KOLOSÉ
11 Akeu’ Paulus lem pengeloo’ Allah éh lawah Kristus Yésus, ngan padéé’ lu’ Timotius amo éh maneu’ surat iteu’ 2 ngan kekat kelunan éh anah Tuhan éh pu’un tong leboo’ Kolosé, inah éh ngan kekat padéé’ mé’ éh tigéh éh ngelan tong Kristus. Jian Allah éh Tamen lu’ mena’ penika Néh ngan pengepawah Néh ngan keh. 3 La’ah hun mé’ sebayang tong ka’ah ngelayau mé’ bara’ jian kenin ngan Allah éh Tamen lu’ Tuhan Yésus Kristus. 4 Uban pu’un mé’ menéng rengah tong pengelan keh tong Kristus Yésus ngan tong penika keh ngan kekat kelunan éh anah Tuhan. 5 La’ah hun keh menéng tong tebaraa’ éh teneng, Rengah Jian éh benara’ mé’ ngan keh rai, pu’un keh menéng tong jalan Tuhan juk mena’ urip éh pelinguh ngan keh. La’ah pengelan keh tong Tuhan ngan penika keh, pu’un éh kenat uban keh ngelan Tuhan juk mena’ urip pelinguh ngan keh éh petenup Néh ngan keh tong seruga. 6 La’ah Rengah Jian inah pu’un éh mihin kuraa’-kuraa’ kelunan jian kenin ngan pu’un éh avéé’ tong kuraa’-kuraa’ kelunan pah tipo tana’, barei’ éh pu’un belah ka’ah jin dau bu’un keh menéng tong penika Allah ngan nesen éh lem kenin keh kepéh. 7 Pu’un keh menéng Rengah Jian inah jin bakéh mé’ Epapras. Iah jah bakéh mé’ éh pekua’ ketigéh améé’ kereja’ ngan Kristus. 8 Pu’un iah bara’ ngan améé’ tong penika keh éh neu’ Sahéé’. 9 Uban néh kenat améé’ ngelayau sebayang tong ka’ah. Pu’un mé’ sebayang kenat jin bu’un mé’ menéng rengah keh. Améé’ menyat Tuhan nolong keh dokoo’ keh omok jam mu’un tong pengeloo’ Néh ngan jam seruh ngan nesen mu’un uban Sahéé’ Tuhan pekelenaa’ pengeloo’ Néh ngan keh. 10 Boh keh omok murip barei’ Tuhan keloo’ keh murip, ngan ngelayau ngepayoo’ kenin Néh. Pinaa’ buaa’ keh kepéh éh neu’ kuraa’-kuraa’ kereja’ keh éh jian, ngan pu’un keh pepit dalem pengejam keh tong Allah. 11 Jian ka’ah gahang neu’ kekat pengegahang Néh éh jin penyukat Néh éh ja’au mu’un, dokoo’ keh omok ngeretep ngan kebit kenin tong ineu’-ineu’ éh teneng tong ka’ah. 12 La’ah jian uleu’ bara’ jian kenin ngan murung kenin ngan Tamen lu’, uban pu’un Iah peteneng kenin lu’, dokoo’ lu’ omok alaa’ kekat pengejian éh petenup Néh ngan kekat kelunan éh anah Néh tong retek éh rema. 13 Uban pu’un Iah ngelepu lu’ jin kekat penyukat éh tong merem, ngan pepiso lu’ tai lem nihau Anak éh kemurung Néh, 14 éh ngelepu lu’ jin kamit Sitan ngan éh mega’ penyala’ lu’. 15 Kristus Iah pekua’ ngan Allah éh bé’ omok ta’an kelunan palaa’ maten usah néh. Kristus nah Anak Allah éh jah awah éh kemurung Néh, kepéh Iah pelapah jian jin kekat éh pu’un senuai Néh. 16 Uban dalem Iah Allah suai kekat ineu’-ineu’ éh tong langit ngan éh tong tana’, éh poléng ngan éh bé’ poléng, kenat péh kekat meliket ngan ineu’-ineu’ kepéh éh pu’un penyukat. La’ah Allah suai kekat tana’ ngan langit neu’ Anak Néh, dokoo’ kekat penyuai Néh inah ngajung Kristus. 