PENGANEU’ LAWAH
11 O Tiopilus, lem surat éh pekateu’ ké’ lepah rai, pu’un ku’ bara’ tong kekat penyuai ngan tong ha’ tebaraa’ éh benara’ Yésus jin bu’un kereja’ Néh, 2 pah avéé’ dau Néh nalaa’ Tuhan tai seruga. La’ah teka Néh nalaa’ Tuhan tai seruga, pu’un Éh bara’ kuraa’-kuraa’ sohoo’ neu’ penyukat Sahéé’ Ni’ai ngan kekat kelunan éh kevéléé’ Néh tenéh nah, ke’ réh tai lawah Néh. 3 Avéé’ pat poloo’ dau kelebéé’ la’o Yésus betéé’ jin patai Néh, pinaa’ koléé’ Néh pepoléng usah Néh ngan réh, ke’ réh jam Éh mu’un adang Néh pu’un murip mu’un. La’ah pu’un réh na’at usah Néh mu’un ngan pu’un Éh nebaraa’ réh tong Pengihau Allah. 4 La’ah tovoo’ Yésus pu’un pemung ngan irah lawah Néh, pu’un Éh bara’ ngan réh, ka’ ha’ Néh, Mai keh piso jin leboo’ Yérusalem, bang jian keh mena pengena’ Tamen Ké’ éh pejajii’ Néh ngan keh rai, éh lepah benara’ Ké’ ngan keh nah. 5 Uban pu’un Yohanes ngebatis kelunan lem baa’, bang ka’ah juk benatis lem Sahéé’ Ni’ai bé’ lebéé’ la’ah, ha’ Yésus ngan réh. 6 Hun irah lawah Yésus nah pu’un pemung ngan Néh, pu’un réh neteng Éh, ka’ ha’ réh, Kineu’ Tuhan, hun iteu’ éh jaka’ Ko’ juk ngelepu améé’ jin lem pengihau Rum ngan metéé’ Pohoo’ améé’ Yahudi kei? Ha’ réh. 7 La’ah Yésus mipa réh, ka’ ha’ Néh, Bé’ tiken ke’ keh juk jam éh, uban Tamen Ké’ awah éh pu’un penyukat bara’ tong jaka’ Néh. 8 Bang hun keh alaa’ Sahéé’ Ni’ai boh keh pu’un penyukat, boh keh omok bara’ Ku’ ngan réh, kenat péh tong Yérusalem, kenat péh tutuh tana’ Yudea ngan Samaria, pah avéé’ tipo tana’, ha’ Néh. 9 La’o Néh pané kenat, lem réh kepuh Éh, pu’un Tuhan alaa’ Éh tai seruga, ngan pu’un avun mekep Éh jin ta’an réh. 10 Lem réh to kepuh sinah, tioo pu’un duah usah éh pu’un pakai mebéng nekedéng déhéé’ réh. 11 Ka’ ha’ roh ngan réh, O kelunan jin Galilia, uban ineu’ keh nekedéng kepuh tong langit kenat? Yésus ri’ nalaa’ Tuhan tai seruga jin belah keh, adang Néh juk tuai kepéh pekua’ keh na’at Éh tai seruga nah, ha’ roh. 12 La’o inah irah lawah Yésus moléé’ jin tokong Saitun tai leboo’ Yérusalem nah. Tokong inah pedanii’ tong Yérusalem, kejuu’ néh, bé’ piso maten dau réh lakau belah néh. 13 Hun réh avéé’ tong Yérusalem masek réh tong lamin ngan tai tong lamin éh saa’ bau nah, sinah réh mokoo’. Ngaran kekat réh, Péterus, Yohanes, Yakub, Anderias, Pilipus, Tomas, Bartolomeus, Matius, Yakub anak Alpeus, Simon éh Selutis, Yudas anak Yakub. 14 La’ah kekat irah inah petipun dokoo’ réh petem sebayang, pemung ngan irah redo, Meriam éh tinen Yésus, ngan irah padéé’ usah Yésus. 15 Ngioo’ duah teleu’ dau la’o inah kepéh, irah éh ngelan petipun kepéh, kekat réh ngioo’ jah ato duah poloo’ usah, boh Péterus nekedéng ke’ néh pané ngan réh, ka’ ha’ néh, 16 O kekat padéé’, ha’ lem surat Allah éh benara’ Sahéé’ Ni’ai ngan Daud, adang néh tekep pu’un kenat mu’un. Inah éh, éh benara’ néh tong Yudas éh mihin kelunan tai ngamit Yésus. 17 Yudas nah pu’un éh kivu lu’ lepah rai, ngan pu’un Tuhan ngevéléé’ éh ke’ néh omok kereja’ pekua’ uleu’ iteu’, ha’ néh. 18 La’ah Yudas melih jah tulat tana’ palaa’ rigit éh nalaa’ néh tong kesa’at néh lepah nah, ngan iah ngelohoo’ usah néh tioo letaa’ betuken néh ngan musit uwit néh. 19 La’ah kekat irah tong leboo’ Yérusalem menéng rengah néh kenat, boh réh maneu’ ngaran tana’ inah lem ha’ irah ke’, Akeldama, sin néh, Tana’ Dahaa’. 20 La’ah ka’ ha’ Péterus kepéh, La’ah pu’un jah ha’ lem surat Masmur, éh bara’ ka’, Kejeraa’ lamin néh usan awah, mai jah usah mokoo’ tong néh. Ha’ Péterus kepéh, pu’un jah ha’ kepéh éh bara’ ka’, Kejeraa’ kelunan éh jah maneu’ kereja’ néh. 21 - 22 La’ah ha’ Péterus, Uban néh kenat jian jah usah ngeliwah Yudas nah ngan masek ngan uleu’ ke’ néh bara’ tong pengebetéé’ Tuhan Yésus. Tekep éh kelunan éh pu’un kivu lu’ kelebéé’ Tuhan Yésus pu’un ngan lu’ rai, inah éh, jin bu’un Yésus benatis Yohanes, pah avéé’ dau Tuhan alaa’ Éh tai seruga, ha’ Péterus nah. 23 Pelapah irah ngevéléé’ duah usah, inah éh Yusup keruwah ngaran néh Barsabas, pu’un jah ngaran néh kepéh, Yustus, lakei’ éh keruwah néh, inah éh Matias. 24 Pu’un réh sebayang, ka’ ha’ réh, O Tuhan, Ka’au’ éh jam kenin kekat kelunan, uban néh kenat jian Ke’ bara’ séé’ éh kevéléé’ Ko’ jin belah rawah iteu’, 25 ke’ néh omok ngeliwah Yudas tong kereja’ néh, uban Yudas lepah tai tong retek éh kevéléé’ Tuhan tulat néh, ha’ sebayang réh. 26 La’ah irah nyurat ngaran roh kivu éh seneruh siget usah lem kenin néh tengéé’, dokoo’ réh ngevéléé’ jah usah jin belah roh. Matias éh kevéléé’ réh, irah alaa’ éh pemung ngan irah éh jah poloo’ jah lawah nah.
21 Avéé’ tong dau kelunan Yahudi maneu’ Dau Ja’au Pentakosta, kekat kelunan éh ngelan tong Yésus pu’un réh petipun béé tong jah jalan. 2 Tioo pu’un ha’ jin langit éh barei’ ha’ leveng kepu. La’ah lamin éh jalan réh mokoo’ nah, penoo’ éh neu’ ha’ inah. 3 Ngan pu’un éh barei’ luten ta’an réh nelujuk ngan pejeléé’ tai pesiget usah réh. 4 La’ah Sahéé’ Ni’ai penoo’ lem kenin réh, ke’ réh omok pané dalem kuraa’-kuraa’ arong ha’, pekua’ Sahéé’ nah maneu’ irah pané. 5 La’ah pu’un kelunan Yahudi éh mokoo’ tong leboo’ Yérusalem, éh kivu adet sebayang réh mu’un, éh pu’un tuai jin siget arong tana’. 6 Hun réh menéng ha’ jin langit nah, tuai réh béé pepeng. Tekejet réh menéng ha’ kelunan iri’ pané ngan réh lem ha’ irah éh jalan réh pané nah. 7 Béé kenin réh, bé’ réh jam lah, ka’ ha’ réh, Kineu’ réh jam pané ka’ hun réh kelunan jin Galilia awah? 8 Kineu’ jalan lu’ omok menéng ha’ réh pané lem ha’ uleu’ ke’ kenat? 9 Pu’un jelua’ lu’ jin tana’ Partia, jin Media, jin Elam, ngan éh jin tana’ Mesopotamia, jin Yudea, jin Kapadokia, ngan pu’un jin Pontus ngan jin Asia, 10 ngan jin Prigia, jin Pampilia, jin Mesir, jin Libia éh danii’ jin tana’ Kirene, ngan pu’un jelua’ lu’ jin Rum. 11 La’ah pu’un kelunan Yahudi, pu’un irah éh jah ngabit adet réh, ngan pu’un jelua’ jin Pulau Kreta ngan jin tana’ Arab, na’ péh éh kenat, kekat uleu’ béé menéng ha’ réh nebaraa’ lu’ tong kekat penyuai Allah éh ja’au, lem ha’ uleu’ ke’, ha’ réh. 12 Béé kenin réh, bé’ réh jam lah, la’ah pepané réh, ka’ ha’ réh, Kineu’ énéh kenat, ha’ réh. 13 Bang kelunan éh jah pesanyaa irah éh ngelan nah, ka’ ha’ réh, Mavuk irah iteu’ tu de’, ha’ réh. 14 La’ah nekedéng Péterus pemung ngan jah poloo’ jah lawah inah, ke’ néh pané ngan irah pinaa’ nah, ka’ ha’ néh, O padéé’ ké’ Yahudi ngan kekat ka’ah béé éh mokoo’ tong leboo’ Yérusalem, jian keh menéng ha’ ké’ da’ ngan mihau éh lem kenin keh. 15 Bé’ kelunan inah mavuk barei’ kunah ka’ah inah, uban hun iteu’ dau paraa’ pelakei’ awah éh. 16 Bang iteu’ ke’ éh lepah benara’ nabi Yoel, kelunan éh bara’ ha’ Tuhan ngan kelunan sahau, ka’ ha’ néh, 17 La’ah ha’ Allah, Sioo’ tai pengega’ dau vam, inah éh juk neu’ Ké’, Akeu’ juk mena’ Sahéé’ Ké’ tong kekat kelunan. La’ah anak keh éh lakei’ ngan anak keh éh redo péh omok bara’ kenin Tuhan Allah ngan kelunan. La’ah irah lakei’ lemanai omok na’at kekat éh pepoléng Tuhan tong ta’an réh. Irah lakei’ éh mukun omok nyupin ngan kuraa’-kuraa’ arong nyupin. 18 Tovoo’ inah péh Akeu’ juk mena’ Sahéé’ Ké’ ngan kekat anak Ké’, irah éh lakei’ ngan irah éh redo péh, Akeu’ juk mena’ Sahéé’ ké’ hun inah, ke’ réh omok bara’ kenin Tuhan Allah ngan kelunan. 19 La’ah Akeu’ juk maneu’ telana’ ja’au tong langit, kenat péh pinaa’ penganeu’ Ké’ tong tana’ éh omok ngebéé kenin kelunan. Inah éh pu’un dahaa’ ngan luten, ngan sap nebului neu’ réh pekayau. 20 La’ah maten dau juk paléu merem mu’un. Laséh péh paléu bala barei’ dahaa’. Kekat inah pu’un tenah bé’ jak dau Tuhan tuai ke’ Néh ngukum kelunan, éh dau éh ja’au ngan éh jian mu’un. 21 Tovoo’ inah péh, séé’-séé’ éh tebai tong ngaran Tuhan, omok éh alaa’ urip dalem Tuhan. 22 Ka’ ha’ Péterus kepéh, O kelunan Yahudi, menéng keh, Yésus éh jin Nasaret nah, pinaa’ penganeu’ Néh éh ja’au tong tana’ iteu’, neu’ kekat penganeu’ Néh kenat inah jalan Allah pekelenaa’ Iah pu’un tuai jin Allah. Uban neu’ penyukat Allah, pinaa’ arong penganeu’ Yésus éh ngebéé kenin kelunan ngan éh pekelenaa’ penyukat Néh. Ka’ah péh jam éh pu’un kenat, uban Néh maneu’ éh kenat tong ta’an uleu’ siteu’ rai. 23 La’ah dalem pengeloo’ ngan pengejam Allah tengéé’ Iah kejeraa’ kelunan mena’ Yésus ngan keh, la’ah pu’un keh lepah mematai Éh hun keh kejeraa’ kelunan éh sa’at mematai Éh tong salib rai. 24 Bang pu’un Allah pebetéé’ Éh jin patai Néh, ngan pu’un Éh ngelepu Éh jin keta pematai bé’ pu’un penyukat pematai nah omok magen Éh. 25 Uban ka’ ha’ Daud bara’ tong Yésus, Akeu’ na’at Tuhan ngelayau pu’un saa’ tenah ké’, ngan pu’un Éh saa’ na’au’ ké’ ngan bé’ pu’un ineu’-ineu’ éh omok petusah ku’. 26 Uban néh kenat murung kenin ké’, ngan kekat ha’ tosok ké’ pu’un éh ngan kemurung ké’. Na’ péh akeu’ kelunan awah, akeu’ ngelan Ka’au’ mu’un. 27 Bé’ Ke’ kejeraa’ sahéé’ ké’ mokoo’ tong jalan patai. Bé’ Ke’ kejeraa’ Anak Ko’ éh ni’ai borok awah. 28 La’ah pu’un Ke’ bara’ jalan urip ngan ké’. La’ah uban Ko’ pu’un ngan ké’, murung mu’un-mu’un kenin ké’. 29 Ka’ ha’ Péterus kepéh, O kekat padéé’ ké’, jian keh nesen tong tepun lu’ Daud. Akeu’ juk pekelenaa’ éh ngan keh, Daud rai lepah matai tenéh éh ngan tenanem réh éh, ngan tanem néh pu’un keto belah lu’ avéé’ hun iteu’. 30 La’ah Daud nah jah kelunan nabi iah jam tong jajii’ Tuhan ngan néh, uban Allah lepah pejajii’ juk maneu’ jah usah jin pohoo’ Daud nah éh omok raja’ réh barei’ Daud nah raja’ réh. 31 Uban Daud jam éh kenat, inah iah bara’ tong pengebetéé’ Kristus, hun néh bara’ ka’ ri’, Bé’ Tuhan kejeraa’ éh petem tong jalan patai, usah Néh bé’ omok borok awah, ha’ ri’. 32 La’ah Yésus nah, iah néh éh netéé’ Allah, améé’ omok bara’ éh kenat uban usah mé’ lepah na’at Éh kenat mu’un. 33 La’ah Iah pu’un netéé’ saa’ na’au’ Allah, ngan pu’un Éh alaa’ Sahéé’ Ni’ai éh pejajii’ Tamen Néh ngan Néh lepah nah, éh ta’an keh ngan éh nenéng keh hun iteu’, inah néh éh Sahéé’ Néh éh nena’ Néh ngan uleu’ kepéh. 34 Uban bé’ éh Daud nah éh tai seruga, bang inah ha’ éh benara’ néh awah, ka’ ha’ néh, Tuhan pu’un bara’ ngan Iah éh Tuhan ké’, ka’ ha’ Tuhan ngan Néh, Jian ke’ menyun saa’ na’au’ ké’ siteu’, 35 avéé’ Ké’ maneu’ kekat ayau Ko’ inah barei’ lun gem Ko’ awah. 36 Ka’ ha’ Péterus kepéh, uban néh kenat jian kekat pohoo’ Yahudi jam mu’un, Yésus nah Éh penatai keh tong salib rai, Allah metéé’ Éh maneu’ éh Tuhan ngan Kristus, ha’ néh. 37 Hun réh menéng ha’ Péterus pané kenat, besau kenin réh, tioo pané réh ngan Péterus ngan irah lawah Tuhan éh jah kepéh, ka’ ha’ réh, O kekat padéé’, kineu’ lah mé’ da’, ha’ réh. 38 Ka’ ha’ Péterus ngan réh, Jian siget-siget usah keh piso jin penyala’ keh, ngan batis dalem ngaran Yésus Kristus dokoo’ penyala’ keh omok pega’. La’ah ka’ah omok alaa’ Sahéé’ Ni’ai éh pengena’ Allah ngan lu’. 39 Uban jajii’ Tuhan pu’un éh ngan keh, kenat péh pu’un éh ngan anak keh, kenat péh ngan kuraa’ kekat kelunan éh juu’ péh, inah éh ngan kekat kelunan éh tenebai Tuhan, Tuhan Allah éh kenelan lu’, ha’ Péterus. 40 La’ah pinaa’ ha’ tebaraa’ éh jah éh benara’ Péterus ngan réh, ka’ ha’ néh, kelap keh jin ukum éh juk avéé’ tong pohoo’ kelunan éh sa’at nah, ha’ néh. 41 La’ah pinaa’ kelunan jin belah réh ngelan ha’ tebaraa’ éh benara’ néh inah, ngan pu’un éh ngebatis réh. Tong dau inah péh pepit kepéh ngioo’ teleu’ ibu’ kekat kelunan masek maréng pemung ngan irah éh lepah ngelan nah kepéh. 42 Pu’un réh mekat pekalai tong ha’ tebaraa’ éh benara’ irah lawah nah, ngan pata pekua’ kenin réh tong urip réh dalem Kristus, kenat péh irah pemung kuman ngan pekua’ kenin, ngan pekua kenin réh sebayang. 43 La’ah pinaa’ arong penganeu’ irah lawah Tuhan, éh ngebéé kenin kelunan ngan éh bara’ penyukat Tuhan. Béé kenin réh na’at éh kenat uban bé’ réh pu’un na’at éh kenat jin sahau. 44 Kekat kelunan éh ngelan nah pata pekua’ kenin réh béé, ngan ineu’-ineu’ éh pu’un ngan réh pu’un réh petulat éh belah irah ke’. 45 Irah éh pu’un tana’ ngan livah péh, pu’un réh melih éh, ngan kekat éh nalaa’ réh tong néh, pu’un réh petulat éh ngan kekat kelunan kivu pengekurang réh. 46 Siget dau irah petipun tong umaa’ Allah, kenat péh irah pemung kuman tong lamin réh tengéé’ péh, la’ah irah kuman ngan jian kenin ngan diva’ kenin, 47 ngan pu’un réh mejing Allah, kekat kelunan pata jian kenin. La’ah siget dau Tuhan pepit kelunan éh ngelan tong Iah tai pemung ngan irah inah kepéh.
31 Jah dau Péterus ngan Yohanes tai tong umaa’ Allah tovoo’ jaka’ sebayang, inah éh vevilang dau kuba’. 2 Tong umaa’ Allah inah pu’un jah tapé ngaran néh, Tapé éh Jian. La’ah déhéé’ tapé inah pu’un jah lakei’ éh paket jin lohoo’ néh. Siget dau pu’un irah éh jah mihin éh tuai ke’ réh pei’ éh sinah, ke’ néh menyat tolong jin kelunan éh masek tong umaa’ Allah nah. 3 Hun néh na’at Péterus ngan Yohanes juk masek tong umaa’ Allah nah, pu’un éh menyat pika jin roh. 4 Rawah kepuh éh, boh Péterus pané ngan néh, ka’ ha’ néh, Jian ke’ na’at amo, ha’ néh. 5 Pelapah éh kepuh roh kepéh, kelem néh, Barang pu’un péh éh juk na’ koh ngan ké’ da’, kelem néh. 6 Boh Péterus bara’ ngan néh kepéh, ka’ ha’ néh, Bé’ pu’un livah ineu’-ineu’ ngan ké’, bang éh pu’un, inah awah éh na’ ké’, inah éh, dalem ngaran Yésus Kristus kelunan jin Nasaret, akeu’ nyohoo’ ke’ lakau, ha’ néh. 7 Pelapah Péterus ngamit ojoo’ néh saa’ na’au’ ke’ néh metéé’ éh. Pelapah geto’ gem néh pu’un gahang, 8 tioo betéé’ éh nekedéng ngan lakau. Pelapah éh kivu roh tai tong umaa’ Allah nah. Murung kenin néh lakau neporok-neporok éh mejing Allah. 9 La’ah kekat kelunan na’at éh lakau ngan mejing Allah nah. 10 Hun réh jam éh lakei’ éh mokoo’ déhéé’ Tapé éh Jian tong umaa’ Allah, éh menyat pika jin irah lepah nah, béé kenin réh uban néh lepah jian nah. 11 Pu’un lakei’ inah mengen Péterus ngan Yohanes, béé kenin irah pinaa’ nah, nekedeu’ réh tai umaa’ Allah tavin réh teleu’ retek luvang lamin éh ngaran néh, Lamin Salomo. 12 Hun Péterus na’at irah pinaa’ nah, pu’un éh pané ngan réh, ka’ ha’ néh, O kelunan Yahudi, uban ineu’ keh béé kenin? Uban ineu’ keh kepuh amo kenat? Pu’un keh seruh éh neu’ kerenget amo ngan neu’ kejian amo kelunan inah ma’o ngan omok lakau nah kei? Sala’ kenin keh seruh éh kenat. 13 Allah éh kenelan tepun lu’ Abraham, Ishak ngan Yakub, ngan éh kenelan kekat tepun uleu’ éh jah kepéh, Allah inah éh ngajung Anak Néh Yésus. Pu’un keh lepah mena’ Éh ngan irah éh pengeja’au keh, ngan hun Pilatus juk ngelepu Éh bé’ keh buhaa’ éh ngelepu Éh, pu’un keh bet Éh awah. 14 Yésus inah pu’un éh ni’ai ngan jian, bang ka’ah lepah bet Éh ngan pu’un keh menyat pika ngan Pilatus dokoo’ néh ngelepu jah kelunan éh mematai kelunan. 15 Inah jalan keh mematai Iah éh nebu’un urip. Bang Allah pu’un pebetéé’ Éh jin belah kelunan matai, améé’ jam éh pu’un kenat mu’un uban maten mé’ na’at Éh la’o Néh betéé’ jin patai Néh. 16 La’ah neu’ penyukat lem ngaran Néh, inah éh maneu’ lakei’ inah pu’un gahang, la’ah éh ta’an keh hun iteu’, pu’un mo maneu’ éh neu’ pengelan mo tong ngaran Yésus. Neu’ pengelan mo tong Yésus, inah éh maneu’ éh omok lakau pekua’ éh ta’an keh nah, ha’ Péterus. 17 Ka’ ha’ Péterus kepéh, O kekat padéé’ ke’, kekat penganeu’ keh ngan penganeu’ irah pengeja’au keh tong Yésus rai, kejam ké’ keh pu’un maneu’ éh kenat uban keh bé’ jak jam éh Iah 18 Bang lebéé’ tenéh pu’un Allah bara’ neu’ kekat nabi Néh, Kristus éh tuai ke’ Néh purip kelunan adang Néh juk jam keta. La’ah kekat éh neu’ keh nah, inah éh pesukup ha’ éh benara’ Tuhan kenat nah. 19 Uban néh kenat jian keh piso jin kesa’at keh ngan tavin Allah, jalan Néh mega’ penyala’ keh, 20 dokoo’ Tuhan omok mena’ jah sioo’ éh jian ngan pawah ke’ Néh nyohoo’ Yésus tuai, uban Yésus nah Iah éh Kristus. 21 Adang Yésus nah juk mokoo’ tong seruga pah avéé’ jaka’ Allah juk maneu’ kekat éh maréng kepéh, pekua’ éh benara’ Néh neu’ kekat nabi Néh sahau. 22 Uban ka’ ha’ éh benara’ Musa sahau, Tuhan Allah juk nyohoo’ jah nabi tai ngan keh barei’ Néh mena’ akeu’ iteu’ ngan keh rai. Kelunan éh juk sohoo’ Néh nah jin pohoo’ keh tengéé’. Hun Néh pu’un avéé’ da’, jian keh menéng kekat ha’ éh benara’ Néh ngan keh. 23 Séé’-séé’ éh bé’ menéng éh, adang Tuhan juk pepiso éh jin belah irah éh anah Allah ngan ngebéé éh, kenat ha’ Musa, ha’ Péterus nah. 24 Ka’ ha’ Péterus kepéh, Bé’ éh Musa awah éh bara’ éh kenat, Samuel péh, ngan kekat nabi sahau la’o Samuel péh, irah péh pu’un bara’ éh kenat. Kekat éh benara’ réh sahau nah lepah avéé’ lem urip lu’ hun iteu’. 25 La’ah kekat jajii’ éh pejajii’ Allah neu’ kekat Nabi Néh, pu’un éh ngan keh, ngan ka’ah péh omok masek jajii’ éh pejajii’ Allah ngan kekat tepun lu’ sahau rai. Barei’ jajii’ éh benara’ Néh ngan Abraham, ka’ ha’ Néh, Jin pohoo’ ko’ éh tuai jin ka’au’ Akeu’ juk mena’ pengejian Ké’ ngan kekat arong kelunan pah tipo tana’ kepéh. Kenat ha’ jajii’ Tuhan ngan Abraham sahau. 26 Kenat péh Allah ngevéléé’ Anak Néh ke’ Anak inah tai ngan ka’ah tenah, dokoo’ Néh mena’ pengejian Néh ngan keh, neu’ Néh mihin siget usah keh piso jin kekat kesa’at keh, ha’ Péterus nah.
41 La’ah lem Péterus ngan Yohanes to pané ngan kelunan pinaa’ nah, tuai irah imam, ngan lakei’ ja’au éh pengeja’au irah éh mavaa’ umaa’ Allah, ketem kelunan Yahudi éh kivu adet sebayang Saduki. 2 Merek réh uban Péterus rawah Yohanes nebaraa’ kelunan inah tong pengebetéé’ Yésus, inah jalan réh omok jam kelunan éh lepah matai omok betéé’ murip kepéh. 3 Neu’ ha’ tebaraa’ roh kenat, inah irah éh tuai nah ngamit roh ngan maneu’ roh lem lamin tutup merem inah, uban hun réh maneu’ roh nah dau ngit éh. 4 Bang pinaa’ kelunan éh pu’un menéng ha’ tebaraa’ roh inah pu’un réh ngelan, ngioo’ kekat irah lakei’ lemah ibu usah. 5 Barei’ sagam irah pengeja’au pohoo’ Yahudi, pengeja’au kelunan Yahudi ngan irah guru éh nebaraa’ tong sohoo’ lem Surat Musa, pu’un petipun tong leboo’ Yérusalem, 6 pemung ngan Hanas éh Imam éh pengeja’au kekat imam ngan Kayapas, Yohanes, ngan Aleksander, ngan kelunan éh jah éh lua’ Hanas nah. 7 La’ah pu’un réh nyohoo’ Péterus ngan Yohanes nekedéng belah réh ke’ réh neteng roh, ka’ ha’ réh, Kineu’ koh maneu’ éh kenat? Ineu’ éh penyukat koh? Ineu’ éh palaa’ keh peka’o éh, ha’ réh. 8 La’ah Péterus éh penoo’ neu’ Sahéé’ Ni’ai mipa réh, ka’ ha’ néh, O kekat pengeja’au pohoo’ Yahudi ngan pengeja’au kelunan Yahudi! 9 Hun keh juk neteng amo kineu’ tok penganeu’ mo tong lakei’ éh paket nah rai, ke’ néh pu’un ma’o hun iteu’ nah. 10 Jian keh jam, ngan jian kekat kelunan Yahudi péh jam, tong jalan lakei’ inah ma’o, bé’ éh neu’ amo, bang iah ma’o naneu’ penyukat lem ngaran Yésus Kristus, kelunan jin leboo’ Nasaret, éh lepah senalib keh ngan éh netéé’ Allah jin patai Néh, kenat éh ke’ néh omok nekedéng belah keh nah ngan jian. 11 Yésus nah, Iah ke’ éh benara’ réh lem surat Allah, ka’ ha’ réh, Bateu’ éh nebet tukeng lamin, bateu’ inah éh matek jian. Kenat ha’ surat Allah. 12 La’ah jin lem Iah awah lu’ omok alaa’ urip, uban bé’ pu’un ngaran éh jah pah tipo tana’ éh nena’ Allah ngan kelunan éh kelu’ omok murip, ha’ Péterus. 13 La’ah irah Pengeja’au Komiti sebayang Yahudi, béé kenin réh uban Péterus ngan Yohanes makang kenin kenat, uban kejam réh rawah iteu’ kelunan éh adek ke’ awah, éh bé’ jam surat, boh réh nesen rawah pu’un pemung ngan Yésus lepah nah. 14 Bé’ réh omok nyakat ha’ roh kepéh, uban irah na’at lakei’ éh paket nah nekedéng pata ngan roh ngan lepah ma’o jin kepaket néh nah. 15 La’ah irah nyohoo’ roh musit jin lamin Komiti sebayang Yahudi petipun nah, ke’ réh pakat tengéé’ kepéh la’. 16 Ka’ ha’ réh, Ineu’ kelu’ maneu’ tong kelunan iteu’ lah da’? Adang kekat kelunan éh mokoo’ tong leboo’ Yérusalem jam roh lepah maneu’ telana’ éh ja’au kenat, bé’ lu’ omok melim éh dat. 17 Bang dokoo’ rengah inah bé’ avéé’ tong kelunan éh jah kepéh, jian lu’ magen roh, mai lu’ buhaa’ rawah bara’ tong ngaran Yésus ngan séé’-séé’ kepéh, ha’ réh. 18 Boh réh tebai roh kepéh ke’ réh magen roh, bé’ buhaa’ roh bara’ tong ngaran Yésus kepéh. 19 Bang ka’ ha’ Péterus rawah Yohanes mipa réh, Jian ka’ah tengéé’ seruh, éh mah éh teneng tong ta’an Allah, hun mo mokoo’ kivu sohoo’ keh kenat, kineu’, hun mo kivu sohoo’ Allah? Éh mah éh teneng kunah ka’ah? 20 Uban bé’ amo omok ma’o bara’ tong éh ta’an mé’ ngan éh nenéng mé’, ha’ roh ngan réh. 21 La’ah jaa’-jaa’ néh irah pengeja’au Komiti sebayang Yahudi magen roh. La’o inah kepéh boh réh ngelepu roh, uban bé’ pu’un sala’ roh éh ke’ réh ngukum roh, uban kekat kelunan pu’un mejing Allah uban réh na’at kelunan paket nah lepah ma’o. 22 La’ah lakei’ éh ma’o neu’ penyukat Tuhan nah, urip néh mutaa’ jin pat poloo’ ta’un. 23 La’ah hun Péterus ngan Yohanes musit jin lamin tutup tioo tai roh ngan bakéh roh, ke’ roh bara’ ha’ irah pengeja’au imam ngan irah pengeja’au kelunan Yahudi éh magen roh lepah nah. 24 Hun réh menéng éh kenat, pu’un réh sebayang ngan Allah, ka’ ha’ réh, O Tuhan, Ka’au’ éh suai langit ngan tana’ ngan baa’ banget, ngan kekat éh tong néh, 25 La’ah neu’ Sahéé’ Ni’ai pu’un Ke’ pané neu’ tepun mé’ Daud, kelunan éh kivu sohoo’ Ko’ rai, ka’ ha’ néh, Uban ineu’ kekat kelunan éh tengéé’ pohoo’ pu’un merek? Uban ineu’ kelunan pakat juk maneu’ sa’at ngan bé’ omok maneu’ éh? 26 Pu’un kekat raja’ tong tana’ petenup ngan irah pengeja’au éh jah pu’un petipun, dokoo’ réh ngelawan Tuhan ngan ngelawan Iah éh tuai jin Allah ke’ Néh pepurip kelunan. Kenat ha’ Daud. 27 Hun iteu’ pu’un éh kenat mu’un tong leboo’ iteu’, uban Herodis ngan Pontius Pilatus ngan kelunan Yahudi ngan kelunan éh tengéé’ pohoo’, petipun ke’ réh ngelawan Yésus, Anak Ko’ éh ni’ai, éh kevéléé’ Ko’ ke’ Néh pepurip kekat kelunan. 28 Pu’un réh petipun kenat dokoo’ naneu’ réh pekua’ éh sohoo’ Ko’ jin bu’un tenéh, ke’ néh pu’un kenat. Ka’au’ kejeraa’ réh kenat kivu penyukat ngan pengeloo’ Ko’ tengéé’. 29 O Tuhan, hun iteu’ kepéh jian Ke’ menéng tong kekat éh magen mé’ nah ngan nolong améé’ éh maneu’ kereja’ Ko’, dokoo’ mé’ omok makang bara’ ha’ tebaraa’ Ko’ ngan kelunan kepéh. 30 Jian Ke’ pepoléng penyukat Ko’ ngan peka’o kelunan sakit, ngan jian Ke’ mena’ penyukat Ko’ ngan améé’ dokoo’ neu’ ngaran Yésus éh Anak Ko’ éh Ni’ai, omok améé’ maneu’ pinaa’ arong penganeu’ éh nojoo’ penyukat Ko’ ngan éh ngebéé kenin kelunan. Kenat ha’ sebayang réh. 31 La’o réh Sebayang Kenat, jalan réh petipun nah pu’un tegen, irah béé penoo’ neu’ Sahéé’ Ni’ai, ngan pu’un réh bara’ ha’ Tuhan Allah ngan makang kenin. 32 La’ah kekat kelunan éh ngelan pu’un réh pata pekua’ kenin béé. Bé’ pu’un jah usah éh bara’ livah néh éh anah nah ke’ tengéé’, bang pu’un réh petulat ineu’-ineu’ éh pu’un tong réh belah irah ke’. 33 La’ah neu’ penyukat Tuhan, irah lawah Tuhan bara’ tong kekat éh ta’an réh tong pengebetéé’ Tuhan Yésus, la’ah ja’au mu’un penika Tuhan ngan kekat réh béé. 34 Bé’ pu’un jah-jah usah réh pu’un pegekurang ineu’-ineu’ uban irah éh pu’un tana’ ngan pu’un lamin, pu’un réh melih éh, ngan éh nalaa’ réh tong néh, inah éh nihin réh kepéh 35 ke’ réh mena’ éh ngan irah lawah Tuhan kepéh, ke’ réh petulat éh ngan siget kelunan pah avéé’ néh sukup mu’un. 36 Kenat péh jah kelunan jin betah Lewi, Yusup ngaran néh, éh jin Siprus, éh nateng irah lawah nah, Barnabas, sin tong ngaran néh, kelunan éh jam papung. 37 Barnabas nah melih tulat tana’ éh anah nah, ngan iah mihin rigit éh nalaa’ néh ke’ néh mena’ éh ngan irah lawah Tuhan.
