1 TIMOTIUS

¹ Akeu’ Paulus éh lawah Kristus Yésus neu’ sohoo’ Allah éh pepurip lu’, pemung ngan Yésus Kristus éh kenelan lu’, ² akeu’ éh maneu’ surat iteu’ ngan Timotius éh seleket anak usah ké’ mu’un neu’ pengelan ko’ tong Tuhan. Jian Allah éh Tamen, ngan Tuhan Yésus Kristus, mena’ penika Néh ngan pengasi Néh ngan pengepawah Néh ngan ko’. ³ Barei’ ha’ ké’ ngan ko’ teka ké’ tai Makedonia éh nyohoo’ ke’ mokoo tong Épesus rai, kenat péh ha’ ké’ hun iteu’ kepéh, jian ke’ mokoo’ sinah dokoo’ ko’ omok meta’ kuraa’ kelunan éh bara’ tong ha’ tebaraa’ éh sala’ awah. ⁴ Jian ke’ meta’ réh mai ke’ buhaa’ réh bara’ kepéh tong ha’ tukit awah ngan pané tong ha’ tosok tong puku’ néh éh mihin kelunan paneu’ awah, hun réh maneu’ kenat bé’ éh nya’ap ngan ngegahang kenin ke’ réh kivu Allah éh omok ngereken pengelan lu’ tong Iah. ⁵ Éh ke’ ké’ nyohoo’ ke’ kenat dokoo’ kekat kelunan omok pepit penika éh pu’un jin kenin réh éh ni’ai, kenat péh bé’ pu’un ineu’-ineu’ jin lem kenin réh éh omok pesala’ réh uban pengelan réh pu’un mu’un tong Tuhan. ⁶ Pu’un kuraa’ kelunan éh netat jin tebaraa’ éh teneng teu’, tawang awah lah réh neu’ réh pepané tong ha’ éh adek ke’ awah. ⁷ Keloo’ réh guru bang ngelayoo’ awah réh barei’ jam rai nebaraa’ tong sohoo’ lem Surat Allah nah, irah tengéé’ péh bé’ réh jam éh tenosok réh nah ngan bé’ réh jam sin ha’ éh benara’ réh nah, na’ péh réh makang kenin bara’ éh. ⁸ Uleu’ jam kekat sohoo’ lem Surat Musa jian éh, inah éh hun kelunan pu’un kivu éh barei’ éh tekep kenivu néh. ⁹ Bang jian irah nesen sohoo’ inah bé’ éh tulat kelunan éh Jian, bang tulat kelunan sa’at ngan éh ngelapah sohoo’, kelunan éh bé’ jam Allah ngan kelunan penyala’, kelunan éh bé’ keloo’ sebayang ngan éh kivu urip tana’, kelunan éh mematai tamen ngan tinen ngan mematai kelunan. ¹⁰ Kelunan éh petuyang ngan lakei’ petuyang ngan lakei’ irah pebelih kelunan ripen, irah éh kenyo, irah éh pané nebok. Ngan séé’ séé’ éh maneu’ kuraa’ penganeu’ éh tengéé’ jin ha’ tebaraa’ éh teneng. ¹¹ La’ah inah éh tebaraa’ éh pu’un lem Rengah Jian éh nena’ Tuhan lem nihau ké’, ke’ ké’ bara’ éh kepéh, inah éh Rengah Jian jin Allah éh maren mu’un ngan éh tekep nejing lu’. ¹² La’ah akeu’ bara’ jian kenin ngan Kristus Yésus éh Tuhan lu’, éh ngegahang ku’ maneu’ kereja’ Néh. Akeu’ bara’ jian kenin ngan Néh uban Iah ngevéléé’ akeu’ ké’ tekep maneu’ kereja’ Néh. ¹³ Hun sahau rai pu’un akeu’ pané ngesa’at ngaran Néh, ngan peketa ngan punyat kenin irah éh ngelan tong Iah, seleket ké’ maneu’ usah Néh mu’un, na’ péh kenat pu’un