ÉH POLÉNG
11 Surat iteu’ pu’un bara’ tong kekat éh Pepoléng Yésus Kristus ngan Yohanes. Allah bara’ éh ngan Kristus, ngan Kristus pepoléng ineu’ éh, juk avéé’ bé’ makat lebéé’ la’ah, ngan irah éh sohoo’ Allah. Kristus nyohoo’ meliket Néh dokoo’ bara’ ngan Yohanes, kelunan sohoo’ Néh, tong kekat inah. 2 Yohanes kepéh pu’un bara’ tong kekat éh ta’an néh inah. La’ah kekat ha’ lem surat iteu’ bara’ tong kekat éh benara’ Allah, ngan tong kekat éh pepoléng Yésus Kristus ngan néh. 3 Murung kenin irah éh purung surat iteu’ ngan sidang. Murung kenin irah éh menéng ha’ éh benara’ iteu’ ngan éh tigéh kivu tong ineu’ éh senurat dalem surat iteu’, uban bé’ lebéé’ la’ah kekat iteu’ adang juk pu’un kenat mu’un. 4 Akeu’ Yohanes maneu’ surat iteu’ ngan tujuu’ sidang éh pu’un tong tana’ Asia. Jian penika ngan pengepawah éh jin Allah pu’un ngan keh, inah éh Allah éh pu’un hun iteu’ ngan éh lepah pu’un tenéh ngan éh juk tuai kepéh, kenat péh jin tujuu’ sahéé’ éh pu’un saa’ jumen nyun Allah. 5 Kenat péh jin Yésus Kristus éh tigéh lem kekat éh benara’ Néh, Iah éh bu’un bu’un pebetéé’ Allah jin patai Néh ngan Iah éh raja bau kekat raja tong tana’. Yésus pika uleu’ ngan neu’ dahaa’ Néh, inah Iah ngelepu uleu’ jin kekat penyala’ lu’. 6 Kristus maneu’ uleu’ imam éh pu’un penyukat pemung ngan Néh ngan éh mena’ usah néh ngan Allah, éh Tamen néh. Kekat pengaren ngan penyukat anah Yésus pelinguh-linguh. Amin! 7 Na’at keh, pu’un Éh tuai lem avun. Adang kekat kelunan pu’un na’at Éh, pah avéé’ irah éh muja’ Éh rai péh pu’un na’at Éh. Pinaa’ arong kelunan pah tipo tana’ besau kenin na’at savéé’ Néh. Oo’ adang néh pu’un kenat! Amin. 8 Akeu’ éh bu’un ngan ga’ péh, kenat ha’ Allah éh pelapah ja’au penyukat, éh pu’un hun iteu’, ngan éh lepah pu’un tenéh, ngan éh juk tuai kepéh. 9 La’ah akeu’ éh padéé’ keh Yohanes, ngan barei’ ka’ah jam keta pemung ngan Yésus, akeu’ péh barei’ ka’ah lem kekat pengeketa iteu’, pu’un lem nihau Tuhan, ngan ngeretep ngan kebit kenin. Pu’un réh marau akeu’ tai Pulau Patmos uban ké’ bara’ ha’ tebaraa’ Allah ngan bara’ tong kekat éh kejam ké’ tong Yésus. 10 La’ah tong dau Tuhan, Sahéé’ Ni’ai ngamit kenin ké’, ngan nenéng ké’ jah ha’ éh ja’au mu’un, barei’ ha’ serupit, ngan pu’un éh pané jin likot ké’. 11 Ka’ ha’ Néh ngan ké’ jian ke’ nyurat kekat éh ta’an ko’ da’ ngan pekateu’ surat iteu’ ngan sidang tong tujuu’ leboo’ ja’au iteu: Épesus, Smirna, Pergamus, Tiatira, Sardis, Piladelpia, ngan Laodikia. Ha’ Néh. 12 La’ah pupah ku’ juk na’at éh dokoo’ ké’ jam séé’ éh pané kenat ngan ké’. La’ah ta’an ké’ tujuu’ pelita’ mas. 13 Belah kekat pelita’ inah nekedéng jah usah, layan Néh barei’ kelunan, pu’un éh memakai livah pakai éh kebit avéé’ tong gem Néh, ngan tong kebah Néh peseviget neu’ mas. 14 La’ah bok Néh mebéng, barei’ lamut éh mebéng, barei’ avun éh mebéng mu’un ngan maten Néh barei’ tekok luten. 15 Gem Néh mening barei’ temagaa’ éh lepah teni’ai ngan nosoo’ ngan ha’ Néh barei’ ha’ desai o’ong éh ja’au. 16 La’ah lem ojoo’ Néh saa’ na’au’ pu’un tujuu’ kenyuhai ngan jin ujun Néh musit po’é éh peseripa nyahit. La’ah da’in Néh ngada barei’ ada maten dau tovoo’ dau pejek. 17 Hun ké’ na’at Éh, akeu’ mohong déhéé’ gem Néh, barei’ kelunan éh lepah matai. Bang ojoo’ Néh saa’ na’au’ napai Néh tong akeu’ ka’ ha’ Néh ngan ké’ Mai ke’ medai Akeu’ éh bu’un ngan Akeu’ éh ga’ péh. 18 Akeu’ éh murip. Pu’un Ku’ lepah matai rai, bang na’at ke’, pu’un Ku’ murip kepéh avéé’ pelinguh. Akeu’ pu’un penyukat bau kekat éh maneu’ réh matai ngan jalan patai. 19 Uban néh kenat jian ke’ nyurat kekat éh pu’un ta’an ko’ da’, kekat éh pu’un hun iteu’ ngan kekat éh juk avéé’ vam. 20 Inah éh sin tong tujuu’ kenyuhai éh pu’un lem ojoo’ Ké’ saa’ na’au’ ngan tong tujuu’ pelita’ mas éh ta’an ko’ nah. Ka’ éh, sin tong tujuu’ kenyuhai nah, inah éh meliket tong tujuu’ sidang. Tujuu’ pelita’ nah, inah éh tujuu’ sidang, ha’ Néh.
21 La’ah ha’ Néh kepéh, Jian ke’ nyurat ha’ Ké’ iteu’ ngan meliket tong sidang Épesus. Ka’ ha’ jin Iah éh ngamit tujuu’ kenyuhai lem ojoo’ Néh saa’ na’au’, éh lakau belah tujuu’ pelita’ mas. 2 Akeu’ jam tong kekat penganeu’ ko’, ngan Akeu’ jam tong jalan ko’ kereja’ muruh mu’un, ngan Akeu’ jam ke’ pu’un kebit kenin. Ngan Akeu’ jam ke’ leko mu’un tong kelunan éh maneu’ sa’at, ngan pu’un ke’ petuneng irah éh ngelayoo’ awah lawah Tuhan, bang bé’ réh lawah Néh mu’un, ngan kejam ko’ irah pané kenyo awah. 3 Pu’un ke’ kebit kenin, ngan pinaa’ arong penusah ko’ uban ko’ ngelan tong Akeu’, bang bé’ ke’ putui pengelan. 4 Bang inah éh pengekurang ko’, uban bé’ ke’ murung Akeu’ barei’ hun bu’un bu’un ko’ ngelan tong Akeu’ rai. 5 Jian ke’ nesen ka’au’ lepah pelohoo’ dilem mu’un lem penyala’. Jian keh pekoléé’ kenin jin penyala’ ko’ ngan maneu’ ineu’ éh naneu’ ko’ bu’un-bu’un ko’ ngelan tong ku’ rai. Hun ko’ bé’ adang akeu’ tuai tavin ke’ ngan pepiso pelita ko’ inah jin retek néh. 6 Bang pu’un jah jalan éh jian éh neu’ ko’, inah éh uban ko’ leko mu’un tong kekat penganeu’ irah éh kivu adet Nikolaus, barei’ Akeu’ péh leko tong néh, ha’ Néh. 7 Hun ko’ pu’un kelingen omok menéng, jian ke’ menéng kekat ha’ éh benara’ Sahéé’ Ni’ai ngan kekat sidang. Kekat irah éh nyopéé’ kekat arong kesa’at, Akeu’ kejeraa’ réh kuman buaa’ éh purip kelunan éh pu’un tong pulah Allah. 8 Jian ke’ nyurat ha’ ké’ iteu’ ngan meliket sidang tong Smirna. Iteu’ ha’ éh benara’ jin Iah éh bu’un ngan éh ga’ péh, éh lepah matai ngan éh murip kepéh. 9 Akeu’ jam kekat penusah ko’, Akeu’ jam ke’ pu’un kari, bang éh mu’un néh ka’au’ kaya’. Akeu’ jam kekat ha’ sa’at éh jalan irah Yahudi pesala’ ke’. Irah bara’ réh pohoo’ Yahudi, bang bé’ réh pohoo’ Yahudi mu’un, pu’un réh lem kamit Sitan. 10 Mai ke’ medai tong pengeketa éh bé’ lebéé’ la’ah juk teneng tong ke’. Nesen ke’! Adang Sitan juk tupat ke’. Adang iah ngamit ngan masek kuraa’-kuraa’ usah jin belah keh lem lamin tutup. Adang keh teneng pengeketa kelebbéé’ jah poloo’ dau. Jian keh tigéh tong Akeu’ pah avéé’ matai, ngan adang akeu’ mena’ urip pelinguh ngan keh uban keh lepah menang. 11 Hun ko’ pu’un kelingen omok menéng, jian ke’ menéng kekat ha’ éh benara’ Sahéé’ Ni’ai ngan kekat sidang. Irah éh nyopéé’ kekat arong kesa’at, bé’ réh teneng pengeketa neu’ pematai éh keruwah koléé’. 12 Jian ke’ nyurat ha’ Ké’ iteu’ ngan meliket sidang tong Pergamus. Iteu’ ha’ éh benara’ jin Iah éh pu’un po’é éh peseripa nyahit. 13 Kejam Ké’ retek ko’ mokoo’, inah éh retek Sitan pengeja’au. Pu’un ke’ tigéh tong Akeu’. Ka’ah bé’ bet pengelan keh tong Akeu’. Sioo’ Antipas kelunan éh tigéh perengah tong Akeu’ pu’un penatai réh tong retek Sitan mokoo’ nah. 14 Bang pu’un pengekurang ko’, uban jelua’ keh pu’un kivu ha’ tebaraa’ Bileam éh nebaraa’ Balak tong jalan néh mihin kelunan Israel maneu’ penyala’ neu’ réh kuman ka’an éh nena’ réh ngan butun, ngan neu’ réh petuyang ngan maneu’ kuraa’-kuraa’ barék éh sa’at. 15 Kenat péh pu’un jelua’ keh kivu ha’ tebaraa’ Nikolaus. 16 Uban néh kenat jian ke’ pekoléé’ kenin jin penyala’ ko’ nah. Hun ko’ bé’ pekoléé’ kenin jin penyala’ ko’ adang Akeu’ pu’un tuai laho ngan ngelawan kekat irah inah palaa’ po’é éh musit jin ujun ké’, ha’ Néh. 17 Hun ko’ pu’un kelingen omok menéng, jian ke’ menéng kekat ha’ éh benara’ Sahéé’ Ni’ai ngan sidang. La’ah ngan irah éh menang, Akeu’ juk mena’ mana éh nodoo’ Ké’ pelim. Kenat kepéh Akeu’ juk mena’ ngan siget usah réh jah bateu’ éh mebéng tong bateu’ inah senurat ngaran maréng, éh bé’ omok kenejam séé-séé’ péh, bang irah éh alaa’ éh awah éh jam éh. 18 Jian ke’ nyurat ha’ Ké’ iteu’ ngan meliket sidang tong Tiatira. Inah ha’ éh benara’ Anak Allah, éh maten Néh barei’ tekok luten, gem Néh mening barei temagaa’ éh lepah nosoo’ rai. 19 Akeu’ jam kekat éh lepah naneu’ ko’. Akeu’ jam ka’ah kua’ pepika, ka’ah tigéh, ka’ah kua’ petolong, ngan ka’ah kebit kenin lem pengeketa. Akeu’ jam ka’ah hun iteu’ pu’un maneu’ kereja’ pelapah pinaa’ jin éh neu’ keh sahau sioo’ bu’un-bu’un keh ngelan tong Akeu. 20 Bang jah awah éh kurang tong ke’, uban ko’ peturut Isebél redo éh bara’ iah senohoo’ Allah nebaraa’ irah éh anah ke’. Palaa’ ha’ tebaraa’ néh iah petawang irah éh sohoo’ ké’ pah avéé’ irah maneu’ penganeu’ éh segit ngan kuman penguman éh lepah nena’ réh ngan butun. 21 Akeu’ lepah mena’ bi’en ngan néh ke’ néh omok pekoléé’ kenin jin penyala’ néh, bang bé’ iah keloo’ pekoléé’ kenin jin kekat barék néh éh segit. 22 Uban néh kenat, Akeu’ juk ngukum iah palaa’ penyakit ngan irah éh petuyang ngan néh adang teneng pengeketa éh Sa’at mu’un. Akeu’ juk maneu’ kekat inah hun iteu’ péh, hun réh bé’ tioo pekoléé’ kenin jin penganeu’ réh éh segit éh naneu’ réh pemung ngan néh. 23 Akeu’ péh juk mematai kekat irah éh kivu iah boh kekat sidang omok jam Akeu’ éh jam lem penyeruh ngan kenin kelunan. Akeu’ juk mena’ oléé’ ngan keh kivu penganeu’ siget usah. 24 Bang Ka’ah éh jah éh mokoo’ tong Tiatira bé’ kivu ha’ tebaraa’ éh sa’at inah. Ka’ah bé’ pekalai limu’ jin Sitan Akeu’ bara’ ngan Ka’ah bé’ Akeu’ ngebahat ka’ah palaa’ ha’ sohoo’ éh jah. 25 Bang jian keh petem mihau tong ineu’ éh pu’un ngan keh, pah avéé’ akeu’ pu’un tuai kepéh. 26 - 28 La’ah kekat kelunan éh nyopéé’ kekat arong kesa’at ngan éh maneu’ kekat pengeloo’ Ké’ pah avéé’ ga’ néh, Akeu’ juk mena’ penyukat barei’ nalaa’ ké’ jin Tamen ké’. Irah omok alaa’ Penyukat jin Akeu’ ke’ réh omok pengeja’au bau kekat arong kelunan palaa’ penyukat éh gahang mu’un seleket daven ngan dokoo’ mepa’ réh barei’ kuren tana’. Irah péh juk alaa’ kenyalung teka rema jin Akeu’. 29 Hun ko’ pu’un kelingen omok menéng jian ke’ menéng ineu’ éh benara’ Sahéé’ Ni’ai ngan sidang!
