no garem wanem yufala laekem tumas? Yufala no garem, bikos yufala no askem God. ³ An taem yufala askem God, hemi no givim wanem yufala laekem, bikos tingting blong yufala hemi nogud. Yufala laekem olketa samting wea hemi mekem yufala seleva filgud nomoa. ⁴ Yufala lusim finis wei blong God. ?Waswe, yufala no save dat disfala wei fo falom wol hemi agensim God? So eniwan hu hemi laek fo falom wei blong wol, hemi enemi blong God nao. ⁵ Nao wanem Buktambu hemi talem hemi tru ya, “Laef wea God hemi putum insaet long yumi, hemi laekem tumas evrisamting.” ⁶ Bat nomata olsem, kaenfala lav blong God fo yumi, hemi bikfala moa winim diswan. Dastawe nao Buktambu hemi sei, “God hemi daonem eniwan hu hemi praod, bat hemi somaot kaenfala lav blong hem long olketa hu i hambol.” ⁷ So yufala mas putum laef blong yufala andanit long paoa blong God. An yufala mas stanap strong agensim Seitan, mekem hemi ranawe from yufala. ⁸ Yufala mas kam kolsap long God, an bae hemi kam kolsap long yufala. Yufala mas lusim evri sin blong yufala, an yufala mas no garem tufala tingting moa. Bat yufala mas tingting wansaet nomoa long God. ⁹ Yufala mas barava sore an krae. Hemi no fitim fo yufala laf, yufala mas krae. An hemi no fitim fo yufala hapi, yufala mas sore. ¹⁰ Yufala mas hambol long ae blong Masta, mekem hemi haemapem yufala. ¹¹ Olketa Kristin fren, yufala mas no tokspoelem nara man. Sapos yu spoelem nara Kristin fren o yu jajem hem, yu tokspoelem an jajem Lo blong God. An sapos yu jajem Lo, bae yu no man fo obeim Lo ya, bat yu man fo jajem Lo nomoa. ¹² ?Waswe, yu tingse yu nao God, mekem yu jajem nara man? God nao hemi givim Lo an hem seleva nao hemi save jajem pipol, an hem nomoa save givim laef o tekemaot laef from eniwan. ¹³ Yufala lisin, yufala mas no tok olsem, “Bae tude o tumoro nao yumi go long wanfala taon. An bae yumi stap kam fo wanfala yia, mekem yumi gohed fo duim bisnis fo garem staka seleni.” ¹⁴ !Sei olketa, no eniwan save wanem nao bae hemi hapen long hem tumoro! Laef blong yumi, hemi olsem smok nomoa wea hemi save kamaot fo lelebet taem, an bihaen hemi lus moa. ¹⁵ So yufala mas tok olsem, “Sapos hemi oraet long Masta an yumi laef yet, bae yumi save duim wanem yumi tingim.” ¹⁶ Bat yufala praod tumas an yufala sei dat yufala save finis long wanem bae hemi hapen. Diskaen wei hemi nogud tumas. ¹⁷ So man hu hemi save nomoa long stretfala samting fo duim bat hemi no duim, hemi sin nao.

¹ Yufala olketa ris man, yufala mas krae bikfala nao, bikos trabol wea bae hemi kasem yufala, hemi barava nogud tumas. ² Risis blong yufala i gohed fo roten finis. An olketa kaleko i nogud tu. ³ Olketa gol an silva tu i rasta finis. An rasta ya nao hemi somaot dat yufala rong, an bae hemi spoelem yufala olsem faea hemi save spoelem samting nogud. No longtaem bae disfala wol hemi finis, bat yufala gohed nomoa fo hipimap olketa risis blong yufala. ⁴ !Yufala herem! Oltaem nomoa yufala ravem wejis blong olketa wakaman hu i waka long plantesin blong yufala. Diswan nao hemi barava somaot dat yufala rong. Masta hu hemi garem evri paoa, hemi herem finis komplen blong olketa wakaman blong yufala. ⁵ Taem yufala stap long disfala wol, yufala ris tumas long enikaen gudfala samting an yufala yusim evrisamting ya fo mekem yufala seleva nomoa fo filgud long hem. Long diskaen wei, yufala jes mekem yufala seleva fat, olsem fat buluka wea bae olketa busarem. ⁶ Yufala ya, yufala bin jajem nogud olketa hu i no duim eni rong samting. An yufala bin kilim dae olketa tu, bat olketa no trae fo faet agensim yufala. ⁷ Olketa Kristin fren, yufala mas wiling fo weit, go-go Masta blong yumi hemi kambaek moa. Yufala save, taem man hemi wakem gaden finis, hemi gohed nomoa fo weitem taem blong ren an taem kaikai hemi redi. ⁸ So yufala tu mas wiling fo weit nomoa. !Yufala no wari, Masta blong yumi hemi kolsap kambaek nao! ⁹ Olketa Kristin fren, yufala mas lusim disfala wei fo talem enikaen toktok agensim nara Kristin, nogud God hemi jajem yufala, bikos hemi redi finis fo jajem evriwan. ¹⁰ Olketa Kristin fren, yufala mas luk falom wei blong olketa profet long bifoa hu i talemaot toktok blong God. Nomata pipol mekem olketa safa, olketa stanap strong nomoa. ¹¹ Yumi save sei olketa hapi tumas bikos olketa stanap strong go-go kasem en. An yufala herem finis abaotem Job. Enikaen nogud samting nao hemi kasem hem, bat hemi gohed nomoa fo biliv long God. An yufala save finis long wei wea Masta hemi helpem hem bihaen. Ya, Masta hemi gohed fo sore an kaen tumas long evriwan. ¹² Olketa Kristin fren, bikfala samting wea yufala mas save hemi olsem ya. Taem yufala mekem promis, yufala mas no suea long enisamting long heven o long wol. Sapos yufala save dat samting hemi tru, yufala mas sei, “Hemi tru.” An sapos yufala save dat samting hemi no tru, yufala mas sei, “Hemi no tru”. Sapos yufala tok olsem, bae God no save panisim yufala. ¹³ Sapos eniwan long yufala hemi garem enikaen trabol, hemi mas prea long God. An sapos eniwan hemi filhapi, hemi mas singsing fo mekhae long God. ¹⁴ Sapos eniwan long yufala hemi sik, hemi mas askem olketa lida long sios fo rabem oel long hem an prea fo hem long nem blong Masta. ¹⁵ An from olketa biliv long God taem olketa prea, Masta bae hemi mekem sikman ya fo gudbaek moa. An sapos man ya hemi garem eni sin, Masta bae hemi fogivim hem tu. ¹⁶ So yufala mas talemaot olketa sin blong yufala long yufala evriwan, an yufala mas prea fo eniwan long yufala hu hemi sik, mekem hemi gudbaek moa. Prea blong stretfala man, hemi barava garem paoa an hemi save helpem pipol. ¹⁷ Profet Elaeja hemi wanfala man olsem yumi nomoa. Bat hemi prea strong long God fo stopem ren, an hemi no ren long ples blong olketa fo trifala yia an siksfala mans. ¹⁸ An bihaen, Elaeja hemi prea moa long God fo sendem kam ren. So ren hemi kam an hemi mekem evrisamting long graon fo grou moa. ¹⁹ Olketa Kristin fren, sapos eniwan long yufala hemi goawe from tru toktok, hemi gud fo yufala helpem hem fo kambaek moa. ²⁰ Hemi tru, taem yufala helpem eniwan fo lusim disfala nogud wei blong hem, bae God hemi fogivim hem from enikaen sin an sevem hem from dae.