PILIPI
11 Amo Paulus ngan Timotius éh kelunan sohoo’ Kristus Yésus, amo maneu’ surat iteu’ ngan kekat kelunan éh anah Allah éh mokoo’ tong tana’ Pilipi éh ngelan tong Kristus Yésus, pemung ngan kekat pengeja’au ngan irah éh jah péh éh nolong tong sidang. 2 Jian Allah éh Tamen lu’, ngan Tuhan Yésus Kristus, mena’ penika Néh ngan pengepawah Néh ngan keh. 3 La’ah siget koléé’ akeu’ seruh tong ka’ah, ngelayau akeu’ bara’ jian kenin ngan Allah. 4 Kenat péh siget koléé’ hun ké’ sebayang tong ka’ah pu’un ku’ sebayang ngan jian kenin. 5 Pu’un ku’ seruh tong kekat jalan keh nolong ku’ perengah Rengah Jian, jin bu’un keh pu’un menéng rengah iteu’ rai, pah avéé’ hun iteu’ péh. 6 La’ah akeu’ jam Allah éh ngusii’ kenin keh bu’un, adang Néh juk ngusii’ kenin keh kepéh pah avéé’ keh pu’un sukup ngan jian mu’un tong Dau Yésus Kristus pu’un tuai kepéh. 7 Akeu’ murung keh ngan nesen keh lem kenin ké’. Ka’ah béé pu’un nolong ku’ lem kereja’ ké’ ngan Allah, jin ké’ bé’ jak tai lamin tutup ngan ké’ nyakat tong kelunan éh juk kebéé Rengah Jian iteu’, pah avéé’ ké’ pu’un lem lamin tutup nah péh. 8 Allah éh jam akeu’ pané mu’un hun ké’ bara’ akeu’ pika keh ngan tawai keh neu’ penika Kristus Yésus. 9 Akeu’ sebayang dokoo’ penika keh ngan Allah ngan kelunan omok pepit, pemung ngan pengejam keh tong kekat éh teneng, pah avéé’ keh jam seruh mu’un, 10 dokoo’ keh omok jam ngelayau ngevéléé’ kekat éh jian. Boh ka’ah pu’un ni’ai, bé’ pu’un ineu’-ineu’ éh omok pesala’ keh tong Dau Kristus pu’un tuai kepéh. 11 Akeu’ keloo’ kekat urip ngan barék keh pu’un jian neu’ penyukat Yésus Kristus lem kenin keh, dokoo’ keh omok peparen ngan mejing Allah. 12 O kekat padéé’ ké’, akeu’ keloo’ ka’ah jam tong kekat penusah éh teneng tong akeu’, penusah inah mukap jalan kepéh tong Rengah Jian. 13 Uban neu’ penusah ké’ iteu’, pinaa’ seradu tong lamin Raja’ ngan kekat irah éh jah péh siteu’, irah béé jam akeu’ pu’un dalem lamin tutup uban ké’ kivu Kristus. 14 La’ah neu’ ké’ pu’un tong lamin tutup, pinaa’ padéé’ lu’ dalem Tuhan pu’un éh gahang kepéh lem pengelan réh tong Tuhan, avéé’ irah makang kenin bara’ ha’ Allah ngan bé’ medai. 15 Pu’un jelua’ réh perengah Kristus uban réh leko tong akeu’ ngan nyelepéé’ kenin, bang jelua’ réh kepéh, pu’un réh perengah éh ngan jian kenin. 16 Irah maneu’ kenat uban réh pika akeu’ uban kejam réh akeu’ pu’un siteu’ dokoo’ ké’ nyakat kelunan éh juk kebéé Rengah Jian. 17 Irah éh jah nah bé’ réh perengah Kristus uban réh juk mihin kelunan ngelan Iah mu’un, bang irah seruh hun réh perengah Iah kenat, inah jalan réh omok petusah kenin ké’ kepéh uban akeu’ pu’un tong lamin tutup iteu’. 18 Bang na’ péh kenat, bé’ akeu’ sa’at kenin, murung kenin ké’, sokoh néh kelunan pu’un bara’ tong Kristus. Kenat péh hun irah bara’ éh ngan teneng kenin, kenat péh hun néh bé’ teneng kenin, sokoh néh réh bara’ tong Kristus, boh ku’ murung kenin. 