31 Jian ke’ nyurat ha’ Ké’ iteu’ ngan meliket tong sidang Sardis. Iteu’ ha éh benara’ jin Iah éh pu’un tujuu’ sahéé’ éh jin Allah ngan tujuu’ kenyuhai inah. Akeu’ jam ineu’ éh maneu’ keh. Ka’ah benara’ réh murip semu’un néh Ka’ah Matai! 2 Uban néh kenat to’ot ke’ ngan ngegahang éh to de’ ke’ ngan ko’ dai néh béé matai awah. Uban kekat penganeu’ ko’ mepai awah, bé’ jak éh jian mu’un tong ta’an Allah ké’. 3 Jian ke’ nesen tong ineu’ éh lepah benara’ ngan ko’ ngan ineu’ éh lepah nenéng ko’. Jian ke’ kivu éh béé ngan pekoléé’ kenin jin penyala’ ko’. Hun ko’ bé’ to’ot, Akeu’ juk tuai tavin ke’ barei’ kelunan nekau ngan ka’au’ bé’ omok jam jaka’ ké’ pu’un tuai. 4 Bang pu’un jelua’ jin belah ka’ah tong Sardis éh mihau livah pakai réh ke’ néh petem ni’ai. Irah juk lakau pemung ngan ké’ ketem livah pakai éh mebéng, uban réh payoo’ maneu’ kenat. 5 Irah éh nyopéé’ kekat arong kesa’at omok réh alaa’ pakai éh mebéng ngan bé’ Akeu’ bet ngaran réh jin surat ngaran irah éh pu’un urip maréng. Tong jumen Tamen ké’ ngan kekat meliket Néh Akeu’ juk ngakun mu’un irah éh anah ké’ ha’ Néh. 6 Hun ko’ pu’un kelingen omok menéng, jian ke’ menéng ineu’ éh benara’ Sahéé’ Ni’ai ngan sidang! 7 Jian ke’ nyurat ngan meliket sidang tong Piladelpia. Iteu’ ha’ éh benara’ jin Iah éh ni’ai ngan tigéh. Iah ngamit kusi’ éh jin Daud; hun mah Iah mukap tapé, bé’ pu’un jah usah péh omok tutup éh. Hun mah Iah tutup éh, bé’ pu’un jah usah péh omok mukap éh. 8 Akeu’ jam kekat penganeu’ ko’, Akeu’ jam ka’au’ pu’un penyukat éh si’ik awah, ngan Akeu’ jam ka’au’ pu’un kivu ha’ tebaraa’ Ké’ ngan tigéh kivu Akeu’. Pu’un Ku’ mukap jah tapé ngan ko’ éh bé’ omok tenutup séé’-séé’ péh. 9 Jian ke’ nesen tong irah éh kivu Sitan éh bara’ irah pohoo’ Yahudi bang ha’ réh kenyo. Akeu’ juk mihin réh tuai tavin ke’ ke’ réh ngejekuu’ lep réh ngerera’ tong ke’ irah béé jam Akeu’ murung ka’au’. 10 Uban ko’ kivu sohoo’ Ké’ ngan pu’un ngeretep ngan kebit kenin, Akeu’ juk mihau ke’ jin kekat penusah éh juk avéé’ tong tana’ iteu’ ke’ néh tupat kenin kekat kelunan pah tipo tana’. 11 Akeu’ juk tuai laho. Jian ke’ mihau kekat éh nena’ Tuhan ngan ko’, mai pu’un séé’-séé’ éh pekepai ke’, ke’ ko’ bé’ omok alaa’ tapong éh juk nena’ Tuhan ngan ko’. 12 Kelunan éh nyopéé’ kekat arong kesa’at Akeu’ juk maneu’ éh barei’ lihei’ tong umaa’ Allah ké’ Tuhan ké’ ngan bé’ iah pu’un piso jin sinah kepéh. La’ah Akeu’ juk nyurat ngaran Allah ké’ tong néh ngan ngaran leboo’ Allah ké’, inah éh Yérusalem éh maréng éh juk tuhun jin seruga jin Allah ké’. La’ah Akeu’ juk nyurat ngaran Ké’ éh maréng tong néh, ha’ Néh. 13 Hun ko’ pu’un kelingen jian ke’ menéng ineu’ éh benara’ Sahéé’ Ni’ai ngan sidang! 14 Jian ke’ nyurat ha’ Ké’ iteu’ ngan meliket sidang tong Laodikia. Iteu’ ha’ éh benara’ jin Iah éh nateng réh Amin, Iah éh tigéh ngan teneng lem kekat éh benara’ Néh; jin Iah Allah suai kekat ineu’-ineu’ éh senuai Néh. 15 Akeu’ jam kekat penganeu’ ko’, ngan Akeu’ jam bé’ ke’ pu’un pana ngan bé’ ke’ pu’un genin. Akeu’ keloo’ hun ko’ pu’un pana, pana ke’, ngan hun ko’ pu’un genin, genin mu’un ke’. 16 Bang uban ko’ pu’un barei’ baa’ pétéé awah, bé’ ke’ pana mu’un ngan bé’ péh ke’ genin mu’un, Akeu’ juk mua’ ke’ jin ujun Ké’. 17 Ka’ah bara’ améé’ kaya’ lepah alaa’ kekat éh omok mihin mé’ omok kaya’, améé’ bé’ pu’un pengekurang ineu’-ineu’ péh. Bang bé’ ka’ah jam keh matek kari mu’un ngan bé’ pu’un séé’-séé’ éh jam pika keh! Ka’ah kari ugai ngan peseu’. 18 Uban néh kenat inah Akeu’ nyohoo’ ke’ melih mas jin Akeu’, mas éh mas mu’un, boh ke’ omok kaya’. Jian ke’ melih satek livah éh mebéng dokoo’ petavun usah ko’, dai ke’ menyaa’ ugai. Ngan melih tawan maten dokoo’ ko’ omok na’at. 19 Kekat kelunan éh kemurung Ké’ Akeu’ petena’ réh ngan memerah réh. Uban néh kenat jian keh mekat pitah jalan keh omok pekoléé’ kenin jin kekat penyala’ keh. 20 Menéng keh. Pu’un Ku’ nekedéng tong usit tapé kenin keh ngan ngatong, séé’-séé’ éh menéng ha’ Ké’ ngan mukap tapé nah, Akeu’ juk masek ngan mokoo’ ngan kuman ngan néh, ngan iah péh omok kuman ngan Ké’. 21 Ngan irah éh nyopéé’ kekat arong kesa’at, Akeu’ kejeraa’ réh menyun déhéé’ Ké’ tong nyun jalan Ké’ Raja’, barei’ Akeu’ lepah menang ngan menyun déhéé’ Tamen Ké’ tong jalan Néh Raja’, ha’ Néh. 22 Hun ko’ pu’un kelingen omok menéng, jian ke’ menéng ineu’ éh benara’ Sahéé’ Ni’ai ngan sidang!
41 La’o kekat inah, pu’un éh tengéé’ kepéh ta’an ké’, Pu’un ku’ na’at jah usit tapé pukap tong seruga. La’ah ha’ éh barei’ ha’ serupit éh nenéng ké’ lepah nah, pu’un éh bara’ ngan ké’, ka’ ha’ Néh, Jian ke’ tuai bau siteu’, Akeu’ juk bara’ ngan ko’ tong kekat éh juk pu’un kepéh, ha’ Néh. 2 Sahéé’ Ni’ai tioo masek lem ku’ akeu’ na’at jah nyun tong seruga ngan jah usah menyun bau nyun inah. 3 Da’in Néh ngada barei’ bateu’ jasper ngan bateu’ Sardis. Nyun inah tutuh neu’ berungan éh ngada barei’ Jamrud bateu’ éh marung barei’ ujung kayeu’. 4 La’ah tutuh nyun inah pu’un duah poloo’ pat nyun éh jah kepéh, ngan tong kekat nyun inah pu’un duah poloo’ pat pengeja’au éh pu’un pakai mebéng ngan tapong mas. 5 La’ah pu’un kela’ap musit jin nyun nah, ngan ha’ ja’au ngan ha’ lengedo. Saa’ jumen nyun inah pu’un tujuu’ pelita éh mahang inah éh tujuu’ sahéé’ jin Allah. 6 La’ah saa’ jumen nyun nah pu’un barei’ jah banget éh mening ngan poléng pah avéé’ teran néh. La’ah tutuh nyun inah, inah éh saa’ kabéng ngan saa’ na’au’ ngan saa’ iteu’ ngan saa’ itai nyun inah, pu’un pat usah layan éh murip éh pinaa’ retek maten néh, maten néh pu’un éh saa’ jumen néh ngan pu’un éh saa’ likot néh péh. 7 Layan éh bu’un bu’un nah barei layan singa’, éh keruwah néh nah barei’ layan lakin sapé’, éh keteleu’ néh nah da’in néh barei’ layan da’in kelunan ngan éh kepat néh nah barei’ layan juhit pelakei’ hun néh marang. 8 Siget-siget néh pu’un nem pawit néh pinaa’ maten tutuh usah néh pah avéé’ ra’ pawit néh péh putung dau ngan merem bé’ réh posot nyanyi ka’ ha’ réh. Ni’ai, ni’ai, ni’ai Tuhan Allah éh pelapah ja’au penyukat éh lepah pu’un tenéh, éh pu’un hun iteu’ ngan éh juk tuai kepéh, ha’ réh. 9 Irah éh pat inah nyanyi ke’ réh mejing, seva’ ngan bara’ jian kenin ngan Iah éh menyun bau nyun inah, iah éh murip pelinguh-linguh. Sioo’ irah inah nyanyi kenat, 10 duah poloo’ pat irah pengeja’au inah ngejekuu’ lep tong jumen Iah éh menyun bau nyun inah ngan seva’ Iah éh murip pelinguh-linguh. Irah pei’ tapong réh tong jumen nyun inah ngan bara’. 11 Oo’ Tuhan éh Allah mé’! Bang Ka’au’ awah éh tekep alaa’ pengaren, penyeva’ ngan penyukat, uban Ka’au’ éh suai kekat ineu’-ineu’ péh ngan kivu pengeloo’ Ko’ kepéh kekat ineu’-ineu’ péh poléng ngan murip.
51 La’ah ta’an ké’ lem ojoo’ Néh saa’ na’au’ Iah éh menyun bau nyun inah, jah lem surat éh lepah pesurat saa’ lem ngan saa’ likot péh ngan tenada’ palaa’ tujuu’ tada’. 2 La’ah ta’an ké’ kepéh jah meliket éh ja’au penyukat, éh bara’ ngan ja’au ha’ ka’ ha’ néh, séé’ éh tekep mega’ kekat tada’ iteu’ ngan muka len surat iteu, ha’ néh. 3 Bang bé’ pu’un séé’-séé’ péh tong seruga kenat péh tong tana’ ngan ra’ tana’ péh éh omok muka len surat inah ngan purung ha’ lem néh. 4 Akeu’ mangaa’ besikon uban bé’ pu’un jah kelunan péh éh tekep muka len surat inah ngan purung ha’ lem néh. 5 Boh jah pengeja’au sinah bara’ ngan ké’, ha’ néh, Mai ke’ mangaa’. Na’at ke’, Singa’ éh jin betah Yehuda, éh pohoo’ néh jin Daud, pu’un éh lepah menang ngan Iah omok mega’ tujuu’ telana’ inah ngan mukap surat inah, ha’ néh. 6 La’ah ta’an ké’ jah Anak Domba nekedéng belah nyun inah, tutuh néh pu’un pat penyuai éh murip ngan kekat pengeja’au inah. Anak Domba inah layan néh barei’ éh lepah penatai. Anak Domba inah pu’un tujuu’ uheng ngan tujuu’ maten Néh, inah éh tujuu’ sahéé’ éh jin Allah éh lepah senohoo’ Néh tai pah tipo tana’. 7 Anak Domba inah tai alaa’ len surat inah jin ojoo’ saa’ na’au’ Iah éh menyun bau nyun inah. 8 Tovoo’ Anak Domba inah maneu’ kenat, pat penyuai éh murip inah ngan duah poloo’ pat irah pengeja’au inah ngejekuu’ lep réh tong jumen Anak Domba. Siget usah réh petep sapé’ ngan jah pigan mas éh pu’un kemenyan inah éh kekat ha’ sebayang irah éh anah Allah. 9 La’ah irah nyanyi, jah nyanyi éh maréng, ka’ ha’ réh. Ka’au’ éh tekep alaa’ len surat inah ngan mega’ tada’ tong néh. Uban Ka’au’ éh penatai réh, ngan neu’ dahaa’ Ko’, pu’un Ke’ melih kelunan jin siget pohoo’, siget arong ha’, siget leboo’ ngan siget arong kelunan béé dokoo’ réh omok anah Allah. 10 Pu’un Ke’ maneu’ réh imam dokoo’ réh omok seva’ Allah ngan maneu’ kereja’ Néh. Omok réh pengeja’au ngan mihau kelunan tong tana’, ha’ nyanyi réh. 11 La’ah pu’un ku’ na’at kepéh, boh ku’ menéng ha’ irah meliket éh pinaa’ mu’un ibu-ibu ngan juta-juta kekat réh. Pu’un réh nekedéng tutuh nyun inah, ngan pat usah penyuai éh murip ngan kekat irah pengeja’au nah. 12 Irah Nyanyi ngan ha’ éh ja’au, Anak Domba éh lepah penatai inah tekep alaa’ penyukat, pengekaya’, pengejam, pengegahang, penyeva’, pengaren, ngan kenajung. 13 La’ah akeu’ menéng ha’ kekat penyuai éh murip tong seruga, tong tana’, ra’ tana’ péh, ngan kekat penyuai éh murip lem baa’ banget ngan kekat penyuai éh murip tong langit ngan tong tana’ iteu’, irah nyanyi. Kekat kenajung ngan penyeva’ pengaren ngan penyukat anah Iah éh menyun bau nyun inah kenat péh ngan Anak Domba inah pah avéé’ kelebéé’-lebéé’ néh. 14 La’ah pat usah penyuai éh murip nah mipa réh, Amin! Kekat pengeja’au inah péh ngejekuu’ lep réh ke’ réh seva’ Allah ngan Anak Domba inah.
