2 PÉTERUS

¹ Surat iteu’ jin Simon Peterus, kelunan sohoo’ éh lawah Yésus Kristus. Surat iteu’ nena’ ké’ ngan kelunan éh ngelan tong Kristus pekua’ améé’ éh ngelan tong Néh. Yésus Kristus, inah éh Allah éh pepurip lu’, maneu’ lu’ kelu’ omok ngelan tong Néh uban Iah éh maneu’ kekat éh teneng. ² Uban keh jam Allah ngan Yésus éh Tuhan lu’, jian kekat kemurung Allah ngan pengepawah Néh pepit dalem kenin keh kepéh. ³ Naneu’ penyukat Néh éh nena’ Allah ngan lu’ pu’un Iah mena’ kekat éh tekep tong urip uleu’ éh ni’ai, dokoo’ urip lu’ omok jian barei’ éh tekep ngan kelunan éh ngelan Tuhan. Uleu’ omok murip jian kenat neu’ pengejam lu’ tong Allah éh tebai lu’ tai pemung ngan Néh dalem kekat pengaren ngan pengejian Néh. ⁴ Kenat péh Iah mena’ kuraa’ kuraa’ arong jajii’ éh matek jian mu’un ngan lu’. Dokoo’ lem kekat inah béé ka’ah pu’un kivu barék Allah ngan pelepu jin pengagat éh sa’at éh pu’un tong tana’ iteu’. ⁵ Uban néh kenat, jian keh ngerakep dokoo’ keh petem ngelan tong Kristus, mihau urip éh jian ngan kepéh jam tong pengeloo’ Allah. ⁶ Kenat kepéh ka’ah tekep mihau usah keh ngeretep kenin tovoo’ keh teneng tong ineu’-ineu’ péh ngan ka’ah tekep murip ni’ai. ⁷ Ka’ah tekep murung tong padéé’ keh dalem Tuhan ngan pika tong kekat kelunan béé. ⁸ Kekat barék inah éh tekep pu’un ngan keh hun keh alaa’ éh ngan kivu éh mu’un, adang urip keh pu’un gunah ngan ka’ah pepit kepéh jam tong Yésus Kristus Tuhan lu’ ngan jian. ⁹ Bang séé’-séé’ éh bé’ pu’un kekat barék éh jian inah, kelunan inah barei’ kelunan éh pu’un siik awah ta’an ngan iah ngelepan iah lepah nohéé’ jin penyala’ néh éh lepah. ¹⁰ Uban néh kenat o kekat padéé’ ké’, jian keh mekat pekalai dokoo’ pekelenaa’, ka’ah éh tenebai Allah ngan éh kevéléé’ Néh. Hun keh maneu’ kenat, bé’ keh peleraa’ jin pengelan keh kepéh. ¹¹ Hun keh maneu’ kenat, boh keh pu’un penyukat omok tai lem Pengihau éh pelinguh jin Tuhan éh purip lu’ Kristus. ¹² Uban néh kenat adang akeu’ juk ngelayau petesen ka’ah tong kekat inah, na’ péh ka’ah lepah jam éh ngan petem dalem ha’ tebaraa’ Allah éh lepah nalaa’ keh inah. ¹³ Adang akeu’ tekep petesen ka’ah tong kekat inah béé kelebéé’ ké’ murip keto. ¹⁴ Uban kejam ké’ bé’ akeu’ lebéé’ murip tong tana’ iteu’ la’ah, uban Tuhan Yésus Kristus lepah bara’ éh kenat ngan ké’. ¹⁵ Uban néh kenat akeu’ juk ngerakep mu’un-mu’un dokoo’ jin la’o akeu’ matai péh, ka’au’ ngelayau nesen tong kekat iteu’ béé. ¹⁶ Uban bé’ améé’ kivu ha’ suket kelunan hun mé’ nebaraa’ ka’ah tong Tuhan Yésus Kristus éh juk tuai kepéh dalem kekat penyukat Néh. Maten améé’ tengéé’ pu’un na’at kekat kemaren Néh hun Néh pu’un tong tana’ iteu’ rai. ¹⁷ Pu’un améé’ pemung ngan Néh tovoo’ Néh kenajung ngan peparen Allah éh tamen. Tovoo’ inah pu’un ha’ jin Iah éh matek maren pané ngan Néh. Iteu’ néh Anak Ké’ éh kemurung Ké’. Iah ngepayoo’ kenin Ké’ ha’ Néh. ¹⁸ Améé’ tengéé’ pu’un menéng ha’ inah tuai jin seruga tovoo’ améé’ pemung ngan Néh bau tokong éh ni’ai inah. ¹⁹ Uban néh kenat améé’ makin ngelan kepéh tong ha’ éh benara’ irah nabi, Ka’ah tekep mihau ha’ tebaraa’ irah ngan jian-jian, uban ha’ tebaraa’ irah éh barei’, titui éh perema tong retek éh merem pah avéé’ dau peka, ngan ada kenyalung teka rema éh perema dalem kenin keh. ²⁰ Éh bu’un-bu’un éh tekep keh nesen inah éh, bé’ pu’un séé’-séé’ péh omok pekelenaa’ sin ha’ éh benara’ Tuhan lem surat Tuhan palaa’ pengejam néh tengéé’. ²¹ Uban kekat ha’ tebaraa’ éh benara’ irah nabi, bé’ irah bara’ éh kivu pengeloo’ kenin réh tengéé’, bang Sahéé’ Ni’ai pekelenaa’ éh lem kenin réh tovoo’ réh bara’ ha’ Allah ngan kelunan.