Allah pika akeu’, éh ké’ maneu’ kenat nah uban ké’ bé’ jak ngelan tong Iah, ngan bé’ jak ku’ jam tong penganeu’ ké’ kenat nah sala’. ¹⁴ La’ah ja’au mu’un penika Tuhan ngan ké’ ngan mutaa’ kepéh, pu’un éh ngusii’ kenin ké’ dokoo’ ké’ omok ngelan ngan omok pika neu’ ké’ pu’un petem lem Kristus Yésus. ¹⁵ Teneng mu’un ha’ iteu’ ngan tekep kelunan alaa’ éh ngan ngelan éh, ka’ éh, Kristus Yésus tuai tong tana’ teu’ ke’ Néh omok purip kelunan. La’ah akeu’ éh pelapah sa’at jin kekat kelunan béé éh pu’un penyala’. ¹⁶ Na’ péh kenat pu’un Allah pika akeu’ dokoo’ Kristus Yésus pepoléng pemekat kenin Néh ngan ké’, neu’ pengebit kenin Néh kenat akeu’ omok jah telana’ éh omok ta’an ngan kenivu kelunan ke’ réh omok ngelan kepéh ngan alaa’ urip pelinguh. ¹⁷ Jian Allah, Raja’ éh pelinguh, éh murip pelinguh-linguh, éh bé’ omok ta’an kelunan, ngan éh jah awah, tekep seneva’ ngan peparen avéé’ kelebéé’ lebéé’ néh. Amin. ¹⁸ O anak ké’ Timotius, iteu’ sohoo’ ké’ ngan ko’, jian ke’ mihau éh. Pu’un éh pekua’ kekat ha’ éh benara’ réh ngan ko’ sahau hun réh bara’ tong kekat neu’ ko’ kepéh vam. Jian ke’ mihau kekat ha’ réh inah barei’ lajam ko’ mu’un, dokoo’ ko’ omok nyopéé’ kekat kesa’at. ¹⁹ Jian ke’ petem dalem pengelan ko’, mai ke’ maneu’ ineu’-ineu’ éh omok petawang kenin ko’. Pu’un jelua’ kelunan éh maneu’ barék éh bé’ jian éh petawang kenin néh, éh mega’ pengelan néh jin Tuhan. ²⁰ Kenat péh Himenius rawah Aleksander, pu’un ku’ lepah pepusit rawah jin sidang dokoo’ rawah omok jam, mai roh pané ngesa’at ngaran Tuhan kepéh.

¹ La’ah bu’un-bu’un akeu’ nyohoo’ dokoo, sebayang menyat ngan bara’ jian kenin ngan Allah tulat kekat kelunan. ² Ngan irah raja’ kenat péh irah éh pu’un penyukat. Sebayang ngan Allah dokoo’ uleu’ omok murip ngida ngan pawah. Uleu’ tekep seva’ Allah ngan Jian tipan ngan kekat kelunan. ³ Jian uleu’ sebayang kenat uban inah jalan éh ngepayoo’ kenin Allah éh purip lu’. ⁴ Adang Iah keloo’ kekat kelunan alaa’ urip Néh ngan jam tong ha’ tebaraa’ éh teneng éh omok purip éh. ⁵ Allah jah awah, ngan Kristus Yésus Iah awah éh jalan éh omok mihin lu’ pemung jah awah kepéh ngan Allah. Kenat péh Kristus inah Iah malui kelunan mu’un. ⁶ Yésus mena’ usah Néh penatai réh dokoo’ ngelepu kekat kelunan, inah éh telana’ éh benara’ Néh sioo’ jaka’ éh kevéléé’ Néh éh jalan lu’ omok jam adang Iah keloo’ kekat kelunan alaa’ urip Néh. ⁷ Kenat péh jalan Tuhan ngevéléé’ akeu’ lawah Néh ngan nyohoo’ ku’ tai nebaraa’ irah éh tengéé’ pohoo’ jin irah Yahudi dokoo’ ké’ nebaraa’ réh tong pengelan tong