ÉPESUS

ÉPESUS

¹ Akeu’ Paulus lem pengeloo’ Allah lawah Kristus Yésus, akeu’ éh maneu’ surat iteu’ ngan kekat kelunan éh anah Allah éh mokoo’ tong leboo’ Épesus, ngan éh tigéh dalem urip réh lem Kristus Yésus. ² Jian Allah éh Tamen lu’ ngan Tuhan Yésus Kristus, mena’ penika Néh ngan pengepawah Néh ngan keh. ³ Jian uleu’ bara’ jian kenin ngan Allah éh Tamen Tuhan lu’ Yésus Kristus, uban uleu’ murip pemung ngan Kristus, Allah lepah mena’ pengejian ngan lu’, palaa’ kekat pengejian éh jin seruga. ⁴ Bé’ jak tana’ iteu’ pu’un, Allah pu’un ngevéléé’ uleu’ tenéh, dokoo’ neu’ urip lu’ lem Kristus, uleu’ omok anah Néh, ngan murip ni’ai ngan jian mu’un, bé’ pu’un sa’at ineu’-ineu’ tong jumen Néh. Uban neu’ penika Néh, ⁵ La’ah naneu’ penika Néh, jin bu’un tenéh Allah petenup jalan dokoo’ neu’ Anak Néh Kristus éh matai tong salib, Iah omok maneu’ uleu’ anak Néh kepéh.Iah maneu’ kenat kivu pengeloo’ ngan kemurung kenin Néh tengéé’. ⁶ Jian uleu’ mejing Allah uban lu’ jam penika Néh éh ja’au mu’un. Bé’ éh mena’ urip maréng ngan lu’ uban pengejian uleu’, bang uban neu’ penika Néh awah nah ke’ Néh mena’ urip maréng ngan lu’, dalem Anak Néh éh kemurung Néh mu’un. ⁷ Uban neu’ dahaa’ Kristus, uleu’ pu’un pelepu, inah éh, penyala’ lu’ pu’un pega’. Iah maneu’ kenat uban ja’au mu’un penika Allah ngan lu’, pelapah ja’au jin éh omok benara’ lu’. ⁸ Uban dalem pengejam ngan pengeloo’ kenin Néh tengéé’, Iah kivu kenin Néh, ⁹ ngan kejeraa’ uleu’ jam tong pengeloo’ kenin Néh éh petenup Néh tenéh ngan éh pelim jin kelunan sahau. ¹⁰ Pengeloo’ kenin Néh éh juk neu’ Néh, tovoo’ avéé’ jaka’ néh, Iah juk pepemung kekat penyuai Néh dalem Kristus ngan Kristus éh omok pengeja’au néh béé. Kenat péh tong seruga, kenat péh tong kekat éh tong tana’ péh. ¹¹ Allah ngelayau maneu’ ineu’-ineu’ éh payoo’ kivu pengeloo’ kenin Néh. Avéé’ Néh ngevéléé’ améé’ dalem Kristus dokoo’ mé’ omok anah Néh, kivu pengeloo’ kenin Néh éh petenup Néh tenéh jin sahau. ¹² Uban néh kenat, jian urip améé’ éh bu’un-bu’un ngelan tong Kristus, pepoléng pengaren Allah. ¹³ Kenat éh ngan ka’ah kepéh, hun keh menéng ha’ tebaraa’ éh teneng, inah éh Rengah Jian éh jalan keh alaa’ urip maréng, hun keh menéng éh pu’un keh ngelan tong Kristus, uban Allah nelana’ ka’ah éh anah nah, inah éh Iah mena’ Sahéé’ Ni’ai ngan keh éh lepah pejajii’ Néh. ¹⁴ Uban Allah mena’ Sahéé’ Ni’ai ngan uleu’, inah telana’ adang lu’ omok alaa’ kekat éh pejajii’ Néh ngan uleu’ éh anah nah, ngan inah kepéh telana’ adang Tuhan juk ngelepu uleu’ jin kekat kesa’at ngan penyala’ lu’. Uban néh kenat jian uleu’ mejing Allah éh Matek Maren. ¹⁵ Uban néh kenat jin bu’un ké’ menéng rengah tong pengelan keh tong Tuhan Yésus, ngan penika keh