2 TIMOTIUS

¹ Surat iteu’ jin Paulus éh lawah Kristus Yésus dalem pengeloo’ Allah, ngan éh senohoo’ dokoo’ bara’ tong urip éh pejajii’ Allah. Urip inah omok nalaa’ lu’ uban pemung ngan Kristus Yésus. ² Akeu’ maneu’ surat iteu’ ngan Timotius, anak ké’ éh penika ké’. Jian Allah éh Tamen, ngan Kristus Yésus éh Tuhan lu’, mena’ pengejian, penika ngan pengepawah Néh ngan ko’. ³ Akeu’ bara’ jian kenin ngan Allah éh kenivu ké’ ngan bé’ pu’un ineu’-ineu’ pesala’ kenin ké’ barei’ kekat tepun ké’ sahau rai. La’ah akeu’ ngelayau sebayang bara’ jian kenin ngan Néh hun ké’ seruh tong ka’au’, siget dau ngan siget merem péh. ⁴ Pu’un ku’ nesen baa’ maten ko’ rai, ngan tawai ku’ juk temeu’ ngan ko’ kepéh, dokoo’ ké’ omok murung mu’un. ⁵ La’ah pu’un ku’ seruh tong pengelan ko’ mu’un tong Tuhan, barei’ éh pu’un dalem kenin tepun ko’ Lois ngan tinen ko’ Yunike, ngan akeu’ jam éh pu’un kenat kepéh lem kenin ko’. ⁶ Kenat péh akeu’ petesen ke’, jian ke’ purip pengena’ Allah lem kenin ko’, éh nena’ néh hun ké’ mapai ojoo’ ké’ tong ke’ rai. ⁷ Uban Sahéé’ éh nena’ Tuhan ngan lu’, bé’ éh maneu’ lu’ medai, bang Sahéé’ Ni’ai pepenoo’ lu’ palaa’ penyukat, penika ngan pengegahang éh mihin lu’ jam mihau kenin. ⁸ Uban néh kenat mai ke’ medai bara’ tong pengelan ko’, kenat péh mai ke’ menyaa’ bara’ tong pengelan ko’, kenat péh mai ke’ menyaa’ uban ké pu’un tong lamin tutup uban Kristus. Bang jian ke’ pemung ngan ké’ lem pengeketa neu’ lu’ bara’ Rengah Jian tong Kristus. Adang Allah omok ngegahang ke’ dokoo’ ko’ omok ngeretep. ⁹ Pu’un éh purip uleu’ ngan tebai lu’ kelu’ omok anah Nah mu’un, bé’ éh uban ineu’-ineu’ éh penganeu’ lu’, bang kivu pengeloo’ Néh ngan penika Néh tengéé’. Iah mena’ penika Néh jin bu’un-bu’un dalem Kristus Yésus. ¹⁰ Bang hun iteu’ kepéh Iah pepoléng penika Néh ngan lu’ neu’ penyavéé’ Iah éh purip lu’ Kristus Yésus. Yésus lepah nyopéé penyukat pematai ngan mihin urip éh pelinguh jin Rengah Jian inah. ¹¹ La’ah pu’un Allah ngevéléé’ akeu’ ké’ lawah Néh ngan guru Néh ke’ ké’ bara’ Rengah Jian Néh. ¹² La’ah kenat péh akeu’ sioo’ keta dalem kekat penganeu’ ké’ iteu’. Na’ péh kenat bé’ akeu’ menyaa’, uban ké’ jam Iah éh kepelum ké’ ngan akeu’ jam Iah pu’un penyukat omok mihau kekat éh lepah nena’ néh ngan ké’, pah avéé’ pengega’ dau. ¹³ Jian ke’ mihau kekat ha’ tebaraa’ éh teneng barei’ éh lepah benara’ ké’ ngan ko’ lepah rai. Inah éh ha’ éh tekep kenivu ko’ ngan jian ke’ petem lem pengelan ko’ ngan penika ko’ dalem Kristus Yésus. ¹⁴ Neu’ penyukat Sahéé’ Ni’ai éh murip lem kenin ko’, jian ke’ mihau Rengah Jian éh lepah nena’ Néh ngan ko’ pekua’ ke’ mihau livah éh ma’an. ¹⁵ La’ah ka’au’ jam kekat kelunan tong tana’ Asia bet akeu’, kenat péh Pigelus ngan Hemogenes péh bet akeu’ rai. ¹⁶ Jian Tuhan masi kelunan tong lamin Onésiporus, uban pinaa’ koléé’ néh ngejian kenin ké’ rai. Bé’ iah menyaa’ hun néh jam akeu’ pu’un tong lamin tutup, ¹⁷ bang tovoo’ iah avéé’ tong leboo’ Rum, iah tioo pitah akeu’ pah avéé’ néh temeu’ ngan ké’. ¹⁸ Jian Tuhan pika éh tovoo’ Dau savéé’ Tuhan. Ka’au’ jam tong kekat jalan néh nolong akeu’ hun ké’ pu’un tong Épesus rai.