Tuhan éh jalan éh teneng. Pu’un ku’ pané mu’un bé’ ku’ kenyo. ⁸ Akeu’ keloo’ irah lakei’ sebayang semah-semah péh ngan kenin éh Ni’ai, bé’ pu’un kemerek kenat péh pepaneu’. ⁹ Kenat péh akeu’ keloo’ kekat redo jam nipet tong pakai néh. Jian éh pakai kekat éh jian ngan éh tekep, mai éh pakai éh ke’ néh no’é’ kelunan. Mai réh manyam bok réh nyavuu’ anyam éh tengéé’ jin kemalai réh ngan mai réh pakai mas ngan talem mutiara ngan pakai seput éh ma’an belih éh palaa’ réh ngejian layan usah réh dokoo’ kelunan éh jah magat réh awah. ¹⁰ Jian réh pekerayung usah réh palaa’ kekat penganeu’ éh jian éh nolong kelunan éh jah, inah barék éh tekep ngan redo éh ngelan ngan kivu Tuhan. ¹¹ Jian kekat redo pekalai mokoo’ kelem ngan diva’ kenin. ¹² Bé’ akeu’ buhaa’ irah redo nebaraa’ ngan pu’un penyukat bau irah lakei’, jian irah mokoo’ kelem awah. ¹³ Uban Adam éh tenah senuai Tuhan, la’o inah boh éh Awa’. ¹⁴ La’ah bé’ éh Adam éh pu’un lavo’ rai, bang redo néh éh lavo’ nah, ngan redo néh éh ngelapah tong sohoo’ Allah. ¹⁵ Bang redo omok alaa’ urip neu’ pu’un anak, inah éh hun néh pu’un petem dalem pengelan néh, ngan pika ngan kekat éh ni’ai ngan jam seruh.

¹ La’ah teneng mu’un ha’ iteu’ éh bara’, Hun pu’un kelunan éh keloo’ juk maneu’ kereja’ mihau Sidang Tuhan, inah iah keloo’ maneu’ jah kereja’ éh jian mu’un. ² La’ah kelunan éh mihau sidang nah, tekep éh bé’ pu’un ineu’-ineu’ kesa’at naneu’ néh éh ke’ réh omok pesala’ éh tong néh. Iah tekep jah awah redo. Jian éh kelunan éh jam mihau kenin néh, jam seruh ngan bé’ paba pané. Jian éh kelunan éh keloo’ alaa’ irah éh jah tong lamin néh ngan mihau réh ngan jian kenin, tekep éh kelunan éh jam nebaraa’ irah éh jah. ³ Mai éh kelunan keloo’ mesep baa’ éh maneu’ réh mavuk éh keloo’ pepaneu’, iah tekep dawai pengané ngan keloo’ pawah. Mai éh mekum tong rigit. ⁴ Jian éh kelunan éh jam nebaraa’ ngan petena’ irah tong lamin néh ngan anak néh péh keloo’ kivu sohoo’ néh ngan jian kenin. ⁵ Uban hun kelunan bé’ jam nebaraa’ ngan petena’ irah tong lamin néh, kineu’ jalan néh omok mihau sidang Allah kepéh? ⁶ Mai éh kelunan éh bu’un-bu’un ngelan tong Tuhan dai éh bau kenin ngan kenukum Tuhan barei’ Sitan rai. ⁷ Jian éh kelunan éh senepah irah éh bé’ kivu sebayang, dai éh teneng tong penyala’ ngan pejeu tong viheu’ Sitan. ⁸ La’ah kenat péh irah pelayan, tekep réh kelunan éh jam seruh, mai éh kelunan paba pané, kenat péh mai éh kelunan keloo’ mesep baa’ éh maneu’ éh mavuk, kenat kepéh mai éh kelih tong rigit ngan alaa’ mekum tong rigit. ⁹ Bang jian éh