IBRANI

IBRANI

¹ La’ah hun sahau, pinaa’ koléé’ Allah pu’un pané ngan tepun lu’ jin irah nabi palaa’ kuraa’-kuraa’ jalan. ² Bang hun iteu’ tovoo’ tai ga’ tana’, inah Iah pané ngan uleu’ kepéh Jin Anak Néh. La’ah Jin Anak Néh, pu’un Allah suai kekat tana’ ngan langit. Allah lepah ngevéléé’ Anak Néh iteu’ ke’ Néh pu’un penyukat bau kekat ineu’-ineu’ péh tong ga’ néh. ³ Pu’un éh pepoléng kekat pengaren ngan pengejian Allah uban Iah péh pekua’ ngan Allah. Iah pu’un mihau kekat penyuai Néh tong tana’ ngan tong langit palaa’ ha’ Néh éh pu’un penyukat. La’o Néh maneu’ kelunan pelepu jin penyala’, Iah menyun tong seruga saa’ na’au’ Allah Pengeja’au éh matek bau. ⁴ Anak Néh inah pelapah bau jin meliket, ngan ngaran éh nena’ Allah ngan Néh péh pelapah jian jin ngaran kekat meliket. ⁵ Uban bé’ Allah pu’un bara’ ka’ ngan jah-jah meliket péh, Ka’au’ éh Anak Ké’, dau iteu’ Akeu’ éh Tamen Ko’, Kenat péh bé’ Allah pu’un bara’ ka’ ngan jah-jah meliket péh, Akeu’ éh Tamen Néh, ngan Iah éh Anak Ké’, ⁶ La’ah hun Allah pu’un nyohoo’ Anak tuken Néh tuai tong tana’, pu’un éh bara’ ka’, Jian kekat meliket Allah seva’ Éh. ⁷ Bang tong meliket inah, ka’ ha’ Néh, Allah maneu’ kekat meliket Néh barei’ kepu ngan luten éh kivu sohoo’ Néh awah, ha’ Néh. ⁸ Bang tong Anak Néh nah pu’un Allah bara’ ka’, Ka’au’ éh Allah, Ka’au’ omok raja’ avéé’ pelinguh Pu’un Ke’ mihau kekat irah éh lem nihau Ko’ dalem kekat éh teneng ngan jian mu’un. ⁹ Ka’au’ éh murung tong kekat éh jian ngan teneng, bang leko Ke’ tong kekat éh sa’at. Uban néh kenat Allah ngevéléé’ Ke’ ngan pepenoo’ kenin Ko’ neu’ kekat kemurung Néh éh pelapah ja’au jin kemurung éh nena’ Néh ngan irah bakéh Ko’, ¹⁰ Iteu’ kepéh éh benara’ Allah tong Anak Néh, Bu’un-bu’un sahau, O Tuhan, Ka’au’ éh suai kekat tana’, ojoo’ Ko’ tengéé’ éh suai Langit. ¹¹ Tana’ ngan langit nah juk béé, bang Ka’au’ awah éh omok pu’un pelinguh. Kekat tana’ ngan langit juk mupuk barei’ livah. ¹² Barei’ kelunan ngejekuu’ kerayung néh. Barei’ kelunan ngeliwah pakai néh, kenat péh Ka’au’ juk ngeliwah tana’ ngan ngeliwah langit. Bang Ka’au’ Tuhan ngelayau Ke’ pu’un pekua’, bé’ Ka’au’ omok mukun, ha’ néh. ¹³ La’ah bé’ Allah pu’un bara’ ka’ ngan jah-jah meliket péh, Menyun ke’ siteu’ saa’ na’au’ Ké’, avéé’ Ké’ maneu’ kekat ayau Ko’, barei’ lun gem Ko’ awah, ¹⁴ Hun néh kenat kineu’ irah meliket nah? Irah Sahéé’ éh ngerera’ kivu sohoo’ Allah. Pu’un Tuhan nyohoo’ réh tai nolong irah éh tekep alaa’ urip Néh

¹ Uban kenat uleu’ tekep petem megem tong kekat ha’ tebaraa’ éh lepah nenéng lu’ dai lu’ petat jin pengelan lu’. ² Uban hun ha’ tebaraa’ éh benara’ irah meliket nah pu’un teneng, ngan hun séé’-séé’ bé’ kivu éh adang réh teneng ukum, makin péh tong uleu’ hun iteu’ hun lu’ bé’ mihau ha’ Anak Néh. ³ Bé’ pu’un jalan lu’ omok kelap hun lu’ ngelapah awah tong penika Tuhan éh juk purip lu’, adang lu’ teneng ukum Néh. Uban Tuhan tengéé’ éh bu’un-bu’un bara’ tong jalan Néh juk purip lu’, ngan irah éh pu’un menéng éh pu’un bara’ éh ngan uleu’ kepéh ngan pekelenaa’ éh ngan lu’ adang Tuhan juk purip kelunan. ⁴ La’ah Allah péh pekelenaa’ kekat éh benara’ Néh nah pu’un teneng mu’un, neu’ Néh mena’ penyukat Néh ngan réh ke’ réh maneu’ kuraa’-kuraa’ arong telana’ éh pepoléng penyukat Néh ngan éh ngebéé kenin kelunan, ngan Iah pu’un mena’ pengena’ Sahéé Ni’ai kivu pengeloo’ kenin Néh tengéé’. Pu’un Tuhan mena’ kuraa’-kuraa’ pengena’ éh jin Sahéé’ Ni’ai ngan réh kivu pengeloo’ kenin Néh tengéé’. ⁵ Bé’ Allah ngevéléé’ meliket ke’ néh omok pengeja’au tana’ maréng éh juk pu’un kepéh. Inah éh tana’ éh nané lu’ hun iteu’ nah. ⁶ Bang Iah ngevéléé’ kelunan mihau éh, bang barei’ ha’ éh benara’ néh lem surat Allah, ka’ éh, O Allah, ineu’ kelunan inah, Ke’ ko’ keloo’ seruh tong réh? Kelunan pohoo’ kelunan awah, bang Ka’au’ mihau réh? ⁷ Lem jaka’ metok awah Ka’au’ maneu’ kelunan diva’ siik jin meliket; Ka’au’ mena’ ngan kelunan pengaren ngan penyeva’. ⁸ Ngan maneu’ kelunan pu’un penyukat mihau kekat ineu’-ineu’ péh. Lem ayat inah bara’ tong Allah maneu’ kelunan pu’un penyukat bau kekat ineu’-ineu’ péh; hun néh kenat bé’ pu’un jah ineu’ péh kenat bé’ pu’un lem nihau kelunan. Bang hun iteu’ bé’ jak lu’ na’at kelunan pu’un penyukat mihau kekat ineu’-ineu’ péh. ⁹ Bang uleu’ lepah na’at Yésus pu’un penyukat! Lem jaka’ metok awah, Iah pu’un diva’ siik jin meliket, dokoo’ neu’ pengasi Allah, Iah omok matai tulat kekat kelunan. Hun iteu’ uleu’ na’at Iah nena’ pengaren ngan penyeva’ uban Iah lepah keta avéé’ matai. ¹⁰ La’ah Allah éh suai kekat ineu’-ineu’ ngan mihau éh, tekep maneu’ Yésus, jalan pepurip kelunan éh sukup mu’un neu’ kekat pengeketa Néh. Inah jalan Allah omok mihin pinaa’ kelunan masek lem kemaren Yésus, uban Yésus nah pengeja’au éh mihin kelunan tavin urip. ¹¹ Uban pu’un Yésus nah peti’ai kelunan jin penyala’ réh, ngan Iah éh pu’un ni’ai ngan irah éh peti’ai néh nah, jah awah Tamen réh. Kenat péh Yésus nah bé’ éh leko mateng réh padéé’ Néh. ¹² Barei’ ha’ Yésus ngan Allah, O Allah, Akeu’ juk bara’ Ke’ ngan kekat padéé’ Ké’. Hun réh petipun sebayang Akeu’ juk nyanyi mejing ngaran Ko’, ha’ Néh. ¹³ Pu’un éh bara’ kepéh, Akeu’ juk ngelan tong Allah. Ka’ ha’ Néh kepéh, iteu’ Akeu’ pu’un ngan kekat anak éh nena’ Allah ngan Ké’. ¹⁴ Uban irah éh nateng anak Allah kelunan mu’un, inah Yésus tuai paléu kelunan pekua’ irah inah ke’. Iah paléu kelunan dokoo’ neu’ pematai Néh Iah omok ngebéé Sitan éh pu’un penyukat bau patai. ¹⁵ Kenat jalan Iah ngelepu irah éh putung-putung urip réh keripen Sitan, uban réh medai tong pematai. ¹⁶ Uban bé’ Yésus tuai ke’ Néh nolong meliket, bang Iah tuai ke’ Néh nolong pohoo’ Abraham. ¹⁷ Adang néh tekep Yésus paléu kelunan pekua’ kekat padéé’ Néh dalem kekat ineu’-ineu’ péh. Dokoo’ Iah omok Imam éh pengeja’au kekat imam éh tigéh ngan pu’un penika. Neu’ penganeu’ Néh inah penyala’ kelunan omok pega’. ¹⁸ Uban kenat, hun iteu’ Iah omok nolong irah éh teneng tenupat, uban Iah tengéé’ péh lepah teneng tenupat ngan pengeketa.

