GALATIA

GALATIA

¹ Akeu’ Paulus, bara’ tabi’ ngan sidang tong tana’ Galatia. Akeu’ kevéléé’ ke’ ké’ lawah Néh, naneu’ Yésus Kristus ngan Allah Tamen lu’ éh lepah pebetéé’ Yésus jin pematai Néh. Bé’ éh jin kelunan ngan kevéléé’ kelunan péh. ² Tabi’ jin kekat padéé’ keh éh kua’ pengelan siteu’, ngan sidang tong tana’ Galatia. ³ Jian Allah éh Tamen lu’, ngan Tuhan Yésus Kristus, mena’ penika Néh ngan pengepawah Néh ngan keh. ⁴ La’ah pu’un Kristus mena’ urip Néh uban penyala’ lu’ kivu pengeloo’ Tamen Néh Allah, dokoo’ Néh ngelepu lu’ jin urip lu’ éh sa’at tong tana’ iteu’. ⁵ Kekat pengaren ngan Allah avéé’ kelebéé’-lebéé’ néh. Amin. ⁶ La’ah béé kenin ké’ uban ka’ah lumang mu’un petat jin Allah éh ngevéléé’ keh uban Néh pika keh, ngan tai kivu jah rengah éh bé’ rengah jian mu’un. ⁷ Éh mu’un bé’ pu’un rengah jian éh tengéé’ jin éh benara’ améé’, bang akeu’ pané kenat uban kelunan pu’un petusah kenin keh ngan juk ngepaléu Rengah Jian éh jin Kristus. ⁸ Hun néh améé’ péh ngan hun néh meliket jin seruga péh éh bara’ ha’ tebaraa’ éh tengéé’ jin ha’ tebaraa’ Tuhan ngan keh, bé’ sala’ hun Allah ngukum réh mu’un tong luten meraka. ⁹ Pekua’ ha’ mé’ lepah rai, kenat péh ha’ ké’ hun iteu’ kepéh, hun pu’un jah usah éh bara’ jah tebaraa’ éh tengéé’ jin éh lepah kenivu keh nah, jian Allah ngukum éh mu’un tong luten meraka. ¹⁰ Kineu’, hun ké’ pané kenat, pu’un éh barei’ kelunan éh pitah kenajung jin kelunan awah? Adang bé’. Akeu’ pitah kenajung jin Allah awah. Kineu’ pu’un keh seruh akeu’ pitah jalan dokoo’ kelunan omok bakéh ké’? Hun akeu’ pitah éh kenat, bé’ akeu’ kelunan sohoo’ Kristus kepéh. ¹¹ O kekat padéé’ ké’, akeu’ bara’ mu’un ngan keh, Rengah jian éh benara’ ké’ ngan keh rai’ bé’ éh jin kelunan awah. ¹² Bé’ akeu’ alaa’ éh jin kelunan, ngan bé’ éh kelunan éh bara’ éh ngan ké’, bang Yésus Kristus éh pepoléng éh ngan ké’. ¹³ Pu’un keh lepah jam tong kekat penganeu’ ké’ hun ké’ kivu adet irah Yahudi lepah rai, gahang mu’un ku’ peketa irah tong sidang Allah pah avéé’ ké’ juk kebéé réh mu’un. ¹⁴ La’ah tong adet irah Yahudi, akeu’ éh pelapah jam éh jin kekat kelunan éh pekua’ tatek urip ké’ jin belah pohoo’ ké’ tengéé’, uban akeu’ mekat mu’un kivu kekat adet ngan ha’ tukit jin tepun ké’. ¹⁵ Bang neu’ penika Allah awah, Iah ngevéléé’ akeu’ hun ké’ to lem boré tinen ké’, ngan Iah tebai akeu’ maneu’ kereja’ Néh. ¹⁶ Hun Allah pepoléng Anak Néh ngan ké’ dokoo’ ké’ omok bara’ Rengah Jian tong Anak Néh inah ngan irah éh tengéé’ pohoo’, bé’ akeu’ tai neteng kelunan séé’-séé’ péh. ¹⁷ Bé’ akeu’ pu’un tai Yérusalem tavin irah lawah Tuhan sitai éh kevéléé’ Tuhan tenah jin akeu’. Bang akeu’ tioo pelapah tai tong tana’ Arab, la’o inah boh akeu’ moléé’ tai leboo’ ja’au Damsyik kepéh. ¹⁸ Teleu’ ta’un la’o inah boh akeu’ tai Yérusalem dokoo’ ké’ pané’ ngan Péterus, akeu’ mokoo’ ngan néh duah migu kelebéé’. ¹⁹ Bé’ akeu’ pu’un temeu’ ngan irah lawah éh jah, bang Yakub éh padéé’ Tuhan iah awah éh temeu’ ngan ké’. ²⁰ Tong kekat ha’ éh senurat ké’ iteu’, teneng béé-béé éh, bé’ akeu’ kenyo, Tuhan jam, bé’ akeu’ kenyo. ²¹ La’o inah boh akeu’ tai tong kuraa’ leboo’ tong tana’ Siria ngan tana’ Kilikia. ²² Kelebéé’ ké’ lakau inah, kekat irah tong sidang Kristus tong tana’ Yudea to ke’ bé’ jak jam ku’ mu’un. ²³ Irah menéng ha’ réh bara’, lakei’ éh peketa lu’ ngan éh juk ngebéé pengelan lu’ rai hun iteu’ iah nebaraa’ tong pengelan lem Tuhan. ²⁴ Inah maneu’ réh mejing Allah uban akeu’ pu’un ngelan kepéh.

