FAS TIMOTI

FAS TIMOTI

¹ Mi Pol, mi aposol blong Jisas Kraes, falom toktok blong God hu hemi Sevia blong yumi an Jisas Kraes hu yumi save trastem olowe. ² Mi raet go long yu Timoti. Yu barava olsem san blong mi bikos yumitufala biliv long Kraes. Letem kaenfala lav, an sore, an piis blong God Dadi blong yumi an Jisas Kraes Masta blong yumi, hemi stap wetem yu. ³ Olsem, mi talem strong long yu finis taem mi lusim yu fo go long provins long Masedonia, mi laekem yu fo stapbaek nomoa long taon long Efesas. Yu mas stap long ples ya, mekem yu stopem olketa pipol hu i gohed fo tisim olketa samting wea hemi falom laea tising. ⁴ Yu mas talem olketa fo no westem taem fo tokabaotem olketa kastom stori wea i nating tru an olketa longfala stori abaotem olketa laen blong olketa olo long bifoa. Olketa samting ya i mekem pipol fo raoa nomoa long toktok ya, an hemi no mekem pipol fo duim wanem God hemi planem fo olketa duim. Wei blong biliv nomoa hemi save helpem yumi fo falom plan blong God. ⁵ Nao sapos olketa falom disfala toktok blong mi ya, bae olketa save garem lav wea hemi kamaot long klin an stretfala laef an long barava trufala biliv. ⁶ Samfala pipol lusim olketa wei olsem, an olketa gohed nao fo tokabaotem olketa samting nating nomoa. ⁷ Olketa laek fo kamap tisa long Lo blong Mosis, bat olketa no save minim wanem olketa seleva gohed fo talem. An olketa nating save tu long tising wea olketa tingse olketa savegud tumas long hem. ⁸ Yumi save dat Lo ya hemi gud sapos yumi yusim long gudfala wei. ⁹ An yumi save tu dat olketa lo ya olketa no stap fo stretem olketa gudfala pipol ya, bat fo stretem olketa pipol hu i brekem olketa lo an olketa hu i mekem trabol olowe. Hemi fo stretem wei blong olketa pipol hu i no falom God, an olketa hu i stap long wei blong sin, an olketa hu i tokdaonem God an olketa narasamting moa wea hemi holi. Hemi fo stretem olketa hu i kilim dae mami o dadi blong olketa, an olketa hu i kilim dae eni nara man moa. ¹⁰ An hemi fo stretem olketa pipol hu i save durong wetem eniwan, an olketa hu i barava durong nogud, an olketa hu i save stilim pipol, an olketa hu i save talem laea olobaot, an olketa hu i save talem laea long kot, an olketa pipol hu i save duim enisamting moa wea hemi no falom gudfala tising. ¹¹ Disfala tising hemi falom Gudnius wea God hemi givim kam long mi fo talemaot. Disfala Gudnius blong God hemi barava gudfala, an hemi garem saen blong bikfala paoa blong hem. ¹² Mi tengkiu long Jisas Kraes Masta blong yumi hu hemi givim strong long mi, bikos hemi save dat mi fit fo waka fo hem an hemi bin siusim mi fo disfala waka. ¹³ Hemi tru, long bifoa nao mi save tokspoelem hem an mi mekful tumas long olketa Kristin. Bat nomata olsem, hemi sore long mi wea mi nating save nomoa long wanem mi duim bikos mi no biliv yet long taem ya. ¹⁴ An Jisas Kraes Masta blong yumi hemi barava somaot kaenfala lav long mi, an hemi givim mi disfala biliv an disfala lav fo olketa pipol. ¹⁵ Jisas Kraes hemi kam insaet long wol ya fo mekem pipol fo fri from wei blong sin. Disfala toktok ya hemi barava tru ya, an hemi gud fo evriwan fo herem an bilivim. Mi nao mi barava wos winim eniwan long saet blong sin, ¹⁶ bat