2 TESALONIKA
11 Akeu’ Paulus, ngan Silas ngan Timotius, maneu’ surat iteu’ ngan kekat kelunan tong sidang Tesalonika, éh anah Allah éh Tamen lu’ ngan Tuhan Yésus Kristus. 2 Jian Allah éh Tamen lu’, ngan Tuhan Yésus Kristus, mena’ penika Néh ngan pengepawah Néh ngan keh. 3 O kekat padéé’ ké’, tekep améé’ ngelayau bara’ jian kenin ngan Allah uban pengelan keh tong Kristus pu’un éh pepit-pepit, ngan penika keh ngan pesiget-siget ka’ah ke’ pu’un éh pepit mu’un. 4 Inah éh maneu’ améé’ ngajung ka’ah dalem kekat sidang Allah éh jah péh. Améé’ ngajung keh uban keh reken kenin ngan ngelan tong Kristus dalem kekat pengeketa ngan penusah éh pu’un tong keh. 5 Kenat péh uleu’ jam kekat penganeu’ Allah ngan kelunan, pu’un éh teneng mu’un, uban neu’ keh ngeretep ngan ngelan kenat, inah jalan Néh petenup kenin keh dokoo’ keh omok tai lem nihau Néh. Uban neu’ pengelan keh tong Tuhan, kenat éh keh sioo’ keta hun iteu’. 6 Bang Allah éh teneng, adang Iah mena’ tusah ngan irah éh petusah ka’ah hun iteu’ nah 7 ngan Iah mena’ pawah ngan ka’ah éh jam tusah hun iteu’ nah, kenat péh tong améé’ péh. Iah pu’un maneu’ éh kenat tovoo’ Tuhan Yésus pu’un tuai jin seruga, pemung ngan kekat meliket Néh éh maren 8 dalem luten éh nengah, ke’ Néh ngukum kekat kelunan éh bé’ jam Allah, ngan kekat kelunan éh bé’ kivu Rengah Jian tong Yésus éh Tuhan lu’. 9 Adang irah teneng kenukum Néh pelinguh, inah éh Iah marau réh juu’ mu’un jin jumen Tuhan ngan kekat pengejian Néh ngan penyukat Néh éh poléng. 10 Adang kekat inah pu’un tovoo’ Dau savéé’ Néh dokoo’ kekat kelunan éh anah Nah, éh ngelan tong Iah, peparen Iah ngan seva’ Iah awah. Adang ka’ah péh pu’un pemung ngan réh uban keh pu’un ngelan tong tebaraa’ éh benara’ mé’ ngan keh rai. 11 Uban néh kenat ngelayau mé’ sebayang tong keh. Améé’ menyat Allah éh kenelan mé’, maneu’ keh omok murip ngan barék éh jian pekua’ éh tekep tong tenebai Néh ngan keh. La’ah neu’ penyukat Tuhan, jian Iah pesukup pengeloo’ keh tong kekat éh jian, ngan pesukup kekat kereja’ keh éh neu’ pengelan keh. 12 Hun néh pu’un kenat, boh ngaran Yésus éh Tuhan lu’, omok peparen dalem keh, ngan ka’ah péh peparen dalem Iah, naneu’ penika Allah ngan Tuhan Yésus Kristus.