¹ La’ah jah poloo’ pat ta’un la’o inah, amo Barnabas tai Yérusalem. Pu’un akeu’ mihin Titus ngan ké’ kepéh. ² Pu’un ku’ tai tong leboo’ Yérusalem uban Allah éh nyohoo’ ku’ tai. La’ah pu’un ku’ pané ngan irah pengeja’au hun réh petipun tengéé’, bara’ tong kekat ha’ tebaraa’ éh benara’ ké’ belah kelunan éh tengéé’ pohoo’ jin irah Yahudi nah. Uban bé’ akeu’ keloo’ kereja’ ké’ éh lepah nah ngan éh hun iteu’ péh pu’un tuyah-tuyah awah. ³ La’ah bakéh ké’ Titus, na’ péh iah pohoo’ Yunani, bé’ réh nyohoo’ éh kivu adet irah Yahudi ngan pesunat éh, ⁴ Na’ péh pu’un jelua’ keloo’ éh kenat, irah inah kelunan éh selim masek ngan améé’ ngan ngelayoo’ awah pepadéé’ dalem Tuhan, irah pu’un tuai dokoo’ réh omok ngedalem uban ineu’ améé’ bé’ pu’un kivu kekat-kekat adet réh, ngan naneu’ ineu’ améé’ pu’un pemung ngan Kristus. Irah maneu’ kenat ke’ réh juk ngeripen mé’ tong adet réh kepéh. ⁵ La’ah bé’ sapét si’ik ké’ améé’ ngayo ngan kivu sohoo’ réh kenat, dokoo’ ka’ah omok jam tong Rengah Jian éh teneng mu’un. ⁶ Bang irah éh barei’ pengeja’au, barang irah kenat mu’un péh, bé’ ku’ jam, uban bé’ ku’ pegunah kemaren kelunan awah, uban Allah bé’ Iah ngevéléé’ éh jian kunah kelunan awah. Irah pengeja’au inah, bé’ réh pu’un bara’ ineu’-ineu’ éh maréng ngan ké’. ⁷ Bang irah jam Allah pu’un nyohoo’ ku’ perengah Rengah Jian ngan kelunan éh tengéé’ pohoo’, pekua’ Iah nyohoo’ Péterus perengah Rengah Jian ngan irah Yahudi rai. ⁸ Uban Allah éh maneu’ akeu’ lawah Néh ngan kelunan éh tengéé’ pohoo’, pekua’ Péterus lawah Néh ngan kelunan Yahudi nah. ⁹ La’ah Yakub, Péterus, ngan Yohanes, éh pengeja’au réh, irah péh jam Allah pu’un mena’ kereja’ iteu’ ngan ké’. Uban kenat réh teleu’ petabi’ ngan amo Barnabas tada’ améé’ pekua’ kenin améé’ béé pu’un bara’ amo éh tai ngan réh teleu’ éh tai ngan kelunan Yahudi. ¹⁰ Jah awah éh sohoo’ réh ngan mo, mai mo ngelepan kelunan éh kari éh pu’un belah irah Yahudi nah, akeu’ péh seruh kenat. ¹¹ Bang hun Péterus avéé’ tong leboo’ Antiokia, pelapah akeu’ pané ngan néh ma’ah éh uban néh sala’. ¹² Uban hun irah Yahudi éh sohoo’ Yakub nah bé’ jak avéé’ rai, pu’un Péterus kuman ngan irah éh ngelan tong Tuhan, éh tengéé’ pohoo’ jin irah Yahudi. Bang la’o irah inah avéé’ nah, bé’ Péterus kuman kepéh ngan réh. Piso éh uban néh medai tong irah éh seruh tekep kekat pohoo’ kelunan kivu adet sebayang réh ngan pesunat kelunan ke’ réh alaa’ urip Tuhan. ¹³ Kenat péh kuraa’ kelunan Yahudi éh padéé’ lu’ dalem Tuhan, irah péh medai ngan kivu Péterus, pah avéé’ Barnabas péh kivu éh kepéh. ¹⁴ Bang hun ké’ jam irah piso kenat uban réh medai ngan menyaa’, ngan bé’ pu’un maneu’ éh pekua’ éh teneng tong Rengah Jian, pu’un ku’ ma’ah Péterus tong jumen réh béé. Ka’ ha’ ké’ ngan néh, ka’au’ iteu’ kelunan Yahudi, bang lepah rai pu’un ke’ bet kekat adet sebayang Yahudi. Hun néh kenat, uban ineu’ ke’ nyohoo’ kelunan éh tengéé’ pohoo’, kivu adet inah ngan murip barei’ kelunan Yahudi kepéh, ha’ ké’ ngan néh. ¹⁵ Adang mu’un améé’ iteu’ éh pohoo’ Yahudi, bé’ mé’ kelunan éh tengéé’ pohoo’ éh penyala’. ¹⁶ Na’ péh kenat kejam mé’, bé’ pu’un jah usah péh éh pu’un kenin éh jian éh teneng mu’un tong jumen Allah neu’ néh kivu kekat adet sebayang lem Surat Musa. Kelunan omok ngepayoo’ kenin Allah neu’ pengelan néh awah tong Yésus Kristus. Bé’ éh neu’ penganeu’ néh kivu kekat adet sebayang lem Surat Musa. Uban jah usah péh bé’ omok ngepayoo’ kenin Allah neu’ néh kivu adet inah. Kenat péh améé’ Yahudi péh, améé’ pu’un kenin éh jian kepéh tong jumen Allah neu’ pengelan mé’ tong Kristus awah. ¹⁷ Bang kineu’ améé’ Yahudi, hun mé’ pitah jalan ke’ mé’ omok ngepayoo’ kenin Allah boh mé’ nesen, bé’ mé’ tengéé’ jin irah éh pohoo’ éh jah, améé’ péh kelunan penyala’ barei’ irah éh tengéé’pohoo’, seruh keh, séé’ éh maneu’ mé’ sala’? Kineu’, pu’un keh seruh Kristus éh maneu’ mé’ sala’? Adang bé’. ¹⁸ Bang inah akeu’ sala’, hun ké’ juk kivu kekat-kekat éh nebet ké’ tong kekat adet lem Surat Musa. ¹⁹ Bang akeu’ seleket matai awah tong kekat adet ngan sohoo’ lem Surat Musa, bé’ akeu’ mihau éh. Sala’ akeu’ hun akeu’ juk kivu éh kepéh. Hun iteu’ urip ké’ lem Allah, akeu’ lepah matai pemung ngan Kristus tong salib Néh. ²⁰ La’ah urip ké’ hun iteu’ bé’ éh anah ké’ tengéé’ kepéh, bang urip Kristus éh murip dalem akeu’. La’ah tong urip ké’ hun iteu’, akeu’ murip neu’ pengelan ké’ tong Anak Allah, éh pika akeu’ ngan éh mena’ usah Néh uban akeu’. ²¹ Bé’ akeu’ bet penika Allah, bang hun kelunan omok alaa’ jian kepéh tong jumen Allah, neu’ néh kivu sohoo’ ngan adet lem Surat Musa, boh pematai Kristus nah, tuyah-tuyah awah.

¹ Palui ka’ah kelunan Galatia. Séé’ lepah ngaboo’ ngan ngepaléu kenin ka’ah? Hun lepah rai pu’un keh menéng ngan lenaa’ mu’un tong jalan Kristus Yésus pu’un matai tong kayeu’ salib rai. ² Akeu’ juk neteng keh, kineu’ jalan keh pu’un alaa’ Sahéé’ Tuhan. Kineu’, neu’ keh kivu kekat sohoo’ lem Surat Musa? Adang bé’. Pu’un keh alaa’ Sahéé’ Ni’ai uban keh menéng Rengah Jian ngan ngelan éh nenéng keh. ³ Uban ineu’ keh bé’ jam seruh. Pengelan keh rai, pu’un éh neu’ Sahéé’ Tuhan, kineu’ keh juk kivu kekat jin tana’ iteu’ hun iteu’ kepéh. ⁴ Kineu’, tuyah-tuyah awah kekat pengeketa keh hun keh ngelan rai? Kioo’ ké’ bé’ éh tuyah-tuyah awah. ⁵ Hun Allah pu’un mena’ Sahéé’ Néh ngan keh ngan maneu’ kuraa’ telana’ belah keh rai, bé’ éh mena’ éh neu’ keh kivu adet sebayang Yahudi. Nena’ Néh Sahéé’ uban keh menéng ngan ngelan tong Rengah Jian nah. ⁶ La’ah barei’ ha Surat Allah bara’ tong Abraham, ka’ ha’ Néh, Pu’un Abraham ngelan tong Allah, ngan neu’ pengelan néh, inah jalan Allah alaa’ iah seleket kelunan éh lepah jian kepéh. ⁷ Uban néh kenat jian keh nesen, kelunan éh ngelan, inah éh puku’ Abraham mu’un. ⁸ Lem surat Allah lepah bara’ éh tenéh, Allah juk alaa’ irah éh tengéé’ pohoo’ jin irah Yahudi neu’ pengelan réh tong Iah. Kenat péh Allah bara’ Rengah Jian iteu’ ngan Abraham, bé’ jak éh pu’un kenat. Jin ka’au’ kekat arong kelunan pah tipo tana’ omok alaa’ pengejian ké’. ⁹ Pu’un Abraham ngelan ha’ Tuhan inah, kenat iah pu’un alaa’ pengejian jin Allah. Kenat péh kepéh kekat kelunan éh ngelan, omok réh alaa’ pengejian jin Allah pekua’ Abraham nah. ¹⁰ Kelunan éh seruh iah omok ngepayoo’ kenin Allah neu’ néh kivu sohoo’ lem Surat Musa, ukum Tuhan teneng tong iah. Uban pu’un jah ha’ lem Surat Allah bara’ ka’, séé’-séé’ éh bé’ ngelayau kivu kekat éh lepah senurat dalem Surat Musa, pu’un Allah ngukum éh, ha’ Néh. ¹¹ La’ah bé’ pu’un jah usah péh éh omok ngepayoo’ kenin Allah neu’ néh kivu sohoo’ lem Surat Musa. Uban pu’un jah ha’ lem Surat Allah éh bara’ ka’, kelunan éh pu’un kenin éh jian kepéh tong Allah neu’ pengelan néh tong Iah, omok éh murip. ¹² Bang Surat Musa nah, bé’ éh bara’ ineu’-ineu’ tong pengelan bang pu’un éh bara’ tong penganeu’ kelunan awah, barei’ jah ha’ lem Surat Allah kepéh, éh bara’ kelunan éh kivu kekat sohoo’ lem Surat Musa, omok éh murip, ha’ Néh. ¹³ La’ah Kristus lepah ngelepu uleu’ jin ukum inah, uban kelunan bé’ omok kivu kekat ha’ ngan sohoo’ lem Surat Musa. Jalan Kristus ngelepu uleu’, Iah tagong ukum uleu’, usah Néh tengéé’ kenukum Tuhan ngeliwah uleu’. Uban pu’un jah ha’ lem Surat Allah bara’ ka’, siget-siget kelunan éh matai tong kayeu’ salib pu’un éh kenukum Tuhan, ha’ Néh. ¹⁴ Uban Yésus Kristus matai kenat, kekat pengejian éh pejajii’ Allah ngan Abraham, omok éh avéé’ tong kelunan éh tengéé’ pohoo’. Pu’un éh kenat dokoo’ neu’ pengelan lu’ tong Yésus Kristus, uleu’ péh omok alaa’ Sahéé’ Ni’ai éh pejajii’ Néh. ¹⁵ O Kekat padéé’ ké’, akeu’ juk bara’ ngan keh tong jalan éh kemalai keh. Hun pu’un duah usah maneu’ jajii’ ngan peséréé’ bé’ pu’un jah usah péh omok memata’ éh kenat péh pepit ineu’-ineu’ tong néh. ¹⁶ La’ah pu’un Allah maneu’ jajii’ Néh ngan Abraham ngan jah panak néh kepéh. La’ah bé’ iah maneu’ jajii’ ngan kekat panak Abraham, barei’ okoo’ ngan kelunan pinaa’ nah, bang tong jah usah jin panak néh uban ka’ ha’ Tuhan rai, Jajii’ Ké’ iteu’ pu’un avéé’ tong jah usah panak ko’, ha’ Néh. La’ah panak néh nah, inah éh Kristus. ¹⁷ Iteu sin tong éh benara’ ké’ nah. pu’un Allah lepah maneu’ jah jajii’ ngan Abraham, adang jajii’ Néh inah pu’un petem, kekat sohoo’ lem Surat Musa éh nena’ Néh pat ato-teleu’ poloo’ ta’un la’o inah, bé’ éh omok memata’ jajii’ Allah. ¹⁸ Uban hun lu’ omok alaa’ kenin éh jian kepéh ngan Allah neu’ lu’ kivu sohoo’ lem Surat Musa nah awah, bé’ lu’ tusah ngelan tong Tuhan, ngan jajii’ Tuhan inah, seleket bé’ pu’un. Bang pu’un Allah mena’ éh pejajii’ Néh ngan Abraham kivu ha’ jajii’ Néh lepah nah. ¹⁹ Uban ineu’ Tuhan mena’ kekat sohoo’ lem Surat Musa? Ineu’ gunah néh? Lebéé’ tenéh la’o ha’ jajii’ Néh ngan Abraham nah, nena’ Néh sohoo’ inah dokoo’ néh pepoléng kekat sala’ lu’. Sohoo’ Néh inah pu’un pah avéé’ tong savéé’ panak Abraham nah, inah éh Kristus, éh panak Abraham nah uban jajii’ inah rai pu’un éh ngan néh. La’ah kekat sohoo’ lem Surat Musa, nena’ Tuhan neu’ meliket Néh ngan Musa, éh mena’ éh ngan kelunan kepéh. ²⁰ Bang hun Allah mena’ jajii’ Néh ngan Abraham rai, bé’ pu’un pebelah, la’ah Allah Iah péh jah awah. ²¹ Hun néh kenat, kineu’, Surat Musa nah pekelawan ngan jajii’ Allah éh? Bé’ éh kenat. Uban hun néh pu’un jah sohoo’ éh omok pepurip kelunan, boh irah pu’un jian kepéh ngan Allah