¹ O kekat padéé’ ké’ lem Tuhan éh tenebai Allah, jian keh seruh tong Yésus éh tuai sohoo’ Allah ke’ Néh omok Imam éh pengeja’au kekat imam tong adet sebayang lu’. ² Yésus tigéh tong Allah éh lepah ngevéléé’ Iah dokoo’ maneu’ kereja’ inah, barei’ Musa péh tigéh maneu’ kereja’ néh tong Umaa’ Allah. ³ La’ah kelunan éh suai lamin pu’un éh kenajung réh. Bé’ réh ngajung lamin éh senuai néh. Kenat péh adang néh tekep Yésus péh alaa’ pengaren éh pelapah ja’au jin Musa. ⁴ La’ah siget-siget lamin pu’un éh senuai kelunan, bang Allah éh suai kekat ineu’-ineu’. ⁵ Musa tigéh barei’ kelunan sohoo’ dalem Umaa’ Allah. Iah bara’ tong kekat éh juk benara’ Allah jaka’ temurei’ kepéh. ⁶ Bang Kristus nah Anak Tuhan mu’un, tigéh mu’un éh mihau umaa’ Allah. La’ah uleu’ néh umaa’ Allah, inah éh hun lu’ ngereken kenin lu’ ngan petem pengelan lu’ omok alaa’ ineu’ éh kepelum lu’. ⁷ Uban barei’ éh benara’ Sahéé’ Ni’ai, ka’ ha’ Néh, Dau iteu’ hun keh menéng ha’ Allah, ⁸ mai keh mahéng kenin barei’ tepun keh irah ngelawan Allah, barei’ hun réh tupat Allah tong tana’ pengawa sahau rai. ⁹ Tong sinah tepun keh tupat Akeu’ ngan silam ku’ ha’ Allah, na’ péh irah lepah na’at ineu’ éh naneu’ ké’ kelebéé’ pat poloo’ taun. ¹⁰ Inah maneu’ Akeu’ merek ngan réh ngan bara’ ka’, irah ngelayau ngelapah ha’ ngan bé’ keloo’ kivu sohoo’ ké’. ¹¹ Akeu’ merek ngan pejajii’, bé’ réh omok masek tong tana’ inah dokoo’ réh omok posot pemung ngan ké’. ¹² O kekat padéé’ ké’, mavaa’ keh jian-jian, mai pu’un séé’-séé’ péh éh pu’un kenin sa’at éh bé’ ngelan tong Tuhan pah avéé’ néh piso jin Allah éh murip. ¹³ Bang dai pu’un kelunan éh kelavo’ penyala’ ngan mahéng kenin, jian keh nolong petolong, ngereken kenin siget usah ngan siget dau, jian keh nolong petolong ngereken kenin siget usah kelebéé’ lu’ to murip lem jaka’ éh nateng Dau iteu barei’ éh benara’ lem surat Allah. ¹⁴ Uleu’ béé pu’un pekua’ kereja’ ngan Kristus, hun lu’ avéé’ ga’ néh petem ngamit pengelan éh pu’un ngan lu’ jin bu’un néh. ¹⁵ Uban ka’ ha’ surat Allah, Dau iteu’ hun keh menéng ha’ Allah, mai keh mahéng kenin barei’ tepun keh sahau tovoo’ réh ngelawan Allah. ¹⁶ Séé’ réh éh menéng ha’ Allah ngan éh ngelawan éh kepéh? Kekat irah éh nihin Musa piso jin tana’ Mesir. ¹⁷ Ngan séé’ Allah merek avéé’ pat poloo’ ta’un kelebéé’ nah? Iah pu’un merek ngan irah éh maneu’ penyala’ ngan éh matai tong tana’ pegawa. ¹⁸ Hun Allah bara’, adang irah bé’ omok masek tong tana’ inah, ke’ réh omok posot pemung ngan ké’, séé’ éh benara’ néh inah? Irah éh ngelawan Allah. ¹⁹ Hun iteu’ uleu’ jam irah bé’ omok masek tong tana’ inah, uban réh bé’ keloo’ ngelan tong Allah.

¹ La’ah uban jajii’ dokoo’ omok masek lem pengeposot Néh inah pu’un petem ngan lu’, jian lu’ mavaa’ dai pu’un séé’-séé’ jin belah ka’ah bé’ omok alaa’ éh pejajii’ Néh inah. ² Uban pu’un lu’ lepah menéng Rengah Jian éh benara’ ngan lu’, barei’ irah éh kivu Musa nah. Irah menéng ha’ inah, bang Rengah inah bé’ pu’un gunah tong réh, uban tovoo’ réh menéng éh bé’ irah ngelan tong jajii’ Allah inah. ³ Bang uleu’ éh ngelan tong Allah, omok alaa’ posot éh pejajii’ Allah. Inah éh pekua’ ha’ éh benara Néh, Akeu’ merek ngan pejajii’, Irah bé’ omok masek tong tana’ inah dokoo’ réh omok posot pemung ngan ké’. Allah pu’un pané kenat na’ péh kereja’ Néh lepah ma’o tenéh jin bu’un Néh suai tana’ iteu’. ⁴ Tong dau éh ketujuu’, pu’un éh senurat lem surat Allah, Tong dau éh ketujuu’ Allah posot jin kekat kereja’ Néh. ⁵ Pu’un éh benara’ jah koléé’ kepéh, Irah bé’ omok masek tong tana’ inah dokoo’ alaa’ posot pemung ngan ké’. ⁶ Irah éh bu’un-bu’un menéng Rengah Jian iteu’, bé’ réh omok alaa’ posot inah uban réh bé’ ngelan. hun néh kenat pu’un kelunan éh jah éh omok posot pemung ngan Néh. ⁷ Uleu’ jam éh kenat uban Allah lepah natu’ jah dau éh nateng Dau Iteu’. Allah pu’un bara’ tong iteu’ lebéé’ la’o inah jin Daud lem ayat éh lepah senurat inah, Dau iteu’ hun keh menéng ha’ Allah, mai keh ngemahéng kenin keh. ⁸ Né’ Yosua lepah mihin réh omok posot kivu éh pejajii’ Allah adang Allah bé’ pané kepéh tong jah dau éh jah. ⁹ Uban kenat to ke’ pu’un posot ngan irah éh anah Allah, barei’ Allah pu’un posot tong dau éh ke tujuu’ nah. ¹⁰ Pu’un éh kenat uban séé’-séé’ omok posot kivu éh pejajii’ Allah, adang néh posot kepéh jin kereja’ néh barei’ okoo’ Allah pu’un posot jin kereja’ Néh. ¹¹ Uban kenat Jian lu’ mekat pitah dokoo’ lu’ omok alaa’ posot éh pejajii’ Allah mai pu’un séé’-séé’ péh jin belah lu’ mepai awah barei’ irah sahau, uban réh bé’ ngelan tong Allah. ¹² Ha’ tebaraa’ Tuhan inah murip ngan pu’un penyukat, pelapah nyahit jin po’é éh peseripa nyahit. Ha’ tebaraa’ Tuhan inah masek dilem avéé’ tong urip ngan sahéé’ avéé’ tong kekat bukun tulang ngan utek péh. Ha’ tebaraa’ Tuhan petuneng penyeruh ngan pengeloo’ kenin kelunan. ¹³ Bé’ pu’un ineu’-ineu’ péh éh pelim tong Allah. Kekat ineu’-ineu’ éh pu’un tong tana’ iteu’ poléng ngan pukap tong jumen Allah. Uleu’ béé adang bara’ kekat penganeu’ lu’ tong urip lu’ ngan Allah. ¹⁴ Uban kenat jian uleu’ mihau pengelan lu’ mu’un tong Tuhan uban uleu’ pu’un Imam éh pengeja’au kekat imam éh ja’au, inah éh Yésus éh Anak Allah pu’un éh lepah tai tong jumen Allah mu’un. ¹⁵ Bé’ lu’ pu’un Imam éh pengeja’au kekat imam éh bé’ jam pika lu’ ngan éh bé’ nesen tong kekat pengelemoo’ lu’ bang Imam éh pengeja’au kekat imam lu’ lepah teneng penupat lem kekat ineu’-ineu’ péh, pekua’ uleu’ iteu’, bang bé’ éh maneu’ penyala’. ¹⁶ Uban néh kenat mai lu’ medai bang jian lu’ tai tavin Allah ke’ Néh omok pika lu’. Hun lu’ tavin Éh adang Néh masi lu’ lem kekat pengekurang lu’ ngan pika ngan nolong lu’ siget koléé’ lu’ teneng penusah.

¹ Siget-siget Imam éh pengeja’au kekat imam pu’un éh kevéléé’ Tuhan jin belah irah pinaa’ iah kevéléé dokoo’ mena’ usah néh ngan Allah ke’ néh menyat Tuhan pika réh. Kereja’ néh mena’ pengena’ ngan mematai ka’an éh nihin réh dokoo’ Tuhan omok mega’ penyala’ réh. ² Uban usah néh tengéé’ péh pu’un pinaa’ arong pengelemoo’, inah maneu’ éh omok dawai kenin ngan irah éh tawang uban réh bé’ jam ineu’-ineu’. ³ La’ah uban usah nah péh lemoo’, bé’ éh mematai ka’an dokoo’ Tuhan omok mega’ penyala’ irah pinaa’ awah, bang iah mematai éh ngeliwah usah nah ke’, dokoo’ Tuhan omok mega’ penyala’ néh. ⁴ Bé’ éh séé’-séé’ éh keloo’ Imam éh pengeja’au kekat imam éh omok alaa’ kereja’ inah bang jin penebai Allah kelunan omok Imam éh pengeja’au kekat imam barei’ éh teneng tong Harun rai. ⁵ Kristus bé’ keloo’ Imam éh pengeja’au kekat imam uban néh juk ngajung usah néh tengéé’. Bang ka’ ha’ Allah ngan néh Ka’au’ éh Anak Ké’ dau iteu’ Akeu’ éh Tamen Ko’. ⁶ Pu’un éh bara’ ka’ lem surat éh jah kepéh, ka’au’ omok imam avéé’ pelinguh barei’ Imam Melkisedek. ⁷ Hun Yésus pu’un tong tana’, Iah sebayang ngan menyat mu’un ngan mangaa’ bara’ kekat pengenyat Néh ngan Allah éh pu’un penyukat ngelepu Éh jin pematai. Uban Yésus ngerera’ ngan tigéh tong Allah, Allah menéng ha’ pengenyat Néh. ⁸ La’ah na’ péh Yésus nah Anak Allah mu’un, Iah pekalai tigéh neu’ kekat pengeketa éh teneng tong Néh. ⁹ Uban néh kenat jin la’o Iah lepah sukup mu’un, Iah ke’ éh jalan alaa’ urip éh pelinguh tulat kekat kelunan éh tigéh tong Néh. ¹⁰ Allah péh mateng Iah Imam éh pengeja’au kekat imam barei’ Imam Melkisedek. ¹¹ Pu’un pinaa’ keto éh benara’ mé’ tong ha’ iteu’ bang tusah mé’ juk pekelenaa’ éh uban ka’ah lieu’ mu’un jam tong néh. ¹² Lepah lebéé’ tenéh keh pu’un kivu Tuhan ngan pekalai, sukup kelebéé’ keh omok nebaraa’ irah éh jah. Bang na’ péh kenat kelebéé’, to de’ ke’ keh bé’ nesen mu’un, ngan ka’ah ngelan kelunan nebaraa’ keh keto tong ha’ tebaraa’ éh bu’un-bu’un nenéng keh. Ka’ah météé’ awah, bé’ jak keh jam kuman sin ka’an. ¹³ Irah éh météé’, anak keto réh, bé’ réh jam seruh éh mah éh jian ngan éh mah éh sa’at. ¹⁴ Bang sin ka’an, inah éh ngan irah éh lepah ja’au. Kelunan éh ja’au nah, neu’ kuraa’-kuraa’ koléé’ néh pekalai iah jam éh jian ngan éh sa’at péh.

