RUM

RUM

¹ Surat iteu’ jin akeu’ Paulus éh kelunan sohoo’ Kristus Yésus, akeu’ pu’un kevéléé’ Allah ngan tenebai Néh dokoo’ ké’ lawah Néh ngan perengah Rengah Jian. ² Rengah Jian inah lepah pejajii’ Allah neu’ kekat nabi éh bara’ ha’ Néh ngan kelunan sahau, pu’un éh senurat réh dalem surat Allah. ³ La’ah rengah inah bara’ tong Anak Néh Tuhan Yésus Kristus. Tong puku’ Néh tong tana’, inah éh jin Daud, ⁴ bang poléng mu’un Iah Anak Allah, uban neu’ penyukat éh ja’au, éh penyukat Sahéé’ Ni’ai, Allah pebetéé’ Éh jin patai Néh. ⁵ jin Kristus, Allah lepah mena’ penika Néh ngan ké’ iah tebai akeu’ lawah Néh dokoo’ mihin siget arong kelunan ngelan tong Iah ngan kivu Éh kepéh. ⁶ Uban kenat ka’ah éh tong leboo’ Rum kepéh, Allah pu’un tebai ka’ah dokoo’ ka’ah omok anah Yésus Kristus. ⁷ Kenat péh akeu’ nyurat surat iteu’ ngan kekat ka’ah éh pu’un tong leboo’ Rum éh penika Allah ngan éh tenebai Néh dokoo’ ka’ah omok anah nah kepéh. Akeu’ sebayang keh dokoo’ Allah Tamen uleu’ ngan Tuhan Yésus Kristus mena’ penika ngan pengepawah ngan keh. ⁸ La’ah éh bu’un-bu’un néh akeu’ sebayang bara’ jian kenin ngan Allah dalem ngaran Yésus Kristus uban kekat ka’ah pu’un petem dalem pengelan keh. Kenat péh uban kekat kelunan pah tipo tana’ lepah menéng rengah tong pengelan keh tong Yésus. ⁹ Allah jam akeu’ sebayang ka’ah siget koléé’, adang Allah jam akeu’ sebayang ka’ah mu’un, bé’ akeu’ kenyo, Iah éh Allah éh kenelan ké’ ngan ketem lo’ong kenin ké’ avéé’ ké’ perengah Rengah Jian éh bara’ tong Anak Néh. ¹⁰ Akeu’ sebayang menyat Allah hun néh lem pengeloo’ Néh ku’ angai hun iteu’, jian Éh mukap jalan ngan ké’ dokoo’ ké’ omok tuai nepah ka’ah hun iteu’. ¹¹ Gahang mu’un-mu’un kenin ké’ juk tuai jam ka’ah dokoo’ ké’ omok tulat kepéh pengena’ éh nena’ Sahéé’ Ni’ai éh pu’un ngan ké’ ke’ néh omok pepit kegahang keh kepéh. ¹² Inah éh dokoo’ ka’ah ngan akeu’ péh, pekua’ pu’un reken kenin, ka’ah omok reken neu’ pengelan ké’ akeu’ omok reken neu’ pengelan ka’ah. ¹³ O kekat padéé’ ké’, mai keh seruh akeu’ bé’ pu’un pitah jalan tuai nepah ka’ah, pinaa’ tenéh koléé’ ké’ lepah pitah jalan juk tuai tavin ka’ah bang meraran awah ku’. Akeu’ juk tuai kenat jalan ké’ omok mihin kuraa’ usah jin belah ka’ah ngelan tong Tuhan, barei’ irah éh lepah pu’un ngelan Tuhan jin belah kuraa’ arong kelunan éh tengéé’ pohoo’ jin irah Yahudi nah rai. ¹⁴ Bé’ ku’ omok bé’ bara’ ha’ Tuhan ngan kekat-kekat kelunan, kenat péh ngan kelunan maren ngan irah éh adek ke’ awah, ngan irah éh lepah tai sekulah bau péh, kenat péh ngan irah éh bé’ pu’un sekulah. ¹⁵ Gahang mu’un-mu’un kenin ké’ juk bara’ Rengah Jian ngan ka’ah éh mokoo’ tong leboo’ Rum siteu’ kepéh. ¹⁶ La’ah bé’ akeu’ menyaa’ bara’ Rengah Jian iteu’, uban Rengah Jian iteu’ inah éh penyukat Allah ke’ Néh purip kekat kelunan éh ngelan tong Yésus, kenat péh irah Yahudi, kenat péh irah éh tengéé’ pohoo’. ¹⁷ Uban dalem Rengah Jian inah, pu’un éh tojoo’ jalan tong pengepemung kelunan ngan Allah ke’ néh omok jian kepéh. Pu’un Allah maneu’ éh jian kepéh neu’ pengelan réh tong Iah awah, bé’ éh neu’ ineu’-ineu’ éh neu’ réh. Barei’ ha’ lem Surat Allah, ka’ éh, Kelunan éh ngelan tong Allah, pengepemung néh ngan Allah omok jian kepéh, kelunan inah omok éh murip, ha’ Néh. ¹⁸ Jin seruga Allah bara’ kemerek Néh tong kekat arong penyala’ ngan kesa’at kelunan, uban penyala’ réh inah, mapat jalan réh bé’ omok jam Allah. ¹⁹ Pu’un Allah ngukum kelunan, uban ineu’ éh omok kenejam réh tong Allah lepah kejam réh lenaa’ éh, uban Allah tengéé’ lepah pepoléng éh ngan réh. ²⁰ Na’ péh Allah bé’ ta’an kelunan, omok réh jam Iah pu’un penyukat pelinguh, ngan adang réh omok jam tong Tuhan Iah éh Tuhan mu’un. Omok réh jam éh kenat neu’ kekat penyuai Néh éh jin bu’un tana’ iteu’. Uban réh jam éh kenat, bé’ réh omok bara’, bé’ mé’ jam Éh. ²¹ Na’ péh irah jam Allah pu’un penyukat kenat, bé’ irah seva’ Iah ngan bara’ jian kenin ngan Néh, bé’ irah kivu Iah, irah suwok kenin awah, bé’ réh jam seruh, pah avéé’ réh merem awah lem kenin réh. ²² Irah bara’ réh jam seruh, éh semu’un néh irah palui awah. ²³ Inah éh pepoléng réh palui uban bé’ réh keloo’ seva’ Allah éh pu’un pelinguh, irah maneu’ butun pekua’ layan kelunan, kelunan murip metok awah, pu’un réh maneu’ jelua’ kepéh pekua’ layan juhit ngan layan ka’an ngan layan torok péh, bang butun inah awah éh seneva’ réh. ²⁴ Uban réh palui kenin bé’ keloo’ kivu Allah, inah Allah kejeraa’ réh kivu kenin réh tengéé’ maneu’ kekat éh sa’at ngan jelemih, pah avéé’ réh maneu’ barék réh éh bé’ tekep belah irah ke’ péh. ²⁵ Irah bet ha’ tebaraa’ Allah ke’ réh kivu ha’ tebaraa’ éh kenyo irah ke’ awah. Pu’un irah pakai penyuai Allah barei’ juhit ngan ka’an éh senuai Néh inah, bang bé’ irah ngajung ngan kivu Allah éh suai kekat inah, Allah inah éh tekep kenajung lu’ pelinguh. Amin. ²⁶ Uban barék réh pu’un sa’at, Allah kejeraa’ réh kivu kenin réh tengéé’ ngan maneu’ kekat kemagat réh tong kekat kesa’at. Kenat péh irah redo péh, bé’ réh pemung ngan lakei’ barei’ kemalai redo, bang pu’un réh maneu’ kuraa’ adet éh sa’at éh jelemih mu’un tong usah réh. ²⁷ Kenat péh irah lakei’, bé’ irah tai pemung ngan redo barei’ malai, bang bé’ réh omok ngeretep, ngelayau réh keloo’ tai petuyang ngan irah pata lakei’ ke’, jelemih mu’un barék réh kenat. Neu’ réh maneu’ barék éh jelemih kenat, inah irah alaa’ ukum dalem usah réh éh oléé’ kesa’at réh inah. ²⁸ Uban irah bet Allah ngan bé’ keloo’ seruh tong Iah, inah Iah kejeraa’ réh kivu kenin réh tengéé’, ngan kekat penyeruh réh pepit dalem kesa’at réh awah, pah avéé’ réh maneu’ kekat éh bé’ tekep réh maneu’. ²⁹ Kenin réh penoo’ neu’ kuraa’ arong kesa’at ngan penyala’, inah éh sihun ngan juk alaa’ mekum, sakit kenin merek, sa’at mu’un-mu’un kenin réh, pu’un réh mematai kelunan ngan paneu’ péh, ngan ngelavo’ irah éh jah, irah bara’ tong penganeu’ kelunan tengéé’ jin éh pu’un dokoo’ ngesa’at kelunan inah ngan irah éh jah. Pu’un réh nekau ha’ ngan perengah éh ngan irah éh jah kepéh, ³⁰ ngan ngesa’at ngaran kelunan éh jah, bau kenin réh irah ngajung usah réh tengéé’, leko mu’un-mu’un réh tong Allah. Irah pitah jalan ke’ réh maneu’ éh pelapah sa’at kepéh, pu’un réh ngelepah ha’ tinen tamen réh. ³¹ Kekat barék réh jelemih mu’un, kekat ha’ ané réh bé’ éh batuu’-batuu’ bé’ réh jam nolong ngan pika irah éh jah. ³² Kejam irah ke’ Allah tekep ngukum réh matai pelinguh, bang na’ péh kenat, makang kenin réh maneu’ kesa’at de’ ke’, ngan inah kepéh irah murung kenin hun kelunan éh jah pu’un maneu’ éh kenat.

¹ O kei, kineu’ ke’, pu’un keh pesala’ kelunan éh jah? Séé’-séé’ éh pu’un maneu’ kenat, bé’ éh omok bara’ kenin néh pu’un teneng. Uban hun ko’ pesala’ kelunan éh jah uban barék réh sa’at, boh usah ko’ maneu’ barék inah kepéh, usah ko’ péh éh sala’ barei’ inah ke’ éh kepéh. ² Bé’ Allah sala’ ngukum irah éh maneu’ kenat. ³ Bang barék ko’ péh kei, pu’un éh pekua’ barék kelunan éh pesala’ ko’ inah. Kineu’ ke’, pu’un ke’ seruh ke’ omok pelepu jin ukum Allah? ⁴ Kineu’, leko ke’ tong penika néh éh ja’au ngan pengasi néh ngan tong néh kebit kenin ngan ko’? Kineu’, nebet ko’ awah penika Néh? Bé’ ke’ jam uban Allah pika ke’ inah Iah juk mihin ke’ moléé’ kenin kepéh? ⁵ Adang ko’ jam éh bang ka’au’ mahéng kenin. Neu’ kenin ko’ mahéng kenat ngan bé’ keloo’ moléé’ tavin Iah, adang ukum ko’ pelapah bahat kepéh tong dau Allah pepoléng kemerek Néh tong kelunan éh maneu’ penyala’ ngan ngukum réh. Teneng mu’un Iah tong jalan Néh ngukum réh. ⁶ Uban pu’un Allah mena’ oléé’ ngan siget-siget kelunan, kivu pekua’ penganeu’ kelunan. ⁷ Irah kelunan éh ngelayau maneu’ jian, éh pitah jalan ke’ réh omok pemung ngan Allah ngan mejing Éh, ngan ngajung Éh ngan éh pitah urip éh pelinguh, ngan kelunan éh kenat, adang Allah mena’ urip pelinguh ngan réh. ⁸ Bang kelunan éh kivu kenin réh tengéé’, éh bé’ keloo’ kivu sohoo’ Allah, éh bet kekat jalan éh teneng ke’ réh kivu kekat éh sala’ awah, ngan kelunan éh kenat, adang Allah merek ngan réh ngan ngukum réh. ⁹ Kekat kelunan éh petem maneu’ kesa’at adang réh pu’un keta ngan tusah kepéh vam, irah éh pohoo’ Yahudi péh, kenat péh irah éh tengéé’ pohoo’ péh. ¹⁰ Bang kekat kelunan éh maneu’ jian, adang irah omok pemung ngan Allah ngan nejing Néh ngan kenajung Néh, ngan mena’ pengepawah Néh ngan réh, ngan irah éh pohoo’ Yahudi péh, ngan irah éh tengéé’ pohoo’ péh. ¹¹ Uban Allah bé’ éh netah kenin ngan kelunan séé’-séé’ péh, adang Néh pekua’ kenin ngan kekat kelunan béé. ¹² Kelunan éh tengéé’ pohoo’, éh bé’ pu’un alaa’ Surat Musa, hun réh maneu’ penyala’, penyala’ inah mihin réh tawang. Bang bé’ réh kenukum kivu ha’ lem Surat Musa bang kelunan Yahudi éh pu’un alaa’ surat inah hun réh maneu’ penyala’ adang Allah ngukum réh kivu ha’ lem Surat Musa nah. ¹³ Bé’ kelunan omok jian kepéh ngan Allah hun réh menéng éh awah tong kekat ha’ lem Surat Musa. Bang hun réh pu’un kivu kekat sohoo’ lem surat inah, boh irah pu’un jian kepéh tong jumen Néh. ¹⁴ Irah kelunan éh tengéé’ pohoo’, bé’ réh pu’un alaa’ Surat Musa, bang na’ péh irah bé’ pu’un alaa’ surat inah kejam réh tong éh jian ngan éh sa’at. Hun irah pu’un kivu kuraa’-kuraa’ sohoo’ éh pu’un lem surat inah, kenin réh tengéé’ mihin réh maneu’ éh. ¹⁵ Neu’ réh maneu’ kuraa’-kuraa’ sohoo’ kenat, inah éh pepoléng kuraa’ sohoo’ lem Surat Musa, irah tengéé’ ke’ jam éh. Irah tengéé’ ke’ jam seruh éh mah barék éh jian ngan éh mah barék éh sa’at, uban jelua’ barék réh irah seruh bé’ tekep réh maneu’ éh kenat, ngan tong jelua’ kepéh irah seruh, jian maneu’ éh kenat. ¹⁶ Kenin ké’ hun ké’ seruh tong Rengah Jian éh benara’ ké’ iteu’, inah jalan Allah dalem Yésus Kristus ngukum kekat kelunan ngan ngukum kesa’at éh pelim lem kenin réh tovoo’ ga’ dau vam. ¹⁷ Bang kineu’ ka’ah éh pohoo’ Yahudi, pu’un keh seruh keh pelapah jian uban keh pu’un alaa’ Surat Musa inah, ngan bau kenin keh uban ka’ah éh kevéléé’ Allah? ¹⁸ Neu’ ha’ lem Surat Musa inah, adang ka’ah jam tong kekat pengeloo’ Allah ngan tong kekat éh jian ngan tong kekat éh sa’at péh, bang na’ péh kenat bé’ keh pu’un kivu tong éh jian nah. ¹⁹ Ka’ah seruh uban ka’ah pu’un alaa’ Surat Musa inah, ka’ah omok majak kelunan éh peseu’, kenat péh barei’ jah rema tong irah éh lem merem ngan ²⁰ barei’ guru éh jam petena’ irah éh sala’, barei’ guru éh nebaraa’ irah anak. Ka’ah seruh ka’ah jam tong ha’ lem Surat Musa inah ngan dalem tebaraa’ inah, inah éh jalan kelunan jam tong kekat jalan éh teneng. ²¹ Pu’un ka’ah nebaraa’ kelunan éh jah, uban ineu’ keh bé’ nebaraa’ usah keh tengéé’? Pu’un keh nebaraa’ réh, Mai keh nekau, bang kineu’ ka’ah, pu’un keh nekau? ²² Ha’ keh ngan réh, mai keh petuyang, bang kineu’ ka’ah, pu’un keh petuyang? Leko mu’un-mu’un keh tong butun éh seneva’ irah éh seva’ butun, bang kineu’ éh ke’ keh tai lamin butun ngan nekau pengena’ réh ngan butun. ²³ Bau kenin keh uban keh pu’un alaa’ ha’ tebaraa’ Allah, bang pu’un keh ngesa’at ngaran Allah uban keh bé’ keloo’ kivu sohoo’ lem tebaraa’ inah. ²⁴ Uban pu’un jah ha’ lem Surat Allah éh bara’ ka’, Naneu’ penganeu’ irah Yahudi, irah éh tengéé’ pohoo’ ngesa’at ngaran Allah, ha’ Surat Allah. ²⁵ Hun ka’ah pu’un kivu kekat sohoo’ lem Surat Musa, boh adet sunat inah pu’un gunah ngan keh, bang hun keh ngelapah tong kekat sohoo’ inah, seleket keh bé’ pu’un pesunat. ²⁶ Irah éh tengéé’ pohoo’ éh bé’ pu’un pesunat nah, hun irah kivu sohoo’ lem Surat Musa, kineu’ bé’ Allah seruh éh seleket kelunan éh pesunat? Adang Allah seruh éh pekua’ kelunan éh pesunat ke’ éh. ²⁷ Irah éh tengéé’ pohoo’ pu’un irah pesala’ ka’ah Yahudi, uban ka’ah pu’un alaa’ ha’ tebaraa’ inah ngan pakai adet sunat tong usah keh awah, bang bé’ keh pu’un kivu ha’ tebaraa’ inah lem kenin keh mu’un. Na’ péh irah éh tengéé’ pohoo’ bé’ pu’un pesunat, pu’un réh kivu sohoo’ lem Surat Musa inah. ²⁸ Jian keh seruh, séé’ éh kelunan éh pohoo’ Yahudi mu’un éh pesunat mu’un? irah inah bé’ éh alaa’ ngaran awah ngan maneu’ adet sunat tong usah réh awah. ²⁹ Bang kelunan éh pesunat kenin neu’ Sahéé’ Ni’ai, inah éh kelunan Yahudi mu’un, bé’ éh kelunan éh pesunat tong usah réh awah, kelunan éh pesunat kenin kenat, inah éh kenajung Allah, bé’ éh kenajung kelunan awah.