kelunan éh petem mihau pengelan néh tong Tuhan éh lepah benara’ Allah lem lepok kenin néh éh ni’ai. ¹⁰ Jian ngelenaa’ éh tenah, hun kelunan inah éh tigéh ngan bé’ éh kelunan maneu’ ineu’-ineu’ éh sala’, boh éh omok maneu’ kereja’ pelayan. ¹¹ La’ah kenat péh tekep redo néh kelunan éh jian barék, mai éh kelunan éh tosok tong kekat rengah sa’at, jian éh kelunan éh jam seruh éh bé’ paba pané, ngan éh tigéh dalem kekat penganeu’ néh. ¹² La’ah irah éh pelayan, tekep éh kelunan éh pu’un jah awah redo, éh jam nebaraa’ ngan petena’ anak néh ngan irah tong lamin néh. ¹³ Kelunan éh maneu’ kereja’ pelayan mu’un, éh maneu’ éh ngan jian ngan teneng, pu’un réh alaa’ ngaran éh jian belah irah pinaa’ nah, ngan omok réh bara’ tong pengelan réh tong Kristus Yésus ngan makang kenin. ¹⁴ Akeu’ ngelan ku’ omok tuai laho ngan ko’, bang pu’un ku’ maneu’ surat iteu’ ¹⁵ lavaa’ ké’ lieu’, dokoo’ ko’ omok jam tong barék éh tekep ngan uleu’ éh pepadéé’ dalem Allah, inah éh sidang Allah éh murip, sidang Néh éh lihei’ ngan suka’ tong tebaraa’ éh teneng tong Allah. ¹⁶ Adang sebayang lu’ pu’un barei’ pelim ngan irah éh bé’ jam éh, bang jian mu’un éh, ka’ éh, Pu’un Tuhan tuai paléu kelunan, Sahéé’ Ni’ai pekelenaa’ Iah pu’un teneng, pu’un éh ta’an irah meliket. La’ah Iah éh benara’ réh tong siget-siget pohoo’, Iah éh kepelum kelunan pah tipo tana’, Iah éh netéé’ Tamen Néh pemung ngan kemaren Néh, moléé’ tai seruga.

¹ La’ah Sahéé’ Ni’ai pu’un bara’ lenaa’ mu’un, sioo’ tai ga’ tana’ adang pu’un kuraa’ kelunan petat jin pengelan réh tong Kristus avéé’ réh kivu kuraa’-kuraa’ ha’ tebaraa’ sahéé’ éh petawang ngan tebaraa’ sahéé éh sa’at. ² Ha’ tebaraa’ inah benara’ kelunan éh ngelayoo’ awah ngan pané’ kenyo éh Seleket Matai lem penyeruh néh uban penyeruh néh barei’ potong ngan lasoo’ mu’un neu’ daven éh pana. ³ Pu’un réh nebaraa’ kelunan ngan meta’ réh kawin. Irah meta’ kelunan kuman jelua’ arong ka’an. La’ah uleu’ éh kelunan Kristén éh jam tong tebaraa’ Tuhan éh teneng, omok lu’ kuman éh ngan bara’ jian kenin ngan Tuhan. Hun réh sebayang bara’ jian kenin ngan Néh omok réh kuman éh béé. ⁴ Kekat-kekat penyuai Allah pu’un éh jian béé, bé’ lu’ tekep bet éh awah, bang jian lu’ alaa’ éh béé ngan sebayang bara’ jian kenin ngan Tuhan, ⁵ uban kekat néh béé pu’un éh jian naneu’ ha’ Allah ngan ha’ sebayang lu’. ⁶ Hun ko’ nebaraa’ irah padéé’ lu’ dalem Tuhan tong kekat tebaraa’ inah, adang ka’au’ kelunan éh jian éh kivu sohoo’ Kristus Yésus ngan omok ke’ gahang kepéh neu’ kekat tebaraa’ tong pengelan lu’ tong Tuhan, ngan