TITUS
11 Surat iteu’ jin akeu’ Paulus kelunan sohoo’ Allah ngan lawah Yésus Kristus. Pu’un Allah ngevéléé’ akeu’ dokoo’ ké’ omok ngereken pengelan kelunan éh anah Allah, ngan mihin réh jam tong ha’ tebaraa’ éh teneng dalem sebayang mé’. 2 Ha’ tebaraa’ iteu’ éh mihin kelunan alaa’ urip éh pelinguh. La’ah Allah éh bé’ omok kenyo, Iah jajii’ mena’ urip pelinguh ngan lu’ jin bu’un-bu’un sahau tovoo’ bé’ jak tana’ ngan langit iteu’ pu’un, 3 ngan tovoo’ jaka’ éh kevéléé’ Néh, Iah pepoléng kenin Néh kenat lem ha’ tebaraa’ Néh. La’ah tebaraa’ Néh iteu’ nena’ Néh ngan ké’, ngan akeu’ perengah éh kepéh kivu sohoo’ Allah éh Pepurip uleu’. 4 La’ah akeu’ maneu’ surat iteu’ ngan Titus, éh seleket anak ké’ mu’un dalem pengelan lu’ tong Kristus. Jian Allah Tamen ngan Yésus Kristus éh purip lu’ mena’ pengejian ngan pengepawah ngan ko’. 5 La’ah pu’un ku’ pokoo’ ke’ tong tana’ Kreta rai, dokoo’ ko’ omok pesukup kekat kereja’ tong sidang sinah, dokoo’ ko’ omok ngevéléé’ irah éh omok pelayan tong siget sidang tong kekat leboo’ sinah. Mai ke’ ngelepan tong kekat sohoo’ ké’ ngan ko’ rai. 6 La’ah irah éh pelayan jian éh kelunan éh teneng lem kekat barék néh, ngan éh pu’un jah awah redo, ngan anak néh péh ngelan tong Kristus, ngan éh bé’ pu’un barék éh sa’at, ngan éh jam kivu sohoo’. 7 Uban kelunan éh pelayan, pu’un éh maneu’ kereja’ Allah ngan bé’ tekep éh pu’un sa’at. Mai éh kelunan éh bau kenin ngan éh lumang merek. Mai éh kelunan éh mavuk ngan éh lumang pané sa’at, mai éh kelunan éh kelih, éh mekum tong rigit. 8 Tekep éh kelunan éh keloo’ alaa’ irah sakai tong lamin néh ngan petubo éh ngan jian kenin. Jian éh kelunan éh keloo’ tong kekat éh jian, éh jam mavaa’ kenin néh, éh teneng dalem kekat penganeu’ néh, ngan éh ni’ai kenin ngan éh jam seruh. 9 La’ah jian éh kelunan éh jam mihau ha’ tebaraa’ éh teneng, dokoo’ néh omok nebaraa’ ngan ngereken kenin kelunan éh jah neu’ ha’ tebaraa’ éh teneng inah, ngan éh jam makang meta’ kelunan éh sala’, éh ngelawan ha’ tebaraa’ inah kepéh. 10 Uban pinaa’ kelunan makin péh tong irah Yahudi, bé’ réh keloo’ ngerera’ tong pengeja’au tong sidang. Pu’un réh ngelavo’ kelunan neu’ kekat ha’ tosok réh éh palui awah. 11 Mai ke’ kejeraa’ réh pané, uban pu’un réh petusah kenin kuraa’-kuraa’ kelunan neu’ réh bara’ tong éh bé’ tekep. Pu’un réh maneu’ kenat uban réh juk alaa’ rigit awah. 12 La’ah pu’un jah kelunan éh pohoo’ irah Kreta inah, éh bara’ ha’ Tuhan ngan kelunan sahau éh bara’ ka’, La’ah kelunan pohoo’ Kreta ngelayau réh kenyo, pu’un réh barei’ ka’an éh luvaa’, pu’un réh kuman nyahan ngan leko kereja’, ha’ néh. 13 La’ah teneng mu’un ha’ néh kenat. Uban néh kenat jian ke’ pané mu’un ngan petena’ réh, dokoo’ réh omok ngelan mu’un, 14 ngan bé’ pu’un ngamit kekat ha’ suket ngan ha’ tukit kelunan Yahudi éh bé’ keloo’ ngelan tong tebaraa’ éh teneng. 15 Tulat kelunan éh ni’ai, kekat néh pu’un ni’ai. Bang tulat kelunan éh penyeruh réh pu’un sa’at neu’ penyala’ ngan éh bé’ ngelan tong ineu’ éh teneng, bé’ pu’un jah péh éh ni’ai, uban penyeruh ngan ketem lo’ong kenin réh lepah sa’at. 16 La’ah pu’un réh bara’ irah jam Allah, bang kekat penganeu’ réh pepoléng réh bé’ jam Éh. Irah teneng tong rek Tuhan, bé’ réh kivu sohoo’ Allah, bé’ réh omok maneu’ ineu’-ineu’ éh jian.