51 Bang jah kelunan éh ngaran néh Ananias, ngan ngaran redo néh Sapira, lakei’ néh nah melih jah tulat tana’ éh anah nah, 2 bang pu’un éh modoo’ jelua’ rigit nah ke’ néh juk pakai éh tengéé’. Jelua’ nah, inah éh nena’ néh ngan irah lawah Tuhan, ngan redo néh jam lakei’ néh maneu’ éh kenat. 3 La’ah ka’ ha’ Péterus ngan néh, O Ananias, uban ineu’ ke’ kejeraa’ Sitan masek lem kenin ko’, ke’ ko’ kenyo ngan Sahéé’ Ni’ai, ngan modoo’ jelua’ rigit éh nalaa’ ko’ jin tana’ inah ri’? 4 Hun ko’ to bé’ jak melih tana’ inah, anah koo’ ke’ éh. La’o ko’ melih éh, kekat rigit éh nalaa’ ko’ tong néh, anah koo’ ke’ éh. Hun néh kenat uban ineu’ ke’ seruh juk kenyo kenat? Bé’ ke’ kenyo ngan kelunan awah, bang pu’un ke’ kenyo ngan Allah, ha’ Péterus ngan néh. 5 Hun Ananias menéng ha’ néh kenat, tioo kuba’ éh ngan béé laset. La’ah kekat kelunan éh menéng rengah inah, medai mu’un réh. 6 La’ah tuai irah lakei’ lemanai mutup patai néh ngan metéé’ éh musit ke’ réh nanem éh. 7 Ngioo’ teleu’ jam la’o inah kepéh, tuai redo néh, bang bé’ éh jam tong kekat inah ri’. 8 La’ah ka’ ha’ Péterus ngan néh, Jian ke’ bara’ mu’un ngan ké’, tana’ éh nelih koh rai, kineu’, inah néh kekat éh nalaa’ koh tong néh kei? Ha’ néh. La’ah ha’ redo inah, Oo’, mu’un, inah néh kekat néh béé, ha’ néh. 9 Ka’ ha’ Péterus kepéh, Uban ineu’ koh maneu’ kenat pah avéé’ koh tupat Sahéé’ Tuhan? Kelunan éh nanem lakei’ ko’ ri’, iteu’ néh oléé’ réh avéé’ tong usit tapé iteu’, irah juk mihin ka’au’ kepéh pekua’ réh mihin lakei’ ko’ iri’, ha’ néh. 10 Tioo kuba éh matai déhéé’ gem Péterus. Masek irah lemanai ri’ ngan na’at éh lepah matai, boh réh metéé’ éh ke’ réh mihin éh nanem éh ngepata tanem lakei’ néh ri’. 11 Kekat irah sidang ngan kekat kelunan éh jah péh éh menéng rengah inah, medai mu’un réh lah. 12 La’ah pinaa’ arong penganeu’ neu’ irah lawah Tuhan, penganeu’ éh ngebéé kenin kelunan ngan éh nojoo’ penyukat Tuhan. Pu’un kepéh kelunan éh ngelan petipun tong umaa’ Allah tong jah luvang lamin éh ngaran néh, Lamin Salomo. 13 Kelunan éh bé’ ngelan, bé’ réh jeleng masek ngan réh, bang pu’un réh sepah tong irah éh ngelan nah. 14 Pepit kepéh irah éh ngelan tong Tuhan, pinaa’ réh, irah lakei’ ngan irah redo péh. 15 Neu’ kekat penganeu’ irah lawah belah kelunan pinaa’, inah éh maneu’ kelunan mihin irah éh sakit tai jalan totoo’, ngan pei’ réh tong bisan ngan tong mak péh, dokoo’ hun Péterus lapah sinah da’, barang ada kuyuh néh omok teneng tong kelunan éh sakit nah. 16 La’ah pinaa’ kepéh kelunan tuai jin tutuh leboo’ Yérusalem mihin kelunan éh sakit ngan kelunan éh nasek balei’, kekat irah inah péh pu’un ma’o jin kesakit réh. 17 La’ah Imam éh pengeja’au kekat imam ngan irah Yahudi, éh kivu adet sebayang Saduki, pu’un réh pana kenin ngan irah lawah. 18 Pelapah irah ngamit Péterus rawah Yohanes, ke’ réh mihin roh tai lamin tutup. 19 Bang tovoo’ merem inah jah meliket Tuhan mukap tapé lamin tutup ke’ néh mihin roh musit. Ka’ ha’ néh ngan roh, 20 Jian koh tai umaa’ Allah ngan bara’ tong urip maréng ngan kekat kelunan éh pu’un sinah, ha’ néh. 21 Pelapah roh tai kenat, ngan tovoo’ peka ngivun masek roh tong umaa’ Allah ngan nebaraa’ réh. La’ah Imam éh pengeja’au kekat imam ngan bakéh néh ri’, pu’un réh tebai kekat pengeja’au kelunan Yahudi dokoo’ irah Komiti sebayang Yahudi pu’un petipun béé-béé. La’o inah irah nyohoo’ kelunan tai lamin tutup ngan ke’ réh juk mihin Péterus rawah Yohanes lawah nah tuai kepéh. 22 Bang hun réh avéé’ tong lamin tutup, beleka’ rawah ieng ke’. Pelapah irah moléé’ kepéh tavin irah Komiti sebayang Yahudi, ke’ réh bara’ ka’ ngan réh, 23 Hun mé’ avéé’ tong lamin tutup ri’, kenusi’ réh béé keto kekat usit tapé nah, ngan kekat irah éh mavaa’ lamin tutup pu’un réh nekedéng tong kekat usit tapé mavaa’ éh. Bang hun mé’ mukap usit tapé, bé’ sapét jah péh réh lem néh, ha’ réh. 24 Lakei’ ja’au éh pengeja’au irah éh mavaa’ umaa’ Allah ngan irah pengeja’au imam, hun réh menéng éh kenat, mujah kenin réh seruh éh, Kemah réh da’, kelem réh. 25 Boh jah lakei’ masek kepéh bara’ ngan réh, ka’ ha’ néh, Menéng keh, rawah éh tenutup keh ri’, pu’un roh nekedéng tong umaa’ Allah ngan nebaraa’ kelunan éh pu’un sinah, ha’ néh. 26 Boh lakei’ pengeja’au iri’ éh mavaa’ umaa’ Allah mihin kelunan éh kereja’ pekua’ ngan néh tai ngamit roh kepéh, bang bé’ irah maneu’ roh uban réh medai kelunan memateu’ réh. 27 La’ah pu’un réh alaa’ roh ke’ réh nyohoo’ roh nekedéng tong jumen irah Komiti sebayang Yahudi éh petipun nah. Pelapah Imam éh pengeja’au kekat imam nah pané ngan roh kepéh. 28 Ka’ ha’ néh, Pu’un mé’ magen koh lepah rai, bé’ buhaa’ koh nebaraa’ kelunan tong ngaran Yésus, bang beleka’ koh nebaraa’ réh tong ha’ tebaraa’ koh iteu’ keto, pah avéé’ tutuh Yérusalem. Iteu’ kepéh, kawah mesuh améé’ tong pematai kelunan nah, ha’ néh ngan roh. 29 Péterus ngan irah lawah Tuhan éh jah mipa éh, ka’ ha’ réh, Adang éh tekep mé’ kivu sohoo’ Allah jin hun mé’ kivu sohoo’ kelunan awah. 30 Yésus éh penatai keh tong kayeu’ salib rai, Allah éh kenelan tepun lu’, Iah éh pebetéé’ Éh kepéh jin patai Néh. 31 Allah pu’un metéé’ Éh saa’ na’au’ Néh ngan maneu’ Éh Raja’ ke’ Néh omok purip kelunan dokoo’ Néh maneu’ jalan ngan pohoo’ kelunan Yahudi ke’ réh ngepaléu kenin réh ngan penyala’ réh omok pega’. 32 La’ah améé’ lepah na’at éh kenat, kenat péh améé’ omok bara’ éh, kenat kepéh Sahéé’ Ni’ai éh nena’ Allah ngan kekat kelunan éh kivu sohoo’ Néh, iah péh jam éh kenat, ha’ Péterus. 33 Hun irah pengeja’au Komiti sebayang Yahudi nah menéng ha’ réh kenat, merek mu’un-mu’un réh, avéé’ réh juk mematai irah lawah nah. 34 Bang pu’un jah usah jin belah réh, ngaran néh Gamaliel, éh kivu adet Parisi, ngan éh nebaraa’ réh tong sohoo’ lem Surat Musa, ngan éh senepah kekat kelunan, pu’un éh nekedéng iah nyohoo’ réh pepusit irah lawah iri’ metok. 35 Boh éh bara’ ngan Komiti sebayang Yahudi, ka’ ha’ néh, O kelunan Yahudi, jian keh seruh jian-jian tong éh juk neu’ keh tong irah iteu’ ri’. 36 Uban pu’un jah kelunan sahau ngaran néh Teudas, pu’un éh ngajung usah néh tengéé’, la’ah pu’un kelunan kivu éh, ngioo’ kekat réh pat ato usah. La’ah Teudas nah penatai réh, ngan kekat kelunan éh kivu éh nah purat awah réh. 37 La’o inah kepéh pu’un Yudas éh jin tana’ Galilia, éh pu’un sioo’ réh purung kelunan lepah nah, iah inah péh pu’un kelunan kivu éh, iah péh penatai réh ke’ éh, ngan kekat kelunan éh kivu éh nah purat awah réh kepéh. 38 Kenat akeu’ bara’ tong rawah inah, mai keh maneu’ ineu’-ineu’ tong rawah iteu’ kepéh, turut ke’ rawah awah, uban hun ha’ tebaraa’ roh ngan kereja’ roh pu’un jin kelunan awah, adang néh juk béé kepéh vam. 39 Bang hun néh pu’un jin Allah, bé’ keh omok kebéé éh, jian keh seruh jian-jian dai keh ngelawan Allah, ha’ Gamaliel nah. La’ah pu’un irah Komiti sebayang Yahudi kivu sohoo’ Gamaliel kenat. 40 Boh réh tebai rawah lawah iri’ masek kepéh ke’ réh mipok roh, ngan irah magen roh mu’un-mu’un, bé’ buhaa’ roh nebaraa’ kelunan lem ngaran Yésus kepéh. La’o inah boh réh ngelepu roh kepéh. 41 Musit irah lawah nah jin lamin Komiti sebayang Yahudi nah, murung mu’un-mu’un kenin réh uban kejam réh Tuhan ngevéléé’ réh lem néh kejeraa’ kelunan pekenyaa’ réh kenat uban ngaran Yésus. 42 La’ah siget dau pu’un irah lawah nebaraa’ réh tong umaa’ Allah ngan tong lamin kelunan ngan perengah Rengah Jian tong Yésus Iah ke’ éh Kristus.
61 Lebéé’ si’ik la’o inah kepéh, pinaa’ kelunan éh ngelan tong Tuhan kepéh. Boh kelunan Yahudi éh pohoo’ Yahudi mu’un, ngan irah Yahudi éh tepiluh tong ha’ pohoo’ néh tengéé’ éh jam tong ha’ Yunani awah, tengéé’ kenin, uban irah Yahudi éh jam ha’ Yunani awah, bara’ irah Yahudi éh jah nah, hun réh petulat rigit siget dau, bé’ réh mena’ ineu’-ineu’ ngan irah redo baleu’ éh jam ha’ Yunani. 2 La’ah irah lawah éh jah poloo’ duah usah nah, tebai kekat irah kelunan éh pinaa’ nah ke’ réh bara’ ngan réh, ka’ ha’ réh, Bé’ tekep améé’ pei’ kereja’ mé’ tong ha’ tebaraa’ Allah ke’ mé’ mihau tong pengena’ mé’ ngan kelunan awah. 3 O kekat padéé’ mé’, uban néh kenat jian keh ngevéléé’ tujuu’ lakei’ éh penoo’ neu’ Sahéé’ Ni’ai ngan éh jam seruh, ke’ mé’ omok mena’ kereja’ iteu’ ngan irah kepéh. 4 Boh mé’ omok petem dalem sebayang ngan nebaraa’ keh tong ha’ tebaraa’ iteu’ kepéh, ha’ irah lawah. 5 Jian kenin réh menéng ha’ réh kenat, boh réh ngevéléé’ Stepanus, jah kelunan éh sukup pengelan, ngan éh penoo’ neu’ Sahéé’ Ni’ai, ngan inah kepéh, Pilipus, Prokhorus, Nikanor, Timon, Parmenas, Nikolaus éh pu’un jin Antiokia éh ngabit adet réh. 6 Boh réh mihin réh teleu’ tavin irah lawah nah. Pu’un réh sebayang ngan mapai ojoo’ réh tong siget usah réh. 7 La’ah ha’ tebaraa’ Allah avéé’ kepéh tong kuraa’-kuraa’ kelunan éh jah, pinaa’ kelunan tong Yérusalem ngelan tong Tuhan kepéh, kenat péh pinaa’ imam ngelan kepéh. 8 La’ah Allah mena’ pengejian ngan Stepanus, ngan iah penoo’ neu’ penyukat Sahéé’ Ni’ai, pu’un éh maneu’ pinaa’ arong penganeu’ éh ngebéé kenin kelunan ngan éh pepoléng penyukat Tuhan. 9 Bang pu’un jelua’ kelunan éh maneu’ éh, pu’un réh jin lamin sebayang Yahudi éh ngaran sebayang réh, Kelunan éh pelepu. Tong lamin sebayang inah pu’un kelunan Yahudi éh jin tana’ Kirene ngan jin leboo’ kapan Aleksandria. Irah inah ngan kelunan Yahudi kepéh éh jin tana’ Kilikia ngan Asia, maneu’ Stepanus. 10 Bang bé’ éh Stepanus tengéé’ éh mipa ha’ réh, bang Sahéé’ Tuhan mena’ pengejam ngan néh avéé’ réh bé’ omok maneu’ éh kepéh. 11 Boh réh mena’ rigit ngan kelunan éh jah ke’ réh nyohoo’ réh bara’ ka’, Pu’un mé’ menéng ha’ kelunan iteu’ ngesa’at Musa ngan ngesa’at Allah péh, ha’ réh. 12 Kenat péh irah punyat kenin kelunan pinaa’, ngan irah pengeja’au kelunan Yahudi, ngan irah guru éh nebaraa’ tong sohoo’ lem Surat Musa. Pelapah irah ngamit Stepanus ke’ réh mihin éh tai tong jumen Komiti sebayang Yahudi. 13 Boh réh tebai kuraa’ kelunan tuai ke’ réh nyohoo’ réh pané kenyo pesala’ Stepanus. Ka’ ha’ réh, Lakei’ iteu’ ngelayau éh pané ngan bé’ paréé’ umaa’ Allah, kenat péh tong sohoo’ lem Surat Musa. 14 Pu’un mé’ lepah menéng ha’ néh bara’, Yésus éh kelunan jin leboo’ Nasaret juk kebéé umaa’ Allah ngan ngepaléu adet éh nena’ Musa ngan lu’ sahau rai, ha’ réh. 15 Kekat irah éh pu’un tong petipun Komiti sebayang Yahudi ri’ kepuh Stepanus, ta’an réh da’in néh barei’ layan da’in meliket.
71 La’ah Imam éh pengeja’au kekat imam neteng Stepanus, ka’ ha’ néh, Kineu’ ke’ kenat kurah nah, ha’ néh. 2 Ka’ ha’ Stepanus mipa éh, O kekat tamen ngan kekat padéé’ ké’, jian keh menéng ha’ ké’. Allah éh matek maren mu’un, pu’un Éh poléng tong Abraham éh tepun lu’ sahau hun néh mokoo’ keto tong tana’ Mesopotamia, bé’ jak éh tai tong leboo’ Haran rai. 3 Ka’ ha’ Allah pané ngan Abraham, Jian ke’ piso jin tana’ ko’ iteu’, ngan jin pohoo’ ko’ iteu’, ngan tai jah tana’ éh juk benara’ Ké’ ngan ko’ kepéh da’, ha’ Néh. 4 La’ah piso Abraham jin tana’ Kasdim tai leboo’ Haran. La’o tamen néh matai, Allah nyohoo’ éh piso jin sinah tai tana’ iteu’ kepéh, éh tana’ jalan keh murip hun iteu’ nah. 5 Tovoo’ inah bé’ Allah mena’ jah tulat tana’ iteu’ ngan Abraham, bé’ sapét si’ik péh éh na’ néh, bang jajii’ Allah, adang néh juk mena’ tana’ iteu’ ngan néh kepéh vam, ngan inah kepéh, adang tana’ iteu’ omok anah nah ngan anah kekat anak-ayam néh jin la’o urip nah inah kepéh. Tovoo’ Allah maneu’ jajii’ Néh inah, bé’ jak Abraham pu’un anak. 6 Na’ péh kenat, Allah bara’ ngan néh kepéh, Adang kekat anak-ayam ko’ juk murip tong jah tana’ éh bé’ pohoo’ tana’ réh mu’un, ngan keripen réh, ngan irah juk jam keta neu’ irah éh pu’un tana’ inah pat ato ta’un kelebéé’ néh. 7 Bang Akeu’ juk ngukum irah éh ngeripen réh inah. La’o inah anak-ayam ko’ juk piso jin tana’ inah ngan kivu Akeu’ tong tana’ iteu’ kepéh. Kenat ha’ Allah ngan Abraham sahau, ha’ Stepanus. 8 Ha’ Stepanus kepéh, La’ah Allah mena’ adet sunat ngan Abraham, ke’ néh petesen réh tong jajii’ iteu’. La’ah Abraham pesunat anak néh Ishak ayah dau la’o lohoo’ néh, ngan Ishak pesunat anak néh Yakub, ngan Yakub pesunat anak néh jah poloo’ duah usah éh tepun lu’ rai, ha’ néh. 9 Ka’ ha’ Stepanus kepéh, La’ah tepun lu’ rai leko éh tong padéé’ réh Yusup ngan irah melih éh ngan kelunan jin tana’ Mesir ke’ réh ngeripen éh sitai. Bang Allah pu’un ngan néh, 10 ngan ngelepu éh jin kekat penusah néh. La’ah hun Yusup tai tong jumen Piraun, éh raja’ tong tana’ Mesir nah, pu’un Allah nolong Yusup ke’ néh omok ngejian kenin kelunan ngan ke’ néh omok jam seruh. La’ah Piraun ngajung éh, ngan maneu’ éh pengeja’au tong tana’ Mesir ngan tong kekat irah tong umaa’ raja’ nah kepéh. 11 La’o inah pu’un la’au’ ja’au tong tana’ Mesir ngan tong tana’ Kana’an, keta mu’un kekat kelunan neu’ la’au’ inah. Juk matai la’au’ awah kekat tepun lu’. 12 Hun Yakub menéng rengah parai pu’un tong tana’ Mesir, iah nyohoo’ anak néh éh tepun lu’ tai sinah, inah éh bu’un réh tai. 13 Tong keruwah koléé’ réh tai, pu’un Yusup bara’ usah néh ngan kekat padéé’ néh ke’ réh jam éh iah, kenat péh Piraun jam pohoo’ Yusup inah kepéh. 14 La’ah pu’un Yusup nyohoo’ réh tai tebai tamen néh Yakub, ngan kekat lua’ néh kepéh, tujuu’ poloo’ lemah usah kekat réh béé. 15 Lakau Yakub tai tana’ Mesir, sinah lah éh matai, kenat péh kekat tepun lu’ sahau. 16 La’ah patai réh nihin kelunan tai tana’ Sikhem, ke’ réh nanem éh lem tanem éh nelih Abraham jin irah Hamor sahau, ha’ néh. 17 Ka’ ha’ Stepanus kepéh, La’ah teka avéé’ tong jaka’ Allah juk maneu’ éh pekua’ éh pejajii’ néh ngan Abraham lepah nah, pohoo’ lu’ éh mokoo’ tong tana’ Mesir lepah pinaa’ réh kepéh. 18 La’ah pu’un jah raja’ maréng tong tana’ Mesir éh bé’ jam tong Yusup. 19 Iah ngelavo’ pohoo’ lu’ ngan peketa kekat tepun lu’, ngan nyohoo’ réh bet anak réh éh si’ik ke’ néh matai. 20 Sioo’ inah péh inah éh lohoo’ Musa, iah jah anak éh jian mu’un-mu’un. Teleu’ laséh kelebéé’ tinen néh petubo éh tong lamin néh tengéé’. 21 Hun réh miso éh jin lamin réh, anak Piraun éh redo alaa’ éh ke’ néh mamung éh pekua’ barei’-okoo’ anak usah néh mu’un. 22 La’ah irah nebaraa’ Musa tong kekat éh pengejam kelunan Mesir, pah avéé’ néh kelunan ja’au éh jam seruh, ngan teneng mu’un kekat penganeu’ néh kepéh, ha’ néh. 23 Ka’ ha’ Stepanus kepéh, Tovoo’ urip Musa pat poloo’ ta’un, boh éh seruh juk tai nepah kekat padéé’ néh éh pohoo’ Israel. 24 La’ah pu’un éh na’at kelunan Mesir mipok kelunan éh pohoo’ Musa, pelapah Musa tai nya’ap éh ngan maneu’ kelunan Mesir nah ngan mematai éh. 25 Uban kelem Musa nah, adang pohoo’ néh tengéé’ jam Allah lepah ngevéléé’ iah ke’ néh ngelepu réh, bang bé’ irah pohoo’ néh jam éh kenat. 26 Barei’ sagam kepéh pu’un éh na’at pata kelunan Israel petayuu’, ngan iah tai juk pebelah roh. Ka’ ha’ Musa ngan roh, Mai koh petayuu’ kenat uban kawah iteu’ pepadéé’, mai koh kenat, ha’ néh. 27 Bang iah éh mihin roh petayuu’ nah, mipa éh, ka’ ha’ néh, séé’ maneu’ ke’ pengeja’au améé’, séé’ nyohoo’ ke’ petuneng améé’, ko’ kenat ha’ nah. 28 Kineu’, keloo’ ke’ mematai akeu’ barei’ ke’ mematai kelunan Mesir malem rai, ha’ lakei’ inah ngan Musa. 29 Hun Musa menéng ha’ néh kenat, kelap éh jin tana’ Mesir tai tana’ Midian. Kelebéé’ néh mokoo’ sinah pu’un duah anak néh lakei’, ha’ Stepanus ngan réh. 30 Ha’ Stepanus kepéh, Pat poloo’ ta’un la’o inah kepéh, hun Musa pu’un tong tana’ pegawa déhéé’ tokong Sinai, pu’un jah meliket poléng tong néh lem ada luten tong telo kayeu’ seliveu’ diva’. 31 Béé kenin Musa na’at luten kenat, uban kayeu’ nah bé’ potong. Tai éh jin danii’ ke’ néh juk petuneng na’at éh. Boh éh menéng ha’ Tuhan pané ngan néh, ka’ ha’ Néh ngan Musa, 32 Akeu’ éh Allah éh kenelan kekat tepun ko’, Akeu’ ke’ éh Allah éh kenelan Abraham, ngan Ishak ngan Yakub, ha’ Tuhan ngan néh. Riyet éh medai, bé’ éh makang kenin na’at éh kepéh. 33 La’ah ka’ ha’ Tuhan ngan néh kepéh, Jian ke’ mega’ kasut ko’ nah, uban Akeu’ éh nekedéng siteu’. 34 Pu’un Ku’ lepah na’at ngan lepah jam tong kekat pengeketa éh pu’un tong irah éh anah Ké’ kelebéé’ réh pu’un mokoo’ tong tana’ Mesir, ngan pu’un Ku’ lepah menéng ha’ réh besau, inah Akeu’ pu’un tuhun juk ngelepu réh. Hun iteu’ jian ke’ kivu sohoo’ Ké’, Akeu’ éh nyohoo’ ke’ tai tana’ Mesir kepéh, ha’ Tuhan pané ngan Musa, ha’ Stepanus. 35 Ha’ Stepanus kepéh, La’ah Musa inah, pu’un éh nebet kelunan Israel rai, ka’ ha’ réh ngan néh, séé’ maneu’ ka’au’ pengeja’au améé’, séé’ nyohoo’ ke’ petuneng améé’, ha’ réh. La’ah pu’un Allah nyohoo’ éh tai ngan réh ke’ néh omok pengeja’au réh ngan purip réh neu’ penyukat meliket éh ta’an néh lem ada luten tong telo kayeu’ rai. 36 La’ah pu’un éh mihin pohoo’ néh piso jin tana’ Mesir, pinaa’ arong penganeu’ néh belah pohoo’ irah Mesir éh tejeu’ ta’an réh, kenat péh penganeu’ néh tong baa’ Banget Kelosom, ngan hun réh pu’un tong tana’ pegawa péh pat poloo’ ta’un kelebéé’ néh, pinaa’ arong penganeu’ néh éh ngebéé kenin kelunan pinaa’. 37 La’ah Musa nah, pu’un éh bara’ ka’ ngan pohoo’ Israel, Allah juk nyohoo’ jah nabi tai ngan keh ke’ néh omok bara’ kenin Tuhan ngan keh, éh jin pohoo’ keh tengéé’, barei’ néh mena’ akeu’ iteu’ ngan keh rai, kenat ha’ Musa, ha’ Stepanus nah. 38 Ha’ Stepanus, La’ah Musa nah pu’un éh pemung ngan kekat kelunan Israel hun réh pu’un tong tana’ pegawa sahau, iah pu’un pemung ngan kekat tepun lu’ ngan meliket éh pané ngan néh tong tokong Sinai, ngan pu’un éh alaa’ kekat ha’ tebaraa’ jin Allah éh omok purip réh ke’ néh bara’ éh ngan uleu’ kepéh, ha’ néh. 39 Ka’ ha’ Stepanus kepéh, Bang tepun lu’ sahau rai, bé’ réh keloo’ kivu sohoo’ Musa, pu’un réh bet éh awah, gahang kenin réh juk moléé’ murin tai tana’ Mesir kepéh 40 Pu’un réh bara’ ngan Harun, ka’ ha’ réh, Jian ke’ maneu’ butun éh omok majak mé’, uban Musa éh mihin mé’ piso jin tana’ Mesir rai, bé’ mé’ jam éh lah, ha’ réh ngan Harun. 41 Boh réh maneu’ jah butun éh barei’ layan anak sapé’ éh ka’an rai. Pu’un réh peliwa éh, murung kenin réh tong penyuai réh nah. 42 Bang Allah telikut jin irah ke’ néh kejeraa’ réh seva’ kekat kenyuhai éh tong langit, barei’ okoo’ ha’ éh lepah senurat irah nabi sahau, ka’ ha’ réh, O kelunan Israel, kekat ka’an éh penatai keh, pat poloo’ ta’un kelebéé’ keh lakau tong tana’ pengawa rai, bé’ keh mematai éh dokoo’ keh tavin Akeu’. 43 La’ah balei’ éh ngaran néh Molok, lamin balei’ inah éh nihin keh bé’ éh lamin Ké’. Butun éh kebeteu’ keh barei’ layan kenyuhai éh benara’ keh retek balei’ éh ngaran néh Repan, inah éh nihin keh. Lamin balei’ Molok ngan butun éh kebeteu’ keh barei’ layan kenyuhai nah, butun awah éh, bang pu’un keh suai éh ngan maneu’ éh pengeja’au keh. Uban keh maneu’ éh kenat, pu’un Ku’ ngukum keh ngan bet keh tai jah tana’ juu’ jin tana’ Babel. 44 Ka’ ha’ Stepanus kepéh, Tepun lu’ rai pu’un lamin Tuhan éh penakai réh kelebéé’ réh pu’un tong tana’ pengawa sahau, sinah réh omok tavin Allah. Lamin inah senuai réh pekua’ layan éh sohoo’ Allah ngan Musa rai. 45 La’o inah kepéh tepun lu’ alaa’ lamin inah jin tamen réh, pu’un réh mihin éh hun réh kivu Yosua tai alaa’ tana’ pohoo’ kelunan éh senopéé’ Allah. Lamin inah pu’un éh ngan réh pah avéé’ lem pengurip Daud. 46 La’ah Daud pu’un payoo’ tong ta’an Allah, ngan iah menyat Allah kejeraa’ éh maneu’ jah lamin éh reken ngan Allah éh kenelan Yakub, 47 bang Salomo iah éh maneu’ lamin inah ngan Allah la’ah. 48 Bang Allah éh matek maren mu’un, bé’ éh mokoo’ tong lamin éh senuai kelunan, barei’ éh benara’ nabi Yesaya, ka’ ha’ néh. 49 Ka’ ha’ Allah, seruga inah éh nyun Ké’, ngan tana’, inah éh jalan Ké’ mapai gem Ké’. Kineu’ layan lamin éh juk neu’ ko’ ngan Ké’? Semah jalan éh tekep Ké’ mokoo’? 50 Kineu’, bé’ éh Akeu’ éh maneu’ kekat inah béé? 51 Ka’ ha’ Stepanus kepéh, Mahéng mu’un-mu’un kenin keh, barei’ kenin kelunan éh bé’ jak pu’un ngelan, rengen awah keh tong ha’ tebaraa’ Allah. Ka’ah pekua’ barei’ tepun keh sahau, ka’ah péh éh ngelayau ngemahéng kenin keh tong Sahéé’ Ni’ai. 52 Kineu’, pu’un jah usah nabi bé’ jam keta neu’ tepun keh rai? Pu’un réh mematai lawah Tuhan, irah lawah inah lebéé’ tenéh réh pu’un bara’ tong savéé’ Anak Allah éh teneng. Ngan hun iteu’ pu’un keh memalo ngan mematai Anak Allah inah. 53 Pu’un keh alaa’ kekat ha’ Tuhan lem Surat Musa éh nena’ meliket ngan keh, na’ péh kenat bé’ keh kivu Éh, ha’ Stepanus nah. 54 Hun irah Pengeja’au tong Komiti sebayang Yahudi menéng ha’ Stepanus bara’ kenat, merek mu’un-mu’un réh riyet réh ngan nyegitep ja’an réh. 55 Bang Stepanus éh penoo’ neu’ Sahéé’ Ni’ai, iah na’at kebau ngan ta’an néh pengaren Allah, ngan ta’an néh Yésus éh nekedéng saa’ na’au’ Allah. 56 Ka’ ha’ Stepanus, Jian keh na’at, pu’un ku’ na’at seruga pukap, ngan ta’an ké’ Yésus nekedéng saa’ na’au’ Allah, ha’ néh. 57 Pelapah irah Komiti sebayang Yahudi ngeradau tioo mapek kelingen réh ngan pata nekedeu’ réh nyurung éh. 58 La’ah nebet réh éh jin leboo’ réh ngan benateu’ réh éh. Kelunan éh maneu’ éh nah modoo’ kerayung réh éh kebit ngan jah lakei’ lemanai ngaran néh Saulus. 59 Kelebéé’ réh memateu’ Stepanus pu’un éh sebayang ngan Tuhan, ka’ ha’ néh, O Tuhan Yésus, jian Ke’ alaa’ akeu’, ha’ néh. 60 Iah ngejekuu’ lep néh ngan sebayang kepéh ngan ja’au ha’, ka’ ha’ néh, O Tuhan, mai ke’ mihau penyala’ irah iteu’, ha’ néh. La’o néh sebayang kenat béé laset néh.