17 La’ah Kristus Anak Néh inah pu’un éh tenéh hun kekat ineu’-ineu’ bé’ jak pu’un, ngan neu’ penyukat Néh kekat ineu’-ineu’ pu’un petem reken. 18 La’ah Kristus éh Anak Néh pengeja’au usah, inah éh sidang, Iah éh pungun urip sidang Néh. Kenat kepéh Iah éh tenah netéé’ Allah jin patai Néh dokoo’ Iah omok pu’un penyukat bau ineu’-ineu’ péh. 19 Uban lem pengeloo’ Allah, Anak Néh nah pu’un pekua’ mu’un ngan Allah éh sukup lem kekat pengejian ngan pengemaren Néh. 20 Kenat péh neu’ Anak Néh Allah maneu’ jah pemekat kenin dokoo’ Néh mihin kekat-kekat penyuai Néh moléé’ tavin Tuhan ngan petunuk réh neu’ dahaa’ Anak Néh éh matai tong kayeu’ salib. Kenat péh jalan Néh mihin kekat éh tong tana’ ngan éh tong langit péh moléé’ tavin Iah kepéh. 21 La’ah hun sahau rai ka’ah juu’ jin Allah, la’ah inah éh maneu’ keh ayau Néh neu’ kekat penganeu’ ngan penyeruh keh éh sa’at. 22 Bang hun iteu’ neu’ Anak Néh matai, Tuhan pu’un maneu’ keh bakéh Néh kepéh, dokoo’ Néh mihin keh tai tong jumen Néh mu’un, ngan ni’ai ngan teneng kenin, bé’ pu’un sa’at ineu’-ineu’ péh. 23 Bang jian keh tigéh ngan reken mu’un lem pengelan keh, mai keh kejeraa’ ineu’-ineu’ ngusii’ ngan mega’ keh jin pengelan keh tong Rengah Jian éh lepah nenéng keh. La’ah uban Rengah Jian iteu’ akeu’ Paulus pu’un maneu’ kereja’ ngan Tuhan, ngan Rengah Jian iteu’ benara’ kelunan ngan kekat irah pah tipo tana’. 24 Hun iteu’ murung akeu’ dalem kekat pengeketa ké’, uban kereja’ ké’ ngan keh, uban ké’ jam pengeketa ké’ inah, inah maneu’ akeu’ omok pemung ngan Kristus lem pengeketa Néh, uban sidang Néh. 25 La’ah akeu’ éh kevéléé’ Allah dokoo’ ké’ nolong sidang Néh Iah nyohoo’ ku’ maneu’ kereja’ iteu’ dokoo’ nolong ka’ah. Kereja’ ké’ iteu’, inah éh dokoo’ ké’ bara’ rengah Néh. 26 Uban jin sahau nah pu’un jah jalan éh juk neu’ Allah bang pelim éh tong kelunan sahau nah. Bang hun iteu’ kepéh Tuhan pepoléng éh ngan irah éh anah Nah kepéh. 27 La’ah jian mu’un éh kivu pengeloo’ Néh pu’un Éh petenup éh ngan kekat arong kelunan, bé’ makat ngan pohoo’ Yahudi awah. Éh pelim jin irah sahau, inah éh Kristus pu’un dalem ka’ah ngan hun Néh pu’un dalem keh kenat adang kelunan ngelan keh pu’un pemung ngan Allah lem kekat pengaren Néh. 28 Uban néh kenat inah éh mihin améé’ bara’ Kristus ngan kekat kelunan. Améé’ nebaraa’ ngan petena’ réh béé ngan kekat pengejam kenin mé’, dokoo’ mé’ omok mihin siget-siget usah réh tong jumen Tuhan barei’ kelunan éh sukup mu’un kenin dalem Kristus. 29 Uban néh kenat inah akeu’ kereja’ muruh ngan kekat pengegahang Kristus éh pu’un dalem akeu’.