neu’ sohoo’ inah. ²² Surat Allah lepah bara’, kekat kelunan béé pu’un lem penyukat penyala’. Hun néh kenat kineu’ jalan néh omok pelepu. Inah éh neu’ pengelan néh tong Yésus Kristus. Séé’-séé’ éh ngelan kenat adang néh pelepu. ²³ Bang kelebéé’ Kristus bé’ jak tuai rai uleu’ pu’un lem kamit sohoo’ lem Surat Musa, bang hun Kristus avéé’ boh pu’un pengelan tong Iah kepéh. ²⁴ La’ah kenat péh Surat Musa iteu’, barei’ jah guru éh mihin uleu’ tavin Kristus, dokoo’ uleu’ pu’un jian kepéh tong jumen Allah neu’ pengelan lu’ tong Iah. ²⁵ Bang hun iteu’ uleu’ pu’un ngelan tong Kristus, ngan bé’ uleu’ pu’un lem kamit sohoo’ lem Surat Musa iteu’ éh barei’ jah guru nah. ²⁶ Uban neu’ pengelan keh tong Kristus, ka’ah béé péh anak Allah, uban keh pu’un pemung ngan Kristus Yésus. ²⁷ Uban kekat ka’ah éh lepah benatis dalem Kristus, pu’un keh lepah alaa’ kekat pengejian pekua’ barei’ Kristus kepéh. ²⁸ Kenat péh hun iteu’, ka’ah béé-béé pu’un jah awah dalem Kristus Yésus. Bé’ pu’un kelunan Yahudi ngan irah éh tengéé’ pohoo’ kepéh, kenat péh bé’ pu’un kelunan ripen ngan kelunan éh bé’ ripen, bé’ éh tengéé’ irah lakei’ ngan tengéé’ irah redo, ka’ah béé jah awah neu’ pengelan keh tong Kristus Yésus. ²⁹ Hun ka’ah anah Kristus boh ka’ah péh panak Abraham kepéh, ngan ka’ah omok alaa’ kekat éh pejajii’ Allah ngan Abraham kepéh.

¹ La’ah iteu’ éh benara’ ké’, anak éh tekep alaa’ kekat-kekat livah tamen néh hun tamen néh matai, kelebéé’ néh anak keto, iah péh barei’ kelunan sohoo’ awah na’ péh kekat livah inah juk anah nah béé. ² Kelebéé’ néh si’ik keto, kelunan éh jah mihau éh, ngan mihau kekat livah inah, pah avéé’ jaka’ néh omok alaa’ éh kunah tamen néh. ³ Hun lepah rai, hun lu’ to bé’ jak sukup kenin tong Tuhan, uleu’ péh barei’ anak awah, keripen awah kivu kekat sohoo’ ngan adet tong tana’ iteu’. ⁴ Bang avéé’ tong jaka’ éh kevéléé’ Allah, inah éh nyohoo’ Anak Néh mu’un tuai, Iah tuai tong tana’ ngan tinen Néh kelunan jin tana’. Anak Néh inah pu’un éh kivu sohoo’ lem Surat Musa, ⁵ ke’ Néh ngelepu lu’ jin kamit sohoo’ lem Surat Musa nah dokoo’ uleu’ béé omok anak Allah kepéh. ⁶ La’ah dokoo’ uleu’ omok jam uleu’ pu’un paléu anak Néh, Allah mena’ Sahéé’ Anak Néh lem kenin uleu’, Sahéé’ inah éh bara’, O Amam, O Amam. ⁷ Uban néh kenat bé’ ka’ah kelunan ripen kepéh, bang ka’ah anak Tuhan, ngan hun keh anak Néh, ka’ah péh omok alaa’ kekat éh juk nena’ Allah ngan irah éh anak Néh. ⁸ Hun lepah rai bé’ keh jam Allah bang ka’ah pu’un kivu kuraa’ arong allah éh adek ke’ awah. ⁹ Bang hun iteu’ uban keh lepah jam Allah, éh mu’un néh Allah éh jam keh, uban ineu’ keh juk keripen sahéé’ ngan kekat-kekat éh kenat, éh lemoo’ ngan sa’at awah? Uban ineu’ keh juk alaa’ éh pengeja’au keh kepéh? ¹⁰ Uban keh pu’un mihau kuraa’ dau ngan kuraa’ laséh, ngan ta’un péh, inah keh seruh keh kivu Tuhan mu’un. ¹¹ Medai ku’ seruh keh kenat, dai kekat kemutau ké’ kereja’ ngan keh rai, tuyah-tuyah awah. ¹² O kekat padéé’ ké’, akeu’ nyohoo’ keh kivu Tuhan barei’ akeu’ péh, uban akeu’ péh kelunan pekua’ ka’ah ke’. Na’ péh akeu’ pané kenat, bé’ makat ka’ah