81 La’ah Saulus péh ngayo kenin irah éh mematai Stepanus nah. Tovoo’ dau inah, inah éh bu’un pengeketa ja’au tong sidang tong Yérusalem. Kekat kelunan éh ngelan purat réh, jelua’ réh tai tana’ Yudea, jelua’ réh tai tana’ Samaria, bang bé’ irah lawah Tuhan tai kenat. 2 Pu’un kelunan éh ngelan mu’un tai alaa’ patai Stepanus ke’ réh nanem éh, mangaa’ réh ngan besau mu’un-mu’un kenin réh. 3 La’ah Saulus juk kebéé sidang Tuhan. Tai éh tong siget-siget lamin réh ke’ néh ngamit réh, irah lakei’ ngan irah redo péh éh pu’un ngelan, ke’ néh masek réh lem lamin tutup. 4 Kekat irah éh purat nah tai bara’ Rengah Jian. 5 Pu’un Pilipus tai Samaria leboo’ ja’au ke’ néh bara’ tong Kristus Iah ke’ éh kevéléé’ Allah. 6 Irah tong Samaria mihau ha’ tebaraa’ éh benara’ Pilipus ngan réh. Pu’un réh ngenéné’ éh mu’un tong kekat éh benara’ néh, ngan pu’un réh na’at penganeu’ néh éh tejeu’ kepéh. 7 Pinaa’ balei’ musit jin kelunan, bika’-bika’ balei’ nah. La’ah pu’un éh peka’o pinaa’ kelunan éh matai keluhat ngan irah éh paket péh. 8 Neu’ inah pu’un kemurung éh ja’au tong tana’ Samaria. 9 Tong leboo’ inah pu’un jah lakei’ ngaran néh Simon, béé kenin kelunan Samaria neu’ néh ngelimu’. Iah ngajung usah néh ngan bara’ akeu’ iteu’ éh pu’un penyukat. 10 Kekat kelunan tong leboo’ inah, irah éh si’ik pah avéé’ irah éh ja’au péh, pu’un réh mihau kekat ha’ éh benara’ néh mu’un. Ka’ ha’ réh, Lakei’ iteu’ iah ke’ éh penyukat Allah, éh benara’ réh, Penyukat Ja’au, ha’ réh. 11 Uban lebéé’ tenéh éh pu’un ngebéé kenin réh neu’ néh ngelimu’. Inah maneu’ réh mihau mu’un kekat ha’ tosok néh. 12 Bang hun irah ngelan ha’ tebaraa’ éh benara’ Pilipus tong Rengah Jian, tong Allah éh pengeja’au réh ngan mihau réh, ngan tong ngaran Yésus Kristus, pu’un réh batis, kenat péh irah lakei’ ngan irah redo péh. 13 Simon péh ngelan kepéh, ngan la’o néh batis mokoo’ éh ngan Pilipus, béé kenin néh na’at kekat penganeu’ Pilipus, penganeu’ éh pepoléng penyukat Tuhan ngan éh ngebéé kenin kelunan. 14 Hun irah lawah Tuhan tong leboo’ Yérusalem menéng rengah irah Samaria pu’un ngelan tong ha’ tebaraa’ Allah, pu’un réh nyohoo’ Péterus rawah Yohanes tai ngan réh kepéh. 15 Hun roh avéé’ tong réh, pelapah roh sebayang dokoo’ kelunan Samaria éh lepah ngelan omok alaa’ Sahéé’ Ni’ai. 16 Uban bé’ jak réh pu’un alaa’ Sahéé’ Ni’ai, uban pu’un réh batis lem ngaran Tuhan Yésus awah. 17 Boh Péterus rawah Yohanes mapai ojoo’ roh bau réh ngan irah kepéh pu’un alaa’ Sahéé’ Ni’ai. 18 Hun Simon nah na’at Sahéé’ Ni’ai pu’un tong réh tovoo’ rawah mapai ojoo’ roh bau réh nah, pelapah éh juk mena’ rigit ngan roh, 19 ka’ ha’ néh, Jian koh mena’ penyukat inah ngan ké’ kepéh, dokoo’ tong séé’-séé’ ku’ mapai ojoo’ ké’ omok réh alaa’ Sahéé’ Ni’ai kepéh, ha’ néh. 20 Bang ka’ ha’ Péterus ngan néh, Rigit ngan usah ko’ matai tai luten awah éh, uban ko’ seruh penyukat Tuhan omok nelih, bé’ éh omok nelih, pengena’ Néh awah éh. 21 Bé’ ke’ omok alaa’ ineu’-ineu’ péh, bé’ ke’ omok kereja’ pemung ngan améé’, uban kenin ko’ bé’ teneng tong jumen Allah. 22 Jian ke’ piso jin penyala’ ko’, ngan sebayang menyat Allah mega’ penyala’ ko’ uban kekat penyeruh ko’ sala’. 23 Uban kejam ké’ kenin ko’ nah sala’ mu’un ngan keripen lem kesa’at, uban ko’ kelih juk alaa’ penyukat awah. 24 Ka’ ha’ Simon kepéh, Jian koh sebayang menyat Tuhan pika ku’, mai pu’un ineu’-ineu’ barei’ éh benara’ koh ri’ teneng tong akeu’ da’, ha’ néh. 25 La’o Péterus ngan Yohanes bara’ ha’ tebaraa’ Tuhan ngan réh, ngan bara’ kepéh tong éh kejam roh lem kenin roh tengéé’, moléé’ lah roh tai Yérusalem kepéh. Belah jalan roh lakau moléé’ nah, pu’un roh bara’ Rengah Jian tong kuraa’ leboo’ tong tana’ Samaria. 26 La’ah pu’un jah meliket Tuhan pané ngan Pilipus, ka’ ha’ néh, Tai ke’ jin tana’ Samaria nah masek aweng jalan ja’au jin Yérusalem tai leboo’ Gasa tong tana’ Yudea, ha’ néh. La’ah jalan éh benara’ néh inah tong ahang tana’ awah. 27 Pelapah Pilipus betéé’ ke’ néh tai. La’ah jah kelunan sohoo’ éh tuai jin tana’ Etiopia, lakau kivu jalan totoo’ inah ke’ néh moléé’ kepéh. Lakei’ inah jah kelunan éh ja’au, éh kereja’ mavaa’ kekat rigit éh anah Raja-Kuin tong tana’ Etiopia, ngaran Kuin nah Kandake. 28 Lakei’ inah lepah tai Yérusalem ke’ néh seva’ Allah, ngan hun inah pu’un éh moléé’ kepéh jalan kerita éh nihit kuda’. Lem néh lakau nah, pu’un éh purung surat Nabi Yesaya. 29 La’ah Sahéé’ Ni’ai pané ngan Pilipus, ka’ ha’ néh, Jian ke’ tai déhéé’ kerita inah, ha’ Sahéé’. 30 Nekedeu’ Pilipus tai sinah, la’ah nenéng néh ha’ lakei’ ja’au inah purung surat Yesaya nah. Pu’un Pilipus neteng éh ka’, Kineu’, kejam ko’ ha’ éh penurung ko’ nah kei, ha’ néh. 31 Ka’ ha’ lakei’ ja’au mipa éh, Kineu’ ku’ omok ulak jam éh hun kelunan bé’ pu’un bara’ éh ngan ké’, ha’ néh. Boh éh tebai Pilipus masek lem kerita nah ke’ néh mokoo’ ngan néh. 32 Ka’ ha’ éh penurung néh iri’, Iah pu’un nihin réh barei’ domba éh juk penatai réh. Barei’ domba éh bé’ kahut tovoo’ réh memerit bulun néh, kenat péh Iah, bé’ Iah pané. 33 Irah pekenyaa’ Éh, ngan bé’ irah petuneng Éh mu’un. Bé’ pu’un kelunan éh omok bara’ tong anak-ayam Néh vam, uban urip néh tong tana’ lepah béé. 34 Kenat ha’ éh penurung lakei’ ja’au nah. La’ah ka’ ha’ lakei’ ja’au ngan Pilipus. Séé’ éh benara’ nabi Yesaya kenat? Kineu’, ha’ néh maneu’ usah néh tengéé’? Kineu’, ha’ néh maneu’ irah éh jah kei, ha’ néh. 35 Pelapah Pilipus nebaraa’ éh, éh bu’un néh iah nebaraa’ éh jin tebaraa’ éh penurung néh iri’, pah avéé’ tong Rengah Jian tong Yésus. 36 Lem roh lakau nah, avéé’ roh tong baa’, boh lakei’ ja’au nah bara’ ngan Pilipus, ka’ ha’ néh, Pu’un baa’ siteu’ ne’, kineu’, pu’un ineu’ éh ké’ bé’ tekep batis kejam ko’, ha’ néh. 37 Ka’ ha’ Pilipus ngan néh, Hun ko’ ngelan ngan kekat kenin ko’, omok ke’ batis, ha’ néh. Ka’ ha’ lakei’ ja’au kepéh, Pu’un ku’ ngelan Yésus Kristus adang Néh Anak Allah, ha’ lakei’ ja’au nah. 38 Boh éh nyohoo’ kerita nah mokoo’. Tuhun roh lem baa’ boh Pilipus ngebatis éh. 39 La’o roh taket jin baa’, Sahéé’ Tuhan pepiso Pilipus jin lakei’ ja’au nah. Bé’ lakei’ ja’au nah jam Pilipus lah, bang moléé’ éh ngan murung mu’un-mu’un kenin néh. 40 Tovoo’ Pilipus tong leboo’ ja’au Asdod éh déhéé’ baa’ banget. Lakau éh tong siget leboo’ réh ke’ néh bara’ Rengah Jian tong Yésus ngan réh, pah avéé’ néh avéé’ tong Kaisarea leboo’ ja’au déhéé’ baa’ banget.
91 La’ah kelebéé’ inah Saulus too keto mi’ah ngan irah éh ngelan tong Tuhan. Tai éh tavin Imam éh pengeja’au kekat imam, 2 ke’ néh menyat surat jin néh ke’ néh mihin éh tai lamin sebayang irah Yahudi tong leboo’ ja’au Damsyik tong tana’ Siam, dokoo’ hun néh avéé’ sitai iah pu’un penyukat omok ngamit irah éh kivu sebayang Tuhan Yésus, irah lakei’ ngan irah redo péh, ke’ néh mihin réh tai Yérusalem. 3 Lem néh lakau nah, hun néh danii’ déhéé’ leboo’ Damsyik, tioo pu’un ada jin langit peséng tutuh néh. 4 Tioo pesut éh kuba’ tong tana’, pu’un jah ha’ nenéng néh éh bara’ ngan néh ka’, Saulus, Saulus, uban ineu’ ke’ peketa Akeu’, ha’ Néh. 5 Boh Saulus neteng éh ka’, séé’ ke’ néh, ha’ néh. Ka’ ha’ Tuhan ngan néh kepéh, Akeu’ iteu’ Yésus éh peketa ko’ nah. 6 Betéé’ ke’ tai leboo’ inah, hun ko’ avéé’ sitai da’, boh éh bara’ ineu’ éh tekep ko’ maneu’, ha’ Tuhan ngan néh. 7 Kelunan éh kivu Saulus ri’, nekedéng kelem awah, nenéng réh ha’ inah, bang bé’ pu’un jah usah péh ta’an réh. 8 Betéé’ Saulus pekang maten néh, bang bé’ éh omok na’at ineu’-ineu’ péh, bé’ pu’un ta’an néh. Boh réh majak éh tai leboo’ Damsyik. 9 Teleu’ dau kelebéé’ néh bé’ éh omok na’at, bé’ iah kuman ngan bé’ iah sapét mesep péh. 10 Pu’un jah kelunan éh ngelan tong Tuhan Yésus tong leboo’ Damsyik, ngaran néh Ananias. Tuhan pané ngan néh barei’ lem pengeta’an néh, ka’ ha’ Néh, O Ananias, ha’ Néh. Ha’ Ananias kepéh, Akeu’ itut de’ Tuhan, ha’ néh. 11 Ka’ ha’ Tuhan ngan néh kepéh, jian ke’ lakau tai jalan totoo’, ngaran jalan inah, Jalan Pejek, masek tong lamin Yudas pitah jah kelunan ngaran néh Saulus éh pu’un jin leboo’ Tarsus. Hun iteu’ pu’un éh sebayang, 12 ngan pu’un tong ta’an néh barei’ hun néh nyupin, bang bé’ éh nyupin. Éh ta’an néh nah, inah éh, barei’ jah kelunan tuai tavin éh ke’ néh mapai ojoo’ néh tong néh ke’ néh omok na’at kepéh, ngaran kelunan éh ta’an néh nah, Ananias, ha’ Tuhan ngan Ananias. 13 Ka’ ha’ Ananias kepéh, O Tuhan, pinaa’ kelunan lepah bara’ ngan ké’ tong kesa’at kelunan inah, tong kekat éh neu’ néh tong kelunan éh ngelan tong Ka’au’ éh pu’un tong Yérusalem. 14 Ngan hun iteu’ kepéh inah iah tuai siteu’ tong leboo’ Damsyik mihin surat jin irah pengeja’au imam ke’ néh pu’un penyukat maneu’ kekat kelunan éh sebayang lem ngaran Ko’, ha’ Ananias ngan Tuhan. 15 Ka’ ha’ Tuhan ngan néh kepéh, Jian ke’ tai tavin éh, uban pu’un Ku’ lepah ngevéléé’ éh ke’ néh bara’ ngaran Ké’ belah kelunan éh tengéé’ pohoo’, kenat péh tong irah éh raja’, avéé’ tong pohoo’ Yahudi kepéh. 16 Akeu’ tengéé’ juk pepoléng kekat pengeketa éh juk avéé’ tong néh neu’ ngaran Ké’, ha’ Tuhan ngan Ananias. 17 Pelapah Ananias tai masek tong lamin Yudas ke’ néh mapai ojoo’ néh bau Saulus, ka’ ha’ néh ngan néh, O padéé’ ké’ Saulus, Tuhan éh nyohoo’ ku’ tuai siteu’, Yésus éh ta’an ko’ tong jalan totoo’ rai de’, Iah éh nyohoo’ ku’ tuai dokoo’ ko’ omok na’at kepéh, ngan dokoo’ ko’ omok penoo’ neu’ Sahéé’ Ni’ai, ha’ néh. 18 Tioo pu’un barei’ seléé’ rai pega’ jin maten Saulus, tioo omok éh na’at kepéh. Betéé’ éh ke’ néh tioo batis, 19 Ngan la’o néh kuman boh éh gahang kepéh. La’o inah mokoo’ Saulus tong leboo’ Damsyik, duah teleu’ dau awah pemung ngan irah éh ngelan tong Tuhan, éh pu’un tong leboo’ Damsyik nah. 20 Tai éh tong lamin sebayang Yahudi ke’ néh bara’ Yésus ngan réh, ka’ ha’ néh, Yésus nah iah ke’ éh Anak Allah, ha’ néh. 21 Béé kenin kekat réh éh menéng ha’ néh kenat, ka’ ha’ réh, Kineu’ lakei’ iteu’, bé’ éh iah éh mematai kelunan tong Yérusalem éh tebai tong ngaran Yésus rai kei? Kineu’, bé’ éh iah éh tuai siteu’ ke’ néh juk ngamit réh ke’ néh mihin réh tai tavin irah pengeja’au imam rai kei? Ha’ réh. 22 Pu’un Saulus nebaraa’ réh jaa’ néh lebéé’ jaa’-jaa’ néh éh gahang mu’un nebaraa’ réh. Pu’un éh nyopéé’ irah Yahudi éh mokoo’ tong leboo’ Damsyik uban néh bara’ lenaa’ mu’un, adang Yésus nah Iah ke’ éh Kristus. 23 Lebéé’ si’ik la’o inah kepéh, pu’un irah Yahudi petipun ke’ réh pakat pitah jalan juk mematai Saulus. 24 Bang pu’un kelunan éh jah bara’ ngan Saulus tong réh juk maneu’ éh. Siget dau ngan siget merem irah Yahudi mavaa’ tong kekat usit leboo’ ke’ réh juk mematai éh. 25 Bang tong jah merem pu’un irah éh kivu Saulus alaa’ éh lem jalan éh barei’ ingen rai ke’ réh polo éh jin giwang tapé kera’ ketai. 26 Lakau Saulus tai leboo’ Yérusalem kepéh ke’ néh juk mokoo’ ngan irah éh ngelan tong Tuhan sinah. Bang medai réh éh, bé’ irah ngelan iah pu’un ngelan Tuhan Yésus kepéh. 27 Bang pu’un Barnabas nolong Saulus ngan mihin éh tavin irah lawah Tuhan ke’ néh bara’ tong kekat pengelakau Saulus lepah nah. Pu’un éh bara’ kepéh tong kekat éh pu’un hun Saulus pu’un na’at Tuhan, ngan tong kekat éh benara’ Tuhan ngan néh, ngan bara’ kepéh tong jalan Saulus tai nebaraa’ irah tong Damsyik tong ngaran Yésus ngan makang kenin. 28 La’o inah Saulus mokoo’ ngan réh sinah. Lakau éh pah tipo Yérusalem, makang kenin néh nebaraa’ réh lem ngaran Tuhan Yésus. 29 Iah pané lenaa’ mu’un ngan pesakat ngan irah Yahudi éh tepiluh tong ha’ pohoo’ néh tengéé’ éh jam ha’ Yunani awah, bang irah pitah jalan ke’ réh juk mematai éh awah. 30 Hun kekat padéé’ néh jam éh kenat, pu’un réh patet éh tai Kaisarea, leboo’ kapan déhéé’ baa’ banget ke’ réh nyohoo’ éh tai leboo’ ja’au Tarsus kepéh. 31 Kenat péh jalan kekat sidang pah tipo tana’ Yudea ngan Galilia, ngan Samaria, pu’un pawah, ngan bé’ pu’un kelunan éh peketa réh kepéh. Bé’ lah réh keloo’ maneu’ kesa’at la’ah, jaa’-jaa’ néh réh gahang lem pengelan réh, ngan neu’ penyukat Sahéé’ Ni’ai pinaa’ kelunan ngelan kepéh. 32 Péterus lakau tipo lem leboo’ inah, ngan tong jah dau iah tai nepah irah éh ngelan tong Tuhan tong leboo’ Lida. 33 Sinah éh jam jah kelunan ngaran néh Aeneas, éh matai keluhat, bé’ éh omok gusii’, avéé’ ayah ta’un kelebéé’ néh kenat tenéh. 34 La’ah ka’ ha’ Péterus ngan néh, O Aeneas, Yésus Kristus éh peka’o ke’, betéé’ ke’, ko’ melen mak ko’ nah, ha’ néh. Tioo betéé’ lah éh. 35 Kekat kelunan jin leboo’ Lida ngan leboo’ Saron na’at éh pu’un ma’o kenat, boh réh ngelan tong Tuhan kepéh. 36 Tong leboo’ Yopé, leboo’ éh ja’au déhéé’ baa’ banget, pu’un jah redo éh ngelan tong Tuhan, ngaran néh Tabita. Ngaran néh dalem ha’ Yunani Dorkas, sin néh Payau. Kekat penganeu’ redo inah jian éh, ngelayau éh nolong kelunan kari. 37 Tovoo’ Péterus tai sinah nah, sakit redo inah tioo matai éh. Pu’un réh peroo’ patai néh ngan modoo’ éh tong lamin éh saa’ bau nah. 38 Leboo’ Yopé bé’ éh juu’ jin leboo’ Lida, hun irah jin Yopé éh ngelan tong Tuhan menéng rengah Péterus pu’un tong Lida, pu’un réh nyohoo’ duah usah tai pitah éh. Ka’ ha’ réh ngan néh, Rigah ke’ tuai da’, ha’ réh. 39 Pelapah Péterus tai kivu roh. Hun néh avéé’ tong lamin réh, pu’un réh mihin éh tai lamin éh saa’ bau nah. Kekat redo baleu’ nyikeu’ éh ngan mangaa’. Kekat kerayung ngan pakai éh neu’ Dorkas nah rai pu’un réh bara’ éh ngan néh. 40 La’ah Péterus nyohoo’ kekat kelunan musit jin lamin inah, boh éh ngejekuu’ lep néh ngan sebayang, la’o inah pupah éh na’at patai redo inah, ka’ ha’ néh, O Tabita, betéé’ ke’, ha’ néh. La’ah pekang maten redo inah, ngan hun néh na’at Péterus, pelapah menyun éh. 41 Boh Péterus ngamit ojoo’ néh ke’ néh petekedéng éh. Boh Péterus tebai kelunan éh ngelan tong Tuhan ngan tebai irah redo baleu’ iri’ kepéh, ke’ néh mena’ Dorkas éh lepah murip nah ngan réh. 42 La’ah rengah inah avéé’ tutuh leboo’ Yopé nah, ngan pinaa’ kelunan ngelan tong Tuhan kepéh. 43 Péterus mokoo’ tong Yopé lem kuraa’ kuraa’ dau pemung ngan jah kelunan ngaran néh Simon éh kereja’ néh ngaténg kulit ka’an.
101 La’ah tong leboo’ kapan Kaisarea pu’un jah kelunan ngaran néh Kornelius, éh pengeja’au jah ato seradu, jin peng seradu Rum, éh ngaran peng inah, Peng Italia. 2 Lakei’ inah gahang kivu sebayang, usah néh tengéé’ péh kenat péh irah panak néh seva’ Allah. La’ah ja’au mu’un pengena’ néh ngan kelunan Yahudi éh kari, ngan ngelayau éh sebayang ngan Allah. 3 Jah dau ngioo’ éh dau poké kuba’, pu’un tong ta’an néh, barei’ jah meliket Allah tuai tavin éh, O Kornelius, ha’ meliket nah. 4 Medai mu’un-mu’un éh na’at meliket nah. Ka’ ha’ néh ngan meliket nah, O lakei’ ja’au, ineu’ juk neu’ ko’, ha’ néh. Ka’ ha’ meliket nah kepéh, Kekat ha’ sebayang ko’ ngan kekat penganeu’ ko’ ngan kelunan kari, Allah lepah jam éh, ngan Iah juk mipa ha’ sebayang ko’. 5 Jian ke’ nyohoo’ kelunan tai leboo’ Yopé ngan tebai jah kelunan éh ngaran néh Simon bang éh nateng réh Péterus. 6 Pu’un éh mokoo’ tong lamin kelunan éh ngaran néh Simon, éh kereja’ néh ngaténg kulit ka’an, lamin inah déhéé’ baa’ banget, ha’ meliket nah. 7 La’o néh pané kenat piso éh. Boh Kornelius tebai duah kelunan sohoo’ éh kereja’ tong lamin néh, ngan jah usah seradu éh gahang sebayang éh pu’un mihau Kornelius. 8 Pu’un éh bara’ kekat éh ta’an néh nah ngan réh, ke’ néh nyohoo’ réh tai Yopé. 9 Barei’ sagam kepéh hun réh danii’ tong Yopé, Péterus taket tong lamin éh saa’ bau lamin nah ke’ néh sebayang tovoo’ dau pejek. 10 La’au éh juk kuman éh, ngan kelebéé’ réh petenup ka’an, pu’un tong ta’an néh, 11 barei’ langit pukap ngan barei’ jah livah éh ja’au éh petuhun réh jin langit tai tana’ palaa’ pat kelingen néh. 12 La’ah lem livah inah pinaa’ arong ka’an, pu’un torok, pu’un juhit péh. 13 La’ah pu’un jah ha’ éh bara’ ka’ ngan néh, O Péterus, jian ke’ mematai ka’an inah, ko’ kuman éh, ha’ néh 14 Bang ka’ ha’ Péterus, O Tuhan, bé’ akeu’ omok kenat, bé’ ku’ pu’un kuman ineu’-ineu’ éh kilin, ha’ Péterus. 15 Ka’ ha’ inah ngan néh kepéh, Ineu’-ineu’ kilin éh nebet Allah, mai ke’ juk mihau éh kepéh, ha’ néh. 16 Teleu’ koléé’ pu’un éh na’at éh kenat, la’o inah boh livah inah netéé’ tai langit kepéh. 17 Pu’un Péterus seruh tong kekat éh ta’an néh nah, ke’ néh juk jam sin néh. Lem néh to seruh tong inah, kelunan éh sohoo’ Kornelius nah neteng retek lamin Simon, ngan inah savéé’ réh tong lamin inah. Nekedéng réh tong usit tapé lamin inah, 18 ke’ réh neteng réh ka’, Kineu’, pu’un kelunan mokoo’ siteu’ éh ngaran néh Simon Péterus kei? ha’ réh. 19 Lem Péterus to seruh tong éh ta’an néh ri’, pu’un Sahéé’ Tuhan pané ngan néh, ka’ ha’ néh, Menéng ke’, pu’un teleu’ usah siteu’ éh pitah ke’. 20 Betéé’ ke’, tai ke’ tuhun kera’, mai ke’ medai kivu réh, uban Akeu’ éh nyohoo’ réh tuai rit, ha’ Sahéé’ Tuhan ngan néh. 21 Tioo tuhun Péterus ke’ néh tavin réh, ka’ ha’ néh, Akeu’ iteu’ néh éh penitah keh rit. Kineu’ keh tuai siteu’, ha’ néh. 22 Ka’ ha’ réh mipa éh, Pu’un mé’ tuai sohoo’ Kornelius éh pengeja’au mé’ Kornelius nah iah jah kelunan éh jian ngan éh seva’ Allah ngan éh senepah kekat kelunan Yahudi. Pu’un jah meliket Tuhan nyohoo’ éh tebai ke’ tai lamin néh, ke’ néh omok menéng ineu’-ineu’ éh juk benara’ ko’ ngan néh, ha’ réh ngan Péterus. 23 La’o inah Péterus tebai réh masek tong lamin néh ke’ réh mokoo’ ngan néh merem inah. Barei’ sagam kepéh tai éh kivu réh. Jelua’ padéé’ néh lem Tuhan jin Yopé kivu éh tai. 24 Dau rema sagam kepéh, inah savéé’ réh tong leboo’ ja’au Kaisarea. Kornelius mena savéé’ réh, pemung ngan kekat panak néh ngan lua’ néh, éh tenebai néh tenéh. 25 Hun Péterus juk masek tong lamin Kornelius, tuai éh ngejekuu’ lep néh déhéé’ gem Péterus ke’ néh sepah éh. 26 Boh Péterus metéé’ éh, ka’ ha’ néh ngan néh, nekedéng ke’, akeu’ péh kelunan pekua’ ka’au’ ke’ akeu’, kelunan éh sa’at awah, ha’ néh. 27 Tovoo’ Péterus masek tong lamin inah pané ngan Kornelius, pinaa’ kelunan éh petipun tong lamin inah. 28 Ka’ ha’ Péterus ngan réh, Ka’ah jam pu’un ha’ éh meta’ améé’ Yahudi tai pemung ngan kelunan éh tengéé’ pohoo’, bang pu’un Allah bara’ ngan ké’ bé’ tekep akeu’ bara’ jah kelunan péh sa’at ngan jelemih. 29 Kenat péh hun keh tebai akeu’ ri’, pelapah ku’ tuai. Ngan hun iteu’ inah akeu’ juk neteng keh, kineu’ éh keh tebai akeu’ tuai nah, ha’ néh. 30 Ka’ ha’ Kornelius mipa ha’ Péterus, Pat dau tenéh, ngioo’ éh dau poké kuba’, pu’un ku’ sebayang tong lamin ké’. Beleka’ pu’un jah usah nekedéng tong jumen ké’ ngan pakai néh mening mu’un, 31 ka’ ha’ néh ngan ké’, O Kornelius, kekat ha’ sebayang ko’ ngan kekat penganeu’ ko’ ngan kelunan kari, Allah lepah jam éh ngan Iah juk mipa ha’ sebayang ko’. 32 Jian ke’ nyohoo’ kelunan tai leboo’ Yopé tebai jah kelunan éh ngaran néh Simon, éh nateng réh Péterus. Pu’un éh mokoo’ tong lamin kelunan éh ngaran néh Simon, éh tukeng ngaténg kulit ka’an, lamin néh déhéé’ baa’ banget, kenat ha’ néh ngan ké’. 33 Inah akeu’ nyohoo’ kelunan tai tebai ke’, jian éh uban ko’ pu’un tuai. Hun iteu’ pu’un améé’ petipun siteu’ tong ta’an Allah ke’ mé’ juk menéng kekat ha’ éh sohoo’ Tuhan benara’ ko’ ngan mé’, ha’ néh. 34 Boh Péterus pané ngan réh kepéh, ka’ ha’ néh, Hun iteu’ kejam ké’ mu’un, bé’ Allah netah kenin tong kelunan. 35 Séé’-séé’ éh ngelan tong Néh ngan éh leko maneu’ sa’at pu’un éh ngepayoo’ kenin Tuhan, ngan Tuhan pu’un alaa’ éh, kenat péh pohoo’ Yahudi ngan irah éh tengéé’ pohoo’ péh. 36 Pu’un éh pané ngan pohoo’ Yahudi bara’ Rengah Jian ngan réh, rengah inah bara’ tunuk neu’ Yésus Kristus éh Tuhan kekat kelunan. 37 Ka’ah jam rengah tong Yésus Kristus, kelunan jin Nasaret rai, uban rengah inah lepah avéé’ tong siget tana’ pohoo’ Yahudi. Bu’un néh Rengah inah avéé’ tong tana’ Galilia, inah éh la’o Yohanes nebaraa’ kelunan tong jalan batis sahau rai. 38 Pu’un keh jam kepéh Allah mena’ Sahéé’ Ni’ai ngan penyukat Néh ngan Yésus. Pu’un Yésus lakau semah-semah péh ke’ Néh nolong kelunan ngan ngelepu irah éh keripen Sitan, uban Allah pu’un ngan néh. 39 Pu’un mé’ na’at kekat penganeu’ Néh tipo tana’ pohoo’ Yahudi ngan tong Yérusalem péh. Pu’un réh mematai éh tong kayeu’ salib, 40 bang tong keteleu’ dau pu’un Allah pebetéé’ éh jin patai Néh ngan pepoléng éh ngan kelunan kepéh. 41 Bang bé’ éh ta’an kekat kelunan béé, bang ngan améé’ awah éh kevéléé’ Tuhan ke’ mé’ omok bara’ tong kekat éh kejam mé’ tong Néh. La’o Néh pebetéé’ Tuhan pu’un mé’ kuman ngan mesep pemung ngan Néh. 42 Pu’un Éh nyohoo’ mé’ perengah Éh ngan kekat arong kelunan, ngan bara’ Iah éh kevéléé’ Allah ke’ Néh petuneng kekat kelunan, irah éh murip keto, kenat péh irah éh lepah matai. 43 Kekat nabi Tuhan sahau, pu’un réh bara’ tong Néh hun réh bara’, séé’-séé’ éh ngelan tong Yésus, omok Tuhan mega’ penyala’ réh neu’ penyukat ngaran Néh, ha’ Péterus ngan réh. 44 Lem Péterus to pané ngan réh, pu’un Sahéé’ Ni’ai tuhun tong kekat irah éh pu’un menéng ha’ néh inah. 45 La’ah irah Yahudi éh lepah ngelan tong Yésus, éh kivu Péterus jin leboo’ Yopé nah, béé kenin réh uban Tuhan mena’ Sahéé’ Ni’ai ngan kelunan éh tengéé’ pohoo’ péh. 46 Pu’un réh menéng ha’ réh pané lem kuraa’ arong ha’ éh tejeu’ ke’ réh ngajung Allah. La’ah ka’ ha’ Péterus ngan réh, 47 Pu’un réh alaa’ Sahéé’ Ni’ai pekua’ barei’ uleu’ iteu’ lepah rai. Hun néh kenat kineu’, tekep lu’ meta’ réh batis dalem baa’ kei? ha’ néh. 48 La’ah pu’un éh nyohoo’ réh batis lem ngaran Yésus Kristus. La’o inah irah nyohoo’ Péterus mokoo’ ngan réh duah teleu’ dau kepéh.