61 La’o inah boh akeu’ na’at Anak Domba nah mega tada’ éh bu’un nah jin ketujuu’ tada’ inah. Ngan pu’un ku’ menéng jah jin belah pat penyuai éh murip nah pané ngan ja’au ha’, barei’ ha’ lengedo, ka’ ha’ néh Tuai! Ha’ néh. 2 Boh akeu’ na’at kepéh ngan ta’an ké’ jah kuda éh mebéng. Iah éh menyun tong néh pu’un ngamit kayeu’ selato palaa’ réh put, ngan jah tapong nena’ ngan néh. Iah musit barei’ kelunan éh lepah nyopéé’ kekat ayau néh ngan iah lepah menang. 3 Boh Anak Domba nah mega’ keruwah tada’ nah kepéh, ngan nenéng ké’ ha’ penyuai éh murip éh keruwah nah pané Tuai! Ha’ néh. 4 Boh jah kuda kepéh pu’un tuai, kuda inah bala. La’ah kelunan éh menyun tong néh pu’un Tuhan mena’ penyukat ngan néh ke’ néh tai pekayau tong tana’, dokoo’ mihin kelunan pepatai, la’ah pu’un Tuhan mena’ po’é éh ja’au ngan néh. 5 La’o inah Anak Domba nah mega’ tada’ éh keteleu’ nah kepéh, ngan nenéng ké’ ha’ penyuai éh murip éh keteleu’ nah pané Tuai! ha’ néh. Akeu’ na’at, tioo ta’an ké’ jah kuda padeng. Iah éh menyun tong néh ngamit jah tebangan, lem ojoo’ néh. 6 La’ah nenéng ké’ ha’ jin belah pat usah penyuai éh murip nah, ka’ ha’ néh. Teleu’ suvang parai tong gaji jah dau ngan pien suvang jelai tong gaji jah dau. Bang mai nasa’ inan saitun ngan pulah agun! 7 La’o inah Anak Domba nah mega’ ke pat tada’ nah kepéh ngan nenéng ké’ ha’ penyuai éh murip éh ke pat nah pané Tuai! ha’ néh. 8 La’ah pu’un ku’ na’at ngan ta’an ké’ jah kuda éh barei’ layan kelunan éh tayen éh marung da’in. Ngaran Iah éh menyun tong kuda inah, patai ngan jalan patai pu’un nyeliko lotok néh. Rawah nena’ penyukat dokoo’ mematai jah jin pat tulat kelunan murip tong tana’ neu’ réh pekayau, neu’ la’au’ ja’au, neu’ penyakit ngan neu’ ka’an luvaa’. 9 La’o inah Anak Domba nah mega’ kelemah tada’ nah kepéh, ra’ jalan réh motong kemenyan ngan Tuhan akeu’ na’at kekat sahéé’ irah éh penatai réh. Irah penatai uban réh perengah ha’ tebaraa’ Tuhan ngan tigéh kivu ha’ éh benara’ réh nah. 10 Pu’un réh pané ngan ja’au ha’, ka’ ha’ réh, O Tuhan éh pelapah ja’au penyukat jin ineu’-ineu’ péh, éh ni’ai ngan éh teneng, kineu’ kelebéé’ la’ah da’ boh Ke’ petuneng kelunan tong tana’ ngan ngukum réh uban réh pu’un mematai améé’, ha’ réh. 11 La’ah pu’un Tuhan mena’ jah livah pakai éh mebéng ngan usah réh, ngan nyohoo’ réh mena lebéé’ siik kepéh, avéé’ sukup kekat irah éh sohoo’ Tuhan ngan padéé’ éh kua’ pengelan, penatai réh barei’ réh mematai irah inah ke’. 12 La’ah ta’an ké’ Anak Domba nah mega’ ke nem tada’ nah kepéh. Tioo pu’un tegen tana’ éh ja’au ngan maten dau paléu padeng, barei’ livah kapan éh padeng ngan laséh péh paléu bala barei’ okoo’ dahaa’. 13 kekat kenyuhai péh pelohoo’ tong tana’ barei’ buaa’ ara éh bé’ jak mesak peleraa’ neu’ kepu éh gahang. 14 La’ah langit péh salai, barei’ surat éh nelen réh, ngan siget berusu’ ngan siget tana’ si’ik, piso jin retek néh bu’un. 15 Boh kekat raja’ tong tana’, kekat irah éh pengeja’au réh, ngan kekat pengeja’au irah seradu, irah éh kaya’ ngan pu’un penyukat, ngan kekat kelunan éh jah péh, irah éh ripen ngan irah éh bé’ ripen, kelap béé-béé tai kelim tong luvang bateu’ ngan ra’ bateu’ ja’au éh pu’un tong tokong. 16 Pu’un réh pané ngan kekat tokong ngan kekat bateu’ inah, Pelohoo’ tong mé’ ngan melim mé’ jin ta’an Iah éh menyun bau nyun nah ngan jin kemerek Anak Domba nah ha’ réh. 17 Dau éh ja’au jalan Allah ngan Anak Domba pepoléng kemerek Néh lepah avéé’ ngan bé’ pu’un jah usah péh éh omok pelepu.
71 La’o inah kepéh ta’an ké’ pat meliket nekedéng tong pat tikong tana’ ngan mapat pat usit kepu tong tana’, tong baa’ banget, kenat péh tong kekat kayeu’. 2 La’ah ta’an ké’ kepéh jah meliket kepéh tuai jin saa’ usit maten dau, pu’un éh mihin tada’ éh penakai Allah éh murip. Ngan ha’ éh ja’au meliket inah tebai pat meliket éh lepah nena’ Allah penyukat ke’ réh nasa’ tana’ ngan baa’ banget. 3 Ka’ ha’ meliket nah, Mai keh nasa’ tana’, ngan mai keh nasa’ baa’ banget, kenat péh kekat kayeu’ péh pah avéé’ améé’ maneu’ tada’ tong sela’ irah éh sohoo’ Allah lu’. 4 La’ah pu’un iah bara’ ngan ké’ 144,000 kelunan tenada’ palaa’ tada jin Allah tong sela’ réh. Irah jin jah poloo’ duah betah Israel. 5 - 8 Jah poloo’ duah ibu kelunan jin siget betah, inah éh betah Yehuda, Ruben, Gad, Asher, Naptali, Manasye, Simeon, Lewi, Isakhar, Sebulon, Yusup ngan Benyamin. 9 La’o inah pu’un ku’ na’at kepéh ngan ta’an ké’ kelunan pinaa’ mu’un. Bé’ pu’un jah kelunan péh omok purung réh. Irah jin siget pohoo’, betah, leboo’ ngan siget arong ha’. Irah pakai livah éh mebéng ngan irah ngamit da’an pulah éh barei da’an uvut. Irah piting nekedéng tong jumen nyun inah ngan Anak Domba nah. 10 Pu’un réh pané ngan ha’ éh ja’au, améé’ lepah alaa’ urip jin Allah mé’ éh menyun bau nyun ngan jin Anak Domba inah! 11 La’ah kekat meliket nekedéng tutuh nyun inah ngan irah pengeja’au, ngan pat usah penyuai éh murip inah. Irah béé ngejekuu’ lep réh tong jumen nyun inah ngan seva’ Allah. 12 Ka’ ha’ réh, Amin! Kekat kenajung, pengaren, pengejam, kemurung kenin, penyeva’, penyukat ngan pengegahang anah Allah lu’ avéé’ kelebéé’ lebéé’ néh! Amin. 13 Pu’un jah usah jin irah pengeja’au nah neteng akeu’ séé’ kekat irah éh pu’un pakai mebéng nah, jin semah réh tuai ha’ néh. 14 Ka’ ha’ ké’ mipa éh, O lakei’ ja’au bé’ akeu’ jam, bang ka’au’ éh jam réh, ha’ ké’. Ha’ néh kepéh, Kekat irah inah irah éh bé’ putui pengelan tovoo’ réh teneng pengeketa éh bahat rai. Pu’un réh poo’ livah pakai réh ngan ngemebéng éh neu’ dahaa’ Anak Domba. 15 Inah maneu’ réh nekedéng tong jumen nyun Allah ngan ngerera’ kivu sohoo’ Néh putung dau ngan putung merem dalem umaa’ Allah. Iah éh menyun bau nyun inah pu’un mihau réh uban Néh pu’un pemung ngan réh. 16 Bé’ réh jam la’au’ ngan mapeu’ batok la’ah; maten dau ngan kenat péh kepana pétéé bé’ éh maneu’ réh lasoo’ la’ah. 17 Uban Anak Domba éh pu’un belah nyun inah, Iah omok tepun réh ngan mihau réh ngan majak réh tai usit baa’ éh baa’ éh purip réh, ngan Allah pu’un mitit kekat baa’ maten réh, ha’ néh.
81 Hun Anak Domba nah mega’ tada’ éh ketujuu’ nah kepéh, kekat éh tong seruga kelem béé-béé, ngioo’-ngioo’ teleu’ poloo’ minit kelebéé’ néh. 2 Boh akeu’ na’at tujuu’ meliket éh ngelayau nekedéng tong jumen Allah, ngan tujuu’ serupit nena’ Tuhan ngan réh. 3 La’ah jah meliket kepéh éh pu’un pigan mas éh jalan motong kemenyan tuai éh nekedéng déhéé’ jalan réh motong kekat pengena’ réh ngan Tuhan. La’ah pinaa’ kemenyan nena’ ngan meliket nah ke’ néh motong éh pemung ngan ha’ sebayang irah éh anah Allah dokoo’ néh omok motong éh tong jalan mas éh pu’un saa’ tenah nyun inah. 4 La’ah sap kemenyan éh potong éh pu’un lem ojoo’ meliket éh nekedéng tong jumen Allah pu’un éh tai kebau pemung ngan ha’ sebayang irah éh anah Allah. 5 Boh meliket nah alaa’ pigan mas éh jalan néh motong kemenyan nah ke’ néh mena’ la’ang jin jalan réh motong pengena’ réh ngan Tuhan nah lem néh, ke’ néh ngaléng éh kera’ tai tana’. Tioo pu’un ha’ lengedo, éh ja’au ngan kelat kela’ap bé’ bekat-bekat ngan tegen tana’. 6 Boh tujuu’ meliket nah éh pu’un tujuu’ serupit, petenup juk nyelevuu serupit néh. 7 Meliket éh bu’un nah nyelevuu serupit néh, tioo pu’un taa’ bateu’ ngan luten motong jah jin keteleu’ tulat tana’ ngan kebéé kekat kayeu’ ngan kekat-kekat éh murip Sinah. 8 Boh meliket éh keruwah nah nyelevuu serupit néh. Tioo pu’un barei’ jah berusu’ éh ja’au éh mahang, éh kelohoo’ Tuhan lem baa’ banget. Jah tulat jin keteleu’ tulat baa’ banget paléu dahaa’, 9 jah jin keteleu’ tulat kekat éh murip lem baa’ banget pu’un matai, ngan jah jin keteleu’ tulat kekat kapen pu’un tasa’. 10 Boh meliket éh keteleu’ nah nyelevuu serupit néh. Boh jah kenyuhai ja’au, éh mahang barei’ tekok luten, pu’un éh pelohoo’ jin langit tong jah tulat jin keteleu’ tulat kekat baa’ ngan usit baa’ tong tana’. 11 Ngaran kenyuhai inah, Petuh. Jah tulat jin keteleu’ tulat kekat baa’ pu’un petuh, ngan pinaa’ kelunan matai uban réh kuman baa’ éh petuh nah. 12 Boh meliket éh ke pat nah nyelevuu serupit néh. Maten dau, laséh ngan kenyuhai pu’un sopéé’ pah avéé’ bé’ omok ngada jah jin keteleu’ tulat jin pohoo’ néh. Maten dau bé’ ngada kelebéé’ jah jin keteleu’ tulat dau rema; laséh ngan kenyuhai bé’ pu’un ngada kelebéé’ jah jin keteleu’ tulat dau merem. 13 Boh akeu’ na’at kepéh, ngan juhit éh barei’ pelakei’ pu’un éh marang bau ngan nenéng ké’ ha’ néh bara’ ngan ja’au ha’, matek tusah, matek tusah, matek tusah mu’un kekat kelunan éh murip tong tana’ hun réh teleu’ meliket éh teleu’ nah nyelevuu serupit réh kepéh da’, ha’ néh.