ngan kekat kelunan éh anah Allah, ¹⁶ bé’ ku’ posot, ngelayau ku’ sebayang bara’ jian kenin ngan Allah. Akeu’ mateng ka’ah dalem sebayang ké’, ¹⁷ Akeu’ menyat Allah, éh Tamen Tuhan Yésus Kristus, inah éh Tamen éh Matek Maren, akeu’ menyat éh mena’ pengejam jin Sahéé’ Ni’ai ngan keh dokoo’ keh omok nesen mu’un tong Kristus, ngan kekat éh neu’ Néh. ¹⁸ Akeu’ sebayang menyat éh pepekang maten kenin keh dokoo’ keh omok nesen tong pengeloo’ kenin Néh tovoo’ Néh tebai keh rai. Pengeloo’ kenin Néh nah bé’ éh terah urip lu’ hun iteu’ awah, bang avéé’ vam kepéh. Hun keh nesen éh adang keh nesen kepéh tong kejian pengena’ Néh éh pejajii’ Néh ngan irah éh anah nah. ¹⁹ Ngan akeu’ keloo’ keh jam tong ke ja’au penyukat Tuhan lem uleu’ éh ngelan tong Kristus. Penyukat Néh inah pu’un éh pekua’ penyukat Néh, ²⁰ jalan iah pebetéé’ Kristus jin patai Néh, ngan ngajung Iah saa’ na’au’ Néh tong seruga. ²¹ Tong sinah Kristus pu’un penyukat bau kekat pengeja’au, kelunan éh pu’un penyukat, kelunan éh majak ngan raja’. Kristus pelapah ja’au penyukat jin la’o séé’-séé’ kelunan murip kesioo’ jaka’ éh juk avéé’ kepéh. ²² La’ah pu’un Allah mena’ kekat-kekat néh béé ra’ penyukat Kristus, ngan mena’ Kristus ngan sidang ke’ Néh pengeja’au néh, ngan pengeja’au kekat ineu’-ineu’ péh. ²³ La’ah sidang nah usah Kristus éh pu’un pepoléng pengejian Kristus, uban Kristus pu’un pesukup kekat ineu’-ineu’ péh.

¹ La’ah hun sahau ka’ah pu’un matai neu’ kekat kesa’at ngan penyala’ keh. ² Tovoo’ inah pu’un keh kivu jalan éh kemalai kelunan éh bé’ jam Tuhan. Pu’un keh kivu sohoo’ pengeja’au kekat balei’, pengeja’au balei’ nah pu’un éh ngamit kelunan éh bé’ kivu sohoo’ Tuhan pah avéé’ hun iteu’. ³ La’ah hun sahau uleu’ béé péh pu’un barei’ inah, pohoo’ lu’ sa’at awah, pu’un lu’ maneu’ ineu’-ineu’ éh pengeloo’ usah ngan kenin lu’, uleu’ péh teneng kenukum Allah pekua’ kelunan inah. ⁴ Bang pu’un Allah pika lu’ mu’un, ja’au mu’un penika Néh, bé’ éh omok benara’ lu’, ⁵ uban tovoo’ uleu’ matai neu’ kesa’at lu’, Iah pepurip lu’ pemung ngan Kristus, uban neu’ penika Néh awah ka’ah pu’un piso jin ukum penyala’. ⁶ Neu’ pengelan lu’ tong Kristus Yésus, Iah lepah pebetéé’ uleu’ pemung ngan Néh dokoo’ lu’ omok pengeja’au pemung ngan Néh tong seruga. ⁷ Pu’un Iah maneu’ kenat dokoo’ penika Néh ngan lu’ dalem Kristus, éh ja’au mu’un, éh bé’ omok benara’ lu’, pu’un poléng pelinguh. ⁸ Uban naneu’ penika Allah awah ka’ah pu’un pelepu jin ukum penyala’, neu’ pengelan keh tong Iah. Bé’ éh neu’ ineu’-ineu’ penganeu’ keh, bang neu’ pengena’ Allah ngan keh awah. ⁹ Bé’ keh omok ngajung usah keh, uban bé’ keh pu’un pelepu jin ukum penyala’ neu’ ineu’-ineu’ éh penganeu’ keh. ¹⁰ Uban uleu’ éh senuai