19 Uban akeu’ jam neu’ ha’ sebayang keh ngan neu’ Sahéé’ Yésus Kristus pu’un nolong akeu’, adang akeu’ omok pelepu jin lamin tutup iteu’ kepéh. 20 Uban kenin ké’ mu’un, akeu’ ngelan mai akeu’ maneu’ ineu’-ineu’ éh omok mihin akeu’ menyaa’, bang siget-siget koléé’, makin péh hun iteu’ hun ké’ pu’un tong lamin tutup, jian akeu’ makang kenin dalem kekat urip ké’, dokoo’ ké’ omok pesavéé’ kenajung ngan Kristus, kenat péh hun ké’ murip, kenat péh hun ké’ matai péh. 21 Uban urip ké’, inah éh Kristus. Uban néh kenat hun ké’ matai, inah éh pelapah jian. 22 Bang hun néh neu’ ké’ murip boh akeu’ omok maneu’ jah kereja’ ngan Tuhan kepéh, hun néh kenat bé’ akeu’ jam éh mah éh tekep ké’ ngevéléé’. 23 Uban duah kenin ké’, jah kenin ké’ juk piso jin usah ké’ iteu’ tai pemung ngan Kristus, uban inah éh pelapah jian. 24 Bang uban ka’ah, inah éh pelapah jian hun ké’ omok murip keto. 25 Adang éh kenat, uban néh kenat bé’ akeu’ matai, adang akeu’ omok murip ngan mokoo’ ngan ka’ah, dokoo’ ka’ah omok pepit kepéh dalem pengelan keh ngan kemurung keh tong Tuhan. 26 Hun néh kenat hun akeu’ pu’un pemung ngan ka’ah kepéh, boh keh omok murung tong urip keh dalem Kristus Yésus. 27 La’ah jian kekat urip keh pu’un pekua’ éh tekep tong Rengah Jian Kristus, dokoo’ hun ké’ pu’un tai ngan ka’ah, kenat péh hun ké’ bé’ omok tai péh, omok akeu’ menéng rengah ka’ah pu’un nekedéng petem ngan pekua’ kenin ngelawan ineu’-ineu’ éh juk nyopéé’ pengelan kelunan tong Rengah Jian iteu’. 28 Mai keh medai ayau keh, jian keh ngelayau makang kenin, hun néh kenat inah éh pepoléng éh ngan réh irah juk sopéé’ awah ngan ka’ah omok menang uban Allah éh mihin lu’ menang. 29 Jian keh murung kenin uban neu’ penika Kristus Iah mihin keh ngelan tong Iah, bang bé’ makat ngelan kenat awah, bang inah kepéh Iah mihin keh jam keta pemung ngan Néh. 30 Hun iteu’ ka’ah omok ngelawan pemung ngan ké’ tong kekat éh kelawan ké’ rai, ngan éh kelawan ké’ pah avéé’ hun iteu’ pekua’ éh nenéng keh nah.
21 Hun néh lem urip keh lem Kristus penika Néh pu’un penyukat maneu’ keh pekua’ kenin, ngan hun keh pu’un alaa’ Sahéé’ Ni’ai ngan hun néh urip keh inah mihin keh pepika ngan petolong, hun néh pu’un éh kenat mu’un, 2 jian keh pesukup kemurung kenin ké’ neu’ keh pu’un pekua’ kenin ngan pepika ngan pekua’ penyeruh. 3 Mai keh maneu’ ineu’-ineu’ uban keh juk ngepayoo’ kenin keh tengéé’, ngan uban keh juk ngajung usah keh tengéé’, bang jian keh diva’ kenin ngan ngerera’ belah ka’ah ke’, mai keh bau kenin ngan seruh usah ko’ pelapah jian jin irah éh jah. 4 Mai keh seruh tong jah penganeu’ ko’ awah, bang jian keh seruh tong penganeu’ irah éh jah kepéh. 5 Jian keh pu’un kenin pekua’ kenin Kristus Yésus. 