nomata olsem, God hemi sore long mi. From samting ya nao, Jisas Kraes hemi somaot bikfala lav blong hem taem hemi sevem mi. Diswan hemi fo helpem olketa pipol hu bae i biliv long hem long bihaen, mekem olketa kasem tru laef wea hemi no save finis. ¹⁷ God nao hemi King olowe nomoa an hemi no save dae enitaem. No eniwan save lukim hem, bat hem nomoa hemi God. Letem evriwan mekhae long hem an preisim hem olowe, go-go hemi no save finis. Amen. ¹⁸ Yu Timoti san blong mi, olketa toktok wea mi talem go long yu, olketa falom nomoa olketa toktok wea olketa profet i bin talemaot abaotem yu finis. Yu mas letem olketa toktok ya fo helpem yu fo faet agensim olketa ravis wei blong wol. ¹⁹ Yu mas gohed fo holemstrong biliv an gudfala tingting blong yu. Samfala pipol i lusim finis gudfala tingting blong olketa, mekem biliv blong olketa hemi nogud finis tu. ²⁰ Tufala hu i joenem olketa ya nao Haemeneas an Aleksanda. Mi bin givim tufala go long han blong Seitan, mekem tufala save luksave dat tufala mas no gohed fo tokspoelem God.

¹ Bikfala samting mi askem strong long olketa Kristin fo duim nao, hemi fo olketa mas prea an toktengkiu long God fo evri pipol an askem hem fo helpem olketa. ² An olketa mas prea long God, mekem hemi helpem olketa king an evri bikman. Sapos olsem, bae yumi save stap kuaet gudfala an falom gudfala wei blong God an stapgud wetem olketa nara pipol. ³ Prea olsem diswan ya hemi gudfala, an God hu hemi Sevia blong yumi hemi laekem tu. ⁴ Hemi laekem evri pipol fo kasem tru laef an fo save long Gudnius wea hemi tru tumas. ⁵ Wanfala God nomoa hemi stap ya, an wanfala man nomoa hemi stap hu hemi lidim olketa pipol go long God, an disfala man ya nao hemi Jisas Kraes. ⁶ Hemi letem hem seleva fo dae fo peimaot evri pipol from sin blong olketa. Diswan, hemi somaot long gudfala taem blong hem, wea God hemi laek fo sevem evri pipol. ⁷ Dastawe nao God hemi siusim mi fo waka olsem aposol. Hemi laekem mi fo talemaot Gudnius long olketa pipol hu i no Jiu, an fo tisim olketa abaotem biliv wea hemi barava truwan. Mi toktru ya, mi no laea. ⁸ Nao mi laekem olketa man long evri ples, fo olketa mas prea. Olketa mas stret gudfala, an olketa mas save holemap han blong olketa long prea wea olketa no filkros an olketa no raoa. ⁹ Mi laekem tu olketa woman fo werem gudfala kaleko, wea hemi no fo stael nomoa. An olketa mas no staelem tumas hea blong olketa o yusim enikaen gol an naesfala pel, an olketa mas no werem olketa kaleko wea hemi dia tumas fo baem. ¹⁰ Olketa woman hu i laek fo falom toktok blong God, olketa mas duim olketa gudfala waka wea hemi fitim fo olketa duim. ¹¹ Olketa woman mas hambol an stap kuaet taem olketa stap fo lanem enisamting long sios. ¹² Mi no letem olketa woman fo tis o fo garem paoa ovarem olketa man. Nomoa, olketa mas stap kuaet nomoa. ¹³ Bikos yu save, God hemi mekem Adam fastaem an bihaen nomoa hemi mekem Iv. ¹⁴ An Seitan hemi no laea long Adam, woman ya nao hemi laea long hem an long wei ya nao woman hemi brekem lo blong God. ¹⁵ Bat bae God hemi sevem olketa woman, bikos olketa nao i save bonem pikinini. Bat olketa mas gohed tu fo biliv an fo somaot lav an fo stap holi long laef blong olketa.