¹ Hun néh kenat kineu’ kelunan Yahudi, pu’un gunah néh uban réh pohoo’ Yahudi? Kenat péh tong adet sunat inah kineu’ pu’un gunah réh? ² Adang kekat inah pu’un gunah. Uban éh bu’un néh Allah lepah mena’ ha’ tebaraa’ Néh ngan réh. ³ Kineu’ hun jelua’ kelunan Yahudi bé’ tigéh ngan bé’ kivu? Kineu’ pu’un Allah ngepaléu kenin Néh ngan bé’ tigéh uban irah bé’ pu’un tigéh? ⁴ Adang Allah bé’ ngepaléu kenin Néh Iah pu’un tigéh, na’ péh kekat kelunan kenyo awah bé’ Iah omok kenyo. Barei’ ha’ lem Surat Allah bara’ tong Iah, ka’ éh, Hun Ko’ pané, kekat kelunan jam Ké’ pu’un pané teneng, bé’ pu’un ineu’-ineu’ ke’ réh omok pesala’ Ké adang ko’ pu’un menang. ⁵ Kineu’ hun néh neu’ kekat koléé’ lu’ maneu’ sa’at, inah éh pepoléng Allah pu’un jian ngan ngelayau maneu’ jian? Kineu’ kepéh éh? Kineu’ Allah, sala’ éh ngukum lu’? Nah, kekat ha’ ké’ inah akeu’ pané’ barei’ éh kemalai seneruh kelunan awah. ⁶ Adang Allah bé’ sala’. Hun Allah bé’ teneng ngukum kelunan éh maneu’ penyala’, kineu’ jalan Néh omok petuneng kekat kelunan pah tipo tana’? ⁷ Bang na’ péh akeu’ bé’ pu’un tigéh, Allah éh pu’un kenajung uban Iah pu’un tigéh ngan pu’un kivu jajii’ Néh. Hun néh kenat uban ineu’ Allah ngukum akeu’ pekua’ kelunan éh penyala’? ⁸ Hun néh kenat kineu’, jian uleu’ maneu’ sa’at awah jalan Allah omok kenajung? Adang bé’. Kenat ha’ jelua’ réh pesala’ akeu’ ngan bara’ akeu’ nyohoo’ réh maneu’ sa’at sahau rai. Bé’ Allah sala’ ngukum réh. ⁹ Hun néh kenat kineu’ kenin améé’ éh pohoo’ Yahudi, pu’un éh pelapah jian jin kelunan éh tengéé’ pohoo’? Adang bé’. Uban dalem kekat ha’ éh benara’ ké’ inah ri’, inah akeu’ bara’, kekat kelunan béé-béé pu’un lem penyukat penyala’, kenat péh pohoo’ Yahudi kenat péh irah éh tengéé’ pohoo’. ¹⁰ Barei’ ha’ lem Surat Allah bara’ éh, Bé’ pu’un jah-jah usah kelunan éh teneng kenin. ¹¹ Bé’ sapét jah usah éh jam ineu’ éh teneng, ngan éh pitah Allah. ¹² Kekat réh béé pu’un moléé’ murin kepéh ngan bet Allah. Kekat réh béé pu’un sa’at awah. Bé’ pu’un séé’-séé’ éh maneu’ jian, jah-jah usah péh bé’ pu’un. ¹³ Kekat ha’ tosok réh pekua’ barei’ luvang tanem éh pukap. Ha’ éh ngelavo’ ngan ha’ tebok barei’ ibah torok éh katah rai. ¹⁴ Lumang réh menoo’ kelunan ngan maneu’ kelunan. ¹⁵ Lumang réh ngesakit ngan mematai kelunan. ¹⁶ Semah-semah réh tai, sinah réh petusah ngan peketa kelunan. ¹⁷ Bé’ réh jam murip pawah. ¹⁸ Bé’ réh medai Allah, bé’ réh seva’ Iah. ¹⁹ Hun iteu’ uleu’ jam tong kekat éh senurat dalem Surat Musa pu’un éh tulat kelunan éh murip ra’ Surat Musa. Uban néh kenat bé’ pu’un jah usah péh éh omok bara’ réh bé’ jam éh adang Tuhan Allah juk petuneng kekat kelunan tong tana’ iteu’. ²⁰ Bé’ pu’un séé’-séé’ kelunan éh omok pemung ngan Allah ke’ néh omok jian kepéh, neu’ néh kivu sohoo’ lem Surat Musa. Surat Musa nojoo’ jalan ngan kelunan ke’ réh jam kekat kelunan, kelunan penyala’ awah. ²¹ Bang hun iteu’ Allah nojoo’ jalan ngan kelunan, ke’ réh omok pemung ngan Néh ke’ réh omok jian kepéh, bé’ éh neu’ kelunan kivu sohoo’ lem Surat Musa ngan surat irah nabi, pu’un éh bara’ tong néh, bang bé’ éh lenaa’. ²² Jalan Allah omok maneu’ kelunan pu’un pengepemung ngan Néh ke’ Néh omok jian kepéh, inah éh neu’ pengelan réh tong Yésus Kristus. Bé’ pu’un jalan éh tengéé’ jin inah ke’ Néh omok jian kepéh. ²³ Uban kekat kelunan lepah maneu’ penyala’ ngan mepai tong pengejian Allah. ²⁴ Bang naneu’ penika Allah nah awah, kekat kelunan omok alaa’ pengepemung ngan Allah ke’ néh omok jian kepéh, neu’ Allah mena’ Anak Néh, dokoo’ naneu’ dahaa’ Néh éh pega’, pu’un jalan ke’ Tuhan omok mega’ penyala’ réh naneu’ pengelan réh tong Yésus. ²⁵ Pu’un Allah mena’ Yésus Kristus pengena’ Néh dokoo’ neu’ pengematai Néh Iah omok mega’ penyala’ kelunan, hun réh ngelan tong Néh. Allah maneu’ kenat dokoo’ pepoléng Iah teneng mu’un. Sahau kebit kenin Allah tong penyala’ Kelunan, bé’ Iah tioo ngukum réh. ²⁶ bang hun iteu’ bé’ Iah ngelapah tong penyala’ réh kenat la’ah, inah telana’ néh Iah pu’un pengeteneng, uban kekat kelunan éh ngelan tong Yésus Iah maneu’ réh jian kepéh ngan Allah. ²⁷ Hun néh kenat bé’ pu’un ineu’ kejian uleu’ éh kelu’ omok ngajung usah lu’. Bé’ lu’ omok jian kepéh ngan Allah uban neu’ lu’ kivu sohoo’ lem Surat Musa, bang neu’ pengelan lu’ tong Yésus Kristus inah ke’ lu’ omok jian kepéh ngan Allah. ²⁸ Ka’ éh séé’ séé’ péh omok jian kepéh ngan Allah, uban néh ngelan tong Yésus Kristus, ngan bé’ éh uban néh maneu’ ineu’ éh senohoo’ Surat Musa. ²⁹ Uban Allah nah, bé’ éh Allah éh kenelan irah Yahudi awah, bang Allah éh kenelan pah avéé’ kelunan éh tengéé’ pohoo’ ke’ Éh. ³⁰ Jah de ke’ Allah ngan pu’un Iah maneu’ kelunan Yahudi jian kepéh ngan Allah, naneu’ pengelan réh tong Yésus Kristus, kenat péh kelunan éh tengéé’ pohoo’ Iah maneu’ réh jian kepéh ngan Allah, naneu’ pengelan réh tong Yésus Kristus. ³¹ Hun néh kenat kineu’ lu’ da’, tekep lu’ bet Surat Musa ngan ngelan tong Yésus awah. Bé’ makat lu’ tekep bet éh, tekep lu’ mihau kekat tebaraa’ inah pemung ngan pengelan lu’ tong Yésus.

¹ Jian lu’ seruh kepéh tong tepun lu’ Abraham. Kineu’ éh, omok éh alaa’ kenin éh jian kepéh ngan Allah neu’ penganeu’ néh. ² Hun néh pu’un éh jin neu’ penganeu’ néh, omok éh ngajung usah néh, bang bé’ éh omok ngajung usah néh tong jumen Allah. ³ Uban ha’ lem surat Allah pu’un bara’, Abraham ngelan tong Allah ngan neu’ pengelan néh, inah jalan Allah alaa’ iah seleket kelunan éh jian kepéh ngan Néh. ⁴ Kelunan éh kereja’ pu’un éh alaa’ gaji néh, bé’ éh seruh gaji néh nah pengena’ kelunan awah, uban réh pika éh awah, adang iah seruh tekep réh mena’ gaji néh uban néh kereja’ ngan réh nah. ⁵ Kelunan éh bé’ pu’un maneu’ ineu’-ineu’ ke’ néh omok jian kepéh ngan Allah, bang éh ngelan tong Allah awah, neu’ pengelan réh kenat, inah jalan Allah alaa’ iah seleket kelunan éh lepah jian kepéh ngan Néh, uban Allah awah éh omok bara’ kelunan penyala’ pu’un jian. ⁶ Kenat sin tong ha’ Daud rai, hun néh bara’ tong kemurung kelunan éh nalaa’ Allah seleket kelunan éh jian ngan Néh kepéh. ⁷ Murung kenin kekat kelunan éh nega’ Tuhan kesa’at. Penyala’ néh nebet Tuhan tenéh. ⁸ Murung kenin kelunan éh bé’ nihau Tuhan penyala’ la’ah. Kenat ha’ Daud ⁹ Tong kelunan éh pu’un kemurung kenat, bé’ éh irah Yahudi éh pesunat nah awah, bang kelunan éh pesunat pemung ngan irah éh bé’ pesunat, pata murung béé-béé réh. Uban ka’ ha’ éh benara’ mé’ ri’, Pu’un Abraham ngelan tong Allah ngan neu’ pengelan néh, inah jalan Allah alaa’ iah seleket kelunan éh jian kepéh ngan Néh. ¹⁰ Hun mah Allah alaa’ éh kenat? Kineu’, hun néh bé’ jak pesunat, kineu’ la’o néh pesunat. Hun néh bé’ jak pesunat nah Allah alaa’ iah seleket kelunan éh jian kepéh. ¹¹ La’o inah boh éh pesunat, ngan sunat nah éh telana’ éh neu’ Allah éh bara’ naneu’ pengelan Abraham tong Allah inah jalan Allah alaa’ iah seleket kelunan éh jian kepéh ngan Néh. Abraham nah seleket tepun kekat kelunan éh bé’ kivu adet sunat, bang éh ngelan tong Allah ngan éh nalaa’ Allah seleket kelunan éh jian mu’un kepéh ngan Néh. ¹² Barei’ inah kepéh Abraham nah seleket tepun kekat kelunan pohoo’ Yahudi éh kivu adet sunat bang pengelan réh pu’un tong Allah barei’ Abraham hun néh to bé’ pesunat nah rai. ¹³ La’ah hun Allah maneu’ jajii’ ngan Abraham inah ke’ éh avéé’ ngan pohoo’ néh, kekat arong tana’ omok anah nah ngan anah pohoo’ néh, ka’ éh, bé’ Allah pejajii’ éh kenat uban Abraham pu’un kivu sohoo’ lem Surat Musa, bang uban Abraham ngelan tong Allah kenat éh Allah alaa’ iah seleket kelunan éh jian kepéh ngan Néh. ¹⁴ Uban hun lu’ omok alaa’ éh pejajii’ Allah neu’ lu’ kivu sohoo’ lem Surat Musa awah, bé’ pu’un gunah kelunan ngelan tong Allah ngan pejajii’ Allah seleket néh bé’ pu’un. ¹⁵ Uban hun kelunan bé’ kivu sohoo’ lem Surat Musa inah éh pesavéé’ rek Allah, bang hun néh bé’ pu’un sohoo’, bé’ pu’un kelunan éh omok ngelapah tong néh, uban néh bé’ pu’un. ¹⁶ Jajii’ Allah inah kivu pengelan kelunan tong Allah. Uban kenat jajii’ inah pu’un petem neu’ pengena’ Allah éh nena’ Néh awah ngan kekat anak ayam Abraham, irah éh kivu sohoo’ lem Surat Musa kenat péh irah ngelan tong Allah barei’ Abraham nah seleket tepun kekat kelunan éh ngelan tong Allah. ¹⁷ Kenat sin tong ha’ lem surat Allah éh benara’ Allah ngan Abraham, ka’ éh, Pu’un Ku’ maneu’ ke’ tepun kekat arong kelunan, ha’ Néh. Jajii’ inah pu’un petem ngan Abraham uban pengelan Abraham tong Allah. Allah inah, Allah éh omok purip kekat kelunan éh matai ngan Iah ke’ éh Allah éh neu’ ha’ Néh awah, kekat éh bé’ jak pu’un pesuai omok pesuai kepéh. ¹⁸ Uban Abraham petem lem pengelan néh tong éh benara’ Allah ngan néh, na’ péh éh bé’ pu’un ineu’ ta’an néh éh tekep ke’ néh omok ngelan éh pu’un kenat, uban hun inah to ke’ éh bé’ jak pu’un anak, bang neu’ pengelan néh, Allah maneu’ éh omok tepun siget arong pohoo’ kelunan. Barei’ ha’ lem surat Allah éh bara’, Kekat pohoo’ ko’ pepit pinaa’ mu’un kepéh, ha’ Néh. ¹⁹ Tovoo’ Allah pané kenat, Abraham lepah mukun danii’ jah ato ta’un kelebéé’ urip néh, bang bé’ iah putui pengelan seruh tong pengelemoo’ usah néh éh danii’ juk matai. Kenat péh bé’ iah putui pengelan seruh tong redo néh Sara éh nyalun ngan mukun mu’un-mu’un, bé’ omok pu’un anak la’ah. ²⁰ Bé’ iah putui pengelan, bé’ iah duah kenin, bang neu’ pengelan néh tong Allah, usah néh mesoléé’ gahang kepéh pu’un iah mejing Allah, ²¹ uban iah ngelan mu’un omok Allah maneu’ pekua’ barei’ ha’ jajii’ Néh inah. ²² Kenat péh uban Abraham ngelan tong Allah, inah jalan Allah alaa’ iah seleket kelunan éh jian kepéh ngan Allah, ²³ Tong ha’ inah éh bara’, Allah alaa’ iah seleket kelunan éh jian kepéh ngan Allah, bé’ éh pu’un senurat kenat uban Abraham awah. ²⁴ Bang pu’un éh senurat kenat ngan uleu’ kepéh éh nalaa’ Allah seleket kelunan éh jian kepéh ngan Allah, inah éh ngan uleu’ éh ngelan tong Allah éh pebetéé’ Tuhan Yésus jin patai Néh rai. ²⁵ Pu’un Iah matai naneu’ penyala’ uleu’, Iah pu’un betéé’ murip kepéh dokoo’ lu’ omok jian kepéh ngan Allah.