maneu’ sala’ ngan ké’. ¹³ Bang tong jalan bu’un-bu’un ké’ tuai perengah Rengah Jian ngan keh rai, ka’ah péh jam éh, pu’un ku’ tai uban ké’ sakit. ¹⁴ Bé’ ka’ah leko tong kesakit ké’ nah, bé’ keh bet akeu’, na’ péh keh tusah mu’un na’at ku’ sakit kenat, pu’un keh alaa’ akeu’ barei’ alaa’ jah meliket Tuhan, éh mu’un néh ka’ah alaa’ ku’ barei’ hun néh usah Kristus Yésus mu’un. ¹⁵ Murung kenin keh hun irai, mah lah kekat kemurung keh irai kepéh? Uban akeu’ jam hun keh omok nirok mega’ tulin maten keh dokoo’ mena’ éh tong akéé’, keloo’ keh kenat. ¹⁶ Kineu’ kepéh kenin keh hun iteu’, akeu’ éh barei’ ayau keh uban ké’ bara’ kekat éh teneng ngan keh? ¹⁷ Gahang mu’un irah éh jah ngajung ka’ah, bé’ éh uban réh keloo’ maneu’ jian, bang uban irah keloo’ petengéé’ keh jin akeu’ dokoo’ ka’ah omok ngajung irah kepéh. ¹⁸ La’ah jian ke’ éh kelunan ngajung keh jin kenin réh mu’un, bé’ makat hun ké’ pu’un na’at keh awah. ¹⁹ O kekat anak ké’, barei’ hun lepah rai akeu’ keta mu’un lem kenin juk mihin keh ngelan tong Kristus, kenat péh hun iteu’ kepéh, akeu’ keloo’ kéh pepit mu’un ngan sukup mu’un kenin lem Kristus. ²⁰ Keloo’ mu’un-mu’un akeu’ pemung ngan keh hun iteu’, dokoo’ ké’ omok ngepaléu kenin ké’ éh bahat iteu’. Bahat mu’un-mu’un kenin ké’ seruh keh. ²¹ Akeu’ juk neteng ka’ah éh juk kivu kekat sohoo’ lem Surat Musa dokoo’ alaa’ urip, bé’ keh jam tong ha’ tebaraa’ lem surat inah kei? ²² Pu’un éh bara’ Abraham duah anak, jah anak néh ngan Hagar redo ripen, jah anak néh kepéh ngan Sara, redo néh mu’un. ²³ Anak néh ngan Hagar redo ripen nah, pu’un éh uban roh pemung barei’ kemalai kelunan awah, bang anak néh ngan redo néh mu’un, pu’un éh uban Tuhan kivu jajii’ Néh ngan Abraham ngan mena’ anak inah ngan rawah. ²⁴ Rawah anak inah barei’ ha’ tapan ngan lu’ kepéh tong urip lu’ lem Tuhan. Rawah redo inah ha’ tapan tong duah jajii’ Tuhan. Jah jajii’ Néh nena’ Néh ngan Musa tong tokong Sinai éh tong tana’ Arab éh tana’ Hagar nah. ²⁵ La’ah Hagar nah ha’ tapan kepéh tong Yérusalem éh leboo’ Yahudi, éh keripen pemung ngan kekat irah éh pohoo’ néh inah. ²⁶ Bang Sara nah ha’ tapan tong jajii’ Tuhan éh keruwah nah, éh bara’ tong Yérusalem éh tong seruga éh seleket tinen lu’. Iah éh pelepu ngan kekat uleu’ éh anak néh pu’un lu’ pelepu kepéh. ²⁷ Barei’ ha’ lem Surat Allah éh bara’ ka’, O redo éh bé’ pu’un anak, murung kenin ko’, ka’au’ éh bé’ jam sakit nganak uban ko’ bé’ pu’un anak, mejui ke’ ngan ngelahap murung kenin. Uban redo éh bé’ pu’un lakei’ néh pelapah pinaa’ anak jin redo éh pu’un petem lakei’. ²⁸ O kekat padéé’ ké’, ka’ah péh anak Allah neu’ jajii’ Néh, pekua’ Ishak anak Abraham éh pu’un neu’ jajii’ Tuhan. ²⁹ Uban hun sahau rai, Ismael éh anak redo ripen, pu’un éh peketa Ishak éh pu’un neu’ Sahéé’ Tuhan, kenat péh hun iteu’ kepéh. ³⁰ Bang kineu’ ha’ lem Surat Allah? Ha’ lem Surat Allah bara’, ka’ éh, Bet redo ripen ngan anak néh uban redo ripen bé’ omok alaa’ livah tamen néh pemung ngan anak redo éh bé’ ripen, ha’ Néh. ³¹ O kekat padéé’ ké’, uban néh kenat, bé’ uleu’ anak redo ripen, bang uleu’ anak redo éh bé’ ripen.