21 O kekat padéé’ ké’, tong penyavéé’ Tuhan lu’ Yésus Kristus ngan tong uleu’ éh juk tai pemung ngan néh, améé’ bara’ ngan keh, 2 mai keh tawang kenin ngan besau menéng ha’ kelunan bara’ Dau savéé’ Tuhan nah lepah avéé’ tenéh. Barang pu’un péh kelunan bara’ kenat hun néh bara’ tong kekat éh juk avéé’ vam, barang pu’un péh kelunan bara’ kenat hun néh nebaraa’ keh. Barang pu’un réh bara’ améé’ nyurat éh kenat dalem surat mé’. 3 Bang mai keh lavo’ neu’ ha’ réh pané kenat ngan keh. Uban dau inah bé’ omok avéé’ jak pah avéé’ hun kelunan pinaa’ éh ngelayoo’ bara’ réh ngelan tong Tuhan pu’un petat ngan ngelawan Tuhan mu’un, ngan pu’un jah kelunan éh sa’at pu’un poléng éh juk kenukum Allah tai tong luten meraka. 4 Adang kelunan éh sa’at nah pu’un ngelawan kekat éh kenelan kelunan, ngan éh seneva’ réh pah avéé’ iah ngebau usah néh ngan tai lem umaa’ Allah, ke’ néh bara’ iah ke’ Allah. 5 Kineu’, kelepan keh ha’ ké’ bara’ tong kekat inah ngan keh hun ké’ mokoo’ keto ngan keh rai kei? 6 Bang ka’ah jam uban ineu’ éh bé’ jak pu’un kenat. Bang hun sukup jaka’ néh boh jah kelunan éh sa’at nah pu’un poléng. 7 Uban kekat kesa’at éh juk neu’ jah kelunan éh sa’at nah, pu’un éh maneu’ éh hun iteu’ bang bé’ jak éh poléng mu’un, pu’un éh kenat pah avéé’ hun iah éh mapat éh hun iteu’ nah pu’un piso. 8 Boh jah kelunan sa’at nah pu’un poléng mu’un, bang Tuhan Yésus juk mematai éh naneu’ laset jin ujun Néh, ngan kebéé éh naneu’ ada pengaren Néh sioo’ savéé’ Néh. 9 La’ah jah kelunan éh sa’at nah, pu’un éh tuai dalem kekat kerenget Sitan, ke’ néh omok maneu’ kuraa’ arong penyuai éh tejeu’ éh ngebéé kenin kelunan, ngan maneu’ kuraa’-kuraa’ telana’ bang kekat néh béé sala’ awah, 10 ngan neu’ kuraa’ arong kesa’at néh pu’un éh ngelavo’ kelunan éh sioo’ kenukum Tuhan. Irah pu’un kenebéé Tuhan ngan tawang uban réh bé’ keloo’ alaa’ ha’ tebaraa’ éh teneng éh omok mihin réh alaa’ urip. 11 Uban néh kenat Allah kejeraa’ kelunan éh bara’ tebaraa’ éh sala’, éh ngelavo’ réh awah ke’ néh mihin réh ngelan tong kekat éh sala’ awah. 12 Kenat péh kekat irah éh bé’ ngelan tong ha’ tebaraa’ éh teneng, bang éh murung dalem kekat éh sa’at awah, adang réh sioo’ kenukum Allah. 13 O kekat padéé’ ké’ éh kemurung Allah, tekep améé’ ngelayau bara’ jian kenin ngan Allah uban Iah ngevéléé’ ka’ah tenah jin irah éh jah ke’ Néh purip keh neu’ penyukat Sahéé’ Ni’ai ke’ Néh maneu’ keh anah Allah mu’un, inah éh neu’ pengelan keh tong tebaraa’ éh teneng. 14 La’ah kenat péh Allah tebai keh neu’ Rengah éh Jian éh benara’ mé’ ngan keh. Iah tebai keh dokoo’ keh omok alaa’ pengejian Tuhan Yésus Kristus. 15 O kekat padéé’ ké’, uban néh kenat jian keh nekedéng petem, ngan mihau kekat ha’ tebaraa’ éh teneng éh benara’ mé’ ngan keh, hun néh ha’ tebaraa’ usah mé’ péh, kenat péh hun néh ha’ surat mé’ awah péh. 16 Jian Tuhan Yésus Kristus, ngan Allah éh Tamen lu’, éh pika uleu’ ngan naneu’ penika Néh Iah mena’ pengepapung Néh éh pelinguh ngan pengelan éh jian ngan lu’, 17 Jian Iah ngegahang kenin keh ngan ngereken keh ke’ ka’ah omok maneu’ ngan bara’ kekat éh jian.