6 Na’ péh Iah pekua’ Allah, bé’ Iah juk ngajung usah Néh tengéé’ pelapah jin Allah. 7 Bang neu’ pengeloo’ kenin Néh tengéé’, pu’un Éh pokoo’ kekat pengaren Néh, ngan paléu pekua’ kelunan ripen awah. Pu’un éh paléu kelunan awah, ngan Iah tuai pekua’ layan kelunan. 8 Diva’ kenin Néh, ngelayau Iah kivu sohoo’ Tamen Néh, pah avéé’ néh matai tong kayeu’ salib. 9 Uban néh kenat inah Allah ngajung Iah bau mu’un ngan mena’ ngaran Néh bau kekat ngaran. 10 Dokoo’ neu’ ngaran Yésus, siget-siget kelunan pu’un ngejekuu’ lep ngan seva’ éh, kenat péh kekat éh tong seruga, ngan éh tong tana’ péh, ngan éh ra’ tana’ péh. 11 Ngan kekat néh béé bara’ Yésus Kristus Iah éh pengeja’au. Neu’ ha’ réh kenat pu’un réh peparen Allah éh Tamen. 12 O kekat bakéh ké’ éh penika ké’, hun néh kenat barei’ keh ngelayau kivu sohoo’ ké’ hun ké’ pu’un pemung ngan keh rai, na’ péh ku’ juu’ jin ka’ah, tekep keh kivu éh kepéh. Jian keh murip barei’ kelunan éh lepah alaa’ urip maréng, éh medai ngan leko tong kekat kesa’at. 13 Uban Allah éh kereja’ dalem kenin ka’ah, avéé’ ka’ah keloo’ maneu’ ngan pu’un maneu’ kekat-kekat éh pengeloo’ Néh. 14 Ineu’-ineu’ naneu’ keh, jian keh maneu’ éh ngan jian kenin, mai pané selim ngan pekisaa’, 15 dokoo’ ka’ah pu’un teneng ngan jian tong jumen kelunan éh jah, murip pekua’ barei’ kelunan éh anak Allah belah kelunan éh sa’at éh penyala’. Barei’ kenyuhai perema tong langit kenat péh tekep ka’ah barei’ rema belah irah kepéh. 16 Jian keh bara’ ha’ tebaraa’ ngan réh éh omok purip réh. Hun keh maneu’ kenat boh ku’ pu’un jalan ké’ ngajung tong Dau Kristus tuai kepéh, uban kenat éh pepoléng kekat kereja’ ngan kemutau ké’ bé’ éh tuyah-tuyah awah. 17 Barang irah mematai ku’ ngan dahaa’ ké’ pega’ barei’ dahaa’ ka’an éh pengena’ kelunan ngan Allah, barei’ telana’ tong pengelan keh tong Kristus. Hun ké’ pu’un matai kenat, murung kenin ké’ ngan akeu’ keloo’ ka’ah kepéh pu’un kemurung ké’ inah. 18 La’ah jian ka’ah murung kenin ngan maneu’ akeu’ kepéh pekua’ ka’ah pu’un murung nah. 19 Akeu’ ngelan Tuhan Yésus mukap jalan ké’ omok nyohoo’ Timotius laho tai ngan ka’ah, dokoo’ ké’ omok jian kenin hun ké’ menéng rengah ka’ah kepéh. 20 Uban iah awah éh pekua’ kenin ngan ké’ éh pika ka’ah mu’un. 21 Kekat irah éh jah seruh tong kereja’ réh awah, bé’ réh seruh tong kereja’ Yésus Kristus. 22 Ka’ah jam Timotius pu’un tigéh mu’un, iah éh seleket anak ké’, amo pekua’ perengah Rengah Jian. 23 Akeu’ ngelan ku’ omok nyohoo’ Timotius kangai laho, inah éh hun ké’ jam ineu’ éh juk neu’ réh tong akeu’. 24 Akeu’ ngelan tong Tuhan usah ké’ tengéé’ péh omok laho tuai ngan keh. 25 Bang akeu’ seruh tekep ku’ nyohoo’ padéé’ lu’ Epaproditus tai tavin keh, iah éh bakéh ké’ dalem kereja’ Tuhan, gahang mu’un amo kereja’ ngelawan kekat kesa’at, ngan iah éh senohoo’ keh tai nolong akeu’. 