¹ La’ah uleu’ lepah piso jin kekat sohoo’ lem Surat Musa uban Kristus éh pepiso lu’. Uban néh kenat, jian keh nekedéng petem, mai keh moléé’ kivu inah kepéh. ² Jian keh menéng ha’ ké’, akeu’ iteu’ Paulus éh bara’ ngan keh, hun keh kejeraa’ réh pesunat keh, adang Kristus bé’ pu’un gunah ngan keh. ³ Akeu’ bara’ kepéh, siget-siget usah éh kejeraa’ réh pesunat éh, adang iah tekep kivu kekat sohoo’ lem Surat Musa kepéh. ⁴ La’ah hun keh keloo’ jian kepéh tong jumen Allah neu’ keh kivu sohoo’ lem Surat Musa, inah ka’ah petengéé’ usah keh jin Kristus, ka’ah lepah piso jin penika Allah. ⁵ Bang améé’ pu’un améé’ ngelan Allah omok maneu’ améé’ jian kepéh tong jumen Néh, kenat améé’ mena ngan kebit kenin, neu’ penyukat Sahéé’ Ni’ai éh kereja’ pemung ngan pengelan mé’. ⁶ Uban hun lu’ pu’un petem lem Kristus Yésus, pesunat ngan bé’ pesunat péh, bé’ éh ineu’, bang inah awah éh pu’un gunah, pengelan lu’ tong Yésus éh pu’un neu’ penika Néh. ⁷ La’ah jian ka’ah hun lepah rai. Séé’ éh meta’ keh dokoo’ keh bé’ kivu ha’ tebaraa’ éh teneng. Séé’ ngaboo’ ngan ngepaléu kenin keh? ⁸ Tuhan éh tebai keh, bé’ Iah maneu’ kenat. ⁹ Pu’un éh barei’ éh benara’ kelunan, si’ik awah tawan pekevat omok éh pekevat tepong béé. ¹⁰ Bang akeu’ ngelan adang ka’ah omok ngelan Tuhan kepéh, barei’ keh ngelan hun kekat penusah iteu’ bé’ pu’un rai. Uban lu’ pu’un petem lem Tuhan, inah éh maneu’ akeu’ omok ngelan ka’ah bé’ pu’un tengéé’ kenin ngan bé’ kivu ha’ tebaraa’ éh tengéé’. Ngan inah kepéh kejam ké’, kelunan séé’-séé’ éh petusah kenin keh nah, adang néh kenukum Allah. ¹¹ O kekat padéé’ ké’, hun ké’ to nebaraa’ kelunan nyohoo’ réh pesunat, barei’ ha’ irah jelua’ maneu’ akeu’ nah, uban ineu’ réh peketa akeu’? Hun akeu’ nyohoo’ réh pesunat, adang kekat ha’ tebaraa’ éh benara’ ké’ tong salib Kristus bé’ éh petusah kenin kelunan. Bang bé’ akeu’ nyohoo’ réh kenat. ¹² Akeu’ ngelan dokoo’ kekat kelunan éh petusah kenin keh pepiso usah réh jin sidang Tuhan. ¹³ O kekat padéé’ ké’, ka’ah pu’un tenebai Tuhan dokoo’ keh omok pelepu jin kekat ukum tong adet kelunan. Bang mai keh seruh, pelepu mé’ hun iteu’ bé’ pu’un ukum kepéh, omok mé’ kivu kenin mé’ tengéé’ tong kekat pengagat usah mé’. Bé’ éh kenat. Bang neu’ penika keh ngan Tuhan jian keh nolong ngan petolong pesiget usah keh béé. ¹⁴ Uban kekat sohoo’ lem Surat Musa lepah sukup lem jah ha’, inah éh, Tekep ke’ murung padéé’ ko’ pekua’ ke’ murung usah ko’ tengéé’, ha’ nah. ¹⁵ Bang hun ka’ah barei’ barék ka’an awah, pu’un keh barei’ nyuhat ngan ngesakit saa’ belah ka’ah ke’, mavaa’ keh dai keh pu’un ngebéé ketem lo’ong ka’ah ke’. ¹⁶ Bang iteu’ ha’ ké’ ngan keh, kejeraa’ Sahéé’ Ni’ai majak keh, mai keh kivu pengagat dalem usah keh. ¹⁷ Uban pengagat dalem usah keh pekelawan ngan pengeloo’ Sahéé’, ngan pengeloo’ Sahéé’ pekelawan ngan pengagat dalem usah keh. Rawah inah kua’ pekelawan inah éh maneu’ keh bé’ omok kivu kekat éh pengeloo’ keh. ¹⁸ Bang hun Sahéé’ Ni’ai majak keh, bé’ keh pu’un dalem penyukat sohoo’ lem Surat Musa kepéh. ¹⁹ La’ah poléng mu’un kelunan éh kivu pengagat lem kenin néh, uban barék néh, inah éh, petuyang ngan kekat barék éh segit mu’un éh bé’ tekep néh maneu’ éh. ²⁰ Pu’un réh maneu’ butun ngan ngelimu’, pepaneu’ péh, tengéé’ kenin ngan sa’at kenin ngan kelunan éh jah, pepihet, merek ngan bau-bau kenin. Pu’un réh petengéé’ usah réh jin kelunan éh jah, ²¹ pu’un réh magat livah irah éh jah, mavuk, kuman nyahan, ngan pinaa’ arong éh barei’ inah kepéh. La’ah akeu’ bara’ ngan keh, pekua’ éh benara’ ké’ ngan keh lepah rai, kelunan éh maneu’ kenat bé’ réh omok tai lem nihau Allah. ²² Bang Sahéé’ Ni’ai mihin kelunan maneu’ kekat éh jian, inah éh mihin réh jam pika, murung kenin, pawah kenin, ngan dawai kenin, pu’un éh mihin réh jam nolong kelunan éh jah, ngan barék éh jian, ngan tigéh, ²³ diva’ kenin, jam mihau kenin. La’ah bé’ pu’un séé’ éh meta’ éh kenat. ²⁴ La’ah kekat kelunan éh anah Yésus Kristus pu’un éh lepah mematai pengagat dalem usah néh pemung ngan kekat kesa’at ngan pengeloo’ néh tengéé’. ²⁵ Pu’un lu’ alaa’ urip maréng neu’ Sahéé’ Ni’ai, hun néh kenat tekep Sahéé’ inah majak lu’ lem kekat urip lu’ kepéh. ²⁶ Mai lu’ bau kenin, mai lu’ maneu’ ineu’-ineu’ éh omok ngesakit kenin kelunan éh jah, ngan mai lu’ ngeleko jah usah ngan jah usah.