¹ Disfala toktok ya hemi tru tumas ya. Sapos eniwan hemi wande fo waka olsem lida long sios, gudfala waka nao hemi wande fo duim ya. ² Dastawe no enisamting hemi mas rong long laef blong lida long sios ya, an hemi mas garem wanfala waef nomoa. An hemi mas save hao fo lukaftarem hem seleva gud an hemi mas no kros kuiktaem an hemi mas stapgud olowe. An hemi mas lukaftarem gud olketa pipol wea olketa kam kasem ples blong hem, an hemi mas savegud hao fo tis. ³ Hemi mas no dring tumas an hemi mas no raf bat hemi mas hambol. Hemi mas no mekem raoa olowe an hemi mas no laekem seleni tumas. ⁴ Hemi mas save hao fo lukaftarem famili blong hem gudfala, an hemi mas save hao fo mekem olketa pikinini blong hem fo obeim hem an fo tinghae long hem. ⁵ ?Sapos eniwan hemi no save lukaftarem famili blong hem seleva, hao nao hemi save lukaftarem sios blong God? ⁶ Wanfala man hu hemi niufala Kristin hemi mas no kamap lida long sios. Nogud hemi save praod tumas, mekem God bae hemi panisim hem olsem hemi duim bifoa long Seitan. ⁷ Bat wanfala man wea olketa pipol hu i no blong sios olketa tinghae long hem, hem nomoa hemi fit fo kamap lida. Sapos olsem, bae hemi no sem, an hemi no save foldaon long trap blong Seitan. ⁸ Nao man fo help long sios hemi mas somaot gudfala wei tu long laef blong hem. Hemi mas no laea, an hemi mas no dringim waen tumas, an hemi mas no laekem seleni tumas. ⁹ Hemi mas barava biliv long tru tising, an hemi mas no garem tufala tingting long hem. ¹⁰ Man hu hemi laek fo kamap man fo help long sios, yu mas sekap long hem fastaem. An sapos laef blong hem hemi gud nomoa, yu save letem hem fo waka olsem man fo help long sios nao. ¹¹ Long sem wei tu, waef blong hem hemi mas somaot gudfala wei long laef blong hem an hemi mas no stori nogud abaotem nara pipol, bat hemi mas save hao fo lukaftarem hem seleva gud an hemi mas wanfala woman wea yumi save trastem hem oltaem. ¹² Man fo help long sios hemi mas garem wanfala waef nomoa, an hemi mas save hao fo lukaftarem gudfala olketa pikinini blong hem wetem ful famili blong hem. ¹³ Eniwan hu i waka gud long disfala waka ya bae olketa pipol save tinghae long hem ya, an bae hemi save stap strong fo talemaot toktok abaotem biliv blong hem long Jisas Kraes. ¹⁴ Nao taem mi stap fo raetem leta ya long yu, mi tingse, no longtaem nomoa, bae mi kam lukim yu. ¹⁵ Bat sapos mi no kam kuiktaem, bae yu save ridim disfala leta ya abaotem gudfala wei blong olketa pipol long famili blong God. Hem ya nao sios blong God hu i laef oltaem. An sios ya nao hemi barava holemstrong tru toktok ya, mekem no eniwan save spoelem. ¹⁶ An hemi tru nao, tru tising abaotem biliv long Kraes hemi barava bikfala samting tumas. An tising ya nao hemi olsem, Kraes hemi somaot hem seleva long bodi olsem man. An Holi Spirit hemi somaot dat wei blong Kraes hemi barava stret. An olketa enjel olketa lukim tu. Toktok abaotem hem hemi gogoraon long olketa kantri, an plande pipol long wol i biliv long hem. An God hemi tekem hem goap long heven.