111 La’ah kekat lawah Tuhan ngan irah éh ngelan tong Tuhan éh pu’un tong tana’ Yudea, menéng rengah kelunan éh tengéé’ pohoo’ lepah ngelan ha’ tebaraa’ Allah kepéh. 2 Hun Péterus tai Yérusalem, irah éh kivu adet sunat pu’un réh juk pesunat kelunan éh tengéé’ pohoo’, boh réh maneu’ Péterus, 3 ka’ ha’ réh, ka’au’ péh pu’un ke’ mokoo’ tong lamin kelunan éh bé’ kivu adet sunat, ngan inah kepéh, pah avéé’ ko’ pu’un kuman ngan réh, ha’ réh maneu’ Péterus. 4 Boh Péterus bara’ tong kekat éh neu’ Tuhan belah irah éh tengéé’ pohoo’, jin bu’un avéé’ tong ga’ néh. 5 Ka’ ha’ néh, Pu’un ku’ sebayang tong leboo’ Yopé ngan pu’un ta’an ké’. Pu’un ku’ na’at barei’ livah éh ja’au, pu’un éh tuai jin langit petuhun palaa’ pat kelingen barei’ ja’an, avéé’ déhéé’ ké’. 6 Pu’un ku’ na’at lem néh, uban pinaa’ arong ka’an lem néh. Pu’un ka’an tana’, pu’un torok, pu’un juhit péh. 7 La’ah nenéng ké’ jah ha’ éh bara’ ngan ké’, ka’ ha’ néh, O Péterus, jian ké’ mematai ka’an inah, ko’ kuman éh, ha’ néh. 8 Bang ha’ ké’, O Tuhan, bé’ akeu’ omok kenat, bé’ ku’ pu’un kuman ineu’-ineu’ éh kilin, ha’ ké’ ngan néh. 9 La’ah pu’un éh pané kepéh ngan ké’, ka’ ha’ néh, Ineu’-ineu’ kilin éh nebet Allah, mai ke’ juk mihau éh kepéh, ha’ néh. 10 La’ah teleu’ koléé’ pu’un éh kenat, la’o inah boh livah nah netéé’ tai langit kepéh. 11 Tovoo’ inah péh pu’un teleu’ usah nekedéng tong usit lamin éh jalan ké’ mokoo’ nah, éh tuai sohoo’ réh jin leboo’ Kaisarea alaa’ ku’. 12 La’ah pu’un Sahéé’ Tuhan bara’ ngan ké’, ka’ ha’ Néh, Mai ke’ medai kivu réh, ha’ néh. Pu’un nem usah bakéh ké’ kivu ku’ tai leboo’ Kaisarea nah. Kekat mé’ pu’un masek tong lamin Kornelius. 13 Pu’un Kornelius tosok tong jalan néh na’at jah meliket nekedéng tong lamin néh éh bara’ ka’ ngan néh, Jian ke’ nyohoo’ kelunan tai leboo’ Yopé tebai jah kelunan éh ngaran néh Simon éh nateng réh Péterus. 14 Iah omok bara’ ha’ tebaraa’ ngan keh éh omok purip ke’, ngan kekat panak ko’ péh. Kenat ha’ meliket nah ngan Kornelius, ha’ Péterus. 15 Ka’ ha’ Péterus kepéh, Lem ké’ pané ngan réh, pu’un Sahéé’ Ni’ai tuhun tong réh pekua’ éh tong uleu’ sahau rai. 16 Boh ku’ nesen tong ha’ Tuhan éh benara’ néh rai, ka’ ha’ néh, Pu’un Yohanes ngebatis kelunan lem baa’, bang ka’ah juk benatis Sahéé’ Ni’ai, ha’ néh. 17 La’ah lenaa’ mu’un Allah pu’un mena’ Sahéé’ Néh ngan réh pekua’ éh na’ Néh ngan lu’ tovoo’ lu’ ngelan tong Tuhan Yésus Kristus lepah nah. Hun néh kenat kineu’ akeu’, omok akeu’ meta’ Tuhan mena’ Sahéé’ Néh ngan réh, ha’ néh. 18 Hun réh jam éh kenat, bé’ réh maneu’ éh kepéh, bang pu’un réh mejing Allah, ka’ ha’ réh, Hun néh kenat adang Allah maneu’ jalan ngan kelunan éh tengéé’ pohoo’ péh ke’ réh piso jin kesa’at réh ngan alaa’ urip éh maréng, ha’ réh. 19 La’ah uban Stepanus penatai réh ngan pu’un pengeketa éh ja’au mu’un neu’ kelunan éh maneu’ irah éh ngelan tong Tuhan Yésus, purat réh lakau tai kuraa’-kuraa’ tana’ kepéh. Jelua’ réh tai tana’ Penisia, jelua’ kepéh tai pulau Siprus, jelua’ kepéh tai leboo’ ja’au Antiokia tong tana’ Siria, ke’ réh nebaraa’ irah éh pohoo’ Yahudi. 20 La’ah jelua’ irah éh pu’un jin pulau Siprus ngan leboo’ Kirene éh déhéé’ baa’ banget, irah kepéh tai leboo’ Antiokia ke’ réh bara’ Rengah Jian tong Tuhan Yésus ngan irah éh pohoo’ Yunani. 21 La’ah penyukat Tuhan pu’un ngan réh avéé’ kelunan pinaa’ tavin Tuhan ngan ngelan tong Néh. 22 Hun sidang tong Yérusalem menéng rengah kelunan pinaa’ nah pu’un ngelan, boh réh nyohoo’ Barnabas tai Antiokia. 23 Hun néh avéé’ sitai ngan jam Allah mena’ pengejian Néh ngan réh, murung kenin néh. Pu’un éh nyohoo’ réh mihau ha’ tebaraa’ Tuhan lem kenin réh mu’un ngan petem dalem Tuhan. 24 La’ah Barnabas nah, kelunan éh jian, éh penoo’ neu’ Sahéé’ Ni’ai ngan éh sukup kenin lem pengelan néh. La’ah pinaa’ kepéh kelunan éh ngelan tong Tuhan. 25 La’o inah boh Barnabas tai tong leboo’ ja’au Tarsus, ke’ néh pitah Saulus. 26 Hun néh temeu’ ngan néh, boh éh mihin éh tai leboo’ Antiokia kepéh. Mokoo’ roh tong sidang Antiokia avéé’ jah ta’un ke’ roh nebaraa’ kelunan sinah. La’ah tong Antiokia nah, inah éh bu’un réh mateng ngaran kelunan éh ngelan tong Tuhan, kelunan Kristén. 27 Tovoo’ inah péh kuraa’ kelunan nabi jin Yérusalem, pu’un réh tai Antiokia. 28 La’ah jah usah jin belah ngaran néh Agabus, neu’ penyukat Sahéé’ Ni’ai pu’un éh nekedéng ke’ néh bara’ pu’un jah pengela’au éh ja’au mu’un juk pu’un pah tipo tana’ dat. La’ah pu’un la’au’ kenat lem raja’ Klaudius mihau réh sahau rai. 29 La’ah kekat kelunan éh ngelan tong Tuhan pekua’ kenin juk mena’ ineu’-ineu’ ke’ réh nolong padéé’ réh lem Tuhan éh mokoo’ tong tana’ Yudea. 30 Boh réh maneu’ éh kenat, ngan pekateu’ rigit inah kivu Barnabas rawah Saulus, ke’ réh mena’ ngan pengeja’au sidang tong Yérusalem.
121 La’ah sioo’ inah pu’un Raja’ Herodis peketa irah tong sidang. 2 Pu’un éh nyohoo’ kelunan ngulep ulun Yakub padéé’ Yohanes nah, palaa’ po’é. 3 Hun Herodis jam irah Yahudi jian kenin uban néh mematai éh kenat, boh éh nyohoo’ réh tai ngamit Péterus kepéh. Pu’un éh maneu’ kenat tovoo’ Dau Ja’au Roti éh bé’ pu’un tawan pekevat. 4 La’o réh ngamit Péterus nah, pu’un réh mihin éh tai lamin tutup, ke’ réh mena’ éh ngan pat tulat seradu éh pu’un pat usah dalem siget tulat inah, ke’ réh mavaa’ éh, uban Herodis seruh juk mena’ Péterus ngan kelunan Yahudi la’o Dau Ja’au Paska. 5 Uban kenat péh Péterus pu’un tong lamin tutup, bang irah sidang gahang mu’un réh sebayang ngan Allah tong néh. 6 La’ah tong merem teka dau Herodis juk mena’ Péterus ngan kelunan Yahudi, pegen éh belah duah seradu nah. La’ah usah néh kejeret réh tenéh palaa’ duah ratai, ngan pu’un kuraa’ kelunan kepéh éh mavaa’ usit tapé lamin tutup nah. 7 Tioo pu’un jah meliket Tuhan nekedéng sinah, ngan rema peséng lem lamin inah. La’ah meliket inah tepap tong pa’an Péterus ke’ néh peto’ot éh, ka’ ha’ meliket nah, Rigah ke’ to’ot, ha’ Néh. Tioo pega’ ratai jin ojoo’ Péterus. 8 Ka’ ha’ meliket nah kepéh, nyelirut ke’, ko’ alaa’ kasut ko’, tuai ke’ kivu akeu’, ha’ Néh. 9 Boh Péterus tai kivu éh kenat, bang bé’ jak Péterus jam hun néh pu’un éh kenat mu’un, ngan hun néh nyupin éh awah péh. 10 Lapah roh tong duah betah retek réh mavaa’ tong lamin tutup, avéé’ roh tong usit tapé daven nah, inah éh jalan kelunan masek tai leboo’ ja’au. Boh usit tapé inah péh pu’un pukap tengéé’, boh roh masek. Lakau roh masek jalan totoo’, boh meliket nah tioo piso jin Péterus. 11 Boh Péterus petavéé’ kenin kepéh, ka’ kelem néh, Hun iteu’ kejam ké’ kekat iteu’ pu’un kenat mu’un. Tuhan nyohoo’ meliket Néh tuai ke’ Néh ngelepu ku’ jin kamit Herodis, ngan ngelepu ku’ jin kekat kesa’at éh keneloo’ kelunan Yahudi, kelem néh. 12 Hun néh jam éh kenat, boh éh tai lamin Meriam éh tinen Yohanes, éh keruwah ngaran Yohanes nah, Markus. Tong lamin inah pinaa’ kelunan petipun sebayang. 13 Pu’un Péterus ngatong tong usit tapé, boh jah redo lemanai tuai, ke’ néh jam séé’ éh pu’un sinah, ngaran redo inah Rode. 14 Boh éh jam éh ha’ Péterus nah. Murung kenin néh, bé’ éh sakui mukap tapé, tioo nekedeu’ éh tai tavin irah pinaa’ éh petipun ri’, ke’ néh bara’ ngan réh, Péterus ine’ kei, ha’ néh. 15 Ka’ ha’ réh, ha’ ko’ kenyo ine’, ha’ réh. Bang redo inah bara’ éh mu’un de’ ke’. Boh réh bara’ kepéh, ka’ ha’ réh, meliket néh awah idat, ha’ réh. 16 Kelebéé’ réh pané kenat, Péterus nah ngatong-ngatong tapé nah. Hun réh mukap éh ta’an réh éh Péterus mu’un, béé mu’un-mu’un kenin réh. 17 La’ah iah mapat réh palaa’ ojoo’ néh ke’ néh nyohoo’ réh kelem awah, pelapah éh bara’ ngan réh tong jalan Tuhan ngelepu éh jin lamin tutup nah. Ka’ ha’ néh kepéh, Jian keh bara’ kekat rengah iteu’ ngan Yakub ngan kekat padéé’ lu’ lem Tuhan. La’o inah lakau éh tai jalan éh jah. 18 Hun dau rema, kekat seradu nah besau mu’un-mu’un réh, Kemah-kemah péh Péterus, kelem réh. 19 La’ah Herodis nyohoo’ réh tai pitah Péterus nah mu’un-mu’un, bang bé’ réh jam éh. Boh Herodis neteng irah seradu nah mu’un-mu’un, la’o inah boh éh nyohoo’ kelunan mematai seradu nah. Lakau Herodis piso jin tana’ Yudea tai leboo’ ja’au Kaisarea. 20 La’ah merek mu’un-mu’un raja’ Herodis ngan kelunan jin leboo’ Tirus ngan Sidon, la’ah pu’un réh pelamai kenin Blastus tenah ke’ néh omok kua’ kenin ngan réh uban lakei’ inah, iah éh pengeja’au tong lamin raja’ nah. Jin la’o inah boh réh tai menyat tunuk ngan Herodis, uban kekat penguman réh nelih jin tana’ raja’ nah. 21 La’ah lem jah koléé’ pu’un Herodis memakai pakai raja’, ke’ néh menyun tong nyun raja’ ke’ néh pané ngan kekat kelunan. 22 Bika’-bika’ kekat réh béé, ka’ ha’ réh, Bé’ éh kelunan awah éh pané ngan lu’, balei’ mu’un ine’, ha’ réh ngajung éh. 23 Tioo pu’un meliket Tuhan ngukum Herodis, uban néh bé’ ngajung Allah. La’ah matai éh kinan angat. 24 La’ah ha’ tebaraa’ Allah avéé’ tong kuraa’-kuraa’ tana’ kepéh. 25 Ma’o lah kereja’ Barnabas rawah Saulus, moléé’ roh jin Yérusalem ngan pu’un roh mihin Yohanes ngan roh, keruwah ngaran Yohanes nah Markus.
131 Tong sidang tong Antiokia pu’un, kuraa’ nabi ngan guru, inah éh, Barnabas rawah Simeon, éh keruwah ngaran Simeon nah, Kelunan Padeng, ngan Lukius éh jin leboo’ Kirene, ngan Menahem éh namung réh pemung ngan pengeja’au Herodis, ngan Saulus péh. 2 Tovoo’ irah seva’ Tuhan muruh sebayang ngan kelaset nah, pu’un Sahéé’ Ni’ai pané ngan réh, ka’ ha’ néh, Jian keh mena’ Barnabas rawah Saulus ngan Ké’, dokoo’ roh omok maneu’ kereja’ éh sohoo’ ké’ ngan roh, ha’ Néh. 3 La’o réh kelaset ngan sebayang nah, pu’un réh mapai ojoo’ réh bau roh ke’ réh nyohoo’ roh tai maneu’ kereja’ Tuhan. 4 La’ah uban Sahéé’ Ni’ai nyohoo’ rawah tai maneu’ kereja’ Tuhan, lakau Barnabas ngan Saulus jalan tana’ tai leboo’ Seleukia éh déhéé’ baa’ banget, ke’ roh lakau jin sinah kepéh jalan kapen tai pulau Siprus. 5 Hun roh avéé’ tong leboo’ Salamis tong pulau Siprus, boh roh bara’ ha’ tebaraa’ Allah lem kekat lamin sebayang Yahudi. Yohanes Markus péh pu’un ngan roh ngan nolong roh. 6 Lakau réh teleu’ nutuh pulau inah avéé’ leboo’ Papos éh tong pulau Siprus nah. Sinah réh temeu’ ngan jah kelunan Yahudi éh mihau balei’, ngaran néh Bar-Yésus, éh bara’ usah néh nabi, éh mu’un néh bé’ éh kenat. 7 Lakei’ inah pebakéh ngan Sergius Paulus, éh pengeja’au réh tong pulau inah, Sergius nah jam mu’un éh seruh. Pu’un Sergius tebai Barnabas ngan Saulus tuai ke’ roh omok bara’ ha’ tebaraa’ Allah ngan néh. 8 Bang lakei’ éh mihau balei’ nah, éh ngaran néh tong ha’ Yunani, Élimas, pu’un éh ngelawan roh ke’ néh juk mega’ pengeja’au nah jin pengelan néh tong Tuhan. 9 Boh Saulus éh nateng réh Paulus nah, éh penoo’ neu’ Sahéé’ Ni’ai, kepuh lakei’ éh mihau balei’ nah, 10 ke’ néh bara’ ngan néh, ka’ ha’ néh, Anak Sitan ka’au’, ka’au’ penoo’ neu’ kekat arong kesa’at awah, ka’au’ ngelawan tong kekat éh jian, ka’au’ juk maneu’ kekat ha’ Tuhan éh teneng malui ha’ kenyo awah. 11 Ukum Tuhan teneng tong ka’au’, bé’ ke’ omok na’at nawa lem kuraa’ kelebéé’ da’, ha’ Saulus. Pelapah Élimas jam barei’ avun kakap tetong merem tong néh, pupah éh keteu’-ketai pitah kelunan éh omok majak éh lakau. 12 Hun pengeja’au nah na’at éh pu’un kenat nah, pu’un éh ngelan, béé mu’un kenin néh menéng ha’ tebaraa’ Tuhan nah. 13 Lakau Paulus ngan rawah bakéh néh jin leboo’ Papos jalan baa’ banget ke’ réh tai Perga, leboo’ ja’au tong tana’ Pampilia. Hun réh avéé’ sinah boh Yohanes Markus petat jin rawah kepéh moléé’ tai Yérusalem. 14 Lakau Paulus rawah Barnabas kepéh jin Perga jalan tana’ tai Antiokia leboo’ ja’au tong tana’ Pisidia. Tovoo’ Dau Posot tai roh tong lamin sebayang Yahudi. 15 La’o réh purung Surat Musa ngan surat irah éh nabi Tuhan, irah pengeja’au tong lamin sebayang nah nyohoo’ kelunan tavin roh ke’ réh bara’ ka’, O padéé’, hun néh pu’un ha’ tebaraa’ éh omok ngereken kenin mé’ jian koh bara’ éh, ha’ réh. 16 Boh Paulus nekedéng ngan mapat réh, ka’ ha’ néh. O kekat padéé’ ké’ éh pohoo’ Yahudi, kenat péh ka’ah éh tengéé’ pohoo’ éh pu’un seva’ Allah, jian keh menéng ha’ ké’. 17 La’ah Allah éh kenelan kelunan Yahudi pu’un Éh ngevéléé’ tepun lu’, ngan ngeja’au réh hun réh ngabit irah tong tana’ Mesir sahau. Neu’ penyukat Néh éh ja’au pu’un Éh mihin réh piso jin tana’ Mesir rai. 18 La’ah kelebéé’ réh lakau tong tana’ pegawa nah pat poloo’ ta’un, pu’un Éh mihau réh ngan kebit kenin. 19 Pu’un Éh ngebéé tujuu’ arong pohoo’ kelunan tong tana’ Kana’an, ke’ Néh mena’ tana’ kelunan inah ngan irah éh anah nah, 20 Ngioo’ éh pat ato lemah poloo’ ta’un kelebéé’ irah Israel pu’un tana’ inah lah. La’o inah kepéh Tuhan mena’ réh kuraa’-kuraa’ kelunan éh jam petuneng réh, pah avéé’ lem pengurip nabi Samuel. 21 Ngan hun réh menyat jah raja’ jin Allah, pu’un Éh mena’ Saul anak Kis éh jin betah Benyamin ngan réh, ke’ néh omok raja’ réh, pat poloo’ ta’un kelebéé’ néh pu’un raja’ réh. 22 La’o Allah pepiso Saul nah, pu’un éh ngeja’au Daud ke’ néh omok raja’ réh kepéh. Ka’ ha’ Allah bara’ tong Daud nah, Akeu’ lepah alaa’ Daud anak Isai, jah kelunan éh payoo’ tong kenin Ké’, éh juk maneu’ kekat pengeloo’ Ké’, ha’ Allah. 23 La’ah jin betah Daud, pu’un Allah mena’ Yésus ngan pohoo’ Israel, ke’ Néh purip réh, pekua’ éh pejajii’ Néh lepah. 24 La’ah bé’ jak Yésus pu’un tuai, pu’un Yohanes nebaraa’ kekat kelunan éh pohoo’ Israel nyohoo’ réh piso jin kesa’at réh ngan batis. 25 Hun Yohanes danii’ juk ma’o jin kekat kereja’ néh, pu’un éh bara’ ngan kekat kelunan, ka’ ha’ néh, séé’ ku’ tu’ kunah ka’ah kei? Bé’ akeu’ tu’ Iah éh nena keh nah ne’. Adang Iah pu’un tuai la’o ké’ da’, ngan mega’ kasut jin gem Néh péh ku’ bé’ tekep, kenat ha’ Yohanes, ha’ Paulus nah. 26 Ka’ ha’ Paulus kepéh, O kekat tamen ngan kekat padéé’ éh anak-ayam Abraham, ngan kekat kelunan éh tengéé’ pohoo’ péh éh pu’un seva’ Allah, rengah tong jalan lu’ omok alaa’ urip, pu’un éh lepah avéé’ tong kekat uleu’ béé. 27 Uban kelunan éh mokoo’ tong Yérusalem ngan kekat pengoloo’ réh, bé’ réh jam Yésus juk purip réh, ngan bé’ réh nesen kekat ha’ lem surat Tuhan éh penurung réh siget Dau Posot. Bang pu’un réh pesukup kekat ha’ irah nabi neu’ réh pu’un ngukum Yésus. 28 Bé’ pu’un ineu’ éh tekep ke’ réh mematai Éh, bang pu’un réh nyohoo’ Pilatus ke’ néh nyohoo’ réh mematai Éh. 29 La’o réh maneu’ kekat éh benara’ réh lem surat Tuhan tong jalan réh maneu’ Yésus, boh réh petuhun éh jin kayeu’ salib ke’ réh modoo’ Éh lem tanem. 30 Bang pu’un Allah pebetéé’ Éh jin patai Néh, 31 ngan irah éh kivu Éh jin tana’ Galilia tai Yérusalem nah rai, pu’un réh na’at Éh lem kuraa’-kuraa’ dau kepéh, ngan hun iteu’ kepéh irah bara’ kekat éh ta’an réh nah ngan kekat pohoo’ Israel. 32 La’ah kenat éh ke’ améé’ tuai siteu’ ke’ mé’ juk bara’ Rengah Jian ngan ka’ah kepéh. Uban rengah iteu’ éh pejajii’ Allah ngan tepun lu’ rai, 33 pu’un Éh lepah pesukup éh ngan uleu’ éh anak-ayam réh kepéh, uban pu’un Éh pebetéé’ Yésus jin patai Néh. Barei’ ha’ éh lepah senurat lem surat Masmur tulat duah, ka’ éh. Ka’au’ éh Anak ké’, dau iteu’ Akeu’ bara’ ngan kekat kelunan Akeu’ éh Tamen Ko’, ha’ Néh. 34 La’ah tong Allah pebetéé’ Éh jin patai Néh ke’ Néh bé’ omok borok, pu’un Allah lepah bara’ ka’, Kekat éh pejajii’ ké’ ngan Daud tong penika ké’ ngan néh bé’ éh omok paléu, pu’un éh kenat avéé’ pelinguh, kenat péh penika ké’ tong ka’au’ kepéh, ha’ Néh. 35 Barei’ ha’ lem jah Masmur éh jah kepéh, ka’ éh, Bé’ Ka’au’ kejeraa’ Anak Ko’ Éh Ni’ai tai borok, ha’ Néh. 36 Pu’un Daud kivu pengeloo’ Allah kelebéé’ néh murip, bang matai éh, ngan tenanem réh éh ngepata kekat tepun néh, ngan pu’un éh borok. 37 Bang éh Allah pebetéé’ jin patai nah bé’ éh borok. 38 O kekat tamen ké’ ngan kekat padéé’ ké’, jian keh jam mu’un, jalan mega’ penyala’, inah éh lem ngaran Yésus éh benara’ mé’ ngan keh. 39 La’ah séé’-séé’ éh ngelan tong Yésus, pu’un éh pelepu jin kekat penyala’ néh. Neu’ néh kivu sohoo’ lem Surat Musa awah bé’ éh omok pelepu. 40 Uban néh kenat mavaa’ keh jian-jian, dai ka’ah pu’un barei’ ha’ éh lepah senurat lem surat irah nabi, ka’ ha’ réh. 41 O ka’ah éh lebuau, na’at keh. Tekep ka’ah mapah ngan matai, uban kekat penganeu’ Ké’ lem urip keh iteu’, bé’ keh ngelan éh. Mu’un péh kelunan bara’ éh lenaa’ mu’un ngan keh, bang bé’ keh ngelan éh. Kenat ha’ néh, ha’ Paulus nah. 42 Hun Barnabas rawah Paulus musit jin lamin sebayang nah, pu’un réh menyat roh tuai kepéh nebaraa’ réh tong Dau Posot migu maréng. 43 Musit réh béé-béé, pinaa’ kelunan Yahudi ngan kelunan éh tengéé’ pohoo’ éh ngabit sebayang réh, pu’un réh kivu Paulus ngan Barnabas. Pu’un roh pané ngan réh nyohoo’ réh murip petem lem pengelan tong Tuhan éh pika réh. 44 Avéé’ tong Dau Posot kepéh nah, kekat irah tong leboo’ inah petipun béé ke’ réh menéng ha’ tebaraa’ Tuhan. 45 Hun kelunan Yahudi na’at kelunan pinaa’ nah tai menéng ha’ tebaraa’ roh, leko réh na’at éh kenat, pu’un réh ngisaa’ ha’ tebaraa’ Paulus ke’ réh pekenyaa’ éh. 46 Bang Paulus ngan Barnabas makang kenin nebaraa’ réh, ka’ ha’ roh, Tekep ha’ tebaraa’ Tuhan pu’un benara’ mé’ ngan keh tenah. Bang uban keh pu’un bet éh awah, seleket keh bara’ bé’ keh keloo’ alaa’ urip éh pelinguh, inah améé’ juk piso jin keh tai nebaraa’ kelunan éh tengéé’ pohoo’ kepéh. 47 Uban pu’un Tuhan nyohoo’ améé’ nebaraa’ éh kenat, ka’ ha’ Néh, Akeu’ maneu’ keh barei’ rema tong kekat kelunan éh tengéé’ pohoo’, dokoo’ keh mihin kekat kelunan pah tipo tana’ alaa’ urip. Kenat ha’ Néh ngan mé’. 48 Hun irah éh tengéé’ pohoo’ jin pohoo’ Yahudi menéng ha’ roh kenat, murung kenin réh. Pu’un réh mejing Tuhan uban ha’ tebaraa’ Néh. Kekat kelunan éh kevéléé’ Tuhan ke’ réh alaa’ urip éh pelinguh, pu’un réh ngelan tong néh. 49 La’ah pu’un ha’ tebaraa’ Tuhan avéé’ tong kuraa’-kuraa’ leboo’ kepéh. 50 Bang pu’un irah Yahudi punyat kenin irah éh pengeja’au tong leboo’ inah, kenat péh réh punyat kenin kuraa’ redo éh maren, éh bé’ pohoo’ Yahudi bang éh kivu adet sebayang réh ngan éh seva’ Allah. Inah réh punyat kenin kelunan ke’ réh peketa Paulus ngan Barnabas ngan bet roh jin leboo’ inah. 51 Boh roh nepaga’ agaa’ tana’ jin gem roh, seleket roh bara’, irah bé’ keloo’ alaa’ ha’ tebaraa’ roh. Lakau roh kepéh tai leboo’ Ikonium. 52 La’ah kekat kelunan tong Antiokia éh ngelan tong Tuhan pu’un réh penoo’ neu’ Sahéé’ Ni’ai ngan murung kenin réh.