91 Boh meliket éh kelemah nah nyelevuu serupit néh. Ta’an ké’ jah kenyuhai pelohoo’ jin langit tai tong tana’. Kenyuhai inah nena’ kusi’ jalan ngusi’ luvang patai éh dilem mu’un. 2 Kenyuhai inah mukap usit luvang patai inah, tioo’ musit sap jin lem néh barei sap hun réh motong térék, maten dau ngan sawang péh pu’un merem neu’ sap jin luvang inah. 3 La’ah karah musit jin sap inah tai tana’, ngan alaa’ katah barei’ katah duyung. 4 La’ah Tuhan meta’ karah inah kebéé ureu’ ngan kayeu’ ngan ineu’-ineu’ éh murip kenat, bang omok éh peketa kelunan éh bé’ pu’un telana’ Allah tong sela’ réh. 5 Bé’ iah buhaa’ karah inah mematai réh mu’un, bang omok éh peketa réh awah avéé’ lemah laséh kelebéé’. Kesakit réh neu’ néh barei’ keta kesakit neu’ duyung. 6 Lem lemah laséh réh keta kenat pu’un réh juk matai, bang bé’ réh omok matai, adang réh gahang mu’un juk maneu’ réh matai, bang bé’ réh omok matai. 7 La’ah layan karah inah barei’ kuda éh lepah petenup réh ke’ réh tai pekayau, tong ulun karah nah pu’un barei’ tapong mas, ngan da’in néh barei’ layan da’in kelunan. 8 Bok néh barei’ bok redo, jipen néh barei’ jipen singa’. 9 Tong kebah néh pu’un barei’ kerayung daven, ngan ha’ pawit néh hun néh marang barei’ ha’ tekedeu’ kerita pinaa’ éh nihit kuda nekedeu’ tai pekayau. 10 Iko néh pu’un sevut barei’ duyung ngan palaa’ iko néh, inah jalan néh peketa kelunan avéé’ lemah laséh. 11 Pengeja’au réh éh Seleket raja’ inah éh meliket éh pu’un penyukat bau luvang patai. Lem ha’ irah Ibrani ngaran néh Abadon ngan lem ha’ irah Yunani ngaran néh Apolion éh sin néh iah éh kebéé. 12 La’ah penusah éh bu’un nah lepah ma’o, ngan pu’un duah keto éh bé’ jak sakui avéé’. 13 Boh meliket éh ke nem nah nyelevuu serupit néh. Ngan akeu’ menéng ha’ éh musit jin pat tikong tong jalan réh motong kemenyan éh pu’un tong jumen Allah. 14 La’ah ha’ inah pu’un bara’ ngan meliket éh kenem nah éh pu’un serupit nah, ka’ ha’ néh, Jian ke’ ngelepu pat meliket éh kejeret tong baa’ ja’au Eprat, ha’ néh. 15 Boh pat meliket nah pu’un pelepu, Tuhan pu’un petenup réh ngan sioo’ iteu’, ngan dau’ iteu’, tong laséh iteu’, lem ta’un iteu’, ke’ réh pu’un penyukat omok mematai jah tulat jin keteleu’ tulat kekat arong kelunan. 16 Pu’un iah bara’ ngan ké’ tong kekat irah éh jalan kuda nah inah éh duah ato juta kekat réh. 17 Lem éh ta’an ké’, akeu’ na’at pinaa’ kuda ngan irah éh menyun tong néh. Irah pakai kerayung daven tong kebah réh éh bala barei’ ada luten, ngan marung barei’ bateu’ nilam ngan éh letéé’ mu’un. Ulun kuda nah barei’ layan ulun singa’ ngan pu’un luten, sap ngan éh letéé’ éh sa’at ba’oo’ musit jin ujun néh. 18 Jah jin keteleu’ tulat kelunan pu’un matai neu’ teleu’ penusah inah, luten, sap, ngan éh letéé’ éh musit jin ujun kuda inah. 19 Uban penyukat kuda inah pu’un éh lem ujun néh ngan tong iko néh péh. Iko néh barei’ layan ulun torok, ngan palaa’ iko néh inah jalan néh peketa kelunan. 20 La’ah kekat kelunan éh murip keto, éh bé’ matai neu’ kekat penusah inah ri’, bé’ irah piso jin kekat penganeu’ ojoo’ réh. Pu’un réh pakai balei’ bé’ réh keloo’ bet éh, ngan pu’un réh pakai butun mas, ngan butun daven ngan butun temagaa’ ngan butun bateu’ ngan butun kayeu’ péh, kekat butun nah bé’ éh omok menéng ngan bé’ éh omok na’at ngan bé’ éh omok lakau. 21 La’ah bé’ irah pekoléé’ kenin jin kekat kesa’at réh éh mematai kelunan ngan kekat limu’ réh ngan barék réh éh sa’at ngan jin réh nekau péh.
101 La’o inah ta’an ké’ jah meliket kepéh éh ja’au penyukat éh tuhun jin seruga. Pu’un avun tutuh néh ngan tutuh ulun néh pu’un berungan. Da’in néh ngada barei’ maten dau, ngan gem néh barei’ lihei éh mahang. 2 La’ah iah ngamit jah surat éh si’ik éh lepah pukap. La’ah gem néh saa’ na’au’, napai néh tong baa’ banget, ngan gem néh saa’ kabéng napai néh tong tana’, 3 Boh éh mejui ngan ha’ éh ja’au barei’ ha’ kenohong Singa’ éh pinaa’. La’o néh mejui kenat tujuu’ lengedo mipa ha’ néh ngan ha’ éh ja’au kepéh. 4 La’o réh pané nah akeu’ juk nyurat ha’ réh nah, bang nenéng ké’ jah ha’ jin seruga éh bara’ ka’, Jian ke’ melim ha’ éh benara’ tujuu’ lengedo inah, mai ke’ nyurat éh, ha’ néh. 5 Boh meliket éh ta’an ké’ ri’ éh mapai gem néh tong baa’ banget ngan tong tana’ péh nah, metéé’ ojoo’ néh saa’ na’au’ kebau, 6 ngan bara’ mu’un dalem ngaran Allah éh murip pelinguh, ngan éh suai seruga ngan kekat éh pu’un tong seruga, ngan éh suai tana’ ngan kekat éh pu’un tong tana’, ngan éh suai baa’ banget ngan kekat éh pu’un lem néh. Ka’ ha’ meliket nah, Bé’ pu’un mena kepéh, 7 bang hun meliket éh ketujuu’ nah nyelevuu serupit néh, boh Allah juk pesukup kekat pengeloo’ kenin néh éh pelim, barei’ éh benara’ néh ngan irah kelunan sohoo’ néh, inah éh ngan irah éh bara’ ha’ Tuhan ngan kelunan sahau, ha’ néh. 8 Boh ha’ éh nenéng ké’ jin seruga ri’, pané kepéh ngan ké’, ka’ ha’ néh, Jian ke’ tai alaa’ surat éh lepah pukap nah jin ojoo’ meliket éh mapai gem néh tong baa’ banget ngan tong tana’ péh nah, ha’ néh. 9 La’ah tai ku’ tavin meliket inah ngan menyat surat siik inah jin iah. Ka’ ha’ néh ngan ké’ Ko’ alaa’ éh ngan kuman éh adang néh mesem lem betuken ko’ bang tong ujun ko’ méé barei nyak layuk. 10 Boh akeu’ alaa’ surat siik nah jin ojoo’ néh ngan kuman éh, lem ujun ké’ pu’un éh méé barei’ nyak layuk bang hun ké’ nyeloo’ éh mesem éh tai lem betuken ké’. 11 Boh éh bara’ ngan ké’ kepéh ka’ ha’ néh Jah koléé’ kepéh jian ke’ perengah rengah Allah tong kuraa’-kuraa’ leboo’, bengesa’, arong ha’ ngan raja’.
111 Boh iah mena’ ngan ké’ jah kayeu’ éh palaa’ ké’ nguwa’ Iah nyohoo’ ku’ tai nguwa’ umaa’ Allah ngan jalan réh motong kemenyan. Ngan purung kekat irah éh petipun seva’ Allah lem umaa’ Allah. 2 Bang mai ke’ nguwa’ belasek éh saa’ usit nah, uban kekat inah nena’ néh ngan irah éh bé’ ngelan. Adang irah lakau nejat leboo’ ni’ai inah avéé’ pat poloo’ duah laséh kelebéé’. 3 Akeu’ juk nyohoo’ duah kelunan sohoo’ éh pakai roh talun, tai bara’ tong kekat éh benara’ Allah ngan roh dalem jah ibu duah ato nem poloo’ dau inah da’, ha’ néh. 4 Rawah éh sohoo’ ké’ nah inah éh duah inan kayeu’ situn ngan duah jalan tekedéng pelita’ éh nekedéng tong jumen Tuhan éh pu’un tana’ ngan langit. 5 Hun séé’-séé’ tupat peketa roh, pu’un luten musit jin ujun roh éh kebéé ayau roh, kenat péh séé’-séé’ éh tupat peketa roh, usah irah tengéé’ pu’un matai. 6 Rawah pu’un penyukat omok maneu’ langit bé’ pu’un taa’ kelebéé’ roh bara’ ha’ tebaraa’ Allah. La’ah rawah pu’un penyukat tong siget usit baa’ dokoo’ néh paléu dahaa’, rawah pu’un penyukat kepéh maneu’ kuraa’-kuraa’ arong penusah tong tana’ ngan maneu’ éh kuraa’-kuraa’ koléé’ kivu pengeloo’ kenin roh. 7 Hun rawah lepah ma’o bara’ tong kekat ha’ tebaraa’ éh juk benara’ roh, boh ka’an jin luvang tana’ éh dilem juk ngelawan roh. Pu’un éh nyopéé’ roh ngan mematai roh, 8 ngan patai roh pu’un éh tong jalan totoo’ tong leboo’ ja’au, éh jalan Tuhan éh Raja’ roh pu’un penaku’ réh tong kayeu’ salib sahau rai. Tapan ngaran leboo’ inah barei’ leboo’ Sodom ngan tana’ Mesir. 9 Kelunan jin kekat leboo’ puku’, arong ha’ ngan bengesa’ pu’un na’at patai roh teleu’ dau memutui kelebéé’, bé’ réh buha’ kelunan nanem patai roh. 10 Kelunan tong tana’ murung kenin réh uban rawah lepah matai. Pu’un réh maneu’ ramai ngan mena’ pengena’ ngan siget usah réh, uban rawah nabi Tuhan inah rai pu’un roh petusah kenin réh bang hun iteu’ rawah lepah matai. 11 La’o teleu’ dau memutui jah dau kepéh nah, pu’un laset jin Allah éh omok purip, masek lem roh, boh rawah nekedéng kepéh. La’ah kekat kelunan éh na’at roh medai mu’un. 12 Boh rawah menéng ha’ ja’au jin seruga pané ngan roh, Tuai kebau keteu’ koh! ha’ néh. La’ah jin ta’an ayau roh na’at roh, rawah nabi inah petéé’ lem avun tai seruga. 13 Tovoo’ inah péh pu’un tegen tana’ ja’au mu’un, jah tulat jin jah poloo’ tulat leboo’ inah pu’un tasa’ ngan tujuu’ ibu kekat kelunan matai neu’ tegen tana’ inah. Irah éh murip keto medai mu’un réh seruh tong penyukat Tuhan, pu’un réh ngerera’ kenin réh ngan seva’ Allah éh tong seruga. 14 La’ah penusah éh keruwah nah lepah ma’o, bang na’at ke’, penusah éh keteleu’ nah juk avéé’ kepéh. 15 Boh meliket éh ketujuu’ nah nyelevuu serupit néh, pu’un kuraa’-kuraa’ ha’ ja’au tong seruga, éh bara’ ka’, Kekat penyukat pu’un éh ngan Allah Tuhan mé’ ngan pu’un éh ngan Kristus éh kevéléé’ Néh ke’ Néh omok Raja’, Iah omok Raja’ pah tipo tana’, pu’un éh Raja’ ngan mihau réh pah avéé’ pelinguh, ha’ réh. 16 Boh irah pengeja’au nah éh duah poloo’ pat usah éh menyun tong jumen Allah, ngejekuu’ lep ke’ réh seva’ Allah, 17 Ka’ ha’ réh, O Tuhan Allah éh pelapah ja’au penyukat jin ineu’-ineu’ péh, éh pu’un hun iteu’ ngan éh pu’un tenéh. Améé’ bara’ jian kenin ngan Ko’ uban penyukat Ko’ ja’au ngan Ka’au’ péh Raja’. 18 La’ah kekat pohoo’ kelunan éh bé’ ngelan tong Ka’au’ merek mu’un réh, bang kemerek Ko’ lepah avéé’ tenéh, ngan sukup jaka’ Ko’ petuneng kelunan éh lepah matai, ngan mena’ oléé’ ngan irah éh sohoo’ Ko’, inah éh ngan irah nabi Ko’ sahau. Ngan sukup jaka’ Ko’ mena’ oléé’ ngan kekat kelunan éh anah Ko’, irah éh ja’au ngan irah éh si’ik péh, inah éh ngan kekat irah éh seva’ Ka’au’, ngan éh leko maneu’ sa’at. Sukup jaka’ Ko’ kebéé irah éh pu’un kebéé tana’, ha’ réh. 19 Boh Umaa’ Allah éh tong seruga pu’un pukap, ngan ta’an ké’ lem Umaa’ Allah nah pati’ jalan surat éh bara’ tong jalan jajii’ Tuhan. La’ah pu’un kela’ap, ngan ha’ ja’au, ngan ha’ lengedo, ngan tegen tana’ ngan taa’ bateu’.