21 La’ah muruh mu’un ku’ kereja’ nolong ka’ah, kenat péh dokoo’ ké’ nolong irah tong Laodikia ngan kekat irah éh jah éh bé’ jak jam akeu’ péh. 2 Pu’un ku’ kereja’ kenat dokoo’ keh omok gahang kenin ngan pekua’ kenin jah awah neu’ penika keh ngan Allah. La’ah dokoo’ keh omok jam mu’un tong Kristus ngan kekat kenin ngan pengejam keh, ngan jam tong pengeloo’ kenin Allah éh pelim sahau rai bang hun iteu’ pu’un éh pepoléng éh kepéh, inah éh Kristus. 3 Uban kekat pengejam ngan penesen éh ja’au mu’un, pu’un éh lem Kristus. 4 Akeu’ bara’ kenat dai séé’-séé’ péh petawang keh neu’ néh pané menat-menat kenin keh. 5 Uban na’ péh usah ké’ bé’ pu’un ngan keh, bang dalem kenin ké’ akeu’ pu’un ngan keh ngan murung kenin ké’ hun ké’ jam keh petem pekua’ kenin lem pengelan keh tong Kristus. 6 La’ah uban ka’ah pu’un alaa’ Kristus Yésus Tuhan keh, jian keh murip ngan jian barék pemung ngan Néh. 7 Jian keh pu’un reken mu’un dalem Iah barei’ lakat éh masek dilem mu’un lem tana’. Jian keh mejek lihei’ keh tong Kristus, dokoo’ keh pelapah gahang kepéh ngan reken mu’un dalem pengelan keh, barei’ ha’ réh ngan keh rai. Jian keh murung kenin ngan ngelayau jam seruh tong kekat pengena’ ngan pengasi Tuhan ngan keh, ngan bara’ jian kenin ngan Néh kepéh. 8 Mavaa’ keh jian-jian dai kelunan mejeu keh neu’ kuraa’-kuraa’ arong ha’ tebaraa’ éh sala’, éh kenyo ngan ngelavo’ keh awah. Tebaraa’ inah bé’ éh jin Kristus bang jin kenin kelunan awah kenat péh tebaraa’ inah jin pengejam utek néh awah, bé’ éh jin penyukat Tuhan. 9 Uban kekat pengaren ngan pengeni’ai Allah pu’un éh lem Kristus, inah éh, lem urip Néh paléu kelunan, 10 ngan ka’ah pu’un alaa’ urip mu’un pemung ngan Néh. Iah éh pengeja’au bau kekat meliket ngan ineu’-ineu’ éh pu’un penyukat. 11 La’ah neu’ keh ngelan tong Kristus, ka’ah lepah pesunat lem kenin keh, uban Kristus éh lepah mega’ kekat kesa’at keh ngan peti’ai kenin keh jin kekat kesa’at ngan penyala’ éh pu’un dalem keh. 12 Uban hun lu’ pu’un batis inah lu’ seleket tenanem pemung ngan Kristus, bang hun lu’ musit jin lem baa’ kepéh, inah seleket lu’ pu’un betéé’ murip ngan Kristus neu’ pengelan lu’ tong penyukat Allah éh pebetéé’ Kristus jin patai Néh. 13 La’ah hun lepah rai ka’ah matai naneu’ kekat penyala’ keh, kenat péh ka’ah éh tengéé’ pohoo’ jin irah Yahudi bé’ keh pu’un lem jajii’ éh pejajii’ Tuhan ngan irah Yahudi. Bang hun iteu’ kepéh Allah pu’un pepurip keh pemung ngan Kristus, nega’ Néh kekat penyala’ lu’. 14 La’ah pu’un Iah mosoo’ surat utang éh bara’ tong kekat penyala’ ngan kesa’at lu’. Nalaa’ Néh surat utang penyala’ nah ngan Iah memata’ éh neu’ Néh senalib tong kayeu’ salib. 15 La’ah tong kayeu’ salib, Kristus lepah nyopéé’ kekat penyukat ngan pengegahang éh jin tana’ iteu’, Iah mihin réh lakau tong ta’an kekat kelunan barei’ mihin irah éh lepah senopéé’ éh nalaa’ réh ripen rai. Iah mihin réh lakau kenat lem pengemenang Néh bau réh. 16 Uban néh kenat mai keh kejeraa’ kelunan nyohoo’ keh kivu sohoo’ tong penguman éh omok kinan keh ngan éh bé’ omok kinan keh, ngan tong baa’ éh omok nesep keh. Kenat péh mai keh kejeraa’ réh nyohoo’ keh mihau kuraa’-kuraa’ dau éh benara’ réh dau ja’au lem adet sebayang. Mai keh kejeraa’ réh nyohoo’ keh ngajung dau usit laséh maréng ngan kivu sohoo’ réh tong kuraa’-kuraa’ adet réh tong Dau Posot. 