¹ La’ah uban uleu’ pu’un jian kepéh ngan Allah naneu’ pengelan lu’ tong Iah, inah éh mihin uleu’ tunuk ngan Allah kepéh naneu’ Tuhan Yésus Kristus éh kenelan lu’. ² Uban neu’ pengelan lu’ tong Iah, pu’un Iah lepah mihin uleu’ tavin Allah éh jalan lu’ alaa’ urip maréng éh nena’ Néh ngan lu’. Murung kenin lu’ uban uleu’ ngelan adang uleu’ omok pemung ngan Allah lem kekat pengaren Néh ngan paléu’ jian pekua’ barei’ Iah pu’un jian. ³ Kenat péh uleu’ murung kenin dalem kekat penusah lu’, uban uleu’ jam kekat penusah inah, inah éh mihin uleu’ omok ngeretep ngan kebit kenin, ⁴ ngan hun lu’ ngeretep ngan kebit kenin kenat, inah mihin lu’ reken kenin ngan sukup mu’un kenin, ngan hun néh pu’un kenat petem kenin lu’ ngelan adang uleu’ omok tai pemung ngan Allah. ⁵ Hun lu’ ngelan tong Allah kenat bé’ lu’ duah kenin uban lu’ jam Allah éh pika lu’, éh mena’ Sahéé’ Ni’ai Néh ngan uleu’. ⁶ Uban lem lu’ to lemoo’ ngan bé’ omok piso jin kesa’at lu’, tovoo’ jaka’ éh kevéléé’ Allah ke’ Kristus matai ngeliwah uleu’ kelunan éh sa’at. ⁷ Leko mu’un-mu’un kelunan matai ngeliwah jah kelunan éh tigéh ngan éh jian, jah péh pu’un kelunan keloo’ matai ngeliwah kelunan éh jian kenat, bang mejat mu’un éh. ⁸ Bang inah jalan Allah pepoléng penika Néh ngan uleu’, uban lem lu’ pu’un maneu’ penyala’ keto, inah Kristus matai ngeliwah uleu’. ⁹ Naneu’ dahaa’ Néh éh pega’ inah jalan Iah maneu’ lu’ jian kepéh ngan Allah, hun néh kenat adang Iah pu’un ngelepu lu’ jin kemerek Allah kepéh da’. ¹⁰ Hun lepah rai uleu’ ayau Allah, bang naneu’ pengematai Anak Néh, inah jalan Iah maneu’ uleu’ bakéh Néh kepéh. Hun néh neu’ pengematai Anak Néh uleu’ omok bakéh Allah kepéh, adang lu’ omok murip naneu’ urip Néh. ¹¹ Bang bé’ éh kenat awah, bang inah kepéh uleu’ murung kenin dalem Allah naneu’ Tuhan Yésus Kristus éh kenelan lu’ éh matai ke’ Néh mihin lu’ tavin Allah dokoo’ uleu’ omok bakéh Néh kepéh. ¹² La’ah naneu’ jah kelunan, inah éh bu’un penyala’ pu’un tong tana’, ngan naneu’ penyala’, inah éh maneu’ kekat ineu’-ineu’ péh jam matai, pah avéé’ tong kekat kelunan béé, uban kekat kelunan pu’un maneu’ penyala’. ¹³ Hun Allah to bé’ jak mena’ kekat sohoo’ lem Surat Musa, pu’un kelunan maneu’ penyala’, bang uban kekat sohoo’ Néh inah to bé’ jak pu’un, bé’ Allah mihau kekat penyala’ réh. ¹⁴ Bang na’ péh kenat, jin Adam pah avéé’ tong Musa, kekat kelunan éh murip kelebéé’ inah, patai inah éh pu’un penyukat tong réh, avéé’ tong irah éh bé’ maneu’ penyala’ pekua’ éh naneu’ Adam tovoo’ néh ngelapah sohoo’ Allah rai. Adam nah inah jah gaben tong Yésus Kristus éh juk tuai kepéh nah. ¹⁵ Bang Adam ngan Kristus bé’ roh pu’un pekua bé’ roh pu’un pekua’ uban penika Allah pelapah juu’ tipah néh jin penyala’ kelunan matai naneu’ oléé penyala’ kelunan éh jah nah inah éh neu’ Adam, bang penika Allah pelapah ja’au kepéh. Iah mena’ jalan urip ngan kekat kelunan jin penika jah kelunan, inah éh Yésus Kristus. ¹⁶ Inah kepéh hun lu’ seruh tong jalan Allah mena’ urip maréng ngan kuraa’ kelunan, tengéé’ mu’un éh jin penyala’ Adam nah. Neu’ Adam ngelapah tong sohoo’ Allah, inah pesavéé’ ukum éh mihin kekat kelunan matai, bang Kristus bet kekat penyala’ kelunan ngan pepurip réh. ¹⁷ Mu’un kekat kelunan pu’un lem penyukat patai naneu’ penyala’ jah kelunan inah, bang inah kepéh naneu’ jah kelunan éh jah nah, inah éh naneu’ Yésus Kristus, kekat kelunan éh alaa’ penika Allah ngan alaa’ kenin éh teneng éh pengena’ Néh ngan uleu’, omok irah inah murip ngan menang naneu’ Yésus Kristus. ¹⁸ Uban néh kenat, neu’ penyala’ Adam inah mihin kekat kelunan teneng tong ukum Allah, kenat ke’ kepéh uleu’ pelepu jin sala’ ngan alaa’ urip uban penganeu’ Kristus éh kivu pengeloo’ Allah. ¹⁹ Barei’ Adam ngelapah tong sohoo’ Tuhan inah maneu’ kelunan pinaa’ kepéh pu’un penyala’. Barei’ inah kepéh naneu’ jah kelunan éh kivu sohoo’ Tuhan, inah éh Kristus, inah éh mihin kelunan pinaa’ omok jian kepéh ngan Allah. ²⁰ Surat Musa pepoléng kekat éh sa’at ngan pepit éh, bang na’ péh penyala’ pu’un pepit ja’au mu’un, penika Allah pelapah ja’au kepéh. ²¹ Kenat péh lepah rai, penyala’ éh pengeja’au ngan mihin kelunan matai, bang hun iteu’ kepéh penika Allah éh pengeja’au ngan mihin lu’ alaa’ urip éh pelinguh naneu’ Yésus Kristus Éh Tuhan uleu’.

¹ Hun Allah pika lu’ kenat, kineu’, tekep lu’ petem maneu’ penyala’ kepéh dokoo’ penika Allah pepit kepéh ngan lu’? ² Adang uleu’ bé’ tekep maneu’ kenat kepéh. Uban penyala’ bé’ pu’un penyukat tong uleu’ uban uleu’ lepah matai tong penyala’ ngan lepah piso jin penyala’, bé’ lu’ juk murip petem maneu’ penyala’ la’ah. ³ Kineu’, bé’ keh jam éh tovoo’ lu’ benatis, inah lu’ seleket jah awah pemung ngan Kristus, inah sin néh lu’ seleket jah awah lem pematai Néh. ⁴ Tovoo’ lu’ benatis réh uleu’ pu’un pemung ngan Néh dalem pematai Néh kenat péh seleket lu’ tenanem pemung ngan Néh, dokoo’ barei’ Tamen Néh pebetéé’ Kristus jin patai Néh neu’ penyukat Néh, uleu’ péh omok betéé’ murip petem dalem Iah dalem kekat urip éh maréng kepéh. ⁵ Uban hun lu’ pu’un pemung ngan Néh dalem pematai Néh, adang uleu’ pu’un pemung ngan Néh dalem pengebetéé’ Néh kepéh, ngan uleu’ pu’un murip lem urip éh maréng awah la’ah. ⁶ Uban uleu’ jam kekat kenin ngan kekat urip lu’ éh jin bu’un sahau, pu’un éh lepah matai pemung ngan Kristus tong salib Néh, dokoo’ pengeloo’ usah lu’ iteu’ éh malai maneu’ kesa’at kenebéé penyukat Néh dokoo’ penyala’ bé’ omok ngeripen keh kepéh. ⁷ Uban kelunan éh lepah matai, pu’un éh pelepu jin penyala’, bé’ penyala’ pu’un penyukat tong néh kepéh. ⁸ Uban hun uleu’ pu’un matai pemung ngan Kristus, adang uleu’ omok betéé’ murip pemung ngan Néh kepéh. ⁹ Uleu’ jam Allah pebetéé’ Kristus jin patai Néh, bé’ Iah omok matai kepéh, kenat péh patai bé’ pu’un penyukat bau Néh la’ah. ¹⁰ Tong jalan Néh matai, Iah matai jah de’ ke’ koléé’ awah ke’ Néh ngebéé penyukat penyala’ ngan ngeliwah kekat kelunan béé bang tong urip Néh hun iteu’, Iah pu’un murip ngan Allah. ¹¹ Kenat péh ka’ah éh lepah matai tong penyala’, jian keh nesen usah keh seleket matai tong kekat penyukat penyala’, ngan murip kepéh hun iteu’ ngan Allah uban keh pu’un pemung dalem Kristus Yésus. ¹² Mai keh kejeraa’ penyala’ pengeja’au keh, pah avéé’ keh tai maneu’ kekat pengagat usah keh. ¹³ Mai keh maneu’ kesa’at, kenat péh mai keh mena’ sapét jebila’ usah keh, barei’ maten keh ngan ojoo’ ngan gem keh maneu’ sa’at. Bang jian keh mena’ ketem lo’ong usah ngan kenin keh ngan Allah barei’ kelunan éh lepah piso jin jalan patai ngan éh murip ngan Allah, ngan mena’ kekat usah ngan kekat kenin keh ngan Allah, dokoo’ keh kivu kekat éh pengeloo’ Néh. ¹⁴ Uban penyala’ bé’ éh omok pengeja’au keh kepéh, uban bé’ ka’ah pu’un murip kivu sohoo’ lem Surat Musa, bang ka’ah pu’un murip dalem penika Allah. ¹⁵ Uban hun iteu’ uleu’ pu’un murip lem penika Allah, bé’ uleu’ pu’un murip lem penyukat ukum kepéh, hun néh kenat, kineu’, tekep lu’ maneu’ penyala’ kepéh, adang lu’ bé’ tekep maneu’ éh. ¹⁶ Kineu’, bé’ keh jam hun keh ngerera’ kivu sohoo’ kelunan, kelunan inah éh pengeja’au keh, bé’ keh omok kivu kenin keh tengéé’. Barei’ inah péh hun keh kivu sohoo’ penyala’ iah éh pengeja’au keh, ga’ néh mihin keh matai. Kenat péh hun keh kivu sohoo’ Allah éh jalan keh alaa’ jian kepéh ngan Néh, Tuhan pengeja’au keh. ¹⁷ Bang mejing ngaran Allah uban na’ péh lepah rai pu’un keh keripen penyala’ bang hun iteu’ kepéh pu’un keh kivu mu’un kekat jalan éh teneng éh pekua’ barei’ ha’ tebaraa’ éh benara’ réh ngan keh rai. ¹⁸ Pu’un Allah ngelepu keh jin penyala’ rai ngan hun iteu’ ka’ah pu’un ripen tong kekat éh pengeloo’ kenin Allah kepéh. ¹⁹ Akeu’ bara’ éh palaa’ ha’ tapan inah dokoo’ keh omok jam éh. Hun lepah rai pu’un keh mena’ usah keh maneu’ kekat kesa’at barei’ kelunan éh keripen tong kekat éh jelemih ngan sa’at. Barei’ inah péh hun iteu’, jian keh mena’ usah keh kepéh maneu’ kekat éh ni’ai ngan ripen tong kekat éh teneng. ²⁰ Hun lepah rai pu’un keh keripen penyala’, bé’ keh nesen kekat éh teneng. ²¹ Kineu’, pu’un ineu’-ineu’ éh lem barék keh éh sa’at lepah nah, éh maneu’ keh jian kenin? Kekat barék keh rai sa’at awah éh, menyaa’ keh seruh éh hun iteu’ kepéh, pengega’ néh mihin keh matai. ²² Bang hun iteu’ kepéh Allah pu’un ngelepu keh jin penyala’ keh ngan Iah maneu’ keh ripen Allah kepéh. Uban Iah ngelepu keh kenat, kekat urip keh anah nah, pengega’ néh mihin keh murip pelinguh. ²³ Kelunan éh maneu’ penyala’ pu’un oléé’ néh kepéh, inah éh matai, bang pengena’ Allah, inah éh urip pelinguh, pemung ngan Kristus Yésus éh Tuhan lu’.