26 Gahang kenin néh juk jam ka’ah kepéh, bahat kenin néh uban ka’ah menéng rengah néh pu’un sakit rai. 27 Sakit mu’un éh hun irai, danii’ éh juk matai, bang Allah pika éh, bé’ makat pika iah awah, bang Iah pika akeu’ péh, dokoo’ mai akeu’ pepit besau kepéh. 28 Uban néh kenat gahang kenin ké’ juk nyohoo’ iah tai tavin keh, dokoo’ ka’ah omok murung kenin, boh ku’ omok ma’o besau. 29 Jian keh alaa’ iah ngan murung kenin pekua’ jah padéé’ dalem Tuhan. Jian keh sepah kelunan éh barei’ iah, 30 uban neu’ kereja’ néh ngan Kristus, inah iah danii’ juk matai rai, dokoo’ néh nolong akeu’ tong jalan ka’ah bé’ omok nolong rai.
31 O kekat padéé’ ké’, tong pengega’ ha’ ké’, inah akeu’ bara’, jian ka’ah murung kenin dalem Tuhan. La’ah bé’ akeu’ menyaa’ nyurat kepéh éh lepah senurat ké’ rai, uban inah éh jalan keh omok jam seruh. 2 Mavaa’ usah keh jin kekat kelunan éh maneu’ sa’at, barei’ aseu’ awah réh, gahang mu’un réh nyohoo’ kelunan pesunat, 3 bang uleu’ éh pu’un pesunat éh teneng, uban uleu’ seva’ Allah naneu’ Sahéé’ Néh ngan murung naneu’ urip lu’ lem Kristus Yésus, bé’ uleu’ ngelan tong ineu’-ineu’ éh omok neu’ kelunan. 4 Bé’ makat uban néh bé’ pu’un ineu’-ineu’ kenat éh omok kenelan ké’, adang éh pu’un. Hun kelunan seruh neu’ kekat penganeu’ réh inah éh omok mihin réh jian tong jumen Tuhan, makin péh tong akeu’, omok akeu’ jian uban pinaa’ penganeu’ éh lepah naneu’ ké’. 5 Pu’un réh pesunat akeu’ ayah dau la’o lohoo’ ké’. La’ah pohoo’ ké’ inah éh pohoo’ Yahudi, ngan akeu’ pu’un jin betah Benyamin, Oo’ mu’un, akeu’ éh pohoo’ Yahudi mu’un. Hun lepah rai pu’un ku’ kivu kekat sebayang irah Yahudi, ngan pu’un ku’ kivu adet Parisi, 6 avéé’ ké’ pu’un peketa sidang Tuhan. Hun kelunan omok teneng kenin tong jumen Tuhan neu’ réh kivu sohoo’ lem Surat Musa, akeu’ éh pu’un kivu kekat néh béé. 7 Bang tong kekat éh benara’ ké’ pu’un gunah bu’un rai, hun iteu’ kepéh akeu’ bara’ éh pekua’ moo’ awah neu’ pengelan ké’ tong Kristus. 8 Bé’ makat kekat inah awah, bang kekat ineu’-ineu’ péh kepéh akeu’ bara’ éh pekua’ moo’ awah hun ké’ pepata éh tong kekat éh jian, inah éh tong pengejam ké’ tong Kristus Yésus éh pengeja’au ké’. Uban neu’ pengelan ké’ tong Kristus, akeu’ lepah bet kekat inah, kekat inah seleket moo’ awah éh tong jumen ké’, dokoo’ ké’ omok alaa’ Kristus anah ké’ mu’un, 9 ngan pu’un petem dalem Iah. Bé’ éh neu’ pengeteneng ké’ uban ké’ pu’un kivu kekat sohoo’ lem Surat Musa, bang pengeteneng éh pu’un neu’ pengelan ké’ tong Kristus, inah éh pengeteneng éh jin Allah éh pu’un neu’ pengelan. 10 Jah awah kenin ké’, akeu’ juk jam Kristus ngan juk jam tong penyukat Néh dalem pengebetéé’ Néh jin patai Néh ngan juk pemung ngan Néh dalem pengeketa Néh, ngan pu’un barei’ Iah dalem pengematai Néh, 11 dokoo’ ké’ omok betéé’ jin patai ké’ alaa’ urip maréng. 