MEKTU TESALONAEKA

¹ Mi Pol wetem Saelas an Timoti, mitrifala raet go long yufala pipol long sios long Tesalonaeka. Yufala nao pipol blong God hu hemi Dadi blong yumi, an Jisas Kraes Masta blong yumi. ² Letem kaenfala lav an piis blong God Dadi blong yumi an blong Jisas Kraes Masta blong yumi, hemi stap wetem yufala. ³ Olketa Kristin fren, oltaem nomoa mifala talem tengkiu long God fo yufala evriwan. An hemi gud fo mifala duim olsem, bikos oltaem nomoa biliv blong yufala hemi gohed fo grou strong moa, an lav wea yufala garem fo evriwan hemi gohed fo bikfala moa. ⁴ Dastawe nao mifala gohed fo tokpraod abaotem yufala long olketa sios blong God. Mifala tokpraod abaotem disfala wei wea nomata yufala safa tumas an olketa spoelem yufala, bat yufala stanap strong an gohed nomoa fo biliv. ⁵ Olketa samting ya, hemi barava somaot dat wei blong God fo jajem pipol hemi stret. Hem nao nomata yufala safa tumas distaem, bae God hemi tekem yufala insaet long kingdom blong hem. ⁶ God bae hemi duim wanem hemi stret, an bae hemi panisim olketa hu i mekem yufala safa. ⁷ An fo yufala wea yufala barava safa tumas an fo mifala tu, bae God hemi finisim trabol blong yumi evriwan. Diswan bae hemi hapen long taem wea Jisas Masta blong yumi, bae hemi kamdaon from heven wetem olketa enjel blong hem hu i garem strongfala paoa. ⁸ Bae hemi kam wetem bikfala faea fo panisim olketa pipol hu i agensim God an no obeim Gudnius abaotem Jisas Masta blong yumi. ⁹ An panis wea God bae hemi givim olketa hemi barava nogud tumas an hemi no save finis. An Masta bae hemi torowem olketa from ples blong hem an from saen blong bikfala paoa blong hem long heven. ¹⁰ Bae diswan hemi hapen long datfala de wea Masta bae hemi kambaek moa an pipol blong hem bae i mekhae long hem. Ya, long datfala taem, olketa hu i biliv long hem bae olketa preisim hem fogud. An yufala tu bae stap wetem olketa pipol blong Masta, bikos yufala biliv finis long olketa toktok wea mifala bin talem long yufala. ¹¹ From olketa samting ya nao, mifala gohed fo prea fo yufala olowe. Mifala gohed fo askem God blong yumi, fo hemi mekem yufala fit fo falom disfala gudfala laef wea hemi askem yufala fo stap long hem. An mifala askem God fo yusim paoa blong hem fo helpem yufala fo falom olketa gudfala tingting blong yufala, an fo helpem yufala fo gohed long olketa gudfala waka wea yufala duim bikos yufala biliv long hem. ¹² Sapos yufala duim diswan, bae yufala liftimap nem blong Jisas Masta blong yumi, an bae hem tu hemi liftimap nem blong yufala. Hemi duim diswan long kaenfala lav blong hem an blong Masta blong yumi Jisas Kraes.

¹ Olketa Kristin fren, hemi gud fo tingim wei wea Jisas Kraes Masta blong yumi bae hemi kambaek moa an bae hemi mekem yumi stap tugeta wetem hem. ² So mi talem strong long yufala, plis no kuiktaem fo lusim tingting blong yufala o wari tumas taem yufala herem olketa olobaot toktok wea hemi sei, “De blong Masta hemi kam finis nao.” Nogud olketa pipol laea olsem an sei Holi Spirit nao hemi talem diswan o olketa sei mifala nao talem o raetem long eni leta blong mifala. ³ Yufala no letem eniwan fo laea olsem long yufala, bikos Lasde ya bae hemi no save kam nating. Fastaem, staka pipol nao bae faet agensim God, an disfala man wea olketa kolem “Man fo Brekem Lo”, bae hemi kam fastaem tu. An hem nao man wea God bae hemi barava spoelem hem. ⁴ Bae disfala man hemi agensim evrisamting wea pipol olketa gohed fo wosipim, wetem enikaen god blong olketa. An bae hemi mekem hem seleva fo bikfala winim moa evrisamting ya, an bae hemi go sidaon insaet long Tambuhaos blong God an talem dat hem seleva nao hemi God. ⁵ ?So waswe, yufala fogetem finis nao olketa samting wea mi talem long yufala taem mi stap yet wetem yufala? ⁶ Disfala Man fo Brekem Lo bae hemi som hem seleva long barava taem blong hem. An yufala save finis long disfala paoa wea hemi stopem hem fo no kamaot klia yet. ⁷ Paoa blong disfala Man fo Brekem Lo nao, hemi gohed waka distaem. Bat hemi staphaed yet gogo kasem taem wea God bae hemi tekemaot disfala man hu hemi gohed fo stopem Man fo Brekem Lo. ⁸ Long taem ya nomoa, Man fo Brekem Lo bae hemi kamaot klia nao. Hem nao man wea Jisas Masta blong yumi, bae hemi kilim dae wetem win blong maos blong hem nomoa. Ya, taem Jisas hemi kambaek moa, bikfala paoa blong hem bae hemi saen kam fo barava spoelem man ya. ⁹ Bat fastaem, bae Man fo Brekem Lo hemi kam wetem paoa blong Seitan, an bae hemi mekem enikaen laea mirakol an olketa bikfala samting moa wea pipol i sapraes long hem. ¹⁰ Bae hemi yusim tu enikaen ravis trik nomoa fo laea long olketa pipol wea bae olketa gohed fo lus. Bae olketa lus, bikos olketa no wiling fo lavem an fo falom tru toktok abaotem Masta wea hemi save sevem olketa. ¹¹ Dastawe nao God bae hemi mekem olketa fo no tingting stret, mekem olketa biliv nomoa long olketa laea toktok. ¹² Bikos olketa no biliv long tru toktok, an olketa hapi fo duim olketa ravis samting, God bae hemi jajem olketa ya. ¹³ Olketa Kristin fren, Masta blong yumi hemi lavem yufala tumas. Ya, hemi fitim fo mifala talem tengkiu long God fo yufala, bikos God hemi siusim yufala, mekem yufala nao olketa faswan fo hemi sevem. Hemi sevem yufala bikos Holi Spirit hemi mekem yufala holi an bikos yufala biliv long disfala tru toktok. ¹⁴ God hemi kolem yufala kam long Gudnius wea mifala talemaot finis. Hemi duim bikos hemi laekem nambawan laef blong Jisas Kraes Masta blong yumi, fo saenaot long laef blong yufala. ¹⁵ Olketa Kristin fren, yufala mas stanap strong an holetaet long olketa tru toktok wea mifala bin tisim long yufala. Hem nao olketa tising mifala bin talemaot long toktok o mifala bin raetem long leta. ¹⁶ Masta blong yumi Jisas Kraes wetem God Dadi blong yumi, hemi lavem yumi tumas ya. An hemi helpem yumi tumas tu long kaenfala lav blong hem, wea oltaem hemi mekem yumi trastem hem an oltaem tu hemi strongim tingting blong yumi. ¹⁷ Mifala prea wea hemi mas mekem tingting blong yufala fo strong moa, an mekem yufala gohed olowe fo duim evri gudfala waka an fo talem evri gudfala toktok.