¹ O kekat padéé’ ké’, adang keh jam tong éh juk benara’ ké’ iteu’ da’, uban keh jam tong ha’ neta’ tong kelunan éh lepah kawin bé’ omok petat kepéh. La’ah ha’ inah magen éh kelebéé’ roh murip. Hun néh matai bé’ éh inah omok magen éh kepéh. ² ka’ éh, jah redo éh pu’un lakei’ bé’ éh omok petat jin lakei’ néh kelebéé’ lakei’ néh murip, bang hun lakei’ néh matai, redo inah pelepu jin ha’ éh magen éh nah. ³ Bang hun redo inah murip pemung ngan lakei’ éh jah hun lakei néh to murip keto, redo inah petuyang. Bang hun lakei’ néh lepah matai, redo inah lepah pelepu jin ha’ éh magen éh nah. Hun néh kawin ngan lakei’ éh jah bé’ éh petuyang. ⁴ O kekat padéé’ ké’, inah ha’ tapan ké’ tong ka’ah kepéh. Ka’ah iteu’ lepah matai ngan pelepu jin sohoo’ lem Surat Musa, uban ka’ah lepah pemung ngan Kristus. La’ah hun iteu’ ka’ah anah Kristus éh betéé’ jin patai Néh. Iah betéé’ kenat dokoo’ uleu’ kelunan omok murip ngan barék éh teneng ngan pu’un gunah ngan Allah. ⁵ Uban lepah rai hun lu’ bé’ jak jam urip Tuhan lem kenin lu’, uleu’ murip kivu kenin lu’ tengéé’, kekat sohoo’ lem Surat Musa nah makin barei’ pebetéé’ pengagat dalem kenin lu’ ke’ néh sa’at kepéh inah éh mihin lu’ matai. ⁶ Bang hun iteu’ kepéh uleu’ seleket matai tong sohoo’ jin Surat Musa, bé’ sohoo’ inah omok pengeja’au lu’ kepéh. Jalan lu’ ngepayoo’ kenin Allah hun iteu’, maréng éh, neu’ lu’ kivu pengeloo’ Sahéé’ Ni’ai. ⁷ Hun néh kenat, kineu’ ha’ lu’ tong Surat Musa, tekep lu’ bara’ éh sala’, adang éh bé’ sala’. Uban neu’ kekat ha’ Tuhan lem Surat Musa, inah jalan ké’ nesen tong kesa’at penyala’, uban hun néh usah ké’ tengéé’, bé’ akeu’ jam akeu’ pu’un magat tong kesa’at, bang uban ha’ lem Surat Musa bara’, Mai keh magat tong kesa’at, inah jalan ké’ nesen akeu’ pu’un éh kenat. ⁸ Neu’ ha’ neta’ inah, inah jalan penyala’ omok tioo gusii’ lem kenin ké’ ngan mihin ku’ magat tong kesa’at. Uban hun néh bé’ pu’un ha’ Tuhan lem Surat Musa meta’ kenat, penyala’ nah seleket pegen awah jak éh lem ku’. ⁹ Hun sahau rai, pu’un ku’ murip marut awah, bé’ ku’ jam tong Surat Musa. Tovoo’ ké’ jam ha’ Tuhan meta’ kenat, tioo penyala’ murip ngan gusii’ lem kenin ké’. ¹⁰ Inah akeu’ seleket matai awah. La’ah kekat ha’ lem Surat Musa, nena’ Tuhan dokoo’ purip lu’, bang bé’ éh purip akeu’, inah éh mihin akeu’ matai awah. ¹¹ Neu’ ha’ Tuhan inah, inah penyala’ ngelavo’ akeu’ ngan mematai ku’. ¹² La’ah kekat sohoo’ lem Surat Musa pu’un éh nena’ Allah, ngan kekat ha’ éh meta’ lu’ maneu’ sa’at, inah kepéh nena’ Allah, ngan teneng éh ngan jian éh. ¹³ Kekat sohoo’ lem Surat Musa pu’un éh jian. Hun néh kenat, kineu éh? Éh jian nah mihin ku’ matai? Bé’ éh jian nah mihin ku’ matai, bang penyala’ nah éh. Uban pu’un Surat Musa pepoléng penyala’ nah pelapah sa’at mu’un. ¹⁴ Uleu’ jam Allah pu’un mena’ kekat sohoo’ lem Surat Musa ngan uleu’, bang akeu’ pohoo’ kelunan éh lemoo’ kenin ngan keripen dalem penyala’ awah. ¹⁵ Bé’ akeu’ jam uban ineu’ ku’ ngelayau maneu’ sa’at, keloo’ ku’ maneu’ jian, bang bé’ ku’ omok maneu’ éh, bang kekat éh keleko ké’, inah awah éh omok neu’ ké’. ¹⁶ Bang hun ké’ maneu’ éh keleko ké’ inah, bé’ éh uban ha’ lem Surat Musa nah pu’un sa’at. Adang kekat ha’ tebaraa’ inah jian béé. ¹⁷ Hun néh kenat bé’ éh akeu’ éh maneu’ éh, bang penyala’ éh murip dalem ku’, inah éh maneu’ éh. ¹⁸ Akeu’ jam bé’ pu’un ineu’-ineu’ éh jian murip dalem kenin ké’ hun bé’ pu’un Sahéé’ Ni’ai. Uban na’ péh ku’ keloo’ ngan gahang kenin juk maneu’ jian, bé’ ku’ omok maneu’ éh. ¹⁹ Bé’ akeu’ omok maneu’ jian barei’ éh keneloo’ ké’, bang kekat kesa’at éh keleko ké’, inah awah éh omok neu’ ké’. ²⁰ Hun akeu’ maneu’ kekat éh keleko ké’, éh mu’un néh, bé’ éh akeu’ éh maneu’ éh, bang penyala’ éh murip dalem akeu’, inah éh maneu’ éh. ²¹ Uban néh kenat duah jalan kenin ké’, keloo’ ku’ maneu kekat éh jian, bang bé’ ku’ omok bé’ maneu’ sa’at. ²² Dalem kenin ké’ mu’un, jian kenin ké’ seruh tong kekat éh sohoo’ Allah ngan keloo’ akeu’ maneu’ éh, ²³ bang usah ké’ bé’ keloo’ ku’ kenat. Ngelayau usah ké’ ngelawan éh juk neu’ kenin ké’ ngan ngeripen ku’ tong penyala’. ²⁴ Aduii’, besau mu’un ku’. Séé’ omok ngelepu ku’ jin usah ké’ éh mihin ku’ matai iteu’? ²⁵ Mejing ngaran Allah éh omok ngelepu ku’ neu’ Yésus Kristus. Uban néh kenat éh kejam ké’ pu’un ku’ kivu sohoo’ Allah pakai pengejam utek ké’ ke’ awah, bang usah ké’ kivu kekat sohoo’ tong penyala’.

¹ Bé’ pu’un ukum hun iteu’ tong kelunan éh petem dalem Kristus Yésus. ² Uban Sahéé’ Ni’ai éh pu’un mihin lu’ murip petem dalem Yésus Kristus, pu’un éh ngelepu lu’ jin penyukat penyala’ éh mihin kelunan matai. ³ Kekat ha’ lem Surat Musa bé’ pu’un penyukat ngelepu kelunan jin penyukat penyala’ uban kelunan lemoo’ kenin, bang Allah pu’un penyukat omok ngelepu réh. Pu’un éh ngukum penyala’ ngan memekat pengereken penyala’ jin lem kenin kelunan, neu’ Anak Néh mu’un éh senohoo’ Néh tuai. Iah tuai paléu’ kelunan mu’un, pekua’ layan kelunan éh penyala’, dokoo’ Néh kebéé penyala’. ⁴ Pu’un Allah mena’ Anak Néh dokoo’ lu’ omok ni’ai ngan kivu kekat pengeloo’ Tuhan éh benara’ Néh lem Surat Musa, inah éh ngan uleu’ éh murip kivu pengeloo’ Sahéé’ Ni’ai, éh bé’ murip barei’ kelunan éh bé’ jam urip Tuhan, éh murip kivu kenin réh tengéé’. ⁵ Uban kelunan éh bé’ jam urip Tuhan, pu’un éh murip kivu kenin néh tengéé’. Kelunan éh murip pekua’ barei’ pengeloo’ Sahéé’ Ni’ai, kekat kenin néh pu’un éh kivu sohoo’ Sahéé’ Ni’ai. ⁶ Kelunan éh murip kivu kenin néh tengéé’, kenin éh kenat mihin éh matai. Kelunan éh murip kivu tong sohoo’ Sahéé’ Ni’ai, ga’ kelunan inah murip ngan pawah kenin. ⁷ Kenat péh hun kelunan murip kivu kenin néh tengéé’, inah éh ayau Allah. ⁸ kelunan inah bé’ éh kivu pengeloo’ Allah, ngan semu’un néh iah bé’ omok kivu pengeloo’ Allah. ⁹ Bang bé’ ka’ah murip kivu kenin keh tengéé’, bang ka’ah murip kivu pengeloo’ Sahéé’, inah éh hun néh mu’un Sahéé’ Tuhan pu’un murip dalem kenin keh. Uban séé’-séé’ éh bé’ pu’un Sahéé’ Kristus, bé’ éh anah Kristus. ¹⁰ Bang hun Kristus petem dalem keh, na’ péh usah keh omok matai naneu’ penyala’, bang Sahéé’ Ni’ai omok purip keh uban keh pu’un jian kepéh ngan Allah. ¹¹ Sahéé’ Allah éh pebetéé’ Yésus jin patai Néh, hun Iah pu’un murip dalem keh, boh Allah éh pebetéé’ Kristus jin patai, omok purip usah keh kepéh naneu’ Sahéé’ Néh éh murip dalem keh. ¹² O kekat padéé’ ké’, hun Sahéé’ juk maneu’ éh kenat, adang tekep uleu’ kivu kekat pengeloo’ Sahéé’, ngan mai lu’ kivu kenin lu’ tengéé’. ¹³ Uban hun keh murip kivu kenin keh tengéé’ adang keh matai. Bang hun keh mematai kekat penganeu’ keh éh sa’at, neu’ penyukat Sahéé’ Ni’ai, boh keh omok murip. ¹⁴ Kelunan éh alaa’ Sahéé’ Tuhan pengeja’au néh, kelunan inah éh anah Tuhan mu’un. ¹⁵ Uban Sahéé’ Ni’ai éh nena’ Tuhan ngan keh, bé’ éh ngeripen keh ke’ Néh ngedai keh, bang pu’un Iah maneu’ keh anak Tuhan Allah mu’un. Naneu’ penyukat Sahéé’, inah jalan uleu’ omok mateng Allah, Amam O Amam! ¹⁶ Sahéé’ Tuhan pemung ngan sahéé’ uleu’, pu’un éh bara’ uleu’ anak Allah. ¹⁷ Uban uleu’ éh anak Néh, uleu’ omok alaa’ kekat pengejian éh juk nena’ Allah ngan kelunan éh anah nah. Kenat péh kepéh uleu’ omok alaa’ éh pemung ngan Kristus, kekat éh lepah pejajii’, nah Allah ngan Anak Néh. Uban hun lu’ keta pemung ngan Kristus, uleu’ péh omok pemung ngan Néh lem pengaren Néh. ¹⁸ Hun ké’ seruh tong kekat penusah éh teneng tong uleu’ hun iteu’, si’ik awah éh hun ké’ seruh tong kekat kemurung lu’ pemung ngan Tuhan, ngan na’at Éh dalem kekat pengaren Néh kepéh vam. ¹⁹ Kekat arong penyuai Tuhan mena hun mah savéé’ dau Tuhan ke’ Néh pepoléng irah éh anak Néh mu’un. ²⁰ Uban kekat arong penyuai Tuhan inah lepah kenukum Néh tenéh ke’ néh borok ngan bé’ pu’un jian kepéh. Bé’ makat éh neu’ pengeloo’ kekat arong penyuai Néh éh ke’ néh borok ngan bé’ pu’un jian kenat, bang kekat inah pu’un kenat neu’ pengeloo’ Allah awah. Bang uleu’ jam mu’un kekat penyuai Néh inah ²¹ omok pelepu tong jah dau vam jin ukum éh maneu’ éh kenat nah, adang néh omok pelepu mu’un barei’ irah éh anak Tuhan mu’un. ²² Uban uleu’ jam pah avéé’ hun iteu’ péh kekat arong penyuai Tuhan ngerahéng barei’ redo éh ngerahéng juk nganak, kenat péh kekat penyuai Tuhan ngerahéng otoo’ mena Tuhan ngelepu éh jin ukum. ²³ Bé’ makat éh kekat arong penyuai Néh awah éh ngerahéng kenat, bang pah avéé’ uleu’ kelunan éh pu’un Sahéé’ Ni’ai éh tenah nena’ Allah jin kekat pengena’ Néh éh jah ngan uleu’, uleu’ péh pu’un barei’ okoo’ ngerahéng dalem kenin lu’ kelebéé’ lu’ mena Tuhan maneu’ lu’ anak Néh mu’un ngan ngelepu lu’ jin ukum. ²⁴ Uleu’ pu’un alaa’ urip Tuhan lem kenin lu’ rai neu’ pengelan lu’ tong Iah, na’ péh bé’ pu’un ineu’-ineu’ éh ta’an lu’ hun iteu’, uleu’ ngelan adang lu’ omok tai pemung ngan Néh vam, uban bé’ kelunan omok ngelan melih jah de’ ke’ livah duah koléé’ néh melih éh iah inah ke’. ²⁵ Na’ péh bé’ pu’un ineu’-ineu’ éh ta’an lu’ hun iteu’, ngan kebit kenin lu’ mena pah avéé’ dau lu’ omok tai pemung ngan Tuhan. ²⁶ Kenat péh Sahéé’ pu’un nolong uleu’ dalem kelemoo’ lu’. Uban bé’ uleu’ jam sebayang mu’un, bang Sahéé’ Ni’ai muruh sebayang uleu’ ngan Allah, palaa’ kuraa’-kuraa’ ateng ha’ éh bé’ omok benara’, Iah péh barei’ okoo’ ngerahéng dalem sebayang Néh. ²⁷ Ngan Allah éh jam kenin kekat kelunan, Iah péh jam tong pengeloo’ Sahéé’, uban Sahéé’ Ni’ai menyat jin Allah tong kekat kelunan éh anah nah, pekua’ pengeloo’ Allah. ²⁸ Uban uleu’ jam Allah ngepaléu kekat ineu’-ineu’ kivu pengeloo’ Néh ke’ néh jian, dokoo’ Néh pesavéé’ pengejian ngan kekat kelunan éh pika Iah. ²⁹ Tuhan jam kekat irah éh omok anah nah, Iah lepah ngevéléé’ réh hun réh to bé’ jak pu’un tong tana’, ke’ Néh ngepaléu réh jian barei’ Anak Néh, dokoo’ Anak Néh inah omok ja’au belah kekat uleu’ éh padéé’ Néh. ³⁰ Pu’un Allah tebai irah éh kevéléé’ Néh nah, bé’ Iah tebai réh awah, bang pu’un Iah maneu’ réh jian kepéh tong jumen Allah, bang bé’ makat éh kenat awah, bang Iah juk ngepaléu réh jian pekua’ barei’ Iah pu’un jian. ³¹ Hun lu’ seruh tong kekat inah, ineu’ éh juk benara’ lu’ kepéh? Ieng ke’. Hun Allah pu’un pemung ngan uleu’, bé’ pu’un séé’-séé’ éh omok nyopéé’ uleu’ kepéh. ³² Uban bé’ Tuhan sihun tong Anak Néh, bang Iah mena’ éh ke’ Néh matai uban Néh ngeliwah kekat uleu’. Anak Néh mu’un éh nena’ Néh. Hun néh kenat, adang Iah keloo’ mena’ ineu’-ineu’ éh jah ngan uleu’ kepéh éh omok mihin uleu’ menang. ³³ Bé’ pu’un séé’ omok pesala’ kelunan éh kevéléé’ Allah. Uban Allah éh bara’ réh pu’un jian kepéh tong jumen Néh. ³⁴ Hun néh kenat, bé’ pu’un kelunan éh omok pesala’ réh. Uban Kristus Yésus éh matai, éh mu’un néh Allah éh pebetéé’ Éh jin patai Néh ngan pu’un Éh saa’ na’au’ Allah. Iah péh muruh sebayang uleu’ ngan Allah. ³⁵ Hun néh kenat, séé’ omok pepetat uleu’ jin penika Kristus? Kineu’, omok penusah, ngan pengekurang, ngan pengeketa, ngan pengela’au’, ngan pengekari, ngan kekat-kekat éh omok maneu’ lu’ tioo matai, ngan pengematai éh neu’ kelunan ulak mematai kelunan? Kineu’, omok kekat inah pepetat uleu’ jin penika Kristus? Adang néh bé’ omok. ³⁶ Barei’ ha’ dalem surat Allah pu’un bara’, Naneu’ pengelan mé’ tong Ka’au’, si’ik la’ah mé’ bé’ matai putung-putung dau, bé’ irah pika améé’, pu’un réh maneu’ améé’ barei’ réh maneu’ domba éh juk penatai réh. ³⁷ Adang néh bé’ pu’un ineu’-ineu’ éh omok pepetat uleu’ jin penika Kristus. Uleu’ omok menang naneu’ Iah éh pika uleu’. ³⁸ Uban akeu’ jam bé’ pu’un ineu’-ineu’ éh omok pepetat uleu’ jin penika Kristus, pengematai péh bé’ omok, meliket ngan ineu’-ineu’ péh éh ja’au tong seruga péh bé’ omok, bé’ pu’un ineu’-ineu’ hun iteu’ péh ngan vam péh bé’ éh omok, ³⁹ bé’ pu’un ineu’-ineu’ éh bau lu’ ngan éh ra’ lu’ péh éh omok, bé’ pu’un ineu’-ineu’ ngan semah-semah péh éh omok pepetat lu’ jin penika Allah éh pepoléng Néh ngan uleu’ dalem Kristus Yésus éh Tuhan lu’.