12 Bé’ jak akeu’ jam éh kenat, bé’ jak akeu’ pu’un sukup mu’un, bang akeu’ juk lakau mu’un pah avéé’ ké’ pu’un jian mu’un, barei’ éh seneruh Kristus Yésus hun néh purip ku’ bu’un rai. 13 O kekat padéé’ ké’, na’ péh akeu’ lepah peleka, bé’ akeu’ seruh akeu’ lepah avéé’ tong néh tenéh, bang jah awah éh neu’ ké’, akeu’ juk ngelepan tong kekat pengelakau ké’ lepah, ngan lakau mu’un dokoo’ ké’ omok avéé’ tong éh juk tenavin ké’ inah. 14 Akeu’ nekedeu’ mu’un barei’ irah lem petakéé’ dokoo’ ké’ omok alaa’ pengena’ néh, inah éh, tong Allah tebai ku’ dalem Kristus Yésus, dokoo’ ké’ omok alaa’ urip maréng pemung ngan Néh tong seruga. 15 Uban néh kenat kelunan éh jam seruh ngan éh sukup mu’un, jian iah pu’un kenin pekua’ barei’ iteu’. Hun pu’un séé’-séé’ éh tengéé’ kenin jin inah, Allah omok pekelenaa’ éh ngan réh. 16 Bang jian uleu’ béé lakau kivu Tuhan lem kekat éh kenivu lu’ rai. 17 O kekat padéé’ ké’, jian ka’ah kivu uban ké’. Pu’un mé’ lepah bara’ jalan ngan ka’ah, jian keh kivu kelunan éh kivu barék éh teneng inah. 18 Pinaa’ koléé’ ké’ bara’ éh ngan keh tenéh, ngan hun iteu’ kepéh akeu’ bara’ éh ngan baa’ maten ké’ musit mu’un, pu’un jelua’ kelunan neu’ barék néh éh sa’at, inah éh maneu’ réh ayau Kristus éh matai tong kayeu’ salib. 19 Kelunan éh kenat adang réh pu’un tai tong luten meraka, uban pengeja’au réh inah éh kekat pengagat éh sa’at lem usah réh. Bau kenin réh tong kekat éh tekep réh menyaa’, ngan irah seruh tong kekat éh pu’un jin tana’ iteu’ awah. 20 Bang tana’ ngan baa’ uleu’ pu’un éh tong seruga, jin sinah uleu’ mena Tuhan Yésus Kristus tuai kepéh, éh juk purip lu’. 21 La’ah usah uleu’ éh lemoo’ ngan omok matai iteu’, omok éh paléu pekua’ usah Nah éh maren, naneu’ penyukat Néh éh jalan Néh juk mihin ineu’-ineu’ lem nihau Néh.
41 O kekat padéé’ ké’ éh penika ké’ ngan éh tenawai ké’, tong ka’ah iteu’ akeu’ murung kenin, jian kenin ké’ seruh tong keh. O kekat padéé’ uban néh kenat tong kekat jalan iteu’ jian ka’ah nekedéng petem dalem Tuhan. 2 O Euodia ngan Sintikhe, akeu’ nyohoo’ kawah pekua’ kenin barei’ kelunan éh pepadéé’ dalem Tuhan. 3 La’ah Sinsigus éh bakéh ké’ mu’un, jian ke’ petena’ rawah redo inah dokoo’ roh jam pekua’ kenin kepéh, uban lepah rai gahang mu’un rawah kereja’ dokoo’ perengah Rengah Jian, pemung ngan Kelemen ngan kekat bakéh ké’ éh jah kepéh, ngaran réh pu’un éh senurat Tuhan lem surat ngaran irah éh pu’un urip maréng. 4 Jian ka’ah ngelayau murung kenin dalem Tuhan, jah koléé’ kepéh akeu’ bara’, jian ka’ah murung kenin. 5 Jian ka’ah dawai kenin ngan kekat kelunan béé. Tuhan pu’un danii’ juk tuai kepéh. 6 Mai ka’ah besau kenin seruh tong ineu’-ineu’, bang dalem kekat néh béé jian keh sebayang bara’ éh ngan Allah. Siget koléé’ keh menyat jin Iah, jian keh menyat ngan bara’ jian kenin ngan Néh kepéh. 