¹ Uban néh kenat jian uleu’ lakau kepéh avéé’ tong ha’ tebaraa’ éh ngan irah éh sukup kenin dalem Tuhan, mai lu’ posot terah ha’ tebaraa’ éh bu’un-bu’un tong Kristus. Mai lu’ ngelayau nebaraa’ éh bu’un-bu’un tong pengelan tong Allah ngan posot maneu’ kekat éh bé’ pu’un gunah. ² Kenat péh ha’ tebaraa’ tong pengebatis ngan mapai ojoo’ tong kelunan, kenat péh tong pengebetéé’ kelunan matai ngan tong ukum éh pelinguh. ³ Uleu’ tekep kelunan Kristén éh sukup kenin dalem Tuhan. Hun néh pengeloo’ Allah, iteu’ éh juk neu’ mé’. ⁴ Éh ke’ néh kenat, uban kelunan éh bé’ keloo’ ngelan tong Kristus la’ah, bé’ réh omok najak moléé’ ke’ réh pekoléé’ kenin. Irah lepah pu’un lem rema Allah, irah lepah masek lem pengena’ Allah ngan alaa’ Sahéé’ Ni’ai éh lepah nena’ ngan réh. ⁵ Jin éh lepah kenejam’ réh, irah jam ha’ tebaraa’ Allah inah jian. Irah péh lepah jam tong penyukat jin pengena’ Allah tong jaka’ éh temurei’ kepéh. ⁶ Bang la’o inah irah bé’ keloo’ ngelan tong Kristus la’ah! Adang irah bé’ omok najak moléé’ ke’ réh pekoléé kenin, uban irah nyalib Anak Allah kepéh ngan pekenyaa’ Iah tong jumen kelunan pinaa’. ⁷ Pulah éh ngelayau basa’ neu’ taa’, pulah inah omok mena’ oléé’ éh jian ngan kelunan éh mihau pulah néh, uban Allah maneu’ jian éh jian tong pulah inah. ⁸ Bang hun tana’ inah purip suha’ ngan ureu’ awah, bé’ tana’ inah jian, adang Tuhan ngukum éh ngan motong éh awah. ⁹ O kekat bakéh mé’, na’ péh mé’ pané kenat, Améé’ jam adang ka’ah ngebuaa’ ngan buaa’ éh jian uban keh lepah alaa’ urip dalem Allah. ¹⁰ Allah nah bé’ éh bé’ teneng. Iah bé’ ngelepan ineu’ éh lepah neu’ keh ngan Néh kenat péh penika keh éh pepoléng keh ngan Néh hun keh nolong irah éh ngelan tong Tuhan lepah rai kenat pu’un avéé’ hun iteu’. ¹¹ Améé’ keloo’ dokoo’ siget usah jin belah ka’ah petem tigéh pah avéé’ ga’, dokoo’ kekat ineu’ ineu’ éh kepelum keh omok nalaa’ keh. ¹² Bé’ mé’ keloo’ keh barei’ kelunan éh leko. Jian keh murip barei’ kelunan éh lepah alaa’ ineu’ éh pejajii’ Allah uban réh ngelan tong Néh ngan kebit kenin. ¹³ Uban pu’un Allah maneu’ jah jajii’ ngan Abraham, Iah pejajii’ adang Iah maneu’ éh pejajii’ Néh nah. Uban bé’ pu’un séé’-séé’ péh éh pelapah bau jin Allah, Iah pejajii’ palaa’ ngaran Nah ke’ tengéé’. ¹⁴ Ka’ ha’ Allah ngan Abraham Akeu’ pejajii’ juk mena’ pengejian ngan ko’ ngan mena’ anak ayam ko’ pinaa’ mu’un ¹⁵ Abraham kebit kenin. Uban kenat Iah alaa’ ineu’ éh lepah pejajii’ Allah ngan néh. ¹⁶ Tovoo’ kelunan pesupa iah pakai ngaran kelunan éh jah éh pelapah bau pakat néh jin iah. Boh ha’ supa inah omok peka’o kekat ha’ pepaneu’. ¹⁷ Allah juk ngereken kenin kelunan éh juk alaa’ ineu’ éh pejajii’ Néh Iah bé’ piso kenin tong kekat éh pejajii’ Néh. Inah ke’ Néh pesupa tong jajii’ Néh inah. ¹⁸ Duah ha’ iteu’ bé’ omok paléu inah éh jajii’ Néh ngan ha’ supa Néh. Bé’ Allah omok kenyo tong Néh. Uban kenat uleu’ éh lepah tai tavin éh dokoo’ alaa’ Iah singau lu’ uleu’ senohoo’ dokoo’ ngamit reken pengepelum éh pu’un saa’ tenah lu’. ¹⁹ Pengepelum lu’ inah barei’ jah pengereken éh omok kenamit lem urip éh gahang ngan pawah. Pengepelum inah ngelesan apat éh mekep retek éh matek ni’ai tong lamin Tuhan tong seruga. ²⁰ Yésus lepah masek sinah saa’ tenah jin uleu’, ngan Iah éh Imam éh pengeja’au kekat imam éh pelinguh barei’ Imam Melkisedek.

¹ Imam Melkisedek iah éh raja’ Salem ngan imam Allah éh matek bau. Tovoo’ Abraham moléé’ jin pekayau la’o néh nyopéé’ pat raja’, Melkisedek petemeu’ ngan néh ngan menyat Allah mena’ pengejian ngan néh. ² La’ah Abraham petulat kekat livah éh nalaa’ néh jin irah éh senopéé’ néh avéé’ jah tulat jin siget éh jah poloo’ ke’ néh mena’ éh ngan Melkisedek. La’ah duah sin tong ngaran Melkisedek nah, éh bu’un nah Raja’ éh teneng mu’un. Uban iah raja Salem sin tong ngaran néh kepéh éh mihin pengepawah. ³ La’ah bé’ pu’un kelunan jam séé’ éh tamen tinen Melkisedek, kenat péh tepun néh, bé’ pu’un séé’ péh éh nyurat tong lohoo’ Melkisedek ngan tong pematai néh. Melkisedek nah barei’ Anak Allah, inah éh imam avéé’ pelinguh. ⁴ Seruh keh jian-jian uban lenaa’ mu’un Melkisedek nah kelunan éh ja’au ngaran, avéé’ Abraham éh tepun pohoo’ Israel mena’ tulat poloo’ jin kekat éh laa’ néh jin néh pekayau nah ke’ néh mena’ éh ngan Melkisedek nah. ⁵ Kekat imam éh jin betah Lewi nyemung tulat poloo’ jin irah pohoo’ Israel, inah éh jin irah lua’ irah ke’ tengéé’ kivu ha’ lem Surat Musa. Na’ péh irah béé jah arong awah jin pohoo’ Abraham. ⁶ Bang Melkisedek nah bé’ éh jin betah irah Lewi nah, na’ péh kenat pu’un éh alaa’ tulat poloo’ jin Abraham ngan pu’un éh menyat Allah maneu’ jian ngan Abraham éh jalan Tuhan pejajii’ nah. ⁷ Bé’ lu’ duah kenin kelunan éh diva’ pakat alaa’ pengejian jin kelunan éh bau jin iah. ⁸ La’ah irah imam éh alaa’ tulat poloo’ jin kelunan, inah éh kelunan éh omok matai, bang Melkisedek nah éh alaa’ tulat poloo’ jin Abraham, murip éh, barei’ ha’ lem surat Allah. ⁹ La’ah hun Abraham mena’ tulat poloo’, Lewi péh mena’ éh Na’ péh pohoo’ Lewi nah nyemung tulat poloo’ jin kelunan Israel. ¹⁰ Uban tovoo’ Abraham mena’ tulat poloo’ ngan Melkisedek bé’ jak Lewi nah pu’un, bang seleket néh pu’un lem usah tepun néh Abraham. ¹¹ Imam-imam pohoo’ Lewi éh ngereken ha’ lem Surat Musa, éh