¹ Timotius anak ké’! Jian ke’ gahang neu’ penika Néh éh pu’un ngan lu’, uban lu’ pemung ngan Kristus Yésus. ² La’ah kekat tebaraa’ éh nenéng ko’ éh benara’ ké’ tong jumen kelunan pinaa’ rai, jian ke’ bara’ éh kepéh ngan kelunan éh tigéh, ke’ réh omok bara’ éh ngan kelunan éh jah kepéh. ³ Jian ke’ ngeretep ngan kebit kenin pemung ngan ké’ dalem pengeketa, barei’ seradu Kristus Yésus éh tigéh. ⁴ Kelunan seradu adang néh ngepayoo’ kenin pengeja’au néh, bé’ iah bubuu’ seruh maneu’ kereja’ kelunan éh jah. ⁵ Kenat péh kelunan éh petesi tong inga’ bé’ réh omok alaa’ tapong hun réh bé’ kivu adet. ⁶ La’ah kelunan éh mutau nérék, tekep iah éh tenah alaa’ buaa’ jin térék néh. ⁷ Jian ke’ seruh tong kekat ha’ ké’ inah, uban Tuhan omok nolong ke’ nesen éh. ⁸ Ko’ nesen éh iteu’, barei’ ha’ éh benara’ lem Rengah Jian éh benara’ ké’, Yésus Kristus lepah pebetéé Tamen Néh jin patai ngan Iah jin puku’ Daud. ⁹ La’ah uban akeu’ pu’un bara’ tong Rengah Jian nah, inah akeu’ jam keta ngan kejeret réh tong lamin tutup, pekua’ barei’ kelunan éh maneu’ penyala’ mu’un. Bang ha’ tebaraa’ Tuhan bé’ éh omok kejeret ngan tenutup réh. ¹⁰ Kenat péh akeu’ ngeretep dalem kekat pengeketa ké’, dokoo’ ké’ omok nolong kelunan éh kevéléé’ Allah, dokoo’ irah péh omok alaa’ urip dalem Kristus Yésus, pemung ngan pengaren Néh éh pu’un pelinguh. ¹¹ La’ah teneng mu’un ha’ iteu’ éh bara’ ka’, Hun uleu’ matai pemung ngan Yésus, omok uleu’ murip pemung ngan Néh kepéh. ¹² Hun uleu’ omok ngeretep dalem pengeketa, omok lu’ pengeja’au pemung ngan Néh kepéh. Hun lu’ ngaken bara’ lu’ bé’ jam Iah, Iah péh ngaken kepéh bara’ Iah bé’ jam uleu’. ¹³ Na’ péh lu’ bé’ tigéh, Iah petem tigéh, uban bé’ Iah omok bé’ pu’un tigéh, uban bé’ Iah omok maneu’ ineu’-ineu’ éh tengéé’ jin pohoo’ kenin Néh. ¹⁴ Jian ke’ petesen kekat irah lem nihau ko’ tong ha’ ké’ iteu’, ngan pané mu’un-mu’un ngan réh barei’ tong jumen Allah mu’un, mai réh pepaneu’ tong sin ateng ha’ inah bé’ pu’un gunah néh, bang éh nasa’ pengelan kelunan éh menéng éh awah. ¹⁵ Jian ke’ mekat pitah jalan éh dokoo’ Tuhan omok bara’ ke’ pu’un jian, barei’ kelunan éh bé’ menyaa’ tong kekat penganeu’ néh. Jian ke’ bara’ ha’ tebaraa’ éh teneng jin Allah ngan teneng mu’un. ¹⁶ Piso ke’ jin ha’ tosok kelunan éh bé’ pu’un gunah ngan éh ngesa’at Allah. Ha’ tosok éh kenat maneu’ kelunan makin juu’ jin Allah. ¹⁷ Ha’ tebaraa’ réh pu’un éh barei’ okoo’ baha’ éh memeseu’ ngan éh ngeborok ketem lo’ong usah réh. Pu’un duah guru kenat, Himenius rawah Piletus. ¹⁸ Pu’un réh netat jin ha’ tebaraa’ éh teneng, ngan hun iteu’ irah mihin kuraa’ kelunan petat jin pengelan réh tong Kristus. Uban réh bara’, pengebetéé kelunan jin pematai lepah pu’un tenéh. ¹⁹ Bang lihei’ éh neu’ Allah, pu’un éh reken mu’un, bé’ éh omok gusii’, ngan Tuhan pu’un nyurat tong néh ka’, Tuhan jam kekat kelunan éh anah Nah, ha’ néh, ngan ha’ néh kepéh, séé’-séé’ kelunan éh bara’ pengelan néh pu’un tong Tuhan, jian iah ngejuu’ usah néh jin kekat kesa’at, ha’ néh. ²⁰ La’ah tong umaa’ ja’au pu’un pinaa’ arong pigan penakai réh, pu’un pigan mat ngan pirek, pu’un éh lalit, pu’un éh kuren tana’ péh, pu’un jelua’ éh mejat penakai réh, pu’un jelua’ kepéh éh ngelayau penakai réh. ²¹ Uban néh kenat séé’-séé’ éh peti’ai usah néh jin kekat éh sa’at iah éh omok penakai Tuhan maneu’ kereja’ éh jian, uban néh pu’un gunah ngan pengeja’au néh ke’ néh omok pakai éh maneu’ ineu’-ineu’ kereja’ éh jian. ²² Bang jian ke’ ngejuu’ usah ko’ jin kekat pengagat kelunan lemanai, mekat kenin kivu pengeloo’ Allah, maneu’ néh kekat inah pemung ngan irah éh menyat Tuhan nolong réh ngan kenin éh ni’ai. ²³ Bang mai keh pemung ngan kelunan éh suwok kenin, éh pesakat tong kekat éh bé’ pu’un gunah, uban ka’au’ jam irah éh maneu’ kenat pepit réh paneu’ kepéh. ²⁴ Kelunan éh sohoo’ Tuhan bé’ tekep éh paneu’, bang jian iah pika ngan nolong kekat kelunan, nebaraa’ ngan petena’ réh jian-jian ngan kebit kenin. ²⁵ Hun néh peteneng irah éh ngelawan éh, jian éh peteneng réh ngan dawai kenin, mai éh maneu’ éh ngan kejaha kenin. Barang Allah omok ngusii’ kenin réh ke’ réh omok pekoléé’ kenin ngan nesen tong kekat ha’ tebaraa’ éh teneng. ²⁶ Boh réh omok nesen kesa’at réh ngan kelap jin viheu’ Sitan éh mugun réh maneu’ éh kivu pengeloo’ néh.