121 Boh pu’un jah telana’ tong langit éh ja’au éh ngebéé kenin kelunan. Jah éh pakai néh maten dau ngan laséh ra’ gem néh, Iah pakai jah tapong éh pu’un jah poloo’ duah kenyuhai tong ulun néh. 2 Danii’ néh juk nganak, ngan neu’ kesakit néh juk nganak, pu’un éh ngeradau. 3 Boh jah telana’ kepéh pu’un tong Langit. Pu’un jah berungan bala éh ja’au mu’un, pu’un tujuu’ ulun néh ngan jah poloo’ uheng néh. Pu’un tapong tong siget ulun néh. 4 Palaa’ iko néh iah mega’ jah tulat jin teleu’ tulat kenyuhai tong langit ke’ néh ngelohoo’ éh tong tana’. Boh éh nekedéng saa’ tenah redo éh juk nganak nah ke’ néh kuman anak néh hun néh pelohoo’. 5 Boh redo inah nganak jah anak lakei’ éh juk pengeja’au éh pu’un sekot daven ngan éh pu’un penyukat bau kekat pohoo’ kelunan. Bang anak inah senagem ngan nihin tai ngan Allah éh menyun tong nyun-raja’. 6 Redo inah kelap tai tana’ linek, pu’un Allah petenup jalan néh sinah, sinah iah mokoo’ lem nihau Néh avéé’ jah ibu duah ato nem poloo’ dau kelebéé’. 7 La’ah pu’un pekayau tong seruga. Mikhael ngan irah meliket néh pekayau ngelawan berungan inah. Berungan inah tenolong irah meliket néh ngelawan Mikhael. 8 Bang berungan inah pu’un senopéé’. Berungan inah ngan irah meliket néh bé’ omok mokoo’ tong seruga kepéh. 9 Berungan ja’au nah nebet jin seruga. Inah éh torok éh sahau éh ngaran néh Iblis ngan Sitan, éh ngelavo’ kekat kelunan pah tipo tana’. Iah pu’un nebet tai tana’ pemung ngan kekat meliket néh. 10 Boh akeu’ menéng jah ha’ éh ja’au tong seruga éh bara’ ka’, Hun iteu’ jalan Allah purip kelunan lepah avéé’. Hun iteu’ Allah pu’un pepoléng penyukat Néh, penyukat Néh Raja’ bau kekat ineu’-ineu’ péh. Hun iteu’ Kristus éh kevéléé’ Tuhan ke’ Néh Raja’, Iah péh pu’un pepoléng penyukat Néh. Uban Sitan éh pesala’ padéé’ lu’ tong jumen Allah putung dau ngan putung merem, lepah nebet Tuhan jin seruga. 11 Kekat padéé’ lu’ lepah nyopéé’ éh neu’ dahaa’ Anak Domba ngan neu’ ha’ tebaraa’ Tuhan éh benara’ réh avéé’ réh mena’ urip réh matai ngan jian kenin. 12 Uban néh kenat jian kekat ka’ah éh murip tong seruga, pu’un murung Bang tusah mu’un ngan kekat ka’ah éh pu’un tong tana’ ngan tong baa’ banget péh. Uban Sitan lepah tai ngan keh, merek mu’un-mu’un éh, uban kejam néh bé’ iah omok lebéé’ kepéh, ha’ néh. 13 Hun berungan nah jam iah nebet Tuhan tong tana’, pu’un éh pitah redo éh nganak anak lakei’ nah. 14 Pu’un Tuhan mena’ duah pawit juhit ja’au éh barei’ juhit pelakei’ ngan redo inah ke’ néh omok marang tai tana’ linek, sinah éh pu’un lem nihau Tuhan avéé’ teleu’ ta’un ngan memutui jah ta’un kepéh, ngan torok inah bé’ éh omok maneu’ éh. 15 La’ah berungan nah maneu’ baa’ musit jin ujun néh barei’ baa’ ja’au, ke’ néh juk pepatong redo inah. 16 Bang tana’ nolong redo inah, pu’un éh bila’ ke’ néh alaa’ baa’ éh musit jin ujun Berungan nah. 17 Berungan inah merek mu’un ngan redo inah pah avéé’ iah ngayau kekat irah éh anak ayam redo inah. Inah éh kekat irah éh bé’ putui pengelan bang éh ngelan tong Yésus, éh mihau kekat sohoo’ Allah. 18 La’ah berungan nah nekedéng tong dirin baa’ banget.
131 La’ah ta’an ké’ jah ka’an éh musit jin baa’ banget ka’an inah pu’un jah poloo’ uheng néh ngan tujuu’ ulun néh, pu’un tapong tong siget uheng néh ngan tong siget ulun néh pu’un surat éh ngesa’at Allah. 2 Ka’an inah ta’an ké’ barei’ layan bilung, bang gem néh barei’ gem buang, ngan ujun néh barei’ ujun singa’. La’ah berungan nah mena’ ngan ka’an inah pengegahang néh, ngan néh, ngan penyukat néh éh ja’au. 3 La’ah jah jin belah ulun ka’an inah, pu’un ila uban suhat éh ja’au mu’un, bang suhat néh inah lepah malit. Kekat kelunan pah tipo tana’ béé kenin na’at éh, ngan irah kivu ka’an inah. 4 Kekat kelunan seva’ berungan nah uban iah mena’ penyukat néh ngan ka’an inah. Pu’un réh seva’ ka’an inah kepéh, pu’un réh bara’, Bé’ pu’un ka’an éh jah éh jian barei’ ka’an iteu’. Bé’ pu’un séé’ péh omok ngelawan éh, ha’ réh. 5 Tuhan kejeraa’ ka’an inah ngesa’at Allah ngan kejeraa’ éh pu’un penyukat avéé’ pat poloo’ duah laséh kelebéé’. 6 Ka’an inah ngesa’at Allah, ngaran Allah, retek okoo’ Allah, ngan kekat éh pu’un tong seruga. 7 Pu’un Tuhan kejeraa’ ka’an inah ngelawan irah éh anah Allah ngan nyopéé’ réh. Ngan pu’un penyukat nena’ ngan néh bau siget pohoo’, leboo’, arong ha’ ngan bengesa’. 8 Kekat kelunan éh murip tong tana’ seva’ ka’an inah, bang irah éh ngaran réh senurat lem surat irah éh alaa’ urip bé’ seva’ éh. Kekat ngaran inah pu’un senurat tenéh bé’ jak tana’ iteu’ senuai, ngan surat inah pu’un ngan Anak Domba éh lepah penatai. 9 Hun keh pu’un kelingen omok menéng, jian keh menéng éh mu’un. 10 Séé’-séé’ éh tekep narau réh, adang iah pu’un narau réh kenat. Séé’-séé’ éh tekep penatai réh palaa’ po’é adang néh penatai réh kenat. Uban néh kenat irah éh anah Allah tekep ngeretep, kebit kenin ngan tigéh tong Kristus. 11 La’o inah ta’an ké’ jah ka’an éh jah kepéh éh musit jin lem tana’. Ka’an inah pu’un duah uheng barei’ uheng anak domba, bang ha’ néh barei’ ha’ berungan. 12 Ka’an iteu’ alaa’ penyukat ja’au ka’an éh bu’un nah tong ta’an néh. Kekat kelunan tong tana’ nugun dokoo’ seva’ ka’an éh bu’un nah éh suhat néh ja’au nah lepah malit. 13 Ka’an éh keruwah iteu’ maneu’ kuraa’-kuraa’ telana’ éh tejeu’. Tong jumen kekat kelunan, luten petuhun néh jin langit tai tana’. 14 Allah kejeraa’, ka’an éh keruwah iteu’ dokoo’ maneu’ kuraa’-kuraa’ telana’ tong jumen ka’an éh bu’un. Palaa’ kekat telana’ inah, ka’an éh keruwah iteu’ ngelavo’ kekat kelunan éh murip tong tana’ ngan nyohoo’ réh maneu’ butun dokoo’ seva’ ka’an éh bu’un éh lepah suhat neu’ po’é, bang to ke’ murip. 15 Ka’an éh keruwah iteu’ omok mena’ laset ngan butun inah, pah avéé’ butun inah omok pané ngan mematai kekat irah éh bé’ keloo’ seva’ éh. 16 Ka’an éh keruwah iteu’ mugun kekat kelunan: kelunan kemalai ngan kelunan ja’au, kelunan kaya’ ngan kelunan kari, ripen ngan kelunan pelepu, dokoo’ alaa’ tada’ tong ojoo’ saa’ na’au’ ngan tong sela’ réh. 17 Bé’ pu’un séé’-séé’ omok melih ngan pebelih, hun néh bé’ pu’un tada’ inah, inah éh ngaran ka’an inah ke’ tengéé’ hun néh bé’ kenat lubun éh ngeliwah ngaran ka’an inah. 18 Tong iteu’ tekep pakai pengejam. Séé’-séé’ éh jam omok éh jam sin tong lubun ka’an inah, uban lubun inah ngeliwah ngaran kelunan. Lubun inah 666.
141 La’ah pu’un ku’ na’at kepéh ngan ta’an ké’ Anak Domba nah nekedéng tong Tokong Sion, inah éh Yérusalem éh tong seruga. La’ah pu’un jah ato pat poloo’ pat ibu kelunan, iteu’ kelunan éh pu’un ngaran Anak Domba ngan ngaran Tamen Néh tong sela’ réh éh pu’un pemung ngan Néh sinah. 2 La’ah nenéng ké’ ha’ jin seruga éh barei’ ha’ o’ong éh ja’au barei’ ha’ lengedo éh ja’au. Ha’ éh nenéng ké’ nah barei’ ha’ sapé’ éh netit réh. 3 Tong saa’ lemah nyun inah, pat penyuai éh murip inah, ngan irah pengeja’au inah, nekedéng 144,000 kelunan inah. Irah nyanyi jah nyanyi maréng éh bé’ omok kelunan éh jah nyanyi éh. Irah inah awah éh lepah alaa’ urip jin Allah. 4 Irah bé’ pemung pegen ngan redo, ke’ réh mihau usah réh ni’ai. Irah kivu Anak Domba semah awah éh tai. Jin belah kekat kelunan, irah inah éh lepah alaa’ urip jin Allah. Irah anah Allah ngan Anak Domba inah. Uban irah néh éh barei’ ajau éh bu’un-bu’un éh nena’ ngan Allah. 5 Bé’ irah pané kenyo, bé’ pu’un ineu’-ineu’ kesa’at réh. 6 La’ah akeu’ na’at jah meliket kepéh marang bau tong sawang. Iah mihin Rengah Jian éh pelinguh ke’ néh perengah éh ngan kelunan tong tana’; inah ngan kekat bengesa’, pohoo’, arong ha’ ngan leboo’. 7 Meliket inah pané ngan ja’au ha’ Jian keh seva’ Allah ngan ngajung Iah uban Néh Ja’au! Hun iteu’ avéé’ jaka’ Allah petuneng kelunan. Jian keh tukep seva’ Iah éh suai langit, tana’, baa’ banget, ngan kekat usit baa’! 8 Jin la’o meliket éh bu’un nah piso, avéé’ meliket éh keruwah éh bara’ Leboo’ Babel lepah Sopéé’. Leboo’ ja’au inah lepah sopéé’! Penganeu’ éh segit tong Leboo’ Babel nah nasa’ kekat bengesa’, barei baa’ buaa’ agun éh maneu’ réh mavuk. 9 Jin la’o rawah meliket inah piso avéé’ kepéh meliket éh ke teleu’ éh bara’, séé’-séé’ éh seva’ ka’an inah ngan butun néh ngan éh alaa’ tada’ ka’an inah tong sela’ ngan ojoo’ réh, 10 irah mesep baa’ buaa’ agun kemerek Allah, baa’ buaa’ agun éh mulun éh nujek lem sawan kemerek Néh! Kekat irah inah juk teneng pengeketa dalem luten ngan éh letéé’ éh pana mu’un tong jumen kekat meliket ni’ai ngan Anak Domba. 11 Sap luten éh peketa réh nebului ngelayau avéé’ pelinguh-linguh. Irah éh seva’ ka’an inah, ngan butun néh, kenat péh irah éh pu’un tada’ ngaran ka’an inah adang réh keta mu’un-mu’un putung dau ngan putung merem. 12 Inah maneu’ irah éh anah Allah éh tigéh kivu sohoo’ Néh ngan tigéh tong Yésus tekep kebit kenin. 13 La’ah nenéng ké’ jah ha’ jin seruga éh bara’, Jian ke’ nyurat ha’ ké’ iteu’, Jin la’o iteu’ murung kenin kelunan éh matai lem réh maneu’ kereja’ Tuhan, ha’ néh. Ka’ ha’ Sahéé’ Ni’ai mipa éh, Mu’un, adang réh murung, uban réh ma’o jin kereja’ réh bahat, kekat penganeu’ réh pu’un oléé’ ngan réh kepéh, ha’ néh. 14 La’ah pu’un ku’ na’at kepéh ngan ta’an ké’ jah avun éh mebéng. Pu’un jah kelunan menyun tong avun inah, layan néh barei’ kelunan mu’un, pu’un jah tapong mas tong ulun Néh, ngan po’é tebikong éh nyahit kenamit Néh. 15 La’ah pu’un jah meliket kepéh musit jin Umaa’ Allah pané ngan ja’au ha’ ngan Iah éh menyun tong avun nah, ka’ ha’ néh alaa’ po’é Ko’ ngan nebu’un kereja’ majau, uban jaka’ ajau lepah avéé’, ajau tong tana’ lepah mesak ngan lepah avéé’ jaka’ néh dokoo’ majau! 16 Boh Iah éh menyun bau avun nah niwet po’é Néh tong tana’ ngan ajau tong tana’ tenipun Néh. 17 La’o inah ta’an ké’ jah meliket kepéh musit jin Umaa’ Allah éh tong seruga, ngan iah péh pu’un po’é éh tebikong éh nyahit. 18 La’ah tuai jah meliket kepéh éh mihau luten tong jalan réh motong kemenyan ngan Tuhan. Pu’un éh pané ngan ja’au ha’ ngan meliket éh pu’un po’é tebikong éh nyahit nah, ka’ ha’ néh, pakai po’é ke’ alaa’ buaa’ agun jin pulah tong tana’ uban néh lepah mesak tenéh, ha’ néh. 19 Boh meliket nah niwet po’é néh tong tana’ ngan alaa’ buaa’ agun jin inan néh ngan ngaléng éh tong jalan meték buaa’ agun, inah éh kemerek Allah. 20 Kekat buaa’ agun nah neték réh saa’ usit leboo’ inah ngan jin jalan meték agun inah nguhat dahaa’ barei tovoo’ baa’ ja’au, kejuu’ néh barei jin i’ot jah atong baa’ ja’au pah avéé’ long néh, kedilem néh ngioo’-ngioo’ nem kaki.
151 La’ah ta’an ké’ tong langit jah telana’ éh tejeu’ ngan éh ngebéé’ kenin. Pu’un tujuu’, meliket éh kereja’ pesavéé’ tujuu’ penusah éh pengega’ bau tana’ palaa’ tujuu’ penusah inah Allah ngega’ ukum Néh. 2 Ta’an ké’ barei’ baa’ banget éh mening ngan barei’ pekulup ngan luten. La’ah ta’an ké’ kepéh irah éh lepah menang bau ka’an éh musit jin baa’ ngan butun éh pekua’ layan ka’an inah, ngan bau iah éh bara’ ngaran néh palaa’ lubun nah. Pu’un réh nekedéng déhéé’ baa’ éh mening nah, ngan pu’un irah ngamit sapé’ éh nena’ Allah ngan réh. 3 Pu’un réh nyanyi ha’ nyanyi Musa, kelunan éh sohoo’ Allah, ngan ha’ nyanyi Anak Domba, ka’ ha’ réh, O Tuhan, Tuhan Allah éh pelapah ja’au penyukat jin ineu’-ineu’ péh, matek jian ngan matek ja’au kekat penganeu’ Ko’. Ka’au’ éh Raja’ bau kekat arong kelunan, kekat jalan Ko’ pu’un teneng ngan pu’un pejek. 4 O Tuhan, tekep kekat kelunan leko maneu’ sa’at tong Ke’, jian réh peparen ngaran Ko’, uban Ka’au’ awah éh pu’un ni’ai. Kekat kelunan pah tipo tana’ juk tuai seva’ Ke’, uban kekat penganeu’ Ko’ éh teneng kejam réh béé-béé, ha’ réh. 5 La’o inah ta’an ké’ umaa’ Allah tong seruga pu’un pukap inah éh lamin jalan Allah mokoo’ sahau rai. 6 La’ah tujuu’ meliket éh ngamit tujuu’ arong penusah nah musit jin umaa’ Allah irah pakai livah kapan éh ni’ai ngan ngada. Tong kebah réh peseviget naneu’ mas. 7 Jah usah jin pat penyuai éh murip inah mena’ ngan tujuu’ meliket inah, tujuu’ pigan mas éh penoo’ neu’ kemerek Allah, inah éh Allah éh murip pelinguh-linguh. 8 Umaa’ Allah inah penoo’ neu’ sap jin pengaren ngan penyukat Allah, ngan bé’ pu’un séé’-séé’ péh omok tai lem Umaa’ Allah inah hun tujuu’ penusah éh kamit tujuu’ meliket nah bé’ jak ma’o.