¹ Hun sahau pu’un kuraa’-kuraa’ irah nabi, éh ngelavo’ musit belah irah éh anah Allah. Kenat péh irah éh ngelavo’ juk musit belah ka’ah tovoo’ hun iteu’. Irah pu’un perengah ha’ tebaraa’ éh sala’ ngan éh petawang. Avéé’ réh bet Yésus Kristus Tuhan éh purip réh uban néh kenat inah maneu’ ukum Tuhan laho juk teneng tong réh ² Na’ péh kenat, pinaa’ kelunan juk kivu gaya’ urip irah guru éh ngelavo’ éh maneu’ penganeu’ éh segit penganeu’ réh inah mihin kelunan ngesa’at jalan éh teneng jin Allah. ³ Irah kelunan éh ngelavo’ nah, magat juk alaa’ mekum, kenat jalan réh alaa’ rigit jin kelunan éh kivu réh uban réh nebaraa’ réh tong kuraa’-kuraa’ ha’ tebaraa’ éh sala’, tebaraa’ éh neu’ irah ke’ tengéé’. Lebéé’ tenéh Allah pu’un bara’ tong ukum éh juk teneng tong réh, bé’ Tuhan telalau kenin adang Tuhan pu’un ngukum réh mu’un. ⁴ Allah péh bé’ Iah ngelepu irah meliket éh lepah maneu’ penyala’, bang Iah bet réh lem meraka. Sinah réh kejeret tong retek éh merem pah avéé’ Dau Tuhan petuneng kelunan. ⁵ Pekua’ irah kelunan sahau éh pinaa’ penyala’, bé’ réh pelepu jin ukum Allah. Iah maneu’ labuu ke’ Néh ngebéé kelunan éh maneu’ penyala’ bang Iah purip Noh ngan tujuu’ usah éh pemung ngan néh, uban Noh mihin pengurip éh ngepayoo’ kenin Allah. ⁶ Kenat péh Allah pu’un ngukum irah tong leboo’ Sodom ngan leboo’ Gemora ngan ngebéé réh neu’ luten. Inah jah telana’ dokoo’ omok petesen kelunan éh petem maneu’ kesa’at hun iteu’ péh, adang ukum Tuhan pu’un teneng tong réh. ⁷ La’ah Allah purip Lot, uban iah jah kelunan éh teneng, avéé’ néh pua kenin na’at kekat barék éh sa’at éh neu’ kelunan bé’ ngelan Tuhan. ⁸ Uban kelebéé’ Lot murip belah irah, besau kenin néh neu’ kekat barék réh sa’at éh ta’an néh ngan nenéng néh siget-siget dau. ⁹ Kenat péh Tuhan jam purip kekat kelunan éh ni’ai jin kekat arong penupat ngan penusah réh, ngan Iah jam pokoo’ kelunan sa’at dokoo’ réh kenukum tong dau petuneng. ¹⁰ Makin péh irah éh kivu pengagat éh segit ngan irah éh lebuau tong penyukat Allah. Irah guru éh ngelayoo’ inah bé’ réh jam menyaa’ bau kenin réh. Bé’ irah peduli’. Kekat éh maren tong seruga; bang irah ngesa’at kekat néh béé. ¹¹ Na’ péh kekat meliket pelapah gahang ngan pu’un penyukat jin irah guru éh ngelavo’ inah, bé’ irah pesala’ ngan ngesa’at ngaran réh tong jumen Tuhan. ¹² Bang irah guru éh ngelavo’ nah bara’ ka’an éh luvaa’ éh pu’un tong