¹ - ² La’ah besau kenin ké’ uban irah Yahudi éh pohoo’ ké’ mu’un, bé’ réh pu’un ngelan tong Tuhan. Bé’ ku’ kenyo bara’ ku’ besau kenin kenat, usah ké’ tengéé’ kivu Kristus ngan kenin ké’ pu’un lem nihau Sahéé’ Ni’ai, akeu’ jam ku’ bé’ pané kenyo. Besau kenin ké’, keta mu’un lem kenin ké’ seruh réh uban réh panak ké’ mu’un bang bé’ irah ngelan Tuhan. ³ Neu’ ké’ pika irah kenat, palaa’ kenin ké’ éh selayoo’ péh éh akeu’ éh teneng ukum ngan bet usah ké’ tengéé’ jin Kristus. ⁴ Uban irah éh kelunan éh kevéléé’ Allah, Allah lepah alaa’ réh anak Néh mu’un ngan peta’an réh tong pengemaren Néh. Iah mena’ jajii’ ngan réh kenat péh Iah mena’ Surat Musa. Irah jam tong penyebayang éh teneng, ngan réh pu’un alaa’ jajii’ Allah. ⁵ Kenat péh irah Yahudi jin pohoo’ tepun réh, inah éh Abraham, Ishak ngan Yakub. Inah kepéh hun Kristus pu’un tuai tong tana’ ke’ Néh paléu kelunan, Iah tuai jin pohoo’ irah inah ke’ éh. Jian Allah éh bau béé-béé nejing kelunan avéé’ pelinguh. Amin. ⁶ Akeu’ bé’ bara’ tong ineu’ éh pejajii’ Allah bé’ petem, ineu’ éh pejajii’ Néh lepah pu’un tenéh, uban bé’ éh ketem lo’ong kelunan Israel éh kevéléé’ Néh. ⁷ Kenat péh bé’ makat kekat pohoo’ kelunan jin Abraham éh omok anak Allah mu’un, uban ka’ ha’ Allah ngan Abraham. Kekat irah jin anak ko’ Ishak, inah awah éh pohoo’ ko’ mu’un, ha’ Néh. ⁸ Neu’ ha’ Allah bara’ kenat, inah uleu’ jam bé’ makat éh kekat pohoo’ Abraham éh omok anak Allah, bang kekat pohoo’ néh éh pu’un neu’ jajii’ Allah, inah awah éh pohoo’ Abraham mu’un. ⁹ Uban ka’ ha’ Allah ngan Abraham, Jah ta’un kepéh boh Akeu’ tuai ngan Sara juk nganak jah anak lakei’, ha’ Allah ngan Abraham. ¹⁰ Bang bé’ éh kenat awah, uban anak Ribkah éh duah nah, Ishak éh tepun lu’, inah éh tamen rawah anak inah. ¹¹ - ¹² Bang uban Allah juk ngevéléé’ jah usah awah jin rawah inah kivu pengeloo’ Néh tengéé’, Allah pu’un bara’ ngan Ribkah, ha’ néh, Anak ko’ éh tuken, iah éh ngerera’ tong padéé’ néh éh tadin ha’ Allah ngan Ribkah. Pu’un Allah pané kenat ngan Ribkah hun rawah anak inah bé’ jak pelohoo’, to bé’ jam maneu’ jian ngan maneu’ sa’at péh. Inah Allah ngevéléé’ ngan tebai jah usah jin rawah kivu pengeloo’ kenin Tuhan tengéé’, bé’ makat uban ineu’-ineu’ éh penganeu’ rawah. ¹³ La’ah barei’ ha’ lem surat Allah, Pu’un Ku’ ngevéléé’ Yakub ngan nebet Ké’ Esau, ha’ Néh. ¹⁴ Hun Allah ngevéléé’ jelua’ awah kelunan nah, kineu’, tekep lu’ bara’ Allah netah kenin? Bé’ éh netah kenin. ¹⁵ Uban ka’ ha’ Néh ngan Musa, Akeu’ pu’un pika kelunan séé’ éh keneloo’ Ké’, kenat péh Akeu’ pu’un masi kelunan séé’ éh keneloo’ Ké’, ha’ Néh ngan Musa. ¹⁶ Hun néh kenat, inah Allah ngevéléé’ kelunan kivu kenin Tuhan tengéé’, bé’ éh kivu pengeloo’ kenin kelunan ngan bé’ éh neu’ ineu’-ineu’ éh penganeu’ réh, bang neu’ penika Allah awah. ¹⁷ Uban pu’un jah ha’ lem surat Allah éh bara’ tong ha’ Allah ngan raja’ Mesir, ka’ ha’ Néh, Pu’un Akeu’ ngevéléé’ ke’ raja’, dokoo’ neu’ ko’, Akeu’ pepoléng penyukat Ké’, dokoo’ kelunan pah tipo tana’ péh omok jam penyukat Ké’ éh pelapah ja’au, ha’ Néh. ¹⁸ Kenat péh jalan Allah pika kelunan séé’ éh keneloo’ Néh, kenat péh Iah jam ngemahéng kenin kelunan séé’ éh keneloo’ Néh kepéh. ¹⁹ Barang pu’un péh kelunan éh seruh, Hun néh kenat uban ineu’ Allah pesala’ kelunan? Séé’ omok ngelawan pengeloo’ Allah. ²⁰ O padéé’ ké’ séé’ ka’ah ke’ keh makang neteng ngan Allah? kineu’ omok kuren tana’ éh senuai réh barei’ lajang nah neteng ngan irah éh suai éh, kineu’ ko’ suai akeu’ ka’? ²¹ Adang éh tekep kelunan éh suai éh maneu’ ineu’-ineu’ kivu pengeloo’ néh. Jin jah lugung tana’, omok éh suai duah pigan. Jah pigan nah penakai néh lebéé’, jah nah penakai néh metok awah, pu’un éh kenat kivu pengeloo’ iah éh suai éh nah. ²² Kenat péh penganeu’ Allah, Iah juk pepoléng kemerek Néh ngan juk pepoléng penyukat Néh kepéh. Kenat péh Iah kebit kenin tong irah éh tekep kenukum Néh. ²³ Inah kepéh Iah juk pepoléng pengaren Néh ngan uleu’ éh penika Néh, inah éh ngan uleu’ éh lepah kevéléé’ Néh jin sahau. ²⁴ Uban uleu’ éh lepah kevéléé’ Néh, bé’ éh jin belah pohoo’ Yahudi awah, bang jin belah kelunan éh tengéé’ pohoo’ péh. ²⁵ Uban ka’ ha’ Allah dalem surat Hosea, Kekat arong kelunan éh bé’ anah Ké’, Akeu’ juk mateng réh kepéh, kelunan éh anah Ké’. Jah pohoo’ kelunan éh bé’ penika Ké’, Akeu’ juk mateng réh kepéh, kelunan éh penika Ké’. ²⁶ La’ah tong retek Ké’ bara’ keh, Bé’ keh anah Ké’, sinah péh Akeu’ juk mateng réh, kelunan éh anah Allah éh murip. Kenat ha’ Allah ²⁷ La’ah inah jah ha’ kepéh éh benara’ Yesaya tong pohoo’ Israel, Na’ péh pohoo’ Israel pinaa’ mu’un pekua’ napun tong baa’ banget, jelua’ awah réh omok alaa’ urip. ²⁸ Hun Tuhan juk ngukum réh Iah tioo ngukum réh ngan jah awah kenin, ha’ Yesaya nah. ²⁹ Barei’ ha’ éh benara’ Yesaya kepéh, ka’ ha’ néh, Hun Tuhan éh ja’au mu’un penyukat bé’ pika jelua’ pohoo’ lu’ ngan purip éh, adang uleu’ teneng kenukum Néh barei’ leboo’ Sodom ngan leboo’ Gomora éh lepah béé inah, ha’ Yesaya. ³⁰ Hun néh kenat, kineu’ ha’ lu’ kepéh, kelunan éh tengéé’ pohoo’ jin irah Yahudi, bé’ éh pitah jalan ke’ réh omok jian kepéh ngan Allah, bang hun iteu’ Allah tengéé’ mihin réh jian kepéh tong Allah neu’ pengelan réh tong Iah. ³¹ Bang pohoo’ Yahudi pitah jah arong adet éh omok mihin réh jian kepéh ngan Allah, bé’ pu’un adet éh omok mihin réh jian kepéh ngan Allah. ³² Uban ineu’ adet inah bé’ omok? Uban kekat penganeu’ réh tong adet inah bé’ éh neu’ pengelan réh tong Allah, bang irah seruh neu’ kekat adet réh kenat, omok réh jian. La’ah tekaleu’ réh tong bateu’ nekaleu’, ³³ éh benara’ Tuhan lem surat Néh, ka’ ha’ Néh. Pu’un Akeu’ modoo’ jah bateu’ éh reken tong Yérusalem, bateu’ inah mihin kelunan tekaleu’ ngan pegup. Bang kelunan éh ngelan tong Iah, bé’ iah pu’un pekawaa’. Kenat ha’ lem surat Allah.