Allah, ngan murip petem lem Kristus Yésus, Iah suai lu’ kelu’ omok murip ngan maneu’ kuraa’-kuraa’ kereja’ éh jian, éh lepah petenup Néh ngan lu’. ¹¹ La’ah ka’ah éh tengéé’ pohoo’ jin pohoo’ Yahudi, éh keleko irah uban keh bé’ kivu adet sunat, uban irah Yahudi seruh irah pu’un jian uban réh kivu adet inah. Bang pesunat inah éh bara’ tong penganeu’ réh tong usah réh awah. Jian keh seruh tong urip keh sahau. ¹² Sahau bé’ keh jam Kristus. Ka’ah barei’ kelunan éh tejeu’, bé’ keh jam ineu’-ineu’ tong adet sebayang Yahudi, bé’ keh pu’un pemung ngan pohoo’ kelunan éh kevéléé’ Allah. Bé’ keh pu’un lem jajii’ Allah ngan irah éh anah nah. Pu’un keh murip tong tana’ iteu’, bé’ keh pu’un pengelan ngan bé’ keh jam Allah. Kenat keh sahau rai. ¹³ Bang hun iteu’ kepéh neu’ urip keh petem lem Kristus Yésus, ka’ah éh bé’ jam Allah sahau rai, hun iteu’ neu’ dahaa’ Kristus ka’ah jam éh, ngan pu’un Iah mihin keh tavin Allah. ¹⁴ Uban Kristus pu’un mihin tunuk neu’ Néh mihin kelunan Yahudi ngan kelunan éh tengéé’ pohoo’ jah awah, bé’ kéh duah arong la’ah. Neu’ usah Néh tengéé’ Iah nasa’ apat éh mihin keh petengéé’ kenin ngan bé’ omok pepadéé’. ¹⁵ Neu’ pematai Néh, nebet Néh kekat adet lem Surat Musa pemung ngan kekat sohoo’ ngan penganeu’ Néh, uban neu’ adet inah, kelunan Yahudi ngan kelunan éh tengéé’ pohoo’ pu’un tengéé’ kenin. La’ah pu’un éh maneu’ kelunan Yahudi ngan kelunan éh tengéé’ pohoo’, jah arong éh maréng dalem usah Néh. Neu’ Néh maneu’ kenat inah Iah mihin keh tunuk. ¹⁶ Neu’ pengematai Néh tong salib, Kristus pu’un kebéé kekat kenin kelunan éh pekeleko, éh maneu’ réh bé’ omok pepadéé’, naneu’ salib Néh, Iah mihin duah arong inah jah kenin awah ngan mihin éh moléé’ tavin Allah kepéh. ¹⁷ La’ah kenat péh Kristus tuai ke’ Néh bara’ Rengah Jian tong jalan kelunan omok tunuk ngan Allah, kenat péh ka’ah éh tengéé’ pohoo’ éh juu’ jin Allah sahau rai, kenat péh kelunan Yahudi éh pu’un lepah danii’ tong Iah. ¹⁸ Uban neu’ Kristus kekat uleu’ béé, kelunan Yahudi ngan kelunan éh tengéé’ pohoo’ péh, omok tavin Tamen lu’ neu’ Sahéé’ éh jah awah. ¹⁹ Ka’ah éh tengéé’ pohoo’ jin améé’ bé’ keh barei’ kelunan éh tejeu’ éh bé’ jam Allah, bang ka’ah péh paléu pekua’ pohoo’ kelunan éh pu’un lem nihau Néh, pu’un keh pepadéé’ ngan Allah éh Tamen lu’ béé. ²⁰ Ka’ah péh petok réh bau balun éh neu’ irah lawah ngan neu’ irah nabi, la’ah bateu’ éh lihei’ néh, inah éh Kristus Yésus mu’un. ²¹ La’ah neu’ Kristus, kekat éh lem lamin inah pu’un éh pepetok dalem Tuhan ke’ néh omok sukup ngan omok pesuai mu’un ke’ néh omok umaa’ Allah éh ni’ai. ²² La’ah pemung ngan Néh ka’ah péh pu’un petok pemung ngan kekat irah éh jah ke’ néh omok jah lamin éh jalan pengokoo’ Sahéé’ Néh.