¹ O kekat padéé’ ké’, hun keh jam séé’-séé’ péh maneu’ penyala’, tekep ka’ah éh penoo’ neu’ Sahéé’ Tuhan, dawai kenin peteneng jalan néh, ngan mihau usah keh kepéh dai keh sioo’ tenupat kepéh. ² Tekep keh nolong kelunan éh jah lem penusah néh, kenat jalan keh kivu sohoo’ Kristus. ³ Uban hun jah usah seruh usah néh tengéé’ jian jin kekat irah éh jah, éh mu’un néh bé’ éh kenat, hun iah seruh éh pu’un jian kenat, inah iah ngelavo’ usah néh awah. ⁴ Tekep siget usah petuneng kereja’ néh tengéé’, hun kereja’ néh pu’un jian boh éh omok murung kenin ngan bé’ makat pitah kelunan éh jah mejing iah. ⁵ Uban tekep siget usah ngamit penusah néh tengéé’. ⁶ La’ah kelunan éh pekalai tong tebaraa’ Kristus, tekep iah mena’ tulat jin kekat-kekat éh nalaa’ néh éh jian ngan irah éh nebaraa’ éh. ⁷ Mai keh ngelavo’ usah keh tengéé’. Mai keh seruh Allah bé’ jam ineu’-ineu’ éh penganeu’ keh. Barei’ éh nulah kelunan kenat ke’ éh najau néh kepéh. ⁸ Uban kelunan éh mulah kekat barék éh sa’at lem kenin néh, neu’ néh kivu pengagat dalem kenin néh éh sa’at, iah majau éh kepéh, ajau néh inah mihin éh matai awah. Kenat péh kelunan éh mulah kekat éh jin Sahéé’ lem kenin néh, iah péh majau éh kepéh, ajau néh inah mihin éh alaa’ urip pelinguh. ⁹ Hun néh kenat mai lu’ leko maneu’ jian, uban hun lu’ nengayet maneu’ jian, omok lu’ majau éh kepéh. ¹⁰ Uban néh kenat siget koléé’ hun lu’ na’at kelunan lem penusah néh, tekep lu’ nolong réh, makin péh ngan kekat padéé’ lu’ éh ngelan tong Tuhan. ¹¹ Kebit mu’un ha’ éh senurat ké’ tengéé’. ¹² La’ah kelunan éh bau kenin éh keloo’ pané tong kekat adet kelunan awah, inah éh nyohoo’ ka’ah pesunat. Irah maneu’ kenat dokoo’ mai kelunan éh jah peketa réh uban hun réh bara’, Neu’ pengematai Kristus tong salib, inah awah jalan kelunan omok alaa’ urip Tuhan, hun réh pané kenat adang irah Yahudi peketa réh. ¹³ Uban irah éh pakai adet sunat nah, bé’ réh kivu kekat sohoo’ lem Surat Musa, bang irah keloo’ ka’ah sunat dokoo’ réh omok ngajung usah réh ngan kelunan éh jah uban ka’ah kivu sohoo’ réh kenat. ¹⁴ Bang tong akeu’, jah awah éh juk kenajung ké’, inah éh tong pengematai Tuhan lu’ Yésus Kristus. Uban neu’ Néh matai tong kayeu’ salib, kekat-kekat éh tong tana’ iteu’ tuyah-tuyah awah ngan ké’. Akeu’ péh seleket matai ngan kekat-kekat éh pu’un tong tana’. ¹⁵ Uban na’ péh kelunan pu’un pesunat ngan bé’ pesunat péh, bé’ éh ineu’, inah awah éh pu’un gunah, hun kelunan pu’un alaa’ urip maréng lem kenin néh. ¹⁶ Jian pengepawah ngan penika Tuhan pu’un ngan kekat ka’ah éh pu’un alaa’ urip maréng, kenat péh ngan kekat kelunan éh anah Tuhan semah-semah péh. ¹⁷ Inah ga’ ha’ ké’, jin la’o iteu’ mai jah usah péh petusah kenin ké’ kepéh. Kekat ila tong usah ké’ neu’ kelunan éh bé’ ngelan éh maneu’ akeu’ lepah rai, inah éh pekelenaa’ akeu’ kelunan sohoo’ Yésus. ¹⁸ O kekat padéé’ ké’, jian penika Tuhan Yésus Kristus pu’un ngan ka’ah béé, Amin.