¹ O kekat padéé’ ké’, ngan kekat kenin ké’ akeu’ keloo’ mu’un hun irah pohoo’ ké’ tengéé’ omok alaa’ urip. Akeu’ naten kenin sebayang irah ngan Allah. ² Uban akeu’ jam irah juk kivu Allah bang bé’ réh jam tong pengeloo’ Néh. ³ Uban bé’ réh jam tong jalan Allah omok mihin kelunan jian kepéh ngan Allah. Kenat péh irah kivu tong jalan éh jah ngan bé’ irah ngerera’ kenin tong jalan Allah pu’un mihin kelunan jian kepéh ngan Allah. ⁴ Uban usah Kristus tengéé’ lepah tuai ke’ Néh pesukup kekat ha’ lem Surat Musa, dokoo’ siget-siget kelunan éh ngelan tong Yésus, omok éh jian kepéh ngan Allah. ⁵ Hun Musa nyurat tong jalan kelunan omok jian kepéh ngan Allah, pu’un éh bara’ ka’, Kekat kelunan éh kivu kekat sohoo’ Tuhan éh pu’un lem Surat Musa, omok réh murip. ⁶ Ke’ kelunan omok jian kepéh ngan Allah inah éh neu’ pengelan néh awah. Bé’ irah seruh, séé’ omok tai seruga ke’ néh mihin Kristus tuai. ⁷ Ngan bé’ réh seruh, séé’ omok tai retek patai kelunan éh ke’ néh pebetéé’ Kristus jin belah irah éh matai nah. ⁸ Bang kekat kelunan omok jian kepéh ngan Allah neu’ pengelan réh nah awah. Pu’un réh bara’ tebaraa’ éh tong jalan lu’ alaa’ kenin éh teneng, petepih mu’un éh barei’ ujun, ngan lem kenin keh, inah éh ha’ tebaraa’ éh benara’ mé’ ngan keh rai. ⁹ Kenat péh hun keh bara’ Yésus éh pengeja’au ké’ ngan kenelan éh kenat mu’un lem kenin ko’ ngan ngelan tong Allah lepah pebetéé’ Kristus jin belah kelunan éh matai, boh keh omok jian kepéh ngan Allah nah. ¹⁰ Hun ko’ ngelan éh kenat mu’un ngan bara’ éh kenat ngan irah éh jah kepéh, boh ke’ omok murip. ¹¹ Uban pu’un jah ha’ lem surat Allah kepéh éh bara’, Kekat kelunan éh ngelan tong Iah, bé’ iah pu’un pekawaa’, ha’ Néh. ¹² Neu’ ha’ lem surat Allah kenat, lenaa’ mu’un irah Yahudi péh ngan kelunan éh tengéé’ pohoo’ péh pekua’ awah jalan réh alaa’ urip Tuhan. Uban jah de’ ke’ Allah éh Tuhan kekat kelunan béé, Iah pika séé’-séé’ kelunan éh menyat pika jin Iah. ¹³ Barei’ ha’ lem surat Allah, Siget-siget kelunan éh tebai tong ngaran Tuhan omok éh alaa’ urip, kenat ha’ lem surat Allah. ¹⁴ Kineu’ réh omok menyat pika jin Tuhan da’ né’ bé’ réh jak ngelan tong Iah. Kineu’ réh omok ngelan da’ né’, bé’ réh sakui menéng ha’ tebaraa’ Tuhan? Kineu’ réh omok menéng ha’ tebaraa’ Néh nah da’ né’ bé’ pu’un kelunan bara’ éh ngan réh. ¹⁵ Kineu’ jalan réh omok tai nebaraa’ réh da’, hun néh bé’ jak pu’un nyohoo’ réh tai? Barei’ ha’ lem surat Allah éh bara’, Jian mu’un savéé’ kelunan éh mihin Rengah Jian, ha’ Néh. ¹⁶ Bang bé’ makat kekat irah béé éh ngelan tong Rengah Jian iteu’. Uban ka’ ha’ Yesaya, O Tuhan, séé’ pu’un ngelan tong tebaraa’ éh lepah benara’ améé’ ngan réh? ¹⁷ Hun kelunan menéng ha’ tebaraa’ Tuhan, boh réh omok ngelan, inah éh hun lu’ bara’ Rengah Jian tong Kristus ngan réh. ¹⁸ Bang ha’ ké’ neteng, Kineu’ irah Yahudi, bé’ jak irah pu’un menéng tong Rengah Jian? Pu’un réh menéng idat, barei’ ha’ lem surat Allah, ka’ éh, Pu’un kelunan tai bara’ ha’ tebaraa’ Allah pah tipo tana’. Ha’ tebaraa’ réh lepah avéé’ tong siget-siget arong tana’ éh juu’ péh. ¹⁹ Akeu’ neteng kepéh, Kineu’, bé’ irah Israel jam éh kei? Pu’un réh jam éh. Uban ka’ ha’ Allah lem Surat Musa, La’ah Akeu’ juk peki’ah keh mu’un, uban akeu’ tebai kelunan éh tengéé’ pohoo’ kepéh. Akeu’ juk pekerek keh neu’ Ké’ tebai jah arong kelunan éh suwok kenin. Ha’ Néh. ²⁰ La’ah makang mu’un Yesaya pané kepéh jin Musa, ka’ ha’ néh, Akeu’ tavin kelunan éh bé’ pitah Akeu’, ngan Akeu’ pepoléng usah Ké’ ngan kelunan éh bé’ neteng Akeu’. ²¹ Bang ka’ ha’ Néh ngan irah pohoo’ Israel, Putung dau Akeu’ nyelaka’ kelunan éh ngelapah awah tong ha’ Ké’ ngan mahéng kenin.

¹ La’ah akeu’ neteng kepéh, kineu’ Allah, nebet Néh awah kelunan Israel éh kevéléé’ Néh rai? Bé’ Iah bet irah. Akeu’ péh jah kelunan pohoo’ Israel, akeu’ pu’un jin betah Benyamin éh ayam Abraham. ² Bé’ Allah bet irah éh kevéléé’ Néh jin bu’un. Ka’ah jam tong jah ha’ lem surat Allah éh bara’ tong Elia hun néh sebayang bara’ tong kesa’at pohoo’ Israel, ka’ ha’ néh. ³ O Tuhan, pu’un réh lepah mematai nabi-nabi Ko’, kenat péh kekat éh penakai réh motong ka’an ngan Ko’ rai, lepah tenasa’ réh, jah akeu’ awah éh murip keto ngan irah pitah jalan ke’ réh juk mematai akeu’ kepéh, ha’ Elia. ⁴ Kineu’ ha’ Allah mipa éh kepéh? Ka’ ha’ Allah, pu’un tujuu’ ibu’ keto kelunan éh bé’ pakai butun éh benara’ réh Baal, bé’ réh seva’ éh, ha’ Tuhan. ⁵ Kenat péh hun iteu’, pu’un keto jelua’ kelunan éh kevéléé’ Allah lem penika Néh. ⁶ Pu’un Iah ngevéléé’ réh neu’ penika Néh awah, bé’ éh uban neu’ ineu’-ineu’ éh penganeu’ réh. Hun Allah ngevéléé’ réh uban neu’ penganeu’ réh awah, bé’ éh neu’ penika Néh. ⁷ Hun néh kenat, kineu’ pohoo’ Israel, bé’ réh alaa’ éh penitah réh, inah éh, jah adet éh omok mihin réh jian kepéh ngan Allah. Kerat awah réh éh alaa’ éh penitah réh, irah éh pinaa’ nah barei’ rengen awah réh tong penebai Allah. ⁸ Barei’-okoo’ ha’ lem surat Allah bara’, Allah maneu’ kenin réh marut awah bé’ nesen tong jalan Tuhan. Pah avéé’ hun iteu’ maten kenin réh peseu’, ngan kelingen kenin réh rengen. Kenat ha’ lem surat Allah. ⁹ La’ah ka’ ha’ Daud kepéh, Turut ke’ réh teneng keviheu’ neu’ penguman réh nah. Turut ke’ réh penyala’, turut ke’ réh kenukum. ¹⁰ Turut ke’ ta’an réh nah merem awah dokoo’ réh bé’ omok na’at. Maneu’ réh ngelayau nerekut, uban neu’ kekat penusah réh. ¹¹ Akeu’ juk neteng kepéh, Hun irah Yahudi tekaleu’ rai, kineu’ réh, pu’un réh pegup pah avéé’ réh bé’ omok betéé’ nekedéng kepéh? Bé’ éh kenat. Bang neu’ penyala’ irah Yahudi bé’ ngelan tong Tuhan, inah pesavéé’ urip ngan kelunan éh tengéé’ pohoo’, dokoo’ peki’ah irah Yahudi ngan pebetéé’ kenin réh ke’ réh tavin Tuhan kepéh. ¹² Penyala’ kelunan Yahudi pesavéé’ pengejian éh ja’au mu’un ngan kekat arong kelunan pah tipo tana’, pengekari lem kenin réh pesavéé’ pengekaya’ kenin ngan kelunan éh tengéé’ pohoo’. Hun néh kenat makin péh temurei’ kepéh hun kekat réh moléé’ béé tavin Tuhan, adang pu’un kuraa’-kuraa’ ke ja’au pengejian éh pu’un neu’ réh kepéh. ¹³ Hun iteu’ kepéh akeu’ pané ngan kelunan éh tengéé’ pohoo’ jin irah Yahudi, kelebéé’ ké’ lawah Tuhan belah irah éh tengéé’ pohoo’ adang muruh mu’un ku’ kereja’. ¹⁴ Lem ké’ kereja’ kenat, bé’ akeu’ ngelepan tong pohoo’ ké’ tengéé’ barang kenat péh jalan ké’ menat kenin réh dokoo’ réh omok alaa’ urip kepéh. ¹⁵ Uban irah Yahudi nebet Allah, inah jalan mihin kelunan éh tengéé’ pohoo’ omok pebakéh kepéh ngan Allah. Hun néh kenat, kineu’ kepéh hun réh moléé’ ngan Allah. Adang iteu’ barei’ hun kelunan matai pu’un betéé’ ngan murip kepéh. ¹⁶ Hun lu’ mena’ jah suvang apo ngan Allah jin jah anyam apo, apo éh to ke’ lem anyam inah anah Allah béé. Kenat péh lakat kayeu’ éh anah Allah, avéé’ paka’ néh kepéh anah Allah béé. ¹⁷ Pu’un jelua’ paka’ éh lepah nega’ jin inan saitun éh murip nulah, ngan paka’ saitun éh murip bé’ nulah pepetok kepéh tong inan éh nulah. La’ah ka’ah kelunan éh tengéé’ pohoo’ ka’ah la’ah barei’ paka’ saitun éh pepetok tong inan saitun éh nulah nah. Uban hun iteu’ nah omok lah ka’ah alaa’ urip pekua’ irah Yahudi. ¹⁸ Hun néh kenat mai keh seruh ka’ah pelapah jian jin paka’ éh lepah nega’ Néh inah. Jian keh diva’ kenin. Ka’ah iteu’ paka’ awah keh, bé’ keh omok purip lakat buaa’ inah, bang lakat buaa’ inah éh purip ka’ah. ¹⁹ Barang pu’un keh bara’, Mu’un éh kenat, bang kekat paka’ néh nega’ Néh rai dokoo’ akeu’ omok petok dalem inan néh kepéh. ²⁰ Teneng éh kenat. Pu’un éh nega’ Néh kenat uban réh bé’ ngelan, ngan ka’ah pu’un petem dalem néh uban keh pu’un ngelan. Jian keh diva’ kenin ngan medai. ²¹ Hun Allah bé’ pika irah Yahudi éh tapan paka’ paraa’ éh méé, kineu’, omok Éh pika ka’ah éh barei’ ha’ tapan paka’ paraa’ éh mesem awah? ²² Kenat péh jalan lu’ jam tong penika Allah ngan tong kemahéng kenin Néh kepéh. Tong kelunan éh bé’ ngepelum éh nega’ Néh inah, pu’un Iah mahéng kenin, bang pu’un Iah pika ka’ah, inah éh hun keh petem dalem penika Néh. Bang hun keh bé’ petem dalem penika Néh, ka’ah péh nega’ Néh kepéh. ²³ Kenat péh tong irah Yahudi, hun réh piso jin kesa’at réh ngan ngelan, omok réh petok lem inan inah kepéh, uban Allah pu’un penyukat pepetok réh kepéh. ²⁴ Ka’ah éh tengéé’ pohoo’, ka’ah barei’-okoo’ paka’ buaa’ paraa’ éh mesem éh pepetok Néh tong inan buaa’ paraa’ éh méé kepéh. Pohoo’ irah Yahudi inah éh barei’ paka’ paraa’ éh méé, omok Allah pepetok réh kepéh tong inan buaa’ paraa’ éh méé, uban jin inan éh inah éh nebet Néh bu’un rai. ²⁵ O kekat padéé’ ké’, akeu’ keloo’ ka’ah jam tong éh ma’an mu’un éh bé’ omok kejam kelunan lepah rai, bang hun iteu’ Tuhan pepoléng éh. Bé’ ka’ah omok jam éh neu’ pengejam keh tengéé’, Allah awah éh omok pepoléng éh ngan keh. Tong éh bé’ kejam kelunan lepah rai, inah éh tong éh kemahéng kenin irah Yahudi, bé’ réh mahéng kenin kenat avéé’ pelinguh, pu’un éh kenat pah avéé’ kekat irah éh tengéé’ pohoo’ pu’un tavin Allah. ²⁶ La’ah inah jalan kelunan Yahudi omok alaa’ urip jin Tuhan, barei’ ha’ lem surat Allah éh bara’ ka’, Kelunan éh omok purip réh pu’un Éh juk tuai jin Yérusalem, ngan Iah omok bet kekat kesa’at jin irah Yahudi. ²⁷ La’ah akeu’ juk maneu’ kenat, tovoo’ ké’ mega penyala’ réh, ha’ Allah. ²⁸ La’ah uban irah Yahudi bet Rengah Jian, inah maneu’ réh ayau Allah, dokoo’ ka’ah éh tengéé’ pohoo’ omok ngelan. Bang uban néh pengeloo’ Allah awah, omok réh bakéh Néh kepéh uban neu’ jajii’ Néh ngan tepun réh sahau pu’un éh petem. ²⁹ Bé’ Allah ngepaléu kenin Néh tong kelunan éh kevéléé’ Néh ngan éh tenebai Néh. ³⁰ Sahau rai ka’ah éh tengéé’ pohoo’ pu’un keh ngelapah tong ha’ Allah, bang hun iteu’ Allah pu’un pika keh kepéh, naneu’ pohoo’ Yahudi éh ngelapah awah tong ha’ Néh. ³¹ Barei’ inah kepéh, barei’ ka’ah pu’un alaa’ penika Néh, inah irah Yahudi ngelapah tong ha’ Allah awah, dokoo’ irah péh omok alaa’ penika Allah kepéh. ³² Uban Allah kejeraa’ kekat kelunan keripen tong ineu’-ineu’ éh juk kenivu réh tengéé’, dokoo’ Iah omok pepoléng penika Néh ngan réh kepéh. ³³ Allah pu’un jian mu’un, sukup mu’un éh lem kekat penganeu’ Néh ngan pengejam Néh. Séé’ omok ngelé kekat penganeu’ Néh? Séé’ omok jam tong kekat jalan Néh? ³⁴ Barei’ ha’ dalem surat Allah, Séé’ omok jam tong kenin Tuhan? Séé’ omok nebaraa’ Iah? ³⁵ Séé’ omok mena’ ngan Tuhan dokoo’ Tuhan ngayo kenin kelunan inah mena’ oléé’ néh kepéh ngan néh? ³⁶ Uban kekat-kekat ineu’-ineu’ péh senuai Néh béé. La’ah neu’ Iah péh kekat néh pu’un petem ngan pu’un éh ngan Néh. Jian Allah kenajung kelunan pelinguh. Amin.