17 Kekat éh penganeu’ réh inah nojoo’ tong éh juk pu’un kepéh, bé’ éh usah Kristus mu’un, Hun iteu’ kepéh bé’ éh penojoo’ kenat awah uban pu’un Kristus tuai tenéh. 18 Mai keh kejeraa’ usah keh kelavo’ kelunan éh ngelayoo’ diva’ kenin ngan éh seva’ meliket. Uban kelunan éh kenat bau kenin réh uban penyeruh réh jin tana’ iteu’ awah, Kenat péh irah ngajung usah réh uban réh na’at Kuraa’-kuraa’ éh ta’an réh. 19 Iah bé’ la’ah ngepelum tong Kristus éh ulun sidang, inah éh Usah Néh. Uban lem Kristus Ketem lo’ong Usah pu’un nihau Néh ngan pu’un petok pemung neu’ bukun tulang ngan keluhat, ngan pepit Kepéh barei’ éh pengeloo’ Allah. 20 La’ah ka’ah lepah matai pemung ngan Kristus, ngan pu’un keh pelepu jin kamit kekat sahéé’ éh pu’un tong tana’ iteu’. Hun néh kenat uban ineu’ keh murip barei’ hun keh pu’un lem kamit néh keto. Uban ineu’ keh to keto kivu sohoo’ néh éh bara’, 21 mai alaa’ inah, ngan mai kuman inah, ngan mai sapét ngejeming inah. Uban ineu’ keh kivu sohoo’ réh kenat. 22 Kekat inah bé’ éh pu’un gunah, ha’ tebaraa’ kelunan awah éh, 23 Oo’ mu’un uleu’ seruh irah pu’un pengejam mu’un uban réh barei’ kelunan éh diva’ kenin éh jam mihau usah néh, bang na’ péh réh maneu’ kenat, bé’ réh pu’un penyukat omok mihau kenin réh jin kekat kemagat éh sa’at.
31 Ka’ah pu’un betéé’ murip pemung ngan Kristus, jian keh pitah kekat éh pu’un tong seruga éh jalan Kristus menyun saa’ na’au’ Allah. 2 Jian kekat éh pengeloo’ kenin keh pu’un tong seruga, mai keh ja’au kenin tong kekat éh tong tana’. 3 Uban ka’ah lepah matai ngan urip keh pu’un éh pelim pemung ngan Kristus dalem Allah. 4 Urip keh mu’un inah éh Kristus, ngan hun Iah pu’un poléng kepéh, ka’ah péh pu’un poléng pemung ngan Néh ngan tai pemung ngan Néh lem kekat pengaren Néh. 5 Uban néh kenat jian keh mematai kekat pengagat éh sa’at éh jin tana’ iteu’ éh pu’un lem kenin keh, barei’ petuyang, kekat barék éh bé’ tekep keh maneu’, magat tong kelunan éh jah, merek, ngan magat juk alaa’ mekum. Kelunan éh magat kenat inah éh pekua’ kelunan éh pakai butun, uban kemagat néh, inah éh pengeja’au kenin néh. 6 La’ah rek Allah pu’un tong kekat kelunan éh maneu’ kesa’at inah ngan éh ngelapah tong sohoo’ Tuhan. 7 La’ah hun lepah rai, tovoo’ kekat inah pu’un pengeja’au lem kenin keh, ka’ah péh maneu’ kekat inah. 8 Bang hun iteu’ jian keh bet kekat barék éh kenat, barei’ merek, ngan mi’ah, ngan leko kelunan ngan ngesa’at ngaran réh. Mai lah keh pané maneu’ kelunan ngan tosok tong éh bé’ tekep. 