¹ Holi Spirit hemi talemaot klia wea bae samfala pipol i lusim biliv blong olketa long taem wea bae i kam. An bae olketa falom olketa spirit wea save laea tumas, an bae olketa falom moa enisamting wea olketa devol save tisim. ² Olketa tising olsem ya, hemi kam falom olketa nogud wei blong olketa pipol hu i save laea tumas ya, bikos klia tingting blong olketa hemi barava dae finis nao. ³ Olketa pipol olsem ya olketa stopem pipol fo no marit an fo no kaikaim plande kaen kaikai. Bat God hemi mekem olketa kaikai ya fo olketa pipol save kaikaim nomoa. An yumi pipol wea yumi biliv long God an save long tru toktok, yumi save talem tengkiu long God fo olketa kaen kaikai ya, an yumi save kaikaim nomoa. ⁴ Evrisamting God hemi mekem, hemi barava gud, so yumi no save les long hem. Bat taem yumi kaikaim olketa kaikai ya, yumi mas toktengkiu long God nomoa, ⁵ bikos toktok blong God an prea nao hemi mekem olketa kaikai kamap gud long ae blong God. ⁶ Sapos yu talemaot olketa toktok ya long olketa Kristin fren blong yumi, bae yu wanfala gudfala wakaman blong Jisas Kraes. An bae yu grouap strong long olketa gudfala tising insaet long biliv wea yu falom kam finis. ⁷ Yu no lisin go long olketa krangge stori wea olketa nating tru. Bat yu mas gohed fo mekem Kristin laef blong yu fo kamap strong moa. ⁸ Hemi gud sapos yumi gohed fo mekem bodi blong yumi fo kamap strong moa. Bat hemi barava gudfala moa sapos yumi gohed fo mekem Kristin laef blong yumi fo kamap strong moa, bikos diswan hemi save helpem yumi long plande wei. Hemi givim gudfala samting long laef blong yumi distaem, an long laef wea bae hemi kam yet tu. ⁹ Disfala toktok hemi barava truwan an hemi gud fo evriwan fo herem an falom. ¹⁰ Yumi gohed nomoa fo wakahad, bikos yumi barava biliv long God hu hemi laef. Hem nao hemi Sevia blong evri pipol, an hemi tru, bae hemi sevem yumi evriwan hu i biliv long hem. ¹¹ Yu mas talemaot disfala toktok ya an tisim olketa pipol gudfala. ¹² Yu no letem eniwan fo tingdaonem yu from yu yangfala man nomoa. Nomoa ya. Yu mas somaot gudfala wei long olketa Kristin pipol, mekem olketa save falom yu long toktok blong yu an long laef blong yu an long lav blong yu an long biliv blong yu an long stretfala wei blong yu. ¹³ An long distaem wea yu weitem mi fo kambaek, yu gohed nomoa fo ridimaot Buktambu an fo talemaot Gudnius an tisim olketa pipol gudfala. ¹⁴ Disfala spesol paoa wea yu garem, yu mas no letem hem fo stap nating. God nao hemi givim yu diswan, taem olketa profet i talemaot toktok abaotem yu an olketa lida long sios i putum han blong olketa antap long yu. ¹⁵ Yu mas gohed nomoa fo duim olketa waka ya, an yu mas traehad fo duim olketa samting ya gudfala, mekem evri pipol i save lukim dat waka blong yu i gohed fo kamap gudfala moa. ¹⁶ Yu mas lukaftarem gud laef blong yu wetem olketa toktok wea yu gohed fo tisim ya. Sapos yu duim diswan, bae yu sevem yu seleva wetem olketa pipol hu i herem yu tu.