161 La’ah nenéng ké’ jah ha’ éh ja’au pané jin Umaa’ Allah ngan tujuu’ meliket nah, ka’ ha’ Néh, Tai keh mujek kemerek Allah jin pigan inah tong tana’, ha’ néh. 2 Tai meliket éh bu’un nah mujek kemerek nah tong tana’ jin pigan inah. Irah éh pu’un telana’ ka’an ngan éh seva’ butun éh pekua’ layan ka’an inah, irah tioo buteu’ éh sa’at mu’un ngan sakit mu’un réh. 3 Boh meliket éh keruwah nah mujek kemerek nah tong baa’ banget jin pigan inah. Baa’ inah paléu barei’ dahaa’ kelunan éh lepah matai, ngan kekat-kekat arong éh pu’un lem baa’ banget nah matai béé. 4 Boh meliket éh keteleu’ nah mujek kemerek nah tong kekat baa’ ngan usit baa’ jin pigan inah, ngan baa’ inah paléu dahaa’. 5 La’ah nenéng ké’ ha’ meliket éh pu’un penyukat bau baa’ bara’, O Iah éh Ni’ai, éh pu’un hun iteu’ ngan éh lepah pu’un tenéh, teneng Ke’ maneu’ kekat ukum kenat, 6 pu’un réh mematai kelunan éh anah Allah ngan irah nabi, ngan hun iteu’ pu’un Ke’ mena’ dahaa’ ngan réh kepéh ke’ réh mesep éh. Pu’un réh alaa’ éh tekep ngan réh, ha’ néh, 7 La’ah akeu’ menéng ha’ jin jalan réh motong kemenyan pané, Tuhan, Allah éh ja’au penyukat! Ukum neu’ Ko’ inah teneng ngan pejek mu’un! 8 La’ah meliket éh kepat nah mujek kemerek nah tong maten dau jin pigan inah, ngan pu’un kelunan sakit ngan lasoo’ neu’ kepana néh. 9 Pu’un kelunan lasoo’ neu’ éh pana mu’un, ngan pu’un réh menoo’ ngaran Allah éh pu’un penyukat maneu’ kekat penusah inah. Bang bé’ réh piso jin penyala’ réh ngan ngerera’ kenin réh ngan seva’ Allah. 10 Boh meliket éh kelemah nah mujek kemerek nah tong nyun jalan ka’an inah mokoo’ raja’. Tioo pu’un merem tong kekat tana’ éh lem nihau ka’an inah, ngan pu’un réh menya’ jela’ réh uban pengeketa réh, 11 pu’un réh menoo’ Allah tong seruga uban kesakit ngan pengeketa réh. Bang bé’ réh piso jin kesa’at réh. 12 Boh meliket éh kenem nah mujek kemerek nah tong baa’ ja’au Eprat jin pigan inah. Tioo baa’ inah mapeu’ dokoo’ maneu’ jalan ngan irah raja’ éh tuai jin tana’ éh saa’ usit maten dau. 13 Boh akeu’ na’at teleu’ sahéé’ éh sa’at éh barei’ layan sa’ai musit jin ujun berungan, jin ujun ka’an inah, ngan jin ujun nabi éh ngelavo’. 14 Sahéé’ inah sahéé’ éh sa’at éh maneu’ kuraa’-kuraa’ telana’ éh ngebéé kenin kelunan. Teleu’ sahéé inah tai tavin kekat raja’ pah tipo tana’, ngan pepemung réh ke’ réh pekayau tong dau Allah éh ja’au penyukat ngelohoo’ ukum Néh. 15 Menéng keh! Akeu’ juk tuai barei’ kelunan nekau! Murung kenin kelunan éh mavaa’ ngan mihau pakai néh, ke’ néh bé’ lakau ugai ngan menyaa’ ta’an kelunan pinaa’! 16 La’ah sahéé’ inah mihin kekat raja’ inah pemung tong jah retek éh lem ha’ Ibrani ngaran néh Harmegedon. 17 Boh meliket éh ketujuu’ nah mujek kemerek nah tong sawang jin pigan inah. Tioo pu’un jah ha’ éh ja’au jin nyun tong Umaa’ Allah éh bara’, Iteu’ néh pengebéé néh, ha’ néh. 18 Tioo pu’un kela’ap ngan ha’ ja’au ngan ha’ lengedo ngan tegen tana’ ja’au mu’un. Jin bu’un-bu’un kelunan pu’un tong tana’, bé’ pu’un tegen tana’ pekua’ tegen tana’ inah. Tegen tana’ inah pelapah sa’at jin kekat tegen tana’ éh jah. 19 Leboo’ ja’au éh kenajung réh, pebila’ teleu’, ngan kekat leboo’ ja’au tong siget tana’ pu’un tasa’ mu’un. Allah nesen Babel éh ja’au ngan maneu’ éh mesep baa’ agun jin sawan Néh, inah éh mesep kemerek Néh. 20 Kekat tana’ éh siik salai béé ngan kekat tokong bé’ pu’un la’ah. 21 Pu’un taa’ bateu’ éh ja’au pelohoo’ jin langit teneng tong kelunan. Kebahat jah tétéé’ taa’ inah avéé’ jah pikun. Pu’un kelunan menoo’ Allah uban taa’ bateu’ inah, uban néh sa’at mu’un.
171 Boh jah usah jin ketujuu’ meliket éh pu’un tujuu’ pigan nah, tuai tavin ku’ ngan bara’ ngan ké’ ka’ ha’ néh, Tuai ke’, boh akeu’ bara’ tong ukum éh tong redo petuyang, inah éh leboo’ ja’au éh pu’un déhéé’ baa’ pinaa’. 2 Irah raja’ tong tana’ petuyang ngan redo éh sa’at inah, ngan kelunan tong tana’ barei’ kelunan mavuk tovoo’ redo éh petuyang inah maneu’ penganeu’ éh segit ngan réh. 3 La’ah Sahéé’ Ni’ai pepenoo’ kenin ké’ ngan meliket inah mihin akeu’ tai tana’ linek. Sinah akeu’ na’at jah redo menyun tong jah ka’an bala éh pu’un kuraa’-kuraa’ surat éh ngesa’at ngaran Allah tong usah néh. Ka’an inah pu’un tujuu’ ulun ngan jah poloo’ uheng. 4 Redo inah pu’un pakai livah éh rep-rep ngan bala, ngan pinaa’ arong mas ngan bateu’ éh jian na’at, éh ma’an melih, ngan bateu’ mutiara. Iah ngamit sawan mas éh penoo’ neu’ kuraa’-kuraa’ arong éh sa’at ngan jelemih neu’ barék néh éh sa’at. 5 Tong sela’ néh pu’un ngaran, éh sin tong ngaran inah pelim, ka’ éh, Babel ja’au éh tinen kekat kelunan éh petuyang ngan kekat irah éh maneu’ ineu’-ineu’ barék éh sa’at tong tana’ iteu’ kenat ngaran éh tong sela’ néh. 6 La’ah ta’an ké’ redo inah mavuk neu’ dahaa’ kelunan éh anah Allah, ngan dahaa’ irah éh penatai réh uban réh tigéh kivu Yésus. Hun ké’ na’at éh, béé kenin ké’. 7 Boh meliket nah neteng ku’, Uban ineu’ ke’ béé kenin, akeu’ juk bara’ sin tong redo inah ngan sin tong ka’an éh mihin éh lakau nah, ngan sin tong ka’an éh pu’un tujuu’ ulun ngan jah poloo’ uheng nah. 8 Ka’an éh ta’an ko’ nah, inah pu’un éh murip sahau bang hun iteu’ bé’ éh murip la’ah, bang danii’ jaka’ néh juk musit jin luvang éh dilem, ke’ Tuhan kebéé éh pelinguh. La’ah kekat kelunan tong tana’ éh bé’ pu’un ngaran senurat lem surat urip bé’ jak tana’ iteu’ senuai, adang irah inah béé kenin na’at ka’an inah. Ka’an inah sahau pu’un éh murip, hun iteu’ bé’ éh murip la’ah, bang pu’un éh juk poléng kepéh. 9 Iteu’ tekep seneruh palaa’ pengejam éh dilem. Tujuu’ ulun inah, inah éh tujuu’ tokong éh jalan redo inah menyun, tujuu’ ulun inah kepéh inah éh tujuu’ raja. 10 Lemah usah raja jin belah irah inah lepah matai, pu’un jah éh raja keto, ngan jah kepéh to bé’ jak tuai. Hun iah pu’un tuai metok awah éh maneu’ kereja’ néh raja. 11 La’ah ka’an éh murip sahau nah, bang éh bé’ murip hun iteu’, inah éh kayah raja nah éh pu’un ngan irah tujuu’ nah, ngan iah danii juk kenebéé’ Tuhan. Ha néh. 12 Ha’ meliket nah kepéh, la’ah jah poloo’ uheng éh ta’an ko’ nah, inah éh jah poloo’ raja’ éh to bé’ jak maneu’ kereja’ néh raja, bang pu’un Tuhan kejeraa’ réh pu’un penyukat ke’ réh omok raja’ pemung ngan ka’an inah kelebéé’ jah jam. 13 Jah poloo’ raja inah pu’un pekua’ kenin, ngan pu’un réh mena’ pengegahang réh ngan penyukat réh ngan ka’an inah. 14 Pu’un réh ngelawan Anak Domba nah, bang Anak Domba nah pemung ngan irah éh tenebai Néh ngan kevéléé’ Néh, irah éh tigéh, pu’un réh nyopéé’ réh teleu’ raja inah, uban Anak Domba nah éh Pengeja’au bau kekat pengeja’au, ngan Raja bau kekat raja’ péh, ha’ néh. 15 La’ah ha’ meliket nah ngan ké’ kepéh, baa’ éh ta’an ko’ nah, éh jalan redo éh petuyang nah menyun, inah éh kuraa’-kuraa’ leboo’, kelunan, bengesa’ ngan arong ha’. 16 La’ah jah poloo’ uheng éh ta’an ko’ ngan ka’an éh ta’an ko’ nah, adang réh juk leko mu’un tong redo éh petuyang nah, ngan alaa’ kekat pakai néh ngan bet usah néh ugai awah, adang réh pu’un kuman sin néh ngan motong éh lem luten. 17 Éh ke’ néh kenat uban Allah lepah ngusii’ kenin réh dokoo’ pesukup ineu’ éh pengeloo’ Néh. Pu’un Allah maneu’ réh kua’ kenin ke’ réh mena’ penyukat réh ngan ka’an inah, ke’ néh omok raja pah avéé’ ineu’ éh lepah benara’ Allah pu’un kenat mu’un. 18 Ka’ ha’ néh kepéh, La’ah redo éh ta’an ko’ nah, inah éh leboo’ ja’au éh kenajung réh éh pu’un penyukat bau kekat raja tong tana’, ha’ néh.