nena’ ngan pohoo’ Israel. Hun kekat éh naneu’ irah imam betah Lewi sahau nah lepah sukup mu’un, bé’ Iah tiken pu’un imam éh jah barei’ Imam Melkisedek, éh bé’ jin pohoo’ Imam Harun. ¹² La’ah hun Tuhan pu’un ngeliwah jalan Néh ngevéléé’ irah éh omok imam, adang Néh ngeliwah sohoo’ lem Surat Musa. ¹³ Sin tong ha’ iteu’ inah éh Tuhan lu’, Iah jin betah éh jah, ngan bé’ jak pu’un jah usah péh jin betah Néh éh maneu’ kereja’ imam. ¹⁴ Kekat kelunan jam Tuhan lu’, tuai jin betah Yehuda; ngan Musa bé’ pu’un mateng betah irah tovoo’ néh pané tong irah imam. ¹⁵ Ineu’ éh nané inah poléng mu’un éh hun iteu’, jah imam kepéh lepah tuai, imam éh barei’ Melkisedek. ¹⁶ Iah kevéléé’ ke’ Néh imam, bé’ éh kivu tebaraa’ ngan adet éh neu’ kelunan, bang jin urip Néh éh pu’un penyukat ngan éh bé’ pu’un pengega’. ¹⁷ Barei’ ha’ lem surat Allah éh bara’ ka’, Ka’au’ omok imam pelinguh-linguh barei’ Imam Melkisedek. ¹⁸ Uban néh kenat adet éh sahau lepah nebet, uban néh lemoo’ ngan bé’ pu’un gunah. ¹⁹ Uban kekat sohoo’ lem Surat Musa bé’ éh pu’un penyukat pesukup ineu’-ineu’ ke’ néh teneng. Bang hun iteu’ uleu’ pu’un pengelan éh pelapah jian jin pengelan irah Israel rai, uban Kristus pu’un penyukat mihin lu’ tepih mu’un tavin Allah. ²⁰ La’ah Allah pesupa bara’, adang Kristus nah omok imam pelinguh. Hun mah irah imam éh jah kevéléé’, bé’ Allah pesupa kenat. ²¹ Bang hun Néh ngevéléé’ Yésus ke’ Néh imam, Allah supa hun Néh bara’ ka’ ngan Néh, Tuhan lepah supa, ngan bé’ Iah ngepaléu’ kenin Néh, Adang Ka’au’ omok imam pelinguh-linguh. ²² Neu’ ha’ Tuhan pesupa kenat, Yésus omok jamin jah jajii’ éh pelapah jian. ²³ Inah kepéh, irah imam éh jah pinaa’ réh uban réh matai ngan bé’ omok nutun kereja’ réh kepéh. ²⁴ Bang Yésus nah Iah pu’un murip pelinguh, tong kereja’ Néh maneu’ kereja’ imam, bé’ pu’un irah éh jah ngeliwah Éh. ²⁵ Kenat péh kekat kelunan éh tuai tavin Tuhan dalem Iah, Kristus pu’un penyukat purip réh, kenat éh hun iteu’, kenat péh avéé’ pelinguh, uban Iah murip pelinguh ngelayau Éh menyat Allah pika réh. ²⁶ Yésus nah, Iah Imam éh pengeja’au kekat imam lu’ éh omok nolong lu’ mu’un. Iah pu’un ni’ai, bé’ pu’un ineu’-ineu’ sala’ ngan kesa’at lem Néh, tengéé’ éh jin pohoo’ kelunan penyala’, Iah pu’un bau tong seruga ngan kenajung réh. ²⁷ Bé’ Iah barei’ irah Imam éh pengeja’au kekat imam éh jah, éh siget dau mena’ pengena’ uban penyala usah nah ke’ kenat péh uban penyala’ irah pinaa’ nah. Yésus mena’ pengena’ jah koléé’ awah avéé’ pelinguh-linguh, tovoo’ Iah mena’ usah Néh matai jah koléé’ awah uban penyala’ kekat kelunan. ²⁸ Lepah rai tong adet sebayang Yahudi, pohoo’ kelunan éh lemoo’ éh Imam éh pengeja’au kekat imam, bang la’o inah kepéh, Allah neu’ ha’ jajii’ Néh éh benara’ Néh lebéé’ si’ik la’o Néh bara’ sohoo’ lem Surat Musa, inah Iah ngevéléé’ Anak Néh imam, Anak Néh inah pu’un éh teneng mu’un avéé’ pelinguh.

¹ Iteu’ néh éh gunah jin iteu’ éh benara’ mé’. Uleu’ pu’un Imam éh pengeja’au kekat imam lu’; Iah menyun saa’ na’au’ nyun Allah éh matek Ja’au tong seruga. ² Iah maneu’ kereja’ Néh Imam éh pengeja’au kekat imam tong retek éh matek ni’ai, dalem umaa’ Tuhan éh mu’un ngan éh senuai Tuhan bé’ éh senuai kelunan. ³ Siget-siget Imam éh pengeja’au kekat imam pu’un kevéléé’ dokoo’ mena’ pengena’ ngan mematai ka’an mena’ ngan Allah, kenat péh Imam éh pengeja’au kekat imam lu’ adang pu’un jah pengena’ éh tekep nena’ Néh. ⁴ Né’ Iah pu’un tong tana’ iteu’, adang bé’ Iah omok imam, uban lepah pu’un imam éh mena’ pengena’ kivu ha’ Surat Musa ngan kelunan Yahudi. ⁵ Kekat penganeu’ réh tong tana’ pu’un éh nojoo’ éh pu’un kenat mu’un tong seruga. Barei’ Musa hun néh juk maneu’ umaa’ Tuhan rai, ka’ ha’ Allah ngan néh, Jian ke’ maneu’ lamin Ké’ iteu’ pekua’ éh benara’ Ké’ ngan ko’ hun ko’ pu’un tong tokong rai, ha’ Néh. ⁶ Bang hun iteu’ Yésus pu’un kereja’ imam éh pelapah maren jin éh naneu’ irah imam inah, uban jajii’ éh naneu’ Néh saa’ belah Allah ngan kelunan pu’un éh pelapah jian. Jajii’ inah pu’un éh jin jajii’ tong kekat éh pelapah jian. ⁷ Hun néh bé’ pu’un pengekurang tong jajii’ éh bu’un, bé’ tiken maneu’ jajii’ éh keruwah. ⁸ Bang bé’ réh pu’un kivu éh, inah Allah pesala’ réh hun Néh bara’ ka’, pu’un jah dau temurei’ Akeu’ juk maneu’ jah jajii’ éh maréng ngan pohoo’ Israel, ngan betah Yehuda. ⁹ Jajii’ maréng Ké’ iteu’, bé’ éh pu’un barei’ jajii’ éh neu’ Ké’ ngan tepun réh sahau hun Ké’ ngamit ojoo’ réh ngan mihin réh piso jin tana’ Mesir. Bé’ irah kivu jajii’ Ké’ nah, inah maneu’ Akeu’ pei’ réh awah, ha’ Tuhan. ¹⁰ Bang hun iteu’, iteu’ néh jajii’ éh juk neu’ ké’ ngan pohoo’ Israel tong jaka’ éh temurei’ ha’ Tuhan: Akeu’ juk mulah ha’ tebaraa’ ké’ lem penyeruh réh ngan nyurat éh lem kenin réh Akeu’ omok Allah réh ngan Irah omok anah ké’. ¹¹ Hun Ké’ maneu’ kenat, bé’ réh tusah bara’ ngan bakéh réh ngan padéé’ réh ka’, Jian ke’ jam Tuhan, adang kekat réh béé omok jam Akeu’, jin irah éh si’ik péh avéé’ irah éh ja’au péh. ¹² Hun réh maneu’ penyala’ adang Akeu’ pika réh, ngan bé’ Akeu’ mihau kesa’at réh kepéh, ha’ Néh. ¹³ Neu’ ha’ Allah pané kenat bara’ tong jajii’ éh maréng, seleket néh bara’ éh lepah nah pu’un mukun tenéh, ngan ineu’-ineu’ hun néh lepah mukun ngan mupuk, adang néh juk béé awah.