21 Bang jian ke’ bara’ ha’ tebaraa’ éh teneng. 2 Jian ke’ nebaraa’ irah lakei’ éh ja’au urip, ke’ réh jam seruh, ngan pu’un barék éh jian ngan jam mihau usah réh, ngan petem lem pengelan réh tong Kristus, ngan jam pika irah éh jah, kebit kenin lem pengeketa. 3 Kenat péh jian ke’ nebaraa’ irah redo éh ja’au urip, dokoo’ barék réh barei’ éh tekep tong kelunan éh ni’ai éh ngelan tong Allah. Mai réh pané ngesa’at ngaran kelunan, mai réh keripen baa’ nesep éh bisa’. Bang jian réh pané tong kekat éh jian, 4 dokoo’ réh omok nebaraa’ irah redo éh bé’ jak ja’au urip ke’ réh jam murung lakei’ réh ngan anak réh, 5 ngan jam mavaa’ kenin réh ngan ni’ai, ngan jam petubo lamin réh, ngan ngerera’ tong lakei’ réh, dokoo’ mai séé’-séé’ péh ngesa’at ha’ tebaraa’ éh jin Allah. 6 Kenat péh jian ke’ nebaraa’ irah lemanai dokoo’ réh jam mavaa’ kenin réh. 7 ka’au’ tekep jah telana’ tong barék éh jian dalem kekat ineu’-ineu’ péh. Jian ke’ nebaraa’ réh jin kenin ko’ mu’un, mai ke’ ngelayoo’ awah. 8 Jian ke pakai ha’ tebaraa’ éh teneng mu’un éh bé’ omok kesa’at réh, dokoo’ kelunan éh ngelawan lu’, omok menyaa’ uban réh bé’ omok pesala’ lu’. 9 La’ah jian ke’ nyohoo’ kekat kelunan sohoo’ pengeja’au réh ngan ngepayoo’ kenin pengeja’au néh dalem kekat ineu’-ineu’. Hun pengeja’au néh pané, mai éh nyakat ha’ néh, 10 ngan mai réh nekau. Bang jian réh ngelayau maneu’ kekat éh jian ngan tigéh dokoo’ jin penganeu’ réh éh kenat kelunan omok ngajung ha’ tebaraa’ tong Allah éh purip lu’. 11 Uban pu’un Allah pepoléng penika Néh dokoo’ Néh omok purip kekat kelunan. 12 La’ah penika Néh inah mihin uleu’ dokoo’ murip ni’ai ngan bé’ kivu kekat éh jin tana’ iteu’. Tong tana’ iteu’ uleu’ tekep murip jam mavaa’ kenin, teneng ngan kivu sohoo’ Allah. 13 kelebéé’ lu’ mena tong Dau éh kenelan lu’, hun pengaren Allah éh Matek ja’au ngan Yésus Kristus éh Pepurip lu’ pu’un poléng kepéh. 14 Pu’un éh mena’ urip Néh ngeliwah uleu’, dokoo’ Néh ngelepu lu’ jin kekat arong kesa’at, mohéé uleu’ ngan maneu’ uleu’ anah nah awah, kenat péh mihin uleu’ mekat maneu’ jian. 15 Jian ke’ bara’ kekat ha’ tebaraa’ iteu’, ngan neu’ penyukat Sahéé’ Ni’ai jian ke’ nebaraa’ ngan petena’ réh. Mai jah-jah usah péh ngera’ ke’ awah.