¹ Uban néh kenat akeu’ Paulus éh pu’un tong lamin tutup dalem pengeloo’ Kristus Yésus uban kereja’ ké’ belah ka’ah éh tengéé’ pohoo’ jin améé’. ² Adang ka’ah lepah menéng tong penika Allah ngevéléé’ akeu’ dokoo’ ké’ omok maneu’ kereja’ Néh nolong keh. ³ Pu’un Allah pepoléng kenin Néh ngan ké’, éh pelim jin kelunan sahau, bang pu’un éh pepoléng éh hun iteu’ kepéh. Pu’un ku’ nyurat si’ik tong inah rai, ⁴ ngan hun keh purung éh, omok keh jam tong kenin Kristus. ⁵ Bé’ kelunan sahau jam tong kenin Néh inah, bang hun iteu’ neu’ Sahéé’ Néh pu’un Tuhan pekelenaa’ éh ngan kekat lawah Néh ngan irah nabi Tuhan. ⁶ Neu’ Rengah Jian éh pelim lem kenin Allah sahau, bang éh pepoléng Néh hun iteu’ kepéh, kelunan éh tengéé’ pohoo’ jin pohoo’ Yahudi péh, omok éh alaa’ kekat pengejian Allah pemung ngan irah Yahudi. Irah péh barei’ jebila’ usah Tuhan ngan pu’un dalem jajii’ éh pejajii’ Allah lem Kristus Yésus. ⁷ Dalem penika Allah Iah ngevéléé’ akeu’ ngan maneu’ akeu’ kelunan sohoo’ Néh dokoo’ ké’ perengah Rengah Jian, ngan neu’ penyukat Néh pu’un ku’ maneu’ kekat kereja’ Néh inah. ⁸ La’ah na’ péh akeu’ pelapah si’ik jin kekat irah éh jah éh anah Allah, dalem penika Néh Iah kejeraa’ akeu’ bara’ ngan kelunan éh tengéé’ pohoo’ tong pengejian Kristus éh pelapah jian jin éh omok benara’ lu’. ⁹ La’ah Iah kejeraa’ akeu’ mihin kekat kelunan jam tong jalan éh petenup Néh tenéh ke’ Néh omok kivu pengeloo’ kenin Néh. La’ah Allah éh lepah suai kekat ineu’-ineu’, nelim Néh pengeloo’ kenin Néh jin kelunan sahau, ¹⁰ dokoo’ naneu’ sidang hun iteu’ kekat meliket ngan kekat éh pu’un penyukat tong seruga, omok jam tong pengeloo’ kenin Tuhan éh jian mu’un. ¹¹ Allah maneu’ éh kenat pekua’ ngan pengeloo’ Néh éh pu’un pelinguh, éh petenup Néh dalem Kristus Yésus éh Tuhan lu’. ¹² Pemung ngan Kristus ngan naneu’ pengelan lu’ tong Iah, uleu’ omok tavin Allah ngan bé’ pu’un medai. ¹³ Uban néh kenat akeu’ nyohoo’ keh, mai keh putui pengelan uban ké’ teneng keta naneu’ kereja’ ké’ belah ka’ah rai, pu’un éh kenat dokoo’ mena’ pengejian ngan ka’ah. ¹⁴ La’ah uban néh kenat akeu’ ngejekuu’ lep ké’ tong jumen Tamen ké’, ¹⁵ Éh jalan siget-siget tamen tong seruga ngan tong tana’ péh alaa’ ngaran réh. ¹⁶ Matek ja’au mu’un pengemaren Allah, uban néh kenat akeu’ sebayang menyat éh ngegahang kenin keh neu’ penyukat Sahéé’ Ni’ai pekua’ ke ja’au pengaren Néh éh ja’au nah. Akeu’ sebayang kenat dokoo’ Kristus omok mokoo’ lem kenin keh neu’ pengelan keh tong Iah. ¹⁷ Jian Kristus petem dalem kenin keh, uban keh ngelan tong Néh. Akeu’ sebayang dokoo’ kekat penganeu’ keh ngelakat dilem ngan petem reken lem penika. ¹⁸ Ngan inah kepéh, dokoo’ ka’ah péh pemung ngan kekat kelunan éh anah Allah, omok nesen tong ke ja’au ngan kebit ngan kebau ngan kedilem penika Kristus ngan lu’. ¹⁹ Kenat akeu’ sebayang dokoo’ keh omok jam tong penika Allah ngan lu’, dokoo’ keh omok sukup ngan penoo’ mu’un ngan kekat kejian Allah. La’ah ja’au mu’un penika Néh, bé’ lu’ omok jam éh béé. ²⁰ La’ah ngan Allah éh pu’un penyukat maneu’ éh pelapah ja’au jin ineu’-ineu’ éh pengenyat lu’ ngan éh seneruh lu’, naneu’ penyukat Néh éh kereja’ dalem uleu’, ²¹ kekat pengajung anah nah dalem sidang ngan dalem Kristus Yésus kelebéé’-lebéé’ néh pah avéé’ pelinguh. Amin.