¹ Jajii’ éh bu’un inah ketem adet tong sebayang, ngan pu’un jalan sebayang éh senuai kelunan. ² La’ah lem lamin inah pu’un duah luvang lamin kepéh, ngaran lamin éh bu’un nah, inah éh Retek Ni’ai. Tong lamin inah pu’un pelita’, ngan pu’un mija, tong mija inah pu’un roti éh nena’ ngan Allah. ³ La’ah pu’un livah kapan éh neu’ réh tapé belah sinah, saa’ luwat livah inah, inah jah luvang lamin kepéh, ngaran lamin éh inah, Retek Matek Ni’ai. ⁴ Tong retek inah, pu’un jah jalan réh motong kemenyan éh senuai réh palaa’ mas, ngan pu’un tohong jalan jajii’ éh keliket réh palaa’ mas. Lem tohong inah pu’un teleu’ livah lem néh éh bu’un-bu’un tajau éh senuai réh palaa’ mas, éh pu’un mana lem néh, éh keruwah pu’un sekot Harun éh nelo rai, ngan éh keteleu’ néh duah bateu’ éh pu’un jah poloo’ sohoo’ Allah senurat tong néh. ⁵ Bau tohong inah pu’un duah Kerubin. Kerubin inah telana’ Allah pu’un tong retek inah, pawit roh selevat bau tutup tohong jalan mega’ penyala’ kelunan. Bang bé’ mé’ omok bara’ éh béé-béé hun iteu’. ⁶ La’ah tong Retek Ni’ai nah, siget dau irah imam tai sinah ke’ réh maneu’ kekat penganeu’ ngan adet sebayang réh. ⁷ Bang tong Retek Matek Ni’ai Imam éh pengeja’au kekat imam, iah awah éh omok tai sinah, jah de’ ke’ koléé’ awah jah ta’un. Hun iah tai tong Retek Matek Ni’ai nah, pu’un iah mihin dahaa’ ka’an éh nena’ néh ngan Allah ke’ néh ngeliwah usah nah ke’, kenat péh tong irah pinaa’ éh lepah maneu’ penyala’ bang bé’ réh jam éh. ⁸ Kelebéé’ Retek Ni’ai pu’un penakai réh, inah Sahéé’ Ni’ai pu’un bara’, bé’ jak pu’un jalan dokoo’ kelunan pinaa’ omok tai Retek Ni’ai Mu’un, inah éh bé’ réh omok tioo tai tong jumen Tuhan mu’un. ⁹ Tong kekat inah pu’un éh barei’ jah ha’ tapan ngan uleu’ kepéh hun iteu’. Kekat pengena’ irah Yahudi ngan Tuhan ngan kekat ka’an éh penatai réh nah dokoo’ réh omok tavin Tuhan, bé’ éh omok mihin kelunan sukup mu’un kenin. ¹⁰ Kekat adet inah bang tong penguman, baa’ nesep ngan kuraa’-kuraa’ adet peti’ai usah réh.Kekat adet inah tong usah réh, tekep réh kivu éh kenat pah avéé’ tong jaka’ hun mah Allah ngeliwah kekat inah ngan maneu’ éh maréng kepéh. ¹¹ Bang Kristus nah pu’un tuai barei’ okoo’ Imam éh pengeja’au kekat imam tong kekat éh jian éh lepah pu’un tenéh. Lamin éh jalan Néh maneu’ kekat kereja’ Néh Imam éh pengeja’au kekat imam pu’un éh gunah mu’un ngan sukup mu’un Lamin inah bé’ éh senuai kelunan. Sin néh bé’ éh jin tana’ éh senuai Néh iteu’. ¹² Hun Kristus pu’un tai tong Retek Matek Ni’ai jah koléé’ awah Éh tai, bé’ Éh tai kepéh, ngan bé’ Iah mihin dahaa’ mék ngan dahaa’ sapé’ lakin ke’ Néh mena’ éh ngan Allah, bang Iah mihin dahaa’ Néh tengéé’, ngan neu’ dahaa’ Néh inah Iah ngelepu uleu’ avéé’ pelinguh. ¹³ La’ah dahaa’ mék ngan dahaa’ sapé’, lakin ngan ahun anak sapé’ éh notong réh, inah éh nalaa’ imam ke’ néh memirih éh tong kelunan éh segit kivu adet sebayang réh, penganeu’ inah omok peti’ai réh jin kekat éh maneu’ réh segit nah. ¹⁴ Hun néh kenat tong dahaa’ ka’an awah, makin péh tong dahaa’ Kristus mu’un, uban neu’ Sahéé’ Néh éh pelinguh, Iah mena’ usah Néh ke’ Néh matai dokoo’ kelunan omok tavin Tuhan, barei’ ka’an éh penatai réh tong sebayang Yahudi. Tong pengena’ Kristus hun Néh matai tong kayeu’ salib, sukup mu’un éh. Dahaa’ Néh pu’un penyukat mohéé’ kenin lu’ jin kekat penganeu’ éh bé’ omok purip lu’, kelu’ omok kivu Allah éh murip ngan ngepayoo’ kenin Néh. ¹⁵ Uban néh kenat inah Kristus maneu’ jalan tong jajii’ éh maréng ngan uleu’ dokoo’ kekat kelunan éh tenebai Allah omok alaa’ pengejian pelinguh pekua’ éh pejajii’ Allah. Éh ke’ néh omok kenat uban Kristus lepah matai dokoo’ ngelepu kelunan jin penyala’ éh naneu’ réh hun réh kivu jajii’ éh bu’un nah keto. ¹⁶ Hun kelunan maneu’ surat bara’ tong jalan petulat livah néh hun néh matai, bé’ kelunan éh jah omok alaa’ livah néh inah avéé’ réh jam kelunan inah lepah matai. ¹⁷ Uban surat nah seleket néh bé’ pu’un kelebéé’ kelunan éh maneu’ éh nah murip keto, hun néh lepah matai boh réh omok kivu sohoo’ néh lem surat néh inah. ¹⁸ Barei’ inah péh jajii’ Tuhan éh bu’un nah, neu’ dahaa’ ka’an éh penatai réh, dahaa’ inah éh maneu’ jajii’ Tuhan petem reken. ¹⁹ Bu’un-bu’un Musa bara’ kekat sohoo’ Tuhan ngan irah Israel. La’o inah alaa’ dahaa’ sapé’ lakin ngan dahaa’ mék, ngan pekulup éh ngan baa’, boh éh memirih éh tong kekat sohoo’ Tuhan nah, ngan memirih éh kepéh tong kelunan pinaa’ nah palaa’ da’an ureu’ hisop ngan bulun domba éh kebala réh. ²⁰ Ka’ ha’ Musa nah, Iteu’ néh dahaa’ éh maneu’ jajii’ jin Allah petem reken éh tekep kenivu keh. ²¹ La’o inah kepéh hun Umaa’ Allah lepah pesuai, boh Musa memirih dahaa’ tong Umaa’ Allah nah kenat péh tong kekat éh penakai réh tong sebayang réh tong lamin inah. ²² Kivu adet lem Surat Musa, pinaa’ ineu’-ineu’ éh peti’ai réh palaa’ dahaa’. Hun dahaa’ bé’ pu’un pega’, bé’ pu’un jalan mega’ penyala’. ²³ La’ah lamin Tuhan éh tong tana’ ngan kekat éh penakai réh sinah, éh barei’ lamin Tuhan éh tong seruga, pu’un réh peti’ai éh neu’ dahaa’ ka’an. Bang lamin Tuhan tong seruga tekep éh pu’un ni’ai neu’ dahaa’ éh pelapah jian jin dahaa’ ka’an. ²⁴ Uban Kristus bé’ Iah tai Retek Ni’ai éh senuai kelunan, éh itong jah gaben tong Retek Ni’ai mu’un tong seruga. Bang pu’un éh tai seruga, sinah éh poléng tong jumen Allah ke’ néh nolong uleu’. ²⁵ Siget ta’un Imam éh pengeja’au kekat imam Yahudi masek tong Retek Matek Ni’ai mihin dahaa’ ka’an. Bang Kristus bé’ Iah tai mena’ pinaa’ koléé’. ²⁶ Hun Néh pu’un tai pinaa’ koléé’ adang Néh pinaa’ koléé’ keta jin bu’un-bu’un Allah suai tana’. Bang hun iteu’ tovoo’ tai ga’ tana’ pu’un Éh poléng tong salib jah koléé’ awah ke’ Néh mega’ penyala’ kekat kelunan. ²⁷ Adang kekat kelunan pu’un matai jah koléé’, la’o inah pu’un Allah petuneng réh. ²⁸ Kenat péh Kristus pu’un éh matai jah koléé’ ke’ néh mega’ penyala’ kekat kelunan. Pu’un éh juk poléng jah koléé’ kepéh, bé’ éh ke’ Néh mega’ penyala’ kelunan bang dokoo’ néh ngelepu kekat kelunan éh mena savéé’ Néh.

¹ Sohoo’ lem Surat Musa, bé’ éh jah layan éh kelo’ong ngan sukup mu’un, tong ineu’-ineu’ éh semu’un néh, bang inah barei’ kuyuh kekat éh jian éh juk avéé’ kepéh, siget-siget taun irah mematai ka’an ke’ réh mena’ éh ngan Allah bang inah bé’ omok mega’ penyala’. ² Hun kelunan éh seva’ Allah nah mu’un-mu’un lepah nohéé’ jin penyala’, bé’ réh seruh réh pu’un penyala’ keto, ngan bé’ réh tiken mematai ka’an kepéh. ³ Bang siget ta’un hun réh mematai ka’an tong sebayang réh, inah éh petesen réh tong penyala’ réh kepéh. ⁴ Uban dahaa’ sapé’ lakin ngan mék bé’ omok mega’ penyala’. ⁵ Inah éh ke’ Kristus bara’ ngan Allah teka Néh tuai tong tana’, ka’ ha’ Néh O Tuhan, bé’ Ka’au’ keloo’ réh mematai ka’an ke’ réh mena’ éh ngan Ko’. bang usah Ké’ iteu’ éh petenup Ko’. ⁶ Bé’ Ka’au’ menyat ka’an éh penatai réh ngan éh notong réh, jalan omok mega’ penyala’ kelunan. ⁷ Boh Akeu’ bara’ kepéh ka’, O Allah, Akeu’ tuai dokoo’ Ké’ kivu pengeloo’ Ko’, barei’ éh benara’ tong Akeu’ lem Surat Musa, ha’ Néh. ⁸ Bu’un-bu’un Kristus bara’, bé’ Ka’au’ keloo’ réh mematai ka’an ngan na’ pengena’, bé’ Ka’au’ menyat réh mematai ka’an dokoo’ ngejian kenin Ko’ ngan mematai ka’an dokoo’ mega’ penyala’. Iah bara’ kenat na’ péh kekat ka’an éh penatai inah kivu ha’ Surat Musa. ⁹ boh Éh pu’un bara’ kepéh ka’, O Allah, Akeu’ tuai iteu’ dokoo’ Ké’ kivu pengeloo’ Ko’, ha’ Néh. Inah Allah bet kekat penganeu’ réh tong ka’an éh penatai réh nah ngan ngeliwah éh palaa’ Kristus éh matai tong kayeu’ salib nah. ¹⁰ Uban Yésus Kristus pu’un kivu pengeloo’ Allah ngan mena’ usah Néh tengéé’ dokoo’ Néh penatai. Iteu’ naneu’ Néh jah koléé’ awah pah avéé’ pelinguh-linguh, uban kenat penyala’ lu’ omok pega’. ¹¹ Siget-siget dau irah imam nekedéng kivu kekat adet réh ngan mematai ka’an, bang ka’an inah bé’ mu’un éh omok mega’ penyala’ réh. ¹² Bang jah koléé’ awah Kristus matai mena’ urip Néh ngan Allah ke’ Néh mega’ penyala’ kelunan, pengena’ Néh inah pu’un penyukat mega’ penyala’ avéé’ pelinguh. La’o inah Iah menyun saa’ na’au’ Allah. ¹³ Hun iteu’ Iah mena jaka’ hun Allah maneu’ kekat ayau Néh apai gem Néh awah. ¹⁴ La’ah neu’ Néh mena’ urip Néh jah koléé’ awah, Iah peteneng kenin irah éh lepah nohéé’ Néh penyala’ réh avéé’ pelinguh. ¹⁵ Uleu’ jam éh pu’un kenat uban Sahéé’ Ni’ai pu’un bara’ ka’, ¹⁶ Iteu’ néh jajii’ éh juk neu’ ké’ ngan réh tong jaka’ éh temurei’ ha’ Tuhan, Akeu’ juk mulah ha’ sohoo’ ké’ dalem kenin réh ngan nyurat éh dalem penyeruh réh. ¹⁷ La’o inah Iah pu’un bara’ ka’, Bé’ Akeu’ mihau kekat penyala’ ngan kesa’at réh ha’ Néh. ¹⁸ Uban kenat, hun Tuhan lepah mega’ kekat penyala’ ngan kesa’at, bé’ tiken lu’ mematai ka’an dokoo’ mega’ penyala’ kepéh. ¹⁹ Uban kenat, O kekat padéé’ ké’, neu’ pematai Yésus uleu’ makang kenin omok masek tai Retek Matek Ni’ai. ²⁰ Pu’un Yésus maneu’ jalan maréng ngan uleu’, jalan éh mihin lu’ murip, neu’ Néh matai pu’un éh mega’ livah éh mapat jalan lu’ tai tong jumen Allah. ²¹ Uleu’ pu’un Imam éh pengeja’au kekat imam lu’ éh jian mu’un, éh imam tong lamin Tuhan, inah éh imam tong kekat kelunan éh ngelan tong Tuhan. ²² Uban néh kenat jian uleu’ tuai tepih tong Allah ngan jah awah kenin ngan pengelan éh reken ngan kenin éh ni’ai éh bé’ pu’un ineu’ pesala’ kenin lu’ kepéh, ngan usah éh lepah nohéé’ palaa’ baa’ éh ni’ai. ²³ Jian lu’ mihau pengelan lu’ mu’un tong Tuhan, uban Allah éh kenelan lu’, adang Iah kivu pekua’ éh pejajii’ Néh. ²⁴ Jian uleu’ nolong petolong siget usah, dokoo’ lu’ kua’ ngegahang kenin lu’ pika jah usah ngan jah usah ngan maneu’ kekat éh jian. ²⁵ Mai lu’ leko petipun sebayang barei’ jelua’ kelunan, bang jian lu’ ngereken kenin pesiget usah lu’, makin péh hun iteu’ uban kejam lu’ Dau penyavéé’ Tuhan lepah danii’ mu’un. ²⁶ Bé’ pu’un jalan mega’ penyala’ kepéh, hun uleu’ petem keto maneu’ penyala’, jin la’o ha’ tebaraa’ éh teneng tong Rengah Jian lepah benara’ ngan lu’. ²⁷ Iteu’ awah éh to ke’ pu’un ngan lu’, inah éh uleu’ ngan medai mena Allah petuneng ngan luten éh pana mu’un éh juk kebéé irah éh ngelawan Allah. ²⁸ Kelunan éh ngelapah tong sohoo’ Musa sahau, kenukum réh matai bé’ réh pika éh, hun duah-teleu’ kelunan jam mu’un iah pu’un ngelapah éh ngan maneu’ penyala’. ²⁹ Hun néh kenat tong irah inah, makin péh tong kelunan éh bet Anak Tuhan, éh seruh dahaa’ Yésus barei’ dahaa’ kelunan awah, ngan bé’ makat éh dahaa’ éh jalan Allah maneu’ jajii’ maréng ngan réh, inah éh ngesa’at Sahéé’ Ni’ai éh pika iah. ³⁰ Éh ke’ néh kenat uban uleu’ jam Iah éh bara’ ka’; Akeu’ juk mena’ oléé’ néh! Akeu’ juk ngukum! pu’un éh bara’ kepéh, Tuhan juk petuneng irah éh anah Nah. ³¹ Matek tusah mu’un hun pelohoo’ lem ojoo’ Allah éh murip. ³² Jian keh nesen tong urip keh éh bu’un jin la’o keh ngelan tong Kristus, na’ péh keh pinaa’ koléé’ teneng pengeketa, bang bé’ ka’ah bet Tuhan. ³³ Jelua’ koléé’ irah pekenyaa’ ngan peketa keh tong jumen kelunan pinaa’. Jelua’ koléé’ kepéh ka’ah keloo’ keta pemung ngan irah éh peketa réh. ³⁴ Ka’ah péh jam pengeketa kelunan éh lem lamin tutup. Hun réh nyayoh livah keh ka’ah ngeretep ngan murung kenin, uban keh jam ka’ah jian ngan éh omok pu’un pelinguh-linguh. ³⁵ Uban néh kenat mai keh putui pengelan, uban ja’au mu’un oléé’ néh ngan keh hun keh petem ngelan. ³⁶ Jian keh kebit kenin dokoo’ keh omok maneu’ pengeloo’ Allah, boh keh omok alaa’ kekat éh pejajii’ Néh. ³⁷ Uban pu’un éh senurat lem surat Allah, Bé’ lebéé’ La’ah, Iah éh juk tuai nah pu’un juk laho avéé’, bé’ éh lieu’. ³⁸ Irah éh anah ké’ éh maneu’ pengeloo’ ké’ adang ngelan tong Akeu’ ngan murip; Bang hun pu’un jin belah réh éh bé’ ngelan tong Akeu’ la’ah. Akeu’ bé’ payoo’ tong néh. ³⁹ Bang uleu’ iteu’, bé’ lu’ kelunan éh moléé’ murin ngan tawang, bang pu’un lu’ ngelan ngan omok alaa’ urip.

¹ Sin pengelan inah éh, uleu’ ngelan mu’un adang uleu’ omok alaa’ éh kepelum lu’ inah ngan jam éh pu’un kenat mu’un na’ péh éh bé’ jak omok ta’an lu’. ² Uban pengelan tepun lu’ sahau Allah payoo’ kenin tong réh. ³ Uban neu’ pengelan uleu’ jam tana’ ngan langit iteu’ pu’un senuai Allah Neu’ ha’ Néh awah. Kekat-kekat éh ta’an lu’ hun iteu’ péh senuai Néh palaa’ ha’ Néh awah. ⁴ Neu’ pengelan, Habel mena’ pengena’ éh pelapah jian jin pengena’ Kain ngan Allah. Neu’ pengelan Habel nah, inah Allah bara’ kenin Habel nah pu’un teneng mu’un, uban pengena’ néh nah pu’un éh ngepayoo’ kenin Allah. Neu’ pengelan néh inah, na’ péh Habel nah lepah matai sahau, seleket néh pu’un pané ngan uleu’ hun iteu’ kepéh. ⁵ Neu’ pengelan, Henokh bé’ matai.Bang iah pu’un netéé’ ngan nihin tavin Allah.Bé’ pu’un séé’-séé’ na’at éh kepéh Uban néh lepah netéé’ Allah. Lem surat Allah pu’un éh senurat, bé’ jak Allah metéé’ Henokh, pu’un éh ngepayoo’ kenin Allah. ⁶ Bé’ kelunan omok ngepayoo’ kenin Allah hun néh bé’ ngelan tong Néh. Kelunan éh tavin Allah, tekep éh ngelan Allah pu’un ngan ngelan Iah omok mena’ ngan irah éh mekat pitah Éh. ⁷ Neu’ pengelan, Noh mihau ha’ Allah éh bara’ tong kekat éh juk pu’un éh bé’ jak sakui ta’an néh, pu’un Noh kivu sohoo’ Allah, ngan maneu’ kapen ke’ néh purip usah néh ngan pemanak néh.Tana’ iteu’ kenukum, bang Allah pepoléng Noh nah kelunan éh jian neu’ pengelan néh. ⁸ Neu’ pengelan, Abraham kivu sohoo’ Allah hun Allah nyohoo’ éh piso tai tana’ éh jah éh pejajii’ Allah ngan néh. Hun néh piso bé’ éh jam semah-semah éh juk tai nah. ⁹ Neu’ pengelan, Abraham mokoo’ barei’ kelunan éh tejeu’ tong tana’ éh pejajii’ Allah ngan néh. Pu’un éh mokoo’ tong lamin pai pemung ngan Ishak rawah Yakub, éh alaa’ jajii’ éh kua’ jin Allah. ¹⁰ kebit kenin néh mena Allah mihin éh mokoo’ mu’un tong leboo’ éh senuai Allah éh pu’un lihei’ reken mu’un. ¹¹ Neu’ pengelan, Abraham omok pu’un anak na’ péh éh lepah mukun ngan Sara péh mukun ngan nyalun. Pu’un Abraham ngelan tong ha’ jajii’ Allah bara’ éh omok pu’un anak. ¹² Na’ péh Abraham mukun ngan danii’ juk matai, neu’ pengelan néh tong Allah, inah iah omok tepun kelunan pinaa’, barei’ kekat kenyuhai tong langit, ngan barei’ kekat napun tong dirin baa’ banget. ¹³ Kekat kelunan inah matai petem pengelan réh tong Allah. Bé’ réh pu’un alaa’ kekat éh pejajii’ Allah ngan réh, bang irah barei’ na’at éh jin juu’ awah, ngan murung kenin réh uban kejam réh adang réh omok alaa’ éh temurei’ kepéh, uban pu’un réh bara’, tana’ iteu’ bé’ éh tana’ réh mu’un, irah barei’ kelunan éh tejeu’ ngan nyakai awah. ¹⁴ Hun