¹ O kekat padéé’ ké’, hun néh kenat uban kuraa’-kuraa’ penika Allah ngan lu’, akeu’ nyohoo’ keh mena’ usah keh ngan Allah barei’ jah pengena’ ngan Allah dokoo’ usah keh inah omok anah Tuhan mu’un ngan maneu’ kereja’ Néh, inah éh omok ngepayoo’ kenin Néh. Inah éh jalan éh tekep ngan kelunan éh seva’ Iah. ² Mai keh kivu barék kelunan éh bé’ ngelan tong Tuhan, bang jian keh kejeraa’ Allah ngepaléu kenin keh mu’un neu’ Iah ngepaléu kekat penyeruh keh tong éh sa’at rai. Boh keh omok jam tong pengeloo’ Allah ngan jam tong kekat éh jian ngan éh ngepayoo’ kenin Néh ngan sukup mu’un. ³ Uban neu’ pengena’ Allah éh lepah nena’ Néh ngan ké’, inah akeu’ bara’ ngan ka’ah, mai keh bau kenin ngan ulak juk maneu’ ineu’-ineu’ hun Allah bé’ mena’ éh ngan keh. Kenat péh mai keh seruh ka’ah kelunan éh ulak sa’at awah, ngan Tuhan bé’ keloo’ pakai keh, bang jian siget usah keh petuneng tong kenin keh tengéé’, pekua’ jalan keh ngelan keh omok pakai pengena’ Allah ngan keh. ⁴ Uban tong usah uleu’ pinaa’ arong néh, barei’ ojoo’ ngan gem ngan maten, ngan siget-siget inah tengéé’ éh neu’ Néh. ⁵ Kenat péh na’ péh uleu’ pinaa’ usah, uleu’ péh barei’ jah usah awah dalem Kristus, ngan pu’un pemung pekua’ barei’ kekat arong éh pu’un tong usah kelunan. ⁶ Jian siget usah tigéh maneu’ kereja’ Tuhan. Pinaa’ arong pengena’ Allah lem kenin kelunan dokoo’ kelunan inah omok nolong irah éh jah. Jian keh tigéh pakai kekat pengena’ Néh inah. Hun néh pengena’ Néh ngan keh dokoo’ keh perengah Iah, jian keh maneu’ éh kenat pekua’ jalan keh ngelan keh omok pakai pengena’ Tuhan ngan keh inah. ⁷ Hun néh pengena’ Néh ngan keh dokoo’ keh omok maneu’ kereja’ nolong irah éh jah, jian keh maneu’ éh kenat. Hun néh pengena’ Néh dokoo’ keh nebaraa’ kelunan, jian keh nebaraa’ réh kenat. ⁸ Hun néh pengena’ Néh dokoo’ keh ngegahang kenin kelunan, jian keh maneu’ kenat, ngan hun néh pengena’ Néh dokoo’ keh mena’ ngan irah éh jah, jian keh mena’ éh ngan réh ngan murung kenin. Ngan hun néh pengena’ Tuhan keh pengeja’au réh, jian keh kereja’ mu’un. Kenat péh hun néh pengena’ Tuhan keh masi kelunan, jian keh masi réh ngan jian kenin. ⁹ Jian keh pika kelunan mu’un, mai keh ngelayoo’ awah pika réh. Jian keh leko tong kekat éh sa’at, ngan megem kekat éh jian awah. ¹⁰ Jian keh pika kekat padéé’ keh dalem Kristus, jian keh pata ngerera’. ¹¹ Mai keh leko kereja’, kereja’ mu’un keh. Jian keh maneu’ kereja’ Tuhan ngan kekat kenin keh. ¹² La’ah uban pengelan keh tong Tuhan, jian keh ngelayau murung kenin ngan kebit kenin dalem kekat penusah keh, ngan ngelayau sebayang siget koléé’. ¹³ Jian keh petulat livah keh ngan kekat padéé’ keh dalem Tuhan éh kari mu’un, jian keh alaa’ irah éh nyakai tong lamin keh ngan petubo réh mu’un. ¹⁴ Menyat Allah pika kelunan éh peketa ka’ah, oo’ mu’un ha’ ké’ kenat, menyat Iah pika réh, mai menoo’ réh. ¹⁵ Murung kenin keh ngan kelunan éh murung kenin, ngan mangaa’ keh ngan kelunan éh mangaa’. ¹⁶ Jian ka’ah pekua’ kenin ngan kekat kelunan béé. Mai keh bau kenin, bang maneu’ kekat kereja’ keh ngan diva’ kenin. Mai keh ngajung usah keh uban keh seruh ka’ah kelunan éh jam seruh. ¹⁷ Hun kelunan ngesa’at keh, mai keh mipa kesa’at réh ngan kesa’at kepéh. Pekalai keh maneu’ kekat éh pu’un jian kunah kelunan. ¹⁸ Jian keh pekalai mu’un murip ngan pawah kenin belah kekat kelunan béé. ¹⁹ O kekat padéé’ ké’! mai ka’ah ngesa’at kelunan na’ péh irah ngesa’at keh bu’un, bang kejeraa’ néh Tuhan mipa penganeu’ réh inah, uban pu’un jah ha’ lem surat Allah éh bara’ Akeu’ omok maneu’ irah éh maneu’ keh, Akeu éh mena’ oléé’ ngan réh kepéh ha’ Tuhan. ²⁰ Pu’un jah ha’ kepéh éh bara’, Hun ayau keh la’au’, mena’ ka’an ngan néh. Hun iah mapeu’ batok, mena’ baa’ nesep néh, uban naneu’ penganeu’ keh pika iah kenat, barang iah omok menyaa’ seruh tong kekat barék néh éh sa’at lepah nah, ha’ lem surat Allah. ²¹ Mai keh sopéé’ neu’ kesa’at, bang jian keh nyopéé’ kekat kesa’at palaa’ pengejian.

¹ Jian siget-siget usah kivu sohoo’ kekat pengeja’au peritah, uban Allah ke’ éh kejeraa’ irah omok pengeja’au, kenat péh kekat irah éh kereja’ lem kereja’ peritah, uban Allah éh kejeraa’ éh kenat, inah maneu’ irah pu’un kenat. ² Uban néh kenat séé’-séé’ éh ngelawan ngan ngelapah tong ha’ peritah, inah irah ngelawan tong éh neu’ Allah, ngan kelunan éh ngelawan kenat, adang réh teneng kenukum Tuhan neu’ pengepalui réh tengéé’. ³ Uban kelunan éh maneu’ jian ngan éh teneng barék, bé’ réh medai tong peritah réh, bang kelunan éh maneu’ sa’at adang réh pu’un medai. Kineu’, keloo’ keh bé’ medai tong peritah kei? Hun keh keloo’, jian keh maneu’ kekat éh jian boh pengeja’au keh pu’un mejing keh kepéh. ⁴ Uban peritah nah kelunan éh sohoo’ Allah, ngan pu’un iah pitah jalan ngan kereja’ dokoo’ keh omok murip jian. Bang hun keh maneu’ sa’at, tekep keh medai uban iah pu’un penyukat ngukum keh. Uban peritah nah kelunan éh sohoo’ Allah ngan hun iah merek ngan kelunan éh maneu’ sa’at, inah iah pepoléng keleko ngan kemerek Tuhan tong kesa’at réh inah. ⁵ Uban néh kenat tekep keh kivu sohoo’ peritah nah, bé’ makat uban keh medai kemerek Allah, bang uban kenin keh keloo’ kivu éh kenat. ⁶ Uban néh kenat jian ka’ah mena’ sukai ngan réh, uban irah peritah hun réh kereja’ mu’un ngan maneu’ kekat éh jian, irah péh seleket kereja’ ngan Allah. ⁷ Hun keh bé’ jak sakui bayan sukai, jian keh bayan éh ngan sukup, kenat péh siget koléé’ hun sukup tong tatek keh bayan éh kurah, jian keh bayan éh kivu sohoo’ réh siget koléé’ kepéh. Jian keh ngerera’ ngan murung kekat réh béé. ⁸ Mai keh putang ineu’-ineu’ jin kelunan, bang jian keh pika kekat kelunan. Uban séé’-séé’ éh pika kelunan éh jah, pu’un iah kivu sohoo’ lem Surat Musa. ⁹ Uban kekat sohoo’ lem Surat Musa inah, barei’ ha’ néh bara’, Mai ke’ nuyang, mai ke’ mematai kelunan, mai ke’ nekau, mai ke’ magat ineu’-ineu’ anah irah, kekat sohoo’ inah ngan ineu’-ineu’ éh jah kepéh, pu’un éh lem jah ha’ inah éh bara’, Tekep ke’ murung padéé’ ko’ pekua’ ke’ murung usah ko’ tengéé’, ha’ nah. ¹⁰ La’ah séé’-séé’ éh murung padéé’ néh, bé’ éh maneu’ sa’at ngan néh. Hun néh kenat hun lu’ jam murung réh kenat, boh lu’ kivu kekat sohoo’ lem Surat Musa. ¹¹ Jian keh seruh maneu’ kekat barék éh jian, uban ka’ah jam tong sioo’ éh pu’un hun iteu’, inah éh uban lebéé’ tenéh keh pu’un pegen awah, to’ot keh hun iteu’. Uban jaka’ Tuhan juk purip lu’ lepah danii’ jin hun bu’un lu’ ngelan rai. ¹² La’ah hun iteu’ merem iteu’ juk rema. Hun néh kenat mai lu’ maneu’ kekat penganeu’ éh merem kepéh. Jian uleu’ alaa’ kekat kelevit ngan lajam lu’ hun rema inah pu’un, dokoo’ lu’ ngelawan kekat éh jin merem. ¹³ Tekep uleu’ maneu’ kekat barék éh teneng, pekua’ éh tekep tong kelunan éh murip tong rema, mai maneu’ inga’ éh sa’at ngan mavuk, mai petuyang ngan maneu’ barék éh sa’at, ngan mai punan ngan pana kenin. ¹⁴ Bang jian keh alaa’ Tuhan Yésus Kristus lajam keh mu’un. Ngan mai la’ah keh purip pengagat éh sa’at lem kenin keh pah avéé’ keh kivu sohoo’ néh.

¹ Jian keh alaa’ kelunan éh kurang dalem pengelan néh ngan jian saa’ belah keh. Bang mai keh pesakat ngan néh tong ineu’-ineu’ éh seneruh réh. ² Jah kelunan omok kuman kekat arong ka’an, bang kelunan éh kurang dalem pengelan néh, iah seruh tekep iah kuman ujung ba’an awah. ³ Tong kelunan éh omok kuman kekat arong ka’an, mai éh nyelepéé’ kenin tong kelunan éh bé’ omok kuman éh, kenat péh iah éh kuman ujung ba’an awah, mai éh pesala’ kelunan éh omok kuman kekat arong ka’an, na’ péh iah kuman éh ngan na’ péh iah éh bé’ kuman éh, adang Allah alaa’ iah. ⁴ Séé’ ka’au’ iteu’ ke’ ko’ omok pesala’ kelunan sohoo’ irah éh jah? Pengeja’au nah ke’ omok bara’ ngan néh hun iah maneu’ jian ngan hun néh maneu’ sa’at péh. Adang iah omok maneu’ jian uban Tuhan pu’un penyukat mihin iah keloo’ maneu’ jian. ⁵ La’ah pu’un jelua’ kelunan seruh jah dau pelapah jian jin jah dau éh jah, ngan pu’un jelua’ kepéh éh seruh siget-siget dau nah pu’un éh pekua’ awah. Tekep siget-siget usah seruh dalem kenin néh tengéé’. ⁶ Kelunan éh mihau dau ja’au iah maneu’ éh kenat ke’ néh seva’ Tuhan, kenat péh kelunan éh kuman kekat arong ka’an iah kuman éh ke’ néh seva’ Tuhan, uban iah bara’ jian kenin ngan Allah uban Tuhan éh mena’ ka’an inah. Kelunan éh bé’ keloo’ kuman sin ka’an, iah bé’ kuman éh kenat uban iah juk seva’ Tuhan, ngan iah péh bara’ jian kenin ngan Allah kepéh. ⁷ Uban bé’ pu’un séé’-séé’ éh murip ngan usah néh tengéé’, ngan jah usah péh bé’ éh matai ngan usah néh tengéé’, hun lu’ murip pu’un lu’ murip ngan Tuhan, ⁸ kenat péh hun uleu’ matai inah uleu’ matai ngan Tuhan. Hun néh kenat hun uleu’ murip péh ngan hun lu’ matai péh, adang uleu’ anah Tuhan. ⁹ Uban Kristus lepah matai ngan betéé’ murip kepéh, dokoo’ Iah omok Tuhan kekat kelunan, irah éh lepah matai, kenat péh irah éh murip keto péh. ¹⁰ Hun néh kenat, uban ineu’ ke’ netah kenin tong padéé’ ko’? Kekat uleu’ béé juk nekedéng tong jumen Allah ke’ Néh petuneng kekat penganeu’ lu’. ¹¹ Uban pu’un jah ha’ lem surat Allah éh bara’ ka’, Akeu’ iteu’ Allah éh murip, ha’ Tuhan, Adang siget-siget kelunan ngejekuu’ lep néh ngan ngerera’ tong jumen Ké’. Siget-siget usah réh pu’un ngajung Akeu’. ha’ Néh. ¹² Kenat péh uleu’ jam pesiget-siget usah uleu’ adang uleu’ pu’un bara’ tong kekat penganeu’ usah lu’ tengéé’ ngan Allah. ¹³ Uban néh kenat mai lu’ pesala’ jah usah ngan jah usah kepéh, bang inah éh jian, mai maneu’ ineu’-ineu’ éh omok mihin padéé’ keh dalem Tuhan petat ngan maneu’ penyala’. ¹⁴ La’ah kejam ké’ mu’un neu’ ké’ petem dalem Tuhan Yésus, ka’an éh kinan bé’ éh omok ngesa’at kenin kelunan. Kelunan éh seruh éh sa’at hun néh kuman éh, bang iah kuman éh de’ ke’ inah petusah kenin nah ke’. ¹⁵ Hun keh petusah kenin padéé’ keh neu’ keh kuman ka’an éh seneruh néh bé’ tekep kuman éh, bé’ keh pika padéé’ keh nah. Mai keh petusah kenin padéé’ keh neu’ ka’an éh kinan keh uban Kristus lepah matai ke’ Néh pepurip iah péh. ¹⁶ Uban néh kenat mai éh jian kunah keh nah malui ha’ sa’at tong kelunan éh jah, ¹⁷ uban bé’ lu’ kivu Tuhan neu’ ka’an kinan lu’ ngan baa’ nesep lu’ bang neu’ lu’ maneu’ kekat éh teneng ngan urip éh pawah ngan kemurung éh jin Sahéé’ Ni’ai. ¹⁸ Séé’-séé’ éh jam mihau kekat inah iah pu’un kivu Kristus, iah éh payoo’ tong jumen Allah ngan tong jumen kelunan péh. ¹⁹ Uban néh kenat jian uleu’ ngelayau maneu’ kekat éh mihin kelunan murip ngan pawah, éh omok ngereken kenin lu’. ²⁰ Mai nasa’ penganeu’ Allah neu’ ka’an kinan keh. Kekat arong ka’an omok lu’ kuman éh, bang sala’ lu’ hun lu’ kuman éh awah ngan neu’ lu’ kuman éh inah mihin kelunan éh jah petat. ²¹ Inah jalan éh teneng, pelapah jian mai lu’ kuman ka’an ngan mai mesep éh maneu’ lu’ mavuk, ngan mai maneu’ ineu’-ineu’ éh omok mihin padéé’ lu’ petat. ²² Hun keh seruh tekep kuman éh péh ngan bé’ tekep kuman éh péh, mihau éh lem kenin ko’ tengéé’, kejeraa’ éh pu’un tong jumen Allah awah. Jian mu’un ngan kelunan éh omok kuman kekat ka’an ngan bé’ pu’un ineu’ petusah kenin néh. ²³ Bang séé’-séé’ éh duah kenin bé’ jam seruh hun néh omok kuman ngan bé’ péh, boh éh ulak kuman éh awah, pu’un Allah ngukum iah, uban iah kuman ngan bé’ ngelan. La’ah ineu’-ineu’ éh neu’ lu’ éh bé’ pu’un ngan pengelan lu’, penyala’ awah éh.