31 O kekat padéé’ ké’, iteu’ éh pengega’ ha’ ké’ ngan keh, jian ka’ah sebayang tong améé’, dokoo’ ha’ tebaraa’ Tuhan omok rigah avéé’ semah-semah péh ngan kenajung, barei’ éh pu’un belah keh teu’ rai. 2 La’ah sebayang kepéh dokoo’ Allah omok mihau améé’ jin kelunan éh sa’at mu’un, uban bé’ éh kekat kelunan éh pu’un ngelan tong ha’ tebaraa’ Tuhan. 3 Bang Tuhan éh tigéh. La’ah Iah omok ngegahang kenin keh ngan mavaa’ keh jin kekat kesa’at. 4 La’ah dalem Tuhan améé’ ngelan adang keh maneu’ ngan keloo’ maneu’ kekat éh senohoo’ mé’ ngan keh. 5 La’ah jian Tuhan mukap kenin keh dokoo’ keh omok jam mu’un tong penika Allah ngan keh ngan tong pengebit kenin Kristus. 6 Kekat padéé’ ké’, dalem ngaran Tuhan Yésus Kristus, améé’ meta’ keh, mai keh pebakéh ngan kekat padéé’ éh leko kereja’ éh bé’ kivu sohoo’ mé’ rai. 7 Uban ka’ah tengéé’ péh jam tekep keh maneu’ pekua’ éh naneu’ mé’ rai, uban bé’ mé’ leko kereja’ hun mé’ pu’un ngan keh rai ne’. 8 Bé’ mé’ kuman ka’an éh nalaa’ irah éh jah hun mé’ bé’ melih éh, bang pu’un mé’ kereja’ ngan mutau mu’un, siget dau ngan siget merem péh dai mé’ petusah jah usah péh. 9 Améé’ maneu’ kenat bé’ makat uban mé’ bé’ omok nyohoo’ keh tagong améé’, bang dokoo’ mé’ maneu’ jah telana’ éh tekep keh kivu. 10 Uban hun mé’ mokoo’ keto ngan keh rai, pu’un mé’ bara’, Kelunan éh leko kereja’ mai éh kuman, kenat ha’ mé’ rai. 11 Pu’un mé’ pané kenat kepéh hun iteu’, uban mé’ pu’un menéng kuraa’ kekat kelunan belah ka’ah éh leko kereja’, éh bé’ kereja’ maneu’ ineu’-ineu’ bang irah petusah kelunan éh jah awah. 12 Dalem ngaran Tuhan Yésus Kristus, améé’ nyohoo’ kelunan éh kenat, tekep kekat urip réh pu’un teneng ngan tekep réh kereja’ ke’ réh tagong usah réh tengéé’. 13 O kekat padéé’ ké’, bang ka’ah iteu’, mai keh leko maneu’ jian. 14 Barang pu’un kelunan sinah éh bé’ kivu sohoo’ mé’ lem surat mé’ iteu’, hun néh pu’un kelunan kenat, mai keh ngebakéh éh dokoo’ néh omok nesen kesa’at néh inah. 15 Mai keh seruh éh barei’ ayau keh mu’un, bang jian keh petena’ éh barei’ padéé’ keh dalem Tuhan. 16 La’ah jian Tuhan éh jalan lu’ alaa’ pawah kenin, ngelayau mena’ pengepawah Néh ngan keh dalem kekat-kekat pengurip keh. Jian Tuhan pu’un ngan kekat keh béé. 17 Ojoo’ ké’ tengéé’ nyurat iteu’, tabi’ jin akeu’ Paulus. Kenat péh éh neu’ ké’ tong siget-siget surat éh senurat ké’. 18 Jian Tuhan lu’ Yésus Kristus mena’ pengejian ngan kekat ka’ah béé.