¹ La’ah kenat péh jalan akeu’ éh pu’un tong lamin tutup uban kereja’ ké’ ngan Tuhan, akeu’ nyohoo’ keh jian keh murip ngan barék keh pu’un jian ngan teneng pekua’ ha’ Tuhan ngan keh hun Néh tebai keh tavin Iah sahau rai. ² Jian keh diva’ kenin ngan dawai kenin, ngan kebit kenin. Jian keh kebit kenin pika kelunan lem kekat pengelemoo’ réh, ³ Ngan mihau mu’un-mu’un dokoo’ keh ngelayau pekua’ kenin dalem Sahéé’ neu’ keh murip lem pengepawah Néh. ⁴ Uban usah Kristus jah awah, uleu’ béé péh seleket usah Néh inah, jah awah Sahéé’, barei’ jah awah pengelan lu’, inah éh, uleu’ ngelan omok tai pemung ngan Allah ngan paléu jian, pekua’ tenebai Allah ngan keh. ⁵ La’ah jah awah Tuhan, jah awah pengelan éh jalan lu’ alaa’ urip Néh, jah awah pengebatis, ⁶ ngan jah awah Allah éh Tamen kekat kelunan, éh pengeja’au kekat lu’ béé, éh kereja’ pakai uleu’ béé, ngan éh pu’un dalem kekat lu’ béé. ⁷ Siget-siget usah lu’ pu’un pengena’ néh ngan lu’ dokoo’ lu’ omok maneu’ kereja’ néh kivu pekua’ pengena’ Kristus. ⁸ Barei’ ha’ lem surat Allah pu’un bara’ ka’, Tovoo’ Iah mukat tai retek éh matek bau, Iah mihin kekat kelunan éh senopéé’ Néh, ngan Iah mena’ kuraa’-kuraa’ pengena’ ngan kelunan. ⁹ Bang iteu’ sin tong ha’ Néh bara’ Iah mukat kebau bu’un-bu’un Iah tuhun tai ra’ mu’un avéé’ tong jalan patai. ¹⁰ La’ah Iah éh lepah tuhun, Iah ke’ éh lepah mukat pelapah bau kepéh jin langit, dokoo’ Iah pengeja’au kekat ineu’-ineu’ tong tana’ ngan tong langit péh. ¹¹ Pu’un Iah mena’ kuraa’ pengena’ ngan kelunan ke’ réh omok nolong sidang, Iah ngevéléé’ jelua’ réh ke’ réh omok lawah Néh, jelua’ kepéh ke’ réh nabi, jelua’ kepéh ke’ réh perengah Rengah Jian tong Yésus, jelua’ kepéh ke’ réh gembala mihau sidang, ngan jelua’ kepéh ke’ réh guru nebaraa’ tong sidang. ¹² Iah maneu’ kenat dokoo’ nolong kekat kelunan éh anah Allah maneu’ kereja’ Néh dokoo’ sukup avéé’ usah Kristus pu’un gahang, inah éh sidang nah. ¹³ Inah jalan uleu’ béé jah awah lem pengelan ngan jam tong Anak Allah, avéé’ uleu’ béé pu’un sukup kenin jam seruh, inah éh avéé’ uleu’ béé sukup kenin dalem kekat pengejian Kristus. ¹⁴ Hun lu’ pu’un kenat bé’ lu’ barei’ anak éh bé’ jam seruh, bé’ lu’ duah kenin keteu’-ketai barei’ lipak, ngan bé’ lu’ palit neu’ kekat kepu, inah éh ha’ tebaraa’ éh benara’ kelunan éh ngelavo’ irah éh jah ke’ néh petawang réh neu’ aken kenin néh éh kenyo. ¹⁵ Bang jian keh bara’ tong kekat éh teneng, neu’ kenin keh penoo’ ngan penika Tuhan jian uleu’ pepit kepéh dokoo’ lu’ sukup mu’un dalem kekat ineu’-ineu’ lem Kristus éh ulun lem sidang. ¹⁶ Jin Iah kekat éh tong usah petok pemung, ngan pu’un gahang ngan reken neu’ siget-siget bukun tulang néh, dokoo’ hun siget-siget arong tong usah inah maneu’ éh tekep neu’ néh, ketem lo’ong usah inah pu’un éh pepit ja’au ngan tai gahang naneu’ penika néh. ¹⁷ Dalem ngaran Tuhan inah éh sohoo’ ké’ ngan keh. Mai la’ah keh murip barei’ kelunan éh bé’ ngelan tong Tuhan, ¹⁸ Kekat penyeruh ngan penganeu’ réh barei’ merem awah. Bé’ irah nesen ineu’-ineu’ tong urip uleu’ éh nena’ Allah ngan lu’, uban kenin réh pu’un palui ngan mahéng. ¹⁹ La’ah bé’ réh jam