ha’ tebaraa’ éh teneng éh kenivu ko’ inah. ⁷ Jian ke’ petedau tong ha’ tosok kelunan éh bé’ pu’un gunah nah. Jian ke’ pepit gahang dalem Pengurip sebayang ko’. ⁸ Hun lu’ tupat pekalai alaa’ kegahang usah lu’, pu’un gunah néh si’ik awah, bang hun lu’ pekalai alaa’ kegahang dalem kenin lu’, boh éh gunah mu’un, uban pu’un gunah néh lem urip lu’ hun iteu’, kenat péh lem urip lu’ kepéh. ⁹ Teneng mu’un éh kenat ngan tekep lu’ alaa’ ha’ inah ngan ngelan éh mu’un. ¹⁰ Uban kenat péh uleu’ kereja’ mutau mu’un, uban pengelan lu’ pu’un tong Allah éh murip, éh juk pepurip kekat kelunan, adang Iah omok purip irah éh ngelan tong Iah. ¹¹ Jian ke’ petena’ ngan nebaraa’ réh tong kekat ha’ ké’ inah. ¹² Mai ke’ kejeraa’ séé’-séé’ ngera’ ke’ ngan bara’ ke’ anak awah. Bang jian ke’ jah telana’ ngan kekat kelunan éh ngelan tong Kristus. Kenat péh lem kekat ha’ ané ko’, ngan lem barék ko’ ngan tong penika ko’, ngan pengelan ko’ ngan pengeni’ai ko’ kepéh. ¹³ Avéé’ akeu’ tuai kepéh jian ke’ ngelayau purung Surat Tuhan ngan réh tong petipun réh. Jian ke’ ngelayau bara’ ha’ Tuhan ngan réh, ngan nebaraa’ réh tong kekat urip réh lem Tuhan. ¹⁴ Mai ke’ si’ik awah kenin tong pengena’ Sahéé’ lem kenin ko’, éh nena’ Néh hun irah éh bara’ ha’ Tuhan ngan kelunan ngan irah pengeja’au tong sebayang, mapai ojoo’ réh tong ka’au’ lepah rai. ¹⁵ Pekalai tong kekat néh ngan petem maneu’ éh, dokoo’ kekat kelunan omok jam ka’au’ pepit gahang kepéh. ¹⁶ Mavaa’ kenin ko’ ngan mavaa’ ha’ tebaraa’ ko’ kepéh. Jian ke’ petem maneu’ éh, uban kenat péh jalan ko’ omok purip kenin ko’ ngan purip irah éh menéng ha’ ko’ kepéh.

¹ La’ah mai ke’ pané nyahit ngan irah lakei’ éh mukun. Bang jian ke’ dawai pané ngan néh barei’ ngan tamen ko’ mu’un. Kenat péh hun ko’ pané nebaraa’ irah lakei’ lemanai jian ke’ pané ngan réh barei’ ko’ pané ngan padéé’ ko’ mu’un. ² Kenat péh tong redo éh mukun, jian ke’ pané ngan néh barei’ ko’ pané ngan tinen ko’ mu’un, ngan tong irah redo lemanai jian ke’ pané ngan réh barei’ ngan padéé’ ko’ mu’un dalem kekat éh ni’ai. ³ Jian ke’ pika irah redo baleu’, éh bé’ pu’un séé’-séé’ nolong éh. ⁴ Bang tong redo baleu’ éh pu’un anak ngan ayam, jian irah anak ngan ayam néh pekalai nolong éh, ngan mena’ oléé’ ngan néh, uban kenat péh éh ngepayoo’ kenin Allah. ⁵ La’ah redo éh baleu’ éh bé’ pu’un séé’-séé’ éh omok petubo éh bang pu’un éh ngelan Allah awah mihau éh, ngan pu’un éh sebayang siget dau ngan siget merem péh menyat pika jin Tuhan. ⁶ Bang redo baleu’ éh murip seminga’ awah, na’ péh éh murip keto