réh pané kenat inah uleu’ jam réh mena ngan kelih mu’un juk tai jah tana’ éh omok tana’ réh mu’un. ¹⁵ Bé’ irah seruh tong tana’ lohoo’ réh, hun réh kelih juk tai sinah, omok réh tai kepéh. ¹⁶ Bang irah juk tai jah tana’ éh pelapah jian jin inah, inah éh seruga. Inah maneu’ Allah bé’ menyaa’ hun réh mateng Iah Allah réh, uban pu’un Éh lepah petenup leboo’ tong seruga ngan réh. ¹⁷ Neu’ pengelan, Abraham sedia’ mematai anak néh Ishak barei’ jah pengena’ ngan Allah, inah éh tovoo’ Allah nesek kenin néh. Pu’un Allah mena’ jajii’ Néh ngan Abraham bang Abraham iah makang kivu sohoo’ Allah dokoo’ mematai anak néh éh jah de ke’ inah. ¹⁸ Allah lepah bara’ ngan Abraham, neu’ anak néh Ishak, inah Abraham omok pu’un anak-ayam pinaa’ mu’un. ¹⁹ Abraham ngelan, na’ péh éh mematai anak néh kivu sohoo’ Allah, omok Allah purip éh jin patai néh kepéh, ngan inah Abraham seleket alaa’ Ishak jin patai néh. ²⁰ Uban neu’ pengelan, Ishak bara’ tong jajii’ Allah juk maneu’ éh jian ngan Yakub rawah Esau. ²¹ Uban neu’ pengelan, Yakub bara’ tong jalan Allah juk maneu’ jian ngan ayam néh éh anak Yusup, bé’ jak éh matai. Pu’un éh madaa’ bau sekot néh ngan seva’ Allah. ²² Uban neu’ pengelan, Yusup hun néh jam éh juk matai, inah maneu’ éh bara’ tong jalan Allah juk mihin kelunan Israel piso jin tana’ Mesir. Iah kepéh bara’ tong jalan réh mihin tulang néh hun mah réh piso. ²³ Uban neu’ pengelan, tinen tamen Musa melim Musa avéé’ teleu’ laséh la’o lohoo’ néh. Rawah jam anak roh inah jian mu’un layan, ngan rawah makang kenin bé’ kivu sohoo’ raja’. ²⁴ Uban neu’ pengelan, Musa hun néh lepah ja’au usah, iah bé’ kejeraa’ kelunan mateng éh anak redo éh anak Raja’ Mesir. ²⁵ Musa pulang keloo’ keta pemung ngan irah éh pohoo’ néh éh anah Allah, jin néh alaa’ penyenang urip, maneu’ penyala’ éh metok awah. ²⁶ Musa peseruh pelapah jian iah teneng keta uban Kristus jin hun néh alaa’ kekat pengekaya’ tong tana’ Mesir, uban Musa ngelan tong éh pejajii’ Tuhan tong jaka’ éh temurei’ kepéh. ²⁷ Uban neu’ pengelan, Musa kelap jin tana’ Mesir ngan bé’ medai rek raja’. Barei’ hun néh pu’un na’at Allah éh bé’ omok ta’an kelunan. ²⁸ Uban neu’ pengelan, Musa nyohoo’ irah Israel mematai anak domba ngan mosoo’ dahaa’ néh tong usit tapé réh dokoo’ meliket patai bé’ mematai anak tuken irah Israel. ²⁹ Uban neu’ pengelan, irah Israel makang papit baa’ Banget bala pekua’ hun réh lakau tong tana’ awah. Bang hun irah Mesir tupat juk papit kepéh, bé’ réh omok, irah matai menyet. ³⁰ Uban neu’ pengelan, irah Israel maneu’ pagin tutuh leboo’ Yerikho nah kuba’ jin la’o réh lakau nutuh leboo’ inah tujuu’ dau kelebéé’. ³¹ Uban neu’ pengelan, Rahab redo éh bavah inah, bé’ teneng pematai pemung ngan irah éh ngelawan Allah. Uban iah alaa’ rawah pohoo’ Israel éh ngelong tana’ inah ngan jian kenin. ³² Kineu’ ha’ ké’ kepéh? Bé’ ku’ omok pané ngan kebit ha’ bara’ tong Gidion, Barak, Simson, Yepta, Daud, Samuel ngan kekat irah nabi. ³³ Neu’ pengelan, irah omok nyopéé’ kuraa’-kuraa’ arong tana’. Pu’un réh maneu’ ineu’ éh teneng, uban kenat irah alaa’ ineu’ éh pejajii’ Allah, irah mitep ujun tepun, ³⁴ memata’ luten éh pana mu’un, ngan jelua’ réh kepéh pu’un réh pelepu jin kelunan éh juk mematai réh palaa’ po’é. Dalem kekat pengelemoo’ réh pu’un réh gahang, gahang mu’un réh pekayau ngan nyopéé’ kekat ayau réh. ³⁵ Neu’ pengelan, jelua’ irah redo alaa’ bakéh réh éh lepah betéé’ jin patai néh. Jelua’ réh kepéh matai neu’ kelunan peketa réh, uban réh pelapah keloo’ matai jin hun réh bet Allah ke’ réh ngelepu réh. Uban pu’un réh ngelan Allah pebetéé’ réh jin patai réh. ³⁶ Jelua’ réh pu’un kelunan peja’ réh ngan memerah réh. Jelua’ réh kepéh kejeret réh ngan nebet réh lem lamin tutup. ³⁷ Pu’un jelua’ réh kepéh éh benateu’ réh avéé’ matai, ngan pu’un jelua’ réh kerajii’ réh usah réh peputui duah, ngan jelua’ kepéh penatai réh palaa’ po’é. Jelua’ réh pu’un pakai kulit domba ngan mék awah. Kari mu’un réh, semah-semah réh tai, sinah ke’ kelunan peketa ngan maneu’ réh. ³⁸ Bé’ tuneng-tuneng jalan réh mokoo’ neu’ pengelan réh tong Tuhan, inah maneu’ kelunan bet réh ke’ réh lakau ngan murip tong tana’ linek ngan tong pegé awah, luvang bateu’ ngan luvang tana’ nah awah lamin réh. Jian mu’un kelunan inah, bé’ pu’un kelunan tong tana’ iteu’ éh sukup jian ke’ réh tekep alaa’ réh. ³⁹ Matek ja’au mu’un penganeu’ kekat irah iteu’ uban pengelan réh na’ péh kenat bé’ jak réh pu’un alaa’ éh pejajii’ Allah. ⁴⁰ Allah juk maneu’ jah jalan éh jian ngan lu’ dokoo’ hun réh pemung ngan uleu’ awah irah omok sukup mu’un.

¹ La’ah uban pu’un kelunan pinaa’ nah éh tutuh lu’ éh omok nelana’ bara’ tong pengelan réh tong Allah, jian uleu’ bet kekat éh nebii’ lu’ éh bahat ngan bet kekat penyala’ éh maneu’ lu’ tekaleu’ ngan saveng, dokoo’ lu’ omok petakéé’ nekedeu’ mu’un-mu’un mapun éh saa’ tenah lu’. ² Bang jian lu’ petem kepuh tong Yésus, éh majak lu’ lem pengelan lu’ jin bu’un avéé’ ga’. Yésus bé’ béé kenin, na’ péh Iah pu’un matai tong kayeu’ salib. Bang uban kemurung éh juk laa’ Néh kepéh, bé’ Iah seruh kemenyaa’ éh teneng tong kelunan éh matai tong kayeu’ salib, hun iteu’ Iah menyun saa’ na’au’ nyun Allah. ³ Jian keh pepata urip keh ngan urip Néh, pinaa’ penusah Néh neu’ kelunan éh sa’at éh leko Éh ngan maneu’ Éh mu’un-mu’un, bang kebit kenin Néh lem kekat penusah Néh. Jian keh pepata urip keh ngan urip Néh kenat, dai keh béé kenin ngan bé’ omok ngeretep lem kekat penusah keh kepéh. ⁴ Uban tong jalan keh ngelawan penyala’ dokoo’ keh omok nyopéé’ éh, bé’ jak keh pu’un ngelawan éh pah avéé’ keh penatai réh. ⁵ Mai kelepan ha’ Allah pané ngan keh éh anak Néh dokoo’ Néh ngereken kenin keh. Ka’ ha’ Néh, O anak ké’, mai ke’ bet ha’ Tuhan hun Néh memerah ke’. Mai ke’ juk béé kenin hun Néh ngukum keh. ⁶ Uban pu’un Tuhan petena’ kekat kelunan éh penika Néh, ngan ngukum kekat irah éh anak Néh, ha’ Néh. ⁷ Hun néh kenat jian keh ngeretep lem pengeketa keh, ngan kejeraa’ pengeketa inah pu’un barei’ perah éh penakai tamen ko’ dokoo’ nebaraa’ ke’, uban neu’ pengeketa keh nah inah jalan Allah nebaraa’ keh uban keh anak Néh. Mah pu’un anak éh bé’ penerah tamen néh? ⁸ Hun Tuhan bé’ memerah keh barei’ Iah memerah kekat anak Néh, barang bé’ péh keh anak Néh mu’un bang anak ubuu’ awah keh. ⁹ Irah éh tamen lu’ tong tana’, pu’un réh memerah lu’ ngan pu’un lu’ sepah réh kepéh. Makin péh hun néh Tamen lu’ tong seruga maneu’ kenat, tekep lu’ ngerera’ kenin lu’ dokoo’ lu’ omok murip. ¹⁰ Pu’un Tamen lu’ tong tana’ petena’ ngan memerah lu’ kelebéé’ lu’ bé’ jam seruh, dokoo’ lu’ jam kivu kekat éh jian kunah néh. Bang pu’un Tuhan memerah lu’ dokoo’ Néh nolong lu’ ke’ lu’ omok ni’ai barei’ Iah péh pu’un ni’ai. ¹¹ Kelebéé’ Tuhan memerah lu’, tusah kenin lu’ bé’ lu’ murung, bang la’o inah kepéh hun lu’ mihau ha’ tebaraa’ Néh, pu’un lu’ murip kivu pengeloo’ Tuhan ngan alaa’ pengepawah Néh. ¹² Uban néh kenat jian keh metéé’ ojoo’ keh éh lepah tai lemoo’ ngan ngegahang lep keh éh riyet. ¹³ Lakau keh masek jalan éh lepah pemai neu’ keh, dokoo’ kelunan éh paket gem bé’ teguu’ ke’ néh omok ma’o mu’un jin kesakit néh. ¹⁴ Mekat keh pitah jalan dokoo’ keh omok murip ngan pawah kenin belah kekat