tana’ dokoo’ kelunan alaa’ ngan mematai éh awah. Irah kivu kenin réh awah. Palaa’ kekat ha’ éh sa’at irah ngesa’at ngan muau ineu’-ineu’ éh bé’ kejam réh. Irah péh juk kenebéé barei’ ka’an éh luvaa’ inah. ¹³ Neu’ réh petusah kenin kelunan éh jah, adang irah tengéé’ péh teneng tusah kepéh. Kenat péh bé’ réh jam menyaa’, hun dau rema murung kenin réh kivu kekat pengagat usah réh. Tovoo’ réh pu’un kuman pemung ngan keh, barék réh omok pekenyaa’ mu’un. Irah murung kenin uban réh omok ngelavo’ keh. ¹⁴ Hun réh na’at irah redo, kelih réh maneu’ barék sa’at ngan petuyang péh, bé’ réh sara maneu’ barék éh sa’at, ngelayau réh maneu’ barék sa’at kenat. Kenat kepéh irah keloo’ tupat kelunan éh bé’ petem lem Tuhan, ke’ réh mihin réh maneu’ penyala’. Kenin réh malai tong kesa’at awah, barei’ kelunan ngelayau kuman nyahan bé’ réh omok beso, adang ukum Tuhan omok teneng tong réh. ¹⁵ Irah pu’un petat jin jalan éh teneng, tawang awah réh. Pu’un réh kivu jalan éh kenivu Bileam anak Beor sahau. Bileam nah magat alaa’ rigit éh juk nena’ réh ngan néh ke’ néh maneu’ sa’at. ¹⁶ Bileam nah neta’ Tuhan uban penyala’ néh inah keledai néh pané’ palaa’ ha’ kelunan ngan meta’ Bileam jin penganeu’ néh éh palui nah. ¹⁷ Irah guru éh ngelavo’ inah barei’ okoo’ usit baa’ éh metei’ ngan mapeu’ ngan barei’ avun éh selevuu kepu. Allah lepah petenup jah jalan éh matek merem ngan réh. ¹⁸ Irah pepoléng réh bau kenin ngan palui, kenat péh irah pakai pengagat éh segit dokoo’ ngelohoo’ kelunan éh maréng pelepu jin belah kelunan éh murip tawang. ¹⁹ Irah guru éh ngelavo’ inah pejajii’ mena’ pengelepu ngan réh, bang usah irah guru éh ngelavo’ inah tengéé’ péh keripen neu’ kemalai réh éh juk kebéé réh. Éh ke’ néh kenat, uban séé’-séé’ éh senopéé ineu’-ineu’ péh, iah néh éh ripen kekat inah. ²⁰ Kelunan éh jam Tuhan ngan Éh purip lu’ Yésus Kristus, lepah pelepu jin penyukat tana’ iteu’ éh ngesegit kelunan. Bang hun jin la’o inah irah keripen kepéh ngan sopéé’ neu’ kekat penyukat inah, urip réh pelapah sa’at kepéh jin hun réh bé’ jak jam Kristus. ²¹ Pelapah jian kelunan éh kenat bé’ pu’un jam gaya urip éh keneloo’ Allah, jin hun réh jam éh ngan bé’ keloo’ kivu sohoo’ éh nena’ Allah. ²² Pu’un jah ha’ tapan éh pekua’ ngan kelunan éh maneu’ kenat, ka’ éh, Aseu’ moléé’ kuman lutaa’ néh kepéh, ngan Idok éh lepah peroo’ réh moléé’ tai ngelina’ dalem lina’ néh kepéh.