menyaa’, irah mihin usah réh maneu’ kekat éh sa’at, ngan maneu’ kuraa’-kuraa’ adet éh bé’ tekep, keloo’ réh maneu’ kenat. ²⁰ Bang bé’ tekep keh maneu’ kenat la’ah, uban keh lepah pekalai tong Kristus. ²¹ Pu’un keh lepah menéng rengah Néh tong pengeteneng éh pu’un dalem Yésus, ngan pu’un keh lepah ngelan ha’ tebaraa’ nah. ²² Uban néh kenat jian keh piso jin gaya’ pengurip keh éh sahau, tovoo’ kelunan bé’ jak ngelan tong Tuhan, uban kekat gaya’ pengurip keh inah ngelavo’ keh awah. ²³ Tekep kenin ngan penyeruh keh pu’un maréng kepéh. ²⁴ Jian keh murip barei’ kelunan éh pu’un urip maréng éh pekua’ urip Allah, ngan pepoléng keh pu’un urip maréng inah neu’ kekat barék keh pu’un teneng ngan ni’ai. ²⁵ Uban néh kenat mai la’ah keh pané kenyo, jian siget-siget usah pané mu’un ngan padéé’ néh, uban uleu’ béé pu’un pepadéé’ dalem Kristus. ²⁶ Hun keh merek, mai kejeraa’ kemerek keh inah mihin keh maneu’ penyala’, ngan mai keh merek pah avéé’ dau tahup. ²⁷ Mai keh maneu’ giwang ngan Sitan. ²⁸ Kelunan éh pu’un nekau lepah rai, mai éh nekau kepéh, bang jian éh kereja’ dokoo’ néh omok tagong usah néh ngan pu’un palaa’ kepéh ke’ Néh nolong kelunan éh kari mu’un. ²⁹ Mai keh sa’at ha’ ané, bang jian keh pané tong kekat éh omok ngegahang ngan ngereken kenin kelunan, dokoo’ keh omok nolong irah éh menéng ha’ keh inah. ³⁰ Mai keh petusah Sahéé’ Allah éh Sahéé’ Ni’ai, uban Sahéé’ inah, Iah éh telana’ ka’ah anah Allah, uban pu’un jah dau vam, Tuhan juk ngelepu lu’ jin usah lu’ éh sa’at iteu’ kepéh. ³¹ Jian keh bet kekat ha’ éh sa’at éh omok punyat kenin kelunan ke’ néh merek. Mai keh paneu’ ngan mai keh pané ngan luvaa’. Mai keh leko kelunan ngan ngesa’at ngaran réh. ³² Bang jian keh dawai kenin, nolong petolong, pika pepika, pekua’ Allah dalem Kristus pu’un pika ngan mega’ penyala’ lu’.

¹ La’ah uban ka’ah anak Allah éh penika Néh, jian kekat urip keh pu’un jian barei’ Iah péh. ² Dalem kekat urip keh jian keh maneu’ éh ngan pepika, pekua’ Kristus pika uleu’ ngan mena’ urip Néh ngeliwah lu’. Iah mena’ usah Néh penatai réh, ke’ Néh ngeliwah lu’, inah jalan éh ngepayoo’ kenin Allah, barei’ ka’an éh penatai irah sioo’ sahau, ke’ réh mena’ éh ngan Tuhan rai. ³ Bang uban ka’ah kelunan éh anah Allah, bé’ tekep keh tosok tong nuyang ngan barék éh segit, ngan kelih tong livah, magat juk alaa’ mekum, mateng ngaran néh péh bé’ tekep, makin péh tai maneu’ éh, adang néh bé’ omok. ⁴ Kenat péh bé’ tekep keh tosok tong ha’ éh segit éh mihin kelunan seruh ngan magat tong kekat éh sa’at éh bé’ tekep. Bang inah éh tekep, jian keh bara’ jian kenin ngan Allah. ⁵ Jian keh jam, bé’ pu’un kelunan séé’-séé’ péh éh petuyang, ngan éh maneu’ barék éh bé’ tekep, ngan kelunan éh magat juk alaa’ mekum, éh omok tai lem nihau Kristus ngan Allah, uban kelunan éh kelih tong livah juk alaa’ mekum, irah inah pekua’ barei’ kelunan éh pakai butun uban réh ngajung éh kemagat réh inah. ⁶ Mai keh kejeraa’ séé’-séé’ péh pané ngelavo’ keh, uban inah omok pesavéé’ kemerek Allah neu’ réh bé’ tigéh kivu sohoo’ Néh. ⁷ Mai keh ngebakéh réh. ⁸ Uban sahau rai ka’ah pu’un tong merem, bang hun iteu’ kepéh neu’ pengelan keh tong Tuhan, pu’un keh tong rema, jian keh murip barei’ kelunan éh pu’un tong rema. ⁹ Uban kelunan éh pu’un tong rema, pinaa’ buaa’ néh, inah éh kekat éh jian ngan teneng ngan tigéh. ¹⁰ Jian keh tutui maneu’ kekat éh ngepayoo’ kenin Tuhan. ¹¹ Mai keh ngebakéh kelunan éh maneu’ kekat éh bé’ tekep éh pu’un tong merem awah. Bang jian keh pepoléng kekat kesa’at réh tong rema. ¹² Menyaa’ lu’ tosok tong kekat penganeu’ réh éh selem-selem nah. ¹³ Uban hun lu’ pepoléng kekat penganeu’ réh inah tong rema, boh lu’ nesen éh sa’at mu’un. ¹⁴ Uban ineu’-ineu’ éh ta’an lu’ tong rema adang néh poléng mu’un. Inah néh benara’ ka’, To’ot, o ka’au’ éh pegen, ngan betéé’ jin pematai Kristus juk ngada tong ke’ ¹⁵ Uban néh kenat seruh keh jian-jian tong kekat pengurip ngan barék keh, mai keh murip barei’ kelunan éh bé’ jam seruh, bang jian keh barei’ kelunan éh jam seruh. ¹⁶ Jian keh pakai bi’en éh keto ngan keh, maneu’ kereja’ Tuhan uban tovoo’ jaka’ iteu’ pinaa’ kelunan too ke’ keto lem kesa’at réh. ¹⁷ Mai keh barei’ gaya’ kelunan éh bé’ jam seruh, bang jian keh pitah éh pengeloo’ Tuhan ngan keh. ¹⁸ Mai keh mesep baa’ éh maneu’ keh mavuk, uban jin penganeu’ keh kenat, omok éh nasa’ urip keh, bang jian keh penoo’ neu’ Sahéé’ Ni’ai. ¹⁹ Jian keh petebaraa’ ha’ jin lem Surat Masmur éh omok mihin keh mejing Tuhan, ngan nyanyi dalem Sahéé’, jian keh nyanyi mejing Tuhan lem kenin keh. ²⁰ Dalem kekat ineu’-ineu’ péh jian keh ngelayau bara’ jian kenin ngan Allah éh Tamen lu’, dalem ngaran Tuhan Yésus Kristus. ²¹ Jian keh pata ngerera’, uban keh medai tong Kristus. ²² O kekat redo éh pu’un lakei’, jian keh ngerera’ tong lakei’ keh barei’ tong Tuhan. ²³ Uban irah lakei’ pu’un penyukat bau irah redo, pekua’ Kristus pu’un penyukat bau sidang, la’ah Kristus Iah éh pepurip sidang éh usah Néh. ²⁴ Kenat péh tekep kekat redo éh pu’un lakei’ ngerera’ tong lakei’ néh dalem kekat ineu’-ineu’ péh, pekua’ barei’ sidang ngerera’ tong Kristus. ²⁵ O kekat lakei’ éh pu’un redo, jian keh pika redo keh pekua’ Kristus lepah pika sidang ngan mena’ usah Néh ngeliwah sidang. ²⁶ Iah maneu’ kenat ke’ Néh mena’ sidang Néh ngan Allah, ke’ Néh omok ngeni’ai éh neu’ ha’ tebaraa’ Néh ngan neu’ baa’ ²⁷ ke’ Néh omok mena’ sidang nah ngan Allah dalem kekat pengaren Néh ngan pengeni’ai Néh, ngan bé’ pu’un ineu’-ineu’ éh kurang ngan sa’at. ²⁸ Adang éh tekep kekat lakei’ éh pu’un redo pika redo néh pekua’ iah pika usah néh tengéé’. La’ah kelunan éh pika redo néh, iah péh pika usah néh. ²⁹ Uban bé’ pu’un séé’-séé’ éh omok leko tong usah néh tengéé’, adang iah petubo ngan mihau usah néh pekua’ barei’ éh naneu’ Kristus tong sidang Néh. ³⁰ Uban uleu’ béé usah Néh. ³¹ Barei’ ha’ lem surat Allah, ka’ éh, Kenat péh lakei’ pokoo’ tinen tamen néh ke’ néh tai pemung ngan redo néh, inah rawah jah awah kenin, ha’ Néh. ³² Pu’un jah sin éh jah lem ha’ Néh kenat, jian mu’un éh, inah Tuhan bara’ tong Kristus tong sidang Néh. ³³ Bang pu’un éh bara’ éh kepéh ngan uleu’, adang éh tekep siget lakei’ éh pu’un redo, pika redo néh pekua’ iah pika usah néh tengéé’ ngan tekep siget redo ngerera’ tong lakei’ néh.