181 La’o inah ta’an ké’ jah meliket kepéh tuai jin seruga. Meliket inah pu’un ja’au penyukat, ngan pengaren néh nawa pah tipo tana’. 2 Iah pané ngan ja’au ha’ Babel lepah Sopéé’! Babel éh ja’au lepah sopéé’! Hun iteu’ kekat Sitan ngan balei’ éh sa’at mokoo’ tong Babel. Kuraa’-kuraa’ arong juhit éh segit ngan éh keleko’ kelunan mokoo’ Sinah. 3 Kekat arong kelunan pu’un mesep baa’ buaa’ agun néh, inah éh penganeu’ néh éh segit. Irah raja’ tong tana’ pu’un réh petuyang ngan néh, ngan kelunan éh pebelih tong tana’ pu’un réh kaya’ neu’ barék néh éh sa’at inah. 4 La’ah nenéng ké’ jah ha’ kepéh jin seruga éh bara’, Musit keh, kekat kelunan éh anah Ké’. Musit keh jin Babel. Mai keh ngebakéh éh lem kekat penyala’ néh, dai keh kenukum pemung ngan néh. 5 Uban penyala’ néh petipun avéé’ tai langit ngan Allah bé’ ngelepan tong kesa’at néh. 6 Keh maneu’ ngan Babel pekua’ éh lepah neu’ néh ngan keh keh poléé’ ngan Babel duah koléé’ kepéh kivu kekat penganeu’ néh. Pepenoo’ sawan néh kepéh palaa’ baa’ éh duah koléé’ katah jin éh nena’ néh ngan keh. 7 Petusah éh ngan ngebesau éh pekua’ ke ja’au pengaren ngan pengejian néh lepah nah. Uban pu’un éh bara’ ka’ rai, Akeu’ éh raja Kuin, bé’ akeu’ redo baleu’, bé’ pu’un ineu’-ineu’ omok ngebesau akeu’, ha’ néh. 8 Uban néh kenat lem jah dau awah kekat penusah iteu’ juk teneng tong néh. Penyakit, kebesau ngan kela’au. Babel adang juk potong neu’ luten, uban Tuhan Allah éh petuneng éh nah pu’un penyukat. 9 Irah raja tong tana’ éh petuyang ngan maneu’ barék éh segit ngan néh, adang néh mangaa’ ngan nirau leboo’ inah. Hun mah réh na’at sap luten motong éh. 10 Irah nekedéng jin juu’, uban réh medai teneng neu’ pengeketa inah. Ka ha réh, tusah mu’un-mu’un leboo’. Babel éh ja’au ngan éh kenajung réh inah. Lem jah jam awah Babel lepah kenukum! 11 La’ah irah kelunan pebelih tong tana’ mangaa’ ngan nirau tong néh, uban bé’ pu’un séé’-séé’ kelunan péh melih livah réh kepéh. 12 Bé’ pu’un jah usah péh melih mas, pirek, bateu’ éh ma’an éh jalan na’at ngan Mutiara réh. Bé’ pu’un jah usah péh melih livah kapan, livah éh rep-rep, livah népé ngan livah bala rep-rep. Bé’ jah usah péh melih kekat arong kayeu’ éh ma’an pitah, kuraa’-kuraa’ arong éh senuai réh jin jipen gajah, kayeu’ éh ma’an, temagaa’, daven ngan bateu pesan. 13 Bé’ pu’un jah usah péh melih Ipaa’ kayeu’ éh jian ba’oo’ kekat éh ngejian ba’oo’ ka’an, kemenyan éh jian ba’oo’, mur ngan kemenyan. Bé’ pu’un jah usah péh melih baa’ buaa’ agun, nyak Saitun, apo ngan parai, sapé’ ngan domba, kuda ngan kerita kuda, ripen ngan kelunan éh senopéé’ lem pekayau péh. 14 Ka’ ha’ irah éh pebelih bara’ ngan leboo’ Babel, Kekat-kekat arong éh jian éh penitah ko’, béé éh hun iteu’, ngan kekat pengekaya’ ko’ ngan pengaren ko’ lepah béé, adang ko’ bé’ omok alaa’ éh kepéh, ha’ réh. 15 La’ah irah pebelih éh pu’un alaa’ pengekaya’ réh jin leboo’ inah, adang réh juk nekedéng na’at éh jin juu’, uban réh medai na’at kekat penusah néh nah. Irah mangaa’ ngan nirau. 16 Ka’ ha’ réh tusah mu’un-mu’un leboo’ éh ja’au inah! Kemalai néh Babel pakai livah kapan, livah rep-rep ngan livah bala rep-rep; kemalai néh Babel pakai mas, bateu’ éh jian na’at éh ma’an ngan Mutiara! 17 Bang lem jah jam awah kekat pengekaya’ Babel lepah béé. La’ah kekat pengeja’au éh ngamit kapen ngan irah éh jalan kapen, ngan irah éh kereja’ tong kapen, ngan kekat kelunan éh jah éh pohoo’ kereja’ réh tong baa’ banget pu’un réh nekedéng na’at éh jin juu’. 18 Irah ngeradau hun réh na’at sap luten éh motong leboo’ inah. Irah bara’, Bé’ pu’un leboo’ éh barei’ leboo’ éh ja’au iteu’! 19 Irah mavat agaa’ tana’ tong ulun réh tada’ réh tusah kenin, irah mangaa’ ngan nirau ka’ ha’ réh, tusah mu’un-mu’un leboo’ éh ja’au inah! Uban Sinah kekat kelunan éh pu’un kapen tong banget nah omok kaya’ uban pengekaya’ leboo’ inah! Bang lem jah jam awah kekat ineu’-ineu’ anah Babel nah pu’un béé! 20 O kekat kelunan tong seruga, jian keh murung kenin uban néh lepah béé. O kekat kelunan éh anah Allah, ngan kekat lawah Néh ngan kekat nabi, murung keh, uban pu’un Allah ngukum éh uban kekat penganeu’ néh ngan keh lepah rai. 21 Boh jah meliket kepéh éh ja’au penyukat alaa’ jah bateu’ ke ja’au song ke’ néh ngelohoo’ éh lem baa’ banget, ka’ ha’ néh, Barei’ inah péh Babel éh leboo’ ja’au éh kenajung réh pu’un pelohoo’, bé’ pu’un séé’ péh na’at éh kepéh. 22 Bé’ pu’un kelunan ngeringot ngan metit sapé’ kepéh, bé’ pu’un ha’ serupit, bé’ pu’un ha’ ineu’-ineu’ éh omok mihin kelunan murung kenin tong leboo’ inah kepéh. Bé’ pu’un séé’ péh maneu’ kereja’ tong leboo’ inah kepéh. Bé’ pu’un ha’ réh muja’ parai. 23 Bé’ pu’un ada pelita’, bé’ pu’un ha’ kelunan kawin tong leboo’ inah kepéh. Kelunan pebelih jin leboo’ inah, pelapah jam réh pitah aken réh jin kelunan éh jah éh jin semah-semah péh, ngan neu’ kuraa’-kuraa’ penganeu’ réh éh neu’ réh neu’ kerenget réh, éh ngebéé kenin kelunan, pu’un réh ngelavo’ kekat kelunan tong tana’ rai, ha’ néh. 24 Pu’un Allah ngukum leboo’ Babel uban dahaa’ irah éh nabi Tuhan, ngan dahaa’ kelunan éh jah éh anah Allah, pu’un éh pega’ tong leboo’ inah, inah éh dahaa’ kekat kelunan éh penatai réh tong tana’.
191 La’o inah nenéng ké’ ha’ éh barei’ ha’ kelunan pinaa’ tong seruga, ka’ ha’ réh, Mejing Allah. Iah pu’un penyukat purip kelunan, matek maren mu’un éh, ngan ja’au mu’un penyukat néh. 2 Teneng ngan pejek mu’un jalan Allah petuneng! Iah lepah ngukum redo éh petuyang inah, éh petawang kelunan tong tana’ palaa’ penganeu’ néh éh segit. Allah lepah ngukum éh uban néh mematai irah éh sohoo’ Allah! 3 Jah koléé’ kepéh irah pané ngan ja’au ha’ Mejing Allah! Sap leboo’ ja’au éh potong nah nebului pelinguh-linguh. 4 Duah poloo’ pat irah pengeja’au ngan pat penyuai éh murip inah ngejekuu’ lep réh ngan seva’ Allah éh menyun bau nyun inah. Ka’ ha’ réh Amin! Mejing Allah! 5 Boh pu’un ha’ jin nyun inah bara’,Mejing Allah, oo’ kekat kelunan sohoo’ Néh ngan kekat kelunan éh medai tong Iah jian péh pu’un pakat kenat péh kelunan éh kemalai awah! 6 La’ah nenéng ké’ kepéh ha’ éh barei’ ha’ kelunan pinaa’ nah, ngan barei’ ha’ o’ong éh ja’au, ngan barei’ ha’ lengedo éh ja’au, ka’ ha’ réh, Mejing Allah, uban Tuhan inah éh Allah éh pelapah ja’au penyukat jin ineu’-ineu’ péh, Iah éh Raja. 7 Jian lu’ murung ngan bahuu’ kenin, jian lu’ ngeja’au ngan peparen Iah, uban hun iteu’ lepah avéé’ jaka’ Anak Domba nah juk kawin, ngan redo Néh lepah petenup ke’ néh omok tai pemung ngan Néh. 8 Redo éh juk kawin nah lepah nena’ réh livah kapan éh Ni’ai ngan ngada ke’ néh pakai éh. (Livah kapan éh penakai néh inah, inah éh penganeu’ éh jian éh lepah naneu’ irah éh anah Allah.) 9 Boh meliket bara’ ngan ké’, Jian ke’ nyurat ha’ ké’ iteu’, Murung kenin kekat kelunan éh tenebai Tuhan tong kawin Anak Domba, ha’ néh. La’ah ha’ néh ngan ké’ kepéh, Kekat ha’ inah teneng éh, inah éh matek ha’ Allah mu’un, ha’ néh. 10 Akeu’ ngejekuu’ lep ké’ déhéé’ gem néh juk seva’ éh, bang ha’ néh ngan ké’, Mai ke’ seva’ akeu’, akeu’ péh kelunan sohoo’ barei’ ka’au’ ngan kekat irah padéé’ ko’, inah éh irah éh bé’ putui pengelan bang éh ngelan tong Yésus ngan mihau ha’ tebaraa’ éh teneng éh benara’ Yésus. Jian ke’ seva’ Allah, ha’ néh. Uban pengeteneng éh benara’ Yésus pu’un éh ngusii’ kenin kelunan éh bara’ ha’ Tuhan ngan kelunan. 11 La’ah akeu’ na’at seruga pu’un pukap ngan akeu’ na’at jah kuda mebéng. Iah éh menyun tong néh ngaran néh éh tigéh ngan éh teneng. Iah petuneng ngan teneng mu’un ngan nyakat tong pengeteneng. 12 Maten Néh barei’ tekok luten ngan pinaa’ tapong tong ulun Néh. Pu’un jah ngaran tong néh éh bé’ kejam kelunan éh jah, Iah awah éh jam éh. 13 Livah pakai Néh ripoo’ neu’ dahaa’. Ngaran Néh Ateng ha’ Allah. 14 Kekat seradu Néh tong seruga kivu éh jalan kuraa’-kuraa’ kuda éh mebéng ngan pakai réh livah kapan éh mebéng ngan ni’ai. 15 Jin ujun Néh musit jah po’é éh nyahit, ngan palaa’ po’é inah Iah juk nyopéé’ kekat arong kelunan. Iah juk mihau réh palaa’ sekot daven. Iah juk meték buaa’ agun tong jalan réh meték éh. Inah éh kemerek ngan kepana kenin Allah éh ja’au penyukat. 16 Tong livah pakai Néh ngan tong pa’an Néh senurat ngaran iteu’, Raja’ bau kekat raja ngan Tuhan bau kekat Tuhan. 17 La’ah ta’an ké’ kepéh jah meliket nekedéng bau maten dau, pu’un éh bara’ ngan ja’au ha’ ngan kekat juhit éh marang tong sawang. tuai keh petipun tavin penguman ja’au éh lepah petenup Allah. 18 Tuai kuman sin raja, sin pengeja’au seradu ngan seradu, sin kuda ngan irah éh bau néh péh, sin kekat kelunan, irah éh ripen ngan irah éh pelepu péh, kelunan pengeja’au ngan kelunan kemalai awah! 19 La’ah ta’an ké’ ka’an inah ngan kekat raja tong tana’ ngan kekat seradu réh petipun ke’ réh ngelawan Iah éh menyun bau kuda Mebéng nah ngan seradu Néh. 20 La’ah kamit réh ka’an inah pemung ngan iah éh ngelayoo’ nabi, éh pu’un maneu’ kuraa’-kuraa’ arong éh tejeu’ tong jumen néh lepah nah. Pu’un éh ngelavo’ irah éh pu’un telana’ ka’an inah, ngan irah éh seva’ butun éh pekua’ layan ka’an inah, neu’ kuraa’-kuraa’ penganeu’ néh éh tejeu’ ta’an réh. Ka’an nah ngan iah éh bara’ iah tuai sohoo’ Tuhan bang bé’ éh sohoo’ Néh, nebet réh ketem murip lem Bawang luten éh mahang pemung ngan éh letéé’ éh pana’ mu’un. 21 Kekat seradu ka’an inah matai neu’ po’é éh musit jin ujun Iah éh menyun tong kuda nah, ngan kekat juhit kuman sin réh pah beso.
201 La’ah ta’an ké’ kepéh jah meliket tuai jin seruga, éh ngamit kusi’ luvang tana’ éh dilem nah ngan jah latai éh ja’au. 2 Iah ngamit berungan inah, torok éh sahau inah éh Iblis iah ke’ éh Sitan ngan ngejeret éh palaa’ latai avéé’ jah ibu taun kelebéé’. 3 Meliket nah bet éh lem luvang tana’ éh dilem nah, ngan tutup éh ngan ngusii’ éh ke’ néh bé’ omok ngelavo’ kekat arong kelunan kepéh, avéé’ jah ibu ta’un nah béé. La’o inah boh éh pelepu metok awah. 4 La’ah ta’an ké’ kepéh kuraa’-kuraa’ nyun raja ngan irah éh menyun tong néh. Irah inah pu’un penyukat omok petuneng kelunan. La’ah ta’an ké’ kepéh sahéé’ irah éh penatai réh uban réh bara’ tong pengelan réh tong Yésus ngan nebaraa’ tong ha’ tebaraa’ Allah. Bé’ irah inah seva’ ka’an ngan butun éh pekua’ layan ka’an inah, ngan bé’ réh pakai tada’ ka’an inah tong sela’ ngan tong ojoo’ réh. Pu’un réh murip kepéh ngan pu’un réh pengeja’au pemung ngan Kristus avéé’ jah ibu ta’un kelebéé’. 5 Murung kenin irah éh betéé’ tong pengebetéé’ éh bu’un, irah anah Allah. Pematai éh keruwah bé’ pu’un penyukat bau réh. Irah omok imam Allah ngan imam Kristus. Irah omok pengeja’au pemung ngan Néh avéé’ jah ibu taun kelebéé’. 6 Murung kenin, bahuu’ mu’un irah éh betéé’ tong pengebetéé’ éh bu’un nah. Bé’ patai éh keruwah koléé’ pu’un penyukat bau réh, irah pu’un seva’ Allah ngan Kristus, irah péh pengeja’au pemung ngan Néh avéé’ jah ibu ta’un kelebéé’. 7 La’o jaka’ jah ibu taun nah béé, Sitan nah pu’un kelepu jin jalan néh tenutup. 8 Ke’ néh tai ngelavo’ kuraa’ arong kelunan pah tipo tana’, inah éh Gog ngan Magog. Tovoo’ inah pu’un Sitan mihin réh pemung ke’ réh pekayau, pinaa’ mu’un réh pekua’ kekat napun tong baa’ banget. 9 Irah purat tong tana’ ngan pu’un tutuh retek pengokoo’ kelunan éh anah Allah, ngan tutuh Yérusalem leboo’ ja’au éh kemurung Tuhan. Bang pu’un luten tuhun jin langit kebéé kekat réh béé. 10 Boh Sitan éh ngelavo’ réh nebet Tuhan lem bawang luten ngan éh letéé’ éh pana mu’un. Éh jalan ka’an inah ngan nabi éh ngelavo’ nah nebet Tuhan sahau. Irah béé teneng keta putung dau ngan putung merem avéé’ pelinguh-linguh. 11 La’ah akeu’ na’at jah nyun ja’au éh mebéng ngan Iah éh menyun tong néh. Langit ngan tana’ piso jin jumen Néh, avéé’ néh bé’ poléng la’ah. 12 La’ah ta’an ké’ kekat kelunan éh lepah matai, irah éh ja’au ngan irah éh si’ik péh, kekat réh béé nekedéng saa’ tenah nyun nah. La’ah pu’un réh mukap kekat surat, boh réh mukap jah surat kepéh, éh surat ngaran irah éh pu’un urip maréng. Kekat irah éh lepah matai petuneng néh kivu kekat penganeu’ réh pekua’ éh senurat lem kekat surat inah. 13 Boh baa’ banget pepusit irah matai éh pu’un lem néh. Patai ngan jalan patai péh pepusit irah matai éh pu’un sinah. Kekat irah matai petuneng Néh kivu penganeu’ réh. 14 Boh pematai ngan jalan patai nebet Néh lem bawang luten. Bawang luten nah inah éh patai éh keruwah koléé’. 15 Séé’-séé’ éh bé’ pu’un ngaran lem surat ngaran irah éh pu’un urip maréng pu’un Tuhan bet réh lem bawang luten nah.