141 La’ah kenat péh hun Paulus rawah Barnabas pu’un tong leboo’ Ikonium éh leboo’ kapan. Tai roh tong lamin sebayang Yahudi ke’ roh nebaraa’ réh lenaa’ mu’un, avéé’ pinaa’ kelunan Yahudi ngan pinaa’ kelunan éh tengéé’ pohoo’ pu’un ngelan. 2 Bang kelunan Yahudi éh bé’ keloo’ ngelan tong Yésus, pu’un réh punyat kenin kelunan éh tengéé’ pohoo’ ke’ réh maneu’ kelunan éh ngelan nah. 3 Lebéé’ roh mokoo’ tong leboo’ inah, bara’ ha’ tebaraa’ Tuhan ngan makang kenin. Tuhan pekelenaa’ kekat éh benara’ roh tong penika Néh adang néh teneng, neu’ Néh mena’ penyukat Néh ngan roh, ke’ roh omok maneu’ pinaa’ arong penganeu’ éh ngebéé kenin kelunan. 4 Petengéé’ kenin irah tong leboo’ inah, jelua’ réh alaa’ tai saa’ irah Yahudi, jelua’ kepéh alaa’ tai rawah lawah nah. 5 La’ah kelunan éh tengéé’ pohoo’ jin pohoo’ Yahudi, pemung ngan kelunan éh pohoo’ Yahudi, ngan pengeja’au réh, pekua’ kenin réh juk maneu’ rawah lawah ngan memateu’ roh. 6 Hun roh jam réh juk maneu’ roh kenat, kelap roh tai Listra ngan Derbe leboo’ ja’au tong tana’ Likaonia, pu’un roh lakau tai siget leboo’ tong tana’ inah kepéh, 7 ke’ roh bara’ Rengah Jian tong Yésus ngan réh. 8 La’ah tong leboo’ Listra pu’un jah kelunan éh mokoo’ awah, uban néh paket gem jin lohoo’ néh, bé’ éh omok lakau. 9 La’ah pu’un éh menéng ha’ tebaraa’ Paulus. La’ah Paulus na’at éh, kejam néh lakei’ inah pu’un pengelan ke’ néh omok ma’o. 10 Boh Paulus kepuh éh, ke’ néh pané ngan néh ngan ja’au ha’, ka’ ha’ néh, Jian ke’ nekedéng pejek, ha’ néh. Tioo betéé’ éh ngan lakau. 11 Hun kelunan pinaa’ na’at Paulus peka’o éh kenat, pu’un réh bika’ lem ha’ Likaonia, éh ha’ pohoo’ réh, ka’ ha’ réh, Pu’un balei’ lepah ngepaléu usah néh pekua’ layan kelunan ngan pu’un éh tuai ngan lu’, ha’ réh. 12 Uban réh seruh Barnabas rawah Paulus nah balei’, irah ngeliwah ngaran roh ka’, Barnabas nah Seus, ngan Paulus nah Hermes. 13 Lakei’ éh jam dayung, éh kivu balei’ Seus, lamin butun nah pu’un tong usit leboo’ nah. Iah ngan irah pinaa’ juk mena’ pengena’ réh ngan Barnabas rawah Paulus, pekua’ barei’ réh mena’ pengena’ ngan balei’. Uban kenin néh juk mihin kelunan pinaa’ peliwa Barnabas rawah Paulus palaa’ lakin sapé’ ngan anyam bunga’ nah. 14 Hun Barnabas rawah Paulus jam réh juk maneu’ éh kenat tong roh, besau kenin roh, pelapah roh mejéé’ pakai roh ngan tioo nekedeu’ tai kelunan pinaa’ nah. Pu’un roh bika’, ka’ ha’ roh, 15 Uban ineu’ keh maneu’ iteu’? Amo iteu’ péh pekua’ ka’ah ke’ mo. Amo tuai dokoo’ mo bara’ Rengah Jian ngan keh, dokoo’ keh omok piso jin kekat éh bé’ omok purip keh iteu’, dokoo’ keh omok tavin Allah éh murip, éh pu’un suai langit ngan tana’ ngan baa’ banget ngan kekat éh lem néh. 16 Hun lepah rai pu’un Éh kejeraa’ kekat arong kelunan kivu kenin réh tengéé’. 17 Na’ péh éh kenat, bé’ éh bé’ pu’un telana’ éh bara’ tong Néh, uban kekat penganeu’ Néh éh jian, inah éh bara’ tong Néh. Pu’un retek Néh maneu’ taa’ ke’ Néh purip kekat buaa’ éh nena’ Néh ngan uleu’. Pu’un éh mena’ kekat arong penguman ngan lu’, ngan pu’un éh pepenoo’ kenin lu’ neu’ kekat kemurung Néh, ha’ roh ngan réh. 18 Na’ péh roh pané kenat, si’ik awah la’ah réh bé’ peliwa roh. 19 La’ah tuai kuraa’ kelunan Yahudi jin leboo’ Antiokia tong tana’ Pisidia ngan jin leboo’ Ikonium péh, éh punyat kenin kelunan pinaa’ nah kepéh ke’ réh memateu’ Paulus. Pu’un réh mihit éh musit jin leboo’ inah, uban réh seruh éh matai. 20 Bang pu’un kelunan éh ngelan tong Tuhan nekedéng tutuh néh, lem réh nekedéng kenat, betéé’ éh tai tong leboo’ inah kepéh. Barei’ sagam Paulus rawah Barnabas tai leboo’ Derbe. 21 La’ah Paulus rawah Barnabas pu’un bara’ Rengah Jian ngan irah leboo’ Derbe, ngan pu’un pinaa’ kelunan ngelan tong Tuhan kepéh sinah. La’o inah moléé’ roh kepéh tai leboo’ Listra ngan Ikonium ngan Antiokia tong tana’ Pisidia. 22 Pu’un roh ngereken kenin kekat kelunan éh ngelan tong Tuhan ngan nyohoo’ réh gahang lem pengelan réh. Ka’ ha’ roh, Adang lu’ juk teneng kuraa’ arong penusah kelu’ omok tai lem nihau Tuhan, ha’ roh. 23 La’ah pu’un roh ngevéléé’ kelunan éh omok maneu’ kereja’ pelayan tong siget sidang. La’ah kelaset roh sebayang, mejai kekat réh béé ngan Tuhan éh kenelan réh. 24 Lakau roh tong tana’ Pisidia, pah avéé’ tong tana’ Pampilia. 25 Pu’un roh bara’ ha’ tebaraa’ Tuhan tong leboo’ Perga, la’o inah lakau kepéh roh tai leboo’ Atalia, 26 ngan jin sinah kepéh boh roh lakau jalan kapen moléé’ tai Antiokia sidang éh mejai roh ngan Tuhan lepah nah ke’ Allah petubo ngan mihau roh kelebéé’ roh maneu’ kereja’ Néh éh barei’ neu’ roh inah. 27 Hun Paulus rawah Barnabas avéé’ tong Antiokia pu’un roh petipun ngan irah tong sidang inah, ke’ roh bara’ tong jalan Allah pu’un nolong roh, ngan mukap jalan ke’ kelunan éh tengéé’ pohoo’ omok ngelan tong Yésus. 28 Lebéé’ roh mokoo’ tong Antiokia pemung ngan kekat kelunan éh ngelan tong Tuhan.
151 La’ah pu’un kelunan jin tana’ Yudea tai Antiokia ke’ réh nebaraa’ irah éh ngelan sinah. Ka’ ha’ réh, Hun keh bé’ sunat kivu sohoo’ lem Surat Musa, bé’ keh omok alaa’ urip dalem Yésus, ha’ réh. 2 La’ah tengéé’ kenin Paulus rawah Barnabas jin kenin irah. Pesakat mu’un roh ngan réh. Uban néh kenat pu’un réh ngevéléé’ Paulus ngan Barnabas ngan kuraa’ kelunan éh jah jin belah réh, ke’ réh nyohoo’ réh tai Yérusalem tavin kekat lawah Tuhan ngan irah pengeja’au sidang ke’ réh neteng irah kepéh. 3 Uban irah sidang nyohoo’ réh kenat, lakau réh tai Yérusalem. Belah jalan réh nah, tai réh tong tana’ Penisia ngan tana’ Samaria ke’ réh bara’ tong jalan kelunan éh tengéé’ pohoo’ pu’un piso jin kesa’at réh ngan ngelan tong Tuhan kepéh. Hun réh jam éh kenat, murung mu’un-mu’un kekat irah éh ngelan tong Tuhan. 4 Hun Paulus réh teleu’ Barnabas avéé’ tong Yérusalem, pu’un irah sidang ngan irah lawah Tuhan ngan kekat pengeja’au sidang alaa’ réh ngan jian kenin. La’ah pu’un réh teleu’ bara’ tong jalan Allah pu’un nolong réh lepah nah. 5 Bang pu’un jelua’ irah Yahudi éh kivu adet Parisi éh ngelan tong Tuhan Yésus, nekedéng ke’ réh pané. Ka’ ha’ réh, Tekep pesunat kekat kelunan inah ngan nyohoo’ réh kivu sohoo’ lem Surat Musa, ha’ réh. 6 Kekat lawah Tuhan ngan irah pengeja’au sidang petipun ke’ réh seruh tong kekat inah kepéh. 7 Lebéé’ irah pepané ngan peteteng tong inah, boh Péterus nekedéng ke’ néh pané ngan réh, ka’ ha’ néh, O kekat tamen ngan kekat padéé’ ké’, ka’ah jam Allah pu’un ngevéléé’ akeu’ jin belah keh lepah rai, dokoo’ ké’ omok tai bara’ Rengah Jian ngan kelunan éh tengéé’ pohoo’ jin pohoo’ Yahudi dokoo’ réh omok menéng ngan ngelan kepéh. 8 La’ah Allah éh jam kenin kekat kelunan, pu’un Éh pekelenaa’ adang Néh keloo’ kelunan éh tengéé’ pohoo’ alaa’ urip Néh, neu’ Néh mena’ Sahéé’ Ni’ai ngan réh, pekua’ éh na’ Néh ngan uleu’ rai. 9 Bé’ éh tengéé’ ke’ penganeu’ Néh ngan uleu’, tengéé’ ke’ éh neu’ Néh ngan irah, bang Iah mega’ penyala’ lu’ béé neu’ pengelan lu’ tong Iah awah. 10 Hun néh kenat, uban ineu’ keh ngelawan Allah ngan nyohoo’ réh barei’ bii’ éh bahat hun tepun lu’ ngan usah lu’ tengéé’ péh bé’ omok bii’ éh rai. Hun néh kenat uban ineu’ keh nyohoo’ réh bii’ éh. 11 Hun uleu’ ngelan adang lu’ omok alaa’ urip neu’ penika Tuhan Yésus awah, kenat péh tong irah éh tengéé’ pohoo’ kepéh, ha’ Péterus. 12 Kekat kelunan pinaa’ nah mokoo’ kelem menéng ha’ Barnabas rawah Paulus bara’ tong kekat jalan Allah nolong roh maneu’ pinaa’ arong penganeu’ belah kelunan éh tengéé’ pohoo’, éh pekelenaa’ penyukat Tuhan ngan éh ngebéé kenin kelunan. 13 La’o rawah pané, boh Yakub pané kepéh, ka’ ha’ néh, O kekat pengeja’au ngan kekat padéé’ ké’, jian keh menéng ha’ ké’. 14 Pu’un Simon bara’ tong jalan Allah tebai kelunan éh tengéé’ pohoo’ ke’ Néh ngevéléé’ kuraa’ kekat éh omok anah Nah. 15 La’ah kekat iteu’ pu’un éh pekua’ éh benara’ nabi Tuhan sahau, ka’ ha’ réh, 16 La’o iteu’ Akeu’ juk tuai kepéh, ha’ Tuhan. Lamin Daud éh lepah kuba’, Akeu’ juk mejek éh maréng kepéh. Ngan éh lepah tegarai, Akeu’ juk tipun éh kepéh, ngan pepejek éh kepéh. 17 Kekat kelunan éh tengéé’ pohoo’ pu’un réh juk pitah Tuhan kepéh, inah éh, kekat pohoo’ éh tenebai Ké’ dokoo’ réh omok anah Ké’. 18 Kenat ha’ Tuhan bara’ ngan kelunan jin bu’un sahau. 19 Ka’ ha’ Yakub kepéh, éh seneruh ké’, mai lu’ petusah kelunan éh tengéé’ pohoo’ éh pu’un ngelan ngan kivu Allah. 20 Bang jian lu’ nyurat jah surat meta’ réh mai réh kuman ka’an éh kenilin éh pengena’ kelunan ngan butun, ngan mai réh petuyang, mai réh kuman ka’an éh matai nahat réh batok awah, ngan mai réh kuman dahaa’. 21 Uban lepah lebéé’ tenéh siget Dau Posot pu’un kelunan purung ha’ tebaraa’ lem Surat Musa tong lamin sebayang Yahudi, ha’ Yakub ngan réh. 22 Boh irah lawah Tuhan ngan pengeja’au sidang, ngan irah sidang péh seruh, jian réh ngevéléé’ kelunan éh omok kivu Paulus rawah Barnabas tai Antiokia kepéh. Boh réh ngevéléé’ Yudas, éh keruwah ngaran néh Barsabas, rawah Silas, inah éh kenelan kekat irah sidang. 23 Pu’un réh pekateu’ surat jalan rawah, ka’ ha’ lem surat inah, Surat iteu’ jin lawah Tuhan ngan jin pengeja’au sidang ngan jin kekat améé’ padéé’ keh siteu’. Tabi’ ngan kekat padéé’ dalem Tuhan éh tengéé’ pohoo’ éh mokoo’ tong leboo’ Antiokia ngan tong tana’ Siria ngan tong tana’ Kilikia péh. 24 Pu’un améé’ menéng pu’un kuraa’ kelunan jin belah améé’ lepah tai petusah ngan ngebahat kenin ka’ah neu’ kekat ha’ tebaraa’ réh, bang bé’ mé’ nyohoo’ réh pané kenat. 25 Uban néh kenat pu’un améé’ petipun siteu’, ngan pekua’ kenin mé’ seruh, tekep mé’ ngevéléé’ kelunan éh omok tai ngan keh kepéh, kivu Barnabas rawah Paulus, éh bakéh mé’ mu’un. 26 Bé’ rawah paréé’ urip roh lem roh kereja’ ngan Tuhan Yésus Kristus éh kenelan lu’. 27 Uban néh kenat améé’ nyohoo’ Yudas ngan Silas tai tavin ka’ah. Rawah omok bara’ kekat ha’ mé’ lem surat iteu’ da’. 28 Uban Sahéé’ Ni’ai ngan améé’ péh seruh, bé’ tekep mé’ nyohoo’ keh maneu’ éh bé’ keh omok maneu’. Bang inah awah sohoo’ mé’ ngan keh, 29 mai keh kuman ka’an éh peliwa kelunan ngan butun, ngan mai keh kuman dahaa’, ngan mai keh kuman ka’an éh matai nahat réh batok awah, ngan mai keh petuyang. Hun keh kivu kekat éh benara’ mé’ inah, adang keh jian. Iteu’ awah ha’ mé’, ha’ réh. 30 Lakau réh tai Antiokia, sinah réh tebai kekat kelunan éh ngelan petipun ke’ réh mena’ surat inah ngan réh. 31 La’o réh purung surat inah, murung kenin réh, uban rengah inah papung kenin réh. 32 La’ah Yudas ngan Silas, rawah péh kevéléé’ Tuhan ke’ roh bara’ ha’ tebaraa’ Néh ngan kelunan, la’ah kebit ha’ tebaraa’ roh nebaraa’ ngan ngereken kenin kekat padéé’ éh sinah. 33 Irah éh tuai jin Yérusalem nah, lebéé’ réh mokoo’ sinah, la’o inah irah padéé’ tong Antiokia kejeraa’ réh moléé’ ngan dawai lakau tai tavin irah éh nyohoo’ réh tuai lepah nah. 34 Bang Silas mokoo’ keto. 35 La’ah lebéé’ Paulus ngan Barnabas mokoo’ tong Antiokia, pu’un rawah ngan irah éh jah kepéh nebaraa’ ngan petena’ réh tong ha’ tebaraa’ Tuhan. 36 Lebéé’ si’ik la’o inah ka’ ha’ Paulus ngan Barnabas, Jian toh ngeliwet nepah padéé’ lu’ lem Tuhan tong siget leboo’ éh jalan toh tai bara’ ha’ Tuhan lepah rai, dokoo’ toh omok jam kineu’ réh kepéh, ha’ néh. 37 La’ah Barnabas juk mihin Yohanes Markus ngan roh, 38 bang Paulus seruh, bé’ tekep mihin éh, uban néh bé’ pesukup kereja’ néh tong tana’ Pampilia lepah nah bang nebet néh roh hun irai pu’un éh moléé’ awah. 39 Pesakat mu’un Paulus rawah Barnabas, pah avéé’ rawah petat lakau. Barnabas mihin Markus ngan néh jalan kapen tai pulau Siprus, 40 ngan Paulus mihin Silas ngan néh. La’o irah sidang nah mejai éh ngan Tuhan dokoo’ Tuhan mavaa’ éh, 41 lakau roh tai siget leboo’ tong tana’ Siria ngan tana’ Kilikia ke’ roh ngereken kenin kelunan tong sidang inah.
161 Lakau Paulus tai leboo’ Derbe ngan Listra. La’ah pu’un jah kelunan éh ngelan tong Tuhan sinah, ngaran néh Timotius, tinen néh pohoo’ Yahudi, la’ah iah péh ngelan, bang tamen néh pohoo’ Yunani. 2 Timotius senepah kekat padéé’ lem Tuhan éh tong leboo’ Listra ngan leboo’ Ikonium. 3 Uban Paulus juk mihin Timotius ngan néh, pu’un éh pesunat éh. Iah maneu’ éh kenat uban kelunan Yahudi éh pu’un tong tana’ inah jam tamen Timotius nah pohoo’ Yunani. 4 La’ah hun roh lakau tai leboo’ inah, pu’un roh mena’ surat éh jin irah lawah Tuhan ngan jin irah pengeja’au sidang tong Yérusalem, ngan irah inah, ngan nyohoo’ réh kivu kekat ha’ réh lem surat inah. 5 Inah jalan kekat sidang pu’un reken lem pengelan réh tong Tuhan ngan siget dau pepit pinaa’ kelunan kepéh. 6 Lakau réh teleu’ inah tong tana’ Prigia ngan Galatia, bé’ Sahéé’ Ni’ai kejeraa’ réh tai bara’ ha’ Tuhan tong Asia. 7 Hun réh avéé’ déhéé’ belah tana’ Misia, pu’un réh pitah jalan juk tai jah betah tana’ Bitinia, bang bé’ Sahéé’ Yésus kejeraa’ réh tai. 8 Uban néh kenat lakau réh kepéh pajau tana’ Misia tai Troas, éh leboo’ ja’au tong tana’ Makedonia. 9 Merem inah pu’un éh poléng tong ta’an Paulus. Pu’un éh na’at barei’ jah kelunan jin Makedonia éh nekedéng ngan tebai éh, ka’ ha’ néh, Jian ke’ papit tuai tai tana’ Makedonia nolong améé’ siteu’, ha’ néh. 10 La’o Paulus na’at kekat inah rii’, boh mé’ pitah jalan tai Makedonia, uban kenat péh jalan mé’ jam Allah pu’un tebai mé’ tai sitai bara’ Rengah Jian ngan réh. 11 La’ah masek mé’ lem kapen peleka jin leboo’ Troas mepai tong pulau Samotrake, ngan barei’ sagam kepéh papit mé’ tai leboo’ Neapolis. 12 Jin sinah kepéh lakau mé’ jalan tana’ tai leboo’ ja’au Pilipi, Pilipi inah jah leboo’ ja’au jin kekat leboo’ tong tana’ Makedonia. La’ah leboo’ Pilipi nah nihau peritah Rum. La’ah duah-teleu’ dau mé’ mokoo’ sinah. 13 Tong Dau Posot musit mé’ jin leboo’ inah tai déhéé’ baa’ uban mé’ seruh barang pu’un péh retek irah Yahudi petipun sinah sebayang. Menyun mé’ pané ngan kekat redo éh pu’un sinah. 14 Pu’un jah redo éh menéng ha’ mé’, ngaran néh Lidia, éh jin leboo’ ja’au Tiatira tong tana’ Rum. Pu’un redo inah melih livah rep-rep. Pu’un éh seva’ Allah, kenin néh pukap ngan Tuhan ke’ néh mihau kekat ha’ éh benara’ Paulus nah. 15 Pu’un éh batis pemung ngan kekat irah tong lamin néh. La’o inah pu’un éh tebai mé’, ka’ ha’ néh, Hun keh seruh akeu’ ngelan tong Tuhan mu’un, jian keh tai lamin ké’ mokoo’ ngan améé’, ha’ néh. Gahang mu’un éh tebai’ mé’. 16 La’ah jah dau tovoo’ améé’ tai tong jalan kelunan sebayang nah temeu’ mé’ ngan jah redo éh ripen éh nasek balei’, éh pu’un pengejam omok bara’ ineu’-ineu’ éh juk pu’un. Pinaa’ rigit laa’ pengeja’au néh neu’ redo inah ngebalei’. 17 Pu’un éh kivu Paulus seliko ngan améé’, mejui éh, ka’ ha’ néh, Kelunan inah maneu’ kereja’ Allah éh Matek Bau, pu’un réh bara’ jalan uleu’ kelunan omok alaa’ urip éh maréng, ha’ néh. 18 Kuraa’-kuraa’ dau pu’un éh maneu’ kenat, pah avéé’ Paulus tusah kenin menéng éh kenat, pelapah pupah Paulus ke’ néh meta’ balei’ nah, ka’ ha’ néh, Dalem ngaran Yésus Kristus akeu’ nyohoo’ ke’ pega’, ha’ néh. Tioo pega’ balei’ nah. 19 Hun pengeja’au redo inah jam éh bé’ omok alaa’ rigit pinaa’ kepéh uban balei’ nah lepah pega’, pelapah réh ngamit Paulus ngan Silas ke’ réh menat roh tavin pengeja’au peritah tong retek pegawa déhéé’ jalan pebelih. 20 Pu’un réh mihin roh tavin pengeja’au tong leboo’ ja’au Pilipi nah, éh maneu’ kereja’ peritah Rum, ka’ ha’ réh, Rawah iteu’ kelunan Yahudi, pu’un roh petusah leboo’ uleu’. 21 Pu’un rawah bara’ tong kuraa’ kekat adet éh tengéé’ jin adet améé’ éh lem nihau Rum, bé’ mé’ omok alaa’ ngan kivu adet éh jah éh benara’ roh nah, ha’ réh. 22 Pinaa’ kelunan maneu’ Paulus ngan Silas. Boh irah éh kereja’ ngan peritah Rum nah mejéé’ pakai roh, ngan nyohoo’ kelunan mipok roh. 23 Pinaa’ koléé’ réh mipok roh, la’o inah irah bet roh lem lamin tutup, ngan nyohoo’ pengeja’au éh mavaa’ lamin tutup mavaa’ roh mu’un-mu’un. 24 Uban sohoo’ réh kenat, pu’un éh masek roh lem lamin tutup tong retek éh dilem mu’un ngan ke’ néh natip gem roh palaa’ kayeu’. 25 Bang belu’an merem Paulus rawah Silas sebayang ngan nyanyi mejing Allah, kekat kelunan éh tong lamin tutup menéng ha’ roh. 26 Tioo pu’un tegen tana’ éh ja’au mu’un, éh ngusii’ kekat lihei’ lamin tutup nah. Pelapah kekat usit tapé pukap tengéé’, ngan kekat jeret irah éh tenutup réh nah pu’un pega’. 27 Tioo to’ot lakei’ pengeja’au éh mavaa’ lamin tutup nah, ngan na’at kekat usit tapé lamin nah pu’un pukap, iah seruh kelunan éh tenutup néh nah lepah kelap. Boh éh menat po’é néh ke’ néh juk mematai iah ke’. 28 Bang Paulus bika’ ngan ja’au ha’, ka’ ha’ néh, Mai ke’ mematai ka’au’ ke’, uban kekat améé’ béé to de’ ke’ siteu’, ha’ néh. 29 La’ah pengeja’au nah tebai réh tuai mihin titui ke’ néh tioo nekedeu’ tai masek. Riyet éh tioo pegup tong jumen Paulus rawah Silas. 30 La’ah iah mihin roh musit ke’ néh neteng roh, ka’ ha’ néh, O lakei’ ja’au, ineu’ éh tekep ké’ maneu’ dokoo’ ké’ omok alaa’ urip, ha’ néh. 31 La’ah ka’ ha’ roh ngan néh, Ngelan tong Tuhan Yésus boh ke’ omok alaa’ urip, kenat péh kekat irah tong lamin ko’, ha’ roh. 32 Boh roh bara’ ha’ Tuhan ngan néh, kenat péh ngan kekat irah éh pu’un tong lamin néh kepéh. 33 Tovoo’ merem inah péh pu’un éh mihin roh ngan pohéé’ suhat roh, boh éh batis pemung ngan kekat kelunan tong lamin néh. 34 La’ah pu’un éh mihin Paulus rawah Silas taket tong lamin néh ke’ néh mena’ ka’an ngan roh. Murung kenin néh, kenat péh kekat irah tong lamin néh uban pengelan réh tong Allah. 35 Dau ngivun sagam pengeja’au tong leboo’ Pilipi éh maneu’ kereja’ peritah Rum nyohoo’ pengeja’au tong lamin tutup ngelepu roh. 36 Boh éh tai bara’ kenat ngan Paulus, ka’ ha’ néh, pu’un peritah nyohoo’ ku’ ngelepu koh ri’ de’. Hun néh kenat ngelajam koh lakau da’, ha’ néh ngan roh. 37 Bang ha’ Paulus ngan réh, amo iteu, lem nihau irah Rum amo bé’ pu’un maneu’ sala’ ineu’-ineu’ bang amo lepah nipok tong jumen kelunan pinaa’ ngan nasek lem lamin tutup. Hun iteu’ kepéh irah juk nyohoo’ amo musit ngan selem-selem, bé’ amo keloo’. Irah pengeja’au jin peritah Rum inah tengéé’ tekep tuai ke’ réh pepusit mo. 38 La’ah irah éh mavaa’ lamin tutup, bara’ ha’ roh nah ngan pengeja’au éh maneu’ kereja’ peritah Rum. Hun pengeja’au peritah jam Paulus rawah Silas nah lem nihau irah Rum, medai réh kepéh. 39 Pelapah réh tai menyat jian ngan Paulus rawah, ngan mihin roh musit jin lamin tutup. La’o inah boh pengeja’au nah menyat roh piso jin leboo’ inah. 40 Musit roh jin lamin tutup tioo tai lamin Lidia. Sinah roh temeu’ ngan kekat padéé’ lem Tuhan, la’ah pu’un roh nebaraa’ réh ke’ roh ngereken kenin réh. La’o inah lakau roh kepéh.
171 Lakau Paulus ngan Silas lapah tong leboo’ ja’au Ampipolis ngan Apolonia, tai Tesalonika leboo’ ja’au. La’ah tong leboo’ inah pu’un lamin sebayang Yahudi. 2 Barei’ kemalai Paulus, tai éh tong lamin sebayang nah. La’ah teleu’ batang Dau Posot pu’un éh pepané ngan peteteng tong ha’ lem surat Tuhan. 3 Iah bara’ éh lenaa’ mu’un, adang éh tekep Kristus keta ngan betéé’ jin patai Néh. Ka’ ha’ néh, Yésus éh benara’ ké’ ngan keh, adang néh Iah ké’ éh Kristus, ha’ néh. 4 La’ah jin belah réh pu’un jelua’ kelunan éh ngelan tong Tuhan Yésus kepéh éh tai pemung ngan Paulus rawah Silas, kenat péh pinaa’ kelunan éh pohoo’ Yunani éh seva’ Allah, irah péh ngelan tong Tuhan Yésus kepéh, kenat péh kuraa’ redo éh maren. 5 Bang irah Yahudi sakit kenin ngan leko tong irah éh ngelan nah. Tai réh tebai kuraa’ kelunan sa’at éh murip awah tong jalan pebelih, ke’ irah inah maneu’ roh kepéh. La’ah irah punyat kenin kekat kelunan tong leboo’ inah, pah avéé’ réh béé tai nutuh lamin Yason ke’ réh pitah Paulus rawah Silas ke’ réh mihin roh musit tavin kelunan pinaa’ nah. 6 Uban réh bé’ jam semah rawah pu’un, irah tioo ngamit Yason ngan kuraa’ usah padéé’ lem Tuhan kepéh, ke’ réh menat réh tai peritah tong leboo’ inah. Bika’-bika’ réh, ka’ ha’ réh, Kelunan éh petusah kelunan tong leboo’ semah-semah réh tai, pu’un réh tong leboo’ uleu’ kepéh ngan petusah uleu’ siteu’. 7 Pu’un Yason papung roh ngan alaa’ roh tong lamin néh. Kekat irah béé ngelawan raja’ lu’, uban ha’ réh, pu’un jah raja’ éh jah kepéh ngaran Néh Yésus, ha’ réh ngan peritah. 8 La’ah neu’ ha’ réh kenat nah, kelunan pinaa’ ngan irah peritah tong leboo’ inah betéé’ kenin ngan tusah mu’un-mu’un. 9 Irah peritah nah nyohoo’ Yason ngan irah éh jah kepéh mena’ rigit éh telana’ réh bé’ réh juk petusah réh kepéh, la’o inah irah ngelepu réh. 10 Hun talum merem inah kekat padéé’ dalem Tuhan nyohoo’ Paulus ngan Silas tai leboo’ ja’au Berea. Avéé’ sitai tai roh tong lamin sebayang Yahudi. 11 La’ah irah tong Berea nah, bé’ réh mahéng kenin barei’ irah éh tong Tesalonika, murung réh menéng ha’ tebaraa’ Tuhan. Siget dau mekat réh purung surat Tuhan ke’ réh omok jam hun néh pu’un mu’un barei’ éh benara’ Paulus ngan réh. 12 Pinaa’ kelunan jin belah réh éh ngelan kepéh, kenat péh pinaa’ redo Yunani éh maren ngan pinaa’ lakei’ éh pohoo’ Yunani ngelan kepéh. 13 Hun kelunan Yahudi éh tong Tesalonika jam Paulus pu’un bara’ ha’ tebaraa’ Tuhan ngan kelunan tong Berea, tai réh sinah kepéh, ngan punyat kenin ngan petusah kelunan pinaa’ éh sinah kepéh. 14 Pelapah padéé’ dalem Tuhan nyohoo’ Paulus tai baa’ banget, bang Silas rawah Timotius mokoo’ keto tong Berea. 15 Kelunan éh mihin Paulus patet éh avéé’ tong leboo’ Atena, boh réh moléé’ tai Berea kepéh bara’ ha’ Paulus ngan Silas rawah Timotius nyohoo’ roh rigah tai ngan néh. 16 Kelebéé’ Paulus mokoo’ mena rawah tong Atena éh leboo’ ja’au, mujah kenin néh na’at kekat butun éh penakai réh tong leboo’ ja’au nah. 17 Boh éh tai tong lamin sebayang Yahudi ke’ néh nebaraa’ ngan petena’ irah Yahudi, ngan irah éh tengéé’ pohoo’ péh éh pu’un seva’ Allah. Kenat péh tai éh tong jalan pebelih, siget-siget dau pu’un éh nebaraa’ ngan petena’ réh sinah. 18 Pu’un kelunan kepéh éh guru tong adet Epikuros ngan Stoa éh pepata’ ha’ ngan Paulus. Ka’ ha’ jelua’ réh, Kineu’ kelunan inah éh palui, ineu’ ha’ tebaraa’ éh juk benara’ néh, ha’ réh. Ka’ ha’ jelua’ kepéh, Iah pu’un bara’ tong kuraa’ balei’ ngan adet éh tengéé’ kepéh, ha’ réh. Pu’un réh pané kenat uban Paulus nebaraa’ réh tong Rengah Jian tong Yésus ngan tong pengebetéé’ néh kepéh. 19 La’ah irah mihin Paulus tai tong Miting Areopagus, ka’ ha’ réh, Keloo’ mé’ menéng ha’ tebaraa’ ko’ éh maréng. 20 Uban éh benara’ ko’ nah, bé’ mé’ malai menéng éh, uban néh kenat améé’ juk jam kekat sin tong tebaraa’ inah, ha’ réh. 21 Éh ke’ réh kenat ha’ uban kelunan Atena ngan irah éh jin jah éh mokoo’ sinah keloo’ mu’un-mu’un réh pané ngan menéng tong kekat rungen éh maréng, bé’ pu’un kenin réh tai jah. 22 Nekedéng Paulus tong jumen irah éh Petipun tong Areopagus ke’ néh bara’ ngan réh, ka’ ha’ néh, O kelunan Atena, kejam ké’ ka’ah mekat kivu kuraa’ arong adet. 23 Uban tovoo’ ké’ lakau tong leboo’ keh, ta’an ké’ kekat rungen éh seneva’ keh, ngan ta’an ké’ jah jalan peliwa, ka’ éh senurat tong néh, Ngan jah Allah éh bé’ kejam kelunan, ha’ néh. Bé’ ka’ah jam ineu’ éh seneva’ keh inah, bang akeu’ éh jam Éh, inah ke’ ké’ juk bara’ éh ngan keh kepéh. 24 La’ah Allah pu’un suai tana’ ngan kekat éh lem néh, Iah éh pengeja’au tong seruga ngan tong tana’ péh, bé’ Éh mokoo’ tong lamin éh senuai ojoo’ kelunan, 25 bé’ pu’un pengekurang Néh ke’ uleu’ kelunan omok pesukup éh, uban Iah tengéé’ mena’ urip ngan laset ngan kekat ineu’-ineu’ ngan uleu’ kelunan. 26 Jin jah kelunan Iah suai siget arong kelunan pah tipo tana’ kepéh. Iah ngevéléé’ kekat sioo’ pengurip réh ngan petulat tana’ jalan pengokoo’ réh. 27 Iah jam maneu’ éh kenat dokoo’ réh pitah ngan lumang jam Éh. Bang bé’ Allah juu’ jin uleu’. 28 Uban pu’un jah ha’ éh bara’ ka’, Dalem Iah uleu’ murip ngan gusii’ ngan pu’un tong tana’ iteu’, ha’ nah. Barei’ ha’ irah jin belah keh éh jam mipet, ka’ ha’ réh, Uban uleu’ péh anak Néh, ha’ réh. 29 La’ah uban uleu’ éh anak Allah, bé’ tekep lu’ seruh layan Allah pu’un barei’ layan butun mas ngan pirek éh senuai réh, ngan bateu’ éh kebeteu’ réh neu’ pengejam réh suai éh awah. 30 Bé’ Allah mihau kekat penganeu’ kelunan hun réh bé’ jam sahau ke’ Néh ngukum réh, bang hun iteu’ Iah nyohoo’ kekat kelunan semah-semah péh piso jin kesa’at réh kepéh. 31 Iah pu’un netap jah dau dokoo’ Néh petuneng kekat kelunan tong tana’, teneng éh petuneng Néh. Iah petuneng réh neu’ jah kelunan éh lepah kevéléé’ Néh. Iah lepah maneu’ jah telana’ dokoo’ kekat kelunan omok jam Iah juk petuneng réh, inah éh, uban Néh pebetéé’ kelunan inah jin patai Néh, ha’ néh. 32 Hun irah menéng ha’ Paulus bara’ tong pengebetéé’ kelunan matai, pu’un jelua’ réh pesanyaa éh awah, bang ka’ ha’ jelua’ kepéh, Améé’ juk menéng ha’ ko’ bara’ tong iteu’ temurei’ kepéh, ha’ réh. 33 La’o inah musit Paulus jin petipun nah. 34 Pu’un jelua’ kelunan alaa’ saa’ Paulus ngan ngelan tong Tuhan Yésus. La’ah jelua’ irah éh ngelan nah, Dionisius, éh jin irah tong miting Areopagus, ngan jah redo ngaran néh Damaris, ngan pu’un irah éh jah kepéh.