seleket néh lepah matai tenéh. ⁷ Tong irah redo éh kenat jian ke’ nebaraa’ réh dokoo’ mai pu’un kelunan pesala’ éh neu’ barék réh pu’un sa’at. ⁸ Hun séé’-séé’ éh bé’ jam petubo lua’ néh, makin péh irah éh panak néh mu’un, kelunan inah seleket kelunan éh bé’ ngelan tong Tuhan, iah pelapah sa’at jin kelunan éh pohoo’ bé’ ngelan. ⁹ Redo baleu’ éh bé’ jak avéé’ nem poloo’ ta’un urip néh, éh omok keto kereja’, mai éh ngelan penolong jin sidang awah. Tekep iah péh tutui kereja’. Bang tong redo baleu’ éh bé’ gahang la’ah ngan éh jian barék, éh bé’ pu’un pemung sebarang ngan kuraa’-kuraa’ lakei’, boh sidang kepéh mena’ penolong ngan néh. ¹⁰ Inah kepéh hun néh redo éh pu’un ngaran éh jian uban néh pinaa’ jalan nolong kelunan éh jah, éh pu’un mihau anak néh mu’un ngan éh ngelayau alaa’ irah sakai tong lamin néh ngan mihau réh ngan jian kenin, éh pu’un masi ngan pika kelunan lem penusah réh, ngan éh mekat maneu’ kuraa’-kuraa’ arong kereja’ éh jian péh, redo baleu’ éh kenat jian keh nolong éh. ¹¹ Uban hun sidang nolong irah redo éh baleu’ lem néh danak keto, hun avéé’ jaka’ irah juk pemung ngan lakei’ kepéh inah maneu’ irah ngelepan Kristus. ¹² irah pu’un sala’ uban réh bé’ kivu jajii’ réh ngan Kristus. ¹³ La’ah ngan pepit-pepit leko kereja’ ngan tai kasau-kasau tong lamin kelunan éh jah awah, bang bé’ makat kenat awah, inah réh tosok kekat rengah éh bé’ tekep ngan pekelakau ha’ sa’at éh bé’ tekep ngan réh, ngan kasau kenin ngan kereja’ kelunan éh jah. ¹⁴ Uban néh kenat inah éh pengeloo’ ké’, jian irah redo baleu’ éh danak keto, kawin kepéh ngan pu’un anak kepéh ngan mihau lamin néh dokoo’ irah éh bé’ ngelan Tuhan péh bé’ omok pesala’ sidang. ¹⁵ Uban jelua’ irah redo baleu’ lepah ngelepan Kristus ngan kivu Sitan. ¹⁶ Bang hun pu’un redo éh ngelan tong Tuhan éh pu’un redo baleu’ mokoo’ tong lamin néh, jian redo inah petubo éh, dai éh pu’un tusah ngan bahat tong sidang, dokoo’ sidang omok nolong irah éh baleu’ mu’un, éh bé’ pu’un séé’-séé’ éh omok nolong réh kepéh. ¹⁷ La’ah tong kelunan éh mihau sidang, éh maneu’ kereja’ mu’un bé’ éh sala’ lu’ mena’ pengena’ mutaa’ jin éh kemalai ngan réh. Makin péh ngan irah éh kereja’ muruh mu’un nebaraa’ ngan petena’ kelunan. ¹⁸ Uban pu’un jah ha’ lem Surat Allah éh bara’, Mai keh ngejeret ujun sapé’ tovoo’ néh meték. Ngan pu’un jah ha’ kepéh éh bara’, Kelunan éh kereja’ adang néh tekep alaa’ oléé’ kereja’ néh kepéh, kenat ha’ lem Surat Tuhan. ¹⁹ Mai keh ulak ngelan ha’ kelunan éh pesala’ irah éh mihau sidang, hun néh bé’ kejam keh mu’un. Jian