¹ O kekat anak, jian keh kivu sohoo’ tinen tamen keh dalem Tuhan, uban kenat éh jian. ² Jian ke’ ngerera’ tong tinen tamen ko’ inah éh sohoo’ Allah éh bu’un-bu’un pemung ngan jajii’ Néh éh bara’ ka’: ³ dokoo’ ko’ omok jian ngan kebit urip tong tana’ iteu’. ⁴ O kekat tamen tinen, mai keh pekerek anak keh, bang jian keh mihau irah ngan nebaraa’ réh tong ha’ tebaraa’ Tuhan. ⁵ O kekat ripen, jian keh kivu sohoo’ pengeja’au keh tong tana’, ngan ngerera’ tong réh. Jian keh kivu sohoo’ réh ngan kenin keh mu’un, barei’ keh pu’un kivu sohoo’ Kristus. ⁶ Jian keh ngelayau maneu’ kenat, bé’ makat hun néh ta’an réh awah dokoo’ ngepayoo’ kenin réh, bang ngan kekat kenin keh jian keh maneu’ pengeloo’ Tuhan barei’ kelunan éh ripen Kristus. ⁷ Jian keh maneu’ kereja’ keh ngan jian kenin, barei’ keh pu’un maneu’ éh ngan Tuhan, ngan bé’ makat neu’ sohoo’ kelunan awah. ⁸ Jian keh nesen, Tuhan mena’ oléé’ kereja’ éh jian éh naneu’ siget-siget usah, kenat péh tong kelunan ripen, kenat péh tong irah éh bé’ ripen. ⁹ O kekat pengeja’au, barei’ inah péh jian keh maneu’ kenat ngan irah éh ripen keh, mai keh pané ngan ngedai réh. Jian keh nesen, ka’ah péh ngan irah éh ripen keh péh, ka’ah béé anah Allah éh pu’un tong seruga, ngan bé’ Tuhan netah kenin tong kekat kelunan. ¹⁰ Inah éh pengega’ ha’ ké’, jian ka’ah gahang dalem Tuhan, neu’ penyukat Néh éh ja’au mu’un. ¹¹ Jian keh pakai kekat lajam ngan pakai jin Allah, dokoo’ keh omok nekedéng ngan pu’un terokon ngelawan kekat aken kenin Sitan. ¹² Uban bé’ uleu’ ngelawan kelunan, bang uleu’ ngelawan kekat balei’ sa’at ngan ungap éh pu’un tong sawang, ngan kekat kerenget balei’, ngan kekat kesa’at éh mihin kelunan tong merem. ¹³ Uban néh kenat jian keh pakai kekat lajam ngan pakai jin Allah, Hun dau éh sa’at nah pu’un, inah éh dau Sitan ngelawan keh mu’un, boh keh omok nekedéng petem nerokon nyakat éh, ngan la’o keh pesakat nah péh, pu’un keto keh nekedéng petem nerokon. ¹⁴ Uban néh kenat jian keh petenup ngan ngejeret é’éng keh palaa’ ha’ tebaraa’ éh teneng, éh bara’ tong Allah ngan pakai kerayung daven, inah éh tigéh kenin, ¹⁵ ngan pakai kasut keh, inah éh Rengah Jian éh mihin lu’ tunuk ngan Tuhan. ¹⁶ Jian keh ngelayau ngamit kelevit, inah éh pengelan keh tong Tuhan, inah éh jalan keh omok memata’ luten jin belat éh tuai jin iah éh sa’at. ¹⁷ Jian keh alaa’ tupi daven tong ulun keh, inah éh kekat urip Tuhan. La’ah ha’ tebaraa’ Tuhan inah éh po’é éh nena’ Sahéé’ Ni’ai ngan keh. ¹⁸ Pakai kekat inah béé ngan sebayang menyat Tuhan nolong keh. Ngelayau sebayang kivu pengeloo’ Sahéé’. Jian keh mavaa’ mu’un, mai keh putui pengelan bang jian keh ngelayau sebayang tong kekat kelunan éh anah Allah. ¹⁹ Kenat péh jian keh sebayang tong akeu’, menyat Tuhan mena’ ha’ tebaraa’ Néh ngan ké’ dokoo’ ké’ omok makang kenin bara’ tong Rengah Jian éh bé’ jak kejam kelunan sahau rai. ²⁰ Uban akeu’ éh kevéléé’ Tuhan dokoo’ ké’ lawah Néh tong Rengah Jian, bang hun iteu’ akeu’ pu’un tong lamin tutup. Bang jian keh sebayang dokoo’ ké’ omok bara’ tong Rengah Jian inah ngan makang kenin, pekua’ éh tekep ke’ ké’ bara’ éh. ²¹ La’ah Tikhikus éh padéé’ lu’ éh penika lu’, éh tigéh dalem kereja’ néh ngan Tuhan, iah omok bara’ kekat rengah ké’ ngan keh da’, dokoo’ keh omok jam kineu’ pengokoo’ ké’ siteu’. ²² Inah akeu’ nyohoo’ iah tai tavin keh, dokoo’ néh omok bara’ rengah mé’ ngan keh ngan ngegahang kenin keh. ²³ La’ah jian Allah éh Tamen lu’, ngan Tuhan Yésus Kristus, mena’ pengepawah Néh ngan penika Néh ngan kekat padéé’ mé’ éh ngelan tong Tuhan. ²⁴ Jian penika Allah pu’un pemung ngan kekat kelunan éh pika Tuhan Yésus Kristus neu’ penika Néh éh bé’ omok béé.