181 La’o inah lakau Paulus jin leboo’ Atena tai Korintus leboo’ ja’au tong tana’ Yunani. 2 Sinah éh temeu’ ngan jah kelunan Yahudi ngaran néh Akwila, pohoo’ néh jin tana’ Pontus. Akwila nah ngan do néh Priskila rawah inah avéé’ maréng tong Korintus jin tana’ Italia, uban pu’un raja’ Klaudius nyohoo’ kekat kelunan Yahudi piso jin leboo’ Rum. La’ah tai Paulus tavin roh, 3 mokoo’ ngan kereja’ ngan roh uban kemalai kereja’ néh pekua’ kereja’ rawah inah, inah éh, tukeng maneu’ lamin jin livah. 4 Siget Dau Posot Paulus nebaraa’ réh lem lamin sebayang Yahudi ke’ néh pekejam kelunan Yahudi ngan irah pohoo’ Yunani péh tong Yésus. 5 Hun Silas rawah Timotius avéé’ jin tana’ Makedonia, bé’ Paulus kereja’ kepéh, bang siget dau pu’un éh nebaraa’ irah Yahudi tong tebaraa’ Tuhan, ngan bara’ adang Yésus Iah éh Kristus. 6 Bang hun irah ngelawan ngan pané ngesa’at ngaran néh, pu’un éh nepaga’ agaa’ tana’ jin pakai néh ke’ néh maneu’ irah ke’. Ka’ ha’ néh, Hun keh tawang, neu’ kenin ka’ah ke’ ka’ah tawang, bé’ éh keneloo’ ké’ kenat. Hun iteu’ akeu’ juk tai nebaraa’ kelunan éh tengéé’ pohoo’ kepéh, ha’ néh. 7 Piso éh jin réh ke’ néh tai lamin Titius Yustus, kelunan éh tengéé’ pohoo’ jin pohoo’ Yahudi ngan éh seva’ Allah, lamin néh tepih tong lamin sebayang Yahudi. 8 La’ah Krispus éh pengeja’au tong lamin sebayang Yahudi nah, ngan kekat irah tong lamin néh, pu’un réh ngelan tong Tuhan Yésus, kenat péh pinaa’ kelunan jin leboo’ Korintus éh menéng ha’ Paulus, pu’un réh ngelan ngan batis kepéh. 9 Jah merem Tuhan pané ngan Paulus lem éh poléng ta’an néh, ka’ ha’ Néh, Mai ke’ medai, jian ke’ pané ngan réh, mai ke’ ma’o nebaraa’ réh 10 uban Akeu’ pu’un ngan ko’. La’ah bé’ pu’un jah usah éh omok peketa ngan ngesakit ke’, uban pinaa’ kelunan tong leboo’ iteu’ éh omok anah Ké’ kepéh, ha’ Tuhan ngan Paulus. 11 La’ah Paulus mokoo’ sinah jah ta’un nem laséh kelebéé’ ke’ néh bara’ ha’ tebaraa’ Tuhan ngan réh. 12 La’ah hun réh ngevéléé’ Galio ke’ néh pengeja’au Rum tong tana’ Yunani, irah Yahudi pakat ngelawan Paulus ke’ réh ngamit éh ngan mihin éh tai jalan besara’. 13 Ka’ ha’ réh, Kelunan iteu’ menat kenin kelunan pinaa’ nah ke’ réh seva’ Allah, bang kivu jalan éh tengéé’ jin ha’ tebaraa’ Musa, ha’ réh. 14 Hun Paulus juk pané, boh Galio pané ngan kelunan Yahudi, ka’ ha’ néh, O kelunan Yahudi, hun pu’un sala’ ngan kesa’at éh sa’at mu’un éh neu’ kelunan iteu’, omok akeu’ kebit kenin ngan menéng ha’ keh. 15 Bang hun keh juk pesala’ éh uban neu’ ha’ tebaraa’ néh, ngan neu’ néh bara’ ngaran éh jah, ngan bara’ tong adet keh tengéé’, ka’ah tengéé’ petuneng éh, bé’ akeu’ omok seruh éh, ha’ Galio nah. 16 Boh éh pekelap réh jin jalan besara’. 17 La’ah irah pinaa’ nah ngamit Sostenes, pengeja’au tong lamin sebayang Yahudi, ke’ réh mipok éh déhéé’ lamin besara’. Bang bé’ sapét si’ik péh Galio pegunah réh maneu’ éh kenat. 18 La’ah Paulus mokoo’ lebéé’ si’ik tong Korintus pemung ngan kelunan éh ngelan. La’o inah lakau éh jalan kapen tai tana’ Siria mihin Priskila ngan Akwila. Hun néh pu’un tong leboo’ Kengkrea bé’ jak éh peleka tai tana’ Siria, uban sukup kelebéé’ néh tong ha’ jajii’ néh ngan Allah lepah nah, boh Paulus memerit ulun néh. 19 Hun réh teleu’ avéé’ tong Épesus éh leboo’ ja’au, boh Paulus piso jin rawah kepéh, tai éh tong lamin sebayang Yahudi ke’ néh bara’ ngan petena’ réh. 20 Irah menyat éh mokoo’ lebéé’ si’ik kepéh ngan réh sinah, bang bé’ éh omok kenat. 21 Hun néh bara’ tabi’ pu’un éh bara’ ka’ ngan réh, Hun néh lem pengeloo’ Allah adang akeu’ juk tuai kepéh, ha’ néh. Lakau éh kepéh jalan kapen jin Épesus. 22 Hun néh avéé’ tong leboo’ Kaisarea, boh éh jalan tana’ tai Yérusalem ke’ néh bara’ tabi’ ngan sidang sinah. La’o inah lakau éh jalan tana’ kepéh tai leboo’ Antiokia. 23 Lebéé’ si’ik éh mokoo’ sinah, boh éh lakau kepéh tai siget leboo’ tong tana’ Galatia ngan Prigia, ke’ néh ngereken kenin kekat kelunan éh ngelan tong Tuhan. 24 La’ah pu’un jah kelunan Yahudi ngaran néh Apolos, lohoo’ néh tong leboo’ Aleksandria, tuai éh tong Épesus. Kelunan inah jam pané ngan malai mu’un éh tong kekat tebaraa’ lem surat Tuhan. 25 Pu’un éh lepah pekalai tong jalan Tuhan, mekat mu’un éh nebaraa’ kelunan tong kekat ha’ tebaraa’ tong Yésus, bang tong batis éh benara’ Yohanes awah éh kejam néh. 26 La’ah makang kenin néh nebaraa’ réh tong lamin sebayang Yahudi. Bang hun Priskila ngan Akwila menéng ha’ tebaraa’ néh, boh roh alaa’ éh ke’ roh pesukup ha’ tebaraa’ éh mepai bé’ kejam néh tong jalan kelunan omok alaa’ urip jin Allah. 27 Apolos nah juk tai tana’ Yunani, boh irah éh ngelan tong Tuhan éh pu’un tong Épesus nah maneu’ jah surat ngan kekat padéé’ dalem Tuhan nyohoo’ réh alaa’ éh. Hun néh avéé’ sitai gahang kenin néh nolong kelunan éh pu’un ngelan neu’ penika Tuhan ngan réh. 28 Uban neu’ pengejam néh pu’un éh nyopéé’ kelunan Yahudi tong jumen kelunan pinaa’ tong réh pepatai ha’, neu’ néh nojoo’ kuraa’-kuraa’ ha’ jin surat Tuhan éh bara’ mu’un, adang Yésus nah Iah éh Kristus.
191 Hun Apolos pu’un tong leboo’ Korintus, lakau Paulus tong tana’ Asia dayah leboo’ Épesus pah avéé’ néh avéé’ tong Épesus. Sinah éh temeu’ ngan kelunan éh ngelan tong Tuhan, 2 boh éh neteng réh, ka’ ha’ néh, Kineu’ keh, pu’un keh alaa’ Sahéé’ Ni’ai hun keh ngelan rai, ha’ néh. Ha’ réh mipa éh, Bé’ améé’ pu’un menéng ha’ réh bara’ tong Sahéé’ Ni’ai, ha’ réh. 3 Ka’ ha’ Paulus kepéh, Hun réh ngebatis keh rai kivu jalan batis mah keh benatis réh, ha’ néh. Ha’ réh, Kivu jalan batis éh benara’ Yohanes, ha’ réh. 4 Ka’ ha’ Paulus kepéh, pu’un Yohanes ngebatis kelunan éh piso jin kesa’at réh, ngan pu’un éh nyohoo’ pohoo’ Yahudi tekep réh ngelan tong Iah éh juk tuai la’o iah, inah éh ngelan tong Yésus, ha’ Paulus ngan réh. 5 Hun réh menéng éh kenat, boh réh batis lem ngaran Tuhan Yésus kepéh. 6 Pu’un Paulus mapai ojoo’ néh bau réh ngan Sahéé’ Ni’ai tuai tong réh, pelapah irah pané lem kuraa’ arong ha’ éh tejeu’ ngan pané kepéh tong ha’ tebaraa’ Tuhan. 7 Ngioo’ kekat irah inah jah poloo’ duah usah. 8 La’ah tai Paulus tong lamin sebayang Yahudi, ngan makang kenin néh nebaraa’ réh avéé’ teleu’ laséh kelebéé’ ke’ néh pekejam réh tong Allah éh pengeja’au. 9 Bang jelua’ réh mahéng kenin, ngan bé’ keloo’ ngelan. Pu’un réh bara’ jalan Tuhan omok mena’ urip nah, sa’at mu’un éh, ha’ réh ngan kelunan pinaa’ nah. Boh Paulus piso jin réh ke’ néh mihin kekat kelunan éh ngelan tong Tuhan pemung ngan néh. La’ah siget dau tai éh tong sekulah Tiranus, ke’ néh mihin réh peteteng tong ha’ tebaraa’ Tuhan sinah. 10 Duah ta’un kelebéé’ néh maneu’ kenat, avéé’ kekat kelunan éh mokoo’ tong tana’ Asia pu’un menéng ha’ Tuhan, kenat péh irah Yahudi ngan irah éh tengéé’ pohoo’ péh. 11 La’ah neu’ penyukat Allah Paulus pu’un maneu’ kuraa’ penganeu’ éh tejeu’ ta’an réh, 12 avéé’ irah alaa’ osoo’ ojoo’ néh ngan pakai néh ke’ réh mena’ éh ngan kelunan sakit, beleka’ kesakit réh ngan kekat balei’ péh tioo pega’ jin réh. 13 Bang pu’un kelunan Yahudi éh jam ngedayung, lakau semah-semah péh ke’ réh bet balei’, irah tupat pakai ngaran Tuhan Yésus ke’ réh juk bet balei’ palaa’ ngaran inah bang bé’ réh omok. Ka’ ha’ réh ngan balei’, Akeu’ nyopéé’ keh dalem ngaran Yésus éh benara’ Paulus, ha’ réh. 14 Tujuu’ usah réh maneu’ kenat, tamen réh Skewa jah pengeja’au imam. 15 Bang ka’ ha’ balei’ nah mipa réh, Kejam ké’ Yésus ngan kejam ké’ Paulus nah, bang ka’ah iteu’ séé’ keh, ha’ balei’ nah. 16 Boh kelunan éh nasek balei’ nah nayuu’ réh ngan nyopéé’ réh, avéé’ réh kelap jin lamin néh pega’ pakai réh ngan suhat usah réh neu’ kelunan éh nasek balei’ nah. 17 Kekat kelunan Yahudi ngan irah éh tengéé’ pohoo’ éh mokoo’ tong Épesus menéng rengah inah, pu’un réh medai mu’un, ngan ngaran Tuhan Yésus pu’un ja’au kepéh. 18 La’ah pinaa’ kelunan éh ngelan tong Tuhan tuai bara’ tong kekat penganeu’ réh éh sa’at. 19 Kelunan éh lepah jam ngedayung mihin kekat éh penakai réh ngedayung ke’ réh motong éh tong jumen kekat kelunan béé. Iah purung kekat belih surat éh penakai réh dayung nah, lemah poloo’ ibu rigit pirek. 20 Kenat jalan ha’ tebaraa’ Tuhan pepit ngan tai gahang kepéh. 21 La’o inah kepéh Paulus juk lakau tai tana’ Makedonia ngan tana’ Yunani, ngan jin sinah kepéh tai Yérusalem, ka’ ha’ néh, Hun ké’ omok avéé’ sinah adang akeu’ juk tai leboo’ Rum kepéh, ha’ néh. 22 La’ah pu’un éh nyohoo’ duah usah éh nolong éh, Timotius rawah Erastus tai Makedonia, usah nah mokoo’ jak tong tana’ Asia. 23 Sioo’ inah péh pu’un tusah ja’au tong Épesus naneu’ ha’ tebaraa’ tong Yésus. 24 Pu’un jah kelunan ngaran néh Demetrius, éh tukeng pirek éh maneu’ lamin pirek éh pekua’ layan lamin jalan réh seva’ Artemis, jah redo balei’. La’ah neu’ kereja’ réh kenat pinaa’ kelunan éh tukeng pirek alaa’ pengekaya’. 25 La’ah pu’un Demetrius nah tebai kekat kelunan tukeng, ngan irah éh jah éh maneu’ kereja’ pekua’ inah petipun, ka’ ha’ néh ngan réh, O kekat bakéh, adang ka’ah jam neu’ kereja’ lu’ kenat inah jalan lu’ alaa’ pengekaya’. 26 Inah kepéh ka’ah jam tong kekat penganeu’ Paulus nah. Pu’un éh bara’ butun éh senuai kelunan bé’ pu’un ineu’-ineu’ gunah néh, bé’ pu’un penyukat lem néh. Neu’ néh pané kenat, inah iah menat kenin kelunan pinaa’ ke’ sadat réh bé’ keloo’ pakai inah kepéh, kenat péh tong leboo’ Épesus kenat péh tong tana’ Asia. 27 Medai lu’ dai kereja’ lu’ inah béé, ngan inah kepéh, lamin jalan réh seva’ Artemis, jah redo balei’ éh matek bau, bé’ kelunan pegunah éh kepéh, adang réh ngera’ éh jin kekat pengaren néh, balei’ inah néh éh seneva’ kekat irah tong tana’ Asia ngan pah tipo tana’ péh, ha’ Demetrius nah. 28 Hun réh menéng ha’ néh pané kenat, pana kenin réh, merek mu’un réh kepéh, ka’ ha’ réh bika’, Artemis éh matek maren éh seneva’ kelunan Épesus, ha’ réh. 29 Pana kenin réh béé, pah avéé’ kemerek inah avéé’ tong kekat kelunan tong leboo’ inah kepéh. Kelunan pinaa’ nah ngamit Gayus ngan Aristarkhus, rawah éh jin tana’ Makedonia éh kivu Paulus lem pengelakau néh. Irah tioo menat roh masek lem lamin jalan réh seminga’ ngan sayau, ke’ réh maneu’ roh sinah. 30 Paulus péh juk masek belah kelunan pinaa’ nah, bang irah éh ngelan tong Tuhan bé’ réh kejeraa’ éh tai. 31 Kenat péh kuraa’-kuraa’ irah éh kereja’ ngan peritah jin Asia éh bakéh Paulus, meta’ éh, mai éh makang kenin tai lamin jalan réh seminga’ ngan sayau nah. 32 Kelebéé’ inah bika’-bika’ kekat kelunan, jelua’ pané barei’ iteu’, ngan jelua’ pané barei’ inah, uban kelunan pinaa’ nah bé’ jam uban ineu’ réh petipun kenat. 33 Irah Yahudi nyohoo’ jah kelunan ngaran néh Aleksander tai tong jumen réh pané ngan réh. Hun réh na’at éh kenat jelua’ réh seruh lakei’ inah éh pebetéé’ kenin réh ke’ réh pepaneu’ kenat, kelem réh. Aleksander mapat ojoo’ néh juk pané ngan kelunan pinaa’ nah, 34 bang hun réh jam éh kelunan Yahudi, bika’ réh béé-béé avéé’ duah jam kelebéé’, ka’ ha’ réh, Artemis éh matek maren éh seneva’ kelunan Épesus, ha’ réh. 35 La’ah jah kelunan éh kereja’ tong lamin peritah tong leboo’ inah ngejian kenin kelunan pinaa’ nah, ka’ ha’ néh, O kelunan Épesus, kekat kelunan jam uleu’ tong leboo’ Épesus éh mihau lamin jalan réh seva’ Artemis éh maren, kenat péh tong bateu’ éh pelohoo’ jin seruga éh pekua’ layan Artemis. 36 Bé’ pu’un séé’-séé’ éh omok nyakat ngan bara’ bé’ éh pu’un kenat. Uban néh kenat dawai kenin keh, mai keh tioo maneu’ ineu’-ineu’. 37 Uban pu’un keh mihin rawah inah tuai, bang bé’ rawah nekau jin lamin butun ngan bé’ roh pesalut iah éh seneva’ lu’. 38 Hun Demetrius ngan kekat kelunan éh kereja’ ngan néh juk bara’ sala’ séé’-séé’ péh, jian irah tai lamin besara’ nah awah, uban pu’un kelunan sinah éh jam petuneng kekat ha’ réh. 39 Bang hun keh pitah ineu’-ineu’ éh tengéé’ jin iteu’, jian keh memekat ha’ inah tong petipun kekat kelunan. 40 Uban medai lu’ peritah ngukum lu’ neu’ kekat éh pu’un dau iteu’, uban kekat kelunan pu’un nyelatuu’ awah merek ngan pana kenin. Bé’ pu’un ineu’ éh kelu’ omok bara’ tong jalan néh, ngan ineu’ tuman néh éh kelu’ kenat, ha’ lakei’ peritah nah. 41 La’o néh pané kenat pu’un éh nyohoo’ réh moléé’.
201 Hun penusah inah lepah ma’o, pu’un Paulus tebai kekat kelunan éh ngelan tong Tuhan ke’ néh ngereken kenin réh ngan bara’ tabi’ ngan réh teka néh lakau. Boh éh lakau kepéh tai tana’ Makedonia. 2 Lakau éh tai siget leboo’ tong tana’ inah ke’ néh ngereken kenin réh neu’ kuraa’-kuraa’ ha’ tebaraa’ néh. La’o inah lakau éh tai tana’ Akhaya kepéh, 3 pu’un éh mokoo’ ngan réh sinah teleu’ laséh kelebéé’. Hun néh teven juk peleka tai tana’ Siria, iah jam irah Yahudi pakat juk maneu’ éh kepéh, pelapah éh moléé’ murin pajau jin tana’ Makedonia. 4 La’ah Sopater anak Pirus éh jin leboo’ Berea kivu éh, kenat péh Aristarkhus rawah Sekundus, éh jin Tesalonika leboo’ ja’au, ngan Gayus jin Derbe leboo’ ja’au, ngan Timotius réh teleu’ Tikhikus ngan Tropimus, jin tana’ Asia. 5 Pu’un réh lakau jalan tana’ tai tenah mena améé’ tong Troas leboo’ ja’au déhéé’ baa’ banget. 6 La’o Dau Ja’au Roti éh bé’ pu’un tawan pekevat inah, lakau mé’ jalan kapen jin Pilipi. Lemah dau la’o inah avéé’ mé’ tong leboo’ Troas, sinah mé’ mokoo’ jah batang migu kelebéé’. 7 Dau migu inah, tovoo’ mé’ pelelong kuman ngan sebayang, pu’un Paulus nebaraa’ réh, kebit ha’ tebaraa’ néh avéé’ lepok merem, uban néh juk lakau kepéh dau rema da’. 8 Pu’un pinaa’ pelita’ tong lamin éh saa’ bau éh jalan mé’ petipun nah. 9 La’ah jah lakei’ lemanai ngaran néh Eutikhus, pu’un éh menyun tong sikan lamin. Uban Paulus pané lebéé’, iah nuro’ tioo jenek mu’un ga’ néh iah pelohoo’ tai tana’ jin tevan lamin éh keteleu’ nah.Hun réh metéé éh iah lepah matai. 10 Pelapah Paulus tuhun makung ngan mikop éh, ka’ ha’ néh, Mai keh besau kenin uban pu’un laset néh keto, ha’ néh ngan réh. 11 La’o inah Paulus taket kepéh boh éh petulat roti ngan irah pemung kuman. La’o inah lebéé éh pané ngan réh, pah avéé’ maten dau musit boh éh peleka. 12 La’ah pu’un réh alaa’ lakei’ lemanai ri’ moléé’, murip éh, jian kenin irah béé. 13 Lakau mé’ tenah jalan baa’ tai leboo’ Asos, ke’ mé’ juk alaa’ Paulus jin Asos nah, uban ha’ néh bu’un iah juk lakau jalan tana’ avéé’ sinah. 14 Hun Paulus avéé’ tong leboo’ Asos, améé’ alaa’ éh masek lem kapen lakau kepéh tai leboo’ Metilene. 15 Jin sinah améé’ lakau kepéh ngan dau rema inah avéé’ mé’ tong pulau Khios, dau rema inah kepéh avéé’ mé’ tong Samos, jah dau la’o inah kepéh avéé’ mé’ tong Miletus. 16 La’ah Paulus memekat kenin néh ke’ néh lakau pajau jin Épesus’ dai néh lebéé’ mokoo’ tong tana’ Asia. Iah juk ngerigah avéé’ tong Yérusalem, bé’ jak dau Pentakosta. 17 Jin Miletus Paulus nyohoo’ kelunan tai Épesus tebai kekat pengeja’au sidang tuai temeu’ ngan néh sinah. 18 Hun kekat kelunan inah tuai, boh éh bara’ ngan réh, ka’ ha’ néh, Ka’ah jam tong kekat kereja’ ké’ ngan barék ké’ belah keh jin dau bu’un ké’ avéé’ tong tana’ Asia iteu’ rai. 19 La’ah dawai kenin ké’ avéé’ baa’ maten ké’ musit ku’ kereja’ ngan Tuhan rai, uban pinaa’ arong penusah ké’ neu’ irah Yahudi éh pakat maneu’ ku’. 20 La’ah kekat ha’ tebaraa’ éh omok ngegahang keh, bé’ ku’ bé’ bara’ éh ngan keh, bang pu’un ku’ bara’ éh tong jumen kekat kelunan, kenat péh tong siget-siget lamin péh. 21 Pu’un ku’ nebaraa’ pohoo’ Yahudi ngan irah éh tengéé’ pohoo’ péh, nyohoo’ réh piso jin kesa’at réh ngan tavin Allah ngan ngelan tong Tuhan Yésus Kristus. 22 Hun iteu’ akeu’ juk kivu sohoo’ Sahéé’ Ni’ai tai Yérusalem, bé’ ku’ jam ineu’ éh juk pu’un tong ku’ sitai da’. 23 Bang pu’un Sahéé’ Ni’ai bara’ lem kenin ké’, tong siget-siget leboo’ adang réh juk nutup ngan juk petusah akeu’. 24 Bang bé’ akeu’ paréé’ urip ké’, sokoh ke’ ku’ omok pesukup kekat kereja’ éh na’ Tuhan Yésus ngan ké’, inah éh, bara’ Rengah Jian tong penika Allah. 25 Pu’un ku’ lakau belah keh rai, ngan nebaraa’ keh tong Allah éh pengeja’au ngan mihau keh, kejam ké’ bé’ ka’ah omok na’at akeu’ la’o iteu’ kepéh, bé’ akeu’ pu’un peliwet ngan keh kepéh. 26 Uban néh kenat dau iteu’ akeu’ bara’ mu’un ngan keh, hun néh pu’un séé’-séé’ jin belah keh éh tawang, bé’ éh uban ké’ bé’ nebaraa’ éh, 27 uban bé’ ku’ melim jelua’ ha’ tebaraa’, bang pu’un ku’ lepah bara’ kekat jalan Allah ngan keh. 28 Jian keh mihau kenin keh mu’un-mu’un, kenat péh mihau kekat domba Tuhan éh nena’ Sahéé’ Ni’ai ngan keh. Jian keh mihau sidang Allah mu’un-mu’un, éh anah nah neu’ dahaa’ Anak Néh. 29 La’ah akeu’ jam la’o ké’ piso, pu’un kuraa’ kelunan éh barei’ bekuleu’ éh luvaa’ masek belah keh kepéh. Bé’ réh jam pika domba Tuhan inah. 30 La’ah jin belah ka’ah ke’ pu’un kuraa’ kelunan juk betéé’ nalau keh jin ha’ tebaraa’ éh teneng, ke’ réh pepetat kelunan éh ngelan tong Tuhan jin pengelan réh ke’ réh kivu irah kepéh. 31 Uban néh kenat mavaa’ keh jian-jian, ngan seruh keh jian-jian, uban teleu’ ta’un tenéh, pu’un ku’ nebaraa’ keh siget dau ngan siget merem pah avéé’ baa’ maten ké’ musit mu’un. 32 Hun iteu’ akeu’ mejai keh ngan Allah, ngan ha’ tebaraa’ Néh éh bara’ tong penika Néh. Iah pu’un penyukat ngereken keh ngan mena’ kekat pengejian Néh ngan keh éh pu’un nena’ Néh ngan kekat kelunan éh anah nah. 33 Bé’ akeu’ magat livah ngan pakai kelunan. 34 Ka’ah péh jam usah ké’ tengéé’ lepah kereja’ pesukup kekat éh bé’ pu’un sukup ngan ké’, kenat péh ku’ pesukup kekat éh bé’ sukup ngan kekat kelunan éh ngan ké’. 35 Dalem kekat éh neu’ ké’ inah, inah akeu’ bara’ adang tekep lu’ gahang kereja’ nolong kelunan éh lemoo’, uban pu’un Tuhan Yésus bara’ ka’, Kelunan éh mena’ pelapah jian kenin néh jin irah éh alaa’ éh, ha’ Néh. Kenat ha’ Paulus ngan kekat pengeja’au jin sidang Épesus. 36 La’o Paulus pané kenat, boh éh ngejekuu’ lep néh ke’ néh sebayang pemung ngan kekat réh béé. 37 Pu’un réh nyekavit Paulus ngan mangaa’ besau uban réh petat. 38 Besau kenin réh neu’ ha’ néh bara’, bé’ réh pu’un na’at éh kepéh. Boh réh kivu éh avéé’ tong kapen.
211 La’o mé’ bara’ tabi’ ngan réh, lakau mé’ jalan kapen tai kedipa pulau Kos, ngan barei’ sagam mé’ tai pulau Rodes, ngan jin sinah mé’ tai leboo’ ja’au Patara. 2 Sinah mé’ jam jah kapen kepéh juk papit tai betah tana’ Penisia, masek mé’ lem kapen tioo lakau kepéh. 3 Poléng tana’ Siprus ta’an mé’ saa’ kabéng, lakau de’ ke’ mé’ tai tana’ Siria. Avéé’ tong leboo’ Tirus taket mé’ tong tana’, uban sinah kapen modoo’ kekat livah éh pu’un lem néh. 4 Pu’un mé’ petemeu’ ngan kuraa’ kelunan éh ngelan tong Tuhan sinah, mokoo’ mé’ ngan réh jah batang migu kelebéé’. La’ah neu’ penyukat Sahéé’ pu’un réh meta’ Paulus tai Yérusalem. 5 Bang hun sukup dau mé’ mokoo’ ngan réh, lakau mé’ kepéh. Kekat réh béé, pemung ngan redo ngan anak réh, mihin mé’ jin leboo’ réh patet mé’ tai napun déhéé’ baa’ banget. Pu’un mé’ ngejekuu’ lep mé’ ngan sebayang. 6 Hun réh lepah tabi’ kekat mé’ béé, masek mé’ lem kapen moléé’ réh tai lamin réh. 7 Lakau mé’ kepéh jin leboo’ Tirus tai leboo’ ja’au Ptolemais. Pu’un mé’ bara’ tabi’ ngan kekat padéé’ lem Tuhan, mokoo’ mé’ ngan réh dau inah. 8 Barei’ sagam lakau mé’ kepéh tai leboo’ ja’au Kaisarea. Sinah mé’ tai tong lamin Pilipus, kelunan éh bara’ Rengah Jian. Lakei’ inah jah usah jin irah éh kevéléé’ réh tujuu’ usah tong Yérusalem lepah nah. Tong lamin lakei’ inah mé’ mokoo’. 9 Pat anak néh redo lemanai éh bara’ tong ha’ tebaraa’ Allah. 10 La’o mé’ mokoo’ sinah duah-teleu’ dau, boh jah kelunan éh nabi, ngaran néh Agabus pu’un éh tuai jin tana’ Yudea. 11 Tuai éh tavin mé’ ke’ néh alaa’ jeret é’éng Paulus ke’ néh ngejeret gem ngan ojoo’ nah ke’, ka’ ha’ néh, Iteu’ éh benara’ Sahéé’ Ni’ai, Kelunan éh pu’un jeret é’éng iteu’, inah éh juk kamit ngan kejeret irah Yahudi tong Yérusalem kepéh, la’o inah boh réh pu’un mena’ éh ngan kelunan éh tengéé’ pohoo’, ha’ néh. 12 Hun mé’ menéng ha’ néh kenat, boh mé’ ngan kekat kelunan tong leboo’ inah meta’ Paulus mu’un-mu’un, bé’ buhaa’ éh tai Yérusalem. 13 Bang ka’ ha’ Paulus ngan mé’, Kineu’ keh mangaa’ ngan memutui kenin ké’? Uban akeu’ keloo’ bé’ makat kejeret awah tong Yérusalem bang matai mu’un péh neu’ ngaran Tuhan Yésus, ha’ néh. 14 Uban néh bé’ keloo’ kivu sohoo’ mé’, bé’ améé’ pané kepéh, ka’ awah ha’ mé’ ngan néh, Kivu pengeloo’ Tuhan awah, ha’ mé’. 15 La’ah pu’un mé’ mokoo’ sinah lebéé’ si’ik, la’o inah boh mé’ teven livah mé’ juk tai Yérusalem. 16 La’ah kelunan éh ngelan tong Tuhan éh jin leboo’ Kaisarea patet mé’ tai lamin Menason, kelunan jin pulau Siprus éh ngelan tong Tuhan lepah lebéé’ tenéh, uban sinah améé’ juk mokoo’. 17 Hun mé’ avéé’ tong Yérusalem kekat padéé’ lu’ lem Tuhan alaa’ mé’ ngan jian kenin. 18 Dau rema Paulus pemung ngan améé’ tai tavin Yakub ngan pu’un kekat pengeja’au sidang sinah kepéh. 19 Pu’un Paulus bara’ tabi’ ngan réh ngan bara’ tong kekat penganeu’ Allah belah kelunan éh tengéé’ pohoo’. 20 Hun réh menéng éh, boh réh mejing Allah. Ka’ ha’ réh ngan Paulus, O padéé’, kejam ko’ pu’un kuraa’-kuraa’ ibu kelunan Yahudi éh ngelan tong Tuhan Yésus, ngan éh mekat kivu sohoo’ lem Surat Musa. 21 La’ah pu’un réh lepah menéng rengah tong jalan ko’ nebaraa’ kekat kelunan Yahudi éh mokoo’ belah irah éh tengéé’ pohoo’ ngan nyohoo’ réh bet kekat sohoo’ lem Surat Musa, ngan inah kepéh pu’un réh menéng rengah ko’ nebaraa’ réh mai réh pesunat anak réh, ngan mai réh kivu kekat adet Yahudi. 22 Hun néh kenat kineu’ lah lu’. Adang irah jam ka’au’ lepah avéé’ siteu’. 23 Uban néh kenat jian ke’ kivu ha’ mé’. Pu’un pat usah siteu’ éh lepah maneu’ jajii’ ngan Tuhan, 24 jian ke’ kivu réh ngan maneu’ kekat éh tekep tong adet peti’ai la’o réh maneu’ jajii’ ngan Tuhan kenat, jian ke’ mena’ rigit bayan pengena’ réh tong Umaa’ Allah, la’o inah boh réh omok memerit ulun réh. Hun ko’ maneu’ kenat boh réh jam rengah éh nenéng réh tong ke’ nah bé’ éh teneng, uban omok réh na’at usah ko’ tengéé’ péh pu’un kivu sohoo’ lem Surat Musa. 25 Bang tong kelunan éh tengéé’ pohoo’ jin pohoo’ Yahudi éh pu’un ngelan tong Yésus, pu’un mé’ pekateu’ surat ngan réh rai, meta’ réh mai réh kuman ka’an éh peliwa kelunan ngan butun, ngan mai réh kuman dahaa’, ngan mai réh kuman ka’an éh matai nahat réh batok awah, ngan mai réh petuyang, kenat ha’ réh bara’ ngan Paulus. 26 Boh Paulus mihin irah pat usah iri’ ngan dau rema Paulus ngan irah iri’, kivu adet irah Yahudi peti’ai. La’o inah masek éh tong umaa’ Allah ke’ néh bara’ kuraa’ dau la’ah boh éh ma’o tong ha’ jajii’ néh ngan Tuhan nah, ke’ réh omok petenup ka’an éh juk penatai réh ngan Tuhan barei’ éh kemalai réh. 27 Teka tujuu’ dau nah juk béé, kelunan Yahudi jin Asia na’at Paulus nah lem umaa’ Allah. Irah pebetéé’ kenin kelunan pinaa’ nah ke’ réh ngamit Paulus. 28 Ka’ ha’ réh, O kelunan Yahudi, nolong améé’, iteu’ kelunan éh nebaraa’ kekat kelunan ke’ réh leko pohoo’ lu’ Yahudi, ngan Surat Musa ngan umaa’ Allah iteu’, ngan hun iteu’ kepéh pu’un éh mihin kelunan éh tengéé’ pohoo’ tuai tong umaa’ Allah. Bé’ éh tekep éh mihin réh tong umaa’ Allah, ha’ réh. 29 Irah bara’ kenat uban réh na’at Tropimus kelunan jin Épesus nah pu’un ngan Paulus tong leboo’ inah, kenat irah ke’ réh seruh Paulus pu’un mihin éh tai umaa’ Allah. 30 La’ah kekat irah tong leboo’ inah bé’ batuu’-batuu’ kenin réh, nekedeu’ réh tai ngamit Paulus, mihit éh musit jin umaa’ Allah, kenat ke’ réh tutup kekat usit tapé tong umaa’ Allah. 31 Hun réh juk mematai Paulus, boh lakei’ ja’au éh pengeja’au jah ibu seradu Rum menéng rengah kekat kelunan tong Yérusalem merek mu’un ngan betéé’ juk mematai kelunan. 32 Pelapah éh mihin irah seradu ngan pengeja’au réh nekedeu’ tai irah pinaa’ éh pana kenin nah. Hun réh na’at lakei’ ja’au ngan seradu nah, boh réh bé’ mipok Paulus kepéh. 33 Tuai lakei’ ja’au nah ngamit Paulus ke’ néh nyohoo’ réh ngejeret éh palaa’ duah ratai. Boh éh neteng réh, ka’ ha’ néh, séé’ kelunan iteu’, ineu’ éh neu’ néh, ha’ néh. 34 Pu’un jelua’ réh bika’ barei’ iteu’, ngan jelua’ kepéh bika’ barei’ inah. Uban néh bé’ jam kineu’ éh ke’ réh paneu’ kenat, pu’un éh nyohoo’ réh mihin éh tai umaa’ peritah. 35 Hun réh avéé’ tong jan pu’un irah seradu metéé’ éh uban irah pinaa’ nah mi’ah mu’un. 36 Pesikeu’ kekat réh, ja’au ha’ réh bika’, ka’ ha’ réh, Mematai éh, ha’ réh. 37 Hun réh juk mihin Paulus tai lem umaa’ peritah, boh éh pané ngan lakei’ ja’au éh pengeja’au jah ibu seradu nah, ka’ ha’ néh, Kineu’, omok ku’ pané metok ngan ko’ kei, ha’ néh. Ka’ ha’ lakei’ ja’au nah, Kineu’ ko’ jam ha’ Yunani kei! 38 Bé’ éh ka’au’ éh jin Mesir éh pebetéé’ kenin kelunan ke’ réh pekayau, ngan mihin pat ibu kelunan sa’at tai ahang tana’ irai kei, ha’ néh neteng Paulus. 39 Ka’ ha’ Paulus mipa éh, Akeu’ iteu’ kelunan Yahudi jin leboo’ Tarsus, tong tana’ Kilikia, Tarsus nah leboo’ ja’au, akeu’ pu’un jin leboo’ inah. Akeu’ menyat ke’ kejeraa’ akeu’ pané ngan irah pinaa’ nah, ha’ néh. 40 Boh lakei’ ja’au nah kejeraa’ éh pané ngan réh. Nekedéng Paulus tong jan ngan mapat réh palaa’ ojoo’ néh. Hun réh pawah ke’ ha’ boh éh pané lem ha’ Ibrani, ka’ ha’ néh.