7 La’ah pengepawah éh jin Allah, éh tengéé’ mu’un jin kekat ineu’-ineu’ éh omok kejam kelunan, omok éh mihau kenin keh ngan penyeruh keh dalem Kristus Yésus. 8 O kekat padéé’ ké’, tong pengega’ ha’ ké’, jian keh ngelayau seruh tong kekat-kekat éh teneng ngan éh tekep kenajung kelunan, inah éh, tong kekat éh teneng ngan jian, éh tekep naneu’ kelunan. Jian keh seruh tong kekat éh ni’ai, tong kekat éh mihin keh jam pika, ngan éh omok kenajung lu’. 9 La’ah tong kekat éh lepah pekalai keh ngan kekat éh nenéng keh, ngan éh ta’an keh tong akeu’ nah, jian keh maneu’ éh pekua’ éh naneu’ ke’ nah kepéh. La’ah jian Tuhan Allah éh mena’ Pengepawah Néh ngan uleu’ pu’un pemung ngan ka’ah. 10 Murung kenin ké’ dalem Tuhan, uban hun iteu’ kepéh, na’ péh éh pu’un lebéé’, inah ka’ah pu’un gusii’ kenin seruh nolong akeu’ kepéh. Na’ péh akeu’ pané kenat, bé’ éh uban keh bé’ seruh tong akeu’, bang uban ieng ke’ jalan keh maneu’ éh. 11 Bé’ akeu’ pané kenat uban ké’ pu’un kurang, uban hun néh kineu’-kineu’ péh jalan ké’, jian kenin ké’ kenat. 12 Jelua’ koléé’ akeu’ jam kurang mu’un, ngan jelua’ koléé’ pu’un éh sukup mutaa’ mu’un. Bang dalem kekat néh béé, akeu’ jian kenin, kenat péh hun ké’ beso, kenat péh hun ké’ la’au’, kenat péh hun ké’ pu’un mutaa’, ngan kenat péh hun ké’ pu’un kurang. 13 Tong kekat éh benara’ ké’ iteu’ omok akeu’ kenat naneu’ penyukat Kristus éh ngegahang akeu’. 14 Bang ka’ah pu’un jian uban keh lepah nolong akeu’ dalem penusah ké’. 15 La’ah ka’ah éh mokoo’ tong Pilipi jam, hun ké’ tai jin tana’ Makedonia éh bu’un ké’ tai Perengah Rengah Jian lepah rai, sidang ka’ah awah éh pu’un nolong akeu’. 16 Uban hun ké’ tong Tesalonika rai, bé’ éh jah koléé’ awah keh pekateu’ pengena’ ngan ké’ nolong akeu’ dalem pengekurang ké’. 17 Bé’ akeu’ pitah pengena’ jin kelunan makat, bang éh penitah ké’ ngan éh keneloo’ ké’ ka’ah pepit dalem kekat éh jian, inah éh pepit pengejian Tuhan lem kenin keh kepéh. 18 Akeu’ bara’ jian kenin uban kekat pengena’ keh iteu’, pinaa’ mu’un éh. Bé’ akeu’ pu’un kurang ineu’-ineu’ péh, uban akeu’ lepah alaa’ kekat pengena’ keh éh nihin Epaproditus rai. Kekat néh béé barei’ kapon éh jian ba’oo’ éh notong kelunan ngan Allah, jah pengena’ éh ngepayoo’ kenin Néh éh pengeloo’ Néh. 19 La’ah Allah éh kenelan ké’ omok Éh pesukup kekat pengekurang keh kivu pengekaya’ Néh dalem Kristus Yésus. 20 La’ah jian kekat kenajung pu’un ngan Allah éh Tamen uleu’, avéé’ kelebéé’-lebéé’ néh. Amin. 21 Akeu’ bara’ tabi’ ngan kekat kelunan éh anah Kristus Yésus. Kenat péh kekat padéé’ keh dalem Tuhan éh pemung ngan ké’ siteu’, bara’ tabi’ ngan keh. 22 Kenat péh kekat kelunan éh anah Tuhan siteu’ bara’ tabi’, makin péh irah tong lamin raja’, irah péh bara’ tabi’ ngan keh. 23 Jian penika Tuhan Yésus Kristus pu’un pemung ngan keh.