211 La’ah ta’an ké’ langit éh maréng ngan tana’ éh maréng. Langit éh bu’un ngan tana’ éh bu’un bé’ pu’un La’ah, ngan baa’ banget péh salai. 2 La’ah ta’an ké’ leboo’ ni’ai, inah éh Yérusalem éh maréng éh tuai jin seruga jin Allah. Pu’un éh lepah petenup tenéh barei’ redo éh lepah petenup usah néh ke’ néh tai temeu’ ngan lakei’ néh. 3 Akeu’ menéng ha’ éh ja’au pané jin nyun inah, Hun iteu’ Allah mokoo’ pemung ngan kelunan! Iah pu’un murip pemung ngan réh ngan irah omok anah Nah. Allah tengéé’ juk mokoo’ pemung ngan réh ke’ Néh omok Allah réh. 4 Iah juk mitit baa’ maten réh. Pematai péh bé’ pu’un la’ah, kenat péh kebesau, kangaa’ ngan penyakit. Kekat éh jin sahau lepah salai béé. 5 La’ah Iah éh menyun tong nyun raja nah bara’, Hun iteu’ Akeu’ maneu’ kekat-kekat néh maréng, ha’ Néh. La’ah ka’ ha’ néh ngan ké’ kepéh, Jian ke’ nyurat ha’ ké’ iteu’, uban kekat ha’ inah teneng éh ngan omok kelunan ngelan éh. 6 Ka’ ha’ Néh kepéh, hun iteu’ kekat néh béé lepah ma’o! Akeu’ éh bu’un ngan ga’ péh, Akeu’ éh Tuhan jin bu’un avéé’ pengega’. Kelunan éh mapeu’ batok Akeu’ juk mena’ baa’ nesep éh nena’ ké’ awah ngan réh jin usit baa’ éh mena’ urip. 7 Séé’-séé’ éh nyopéé’ kekat arong kesa’at iah omok alaa’ iteu’ jin Akeu’, Akeu’ omok Allah néh ngan Iah omok Anak ké’. 8 Bang kekat kelunan éh medai, éh bé’ ngelan, irah éh maneu’ barék éh segit, irah éh mematai kelunan, irah éh petuyang, irah éh pakai limu’, irah éh seva’ butun ngan kekat irah éh kenyo, adang nebet lem bawang luten ngan éh letéé’ éh pana mu’un éh mahang ngelayau, inah éh pematai éh keruwah koléé’. 9 La’ah jah meliket jin irah éh tujuu’ nah éh pu’un tujuu’ pigan penoo’ neu’ tujuu’ arong penusah rai, tuai éh tavin akeu’, ka’ ha’ néh ngan ké’, Tuai ke’, akeu’ omok bara’ redo Anak Domba ngan ko’, ha’ néh. 10 Sahéé’ Ni’ai pepenoo’ kenin ké’ ngan meliket nah mihin ku’ tai bau jah berusu’ éh bau mu’un. Boh éh pepoléng Yérusalem ngan ké’, leboo’ ni’ai inah, éh tuai jin seruga jin Allah, 11 ngan pu’un éh maren neu’ pengaren Allah. Leboo’ inah mening mu’un barei’ bateu’ éh jian éh ma’an belih, barei’ bateu’ jasper éh mening pesan barei’ kristal. 12 Leboo’ inah pu’un pagin bau éh ja’au ngan jah poloo’ duah usit néh, ngan pu’un jah poloo’ duah meliket mavaa’ siget usit inah. Tong siget usit inah senurat ngaran jah poloo’ duah betah Israel. 13 Tutuh leboo’ inah pu’un teleu’ usit ja’au. Teleu éh saa’ usit maten dau, teleu’ éh saa’ na’au’ usit maten dau, teleu éh saa’ kabéng usit maten dau ngan teleu’ éh saa’ oléé’ maten dau. 14 Pagin leboo’ inah nejek réh bau jah poloo’ duah kekat bateu’ pengereken néh. Tong siget bateu’ inah senurat ngaran jah poloo’ duah irah lawah Anak Domba. 15 La’ah meliket éh pané ngan ké’ pu’un utang mas palaa’ néh nguwa’ ke’ néh nguwa’ leboo’ inah ngan siget usit néh ngan pagin néh. 16 Leboo’ inah layan néh besagi’ pat, kebit ngan ke ja’au néh kua’. Meliket inah nguwa’ leboo’ inah palaa’ utang mas inah: kebit néh 2,400 kilo meter, ke ja’au ngan kebau néh pekua awah ngan kebit néh. 17 Meliket inah péh nguwa’ pagin leboo’ inah; kebau néh 216 kaki: kivu kemalai kelunan nguwa’. 18 Pagin leboo’ inah senuai jin bateu’ jasper bang usah leboo’ inah senuai jin mas éh mu’un, éh mening barei pengada. 19 Kekat bateu’ pengereken pagin leboo’ inah senuai jin kuraa’-kuraa’ arong bateu’ éh ma’an belih. Bateu’ éh bu’un-bu’un inah éh bateu’ jasper, éh keruwah bateu’, nilam, éh keteleu’ bateu’ akik, éh ke pat néh bateu’ jam rud 20 éh kelemah bateu’ oniks, éh ke nem bateu’ Sardis, éh ketujuu’ bateu’ kuarja letéé’ éh kayah néh bateu’ beril, éh ke pien bateu’ topas, éh ke poloo’ néh bateu’ kalsedoni, éh jah poloo’ jah néh bateu’ pirus ngan éh jah poloo’ duah néh bateu’ kesubung. 21 Jah poloo’ duah kekat usit ja’au inah, jah poloo’ duah mutiara tong néh. Jalan ja’au tong leboo’ inah senuai jin mas éh mu’un éh mening barei’ pengada. 22 La’ah bé’ pu’un Umaa’ Allah ta’an ké’ tong leboo’ inah, uban Allah éh pelapah ja’au penyukat jin ineu’-ineu’ péh, ngan Anak Domba éh umaa’ Allah. 23 La’ah bé’ pu’un maten dau ngan laséh tong leboo’ inah, uban pengaren Allah éh perema tong leboo’ inah ngan Anak Domba éh pelita’ néh. 24 Kekat arong kelunan omok lakau tong rema néh, ngan kekat raja tong tana’ mihin pengekaya’ tong leboo’ inah. 25 Usit leboo’ inah pu’un pukap putung dau, bé’ éh tenutup réh uban bé’ pu’un merem sinah. 26 Kekat pengaren ngan pengekaya’ jin siget arong bengesa’ juk nihin tai lem leboo’ inah. 27 Bang kekat ineu’-ineu’ éh segit bé’ omok masek lem leboo’ inah, kenat péh kelunan éh maneu’ kuraa’-kuraa’ penganeu’ éh sa’at éh pekenyaa’ ngan kelunan éh kenyo. Bang kelunan éh pu’un ngaran senurat lem surat urip, éh anah Anak Domba éh omok masek lem leboo’ inah.
221 La’ah meliket nah nojoo’ baa’ ja’au éh baa’ éh purip kelunan, mening mu’un éh. Baa’ inah musit jin nyun éh jalan Allah, ngan Anak Domba nah mokoo’ ke’ roh Raja. 2 Baa’ inah matong tai belu’an jalan ja’au tong leboo’ inah. La’ah pipa dirin baa’ inah, pu’un inan kayeu’ buaa’ éh purip kelunan, éh ngebuaa’ jah poloo’ duah koléé’ lem jah taun, inah éh jah koléé’ jah laséh. Ujung kayeu’ inah jalan nawan kekat kelunan. 3 Bé’ pu’un ineu’-ineu’ éh kenukum Allah éh omok pu’un tong leboo’ inah. Nyun éh jalan Allah menyun ke’ néh Raja ngan Anak Domba pu’un lem leboo’ inah, ngan irah éh sohoo’ Néh omok réh seva’ Éh. 4 Omok réh na’at da’in Néh, ngaran Néh pu’un tong sela’ réh. 5 Bé’ pu’un merem kepéh, bé’ tiken pelita’ ngan ada maten dau, uban Tuhan Allah tengéé’ éh perema réh. Irah omok raja’ pemung ngan Néh pelinguh-linguh. 6 Boh meliket inah bara’ ka’ ngan ké’, Kekat ha’ inah teneng éh omok ke’ ngelan éh. La’ah Tuhan Allah éh mena’ Sahéé’ Néh ngan irah nabi Néh, Iah nyohoo’ meliket Néh tai bara’ ngan irah éh sohoo’ Néh ke’ réh omok jam tong kekat éh danii’ juk pu’un kepéh, ha’ néh. 7 La’ah ka’ ha’ Yésus, Menéng ke’. Akeu’ juk tuai laho. Murung kenin kekat irah éh kivu kekat ha’ lem surat iteu’ éh bara’ tong kekat éh juk avéé’ kepéh, ha’ Néh. 8 Akeu’ Yohanes lepah menéng ngan na’at kekat iteu’. La’o ké’ menéng ngan na’at éh, akeu’ ngejekuu’ lem ké’ tong jumen meliket éh bara’ kekat iteu’ ngan ké’. Ké’ juk seva’ éh. 9 Bang ka’ ha’ néh ngan ké’, Mai ke’ maneu’ kenat, akeu’ péh kelunan éh sohoo’ Tuhan barei’ ka’au’, ngan barei’ kekat padéé’ ko’ éh bara’ ha’ Tuhan ngan kelunan, ngan barei’ kekat irah éh jah éh kivu kekat ha’ lem surat iteu’. Jian ke’ seva’ Allah, ha’ néh. 10 La’ah ka’ ha’ néh kepéh, Kekat ha’ lem surat iteu’ éh bara’ tong kekat éh juk avéé’ kepéh vam, mai ke’ melim éh, uban danii’ mu’un hun kekat éh benara’ néh inah pu’un kenat mu’un. 11 Séé’-séé’ éh maneu’ barék sa’at, adang néh petem lem kesa’at néh inah, ngan séé’-séé’ éh pu’un penyeruh éh segit, adang néh pu’un petem lem penyeruh néh éh segit kenat, séé’-séé’ éh maneu’ jian, tekep éh petem maneu’ jian, ngan séé’-séé’ éh pu’un ni’ai kenin, tekep éh petem ni’ai kenin, ha’ néh. 12 La’ah ka’ ha’ Yésus, Menéng ke’. Akeu’ juk tuai laho, ngan pu’un Akeu’ mena’ oléé’ ngan siget-siget usah kivu kekat penganeu’ néh. 13 Akeu’ éh bu’un ngan éh pengega’, éh saa’ tenah ngan éh Saa’ murin; Akeu’ éh Tuhan jin bu’un avéé’ pengega’. 14 La’ah murung kenin irah éh poo’ pakai réh ngan maneu’ éh ni’ai. Irah omok kuman buaa’ kayeu’ éh mena’ urip ngan kelunan, ngan omok masek lem leboo’ inah jin usit néh. 15 Bang kelunan éh maneu’ barék éh segit, irah éh pakai limu’, irah éh petuyang, éh mematai kelunan, irah éh seva’ butun ngan irah éh kenyo jian péh palaa’ ha’ kenat péh palaa’ penganeu’ néh, bé’ réh omok masek lem leboo’ inah. 16 Ka’ ha’ Néh kepéh, Akeu’ Yésus nyohoo’ meliket Ké’ tai bara’ kekat ha’ iteu’ ngan kekat sidang. Akeu’ pu’un jin puku’ Daud, Akeu’ éh kenyuhai éh ngada teka rema, ha’ Néh. 17 La’ah Sahéé’ Ni’ai ngan redo éh juk kawin bara’, Tuai ke’, ha’ néh. La’ah siget usah éh menéng éh jian éh bara’, Tuai ke’. Séé’-séé’ éh mapeu’ batok tuai ke’, alaa’ baa’ éh omok purip ke’, pu’un Tuhan mena’ éh awah ngan séé’-séé’ éh keloo’ alaa’ éh. 18 La’ah akeu’ Yohanes akeu’ bara’ mu’un ngan siget-siget kelunan éh menéng kekat ha’ lem surat iteu’ éh bara’ tong kekat éh juk avéé’ kepéh vam, Mavaa’ keh jian-jian, hun pu’un séé’-séé’ pepit ha’ éh jah ngan ha’ iteu’, Allah pepit kekat penusah éh benara’ néh lem surat iteu’ ngan réh kepéh. 19 Ngan hun pu’un séé’-séé’ bet jelua’ ha’ jin kekat ha’ lem surat iteu’ éh bara’ tong kekat éh juk pu’un, Allah bet tulat néh jin inan kayeu’ éh omok purip kelunan pelinguh, kenat péh pu’un éh bet tulat néh jin leboo’ ni’ai éh benara’ Néh lem surat iteu’ nah. 20 La’ah Iah éh bara’ tong kekat iteu’ bara’ mu’un, Akeu’ juk tuai laho ha’ Néh, Amin! Tuai ke’, Tuhan Yésus. 21 Jian Tuhan Yésus mena’ pengejian ngan siget usah éh anah Nah.