221 O kekat tamen ngan kekat padéé’ ké’, jian keh menéng ha’ ké’, ha’ Paulus. 2 Hun réh menéng ha’ néh pané lem ha’ Yahudi nah, boh réh kelem mu’un. Ka’ ha’ Paulus, 3 Akeu’ iteu’ kelunan Yahudi, ngan lohoo’ ké’ tong leboo’ Tarsus tong tana’ Kilikia, bang hun ké’ sukup ja’au boh ku’ tuai tong leboo’ Yérusalem iteu’ ké’ omok pekalai jin Gamaliel éh nebaraa’ tong kekat sohoo’ lem Surat Musa éh kenivu tepun lu’. La’ah mekat mu’un ku’ kivu Allah pekua’ barei’ ka’ah dau iteu’ nah. 4 Pu’un ku’ lepah peketa kelunan éh kivu ha’ tebaraa’ éh Maréng, pah avéé’ réh matai, ngan ngejeret réh ngan maneu’ réh lem lamin tutup, kenat péh irah lakei’ ngan irah redo péh. 5 La’ah Imam éh pengeja’au kekat imam ngan kekat irah Komiti sebayang Yahudi jam ku’ pu’un pané mu’un. Pu’un ku’ alaa’ surat jin réh éh pekateu’ réh ngan irah Yahudi tong leboo’ Damsyik, boh ku’ tai Damsyik dokoo’ ké’ omok ngamit kelunan sinah ngan ngejeret réh tai Yérusalem dokoo’ irah omok ngukum réh, ha’ Paulus ngan réh. 6 Ka’ ha’ Paulus kepéh, Ngioo’ dau pejek hun ké’ lakau nah danii’ tong leboo’ Damsyik nah, tioo pu’un ada jin langit rema tutuh ké’. 7 Tioo pesut ku’ kuba’ tong tana’, boh ku’ menéng jah ha’ éh bara’ ka’ ngan ké’, Saulus, Saulus, uban ineu’ ke’ peketa Akeu’, ha’ Néh. 8 La’ah ha’ ké’ ngan Néh, séé’ ke’ Néh, O Tuhan, ha’ ké’. Ka’ ha’ Néh kepéh, Akeu’ iteu’ Yésus jin Nasaret éh peketa ko’ nah, ha’ Néh. 9 Kekat kelunan éh pemung ngan ké’ nah pu’un réh na’at ada inah, bang bé’ réh menéng ha’ éh pané ngan ké’ nah. 10 Ka’ ha’ ké’ kepéh, O Tuhan, ineu’ éh tekep ké’ maneu’, ha’ ké’. Ha’ Tuhan ngan ké’, Jian ke’ betéé’ tai leboo’ Damsyik, hun ko’ avéé’ sinah boh éh pu’un bara’ éh tekep ko’ maneu’ kepéh, ha’ Néh. 11 Uban ké’ bé’ omok na’at neu’ kemening ada inah, kelunan éh ngan ké’ nah majak ku’ tai leboo’ inah. 12 La’ah tong Damsyik nah pu’un jah kelunan ngaran néh Ananias, éh senepah kekat kelunan Yahudi, mekat mu’un éh kivu sohoo’ lem Surat Musa. 13 Tuai éh tavin ku’ nekedéng déhéé’ ké’, ka’ ha’ néh ngan ké’, O padéé’ ké’ Saulus, jian ke’ omok na’at kepéh, ha’ néh. Pelapah pu’un ta’an ké’ kepéh, pu’un ku’ na’at éh. 14 La’ah ka’ ha’ néh, Allah éh kenelan tepun lu’ pu’un éh ngevéléé’ ke’ dokoo’ ko’ omok jam pengeloo’ Néh, ngan omok na’at Anak Néh éh teneng, ngan menéng ha’ usah Néh mu’un. 15 Uban ka’au’ juk bara’ Iah ngan kekat kelunan dokoo’ ko’ omok bara’ tong kekat éh ta’an ko’ ngan éh nenéng ko’ rai kepéh. 16 La’ah hun iteu’ kineu’ ke’ mokoo’? Jian ke’ betéé’ ngan batis, ngan menyat pika lem ngaran Néh ke’ Néh mega’ penyala’ ko’, kenat ha’ Ananias ngan ké’, ha’ Paulus. 17 Ka’ ha’ Paulus kepéh, La’ah hun ké’ moléé’ tai Yérusalem ngan sebayang tong umaa’ Allah, pu’un poléng ta’an ké’, 18 pu’un ku’ na’at Tuhan éh bara’ ngan ké’, ka’ ha’ Néh, Rigah ke’ piso jin Yérusalem, uban bé’ réh keloo’ alaa’ ha’ tebaraa’ ko’ tong Akeu’, ha’ Tuhan. 19 La’ah ka’ ha’ ké’, O Tuhan, kejam réh akeu’ pu’un tai siget-siget lamin sebayang, ké’ ngamit kelunan éh ngelan tong Ka’au’ ngan mipok réh ngan mihin réh tai lamin tutup rai. 20 Irah jam hun réh mematai Stepanus éh bara’ tong Ka’au’ rai, pu’un ku’ nekedéng déhéé’ néh ngan mihau pakai kelunan éh mematai éh nah, murung kenin ké’ na’at réh maneu’ éh, kenat ha’ ké’ ngan Tuhan. 21 Ka’ ha’ Tuhan ngan ké’ kepéh, Lakau ke’, Akeu’ juk nyohoo’ ke’ tai juu’, avéé’ tong kelunan éh tengéé’ pohoo’ jin pohoo’ Yahudi. Kenat ha’ Tuhan ngan ké’ rai, ha’ Paulus. 22 Boh kekat kelunan Yahudi éh juk maneu’ Paulus nah, menéng ha’ néh pah avéé’ tong ha’ néh bara’ tong kelunan éh tengéé’ pohoo’, boh réh pelapah merek kepéh, bika’-bika’ réh, ka’ ha’ réh, Kebéé éh, mematai éh, bé’ tekep néh murip la’ah, ha’ réh. 23 Irah ngeradau ngan niwet livah pakai réh pah avéé’ aveu’ nebului tong sawang. 24 La’ah lakei’ ja’au éh pengeja’au jah ibu seradu nah nyohoo’ irah seradu mihin Paulus tai umaa’ peritah ke’ réh pekerat mipok éh, jalan réh nelusit éh pané bara’ tong sala’ néh éh ke’ kelunan pinaa’ nah bika’ kenat. 25 La’o réh ngejeret éh ke’ réh juk memahit mipok éh, boh Paulus pané ngan pengeja’au jah ato seradu éh nekedéng sinah, ka’ ha’ néh, Kineu’, omok keh mipok kelunan éh lem nihau Rum hun néh bé’ jak petuneng réh sala’ kei? Kineu’, jian keh maneu’ éh kenat, ha’ néh. 26 Hun pengeja’au jah ato seradu nah menéng ha’ néh kenat, tai éh ngan pengeja’au jah ibu seradu ke’ néh bara’ ngan néh, ka’ ha’ néh, Kineu’ éh juk neu’ ko’, uban kelunan inah kelunan lem nihau Rum éh, ha’ néh ngan pengeja’au néh. 27 Tuai pengeja’au jah ibu seradu iri’ kepéh ke’ néh neteng Paulus, ka’ ha’ néh, Kineu’, mu’un éh ka’au’ kelunan lem nihau Rum, ha’ néh. Ka’ ha’ Paulus kepéh, Oo’, mu’un, ha’ néh. 28 Ka’ ha’ pengeja’au seradu nah kepéh, Ja’au mu’un pengena’ ké’ ke’ ké’ omok masek lem nihau Rum, ha’ néh. Ka’ ha’ Paulus kepéh, Bé’ akeu’ pu’un mena’ ineu’-ineu’ péh uban jin lohoo’ ké’ akeu’ pu’un lem nihau Rum awah, ha’ néh. 29 Kekat kelunan éh to juk peresa’ éh nah tioo piso jin néh, pengeja’au seradu nah péh medai, uban néh jam Paulus pu’un lem nihau Rum, ngan pu’un éh lepah ngejeret éh palaa’ ratai. 30 Bang barei’ sagam kepéh uban pengeja’au nah juk jam tong rungen kelunan Yahudi pesala’ Paulus, pu’un éh nyohoo’ réh muka jeret néh ngan nyohoo’ irah pengeja’au imam irah Komiti sebayang Yahudi petipun, ke’ néh mihin Paulus tong jumen kekat réh béé.
231 Pu’un Paulus kepuh kekat irah Komiti sebayang Yahudi, ka’ ha’ néh, O kekat tamen ngan kekat padéé’ ké’, bé’ pu’un ineu’-ineu’ éh lem kenin ké’ éh omok pesala’ ku’ tong jumen Allah jin bu’un urip ké’ pah avéé’ dau iteu’ péh. 2 La’ah Ananias éh Imam éh pengeja’au kekat imam, nyohoo’ kelunan éh nekedéng déhéé’ Paulus mabok ujun néh. 3 La’ah ka’ ha’ Paulus ngan néh, Allah juk ngukum ke’, ka’au’ barei’ boloo’ senang pinaa’ beték bang tetok awah. Pu’un ke’ mokoo’ juk ngukum akeu’ kivu sohoo’ lem Surat Musa, bang pu’un ke’ ngelapah tong ukum inah uban ko’ nyohoo’ réh mabok ujun ké’, ha’ Paulus. 4 Ka’ ha’ kelunan éh nekedéng déhéé’ Paulus nah, Kineu’ ke’ pané kenat nyesa’at Imam éh pengeja’au kekat imam Allah lu’, ha’ néh ngan Paulus. 5 Ka’ ha’ Paulus mipa éh, O kekat padéé’ ké’, bé’ akeu’ jam iah éh Imam éh pengeja’au kekat imam, uban pu’un jah ha’ lem surat Allah éh bara’ ka’, Mai keh ngesa’at iah éh pengeja’au keh, ha’ néh. 6 Hun Paulus jam jelua’ irah Komiti sebayang Yahudi nah kelunan éh kivu adet Saduki ngan jelua’ kivu adet Parisi, pelapah éh pané ngan ja’au ha’ ngan irah Komiti sebayang Yahudi, ka’ ha’ néh, O kekat tamen ngan kekat padéé’ ké’, akeu’ iteu’ péh kelunan Parisi ngan anak kelunan Parisi. La’ah uban ké’ ngelan kelunan matai omok betéé’ murip kepéh, inah ké’ kenukum réh ka’, ha’ néh. 7 Hun réh menéng ha’ néh kenat, pelapah irah Parisi ngan irah Saduki pepaneu’, pah avéé’ réh petengéé’ kenin kepéh. 8 Uban kelunan Saduki bara’ bé’ pu’un pengebetéé’ jin patai, ngan bé’ pu’un meliket ngan sahéé’ péh, bang kelunan Parisi ngelan kekat inah pu’un. 9 Pelapah ja’au ha’ réh pepaneu’ kepéh ngan pu’un kuraa’ kelunan Parisi éh nebaraa’ tong sohoo’ lem Surat Musa nekedéng ngan pesakat, ka’ ha’ réh, Bé’ améé’ jam ineu’-ineu’ éh kesa’at kelunan iteu’. Barang pu’un jah sahéé’ éh pané ngan néh, barang meliket péh, ha’ réh. 10 Uban réh paneu’ ngan merek mu’un kenat, inah pengeja’au jah ibu seradu nah medai réh mesa Paulus. Kenat iah nyohoo’ seradu tai alaa’ Paulus jin belah réh ngan mihin éh tai umaa’ peritah. 11 Tong keruwah merem nekedéng Tuhan déhéé’ Paulus ke’ Néh bara’ ngan néh, ka’ ha’ Néh, reken kenin ko’, uban pekua’ ko’ bara’ Akeu’ tong Yérusalem rai, kenat péh tekep ke’ bara’ Akeu’ tong leboo’ Rum kepéh, ha’ Tuhan ngan Paulus. 12 Hun dau rema kepéh kelunan Yahudi petipun ngan pakat, ngan pekua’ kenin pesupa bara’, Bé’ irah kuman, bé’ irah mesep péh pah avéé’ Paulus penatai réh. 13 La’ah mutaa’ pat poloo’ usah réh éh pakat ngan pesupa kenat. 14 Tai réh tavin irah pengeja’au imam ngan irah pengeja’au kelunan Yahudi, ke’ réh bara’ ngan réh, ka’ ha’ réh, Améé’ pekua’ kenin pesupa mu’un, bé’ améé’ keloo’ kuman ineu’-ineu’ péh pah avéé’ Paulus penatai mé’. 15 Uban néh kenat jian ka’ah ngan irah Komiti sebayang Yahudi nyohoo’ pengeja’au jah ibu seradu mihin Paulus ngan ka’ah, barei’ keh juk pané ngan néh ke’ néh seruh keh keloo’ peresa’ éh lenaa’ mu’un. Bang bé’ mena Paulus avéé’ siteu’ omok mé’ mematai éh belu’an jalan nah, ha’ irah éh pesupa nah. 16 Bang pu’un jah anak éh anak padéé’ Paulus éh redo, menéng ha’ réh pané kenat, pelapah éh tai tong umaa’ peritah ke’ néh bara’ ngan Paulus. 17 La’ah Paulus tebai jah kelunan éh pengeja’au jah ato seradu ke’ néh bara’ ngan néh, ka’ ha’ néh, Jian ke’ mihin anak iteu’ tavin lakei’ ja’au éh pengeja’au jah ibu seradu, uban pu’un jah ha’ éh juk benara’ néh ngan néh ne’, ha’ Paulus. 18 La’ah iah mihin éh tai pengeja’au seradu nah, ka’ ha’ néh, Paulus éh tenutup rai pu’un éh nyohoo’ ku’ mihin anak iteu’ ngan ko’, uban pu’un jah ha’ éh juk benara’ néh ngan ko’, ha’ néh. 19 La’ah pengeja’au seradu nah ngamit ojoo’ anak inah ke’ néh mihin éh tengéé’ ke’ néh neteng éh, ka’ ha’ néh, Ineu’ éh juk benara’ ko’ ngan ké’ kei, ha’ néh. 20 Ka’ ha’ anak inah ngan néh, Pu’un kelunan Yahudi lepah pakat juk menyat ke’ mihin Paulus tai irah Komiti sebayang Yahudi kepéh sagam, barei’ réh keloo’ neteng éh pelapah lenaa’ kepéh nah. 21 Bang mai ke’ kivu sohoo’ réh da’, uban mutaa’ pat poloo’ réh pu’un kelim belu’an jalan ke’ réh mavang éh. Pu’un réh lepah pesupa bé’ keloo’ kuman ngan mesep pah avéé’ réh pu’un mematai Paulus. Hun iteu’ kekat réh lepah petenup mena ha’ ko’ awah, ha’ anak inah bara’ ngan pengeja’au seradu nah. 22 Ka’ ha’ pengeja’au seradu inah ngan néh, Mai ke’ bara’ ha’ éh benara’ ko’ ngan ké’ iteu’ ri’ ngan irah éh jah kepéh da’, ha’ néh. Boh éh nyohoo’ anak inah moléé’. 23 La’ah lakei’ ja’au éh pengeja’au jah ibu seradu nah tebai duah usah éh pengeja’au jah ato seradu kepéh ke’ néh bara’ ka’ ngan roh, Jian keh nyohoo’ kekat seradu petenup ke’ réh tai leboo’ Kaisarea. Duah ato seradu éh omok lakau tana’, ngan tujuu’ poloo’ kepéh éh jalan kuda, 24 Jian réh peleka pukun pien merem iteu’ da’ ngan mihin kuda’ kepéh éh jalan Paulus ke’ réh omok mihin éh tavin Peliks éh pengeja’au peritah nah, dai réh maneu’ éh belu’an jalan nah da’, ha’ néh. 25 La’ah pu’un éh maneu’ jah surat, ka’ ha’ néh. 26 Akeu’ Klaudius Lisias bara’ tabi’ ngan ko’ Peliks, éh pengeja’au mé’. 27 La’ah pu’un irah Yahudi ngamit Paulus ke’ réh juk mematai éh. Hun ké’ jam iah pu’un lem nihau Rum boh ku’ tai alaa’ éh. 28 La’ah uban ké’ juk jam uban ineu’ réh maneu’ éh kenat, inah akeu’ mihin éh tai tavin Komiti sebayang Yahudi. 29 Inah awah éh kejam ké’ tong iah, irah pu’un pesala’ éh uban ha’ tebaraa’ néh tong adet réh tengéé’, bang bé’ pu’un jah ineu’ péh éh ke’ néh tekep kenukum réh matai ngan tenutup péh. 30 Hun ké’ jam irah pu’un pakat pitah jalan ke’ réh juk mematai éh, inah akeu’ nyohoo’ éh tai tavin ka’au’ kepéh. Pu’un ku’ nyohoo’ irah éh pesala’ éh nah bara’ kekat kesa’at néh ngan ko’ kepéh. Kenat ha’ Klaudius lem surat néh. 31 La’ah kekat seradu nah maneu’ pekua’ éh sohoo’ Klaudius ngan réh nah. Tovoo’ merem inah irah alaa’ Paulus ke’ réh patet éh avéé’ leboo’ ja’au Antipatris. 32 Dau rema inah moléé’ kepéh irah éh lakau tana’ tai umaa’ peritah, irah éh jalan kuda’ nah to ke’ patet Paulus. 33 Hun réh avéé’ tong Kaisarea pu’un réh mena’ surat inah ngan pengeja’au peritah ngan pokoo’ Paulus ngan néh sinah. 34 La’o néh purung surat inah pu’un éh neteng Paulus semah éh pengurip néh bu’un. Hun néh jam Paulus iteu’ kelunan jin tana’ Kilikia, 35 boh éh bara’ ngan néh, ka’ ha’ néh, Hun kekat kelunan éh maneu’ ke’ rai avéé’ siteu’ da’, boh ku’ peresa’ ke’, ha’ Peliks. La’ah iah nyohoo’ réh pokoo’ Paulus tong umaa’ Raja’ Herodis ngan mavaa’ éh sinah.
241 Lemah dau la’o inah, tuai Ananias Imam éh pengeja’au kekat imam, pemung ngan irah pengeja’au kelunan Yahudi, ngan jah kelunan éh jam pané, ngaran néh Tertulus. Kekat irah inah pané mu’un ngan Peliks éh pengeja’au peritah ke’ réh maneu’ Paulus. 2 Tovoo’ Paulus tuai tenebai réh, pu’un Tertulus pané maneu’ éh, ka’ ha’ néh, O Peliks éh maren, ka’au’ éh jam seruh, améé’ iteu’ kelunan éh sa’at awah. Ke’ améé’ murip jian ngan bé’ pu’un pekayau uban ka’au’ éh jam seruh mé’. 3 Améé’ ngelayau jian kenin hun ka’au’ mihau mé’ kenat semah-semah péh. 4 Bang uban ké’ bé’ keloo’ ke’ mutau bé’ ku’ kebit ha’ dat. Jian ke’ menéng kekat ha’ éh juk benara’ mé’ ngan ko’ da’. 5 Améé’ alaa’ kelunan iteu’ uban néh ngasau mu’un, uban semah-semah éh tai pah tipo tana’, iah éh nebu’un kelunan Yahudi merek ngan betéé’ maneu’ kelunan. Inah kepéh, iah jah pengeja’au vun irah kelunan Nasaret. 6 La’ah pu’un éh tupat mihin kelunan tai umaa’ Allah éh bé’ payoo’ réh tai kenat, bang pu’un mé’ ngamit éh. Améé’ juk ngukum éh kivu ukum mé’, 7 bang lakei’ ja’au éh pengeja’au jah ibu seradu, éh ngaran néh Lisias, pu’un éh tuai alaa’ éh jin améé’. Boh Lisias nyohoo’ kekat améé’ éh maneu’ éh nah tuai tavin ka’au’. 8 Hun ko’ keloo’ neteng éh, omok ke’ jam tong kekat penganeu’ néh ke’ améé’ maneu’ éh, pu’un éh pekua’ ha’ mé’ nah, ha’ Tertulus pané ngan Peliks. 9 La’ah kekat kelunan Yahudi éh pemung ngan Tertulus maneu’ Paulus bara’ kekat ha’ éh benara’ Tertulus pu’un éh kenat mu’un. 10 La’o inah Peliks ngawet nyohoo’ Paulus pané, boh éh pané, ka’ ha’ néh, Jian kenin ké’ pané uban ké’ jam ka’au’ pu’un mihau kekat améé’ tong tana’ Rum iteu’ jin sahau rai. 11 La’ah jah poloo’ duah dau awah akeu’ pu’un tong Yérusalem seva’ Allah. Hun ko’ neteng kelunan, boh ke’ jam éh pu’un kenat mu’un. 12 La’ah bé’ irah Yahudi na’at ku’ pesakat ngan séé’-séé’ péh tong umaa’ Allah nah. Kenat péh bé’ réh na’at ku’ pebetéé’ kenin kelunan. Bé’ éh pu’un kenat tong lamin sebayang Yahudi ngan tong leboo’ ja’au péh. 13 Bé’ réh omok pekelenaa’ jalan éh ke’ réh maneu’ akeu’ ngan ko’ nah. 14 Bang akeu’ bara’ mu’un ngan ko’, mu’un akeu’ seva’ Allah éh kenelan tepun mé’, ngan mu’un akeu’ pu’un kivu ha’ tebaraa’ Yésus, éh benara’ réh sala’, bang inah kepéh pu’un akeu’ ngelan tong kekat ha’ éh lepah senurat dalem Surat Musa ngan éh lem surat irah nabi Tuhan. 15 Pu’un réh ngelan Allah omok metéé’ kekat kelunan jin patai réh, kelunan éh teneng ngan kelunan éh sala’ péh, kenat péh akeu’ ngelan éh kepéh. 16 Ngelayau akeu’ pitah jalan dai pu’un ineu’-ineu’ lem kenin ké’ éh omok pesala’ ku’ tong jumen Allah kenat péh tong jumen kelunan, ha’ Paulus. 17 Ka’ ha’ néh kepéh, La’ah uban lepah lebéé’ mu’un ku’ bé’ tai Yérusalem avéé’ kuraa’-kuraa’ ta’un tenéh, inah ku’ tai dokoo’ ké’ mihin rigit ngan mena’ éh ngan pohoo’ ké’, ngan inah kepéh dokoo’ ké’ omok mena’ pengena’ ngan Allah, barei’ kemalai mé’ tong sebayang mé’. 18 Tovoo’ ké’ maneu’ kenat tong umaa’ Allah, inah réh temeu’ ngan ké’ la’o ké’ kivu adet mé’ éh adet peti’ai nah. Hun inah péh bé’ pu’un kelunan pinaa’ ngan ké’, ngan bé’ pu’un pepaneu’, 19 bang kelunan Yahudi jin Asia awah ngan ké’ sinah. Hun réh juk maneu’ akeu’, tekep réh pu’un siteu’ ke’ réh bara’ ngan ko’ tong kekat jalan ké’ éh ke’ réh maneu’ ku’ nah. 20 Hun réh bé’ omok kenat, jian kekat kelunan éh pu’un iteu’ bara’ ineu’ éh sala’ ké’ éh kejam réh hun ké’ nekedéng tong jumen Komiti sebayang Yahudi rai. 21 Bang jah awah sala’ ké’ rai, uban ké’ mejui hun ké’ nekedéng belah réh rai, ka’ ha’ ké’, Ka’ah pu’un maneu’ akeu’ dau iteu’ uban akeu’ ngelan kelunan matai omok betéé’ murip kepéh. Kenat ha’ ké’ rai, ha’ Paulus. 22 Bang Peliks, éh pinaa’ pengejam néh tong ha’ tebaraa’ Yésus, bang bé’ iah kivu éh, iah nutup petipun réh, ka’ ha’ néh, Hun Lisias, pengeja’au jah ibu seradu tuai kepéh, boh ku’ omok memekat ha’ ko’ iteu’, ha’ néh. 23 La’ah iah nyohoo’ pengeja’au jah ato seradu nah mavaa’ Paulus, bang kejeraa’ éh lakau tong lamin éh jalan néh nah ngan kejeraa’ bakéh néh tuai nolong éh. 24 Kuraa’ dau la’o inah tuai Peliks ngan Drusila éh do néh, redo inah kelunan Yahudi. Iah nyohoo’ réh tebai Paulus ke’ néh menéng ha’ néh bara’ tong pengelan néh lem Kristus Yésus. 25 Bang tovoo’ Paulus bara’ tong kekat barék éh jian, ngan tong mavaa’ kenin, ngan tong dau Tuhan juk ngukum kelunan, medai Peliks, boh éh bara’ ngan Paulus, ka’ ha’ néh, Ma’o lah ke’ pané hun iteu’, moléé’ ke’, hun mah ku’ juk tebai ke’ kepéh, boh ku’ tebai ke’, ha’ néh. 26 Sioo’ inah Peliks ngelan Paulus omok mena’ rigit ngan néh, inah iah nyohoo’ éh tuai liwet-liwet tavin éh pané pepané ngan néh. 27 Bang la’o duah ta’un kelebéé’, boh Perkius Pestus ngeliwah Peliks pengeja’au réh, la’ah uban Peliks juk ngayo kenin kelunan Yahudi, pu’un éh pokoo’ Paulus keto lem tutup.