¹ O kekat bakéh ké’, iteu’ éh keruwah koléé’ ké’ maneu’ surat ngan ka’ah. Dalem duah surat ké’ iteu’, akeu’ tupat mihin keh seruh tong kekat éh ni’ai, neu’ ké’ petesen keh tong néh. ² Akeu’ keloo’ ka’ah nesen ha’ éh benara’ irah nabi Allah sahau, kenat péh kekat tebaraa’ ngan kekat sohoo’ éh jin Tuhan éh ngelepu lu’, éh benara’ irah lawah ngan keh kepéh. ³ Éh bu’un néh jian keh nesen, tai sioo’ pengega’ urip pu’un kuraa’-kuraa’ kelunan juk betéé’ ngan maneu’ barék sa’at kivu kenin réh tengéé’. Irah pu’un peja’ keh, ⁴ ngan bara’ mah savéé’ Néh éh kunah réh nah kei avéé’ tepun lu’ péh lepah matai bang kekat ineu’-ineu’ péh pu’un pekua’ barei’ éh pu’un jin bu’un nah ke’ éh. ⁵ Uban réh ngepo’ong awah, bé’ keloo’ jam tong penyukat Allah éh suai kekat langit ngan tana’ neu’ ateng ha’ Néh awah. Tana’ iteu’ senuai Néh jin baa’ ngan palaa’ baa’. ⁶ Neu’ baa’ inah kepéh, inah éh labuu, inah jalan Tuhan ngebéé kekat tana’ sahau nah. ⁷ Bang langit ngan tana’ éh pu’un hun iteu’, neu’ ha’ Néh awah Tuhan mihau éh pah avéé’ jaka’ Néh ngebéé éh palaa’ luten. Langit ngan tana’ péh pu’un nihau Néh pah avéé’ dau Tuhan pu’un ngukum ngan kebéé kekat kelunan éh bé’ ngelan Tuhan. ⁸ O kekat bakéh ké’, mai keh ngelepan ha’ ké’ iteu’, tong ta’an Tuhan jah dau péh bé’ éh tengéé’ jin jah ibu ta’un. Jah ibu ta’un péh bé’ éh tengéé’ jin jah dau nah, pu’un éh pekua’ awah. ⁹ La’ah bé’ Tuhan tipa’ maneu’ kekat éh pejajii’ Néh, na’ péh jelua’ kelunan seruh Tuhan tipa’ maneu’ éh, uban neu’ Néh kebit kenin bé’ Iah keloo’ jah-jah usah péh matai lem penyala’ néh, bang Iah keloo’ kekat kelunan pekoléé’ kenin jin penyala’ réh. ¹⁰ Bang Dau savéé’ Tuhan inah, iah tioo pu’un avéé’ barei’ kelunan éh nekau. Tovoo’ Dau inah langit pu’un béé pemung ngan ha’ éh ja’au mu’un, ngan kekat éh tong langit péh pu’un potong béé. La’ah tana’ iteu’ ngan kekat éh pu’un tong néh juk salai béé. ¹¹ Uban kekat inah juk béé kenat, kineu’ tok ka’ah dalem urip keh hun iteu’? Adang éh tekep kekat urip keh pu’un ni’ai ngan pu’un lem nihau Allah kelebéé’ keh mena tong Dau savéé’ Néh. ¹² Ngan neu’ kekat penganeu’ keh kenat, inah jalan pesavéé’ Dau inah rigah avéé’. Tovoo’ Dau inah langit potong béé ngan kekat éh tong langit péh munyai neu’ éh pana mu’un. ¹³ Bang uleu’ mena ineu’ éh lepah pejajii’ Allah, Iah inah Langit maréng ngan tana’ maréng jalan kekat éh teneng mu’un. ¹⁴ Uban néh kenat, O kekat padéé’ éh kemurung ké’, kelebéé’ keh mena Dau inah avéé’, jian keh mekat dokoo’ keh pu’un ni’ai ngan bé’ pu’un sala’ ineu’-ineu’ tong jumen Allah. ¹⁵ Jian ka’ah seruh tong pengekebit kenin Tuhan lu’, inah jah bi’en éh nena’ Tuhan ngan keh dokoo’ keh omok alaa’ urip Néh. Padéé’ lu’ Paulus éh kemurung lu’, neu’ pengejam éh nena’ Allah ngan néh. ¹⁶ Dalem kekat surat néh, Paulus, ngelayau nyurat tong kekat inah. Adang pu’un kuraa’-kuraa’ ha’ lem surat néh éh bé’ lumang kenejam. Kelunan éh bé’ jam ineu’-ineu’ ngan éh lemoo’ pengelan, lepah sala’ bara’ sin ha’ inah. Irah péh lepah sala’ bara’ sin ha’ jin kuraa’-kuraa’ tulat surat Tuhan éh jah penganeu’ inah mihin penasa’ tong usah réh tengéé’. ¹⁷ Bang ka’ah kekat padéé’ éh kemurung ké’ ka’ah lepah jam tong inah, uban néh kenat jian keh mavaa’ mu’un-mu’un dai keh pu’un tawang naneu’ penganeu’ kelunan éh maneu’ sa’at, ngan pelohoo ’ jin jalan tekedéng éh reken. ¹⁸ Tekep ka’ah pepit lem penika Yésus Kristus. Tuhan ngan Éh purip lu’ ngan tekep ka’ah péh pepit kepéh jam tong Iah. Jian uleu’ mejing ngan peparen Kristus, hun iteu’ ngan kelebéé’-lebéé’ néh. Amin.