¹ Yu no tokhad tumas long man hu hemi olo winim yu, bat yu mas tok long hem long gudfala wei olsem yu toktok long dadi blong yu seleva. An yu mas lukim olketa yangman olsem olketa brata blong yu, ² an olketa olowoman olsem olketa mami blong yu, an olketa yangwoman olsem olketa sista blong yu nomoa, an yu mas duim diswan long barava stretfala wei. ³ Yufala mas helpem olketa wido woman wea olketa barava no save lukaftarem olketa seleva. ⁴ Bat sapos wanfala wido woman hemi garem olketa pikinini an olketa grani, oraet, olketa ya nao mas falom gudfala wei blong Kristin an helpem disfala mami blong olketa fastaem. Hemi gud fo olketa sensimbaek mami an dadi blong olketa fo hadwaka blong tufala, bikos God hemi hapi long diskaen wei ya. ⁵ Wanfala wido woman wea hemi stap seleva nomoa an hemi no save helpem hem seleva, hemi save putum biliv blong hem strong long God, an evritaem, nomata naet, hemi save gohed fo prea long God fo hemi helpem hem. ⁶ Bat eni wido woman wea hemi falom tingting blong bodi blong hem seleva nomoa, hemi olsem hemi dae finis ya nomata hemi laef yet. ⁷ Olsem, yu mas tisim disfala toktok long olketa wido woman gudfala, mekem olketa falom. Sapos olsem, bae no eniwan save tokdaonem olketa. ⁸ Bikos eniwan wea hemi no duim enisamting fo helpem olketa pipol long laen blong hem an long famili blong hem seleva, hemi somaot dat hemi lusim biliv blong hem. Wei blong hem hemi wos moa winim olketa pipol hu i no biliv long God. ⁹ Nao long buk fo raetemdaon nem blong olketa wido woman ya, bae yu no raetemdaon nem blong eni wido woman sapos yu no sekap gud long hem fastaem. Wido woman ya hemi mas kasem siksti yia finis an hemi mas no marit mektu taem. ¹⁰ Hemi mas wanfala woman wea olketa pipol luksave long hem from hemi save duim olketa gudfala waka. Olketa waka olsem fo lukaftarem gud olketa pikinini blong hem, an fo letem olketa pipol stap long haos blong hem, an fo welkamem olketa Kristin pipol long haos blong hem, an fo helpem olketa pipol hu i garem trabol long laef blong olketa. Ya, hemi mas woman wea hemi traehad olowe fo duim enikaen gudfala waka. ¹¹ Bat yu mas no raetemdaon nem blong olketa wido woman wea olketa yangfala yet. Bikos taem bodi blong olketa barava laekem tumas fo marit winim tingting blong olketa fo Jisas, bae olketa laek fo marit moa. ¹² Long wei ya nao, bae olketa pipol i save jajem olketa yangwoman olsem, bikos olketa brekem promis wea olketa mekem fastaem. ¹³ An olketa tu, olketa save stat fo falom wei fo stap nating nomoa an fo gogoraon long evri haos tumas. An bae diskaen samting hemi save kamap wos moa, wea olketa save stori nogud tumas abaotem olketa nara pipol, an olketa save olobaot tumas, an olketa save toktok abaotem olketa samting wea i no bisnis blong olketa. ¹⁴ Dastawe nao mi laekem olketa yangfala wido woman fo olketa marit moa, mekem olketa save garem pikinini an lukaftarem haos blong olketa seleva. Sapos olketa duim olsem, bae olketa enemi blong yumi i no save faendem eni wei fo tokdaonem yumi. ¹⁵ Yu save, samfala wido woman ya olketa go long deferen wei finis fo falom Seitan nao. ¹⁶ Sapos long famili blong wanfala Kristin woman hemi garem olketa wido woman i stap, hemi gud fo woman ya seleva nao hemi helpem olketa. Hemi mas duim olsem, mekem sios hemi save helpem nomoa olketa nara wido woman wea olketa barava stap