¹ La’ah uleu’ éh gahang dalem pengelan lu’ tong Tuhan, tekep lu’ nolong bii’ kebahat penusah kelunan éh kurang pengelan. Mai lu’ maneu’ éh omok ngejian kenin usah lu’ tengéé’. ² Jian siget usah uleu’ ngepayoo’ kenin padéé’ lu’, dokoo’ ngegahang iah kepéh dalem pengelan néh. ³ Uban Kristus bé’ éh maneu’ éh omok ngejian kenin Néh tengéé’, barei’ jah ha’ lem surat Allah éh bara’ ka’, La’ah pu’un kelunan merek ngan keh, rek réh inah pu’un éh teneng tong Akeu’, kenat ha’ lem surat Allah. ⁴ La’ah kekat ha’ lem surat Allah pu’un éh senurat dokoo’ nebaraa’ uleu’, dokoo’ uleu’ omok ngelan ngan alaa’ kebit kenin ngan alaa’ pengepapung kenin neu’ ha’ tebaraa’ inah. ⁵ Jian Allah éh mihin lu’ kebit kenin ngan éh ngegahang kenin lu’ nah mihin ka’ah pekua’ kenin neu’ ka’ah kivu kenin Yésus Kristus, ⁶ dokoo’ ka’ah béé ngan jah kenin, ngan jah ha’, omok mejing Allah éh Tamen Yésus Kristus éh kenelan lu’. ⁷ Uban néh kenat jian ka’ah pata pepalaa’ ngan jian kenin, barei’ Kristus lepah alaa’ ka’ah dokoo’ kelunan omok mejing Allah. ⁸ Uban ha’ ké’ ngan ka’ah, Kristus tuai paléu barei’ jah kelunan ripen awah belah kelunan Yahudi, dokoo’ kelunan omok jam Allah petem tigéh pesavéé’ kekat jajii’ Néh ngan tepun kelunan Yahudi, inah éh Abraham, Ishak, ngan Yakub. ⁹ Inah éh kepéh dokoo’ kelunan éh tengéé’ pohoo’ omok mejing Allah uban penika Néh, pekua’ barei’ ha’ lem surat Allah éh bara’ ka’, La’ah kenat péh jalan ké’ mejing Ka’au’ belah kekat kelunan éh tengéé’ pohoo’ jin irah Yahudi. La’ah akeu’ juk nyanyi mejing ngaran Ko’, ha’ néh. ¹⁰ Pu’un jah ha’ kepéh éh bara’ ka’, Ka’ah éh tengéé’ pohoo’, jian keh murung kenin pemung ngan kelunan éh kevéléé’ Allah, ha’ néh. ¹¹ Pu’un jah ha’ kepéh éh bara’ ka’, Mejing Tuhan O kekat kelunan éh tengéé’ pohoo’ jin irah Yahudi. Mejing Iah mu’un kekat arong kelunan, ha’ néh. ¹² Kenat péh ha’ lem surat Yesaya kepéh bara’, La’ah jah kelunan jin puku’ Isai juk tuai, Allah pu’un ngajung Iah ke’ Néh omok pengeja’au kekat kelunan éh tengéé’ pohoo’ jin irah Yahudi. La’ah irah juk ngelan tong Iah kepéh, ha’ néh. ¹³ Jian Allah éh kenelan lu’, pepenoo’ kenin ka’ah ngan kekat kemurung Néh ngan pengepawah Néh, neu’ pengelan keh tong Iah, dokoo’ ka’ah omok pepit dalem pengelan keh neu’ penyukat Sahéé’ Ni’ai. ¹⁴ O kekat padéé’ ké’, kejam ké’ ka’ah pu’un pika ngan jam seruh maneu’ pekua’ barei’ éh benara’ ké’ iteu’, ngan kejam ké’ ka’ah jam petebaraa’ belah ka’ah ke’. ¹⁵ Na’ péh kenat dalem surat ké’ iteu’ akeu’ makang nyurat éh dokoo’ petesen ka’ah kepéh. Akeu’ makang maneu’ éh kenat uban Allah pu’un ngevéléé’ akeu’ ¹⁶ dokoo’ ké’ omok maneu’ kereja’ Kristus Yésus belah kelunan éh tengéé’ pohoo’. Lem ké’ bara’ Rengah Jian éh jin Allah ngan kelunan éh tengéé’ pohoo’ kenat, dokoo’ ké’ omok mena’ réh ngan Allah, barei’ kelunan éh mena’ ka’an ngan Tuhan rai, kenat péh akeu’ mena’ réh ngan Allah ke’ réh omok anah nah neu’ Sahéé’ Ni’ai. ¹⁷ Uban néh kenat dalem Kristus Yésus, murung kenin ké’ maneu’ kereja’ Allah. ¹⁸ Makang kenin ké’ bara’ tong kekat jalan Kristus ngevéléé’ akeu’ dokoo’ ké’ mihin kelunan éh tengéé’ pohoo’ jin irah Yahudi kivu Allah kepéh. Pu’un éh kenat neu’ ha’ tebaraa’ Tuhan éh nenéng réh ngan kuraa’ arong penganeu’ ké’ kepéh éh ta’an réh kepéh, ¹⁹ ngan neu’ kuraa’ telana’ ja’au éh ngebéé kenin réh, ngan neu’ penyukat Sahéé’ Ni’ai kepéh. La’ah jin Yérusalem avéé’ tong tana’ Ilirikum pu’un akeu’ tai bara’ Rengah Jian tong Kristus ngan réh. ²⁰ Jin bu’un ké’ lakau rai, gahang kenin ké’ keloo’ bara’ Rengah Jian tong tana’ éh bé’ jak jam ngaran Kristus, dokoo’ mai akeu’ tai ngan kelunan éh pu’un menéng Rengah Jian neu’ kelunan éh tengéé’, ²¹ barei’ ha’ lem surat Allah bara’, La’ah kelunan éh bé’ jak jam rengah tong Iah, omok maten kenin réh pekang. Kelunan éh bé’ jak menéng omok réh nesen éh kepéh. ²² Keloo’ mu’un ku’ perengah Tuhan semah-semah péh, bang pinaa’ koléé’ hun ké’ seruh juk tai tavin ka’ah, meraran awah ku’. ²³ Bang hun iteu’ uban kereja’ ké’ tong tana’ siteu’ lepah ma’o, na’ péh lem kuraa’ ta’un lepah rai bé’ ku’ omok angai nepah ka’ah, ²⁴ hun iteu’ akeu’ ngelan omok angai da’. Tovoo’ ké’ lakau tai tana’ Sepanyol akeu’ juk mokoo’ ngan keh jak, la’o inah boh keh omok nolong akeu’ tai. ²⁵ Bang hun iteu’ bé’ jak ku’ kangai ngan ka’ah akeu’ juk tai Yérusalem tenah, dokoo’ ké’ nolong kelunan éh anah Tuhan sitai. ²⁶ Uban sidang tong Makedonia ngan Akhaya pu’un réh mena’ kuraa’-kuraa’ pengena’ nyohoo’ akeu’ patet éh ngan sidang tong Yérusalem. Bé’ réh sihun tong pengena’ réh inah, bang pu’un réh mena’ éh dokoo’ nolong kelunan kari éh belah irah anah Tuhan tong Yérusalem. ²⁷ Kenin réh tengéé’ juk maneu’ kenat, bé’ pu’un séé’ éh nyohoo’ réh, bang éh mu’un néh tekep réh maneu’ kenat uban irah Yahudi rai pu’un réh mena’ kuraa’-kuraa’ kejian dalem kenin irah éh tengéé’ pohoo’, kenat péh hun iteu’ kepéh, tekep irah éh tengéé’ pohoo’ nolong irah Yahudi dalem pengekari réh kepéh. ²⁸ La’o ké’ tai kenat ngan mena’ kekat rigit inah ngan réh, boh akeu’ sa’o tai tana’ Sepanyol, tovoo’ inah akeu’ tuai nepah ka’ah kepéh. ²⁹ La’ah akeu’ jam tovoo’ ké’ tuai tavin ka’ah, adang ka’ah pu’un alaa’ kekat pengejian Kristus. ³⁰ O kekat padéé’ ké’, akeu’ nyohoo’ ka’ah dalem ngaran Tuhan Yésus Kristus, ngan uban penika Sahéé’ Ni’ai ngan uleu’, jian keh gahang sebayang tong akeu’. ³¹ Sebayang menyat Tuhan mihau ku’ jin kelunan éh bé’ ngelan Tuhan tong tana’ Yudia, ngan inah kepéh dokoo’ kereja’ ké’ tong Yérusalem omok payoo’ ngan kelunan éh anah Allah, ³² Ngan inah kepéh hun néh pengeloo’ Allah, dokoo’ ké’ omok angai ngan murung kenin, ngan alaa’ jian kenin pemung ngan ka’ah kepéh. ³³ Jian Allah éh mihin lu’ murip pawah, jian Iah pu’un pemung ngan ka’ah béé. Amin.

¹ La’ah akeu’ juk bara’ ngan keh tong jah padéé’ lu’ redo pu’un ke’ éh angai dat, ngaran néh Pebe éh, iah éh nolong irah tong sidang Kengkrea. ² Jian keh alaa’ éh dalem ngaran Tuhan, pekua’ éh tekep ngan kelunan éh anah Allah, ngan nolong éh dalem kekat kereja’ néh da’. Uban usah néh tengéé’ pu’un nolong kelunan pinaa’, pah avéé’ iah nolong usah ké’ tengéé’ péh. ³ Bara’ tabi’ ngan Priskila ngan Akwila, rawah éh bakéh ké’ dalem kereja’ Kristus Yésus, ⁴ si’ik awah la’ah rawah bé’ matai rai uban roh nolong akeu’. Jian kenin ké’ uban rawah bé’ matai, bé’ éh akeu’ awah éh jian kenin, bang kekat sidang belah kelunan éh tengéé’ pohoo’ péh. ⁵ Bara’ tabi’ kepéh ngan sidang éh tong lamin roh. Tabi’ ngan Epenetus éh bakéh ké’ mu’un rai, iah éh bu’un ngelan tong Kristus jin belah irah tong tana’ Asia. ⁶ Tabi’ ngan Meriam éh kereja’ mu’un nolong ka’ah. ⁷ Tabi’ ngan Andronikus ngan Yunias, rawah éh kua’ pohoo’ ngan ké’, éh pu’un tong lamin tutup pemung ngan ké’ lepah rai, kekat irah lawah malai mu’un ngan rawah inah, rawah inah ngelan tong Tuhan hun ké’ to bé’ jak ngelan irai. ⁸ Tabi’ ngan Ampliatus, bakéh ké’ mu’un dalem kereja’ Tuhan. ⁹ Tabi’ ngan Urbanus, jah kelunan kepéh éh kereja’ pemung ngan améé’ dalem kereja’ Kristus, kenat péh Stakhis, bakéh ké’ irai. ¹⁰ Tabi’ ngan Apeles éh poléng mu’un pu’un ngelan tong Tuhan, bé’ iah bet Tuhan na’ péh ja’au penusah néh rai. Tabi’ ngan kekat irah panak Aristobulus. ¹¹ Tabi’ ngan Herodion éh panak ké’. Tabi’ ngan kekat kelunan Kristén tong lamin Nakkisus. ¹² Bara’ tabi’ ngan Tripina ngan Triposa, rawah redo éh maneu’ kereja’ Tuhan, ngan bakéh ké’ Persis éh kereja’ mu’un ngan Tuhan. ¹³ Tabi’ ngan Rupus éh jian mu’un-mu’un kereja’ ngan Tuhan, tabi’ kepéh ngan tinen néh éh ngelayau alaa’ akeu’ seleket anak usah néh mu’un. ¹⁴ Tabi’ ngan Asinkritus ngan Plegon ngan Hermes ngan Patrobos ngan Hermas ngan kekat padéé’ lu’ lem Kristus éh pemung ngan réh. ¹⁵ Tabi’ ngan Pilologus ngan Yulia ngan Nereus ngan padéé’ néh éh redo, ngan Olipas, ngan kekat kelunan éh ngelan tong Tuhan éh pemung ngan réh. ¹⁶ Jian ka’ah petabi’ jah usah ngan jah usah. La’ah kekat sidang Kristus bara’ tabi’ ngan ka’ah. ¹⁷ O kekat padéé’ ké’ akeu’ nyohoo’ ka’ah jian keh mavaa’ dai pu’un kelunan tuai mihin tebaraa’ éh petawang kelunan ngan pepetat réh jin pengelan réh tong Tuhan, éh bara’ jah ha’ tebaraa’ éh tengéé’ jin éh benara’ ké’ ngan keh rai. Jian ka’ah ngelepat jin irah. ¹⁸ Uban bé’ réh maneu’ kereja’ Kristus éh Tuhan uleu’, bang irah maneu’ kekat éh omok ngejian kenin réh tong kemagat réh éh sa’at. La’ah neu’ ha’ réh éh méé ngan jian, inah irah ngelavo’ kelunan éh bé’ malai. ¹⁹ La’ah kekat kelunan lepah menéng rengah ka’ah pu’un ngelan tong Rengah Jian tong Yésus Kristus, uban néh kenat akeu’ murung kenin, bé’ medai. Bang akeu’ keloo’ ka’ah malai tong kekat éh jian, bang bé’ malai tong kekat éh sa’at. ²⁰ La’ah Allah éh mihin lu’ pawah, iah éh omok nyaga’ Sitan ra’ gem keh. La’ah jian Yésus Kristus Tuhan lu’ pu’un pepit penika Néh ngan ka’ah. ²¹ La’ah Timotius bakéh ké’ dalem kereja’ iteu’, bara’ tabi’ ngan ka’ah, kenat péh irah panak ké’ Lukius ngan Yason ngan Sosipater, irah kepéh bara’ tabi’. ²² Akeu’ Tertius éh nyurat ha’ Paulus iteu’, akeu’ péh bara’ tabi’ ngan keh dalem ngaran Tuhan. ²³ La’ah Gayus péh, lakei’ éh alaa’ améé’ sebayang tong lamin néh, iah kepéh bara’ tabi’. Kenat péh Érastus, kelunan éh kereja’ peritah mihau rigit, ngan padéé’ lu’ Kuartus, rawah péh bara’ tabi’. ²⁴ Tuhan Yésus Kristus pu’un pepit penika Néh ngan ka’ah. Amin. ²⁵ Jian lu’ mejing Allah. Iah pu’un penyukat ngereken kenin ka’ah dalem pengelan keh tong Rengah Jian éh benara’ ké’ tong Yésus Kristus. Adang Tuhan juk purip ka’ah éh tengéé’ pohoo’. Hun sahau rai bé’ kelunan jam tong kenin Tuhan kenat uban néh pelim, ²⁶ bang hun iteu’ bé’ éh pelim kepéh pu’un réh jam éh neu’ kekat ha’ éh senurat irah nabi, ngan neu’ sohoo’ Allah éh pu’un pelinguh pu’un iteu’ poléng ngan kelunan béé dokoo’ réh omok ngelan ngan kivu Tuhan kepéh. ²⁷ Jah awah Allah ngan Iah jam kekat ineu’-ineu’, tekep uleu’ mejing Iah pah avéé’ pelinguh neu’ Yésus Kristus. Amin.