kelunan. Kenat péh jian keh mekat pitah dokoo’ kekat barék keh pu’un ni’ai, uban bé’ pu’un séé’-séé’ péh éh omok na’at Tuhan hun néh bé’ pu’un ni’ai. ¹⁵ Mavaa’ keh dai pu’un kelunan bet Allah éh na’ penika Néh ngan lu’. Mai pu’un séé’-séé’ péh éh barei’ pulah éh petuh, éh maneu’ pinaa’ penusah ngan éh ngesa’at kelunan palaa’ katah néh. ¹⁶ Mavaa’ keh dai pu’un séé’-séé’ petuyang ngan bet Tuhan barei’ Esau bet Tuhan sahau uban néh magat juk kuman ka’an awah. Iah éh anak tuken bang bé’ éh pegunah kekat penyukat ngan pengejian éh tekep ngan irah éh anak tuken, bang nelih néh awah éh uban néh kuman ka’an éh kemagat néh. ¹⁷ La’o inah Esau juk alaa’ penyukat ngan pengejian inah jin tamen néh, bang bé’ éh omok alaa’ éh kepéh; Na’ péh Iah mangaa’ mu’un juk pitah jalan ke’ néh juk ngepaléu’ ineu’ éh Lepah naneu’ néh nah, bang bé’ éh omok. ¹⁸ La’ah ka’ah iteu’, bé’ keh pu’un tai tong jah tokong éh omok ta’an keh barei’ irah Israel hun réh tai tong tokong Sinai. Tokong inah barei’ mahang irah tavin merem, lihep ngan kepu kasi. ¹⁹ Ha’ serupit ngan ha’ Allah pu’un pané. Hun kelunan Israel menéng ha’ inah, irah ngan mu’un-mu’un bara’ réh bé’ keloo’ menéng ha’ inah kepéh. ²⁰ Irah bara’ kenat uban réh bé’ putung menéng ha’ sohoo’ éh bara’ ka’, Jian péh kelunan kenat péh ka’an éh avéé’ tong tokong iteu’, tekep éh benateu’ avéé’ matai, ha’ nah. ²¹ Kekat éh ta’an réh nah ngedai réh mu’un, avéé’ Musa péh bara’, Medai mu’un ku’, riyet ku’ medai, ha’ néh. ²² - ²³ Bang ka’ah tuai tong tokong Sinai ngan tong leboo’ Allah éh murip, inah éh Yerusalem éh tong seruga pemung ngan ibu-ibu meliket Néh. Ka’ah lepah tai tavin tipun kelunan éh murung kenin, inah éh tipun kekat irah éh tenah tai tong seruga, éh pu’un ngaran senurat tong seruga. Ka’ah lepah tavin Allah éh petuneng kekat kelunan ngan sahéé’ kekat kelunan éh jian éh lepah pu’un sukup mu’un. ²⁴ Ka’ah lepah tuai tavin Yésus, Iah éh maneu’ jajii’ maréng inah, ngan tavin dahaa’ éh penirih éh pejajii’ tong kekat éh pelapah jian jin dahaa’ Habel. ²⁵ Uban néh kenat mai keh bé’ menéng ha’ Néh Pané inah. Irah éh bé’ keloo’ menéng ha’ Iah éh tuai tong tana’ éh pesavéé’ Rengah éh jin Allah, bé’ omok ngelepu usah néh tengéé’. Hun lu’ bet Iah éh pané jin seruga, adang lu’ bé’ omok ngelepu usah lu’. ²⁶ Hun Tuhan pané ngan réh sahau, pu’un tegen tana’ tovoo’ Néh pané nah, bang hun iteu’ kepéh pu’un ha’ Jajii’ Néh ka’, Jah koléé’ kepéh Akeu’ juk negen tana’, bang bé’ éh tana’ awah bang avéé’ seruga péh, ha’ Néh. ²⁷ Neu’ ha’ Néh éh bara’ ka’, Jah koléé’ kepéh, ha’ nah, nojoo’ ketem lo’ong tana’ ngan langit éh senuai Néh juk tenegen ngan juk nebet Néh, dokoo’ ineu’ éh bé’ omok tenegen inah éh petem pelinguh. ²⁸ Uban kenat tekep uleu’ bara’ jian kenin uban uleu’ pu’un lem nihau Néh éh pelinguh, tekep uleu’ bara’ jian kenin ngan seva’ Allah ngan penoo’ penyeva’ ngan Medai tong Néh, kivu jalan éh ngepayoo’ kenin Néh. ²⁹ uban Allah Iah pu’un barei’ luten éh omok kebéé ineu’-ineu’ péh.

¹ Barei’ keh pu’un pika pepika, jian keh petem maneu’ kenat barei’ éh tekep ngan kelunan éh pepadéé’ dalem Tuhan. ² Jian keh alaa’ kelunan éh nyakai tong lamin keh ngan jian kenin. Pu’un kelunan éh alaa’ réh kenat inah réh alaa’ meliket, bang bé’ réh jam éh meliket. ³ Mai keh ngelepan irah éh tong lamin tutup, pika réh, seleket hun néh usah ko’ tengéé’ éh tenutup réh. Pika irah éh keta, seleket hun néh usah ko’ tengéé’ éh keta. ⁴ Kelunan éh kawin jian éh mokoo’ petem ngan redo néh kenat péh lakei’ néh, jian éh mihau éh mu’un pekua’ lu’ mihau livah éh ma’an belih, jian lakei’ inah ngan redo inah pu’un barék éh teneng belah rawah ke’, mai roh magat irah éh jah ngan petuyang. Adang Tuhan, petuneng irah éh sa’at barék ngan petuyang. ⁵ Adang Tuhan ngukum irah éh sa’at barék ngan petuyang. Dalem kekat urip keh, mai keh kelih juk kaya’, bang jian keh sukup kenin tong éh pu’un ngan keh. Uban ka’ ha’ Tuhan, Bé’ Akeu’ kejeraa’ ka’au’ tengéé’, bé’ Akeu’ bet ke’, ha’ Néh. ⁶ Uban néh kenat jian uleu’ makang kenin bara’ pekua’ ha’ jin dalem surat Allah, ka’ éh, Tuhan éh nolong ku’, akeu’ bé’ medai. Ineu’ éh omok neu’ kelunan tong akeu’ ha’ Néh. ⁷ Jian keh seruh tong irah éh pengeja’au keh lepah, éh bara’ ha’ Tuhan ngan keh. Seruh keh tong urip réh ngan tong pematai réh, jian keh nyavuu’ pengelan réh. ⁸ Yésus Kristus pu’un pekua’ hun sahau, hun iteu’ ngan avéé’ kelebéé’-lebéé’ néh. ⁹ Mai keh kejeraa’ ha’ tebaraa’ éh tengéé’ pepetat keh jin jalan éh teneng. Kenin lu’ tekep gahang neu’ penika Allah, bé’ éh neu’ lu’ kivu kuraa’ kuraa’ sohoo’ tong éh omok kinan lu’. Kelunan éh kivu sohoo’ inah bé’ inah omok ngegahang pengelan réh tong Tuhan. ¹⁰ Irah imam éh kereja’ tong lamin Tuhan bé’ réh omok kuman pengena’ éh tong mija jalan pengena’ lu’. ¹¹ Imam éh pengeja’au kekat imam Yahudi mihin dahaa’ ka’an tai lem Retek Matek Ni’ai dokoo’ mena’ éh ngan Tuhan jalan mega’ penyala’. Bang usah ka’an inah, nolong réh saa’ usit lamin inah. ¹² Kenat péh Yésus matai saa’ usit pagin leboo’, dokoo’ mohéé’ irah éh anah nah jin penyala’ réh palaa’ dahaa’ Néh tengéé’. ¹³ Uban néh kenat jian uleu’ tai tavin Éh saa’ usit lamin inah dokoo’ lu’ masek lem pengemenyaa’ pemung ngan Néh. ¹⁴ Éh ke’ néh kenat uban tong tana’ bé’ pu’un leboo’ éh pelinguh jalan lu’ mokoo’; uleu’ to ke’ pitah leboo’ éh juk pu’un kepéh vam. ¹⁵ Uban néh kenat, jian uleu’ ngelayau musit ha’ mejing Tuhan, inah seleket pengena’ lu’ ngan Allah lem Yésus. Kekat ha’ inah éh pengena’ lu’ hun lu’ ngakun Iah éh Tuhan lu’. ¹⁶ Mai ngelepan maneu’ jian ngan nolong-petolong, uban Penganeu’ inah seleket pengena’ éh pesenang kenin Allah. ¹⁷ Jian keh ngerera’ tong irah éh majak keh ngan kivu sohoo’ réh. Uban irah éh mihau kekat urip keh, uban irah juk bara’ kekat kereja’ réh ngan Allah, hun keh kivu sohoo’ réh, irah omok kereja ngan jian kenin, Bang hun keh bé’ kivu sohoo’ réh irah péh kereja ngan bahat kenin ngan bé’ omok mihau keh mu’un. ¹⁸ Jian keh ngelayau sebayang tong améé’. Bé’ pu’un ineu’-ineu’ éh pesala’ kenin mé’, uban ngelayau améé’ juk maneu’ kekat éh teneng. ¹⁹ Inah akeu’ nyohoo’ keh sebayang mu’un menyat Allah mukap jalan ke’ ké’ omok laho moléé’ ngan keh kepéh. ²⁰ Allah lepah Pebetéé’ Tuhan lu’ Yésus jin pematai Néh. Uban neu’ pematai Néh inah, Iah hun iteu’ omok Gembala éh pengeja’au kekat Gembala uleu; domba-domba Néh. Pematai Néh péh netap jajii’ éh pelinguh éh naneu’ Allah ngan uleu’. ²¹ Jian Allah inan pengepawah inah pesukup kekat pengejian Néh ngan keh dokoo’ keh omok maneu’ pengeloo’ Néh. Dokoo’ jin Yésus Kristus Allah maneu’ kekat ineu’ éh keneloo’ Néh dalem urip lu’. Jian Kristus pu’un peparen avéé’ kelebéé’ lebéé’ néh! Amin. ²² Akeu’ menyat ka’ah kebit kenin menéng kekat ha’ tena’ éh jalan ngegahang kenin keh uban surat ké’ iteu’ bé’ éh pelapah kebit. ²³ La’ah akeu’ keloo’ keh jam Timotius pu’un kelepu réh jin lamin tutup. Hun néh laho avéé’ siteu’ da’, boh ku’ mihin éh tovoo’ ké’ tuai nepah ka’ah. ²⁴ Akeu’ bara’ tabi’ ngan kekat pengeja’au keh, kenat péh ngan kekat kelunan éh anah Tuhan. Kelunan Kristén éh jin tana’ Italia, irah péh bara’ tabi’ ngan keh. ²⁵ Jian Allah mena’ pengejian ngan ka’ah bé’.