seleva. ¹⁷ Hemi fitim fo yufala mekhae long olketa lida hu i lukaftarem sios gudfala an givim gudfala wejis long olketa tu, olsem olketa hu i save gohed fo wakahad fo talemaot Gudnius an tisim olketa toktok blong God. ¹⁸ Bikos Buktambu hemi sei, “Sapos yufala tekem kam buluka fo hemi wakabaot long hed blong wit fo klinimaot olketa sid blong wit ya, yufala mas no satem maos blong hem, yufala mas letem hemi kaikaim samfala long olketa wit ya.” An Buktambu hemi sei tu, “Man wea hemi waka, hemi fitim fo hemi tekem pei blong hem.” ¹⁹ Yu no lisin long eni toktok agensim wanfala lida long sios, sapos wanfala man nomoa hemi talem. Tufala o trifala man nao i mas kam fo ripotem samting long yu fastaem. ²⁰ Bat sapos wanfala lida hemi duim samting rong, yu mas tokhad long hem taem olketa Kristin pipol i hipap tugeta, mekem olketa nara pipol tu save fraet fo duim semsamting. ²¹ Mi tokstrong long yu long ae blong God an Jisas Kraes an olketa enjel. Yu mas no fogetem olketa toktok ya, bat yu mas falom olketa gudfala. An yu mas no fevarem eniwan nomoa. ²² Yu mas no kuiktaem tumas fo putum han blong yu antap long eni man fo mektambu long hem fo waka long sios. An taem olketa nara pipol i duim olketa ravis samting, yu mas no duim tu. Bat yu mas kipim yu seleva fo klin from samting ya. ²³ Hemi nogud sapos yu dringim wata nomoa olowe. Yu mas stat fo dringim lelebet waen tu fo helpem bele blong yu bikos plande taem sik hemi kasem yu. ²⁴ Olketa sin blong samfala pipol i stap klia nomoa ya, an kuiktaem nomoa olketa pipol i save jajem olketa. Bat olketa sin blong samfala pipol moa i staphaed, an long bihaen nomoa, olketa sin ya bae kamap klia. ²⁵ Long sem wei tu, olketa gudfala waka i stap klia nomoa fo olketa pipol i luksave long olketa. An nomata olketa gudfala waka wea i staphaed fastaem, bae olketa no save staphaed olowe.

¹ Olketa Kristin hu i waka olsem slev, olketa mas tinghae long olketa masta blong olketa, mekem olketa pipol i no save tokspoelem nem blong God an tising blong sios. ² Nomata olketa slev wea i waka fo olketa Kristin masta i olsem brata blong olketa nomoa, olketa mas tinghae long olketa ya tu. Ya, olketa slev olsem, olketa mas waka gud moa bikos olketa helpem olketa masta wea i Kristin pipol, an olketa lavem olketa masta ya tumas. Nao yu mas tisim olketa samting ya long olketa pipol, an yu mas tokstrong long olketa fo olketa mas falom. ³ Samfala pipol stat fo tisim samting wea hemi deferen, an olketa no save falom barava tru tising blong Masta blong yumi Jisas Kraes wetem olketa tising blong sios. ⁴ Olketa pipol ya, olketa no save long enisamting nomoa ya, bat olketa praod tumas an oltaem olketa garem nogud tingting fo raoa abaotem enikaen toktok. Diswan hemi mekem olketa pipol fo joles an fo faet an fo tok nogud abaotem nara man, an fo tingting nogud abaotem olketa. ⁵ Olketa save raoa olowe nomoa, an olketa no garem eni stretfala tingting, an olketa no save luksave long wanem nao hemi barava tru samting. Olketa tingse wei fo biliv long God hemi wanfala gudfala wei fo kamap ris. ⁶ Hemi tru, wea sapos wanfala man hemi hapi nomoa long wanem hemi garem finis, bae disfala wei fo biliv long God hemi save mekem hem fo garem gudfala laef. ⁷ Yumi save, yumi no tekem kam enisamting insaet long wol taem yumi bon kam, an taem yumi dae, bae yumi no save tekem enisamting