9 Mai keh pané kenyo la’ah, uban pu’un keh lepah bet urip keh sahau pemung ngan kekat barék ngan penganeu’ keh éh sa’at, 10 ngan pu’un keh memakai urip éh maréng. Hun iteu’ ka’ah pu’un maréng senuai Allah, Iah ngelayau ngepaléu keh maréng dokoo’ keh omok murip barei’ Iah. Inah jalan keh omok jam Allah mu’un. 11 Neu’ Tuhan ngelepu keh kenat bé’ pu’un éh petengéé belah kelunan éh tengéé’ pohoo’ ngan kelunan Yahudi, kelunan pesunat ngan kelunan éh bé’ pesunat kelunan éh jam tong adet irah Yunani ngan kelunan éh murip tong tana’ awah, ripen ngan kelunan pelepu. Bang Kristus Iah awah éh pu’un dalem kekat néh béé ngan Iah pu’un pemung ngan kekat néh béé. 12 La’ah ka’ah péh anah Allah, pu’un Iah pika keh ngan ngevéléé’ keh dokoo’ keh omok anah Néh mu’un. Uban kenat ka’ah tekep pika pepika, Jian tipan, diva’ kenin, dawai kenin ngan kebit kenin. 13 Hun séé’-séé’ éh pu’un tengéé’ kenin ngan bakéh néh, jian réh pata pepika kepéh. Mai mihau penyala’ néh lem kenin ko’, pekua’ Tuhan mega’ penyala’ lu’. 14 La’ah pemung ngan kekat inah jian keh pepit penika keh kepéh, uban penika nah, inah jalan omok memikah keh pemung. 15 Jian pengepawah éh nena’ Kristus nolong keh maneu’ pemekat tong ineu’-ineu’ éh tekep naneu’ keh, uban Allah lepah tebai keh dokoo’ keh murip jah awah dalem pengepawah Néh. 16 Jian kekat tebaraa’ Kristus dalem kekat kejian néh pu’un petem dalem kenin keh. Jian keh kua’ petebaraa’ ngan petesen siget-siget usah pah terah kekat pengejam keh. Jian keh nyanyi ha’ nyanyi jin surat Masmur, nyanyi mejing Tuhan, ngan nyanyi éh ni’ai. Nyanyi mejing Tuhan Allah, bara’ jian kenin keh ngan Néh. 17 Kekat ineu’-ineu’ éh naneu’ keh Kenat péh éh nané keh, jian keh maneu’ éh dalem ngaran Tuhan Yésus, ngan bara’ jian kenin ngan Allah Tamen, tong ineu’ éh naneu’ Tuhan Yésus ngan keh. 18 O kekat redo éh pu’un lakei’, jian keh ngerera’ tong lakei’ keh, uban kenat éh tekep ngan kelunan éh ngelan tong Tuhan. 19 O kekat lakei’ éh pu’un redo, jian keh pika redo keh, mai keh sa’at adet ngan réh. 20 O kekat anak, jian keh ngelayau kivu sohoo’ tinen tamen keh, uban kenat jalan éh ngepayoo’ kenin Tuhan. 21 O kekat tamen tinen, mai keh pekerek anak keh dai irah sa’at kenin ngan bé’ jam seruh. 22 O kekat kelunan sohoo’, jian keh kivu kekat sohoo’ pengeja’au keh, bé’ makat tovoo’ réh na’at keh awah, mai keh ngelayoo’ awah kereja’ tong ta’an pengeja’au keh nah, bang jian keh kereja’ mu’un uban keh ngelan tong Tuhan. 23 La’ah ineu’-ineu’ éh naneu’ keh, jian keh maneu’ éh mu’un, pekua’ barei’ keh maneu’ éh ngan Tuhan ngan bé’ makat éh ngan kelunan awah. 24 Jian keh nesen adang Tuhan mena’ oléé’ néh ngan keh kepéh, adang keh pu’un alaa’ tulat éh nodoo’ Néh ngan irah éh anah Nah. Uban Kristus Iah éh Tuhan keh mu’un, ngan ineu’-ineu’ éh neu’ keh, jian keh maneu’ éh dokoo’ ngepayoo’ kenin Néh. 25 La’ah kelunan séé’-séé’ éh maneu’ sala’, iah kepéh pu’un alaa’ oléé’ néh tong kekat kesa’at néh, uban bé’ Allah tengéé’ kenin ngan netah kenin tong kelunan, adang Iah pekua’ kenin tong kekat réh béé.