31 Jian ke’ petesen irah éh lem sidang ko’, dokoo’ réh omok ngerera’ tong peritah ngan séé’-séé’ éh pu’un penyukat, ngan kivu sohoo’ réh, ngan maneu’ kekat kereja’ éh jian. 2 Mai réh pané ngesa’at ngaran kelunan, jian réh murip ngan pawah ngan maneu’ éh jian. Jian réh jian pengané, dawai kenin ngan kekat kelunan béé. 3 Uban hun bu’un rai uleu’ béé kelunan éh suwok kenin, éh bé’ kivu sohoo’, ngan tawang awah. Uleu’ pu’un keripen kekat pengagat sa’at ngan pengekelih, urip lu’ penoo’ neu’ akam ngeleko kelunan ngan nyonoh ngan uleu’ murip pata pekeleko. 4 Bang Allah, éh purip lu’ pepoléng penika ngan pengejian kenin Néh ngan uleu’. 5 pu’un éh purip uleu’. Bé’ éh neu’ ineu’-ineu’ penganeu’ lu’ éh jian, bang neu’ pengasi Néh awah Iah purip lu’, neu’ Néh mohéé’ kenin lu’ ngan mena’ urip maréng ngan lu’ neu’ Sahéé’ Ni’ai, 6 éh nena’ Néh ngan kekat kenin néh neu’ Yésus Kristus éh purip lu’, 7 dokoo’ neu’ penika Néh uleu’ omok alaa’ kenin éh teneng tong jumen Allah ngan alaa’ urip éh pelinguh pekua’ pengelan lu’. 8 La’ah teneng mu’un ha’ inah. La’ah éh pengeloo’ ké’, jian ke’ mekat bara’ kekat ha’ tebaraa’ iteu’, dokoo’ irah éh ngelan tong Allah omok mekat kereja’ ngan maneu’ kekat éh jian. Kekat ha’ tebaraa’ iteu’ jian éh, ngan pu’un gunah néh ngan kekat kelunan. 9 Bang jian ke’ petedau tong kekat ha’ réh pesakat, ngan ha’ tosok réh tong puku’ kelunan awah, ngan tong kekat ha’ kelunan paneu’, ngan tong réh nyakat tong sohoo’ lem Surat Musa. Kekat inah bé’ pu’un gunah néh, seleket moo’ awah éh. 10 Tong kelunan éh mihin irah éh jah tengéé’ kenin, jian ke’ pané ngan néh duah koléé’ meta’ éh maneu’ kenat, la’o inah mai ngebakéh éh. 11 Uban ka’au’ jam kelunan éh kenat, sala’ mu’un éh, ngan penyala’ néh tengéé’ péh pepoléng éh pu’un sala’ mu’un. 12 Hun mah ku’ nyohoo’ Artemas barang Tikhikus péh tai tavin ke’ kepéh, jian ke’ mekat pitah jalan tuai tavin akeu’ tong leboo’ Nikopolis uban akeu’ juk tai mokoo’ sinah sioo’ genin. 13 Jian ke’ nolong Senas, guru Surat Musa irai, ngan Apolos, lem pengelakau roh, ko’ nolong roh dokoo’ mai roh pu’un kurang ineu’-ineu’. 14 Jian irah éh ngelan, pekalai maneu’ jian ngan pesukup ineu’-ineu’ pengekurang kelunan, mai réh murip ngan bé’ jam seruh. 15 La’ah kekat kelunan éh pu’un pemung ngan ké’ siteu’ bara’ tabi ngan ko’. Bara’ tabi’ kepéh ngan kekat bakéh lu’ dalem pengelan lu’ tong Tuhan. Jian penika Allah pu’un pemung ngan ka’ah béé.