keh petuneng éh mu’un avéé’ duah-teleu’ usah kelunan jam éh kenat mu’un. ²⁰ Hun pu’un mu’un sala’ néh, jian ke’ meta’ éh tong jumen kelunan sidang, dokoo’ kelunan éh jah péh medai maneu’ kenat lah. ²¹ La’ah tong jumen Allah ngan Kristus Yésus ngan kekat meliket néh éh ni’ai, akeu’ nyohoo’ ke’ kivu kekat sohoo’ ké’ inah, ngan mai ke’ ngevéléé’-véléé’ ngan netah kenin tong kelunan. ²² Mai ke’ perasoh mapai ojoo’ ko’ tong kelunan ke’ réh maneu’ kereja’ Tuhan. La’ah mai ke’ ngebakéh kelunan éh maneu’ penyala’. Mihau kenin ko’ ke’ néh ni’ai. ²³ Mai ke’ mesep baa’ awah, bang jian ke’ mesep baa’ buaa’ agun si’ik awah, dai ke’ sakit boré, uban ngelayau ke’ sakit ngan lemoo’ usah. ²⁴ La’ah penyala’ jelua’ kelunan pu’un éh poléng mu’un, ngan kekat kelunan jam éh. Bang penyala’ jelua’ kelunan temurei’ éh poléng kepéh. ²⁵ Kenat péh tong penganeu’ kelunan. Tong penganeu’ réh éh jian, pu’un éh jelua’ poléng hun iteu’, ngan tong kekat éh bé’ jak poléng mu’un, bé’ éh omok pelim pelinguh.

¹ La’ah jian kekat kelunan ripen ngerera’ kivu sohoo’ pengeja’au keh, dokoo’ mai pu’un séé’-séé’ éh omok pané ngesa’at ngaran Allah ngan ngesa’at ha’ tebaraa’ lu’ iteu’ kepéh. ² Kekat kelunan ripen éh pu’un lem nihau kelunan éh ngelan tong Tuhan, jian keh ngerera’ tong réh, uban ka’ah péh pepadéé’ lem Tuhan. Jian keh kereja’ pelapah gahang kepéh ngan irah éh ngelan nah, uban irah éh alaa’ oléé’ jin kereja’ keh inah, pu’un réh ngelan ngan pika Tuhan kepéh. ³ Jian ke’ nebaraa’ ngan petena’ réh tong kekat ha’ ké’ iteu’. Séé’-séé’ éh bara’ ha’ tebaraa’ éh tengéé’ jin inah, éh bé’ pekua’ ngan ha’ tebaraa’ Tuhan lu’ Yésus Kristus, éh tengéé’ jin kekat tebaraa’ tong sebayang lu’, ⁴ Iah bau kenin ngan bé’ jam ineu’-ineu’! Pengeloo’ néh bé’ barei’ pohoo’. Iah keloo’ pepatai ha’ ngan pepaneu’ tong ateng ha’ ga’ néh mihin pesonoh, petengéé’ kenin, ngesa’at ngaran kelunan, pakai’ kioo’ éh sa’at, ⁵ ngan pepaneu’ éh bé’ jam posot ngan kekat kelunan éh bé’ jam seruh ngan bé’ jam ineu’ éh teneng. Irah seruh réh omok kaya’ neu’. ⁶ Hun lu’ petem lem sebayang mu’un, uleu’ omok kaya’, bang pengekaya’ nah, bé’ éh jin tana’ iteu’, inah éh kaya’ lem kejian éh jin Tuhan. Kenat péh hun lu’ murip jam seruh ngan bé’ juk alaa’ mekum, bang sukup kenin tong éh pu’un ngan lu’ awah. ⁷ Hun lu’ pelohoo’ jin boré tinen lu’, bé’ lu’ pu’un pakai ineu’-ineu’ péh. Kenat péh hun lu’ piso jin tana’ iteu’ kepéh, bé’ lu’ pu’un mihin ineu’-ineu’ ngan lu’. ⁸ Uban néh kenat hun lu’ pu’un penguman ngan pakai sukup, jian lu’ sukup kenin