41 O kekat pengeja’au, jian keh maneu’ kekat éh jian ngan éh teneng ngan kekat irah éh lem nihau keh. Mai keh ngelepan, pengeja’au keh pu’un éh tong seruga. 2 Jian keh gahang sebayang pah avéé’ keh omok jam Allah mipa ha’ keh, ngan mavaa’ kenat péh bara’ jian kenin kepéh ngan Néh. 3 Jian keh ngelayau sebayang tong améé’, menyat Allah mukap jalan ngan améé’ ke’ mé’ omok perengah Rengah Jian Néh dokoo’ bara’ tong pengeloo’ kenin Néh lem Kristus. Uban neu’ Rengah Jian inah, kenat akeu’ pu’un tong lamin tutup hun iteu’. 4 Jian keh sebayang menyat Tuhan nolong akeu’ bara’ ha’ tebaraa’ Néh ngan lenaa’ mu’un, barei’ éh tekep naneu’ ké’. 5 Jian keh jam seruh dalem kekat penganeu’ ngan barék keh belah kelunan éh bé’ ngelan, ngan pakai kekat bi’en éh pu’un ngan jian-jian. 6 Jian kekat ha’ ané keh ngelayau pu’un jian, éh mihin kenin kelunan keloo’ menéng ha’ keh, ngan jian keh seruh mipa siget-siget ha’ réh éh neteng keh tong pengelan keh. 7 La’ah padéé’ lu’ Tikhikus éh penika lu’, éh tigéh lem kekat kereja’ néh ngan Tuhan, éh bakéh ké’ dalem kereja’ Tuhan, iah omok bara’ kekat rengah ké’ ngan keh. 8 Uban Kenat akeu’ nyohoo’ iah tai ngan keh dokoo’ néh omok ngejian kenin keh. 9 La’ah Onésimus, padéé’ lu’ éh tigéh ngan éh penika lu’, éh pemung tana’ ngan ka’ah, iah pu’un kivu éh tai. Rawah omok bara’ kekat rengah améé’ siteu’ ngan keh kepéh. 10 La’ah Aristarkhus bakéh ké’ éh pu’un tong lamin tutup pemung ngan ké’ siteu’, iah bara’ tabi’ ngan keh, kenat péh Markus, padéé’ pata Barnabas. Pu’un keh lepah alaa’ surat éh bara’ tong Markus nah, éh nyohoo’ keh alaa’ éh hun mah éh avéé’ sinah. 11 Iah péh bara’ tabi’ ngan keh. La’ah réh teleu’ inah awah éh jin pohoo’ Yahudi éh bakéh ké’ éh kereja’ pemung ngan ké’ dokoo’ mihin kelunan ngelan tong Allah ngan tai lem nihau Néh, pinaa’ kereja’ réh teleu’ nolong akeu’. 12 La’ah Epapras iah péh pemung tana’ ngan ka’ah, ngan éh sohoo’ Kristus Yésus, iah péh bara’ tabi’ ngan keh. Ngelayau iah gahang sebayang tong ka’ah dokoo’ keh omok reken kenin ngan sukup kenin ngan jam seruh ngan ngelayau kivu pengeloo’ Allah. 13 Akeu’ péh jam iah kereja’ muruh ke’ néh nolong keh, kenat péh irah tong Laodikia ngan tong Hierapolis. 14 La’ah Lukas, lakei’ éh kereja’ nawan, éh penika mé’, ngan Demas, rawah inah péh bara’ tabi’ ngan keh. 15 Jian keh bara’ tabi’ ngan kekat padéé’ mé’ éh tong Laodikia ngan tabi’ ngan Nimpa ngan tabi’ ngan sidang éh pu’un tong lamin redo inah. 16 La’ah la’o keh purung surat ké’ iteu’, jian keh purung éh kepéh tong sidang tong Laodikia, ngan jian keh purung surat éh tuai jin sidang tong Laodikia kepéh. 17 La’ah jian keh bara’ ngan Arkhipus, Jian ke’ pesukup kereja’ ko’ éh nena’ Tuhan ngan ko’. 18 La’ah akeu’ tengéé’ nyurat ha’ ké’ iteu’, Tabi’ jin Paulus. Mai keh ngelepan akeu’ pu’un kejeret réh tong lamin tutup iteu’. Jian penika Allah pu’un pemung ngan keh.