¹ Jian ke’ nesen, tovoo’ tai ga’ tana’, adang pu’un kuraa’-kuraa’ penusah. ² Adang kelunan pu’un nyelepéé’ kenin, ngan magat juk alaa’ mekum, ngan ngajung usah réh ngan bau kenin. Adang réh pu’un ngesa’at ngaran kelunan éh jah, ngan ngelapah ha’ tinen tamen réh, sevahau’ ke’ awah kenin réh, bé’ réh jam seruh, bé’ réh sebayang, ³ Bé’ réh pika kelunan, bé’ réh jam masi, Irah pedok kelunan, sa’at tipan réh, luvaa’ réh ngan leko réh tong éh Jian. ⁴ Bé’ réh tigéh bé’ réh kebit kenin seruh ngan bau kenin réh. Pelapah keloo’ réh murip seminga’ awah, bé’ réh murung Allah. ⁵ Pu’un réh barei’-okoo’ kivu sebayang bang ngelayoo’ awah, bé’ réh jam tong penyukat Tuhan. Mai ke’ ngebakéh kelunan éh kenat. ⁶ Uban jelua’ kelunan éh kenat taket tong lamin kelunan ngan menat kenin irah redo éh lemoo’ kenin neu’ penyala’ réh pinaa’, éh magat tong kekat éh sa’at. ⁷ Irah redo éh kenat ngelayau réh keloo’ pekalai bang bé’ réh omok jam ha’ tebaraa’ éh teneng. ⁸ Barei’-okoo’ Yanes ngan Yambres éh ngelawan Musa sahau rai, kenat péh kekat kelunan inah ngelawan kekat ha’ tebaraa’ Allah, suwok kenin réh, bé’ réh jam seruh, lepah petat réh jin pengelan réh tong Tuhan. ⁹ La’ah bé’ irah omok jian kepéh, uban kekat kelunan jam tong pengepalui réh, barei’ réh jam tong pengepalui Yanes rawah Yambres inah. ¹⁰ Bang bé’ ka’au’ kenat, ka’au’ nah pu’un ke’ kivu ha’ tebaraa’ ké’ ngan barék ké’ ngan penganeu’ ké’. Kejam ko’ tong pengelan ké’ tong Kristus ngan kebit kenin lem pengeketa; kenat péh penika ké’ tong padéé’ éh kua’ pengelan ngan tong ké’ ngeretep péh, ¹¹ ngan tong kekat penusah ngan pengeketa ké’ kepéh. ka’au’ jam tong kekat arong penusah éh teneng tong akeu’ tong Antiokia ngan tong Ikonium ngan Listra rai, matek pinaa’ mu’un penusah inah. Bang Tuhan ngelepu akeu’ jin kekat néh béé. ¹² La’ah kekat kelunan éh keloo’ murip ngan urip éh ni’ai dalem Kristus Yésus, adang irah éh jah pu’un peketa réh. ¹³ Kelunan sa’at ngan éh ngelavo’ adang makin sa’at kepéh, Irah ngelavo’ kelunan éh jah, semu’un néh irah tengéé’ péh pu’un kelavo’. ¹⁴ Bang jian ke’ petem dalem kekat tebaraa’ réh ngan ko’ rai, ngan reken dalem pengelan ko’, uban ka’au’ jam irah éh nebaraa’ ke’ rai, ¹⁵ ngan inah kepéh, jin hun ko’ si’ik ka’au’ lepah jam tong surat Allah éh ni’ai, éh omok mihin ke’ jam seruh ngan alaa’ urip neu’ pengelan ko’ tong Kristus Yésus. ¹⁶ Uban kekat ha’ lem surat Allah, jin Allah éh bu’un néh, ngan pu’un gunah néh ke’ néh nebaraa’ ngan petena’ ngan peteneng kelunan, ngan kuraa’ sohoo’ néh kepéh ke’ réh murip ngan barék éh jian, ¹⁷ dokoo’ kelunan éh maneu’ kereja’ Allah omok sukup, ngan pu’un palaa’ néh maneu’ kekat kereja’ néh jian.