tong inah awah. ⁹ Bang kelunan éh kelih juk kaya’ pu’un éh teneng tong tenupat, pu’un éh barei’ ka’an éh pejeu tong siang, uban pinaa’ arong pengekelih néh éh suwok ngan petusah éh awah, éh pepetat éh ngan petawang éh mu’un. ¹⁰ Uban neu’ kelunan kelih tong rigit, inah éh nebu’un kuraa’-kuraa’ arong kesa’at. Jelua’ kelunan éh mekat pitah juk kaya’, pu’un réh petat jin pengelan réh ngan mujah kenin neu’ kuraa’-kuraa’ arong penusah. ¹¹ Bang ka’au’ éh kivu pengeloo’ Tuhan, jian ke’ ngejuu’ usah ko’ jin kekat éh kenat. Jian ke’ ngerakep dokoo’ ngelayau maneu’ pengeloo’ Allah, murip sebayang, ngelayau ngelan tong Kristus, pika padéé lu’ éh kua’ pengelan, kebit kenin lem pengeketa, ngan dawai kenin. ¹² Jian ke’ nengayet mu’un dokoo’ murip tigéh lem urip Kristén ko’, dokoo’ ka’au’ omok alaa’ urip mu’un éh pelinguh, uban kenat péh jalan Allah tebai ke’ hun ko’ ngakun pengelan ko’ tong Tuhan tong Jumen kelunan pinaa’ rai. ¹³ La’ah tong jumen Allah éh purip kekat ineu’-ineu’, ngan tong jumen Kristus Yésus éh ngakun pengelan néh tong jumen Pontius Pilatus, inah akeu’ nyohoo’ ke’. ¹⁴ Jian ke’ kivu kekat sohoo’ Tuhan, mihau éh mu’un, mai kejeraa’ ineu’-ineu’ ngepaléu kenin ko’ pah avéé’ Dau savéé’ Tuhan lu’ Yésus Kristus. ¹⁵ Adang Iah pu’un tuai hun avéé’ tong jaka’ éh kevéléé’ Allah, Iah awah éh pengeja’au mu’un, Raja’ éh bau kekat raja’, Tuhan éh bau kekat pengeja’au. ¹⁶ Iah awah éh murip pelinguh-linguh. Iah murip lem rema éh bé’ omok tenavin kelunan séé’ séé’ péh. Bé’ pu’un kelunan na’at Éh kenat péh bé’ Éh omok ta’an kelunan. Tekep Iah ngelayau seneva’ ngan Iah pu’un penyukat pelinguh-linguh’. Amin. ¹⁷ Jian ke’ bara’ ngan kekat kelunan kaya’ mai réh bau kenin, ngan mai réh ngelan tong pengekaya’ réh uban bé’ réh jam hun mah éh juk béé kepéh. Bang jian réh ngelan tong Allah éh mena’ kekat ineu’-ineu’ ngan lu’ ngan mutaa’ kepéh dokoo’ néh ngejian kenin lu’. ¹⁸ Jian ke’ nyohoo’ irah kaya’ maneu’ jian, ngan barei’ kaya’ lem kereja’ réh éh jian. Jian irah petulat éh nalaa’ réh ngan irah éh kari ngan jian kenin. ¹⁹ Hun réh maneu’ kenat, irah pu’un alaa’ oléé’ éh pelapah ja’au kepéh, inah éh alaa’ urip éh pelinguh. ²⁰ Timotius, jian ke’ mihau kekat ha’ tebaraa’ éh lepah benara’ réh ngan ko’ rai. Jian ke’ petedau kekat ha’ ané kelunan éh pané awah, ngan ha’ kelunan éh pepané uban irah seruh réh pu’un pengejam, bang éh mu’un bé’ réh pu’un pengejam. ²¹ Uban pinaa’ kelunan éh bara’ réh pu’un pengejam tawang awah réh tong pengelan réh. Jian Allah mena’ pengejian ngan kekat ka’ah béé.