251 Teleu’ dau la’o savéé’ Pestus tong tana’ inah, boh éh lakau kepéh jin Kaisarea tai Yérusalem. 2 La’ah sinah kekat irah pengeja’au imam ngan pengeja’au irah Yahudi maneu’ Paulus. 3 Irah menyat éh kejeraa’ Paulus tai Yérusalem, bang irah tengéé’ lepah pakat pitah jalan juk mematai Paulus belu’an jalan lem néh lakau tuai nah. 4 Bang ka’ ha’ Pestus mipa réh, Paulus lepah pokoo’ réh tong Kaisarea, tai ke’ ku’ sinah dat. 5 Hun néh pu’un séé’-séé’ pengeja’au keh éh juk bara’ sala’ ineu’-ineu’ tong lakei’ inah, omok éh kivu ku’ tai da’, ha’ néh. 6 La’ah Pestus mokoo’ tong Yerusalem ngioo’-ngioo’ ayah dau hun bé’ kenat barang jah poloo’ dau kepéh, boh éh moléé’ tai Kaisarea, Barei’ sagam menyun éh tong lamin besara’ ke’ néh nyohoo’ réh mihin Paulus tong jumen néh. 7 Hun Paulus avéé’, pu’un kelunan Yahudi éh lepah tuai jin Yérusalem nekedéng tutuh néh ngan maneu’ éh bara’ éh pu’un maneu’ kuraa’ arong penyala’ éh ja’au, bang bé’ réh omok pekelenaa’ ha’ réh kenat. 8 Bang hun Paulus mipa ha’ réh, pu’un éh bara’ bé’ éh pu’un kenat. Ka’ ha’ néh, Bé’ pu’un ineu’ sala’ ké’ éh ngelapah sohoo’ lem Surat Musa éh kenivu kelunan Yahudi, kenat péh tong umaa’ Allah, bé’ ku’ pu’un maneu’ ineu’-ineu’ éh bé’ tekep ké’ maneu’ sinah, kenat péh bé’ ku’ ngelapah tong sohoo’ raja’ Rum, ha’ Paulus nah. 9 Uban Pestus juk ngayo kenin kelunan Yahudi, pu’un éh neteng Paulus, ka’ ha’ néh, Kineu’ ke’, keloo’ ke’ tai Yérusalem ke’ réh pekelenaa’ ke’ tong kekat jalan ko’ éh ke’ réh maneu’ ke’ kenat, ha’ néh. 10 Ka’ ha’ Paulus, Pu’un akeu’ nekedéng tong lamin besara’ peritah Rum tong jumen kelunan éh jam petuneng, hun réh juk maneu’ ku’, iteu’ néh retek éh tekep réh maneu’ ku’. Bé’ pu’un ineu’-ineu’ sala’ ké’, ke’ irah Yahudi pesala’ ku’ nah ka’au’ péh jam sala’ ké’ bé’ pu’un. 11 Hun ké’ pu’un sala’ ngan ngelapah tong ukum ngan pu’un maneu’ ineu’-ineu’ éh tekep ké’ penatai réh, bé’ akeu’ juk kelap. Bang hun ha’ réh bé’ teneng lem kekat ha’ réh éh maneu’ ku’ nah, bé’ pu’un jah usah éh omok mena’ ku’ ngan réh. Akeu’ menyat juk tai tong jumen raja’ lu’, ha’ néh. 12 La’o néh pané kenat, boh Pestus pané ngan kekat pengeja’au réh éh tong besara’ nah, boh éh pané ngan Paulus kepéh, ka’ ha’ néh, Pu’un ke’ menyat juk tavin raja’, hun néh kenat tekep ke’ tavin éh, ha’ néh. 13 Lebéé’ si’ik la’o inah, tuai Agripa éh pengeja’au réh, pemung ngan redo néh Bernike tong Kaisarea ke’ roh nepah Pestus. 14 La’o duah-teleu’ dau la’o savéé’ roh, boh Pestus bara’ kekat rungen Paulus ngan Agripa nah. Ka’ ha’ néh, Pu’un jah kelunan lem tutup siteu’ éh pokoo’ Peliks. 15 La’ah hun Ké’ tai Yérusalem irai, pu’un irah pengeja’au imam, ngan irah pengeja’au kelunan Yahudi, maneu’ éh ngan nyohoo’ ku’ ngukum éh. 16 Bang pu’un ku’ bara’ ngan réh, bé’ pu’un suket kelunan Rum ngukum séé’-séé’ péh hun néh bé’ jak tavin kelunan éh maneu’ éh, ke’ néh sakui bara’ tong kekat jalan réh maneu’ éh nah. 17 La’ah hun réh tuai siteu’, bé’ ku’ ngelalah, bang barei’ sagam menyun ku’ tong lamin besara’ ngan nyohoo’ réh mihin lakei’ inah tuai. 18 Tovoo’ inah kekat kelunan éh maneu’ éh nah pu’un réh nekedéng, bang bé’ réh bara’ tong kekat rungen éh sa’at pekua’ éh seneruh ké’ nah. 19 Bang pu’un réh maneu’ éh tong kuraa’ jalan tong sebayang réh tengéé’, ngan tong jah kelunan éh ngaran néh Yésus, éh lepah matai, bang murip Éh kepéh kunah Paulus nah. 20 La’ah uban ké’ bé’ jam kineu’ jalan ké’ omok pekelenaa’ kekat ha’ réh kenat nah, pu’un ku’ neteng Paulus hun néh keloo’ tai Yérusalem ke’ réh pekelenaa’ kekat ha’ inah sitai. 21 Bang Paulus menyat dokoo’ Kaisar éh petuneng éh ngan kejeraa’ éh petem tong lamin tutup pah avéé’ besara’ néh ma’o. Uban kenat akeu’ nyohoo’, réh pokoo’ éh keto, pah avéé ké’ pu’un avah dokoo’ patet éh tai Kaisar. 22 Ka’ ha’ Agripa kepéh, Akeu’ tengéé’ péh keloo’ ku’ menéng ha’ lakei’ inah, ha’ néh. Ka’ ha’ Pestus, Dau sagam da’ boh ke’ omok menéng ha’ néh, ha’ Pestus. 23 Barei’ sagam tuai Agripa ngan Bernike ngan pu’un kekat kelunan ngajung ngan sepah roh. Tai roh tong lamin besara’ pemung ngan kekat pengeja’au seradu ngan kekat pengoloo’ ngan kelunan éh ja’au tong leboo’ inah. Boh Pestus nyohoo’ réh mihin Paulus tuai. 24 Ka’ ha’ Pestus ngan réh, O Agripa ngan kekat pengeja’au éh pu’un pemung ngan améé’ siteu’, lakei’ inah éh ngelayau benara’ irah Yahudi pu’un sa’at, kenat péh ha’ irah tong Yérusalem kenat péh ha’ irah siteu’ péh. Pu’un réh bika’ bara’ bé’ tekep éh murip la’ah. 25 Bang bé’ ku’ jam ineu’-ineu’ penganeu’ néh éh tekep kelu’ mematai éh. Inah kepéh pu’un éh menyat juk tai tong jumen Kaisar, inah akeu’ peturut éh tai. 26 Bang bé’ ku’ jam kineu’ ha’ ké’ pané ngan raja’ lem surat ké’ da’, kenat éh ké’ mihin éh tavin ka’au’ Agripa ngan kekat ka’ah béé, barang pu’un péh ineu’-ineu’ éh kejam keh tong ha’ néh la’o keh menéng éh, éh tekep ké’ nyurat da’. 27 Uban akeu’ seruh bé’ tekep nyohoo’ kelunan tai kenat hun lu’ bé’ omok bara’ sala’ néh, ha’ Pestus nah.
261 La’ah ka’ ha’ Agripa ngan Paulus, Hun ko’ keloo’ bara’ kekat rungen éh juk benara’ ko’, omok ke’ bara’ éh, ha’ néh. Pelapah Paulus mejing ojoo’ néh ke’ néh pané, ka’ ha’ néh, 2 Dau iteu’ akeu’ jian kenin uban ké’ omok bara’ ngan ko’ Agripa tong kekat rungen éh ke’ irah Yahudi maneu’ ku’ nah. 3 Inah kepéh akeu’ jian kenin uban ko’ lepah malai lem kekat adet ngan ha’ teneteng améé’ Yahudi. Uban néh kenat, jian ke’ kebit kenin ngan menéng ha’ ké’. 4 La’ah kekat irah Yahudi jam tong urip ké’ jin bu’un ké’ danak. Irah jam ku’ pu’un murip tong tana’ ké’ tengéé’, la’o inah boh ku’ tai Yérusalem. 5 Inah kepéh kejam réh akeu’ pu’un kivu kekat adet kelunan Parisi, éh mekat mu’un kivu kekat adet sebayang, hun réh keloo’ bara’ éh, omok réh bara’ éh. 6 Hun iteu’ akeu’ nekedéng siteu’ tong besara’ uban akeu’ ngelan tong jajii’ éh lepah pejajii’ Allah ngan tepun mé’, 7 la’ah jah poloo’ duah betah pohoo’ mé’ mekat mu’un réh sebayang ngan Tuhan dau rema ngan dau merem péh, uban réh ngelan tong éh pejajii’ Tuhan. Uban ké’ ngelan éh kenat, nah ke’ irah Yahudi nah maneu’ akeu’. 8 Kineu’ ka’ah Yahudi bé’ omok ngelan Allah pu’un pebetéé’ kelunan éh matai, ha’ néh. 9 Ka’ ha’ Paulus kepéh, Hun lepah rai akeu’ tengéé’ péh seruh tekep ku’ maneu’ kuraa’ jalan ké’ ngelawan ngaran Yésus, éh kelunan Nasaret, 10 pu’un ku’ maneu’ kenat tong Yérusalem lepah rai. Pu’un ku’ alaa’ surat jin irah pengeja’au imam jalan ké’ pu’un penyukat omok ngamit kelunan éh ngelan tong Tuhan Yésus ngan mihin réh tai lamin tutup. Hun réh ngukum réh matai, akeu’ péh keloo’ éh kenat. 11 Pinaa’ koléé’ ku’ peketa réh tong lamin sebayang Yahudi, dokoo’ ké’ punyat kenin réh ngan mega’ réh jin pengelan réh tong Yésus. Uban ké’ merek mu’un ngan réh, pu’un ku’ tai avéé’ tong tana’ éh jah éh juu’, dokoo’ ké’ peketa réh sitai kepéh. Kenat ha’ Paulus pané ngan Agripa. 12 La’ah ka’ ha’ Paulus kepéh, Lakau ku’ tai Damsyik mihin surat jin irah pengeja’au imam, jalan ké’ omok maneu’ réh sitai. 13 Inah kepéh dau pejek lem ké’ lakau nah, tioo pu’un ada jin langit éh pelapah ngada jin ada maten dau, inah éh rema tutuh ké’ avéé’ tong kekat kelunan éh lakau pemung ngan ké’ nah. 14 Kuba’ mé’ béé tong tana’ neu’ ada inah, boh ku’ menéng jah ha’ éh bara’ ngan ké’ lem ha’ Yahudi, ka’ ha’ néh, Saulus, Saulus, Kineu’ ke’ peketa Akeu’? Tusah kenin ko’ ngelawan Akeu’ kenat hun ko’ to ngelawan ka’au’ ngesakit usah ko’ tengéé’ barei’ lakin sapé’ éh nyurung tapak kayeu’ éh nyahit rai ha’ néh. 15 La’ah ka’ ha’ ké’, séé’ ke’ néh, O Tuhan, ha’ ké’. Ka’ ha’ Tuhan, Akeu’ iteu’ Yésus éh peketa ko’ nah. 16 Betéé ke’, nekedéng! Akeu’ pepoléng usah Ké ngan ko’ uban ké’ keloo’ maneu’ ka’au’ kelunan sohoo’ Ké’. Jian ke’ bara’ ngan irah éh jah tong ineu’ éh ta’an ko dau iteu’ tong Akeu’ ngan tong kekat éh juk benara’ Ké’ ngan ko’ temurei’ kepéh. 17 La’ah Akeu’ juk purip ke’ jin pohoo’ Yahudi iteu’, kenat péh jin kelunan éh tengéé’ pohoo’ tong jalan semah-semah ke’ sohoo’ ké’ tai. 18 Tekep ke’ pepekang maten kenin réh, dokoo’ réh omok musit jin merem ngan masek tong rema, ngan ngelepu réh jin penyukat Sitan ke’ réh tai lem nihau Allah, éh omok mega’ penyala’ réh neu’ pengelan réh tong Akeu’, ke’ réh omok tai pemung ngan kekat kelunan éh anah ké’. Kenat ha’ Tuhan ngan ké’ irai, ha’ Paulus nah. 19 Ka’ ha’ Paulus kepéh, O Raja’ Agripa, uban néh kenat akeu’ ngelayau kivu kekat éh ta’an ké’ éh tuai jin seruga. 20 Tong bu’un néh pu’un ku’ tai nebaraa’ réh tong Damsyik ngan tong Yérusalem, la’o inah boh ku’ tai tutuh tana’ Yudea, ngan tai ngan kelunan éh tengéé’ pohoo’ péh nyohoo’ réh piso jin kesa’at réh ngan tavin Allah, ngan maneu’ barék réh éh pekelenaa’ réh pu’un piso jin kesa’at réh nah. 21 La’ah uban ké’ tai nebaraa’ réh kenat, inah irah Yahudi ngamit akeu’ lem umaa’ Allah ngan juk mematai ku’ rai. 22 Bang avéé’ dau iteu’ Allah éh pu’un nolong akeu’, kenat péh akeu’ nekedéng tong jumen ka’ah béé siteu’ ngan bara’ tong pengelan ké’, kenat péh ngan kelunan éh maren ngan irah éh awah péh. La’ah kekat ha’ éh benara’ ké’ iteu’, bé’ éh tengéé’ jin éh benara’ irah nabi sahau, ngan éh benara’ Musa tong kekat éh juk pu’un temurei’. 23 Pu’un réh bara’ Kristus, adang Néh jam keta ngan Iah éh tenah betéé’ jin belah kelunan matai, ke’ Néh bara’ tong rema urip ngan pohoo’ Yahudi kenat péh ngan kelunan éh tengéé’ pohoo’ péh, ha’ néh. 24 Hun Paulus pané kenat, boh Pestus pané ngan ja’au ha’, ka’ ha’ néh, Palui ka’au’ Paulus, neu’ kekat ha’ tebaraa’ ko’ kenat, inah éh maneu’ ke’ parit, ha’ néh. 25 Bang ka’ ha’ Paulus, akeu; bé’ palui, ka’au’ Pestus éh maren kekat ha’ ké’ inah teneng ngan musit jin penyeruh ké’ éh jian. 26 O Agripa, akeu’ omok pané ngan ko’ ngan makang kenin, uban ka’au’ lepah jam ngan malai tong kekat inah, bé’ éh pelim. 27 Kineu’ ke’ Agripa, pu’un ke’ ngelan ha’ éh benara’ irah nabi sahau rai kei. Kejam ké’ ka’au’ ngelan éh, ha’ Paulus. 28 Ka’ ha’ Agripa kepéh, Neu’ ha’ ko’ éh kerat kenat, pu’un ke’ seruh ke’ omok maneu’ akeu’ kelunan Kristén, ha’ néh. 29 Ka’ ha’ Paulus kepéh, Hun néh neu’ ha’ ké’ éh kerat ngan neu’ ha’ ké’ éh pinaa’ péh, akeu’ sebayang ngan Allah, dokoo’ ka’au’ ngan kekat irah éh menéng ha’ ké’ dau iteu’ nah, omok pu’un pekua’ barei’ akeu’, bang mai réh kejeret palaa’ ratai. Kenat ha’ Paulus ngan Agripa. 30 La’o inah betéé’ Pestus ngan Agripa rawah Bernike, ngan kekat kelunan éh menyun pemung ngan réh, 31 ngan hun irah lepah piso irah pané ngan irah ke’, ka’ ha’ réh, Bé’ lakei’ inah pu’un maneu’ ineu’-ineu’ éh tekep ke’ réh ngukum éh matai, ngan pokoo’ éh lem lamin tutup, ha’ réh. 32 La’ah ka’ ha’ Agripa ngan Pestus, Hun néh bé’ menyat tai tavin raja’ Kaisar omok éh pelepu, ha’ néh.
271 La’o réh seruh tekep mé’ jalan kapen tai tana’ Italia, boh réh alaa’ Paulus ngan kelunan éh jah kepéh jin lamin tutup ke’ réh mena’ réh ngan Yulius, éh pengeja’au jah ato seradu jin peng seradu Rum éh ngaran peng inah Pengeja’au Seradu jin peng seradu Rum éh nateng réh peng Kaisar. 2 Masek mé’ lem jah kapen éh jin leboo’ ja’au Adramitium, éh juk lakau tai kuraa’ leboo’ déhéé’ baa’ banget tong tana’ Asia, boh mé’ lakau. Pu’un Aristarkhus kelunan Makedonia éh jin leboo’ Tesalonika pemung ngan mé’. 3 Dau rema inah avéé’ mé’ tong leboo’ Sidon, la’ah Yulius pika Paulus ngan kejeraa’ éh tai tavin bakéh néh ke’ néh alaa’ éh tekep penakai néh lem pengelakau néh. 4 La’o inah lakau mé’ kepéh ngan uban kepu pu’un nyelalang mé’ saa’ kabéng mé’ pulau Siprus. 5 La’ah pu’un mé’ moto baa’ Banget Kilikia ngan baa’ Banget Pampilia, pah avéé’ tong leboo’ ja’au Mira tong tana’ Likia. 6 La’ah sinah pengeja’au seradu jam jah kapen éh jin leboo’ ja’au Aleksandria éh juk tai tana’ Italia, pelapah éh nyohoo’ mé’ kivu kapen inah. 7 La’ah avéé’ duah-teleu’ dau améé’ lakau dawai-dawai, tusah mu’un mé’ belah jalan tai leboo’ kapan Knidus. Uban kepu to nyelalang mé’ bé’ mé’ omok tai jalan inah, bang lakau mé’ kepéh jalan saa’ kabéng pulau Kreta, uban pulau inah éh mekep kepu nah boh mé’ ngelipuh tapak Boyo Salmone. 8 Lakau mé’ tepih tong pulau inah, tusah mu’un mé’ lakau kenat pah avéé’ tong jah retek éh ngaran néh jalan apén kapen éh Jian, bé’ éh makat juu’ jin leboo’ Lasea. 9 Lebéé’ mu’un mé’ mokoo’ sinah, pah avéé’ mé’ medai lah lakau dai mé’ kaham, uban tovoo’ inah Dau Pengelepu kelunan Yahudi jin penyala’ lepah melapuh. Lebéé’ mé’ mokoo’ sinah pah avéé’ bé’ éh jaka’ éh jian jalan mé’ lakau. Uban kenat Paulus pané ngan réh ka’, 10 O padéé’, akeu’ jam hun lu’ lakau kepéh da’, adang lu’ pu’un tusah, adang kapen lu’ bila’, ngan pinaa’ livah pega’ kepéh, ngan inah kepéh barang pu’un péh kelunan éh matai da’, ha’ néh. 11 Bang pengeja’au seradu ngelan ha’ kelunan éh ngamit kapen inah, ngan ha’ lakei’ éh pu’un kapen inah kepéh, bé’ iah ngelan ha’ Paulus nah. 12 La’ah tong pengokoo’ réh nah bé’ réh tekep mokoo’ tong apén kapen, sinah bé’ éh omok jalan kapen mokoo’ sioo’ genin. Irah tioo juk lakau pajau tai tana’ Peniks ke’ réh omok mokoo’ tong Peniks sioo’ genin nah. Peniks nah jalan réh mapén tong Pulau Kreta éh saa’ kabéng oléé’ maten dau. 13 Hun réh juk tai Peniks pu’un peliu si’ik, jian kenin réh na’at éh kenat, irah tioo alaa’ daven éh jalan réh pokoo’ kapen ke’ réh lakau reng kejuu’ jin dirin baa’ banget tong pulau Kreta. 14 Bang lem réh to lakau nah, tioo tuai kepu gahang jin saa’ na’au’ pulau inah. 15 Kepu inah nesung kapen réh moléé’ ngabéng 16 tai jah pulau éh si’ik ngaran néh Kauda, na’ péh pu’un tusah, sinah mé’ tenep alut éh jin kapen inah. 17 Boh mé’ metéé’ alut ke’ mé’ masek éh lem usah kapen nah. Pu’un mé’ ngejeret boré kapen palaa’ kuraa’-kuraa’ talei’, uban réh medai kapen nah tepasit tong dirin tana’ Sirtis, kenat péh irah petuhun kekat livah éh mebéng éh nasek kepu éh maneu’ kapen nah lakau, ke’ néh matong awah. 18 Gusii’ mu’un kapen inah neu’ lipak éh gahang. Barei’ sagam irah bet livah jin lem kapen nah lem baa’ banget. 19 Dau rema inah kepéh, pu’un réh bet kuraa’-kuraa’ éh penakai réh tong kapen nah, lem baa’ banget kepéh. 20 Hun inah avéé’ kuraa’ dau bé’ pu’un maten dau ngan kenyuhai péh poléng, ngan kepu éh matek gahang pu’un tong mé’, bé’ pu’un kenin mé’ seruh mé’ omok murip la’ah. 21 La’ah uban lebéé’ tenéh réh bé’ kuman, pu’un Paulus nekedéng belah réh ke’ néh pané ngan réh, ka’ ha’ néh, O kekat kelunan, Hun keh bé’ bet ha’ ké’ meta’ keh lakau rai, bé’ tam tusah ngan rugi ka’. 22 Bang na’ péh kenat mai tam besau, uban jah-jah usah péh bé’ éh matai, bang kapen tam awah éh tasa’ dat. 23 Uban tovoo’ merem ni’ei’ ri’, pu’un jah meliket éh tuai jin Allah nekedéng déhéé’ ké’, Allah inah éh mihau akeu’ ngan inah éh seneva’ ké’. 24 Ka’ ha’ néh ngan ké’, O Paulus, mai ke’ medai, adang ka’au’ omok nekedéng tong jumen raja’, inah kepéh uban Allah pika ke’ Iah purip kekat kelunan éh lakau ngan ko’ inah, ha’ meliket nah. 25 Uban Tuhan pu’un bara’ kenat ngan ké’, mai keh besau, uban akeu’ ngelan Allah adang Néh pu’un pekua’ ha’ Nnéh éh benara’ Néh ngan ké’ nah. 26 Pu’un tam tepasit tong jah tana’ ngan kapen tam tasa’ dat, ha’ Paulus nah. 27 Avéé’ jah poloo’ pat dau kepu gahang maneu’ mé’, ngan tong merem inah, ngioo’ éh belu’an merem hun kapen mé’ keteu’-ketai tong baa’ Banget Adaria neu’ kepu éh gahang nah, pu’un kelunan éh ngamit kapen nah seruh mé’ avéé’ déhéé’ tana’. 28 La’ah irah nguwa’ kedilem baa’, kejam réh éh duah poloo’ depah kedilem néh. Bé’ makat juu’ jin sinah kepéh, pu’un réh nguwa’ éh kepéh ngan kejam réh éh jah poloo’ lemah depah kedilem néh. 29 Medai réh kapen nah tepasit retek bateu’ ngan bila’. La’ah saa’ murin kapen inah irah petuhun pat daven inah lem baa’ ke’ réh pokoo’ kapen nah. Pu’un réh sebayang keloo’ dau nah laho rema. 30 La’ah kelunan éh ngamit kapen juk kelap jin kapen nah. Pu’un réh petuhun jah alut jin kapen nah tong baa’ banget, ngan ngelavo’ juk petuhun daven éh saa’ tenah kapen éh jalan néh pokoo’ éh mu’un né’ irah juk kelap. 31 La’ah Paulus pané ngan pengeja’au seradu ngan kekat seradu péh, ka’ ha’ néh, Hun irah bé’ mokoo’ lem kapen iteu’, bé’ keh murip, ha’ néh. 32 Boh irah seradu metep telun alut nah ngan kejeraa’ éh matong awah. 33 Tovoo’ dau juk rema, pu’un Paulus nyohoo’ irah béé kuman, ka’ ha’ néh, Jah poloo’ pat dau tenéh uleu’ bé’ pu’un kuman ineu’-ineu’ péh, 34 jian keh kuman dokoo’ keh omok gahang, mai keh medai, jah ihat bok keh péh bé’ éh pu’un pega’, ha’ Paulus ngan réh. 35 La’o néh pané kenat, boh éh alaa’ ka’an ngan bara’ jian kenin ngan Allah tong jumen réh béé, ke’ néh mutip éh, pelapah éh kuman. 36 Boh réh jian kenin, omok lah réh kuman. 37 La’ah kekat améé’ dalem kapen inah 276 usah. 38 Hun réh lepah kuman beso, irah bet parai lem baa’ banget ke’ réh ngeni’an kapen. 39 Hun dau lepah rema bé’ réh jam tana’ inah, bang irah na’at jah livuk éh pu’un napun, boh réh seruh juk tupat mihin kapen nah tai sinah. 40 La’ah irah metep jeret tong kekat daven éh jalan réh pokoo’ kapen nah ke’ réh bet éh lem baa’ banget, kenat péh irah metep jeret éh tong besai saa’ murin, boh réh metéé’ livah éh mebéng éh nasek kepu, ke’ néh peteneng kapen nah tai napun inah. 41 Bang kapen inah teneng tong kelo’ong napun déhéé’ dirin baa’. Saa’ tenah kapen nah perang ngan bé’ omok pegisoh, saa’ murin kapen nah bila’ tenesung lipak éh gahang. 42 La’ah pu’un irah seradu juk mematai kekat kelunan éh lem nihau réh nah, dai réh pelangui ngan kelap. 43 Bang pengeja’au seradu juk purip Paulus, bé’ éh kejeraa’ réh maneu’ réh. La’ah pu’un éh nyohoo’ kekat kelunan éh jam pelangui tuhun lem baa’ ngan pelangui tai tana’ tenah. 44 Bang kelunan éh jah éh bé’ jam pelangui, pu’un éh nyohoo’ réh ngamit kayeu’ ngan livah jin kapen nah. Kenat jalan améé’ béé omok avéé’ tong tana’.
281 Hun mé’ avéé’ tong dirin baa’, boh mé’ jam tana’ inah pulau Malta. 2 La’ah irah tong tana’ inah pika mé’ mu’un-mu’un. Pu’un réh kahang luten ke’ réh tebai mé’ ngereu’ uban dau taa’ ngan sioo’ genin. 3 Paulus alaa’ jah pikah kayeu’ ke’ néh pei’ éh bau luten. Pu’un jah torok musit neu’ pana, ngan nekeleng ojoo’ néh. 4 Hun kelunan jin tana’ inah na’at torok nah tekieng tong ojoo’ néh, boh réh pané ngan irah ke’, ka’ ha’ réh, Adang kelunan inah kelunan éh mematai kelunan, na’ péh éh musit jin baa’ banget, bé’ balei’ éh nateng réh Pengeteneng nah kejeraa’ éh murip la’ah, ha’ réh. 5 Pelapah Paulus memirih torok nah lem luten, bang bé’ Paulus sakit. 6 La’ah irah mena éh baha’ ngan matai, bang lebéé’ réh mena éh kenat bé’ pu’un ineu’-ineu’ kesakit néh ta’an réh, boh réh béé kenin kepéh ngan bara’ ka’, Paulus nah jah balei’, ha’ réh. 7 La’ah déhéé’ jalan mé’ kaham nah, pu’un térék éh anah pengoloo’ tong tana’ inah, ngaran néh Publius. Pu’un éh tebai mé’ ke’ néh petubo mé’ ngan jian kenin ngan teleu’ dau mé’ mokoo’ ngan néh. 8 La’ah tamen Publius nah pegen darem ngan sakit boré. Masek Paulus ngan néh ke’ néh sebayang éh, ke’ néh mapai ojoo’ néh tong néh ngan peka’o éh. 9 Boh kekat kelunan tong pulau inah éh pu’un sakit, tuai tavin Paulus ke’ néh peka’o réh. 10 La’ah irah sepah mé’, kenat péh pinaa’ arong pengena’ réh ngan mé’, ngan hun mé’ lakau pu’un réh mena’ livah éh pu’un gunah ngan mé’ lem pengelakau mé’ nah. 11 La’ah teleu’ laséh la’o inah kepéh, lakau mé’ jalan jah kapen éh pu’un tong pulau Malta éh pekena genin ma’o. Ngaran kapen inah, Kasetun ngan Pulok, éh jin leboo’ kapan Aleksandria. 12 La’ah avéé’ mé’ tong leboo’ kapan Sirakusa, mokoo’ mé’ sinah teleu’ dau kelebéé’. 13 Jin sinah mé’ lakau kepéh avéé’ tong leboo’ ja’au Regium, la’ah dau rema kepéh tuai kepu jin murin mé’, la’ah duah dau kepéh avéé’ mé’ tong leboo’ ja’au Putioli. 14 Sinah mé’ temeu’ ngan kelunan éh ngelan tong Tuhan, pu’un réh tebai mé’ mokoo’ ngan réh jah batang migu. La’o inah boh mé’ tai leboo’ kapan Rum. 15 Hun padéé’ mé’ tong Rum menéng rengah mé’ lepah avéé’, tuai réh avéé’ tong jalan pebelih ngaran jalan pebelih nah, Apius ngan Kedai Teleu’, sinah mé’ petemeu’. Hun Paulus na’at réh, pu’un éh bara’ jian kenin ngan Allah ngan ngereken kenin néh. 16 Hun mé’ avéé’ tong leboo’ Rum, irah kejeraa’ Paulus mokoo’ tengéé’ tong jah lamin ngan pu’un jah seradu mavaa’ éh. 17 Teleu’ dau la’o savéé’ mé’, pu’un Paulus tebai kekat pengeja’au irah Yahudi petipun. Hun réh avéé’ pu’un éh bara’ ngan réh, ka’ ha’ néh, O kekat padéé’ ké’, na’ péh akeu’ bé’ maneu’ ineu’-ineu’ éh ngelawan pohoo’ lu’ ngan adet tepun lu’, pu’un réh ngamit akeu’ tong Yérusalem ngan mena’ ku’ ngan irah Rum kepéh. 18 La’ah pu’un réh neteng-neteng ku’, la’ah irah juk ngelepu ku’, uban bé’ pu’un ineu’ éh tong akeu’ éh tekep ke’ réh mematai ku’. 19 Bang hun kelunan Yahudi bé’ keloo’ akeu’ pelepu kenat, boh ku’ juk tai tavin raja’ Kaisar, bang bé’ akeu’ juk pesala’ pohoo’ ké’ ngan néh. 20 La’ah kenat péh éh ké’ menyat keh tuai siteu’, jalan ké’ omok pané ngan keh. Uban neu’ ké’ ngelan tong Iah éh juk pepurip pohoo’ Yahudi, pekua’ barei’ kelunan Yahudi ngelan Éh, kenat akeu’ pu’un kejeret réh palaa’ ratai iteu’, ha’ néh. 21 La’ah ka’ ha’ réh ngan néh, Bé’ mé’ pu’un alaa’ surat jin irah tong tana’ Yudea éh bara’ tong ka’au’. Bé’ pu’un jah-jah usah éh tuai siteu’ bara’ ineu’-ineu’ kesa’at ko’ ngan mé’. 22 Bang keloo’ mé’ menéng ha’ ko’ ngan tong penyeruh ko’, uban kejam mé’ irah semah-semah péh pu’un réh bara’ sebayang maréng iteu’ sa’at awah, ha’ réh. 23 La’ah pu’un réh maneu’ jajii’ ngan Paulus, avéé’ tong sukup jajii’ inah pinaa’ mu’un kelunan tuai tavin éh tong lamin jalan néh mokoo’ nah. La’ah jin dau ngivun avéé’ dau merem pu’un éh pekelenaa’ kekat ha’ tebaraa’ néh ngan réh tong Pengihau Allah. Gahang mu’un éh juk mihin réh nesen tong Yésus, kenat péh éh nebaraa’ réh jin Surat Musa ngan jin surat irah nabi. 24 Pu’un jelua’ réh éh ngelan tong éh benara’ néh nah, pu’un jelua’ kepéh éh bé’ ngelan. 25 La’o Paulus bara’ tong jah ha’ lem surat Yesaya moléé’ réh ngan petengéé’ kenin réh. Ka’ ha’ néh ngan réh, La’ah teneng mu’un éh benara’ Sahéé’ Ni’ai neu’ nabi Yesaya ngan tepun keh sahau, 26 ka’ ha’ Yesaya nah, Tai keh tong pohoo’ iteu’ ngan bara’ ka’, Pu’un keh juk ngenéné’ éh mu’un, bang bé’ keh nesen éh. Pu’un keh juk kepuh éh mu’un, bang bé’ keh pu’un ta’an. 27 Uban kelunan iteu’ pu’un réh mahéng kenin, pu’un réh mapek kelingen réh ngan pu’un réh sidem, dai réh na’at ngan dai réh menéng ngan dai réh nesen éh ngan dai réh moléé’ tavin Akeu’ ke’ ké’ peka’o réh, ha’ Tuhan. 28 La’ah ka’ ha’ Paulus, uban néh kenat nesen keh, rengah tong urip éh jin Allah lepah avéé’ tong kelunan éh tengéé’ pohoo’, adang irah juk menéng kepéh, ha’ néh. 29 La’o néh pané kenat, moléé’ kekat kelunan Yahudi ngan pepaneu’ belah irah ke’. 30 Duah ta’un Paulus mokoo’ tengéé’ ngan tagong usah néh, ke’ néh alaa’ kekat kelunan éh tuai nepah éh, 31 pu’un éh nebaraa’ réh tong Pengihau Allah ngan tong Tuhan Yésus Kristus. Iah pané ngan makang kenin ngan bé’ pu’un séé’ éh meta’ éh.