¹ La’ah tong jumen Allah ngan Kristus Yésus adang juk tuai kepéh ke’ Néh petuneng kelunan éh murip ngan éh matai péh. Iah tuai ke’ Néh Raja’. Uban kenat tong jumen Allah ngan Kristus Yésus ngan semu’un kenin akeu’ nyohoo’ ke’, ² jian ke’ bara’ ha’ tebaraa’ Tuhan, mai ke’ bé’ bara’ éh, kenat péh tovoo’ sioo’ jian, kenat péh tovoo’ sioo’ sa’at péh, dokoo’ ko’ mihin réh jam tong penyala’ réh. Jian ke’ petena’ réh ngan ngereken kenin réh, jian ke’ nebaraa’ réh ngan dawai kenin ngan kebit kenin. ³ Uban pu’un sioo’ kepéh temurei’ hun kelunan bé’ keloo’ menéng ha’ tebaraa’ éh teneng, adang irah keloo’ kivu kenin réh tengéé’ ngan pepit pinaa’ guru kepéh éh pu’un bara’ tong kekat éh keneloo’ réh menéng awah. ⁴ Adang réh pu’un marau kelingen réh tong ha’ tebaraa’ éh teneng, ke’ réh mihau ha’ tosok éh bé’ pu’un gunah. ⁵ Bang jian ke’ mihau kenin ko’, ngeretep dalem penusah, maneu’ kereja’ kelunan éh bara’ Rengah Jian, maneu’ kekat kereja’ ko’ barei’ éh tekep ngan kelunan éh sohoo’ Allah. ⁶ Bang jaka’ ké’ lepah avéé’, inah éh jaka’ réh mematai ku’, adang akeu’ juk piso jin tana’ iteu’. ⁷ Pu’un ku’ mekat mu’un lem pekayau tong pengelan, akeu’ lepah pesukup kekat kereja’ ké’, ngan akeu’ lepah mihau pengelan tong Kristus avéé’ ga’ néh. ⁸ Hun iteu’, tapong pengeteneng nodoo’ Tuhan ngan ké’, Tong pengega’ dau, Tuhan éh teneng mu’un petuneng juk mena’ éh ngan ké’, uban akeu’ lepah murip kivu pengeloo’ Néh. Bé’ éh nena’ Néh ngan ké’ awah, bang Iah mena’ éh ngan kekat kelunan éh mena savéé’ Néh ngan murung kenin. ⁹ La’ah Jian ke’ pitah jalan ko’ tuai tavin ku’ ngan rigah. ¹⁰ uban pu’un Demas bet akeu’ uban néh murung tana’ iteu’ awah, iah lepah tai Tesalonika tenéh. La’ah Kereskes lepah tai Galatia, ngan Titus lepah tai Dalmatia, ¹¹ Lukas awah éh pu’un keto ngan ké’ siteu’. Hun ko’ tuai jian ke’ mihin Markus péh tuai, uban iah omok nolong akeu’ lem kereja’ ké’ iteu’. ¹² La’ah pu’un ku’ nyohoo’ Tikhikus tai Épesus. ¹³ La’ah hun ko’ tuai kepéh, jian ke’ mihin kerayung ké’ éh ja’au, éh nodoo’ ké’ ngan Karpus tong Troas, ngan mihin kekat surat ké’ kepéh, makin péh surat ké’ kulit ka’an. ¹⁴ La’ah Aleksander, tukeng temagaa’ rai, pinaa’ kesa’at neu’ néh ngan ké’, la’ah Tuhan omok mena’ oléé’ néh pekua’ penganeu’ néh inah. ¹⁵ Mavaa’ ke’ uban iah ngelawan mu’un tong ha’ tebaraa’ lu’. ¹⁶ La’ah bu’un ké’ pané tong besara’ rai, bé’ pu’un séé’-séé’ éh bakéh ké’, kekat réh béé bet ku’ awah. Mai Tuhan mihau kesa’at réh inah. ¹⁷ Bang Tuhan pu’un pemung ngan ké’ ngan ngegahang ku’, dokoo’ ké’ omok bara’ Rengah Jian ngan kekat kelunan éh tengéé’ pohoo’, ngan pu’un éh ngelepu ku’ jin ukum patai éh juk neu’ réh tong ku’. ¹⁸ Adang Tuhan omok ngelepu akeu’ jin siget-siget kesa’at ngan mihin akeu’ avéé’ tong lamin néh tong seruga. La’ah jian kekat pengaren anah nah béé avéé’ kelebéé’-lebéé’ néh. Amin. ¹⁹ Akeu’ bara’ tabi’ ngan Priskila ngan Akwila, kenat péh ngan kekat irah tong lamin Onésiporus. ²⁰ Pu’un Erastus mokoo’ tong Korintus ngan pu’un ku’ pokoo’ Tropimus tong Miletus uban néh sakit. ²¹ Jian ke’ mekat pitah jalan tuai siteu’ bé’ jak sioo’ genin. La’ah Ebulus ngan Pudes ngan Linus ngan Klaudia ngan kekat padéé’ lu’ siteu’ bara’ tabi’ ngan ko’. ²² Jian Tuhan pu’un pemung ngan ko’. Jian Allah mena’ pengejian ngan kekat ka’ah béé.