¹ Olketa Kristin fren, plis yufala prea fo mifala dat toktok blong Masta hemi save go kasem plande ples kuiktaem, an olketa pipol i save herem an mekhae long hem, olsem hemi hapen finis long yufala. ² An plis yufala prea tu dat God bae hemi tekemaot mifala from han blong olketa barava nogud pipol. Bikos yufala save, plande pipol nao no trastem Gudnius. ³ Bat yufala save t rastem Masta olowe nomoa. Bae hemi mekem yufala strong an bae hemi lukaftarem yufala, mekem paoa blong Seitan hemi no save spoelem yufala. ⁴ An Masta blong yumi nao hemi mekem mifala save dat yufala falom nomoa wanem mifala bin talem long yufala finis. An mifala save tu dat bae yufala gohed olsem olowe. ⁵ Letem Masta blong yumi, hemi helpem tingting blong yufala fo save moa long lav blong God an long wei blong Kraes fo stanap strong olowe. ⁶ Olketa Kristin fren, long nem blong Jisas Kraes Masta blong yumi, mifala tokstrong go long yufala ya. Yufala mas no joen wetem olketa Kristin hu i les tumas fo duim waka an olketa no falom olketa toktok wea mifala talem finis long yufala. ⁷ Yufala seleva save finis nao dat yufala mas falom olketa wei blong mifala. Taem mifala stap wetem yufala, mifala no les fo duim waka. ⁸ An mifala no bin tekem nating eni kaikai long olketa pipol. Mifala seleva nao peim evrisamting. Olowe nomoa, nomata long de o naet, mifala gohed fo wakahad tumas, bikos mifala no laekem eniwan long yufala fo karihevi long mifala. ⁹ Taem mifala duim olsem, hemi no minim wea mifala no garem raet fo askem yufala fo helpem mifala. Nomoa ya. Bat mifala laek fo somaot gudfala wei fo yufala, mekem yufala save falom. ¹⁰ Taem mifala stap tugeta wetem yufala yet, mifala talem finis long yufala olsem, “Sapos eni man hemi les fo duim waka, yufala mas no givim eni kaikai long hem.” ¹¹ Mifala talem diswan, bikos mifala herem dat samfala long yufala i les tumas fo duim waka. Olketa liu nomoa an olketa goraon long olketa pipol fo spoelem olketa, mekem olketa no save duim gudfala waka. ¹² So long nem blong Jisas Kraes Masta blong yumi, mifala tokstrong go long olketa ya. Olketa mas stap long gudfala wei an olketa mas wakahad fo garem kaikai blong olketa seleva. ¹³ Nao yufala olketa Kristin fren, yufala mas no taet fo duim olketa gudfala waka. ¹⁴ Maet samwan long yufala hemi no save obeim olketa toktok wea mifala bin raetem go long disfala leta. Sapos olsem, hemi gud fo yufala mas luksave gud long man ya. An yufala mas no stap tugeta wetem hem, mekem hemi filsem long wei blong hem seleva. ¹⁵ Bat yufala mas no mekem hem kamap enemi blong yufala. Hemi gud fo yufala wonem hem nomoa, bikos hem nao hemi Kristin fren blong yufala. ¹⁶ Letem Masta blong piis stap wetem yufala evriwan, an givim piis long yufala oltaem an long evri wei nomoa. ¹⁷ Mi Pol nao mi raetem disfala halo long yufala long han blong mi seleva. Hem nao wei wea mi seleva mi save saenem nem blong mi long en blong evri leta mi raetem. ¹⁸ Letem kaenfala lav blong Jisas Kraes Masta blong yumi, hemi stap wetem yufala evriwan.