goaot from wol ya tu. ⁸ Olsem, sapos yumi garem kaikai an kaleko, hem nao hemi naf fo yumi. ⁹ Hemi isi nomoa fo olketa pipol hu i laek fo garem plande samting fo gorong tumas ya. Olketa save gorong long enikaen krangge samting an enikaen ravis samting wea olketa laekem. An bae olketa samting ya i save pulum olketa, gogo laef blong olketa hemi barava nogud an bae God hemi panisim olketa. ¹⁰ Enikaen ravis samting nao hemi save kamaot long diskaen wei fo lavem seleni tumas. Samfala pipol hu i laekem seleni tumas, olketa gorong finis long biliv blong olketa nao, an olketa mekem olketa seleva fo filnogud tumas. ¹¹ Bat yu nao yu man blong God, an yu mas no duim enisamting olsem ya. Yu mas traehad oltaem fo duim nomoa olketa samting wea hemi stret long ae blong God. An yu mas stapgud long Kristin laef blong yu, an gohed fo holem biliv blong yu strong. Yu mas stanap strong long olketa hadtaem, an yu mas garem lav olowe, an yu mas kaen tumas long olketa nara pipol. ¹² Yu mas traehad fo gohed gud long Kristin laef blong yu, olsem man hu hemi traehad fo ran fo winim resis. Long wei ya nao, bae yu save tekem disfala praes wea hemi tru laef wea hemi no save finis. Long bifoa, taem yu talemaot biliv blong yu long ae blong plande pipol, God hemi siusim yu fo yu tekem disfala laef ya. ¹³ Long ae blong God hu hemi save givim laef long evrisamting, an long ae blong Jisas Kraes hu hemi bin talemaot barava strongfala biliv blong hem long taem Pontias Paelat hemi jajem hem, mi tokstrong long yu. ¹⁴ Olketa samting wea God hemi talem yu fo duim, yu mas obeim long barava stretfala wei go-go kasem taem Masta blong yumi Jisas Kraes bae hemi kambaek. ¹⁵ God nao bae hemi mekem Kraes fo kambaek long taem wea hem seleva hemi siusim finis. God hemi barava gudfala, an hem seleva nomoa hemi garem evri paoa long wol, wea hemi King ovarem evri king an hemi Masta ovarem evri masta. ¹⁶ Hem seleva nomoa hemi no save dae. Hemi stap insaet long bikfala laet wea hemi mekem no eniwan save kasem hem. No eniwan hemi lukim God yet, an no eniwan hemi save lukim hem tu. Letem pipol mekhae long hem, an letem hem rul olsem king long bikfala paoa blong hem olowe, go-go hemi no save finis. Amen. ¹⁷ Olketa pipol hu i garem plande risis long wol ya, yu mas talemaot strong long olketa fo olketa mas no praod tumas. Olketa mas no putum trast blong olketa long olketa samting wea hemi save lus enitaem, bat olketa mas putum trast blong olketa long God nomoa. Hem nao hemi save givim kam evri gudfala samting fo mekem yumi stap hapi. ¹⁸ Yu talem strong long olketa fo olketa mas duim olketa gudfala samting, an olketa mas wiling fo helpem olketa nara pipol an searemaot wanem olketa garem. Olketa gudfala waka olsem ya, hem nao olsem gudfala risis blong olketa, ¹⁹ wea olketa save gohed fo hipimap olketa fo mekredi gud fo taem wea bae hemi kam. Long wei ya nao, bae olketa save kasem disfala laef wea hemi barava tru laef nao. ²⁰ Timoti, yu mas lukaftarem gud disfala Gudnius wea God hemi putum long han blong yu finis. Yu mas tanem baeksaet blong yu long disfala nogud toktok wea hemi agensim God. ²¹ Samfala pipol tingim diskaen toktok hemi gudfala save, bat hemi laea nomoa. Olketa falom disfala save finis, an dastawe nao olketa lusim biliv blong olketa long Kraes. Letem kaenfala lav blong God bae hemi stap wetem yufala.